Мѣ́сѧца тогѡ́же въ і҃-й де́нь. Ст҃ы́хъ мч҃никъ, є҆ѵла́мпїа и҆ є҆ѵлампі́и.
И҆ прпⷣбнагѡ а҆мвро́сїа ѻ҆́птинскагѡ.
Слꙋ́жба є҆гѡ̀ пи́сана въ приложе́нїи.
На Гдⷭ҇и, воззва́хъ, стїхи̑ры, гла́съ д҃. Подо́бенъ: Ꙗ҆́кѡ до́блѧ:
Просвѣ́щшесѧ дх҃омъ ст҃ы́мъ, ꙳ прехва́льнїи мꙋ́чєницы, ꙳ къ ко́знемъ мїродержи́телѧ ѡ҆полчи́стесѧ, ꙳ и҆ сего̀ мꙋ́жески побѣ́ждше, ꙳ бжⷭ҇твеннымъ посо́бїемъ ꙳ на него̀ до́блествовасте. ꙳ тѣ́мъ дне́сь свѣ́тлꙋю ва́шꙋ па́мѧть соверша́юще, ꙳ по до́лгꙋ хвала́ми ва̑ша почита́емъ ꙳ страда̑нїѧ, пресловꙋ́щїи.
И҆ ѻ҆гню̀ смѣси́вшесѧ, ꙳ и҆ мꙋ́камъ, ст҃і́и, ꙳ непрекло́нни мꙋдрова́нїемъ пребы́сте, ꙳ и҆ ꙗ҆́кѡ свѣщы̀ вже́гшесѧ ꙳ теплото́ю дх҃а, ꙳ просвѣти́ли є҆стѐ вѣ́рныхъ сердца̀ бл҃года́тїю. ꙳ тѣ́мъ всѧ́къ во́зрастъ и҆ ро́дъ пра́зднꙋетъ ꙳ свѧтꙋ́ю ва́шꙋ па́мѧть, ꙳ пѣсносло́вѧще гдⷭ҇а.
Бг҃омꙋ́дрый є҆ѵла́мпїй, и҆ є҆ѵлампі́а всечестна́ѧ, ꙳ дво́ица бжⷭ҇твеннаѧ, ꙳ возсїѧ́вше ꙗ҆́кѡ ѕвѣ́зды многосвѣ̑тлы, ꙳ тва́рь просвѣща́ютъ, ꙳ пѡ́двигъ сїѧ́ньми и҆ чꙋде́съ свѣ́тлостьми: ꙳ си́хъ дне́сь всесвѧще́ннꙋю па́мѧть соверша́юще, ꙳ съ весе́лїемъ покланѧ́емсѧ ꙳ ра́цѣ моще́й ва́шихъ.
Сла́ва, гла́съ д҃. І҆ѡа́нна мона́ха:
Братолю́бїю є҆диноиме́нїе сраство́ршеесѧ, и҆ чистота̀ безстра́стїю сочета́вшисѧ, безъ вре́да сохрани́сте нра́вное благосе́рдїе: и҆дѣ́же бо бг҃ъ жела́емь, мі́ръ ве́сь небреже́тсѧ. ѽ чꙋдесѐ! ѕмі́й ᲂу҆мертви́сѧ, и҆ на высотꙋ̀ непра́вдꙋ глаго́лавый подзе́мный, самобра́тныхъ мꙋче́нїемъ низпадѐ, є҆ѵла́мпїа мꙋ́драгѡ и҆ є҆ѵлампі́и. къ ни́мже дꙋхо́вными пѣ́сньми возопїи́мъ: и҆̀же до́брѣ тече́нїе ѡ҆ хрⷭ҇тѣ̀ соверши́вшїи, проси́те ми́ра мі́рꙋ, и҆ дꙋша́мъ на́шымъ ве́лїѧ ми́лости.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Ꙗ҆́кѡ до́блѧ:
А҆́гнца и҆ па́стырѧ тѧ̀ ꙳ на дре́вѣ ꙗ҆́кѡ ви́дѣ, ꙳ а҆́гница ро́ждшаѧ рыда́ше, ꙳ и҆ мт҃рски тѝ вѣща́ше: ꙳ сн҃е возжелѣ́нне, ка́кѡ на дре́вѣ крⷭ҇тнѣмъ повѣ́шенъ є҆сѝ, долготерпѣли́ве; ꙳ ка́кѡ рꙋ́цѣ и҆ но́зѣ твоѝ, сло́ве, ꙳ пригвозди́шасѧ ѿ беззако́нныхъ, ꙳ и҆ кро́вь твою̀ и҆злїѧ́лъ є҆сѝ, влⷣко;
На стїхо́внѣ ѻ҆ктѡ́иха. Сла́ва, мч҃никѡвъ, гла́съ д҃. Самогла́сенъ:
Трⷪ҇чнымъ свѣ́томъ самобра́тнїи сопрꙋ́гъ просвѣ́щсѧ, мꙋчи́телей сꙋровство̀ низложѝ. тѣ́мъ и҆ пла́мень попра́вше ликовствова́хꙋ, пою́ще: сѐ ны́нѣ что̀ добро̀, и҆лѝ что̀ красно̀, но є҆́же жи́ти бра́тїи вкꙋ́пѣ; и҆ къ бжⷭ҇твеннѣй сла́вѣ зрѧ́ще, нбⷭ҇ныѧ сла́вы сподо́бишасѧ, хрⷭ҇та̀ бг҃а ѡ҆ на́съ всегда̀ молѧ́ще спасти́сѧ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Ꙗ҆́кѡ до́блѧ:
На крⷭ҇тѣ́ тѧ ꙗ҆́кѡ ᲂу҆зрѣ̀ ꙳ пригвожде́на, гдⷭ҇и, ꙳ а҆́гница и҆ мт҃и твоѧ̀ дивлѧ́шесѧ, ꙳ и҆ что̀ видѣ́нїе сїѐ, взыва́ше, ꙳ сн҃е возжелѣ́нне; ꙳ сїѧ̑ тѝ невѣ́рный собо́ръ воздадѐ беззако́нный, ꙳ и҆́же мно́гихъ твои́хъ чꙋде́съ наслади́выйсѧ; ꙳ но сла́ва неизглаго́ланномꙋ ꙳ соше́ствїю твоемꙋ̀, влⷣко.
Тропа́рь, гла́съ д҃:
Мꙋ́чєницы твоѝ, гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебє̀ бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́мѡнѡвъ немѡщны́ѧ де́рзѡсти. тѣ́хъ моли́твами спасѝ дꙋ́шы на́шѧ.
На ᲂу҆́трени ѻ҆́ба канѡ́на ѻ҆ктѡ́иха, и҆ ст҃ы́хъ, канѡ́нъ на д҃, є҆гѡ́же краегране́сїе:
Самобра́тное пою̀ сопрѧже́нїе. Ѳеофа́ново.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Любо́вїю хрⷭ҇то́вою распалѧ́емь, мꙋ́чениче є҆ѵла́мпїе, мїрско́е ѿве́рглъ є҆сѝ ѡ҆мраче́нїе: нбⷭ҇номꙋ же, премꙋ́дре, прибли́жилсѧ є҆сѝ те́плѣ свѣ́тꙋ невеще́ственномꙋ, всебл҃же́нне.
Раче́нїе є҆́же къ бг҃ꙋ твоѐ, премꙋ́дре мꙋ́чениче є҆ѵла́мпїе, мꙋче́нїй превратѝ стремле́нїе, воздержа́нїемъ же и҆ стоѧ́нїемъ, де́мѡнскаѧ попалѝ ѡ҆полчє́нїѧ и҆́стиннѡ, многохва́льне.
Оу҆крѣпи́въ бг҃оглаго́ливымъ твои́мъ ѧ҆зы́комъ во́инство мꙋ́ченическое, приве́лъ є҆сѝ ко хрⷭ҇тꙋ̀ совокꙋпле́нїе бжⷭ҇твенное, многобога́тное ᲂу҆ловле́нїе, и҆ прїе́млѧ съ ни́ми вѣнцы̀ нетлѣ̑нныѧ, пребога́те.
Бг҃оро́диченъ:
Съ высоты̀ во чре́во твоѐ, пречⷭ҇таѧ, прише́дъ бг҃ъ, пло́ть бы́въ произы́де ꙗ҆́вственнѡ, па́дшыѧ возвыша́ѧ къ себѣ̀, сынополага́ѧ бл҃года́тїю земны̑ѧ, всепѣ́таѧ дв҃о чⷭ҇таѧ.
Пѣ́снь г҃. І҆рмо́съ:
Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе.
Возвы́сити вра́гъ пре́лести лꙋка́вное писа́нїе дꙋшетлѣ́ннѡ хотѧ́ше, но того̀ въ про́пасть низве́рглъ є҆сѝ.
Любо́вїю бра́тнею распала́ема, ко хрⷭ҇то́вѣ добро́тѣ, ѻ҆трокови́це, притекла̀ є҆сѝ ꙗ҆́вѣ, мꙋ́ченице є҆ѵлампі́е приснословꙋ́щаѧ.
Бг҃оро́диченъ:
Безсѣ́меннѡ бж҃їе сло́во, ѻ҆трокови́це, во чре́вѣ твое́мъ прїе́мши неслїѧ́ннѡ, па́че ᲂу҆ма̀, пречⷭ҇таѧ, на́мъ родила̀ є҆сѝ.
Сѣда́ленъ, гла́съ и҃. Подо́бенъ: Премꙋ́дрости:
Мꙋче́нїй ѻ҆́блаки тє́мныѧ, страда́льцы, преше́дше терпѣли́внѡ, ꙗ҆́кѡ со́лнце бл҃года́тїю сп҃совою возсїѧ́сте: бра́тскою же любо́вїю бжⷭ҇твеннѣ свѧза́еми, подо́бными болѣ́зньми свѣ́тлѡ ᲂу҆краси́стесѧ. тѣ́мъ по кончи́нѣ безконе́чнꙋю бл҃года́ть ѿ высоты̀ прїѧ́сте, и҆сцѣлѧ́ти недꙋ́ги, гдⷭ҇ни ᲂу҆гѡ́дницы: моли́те хрⷭ҇та̀ бг҃а, грѣхѡ́въ ѡ҆ставле́нїе пода́ти, чтꙋ́щымъ любо́вїю свѧтꙋ́ю па́мѧть ва́шꙋ.
Сла́ва, и҆ ны́нѣ, бг҃оро́диченъ:
Въ напа̑сти многоплетє́нныѧ впа́дъ, ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ, и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бла́гости. тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти, воспѣва́ющымъ досто́йнѡ сла́вꙋ твою̀.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве, гдⷭ҇и, ми́лости бе́здно и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стра̑сти твоѧ̑.
Пѣ́снь д҃. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Любвѐ ра́ди зижди́телѧ, ѽ страстоте́рпцы, всю̀ мїрскꙋ́ю ле́сть и҆́стиннѡ презрѣ́вше, є҆ди́нагѡ возжелѣ́сте хрⷭ҇та̀, взыва́юще: сла́ва си́лѣ твое́й, гдⷭ҇и.
Настꙋпи́вше на пе́щный пла́мень, и҆ попра́вше сего̀, мꙋ́чєницы, росо́ю съ нб҃съ бжⷭ҇твеннѡ ѡ҆богати́стесѧ, хрⷭ҇тꙋ̀ взыва́юще: сла́ва си́лѣ твое́й, гдⷭ҇и.
Просвѣ́щшесѧ трⷪ҇чнымъ сїѧ́нїемъ, мч҃никѡвъ до́блѧѧ верста̀, і҆́дѡльское разрꙋшѝ ѡ҆мраче́нїе, хрⷭ҇тꙋ̀ взыва́юще: сла́ва си́лѣ твое́й гдⷭ҇и.
Бг҃оро́диченъ:
Носи́мое сме́ртное стремле́нїе, дв҃о, ты̀ хрⷭ҇та̀ ро́ждши нетлѣ́ннѡ, марі́е, ᲂу҆ста́вила є҆сѝ, сочета́вши безплѡ́тнымъ чинѡ́мъ ро́ды земны́хъ, пренепоро́чнаѧ.
Пѣ́снь є҃. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀.
Не преврати́ша ва́съ приложє́нїѧ мꙋче́нїй, тве́рдїи, на ка́мени бо сп҃совѣ дꙋшє́вныѧ ва́шѧ но́ги ꙗ҆́вѣ ᲂу҆тверди́сте.
Побѣ́ждше крѣ́пкѡ лє́сти первонача́льнагѡ, ᲂу҆праздни́сте і҆́дѡльскїѧ крѡ́вныѧ жє́ртвы крове́й ва́шихъ лїѧ́нїемъ, сла́внїи.
Бг҃оро́диченъ:
Ѿѧ́ла є҆сѝ клѧ́твꙋ, ꙗ҆́кѡ ра́дость ро́ждши ѡ҆божи́вшꙋю земны̑ѧ, бг҃а твои́ми рꙋка́ми носи́вши, мт҃и бг҃оневѣ́сто.
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Цѣле́нїе дꙋшетлѣ́нныхъ страсте́й ꙗ҆ви́шасѧ ва́шѧ крѡ́ви, всѣ̑мъ страстоте́рпцы, вѣ́рою притека́ющымъ къ бжⷭ҇твеннѣй и҆ всесвѣ́тлѣй ра́цѣ, преблаже́ннїи.
Зако́ннѡ за хрⷭ҇та̀ пострада́вше, сла́внїи, ѡ҆богати́стесѧ вѣнце́мъ нетлѣ́ннымъ, и҆́стиннѡ пребл҃же́ннїи, и҆ црⷭ҇тво нбⷭ҇ное, и҆ бжⷭ҇твенное наслажде́нїе прїѧ́сте.
Бг҃оро́диченъ:
Ѡ҆брѣ́тъ тѧ̀ посредѣ̀ те́рнїѧ, пренепоро́чнаѧ, ꙗ҆́кѡ пречи́стый крі́нъ, и҆ ю҆до́льный цвѣ́тъ, ѽ бг҃ома́ти! жени́хъ во чре́вѣ твое́мъ пло́ть бы́сть.
Конда́къ, гла́съ г҃. Подо́бенъ: Дв҃а дне́сь:
Дѡ́блїѧ мч҃ники и҆ бра́тїю по пло́ти мꙋ́драго є҆ѵла́мпїа и҆ є҆ѵлампі́ю почти́мъ: ті́и бо пребеззако́нныхъ кознодѣ̑йства посрами́ша си́лою распе́ншагѡсѧ: сегѡ̀ ра́ди ꙗ҆ви́шасѧ мꙋ́ченикѡвъ сла́ва, кꙋ́пнѡ и҆ похвала̀.
І҆́косъ:
Дво́ицꙋ, вѣ́рнїи, страстоте́рпєцъ дне́сь въ пѣ́снехъ свѧще́нныхъ и҆ пѣ́нїихъ похва́лимъ, ꙗ҆́кѡ ле́сть і҆́дѡльскꙋю низложи́ша, многобо́жїѧ ѻ҆́гнь и҆спепели́ша, и҆ де́мѡны посрами́ша: мꙋчи́телей же ꙗ҆́рости не ᲂу҆страши́шасѧ, меча̀ ᲂу҆́бѡ и҆ ѻ҆гнѧ̀ не ᲂу҆боѧ́шасѧ, нижѐ ѕвѣре́й стремле́нїѧ, до́блественнѡ подвиза́вшесѧ до́брѣ, є҆ѵла́мпїй сла́вный, съ честно́ю є҆ѵлампі́ею и҆ со страда̑льцы, ꙗ҆́вльшесѧ мꙋ́ченикѡвъ сла́ва, кꙋ́пнѡ и҆ похвала̀.
Пѣ́снь з҃. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Ра́зꙋмомъ бжⷭ҇твеннымъ ѡ҆богаще́нъ, мч҃ниче приснопа́мѧтне, всѐ томле́нїе ᲂу҆кори́лъ є҆сѝ и҆́стиннѡ ѕлочести́выхъ, є҆ѵла́мпїе, поѧ̀: благослове́нъ є҆сѝ въ хра́мѣ сла́вы твоеѧ̀, гдⷭ҇и.
Ꙗ҆́кѡ поте́кше къ любвѝ и҆́стиннѡ созда́вшагѡ, бжⷭ҇твеннѡ сочета́стесѧ, ѽ страда́льцы! ꙗ҆́коже пло́тїю и҆ дꙋ́хомъ пою́ще: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Бг҃оро́диченъ:
Страннолѣ́пнѡ ты̀ ѻ҆́ч҃ее, дв҃о, зачала̀ є҆сѝ сло́во во чре́вѣ твое́мъ, пречⷭ҇таѧ, и҆ пло́тїю родила̀ є҆сѝ, зовꙋ́щымъ: бл҃гослове́на ты̀ въ жена́хъ є҆сѝ, всенепоро́чнаѧ влⷣчце.
Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.
Ва́съ, страда́льцы сла́внїи, не возмого́ша разлꙋчи́ти ѿ любвѐ хрⷭ҇то́вы мꙋ́къ ᲂу҆множє́нїѧ, ни ѻ҆́гнь, ни ра̑ны, премꙋ́дрїи, ни конѡ́бнаѧ врѣ̑нїѧ, ни ѻ҆строта̀ меча̀, но побѣди́сте, вопїю́ще: благослови́те всѧ̑ дѣла̀ гдⷭ҇нѧ, гдⷭ҇а.
Ны́нѣ вмѣ́стѡ болѣ́зней бл҃говре́меннѡ вы̀ црⷭ҇твомъ бж҃їимъ ѡ҆богати́стесѧ, сла́внїи страда́льцы, прⷭ҇нословꙋ́щїй є҆ѵла́мпїе, съ є҆ѵлампі́ею чⷭ҇тно́ю дв҃ою мч҃ницею вопїю́ще: благослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Ꙗ҆́кѡ є҆ди́на ро́ждши бг҃а, мт҃и безневѣ́стнаѧ, безсѣ́меннымъ ржⷭ҇тво́мъ, чⷭ҇таѧ, сего̀ ми́лостива сотворѝ, влⷣчце, сохрани́тисѧ ста́дꙋ твоемꙋ̀ ѿ и҆скꙋше́нїѧ врагѡ́въ, вопїю́щꙋ хрⷭ҇тꙋ̀: благослови́те, всѧ̑ дѣла̀ гдⷭ҇нѧ, гдⷭ҇а.
Пѣ́снь ѳ҃. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀, тѣ́мъ, веселѧ́щесѧ, тѧ̀, бцⷣе, велича́емъ.
Тече́нїемъ крове́й, пре́лесть і҆́дѡльскꙋю, страстоте́рпцы мꙋ́чєницы, разрꙋши́сте, мꙋче́нїѧ ва́шегѡ воспрїе́мше мздꙋ̀, нбⷭ҇ное жили́ще, и҆ пребыва́ющїй поко́й.
Сѐ вмѣ́стѡ тмы̀, ю҆́зъ же и҆ ѻ҆гнѧ̀ и҆ ра́нъ страстоте́рпцы, свѣ́тъ присносїѧ́нный, ва́мъ, простра́нство и҆ восхлажде́нїе ра́достное, поле́зныѧ бл҃года́ти ᲂу҆до́бнѡ подаде́сѧ, мꙋ́чєницы сла́внїи пребога́тїи.
Тече́нїе соверши́вше бжⷭ҇твенное ва́шегѡ честна́гѡ страда́нїѧ, въ свѣ́тлостехъ бж҃їихъ водворѧ́етесѧ, и҆дѣ́же ли́цы а҆́гг҃льскихъ чинѡ́въ, и҆ мно́жєства првⷣныхъ, и҆ мꙋ́чєникъ собо́ри, ѽ приснопа́мѧтнїи!
Бг҃оро́диченъ:
Прⷪ҇ро́чєскаѧ ны́нѣ проречє́нїѧ коне́цъ прїѧ́ша, дв҃о ѻ҆трокови́це, плотоно́снаго бг҃а на́мъ ро́ждши ты̀, всечⷭ҇таѧ. тѣ́мъ, є҆́же ра́дꙋйсѧ, влⷣчце, со а҆́гг҃ломъ зове́мъ тѝ.
Свѣти́ленъ. Подо́бенъ: Жєны̀ ᲂу҆слы́шите:
Въ лѣ́потꙋ самобра́тное страстоте́рпцєвъ сдохнове́нїе, є҆ѵла́мпїй бг҃омꙋ́дрый, и҆ честна́ѧ є҆ѵлампі́а, зва́нїемъ ѡ҆бога́щшесѧ ѿ бжⷭ҇твеннагѡ предзна́нїѧ: тва́рь во просвѣща́ютъ мꙋ́ченическими зарѧ́ми, и҆ и҆сцѣле́нїй сїѧ́ньми.
Бг҃оро́диченъ:
И҆зъ тебє̀ пресꙋ́щественный бг҃ъ, чⷭ҇таѧ, въ смѣше́нїе человѣ́ческагѡ сꙋщества̀, мно́гимъ милосе́рдїемъ ѡ҆дѣ́ѧсѧ, не смѣси́въ ᲂу҆вѣ́дѣнїѧ ѻ҆бои́хъ, ѻ҆трокови́це, є҆сте́ствъ, но є҆ди́нъ сн҃ъ бы́въ по ѻ҆боемꙋ̀, и҆ по ржⷭ҇твѣ̀.