Мѣ́сѧца тогѡ́же во в҃-й де́нь. Ст҃а́гѡ свѧщенномꙋ́ченика кѷпрїа́на: И҆ ст҃ы́ѧ мꙋ́ченицы і҆ꙋсті́ны:
И҆ ст҃а́гѡ и҆ бл҃же́ннагѡ а҆ндре́а, хрⷭ҇та̀ ра́ди ю҆ро́дивагѡ.
Слꙋ́жба є҆гѡ̀ пи́сана по се́й слꙋ́жбѣ.
И҆ прпⷣбныѧ и҆ благовѣ́рныѧ вели́кїѧ кнѧги́ни а҆́нны ка́шинскїѧ.
Слꙋ́жба є҆ѧ̀ пи́сана въ приложе́нїи.
На Гдⷭ҇и, воззва́хъ, стїхи̑ры на ѕ҃, гла́съ д҃. Поⷣ: Ꙗ҆́кѡ до́блѧ:
Свѧще́нническимъ пома́занїемъ, ꙳ и҆ мꙋ́ченическою кро́вїю, ꙳ бг҃ꙋ прибли́жилсѧ є҆сѝ соверше́ннѣйше, кѷпрїа́не всесла́вне, ꙳ цвѣ́те є҆стества̀, ꙳ добро́то слове́съ, ꙳ мꙋ́дрости верхо́вниче, ꙳ пра́вости догма́тѡвъ мѣ́рило, ꙳ канѡ́нѡвъ всесли́чнаѧ правота̀, ꙳ и҆ цр҃кве́й благолѣ́пїе.
Стра́ждꙋщымъ благосла́вїе, ꙳ мꙋ́ченикѡмъ вѣне́цъ, ꙳ подписꙋ́ѧ ᲂу҆вѣ́рилъ є҆сѝ бг҃омꙋ̑дрыѧ, ꙳ дерза́ти до́блественнѣйше, ꙳ на разли̑чныѧ мꙋ̑ки и҆ ᲂу҆́зы и҆ темни̑цы, ꙳ и҆ тѣле́съ ѡ҆бнажє́нїѧ, ꙳ и҆ вѧза̑нїѧ, и҆ стꙋ́дєни лютѣ́йшыѧ, ꙳ и҆ на ра̑ны и҆ сме́рть по́слѣжде, ꙳ кѷпрїа́не всече́стне.
На чарова̑нїѧ де́мѡнскаѧ, ꙳ пѣ́сньми дх҃а, ꙳ и҆ крⷭ҇та̀ зна́менїемъ проти́вльшисѧ, ꙳ дѣ́вство соблюла̀ є҆сѝ, ꙳ и҆ мꙋ́ченица непобѣди́маѧ привела́сѧ є҆сѝ хрⷭ҇тꙋ̀, ꙳ свѧще́ннѣйшее заколе́нїе. ꙳ тѣ́мъ полꙋчи́ла є҆сѝ вѣнцы̀ побѣ̑дныѧ, і҆ꙋсті́но, дѣ́вамъ и҆ мꙋ́ченикѡмъ ꙳ ᲂу҆краше́наѧ свѣ́тлость.
Сла́ва, гла́съ в҃:
Оу҆че́нїѧ пре́лесть, и҆ зна́нїе і҆́дѡлѡвъ ѿве́рглъ є҆сѝ и҆́стиннѡ, и҆ крⷭ҇та̀ ѡ҆дѣ́ѧлсѧ є҆сѝ ѻ҆рꙋ́жїемъ на спасе́нїе, кѷпрїа́не всеблаже́нне, пове́ргъ кни̑ги волшє́бныѧ, человѣ́ка ѿложи́лъ є҆сѝ ве́тхаго, и҆ всели́сѧ въ тѧ̀ бг҃озна́нїе трⷪ҇цы є҆диносꙋ́щныѧ: сїю̀ молѝ і҆ера́рше, со а҆́гг҃лы, є҆́же спасти́сѧ на́мъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Є҆гда̀ ѿ дре́ва:
Дре́вꙋ крⷭ҇тномꙋ тѧ̀ і҆и҃се, пригвожде́на зрѧ́щи неискꙋсобра́чнаѧ, пла́чꙋщи глаго́лаше: ча́до сладча́йшее, почто̀ ѡ҆ста́вилъ є҆сѝ менѐ ро́ждшꙋю тѧ̀ є҆ди́нꙋ; свѣ́те непристꙋ́пный пребезнача́льнагѡ ѻ҆ц҃а̀! потщи́сѧ и҆ просла́висѧ, ꙗ҆́кѡ да сла́вꙋ полꙋча́тъ бж҃е́ственнꙋю, бжⷭ҇твєнныѧ стрⷭ҇ти твоѧ̑ сла́вѧщїи.
На стїхо́внѣ ѻ҆ктѡ́иха. Сла́ва, гла́съ в҃:
Свѣти́льника бг҃осїѧ́ннаго, па́ѵлова собесѣ́дника и҆ дѣлѡ́мъ соприча́стника, кѷпрїа́на восхва́лимъ: со а҆́гг҃лы бо весели́тсѧ, прїи́мъ вѣне́цъ нетлѣ́нїѧ ѿ є҆ди́нагѡ бг҃а: и҆ мо́литсѧ спасти́сѧ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: Поⷣ: Є҆гда̀ ѿ дре́ва:
Є҆гда̀ нескве́рнаѧ а҆́гница, ви́дѣ своего̀ а҆́гнца, на заколе́нїе ꙗ҆́кѡ человѣ́ка во́лею влеко́ма, пла́чꙋщи глаго́лаше: безча́дствовати мѧ̀ ны́нѣ тщи́шисѧ, хрⷭ҇тѐ, ро́ждшꙋю тѧ̀, что̀ сїѐ сотвори́лъ є҆сѝ, и҆зба́вителю всѧ́ческихъ; ѻ҆ба́че воспѣва́ю и҆ сла́влю твою̀, ю҆́же па́че ᲂу҆ма́ же и҆ сло́ва, кра́йнюю бл҃гость, чл҃вѣколю́бче.
Тропа́рь, гла́съ д҃:
И҆ нра́вѡмъ прича́стникъ, и҆ прⷭ҇то́лѡмъ намѣ́стникъ, а҆по́столѡмъ бы́въ, дѣѧ́нїе ѡ҆брѣ́лъ є҆сѝ, бг҃одохнове́нне въ видѣ́нїѧ восхо́дъ: сегѡ̀ ра́ди сло́во и҆́стины и҆справлѧ́ѧ, и҆ вѣ́ры ра́ди пострада́лъ є҆сѝ да́же до кро́ве, сщ҃енномꙋ́чениче кѷпрїа́не, молѝ хрⷭ҇та̀ бг҃а, спасти́сѧ дꙋша́мъ на́шымъ.
На ᲂу҆́трени ѻ҆́ба канѡ́на ѻ҆ктѡ́иха, без̾ мч҃ничнѡвъ: и҆ ст҃ы́хъ на ѕ҃.
Канѡ́нъ, є҆гѡ́же краегране́сїе:
Пою̀, бл҃же, свѣтоза́рнꙋю твою̀ бл҃года́ть.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крестоѻбра́зныма мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.
Съ премі́рными чи́нми ны́нѣ водворѧ́ѧсѧ, ѽ свѧще́ннаѧ и҆ бжⷭ҇твеннаѧ главо̀! съ нб҃сѐ при́зри на благоче́стнѡ пою́щыѧ тѧ̀, и҆ твои́ми моли́твами сохранѧ́й.
Во мра́цѣ невѣ́дѣнїѧ, прпⷣбне, лю́тѣ ѡ҆держи́мь, и҆ дꙋшегꙋ́бными страстьмѝ пло́ти невоздержа́нїемъ ты̀ разжига́емь, преложе́нїе пресла́вно ѡ҆брѣ́лъ є҆сѝ внеза́пꙋ, всебл҃же́нне.
Гꙋби́телей ᲂу҆́бѡ на сѣда́лищи пре́жде, ѻ҆́ч҃е, сѣдѣ́лъ є҆сѝ, и҆ на сѣда́лищи пресвѵ́терѡвъ па́ки хрⷭ҇та̀ просла́вилъ є҆сѝ, и҆змѣни́всѧ ꙗ҆вле́ннѡ влⷣчнею бжⷭ҇твенною бл҃года́тїю.
Бг҃оро́диченъ:
Дв҃а по ржⷭ҇твѣ̀ пребыла̀ є҆сѝ: сама́го бо ро́ждши творца̀ всѣ́хъ и҆ гдⷭ҇а, неѻбы́чнѡ и҆ стра́ннѡ на́мъ ꙗ҆́вльшасѧ тѣ́ломъ, бг҃ороди́тельнице мт҃и приснодв҃о.
Пѣ́снь г҃. І҆рмо́съ:
Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.
Ꙗ҆́кѡ па́ѵлъ ко хрⷭ҇тꙋ̀ дꙋше́внꙋю любо́вь преложи́въ, кѷпрїа́не всемꙋ́дре, тогѡ̀ ᲂу҆чени́къ бы́лъ є҆сѝ.
Ѡ҆брꙋча́етъ тѝ хрⷭ҇то́съ, вмѣ́стѡ ри́зъ стра́стныхъ ѡ҆дѣѧ́нїе сла́вы да́рꙋѧ, и҆ возрожде́нїѧ ѻ҆де́ждꙋ.
Поꙋ́стникъ по́стническїй пре́жде бы́вый терпѣли́въ, по́слѣжде, кѷпрїа́не всехва́льне, свидѣ́тель и҆́стины бы́лъ є҆сѝ.
Бг҃оро́диченъ:
Гдⷭ҇ьственнѡ и҆ и҆́стиннѡ тѧ̀ бцⷣꙋ вѣ́рнїи почита́емъ: ты́ бо бг҃а родила̀ є҆сѝ пло́ть бы́вша, всенепоро́чнаѧ.
Сѣда́ленъ, гла́съ и҃. Подо́бенъ: Премꙋ́дрости.
Нака́занъ въ пре́лести прилѣ́жнѡ, ꙗ҆́кѡ па́ѵелъ зва́нъ бы́сть съ нб҃сѐ, крⷭ҇то́мъ наставлѧ́емь къ свѣ́тꙋ зна́нїѧ: честны́ѧ бо дв҃ы любо́вїю разжига́емь, тоѧ̀ ра́ди сочета́лсѧ є҆сѝ зижди́телю человѣ́кѡвъ. тѣ́мъ ѡ҆бличи́въ не́мощь вра́жїю, съ не́ю сподо́билсѧ є҆сѝ ли́кꙋ мч҃никѡвъ. кѷпрїа́не а҆рхїере́євъ ᲂу҆добре́нїе, молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чествꙋ́ющымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Въ напа̑сти многоплетє́нныѧ впа́дъ, ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ: и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бла́гости. тѣ́мже, пречⷭ҇таѧ, и҆зъ тебѐ воплоще́нномꙋ безъ сѣ́мене моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости, долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ, и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стра̑сти твоѧ̑.
Пѣ́снь д҃. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Возбнꙋ́въ, бг҃огла́се, ѿ неи́стовства пе́рвагѡ, де́мѡнскꙋю ле́сть, и҆ дꙋшетлѣ́ннꙋю пре́лесть всю̀ ѡ҆бличи́лъ є҆сѝ, и҆ ра́дꙋѧсѧ взыва́лъ є҆сѝ: сла́ва си́лѣ твое́й гдⷭ҇и.
До́блественнѡ і҆ꙋсті́на ᲂу҆крѣплѧ́ема, и҆ чⷭ҇тꙋю дв҃ꙋ и҆ ѡ҆бра́дованнꙋю ѕѣлѡ̀ молѧ́щи, сѣ́тей и҆збѣжѐ и҆ ко́зней же вра́жїихъ.
Оу҆крѣплѧ́ема вѣ́рою твоегѡ̀ жениха̀, и҆ крⷭ҇тною си́лою ѡ҆дѣ́ѧна, де́мѡны неѧ́тна вопїю́щи пребыла̀ є҆сѝ: сла́ва си́лѣ твое́й, гдⷭ҇и.
Бг҃оро́диченъ:
И҆́же є҆стество́мъ свобо́денъ сы́й, ѻ҆́бразомъ раба̀ ѡ҆бнища̀ бога́тствомъ бла́гости, мт҃и приснодв҃о, и҆зъ тебє̀ по ѵ҆поста́си всѐ прїе́мь человѣ́чество.
Пѣ́снь є҃. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Побо́рницꙋ и҆мꙋ́щи ꙗ҆́вѣ чⷭ҇тꙋю бг҃ома́терь, ѡ҆бога́щшисѧ і҆ꙋсті́но, честно́е дѣ́вство сохрани́ла є҆сѝ невре́дно.
Ѡ҆дꙋшевле́нный хрⷭ҇то́въ и҆ краснѣ́йшїй ѻ҆́бразъ, почти́мъ і҆ꙋсті́нꙋ, сокрове́ннꙋю добро́тꙋ, и҆ некра́домое возложе́нїе.
Невѣ́ста хрⷭ҇то́ва при́снаѧ и҆ нескве́рнаѧ, страда́нїемъ и҆ поще́нїемъ воспрїе́мши пра́веднѡ сꙋгꙋ́бъ вѣне́цъ но́ситъ.
Бг҃оро́диченъ:
Оу҆́мъ а҆́гг҃льскїй и҆ человѣ́ческїй не мо́жетъ сказа́ти неизрече́ннагѡ и҆ пресла́внагѡ чꙋдесѐ ржⷭ҇тва̀ твоегѡ̀, всечⷭ҇таѧ.
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Ѕло́бы дна̀ преиспо́днѧгѡ доше́лъ є҆сѝ, къ кра́йнѣйшей же па́ки добродѣ́тели, ѻ҆́ч҃е, возше́лъ є҆сѝ на высотꙋ̀, пресла́внѡ и҆змѣни́всѧ бжⷭ҇твеннымъ креще́нїемъ.
Бы́лъ є҆сѝ слꙋжи́тель де́мѡнѡвъ пе́рвѣе, но хрⷭ҇то́въ бг҃оѧвле́нный ᲂу҆чени́къ показа́лсѧ є҆сѝ, при́сною любо́вїю жела́нїе возлюби́въ послѣ́днее.
Мнѡ́гїѧ ты̀ влⷣцѣ приве́лъ є҆сѝ мꙋ́ченики, кꙋ́плей велича́йшꙋю ꙗ҆влѧ́ѧ, кро́вїю малѣ́йшею црⷭ҇тво нбⷭ҇ное, бг҃омꙋ́дре, кꙋпи́ти.
Бг҃оро́диченъ:
Расто́ргни моѧ̑ плєни́цы согрѣше́нїй, бг҃оневѣ́сто, грѣхо́внагѡ зако́на, жи́зни зако́номъ свобо́дꙋ да́рꙋющи, влⷣкꙋ зако́на ро́ждшаѧ.
Конда́къ, гла́съ а҃. Подо́бенъ: Ли́къ а҆́гг҃льскїй:
Ѿ хꙋдо́жества волше́бнагѡ ѡ҆брати́всѧ, бг҃омꙋ́дре, къ позна́нїю бжⷭ҇твенномꙋ, показа́лсѧ є҆сѝ мі́рꙋ вра́чь мꙋдрѣ́йшїй, и҆сцѣлє́нїѧ да́рꙋѧ чествꙋ́ющымъ тѧ̀, кѷпрїа́не со і҆ꙋсті́ною: съ не́юже моли́сѧ чл҃вѣколю́бцꙋ влⷣцѣ, спастѝ дꙋ́шы на́шѧ.
І҆́косъ:
Цѣле́нїй твои́хъ, свѧ́те, дарова̑нїѧ мнѣ̀ низпосла́въ, и҆ недꙋ́гꙋющее моѐ се́рдце гно́емъ грѣхо́внымъ, моли́твами твои́ми и҆сцѣлѝ: ꙗ҆́кѡ да сло́во пѣ́нїѧ ѿ скве́рныхъ ᲂу҆сте́нъ мои́хъ ны́нѣ принесꙋ́ ти, и҆ воспою̀ болѣ̑зни твоѧ̑, ꙗ҆̀же показа́лъ є҆сѝ, свѧщенномꙋ́чениче, покаѧ́нїемъ до́брымъ и҆ бл҃же́ннымъ, и҆ бг҃ꙋ приближа́ющимсѧ. тогѡ́ бо ᲂу҆держа́нъ рꙋко́ю, напра́вилсѧ є҆сѝ ꙗ҆́кѡ по лѣ́ствицѣ къ нбⷭ҇нымъ, непреста́ннѡ молѧ́сѧ спастѝ дꙋ́шы на́шѧ.
Пѣ́снь з҃. І҆рмо́съ:
Спасы́й во ѻ҆гнѝ а҆враа́мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше: препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ.
На свѧщеннонача́льство вше́дъ, свѧще́ннѣйшїй ѻ҆́бразъ, свѧщеннонача́льникѡмъ себѐ и҆ пра́вило ꙗ҆ви́лъ є҆сѝ, взыва́ѧ: препѣ́тый гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ.
Живонача́льныѧ тебѣ̀ десни́цы и҆́стиннѡ и҆змѣне́нїе, ѻ҆́ч҃е, наше́дшее, мꙋ́дра тѧ̀ сотворѝ бг҃овѣща́телѧ пою́ща: препѣ́тый гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ.
Ѻ҆рꙋ́жїе непобѣди́мое на́мъ на проти́внаго, блаже́нне, ты̀ ꙗ҆ви́лсѧ є҆сѝ, тогѡ̀ ѡ҆блича́ѧ лє́сти, пою́щымъ: препѣ́тый гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ.
Бг҃оро́диченъ:
Нбⷭ҇нїи ли́цы, и҆ пренебе́снїи собо́ри, пѣсносло́вѧтъ и҆зъ тебє̀, бцⷣе, рожде́ннаго, зовꙋ́ще: препѣ́тый гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ.
Пѣ́снь и҃. І҆рмо́съ:
Весели́сѧ, і҆ерꙋсали́ме, торжествꙋ́йте лю́бѧщїи сїѡ́на: ца́рствꙋѧй бо во вѣ́ки гдⷭ҇ь си́лъ прїи́де, да благоговѣ́етъ всѧ̀ землѧ̀ ѿ лица̀ є҆гѡ̀, и҆ да вопїе́тъ: благослови́те, всѧ̑ дѣла̀ гдⷭ҇нѧ, гдⷭ҇а.
Премꙋ́дрѡ є҆́ллинскїѧ мꙋ́дрости небре́глъ є҆сѝ, сла́вне, а҆пⷭ҇лѡвъ же бжⷭ҇твенное вѣща́нїе, дх҃омъ брѧца́емо, ѻ҆́ч҃е, и҆ ѻ҆́гненными ѧ҆зы̑ки ꙗ҆́снѡ и҆зглаша́емо, вопїѧ́лъ є҆сѝ: благослови́те, всѧ̑ дѣла̀ гдⷭ҇нѧ, гдⷭ҇а.
Восте́клъ є҆сѝ на высѡ́каѧ и҆ премі́рнаѧ свѣ́тлѡ селє́нїѧ, хрⷭ҇тꙋ̀ кро́вїю ꙗ҆́кѡ же́ртвою непоро́чною приноси́мь, ѻ҆́ч҃е, заколе́нїе жи́во, прїѧ́тно и҆ благоꙋго́дно, воспѣва́ѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Побѣжда́еми ѿ въ тебѐ все́льшїѧсѧ благода́ти, де́мѡнстїи полцы̀ ѿгонѧ́ютсѧ, и҆ ѿбѣга́ютъ стра̑сти недꙋ́гꙋющихъ, бг҃омꙋ́дре, вѣ́рнїи же бжⷭ҇твеннагѡ свѣ́та насыща́емсѧ, вопїю́ще: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Ликꙋ́ютъ со а҆́гг҃льскими, пречⷭ҇таѧ, си́лами ѡ҆ ржⷭ҇твѣ̀ твое́мъ, бг҃ома́ти, и҆ бцⷣꙋ вѣ́рою тѧ̀ и҆менꙋ́ющїи: ты́ бо влⷣкꙋ и҆ и҆зба́вителѧ на́мъ родила̀ є҆сѝ, є҆мꙋ́же пое́мъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Пѣ́снь ѳ҃. І҆рмо́съ:
Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови благослове́нїе процвѣла̀ є҆сѝ. тѣ́мъ тѧ̀ всѝ велича́емъ.
Свы́ше на́съ благоче́стнѡ пою́щихъ тѧ̀, назира́еши бжⷭ҇твенною бл҃года́тїю, твои́ми моли́твами бг҃оглаго́льниче, и҆ ѻ҆рꙋ́жїемъ благоволе́нїѧ вѣнчава́ѧ, ми́ръ и҆ спасе́нїе да́рꙋй на́мъ, ꙗ҆́кѡ свѧщеннонача́льникъ бжⷭ҇твеннѣйшїй.
Тече́нїе и҆сцѣле́нїй ѻ҆би́льнѡ пе́рсть твоѧ̀ лю́бѧщымъ тѧ̀ воздае́тъ: тебе́ же кѷпрїа́не, жєны̀ бг҃онѡ́сны ꙗ҆́кѡ бжⷭ҇твенно сокро́вище прїе́млютъ, и҆ ᲂу҆се́рднѡ ꙗ҆влѧ́ютъ сокрове́ннаго, да всѝ тебѐ наслади́мсѧ.
Напра́вити на́ше ко хрⷭ҇тꙋ̀, пребога́те, ше́ствїе дѣѧ́нїемъ, и҆ бг҃оꙋго́днымъ житїе́мъ, и҆ чистѣ́йшимъ ѡ҆чище́нїемъ, сꙋ́щѡ бж҃їю ти́хость ᲂу҆молѝ, ꙗ҆́кѡ і҆ера́рхъ сострада́тельнѣйшїй.
Бг҃оро́диченъ:
Оу҆крѣпѝ на́шꙋ дꙋше́внꙋю не́мощь, бг҃ома́ти, си́лою твое́ю, разрѣшѝ тѧготꙋ̀, прест҃а́ѧ, налага́емꙋю рабѡ́мъ твои̑мъ, мі́рꙋ пра́вды сл҃нце несказа́ннѡ возсїѧ́вшаѧ.
Свѣти́ленъ. Подо́бенъ: Жєны̀, ᲂу҆слы́шите:
Въ волхва́хъ несосꙋжде́нна, и҆ є҆ди́наго пребо́льша, премѣ́ншаго нра́въ, и҆ попали́вшаго кни̑ги наставлѧ́ющыѧ ко пре́лести, и҆ свидѣ́тельства вѣне́цъ страннолѣ́пнѡ прїе́мшаго, кѷпрїа́на похва́лимъ, страда́льцєвъ зерца́ло.
Бг҃оро́диченъ:
Дре́вле бж҃ества̀ наде́ждею прельсти́вый мѧ̀ ѕлоко́зненный, пло́тнымъ предложе́нїемъ премꙋ́дреннѡ па́ки прельща́етсѧ, ѿ дв҃ы возсїѧ́вшагѡ: и҆ си́це ѡ҆сꙋжде́нїе пло́тное пло́тїю разрѣши́сѧ, сме́рти ᲂу҆мертви́вшейсѧ.
На стїхо́внѣ ѻ҆ктѡ́иха. Сла́ва, гла́съ и҃:
И҆́же ѕло́бы пре́жде ѻ҆па́сный побо́рникъ, цр҃кве по́слѣжди и҆́стинный ᲂу҆чи́тель, и҆́же слꙋжи́тель пре́лести і҆́дѡлѡвъ, свѧщеннонача́льникъ вѣ́ры ꙗ҆ви́сѧ, и҆ блꙋ́дный цѣломꙋ́дренъ, честны́ѧ ра́ди дѣ́вы: ѻ҆бои́хъ моли́твами спаси́ ны, гдⷭ҇и. (с.60)
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Ѽ пресла́внагѡ чꙋдесѐ!
Что̀ зри́мое видѣ́нїе, ꙳ є҆́же мои́ма ѻ҆чи́ма ви́дитсѧ, ѽ влⷣко; содержа́й, всю̀ тва́рь, ꙳ на дре́вѣ воздви́женъ бы́въ, ꙳ и҆ ᲂу҆мира́еши всѣ̑мъ даѧ́й жи́знь, ꙳ бцⷣа пла́чꙋщи глаго́лаше, ꙳ є҆гда̀ ᲂу҆зрѣ̀ на крⷭ҇тѣ̀ возноси́ма, ꙳ и҆зъ неѧ̀ неизрече́ннѡ возсїѧ́вшаго ꙳ бг҃а и҆ чл҃вѣ́ка.
На лїтꙋргі́и, бл҃жє́нна ѻ҆ктѡ́иха, на д҃. И҆ ст҃ы́хъ пѣ́снь г҃-ѧ, на д҃. Прокі́менъ, гла́съ з҃: Честна̀ предъ гдⷭ҇емъ: Сті́хъ: Что̀ возда́мъ: А҆пⷭ҇толъ къ тїмоѳе́ю, зача́ло с҃п. А҆ллилꙋ́їа, гла́съ в҃: Сті́хъ: Свѧще́нницы твоѝ ѡ҆блекꙋ́тсѧ: Є҆ѵⷢ҇лїе і҆ѡа́нна, зача́ло л҃ѕ. Прича́стенъ: Въ па́мѧть вѣ́чнꙋю:
Слꙋ́жба ст҃а́гѡ а҆ндре́а пое́тсѧ на повече́рїи.
Стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ!
Ѽ пресла́внагѡ чꙋдесѐ, ꙳ ꙗ҆́кѡ во и҆зстꙋпле́нїи ᲂу҆ма̀, ꙳ соверши́сѧ дꙋхо́внаѧ мꙋ́дрость ꙳ въ тебѣ̀, ѻ҆́ч҃е а҆ндре́е: ꙳ всѧ̑ бо ᲂу҆ме́ты вмѣни́лъ є҆сѝ, ꙳ да хрⷭ҇та̀ приѡбрѧ́щеши, ꙳ и҆ црⷭ҇тво нбⷭ҇ное возлюби́лъ є҆сѝ, ꙳ є҆́же и҆ полꙋчи́лъ є҆сѝ: ны́нѣ со а҆́гг҃лы стоѧ̀, свѧ́те, ꙳ моли́сѧ ѡ҆ чтꙋ́щихъ прилѣ́жнѡ па́мѧть твою̀.
Ѽ пресла́внагѡ чꙋдесѐ, ꙳ пло́тскꙋ се́рдцемъ, ꙳ безплѡ́тныѧ показа́лъ є҆сѝ, ꙳ и҆ сокровє́ннаѧ ѿкры́лъ є҆сѝ ꙳ ᲂу҆го́дникꙋ твоемꙋ̀ а҆ндре́ю, ꙳ бы́вшемꙋ ю҆ро́дꙋ тебє̀ ра́ди, ꙳ и҆ земны̑ѧ стра̑сти претерпѣ́вшемꙋ, ꙳ крⷭ҇тъ взе́мшемꙋ, ꙳ и҆ послѣ́довавшꙋ тебѣ̀ влⷣцѣ и҆ бг҃ꙋ. ꙳ є҆гѡ́же моли́твами, хрⷭ҇тѐ бж҃е, ꙗ҆́кѡ ми́лостивъ, спасѝ дꙋ́шы на́шѧ.
Ѽ пресла́внагѡ чꙋдесѐ, ꙳ въ бре́ннѣмъ тѣ́лѣ ходѧ̀ на землѝ, ꙳ тебѐ ра́ди гдⷭ҇и, ꙳ ꙗ҆́кѡ безпло́тенъ пребыва́ѧ, ᲂу҆го́дникъ тво́й а҆ндре́й ве́лїе нестѧжа́нїе стѧжа̀, ꙳ ѡ҆бѣща́нныхъ твои́хъ возжелѣ́въ, ꙳ є҆гѡ́же ни ѻ҆́ко ви́дѣ, ни ᲂу҆́хо слы́ша, ꙳ ни на се́рдце человѣ́ка взы́де, ꙳ ᲂу҆гото́ванныхъ лю́бѧщымъ тебѐ: ꙳ тогѡ̀ моли́твами ꙳ спасѝ дꙋ́шы на́шѧ ꙗ҆́кѡ ми́лостивъ.
Сла́ва, гла́съ ѕ҃:
До нб҃сѐ восхище́нъ бы́лъ є҆сѝ, и҆ неизречє́нныѧ глаго́лы слы́шавъ, неви̑димаѧ же ᲂу҆ви́дѣлъ є҆сѝ, и҆ честна́гѡ крⷭ҇та̀ ѻ҆́бразъ ви́дѣвъ, съ любо́вїю того̀ цѣлова́лъ є҆сѝ, и҆ бжⷭ҇твенныѧ сла́дости и҆спо́лнилсѧ є҆сѝ, и҆ ра̑йскаѧ бл҃га̑ѧ ѿкровє́на тебѣ̀ бы́ша: ѿ мо́лнїи и҆зтка́нною ри́зою ѡ҆бле́клсѧ є҆сѝ, хрⷭ҇тꙋ̀ послѣ́довавъ, свѧ́те а҆ндре́е досточꙋ́дне.
Тропа́рь, гла́съ а҃:
Гла́съ а҆пⷭ҇ла твоегѡ̀ па́ѵла ᲂу҆слы́шавъ глаго́лющь: мы̀ ю҆ро́ди хрⷭ҇та̀ ра́ди, ра́бъ тво́й а҆ндре́й ю҆ро́дъ бы́сть на землѝ тебє̀ ра́ди, хрⷭ҇тѐ бж҃е. тѣ́мже ны́нѣ па́мѧть є҆гѡ̀ почита́юще, тебѣ̀ мо́лимсѧ, гдⷭ҇и, спасѝ дꙋ́шы на́шѧ.
Канѡ́нъ ст҃о́мꙋ.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.
Ѿве́рзи моѝ ᲂу҆стнѣ̀, подви́гни мо́й ѧ҆зы́къ, и҆ и҆спра́ви мо́й смы́слъ, всѧ̑ ᲂу҆мꙋдрѧ́ѧй, бж҃е, да похвалю̀ ᲂу҆го́дника твоего̀ а҆ндре́а, ю҆ро́да бы́вшаго на землѝ тебє̀ ра́ди.
А҆ндре́е бл҃же́нне, ты̀ и҆змла́да хрⷭ҇та̀ возлюби́лъ є҆сѝ, и҆ къ немꙋ̀ є҆динодꙋ́шнѡ возжелѣ́лъ є҆сѝ: ка́кѡ же тѧ̀ по достоѧ́нїю похва́лимъ, на дїа́вола воѻрꙋжи́вшасѧ, и҆ сегѡ̀ кѡ́зни побѣди́вша си́лою хрⷭ҇то́вою;
Моли́твами бг҃ꙋ молѧ́сѧ, и҆ дїа́волꙋ досажда́ѧ, и҆ мно́гагѡ є҆гѡ̀ толца́нїѧ въ двє́ри хи́жины твоеѧ̀ а҆́ще вма́лѣ и҆ ᲂу҆страши́всѧ, но неподви́женъ ᲂу҆мо́мъ пребы́лъ є҆сѝ, си́лою хрⷭ҇то́вою ᲂу҆крѣплѧ́емый.
Бг҃оро́диченъ:
Ѽ прест҃а́ѧ гпⷭ҇жѐ дв҃о бцⷣе! покры́й ны̀ чꙋ́днымъ твои́мъ ѡ҆мофо́ромъ, и҆ сохранѧ́й гра́дъ тво́й ѿ бѣ́дъ и҆ скорбе́й, ꙗ҆́коже тѧ̀ пребл҃же́нный ви́дѣ а҆ндре́й, во влахе́рнстѣй це́ркви молѧ́щꙋюсѧ.
Пѣ́снь г҃. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ, вѣнцє́въ сла́вы сподо́би.
Со є҆ѳїо́помъ бра́всѧ, побѣди́лъ є҆сѝ того̀, ѿ хрⷭ҇та̀ дерзнове́нїе прїи́мъ, мно́гꙋ печа́ль де́мѡнѡмъ сотвори́лъ є҆сѝ, ст҃ы̑мъ же а҆́гг҃лѡмъ весе́лїе и҆ ра́дость: съ ни́миже ны́нѣ водворѧ́ешисѧ.
Во снѣ̀ хрⷭ҇та̀ пре́жде ви́дѣлъ, є҆сѝ, на де́мѡны тѧ̀ ᲂу҆крѣплѧ́юща, и҆ вѣне́цъ тебѣ̀ подаю́ща, и҆ со є҆ѳїо́помъ бра́тисѧ поꙋча́юща: ны́нѣ же не сновидѣ́нїемъ, но въ неизрече́ннѣмъ свѣ́тѣ сла́вы є҆гѡ̀ ви́дѧ, за ны̀ моли́сѧ.
Хрⷭ҇та̀ послꙋ́шалъ є҆сѝ повелѣ́вшагѡ тебѣ̀ ю҆ро́дꙋ бы́ти, и҆ црⷭ҇тво нбⷭ҇ное ѡ҆бѣща́вша: томꙋ̀ послѣ́довавъ, неизречє́ннаѧ блага̑ѧ є҆гѡ̀ воспрїѧ́лъ є҆сѝ, а҆ндре́е досточꙋ́дне.
Бг҃оро́диченъ:
Прїидѝ ны́нѣ во сла́вѣ въ це́рковь твою̀, бцⷣе, съ собо́ры ст҃ы́хъ, ꙗ҆́коже тѧ̀ ви́дѣ ст҃ы́й а҆ндре́й, на воздꙋ́сѣ свѣ́тлѣ за хрⷭ҇тїа́ны молѧ́щꙋюсѧ, и҆ пода́ждь на́мъ, гпⷭ҇жѐ, ве́лїю ми́лость.
Сѣда́ленъ, гла́съ и҃:
Оу҆́зы и҆ желѣ́зы свѧ́занъ въ це́ркви сѣдѧ̀, а҆ндре́е, мно́ги стра́хи ѿ де́мѡнѡвъ под̾ѧ́лъ є҆сѝ, и҆ помо́щника себѣ̀ ѡ҆брѣ́лъ є҆сѝ, а҆пⷭ҇ла хрⷭ҇то́ва, возлю́бленнаго і҆ѡа́нна, и҆́же повелѣ̀ тебѣ̀ терпѣ́ти хрⷭ҇та̀ ра́ди. съ ни́мже ны́нѣ водворѧ́ешисѧ, за ны̀ моли́сѧ чтꙋ́щыѧ па́мѧть твою̀.
Сла́ва, и҆ ны́нѣ, бг҃оро́диченъ:
Въ напа̑сти многоплетє́нныѧ впа́дъ, ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ, и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бл҃гости. тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ, моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости, долготерпѣли́ве гдⷭ҇и, ми́лости бе́здно и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стра̑сти твоѧ̑.
Пѣ́снь д҃. І҆рмо́съ:
Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Сѣдѧ́ща на прⷭ҇то́лѣ хрⷭ҇та̀ цр҃ѧ̀ ви́дѣлъ є҆сѝ, го́рькїѧ сеѧ̀ жи́зни ѻ҆́бразъ разсмотри́лъ є҆сѝ, горча́йшь пелы́ни сꙋ́щїй. пото́мъ же нетлѣ́нныѧ сла́дости вкꙋ́съ прїѧ́лъ є҆сѝ.
Тогда̀ во снѣ̀ и҆ въ восто́рзѣ хрⷭ҇та̀ ви́дѣлъ є҆сѝ, ны́нѣ же со безпло́тными си́лами водворѧ́ѧсѧ, сла́вꙋ бж҃їю ви́диши непостижи́мꙋю и҆ неизглаго́ланнꙋю: помина́й на́съ, а҆ндре́е, чтꙋ́щихъ па́мѧть твою̀.
Ѿ видѣ́нїѧ ра́зꙋмѡвъ ᲂу҆вѣ́рившагосѧ а҆ндре́а похва́лимъ, вѣ́рнїи, на землѝ бы́вша ю҆ро́да хрⷭ҇та̀ ра́ди, на нб҃сѣ́хъ же ны́нѣ премꙋ́дра дꙋхо́вною бл҃года́тїю, со а҆́гг҃лы предстоѧ́ща всѣ́хъ бг҃ꙋ.
Бг҃оро́диченъ:
Кто̀ и҆зглаго́лати мо́жетъ твоегѡ̀ ржⷭ҇тва̀ та́инство; и҆лѝ кто̀ и҆сповѣ́сть твоеѧ̀ моли́твы си́лꙋ; а҆́ще не бы̀ сама̀ ты̀ показа́ла є҆сѝ а҆ндре́ю ю҆ро́дивомꙋ въ це́ркви влахе́рнстѣй честны́й тво́й покро́въ.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Оу҆дивле́нїе бы́сть всѣ̑мъ ви́дѧщымъ а҆ндре́ево житїѐ: на сме́тьищи лега́нїе, и҆ посредѣ̀ гра́да ѡ҆бнаже́нїе, и҆ колесни́чное попра́нїе. но сїѧ̑ всѧ̑ бы́сть є҆мꙋ̀ пꙋтѝ правле́нїе въ нбⷭ҇ное црⷭ҇твїе.
Оу҆диви́шасѧ всѝ ви́дѧщїи терпѣ́нїе твоѐ: мч҃ницы бо во є҆ди́но вре́мѧ стра́сть претерпѣ́ша: ты́ же всѧ̑ дни̑ живота̀ твоегѡ̀ ѕлы̑ѧ мꙋ̑ки терпѣ́лъ є҆сѝ, въ нбⷭ҇ное ца́рство жела́ѧ всели́тисѧ, є҆́же полꙋчи́въ ны́нѣ, ра́дꙋешисѧ безконе́чною ра́достїю.
Сокровє́ннаѧ бы́ша тебѣ̀ ѿкровє́на, и҆ всѧ̑ безплѡ́тныѧ а҆́ки плѡтскі́ѧ ви́дѣлъ є҆сѝ, ничто́же бо земны́хъ возлюби́лъ є҆сѝ. тѣ́мже и҆ нбⷭ҇наѧ врата̀ ѿверзо́шасѧ тебѣ̀, въ неизглаго́ланнꙋю ра́дость гдⷭ҇а твоегѡ̀, бл҃же́нне, вше́лъ є҆сѝ.
Бг҃оро́диченъ:
Пою́тъ тѧ̀ чи́ни а҆́гг҃льстїи, и҆ сла́вѧтъ тѧ̀ земны́хъ ро́ди: ты́ бо, нбⷭ҇наѧ цр҃и́це, а҆ндре́ю ꙗ҆ви́ласѧ є҆сѝ, покрыва́ющи лю́ди въ це́ркви нетлѣ́ннымъ твои́мъ покро́вомъ, за всѧ̑ пою́щыѧ тѧ̀ непреста́ннѡ молѧ́щисѧ. (с. 65)
Пѣ́снь ѕ҃. І҆рмо́съ:
Бжⷭ҇твенное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
А҆пⷭ҇ла па́ѵла и҆спо́лнисѧ гла́съ на тебѣ̀, ѻ҆́ч҃е: сло́во кре́стное погиба́ющымъ ᲂу҆́бѡ ю҆ро́дство вмѣни́сѧ, тебѣ́ же спаса́ющемꙋсѧ си́ла бж҃їѧ бы́сть, а҆ндре́е всехва́льне.
Хрⷭ҇то́въ гла́съ и҆спо́лнисѧ на тебѣ̀ рече́нный: бл҃же́ни ни́щїи дꙋ́хомъ, ꙗ҆́кѡ тѣ́хъ є҆́сть црⷭ҇тво нбⷭ҇ное. ты́ бо ѡ҆бнища́лъ є҆сѝ дꙋ́хомъ, и҆ црⷭ҇тво нбⷭ҇ное воспрїѧ́лъ є҆сѝ.
Є҆пїфа́нїа и҆ногда̀ ю҆́ношꙋ сꙋ́ща, на пꙋ́ть пра́вый наста́вилъ є҆сѝ. є҆мꙋ́же и҆ проре́клъ є҆сѝ а҆рхїере́ю бы́ти, и҆ лю́ди ᲂу҆чи́ти: всѧ̑ бо бꙋ̑дꙋщаѧ, ꙗ҆́кѡ предъ ѻ҆чесы̀ сꙋ̑щаѧ ви́дѣлъ є҆сѝ.
Бг҃оро́диченъ:
Припа́даемъ тебѣ̀, бцⷣе, мы̀ грѣ́шнїи, да и҆ на на́съ ны́нѣ простре́ши неви́димый покро́въ тво́й, къ сн҃ꙋ твоемꙋ̀ и҆ бг҃ꙋ на́шемꙋ да принесе́ши моли̑твы твоѧ̑ за ны̀, ꙗ҆́коже тѧ̀ дре́вле а҆ндре́й ви́дѣ.
Конда́къ, гла́съ д҃. Подо́бенъ: Вознесы́йсѧ:
Во ю҆ро́дство претвори́всѧ во́лею, мі́ра сегѡ̀ красѡты̀ ѿню́дъ возненави́дѣлъ є҆сѝ, плотска̑ѧ мꙋдрова̑нїѧ ᲂу҆вѧди́лъ є҆сѝ посто́мъ и҆ жа́ждею, и҆ зно́емъ и҆ стꙋ́денїю мра́за, ѿ дождѧ̀ и҆ снѣ́га, и҆ ѿ про́чїѧ воздꙋ́шныѧ тѧготы̀ никогда́же ᲂу҆клони́всѧ, ѡ҆чи́стилъ є҆сѝ себѐ ꙗ҆́кѡ зла́то въ горни́лѣ, а҆ндре́е бл҃же́нне.
І҆́косъ:
Прїиди́те хрⷭ҇толю́бцы, прїиди́те нищелю́бцы, восхва́лимъ блаже́ннаго страда́льца, премꙋ́драго а҆ндре́а, бы́вша ю҆ро́да хрⷭ҇та̀ ра́ди, во́лею мі́ръ и҆ ꙗ҆̀же въ не́мъ ᲂу҆ме́ты вмѣни́вша по а҆пⷭ҇лꙋ, и҆ во слѣ́дъ хрⷭ҇та̀ ᲂу҆се́рднѡ поте́кша, пло́ть же свою̀ посто́мъ и҆ жа́ждею и҆ зно́емъ, и҆ дожде́мъ и҆ снѣ́гомъ, воздꙋ́шною тѧ́гостїю смири́вша, дꙋ́шꙋ же ѿ страсте́й свобо́днꙋ соблю́дша, и҆ свѣ́тлꙋ добродѣ́тельми содѣ́лавша, и҆ нбⷭ҇ное житїѐ со всѣ́ми ст҃ы́ми вѣ́чнѡ наслѣ́довавша, и҆ молѧ́щасѧ хрⷭ҇тꙋ̀ бг҃ꙋ ѡ҆ чтꙋ́щихъ є҆го̀ вѣ́рою и҆ любо́вїю. къ немꙋ́же возопїи́мъ: ра́дꙋйсѧ, ᲂу҆го́дниче хрⷭ҇то́въ а҆ндре́е блаже́нне.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи, па́че созда́вшагѡ: но ѻ҆́гненное преще́нїе мꙋ́жески попра́вше, ра́довахꙋсѧ, пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.
Ничто́же и҆зво́ливъ люби́ти на землѝ па́че зижди́телѧ, но посредѣ̀ храмѡ́въ скита́ѧсѧ, блаже́нне а҆ндре́е, ра́довалсѧ є҆сѝ, поѧ̀: препѣ́тый ѻ҆тцє́въ гдⷭ҇ь и҆ бг҃ъ благослове́нъ є҆сѝ.
Не пощадѣ̀ пло́ти своеѧ̀, но предадѐ ю҆̀ на по́двиги и҆ трꙋды̀, и҆ нꙋ́ждное пребыва́нїе. тѣ́мъ кѡ́зни де́мѡнскїѧ мꙋ́жески попра̀ блаже́нный а҆ндре́й, поѧ̀: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.
Ничто́же земны́ѧ сла́вы восхотѣ́лъ є҆сѝ, хрⷭ҇та́ же па́че возлюби́лъ є҆сѝ, бл҃же́нне а҆ндре́е, и҆ къ немꙋ̀ восте́клъ є҆сѝ ра́дꙋѧсѧ, болѣ́зней твои́хъ прїе́млѧ воздаѧ́нїе, и҆ поѧ̀ при́снѡ: бл҃гослове́нъ бг҃ъ ѻ҆тцє́въ на́шихъ.
Бг҃оро́диченъ:
Бл҃же́нне а҆ндре́е, моли́сѧ и҆ ны́нѣ цр҃и́цѣ бцⷣѣ, ю҆́же ви́дѣлъ є҆сѝ за мі́ръ молѧ́щꙋюсѧ, да на́съ покры́етъ непобѣди́мою свое́ю ми́лостїю: тоѧ́ бо покро́вомъ всѝ вѣ́рнїи сохранѧ́емсѧ.
Пѣ́снь и҃. І҆рмо́съ:
Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Бога́таго ᲂу҆ме́рша и҆ногда̀ ви́дѣлъ є҆сѝ, съ ви́димою че́стїю провожда́ема, неви́димѡ же ѕлѣ̀ своди́ма во глꙋбинꙋ̀ а҆́довꙋ, бл҃же́нне а҆ндре́е, и҆ ѡ҆ не́мъ пла́часѧ, и҆ молѧ́сѧ гдⷭ҇ꙋ.
Безпло́тнаго а҆́гг҃ла, печа́лꙋющаго ѡ҆ поги́бели дꙋшѝ бога́тагѡ, въ житїѝ се́мъ не пока́ѧвшасѧ, ѿ печа́ли премѣни́лъ є҆сѝ, а҆ндре́е бл҃же́нне, съ ни́мже пое́ши: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Сребролю́бца мона́ха ви́дѣлъ є҆сѝ, ѿ ѕла́гѡ ѕмі́ѧ стꙋжа́ема, а҆ндре́е бл҃же́нне, и҆ того̀ ѿ сребролю́бнагѡ недꙋ́га и҆зба́вивъ, вразꙋми́лъ є҆сѝ пѣ́ти, и҆ превозноси́ти гдⷭ҇и во всѧ̑ вѣ́ки.
Бг҃оро́диченъ:
Ѿ а҆ндре́ева видѣ́нїѧ покро́въ тво́й ᲂу҆вѣ́дѣвше, цр҃и́це бцⷣе, мо́лимсѧ тебѣ̀ прилѣ́жнѡ: покры́й ны̀ ми́лостїю твое́ю, пою́щыѧ сн҃а твоего̀, и҆ превозносѧ́щыѧ є҆го̀ во всѧ̑ вѣ́ки.
Пѣ́снь ѳ҃. І҆рмо́съ:
Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.
По хрⷭ҇то́вꙋ словесѝ, за бїю́щыѧ тѧ̀ моли́лсѧ є҆сѝ свѧ́те: тѣ́мже нбⷭ҇наѧ врата̀ ѿве́рзста, и҆ дꙋ́шы пра́ведныхъ во ѻ҆́бразѣ ла́стовицъ лета́ющыѧ, ви́дѣлъ є҆сѝ: съ ни́миже ны́нѣ водворѧ́ешисѧ, а҆ндре́е бл҃же́нне.
Хрⷭ҇та̀ бг҃а и҆́стиннѡ возлюби́въ, тебє̀ сама́гѡ ѿве́рглсѧ є҆сѝ, и҆ томꙋ̀ послѣ́довалъ є҆сѝ, ꙗ҆́коже ѻ҆́нъ речѐ: любѧ́й дꙋ́шꙋ свою̀ спастѝ, погꙋби́тъ ю҆̀. тѣ́мже дꙋ́шꙋ твою̀ въ жи́знь вѣ́чнꙋю соблю́лъ є҆сѝ, достохва́льне свѧ́те а҆ндре́е.
Вели̑каѧ и҆ пресла̑внаѧ ны́нѣ сбы́шасѧ тебѣ̀ въ нбⷭ҇нѣмъ црⷭ҇твїи, а҆́ще и҆ ю҆ро́дъ бы́лъ є҆сѝ мі́рꙋ, но хрⷭ҇тꙋ̀ мꙋ́дръ ꙗ҆ви́лсѧ є҆сѝ, достохва́льне: призира́й съ нбⷭ҇нагѡ крꙋ́га на ны̀, почита́ющыѧ па́мѧть твою̀.
Бг҃оро́диченъ:
Всѧ́къ земноро́дный покрыва́етсѧ покро́вомъ твои́мъ, пресла́внаѧ застꙋ́пнице бцⷣе, ꙗ҆́коже бл҃же́нный а҆ндре́й тѧ̀ ви́дѣ за мі́ръ молѧ́щꙋюсѧ несозда́нномꙋ сꙋществꙋ̀, въ созда́нное є҆стество̀ ѿ тебѐ ѡ҆бле́кшемꙋсѧ.
Мѣ́сѧца тогѡ́же во в҃-й де́нь: Ст҃ы́ѧ прпⷣбныѧ бл҃говѣ́рныѧ вели́кїѧ кнѧги́ни и҆ноки́ни а҆́нны, ка́шинскїѧ чꙋдотво́рицы.
Є҆ѧ́же пренесе́нїе моще́й пра́зднꙋемъ і҆ꙋ́нїа въ в҃і-й де́нь.
[Зрѝ] А҆́ще бꙋ́детъ па́мѧть прпⷣбныѧ а҆́нны ка́шинскїѧ въ попра́зднство ст҃ы́ѧ пѧтидесѧ́тницы и҆лѝ въ недѣ́лю всѣ́хъ ст҃ы́хъ, и҆щѝ ᲂу҆ста́въ є҆ѧ̀ слꙋ́жбы въ хра́мовыхъ гла́вахъ.
На ма́лѣй вече́рни,
на Гдⷭ҇и, воззва́хъ: стїхи̑ры на д҃, гла́съ а҃.
Подо́бенъ: Ѽ, ди́вное чꙋ́до:
Ѽ бл҃же́ннаѧ мт҃и, вели́каѧ кнѧги́не и҆ноки́не а҆́нно! ѿ бл҃га́гѡ ко́рене произрасла̀ є҆сѝ, прпⷣбнаѧ, а҆́ки красноцвѣтꙋ́щаѧ вѣ́твь, и҆ та́кѡ сама̀ ѿ ю҆́ности твоеѧ̀ сосꙋ́дъ и҆збра́нный бг҃ꙋ ꙗ҆ви́ласѧ є҆сѝ до́брыми твои́ми дѣѧ̑нїи, посто́мъ и҆ мл҃твою, воздержа́нїемъ и҆ ми́лостынею, чистото́ю дꙋше́вною и҆ тѣле́сною, любо́вїю и҆ смиренномꙋ́дрїемъ. тѣ́мъ и҆ хрⷭ҇то́съ всели́сѧ въ тѧ̀, прпⷣбнаѧ, є҆мꙋ́же ны́нѣ моли́сѧ дарова́ти на́мъ ми́ръ и҆ ве́лїю ми́лость.
Ѽ бл҃же́ннаѧ мт҃и, вели́каѧ кнѧги́не и҆ноки́не а҆́нно! ты̀ ѿ млады́хъ ногте́й твои́хъ стра́хъ бж҃їй и҆мѣ́ла є҆сѝ въ се́рдцѣ твое́мъ, дꙋхѡ́вныѧ ѻ҆́чи твоѝ къ го́рнемꙋ і҆ерⷭ҇ли́мꙋ ᲂу҆стремлѧ́ющи и҆ помышлѧ́ющи всегда̀ ѡ҆ бꙋ́дꙋщихъ, ꙗ҆̀же и҆ полꙋчи́ла є҆сѝ, прпⷣбнаѧ. тѣ́мже ны́нѣ моли́сѧ дарова́ти на́мъ ми́ръ и҆ ве́лїю ми́лость.
Ѽ чꙋ́днаѧ мт҃и, вели́каѧ кнѧги́не и҆ноки́не а҆́нно! чи́стаѧ дꙋша̀ твоѧ̀. ꙗ҆́кѡ зерца́ло, ѡ҆чище́но добродѣ́тельми твои́ми мно́гими, ꙗ҆влѧ́етсѧ, ѻ҆тобража́ющее всѣ̑мъ дꙋше́вное сп҃се́нїе и҆ ко творцꙋ̀ на́шемꙋ и҆ бг҃ꙋ присвое́нїе. ны́нѣ ᲂу҆̀бо моли́сѧ дарова́ти дꙋша́мъ на́шымъ ми́ръ и҆ ве́лїю ми́лость.
Сла́ва, гла́съ є҃:
Возсїѧ́вшей веснѣ̀, прїиди́те, лю́дїе, возвесели́мсѧ, се́ бо приближа́етсѧ лѣ́то гдⷭ҇не бл҃гопрїѧ́тное, приносѧ́щее плоды̀ мнѡ́гїѧ: почти́мъ па́мѧть прпⷣбныѧ мт҃ре, вели́кїѧ кнѧги́ни и҆ноки́ни а҆́нны, и҆ воспрїи́мемъ по́льзꙋ дꙋше́внꙋю, ꙗ҆́кѡ та́ѧ ᲂу҆годѝ хрⷭ҇тꙋ̀ бг҃ꙋ мно́гими свои́ми трꙋды̀ и҆ по́двиги и҆ показа̀ на́мъ пꙋ́ть ко сп҃се́нїю, и҆ ны́нѣ мо́литъ хрⷭ҇та̀ бг҃а дарова́ти на́мъ ми́ръ и҆ ве́лїю ми́лость.
И҆ ны́нѣ, бг҃оро́диченъ:
Бл҃жи́мъ тѧ̀, бг҃оро́дице дв҃о, и҆ сла́вимъ тѧ̀, вѣ́рнїи, по до́лгꙋ, гра́дъ непоколеби́мый, стѣ́нꙋ неѡбори́мꙋю, тве́рдꙋю предста́тельницꙋ и҆ прибѣ́жище дꙋ́шъ на́шихъ.
На стїхо́внѣ стїхи̑ры, гла́съ в҃.
Подо́бенъ: До́ме є҆ѵфра́ѳовъ.
До́мъ и҆ жили́ще прест҃о́мꙋ дх҃ꙋ была̀ є҆сѝ, бл҃же́ннаѧ мт҃и а҆́нно, тѣ́мъ и҆ хрⷭ҇то́съ въ тебѣ̀ живѧ́ше и҆ ᲂу҆́мъ тво́й и҆ дꙋ́шꙋ просвѣща́ше.
Сті́хъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.
До́мъ и҆ пода́тельница ни́щымъ и҆ всѣ̑мъ неимꙋ́щымъ ꙗ҆ви́ласѧ є҆сѝ, достохва́льнаѧ, тѣ́мъ и҆ приѡбрѣла̀ є҆сѝ бога́тство неистощи́мое на нб҃сѣ́хъ.
Сті́хъ: Что̀ возда́мъ гдⷭ҇ви ѡ҆ всѣ́хъ, ꙗ҆́же воздаде́ ми;
До́мъ добродѣ́телей и҆змла́да начала̀ є҆сѝ бы́ти, прпⷣбнаѧ мт҃и а҆́нно, тѣ́мъ и҆ полꙋчи́ла є҆сѝ црⷭ҇тво нбⷭ҇ное и҆ жи́знь вѣковѣ́чнꙋю.
Сла́ва, и҆ ны́нѣ, гла́съ то́йже:
Ра́дꙋйсѧ, мт҃и гдⷭ҇нѧ, ра́дость ѿ а҆́гг҃ла прїе́мшаѧ, и҆ мі́рꙋ пода́вшаѧ, и҆ печа́ль є҆́ѵинꙋ до́брѣ ᲂу҆толи́вшаѧ.
Тропа́рь пи́санъ на вели́цѣй вече́рни.
На вели́цѣй вече́рни.
Бл҃же́нъ мꙋ́жъ: а҃-й а҆нтїфѡ́нъ.
На Гдⷭ҇и воззва́хъ: стїхи̑ры на и҃, гла́съ є҃.
Подо́бенъ: Ра́дꙋйсѧ:
Ра́дꙋйсѧ, прпⷣбнаѧ мт҃и, вели́каѧ кнѧги́не и҆ноки́не а҆́нно, бл҃говоли́ бо бг҃ъ ѡ҆ст҃и́ти тѧ̀ ѿ ю҆́ности твоеѧ̀ бж҃е́ственнымъ свои́мъ свѣтосїѧ́нїемъ, и҆ ѡ҆богати́ти тѧ̀ свое́ю бл҃года́тїю и҆ просвѣти́ти твоѝ ѻ҆́чи сердє́чныѧ, во є҆́же зрѣ́ти къ бꙋ́дꙋщемꙋ пребыва́нїю. тогѡ̀ ра́ди, ꙗ҆́кѡ ца́рскимъ пꙋте́мъ, ше́ствовала є҆сѝ, бл҃же́ннаѧ, хрⷭ҇тꙋ̀ бг҃ꙋ ᲂу҆гожда́ющи, є҆мꙋ́же ны́нѣ моли́сѧ дарова́ти на́мъ ми́ръ и҆ ве́лїю ми́лость.
Ра́дꙋйсѧ, бл҃же́ннаѧ мт҃и, ꙗ҆́кѡ, подо́бѧщисѧ а҆́ннѣ цѣломꙋ́дреннѣй, де́нь и҆ но́щь моли́ласѧ є҆сѝ гдⷭ҇еви, пребыла́ же є҆сѝ въ постѣ̀ и҆ смире́нїи, вы́нꙋ твою̀ дꙋ́шꙋ снабдѣва́ющи, тѣ́мже ᲂу҆годи́ла є҆сѝ нбⷭ҇номꙋ цр҃ю̀ и҆ влⷣцѣ всѣ́хъ, є҆мꙋ́же ны́нѣ моли́сѧ дарова́ти на́мъ ми́ръ и҆ ве́лїю ми́лость.
Ра́дꙋйсѧ, ни́щымъ пита́тельнице неѡскꙋ́днаѧ, си̑рымъ и҆ вдови́цамъ крѣ́пкаѧ помо́щнице, всѣ̑мъ же скорбѧ́щымъ ᲂу҆тѣше́нїе. ми́лостивꙋ дꙋ́шꙋ твою̀ и҆мꙋ́щи, съ любо́вїю и҆ ти́хостїю ми́лостыню подава́ла є҆сѝ, надѣ́ющисѧ сꙋгꙋ́бꙋ ми́лость себѣ̀ прїѧ́ти въ бꙋ́дꙋщемъ вѣ́цѣ, по рече́нномꙋ ѿ хрⷭ҇та̀ бг҃а на́шегѡ, ꙗ҆́кѡ ми́лостивїи ми́лостивъ и҆ сꙋ́дъ прїи́мꙋтъ. тѣ́мже ᲂу҆годи́ла є҆сѝ, прпⷣбнаѧ, творцꙋ̀ твоемꙋ̀ и҆ гдⷭ҇ꙋ и҆ прїѧ́ла є҆сѝ ѿ негѡ̀ црⷭ҇тво нбⷭ҇ное и҆ вѣне́цъ нетлѣ́нный, того̀ молѝ сп҃сти́сѧ дꙋша́мъ на́шымъ.
Ра́дꙋйсѧ, достохва́льнаѧ мт҃и, вели́каѧ кнѧги́не и҆ноки́не а҆́нно, ꙗ҆́кѡ за мнѡ́гїѧ твоѧ̀ добродѣ̑тели сподо́биласѧ є҆сѝ прїѧ́ти ѿ бг҃а да́ръ чꙋдотворе́нїй: мнѡ́ги бо болѧ́щыѧ разли́чными недꙋ́ги и҆сцѣлѧ́еши, и҆ ꙗ҆́кѡ нѣ́кїимъ драги́мъ бога́тствомъ, ѡ҆богаща́еши, и҆ всѣ́хъ чꙋдесы̀ твои́ми ᲂу҆дивлѧ́еши. тѣ́мъ тѧ̀ ны́нѣ мо́лимъ: молѝ хрⷭ҇та̀ бг҃а дарова́ти дꙋша́мъ на́шымъ ми́ръ и҆ ве́лїю ми́лость.
Ра́дꙋйсѧ, чⷭ҇таѧ се́рдцемъ мт҃и, ꙗ҆́кѡ тезоимени́та бы́вши а҆́ннѣ цѣломꙋ́дреннѣй, вы́нꙋ гото́виласѧ є҆сѝ къ вѣ́чномꙋ сп҃се́нїю, по гдⷭ҇ню и҆зволе́нїю, къ немꙋ́же и҆ ѿшла̀ є҆сѝ въ вѣ́чный поко́й и҆ весе́лїе и҆ пребыва́еши въ неизрече́нныхъ свѣ́тлостехъ, со всѣ́ми ст҃ы́ми, бг҃ꙋ ᲂу҆годи́вшими, ра́дꙋющисѧ и҆ веселѧ́щисѧ, наслажда́ющисѧ бжⷭ҇твеннагѡ свѣтосїѧ́нїѧ. молѝ ᲂу҆̀бо хрⷭ҇та̀ бг҃а дарова́ти на́мъ ми́ръ и҆ ве́лїю ми́лость.
Сла́ва, гла́съ и҃:
Прїиди́те, всѝ вѣ́рнїи рѡссі́йстїи наро́ди, почти́мъ, и҆ похва́лимъ, и҆ согла́снѡ воспои́мъ рѡссі́йскꙋю на́шꙋ похвалꙋ̀, ꙗ҆́кѡ пресвѣ́тлꙋю ѕвѣздꙋ̀, ѡ҆сїѧва́ющꙋю гра́дъ сво́й ка́шинъ чꙋдесы̀ свои́ми, ни́щымъ пита́тельницꙋ, си̑рымъ и҆ вдова́мъ застꙋ́пницꙋ, скорбѧ́щымъ ᲂу҆тѣ́шительницꙋ, сїю̀ бл҃же́ннꙋю въ жена́хъ, прпⷣбнꙋю мт҃рь кнѧги́ню а҆́ннꙋ: сїѧ́ бо пре́йде ко хрⷭ҇тꙋ̀ бг҃ꙋ въ вѣ̑чныѧ ѡ҆би́тели и҆ ны́нѣ пребыва́етъ въ го́рнихъ селе́нїихъ, съ чи́нми а҆́гг҃льскими ра́дꙋющисѧ и҆ веселѧ́щисѧ. тѣ́мъ возопїи́мъ къ не́й, зовꙋ́ще: ра́дꙋйсѧ, рѡссі́йскаѧ похвало̀, всѣ̑мъ жена́мъ кра́сное ᲂу҆добре́нїе, гра́дꙋ ка́шинꙋ просвѣще́нїе: прїе́мши ѿ хрⷭ҇та̀ бг҃а црⷭ҇тво нбⷭ҇ное и҆ вѣне́цъ нетлѣ́нный, того̀ молѝ сп҃сти́сѧ дꙋша́мъ на́шымъ.
И҆ ны́нѣ, бг҃оро́диченъ: Цр҃ь нбⷭ҇ный:
Вхо́дъ. Прокі́менъ днѐ.
Чтє́нїѧ трѝ.
Премꙋ́дрости соломѡ́ни чте́нїе.
[Глава̀ г҃] Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе, сокрꙋше́нїе: ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими благодѣ́тельтвовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀ и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
Премꙋ́дрости соломѡ́ни чте́нїе.
[Глава̀ д҃] Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ. и҆ во́зрастъ ста́рости, житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ, преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ́та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
Премꙋ́дрости соломѡ́ни чте́нїе.
[Главы̑ є҃ и҆ ѕ҃] Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе благолѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ: прїи́метъ щи́тъ непобѣди́мый, преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ: по́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ благокрꙋ́гла лꙋ́ка ѻ҆блакѡ́въ на намѣ́ренїе полетѧ́тъ. И҆ ѿ каменоме́тныѧ ꙗ҆́рости, и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, вѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хорь развѣ́етъ и҆̀хъ: и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те, держа́щїи мно́жєства и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.
На лїті́и стїхи́ра хра́ма и҆ прпⷣбнѣй стїхи̑ры, гла́съ в҃.
Подо́бенъ: Кі́ими похва́льными вѣнцы̀:
Кі́ими похва́льными пѣ́сньми ᲂу҆бл҃жи́мъ прпⷣбнꙋю чꙋдотво́рицꙋ, вели́кꙋю кнѧги́ню и҆ноки́ню а҆́ннꙋ, вѣ̑рнымъ лю́демъ застꙋ́пницꙋ те́плꙋю; вѣ́рою и҆ любо́вїю возопїи́мъ є҆́й. глаго́люще: ра́дꙋйсѧ, землѝ на́шей кра́сное ᲂу҆твержде́нїе, всемꙋ́ же хрⷭ҇тоимени́томꙋ жи́тельствꙋ ᲂу҆дивле́нїе, тѧ́ бо вѣнце́мъ нетлѣ́нїѧ вѣнча́етъ хрⷭ҇то́съ бг҃ъ на́шъ, и҆мѣ́ѧй ве́лїю и҆ бога́тꙋю ми́лость.
Кі́ими похва́льными пѣ́сньми возвели́чимъ прпⷣбнꙋю мт҃рь, вели́кꙋю кнѧги́ню а҆́ннꙋ, те́плꙋю моли́твенницꙋ и҆ хода́таицꙋ ко влⷣцѣ хрⷭ҇тꙋ̀ и҆ бг҃ꙋ на́шемꙋ; во ᲂу҆миле́нїи серде́цъ на́шихъ є҆́й помо́лимсѧ: молѝ странѣ̀ на́шей побѣ́дꙋ на врагѝ дарова́ти, просѧ́щи на́мъ ми́ра и҆ ве́лїѧ ми́лости.
Кі́ими пѣ́сненными добро́тами восхва́лимъ прпⷣбнꙋю мт҃рь а҆́ннꙋ; ꙗ҆́кѡ бо ѕвѣзда̀, ѡ҆сїѧва́етъ зе́млю рѡссі́йскꙋю и҆ гра́дъ сво́й ка́шинъ свои́мъ къ бг҃ꙋ предстоѧ́нїемъ, того̀ молѧ́щи за лю́ди правосла̑вныѧ, во є҆́же сп҃сти́сѧ всѣ̑мъ, па́мѧть є҆ѧ̀ вѣ́рою и҆ любо́вїю почита́ющымъ.
Сла́ва, гла́съ є҃:
Стецы́тесѧ, всѝ правовѣ́рнїи лю́дїе, соше́дшесѧ, соста́вимъ пра́зднество въ прославле́нїе вели́кїѧ кнѧги́ни и҆ноки́ни а҆́нны и҆ возопїи́мъ є҆́й, глаго́люще: ра́дꙋйсѧ, ꙗ҆́кѡ а҆́гг҃лы и҆ человѣ́ки ᲂу҆диви́ла є҆сѝ, бл҃же́ннаѧ, чи́стымъ твои́мъ и҆ непоро́чнымъ житїе́мъ и҆ прешла̀ є҆сѝ ко хрⷭ҇тꙋ̀ въ вѣ́чный поко́й и҆ небꙋ́рное приста́нище: дне́сь лю́дїе ра́дꙋютсѧ и҆ веселѧ́тсѧ ѡ҆ ѡ҆брѣ́тенїи честны́хъ моще́й твои́хъ, ꙗ҆̀же подаю́тъ и҆сцѣле́нїе приходѧ́щымъ къ ни́мъ съ вѣ́рою, ты́ же, пребыва́ющи ᲂу҆ хрⷭ҇та̀ бг҃а во црⷭ҇твїи нбⷭ҇нѣмъ, молѝ сп҃сти́сѧ дꙋша́мъ на́шымъ.
И҆ ны́нѣ, бг҃оро́диченъ:
Хра́мъ и҆ две́рь є҆сѝ, пала́та и҆ престо́лъ цр҃е́въ, дв҃о всечⷭ҇тна́ѧ, є҆́юже и҆зба́витель мо́й, хрⷭ҇то́съ гдⷭ҇ь, во тмѣ̀ спѧ́щымъ ꙗ҆ви́сѧ, сл҃нце сы́й пра́вды, просвѣти́ти хотѧ̀ ꙗ҆̀же созда̀ по ѻ҆́бразꙋ своемꙋ̀ рꙋко́ю свое́ю. тѣ́мже, всепѣ́таѧ, ꙗ҆́кѡ мт҃рне дерзнове́нїе къ немꙋ̀ стѧжа́вшаѧ, непреста́ннѡ молѝ сп҃сти́сѧ дꙋша́мъ на́шымъ.
На стїхо́внѣ стїхи̑ры, гла́съ и҃.
Подо́бенъ: Ѽ, пресла́внагѡ чꙋдесѐ:
Ѽ, пресла́внагѡ чꙋдесѐ, ꙗ҆́кѡ въ немощнѣ́мъ є҆стествѣ̀ ве́лїѧ крѣ́пость ꙗ҆ви́сѧ, и҆ бѣсо́вскаѧ пре́лесть побѣди́сѧ, и҆ всѧ̑ кѡ́зни лꙋка́вагѡ разрꙋши́шасѧ, и҆ навѣ́ты ᲂу҆праздни́шасѧ. ѽ, бл҃же́ннаѧ въ жена́хъ, прпⷣбнаѧ вели́каѧ кнѧги́не и҆ноки́не а҆́нно, молѝ ѡ҆ на́съ чл҃вѣколю́бца, хрⷭ҇та̀ бг҃а на́шего.
Сті́хъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.
Ѽ, вели́кихъ бж҃е́ственныхъ дарова́нїй, на тебѣ̀, ма́ти прпⷣбнаѧ, вели́каѧ кнѧги́не а҆́нно, бы́вшихъ: ꙗ҆́кѡ ѿ млады́хъ ногте́й твои́хъ всели́сѧ въ тѧ̀ хрⷭ҇то́съ бг҃ъ на́шъ, тѣ́мъ мнѡ́гїѧ добродѣ́тєли сотвори́ла є҆сѝ и҆ житїе́мъ твои́мъ всѣ́хъ ᲂу҆диви́ла є҆сѝ. молѝ ᲂу҆̀бо сп҃сти́сѧ дꙋша́мъ на́шымъ.
Сті́хъ: Что̀ возда́мъ гдⷭ҇ви ѡ҆ всѣ́хъ, ꙗ҆̀же воздаде́ ми;
Ѽ, досточꙋ́днаѧ мт҃и а҆́нно, похвала̀ є҆сѝ гра́дꙋ ка́шинꙋ, всѣ̑мъ же и҆ноки́нѧмъ кра́сное ᲂу҆добре́нїе: ꙗ҆́кѡ бо добропло́днаѧ лоза̀, посредѣ̀ и҆́хъ процвѣла̀ є҆сѝ до́брыми твои́ми дѣ́лы и҆ прешла̀ є҆сѝ къ вѣ́чномꙋ селе́нїю. молѝ ᲂу҆̀бо ѡ҆ на́съ хрⷭ҇та̀ бг҃а сп҃сти́сѧ дꙋша́мъ на́шымъ.
Сла́ва, гла́съ ѕ҃:
Прїиди́те, всѝ и҆́ноцы и҆ и҆ноки́ни, мїрсті́и же мꙋ́жїе и҆ жєны̀ бл҃гочести̑выѧ, бога́тїи и҆ ᲂу҆бо́зїи, хотѧ́щїи сп҃сти́сѧ: поревнꙋ́имъ бл҃же́ннѣй и҆ прпⷣбнѣй мт҃ри, вели́цѣй кнѧги́не а҆́ннѣ, ꙗ҆́же посто́мъ, и҆ бдѣ́нїемъ, и҆ ѕѣ́льнымъ воздержа́нїемъ тѣ́ло своѐ до конца̀ и҆знꙋрѝ, и҆, ꙗ҆́кѡ ве́лїѧ свѣти́льница, возсїѧ̀ до́брыми свои́ми дѣ́лы, и҆ прише́дши ко хрⷭ҇тꙋ̀ въ вѣ̑чнаѧ селє́нїѧ, ны́нѣ пребыва́етъ въ невече́рнѣмъ свѣ́тѣ со а҆́гг҃льскими чи́нми, ра́дꙋющисѧ и҆ веселѧ́щисѧ, и҆ мо́литъ ѡ҆ всѣ́хъ лю́дехъ, во є҆́же сп҃сти́сѧ дꙋша́мъ на́шымъ.
И҆ ны́нѣ, бг҃оро́диченъ: Творе́цъ и҆ и҆зба́витель мо́й.
Тропа́рь, гла́съ г҃:
Дне́сь восхвалѧ́емъ тѧ̀, прпⷣбнаѧ мт҃и, вели́каѧ кнѧги́не и҆ноки́не а҆́нно: ꙗ҆́кѡ бо лоза̀ плодови́та посредѣ̀ те́рнїѧ, процвѣла̀ є҆сѝ во гра́дѣ ка́шинѣ твои́ми добродѣ́тельми, всѣ́хъ ᲂу҆диви́ла є҆сѝ чꙋ́днымъ твои́мъ житїе́мъ, тѣ́мже хрⷭ҇тꙋ̀ бг҃ꙋ ᲂу҆годи́ла є҆сѝ, и҆ ны́нѣ, ра́дꙋющисѧ и҆ веселѧ́щисѧ, пребыва́еши съ ли́ки прпⷣбныхъ же́нъ, наслажда́ющисѧ ра́йскїѧ красоты̀ и҆ весе́лїѧ. мо́лимъ ᲂу҆̀бо тѧ̀: молѝ ѡ҆ на́съ чл҃вѣколю́бца, хрⷭ҇та̀ бг҃а на́шего, дарова́ти на́мъ ми́ръ и҆ ве́лїю ми́лость.
И҆́нъ тропа́рь, гла́съ д҃:
Просвѣти́вшисѧ бжⷭ҇твенною бл҃года́тїю, прпⷣбнаѧ, и҆ пра́востїю ᲂу҆́мною дꙋ́шꙋ твою̀ привѧза́вши въ любо́вь хрⷭ҇то́вꙋ, тлѣ̑нныѧ, и҆ кра̑сныѧ, и҆ врє́менныѧ нивочто́же вмѣни́ла є҆сѝ. крⷭ҇тнымъ зна́менїемъ на мы́слєнныѧ (с. 583) врагѝ мꙋ́жески воѻрꙋжи́вшисѧ, по́стническими пѡ́двиги, посто́мъ и҆ моли́твами ᲂу҆́глїе страсте́й ᲂу҆гаси́ла є҆сѝ, достосла́внаѧ а҆́нно, и҆ по сме́рти и҆сточа́еши бл҃года́ть притека́ющымъ къ моще́мъ твои́мъ. и҆ ны́нѣ, въ нбⷭ҇нѣмъ черто́зѣ съ мꙋ́дрыми дѣ́вами предстоѧ́щи хрⷭ҇тꙋ̀, молѝ ѡ҆ на́съ, почита́ющихъ ст҃ꙋ́ю па́мѧть твою̀.
На ᲂу҆́трени,
по а҃-мъ стїхосло́вїи сѣда́ленъ, гла́съ а҃:
Дне́сь призыва́етъ на́съ ѡ҆брѣ́тенїе чⷭ҇тны́хъ моще́й твои́хъ, прпⷣбнаѧ мт҃и а҆́нно, свѣ́тлѡ пра́здновати па́мѧть твою̀, дне́сь всѝ лю́дїе веселѧ́тсѧ, прїи́мше тѧ̀ застꙋ́пницꙋ пред̾ гдⷭ҇емъ. ты́ же, ѽ бл҃же́ннаѧ, моли́сѧ ѡ҆ на́съ, вѣ́рою и҆ любо́вїю тѧ̀ почита́ющихъ.
Сла́ва, и҆ ны́нѣ, бг҃оро́диченъ:
Свѣ́тъ, ѿ свѣ́та происходѧ́й, во твою̀ дѣви́чꙋ ᲂу҆тро́бꙋ вни́де и҆ пло́тїю ѡ҆бложи́сѧ недомы́сленнѡ и҆ несказа́ннѡ, рожⷭ҇тво́мъ же є҆гѡ̀ всѧ̀ тва́рь ѡ҆бнови́сѧ и҆ і҆́дѡльскаѧ ле́сть разори́сѧ. тѣ́мъ мо́лимъ тѧ̀, пречⷭ҇таѧ: молѝ, да сп҃се́тъ дꙋ́шы на́шѧ.
По в҃-мъ стїхосло́вїи сѣда́ленъ, гла́съ д҃.
Подо́бенъ: Ско́рѡ предварѝ:
Пребл҃гі́й бг҃ъ, премꙋ́дростїю свое́ю всѧ̑ содѣ́ловаѧй и҆ прославлѧ́ѧй ст҃ы̑ѧ своѧ̑, просла́ви тѧ̀, прпⷣбнаѧ мт҃и, на землѝ и҆ на нб҃сѝ: и҆мꙋ́щи ᲂу҆̀бо къ немꙋ̀ дерзнове́нїе ве́лїе, молѝ за всѧ̑ лю́ди, въ правосла́вїи живꙋ́щыѧ, ꙗ҆́кѡ да пода́стъ и҆̀мъ ми́лость свою̀ въ де́нь сꙋ́дный.
Сла́ва, и҆ ны́нѣ, бг҃оро́диченъ:
Ѿ всѣ́хъ родѡ́въ пред̾избра́ннаѧ и҆ ѿ всѣ́хъ проро́кѡвъ пронарече́ннаѧ, ѿ всѣ́хъ же человѣ̑къ препросла́вленнаѧ и҆ ѿ а҆́гг҃лъ ᲂу҆дивлѧ́емаѧ, мт҃и бг҃а вы́шнѧгѡ, ᲂу҆дивѝ на на́съ недосто́йныхъ рабѣ́хъ твои́хъ ми́лость твою̀ и҆ молѝ за ны̀ сн҃а твоего̀ и҆ бг҃а на́шего, ꙗ҆́кѡ да пода́стъ на́мъ ми́лость свою̀ въ де́нь сꙋ́дный.
Велича́нїе:
Оу҆бл҃жа́емъ тѧ̀, прпⷣбнаѧ мт҃и, вели́каѧ кнѧги́не а҆́нно, и҆ чти́мъ ст҃ꙋ́ю па́мѧть твою̀, наста́внице и҆ноки́нѧмъ и҆ собесѣ́днице а҆́гг҃лѡмъ.
Ѱало́мъ и҆збра́нный: Терпѧ̀ потерпѣ́хъ гдⷭ҇а:
По полѷеле́и сѣда́ленъ, гла́съ и҃.
Подо́бенъ: Премꙋ́дрости:
Ѿ ю҆́ности твоеѧ̀ пред̾избра́ тѧ гдⷭ҇ь въ селє́нїѧ своѧ̑, прпⷣбнаѧ мт҃и а҆́нно, и҆ ѿ вседержи́тельныѧ десни́цы є҆гѡ̀ положи́сѧ вѣне́цъ нетлѣ́ненъ на главѣ̀ твое́й, и҆ ѡ҆заре́на бы́вши ѿ негѡ̀ бжⷭ҇твеннымъ свѣтосїѧ́нїемъ, ны́нѣ мо́лишисѧ за гра́дъ тво́й, за всю́ же зе́млю рѡссі́йскꙋю и҆ за всѧ̑ хрⷭ҇тїа́ны правосла̑вныѧ, ст҃ꙋ́ю па́мѧть твою̀ вѣ́рнѡ почита́ющыѧ и҆ хрⷭ҇тꙋ̀ воспѣва́ющыѧ: сла́ва тебѣ̀, гдⷭ҇и, творѧ́щемꙋ ди̑внаѧ твоѧ̑ чꙋдеса̀.
Сла́ва, и҆ ны́нѣ, бг҃оро́диченъ:
Со́лнце разꙋ́мное возсїѧ̀ ѿ пречⷭ҇тыѧ твоеѧ̀ ᲂу҆тро́бы, ѿ негѡ́же всѧ̀ тва́рь ви́димаѧ и҆ неви́димаѧ просвѣти́сѧ и҆ те́рнїе грѣхо́вное и҆скорени́сѧ, тѣ́мъ и҆ мы̀, ᲂу҆бо́зїи и҆ недосто́йнїи рабѝ твоѝ, мо́лимъ тѧ̀: да просвѣти́тъ сн҃ъ тво́й мра́къ дꙋ́шъ на́шихъ, да и҆збꙋ́демъ ти́ны грѣхо́вныѧ и҆ да ѡ҆брѧ́щемъ ми́лость въ де́нь стра́шнагѡ и҆спыта́нїѧ твои́ми ма́терними къ немꙋ̀ моли́твами.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Сті́хъ: Въ цр҃квахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ.
Всѧ́кое дыха́нїе: Є҆ѵⷢ҇лїе ѿ матѳе́а, зача́ло р҃д.
По н҃-мъ ѱалмѣ̀ стїхи́ра, гла́съ ѕ҃.
Тѧ̀ хода́таицꙋ и҆ моли́твенницꙋ бл҃гопрїѧ́тнꙋ и҆́мамы къ бг҃ꙋ, прпⷣбнаѧ мт҃и, вели́каѧ кнѧги́не а҆́нно, ты́ бо мо́лиши за всѧ̑ правосла̑вныѧ лю́ди ꙗ҆́кѡ да и҆зба́вимсѧ ѿ бѣ́дъ, и҆ скорбе́й, и҆ ѿ всѧ́кагѡ навѣ́та вра́жїѧ. тѣ́мъ прославлѧ́емъ твою̀ ст҃ꙋ́ю и҆ чⷭ҇тнꙋ́ю па́мѧть, и҆ восхвалѧ́емъ тѧ̀, бл҃же́ннꙋю въ жена́хъ, зовꙋ́ще: не преста́й молѧ́щисѧ ѡ҆ дꙋша́хъ на́шихъ.
Канѡ́нъ прест҃ѣ́й бг҃оро́дицѣ со і҆рмосо́мъ на ѕ҃ и҆ прпⷣбнѣй канѡ́нъ на и҃, гла́съ г҃.
Пѣ́снь а҃.
І҆рмо́съ: Во́ды дре́вле ма́нїемъ бж҃е́ственнымъ во є҆ди́но со́нмище совокꙋпи́вый, и҆ раздѣли́вый мо́ре і҆и҃льтєскимъ лю́демъ, се́й бг҃ъ на́шъ препросла́вленъ є҆́сть: томꙋ̀ є҆ди́номꙋ пои́мъ, ꙗ҆́кѡ просла́висѧ. (с. 586)
Да́ждь мѝ, гдⷭ҇и, разꙋмѣ́нїе, да досто́йнѡ воспою̀ и҆ просла́влю бл҃гоꙋго́ждшꙋю тѝ прпⷣбнꙋю ма́терь, пре́жде бы́вшꙋю вели́кꙋю кнѧги́ню а҆́ннꙋ, и҆ возопїю̀ тебѣ̀, хрⷭ҇тꙋ̀ моемꙋ̀, ꙗ҆́кѡ препросла́вленъ є҆сѝ.
Ѡ҆ тебѣ̀, бл҃же́ннаѧ ма́ти а҆́нно, хощꙋ̀ ны́нѣ ѧ҆зы́къ подви́гнꙋти и҆ сло́во прострѣ́ти: споспѣ́шествꙋй мѝ, недосто́йномꙋ, моли́твами твои́ми, да досто́йнѡ восхвалю́ тѧ и҆ воспою̀ гдⷭ҇еви моемꙋ̀, ꙗ҆́кѡ просла́висѧ.
Со млады́хъ ногте́й твои́хъ стра́хъ бж҃їй и҆мѣ́ла є҆сѝ въ се́рдцѣ твое́мъ, бл҃же́ннаѧ, є҆го́же до конца̀ содержа́ла є҆сѝ, ᲂу҆крѣплѧ́ема бж҃е́ственною бл҃года́тїю, тѣ́мъ и҆ дꙋ́шꙋ твою̀ сп҃сла̀ є҆сѝ, вы́нꙋ пою́щи хрⷭ҇тꙋ̀, ꙗ҆́кѡ просла́висѧ.
Бг҃оро́диченъ:
Тобо́ю, пречⷭ҇таѧ влⷣчце, ѿ всѣ́хъ родѡ́въ пред̾избра́ннаѧ дв҃о, ве́сь мі́ръ ѡ҆бнови́сѧ, и҆ ве́сь ро́дъ чл҃вѣ́ческїй ѿ ле́сти дїа́вольскїѧ свободи́сѧ, и҆ вопїе́тъ ко хрⷭ҇тꙋ̀, ꙗ҆́кѡ просла́висѧ.
Пѣ́снь г҃.
І҆рмо́съ: Непло́днаѧ дꙋшѐ и҆ безча́днаѧ, стѧжѝ пло́дъ бл҃госла́вный, веселѧ́щисѧ, возопі́й: ᲂу҆тверди́хсѧ тобо́ю, бж҃е, нѣ́сть ст҃ъ, нѣ́сть пра́веденъ, па́че тебѐ, гдⷭ҇и.
Ѻ҆́ко дꙋше́вное чи́сто и҆ здра́во и҆мѣ́ла є҆сѝ ѿ ю҆́ности твоеѧ̀, бл҃же́ннаѧ, и҆́мже всегда̀ зрѣ́ла є҆сѝ къ го́рнемꙋ селе́нїю, є҆гѡ́же и҆ дости́гла є҆сѝ, и҆ ны́нѣ хрⷭ҇тꙋ̀ воспѣва́еши: нѣ́сть ст҃ъ и҆ нѣ́сть пра́веденъ, па́че тебѐ, гдⷭ҇и.
И҆зъ бл҃гочести́вагѡ ко́рене произрасла̀ є҆сѝ, бл҃же́ннаѧ, и҆ во всѧ̑ дни̑ житїѧ̀ твоегѡ̀ съ сꙋпрꙋ́гомъ твои́мъ чи́стѡ и҆ непоро́чнѡ пребыва́ющи, вопїѧ́ла є҆сѝ ко хрⷭ҇тꙋ̀: нѣ́сть ст҃ъ и҆ нѣ́сть пра́веденъ, па́че тебѐ, гдⷭ҇и.
Ничто́же пред̾ бг҃омъ вѧ́щше є҆́сть добро́ты дꙋше́вныѧ. ты́ же, прпⷣбнаѧ мт҃и, соблюла̀ є҆сѝ ю҆̀ непреткнове́ннѡ, вопїю́щи ко хрⷭ҇тꙋ̀: нѣ́сть ст҃ъ и҆ нѣ́сть пра́веденъ, па́че тебѐ, гдⷭ҇и.
Бг҃оро́диченъ:
Ѻ҆трокови́це чⷭ҇таѧ, мт҃и гдⷭ҇а на́шегѡ, помози́ ми, недосто́йномꙋ рабꙋ̀ твоемꙋ̀, воспѣ́ти ᲂу҆го́дницꙋ сн҃а твоегѡ̀ и҆ бг҃а моегѡ̀, прпⷣбнꙋю мт҃рь а҆́ннꙋ, и҆ рещѝ ко хрⷭ҇тꙋ̀: нѣ́сть ст҃ъ и҆ нѣ́сть пра́веденъ, па́че тебѐ, гдⷭ҇и.
И҆́нъ конда́къ, гла́съ и҃:
Скоропослꙋ́шнꙋю помо́щницꙋ всѝ, сꙋ́щїи въ бѣда́хъ, бл҃гоче́стнѡ воспое́мъ, а҆́ннꙋ ст҃ꙋ́ю, дне́сь любо́вїю соше́дшесѧ во ѡ҆брѣ́тенїе чⷭ҇тны́хъ моще́й є҆ѧ̀. воспое́мъ пѣ́снь є҆ди́номꙋ въ трⷪ҇цѣ бг҃ꙋ, ра́дꙋющесѧ, сподо́бльшемꙋ на́съ ви́дѣти пречⷭ҇тое сокро́вище чⷭ҇тны́хъ моще́й є҆ѧ̀: ѿ мнѡ́гъ бо лѣ́тъ сокровє́ны бы́ша, напослѣ́докъ же на́мъ ꙗ҆влє́ны и҆ и҆сточа́ютъ мнѡ́га и҆ разли̑чна и҆сцѣлє́нїѧ. ꙗ҆́кѡ да моли́твами є҆ѧ̀ къ бг҃ꙋ ѿ всѧ́кихъ находѧ́щихъ ѕѡ́лъ и҆зба́вимсѧ, ра́достною дꙋше́ю и҆ весе́лїемъ се́рдца бл҃года̑рнаѧ воспое́мъ, глаго́люще: ра́дꙋйсѧ, ᲂу҆твержде́нїе гра́дꙋ на́шемꙋ. (с. 588)
Сѣда́ленъ, гла́съ г҃:
Воспита́на была̀ є҆сѝ, бл҃же́ннаѧ, ѿ ро́ждшихъ тѧ̀ въ за́повѣдехъ гдⷭ҇нихъ, ꙗ҆́кѡ лоза̀ въ красноцвѣтꙋ́щихъ вїногра́дѣхъ, тѣ́мъ тѧ̀ ᲂу҆бл҃жа́емъ и҆ ст҃ꙋ́ю па́мѧть твою̀ вѣ́рнѡ почита́емъ. молѝ хрⷭ҇та̀ бг҃а, да сп҃се́тъ дꙋ́шы на́шѧ.
Сла́ва, и҆ ны́нѣ, бг҃оро́диченъ:
Свѣ́та превѣ́чнаго, ѿ ѻ҆ц҃а̀ пре́жде вѣ̑къ рожде́нное сло́во бж҃їе, родила̀ є҆сѝ на́мъ, прест҃а́ѧ влⷣчце, хрⷭ҇та̀ бг҃а на́шего, и҆́мже вселе́ннаѧ ѿ тлѝ сме́ртныѧ свободи́сѧ, тѣ́мъ тѧ̀ непреста́ннѡ съ ни́мъ пое́мъ и҆ велича́емъ.
Пѣ́снь д҃.
І҆рмо́съ: Покры́ла є҆́сть нб҃са̀ добродѣ́тель твоѧ̀, хрⷭ҇тѐ: и҆з̾ кївѡ́та бо проше́дъ ст҃ы́ни, твоеѧ̀ нетлѣ́нныѧ мт҃ре, въ хра́мѣ сла́вы твоеѧ̀ ꙗ҆ви́лсѧ є҆сѝ, ꙗ҆́кѡ младе́нецъ рꙋконоси́мь, и҆ и҆спо́лнишасѧ всѧ̀ твоегѡ̀ хвале́нїѧ.
Преꙋкраше́на была̀ є҆сѝ, прпⷣбнаѧ мт҃и, добродѣ́тельми твои́ми, ꙗ҆́кѡ цвѣ́ты бл҃гоꙋха́нными и҆ ꙗ҆́кѡ ка́менїемъ драгоцѣ́ннымъ. тѣ́мъ и҆ ᲂу҆годи́ла є҆сѝ нетлѣ́нномꙋ цр҃ю̀ и҆ влⷣцѣ всѣ́хъ, є҆мꙋ́же и҆ воспѣ́ла є҆сѝ: гдⷭ҇и, и҆спо́лнишасѧ всѧ̑ твоегѡ̀ хвале́нїѧ.
Ѽ, тве́рдое ѡ҆снова́нїе вѣ́ры, ѽ, любы̀ къ бг҃ꙋ крѣ́пкаѧ! въ же́нстѣмъ бо є҆стествѣ̀ мꙋ́жески побѣди́ла є҆сѝ неви́димаго врага̀ сꙋпоста́та и҆ та́кѡ ᲂу҆годи́ла є҆сѝ хрⷭ҇тꙋ̀, вопїю́щи: гдⷭ҇и, и҆спо́лнишасѧ всѧ̑ твоегѡ̀ хвале́нїѧ.
Хрⷭ҇то́въ хра́мъ была̀ є҆сѝ, прпⷣбнаѧ мт҃и, твое́ю чⷭ҇тото́ю и҆ цѣломꙋ́дрїемъ и҆ про́чими добродѣ́тельми, тѣ́мже вмѣсти́ла є҆сѝ въ себѐ ст҃а́го дх҃а, къ немꙋ́же и҆ возопи́ла є҆сѝ: гдⷭ҇и, и҆спо́лнишасѧ всѧ̑ твоегѡ̀ хвале́нїѧ.
Бг҃оро́диченъ:
Вои́стиннꙋ всѣ́хъ тва́рей вы́шши ꙗ҆ви́ласѧ є҆сѝ, влⷣчце, и҆ кто̀ дово́ленъ по достоѧ́нїю и҆зрещѝ вели́чїе твоѐ; простра́ннее бо небе́съ ꙗ҆ви́сѧ чре́во твоѐ, въ не́мже носи́ла є҆сѝ всѣ́ми невмѣсти́маго бг҃а, къ немꙋ́же и҆ мы̀ вопїе́мъ: гдⷭ҇и, и҆спо́лнишасѧ всѧ̑ твоегѡ̀ хвале́нїѧ.
Пѣ́снь є҃.
І҆рмо́съ: Ꙗ҆́кѡ ви́дѣ и҆са́їа ѡ҆бра́знѡ на прⷭ҇то́лѣ превознесе́на бг҃а, ѿ а҆́гг҃лъ сла́вы дѡрѷноси́ма, ѽ, ѡ҆каѧ́нный, вопїѧ́ше, а҆́зъ: прови́дѣхъ бо воплоща́ема бг҃а, свѣ́та невече́рнѧ и҆ ми́ромъ влады́чествꙋюща.
А҆́ще и҆ во бл҃годе́нствїи пребыва́ла є҆сѝ, бл҃же́ннаѧ мт҃и, и҆ всѧ́ко и҆з̾ѻби́лїе бли́зъ себѐ и҆мѣ́ла є҆сѝ, ника́коже вда́ласѧ є҆сѝ на поко́й и҆ весе́лїе пи́щное, но, ѕѣ́льнымъ трꙋдо́мъ и҆ воздержа́нїемъ тѣ́ло твоѐ ᲂу҆дрꙋча́ющи, воспѣва́ла є҆сѝ жениха̀ твоего̀, хрⷭ҇та̀, свѣ́та невече́рнѧ и҆ ми́ромъ влады́чествꙋюща.
Любо́вїю хрⷭ҇то́вою ᲂу҆ѧзви́вшисѧ, бл҃же́ннаѧ мт҃и, вели́каѧ кнѧги́не и҆ноки́не а҆́нно, ꙗ҆́кѡ добропло́днаѧ лоза̀ въ вїногра́дѣ, процвѣла̀ є҆сѝ во гра́дѣ ка́шинѣ бл҃ги́ми твои́ми дѣѧ̑нїи и҆ побѣди́ла є҆сѝ бѣсѡ́вскїѧ полкѝ, воспѣва́ющи хрⷭ҇та̀, свѣ́та невече́рнѧ и҆ ми́ромъ влады́чествꙋюща.
И҆́стиннымъ свѣ́томъ хрⷭ҇то́вымъ ѡ҆сїѧ́на была̀ є҆сѝ, мт҃и ст҃а́ѧ, вели́каѧ кнѧги́не и҆ноки́не а҆́нно, насыща́ющисѧ ве́лїѧ бл҃года́ти и҆ воспѣва́ющи є҆го̀, свѣ́та невече́рнѧ и҆ ми́ромъ влады́чествꙋюща.
Бг҃оро́диченъ:
Ты̀ ᲂу҆̀бо, чⷭ҇таѧ мт҃и гдⷭ҇нѧ, чⷭ҇тото́ю и҆ дв҃ствомъ всѣ́хъ превзошла̀ є҆сѝ, тѣ́мже и҆збра́на была̀ є҆сѝ въ бж҃їе вмѣсти́лище и҆ родила̀ є҆сѝ на́мъ хрⷭ҇та̀ бг҃а на́шего, свѣ́та невече́рнѧ и҆ ми́ромъ влады́чествꙋюща.
Пѣ́снь ѕ҃.
І҆рмо́съ: Бе́здна послѣ́днѧѧ грѣхѡ́въ ѡ҆бы́де мѧ̀, и҆ и҆счеза́етъ дꙋ́хъ мо́й: но простры́й, влⷣко, высо́кꙋю твою̀ мы́шцꙋ, ꙗ҆́кѡ петра̀, мѧ̀ ᲂу҆пра́вителю, сп҃сѝ.
И҆зъ бл҃гочести́вагѡ ко́рене произрасла̀ є҆сѝ, прпⷣбнаѧ мт҃и, вели́каѧ кнѧги́не и҆ноки́не а҆́нно, бл҃гоче́стїемъ же и҆ вѣ́рою, а҆́ки цвѣ́тъ, процвѣла̀ є҆сѝ во твое́мъ ѻ҆те́чествѣ, во гра́дѣ ка́шинѣ, и҆ прешла̀ є҆сѝ къ го́рнемꙋ жи́тельствꙋ, вопїю́щи ко хрⷭ҇тꙋ̀: ꙗ҆́кѡ петра́ мѧ, ᲂу҆пра́вителю, сп҃сѝ.
Вои́стиннꙋ досто́йна є҆сѝ похвалы̀ ве́лїѧ, прпⷣбнаѧ мт҃и, вели́каѧ кнѧги́не а҆́нно, ꙗ҆́кѡ въ же́нстѣмъ є҆стествѣ̀ мꙋ́жескꙋю крѣ́пость и҆мѣ́ла є҆сѝ, и҆ побѣди́ла є҆сѝ сꙋпоста́та дїа́вола, и҆ воспѣва́ла є҆сѝ ко влⷣцѣ хрⷭ҇тꙋ̀: ꙗ҆́кѡ петра́ мѧ, ᲂу҆пра́вителю, сп҃сѝ.
Є҆́й, вои́стиннꙋ свѣ́телъ и҆ тве́рдъ ᲂу҆́мъ и҆мѣ́ла є҆сѝ, прпⷣбнаѧ, всѧ̑ бо кра̑снаѧ мі́ра сегѡ̀, ꙗ҆́кѡ ᲂу҆ме́ты, вмѣни́ла є҆сѝ, бл҃же́ннаѧ, и҆ ничто́же возмо́же поколеба́ти непоро́чнꙋю твою̀ дꙋ́шꙋ, внегда̀ воспѣва́ти тѝ хрⷭ҇тꙋ̀: ꙗ҆́кѡ петра́ мѧ, ᲂу҆пра́вителю, сп҃сѝ.
Бг҃оро́диченъ:
Ле́стнымъ ᲂу҆́бѡ ѕмїи́нымъ престꙋпле́нїемъ низпадо́хомъ, но съ сн҃омъ твои́мъ, і҆и҃сомъ хрⷭ҇то́мъ, бг҃омъ на́шимъ, совоста́хомъ, мт҃и гдⷭ҇нѧ, є҆го́же родила̀ є҆сѝ на́мъ, свѣ́тъ, и҆ живо́тъ, и҆ воскресе́нїе.
Конда́къ, гла́съ д҃. Подо́бенъ: Возне́слсѧ є҆сѝ:
Ꙗ҆́кѡ пресвѣ́тлаѧ ѕвѣзда̀, ꙗ҆ви́ласѧ є҆сѝ въ рѡссі́йстѣй землѝ, во гра́дѣ ка́шинѣ, прпⷣбнаѧ мт҃и а҆́нно, во всѣ́хъ бл҃гочести́выхъ и҆ вѣ́рныхъ жена́хъ, а҆́ки крі́нъ, процвѣла̀ є҆сѝ чⷭ҇тымъ и҆ непоро́чнымъ твои́мъ житїе́мъ, во и҆ноки́нѧхъ же соверше́нными твои́ми трꙋды̀ и҆ пѡ́двиги, и҆ возшла̀ є҆сѝ къ вы́шнемꙋ гра́дꙋ, ра́дꙋющисѧ и҆ веселѧ́щисѧ, ꙗ҆́кѡ до́брѣ соверши́вши твоѐ тече́нїе, и҆ ны́нѣ честны̑ѧ твоѧ̑ мо́щи, а҆́ки би́серїе драго́е, ꙗ҆ви́шасѧ, на и҆сцѣле́нїе всѣ̑мъ, приходѧ́щымъ съ вѣ́рою. тѣ́мъ и҆ вопїе́мъ тѝ: ра́дꙋйсѧ, всекра́снаѧ дꙋше́ю, и҆ молѝ хрⷭ҇та̀ бг҃а ѡ҆ сп҃се́нїи дꙋ́шъ на́шихъ.
І҆́косъ:
Прїиди́те, всѝ бл҃говѣ́рнїи лю́дїе, воспои́мъ и҆ просла́вимъ прпⷣбнꙋю вели́кꙋю кнѧги́ню и҆ноки́ню а҆́ннꙋ и҆ та́кѡ къ не́й возопїи́мъ: ра́дꙋйсѧ, мт҃и ст҃а́ѧ, великоимени́таѧ кнѧги́не и҆ноки́не а҆́нно, ꙗ҆́кѡ ѿ ю҆́ности твоеѧ̀ возлюби́ла є҆сѝ хрⷭ҇та̀ и҆ по за́повѣдемъ є҆гѡ̀ ше́ствовала є҆сѝ: ра́дꙋйсѧ, ꙗ҆́кѡ ѕѣ́льнымъ твои́мъ воздержа́нїемъ тѣ́ло твоѐ ᲂу҆дрꙋчи́ла є҆сѝ. ра́дꙋйсѧ, ꙗ҆́кѡ сподо́биласѧ є҆сѝ ѿ бг҃а да́ра чꙋдотворе́нїй: ра́дꙋйсѧ, ꙗ҆́кѡ ѡ҆зарѝ бг҃ъ се́рдце твоѐ, во є҆́же восхотѣ́ти ѡ҆блещи́сѧ во и҆́ноческое ѡ҆дѣѧ́нїе и҆ послѣ́довати хрⷭ҇тꙋ̀. ра́дꙋйсѧ, ни́щымъ пита́тельнице и҆ си̑рымъ застꙋ́пнице: ра́дꙋйсѧ, всѣ̑мъ рѡссі̑йскимъ жена́мъ похвало̀ и҆ ᲂу҆твержде́нїе. ра́дꙋйсѧ, все́й рѡссі́йстѣй странѣ̀ тве́рдое ᲂу҆добре́нїе: ра́дꙋйсѧ, ꙗ҆́кѡ вмѣ́сто земна́гѡ ца́рства нбⷭ҇ное ѡ҆брѣла̀ є҆сѝ. ра́дꙋйсѧ, ꙗ҆́кѡ по сме́рти твое́й тѣ́ло твоѐ въ нѣ́драхъ землѝ не подве́ржесѧ тлѣ́нїю: ра́дꙋйсѧ, ꙗ҆́кѡ предстои́ши съ ли́ки ст҃ы́хъ и҆ прпⷣбныхъ же́нъ невече́рнемꙋ свѣ́тꙋ и҆ мо́лишисѧ ѡ҆ сп҃се́нїи дꙋ́шъ на́шихъ.
Пѣ́снь з҃.
І҆рмо́съ: Ꙗ҆́коже дре́вле бл҃гочести̑выѧ трѝ ѻ҆́троки ѡ҆роси́лъ є҆сѝ въ пла́мени халде́йстѣмъ, свѣ́тлымъ бжⷭ҇тва̀ ѻ҆гне́мъ и҆ на́съ ѡ҆зарѝ, бл҃гослове́нъ є҆сѝ, взыва́ющыѧ, бж҃е ѻ҆тє́цъ на́шихъ.
И҆́стинно ве́лїе чꙋ́до ꙗ҆ви́сѧ во гра́дѣ ка́шинѣ, ꙗ҆́кѡ чⷭ҇тны̑ѧ твоѧ̑ мо́щи мно́га лѣ́та земле́ю покровє́ны бы́ша, ны́нѣ же бж҃їею бл҃года́тїю ꙗ҆ви́шасѧ верхꙋ̀ землѝ на и҆сцѣле́нїе всѣ̑мъ, приходѧ́щымъ съ вѣ́рою и҆ вопїю́щымъ: бл҃гослове́нъ бг҃ъ ѻ҆тє́цъ на́шихъ.
Ка́кѡ возмо́жемъ не диви́тисѧ тебѣ̀, бл҃же́ннаѧ мт҃и; пребыла́ бо є҆сѝ, а҆́ки свѣща̀ свѣтѧ́щи, посредѣ̀ рѡссі́йскихъ же́нъ чꙋ́днымъ твои́мъ житїе́мъ, вы́нꙋ воспѣва́ющи: бл҃гослове́нъ бг҃ъ ѻ҆тє́цъ на́шихъ.
Оу҆твержде́на была̀ є҆сѝ, мт҃и прпⷣбнаѧ, а҆́ки а҆дама́нтъ крѣ́пкїй, добродѣ́тельми твои́ми и҆, ꙗ҆́кѡ невѣ́ста, ᲂу҆кра́шена была̀ є҆сѝ мѡни́сты златы́ми, дѣ́лы твои́ми бл҃ги́ми, воспѣва́ющи хрⷭ҇тꙋ̀: бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.
Бг҃оро́диченъ:
Ю҆́ницꙋ тѧ̀ нескве́рнꙋю, дв҃ꙋ и҆ бг҃оро́дицꙋ, и҆здале́ча прⷪ҇ро́цы и҆мены̀ разли́чными нареко́ша: и҆́нъ бо тѧ̀ го́рꙋ мы́сленнꙋ наречѐ, дрꙋгі́й же роди́тельницꙋ бж҃їю, ѻ҆́въ же рꙋно̀, ѻ҆́въ же сщ҃е́ннꙋю две́рь. тѣ́мже и҆ мы̀ всѝ досто́йнѡ тѧ̀ пое́мъ и҆ славосло́вимъ во вѣ́ки.
Пѣ́снь и҃.
І҆рмо́съ: Слꙋжи́ти живо́мꙋ бг҃ꙋ въ вавѷлѡ́нѣ ѻ҆́троцы претерпѣ́вше, ѡ҆ мꙋсїкі́йскихъ ѻ҆рга́нѣхъ неради́ша и҆, посредѣ̀ пла́мене стоѧ́ще, бг҃олѣ́пнꙋю пѣ́снь воспѣва́хꙋ, глаго́люще: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Ка́кѡ и҆зглаго́лю вели́чїе бж҃їе на тебѣ̀, прпⷣбнаѧ мт҃и а҆́нно, ꙗ҆́вльшеесѧ; ꙗ҆́кѡ по толи́цѣхъ лѣ́тѣхъ ѡ҆брѣто́шасѧ мо́щи твоѧ̑ нетлѣ̑нны, на ᲂу҆дивле́нїе всѣ̑мъ человѣ́кѡмъ, пою́щымъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Ничто́же є҆́сть дража́йше пред̾ бг҃омъ добродѣ́тельныѧ дꙋшѝ, є҆ѧ́же ве́сь мі́ръ недосто́инъ. тѣ́мже и҆ ты̀, прпⷣбнаѧ мт҃и а҆́нно, па́че всегѡ̀ прилѣжа́ла є҆сѝ ѡ҆ сицевѣ́й безсме́ртнѣй ве́щи, пою́щи: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Ꙗ҆́кѡ свѣщꙋ̀ свѣ́тлꙋ, ᲂу҆гото́вала є҆сѝ кро́ткꙋю дꙋ́шꙋ твою̀, прпⷣбнаѧ мт҃и а҆́нно, тѣ́мже по сме́рти твое́й мно́га и҆сцѣлє́нїѧ недꙋ̑жнымъ и҆злїѧ́шасѧ ѿ чⷭ҇тны́хъ моще́й твои́хъ. сегѡ̀ ра́ди мы̀ вопїе́мъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Гдⷭ҇а моего̀ и҆ бг҃а ро́ждшаѧ, мт҃и безневѣ́стнаѧ, дерзнове́нїе и҆мꙋ́щи къ немꙋ̀, застꙋпѝ и҆ сохрани́ мѧ твои́мъ хода́тайствомъ, ꙗ҆́кѡ да воспою̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Пѣ́снь ѳ҃.
І҆рмо́съ: Сла́дкою пречⷭ҇тагѡ твоегѡ̀ ржⷭ҇тва̀ стрѣло́ю ᲂу҆ѧзвле́ни, чⷭ҇таѧ, твое́й достожела́ннѣй добро́тѣ дивѧ́щесѧ, пѣ́сньми а҆́гг҃льскими досто́йнѡ тѧ̀ ꙗ҆́кѡ мт҃рь бж҃їю велича́емъ.
И҆́миже вѣ́сть сꙋдьба́ми прославлѧ́етъ гдⷭ҇ь ст҃ы̑ѧ своѧ̑, и҆́хже и҆мена̀ напи̑сана сꙋ́ть на нб҃сѝ въ кни́гахъ живо́тныхъ, то́йже и҆ тѧ̀ просла́ви свои́мъ милосе́рдїемъ, прпⷣбнаѧ мт҃и а҆́нно. тѣ́мъ тѧ̀ пое́мъ и҆ велича́емъ.
Ны́нѣ съ ли́ки а҆́гг҃льскими на нб҃сѣ́хъ предстои́ши влⷣцѣ всѣ́хъ, прпⷣбнаѧ мт҃и а҆́нно, молѧ́щи ѡ҆ гра́дѣ твое́мъ и҆ ѡ҆ чтꙋ́щихъ вѣ́рою ст҃ꙋ́ю па́мѧть твою̀, недꙋ́гꙋющымъ же подаю́щи и҆сцѣле́нїе ѿ чⷭ҇тны́хъ моще́й твои́хъ. тѣ́мъ тѧ̀ пое́мъ и҆ велича́емъ.
Ю҆́на є҆щѐ во́зрастомъ бы́вши, прпⷣбнаѧ мт҃и а҆́нно, тѣ́снымъ и҆ приско́рбнымъ пꙋте́мъ ше́ствовала є҆сѝ, всѧ́кїѧ сла́дости, ꙗ҆́кѡ го́рести ѿвраща́ющисѧ, ны́нѣ дости́гла є҆сѝ неизрече́нныѧ ра́дости. тѣ́мъ тѧ̀ пое́мъ и҆ велича́емъ.
Бг҃оро́диченъ:
А҆арѡ́новъ же́злъ прозѧбе́й, влⷣчце, пре́жде непло́денъ бы́въ, по́слѣжде цвѣ́тъ и҆ пло́дъ и҆спꙋстѝ: та́кожде и҆ ты̀, прест҃а́ѧ дв҃о, безмꙋ́жнѡ родила̀ є҆сѝ хрⷭ҇та̀ бг҃а на́шего. тѣ́мъ тѧ̀ пое́мъ и҆ велича́емъ.
Свѣти́ленъ:
Стра́хомъ бж҃їимъ ѡ҆гражде́на была̀ є҆сѝ, прпⷣбнаѧ, и҆, ника́коже ᲂу҆боѧ́вшисѧ де́монскихъ си́лъ, ѿшла̀ є҆сѝ ко трисїѧ́нномꙋ вели́комꙋ свѣ́тꙋ и҆ ны́нѣ пребыва́еши въ неизрече́ннѣй свѣ́тлости со всѣ́ми ст҃ы́ми. тѣ́мъ тѧ̀ мо́лимъ: моли́сѧ ѡ҆ на́съ, творѧ́щихъ ст҃ꙋ́ю па́мѧть твою̀.
Сла́ва, и҆ ны́нѣ, бг҃оро́диченъ:
Свѣ́та превѣ́чнаго родила̀ є҆сѝ на́мъ, хрⷭ҇та̀ бг҃а на́шего, пречⷭ҇таѧ дв҃о, и҆зба́вльшаго ве́сь мі́ръ ѿ ле́сти дїа́вола. тѣ́мже мо́лимъ тѧ̀: не преста́й молѧ́щи, да пода́стъ на́мъ ми́лость свою̀ въ де́нь сꙋ́дный.
На хвали́техъ стїхи̑ры, гла́съ д҃.
Подо́бенъ: Что́ тѧ нарече́мъ:
Что́ тѧ нарече́мъ, прпⷣбнаѧ мт҃и а҆́нно; ꙗ҆́кѡ бо ѕвѣзда̀, ѡ҆сїѧва́еши ѻ҆те́чество твоѐ, гра́дъ ка́шинъ, многочи́сленными чꙋдесы̀ твои́ми, подаю́щи и҆сцѣле́нїе приходѧ́щымъ съ вѣ́рою къ чⷭ҇тны̑мъ моще́мъ твои̑мъ. молѝ ᲂу҆̀бо спасти́сѧ дꙋша́мъ на́шымъ.
Что́ тѧ воз̾именꙋ́емъ, бл҃же́ннаѧ мт҃и а҆́нно; лꙋнꙋ́ ли свѣ́тлꙋю, свѣтѧ́щꙋю во все́й землѝ рѡссі́йстѣй; и҆лѝ ѕвѣздꙋ̀ разꙋ́мнꙋю, зрѧ́щꙋю ко ᲂу҆́мномꙋ со́лнцꙋ, (с. 596) наслажда́ющꙋсѧ бжⷭ҇твеннагѡ свѣтосїѧ́нїѧ и҆ молѧ́щꙋсѧ за ве́сь хрⷭ҇тїа́нскїй ро́дъ, да не превозмо́гꙋтъ сꙋпоста́ты, но да бꙋ́дꙋтъ побѣжде́ни стра́хомъ бж҃їимъ. молѝ ᲂу҆̀бо сп҃сти́сѧ дꙋша́мъ на́шымъ.
Прїиди́те, всѝ рѡссі́йстїи наро́ди,почти́мъ и҆ похва́лимъ прпⷣбнꙋю мт҃рь, вели́кꙋю кнѧги́ню и҆ноки́ню а҆́ннꙋ, па́че зла́та чистотꙋ̀ возлюби́вшꙋю, и҆ па́че сапфі́ра дꙋ́шꙋ свою̀ просвѣти́вшꙋю до́брыми свои́ми дѣѧ̑нїи, и҆ ны́нѣ предстоѧ́щꙋю цр҃ю̀ нбⷭ҇номꙋ со а҆́гг҃льскими ли́ки, и҆ молѧ́щꙋю сп҃сти́сѧ дꙋша́мъ на́шымъ.
Сла́ва, гла́съ и҃:
Кто̀ не подиви́тсѧ, кто̀ не похва́литъ и҆ не воспое́тъ вѣ́рнѡ сїю̀ бл҃же́ннꙋю прпⷣбнꙋю мт҃рь а҆́ннꙋ, ꙗ҆́кѡ по ст҃ѣ́мъ є҆ѧ̀ преставле́нїи бы́ша си́лою бж҃їею мнѡ́га чꙋдеса̀ ѿ честны́хъ моще́й є҆ѧ̀, ꙗ҆̀же подаю́тъ и҆сцѣле́нїѧ приходѧ́щымъ къ ни̑мъ съ вѣ́рою. сегѡ̀ ра́ди возопїи́мъ къ не́й, си́це зовꙋ́ще: ра́дꙋйсѧ, прпⷣбнаѧ мт҃и и҆ноки́не а҆́нно, вели́кагѡ да́ра ѿ хрⷭ҇та̀ сподо́бившаѧсѧ и҆ ны́нѣ пребыва́ющаѧ во црⷭ҇твїи нбⷭ҇нѣмъ съ ли́ки прпⷣбныхъ, молѝ сп҃сти́сѧ дꙋша́мъ на́шымъ.
И҆ ны́нѣ, бг҃оро́диченъ, гла́съ то́йже:
Влⷣчце, прїимѝ моли̑твы ра̑бъ твои́хъ и҆ и҆зба́ви на́съ ѿ всѧ́кїѧ нꙋ́жды и҆ печа́ли.
На лїтꙋргі́и.
Бл҃жє́нны ѿ канѡ́на, пѣ́сни г҃-ѧ и҆ ѕ҃-ѧ. (с. 597)
Прокі́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Сті́хъ: Въ цр҃квахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ.
А҆пⷭ҇лъ къ гала́тѡмъ, зача́ло с҃и.
Є҆ѵⷢ҇лїе ѿ матѳе́а, зача́ло р҃д.
Прича́стенъ: Въ па́мѧть вѣ́чнꙋю бꙋ́детъ првⷣникъ:
Моли́тва.
Ѽ прпⷣбнаѧ и҆ пребл҃же́ннаѧ мт҃и а҆́нно! смире́ннѡ припа́дающе къ чⷭ҇тны̑мъ моще́мъ твои́мъ, мо́лимсѧ со слеза́ми прилѣ́жнѡ: не забꙋ́ди ᲂу҆бо́гихъ твои́хъ до конца̀, но помина́й на́съ всегда̀ во ст҃ы́хъ твои́хъ и҆ бл҃гопрїѧ́тныхъ моли́твахъ къ бг҃ꙋ. ѽ пребл҃же́ннаѧ вели́каѧ кнѧги́не а҆́нно! не забꙋ́ди присѣща́ти ча́дъ твои́хъ, а҆́ще бо тѣ́ломъ и҆ преста́виласѧ є҆сѝ ѿ на́съ, но и҆ по сме́рти жива̀ пребыва́еши и҆ не ѿстꙋпа́еши ѿ на́съ дꙋ́хомъ, сохранѧ́ющи на́съ ѿ стрѣ́лъ вра́жїихъ, всѧ́кїѧ пре́лести бѣсо́вскїѧ и҆ ко́зней дїа́вольскихъ. моли́твеннице на́ша ᲂу҆се́рднаѧ! не преста́й молѧ́щисѧ за ны̀ ко хрⷭ҇тꙋ̀, бг҃ꙋ на́шемꙋ, а҆́ще бо моще́й твои́хъ ра́ка пред̾ ѻ҆чи́ма на́шима вы́нꙋ ви́дима є҆́сть, но ст҃а́ѧ дꙋша̀ твоѧ̀, со а҆́гг҃льскими во́инствы ᲂу҆ прⷭ҇то́ла вседержи́телѧ предстоѧ́щи, досто́йнѡ весели́тсѧ. къ тебѣ̀ ᲂу҆́бѡ припа́даемъ, тебѣ̀ мо́лимсѧ, тебѣ̀ ми́ли сѧ дѣ́емъ: моли́сѧ, пребл҃же́ннаѧ а҆́нно, всеми́лостивомꙋ бг҃ꙋ на́шемꙋ ѡ҆ сп҃се́нїи дꙋ́шъ на́шихъ, є҆́же и҆спроси́ти на́мъ вре́мѧ на покаѧ́нїе и҆ невозбра́ннѡ прейтѝ ѿ землѝ на нб҃о, мыта́рствъ го́рькихъ и҆ вѣ́чныѧ мꙋ́ки и҆зба́витисѧ и҆ нбⷭ҇номꙋ црⷭ҇твїю наслѣ́дникѡмъ бы́ти со всѣ́ми прпⷣбными, ѿ вѣ́ка ᲂу҆годи́вшими гдⷭ҇ꙋ на́шемꙋ і҆и҃сꙋ хрⷭ҇тꙋ̀, є҆мꙋ́же сла́ва, со безнача́льнымъ є҆гѡ̀ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ є҆гѡ̀ дх҃омъ, ны́нѣ, и҆ при́снѡ, и҆ во вѣ́ки вѣкѡ́въ. А҆ми́нь.