В 18-й день

ВЕ́ЧЕР

На Го́споди, воззва́х: стихи́ры пра́здника, глас 4.

Подо́бен: Я́ко до́бля:

Возноси́му Тебе́, Влады́ко, на Крест,/ совозне́сл еси́ па́дшее ада́мово естество́ все;/ сего́ ра́ди вознося́ще/ пречи́стый Крест Твой, Человеколю́бче,/ от вы́шния Твоея кре́пости/ про́сим, зову́ще:/ спаси́, Вы́шний, я́ко Бог Ми́лостив,/ почита́ющия честно́е и светоно́сное/ Твоего́ Креста́ боже́ственное вознесе́ние.

Псало́мски ны́не предзря́ще/ подно́жие Твое́, Влады́ко,/ иде́же но́ги Твоя́ стоя́ша пречи́стыя,/ днесь любо́вию почита́ем Крест Твой пречестны́й/ и, вознося́ще благочести́во,/ мо́лим Тя, взыва́юще:/ Вы́шний, вся Кресто́м Твои́м Боже́ственным освяти́в,/ Твоего́ неизрече́ннаго благоутро́бия/ прича́стники покажи́ и благода́ти.

Я́ко непобеди́мому ору́жию,/ щиту́ непребори́му/ и я́ко ски́птру Боже́ственному,/ поклони́мся Кресту́ Твоему́, Христе́, пресвято́му,/ и́мже мир спасе́ся,/ и лику́ет Ада́м;/ земны́х собо́ри, сего́ пе́сньми благохва́ляще почита́ем/ и, того́ Боже́ственное воздви́жение соверша́юще,/ очище́ния про́сим.

И́ны стихи́ры свята́го. Глас и подо́бен то́йже:

Ду́шу и те́ло твое́/ от страсте́й очи́стив,/ Свята́го Ду́ха дом был еси́,/ и свяще́нных ма́стию/ себе́ украси́л еси́,/ предста́тель изя́щный был еси́, Евме́ние,/ и собеседник святы́х А́нгелов,/ и сла́вы Госпо́дни насле́дник,/ и моле́бник о хва́лящих тя.

Пресла́вное житие́ твое́,/ доброде́тельми просвети́вшееся,/ и чуде́с просия́ све́тлостьми,/ и благосла́вна тя конца́м, всеблаже́нне, соде́ла,/ и свети́льника непреле́стна,/ и святы́х единосе́льна,/ и гра́да свята́го граждани́на иера́рха,/ А́нгелов сограждани́на,/ чудотво́рче достосла́вне.

Кри́тское удобре́ние,/ горти́нскаго председа́теля,/ Це́ркве непоколеби́мое основа́ние,/ иера́рха Евме́ния,/ в чудесе́х велича́йшаго,/ и в си́лах мно́гих бы́вша пресла́внаго,/ и просвети́вша су́щая во мра́це сердца́,/ я́ко свети́льника ве́рных,/ велегла́сно, соше́дшеся, почти́м.

Сла́ва, и ны́не, глас 2. Самогла́сен:

Боже́ственное сокро́вище, в земли́ скрыва́емо,/ Жизнода́вца Крест,/ на небеса́х показа́ся царю́ благочести́вому/ и побе́ды на враги́ подписа́ние явля́ет разу́мно;/ его́же, ра́дуяся, ве́рою и любо́вию, боже́ственно восте́к к высоте́ зре́ния,/ тща́нием же того́ от земны́х недр изнесе́,/ во избавле́ние ми́ра и спасе́ние душ на́ших.

На стихо́вне стихи́ры, глас 2.

Подо́бен: До́ме Евфра́фов:

Днесь Крест Христо́в/ возно́сится,/ живоно́сное Дре́во,/ на не́мже Пло́тию распя́тся,/ вся призыва́я.

Стих: Возноси́те Го́спода Бо́га на́шего/ и покланя́йтеся подно́жию но́гу Его́, я́ко свя́то есть.

Ра́дуйся, ве́рных/ храни́ло Боже́ственное,/ необори́мая стено́,/ Кре́сте Госпо́день,/ и́мже от земли́ вознесо́хомся.

Стих: Бог же, Царь наш пре́жде ве́ка,/ соде́ла спасе́ние посреде́ земли́.

Прииди́те ве́село,/ целу́ем вси/ живоно́сное Дре́во,/ на не́мже распростре́ся/ Христо́с, Избавле́ние.

Сла́ва, и ны́не, глас 4:

Честна́го Креста́, Христе́, де́йство прообрази́в, Моисе́й/ победи́ проти́внаго Амали́ка в пусты́ни Сина́йстей:/ егда́ бо простира́ше ру́це, Креста́ о́браз творя́,/ укрепля́хуся лю́дие;/ ны́не же веще́й сбытие́ в нас испо́лнися,/ днесь Крест воздвиза́ется,/ и де́мони бе́гают,/ днесь тварь вся от тли свободи́ся,/ вся бо Креста́ ра́ди возсия́ша нам дарова́ния./ Те́мже, ра́дующеся, вси/ припа́даем Тебе́, глаго́люще:// я́ко возвели́чишася дела́ Твоя́, Го́споди, сла́ва Тебе́.

Тропа́рь пра́здника: Спаси́, Го́споди, лю́ди Твоя́:

НА У́ТРЕНИ

Тропа́рь пра́здника, три́жды.

По 1-м стихосло́вии седа́лен, глас 4.

Подо́бен: Удиви́ся Ио́сиф:

Просте́р Моисе́й ру́це к высоте́ небе́сней,/ прообразова́ше Крест, Боже́ственное ору́жие ве́рных,/ на не́мже Христо́с грехи́ пригвозди́./ Тем враг пла́каше, стражда́ боле́зненно чу́вствы, глаго́лаше:/ древяно́е мя копие́ прободе́ посреде́ се́рдца моего́./ Христо́с вся от а́дских уз реши́т.

Сла́ва, и ны́не, то́йже.

По 2-м стихосло́вии седа́лен, глас 6.

Подо́бен: Наде́жде ми́ра:

На Дре́ве, Спа́се, кре́стнем за утро́бы ми́лости возвы́сився/ и ре́бра пробо́д копие́м,/ растерза́л еси́ грехо́в лю́тое рукописа́ние, я́ко Всемо́щный Бог:/ тем Твое́ неизрече́нное пое́м благоче́стно, Сло́ве, смотре́ние.

Сла́ва, и ны́не, то́йже.

Кано́н пра́здника со ирмосо́м на 8 и свята́го на 4.

Кано́н пра́здника, глас 8.

Песнь 1

Ирмо́с: Крест начерта́в, Моисе́й/ впря́мо жезло́м Чермно́е пресече́,/ Изра́илю пешеходя́щу,/ то́же обра́тно фарао́новым колесни́цам,/ уда́рив, совокупи́,/ вопреки́ написа́в непобеди́мое ору́жие.// Тем Христу́ пои́м, Бо́гу на́шему, я́ко просла́вися.

О́браз дре́вле Моисе́й пречи́стыя Стра́сти в себе́ само́м прообрази́,/ свяще́нных среде́ стоя́:/ Крест же вообрази́в,/ просте́ртыми побе́ду дла́ньми воздви́же,/ держа́ву погуби́в Амали́ка всегуби́теля./ Тем Христу́ пои́м, Бо́гу на́шему, я́ко просла́вися.

Возложи́ Моисе́й на столпе́ врачевство́,/ тлетвори́ваго избавле́ние и ядови́таго угрызе́ния,/ и дре́ву о́бразом Креста́/ по земли́ пресмыка́ющагося зми́я привяза́,/ лука́вный в сем обличи́в вред./ Тем Христу́ пои́м, Бо́гу на́шему, я́ко просла́вися.

Показа́ не́бо Креста́ побе́ду благоче́стия держа́телю и царю́ богому́дру,/ враго́в в не́мже злосе́рдных низложи́ся свире́пство,/ лесть же преврати́ся,/ и ве́ра распростре́ся земны́м конце́м Боже́ственная./ Тем Христу́ пои́м, Бо́гу на́шему, я́ко просла́вися.

Ин кано́н свята́го, его́же краегране́сие:

Моли́твами твои́ми даждь ми Христа́ благоуве́тлива, блаже́нне. Ио́сиф. Глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,// я́ко просла́вися.

Име́я Христа́, о́тче богому́дре Евме́ние,/ послу́шающа твои́х моли́тв боже́ственных,/ Его́же ти́ха, блаже́нне, соде́лай любо́вию хва́лящим тя.

Высокотво́рное от ю́ности, преподо́бне, возлюби́в смире́ние,/ го́рдаго смири́л еси́ зми́я/ и да́ром врачева́ний я́ве обогати́лся еси́.

Вмести́тельный Ду́ха орга́н был еси́,/ пло́ти мудрова́ния мно́гими посты́ души́ покори́в,/ лу́чшему го́ршее ты порабо́тив.

Богоро́дичен: Я́же о Тебе́, ны́не проро́чествия испо́лнишася, Богороди́тельнице Влады́чице:/ Его́же бо провозвести́ша высокоглаго́ливо, во чре́во вмести́ла еси́,/ во двух соверше́нных естества́х.

Песнь 3

Ирмо́с: Жезл во о́браз та́йны прие́млется,/ прозябе́нием бо предразсужда́ет свяще́нника,/ неплодя́щей же пре́жде Це́ркви,/ ны́не процвете́ Дре́во Креста́,// в держа́ву и утвержде́ние.

Яко испусти́, ударя́емь, во́ду краесеко́мый/ непокори́вым лю́дем и жестосе́рдым,/ богозва́нныя проявля́ше Це́ркве та́инство,/ ея́же Крест держа́ва и утвержде́ние.

Ре́бром пречи́стым, копие́м прободе́нным,/ вода́ с Кро́вию истече́,/ обновля́ющая Заве́т и омыва́тельная греха́:/ ве́рных бо Крест похвала́ и царе́й держа́ва и утвержде́ние.

Ин

Ирмо́с: Утверди́ нас в Тебе́, Го́споди,/ Дре́вом умерщвле́н грех,/ и страх Твой всади́// в сердца́ нас, пою́щих Тя.

Прете́кл еси́ тща́тельно, я́ко пчела́,/ цветники́ слове́сныя, иера́рше,/ сла́дкий мед собира́я/ и в серде́чныя со́ты влага́я.

Житие́ чи́сто,/ сло́во же со́лию Боже́ственною, Евме́ние, устро́ив,/ показу́еши твою́, сла́вне, сокрове́нную и благода́ть, и све́тлость.

Возвы́сился еси́, доброде́тельми украша́емь,/ и на высоча́йшия престо́лы возше́л еси́, ми́ром Боже́ственнаго Ду́ха пома́зався,/ и Христо́во благово́ние познава́ешися.

Богоро́дичен: Мари́е, злата́я кади́льнице,/ страсте́й мои́х отжени́ злово́ние/ и утверди́ коле́блема прило́ги льсти́ваго ратобо́рца.

Конда́к, глас 2.

Подо́бен: Вы́шних ища́:

Све́том Боже́ственным просвети́вся, всеблаже́нне,/ просвеща́еши ны,/ любо́вию пою́щия твое́ честно́е и сла́вное/ и свято́е, о́тче, преставле́ние,/ иера́рше Евме́ние,// моли́ непреста́нно о всех нас.

Седа́лен, глас 5.

Подо́бен: Собезнача́льное:

Правосла́вными сия́я, о́тче, уче́ньми,/ мра́чныя е́реси вся ума́лил еси́/ и, чуде́с самоде́латель показа́вся, Евме́ние,/ преслову́щий по всему́ про́мыслом Боже́ственным был еси́:/ тем тя ве́рою почита́ем,/ я́ко иера́рха и А́нгелов равноче́стна.

Сла́ва, и ны́не, подо́бен то́йже:

Крест претерпе́вый во́льным сове́том,/ и от тли челове́ки свободи́л еси́, Спа́се:/ воспева́ем, ве́рнии, и покланя́емся Тебе́,/ я́ко просвети́л еси́ ны си́лою Креста́,/ и вси Тя благослови́м, Человеколю́бче и Ще́дрый,/ Я́ко Жизнода́вца и Го́спода.

Песнь 4

Ирмо́с: Услы́шах, Господи,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

Горькоро́дныя преложи́ дре́вом Моисе́й/ исто́чники в пустыни дре́вле,/ Кресто́м ко благоче́стию язы́ков/ проявля́я преложе́ние.

Глубине́ вне́дривый секу́щую/ издаде́ Иорда́н дре́ву,/ Кресто́м и креще́нием/ сече́ние ле́сти зна́менуя.

Свяще́нно ополча́ются/ четвероча́стнии лю́дие, предходя́ще/ о́бразом свиде́тельства ски́нии,/ крестообра́зными чи́нми прославля́емии.

Чу́дно простира́емь,/ солнечныя лучи́ испуща́ше Крест,/ и пове́даша небеса́/ сла́ву Бо́га на́шего.

Ин

Ирмо́с: Услы́шах, Го́споди,/ слух Твоего́ смотре́ния/ и просла́вих Тя,// Еди́не Человеколю́бче.

Дом был еси́ Ду́ха,/ в Боже́ственных хра́мех упражня́яся, иера́рше,/ и честны́ми уче́ньми украша́яся.

Иера́рх богоприя́тен, о́тче му́дре,/ и председа́тель горти́нский быв,/ чуде́с лучу́ изблиста́л еси́.

Зия́ние вели́кое зми́я/ твои́х моли́тв поже́гл еси́ луча́ми,/ на тя устреми́вшагося, свяще́ннейший.

Богоро́дичен: Свяще́ннии провозвести́ша дре́вле гла́си/ Рождества́ Твоего́ глубину́,/ и́хже ны́не сбытие́ ви́дехом, Чи́стая.

Песнь 5

Ирмо́с: О треблаже́нное Дре́во,/ на не́мже распя́ся Христо́с, Царь и Госпо́дь,/ и́мже паде́ дре́вом прельсти́вый,/ тобо́ю прельсти́вся,/ Бо́гу пригвозди́вшуся Пло́тию,// подаю́щему мир душа́м на́шим.

Тебе́, приснопе́тое Дре́во, на не́мже простре́ся Христо́с,/ Еде́м храня́щее обраща́ющееся ору́жие, Кре́сте, устыде́ся:/ стра́шный же Херуви́м уступи́ на тебе́ пригвожде́нному Христу́,/ подаю́щему мир душа́м на́шим.

Подзе́мных си́лы проти́вныя Креста́ страша́тся/ начерта́ема зна́мения на возду́се,/ по нему́же хо́дят Небе́сных и земноро́дных ро́ди,/ коле́на преклоня́юще Христу́,/ подаю́щему мир душа́м на́шим.

Заря́ми нетле́нными я́влься Боже́ственный Крест/ омраче́нным язы́ком, заблужде́нным в пре́лести,/ Боже́ственный свет облиста́в,/ усвоя́ет на нем пригвожде́нному Христу́,/ подаю́щему мир душа́м на́шим.

Ин

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:// ра́зве бо Тебе́ ино́го Бо́га не зна́ем.

Ра́зум име́л еси́, я́ко умири́в от страсте́й, преподо́бне, ум и ду́шу:/ тем разруша́еши сва́ры ве́рно ца́рствующих/ и до́бре покаря́ющихся тебе́.

Слу́хи подложи́в тебе́ царе́й, ве́рный/ разруши́ до́лгую вражду́, па́губу родя́щую,/ и бра́тское единоу́мие лю́бит, богому́дре Евме́ние.

Я́коже свети́льник, прише́д, Рим просвеща́еши, соверша́я чудеса́/ и во глубине́ страсте́й ныря́ющия/ ко приста́нищу ти́ху врачевства́, блаже́нне, я́ве призыва́я.

Богоро́дичен: Ю́на я́ко Младе́нца нам, Преве́чнаго же Сы́на родила́ еси́,/ воли́тельными двема́ де́йствы су́ща сугу́баго,/ я́ко Челове́ка ку́пно же и Бо́га, Всенепоро́чная.

Песнь 6

Ирмо́с: Во́днаго зве́ря во утро́бе/ дла́ни Ио́на крестови́дно распросте́р,/ спаси́тельную Страсть прообража́ше я́ве./ Тем, тридне́вен изше́д,/ преми́рное Воскресе́ние прописа́ше/ Пло́тию пригвожде́ннаго Христа́ Бо́га// и тридне́вным Воскресе́нием мир просве́щшаго.

Ста́ростию преклони́вся и неду́гом отягче́н, испра́вися Иа́ков, ру́це премени́в,/ де́йствие явля́я жизноно́снаго Креста́:/ и́бо ве́тхость зако́ннаго сено́внаго писа́ния новописа́ на сем Пло́тию пригвозди́выйся Бог/ и душегуби́тельный неду́г ле́сти отгна́.

На ю́ныя возложи́в дла́ни боже́ственный Изра́иль, крестови́дно главы́ явля́ше,/ я́ко старе́йшая сла́ва, законослужи́тели лю́дие./ Те́мже, подмне́вся та́ко испрельсти́тися, не измени́ жизноно́снаго о́браза:/ превзы́дут бо лю́дие Христо́вы Бо́жии новоутвержде́ннии,/ вопия́ху, Кресто́м огражда́еми.

Ин

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:// от тли, Бо́же, мя возведи́.

Де́тельное сокро́вище неиждива́емое име́я в се́рдцы твое́м, Христа́, Евме́ние,/ я́коже бре́ние вмени́л еси́ зла́то,/ е́же царь подаде́ тебе́.

На высо́цем седа́лищи сел еси́, о́тче,/ ми́ра глаго́л привеща́в Це́ркви свы́ше,/ я́же ны́не призыва́нием твои́м хва́лится.

Не омочи́вся грехми́, преплы́л еси́ жития́ бу́рю многоболе́зненную/ и в приста́нища дости́гл еси́,/ иде́же собо́р преподо́бных весели́тся.

Богоро́дичен: На Тя сшед, Небе́сный Дождь/ олядене́вшую¹³ зе́млю, Присноде́во, богозна́ния вода́ми напои́в,/ многопло́дну показа́.

Конда́к, глас 4. Самоподо́бен:

Вознесы́йся на Крест во́лею,/ тезоимени́тому Твоему́ но́вому жи́тельству/ щедро́ты Твои́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на сопоста́ты,/ посо́бие иму́щим Твое́ ору́жие ми́ра,// непобеди́мую побе́ду.

И́кос:

И́же до тре́тияго Небесе́ восхище́н бысть в рай/ и глаго́лы слы́шав неизрече́нныя и Боже́ственныя,/ и́хже не леть язы́ки (челове́ческими) глаго́лати,/ что Гала́том пи́шет, я́ко рачи́телие Писа́ний прочто́сте и позна́сте:/ мне, глаго́лет, хвали́тися да не бу́дет, то́кмо во еди́ном Кресте́ Госпо́дни,/ на не́мже, страда́в, уби́ стра́сти./ Того́ у́бо и мы изве́стно держи́м, Крест Госпо́день, хвалу́ вси:/ есть бо нам спаси́телыюе сие́ Дре́во/ ору́жие ми́ра, непобеди́мая побе́да.

Песнь 7

Ирмо́с: Безу́мное веле́ние/ мучи́теля злочести́ваго лю́ди поколеба́,/ дьшущее преще́ние и злохуле́ние богоме́рзкое;/ оба́че три о́троки не устраши́ я́рость зве́рская,/ ни огнь снеда́яй,/ но, противоды́шущу росоно́сному Ду́ху,/ со огне́м су́ще, поя́ху:// препе́тыи́ отце́в и нас Бо́же, благослове́н еси́.

От дре́ва вкуси́в, пе́рвый в челове́цех в тле́ние всели́ся:/ отверже́нием бо жи́зни безче́стнейшим осуди́вся,/ всему́ ро́ду телотле́нен не́кий я́ко вред неду́га преподаде́;/ но, обре́тше, земноро́днии, воззва́ние кре́стным Дре́вом, зове́м:/ препе́тый отце́в и нас Бо́же, благослове́н еси́.

Разруши́ повеле́ние Бо́жие преслуша́ние,/ и дре́во принесе́ смерть челове́ком,/ е́же неблаговре́менно прича́стно бы́вшее;/ во утвержде́ние же зело́ честна́го/ отту́ду жи́зни дре́во возбраня́емо бе,/ е́же разбо́йнику злоуме́ршу отве́рзе, благоразу́мно зову́щу:/ препе́тый отце́в и нас Бо́же, благослове́н еси́.

Жезла́ объе́млет край Ио́сифова,/ бу́дущая зря, Изра́иль,/ Ца́рствия держа́вное,/ я́ко возыму́ществит пресла́вный Крест, проявля́я:/ сей бо царе́й победоно́сная похвала́ и свет ве́рою зову́щим:/ препе́тый отце́в и нас Бо́же, благослове́н еси́.

Ин

Ирмо́с: О́бразу злато́му на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния;/ посреде́ же огня́ вве́ржени,/ ороша́еми, поя́ху:// благослове́н еси́, Бо́же оте́ц на́ших.

Ме́ртвых помысло́в усе́рдием души́ похваля́яся,/ во глубоча́йшей ста́рости, преподо́бне,/ стра́нствования твори́л еси́ на благодея́ние ве́рою прие́млющих, Евме́ние,/ тя, се́ятеля свяще́нных и честны́х уче́ний.

Рим твои́х наслади́вся до́брых,/ дар люби́мый не хотя́ща, о́тче Евме́ние, Фиваи́де отсыла́ет;/ иде́же быв, востяга́еши сухоты́ посупле́ние/ надожде́нием честны́х моли́тв твои́х, преподо́бне.

Сосцы́ воспита́вся воздержа́ния, чистоты́ млеко́ ссал еси́/ и во́зраста ме́ру дости́гл еси́, вшед на высоту́, о́тче, доброде́телей,/ и со́лнца возсия́в светле́е богозна́меньми/ но́щию объя́тым страсте́й.

Богоро́дичен: Невеще́ственнаго Све́та селе́ние Твое́ чре́во бысть,/ светлостьми́ боже́ственнаго зна́ния безбо́жие ума́лившаго,/ Пречи́стая Богоневе́сто Отрокови́це, Е́йже, пою́ще, взыва́ем:/ благослове́н Плод Твоего́ чре́ва.

Песнь 8

Ирмо́с: Благослови́те, о́троцы,/ Тро́ицы равночи́сленнии,/ Соде́теля Отца́ Бо́га,/ по́йте снизше́дшее Сло́во,/ и огнь в ро́су претво́ршее,/ и превозноси́те всем жизнь подава́ющаго // Ду́ха Всесвята́го во ве́ки.

Воздвиза́ему Дре́ву,/ окропле́ну Кро́вию вопло́щшагося Сло́ва Бо́га,/ по́йте, Небе́сныя Си́лы;/ земны́х воззва́ние пра́зднующе, лю́дие,/ поклони́теся Христо́ву Кресту́,/ и́мже ми́ру воста́ние во ве́ки.

Земноро́днии, дла́ньми, строи́телие благода́ти,/ Крест, на не́мже стояше Христо́с Бог, возноси́те священноле́пно/ и копие́, Бо́жия Сло́ва Те́ло пробо́дшее,/ да ви́дят язы́цы вси спасе́ние Бо́жие,/ сла́вяще Его́ во ве́ки.

Боже́ственным судо́м предызбра́ннии, весели́теся,/ христиа́нстии ве́рнии ца́рие,/ хвали́теся победоно́сным ору́жием,/ прие́мше от Бо́га Крест честны́й:/ в сем бо коле́на бра́ней, де́рзости и́щуще,/ разсыпа́ются во ве́ки.

Ин

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,// и превозноси́те во вся ве́ки.

Победи́в врага́ и тече́ние до́брое соверши́в,/ в глубоча́йшей ста́рости ко отце́м твои́м преше́л еси́,/ я́ко пшени́ца зре́лая,/ на стра́нней земли́ прие́м жития́ коне́ц.

Ника́коже по́мняще твои́х, о́тче, до́брых,/ де́ти Фиваи́дстии, оте́честву и па́стве,/ свяще́нную твою́ ра́ку, ле́потно держа́щии, предпосыла́ют,/ ея́же возвраще́нием чуде́с то́чат благода́ть.

Ра́ка Кири́ллово честно́е и многострада́льное пре́жде содержа́ше те́ло/ и твое́ ны́не скрыва́ет преи́скренно, му́дре,/ совокупи́в житие́м единому́дренныя,/ и́хже го́рнее оте́чество име́ет во ве́ки.

Богоро́дичен: Свяще́ннейший проро́ков честны́й лик/ Тя пропису́ет киво́т и несеко́мую го́ру,/ жезл и дверь, е́юже, я́ко весть, про́йде Вы́шний,/ па́ки заключе́ну оста́вив Тя, Де́во.

Песнь 9

Ирмо́с: Сне́дию дре́ва ро́ду прибы́вшая смерть/ Кресто́м упраздни́ся днесь,/ и́бо прама́терняя всеро́дная кля́тва разруши́ся/ Прозябе́нием Чи́стыя Богома́тере,// Юже вся Си́лы Небе́сныя велича́ют.

Го́рести уби́йственныя, я́же от дре́ва, не оста́вив, Го́споди,/ Кресто́м бо сию́ соверше́нно истреби́л еси́./ Сего́ ра́ди и дре́вом услади́ иногда́ го́ресть вод Ме́рры:/ прообразу́ющее Креста́ де́йство,/ е́же вся Си́лы Небе́сныя велича́ют.

Непреста́нно гружа́емыя мра́ком пра́отца, Го́споди,/ Кресто́м возвы́сил еси́ днесь,/ я́ко бо ле́стию весьма́ неудержа́нно естество́ пре́жде сведено́ бысть,/ всеро́дне ны па́ки испра́ви свет Креста́ Твоего́,/ его́же, ве́рнии, велича́ем.

Да о́браз пока́жеши ми́ру покланя́емый, Го́споди, Креста́,/ во всех я́ко пресла́вный, на небесе́х изобрази́л еси́,/ све́том безме́рным озаре́н,/ царю́ всеору́жие непобеди́мое./ Тем Тя вся Си́лы Небе́сныя велича́ют.

Ин

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святыя Де́вы неизрече́нно воплоти́вшагося нас ра́ди, // ве́рнии, единому́дренно пе́сньми велича́ем.

Яко Христо́в иера́рх,/ от си́лы, о́тче, в си́лу преше́л еси́ чу́дно,/ иде́же ли́цы свяще́ннейшии слу́жат во стра́се Тро́ице Честне́й,/ со все́ми Небе́сными, всеблаже́нне Евме́ние, Си́лами.

Уста́ви ны́нешнюю бу́рю оте́чества, Божество́ твои́ми умилостивля́я моли́твами:/ ва́рварское, блаже́нне, нахожде́ние низложи́, нас му́чащее,/ искуше́ние, сре́ющее¹⁴ злых во глубину́ поги́бели,/ приснопа́мятне Евме́ние.

Твоя́ всесвяще́нная па́мять созыва́ет па́стыри преподо́бныя и лю́ди благочести́выя,/ освяще́ние всем нося́щи:/ ю́же соверша́ющия, бога́тно озари́ ны сия́ньми, су́щими в тебе́ благода́тьми,/ всехва́льне Евме́ние.

Богоро́дичен: Но́сиши Нося́щаго вся Боже́ственною си́лою/ и пита́еши, Всечи́стая, от сосе́ц все дыха́ние Пита́ющаго,/ па́че ума́ Твое́ чу́до удивля́ет А́нгелы и челове́ки,/ при́сно Тя пою́щия и любо́вию блажа́щия.

Свети́лен:

Светоза́рными сия́нии Крест Госпо́день/ на воздви́жение его́ всех жела́нием Боже́ственным, предлежа́, созыва́ет:/ прииди́те, сего́ вси ра́достию, и любо́вию, и стра́хом целу́им ве́рно/ и просла́вим Еди́наго Творца́ и Влады́ку.

Сла́ва, и ны́не, то́йже.

На стихо́вне стихи́ры, глас 2.

Подо́бен: До́ме Евфра́фов:

Пе́сньми та́инственными/ воспои́м согла́сно/ Крест Госпо́день,/ на не́мже Спас распя́тся,// всех Воскресе́ние.

Стих: Возноси́те Го́спода Бо́га на́шего// и покланя́йтеся подно́жию но́гу Его́, я́ко свя́то есть.

Прииди́те, мона́шествующих/ мно́жества, соше́дшеся,/ воспои́м боже́ственне/ живоно́сное Дре́во,// на не́мже Христо́с распростре́ся.

Стих: Бог же, Царь наш пре́жде ве́ка,// соде́ла спасе́ние посреде́ земли́.

Просла́вим, ве́рнии,/ Крест Госпо́день,/ на не́мже излия́ся/ Кровь Влады́чня,// во всех избавле́ние.

Сла́ва, и ны́не, глас 4:

Светосия́нен звезда́ми о́браз/ предпоказа́, Кре́сте, побе́ду одоле́ния/ благочести́вому царю́ вели́кому,/ его́же ма́ти Еле́на изобре́тши,/ ми́ру явле́нна сотвори́,/ и, тя днесь воздви́жуще, ве́рных ли́цы, зове́м:/ просвети́ ны све́тлостию твое́ю,/ Кре́сте живоно́сный,/ освяти́ ны кре́постию твое́ю,/ всечестны́й Кре́сте,/ и утверди́ ны воздви́жением твои́м,// воздвиза́емый ко ополче́нию враго́в.

НА ЛИТУРГИ́И

Блаже́нны пра́здника, пе́сни 5-я и 6-я, на 6.

Преподобный Евмений (VII в.) с юности отличался добродетельной жизнью. Он стремился служить Единому Богу и поэтому, раздав свое имущество нищим, не связывал себя никакими житейскими заботами. За свою незапятнанно-чистую жизнь он был избран и возведен в сан епископа Гортинской церкви на острове Крите. Он стал милостивым отцом для своей паствы, утешая скорбящих, поддерживая сирот и неимущих, и сподобился за это от Бога дара чудотворений. Так, однажды во время засухи он своей молитвой низвел на землю обильный дождь. Кроме того, святой Евмений защищал православную веру от возникшей в то время монофелитской ереси и, пострадав за это, был сослан в Фиваиду, где и скончался. Тело его было погребено в Гортине.

В той же день

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры пра́здника 3 и святы́я 5, глас 2:

Прииди́те, ве́рнии,/ пе́сньми почти́м пречу́дную Евфроси́нию,/ при́сную о нас к Бо́гу моли́твенницу,/ усе́рдно взыва́юще:/ ра́дуйся, страны́ Росси́йския ве́рное охране́ние,/ гра́да на́шего ве́рный покро́ве/ и всем христиа́ном ско́рое вспоможе́ние и заступле́ние.

Пресла́вная Евфроси́ние,/ Престо́лу предстоя́щи Вседержи́теля,/ при́зри на нас, с любо́вию па́мять твою́ соверша́ющих,/ и ми́лостивно приими́ хвале́бная на́ша тебе́ песнопе́ния,/ ми́лостивным о́ком всегда́ взира́ти на нас сотвори́/ Влады́ку на́шего и Го́спода.

Весь град и вся страна́,/ ны́не сте́кшеся в храм твой,/ те́плая к тебе́ обраща́ют сердца́,/ ча́юще твои́ми моли́твами получи́ти грехо́в оставле́ние,/ в доброде́телех преспе́яние,/ вре́менное благоде́нствие и ве́чное спасе́ние./ Ты же, я́ко ми́лостивая ма́ти,/ собо́р сей пра́зднственный ра́достно прие́млющи,/ ра́дости испо́лни сердца́ на́ша,/ я́ко ра́дости тезоимени́тая.

И́ны стихи́ры, глас то́йже.

Подо́бен: Терпя́ще муче́ния:

Терпя́щи ны́нешняя му́жественне, веселя́щися бу́дущим,/ ко всем глаго́лаше, преподо́бная Евфроси́ние:/ еда́ у́бо ту́не подвиза́емся, но ве́чнаго живота́ ча́юще получи́ти,/ лю́ты ско́рби, но сла́док рай,/ боле́зненни труди́, но присносу́щно восприя́тие ве́чнаго живота́;/ не облени́мся у́бо, о по́стницы, ма́ло претерпи́м,/ да венцы́ нетле́нными увязе́мся от Христа́ Бо́га/ и Спа́са душа́м на́шим.

Зря́щи я́ко наслажде́ние ско́рби,/ ше́ствующи те́сным путе́м,/ к учени́цам си́це глаго́лаше, преблаже́нная Евфроси́ние:/ не устраши́мся по́двига по́стнаго,/ да стра́шнаго гее́нскаго огня́ избе́гнем,/ согбе́ны бу́дут ру́це, да возде́ютжеся к Не́бу,/ но́зе же утверже́не на моли́тве предстоя́ти,/ не пощади́м естества́ тле́ннаго, изво́лим по́двиг,/ да венцы́ побе́дными увязе́мся от Христа́/ и Спа́са душа́м на́шим.

Отве́ргши тле́нныя ри́зы,/ хожда́ше в зи́му без те́плы оде́жды, я́коже в ле́то,/ глаго́лаше, терпели́вая Евфроси́ние:/ за рай, и́же погуби́хом,/ ри́зы мя́гкия ны́не отлага́ем,/ грехо́м иногда́ преступле́ния оде́яхомся,/ совлеце́мся ны́не ра́ди нетле́нных риз,/ небреже́м, о по́стницы, о зиме́ преходя́щей, плоть изнури́м,/ да венцы́ побе́дными увязе́мся от Христа́ Бо́га// и Спа́са душа́м на́шим.

Всечестна́я ра́ка моще́й твои́х,/ преподо́бная ма́ти Евфроси́ние,/ яви́ся я́ко второ́е со́лнце, е́же во гра́де Су́здале,/ сия́ющи чудесы́ оби́льно,/ но всех нас помина́й, почита́ющих па́мять твою́,/ и моли́ся Христу́ Бо́гу/ пода́ти одоле́ние правосла́вным лю́дем на́шим на пога́ныя// и спаси́ ду́ши на́ша.

Сла́ва, глас 8:

Преподо́бная и всехва́льная ма́ти,/ я́ко со́лнце возсия́ла еси́ в стране́ на́шей,/ оби́льно источа́ющи исцеле́ния/ и всех привлека́ющи к че́ствованию и́мене твоего́./ Те́мже и ны́не, собра́вшеся в храм сей,/ ублажа́ем тя, преподо́бная, и мо́лимся:// моли́ спасти́ся душа́м на́шим.

И ны́не, пра́здника, глас то́йже: Его́же дре́вле Моисе́й: (зри страни́цу 417).

Та́же вход. Проки́мен дне. Чте́ния три преподо́бническая (зри страни́цы 272–273).

На лити́и стихи́ры пра́здника стихо́вныя. Сла́ва: святы́я. И ны́не: пра́здника.

На стихо́вне стихи́ры, глас 5:

От плотска́го обру́чника свобо́ду прии́мши,/ Христу́ Го́споду уневе́стилася еси́, преподо́бная,/ вме́сто бога́тства избра́вши нищету́,/ вме́сто сласте́й вся́кое воздержа́ние,/ вме́сто поко́я труд, моли́тву и бде́ние./ Те́мже и в черто́г Того́ с му́дрыми де́вами/ прия́та бы́ти сподо́билася еси́,/ иде́же веселя́щися не преста́й моли́тися// и о чту́щих па́мять твою́ ве́рно.

Стих: Восхва́лятся преподо́бнии во сла́ве// и возра́дуются на ло́жах свои́х.

Прииди́те, вси люби́телие де́вства/ и чистоты́ рачи́телие,/ согла́сно воспои́м Евфроси́нию пресла́вную:/ изде́тска бо возлюби́вши чистоту́,/ чи́стое де́вства сокро́вище до конца́ сохрани́ла есть,/ теле́сную красоту́ по́стническими труды́ увяди́вши,/ ду́шу же украси́вши благообра́зием доброде́телей./ Те́мже а́нгельски на земли́ пожи́вши,/ со А́нгелы ны́не лику́ет в пресла́вных оби́телех Небе́сных.

Стих: Ди́вен Бог во святы́х Свои́х,/ Бог Изра́илев.

Ди́вными по́двиги,/ внима́нием себе́ и трезве́нием,/ непреста́нною моли́твою и хожде́нием пред Бо́гом/ се́рдце свое́ очи́стивши,/ храм Свята́го Ду́ха была́ еси́, богоблаже́нная,/ те́мже Того́ ди́вных даро́в сподо́билася еси́,/ моли́твою же твое́ю от ага́рянскаго неи́стовства/ чу́дно оби́тель твою́ изба́вила еси́.

Сла́ва, глас 8:

Тяготу́ ве́чныя сла́вы прия́ла еси́/ за ле́гкия печа́ли по́стничества,/ же́ртву себе́ непоро́чну те́ми предста́вивши Го́сподеви./ Те́мже иму́щи дерзнове́ние ко Всеще́дрому Бо́гу,/ испроси́ ве́ры правосла́вныя утвержде́ние/ и душа́м на́шим ве́лию ми́лость.

И ны́не, пра́здника, глас то́йже: Глас проро́ка Твоего́ Моисе́я: (зри страни́цу 425) .

И́ны стихи́ры, на стихо́вне, глас 8.

В боле́знех по́стнических терпя́щи,/ прия́ла еси́ благода́ть/ душе́вныя боле́зни очища́ти ми́лостивно, чи́стая,/ ду́хом прогони́ти ду́хи/ и всем предста́тельствовати,/ те́мже твои́ми моли́твами проси́ всем исцеле́ния,/ преподо́бная Евфроси́ние,/ и ве́лию ми́лость.

Стих: Восхва́лятся преподо́бнии во сла́ве/ и возра́дуются на ло́жах свои́х.

Ты, всеблаже́нная Евфроси́ние,/ источа́еши слепы́м прозре́ние/ и всем боля́щим исцеле́ние,/ приходя́щим ве́рою,/ прося́щим посеще́ния твоего́,/ преподо́бная и досточу́дная,/ те́мже твои́ми моли́твами/ испроси́ нам ве́лию ми́лость.

Стих: Ди́вен Бог во святы́х Свои́х,/ Бог Изра́илев.

Богоблаже́нная Евфроси́ние,/ ми́лование стяжа́ла еси́,/ ве́ру же Правосла́вную и любо́вь, я́же к Бо́гу, всечу́дная,/ о́браз же бысть всем доброде́телем духо́вным,/ те́мже Бо́жия благода́ть духо́вная в тебе́ препочи́ла есть, всеблаже́нная,// сохраня́й ве́рою тя блажа́щих.

Сла́ва, и ны́не, глас 6:

Одесну́ю Спа́са,/ я́коже пое́т Дави́д,/ предста́ цари́ца, твоя́ душа́,/ боле́зньми по́двиг испещре́на, я́ко ря́сны златы́ми/ и же́ртву себе́ предста́вила еси́ Го́сподеви своему́,/ Евфроси́ние преподо́бная,/ сле́зными же пото́ки вся боле́зни бесо́вския потопи́ла еси́,/ иму́щи о всем себе́ Помо́щницу Цари́цу и Богоро́дицу./ Тем и Христо́с да́ром чуде́с обогати́ тя,/ но, иму́щи дерзнове́ние, всечу́дная, ко Ще́дрому Бо́гу,/ испроси́ богохрани́мей стране́ на́шей на неве́рныя одоле́ние/ и утвержде́ние Правосла́вныя ве́ры,// и душа́м на́шим ве́лию ми́лость.

Тропа́рь, глас 8:

В тебе́, ма́ти, изве́стно спасе́ся е́же по о́бразу,/ прии́мши бо крест, после́довала еси́ Христу́/ и, де́ющи, учи́ла еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со А́нгелы сра́дуется, преподо́бная Евфроси́ние, дух твой.

Ин тропа́рь, глас 4:

Свята́я твоя́ па́мять/ Су́ждальскую страну́ весели́т,/ ве́рныя же вся созыва́ет во всечестны́й храм твой,/ иде́же ны́не соверша́ется всесла́вная па́мять твоя́,/ Евфроси́ние преподо́бная,/ моли́ Христа́ Бо́га,// спасти́ся душа́м на́шим.

Сла́ва, и ны́не, пра́здника.

НА У́ТРЕНИ

На Бог Госпо́дь: тропа́рь два́жды. Сла́ва, и ны́не, пра́здника.

По 1-м стихосло́вии седа́лен, глас 1.

Подо́бен: Гроб Твой:

Бде́нии всено́щными, моли́твами непреста́нными и до́лгими поще́нии/ плоть свою́ распе́нши со страстьми́ и похотьми́,/ и́стинно Христо́ва раба́ яви́лася еси́ и нам путь показа́ла еси́,/ и́мже ше́ствующе во след Христа́,/ Ца́рствия Небе́снаго сподобля́емся.

Ин седа́лен, глас то́йже:

Бде́нием всено́щным и моли́твами кре́пкими, преблаже́нная Евфроси́ние,/ и безме́рным посто́м плоть смири́ла еси́,/ те́мже прия́ла еси́ исцеле́ний благода́ть,/ уврачу́ющи стра́сти притека́ющим ти си́лою духо́вною.

Сла́ва, и ны́не, пра́здника или́ Богоро́дичен:

Богоро́дице Де́во, ду́ши на́ша, одолева́емыя страстьми́,/ на брань и труды́ по́стничества укрепи,/ да те́ми де́вства на́шего обе́ты нело́жны сотвори́м.

Ин Богоро́дичен:

Го́ру Тя, Богоро́дице, Дании́л проро́к прорече́,/ Гедео́н же я́ко руно́, Иезеки́иль же Тя, Де́во, дверь прови́дев,/ ви́де Тя Иса́ия, Бо́жию Роди́тельницу,/ мы же Ти арха́нгельский глас вопие́м:/ ра́дуйся, Обра́дованная, Госпо́дь с Тобо́ю, име́яй ве́лию ми́лость.

По 2-м стихосло́вии седа́лен, глас 2.

Подо́бен: Ско́ро предвари́:

Мир презре́вши и себе́ отве́ргшися,/ Христу́ му́жественно после́довала еси́, преподо́бная Евфроси́ние,/ ны́не же по труде́х в Небе́сных оби́телех упокоева́ешися сла́достно,/ иде́же и нам всели́тися моли́твами твои́ми сотвори́.

Ин седа́лен, глас то́йже:

Испо́лнися вся страна́ Су́ждальская благоуха́ния в преставле́нии твое́м, преблаже́нная Евфроси́ние,/ но и са́мая чудеса́ свиде́тельствуют, егда́ пра́зднуется всесвята́я па́мять твоя́:/ хромы́м и разсла́бленным исправле́ние, слепы́м прозре́ние./ Те́мже и нам проси́ грехо́в оставле́ние.

Сла́ва, и ны́не, пра́здника или́ Богоро́дичен:

Милосе́рдия су́щи исто́чник, ми́лости сподо́би нас, Богоро́дице,/ при́зри на лю́ди согреши́вшия, яви́, я́ко при́сно, си́лу Твою́:/ на Тя бо упова́юще, ра́дуйся, вопие́м Ти,/ я́ко иногда́ Гаврии́л, безпло́тных архистрати́г.

По полиеле́и седа́лен, глас 4:

Неве́сто Христо́ва, Евфроси́ние всеблаже́нная,/ по́стническими по́двиги свои́ми все плотско́е мудрова́ние умертви́вши,/ вся́кими доброде́тельми украси́ла еси́ житие́ твое́/ и к Бо́гу дерзнове́ние стяжа́ла еси́,/ Ему́же приле́жно моли́ся поми́ловатися душа́м на́шим.

Ин седа́лен, глас то́йже:

Неве́сто Христо́ва, Евфроси́ние блаже́нная,/ яви́ся по́стническими по́двиги свои́ми светови́дно сия́ющи,/ те́мже с ли́ки, преподо́бная, му́дрых дев сочета́ся,/ с ни́миже ра́дующися, живе́ши в неве́стницех Христо́вех.

Сла́ва, и ны́не, пра́здника или́ Богоро́дичен:

Тя наде́жду, прибе́жище и Предста́тельницу обре́тше, ве́рнии,/ к Тебе́ притека́ем и приле́жно вопие́м:/ поми́луй, Богоро́дице, на Тя упова́ющия/ и прегреше́ний оставле́ние нам испроси́ моли́твами Твои́ми.

Ин Богоро́дичен:

Стена́ непобеди́мая нам христиа́ном еси́, Богоро́дице Де́во,/ к Тебе́ бо прибега́юще, невреди́ми пребыва́ем/ и, па́ки согреша́юще, и́мамы Тя Моли́твенницу,/ тем, благодаря́ще, вопие́м Ти:/ ра́дуйся, Обра́дованная, Госпо́дь с Тобо́ю.

Степе́нна, 1-й антифо́н 4-го гла́са. Проки́мен, глас 4: Восхва́лятся преподо́бнии во сла́ве// и возра́дуются на ло́жах свои́х. Стих: Воспо́йте Го́сподеви песнь но́ву, я́ко ди́вна сотвори́ Госпо́дь. Вся́кое дыха́ние: Ева́нгелие от Матфе́я, зача́ло 104.

По 50-м псалме́ стихи́ра, глас 8:

Сама́ ше́ствующи те́сным путе́м,/ к спо́стницам свои́м глаго́лала еси́:/ не устраши́мся по́двигов и́ночества./ Томи́тельно поще́ние, но сла́достен рай,/ притру́дно моли́твенное стоя́ние, но блаже́нно пребыва́ние на Не́бе,/ го́рько своея́ во́ли отрече́ние, но уте́шительно сожи́тельство святы́м./ Не облени́мся у́бо, се́стры, претерпи́м ма́ло,/ да венцы́ нетле́нными увязе́мся// от Христа́ Бо́га и Спа́са душ на́ших.

Кано́н пра́здника, глас 8, со ирмосо́м на 6 и святы́я на 8.

Кано́н святы́я, глас 8.

Песнь 1

Ирмо́с: Во́ду проше́д:

Припе́в: Преподо́бная благове́рная княжно́ Евфроси́ние, моли́ Бо́га о нас.

Све́том моли́тв твои́х озари́ нас,/ с любо́вию приступа́ющих святу́ю па́мять твою́ воспе́ти,/ преподо́бная ма́ти.

Испро́шена моли́твами и от чре́ва ма́терия избра́на бы́вши,/ всю себе́ в же́ртву Христу́ Бо́гу принесла́ еси́/ и сосу́д избра́н боже́ственных даро́в яви́лася еси́, блаже́нная.

Сохрани́ти хотя́щи де́вство Христу́ Жениху́ и послуша́ние соблюсти́ роди́телем,/ моли́твенно воззва́ла еси́ к Богоро́дице/ и Той хода́тайством жела́нное устрое́ние жи́зни улучи́ла еси́, пресла́вная.

Богоро́дичен: Всего́ мя спаса́ет Сло́во Пребоже́ственное,/ из чре́ва Твоего́ воплоти́тися благоволи́вшее,/ Чи́стая Ма́ти Де́во.

Ин кано́н святы́я, творе́ние Григо́рия смире́ннаго. Его́же краегране́сие си́це: Ра́дуйся, преподо́бная главо́, и́нокиням удобре́ние. Глас 8.

Песнь 1

Ирмо́с: Во́ду проше́д:

Теплото́ю Уте́шителя согрева́ему се́рдцу твоему́,/ прекра́сная Евфроси́ние,/ лед бесо́вский и страсте́й зи́му разори́ла еси́.

У́глием боже́ственнаго стра́ха опали́вши страсте́м вещь,/ была́ еси́ разсужде́ния свети́льник/ и безстра́стия опале́ние, блаже́нная.

Нося́щи на ра́ме крест свой,/ после́довала еси́ Зову́щему любо́вию/ и свети́льница и́нокиням была́ еси́.

Богоро́дичен: Всего́ мя спаса́ет Сло́во Пребоже́ственное,/ благода́тию восхоте́в из чре́ва Твоего́ воплоти́тися,/ Чи́стая Ма́ти Де́во.

Песнь 3

Ирмо́с: Небе́снаго кру́га:

Свобо́ду получи́вши от бра́ка Бо́жиим смотре́нием,/ кра́сному добро́тою Христу́ обручи́лася еси́ произволе́нием/ и, Тому́ усе́рдно порабо́тавши,/ ны́не в Небе́сных оби́телех Того́ утеша́ешися оби́льно.

Небе́сная возлюби́вши, вся кра́сная ми́ра сего́ оста́вила еси́, преподо́бная,/ и, во оби́тель все́льшися, неле́ностными труды́ по́стничества Бо́гу угоди́ла еси́,/ Его́же моли́ спасти́ся душа́м на́шим.

Всено́щными стоя́нии твои́ми/ безпло́тным Ангелом подо́билася еси́,/ тех споспе́шники иму́щи в твои́х непреста́нных к Бо́гу моли́твах.

Богоро́дичен: При́зри на не́мощь рабо́в Твои́х, Всепе́тая Богоро́дице,/ и изба́ви нас от скры́тых сете́й врага́/ и губи́теля душ на́ших.

Ин

Ирмо́с: Ты еси́ утвержде́ние:

Стоя́нию всено́щному твоему́ удиви́шася Ангели,/ и́бо тех имя́ше поспе́шники, я́же к Бо́гу, в моли́твах.

Дрема́ние оттрясла́ еси́ страсте́й от о́чию ума́ своего́,/ те́мже прозира́ше чи́сто Неви́димаго.

Млеко́м воздержа́ния я́ко воспита́ся, Евфроси́ние преподо́бная,/ на высоту́ доброде́телей возвы́сися в соверше́нное безстра́стие.

Богоро́дичен: Име́я Тя Помо́щницу, враго́в стремле́ния не убою́ся,/ име́я Тя Предста́тельницу, тех побежда́ю полки́.

Конда́к и и́кос пра́здника.

Седа́лен, глас 3:

Пасо́ма от Го́спода, я́ко овча́ кро́ткое,/ сопроти́вных полки́ победи́ла еси́ благода́тию Свята́го Ду́ха/ и, сконча́вши му́жественно по́двиг,/ венцы́ побе́дныя прия́ла еси́ в Небе́сных селе́ниих, иде́же упокоева́ющися,/ Бо́га приле́жно моли́ спасти́ся душа́м на́шим.

Ин седа́лен, глас 3.

Подо́бен: Бо́жии ве́ре:

Пасо́ма от Го́спода, Сего́ овча́ яви́лася еси́ кро́тко,/ сопроти́вныя полки́ побежда́ющи,/ и, сконча́вши по́двиг боже́ственный свой,/ в Небе́сную огра́ду всели́ся, Евфроси́ние преподо́бная,/ Бо́га приле́жно моля́щи дарова́ти нам ве́лию ми́лость.

Сла́ва, и ны́не, пра́здника или́ Богоро́дичен:

Мно́гими обдержи́мии напа́стьми,/ к Тебе́ прибега́ем, Влады́чице Чи́стая:/ покры́й нас покро́вом Твои́м/ и моли́твами Твои́ми от страсте́й и бед спаси́.

Ин Богоро́дичен:

Боже́ственнаго естества́ не отлучи́ся, Плоть быв во утро́бе Твое́й,/ но Бог вочелове́чся пребы́сть,/ Иже по Рождестве́ Де́ву Ма́терь Тя, я́коже пре́жде Рождества́,/ сохра́нь всенепоро́чну, Еди́н Госпо́дь,/ Того́ приле́жно моли́ дарова́ти нам ве́лию ми́лость.

Песнь 4

Ирмо́с: Услы́шах, Го́споди:

Бо́дренным о́ком ума́ твоего́/ в зре́нии неви́димаго Бо́га вы́ну пребыва́ла еси́, блаже́нная:/ Его́же лицезре́нием ны́не наслажда́ющися,/ моли́ уны́ния дрема́нию оттрясти́ся от оче́й на́ших.

Боже́ственным сло́вом и благода́тию Свята́го Ду́ха воспита́вшися,/ на высоту́ доброде́телей востекла́ еси́, преподо́бная ма́ти,/ и́хже стезе́ю ше́ствовати и нас укрепи́ моли́твами твои́ми.

Огне́м Боже́ственнаго стра́ха попали́вши страсте́й те́рние/ и теплото́ю Уте́шителя согре́вшися,/ была́ еси́ безстра́стия зерца́ло,/ его́же прича́стники и нас покажи́ хода́тайством твои́м.

Богоро́дичен: Омраче́нныя грехми́ ду́ши на́ша просвети́, Пречи́стая,/ и во све́те за́поведей Сы́на Твоего́ и Бо́га ходи́ти научи́ ны.

Ин

Ирмо́с: Услы́шах, Го́споди:

Нескве́рное зерца́ло, уте́шительныя зари́ прии́мши, преподо́бная Евфроси́ние,/ прия́телище Боже́ственных восхожде́ний.

Напая́емо дре́во слеза́ми яви́лася еси́, ма́ти высокора́слена,/ воздержа́нием удобря́емо и плоды́ боже́ственными направля́емо.

Углуби́ла еси́ бразду́ твоего́ ума́ боле́зньми воздержа́ния,/ доброде́телей клас многопло́ден и чуде́с благода́ти расплоди́ла еси́.

Богоро́дичен: Де́вства сосу́де и Неотлучи́маго Естества́ село́,/ ду́шу мою́ просвети́ омраче́нную, Богоневе́сто.

Песнь 5

Ирмо́с: Просвети́ нас повеле́нии:

Нося́щи крест свой,/ после́довала еси́ позва́вшему тя Го́споду бо́дренно,/ свети́льник и́нокиням бы́вши в житии́ твое́м, пресла́вная ма́ти.

В терпе́нии, послуша́нии и во́ли своея отрече́нии те́сный путь соверши́вши,/ ны́не в простра́нных селе́ниих обита́еши,/ в ня́же доспе́ти и нас устро́и.

Вся кра́сная ми́ра сего́ попра́вши,/ бу́ди нам помо́щница,/ изнемога́ющим в боре́нии с пре́лестьми ве́ка сего́.

Богоро́дичен: Присноде́ву пое́м Тя, Богоро́дице:/ Ты бо Бо́га Сло́ва пло́тию ми́рови ро́ждши,/ пребыла́ еси́ Де́ва.

Ин

Ирмо́с: У́тренююще, вопие́м:

Вар поне́сши дне́вный, сла́вная,/ ра́дости сподо́билася еси́ Го́спода своего́, преподо́бная.

Воздержа́нием, цве́те сладкоуха́нен, прозябла́ еси́ шипо́к,/ дыха́ния Бо́жия Ра́зума благоуха́ющи конце́м.

И́же пе́рвее вельми́ хва́лящагося зми́я/ к земли́ смири́ла еси́, смире́нием огра́ждьшися.

Богоро́дичен: Де́ву по Рождестве́ пое́м Тя, Богоро́дице,/ Ты бо Бо́га Сло́ва пло́тию ми́рови родила́ еси́.

Песнь 6

Ирмо́с: Моли́тву пролию́:

Мно́гими по́двиги плотска́я умертви́вши стремле́ния,/ и нас, подража́ти тебе́ в по́стничестве возжела́вших,/ те́сным путе́м твои́м ше́ствовати умудри́.

Воздержа́ние, моли́тву и любо́вь стяжа́вши, преподо́бная,/ и́ноческаго жития́ о́браз яви́лася еси́,/ в не́мже преуспе́ти и нам посо́бствуй хода́тайством твои́м.

Послуша́ния труды́ преше́дши и все́ми доброде́тельми украси́вшися,/ жезл настоя́тельства прия́ла еси́ во оби́тели и́ночестей,/ ны́не же венце́м сла́вы увенча́на еси́:/ сего́ ра́ди ублажа́ем тя, преподо́бная.

Богоро́дичен: Я́же Бо́га Сло́ва Изба́вителя ми́ру пло́тию ро́ждшая,/ изба́ви, мо́лимся, от сете́й вра́жиих ду́ши на́ша,/ Богороди́тельнице Чи́стая.

Ин

Ирмо́с: Моли́тву пролию́:

Умертви́вши теле́сная стремле́ния мно́гими по́двиги,/ к жи́зни безсме́ртней отшла́ еси́, Евфроси́ние досточу́дная.

Воздержа́ние при́сно, моли́тву и любо́вь нелицеме́рну стяжа́в, преподо́бная,/ нескве́рнено Бо́жие яви́лася еси́ зерца́ло.

Богоро́дичен: Я́же еди́на Сло́вом Пло́тию Сло́во ро́ждши,/ изба́ви, мо́лимся, от сете́й вра́жиих ду́ши на́ша.

Конда́к, глас 2:

Де́вства чи́стый сосу́д/ еле́ем моли́твы и любве́ испо́лнивши,/ неугаси́мый свети́льник в се́рдце свое́м возжгла́ еси́, преподо́бная,/ с ни́мже бо́дренно в сре́тение Небе́снаго Жениха́ изше́дши,/ в черто́г Того́ пресве́тлый прия́та была́ еси́,/ иде́же ны́не водворя́ющися с ли́ки А́нгелов и святы́х,/ моли́ся, мо́лимся, Христу́ Бо́гу,// ча́сти дев юро́дивых изба́витися нам.

Ин конда́к, глас 6:

Женише́ мой Сладча́йший,/ Христу́ взыва́ше прекра́сная Евфроси́ния,/ и́бо сла́дость любве́ Твоея́ ду́шу ми наде́ждею впери́/ и красота́ ми́лости Твоея́ се́рдце ми услади́,/ сопотруди́тися страда́нии по Тебе́,/ иму́щи на Тя наде́жду,/ да досто́йну мя сотвори́ши черто́га с му́дрыми де́вами/ и ликовствова́ти у тебе́ причти́мся./ Те́мже, преподо́бная,/ почита́юще по́двиг трудо́в твои́х, мо́лим тя:// моли́ не зазри́тися¹⁵ и нам черто́гу две́ри.

Ин конда́к, глас 8:

Де́вства чистото́ю возжегла́ еси́ свещу́ своего́ ра́зума/ и просвети́ла еси́ душе́вную чистоту́,/ поще́нием же и бде́нием плоть порабо́тила еси́ ду́ху,/ те́мже, преподо́бная Евфроси́ние,/ почита́юще по́двиги трудо́в твои́х, мо́лимся:// моли́ Христа́ Бо́га спасти́ся душа́м на́шим.

И́кос:

Де́вство возлюби́вши, сохране́ния того́ испроси́ла еси́ у Присноде́вы/ и, к земно́му ше́ствующи жениху́, Небе́снаго сре́тила еси́,/ Ему́же уневе́стившися, вся жите́йская оста́вила еси́/ и, притру́дное соверши́вши по́стническое житие́,/ в небе́сный черто́г прия́та бы́ти сподо́билася еси́,/ иде́же ны́не с ли́ки А́нгелов и святы́х водворя́ющися, моли́ Христа́ Бо́га/ сотвори́ти и нас прича́стники блаже́нныя ча́сти твоея́.

Песнь 7

Ирмо́с: От Иуде́и доше́дше:

Восте́кши на высоту́ доброде́телей/ и безстра́стным во пло́ти житие́м А́нгелом уподо́бльшися,/ рая́ сла́дости насле́дница бы́ти сподо́билася еси́, взыва́ющи:/ благослове́н еси́, Го́споди Бо́же, во ве́ки.

Сия́ющи све́том безстра́стия,/ от страсте́й моли́твами твои́ми избавля́еши/ притека́ющих к тебе́ моли́твенно, преподо́бная, взыва́ющих:/ благослове́н еси́, Го́споди Бо́же, во ве́ки.

Престо́лу предстоя́щи Вседержи́теля,/ избавле́ние от бед и скорбе́й моли́твами твои́ми/ испроси́ нам, чту́щим па́мять твою́, да взыва́ем:/ благослове́н еси́, Го́споди Бо́же, во ве́ки.

Богоро́дичен: Пресвята́я Де́во Богоро́дице, хода́тайством Твои́м/ исцели́ на́ша теле́сныя не́мощи и душе́вныя неду́ги,/ да Тебе́ ра́достно воспое́м:/ ра́дуйся, Благода́тная.

Ин

Ирмо́с: Отроцы евре́йстии:

Взя́тся на высоту́ доброде́тели безстра́стия,/ с пло́тию А́нгелом подо́бящися, рая́ пи́щи бысть насле́дница, взыва́ющи:/ благослове́н Бог оте́ц на́ших.

Сия́ющи заре́ю безстра́стия,/ очерни́ла еси́ бесо́м искуше́ния/ и сих озлобле́ния изба́ви мно́ги, вопию́щая:/ благослове́н Бог оте́ц на́ших.

Богородичен: Сию́ же рече́ Де́ву Ду́хом вели́кий Иса́ия,/ Я́же во чре́ве Бо́га зача́т и ражда́ет, Ему́же пое́м:/ благослове́н еси́, Го́споди Бо́же, во ве́ки.

Песнь 8

Ирмо́с: Царя́ Небеснаго:

За́поведи Го́спода внима́ющи,/ трезве́нием и бо́дренностию вся наве́ты и ко́зни врага́ препобеди́ла еси́,/ от ни́хже и нам изба́витися моли́твами твои́ми сподо́би.

Щито́м ве́ры и шле́мом упова́ния вооружи́вшися,/ по́лчища вра́жеская отрази́ла еси́ моли́твами твои́ми от оби́тели,/ и ны́не нас храни́ти не преста́й хода́тайством твои́м.

Срамны́х страсте́й совлещи́ся ру́бищ,/ в кра́сныя же доброде́тели ри́зы облещи́ся/ сподо́би нас моли́твами твои́ми.

Богоро́дичен: Влады́чице Чи́стая,/ нас, к Тебе́ усе́рдно прибега́ющих,/ от страсте́й и бед свободи́ моли́твами Твои́ми.

Ин

Ирмо́с: Богоглаго́ливии о́троцы в пещи́:

Неугаси́му душе́вную свещу́ ма́слом твои́х по́двиг соблю́дши,/ вошла́ еси́ ра́достию в нетле́нный черто́г и живе́ши во ве́ки.

Не поколеба́ша душа́ твоея́ столп ве́тры нечи́стых духо́в,/ утверди́ бо ся на ка́мени ве́ры, всеблаже́нная:/ Го́спода по́йте и превозноси́те во ве́ки.

Злообра́зную страсте́й совлекла́ еси́ ри́зу,/ обле́кшися, блаже́нная, в кра́сную оде́жду боже́ственнаго безстра́стия,/ Христо́ви соца́рствуя:/ Го́спода по́йте и превозноси́те во ве́ки.

Богоро́дичен: Я́ко честны́й превознесе́нный Престо́л су́щую Бо́га Вы́шняго/ воспои́м, лю́дие, еди́ну по Рождестве́ Де́ву сохра́ньшуся.

Песнь 9

Ирмо́с: Вои́стину Богоро́дицу:

Нечистота́ми грехо́вными оскверне́нных нас убели́,/ блаже́нная Евфроси́ние, моли́твами твои́ми,/ к покая́нию подви́гши ожесте́вшия ду́ши на́ша.

Нестяжа́нием упраздни́вшися,/ безбе́дно преплыла́ еси́ жите́йское мо́ре, преподо́бная,/ его́же треволне́ний изба́витися сподо́би и нам, чту́щим па́мять твою́.

То́ки слез твои́х огнь страсте́й угаси́ла еси́, блаже́нная,/ и́хже жже́ния изба́ви и нас моли́твами твои́ми.

Богоро́дичен: Бу́ди нам прибе́жище, стена́ и покро́в, Пречи́стая Де́во,/ да Тя с безпло́тными ли́ки непреста́нно велича́ем.

Ин

Ирмо́с: Велича́ем Тя, Ма́терь Бо́жию:

Сою́зом грехо́вным помраче́нное се́рдце мое́ убели́, прекра́сная Евфроси́ние,/ покая́нием, слез ту́чами и моли́твами твои́ми.

Ве́трилом окорми́вшися нестяжа́ния,/ легко́ преплыла́ еси́ жите́йское, преподо́бная, мо́ре,/ к приста́нищу ти́хому направля́ема.

Звезда́ воздержа́ния, высота́ми сия́ющи, яви́лася еси́,/ ду́ши на́ша просвеща́ющи, пресла́вная.

Богоро́дичен: Де́ву по Рождестве́ пое́м Тя, Богоро́дице Мари́е,/ те́мже и Предста́тельницу Тя и́мамы и непреста́нно велича́ем.

Ин Богоро́дичен: Упова́ние на́ше, Богоро́дице, кре́пкая Помо́щнице,/ скорбя́щих от сме́рти изыма́еши и от мук избавля́еши,/ кому́ждо по достоя́нию благода́ть дае́ши,/ Тя, Богоро́дице, вси велича́ем.

Свети́лен, глас 5:

Свети́льник нога́м на́шим бысть житие́ твое́, преподо́бная,/ ему́же после́дующе,/ невече́рняго Све́та безбе́дно дости́гнем.

Ин свети́лен:

Ту́чами слез твои́х о́гненное опале́ние стра́сти попали́ла еси́/ и река́ яви́лася еси́ дарова́ний, наполня́ема Ду́хом.

Сла́ва, и ны́не, пра́здника или́ Богоро́дичен:

Све́та Твоего́ заря́ми просвети́, Де́во,/ мрак неве́дения отгоня́ющи,/ благове́рно Богоро́дицу Тя испове́дающих.

Ин Богоро́дичен:

Име́я Тя Помо́щницу, враго́в стремле́ния не убою́ся,/ име́я Тя Предста́тельницу, тех побежда́ю полки́.

На хвали́тех стихи́ры, глас 1:

Прииди́те, ве́рнии, с ве́рою к преподо́бней,/ хвале́бныя ей пе́сни вознесе́м, веселя́щеся,/ да моли́твами ея́ от страсте́й и бед// избавле́ние прии́мем.

Поще́ния труд восприи́мши/ и непреста́нныя моли́твы свети́льник возже́гши в се́рдце свое́м,/ в све́тлыя оби́тели ра́йския всели́лася еси́, блаже́нная,/ в ни́хже и нам доспе́ти/ сподо́би хода́тайством твои́м.

Те́сным путе́м ше́ствовавши,/ широты́ ра́йския дости́гла еси́,/ Евфроси́ние досточу́дная,/ иде́же ны́не дре́ва живо́тнаго причаща́ющися,/ моли́ Человеколю́бца Бо́га/ десна́го сподо́битися стоя́ния и нам/ в день Стра́шнаго Суди́ща Христо́ва.

Сла́ва, глас 8:

Измла́да себе́ Христу́ Бо́гу преда́вши,/ преподо́бием и пра́вдою украси́лася еси́, преподо́бная,/ и, в ме́ру во́зраста исполне́ния его́ дости́гши,/ вене́ц сла́вы от руки́ Вседержи́теля прия́ла еси́,// Ему́же моли́ся спасти́ся душа́м на́шим.

И ны́не, пра́здника, глас то́йже: Днесь Влады́ка тва́ри: (зри страни́цы 425–426) .

Славо́сло́вие вели́кое.

НА ЛИТУРГИ́И

Блаже́нны от кано́на пра́здника, песнь 5-я на 4, и святыя, песнь 6-я на 4. Проки́мен, глас 7: Восхва́лятся преподо́бнии во сла́ве// и возра́дуются на ло́жах свои́х. Стих: Воспо́йте Го́сподеви песнь но́ву:Апо́стол к Кори́нфяном. зача́ло 181. Ева́нгелие от Матфе́я, зача́ло 104. Прича́стен: В па́мять ве́чную бу́дет пра́ведник:

Моли́тва

О пресла́вная ма́ти, ско́рая на́ша помо́щнице и засту́пнице и неусы́пная о нас моли́твеннице! Предстоя́ще ико́не твое́й и на сию́ со умиле́нием, я́ко живе́й ти су́щей, взира́юще, мо́лимся тебе́ усе́рдно: приими́ проше́ния на́ша и принеси́ я ко Престо́лу Милосе́рдаго Отца́ Небе́снаго, я́ко дерзнове́ние мно́гое к Нему́ иму́щая. Испроси́ притека́ющим к тебе́ и всем правосла́вным христиа́ном ве́чное спасе́ние и вре́менное благоде́нствие, на вся же блага́я дела́ и начина́ния на́ша ще́дрое благослове́ние и от вся́ких бед и скорбе́й ско́рое избавле́ние. Ей, чадолюби́вая ма́ти на́ша! Тебе́, предстоя́щей Престо́лу Бо́жию, ве́домы суть ну́жды на́ша духо́вныя и жите́йския: при́зри на ня ма́терним о́ком и твои́ми моли́твами вся зла́я от нас отврати́, па́че же злых и богопроти́вных обы́чаев умноже́ние. Утверди́ же во всех ве́ры согла́сное ве́дение, взаи́мную любо́вь и единомы́слие, да во всем житии́ на́шем, словесы́ же и писа́нии и де́лы, сла́вится всесвято́е и́мя Отца́ и Сы́на и Свята́го Ду́ха, Еди́наго Бо́га, в Тро́ице покланя́емаго, Ему́же честь и сла́ва во ве́ки веко́в. Ами́нь.

Преподобная Евфросиния Суздальская († 1250) (в миру Феодулия) была старшей дочерью черниговского князя Михаила Всеволодовича, мученическая кончина которого отмечается 20 сентября. Она с детства отличалась глубоким благочестием, которое воспитали в ней ее отец и приближенный к нему боярин Феодор. Когда пришло время, родители хотели выдать свою дочь замуж за суздальского князя Мину, потомка благочестивого варяжского князя Шимона. Феодулия покорилась родительской воле, но тайно молила Господа о сохранении девства, так как к тому времени она уже почувствовала призвание к иноческой жизни. Ее молитвы были услышаны: жених скоропостижно скончался, а сама Феодулия осталась в Суздале, куда она прибыла для заключения брака. Она поступила в Суздальскую Ризоположенскую женскую обитель (основанную в 1207 году) и приняла постриг с именем Евфросиния. Совсем еще юная инокиня ревностно выполняла правила монашеской жизни, поражая остальных насельниц обители благоразумием, высокой духовной настроенностью и ранней зрелостью ума. На святую обратила внимание сама игумения и, приблизив ее к себе, стала готовить ее своей преемницей по игуменству. По преставлении игумении, преподобная продолжила духовное руководство обителью, сохраняя в ней примерный порядок.

В 1238 году Батый ворвался в город Суздаль и опустошил его. Однако, как свидетельствует летописец того времени, Ризоположенская обитель осталась невредимой по молитвам игумении Евфросинии. Еще при жизни преподобную глубоко почитали в народе за ее материнскую отзывчивость и многочисленные благодатные проявления. 25 сентября 1250 года преподобная Евфросиния преставилась к Богу. При гробе ее верующие стали получать благодатную помощь чудесным исцелением различных недугов.

18 сентября 1698 года по благословению патриарха Адриана митрополит Суздальский Иларион совершил прославление преподобной.

Житие преподобной Евфросинии, составленное в XVI веке иноком Суздальского Спаса-Евфимиева монастыря Григорием, было написано на основании достоверных рассказов инокинь Суздальского Ризоположенского монастыря, свято чтивших память преподобной Евфросинии.