Начало с Богом Святым месяцеслова, 12 месяцев. Месяц сентябрь
3/16 Священномученика Анфима, епископа Никомидийского (302). Преподобного Феоктиста, спостника Евфимия Великого (467). Блаженного Иоанна Власатого, Ростовского чудотворца (1580). Писидийской иконы Божией Матери (VI).
Тропарь священномученику Анфиму, епископу Никомидийскому, глас 4
И нр́авом прича́стник... (общий священномученику).
Кондак, глас 4
Во свяще́нницех благоче́стно пожи́в,/ и муче́ния путь сконча́в,/ и́дольская угаси́л еси́ служе́ния,/ побо́рник быв твоему́ ста́ду, Богому́дре./ Те́мже тя и почита́ем ны́не, та́йно вопию́ще:/от бед изба́ви нас/ твои́ми моли́твами, приснопа́мятне Анфи́ме.
Величание
Велича́ем тя,/ священному́чениче Анфи́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
Тропарь преподобному Феоктисту, спостнику Евфимия Великого, глас 8
Слез твои́х тече́ньми пусты́ни безпло́дное возде́лал еси,/ и и́же из глубины́ воздыха́ньми во сто трудо́в уплодоноси́л еси, / и был еси́ свети́льник вселе́нней,/ сия́я чудесы́, Феокти́сте о́тче наш,/ моли́ Христа́ Бо́га спасти́ся душа́м на́шим.
Кондак, глас 4
В по́стницех присовокупи́вся вели́кому Евфи́мию,/ в по́двизех, я́ко а́нгел на земли́ яви́ся,/ очища́я, преподо́бне, сердца́ ве́рных Боже́ственными зна́меньми повсегда́,/ сего́ ра́ди любо́вию, Феокти́сте, тя почита́ем.
Величание
Ублажа́ем тя,/ препо́добне о́тче Феокти́сте,/ и чтим святу́ю па́мять твою́,/ наста́вниче мона́хов/ и собесе́дниче ангелов.
Тропарь блаженному Иоанну Власатому, Ростовскому чудотворцу, глас 8
Яви́лся еси́ во гра́де, я́ко в пу́стыни, / в смиренному́дрии, чистоте́, и в труде́х, и по́двизех, и в терпе́нии мно́зе,/ преблаже́нне о́тче Иоа́нне./ Взем бо Крест Христо́в, после́довал еси́ Ему́,/ и в моли́твах и в псалмопе́нии день и нощь пребыва́л еси́, / о спасе́нии всего́ ми́ра и ро́да христиа́нскаго иноязы́чная рече́ния глаго́ля./ Ны́не же, по преселе́нии твое́м к Невече́рнему Све́ту, ко гро́бу твоему́ притека́юще,/ ве́рнии мо́лятся Го́сподеви, Богоро́дице и Предте́чи, и прие́млют от Го́спода исцеле́ния моли́твами твои́ми./ При́сно за ны моли́ся, блаже́нне о́тче Иоа́нне, спасти́ся душа́м на́шим.
Ин тропарь, глас 4
Яви́лся еси́ во гра́де, я́ко в пу́стыни, / смиренному́дрием и чистото́ю,/ и взем Крест Христо́в, после́довал Ему́/ в труде́х и по́двизех, и в терпе́нии мно́зе, преблаже́нне о́тче Иоа́нне./ И ны́не моли о нас, соверша́ющих па́мять твою́/ и усе́рдно притека́ющих к ра́це моще́й твои́х,/ изба́витися от бед, и душа́м на́шим пода́ти ве́лию ми́лость.
Кондак, глас 8
Христо́вою любо́вию уязви́вся, о́тче Иоа́нне блаже́нне,/ вы́шния красоты́ жела́я,/ земна́я же презре́ и нивочто́же вмени́,/ и на земли́ а́нгельское житие́ препроводи́,/ в ве́чный поко́й
дости́же,/ иде́же глас пра́зднующих, с ни́миже моли́ся за ны,/ и душа́м на́шим проще́ние/ и телесе́м исцеле́ние да́руй.
Ин кондак, глас 2
Христо́вою любо́вию уязви́вся, о́тче Иоа́нне блаже́нне,/ вы́шния красоты́ жела́я,/ земна́я же вся презре́ и нивочто́же вмени́,/ и на земли а́нгельское житие́ име́я,/ пресели́лся еси́ в
ве́чный поко́й,/ иде́же, предстоя́ Христу́ Бо́гу,/ моли́ спасти́ся нам и всему́ христиа́нскому ро́ду, я́ко да зове́м ти:/ ра́дуйся, преблаже́нне о́тче Иоа́нне.
Величание
Ублажа́ем тя,/ святы́й пра́ведный Иоа́нне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
Ино величание
Велича́ем тя,/ святы́й блаже́нне Иоа́нне Ми́лостиве,/ и чтим святу́ю па́мять твою́, / ты бо мо́лиши за нас/ Христа́ Бо́га на́шего.