В 9-й день

Свята́го му́ченика Евпси́хия

НА ВЕЧЕ́РНИ:

Стихи́ры, глас 8.

Подо́бен: Му́ченицы Госпо́дни:

Гребеньми́ стру́жемь да́же до вну́тренних твои́х,/ до́блий му́чениче, пребы́л еси́ непрекло́нен,/ име́я о́ко у́мное к Бо́гу,/ укрепля́ющему тя, Евпси́хие,/ и беззако́ннующия посрамля́ющему,/ Его́же моли́ спасти́ся/ ве́рою твою́ чту́щим па́мять днесь.

Я́звою меча́ усече́ся/ Боже́ственная глава́ твоя́, до́блий му́чениче,/ и вме́сто кро́ве млеко́ и во́ду источа́еши, чу́дно,/ привле́кл еси́ к позна́нию неразу́мныя,/ сла́ву неизрече́нную прие́м,/ и Боже́ственными хода́тайствы/ всем подая́ ве́лию ми́лость.

Благоду́шно Евпси́хий страда́ния сконча́ и по́двиги,/ и побежда́я безу́мныя терпе́нием,/ и удивля́я неве́рныя/ боле́зней нестерпи́мых наведе́ньми,/ те́мже по кончи́не ублажа́ется./ Того́ моли́твами, Го́споди,/ всем пода́ждь ве́лию ми́лость.

Сла́ва, и ны́не, Богоро́дичен:

Помышле́ния нечи́ста, и устна́ льсти́ва,/ дела́ же моя́ вся оскверне́на,/ и что сотворю́?/ Ка́ко усря́щу Судию́?/ Влады́чице Де́во, моли́ Сы́на Твоего́,/ и Зижди́теля, и Го́спода,/ я́ко да в покая́нии прии́мет дух мой,/ я́ко еди́н Благоутро́бен.

Крестобогоро́дичен:

Не терплю́, Ча́до, ви́дящи Тя,/ на Дре́ве усну́вша,/ бо́дрость всем подаю́щаго,/ я́ко да и́же дре́вле преступле́ния плодо́м,/ сном поги́бельным усну́вшим/ Боже́ственную и спаси́тельную бо́дрость пода́си, –/ Де́ва глаго́лаше, пла́чущися, Ю́же велича́ем.

Кано́н, его́же краегране́сие: Евпси́хия благоду́шно пою́ боле́зни. Творе́ние Ио́сифово. Глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Страда́ния благоду́шно, блаже́нне, твоя́, Евпси́хие му́чениче, поя́, молю́ тя:/ ко Го́споду име́я дерзнове́ние,/ ду́шу мою страсте́й мучи́тельства исхити́.

Ум твой, манове́нием е́же к Бо́гу,/ презре́ вся жития́ кра́сная, блаже́нне,/ и весь красе́н яви́ся, над страстьми́ ца́рствовав Евпси́хие.

Бысть вои́стинну терпели́в, егда́ му́ками искуша́шеся и боле́зньми,/ вся удивля́я безбо́жныя,/ и страда́лец и́стинен познава́емь.

Богоро́дичен: Пло́ти подо́бием роди́вся из Тебе́, Влады́ка/ обнови́ на́ше обветша́вшее, Отрокови́це, естество́/ и ме́ртвыя Небе́сны соде́ла.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Разу́мна су́ща пове́дают безу́мнии тебе́,/ злочести́вому князю́, безу́мно де́моном служа́щему.

На высоту́ муче́ния твоего́ возне́сшу ти ся, А́нгел я́влься,/ тебе́ дерзнове́нна устроя́ет, страстоте́рпче Евпси́хие.

Поя́, пребы́л еси́ в темни́це, Бо́га и Го́спода испове́дая,/ храни́тель же Сего́ повеле́нием показу́яся.

Богоро́дичен: Пе́ние благода́рственно страда́льческий лик пое́т Тебе́,/ Отрокови́це Чи́стая,/ Твои́ми хода́тайствы победоно́сец быв.

Седа́лен, глас 1.

Подо́бен: Гроб Твой:

Благоду́шно до́брый соверши́в по́двиг,/ победи́л еси́ врага́ супоста́та, му́чениче, по́чести и чудеса́ от Бо́га прие́м./ Те́мнее вся ве́рных Це́рковь ублажа́ет тя,/ в настоя́щий день богохва́льно почита́ющи.

Сла́ва, и ны́не, Богоро́дичен:

Наста́ви ны на путь покая́ния,/ укло́ньшияся при́сно к безпу́тием зол/ и Преблага́го прогне́вавший Го́спода,/ Неискусобра́чная Благослове́нная Мари́е,/ прибе́жище отча́янных челове́ков, Бо́жие жили́ще.

Крестобогоро́дичен:

Зря́щи Тя, Христе́, Всенепоро́чная Ма́ти,/ ме́ртва на Кресте́ просте́рта, вопия́ше:/ Сы́не Мой, Собезнача́льне Отцу́ и Ду́ху,/ что́ неизрече́нное Твое́ сие́ смотре́ние,/ и́мже спасл еси́ пречи́стых рук Твои́х, Ще́дре, созда́ние?

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Ра́дуяся, му́чениче, разда́л еси́ вся име́ния ни́щим,/ муче́ния бога́тство некра́домо/ и ра́дость нестаре́емую противостяжа́в.

Свяще́нно просвеща́емь, тьму несвяще́нных ты обличи́л еси́,/ ну́дити искуша́ющих тя,/ отвести́ ле́стию злоде́монскою.

И́же пре́лести прилежа́щии/ тебе́, неле́стными нра́вы украше́нному, дивля́хуся,/ источа́ющу живото́чныя словеса́, досточу́дне.

Богоро́дичен: Превы́шши сил Небе́сных Ты су́щи,/ плотски́х страсте́й вы́шший ум мой, Де́во, покажи́.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Челове́колюбче.

Терпе́л еси́ плотски́я я́звы терпели́вно,/ обе́шен быв, блаже́нне Евпси́хие,/ прии́скренно Влады́це всея тва́ри.

Пое́ши Христу́, по ре́бром, му́чениче, стру́жемь и ко́жи одира́емь,/ му́жественным по́мыслом терпели́внейший.

Пою́щу Бо́гу, явля́ется тебе́ А́нгел,/ к подвиго́м обуча́я тя,/ я́же, о Го́споде возмога́емь, соверши́л еси́.

Богоро́дичен: О и́же на Тя наде́жды всех, Влады́чице, возложи́вших при́сно моли́ся,/ я́ко да бу́дущаго осужде́ния изба́вимся.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Обурева́ет у́бо муче́ний тягота́, не мо́жет же погрузи́ти тя, му́чениче:/ Христа́ бо и Бо́га Помо́щника име́л еси́ и Ко́рмчия,/ направля́юща тя ко приста́нищу ти́хому Своего́ Ца́рствия, Евпси́хие.

Красно́ твое́ воста́ние, му́чениче, душе́вное сопроти́вным показу́я,/ яви́лся еси́ тем стра́шен, удивля́я терпе́нием о́нех зломы́слие,/ и прия́т от Христа́ подвиго́в побе́ды возме́здие.

Без пра́вды пролия́нною кро́вию погрузи́л еси́ весь де́монский полк/ и злочести́вых мно́жество истопе́;/ ве́рных же напои́ся собо́р, Евпси́хие, бога́тно,/ святы́х му́ченик украше́ние.

Богоро́дичен: Испра́ви спа́дша мя всего́, я́ко страсте́м отве́рзшаго дверь,/ и Твои́м благи́м хода́тайством к пока́яния вхо́дом введи́,/ и спаси́ мя, всех Спа́са ро́ждшая и Го́спода.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Собо́ром му́чеников причи́слился еси́ и лико́м Боже́ственных Безпло́тных,/ от безслове́сия страсте́й те́ло удержа́в,/ хра́бровал еси́ изря́дно, страда́льче Христо́в треблаже́нне.

О, до́брыя твоея́ ку́пли!/ Го́рстию бо кро́ве измени́л еси́ Вы́шнее Ца́рство, му́дре, в не́мже и воспева́еши:/ благослове́н еси́, Го́споди Бо́же, во ве́ки.

Па́даеши, уязви́вся мече́м, му́чениче,/ и без ме́ры хва́лящагося велиа́ра спопира́еши/ и я́звами ссека́еши неисце́льно,/ твоему́ кре́пкому уму́ злообра́зно прирази́вшася.

Богоро́дичен: Го́ру Тя проро́к Дании́л Боже́ственным Ду́хом нарече́, Де́во,/ из нея́же ка́мень – Христо́с – без руку́ отсече́ся/ и сокруше́ние соде́ла истука́нных пре́лести.

Песнь 8

Ирмо́с: Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.

Победи́тель мучи́телей и духо́в был еси́ нечи́стых,/ ве́рных же челове́ков, страда́льче Евпси́хие, сла́ва и похвала́,/ тя восхваля́ющих свяще́нными пе́сньми и превознося́щих Христа́ во вся ве́ки.

Кесари́йстии свяще́ннии воспева́ют тя лю́дие, преблаже́нне:/ в том бо, му́чениче, лежа́, те́ло твое́ источа́ет исцеле́ний струи́,/ стра́сти потопля́ющия и ве́рных сердца́ ороша́ющия боже́ственно.

Вшед му́жески в подвиго́в суди́ще, му́чениче,/ стро́ган был еси́ да́же до члено́в и до самаго́ вну́тренняго строе́ния,/ но яви́лся еси́ весь непрекло́нен, непоколеби́м,/ тем венцы́ прия́л еси́ побе́ды.

Богоро́дичен: Ми́лостивая Де́во, Я́же ми́лостиваго Сло́ва ро́ждши,/ немилосе́рдаго мя ту́не уще́дри,/ отча́яннаго прегреше́ньми безме́рными и не обраща́ющася,/ но в ле́ности житие́ ижди́вша.

Песнь 9

Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

На дре́во воздви́жен был еси́, страсть вообража́я Безстра́стнаго/ и стра́сти ума́лившаго благочести́вых за милосе́рдие, му́чениче Евпси́хие.

Ви́дено бысть чу́до ве́лие в твое́й кончи́не:/ вме́сто бо кро́ве млеко́ с водо́ю/ главе́ твое́й, отсе́чене бы́вшей, му́чениче, истече́.

Твои́ми удесы́, всеблаже́нне, Препросла́вленный еди́н Бог просла́вися/ в прославле́нии всесвяты́я твоея́ па́мяти,/ я́коже проре́кл еси́.

Днесь весе́лие в твое́й Боже́ственней па́мяти/ Це́рковь познава́ет, Евпси́хие,/ в ню́же пою́щия тя вся спаса́й моли́твами твои́ми.

Богоро́дичен: Све́том мя покая́ния озари́, Де́во,/ греха́ но́щию омраче́ннаго/ и уны́ния мгло́ю спокрове́ннаго.

Святой мученик Евпсихий

Святой мученик Евпсихий родился в знатной христианской семье Кесарии Каппадокийской (город на юго-востоке Малой Азии). Его жизнь увенчалась мученическим венцом в период гонений на веру Христову при императоре Юлиане Отступнике (361–363), который, хотя и был воспитан в христианской вере, но впоследствии, достигнув 20 лет, стал язычником. Святой мученик Евпсихий в зрелом возрасте женился на христианке. Свадьба его совпала с языческим празднеством в честь богини Тихе, особо почитавшейся Юлианом Отступником, которая олицетворяла удачу. Когда греки-язычники пришли на праздник в капище Тихе, святой Евпсихий и другие христиане также отправились к этому месту. По их молитвам капище было разрушено. Юлиан Отступник был разъярен. Решив покарать не только святого Евпсихия, но и весь город, он повелел одних предать казни, других сослать в заточение и приказал разгромить христианские храмы Кесарии, а клириков принудительно направить в армию. Кроме того, он распорядился отнять у города почетное имя Кесария, присвоенное ему в правление императора Тиверия (14–37), и называть город прежним именем Ма́за или Ма́зака; отнять у города автономию, исключить его из числа почетных городов империи, а христиан обложить огромным налогом. Наконец, император приказал, чтобы христиане восстановили разоренное капище. Однако Юлиан Отступник не успел осуществить задуманное, т. к. погиб в июне 363 года, в Персидской войне. Святого Евпсихия император хотел пытками принудить к языческому жертвоприношению.

Его взяли под стражу и ежедневно водили на многочасовые допросы, обещая помиловать, если он поклонится идолам. Но святой Евпсихий решительно отказался это сделать. Тогда его подвесили на дыбе и ножами среза́ли мясо с костей. Ангел Господень явился и духовно укреплял святого мученика. Наконец, в бессилии святого Евпсихия обезглавили. И свершилось чудо: вместо крови из его тела полились молоко и вода. Христиане взяли тело святого и предали его честно́му погребению.

Народ воздвиг над гробом святого Евпсихия прекрасный храм. Господь прославил Своего мученика многими чудесами, совершенными у его святых мощей.


Комментарии для сайта Cackle