Повесть об Андрее Критском

Месяца июня в 4 день житие иже во святых отца нашего Андрея Критского

Бе град Крит, и в том граде бе некий купец именем Поуливач. Иде из ложницы⁷²¹ своея и слышав той купец птиц, зовомы голуби, два глаголюще между собою «Будет у господина нашего радость жена его ему родит сына, и нарекут имя ему Андрей. И той отроча убиет отца своего, а матерь свою себе в жену возметъ. И триста девиц стариц растлит блудом». (И той бе монастырь от града того 30 поприщ).

И слышав той купец и удивися о глаголании птиц тех. И той убо купец заповеда бабе⁷²² – повеле его смерти предать. И как приспе время рождению его, баба же убояся суда Божия и смерти, смерти отроча не предаде, заповеди господина своего. И матери отроча того сказа. Мати же его повеле во святом крещении ввесть иерею, и нарекоша имя ему Андрей. И повеле мати его пререзати чрево его поперех ножем и повеле на дщицу и привязати поясом и пустити его на море. И баба сотвори тако, якоже повеле мати его.

По повелению же Божиею восташа волны морския и принесоша его к монастырю девичью, зовомы Купина, от града того тридесять поприщ. И поставиша его под монастырем девичьим, и ста дщица у брега против монастыря.

И выде из того монастыря черница воды почерпнути и узре отрача лежаща на дщице мужеск пол, едва дышуще, мало гласа его слышать. Та же убо черница узрев и скоро поведа игуменье. Игуменья же повеле ударить в било, и собрашася вси черноризицы, 300 их числом. И идоша досмотрити отрочати и видеша утробу его разрезану. И рече игуменья ко старицам своим «О, дивное чудо, сестры! Откуды сеи отрочате море принесло к нашей обители?». Они же недомышляхуся⁷²³, и вси старицы плачущеся и заклинахуся именем Божием и Пресвятою Богородицею (бяше же монастырь во имя Богородицы Неопалимыя Купины) и глаголюще ко игуменье «Мы не вемы⁷²⁴, госпоже, сего детища и не растлихомся⁷²⁵». И рече игуменья «Богу изволившу, тако и будет». И взя его игуменья и велела зашити утробу его и вскормиша его от козлия млека и выкормиша его до девяти лет и даша его к некоей старице в научение грамоте. И нача его посылати с сестрами.

Отрок же бысть 15 лет, и вложи на ум его ветхи⁷²⁶ зломысленный ненавистник рода христианского диавол мысль злую. И нача отрок той едину по единой девице и старице оскверняти блудом, овогда⁷²⁷ сильно творяще блуд, овогда любовию втайне. Улучи время, что и со игуменьею блуд сотвори.

Игуменья же виде свое беззаконие и собра вся сестры своя 300 числом и нача пред ними каятися греха своего, яко зол грех сотворила еси со отраком тем. И рекоша старицы «Не ради мы тому греху». И поклонися игуменья до земли, и сестры рекли игуменье «И нас отрок той всех растли овогда волею и неволею». И начаша плакатися.

И рекла игуменья «Аз вам поведаю, как меня отрок изнасилил блудом прельстил мя святыми своими многими причами прежних человек падении во грех, мытарей и гонителей, и блудниц, и блудников, и всех праведных от века. Рек «Покаянием и слезами, и милостынею спасохомся». Аз же слышах такое глаголание его, и расслабе тело мое, и разгоресь сердце мое, и ум мой поколебася. И тако в поползновении и во грех велики впадох. Простите мя, сестры моя!». И падоша до земли на мног час, лежаше на мног чась на земли. А они такоже от нея прощения прошаху и прощение меж себя прияша со слезами. И тако стали иметь пост и молитву, и милостыню, а отрока из монастыря выслаша и закрепиша ворота монастырския твердо, чтоб мужеск пол не ходил никто в монастырь.

Отрок же той Андрей поиде во град Крит и не познаше отца своего, ни матери. И наняся у отца своего винограда⁷²⁸ стрещи. И даде ему заповедь: «Аще кого узриши идуща в виноград мой во дни или в нощи, устрели его до смерти». И тако отрок стреже у господина своего винограда и заповеди его творяше.

И рече господин его «Поиду в виноград мой искушу⁷²⁹ сторожа своего». И пришед полунощию к виноградным вратам. И увидев отрок той и взя лук свой и устрелил отца своего до смерти, чая, яко тать⁷³⁰ приде. И увиде отрок, что он господин его есть, и убоялся, и шед скры его под яблонью, и поведа госпоже своей. И госпожа мало плакав погребе его.

И мало время минув, восхоте отрок той поняти госпожу свою в жену. И браку сочетавшуся веселяся. И возлегши на одр спати, и хвати жена его за чрево и на чреве рубец. И рече госпожа его «Како сей у тебе рубец?». Он же сказа ей по ряду, госпоже, от детища сотворися над ним и како его повеле убити отец его, и как мати его повеле утробу прорезати ножем, и как по морю на дщице плавал, к монастырю девичью приплыл, и как игуменья и сестры вскормиша козлием млеком, и как грамоте научися, и как сотвори с ними грех, и как изгнаша его из монастыря вон, и как приде во град Крит. «И ныне понял тя, госпожу свою, в жену».

Она же возопи гласом великим с плачем: «Не жена твоя есть, но мати твоя аз! Ты любимый мой сын Андрей, отца своего устрели в винограде моем!». И вскочи Андрей вскоре со одра своего и рече «О, горе мне, окаянному, яко чрез закон согреших паче⁷³¹ всех человек!».

И посла мати его во град Крит искать отца своего духовного искусна исповедати ему вся своя согрешения по ряду. Иерей же не прости его за его многая согрешения. Он же Андрей уби того отца своего духовного налоем церковным до смерти, изыде из церкви тайно един.

И приде ко иному отцу духовному, такоже вся исповеда ему своя согрешения, еже согреших от юности своея и до днесь⁷³², и доиде слово о блуде и о кровопролитии. Иерей же не прости его грех «Андрею, не подобает нам таких на дух приняти». И рече Андрей «Глаголя Христос «Приде в мир призвати грешных на покаяние». Ты же, иерей, не хощеши простити мя во гресех моих. Рече во Евангелии «Аще свяжете на земли, будет связан на небеси, аще разрешите на земли, будет разрешен на небесех». Иерей же рече «Не хощу аз такового греха носити на себе, яко не иматъ такового прощения человеку сотворивы грех». Андрей же и того иерея уби и поясом своим извлече его из церкви вон.

Так же прииде к третьему иерею, исповеда ему вся своя согрешения. И тот иерей не прости его за его многия грехи. Андрей же и третьего иерея уби замком церковным до смерти.

И рече Андрей себе «Иду во град Крит, да тамо есть епископ. Той мя приимет на покаяние, прозорлив бо есть, да имет мя простити, и богобоязнив. Аще не имет мя простити, поиду в дальную страну ко царю во Арду и воздвигну рать велию и град Крит зажгу, а людей в плен возьму, а епископа убью».

Благ же и человеколюбец Бог не хотя смерти грешником, ожидая их на покаяние. И прииде Андрей во град Крит и поклонися епископу. Епископ же прият его и повеле сыскать мать Андрееву. И видев епископ Андрея украшена мужеством, яко хощет сосуд Божий быти избранный, и нача вопрошати наедине. Андрей же исповеда епископу своя согрешения по ряду, еже сотвори от юности своея и до старости. Епископ же убояся суда Божия и смерти и посла его по матерь свою. И приде Андрей с матерью своею к епископу. Епископ же научив их довольно и духовно и отпусти их.

И повеле епископ погреб выкопать трехсаженной, а в ширину пол сажени на две страны. Призва епископ Андрея с материю и посла его по чернилы и по бумагу. И как Андрей вниде в погреб, епископ же повеле железною цкою⁷³³ покрыти его и запечатать во погребе. И даде заповедь 30 лет «И како наполнится тот погреб земли, и станет земля наверху погреба, тогда прощен будет от грехов своих». А матери его епископ нозри прореза и замкнул замком, а ключ того замка повеле ввергнуть в море. А богатство их повеле епископ раздати злато и сребро нищим. И повеле епископ Андреевой матери по миру ходить и Господа Бога Спаса нашего славити и милости просити о своем согрешении. И рече епископ «Тогда прощена будешь, как того замка ключ из моря выдет».

Андрей же пребыв в погребе, моляся Богу о своем согрешении и приводя душу свою во многия притчи и каряше себе. И сложи канон, иже поется Великий в пост пятыя недели в четверток. И достиже тридесятого лета.

И приидоша к епископу гости⁷³⁴ со многих стран во град Крит. И прилучися жена та, еже бе у ней замок на нозрях. И вопросиша у нея гости «Какой у тебя на нозрях замок сей, коею притчею сотворися тебе?». Она же поведа им всем. И в то время повеле епископ на трапезу купить рыбы на торгу. И купиша рыбу, и спороша чрево ей, и выпаде из рыбы той ключ. И показаша ключ той епископу. Епископ же повеле призвати Андрееву мать и повеле приложити к замку тому. И отпряну замок от носу ея. И повеле епископ Андрееву мать пострищи в иноческий чин.

И прииде епископ ко Андрею со всем собором к погребу. Андрей же седяше наверху погреба, дописывает девятую песнь канона великого. И когда епископ Критский восхвали Бога и Господа нашего Иисуса Христа, яко сподобися Андрей прияти прощение грехов своих. И постриже епископ Андрея во иноческий чин.

И принесе епископ канон той, что сложил Андрей, в церковь и прочте его всем людем вслух, на коеждом⁷³⁵ тропари метания⁷³⁶ и поклонов положить людем всем повеле. И тако епископ похвали Бога вельми Господа нашего Иисуса Христа.

И призва епископ Андрея к себе и рече: «Чадо мое, прости мя в сем веце и в будущем. Иди и пребуди, чадо мое и брате, в монастыре моем три дни, а в четвертый день прииди и погреби тело мое грешное». И разболеся епископ в третий день и отиде ко Господу. Андрей же погребе епископа в церкви Спасове.

Изволи Богу быть во граде Крите Андрею во епископах 30 лет. Богоугодно поживе и праведно, постом и молитвами и милостынею и слезами, и Бога умолив, и многия церкви воздвиже, и многия люди привлече ко спасению, и бысть ко всем людем милостив. И преставися в вечную жизнь о Христе Иисусе Господе нашем. Ему же слава ныне и присно и по веки веков. Аминь.