Службы седьмой седмицы по Пасхе

 ОглавлениеВоскресенье (Неделя седьмая)Понедельник 

Воскресенье (Неделя седьмая)

В неде́лю ве́чера

на Го́споди воззва́х: поста́вим стихо́в 6, и пое́м стихи́ры святы́х оте́ц, 3, гла́с 6.

Подо́бен: Отча́янная:

Из чре́ва роди́лся еси́ пре́жде денни́цы, от Отца́ безма́терен пре́жде ве́к: а́ще и А́рий тва́рь Тя́, а не Бо́га сла́вит, де́рзостию смеша́я Тя́ Зижди́теля тва́рем безу́мно, вещество́ огня́ ве́чнаго себе́ сокро́вищствуяй. Но Собо́р, и́же в Нике́и, Сы́на Бо́жия Тя́ пропове́да Го́споди, Отцу́ и Ду́ху Сопресто́льна.

Кто́ Твою́ Спа́се ри́зу раздра́? А́рий, Ты́ ре́кл еси́, и́же Тро́ицы пресече́ Единоче́стное Нача́ло в разделе́ния: се́й отве́рже Тя́ бы́ти Еди́наго от Тро́ицы, се́й и Несто́риа у́чит Богоро́дицу не глаго́лати. Но Собо́р, и́же в Нике́и Сы́на Бо́жия Тя́ пропове́да Го́споди, Отцу́ и Ду́ху Сопресто́льна.

В бре́г па́дает греха́, А́рий возненави́девый све́та ви́дети, и боже́ственною растерза́ется у́дицею вну́тренних, все́ изда́ти существо́ и ду́шу ну́жно, други́й Иу́да бы́в нра́вом и о́бразом. Но Собо́р, и́же в Нике́и, Сы́на Бо́жия Тя́ пропове́да Го́споди, Отцу́ и Ду́ху Сопресто́льна.

И Мине́и свята́го, 3. Сла́ва: гла́с 6.

Та́инственныя дне́сь Ду́ха трубы́, богоно́сныя отцы́ восхва́лим песнопе́вшыя посреде́ Це́ркве, пе́снь сли́чную богосло́вия, Тро́ицу Еди́ну непреме́нную, Существо́ же и Божество́: низложи́тели А́риевы, и правосла́вных побо́рники, моля́щыяся всегда́ Го́споду, поми́ловатися душа́м на́шым.

И ны́не, гла́с то́йже:

На гора́х святы́х зря́ще Твое́ Вознесе́ние Христе́, Сия́ние сла́вы О́тчи, пое́м Тво́й светообра́зный лица́ зра́к, кла́няемся Страсте́м Твои́м, почита́ем Воскресе́ние, сла́вное Вознесе́ние сла́вяще, поми́луй на́с.

На стихо́вне стихи́ры, гла́с 6: Все́ собра́вше душе́вное худо́жество: со стихи́ и́х. Пи́саны сего́ дне́ на хвали́тех.

Сла́ва, гла́с 3:

Апо́стольских преда́ний изве́стнии храни́телие бы́сте святи́и отцы́: Святы́я бо Тро́ицы Единосу́щное правосла́вно научи́вше, А́риево хуле́ние собо́рне низложи́сте, с ни́м же и Македо́ниа духобо́рца обличи́вше, осуди́сте Несто́риа, Евти́хиа и Диоско́ра, Саве́ллиа же и Севи́ра безгла́внаго: и́хже пре́лести испроси́те изба́витися на́м, и нескве́рну на́шему житию́ в ве́ре сохрани́тися, мо́лимся.

И ны́не: гла́с 6:

Взы́де Бо́г в воскликнове́нии, Госпо́дь во гла́се тру́бне, е́же вознести́ па́дший о́браз Ада́мов, и посла́ти Ду́ха уте́шителя, е́же освяти́ти ду́шы на́шя.

Отпусти́тельный тропа́рь, гла́с 8: Препросла́влен еси́ Христе́ Бо́же на́ш: Сла́ва: свята́го, а́ще е́сть: а́ще ли ни́, Сла́ва, и ны́не: пра́здника, гла́с 4: Возне́слся еси́ во сла́ве: И отдае́тся после́дование святы́х оте́ц.

Неде́ля седма́я, святы́х, богоно́сных оте́ц, и́же в Нике́и.

В суббо́ту ве́чера

на ма́лей вече́рни,

на Го́споди воззва́х: поста́вим стихи́ 4. И пое́м стихи́ры воскре́сны, гла́с 6: Побе́ду име́яй христе́: Дне́сь Христо́с: Тебе́ Го́споди: повторя́юще пе́рвую. Сла́ва: гла́с то́йже: Та́йныя дне́сь: [ищи́ сия́ вся́ на вели́цей вече́рни.]

И ны́не: Богоро́дичен:

Досто́йно е́сть я́ко вои́стинну, блажи́ти Тя́ Богоро́дицу: в Твое́ бо пречи́стое вше́д чре́во все́х Соде́тель, пло́ть бы́сть, не преложи́вся естество́м, ниже́ мечта́вся о смотре́нии: но восприя́тей из Тебе́ слове́сно одушевле́нней пло́ти соедини́вся, по ипоста́си. Отону́дуже благоче́стно во обои́х естества́х явля́ющихся ра́знство твори́м. Того́ моли́ Честна́я Пресвята́я, низпосла́ти на́м ми́р и ве́лию ми́лость.

На стихо́вне, воскре́сная стихи́ра. Та́же, настоя́щыя стихи́ры подо́бны Пресвяты́я Богоро́дицы, гла́с 6.

Подо́бен: Всю́ отложи́вше:

Сти́х: Помяну́ и́мя твое́ во вся́ком ро́де и ро́де:

Кля́твою я́ко обеща́ Твоему́ пра́отцу дре́вле Бо́г Преле́тный, в после́дняя времена́ соверши́, произше́д Пречи́стая от чре́ва Твоего́ боже́ственнаго. И́бо вои́стинну возсия́ от Тебе́ Госпо́дь, дла́нию содержа́й концы́: его́же и мне́ благоуве́тлива сотвори́ в ча́с су́дный Де́во Блаже́нная, Того́ Ца́рствия мя́ получи́ти доброде́телей возвыше́нием, и страсте́й умерщвле́нием.

Сти́х: Слы́ши Дщи́ и ви́ждь, и приклони́ у́хо Твое́:

Ума́ чистото́ю иса́иа де́во издале́ча прорече́, роди́ти иму́щую созда́теля всея́ тва́ри тя́, честна́я пречи́стая: ты́ бо яви́лася еси́ еди́на во ве́ки всенепоро́чная. те́мже тя́ молю́: оскверне́ную очи́сти ду́шу мою́, и све́тлости боже́ственныя о́бщника мя́ покажи́, и боже́ственнаго твоего́ сы́на стоя́ния десна́го, егда́ ся́дет, я́коже пи́сано е́сть, суди́ти ми́ру всему́.

Сти́х: Лицу́ Твоему́ помо́лятся:

Сме́рти разруше́ние Рождество́м Твои́м яви́ся, Ты́ бо Отрокови́це Живота́ Нетле́ннаго пребыва́лище. Те́мже Тя́ молю́, в ме́стех а́довых страсте́й мои́х лежа́ща Ты́ возста́ви, и к весе́лию мя́ оживи́ Де́во. Руково́дствуй ко блаже́нному возда́нию, и ве́чныя и боже́ственныя сподо́би ра́дости, иде́же сла́дость присносу́щная, иде́же све́т невече́рний.

Сла́ва: гла́с 4: Моле́бную па́мять: И ны́не: пра́здника. Го́споди, та́инство: [зри́ на вели́цей вече́рни, на стихо́вне сла́вник.] Тропа́рь воскре́сн: Сла́ва, и ны́не: пра́здника. Ектении́, и отпу́ст.

На вели́цей вече́рни

Блаже́н му́ж: На Го́споди воззва́х: поста́вим стихо́в 10, и пое́м воскре́сны 3: и Вознесе́нию 3: и отце́м 4.

Стихи́ры воскре́сны, гла́с 6:

Побе́ду име́яй Христе́, ю́же на а́да, на Кре́ст возше́л еси́: да во тме́ сме́рти седя́щыя воскреси́ши с Собо́ю, И́же в ме́ртвых Свобо́дь, Источа́яй живо́т от Своего́ све́та, Всеси́льне Спа́се, поми́луй на́с.

Дне́сь Христо́с сме́рть попра́в, я́коже рече́, воскре́се, и ра́дование ми́рови дарова́, да вси́ взыва́юще, пе́снь та́ко рце́м: Исто́чниче жи́зни, Непристу́пный Све́те, Всеси́льне Спа́се, поми́луй на́с.

Тебе́ Го́споди Су́щаго по все́й тва́ри, гре́шнии ка́мо бежи́м? На небеси́ Са́м живе́ши, во а́де попра́л еси́ сме́рть. Во глубины́ морски́я? Та́мо рука́ Твоя́ Влады́ко. К тебе́ прибега́ем, Тебе́ припа́дающе мо́лимся: Воскресы́й из ме́ртвых, поми́луй на́с.

И́ны самогла́сны, Вознесе́ния, гла́с то́йже:

Госпо́дь Вознесе́ся на небеса́, да по́слет Уте́шителя ми́ру, небеса́ угото́ваша престо́л Его́, о́блацы восхожде́ние Его́: а́нгели дивя́тся, Челове́ка зря́ще превы́ше себе́. Оте́ц жде́т, Его́же в не́драх и́мать Соприсносу́щна, Ду́х же Святы́й вели́т все́м а́нгелом Его́: возми́те врата́ кня́зи ва́шя. вси́ язы́цы восплещи́те рука́ми, я́ко взы́де Христо́с, иде́же бе́ пе́рвее.

Го́споди, Твоему́ Вознесе́нию удиви́шася херуви́ми, зря́ще Тебе́ Бо́га на о́блацех восходя́ща, на ни́х седя́щаго, и сла́вим Тя́, я́ко бла́га ми́лость Твоя́: сла́ва Тебе́.

На гора́х святы́х зря́ще Твое́ Вознесе́ние Христе́, Сия́ние сла́вы О́тчи, воспева́ем Тво́й светообра́зный лица́ зра́к, кла́няемся Страсте́м Твои́м, почита́ем Воскресе́ние, сла́вное Вознесе́ние сла́вяще, поми́луй на́с.

И́ны стихи́ры святы́м отце́м. Гла́с 6.

Подо́бен: Отча́янная:

Из чре́ва роди́лся еси́ пре́жде денни́цы, от Отца́ безма́терен пре́жде ве́к: а́ще и А́рий тва́рь Тя́, а не Бо́га сла́вит, де́рзостию смеша́я Тя́ Зижди́теля тва́рем безу́мно, вещество́ огня́ ве́чнаго себе́ сокро́вищствуяй. Но Собо́р и́же в Нике́и, Сы́на Бо́жия Тя́ пропове́да Го́споди, Отцу́ и Ду́ху Сопресто́льна.

Кто́ Твою́ Спа́се ри́зу раздра́? А́рий, Ты́ ре́кл еси́, и́же Тро́ицы пресече́ Единоче́стное Нача́ло в разделе́ния: се́й отве́рже Тя́ бы́ти Еди́наго о Тро́ицы, се́й и Несто́риа учи́т Богоро́дицу не глаго́лати. Но Собо́р, и́же в Нике́и, Сы́на Бо́жия Тя́ пропове́да Го́споди, Отцу́ и Ду́ху Сопресто́льна.

В бре́г па́дает греха́ А́рий, Возненави́девый све́та ви́дети, и боже́ственною растерза́ется у́дицею вну́тренних, все́ изда́ти существо́ и ду́шу ну́жно, други́й Иу́да бы́в нра́вом и о́бразом. Но Собо́р, и́же в Нике́и, Сы́на Бо́жия Тя́ пропове́да Го́споди, Отцу́ и Ду́ху Сопресто́льна.

А́рий безу́мный Пресвяты́я Тро́ицы пресече́ единонача́лие, в три́ беззако́нная же и несра́сленная существа́. Те́мже отцы́ богоно́снии соше́дшеся усе́рдно, ре́вностию разжиза́еми, я́коже Фесви́тянин Илиа́, духо́вным посека́ют мече́м студу́ научи́вшаго ху́льника, я́коже Ду́х веща́ше.

Сла́ва: гла́с 6:

Та́йныя дне́сь Ду́ха трубы́, богоно́сныя отцы́ восхва́лим песнопе́вшыя посреде́ Це́ркве пе́снь сли́чную богосло́вия, Тро́ицу Еди́ну непреме́нную, Существо́ же и Божество́, низложи́тели А́риевы, и правосла́вных побо́рники, моля́щыяся всегда́ Го́споду, поми́ловатися душа́м на́шым.

И ны́не: Богоро́дичен:

Кто́ Тебе́ не ублажи́т, Пресвята́я Де́во? Кто́ ли не воспое́т Твоего́ Пречи́стаго Рождества́? Безле́тно бо от Отца́ возсия́вый Сы́н Единоро́дный, То́йже от Тебе́ Чи́стыя про́йде, неизрече́нно вопло́щся, естество́м Бо́г Сы́й, и естество́м бы́в Челове́к на́с ра́ди, не во двою́ лицу́ разделя́емый, но во двою́ естеству́ несли́тно познава́емый. Того́ моли́ Чи́стая Всеблаже́нная, поми́ловатися душа́м на́шым.

Вхо́д. Проки́мен дне́, и чте́ния.

Бытия́ чте́ние. [Глава́ 14.]

Слы́шав А́вра́м, я́ко плене́н бы́сть Ло́т брата́ничь его́, сочте́ своя́ домоча́дцы три́ста и осмьна́десять, и погна́ в сле́д и́х да́же до Да́на, и нападе́ на ня́ но́щию са́м, и о́троцы его́ с ни́м: и порази́ и́х, и гони́ и́х до Хова́ла, е́же е́сть ошу́юю Дама́ска. И возврати́ вся́каго коня́ содо́мскаго, и Ло́та брата́нича своего́ возврати́, и вся́ име́ния его́, и жены́ и лю́ди. Изы́де же ца́рь Содо́мский во сре́тение ему́, повнегда́ возврати́тися ему́ от се́ча Ходоллогомо́рскаго, и с царьми́ и́же с ни́м, во юдо́ль Са́вин: сие́ же бя́ше по́ле царе́во. И Мелхиседе́к ца́рь Сали́мский изнесе́ хле́бы и вино́, бя́ше же свяще́нник Бо́га Вы́шняго. И благослови́ Авра́ма, и рече́: благослове́н Авра́м Бо́гом Вы́шним, И́же созда́ не́бо и зе́млю, и благослове́н Бо́г Вы́шний, И́же предаде́ враги́ твоя́ под ру́ки тебе́.

Втора́го зако́на чте́ние. [Глава́ 1.]

Во дне́х о́нех, рече́ Моисе́й к сыно́м Исра́илевым: ви́дите, преда́х пред лице́м ва́шим зе́млю: вше́дше насле́дуйте зе́млю, е́юже кля́тся Госпо́дь отце́м ва́шым, Авраа́му, Исаа́ку и Иа́кову, да́ти и́м, и се́мени и́х по ни́х. И реко́х к ва́м во вре́мя о́но, глаго́ля: не возмогу́ еди́н води́ти ва́с, Госпо́дь Бо́г на́ш умно́жил вы́ е́сть, и се́ есте́ дне́сь я́ко зве́зды небе́сныя мно́жеством. Госпо́дь Бо́г оте́ц на́ших да приложи́т ва́м, я́ко да бу́дете ты́сящами сугу́бо, и да благослови́т ва́с, я́коже глаго́ла ва́м. И взя́х от ва́с му́жы му́дры, и све́домы, и смы́слены, и поста́вих и́х владе́ти над ва́ми тысященача́льники, и стонача́льники, и пятьдесятонача́льники, и десятонача́льники, и писмовводи́тели судия́м ва́шым. И запове́дах судия́м ва́шым во вре́мя о́но, глаго́ля: разслу́шайте посреде́ бра́тий ва́ших, и суди́те пра́ведно посреде́ му́жа, и посреде́ бра́та его́, и посреде́ прише́льца его́, да не позна́ете лица́ в суде́. ма́лому и вели́кому су́диши, и не устыди́шися лица́ челове́ческа, я́ко су́д Бо́жий е́сть.

Втора́го зако́на чте́ние. [Глава́ 10.]

Во дне́х о́нех, рече́ Моисе́й к сыно́м Исра́илевым: се́ Го́спода Бо́га твоего́ не́бо, и не́бо небесе́: земля́, и вся́ ели́ка су́ть на не́й. Оба́че отцы́ ва́ши произво́ли Госпо́дь люби́ти я́: и избра́ се́мя и́х по ни́х, ва́с, па́че все́х язы́к, в де́нь се́й. И обре́жите жестосе́рдие ва́ше, и вы́и ва́шея не ожесточи́те ктому́. И́бо Госпо́дь Бо́г на́ш, Се́й Бо́г бого́в, и Госпо́дь господе́й: Бо́г Вели́кий, Кре́пкий и Стра́шный, И́же не диви́тся лицу́, ниже́ взе́млет да́р. Творя́й су́д прише́льцу, и сироте́ и вдове́, и лю́бит прише́льца, да́ти ему́ хле́б и ри́зу. И возлюби́те прише́льца: прише́льцы бо бе́сте в земли́ еги́петстей. Го́спода Бо́га твоего́ да убои́шися, и Тому́ еди́ному послу́жиши, и к Нему́ прилепи́шися, и и́менем его́ клене́шися. То́й хвала́ твоя́, и То́й Бо́г тво́й, И́же сотвори́ тебе́ вели́кая и сла́вная сия́, я́же ви́десте о́чи твои́.

На лити́и стихи́ра пра́здника, гла́с 1:

Возше́д на небеса́, отону́дуже и соше́л еси́, не оста́ви на́с си́рых Господи: да прии́дет Тво́й Ду́х, нося́ ми́р ми́рови, покажи́ сыно́м челове́ческим дела́ си́лы Твоея́, Го́споди Человеколю́бче.

Сла́ва: отце́м, гла́с 3:

Апо́стольских преда́ний изве́стнии храни́телие бы́сте святи́и отцы́: Святы́я бо Тро́ицы Единосу́щное правосла́вно научи́вше, А́риево хуле́ние собо́рне низложи́сте, с ни́м же и Македо́ниа духобо́рца обличи́вше, осуди́сте Несто́риа, Евти́хиа и Диоско́ра, Саве́ллиа же и Севи́ра безгла́внаго: И́хже пре́лести испроси́те изба́витися на́м, нескве́рну на́шему житию́ в ве́ре сохрани́тися, мо́лимся.

И ны́не: пра́зднику, гла́с 6:

Го́споди, смотре́ния соверши́в та́инство, пои́м Твоя́ ученики́ на го́ру Елео́нскую возноси́лся еси́, и се́ тве́рдь небе́сную проше́л еси́, мене́ ра́ди Обнища́вый по мне́: и возше́д отону́дуже не разлучи́лся еси́, Всесвята́го Твоего́ Ду́ха низпосли́ просвеща́юща ду́шы на́шя.

На стихо́вне стихи́ра, гла́с 6:

Воскресе́ние Твое́ Христе́ Спа́се, а́нгели пою́т на небесе́х, и на́с на земли́ сподо́би чи́стым се́рдцем Тя́ сла́вити.

И́ны стихи́ры по алфави́ту.

Сти́х: Госпо́дь воцари́ся, в ле́поту облече́ся.

Врата́ сокруши́в ме́дная, и вереи́ а́довы сотры́й, я́ко Бо́г Всеси́лен, ро́д челове́ческий па́дший воскреси́л еси́. Сего́ ра́ди и мы́ согла́сно вопие́м: воскресы́й из ме́ртвых, Го́споди сла́ва Тебе́.

Сти́х: И́бо утверди́ вселе́нную, я́же не подви́жится.

Тле́ния на́с дре́вняго Христо́с испра́вити хотя́, на Кресте́ пригвожда́ется, и во гро́бе полага́ется, Его́же мироно́сицы жены́ со слеза́ми иска́ху, рыда́юще глаго́лаху: увы́ на́м Спа́се все́х, ка́ко изво́лил еси́ во гро́б всели́тися? Всели́вый же ся хотя́й, ка́ко укра́ден бы́л еси́? Ка́ко преложе́н бы́л еси́? Ко́е же ме́сто Твое́ Живоно́сное сокры́ Те́ло? Но Влады́ко, я́коже обеща́лся еси́, на́м яви́ся, и утоли́ от на́с рыда́ние сле́з. Пла́чущымся же и́м, а́нгел к ни́м возопи́: от пла́ча преста́вше, апо́столом рцы́те, я́ко воскре́се Госпо́дь, ми́рови да́руяй очище́ние и ве́лию ми́лость.

Сти́х: До́му Твоему́ подоба́ет:

Распны́йся я́ко восхоте́л еси́ Христе́, и сме́рть погребе́нием Твои́м плени́вый, тридне́вен воскре́сл еси́ я́ко Бо́г со сла́вою, ми́рови да́руяй безконе́чную жи́знь, и ве́лию ми́лость.

Сла́ва: отце́м, гла́с 4:

Моле́бную па́мять дне́сь богоно́сных отце́в, от всея́ вселе́нныя собра́вшихся, в све́тлем гра́де Нике́йстем, правосла́вных собра́ния, благоче́ствующе ве́рно пра́зднуим. Си́и бо лю́таго А́риа безбо́жное веле́ние благочестному́дренне низложи́ша, и от Кафоли́ческия Це́ркве собо́рне того́ изгна́ша: и я́сно Сы́на Бо́жия единосу́щна и соприсносу́щна, пре́жде ве́к Су́ща, все́х научи́ша испове́дати во изъображе́нии ве́ры, изве́стно и благоче́стно сие́ изложи́вше. Те́мже и мы́ боже́ственным и́х повеле́нием после́дствующе, изве́стно ве́рующе слу́жим, со Отце́м Сы́ну, и Ду́ху Всесвято́му, во еди́ном Божестве́, Тро́ице Единосу́щней.

И ны́не: пра́зднику, гла́с то́йже.

Го́споди, та́инство е́же от веко́в сокрове́нное и от родо́в испо́лнив я́ко Бла́г, прише́л еси́ со ученики́ Твои́ми на го́ру Елео́нскую, име́яй Ро́ждшую Тя́ Творца́, и все́х Соде́теля: То́й бо в стра́сти Твое́й ма́терски па́че все́х боле́зновавшей, подоба́ше и сла́вою пло́ти Твоея́ премно́гия наслади́тися ра́дости. Ея́же и мы́ причаща́ющеся, е́же на небеса́ восхо́дом Твои́м Влады́ко, вели́кую Твою́ ми́лость на на́с бы́вшую сла́вим.

Та́же, Ны́не отпуща́еши: Трисвято́е, и по О́тче на́ш: Тропа́рь отце́в, гла́с 8: Препросла́влен еси́: два́жды. И пра́здника еди́ножды, пи́саны на у́трени. И благослове́ние хле́бов, и чте́ние дея́ний святы́х апо́стол.

А́ще ли не́сть бде́ния, тропа́рь воскре́сен: А́нгельския си́лы: Сла́ва: отце́в: И ны́не: Вознесе́ния. На повече́рии конда́к отце́в: Сла́ва, и ны́не: Вознесе́ния. На полу́нощнице пое́м кано́н тро́ичный окто́иха гла́са, и про́чее я́ко обы́чно. И отпу́ст.

В неде́лю на У́трени

На Бо́г Госпо́дь: тропа́рь воскре́сен, гла́с 6:

А́нгельския си́лы на гро́бе Твое́м, и стрегу́щии омертве́ша: и стоя́ше Мари́а во гро́бе, и́щущи Пречи́стаго Те́ла Твоего́. Плени́л еси́ а́д, не искуси́вся от него́: сре́тил еси́ Де́ву, да́руяй живо́т, воскресы́й из ме́ртвых, Го́споди сла́ва тебе́. [Два́жды.]

Сла́ва: отце́в, гла́с 8:

Препросла́влен еси́ Христе́ Бо́же на́ш, свети́ла на земли́ отцы́ на́ши основа́вый, и те́ми ко и́стинней ве́ре вся́ ны́ наста́вивый: Многоблагоутро́бне, сла́ва Тебе́.

И ны́не: тропа́рь Вознесе́ния:

Возне́слся еси́ во сла́ве Христе́ Бо́же на́ш, ра́дость сотвори́вый ученико́м, обетова́нием Свята́го Ду́ха, извеще́нным и́м бы́вшым благослове́нием: я́ко Ты́ еси́ Сы́н Бо́жий Изба́витель ми́ра.

По 1-м стихосло́вии, седа́лен, гла́с 6.

Гро́бу отве́рсту, а́ду пла́чущуся, Мари́а вопия́ше ко скры́вшымся апо́столом: изыди́те виногра́да де́лателие, пропове́дите воскресе́ния сло́во: воскре́се Госпо́дь, подая́й ми́рови ве́лию ми́лость.

Сти́х: Воскресни́ Го́споди Бо́же мо́й:

Го́споди, предстоя́ше гро́бу Твоему́ Мари́а Магдали́на, и пла́каше вопию́щи, вертогра́даря Тя́ мня́щи, глаго́лаше: где́ положи́л еси́ Ве́чный Живо́т? где́ скры́л еси́ Седя́щаго на престо́ле херуви́мстем? Стрегу́щии бо Сего́ стра́ха омертве́ша. Или́ Го́спода моего́ дади́те ми́, или́ со мно́ю возопи́йте: в ме́ртвых бы́в, и ме́ртвыя воскреси́вый, сла́ва Тебе́.

Сла́ва, и ны́не: Богоро́дичен.

Благослове́нную Нареки́й Твою́ Ма́терь, прише́л еси́ на Стра́сть во́льным хоте́нием, возсия́в на Кресте́, взыска́ти хотя́ Ада́ма, глаго́ля а́нгелом: сра́дуйтеся Мне́, я́ко обре́теся поги́бшая дра́хма. Вся́ му́дре устро́ивый Бо́же на́ш, сла́ва Тебе́.

По 2-м стихосло́вии, седа́лен, гла́с то́йже.

Живо́т во гро́бе возлежа́ше, и печа́ть на ка́мени надлежа́ше, я́ко Царя́ спя́ща во́ини стрежа́ху Христа́, и враги́ Своя́ неви́димо порази́вый, воскре́се Госпо́дь.

Сти́х: Испове́мся Тебе́ Го́споди, все́м се́рдцем мои́м:

Во́льною сме́ртию живо́т безсме́ртный обрето́хом, Всеси́льне и еди́не все́х Спа́се: Ты́ бо в честно́м Твое́м Воста́нии вся́ воззва́л еси́, разруши́вый а́дову побе́ду и сме́рти жа́ло.

Сла́ва, и ны́не: Богоро́дичен:

Богоро́дице Де́во, моли́ Сы́на Твоего́, во́лею пригвозди́вшагося на Кресте́, и воскре́сшаго из ме́ртвых Христа́ Бо́га на́шего, спасти́ся душа́м на́шым.

По непоро́чнах, Благослове́н еси́ Го́споди: А́нгельский собо́р:

И а́бие ипакои́, гла́с 6:

Во́льною и животворя́щею Твое́ю сме́ртию Христе́, врата́ а́дова сокруши́в я́ко Бо́г, отве́рзл еси́ на́м дре́вний ра́й, и воскре́с из ме́ртвых, изба́вил еси́ от истле́ния живо́т на́ш.

Степе́нна, гла́с 6.

Антифо́н 1:

На не́бо о́чи мои́ возвожу́ к Тебе́, Сло́ве: уще́дри мя́, да живу́ Тебе́.

Поми́луй на́с уничиже́нных, устроя́я благопотре́бныя Твоя́ сосу́ды, сло́ве.

Сла́ва:

Свято́му Ду́ху, вся́кая всеспаси́тельная вина́, а́ще ко́ему Се́й по достоя́нию дхне́т, ско́ро взе́млет от земны́х, восперя́ет, возраща́ет, устроя́ет горе́.

И ны́не: то́йже.

Антифо́н 2:

А́ще не Госпо́дь бы бы́л в на́с, никто́же от на́с проти́ву возмо́гл бы вра́жиим бра́нем одоле́ти: побежда́ющии бо от зде́ возно́сятся.

Зубы́ и́х да не я́та бу́дет душа́ моя́, я́ко птене́ц Сло́ве: увы́ мне́, ка́ко и́мам от врага́ избы́ти грехолюби́в сы́й?

Сла́ва:

Святы́м Ду́хом обоже́ние все́м, благоволе́ние, ра́зум, ми́р и благослове́ние: ра́внодетельный бо е́сть Отцу́ и Сло́ву.

И ны́не: то́йже.

Антифо́н 3:

Наде́ющиися на Го́спода враго́м стра́шни, и все́м ди́вни: горе́ бо зря́т.

В беззако́ния ру́к свои́х, пра́ведных жре́бий, помо́щника Тя́ име́я Спа́се, не простира́ет.

Сла́ва:

Свята́го Ду́ха держа́ва на все́х: Ему́же вы́шняя во́инства покланя́ются со вся́ким дыха́нием до́льним.

И ны́не: то́йже.

Проки́мен, гла́с 6: Го́споди, воздви́гни си́лу Твою́, и прииди́ во е́же спасти́ на́с. Сти́х: Пасы́й изра́иля вонми́, наставля́яй я́ко овча́ ио́сифа. Вся́кое дыха́ние: Ева́нглие воскре́сно от иоа́нна, зача́ло 66: Яви́ся иису́с ученико́м свои́м воста́в от ме́ртвых: Та́же, Воскре́сние христо́во: Псало́м 50: И про́чее, обы́чно.

Кано́н воскре́сен, со ирмосо́м на 4: и Вознесе́ния на 4: и святы́х оте́ц на 6.

Кано́н воскре́сен, гла́с 6.

Пе́снь 1.

Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь, пои́м, вопия́ше.

Распросте́ртыма дла́ньма на Кесте́, Оте́ческаго испо́лнил еси́ благоволе́ния Благи́й Иису́се, вся́ческая: те́мже побе́дную пе́снь Тебе́ вси́ пое́м.

Стра́хом к Тебе́ я́ко рабы́ня, сме́рть повеле́вшися приступи́ Влады́це живота́, то́ю подава́ющему на́м безконе́чный живо́т и воскресе́ние.

Богоро́дичен:

Своего́ прии́мши Соде́теля, я́ко Са́м восхоте́, из безсе́менна чре́ва Твоего́, па́че ума́ воплоща́ема Чи́стая, тва́рей вои́стинну яви́лася еси́ Влады́чица.

Кано́н Вознесе́нию, гла́с 5.

Ирмо́с: Спаси́телю Бо́гу:

Воспои́м вси́ лю́дие, на ра́мех херуви́мских Возне́сшуся со сла́вою Христу́, и спосади́вшему на́с одесну́ю Отца́, пе́снь побе́дную: я́ко просла́вися.

Хода́тая Бо́гу и челове́ком Христа́, ли́цы а́нгельстии ви́девше, с пло́тию в вы́шних, удивля́хуся, согла́сно же воспева́ху пе́снь побе́дную: я́ко просла́вися.

Я́вльшемуся Бо́гу на горе́ Сина́йстей и зако́н да́вшему богови́дцу Моисе́ю, от горы́ Елео́нския Возне́сшемуся пло́тию, Тому́ вси́ воспои́м: я́ко просла́вися.

Богоро́дичен:

Пречи́стая Ма́ти Бо́жия, Воплоще́ннаго от Тебе́, и от не́др Роди́теля не отсту́пльшаго Бо́га, непреста́нно моли́, от вся́каго обстоя́ния спасти́, я́же созда́.

Кано́н святы́м отце́м, гла́с 6.

его́же краестро́чие: Пе́рвое воспою́ сосло́вие па́стырей.

Пе́снь 1.

Ирмо́с: Я́ко по су́ху пешеше́ствовав Изра́иль:

Святы́х оте́ц восхваля́я всесвяты́й Собо́р, всесвято́е того́ во мне́ прорица́ние, вопия́: молю́ Тя Христе́, сохрани́тися мне́. [Два́жды.]

Богоно́снии отцы́, я́ко мо́лния соше́дшеся дне́сь, Тебе́ Христе́ Единоро́дна, Отцу́ Собезнача́льна Сы́на испове́даша я́сно, и единосу́щна.

Сла́ва:

Неве́сты Твоея́ Це́ркве, благосла́внии невестокраси́телие Влады́ко, ве́ры я́ве определе́ние изложи́вше злато́е, я́ко у́тварию боголе́пною сию́ украси́ша.

И ны́не: Богоро́дичен:

Преукраше́нна сла́вою боже́ственною Честна́я Цари́ца, Сы́ну Своему́ и Бо́гу предстои́т, на́м спасе́ние душе́вное прося́щи.

Катава́сиа: Боже́ственным покрове́н:

Пе́снь 3.

Ирмо́с: Не́сть свя́т я́коже Ты́ Го́споди Бо́же мо́й, Вознесы́й ро́г ве́рных Твои́х Бла́же, и утверди́вый на́с на ка́мени испове́дания Твоего́.

Бо́га распина́ема пло́тию зря́щи тва́рь распада́шеся стра́хом: но содержа́щею дла́нию на́с ра́ди Распя́таго, кре́пко содержа́шеся.

Сме́ртию сме́рть разори́вшися, лежи́т окая́нная бездыха́нна: Живота́ бо не терпя́щи Боже́ственнаго приложе́ния, мертва́ быва́ет кре́пкая, и да́руется все́м воскресе́ние.

Богоро́дичен:

Боже́ственнаго Рождества́ Твоего́ Чи́стая, вся́кий естества́ чи́н превосхо́дит чу́до: Бо́га бо преесте́ственно зачала́ еси́ во чре́ве, и ро́ждши пребыва́еши при́сно Де́ва.

И́н. Ирмо́с: Си́лою Креста́ Твоего́ Христе́:

Возше́л еси́ Жизнода́вче Христе́ ко Отцу́, и Возне́сл еси́ ро́д на́ш Человеколю́бче, неизрече́нным благоутро́бием Твои́м.

Чи́ни а́нгельстии Спа́се, челове́ческое естество́ ви́девше совосходя́щее Тебе́, непреста́нно удивля́еми воспева́ху Тя́.

Ужаса́хуся а́нгельстии ли́цы Христе́, зря́ще Тя́ с телесе́м Возне́сшася, и воспева́ху свято́е Твое́ Вознесе́ние.

Богоро́дичен:

Моли́ непреста́нно чи́стая, произше́дшаго от боку́ твое́ю, изба́витися пре́лести диа́воли, пою́щым тя́ ма́терь бо́жию.

И́н. Ирмо́с: Не́сть свя́т, я́коже Ты́ Го́споди:

То́к и стра́сть и сече́ние, А́рий безу́мный рождеству́ Боже́ственному злоче́стно нечести́вый прилага́я, сечи́тельным оте́ческим мече́м отсека́ется. [Два́жды.]

Я́коже дре́вле боже́ственный Авраа́м, вво́инившеся вси́ всечестни́и богоглаго́ливии, враги́ Твоя́ Бла́же неи́стовныя Твое́ю си́лою кре́пко погуби́ша. [Два́жды.]

Сла́ва:

Пе́рвое собра́ние собра́вшееся Твои́х свяще́нных, Единосу́щна Тя́ Спа́се Безнача́льному Отцу́, и Творца́ все́х Ро́ждшагося благоче́стно пропове́даша.

И ны́не: Богоро́дичен:

Не мо́жет сло́во земны́х, ниже́ язы́к Де́во восхвали́ти Тя́ досто́йно: из Тебе́ бо без се́мене Жизнода́вец Христо́с воплоти́тися Пречи́стая благоволи́.

Катава́сиа: Разве́рзе утро́бы:

Конда́к Вознесе́нию, гла́с 6: Е́же о на́с испо́лнив: И и́кос.

Та́же, седа́лен отце́м. Гла́с 4. Подо́бен: Ско́ро предвари́:

Свети́льницы пресве́тлии и́стины Христо́вы ми́ру яви́стеся на земли́ вои́стинну блаже́ннейшии отцы́ боговеща́ннии, изсуши́вше е́реси ху́льных языковре́дий, и угаси́вше пламенови́дная злосла́вных смуще́ния: те́мже я́ко святи́телие Христо́вы, моли́теся спасти́ся на́м.

Сла́ва: други́й, гла́с то́йже. Подо́бен: Вознесы́йся:

Нике́йский све́тлый гра́д дне́сь, от всея́ земли́ к себе́ призва́ три́ста и осмьна́десять священнонача́льников, на глаго́лавшаго хулу́ А́риа, и умаля́ющаго Еди́наго от Тро́ицы, Сы́на и Сло́ва су́щаго Бо́жия, его́же А́риа низло́жше, ве́ру утверди́ша.

И ны́не: Вознесе́ния. Подо́бен:

Возше́д на небеса́ со сла́вою, и соседы́й Отцу́ одесну́ю, ника́коже разлучи́лся еси́ Человеколю́бче Христе́: Ду́ха же Свята́го прему́дрым ученико́м Твои́м посла́ти обеща́вый, и на́шя озари́вый мы́сли, да́ждь просвеще́ние, я́ко да непреста́нно пое́м Тя́, Влады́ко.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т взыва́ющи, от смы́сла чи́ста о Го́споде пра́зднующи.

Дре́во процвете́ Христе́ и́стинныя жи́зни: Кре́ст бо водрузи́ся, и напои́вся кро́вию и водо́ю от нетле́нных Твои́х ре́бр, живо́т на́м прозябе́.

Не ктому́ мне́ зми́й ло́жно обоже́ние подлага́ет: Христо́с бо Богоде́тель челове́ча естества́, ны́не невозбра́нно стезю́ мне́ жи́зни устро́и.

Богоро́дичен:

Я́ко вои́стинну неизглаго́ланна и непости́жна су́ть, Твоего́ Богоро́дице боголе́пнаго Рождества́, су́щым на земли́ и на небеси́, Присноде́во та́инства.

И́н. Ирмо́с: Услы́шах слу́х си́лы Креста́:

Возне́слся еси́ во сла́ве, а́нгелов Царю́, Уте́шителя на́м от Отца́ посла́в. Те́мже вопие́м: сла́ва Христе́, Вознесе́нию Твоему́.

Я́ко взы́де Спа́с ко Отцу́ с пло́тию, удиви́шася а́нгельская во́инства, и возопи́ша: сла́ва Христе́ Вознесе́нию Твоему́.

Го́рния си́лы го́рнейшым вопия́ху: врата́ возми́те Христу́ на́шему Царю́, Его́же воспева́ем вку́пе со Отце́м и Ду́хом.

Богоро́дичен:

Де́ва роди́, и ма́терних не позна́, но Ма́ти у́бо е́сть, Де́вою же пребы́сть: Ю́же воспева́юще, ра́дуйся Богоро́дице, взыва́ем.

И́н. Ирмо́с: Христо́с моя́ си́ла:

Прелюбоде́йствовавый А́рий умо́м неразу́мным правосла́вную ве́ру, оте́ческими суды́ изгна́н бы́сть от це́ркве, я́коже у́д гнилы́й, злоимени́тый. [Два́жды.]

О Тебе́ Влады́ко, подвиза́вся ли́к оте́ц, Твоя́ враги́ зело́ победи́ и Соесте́ственна Тя́ Отцу́ и Ду́ху просла́ви.

Сла́ва:

Хода́тай бы́л еси́ Бо́же и Челове́че, Бо́гу и челове́ком Христе́: те́мже во двою́ Тя́ естеству́ Еди́наго зна́юще Сы́на, богому́дрии пропове́даша.

И ны́не: Богоро́дичен:

Ме́ртва мя́ показа́ сада́ вкуше́ние, Жи́знь же Дре́во из Тебе́ я́вльшееся Всечи́стая воскреси́, и ра́йския сла́дости насле́дника мя́ показа́.

Катава́сиа: Царю́ царе́й:

Пе́снь 5.

Ирмо́с: Бо́жиим све́том Твои́м Бла́же, у́тренюющих Ти́ ду́шы любо́вию озари́, молю́ся, Тя́ ве́дети Сло́ве Бо́жий, и́стиннаго Бо́га от мра́ка грехо́внаго взыва́юща.

Уступа́ют ми́ херуви́ми ны́не, и пла́менное ору́жие Влады́ко плещи́ мне́ дае́т, Тя́ ви́девше Сло́ве Бо́жий, и́стиннаго Бо́га, разбо́йнику пу́ть сотво́ршаго в ра́й.

Не ктому́ бою́ся е́же в зе́млю Влады́ко Христе́ возвраще́ния: Ты́ бо от земли́ возве́л мя́ еси́ забве́на, благоутро́бия ра́ди мно́гаго, к высоте́ нетле́ния Воскресе́нием Твои́м.

Богоро́дичен:

Богоро́дицу Тя́ от души́, Влады́чице ми́ру Блага́я, испове́дающих спаса́й: Тя́ бо Предста́тельницу непобеди́мую и́мамы, и́стинную Богороди́тельницу.

И́н. Ирмо́с: У́тренююще вопие́м ти́, го́споди:

Испо́лнив весе́лия вся́ческая Ми́лостиве, к го́рним си́лам с пло́тию прише́л еси́.

А́нгельския си́лы взе́млема Тбе́ ви́девше, врата́, взыва́ху, Царю́ на́шему возми́те.

Апо́столи ви́девше возвыша́ема Спа́са, с тре́петом взыва́ху Царю́ на́шему: сла́ва Тебе́.

Богоро́дичен:

Де́ву по рождестве́ пое́м Тя́ Богоро́дице, Ты́ бо Бо́га Сло́ва пло́тию ми́рови родила́ еси́.

И́н. Ирмо́с: Бо́жиим све́том:

Кра́сны но́ги я́ко вои́стинну, ны́не пропове́дающих Тя́ Ми́р вся́к у́м преиму́щий, все́х а́нгелов и челове́ков Христе́, и мно́жеством ми́ра ми́р совокупля́ющий. [Два́жды.]

Прему́дрость, си́лу, о́тчее сло́во ипоста́сное христе́, тебе́ соше́дшеся пропове́даша, всесвята́го свяще́нства че́стно зако́ном печа́тавше, боже́ственнии учи́телие. [Два́жды.]

Сла́ва:

Во́д струя́ми чи́стыми уче́ния, Правосла́вную Це́рковь напои́вшии, на вода́х поко́я ны́не наслажда́етеся ве́чно ра́дующеся.

Богоро́дичен:

Све́щник Пречи́стая све́тлый, все́м озаря́ющий Христа́ Пра́вды Со́лнце, Тебе́ ве́дуще еди́на Богороди́тельнице Чи́стая, Твое́ ны́не заступле́ние призыва́ем.

Катава́сиа: Реши́тельное очище́ние:

Пе́снь 6.

Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ Ти: возведи́ от тли́ живо́т мо́й, Многоми́лостиве.

Распина́емь Влады́ко, гвоздьми́ у́бо кля́тву ю́же на на́с очи́стил еси́, копие́м же пробода́емь в ре́бра, Ада́мово рукописа́ние раздра́в, ми́р свободи́л еси́.

Ада́м низведе́н бы́сть, ле́стию запе́нся, ко а́дове про́пасти: но естество́м Бо́г же и Ми́лостив, соше́л еси́ ко иска́нию, и на ра́му поне́с, совоскреси́л еси́.

Богоро́дичен:

Пречи́стая Влады́чице, ро́ждшая челове́ком Ко́рмчию Го́спода, страсте́й мои́х непостоя́нное и лю́тое разжени́ смуще́ние, и тишину́ пода́ждь се́рдцу моему́.

И́н. Ирмо́с: Обы́де мя́ бе́здна:

Взыгра́шася апо́столи, зря́ще на высоту́ дне́сь Зижди́теля взе́млема упова́нием Ду́ха, и стра́хом зовя́ху: сла́ва восхо́ду Твоему́.

Предста́ша а́нгели, вопию́ще Христе́ ученико́м Твои́м: и́мже о́бразом ви́десте Христа́ восходя́ща с пло́тию, па́ки прии́дет Пра́ведный все́х Судия́.

Я́ко ви́деша Тя́ Спа́се на́ш небе́сныя си́лы, на высоту́ взе́млема с те́лом, взыва́ху, глаго́люще: вели́кое, Влады́ко, человеколю́бие Твое́.

Богоро́дичен:

Купину́ Тя неопали́мую, и го́ру, и ле́ствицу одушевле́нную, и две́рь небе́сную досто́йно сла́вим Мари́е сла́вная, правосла́вных Похвало́.

И́н. Ирмо́с: Жите́йское мо́ре:

Утаи́тися не возмо́же пле́велов се́ятель, про́мысла неизрече́ннаго, неи́стовству тезоимени́т нарече́нный: Иу́де бо поревнова́в, я́коже о́н разсе́деся вселука́вый. [Два́жды.]

Боже́ственное собра́ние оте́ц честно́е, Единоро́дное Озаре́ние, от существа́ возсия́вшее О́тча, пропове́дует Тя́ Влады́ко, и пре́жде все́х ве́к рожде́нна Сы́на.

Сла́ва:

Чре́во растерза́ется по словеси́, исто́чник му́тный и непи́тный ересе́й, источи́вший злочести́вых, ра́лом моли́твы свяще́нник боже́ственных промы́сленнее.

И ны́не: Богоро́дичен:

Вели́кий преднаписа́ во проро́цех Моисе́й, Тебе́ Ковче́г, и Трапе́зу, и Све́щник, и Ру́чку, обра́зно зна́менуя воплоще́ние Вы́шняго из Тебе́ Ма́ти Де́во.

Катава́сиа: Очище́ние на́м:

Конда́к отце́м, гла́с 8. Подо́бен: Я́ко нача́тки:

Апо́стол пропове́дание, и оте́ц догма́ты, Це́ркви еди́ну ве́ру запечатле́ша, я́же и ри́зу нося́щи и́стины, истка́ну от е́же свы́ше богосло́вия, исправля́ет и сла́вит благоче́стия вели́кое та́инство.

И́кос:

Высо́ким пропове́данием, Бо́жию Це́рковь услы́шим вопию́щу: жа́ждай да гряде́т ко мне́ и пие́т ча́шу, ю́же держу́, ча́ша е́сть прему́дрости, сие́ питие́ и́стины сло́вом почерпо́х, во́ду пролива́ющую не прекосло́вия, но испове́дания, ю́же пия́ ны́нешний Изра́иль, Бо́га зри́т веща́юща: ви́дите, ви́дите, я́ко са́м а́з е́смь, и не пременя́юся: Аз Бо́г пе́рвый, Аз же и по си́х, и ра́зве Мене́ не́сть ино́го отню́д. Отсю́ду причаща́ющиися насы́тятся, и восхва́лят благоче́стия вели́кое та́инство.

Синакса́рий в неде́лю святы́х 318 богоно́сных оте́ц, и́же в Нике́и.

Сти́х: Свети́л собра́ние избра́нное:

Лучеви́дны просвети́те мне́ мы́сли.

Сти́х: Стра́нна Сы́на О́тча Существа́, глаго́ля:

А́рий си́це, Бо́жия сла́вы стра́нен.

В то́йже де́нь, в неде́лю седму́ю по Па́сце, и́же в Нике́и Пе́рвый Собо́р пра́зднуем три́ста и осмина́десяти богоно́сных оте́ц, вины́ ра́ди сицевы́я:

Поне́же бо Госпо́дь на́ш Иису́с Христо́с, в пло́ть оболки́йся, е́юже по на́м смотре́ние все́ неизрече́нно де́йствова, и ко Оте́ческому па́ки взы́де престо́лу, хотя́ще показа́ти святи́и, я́ко вои́стинну Сы́н Бо́жий бы́сть Челове́к, и соверше́нный Челове́к Вознесе́ся Бо́г, и се́де одесну́ю вели́чествия на высо́ких, Собо́р се́й святы́х оте́ц та́ко Его́ пропове́да, и испове́да Единосу́щна, и Единоче́стна Отцу́. Си́м сло́вом по сла́вном Вознесе́нии, настоя́щий уста́виша пра́здник, а́ки собра́ние толи́ких оте́ц предызводя́ще, Сего́ во пло́ти Возне́сшася Бо́га и́стинна, и во пло́ти Челове́ка соверше́нна пропове́дающе.

Собо́р же се́й бы́сть при Константи́не Вели́цем царе́, в двадеся́том ле́те ца́рства его́, гоне́нию преста́вшу. Се́й в Ри́ме пре́жде облада́ше, пото́м же и всесла́вный Константи́нь гра́д себе́ тезоимени́т созда́в.

В ле́то от созда́ния ми́ра пя́ть ты́сящ осмьсо́т три́десять осмо́е, я́же на а́риа нача́ша глаго́лати. И́же А́рий бя́ше у́бо от Ливи́и, во Александри́ю же прише́д, и диа́кон от священному́ченика Петра́ Александри́йскаго поста́влен бы́в поне́же ху́лити нача́т на Сы́на Бо́жия, тва́рь Сего́ пропове́дая, от не су́щих же бы́ти, и дале́че су́ща от Боже́ственнаго достоя́ния злоупотреби́тельно же Прему́дрости и Сло́ву Бо́жию глаго́латися: я́ко уподо́бльшася Саве́ллию злочести́вому, единоли́чно, и единоипоста́сно глаго́лющу Божество́. И овогда́ у́бо Отцу́ быва́ти, овогда́ же Сы́ну, овогда́ же Ду́ху Свято́му.

Сия́ у́бо А́риа ху́ляща, вели́кий Пе́тр от свяще́нства его́ отлуча́ет, Христа́ я́ко Младе́нца на святе́м же́ртвеннице ви́дев, в раздра́нну облече́на ри́зу и глаго́люща, я́ко А́рий раздра́ ю́.

Ахи́лла же, по Петре́ патриа́рхию прии́мый Александри́йскаго гра́да, на обеща́ниих па́ки разреша́ет А́риа: к си́м же поставля́ет его́ и пресви́тера, и во Александри́и учи́теля предпоставля́ет. Ахи́лле же сконча́вшуся, Алекса́ндр быва́ет патриа́рх, и́же А́риа та́яжде и го́ршая ху́ляща обре́т, от Це́ркве изри́нув, Собо́ром того́ низложи́в, я́коже глаго́лет Феодори́т: я́ко и прело́жна естества́ Христа́ глаго́лаше, и безу́мную и безду́шную восприя́ти пло́ть Го́споду, пе́рвый се́й отры́гну. А́рий у́бо мно́гих своему́ злоче́стию подве́д, пи́шет и усвоя́ет Никомиди́йскаго Евсе́виа, Ти́рскаго Павли́на, Евсе́виа же Кесари́йскаго, и ины́х, и на алекса́ндра вмеща́ется. Алекса́ндр же везде́ по вселе́нней хулы́ о́наго и низложе́ние посла́в, мно́гих на ме́сть воздви́же.

Це́ркви у́бо смуща́емей, и мно́гим хотя́щым христиа́нская приима́ти, возбраня́емым же любопре́нием уче́ния, вели́кий Константи́н везде́ по вселе́нней, людски́ми колесни́цами и носи́лы, су́щыя отцы́ в Нике́ю собра́в, та́мо и са́м прихо́дит. И отце́м у́бо все́м се́дшым, повеле́н и са́м се́де не на ца́рстем престо́ле, но на ума́леннем достоя́ния седа́лищи. И я́же на А́риа глаго́ланным бы́вшым, ана́феме у́бо о́н, и о́ному сму́дрствующии вси́ подлага́ются. Сло́во же Бо́жие от святы́х оте́ц, Единосу́щное, и Единоче́стное, и Собезнача́льное пропове́дается Отцу́. Излага́ют же си́и ве́ры святы́й Симво́л, приве́дше то́й да́же и до е́же, И в Ду́ха Свята́го Го́спода: е́же посе́м, Вторы́й испо́лни Собо́р. Затверди́ же к си́м Пе́рвый Собо́р и Па́схи пра́здник, когда́, и ка́ко подоба́ет на́м то́й соверша́ти, и не со иуде́и, я́коже бя́ше пе́рвее обы́чно. Излага́ет же и пра́вил о церко́вном исправле́нии два́десять. Святы́й же ве́ры Симво́л, вели́кий, и равноапо́стольный константи́н по́слежде все́х, червле́ными затверди́ пи́смены.

Бя́ху же архиере́й у́бо святы́х си́х оте́ц двесте́ три́десять и два́. Свяще́нников же и диа́конов, к си́м же и мона́хов о́смьдесять и ше́сть: все́х же три́ста и осмьна́десять. Знамени́тии же си́и: Силве́стр Ри́мский архиере́й. Митрофа́н Константи́ня гра́да, бо́лен сы́й: си́и у́бо бы́ша ту́ чрез своя́ местоблюсти́тели. Алекса́ндр Александри́йский, со Афана́сием Вели́ким, архидиа́коном тогда́ су́щим, и Евста́фий Антиохи́йский, и Мака́рий Иерусали́мский. Осси́й Кудру́вский епи́скоп. Пафну́тий испове́дник. Мироточи́вый Никола́й, и Спиридо́н Тримифу́нтский, и́же та́мо филосо́фа низложи́в крести́, трисо́лнечное ему́ показа́в. Посреде́ же Собо́ра двема́ к Бо́гу преста́вльшемася отце́ма архиере́ома, вели́кий константи́н в ковче́ги и́х преде́л свята́го собо́ра вложи́в, и тве́рдо заключи́в, обре́те и от о́нех запеча́тан же и подпи́сан неизрече́нными словесы́ Бо́жиими.

Соверши́вшуся же Собо́ру, поне́же и Царьгра́д уже́ созида́емый соверши́ся. Призыва́ет Константи́н Вели́кий святы́я о́ныя вся́ му́жы, и́же и обше́дше ве́сь гра́д, и моли́твовавше и дово́льно, ца́рствующий бы́ти градово́м уставля́ют, и Ма́тери Сло́ва того́ возложи́ша царю́ повеле́вшу. И та́ко святи́и ки́йждо отидо́ша в до́мы.

Но еще́ к Бо́гу не отше́дшу вели́кому Константи́ну, с сы́ном свои́м Конста́нтием ски́птры соблюда́ющу, А́рий к царю́ прихо́дит, глаго́ля: оставля́ю вся́, и Це́ркви Бо́жией соедини́тися хощу́. Написа́в у́бо своя́ хулы́ обе́си на вы́и, и а́ки бы Собо́ру повину́яся, во о́но руко́ю ударя́я, си́м глаго́лаше повинова́тися: и у́бо ца́рь во обще́ние прия́ти А́риа патриа́рху константи́ня гра́да повелева́ет. Бя́ше же тогда́ по Митрофа́не Алекса́ндр, и́же злонра́вие ве́дый му́жа, не ве́руяй бя́ше, и моля́шеся Бо́гу яви́ти ему́, а́ще по во́ли Его́ А́рий приобщи́тся. Егда́ же вре́мя прии́де, в не́же подоба́ше сослужи́ти ему́ тепле́йший быва́ет в моли́тве. А́рий же к це́ркви гряды́й, и не́где бли́з столпа́ торго́внаго, расто́ргшуся его́ чре́ву, в наро́дное подтро́ние вхо́дит, и та́мо разсе́деся, все́ вну́треннее зда́ние изрыга́ет до́лу, Иу́дино разседа́ние подъе́м, о ра́внем преда́тельстве Сло́ва, и Бо́жияго Сы́на О́тча Существа́ оттерза́я, растерза́ется са́м, и ме́ртв обре́тен бы́в: и та́ко Бо́жия Це́рковь от о́наго па́губы измени́ся.

Святы́х тре́х со́т и осмина́десяти богоно́сных оте́ц моли́твами, Христе́ Бо́же на́ш, поми́луй на́с. Ами́нь.

Пе́снь 7.

Ирмо́с: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́ Бо́же оте́ц на́ших.

Рыда́ющее во Стра́сти Твое́й со́лнце, во мра́к облече́ся, и во дни́ по все́й Влады́ко земли́ све́т поме́рче, вопия́: благослове́н еси́ Бо́же оте́ц на́ших.

Облеко́шася Христе́, схожде́нием Твои́м во све́т преиспо́дняя, пра́отц же весе́лия испо́лнен яви́вся, ликовству́я взыгра́ше, вопия́: благослове́н еси́ Бо́же оте́ц на́ших.

Тро́ичен:

Ца́рствующее и все́ми владя́щее Естество́ Триипоста́сное, бла́гости и безме́рныя пучи́ны Све́т пою́ще, возопии́м ве́рнии: благослове́н еси́ Бо́же оте́ц на́ших.

И́ный. Ирмо́с: В пещи́ о́гненней:

На о́блацех све́та Вознесы́йся, и Спасы́й ми́р, благослове́н Бо́г оте́ц на́ших.

На ра́му Христе́, заблу́ждшее взе́м естество́, Возне́сся Бо́гу и Отцу́ приве́л еси́.

Возше́дый в пло́ти к Безпло́тному Отцу́, благослове́н Бо́г оте́ц на́ших.

Умерщвле́нное на́ше грехо́м естество́ взе́м, Твоему́ Сво́йственному Отцу́ Спа́се, приве́л еси́.

И́ный. Ирмо́с: Росода́тельну:

Победи́сте неи́стовству тезоимени́таго А́риа, неи́стовствовавшаго лю́те, и глаго́лавшаго на высоту́ непра́ведная. Бо́жию бо Сы́ну отрече́ся вопи́ти: благослове́н еси́ Бо́же оте́ц на́ших. [Два́жды.]

Сы́на гро́мова подража́юще чу́днии, Сло́ва Отцу́ Собезнача́льна и Единопресто́льна, огнезра́чными усты́ ва́шими все́х научи́сте вопи́ти: благослове́н еси́ Бо́же оте́ц на́ших. [Два́жды.]

Сла́ва:

Я́ко крила́тии, Сло́ву помо́гшии, приидо́сте богоблаже́ннии, от коне́ц бо вселе́нныя собра́ ва́с Ду́х Святы́й вопи́ти: благослове́н еси́ Бо́же оте́ц на́ших.

И ны́не: Богоро́дичен:

Ю́ношы три́ пе́щь не опали́, Рождество́ прообразу́ющыя Твое́: Боже́ственный бо О́гнь Тебе́ не опали́в, всели́ся в Тя́, и все́х просвети́ вопи́ти: благослове́нна еси́ Бо́га пло́тию Поро́ждшая.

Катава́сиа: Согла́сная возшуме́ орга́нская:

Пе́снь 8.

Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ во твори́ши Христе́, то́кмо е́же хоте́ти, Тя́ превозно́сим во вся́ ве́ки.

Иуде́йския дре́вле пророкоуби́йцы лю́ди, богоуби́йцы за́висть ны́не соде́ла, Тебе́ на Кре́ст Возне́сшыя, Сло́ве Бо́жий: его́же превозно́сим во вся́ ве́ки.

Небе́сных кре́ст не оста́вил еси́, и во а́д соше́д, всего́ совоздви́гл еси́ Христе́, лежа́щаго во гно́и челове́ка. Те́мже Тя́ пое́м во вся́ ве́ки.

Богоро́дичен:

От Све́та Светода́вца Сло́ва зачала́ еси́, и ро́ждши несказа́нно Пресу́щественнаго: Ду́х бо в Тя́ Де́во Боже́ственный всели́ся. Те́мже Тя́ пое́м во вся́ ве́ки.

И́н. Ирмо́с: Из Отца́ пре́жде ве́к:

Во двою́ существу́ возлете́вшаго Жизнода́вца Христа́ на небеса́ со сла́вою, и Отцу́ соседя́ща, свяще́нницы по́йте, лю́дие превозноси́те во вся́ ве́ки.

От рабо́ты и́дольския тва́рь Изба́вившаго, и Предста́вившаго ту́ свобо́дну Своему́ Отцу́, Тебе́ Спа́се пое́м, и Тебе́ превозно́сим во вся́ ве́ки.

Свои́м схожде́нием Низложи́вшаго супоста́та, и Свои́м возше́ствием Возне́сшаго челове́ки, свяще́нницы по́йте, лю́дие превозноси́те во вся́ ве́ки.

Богоро́дичен:

Херуви́мов превы́шшая яви́лася еси́ Богоро́дице Чи́стая, во чре́ве Твое́м си́ми Носи́маго носи́вшая: его́же с безпло́тными челове́цы славосло́вим во вся́ ве́ки.

И́н. Ирмо́с: Из пла́мене преподо́бным:

Просвети́вшеся луча́ми Твоего́ Божества́ блази́и Твои́ па́стырие, Тебе́ испове́даша бытию́ Соде́теля все́х и Го́спода: его́же превозно́сим во вся́ ве́ки. [Два́жды.]

Ли́к па́стырей приснопа́мятный собра́вся, богому́дренно Тро́ицу Несозда́нную ны́не богосло́вя, все́х учи́т вопи́ти: Тя́ превозно́сим во вся́ ве́ки. [Два́жды.]

Благослови́м Отца́, и Сы́на, и Свята́го Ду́ха, Го́спода.

Священнонача́льницы, па́стырие достосла́внии, Христо́ву Це́рковь просвеща́ют, ины́й и́нуду сию́ освеща́юще, и превознося́ще во вся́ ве́ки.

Богоро́дичен:

Та́йно во о́бразех предви́деша Тебе́ проро́цы вси́, Сло́во ро́ждшую, пло́ть бо из Тебе́ Взе́мый Се́й про́йде сугу́б: Его́же превозно́сим во вся́ ве́ки.

Та́же, Хва́лим, благослови́м, покланя́емся Го́сподеви, пою́ще, и превознося́ще во вся́ ве́ки.

Катава́сиа: Разреша́ет у́зы:

Пое́м, Честне́йшую:

Пе́снь 9.

Ирмо́с: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти: Тобо́ю бо Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Страсте́м неприча́стен Ты́ пребы́л еси́ Сло́ве Бо́жий, пло́тию приобщи́вся Страсте́м: но реши́ши от страсте́й челове́ка, страсте́м бы́в Стра́сть Спа́се на́ш, еди́н бо еси́ Безстра́стен и Всеси́лен.

Тлю́ сме́ртную прие́м, и тле́ния соблю́л еси́ те́ло Твое́ невку́сно: твоя́ же животворя́щая и Боже́ственная Влады́ко душа́, во а́де не оста́влена бы́сть, но я́коже от сна́ воскре́с, на́с совоздви́гл еси́.

Тро́ичен:

Бо́га Отца́, Сы́на Собезнача́льна, вси́ челове́цы устна́ми у́бо чи́стыми сла́вим: неизрече́нную же и пресла́вную Ду́ха Всесвята́го си́лу почита́ем: Еди́на бо е́сть Всеси́льная Тро́ица Неразлу́чная.

И́н. Ирмо́с: Тя́ па́че ума́ и словесе́, Ма́терь Бо́жию:

Тебе́ Изба́вителя ми́ра Христа́ Бо́га, апо́столи ви́дяще Боже́ственно возвыша́ема, со стра́хом игра́юще велича́ху.

Твою́ обожи́вшуюся пло́ть зря́ще Христе́, на высоте́ а́нгели, дру́г ко дру́гу глаго́лаху: вои́стинну Се́й е́сть Бо́г на́ш.

Тебе́ безпло́тных чи́нове Христе́ Бо́же, на о́блацех взе́млема ви́дяще взыва́ху: сла́вы Царю́ врата́ возми́те.

Богоро́дичен:

Ра́дуйся Богоро́дице, Ма́ти Христа́ Бо́га, Его́же родила́ еси́, дне́сь от земли́ возноси́ма, со апо́столы зря́щи возвелича́ла еси́.

И́н. Ирмо́с: Бо́га челове́ком:

Обре́т вы́ спобо́рники собра́, держа́вною си́лою вооружи́в Ду́ха, Отцу́ Собезнача́льное, и Сопресто́льное Сло́во, пре́жде ве́к Су́щее: Его́же ны́не всесвяще́ннии, с небе́сными во́инствы при́сно сла́вите. [Два́жды.]

Па́жить А́риеву лю́тыя е́реси, я́ко вра́чеве душа́м же и телесе́м уста́висте, свяще́нный ве́ры Симво́л все́м изложи́вше, и́же ны́не держа́ще, па́мять ва́шу священноде́телие при́сно сла́вим. [Два́жды.]

Сла́ва:

Я́ко Све́т сы́й Христе́ Пречи́стый, от страсте́й мглы́ ду́шу мою́ очи́сти, моли́твами Влады́ко Твои́х служи́телей, ны́не Тебе́ пропове́давших Безнача́льна, Несозда́нна, Зижди́теля же все́х и Бо́га, и Отцу́ Собезнача́льна.

И ны́не: Богоро́дичен:

Ме́ртвым воскресе́ние ны́не дарова́ся Твои́м неизрече́нным и неизглаго́ланным Рождество́м, Богоро́дице Влады́чице: Жи́знь бо из Тебе́ пло́тию обложе́на все́м возсия́, и сме́рти неускла́бное я́ве разруши́.

Катава́сиа: Ра́дуйся Цари́це:

Свя́т Госпо́дь Бо́г на́ш. [Три́жды.]

Ексапостила́рий воскре́сен:

Тивериа́дское мо́ре с детьми́ Зеведе́овыми, Нафана́ила с Петро́м же, и с други́ма двема́ дре́вле, и Фому́ имя́ше на ло́ве, и́же Христо́вым повеле́нием одесну́ю вве́ргше, мно́жество извлеко́ша ры́б: его́же Пе́тр позна́в, к Нему́ бродя́ше, и́мже тре́тие явле́йся, и хле́б показа́, и ры́бу на у́глех.

Сла́ва: отце́в. Подо́бен: Жены́ услы́шите:

Оте́ц боже́ственных дне́сь па́мять пра́зднующе, моле́ньми те́х мо́лим Всеще́дре: вся́каго вреда́ ересе́й изба́ви лю́ди Твоя́ Го́споди, и вся́ сподо́би, Отца́ Сло́ва сла́вити, и Всесвята́го Ду́ха.

И ны́не: Вознесе́ния:

Ученико́м зря́щым Тя́, Возне́слся еси́ Христе́ ко Отцу́ соседя́, а́нгели предтеку́ще зовя́ху: возми́те врата́, возми́те, Ца́рь бо взы́де к нача́льному Све́ту сла́вы.

На хвали́тех, Вся́кое дыха́ние: поста́вим стихо́в 8. И пое́м стихи́ры воскре́сны, 4: И святы́м отце́м, 4.

Стихи́ры воскре́сны, гла́с 6:

Кре́ст Тво́й Го́споди, жи́знь и воскресе́ние лю́дем Твои́м е́сть, и на́нь наде́ющеся, Тебе́ воскре́сшаго Бо́га на́шего пое́м: поми́луй на́с.

Погребе́ние Твое́ Влады́ко, ра́й отве́рзе челове́ческому ро́ду, и от тли́ изба́вльшеся, Тебе́ воскре́сшаго Бо́га на́шего пое́м: поми́луй на́с.

Со Отце́м и Ду́хом Христа́ воспои́м воскре́сшаго из ме́ртвых, и к Нему́ возопии́м: Ты́ еси́ Жи́знь на́ша и Воскресе́ние, поми́луй на́с.

Тридне́вен воскре́сл еси́ Христе́ из гро́ба, я́коже е́сть пи́сано, совоздви́гнувый пра́отца на́шего: те́мже Тя́ и сла́вит ро́д челове́ческий, и пое́т Твое́ воскре́сние.

И́ны стихи́ры святы́х оте́ц, гла́с 6.

Подо́бен: Всю́ отложи́вше:

Все́ собра́вше душе́вное худо́жество, и Боже́ственным Ду́хом сразсмотри́вше, небе́сный и честны́й Симво́л ве́ры, честни́и отцы́ богопи́санне начерта́ша: в не́мже я́вственнейше Ро́ждшему Собезнача́льнаго Сло́ва науча́ют, и всеи́стинно Единосу́щнаго, апо́стольским после́дующе проявле́нно уче́нием, благосла́внии и пребога́тии и́стинно, и богому́дрии.

Все́ прие́мше у́мное сия́ние Свята́го Ду́ха, преесте́ственнейшее благосло́вие, кра́ткими глаго́лы, и мно́гим ра́зумом богодухнове́нно провеща́ша: я́ко Христо́вы пропове́дницы, ева́нгльских предста́телие уче́ний блаже́ннии, и благочести́вых преда́ний, свы́ше прие́мше си́х открове́ние я́ве, и просве́щшеся, изложи́ша ве́ру Богонауче́нную.

Сти́х: Благослове́н еси́ Го́споди Бо́же оте́ц на́ших:

Все́ собра́вше па́стырское иску́сство, и я́рость подви́гше ны́не пра́веднейшую, отмсти́тельне тя́жкия отгна́ша и па́губныя во́лки, пра́щею Ду́ха изве́ргше от церко́внаго исполне́ния, па́дшыя я́ко к сме́рти, и я́ко неисце́льно неду́говавшыя боже́ственнии па́стырие, и я́ко раби́ и́стиннейшии Христо́вы, и Боже́ственнаго пропове́дания таи́нницы свяще́ннейшии.

Сти́х: Собери́те ему́ преподо́бныя его́:

И па́ки 1-ю стихи́ру: Все́ собра́вше душе́вное:

Сла́ва: гла́с 8:

Святы́х отце́в ли́к, от коне́ц вселе́нныя сте́кшийся, Отца́ и Сы́на и Ду́ха Свята́го, Еди́но Существо́ научи́ша и Естество́, и та́йну богосло́вия я́сно преда́ша Це́ркви: и́хже похваля́юще ве́рою ублажи́м, глаго́люще: О боже́ственный по́лче, богоглаго́ливии ору́жницы ополче́ния Госпо́дня, зве́зды многосве́тлыя мы́сленныя тве́рди, та́инственнаго Сио́на необори́мии столпи́, миродохнове́ннии цве́ти ра́йстии, всезлата́я уста́ Сло́ва, Нике́йская похвало́, вселе́нныя украше́ние, приле́жно моли́теся о душа́х на́ших.

И ны́не: Преблагослове́нна еси́ Богоро́дице Де́во:

Славосло́вие вели́кое. Тропа́рь воскре́сен то́чию. Ектении́ и отпу́ст. И исхожде́ние в притво́р.

Сла́ва, и ны́не:

Стихи́ра ева́нгльская, гла́с 6:

По е́же во а́д соше́ствии, и е́же из ме́ртвых воскресе́нии, скорбя́ще я́коже досто́яше, о разлуче́нии Твое́м Христе́, ученицы́ на де́лание обрати́шася, и па́ки корабля́ и мре́жи, и ло́ва нигде́же. Но Ты́ Cпа́се, яви́вся я́ко Влады́ка все́х, одесну́ю мре́жи повелева́еши воврещи́, и бы́сть сло́во де́ло вско́ре. И мно́жество ры́б мно́гое, и ве́черя стра́нная гото́ва на земли́: ея́же причасти́вшымся тогда́ Твои́м ученико́м, и на́с ны́не мы́сленно сподо́би наслади́тися, Человеколю́бче Го́споди.

И поуче́ние Студи́тово, и ча́с пе́рвый. На 1-м часе́ тропа́рь воскре́сен. Сла́ва: пра́здника: И ны́не: Богоро́дичен часо́в. По трисвято́м конда́к пра́здника. На 3-м часе́ тропа́рь воскре́сен. Сла́ва: отце́в. И ны́не: Богоро́дичен часо́в. По трисвято́м конда́к отце́в. Та́же и на про́чих часе́х, тропа́рь и конда́к пра́здника, и отце́в, глаго́лем пременя́юще.

На литурги́и блаже́нна гла́са. Гла́с 6:

Помяни́ мя Бо́же Спа́се мо́й, егда́ прии́деши во Ца́рствии Твое́м: и спаси́ мя, я́ко еди́н Человеколю́бец.

Дре́вом Ада́ма прельсти́вшагося, Дре́вом Кре́стным па́ки спа́сл еси́, и разбо́йника вопию́ща: помяни́ мя Го́споди во Ца́рствии Твое́м.

А́дова врата́ и вереи́ сокруши́вый Жизнода́вче, воскреси́л еси́ вся́ Спа́се, вопию́щыя: сла́ва Воста́нию Твоему́.

Помяни́ мя, И́же сме́рть Плени́вый погребе́нием Твои́м, и Воскресе́нием Твои́м ра́дости вся́ испо́лнивый, я́ко Благоутро́бен.

И пра́здника пе́снь 4-я, на 4: и отце́в пе́снь 6-я, на 4. По вхо́де глаго́лем тропа́рь воскре́сен: та́же Вознесе́ния, и отце́в. Сла́ва: конда́к отце́в. И ны́не: Вознесе́ния.

Вме́сто проки́мна пе́снь отце́в, гла́с 4:

Благослове́н еси́ Го́споди Бо́же оте́ц на́ших: и хва́льно и просла́влено и́мя Твое́ во ве́ки.

Сти́х: Я́ко пра́веден еси́ о все́х, я́же сотвори́л еси́ на́м:

Апо́стол в дея́ниих, зача́ло 44: Суди́ Па́вел ми́мо ити́ Ефе́с: Аллилу́иа, гла́с 1: Бо́г бого́в Госпо́дь глаго́ла, и призва́ зе́млю от восто́к со́лнца до за́пад. Сти́х: Собери́те Ему́ преподо́бныя Его́, завеща́ющыя заве́т Его́ о же́ртвах. Ева́нглие от Иоа́нна, зача́ло 56: Возве́д Иису́с о́чи Свои́ на не́бо: Прича́стный: Хвали́те Го́спода с небе́с: Други́й: Ра́дуйтеся: Аллилу́иа, три́жды.


 ОглавлениеВоскресенье (Неделя седьмая)Понедельник