№ 64. Мнение неизвестно кем поданное царю и собору, о том, что Никон должен быть лишён патриаршества, но не лишён священства

Обретаются ещё, царю святой и великий самодержче, в писаниях Церкви нашей: Яко иные архиереи и иногда отставили престолы свои, овии и часнии имяху и по отречении священство своё, а не имяху есь властителне от себе, но моляще соборов, якоже Евстафий панфилийский и инии; обаче аще и правила святых отец повелевают, яко аще кто архиерей оставит престола своего, да емлется и достоинство священства; обаче тамошного времене царские и святии собори, умолими молением их, благосердствоваху паки и творяху снисхождение, и оставляху им имети священства неким приличным образом, за малое утешение; подобие, аще повелит святое и превеликое твое царство и святый собор, и синклит, – возможно есть быти и о господине Никоне сицевое снисхождение и человеколюбие. Якоже сотвори и святый и вселенский третий собор о Евстафии, епископе панфилийстем. Зане аще и господин Никон в прочих внешних вещех, и во отречении своем погреши, яко человек, но в догматех благочестивыя и православныя веры бе благочестивейший и прав; и во апостольских и отеческих преданиих Восточные Церкве бе зело ревнитель. И сего ради, аще от престола своего сам отринуся, достоинства же священства благоутробием и человеколюбием святого твоего царства и святого собора приличным образом да имать священство за некое малое утешение, якоже повелит святое твое царство, и да не явимся тяжки в том, молим великое твое царство, якоже християннейшему и кротчайшему и благоутробнейшему царю, с дерзновением пишем. Господь же наш Иисус Христос и Бог всех да благословит и утвердит величайшую державу святого твоего царствия, и да возрастит и расширит святое твое царствие в роды родов, от конец даже до конец вселенные, во веки бесконечных веков. Аминь.