Среда

В сре́ду на У́трени

На Бо́г Госпо́дь: тропа́рь пра́здника три́жды.

По 1-й кафи́сме седа́лен, гла́с 5.

Подо́бен: Собезнача́льное:

Духо́вная благода́ть, прише́дши от ни́щих лове́ц апо́стол Твои́х, просвети́ Христе́ прему́дрыя и кня́зи: и́хже уче́нием и мы́ пятдеся́тницы пра́здник све́тлый при́сно соверша́ем, со Отце́м Тебе́ пою́ще и боже́ственным ду́хом.

Сла́ва, и ны́не: то́йже.

По 2-й кафи́сме седа́лен, гла́с 8.

Подо́бен: Прему́дрости:

Всесвяты́й Ду́х ны́не соше́д на апо́столы ви́дом огня́, у́жасом испо́лни язы́к собра́ния: язы́ки бо о́гненными Человеколю́бче глаго́лющым, свою́ ки́йждо бесе́ду слы́шаше. Те́мже и чу́до неве́рным, я́ко пия́нство, ве́рным же спасе́ние вои́стинну познава́шеся: сего́ ра́ди сла́вим держа́ву Твою́ Христе́ Бо́же, прегреше́ний оставле́ния прося́ще, низпосла́ти бога́тно рабо́м Твои́м.

Сла́ва, и ны́не: то́йже:

Кано́н пра́здника, и мине́и. По 9-й пе́сни, ексапостила́рий пра́здника.

На стихо́вне стихи́ры, гла́с 2.

Подо́бен: До́ме Евфра́фов:

Свы́ше к на́м Уте́шителю прише́дый, я́коже пе́рвее ко апо́столом, освяти́ и спаси́ тебе́ бо́га пропове́дающих.

Сти́х: Се́рдце чи́сто сози́жди во мне́ Бо́же:

Внеза́пу с небесе́, Апо́столы вся́, Боже́ственнаго Уте́шителя си́ла, всему́дры и богосло́вцы показа́.

Сти́х: Не отве́ржи мене́ от лица́ Твоего́:

Заре́ю богонача́льною у́м просвети́вше, ученицы́ твои́ сло́ве, су́щественно Ду́х Святы́й прия́ша.

Сла́ва, и ны́не: гла́с 6:

Царю́ Небе́сный, Уте́шителю, Ду́ше и́стины, И́же везде́ сы́й, и вся́ исполня́яй, Cокро́вище благи́х, и жи́зни Пода́телю, прииди́ и всели́ся в ны́, и очи́сти ны́ от вся́кия скве́рны, и спаси́ Бла́же ду́шы на́шя.

Та́же ча́с 1-й. И отпу́ст.

На Литурги́и блаже́нна от кано́на пра́здника, обои́х творцо́в пе́снь 4-я, на 6.

В ту́ же сре́ду пятдеся́тную ве́чера

На Го́споди воззва́х: поста́вим стихо́в, 6: пра́здника 3, и Мине́и 3: Стихи́ры пра́здника, гла́с 4.

Подо́бен: Зва́нный свы́ше:

Се́ де́нь ра́дости и весе́лия, свы́ше яви́ся свяще́нным ученико́м Ду́х Святы́й дне́сь, о́гненным ви́дом от отца́, и все́х просвети́: сказа́тели яви́ ры́бари мудрецы́, я́коже Лука́ написа́ богогла́сный, ду́хом ну́жным исполня́яй вся́ческая. Те́мже ве́рою дивя́щеся, восхваля́ем Христа́ Бо́га на́шего мно́гую ми́лость, и кра́йнее снизше́ствие.

Пятдеся́тницу пра́зднуим святу́ю, и Ду́ха си́лу, и и́стинную ра́дость, боже́ственныя наде́жди соверше́ние, и та́инства е́же от ве́ка яви́вшагося на́м. Те́мже и вопие́м Ти́: Соде́телю все́х, не отими́ Ду́ха Твоего́ от на́с сло́ве, но с небесе́ спа́се посли́, моли́твами святы́х и всесла́вных честны́х Апо́стол Твои́х, ми́р пода́ждь душа́м на́шым, мо́лимся.

Небеса́ одушевле́нная пове́дают дне́сь Спа́сова вели́чия, и ве́сь ми́р проидо́ша, я́сно пропове́дати Уте́шителеву боже́ственную си́лу, и просвети́ша всю́ тва́рь уче́ньми, е́же воспева́ти нераздели́мую Тро́ицу еди́ну, в три́ ли́ца неслия́нну. Те́мже ве́рою пра́зднуем Свята́го Ду́ха прише́ствие, свы́ше яви́вшееся, и просвеща́ющее концы́.

Сла́ва и ны́не, гла́с 7:

Уте́шителя иму́ще ко Отцу́ Христа́ Бо́га, уте́шителю ино́му прише́дшему к на́м на зе́млю дне́сь, ду́ху свято́му ве́рою поклони́мся.

Та́же: Све́те ти́хий:

На стихо́вне стихи́ры, гла́с 1.

Подо́бен: Прехва́льнии му́ченицы:

Ду́ха Свята́го, от отца́ исходя́щаго, и в сы́не прославля́емаго, и́мже и но́сятся и держа́тся вся́, и живото́м содержа́тся, и живу́т, и пребыва́ют, и спаса́ются, богосло́вим: непостижи́мый уте́шителю, ми́р ми́рови твоему́ да́руй.

Сти́х: Се́рдце чи́сто сози́жди во мне́ бо́же:

Ду́х Святы́й, исто́чник вся́кия бла́гости, су́щественне прии́де, земны́я концы́ небе́сною си́лою, Апо́стол ра́ди испо́лнити, и боже́ственною бла́гостию. Тому́ возопии́м: несказа́нный уте́шителю, ми́р ми́рови Твоему́ да́руй.

Сти́х: Не отве́ржи мене́ от лица́ твоего́:

Ду́х Святы́й Бо́г, сра́слен и сопресто́лен Отцу́ и Сло́ву познава́ется, Све́т пресоверше́нный от Све́та просия́вый, от безнача́льнаго соверше́ннаго Отца́, и сы́ном происходя́й. Тому́ возопии́м: жизнода́вче уте́шителю, ми́р ми́рови Твоему́ да́руй.

Сла́ва, и ны́не, гла́с 8:

Егда́ Ду́ха Твоего́ посла́л еси́ Го́споди, седя́щым апо́столом, тогда́ евре́йския де́ти зря́ще ужаса́хуся у́жасом: слы́шаху бо я́ веща́ющя ины́ми стра́нными язы́ки, я́коже Ду́х подава́ше и́м. Неве́жди бо су́ще умудри́шася, и язы́ки в ве́ру улови́вше, боже́ственная вети́йствоваху. Те́мже и мы́ вопие́м Ти́: и́же на земли́ явле́йся, и от пре́лести спасы́й на́с, Го́споди сла́ва Тебе́.

Та́же: Ны́не отпуща́еши: тропа́рь. И отпу́ст.


Комментарии для сайта Cackle