Испытайте писаний, яко вы мните в них имети живот вечный.
Словеса суть Христа Бога нашего, ко иудеом глаголанные, от божественного же евангелиста Иоанна, во гл. 5 в зачале 17, положенная
По изгнании праотца Адама из рая, вся потребная жизни человечестей трудами снискаема бывают, слушателие православные. Не точию же плотская, но и духовная. О плотских рече Господь ко Адаму: в поте лица твоего снеси хлеб (Быт.3). О духовных же Дух Святый усты Иисуса Сирахова, именно же о стяжании премудрости, увещает сице: чадо, всею душою твоею приступи к премудрости, и всею силою твоею соблюди пути ее, исследи и взыщи, и позна ти будет, и емся за ню, не остави ее: напоследок бо обрящеши покой ее, и обратися тебе на веселие (Сир. 6). Корень ее исполнь горести, но плоды зело сладцы: путь к ней вельми тесен и нужден, но прибыток пространен, честен. Где же оные искати имамы, се показует сама Премудрость Божия Ипостасная иудеом; испытайте писаний, яко мните в них имети живот вечный: и та суть сведетельствующа о Мне, и не хощете приити ко Мне, да живот имате. В нихже, яко во свойственном премудрсти месте, да вы православные людие, ищите прилежно, и обрящете полезно премудрсть Божию и с нею живот вечный, се аз о божественных писаниях слово к вашему благочестию простираю, и от кого достоит испытовати их показати желаю. Бога Слова молю о дар полезного слова, вашу же любовь о прилежное глаголемых внимание и соблюдение.
Писание священное, за премножество пользы, различными можем имены наречено быти, слушатели православные. Есть оно послание Божие к людем, послание, приносящее свет жизни, учащее добронравию, устрояющее умножение правды, светильник сущее веры. Тем бо мрак неверия отгонится, и греховная тма просвещением спраздняется, злонравие искореняется, вреды душевные исцеляются: лесть истребляется, и жизнь вечная обретается. Аще же земных царей грамоты, временной нам державы и прибытки утверждающие, тощно и любезно взыскуем, со многим иждевением и трудоположением: кольми паче всякими труды господствует, царя небесного посланий искати, вечных благ стяжание нам содевающих и крепость наследия небесного приносящих. Убо исытайте писаний. Божественный Василий, велие всея церкви светило, учитель вселенной, писание священное мирохранилищу, преобильно устроенному, уподобляет, тоя вины ради, яко имже образом во мирохранилище богатом, на всякие болезни плотские преугодные врачества обретаются, тако в писании божественном, на вся смертоносные вреды душевные, врачбы духовные обретаемы суть. Есть в нем на вред гордости врачевство смирения: Господь гордым противится, смиренным же дает благодать (Иак. 4); есть на язву сребролюбия – былие милостыни: От сущих вам дадите милостыню, и се вся чиста вам будут (Лк.11); есть на тлю нечистоты – бальство умерщвления плоти: умертвите убо удеса ваша, яже на земли, блуд нечистоту, страсть, похоть злую (Кол. 3); есть на недуг зависти лечба, еже благо желати комуждо: бывайте же друг ко другу блази (Еф. 4); есть на недег чревобесия былие воздержания: не пресыщайся во всей пищи, и не разливайся на различие брашна, ибо во мнозе брашне недуг будет, и пресыщение до скорби дойдет (Сир. 37), и паки: яко во дни благообразно ходим, не козлогласовании и пианства; есть на гнев – кротость (Рим.13): научитеся от Мене, яко кротость есмь и смирен сердцем (Мф.11); есть на леность трудолюбие: аще не хощет кто делати, ниже да яст, слышим бо некие бесчинно ходящие у вас, ничтоже делающие, но лукавно обходящиеся, таковым завещеваем и молим о Господе нашем Иисусе Христе, да со безмолвием делающе, свой хлеб ядят (2Сол. 3). Суть на иные всяческие недуги душевные иная доброполезная былия, яко в царстей, в небесной мироварнице: ибо по словеси учителя языков; всяко писание богодухновенно и полезно есть ко учению, ко обличению, ко исправлению, к наказанию еже в правде, да совершен будет Божий человек, на всяко дело благое уготован (2Тим. 3). Аще убо на плотских недугов устрабление, со всяким прилежанием ищем во врачебных храмех былия, много тошнее во исцеление недугов душевных долженствуем искати врачевств духовных, в писаниях божественных, ибо много лучшая душа есть от плоти: убо испытайте писаний Амвросий богомудрый в толковании притчи евангельской, яже о винограде, чрез столп, в винограде утвержденный, разумеет священное писание в церкви Богом данное: ибо якоже из столпа на вся страны страж смотрит и видит: тако приседящие божественному писанию могут зрети и настоящей жизни тление, и будущую вечность: тако жизнь блаженную, якоже плачевную, могут видети и Божия и человеческая, не токмо же явная, но и утаенная. Кто убо смыслен сый не потщится на той стоп восступити, аще и со многих трудов положением, но со величайшею пользою и веселием.
Григорий святый, папа римский, уподобляет е зерцалу, глаголя сице: писание священное очесем ума есть некое зерцало предложенное, да лице наше внутреннее видимо будет: тамо бо познавается скаредство наше и красота наша. Тамо уразумеваем, аще исправляемся, и коль далече отстоим от исправления. Аще же в зерцалех плотских прилежим усмотряти лица наша внешняя, да ничто порочное обрящется на них: то много прилежнее подобает нам созерцатися в зерцале духовном, в писаниях божественных, да непорочна будут внутренняя лица наша, ихже красоты Царь небесный есть рачитель приснотеплый.
Златоустый святый дает имя писанию сокровища духовного, внегда к слушателям пресладких бесед своих глаголати ему сице: днесь вам, возлюбленнейшие, духовное сокровище отверсти хощу, еже аще и между многими делится, обаче никогдаже истощавается. Вся бо обогащает, не точию кроме всякого умаления си, но и со умножением неким (Быт.3): ибо яко егда кто от чувственного сокровища, аще и малую возмет часть, обаче многая себе оттуда богатства пристяжет (Бесед. 16): тако и в божественных писаниях, и вкратце чтении, разумов честнота и неизреченная обретаются богатства. Сицево бо естество сего сокровища, яко обиловати творити ему обретающие е, и никогда же самому оскудевати: струи бо сея источник есть Дух Святый. О сокровища неоцененного! О богатства небесного!. Кто, сия слыша о нем, ленив обращается и не потщится искати его? Кто, жажду имея душевную, не восхощет сею утолити струею?
Ту струю виде некогда Иезекииль пророк, зело в велику реку возрастшу, яко не мощи ему прейти ее, за глубину непроходимую. Сказатели же писаний божественных, чрез реку ту писания глубину, или слова Божия пучину разумеют. Аще же есть в писаниях глубина, то есть и бедство потопления, неискусным плавания духовного, ей тако: мнози бо в той глубине потонуша, иже не в лодии Церкве, ни кормилом ее правыми быти хотяще, о себе суемудрствующе, запустишася на ту глубину, и ветры ересей извратившеся, кораблесокрушение душевное пострадаша, и от глубины писаний во глубину адскую низвержени быша. Такови суть вси ересеначальницы, Арий, Несторий, Савеллий, Македоний, и прочии им точнии. Тоя глубины и нынешним суемудрцем, во глубину писания продерзиво вревающимся, и по своему умышлению толкующим я, блюстися подобает, да не подобная овым постраждут. Бесчинно и погибельно есть, егда кто неискусен плавания ввергается в пучину бисерей искати: подобно есть тому, аще невеглас реется во глубину писаний тайные бисры премудрости взимати. Довольно есть людем, благочестие хранити любящим, мало же учения снискавшим, на брезе реки тоя стояще, жажду си тою животворною утоляти водою: и тако бо блаженства онаго не лишатся, еже Дух Святый чрез пророка обеща, в законе Господнем имеющим воли своя, и в законе Его поучающимся день и нощь: будет кождо сицевый, яко древо сажденное при исходящих вод, еже плод свой даст во время свое, и лист его не отпадет, и вся, елика аще творит, успеет. Но оле несытства славы мира сего! Оле бесстудного дерзновения! Яко и слепцы вождествовати устремляются: и о шарех, ихже не видят, рассуждение деют. Горькими слезами блаженный Иероним оплакивает свое время, за таковых людей бесчинных бесстудство; егоже и нам подражати должно есть, занеже и ныне таковые обретаются, иже первее учителие писания священного именуются, нежели ученицы нарицахуся. И тому научают, емуже никогда же изучишася сами: что не бывает и в мирских учениях, в нихже никтоже первее учитель бывает, нежели ученик. Само учение писания священного есть сицево, еже вси себе приписуют, и егда уши человеческие глаголы сладкими помастят, что-либо рекут, то мнят закон Божий быти, и не брегут ведети, что о том пророцы, что апостоли разумеша, но по уму си приводят свидетельства. Аки бы не быти тому великому прогрешению и скаредному образу учения: развращают разумения, и по воли си влекут писание, еже им противится: доселе словеса учителя помяненного. Яже вы братие и чада слышавше, молю именем Господа нашего Иисуса Христа, рассудите по истине, не тако ли у нас ныне деется? Разглагольствуют ныне о богословии мужие, разглагольствуют и отроцы, беседуют в лесах дивии человецы, препираются и на торжищах скотопродаватели, да не реку в корчемницах пиании. Напоследок и буия женища словопрение деют безумное, мужем своим и церкви пререкающе. Не помнят окаянные увещания, от учителя язык в послании, еже к Тимофею написанного (1Тим. 2): жена в безмолвии да учится со всяким покорением: жене же учити не повелеваю.
Учитися комуждо достоит, и монаху и мирскому. Чтение божественных писаний всякому полезно, и мужу и жене: ибо якоже вси уязвление от стрел демонских страждем: тако вси пластырей здравотворных из мирницы писания божественного долженствуем искати. Но учити тому есть прилично, ему же дадеся ключ разумения и власть учения. Толковати тому есть праведно и достойно, иже первее сам ученик быти научися, таже на седалище учительское возведеся. Ниже да глаголет ми кто, удобно быти все священное писание ко уразумению: ибо Петр святый апостол неудобство в Павловых обретает писаниях, и нам о нем изъявляет, глаголя сице: возлюбленный наш брат Павел, по данной ему премудрости, написа вам, якоже во всех своих посланиях, глаголя в них о сих: в нихже суть неудобь разумна некая, яже ненаучении и неутверждении развращают, якоже и прочие писания, ко своей им погибели (2Пет. 3).
Зрите, чада возлюбленные, смотрите, братия, яко не учат, но развращают неискусные: темже не подобает много суеглаголания их слушати; но бегати таковых годствует. Се бо Петр святый тако завещает: вы же убо возлюбленные предведяще хранитеся, да не лестию беззаконных сведени бывше, отпадете своего утверждения.
Неглиже вопросити мя хощете, от кого неудобных разума научитися имате? О сем не аз вы поучаю, но дивный он пророк, Моисей боговидец, глаголя: вопроси отца твоего, и возвестит тебе, старцы твоя – и рекут тебе, еже есть (Вт. 32): вопроси архиерея, иерея, учителя, имже дадеся ключ отверзения писания дверей: пачеже отверзения дверей царствия небесного: ибо святый Иоанн Златоустый глаголет: царствие есть блаженство небесное, дверь же его есть писание, еюже вшествуется в не: дверницы же суть священницы, имже вверено слово учения и толкования писаний. Ключ паки есть слово ведения писаний, имже отверзается человеком дверь истины. Отверзение же есть толкование истинное. К таковым убо дверником приходите, тыя о отверзение тех дверей небесных просите, а не овех, иже заключают токмо, а не отверзают, яко не взяша ключа разумения писаний.
Но и вы, о продерзивые суеучители, славы мира сего ловители, а не Божия славы искатели, доколе противитеся истине? Доколе подражаете Кореа, Дафана и Авирона, в пререкании их ходяще (Чис. 16)? Помяните, яко сии, противу ставше Моисею, живи землею поглотишася, вы же не Моисею, но самому Христу Богу противитеся егда архиереи и иереи, к нимже самым во апостолех рече Господь: шедше научите вся языки (Мф.28), уничижаете власть учения, им данную, себе похищающе. Помяните, яко не в свое дело царь Иосиа вложився, фимиамом хотев кадити Богу, абие проказою казнися от Господа (2Пар. 26). Возведите на память, яко сына Ааронова (Лев. 10), чуждый огнь, непосвященный Господеви, принесшая, напрасною погибоста смертию, огнем сожжена от Господа. Вы же не чуждый ли огнь приносите, егда неизвестные учения, бабия басни неискусным подаяти дерзаете? Воспомяните, яко и Саул, без Самуила принес жертвы Богу, царствия лишися (1Цар. 13): тако и вы кроме повеления архиереев Божиих учения, учения же суетные творяще, отриновени будете от царствия небесного. Еяже тщеты и огня вечного муки во еже бы вам не подъяти, престаните от начинаний ваших лукавых. Взыщите славы Богу, а не себе от человек, изберите зде буи мними быти, да мудри явитеся пред Господом, и с мудрыми девами впущени будете в чертог Его небесный, иначе бо, якоже девам юродивым, тако вам двери затворены будут чертога Христова. Вы же, благочестивые люди, избранное стадо Христово, благопокоривая овчата, бегайте таковых развратников общества, яко змиина, да не како прельстят вы от пути истины в погибель, якоже древле змий лукавый Еву сладкими убо, но смертоносными словесы своими. Приклоняйте же ушеса ваша на глаголы истинных ваших пастырей, тех гласа слушайте, от них испытайте писаний, и обрящете в них сокровище жизни вечной, бисер царствия небесного. По них ходити, и внидете на ту приснозлачную паству, идеже насыщени будете во веки, явлением славы Божия. О нейже пророк глаголет: насыщуся внегда явитмися слава твоя (Пс.17); и упиетеся от обилия дому Божия, о немже пророче Давид: упиются от тука дому Твоего, и потоком сладости Твоея напоиши я, яко у Тебе есть источник живота, и во свете твоем узрим свет (Пс.35). егоже зрети и от источника живота присно пити да сподобит вы сам Бог Отец, Бог Сын, Бог Дух святый, Бог в Троице единый. Аминь.
(Вечеря, л. 1–8).