Глава 49. Чи́н благослове́ния кампа́на, си́есть ко́локола или́ зво́на

Пове́сивши зво́н при це́ркви, я́коже бы мощи́ и све́рху и извну́трь окропле́нну бы́ти, пре́жде да́же не поста́вити его́ на колоко́льне, си́м благослове́нием благослови́ти его́ подоба́ет: А́ще святи́тель сие́ де́йствует, оде́ян во вся́ святи́тельския оде́жды, или́ то́чию в ма́нтию, в епитрахи́ль, омофо́р и ми́тру, [а́ще же свяще́нник, в епитрахи́ль и фело́нь] исхо́дит из це́ркве, и прихо́дит к зво́ну та́мо у́бо предугото́ванной су́щей воде́ свяще́нной и кропи́льнице, на че́стно покрове́нном столе́, и начина́ет обы́чно:

Благослове́н Бо́г на́ш: Кли́р же пое́т 6-м гла́сом: Царю́ небе́сный: посе́м чте́тся: Трисвято́е: О́тче на́ш: Го́споди поми́луй, 12. Сла́ва, и ны́не: Прииди́те, поклони́мся: три́жды.

И псало́м 148:

Хвали́те Го́спода с небе́с, хвали́те его́ в вы́шних. Хвали́те его́ вси́ а́нгели его́: хвали́те его́ вся́ си́лы его́. Хвали́те его́ со́лнце и луна́: хвали́те его́ вся́ зве́зды и све́т. Хвали́те его́ небеса́ небе́с, и вода́, я́же превы́ше небе́с. Да восхва́лят и́мя Госпо́дне: я́ко то́й рече́, и бы́ша, то́й повеле́, и созда́шася. Поста́ви я́ в ве́к и в ве́к ве́ка: повеле́ние положи́, и не ми́мо и́дет. Хвали́те Го́спода от земли́ зми́еве, и вся́ бе́здны: О́гнь, гра́д, сне́г, го́лоть, ду́х бу́рен, творя́щая сло́во его́: Го́ры и вси́ хо́лми, древа́ плодоно́сна и вси́ ке́дри: Зве́рие и вси́ ско́ти, га́ди, и пти́цы перна́ты: Ца́рие зе́мстии и вси́ лю́дие, кня́зи и вси́ судии́ зе́мстии: Ю́ноши и де́вы, ста́рцы с ю́нотами, да восхва́лят и́мя Госпо́дне, я́ко вознесе́ся и́мя того́ еди́наго: испове́дание его́ на земли́ и на небеси́. И вознесе́т ро́г люде́й свои́х: пе́снь все́м преподо́бным его́, сыново́м изра́илевым, лю́дем приближа́ющымся ему́.

Та́же псало́м 149.

Воспо́йте Го́сподеви пе́снь но́ву, хвале́ние его́ в це́ркви преподо́бных. Да возвесели́тся изра́иль о сотво́ршем его́, и сы́нове сио́ни возра́дуются о царе́ свое́м. Да восхва́лят и́мя его́ в ли́це, в тимпа́не и псалти́ри да пою́т ему́. Я́ко благоволи́т Госпо́дь в лю́дех свои́х, и вознесе́т кро́ткия во спасе́ние. Восхва́лятся преподо́бнии во сла́ве, и возра́дуются на ло́жах свои́х. Возноше́ния Бо́жия в горта́ни и́х, и мечи́ обою́ду остры́ в рука́х и́х: Сотвори́ти отмще́ние во язы́цех, обличе́ния в лю́дех. Связа́ти цари́ и́х пу́ты, и сла́вныя и́х ручны́ми око́вы желе́зными: Сотвори́ти в ни́х су́д напи́сан: сла́ва сия́ бу́дет все́м преподо́бным его́.

Та́же псало́м 108.

Хвали́те Бо́га во святы́х его́, хвали́те его́ во утверже́нии си́лы его́. Хвали́те его́ на си́лах его́, хвали́те его́ по мно́жеству вели́чествия его́. Хвали́те его́ во гла́се тру́бнем, хвали́те его́ во псалти́ри и гу́слех. Хвали́те его́ в тимпа́не и ли́це, хвали́те его́ во стру́нах и орга́не. Хвали́те его́ в кимва́лех доброгла́сных, хвали́те его́ в кимва́лех восклица́ния: Вся́кое дыха́ние да хва́лит Го́спода.

Сла́ва, и ны́не: Аллилу́иа, три́жды.

Диа́кон же глаго́лет ектению́ сию́:

Ми́ром Го́споду помо́лимся: да́же до О пла́вающих:

И а́бие прилага́ет сия́:

О е́же благослови́ти кампа́н се́й, в сла́ву свята́го и́мене своего́, небе́сным свои́м благослове́нием, Го́споду помо́лимся.

О е́же пода́ти ему́ благода́ть, я́ко да вси́ слы́шащии звене́ние его́ или́ во дни́ или́ в нощи́, возбудя́тся к славосло́вию и́мене свята́го твоего́, Го́споду помо́лимся.

О е́же гла́сом звене́ния его́ утоли́тися и ути́шитися и преста́ти все́м ве́тром зе́льным, бу́рям же, громо́м и мо́лниям, и все́м вре́дным безве́дриям, и злорастворе́нным возду́хом, Го́споду помо́лимся.

О е́же отгна́ти всю́ си́лу, кова́рства же и наве́ты неви́димых враго́в, от все́х ве́рных свои́х, гла́с зву́ка его́ слы́шащих, и к де́ланию за́поведей свои́х возбуди́ти я́, Го́споду помо́лимся.

О е́же изба́витися на́м от вся́кия ско́рби:

Заступи́, спаси́, поми́луй:

Пресвяту́ю, пречи́стую, преблагослове́нную:

Возгла́с: Я́ко подоба́ет тебе́ вся́кая сла́ва че́сть и поклоне́ние:

Ли́к: Ами́нь.

По си́х чту́т псало́м 28:

Принеси́те Го́сподеви, сы́нове Бо́жии, принеси́те Го́сподеви сы́ны о́вни, принеси́те Го́сподеви сла́ву и че́сть. Принеси́те Го́сподеви сла́ву и́мени его́: поклони́теся Го́сподеви во дворе́ святе́м его́. Гла́с Госпо́день на вода́х: Бо́г сла́вы возгреме́, Госпо́дь на вода́х мно́гих. Гла́с Госпо́день в кре́пости: гла́с Госпо́день в великоле́пии. Гла́с Го́спода сокруша́ющаго ке́дры, и стры́ет Госпо́дь ке́дры лива́нския. И истни́т я́ я́ко тельца́ лива́нска, и возлю́бленный я́ко сы́н единоро́жь. Гла́с Го́спода пресеца́ющаго пла́мень огня́. Гла́с Го́спода стряса́ющаго пусты́ню, и стрясе́т Госпо́дь пусты́ню кадди́йскую. Гла́с Госпо́день сверша́ющий еле́ни, и откры́ет дубра́вы, и в хра́ме его́ вся́кий глаго́лет сла́ву. Госпо́дь пото́п населя́ет, и ся́дет Госпо́дь Ца́рь в ве́к. Госпо́дь кре́пость лю́дем свои́м да́ст, Госпо́дь благослови́т лю́ди своя́ ми́ром.

По сконча́нии же псалма́, ре́кшу диа́кону: Го́споду помо́лимся,

И кли́ру: Го́споди поми́луй.

Иере́й же чте́т моли́тву сию́:

Го́споди Бо́же на́ш, хотя́й от все́х ве́рных твои́х всегда́ сла́вимь и покланя́емь бы́ти, в ве́тсем заве́те рабу́ своему́ законополо́жнику моисе́ю тру́бы сре́бряны сотвори́ти, и сыно́м ааро́новым жреце́м в ня́, внегда́ жре́ти и́м тебе́, воструби́ти повеле́л еси́: я́ко да услы́шавше лю́дие твои́ гла́с тру́бный, гото́ви е́же поклони́тися тебе́ бу́дут, и ко е́же же́ртвы приноси́ти тебе́ соберу́тся, и в бра́нех тру́б си́х гла́сом оглаше́ни, к побежде́нию враго́в кре́пко вооружа́тся. И ны́не, Влады́ко пресвяты́й, смире́нно мо́лим тя́, при́зри ми́лостивно на приле́жное моле́ние на́с недосто́йных рабо́в твои́х, и кампа́н се́й, к слу́жбе це́ркве твоея́ святы́я, в сла́ву же великоле́паго и всесвята́го и́мене твоего́ сооруже́нный, небе́сным святы́м твои́м благослове́нием и благода́тию всеосвяща́ющаго твоего́ ду́ха благослови́ и освяти́, и вле́й во́нь си́лу благода́ти твоея́: я́ко да услы́шавше ве́рнии раби́ твои́ гла́с зву́ка его́, в благоче́стии и ве́ре укрепя́тся, и му́жественно все́м диа́вольским наве́том сопротивоста́нут, и моли́твами и всегда́шним славосло́вием тебе́ и́стиннаго Бо́га сия́ победя́т, к це́ркви же на моли́тву и славосло́вие свята́го и́мене твоего́, во дни́ и в нощи́ спе́шно, я́ко ведо́ми да веду́тся: да утоля́тся же и утиша́тся, и преста́нут и напа́дающыя бу́ри ве́тренныя, гра́ды же и ви́хри и гро́мы стра́шнии и мо́лния, и злорастворе́ннии и вре́днии возду́хи гла́сом его́. Ты́ бо Го́споди Бо́же на́ш, не то́чию у́мными и одушевле́нными созда́ниями твои́ми, в сла́ву твою́ и в спасе́ние и по́льзу ве́рных твои́х, но и безду́шными, я́коже моисе́овым жезло́м, и ме́дяною змие́ю в пусты́ни, вся́ я́же хо́щеши пресла́вная твори́ши и чудоде́йствуеши: вся́ бо тебе́ возмо́жна су́ть, не возмо́жно же ничто́же: и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́шя Го́сподеви приклони́те.

Ли́к: Тебе́ Го́споди.

И все́м предстоя́щым главы́ прикло́ньшым, чте́т иере́й та́йно моли́тву сию́:

Влады́ко Бо́же о́тче вседержи́телю, и́же тру́бным гла́сом седмию́ жре́ц иду́щих пред киво́том свиде́ния, иерихо́нским тве́рдым стена́м па́сти и разруши́тися сотвори́л еси́, и вся́ во гра́де су́щыя в ру́це люде́й твои́х пре́дал еси́: ты́ и ны́не кампа́н се́й небе́сным твои́м благослове́нием испо́лни, я́ко да гла́с звене́ния его́ услы́шавше, проти́вныя возду́шныя си́лы дале́че от огра́д ве́рных твои́х отсту́пят, и вся́ раздеже́нныя и́х о́гненныя, я́же на на́с, стре́лы уга́снут, треска́ния же мо́лний, нападе́ние гра́да, и вся́ вре́дныя возду́хов злорастворе́ния, всеси́льною и кре́пкою десни́цею прогони́ма и уде́ржанна да утоля́тся, ути́хнут и отсту́пят: вся́ бо ты́ в сла́ву твою́, к по́льзе и спасе́нию на́шему чрез посре́дства де́йствуеши.

И возглаша́ет: Твое́ бо е́сть, е́же ми́ловати и спаса́ти ны́, Бо́же на́ш, и тебе́ сла́ву возсыла́ем, безнача́льному отцу́, со единоро́дным твои́м Сы́ном, и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь.

И взе́м иере́й свяще́нную во́ду, кропи́т кампа́н от четы́рех стра́н его́ све́рху, о́крест иды́й, глаго́ля:

Благословля́ется и освяща́ется кампа́н се́й окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. [Три́жды.]

Та́кожде и внутри́ его́ кропя́ на четы́ре страны́, то́жде глаго́лет. Посе́м, взе́м кади́льницу, кади́т кампа́н от четы́рех стра́н, извне́ и вну́трь его́.

Сия́ же ему́ соверша́ющу, кли́рицы чту́т псало́м 69:

Бо́же, в по́мощь мою́ вонми́, Го́споди, помощи́ ми потщи́ся: Да постыдя́тся и посра́мятся и́щущии ду́шу мою́, да возвратя́тся вспя́ть и постыдя́тся хотя́щии ми́ зла́я. Да возвратя́тся а́бие стыдя́щеся глаго́лющии ми́: бла́гоже, бла́гоже. Да возра́дуются и возвеселя́тся о тебе́, вси́ и́щущии тебе́ Бо́же, и да глаго́лют вы́ну, да возвели́чится Госпо́дь лю́бящии спасе́ние твое́. а́з же ни́щ е́смь и убо́г, Бо́же, помози́ ми: помо́щник мо́й и изба́витель мо́й еси́ ты́, Го́споди не закосни́.

Си́м же соверши́вшымся, диа́кон возглаша́ет: Прему́дрость.

Чте́ц глаго́лет: Чи́сл чте́ние.

Диа́кон: Во́нмем.

Чте́ц же чте́т паремию́ сию́ от четве́ртых кни́г моисе́овых, глава́ 10:

Рече́ Госпо́дь к моисе́ю, глаго́ля: Сотвори́ себе́ две́ трубы́ сре́бряны, ко́ваны сотвори́ши я́, и бу́дут тебе́ на созва́ние со́нма, и возставля́ти полки́. И да востру́биши и́ми, и да собере́тся к тебе́ ве́сь со́нм, пред две́ри ски́нии свиде́ния. А́ще же еди́ною трубо́ю востру́бят, да прии́дут к тебе́ вси́ кня́зи и тысященача́льники изра́ильтестии. И воструби́те в зна́мение и воздви́гнутся полцы́, ополча́ющиися на восто́ки: И воструби́те в зна́мение второ́е, и воздви́гнутся полцы́, ополча́ющиися от ю́га: И воструби́те в зна́мение тре́тие, и да воздви́гнутся полцы́, ополча́ющиися от мо́ря: И воструби́те в зна́мение четве́ртое, и воздви́гнутся полцы́, ополча́ющиися от се́вера. Зна́мением да востру́бят в воздви́жение и́х. И егда́ собере́те со́нм, воструби́те не в зна́мение. И сы́нове ааро́ни жрецы́ да востру́бят труба́ми: и да бу́дет ва́м зако́нно ве́чно в ро́ды ва́шя. А́ще же изы́дете на бра́нь в земли́ ва́шей к супоста́том сопроти́вящымся ва́м, и воструби́те и назна́менуйте труба́ми, и воспомяне́тся пред Го́сподем, и изба́витеся от вра́г ва́ших. И во дне́х весе́лия ва́шего, и в пра́здницех ва́ших, и в новоме́сячиих ва́ших, воструби́те труба́ми на всесожже́ния, и на же́ртвы спасе́ний ва́ших, и бу́дет ва́м воспомина́ние пред бо́гом ва́шим: А́з Госпо́дь Бо́г ва́ш.

Посе́м пою́т, или́ чту́т стихи́ры сия́, гла́с 2:

Земли́ и про́чым стихи́ям, гне́ва ра́ди твоего́, гре́х ра́ди на́ших дви́жимаго на ны́, смуща́ющымся и обурева́емым, гла́с зна́мения сего́, я́коже моисе́овых сре́бряных тру́б услы́шав Го́споди, благоутро́бным свои́м о́ком при́зри на ны́, и не я́ростию твое́ю обличи́ на́с, но умилосе́рдився пощади́, вся́каго стра́шнаго преще́ния твоего́ избавля́я, я́ко еди́н милосе́рд.

Гла́с 1:

Основа́ния всея́ земли́ воздвиза́яй, Бо́же, и сотряса́яй еди́н морско́е ло́же, я́ко созда́тель вся́ческих, изба́ви на́с пра́веднаго твоего́ преще́ния, гла́сом зна́мения сего́ отгоня́я зе́льныя бу́ри и ве́тры, гро́мы же и мо́лния: и бо́дрых на́с и тщали́вых всегда́ к твоему́ славосло́вию сотвори́, и ко исполне́нию святы́х твои́х за́поведей, я́ко человеколю́бец.

Сла́ва, и ны́не, гла́с 4:

Вся́ческая еди́ною в нача́ле собо́ю непосре́дственне созда́вый Го́споди, ны́не же вся́ посре́дственне де́йствуяй гла́сом зво́на сего́ освяще́ннаго, вся́кое уны́ние с лени́вством от серде́ц ве́рных твои́х отжени́, стра́х же тво́й в ни́х с благоче́стием вкорени́ и спе́шных на моли́тву, ско́рых же ко вся́кому благо́му де́лу твое́ю си́лою сотвори́, избавля́я на́с от все́х наве́тов вра́жиих: и невре́дных от злорастворе́нных возду́хов заве́трения соблюда́я: моли́твами Богоро́дицы и все́х святы́х твои́х, я́ко еди́н милосе́рд.

По сконча́нии же си́х, святи́тель, или́ нача́льствуяй, ре́кшу диа́кону: Прему́дрость:

И ли́ку: Честне́йшую херуви́м: Сла́ва, и ны́не: Го́споди поми́луй, три́жды, Благослови́, твори́т обы́чный дневны́й отпу́ст.

Чи́н благослове́ния но́ваго до́му, в не́мже хо́щет кто́ пе́рвее всели́тися

Прише́д иере́й в до́м, его́же благослови́ти и́мать, соверша́ет ма́лое освяще́ние воды́. Мо́жет же и име́ти с собо́ю свяще́нную во́ду в сосу́де (а́ще по чему́либо не и́мать бы́ти освяще́ния воды́ в до́ме) и еле́й в друго́м сосу́де, име́ющему же бы́ти нача́лу благослове́ния, на ко́ейждо от четы́рех сте́н да бу́дет кре́ст напи́сан: Посе́м начина́ет обы́чно: Благослове́н Бо́г на́ш: и а́бие пое́т с кли́рики: Царю́ небе́сный: По сконча́нии же пе́ния, чте́м: Трисвято́е. О́тче на́ш: Го́споди поми́луй, 12. Сла́ва, и ны́не: Прииди́те, поклони́мся: три́жды, и псало́м 90: Живы́й в по́мощи вы́шняго: По псалме́ же чте́т, или́ пое́т тропа́рь се́й, гла́с 8:

Я́коже закхе́еву до́му твои́м, Христе́, вхо́дом спасе́ние бы́сть, си́це и ны́не вхо́дом свяще́нных служи́телей твои́х, и с ни́ми святы́х твои́х а́нгел, ми́р тво́й пода́ждь до́му сему́, и ми́лостивно благослови́ его́, спаса́я и просвеща́я все́х жи́ти хотя́щих в не́м.

Су́щей же трапе́зе убру́сом покры́той, Ева́нглию и Кресту́ на не́й, и свеща́м горя́щым, и воде́ свяще́нней и еле́ю су́щым, ста́в иере́й к восто́ку лице́м и ре́к: Го́споду помо́лимся, Го́споди поми́луй.

Чте́т моли́тву сию́ во услыша́ние все́м:

Го́споди Иису́се Христе́ Бо́же на́ш, изво́ливый под се́нь закхе́а мытаря́ вни́ти, и спасе́ние тому́ и всему́ до́му его́ бы́вый: са́м и ны́не зде́ жи́ти хотя́щих, и на́ми недосто́йными молбы́ тебе́ и моле́ния принося́щих, от вся́каго зла́ неврежде́нных соблюди́, благословля́я и́х и обита́лище сие́, и ненаве́тен те́х живо́т вы́ну сохраня́я, изъоби́лно вся́ блага́я твоя́ и́м твои́м благослове́нием на по́лзу подава́яй. Я́ко подоба́ет тебе́ вся́кая сла́ва, че́сть и поклоне́ние, со безнача́льным твои́м отце́м, и пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в.

Ли́к: Ами́нь. Иере́й: Ми́р все́м. Ли́к: И ду́хови твоему́. Иере́й: Главы́ ва́шя Го́сподеви приклони́те. Ли́к: Тебе́ Го́споди. И чте́т иере́й та́йно моли́тву сию́:

Влады́ко го́споди Бо́же на́ш, на высо́ких живы́й и на смире́нныя призира́яй, благослови́вый до́м лава́нов при вхо́де Иа́кова, и до́м пенте́фриев при вхо́де ио́сифовем: благослови́вый до́м аведа́риин внесе́нием киво́та, и во дни́ прише́ствия во пло́ти Христа́ Бо́га на́шего, спасе́ние до́му закхе́еву дарова́вый. Са́м благослови́ и до́м се́й, и в не́м жи́ти хотя́щих стра́хом твои́м огради́, и невреди́мых от сопроти́вных сохрани́, и благослове́ние твое́ с высоты́ жили́ща твоего́ низпосли́ и́м, и благослови́ и умно́жи вся́ блага́я в до́ме се́м.

Возгла́с: Твое́ бо е́сть, е́же ми́ловати и спаса́ти ны́, Бо́же на́ш, и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

А́бие же посе́м зна́менав три́жды еле́й, глаго́лет:

Во и́мя Отца́, и Сы́на, и Свята́го Ду́ха, ами́нь. И чте́т над ни́м моли́тву сию́: Го́споди Бо́же на́ш, при́зри ны́не ми́лостивно на моли́тву мене́ смире́ннаго и недосто́йнаго раба́ твоего́, и низпосли́ благода́ть Пресвята́го твоего́ ду́ха на еле́й се́й, и освяти́ его́, я́ко да бу́дет во освяще́ние ме́сту сему́ и на не́м сооруже́нну до́му, и на прогна́ние вся́кия сопроти́вныя си́лы и сатани́нских наве́тов. Ты́ бо еси́ благословля́яй и освяща́яй вся́ческая, Христе́ Бо́же на́ш, и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

По моли́тве же взе́млет свяще́нную во́ду, и кропи́т е́ю вся́ сте́ны до́му о́крест и вся́ кле́ти его́, глаго́ля:

Во и́мя Отца́, и Сы́на, и Свята́го Ду́ха, окропле́нием воды́ сея́ свяще́нныя, в бе́гство да претвори́тся все́ лука́вое бесо́вское де́йство, ами́нь.

Окропи́в же все́, взе́м еле́й, помазу́ет и́м сте́ны до́ма, иде́же е́сть кре́ст напи́сан в среди́не его́, наче́н от восто́чныя стены́ до́ма, посе́м и за́падную, и по си́х се́верную, в коне́ц же ю́жную сте́ну, над ко́ейждо глаго́лет:

Благословля́ется до́м се́й пома́занием свята́го еле́а сего́, во и́мя Отца́, и Сы́на, и Свята́го Ду́ха, ами́нь.

По соверше́нии пома́зания еле́ем, сожига́ет пома́зание свещы́ горя́щими, на ко́ейждо стене́. Сему́ же быва́ющу, певцы́ пою́т стихи́ру сию́ гла́с 5:

Благослови́, Го́споди, до́м се́й, и испо́лни его́ земны́х твои́х бла́г, и в не́м благоче́стно жи́ти хотя́щих от вся́каго зла́го обстоя́ния неврежде́нных сохрани́, и вся́кое изъоби́лие небе́снаго и земна́го твоего́ благослове́ния те́м да́руй, и я́ко ще́др поми́луй, по вели́цей твое́й ми́лости.

По оконча́нии пома́зания, станови́тся иере́й лице́м к восто́ку, и а́ще изво́лит, чте́т и ева́нглие, ре́к:

Прему́дрость про́сти, услы́шим свята́го Ева́нглиа, и про́чая. От луки́ свята́го Ева́нглиа чте́ние. Ли́к: Сла́ва тебе́ Го́споди: И чте́т от Луки́ зача́ло 94.

Во вре́мя о́но, прии́де Иису́с во иерихо́н. И се́ му́ж нарица́емый закхе́й, и се́й бе́ ста́рей мытаре́м, и то́й бе́ бога́т: и иска́ше ви́дети Иису́са, кто́ есть, и не можа́ше от наро́да, я́ко во́зрастом ма́л бе́: и предите́к, возле́зе на я́годичину, да ви́дит, я́ко хотя́ше ми́мо ея́ проити́. И я́ко прии́де на ме́сто, воззре́в Иису́с ви́де его́, и рече́ к нему́: закхе́е, потща́вся сле́зи: дне́сь бо в дому́ твое́м подоба́ет ми́ бы́ти. И потща́вся сле́зе, и прия́т его́ ра́дуяся. И ви́девше вси́ ропта́ху, глаго́люще, я́ко ко гре́шну му́жу вни́де вита́ти. Ста́в же закхе́й рече́ ко Го́споду: се́ по́л име́ния моего́, Го́споди, да́м ни́щым: и а́ще кого́ чи́м оби́дех, возвращу́ четвери́цею. Рече́ же к нему́ Иису́с: я́ко дне́сь спасе́ние до́му сему́ бы́сть, зане́ и се́й сы́н Аавраа́мль е́сть: прии́де бо Сы́н челове́чь взыска́ти и спасти́ поги́бшаго.

Ли́к: Сла́ва тебе́ Го́споди:

И а́бие чту́т псало́м 100: Ми́лость и су́д воспою́ тебе́, Го́споди:

Иере́й кади́т ве́сь до́м. По се́м же глаго́лет ектению́ сию́:

Поми́луй на́с, Бо́же, по вели́цей ми́лости твое́й, мо́лимтися, услы́ши и поми́луй.

Ли́к: Го́споди поми́луй. Три́жды.

Еще́ мо́лимся о е́же низпосла́ти благослове́ние свое́ на до́м се́й и на раба́ своего́ (или́ рабу́ свою́) и́мярек, и на все́х в не́м благоче́стно жи́ти хотя́щих, и посла́ти и́м а́нгела своего́ ми́лостива, соблюда́юща и сохраня́ща и́х от вся́каго зла́, и наставля́юща к де́ланию все́х доброде́телей, и ко исполне́нию святы́х Христо́вых за́поведей: и о е́же сохрани́ти и́х от гла́да, губи́тельства, тру́са, пото́па, огня́. меча́ и наше́ствия иноплеме́нник. и вся́кия смертоно́сныя ра́ны, и дарова́ти и́м здра́вие, и долгоде́нствием огради́ти и́х. и во все́м угобзи́ти, рце́м вси́, Го́споди, услы́ши и поми́луй.

Еще́ мо́лимся за всю́ бра́тию и за вся́ Христиа́ны.

Возгла́с: Услы́ши ны́, Бо́же спаси́телю на́ш, упова́ние все́х конце́в земли́, и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны́: ми́лостив бо и человеколю́бец Бо́г еси́, и тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

И твори́т дне́вный обы́чный отпу́ст, и многоле́тствовав до́му влады́це, отхо́дит во своя́си, благодаря́ Бо́га.

Чи́н освяще́ния колесни́цы

Нача́ло обы́чное: Царю́ небе́сный и про́чая. Прииди́те поклони́мся: Псало́м 90: Моли́тва:

Го́споди Бо́же на́ш, седя́й на серафи́мех и е́здяй на херуви́мех, му́дростию украси́вый челове́ка, и благи́м твои́м про́мыслом вся́ ко бла́гу направля́яй, ниспосли́ благослове́ние твое́ на колесни́цу сию́ и а́нгела твоего́ к не́й приста́ви, да ше́ствующии в не́й и́м храни́ми и наставля́еми, в ми́ре и благополу́чии пу́ть сво́й соверши́вше, тебе́ сла́ву и благодаре́ние возсыла́ют, хва́ляще отца́ и Сы́на Свята́го Ду́ха. Ами́нь.

Иере́й же взе́млет свяще́нную во́ду, и кропи́т е́ю колесни́цу вовне́ и внутри́, глаго́ля: Благословля́ется и освяща́ется колесни́ца сия́ во и́мя Отца́, и Сы́на, и Свята́го Ду́ха, ами́нь.

Чи́н благослове́ния супру́гов, прожи́вших мно́го ле́т без церко́внаго благослове́ния

оцифровка и приведение к грамматическим нормам ЦС-языка: протоиерей Николай Диваков, Дмитрий Михалин, Анатолий Алексеевич Матвеев.

В затруднительное положение попадают священники, когда к ним обращаются с просьбой совершить Венчание супруги, которые прожили в браке уже много лет без церковного благословения. Некоторые из подобных просителей имеют не только взрослых детей, но даже и внуков. Естественно возникает вопрос: каким же чином венчать их? Ни чин обычный, ни чин о второбрачных не подходит. Здесь уместно воспользоваться чином ̏благословения супругов проживших с собою 25 или 50 лет̏ из Требника изд. во Львове в 1873 г. Вот этот чин, приспособленный к благословению супругов, проживших много лет без церковного благословения̏. < --- > Настольная книга священнослужителя, т. 4, с. 309. М., 1983.

Поставля́ется анало́гий посреде́ це́ркве, и полага́ются на не́м Ева́нглие и Кре́ст. Предстои́т же му́ж одесну́ю, жена́ же ошу́юю. Свяще́нник облаче́н в фело́нь назна́менует главы́ супру́г три́жды я́коже и в пе́рвом чи́не венча́ния указа́ся, и дае́т и́м свещы́ возже́нны, и начина́ет:

Благослове́н Бо́г на́ш. Та́же, Трисвято́е: по О́тче на́ш: Тропа́рь дне́вный.

Та́же ектениа́:

Ми́ром Го́споду помо́лимся.

О свы́шнем ми́ре:

О ми́ре всего́ ми́ра:

О святе́м хра́ме се́м:

О рабе́х Бо́жиих и́мярек и е́же о Бо́зе покро́ве, и сожи́тии и́х, Го́споду помо́лимся.

О е́же спожи́ти и́м до́бре во единомы́слии, Го́споду помо́лимся.

О е́же пода́ти и́м проще́ние прегреше́ний, грехо́в очище́ние, проще́ние беззако́ний во́льных же и нево́льных, Го́споду помо́лимся.

Заступи́, спаси́, поми́луй:

Пресвяту́ю, Пречи́стую, Преблагослове́нную:

Я́ко подоба́ет Тебе́:

Та́же, Го́споду помо́лимся.

Свяще́нник моли́тву:

Влады́ко Го́споди Бо́же на́ш, та́йная ве́дый челове́ческая, и́же Раа́ву блудни́цу прости́вый, и мытаре́во покая́ние прие́мый, не помяни́ грехо́в на́ших неве́дения от ю́ности. а́ще бо беззако́ния на́зриши Го́споди, Го́споди, кто́ постои́т Тебе́, или́ ка́я пло́ть оправди́тся пред Тобо́ю? Ты́ бо еди́н еси́ пра́веден, безгре́шен, свя́т, многоми́лостив, многоблагоутро́бен, и ка́яйся о зло́бех челове́ческих. Ты́, Влады́ко, присво́ивый рабы́ Твоя́ и́мярек, соедини́ к дру́г дру́гу любо́вию: да́руй и́м мытаре́во обраще́ние и блудни́цы сле́зы, да покая́нием от всего́ се́рдца своего́ во единомы́слии и ми́ре за́поведи Твоя́ де́лающе, сподо́бятся и небе́снаго Твоего́ Ца́рствия.

Я́ко Ты́ еси́ строи́тель все́х, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лю́дие: Ами́нь.

Свяще́нник моли́тву:

Бо́же, Бо́же на́ш, прише́дый в Ка́ну Галиле́йскую и та́мошний бра́к благослови́вый, благослови́ и рабы́ Твоя́ сия́ Твои́м про́мыслом ко обще́нию бра́ка сочета́вшыяся: благослови́ и́х вхо́ды и исхо́ды, умно́жи во благи́х живо́т и́х: восприими́ венцы́ и́х в Ца́рствии Твое́м, нескве́рны, и непоро́чны, и ненаве́тны соблюда́яй во ве́ки веко́в.

Лю́дие: Ами́нь.

Та́же благословля́ет я́, глаго́ля три́жды:

Го́споди Бо́же на́ш, сла́вою и че́стию венча́й я́.

Та́же глаго́лет Апо́стол и Ева́нглие, я́коже написа́ся в пе́рвом Венча́нии.

Та́же ектениа́:

Рце́м вси́ от всея́ души́:

Го́споди вседержи́телю, Бо́же оте́ц на́ших:

Поми́луй на́с, Бо́же:

Еще́ мо́лимся о рабе́х Бо́жиих и́мярек, ны́не прося́щих у Бо́га проще́ния и благослове́ния в бра́ка обще́ние, о здра́вии и спасе́нии и́х, рце́м вси́: Го́споди, услы́ши, и ми́лостивно поми́луй.

Еще́ мо́лимся о предстоя́щих лю́дех во святе́м хра́ме се́м, и ча́ющих от Тебе́ вели́кия и бога́тыя ми́лости, за всю́ бра́тию на́шу и за вся́ правосла́вныя Христиа́ны, о здра́вии и спасе́нии и́х, рце́м вси́: Го́споди, услы́ши и ми́лостивно поми́луй.

Я́ко ми́лостив:

Диа́кон: Го́споду помо́лимся.

Свяще́нник моли́тву:

Го́споди Бо́же на́ш, и́же от язы́к предъобручи́вый Це́рковь Де́ву чи́сту, благослови́ и сохрани́ рабы́ Твоя́ сия́ в смире́нии и соедине́нии, я́коже благоволи́л еси́ сохрани́ти я́ до сего́ дне́; испо́лни вся́ блага́я хоте́ния и́х; изле́й на ни́х я́ко ще́др и благоутро́бен бога́тыя ми́лости и щедро́ты твоя́; да́руй и́м с здра́вием долгоде́нствие и во все́х доброде́телех преспе́яние.

Я́ко бла́г и человеколю́бец Бо́г еси́, и Тебе́ подоба́ет вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лю́дие: Ами́нь.

Свяще́нник: Ми́р все́м. Главы́ ва́ша Го́сподеви приклони́те.

И мо́лится:

Оте́ц, Сы́н, и Святы́й Ду́х, Всесвята́я и Единосу́щная, и Живонача́льная Тро́ица, еди́но Божество́ и Ца́рство: да благослови́т ва́с, и да пода́ст ва́м долгожи́тие, преспе́яние живота́ и ве́ры, и да испо́лнит ва́с все́х су́щих на земли́ благи́х: да сподо́бит ва́с получи́ти обеща́нная Небе́сная блага́, моли́твами Святы́я Богоро́дицы и все́х святы́х, ами́нь.

Та́же, Прему́дрость: Пресвята́я Богоро́дице, спаси́ на́с.

Ли́к: Честне́йшую Херуви́м:

Свяще́нник: Сла́ва Тебе́, Христе́ Бо́же:

Ли́к: Сла́ва, и ны́не: Го́споди, поми́луй, три́жды. Благослови́.

Свяще́нник твори́т отпу́ст.

И́же в Ка́не Галиле́йстей прише́ствием свои́м че́стен бра́к показа́вый, Христо́с и́стинный Бо́г на́ш, моли́твами Пречи́стыя Своея́ Ма́тере, святы́х сла́вных и всехва́льных апо́стол, святы́х равноапо́стольных Константи́на и Еле́ны, свята́го великому́ченика Проко́пиа, и все́х святы́х, поми́лует и спасе́т на́с, я́ко бла́г и Человеколю́бец.

Моли́тва на благослове́ние черто́га

Оцифровка и приведение к грамматическим нормам ЦС-языка: протоиерей Николай Диваков, Людоговский Ф. Б.

Го́споди Бо́же Влады́ко Вседержи́телю, благослови́, мо́лим Ти ся, черто́г се́й и вся́ рабы́ Твоя́, живу́щия в не́м, я́ко да охраня́еми Тобо́ю пребу́дут в ми́ре, любви́ и согла́сии: благослови́ я́, я́ко да исполня́юще во́лю святу́ю, обита́ют зде́ до ста́рости своея́, и у́зрят сы́ны сыно́в свои́х: благослови́ я́ ра́достьми, весе́лием и изъоби́лием, я́ко да утеша́ют неиму́щих: благослови́ я́ долголе́тием, я́ко да угожда́юще Тебе́ Влады́це, Созда́телю и Спаси́телю, по ми́лости Твое́й вни́дут живу́щии в се́м черто́зе и во Ца́рствие Твое́ Небе́сное, угото́ванное все́м творя́щим повеле́ния Твоя́. Услы́ши на́с, Всеми́лостиве, и благослови́ черто́г се́й и живу́щих в не́м: я́ко да всегда́ хва́лят Тя́ Бо́га на́шего, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

После́дование моле́бна больно́му пред хирурги́ческим де́йствием

Оцифровка и приведение к грамматическим нормам ЦС-языка: протоиерей Николай Диваков, Людоговский Ф. Б.

Пре́жде подоба́ет соверши́ти моле́бное пе́ние о неду́жных.

В конце́ же сего́ моли́тву:

Влады́ко Вседержи́телю, Святы́й Царю́, наказу́яй и не умерщвля́яй, утвержда́яй низпа́дающия, и возводя́й низве́рженныя, теле́сныя челове́ков ско́рби исправля́яй, мо́лимся Тебе́, Бо́же на́ш, раба́ Твоего́ (и́мярек) немощству́юща посети́ ми́лостию Твое́ю, прости́ ему́ вся́кое согреше́ние во́льное и нево́льное. Е́й, Го́споди, враче́бную Твою́ си́лу с Небесе́ низпосли́ е́же упра́вити у́м и ру́ку раба́ Твоего́ ле́каря да ну́ждную хирурги́ю сотвори́т благополу́чно, я́ко теле́сному неду́гу раба́ Твоего́ (и́мярек) соверше́нно исцели́тися, и вся́кому наше́ствию неприя́зненному далеко́ отгна́ну бы́ти от него́. Воздви́гни его́ от одра́ боле́зненнаго, и да́руй его́ здра́ва душе́ю и те́лом благоугожда́юща и творя́ща во́лю Твою́.

Возглаше́ние: Твое́ бо е́сть, е́же ми́ловати и спаса́ти ны́, Бо́же на́ш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Чи́н благослове́ния но́ваго киво́та, или́ ина́го ко́его сосу́да, или́ ко́его ли́бо храни́лища крестообра́зно или́ и́нако к хране́нию моще́й святы́х сооруже́ннаго

Оцифровка: Максим Е. Плякин

Источник: Требник, часть вторая. Москва, синодальная типография, 1902год. Лист 124 (оборот). Published by Photo-Offset Reproduction. Printing Shop St. Job of Pochaev. Holy Trinity Monastery, Jordanville, N.Y., U.S.A. 1961.

Наче́ншу иере́ю, по Трисвято́м, и по Прииди́те, поклони́мся:

А́ще мо́щи су́ть не му́ченическия, но ина́го ко́его от святы́х, чте́т псало́м 111:

Блаже́н му́ж боя́йся Го́спода, в за́поведех Его́ восхо́щет зело́. Си́льно на земли́ бу́дет се́мя его́, ро́д пра́вых благослови́тся. Сла́ва и бога́тство в дому́ его́, и пра́вда его́ пребыва́ет в ве́к ве́ка. Возсия́ во тьме́ све́т пра́вым: ми́лостив и ще́др и пра́веден. Бла́г му́ж ще́дря и дая́: устро́ит словеса́ своя́ на суде́, я́ко в ве́к не подви́жится. В па́мять ве́чную бу́дет пра́ведник: От слу́ха зла́ не убои́тся. Гото́во се́рдце его́ упова́ти на Го́спода: утверди́ся се́рдце его́, не убои́тся, до́ндеже воззри́т на враги́ своя́. Расточи́, даде́ убо́гим: пра́вда его́ пребыва́ет во ве́к ве́ка: ро́г его́ вознесе́тся в сла́ве. Гре́шник у́зрит и прогне́вается, зубы́ свои́ми поскреже́щет и раста́ет: жела́ние гре́шника поги́бнет.

А́ще же му́ченическия су́ть мо́щи, чте́т псало́м 78:

Бо́же, приидо́ша язы́цы в достоя́ние Твое́, оскверни́ша хра́м святы́й Тво́й. Положи́ша иерусали́м я́ко ово́щное храни́лище, положи́ша тру́пия ра́б Твои́х бра́шно пти́цам небе́сным, пло́ти преподо́бных Твои́х звере́м земны́м: Пролия́ша кро́вь и́х я́ко во́ду о́крест Иерусали́ма, и не бе́ погреба́яй. Бы́хом поноше́ние сосе́дом на́шим, подражне́ние и поруга́ние су́щим о́крест на́с. Доко́ле, Го́споди, прогне́ваешися до конца́, разжже́тся я́ко о́гнь рве́ние Твое́? Проле́й гне́в Тво́й на язы́ки не зна́ющия Тебе́, и на ца́рствия, я́же и́мене Твоего́ не призва́ша: Я́ко поядо́ша Иа́кова, и ме́сто его́ опустоши́ша. Не помяни́ на́ших беззако́ний пе́рвых: ско́ро да предваря́т ны́ щедро́ты Твоя́, Го́споди, я́ко обнища́хом зело́. Помози́ на́м, Бо́же, спаси́телю на́ш: сла́вы ра́ди и́мене Твоего́ Го́споди, изба́ви ны́, и очи́сти грехи́ на́ша и́мене ра́ди Твоего́: да не когда́ реку́т язы́цы: где́ е́сть Бо́г и́х? И да уве́стся во язы́цех пред очи́ма на́шима отмще́ние кро́ве ра́б Твои́х пролиты́я. Да вни́дет пред Тя́ воздыха́ние окова́нных: по вели́чию мы́шцы Твоея́ снабди́ сы́ны умерщвле́нных. Возда́ждь сосе́дом на́шим седмери́цею в не́дро и́х поноше́ние и́х, и́мже поноси́ша Тя́, Го́споди. Мы́ же лю́дие Твои́ и о́вцы па́жити Твоея́, испове́мыся Тебе́, Бо́же, во ве́к, в ро́д и ро́д возвести́м хвалу́ Твою́.

Сла́ва, и ны́не: Аллилу́иа, три́жды.

Диа́кон: Го́споду помо́лимся.

Ли́к: Го́споди, поми́луй.

Иере́й чте́т моли́тву сию́:

Бо́же бого́м и Го́споди господе́м, Тво́рче и Созда́телю всея́ ви́димыя и неви́димыя тва́ри: И́же рабу́ Твоему́ Моисе́ю повеле́л еси́, по о́бразу пока́занному ему́ на горе́, киво́т от древе́с негнию́щих соста́вити, и зла́том чи́стым обложи́ти, в не́мже ста́мну злату́ю, небе́сную в себе́ иму́щую ма́нну, и скрижа́ли Заве́та пе́рстом Твои́м Боже́ственным напи́санныя, во свиде́тельство бу́дущему ро́ду сохрани́ти: я́же вся́ о́браз бы́вше ны́нешним, воплоще́нием Сы́на Твоего́ Го́спода на́шего Иису́са Христа́ испо́лнишася, егда́ те́ло Его́, де́йством Свята́го Ду́ха от Пречи́стыя Де́вы зача́тое и одушевле́нное, исполне́нием Божества́ всего́ испо́лнил еси́. Тебе́ смире́нно мо́лим Вседержи́телю Бо́же, О́тче Го́спода на́шего Иису́са Христа́, из Него́же вся́кое оте́чество на Небеси́ и на земли́ имену́ется, я́ко да се́й киво́т [или́ киво́ты], или́ сосу́д [или́ сосу́ды], к хране́нию моще́й святы́х Твои́х сооруже́нный [или́ сооруже́нныя], моли́твами и предста́тельством те́хже святы́х Твои́х, Небе́сным Твои́м благослове́нием благослови́ши, и освяти́ши, во е́же все́х в не́м [или́ в ни́х] мо́щи святы́я храня́щим и сия́ че́стно чту́щих, и святы́х [и́хже бу́дут мо́щи] призыва́ющих, моли́твами и предста́тельством и́х, от все́х сопроти́вных обстоя́ний належа́щих свободи́ши, и от преходя́щих ну́жд и бе́д изба́виши: вся́ же враго́в ви́димых и неви́димых наве́тования, наше́ствия и нападе́ния от ни́х си́лою Твое́ю отжене́ши, и бу́деши и́м стена́ тве́рда от лица́ вра́жия. И сохрани́ и́х невреди́мых от все́х чарова́ний, обая́ний же и злохи́трий злы́х и лука́вых челове́к, гра́д же и оби́тель, село́ и страну́, в ни́хже мо́щи святы́х Твои́х в сосу́де се́м [или́ в сосу́дех си́х] че́стно храни́мы бу́дут, изба́ви, соблюди́ и невре́дны сохрани́ от поврежде́ния мо́лнии, злорастворе́ний возду́хов, от гра́да, губи́тельства, тру́са, пото́па, огня́, меча́, наше́ствия иноплеме́нник, и междоусо́бныя бра́ни, и вся́кия смертоно́сныя ра́ны, от звере́й же злы́х, и гадо́в ядови́тых, и по́лзающих разли́чных черве́й, и от вся́каго зла́го обстоя́ния. И бу́ди и́м по́мощь, защище́ние и покро́в, избавля́я и́х от вся́каго зла́: да́руя же и́м в благослове́нии Твое́м благорастворе́ния возду́хов, умноже́ния плодо́в земны́х, времена́ ми́рна и вся́кое оби́лие, моли́твами Пречи́стыя Твоея́ Ма́тере и все́х святы́х Твои́х, в ни́хже хвали́мь и сла́вимь еси́ со единоро́дным Твои́м Сы́ном, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́ша Го́сподеви приклони́те.

Ли́к: Тебе́ Го́споди.

Иере́й чте́т та́йно моли́тву сию́:

Влады́ко Бо́же О́тче Вседержи́телю, И́же при Моисе́и уго́днице Твое́м ропта́ние лю́дем утоля́я, свяще́нство же Ааро́ново благоуго́дное Тебе́ бы́ти утвержда́я, же́зл его́ сухи́й прозя́бнути, и цве́т плодоно́сный произвести́ сотвори́л еси́, и се́й в киво́те Заве́та в зна́мение Твоея́ си́лы и чудотворе́ния вложи́ти повеле́л еси́: И́же и на́м образова́ние бы́сть Христа́ Твоего́, Его́же на кре́стном же́ртвеннице сме́ртию изсуше́ние, и тридне́вным Воскре́снием процвете́ние, Це́ркви же сме́ртию Его́ прозябе́ние, и но́щию и дне́м плодоно́сное процвете́ние си́м прообрази́л еси́. Тебе́ всеми́лостиваго Строи́теля и Промы́сленника челове́ческаго ро́да приле́жно мо́лим, при́зри на сосу́ды сия́, к хране́нию моще́й святы́х уго́дников Твои́х сооруже́нныя и благода́тию Твое́ю всеосвяща́ющею, в окропле́нии воды́ сея́ свяще́нныя благослови́ и освяти́, и иде́же а́ще сия́ отнесе́ни и храни́ми бу́дут, моли́твами и предста́тельствы святы́х Твои́х, и́хже мо́щи в ни́х сокры́ются, отту́ду вся́кое сопроти́вное обстоя́ние отжени́, вся́ же поле́зная и блага́я та́мо умно́жи и сохрани́: я́ко да ве́рнии лю́дие Твои́, бога́тыя ми́лости и щедро́ты и благодея́ния Твоя́ в ма́лой ча́сти моще́й святы́х Твои́х, я́коже в це́лом и́х те́ле получи́вше, благодаре́ние Тебе́ до́лжное воздаю́т, и жития́ и́х подража́тельми бы́ти потща́тися хода́тайством и́х, и с ни́ми и насле́дники Ца́рствия Твоего́ бы́ти да сподо́бятся.

И возглаша́ет: Благода́тию и щедро́тами и человеколю́бием Единоро́днаго Сы́на Твоего́, с ни́мже благослове́н еси́, с Пресвяты́м и Благи́м, и Животворя́щим Твои́м Ду́хом, ны́не и при́сно, и во ве́ки веко́в.

Ли́к: Ами́нь.

Иере́й же кропи́т водо́ю свяще́нною сосу́ды, глаго́ля:

Освяща́ются сосу́ды сия́ благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.

А́ще же та́мо су́ть мо́щи святы́х влага́ет я́ в ня́, глаго́ля:

Хвали́те Бо́га во святы́х Его́, хвали́те Его́ во утвержде́нии си́лы Его́. Я́ко восхва́лятся преподо́бнии во сла́ве, и возра́дуются на ло́жах свои́х.

И чте́т тропа́рь и конда́к святы́х, и́хже су́ть мо́щи, и сотвори́в отпу́ст, с воспомина́нием святы́х, и́хже су́ть мо́щи, раздае́т я́ те́м, и́же к освяще́нию принесо́ша.

Моли́тва на благослове́ние но́ваго ме́да

Оцифровка и приведение к грамматическим нормам ЦС-языка: протоиерей Николай Диваков, Людоговский Ф. Б.

Исто́чник: Тре́бник. Ри́м. 1980.

Необъиме́нный в ми́лости и неизрече́нный во щедро́тах, Го́споди Иису́се Христе́, ди́вен Сы́й во сла́ве и творя́й чудеса́: Ты́ де́йством Свята́го Ду́ха иногда́ благослови́вый Изра́иля, и его́ ме́дом насы́тивый от ка́мене: Са́м и ны́не при́зри свы́ше на созда́ние Твое́ сие́, и благослове́нием Твои́м небе́сным благослови́ и освяти́ со́ты пче́л, и от ни́х ме́д, и пода́ждь ему́ де́йственну благода́ть па́че все́х соверше́нну: да вся́к от него́ вкуша́яй, прие́мляй и яды́й обря́щет благополу́чное здра́вие, и пи́щею се́ю насы́тится, и испо́лнится вся́каго бла́га. Я́ко Ты́ еси́ подава́яй вся́ческая блага́я, и Тебе́ сла́ву возсыла́ем, со безнача́льным Твои́м Отце́м, и Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в. Ами́нь.

И кропи́т свяще́нною водо́ю.

После́дование моле́бна за боля́щаго

Оцифровка и приведение к грамматическим нормам ЦС-языка: протоиерей Николай Диваков, Людоговский Ф. Б.

Иере́й облече́н в фело́нь, начина́ет:

Благослове́н Бо́г на́ш: Ли́к: Ами́нь. Сла́ва Тебе́, Бо́же на́ш, сла́ва Тебе́. Царю́ Небе́сный: Трисвято́е по О́тче на́ш. Го́споди, поми́луй, 12. Сла́ва, и ны́не: Прииди́те, поклони́мся: три́жды. И псало́м 142: Го́споди, услы́ши моли́тву мою́: Сла́ва, и ны́не: Аллилу́иа, три́жды.

Та́же глаго́лет иере́й или́ диа́кон ектению́ сию́ о больно́м:

Ми́ром Го́споду помо́лимся.

О рабе́ Бо́жии (или́ рабе́ Бо́жией), и́мярек, и о е́же прости́ти ему́ (или́ е́й) вся́кое прегреше́ние во́льное и нево́льное, и ми́лостиву бы́ти ему́ (или́ е́й), Го́споду помо́лимся.

О е́же вско́ре, я́ко со́тнича о́трока, ханане́ину дще́рь и Петро́ву те́щу, сло́вом си́лы Своея́ ми́лостивно исцели́ти, и от одра́ боле́зни воздви́гнути его́ (или́ ю́), Го́споду помо́лимся.

О е́же, я́коже иногда́ разсла́бленнаго, сло́вом Боже́ственныя Своея́ благода́ти ско́ро от одра́ боле́зни воздви́гнути, и здра́ва (или́ здра́ву) сотвори́ти, Го́споду помо́лимся.

О е́же не презре́ти приле́жная моле́ния раба́ Своего́ (или́ рабы́ Своея́), но ми́лостивно услы́шати и поми́ловати его́ (или́ ю́) и здра́вие ему́ (или́ е́й) пода́ти, Го́споду помо́лимся.

О е́же посети́ти его́ (или́ ю́) посеще́нием Свята́го Своего́ Ду́ха, и исцели́ти вся́к неду́г, и вся́кую боле́знь в не́м (или́ в не́й) гнездя́щуюся, сла́вы ра́ди и́мене Своего́, Го́споду помо́лимся.

О е́же ми́лостивно, я́коже ханане́ин, услы́шати гла́с моле́ния на́с недосто́йных рабо́в Свои́х к Нему́ вопию́щих: и я́коже тоя́ дще́рь поми́ловати и исцели́ти больна́го раба́ Своего́ (или́ больну́ю рабу́ Свою́) и́мярек, Го́споду помо́лимся.

Заступи́, спаси́, поми́луй, и сохрани́ раба́ Твоего́ (или́ рабу́ Твою́) и́мярек, и на́с Бо́же, Твое́ю благода́тию.

Ли́к: Го́споди поми́луй.

Пресвяту́ю, Пречи́стую:

Возгла́с: Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

И а́бие пою́т: Бо́г Госпо́дь и яви́ся на́м: Гла́с 4.

Сти́х: Исцели́ мя́, Го́споди, я́ко смято́шася ко́сти моя́, и душа́ моя́ смяте́ся зело́.

Тропа́рь, гла́с то́йже:

Ско́рый в заступле́нии Еди́н Сы́й Христе́, ско́рое свы́ше покажи́ посеще́ние стра́ждущему рабу́ Твоему́ (или́ стра́ждущей рабе́ Твое́й), изба́ви неду́гов, и го́рьких боле́зней: воздви́гни во е́же пе́ти Тя́ и сла́вити непреста́нно, моли́твами Богоро́дицы, Еди́не Человеколю́бче.

Сла́ва: При́зри ми́лостивно, Го́споди, милосе́рдым Твои́м о́ком на смире́нное на́ше моле́ние, и не презре́в е́, человеколю́бно посети́ боле́знию обдержи́маго раба́ Твоего́ (или́ рабу́ Твою́), на́ми ны́не к тебе́ припа́дающаго (или́ припа́дающую), и си́лою Твоего́ благосе́рдия воздви́гни его́ (или́ ю́) моли́твами Богоро́дицы, Еди́не Человеколю́бче.

И ны́не: Моле́ние те́плое, и Стена́ необори́мая, ми́лости Исто́чниче, ми́рови Прибе́жище, приле́жно вопие́м Ти́: Богоро́дице Влады́чице, предвари́, и от бе́д изба́ви раба́ Твоего́ (или́ рабу́ Твою́), еди́на вско́ре предста́тельствующая.

Посе́м псало́м 50: Поми́луй мя́ Бо́же:

А́бие пою́т, или́ са́м иере́й чте́т кано́н се́й, гла́с 3:

Пе́снь 1.

Ирмо́с: Пресека́емое мо́ре жезло́м дре́вле, Изра́иль про́йде я́ко по пусты́ни, и крестообра́зно я́ве предъуготовля́ет стези́. Сего́ ра́ди пои́м во хвале́нии чу́дному Бо́гу на́шему: я́ко просла́вися.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

В де́нь печа́ли, наше́дшия на ны́, к Тебе́, Спа́се, припа́дающе, Твоея́ ми́лости про́сим: облегчи́ боле́зни раба́ Твоего́ (или́ рабы́ Твоея́), рцы́ и на́м я́ко и со́тнику: се́ здра́в е́сть о́трок тво́й.

Сти́х: Поми́луй мя́ Го́споди, я́ко не́мощен е́смь.

Мольбы́ и моле́ния принося́ще, с воздыха́нием и ве́рою к Тебе́ вопие́м: Сы́не Бо́жий, поми́луй на́с, и воздви́гни от одра́ лежа́щаго (или́ лежа́щую) я́коже разсла́бленнаго сло́вом, реки́й: возми́ о́др тво́й, и отпуща́ют ти ся греси́ твои́.

Сла́ва: Твоего́, Христе́, о́браза подо́бию кла́няющеся, сего́ ве́рою лобза́ем, и боля́щему (или́ боля́щей) здра́вия про́сим, подража́юще кровоточи́вую, я́же воскри́лию ри́з Твои́х прикосну́вшися, исцеле́ние неду́га прия́ла е́сть.

И ны́не, богоро́дичен: Пречи́стая Госпоже́ Богоро́дице, все́м изве́стная Помо́щнице, не пре́зри на́с, к Тебе́ припа́дающих, но моли́ я́ко Блага́я Сы́на Своего́ и Бо́га на́шего пода́ти здра́вие боля́щему (или́ боля́щей), да Тя́ с на́ми прославля́ет.

Пе́снь 3.

Ирмо́с: И́же от не су́щих вся́ приведы́й, Сло́вом созида́емая, соверша́емая Ду́хом, Вседержи́телю Вы́шний, в любви́ Твое́й утверди́ мене́.

Сти́х: Исцели́ мя, Го́споди, я́ко смято́шася ко́сти моя́, и душа́ моя́ смяте́ся зело́.

От тя́жких боле́зней в зе́млю приве́рженный к Тебе́, Христе́, на́ми вопие́т: пода́ждь здра́вие телеси́, я́коже Езеки́и пла́кавшуся к Тебе́.

Сти́х: И Ты́, Го́споди, доко́ле? обрати́ся, Го́споди, изба́ви ду́шу мою́.

При́зри на на́ше смире́ние, и не помяни́ беззако́ний на́ших, но ве́ры ра́ди боля́щаго (или́ боля́щую) я́коже прокаже́ннаго сло́вом исцели́, да Твое́ Христе́ сла́вит и́мя.

Сла́ва: Це́ркви ю́же освяти́л еси́, не да́ждь поноше́ния: воздви́гни неви́димо на одре́ боле́зни лежа́щаго (или́ лежа́щую), и́же мо́лится Тебе́, да не реку́т неве́рнии, где́ е́сть Бо́г и́х.

И ны́не: К Тебе́ Богоро́дице, ру́це возде́юще, вопие́м, услы́ши рабо́в Твои́х моли́тву, и спаси́ в неду́зе лежа́щаго (или́ лежа́щую), да от боле́зни воста́в (или́ воста́вши) возда́ст обе́ты, я́же в печа́ли глаго́лаша уста́ его́ (или́ ея́).

Посе́м глаго́лет иере́й, или́ диа́кон, ектении́ сия́:

Поми́луй на́с Бо́же:

Еще́ мо́лимся, Врачу́ ду́ш и теле́с, и со умиле́нием к Тебе́ в се́рдце сокруше́ннем припа́даем, и стеня́ще вопие́м: исцели́ боле́знь, уврачу́й стра́сти души́ и те́ла раба́ Твоего́ (или́ рабы́ Твоея́), и́мярек, и прости́ ему́ (или́ е́й) я́ко Благосе́рд вся́ согреше́ния, во́льная и нево́льная, и ско́ро воздви́гни от одра́ боле́зни, и ми́лостивно услы́ши, и вско́ре поми́луй.

Возгла́с: Я́ко Ты́ еси́ Исто́чник исцеле́ний, и благи́х Пода́тель, Христе́ Бо́же на́ш, и Тебе́ сла́ву возсыла́ем, со безнача́льным Твои́м Отце́м, и Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.

Ли́к: Ами́нь.

Седа́лен, гла́с 8.

Я́коже дре́вле воздви́гл еси́ Петро́ву те́щу, и спа́сл еси́ разсла́бленнаго носи́ма на одре́, та́ко и ны́не посети́ боля́щаго раба́ Твоего́ (или́ боля́щую рабу́ Твою́), ми́лостиве: Ты́ бо еди́н еси́ понесы́й неду́ги ро́да на́шего, и Тебе́ еди́наго ве́мы терпели́ваго и милосе́рдаго, и ми́лостиваго Врача́ ду́ш и теле́с Христа́ Бо́га на́шего, наводя́щаго неду́ги, и па́ки возставля́ющаго, и подава́ющаго проще́ние ка́ющимся о согреше́ниих, еди́не Милосе́рде и Всеми́лостиве.

Сла́ва, гла́с 7: А́з гре́шный пла́чуся на одре́ мое́м лежа́, проще́ние пода́ждь, Христе́ Бо́же, грехо́м мои́м, я́же от ю́ности моея́ сотвори́х, и от боле́зни мя́ воздви́гни, да сла́влю Тя́ еди́наго всеми́лостиваго ду́ш и теле́с Врача́.

И ны́не: умилосе́рдися, Влады́чице, и воздви́гни мя́ от одра́ боле́зненнаго, кре́пость бо моя́ во мне́ изнемо́же, и ве́сь неча́янием одержи́мь е́смь: Ма́ти Бо́жия Пречи́стая, исцели́ мя неду́гующаго лю́те, Ты́ бо еси́ Помо́щница христиа́ном.

Пе́снь 4.

Ирмо́с: Положи́л еси́ к на́м тве́рдую любо́вь Го́споди, Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й Го́споди.

Сти́х: Спаси́ мя ра́ди ми́лости Твоея́.

Тебе́, Тво́рче, мо́лимся, вся́ грехи́ раба́ Твоего́ (или́ рабы́ Твоея́) прости́, не хо́щеши бо сме́рти гре́шнаго: и оживи́ и уздра́ви его́ боле́знующаго (или́ ю́ боле́знующую), да воста́в (или́ воста́вши) послу́жит Ти́, испове́дая (или́ испове́дающи) с на́ми Твою́ благода́ть.

Сти́х: Я́ко не́сть в сме́рти помина́яй Тебе́, во а́де же кто́ испове́стся Тебе́.

Уже́ отча́яннаго лю́тым неду́гом и к сме́рти прибли́жившагося возврати́, Христе́, в живо́т, и да́ждь пла́чущим утеше́ние, да вси́ прославля́ют Твоя́ свята́я чудеса́.

Сла́ва: Сле́зы Манасси́ины, ниневи́тян покая́ние, и Дави́дово испове́дание прии́м, вско́ре си́х спа́сл еси́: и на́ша моли́твы ны́не приими́, благосе́рде Го́споди, и пода́ждь здра́вие боля́щему (или́ боля́щей), о не́мже (или́ о не́йже) Тя́ мо́лим.

И ны́не: Пода́ждь на́м Твою́ ми́лость, Госпоже́, всегда́ на Тя́ наде́ющимся: и испроси́ здра́вие боля́щему (или́ боля́щей), враче́бнеи Твои́ ру́це, с Предте́чею, Богоро́дице, ко Христу́ Бо́гу простира́ющи.

Пе́снь 5.

Ирмо́с: На земли́ неви́димый яви́лся еси́, и челове́ком во́лею сожи́л еси́ Непостижи́мый, и к Тебе́ у́тренююще, воспева́ем Тя́, Человеколю́бче.

Сти́х: Утруди́хся воздыха́нием мои́м.

Дще́рь Иаи́рову уже́ уме́ршую я́ко Бо́г оживи́л еси́: и ны́не возведи́, Христе́ Бо́же, от вра́т сме́ртных боля́щаго (или́ боля́щую), Ты́ бо еси́ все́м пу́ть Живота́.

Сти́х: Измы́ю на вся́ку но́щь ло́же мое́, слеза́ми мои́ми посте́лю мою́ омочу́.

Сы́на вдови́ча оживи́в, Спа́се, тоя́ сле́зы преложи́л еси́ на ра́дость: и ны́не спаси́ неду́гом тле́ющаго раба́ Твоего́ (или́ тле́ющую рабу́ Твою́), да и на́ша ско́рбь и боле́знь на ра́дость пре́йдет.

Сла́ва: О́гненная боле́знь иногда́, Христе́, те́щи Петро́вы прикоснове́нием Твоея́ руки́ исцеле́: и ны́не та́яжде всеси́льная Твоя́ десни́ца да возста́вит боля́щаго раба́ Твоего́ (или́ боля́щую рабу́ Твою́), да воста́в (или́ воста́вши), я́коже и сия́, послу́жит Тебе́.

И ны́не: В ско́рби су́ще гре́шнии, и не иму́ще к Бо́гу дерзнове́ния, к Тебе́, Пречи́стая Богома́ти, вопие́м: моли́ Сы́на Твоего́ пода́ти боля́щему (или́ боля́щей) здра́вие душе́вное же и теле́сное.

Пе́снь 6.

Ирмо́с: Бе́здна после́дняя грехо́в обы́де мя́, и исчеза́ет ду́х мо́й: но простры́й, Влады́ко, высо́кую Твою́ мы́шцу, я́ко Петра́ мя́, упра́вителю, спаси́.

Сти́х: Смяте́ся от я́рости о́ко мое́.

Бе́здну ми́лости име́яй, Христе́ Бо́же, внуши́ моле́ние рабо́в Твои́х, и я́коже Петро́м Тави́фу воскреси́л еси́, си́це и ны́не в боле́зни лежа́щаго (или́ лежа́щую) воздви́гни, послу́шав церко́вныя моли́твенники.

Сти́х: Обетша́х во все́х вразе́х мои́х.

Врачу́ ду́ш и теле́с на́ших, понесы́й неду́ги всего́ ми́ра, Христе́, Ене́а Петро́м исцели́вый и Евти́ха Па́влом воскреси́вый, и ны́не боля́щаго (или́ боля́щую) исцели́, святы́х апо́стол моли́твами.

Сла́ва: Преложи́, Христе́, на ра́дость рыда́ние, о неду́жном ны́не скорбя́щих: да Твою́ получи́вше ми́лость, вни́дем в до́м Тво́й со обетова́нными да́ры, сла́вяще Тя́ со Отце́м и Ду́хом во Еди́нем Существе́ Неразде́льнаго Бо́га.

И ны́не: Прииди́те, о дру́зи, припаде́м к Бо́жией Ма́тери, Та́ бо и́мать вла́сть неду́жныя исцеля́ти с безме́здникома вку́пе, духо́вным помазу́юще моли́тв Свои́х богоприя́тных еле́ем.

Посе́м же а́бие иере́й, или́ диа́кон, глаго́лет ектению́:

Па́ки и па́ки: Заступи́, спаси́, и про́чая.

Возгла́с: Я́ко Ты́ еси́ Ца́рь ми́ра, благоутро́бия пучи́на, и ми́лости Исто́чник, и Спа́с душа́м на́шим, и Тебе́ сла́ву возсыла́ем, со безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.

Ли́к: Ами́нь.

А́бие же пою́т, или́ чту́т, конда́к, гла́с 2:

На одре́ боле́зни лежа́щаго (или́ лежа́щую), и сме́ртною ра́ною уя́звленнаго (или́ уя́звленную), я́коже дре́вле воздви́гл еси́, Спа́се, Петро́ву те́щу и я́коже разсла́бленнаго на одре́ носи́маго, и ны́не, Милосе́рде, посети́ и исцели́: Ты́ бо еди́н еси́ боле́зни и неду́ги ро́да на́шего понесы́й, и вся́ моги́й, я́ко Многоми́лостив.

Та́же иере́й, или́ диа́кон, глаго́лет: Во́нмем. Иере́й: Ми́р все́м. Ли́к: И ду́хови твоему́.

Проки́мен, гла́с 1: Исцели́ мя́, Го́споди, я́ко смято́шася ко́сти моя́, и душа́ моя́ смяте́ся зело́. Сти́х: Поми́луй мя́, Го́споди, я́ко не́мощен е́смь.

Диа́кон: Го́споду помо́лимся. Ли́к: Го́споди поми́луй.

Свяще́нник возглаша́ет:

Я́ко Свя́т еси́, Бо́же на́ш, и во святы́х почива́еши, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

И пою́т: Вся́кое дыха́ние да хва́лит Го́спода. Сти́х: Хвали́те Бо́га во святы́х Его́, хвали́те Его́ во утверже́нии си́лы Его́. И посе́м возглаша́ет диа́кон:

И о сподо́битися на́м слы́шанию Свята́го Ева́нглиа Го́спода Бо́га мо́лим.

Ли́к: Го́споди поми́луй, три́жды.

Диа́кон: Прему́дрость, про́сти услы́шим Свята́го Ева́нглиа.

Свяще́нник: Ми́р все́м.

Лю́дие: И ду́хови твоему́.

И а́бие: От Иоа́нна (или́ Луки́, или́ Матфе́а) Свята́го Ева́нглиа чте́ние.

Ли́к: Сла́ва Тебе́, Го́споди, сла́ва Тебе́.

Диа́кон: Во́нмем.

Иере́й же чте́т, а́ще му́жеский по́л е́сть больны́й, Ева́нглие сие́. А́ще в це́ркви, на престо́ле, а́ще же в до́му, над главо́ю больна́го:

Глава́ 4. зача́ло 13:

Во вре́мя о́но бе́ не́кий царе́в му́ж, его́же сы́н боля́ше в Капернау́ме. Се́й слы́шав, я́ко Иису́с прии́де от Иуде́и в Галиле́ю, и́де к Нему́ и моля́ше Его́, да сни́дет и исцели́т сы́на его́: име́яше бо умре́ти. Рече́ у́бо Иису́с к нему́: а́ще зна́мений и чуде́с не ви́дите, не и́мате ве́ровати. Глаго́ла к нему́ царе́в му́ж: Го́споди, сни́ди, пре́жде да́же не у́мрет отроча́ мое́. Глаго́ла ему́ Иису́с: иди́, сы́н тво́й жи́в е́сть. И ве́рова челове́к словеси́, е́же рече́ ему́ Иису́с, и идя́ше. А́бие же входя́щу ему́, се́, раби́ его́ срето́ша его́, и возвести́ша ему́, глаго́люще, я́ко сы́н тво́й жи́в е́сть. Вопроша́ше у́бо от ни́х о часе́, в кото́рый легча́е ему́ бы́сть, и ре́ша ему́, я́ко вчера́ в ча́с седмы́й оста́ви его́ о́гнь. Разуме́ же оте́ц, я́ко то́й бе́ ча́с, во́ньже рече́ ему́ Иису́с, я́ко сы́н тво́й жи́в е́сть: и ве́рова са́м и ве́сь до́м его́. Сие́ па́ки второ́е зна́мение сотвори́ Иису́с, прише́д от Иуде́и в Галиле́ю.

А́ще же жена́ е́сть больна́я, в дому́ над главо́ю ея́, в це́ркви же на престо́ле, сие́ Ева́нглие глаго́лет:

От Луки́, глава́ 4, зача́ло 16.

Во вре́мя о́но вни́де Иису́с в до́м Си́монов: те́ща же Си́монова бе́ одержи́ма огне́м ве́лиим: и моли́ша Его́ о не́й. И ста́в над не́ю, запрети́ огню́, и оста́ви ю́: а́бие же воста́вши служа́ше и́м. Заходя́щу же со́лнцу, вси́, ели́цы име́яху боля́щия неду́ги разли́чными, привожда́ху и́х к Нему́: О́н же на еди́наго коего́ждо и́х ру́це возло́жь, исцеля́ше и́х.

А́ще же деви́ца е́сть больна́я, сие́ Ева́нглие глаго́лет:

От Матфе́а, глава́ 9. Зача́ло 32.

Во вре́мя о́но кня́зь не́кий прише́д ко Иису́су кла́няшеся Ему́, глаго́ля, я́ко дщи́ моя́ ны́не у́мре: но прише́д возложи́ на ню́ ру́ку Твою́, и оживе́т. И воста́в Иису́с по не́м и́де, и ученицы́ Его́. И се́, жена́ кровоточи́ва двана́десяте ле́т, присту́пльши созади́, прикосну́ся воскри́лию ри́зы Его́, глаго́лаше бо в себе́: а́ще то́кмо прикосну́ся ри́зе Его́, спасе́на бу́ду. Иису́с же обра́щься и ви́дев ю́, рече́: дерза́й, дщи́, ве́ра твоя́ спасе́ тя. И спасе́на бы́сть жена́ от часа́ того́. И прише́д Иису́с в до́м кня́жь, и ви́дев сопцы́ и наро́д мо́лвящь, глаго́ла и́м: отиди́те, не у́мре бо деви́ца, но спи́т. И руга́хуся ему́. Егда́ же изгна́н бы́сть наро́д, вше́д я́т ю́ за ру́ку: и воста́ деви́ца. И изы́де ве́сть сия́ по все́й земли́ то́й.

Ли́к: Сла́ва Тебе́, Го́споди:

И а́бие пою́т сия́:

Сла́ва: Моли́твами все́х святы́х, Ми́лостиве, очи́сти мно́жества согреше́ний на́ших.

И ны́не: Моли́твами Богоро́дицы, ми́лостиве, очи́сти мно́жества согреше́ний на́ших.

Та́же: Поми́луй мя́, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́.

И стихи́ру сию́, гла́с 6: Не оста́ви на́с тщи́х во упова́нии на́шем, Бо́же преми́лостивый, но приими́ я́ко Влады́ка моле́ния рабо́в Твои́х: ско́рби бо обдержа́т ны́, о боле́знующем рабе́ Твое́м (или́ о боле́знующей рабе́ Твое́й): прибе́жища же не стяжа́хом нигде́же в беда́х на́ших, утеше́ния не и́мамы, ниже́ по́мощи, ра́зве Тебе́, Тво́рче ми́ра, Упова́ние и Спасе́ние ве́рным: те́м к Тебе́ припа́даем и смире́нно мо́лим, воздви́гни ско́ро от одра́ боле́зни, на́ми ны́не Тебе́ приле́жно моля́щагося (или́ моля́щуюся), и изба́ви его́ (или́ ю́) от вся́каго зла́го обстоя́ния.

Посе́м же иере́й, или́ диа́кон глаго́лет:

Спаси́ Бо́же лю́ди Твоя́, и благослови́ достоя́ние Твое́; посети́ ми́р Тво́й ми́лостию и щедро́тами, возвы́си ро́г Христиа́н правосла́вных, и низпосли́ на ны́ ми́лости Твоя́ бога́тыя, моли́твами Всепречи́стыя Влады́чицы на́шея Богоро́дицы и Присноде́вы Мари́и; си́лою Честна́го и Животворя́щаго Креста́; предста́тельствы Честны́х Небе́сных Си́л Безпло́тных; честна́го, сла́внаго Проро́ка, Предте́чи и Крести́теля Иоа́нна; святы́х сла́вных и всехва́льных апо́стол; и́же во святы́х оте́ц на́ших, и вселе́нских вели́ких учи́телей и святи́телей, Васи́лиа Вели́каго, Григо́риа Богосло́ва и Иоа́нна Златоу́стаго; и́же во святы́х отца́ на́шего Никола́а архиепи́скопа Мирлики́йскаго, Чудотво́рца; святы́х равноапо́стольных Мефо́диа и Кири́лла, учи́телей слове́нских; святы́х равноапо́стольных вели́каго кня́зя Влади́мира и вели́кия княги́ни О́льги; и́же во святы́х оте́ц на́ших, святи́теля Михаи́ла, пе́рваго митрополи́та Ки́евскаго; первосвяти́телей Моско́вских и всея́ Руси́, Петра́, Алекси́а, Ио́ны, Мака́риа, Фили́ппа, И́ова, Ермоге́на и Ти́хона; митрополи́тов Моско́вских Филаре́та, Инноке́нтиа и Мака́риа; святи́телей и́мярек [епархиа́льных]; святы́х сла́вных и добропобе́дных му́чеников; новому́чеников и испове́дников росси́йских Влади́мира, митрополи́та Ки́евскаго; Вениами́на, митрополи́та Петрогра́дскаго; Петра́, митрополи́та Крути́цкаго; Иларио́на, архиепи́скопа Вере́йскаго; святы́х ца́рственных страстоте́рпцев; преподо́бному́чениц вели́кия княги́ни Елисаве́ты и и́нокини Варва́ры; преподо́бных и богоно́сных оте́ц на́ших; преподо́бных оте́ц ста́рцев О́птинских; святы́х пра́ведных Иоа́нна Кроншта́дтскаго и Алекси́а Моско́вскаго; святы́х блаже́нных Ксе́нии Петербу́ргския и Матро́ны Моско́вския; святы́х и пра́ведных богооте́ц Иоаки́ма и А́нны, и свята́го [и́мярек, его́же е́сть хра́м] и все́х святы́х. Мо́лим Тя́, многоми́лостиве Го́споди, услы́ши на́с гре́шных, моля́щихся Тебе́, и поми́луй на́с.

Ли́к: Го́споди поми́луй, 12.

Возгла́с: Ми́лостию и щедро́тами и человеколю́бием Единоро́днаго Твоего́ Сы́на, с Ни́мже благослове́н еси́, со Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

Пе́снь 7.

Ирмо́с: Пре́жде о́бразу злато́му, перси́дскому чти́лищу, о́троцы не поклони́шася, трие́ пою́ще посреде́ пещи́: отце́в Бо́же благослове́н еси́.

Сти́х: Отступи́те от Мене́, вси́ де́лающии беззако́ние.

Креста́ Твоего́, Го́споди, животво́рнаго, и́мже сме́рть поги́бе, и ме́ртвии оживотворе́ни бы́ша, Боже́ственным зна́мением, ны́не боля́щаго (или́ боля́щую) воздви́гни, я́коже при Еле́не уме́ршую деви́цу.

Сти́х: Я́ко услы́ша Госпо́дь гла́с пла́ча моего́.

До́лгую, Го́споди, и лю́тую боле́знь И́овлю на гно́ищи в че́рвиях седя́щаго, и благода́рне моля́щагося сло́вом исцели́л еси́: и ны́не боле́знующаго (или́ боле́знующую) и на́ми моля́щагося (или́ моля́щуюся) Тебе́, я́ко бла́г, исцели́ неви́димо моли́твами святы́х Твои́х.

Сла́ва: Вси́ ве́мы, я́ко вся́ко умре́ти на́м е́сть, Тебе́ Бо́гу та́ко изво́лившу: но на ма́лое вре́мя, ми́лостиве, здра́вие про́сим боля́щему (или́ боля́щей), премени́ от сме́рти того́ (или́ ту́) на живо́т, пода́ждь скорбя́щим утеше́ние.

И ны́не: Посо́бствуй и помози́ на́шей нищете́, Богоро́дице, Ты́ ве́си вре́мя и ча́с, когда́ умоли́ти Сы́на Твоего́ и Бо́га на́шего пода́ти здра́вие боля́щему (или́ боля́щей) и проще́ние все́х согреше́ний.

Пе́снь 8.

Ирмо́с: Служи́ти Живо́му Бо́гу в Вавило́не о́троки претерпе́вше, о Мусики́йских орга́нех неради́ша, и посреде́ пла́мене стоя́ще, благоле́пную пе́снь воспева́ху, глаго́люще: благослови́те, вся́ дела́ Госпо́дня, Го́спода.

Сти́х: Услы́ша Госпо́дь моле́ние мое́.

Наказу́я наказа́л еси́, Влады́ко, боле́знию раба́ Твоего́ (или́ рабу́ Твою́), и ско́ро исцели́, ми́лостиве Христе́ Бо́же: и еще́ сме́рти не преда́ждь су́дне, да Тебе́ покая́нием возда́ст: Са́м бо ре́кл еси́: не хощу́ сме́рти гре́шнаго.

Сти́х: Госпо́дь моли́тву мою́ прия́т.

Го́споди ми́лостиве, Твоя́ пресла́вная чудеса́ и до на́с ны́не да дости́гнут: бе́сы прожени́, неду́ги и ра́ны исцели́, боле́зни уврачу́й, потво́ры и чародея́ния: и вся́кия ра́ны изба́ви ны́.

Сла́ва: Запрети́вый, Христе́, морски́м ве́тром, и стра́х ученико́в на ра́дость преложи́вый, запрети́ и ны́не тя́жким боле́знем, тружда́ющим Твоего́ раба́ (или́ Твою́ рабу́): да вси́ возвесели́мся, хва́ляще Тя́ во ве́ки.

И ны́не: Изба́ви, Богоро́дице, от обыше́дших на́с печа́лей, бе́д же и скорбе́й, и все́х разли́чных неду́гов, отра́вы и чародея́ний, и уро́ков разли́чных челове́к, и напра́сныя сме́рти, мо́лимся.

Пе́снь 9.

Ирмо́с: На Сина́йстей горе́ ви́де Тя́ глубину́ Моисе́й, неопа́льно О́гнь Божества́ заче́ншую во чре́ве. Дании́л же Тя́ ви́де, Го́ру несеко́мую, Же́зл прозя́бший, Иса́иа взыва́ше, от ко́рене Дави́дова.

Сти́х: Да постыдя́тся и смяту́тся вси́ врази́ мои́.

Исто́чниче жи́зни, Пода́телю ми́лости, Христе́, не отврати́ лица́ Твоего́ от на́с, но облегчи́ боле́зни, утружде́нному боле́знию, и воздви́гни его́, я́коже Фадде́ом А́вгаря: да при́сно Тебе́ сла́вит со Отце́м и Ду́хом Святы́м Еди́наго Бо́га.

Сти́х: Да возвратя́тся и устыдя́тся зело́ вско́ре.

Ева́нгльскому ве́рующе глаго́лу, Твое́ и́щем обеща́ние, Христе́, проси́те бо, ре́кл еси́, и да́стся ва́м: те́м ны́не прося́ще мо́лим Тя́: возста́ви от одра́ здра́ва лю́тым пове́рженнаго неду́гом: да Тя́ с на́ми вку́пе велича́ет.

Сла́ва: Уму́ченый неду́гом, и вну́трь неви́димыми ра́нами Тебе́, Христе́, на́ми вопие́т, не ра́ди на́с, Го́споди, вси́ бо есмы́ по́лны грехо́в, но ма́терними и предте́чи Твоего́ моли́твами, пода́ждь исцеле́ние боля́щему (или́ боля́щей).

И ны́не: Бо́жия Ма́ти Пречи́стая, со все́ми святы́ми призыва́ем Тя́, со А́нгелы и Арха́нгелы, с проро́ки и патриа́рхи, со апо́столы и святи́тели, с преподо́бными и пра́ведными, моли́ся Христу́ Бо́гу на́шему пода́ти здра́вие боля́щему: да Тя́ вси́ велича́ем.

Посе́м: Досто́йно е́сть: Трисвято́е по О́тче на́ш: Тропари́ сия́, гла́с 6:

Поми́луй на́с, Го́споди, поми́луй на́с: Сла́ва: Го́споди, поми́луй на́с: И ны́не: Милосе́рдия две́ри отве́рзи на́м, благослове́нная Богоро́дице:

А́бие же по си́х иере́й или́ диа́кон глаго́лет ектению́ сию́:

Поми́луй на́с, Бо́же:

Еще́ мо́лимся Тебе́, Всеми́лостивому Го́споду, я́коже Езеки́ины сле́зы, Манасси́ино и Ниневи́тян покая́ние, и Дави́дово испове́дание прия́л еси́, и ско́ро те́х поми́ловал еси́, и на́ша во умиле́нии приноси́мыя Ти́ мольбы́, приими́, Всеблаги́й Царю́, и я́ко ще́др поми́луй лю́те боля́щаго раба́ Твоего́ (или́ лю́те боля́щую рабу́ Твою́), здра́вие ему́ (или́ е́й) да́руя, со слеза́ми мо́лим Ти ся, Исто́чниче жи́зни и безсме́ртия, услы́ши и ско́ро поми́луй.

Диа́кон же возглаша́ет: Па́ки и па́ки со умиле́нием, коле́на прекло́нше, Го́споду помо́лимся.

Ли́к: Го́споди, поми́луй, три́жды.

Иере́й же со все́ми предстоя́щими, коле́на прекло́нше, со вся́ким внима́нием и умиле́нием глаго́лет моли́тву сию́:

Бо́же си́льный и ми́лостивый, вся́ стро́яй на спасе́ние ро́да на́шего, при́зри, смире́нно мо́лим Тя́, на смире́нную мольбу́ на́шу, и ми́лостивно посети́ раба́ Твоего́ (или́ рабу́ Твою́), и́мярек, нарица́ющаго (или́ нарица́ющую) и́мя Христа́ Твоего́, и отпусти́ и прости́ ему́ (или́ е́й) вся́ согреше́ния во́льная и нево́льная, и́миже Твою́ благода́ть прогне́ва, и Твою́ я́рость раздражи́: вся́к же неду́г его́ (или́ ея́) теле́сный исцели́, и вся́кое наше́ствие неприя́зненное дале́че от него́ (или́ от нея́) сотвори́: воздви́гни его́ (или́ ю́) от одра́ боле́зненнаго, и да́руй его́ здра́ва (или́ ю́ здра́ву) душе́ю и те́лом Це́ркви твое́й святе́й, до́брыми де́лы, и словесы́ благи́ми сла́вяща (или́ сла́вящу) со все́ми ве́рными Твои́ми и́мя Христа́ Твоего́: с ни́мже благослове́н еси́ с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в. Ли́к: Ами́нь.

А́бие же, воста́в, твори́т отпу́ст, ре́к: Прему́дрость. Ли́к: Честне́йшую херуви́м: Иере́й: Сла́ва тебе́, Христе́ Бо́же, упова́ние на́ше, сла́ва Тебе́.

Ли́к: Сла́ва, и ны́не: Го́споди поми́луй, три́жды. Благослови́.

Иере́й же глаго́лет отпу́ст се́й:

Христо́с И́стинный Бо́г на́ш, моли́твами Пречи́стыя Своея́ Ма́тере, свята́го сла́внаго проро́ка, Предте́чи и Крести́теля Иоа́нна, святы́х сла́вных и всехва́льных апо́столов, святы́х и безме́здных враче́в Космы́ и Дамиа́на и все́х святы́х свои́х, поми́лует и спасе́т на́с и раба́ Своего́ (или́ рабу́ Свою́) и́мярек я́ко Бла́г и Человеколю́бец.

Посе́м же а́ще изво́лят пою́т или́ чту́т:

При́зри на моле́ния Твои́х ра́б, Всенепоро́чная:

И отхо́дят во своя́ си благодаря́ще Бо́га.

После́дование ма́лаго освяще́ния хра́ма

Компиляция по различным печатным источникам, оцифровка и приведение к грамматическим нормам ЦС-языка: протоиерей Николай Диваков, Дмитрий Михалин, Анатолий Алексеевич Матвеев.

Поставля́ется столе́ц посреде́ це́ркве, па́волокою покрове́нный, на обы́чном ме́сте, и вода́ в сосу́де: архиере́й же, держя́ в руце́ честны́й кре́ст с василки́, и Ева́нглие, предъиду́щу ему́ диа́кону с кади́льницею, и двема́ свещено́сцема со свеща́ми. Прише́д же пред столе́ц, полага́ет на не́м кре́ст и Ева́нглие, и взе́м кади́льницу кади́т во́ду крестообра́зно, и начина́ет обы́чно.

Протодиа́кон: Благослови́, преосвяще́ннейший влады́ко.

Архиере́й: Благослове́н Бо́г на́ш: Ли́к: Ами́нь. И пою́т: Царю́ Небе́сный:

Протодиа́кон: Бо́г Госпо́дь, и яви́ся на́м: три́жды.

И тропа́рь хра́ма.

Сла́ва, и ны́не: обновле́ния, гла́с 4:

Я́коже вы́шния тве́рди благоле́пие, и ни́жнюю споказа́л еси́ красоту́ свята́го селе́ния сла́вы Твоея́ Го́споди, утверди́ сие́ во ве́к ве́ка, и приими́ на́ша в не́м непреста́нно приноси́мая Тебе́ моле́ния Богоро́дицею, все́х Животе́ и Воскре́сние.

Кадя́щу же архиере́ю хра́м, пое́т ли́к тропари́ сия́, гла́с 6:

Е́же ра́дуйся а́нгелом прии́мшая, и ро́ждшая Зижди́теля Твоего́, Де́во, спаса́й Тя́ велича́ющия.

Воспева́ем Сы́на Твоего́ Богоро́дице, и вопие́м: Пречи́стая Влады́чице, вся́кия беды́ изба́ви рабы́ Твоя́.

Царе́м, проро́ком и апо́столом, и му́чеником Ты́ еси́ Похвала́, и Предста́тельница ми́ру, Всенепоро́чная.

Неду́гов, и вся́ких боле́зней, и бе́д на́с свободи́, к свяще́нному Твоему́ покро́ву прибега́ющих.

Сла́ва: Отца́ и Сы́на славосло́вим, и Ду́ха Свята́го, глаго́люще: Тро́ице Свята́я, спаси́ ду́ши на́ша.

И ны́не: Неизрече́нно в после́дняя заче́ншая, и ро́ждшая Созда́теля Твоего́, Де́во, спаса́й Тя́ велича́ющия.

Та́же: Милосе́рдия две́ри отве́рзи на́м Благослове́нная Богоро́дице, наде́ющиися на Тя́ да не поги́бнем, но да изба́вимся Тобо́ю от бе́д: Ты́ бо еси́ спасе́ние ро́да христиа́нскаго.

Та́же, протодиа́кон: Го́споду помо́лимся.

Возгла́с: Я́ко свя́т еси́ Бо́же на́ш:

Ли́к: Ами́нь.

Та́же настоя́щия тропари́, гла́с 6:

Ны́не наста́ вре́мя все́х освяща́ющее, и пра́ведный на́с жде́т Судия́, но обрати́ся душе́ к покая́нию, я́ко блудни́ца зову́щи со слеза́ми: Го́споди, поми́луй мя́.

Вода́ми одожди́вый Христе́ исто́чник исцеле́ний, во всечестне́м хра́ме Де́вы дне́сь, Твоего́ благослове́ния окропле́нием, отгоня́еши неду́ги немощству́ющих, Врачу́ ду́ш и теле́с на́ших.

Де́ва родила́ еси́ неискусобра́чная и Де́во пребыла́ еси́ Ма́ти Безневе́стная, Богоро́дице Мари́е, Христа́ Бо́га на́шего моли́ спасти́ся на́м.

Пресвята́я Богоро́дице Де́во, ру́к на́ших дела́ испра́ви, и проще́ние прегреше́ний на́ших испроси́, внегда́ пе́ти на́м а́нгельское пе́ние:

Святы́й Бо́же, Святы́й Кре́пкий, Святы́й Безсме́ртный, поми́луй на́с.

Отпе́вше же по обы́чаю, и по трисвято́м протодиа́кон глаго́лет: Во́нмем.

Архиере́й: Ми́р все́м.

Ли́к: И ду́хови твоему́.

Чте́ц, проки́мен, гла́с 3:

Госпо́дь Просвеще́ние мое́, и Спаси́тель мо́й, кого́ убою́ся?

Сти́х: Госпо́дь Защи́титель живота́ моего́, от кого́ устрашу́ся?

Апо́стол к евре́ом, зача́ло 306.

Бра́тие, святя́й и освяща́емии, от Еди́наго вси́; ея́же ра́ди вины́ не стыди́тся бра́тию нарица́ти и́х, глаго́ля: Возвещу́ и́мя Твое́ бра́тии Мое́й, посреде́ це́ркве воспою́ Тя́. И па́ки: А́з бу́ду наде́яся На́нь. И па́ки: се́ А́з и де́ти, я́же Ми́ да́л е́сть Бо́г. Поне́же у́бо де́ти приобщи́шася пло́ти и кро́ви, и То́й прии́скренне приобщи́ся те́хже, да сме́ртию упраздни́т иму́щаго держа́ву сме́рти, си́речь диа́вола. И изба́вит си́х ели́цы стра́хом сме́рти чрез все́ житие́ пови́нни бе́ша рабо́те. Не от А́нгел у́бо когда́ прие́млет, но от се́мене Авраа́мова прие́млет. Отню́дуже до́лжен бе́ по всему́ подо́битися бра́тии, да ми́лостив бу́дет и ве́рен Первосвяще́нник, я́же к Бо́гу, во е́же очи́стити грехи́ людски́я. В не́мже бо пострада́, Са́м искуше́н бы́в, мо́жет и искуша́емым помощи́.

Архиере́й: Ми́р ти́.

Аллилу́иа. Гла́с 6.

Сти́х 1: Отры́гну се́рдце мое́ сло́во бла́го.

Сти́х 2: Глаго́лю а́з дела́ моя́ Царе́ви.

Ева́нглие от Иоа́нна, зача́ло 14:

Во вре́мя о́но, взы́де Иису́с во Иерусали́м. Е́сть же во Иерусали́мех на О́вчей купе́ли, я́же глаго́лется евре́йски Вифесда́, пя́ть притво́р иму́щи. В те́х слежа́ше мно́жество боля́щих, слепы́х, хромы́х, сухи́х, ча́ющих движе́ния воды́. А́нгел бо Госпо́день на вся́ко ле́то схожда́ше в купе́ль, и возмуща́ше во́ду: и и́же пе́рвее вла́зяше по возмуще́нии воды́, здра́в быва́ше, яце́мже неду́гом одержи́мь быва́ше.

Та́же протодиа́кон ектению́:

Ми́ром Го́споду помо́лимся.

О свы́шнем ми́ре:

О ми́ре всего́ ми́ра:

О новосозда́ннем хра́ме се́м:

О вели́ком господи́не и отце́ на́шем:

О богохрани́мей стране́ на́шей, власте́х, во́инстве и наро́де ея́, Го́споду помо́лимся.

(А́ще во учи́лищи: О зде́ нача́льствующих, уча́щих и уча́щихся:)

(А́ще во враче́бнице: О все́х тружда́ющихся и стра́ждущих во враче́бнице се́й:)

О все́х, во сла́ву Бо́жию потруди́вшихся в возсозда́нии и благоле́пнем украше́нии свята́го хра́ма сего́:

О гра́де се́м:

О благорастворе́нии возду́хов:

О пла́вающих, путеше́ствующих:

О е́же освяти́тися вода́м си́м, си́лою и де́йствием, и наи́тием Свята́го Ду́ха:

О е́же снизходи́ти на во́ды сия́ очисти́тельному Пресу́щныя Тро́ицы де́йству:

О е́же бы́ти воде́ се́й цели́тельной ду́ш и теле́с, и вся́кия сопроти́вныя си́лы отгна́тельней:

О е́же низпосла́ти Го́споду Бо́гу благослове́ние Иорда́ново, и освяти́ти во́ды сия́:

О все́х тре́бующих от Бо́га по́мощи и заступле́ния:

О е́же просвети́тися на́м просвеще́нием ра́зума, Единосу́щною Тро́ицею:

Я́ко да Госпо́дь Бо́г на́ш возниспо́слет на́м благода́ть Пресвята́го Своего́ Ду́ха ко освяще́нию возсозда́ннаго хра́ма сего́:

О изба́витися на́м от вся́кия ско́рби:

Заступи́, спаси́, поми́луй:

Пресвяту́ю, Пречи́стую:

Ли́к: Тебе́ Го́споди.

Возгла́с: Я́ко подоба́ет Тебе́ вся́кая сла́ва:

Та́же моли́тву сию́:

Бо́же великоимени́тый, творя́й чудеса́, и́мже не́сть числа́! Прииди́ ны́не к моля́щим Тя́ рабо́м Твои́м, Влады́ко, и посли́ Ду́ха Твоего́ Свята́го, и освяти́ во́ду сию́: [сия́ глаго́ля, благословля́ет во́ду десни́цею три́жды:] и да́руй е́й благослове́ние Иорда́ново и си́лу, вся́ скве́рны очища́ющую и вся́ко ме́сто освяща́ющую. И сподо́би на́с и возсозда́нный хра́м се́й, испо́лнитися освяще́ния Твоего́, воды́ сея́ причаще́нием и кропле́нием.

Возгла́с: Ты́ бо еси́ освяще́ние на́ше, и Тебе́ сла́ву и благодаре́ние и поклоне́ние возсыла́ем, со Безнача́льным Твои́м Отце́м, и Всесвяты́м, Благи́м, и Животворя́щим Твои́м Ду́хом, ны́не и при́сно, и во ве́ки веко́в.

Ли́к: Ами́нь.

Та́же взе́м честны́й кре́ст, благословля́ет во́ды три́жды, крестообра́зно низводя́ и возводя́ и́ пра́во, и поя́ настоя́щий тропа́рь, гла́с 1, три́жды:

Спаси́ Го́споди лю́ди Твоя́, и благослови́ достоя́ние Твое́, побе́ды на сопроти́вныя да́руя, и Твое́ сохраня́я кресто́м Твои́м жи́тельство.

И а́бие протодиа́кон: Го́споду помо́лимся.

Архиере́й же чте́т моли́тву:

Го́споди небесе́ и земли́, И́же Святу́ю Твою́ Це́рковь неизрече́нною прему́дростию основа́вый, и во о́браз А́нгельскаго на Небеси́ служе́ния, свяще́нничества чи́н на земли́ соста́вивый.

При́зри ны́не, Влады́ко великода́рне, ми́лостивым Твои́м о́ком на ны́, недосто́йныя рабы́ Твоя́, во умиле́нии серде́ц соверша́ющия освяще́ние хра́ма сего́, в сла́вном благоле́пии возсозда́ннаго к сла́ве Твое́й и ко утеше́нию люде́й правосла́вных гра́да на́шего (а́ще во учи́лищи: и все́х зде́ нача́льствующих, уча́щих и уча́щихся: а́ще во враче́бнице: и все́х тружда́ющихся и стра́ждущих во враче́бнице се́й).

Вонми́ гла́су моле́ния на́шего и низпосли́ Пресвята́го Твоего́ и покланя́емаго и всеси́льнаго Ду́ха и освяти́ возсозда́нный хра́м се́й и в не́м же́ртвенник се́й в че́сть (и́мярек, его́же е́сть хра́м), я́ко да я́же на не́м соверша́емая священноде́йства во святы́й и пренебе́сный и мы́сленный Тво́й же́ртвенник достиза́ют и благода́ть Твоего́ пречи́стаго прино́сят осене́ния.

Испо́лни, Влады́ко многоми́лостиве, хра́м се́й Твоея́ Боже́ственныя сла́вы, святы́ни и благода́ти. Утверди́ его́ до сконча́ния ве́ка це́л и непоколеби́м и сподо́би в не́м моли́твы, славосло́вия и безкро́вныя же́ртвы всегда́ Тебе́ приноси́ти о все́х лю́дех Твои́х.

Возсозда́вшим же и благоукраси́вшим хра́м се́й оставле́ние согреше́ний пода́ждь: да́руй и́м (а́ще во учи́лищи: и все́м зде́ нача́льствующим, уча́щим и уча́щимся: а́ще во враче́бнице: и все́м тружда́ющимся и стра́ждущим во враче́бнице се́й) вся́ я́же ко спасе́нию проше́ния, здра́вие же и спасе́ние, и во все́м благо́е поспеше́ние, да неосужде́нно покло́нятся Тебе́ Еди́ному И́стинному Бо́гу, и Его́же посла́л еси́ Иису́су Христу́, моли́твами Богоро́дицы, и [и́мярек, его́же е́сть хра́м] и все́х святы́х твои́х, ами́нь.

Я́ко свя́т еси́ Бо́же на́ш, и на святы́х по Тебе́ пострада́вших, честны́х му́ченицех почива́еши, и Тебе́ сла́ву возсыла́ем, Отцу́ и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

Та́же кропи́т архиере́й свяще́нною водо́ю олта́рь и солею́ и иконоста́с глаго́люще:

Освяща́ется хра́м се́й окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь.

Кли́рицы же кропя́т сте́ны хра́ма.

Лю́дие же пою́т настоя́щий тропа́рь, гла́с 4:

Спаси́ Го́споди лю́ди Твоя́, и благослови́ достоя́ние Твое́, побе́ды на сопроти́вныя да́руя, и Твое́ сохраня́я Кресто́м Твои́м жи́тельство.

Посе́м:

Протодиа́кон: Прему́дрость:

Ли́к: Преосвяще́ннейший влады́ко благослови́.

Архиере́й: Сы́й благослове́н Христо́с Бо́г на́ш, всегда́, ны́не и при́сно, и во ве́ки веко́в.

Ли́к: Ами́нь. утверди́ Бо́же, святу́ю правосла́вную ве́ру, правосла́вных христиа́н во ве́к ве́ка.

Архиере́й: Пресвята́я Богоро́дице, спаси́ на́с.

Ли́к: Честне́йшую херуви́м:

Архиере́й: Сла́ва Тебе́ Христе́ Бо́же, упова́ние на́ше, сла́ва Тебе́.

Ли́к: Сла́ва, и ны́не: Го́споди поми́луй, три́жды. Преосвяще́ннейший влады́ко благослови́.

Архиере́й твори́т отпу́ст по обы́чаю.

Протодиа́кон: Вели́кому господи́ну и отцу́ на́шему Святе́йшему Патриа́рху Моско́вскому и всея́ Руси́ (и́мярек) со все́ю его́ богоспаса́емою всеросси́йскою па́ствою, и господи́ну на́шему преосвяще́ннейшему митрополи́ту (или́ архиепи́скопу, или́ епи́скопу) [и́мярек, его́же о́бласть], богохрани́мей стране́ на́шей, власте́м, во́инству и наро́ду ея́, (а́ще во учи́лищи: и все́м зде́ нача́льствующим, уча́щим и уча́щимся: а́ще во враче́бнице: и все́м тружда́ющимся и стра́ждущим во враче́бнице се́й), все́м потруди́вшимся в возсозда́нии и благоле́пнем украше́нии свята́го хра́ма сего́ и все́м правосла́вным христиа́ном мно́гая ле́та.

И пое́т ли́к: Мно́гая ле́та, три́жды.

Чи́н ма́лаго освяще́ния воды́ в кра́тце

Оцифровка и приведение к грамматическим нормам ЦС-языка: протоиерей Николай Диваков, Людоговский Ф. Б.

Исто́чник: Тре́бник. Ри́м. 1980

Нача́ло обы́чное. И по О́тче на́ш: пою́т три́жды тропа́рь се́й, гла́с 7-й:

С Небесе́ посли́ благода́ть, Жизнода́вче, и во́ду сию́ освяти́, и все́м скве́рнам яви́ ю́ бы́ти очище́ние.

Посе́м диа́кон: Го́споду помо́лимся.

Ли́к: Го́споди поми́луй.

И иере́й чте́т над водо́ю моли́тву сию́:

Бо́же великоимени́тый, О́тче Го́спода на́шего Иису́са Христа́, творя́й чудеса́ еди́н, и́мже не́сть числа́: Его́же гла́с на вода́х мно́гих, Его́же ви́девше во́ды убоя́шася, и смято́шася бе́здны и мно́жество шу́ма во́д: Его́же путие́ в мо́ри и стези́ в вода́х мно́гих, и стопы́ Твоя́ не позна́ются: и́же креще́нием Единоро́днаго Сы́на Твоего́ воплоще́ннаго, и сни́тием На́нь Пресвята́го Ду́ха в виде́нии го́лубя и Твои́м оте́ческим гла́сом Иорда́нския струи́ освяти́л еси́: Тебе́ ны́не смире́нно недосто́йнии раби́ Твои́ мо́лим и ми́ли ся де́ем, посли́ благода́ть Пресвята́го Ду́ха на во́ду сию́, и небе́сным Твои́м благослове́нием благослови́, очи́сти и освяти́ ю́, и да́руй е́й благода́ть и благослове́ние Иорда́ново и си́лу, вся́ скве́рны очища́ющую, и вся́к неду́г исцеля́ющую, и бесо́в и все́х наве́тов и ко́зней и́х прогони́тельную. И яви́ ю́ си́лою, де́йством и благода́тию Пресвята́го Ду́ха, бы́ти все́м от нея́ с ве́рою пию́щым, прие́млющым же и кропя́щымся рабо́м Твои́м грехо́в оставле́ние, измене́ние страсте́м, прогна́ние вся́каго зла́, умноже́ние доброде́телей, боле́знем исцеле́ние, домово́м же и вся́кому ме́сту освяще́ние и благослове́ние губи́тельных же и вся́ких злотво́рных возду́хов отгна́ние, и благода́ти Твоея́ присвое́ние. Я́ко Ты́ еси́ благословля́яй и освяща́яй вся́ческая, Бо́же на́ш, и Тебе́ сла́ву возсыла́ем, с Единоро́дным Твои́м Сы́ном, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́ша Го́сподеви приклони́те.

Ли́к: Тебе́ Го́споди.

Иере́й же чте́т та́йно моли́тву сию́:

Приклони́ Го́споди у́хо Твое́, и услы́ши мя́, во́ды Иорда́нския явле́нием Христа́ Твоего́ освяти́вый: и благослови́ все́х на́с, преклоне́нием своея́ вы́и зна́менающих Тебе́ повинове́ние, и сподо́би на́с испо́лнитися Твоего́ освяще́ния, воды́ сея́ причаще́нием: и да бу́дет на́м во здра́вие душа́м и телесе́м.

И возглаша́ет:

Ты́ бо еси́ Освяще́ние на́ше, и Тебе́ сла́ву возсыла́ем, со Единоро́дным Твои́м Сы́ном, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.

Ли́к: Ами́нь.

И нача́льствуяй же взе́м кре́ст, погружа́ет его́ во воде́ крестообра́зно, поя́ тропа́рь, гла́с 1–й:

Спаси́ Го́споди лю́ди Твоя́, и благослови́ достоя́ние Твое́, побе́ды благове́рным царе́м на сопроти́вныя да́руя, и Твое́ сохраня́я кресто́м Твои́м жи́тельство.

Три́жды.

И отпу́ст.

Чи́н ма́лаго освяще́ния воды́ в кра́тце

Оцифровка и приведение к грамматическим нормам ЦС-языка: протоиерей Николай Диваков, Людоговский Ф. Б.

Нача́ло обы́чное. И по О́тче на́ш: пою́т три́жды тропа́рь се́й, гла́с 7–й:

С Небесе́ посли́ благода́ть, Жизнода́вче, и во́ду сию́ освяти́, и все́м скве́рнам яви́ ю́ бы́ти очище́ние.

Посе́м диа́кон: Го́споду помо́лимся.

Ли́к: Го́споди поми́луй.

И иере́й чте́т над водо́ю моли́тву сию́:

Бо́же Великоимени́тый, творя́й чудеса́, и́мже не́сть числа́! Прииди́ ны́не к моля́щим Тя́ рабо́м Твои́м, Влады́ко, и посли́ Ду́ха Твоего́ Свята́го, и освяти́ во́ду сию́ [сия́ глаго́ля, благословля́ет во́ду десни́цею три́жды]; и да́ждь пию́щим от нея́ и прие́млющим и кропя́щимся е́ю рабо́м Твои́м премене́ние страсте́м, оставле́ние грехо́в, боле́знем исцеле́ние, и свобожде́ние от вся́каго зла́, утвержде́ние же и освяще́ние домо́м, и очище́ние от вся́кия скве́рны, и наве́та диа́вольскаго отгна́ние. Я́ко благослови́ся и просла́вися пречестно́е и великоле́пое и́мя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в.

Ли́к: Ами́нь.

Иере́й: Ми́р все́м.

Ли́к: И ду́хови твоему́.

Диа́кон: Главы́ ва́ша Го́сподеви приклони́те.

Ли́к: Тебе́ Го́споди.

Иере́й же чте́т та́йно моли́тву сию́:

Приклони́ Го́споди у́хо Твое́, и услы́ши ны́, и́же во Иорда́не крести́тися изво́ливый, и освяти́вый во́ды; и благослови́ все́х на́с, и́же преклоне́нием своея́ вы́и назна́менающих рабо́тное воображе́ние; и сподо́би на́с испо́лнитися освяще́ния Твоего́, воды́ сея́ причаще́нием; и да бу́дет на́м Го́споди, во здра́вие души́ и те́ла.

Возгла́с: Ты́ бо еси́ освяще́ние на́ше, и Тебе́ сла́ву и благодаре́ние и поклоне́ние возсыла́ем, со Безнача́льным Твои́м Отце́м, и Всесвяты́м, Благи́м, и Животворя́щим Твои́м Ду́хом, ны́не и при́сно, и во ве́ки веко́в.

Ли́к: Ами́нь.

И нача́льствуяй же взе́м кре́ст, погружа́ет его́ во воде́ крестообра́зно, поя́ тропа́рь, гла́с а҃:

Спаси́ Го́споди лю́ди Твоя́, и благослови́ достоя́ние Твое́, побе́ды на сопроти́вныя да́руя, и Твое́ сохраня́я кресто́м Твои́м жи́тельство.

Три́жды.

И отпу́ст.

Благодаре́ние о получе́нии проше́ния и о вся́ком благодея́нии Бо́жии

Источник: Православная страница Николая и Елены Андрущенко http://www.orthonord.ru

Ектениа́: Поми́луй на́с, Бо́же:

Благодаря́ще со стра́хом и тре́петом я́ко раби́ непотре́бнии, Твоему́ благоутро́бию, Спа́се и Влады́ко на́ш Го́споди, о Твои́х благодея́ниих, я́же излия́л еси́ изъоби́льно на рабе́х Твои́х, и припа́даем, и славосло́вие Тебе́ я́ко Бо́гу прино́сим, и умиле́нно вопие́м: изба́ви от все́х бе́д рабы́ Твоя́, и всегда́ я́ко ми́лостив, испо́лни во благи́х жела́ние все́х на́с, приле́жно мо́лимся Ти́, услы́ши и поми́луй.

Я́коже ны́не ми́лостивно услы́шал еси́ моли́твы рабо́в Твои́х, Го́споди, и яви́л еси́ на ни́х благоутро́бие человеколю́бия Твоего́, си́це и в пре́дняя не презира́я, испо́лни во сла́ву Твою́ вся́ блага́я хоте́ния ве́рных Твои́х, и яви́ все́м на́м бога́тую ми́лость Твою́, вся́ на́м согреше́ния презира́я: мо́лимся Ти́, услы́ши и поми́луй.

Благоприя́тно, я́ко кади́ло благово́нное и я́ко ту́чная всесожже́ния, да бу́дет, Всеблаги́й Влады́ко, благодаре́ние сие́ на́ше пред вели́чеством сла́вы Твоея́, и низпосли́ всегда́ я́ко ще́др рабо́м Твои́м бога́тыя ми́лости и щедро́ты Твоя́, и от все́х сопротивле́ний ви́димых и неви́димых враго́в, Це́рковь Твою́ святу́ю, оби́тель сию́, изба́ви, лю́дем же Твои́м все́м безгре́шное со здра́вием долгоде́нствие, и во все́х доброде́телех преспе́яние да́руй, мо́лим Ти ся, Всеще́дрый Царю́, ми́лостивно услы́ши и ско́ро поми́луй.

Моли́тва:

Го́споди Иису́се Христе́ Бо́же на́ш, Бо́же вся́каго милосе́рдия и щедро́т, Его́же ми́лость безме́рна, и человеколю́бия неизсле́димая пучи́на! Ко Твоему́ вели́честву припа́дающе, со стра́хом и тре́петом я́ко раби́ недосто́йнии, благодаре́ние Твоему́ благоутро́бию о Твои́х благодея́ниих на рабе́х Твои́х [или́: на рабе́ Твое́м, на рабе́ Твое́й] бы́вших, ны́не смире́нно принося́ще, я́ко Го́спода, Влады́ку и Благоде́теля сла́вим, хва́лим, пое́м и велича́ем, и припа́дающе па́ки благодари́м, Твое́ безме́рное и неизрече́нное милосе́рдие смире́нно моля́ще: да я́коже ны́не моле́ния рабо́в Твои́х прия́ти, и ми́лостивно испо́лнити сподо́бил еси́, и во пре́дняя в Твое́й и и́скренняго любви́ и во все́х доброде́телех преспева́ющих, Твоя́ благодея́ния все́х ве́рных Твои́х получи́ти, Це́рковь Твою́ Святу́ю и оби́тель сию́ от вся́каго зла́го обстоя́ния избавля́я, и ми́р и безмяте́жие те́м да́руя, Тебе́ со безнача́льным Твои́м Отце́м, и Пресвяты́м, и Благи́м, и Единосу́щным Твои́м Ду́хом, во Еди́ном Существе́ сла́вимому Бо́гу, всегда́ благодаре́ние приноси́ти, и преблага́я глаго́лати и воспе́ти сподо́биши.

И а́бие велегла́снейше возглаша́ет:

Сла́ва Тебе́ Бо́гу, Благода́телю на́шему, во ве́ки веко́в.

Моле́бное пе́ние о неду́жных мно́гих, или́ о еди́ном

Ектениа́: Поми́луй на́с, Бо́же:

Врачу́ ду́ш и теле́с, со умиле́нием в се́рдце сокруше́нном к Тебе́ припа́даем, и стеня́ще вопие́м Ти́: исцели́ боле́зни, уврачу́й стра́сти ду́ш и теле́с рабо́в Твои́х [или́: души́ и те́ла раба́ Твоего́, рабы́ Твоея́], и́мярек: и прости́ и́м [или́: ему́, е́й], я́ко благосе́рд, вся́ прегреше́ния, во́льная и нево́льная, и ско́ро воздви́гни от одра́ боле́зни, мо́лим Ти ся, услы́ши и поми́луй.

Не хотя́й сме́рти гре́шных, но е́же обрати́тися, и живы́м и́м бы́ти, пощади́ и поми́луй рабо́в Твои́х [или́: раба́ Твоего́, рабу́ Твою́], и́мярек, ми́лостиве: запрети́ боле́зни, отста́ви всю́ стра́сть, и ве́сь неду́г, и простри́ кре́пкую Твою́ ру́ку, и я́коже Иаи́рову дще́рь, от одра́ боле́зни воздви́гни, и здра́вых [или́: здра́ва, здра́ву] сотвори́, мо́лим Ти ся, услы́ши и поми́луй.

О́гненную боле́знь Петро́вой те́щи прикоснове́нием Твои́м исцели́вый, и ны́не лю́те стра́ждущих рабо́в Твои́х [или́: стра́ждущаго раба́ Твоего́, стра́ждущия рабы́ Твоея́], и́мярек, боле́знь благосе́рдием Твои́м исцели́, здра́вие и́м [или́: ему́, е́й] ско́ро подава́я, приле́жно мо́лим Ти ся, исто́чниче цельба́м, услы́ши и поми́луй.

Езеки́ины сле́зы, Манасси́ино и Ниневи́тян покая́ние, и Дави́дово испове́дание прие́мый и ско́ро те́х поми́ловавый: и на́ша во умиле́нии приноси́мыя Ти́ мольбы́ приими́, Всеблаги́й Царю́, и я́ко ще́др поми́луй лю́те боля́щих рабо́в Твои́х [или́: боля́щаго раба́ Твоего́, боля́щую рабу́ Твою́], и́мярек, здра́вие и́м [или́: ему́, е́й] да́руя, со слеза́ми мо́лим Ти ся, исто́чниче жи́зни и безсме́ртия, услы́ши и ско́ро поми́луй.

Моли́тва:

Влады́ко Вседержи́телю, Святы́й Царю́, наказу́яй и не умерщвля́яй, утвержда́яй низпа́дающия, и возводя́й низве́рженныя, теле́сныя челове́ков ско́рби исправля́яй, мо́лимся Тебе́, Бо́же на́ш, рабо́в Твои́х [или́: раба́ Твоего́, рабу́ Твою́], и́мярек, немощству́ющих [или́: немощству́юща, немощству́ющу] посети́ ми́лостию Твое́ю, прости́ и́м [или́: ему́, е́й] вся́кое согреше́ние во́льное и нево́льное. Е́й, Го́споди, враче́бную Твою́ си́лу с Небесе́ низпосли́, прикосни́ся телеси́, угаси́ огне́вицу, укроти́ стра́сть и вся́кую не́мощь тая́щуюся: бу́ди вра́чь рабо́в Твои́х [или́: раба́ Твоего́, рабы́ Твоея́], и́мярек, воздви́гни и́х [или́: его́, ю́] от одра́ боле́зненнаго, и от ло́жа озлобле́ния це́лых и всесоверше́нных [или́: це́ла и всесоверше́нна, це́лу и всесоверше́нну], да́руй и́х [или́: его́, ю́] Це́ркви Твое́й благоугожда́ющих и творя́щих [или́: благоугожда́юща и творя́ща, благоугожда́ющу и творя́щу] во́лю Твою́. Твое́ бо е́сть, е́же ми́ловати и спаса́ти ны́, Бо́же на́ш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Чи́н благослове́ния в пу́ть

Ектениа́: Поми́луй на́с, Бо́же:

Стопы́ челове́ческия исправля́яй, Го́споди, при́зри ми́лостивно на рабы́ Твоя́ [или́: на раба́ Твоего́, рабу́ Твою́], и́мярек, и прости́в и́м [или́: ему́, е́й] вся́кое прегреше́ние, во́льное же и нево́льное, благослови́ благо́е наме́рение сове́та и́х [или́: его́, ея́], и исхо́ды и вхо́ды со путьше́ствием испра́ви, приле́жно мо́лим Ти ся, услы́ши и поми́луй.

Ио́сифа от озлобле́ния бра́тии его́ пресла́вно свободи́вый, Го́споди, и во Еги́пет того́ наста́вивый, и благослове́нием Твоея́ бла́гости во все́м благополу́чна сотвори́вый: и си́х рабо́в Твои́х [или́: сего́ раба́ Твоего́, сию́ рабу́ Твою́] путьше́ствовати хотя́щих [или́: хотя́ща, хотя́щу] благослови́, и ше́ствие и́х безмяте́жно и благополу́чно сотвори́, мо́лим Ти ся, услы́ши и поми́луй.

Луце́ и Клео́пе во Еммау́с спутьше́ствовавый, и ве́село во Иерусали́м возврати́тися твои́м пресла́вным позна́нием сотвори́вый, спутьше́ствуй Твое́ю благода́тию и Боже́ственным благослове́нием и ны́не рабо́м Твои́м си́м [или́: рабу́ Твоему́ сему́, рабе́ Твое́й се́й], на́ми Тебе́ приле́жно моля́щимся [или́: моля́щемуся, моля́щейся], и во вся́ком де́ле бла́зе, к сла́ве Пресвята́го Твоего́ и́мени благопоспеши́, во здра́вии и благополу́чии соблюда́я и возвраща́я во вре́мя благоподо́бно, я́ко всеще́дрому благоде́телю мо́лим Ти ся, ско́ро услы́ши и ми́лостивно поми́луй.

Моли́тва:

Го́споди Иису́се Христе́ Бо́же на́ш, и́стинный и живы́й путю́, состра́нствовати мни́мому Твоему́ отцу́ Ио́сифу, и пречи́стой Ти́ Де́ве Ма́тери, во Еги́пет изво́ливый, и Луце́ и Клео́пе во Еммау́с спутьше́ствовавый: и ны́не смире́нно мо́лим тя́, Влады́ко Пресвяты́й, и рабо́м Твои́м си́м [или́: рабу́ Твоему́ сему́, рабе́ Твое́й се́й] Твое́ю благода́тию спутьше́ствуй. И я́коже рабу́ Твоему́ Тови́и, А́нгела Храни́теля и наста́вника посли́, сохраня́юща и избавля́юща и́х [или́: его́, ю́] от вся́каго зла́го обстоя́ния ви́димых и неви́димых враго́в, и ко исполне́нию за́поведей Твои́х наставля́юща, ми́рно же и благополу́чно и здра́во препровожда́юща, и па́ки це́ло и безмяте́жно возвраща́юща; и да́ждь и́м [или́: ему́, е́й] все́ благо́е свое́ наме́рение ко благоугожде́нию Твоему́ благополу́чно в сла́ву Твою́ испо́лнити. Твое́ бо е́сть, е́же ми́ловати и спаса́ти на́с, и Тебе́ сла́ву возсыла́ем, со Безнача́льным Твои́м Отце́м, и со Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в. Ами́нь.

Моле́бное пе́ние о призыва́нии по́мощи Свята́го Ду́ха пред нача́лом вся́каго до́браго де́ла

Ектениа́: Поми́луй на́с, Бо́же:

При́зри, Человеколю́бче, ми́лостивым Твои́м о́ком на рабы́ Твоя́ [или́: на раба́ Твоего́, на рабу́ Твою́], и́мярек, к Твоему́ благоутро́бию ве́рою припа́дающия [или́: припа́дающаго, припа́дающую], и услы́шав моле́ния и́х [или́: его́, ея́], благо́е наме́рение и де́ло и́х [или́: его́, ея́] благослови́, и благополу́чно нача́ти и спе́шно кроме́ вся́каго препя́тия во сла́ву Твою́ соверши́ти, я́ко всеси́льному Царю́ мо́лим Ти ся, услы́ши и поми́луй.

Во все́м поспе́шествуяй все́м во благо́е, Го́споди, ми́лостивно и рабо́м Твои́м [или́: рабу́ Твоему́, рабе́ Твое́й], и́мярек, поспе́шествуй, Спа́се, и во благополу́чное соверше́ние де́лу и́х [или́: его́, ея́] спе́шно произвести́ся, благослови́, мо́лим Ти ся, всемоги́й Влады́ко, услы́ши и поми́луй.

А́нгела Твоего́ Храни́теля приста́ви де́лу сему́, благоуве́тливе Го́споди, и е́же воспяти́ти вся́ препя́тия ви́димых и неви́димых враго́в, поспе́шство же во все́м ко благополу́чному соверше́нию де́лающим сотвори́ти, мо́лим Ти ся, преблаги́й Спа́се, услы́ши и поми́луй.

Во сла́ву Твою́ вся́ твори́ти повелева́я, Го́споди, рабо́м Твои́м [или́: рабу́ Твоему́, рабе́ Твое́й], и́мярек, ко Твое́й сла́ве де́ло свое́ начина́ющим [или́: начина́ющу, начина́ющей], благослове́нием Твои́м поспе́шство благополу́чное с дово́льством к соверше́нию пода́ждь, здра́вие и́м [или́: ему́, е́й] со благоде́нствием да́руя, мо́лим Ти ся, вседарови́тый Тво́рче, услы́ши и поми́луй.

Моли́тва:

Го́споди Иису́се Христе́ Бо́же на́ш, приими́ усе́рдное моле́ние на́ше, и благослови́ благо́е наме́рение и де́ло рабо́в Твои́х [или́: раба́ Твоего́, рабы́ Твоея́], и́мярек, е́же благополу́чно нача́ти, и без препя́тия вся́каго ко сла́ве Твое́й соверши́ти. Де́лателем благопоспеши́, и дела́ ру́к испра́ви, и в соверше́ние си́лою Пресвята́го Твоего́ Ду́ха спе́шно произвести́ сотвори́. Твое́ бо е́сть, е́же ми́ловати и спаса́ти ны́, Бо́же на́ш, и Тебе́ сла́ву возсыла́ем, со Безнача́льным Твои́м Отце́м, и Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в. Ами́нь.

Чи́н благослове́ния и освяще́ния надгро́бнаго креста́

Оцифровка и приведение к грамматическим нормам ЦС-языка: протоиерей Николай Диваков, Людоговский Ф. Б.

Иере́й во епитрахи́ль и фело́нь оде́ян зря́ на восто́к и крестообра́зно покади́в но́вый кре́ст, начина́ет:

Благослове́н Бо́г на́ш:

Та́же тропа́рь Кресту́, и конда́к его́, гла́с 4:

Вознесы́йся на кре́ст во́лею:

Посе́м чте́т моли́тву сию́ ре́к:

Го́споду помо́лимся.

Го́споди Бо́же сла́вы, О́тче Вседержи́телю, Бо́же Савао́ф, и́же дре́вом живота́ посреде́ рая́ су́щаго прообрази́л еси́ Животво́рный Кре́ст, на не́мже возлю́бленный Тво́й Сы́н пригвожде́н бы́в у́мре, и сме́ртию сме́рть умертви́, и Его́же Це́ркви Свое́й ору́жие непобеди́мое, ве́ры утвержде́ние, кре́пкое спасе́ния упова́ние, и живота́ получе́ние дарова́; те́мже мы́ раби́ Твои́ толи́кия благода́ти ту́не сподо́бльшеся и благода́рни су́ще, сла́ву и благодаре́ние, и смире́нное поклоне́ние в мольбу́ Твоему́ вели́честву прино́сим; посли́ ны́не благода́ть Пресвята́го Своего́ Ду́ха, ми́лостивно призира́я на зна́мение сие́ кре́стное, гро́б усо́пшаго зде́ лежа́щаго ве́рнаго раба́ Твоего́ (или́ усо́пшия зде́ лежа́щия ве́рныя рабы́ Твоея́) и́мярек, зна́менующее, и благослови́ и освяти́ е́, и да́ждь ему́ бы́ти зна́мением стра́шным и кре́пким на вся́ враги́ ви́димыя и неви́димыя, прогна́ние же и отраже́ние все́х ко́зней и прило́гов диа́вольских; Твои́м лю́дем же да бу́дет покро́в держа́вен, ве́ры утвержде́ние, наде́жды подкрепле́ние, во бране́х побе́да и во все́х доброде́телех преспе́яние, и все́м пред си́м зна́мением Тебе́ кла́няющимся и мольбы́ принося́щим ми́лостивен послу́шатель, и все́х я́же ко спасе́нию проше́ний бога́тый пода́тель бу́ди. И я́коже Кресто́м ми́р от грехо́внаго осужде́ния свободи́л еси́, си́це и рабы́ Твоя́, сие́ кре́стное зна́мение ве́рно соверши́вшия и зде́ любве́ ра́ди я́же к ме́ртвым и усо́пшим зде́ лежа́щим, воздви́гшия, си́лою Креста́ возлю́бленнаго Сы́на Твоего́, всегда́ победи́тели бы́ти греха́ яви́, и вся́ земна́я и Небе́сная Твоя́ блага́я и́м да́руй, и Кресто́м всегда́ к благо́му все́х ве́рных наставля́я, к восприя́тию Небе́снаго венца́ приведи́. Ты́ бо еси́ освяще́ния исто́чник, и все́х благи́х бога́тый пода́тель, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

Кропя́ три́жды свяще́нною водо́ю кре́ст, глаго́лет три́жды:

Освяща́ется кре́стное сие́ зна́мение благода́тию Пресвята́го Ду́ха, окропле́нием воды́ сея́ свяще́нныя, во и́мя отца́, и Сы́на, и свята́го ду́ха, ами́нь.

И а́бие твори́т отпу́ст:

И́же на Дре́ве Кре́стнем спасе́ния на́шего ра́ди распны́йся и сме́рть подъя́ти изво́ливый, и тридне́вно из ме́ртвых воскресы́й, Христо́с и́стинный Бо́г на́ш:

После́дование освяще́ния часо́вни

Компиляция по различным печатным источникам, оцифровка и приведение к грамматическим нормам ЦС-языка: протоиерей Николай Диваков, Дмитрий Михалин, Анатолий Алексеевич Матвеев.

Поставля́ется столе́ц, па́волокою покрове́нный, и вода́ в сосу́де: архиере́й же, держя́ в руце́ честны́й кре́ст с василки́, и Ева́нглие, предъиду́щу ему́ диа́кону с кади́льницею, и двема́ свещено́сцема со свеща́ми. Прише́д же пред столе́ц, полага́ет на не́м кре́ст и Ева́нглие, и взе́м кади́льницу кади́т во́ду крестообра́зно, и начина́ет обы́чно.

Протодиа́кон: Благослови́, преосвяще́ннейший влады́ко.

Архиере́й: Благослове́н Бо́г на́ш: Ли́к: Ами́нь. И пою́т: Царю́ Небе́сный:

Протодиа́кон: Бо́г Госпо́дь, и яви́ся на́м: три́жды.

И тропа́рь хра́ма.

Сла́ва, и ны́не: обновле́ния, гла́с 4:

Я́коже вы́шния тве́рди благоле́пие, и ни́жнюю споказа́л еси́ красоту́ свята́го селе́ния сла́вы Твоея́ Го́споди, утверди́ сие́ во ве́к ве́ка, и приими́ на́ша в не́м непреста́нно приноси́мая Тебе́ моле́ния Богоро́дицею, все́х животе́ и воскре́сние.

Кадя́щу же архиере́ю хра́м, пое́т ли́к тропари́ сия́, гла́с 6:

Е́же ра́дуйся А́нгелом прии́мшая, и ро́ждшая Зижди́теля Твоего́, Де́во, спаса́й тя́ велича́ющия.

Воспева́ем Сы́на Твоего́ Богоро́дице, и вопие́м: Пречи́стая Влады́чице, вся́кия беды́ изба́ви рабы́ Твоя́.

Царе́м, проро́ком и апо́столом, и му́чеником Ты́ еси́ похвала́, и Предста́тельница ми́ру, Всенепоро́чная.

Неду́гов, и вся́ких боле́зней, и бе́д на́с свободи́, к свяще́нному Твоему́ покро́ву прибега́ющих.

Сла́ва: Отца́ и Сы́на славосло́вим, и Ду́ха Свята́го, глаго́люще: Тро́ице Свята́я, спаси́ ду́ши на́ша.

И ны́не: Неизрече́нно в после́дняя заче́ншая, и ро́ждшая созда́теля Твоего́, Де́во, спаса́й Тя́ велича́ющия.

Та́же: Милосе́рдия две́ри отве́рзи на́м благослове́нная Богоро́дице, наде́ющиися на Тя́ да не поги́бнем, но да изба́вимся Тобо́ю от бе́д: Ты́ бо еси́ спасе́ние ро́да христиа́нскаго.

Та́же, протодиа́кон: Го́споду помо́лимся.

Возгла́с: Я́ко свя́т еси́ Бо́же на́ш:

Ли́к: Ами́нь.

Та́же настоя́щия тропари́, гла́с 6:

Ны́не наста́ вре́мя все́х освяща́ющее, и пра́ведный на́с жде́т Судия́, но обрати́ся душе́ к покая́нию, я́ко блудни́ца зову́щи со слеза́ми: Го́споди, поми́луй мя́.

Вода́ми одожди́вый Христе́ исто́чник исцеле́ний, во всечестне́м хра́ме Де́вы дне́сь, Твоего́ благослове́ния окропле́нием, отгоня́еши неду́ги немощству́ющих, Врачу́ ду́ш и теле́с на́ших.

Де́ва родила́ еси́ неискусобра́чная и Де́во пребыла́ еси́ Ма́ти безневе́стная, Богоро́дице Мари́е, Христа́ Бо́га на́шего моли́ спасти́ся на́м.

Пресвята́я Богоро́дице Де́во, ру́к на́ших дела́ испра́ви, и проще́ние прегреше́ний на́ших испроси́, внегда́ пе́ти на́м а́нгельское пе́ние:

Святы́й Бо́же, Святы́й Кре́пкий, Святы́й Безсме́ртный, поми́луй на́с.

Отпе́вше же по обы́чаю, и по трисвято́м протодиа́кон глаго́лет: Во́нмем.

Архиере́й: Ми́р все́м.

Ли́к: И ду́хови твоему́.

Чте́ц, проки́мен, гла́с 3:

Госпо́дь просвеще́ние мое́, и Спаси́тель мо́й, кого́ убою́ся?

Сти́х: Госпо́дь защи́титель живота́ моего́, от кого́ устрашу́ся?

Апо́стол к Евре́ом, зача́ло 306.

Бра́тие, святя́й и освяща́емии, от Еди́наго вси́: ея́же ра́ди вины́ не стыди́тся бра́тию нарица́ти и́х, глаго́ля: Возвещу́ и́мя Твое́ бра́тии Мое́й, посреде́ це́ркве воспою́ Тя́. И па́ки: А́з бу́ду наде́яся На́нь. И па́ки: се́ А́з и де́ти, я́же Ми́ да́л е́сть Бо́г. Поне́же у́бо де́ти приобщи́шася пло́ти и кро́ви, и То́й прии́скренне приобщи́ся те́хже, да сме́ртию упраздни́т иму́щаго держа́ву сме́рти, си́речь диа́вола; И изба́вит си́х ели́цы стра́хом сме́рти чрез все́ житие́ пови́нни бе́ша рабо́те. Не от А́нгел у́бо когда́ прие́млет, но от се́мене Авраа́мова прие́млет. Отню́дуже до́лжен бе́ по всему́ подо́битися бра́тии, да ми́лостив бу́дет и ве́рен первосвяще́нник, я́же к Бо́гу, во е́же очи́стити грехи́ людски́я. В не́мже бо пострада́ Са́м, искуше́н бы́в, мо́жет и искуша́емым помощи́.

Архиере́й: Ми́р ти́.

Аллилу́иа. Гла́с 6.

Сти́х 1: Отры́гну се́рдце мое́ сло́во бла́го.

Сти́х 2: Глаго́лю а́з дела́ моя́ Царе́ви.

Ева́нглие от Иоа́нна, зача́ло 14:

Во вре́мя о́но, взы́де Иису́с во Иерусали́м. Е́сть же во Иерусали́мех на О́вчей купе́ли, я́же глаго́лется евре́йски Вифесда́, пя́ть притво́р иму́щи. В те́х слежа́ше мно́жество боля́щих, слепы́х, хромы́х, сухи́х, ча́ющих движе́ния воды́. А́нгел бо Госпо́день на вся́ко ле́то схожда́ше в купе́ль, и возмуща́ше во́ду; и и́же пе́рвее вла́зяше по возмуще́нии воды́, здра́в быва́ше, яце́мже неду́гом одержи́мь быва́ше.

Та́же протодиа́кон ектению́:

Ми́ром Го́споду помо́лимся.

О свы́шнем ми́ре:

О ми́ре всего́ ми́ра:

О новосозда́нней часо́вне се́й:

О вели́ком господи́не и отце́ на́шем:

О богохрани́мей стране́ на́шей, власте́х, во́инстве и наро́де ея́, Го́споду помо́лимся.

(А́ще во учи́лищи: О зде́ нача́льствующих, уча́щих и уча́щихся):

(А́ще во враче́бнице: О все́х тружда́ющихся и стра́ждущих во враче́бнице се́й):

О все́х, во сла́ву Бо́жию потруди́вшихся в возсозда́нии и благоле́пнем украше́нии святы́я часо́вни сея́:

О гра́де се́м:

О благорастворе́нии возду́хов:

О пла́вающих, путеше́ствующих:

О е́же освяти́тися вода́м си́м, си́лою и де́йствием, и наи́тием Свята́го Ду́ха:

О е́же снизходи́ти на во́ды сия́ очисти́тельному Пресу́щныя Тро́ицы де́йству:

О е́же бы́ти воде́ се́й цели́тельней ду́ш и теле́с, и вся́кия сопроти́вныя си́лы отгна́тельней:

О е́же низпосла́ти Го́споду Бо́гу благослове́ние Иорда́ново, и освяти́ти во́ды сия́:

О все́х тре́бующих от Бо́га по́мощи и заступле́ния:

О е́же просвети́тися на́м просвеще́нием ра́зума, Единосу́щною Тро́ицею:

Я́ко да Госпо́дь Бо́г на́ш вознизпо́слет на́м благода́ть Пресвята́го Своего́ Ду́ха ко освяще́нию возсозда́ннаго хра́ма сего́:

О изба́витися на́м от вся́кия ско́рби:

Заступи́, спаси́, поми́луй:

Пресвяту́ю, Пречи́стую:

Ли́к: Тебе́ Го́споди.

Возгла́с: Я́ко подоба́ет Тебе́ вся́кая сла́ва:

Та́же моли́тву сию́:

Бо́же великоимени́тый, творя́й чудеса́, и́мже не́сть числа́! Прииди́ ны́не к моля́щим Тя́ рабо́м Твои́м, Влады́ко, и посли́ Ду́ха Твоего́ Свята́го, и освяти́ во́ду сию́ [сия́ глаго́ля, благословля́ет во́ду десни́цею три́жды]; и да́ждь пию́щим от нея́ и прие́млющим и кропя́щимся е́ю рабо́м Твои́м премене́ние страсте́м, оставле́ние грехо́в, боле́знем исцеле́ние, и свобожде́ние от вся́каго зла́, утвержде́ние же и освяще́ние домо́м, и обновля́емей часо́вне се́й. Я́ко благослови́ся и просла́вися пречестно́е и великоле́пое и́мя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в.

Ли́к: Ами́нь.

Архиере́й: Ми́р все́м.

Ли́к: И ду́хови твоему́.

Протодиа́кон: Главы́ ва́ша Го́сподеви приклони́те.

Ли́к: Тебе́ Го́споди.

Архиере́й: же чте́т та́йно моли́тву сию́:

Приклони́ Го́споди у́хо Твое́, и услы́ши ны́, и́же во Иорда́не крести́тися изво́ливый, и освяти́вый во́ды; и благослови́ все́х на́с, и́же преклоне́нием своея́ вы́и, назна́менающих рабо́тное воображе́ние; и сподо́би на́с испо́лнитися освяще́ния Твоего́, воды́ сея́ причаще́нием; и да бу́дет на́м Го́споди, во здра́вие души́ и те́ла.

Возгла́с: Ты́ бо еси́ освяще́ние на́ше, и Тебе́ сла́ву и благодаре́ние и поклоне́ние возсыла́ем, со безнача́льным Твои́м Отце́м, и Всесвяты́м, Благи́м, и Животворя́щим Твои́м Ду́хом, ны́не и при́сно, и во ве́ки веко́в.

Ли́к: Ами́нь.

Та́же взе́м честны́й кре́ст, благословля́ет во́ды три́жды, крестообра́зно низводя́ и возводя́ и́ пра́во, и поя́ настоя́щий тропа́рь, гла́с 1, три́жды:

Спаси́ Го́споди лю́ди Твоя́, и благослови́ достоя́ние Твое́, побе́ды на сопроти́вныя да́руя, и Твое́ сохраня́я кресто́м Твои́м жи́тельство.

И а́бие протодиа́кон: Го́споду помо́лимся.

Архиере́й же чте́т моли́тву:

Го́споди небесе́ и земли́, и́же Святу́ю Твою́ Це́рковь неизрече́нною прему́дростию основа́вый, и во о́браз А́нгельскаго на Небеси́ служе́ния, свяще́нничества чи́н на земли́ соста́вивый. При́зри ны́не, Влады́ко великода́рне, ми́лостивым Твои́м о́ком на ны́, недосто́йныя рабы́ Твоя́, во умиле́нии серде́ц соверша́ющия освяще́ние часо́вни сея́ в че́сть (и́мярек, его́же часо́вня), в сла́вном благоле́пии возсозда́нныя к сла́ве Твое́й и ко утеше́нию люде́й правосла́вных гра́да на́шего (а́ще во учи́лищи: и все́х зде́ нача́льствующих, уча́щих и уча́щихся: а́ще во враче́бнице: и все́х тружда́ющихся и стра́ждущих во враче́бнице се́й). Низпосли́ Пресвята́го Твоего́ Ду́ха и освяти́ часо́вню сию́ и утверди́ ю́ до сконча́ния ве́ка це́лу и непоколеби́му и сподо́би в не́й моли́твы и славосло́вия всегда́ Тебе́ приноси́ти о все́х лю́дех Твои́х. Все́м потруди́вшимся в сооруже́нии часо́вни сея́ оставле́ние согреше́ний пода́ждь; да́руй и́м (а́ще во учи́лищи: и все́м зде́ нача́льствующим, уча́щим и уча́щимся; а́ще во враче́бнице: и все́м тружда́ющимся и стра́ждущим во враче́бнице се́й) вся́ я́же ко спасе́нию проше́ния, здра́вие же и спасе́ние, и во все́м благо́е поспеше́ние, да неосужде́нно покло́нятся Тебе́ Еди́ному И́стинному Бо́гу, и его́же посла́л еси́ Иису́су Христу́, моли́твами Богоро́дицы, [и его́же е́сть часо́вня] и все́х святы́х твои́х, ами́нь. Я́ко свя́т еси́ Бо́же на́ш, и во святы́х почива́еши, и Тебе́ сла́ву возсыла́ем, Отцу́ и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

Та́же кропи́т архиере́й часо́вню свяще́нною водо́ю глаго́люще:

Освяща́ется часо́вня сия́ окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь.

Кли́рицы же кропя́т ю́ отвне́.

Лю́дие же пою́т настоя́щий тропа́рь, гла́с 4:

Спаси́ Го́споди лю́ди Твоя́, и благослови́ достоя́ние Твое́, побе́ды на сопроти́вныя да́руя, и Твое́ сохраня́я кресто́м Твои́м жи́тельство.

Посе́м:

Протодиа́кон: Прему́дрость.

Архиере́й: Пресвята́я Богоро́дице, спаси́ на́с.

Ли́к: Честне́йшую херуви́м:

Архиере́й: Сла́ва Тебе́ Христе́ Бо́же, упова́ние на́ше, сла́ва Тебе́.

Ли́к: Сла́ва, и ны́не: Го́споди поми́луй, три́жды. Преосвяще́ннейший влады́ко благослови́.

Архиере́й твори́т отпу́ст по обы́чаю.

Протодиа́кон: Вели́кому господи́ну и отцу́ на́шему Святе́йшему Патриа́рху Моско́вскому и всея́ Руси́ [и́мярек] со все́ю его́ богоспаса́емою всеросси́йскою па́ствою, и господи́ну на́шему Преосвяще́ннейшему митрополи́ту (или́ архиепи́скопу, или́ епи́скопу) [и́мярек, его́же о́бласть], богохрани́мей стране́ на́шей, власте́м, во́инству и наро́ду ея́, (а́ще во учи́лищи: и все́м зде́ нача́льствующим, уча́щим и уча́щимся; а́ще во враче́бнице: и все́м тружда́ющимся и стра́ждущим во враче́бнице се́й), все́м потруди́вшимся в возсозда́нии и благоле́пнем украше́нии часо́вни сея́ и все́м правосла́вным христиа́ном мно́гая ле́та.

И пое́т ли́к: Мно́гая ле́та, три́жды.

После́дование освяще́ния часо́вни. Краткий чин

Компиляция по различным печатным источникам, оцифровка и приведение к грамматическим нормам ЦС-языка: протоиерей Николай Диваков, Дмитрий Михалин, Анатолий Алексеевич Матвеев.

Поставля́ется столе́ц, па́волокою покрове́нный, и освяще́нная вода́ в сосу́де: архиере́й же, держа́ в руце́ честны́й кре́ст с василки́, и Ева́нглие, предъиду́щу ему́ диа́кону с кади́льницею, и двема́ свещено́сцема со свеща́ми. Прише́д же пред столе́ц, полага́ет на не́м кре́ст и Ева́нглие, и начина́ет обы́чно.

Протодиа́кон: Благослови́, преосвяще́ннейший влады́ко.

Архиере́й: Благослове́н Бо́г на́ш: Ли́к: Ами́нь. И пою́т: Царю́ Небе́сный:

Протодиа́кон: Бо́г Госпо́дь, и яви́ся на́м: три́жды.

И тропа́рь хра́ма.

Сла́ва, и ны́не: обновле́ния, гла́с 4:

Я́коже вы́шния тве́рди благоле́пие, и ни́жнюю споказа́л еси́ красоту́ свята́го селе́ния сла́вы Твоея́ Го́споди, утверди́ сие́ во ве́к ве́ка, и приими́ на́ша в не́м непреста́нно приноси́мая Тебе́ моле́ния Богоро́дицею, все́х животе́ и воскре́сние.

Протодиа́кон: Поми́луй на́с Бо́же, по вели́цей ми́лости Твое́й, мо́лим Ти́ ся́, услы́ши, и поми́луй.

Ли́к: Го́споди поми́луй, три́жды.

Еще́ мо́лимся о вели́ком господи́не и отце́ на́шем Святе́йшем Патриа́рсе (и́мярек), и о господи́не на́шем Преосвяще́ннейшем митрополи́те (или́ архиепи́скопе, или́ епи́скопе) (и́мярек), и все́й во Христе́ бра́тии на́шей.

Ли́к: Го́споди поми́луй, три́жды.

Еще́ мо́лимся о богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Ли́к: Го́споди поми́луй, три́жды.

Еще́ мо́лимся о градонача́льнице и прави́тельстве гра́да на́шего и о все́х во сла́ву Бо́жию потруди́вшихся в созида́нии и благоле́пнем украше́нии святы́я часо́вни сея́.

Ли́к: Го́споди поми́луй, три́жды.

Возгла́с: Услы́ши ны́ Бо́же Спаси́телю на́ш, упова́ние все́х конце́в земли́ и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны́.

Ми́лостив бо и человеколю́бец Бо́г еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

И а́бие протодиа́кон: Го́споду помо́лимся.

Архиере́й же чте́т моли́тву:

Го́споди Небесе́ и земли́, и́же Святу́ю Твою́ Це́рковь неизрече́нною прему́дростию основа́вый, и во о́браз А́нгельскаго на Небеси́ служе́ния, свяще́нничества чи́н на земли́ соста́вивый. При́зри ны́не, Влады́ко великода́рне, ми́лостивым Твои́м о́ком на ны́, недосто́йныя рабы́ Твоя́, во умиле́нии серде́ц соверша́ющия освяще́ние часо́вни сея́, в сла́внем благоле́пии возсозда́нныя к сла́ве Твое́й и ко утеше́нию люде́й правосла́вных гра́да на́шего (а́ще во учи́лищи: и все́х зде́ нача́льствующих, уча́щих и уча́щихся: а́ще во враче́бнице: и все́х тружда́ющихся и стра́ждущих во враче́бнице се́й) и все́х зде́ предстоя́щих и моля́щихся. Вонми́ гла́су моле́ния на́шего и ниспосли́ Пресвята́го Твоего́ и покланя́емаго и всеси́льнаго Ду́ха и освяти́ часо́вню сию́ в че́сть: (и́мярек). Испо́лни, Влады́ко многоми́лостиве, часо́вню сию́, Твоея́ Боже́ственныя сла́вы, святы́ни и благода́ти. Утверди́ ю́ до сконча́ния ве́ка це́лу и непоколеби́му и сподо́би в не́й моли́твы и славосло́вия всегда́ Тебе́ приноси́ти о все́х лю́дех твои́х. Созда́вшим же и благоукраси́вшим часо́вню сию́ оставле́ние согреше́ний пода́ждь: да́руй и́м (а́ще во учи́лищи: и все́м зде́ нача́льствующим, уча́щим и уча́щимся; а́ще во враче́бнице: и все́м тружда́ющимся и стра́ждущим во враче́бнице се́й) и все́м приходя́щим в ню́ вся́ я́же ко спасе́нию проше́ния, здра́вие же и спасе́ние, и во все́м благо́е поспеше́ние, да неосужде́нно покло́нятся Тебе́ Еди́ному И́стинному Бо́гу, и его́же посла́л еси́ Иису́су Христу́, моли́твами Богоро́дицы, [и его́же е́сть часо́вня] и все́х святы́х твои́х, ами́нь.

Я́ко свя́т еси́ Бо́же на́ш, и во святы́х почива́еши, и Тебе́ сла́ву возсыла́ем, Отцу́ и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

Та́же кропи́т архиере́й часо́вню свяще́нною водо́ю глаго́люще:

Освяща́ется часо́вня сия́ окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь.

Кли́рицы же кропя́т ю́ отвне́.

Лю́дие же пою́т настоя́щий тропа́рь, гла́с 4:

Спаси́ Го́споди лю́ди Твоя́, и благослови́ достоя́ние Твое́, побе́ды на сопроти́вныя да́руя, и Твое́ сохраня́я Кресто́м Твои́м жи́тельство.

Посе́м:

Протодиа́кон: Прему́дрость.

Архиере́й: Пресвята́я Богоро́дице, спаси́ на́с.

Ли́к: Честне́йшую Херуви́м:

Архиере́й: Сла́ва Тебе́ Христе́ Бо́же, упова́ние на́ше, сла́ва Тебе́.

Ли́к: Сла́ва, и ны́не: Го́споди поми́луй, три́жды. Преосвяще́ннейший влады́ко благослови́.

Архиере́й твори́т отпу́ст по обы́чаю.

Протодиа́кон: Вели́кому господи́ну и отцу́ на́шему Святе́йшему Патриа́рху Моско́вскому и всея́ Руси́ (и́мярек) со все́ю его́ богоспаса́емою всеросси́йскою па́ствою, и господи́ну на́шему Преосвяще́ннейшему митрополи́ту (или́ архиепи́скопу, или́ епи́скопу) [и́мярек, его́же о́бласть], богохрани́мей стране́ на́шей, власте́м, во́инству и наро́ду ея́ градонача́льнику и прави́тельству гра́да на́шего, (а́ще во учи́лищи: и все́м зде́ нача́льствующим, уча́щим и уча́щимся: а́ще во враче́бнице: и все́м тружда́ющимся и стра́ждущим во враче́бнице се́й), все́м потруди́вшимся в возсозда́нии и благоле́пнем украше́нии часо́вни сея́ и все́м правосла́вным христиа́ном мно́гая ле́та.

И пое́т ли́к: Мно́гая ле́та, три́жды.

Моле́бное пе́ние о неду́жных мно́гих, или́ о еди́ном

Оцифровка и приведение к грамматическим нормам ЦС-языка: протоиерей Николай Диваков, Людоговский Ф. Б.

Иере́й начина́ет:

Благослове́н Бо́г на́ш: Ли́к: Ами́нь. Сла́ва Тебе́, Бо́же на́ш, сла́ва Тебе́. Царю́ Небе́сный: Трисвято́е по О́тче на́ш. Го́споди, поми́луй, 12. Сла́ва, и ны́не: Прииди́те, поклони́мся: три́жды.

И псало́м 70:

На Тя́, Го́споди, упова́х, да не постыжу́ся в ве́к. Пра́вдою Твое́ю изба́ви мя́ и изми́ мя; приклони́ ко мне́ у́хо Твое́ и спаси́ мя. Бу́ди ми́ в Бо́га защи́тителя и в ме́сто кре́пко спасти́ мя; я́ко утвержде́ние мое́ и прибе́жище мое́ еси́ ты́. Бо́же мо́й, изба́ви мя́ из руки́ гре́шнаго, из руки́ законопресту́пнаго и оби́дящаго; я́ко Ты́ еси́ терпе́ние мое́, Го́споди, Го́споди, упова́ние мое́ от ю́ности моея́. В Тебе́ утверди́хся от утро́бы, от чре́ва ма́тере моея́ Ты́ еси́ мо́й покрови́тель; о Тебе́ пе́ние мое́ вы́ну. Я́ко чу́до бы́х мно́гим; и Ты́ помо́щник мо́й кре́пок. Да испо́лнятся уста́ моя́ хвале́ния, я́ко да воспою́ сла́ву Твою́, ве́сь де́нь великоле́пие Твое́. Не отве́ржи мене́ во вре́мя ста́рости; внегда́ оскудева́ти кре́пости мое́й, не оста́ви мене́. Я́ко ре́ша врази́ мои́ мне́, и стрегу́щии ду́шу мою́ совеща́ша вку́пе, глаго́люще: Бо́г оста́вил е́сть его́, пожени́те и ими́те его́, я́ко не́сть избавля́яй. Бо́же мо́й, не удали́ся от Мене́; Бо́же мо́й, в по́мощь мою́ вонми́. Да постыдя́тся и исче́знут оклевета́ющии ду́шу мою́, да облеку́тся в сту́д и сра́м и́щущии зла́я мне́. А́з же всегда́ возъупова́ю на Тя́, и приложу́ на вся́ку похвалу́ Твою́. Уста́ моя́ возвестя́т пра́вду Твою́, ве́сь де́нь спасе́ние Твое́, я́ко не позна́х кни́жная. Вни́ду в си́ле Госпо́дни; Го́споди, помяну́ пра́вду Тебе́ еди́наго. Бо́же мо́й, И́мже научи́л мя́ еси́ от ю́ности моея́, и доны́не возвещу́ чудеса́ Твоя́. И да́же до ста́рости и престаре́ния, Бо́же мо́й, не оста́ви мене́, до́ндеже возвещу́ мы́шцу Твою́ ро́ду всему́ гряду́щему, си́лу Твою́ и пра́вду Твою́, Бо́же, да́же до вы́шних, я́же сотвори́л ми́ еси́ вели́чия; Бо́же, кто́ подо́бен Тебе́? Ели́ки яви́л ми́ еси́ ско́рби мно́ги и злы́? И обра́щься оживотвори́л мя́ еси́ и от бе́здн земли́ возве́л мя́ еси́. Умно́жил еси́ на мне́ вели́чествие Твое́, и обра́щься уте́шил мя́ еси́, и от бе́здн земли́ па́ки возве́л мя́ еси́. И́бо а́з испове́мся Тебе́ в лю́дех, Го́споди, в сосу́дех псало́мских и́стину Твою́, Бо́же; воспою́ Тебе́ в гу́слех, святы́й Изра́илев. Возра́дуетеся устне́ мои́, егда́ воспою́ Тебе́, и душа́ моя́, ю́же еси́ изба́вил; еще́ же и язы́к мо́й ве́сь де́нь поучи́тся пра́вде Твое́й, егда́ постыдя́тся и посра́мятся и́щущий зла́я мне́.

Пото́м, а́ще мо́жет, неду́жный чте́т или́ свяще́нник:

Ве́рую во Еди́наго Бо́га Отца́ Вседержи́теля, Творца́ Не́бу и земли́, ви́димым же все́м и неви́димым. И во Еди́наго Го́спода Иису́са Христа́, Сы́на Бо́жия, Единоро́днаго, и́же от Отца́ рожде́ннаго пре́жде все́х ве́к. Све́та от Све́та, Бо́га И́стинна, от Бо́га И́стинна, рожде́нна, не сотворе́нна, единосу́щна Отцу́, И́мже вся́ бы́ша. На́с ра́ди челове́к, и на́шего ра́ди спасе́ния сше́дшаго с Небе́с, и воплоти́вшагося от Ду́ха Свя́та и Мари́и Де́вы, и вочелове́чшася. Распя́таго же за ны́ при Понти́йстем Пила́те, и страда́вша, и погребе́на. И воскре́сшаго в тре́тий де́нь, по Писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во Еди́ну Святу́ю, Собо́рную и Апо́стольскую Це́рковь. Испове́дую Еди́но Креще́ние, во оставле́ние грехо́в. Ча́ю воскре́сния ме́ртвых: И жи́зни бу́дущаго ве́ка, ами́нь.

Та́же ектениа́:

Ми́ром Го́споду помо́лимся.

О свы́шнем ми́ре:

О ми́ре всего́ ми́ра:

О до́ме се́м и живу́щих в не́м:

О е́же прости́ти вся́кое прегреше́ние во́льное и нево́льное рабо́в Свои́х (или́ раба́ Своего́) и́мярек, и ми́лостиву бы́ти и́м (или́ ему́), Го́споду помо́лимся.

О е́же благосе́рдия ра́ди ми́лости Своея́, гре́х ю́ности и неве́дения и́х (или́ его́) не помяну́ти: но ми́лостивно здра́вие и́м (или́ ему́) дарова́ти, Го́споду помо́лимся.

О е́же не презре́ти приле́жная моле́ния рабо́в Свои́х (или́ раба́ своего́), на́ми ны́не моля́щихся (или́ моля́щагося): но ми́лостивно услы́шати и благоуве́тливу, и благопремени́тельну, и человеколюби́ву и́м (или́ ему́) бы́ти и здра́вие пода́ти, Го́споду помо́лимся.

О е́же, я́коже иногда́ разсла́бленнаго сло́вом Боже́ственныя своея́ благода́ти, ско́ро неду́гующих рабо́в Свои́х (или́ неду́гующаго раба́ Своего́) от одра́ боле́зни воздви́гнути, и здра́вых (или́ здра́ва) сотвори́ти, Го́споду помо́лимся.

О е́же посети́ти его́ (или́ ю́) посеще́нием Свята́го Своего́ Ду́ха, и исцели́ти вся́к неду́г, и вся́ку боле́знь в ни́х (или́ в не́й) гнездя́щуюся, Го́споду помо́лимся.

О е́же ми́лостивно, я́коже Ханане́ин услы́шати гла́с, моли́твы на́с недосто́йных рабо́в Свои́х к нему́ вопию́щих: и я́коже тоя́ дще́рь, поми́ловати и исцели́ти больны́х рабо́в Свои́х (или́ больна́го раба́ Своего́) и́мярек, Го́споду помо́лимся.

О изба́витися на́м от вся́кия ско́рби, гне́ва и ну́жды, Го́споду помо́лимся.

Заступи́, спаси́, поми́луй, и сохрани́ на́с Бо́же, Твое́ю благода́тию.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́, и другъдру́га, и ве́сь живо́т на́ш Христу́ Бо́гу предади́м.

Возгла́с: Я́ко Бо́г ми́лости, щедро́т и человеколю́бия еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Ли́к: Ами́нь.

Тропа́рь, гла́с 4:

Ско́рый в заступле́нии Еди́н Сы́й Христе́, ско́рое свы́ше покажи́ посеще́ние стра́ждущим рабо́м Твои́м (или́ стра́ждущему рабу́ Твоему́), и изба́ви от неду́г, и го́рьких боле́зней: воздви́гни во е́же пе́ти Тя́ и сла́вити непреста́нно, моли́твами Богоро́дицы, Еди́не Человеколю́бче.

Конда́к, гла́с 2:

На одре́ боле́зни лежа́щих (или́ лежа́щаго), и сме́ртною ра́ною уя́звленных (или́ уя́звленнаго), я́коже иногда́ воздви́гл еси́ спа́се, Петро́ву те́щу, и разсла́бленнаго на одре́ носи́маго; си́це и ны́не Милосе́рде, стра́ждущих (или́ стра́ждущаго), посети́ и исцели́; Ты́ бо еди́н еси́ неду́ги и боле́зни ро́да на́шего понесы́й, и вся́ моги́й я́ко многоми́лостив.

Проки́мен, гла́с 7:

Поми́луй мя́, Го́споди, я́ко не́мощен е́смь, исцели́ мя́, я́ко смято́шася ко́сти моя́.

Сти́х: Я́ко не́сть в сме́рти помина́яй Тебе́.

Апо́стол Собо́рнаго Посла́ния Иа́ковля (зача́ло 57):

Бра́тие, о́браз приими́те злострада́ния и долготерпе́ния проро́ки, и́же глаго́лаша и́менем Госпо́дним. Се́, блажи́м терпя́щия. Терпе́ние И́овле слы́шасте, и кончи́ну Госпо́дню ви́десте, я́ко многоми́лостив е́сть Госпо́дь и ще́др. Пре́жде же все́х, бра́тие моя́, не клени́теся ни не́бом, ни земле́ю, ни ино́ю ко́ею кля́твою; бу́ди же ва́м е́же е́й, е́й, и е́же ни́, ни́; да не в лицеме́рие впаде́те. Злостра́ждет ли кто́ в ва́с? да моли́тву де́ет; благоду́шствует ли кто́? да пое́т. Боли́т ли кто́ в ва́с, да призове́т пресви́теры церко́вныя, и да моли́тву сотворя́т над ни́м, пома́завше его́ еле́ем во и́мя Госпо́дне; и моли́тва ве́ры спасе́т боля́щаго, и воздви́гнет его́ Госпо́дь; и а́ще грехи́ сотвори́л е́сть, отпу́стятся ему́. Испове́дайте у́бо дру́г дру́гу согреше́ния и моли́теся дру́г за дру́га, я́ко да исцеле́ете: мно́го бо мо́жет моли́тва пра́веднаго поспешеству́ема.

Аллилу́иа гла́са. Сти́х 1: Го́споди, да не я́ростию Твое́ю обличи́ши мене́.

Сти́х 2: Спаси́ мя ра́ди ми́лости Твоея́.

Ева́нглие от Матфе́а (зача́ло 25):

Во вре́мя о́но, вше́дшу Иису́су в Капернау́м, приступи́ к Нему́ со́тник, моля́ Его́, и глаго́ля: Го́споди, о́трок мо́й лежи́т в дому́ разсла́блен, лю́те стражда́. И глаго́ла ему́ Иису́с: А́з прише́д исцелю́ его́. И отвеща́в со́тник, рече́ Ему́: Го́споди, не́смь досто́ин, да под кро́в мо́й вни́деши; но то́кмо рцы́ сло́во, и исцеле́ет о́трок мо́й; и́бо а́з челове́к е́смь под вла́стию, имы́й под собо́ю во́ины; и глаго́лю сему́: иди́, и и́дет; и друго́му: прииди́, и прихо́дит; и рабу́ моему́: сотвори́ сие́, и сотвори́т. Слы́шав же Иису́с, удиви́ся, и рече́ гряду́щим по не́м: ами́нь глаго́лю ва́м; ни во Изра́или толи́ки ве́ры обрето́х. Глаго́лю же ва́м, я́ко мно́зи от восто́к и за́пад прии́дут и возля́гут со Авраа́мом и Исаа́ком и Иа́ковом во Ца́рствии Небе́снем; сы́нове же ца́рствия изгна́ни бу́дут во тму́ кроме́шнюю; ту́ бу́дет пла́чь и скре́жет зубо́м. И рече́ Иису́с со́тнику: иди́, и я́коже ве́ровал еси́, бу́ди тебе́. И исцеле́ о́трок его́ в то́й ча́с.

Ектении́:

Врачу́ ду́ш и теле́с, со умиле́нием в се́рдце сокруше́нном к Тебе́ припа́даем, и стеня́ще вопие́м Ти́: исцели́ боле́зни, уврачу́й стра́сти ду́ш и теле́с рабо́в Твои́х (или́: души́ и те́ла раба́ Твоего́), и́мярек; и прости́ и́м (или́: ему́), я́ко благосе́рд, вся́ прегреше́ния, во́льная и нево́льная, и ско́ро воздви́гни от одра́ боле́зни, мо́лим Ти ся, услы́ши и поми́луй.

Не хотя́й сме́рти гре́шных, но е́же обрати́тися, и живы́м и́м бы́ти, пощади́ и поми́луй рабо́в Твои́х (или́: раба́ Твоего́), и́мярек, ми́лостиве; запрети́ боле́зни, отста́ви всю́ стра́сть, и ве́сь неду́г, и простри́ кре́пкую Твою́ ру́ку, и я́коже Иаи́рову дще́рь, от одра́ боле́зни воздви́гни, и здра́вых (или́: здра́ва) сотвори́, мо́лим Ти ся, услы́ши и поми́луй.

О́гненную боле́знь Петро́вой те́щи прикоснове́нием Твои́м исцели́вый, и ны́не лю́те стра́ждущих рабо́в Твои́х (или́: стра́ждущаго раба́ Твоего́) и́мярек, боле́знь благосе́рдием Твои́м исцели́, здра́вие и́м (или́: ему́) ско́ро подава́я, приле́жно мо́лим Ти ся, исто́чниче цельба́м, услы́ши и поми́луй.

Езеки́ины сле́зы, Манасси́ино и Ниневи́тян покая́ние, и Дави́дово испове́дание прие́мый и ско́ро те́х поми́ловавый: и на́ша во умиле́нии приноси́мыя Ти́ мольбы́ приими́, Всеблаги́й Царю́, и я́ко ще́др поми́луй лю́те боля́щих рабо́в Твои́х (или́: боля́щаго раба́ Твоего́) и́мярек, здра́вие и́м (или́: ему́) да́руя, со слеза́ми мо́лим Ти ся, Исто́чниче Жи́зни и безсме́ртия, услы́ши и ско́ро поми́луй.

Возгла́с: Услы́ши ны́ Бо́же Спаси́телю на́ш, упова́ние все́х конце́в земли́ и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны́: ми́лостив бо и человеколю́бец Бо́г еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Посе́м моли́тва:

Влады́ко Вседержи́телю, Святы́й Царю́, наказу́яй и не умерщвля́яй, утвержда́яй низпа́дающия, и возводя́й низве́рженныя, теле́сныя челове́ков ско́рби исправля́яй, мо́лимся Тебе́, Бо́же на́ш, раба́ Твоего́ и́мярек, немощству́юща посети́ ми́лостию Твое́ю, прости́ ему́ вся́кое согреше́ние во́льное и нево́льное. Е́й, Го́споди, враче́бную Твою́ си́лу с небесе́ низпосли́, прикосни́ся телеси́, угаси́ огне́вицу, укроти́ стра́сть и вся́кую не́мощь тая́щуюся; бу́ди вра́чь раба́ Твоего́ и́мярек, воздви́гни его́ от одра́ боле́зненнаго, и от ло́жа озлобле́ния це́ла и всесоверше́нна да́руй его́ Це́ркви Твое́й благоугожда́юща и творя́ща во́лю Твою́. Твое́ бо е́сть, е́же ми́ловати и спаса́ти ны́, Бо́же на́ш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

После́дование моле́бна жене́ пред порожде́нием

Оцифровка и приведение к грамматическим нормам ЦС-языка: протоиерей Николай Диваков, Людоговский Ф. Б. Источник: Сербский Требник, Белград, 1983

Прочте́нну бы́вшу моле́бному кано́ну ко Пресвяте́й Богоро́дице, в не́мже по 3-й и 6-й пе́сни, в ектении́, проше́ние:

Еще́ мо́лимся о рабе́ Бо́жией (и́мярек), о е́же укрепле́нней бы́ти е́й в ча́с предстоя́щаго ея́ порожде́ния, рце́м вси́, Го́споди спаси́ и поми́луй.

Возглаше́ние: Я́ко ми́лостив:

В конце́ моле́бна рцы́ моли́тву сию́:

Пресвята́я Де́во, Ма́ти Го́спода на́шего Иису́са Христа́, я́же ве́си рожде́ние и естество́ ма́тере и ча́да, поми́луй рабу́ Твою́ (и́мярек) и помози́ в ча́с се́й да разреши́тся бре́мене своего́ благополу́чно. О Всеми́лостивая Влады́чице Богоро́дице, я́же не потре́бовала еси́ по́мощи в рожде́нии Сы́на Бо́жия, пода́ждь по́мощь се́й рабе́ Твое́й по́мощи тре́бующей, наипа́че же от Тебе́. Да́руй е́й благомо́щие в ча́с се́й, и младе́нца, и́же и́мать роди́тися и вни́ти в све́т ми́ра сего́ сподо́би в благопотре́бное вре́мя и у́мнаго све́та во святе́м креще́нии водо́ю и ду́хом. Тебе́ припа́даем Ма́ти Бо́га Вы́шняго моля́щеся: бу́ди ми́лостива ма́ти се́й, е́йже прии́де вре́мя бы́ти ма́ти, и умоли́ воплоти́вшагося из Тебе́ Христа́ Бо́га на́шего, да укрепи́т ю́ си́лою свое́ю свы́ше.

Я́ко держа́ва Его́ благослове́на и препросла́влена, со Безнача́льным его́ Отце́м, и с Пресвяты́м и Благи́м и Животворя́щим его́ Ду́хом, ны́не и при́сно, и во ве́ки веко́в. Ами́нь.

Моли́тва ина́я ко Го́споду Иису́су Христу́:

Го́споди Иису́се Христе́ Бо́же на́ш, от Преве́чнаго Отца́ рожде́нный Сы́не пре́жде ве́к, и в после́дния дни́, благоволе́нием и соде́йствием Свята́го Ду́ха, изво́ливый рожде́ну бы́ти от Пресвяты́я Де́вы я́ко младе́нцу, повие́ну и положе́ну бы́ти во я́сли, Са́м, Го́споди, в нача́ле сотвори́вый челове́ка и жену́ спряги́й ему́, за́поведь да́в и́м: расти́теся и мно́житеся, и напо́лните зе́млю, поми́луй по вели́цей ми́лости Твое́й рабу́ Твою́ (и́мярек) гото́вящуюся роди́ти по за́поведи Твое́й. Прости́ е́й во́льная и нево́льная грехи́, благода́тию Твое́ю да́руй е́й си́лу благополу́чно разреши́тися от бре́мене своего́, сохрани́ сию́ и младе́нца во здра́вии и благомо́щии, огради́ я́ А́нгелы Твои́ми и сохрани́ от неприя́зненнаго де́йствия лука́вых духо́в, и от вся́кия ве́щи злы́я.

Возглаше́ние: Я́ко Бла́г и Человеколю́бец Бо́г еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

И отпу́ст.

Моле́бное пе́ние святи́телю Васи́лию Вели́кому

Компиляция по различным печатным источникам, оцифровка и приведение к грамматическим нормам ЦС-языка: протоиерей Николай Диваков, Дмитрий Михалин, Анатолий Алексеевич Матвеев.

Благослове́н Бо́г на́ш: Сла́ва Тебе́ Бо́же на́ш, сла́ва Тебе́. Царю́ Небе́сный:

Трисвято́е: по О́тче на́ш: Свяще́нник: Я́ко Твое́ е́сть Ца́рство:

Та́же, Го́споди, поми́луй, 12. Сла́ва, и ны́не: Прииди́те, поклони́мся:

Псало́м 91.

Бла́го е́сть испове́датися Го́сподеви и пе́ти и́мени Твоему́, Вы́шний: возвеща́ти зау́тра ми́лость Твою́ и и́стину Твою́ на вся́ку но́щь, в десятостру́ннем псалти́ри с пе́снию в гу́слех. Я́ко возвесели́л мя́ еси́, Го́споди, в творе́нии Твое́м, и в де́лех руку́ Твое́ю возра́дуюся. Я́ко возвели́чишася дела́ Твоя́, Го́споди: зело́ углуби́шася помышле́ния Твоя́. Му́ж безу́мен не позна́ет, и неразуми́в не разуме́ет си́х. Внегда́ прозябо́ша гре́шницы я́ко трава́, и пронико́ша вси́ де́лающии беззако́ние, я́ко да потребя́тся в ве́к ве́ка: Ты́ же вы́шний во ве́к, Го́споди. Я́ко се́, врази́ Твои́, Го́споди, я́ко се́, врази́ Твои́ поги́бнут, и разы́дутся вси́ де́лающии беззако́ние. И вознесе́тся я́ко единоро́га ро́г мо́й, и ста́рость моя́ в еле́и масти́те: и воззре́ о́ко мое́ на враги́ моя́, и востаю́щия на мя́ лука́внующия услы́шит у́хо мое́. Пра́ведник я́ко фи́никс процвете́т: я́ко ке́др, и́же в лива́не, умно́жится. Насажде́ни в дому́ Госпо́дни во дво́рех Бо́га на́шего процвету́т: еще́ умно́жатся в ста́рости масти́те, и благоприе́млюще бу́дут. Да возвестя́т, я́ко пра́в Госпо́дь Бо́г на́ш, и не́сть непра́вды в Не́м.

Сла́ва, и ны́не: Аллилу́иа: Та́же Бо́г Госпо́дь:

Тропа́рь свята́го два́жды, гла́с 1:

Во всю́ зе́млю изы́де веща́ние твое́, я́ко прие́мшую сло́во твое́, и́мже боголе́пно научи́л еси́, естество́ су́щих уясни́л еси́, челове́ческия обы́чаи украси́л еси́, Ца́рское свяще́ние, о́тче преподо́бне, моли́ Христа́ Бо́га спасти́ся душа́м на́шим.

Сла́ва, и ны́не, богоро́дичен, гла́с то́йже:

Гаврии́лу веща́вшу Тебе́ Де́во, ра́дуйся! Со гла́сом воплоща́шеся все́х Влады́ка, в Тебе́ Святе́м Киво́те, я́коже рече́ пра́ведный Дави́д: яви́лася еси́ Ши́ршая Небе́с, поноси́вши Зижди́теля Твоего́. Сла́ва Все́льшемуся в Тя́, сла́ва Проше́дшему из Тебе́, сла́ва Свободи́вшему на́с рождество́м Твои́м.

Посе́м псало́м 50.

Поми́луй мя́, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя́ от беззако́ния моего́ и от греха́ моего́ очи́сти мя́: я́ко беззако́ние мое́ а́з зна́ю, и гре́х мо́й предо мно́ю е́сть вы́ну. Тебе́ еди́ному согреши́х и лука́вое пред Тобо́ю сотвори́х: я́ко да оправди́шися во словесе́х Твои́х и победи́ши, внегда́ суди́ти Ти́. Се́ бо, в беззако́ниих зача́т е́смь, и во гресе́х роди́ мя́ ма́ти моя́. Се́ бо, и́стину возлюби́л еси́, безве́стная и та́йная прему́дрости Твоея́ яви́л ми́ еси́. Окропи́ши мя́ иссо́пом, и очи́щуся: омы́еши мя́, и па́че сне́га убелю́ся. Слу́ху моему́ да́си ра́дость и весе́лие: возра́дуются ко́сти смире́нныя. Отврати́ лице́ Твое́ от гре́х мои́х и вся́ беззако́ния моя́ очи́сти. Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отими́ от Мене́. Возда́ждь ми́ ра́дость спасе́ния Твоего́ и Ду́хом Влады́чним утверди́ мя́. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя́ от крове́й, Бо́же, Бо́же спасе́ния моего́: возра́дуется язы́к мо́й пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, да́л бы́х у́бо: всесожже́ния не благоволи́ши. Же́ртва Бо́гу ду́х сокруше́н: се́рдце сокруше́нно и смире́нно Бо́г не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския: тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Тво́й тельцы́.

И кано́н святи́теля Васи́лиа, гла́с 2, без ирмосо́в.

Пе́снь 1.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Твоему́ гла́су подоба́ше приити́, Васи́лие, нача́ти хотя́щим хвалы́ твоя́, но, о́тче, мольбу́ прие́м, благода́ть подава́й незави́стно на́м.

Доброде́телей ты́ жесто́кий ше́ствовал еси́ пу́ть, в гла́дкий дости́гл еси́, и несопроти́вный небе́сный восхо́д: и все́м яви́лся еси́ о́браз Васи́лие.

Страстно́е взыгра́ние, томя́щее пло́ть, любому́дрия жела́нием наказа́л еси́: те́мже в нетле́нных водворя́ешися Ца́рствиих, о́тче Васи́лие.

Богоро́дичен: Кто́ изрещи́ Твое́ по досто́инству возмо́жет, е́же па́че Сло́ва зача́тие? Бо́га бо родила́ еси́ пло́тию, Всечи́стая, на́м я́вльшася Спа́са и Го́спода.

Пе́снь 3.

Ирмо́с: Утверди́ на́с в Тебе́, Го́споди, Дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Стра́хом Госпо́дним утвержда́емь, нача́ло бо му́дрости се́й е́сть, любо́вию лу́чшею впери́лся еси́ прему́дрости, о Васи́лие.

Наказа́ния бы́в вся́каго испо́лнен, не то́кмо до́льнаго и попира́емаго, мно́го же па́че лу́чшаго, показа́лся еси́ ми́ру све́т, Васи́лие.

Васи́лие прему́дре, вше́л еси́ дея́нием, и дея́ние вше́ствие виде́ния Боже́ственнейшаго показа́л еси́, и су́щих ра́зуму научи́лся еси́ я́ве.

Богоро́дичен: Безсе́менно во чре́ве Бо́га зачала́ еси́ и ражда́еши несказа́нно воплоще́нна: на Него́же зре́ти не сме́ют, Чи́стая, Небе́сных Си́лы, Присноде́во.

Посе́м припе́в: Моли́ Бо́га о на́с, святи́телю о́тче Васи́лие, я́ко мы́ усе́рдно к тебе́ прибега́ем, ско́рому помо́щнику и моли́твеннику о душа́х на́ших.

Ектениа́: Поми́луй на́с, Бо́же:

Возгла́с: Я́ко ми́лостив:

Та́же седа́лен свята́го, гла́с 8.

Подо́бен: Прему́дрости:

Прему́дрости сло́ва навы́к и писа́ние зако́на отложи́в, все́м пропове́дал еси́ благода́ти сло́во и ду́ш скрижа́ли угла́дил еси́ словесы́ твои́ми, в ни́хже начерта́л еси́ Боже́ственная уче́ния. Те́мже и мра́к проше́д о́блаком покро́ва телесе́, и просия́л еси́ ду́хом, святи́телю Васи́лие. Моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Сла́ва и ны́не, богоро́дичен, гла́с то́йже:

Я́ко Де́ву и еди́ну в жена́х Тя́ без се́мене ро́ждшую Бо́га пло́тию, вси́ ублажа́ем ро́ди челове́честии: О́гнь бо всели́ся в Тя́ Божества́, и я́ко Младе́нца дои́ши Зижди́теля и Го́спода. Те́м а́нгельский и челове́ческий ро́д, досто́йно сла́вим пречи́стое рождество́ Твое́, и согла́сно вопие́м Ти́: моли́ Христа́ Бо́га, согреше́ний оставле́ние дарова́ти покланя́ющимся ве́рою Пресвято́му рождеству́ Твоему́.

Пе́снь 4

Ирмо́с: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Непребори́мь яви́лся еси́, по Бо́зе боря́, Васи́лие, во все́х Того́ повеле́нию покаря́яся.

Це́ркви подаде́ся от Бо́га огражде́ние и стена́ тверда́, Васи́лие всеблаже́нне.

Сопротивобо́жным се́чиво ты́ сека́тельное, и о́гнь, пояда́яй пре́лесть, яви́лся еси́, о́тче Васи́лие.

Богоро́дичен: Мо́лим Тя́, Чи́стая, я́же Бо́га безсе́менно заче́нши, при́сно моли́ти за рабы́ Твоя́.

Пе́снь 5

Ирмо́с: Све́та Пода́телю и Веко́в Тво́рче, Го́споди, во све́те Твои́х повеле́ний наста́ви на́с, ра́зве бо Тебе́, ино́го Бо́га не зна́ем.

Непостижи́мый све́т почи́в в тебе́, преподо́бне, пресве́тлу свещу́ ми́ру тя́ показа́ Христо́с, те́мже па́мять твою́ пое́м, Васи́лие.

Всете́мно напи́санное в Сина́и бытие́ Моисе́ем, ты́, сказу́я от Боже́ственных сокро́вищ, начерта́л еси́ все́м, преблаже́нне Васи́лие.

Ни законополо́жник Моисе́й, ни пе́рвее зако́на Ио́сиф бы́сть, и́же по тебе́ пи́щи пшеницоме́ритель: Боже́ственныя бо пло́ти са́м раздроби́тель яви́лся еси́, Васи́лие.

Богоро́дичен: Тебе́, ро́ждшей Христа́, все́х соде́теля, зове́м: ра́дуйся, Чи́стая, ра́дуйся, Све́т возсия́вшая на́м, ра́дуйся, вмести́вшая Бо́га невмести́маго.

Пе́снь 6

Ирмо́с: Бе́здна мя́ мно́га грехо́вная окружа́ет, и вопию́ Ти́, проро́ка подража́яй: от тли́ мя́, Го́споди, возведи́.

Напита́л еси́ ду́ши, та́ющия гла́дом, ни́щих оби́льно и а́лчущих сердца́ вся́каго испо́лнил еси́, Васи́лие, Боже́ственнаго весе́лия.

Напита́л еси́ бога́тно а́лчущия пи́щею небе́сною: хле́б бо а́нгельский е́сть сло́во твое́, Васи́лие, и́мже изря́ден пшеницода́вец бы́л еси́.

Потща́лся еси́ ми́ра отлучи́тися и с Бо́гом пожи́ти: те́мже нестоя́тельная и тле́нная, всеблаже́нне Васи́лие, оста́вль, пребыва́ющая, я́ко му́др, стяжа́л еси́.

Богоро́дичен: Спаси́ от бе́д рабы́ Твоя́, Богоро́дице, я́ко вси́ по Бо́зе к Тебе́ прибега́ем, я́ко к неруши́мей стене́ и предста́тельству.

Посе́м припе́в: Моли́ Бо́га о на́с, святи́телю о́тче Васи́лие, я́ко мы́ усе́рдно к тебе́ прибега́ем, ско́рому помо́щнику и моли́твеннику о душа́х на́ших.

Ектениа́ ма́лая.

Возгла́с: Ты́ бо еси́ Ца́рь ми́ра:

Конда́к, гла́с 4

Подо́бен: Яви́лся еси́ дне́сь:

Яви́лся еси́ основа́ние непоколеби́мое Це́ркве, подая́ все́м некра́домое Госпо́дьство челове́ком, запечатле́я твои́ми веле́ньми, небоявле́нне Васи́лие преподо́бне.

Посе́м проки́мен, гла́с 4: Уста́ моя́ возглаго́лют прему́дрость, и поуче́ние се́рдца моего́ ра́зум.

Сти́х: Услы́шите сия́, вси́ язы́цы, внуши́те, вси́, живу́щии по вселе́нней.

Ева́нглие от Иоа́нна, зача́ло 36

Рече́ Госпо́дь ко прише́дшим к нему́ иуде́ом: А́з е́смь две́рь: Мно́ю а́ще кто́ вни́дет, спасе́тся: и вни́дет и изы́дет, и па́жить обря́щет. Та́ть не прихо́дит, ра́зве да укра́дет и убие́т и погуби́т: А́з приидо́х, да живо́т и́мут и ли́шше и́мут. А́з е́смь па́стырь до́брый: па́стырь до́брый ду́шу свою́ полага́ет за о́вцы: а нае́мник, и́же не́сть па́стырь, ему́же не су́ть о́вцы своя́, ви́дит во́лка гряду́ща, и оставля́ет о́вцы, и бе́гает: и во́лк расхи́тит и́х, и распу́дит о́вцы: а нае́мник бежи́т, я́ко нае́мник е́сть, и неради́т о овца́х. А́з е́смь па́стырь до́брый: и зна́ю Моя́, и зна́ют Мя́ Моя́: я́коже зна́ет Мя́ Оте́ц, и А́з зна́ю Отца́: и ду́шу Мою́ полага́ю за о́вцы. И и́ны о́вцы и́мам, я́же не су́ть от двора́ сего́: и ты́я Ми́ подоба́ет привести́, и гла́с Мо́й услы́шат: и бу́дет еди́но ста́до и еди́н па́стырь.

Сла́ва Тебе́, Го́споди, сла́ва Тебе́.

Сла́ва: Моли́твами святи́теля Васи́лиа, ми́лостиве, очи́сти мно́жества согреше́ний на́ших.

И ны́не: Моли́твами Богоро́дицы, ми́лостиве, очи́сти мно́жества согреше́ний на́ших.

Та́же: Поми́луй мя́, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́.

Стихи́ра самогла́сна, гла́с 6:

Излия́ся благода́ть во устна́х твои́х, преподо́бне о́тче, и бы́л еси́ па́стырь Христо́вы це́ркве, учя́ слове́сныя о́вцы ве́ровати в Тро́ицу Единосу́щную во еди́ном Божестве́.

Ектениа́: Спаси́, Бо́же, лю́ди Твоя́ и благослови́ достоя́ние Твое́, посети́ ми́р Тво́й ми́лостию и щедро́тами, возвы́си ро́г христиа́н правосла́вных и низпосли́ на ны́ ми́лости Твоя́ бога́тыя: моли́твами Всепречи́стыя Влады́чицы на́шея Богоро́дицы и Присноде́вы Мари́и: си́лою Честна́го и Животворя́щаго Креста́: предста́тельствы Честны́х Небе́сных Си́л Безпло́тных: честна́го сла́внаго проро́ка, Предте́чи и Крести́теля Иоа́нна: святы́х сла́вных и всехва́льных апо́стол: святы́х сла́вных и добропобе́дных му́ченик, преподо́бных и богоно́сных оте́ц на́ших, святы́х и пра́ведных богооте́ц Иоаки́ма и А́нны: и и́же во святы́х отца́ на́шего Васи́лиа, архиепи́скопа Кесари́и Каппадоки́йския, Вели́каго, и все́х святы́х: мо́лим Тя́, многоми́лостиве Го́споди, услы́ши на́с, гре́шных, моля́щихся Тебе́ и поми́луй на́с.

Го́споди, поми́луй, 12.

Возгла́с: Ми́лостию и щедро́тами: И про́чая.

Пе́снь 7

Ирмо́с: О́бразу злато́му, на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

О́браз Отца́ Сы́н, и Сы́на Ду́х е́сть: ты́ же Ду́ха, о Васи́лие, нескве́рнено зерца́ло, до́м же всея́ Тро́ицы. Блаже́нна па́мять твоя́, и сла́вящии ю́ воспрославля́ются.

Углуби́в у́м во глубины́ Бо́жия непостижи́мыя и собра́в многоце́нный ты́ би́сер ра́зума, напо́лнил еси́ ми́р прему́дростию и зва́ти научи́л еси́: благослове́н еси́, Бо́же оте́ц на́ших.

Оте́ц сиро́т, и вдо́в защи́тник, и бога́тство ни́щих, боля́щих утеше́ние и су́щих в бога́тстве окормле́ние, ста́рости же́зл яви́лся еси́, и наказа́ние ю́ности, и мона́шествующих доброде́тели пра́вило, Васи́лие.

Богоро́дичен: Тя́ Купину́ Моисе́й в горе́ Сина́йстей огнепали́му, Чи́стая, прови́дяше, прие́мшую неопа́льно нестерпи́мую зарю́ неизглаго́ланнаго Существа́, соедини́вшагося дебельству́ пло́ти еди́ныя в не́м святы́х ипоста́сей.

Пе́снь 8

Ирмо́с: Неизрече́нною му́дростию соста́вльшаго вся́ческая Бо́га Сло́ва и от не су́щих во е́же бы́ти приве́дшаго, благослови́те дела́ я́ко Го́спода, и превозноси́те во вся́ ве́ки.

Несказа́нным про́мыслом дарова́вшаго Васи́лиа ми́ру, све́т благоче́стия, трубу́ же богосло́вия, благослови́те дела́ Госпо́дня, Го́спода.

Бога́тным де́йством все́льшася в му́драго Васи́лиа и те́м благоче́стно богосло́вившаго, благослови́те, дела́ Госпо́дня, Го́спода.

Боже́ственных твои́х слове́с наслади́вшиися, Васи́лие, непреста́нно в твое́й па́мяти торжеству́юще, вопие́м: благослови́те, дела́ Госпо́дня, Го́спода.

Богоро́дичен: Из Отца́, проше́дшаго пре́жде ве́к, и Безле́тнаго Бо́га Сло́ва и в после́дняя возсия́вша из Де́вы, благослови́те, дела́ Госпо́дня, Го́спода.

Пе́снь 9

Ирмо́с: Я́же пре́жде со́лнца свети́льника Бо́га возсия́вшаго, пло́тски к на́м прише́дшаго из боку́ Де́вчу, неизрече́нно воплоти́вшая, Благослове́нная, Всечи́стая, Тя́, Богоро́дице, велича́ем.

Пе́рваго Па́стыря, я́ко овча́ ве́рное Христо́во, Васи́лие, живоно́сным стопа́м после́довал еси́, мучи́телю бо твою́ ду́шу, о́тче, преда́л еси́, до́блественне предбе́дствуя о Це́ркви, всеблаже́нне.

Церко́вное всесвяще́нное Христо́во ви́дев совокупле́ние, твои́м укра́шено святи́тельством, му́дре, всегуби́тель, я́ко от гро́ма, треснове́н бы́в, паде́ся мучи́тель, су́щия бо в тебе́ ду́ха зари́ не стерпе́, Васи́лие.

Апо́столов седа́лища, ли́ка же страда́лец Христо́вых, патриа́рхов ски́нии, и пра́ведных сла́дости, и ра́дости проро́ков сподо́бился еси́, Васи́лие: Богоро́дицы бо служи́тель и Тро́ицы таи́нник бы́л еси́.

Богоро́дичен: Пощади́, мя́, Го́споди, пощади́, егда́ хо́щеши суди́ти и не осуди́ мене́ во о́гнь, ниже́ я́ростию Твое́ю обличи́ мене́: мо́лит Тя́ Де́ва, ро́ждшая Тя́, Христе́, и апо́стол мно́жество, и сла́вный васи́лий.

Посе́м: Досто́йно е́сть:

И стихи́ры, гла́с 5.

Подо́бен: Ра́дуйся:

Вну́трь Небе́снаго Хра́ма я́ко святи́тель свяще́нен вмести́лся еси́, дея́нием и виде́нием прему́дрости нача́лами, я́ко оде́ждею свято́ю, обложе́н. И ны́не в вы́шнем же́ртвеннице, преподо́бне, свяще́нствуя, и Бо́гу предстоя́, невеще́ственную слу́жбу соверша́я, помина́й ми́лостивно, всеблаже́нне Васи́лие, соверша́ющия па́мять свяще́нную твою́ и всечестну́ю, Христа́ моля́, подаю́щаго ми́рови ве́лию ми́лость.

Ве́сь освяще́н Бо́гу и всеобра́зно от де́тства возложе́н, му́дрости Пребоже́ственныя озари́вся заря́ми, су́щих разуме́ние уясни́л еси́, све́тло сказу́я и му́дре пове́дая, е́же в су́щих благочи́ние творя́, позна́ния Боже́ственнейшаго де́ла. Те́мже тя́ богоглаго́лива и Боже́ственна учи́теля и светоно́сна свети́льника церко́внаго, пропове́дуем Христа́ моля́ща, подаю́щаго ми́ру ве́лию ми́лость.

Стра́хом утверди́вся Бо́жиим, нача́ло прему́дрости разуме́л еси́, Васи́лие, стра́х прему́дростию и жития́ пра́востию превозше́л еси́, о́тче, любо́вию же Бо́гу сраствори́вся, и сво́йственнейший бы́л еси́. Те́мже Боже́ственным наказа́вся оправда́нием и судьба́м, челове́ков изъучи́л еси́ обы́чаи и украси́л еси́ ве́рных ра́зумы, законоположе́ньми духо́вными уясни́в собо́р. Христа́ у́бо моли́ душа́м на́шим дарова́ти ве́лию ми́лость.

Сла́ва, гла́с 6:

Излия́ся благода́ть во устна́х твои́х, преподо́бне о́тче, и бы́л еси́ па́стырь Христо́вы Це́ркве, учя́ слове́сныя о́вцы ве́ровати в Тро́ицу Единосу́щную во еди́ном Божестве́.

И ны́не, гла́с то́йже:

Преложе́ние скорбя́щих, Премене́ние боля́щих еси́, Богоро́дице Всепе́тая, спаси́ гра́д и лю́ди, бори́мых Умире́ние, обурева́емых Тишина́, еди́на Предста́тельнице ве́рных.

Трисвято́е: по О́тче на́ш: Свяще́нник: Я́ко Твое́ е́сть Ца́рство:

Тропа́рь свята́го, гла́с 1:

Во всю́ зе́млю изы́де веща́ние твое́, я́ко прие́мшую сло́во твое́, и́мже боголе́пно научи́л еси́, естество́ су́щих уясни́л еси́, челове́ческия обы́чаи украси́л еси́, Ца́рское свяще́ние, о́тче преподо́бне, моли́ Христа́ Бо́га спасти́ся душа́м на́шим.

Сла́ва, конда́к, гла́с 4

Подо́бен: Яви́лся еси́ дне́сь:

Яви́лся еси́ основа́ние непоколеби́мое Це́ркве, подая́ все́м некра́домое Госпо́дьство челове́ком, запечатле́я твои́ми веле́ньми, небоявле́нне Васи́лие преподо́бне.

И ны́не, богоро́дичен, гла́с то́йже:

Е́же от ве́ка утае́нное и а́нгелом несве́домое та́инство, Тобо́ю Богоро́дице, су́щим на земли́ яви́ся Бо́г, в несли́тном соедине́нии воплоща́емь: и Кре́ст во́лею на́с ра́ди восприи́м, и́мже воскреси́в Первозда́ннаго, спасе́ от сме́рти ду́ши на́ша.

Ектениа́: Поми́луй на́с, Бо́же:

Возгла́с: Услы́ши ны́, Бо́же, Спаси́телю на́ш:

И моли́тва святи́телю Васи́лию Вели́кому

О вели́кий во иера́рсех, вселе́нныя учи́телю богому́дрый, преблаже́нне о́тче Васи́лие! Ве́лии по́двизи и труды́ твои́, я́же во сла́ву Святы́я Це́ркве соверши́л еси́: ты́ испове́дник тве́рдый и свети́льник ве́ры Христо́вы на земли́ бы́л еси́, све́том богове́дения ве́рныя озаря́яй, ло́жная уче́ния попаля́яй и всему́ ми́ру сло́во спаси́тельныя и́стины возвеща́яй. Ны́не же, ве́лие на небесе́х име́я дерзнове́ние ко Святе́й Тро́ице, помози́ на́м, со смире́нием к тебе́ припа́дающим, тве́рдо и неизме́нно святу́ю правосла́вную ве́ру до конца́ жития́ на́шего сохрани́ти, от малове́рия же, сомне́ний и колеба́ния в ве́ре соблюди́, да не прельще́ни бу́дем богопроти́вных и душепа́губных уче́ний словесы́. Ду́х ре́вности святы́я, е́юже ты́ пламене́л еси́, о пресла́вный Це́ркве Христо́вы па́стырю, возгре́й предста́тельством твои́м и в на́с. Умоли́ Царя́ ца́рствующих, да возвы́сится страна́ на́ша, и да да́рует всему́ наро́ду на́шему здра́вие, долгоде́нствие и во все́м благо́е поспеше́ние. Испроси́, о милосе́рдый святи́телю, от Отца́ Све́тов и все́м, вся́кий да́р коему́ждо благопотре́бен: младе́нцем благо́е в стра́се Бо́жии возраста́ние, ю́ным целому́дрие, ста́рым и немощны́м укрепле́ние, скорбя́щим утеше́ние, неду́гующим исцеле́ние, заблу́ждшим вразумле́ние и исправле́ние, оби́димым заступле́ние, сирота́м и вдови́цам защище́ние, искуша́емым благода́тное поможе́ние, отше́дшим от сего́ вре́меннаго жития́ отце́м и бра́тиям на́шим блаже́нное упокое́ние. Е́й, свя́тче Бо́жий, при́зри ми́лостивно от оби́телей го́рних на на́с, смире́нных, мно́гими собла́зны и напа́стьми обурева́емых, и к земли́ приве́рженных возведи́ к высоте́ небе́сней. Препода́ждь на́м, преблаги́й о́тче, твое́ архипа́стырское и свято́е благослове́ние, да о́ным осеня́емии, про́чее вре́мя жития́ на́шего в ми́ре, покая́нии и послуша́нии Святе́й правосла́вней Це́ркви поживе́м, за́поведи Христо́вы усе́рдно творя́ще, по́двигом до́брым ве́ры подвиза́ющеся, и та́ко Ца́рствия Небе́снаго дости́гнем, иде́же с тобо́ю и все́ми святы́ми сподо́би Тро́ицу Святу́ю, Единосу́щную и Неразде́льную пе́ти и сла́вити во ве́ки веко́в.

Ли́к: Ами́нь.

Та́же, Прему́дрость: Пресвята́я Богоро́дице, спаси́ на́с.

Ли́к: Честне́йшую Херуви́м:

Свяще́нник: Сла́ва Тебе́, Христе́ Бо́же:

Ли́к: Сла́ва, и ны́не: Го́споди, поми́луй, три́жды. Благослови́.

Свяще́нник твори́т отпу́ст.

И пое́м велича́ние:

Велича́ем тя́, святи́телю Христо́в Васи́лие, благоче́стно Це́рковь Христо́ву сохра́ншаго.

Или́ сие́:

Велича́ем тя́, святи́телю Христо́в Васи́лие и чти́м святу́ю па́мять твою́, ты́ бо мо́лиши за на́с Христа́ Бо́га на́шего.

1

Чи́н благословения в воздушное путешествие

Иере́й начина́ет: Благослове́н Бо́г на́ш:

Ли́к: Царю́ Небе́сный:

Чте́ц: Трисвято́е и про́чая по чи́ну. Сла́ва, и ны́не: Прииди́те поклони́мся: три́жды. Та́же псало́м 138: Го́споди, искуси́л мя́ еси́ и позна́л мя́ еси́: Сла́ва, и ны́не: Аллилу́иа, аллилу́иа, аллилу́иа, сла́ва Тебе́, Бо́же, три́жды.

Ектениа́ вели́кая да́же до О пла́вающих:

О е́же ми́лостиву, благоуве́тливу, и благопремени́тельну бы́ти к рабо́м Свои́м (или́ рабу́ Своему́), на́ми ны́не моля́щымся, и прости́в и́м вся́ согреше́ния, во́льная и нево́льная, и благослови́ти возду́шное путеше́ствие и́х, Го́споду помо́лимся.

О е́же утоли́ти вся́кую бу́рю, уста́вити ве́тры проти́вныя и тишину́ к безмяте́жному по возду́ху провожде́нию и́х пода́ти, Го́споду помо́лимся.

О е́же посла́ти и́м А́нгела своего́ Храни́теля наставля́юща и́х, и от вся́каго зла́ и все́х ко́зней кня́зя возду́шнаго покрыва́юща, от паде́ния же, сокруше́ния и вся́кия неча́янныя беды́ и обстоя́ния избавля́юща, Го́споду помо́лимся.

О е́же ми́рно и благополу́чно препроводи́ти, здра́во же и безмяте́жно возврати́ти и́х, Го́споду помо́лимся.

О е́же благослови́ти наме́рение сове́та и де́ла и́х, к поле́зному соверше́нию, в сла́ву Пресвята́го и́мене Своего́, в душе́вную же и теле́сную по́льзу, Го́споду помо́лимся.

О е́же изба́вити и́х си́лою благода́ти Своея́, от вся́ких бе́д и ну́жд душе́вных и теле́сных, от неду́га же и от напра́сныя смертоно́сныя ра́ны: здра́вие же с благополу́чием, и благовре́менным во своя́си возвраще́нием, ми́лостивно пода́ти, Го́споду помо́лимся.

Заступи́, спаси́, поми́луй, и сохрани́ на́с Бо́же, Твое́ю благода́тию.

Пресвяту́ю, Пречи́стую, Преблагослове́нную, Сла́вную:

Возгла́с: Я́ко подоба́ет Тебе́ вся́кая сла́ва:

Бо́г Госпо́дь и яви́ся на́м: и тропари́ сия́, гла́с 2:

К тебе́, Спа́се, прибега́ющих, и от Твоея́ всеси́льныя десни́цы по́мощи и благослове́ния, я́ко от Творца́ и Влады́ки, и́щущих не пре́зри, но я́коже апо́столы Твоя́ дре́вле на погребе́ние Пречи́стыя Ма́тере Твоея́ от коне́ц о́блаки принесы́й, си́це и ны́не рабо́м Твои́м си́м ско́рое и безмяте́жное по возду́ху превожде́ние со здра́вием да́руй, моли́твами Преблагослове́нныя Богоро́дицы, Еди́не Человеколю́бче.

Сла́ва, гла́с 5: Всю́ наде́жду на Тя возложи́вшим, Спа́се, бу́ди помо́щник и изба́витель, и благо́е наме́рение де́ла с возду́шным путеше́ствием и́х благослови́, да вси́ сла́вим Тя́ еди́наго все́х бла́г Пода́теля.

И ны́не: Под Тво́й покро́в прибега́ем Богоро́дице Де́во, моли́тв на́ших не пре́зри в ско́рбех, но от бе́д изба́ви на́с, Еди́на Чи́стая и Благослове́нная.

Диа́кон: Во́нмем.

Иере́й: Ми́р все́м.

Чте́ц: И ду́хови твоему́.

Диа́кон: Прему́дрость, во́нмем.

Проки́мен, гла́с 4:

Я́ко А́нгелом Свои́м запове́сть о тебе́, сохрани́ти тя́ во все́х путе́х твои́х.

Сти́х: На рука́х во́змут тя́, да не когда́ преткне́ши о ка́мень но́гу твою́.

Апо́стол в дея́ниих, зача́ло 20:

Аллилу́иа, гла́с 4:

Сти́х 1: И взы́де на Херуви́мы и лете́, лете́ на крилу́ ве́треню.

Сти́х 2: Плещма́ Свои́ма осени́т тя́, и под криле́ Его́ наде́ешися.

Ева́нглие от Иоа́нна, зача́ло 47:

По Ева́нглии глаго́лет диа́кон или́ иере́й ектению́ сугу́бую:

Поми́луй на́с Бо́же:

Та́же прилага́ет и сия́:

Небоше́ственника проро́ка Твоего́, Го́споди, дре́вле показа́вый и апо́столы Твоя́ о́блаки от коне́ц земли́ и во святы́й гра́д принесы́й, при́зри и ны́не на моли́тву рабо́в Твои́х, к Тебе́ приле́жно припа́дающих и благослови́ возду́шное путеше́ствие и́х, ти́ху же и ми́рну и безмяте́жну сему́ бы́ти сотвори́, мо́лимтися, Всеблаги́й, услы́ши и поми́луй.

А́нгелом Твои́м повели́, Влады́ко, сохрани́ти сия́, рабы́ Твоя́ по возду́ху ше́ствовати хотя́щыя, я́ко да крило́ма свои́ма осеня́т я́, возду́шнаго же кня́зя под но́зе и́х сокруша́т, мо́лимся всеми́лостивый Спа́се, услы́ши и поми́луй.

Благо́е наме́рение, Спа́се, рабо́в Твои́х благослови́ и моли́тву и́х приими́, ско́рое и безбе́дное по возду́ху превожде́ние и́м устроя́я и благополу́чное во своя́ си возвраще́ние ми́лостиво да́руя, Всеще́дрый Го́споди, услы́ши и поми́луй.

Пресла́вным вознесе́нием Твои́м возду́х освяти́вый Го́споди, и Илию́ огнеколесни́чника пе́рваго небоше́ственника показа́вый, того́ моли́твами рабо́м Твои́м си́м (и́мярек) безмяте́жное возду́шное ше́ствие, здра́вие же и от вся́кия ско́рби и смертоно́сныя ра́ны избавле́ние да́руй, мо́лимтися, Всеми́лостивый Го́споди, услы́ши и поми́луй.

Вся́ страхова́ния бесо́вская дале́че от рабо́в Твои́х отжени́, я́ко да на криле́х жела́ния Боже́ственнаго при́сно носи́ми, на Тя́ же Творца́ и Промысли́теля всея́ тва́ри упова́ние несумне́нное возлага́юще, ми́рно, и ра́достно, я́ко на о́блаце ле́гце, пу́ть возду́шный пре́йдут, ко сла́ве и́мене Твоего́ Пресвята́го и во вре́мя благопотре́бно во своя́ си возвратя́тся, мо́лимтися, Всемоги́й Влады́ко, услы́ши и ми́лостивно поми́луй.

Та́же: Услы́ши ны́, Бо́же Спаси́телю на́ш:

Та́же: Со умиле́нием коле́на и главы́ прекло́нше, Го́споду помо́лимся.

Ли́к: Го́споди поми́луй.

Моли́тва:

Влады́ко Го́споди Иису́се Христе́ Бо́же на́ш, стихи́ям повелева́яй и вся́ го́рстию содержа́й, Его́же бе́здны трепе́щут и Ему́же зве́зды прису́тствуют. Вся́ тва́рь Тебе́ слу́жит, вся́ послу́шают, вся́ Тебе́ повину́ются. Вся́ мо́жеши: сего́ ра́ди вся́ ми́луеши, Преблаги́й Го́споди. Та́ко и ны́не, у́бо, Влады́ко, рабо́в Твои́х си́х (и́мярек) моле́ния те́плыя прие́мля, благослови́ пу́ть и́х и возду́шное ше́ствие, запреща́я бу́рям же и ве́тром проти́вным и лодию́ возду́шную це́лу и невреди́му соблюда́я. Спаси́тельное и небу́ренное по возду́ху превожде́ние и́м да́руй и благо́е наме́рение соверши́вшим и́м, ве́село во здра́вии и в ми́ре возврати́тися благоизво́ли. Ты́ бо еси́ Спа́с и Изба́витель и все́х благи́х Пода́тель и Тебе́ сла́ву возсыла́ем со Безнача́льным Твои́м Отце́м и Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в. Ами́нь.

И твори́т иере́й обы́чный отпу́ст, и взе́м честны́й кре́ст, дае́т путьше́ствующым лобза́ти, и кропи́т свяще́нною водо́ю, глаго́ля:

Да благослови́т ва́с Госпо́дь от Сио́на, и у́зрите блага́я Иерусали́ма во вся́ дни́ живота́ ва́шего, и да испра́вит путеше́ствие ва́ше в ми́ре, в сла́ву свята́го Своего́ и́мене, ами́нь.

* * *

1

Молебное пение святителю Василию Великому для совершения его в часовне его имени на территории Всероссийского выставочного центра составлено по образцу канона молебного Божией Матери и на основе службы святителю Василию Великому из Минеи под 1 января. Это чинопоследование святителю Василию в отличие от канона Божией Матери имеет более хвалебный характер, поэтому вместо 142-го псалма в начале помещен 91-й. В тропарях, седальнах и стихирах соответствующие молитвословия на «Слава и ныне», посвященные празднику Обрезания Господня, заменены на обычные богородичны. Канон святителю сокращен до 4-х тропарей (включая Богородичен). При этом сокращались преимущественно те тропари, в которых одновременно прославляется обрезание Господне и святитель Василий. Богородичен 9-й песни канона Посвящен наступающему празднику Богоявления, поэтому он замещен другим, взятым из Октоиха соответствующего (2-го) гласа (канон Святителю Николаю в четверток утра; при этом имя Святителя Николая заменено на имя святителя Василия).



Источник: Тексты приводятся по изданию: Тре́бник. В дву́х частя́х. — Москва́. Синода́льная типогра́фия. 1906.

Комментарии для сайта Cackle