Среда

Во вто́рник ве́чера,

поста́вим стихо́в, 6. И пое́м стихи́ры преполове́нию 3, повторя́юще я́. Гла́с 4.

Подо́бен: Го́споди, возше́д на Кре́ст:

Наста́ преполове́ние дне́й, от спаси́тельнаго начина́емых воста́ния, Пятдеся́тницею же Боже́ственною печатле́емое: и све́тится све́тлости обою́ду иму́щее, и соединя́ющее обоя́, и приити́ сла́ве предъявля́ющее Влады́чняго Вознесе́ния предпочита́ет.

Слы́ша и возвесели́ся Сио́н, благовести́вшуся Христо́ву Воскресе́нию: ве́рнии же его́ сы́нове возра́довашася Сего́ ви́девше, и омыва́юща Ду́хом скве́рну христоуби́йства: гото́вится торжеству́ющи, обои́х весе́лое преполове́ние.

Прибли́жися Боже́ственнаго изъоби́льное изли́тие на все́х, я́коже написа́ся Ду́ха: предъузаконе́ние пропове́дует, преполови́вшееся, по Христо́ве сме́рти и погребе́нии и Воскресе́нии, от Него́ да́нну су́щу ученико́м нело́жному обеща́нию, Уте́шителево показу́ющу явле́ние.

Сла́ва, и ны́не: гла́с 6:

Пра́зднику преполовля́ющуся Твоего́ Христе́ Воскресе́ния, и Боже́ственнаго прише́ствия Свята́го Твоего́ Ду́ха, сше́дшеся чуде́с Твои́х воспева́ем та́инства: во́ньже низпосли́ на́м ве́лию ми́лость.

На стихо́вне самогла́сны, гла́с 1:

Пятдеся́тницы наста́ дне́й преполове́ние, в не́мже Христо́с обнажи́в малови́дно Боже́ственную си́лу, разсла́бленнаго стягну́ сло́вом, того́ от одра́ возста́вив, и боголе́пно чудотворя́ во зда́нном те́ле, челове́ком дарова́ ве́чный живо́т, и ве́лию ми́лость.

Сти́х: Помяни́ со́нм Тво́й, его́же стяжа́л еси́ испе́рва.

Во святи́лище прише́л еси́ Прему́дросте Бо́жия, преполовля́ющуся пра́зднику, учя́ и облича́я непокори́выя иуде́и, фарисе́и и кни́жники, и вопия́ со дерзнове́нием к ни́м: жа́ждай да гряде́т ко Мне́, и пие́т во́ду живо́тную, и не вжа́ждет во ве́к: ве́руяй Мое́й бла́гости, ре́ки потеку́т из чре́ва его́ жи́зни ве́чныя. О бла́гости и благоутро́бия Твоего́, Христе́ Бо́же на́ш, сла́ва Тебе́!

Сти́х: Бо́г же Ца́рь на́ш пре́жде ве́ка:

Гла́с 2:

Егда́ преполове́ние пра́здника наста́, взы́де Иису́с во святи́лище, и уча́ше непокори́выя иуде́и, глаго́ля: жа́ждай да гряде́т ко Мне́, и пие́т во́ду живо́тную ве́чную, и не вжа́ждется в ве́к. Ве́руяй в Мя́, ре́ки потеку́т из чре́ва его́, и име́ти бу́дет све́т живо́тный.

Сла́ва и ны́не: гла́с 8.

Преполови́вшуся пра́зднику, уча́щу Ти́ Спа́се, глаго́лаху иуде́е: ка́ко Се́й ве́сть пи́смена не учи́вся? Не разуме́юще, я́ко Ты́ еси́ Прему́дрость устро́ившая ми́р, сла́ва Тебе́.

Та́же, тропа́рь отпусти́тельный: Преполови́вшуся пра́зднику: То́йже и на Бо́г Госпо́дь: в сре́ду на У́трени.

В У́трени,

по 1-м, и по 2-м стихосло́вии, седа́льны пра́здника: Воскресе́ние Христо́во: Псало́м 50. И кано́ны 4-го гла́са, со ирмосо́м на 8: и осма́го гла́са, на 6. Конда́к, и и́кос, и ексапостила́рий пра́здника.

На хвали́тех, Вся́кое дыха́ние: поста́вим стихи́ 4:

Прему́дрость и си́ла, О́тчее сия́ние, Сло́во присносу́щное и Сы́н Бо́жий, во святи́лище прии́де пло́тию, и уча́ше иуде́йския лю́ди жесто́кия и неблагода́рныя, и удивля́хуся прему́дрости бога́тству, вопию́ще: отку́ду ве́сть пи́смена ни от кого́же учи́вся? Два́жды.

Кни́жником затыка́ше уста́, иуде́и облича́ше Месси́а Госпо́дь, вопия́ к ни́м: не на лице́ законопресту́пницы, я́ко непра́ведни суди́те: в суббо́ту бо А́з разсла́бленнаго воздви́гнух. Те́мже Госпо́дь суббо́ты е́смь и зако́на: что́ и́щете Мене́ уби́ти, уме́ршыя воздви́гшаго?

Навуфи́а ка́мением поби́ша лю́тии и законопресту́пнии, иуде́йское собра́ние неблагода́рное, Иса́ию же пило́ю древя́нною растро́ша, в ка́л му́драго Иереми́ю вверго́ша, Го́спода же на Кре́ст возне́сше, взыва́ху: хра́м разоря́я, спаси́ Себе́, и уве́руем.

Сла́ва, и ны́не: гла́с 4:

Просвети́вшеся бра́тие Воскресе́нием Спа́са Христа́, и дости́гше преполове́ния пра́здника Влады́чня, прии́скренно сохрани́м за́поведи Бо́жия, да досто́йни бу́дем и Вознесе́ние пра́здновати, и прише́ствие получи́ти Свята́го Ду́ха.

Славосло́вие вели́кое. И отпу́ст.

На Литурги́и блаже́нна обои́х кано́нов, пе́снь 9-я. Проки́мен, и Аллилу́иа пра́здника, Апо́стол, и Ева́нглие дне́. Прича́стный: Яды́й мою́ пло́ть, и пия́й мою́ кро́вь, во мне́ пребыва́ет: И отдае́тся пра́здник. Слу́жба Мине́и пое́тся на Повече́рии.

Комментарии для сайта Cackle