Четверг
В сре́ду ве́чера
На Го́споди воззва́х: стихи́ры подо́бны пра́здника 3, и мине́и 3.
Пра́здника, гла́с 4. Подо́бен: Зва́нный свы́ше:
Е́же о все́х соверши́в спасе́ние, на го́ру прише́л еси́ Елео́нскую Христе́, отону́дуже и взя́лся еси́ пред ученики́ Твои́ми, на небеса́ со сла́вою носи́мь. Те́мже та́инству дивя́щеся, го́рним взыва́ху до́льнии чи́нове: возми́те врата́, и вни́дет, отону́дуже изы́де, все́ми ца́рствуяй Бо́г, я́коже благоволи́, пресла́вно ми́рови спасе́ние соде́лав.
Учени́ческий ли́к, Тебе́ я́коже зря́ше взима́ема, глаго́лаше: Влады́ко, ка́ко ны́не оставля́еши рабы́ Твоя́? и ка́мо и́деши И́же рука́ма Содержа́й концы́? Мы́ же оста́вивше вся́, Тебе́ Бо́гу после́довахом ра́дующеся, во ве́ки с Тобо́ю наде́жду иму́ще бы́ти: не оста́ви си́рых на́с, я́коже обеща́лся еси́ Спа́се на́ш Милосе́рде, Уте́шителя посли́ и Спа́са ду́ш на́ших.
Соверше́ннейшее подая́ благослове́ние друго́м Твои́м Влады́ко, та́йно научи́л еси́ и́х: зри́те дру́зи, иду́ ко Отцу́, ва́м же послю́ Ино́го Уте́шителя, вы́ же се́тование все́ отри́ните: не оста́влю бо ове́ц, я́же собра́х: не забу́ду, и́хже возлюби́х. Боже́ственною с высоты́ обо́лкшеся си́лою иди́те, глаго́люще во вся́ язы́ки спасе́ния благовеща́ние.
Сла́ва, и ны́не: гла́с 6:
Взы́де Бо́г в воскликнове́нии, Госпо́дь во гла́се тру́бне, е́же вознести́ па́дший о́браз Ада́мов, и посла́ти Ду́ха Уте́шителя, е́же освяти́ти ду́шы на́шя.
На стихо́вне стихи́ры, гла́с 2. Подо́бен: До́ме Евфра́фов:
Не оста́влю си́рых, я́же А́з собра́х, Госпо́дь друго́м глаго́лаше: но послю́ ва́м Ду́ха Пресвята́го.
Сти́х: Вси́ язы́цы восплещи́те рука́ми:
А́нгели прему́дрым вопия́ху апо́столом: о му́жие галиле́йстии, и́мже о́бразом зрите́, То́й па́ки прии́дет.
Сти́х: Взы́де Бо́г в воскликнове́нии:
Снидо́ша с ра́достию от горы́ Елео́нския ученицы́ Твои́ Сло́ве, сла́вяще и пою́ще Боже́ственное Твое́ Вознесе́ние.
Сла́ва, и ны́не: гла́с 1:
Возше́д на небеса́, отону́дуже и соше́л еси́, не оста́ви на́с си́рых Го́споди: да прии́дет Тво́й Ду́х, нося́ ми́р ми́рови, покажи́ сыново́м челове́ческим дела́ си́лы Твоея́, Го́споди Человеколю́бче.
Та́же, Ны́не отпуща́еши: И отпу́ст.
В четверто́к на У́трени
По 1-м стихосло́вии седа́лен, гла́с 5.
Подо́бен: Собезнача́льное Сло́во:
Соше́дый с небесе́ на земна́я, и до́лу лежа́щий во а́дове стра́жи, совоскреси́вый я́ко Бо́г Ада́мов зра́к, и Вознесе́нием Твои́м Христе́ на небеса́ возве́д, и престо́лу Оте́ческому Твоему́ соседи́теля соде́лал еси́, я́ко Ми́лостив и Человеколю́бец. [Два́жды.]
По 2-м стихосло́вии седа́лен, гла́с 8.
Подо́бен: Повеле́нное та́йно:
На го́ру возше́д Елео́нскую Ми́лостиве Иису́се, отту́ду взя́лся еси́: све́тлый бо о́блак от земли́ Тя подъя́т, зря́щым ученико́м Твои́м чу́до стра́шное, вопию́щым безпло́тным на небесе́х вы́шшым во́инством: стра́хом врата́ возми́теся. С ни́миже Тя́ Царя́ пое́т вся́ тва́рь, все́х Бо́га.
Сла́ва, и ны́не, то́йже.
И псало́м 50. Кано́н пра́здника, со ирмосы́ на 8: и мине́и на 4. Конда́к и ексапостила́рий пра́здника.
На стихо́вне стихи́ры, гла́с 2. Подо́бен: До́ме Евфра́фов:
Испо́лнивый Бла́же Оте́ческое благоволе́ние, соедини́в же го́рняя с до́льними, возне́слся еси́ во сла́ве к пе́рвейшым.
Сти́х: Вси́ язы́цы восплещи́те рука́ми:
О́блак Тя́ све́та восприя́т на высоту́, и а́нгели со стра́хом и тре́петом служа́ху, Боже́ственному Твоему́ Вознесе́нию.
Сти́х: Взы́де Бо́г в воскликнове́нии:
Хвалу́ богокра́сную, со апо́столы Богоро́дица воспева́ет, Го́спода зря́щи на о́блацех носи́ма.
Сла́ва, и ны́не: гла́с 7:
На го́ру Елео́нскую прише́л еси́, Ми́луяй ро́д челове́ческий, и о́блак подъя́т Тя́ от о́чию учени́к Твои́х, трепе́щущым у́бо за виде́ние, ра́дующым же ся за ча́яние Свята́го Ду́ха, И́мже утверди́в Спа́се поми́луй на́с.
На литурги́и блаже́нна, от кано́на пе́снь 8-я, на 6.