Повесть о царе Аггее

Повесть зело полезна

Бысть во граде Филумени царь именем Аггей, зело славный и богатый. Прилучися⁷⁰⁸ же ему стояти в церкви во время Божественныя литургии и егда священнику чтуще святое Евангелие. Егда же дойде до строки, в ней же написано «Богатии обнищают, а нищии обогатеют», царь же, слыша слово сие, ярости и гнева наполнися и рече: «Что есть написано слово сие ложно, како богатии обнищают, а нищии обогатеют? Но како мне обнищати, а нищу обогатитися?». – И егда священник отслужи Божественную литургию, тогда царь повеле его всадити в темницу, а из Евангелия тот лист повеле вон выдрати, глаголя «Сие есть слово в ложь написано». Сам же царь пойде в дом свой и начат со ближними своими ясти, и пити, и веселитися.

Тогда же некий ближний его отрок бысть в поле и увиде близ града Филуменя ходяще елень по полю. И пришед, возвестиша царю. Царь же скоро взя с собою пятьдесят отроков избранных и поеха в поле. И увидя елень прекрасну зело, и нача гнати за ним по полю. Еленю же бежащу, и прибеже к некоей реке, и поплы чрез реку. Царь же, сам един только, сверже⁷⁰⁹ одежду свою с себе и покиня коня на брегу, и поплы за еленем. И егда преплы реку, тогда не видя еленя. Потом же царь вспять преплы реку.

Прежде бо преплытия его прииде ко отроком его ангел Божий во образе царя Аггея и рече отроком, яко елень утече. И взя одежду, облечеся и всед на коня. И еха во град Филумен со отроки яко Аггей царь, и приеха во град. И нача царство правити по обычею, никто бо его не позна, ни царица, ни вельможи и сильнии его, но все почитаху⁷¹⁰, яко Аггей царь есть.

Царю же Аггею пришедшу на брег, и начат смотрити отроков своих и платья, и коня своего, и не обрете ничего. И ста на мног час, размышляя в себе «Что ми прилучися? Или отроки мои в поле отъехали, или конь мой у них убежал?». И смотря сюду и сюду, и никого не видя, и помышляя в себе: «Что ми приключися? Или сонное видение видит?». И начат кликати гласом громко, дабы отроки его к нему пришли и платья и коня ему дали, и никого не видя. Потом же пойде по полю, помалу ступая, озираясь семо и овамо⁷¹¹, и не видя никого же. И убояся зело, яко место есть пусто, и иде ко граду со стыдением.

И увиде в поле человека, посуще волы, и стыдяся к нему прийти и начат кликати «Постуше, скажи ми, где ты видел отроков моих и коня моего?». Пастух же виде его нага и впроси его «Кто еси ты и какие отроки твои и конь?». Царь же рече «Али ты меня не знаешь? Аз есмь царь Аггей». Пастух же его не позна, понеже отъя Бог зрак лица его⁷¹², и нача бранити его и укаряти «Злый безумный человече, пьяница ли ты или вор, да так себя таковым великим именем называешь?». И начат его бити кнутом без милости. Он же от него насилу убежа. И ходя по полю наг, размышляя, что себе сотворить, и где возмет одежду, и како во град внидет.

И умысли «Иде в деревню и не скажусь, что царь, да тамо меня не познают. И наймуся работать, и возьму себе хотя какую-нибудь одежду. И вниду во град, и уведаю, что ми сие случися⁷¹³».

И иде в деревню и нанялся у крестьянина на все лето, а сказался что шел путем и его злые люди ограбили и убили, мало жива⁷¹⁴ покинули. И пожил у крестьянина мало. Крестьянин же, его видя, что работать ничего не умеет, сослал его с двора, только дал ему малую одежду, худое рубище.

Царь же Аггей иде во град Филумен и прииде к некоей вдовице, и воспросися к ней ночевать яко нищей. Она же видя его в худом рубище, пусти его к себе в хижу. Он же воспроси вдовицы «Кто у вас ныне царь царствует?». Она же поведа, яко Аггей царь, уже тритцать пятое лето. Тогда Аггей моли вдовицу, да принесет ему чернил и хартию⁷¹⁵. Оной же принесшу ему, царь же Аггей написа своею рукою к царице своей слова тайные свои с нею, яко никто меж ими ин те слова ведает.

И вдаде то письмо некоторой жене, моляша ю, да донесет писание то до царицы. Она же взя письмо и вдаде царице, глаголя «Стоит, государыни, человек и молит мя зело, да се письмо донесу тебе и дам в руце». Царица же письмо приим и прочте. И усумнися вельми, и смятеся умом, в себе глаголя «Что ми сие прииде? Кто сей человек, бес ли или какой злый человек, волхв, что наши и тайные слова ведает?». И потом не поведа ангелу ничто о том, и повеле его представити себе. Он же пред нею предста. И вопроси его царица «Кто еси ты и откуду приде, и почему знаешь тайну нашу со царем?». Он же рече «Али ты меня не знаешь, что я царь Аггей?». Царица же ничем не позна его нимало. И наполнися ярости и гнева, и рече «О, враже проклятый, злый человече, от диавола научен еси сему злому делу!». – И повеле его связати и бити немилостивно. И бияше его, глаголя ему «К чему, злый человече, так именем великого царя зовешися?». И биша его, и кинуша за град в поле мертва.

Он же мало отдохнув и пришед в себя мало, и начат плакати горько, воспоминая бывшая своя вся добрая, глаголя «Ох, ми, увы, горе! Уже всего доброго своего лишихся, и царица мене не позна, и ближние мои мене не познаша! – И рече – Куды уже пойду, или что себе где доброе обрящу?».

И потом иде в поле, и увидя нищие на пути, и начаша их молити, глаголя «Братия моя, пожалуйте, приимите меня к себе в работу. Они же рекуще ему «Шел бы ты да работал в деревне у мужика». Царь же им отвеща «Работать я, господие мои, не умею, а милостыни просить один стыжуся». Нищие же взяша его с собою и дав ему суму свою большую носити за собою. Он же нося за ними суму их и работаша им. И пришед на нослег⁷¹⁶, повелеша ему баню про себя истопити и воду принести, и постелю под себя слати. Он же все им угодное сотвори и потом нача зело плакати, рыдая. И воспомяну грех свой, яко согреши пред Богом и похули слово Господне, и воспокаяся о том. И плака много, глаголя «Ох, ми, увы, все я то пострада за слово Божие».

Во утри⁷¹⁷ же день пойдоша нищие во град, а он с ними же. И прийде ко цареву двору, и нача просити милостыню. Ангел же в то время седя на престоле со царицею. Милосердни же Бог, видя его истинное покаяние и слезы, и прости грех ему, и превратися зрак лица его по-прежнему. И увидя вельможи царевы царя Аггея с нищими и смятошеся⁷¹⁸, между собою глаголя «Яко царь сей есть Аггей!». – Потом возвестиша ангелу о сем, глаголя «Яко прийде с нищими подобен тебе, царю, лицем и зраком, и речию, и возрастом⁷¹⁹». Ангел же посмеявся их речам и повеле царя Аггея представити себе⁷²⁰. Он же предста. И вопроси ангел царицу и бояр «Кто вам истинно мнится царь истинный?». Они же ничто отвеща ему. Ангел же вдаде царю Аггею скипетр царства его и наказа его, да к тому не ставит во лжу словес Божиих, и ко всем милостив и не горд будет. Потом же наказа царицу и бояр, да будут в повиновении все господину своему. Потом же ангел невидим бысть.

Царь же Аггей по наказании бысть ко всем милостив и во всем благоугоден до конца живота своего. И поживе много лето, и скончася с миром.