Третья седмица (с понедельника по пяток)
Въ понедѣ́льникъ г҃-ѧ седми́цы на ᲂу҆́трени,
трⷪ҇чны гла́са. По а҃-мъ стїхосло́вїи, глаго́лемъ сѣда́льны ᲂу҆мили́тєльныѧ ѻ҆смогла́сника, слꙋчи́вшагѡсѧ гла́са.
По в҃-мъ стїхосло́вїи сѣда́ленъ, господи́на і҆ѡ́сифа, гла́съ и҃.
Подо́бенъ: Повелѣ́нное та́йнѡ:
Воздержа́нїѧ ѻ҆гне́мъ попали́мъ всѝ хвра̑стнаѧ страсте́й воста̑нїѧ и҆ пла́мень ѻ҆́ный негаси́мый ᲂу҆гаси́мъ ны́нѣ сле́зными тѡ́ки, вопїю́ще хотѧ́щемꙋ сꙋди́ти все́й землѝ: сп҃се бл҃госе́рде гдⷭ҇и,неѡсꙋждє́ны на́съ соблюдѝ, подаѧ̀ на́мъ согрѣше́нїй проще́нїе. [Два́жды.]
Бг҃оро́диченъ, подо́бенъ:
Бг҃обл҃года́тнаѧ чтⷭ҇аѧ бл҃гослове́ннаѧ, милосе́рдїѧ ра́ди щедро́тъ и҆з̾ тебє̀ рожде́ннаго, съ вы́шними си́лами и҆ со а҆рха́гг҃лы и҆ со всѣ́ми безпло́тными, ѡ҆ на́съ молѝ непреста́ннѡ, да́ти на́мъ пре́жде конца̀ проще́нїе и҆ ѡ҆чище́нїе грѣхѡ́въ, и҆ житїѧ̀ и҆справле́нїе, ꙗ҆́кѡ да ѡ҆брѧ́щемъ млⷭ҇ть.
По г҃-мъ же стїхосло́вїи сѣда́ленъ, господи́на ѳео́дѡра,
гла́съ и҃.
Подо́бенъ: Повелѣ́нное та́йнѡ:
Трⷪ҇це ст҃а́ѧ и҆ чтⷭ҇на́ѧ, поста̀ седми́цꙋ тре́тїю соверша́ющыѧ сохранѝ цѣ̑лы и҆ неѡсꙋждє́ны,досто́йнѣ тещѝ къ про́чымъ и҆ всѧ̑ за́пѡвѣди твоѧ̑ соверша́ти: ꙗ҆́кѡ да си́це дости́гнемъ неѡсꙋжде́ннѡ ви́дѣти пресла́вное воскрⷭ҇нїе, пѣ́нїе хвале́бное приносѧ́ще. [Два́жды.]
Бг҃оро́диченъ, гла́съ то́йже:
Предста́тельство вѣ́рныхъ бг҃ороди́тельнице, скорбѧ́щихъ ра́дость и҆ пла́чꙋщихъ преве́лїе ᲂу҆тѣше́нїе, преесте́ственнѡ ро́ждшагосѧ ѿ чре́ва всест҃а́гѡ твоегѡ̀, дв҃о, непреста́ннѡ ѡ҆ на́съ со а҆́гг҃лы и҆ нача́лы молѝ, и҆зба́витисѧ на́мъ ѿ лю́тагѡ ѡ҆сꙋжде́нїѧ въ ча́съ и҆спыта́нїѧ.
Канѡ́нъ въ мине́и, и҆ настоѧ́щїй трипѣ́снецъ, господи́на і҆ѡ́сифа.
И҆ стїхосло́витсѧ пѣ́снь. Гла́съ и҃.
Пѣ́снь а҃.
І҆рмо́съ: Пѣ́снь возсле́мъ, лю́дїе:
И҆мѣ́ѧ ꙗ҆́кѡ бг҃ъ милосе́рдїе, ка́ющасѧ прїимѝ мѧ̀, и҆жди́вшаго житїѐ моѐ блꙋ́днѡ. вопїю̀ тѝ: согрѣши́хъ, ѡ҆бличи́телей не тре́бꙋю, стꙋ́дъ дѣ́лъ мои́хъ приносѧ̀.
Ѡ҆ста́вивъ снѣ́дь а҆́гг҃льскꙋю, ᲂу҆подо́бихсѧ скотѡ́мъ, пита́ѧсѧ скве́рною ѕло́бою: ты̀ же ѡ҆браща́ющасѧ прїимѝ мѧ̀, ꙗ҆́кѡ є҆ди́наго ѿ нає́мникъ твои́хъ, нбⷭ҇ный ѻ҆́ч҃е.
Но́щь сласте́й ѿ пи́щи быва́ющꙋю всѝ вѣ́рнїи ѡ҆ста́вивше, къ свѣ́тꙋ и҆́стины со тща́нїемъ пристꙋ́пимъ, да свѣтоно́снагѡ пи́ра сподо́бимсѧ.
Бг҃оро́диченъ: Ра́дꙋйсѧ, прест҃ы́й хра́ме, рꙋно̀ бг҃оро́сное, запечатлѣ́нный и҆сто́чниче безсме́ртныѧ стрꙋѝ: ста́до твоѐ, влⷣчце сохранѧ́й ѿ всѧ́кихъ сопроти́вныхъ невоева́но.
И҆́ный, господи́на ѳео́дѡра. Гла́съ то́йже.
І҆рмо́съ: Пои́мъ пѣ́снь бг҃ꙋ:
Ны́нѣ въ седми́цахъ трїе́хъ, ꙗ҆́коже дре́вле тридне́внѣ і҆и҃ль, ѡ҆чи́стившесѧ, бра́тїе, горы̀ моли́твъ дости́гнемъ, и҆ ѿтꙋ́дꙋ бж҃е́ственныѧ гла́сы ᲂу҆слы́шавше, хрⷭ҇та̀ воспои́мъ.
Ꙗ҆́коже самѱѡ́нъ посто́мъ ᲂу҆крѣпи́вшесѧ, прїиди́те, лю́дїе, ꙗ҆́коже и҆на́го ѕвѣ́рѧ порази́мъ чре́внаго бѣ́са, и҆ да не посмѣе́тсѧ далі́да страсте́й, прельща́ющаѧ на́съ.
Трⷪ҇ченъ: Трѝ пою̀ херꙋві́мски тебѐ, ст҃о́е бж҃ество̀: свѣ́ты и҆ свѣ́тъ, и҆ жи́знь и҆ жи̑зни, бг҃а ро́ждшаго, бг҃а рожде́ннаго и҆ бг҃а ѿ ѻ҆ц҃а̀ и҆сходѧ́щаго, дх҃а жива́го.
Бг҃оро́диченъ: Ра́дꙋйсѧ, є҆́ѵы ра́досте: и҆́бо ѻ҆́ныѧ печа́ль ржⷭ҇тво́мъ твои́мъ преста̀, чтⷭ҇аѧ.ра́дꙋйсѧ, незаходи́магѡ свѣ́та свѣ́тлый ѡ҆́блаче, и҆з̾ негѡ́же возсїѧ̀ хрⷭ҇то́съ бг҃ъ.
Сла́ва тебѣ̀, бж҃е на́шъ, сла́ва тебѣ̀.
Ꙗ҆́коже дв҃дъ вѣ́рою, и҆ мы̀ смиренномꙋ́дрїемъ воѡрꙋжи́вшесѧ, ꙗ҆́кѡ и҆на́го голїа́ѳа, го́рдый ᲂу҆́мъ низложи́вше, посѣце́мъ кꙋ́пнѡ и҆ тьмы̑ страсте́й.
І҆рмо́съ: Пои́мъ пѣ́снь бг҃ꙋ, і҆и҃лѧ ѿ го́рькагѡ ра́бства фараѡ́нова и҆зба́вльшемꙋ и҆ ѻ҆́гненнымъ столпо́мъ и҆ свѣ́тлымъ ѡ҆́блакомъ наста́вльшемꙋ, ꙗ҆́кѡ просла́висѧ.
Пѣ́снь и҃.
І҆рмо́съ: Бг҃оглаго́ливїи ѻ҆́троцы:
И҆жди́въ бога́тство ѻ҆те́ческое со блꙋдни́цами, и҆згна́нъ бы́хъ ѿ преддве́рїй бл҃года́ти: но прїими́ мѧ̀, ѻ҆́ч҃е, безмѣ́рныѧ ра́ди млⷭ҇ти.
Во свѣтлѣ́йшемъ постѣ̀ мл҃твъ свѣтозаре́нїемъ просвѣти́вшесѧ, свѣтови́дни да бꙋ́демъ, ꙗ҆́кѡ да грѣхо́вныѧ тьмы̀ и҆збѣ́гнемъ.
Мо́литъ тѧ̀ ли́къ безпло́тныхъ, херꙋві́ми мо́лѧтъ, и҆ ст҃ы́хъ чи́нове: дꙋ́шы на́шѧ сп҃сѝ, хрⷭ҇тѐ многомлⷭ҇тиве.
Бг҃оро́диченъ: Невоздѣ́ланный гро́здъ заче́ншаѧ, ᲂу҆цѣломꙋ́дри мѧ̀, пїѧ́нствомъ грѣха̀ ѡ҆мраче́ннаго, бцⷣе дв҃о, наде́ждо дꙋ́шъ на́шихъ.
И҆́ный.
І҆рмо́съ: Покрыва́ѧй вода́ми:
Ѻ҆те́ческимъ сокро́вищемъ, и҆мѣ́нїемъ чꙋ́днымъ, ма́терїю всѣ́хъ послꙋжи́вшихъ влⷣцѣ хрⷭ҇тꙋ̀,прїиди́те, наслади́мсѧ, бра́тїе, посто́мъ: и҆́бо се́й ᲂу҆крѣплѧ́етъ тѣ́ло и҆ просвѣща́етъ ᲂу҆́мъ и҆ се́рдце.
Гедеѡ́нꙋ чꙋ́дномꙋ подража́ющи, дꙋшѐ, добродѣ́тєли носѧ́щи вѣ́рꙋ, наде́ждꙋ и҆ любо́вь хрⷭ҇то́вꙋ,и҆зы́ди ᲂу҆бива́ющи и҆ноплемє́нныѧ стра̑сти, ꙗ҆́коже ѻ҆́ный съ тремѝ сты̀, мадїа́мскїй ꙗ҆зы́къ и҆стреблѧ́ѧ.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: И҆ трⷪ҇цꙋ сла́влю тѧ̀, и҆ ꙗ҆́кѡ є҆ди́ницꙋ пою̀ тѧ̀, бж҃ество̀ є҆ди́но, ѻ҆́ч҃е вседержи́телю, и҆ є҆динонача́льне сн҃е, дш҃е ст҃ы́й, и҆ всевлады́чнаѧ держа́во, є҆ди́но є҆стество̀, є҆ди́но црⷭ҇тво, въ трїе́хъ лѝцахъ покланѧ́емое.
Бг҃оро́диченъ: Болѣ̑зни, и҆́хже въ ржⷭ҇твѣ̀ преесте́ственнѡ и҆збѣжѐ, во твое́й чтⷭ҇нѣ́й стрⷭ҇ти позна̀ ро́ждшаѧ тѧ̀: болѣ́зноваше бо, зрѧ́щи на крⷭ҇тѣ̀ тѧ̀ пригвожде́на во́лею ѿ і҆ꙋде́євъ, на вода́хъ зе́млю ѡ҆снова́вшаго.
Сла́ва тебѣ̀, бж҃е на́шъ, сла́ва тебѣ̀.
Є҆гда̀ прїи́деши во сла́вѣ твое́й сꙋди́ти все́й землѝ, съ ты́сѧщами и҆ тьма́ми си́лъ: тогда̀ пощади́ мѧ, гдⷭ҇и, ѡ҆сла́би, и҆ и҆зба́ви ѿ ѡ҆сꙋжде́нїѧ, не посрамѝ менѐ, не ѡ҆сꙋдѝ менѐ во ѻ҆́гнь вѣ́чный.
Хва́лимъ, бл҃гослови́мъ, покланѧ́емсѧ гдⷭ҇еви:
І҆рмо́съ: Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю и҆ творцꙋ̀, во вѣ́ки.
Пѣ́снь ѳ҃.
І҆рмо́съ: Проѧвле́нное на горѣ̀:
Ѿ твоеѧ̀ любвѐ, ѻ҆́ч҃е, ᲂу҆дали́вшагосѧ и҆ во́льными стремле́ньми сласте́й порабоще́ннаго,ѡ҆браща́ющасѧ ꙗ҆́кѡ блꙋ́днаго прїимѝ: є҆ди́нъ бо є҆сѝ многомлⷭ҇тивъ.
Непло́днаѧ ꙗ҆ви́хсѧ смоко́вница, а҆́зъ ѡ҆каѧ́нный, є҆ди́нꙋ то́кмѡ ѕло́бꙋ дѣ́лаѧ, ѻ҆́гнь мнѣ̀ хода́тайствꙋющꙋю: ты̀ ᲂу҆́бо, гдⷭ҇и, плодоно́сна мѧ̀ покажѝ, дѣѧ̑нїѧ бл҃га̑ѧ плодоносѧ́ща тебѣ̀.
Пости́сѧ, дꙋшѐ моѧ̀, ѿ ѕло́бы и҆ лꙋка́вства, ᲂу҆держи́сѧ ѿ гнѣ́ва и҆ ꙗ҆́рости и҆ всѧ́кагѡ грѣха̀: і҆и҃съ бо такова́гѡ хо́щетъ поста̀, чл҃вѣколю́бнѣйшїй бг҃ъ на́шъ.
Бг҃оро́диченъ: Ты̀ є҆сѝ, бцⷣе, ѡ҆рꙋ́жїе на́ше и҆ стѣна̀: ты̀ є҆сѝ застꙋпле́нїе къ тебѣ̀ прибѣга́ющихъ: тѧ̀ и҆ ны́нѣ на мл҃твꙋ дви́жемъ, да и҆зба́вимсѧ ѿ вра̑гъ на́шихъ.
И҆́ный.
І҆рмо́съ: Велича́емъ тѧ̀:
Чи́стый по́стъ, ѕлы́хъ ѿложе́нїе, принесе́мъ ꙗ҆́кѡ да́ры бл҃гопрїѧ̑тны хрⷭ҇тꙋ̀ бг҃ꙋ на́шемꙋ.
Оу҆вѣ́дѣвши, ка́кѡ є҆лїссе́й дре́вле пита́ше прⷪ҇ро́ки, подо́бнѣ пита́йсѧ, дꙋшѐ, бл҃годарѧ́щи хрⷭ҇та̀.
Трⷪ҇ченъ: Трои́мый ли̑цы є҆ди́нъ зра́къ тѧ̀, бж҃ество̀, воспѣва́ю, ѻ҆ц҃а̀ безнача́льнаго, и҆ сн҃а, и҆ дх҃а жива́го.
Бг҃оро́диченъ: Бг҃омт҃и ѻ҆трокови́це, черто́же нбⷭ҇нагѡ цр҃ѧ̀ хрⷭ҇та̀, мл҃твами твои́ми сп҃сѝ любо́вїю воспѣва́ющыѧ тѧ̀.
Сла́ва тебѣ̀, бж҃е на́шъ, сла́ва тебѣ̀.
Данїи́лъ въ ро́вѣ ѕвѣ̑ри ᲂу҆кроща́етъ ᲂу҆здо́ю воздержа́нїѧ: и҆ мы̀ постѧ́щесѧ стра̑сти ᲂу҆смири́мъ.
І҆рмо́съ: Велича́емъ тѧ̀ всенепоро́чнꙋю мт҃рь хрⷭ҇та̀ бг҃а, ю҆́же ѡ҆сѣнѝ дх҃ъ всест҃ы́й.
Свѣти́ленъ гла́са.
На стїхо́внѣ самогла́сенъ днѐ, два́жды, гла́съ д҃:
Въ лю́тꙋю скве́рнꙋ прегрѣше́нїй мои́хъ ѡ҆блеко́хсѧ и҆ ѿ черто́га ра́дости и҆згна́нъ бы́хъ: ᲂу҆ще́дри мѧ̀ неизглаго́ланнымъ твои́мъ бл҃госе́рдїемъ, ꙗ҆́кѡ блꙋ́днаго сы́на, бж҃е, и҆ поми́лꙋй мѧ̀.
Мч҃нченъ: Кто̀ не диви́тсѧ, ст҃і́и мꙋ́чєницы, зрѧ̀ по́двигъ до́брый, и҆́мже подвиза́стесѧ; ка́кѡ въ тѣлесѝ сꙋ́ще, безпло́тнаго врага̀ побѣди́сте, хрⷭ҇та̀ и҆сповѣ́давше и҆ крⷭ҇то́мъ воѡрꙋжи́вшесѧ; тѣ́мже досто́йнѡ ꙗ҆ви́стесѧ де́монѡвъ прогони́телїе и҆ ва́рварѡвъ борцы̀: непреста́ннѡ моли́те сп҃сти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ, гла́съ то́йже:
Свѣти́льниче неꙋгаси́мый, прⷭ҇то́ле пра́вды, пречтⷭ҇аѧ влⷣчце, молѝ сп҃сти́сѧ дꙋша́мъ на́шымъ.
На ѕ҃-мъ часѣ̀ тропа́рь прⷪ҇ро́чества, гла́съ д҃:
Занѐ не́мощни є҆смы̀ и҆ разсла́блени грѣхмѝ, и҆сцѣлѝ сокрꙋшє́нїѧ на̑ша, врачꙋ̀ дꙋ́шъ на́шихъ, вѣ́дый ᲂу҆́мъ человѣ́чь, чл҃вѣколю́бче.
Прокі́менъ, ѱало́мъ м҃а, гла́съ д҃: Мл҃тва бг҃ꙋ живота̀ моегѡ̀, рекꙋ̀ бг҃ꙋ: застꙋ́пникъ мо́й є҆сѝ. Сті́хъ: И҆́мже ѡ҆́бразомъ жела́етъ є҆ле́нь на и҆сто́чники водны̑ѧ:
Прⷪ҇ро́чества и҆са́їина чте́нїе.
[Глава̀ и҃, ст. г҃і-к҃в: глава̀ ѳ҃, ст. а҃-з҃].
Гдⷭ҇а си́лъ, того̀ ѡ҆ст҃и́те, и҆ то́й бꙋ́детъ тебѣ̀ въ стра́хъ. И҆ а҆́ще бꙋ́деши ᲂу҆пова́ѧ на него̀, бꙋ́детъ тебѣ̀ во ѡ҆сщ҃е́нїе, а҆ не ꙗ҆́коже ѡ҆ ка́мень претыка́нїѧ преткне́шисѧ, нижѐ ꙗ҆́кѡ ѡ҆ ка́мень претыка́нїѧ преткне́шисѧ, нижѐ ꙗ҆́кѡ ѡ҆ ка́мень паде́нїѧ. До́мове же і҆а́кѡвли въ прꙋ́глѣ, и҆ въ раздо́лїи сѣдѧ́щїи во і҆ерⷭ҇ли́мѣ: сегѡ̀ ра́ди и҆знемо́гꙋтъ въ ни́хъ мно́зи, и҆ падꙋ́тъ, и҆ сокрꙋша́тсѧ, и҆ прибли́жатсѧ, и҆ ꙗ҆́ти бꙋ́дꙋтъ человѣ́цы въ тверды́ни сꙋ́ще. Тогда̀ ꙗ҆вле́ни бꙋ́дꙋтъ печатлѣ́ющїи зако́нъ, є҆́же не ᲂу҆чи́тисѧ. И҆ рече́тъ: пождꙋ̀ бг҃а ѿвра́щшагѡ лицѐ своѐ ѿ до́мꙋ і҆а́кѡвлѧ, и҆ ᲂу҆пова́ѧ бꙋ́дꙋ на́нь. Сѐ а҆́зъ и҆ дѣ́ти, ꙗ҆́же мѝ дадѐ бг҃ъ: и҆ бꙋ́дꙋтъ зна́мєнїѧ и҆ чꙋдеса̀ въ домꙋ̀ і҆и҃левѣ ѿ гдⷭ҇а саваѡ́ѳа, и҆́же ѡ҆бита́етъ на горѣ̀ сїѡ́нъ. И҆ а҆́ще рекꙋ́тъ къ ва́мъ: и҆зыщи́те чревоволше́бникѡвъ, и҆ ѿ землѝ возглаша́ющихъ, тщесло́вꙋющихъ, и҆̀же ѿ чре́ва глаша́ютъ: не ꙗ҆зы́къ ли къ бг҃ꙋ своемꙋ̀ взы́щетъ, что̀ и҆спытꙋ́ютъ мє́ртвыѧ ѡ҆ живы́хъ; Зако́нъ бо въ по́мощь дадѐ, да рекꙋ́тъ не ꙗ҆́коже сло́во сїѐ, за́ньже не лѣ́ть да́ры даѧ́ти. И҆ прїи́детъ на вы̀ жесто́къ гла́дъ, и҆ бꙋ́детъ, є҆гда̀ вза́лчете, ско́рбни бꙋ́дете, и҆ ѕло̀ рече́те кнѧ́зю, и҆ ѻ҆те́чествꙋ: и҆ воззрѧ́тъ на не́бо горѣ̀, и҆ на зе́млю ни́зꙋ при́зрѧтъ, и҆ сѐ скꙋ́дость тѣ́сна и҆ тьма̀, ско́рбь и҆ тѣснота̀ и҆ тьма̀, ꙗ҆́коже не ви́дѣти: и҆ не ѡ҆скꙋдѣ́етъ въ тѣснотѣ̀ сы́й да́же до вре́мене. Сїѐ пре́жде и҆спі́й, ско́рѡ творѝ, страно̀ завꙋлѡ́нѧ, и҆ землѐ нефѳалі́млѧ, и҆ про́чїи при мо́ри живꙋ́щїи, и҆ ѡ҆б̾ ѻ҆нꙋ̀ странꙋ̀ і҆ѻрда́на, галїле́а ꙗ҆зы́кѡвъ. Лю́дїе ходѧ́щїи во тьмѣ̀ ви́дѣша свѣ́тъ ве́лїй: живꙋ́щїи во странѣ̀ и҆ сѣ́ни сме́ртнѣй, свѣ́тъ возсїѧ́етъ на вы̀. Мно́жайшыѧ лю́ди, ꙗ҆̀же и҆зве́лъ є҆сѝ въ весе́лїи твое́мъ: и҆ возвеселѧ́тсѧ пред̾ тобо́ю, ꙗ҆́коже веселѧ́щїисѧ въ жа́твꙋ, и҆ ꙗ҆́коже веселѧ́тсѧ дѣлѧ́щїи коры̑сти. Занѐ ѿѧ́тсѧ ꙗ҆ре́мъ лежа́й на ни́хъ, и҆ же́злъ, и҆́же на вы́и и҆́хъ: же́злъ бо и҆стѧзꙋ́ющихъ разсы́па гдⷭ҇ь, ꙗ҆́коже въ де́нь, и҆́же на мадїа́ма. Ꙗ҆́кѡ всѧ́кꙋю ѡ҆де́ждꙋ со́браннꙋ ле́стїю, и҆ ри́зꙋ съ примире́нїемъ ѿдадꙋ́тъ, и҆ восхотѧ́тъ, да бы́ша ѻ҆гне́мъ сожже́ни бы́ли. Ꙗ҆́кѡ ѻ҆троча̀ роди́сѧ на́мъ, сн҃ъ, и҆ даде́сѧ на́мъ, є҆гѡ́же нача́льство бы́сть на ра́мѣ є҆гѡ̀: и҆ нарица́етсѧ и҆́мѧ є҆гѡ̀: вели́ка совѣ́та а҆́гг҃лъ, чꙋ́денъ, совѣ́тникъ, бг҃ъ крѣ́пкїй, властели́нъ, кнѧ́зь ми́ра, ѻ҆ц҃ъ бꙋ́дꙋщагѡ вѣ́ка: приведꙋ́ бо ми́ръ на кнѧ́зи, ми́ръ и҆ здра́вїе є҆мꙋ̀. И҆ ве́лїе нача́льство є҆гѡ̀, и҆ ми́ра є҆гѡ̀ нѣ́сть предѣ́ла на прⷭ҇то́лѣ дв҃довѣ и҆ на црⷭ҇твѣ є҆гѡ̀, и҆спра́вити є҆̀ и҆ застꙋпи́ти є҆го̀ въ сꙋдѣ̀ и҆ пра́вдѣ, ѿны́нѣ и҆ до вѣ́ка: ре́вность гдⷭ҇а саваѡ́ѳа сотвори́тъ сїѧ̑.
Прокі́менъ, ѱало́мъ м҃в, гла́съ ѕ҃: Сп҃се́нїе лица̀ моегѡ̀ и҆ бг҃ъ мо́й. Сті́хъ: Сꙋдѝ мѝ,бж҃е, и҆ разсꙋдѝ прю̀ мою̀.
Въ понедѣ́льникъ г҃-ѧ седми́цы ве́чера.
На Гдⷭ҇и воззва́хъ, поста́вимъ стїхѡ́въ ѕ҃, и҆ пое́мъ настоѧ́щыѧ подо́бны трїѡ́ди, господи́на і҆ѡ́сифа, гла́съ а҃.
Подо́бенъ: Прехва́льнїи мч҃нцы:
По́стъ возлю́бимъ, дꙋшѝ стра̑сти лютѣ́йшыѧ содѣ́йствомъ дх҃а погаша́ющїй и҆ бж҃е́ствєннаѧ дѣѧ̑нїѧ дѣ́ѧти ᲂу҆крѣплѧ́ющїй, и҆ ᲂу҆́мъ на нб҃о возсыла́ющїй, и҆ проще́нїе хода́тайствꙋющїй на́шихъ согрѣше́нїй, да́рꙋемое ѿ бг҃а ще́драгѡ.
Всѐ житїѐ моѐ, гдⷭ҇и, стꙋ́днѡ и҆жди́въ со блꙋдни́цами а҆́зъ ѡ҆каѧ́нный, ꙗ҆́коже блꙋ́дный, во ᲂу҆миле́нїи зовꙋ̀: ѻ҆́ч҃е нбⷭ҇ный, согрѣши́хъ, ми́лостивъ бꙋ́ди и҆ сп҃си́ мѧ, и҆ не ѿри́ни менє̀, самогѡ̀ ѿ тебє̀ ᲂу҆дали́вшасѧ и҆ бж҃е́ственными дѣ́лы ны́нѣ ѡ҆бнища́вшагѡ.
И҆́на стїхи́ра подо́бна, господи́на ѳео́дѡра, гла́съ г҃.
Подо́бенъ: Прїиди́те, всѝ концы̀:
Прїиди́те, всѝ въ кѷмва́лѣхъ ѱало́мскихъ, честно́е воздержа́нїе цѣлꙋ́юще, возгласи́мъ: въ не́мъ бо мы́сленнѡ ѕмі́ѧ ѕлонача́льнаго низверга́емъ. тѣ́мже со дерзнове́нїемъ возопїи́мъ хрⷭ҇тꙋ̀: пода́ждь, сп҃се, неѡсꙋжде́ннѡ всест҃ы́й тво́й крⷭ҇тъ ᲂу҆зрѣ́ти и҆ поклони́тисѧ, во ѱалмѣ́хъ и҆ пѣ́нїихъ пра́здновати свѣ́тлѡ.
И҆ мине́и г҃. Сла́ва, и҆ ны́нѣ, бг҃оро́диченъ:
Прокі́менъ, ѱало́мъ м҃г, гла́съ д҃: Ѡ҆ бз҃ѣ похва́лимсѧ ве́сь де́нь, и҆ ѡ҆ и҆́мени твое́мъ и҆сповѣ́мысѧ во вѣ́къ. Сті́хъ: Бж҃е, ᲂу҆ши́ма на́шима ᲂу҆слы́шахомъ:
Бытїѧ̀ чте́нїе. [Глава̀ ѕ҃, ст. ѳ҃-к҃в.]
Нѡ́е человѣ́къ пра́веденъ, соверше́нъ сы́й въ ро́дѣ свое́мъ, бг҃ꙋ ᲂу҆годѝ нѡ́е. Роди́ же нѡ́е трѝ сы́ны: си́ма, ха́ма, і҆а́феѳа. Растлѣ́сѧ же землѧ̀ пред̾ бг҃омъ, и҆ напо́лнисѧ землѧ̀ непра́вды. И҆ ви́дѣ гдⷭ҇ь бг҃ъ зе́млю, и҆ бѣ̀ растлѣ́нна: ꙗ҆́кѡ растлѝ всѧ́ка пло́ть пꙋ́ть сво́й на землѝ. И҆ речѐ гдⷭ҇ь бг҃ъ нѡ́ю: вре́мѧ всѧ́кагѡ человѣ́ка прїи́де пред̾ мѧ̀, ꙗ҆́кѡ и҆спо́лнисѧ землѧ̀ непра́вды ѿ ни́хъ: и҆ сѐ а҆́зъ погꙋблю̀ и҆̀хъ и҆ зе́млю. Сотворѝ ᲂу҆̀бо себѣ̀ ковче́гъ ѿ дре́въ [негнїю́щихъ] четвероꙋго́льныхъ: гнѣ́зда сотвори́ши въ ковче́зѣ, и҆ посмоли́ши є҆го̀ внꙋтрьꙋ́дꙋ и҆ внѣꙋ́дꙋ смоло́ю. И҆ та́кѡ сотвори́ши ковче́гъ: тре́хъ сѡ́тъ лакте́й долгота̀ ковче́га, и҆ пѧти́десѧти лакте́й широта̀, и҆ три́десѧти лакте́й высота̀ є҆гѡ̀. Собира́ѧ сво́домъ сотвори́ши ковче́гъ, и҆ въ ла́коть сверши́ши є҆го̀ свы́ше: две́рь же ковче́га сотвори́ши ѿ страны̀: ѡ҆бита̑лища двокрѡ́вна и҆ трекрѡ́вна сотвори́ши въ не́мъ. А҆́зъ же сѐ наведꙋ̀ пото́пъ, во́дꙋ на зе́млю, погꙋби́ти всѧ́кꙋ пло́ть, въ не́йже є҆́сть дꙋ́хъ жи́зни под̾ небесе́мъ: и҆ є҆ли̑ка сꙋ́ть на землѝ, сконча́ютсѧ. И҆ поста́влю завѣ́тъ мо́й съ тобо́ю: вни́деши же въ ковче́гъ ты̀, и҆ сы́нове твоѝ, и҆ жена̀ твоѧ̀, и҆ жєны̀ сынѡ́въ твои́хъ съ тобо́ю. И҆ ѿ всѣ́хъ скотѡ́въ, и҆ ѿ всѣ́хъ га̑дъ, и҆ ѿ всѣ́хъ ѕвѣре́й, и҆ ѿ всѧ́кїѧ пло́ти, два̀ два̀ ѿ всѣ́хъ введе́ши въ ковче́гъ, да пита́еши съ собо́ю: мꙋ́жескїй по́лъ и҆ же́нскїй бꙋ́дꙋтъ. Ѿ всѣ́хъ пти́цъ перна́тыхъ по ро́дꙋ, и҆ ѿ всѣ́хъ скотѡ́въ по ро́дꙋ, и҆ ѿ всѣ́хъ гадѡ́въ по́лзающихъ по землѝ по ро́дꙋ и҆́хъ, два̀ два̀ ѿ всѣ́хъ вни́дꙋтъ къ тебѣ̀, пита́тисѧ съ тобо́ю, мꙋ́жескїй по́лъ и҆ же́нскїй. Ты́ же возьмѝ себѣ̀ ѿ всѣ́хъ бра́шенъ, ꙗ҆̀же и҆́мате ꙗ҆́сти, и҆ собере́ши къ себѣ̀: и҆ бꙋ́дꙋтъ тебѣ̀ и҆ ѻ҆́нымъ бра́шно. И҆ сотворѝ нѡ́е всѧ̑, є҆ли̑ка заповѣ́да є҆мꙋ̀ гдⷭ҇ь бг҃ъ, та́кѡ сотворѝ.
Прокі́менъ, ѱало́мъ м҃д, гла́съ ѕ҃: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ. Сті́хъ: Ѿры́гнꙋ се́рдце моѐ сло́во бла́го:
При́тчей чте́нїе. [Глава̀ и҃, ст. а҃-к҃а].
Сы́не, ты̀ премꙋ́дрость проповѣ́ждь, да ра́зꙋмъ послꙋ́шаетъ тебѐ. На высо́кихъ бо крае́хъ є҆́сть, посредѣ́ же сте́зь стои́тъ: при вратѣ́хъ бо си́льныхъ присѣди́тъ, во вхо́дѣхъ же пое́тсѧ. Ва́съ, ѽ человѣ́цы, молю̀, и҆ вдаю̀ мо́й гла́съ сынѡ́мъ человѣ́чєскимъ. Оу҆разꙋмѣ́йте неѕло́бивїи,кова́рство, ненака́заннїи же, приложи́те се́рдце. Послꙋ́шайте менѐ: честна̑ѧ бо рекꙋ̀, и҆ и҆знесꙋ̀ ѿ ᲂу҆сте́нъ пра̑ваѧ. Ꙗ҆́кѡ и҆́стинѣ поꙋчи́тсѧ горта́нь мо́й, мє́рзки же предо мно́ю ᲂу҆стны̀ лжи̑выѧ. Съ пра́вдою всѝ глаго́лы ᲂу҆́стъ мои́хъ, ничто́же въ ни́хъ стро́потно, нижѐ развраще́нно. Всѧ̑ пра̑ва разꙋмѣва́ющымъ, и҆ пра̑ва ѡ҆брѣта́ющымъ ра́зꙋмъ. Прїими́те наказа́нїе, а҆ не сребро̀, и҆ ра́зꙋмъ па́че зла́та и҆скꙋше́на: и҆збира́йте же вѣ́дѣнїе па́че зла́та чи́ста. Лꙋ́чше бо премꙋ́дрость ка́менїй многоцѣ́нныхъ, всѧ́кое же честно́е недосто́йно є҆ѧ̀ є҆́сть. А҆́зъ премꙋ́дрость всели́хъ совѣ́тъ, и҆ ра́зꙋмъ и҆ смы́слъ а҆́зъ призва́хъ: Стра́хъ гдⷭ҇нь ненави́дитъ непра̑вды, досаждє́нїѧ же и҆ горды́ни, и҆ пꙋти̑ лꙋка́выхъ: возненави́дѣхъ же а҆́зъ развращє́нныѧ пꙋти̑ ѕлы́хъ. Мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. Мно́ю ца́рїе ца́рствꙋютъ, и҆ си́льнїи пи́шꙋтъ пра́вдꙋ: мно́ю вельмѡ́жи велича́ютсѧ, и҆ власти́тєли мно́ю держа́тъ зе́млю. А҆́зъ лю́бѧщыѧ мѧ̀ люблю̀, и҆́щꙋщїи же менѐ ѡ҆брѧ́щꙋтъ бл҃года́ть. Бога́тство и҆ сла́ва моѧ̀ є҆́сть, и҆ стѧжа́нїе мно́гихъ и҆ пра́вда. Лꙋ́чше є҆́сть плоди́ти менѐ, па́че зла́та и҆ ка́менїѧ дра́га: мои́ же плоды̀ лꙋ́чше сребра̀ и҆збра́нна. Въ пꙋте́хъ пра́вды хождꙋ̀, и҆ посредѣ̀ сте́зь ѡ҆правда́нїѧ живꙋ̀: да раздѣлю̀ лю́бѧщымъ мѧ̀ и҆мѣ́нїе, и҆ сокрѡ́вища и҆́хъ и҆спо́лню бл҃ги́хъ.
На стїхо́внѣ самогла́сенъ днѐ, два́жды, гла́съ в҃:
Ѻ҆́ч҃е бл҃гі́й, ѿ всѣ́хъ ꙗ҆̀же да́лъ мѝ є҆сѝ, ѡ҆бнажѝ мѧ̀ безꙋ́мїе моѐ: ᲂу҆дали́хсѧ ѿ тебє̀,и҆ порабо́тихсѧ чꙋжде́мꙋ граждани́нꙋ: живѡ́тнаѧ мє́рзкаѧ пасо́хъ, и҆ ни тѣ́хъ пи́щею насыща́хсѧ. тѣ́мже прибѣго́хъ къ тебѣ̀, вѣ́дый твоѐ бл҃госе́рдїе: покры́й мою̀ наготꙋ̀ человѣколю́бїемъ твои́мъ и҆ сп҃сѝ мѧ̀.
Мч҃нченъ: Ст҃ы̑мъ мч҃нкѡмъ молѧ́щымсѧ ѡ҆ на́съ и҆ хрⷭ҇та̀ пою́щымъ, всѧ́каѧ ле́сть преста̀, и҆ человѣ́ческїй ро́дъ вѣ́рою сп҃са́етсѧ.
Сла́ва, и҆ ны́нѣ, бг҃оро́диченъ, гла́съ то́йже:
Ѿ ложе́снъ твои́хъ дв҃и́ческихъ свѣ́тъ мі́рови возсїѧ̀, сло́вомъ сло́во: того̀ молѝ, чтⷭ҇аѧ всест҃а́ѧ дв҃о, и҆зба́витисѧ дꙋша́мъ на́шымъ ѿ сѣ́тей вра́жїихъ.
Во вто́рникъ г҃-ѧ седми́цы на ᲂу҆́трени,
трⷪ҇чны гла́са. По а҃-мъ стїхосло́вїи сѣда́льны ᲂу҆мили́тєльны ѻ҆смогла́сника. По в҃-мъ же стїхосло́вїи сѣда́ленъ, господи́на і҆ѡ́сифа, гла́съ а҃.
Подо́бенъ: Ка́мени запеча́танꙋ:
Посто́мъ и҆ моле́нїемъ себѐ ѡ҆чи́стимъ, и҆ ѡ҆ ᲂу҆бо́гихъ промышле́нїемъ бг҃ꙋ послꙋ́жимъ.воздо́хнемъ, воспла́чемсѧ те́плѣ, ꙗ҆́кѡ и҆́мамы вре́мѧ ѡ҆браще́нїѧ: да ѿ пла́ча вѣ́чнагѡ сꙋ́щагѡ въ пла́мени гее́нны и҆зба́вимсѧ, сла́вꙋ возсыла́юще хрⷭ҇тꙋ̀, покаѧ́нїе ѡ҆предѣли́вшемꙋ человѣ́кѡмъ всѣ́мъ, ѡ҆браща́ющымсѧ мы́сли пра́востїю. [Два́жды.]
Бг҃оро́диченъ: Рꙋ́цѣ твоѝ бж҃е́ственнїи просте́рши, и҆́миже, дв҃о прест҃а́ѧ, носи́ла є҆сѝ содѣ́телѧ, воплоще́нна бж҃ество́мъ, ᲂу҆молѝ є҆го̀ и҆зба́витисѧ на́мъ ѿ и҆скꙋше́нїй и҆ страсте́й и҆ бѣ́дъ, восхвалѧ́ющымъ тѧ̀ любо́вїю и҆ вопїю́щымъ тебѣ̀: сла́ва все́льшемꙋсѧ въ тѧ̀, сла́ва проше́дшемꙋ и҆з̾ тебє̀, сла́ва свободи́вшемꙋ на́съ рождество́мъ твои́мъ.
По г҃-мъ стїхосло́вїи сѣда́ленъ, господи́на ѳео́дѡра, гла́съ г҃.
Подо́бенъ: Да веселѧ́тсѧ нбⷭ҇наѧ:
Посто́мъ веселѧ́щесѧ, пѣ́сньми ра́дꙋющесѧ, и҆ мл҃твами держа́вꙋ на всѧ̑ стра̑сти и҆мꙋ́ще, попере́мъ ловлє́нїѧ велїа́рѡва, возопїи́мъ хрⷭ҇тꙋ̀ послѣ́дꙋюще: крⷭ҇тъ тво́й ви́дѣти сподо́би на́съ, ꙗ҆́кѡ ще́дръ, подаѧ̀ на́мъ ве́лїю млⷭ҇ть. [Два́жды.]
Бг҃оро́диченъ:
Подо́бенъ: Красотѣ̀ дѣ́вства:
Бг҃обл҃же́ннаѧ мт҃и безневѣ́стнаѧ, болѣ́знꙋющꙋю мою̀ дꙋ́шꙋ ᲂу҆врачꙋ́й, ꙗ҆́кѡ содержи́мь є҆́смь лю́тѣ прегрѣше́ньми, бцⷣе. ѿѻнꙋ́дꙋже и҆ взыва́ю тѝ воздыха́нїемъ се́рдца моегѡ̀: прїимѝ мѧ̀ многосогрѣши́вшаго, всенепоро́чнаѧ, да дерзнове́ннѡ вопїю̀ тѝ: ра́дꙋйсѧ, бж҃їе жили́ще.
Канѡ́нъ въ мине́и, и҆ настоѧ́щїй трипѣ́снецъ господи́на і҆ѡ́сифа.
И҆ стїхосло́витсѧ пѣ́снь. Гла́съ а҃.
Пѣ́снь в҃.
І҆рмо́съ: Ви́дите, ви́дите, ꙗ҆́кѡ бг҃ъ а҆́зъ є҆́смь, порабощє́нныѧ лю́ди і҆и҃лєвы, мѡѷсе́ю въ пꙋсты́ни народоводи́ти повелѣ́вый и҆ сп҃сы́й, ꙗ҆́кѡ си́ленъ, вла́стїю мое́ю.
Сы́на положи́въ мѧ̀ ба́нею креще́нїѧ, пребл҃гі́й ѻ҆́ч҃е, бога́тствомъ всѧ́кихъ ᲂу҆краси́лъ є҆сѝ. но порабо́тихсѧ во́лею неплѡ́днымъ помыслѡ́мъ: тѣ́мже ѡ҆бнища́хъ.
Млⷭ҇тивъ, млⷭ҇тивъ, млⷭ҇тивъ бꙋ́ди мѝ, гдⷭ҇и, сꙋдѝ сꙋ́дъ мо́й мнѣ̀, пра́ведный сꙋдїѐ, ма́лое моѐ воздыха́нїе млⷭ҇ти ра́ди ве́лїѧ прїе́млѧ, хрⷭ҇тѐ, и҆ не пре́зри менѐ.
Совле́кшесѧ скве́рныѧ ѡ҆де́жды невоздержа́нїѧ, ѡ҆блеце́мсѧ въ свѣ́тлꙋю ри́зꙋ воздержа́нїѧ, и҆ свѣ́тли ꙗ҆ви́вшесѧ, дости́гнемъ свѣ́тлагѡ воста́нїѧ и҆зба́вителѧ.
Бг҃оро́диченъ: Сп҃сѝ мѧ̀, сп҃сѝ мѧ̀, сп҃са ро́ждшаѧ: ви́ждь ско́рбь мою̀, чтⷭ҇аѧ, ю҆́же мно́жество безмѣ́рныхъ мои́хъ ѕѡ́лъ твори́тъ по всѧ̑ дни̑ ѡ҆каѧ́ннѣй мое́й дꙋшѝ ѿ ѿча́ѧнїѧ.
И҆́ный, господи́на ѳео́дѡра, гла́съ г҃.
І҆рмо́съ: Ви́дите, ви́дите:
Ви́дите, ви́дите, ꙗ҆́кѡ а҆́зъ є҆́смь, сп҃се́нїе ва́мъ и҆сточи́вый, ꙗ҆́кѡ бг҃ъ, є҆́же воздержа́нїемъ, всѝ земні́и, почерпи́те.
Ви́дите, ви́дите, ꙗ҆́кѡ а҆́зъ є҆́смь, вре́мѧ сщ҃е́нное ст҃о́е ѡ҆предѣли́вый ва́мъ въ пи́ршество дꙋше́вное, поста̀ по́прище.
Сла́ва: Трⷪ҇цꙋ просла́вимъ, є҆ди́ницѣ поклони́мсѧ, безнача́льномꙋ безнача́льнагѡ ѻ҆ц҃а̀ сн҃ꙋ є҆диноро́дномꙋ, дх҃ꙋ сопресто́льномꙋ сн҃ови и҆ ѻ҆ц҃ꙋ̀ соприсносꙋ́щномꙋ.
Бг҃оро́диченъ: Молѝ непреста́ннѡ сп҃са, всенепоро́чнаѧ, ѿ всѧ́кагѡ ѡ҆бстоѧ́нїѧ и҆зба́витисѧ бцⷣꙋ тѧ̀ ᲂу҆сты̀ и҆ дꙋше́ю и҆сповѣ́дающымъ,.
Сла́ва тебѣ̀, бж҃е на́шъ, сла́ва тебѣ̀.
Ве́лїй є҆сѝ, гдⷭ҇и, и҆ чꙋ̑дна дѣла̀ твоѧ̑, ꙗ҆́кѡ въ ро́вѣ неснѣде́на ѿ львѡ́въ показа́лъ є҆сѝ нѣ́когда данїи́ла, посто́мъ ѡ҆гражде́на.
І҆рмо́съ: Ви́дите, ви́дите, ꙗ҆́кѡ а҆́зъ є҆́смь сп҃съ мі́ра, свѣ́тъ и҆́стинный, и҆сто́чникъ жи́зни, сн҃ъ бж҃їй.
Пѣ́снь и҃.
І҆рмо́съ: Є҆гѡ́же ᲂу҆жаса́ютсѧ а҆́гг҃ли:
Пла́чꙋ и҆ рыда́ю, ча́съ помышлѧ́ѧ, во́ньже и҆́мамъ предста́ти престо́лꙋ стра́шномꙋ, и҆стѧза́нїю пови́ненъ во мно́гихъ мои́хъ ѕлы́хъ, ꙗ҆̀же въ невѣ́дѣнїи сотвори́хъ и҆ вѣ́дѣнїи.
Мѡѷсе́й ѡ҆чисти́лище по́стъ ѡ҆брѣ́тъ, бг҃а разꙋмѣ̀ є҆ди́наго чи́стаго: дꙋшѐ моѧ̀, посто́мъ ѡ҆чи́стисѧ, да прибли́жишисѧ бг҃ꙋ чл҃вѣколю́бцꙋ.
По́стъ возлю́бимъ, ма́терь добродѣ́телей: пи́щꙋ возненави́димъ, роди́тельницꙋ страсте́й, и҆ воззове́мъ: ѻ҆́ч҃е, и҆́же на нб҃сѣ́хъ, сп҃сѝ на́съ, сп҃сѝ мл҃твами ст҃ы́хъ твои́хъ.
Бг҃оро́диченъ: Сꙋдїю̀, є҆го́же родила̀ є҆сѝ, дв҃о мр҃і́е, ᲂу҆молѝ, чтⷭ҇аѧ, въ ча́съ сꙋда̀ мѧ̀ ᲂу҆ще́дрити и҆ сп҃стѝ ѡ҆сꙋжде́ннаго, є҆ди́но предста́тельство ро́да человѣ́ческагѡ.
И҆́ный.
І҆рмо́съ: Въ пла́мень ко ѻ҆трокѡ́мъ:
Постѡ́въ пресвѣ́тлꙋю бл҃года́ть прїи́мше, добродѣ́тельми ѡ҆блиста́имсѧ, ти̑хаѧ ли́ца, ти̑хїѧ и҆ ѡ҆бы̑чаи показꙋ́юще дꙋше́внымъ ᲂу҆строе́нїемъ.
Пости́всѧ є҆лїссе́й, ѻ҆́трока сѡмані́тїдѣ ѿдаѐтъ жи́ва. ѡ҆ се́мъ разꙋмѣ́имъ, бра́тїе, ко́ль до́бръ по́стъ, ко́ль вели́къ, ко́ль бг҃одарова́ннаѧ бл҃года́ть.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Со ѻ҆ц҃е́мъ сн҃ꙋ поклонѧ́емсѧ, и҆ дх҃ꙋ ст҃о́мꙋ, є҆ди́ницѣ въ трⷪ҇цѣ, со а҆́гг҃лы зовꙋ́ще бре́нными ᲂу҆сты̀: сла́ва въ вы́шнихъ бг҃ꙋ въ трⷪ҇цѣ.
Бг҃оро́диченъ: Ѻ҆троча̀ ражда́еши дѣ́вствꙋющи, є҆ди́на бг҃обл҃года́тнаѧ: та́инство вели́ко,стра́шно чꙋ́до! бг҃а бо родила̀ є҆сѝ воплоще́нна, сп҃са мі́рꙋ.
Сла́ва тебѣ̀, бж҃е на́шъ, сла́ва тебѣ̀.
Да никто́же ѿ на́съ ᲂу҆ны́нїемъ и҆ лѣ́ностїю ѡ҆бложи́тсѧ, ѽ бра́тїе! вре́мѧ дѣ́ланїѧ, ча́съ торжества̀: кто̀ ᲂу҆̀бо премꙋ́дръ во є҆ди́нъ де́нь прїѡбрѣстѝ всѧ̑ вѣ́ки;
Хва́лимъ, бл҃гослови́мъ, покланѧ́емсѧ гдⷭ҇еви:
І҆рмо́съ: Въ пла́мень ко ѻ҆трокѡ́мъ є҆врє́йскимъ снизше́дшаго, бж҃е́ственною си́лою, и҆ ꙗ҆́вльшагосѧ гдⷭ҇а, сщ҃е́нницы, бл҃гослови́те и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Свѣтоно́сный ѡ҆́блакъ:
Въ пꙋчи́нꙋ грѣха̀, во глꙋбинꙋ̀ ѿча́ѧнїѧ, въ треволнє́нїѧ помышле́нїй и҆ въ бꙋ̑ри страсте́й впа́дъ, вопїю̀: млⷭ҇ти бе́здно, помозѝ мѝ, и҆ твои́мъ бл҃госе́рдїемъ ѡ҆дождѝ мѝ ѡ҆чище́нїе грѣхѡ́въ.
Поще́нїемъ тѣ́ло, воздержа́нїемъ дꙋ́хъ, слеза́ми дꙋ́шꙋ ѡ҆чи́стимъ, вѣ́рнїи, и҆ чи́сти чи́стомꙋ свѣ́тлѡ и҆зы́демъ во срѣ́тенїе, да ᲂу҆́зримъ сп҃си́тєльныѧ стрⷭ҇ти, ꙗ҆̀же претерпѣ̀ на́съ ра́ди и҆зба́витель.
Ꙗ҆́кѡ мыта́рь стеню̀, ꙗ҆́коже блꙋдни́ца и҆злива́ю сле́зы, ꙗ҆́кѡ разбо́йникъ вопїю̀: помѧнѝ мѧ̀,ще́дре. ꙗ҆́кѡ слѣпы́й зовꙋ̀ тѝ: сн҃е бж҃їй, ѿве́рзи ѻ҆́чи дꙋшѝ моеѧ̀, ѡ҆слѣплє́нныѧ ѕло́бою льсти́вагѡ запина́телѧ.
Бг҃оро́диченъ: Несѣко́мꙋю го́рꙋ, непроходи́мꙋю две́рь, вы́шшꙋю нб҃сѐ и҆ тва́ри всеѧ̀, добро́тꙋ і҆а́кѡвлю, ста́мнꙋ всезлатꙋ́ю, и҆ мо́стъ, и҆ мт҃рь зижди́телѧ, дв҃ꙋ ᲂу҆бл҃жи́мъ, вѣ́рнїи.
И҆́ный.
І҆рмо́съ: На сїна́йстѣй горѣ̀:
Настоѧ́щыѧ дни̑ па́че всѣ́хъ сщ҃є́нны разꙋмѣ́вше, мл҃твы бг҃ꙋ возсле́мъ, со́вѣстїю чи́стою, ча́стѡ прекланѧ́юще колѣ̑на и҆ глаго́люще: гдⷭ҇и, прїимѝ молє́нїѧ и҆ мл҃твы ра̑бъ твои́хъ при́снѡ.
Лю́дїе сѣ́дшїи, ꙗ҆́коже є҆́сть пи́сано, ꙗ҆́сти и҆ пи́ти, воста́ша и҆гра́ти, слꙋжа́ще и҆стꙋка́нномꙋ веельфегѡ́рꙋ. ви́ждь ѡ҆б̾ѧде́нїѧ лю̑таѧ порождє́нїѧ! мы́ же да пости́мсѧ, и҆ просла́влени бꙋ́демъ ꙗ҆́коже вели́кїй мѡѷсе́й.
Сла́ва: Сꙋщество́мъ є҆ди́ница є҆́сть несѣко́ма пребж҃е́ственнаѧ трⷪ҇ца, соединѧ́ема є҆стество́мъ, дѣли́тсѧ ли̑цы сво́йственнѡ: несѣко́ма бо сѣче́тсѧ, є҆ди́но сꙋ́щи трои́тсѧ. сїѧ̀ ѻ҆ц҃ъ є҆́сть, сн҃ъ, и҆ дх҃ъ живы́й, соблюда́ющаѧ всѐ.
И҆ ны́нѣ: Ѡ҆ дв҃ѣ ѻ҆троча̀ ро́ждшей кто̀ слы́ша, и҆ ѡ҆ мт҃ри без̾ мꙋ́жа; мр҃і́е, соверша́еши чꙋ́до: но скажи́ ми, ка́кѡ; не и҆спытꙋ́й глꙋби́нъ бг҃орожде́нїѧ моегѡ̀: сїѐ всеи́стинно, но па́че человѣ́ческагѡ ᲂу҆ма̀ постиже́нїе.
Сла́ва тебѣ̀, бж҃е на́шъ, сла́ва тебѣ̀.
Ꙗ҆́кѡ нестерпи́мь є҆́сть тво́й гнѣ́въ на грѣ́шники, гдⷭ҇и, кто̀ ᲂу҆̀бо стерпи́тъ ѿ сегѡ̀ преще́нїѧ; безмѣ́рнꙋю и҆мѣ́ѧй млⷭ҇ть, сп҃сѝ мѧ̀ бл҃госе́рдїемъ твои́мъ, не по дѣлѡ́мъ мои̑мъ мнѡ́гимъ и҆ лю̑тымъ.
І҆рмо́съ: На сїна́йстѣй горѣ̀ ви́дѣ тѧ̀ въ кꙋпинѣ̀ мѡѷсе́й, неѡпа́льнѡ ѻ҆́гнь бж҃ества̀ заче́ншꙋю во чре́вѣ: данїи́лъ же тѧ̀ ви́дѣ го́рꙋ несѣко́мꙋю: же́злъ произра́стшїй ѿ ко́рене дв҃дова, и҆са́їа провозгласѝ.
Свѣти́ленъ гла́са.
На стїхо́внѣ самогла́сенъ днѐ, два́жды, гла́съ з҃:
Согрѣши́хъ блꙋ́дный а҆́зъ, и҆сповѣ́даюсѧ тебѣ̀, гдⷭ҇и: не смѣ́ю на нб҃о воззрѣ́ти ѻ҆чи́ма, ѿтꙋ́дꙋ бо и҆спа́дъ, ꙗ҆ви́хсѧ ѡ҆каѧ́ненъ: согрѣши́хъ на нб҃о и҆ пред̾ тобо́ю, и҆ нѣ́смь досто́инъ нарещи́сѧ сы́нъ тво́й: самого̀ себѐ ѡ҆сꙋжда́ю, не тре́бꙋю ѡ҆глаго́льникѡвъ, нижѐ па́ки свидѣ́телей: и҆́мамъ ѡ҆блича́ющїй мѧ̀ блꙋ́дъ, и҆́мамъ ѡ҆блича́ющее ѕло́е житїѐ, и҆́мамъ посрамлѧ́ющꙋю настоѧ́щꙋю мою̀ наготꙋ̀, къ срамотѣ́ же рꙋ̑бище, и҆́мже ѡ҆дѣ́ѧнъ є҆́смь. бл҃госе́рдый ѻ҆́ч҃е, сн҃е є҆диноро́дный, дш҃е ст҃ы́й, ка́ющасѧ мѧ̀ прїимѝ, и҆ поми́лꙋй мѧ̀.
Мч҃нченъ: Посредѣ̀ сꙋди́лища законопрестꙋ̑пникъ, ра́дꙋющесѧ вопїѧ́хꙋ стрⷭ҇тоте́рпцы: гдⷭ҇и,сла́ва тебѣ̀.
Сла́ва, и҆ ны́нѣ, бг҃оро́диченъ, подо́бенъ:
Роди́лсѧ є҆сѝ ѿ дв҃ы несказа́ннѡ, хрⷭ҇тѐ, и҆ просвѣти́лъ є҆сѝ сꙋ́щыѧ во тьмѣ̀, вопїю́щыѧ: гдⷭ҇и, сла́ва тебѣ̀.
На ѕ҃-мъ часѣ̀, тропа́рь прⷪ҇ро́чества, гла́съ з҃:
Сп҃се́нїе на́ше є҆сѝ, гдⷭ҇и, и҆ защи́титель въ де́нь печа́ли: поми́лꙋй на́съ по вели́цѣй млⷭ҇ти твое́й, чл҃вѣколю́бче.
Прокі́менъ, ѱало́мъ м҃є, гла́съ д҃: Гдⷭ҇ь си́лъ съ на́ми, застꙋ́пникъ на́шъ бг҃ъ і҆а́кѡвль. Сті́хъ: Бг҃ъ на́мъ прибѣ́жище и҆ си́ла.
Прⷪ҇ро́чества и҆са́їина чте́нїе.
[Глава̀ ѳ҃, ст. ѳ҃-к҃а: глава̀ і҃, ст. а҃-д҃].
Та́кѡ глаго́летъ гдⷭ҇ь: ᲂу҆разꙋмѣ́ютъ всѝ лю́дїе є҆фре́мѡвы, и҆ живꙋ́щїи въ самарі́и, въ досажде́нїи и҆ высо́комъ се́рдцѣ глаго́люще: плі̑нѳы падо́ша, но прїиди́те, и҆зсѣче́мъ ка́менїе, и҆ посѣче́мъ черни́чїе и҆ ке́дры, и҆ сози́ждемъ себѣ̀ сто́лпъ. И҆ разрꙋши́тъ бг҃ъ востаю́щыѧ на го́рꙋ сїѡ́ню, и҆ врагѝ є҆гѡ̀ разсы́плетъ: сѷрі́ю ѿ востѡ́къ со́лнца, и҆ є҆́ллины ѿ за́пада со́лнца, поѧда́ющыѧ і҆и҃лѧ всѣ́ми ᲂу҆сты̀. Во всѣ́хъ си́хъ не ѿврати́сѧ ꙗ҆́рость є҆гѡ̀, но є҆щѐ рꙋка̀ є҆гѡ̀ высока̀. И҆ лю́дїе не ѡ҆брати́шасѧ, до́ндеже ꙗ҆́звени бы́ша, и҆ гдⷭ҇а не взыска́ша. И҆ ѿѧ́тъ гдⷭ҇ь ѿ і҆и҃лѧ главꙋ̀ и҆ ѡ҆́шибъ, вели́ка и҆ ма́ла, во є҆ди́нъ де́нь: ста́рца, и҆ чꙋдѧ́щихсѧ ли́цамъ, сїѐ нача́ло: и҆ прⷪ҇ро́ка ᲂу҆ча́ща беззакѡ́ннаѧ, се́й ѡ҆́шибъ. И҆ бꙋ́дꙋтъ блажа́щїи люде́й си́хъ льстѧ́ще, и҆ льстѧ́тъ, ꙗ҆́кѡ да поглотѧ́тъ ѧ҆̀. Сегѡ̀ ра́ди ѡ҆ ю҆́ношахъ и҆́хъ не возвесели́тсѧ гдⷭ҇ь, и҆ сиро́тъ и҆́хъ и҆ вдови́цъ и҆́хъ не поми́лꙋетъ: ꙗ҆́кѡ всѝ беззако́ннїи и҆ лꙋка́вїи, и҆ всѧ̑каѧ ᲂу҆ста̀ глаго́лютъ непра́вдꙋ. Во всѣ́хъ си́хъ не ѿврати́сѧ ꙗ҆́рость є҆гѡ̀, но є҆щѐ рꙋка̀ є҆гѡ̀ высока̀. И҆ разгори́тсѧ ꙗ҆́кѡ ѻ҆́гнь беззако́нїе, и҆ ꙗ҆́кѡ тро́скотъ сꙋхі́й поѧде́нъ бꙋ́детъ ѻ҆гне́мъ: и҆ разгори́тсѧ въ ча́щахъ дꙋбра́вныхъ, и҆ поѧ́стъ ꙗ҆̀же ѡ҆́крестъ холмѡ́въ всѧ̑. За ꙗ҆́рость гнѣ́ва гдⷭ҇нѧ сгорѣ̀ всѧ̀ землѧ̀, и҆ бꙋ́дꙋтъ лю́дїе ꙗ҆́кѡ ѻ҆гне́мъ пожже́ни: человѣ́къ бра́та своегѡ̀ не поми́лꙋетъ, но ᲂу҆клони́тсѧ на де́сно, ꙗ҆́кѡ вза́лчетъ, и҆ снѣ́сть ѿ шꙋ́їихъ, и҆ не насы́титсѧ человѣ́къ ꙗ҆ды́й плѡ́ти мы́шцы своеѧ̀: снѣ́сть бо манассі́й є҆фре́мово, и҆ є҆фре́мъ манассі́ино, ꙗ҆́кѡ вкꙋ́пѣ повою́ютъ і҆ꙋ́дꙋ. Во всѣ́хъ си́хъ не ѿврати́сѧ ꙗ҆́рость [є҆гѡ̀], но є҆щѐ рꙋка̀ є҆гѡ̀ высока̀. Го́ре пи́шꙋщымъ лꙋка́вство: пи́шꙋщїи бо лꙋка́вство пи́шꙋтъ, ᲂу҆клонѧ́юще сꙋ́дъ ᲂу҆бо́гихъ, восхища́юще сꙋ́дъ ни́щихъ люде́й мои́хъ, ꙗ҆́кѡ бы́ти и҆̀мъ вдови́цѣ въ расхище́нїе и҆ сиротѣ̀ въ разграбле́нїе. И҆ что̀ сотворѧ́тъ въ де́нь посѣще́нїѧ; ско́рбь бо ва́мъ ѿдале́че прїи́детъ, и҆ къ комꙋ̀ прибѣ́гнете, да помо́жетъ ва́мъ; и҆ гдѣ̀ ѡ҆ста́вите сла́вꙋ ва́шꙋ, є҆́же не впа́сти въ плѣне́нїе; и҆ под̾ ᲂу҆бїе́нными падꙋ́тъ. и҆ во всѣ́хъ си́хъ не ѿврати́сѧ гнѣ́въ є҆гѡ̀, но є҆щѐ рꙋка̀ є҆гѡ̀ высока̀.
Прокі́менъ, ѱало́мъ м҃ѕ, гла́съ г҃: По́йте бг҃ꙋ на́шемꙋ, по́йте: по́йте цр҃е́ви на́шемꙋ, по́йте.Сті́хъ: Всѝ ꙗ҆зы́цы, восплещи́те рꙋка́ми:
Во вто́рникъ г҃-ѧ седми́цы ве́чера,
на Гдⷭ҇и воззва́хъ, поста́вимъ стїхѡ́въ ѕ҃. И҆ пое́мъ подо́бны триїѡ́ди, господи́на і҆ѡ́сифа, гла́съ г҃.
Подо́бенъ Поста́виша три́десѧть сре́брєникъ:
Гдⷭ҇и, крⷭ҇то́мъ ᲂу҆би́вый льсти́ваго, ѿ прельще́нїѧ є҆гѡ̀ и҆зба́ви мѧ̀ согрѣша́ющаго и҆ прельща́емаго: и҆ посто́мъ ѡ҆чи́стивъ мѧ̀, да́ждь мѝ соверша́ти твоѧ̑ хотѣ̑нїѧ, ꙗ҆́кѡ да ви́ждꙋ, влⷣко, ра́дꙋѧсѧ чтⷭ҇ны̑ѧ стрⷭ҇ти твоѧ̑.
Оу҆ѧ́звленъ бы́хъ сла́сти ѡ҆рꙋ́жїемъ, гдⷭ҇и, и҆ лю́тѣ ве́сь ᲂу҆мертви́хсѧ. и҆сцѣлѝ, ѡ҆живѝ смире́ннꙋю мою̀ дꙋ́шꙋ, копїе́мъ ᲂу҆ѧ́звленный, влⷣко, и҆ ᲂу҆ѧ́звлєнныѧ стрѣло́ю врага̀ ꙗ҆́кѡ сп҃съ и҆сцѣлѝвый: и҆ чтⷭ҇ны́хъ твои́хъ страсте́й прича́стника мѧ̀ покажѝ.
И҆́на стїхи́ра, господи́на ѳео́дѡра, гла́съ в҃.
Подо́бенъ: Да ра́спнетсѧ:
Поще́нїемъ дꙋ́шы просвѣти́вше, гдⷭ҇и, да сподо́бимсѧ неѡсꙋжде́ннѡ крⷭ҇тъ тво́й ви́дѣти въ ра́дости и҆ поклони́тисѧ стра́хомъ: просвѣща́етъ бо то́й стрⷭ҇ти твоѧ̑ вѡ́льныѧ, и҆́хже бл҃говолѝ дости́гнꙋти на́мъ, ꙗ҆́кѡ чл҃вѣколю́бецъ.
И҆ въ мине́и г҃. Сла́ва, и҆ ны́нѣ, крⷭ҇тобг҃оро́диченъ.
Прокі́менъ, ѱало́мъ м҃з, гла́съ г҃: Ве́лїй гдⷭ҇ь и҆ хва́ленъ ѕѣлѡ̀ во гра́дѣ бг҃а на́шегѡ. Сті́хъ: Во гра́дѣ гдⷭ҇а си́лъ, во гра́дѣ бг҃а на́шегѡ.
Бытїѧ̀ чте́нїе. [Глава̀ з҃, ст. а҃-є҃].
Речѐ гдⷭ҇ь бг҃ъ къ нѡ́ю: вни́ди ты̀ и҆ ве́сь до́мъ тво́й въ ковче́гъ, ꙗ҆́кѡ тѧ̀ ви́дѣхъ пра́ведна предо мно́ю въ ро́дѣ се́мъ. Ѿ скотѡ́въ же чи́стыхъ введѝ къ себѣ̀ се́дмь се́дмь, мꙋ́жескїй по́лъ и҆ же́нскїй: ѿ скотѡ́въ же нечи́стыхъ два̀ два̀, мꙋ́жескїй по́лъ и҆ же́нскїй: и҆ ѿ пти́цъ небе́ныхъ чи́стыхъ се́дмь се́дмь, мꙋ́жескїй по́лъ и҆ же́нскїй, и҆ ѿ всѣ́хъ пти́цъ нечи́стыхъ двѣ̀, двѣ̀, мꙋ́жескїй по́лъ и҆ же́нскїй, препита́ти сѣ́мѧ по все́й землѝ. Є҆ще́ бо дне́й се́дмь, а҆́зъ наведꙋ̀ до́ждь на зе́млю четы́редесѧть дне́й и҆ четы́редесѧть ноще́й: и҆ потреблю̀ всѧ́кое воста́нїе, є҆́же сотвори́хъ, ѿ лица̀ всеѧ̀ землѝ. И҆ сотворѝ нѡ́е всѧ̑, є҆ли̑ка заповѣ́да є҆мꙋ̀ гдⷭ҇ь бг҃ъ.
Прокі́менъ, ѱало́мъ м҃и, гла́съ в҃: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ. Сті́хъ: Оу҆слы́шите сїѧ̑, всѝ ꙗ҆зы́цы.
При́тчей чте́нїе. [Глава̀ и҃, ст. л҃в-л҃ѕ: глава̀ ѳ҃, ст. а҃-а҃і].
Сы́не, послꙋ́шай менѐ: и҆ бл҃же́ни, и҆̀же пꙋти̑ моѧ̑ сохранѧ́тъ. Оу҆слы́шите премꙋ́дрость, и҆ ᲂу҆мꙋдри́тесѧ, и҆ не ѿмещи́те. Бл҃же́нъ мꙋ́жъ, и҆́же послꙋ́шаетъ менѐ, и҆ человѣ́къ, и҆́же пꙋти̑ моѧ̑ сохрани́тъ, бдѧ́й при мои́хъ две́рехъ при́снѡ, соблюда́ѧй пра́ги мои́хъ вхо́дѡвъ: и҆схо́ди бо моѝ и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Согрѣша́ющїи же въ мѧ̀, нече́ствꙋютъ на своѧ̑ дꙋ́шы, и҆ ненави́дѧщїи мѧ̀ лю́бѧтъ сме́рть. Премꙋ́рость созда̀ себѣ̀ до́мъ, и҆ ᲂу҆твердѝ столпѡ́въ се́дмь: закла̀ своѧ̑ же́ртвєннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. Посла̀ своѧ̑ рабы̑, созыва́ющи съ высо́кимъ проповѣ́данїемъ на ча́шꙋ, глаго́лющи: и҆же є҆́сть безꙋ́менъ, да ᲂу҆клони́тсѧ ко мнѣ̀. И҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ и҆ пі́йте вїно̀, є҆́же раствори́хъ ва́мъ: ѡ҆ста́вите безꙋ́мїе, и҆ жи́ви бꙋ́дете, да во вѣ́ки воцарите́сѧ: и҆ взыщи́те ра́зꙋма, да поживетѐ, и҆ и҆спра́вите ра́зꙋмъ въ вѣ́дѣнїи. Наказꙋ́ѧй ѕлы̑ѧ прїи́метъ себѣ̀ безче́стїе: ѡ҆блича́ѧй же нечести́ваго поро́чна сотвори́тъ себѐ: [ѡ҆бличє́нїѧ бо нечести́вомꙋ ра̑ны є҆мꙋ̀]. Не ѡ҆блича́й ѕлы́хъ, да не возненави́дѧтъ тебѐ: ѡ҆блича́й премꙋ́дра, и҆ возлю́битъ тѧ̀. Да́ждь премꙋ́дромꙋ винꙋ̀, и҆ премꙋ́дрѣйшїй бꙋ́детъ: сказꙋ́й пра́ведномꙋ, и҆ приложи́тъ прїима́т и. Нача́ло премꙋ́дрости стра́хъ гдⷭ҇нь, и҆ совѣ́тъ ст҃ы́хъ ра́зꙋмъ: разꙋмѣ́ти бо зако́нъ, по́мысла є҆́сть бл҃га́гѡ. Си́мъ бо ѡ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ̑та живота̀ твоегѡ̀.
На стїхо́внѣ самогла́сенъ днѐ, два́жды, гла́съ в҃:
Ѻ҆ц҃а̀ мнѣ̀ нарица́ти тѧ̀ созда́телѧ, гдⷭ҇и, дерза́ю, живо́тное сы́й земноро́дное, твоемꙋ̀̀ прича́стный ѡ҆́бразꙋ, а҆́ще сыновства̀ и҆ лиши́хсѧ, блꙋ́днѡ пожи́въ и҆ въ забве́нїи и҆жди́въ твои́хъ дарѡ́въ бога́тство. да не ᲂу҆́бо ѿри́неши мѧ̀, твоемꙋ̀ бл҃говоли́вый сн҃ꙋ є҆диноро́дномꙋ крⷭ҇тъ и҆ сме́рть менє̀ ра́ди пло́тїю претерпѣ́ти: но ᲂу҆соверши́въ присво́й къ себѣ̀, чл҃вѣколю́бче.
Мч҃нченъ: Ли́цы мч҃никъ проти́вишасѧ мꙋчи́телємъ, глаго́люще: мы̀ во́инствꙋемъ цр҃ю̀ си́лъ: а҆́ще и҆ ѻ҆гню̀ и҆ мꙋ́камъ предади́те на́съ, не ѿмета́емсѧ трⷪ҇ческїѧ си́лы.
Сла́ва, и҆ ны́нѣ, крⷭ҇тобг҃оро́диченъ, гла́съ то́йже:
Подо́бенъ: Є҆гда̀ ѿ дре́ва:
Є҆гда̀ беззако́ннїи лю́дїе тѧ̀, сп҃се, жи́знь всѣ́хъ, на дре́вѣ повѣ́сиша, тогда̀ и҆ всечтⷭ҇аѧ а҆́гница и҆ мт҃и твоѧ̀ предстоѧ́щи рыда́ше пла́чꙋщи: ча́до моѐ сладча́йшее, свѣ́те моє́ю ѻ҆́чїю! ᲂу҆вы̀ мнѣ̀, ка́кѡ посредѣ̀ ѕлодѣ́євъ ко дре́вꙋ пригвозди́тисѧ претерпѣ́лъ є҆сѝ, зе́млю повѣ́сивый на вода́хъ;
Въ сре́дꙋ г҃-ѧ седми́цы на ᲂу҆́трени,
трⷪ҇чны. По а҃-мъ стїхосло́вїи сѣда́льны крє́стныѧ ѻ҆смогла́сника. По в҃-мъ же стїхосло́вїи глаго́лемъ настоѧ́щїй сѣда́ленъ господи́на і҆ѡ́сифа, гла́съ г҃.
Подо́бенъ: Красотѣ̀ дѣ́вства:
Дре́вомъ ᲂу҆вѧди́лъ є҆сѝ пла́мень престꙋпле́нїѧ, влⷣко, на крⷭ҇тъ возвыша́емь, и҆ ᲂу҆мертви́лъ є҆сѝ врага̀, ᲂу҆мертви́всѧ во́лею. тѣ́мже тѧ̀ молю̀, пло́ти моеѧ̀ хотѣ̑нїѧ ᲂу҆мертвѝ, и҆ ѡ҆живѝ ѡ҆каѧ́нное се́рдце моѐ, посто́мъ страстоꙋбі́йственнымъ ѡ҆чи́стивъ мѧ̀ ѿ всѧ́кїѧ скве́рны, ꙗ҆́кѡ бл҃госе́рдъ.
Сла́ва, то́йже.
И҆ ны́нѣ, крⷭ҇тобг҃оро́диченъ, подо́бенъ:
Поноси́тельнꙋю сме́рть распѧ́тїемъ во́лею претерпѣ́лъ є҆сѝ, ще́дре, ю҆́же ро́ждшаѧ тѧ̀, хрⷭ҇тѐ, зрѧ́щи, ᲂу҆ѧзвлѧ́шесѧ ᲂу҆тро́бою, бїю́щи бо сѧ ма́терски рыда́ше. тоѧ̀ мл҃твами, ра́ди бл҃госе́рдїѧ млⷭ҇ти твоеѧ̀, ᲂу҆ще́дри и҆ сп҃сѝ мі́ръ, взе́млѧй сегѡ̀ грѣ́хъ.
По г҃-мъ стїхосло́вїи сѣда́ленъ, господи́на ѳео́дѡра, гла́съ в҃.
Подо́бенъ: Воскре́съ и҆з̾ гро́ба:
Свѣ́тлое соверша́юще поста̀ пи́ршество, вопїи́мъ: всѧ̑ соблюдѝ, гдⷭ҇и, въ ми́рѣ, ѿ всѧ́кагѡ кова́рства вра́жїѧ и҆зба́вивъ, и҆ сподо́би на́съ, ꙗ҆́кѡ пребл҃гі́й, крⷭ҇тъ тво́й чтⷭ҇ны́й стра́хомъ ѡ҆блобыза́ти, подаѧ̀ тѣ́мъ млⷭ҇ти твоѧ̑ вселе́ннѣй, є҆ди́не многомлⷭ҇тиве.
Сла́ва, то́йже.
И҆ ны́нѣ, крⷭ҇тобг҃оро́диченъ, гла́съ то́йже.
Подо́бенъ: Милосе́рдїѧ сꙋ́щи:
Дв҃а и҆ мт҃и твоѧ̀, хрⷭ҇тѐ, на дре́вѣ зрѧ́щи тѧ̀ ме́ртва просте́рта, пла́чꙋщи го́рькѡ, вопїю́щи глаго́лаше: что̀ є҆́сть стра́шное сїѐ та́инство; всѣ̑мъ да́рꙋѧй жи́знь вѣ́чнꙋю, ка́кѡ во́лею на крⷭ҇тѣ̀ ᲂу҆мира́еши сме́ртїю поноси́тельною;
Канѡ́нъ въ мине́и, и҆ настоѧ́щїй трипѣ́снецъ господи́на і҆ѡ́сифа.
И҆ стїхосло́витсѧ пѣ́снь. Гла́съ г҃.
Пѣ́снь г҃.
І҆рмо́съ: Оу҆твержде́нїе на тѧ̀ надѣ́ющихсѧ:
Сраспина́еми на́съ ра́ди распе́ншемꙋсѧ, ᲂу҆мертви́мъ всѧ̑ плотскі́ѧ ᲂу҆́ды въ постѣ́хъ и҆ мл҃твахъ и҆ моле́нїихъ.
Те́рнїе грѣха̀ и҆сто́ргнꙋвый распѧ́тїемъ твои́мъ, гдⷭ҇и, тернѡ́внаѧ помышлє́нїѧ ᲂу҆ма̀ моегѡ̀ и҆сто́ргни.
Воѡрꙋжи́вше мы̑сли посто́мъ, побѣжда́имъ чꙋжді̑ѧ полкѝ бѣсѡ́вскїѧ, си́лою крⷭ҇та̀ ѡ҆гражда́еми.
Бг҃оро́диченъ: Воплоща́емое сло́во и҆з̾ тебє̀ про́йде, пречⷭ҇таѧ, паде́нїе пра́ѻтєцъ милосе́рдїѧ ра́ди щедро́тъ и҆справлѧ́ѧ.
И҆́ный, господи́на ѳео́дѡра, гла́съ в҃.
І҆рмо́съ: Оу҆твердѝ на́съ въ тебѣ̀, гдⷭ҇и:
Тво́й животво́рный крⷭ҇тъ, гдⷭ҇и, печа́ть мнѣ̀ є҆́сть во сп҃се́нїе: тѣ́мъ бо сопроти́вника ᲂу҆празднѧ́ѧ, воспѣва́ю тѧ̀ ꙗ҆́кѡ бг҃а си́льнаго.
Дре́во крⷭ҇тное принесѐ мі́рꙋ пло́дъ ѡ҆живле́нїѧ присносꙋ́щнагѡ: є҆гѡ́же мы̀ вкꙋша́юще, ѿ сме́рти, хрⷭ҇тѐ, и҆збавлѧ́емсѧ.
Трⷪ҇ченъ: Трѝ лица̑ є҆ди́нагѡ зра́ка сла́влю, ѻ҆ц҃а̀, сн҃а и҆ дх҃а, є҆ди́нꙋ держа́вꙋ бж҃ества̀: ца́рствꙋетъ бо и҆ є҆динонача́льствꙋетъ ꙗ҆́кѡ бг҃ъ.
И҆ ны́нѣ, бг҃оро́диченъ:
Ржⷭ҇тво̀ твоѐ, чтⷭ҇аѧ, стра́шно бы́сть: бг҃ъ бо є҆́сть вочл҃вѣ́чивыйсѧ, безнача́льнѡ ѿ ѻ҆ц҃а̀ рожде́нный и҆ и҆з̾ тебє̀ въ послѣ̑днѧѧ без̾ мꙋ́жа роди́выйсѧ.
Сла́ва тебѣ̀, бж҃е на́шъ, сла́ва тебѣ̀.
Бл҃года́ть крⷭ҇та̀, предсїѧ́ющаѧ мі́рꙋ, къ бж҃е́ствєннымъ твои̑мъ стрⷭ҇те́мъ, ще́дре, созыва́етъ всѧ̑ ны̀: и҆́мже вѣ́рнѡ поклони́тисѧ сподо́би.
І҆рмо́съ: Оу҆твердѝ на́съ въ тебѣ̀, гдⷭ҇и, дре́вомъ ᲂу҆мертви́вый грѣ́хъ, и҆ стра́хъ тво́й всадѝ въ сердца̀ на́съ воспѣва́ющихъ тѧ̀.
Пѣ́снь и҃.
І҆рмо́съ: Нестерпи́момꙋ ѻ҆гню̀:
Крⷭ҇то́мъ побѣди́вый нача̑ла и҆ вла̑сти тьмы̀, свѣтода́вче, є҆гда̀ прїи́деши со вла́стїю сꙋди́ти мі́рꙋ всемꙋ̀, да не ѡ҆бличи́ши, сло́ве, моѧ̑ та̑йнаѧ, ꙗ҆́кѡ да прославлѧ́ю мно́гое твоѐ бл҃госе́рдїе.
Сꙋди́мь сꙋдїѧ̀ пред̾ сꙋди́лищемъ ста́лъ є҆сѝ, ѡ҆сꙋжда́ѧ враждꙋ̀ крⷭ҇то́мъ твои́мъ, долготерпѣли́ве правосꙋ́де. тѣ́мже ѿ ѡ҆сꙋжде́нїѧ вѣ́чнагѡ и҆зба́ви стра́хомъ зовꙋ́щыѧ и҆ превозносѧ́щыѧ твоѐ чл҃вѣколю́бїе.
Поста̀ ѻ҆гне́мъ ѡ҆б̾ѻстри́вшесѧ, ѻ҆́троцы бл҃гочести́вїи возвы́шенный пла́мень бж҃е́ственною росо́ю дре́вле ᲂу҆гаси́ша вои́стиннꙋ: и҆ мы̀ постѧ́щесѧ, пє́щи всѣ́хъ страсте́й ᲂу҆гаси́мъ, ꙗ҆́кѡ да гее́нскагѡ и҆збѣ́гнемъ пла́мене.
Бг҃оро́диченъ: И҆з̾ тебє̀, ѻ҆трокови́це неискꙋсобра́чнаѧ, бж҃їѧ премꙋ́дрость хра́мъ себѣ̀ созда́вши, воплоти́сѧ неизрече́ннымъ снизхожде́нїемъ: ты́ бо є҆ди́на ѿ всѣ́хъ родѡ́въ и҆збра́на є҆сѝ, нетлѣ́ннаѧ, въ жили́ще нетлѣ́нномꙋ сло́вꙋ.
И҆́ный.
І҆рмо́съ: Въ кꙋпинѣ̀ на сїна́йстѣй горѣ̀:
Носѧ́й всѧ̑ сло́вомъ, менє̀ ра́ди всѧ̑ терпи́ши, заꙋшє́нїѧ и҆ ѡ҆плева̑нїѧ и҆ распѧ́тїе, хрⷭ҇тѐ: восхвалѧ́ю вели̑чїѧ твоегѡ̀ чл҃вѣколю́бїѧ во всѧ̑ вѣ́ки.
Закала́ешисѧ, хрⷭ҇тѐ, ꙗ҆́кѡ а҆́гнецъ, прободе́нъ бы̀въ въ ре́бра твоѧ̑, да мѧ̀ ѻ҆вча̀ заблꙋ́ждшее сп҃се́ши ѿ сѣ́ти дїа́воли, и҆ къ до́брѣй твое́й ѡ҆гра́дѣ причте́ши во вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Бж҃ество̀ є҆ди́но трⷪ҇це, нераздѣ́льное є҆стество̀мъ, раздѣ́льное же ли̑цы, присносꙋ́щнаѧ держа́во, ѻ҆́ч҃е, сн҃е и҆ дш҃е, тебѐ пѣсносло́вимъ во всѧ̑ вѣ́ки.
Бг҃оро́диченъ: Бг҃ороди́тельнице чтⷭ҇аѧ, нб҃снаѧ врата̀, сп҃си̑тельнаѧ две́рь, прїимѝ моле́нїе всѣ́хъ хрїстїа́нъ, ᲂу҆бл҃жа́ющихъ тѧ̀ во всѧ̑ вѣ́ки.
Сла́ва тебѣ̀, бж҃е на́шъ, сла́ва тебѣ̀.
Ѡ҆ крⷭ҇тѣ̀ твое́мъ, хрⷭ҇тѐ, сщ҃е́нницы хва́лѧтсѧ, ца́рїе ᲂу҆крѣплѧ́ютсѧ, всѧ́кїй вѣ́рный просвѣща́етсѧ: сподо́би мѧ̀ се́й̀ ви́дѣти, и҆ поклони́тисѧ, и҆ воспѣва́ти во вѣ́ки.
Хва́лимъ, бл҃гослови́мъ, покланѧ́емсѧ гдⷭ҇еви:
І҆рмо́съ: Въ кꙋпинѣ̀ на сїна́йстѣй горѣ̀ мѡѷсе́ю чꙋ́до дв҃ы дре́вле проѡбрази́вшаго, по́йте, бл҃гослови́те и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Въ зако́нѣ сѣ́ни:
Ѕмі́ѧ мѡѷсе́й на дре́во возносѧ̀, преѡбразова́ше тѧ̀, хрⷭ҇те, на крⷭ҇тѣ̀ во́лею вознесе́на и҆ лꙋка́вагѡ ꙗ҆дови́тꙋю ѕло́бꙋ ѿрази́вша, и҆ къ себѣ́ человѣ́ки привле́кша, чл҃вѣколю́бче.
Ѻ҆гне́мъ стра́ха твоегѡ̀ ѡ҆чи́сти мѧ̀, возжига́ѧ въ мое́й дꙋшѝ бж҃е́ственнꙋю твою̀ любо́вь, и҆ крⷭ҇то́мъ твои́мъ ѡ҆гради́ мѧ, є҆го́же прельстѝ ве́тхїй запина́тель, сластьмѝ ѡ҆мрачи́въ моѐ, хрⷭ҇тѐ, помышле́нїе.
Ѿ скве́рныхъ помышле́нїй и҆ ѿ дѣѧ́нїй ѕлы́хъ да пости́мсѧ, бра́тїе: ѡ҆чи́стимъ сердца̀,воскрили́мсѧ бж҃е́ственными добродѣ́тельми, и҆ ᲂу҆клони́мсѧ ѿ стремле́нїй долꙋвлекꙋщїѧ ѕло́бы, да па́схꙋ вели́кꙋю свѣтоно́снїи ᲂу҆́зримъ.
Бг҃оро́диченъ: И҆з̾ тебє̀, дв҃о, въ на́шꙋ нищетꙋ̀ во́лею ѡ҆блече́сѧ бога́тый є҆стество́мъ, ви́димь же на́мъ бы́сть неви́димый, воспѣва́емый вы́шними ли̑ки, бл҃гостїю ѡ҆бновлѧ́ѧй сокрꙋше́нный ѡ҆́бразъ.
И҆́ный.
І҆рмо́съ: Тебѐ мы́сленнꙋю:
Тебѐ на крⷭ҇тѣ̀ рꙋ́цѣ распросте́рша и҆ четы̀ре концы̀ присвоѧ́юща, и҆́мже ко ѻ҆ц҃ꙋ̀ ѡ҆брѣто́хомъ вхо́дъ, сн҃е бж҃їй, всѝ велича́емъ.
Тебѐ те́рнїемъ вѣнча́вше, хрⷭ҇тѐ, беззако́ннїи бїѧ́хꙋ и҆ распѧ́ша. тогѡ̀ ра́ди поднебе́снаѧ колеба́шасѧ всѧ̀, мы́ же сп҃се́ни тѧ̀ велича́емъ.
Трⷪ҇ченъ: Тѧ̀ трисвѣ́тлое ст҃о́е бж҃ество̀, всѐ содержа́щее, и҆ хранѧ́щее при́снѡ, ѻ҆ц҃а̀, и҆ сн҃а, и҆ дх҃а жива́го, пѣ́сньми немо́лчными велича́емъ.
Бг҃оро́диченъ: Тѧ̀ свѣ́тлый ѡ҆́блакъ дх҃а, и҆з̾ негѡ́же на́мъ возсїѧ̀ свѣ́тъ непристꙋ́пный,хрⷭ҇то́съ, пра́вды вели́кое сл҃нце, пѣ́сньми, бцⷣе, велича́емъ.
Сла́ва тебѣ̀, бж҃е на́шъ, сла́ва тебѣ̀.
Ты̀ на́мъ свѣ́тъ, ст҃о́е зна́менїе, ѡ҆держа́нїе побѣ́ды, хрⷭ҇то́въ крⷭ҇те: ты̀ на́мъ воздержа́нїе ᲂу҆сладѝ, и҆ тебѣ̀ поклони́тисѧ сподо́би.
І҆рмо́съ: Тебѐ мы́сленнꙋю и҆ ѡ҆дꙋшевле́ннꙋю лѣ́вствицꙋ, на не́йже бг҃ъ на́шъ ᲂу҆тверди́сѧ, є҆́юже къ небесѝ ѡ҆брѣто́хомъ восхожде́нїе, пѣ́сньми немо́лчными велича́емъ.
Свѣти́ленъ гла́са.
На стїхо́внѣ самогла́сенъ днѐ, два́жды, гла́съ в҃:
Въ че́сти сы́й сыновства̀, ѻ҆ц҃а̀ бл҃га́гѡ несмы́сленный а҆́зъ не разꙋмѣ́хъ: но себѐ сла́вы лиши́хъ, бога́тство бл҃года́ти ѕлѣ̀ и҆жди́въ, лиша́емь же бж҃е́ственныѧ пи́щи, прилѣпи́хсѧ скве́рномꙋ граждани́нꙋ, и҆ ѿ негѡ̀ по́сланъ бы́хъ въ дꙋшетлѣ́нное є҆гѡ̀ село̀: живы́й блꙋ́днѡ, пасо́мь бы́хъ со скоты̑, и҆ сласте́мъ рабо́таѧ не насыща́хсѧ. но ѡ҆бра́щьсѧ возопїю̀ бл҃госе́рдомꙋ и҆ ще́дромꙋ ѻ҆ц҃ꙋ̀: на нб҃о и҆ пред̾ тобо́ю согрѣши́хъ, поми́лꙋй мѧ̀.
Мч҃нченъ: Мч҃нкъ твои́хъ мно́жєства мо́лѧтъ тѧ̀, хрⷭ҇тѐ: поми́лꙋй ны̀, ꙗ҆́кѡ чл҃вѣколю́бецъ.
Сла́ва, и҆ ны́нѣ, крⷭ҇тобг҃оро́диченъ:
Подо́бенъ: Є҆гда̀ ѿ дре́ва:
Болѣ̑зни мнѡ́гїѧ претерпѣ́вшаѧ въ распѧ́тїи сн҃а и҆ бг҃а твоегѡ̀, пречтⷭ҇аѧ, воздыха́ла є҆сѝ слезѧ́щи, и҆ вопїѧ́ла є҆сѝ го́рькѡ: ᲂу҆вы̀ мнѣ̀, ча́до сладча́йшее! ка́кѡ непра́веднѡ стра́ждеши, хотѧ́й и҆зба́вити сꙋ́щыѧ ѿ а҆да́ма земнорѡ́дныѧ; тѣ́мже, всест҃а́ѧ дв҃о, тѧ̀ мо́лимъ вѣ́рою, ми́лостива на́мъ сего̀ сотворѝ.
На ѕ҃-мъ часѣ̀, тропа́рь прⷪ҇ро́чества, гла́съ и҃:
Соста́ва дѣ́лъ въ на́съ нѣ́сть, гдⷭ҇и: ми́лостивъ є҆сѝ, чл҃вѣколю́бче, дѣ́лъ рꙋ́къ твои́хъ не пре́зри, безгрѣ́шне.
Прокі́менъ, ѱало́мъ м҃ѳ, гла́съ д҃: Пожрѝ бг҃ови же́ртвꙋ хвалы̀, и҆ возда́ждь вы́шнемꙋ мл҃твы твоѧ̑. Сті́хъ: Бг҃ъ богѡ́въ гдⷭ҇ь глаго́ла, и҆ призва̀ зе́млю.
Прⷪ҇ро́чества и҆са́їина чте́нїе. [Глава̀ і҃, ст. в҃і-к҃].
Бꙋ́детъ, є҆гда̀ сконча́етъ гдⷭ҇ь всѧ̑ творѧ̀ въ горѣ̀ сїѡ́ни и҆ во і҆ерꙋсали́мѣ, наведе́тъ на ᲂу҆́мъ вели́кїй, на кнѧ́зѧ а҆ссѷрі́йска, и҆ на высотꙋ̀ сла́вы ѻ҆́чїю є҆гѡ̀. Рече́ бо: крѣ́постїю рꙋкѝ моеѧ̀ сотворю̀, и҆ премꙋ́дростїю ра́зꙋма [моегѡ̀] ѿимꙋ̀ предѣ́лы ꙗ҆зы́кѡвъ, и҆ си́лꙋ и҆́хъ плѣню̀: и҆ сотрѧсꙋ̀ гра́ды населє́нныѧ, и҆ вселе́ннꙋю всю̀ ѡ҆б̾имꙋ̀ рꙋко́ю мое́ю ꙗ҆́кѡ гнѣздо̀, и҆ ꙗ҆́кѡ ѡ҆ста́влєннаѧ ꙗ҆́ица возьмꙋ̀: и҆ нѣ́сть, и҆́же ᲂу҆бѣжи́тъ менє̀, и҆лѝ проти́вꙋ мнѣ̀ рече́тъ, и҆ ѿве́рзетъ ᲂу҆ста̀, и҆ глꙋми́тъ. Є҆да̀ просла́витсѧ сѣки́ра без̾ сѣкꙋ́щагѡ є҆́ю; и҆лѝ вознесе́тсѧ пила̀ без̾ влекꙋ́щагѡ ю҆̀; та́кожде а҆́ще кто̀ во́зьметъ же́злъ, и҆лѝ дре́во: и҆ не та́кѡ. Но по́слетъ гдⷭ҇ь саваѡ́ѳъ на твою̀ че́сть безче́стїе, и҆ на твою̀ сла́вꙋ ѻ҆́гнь горѧ̀ возгори́тсѧ. И҆ бꙋ́детъ свѣ́тъ і҆и҃левъ во ѻ҆́гнь, и҆ ѡ҆ст҃и́тъ є҆го̀ ѻ҆гне́мъ горѧ́щимъ, и҆ поѧ́стъ ꙗ҆́кѡ сѣ́но вещество̀. Въ то́й де́нь ᲂу҆га́снꙋтъ го́ры и҆ хо́лми и҆ дꙋбра̑вы, и҆ поѧ́стъ ѿ дꙋшѝ да́же до пло́тей: и҆ бꙋ́детъ бѣжа́й, ꙗ҆́кѡ бѣжа́й ѿ пла́мене горѧ́ща. И҆ ѡ҆ста́вльшїисѧ ѿ ни́хъ бꙋ́дꙋтъ въ число̀, и҆ ѻ҆троча̀ ма́лое напи́шетъ ѧ҆̀. И҆ бꙋ́детъ въ то́й де́нь, не приложи́тсѧ ктомꙋ̀ ѡ҆ста́нокъ і҆и҃левъ, и҆ сп҃се́ннїи і҆а̑кѡвли не бꙋ́дꙋтъ ктомꙋ̀ ᲂу҆пова́юще на ѡ҆би́дѣвшыѧ и҆́хъ, но бꙋ́дꙋтъ ᲂу҆пова́юще на бг҃а ст҃а́го і҆и҃лева и҆́стиною.
Прокі́менъ, ѱало́мъ н҃, гла́съ ѕ҃: Поми́лꙋй мѧ̀, бж҃е, по вели́цѣй млⷭ҇ти твое́й. Сті́хъ: Се́рдце чи́сто сози́жди во мнѣ̀, бж҃е.
Въ сре́дꙋ г҃-ѧ седми́цы ве́чера,
На Гдⷭ҇и воззва́хъ, поста́вимъ стїхѡ́въ і҃. И҆ пое́мъ самогла́сенъ два́жды, и҆ мч҃нченъ, и҆ трѝ подо́бны триїѡ́ди.
Самогла́сенъ, гла́съ д҃:
Блꙋ́днѡ расточи́въ ѻ҆ч҃еское моѐ бога́тство, пꙋ́стъ ꙗ҆ви́хсѧ, во странѣ̀ всели́всѧ лꙋка́выхъ гра́жданъ: и҆ безꙋ́мїемъ ᲂу҆подо́бихсѧ несмы́слєннымъ скотѡ́мъ, и҆ ѡ҆бнажи́хсѧ всѧ́кїѧ бж҃е́ственныѧ бл҃года́ти. тѣ́мже ѡ҆бра́щьсѧ вопїю̀ тебѣ̀, бл҃госе́рдомꙋ и҆ ще́дромꙋ ѻ҆ц҃ꙋ̀: согрѣши́хъ, прїимѝ мѧ̀ ка́ющасѧ, бж҃е, и҆ поми́лꙋй мѧ̀.
Мч҃нченъ: Жє́ртвы ѡ҆дꙋшевлє́нныѧ, всесожжє́нїѧ словє́снаѧ, мч҃нцы гдⷭ҇ни, заколє́нїѧ совершє́ннаѧ бж҃їѧ, бг҃а зна̑ющаѧ и҆ бг҃омъ зна́ємаѧ ѻ҆вча́та, и҆́хже ѡ҆гра́да волкѡ́мъ невхо́дна, моли́тесѧ и҆ на́мъ ᲂу҆пасє́ннымъ бы́ти съ ва́ми на водѣ̀ поко́йнѣ.
Дрꙋгі̑ѧ стїхи̑ры, господи́на і҆ѡ́сифа, гла́съ ѕ҃.
Подо́бенъ: Всю̀ ѿложи́вше:
Со́лнца мы́сленнагѡ зарє́нїѧ ꙗ҆́вльшесѧ, бг҃ови́дцы а҆пⷭ҇ли, просвѣще́нїе и҆спроси́те дꙋша́мъ на́шымъ, и҆ и҆зба́вите ѿ мра́чныѧ тьмы̀ страсте́й, и҆ де́нь сп҃си́тельный ᲂу҆ви́дѣти помоли́тесѧ,предста́тельствы и҆ моле́ньми сердца̀ на̑ша ѡ҆чи́стивше, ꙗ҆̀же лꙋка́вый ᲂу҆ѧзвѝ, ꙗ҆́кѡ да ва́съ вѣ́рою сп҃са́еми чти́мъ при́снѡ, всемꙋ́дрымъ проповѣ́данїемъ мі́ръ спа́сшыѧ.
Въ странꙋ̀ ѕло́бы ѿше́дъ блꙋ́дный, ѕлѣ̀ и҆жди́хъ бога́тство, є҆́же мѝ да́лъ є҆сѝ, ѻ҆́ч҃е бл҃госе́рде, и҆ та́ю гла́домъ бл҃ги́хъ дѣ́лъ, и҆ сѐ ѡ҆дѣ́ѧхсѧ стꙋдо́мъ престꙋпле́нїѧ, бл҃года́ти бж҃е́ственныѧ ѡ҆бнажа́ѧсѧ, и҆ зовꙋ́ ти: согрѣши́хъ. вѣ́мъ бо твою̀ бл҃гость: прїимѝ мѧ̀, ще́дре,ꙗ҆́кѡ є҆ди́наго ѿ нає́мникъ твои́хъ, хрⷭ҇тѐ, моле́ньми а҆пⷭ҇лъ возлю́бльшихъ тѧ̀.
И҆́на стїхи́ра подо́бна, господи́на ѳео́дѡра, гла́съ то́йже.
Подо́бенъ: Ѡ҆деснꙋ́ю сп҃са:
А҆пⷭ҇ли сп҃сѡвы, свѣти̑ла вселе́нныѧ и҆ бл҃годѣ́телїе и҆ сп҃си́телїе, бж҃їѧ сла́вы ꙗ҆́коже небеса̀ повѣ́дателїе, и҆ преꙋкраше́ннїи ѕвѣзда́ми чꙋде́съ и҆ зна́меньми и҆сцѣле́нїй, прилѣ́жнѡ ѡ҆ на́съ мл҃твы гдⷭ҇еви приноси́те, въ воню̀ пречⷭ҇тꙋю, прїѧ́тисѧ мл҃твамъ на́шымъ, и҆ сподо́битисѧ всѣ̑мъ живоно́сный крⷭ҇тъ и҆ цѣлова́ти и҆ ви́дѣти со стра́хомъ. тогѡ̀ поклоне́нїемъ низпослѝ на́мъ млⷭ҇ти твоѧ̑, сп҃се, ꙗ҆́кѡ чл҃вѣколю́бецъ.
И҆ въ мине́и д҃.
Сла́ва, и҆ ны́нѣ, бг҃оро́диченъ.
Прокі́менъ, ѱало́мъ н҃а, гла́съ д҃: Оу҆пова́хъ на млⷭ҇ть бж҃їю во вѣ́ки и҆ въ вѣ́къ вѣ́ка. Сті́хъ: Что̀ хва́лишисѧ во ѕло́бѣ, си́льне;
Бытїѧ̀ чте́нїе. [Глава̀ з҃, ст. ѕ҃-ѳ҃].
Нѡ́е бѣ̀ лѣ́тъ шестѝ сѡ́тъ, и҆ пото́пъ во́дный бы́сть на землѝ. Вни́де же нѡ́е, и҆ сы́нове є҆гѡ̀, и҆ жена̀ є҆гѡ̀, и҆ жєны̀ сынѡ́въ є҆гѡ̀ съ ни́мъ въ ковче́гъ, воды̀ ра́ди пото́па. И҆ ѿ пти́цъ чи́стыхъ, и҆ ѿ пти́цъ нечи́стыхъ, и҆ ѿ скѡ́тъ чи́стыхъ, и҆ ѿ скѡ́тъ нечи́стыхъ, [и҆ ѿ ѕвѣре́й], и҆ ѿ всѣ́хъ гадѡ́въ пресмыка́ющихсѧ по землѝ, два̀ два̀ внидо́ша къ нѡ́ю въ ковче́гъ, мꙋ́жескїй по́лъ и҆ же́нскїй, ꙗ҆́коже заповѣ́да [гдⷭ҇ь] бг҃ъ нѡ́ю.
Прокі́менъ, ѱало́мъ н҃в, гла́съ д҃: Внегда̀ возврати́тъ гдⷭ҇ь плѣне́нїе люде́й свои́хъ. Сті́хъ: Речѐ безꙋ́менъ въ се́рдцѣ свое́мъ: нѣ́сть бг҃ъ.
При́тчей чте́нїе. [Глава̀ ѳ҃, ст. в҃і-и҃і].
Сы́не, а҆́ще премꙋ́дръ бꙋ́деши, себѣ̀ премꙋ́дръ бꙋ́деши и҆ и҆́скрєннимъ твои̑мъ: а҆́ще же ѕо́лъ бꙋ́деши, є҆ди́нъ почерпне́ши ѕла̑ѧ. Сы́нъ нака́занъ премꙋ́дръ бꙋ́детъ, безꙋ́мный же слꙋго́ю ᲂу҆потреби́тсѧ. и҆́же ᲂу҆твержда́етсѧ на лжа́хъ, се́й пасе́тъ вѣ́тры, то́й же пожене́тъ пти̑цы парѧ́щыѧ: ѡ҆ста́ви бо пꙋти̑ своегѡ̀ вїногра́да, въ стезѧ́хъ же своегѡ̀ земледѣ́ланїѧ заблꙋдѝ: прохо́дитъ же сквозѣ̀ пꙋсты́ню безво́днꙋю и҆ зе́млю ѡ҆предѣле́ннꙋю въ жа́ждѣхъ, собира́етъ же рꙋка́ма непло́дїе. Жена̀ безꙋ́мнаѧ и҆ проде́рзаѧ скꙋдна̀ хлѣ́бомъ быва́етъ, ꙗ҆́же не вѣ́сть стыдѣ́нїѧ, сѣ́де при две́рехъ до́мꙋ своегѡ̀, на столцѣ̀ ꙗ҆́вѣ на сто́гнахъ, призыва́ющаѧ мимоходѧ́щихъ и҆ и҆справлѧ́ющихъ пꙋти̑ своѧ̑: и҆́же є҆́сть ѿ ва́съ безꙋ́мнѣйшїй, да ᲂу҆клони́тсѧ ко мнѣ̀: и҆ лишє́ннымъ ра́зꙋма повелѣва́ю, глаго́лющи: хлѣ́бѡмъ сокровє́ннымъ въ сла́дость прикосни́тесѧ, и҆ во́дꙋ татьбы̀ сла́дкꙋю пі́йте. Ѻ҆́нъ же не вѣ́сть, ꙗ҆́кѡ земноро́днїи ᲂу҆ неѧ̀ погиба́ютъ и҆ во днѣ̀ а҆́да ѡ҆брѣта́ютсѧ. Но ѿскочѝ, не заме́дли на мѣ́стѣ є҆ѧ̀, нижѐ наста́ви ѻ҆́ка своегѡ̀ къ не́й: та́кѡ бо про́йдеши во́дꙋ чꙋждꙋ́ю, и҆ пре́йдеши рѣкꙋ̀ чꙋждꙋ́ю. ѿ воды́ же чꙋжді́ѧ ѡ҆ша́йсѧ, и҆ ѿ и҆сто́чника чꙋжда́гѡ не пі́й: да мно́гое вре́мѧ поживе́ши, и҆ приложа́тсѧ тебѣ̀ лѣ̑та живота̀.
И҆ а҆́бїе бж҃е́ственнаѧ слꙋ́жба преждеѡсщ҃е́нныхъ.
Въ четверто́къ тре́тїѧ седми́цы на ᲂу҆́трени,
трⷪ҇чны. По а҃-мъ стїхосло́вїи глаго́лемъ сѣда́льны а҆пⷭ҇льскїѧ ѻ҆смогла́сника.
По в҃-мъ же стїхосло́вїи глаго́лемъ настоѧ́щїй сѣда́ленъ, господи́на і҆ѡ́сифа, гла́съ ѕ҃.
Подо́бенъ: Оу҆пова́нїе мі́ра:
Свѣти̑ла мі́рꙋ нелѡ́жнаѧ, ᲂу҆ч҃нцы̀ сп҃сѡвы, просвѣти́те мою̀ дꙋ́шꙋ грѣхо́мъ слѣпотствꙋ́ющꙋю, и҆ покажи́те бж҃е́ственнагѡ днѐ прича́стника, хранѧ́ща сп҃си́тєльныѧ за́повѣди, и҆ и҆зба́вите мѧ̀ ѿ тьмы̀ ѻ҆́ныѧ несвѣти́мыѧ, ꙗ҆́кѡ да ва́съ прославлѧ́ю.
Сла́ва, то́йже.
И҆ ны́нѣ, бг҃оро́диченъ: Ст҃а́ѧ влⷣчце, хрⷭ҇та̀ бг҃а на́шегѡ мт҃и, ꙗ҆́кѡ всѣ́хъ творца̀ неизрече́ннѡ ро́ждшаѧ, молѝ со а҆пⷭ҇лы сщ҃е́нными всегда̀ бл҃гость є҆гѡ̀, ѿ страсте́й на́съ и҆зба́вити и҆ да́ти на́мъ ѡ҆ставле́нїе грѣхѡ́въ.
По г҃-мъ же стїхосло́вїи дрꙋгі́й сѣда́ленъ господи́на ѳео́дѡра,
гла́съ ѕ҃.
Подо́бенъ: А҆́гг҃льскїѧ си̑лы:
Мїросвѣ̑тлаѧ свѣти̑ла, бж҃е́ственнїи а҆пⷭ҇ли, просвѣти́те пѣвцы̀ ва́шѧ, проводѧ́щыѧ вре́мѧ поста̀, просѧ́ще дре́во живоно́снагѡ крⷭ҇та̀ досто́йнѡ всѣ̑мъ ви́дѣти и҆ лобыза́ти нескве́рныма ᲂу҆стна́ма и҆ ѻ҆чи́ма, вопїю́щымъ ѱало́мски: гдⷭ҇и, сла́ва тебѣ̀.
Сла́ва, то́йже:
И҆ ны́нѣ, бг҃оро́диченъ: Оу҆пова́нїе мі́ра, бл҃га́ѧ бцⷣе дв҃о, твоѐ и҆ є҆ди́ное стра́шное предста́тельство мо́лимъ: ᲂу҆милосе́рдисѧ на безпомѡ́щныѧ лю́ди, ᲂу҆молѝ млⷭ҇тиваго бг҃а,и҆зба́витисѧ дꙋша́мъ на́шымъ ѿ всѧ́кагѡ преще́нїѧ, є҆ди́на бл҃гослове́ннаѧ.
Канѡ́нъ въ мине́и, и҆ настоѧ́щїй трипѣ́снецъ господи́на і҆ѡ́сифа.
И҆ стїхосло́витсѧ пѣ́снь. Гла́съ ѕ҃.
Пѣ́снь д҃.
І҆рмо́съ: Хрⷭ҇то́съ моѧ̀ си́ла:
По́стъ, сле́зы, мл҃твы, милосе́рдїе, бл҃гоꙋмиле́нный нра́въ, мы́сль пра́вꙋю, житїѧ̀ чистотꙋ̀ пока́жемъ, вѣ́рнїи, ꙗ҆́кѡ да сла́вы наслади́мсѧ.
Свѣти́льницы пресвѣ́тлѡ свѣтѧ́щїи на тве́рди честны́ѧ цр҃кве ꙗ҆ви́стесѧ, а҆пⷭ҇ли: тѣ́мже просвѣти́те на̑ша сердца̀ бж҃е́ственнымъ дх҃омъ.
Ꙗ҆́кѡ бж҃е́ственнїи ᲂу҆́глїе, возжиза́еми ѻ҆гне́мъ невеще́ственнымъ, попали́те страстна̑ѧ вещєства̀ серде́цъ на́шихъ, мꙋ́дрїи бг҃а на́шегѡ а҆пⷭ҇ли.
Бг҃оро́диченъ: Свѣ́ще негаси́маѧ, черто́же всесвѣ́тлый, серафі̑мъ превы́шшаѧ и҆ херꙋві́мскаѧ колесни́це, всенепоро́чнаѧ, ѿ грѣхѡ́въ лю́тыхъ и҆ бѣ́дъ мѧ̀ свободѝ.
И҆́ный, господи́на ѳео́дѡра. Гла́съ то́йже.
І҆рмо́съ: Оу҆слы́ша прⷪ҇ро́къ:
Свѣти́льницы бг҃оѧвле́нїѧ ꙗ҆ви́вшесѧ, а҆пⷭ҇ли сп҃сѡвы, невѣ́дѣнїѧ но́щь разрꙋши́сте, и҆ цр҃ковь проѧсни́вше, ѡ҆свѣща́ете вселе́ннꙋю ѻ҆гневѣща́нными бж҃е́ственными ᲂу҆че́ньми ва́шими.
Мі́ръ проте́кше, кі́йждо во свою̀ странꙋ̀, во є҆ди́нꙋ вѣ́рꙋ всѧ̑ собра́сте, а҆пⷭ҇ли, и҆ полꙋчи́вше нбⷭ҇наѧ, ликꙋ́ете, хрⷭ҇та̀ непреста́ннѡ молѧ́ще сп҃сти́сѧ всѣ̑мъ на́мъ.
Трⷪ҇ченъ: Сн҃а и҆ дх҃а ѿ ѻ҆ц҃а̀ сла́влю, ꙗ҆́кѡ ѿ со́лнца свѣ́тъ и҆ лꙋчꙋ̀: ѻ҆́ваго ᲂу҆́бѡ рожде́ственнѣ, занѐ и҆ рожде́нїе: ѻ҆́ваго же происхо́днѣ, занѐ и҆ происхожде́нїе: собезнача́льнꙋю бж҃е́ственнꙋю трⷪ҇цꙋ, покланѧ́емꙋю ѿ всѧ́кїѧ тва́ри.
Бг҃оро́диченъ: Млⷣнца роди́вшаѧ, и҆ чистотꙋ̀ соблю́дшаѧ дв҃а чтⷭ҇аѧ, ты̀ ꙗ҆ви́ласѧ є҆сѝ, бг҃а ро́ждши и҆ человѣ́ка, є҆ди́наго того̀жде во ѻ҆бою̀ зра̑кꙋ: чꙋ́до твоѐ, дв҃о мт҃и, ᲂу҆жаса́етъ всѧ́кїй слꙋ́хъ и҆ помышле́нїе.
Сла́ва тебѣ̀, бж҃е на́шъ, сла́ва тебѣ̀.
Мл҃твами ва́шими ст҃ы́ми, а҆пⷭ҇ли гдⷭ҇ни, да сподо́бимсѧ ѡ҆блобыза́ти чи́стыми ᲂу҆стна́ми и҆ ѻ҆чесы̀ животворѧ́щїй крⷭ҇тъ, предлежа́щїй сꙋ́щымъ въ мі́рѣ и҆ ѿ всѣ́хъ покланѧ́емый.
І҆рмо́съ: Оу҆слы́ша прⷪ҇ро́къ прише́ствїе твоѐ, гдⷭ҇и, и҆ ᲂу҆боѧ́сѧ, ꙗ҆́кѡ хо́щеши ѿ дв҃ы роди́тисѧ и҆ человѣ́кѡмъ ꙗ҆ви́тисѧ, и҆ глаго́лаше: ᲂу҆слы́шахъ слꙋ́хъ тво́й, и҆ ᲂу҆боѧ́хсѧ. сла́ва си́лѣ твое́й, гдⷭ҇и.
Пѣ́снь и҃.
І҆рмо́съ: И҆з̾ пла́мене преподѡ́бнымъ:
Мѡѷсе́а по́стъ бг҃ови́дца показа̀, и҆ и҆лїю̀ на ѻ҆́гненнѣй колесни́цѣ взѧ́тъ: потщи́сѧ, дꙋшѐ, ѿ помышле́нїй вре́дныхъ ᲂу҆держи́сѧ, ꙗ҆́кѡ да и҆зба́вишисѧ ѿ долꙋвлекꙋ́щагѡ, прельще́нїѧ.
Поползнꙋ́всѧ въ гѡ́ршаѧ влекꙋ́сѧ, и҆ ко ꙗ҆́звѣ стрꙋ́пъ прилага́ю: и҆сцѣлѝ, хрⷭ҇тѐ, ѡ҆камене́нное моѐ ѡ҆жесточе́нїе, ще́дре, а҆пⷭ҇лъ мл҃твами.
Мі́ра свѣти̑ла бг҃оза̑рнѣйшаѧ, страсте́й на́шихъ ѡ҆́блаки разжени́те, и҆ покло́нники свѣ́тлагѡ воскрⷭ҇нїѧ покажи́те ны̀, воспѣва́ющыѧ сл҃нца сла́вы.
Бг҃оро́диченъ: Ро́дове родѡ́въ тѧ̀, бг҃обл҃же́ннаѧ, ᲂу҆бл҃жа́ютъ, ꙗ҆́коже дре́вле прорекла̀ є҆сѝ: є҆ди́на бо человѣ́кѡмъ родила̀ є҆сѝ бл҃же́нное сло́во несказа́ннѡ, и҆з̾ тебє̀ воплоще́нное.
И҆́ный.
І҆рмо́съ: Преподо́бнїи твоѝ ѻ҆́троцы:
Во глꙋбинѣ̀ прельще́нїѧ пла́вающыѧ ᲂу҆лови́вше ᲂу҆́дицею вѣ́ры, а҆пⷭ҇ли гдⷭ҇ни, прино́сите сїѧ̑, бл҃гословѧ́щыѧ, пою́щыѧ и҆ превозносѧ́щыѧ гдⷭ҇а.
Ве́лїѧ крѣ́пость твоѧ̀ во а҆пⷭ҇лѣхъ, занѐ сѣ̑ни и҆ ᲂу҆брꙋ̀сы и҆́хъ и҆сцѣлѧ́ютъ болѧ́щыѧ,бл҃гословѧ́щыѧ, пою́щыѧ и҆ превозносѧ́щыѧ гдⷭ҇а.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: И҆ безнача́льномꙋ, и҆ ржⷭ҇твꙋ, и҆ происхожде́нїю, ѻ҆ц҃ꙋ̀ покланѧ́юсѧ ро́ждшемꙋ, сн҃а прославлѧ́ю рожде́ннаго, воспѣва́ю совозсїѧ́вшаго ѻ҆ц҃ꙋ́ и҆ сн҃ꙋ дх҃а ст҃а́го.
Бг҃оро́диченъ: Є҆го́же родила̀ є҆сѝ, дв҃о, несказа́ннѡ, всегда̀ ꙗ҆́кѡ чл҃вѣколю́бца не преста́й молѧ́щи, да ѿ бѣ́дъ сп҃се́тъ къ тебѣ̀ прибѣга́ющыѧ.
Сла́ва тебѣ̀, бж҃е на́шъ, сла́ва тебѣ̀.
Двоенадесѧ́тице а҆пⷭ҇лъ ст҃а́ѧ, чтⷭ҇но́мꙋ крⷭ҇тꙋ̀ неѡсꙋжде́ннѡ поклони́тисѧ сподо́би мѧ̀,бл҃гословѧ́ща, пою́ща и҆ превозносѧ́ща гдⷭ҇а.
Хва́лимъ, бл҃гослови́мъ, покланѧ́емсѧ гдⷭ҇еви:
І҆рмо́съ: Преподо́бнїи твоѝ ѻ҆́троцы въ пещѝ херꙋві́мѡмъ подража́хꙋ, трист҃ꙋ́ю пѣ́снь воспѣва́юще: бл҃гослови́те, по́йте и҆ превозноси́те гдⷭ҇а.
Пѣ́снь ѳ҃.
І҆рмо́съ: Бг҃а человѣ́кѡмъ:
Бж҃е и҆ гдⷭ҇и многомлⷭ҇тиве, ѡ҆чи́сти ꙗ҆́звы моегѡ̀ се́рдца, прилага́ѧ мнѣ̀ лѣка̑рства покаѧ́нїѧ: согрѣши́хъ, согрѣши́хъ тебѣ̀, ᲂу҆ще́дри, сп҃сѝ мѧ̀, а҆пⷭ҇лъ твои́хъ мл҃твами, ꙗ҆́кѡ многомлⷭ҇тивъ.
Стремле́нїємъ безмѣ̑стнымъ послѣ́довахъ ᲂу҆мовре́днѡ а҆́зъ блꙋ́дный, и҆ внѣ̀ себє̀ ве́сь бы́хъ,сластьмѝ же́сткѡ пита́емь и҆ сп҃си́тельныѧ снѣ́ди лиша́емь: ᲂу҆ще́дри, хрⷭ҇тѐ, и҆ сп҃сѝ мѧ̀.
Дꙋшѐ, ѿ ѕло́бы не ѡ҆чища́ющисѧ и҆ ѿ сласте́й тлетво́рныхъ себѐ не ᲂу҆далѧ́ющи, что̀ безвре́меннѡ ра́дꙋешисѧ постѧ́щисѧ; сегѡ́ бо поста̀ не и҆збра̀ гдⷭ҇ь, є҆ди́нъ хотѧ́й на́шегѡ и҆справле́нїѧ.
Бг҃оро́диченъ: Свѣ́томъ бж҃е́ственнымъ менѐ просвѣтѝ, дв҃о бцⷣе, свѣ́та роди́тельнице, и҆ дꙋшѝ моеѧ̀ мра́къ ѿженѝ, ꙗ҆́кѡ да ᲂу҆бл҃жа́ю тѧ̀, ю҆́же ᲂу҆бл҃жа́ютъ всѝ человѣ́честїи ро́ди, ꙗ҆́коже предрекла̀ є҆сѝ.
И҆́ный.
І҆рмо́съ: Безсѣ́меннагѡ зача́тїѧ:
Сло́вомъ невѣ̑жды, премꙋ́дри ра́зꙋмомъ ꙗ҆ви́стесѧ, плетє́нїѧ слове́съ мꙋдрецє́въ разрꙋши́вше,вѣті́й двꙋсмы̑слїѧ и҆ чи́сла ѕвѣздоче́тцєвъ. тѣ́мже, а҆пⷭ҇ли хрⷭ҇тѡ́вы, є҆ди́ни показа́стесѧ всеѧ̀ вселе́нныѧ ᲂу҆чи́телїе.
Пе́тръ вѣті́йствꙋетъ, и҆ платѡ́нъ ᲂу҆молчѐ: ᲂу҆чи́тъ па́ѵелъ, пѷѳаго́ръ постыдѣ́сѧ: та́же а҆пⷭ҇льскїй бг҃осло́вѧй собо́ръ є҆́ллинское ме́ртвое вѣща́нїе погреба́етъ и҆ совозставлѧ́етъ мі́ръ ко слꙋ́же́нїю хрⷭ҇то́вꙋ.
Сла́ва, трⷪ҇ченъ: Є҆ди́нагѡ є҆динороди́телю, є҆диноро́днагѡ сн҃а ѻ҆́ч҃е: и҆ є҆ди́не свѣ́те, є҆ди́нагѡ свѣ́та сїѧ́нїе: и҆ є҆ди́ный є҆ди́нственнѣ є҆ди́нагѡ бг҃а ст҃ы́й дш҃е, гдⷭ҇а гдⷭ҇ь вои́стиннꙋ сы́й: ѽ трⷪ҇це є҆ди́нице ст҃а́ѧ! сп҃сѝ мѧ̀ бг҃осло́вѧща тѧ̀.
Бг҃оро́диченъ: Чꙋ́до рождества̀ твоегѡ̀ ᲂу҆дивлѧ́етъ мѧ̀, всенепоро́чнаѧ: ка́кѡ зачина́еши безсѣ́меннѡ неѡб̾е́млемаго; рцы̀, ка́кѡ дѣ́вствꙋеши, ро́ждши ꙗ҆́кѡ мт҃и; па́че є҆стества̀ бы́вшее вѣ́рою прїе́мъ, рожде́нномꙋ поклони́сѧ: є҆ли̑ка бо хо́щетъ и҆ мо́жетъ.
Сла́ва тебѣ̀, бж҃е на́шъ, сла́ва тебѣ̀.
Крⷭ҇тъ чтⷭ҇ны́й дре́во всест҃о́е, є҆́же мі́рꙋ сп҃се́нїе произрастѝ, ви́дѣти и҆ поклони́тисѧ всѝ да сподо́бимсѧ, чи́стыми ᲂу҆стна́ми и҆ дꙋше́ю, мл҃твами всѣ́хъ ва́съ, ст҃ы́хъ а҆пⷭ҇лъ хрⷭ҇то́выхъ.
І҆рмо́съ: Безсѣ́меннагѡ зача́тїѧ ржⷭ҇тво̀ несказа́нно є҆́сть, мт҃ре безмꙋ́жныѧ нетлѣ́ненъ пло́дъ: бж҃їе бо рожде́нїе ѡ҆бновлѧ́етъ є҆стєства̀. тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю мт҃рь, правосла́внѡ велича́емъ.
Свѣти́ленъ гла́са.
На стїхо́внѣ самогла́сенъ, два́жды, гла́съ ѕ҃:
Сыноположе́нїѧ и҆спа́дъ блꙋ́дный а҆́зъ, со свинїѧ́ми ꙗ҆́кѡ ра́бъ пита́ѧсѧ и҆ нижѐ тѣ́хъ пи́щи насыща́ѧсѧ, прихождꙋ̀ къ тебѣ̀ ѻ҆ц҃ꙋ̀ бл҃госе́рдомꙋ. ѿѻнꙋ́дꙋже и҆зыдо́хъ ѕлѣ̀, возвраща́юсѧ до́брѣ,въ покаѧ́нїи зовы́й: согрѣши́хъ на нб҃о и҆ пред̾ тобо́ю, ѻ҆́ч҃е: пода́ждь мѝ во ѡ҆браще́нїи вели́кꙋю млⷭ҇ть.
Мч҃нченъ: И҆збра̑нныѧ и҆ ст҃ы̑ѧ ди̑вны показа̀ бг҃ъ на́шъ. ра́дꙋйтесѧ и҆ весели́тесѧ, всѝ рабѝ є҆гѡ̀: ва́мъ бо ᲂу҆гото́ва вѣнцы̀ и҆ црⷭ҇твїе своѐ. но про́симъ, и҆ на́съ не забꙋ́дите
Сла́ва, и҆ ны́нѣ, бг҃оро́диченъ: Бцⷣе, ты̀ є҆сѝ лоза̀ и҆́стиннаѧ, возрасти́вшаѧ на́мъ пло́дъ живота̀. тебѣ̀ мо́лимсѧ: моли́сѧ, влⷣчце, со а҆пⷭ҇лы и҆ всѣ́ми ст҃ы́ми, поми́ловатисѧ дꙋшамъ на́шымъ.
На ѕ҃-мъ часѣ̀, тропа́рь прⷪ҇ро́чества, гла́съ г҃:
А҆́ще беззакѡ́нїѧ на́зриши, чл҃вѣколю́бче, ка́ѧ сп҃се́нїѧ наде́жда на́мъ, но твою̀ свы́ше по́мощь, ꙗ҆́кѡ ще́дръ, лю́демъ твои̑мъ низпослѝ, гдⷭ҇и.
Прокі́менъ, ѱало́мъ н҃г, гла́съ д҃: Бж҃е, во и҆́мѧ твоѐ сп҃си́ мѧ, и҆ въ си́лѣ твое́й сꙋди́ ми. Сті́хъ: Бж҃е, ᲂу҆слы́ши мл҃твꙋ мою̀, внꙋшѝ глаго́лы ᲂу҆́стъ мои́хъ.
Прⷪ҇ро́чества и҆са́їина чте́нїе.
[Глава̀ а҃і, ст. і҃-ѕ҃і: глава̀ в҃і, ст. а҃-в҃].
Та́кѡ глаго́летъ гдⷭ҇ь: бꙋ́детъ въ де́нь ѻ҆́ный ко́рень і҆ессе́овъ, и҆ востаѧ́й владѣ́ти ꙗ҆зы̑ки, на того̀ ꙗ҆зы́цы ᲂу҆пова́ти бꙋ́дꙋтъ: и҆ бꙋ́детъ поко́й є҆гѡ̀, че́сть. И҆ бꙋ́детъ въ де́нь ѻ҆́ный, приложи́тъ гдⷭ҇ь показа́ти рꙋ́кꙋ свою̀, є҆́же возревнова́ти по ѡ҆ста́нкꙋ про́чемꙋ люде́й, и҆́же а҆́ще ѡ҆ста́нетъ ѿ а҆ссѷрі́ѡвъ, и҆ ѿ є҆гѵ́пта, и҆ вавѷлѡ́на, и҆ ѿ є҆ѳїо́пїи, и҆ ѿ є҆ламі́тѡвъ, и҆ ѿ восто́кѡвъ со́лнца, и҆ ѿ а҆раві́и, и҆ ѿ ѻ҆стровѡ́въ морски́хъ. И҆ воздви́гнетъ зна́менїе въ ꙗ҆зы́ки, и҆ собере́тъ поги́бшыѧ і҆и҃лєвы, и҆ расточє́нныѧ і҆ꙋ̑дины собере́тъ ѿ четы́рехъ кри́лъ землѝ. И҆ ѿи́метсѧ ре́вность є҆фре́мова, и҆ вразѝ і҆ꙋ̑дины поги́бнꙋтъ: є҆фре́мъ не возревнꙋ́етъ і҆ꙋ́дѣ, и҆ і҆ꙋ́да не ѡ҆скорби́тъ є҆фре́ма. И҆ полетѧ́тъ въ корабле́хъ и҆ноплеме́нничихъ: мо́ре кꙋ́пнѡ плѣнѧ́тъ, и҆ сꙋ́щихъ ѿ востѡ́къ со́лнца, и҆ і҆дꙋме́ю: и҆ на мѡа́ва пе́рвѣе рꙋ́ки возложа́тъ, сы́нове же а҆ммѡ̑ни пе́рвїи покорѧ́тсѧ. И҆ ѡ҆пꙋстоши́тъ гдⷭ҇ь мо́ре є҆гѵ́петское, и҆ возложи́тъ рꙋ́кꙋ свою̀ на рѣкꙋ̀ дꙋ́хомъ преси́льнымъ: и҆ порази́тъ на се́дмь де́брїй, ꙗ҆́коже преходи́ти ю҆̀ во ѡ҆бꙋве́нїи: и҆ бꙋ́детъ проше́ствїе лю́демъ мои̑мъ ѡ҆ста́вшымъ во є҆гѵ́птѣ и҆ бꙋ́детъ і҆и҃лю, ꙗ҆́коже въ де́нь, є҆гда̀ и҆зы́де ѿ землѝ є҆гѵ́петскїѧ. И҆ рече́ши въ де́нь ѻ҆́ный: бл҃гословлю̀ тѧ̀, гдⷭ҇и, ꙗ҆́кѡ разгнѣ́валсѧ є҆сѝ на мѧ̀ и҆ ѿврати́лъ є҆сѝ ꙗ҆́рость твою̀ [ѿ менє̀], и҆ поми́ловалъ мѧ̀ є҆сѝ. Сѐ бг҃ъ мо́й сп҃съ мо́й, ᲂу҆пова́ѧ бꙋ́дꙋ на него̀, и҆ не ᲂу҆бою́сѧ: занѐ сла́ва моѧ̀ и҆ похвала̀ моѧ̀ гдⷭ҇ь, и҆ бы́сть мѝ во сп҃се́нїе.
Прокі́менъ, ѱало́мъ н҃д, гла́съ з҃: Внꙋшѝ, бж҃е, мл҃твꙋ мою̀, и҆ не пре́зри моле́нїѧ моегѡ̀. Сті́хъ: Вонми́ ми, и҆ ᲂу҆слы́ши мѧ̀.
Въ четверто́къ тре́тїѧ седми́цы ве́чера,
На Гдⷭ҇и воззва́хъ, поста́вимъ стїхѡ́въ ѕ҃, и҆ пое́мъ настоѧ́щыѧ подо́бны триїѡ́ди, господи́на і҆ѡ́сифа, гла́съ є҃.
Подо́бенъ: Ра́дꙋйсѧ, по́стникѡмъ:
Сп҃се, и҆́стиннаѧ сла́досте, горча́йшыѧ во́ды ме́рры дре́вле ᲂу҆слади́лъ є҆сѝ дре́вомъ ѡ҆бразꙋ́ющимъ бж҃е́ственный крⷭ҇тъ: просте́ртъ же бы́въ на не́мъ, ꙗ҆́коже бл҃говоли́лъ є҆сѝ, же́лчи вкꙋси́лъ є҆сѝ, въ ре́бра прободе́нъ, и҆з̾ ни́хже мі́рꙋ и҆злива́еши во́дꙋ ѡ҆ставле́нїѧ, на ѡ҆бновле́нїе земна́гѡ смѣше́нїѧ. тѣ́мже славосло́вимъ твою̀ неизрече́ннꙋю си́лꙋ и҆ мо́лимсѧ: пода́ждь на́мъ стра́хъ тво́й, гдⷭ҇и, во вре́мѧ поще́нїѧ, и҆ проще́нїе согрѣше́нїй, и҆ ве́лїю млⷭ҇ть.
Сло́ве, простры́йсѧ на крⷭ҇тѣ̀, собира́ѧ дале́че ѿстоѧ́щыѧ ѿ тебє̀! возне́съ помышле́нїе моѐ ѿ гно́ѧ страсте́й, добродѣ́тельми всѧ́ческими ѡ҆богатѝ, подава́ѧ се́рдцꙋ моемꙋ̀ чистѣ́йшїй стра́хъ тво́й и҆ дꙋшѝ мое́й соверше́ннꙋю любо́вь, ѿ плотскі́ѧ любвѐ мѧ̀ ѿсѣца́ющꙋю: ꙗ҆́кѡ да воздержа́нїемъ, мл҃твою и҆ моле́нїемъ тебѣ̀ въ настоѧ́щыѧ дни̑ ᲂу҆гождꙋ̀, и҆ ᲂу҆зрю̀ свѣ́тлѡ тво́й де́нь воскрⷭ҇нїѧ, прїе́млѧ ве́лїю млⷭ҇ть.
И҆́на стїхи́ра, господи́на ѳео́дѡра, гла́съ а҃.
Подо́бенъ: Ѡ҆блакъ тѧ̀ свѣ́тлый:
Тре́тїю чтⷭ҇ны́хъ постѡ́въ седми́цꙋ, хрⷭ҇тѐ сло́ве, преше́дшыѧ, дре́во живоно́снагѡ крⷭ҇та̀ твоегѡ̀ ᲂу҆ви́дѣти сподо́би ны̀, и҆ че́стнѣ поклони́тисѧ, и҆ восхвали́ти по достоѧ́нїю, просла́вити держа́вꙋ твою̀, воспѣ́ти стрⷭ҇ти твоѧ̑, дости́гнꙋти чи́стѣ сла́внагѡ и҆ ст҃а́гѡ воскрⷭ҇нїѧ, па́схи та́инственныѧ, є҆́юже а҆да́мъ па́ки вни́де въ ра́й.
И҆ въ мине́и г҃. Сла́ва, и҆ ны́нѣ, крⷭ҇тобг҃оро́диченъ.
Прокі́менъ, ѱало́мъ н҃є, гла́съ ѕ҃: Поми́лꙋй мѧ̀, бж҃е, ꙗ҆́кѡ попра́ мѧ человѣ́къ. Сті́хъ: Попра́ша мѧ̀ вразѝ моѝ ве́сь де́нь.
Бытїѧ̀ чте́нїе. [Глава̀ з҃, ст. а҃і-к҃д: глава̀ и҃, ст. а҃-г҃].
Бы́сть въ шестьсо́тное лѣ́то въ житїѝ нѡ́евѣ, втора́гѡ мѣ́сѧца, въ два́десѧть седмы́й де́нь мѣ́сѧца, въ де́нь то́й разверзо́шасѧ всѝ и҆сто́чницы бе́здны, и҆ хлѧ̑би небє́сныѧ ѿверзо́шасѧ. И҆ бы́сть до́ждь на зе́млю четы́редесѧть дне́й и҆ четы́редесѧть ноще́й. Въ де́нь то́й вни́де нѡ́е, си́мъ, ха́мъ, і҆а́феѳъ, сы́нове нѡ́євы, и҆ жена̀ нѡ́ева, и҆ трѝ жєны̀ сынѡ́въ є҆гѡ̀ съ ни́мъ въ ковче́гъ. И҆ всѝ ѕвѣ́рїе земні́и по ро́дꙋ, и҆ всѝ ско́ти по ро́дꙋ, и҆ всѧ́кїй га́дъ дви́жайсѧ на землѝ по ро́дꙋ, и҆ всѧ́каѧ пти́ца перна́таѧ по ро́дꙋ своемꙋ̀, внидо́ша къ нѡ́ю въ ковче́гъ два̀ два̀, мꙋ́жескїй по́лъ и҆ же́нскїй, ѿ всѧ́кїѧ пло́ти, въ не́йже є҆́сть дꙋ́хъ живо́тный: и҆ входѧ̑щаѧ, мꙋ́жескїй по́лъ и҆ же́нскїй ѿ всѧ́кїѧ пло́ти, внидо́ша къ нѡ́ю въ ковче́гъ, ꙗ҆́коже заповѣ́да гдⷭ҇ь бг҃ъ нѡ́ю. И҆ затворѝ гдⷭ҇ь бг҃ъ ковче́гъ ѿвнѣ̀ є҆гѡ̀. И҆ бы́сть пото́пъ четы́редесѧть дне́й и҆ четы́редесѧть ноще́й на землѝ, и҆ ᲂу҆мно́жисѧ вода̀, и҆ взѧ̀ ковче́гъ, и҆ возвы́сисѧ ѿ землѝ: и҆ возмога́ше вода̀, и҆ ᲂу҆множа́шесѧ ѕѣлѡ̀ на землѝ, и҆ ноша́шесѧ ковче́гъ верхꙋ̀ воды̀. Вода́ же возмога́ше ѕѣлѡ̀ ѕѣлѡ̀ на землѝ: и҆ покры̀ всѧ̑ го́ры высѡ́кїѧ, ꙗ҆̀же бѧ́хꙋ под̾ небесе́мъ: пѧтьна́десѧть лакте́й горѣ̀ возвы́сисѧ вода̀, и҆ покры̀ всѧ̑ го́ры высѡ́кїѧ. И҆ ᲂу҆́мре всѧ́каѧ пло́ть дви́жꙋщаѧсѧ по землѝ, пти́цъ и҆ скотѡ́въ и҆ ѕвѣре́й, и҆ всѧ́кїй га́дъ дви́жайсѧ на землѝ, и҆ всѧ́кїй человѣ́къ: и҆ всѧ̑ є҆ли̑ка и҆́мꙋтъ дыха́нїе жи́зни, и҆ всѐ є҆́же бѣ̀ на сꙋ́ши, ᲂу҆́мре. И҆ потреби́сѧ всѧ́кое воста́нїе, є҆́же бѧ́ше на лицѣ̀ всеѧ̀ землѝ, ѿ человѣ́ка да́же до скота̀ и҆ гадѡ́въ и҆ пти́цъ небе́сныхъ, и҆ потреби́шасѧ ѿ землѝ: и҆ ѡ҆ста̀ нѡ́е є҆ди́нъ, и҆ и҆̀же съ ни́мъ въ ковче́зѣ. И҆ возвы́сисѧ вода̀ над̾ земле́ю дне́й сто̀ пѧтьдесѧ́тъ. И҆ помѧнꙋ̀ бг҃ъ нѡ́а, и҆ всѧ̑ ѕвѣ̑ри, и҆ всѧ̑ скоты̀, и҆ всѧ̑ пти̑цы, и҆ всѧ̑ га́ды пресмыка́ющыѧсѧ, є҆ли̑ка бѣ́хꙋ съ ни́мъ въ ковче́зѣ: и҆ наведѐ бг҃ъ дꙋ́хъ на зе́млю, и҆ преста̀ вода̀. И҆ заключи́шасѧ и҆сто́чницы бе́здны и҆ хлѧ̑би небє́сныѧ, и҆ ᲂу҆держа́сѧ до́ждь ѿ небесѐ: и҆ вспѧ́ть по́йде вода̀, и҆дꙋ́щаѧ ѿ землѝ: и҆ ᲂу҆малѧ́шесѧ вода̀ по стѣ̀ пѧти́десѧтихъ дне́хъ.
Прокі́менъ, ѱало́мъ н҃ѕ, гла́съ з҃: Поми́лꙋй мѧ̀, бж҃е, поми́лꙋй мѧ̀, ꙗ҆́кѡ на тѧ̀ ᲂу҆пова̀ дꙋша̀ моѧ̀. Сті́хъ: И҆ на сѣ́нь крилꙋ̑ твоє́ю надѣ́юсѧ.
При́тчей чте́нїе. [Глава̀ і҃, ст. а҃-к҃в].
Сы́нъ премꙋ́дръ весели́тъ ѻ҆тца̀: сы́нъ же безꙋ́менъ печа́ль ма́тери. Не по́льзꙋютъ сокрѡ́вища беззако́нныхъ, пра́вда же и҆зба́витъ ѿ сме́рти. Не ᲂу҆бїе́тъ гла́домъ гдⷭ҇ь дꙋ́шꙋ првⷣнꙋю, живо́тъ же нечести́выхъ низврати́тъ. Нищета̀ мꙋ́жа смирѧ́етъ: рꙋ́цѣ же мꙋ́жественныхъ ѡ҆богаща́ютсѧ. Сы́нъ нака́занъ премꙋ́дръ бꙋ́детъ, безꙋ́мный же слꙋго́ю ᲂу҆потреби́тсѧ: спасе́тсѧ ѿ зно́ѧ сы́нъ разꙋ́мный, вѣтротлѣ́ненъ же быва́етъ на жа́твѣ сы́нъ беззако́нный. Бл҃гослове́нїе гдⷭ҇не на главѣ̀ првⷣнагѡ: ᲂу҆ста́ же нечести́выхъ покры́етъ пла́чь безвре́менный. Па́мѧть првⷣныхъ съ похвала́ми: и҆́мѧ же нечести́выхъ ᲂу҆гаса́етъ. Премꙋ́дръ се́рдцемъ прїи́метъ за́пѡвѣди: непокрове́нный же ᲂу҆стна́ма ѡ҆строптѣва́ѧ запне́тсѧ. И҆́же хо́дитъ про́стѡ, хо́дитъ надѣ́ѧсѧ: развраща́ѧй же пꙋти̑ своѧ̑ позна́нъ бꙋ́детъ. Намиза́ѧй ѻ҆́комъ съ ле́стїю, собира́етъ мꙋжє́мъ печа̑ли: ѡ҆блича́ѧй же со дерзнове́нїемъ, миротвори́тъ. И҆сто́чникъ жи́зни въ рꙋцѣ̀ првⷣнагѡ: ᲂу҆ста́ же нечести́вагѡ покры́етъ па́гꙋба. Не́нависть воздвиза́етъ ра́спрю: всѣ́хъ же нелюбопри́тельныхъ покрыва́етъ любо́вь. И҆́же ѿ ᲂу҆сте́нъ произно́ситъ премꙋ́дрость, жезло́мъ бїе́тъ мꙋ́жа безсерде́чна.Премꙋ́дрїи скры́ютъ чꙋ́вство, ᲂу҆ста́ же проде́рзагѡ приближа́ютсѧ сокрꙋше́нїю. Стѧжа́нїе бога́тыхъ гра́дъ тве́рдъ: сокрꙋше́нїе же нечести́выхъ нищета̀. Дѣла̀ првⷣныхъ живо́тъ творѧ́тъ, пло́дове же нечести́выхъ грѣхѝ. Пꙋти̑ жи́зни храни́тъ наказа́нїе: наказа́нїемъ же не ѡ҆бличе́нный заблꙋжда́етъ. Покрыва́ютъ враждꙋ̀ ᲂу҆стнѣ̀ пра̑выѧ: и҆зносѧ́щїи же ᲂу҆кори́знꙋ безꙋ́мнѣйшїи сꙋ́ть. Ѿ многосло́вїѧ не и҆збѣжи́ши грѣха̀: щадѧ́ же ᲂу҆стнѣ̀, разꙋ́менъ бꙋ́деши. Сребро̀ разжже́нное ѧ҆зы́къ првⷣнагѡ: се́рдце же нечести́вагѡ и҆сче́знетъ. Оу҆стнѣ̀ првⷣныхъ вѣ́дѧтъ высѡ́каѧ: безꙋ́мнїи же въ скꙋ́дости скончава́ютсѧ. Бл҃гослове́нїе гдⷭ҇не на главѣ̀ првⷣнагѡ: сїѐ ѡ҆богаща́етъ, и҆ не и҆́мать приложи́тисѧ є҆мꙋ̀ печа́ль въ се́рдцы.
На стїхо́внѣ самогла́сенъ днѐ, два́жды, гла́съ ѕ҃:
На дре́вѣ крⷭ҇тнѣмъ повѣ́шеннаѧ жи́знь всѣ́хъ, хрⷭ҇тѐ бж҃е, ѡ҆живѝ мою̀ дꙋ́шꙋ ᲂу҆мерщвле́ннꙋю прегрѣше́ньми: и҆ да не ѡ҆ста́виши всеконе́чнѡ поги́бнꙋти твоѐ ѻ҆вча̀, па́стырю до́брый. ѿстꙋпи́хъ бо ѿ твои́хъ за́повѣдей, и҆ безгрѣ́шности бога́тство, є҆́же дарова́лъ мѝ є҆сѝ, расточи́хъ грѣхолю́бнымъ произволе́нїемъ, растлѣ́хъ же и҆ ѡ҆мерзи́хсѧ въ блꙋ́дныхъ начина́нїихъ: но ѡ҆бновѝ мѧ̀, къ покаѧ́нїю привле́къ, є҆ди́не многомлⷭ҇тиве.
Мч҃нченъ: Мч҃нцы твоѝ, гдⷭ҇и, не ѿверго́шасѧ тебє̀, ни ѿстꙋпи́ша ѿ за́повѣдей твои́хъ: тѣ́хъ мл҃твами поми́лꙋй на́съ.
Сла́ва, и҆ ны́нѣ, крⷭ҇тобг҃оро́диченъ.
Подо́бенъ: Тридне́венъ воскре́слъ є҆сѝ:
Ви́дѧщи тѧ̀ распина́ема, хрⷭ҇тѐ, тебѐ ро́ждшаѧ вопїѧ́ше: что̀ сїѐ стра́нное є҆́же ви́ждꙋ та́инство, сн҃е мо́й; ка́кѡ на дре́вѣ ᲂу҆мира́еши, пло́тїю повѣ́шенъ, жи́зни пода́телю;
Въ пѧто́къ тре́тїѧ седми́цы на ᲂу҆́трени,
трⷪ҇чны гла́са. По а҃-мъ стїхосло́вїи глаго́лемъ сѣда́льны крⷭ҇тны ѻ҆смогла́сника. По в҃-мъ же стїхосло́вїи глаго́лемъ настоѧ́щїй сѣда́ленъ господи́на і҆ѡ́сифа, гла́съ є҃.
Подо́бенъ: Собезнача́льное сло́во:
Снѣ́дїю дре́ва дре́вле ᲂу҆ме́ршїи человѣ́цы, крⷭ҇то́мъ твои́мъ, ще́дре, ѡ҆жи́хомъ: є҆гѡ́же си́лою, бл҃же, на́съ ᲂу҆крѣпѝ воздержа́нїѧ вре́мѧ во ᲂу҆миле́нїи преитѝ, творѧ́щыѧ во́лю твою̀, и҆ ви́дѣти де́нь свѣтоно́снагѡ воскрⷭ҇нїѧ.
Сла́ва, то́йже.
И҆ ны́нѣ, крⷭ҇тобг҃оро́диченъ: На крⷭ҇тѣ̀ тѧ̀ ви́дѧщи мт҃и твоѧ̀, хрⷭ҇тѐ, во́лею посредѣ̀ разбо́йникѡвъ ви́сѧща, и҆ терза́ющисѧ мт҃рски ᲂу҆тро́бою, глаго́лаше: безгрѣ́шный сн҃е, ка́кѡ непра́веднѡ на крⷭ҇тѣ̀ ꙗ҆́коже ѕлодѣ́й водрꙋже́нъ є҆сѝ, хотѧ̀й ро́дъ человѣ́ческїй ѡ҆живи́ти, ꙗ҆́кѡ бл҃госе́рдъ;
По г҃-мъ стїхосло́вїи сѣда́ленъ, господи́на ѳео́дѡра, гла́съ а҃.
Подо́бенъ: Ка́мени запеча́танꙋ:
Пло́ть ѡ҆чи́стившихъ воздержа́нїемъ и҆ мл҃твами просвѣти́вшихъ дꙋ́шы на́шѧ, сподо́би на́съ, гдⷭ҇и, чтⷭ҇ны́й и҆ ст҃ы́й крⷭ҇тъ тво́й ви́дѣти и҆ со стра́хомъ поклони́тисѧ, въ пѣ́снехъ пою́щихъ и҆ глаго́лющихъ: сла́ва живоно́сномꙋ твоемꙋ̀ крⷭ҇тꙋ̀, сла́ва бж҃е́ственномꙋ копїю̀ твоемꙋ̀, и҆́миже ѡ҆живле́ни бы́хомъ, є҆ди́не чл҃вѣколю́бче.
Сла́ва то́йже.
И҆ ны́нѣ, крⷭ҇тобг҃оро́диченъ: А҆́гнца на дре́вѣ а҆́гница ви́дѧщи, съ разбѡ́йники, долготерпѣли́ве, распина́ема тѧ̀, сло́ве, и҆ копїе́мъ въ ре́бра пробода́ема, восклица́ше, вопїю́щи мт҃рски: что̀ є҆́сть сїѐ стра́нное и҆ ᲂу҆жа́сное, і҆и҃се мо́й, та́инство; ка́кѡ сокрыва́ешисѧ во гро́бѣ, неѡпи́санный бж҃е; несказа́нно є҆́сть совѣрша́емое: не ѡ҆ста́ви мѧ̀ є҆ди́нꙋ тѧ̀ ро́ждшꙋю,сы́не мо́й сладча́йшїй.
Канѡ́нъ мине́и, и҆ настоѧ́щыѧ трипѣ́снцы. И҆ стїхосло́витсѧ пѣ́снь. Трипѣ́снецъ господи́на і҆ѡ́сифа, гла́съ є҃.
Пѣ́снь є҃.
І҆рмо́съ: Ѡ҆дѣѧ́йсѧ свѣ́томъ:
И҆сцѣли́ мѧ, гдⷭ҇и, и҆ и҆сцѣлю́сѧ, ꙗ҆́звою твое́ю ѡ҆чи́стивъ ꙗ҆́звы дꙋшѝ моеѧ̀, хрⷭ҇тѐ, пло́тїю стрⷭ҇ти прїе́мый.
Є҆гда̀ ви́дѣ тѧ̀, хрⷭ҇тѐ, пло́тїю на дре́вѣ повѣ́шена, со́лнце свѣ́тъ во тьмꙋ̀ преложѝ, и҆ землѧ̀ подви́жесѧ, и҆ ка́менїе распадо́шасѧ.
Те́рнїемъ ѡ҆бра́стшꙋю и҆ всѧ́кихъ страсте́й ви̑ды запꙋстѣ́вшꙋю мою̀ дꙋ́шꙋ ѡ҆чи́сти, гдⷭ҇и, вѣнча́выйсѧ те́рнїемъ, кра́йнїѧ ра́ди бл҃гости.
Бг҃оро́диченъ: Родила̀ є҆сѝ ꙗ҆́кѡ мла́до ѻ҆троча̀, всечтⷭ҇аѧ, содѣ́телѧ моего̀: є҆го́же молѝ ѡ҆бнови́ти мѧ̀ ѡ҆бетша́вша во мно́зѣ ѕло́бѣ, молю́сѧ.
И҆́ный, господи́на ѳео́дѡра, гла́съ а҃.
І҆рмо́съ: Ѿ но́щи ᲂу҆́тренююще:
На мѣ́стѣ ло́бнѣмъ і҆ꙋдє́и тебѐ распе́нше, хрⷭ҇тѐ, покива́хꙋ глава́ми свои́ми, смѣю́щесѧ и҆ рꙋга́ющесѧ: ты́ же претерпѣ́лъ є҆сѝ, да сп҃се́ши на́съ.
На ті́тлѣ крⷭ҇та̀ твоегѡ̀ трикра́тнѡ написа́въ, пїла́тъ ꙗ҆влѧ́ше тѧ̀ є҆ди́наго ѿ трⷪ҇цы, во́лею пострада́вша за сп҃се́нїе всѣ́хъ, хрⷭ҇тѐ.
Трⷪ҇ченъ: Пресвѣ́тлыѧ трⷪ҇цы трисо́лнечное воспои́мъ, вѣ́рнїи, свѣ́тъ ѻ҆ц҃а̀ чтꙋ́ще, свѣ́тъ сн҃а сла́вѧще, свѣ́тъ и҆ дх҃а возвѣща́юще.
Бг҃оро́диченъ: А҆́гг҃лъ вы́шшꙋю тѧ показа́ и҆з̾ тебє̀ роди́выйсѧ, чтⷭ҇на́ѧ: на него́же бо ꙗ҆́кѡ на бг҃а ті́и трепе́щꙋтъ воззрѣ́ти, ты̀ на рꙋкꙋ̀ но́сиши ꙗ҆́кѡ сн҃а твоего̀, чтⷭ҇аѧ.
Сла́ва тебѣ̀, бж҃е на́шъ, сла́ва тебѣ̀.
Крⷭ҇те всечⷭ҇тны́й, сп҃си́тельный, мі́ра храни́телю, соблюдѝ мѧ̀ постѧ́щасѧ, и҆ досто́йна покажѝ твоегѡ̀ пречи́стагѡ поклоне́нїѧ.
І҆рмо́съ: Ѿ но́щи ᲂу҆́тренююще, воспѣва́емъ тѧ̀, хрⷭ҇тѐ бж҃е, на́съ ра́ди ѡ҆бнища́вшаго и҆ крⷭ҇тъ и҆ сме́рть пло́тїю претерпѣ́вшаго.
Пѣ́снь и҃.
І҆рмо́съ: Тебѐ вседѣ́телю:
Просте́рлъ є҆сѝ на крⷭ҇тѣ̀ твоѝ дла̑ни, хрⷭ҇тѐ, рꙋкѝ пра́ѻтца невоздержа́нїе и҆стреблѧ́ѧ: дре́вомъ же и҆сцѣли́лъ є҆сѝ дре́ва проклѧ́тїе. тѣ́мже тѧ̀ воспѣва́емъ во всѧ̑ вѣ́ки.
Къ тебѣ̀ воли́телю сп҃се́нїѧ припа́даю, сло́ве: хотѣ̑нїѧ вселꙋка̑ваѧ ѿвратѝ ско́рѡ ѿ моегѡ̀ се́рдца, крⷭ҇тъ и҆ страда̑нїѧ во́лею претерпѣ́вый.
Блꙋ́днꙋю жи́знь и҆ ѡ҆скверне́нное житїѐ возлюби́въ, ѡ҆мрачи́хсѧ а҆́зъ блꙋ́дный: возсїѧ́й мѝ лꙋчꙋ̀ ѡ҆браще́нїѧ, сло́ве, со́лнца сїѧ́нїе во страда́нїи ѡ҆мрачи́вый.
Бг҃оро́диченъ: Оу҆толѝ моегѡ̀ многоболѣ́зненнагѡ се́рдца всѐ ѡ҆ѕлобле́нїе, мт҃и хрⷭ҇та̀ бг҃а: сокрꙋшѝ стрѣ́лы и҆ лꙋ́ки бѣсѡ́въ, борю́щихъ смире́ннꙋю дꙋ́шꙋ мою̀.
И҆́ный.
І҆рмо́съ: Пѣсносло́вцы ѻ҆́троки въ пещѝ:
Что̀ тебѣ̀ пострада́вшемꙋ принесе́мъ всѣ́хъ влⷣцѣ мы̀ ѡ҆каѧ́ннїи; на́съ бо ра́ди крⷭ҇тъ прїѧ́лъ є҆сѝ, хрⷭ҇тѐ. пое́мъ безмѣ́рныѧ млⷭ҇ти твоеѧ̀ бл҃года́ть.
На дре́вѣ проклѧ́тѣмъ за́вистїю ᲂу҆би́вше тѧ̀, хрⷭ҇тѐ, і҆ꙋде́є беззако́ннїи не ᲂу҆ма́лиша держа́вы сла́вы твоеѧ̀: є҆си́ бо всѣ́хъ влⷣка, во́лею пострада́вый.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Пресꙋ́щественнагѡ бж҃ества̀ трѝ лица̑ почита́ю: ѻ҆ц҃а̀ безнача́льна, сн҃а, и҆ дх҃а ст҃а́го, є҆стество́мъ несѣко́мое сꙋщество̀ сла́влю во вѣ́ки.
Бг҃оро́диченъ: Нб҃съ вы́шшꙋю и҆ херꙋві́мы превосходѧ́щꙋю, ст҃ыхъ пе́рвꙋю и҆ нескве́рнꙋю ѻ҆трокови́цꙋ всѣ́хъ бг҃а пое́мъ и҆ превозно́симъ во всѧ̑ вѣ́ки.
Сла́ва тебѣ̀, бж҃е на́шъ, сла́ва тебѣ̀.
Требл҃же́нне крⷭ҇те крⷭ҇то́въ, нб҃опи́саннаѧ побѣ́до, ѿ землѝ на́мъ произрасты́й, твоегѡ̀ поклоне́нїѧ достѡ́йны покажи́ ны всѧ̑, посто́мъ ѡ҆чищє́нныѧ.
Хва́лимъ, бл҃гослови́мъ, покланѧ́емсѧ гдⷭ҇еви:
І҆рмо́съ: Пѣсносло́вцы ѻ҆́троки въ пещѝ сохра́ньшаго и҆ громопла́меннꙋю пе́щь на ро́сꙋ,прело́жшаго, хрⷭ҇та̀ бг҃а пое́мъ и҆ превозно́симъ во всѧ̑ вѣ́ки.
Пѣ́снь ѳ҃.
І҆рмо́съ: И҆са́їе, ликꙋ́й:
Ѡ҆камене́нное ѡ҆жесточе́нїе дꙋшѝ моеѧ̀, бл҃госе́рде сп҃се, ᲂу҆мѧгчѝ, и҆ и҆сто́чникъ да́ждь мѝ, бл҃же, бж҃е́ственнагѡ ᲂу҆миле́нїѧ, и҆з̾ ре́бръ и҆сточи́вый мнѣ̀ жи́знь, беззако́нїѧ моегѡ̀ пото́ки и҆стреблѧ́ющꙋю.
Самаго̀ себѐ вверго́хъ во глꙋбины̑ грѣхѡ́въ, ѡ҆ста́вивъ высѡты̀ добродѣ́телей: но привлецы̀ и҆ сп҃си́ мѧ, возше́дый на крⷭ҇тъ и҆ человѣ́чество привлекі́й къ себѣ̀, гдⷭ҇и.
Сла́дость сы́й, гдⷭ҇и, и҆ наслажде́нїе, ꙗ҆́кѡ содѣ́тель, ты̀ же́лчи вкꙋси́лъ є҆сѝ, хрⷭ҇тѐ, ѿ сла́дости бы́вшее ѿпаде́нїе сꙋ́щимъ и҆з̾ а҆да́ма и҆справлѧ́ѧ: тѣ́мже тѧ̀ пое́мъ сп҃се́ннїи твои́ми стрⷭ҇тьмѝ.
Бг҃оро́диченъ: Престⷭ҇аѧ влⷣчце, ᲂу҆пова́нїе моѐ и҆ прибѣ́жище, ꙗ҆́звы дꙋшѝ моеѧ̀ и҆сцѣлѝ, ᲂу҆́мъ мо́й ᲂу҆мирѝ, да и҆ а҆́зъ ра́дꙋѧсѧ, воспѣва́ю вели̑чїѧ твоѧ̑, бцⷣе приснодв҃о.
И҆́ный.
І҆рмо́съ: Тѧ̀ неѡпали́мꙋю кꙋпинꙋ̀:
Тѧ̀, хрⷭ҇тѐ, є҆го́же беззако́ннїи ѡ҆дѣ́ѧша рꙋга́тельнѡ въ порфѵ́рꙋ и҆ вѣне́цъ, ꙗ҆́кѡ цр҃ѧ̀, тро́стїю главꙋ̀ твою̀ ᲂу҆дарѧ́юще, за́вистїю распина́юще и҆ же́лчїю напаѧ́юще, пѣ́сньми всѝ вѣ́рнїи велича́емъ.
Тѧ̀, є҆го́же со́лнце ви́дѣвъ стра́ждꙋща на крⷭ҇тѣ̀, свѣ́тъ сокры̀, внегда̀ всѧ̀ вкꙋ́пѣ тва́рь влⷣчнимъ досажде́нїемъ колеба́шесѧ и҆ распада́хꙋсѧ ка́менїе, пѣ́сньми, хрⷭ҇тѐ сп҃се, велича́емъ.
Трⷪ҇ченъ: Трисо́лнечнаѧ є҆ди́ница свѣ́тъ є҆́сть и҆ жи́знь и҆ вседѣ́тель, бг҃ъ и҆ гдⷭ҇ь, є҆ди́нѣмъ свѣ́томъ сїѧ́ѧй, соѡблиста́ѧсѧ тремѝ начерта́ньми во є҆ди́номъ бж҃ествѣ̀: сыю̀ всѝ вѣ́рнїи велича́емъ.
Бг҃оро́диченъ: Тѧ̀, ю҆́же дв҃дъ пѣве́цъ предвозвѣстѝ, ꙗ҆́кѡ сїѡ́нъ, въ ню́же всели́сѧ нб҃сы̀ невмѣсти́мый, и҆ созда̀ ѿ пло́ти твоеѧ̀ мі́рꙋ ѡ҆чище́нїе, пѣ́сньми, мт҃и чтⷭ҇аѧ, велича́емъ.
Сла́ва тебѣ̀, бж҃е на́шъ, сла́ва тебѣ̀.
Твоегѡ̀ сп҃си́тельнагѡ крⷭ҇та̀, свѣти́льника вѣ̑рнымъ, сподо́би, гдⷭ҇и, воздержа́нїемъ текꙋ́щыѧ дости́гнꙋти, ви́дѣти и҆ поклони́тисѧ, во ѡ҆сщ҃е́нїе на́ше, да тѧ̀ тогѡ̀ ра́ди велича́емъ.
І҆рмо́съ: Тѧ̀ неѡпали́мꙋю кꙋпинꙋ̀, ю҆́же ви́дѣ мѡѷсе́й, и҆ лѣ́ствицꙋ ѡ҆дꙋшевле́ннꙋю, ю҆́же і҆а́кѡвъ ви́дѣ, и҆ две́рь нбⷭ҇нꙋю, є҆́юже про́йде хрⷭ҇то́съ бг҃ъ на́шъ, пѣ́сньми, мт҃и чтⷭ҇аѧ, велича́емъ.
Свѣти́ленъ гла́са.
На стїхо́внѣ самогла́сенъ днѐ, два́жды, гла́съ ѕ҃.
Ѻ҆ч҃агѡ да́ра расточи́въ бога́тство, во блꙋдѣ̀ и҆жди́хъ житїѐ, лꙋка́вными пѡ́мыслы грѣха̀ моегѡ̀ ѿвлече́нъ бы́въ: и҆ сла́достїю стра́сти ᲂу҆слажда́ѧсѧ, несмы́слєннымъ скотѡ́мъ ᲂу҆подо́бихсѧ, сп҃си́тельныхъ за́повѣдей престꙋпле́нїемъ. но, бл҃говоли́вый на крⷭ҇тѣ̀ повѣ́шенъ бы́ти менє́ ра́ди, хрⷭ҇тѐ бж҃е, не ѿри́ни менѐ ѿ твоегѡ̀ сыноположе́нїѧ, но ѡ҆браща́ющасѧ прїимѝ, ꙗ҆́кѡ блꙋ́днаго сы́на, и҆ сп҃сѝ мѧ̀.
Мч҃нченъ: Гдⷭ҇и, въ па́мѧти мч҃нкъ твои́хъ, всѧ̀ тва́рь пра́зднꙋетъ, нб҃са̀ ра́дꙋютсѧ со а҆́гг҃лы и҆ землѧ̀ весели́тсѧ съ человѣ̑ки: тѣ́хъ мл҃твами поми́лꙋй на́съ.
Сла́ва, и҆ ны́нѣ, крⷭ҇тобг҃оро́диченъ, гла́съ то́йже.
Подо́бенъ: Тридне́венъ воскре́слъ є҆сѝ:
Є҆гда̀ ви́дѣ всечⷭ҇таѧ тебѐ на крⷭ҇тѣ̀ повѣ́шена, пла́чꙋщи вопїѧ́ше мт҃рски: сн҃е мо́й и҆ бж҃е мо́й, сладча́йшее моѐ ча́до, ка́кѡ терпи́ши стра́сть поноси́тельнꙋю;
На ѕ҃-мъ часѣ̀, тропа́рь прⷪ҇ро́чества, гла́съ и҃:
Сло́вомъ всѧ̑ соверши́лъ є҆сѝ твое́ю си́лою, бж҃е, и҆ ѿ небытїѧ̀ въ бытїѐ приве́лъ є҆сѝ на́съ: не преда́ждь на́съ беззако́нїємъ на́шымъ, безгрѣ́шне гдⷭ҇и, мо́лимсѧ.
Прокі́менъ, ѱало́мъ н҃з, гла́съ ѕ҃: Возвесели́тсѧ првⷣникъ, є҆гда̀ ᲂу҆ви́дитъ ѿмще́нїе. Сті́хъ: А҆́ще вои́стиннꙋ ᲂу҆́бѡ пра́вдꙋ глаго́лете:
Прⷪ҇ро́чества и҆са́їина чте́нїе. [Глава̀ г҃і, ст. в҃-г҃і].
Та́кѡ глаго́летъ гдⷭ҇ь: на горѣ̀ по́льнѣй воздви́гните зна́менїе, вознеси́те гла́съ и҆̀мъ, не бо́йтесѧ, поꙋща́йте рꙋко́ю, ѿве́рзите, кнѧ́зи. А҆́зъ повелѣва́ю, ѡ҆сщ҃е́ни сꙋ́ть: и҆ а҆́зъ ведꙋ̀ и҆̀хъ, и҆споли́ни и҆́дꙋтъ и҆спо́лнити ꙗ҆́рость мою̀ ра́дꙋющесѧ, вкꙋ́пѣ и҆ ᲂу҆карѧ́юще. Гла́съ ꙗ҆зы́кѡвъ мно́гихъ на гора́хъ, подо́бенъ ꙗ҆зы́кѡвъ мно́гихъ, гла́съ царе́й и҆ ꙗ҆зы́кѡвъ собра́вшихсѧ. Гдⷭ҇ь саваѡ́ѳъ заповѣ́да ꙗ҆зы́кꙋ ѡ҆рꙋжебо́рцꙋ прїитѝ ѿ землѝ и҆здале́ча, ѿ кра́ѧ ѡ҆снова́нїѧ небесѐ, гдⷭ҇ь и҆ ѡ҆рꙋжебо́рцы є҆го̀, растли́ти всю̀ вселе́ннꙋю. Рыда́йте: бли́зъ бо де́нь гдⷭ҇ень, и҆ сокрꙋше́нїе ѿ бг҃а прїи́детъ. Сегѡ̀ ра́ди всѧ́ка рꙋка̀ разслабѣ́етъ, и҆ всѧ́ка дꙋша̀ человѣ́ча ᲂу҆бои́тсѧ: и҆ смѧтꙋ́тсѧ послы̀, и҆ болѣ̑зни прїи́мꙋтъ ѧ҆̀ ꙗ҆́кѡ жены̀ ражда́ющїѧ: и҆ поскорбѧ́тъ дрꙋ́гъ ко дрꙋ́гꙋ, и҆ ᲂу҆жа́снꙋтсѧ, и҆ лицѐ своѐ ꙗ҆́кѡ пла́мень и҆змѣнѧ́тъ. Се́ бо де́нь гдⷭ҇ень грѧде́тъ неисцѣ́льный ꙗ҆́рости и҆ гнѣ́ва, положи́ти вселе́ннꙋю [всю̀] пꙋ́стꙋ, и҆ грѣ́шники погꙋби́ти ѿ неѧ̀. Ѕвѣ́зды бо небє́сныѧ и҆ ѡ҆рі́ѡнъ и҆ всѐ ᲂу҆краше́нїе небе́́сное свѣ́та своегѡ̀ не дадѧ́тъ: и҆ помрачи́тсѧ со́лнце возсїѧва́ющее, и҆ лꙋна̀ не да́стъ свѣ́та своегѡ̀. И҆ заповѣ́мъ все́й вселе́ннѣй ѕла̑ѧ и҆ нечести̑вымъ грѣхѝ и҆́хъ: и҆ погꙋблю̀ ᲂу҆кори́знꙋ беззако́нныхъ, и҆ ᲂу҆кори́знꙋ го́рдыхъ смирю̀. И҆ бꙋ́дꙋтъ ѡ҆ста́вшїи честні́и па́че, не́жели зла́то нежже́нное: и҆ человѣ́къ че́стенъ бꙋ́детъ па́че, не́жели ка́мень, и҆́же ѿ сꙋфі́ра. Раз̾ѧри́тсѧ бо нб҃о, и҆ землѧ̀ потрѧсе́тсѧ ѿ ѡ҆снова́нїй свои́хъ, за ꙗ҆́рость гнѣ́ва гдⷭ҇а саваѡ́ѳа въ де́нь, во́ньже прїи́детъ ꙗ҆́рость є҆гѡ̀.
Прокі́менъ, ѱало́мъ н҃и, гла́съ з҃: Бж҃е, застꙋ́пникъ мо́й є҆сѝ ты̀, и҆ млⷭ҇ть твоѧ̀ предвари́тъ мѧ̀. Сті́хъ: И҆зми́ мѧ ѿ вра̑гъ мои́хъ, бж҃е:
Въ пѧто́къ ве́чера,
ѡбы́чное стїхосло́вїе.
На гдⷭ҇и воззва́хъ, поста́вимъ стїхѡ́въ і҃, и҆ пое́мъ самогла́сенъ днѐ, два́жды, гла́съ з҃:
Ꙗ҆́кѡ блꙋ́дный ѿстꙋпи́хъ ѿ бл҃года́ти твоеѧ̀, гдⷭ҇и, и҆ расточи́въ бога́тство бл҃гости, къ тебѣ̀ прибѣго́хъ, бл҃госе́рде, взыва́ѧ тебѣ̀: бж҃е, согрѣши́хъ, поми́лꙋй мѧ̀.
Та́же мч҃нчны д҃ ѻ҆ктѡ́иха, прилꙋчи́вшагѡсѧ гла́са: и҆ въ мине́и д҃. Сла́ва, ме́ртвенъ гла́са. И҆ ны́нѣ, бг҃оро́диченъ а҃-й гла́са. Вхо́дъ. Свѣ́те ти́хїй: Прокі́менъ, ѱало́мъ н҃ѳ, гла́съ д҃: Да́ждь на́мъ по́мощь ѿ ско́рби, и҆ сꙋ́етно сп҃се́нїе человѣ́ческо. Сті́хъ: Бж҃е, ѿри́нꙋлъ ны̀ є҆сѝ и҆ низложи́лъ є҆сѝ на́съ.
Бытїѧ̀ чте́нїе. [Глава̀ и҃, ст. д҃-к҃а].
Сѣ́де ковче́гъ въ мѣ́сѧцъ седмы́й, въ два́десѧть седмы́й де́нь мѣ́сѧца, на гора́хъ а҆рара́тскихъ. Вода́ же ᲂу҆ходѧ́щи ᲂу҆малѧ́шесѧ да́же до десѧ́тагѡ мѣ́сѧца: и҆ въ десѧ́тый мѣ́сѧцъ въ пе́рвый де́нь мѣ́сѧца, ꙗ҆ви́шасѧ версѝ го́ръ. И҆ бы́сть по четы́редесѧтихъ дне́хъ, ѿве́рзе нѡ́е ѻ҆ко́нце ковче́га, є҆́же сотвори, и҆ посла̀ вра́на [ви́дѣти, а҆́ще ᲂу҆стꙋпи́ла вода̀ ѿ лица̀ землѝ]: и҆ и҆зше́дъ не возврати́сѧ, до́ндеже и҆зсѧ́че вода̀ ѿ землѝ. И҆ посла̀ голꙋби́цꙋ по не́мъ, ви́дѣти, а҆́ще ᲂу҆стꙋпи́ла вода̀ ѿ лица̀ землѝ. И҆ не ѡ҆брѣ́тши голꙋби́ца поко́ѧ нога́ма свои́ма, возврати́сѧ къ немꙋ̀ въ ковче́гъ, ꙗ҆́кѡ вода̀ бѧ́ше по всемꙋ̀ лицꙋ̀ всеѧ̀ землѝ: и҆ просте́ръ рꙋ́кꙋ свою̀, прїѧ́тъ ю҆̀, и҆ внесѐ ю҆̀ къ себѣ̀ въ ковче́гъ. И҆ преме́дливъ є҆щѐ се́дмь дне́й, па́ки посла̀ голꙋби́цꙋ и҆з̾ ковче́га: и҆ возврати́сѧ къ немꙋ̀ голꙋби́ца къ ве́черꙋ, и҆ и҆мѣ́ѧше сꙋче́цъ ма́сличенъ съ ли́ствїемъ во ᲂу҆стѣ́хъ свои́хъ: и҆ позна̀ нѡ́е, ꙗ҆́кѡ ᲂу҆стꙋпѝ вода̀ ѿ лица̀ землѝ. И҆ преме́дливъ є҆щѐ се́дмь дне́й дрꙋги́хъ, па́ки посла̀ голꙋби́цꙋ, и҆ не преложѝ возврати́тисѧ къ немꙋ̀ пото́мъ. И҆ бы́сть въ пе́рвое и҆ шестьсо́тное лѣ́то житїѧ̀ нѡ́ева, въ пе́рвый де́нь пе́рвагѡ мѣ́сѧца, и҆зсѧ́че вода̀ ѿ лица̀ землѝ: и҆ ѿкры̀ нѡ́е покро́въ ковче́га, є҆го́же сотворѝ, и҆ ви́дѣ, ꙗ҆́кѡ и҆зсѧ́че вода̀ ѿ лица̀ землѝ. Въ мѣ́сѧцъ же вторы́й, въ два́десѧть седмы́й де́нь мѣ́сѧца и҆́зсше землѧ̀. И҆ речѐ гдⷭ҇ь бг҃ъ нѡ́еви, глаго́лѧ: и҆зы́ди и҆з̾ ковче́га ты̀, и҆ жена̀ твоѧ̀, и҆ сы́нове твоѝ, и҆ жєны̀ сынѡ́въ твои́хъ съ тобо́ю: и҆ всѧ̑ ѕвѣ̑ри,є҆ли́цы сꙋ́ть съ тобо́ю, и҆ всѧ́кꙋ пло́ть ѿ пти́цъ да́же до скотѡ́въ, и҆ всѧ́къ га́дъ дви́жꙋщїйсѧ по землѝ, и҆зведѝ съ собо́ю: и҆ расти́тесѧ и҆ мно́житесѧ на землѝ. И҆ и҆зы́де нѡ́е, и҆ жена̀ є҆гѡ̀, и҆ сы́нове є҆гѡ̀, и҆ жєны̀ сынѡ́въ є҆гѡ̀ съ ни́мъ: и҆ всѝ ѕвѣ́рїе, и҆ всѝ ско́ти, и҆ всѧ̑ пти̑цы, и҆ всѝ га́ди дви́жꙋщїисѧ по ро́дꙋ своемꙋ̀ на землѝ: и҆зыдо́ша и҆з̾ ковче́га. И҆ созда̀ нѡ́е же́ртвенникъ гдⷭ҇еви: и҆ взѧ̀ ѿ всѣ́хъ скотѡ́въ чи́стыхъ и҆ ѿ всѣ́хъ пти́цъ чи́стыхъ, и҆ вознесѐ во всесожже́нїе на же́ртвенникъ. И҆ ѡ҆бонѧ̀ гдⷭ҇ь воню̀ бл҃гоꙋха́нїѧ.
Прокі́менъ, ѱало́мъ ѯ҃, гла́съ ѕ҃: Оу҆слы́ши, бж҃е, моле́нїе моѐ, вонмѝ мл҃твѣ мое́й. Сті́хъ: Ѿ конє́цъ землѝ къ тебѣ̀ воззва́хъ.
При́тчей чте́нїе. [Глава̀ і҃, ст. л҃а-л҃в: глава̀ а҃і, ст. а҃-в҃і].
Ꙋ҆ста̀ пра́веднагѡ ка́плютъ премꙋ́дрость: ѧ҆зы́къ же непра́веднагѡ поги́бнетъ. Оу҆стнѣ̀ мꙋже́й пра́ведныхъ ка́плютъ бл҃года̑ти: ᲂу҆ста́ же нечести́выхъ развраща́ютсѧ. Мѣ̑рила льсти̑ваѧ ме́рзость пред̾ гдⷭ҇емъ: вѣ́съ же пра́ведный прїѧ́тенъ є҆мꙋ̀. И҆дѣ́же а҆́ще вни́детъ досажде́нїе, та́мѡ и҆ безче́стїе: ᲂу҆ста́ же смире́нныхъ поꙋча́ютсѧ премꙋ́дрости. Оу҆мира́ѧй првⷣникъ ѡ҆ста́ви раска́ѧнїе: ᲂу҆до́бна же быва́етъ и҆ посмѣѧ́тельна нечести́выхъ поги́бель. Соверше́нство пра́выхъ наста́витъ и҆̀хъ: и҆ поползнове́нїе ѿрица́ющихсѧ плѣни́тъ и҆̀хъ. Не ᲂу҆по́льзꙋютъ и҆мѣ̑нїѧ въ де́нь ꙗ҆́рости: пра́вда же и҆зба́витъ ѿ сме́рти. Пра́вда непоро́чнагѡ и҆справлѧ́етъ пꙋти̑, нече́стїе же впа́даетъ въ непра́вдꙋ. Пра́вда мꙋже́й пра́выхъ и҆зба́витъ и҆̀хъ: безсовѣ́стїемъ же ᲂу҆ловлѧ́ютсѧ беззако́ннїи. Сконча́вшꙋсѧ мꙋ́жꙋ пра́веднꙋ, не поги́бнетъ наде́жда: похвала́ же нечести́выхъ поги́бнетъ. Пра́ведный ѿ ло́ва ᲂу҆бѣ́гнетъ, въ негѡ́же мѣ́сто предае́тсѧ нечести́вый.Во ᲂу҆стѣ́хъ нечести́выхъ сѣ́ть гра́жданѡмъ, чꙋ́вство же пра́ведныхъ бл҃гопоспѣ́шно. Во бл҃ги́хъ пра́́ведныхъ и҆спра́витсѧ гра́дъ, и҆ въ поги́бели нечести́выхъ ра́дованїе. Во бл҃гослове́нїи пра́выхъ возвы́ситсѧ гра́дъ, ᲂу҆сты́ же нечести́выхъ раскопа́етсѧ. Рꙋга́етсѧ гра́жданѡмъ лише́нный ра́зꙋма, мꙋ́жъ же мꙋ́дръ безмо́лвїе во́дитъ.
И҆ про́чее послѣ́дованїе преждеѡсщ҃е́нныхъ.