Мѣ́сѧца тогѡ́же въ а҃і-й де́нь. Ст҃а́гѡ а҆пⷭ҇ла фїлі́ппа, є҆ди́нагѡ ѿ седмѝ дїа́конѡвъ:

И҆ прпⷣбнагѡ ѻ҆тца̀ на́шегѡ ѳеофа́на и҆сповѣ́дника, є҆пі́скопа нїкі́йскагѡ.

На Гдⷭ҇и, воззва́хъ, стїхи̑ры а҆пⷭ҇ла, гла́съ д҃.

Подо́бенъ: Зва́нный свы́ше:

И҆́же седмѝ дїа́конѡмъ причте́нъ, ꙳ ꙗ҆́кѡ по́лнъ мꙋ́дрости же ꙳ и҆ бжⷭ҇твенныѧ бл҃года́ти, ꙳ слꙋжи́ти, бл҃же́нне фїлі́ппе ст҃ы́хъ, ꙳ кꙋ́пнѡ со стефа́номъ, потре́бамъ и҆збра́лсѧ є҆сѝ. ꙳ тѣ́мъ и҆ ᲂу҆бива́ема сего̀ ви́дѣвъ, ꙳ къ самарі́и восте́клъ є҆сѝ, ꙳ повелѣ́нїемъ бжⷭ҇твеннымъ, ꙳ бж҃їе сло́во проповѣ́даѧ, сла́вне, ꙳ и҆ просвѣща́ѧ сꙋ́щыѧ во тмѣ̀ пре́жде, ꙳ ꙗ҆̀же соверши́лъ є҆сѝ дх҃омъ бжⷭ҇твеннымъ, ꙳ днѐ сы́ны, всемꙋ́дре.

Бг҃озна́мєнїѧ рꙋко́ю твое́ю соверша́ємаѧ, ꙳ лю́дїе ви́дѧще, ꙳ слѣпы́хъ прозрѣ́нїе, ꙳ и҆ разсла́бленныхъ и҆справле́нїе, ꙳ и҆ нечи́стыхъ дꙋхѡ́въ, и҆дѣ́же живѧ́хꙋ, ѿгна́нїе, ꙳ дивлѧ́хꙋсѧ, фїлі́ппе, ꙳ и҆ прихожда́хꙋ къ спаси́тельномꙋ ѡ҆чище́нїю, ꙳ ѿ невѣ́рїѧ къ вѣ́рѣ внеза́пꙋ направлѧ́еми. ꙳ тѣ́мъ бж҃е́ственный ꙗ҆́кѡ ᲂу҆слы́ша, а҆пⷭ҇льскїй ли́къ веселѧ́шесѧ, ꙗ҆́кѡ и҆ самарі́и мно́жество ꙳ бг҃ꙋ приведе́сѧ.

Колесни́ца сло́ва сы́й, ꙳ бг҃оглаго́ливе, ꙳ на колесни́цѣ ᲂу҆зрѣ́въ ѣ҆́здѧща, ꙳ и҆ вопрошє́нїѧ творѧ́щаго, ꙳ и҆ недомы́слѧщасѧ пости́глъ є҆сѝ канда́кина досточꙋ́днаго, ꙳ и҆ томꙋ̀ сказа́нїе и҆ ꙗ҆вле́нїе ꙳ жела́емыхъ, бл҃же́нне, показа́лъ є҆сѝ: ꙳ вѣ́ровавъ бо про́ситъ бжⷭ҇твеннагѡ ѡ҆чище́нїѧ: ꙳ є҆гѡ́же прїе́мша, ꙳ бжⷭ҇твеннаго проповѣ́дника вседѣ́тель, ꙳ содѣ́ла всеѧ̀ є҆ѳїо́пїи, ꙳ и҆ мꙋ́ченикѡвъ нача́льника.

И҆́ны стїхи̑ры прпⷣбнагѡ, гла́съ ѕ҃. Подо́бенъ: Всѐ ѿло́жше:

Возсїѧ́лъ, є҆сѝ ѳеофа́не, ꙳ добродѣ́телей ви́ды, ꙳ ꙗ҆́кѡ ѕвѣзда̀ свѣтлѣ́йша, ꙳ на тве́рди ꙳ вѣ́ры, ꙳ свѣ́тлѡ сла́вне. ꙳ зарѧ́ми всѧ̑ ѿгонѧ́ѧ ꙳ ѡ҆мрачє́нїѧ є҆реті́чєскаѧ, ꙳ и҆ просвѣща́ѧ вѣ́рою тебѣ̀ и҆ любо́вїю прилѣжа́щыѧ, ꙳ и҆ твои̑мъ бжⷭ҇твєннымъ ᲂу҆че́нїємъ. ꙳ тѣ́мъ свѣтоно́сный соверша́емъ ꙳ тво́й пра́здникъ любо́вїю: со дерзнове́нїемъ моли́сѧ ꙳ ѡ҆ дꙋша́хъ на́шихъ.

Трꙋды̑ по́стническими ꙳ твою̀ дꙋ́шꙋ воѡрꙋжи́въ, плотска̑ѧ ᲂу҆вѧди́лъ є҆сѝ, ꙳ ѻ҆́ч҃е свѧще́ннѣйше, и҆гра̑нїѧ, ꙳ и҆ ᲂу҆́мъ, сла́вне, содѣ́ла ꙳ бжⷭ҇твенныѧ трⷪ҇цы жили́ще: и҆ возвы́силсѧ є҆сѝ, ꙳ и҆дѣ́же мꙋ́ченичєскаѧ вѡ́инства, ꙳ и҆ добро́та недомы́сленнаѧ, ꙳ и҆ і҆ера́рхѡвъ собо́ръ. ꙳ съ ни́миже ны́нѣ ра́дꙋешисѧ, ꙳ во сла́вѣ предстоѧ̀ хрⷭ҇тꙋ̀, ꙳ со дерзнове́нїемъ молѧ́сѧ ѡ҆ дꙋша́хъ на́шихъ.

Бжⷭ҇твенными сле́зъ твои́хъ тече́ньми, і҆ера́рше, ꙳ всѐ потопи́лъ є҆сѝ ꙳ де́мѡнское ѡ҆полче́нїе ꙳ ꙗ҆́кѡ не́мощно: ꙳ твои́ми же всегда̀ къ бг҃ꙋ мановє́нїи ꙳ и҆ си́льными восхождє́нїи ꙳ го́рдое возвыше́нїе на зе́млю низве́рглъ є҆сѝ, ꙳ и҆ возне́слсѧ є҆сѝ на нбⷭ҇наѧ ꙳ и҆ бг҃олѣ̑пнаѧ селє́нїѧ: ꙳ въ ни́хже со а҆́гг҃лы водворѧ́ешисѧ, ꙳ предстоѧ̀ хрⷭ҇тꙋ̀, ꙳ со дерзнове́нїемъ молѧ́сѧ ꙳ ѡ҆ дꙋша́хъ на́шихъ.

Сла́ва, и҆ ны́нѣ, бг҃оро́диченъ, гла́съ и҆ подо́бенъ то́йже:

Нра́вомъ ѕлы́мъ поползо́хсѧ, ꙳ и҆ порабоще́нъ ле́стїю лꙋка́вною, бг҃оневѣ́стнаѧ, ꙳ къ пречꙋ́дномꙋ твоемꙋ̀ милосе́рдїю, ꙳ и҆ те́пломꙋ застꙋпле́нїю, ꙳ пресвѧта́ѧ ѻ҆трокови́це, ꙳ прибѣга́ю ѻ҆каѧ́нный, ꙳ сою̑зъ мѧ̀ и҆зба́ви напа́стей и҆ печа́лей, и҆ спаси́ мѧ, пренепоро́чнаѧ, де́мѡнскихъ прило́гѡвъ: ꙳ да прославлѧ́ю тѧ̀ и҆ любо́вїю пою̀, ꙳ и҆ покланѧ́юсѧ, ꙳ и҆ велича́ю тѧ̀, влⷣчце, ꙳ приснобл҃же́ннꙋю.

Крⷭ҇тобг҃оро́диченъ, подо́бенъ то́йже:

А҆́гнца своего̀, ꙳ а҆́гница нескве́рнаѧ дре́вле, ꙳ и҆ непоро́чнаѧ влⷣчца, ꙳ на дре́вѣ крⷭ҇тнѣмъ ꙗ҆́кѡ ᲂу҆зрѣ̀, ꙳ мт҃рски восклица́ше, ꙳ и҆ дивѧ́щисѧ вопїѧ́ше: ꙳ ча́до сладча́йшее, ꙳ что̀ зрѣ́нїе сїѐ но́вое и҆ пресла́вное; ꙳ ка́кѡ со́нмъ безблагода́тный ꙳ сꙋди́щꙋ пїла́товꙋ предаде́ тѧ, ꙳ и҆ ѡ҆сꙋжда́етъ на сме́рть жи́знь всѧ́ческихъ; ꙳ но воспѣва́ю твоѐ неизрече́нное сло́ве, снизхожде́нїе.

Тропа́рь, а҆по́стола, гла́съ г҃:

А҆пⷭ҇ле, ст҃ы́й фїлі́ппе, молѝ ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.

Сла́ва, прпⷣбнагѡ, гла́съ и҃:

Правосла́вїѧ наста́вниче, благоче́стїѧ ᲂу҆чи́телю и҆ чистоты̀, вселе́нныѧ свѣти́льниче, а҆рхїере́ѡвъ бг҃одꙋхнове́нное ᲂу҆добре́нїе, ѳеофа́не премꙋ́дре, ᲂу҆че́ньми твои́ми всѧ̑ просвѣти́лъ є҆сѝ: цѣвни́це дꙋхо́внаѧ, молѝ хрⷭ҇та̀ бг҃а, спасти́сѧ дꙋша́мъ на́шымъ.

И҆ ны́нѣ, бг҃оро́диченъ.

На ᲂу҆́трени канѡ́нъ ѻ҆ктѡ́иха є҆ди́нъ, и҆ ст҃ы́хъ два̀.

А҆пⷭ҇ла канѡ́нъ, є҆гѡ́же краегране́сїе:

Фїлі́пповꙋ бжⷭ҇твеннꙋю воспою̀ сла́вꙋ. І҆ѡ́сифъ.

Гла́съ ѕ҃. Пѣ́снь а҃. І҆рмо́съ:

Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.

Пресвѣ́тлыми сїѧ̑нїи хрⷭ҇то́выми ѡ҆зари́всѧ, по прича́стїю бжⷭ҇тва̀, мꙋ́дре, свѣ́тъ ꙗ҆ви́лсѧ є҆сѝ вторы́й, вѣ̑рныѧ свѧще́ннѡ свѣтоводѧ̀, сла́вне фїлі́ппе.

Пресꙋ́щественное сло́во, всѐ на́ше ѡ҆сꙋществова́въ, свѧще́нна тѧ̀ ᲂу҆ч҃ника̀ свѧще́ннѡ предлага́етъ, мꙋ́дре, несвѧще́ннагѡ ѡ҆мраче́нїѧ ꙗ҆зы́ки и҆збавлѧ́юща.

Рꙋ́къ возложе́нїемъ свѧще́нныхъ ᲂу҆ч҃никѡ́въ, и҆збра́нъ бы́лъ є҆сѝ со стефа́номъ и҆ про́чими, свѧще́нный дїа́конъ, ꙗ҆́кѡ сы́й по́лнъ дх҃а бж҃їѧ, всемꙋ́дре фїлі́ппе.

Бг҃оро́диченъ:

И҆́же и҆зъ не сꙋ́щихъ всѧ̑ содѣ́тельствꙋѧ, ꙗ҆́кѡ винꙋ́ тѧ и҆мѣ́ѧше воплоще́нїѧ своегѡ̀, бг҃ома́ти чⷭ҇таѧ: тѣ́мъ по до́лгꙋ вѣ́рнїи тѧ̀ ᲂу҆блажа́емъ.

И҆́нъ канѡ́нъ прпⷣбнагѡ, гла́съ и҆ і҆рмо́съ то́йже.

Моегѡ̀ ра́зꙋма твои́ми моли́твами мра́къ ѿженѝ, і҆ера́рше хрⷭ҇то́въ: ꙗ҆́кѡ да воспою̀ сла́вне, твою̀ свѧще́ннꙋю и҆ свѣтоза́рнꙋю па́мѧть пѣ́сньми.

Ꙗ҆́кѡ рѣка̀ ᲂу҆стреми́лсѧ є҆сѝ ѿ сїѡ́на, і҆ера́рше сла́вне, и҆ напои́лъ є҆сѝ ѕѣлѡ̀ бжⷭ҇твенными стрꙋѧ́ми вѣ́рныхъ собо́ры, бг҃ꙋ побѣ́днꙋю пѣ́снь, пои́мъ, вопїѧ́ше.

Бжⷭ҇твенными сїѧ̑нїи твою̀ дꙋ́шꙋ ѡ҆зари́въ, ѳеофа́не, сла̑сти страсте́й воздержа́нїѧ попали́лъ є҆сѝ ѻ҆гне́мъ, пѣснопоѧ̀ и҆́стиннѡ: воспои́мъ пѣ́снь хрⷭ҇тꙋ̀.

Бг҃оро́диченъ:

Свѣтлѣ́йшими лꙋча́ми твоегѡ̀ сн҃а, бцⷣе, просвѣтѝ ѡ҆мраче́ннꙋю мою̀ дꙋ́шꙋ, и҆ страсте́й смꙋще́нїе твои́мъ, чⷭ҇таѧ, ᲂу҆кротѝ хода́тайствомъ.

Пѣ́снь г҃. І҆рмо́съ:

Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Сы́ны соверши́лъ є҆сѝ свѣ́та, во тмѣ̀ невѣ́дѣнїѧ сꙋ́щыѧ, блаже́нне, въ зна́менїихъ стра́шныхъ, ꙗ҆́кѡ нб҃о высо́кое, сло́ва сла́вꙋ повѣ́даѧ.

Ѿ пле́мене і҆ꙋ́дова хрⷭ҇та̀ возсїѧ́вша, бл҃же́нне, свѧще́ннѡ возвѣща́ѧ, бл҃года́ти свѣ́томъ показа́лъ є҆сѝ, є҆го́же мѡѷсе́й дре́вле и҆ проро́цы провозвѣсти́ша.

Ꙗ҆́да дꙋшетлѣ́ннагѡ ѿбѣжа́ти, и҆ спаси́тельнꙋю бл҃года́ть воспрїѧ́ти, покарѧ́еши медото́чными глаго́лы, ѿриновє́нныѧ дале́че неразꙋ́мїемъ, фїлі́ппе бг҃одохнове́нне.

Бг҃оро́диченъ:

Свѣти́льникъ ꙗ҆ви́ласѧ є҆сѝ та́инственный, свѣщꙋ̀, ѻ҆трокови́це, носѧ́щи и҆́стиннѡ, просвѣ́щшꙋю въ нощѝ невѣ́дѣнїѧ пре́жде ѡ҆держи̑мыѧ, кра́йнею бла́гостїю.

И҆́нъ. І҆рмо́съ то́йже.

Сы́й и҆спо́лненъ, мꙋ́дре, бжⷭ҇твеннагѡ дх҃а ꙗ҆ви́лсѧ є҆сѝ. пита́ѧ бога́тнѡ благоче́стїѧ сла́достїю сло́вомъ живи́тельнымъ, сердца̀ зрѧ́щихъ къ тебѣ̀.

Повелѣ̑нїи бжⷭ҇твеннагѡ сїѧ́нїѧ и҆зблиста́ѧ, всеблаже́нне, ѿгна́лъ є҆сѝ всю̀ є҆реті́ческꙋю мглꙋ̀, жизнода́вцꙋ хрⷭ҇тꙋ̀ воспѣва́ѧ: свѧ́тъ є҆сѝ, гдⷭ҇и.

На го́рꙋ бжⷭ҇твенныхъ добродѣ́телей возше́дъ, і҆ера́рше, и҆ во мра́къ вше́дъ сочта́лсѧ є҆сѝ съ бг҃омъ, и҆ ра́зꙋма скрижа́ль прїѧ́лъ є҆сѝ, зако́нъ бл҃года́ти.

Бг҃оро́диченъ:

Сѐ лѣ́ствица і҆а́кѡвлѧ, ю҆́же ви́дѣ и҆ногда̀ ᲂу҆твержде́нꙋ, на не́йже ᲂу҆твержда́шесѧ бг҃ъ, свѣтоно́снаѧ чⷭ҇таѧ ꙗ҆ви́сѧ дѣ́вствꙋющи бцⷣа.

Конда́къ ѳеофа́на, гла́съ в҃. Подо́бенъ: Вы́шнихъ и҆щѧ̀:

Возгремѣ́въ хрⷭ҇то́во бжⷭ҇твенное воплоще́нїе, безплѡ́тныѧ врагѝ до конца̀ ѡ҆бличи́лъ є҆сѝ, чꙋ́дне ѳеофа́не. сегѡ̀ ра́ди всѝ вѣ́рнѡ и҆ благоче́стнѡ вопїе́мъ тѝ: молѝ непреста́ннѡ ѡ҆ всѣ́хъ на́съ.

Сѣда́ленъ а҆пⷭ҇ла, гла́съ и҃. Подо́бенъ: Премꙋ́дрости:

Прогони́тель де́мѡнѡвъ ꙗ҆ви́всѧ, и҆ ꙗ҆́кѡ свѣти́льникъ сꙋ́щыѧ во тмѣ̀ просвѣти́въ, ꙗ҆ви́лъ є҆сѝ сл҃нца ѿ дв҃ы возсїѧ́вшаго, и҆ хра́мы і҆́дѡльскїѧ сокрꙋши́въ, возста́вилъ є҆сѝ цє́ркви блаже́нне, въ сла́вꙋ бг҃а на́шегѡ. тѣ́мъ тѧ̀ почита́емъ, и҆ бжⷭ҇твеннꙋю твою̀ па́мѧть свѣ́тлѡ пра́зднꙋемъ, и҆ согла́снѡ вопїе́мъ тѝ: а҆пⷭ҇ле фїлі́ппе, молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.

Сла́ва, прпⷣбнагѡ, гла́съ д҃. Подо́бенъ: Ꙗ҆ви́лсѧ є҆сѝ дне́сь:

Ꙗ҆ви́лсѧ є҆сѝ, прпⷣбне, цр҃кви ꙗ҆́коже дрꙋго́е со́лнце, ѡ҆зарѧ́ѧ сїю̀ мо́лнїѧми бжⷭ҇твенныхъ слове́съ твои́хъ, ꙗ҆́кѡ ᲂу҆чени́къ гдⷭ҇ень, ѳеофа́не.

И҆ ны́нѣ, бг҃оро́диченъ:

Пречⷭ҇тыѧ рꙋ́ки твоѧ̑ дв҃о мт҃и, просте́рши, покры́й ᲂу҆пова́ющыѧ на тѧ̀, и҆ сн҃ꙋ твоемꙋ̀ зовꙋ́щыѧ: всѣ̑мъ пода́ждь хрⷭ҇тѐ, ми́лѡсти твоѧ̑.

Крⷭ҇тобг҃оро́диченъ:

На дре́вѣ ви́дѧщи воздви́жена сн҃а твоего̀, пречⷭ҇таѧ, ᲂу҆тро́бою мт҃рнею растерза́ема, жа́лостнѡ взыва́ше: ᲂу҆вы̀ мнѣ̀, ка́кѡ за́йде, свѣ́те мо́й безлѣ́тный;

Пѣ́снь д҃. І҆рмо́съ:

Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.

Ви́дѣвъ тѧ̀ сі́мѡнъ содѣва́юща чꙋдеса̀ и҆ зна́мєнїѧ вє́лїѧ, лицемѣ́рствовавъ, фїлі́ппе, креща́етсѧ, не ѕло́бы бѣжа́въ: но поги́бели предае́тсѧ.

Мнѡ́ги тѧ̀ си̑лы содѣва́юща ви́дѧще живꙋ́щїи во гра́дѣ самарі́йстѣмъ, проповѣ́дниче хрⷭ҇то́въ фїлі́ппе, позна́нїѧ свѣ́тъ веселѧ́щесѧ прїима́хꙋ.

И҆дѝ, глаго́ла тебѣ̀ гдⷭ҇ень а҆́гг҃лъ, пꙋ́ть направлѧ́ѧ свѧще́ннагѡ, фїлі́ппе, мꙋ́рїна, є҆́же позна́ти томꙋ̀ стезю̀ сло́ва воплоще́нїѧ.

Свѧще́ннѣйшїй канда́кїй ви́дѣвъ тѧ̀, вразꙋмлѧ́юща того̀, твое́ю рꙋко́ю, фїлі́ппе, креща́етсѧ, и҆ по́лнъ дх҃а ст҃а́гѡ ꙗ҆́вльсѧ, проповѣ́дникъ бжⷭ҇твенный бы́сть.

Бг҃оро́диченъ:

Сн҃ы совершѝ бж҃їѧ, всенепоро́чнаѧ, сы́ны человѣ́чєскїѧ тво́й сн҃ъ, ѿ чⷭ҇тыхъ крове́й твои́хъ вопло́щсѧ и҆ ро́ждсѧ: сегѡ̀ ра́ди сла́вимъ тѧ̀.

И҆́нъ. І҆рмо́съ то́йже.

Поще́нїемъ, всемꙋ́дре ѻ҆́ч҃е ѳеофа́не, себѐ ѡ҆чи́стивъ, ве́сь свѣ́та и҆спо́лненъ бы́лъ є҆сѝ, ве́сь бг҃а вмѣсти́теленъ, ве́сь дх҃а ст҃а́гѡ соприча́стенъ.

Гла́домъ та́емь, въ лю̑таѧ влага́емь заточє́нїѧ, стражда̀, всеблаже́нне, мꙋ́ченически терпѣ́лъ є҆сѝ, ѿ со́вѣсти чи́сты въ гдⷭ҇ѣ веселѧ́сѧ.

Ѡ҆блиста́въ, сла́вне, и҆справлє́нїи ѡ҆бощре́нъ ꙗ҆ви́лсѧ є҆сѝ, ꙗ҆́кѡ хрⷭ҇то́въ ме́чь, ссѣца́ющь є҆реті́чєскаѧ ᲂу҆хищрє́нїѧ, бжⷭ҇твеннымъ дх҃омъ ᲂу҆крѣплѧ́емь.

Бг҃оро́диченъ:

Свѣти́льникъ всесвѣ́тлый ты̀ ꙗ҆ви́ласѧ є҆сѝ, бжⷭ҇твеннаѧ трапе́за, бж҃їе селе́нїе, кївѡ́тъ и҆ же́злъ, процвѣ́тши цвѣ́тъ въ мі́рѣ хрⷭ҇та̀, мт҃и дв҃о.

Пѣ́снь є҃. І҆рмо́съ:

Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Ꙗ҆́рости беззако́нныхъ не ᲂу҆боѧ́всѧ, средѝ волкѡ́въ ꙗ҆́кѡ а҆́гнецъ, и҆́стиннѡ фїлі́ппе, ходи́лъ є҆сѝ, ты̑ѧ претворѧ́ѧ къ благоче́стїю бл҃года́ти сло́вомъ, бл҃же́ннѣйше.

На заколє́нїѧ веде́сѧ ꙗ҆́кѡ а҆́гнецъ є҆мманꙋ́илъ, ꙗ҆́коже глаго́летъ и҆са́їа сла́вный, є҆гѡ́же разꙋмѣ́ти не могі́й, фїлі́ппе, свѧще́нный канда́кїй ѿ тебє̀ наꙋча́етсѧ.

Свѧщенносло́вна тѧ̀ ᲂу҆ч҃ника̀, є҆ди́наго дїа́конѡвъ седмѝ и҆збра́нна ᲂу҆вѣ́дѣхомъ, и҆ цр҃кве бжⷭ҇твенное ѡ҆снова́нїе, и҆ всѣ́хъ сꙋ́щихъ во тмѣ̀ свѣти́льника, фїлі́ппе.

Бг҃оро́диченъ:

Бцⷣꙋ тѧ̀ и҆́стиннѡ ѿ дꙋшѝ и҆сповѣ́дающе, и҆скꙋше́нїй и҆ неꙋдо́бствъ и҆збавлѧ́емсѧ твои́ми ко всѣ́хъ бг҃ꙋ и҆ гдⷭ҇ꙋ дв҃о, хода́тайствы, бг҃облагода́тнаѧ.

И҆́нъ. І҆рмо́съ то́йже.

Свѣтода́тельными твои́ми блиста̑нїи, ѻ҆́ч҃е свѧще́ннѣйше, мра́чнꙋю тмꙋ̀ потреби́лъ є҆сѝ є҆реті́чествꙋющихъ, бг҃озна́нїѧ свѣ́томъ ѡ҆зарѧ́ѧ, и҆ просвѣща́ѧ мі́ра концы̀.

Ѕлочести́выхъ защи̑тницы, тебѐ досточꙋ́дна сꙋ́щаго лю́тыми ра́нами ᲂу҆ѧзви́ша, є҆го́же а҆́гг҃льстїи чи́ни ѡ҆б̾има́хꙋ ꙗ҆́кѡ хрⷭ҇то́ва і҆ера́рха и҆ бжⷭ҇твеннаго мч҃ника.

Бы́лъ є҆сѝ ѻ҆́ч҃е, свѣтови́дный заблꙋ́ждшымъ пꙋтево́ждь, пла́вающымъ ко́рмчїй, коле́блємымъ приложе́ньми лю́тыхъ тве́рдость, и҆ стѣна̀ недви́жима.

Бг҃оро́диченъ:

Добро́та і҆а́кѡвлѧ, ю҆́же бг҃ъ возлюбѝ, и҆ всели́тисѧ и҆збра̀: земны́хъ сла́ва, и҆ прибѣ́жище согрѣша́ющихъ, бцⷣе, ты̀ ꙗ҆ви́ласѧ є҆сѝ.

Пѣ́снь ѕ҃. І҆рмо́съ:

Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.

Во́дъ дꙋхо́вныхъ и҆спо́лнивсѧ, ꙗ҆́кѡ рѣка̀ бжⷭ҇твеннагѡ є҆де́ма и҆зше́лъ є҆сѝ, наводнѧ́ѧ волно́ю ти́хою земны̑ѧ концы̀, и҆ напаѧ́ѧ сердца̀ вѣ́рныхъ, досточꙋ́дне.

Ѿве́рзъ и҆спо́лнилъ є҆сѝ твоѧ̑ ᲂу҆ста̀, ᲂу҆ч҃ничѐ, дꙋхо́внагѡ ра́зꙋма, и҆ разве́рзъ горта́нь лꙋка́вагѡ, поглоще́нныхъ и҆сто́рглъ є҆сѝ безчи́слєннаѧ мно́жєства, и҆ спа́слъ є҆сѝ, а҆пⷭ҇ле.

Крѣ́пость низве́ржесѧ неви́димагѡ врага̀, и҆ ѿню́дъ поги́бе, тебѣ̀ крѣ́постїю дх҃а, хрⷭ҇та̀ проповѣ́дающꙋ, фїлі́ппе, распе́ншагосѧ и҆ ꙗ҆зы́ки призыва́ющаго.

Бг҃оро́диченъ:

Зако́нѡвъ тѧ̀ є҆сте́ственныхъ кромѣ̀ родѝ, хрⷭ҇тѐ, содѣ́телѧ тва́ри, и҆ па́че є҆стества̀ пребы́сть и҆́стиннѡ дв҃а нескве́рна, ст҃а́ѧ мт҃и твоѧ̀, прест҃ы́й.

И҆́нъ. І҆рмо́съ то́йже.

Сы́й ꙗ҆́кѡ со́лнце, бг҃оза̑рныѧ лꙋчы̀, преблаже́нне, и҆спꙋсти́лъ є҆сѝ, похвалѧ́ѧ мꙋ́ченичєскїѧ стра̑сти, вѧза̑нїѧ и҆ ра̑ны, и҆ ди̑вныѧ по́двиги, і҆ера́рше хрⷭ҇то́въ.

Пречⷭ҇тꙋю влⷣчцꙋ похвалѧ́ѧ чи́стѣ, ѧ҆зы́комъ твои́мъ, бг҃омꙋ́дре, воспѣ́лъ є҆сѝ словеса̀ свѣтоза̑рнаѧ, вѣ́рныхъ собо́ры, и҆ мꙋ́дрыхъ сердца̀ ᲂу҆маща̑ющаѧ.

Писа́нїемъ твоегѡ̀ всечестна́гѡ и҆ чи́стагѡ, мꙋ́дре, лица̀, безбо́жныхъ писа̑нїѧ и҆змазꙋ́еши, и҆ тѣ́хъ бг҃омє́рзскаѧ и҆ безбѡ́жнаѧ повелѣ̑нїѧ, возвѣща́ѧ чествова́ти і҆кѡ́нꙋ хрⷭ҇то́вꙋ.

Бг҃оро́диченъ:

Всѧ̑ хотѣ́нїемъ соста́вивый бг҃ъ и҆ содержа́й, пречⷭ҇таѧ, ѡ҆писа́нїемъ тѣлесѐ на твои́хъ ѡ҆б̾ѧ́тїихъ но́ситсѧ, бжⷭ҇твеннымъ сꙋщество́мъ неѡпи́санный.

Конда́къ а҆пⷭ҇ла, гла́съ д҃. Подо́бенъ: Вознесы́йсѧ:

Ꙗ҆зы́кѡвъ лове́цъ пречꙋ́дный, и҆ ᲂу҆ч҃никѡ́въ хрⷭ҇то́выхъ собесѣ́дникъ, а҆пⷭ҇лѡвъ пред̾избра́нный фїлі́ппъ, дне́сь мі́рꙋ и҆сцѣле́нїй подае́тъ бога́тство, покрыва́етъ ѿ ѡ҆бстоѧ́нїй того̀ хва́лѧщыѧ. тѣ́мъ согла́снѡ зове́мъ є҆мꙋ̀: спаса́й всѧ̑ моли́твами твои́ми, а҆пⷭ҇ле.

І҆́косъ:

Ꙗ҆́кѡ нб҃о сла́вꙋ бж҃їю, самови́дче, и҆сповѣ́давъ, ꙗ҆зы́ки да́льнїѧ привлечѐ къ вѣ́рѣ бли́зъ бы́ти бг҃а. тѣ́мъ ꙗ҆́коже мѡѷсе́й законополо́жникъ ѡ҆богаща́еши, прехва́льне, ста́до твоѐ. ѻ҆́нъ дре́вле мо́ре пресѣчѐ, и҆ преве́дъ лю́ди, пото́мъ въ пꙋсты́ни препита̀ хлѣ́бомъ нбⷭ҇нымъ: ты́ же сла́внагѡ лю́тагѡ невѣ́рствїѧ и҆зба́вивъ во хрⷭ҇тѣ̀ всю̀ тва́рь, горѣ̀ къ пребыва́нїємъ нбⷭ҇нымъ возве́лъ є҆сѝ вопїю́щыѧ: спаса́й всѧ̑ моли́твами твои́ми, а҆пⷭ҇ле.

Пѣ́снь з҃. І҆рмо́съ:

Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

Наведе́ тѧ ꙗ҆́кѡ конѧ̀ пребжⷭ҇твенный, возмꙋща́юща ꙗ҆зы́ческое мо́ре, фїлі́ппе, главы̑ сокрꙋша́юща вра̑жїѧ, и҆ пою́ща є҆мꙋ̀ пѣ́сненнѡ: бл҃гослове́нъ є҆сѝ бж҃е ѻ҆тє́цъ на́шихъ.

Сказꙋ́ѧ пре́жде всѣ́хъ вѣкѡ́въ сокрове́ннꙋю та́йнꙋ: тайноглаго́льникъ же бы́въ, фїлі́ппе мꙋ́дре, наꙋчи́лъ є҆сѝ страны̑ и҆ лю́ди, и҆ ѿ та̑инъ ме́рзскихъ ѡ҆чи́стилъ є҆сѝ.

Ꙗ҆ви́лсѧ є҆сѝ велича́йшаѧ ѕвѣзда̀, фїлі́ппе сла́вный, и҆ траллі́и ᲂу҆добре́нїе, въ не́йже тѣ́ло твоѐ честно́е лежи́тъ, содѣва́ѧ чꙋде́съ пресла̑внаѧ, мꙋ́дре, на просвѣще́нїе благочести́внѡ блажа́щихъ тѧ̀.

Бг҃оро́диченъ:

Бг҃ороди́тельницꙋ тѧ̀ дв҃о, и҆менꙋ́емъ марі́е пречⷭ҇таѧ, спаса́емїи тобо́ю де́нь и҆ но́щь, ѿ вра́жїихъ приложе́нїй вре́дныхъ, и҆ и҆скꙋше́нїй всѧ́ческихъ, и҆ дꙋше́вныхъ скве́рнъ.

И҆́нъ. І҆рмо́съ:

Ѻ҆́троцы въ вавѷлѡ́нѣ, пе́щнагѡ пла́мене не ᲂу҆боѧ́шасѧ, но посредѣ̀ пла́мене вве́ржени, ѡ҆роша́еми поѧ́хꙋ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

И҆справлѧ́ѧ ты̀ и҆́стины сло́во, ра́нъ и҆скꙋшє́нїѧ претерпѣ́лъ є҆сѝ, и҆ во и҆згна́нїе вложе́нъ, і҆ера́рше ѳеофа́не, пѣ́лъ є҆сѝ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

Твои́хъ догма́тѡвъ стрꙋи̑, нечести́выхъ потопи́ша морѧ̀, мꙋ́дре, не вопїю́щихъ хрⷭ҇тꙋ̀ бг҃ꙋ на́шемꙋ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

Рѣ́ки твои́хъ слове́съ медото́чныхъ, ѳеофа́не, человѣ́кѡвъ дꙋ́шы весе́лїѧ бжⷭ҇твеннагѡ и҆спо́лниша, пѣсносло́вѧщихъ пѣ́сньми бг҃а препросла́вленнаго.

Бг҃оро́диченъ:

На тебѣ̀ вели́кое содѣ́ѧсѧ, дв҃ома́ти, та́инство, сн҃ъ бж҃їй и҆зъ чре́ва твоегѡ̀ вопло́щсѧ ны́нѣ ꙗ҆ви́сѧ, є҆мꙋ́же веселѧ́щесѧ пое́мъ: ѻ҆тцє́въ бж҃е, бл҃гослове́нъ є҆сѝ.

Пѣ́снь и҃. І҆рмо́съ:

И҆зъ пла́мене преподѡ́бнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.

Сло́вомъ бжⷭ҇твеннымъ, всеблаже́нне, ꙗ҆́коже со́лїю раствори́въ, пре́лести ѡ҆чи́стилъ є҆сѝ смра́дъ лю́тый, и҆ человѣ́чєскаѧ сердца̀ и҆сцѣли́лъ є҆сѝ, честѝ и҆ сла́вити трⷪ҇цꙋ во вѣ́ки.

Оу҆тверди́шасѧ но́ги хромы́хъ сло́вомъ твои́мъ, мꙋ́дре, дꙋ́си же ме́рзцыи и҆ нечи́стїи рыда́хꙋ, терпѣ́ти не могꙋ́ще да́нныѧ тебѣ̀ благода́ти.

Въ самарі́и дре́вле живꙋ́щїи, фїлі́ппе, бл҃года́ти зарю̀ ѿ тебє̀ прїе́млютъ, ви́дѧще мнѡ́гаѧ содѣва́юща тѧ̀ чꙋдеса̀, си́лою дх҃а и҆сто́чника бл҃года́тнагѡ.

Бг҃оро́диченъ:

Коле́блющꙋюсѧ ѕло́бою ратобо́рца дꙋ́шꙋ мою̀, дв҃о чⷭ҇таѧ, ᲂу҆крѣпѝ, бжⷭ҇твеннымъ призира́нїемъ дви́жꙋщаго всѧ́чєскаѧ прїе́мши, и҆ неподви́жꙋщисѧ.

И҆́нъ. І҆рмо́съ:

За зако́ны ѻ҆ч҃єскїѧ бл҃же́ннїи въ вавѷлѡ́нѣ ю҆́ношы предбѣ́дствꙋюще, царю́ющагѡ ѡ҆плева́ша повелѣ́нїе безꙋ́мное, и҆ совокꙋ́плени, и҆́мже не свари́шасѧ, ѻ҆гне́мъ, держа́вствꙋющемꙋ досто́йнꙋю воспѣва́хꙋ пѣ́снь: гдⷭ҇а по́йте дѣла̀, и҆ превозноси́те во всѧ̑ вѣ́ки.

Зако́нъ ѻ҆те́ческїй всебл҃же́нне, и҆́стиннѡ носѧ̀, пребеззако́ннѣйшагѡ црⷭ҇твꙋющагѡ поплева́лъ є҆сѝ повелѣ́нїе несмы́сленное, погꙋблѧ́юща, ѻ҆́ч҃е, гдⷭ҇не воѡбраже́нїе благоче́стнѡ лобза́ющихъ, є҆́же прїе́мъ, въ мі́рѣ ꙗ҆ви́сѧ ѿ дв҃ы ѻ҆трокови́цы: є҆го́же превозно́симъ во вѣ́ки.

Оу҆́мъ бжⷭ҇твенъ, дх҃а прест҃а́гѡ гꙋ́сль всесли́чнаѧ, славі́й добропѣ́снивый, вѣ́рныхъ ве́рхъ, правосла́вїѧ сто́лпъ и҆ ᲂу҆твержде́нїе, мꙋ́дре, цр҃кве тве́рдь, мона́хѡвъ хвала̀, ѳеофа́не, ѻ҆тцє́въ сла́ва и҆ крѣ́пость ꙗ҆ви́лсѧ є҆сѝ, воспѣва́ѧ хрⷭ҇та̀ во вѣ́ки.

Мѷрополо́жница дх҃а прест҃а́гѡ, ѻ҆́ч҃е, ты̀ показа́лсѧ є҆сѝ, и҆злива́нїемъ мѷродохнове́нныхъ твои́хъ и҆ мꙋ́дрыхъ ᲂу҆че́нїй потреблѧ́ѧ пре́лести ѕлосмра́днѣйшꙋю тлю̀, и҆ благово́нствꙋеши нра́вомъ твои́мъ честнꙋ́ю цр҃ковь, зовѧ̀ непреста́ннѡ: пѣ́сньми тѧ̀ превозно́симъ хрⷭ҇тѐ, во вѣ́ки.

Бг҃оро́диченъ:

Бж҃їѧ гора̀ тꙋ́чнѣйшаѧ, ю҆́же пра́ѻц҃ъ дв҃дъ предписа̀ дре́вле пѣснопоѧ̀ прⷪ҇ро́чески, ты̀ ꙗ҆ви́ласѧ є҆сѝ дв҃о: ѿ неѧ́же ѿсѣче́сѧ ка́мень краеꙋго́льный хрⷭ҇то́съ, и҆ сокрꙋшѝ крѣ́пость всю̀ і҆́дѡльскꙋю. тогѡ̀ непреста́ннѡ пое́мъ, и҆ превозно́симъ во вѣ́ки.

Пѣ́снь ѳ҃. І҆рмо́съ:

Бг҃а человѣ́кѡмъ невозмо́жнѡ ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ.

Ви́дѣвъ дре́вле тебѣ̀ ча́ємаѧ, и҆ бжⷭ҇твеннꙋю прїе́мъ вла́сть непоколеби́мꙋ, ѡ҆ не́йже человѣ́ки наꙋчи́лъ є҆сѝ, фїлі́ппе бг҃оглаго́ливе. красꙋ́йсѧ и҆ ликꙋ́й, бжⷭ҇твеннагѡ наслажда́ѧсѧ просвѣще́нїѧ и҆ ᲂу҆тѣше́нїѧ.

Ꙗ҆́кѡ свѣ́тъ, ꙗ҆́кѡ ѕвѣзда̀, ꙗ҆́кѡ вели́кое сл҃нце, свѣща́тельными зарѧ́ми ѡ҆бте́клъ є҆сѝ вселе́ннꙋю, возвѣща́ѧ бжⷭ҇твенное проповѣ́данїе: во траллі́ю же а҆сі́йскїй гра́дъ прише́дъ, є҆мꙋ́же во́ждь бы́въ, бл҃же́нне, въ не́мъ ᲂу҆снꙋ́лъ є҆сѝ.

Крⷭ҇тъ и҆ сме́рть и҆ воскрⷭ҇нїе и҆зба́вителѧ, бли̑жнимъ и҆ да̑льнимъ возвѣсти́лъ є҆сѝ, не́бо ѡ҆ѕвѣзде́нное бы́въ, бжⷭ҇твенными свѣтлостьмѝ блиста́ющесѧ, фїлі́ппе а҆пⷭ҇ле хрⷭ҇то́въ досточꙋ́дне. (с. 201)

Землѧ̀ тѣ́ло твоѐ многострада́льное, сїѧ́нїе и҆спꙋща́ющее и҆сцѣле́нїй, покры̀, не́бо же дꙋ́хъ тво́й ст҃ы́й со а҆пⷭ҇лы и҆́мать веселѧ́щейсѧ: съ ни́миже и҆ на́съ помѧнѝ мꙋ́дре, хва́лѧщихъ тѧ̀.

Бг҃оро́диченъ:

Гла́съ прино́ситъ тѝ благода́рственный всѧ́кое дыха́нїе, вопїю́щїй ве́селѡ и҆ глаго́лющїй: ра́дꙋйсѧ, прⷭ҇то́ле вы́шнѧгѡ ѻ҆гнеѻбра́зный: ра́дꙋйсѧ, бж҃їе село̀ простра́ннѣйшее: ра́дꙋйсѧ, а҆пⷭ҇лѡвъ благолѣ́пное, чⷭ҇таѧ, вѣнча́нїе.

И҆́нъ. І҆рмо́съ:

Безсѣ́меннагѡ зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: бж҃їе бо рожде́нїе ѡ҆бновлѧ́етъ є҆стєства̀. тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю мт҃рь правосла́внѡ велича́емъ.

Побо́рствꙋюща тѧ̀ по хрⷭ҇то́вѣ цр҃кви, человѣкоꙋбі́йца зрѣ́ти не могі́й, и҆скꙋшє́нїѧ тебѣ̀ простира́етъ: ѻ҆ба́че непрекло́ненъ пребы́лъ є҆сѝ, мꙋжемꙋ́дреннѡ къ царє́мъ нечести̑вымъ противлѧ́ѧсѧ до́блественнѡ, ᲂу҆вѣща́ѧ ты̑ѧ покланѧ́тисѧ ѻ҆́бразꙋ хрⷭ҇то́вꙋ, ѳеофа́не.

Оу҆кра́шенъ несказа́нною, бг҃омꙋ́дре, добро́тою трⷪ҇цы, и҆ ᲂу҆пещре́нъ сїѧ̑нїи, свѣ́тиши, и҆ ра́достнѡ, пребога́те, ѡ҆бстои́ши прⷭ҇то́лъ и҆́стиннѡ зижди́телѧ и҆ бг҃а, и҆дѣ́же пра́зднꙋющихъ гла́съ, ѻ҆́ч҃е бг҃оно́се ѳеофа́не.

Твои́хъ подвигѡ́въ досто́йнѡ прїѧ́лъ є҆сѝ чє́сти, и҆ вѣнцено́сецъ ны́нѣ на нб҃сѣ́хъ со а҆́гг҃лы свесели́шисѧ, и҆дѣ́же прⷪ҇ро́кѡвъ собо́ръ и҆ а҆пⷭ҇лѡвъ, и҆ мꙋ́ченикѡвъ и҆́стиннѡ вѡ́инства мнѡ́гаѧ, и҆дѣ́же патрїа́рхѡвъ ли́ки: помина́й на́съ ѻ҆́ч҃е ѳеофа́не.

Бг҃оро́диченъ:

Побо́рствꙋющи лю́демъ вѣ̑рнымъ во бранѣ́хъ на ва́рвары, да́ждь побѣди́тєльнаѧ, дв҃о бг҃ороди́тельнице, бл҃гослове́ннаѧ и҆ препросла́вленнаѧ, мт҃и неискꙋсобра́чнаѧ чⷭ҇таѧ, покрыва́ющи ѿ всѧ́кагѡ вре́да вра́жїѧ: да твоего̀ сн҃а пою́ще, тѧ̀ велича́емъ.

Свѣти́ленъ. Подо́бенъ: Не́бо ѕвѣзда́ми:

А҆пⷭ҇ле хрⷭ҇то́въ, во всю̀ вселе́ннꙋю протечѐ твоѐ вѣща́нїе, бг҃а проповѣ́далъ є҆сѝ на́мъ: є҆го́же ѡ҆ на́съ молѝ, свѣ́тъ ᲂу҆́мный на́мъ возсїѧ́ти.

Сла́ва, прпⷣбнагѡ. Подо́бенъ: Жєны̀ ᲂу҆слы́шите:

Ꙗ҆́кѡ бжⷭ҇твенный свѣ́тъ, ѳеофа́не, цр҃кви ꙗ҆ви́лсѧ є҆сѝ, пѣ́сней твои́хъ сїѧ́нїемъ сїю̀ ѡ҆зари́въ, и҆ свѣ́томъ лица̀ твоегѡ̀, на не́мже хрⷭ҇то́вы ꙗ҆́звы носи́въ ᲂу҆добрѧ́емь: къ немꙋ́же не преста́й молѧ́сѧ ѡ҆ ста́дѣ твое́мъ, ѻ҆́ч҃е.

И҆ ны́нѣ, бг҃оро́диченъ:

Дре́вле дарова́ннꙋю мнѣ̀ ри́зꙋ кꙋпѣ́лїю креще́нїѧ, ѡ҆скверни́хъ стра́стными блꙋды̀, и҆ ᲂу҆жаса́юсѧ ѻ҆каѧ́нный, ча́съ помышлѧ́ѧ бжⷭ҇твеннагѡ и҆́стиннѡ стра́шнагѡ сꙋда̀: дв҃о всенепоро́чнаѧ, предста́ни тогда̀, и҆ и҆зба́ви мѧ̀ стра́шнагѡ преще́нїѧ.

На лїтꙋргі́и, прокі́менъ а҆пⷭ҇ла: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ. Сті́хъ: Небеса̀ повѣ́даютъ сла́вꙋ бж҃їю: А҆пⷭ҇лъ, дѣѧ́нїй зача́ло к҃. А҆ллилꙋ́їа, гла́съ а҃. И҆сповѣ́дѧтъ небеса̀ чꙋдеса̀ твоѧ̑ гдⷭ҇и. Є҆ѵⷢ҇лїе лꙋкѝ, зача́ло и҃. Прича́стенъ: Во всю̀ зе́млю:

[зрѝ] Подоба́етъ вѣ́дати, ꙗ҆́кѡ по а҃і-мъ днѝ сегѡ̀ мѣ́сѧца, въ прїидꙋ́щꙋю недѣ́лю па́мѧть соверша́емъ ст҃ы́хъ ѻ҆тє́цъ, и҆̀же на седмо́мъ вселе́нскомъ собо́рѣ, въ нїке́и собра́вшихсѧ второ́е, свѧты́хъ ѻ҆тє́цъ тѯ҃є, на и҆зверже́нїе и҆ потребле́нїе безбо́жныхъ ᲂу҆че́нїй хрⷭ҇тоненави́стныхъ, и҆ хрⷭ҇тїаноѡглаго́льникѡвъ, і҆кѡнобо́рцєвъ, копрѡнѵ́ма, и҆ є҆мꙋ̀ смꙋ́дрствꙋющихъ, ѻ҆каѧ́нныхъ є҆пі́скопѡвъ, и҆ несвѧще́нныхъ а҆рхїере́євъ, и҆ тѣ́хъ безбо́жнагѡ и҆ скве́рнагѡ собо́рища.

И҆ а҆́ще слꙋчи́тсѧ а҃і де́нь настоѧ́щїй въ недѣ́лю, пое́тсѧ въ то́йже де́нь слꙋ́жба ст҃ы́хъ ѻ҆тє́цъ седма́гѡ собо́ра. А҆́ще же въ сре́дꙋ, пое́тсѧ слꙋ́жба и҆́хъ въ мимоше́дшꙋю недѣ́лю: а҆́ще же въ четверто́къ, пое́тсѧ слꙋ́жба и҆́хъ въ прїидꙋ́щꙋю недѣ́лю.

Рѧдова́гѡ же ст҃а́гѡ слꙋ́жба ѡ҆ставлѧ́етсѧ, и҆ пое́тсѧ, є҆гда̀ разсꙋ́дитъ є҆кклисїа́рхъ.

Въ сꙋббѡ́тꙋ на ма́лѣй вече́рни, стїхи̑ры воскрⷭ҇ны, и҆ бцⷣы, по ѻ҆бы́чаю.

На вели́цѣй вече́рни, на Гдⷭ҇и, воззва́хъ, стїхи̑ры ѻ҆ктѡ́иха, воскрⷭ҇ны г҃, и҆ ꙾восто́ченъ꙾ ² є҆ди́нъ: И҆ ст҃ы́хъ ѻ҆тцє́въ на ѕ҃, гла́съ ѕ҃.

Подо́бенъ: Ѿча́ѧннаѧ:

Честны̑ѧ собо́ры ѻ҆тцє́въ, въ ра̑знаѧ времена̀ соста́вивъ, во є҆ди́но собра̀ є҆ди́нѣмъ и҆ тѣ́мже пра́виломъ, ѕѣлѡ̀ до́брѣ патрїа́рхъ ге́рманъ но́вый, пиша̀ кꙋ́пнѡ же и҆ держа̀ догма́ты си́хъ, и҆́же и҆ моли́твенники бо́дрствєнныѧ сїѧ̑ спасе́нїѧ, гдⷭ҇ꙋ предлага́етъ, и҆ па́ствѣ съ па̑стыри.

Два́жды.

Зако́на писа́нїе дѣ́тємъ є҆врє́йскимъ положѝ честнꙋ́ю седми́цꙋ, сѣ́ни придержа́щымсѧ, и҆ слꙋжа́щымъ се́й, ю҆́же ѻ҆тцы̀ сте́кшесѧ на седмо́мъ собо́рѣ ма́нїемъ бж҃їимъ, въ шестѝ дне́хъ всѐ сїѐ соверши́вшагѡ, и҆ седмы́й благослови́вшагѡ, честнѣ́йшꙋю содѣ́лаша, предѣ́лъ вѣ́ры и҆зложи́вше.

Трⷪ҇цꙋ всѣ̑мъ ѿ веще́й, мїробы́тїѧ сꙋ́щꙋю винꙋ̀, ꙗ҆́снѡ преда́сте треблаже́ннїи ѻ҆тцы̀: три́ бо и҆ четы́ре собо́ры, та́инственнѣйшимъ сло́вомъ положи́вше, и҆ ѿмсти́телїе ꙗ҆́вльшесѧ правосла́внагѡ сло́ва, стїхі́а четы́ре сꙋ́щѧ, и҆ трⷪ҇цꙋ и҆з̾ѧсни́сте, созда́вшꙋю сїѧ̑, и҆ мі́ръ сотво́ршꙋю.

Довлѧ́ше и҆ є҆ди́ною жи́знь вдохнꙋ́ти, лежа́щемꙋ сы́нꙋ слꙋжа́щїѧ, прⷪ҇ро́ка є҆лїссе́а слѧче́нїе ѕѣ́льно: ѻ҆ба́че ѡ҆брати́сѧ седми́жды, и҆ прикланѧ́шесѧ семꙋ̀, провозвѣща́ѧ ꙗ҆́кѡ прови́децъ ва́шѧ собо́ры, и҆́миже ᲂу҆мерщвле́нїе бжⷭ҇твеннагѡ сло́ва водꙋши́сте, а҆́рїа ᲂу҆мертви́вше, и҆ є҆гѡ̀ све́рстники.

Кто̀ твою̀, сп҃се, ри́зꙋ раздра̀; а҆́рїй, ты̀ ре́клъ є҆сѝ: и҆́же трⷪ҇цы пресѣчѐ є҆диноче́стное нача́ло въ раздѣлє́нїѧ: се́й ѿве́рже тѧ̀ бы́ти є҆ди́наго ѿ трⷪ҇цы: се́й и҆ несто́рїа ᲂу҆чи́тъ бцⷣꙋ не глаго́лати. но собо́ръ и҆́же въ нїке́и, сн҃а бж҃їѧ тѧ̀ проповѣ́да, гдⷭ҇и, ѻ҆ц҃ꙋ̀ и҆ дх҃ꙋ сопресто́льна.

Сла́ва, гла́съ ѕ҃. Самогла́сенъ:

Та́инствєннаѧ дне́сь дх҃а трꙋбы̑ бг҃онѡ́сныѧ ѻ҆тцы̀ восхва́лимъ, пѣснопѣ́вшыѧ посредѣ̀ цр҃кве, пѣ́снь сли́чнꙋю бг҃осло́вїѧ: трⷪ҇цꙋ є҆ди́нꙋ непремѣ́ннꙋю, сꙋщество́ же и҆ бж҃ество̀: низложи́тели а҆́рїевы, и҆ правосла́вныхъ побо́рники, молѧ́щыѧсѧ всегда̀ гдⷭ҇ꙋ, поми́ловатисѧ дꙋша́мъ на́шымъ.

И҆ ны́нѣ, бг҃оро́диченъ пе́рвый гла́са.

По вхо́дѣ прокі́менъ днѐ, и҆ чтє́нїѧ г҃.

Бытїѧ̀ чте́нїе.

[Глава̀ д҃і] Слы́шавъ а҆вра́мъ, ꙗ҆́кѡ плѣне́нъ бы́сть лѡ́тъ брата́ничь є҆гѡ̀, сочтѐ своѧ̑ домоча́дцы, три́ста и҆ ѻ҆смьна́десѧть, и҆ погна̀ во слѣ́дъ и҆́хъ да́же до да́на. И҆ нападѐ на нѧ̀ но́щїю са́мъ, и҆ ѻ҆́троцы є҆гѡ̀ съ ни́мъ: и҆ поразѝ и҆̀хъ, и҆ гонѝ и҆̀хъ до хѡва́ла, є҆́же є҆́сть ѡ҆шꙋ́юю дама́ска. И҆ возвратѝ всѧ́каго конѧ̀ содо́мскаго, и҆ лѡ́та брата́нича своего̀ возвратѝ, и҆ всѧ̑ и҆мѣ̑нїѧ є҆гѡ̀, и҆ жєны̀, и҆ лю́ди. И҆зы́де же ца́рь содо́мскїй въ срѣ́тенїе є҆мꙋ̀, повнегда̀ возврати́тисѧ є҆мꙋ̀ ѿ сѣ́ча ходоллогомо́рскагѡ, и҆ съ царьмѝ и҆̀же съ ни́мъ, во ᲂу҆до́ль сави́нꙋ: сїе́ же бѧ́ше по́ле царе́во. и҆ мелхїседе́къ ца́рь сали́мскїй и҆знесѐ хлѣ́бы и҆ вїно̀: бѧ́ше же свѧще́нникъ бг҃а вы́шнѧгѡ. И҆ благословѝ а҆вра́ма, и҆ речѐ: бл҃гослове́нъ а҆вра́мъ бг҃омъ вы́шнимъ, и҆́же созда̀ нб҃о и҆ зе́млю: и҆ бл҃гослове́нъ бг҃ъ вы́шнїй, и҆́же предадѐ врагѝ твоѧ̑ подъ рꙋ́ки тебѣ̀.

Втора́гѡ зако́на чте́нїе.

[Глава̀ а҃] Во дне́хъ ѻ҆́нѣхъ, речѐ мѡѷсе́й къ сынѡ́мъ і҆и҃лєвымъ: ви́дите, преда́хъ предъ лице́мъ ва́шимъ зе́млю, вше́дше наслѣ́дꙋйте зе́млю, ю҆́же клѧ́тсѧ гдⷭ҇ь ѻ҆тцє́мъ ва́шымъ: а҆враа́мꙋ и҆ і҆саа́кꙋ и҆ і҆а́кѡвꙋ, да́ти и҆̀мъ и҆ сѣ́мени и҆́хъ по ни́хъ. И҆ реко́хъ къ ва́мъ во вре́мѧ ѻ҆́но, глаго́лѧ: не возмогꙋ̀ є҆ди́нъ води́ти ва́съ. гдⷭ҇ь бг҃ъ на́шъ ᲂу҆мно́жилъ вы̀ є҆́сть, и҆ сѐ є҆стѐ дне́сь ꙗ҆́кѡ ѕвѣ́зды нбⷭ҇ныѧ мно́жествомъ. гдⷭ҇ь бг҃ъ ѻ҆тє́цъ на́шихъ да приложи́тъ ва́мъ, ꙗ҆́кѡ да бꙋ́дете ты́сѧщами сꙋгꙋ́бѡ, и҆ да благослови́тъ ва́съ, ꙗ҆́коже гл҃го́ла ва́мъ. и҆ взѧ́хъ ѿ ва́съ мꙋ́жы мꙋ́дры, и҆ свѣ́домы, и҆ смы́сленны, и҆ поста́вихъ и҆̀хъ владѣ́ти надъ ва́ми, тысѧщенача́льники, и҆ стонача́льники, и҆ пѧтдесѧтонача́льники, и҆ десѧтонача́льники, и҆ писмовводи́тели сꙋдїѧ́мъ ва́шымъ. И҆ заповѣ́дахъ сꙋдїѧ́мъ ва́шымъ во вре́мѧ ѻ҆́но, глаго́лѧ: разслꙋ́шайте посредѣ̀ бра́тїй ва́шихъ, и҆ сꙋди́те пра́веднѡ, посредѣ̀ мꙋ́жа, и҆ посредѣ̀ бра́та є҆гѡ̀, и҆ посредѣ̀ прише́льца є҆гѡ̀. Да не позна́ете лица̀ въ сꙋдѣ̀, ма́ломꙋ и҆ вели́комꙋ сꙋ́диши, и҆ не ᲂу҆стыди́шисѧ лица̀ человѣ́ческа, ꙗ҆́кѡ сꙋ́дъ бж҃їй є҆́сть.

Втора́гѡ зако́на чте́нїе.

[Глава̀ і҃] Во дне́хъ ѻ҆́нѣхъ, речѐ мѡѷсе́й къ сынѡ́мъ і҆и҃лєвымъ: сѐ гдⷭ҇а бг҃а твоегѡ̀ нб҃о, и҆ нб҃о нб҃сѐ, землѧ̀ и҆ всѧ̑ є҆ли̑ка сꙋ́ть на не́й. Ѻ҆ба́че ѻ҆тцы̀ ва́шѧ произво́ли гдⷭ҇ь, люби́ти ѧ҆̀: и҆ и҆збра̀ сѣ́мѧ и҆́хъ по ни́хъ, ва́съ, па́че всѣ́хъ ꙗ҆зы̑къ, въ де́нь се́й. И҆ ѡ҆брѣ́жите жестосе́рдїе ва́ше, и҆ вы́и ва́шеѧ не ѡ҆жесточи́те ктомꙋ̀. И҆́бо гдⷭ҇ь бг҃ъ на́шъ, се́й бг҃ъ богѡ́въ, и҆ гдⷭ҇ь господе́й: бг҃ъ вели́кїй, и҆ крѣ́пкїй, и҆ стра́шный, и҆́же не диви́тсѧ лицꙋ̀, нижѐ взе́млетъ да́ръ. Творѧ́й сꙋ́дъ прише́льцꙋ, и҆ сиротѣ̀, и҆ вдовѣ̀, и҆ лю́битъ прише́льца, да́ти є҆мꙋ̀ хлѣ́бъ и҆ ри́зꙋ. И҆ возлюби́те прише́льца, прише́льцы бо бѣ́сте въ землѝ є҆гѵ́петстѣй. Гдⷭ҇а бг҃а твоегѡ̀ да ᲂу҆бои́шисѧ, и҆ томꙋ̀ є҆ди́номꙋ послꙋ́жиши, и҆ къ немꙋ̀ прилѣпи́шисѧ, и҆ и҆́менемъ є҆гѡ̀ клене́шисѧ. То́й хвала̀ твоѧ̀, и҆ то́й бг҃ъ тво́й, и҆́же сотворѝ тебѣ̀ вели̑каѧ и҆ сла̑внаѧ сїѧ̑, ꙗ҆̀же ви́дѣста ѻ҆́чи твоѝ.

На лїті́и стїхи̑ры хра́ма. Сла́ва, гла́съ г҃.

А҆пⷭ҇льскихъ преда́нїй и҆звѣ́стнїи храни́телїе бы́сте ст҃і́и ѻ҆тцы̀: ст҃ы́ѧ бо трⷪ҇цы є҆диносꙋ́щное, правосла́внѡ наꙋчи́вше, а҆́рїево хꙋле́нїе собо́рнѣ низложи́сте: съ ни́мже и҆ македо́нїа дꙋхобо́рца ѡ҆бличи́вше, ѡ҆сꙋди́сте несто́рїа, є҆ѵтѵ́хїа и҆ дїѻско́ра, саве́ллїа же, и҆ севи́ра безгла́внаго. и҆́хже пре́лести и҆спроси́те и҆зба́витисѧ на́мъ, нескве́рнꙋ на́шемꙋ житїю̀ въ вѣ́рѣ сохрани́тисѧ, мо́лимсѧ.

И҆ ны́нѣ, бг҃оро́диченъ: Безъ сѣ́мене ѿ бжⷭ҇твеннагѡ:

На стїхо́внѣ ѻ҆ктѡ́иха. Сла́ва, ѻ҆ц҃є́въ, гла́съ д҃.

Моле́бнꙋю па́мѧть дне́сь, бг҃оно́сныхъ ѻ҆тцє́въ, ѿ всеѧ̀ вселе́нныѧ собра́вшихсѧ, во свѣ́тлѣмъ гра́дѣ нїке́йстѣмъ, правосла́вныхъ собра̑нїѧ, благоче́ствꙋюще вѣ́рнѡ пра́зднꙋемъ: сі́и бо лю́тагѡ а҆́рїа безбо́жное велѣ́нїе благочестномꙋ́дреннѣ низложи́ша, и҆ ѿ каѳолі́ческїѧ цр҃кве собо́рнѣ того̀ и҆згна́ша, и҆ ꙗ҆́снѡ сн҃а бж҃їѧ є҆диносꙋ́щна, и҆ соприсносꙋ́щна, пре́жде вѣ̑къ сꙋ́ща, всѣ́хъ наꙋчи́ша и҆сповѣ́дати во и҆з̾ѡбраже́нїи вѣ́ры, и҆звѣ́стнѡ и҆ благоче́стнѡ сїѐ и҆зложи́вше. тѣ́мже и҆ мы̀ бжⷭ҇твєннымъ и҆́хъ повелѣ́нїємъ послѣ́дствꙋюще, и҆звѣ́стнѡ вѣ́рꙋюще слꙋ́жимъ, со ѻ҆ц҃е́мъ сн҃ꙋ, и҆ дх҃ꙋ всест҃о́мꙋ, во є҆ди́номъ бжⷭ҇твѣ̀, трⷪ҇цѣ є҆диносꙋ́щнѣй.

И҆ ны́нѣ, бг҃оро́диченъ: При́зри на молє́нїѧ:

На благослове́нїи хлѣ́бѡвъ, тропа́рь, Бцⷣе дв҃о: два́жды.

И҆ ѻ҆ц҃є́въ, гла́съ и҃:

Препросла́вленъ є҆сѝ, хрⷭ҇тѐ бж҃е на́шъ, свѣти̑ла на землѝ ѻ҆тцы̀ на́ши ѡ҆снова́вый, и҆ тѣ́ми ко и҆́стиннѣй вѣ́рѣ всѧ̑ ны̀ наста́вивый, многобл҃гоꙋтро́бне, сла́ва тебѣ̀.

Є҆ди́ножды.

На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды. Сла́ва, ѻ҆ц҃є́въ. И҆ ны́нѣ, бг҃оро́диченъ: И҆́же на́съ ра́ди.

Канѡ́нъ воскрⷭ҇нъ со і҆рмосо́мъ на д҃: крⷭ҇товоскрⷭ҇нъ на два̀: и҆ бцⷣы на два̀: и҆ ст҃ы́хъ на ѕ҃, є҆гѡ́же краегране́сїе:

Пою̀ бл҃же́нныхъ собра́нїе седмо́е. Ге́рманово:

Гла́съ и҃. Пѣ́снь а҃. І҆рмо́съ:

Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ, и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.

Пѣсносло́вити седмо́е собра́нїе жела́ющемꙋ мѝ ны́нѣ, седми́хъ дарова́нїй собо́ръ, да́ждь мѝ паракли́та, гдⷭ҇и, ᲂу҆мꙋдри́вшаго се́й ѻ҆гненноѧзы́чнѣ, и҆ хꙋ́льное всѐ ѧ҆зыковре́дїе ᲂу҆молча́ти сотво́ршаго.

Бо́льшее и҆зъ нача́ла чи́слъ седмо́е: и҆́бо созда́нїѧ бж҃е́ственнагѡ всегѡ̀ первоѻбра́знѡ бы́сть, всесоверше́нное преста́нїе въ седмы́й де́нь: и҆ ны́нѣ всѣ́хъ є҆ресе́й коне́цъ, въ собо́рѣ равночи́сленномъ.

Побѣди́въ бг҃обо́рнаго а҆́рїа въ нїке́и, дре́вле па́стырскимъ жезло́мъ, правосла́вными ше́ствовати цр҃ковь ᲂу҆че́нїи ли́къ ѻ҆тцє́въ: и҆ ны́нѣ ѡ҆ се́мъ посрами́лъ є҆́сть ѻ҆бразобо́рцы, ꙗ҆́кѡ побо́рникъ.

Бг҃оро́диченъ:

Ꙗ҆́коже ѻ҆тцы̀ благоче́стнѡ наꙋчи́ша, и҆сповѣ́дꙋюще вѣ́рнѡ, дв҃и́ческꙋю ᲂу҆тро́бꙋ безболѣ́зненнѡ ро́ждшꙋю пло́тїю безпло́тнаго: покланѧ́емсѧ же семꙋ̀, столпопи́шꙋще и҆з̾ѡбраже́нїе, и҆ че́стнѣ ѡ҆блобыза́емъ.

Катава́сїа: Ѿве́рзꙋ ᲂу҆ста̀ моѧ̑:

Пѣ́снь г҃. І҆рмо́съ:

Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ па́че тебє̀, є҆ди́не чл҃вѣколю́бче.

Не поколеба́тисѧ хрⷭ҇то́вѣ нерꙋши́мѣй цр҃кви, ѿ негѡ̀ тайнонаꙋча́еми бжⷭ҇твеннїи пастыренача́льницы, и҆̀же сїю̀ поколеба́ти хотѧ́щыѧ, ꙗ҆́коже а҆нті́хрїстовы ча́сти, ѿ благочести́выхъ ѿри́нꙋша.

Ѡ҆чища́етъ мꙋ̑тныѧ и҆ ти̑нныѧ пото́ки, ѿ и҆стѡ́чникъ спасе́нїѧ поче́рпъ, и҆ жа́ждꙋщыѧ лю́ди хрⷭ҇то́вы насыща́етъ ᲂу҆че́нїй стрꙋѧ́ми, ѻ҆тцє́въ сосло́вїе.

На ненави́дѧщихъ и҆́стиннѡ, и҆ хрⷭ҇тїаноѡглаго́льникѡвъ, собра́нїе хрⷭ҇толю́бныхъ седмо́е, въ свѣ́тлѣмъ гра́дѣ нїке́йстѣмъ бы́сть, є҆гѡ́же ца́рїе і҆ри́на и҆ кѡнстанті́нъ защи́тницы.

Бг҃оро́диченъ:

Всѧ́къ да ѿстꙋ́питъ нечести́вый, не почита́ѧй і҆кѡ́нꙋ честнꙋ́ю бцⷣы, и҆ сїю̀ не проповѣ́дꙋѧй хрⷭ҇та̀ бг҃омꙋ́жнѡ ро́ждшꙋю, и҆ во ѻ҆́гнь да ѿшле́тсѧ, сгара́ти несожже́ннѡ.

Конда́къ и҆ і҆́косъ воскрⷭ҇нъ.

Та́же сѣда́ленъ ѻ҆ц҃є́въ, гла́съ д҃. Подо́бенъ: Ско́рѡ предварѝ:

Свѣти́льницы пресвѣ́тлїи и҆́стины хрⷭ҇то́вы мі́рꙋ ꙗ҆ви́стесѧ на землѝ, вои́стиннꙋ блаже́ннѣйшїи ѻ҆тцы̀ бг҃овѣща́ннїи, и҆зсꙋши́вше є҆́рєси хꙋ́льныхъ ѧ҆зыкобо́лїй, и҆ ᲂу҆гаси́вше пламенови̑днаѧ ѕлосла́вныхъ смꙋщє́нїѧ. тѣ́мже ꙗ҆́кѡ і҆ера́рси хрⷭ҇то́вы моли́тесѧ спасти́сѧ на́мъ.

Два́жды.

Сла́ва, и҆ ны́нѣ, бг҃оро́диченъ:

Ско́рѡ на́съ предварѝ, дв҃о мт҃и чⷭ҇таѧ: ѿ вра̑гъ на́съ и҆схитѝ хꙋ́лѧщихъ на тѧ̀: сокрꙋшѝ ѧ҆зыкобѡ́лїѧ є҆ресе́й всѧ̑ разрѣшѝ крѣ́постїю твое́ю стремлє́нїѧ тѣ́хъ, да разꙋмѣ́ютъ ꙗ҆́кѡ є҆ди́на бг҃ома́ти є҆сѝ, моли́твами твои́ми правосла́вныхъ совокꙋпле́нїе спаса́ющаѧ.

Пѣ́снь д҃. І҆рмо́съ:

Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Глаго́лъ бж҃їй и҆мꙋ́ще, стрѣлꙋ̀ и҆ ме́чь, всѧ̑ кꙋ́пнѡ ты̑ѧ закала́ютъ ѕлоꙋ̑мныѧ, ѻ҆́бразомъ крⷭ҇тнымъ, не чтꙋ́щыѧ ра́внѡ и҆з̾ѡбраже́нїѧ хрⷭ҇то́ва, бцⷣы, и҆ всѣ́хъ ст҃ы́хъ, ѻ҆тцы̀ бг҃ови́днѣйшїи.

Ꙗ҆́коже седмїю̀ трꙋба́ми, і҆ерїхѡ́нскїѧ стѣ́ны въ седмо́мъ ѡ҆бхожде́нїи падо́ша: та́кѡ си́ми седмїю̀ собѡ́ры, ве́сь со́нмъ на бг҃а возносѧ́щїйсѧ, низведе́нъ въ бе́зднꙋ, въ собра́нїи седмо́мъ благогла́сныхъ трꙋ́бъ дх҃а.

Ю҆́ношеское настоѧ́нїе показꙋ́ѧ, и҆ бжⷭ҇твенною ре́вностїю распалѧ́емо, ѻ҆те́ческое мно́жество, ꙗ҆́коже и҆лїа̀, стꙋ́дныѧ свѧще́нники ᲂу҆мертви́ло є҆́сть. тѣ́мъ со дерзнове́нїемъ хрⷭ҇то́вѣ і҆кѡ́нѣ любе́знѡ покланѧ́тисѧ наꙋчи́ло є҆́сть.

Бг҃оро́диченъ:

Ты̀ моѧ̀ наде́жда всечⷭ҇таѧ, ты̀ моѐ и҆ пѣ́нїе: ты̀ моѐ приста́нище, ты̀ моѐ и҆справле́нїе: ꙗ҆́же бг҃а сло́ва ѻ҆́ч҃а вопло́щшагосѧ, несочта́ннѡ родила̀ є҆сѝ. тѣ́мже твое́й несомнѣ́ннѡ покланѧ́юсѧ і҆кѡ́нѣ, крѣ́постїю твое́ю ᲂу҆крѣплѧ́емь.

Пѣ́снь є҃. І҆рмо́съ:

Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Высо́кою мы́слїю сразсмотри́вше, а҆на́ѳемѣ ѻ҆бразобо́рцєвъ преда́ша, ꙗ҆́кѡ чꙋжда̑ѧ си́хъ мꙋ́дрствовавшихъ, честні́и ѻ҆тцы̀: и҆ че́сть хрⷭ҇то́вѣ і҆кѡ́нѣ, ꙗ҆́коже лѣ́по, воздаѧ́ти повелѣ́ша.

Ны́нѣ вре́мѧ весе́лїѧ, ны́нѣ де́нь спасе́нїѧ ꙗ҆ви́сѧ, возвесели́мсѧ ᲂу҆̀бо, и҆ хрⷭ҇тꙋ̀ ра́достнѡ возопїи́мъ: ми́ръ да́ждь на́мъ тво́й, моли́твами ѻ҆тцє́въ седма́гѡ собо́ра, чл҃вѣколю́бче.

Бг҃оро́диченъ:

Бл҃гоꙋтро́бїѧ ра́ди ми́лости, ѿ дв҃ы роди́сѧ сн҃ъ бж҃їй невра́щнѡ, чꙋ́ждее носѧ̀ ꙗ҆́кѡ своѐ, и҆ зра́комъ си́мъ ѡ҆пи́санный зри́тсѧ во́лею, по сꙋществꙋ̀ сы́й неѡпи́санъ.

Пѣ́снь ѕ҃. І҆рмо́съ:

Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Да ка́плютъ сла́дость го́ры, и҆ ра́дость: є҆реті́ческое бо мно́жество и҆згна́сѧ, го́рькїй и҆злива́ющее ꙗ҆́дъ, ст҃ы́хъ і҆кѡ́нъ ѿверже́нїе.

Не́бо и҆ землѧ̀ согла́снѡ да пра́зднꙋютъ, дще́ре бж҃їѧ вели́чїе: и҆́бо велича́етсѧ, ѿмета́ющи сїю̀ ᲂу҆малѧ́ющыѧ.

Бг҃оро́диченъ:

Мт҃рнїй сн҃ъ, и҆́же ѻ҆́ч҃їй пе́рвѣе безма́теренъ, без̾ѻ́тчїй же бг҃олѣ́пнѡ роди́всѧ, и҆ возроди́въ мѧ̀: тѣ́мже ро́ждшꙋю съ рожде́ннымъ ѡ҆бразꙋ́ѧ, ѡ҆блобыза́ю.

Конда́къ, гла́съ ѕ҃. Подо́бенъ: Рꙋкопи́саннагѡ:

И҆́же и҆зъ ѻ҆ц҃а̀ возсїѧ́въ сн҃ъ неизрече́ннѡ, и҆зъ жены̀ роди́сѧ сꙋгꙋ́бъ є҆стество́мъ, є҆го́же ви́дѧще не ѿмета́емсѧ зра́ка и҆з̾ѡбраже́нїѧ: но сїѐ благоче́стнѡ начерта́юще, почита́емъ вѣ́рнѡ. и҆ сегѡ̀ ра́ди и҆́стиннꙋю вѣ́рꙋ цр҃ковь держа́щи, лобыза́етъ і҆кѡ́нꙋ вочл҃вѣ́ченїѧ хрⷭ҇то́ва.

І҆́косъ:

Хотѧ́й всеще́дрый бг҃ъ на́съ воздвиза́ти при́снѡ, къ па́мѧти соверше́ннѣй своегѡ̀ вочл҃вѣ́ченїѧ, подло́гъ се́й предадѐ человѣ́кѡмъ, шародѣ́ланьми і҆кѡ́нъ честны́й воз̾ѡбража́ти зра́къ: ꙗ҆́кѡ да сїѧ̑ во зрѣ́нїихъ ви́дѧще, вѣ́рꙋемъ, ꙗ҆̀же сло́вомъ слы́шахомъ, разꙋмѣ́юще ꙗ҆́вѣ дѣѧ́нїе и҆ и҆́мѧ, начерта́нїе, и҆ страда̑нїѧ ст҃ы́хъ мꙋже́й: и҆ хрⷭ҇та̀ вѣнцода́вца вѣнцы̀ подаю́ща ст҃ы̑мъ, страда́льцємъ же и҆ мч҃никѡмъ. и҆́хже ра́ди ꙗ҆снѣ́йше и҆́стиннꙋю вѣ́рꙋ держа́щи цр҃ковь, лобыза́етъ і҆кѡ́нꙋ вочл҃вѣ́ченїѧ хрⷭ҇то́ва.

Пѣ́снь з҃. І҆рмо́съ:

Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Побѣжда́ютсѧ догма́тами бг҃оглаго́ливыхъ мꙋже́й є҆ресенача́льницы, ѻ҆бразѡ́въ че́сть первоѻбра́знымъ и҆з̾ѡбразꙋ́ющихъ пра́вѡ, ꙗ҆́коже речѐ вели́кїй васі́лїй. бл҃гослове́нъ бг҃ъ ѻ҆тє́цъ на́шихъ.

Хра́ми ᲂу҆добрѧ́ютсѧ свѣ́тлыми і҆кѡ́нами ᲂу҆краша́емїи дне́сь: сегѡ̀ ра́ди мі́ръ въ цр҃квахъ, па́че всѣ́хъ человѣ̑къ краснѣ́йшемꙋ добро́тою, совоспѣва́етъ пою́щемꙋ: бл҃гослове́нъ бг҃ъ ѻ҆тє́цъ на́шихъ.

Свѣ́тъ ѡ҆блиста̀, дале́че тма̀, нечести́вїи ѿгна́ны. сегѡ̀ ра́ди всѧ́чєскаѧ свѣ́та и҆спо́лнишасѧ, свѣтода́телѧ хрⷭ҇та̀, съ весе́лїемъ пою́тъ, и҆ глаго́лютъ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ:

Пречⷭ҇таѧ влⷣчца, є҆ди́на всѣ́хъ спасе́нїѧ наде́жда, ꙗ҆́же стра́шнѡ ро́ждшаѧ цр҃ѧ̀ царе́й хрⷭ҇та̀, на рꙋка́хъ свои́хъ сего̀ млⷣнца носѧ́щи, спокланѧ́ема є҆́сть ѡ҆пи́саннѣ, ꙗ҆́коже ѻ҆тцы̀ глаго́лютъ.

Пѣ́снь и҃. І҆рмо́съ:

Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Законополага́етъ ᲂу҆́бѡ и҆зѧ́щнѣйше ѻ҆тцє́въ сосло́вїе, бг҃очести̑вымъ и҆мстви́тельное поклоне́нїе, и҆ возставле́нїе свѧще́нныѧ і҆кѡ́ны хрⷭ҇то́вы: любоблагочести́вїи же лѣ́тнюю па́мѧть, ꙗ҆́кѡ ча̑да соверша́емъ благопослꙋшли̑ваѧ ѻ҆́ныхъ, и҆ любо́вїю ѻ҆́бразъ хрⷭ҇то́въ любыза́емъ.

Седмокра́тнѡ преклонѧ́хꙋ смире́нныхъ высокомꙋ́дреннїи, и҆ любодобродѣ́тельныхъ стремлє́нїѧ пресѣца́хꙋ, и҆́миже ѡ҆глаго́ловахꙋ бжⷭ҇твєннаѧ дѣѧ̑нїѧ и҆́хъ: но и҆̀же седма́гѡ собо́ра соше́дшїисѧ ѻ҆тцы̀ въ нїке́и, горды́ню ѻ҆́ныхъ а҆́бїе и҆стерза́ша седмокра́тнѣйше.

Стрѣ́лы младе́нєцъ быва́ютъ ѱало́мски старомꙋ́дрствꙋющымъ, младомꙋ́дренныхъ ꙗ҆́звы и҆ ра̑ны: бжⷭ҇твенною же си́лою и҆знемога́ютъ ꙗ҆зы́цы мно́зи, хꙋлы̑ на высотꙋ̀ глаго́лющихъ: и҆ всѧ́къ кто̀ ѻ҆ц҃а̀, сн҃а, и҆ дх҃а, бг҃а є҆ди́наго не вѣ́сть всевино́внаго и҆ є҆ди́наго.

Бг҃оро́диченъ:

Зи́ждетсѧ младе́нецъ самово́льнѣ ми́лости ра́ди, зижди́тель ѿ чⷭ҇тыхъ крове́й твои́хъ, соблюда́ѧй тѧ̀ по ржⷭ҇твѣ̀ преѡчище́ннꙋ всю̀ чⷭ҇тꙋю, и҆ ѡ҆чища́ѧй ѡ҆скверне́нный ѻ҆́бразъ. тѣ́мже на і҆кѡ́нахъ соиз̾ѡбража́етсѧ тебѣ̀, є҆стество́мъ бы́въ чл҃вѣ́къ, бг҃ъ сы́й є҆стество́мъ.

Пѣ́снь ѳ҃. І҆рмо́съ:

Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Ве́лїй крѣ́постїю и҆ совѣ́томъ всѧ̑ содержа́й, непостижи́ме є҆ди́не бж҃е, держа́внѣйше всенача́льниче, всецр҃ю̀, цр҃ковь ᲂу҆твердѝ, въ правосла́вїи твое́мъ соблюда́ѧ, ѻ҆тцє́въ всесла́вныхъ, и҆з̾ѡблича́ющихъ ѕлосла́вїе, мольба́ми.

Вели́кихъ че́стей сподо́бистесѧ на землѝ, нб҃омꙋ́дреннїи ст҃і́и, ꙗ҆́кѡ хрⷭ҇то́во и҆з̾ѡбраже́нїе любе́знѡ почто́сте. и҆ ны́нѣ сѣ́нь ѿложи́вше, и҆ покрыва́ло пло́ти, самоли́чнѡ сего̀ въ лицѐ зритѐ, и҆ бо́льшихъ сподоблѧ́еми.

Да нака́жемсѧ всево́инствомъ ва́рварскагѡ безслове́сїѧ, є҆́же попꙋсти́лъ є҆сѝ на ны̀: тѣ́хъ стремле́нїе и҆ де́рзость са́мъ сокрꙋшѝ, и҆ вѣ̑рнымъ спобо́рствꙋй, надѣ́ющымсѧ на тѧ̀, вседѣ́телю, бл҃годерзнове́нными моли́твами ст҃ы́хъ ѻ҆ц҃ъ, и҆́хже соверша́емъ па́мѧть.

Бг҃оро́диченъ:

Разꙋмѣ́ти та́йнꙋ стра́шнагѡ твоегѡ̀ ржⷭ҇тва̀ ника́коже мо́жетъ ᲂу҆́мъ человѣ́ческїй, но нижѐ а҆́гг҃льскїй высокоꙋ́мный: ꙗ҆́кѡ бг҃а ты̀ родила̀ є҆сѝ воплоще́ннаго па́че є҆стества̀. тѣ́мъ тѧ̀ бцⷣꙋ вѣ́дꙋще, и҆ со ѻ҆́нѣмъ написꙋ́юще, велича́емъ.

Свѣти́ленъ воскрⷭ҇нъ. Сла́ва, ѻ҆ц҃є́въ. Поⷣ: Дх҃омъ во ст҃и́лищи:

Ѻ҆ц҃ы̀ нб҃омꙋ́дреннїи, на седмо́мъ собо́рѣ собра́вшїисѧ, моли́твꙋ прилѣ́жнꙋ трⷪ҇цѣ принеси́те, є҆́же и҆зба́витисѧ ѿ всѧ́кїѧ є҆́реси и҆ сꙋда̀ вѣ́чнагѡ, црⷭ҇твїе же полꙋчи́ти на́мъ нбⷭ҇ное, ва́шъ собо́ръ бжⷭ҇твенный воспѣва́ющымъ.

И҆ ны́нѣ, бг҃оро́диченъ:

Мольба́ми, преблагі́й гдⷭ҇и, мт҃ре твоеѧ̀, и҆ и҆̀же на седмѝ собо́рѣхъ собра́вшихсѧ ѻ҆ц҃є́въ, цр҃ковь ᲂу҆твердѝ, и҆ вѣ́рꙋ ᲂу҆крѣпѝ: и҆ црⷭ҇твїѧ нбⷭ҇нагѡ всѧ̑ покажѝ прича́стники, є҆гда̀ прїи́деши на зе́млю сꙋди́ти всю̀ тва́рь.

[Зрѝ] Воскре́снагѡ же свѣти́льна бг҃оро́диченъ не глаго́летсѧ, но ѻ҆ц҃є́въ.

На хвали́техъ стїхи̑ры воскрⷭ҇ны д҃, и҆ ѻ҆ц҃є́въ д҃.

Гла́съ ѕ҃. Подо́бенъ: Всѐ ѿло́жше:

Всѐ собра́вше ꙳ дꙋше́вное хꙋдо́жество, ꙳ и҆ бжⷭ҇твеннымъ дх҃омъ разсмотри́вше ꙳ нбⷭ҇ный и҆ чⷭ҇тны́й ꙳ сѷмво́лъ вѣ́ры, ꙳ чⷭ҇тні́и ѻ҆ц҃ы̀ бг҃опи́саннѣ начерта́ша: ꙳ въ не́мже ꙗ҆́вственнѣйше ꙳ ро́ждшемꙋ собезнача́льнаго сло́ва наꙋча́ютъ, ꙳ и҆ всеи́стиннѡ є҆диносꙋ́щнаго, ꙳ а҆пⷭ҇льскимъ послѣ́дꙋюще проѧвле́ннѡ ᲂу҆че́нїємъ, ꙳ благосла́внїи и҆ пребога́тїи ꙳ и҆́стиннѡ и҆ бг҃омꙋ́дрїи.

Два́жды.

Сті́хъ: Бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ, и҆ хва́льно и҆ просла́влено и҆́мѧ твоѐ во вѣ́ки.

Всѐ прїе́мше ꙳ ᲂу҆́мное сїѧ́нїе ст҃а́гѡ дх҃а, преесте́ственнѣйшее благосло́вїе ꙳ кра́ткими глагѡ́лы, и҆ мно́гимъ ра́зꙋмомъ ꙳ бг҃одохнове́ннѡ провѣща́ша, ꙳ ꙗ҆́кѡ хрⷭ҇тѡ́вы проповѣ́дницы, ꙳ є҆ѵⷢ҇льскихъ предста́телїе ꙳ ᲂу҆че́нїй блаже́ннїи: ꙳ и҆ благочести́выхъ преда́нїй, ꙳ свы́ше прїе́мше си́хъ ѿкрове́нїе ꙗ҆́вѣ, ꙳ и҆ просвѣ́щшесѧ, и҆зложи́ша ꙳ вѣ́рꙋ бг҃онаꙋче́ннꙋю.

Сті́хъ: Собери́те є҆мꙋ̀ прпⷣбныѧ є҆гѡ̀.

Всѐ собра́вше ꙳ па́стырское и҆скꙋ́сство, ꙳ и҆ ꙗ҆́рость дви́гше ны́нѣ пра́веднѣйшꙋ, ꙳ ѿмсти́тельнѣ тѧ́жкїѧ ѿгна́ша и҆ па̑гꙋбныѧ во́лки, ꙳ пра́щею дх҃а и҆зве́ргше, ꙳ ѿ цр҃ко́внагѡ и҆сполне́нїѧ ꙳ па́дшыѧ ꙗ҆́кѡ къ сме́рти, ꙳ и҆ ꙗ҆́кѡ неисцѣ́льнѡ недꙋ́говавшыѧ, ꙳ бжⷭ҇твеннїи па́стырїе, ꙳ ꙗ҆́кѡ рабѝ и҆́стиннѣйшїи хрⷭ҇тѡ́вы, ꙳ и҆ бжⷭ҇твеннагѡ проповѣ́данїѧ ꙳ таи́нницы свѧще́ннѣйшїи.

Сла́ва, гла́съ и҃. Геѡ́ргїа нїкомиді́йскагѡ:

Ст҃ы́хъ ѻ҆тцє́въ ли́къ, ѿ конє́цъ вселе́нныѧ сте́кшїйсѧ, ѻ҆ц҃а̀, и҆ сн҃а, и҆ дх҃а ст҃а́гѡ, є҆ди́но сꙋщество̀ наꙋчи́ша, и҆ є҆стество̀, и҆ та́йнꙋ бг҃осло́вїѧ ꙗ҆́снѡ преда́ша цр҃кви: и҆̀хже похвалѧ́юще вѣ́рою, ᲂу҆блажи́мъ глаго́люще: ѽ бжⷭ҇твенный по́лче! бг҃оглаго́ливїи ѻ҆рꙋ́жницы ѡ҆полче́нїѧ гдⷭ҇нѧ, ѕвѣ́зды многосвѣ̑тлыѧ мы́сленныѧ тве́рди, та́инственнагѡ сїѡ́на неѡбори́мїи столпѝ, мѷродохнове́ннїи цвѣ́ти ра́йстїи, всезлата̑ѧ ᲂу҆ста̀ сло́ва, нїке́йскаѧ похвало̀, вселе́нныѧ ᲂу҆краше́нїе! прилѣ́жнѡ моли́тесѧ ѡ҆ дꙋша́хъ на́шихъ.

И҆ ны́нѣ, Преблгⷭ҇ве́нна є҆сѝ бцⷣе дв҃о: Славосло́вїе вели́кое. И҆ ѿпꙋ́стъ.

И҆ ѻ҆бы́чное и҆схожде́нїе въ притво́ръ.

Сла́ва, и҆ ны́нѣ, стїхи́ра є҆ѵⷢ҇льскаѧ.

На лїтꙋргі́и: Блажє́нна воскрє́сна, на ѕ҃. И҆ ѻ҆ц҃є́въ, пѣ́снь г҃, на д҃. По вхо́дѣ тропа́рь воскрⷭ҇нъ, и҆ ѻ҆ц҃є́въ. Та́же конда́къ воскрⷭ҇нъ: Сла́ва, ѻ҆ц҃є́въ: И҆ ны́нѣ, бцⷣы. Прокі́менъ пре́жде воскрⷭ҇нъ: та́же, пѣ́снь ѻ҆ц҃є́въ, гла́съ д҃: Бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ, и҆ хва́льно и҆ просла́влено и҆́мѧ твоѐ во вѣ́ки. Сті́хъ: Ꙗ҆́кѡ пра́веденъ є҆сѝ ѡ҆ всѣ́хъ, ꙗ҆̀же сотвори́лъ є҆сѝ на́мъ. А҆пⷭ҇лъ днѐ, и҆ ѻ҆ц҃є́въ, къ є҆вре́ѡмъ зача́ло тл҃д. А҆ллилꙋ́їа гла́са, и҆ ѻ҆ц҃є́въ, гла́съ а҃: Бг҃ъ богѡ́въ, гдⷭ҇ь гл҃го́ла: Сті́хъ: Собери́те є҆мꙋ̀ прпⷣбныѧ є҆гѡ̀. Є҆ѵⷢ҇лїе днѐ, и҆ ѻ҆ц҃є́въ, і҆ѡа́нна зача́ло н҃ѕ. Прича́стенъ: Хвали́те гдⷭ҇а съ нб҃съ: Дрꙋгі́й: Ра́дꙋйтесѧ: