Молитва

О великий угодниче Христов, святителю отче наш Ермогене! К тебе молитвеннику теплому и предстателю пред Богом непостыдному усердно притекаем, в нуждах и в скорбех наших утешение и помощи просяще. В древнюю годину искушений, внегда обышедше обыдоша страну нашу нечестивии врази, Господь яви тя церкви своей столпа непоколебима и людем российским пастыря добра, душу свою за овцы положивша и лютыя волки далеча отогнавша. Ныне убо призри и на ны, недостойная чада твоя, умиленною душею и сокрушеным сердцем тебе призывающая. Крепость бо наша в нас оскуде, и вражия ловления и сети обыдоша нас. Помози нам, заступниче наш! Утверди нас в вере святой: научи нас всегда творити заповеди Божия, и вся предания церковныя, от отец нам заповеданная. Укрепи благоверного царя нашего Богом нам данного, и научи нас любити его нелицемерно. Пастырем нашим буди архипастырь, воином вождь духовный, болящим врач, печальным утешитель, гонимым заступник, юным наставник, всем же благосердый отец и за вся теплый молитвенник: яко да молитвами твоими, непрестанно воспоем и прославим всесвятое имя живоначальная Троицы Отца и Сына и Святого Духа, во веке веков. Аминь.

Конец