Мѣ́сѧца тогѡ́же въ д҃і-й де́нь. Ст҃ы́хъ мꙋ́чєникъ, наза́рїа, герва́сїа, прота́сїа и҆ келсі́а:
И҆ прпⷣбныѧ мт҃ре на́шеѧ параске́ѵи.
Слꙋ́жба є҆ѧ̀ пи́сана по се́й слꙋ́жбѣ.
На Гдⷭ҇и, воззва́хъ, стїхи̑ры ст҃ы́хъ, гла́съ д҃. Поⷣ: Ꙗ҆́кѡ до́блѧ:
И҆̀же вѣ́ры свидѣ́телє по́двигъ соверши́вше, ꙳ побѣ́ды вѣне́цъ прїѧ́ша, ꙳ доблемꙋ́дренный наза́рїй, ꙳ и҆ вели́кїй прота́сїй, ꙳ съ келсі́емъ мꙋ́дрымъ, ꙳ бг҃омꙋ́дрый герва́сїй. ꙳ и҆̀хже воспои́мъ ꙗ҆́кѡ дѡ́блїѧ ѡ҆рꙋ́жники, ꙳ ꙗ҆́кѡ вы́шнѧгѡ црⷭ҇твїѧ наслѣ́дники, ꙳ и҆ ꙗ҆́кѡ самовѡ́льнаѧ заколє́нїѧ.
Просвѣти́всѧ смы́сломъ свѣтозаре́нїѧ дх҃а, ꙳ свѧще́нный наза́рїе, ꙳ па́че со́лнца во тмѣ̀ сꙋ́щымъ возсїѧ́лъ є҆сѝ дꙋша́мъ, ꙳ бжⷭ҇твенною бл҃года́тїю ꙳ поꙋча́ѧ, просвѣща́ѧ, ꙳ наставлѧ́ѧ свѣтлѣ́йше, ꙳ є҆ди́наго гдⷭ҇а и҆ вѣ́ровати и҆ чти́ти, ꙳ воплоще́нна ѿ дв҃ы пресла́внѡ, ꙳ и҆ земны̑ѧ ѡ҆сїѧ́вшаго.
Съ наза́рїемъ возсїѧ̀ ꙳ приснопа́мѧтный келсі́й, ꙳ и҆ сла́вный прота́сїй, и҆ герва́сїй, ꙳ доблемꙋ́дреннѡ пострада́вше, ꙳ и҆ всѧ̑ полкѝ де́мѡнскїѧ ꙳ мꙋ́жески на землѝ побѣди́вше. ꙳ тѣ́мъ то́чатъ и҆сцѣле́нїй стрꙋи̑, ꙳ и҆ сердца̀ напаѧ́ютъ бога́тнѡ благочести́выхъ ꙳ бжⷭ҇твенною бл҃года́тїю.
Да восхва́литсѧ наза́рїй, ꙳ и҆ да почти́тсѧ прота́сїй, ꙳ и҆ бжⷭ҇твенный келсі́й, и҆ герва́сїй, ꙳ и҆̀же благосла́внѡ пострада́вше, ꙳ и҆ ле́сть ᲂу҆ма́ливше, ꙳ и҆ а҆́гг҃льскимъ ликѡ́мъ свѧще́ннѡ причита́еми, ꙳ и҆ ѡ҆божа́еми по прича́стїю бжⷭ҇твенномꙋ, ꙳ и҆ побѣ́ды вѣнцы̀ ꙳ ѿ дла́ни живонача́льныѧ прїе́мше.
Ꙗ҆́кѡ тече́нїе соверши́вше, ꙳ и҆ вѣ́рꙋ соблю́дше, ꙳ страда́нїѧ вѣнцы̀ ᲂу҆вѧзо́стесѧ, ꙳ и҆ а҆́гг҃лѡмъ сочета́стесѧ, ꙳ свѣ́тлѡ хра́брствовавше, ꙳ и҆ льсти́ваго врага̀ ѡ҆ хрⷭ҇тѣ̀ попра́вше, ꙳ бжⷭ҇твеннїи мꙋ́чєницы. ꙳ сегѡ̀ ра́ди согла́снѡ соше́дшесѧ, свѣтоно́снꙋю ва́шꙋ па́мѧть ꙳ соверша́емъ веселѧ́щесѧ.
Бг҃омꙋ́дрый наза́рїй, ꙳ бжⷭ҇твеннымъ проповѣ́данїемъ ꙳ гра́ды проходѧ̀ просвѣтѝ: ꙳ є҆го́же подража́въ келсі́й, ꙳ сла́вꙋ стѧжа̀ бжⷭ҇твенныхъ страда́лєцъ, ꙳ попра́въ льсти́ваго. ꙳ сїѧ̑ всѝ похвала́ми почти́мъ, ꙳ ꙗ҆́кѡ ѕвѣ́зды и҆ свѣти̑ла сꙋ́щымъ во тмѣ̀, ꙳ и҆ врачѝ дꙋ́шъ на́шихъ.
Сла́ва, гла́съ и҃:
Жє́ртвы словє́сныѧ, наза́рїа, и҆ герва́сїа, прота́сїа и҆ келсі́а похва́лимъ, ꙗ҆́кѡ всѐ мꙋчи́телей неи́стовство со і҆́дѡлы ᲂу҆праздни́ша. тѣ́мъ моли́твами и҆́хъ, хрⷭ҇тѐ бж҃е, ми́ръ мі́рꙋ да́рꙋй, и҆ дꙋша́мъ на́шымъ ве́лїю ми́лость.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Мꙋ́чєницы гдⷭ҇ни:
Не терплю̀, ча́до, ви́дѧщи тѧ̀ на дре́вѣ ᲂу҆снꙋ́вша, бо́дрость всѣ̑мъ подаю́щаго. ꙗ҆́кѡ да дре́вле престꙋпле́нїѧ плодо́мъ, сно́мъ поги́бельнымъ ᲂу҆снꙋ́вшымъ, бжⷭ҇твеннꙋю и҆ спаси́тельнꙋю бо́дрость пода́си, дв҃а гл҃го́лаше пла́чꙋщи, ю҆́же велича́емъ.
На стїхо́внѣ ѻ҆ктѡ́иха. Тропа́рь, гла́съ д҃:
Мꙋ́чєницы твоѝ, гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебє̀ бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́мѡнѡвъ немѡщны́ѧ де́рзѡсти. тѣ́хъ моли́твами спасѝ дꙋ́шы на́шѧ.
Сла́ва, и҆ ны́нѣ, бг҃оро́диченъ: а҆́ще среда̀, и҆лѝ пѧто́къ, крⷭ҇тобг҃оро́диченъ.
На ᲂу҆́трени, ѻ҆́ба канѡ́на ѻ҆ктѡ́иха: и҆ ст҃ы́хъ, канѡ́нъ на д҃, є҆гѡ́же краегране́сїе:
Вѣ́рнѡ воспою̀ мꙋ́ченики вѣнценѡ́сныѧ. І҆ѡ́сифово.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ чꙋдеса̀.
Вѣ́рнѡ пострада́вше, и҆ по́двигъ сконча́вше, побѣ́ды вѣнце́мъ ᲂу҆вѧзо́стесѧ, бжⷭ҇твеннїи мꙋ́чєницы: бжⷭ҇твеннꙋю ва́шꙋ па́мѧть тѣ́мъ пра́зднꙋемъ веселѧ́щесѧ.
Вѣ́триломъ вперѧ́еми дх҃а бжⷭ҇твеннагѡ, пꙋчи́нꙋ немо́креннѡ преидо́сте, мꙋ́ченицы сла́внїи, мꙋче́нїй, и҆ ны́нѣ къ бжⷭ҇твенномꙋ приста́нищꙋ вы́шнїѧ свѣ́тлости всели́стесѧ.
Крⷭ҇то́мъ ꙗ҆́коже бронѧ́ми ѡ҆дѣ́ѧни, блаже́ннїи, врага̀ безпло́тнаго пора́товасте въ тѣ́лѣ, томлє́нїѧ многоплетє́ннаѧ и҆ сме́рть непра́веднꙋю претерпѣ́вше.
Бг҃оро́диченъ:
Є҆ди́нꙋ вмѣсти́вшꙋю превѣ́чнаго гдⷭ҇а во ᲂу҆тро́бѣ, всенепоро́чнꙋю ѻ҆трокови́цꙋ воспои́мъ, ꙗ҆́кѡ бы́сть нб҃съ простра́ннѣйши, бг҃а воплоти́вши бл҃гости ра́ди.
Пѣ́снь г҃. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ, вѣнцє́въ сла́вы сподо́би.
Ꙗ҆́кѡ гро́здїе бжⷭ҇твеннїи бы́сте вїногра́да бжⷭ҇твеннагѡ и҆́стиннѡ, страда́нїѧ и҆злива́юще вїно̀ на́мъ, мꙋ́чєницы, дꙋхо́внѡ веселѧ́щее всѣ́хъ сердца̀ бл҃года́тїю.
Крѣ́пкѡ проти́вилсѧ є҆сѝ гони́телю, наза́рїе мꙋ́чениче хрⷭ҇то́въ, повелѣва́ющꙋ мє́рзскимъ тебѣ̀ богѡ́мъ жре́ти, пребога́те, ꙗ҆́кѡ а҆́гнѧ заколе́нїю гото́въ бы́лъ є҆сѝ, сла́вне.
Хвале́нїѧ всѝ согла́сїе воспои́мъ дне́сь вѣ́рнѡ, наза́рїю, герва́сїю, прота́сїю и҆ келсі́ю, и҆́стины свидѣ́телємъ бы́вшымъ въ дс҃ѣ.
Бг҃оро́диченъ:
Зако́на проѡбразова́ше ски́нїѧ тѧ̀ бы́ти хотѧ́щꙋю, чⷭ҇таѧ, бж҃їе свѧще́нное жили́ще: и҆зъ негѡ́же ѡ҆чище́нїе на́ше, ст҃ы́ню да́рꙋѧй всѣ̑мъ на́мъ, прїи́детъ.
Сѣда́ленъ, гла́съ и҃. Подо́бенъ: Премꙋ́дрости.
Наза́рїевы стра̑сти и҆ гонє́нїѧ, прота́сїевы болѣ̑зни и҆ ра̑ны чтꙋ́ще, герва́сїа хва́лимъ, и҆ келсі́а, ст҃ы́ѧ трⷪ҇цы сосꙋ́ды честны̑ѧ, свѣ̑тлыѧ ѕвѣ́зды, вѣ́рныхъ предстѡ́лпїѧ, нече́стїѧ и҆́стиннїи потреби́телє, и҆ столпѝ вѣ́ры, и҆ ᲂу҆твержде́нїе непоколеби́мо, и҆̀мже вѣ́рою возопїи́мъ: моли́те хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть ва́шꙋ.
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца дои́ши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти, покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ, и҆ да́рꙋй согрѣше́нїй ѡ҆ставле́нїе, вѣ́рою пою́щымъ бжⷭ҇твєнныѧ стра̑сти твоѧ̑.
Пѣ́снь д҃. І҆рмо́съ:
Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Па́че смы́сла ст҃ы́хъ мꙋ́чєникъ твои́хъ любо́вь превосхо́дитъ всѧ̑ помышлє́нїѧ, сло́ве, борє́нїѧ и҆ мꙋ́жествєнныѧ по́двиги, и҆ натрижнє́нїѧ, ꙗ҆̀же пода́лъ є҆сѝ зако́ннѡ и҆̀мъ пострада́вшымъ.
Є҆ди́нъ ра́зꙋмъ, въ ра́зныхъ ᲂу҆ранѧ́еми тѣлесѣ́хъ, хрⷭ҇тѡ́вы ѻ҆рꙋ̑жницы преизли́шнѡ показа́ша, є҆ди́наго бг҃а въ три́знищи и҆сповѣ́даша, и҆ многобо́жїѧ ле́сть ꙗ҆́вѣ погꙋби́ша.
Наза́рїа, прота́сїа, герва́сїа и҆ келсі́а, честны́хъ мꙋ́ченикѡвъ, а҆́гг҃ли боре́нїю подиви́шасѧ, ка́кѡ въ пло́ти безпло́тномꙋ сплета́ющесѧ, низложи́ша сего̀ на зе́млю мꙋ́жественнѣйше.
Ꙗ҆́кѡ до́блїи во́ини, ꙗ҆́кѡ непобѣди́мїи мꙋ́чєницы, ꙗ҆́кѡ хрⷭ҇тѡ́вы ѻ҆рꙋ̑жницы, и҆ ꙗ҆́кѡ благоче́стїѧ побѡ́рницы, нбⷭ҇наѧ селє́нїѧ наслѣ́довасте, и҆ ликѡ́мъ а҆́гг҃льскимъ всегда̀ свеселѧ́щесѧ.
Бг҃оро́диченъ:
Не и҆стощи́въ ѻ҆ч҃ескихъ пребжⷭ҇твенный, пречⷭ҇таѧ бцⷣе, нѣ́дръ, въ нѣ́дрѣхъ твои́хъ пречи́стыхъ сѣди́тъ, бжⷭ҇твенное сѣда́лище всѣ̑мъ бл҃госты́нею готовлѧ́ѧ, и҆ сла́вꙋ при́снѡ пребыва́ющꙋю.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀, ми́ръ подава́ющаѧ.
Ра́намъ тѣ́ло твоѐ, наза́рїе, приѡбщи́сѧ, ᲂу҆́замъ многоѻбра́зныхъ мꙋ́къ: мѵ́ро благово́нное тѣ́мъ и҆сточа́етъ на́мъ, ѡ҆благово́нствꙋющее дꙋ́шы, вѣ́рою несомнѣ́нною тѧ̀ почита́ющихъ, всехва́льне.
Кропле́ньми крове́й твои́хъ погаси́лъ є҆сѝ ᲂу҆́глїе многобо́жїѧ, страстоте́рпче: бжⷭ҇твенныхъ чꙋде́съ ѻ҆гне́мъ же, всемꙋ́дре, ти́нꙋ страсте́й лю́тыхъ пожига́еши, бж҃їею бл҃года́тїю сп҃совою, наза́рїе.
Цвѣ́ты дыха́ющїи, воню̀ бж҃їѧ зна́нїѧ, бг҃озна́нїѧ ѕла́чники, ра̑йскаѧ древеса̀ благоплѡ́днаѧ, предѡ́брыѧ и҆ свѣтоза̑рныѧ почти́мъ мч҃ники, и҆ вѣ́рнѡ ᲂу҆блажи́мъ.
Да пое́тсѧ наза́рїй, да велича́етсѧ келсі́й, кꙋ́пнѡ съ прота́сїемъ, до́блїй да похва́литсѧ вѣ́рою герва́сїй, цр҃кве непрекло́ннїи столпѝ, и҆ ѡ҆снова̑нїѧ нерꙋши̑маѧ бы́вшїи.
Бг҃оро́диченъ:
Ѻ҆рꙋ́жїе, дре́вле є҆де́мъ стрегꙋ́щее, плещы̀ вѣ̑рнымъ подае́тъ, чⷭ҇таѧ, зна́мєнаннымъ честно́ю кро́вїю, пре́жде и҆сточи́вшеюсѧ ѿ ре́бръ, копїѧ̀ прободе́нїемъ, и҆зъ тебє̀ возсїѧ́вшаго.
Пѣ́снь ѕ҃. І҆рмо́съ:
Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Твоѧ̑ шє́ствїѧ на вода́хъ бы́ша, всебл҃же́нне наза́рїе, и҆ не позна́шасѧ си̑мъ слѣды̀ твоѧ̑ въ дꙋ́сѣ, є҆гѡ́же си́лою всѧ̑ врагѝ посрами́лъ є҆сѝ.
Тѣле́съ стра̑сти неисцѣ̑льныѧ, бж҃їею бл҃года́тїю и҆сцѣли́лъ є҆сѝ, мч҃ниче наза́рїе, мѵ́ро благово́нное и҆сточа́еши же, твои̑мъ честны̑мъ моще́мъ приближа́ющымсѧ.
Ꙗ҆́вѣ бжⷭ҇твенный прота́сїй, вели́кїй же съ ни́мъ герва́сїй, бога́тство привре́менное и҆ могꙋ́тство попра́вше, вѣ́чныѧ сла́вы сподо́бишисѧ.
Бг҃оро́диченъ:
Зако́ны є҆ди́на ѡ҆бнови́ла є҆сѝ є҆стества̀, дв҃о, ро́ждши бг҃а безсме́ртнаго, въ пло́ть ме́ртвеннꙋю ѡ҆дѣ́ѧвшасѧ, да мє́ртвыѧ ѡ҆живи́тъ бла́гостїю.
Конда́къ, гла́съ в҃. Подо́бенъ: Вы́шнихъ и҆щѧ̀:
Свѣти́льницы свѣ́тлїи ꙗ҆́вльшесѧ бжⷭ҇твеннїи мꙋ́чєницы, тва́рь свѣ́томъ чꙋде́съ ѡ҆зарѧ́ете, недꙋ́гѡвъ разрѣша́юще глꙋбо́кꙋю но́щь всегда̀, и҆ хрⷭ҇тꙋ̀ є҆ди́номꙋ бг҃ꙋ молѧ́щесѧ непреста́ннѡ ѡ҆ всѣ́хъ на́съ.
І҆́косъ:
Ꙗ҆́кѡ свѣтоза́рнїи и҆ бжⷭ҇твеннїи свѣти́льницы, свѣ́тꙋ вели́комꙋ предстоѧ́ще при́снѡ, бг҃облаже́ннїи мꙋ́чєницы, и҆ ѿтꙋ́дꙋ и҆спꙋща́емыми невече́рнѧгѡ бж҃ества̀ сїѧ̑нїи, всегда̀ просвѣща́еми и҆ ѡ҆божа́еми, вѣ́рою па́мѧть ва́шꙋ соверша́ющыѧ бжⷭ҇твеннꙋю просвѣти́те, и҆ ѡ҆мраче́нїѧ и҆ страсте́й и҆ бѣ́дъ и҆ ѕло́бы и҆зба́вите, молѧ́щесѧ непреста́ннѡ ѡ҆ всѣ́хъ на́съ.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.
На ка́мени бжⷭ҇твеннагѡ зна́нїѧ ᲂу҆тверди́вше стѡпы̀, сла́внїи, серде́цъ ва́шихъ вра́жїими ᲂу҆хищре́ньми не преврати́сте, воспѣва́юще: препѣ́тый ѻ҆тцє́въ гдⷭ҇и и҆ бг҃ъ, бл҃гослове́нъ є҆сѝ.
Свѣ́тъ невече́рнїй страда́вшымъ кро́вїю ва́мъ возсїѧ̀, и҆ весе́лїе ꙗ҆́вѣ ва́съ прїѧ́тъ великомч҃ницы, воспѣва́ющихъ: препѣ́тый ѻ҆тє́цъ гдⷭ҇ь и҆ бг҃ъ, бл҃гослове́нъ є҆сѝ.
Ѡ҆свѧти́сте преꙋсе́рднѡ проходѧ́ще гра́ды, блаже́ннїи, и҆сповѣ́дающе хрⷭ҇та̀ предъ мꙋчи́тели, и҆ всѣ̑мъ и҆сцѣлє́нїѧ подаю́ще тре́бꙋющымъ, благода́тїю дх҃а всест҃а́гѡ.
Бг҃оро́диченъ:
Свѣтлѣ́йшꙋю пала́тꙋ ѡ҆брѣ́тъ бг҃ъ ᲂу҆тро́бꙋ твою̀, въ сїю̀ всели́сѧ, сы́ны содѣ́ловаѧ свѣ́та, всенепоро́чнаѧ, зовꙋ́щыѧ: ѻ҆тє́цъ на́шихъ бж҃е, бл҃гослове́нъ є҆сѝ.
Пѣ́снь и҃. І҆рмо́съ:
Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Оу҆́тренююще къ возсїѧ́вшемꙋ и҆зъ дв҃ы пресла́внѡ вели́комꙋ сл҃нцꙋ мꙋ́чєницы непобѣди́мїи, свѣ́тъ бы́сте, и҆ пре́лести тмꙋ̀ бл҃года́тїю разори́сте: гдⷭ҇а по́йте, вопїю́ще, дѣла̀, и҆ превозноси́те є҆го̀ во всѧ̑ вѣ́ки.
Ри́мъ дре́вле по́двиги твоѧ̑ проповѣ́даетъ, наза́рїе многострада́льне: кѡнстантїногра́дъ пое́тъ чꙋдеса̀, свѧщє́нныѧ твоѧ̑ мо́щи вѣ́рою содержа́ѧ, гдⷭ҇а по́йте, вопїю́щїй, дѣла̀, и҆ превозноси́те є҆го̀ во всѧ̑ вѣ́ки.
Бжⷭ҇твенный наза́рїй и҆сточа́ѧ мѵ́ра благода́ти, повелѣва́етъ всѣ̑мъ притека́ющымъ вѣ́рою почерпа́ти, на просвѣще́нїе и҆ ѡ҆чище́нїе, взыва́ющымъ: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Ва́съ, дѡ́блїѧ страстоте́рпцы, наза́рїа, келсі́а, прота́сїа, па́ки же герва́сїа, моле́бники ко гдⷭ҇ꙋ крѣпча́йшыѧ и҆мꙋ́ще, любо́вїю зове́мъ: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Бг҃оро́диченъ:
Пло́тїю соедини́всѧ тебѣ̀ по сꙋществꙋ̀, всѣ̑мъ є҆́же бы́ти подаѧ́й, всего́ мѧ ѡ҆бновѝ, всего̀ назда̀ ѡ҆бветша́вшаго, пречⷭ҇таѧ, престꙋпле́ньми. тѣ́мъ тѧ̀ дв҃ꙋ пое́мъ, и҆ превозно́симъ во всѧ̑ вѣ́ки.
Пѣ́снь ѳ҃. І҆рмо́съ:
Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови благослове́нїе процвѣла̀ є҆сѝ. тѣ́мъ тѧ̀ всѝ велича́емъ.
Крѣ́постїю вжилѧ́еми хрⷭ҇та̀, разо́ршагѡ ѕло́бꙋ гꙋби́телѧ, преклони́вше семꙋ̀ вы́ю, коне́цъ мече́мъ прїѧ́сте, разрѣ́шшесѧ ѿ пло́ти, великоимени́тїи: тѣ́мъ досто́йнѡ блажи́ми є҆стѐ.
Краснѝ ꙗ҆́звами плотски́ми бы́сте, и҆ а҆́гг҃лѡмъ ᲂу҆подо́бистесѧ: ны́нѣ же предстоитѐ всѣ́хъ ра́дꙋющесѧ при́снѡ красотѣ̀, прича́стїемъ ꙗ҆́вѣ ᲂу҆добрѧ́еми, краснѣ́йше, всечестні́и.
Зна́меньми и҆ чꙋдесы̀ ва́съ ᲂу҆красѝ, и҆ пре́жде конца̀ всеприснопа́мѧтнїи, и҆ по концѣ̀ влⷣка, наза́рїе, прота́сїе, келсі́е, герва́сїе, непобѣди́мїи мч҃ницы, тѣ́мъ досто́йнѡ ᲂу҆блажа́етесѧ.
Ѡ҆свѧти́шасѧ любо́вїю ва́шею всѧ́чєскаѧ, соверша́ющи па́мѧть дне́сь: ра́дꙋютсѧ мч҃ницы, и҆ всѝ прⷪ҇ро́цы съ на́ми пра́зднꙋютъ, съ ни́миже ѡ҆ на́съ моли́тесѧ бл҃годѣ́телю, всебл҃же́ннїи.
Бг҃оро́диченъ:
Гла́съ тѝ бжⷭ҇твеннагѡ гаврїи́ла прино́симъ веселѧ́щесѧ, ѻ҆трокови́це пречⷭ҇таѧ: ра́дꙋйсѧ ѡ҆бра́дованнаѧ, мꙋ́ченикѡвъ, а҆пⷭ҇лѡвъ похвало̀, и҆ всѣ́хъ вѣ́рныхъ спасе́нїе, дв҃о мт҃и, неискꙋсобра́чнаѧ.
Свѣти́ленъ. Подо́бенъ: Дх҃омъ во ст҃и́лищи:
Претерпѣ́лъ є҆сѝ ꙗ҆́кѡ безпло́тенъ нестерпи̑мыѧ мꙋ̑ки, наза́рїе бл҃же́нне, мч҃никѡвъ сла́ва, съ герва́сїемъ мꙋ́дрымъ, прота́сїемъ же кꙋ́пнѡ и҆ бжⷭ҇твеннымъ келсі́емъ. тѣ́мъ вѣ́рою чти́мъ всепра́зднственнꙋю ва́шꙋ и҆ честнꙋ́ю па́мѧть.
Бг҃оро́диченъ:
Па́че ᲂу҆ма̀ ржⷭ҇тва̀ твоегѡ̀ пресла́вное чꙋ́до, ᲂу҆дивлѧ́етъ всѧ́къ смы́слъ, и҆ земны́хъ и҆ а҆́гг҃лъ: дв҃а бо сꙋ́щи родила̀ є҆сѝ, и҆ дв҃а пребыла̀ є҆сѝ, ꙗ҆́кѡ пре́жде ржⷭ҇тва̀ дв҃о. ѽ стра́шнагѡ та́инства! ѽ ржⷭ҇тва̀ ди́внагѡ! ѽ чревоноше́нїѧ пресла́внагѡ!
Слꙋ́жба прпⷣбныѧ параске́ѵи.
Ве́черъ, каѳі́сма ѻ҆бы́чнаѧ. На Гдⷭ҇и, воззва́хъ, стїхи̑ры на ѕ҃. И҆ на ᲂу҆́трени канѡ́нъ на ѕ҃. А҆́ще ли настоѧ́тель и҆зво́литъ, и҆лѝ гдѣ̀ прилꙋчи́тсѧ хра́мъ прпⷣбныѧ параске́ѵи, тогда̀ пое́мъ: Блаже́нъ мꙋ́жъ: и҆ стїхи̑ры, на и҃: и҆ стїхо́внꙋ. И҆ на ᲂу҆́трени пое́мъ ꙗ҆́коже и҆ про́чымъ ст҃ы̑мъ, и҆мꙋ́щымъ полѷеле́й.
Стїхи̑ры, гла́съ ѕ҃. Подо́бенъ: Всѐ ѿло́жше:
Возсїѧ́ла є҆сѝ параске́ѵо, ꙳ добродѣ́тельми и҆ видѣ́нїемъ ꙳ на тве́рди ꙗ҆́кѡ по́стница вѣ́рна, ꙳ всесвѣ́тлыми и҆ сла́вными зарѧ́ми, ꙳ всѧ̑ ѿгонѧ́еши ѡ҆мрачє́нїѧ є҆реті́чєскаѧ, ꙳ и҆ просвѣща́еши вѣ́рою и҆ любо́вїю ꙳ прилѣжа́щыѧ твои̑мъ ᲂу҆че́нїємъ. ꙳ тѣ́мже свѣтоно́сный тво́й пра́здникъ ꙳ соверша́емъ любо́вїю, ꙳ хрⷭ҇тꙋ̀ со дерзнове́нїемъ моли́сѧ ꙳ ѡ҆ дꙋша́хъ на́шихъ.
Трꙋды̑ по́стническими ꙳ твою̀ дꙋ́шꙋ воѡрꙋжи́ла є҆сѝ, ꙳ и҆ плотска̑ѧ ᲂу҆вѧди́ла є҆сѝ взыгра̑нїѧ, ꙳ и҆ ᲂу҆́мъ, сла́внаѧ, содѣ́лала є҆сѝ ꙳ бжⷭ҇твенныѧ трⷪ҇цы жили́ще: ꙳ и҆ возвы́силасѧ є҆сѝ, ѽ параске́ѵо, ꙳ и҆дѣ́же нетлѣ́нїе, ꙳ и҆ поко́й првⷣныхъ: ꙳ съ ни́миже ны́нѣ ра́дꙋешисѧ, ꙳ и҆ во сла́вѣ предстои́ши хрⷭ҇тꙋ̀, ꙳ со дерзнове́нїемъ молѧ́сѧ ꙳ ѡ҆ дꙋша́хъ на́шихъ.
Бжⷭ҇твенныхъ сле́зъ твои́хъ течє́нїи, параске́ѵо, ꙳ всѐ потопи́ла є҆сѝ ꙳ де́мѡнское ѡ҆полче́нїе, ꙳ ꙗ҆́кѡ не́мощно сꙋ́що, ꙳ твои́ми всегда̀ къ бг҃ꙋ мановє́нїи, ꙳ и҆ си́льными восхождє́нїи: ꙳ и҆ го́рдое возноше́нїе на зе́млю низве́ргла є҆сѝ, ꙳ и҆ возвы́силасѧ є҆сѝ въ нбⷭ҇ныѧ и҆ благолѣ̑пныѧ ѻ҆би́тєли: ꙳ въ ни́хже со а҆́гг҃лы водворѧ́ешисѧ, ꙳ предстоѧ́щи хрⷭ҇тꙋ̀, ꙳ со дерзнове́нїемъ моли́сѧ ꙳ ѡ҆ дꙋша́хъ на́шихъ.
И҆́ны стїхи̑ры, гла́съ и҃ подо́бенъ то́йже:
Живꙋ́щи по сме́рти, ꙳ параске́ѵо блаже́ннаѧ, ꙳ посѣща́еши всѧ̑ ꙳ съ вѣ́рою притека́ющыѧ къ ра́цѣ твое́й: ꙳ ѿ лю́тыхъ страсте́й ꙳ покрыва́еши всегда̀, и҆ ѿ бѣ́дъ и҆збавлѧ́еши, ꙳ подава́еши же и҆сцѣлє́нїѧ моли́твами твои́ми, ꙳ и҆ спаса́еши ѿ де́мѡнскагѡ нахожде́нїѧ ꙳ чтꙋ́щыѧ свѧтꙋ́ю па́мѧть твою̀, ꙳ просѧ́щи ѿ бг҃а ꙳ дарова́ти проще́нїе прегрѣше́нїй.
А҆́гг҃лъ земны́й ꙳ на землѝ ꙗ҆ви́ласѧ є҆сѝ, ꙳ житїѐ безпло́тное въ земнѣ́мъ тѣ́лѣ показа́ла є҆сѝ: ꙳ ѻ҆тца́ бо и҆ ма́тере дале́че ѿбѣ́гши, ꙳ причта́ласѧ є҆сѝ ко хрⷭ҇тꙋ̀ женихꙋ̀ твоемꙋ̀, ꙳ въ черто́зѣ нбⷭ҇нѣмъ ꙳ бг҃оневѣ́сто живꙋ́щи, ꙳ въ каллїкра́тїи и҆́маши селе́нїе крѣ́пко, ꙳ и҆дѣ́же и҆сцѣлє́нїѧ подае́ши ꙳ съ вѣ́рою притека́ющымъ тѝ, ꙳ и҆ чꙋде́съ бл҃года́ть ꙳ всѣ̑мъ и҆сточа́еши.
Дре́вле ᲂу҆́бѡ ѡ҆дождѧ́ше бг҃ъ ꙳ і҆и҃льтѧнѡмъ ма́ннꙋ съ нб҃сѐ: ꙳ дне́сь же и҆мꙋ́щымъ и҆́мѧ твоѐ честно́е ꙳ сꙋгꙋ́ба быва́ше пшени́ца, ꙳ въ раздаѧ́нїе тре́бꙋющымъ. ꙳ и҆ на́съ ны́нѣ въ твое́й па́мѧти, ꙳ прпⷣбнаѧ параске́ѵо, ꙳ хлѣ́ба нбⷭ҇нагѡ сподо́би ꙳ прїѧ́ти бл҃года́ть, ꙳ въ благодаре́нїе чꙋде́съ твои́хъ: ꙳ да ра́дость дꙋша́мъ и҆ спасе́нїе полꙋчи́мъ ꙳ во свѧтѣ́й па́мѧти твое́й.
Сла́ва, гла́съ а҃:
Ты̀ сле́зными и҆злїѧ̑нїи плотски́хъ страсте́й ражжє́нїѧ ᲂу҆гаси́вши, и҆ бжⷭ҇твеннагѡ раче́нїѧ ѻ҆́гнь возгнѣ́щши, ѡ҆зари́ласѧ є҆сѝ цр҃ѧ̀ хрⷭ҇та̀ безсме́ртїемъ: и҆ томꙋ̀ сочта́ласѧ є҆сѝ до́браѧ дѣ́во, и҆ съ ни́мъ въ черто́гъ разꙋ́мный ны́нѣ возшла̀ є҆сѝ, параске́ѵо, моли́сѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ по гла́сꙋ, и҆лѝ крⷭ҇тобг҃оро́диченъ.
Подо́бенъ: Прехва́льнїи мꙋ́чєницы:
Заколе́нїе твоѐ непра́ведное, хрⷭ҇тѐ, ꙳ дв҃а зрѧ́щи, ꙳ и҆ пла́чꙋщи вопїѧ́ше тѝ: ꙳ ча́до сладча́йшее, ꙳ ка́кѡ безъ пра́вды ᲂу҆мира́еши; ꙳ ка́кѡ на дре́вѣ ви́сиши, ꙳ и҆́же всю̀ зе́млю повѣ́шей на вода́хъ; ꙳ не ѡ҆ста́ви менѐ є҆ди́нꙋ, ꙳ бл҃годѣ́телю многоми́лостиве, ꙳ мт҃рь и҆ рабꙋ̀ твою̀, молю́сѧ.
А҆́ще же пое́ши полѷеле́й. И҆ ны́нѣ, бг҃оро́диченъ: Всемі́рнꙋю сла́вꙋ: Вхо́дъ. Прокі́менъ днѐ. Чтє́нїѧ трѝ, прпⷣбничєскаѧ. Пи́саны сегѡ̀ мѣ́сѧца въ пе́рвый де́нь, са́ввѣ ви́шерскомꙋ.
На стїхо́внѣ стїхи̑ры, гла́съ д҃. Подо́бенъ: Зва́нный свы́ше:
Оу҆ѧзви́вшисѧ жела́нїемъ бжⷭ҇твеннымъ ꙳ прпⷣбнаѧ ма́ти параске́ѵо, ꙳ всѧ̑ сꙋ́єтнаѧ преле́стнагѡ житїѧ̀ возненави́дѣвши, ꙳ хрⷭ҇тꙋ̀ послѣ́довала є҆сѝ ꙳ горѧ́щимъ дꙋ́ха жела́нїемъ, ꙳ мꙋдрова́нїе плотско́е ꙳ ᲂу҆мертви́вши воздержа́нїемъ, ꙳ и҆ и҆́стиннымъ ᲂу҆миле́нїемъ, ꙳ и҆ соверше́ннымъ смире́нїемъ, ꙳ и҆ прїѧ́ла є҆сѝ ѿ бг҃а да́ръ чꙋдотворе́нїй неизрече́нныхъ: ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
А҆́гг҃льское возжелѣ́вши житїѐ, ꙳ прпⷣбнаѧ мт҃и параске́ѵо, ꙳ мимотекꙋ́щее сїѐ житїѐ ꙳ ꙗ҆́кѡ со́нъ вмѣни́ла є҆сѝ, подвиза́ющисѧ воздержа́нїемъ, ꙳ и҆ прилѣ́жными моли́твами, ꙳ и҆ поще́нїемъ и҆ бдѣ́нїемъ, ꙳ и҆ низꙋлега́нїемъ и҆ чистото́ю, ꙳ сосꙋ́дъ пречⷭ҇тъ ꙗ҆ви́ласѧ є҆сѝ дх҃а бжⷭ҇твеннагѡ, ꙳ и҆ свѣ́тлыхъ и҆ неизрече́нныхъ чꙋде́съ да́ръ ѿ бг҃а прїѧ́ла є҆сѝ: ꙳ є҆го́же, всебл҃же́ннаѧ ма́ти, молѝ, ꙳ спастѝ и҆ просвѣти́ти дꙋ́шы на́шѧ.
Сті́хъ: Бл҃же́ни всѝ боѧ́щїисѧ гдⷭ҇а, ходѧ́щїи въ пꙋте́хъ є҆гѡ̀.
Настоѧ́щагѡ житїѧ̀ сегѡ̀ ꙳ преле́стнагѡ и҆ маловре́меннагѡ, ꙳ и҆ ско́рѡ мимотекꙋ́щагѡ ꙳ всѧ̑ ѿве́ргла є҆сѝ, ꙳ и҆ пла́мень ѻ҆гнѧ̀ стра́стнагѡ ᲂу҆гаси́ла є҆сѝ, ꙳ непреста́ннымъ ᲂу҆миле́нїемъ, ꙳ и҆ соверше́ннымъ смире́нїемъ, ꙳ и҆ прилѣ́жнымъ моле́нїемъ, ꙳ безпло́тныхъ чи́ны дости́гла є҆сѝ, ꙳ и҆ зри́ши ѿкрове́ннымъ лице́мъ сла́вꙋ бж҃їю: ꙳ є҆го́же, прпⷣбнаѧ параске́ѵо, молѝ, ꙳ спастѝ и҆ просвѣти́ти дꙋ́шы на́шѧ.
Сла́ва, гла́съ в҃:
Ѿ ко́рене блага́гѡ и҆зрастѐ ши́покъ, и҆́же ѿ младе́нчества твоегѡ̀ возлюби́ла є҆сѝ хрⷭ҇та̀, параске́ѵо, бл҃года́тїю па́че не́же млеко́мъ воспита́на бы́вши, и҆ на ка́мени стоѧ́щи пло́ть твою̀ и҆знꙋри́ла є҆сѝ, и҆ къ бг҃ꙋ возвы́сившисѧ ра́зꙋмомъ, и҆ гдⷭ҇не созда́ласѧ є҆сѝ добротѣ́тельми жили́ще, и҆ съ нбⷭ҇ными ликовствꙋ́еши, хрⷭ҇то́ва бы́вши ѻ҆би́тель, молѝ спасти́сѧ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Є҆гда̀ ѿ дре́ва:
Є҆гда̀ нескве́рнаѧ а҆́гница ви́дѣ своего̀ а҆́гнца, на заколе́нїе ꙗ҆́кѡ чл҃вѣ́ка во́лею влеко́ма, пла́чꙋщи глаго́лаше: безча́дствовати мѧ̀ ны́нѣ тщи́шисѧ, хрⷭ҇тѐ, ро́ждшꙋю тѧ̀. что̀ сїѐ сотвори́лъ є҆сѝ, и҆зба́вителю всѧ́ческихъ; ѻ҆ба́че воспѣва́ю и҆ сла́влю твою̀, ю҆́же па́че ᲂу҆ма̀ и҆ сло́ва, кра́йнюю бл҃гость, чл҃вѣколю́бче.
Тропа́рь, гла́съ д҃:
Пꙋсты́нное и҆ безмо́лвное житїѐ возлюби́вши, и҆ во слѣ́дъ хрⷭ҇та̀ жениха̀ твоегѡ̀ ᲂу҆се́рднѡ поте́кши, и҆ тогѡ̀ благо́е и҆́го во ю҆́ности твое́й взе́мши, крⷭ҇тнымъ зна́менїемъ къ мы́слєннымъ врагѡ́мъ мꙋ́жески воѡрꙋжи́вшисѧ, по́стническими пѡ́двиги, посто́мъ и҆ моли́твами и҆ сле́зными ка́плѧми, ᲂу҆́глїе страсте́й ᲂу҆гаси́ла є҆сѝ, достосла́внаѧ параске́ѵо: и҆ ны́нѣ въ нбⷭ҇нѣмъ черто́зѣ съ мꙋ́дрыми дѣ́вами предстоѧ́щи хрⷭ҇тꙋ̀, молѝ ѡ҆ на́съ почита́ющихъ честнꙋ́ю па́мѧть твою̀.
Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́ное:
На ᲂу҆́трени, на Бг҃ъ гдⷭ҇ь, тропа́рь ст҃ы́ѧ, два́жды.
Сла́ва, и҆ ны́нѣ, бг҃оро́диченъ.
По а҃-мъ стїхосло́вїи сѣда́ленъ, гла́съ д҃. Поⷣ: Ско́рѡ предварѝ:
Жениха̀ возлюби́вши творца̀ и҆ бг҃а, жениха́ же (с. 251) тлѣ́ннаго ѡ҆ста́вила є҆сѝ, честна́ѧ параске́ѵо, и҆̀, ра́дꙋющисѧ, претерпѣ́ла є҆сѝ пѡ́стныѧ по́двиги: тѣ́мже и҆ вѣнцы̀ носѧ́щи, къ бжⷭ҇твенномꙋ черто́гꙋ возшла̀ є҆сѝ, и҆спроша́ющи всѣ̑мъ грѣхѡ́въ ѡ҆ставле́нїе.
Два́жды.
Сла́ва, и҆ ны́нѣ, бг҃оро́диченъ:
Дв҃о всенепоро́чнаѧ, ꙗ҆́же пресꙋ́щнаго бг҃а ро́ждшаѧ, со прпⷣбною того̀ непреста́ннѡ молѝ, ѡ҆ставле́нїе прегрѣше́нїй, и҆ и҆справле́нїе житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ.
По в҃-мъ стїхосло́вїи сѣда́ленъ, гла́съ а҃:
Непоро́чнаѧ а҆́гница честна́ѧ, гдⷭ҇еви сочта́сѧ та́инственнѡ въ чⷭ҇тѣмъ житїѝ, добро́тою бг҃ода́нною себѐ ᲂу҆краси́вши. тѣ́мже и҆ прїѧ́тъ бл҃года́ть и҆сцѣле́нїѧ, ᲂу҆врачꙋ́ющи стра̑сти притека́ющихъ къ не́й, си́лою дꙋхо́вною.
Два́жды.
Сла́ва, и҆ ны́нѣ, бг҃оро́диченъ:
Мт҃рь тѧ̀ бж҃їю мо́лимъ всѝ, дв҃ꙋ вои́стиннꙋ и҆ по ржⷭ҇твѣ̀ ꙗ҆́вльшꙋюсѧ, любо́вїю прибѣга́ющїи къ твое́й бла́гости: тебе́ бо и҆́мамы грѣ́шнїи предста́тельницꙋ, тебѐ стѧжа́хомъ въ напа́стехъ спасе́нїе, є҆ди́нꙋ всенепоро́чнꙋю.
Посе́мъ, Хвали́те и҆́мѧ гдⷭ҇не.
Ѱало́мъ и҆збра́нный прпⷣбническъ. Припѣ́въ:
Оу҆блажа́емъ тѧ̀, прпⷣбнаѧ ма́ти параске́ѵо, и҆ чте́мъ свѧтꙋ́ю па́мѧть твою̀, ты́ бо мо́лиши за на́съ хрⷭ҇та̀ бг҃а на́шего.
По полѷеле́и сѣда́ленъ, гла́съ и҃:
Пред̾избра́ннаѧ ѿ бг҃а, прпⷣбнаѧ ма́ти параске́ѵо, житїѧ̀ треволне́нїй, и҆ мѧте́жа мїрска́гѡ стра́стныхъ помышле́нїй и҆збѣ́гши, ко приста́нищꙋ житїѧ̀ дости́гла є҆сѝ, и҆ со а҆́гг҃лы пѣсносло́вѧщи и҆зба́вителѧ хрⷭ҇та̀ бг҃а, молѝ непреста́ннѡ ѡ҆ на́съ, да бл҃года́ть и҆ ми́лость да́рꙋетъ на́мъ, чтꙋ́щымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Ра́дꙋйсѧ, а҆́гг҃ломъ ра́дость мі́ра прїе́мшаѧ. ра́дꙋйсѧ, ро́ждшаѧ творца̀ твоегѡ̀ и҆ гдⷭ҇а. ра́дꙋйсѧ, сподо́бльшаѧсѧ бы́ти мт҃и бж҃їѧ.
Та́же степє́нна, а҃ а҆нтїфѡ́нъ, д҃-гѡ гла́са: Прокі́менъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. Сті́хъ: Въ це́рквахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ. Всѧ́кое дыха́нїе: Є҆ѵⷢ҇лїе матѳе́а, зача́ло р҃д. По н҃-мъ ѱалмѣ̀, стїхи́ра, гла́съ и҃:
Всѧ́къ ѧ҆зы́къ да подви́житсѧ къ похвале́нїю хрⷭ҇то́вы кра́сныѧ невѣ́сты, чи́стыѧ голꙋби́цы, позлаще́нныѧ дх҃омъ ст҃ы́мъ: та́ бо, возлюбѝ пꙋсты́нное житїѐ, бы́сть а҆́гг҃лѡмъ собесѣ́дница, дѣ́вственнаѧ похвала̀, ю҆́же а҆́гг҃ли восхвали́ша, и҆ человѣ́честїи ро́ди блажа́ще вопїе́мъ: ра́дꙋйсѧ, застꙋ́пнице сꙋ́щымъ въ бѣда́хъ, и҆ ѡ҆бꙋрева́ємымъ приста́нище, пребл҃же́ннаѧ параске́ѵо: ты́ бо послѣ́довала є҆сѝ твоемꙋ̀ женихꙋ̀ хрⷭ҇тꙋ̀, подаю́щемꙋ мі́рꙋ ве́лїю ми́лость.
Канѡ́нъ бцⷣы, со і҆рмосо́мъ на ѕ҃. И҆ прпⷣбныѧ в҃ канѡ́на, на и҃.
Гла́съ и҃. Пѣ́снь а҃. І҆рмо́съ:
Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.
Моегѡ̀ ра́зꙋма твои́ми моли́твами мра́къ ѿженѝ, параске́ѵо прпⷣбнаѧ, да воспою̀ сла́внꙋю твою̀ па́мѧть, и҆ свѣтоно́снꙋю, и҆ бл҃же́ннꙋю, пѣ́сньми.
Ꙗ҆́кѡ рѣка̀ ᲂу҆стреми́сѧ ѿ сїѡ́на, сла́внаѧ параске́ѵо, напои́ла є҆сѝ ѕѣлѡ̀ бжⷭ҇твенными стрꙋѧ́ми вѣ́рныхъ со́нмы, вопїю́щи: гдⷭ҇еви пои́мъ пѣ́снь но́вꙋю.
Бжⷭ҇твенными сїѧ̑нїи дꙋ́шꙋ твою̀ ѡ҆зари́вши, параске́ѵо, сладостра́стїе пло́ти воздержа́нїѧ попали́ла є҆сѝ ѻ҆гне́мъ, пою́щи и҆́стиннꙋю пѣ́снь хрⷭ҇тꙋ̀.
Бг҃оро́диченъ:
Свѣ́тлыми лꙋча́ми твоегѡ̀ сн҃а, бцⷣе, просвѣтѝ ѡ҆мраче́ннꙋю мою̀ дꙋ́шꙋ, и҆ страсте́й смꙋще́нїе твои́ми, чⷭ҇таѧ, ᲂу҆кротѝ хода́тайствы.
И҆́нъ. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Ликꙋ́ющи, ма́ти, на нб҃сѣ́хъ, и҆ твоемꙋ̀ женихꙋ̀ хрⷭ҇тꙋ̀ предстоѧ́щи при́снѡ, со а҆́гг҃лы, и҆ прⷪ҇рѡ́ки, и҆ со а҆пⷭ҇лы, и҆ со жена́ми прпⷣбными ѡ҆ на́съ моли́сѧ.
По́стъ возлюби́вши и҆ чи́стое смире́нїе, дѣ́во, бг҃а и҆́стиннаго возвесели́ла є҆сѝ: томꙋ̀ непреста́ннѡ ѡ҆ на́съ моли́сѧ.
Ра́достный тѝ хрⷭ҇то́въ гла́съ прїи́де, на землѝ мольбꙋ̀ дѣ́ющей, ма́ти честна́ѧ, и҆ ра́дости напо́лниласѧ є҆сѝ, сего̀ пѣ́сньми за ны̀ молѧ́щи.
Бг҃оро́диченъ:
Чи́ни тѧ̀ а҆́гг҃льстїи и҆ человѣ́честїи, безневѣ́стнаѧ дв҃о, хва́лѧтъ непреста́ннѡ: зижди́телѧ бо и҆́хъ ꙗ҆́кѡ младе́нца, на рꙋкꙋ̀ твоє́ю понесла̀ є҆сѝ.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Ты̀ и҆спо́лниласѧ є҆сѝ, мꙋ́драѧ ма́ти параске́ѵо, бжⷭ҇твеннагѡ дх҃а, и҆ ꙗ҆ви́ласѧ є҆сѝ пита́ющи бога́тнѡ благоче́стїѧ сла́достїю, живо́тнымъ сло́вомъ, зрѧ́щыѧ къ тебѣ̀.
Ѿ повелѣ́нїй бжⷭ҇твеннагѡ сїѧ́нїѧ, просвѣти́ла є҆сѝ всѧ̑, бл҃же́ннаѧ параске́ѵо, ѿгна́вши всю̀ є҆реті́ческꙋю ѕло́бꙋ, жизнода́вцꙋ хрⷭ҇тꙋ̀ воспѣва́ющи: свѧ́тъ є҆сѝ гдⷭ҇и.
На го́рꙋ бжⷭ҇твенныхъ добродѣ́телей востекла̀ є҆сѝ параске́ѵо, и҆ во ѻ҆́блакъ видѣ́нїй прини́кши, сочета́ласѧ є҆сѝ съ бг҃омъ, разꙋ̑мныѧ скрижа̑ли прїи́мши зако́на бл҃года́тнагѡ.
Бг҃оро́диченъ:
Сѐ лѣ́ствица і҆а́кѡвлѧ, ю҆́же ви́дѣ и҆ногда̀ ᲂу҆твержде́нꙋ, на не́йже ᲂу҆твержда́шесѧ бг҃ъ, свѣтоно́сна, чⷭ҇таѧ, ꙗ҆ви́сѧ дѣ́вствꙋющи.
И҆́нъ. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
И҆спросѝ, параске́ѵо, невѣ́сто хрⷭ҇то́ва сла́внаѧ, грѣхѡ́въ проще́нїе пода́ти, вѣ́рою хва́лѧщымъ тѧ̀.
Бѣ́гающи ᲂу҆дали́ласѧ є҆сѝ, и҆ всели́ласѧ є҆сѝ въ пꙋсты́ни и҆ гора́хъ при́снѡ, и҆ верте́пѣхъ, бг҃ꙋ ᲂу҆гожда́ющи.
Ѡ҆брѣла̀ є҆сѝ, є҆го́же возлюби́ла є҆сѝ ѿ дꙋшѝ, пречестна́ѧ параске́ѵо, въ широтѣ̀ пꙋсты́ни сокро́вище потае́ное.
Бг҃оро́диченъ:
Тебѐ всѝ стѧжа́хомъ прибѣ́жище, и҆ стѣ́нꙋ на́шꙋ, хрⷭ҇тїа́не, и҆ тѧ̀ сла́вимъ немо́лчнѡ, мт҃и безневѣ́стнаѧ.
Сѣда́ленъ, гла́съ д҃:
Ꙗ҆ви́ласѧ є҆сѝ прпⷣбнаѧ параске́ѵо, цр҃кви ꙗ҆́кѡ и҆но́е со́лнце, ѡ҆зарѧ́ющи сїю̀ мо́лнїѧми чꙋде́съ твои́хъ, и҆ просвѣща́ющи вѣ́рою вопїю́щыѧ тѝ: ра́дꙋйсѧ, по́стницъ похвало̀, и҆ дѣ́въ ᲂу҆добре́нїе.
Два́жды.
Сла́ва, и҆ ны́нѣ, бг҃оро́диченъ:
Пречⷭ҇тѣи рꙋ́цѣ твоѝ, дв҃ома́ти, просте́рши, покры́й ᲂу҆пова́ющыѧ на тѧ̀, и҆ сн҃ꙋ твоемꙋ̀ зовꙋ́щыѧ: всѣ̑мъ пода́ждь, хрⷭ҇тѐ, ми́лѡсти твоѧ̑.
Крⷭ҇тобг҃оро́диченъ:
На дре́вѣ ви́дѧщи воздви́жена сн҃а твоего̀, пречⷭ҇таѧ, ᲂу҆тро́бою мт҃рнею разтерза́ема, жа́лостнѡ взыва́ла є҆сѝ: ᲂу҆вы̀ мнѣ̀, ка́кѡ заше́лъ є҆сѝ, свѣ́те мо́й безлѣ́тный;
Пѣ́снь д҃. І҆рмо́съ:
Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.
Поще́нїемъ, прпⷣбнаѧ параске́ѵо, себѐ ѡ҆чи́стивши, всѧ̀ свѣ́та и҆спо́лниласѧ є҆сѝ, и҆ всѧ̀ бг҃овмѣ́стна показа́ласѧ є҆сѝ, и҆ всѧ̀ ꙗ҆ви́ласѧ є҆сѝ дх҃ꙋ соприча́стна.
Гла́домъ ᲂу҆морѧ́ющи лю́тѣ, ѕло́е ю҆́ности и҆гра́нїе, параске́ѵо блаже́ннаѧ, и҆ по́стничєскїѧ терпи́ши болѣ̑зни, ѿ со́вѣсти чи́сты ѡ҆ гдⷭ҇ѣ веселѧ́щисѧ.
Ѡ҆блиста́вши, сла́внаѧ, житїѧ̀ и҆справлє́нїи, ѡ҆бощрена̀ ꙗ҆ви́ласѧ є҆сѝ ꙗ҆́кѡ хрⷭ҇то́въ ме́чь, ссѣца́ющи де́мѡнскаѧ ᲂу҆хищрє́нїѧ бжⷭ҇твеннымъ дх҃омъ ᲂу҆крѣплѧ́ема.
Бг҃оро́диченъ:
Свѣти́льникъ всесвѣ́тлый, бжⷭ҇твеннаѧ трапе́за, бж҃їе селе́нїе, кївѡ́тъ, и҆ же́злъ процвѣ́тши въ мі́рѣ хрⷭ҇та̀, ты̀ ꙗ҆ви́лсѧ є҆сѝ, мт҃и дв҃о.
И҆́нъ. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Нескве́рно зерца́ло и҆ свѧ́то по́мысломъ себѐ сотво́рши, ꙗ҆́кѡ свѣти́ло при́снѡ сїѧ́ющи посредѣ̀ по́стницъ, сла́внаѧ.
Въ тѣле́сномъ ѡ҆бнаже́нїи, со́лнечнымъ попале́нїемъ сгара́ла є҆сѝ за любо́вь жениха̀ твоегѡ̀: и҆ мра́за стꙋде́ность претерпѣ́ла є҆сѝ.
Всено́щнымъ бдѣ́нїемъ, и҆ моли́твами крѣ́пкими и҆ стена́ньми, пло́ти ᲂу҆вѧди́ла є҆сѝ движє́нїѧ, преблаже́ннаѧ ма́ти.
Бг҃оро́диченъ:
Хрⷭ҇та̀, є҆го́же родила̀ є҆сѝ, пречⷭ҇таѧ дв҃о, того̀ ᲂу҆молѝ, рабѡ́мъ твои̑мъ дарова́ти прегрѣше́нїй ѡ҆ставле́нїе.
Пѣ́снь є҃. І҆рмо́съ:
Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Свѣтопода́тельными твои́ми блиста́ньми, параске́ѵо, мра́чнꙋю тмꙋ̀ потреби́ла є҆сѝ є҆реті́ческꙋю: и҆ бг҃озна́нїѧ свѣ́томъ ѡ҆зари́вшисѧ, просвѣща́ещи мі́ра концы̀.
Тебѐ всѝ застꙋ́пницꙋ и҆мꙋ́ще, досто́йнѡ сла́вимъ, параске́ѵо: ты́ бо ꙗ҆ви́ласѧ є҆сѝ а҆́гг҃лѡвъ собесѣ́дница, и҆ дѣ́въ ᲂу҆краше́нїе, ма́ти прпⷣбнаѧ.
Ꙗ҆ви́ласѧ є҆сѝ, ма́ти параске́ѵо, свѣтоза́рна, заблꙋ́ждшихъ пꙋтеводи́тельница, вла́ющихсѧ прави́тельница, и҆ коле́блющихсѧ въ лю́тыхъ тве́рдость, и҆ стѣна̀ нерꙋши́ма.
Бг҃оро́диченъ:
Добро́та і҆а́кѡвлѧ, ю҆́же возлюбѝ бг҃ъ, и҆ всели́тисѧ и҆збра̀, земны́хъ сла́ва, и҆ прибѣ́жище грѣша́щихъ, бцⷣе, ты̀ ꙗ҆ви́ласѧ є҆сѝ.
И҆́нъ. І҆рмо́съ:
Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.
Днѐ и҆ мі́ра сопроти̑внаѧ вѣ́дѧщи, жела́нїѧ люботво́рца де́мѡна люби́ти не восхотѣ́ла є҆сѝ.
Мнѧ̀ преѡдолѣ́ти твое́й любвѝ и҆ чистотѣ̀: но смѣ́хъ ꙗ҆ви́сѧ козньмѝ прелꙋка́вый.
Погребо́ша твоѐ тѣ́ло, ꙗ҆́коже нетлѣ́емо: ты́ бо ꙗ҆́кѡ безпло́тна пожила̀ є҆сѝ, бг҃оневѣ́стнаѧ.
Бг҃оро́диченъ:
Дв҃ꙋ по ржⷭ҇твѣ̀ пое́мъ тѧ̀, бцⷣе, ты́ бо бг҃а пло́тїю мі́рꙋ родила̀ є҆сѝ.
Пѣ́снь ѕ҃. І҆рмо́съ:
Жите́йское мо́ре воздвиза́емое зрѧ̀ напа́стей бꙋ́рею, въ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.
Сїѧ́еши ꙗ҆́кѡ со́лнце, бг҃оза́рны лꙋчы̑, преблаже́ннаѧ параске́ѵо, чꙋде́съ и҆спꙋща́ющи, похвалѧ́ющымъ твоѧ̑ пѡ́стныѧ трꙋды̀, и҆ ди̑вныѧ по́двиги.
Пречи́стꙋю влⷣчцꙋ бцⷣꙋ похвалѧ́ющи че́стнѡ, ѧ҆зы́комъ твои́мъ, бг҃омꙋ́драѧ параске́ѵо, воспѣ́вши словеса̀ свѣтоза̑рнаѧ, вѣ́рныхъ со́нмища мꙋ́дрѣ сердца̀ ᲂу҆маща́ющи.
Напи́санный всечⷭ҇тны́й и҆ ст҃ы́й ѻ҆́бразъ любе́знѡ лобыза́еши, безбо́жныхъ же писа̑нїѧ потреблѧ́еши, и҆ тѣ́хъ бг҃омє́рзскаѧ и҆ безбѡ́жнаѧ повелѣ̑нїѧ поплева́еши, и҆ возвѣща́еши че́сть и҆ поклоне́нїе ѻ҆́браза хрⷭ҇то́ва.
Бг҃оро́диченъ:
Всѧ̑ хотѣ́нїемъ свои́мъ соста́вивый бг҃ъ, и҆ содержа́й всѧ́чєскаѧ, ѡ҆писа́нїемъ тѣлесѐ на твои́хъ рꙋка́хъ держи́тсѧ, пречⷭ҇таѧ, и҆́же бжⷭ҇твеннымъ сꙋщество́мъ неѡпи́санный.
И҆́нъ. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Мїрскі̑ѧ мѡлвы̀ попра́ла є҆сѝ, мі́ра содѣ́телю предстои́ши, возлетѣ́вши кри́лы златоꙋкра́шенными, мт҃и, ѿ трꙋдѡ́въ поще́нїѧ и҆ моли́твъ, бг҃облаже́ннаѧ.
Бг҃оꙋго́днагѡ твоегѡ̀ ра́ди житїѧ̀, пречестна́ѧ, ꙗ҆́кѡ да́ръ ѡ҆свѧще́нъ ѻ҆те́чествꙋ подае́шисѧ твоемꙋ̀, параске́ѵо, къ за́падꙋ прише́дши, всесла́внаѧ.
Несказа́нно житїѐ и҆змла́да возжелѣ́вши, неви́дима бо бо въ землѝ потаена̀, восходѧ́щи, прпⷣбнаѧ, на ᲂу҆дивле́нїе бы́сть, бг҃ꙋ ꙗ҆́вльшꙋ тѧ̀.
Бг҃оро́диченъ:
Да и҆збꙋ́демъ ѿ лю́тыхъ прегрѣше́нїй моли́твами твои́ми, бцⷣе чⷭ҇таѧ, и҆ да ᲂу҆лꙋчи́мъ бж҃їе сїѧ́нїе, и҆зъ тебє̀ неизрече́ннѡ воплоще́ннагѡ сн҃а бж҃їѧ.
Конда́къ, гла́съ ѕ҃:
Свѧтꙋ́ю всѝ застꙋ́пницꙋ сꙋ́щымъ въ бѣда́хъ, благоче́стнѡ воспои́мъ параске́ѵꙋ всечестнꙋ́ю: та́ бо житїѐ ѡ҆ста́вльши тлѣ́нное, и҆ нетлѣ́емое прїѧ́тъ во вѣ́ки: сегѡ̀ ра́ди сла́вꙋ ѡ҆брѣ́те, чꙋде́съ бл҃года́ть, бж҃їимъ велѣ́нїемъ.
І҆́косъ:
Прїиди́те, по́стническое сосло́вїе, прїиди́те чистоты̀ рачи́телє, прїиди́те празднолю́бцы, всѧ́къ во́зрастъ, пѣ́сньми дꙋхо́вными похва́лимъ пꙋстыннолю́бнꙋю го́рлицꙋ, по́стникѡвъ похвалꙋ̀, дѣ́въ ᲂу҆краше́нїе, молча́льникѡвъ ᲂу҆добре́нїе, печа́льныхъ ᲂу҆тѣ́шительницꙋ, болѧ́щихъ посѣти́тельницꙋ, и҆ сꙋ́щымъ въ бѣда́хъ скоропослꙋ́шнꙋю помо́щницꙋ, бг҃омꙋ́дрꙋю параске́ѵꙋ, точа́щꙋю всѣ̑мъ и҆сцѣлє́нїѧ: ѡ҆брѣ́те бо благода́ть чꙋде́съ бж҃їимъ велѣ́нїемъ.
Пѣ́снь з҃. І҆рмо́съ:
Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.
И҆справлѧ́ющи ты̀ сло́во жениха̀ хрⷭ҇та̀, томꙋ̀ невозвра́тнымъ жела́нїемъ послѣ́довала є҆сѝ, гдⷭ҇оимени́таѧ параске́ѵо, вопїю́щи: бл҃гослове́нъ бг҃ъ ѻ҆тє́цъ на́шихъ.
Добро́ты тлѣ́ющїѧ, параске́ѵо прпⷣбнаѧ, небрегла̀ є҆сѝ, смотрѧ́ющи та́мѡ сꙋ́щагѡ воздаѧ́нїѧ, и҆ прїѧ́ла є҆сѝ сла́вꙋ нестарѣ́ющꙋюсѧ, бж҃їю красотꙋ̀ и҆ весе́лїе.
Рѣ́ки твои́хъ слове́съ медото́чныхъ, параске́ѵо, человѣ́кѡмъ дꙋ́шы весе́лїѧ бжⷭ҇твеннагѡ и҆сполнѧ́еши, хвалосло́вѧщымъ пѣ́сньми бг҃а препросла́вленнаго.
Бг҃оро́диченъ:
На тебѣ̀ содѣ́ѧсѧ вели́кое, дв҃ома́ти, та́инство: сн҃ъ бж҃їй и҆зъ чре́ва твоегѡ̀ воплоти́сѧ, и҆ всѣ̑мъ ꙗ҆ви́сѧ, є҆мꙋ́же веселѧ́щесѧ пое́мъ: ѻ҆тцє́въ бж҃е, бл҃гослове́нъ є҆сѝ.
И҆́нъ. І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
За́йде ꙗ҆́коже со́лнце, прпⷣбнаѧ ма́ти, просвѣща́еши же чꙋдесы̀, вѣ́рою те́плою и҆ любо́вїю пою́щихъ: бл҃гослове́нъ бг҃ъ ѻ҆тє́цъ на́шихъ.
И҆спо́лнишасѧ всѧ̑ страны̑ твоегѡ̀ благоꙋха́нїѧ, во ѡ҆брѣ́тенїе моще́й твои́хъ, и҆̀мже вѣ́рою пѣ́ти повелѣва́еши, прпⷣбнаѧ: бл҃гослове́нъ бг҃ъ ѻ҆тє́цъ на́шихъ.
Ѡ҆брѣта́ешисѧ, ма́ти, хромы̑мъ и҆справле́нїе: и҆́бо ного́ю болѣ́вый, скака́ѧ вопїѧ́ше, зовы́й немо́лчнѡ: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
Сѐ, ю҆́же проречѐ, дв҃о, дх҃омъ ст҃ы́мъ вели́кїй и҆са́їа, во чре́вѣ бг҃а заче́нши, родила̀ є҆сѝ: и҆ бл҃гослове́нъ, пречⷭ҇таѧ, пло́дъ твоегѡ̀ чре́ва.
Пѣ́снь и҃. І҆рмо́съ:
И҆зъ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.
По зако́нѣ ѻ҆́ч҃и, зако́нъ ѻ҆те́ческїй, всебл҃же́ннаѧ, и҆́стиннѡ носѧ́щи, де́мѡнскаѧ ли́ца поплева́ла є҆сѝ, гдⷭ҇не воѡбраже́нїе благоче́стнѡ лобыза́ющи, є҆́же прїи́мъ въ мі́рѣ ꙗ҆ви́вшасѧ ѿ дв҃ы ѻ҆трокови́цы: є҆го́же превозно́симъ во вѣ́ки.
Оу҆́мъ бжⷭ҇твенъ, и҆ дх҃а прест҃а́гѡ гꙋ́сль всесочета́нна, славі́й добропѣ́снивый, вѣ́рныхъ похвала̀ верхо́внаѧ, правосла́вїѧ сто́лпе, и҆ ᲂу҆твержде́нїе мꙋ́дрое, цр҃ко́вное пра́вило, мона́хинь сла́ва, и҆ всѣ́хъ прпⷣбныхъ ᲂу҆добре́нїе ꙗ҆ви́ласѧ є҆сѝ, пою́щи хрⷭ҇та̀ во вѣ́ки.
Мѷрополо́жница дх҃а прест҃а́гѡ, ма́ти, показа́ласѧ є҆сѝ, и҆злїѧ́нїемъ мѵ́ра благово́нныхъ твои́хъ и҆ мꙋ́дрыхъ ᲂу҆че́нїй, потреблѧ́ющи пре́лести ѕлосмра́днꙋю тлю̀, и҆ благово́нствꙋѧ нра́вомъ твои́мъ, параске́ѵо, честнꙋ́ю цр҃ковь зовꙋ́щи непреста́ннѡ: пѣ́сньми тѧ̀ превозно́симъ хрⷭ҇тѐ, во вѣ́ки.
Бг҃оро́диченъ:
Бж҃їѧ гора̀ тꙋ́чнаѧ, є҆ѧ́же пра́ѻц҃ъ дв҃дъ ᲂу҆ѧсни́въ дре́вле поѧ̀ прⷪ҇ро́чески, ты̀ ꙗ҆ви́ласѧ є҆сѝ дв҃о, ѿ неѧ́же ѿсѣче́сѧ ка́мыкъ краеꙋго́льный хрⷭ҇то́съ, и҆ сокрꙋшѝ крѣ́пость і҆́дѡльскꙋю: того̀ непреста́ннѡ пое́мъ, и҆ превозно́симъ во вѣ́ки.
И҆́нъ. І҆рмо́съ:
Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.
Оу҆крѣ́пльшисѧ ᲂу҆мо́мъ, безпло́тныхъ жела́нїемъ, вдала̀ є҆сѝ тѣ́ло постꙋ̀, и҆ живе́ши во вѣ́ки.
Пребога́таѧ въ жена́хъ ꙗ҆ви́сѧ, бл҃же́ннаѧ параске́ѵо, пою́щи творцꙋ̀: тѧ̀ превозно́симъ во вѣ́ки.
Сꙋ́щꙋ разсла́бленномꙋ въ лѣ̑та мнѡ́га, честна́ѧ, и҆сцѣлє́нїѧ подадѐ недꙋ́га: тѣ́мъ тѧ̀ воспѣва́ше прпⷣбнаѧ во вѣ́ки.
Бг҃оро́диченъ:
Соше́дшаго съ нб҃съ, и҆ въ ложесна̀ дв҃и́чєскаѧ все́льшасѧ гдⷭ҇а, по́йте и҆ превозноси́те є҆го̀ во вѣ́ки.
Пѣ́снь ѳ҃. І҆рмо́съ:
Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно. є҆го́же велича́юще, съ нбⷭ҇ными вѡ́и тѧ̀ ᲂу҆бл҃жа́емъ.
Посо́бствꙋющꙋ тѧ̀ по хрⷭ҇то́вѣ цр҃кви, человѣкоꙋбі́йца зрѣ́ти не могі́й, и҆скꙋшє́нїѧ тебѣ̀ простира́етъ: ѻ҆ба́че непрекло́нна пребы́вши, мы́слєннымъ врагѡ́мъ проти́виласѧ є҆сѝ до́блественнѡ, покланѧ́ющисѧ ѻ҆́бразꙋ хрⷭ҇то́вꙋ, бг҃омꙋ́драѧ параске́ѵо.
Оу҆кра́шена несказа́нною, бг҃омꙋ́драѧ, до́блестїю, и҆ ᲂу҆пещре́на сїѧ́ньми свѣтлѣ́йшими, ра́достнѡ, пребл҃же́ннаѧ, предстои́ши престо́лꙋ зижди́телѧ бг҃а, и҆дѣ́же пра́зднꙋющихъ гла́съ, бг҃омꙋ́драѧ параске́ѵо.
Твои́хъ по́двигѡвъ досто́йнꙋю прїѧ́ла є҆сѝ по́честь, и҆ вѣнцено́сица ны́нѣ на нб҃сѣ́хъ со а҆́гг҃лы ликовствꙋ́ющи, и҆дѣ́же прⷪ҇ро́ческїй со́нмъ, и҆ а҆пⷭ҇тѡлъ, и҆ мꙋ́чєникъ вои́стиннꙋ вѡ́инства мнѡ́га, и҆дѣ́же патрїа́рхѡвъ ликостоѧ̑нїѧ, помина́й на́съ, прпⷣбнаѧ ма́ти параске́ѵо.
Бг҃оро́диченъ:
Побо́рствꙋющи лю́демъ вѣ̑рнымъ бо бранѣ́хъ, во́инствꙋ на́шемꙋ на сопроти̑вныѧ да́ждь побѣ̑ды, бг҃ороди́тельнице, покрыва́ющи ѿ всѧ́кагѡ навѣ́та врагѡ́въ, мт҃и бг҃а сло́ва неискꙋсобра́чнаѧ чⷭ҇таѧ, да твоего̀ сн҃а пою́ще, тѧ̀ велича́емъ.
И҆́нъ. І҆рмо́съ:
Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.
Не преста́й молѧ́щи хрⷭ҇та̀, ма́ти прпⷣбнаѧ, и҆зба́вити ны̀ ѿ бѣ́дъ рабы̑ твоѧ̑, и҆̀же ѿ дꙋшѝ пою́щыѧ тѧ̀ и҆ велича́ющыѧ.
Красота̀ дѣ́въ ꙗ҆ви́ласѧ є҆сѝ, прпⷣбнаѧ, ꙗ҆́кѡ а҆́гг҃льскомꙋ житїю̀ поревнова́ла є҆сѝ: не преста́й молѧ́щи ѡ҆ ѻ҆те́чествѣ твое́мъ.
Сочета́ласѧ є҆сѝ со безпло́тными ликостоѧ̑нїи, и҆ влⷣцѣ предстои́ши ра́дꙋющисѧ, съ мꙋ́дрыми дѣ́вами, семꙋ̀ молѧ́щисѧ ѡ҆ мі́рѣ.
Бг҃оро́диченъ:
Ра́дости и҆спо́лни мѧ̀ и҆ весе́лїѧ, дв҃о, ꙗ҆́кѡ прїи́мши винꙋ̀ ра́дости: ты́ бо и҆сточи́ла є҆сѝ всѣ̑мъ ра́дованїе.
Свѣти́ленъ. Подо́бенъ: Жєны̀ ᲂу҆слы́шите:
Ꙗ҆́кѡ бжⷭ҇твенный свѣ́тъ, параске́ѵо, пѣ́сненнѡ цр҃кви ꙗ҆ви́ласѧ є҆сѝ, красото́ю сїю̀ ѡ҆зари́вши свѣ́томъ лица̀ твоегѡ̀, предо́браѧ невѣ́сто хрⷭ҇то́ва: къ немꙋ́же непреста́ннѡ моли́сѧ ѡ҆ всѣ́хъ на́съ.
Два́жды.
Сла́ва, и҆ ны́нѣ, бг҃оро́диченъ:
Дре́вле дарова́ннꙋю мѝ ри́зꙋ ба́нею креще́нїѧ ѡ҆скверни́въ стра́стнымъ блꙋже́нїемъ, ᲂу҆жаса́юсѧ ѻ҆каѧ́нный, ча́съ помышлѧ́ѧ вои́стиннꙋ бжⷭ҇твеннагѡ сꙋда̀, дв҃о всенепоро́чнаѧ, предста́ни тогда̀, и҆ и҆зба́ви мѧ̀ стра́шнагѡ преще́нїѧ.
На хвали́техъ стїхи̑ры на д҃, гла́съ и҃. Поⷣ: Ѽ пресла́внагѡ чꙋдесѐ!
Грѧди́те всѝ, бг҃омꙋ́дрїи, ꙳ ѿ землѝ да́льнїѧ, ꙳ ра́цѣ прикоснꙋ́вшесѧ преподо́бныѧ, ꙳ и҆ прошє́нїѧ своѧ̑ ѿ дꙋшѝ приносѧ́ще, ꙳ прїими́те и҆збавле́нїе ꙳ ѿ страсте́й разли́чныхъ: ꙳ и҆ні́и же грѣхѡ́въ разрѣше́нїе, ꙳ и҆ къ бг҃ꙋ присвое́нїе, ꙳ и҆ всѧ́кꙋ по́льзꙋ на́мъ ко спасе́нїю.
Два́жды.
Поще́нїѧ пꙋ́ть воспрїе́мши, ꙳ жите́йскїѧ бꙋ́ри и҆збѣ́гши, ꙳ параске́ѵо сла́внаѧ, ꙳ ѻ҆́во ᲂу҆́бѡ съ мꙋ́дрыми дѣ́вами, ꙳ свѣтоно́сна вошла̀ є҆сѝ во дворы̀ гдⷭ҇а твоегѡ̀: ꙳ ѻ҆́во же ᲂу҆невѣ́стившисѧ є҆мꙋ̀, ꙳ и҆сточа́еши и҆сцѣлє́нїѧ притека́ющымъ къ тебѣ̀, ꙳ и҆ ѿ дꙋше́вныхъ недꙋ̑гъ и҆збавлѧ́еши, ꙳ и҆̀же къ бг҃ꙋ твои́ми моли́твами.
Наде́ждею хрⷭ҇то́вою и҆ вѣ́рою возмо́гши, ꙳ стѧжа́нїѧ роди́телей ѿбѣ́гши, ꙳ и҆ со безпло́тными ликꙋ́еши, ꙳ прпⷣбнаѧ ма́ти параске́ѵо сла́внаѧ. ꙳ тѣ́мже и҆сцѣле́нїе то́чиши по сме́рти: ꙳ твоѧ̑ бо мо́щи показа́шасѧ всѧ́кимъ благоꙋха́нїемъ и҆спо́лнены, ꙳ є҆́же хрⷭ҇то́съ тебѣ̀ дарова̀, є҆го́же возлюби́ла є҆сѝ, ꙳ є҆го́же возжелѣ́ла є҆сѝ, ꙳ и҆ то́й тѧ̀ просла́ви, прпⷣбнаѧ.
Сла́ва, гла́съ и҃:
Ѻ҆те́чество и҆ сро́дство и҆ и҆мѣ́нїе ѡ҆ста́вльши, параске́ѵо, и҆ нечє́стїѧ всѧ̑ мїрска̑ѧ возненави́дѣвши, бг҃а є҆ди́наго возлюби́ла є҆сѝ, є҆мꙋ́же и҆ поще́нїемъ ᲂу҆невѣ́стиласѧ є҆сѝ, и҆ была̀ є҆сѝ ст҃а́гѡ дх҃а жили́ще, ѿ негѡ́же свѣтоли́тїемъ просвѣти́вшисѧ, того̀ молѝ спастѝ дꙋ́шы на́шѧ.
И҆ ны́нѣ, бг҃оро́диченъ: Влⷣчце, прїимѝ мл҃твꙋ ра̑бъ твои́хъ:
Славосло́вїе вели́кое. И҆ ѿпꙋ́стъ. А҆́ще ли не пое́мъ полѷеле́а, тогда̀ пое́мъ стїхо́внꙋ во ѻ҆ктѡ́ихѣ.
Сла́ва, прпⷣбнѣй, гла́съ в҃:
Прпⷣбнаѧ ма́ти параске́ѵо, и҆змла́да себѐ самꙋ́ю возложи́вши хрⷭ҇тꙋ̀ бг҃ꙋ, и҆ ѿ негѡ̀ ᲂу҆крѣплѧ́ема, плотскі̑ѧ стра̑сти покори́ла є҆сѝ, и҆ хꙋ́ждшее порабо́тила є҆сѝ лꙋ́чшемꙋ: тѣ́мже и҆ вѣне́цъ триплете́нный прїѧ́ла є҆сѝ, молѝ спастѝ дꙋ́шы на́шѧ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Є҆гда̀ ѿ дре́ва:
Є҆гда̀ нескве́рнаѧ а҆́гница ви́дѣ своего̀ а҆́гнца, на заколе́нїе ꙗ҆́кѡ чл҃вѣ́ка во́лею влеко́ма, пла́чꙋщи глаго́лаше: безча́дствовати мѧ̀ ны́нѣ тщи́шисѧ, хрⷭ҇тѐ, ро́ждшꙋю тѧ̀: что̀ сїѐ сотвори́лъ є҆сѝ, и҆зба́вителю всѧ́ческихъ; ѻ҆ба́че воспѣва́ю и҆ сла́влю твою̀ па́че ᲂу҆ма̀ и҆ сло́ва кра́йнюю бла́гость, чл҃вѣколю́бче.
На лїтꙋргі́и, бл҃жє́нна, ѿ пе́рвагѡ канѡ́на пѣ́снь г҃: и҆ ѿ втора́гѡ пѣ́снь ѕ҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. А҆пⷭ҇лъ къ гала́тѡмъ, зача́ло с҃и: Бра́тїе, пре́жде прише́ствїѧ вѣ́ры: А҆ллилꙋ́їа. Терпѧ̀ потерпѣ́хъ гдⷭ҇а и҆ внѧ́тъ мѝ. Є҆ѵⷢ҇лїе матѳе́а зача́ло р҃д: Речѐ гдⷭ҇ь при́тчꙋ сїю̀: ᲂу҆подо́бисѧ црⷭ҇твїе нбⷭ҇ное десѧти́мъ дѣ́вамъ: Прича́стенъ: Ра́дꙋйтесѧ првⷣнїи ѡ҆ гдⷭ҇ѣ.