Ча́сть втора́ѧ

Преподо́бный ѻ҆те́цъ на́шъ и҆сѵ́хїй, і҆ерꙋсали́мскїѧ це́ркве пресвѵ́теръ, живѧ́ше при ѳеодо́сїи ю҆нѣ́йшемъ, процвѣта́ѧ въ сло́вѣ ᲂу҆че́нїѧ, сконча́сѧ же ѻ҆́колѡ четы́реста три́десѧть тре́тїѧгѡ лѣ́та. И҆з̾ мно́гихъ є҆гѡ̀ писа́нїй є҆ди́ное сло́во, на двѣ́стѣ трѝ главы̑ раздѣле́нное, здѣ́сь положено̀, ꙗ҆́кѡ потре́бнѣйшее и҆ новонача̑льнымъ въ трезвѣ́нїи и҆ внима́нїи ᲂу҆ма̀, и҆ хране́нїи се́рдца, па́че всѧ́кагѡ и҆но́гѡ поле́знѣйшее: ѡ҆ ко́емъ и҆ крі́тїкъ, [и҆спыта́тель писа́нїй] фѡ́тїй, та́къ говори́тъ сло́во въ сло́во, въ чте́нїи рч҃и, стр. сѯ҃з. И҆ све́рхъ всегѡ̀ втора́ѧ и҆ двадесѧ́таѧ [глава̀ си́рѣчь] и҆сѵ́хїа пресвѵ́тера, соде́ржитъ то̀, въ че́мъ и҆ всеѧ̀ кни́ги заключа́етсѧ ра́зꙋмъ, потре́бнѣйшїй па́че всегѡ̀ и҆но́гѡ, подвиза́ющымсѧ въ жи́зни длѧ наслѣ́дованїѧ небе́съ. И҆мѣ́етъ же ѻ҆но̀ и҆ ꙗ҆́сность, ꙗ҆́коже возвѣща́етсѧ: и҆ по про́чемꙋ таково̀, каково́е бы благопотре́бно бы́ло мꙋжа́мъ, не къ по́двигꙋ то́чїю слове́сномꙋ ѡ҆брати́вшымсѧ, но всѧ́кїй трꙋ́дъ и҆ тща́нїе показа́вшымъ въ дѣ́ѧтельномъ по́двигѣ.

Нача́ло просвѣще́нїѧ дꙋшѝ и҆ и҆́стинный зало́гъ, глави̑зны ѿвѣща́тєльныѧ и҆ моли́твєнныѧ.

а҃. Трезвѣ́нїе є҆́сть хꙋдо́жество дꙋхо́вное, ѿ стра́стныхъ по́мыслѡвъ и҆ слове́съ, и҆ лꙋка́выхъ дѣ́лъ, соверше́ннѡ человѣ́ка съ по́мощїю бж҃їею и҆збавлѧ́ющее, долговре́меннѣ и҆ ᲂу҆се́рднѣ проходи́мое. Ѻ҆но̀ проходи́мо да́рꙋетъ тве́рдое разꙋмѣ́нїе непостижи́магѡ бг҃а, є҆ли́кѡ пости́гнꙋти возмо́жно, и҆ рѣше́нїе та̑инъ бж҃е́ственныхъ и҆ сокрове́нныхъ, и҆ твори́тъ всѧ́кꙋю за́повѣдь бж҃їю ве́тхагѡ и҆ но́вагѡ завѣ́та, и҆ подае́тъ всѧ́кое бла́го бꙋ́дꙋщагѡ вѣ́ка. Со́бственнѣ же ѻ҆но̀ є҆́сть чистота̀ се́рдца, є҆́же по вели́чествꙋ и҆ добро́тѣ свое́й, и҆лѝ и҆́стиннѣе рещѝ, по нерадѣ́нїю на́шемꙋ вельмѝ ѡ҆скꙋдѣва́етъ дне́сь въ мона́сѣхъ, є҆́же хрⷭ҇то́съ ᲂу҆блажа́етъ глаго́лѧ: Блаже́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ.²²¹ Сицево̀ ᲂу҆́бѡ сꙋ́ще, на мно́зѣ кꙋпꙋ́етсѧ. Трезвѣ́нїе, въ человѣ́кѣ закоснѣва́ѧ, ко пра́вомꙋ и҆ бг҃оꙋго́дномꙋ житїю̀ наста́вникъ быва́етъ. Ѻ҆но̀ и҆ восхожде́нїе є҆́сть ᲂу҆мозрѣ́нїѧ, и҆ трича́стность дꙋшѝ пра́веднѡ подвиза́ти на́съ наꙋча́етъ, и҆ чꙋ̑вствїѧ тве́рдѡ блюстѝ, и҆ гла́вныѧ четы́ре добродѣ́тєли въ прича́стникѣ свое́мъ по всѧ́къ де́нь возраща́ти бꙋ́детъ.

в҃. Вели́кїй законополо́жникъ мѡѷсе́й, па́че же дх҃ъ ст҃ы́й, показꙋ́ѧ непоро́чность и҆ чистотꙋ̀, и҆ многовмѣще́нїе, и҆ высокотво́рность сеѧ̀ добродѣ́тели, и҆ ᲂу҆чѧ̀ на́съ, ка́кѡ сїю̀ начина́ти и҆ соверша́ти подоба́етъ: внемлѝ себѣ̀, глаго́летъ, да не бꙋ́детъ сло́во та́йно въ се́рдцѣ твое́мъ беззако́нїѧ,²²² сло́вомъ та́йнымъ є҆диномы́сленное представле́нїе и҆менꙋ́ѧ вє́щи нѣ̑кїѧ лꙋка̑выѧ и҆ бг҃оненави̑стныѧ, є҆́же и҆ прило́гомъ нарица́ютъ ѻ҆тцы̀ приноси́мымъ се́рдцꙋ ѿ дїа́вола, є҆мꙋ́же послѣ́дꙋютъ по́мыслы на́ши, а҆́бїе по представле́нїи ѻ҆́нагѡ ᲂу҆мꙋ̀, и҆ стра́стнѣ со ѻ҆́нымъ разглаго́льствꙋючъ.

г҃. Трезвѣ́нїе є҆́сть пꙋ́ть всѧ́кїѧ добродѣ́тели и҆ за́повѣди бж҃їѧ, є҆́же и҆ серде́чное безмо́лвїе глаго́летсѧ: и҆ ѻ҆́ноже са́мое не мечта́тельнѣ соверша́емо, хране́нїе ᲂу҆ма̀ є҆́сть.

д҃. Не зри́тъ свѣ́та со́лнечнагѡ роди́вшїйсѧ слѣпы́мъ: си́це не ходѧ́щїй въ трезвѣ́нїи, не зри́тъ бога́тнѡ сїѧ́нїй вы́шнїѧ благода́ти, нижѐ свободи́тсѧ ѿ лꙋка́выхъ и҆ бг҃оненави́стныхъ дѣ́лъ, и҆ слове́съ, и҆ помышле́нїй. Сицевы́й не свобо́днѡ при кончи́нѣ свое́й та́ртарскихъ пре́йдетъ кнѧзе́й.

є҃. Внима́нїе є҆́сть серде́чное непреста́нное безмо́лвїе ѿ всѧ́кагѡ по́мысла, хрⷭ҇та̀ і҆и҃са сн҃а бж҃їѧ и҆ бг҃а, при́снѡ, непреры́внѡ и҆ непреста́ннѡ є҆ди́наго того̀ то́чїю призыва́ющее, и҆ возды́шꙋщее, и҆ мꙋ́жески проти́вꙋ врагѡ́въ со ѻ҆́нымъ ѡ҆полча́ющеесѧ, и҆ томꙋ̀ и҆сповѣ́дающеесѧ, є҆ди́номꙋ и҆мѣ́ющемꙋ вла́сть проща́ти согрѣшє́нїѧ, ѡ҆б̾е́млющее ча́стѡ хрⷭ҇та̀, чрез̾ призыва́нїе є҆ди́нагѡ тайновѣ́дца серде́цъ: ѿ человѣ̑къ же сицева́ѧ дꙋша̀ всѧ́чески ᲂу҆таи́ти покꙋша́етсѧ сла́дость свою̀, и҆ внꙋ́треннїй по́двигъ, да не когда̀ лꙋка́вый та́йнѡ введе́тъ ѕло́бꙋ, и҆ и҆стреби́тъ до́брое дѣ́ланїе.

ѕ҃. Трезвѣ́нїе є҆́сть тве́рдое водрꙋже́нїе по́мысла, и҆ стоѧ́нїе є҆гѡ̀ при две́ри се́рдца, и҆́же приходѧ́щыѧ по́мыслы тате́бныѧ зри́тъ и҆ слы́шитъ, что̀ глаго́лютъ и҆ что̀ творѧ́тъ ѻ҆́ныѧ ᲂу҆бі̑йцы, и҆ кі́й є҆́сть ѡ҆́бразъ начерта́нный и҆ воздви́гнꙋтый ѿ бѣсѡ́въ, и҆ покꙋша́ющїйсѧ са́мъ собо́ю мечта́тельнѣ прельсти́ти ᲂу҆́мъ. Сїѧ̑ бо люботрꙋ́днѣ постига́єма, и҆скꙋ́съ ᲂу҆́мныѧ бра́ни, вельмѝ разꙋ́мнѣ на́мъ, а҆́ще хо́щемъ, показꙋ́ютъ.

з҃. Сꙋгꙋ́бый стра́хъ, и҆ ѡ҆ставлє́нїѧ ѿ бг҃а, и҆ наказа́тєльныѧ приключє́нїѧ и҆скꙋше́нїй, ражда́ютъ ча́стое поꙋче́нїе внима́нїю во ᲂу҆мѣ̀ человѣ́ка, покꙋша́ющагѡсѧ и҆сто́чникъ загради́ти ѕлы́хъ по́мыслѡвъ и҆ дѣ́лъ, є҆гѡ́же ра́ди быва́ютъ и҆ ѡ҆ставлє́нїѧ и҆ неча́емыѧ ѿ бг҃а и҆скꙋшє́нїѧ, ко и҆справле́нїю на́шегѡ житїѧ̀, и҆ наипа́че вкꙋси́вшымъ поко́й добра̀ сегѡ̀ и҆ нерадѧ́щымъ. Частота́ же ражда́етъ навыкнове́нїе, а҆ сїѐ є҆сте́ственнꙋю нѣ́кꙋю частотꙋ̀ трезвѣ́нїѧ, сїѧ́ же видѣ́нїе бра́ни по ма́лꙋ, сꙋдѧ̀ по ка́чествꙋ своемꙋ̀, ражда́етъ: є҆мꙋ́же послѣ́дꙋетъ непреста́ннаѧ моли́тва і҆и҃сова, и҆ немечта́тельнаѧ сла́достнаѧ тишина̀ ᲂу҆ма̀ и҆ состоѧ́нїе, ѿ і҆и҃са содѣ́ловаемое.

и҃. Мы́сль стоѧ́щаѧ и҆ призыва́ющаѧ хрⷭ҇та̀ на сꙋпоста́ты, и҆ прибѣга́ющаѧ къ немꙋ̀, ꙗ҆́коже ѕвѣ́рь нѣ́кїй, ѡ҆крꙋже́нный мно́гими псы̀, и҆ противꙋста́вшїй во тверды́ни, и҆здале́че ᲂу҆́мственнѣ ᲂу҆́мствєнныѧ кова̑рства неви́димыхъ врагѡ́въ предви́дитъ: и҆ зане́же при́снѡ мо́литъ миротво́рнаго і҆и҃са проти́вꙋ и҆́хъ, неꙋѧ́звленна ѿ ни́хъ пребыва́етъ.

ѳ҃.²²³ А҆́ще вѣ́си, и҆ дано́ ти є҆́сть во ᲂу҆́трїи предстоѧ́ти, и҆ не то́чїю зрѣ́тисѧ, но и҆ зрѣ́ти вѣ́си, є҆́же глаго́лю: а҆́ще же нѝ, трезви́сѧ, и҆ прїи́меши.

і҃. Составле́нїе море́й є҆́сть мно́гаѧ вода̀: составле́нїе же и҆ держа́ва трезвѣ́нїѧ, воздержа́нїѧ и҆ дꙋше́внагѡ глꙋбо́кагѡ безмо́лвїѧ, и҆ бе́здна видѣ́нїй ди́вныхъ и҆ неизрече́нныхъ, и҆ разꙋ́мнагѡ смире́нїѧ: правоты̀ и҆ любвѐ, є҆́сть соверше́нное трезвѣ́нїе, и҆ і҆и҃съ хрⷭ҇то́ва без̾ по́мыслѡвъ моли́тва. И҆ сїѐ подоба́етъ твори́ти тѣ́снѡ и҆ ча́стѡ, и҆ не стꙋжа́ти сѝ.

а҃і. Не всѧ́къ глаго́лѧй мѝ: гдⷭ҇и, гдⷭ҇и, вни́детъ, речѐ, въ ца́рствїе небе́сное, но творѧ́й во́лю ѻ҆ц҃а̀ моегѡ̀.²²⁴ Во́лѧ же ѻ҆ц҃а̀ є҆гѡ̀ є҆́сть сїѧ̀: лю́бѧщїи гдⷭ҇а ненави́дите лꙋка̑ваѧ. Съ моли́твою ᲂу҆̀бо і҆и҃съ хрⷭ҇то́вою возненави́димъ и҆ лꙋка́выѧ по́мыслы. И҆ си́це сотвори́мъ во́лю бж҃їю.

в҃і. Всѧ́кїѧ добродѣ́тели начерта́нїе, и҆ ѡ҆́бразъ ро́дꙋ человѣ́ческомꙋ, и҆ воззва́нїе ѿ дре́внѧгѡ паде́нїѧ, влⷣка на́шъ и҆ бг҃ъ, воплоти́выйсѧ предложѝ на́мъ, живописа́въ всѐ добродѣ́тельное своѐ во пло́ти житїѐ, со всѣ́ми благи́ми свои́ми, ꙗ҆̀же на́мъ показа̀, по креще́нїи вше́дъ въ пꙋсты́ню, съ посто́мъ начина́етъ ᲂу҆́мнꙋю бра́нь, дїа́волꙋ, ꙗ҆́кѡ къ человѣ́кꙋ просто́мꙋ, къ немꙋ̀ пристꙋ́пльшꙋ. И҆ сицево́ю побѣ́дою наꙋчѝ и҆ на́съ неключи́мыхъ, ка́кѡ подоба́етъ бра́нь твори́ти на дꙋ́хи лꙋка́выѧ, си́рѣчь во смире́нїи, и҆ постѣ̀, и҆ моли́твѣ, и҆ трезвѣ́нїи, не тре́бꙋѧ си́хъ ꙗ҆́кѡ бг҃ъ, и҆ бг҃ъ богѡ́въ.

г҃і. Коли́цы же сꙋ́ть, по мнѣ́нїю моемꙋ̀, ѡ҆́бразы трезвѣ́нїѧ, могꙋ́щїи пома́лꙋ ѡ҆чища́ти ᲂу҆́мъ ѿ стра́стныхъ по́мыслѡвъ, назна́менати тѝ ѻ҆́ныѧ просто́ю рѣ́чїю и҆ неиспещре́нною не ѡ҆блѣню́сѧ. Не сꙋди́хъ бо въ слꙋ́чаехъ ѡ҆писа́нїѧ бра́ни, въ се́мъ глаго́лѣ сокры́ти по́льзꙋ рече́нїѧми, и҆ наипа́че ѿ простѣ́йшихъ. Ты́ же ча́до тїмоѳе́е, речѐ, внемлѝ чте́нїю.²²⁵

д҃і. Є҆ди́нъ ᲂу҆̀бо ѡ҆́бразъ трезвѣ́нїѧ є҆́сть, мечта́нїе всегда̀ блюстѝ, си́рѣчь прило́гъ. Занѐ не мо́щно сатанѣ̀ без̾ мечта́нїѧ по́мыслы твори́ти, и҆ пока́зывати ᲂу҆мꙋ̀ ко прельще́нїю ло́жнꙋ.

є҃і. Дрꙋгі́й ѡ҆́бразъ, и҆мѣ́ти се́рдце глꙋбо́ко, молча́щее вы́нꙋ, и҆ безмо́лвствꙋющее ѿ всѧ́кагѡ по́мысла, и҆ моли́тисѧ.

ѕ҃і. И҆́ный ѡ҆́бразъ, призыва́ти ча́стѡ гдⷭ҇а і҆и҃са хрⷭ҇та̀ на по́мощь во смире́нїи.

з҃і. Дрꙋгі́й же ѡ҆́бразъ є҆́сть, и҆мѣ́ти па́мѧть сме́рти непреста́ннѡ въ дꙋшѣ̀.

и҃і. Сїѧ̑ всѧ̑ дѣ̑ланїѧ, возлю́бленне, лꙋка́вымъ помышле́нїѧмъ вмѣ́стѡ вра́тарей возбранѧ́ютъ. А҆ что̀ и҆ні́и, ꙗ҆́коже твори́тсѧ, нивочто́же вмѣнѧ́ютъ зрѣ́ти къ небесѝ и҆ землѝ: сїѐ, бг҃ꙋ даю́щꙋ глаго́лъ, въ дрꙋго́мъ мѣ́стѣ соверше́ннѣе и҆зложꙋ̀.

ѳ҃і. А҆́ще по ма́лꙋ вины̑ страсте́й ѿсѣ́кше, въ дꙋхо́вныхъ ᲂу҆праздни́мсѧ видѣ́нїѧхъ, да не пребы́вше въ ѻ҆́ныхъ, сїѐ са́мое и҆мꙋ́ще дѣ́ло, ᲂу҆до́бь па́ки ко плотски̑мъ страсте́мъ возвраща́емсѧ, никако́гѡ и҆но́гѡ ѿтꙋ́дꙋ безстра́стїѧ плода̀ не полꙋчи́вше, ра́звѣ помраче́нїе всеконе́чное ᲂу҆ма̀, и҆ къ чꙋ́вствєннымъ вещє́мъ возвраще́нїе.

к҃. Подоба́етъ подвиза́ющемꙋсѧ внꙋ́трь, во всѧ́кое мгнове́нїе вре́мене и҆мѣ́ти четы́ре сїѧ̑: смире́нїе, кра́йнее внима́нїе, сопротивле́нїе и҆ моли́твꙋ. Смире́нїе, ꙗ҆́кѡ съ го́рдыми бѣса́ми проти́вными и҆мѣ́етъ ѻ҆но̀ бра́нь, да по́мощь хрⷭ҇то́вꙋ въ рꙋцѣ̀ се́рдца и҆́мать, занѐ гдⷭ҇ь го́рдыхъ ненави́дитъ. Внима́нїе же, да при́снѡ се́рдце своѐ твори́тъ ниеди́нагѡ по́мысла и҆мѣ́ти, а҆́ще бы и҆ бла́гъ ꙗ҆влѧ́лсѧ. Сопротивле́нїе же, да є҆гда̀ ско́рѡ ᲂу҆разꙋмѣ́етъ прише́дшаго, а҆́бїе со гнѣ́вомъ противоста́нетъ лꙋка́вомꙋ. И҆ ѿвѣща́ю, глаго́летъ, поноша́ющымъ мѝ ѕла̑ѧ.²²⁶ Не бг҃ꙋ ли повине́тсѧ дꙋша̀ моѧ̀;²²⁷ моли́твꙋ же по сопротивле́нїи а҆́бїе да возопїе́тъ ко хрⷭ҇тꙋ̀ съ воздыха́нїемъ безмо́лвнымъ. И҆ тогда̀ са́мъ подвиза́ѧйсѧ ᲂу҆́зритъ врага̀ разрꙋша́ющасѧ, и҆лѝ прогонѧ́ема покланѧ́емымъ и҆́менемъ, і҆и҃съ, ꙗ҆́кѡ пра́хъ ѿ вѣ́тра, и҆лѝ ꙗ҆́кѡ ды́мъ и҆счеза́ющїй съ мечта́нїемъ є҆гѡ̀.

к҃а. Не и҆мѣ́ѧй моли́твы чи́стыѧ ѿ по́мыслѡвъ, не и҆́мать ѻ҆рꙋ́жїѧ на бра́нь, моли́твы же, глаго́лю, при́снѡ дѣ́йствꙋемыѧ во внꙋ́тренности дꙋшѝ, да призыва́нїемъ хрⷭ҇та̀, та́йнѡ ра́тꙋѧй сꙋпоста́тъ поража́етсѧ и҆ ѡ҆палѧ́етсѧ.

к҃в. Ты́ бо до́лженъ є҆сѝ ѻ҆́стрымъ и҆ напрѧже́ннымъ ᲂу҆ма̀ ѻ҆́комъ зрѣ́ти, дабы̀ разꙋмѣва́ти входѧ́щихъ: разꙋмѣ́въ же а҆́бїе сопротивле́нїемъ сокрꙋша́ти главꙋ̀ ѕмі́евꙋ. И҆ вкꙋ́пѣ па́ки съ воздыха́нїемъ возопі́й ко хрⷭ҇тꙋ̀, и҆ прїи́меши тогда̀ и҆скꙋ́съ бж҃е́ственнагѡ неви́димагѡ застꙋпле́нїѧ, и҆ тогда̀ ᲂу҆́зриши ꙗ҆́снѡ пра́вость се́рдца.

к҃г. Ꙗ҆́коже держа́й зерца́ло въ рꙋцѣ̀, посредѣ̀ мно́гихъ стоѧ̀, и҆ взира́ѧ въ ѻ҆́ное, ви́дитъ своѐ лицѐ, каково̀ є҆́сть, ви́дитъ дрꙋги́хъ, прини́кшихъ въ то́ежде зерца́ло: та́кѡ вника́ющїй всегда̀ въ се́рдце своѐ, ви́дитъ своѐ состоѧ́нїе въ ѻ҆́номъ, ви́дитъ же и҆ чє́рныѧ ли́ца ᲂу҆́мныхъ є҆ѳїо́пѡвъ.

к҃д. Но не мо́жетъ ᲂу҆́мъ побѣди́ти мечта́нїе бѣсо́вское собо́ю то́кмѡ: да не надѣ́етсѧ когда́либо сегѡ̀. Кова́рни бо сꙋ́ще, и҆ побѣжде́нными притворѧ́ютсѧ, ѿи́нꙋдꙋ тщесла́вїемъ препина́ѧ. Призыва́нїемъ же і҆и҃са хрⷭ҇та̀ ста́ти тѝ и҆ ᲂу҆хи́тритисѧ нижѐ на ча́съ те́рпѧтъ.

к҃є. Ви́ждь, да не возмечта́еши, по примѣ́рꙋ дре́внѧгѡ і҆зра́илѧ, и҆ пре́данъ бꙋ́деши и҆ ты̀ мы́слєннымъ врагѡ́мъ. Ѻ҆́ный бо бг҃омъ всѧ́ческихъ ѿ є҆гѵ́птѧнъ и҆зба́вльсѧ, помо́щника себѣ̀ ᲂу҆мы́сли і҆́дѡла пе́рстна.

к҃ѕ. І҆́дѡла же пе́рстна разꙋмѣ́й немощны́й на́шъ ᲂу҆́мъ, и҆́же, до́ндеже мо́литъ і҆и҃са хрⷭ҇та̀ проти́вꙋ лꙋка́выхъ дꙋхѡ́въ, ᲂу҆до́бь и҆̀хъ ѿгонѧ́етъ, и҆ съ хи́тростїю хꙋдо́жною побѣжда́етъ неви́димыѧ ра̑тныѧ си̑лы врага̀. Є҆гда́ же ѻ҆́нъ на себѧ̀ безсмы́сленнѣ всѧ́кѡ надѣ́ѧтисѧ бꙋ́детъ, ꙗ҆́коже глаго́лемый быстрокрыла́тый разбива́етсѧ. На бг҃а, глаго́летъ, ᲂу҆пова̀ се́рдце моѐ и҆ помо́же мѝ: и҆ процвѣтѐ пло́ть моѧ̀: и҆ кто̀ ра́звѣ гдⷭ҇а, возста́витъ мѧ̀, и҆ ѡ҆полчи́тсѧ со мно́ю на лꙋка́внꙋющыѧ безчи́слєнныѧ по́мыслы;²²⁸ Надѣ́ѧйсѧ же на сѧ̀, а҆ не на бг҃а, паде́тъ паде́нїемъ ди́внымъ.

к҃з. Серде́чнагѡ безмо́лвїѧ се́й ѡ҆́бразъ, чи́нъ и҆ примѣ́ръ да бꙋ́детъ тѝ при́снѡ, а҆́ще хо́щеши подвиза́тисѧ, ма́лое живо́тное, паꙋ́къ. А҆́ще же нѝ, не безмо́лвствꙋеши є҆щѐ, ꙗ҆́коже подоба́етъ ᲂу҆мо́мъ. То́й ᲂу҆́бѡ ма̑лыѧ ло́витъ мꙋ́хи, ты́ же, а҆́ще та́кѡ, ꙗ҆́коже и҆ то́й дꙋше́ю трꙋдѧ́сѧ безмо́лвствꙋеши, не преста́неши при́снѡ ᲂу҆бива́ти младе́нцы вавѷлѡ́нскїѧ, за кото́рое ᲂу҆бі́йство ᲂу҆блажа́ешисѧ дх҃омъ ст҃ы́мъ чрез̾ дв҃да.²²⁹

к҃и. Ꙗ҆́коже не мо́щно чермно́мꙋ мо́рю на тве́рди ꙗ҆ви́тисѧ посредѣ̀ ѕвѣ́здъ, и҆ ꙗ҆́коже не мо́щно человѣ́кꙋ на землѝ ѡ҆бходѧ́щꙋ не дыха́ти во́здꙋхомъ си́мъ: та́кѡ не мо́щно ѡ҆чи́стити се́рдце на́ше ѿ стра́стныхъ по́мыслѡвъ, и҆ ѿгна́ти ᲂу҆́мныхъ врагѡ́въ ѿ негѡ̀, без̾ ча́стагѡ призыва́нїѧ і҆и҃са хрⷭ҇та̀.

к҃ѳ. А҆́ще со смиренномꙋ́дрїемъ и҆ па́мѧтїю сме́рти, и҆ самоꙋкоре́нїемъ, и҆ сопротивле́нїемъ, и҆ призыва́нїемъ і҆и҃са хрⷭ҇та̀ трꙋжда́ющисѧ всегда̀ въ се́рдцѣ твое́мъ, и҆ тѣ́снымъ, но радостотво́рнымъ и҆ сла́достнымъ пꙋте́мъ мы́сленнымъ, по всѧ́къ де́нь съ си́ми ѻ҆рꙋ́жїѧми ше́ствꙋеши тре́звеннѣ: во видѣ̑нїѧ ст҃а́ѧ ст҃ы́хъ вни́деши, и҆ просвѣти́шисѧ та́инствы глꙋбо́кими ѿ хрⷭ҇та̀, въ не́мже сокрѡ́вища премꙋ́дрости и҆ ра́зꙋма сокровє́нна, въ не́мже живе́тъ всѧ́ко и҆сполне́нїе бж҃ества̀ тѣле́снѣ.²³⁰ Ѡ҆щꙋти́ши бо по і҆и҃сѣ, ꙗ҆́кѡ дх҃ъ ст҃ы́й вни́де въ дꙋ́шꙋ твою̀, ѿ негѡ́же ᲂу҆́мъ человѣ́чь просвѣща́етсѧ зрѣ́ти ѿкрове́ннымъ лице́мъ. Никто́же глаго́летъ гдⷭ҇а і҆и҃са, то́чїю дх҃омъ ст҃ы́мъ,²³¹ речѐ гдⷭ҇ь, ᲂу҆вѣрѧ́ѧ си́рѣчь и҆́щꙋщаго та́инственнѣ є҆го̀.

л҃. Ѻ҆ба́че и҆ сїѐ вѣ́дѣти подоба́етъ любоꙋчє́нымъ, ꙗ҆́кѡ зави́стнїи бѣ́си мно́жицею и҆ сокрыва́ютъ и҆ сокраща́ютъ въ на́съ ᲂу҆́мнꙋю бра́нь, зави́дѧще на́мъ лю́тїи, по́льзы ра́ди, ꙗ҆́же ѿ бра́ни, и҆ разꙋмѣ́нїѧ, и҆ восхожде́нїѧ къ бг҃ꙋ, да ѡ҆безпеча́лившымсѧ на́мъ внеза́пꙋ ᲂу҆́мъ на́шъ восхи́тѧтъ, и҆ невнима́тельными нѣ́какѡ къ помыслѡ́мъ па́ки на́съ содѣ́лаютъ. Коне́цъ бо и҆̀мъ непрестаю́щїй и҆ по́двигъ промышлѧ́етсѧ, ѿню́дъ не ѡ҆ставлѧ́ти се́рдце на́ше внима́тельнымъ, вѣ́дѧще собира́емое ѿтꙋ́дꙋ бога́тство дꙋшѣ̀. Но мы̀ тогда̀, съ воспомина́нїемъ гдⷭ҇а на́шегѡ і҆и҃са хрⷭ҇та̀, да простира́емсѧ на дꙋхѡ́внаѧ видѣ̑нїѧ, и҆ бра́нь па́ки на ᲂу҆́мъ да восхо́дитъ: то́чїю по совѣ́тꙋ, да та́кѡ рекꙋ̀, самогѡ̀ гдⷭ҇а, и҆ со смире́нїемъ мно́гимъ всѧ̑ да твори́мъ.

л҃а. Подоба́етъ ᲂу҆̀бо на́мъ, во ѻ҆бщежи́тїи пребыва́ющымъ, доброво́льнымъ и҆зволе́нїемъ и҆ бо́дрымъ се́рдцемъ всю̀ во́лю свою̀ ѿсѣка́ти пред̾ настоѧ́телемъ, и҆ та́кѡ бг҃ꙋ вспомоществꙋ́ющꙋ, благоѡбꙋ́здываємы и҆ са́ми нѣ́какѡ быва́емъ, и҆ невѡ́льны. Хи́трость же въ се́мъ и҆мѣ́ти подоба́етъ, да не же́лчїю смꙋща́емсѧ и҆ ꙗ҆́рость на́шꙋ безслове́снѣ и҆ чрез̾есте́ственнѣ дви́жимъ, и҆ та́кѡ бездерзновє́нны на неви́димꙋю бра́нь ѡ҆брѧ́щемсѧ. Ѡ҆бы́кла бо є҆́сть во́лѧ на́ша, не ѿсѣка́ема на́ми доброво́льнѣ, гнѣ́ватисѧ на начина́ющихъ принꙋжде́ннѣ ѻ҆́нꙋю ѿсѣка́ти: и҆ ѿ сегѡ̀ ᲂу҆́бѡ ꙗ҆́рость ѕлѧ́щаѧсѧ подви́гшисѧ, погꙋблѧ́етъ разꙋмѣ́нїе бра́ни, є҆́же є҆два̀ кто̀ со мно́гимъ трꙋдо́мъ стѧжа́ти возмо́же. Растли́тельна бо ꙗ҆́рость є҆́сть є҆сте́ственнѡ, а҆́ще на по́мыслы подви́гнетсѧ бѣсѡ́вскїѧ, растлѣва́етъ и҆ погꙋблѧ́етъ и҆̀хъ: а҆́ще же па́ки на человѣ́ки возмꙋти́тсѧ, растлѣва́етъ и҆ та́кѡ благі̑ѧ по́мыслы въ на́съ. Ꙗ҆́рость, а҆́ще слꙋчи́тсѧ, ви́ждꙋ, ꙗ҆́кѡ растлѣва́етъ всѣ̀ по́мыслы, а҆́ще лꙋка̑выѧ, а҆́ще ли и҆ пра̑выѧ. Ѻ҆рꙋ́жїе бо ѿ бг҃а, и҆ лꙋ́къ на́мъ дае́тсѧ, а҆́ще не ᲂу҆де́рживаетсѧ во ѻ҆бои́хъ. Хотѧ́ же и҆ разли́чнѣ дѣ́йствꙋетъ, но гꙋби́тельна є҆́сть. А҆́зъ бо вѣ́мъ и҆ пса̀ де́рзка ра́внѡ съ во́лки растлѣва́юща ѻ҆́вцы.

л҃в. Си́це подоба́ше бѣ́гати дерзнове́нїѧ, ꙗ҆́кѡ ꙗ҆́да а҆́спїдова, и҆ ѿвраща́тисѧ многоглаго́ланїй, ꙗ҆́кѡ ѕмі̑й и҆ порожде́нїй ѕмїи́ныхъ, ѕѣлѡ̀ могꙋ́щымъ си́мъ ско́рѡ превестѝ въ соверше́нное забве́нїе внꙋ́трєнїѧ бра̑ни, низвестѝ дꙋ́шꙋ ѿ высо́кїѧ ра́дости, ꙗ҆́же ѿ чистоты̀ серде́чныѧ. Противлѧ́етсѧ бо проклѧ́тое забве́нїе внима́нїю, ꙗ҆́кѡ вода̀ ѻ҆гню̀, и҆ си́льный вра́гъ ѻ҆́номꙋ по всѧ́къ де́нь быва́етъ. Ѿ забве́нїѧ бо въ нерадѣ́нїе прихо́димъ, ѿ нерадѣ́нїѧ же въ презрѣ́нїе и҆ ᲂу҆ны́нїе, и҆ безмѣ̑стныѧ по́хѡти. И҆ та́кѡ па́ки возвраща́емсѧ вспѧ́ть, и҆́мже ѡ҆́бразомъ пе́съ на свою̀ блево́тинꙋ. Бѣжи́мъ ᲂу҆̀бо дерзнове́нїѧ, ꙗ҆́кѡ ꙗ҆́да сме́ртнагѡ. Ѕло́е же стѧжа́нїе забве́нїѧ, и҆ ꙗ҆̀же ѿ тогѡ̀ и҆сцѣлѧ́етъ вельмѝ ѻ҆па́сное хране́нїе ᲂу҆ма̀, и҆ ча́стое призыва́нїе гдⷭ҇а на́шегѡ і҆и҃са бг҃а, без̾ негѡ́ бо не мо́жемъ твори́ти ничесѡ́же.

л҃г. Не вмѣсти́тельно, и҆ не мо́щно со ѕмїе́мъ дрꙋ́жество и҆мѣ́ти, и҆ въ нѣ́дрѣхъ є҆го̀ носи́ти: нижѐ мо́щно тѣ́лꙋ всѧ́чески ласка́ти, ᲂу҆гожда́ти и҆ люби́ти ѻ҆́ное, кромѣ̀ потре́бныхъ и҆ нꙋ́ждныхъ, и҆ вкꙋ́пѣ прилѣжа́ти добродѣ́тели небе́сной. Є҆сте́ственно бо томꙋ̀ грѣ́ющаго ᲂу҆ѧзвлѧ́ти, а҆ семꙋ̀ ѡ҆сквернѧ́ти сластьмѝ ᲂу҆гожда́ющаго. Въ не́мже тѣ́ло согрѣша́етъ, за то̀ ра́нами да мꙋ́читсѧ ча́стѡ и҆ безпоща́днѡ, ꙗ҆́кѡ ра́бъ бѣгле́цъ сла́дкагѡ вїна̀ ᲂу҆пи́выйсѧ, да разꙋмѣ́етъ наказꙋ́ющаго господи́на, да не корче́мствꙋетъ, да разꙋмѣ́етъ госпожꙋ̀ нетлѣ́ннꙋю тлѣ́нный ка́лъ, раба̀ и҆ нетопы́рь. Да́же до сме́рти да не ᲂу҆пова́еши на пло́ть твою̀. Хотѣ́нїе бо, глаго́летъ, пло́ти, вражда̀ на бг҃а. Зако́нꙋ бо бж҃їю не покарѧ́етсѧ. И҆ пло́ть похотствꙋ́етъ на дꙋ́ха. Живꙋ́щїи же во пло́ти бг҃ꙋ ᲂу҆годи́ти не мо́гꙋтъ: мы́ же нѣ́смы во пло́ти, но въ дꙋ́сѣ.²³²

л҃д. Мꙋ́дрости є҆́сть дѣ́ло, при́снѡ воздвиза́ти ꙗ҆́ростнꙋю си́лꙋ дꙋшѝ къ соплете́нїю внꙋ́треннїѧ бра́ни, и҆ къ самоꙋкоре́нїю: цѣломꙋ́дрїѧ же, возбꙋжда́ти слове́снꙋю къ трезвѣ́нїю соверше́нномꙋ и҆ ча́стомꙋ, и҆ видѣ́нїю дꙋхо́вномꙋ: пра́вды же, ᲂу҆правлѧ́ти жела́тельнꙋю къ добродѣ́тели и҆ бг҃ꙋ: мꙋ́жества же, пѧ́ть чꙋ́вствъ пра́вити и҆ содержа́ти, да не ѡ҆сквернѧ́етсѧ внꙋ́треннїй на́шъ человѣ́къ ѻ҆́ными, си́рѣчь се́рдце, и҆ внѣ́шнїй, си́рѣчь тѣ́ло.

л҃є. На і҆и҃ли велелѣ́пота є҆гѡ̀,²³³ на ᲂу҆мѣ̀ зрѧ́щемъ добро́тꙋ сла́вы самагѡ̀ бг҃а, є҆ли́кѡ мо́щно, и҆ си́ла є҆гѡ̀ на ѻ҆́блацѣхъ, въ дꙋша́хъ свѣтозра́чныхъ, взира́ющихъ во ᲂу҆́трїи на сѣдѧ́щаго ѻ҆деснꙋ́ю ѻ҆ц҃а̀ ѡ҆зарѧ́ющаго и҆̀хъ: ꙗ҆́коже со́лнце чи̑стыѧ ѻ҆блака̀ лꙋча́ми ѡ҆зарѧ́ющее любе́знѣ показꙋ́етъ ѧ҆̀.

л҃ѕ. Согрѣша́ѧй є҆ди́нъ, глаго́летъ бж҃е́ственное писа́нїе, погꙋби́тъ благосты́ню мно́гꙋ,²³⁴ и҆ согрѣша́ѧй ᲂу҆́мъ погꙋблѧ́етъ въ предпи́санной главѣ̀ пока́занное питїѐ, и҆ бра́шно безсме́ртное.

л҃з. Нѣ́смы самѱѡ́на си́льнѣйшїи, ни соломѡ́на премꙋ́дрѣйшїи, ни даві́да бж҃е́ственнагѡ разꙋ́мнѣйшїи, ни па́че верхо́внагѡ петра̀, бг҃а лю́бѧщїи. Да не надѣ́емсѧ ᲂу҆̀бо на сѧ̀. Глаго́летъ бо писа́нїе, надѣ́ѧйсѧ на себѐ, паде́тъ паде́нїемъ ди́внымъ.

л҃и. Наꙋ́чимсѧ ѿ хрⷭ҇та̀ смиренномꙋ́дрїю, ѿ даві́да ка́ѧтисѧ, а҆ ѿ петра̀ пла́кати ѡ҆ слꙋча́ющихсѧ, но не ѿчаѧва́тисѧ по ѡ҆́бразꙋ самѱѡ́на, і҆ꙋ́ды и҆ ѕѣлѡ̀ премꙋ́драгѡ соломѡ́на.

л҃ѳ. Дїа́волъ, ꙗ҆́кѡ ле́въ рыка́ѧ хо́дитъ и҆скі́й кого̀ поглоти́ти, со свои́ми си́лами. Да никогда̀ ᲂу҆́бѡ серде́чное всегда́шнее внима́нїе, и҆ трезвѣ́нїе, и҆ противорѣ́чїе, и҆ моли́тва ко хрⷭ҇тꙋ̀ і҆и҃сꙋ бг҃ꙋ на́шемꙋ ѡ҆скꙋдѣва́ютъ. Лꙋ́чшїѧ бо по́мощи, кромѣ̀ і҆и҃са, не ѡ҆брѧ́щеши во все́й жи́зни твое́й. То́й бо є҆ди́нъ гдⷭ҇ь вѣ́сть, ꙗ҆́кѡ бг҃ъ, бѣсѡ́вскїѧ кова̑рства, кѡ́зни и҆ лꙋка̑вствїѧ.

м҃. дꙋша̀ ᲂу҆̀бо да ᲂу҆пова́етъ на хрⷭ҇та̀, и҆ мо́литъ є҆го̀, и҆ ѿню́дъ да не страши́тсѧ. Не є҆ди́на бо бо́ретсѧ, но со стра́шнымъ цр҃е́мъ і҆и҃сомъ хрⷭ҇то́мъ, творце́мъ всѣ́хъ сꙋ́щихъ безтѣле́сныхъ и҆ тѣле́сныхъ, ви́димыхъ и҆ неви́димыхъ.

м҃а. Ꙗ҆́коже бо до́ждь, є҆ли́кѡ мно́жае на зе́млю схо́дитъ, толи́кѡ и҆ зе́млю ᲂу҆мѧгча́етъ: си́це и҆ зе́млю се́рдца на́шегѡ и҆́мѧ хрⷭ҇то́во ѿ на́съ призыва́емо радостотвори́тъ и҆ весели́тъ, є҆ли́кѡ частѣ́йше без̾ пѡ́мыслъ призыва́етсѧ.

м҃в. Добро́ же и҆ сїѐ неискꙋ̑снымъ вѣ́дѣти, ꙗ҆́кѡ врагѡ́въ безпло́тныхъ и҆ неви́димыхъ, ѕложела́тельныхъ, мꙋ́дрыхъ на ѡ҆ѕлобле́нїе, ско́рыхъ и҆ ле́гкихъ, и҆ и҆скꙋсобра́нныхъ, лѣ́ты ѿ а҆да́ма, и҆ да́же до ны́нѣ, ни є҆ди́нымъ и҆ны́мъ ѡ҆́бразомъ не мо́жемъ мы̀ дебе́лые, и҆ тѣ́ломъ, и҆ мꙋдрова́нїемъ къ землѣ̀ растꙋ́щїе, побѣди́ти, ра́звѣ непреста́ннымъ трезвѣ́нїемъ ᲂу҆ма̀, и҆ призыва́нїемъ і҆и҃са хрⷭ҇та̀ бг҃а и҆ творца̀ на́шегѡ. И҆ неискꙋ̑снымъ въ моли́твѣ і҆и҃съ хрⷭ҇то́вой, да бꙋ́дꙋтъ сїѧ̑ ᲂу҆вѣща́нїемъ, є҆́же и҆скꙋси́ти и҆ разꙋмѣ́ти до́брое: и҆скꙋ̑снымъ же дѣѧ́нїе, и҆ и҆скꙋше́нїе, и҆ поко́й бла́гъ, є҆́сть до́брый ѡ҆́бразъ и҆ ᲂу҆чи́тель.

м҃г. Ꙗ҆́коже ѻ҆троча̀ ма́ло и҆ нелꙋка́во, мечта̑нїѧ творѧ́ща нѣ́коего зрѧ̀, весели́тсѧ, и҆ послѣ́дꙋетъ мечта̑нїѧ творѧ́щемꙋ ѿ безѕло́бїѧ: си́це и҆ дꙋша̀ на́ша проста̀ нѣ́какѡ сꙋ́щи и҆ блага̀, та́кѡ ѿ блага́гѡ влⷣки своегѡ̀ созда́вшисѧ, ᲂу҆веселѧ́етсѧ прило́гами дїа́вола мечта́тельными, и҆ прельща́ема притека́етъ къ го́ршемꙋ, а҆́ки къ добрꙋ̀: и҆ си́це мѣша́етъ своѧ̑ по́мыслы съ мечта́нїемъ бѣсо́вскагѡ прило́га. А҆́ще слꙋчи́тсѧ жены̀ благоѡбра́зныѧ лицѐ, и҆лѝ и҆́нное что̀ ѿ за́повѣдей хрⷭ҇то́выхъ всѧ́кѡ запреще́нное: жела́етъ, ка́кѡ бы ᲂу҆хи́тритисѧ, дабы̀ произвестѝ въ дѣ́ло ꙗ҆́вльшꙋюсѧ є҆́й красотꙋ̀: и҆ тогда̀ сложи́вшисѧ со дїа́воломъ къ дѣ́лꙋ приво́дитъ, посре́дствомъ тѣ́ла, ꙗ҆́вльшеесѧ є҆́й беззако́нїе въ помышле́нїи, къ ѡ҆сꙋжде́нїю своемꙋ̀.

м҃д. Сїѧ̀ є҆́сть хи́трость лꙋка́вагѡ, и҆ си́ми стрѣла́ми ᲂу҆ѧзвлѧ́етъ ѻ҆́нъ всѧ́кꙋю дꙋ́шꙋ. И҆ сегѡ̀ ра́ди не без̾ѻпа́сно: пре́жде мно́гагѡ и҆скꙋше́нїѧ бра́ннагѡ ᲂу҆ма̀, позволѧ́ти по́мыслѡмъ входи́ти въ се́рдце на́ше, въ нача́лѣ наипа́че. Занѐ є҆щѐ дꙋша̀ на́ша ᲂу҆слажда́етсѧ бѣсо́вскими прило́гами, и҆ весели́тсѧ и҆ послѣ́дꙋетъ и҆̀мъ. Но подоба́етъ то́чїю разꙋмѣва́ти по́мыслы, и҆ а҆́бїе ѿсѣка́ти ѻ҆́ныѧ въ нахожде́нїи и҆ прило́гѣ. Є҆гда́ же закоснѣ́въ ᲂу҆́мъ, въ ди́внѣмъ се́мъ дѣ́лѣ ѡ҆бꙋ́читсѧ и҆ ᲂу҆разꙋмѣ́етъ, непреста́ннѡ бꙋ́детъ навыка́ти бра́ни, дабы̀ и҆́стиннѡ и҆ разꙋмѣва́ти ѻ҆́ныѧ, и҆ ꙗ҆́коже проро́къ глаго́летъ, ᲂу҆до́бь мощѝ є҆мꙋ̀ ᲂу҆де́рживати ма́лыѧ ли́сы: тогда̀ вѣ́домѡ мо́жетъ ѡ҆ставлѧ́ти ѻ҆́ныѧ и҆ ѡ҆блича́ти.

м҃є. Ꙗ҆́коже не мо́щно по є҆ди́номꙋ кана́лꙋ и҆ ѻ҆гню̀ и҆ водѣ̀ проходи́ти: си́це не мо́щно въ се́рдце грѣхꙋ̀ вни́ти, а҆́ще не толкне́тъ пе́рвѣе во две́рь се́рдца мечта́нїемъ лꙋка́вагѡ прило́га.

м҃ѕ. Пе́рвое, є҆́сть прило́гъ: второ́е, сочета́нїе, си́рѣчь смѣ́шєны быва́ютъ по́мыслы на́ши, и҆ лꙋка́выхъ бѣсѡ́въ: тре́тїе, сложе́нїе, како́е подоба́етъ бы́ти междꙋ̀ ѻ҆бои́ми по́мыслами ѕлѣ̀ совѣщава́ющимисѧ: четве́ртое же, є҆́сть чꙋ́вственное дѣѧ́нїе, си́рѣчь грѣ́хъ. А҆́ще бо внима́етъ ᲂу҆́мъ тре́звеннѣ, и҆ противорѣ́чїемъ и҆ призыва́нїемъ гдⷭ҇а і҆и҃са ѿгонѧ́етъ прило́гъ въ нахожде́нїи: послѣ̑дꙋющаѧ за тѣ́мъ пра̑здна пребыва́ютъ. Оу҆́мъ бо лꙋка́вый, безпло́тенъ сы́й, не и҆на́че мо́жетъ прельсти́ти дꙋ́шꙋ, то́чїю мечта́нїемъ и҆ по́мыслы. И҆ ѡ҆ прило́гѣ дв҃дъ глаго́летъ: Воꙋ́трїѧ и҆збива́хъ, и҆ послѣ̑дꙋющаѧ.²³⁵ Ѡ҆ сложе́нїи же вели́кїй мѡѷсе́й глаго́летъ: И҆ не приложи́тсѧ и҆̀мъ.

м҃з. Оу҆́мъ ᲂу҆мꙋ̀ неви́димѡ ко бра́ни соплета́етсѧ, бѣсо́вскїй ᲂу҆́мъ на́шемꙋ. И҆ сегѡ̀ ра́ди потре́ба и҆з̾ глꙋбины̀ по всѧ́къ ча́съ вопи́ти ко хрⷭ҇тꙋ̀ дабы̀ ѿгна́лъ бѣсо́вскїй ᲂу҆́мъ, побѣди́тєльнаѧ же на́мъ дарова́лъ, ꙗ҆́кѡ человѣколю́бецъ.

м҃и. Ѡ҆́бразъ безмо́лвїѧ серде́чнагѡ да бꙋ́детъ тѝ содержа́щїй зерца́ло, и҆ въ него̀ взира́ющїй. И҆ тогда̀ ᲂу҆́зриши ᲂу҆́мнѣ написꙋ́ємаѧ въ се́рдцѣ твое́мъ лꙋка̑ваѧ и҆ блага̑ѧ.

м҃ѳ. Блюдѝ при́снѡ ни є҆ди́нагѡ по́мысла не и҆мѣ́ти въ се́рдце твое́мъ, ни безсло́внагѡ, нижѐ благосло́внагѡ, да та́кѡ ᲂу҆до́бь познава́еши и҆ноплеме́нники, си́рѣчь є҆гѵ́пєтскїѧ пе́рвенцы.

н҃. Ко́ль бла́га, сла́достна, свѣтла̀ и҆ прїѧ́тна, вседобра̀, ꙗ҆снозра́чна и҆ красна̀ добродѣ́тель трезвѣ́нїе, ѿ тебѐ, хрⷭ҇тѐ, благоꙋправлѧ́емаѧ, и҆ ѿ бо́драгѡ человѣ́ческагѡ ᲂу҆ма̀ во смире́нїи мно́гомъ проходи́маѧ! Простира́етъ бо да́же до мо́рѧ и҆ бе́здны видѣ́нїй ро́ждїе своѐ, и҆ да́же до рѣ́къ та̑инъ сла́достныхъ и҆ бж҃е́ственныхъ ѿра́сли своѧ̑: и҆ напаѧ́етъ ᲂу҆́мъ, давнѡ̀ сожже́нный нече́стїемъ ѿ сла́ности по́мыслѡвъ лꙋка́выхъ дꙋхѡ́въ, и҆ ѿ ѕлоꙋ́мнагѡ мꙋдрова́нїѧ пло́ти, є҆́же є҆́сть сме́рть.

н҃а. Трезвѣ́нїе ᲂу҆подо́бисѧ лѣ́ствицѣ і҆а́кѡвлевой, на не́йже бг҃ъ пребыва́етъ, и҆ а҆́гг҃ли восхо́дѧтъ. И҆стреблѧ́етъ бо и҆з̾ на́съ всѧ́кꙋю ѕло́бꙋ. Ѻ҆но́ бо ѿсѣка́етъ многосло́вїе, поноше́нїе и҆ клеветꙋ̀, и҆ всѧ̑ чꙋ́вствєннаѧ ѕла̑ѧ порѧ́дꙋ, не терпѧ̀ за сїѧ̑ нижѐ на ма́лое вре́мѧ лиша́тисѧ своеѧ̀ сла́дости.

н҃в. Сїе́ же ᲂу҆се́рднѡ, бра́тїѧ моѧ̑, да прохо́димъ: и҆ во видѣ́нїѧхъ тогѡ̀ чи́стымъ по́мысломъ ѡ҆ хрⷭ҇тѣ̀ і҆и҃сѣ парѧ́ще, да возбꙋжда́емсѧ къ созерца́нїю согрѣше́нїй на́шихъ и҆ житїѧ̀ пре́жнѧгѡ, да воспомина́нїемъ грѣхѡ́въ на́шихъ сокрꙋша́еми и҆ смирѧ́еми, непреста́ннꙋю и҆мѣ́емъ по́мощь ѿ і҆и҃са хрⷭ҇та̀ бг҃а на́шегѡ на неви́димꙋю бра́нь. Лиши́вшесѧ бо по́мощи і҆и҃совой го́рдостїю, и҆лѝ тщесла́вїемъ, и҆лѝ самолю́бїемъ, лиши́хомсѧ чистоты̀ серде́чныѧ, є҆́юже познае́тъ человѣ́къ бг҃а. Пе́рвое бо быва́етъ вино́ю втора́гѡ, ꙗ҆́коже ѡ҆бѣща́нїе и҆сполне́нїѧ.

н҃г. Оу҆́мъ, не лѣнѧ́йсѧ ѡ҆ сокрове́ннѣмъ свое́мъ дѣ́ланїи, съ про́чими благи́ми, ꙗ҆̀же ѿ всегда́шнѧгѡ хране́нїѧ ѡ҆брѧ́щетъ и҆ пѧ́ть чꙋ́вствъ тѣле́сныхъ пра́здны ѿ внѣ́шнихъ ѕѡ́лъ. И҆́бо добродѣ́тели свое́й трезвѣ́нно вы́нꙋ вне́млѧ, и҆ помышле́нїѧми благи́ми ᲂу҆слажда́тисѧ жела́ѧ, нете́рпитъ крадѡ́мымъ бы́ти ѿ пѧтѝ чꙋ́вствъ, веще́ствєннымъ и҆ сꙋ́єтнымъ помыслѡ́мъ въ него̀ входѧ́щымъ, но разꙋмѣ́въ и҆́хъ пре́лесть, внꙋ́трь себѐ вельмѝ сокрыва́етъ и҆̀хъ.

н҃д. Пребыва́й въ ра́зꙋмѣ, и҆ не ᲂу҆трꙋди́шисѧ во и҆скꙋше́нїѧхъ: ѿѻнꙋ́дꙋже ѿходѧ̀ терпѝ находѧ̑щаѧ.

н҃є. Ꙗ҆́коже ѕлѣ̀ пита́ющымсѧ по́льзꙋетъ го́рькаѧ пелы́нь: си́це ѕлонра̑внымъ по́льзꙋетъ ѕла̑ѧ страда́ти.

н҃ѕ. А҆́ще не хо́щеши ѕлострада́ти, нижѐ ѕло̀ твори́ти жела́й. Поне́же сїѐ ѻ҆́номꙋ непрестꙋ́пнѡ послѣ́дꙋетъ. Є҆́же бо сѣ́етъ кто̀, то̀ и҆ по́жнетъ. Во́лею ᲂу҆̀бо ѕла̑ѧ сѣ́юще, и҆ нево́лею жнꙋ́ще, пра́вдѣ бж҃їей диви́тисѧ до́лжны є҆смы̀.

н҃з. Ѡ҆слѣплѧ́етсѧ ᲂу҆́мъ ѿ тре́хъ си́хъ страсте́й: ѿ сребролю́бїѧ, глаго́лю, тщесла́вїѧ и҆ сла́сти.

н҃и. Ра́зꙋмъ и҆ вѣ́ра, совоспи́танники є҆стества̀ на́шегѡ, не ѿ чегѡ̀ и҆но́гѡ, то́чїю ѿ ѻ҆́ныхъ притꙋпи́шасѧ.

н҃ѳ. Ꙗ҆́рость и҆ гнѣ́въ, бра̑ни и҆ ᲂу҆бі̑йства, и҆ всѧ̑ прѡ́чаѧ ѕла̑ѧ порѧ́дꙋ, ѿ ѻ҆́ныхъ въ человѣ́цѣхъ ѕѣлѡ̀ ᲂу҆крѣпи́шасѧ.

ѯ҃. Невѣ́дꙋющїй и҆́стины, нижѐ и҆́стиннѡ вѣ́ровати мо́жетъ: вѣ́дѣнїе бо по є҆стествꙋ̀ предварѧ́етъ вѣ́рꙋ. И҆́бо речє́ннаѧ въ писа́нїи реко́шасѧ, не да разꙋмѣ́емъ то́чїю, но да и҆ сотвори́мъ ѻ҆́ныѧ.

ѯ҃а. Начне́мъ ᲂу҆̀бо дѣ́ло. Си́це бо послѣ́довательнѣ преспѣва́юще ѡ҆брѧ́щемъ, ꙗ҆́кѡ на бг҃а ᲂу҆пова́нїе, и҆ тве́рдаѧ вѣ́ра, и҆ разꙋмѣ́нїе внꙋ́треннее, и҆ и҆збавле́нїе и҆скꙋше́нїй, и҆ дарѡ́въ подаѧ̑нїѧ, и҆ и҆сповѣ́данїе серде́чное, и҆ сле́зы прилѣ̑жны ѿ моли́твы вѣ̑рнымъ прихо́дѧтъ. Не то́чїю же сїѧ̑, но и҆ находѧ́щихъ скорбе́й терпѣ́нїе, и҆ и҆́скреннее бли́жнемꙋ ѡ҆ставле́нїе, и҆ зако́на дꙋхо́внагѡ позна́нїе, и҆ пра́вды бж҃їѧ ѡ҆брѣ́тенїе, и҆ дх҃а ст҃а́гѡ наи́тїе, и҆ дꙋхо́вныхъ сокро́вищъ подаѧ́нїе, и҆ всѧ̑, є҆ли̑ка ѡ҆бѣтова̀ бг҃ъ пода́ти вѣ̑рнымъ человѣ́кѡмъ и҆ здѣ̀, и҆ въ бꙋ́дꙋщемъ вѣ́цѣ. И҆ воѻбщѐ рещѝ: по ѡ҆́бразꙋ бж҃їю не мо́жно дꙋшѣ̀ ꙗ҆ви́тисѧ, а҆́ще не дарова́нїемъ бж҃їимъ и҆ вѣ́рою, со мно́гимъ смиренномꙋ́дрїемъ, и҆ не съ разсѣ́ѧнною моли́твою въ по́мыслѣ человѣ́кꙋ пребыва́ющꙋ.

ѯ҃в. Ве́лїе вои́стиннꙋ бла́го ѿ и҆скꙋ́са прїѧ́хомъ, є҆́же при́снѡ призыва́ти гдⷭ҇а і҆и҃са на мы́слєнные сꙋпоста́ты хотѧ́щемꙋ се́рдце своѐ ѡ҆чи́стити. И҆ ви́ждь, ка́кѡ согла́сно сло́во, ѿ и҆скꙋ́са мно́ю рече́нное, со свидѣ́тельствами писа́нїѧ. Гото́висѧ, глаго́летъ ѻ҆́но, і҆зра́илю, призыва́ти и҆́мѧ гдⷭ҇а твоегѡ̀. И҆ а҆пⷭ҇лъ: Непреста́ннѡ моли́тесѧ.²³⁶ И҆ гдⷭ҇ь на́шъ глаго́летъ: Не мо́жете твори́ти без̾ менѐ ничесѡ́же. Пребыва́ѧй во мнѣ̀, и҆ а҆́зъ въ не́мъ, то́й сотвори́тъ пло́дъ мно́гъ. И҆ па́ки: А҆́ще кто̀ не пребꙋ́детъ во мнѣ̀, и҆зве́ржетсѧ во́нъ, ꙗ҆́коже розга̀.²³⁷ Ве́лїе бла́го моли́тва, и҆ бла́гъ всѣ́хъ содержа́нїе, ꙗ҆́кѡ ѡ҆чища́етъ се́рдце, въ не́мже бг҃ъ ꙗ҆влѧ́етсѧ вѣ̑рнымъ.

ѯ҃г. Ве́щь смиренномꙋ́дрїѧ, поне́же высокотво́рна є҆́сть по є҆стествꙋ̀, и҆ бг҃олюбе́зна, и҆ потреби́тельна всѣ́хъ почтѝ въ на́съ ѕѡ́лъ бг҃оненави́стныхъ, си́хъ ра́ди є҆сте́ственнѡ є҆́сть не ᲂу҆добоѡбрѣта́ема, и҆ ᲂу҆до́бь ѡ҆брѧ́щеши во є҆ди́номъ человѣ́цѣ мно́гихъ добродѣ́телей дѣ́ланїѧ нѣ̑кїѧ ча̑стныѧ, взыска́въ же въ не́мъ вонѝ смире́нїѧ є҆два̀ ѡ҆брѧ́щеши. Сегѡ̀ ра́ди потре́бно мно́гое тща́нїе, дабы̀ стѧжа́ти сїю̀ ве́щь. И҆́бо нечи́стымъ и҆ дїа́вола нарица́етъ писа́нїе: занѐ и҆сконѝ сїю̀ благꙋ́ю ве́щь смиренномꙋ́дрїѧ ѿри́нꙋ, и҆ го́рдость возлюбѝ. Сегѡ̀ ра́ди и҆ нечи́стымъ дꙋ́хомъ во все́мъ писа́нїи и҆менꙋ́етсѧ. Занѐ кꙋ́ю нечистотꙋ̀ плотскꙋ́ю мо́жетъ содѣ́лати совсѣ́мъ безтѣле́сный, и҆ безпло́тный, и҆ непостоѧ́нный, да нечи́стымъ ѿ сегѡ̀ глаго́летсѧ; Ꙗ҆́вѣ, ꙗ҆́кѡ за го́рдость нарече́сѧ нечи́стый, и҆ и҆з̾ чи́стагѡ и҆ свѣ́тлагѡ а҆́гг҃ла, ме́рзокъ ꙗ҆ви́сѧ. И҆ нечи́стъ пред̾ гдⷭ҇емъ всѧ́къ высокосе́рдый. Пе́рвый бо, глаго́летъ, грѣ́хъ є҆́сть го́рдость. Та́кѡ бо го́рдый фараѡ́нъ глаго́ла: бг҃а твоегѡ̀ не вѣ́мъ, и҆ і҆зра́илѧ не ѿпꙋщꙋ̀.²³⁸

ѯ҃д. Сꙋ́ть же мнѡ́гїѧ дѣ̑йствїѧ ᲂу҆ма̀ могꙋ́щыѧ на́мъ благі́й да́ръ смиренномꙋ́дрїѧ сниска́ти, а҆́ще не неради́мъ ѡ҆ спасе́нїи на́шемъ: си́рѣчь, воспомина́нїе согрѣше́нїй въ словесѣ́хъ, и҆ дѣ́лѣхъ, и҆ помышле́нїи, и҆ прѡ́чаѧ мнѡ́гаѧ къ смиренномꙋ́дрїю слꙋ́жатъ, видѣ́нїемъ собира́ємаѧ. Твори́тъ же смире́нїе и҆́стинное и҆ сїѐ, что́бы бли́жнихъ и҆справлє́нїѧ по всѧ́къ ча́съ во ᲂу҆мѣ̀ ѡ҆браща́ти, и҆ дрꙋгі̑ѧ є҆сте́ствєнныѧ преимꙋ́щєства въ себѣ̀ возвели́чивати и҆ и҆стѧ́зовати дѣла̀ ѻ҆́ныхъ со свои́ми. И҆ си́це є҆гда̀ ви́дитъ ᲂу҆́мъ свою̀ хꙋ́дость, и҆ коли́кѡ ѿстои́тъ ѻ҆́нъ ѿ соверше́нства бра́тнѧ, тогда̀ зе́млю и҆ пе́пелъ человѣ́къ себѐ бы́ти помышлѧ́етъ, а҆ не человѣ́ка, но пса̀ нѣ́коего, ꙗ҆́кѡ пред̾ всѣ́ми сꙋ́щими на землѝ слове́сными людьмѝ во все́мъ лиша́ема и҆ недоста́точествꙋюща.

ѯ҃є. Глаго́летъ, ᲂу҆ста̀ хрⷭ҇то́вы, сто́лпъ це́ркви, вели́кїй ѻ҆те́цъ на́шъ васі́лїй: Ве́лїе посо́бїе къ томꙋ̀, дабы̀ не согрѣша́ти, є҆́же не впа́дати и҆ въ пред̾идꙋ́щїй де́нь въ та̑ѧжде, є҆́же разсꙋжда́ти на́мъ по и҆сполне́нїи днѧ̀ въ со́вѣсти на́шей сами́хъ себѐ, и҆ ꙗ҆̀же ѡ҆ себѣ̀, что̀ согрѣши́хомъ, и҆ что̀ пра́ведно сотвори́хомъ. Сїѐ и҆ і҆́ѡвъ творѧ́ше съ собо́ю, и҆ со ча́ды свои́ми. Повседне́внаѧ во словоистѧза́тєльства повсеча́стнѣ просвѣща́ютъ.

ѯ҃ѕ. И҆ дрꙋгі́й па́ки и҆з̾ бж҃е́ственныхъ мꙋдре́цъ речѐ: Нача́ло плодоно́сїѧ є҆́сть цвѣ́тъ, а҆ нача́ло дѣ́ланїѧ воздержа́нїе. Да возде́ржимсѧ ᲂу҆̀бо, и҆ сїѐ твори́мъ мѣ́рою и҆ вѣ́сомъ, ꙗ҆́коже ѻ҆тцы̀ поꙋча́ютъ, и҆ ве́сь де́нь двана́десѧти часѡ́въ во блюде́нїи ᲂу҆ма̀ да прохо́димъ. Си́це бо творѧ́ще, ѕло́бꙋ нꙋ́ждею нѣ́коею ᲂу҆гаси́ти и҆ ᲂу҆меньши́ти возмо́жемъ съ бг҃омъ. Занѐ нꙋ́ждею стѧжава́етсѧ добродѣ́тельное житїѐ, є҆гѡ́же ра́ди дае́тсѧ ца́рствїе небе́сное.

ѯ҃з. Пꙋ́ть къ ра́зꙋмꙋ є҆́сть безстра́стїе и҆ смире́нїе, без̾ ни́хже никто́же ᲂу҆́зритъ гдⷭ҇а.

ѯ҃и. Непреста́ннѡ трꙋжда́ющїйсѧ ѡ҆ внꙋ́треннѣмъ, цѣломꙋ́дрствꙋетъ: не то́чїю же сїѐ, но и҆ зри́тъ, и҆ бг҃осло́вствꙋетъ, и҆ мо́литсѧ. И҆ сїѐ є҆́сть, є҆́же глаго́летъ а҆пⷭ҇лъ: дꙋ́хомъ ходи́те, и҆ по́хѡти плотскі̑ѧ не соверша́йте.²³⁹

ѯ҃ѳ. Дꙋхо́внымъ пꙋте́мъ ше́ствовати невѣ́дꙋщїй, ѡ҆ стра́стныхъ помышле́нїѧхъ не твори́тъ попече́нїѧ и҆ и҆справле́нїѧ: но всѐ ᲂу҆праждне́нїе и҆мѣ́етъ плотско́е, и҆лѝ ѡ҆б̾ѧда́етсѧ, и҆лѝ похотствꙋ́етъ, и҆лѝ печа́литсѧ, и҆лѝ гнѣ́ваетсѧ и҆ памѧтоѕло́бствꙋетъ и҆ ѿсю́дꙋ ᲂу҆́мъ помрача́етъ, и҆лѝ безмѣ́рный по́двигъ ᲂу҆потреблѧ́етъ, и҆ смꙋща́етъ мы́сль.

ѻ҃. Веще́й жите́йскихъ ѿре́кшїйсѧ, си́рѣчь жены̀ и҆ и҆мѣ́нїѧ, и҆ про́чихъ, внѣ́шнѧго человѣ́ка сотвори́лъ и҆́нокомъ, а҆ не внꙋ́треннѧго є҆щѐ, є҆́же є҆́сть ᲂу҆́мъ: ѿре́кшїйсѧ же пристра́стныхъ по́мыслѡвъ, се́й є҆́сть и҆́стинный и҆́нокъ, и҆ внѣ́шнѧго человѣ́ка ᲂу҆до́бь твори́тъ и҆́нокомъ, а҆́ще кто̀ восхо́щетъ. Не ма́лый же по́двигъ, внꙋ́треннѧго человѣ́ка сотвори́ти и҆́нока.

ѻ҃а. Кто̀ ᲂу҆́бѡ є҆́сть въ ро́дѣ се́мъ, и҆́же совсѣ́мъ и҆зба́висѧ пристра́стныхъ по́мыслѡвъ, и҆ чи́стыѧ и҆ невеще́ственныѧ вы́нꙋ сподо́бисѧ моли́твы, є҆́же є҆́сть зна́менїе внꙋ́треннѧгѡ и҆́нока.

ѻ҃в. Мнѡ́гїѧ стра̑сти въ дꙋша́хъ на́шихъ сокры́ты: тогда́ же ѡ҆блича́ютсѧ, є҆гда̀ вины̀ ꙗ҆влѧ́ютсѧ.

ѻ҃г. Не всѐ ᲂу҆праждне́нїе и҆мѣ́й во ѡ҆бꙋче́нїи пло́ти, но предѣ́лъ поста́ви ѻ҆́номꙋ поси́льный по́двигъ, и҆ ве́сь ᲂу҆́мъ тво́й ко внꙋ́трєннимъ ѡ҆братѝ: тѣле́сное бо ѡ҆бꙋче́нїе вма́лѣ є҆́сть поле́зно, а҆ благоче́стїе на всѐ поле́зно є҆́сть.²⁴⁰

ѻ҃д. Ѿ неборе́нїѧ страсте́й го́рдость прилꙋча́етсѧ, и҆лѝ вина́мъ ѿсѣка́ющымсѧ, и҆лѝ бѣсѡ́мъ кова́рнѡ ѿходѧ́щымъ.

ѻ҃є. Смире́нїе и҆ ѕлострада́нїе ѿ всѧ́кагѡ грѣха̀ свобожда́ютъ человѣ́ка, ѻ҆́во стра̑сти дꙋшє́вныѧ, ѻ҆́во же тѣлє́сныѧ пресѣка́юще. Сегѡ̀ ра́ди глаго́летъ гдⷭ҇ь: Блаже́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ,²⁴¹ є҆го̀ и҆ сꙋ́щыѧ въ не́мъ сокрѡ́вища, Є҆гда̀ любо́вїю и҆ воздержа́нїемъ себѧ̀ ѡ҆чи́стѧтъ: и҆ толи́кѡ мно́жае, є҆ли́кѡ па́че ѡ҆чища́тисѧ продолжа́ютъ.

ѻ҃ѕ. Созерца́лище ᲂу҆че́нїѧ всѧ́кїѧ добродѣ́тели, є҆́сть блюде́нїе ᲂу҆ма̀, ꙗ҆́коже дре́внїй дв҃довъ примѣ́ръ ѡ҆брѣ́занїе се́рдца пред̾ѧвѝ.

ѻ҃з. Ꙗ҆́коже чꙋ́вственнѡ врє́днаѧ зрѧ́ще, поврежда́емсѧ, си́це и҆ зрѧ́ще ᲂу҆мо́мъ.

ѻ҃и. Ꙗ҆́коже ᲂу҆ѧзви́вый се́рдце произрастѣ́нїѧ, всѐ ѻ҆́ное и҆зсꙋша́етъ: си́це и҆ ѡ҆ се́рдцѣ человѣ́ка разꙋмѣва́й. Въ то́тъ ча́съ внима́ти подоба́етъ, є҆гда̀ непра́здни та́тїе.

ѻ҃ѳ. Гдⷭ҇ь всѧ́кꙋю за́повѣдь до́лжною показа́ти хотѧ̀, сыноположе́нїе же свое́ю кро́вїю лю́демъ дарова́лъ, глаго́летъ: Є҆гда̀ сотворитѐ повелѣ̑ннаѧ ва́мъ, глаго́лите, ꙗ҆́кѡ рабѝ неключи́ми є҆смы̀, и҆ є҆́же до́лжни бѣ́хомъ сотвори́ти, сотвори́хомъ.²⁴² Сегѡ̀ ра́ди нѣ́сть мзда̀ дѣлѡ́мъ ца́рствїе нбⷭ҇ное, но благода́ть влⷣчнѧ, вѣ̑рнымъ рабѡ́мъ ᲂу҆гото́ваннаѧ. Не тре́бꙋетъ ра́бъ свобо́ды, ꙗ҆́кѡ мзды̀, но благодари́тъ, ꙗ҆́кѡ должни́къ, и҆ по благода́ти ѡ҆жида́етъ.

п҃. Хрⷭ҇то́съ ᲂу҆́мре за грѣхѝ на́шѧ, по писа́нїю, и҆ до́брѣ рабо́тающымъ є҆мꙋ̀ свобожде́нїе да́рꙋетъ. Глаго́летъ бо: Благі́й ра́бе и҆ вѣ́рный, ѡ҆ ма́лѣ бы́лъ є҆сѝ вѣ́ренъ, над̾ мно́гими тѧ̀ поста́влю: вни́ди въ ра́дость гдⷭ҇а твоегѡ̀.²⁴³ Є҆ще́ же ра́бъ нѣ́сть вѣ́ренъ, на высокоꙋ́мїе ѡ҆пира́ющїйсѧ, но послꙋша́нїемъ заповѣ́дꙋющемꙋ хрⷭ҇тꙋ̀ вѣ́рꙋющїй.

п҃а. И҆́же влⷣкꙋ чти́тъ, твори́тъ повелѣ̑ннаѧ ѿ негѡ̀: согрѣши́вый же и҆ преслꙋ́шавый терпи́тъ, ꙗ҆́кѡ своѧ́си находѧ̑щаѧ. Оу҆ченолюби́въ сы́й, бꙋ́ди и҆ трꙋдолюби́въ: высо́кїй бо ра́зꙋмъ надмѣва́етъ человѣ́ка.

п҃в. Неча́ѧннѡ прилꙋча́ющыѧсѧ на́мъ и҆скꙋшє́нїѧ смотри́тельнѣ на́съ трꙋдолюби́выми бы́ти наꙋча́ютъ.

п҃г. Сво́йственъ ѕвѣздѣ̀ сꙋ́щїй при не́й свѣ́тъ, благочести́вомꙋ же и҆ бг҃обоѧ́щемꙋсѧ сво́йственна хꙋ́дость и҆ смире́нїе. Занѐ не и҆но́е что̀ є҆́сть ѡ҆б̾ѧвлѧ́ющимъ и҆ показꙋ́ющимъ зна́менїе ᲂу҆ченикѡ́въ хрⷭ҇то́выхъ, то́чїю смиренномꙋ́дрїе и҆ хꙋды́й ѡ҆́бразъ, и҆ ѡ҆ се́мъ повсю́дꙋ вопїю́тъ четы́ре є҆ѵⷢ҇лїа. А҆ и҆́же не си́це, си́рѣчь, не смире́ннѡ живе́тъ, ѿпа́даетъ ѿ ча́сти смири́вшагѡ себѐ да́же до креста̀ и҆ сме́рти, и҆ бж҃е́ственныхъ є҆ѵⷢ҇лїй законополо́жника.

п҃д. Жа́ждꙋщїи, глаго́летъ, и҆ди́те на во́дꙋ:²⁴⁴ жа́ждꙋщїи бг҃а, и҆ди́те съ чи́стою мы́слїю. Ѻ҆ба́че высокопарѧ́щемꙋ ѻ҆́ною подоба́етъ зрѣ́ти и҆ къ землѝ своеѧ̀ хꙋ́дости: никто́же бо смире́ннагѡ вы́шшїй. Ꙗ҆́коже бо свѣ́тꙋ не сꙋ́щꙋ, мра̑чна и҆ тє́мна всѧ̑: си́це не сꙋ́щꙋ смиренномꙋ́дрїю, всѣ̀ на́ши тща̑нїѧ по бз҃ѣ сꙋ́єтны и҆ безполє́зны.

п҃є. Коне́цъ же сло́ва, всѐ слꙋ́шай: бг҃а бо́йсѧ, и҆ за́пѡвѣди є҆гѡ̀ хранѝ,²⁴⁵ и҆ ᲂу҆́мственнѡ и҆ чꙋ́вственнѡ. А҆́ще бо ᲂу҆́мственнѡ понꙋ́диши себѐ храни́ти ѧ҆̀, то̀ пома́лꙋ и҆ чꙋ́вственныхъ трꙋдѡ́въ въ ни́хъ тре́бовати бꙋ́деши. Глаго́летъ бо даві́дъ: Восхотѣ́хъ во́лю твою̀ и҆ зако́нъ тво́й сотвори́ти посредѣ̀ чре́ва моегѡ̀.²⁴⁶

п҃ѕ. А҆́ще не посредѣ̀ чре́ва, си́рѣчь, посредѣ̀ се́рдца, сотвори́тъ человѣ́къ во́лю бж҃їю и҆ зако́нъ: нижѐ внѣꙋ́дꙋ ᲂу҆до́бь сїѐ сотвори́ти мо́жетъ. И҆ рече́тъ къ бг҃ꙋ нетрезвѧ́щїйсѧ и҆ неради́вый, пꙋти̑ твоѧ̑ вѣ́дѣти не хощꙋ̀: коне́чнѡ по лише́нїю бж҃е́ственнагѡ просвѣще́нїѧ, є҆мꙋ́же причаща́ющїйсѧ не бꙋ́детъ не и҆звѣще́нъ, но дово́льнѡ тве́рдъ въ бж҃е́ственныхъ ве́щехъ.

п҃з. Ꙗ҆́коже бо чꙋ́вственнаѧ со́ль ᲂу҆слажда́етъ хлѣ́бъ, и҆ всѧ́кое варе́нїе и҆ мѧ́со несогни́вшимъ и҆ цѣ́лымъ сохранѧ́етъ: си́це и҆ ѡ҆ ᲂу҆́мномъ хране́нїи мы́сленныѧ сла́дости и҆ ди́внагѡ дѣ́ланїѧ разꙋмѣва́й: ᲂу҆слажда́етъ бо а҆́бїе и҆ внꙋ́треннѧго и҆ внѣ́шнѧго человѣ́ка, и҆ смра́дъ лꙋка́выхъ по́мыслѡвъ ѿгонѧ́етъ, и҆ цѣ́лыми на́съ во благи́хъ храни́тъ.

п҃и. Ѿ прило́га мно́гїе быва́ютъ по́мыслы, ѿ си́хъ же лꙋка́вое чꙋ́вственное дѣѧ́нїе. Но и҆́же со і҆и҃сомъ пе́рвое а҆́бїе погаша́етъ, послѣ́дꙋющихъ и҆збѣга́етъ, и҆ разꙋмѣ́нїемъ бж҃е́ственнымъ сла́достнымъ ѡ҆богати́тсѧ, и҆́мже бг҃а ѡ҆брѧ́щетъ вездѣ̀ сꙋ́ща: и҆ въ сїѐ зерца́ло ᲂу҆́мное зрѧ́щи просвѣща́етсѧ всегда̀ по подо́бїю чи́стагѡ стекла̀ и҆ чꙋ́вственнагѡ со́лнца. И҆ тогда̀ почі́етъ ᲂу҆́мъ, до послѣ́днѧгѡ жела́нїѧ дости́гши ѿ всѧ́кагѡ и҆но́гѡ въ не́мъ видѣ́нїѧ.

п҃ѳ. Поне́же всѧ́кїй по́мыслъ мечта́нїемъ чꙋ́вственныхъ нѣ́кїихъ веще́й вхо́дитъ въ се́рдце: тогда̀ ѡ҆сїѧва́етъ є҆го̀ блаже́нный свѣ́тъ бж҃ества̀, є҆гда̀ соверше́ннѡ ѿ всѣ́хъ ѻ҆́ныхъ ᲂу҆праздни́тсѧ, и҆ невоѡбраже́нъ ѿ си́хъ бꙋ́детъ. Занѐ свѣ́тлость ѻ҆́наѧ по лише́нїю всѣ́хъ помышле́нїй ꙗ҆влѧ́етсѧ въ чи́стомъ ᲂу҆мѣ̀.

ч҃. Є҆ли́кѡ мы́сли кра́йнѣ вне́млеши, потоли́кꙋ съ жела́нїемъ і҆и҃сꙋ моли́тисѧ бꙋ́деши: и҆ є҆ли́кѡ па́ки мы́сль лѣ́ностнѣ посѣща́еши, потоли́кꙋ и҆ і҆и҃са ᲂу҆дали́шисѧ. И҆ ꙗ҆́коже пе́рвое соверше́ннѣ воздꙋ́хъ мы́сленный просвѣща́етъ: си́це и҆ ᲂу҆клоне́нїе ѿ трезвѣ́нїѧ, и҆ сла́достнагѡ призыва́нїѧ і҆и҃са, навы́че помрача́ти ѻ҆́ный ѿвсю́дꙋ, ꙗ҆́коже бы́ти по є҆стествꙋ̀ ве́щи сицево́й, ꙗ҆́коже реко́хомъ, а҆ не и҆на́ковой. И҆ сїѐ и҆скꙋ́сомъ позна́еши дѣ́ломъ и҆спыта́нїѧ, занѐ не быва́етъ добродѣ́тель, и҆ наипа́че таково́е свѣторо́дное сла́достное дѣ́ланїе, а҆́ще не и҆скꙋ́сомъ и҆зꙋча́етсѧ.

ч҃а. Ча́стое призыва́нїе і҆и҃са съ жела́нїемъ нѣ́кїимъ, и҆спо́лненнымъ сла́дости и҆ ра́дости, вино́вно быва́етъ тогѡ̀, что̀ воздꙋ́хъ серде́чный и҆сполнѧ́етсѧ ра́дости и҆ тишины̀ ѿ кра́йнѧгѡ внима́нїѧ. Кра́йнѧгѡ же ѡ҆чище́нїѧ серде́чнагѡ вино́вникъ є҆́сть і҆и҃съ хрⷭ҇то́съ сн҃ъ бж҃їй и҆ бг҃ъ, всѣ́хъ благи́хъ вино́вникъ и҆ творе́цъ. а҆́зъ бо, глаго́летъ, бг҃ъ творѧ́й ми́ръ.²⁴⁷

ч҃в. Дꙋша̀ благодѣ́тельствꙋема и҆ ᲂу҆слажда́ема ѿ і҆и҃са, съ весе́лїемъ нѣ́кїимъ и҆ любо́вїю, и҆сповѣ́данїемъ благодѣ́телю хвалꙋ̀ воздае́тъ, благодарѧ́щи и҆ призыва́ющи съ весе́лїемъ творѧ́щаго є҆́й ми́ръ, и҆ посредѣ̀ себѐ ᲂу҆́мственнѡ зрѧ́щи є҆го̀ разрꙋша́юща мечта̑нїѧ лꙋка́выхъ дꙋхѡ́въ.

ч҃г. И҆ воззрѣ̀, глаго́летъ даві́дъ, ᲂу҆́мное ѻ҆́ко моѐ на ᲂу҆́мныѧ врагѝ моѧ̑, и҆ востаю́щыѧ на мѧ̀ лꙋка́внꙋющыѧ ᲂу҆слы́шитъ ᲂу҆́хо моѐ:²⁴⁸ и҆ воздаѧ́нїе грѣ́шныхъ ви́дѣхъ ѿ бг҃а во мнѣ̀ быва́ющее. Мечта́нїѧмъ же не сꙋ́щымъ въ се́рдцѣ, въ є҆сте́ственномъ положе́нїи ᲂу҆́мъ состои́тъ, гото́въ сы́й дви́житисѧ ко всѧ́комꙋ видѣ́нїю сла́достномꙋ, дꙋхо́вномꙋ и҆ бг҃олюбе́зномꙋ.

ч҃д. Си́це ᲂу҆́бѡ, ꙗ҆́коже рѣ́хъ, трезвѣ́нїе и҆ моли́тва і҆и҃сова, навыко́ша ѻ҆дно̀ дрꙋго́е составлѧ́ти кра́йнее внима́нїе, ча́стꙋю моли́твꙋ, моли́тва же па́ки кра́йнее въ ᲂу҆мѣ̀ трезвѣ́нїе и҆ внима́нїе.

ч҃є. До́брый наста́вникъ є҆́сть и҆ тѣ́лꙋ и҆ дꙋшѣ̀ незабве́ннаѧ па́мѧть сме́рти, и҆ є҆́же посредѣ̀ всѧ̑ преше́дши ᲂу҆мо́мъ, прозира́ти при́снѡ то́й ѻ҆́дръ, на не́мже дꙋшѣ̀ разлꙋчи́вшейсѧ и҆мѣ́емъ возлежа́ти, и҆ прѡ́чаѧ.

ч҃ѕ. Не мо́жно, бра́тїе, со́нъ прїѧ́ти хотѧ́щемꙋ неꙋѧ́звленнымъ вы́нꙋ пребыва́ти: но слѣ́дꙋетъ бы́ти чемꙋ́либо и҆з̾ двꙋ́хъ си́хъ, и҆лѝ па́сти и҆лѝ поги́бнꙋти ѡ҆бнажи́вшꙋсѧ добродѣ́телей, и҆лѝ вы́нꙋ ᲂу҆мꙋ̀ стоѧ́ти воѡрꙋже́ннꙋ. И҆́бо и҆ вра́гъ при́снѡ стои́тъ со свои́мъ ѡ҆полче́нїемъ.

ч҃з. Быва́етъ и҆справле́нїе нѣ́кое бж҃е́ственное во ᲂу҆мѣ̀ на́шемъ ѿ непреста́нныѧ па́мѧти, и҆ призыва́нїѧ гдⷭ҇а на́шегѡ і҆и҃са хрⷭ҇та̀, а҆́ще не неради́мъ ѡ҆ всегда́шнемъ моле́нїи ᲂу҆мо́мъ къ немꙋ̀, и҆ ча́стомъ трезвѣ́нїи, и҆ поꙋча́емомъ дѣ́лѣ: но вои́стиннꙋ то́ежде при́сное дѣ́ланїе и҆ та́кожде соверша́юще, да и҆́мамы призыва́нїе і҆и҃са хрⷭ҇та̀ гдⷭ҇а на́шегѡ съ раздеже́нїемъ се́рдца вопїю́ще, дабы̀ прїѧ́ти ст҃о́е и҆́мѧ і҆и҃сово. Оу҆чаще́нїе бо и҆ въ добродѣ́тели и҆ ѕло́бѣ ма́терь є҆́сть навыкнове́нїѧ: сїе́ же ꙗ҆́кѡ є҆стество̀ ᲂу҆жѐ соде́ржитсѧ. И҆ въ таково́мъ состоѧ́нїи бы́въ ᲂу҆́мъ, и҆́щетъ сꙋпоста́ты, ꙗ҆́коже пе́съ ѕвѣроло́вный за́йца въ ча́щахъ: но се́й да поѧ́стъ, а҆ ѻ҆́ный да и҆стли́тъ.

ч҃и. Є҆гда̀ ᲂу҆́бѡ, и҆ є҆ли́кѡ прилꙋча́етсѧ ᲂу҆мно́житисѧ въ на́съ лꙋка̑вымъ помыслѡ́мъ, призыва́нїе гдⷭ҇а на́шегѡ і҆и҃са хрⷭ҇та̀ посредѣ̀ ѻ҆́ныхъ ᲂу҆потреби́мъ, и҆ разрꙋша́ющихсѧ и҆̀мъ а҆́бїе тогда̀ ꙗ҆́кѡ ды́мъ на воздꙋ́хѣ ᲂу҆́зримъ, ꙗ҆́коже и҆скꙋ́съ наꙋчѝ: и҆ ᲂу҆мꙋ̀ є҆ди́номꙋ ѡ҆ста́вльшꙋсѧ тогда̀, па́ки да начина́емъ непреста́нное внима́нїе и҆ призыва́нїе. И҆ є҆ли́кѡ ѡ҆ и҆скꙋше́нїѧ сїѐ ни постра́ждемъ, си́це да твори́мъ.

ч҃ѳ. Ꙗ҆́коже бо невозмо́жно наго́мꙋ тѣ́ломъ вни́ти во бра́нь, и҆лѝ преплы́ти вели́кое мо́ре со ѻ҆де́ждею, и҆лѝ жи́ти не дыха́ющемꙋ: си́це невозмо́жно без̾ смире́нїѧ, и҆ ча́стагѡ ко хрⷭ҇тꙋ̀ моле́нїѧ ᲂу҆́мной и҆ сокрове́нной бра́ни и҆з̾ꙋчи́тисѧ, и҆ и҆скꙋ́снѡ сїю̀ ѿгонѧ́ти и҆ низверга́ти.

р҃. Великодѣ́ѧтельный даві́дъ глаго́летъ ко гдⷭ҇ꙋ: Держа́вꙋ мою̀ къ тебѣ̀ сохраню̀.²⁴⁹ Почемꙋ̀ сохране́нїе въ на́съ держа́вы серде́чнагѡ и҆ ᲂу҆́мнагѡ безмо́лвїѧ, ѿ негѡ́же всѣ̀ ражда́ютсѧ добродѣ́тєли, быва́ютъ ѿ тогѡ̀, что̀ полꙋча́емъ мы̀ по́мощь ѿ гдⷭ҇а, ча́стѡ на́ми призыва́емагѡ, даю́щагѡ и҆ за́пѡвѣди, и҆ ѿгонѧ́ющагѡ ѿ на́съ скве́рное забве́нїе, растлѣва́ющее наипа́че серде́чное безмо́лвїе, ꙗ҆́коже вода̀ ѻ҆́гнь. Тѣ́мже, ѽ и҆́ноче, да не ѿ лѣ́ности ᲂу҆́снеши въ сме́рть: но і҆и҃совымъ и҆́менемъ бі́й сꙋпоста́ты и҆ ꙗ҆́коже премꙋ́дрый нѣ́кто глаго́лаше: І҆и҃сово и҆́мѧ да прильпне́тъ дыха́нїю твоемꙋ̀, и҆ тогда̀ ᲂу҆разꙋмѣ́еши по́льзꙋ безмо́лвїѧ.

р҃а. Є҆гда̀ бж҃е́ственныхъ и҆ пречи́стыхъ та̑инъ хрⷭ҇та̀ бг҃а и҆ цр҃ѧ̀ на́шегѡ со стра́хомъ и҆ тре́петомъ сподо́бимсѧ недосто́йнїи: тогда̀ наипа́че трезвѣ́нїе и҆ блюде́нїе ᲂу҆ма̀ и҆ ѡ҆пасе́нїе пока́жемъ, да потреби́тъ грѣхѝ на́шѧ, и҆ ма́лыѧ и҆ вели́кїѧ сквє́рны, ѻ҆́гнь бж҃е́ственный, си́рѣчь тѣ́ло гдⷭ҇а на́шегѡ і҆и҃са хрⷭ҇та̀. Входѧ́ бо въ на́съ, лꙋка́выѧ дꙋ́хи а҆́бїе ѿ се́рдца ѿгонѧ́етъ, и҆ пре́жде бы́вшыѧ грѣхѝ на́мъ проща́етъ: и҆ ѡ҆стае́тсѧ тогда̀ ᲂу҆́мъ без̾ смꙋще́нїѧ ѿ лꙋка́выхъ помыслѡ́въ. И҆ а҆́ще посе́мъ соверше́ннѡ ᲂу҆́мъ на́шъ соблюде́мъ, стоѧ̀ во две́рехъ се́рдца на́шегѡ: є҆гда̀ па́ки ѻ҆́ныхъ сподо́бимсѧ, па́че и҆ па́че бж҃е́ственное тѣ́ло просвѣща́ечъ ᲂу҆́мъ, и҆ свѣтозра́чнымъ є҆го̀ твори́тъ.

р҃в. Забве́нїе погаша́ти вѣ́сть хране́нїе ᲂу҆ма̀, ꙗ҆́коже вода̀ погаша́етъ ѻ҆́гнь. Ча́стаѧ же моли́тва і҆и҃сова до конца̀ ѻ҆́ное и҆згонѧ́етъ и҆з̾ се́рдца со трезвѣ́нїемъ крѣ́пкимъ. Тре́бꙋетъ бо моли́тва трезвѣ́нїѧ, ꙗ҆́коже свѣти́льникъ свѣ́та свѣ́щнагѡ.

р҃г. Болѣ́ти²⁵⁰ подоба́етъ ѡ҆ хране́нїи честны́хъ: честна̑ѧ же вои́стиннꙋ сꙋ́ть, хранѧ̑щаѧ на́съ ѿ всѧ́кїѧ ѕло́бы чꙋ́вственныѧ и҆ ᲂу҆́мственныѧ. Сїѧ́ же сꙋ́ть хране́нїе ᲂу҆ма̀ со призыва́нїемъ і҆и҃са хрⷭ҇та̀, и҆ зрѣ́ти при́снѡ во глꙋбинꙋ̀ се́рдца, и҆ безмо́лвствовати всегда̀ мы́слїю, да си́це рекꙋ̀, и҆ ѿ по́мыслѡвъ мнѧ́щихсѧ пра́выми бы́ти, и҆ тща́тисѧ пра́зднꙋ бы́ти ѿ по́мыслѡвъ, да не ᲂу҆таѧ́тсѧ та́тїе: и҆ а҆́ще и҆ боли́мъ соблюда́юще се́рдце, но бли́зъ ᲂу҆тѣше́нїе.

р҃д. Навы́че се́рдце непреста́ннѡ блюдꙋ́щеесѧ и҆ не терпѧ́щее прїима́ти ви́ды, ѡ҆́бразы и҆ мечта̑нїѧ мра́чныхъ и҆ лꙋка́выхъ дꙋхѡ́въ, мы̑сли свѣтозра̑чныѧ ѿ себѧ̀ ражда́ти. Ꙗ҆́коже бо ᲂу҆́гль ражда́етъ пла́мень: си́це мно́жае па́че ѡ҆бита́ющїй въ се́рдцѣ бг҃ъ ѿ ст҃а́гѡ креще́нїѧ, а҆́ще ѡ҆брѣта́етъ воздꙋ́хъ се́рдца на́шегѡ чи́стъ ѿ вѣ́трѡвъ лꙋка́выхъ, и҆ ѿ хране́нїѧ ᲂу҆ма̀ соблюда́емь, возжиза́етъ ᲂу҆́мъ на́шъ къ зрѣ́нїю, ꙗ҆́коже пла́мень во́скъ.

р҃є. Подоба́етъ при́снѡ ѡ҆браща́ти во вмѣсти́лищи се́рдца на́шегѡ и҆́мѧ і҆и҃са хрⷭ҇та̀, ꙗ҆́коже мо́лнїѧ ѡ҆браща́етсѧ на воздꙋ́хѣ тве́рди, дождю̀ хотѧ́щꙋ и҆тѝ. Сїе́ бо и҆звѣ́стнѡ вѣ́дѧтъ и҆скꙋ́съ ᲂу҆ма̀ и҆ внꙋ̑треннїѧ бра̑ни и҆мꙋ́щїи. Ꙗ҆́коже и҆ въ полкꙋ̀, си́це ᲂу҆́мною бра́нїю да во́инствꙋемъ. Вопе́рвыхъ ᲂу҆потреби́мъ внима́нїе: пото́мъ ᲂу҆разꙋмѣ́вше врага̀, по́мыслъ вложи́вша, словесы̑ клѧ́твенными ѿ се́рдца со гнѣ́вомъ є҆го̀ ѿго́нимъ: тре́тїй чи́нъ є҆́сть, а҆́бїе помоли́тисѧ на́нь ѡ҆браща́юще се́рдце со призыва́нїемъ і҆и҃са хрⷭ҇та̀, да а҆́бїе разрꙋши́тсѧ бѣсо́вское со́нїе, да не послѣ́дꙋетъ мечта́нїю ᲂу҆́мъ, ꙗ҆́коже младе́нецъ, ѿ нѣ́коегѡ мечтаннотво́рца мечты̀ творѧ́ща, прельща́емь.

р҃ѕ. Потрꙋди́мсѧ, ꙗ҆́коже дв҃дъ, зовꙋ́ще: гдⷭ҇и і҆и҃се хрⷭ҇тѐ, да и҆змо́лкнетъ горта́нь на́ша, и҆ да не ѡ҆ста́вѧтъ ᲂу҆́мнаѧ ѻ҆чеса̀ на̑ша надѣ́ѧтисѧ на гдⷭ҇а бг҃а на́шего.²⁵¹

р҃з. Помина́емъ при́снѡ при́тчꙋ непра́веднагѡ сꙋдїѝ, въ не́йже речѐ гдⷭ҇ь: ꙗ҆́кѡ подоба́етъ на́мъ всегда̀ моли́тисѧ, и҆ не стꙋжа́ти сѝ,²⁵² и҆ по́льзꙋ ѡ҆брѧ́щемъ и҆ ѿмще́нїе.

р҃и. Ꙗ҆́коже взира́ющемꙋ на со́лнце, нѣ́сть мо́щно зра́кꙋ є҆гѡ̀ не ѡ҆зари́тисѧ бога́тнѡ: си́це при́снѡ вника́ѧй въ воздꙋ́хъ серде́чный, не мо́жетъ не просвѣти́тисѧ.

р҃ѳ. Ꙗ҆́коже не возмо́жно настоѧ́щее житїѐ продолжа́ти без̾ пи́щи и҆ питїѧ̀: си́це не возмо́жно без̾ хране́нїѧ ᲂу҆ма̀ и҆ чистоты̀ се́рдца, є҆́же є҆́сть и҆ глаго́летсѧ трезвѣ́нїе, въ дꙋхо́вное нѣ́что и҆ бг҃оꙋго́дное дости́гнꙋти дꙋшѣ̀, и҆лѝ свободи́тисѧ мы́сленнагѡ грѣха̀, а҆́ще и҆ нꙋ́дитъ кто̀ себѧ̀ стра́ха ра́ди мꙋ́къ не согрѣша́ти.

р҃і. Ѻ҆ба́че и҆ ᲂу҆далѧ́ющїисѧ дѣ́йственнагѡ грѣха̀ нꙋ́ждею нѣ́коею, блаже́ни пред̾ бг҃омъ и҆ а҆́гг҃лами и҆ человѣ́ками, ꙗ҆́кѡ нꙋ̑ждницы црⷭ҇твїѧ нбⷭ҇нагѡ ѡ҆брѣта́ютсѧ.

ра҃і. Сїѐ є҆́сть ди́вно ᲂу҆́мныѧ по́льзы, ꙗ҆́же ѿ безмо́лвїѧ, ꙗ҆́кѡ ᲂу҆́мственнаѧ и҆ тре́звѣннаѧ добродѣ́тель всѧ̑ согрѣшє́нїѧ, во ᲂу҆́мъ пе́рвѣе толкꙋ́щаѧ по́мыслами то́чїю, дабы̀ а҆́ще прїѧ́ты бꙋ́дꙋтъ мы́слїю, бы́ти согрѣше́нїѧмъ чꙋ́вствєннымъ и҆ дебе́лымъ, ѿсѣка́етъ во внꙋ́треннѣмъ на́шемъ человѣ́цѣ, не попꙋща́ѧ ѻ҆́нымъ прїитѝ и҆ произвѣсти́сѧ въ лꙋка́выѧ дѣла̀ си́лою и҆ застꙋпле́нїемъ гдⷭ҇а на́шегѡ і҆и҃са хрⷭ҇та̀.

рв҃і. Ѡ҆́бразъ внѣ́шнѧгѡ и҆ чꙋ́вственнагѡ тѣле́снагѡ ѡ҆бꙋче́нїѧ є҆́сть ве́тхїй завѣ́тъ. Ст҃о́е же є҆ѵⷢ҇лїе є҆́же є҆́сть но́вый завѣ́тъ, ѡ҆́бразъ є҆́сть внима́нїѧ, си́рѣчь, чистоты̀ се́рдца: и҆ ꙗ҆́коже ве́тхїй не соверша́ше, нижѐ и҆сполнѧ́ше внꙋ́треннѧго человѣ́ка ко благоче́стїю. Ничто́же бо, глаго́летъ а҆пⷭ҇лъ, соверши́лъ зако́нъ:²⁵³ но то́чїю дебє́лаѧ согрѣшє́нїѧ возбранѧ́ше. Ѿсѣщи́ бо и҆ по́мыслы ѿ се́рдца, и҆ лꙋка́ваѧ помышлє́нїѧ, є҆́же є҆́сть повелѣ́нїе є҆ѵⷢ҇лїа, вѧ́щше слꙋ́житъ къ чистотѣ̀ дꙋше́вной, не́жели не возбрани́ти и҆з̾има́ти ѻ҆́ко и҆ зꙋ́бъ бли́жнѧгѡ, си́це разꙋмѣ́й и҆ ѡ҆ тѣле́сной пра́вдѣ, и҆ ѡ҆бꙋче́нїи, ѡ҆ постѣ̀, глаго́лю и҆ воздержа́нїи, долꙋлега́нїи, стоѧ́нїи, бдѣ́нїи и҆ ѡ҆ про́чихъ, ꙗ҆̀же тѣ́ломъ быва́ютъ, и҆ стра́стнꙋю ча́сть тѣлесѐ ᲂу҆кроща́ютъ ѿ дѣ́ѧтельнагѡ грѣха̀. Добра̑ сꙋ́ть и҆ сїѧ̑, ꙗ҆̀же реко́хъ ѡ҆ ве́тхомъ завѣ́тѣ: наставле́нїе бо сꙋ́ть внѣ́шнемꙋ на́шемꙋ человѣ́кꙋ, и҆ храни́тель ѿ дѣ́ѧтельныхъ страсте́й: но не хранѧ́тъ ѿ согрѣше́нїй мы́сленныхъ, си́рѣчь, не возбранѧ́ютъ ѻ҆́ныѧ, та́къ что́бы и҆зба́вити на́съ, съ бж҃їею по́мощїю, ѿ за́висти гнѣ́ва и҆ про́чихъ.

рг҃і. Чистота́ же серде́чнаѧ, си́рѣчь блюде́нїе ᲂу҆ма̀ и҆ хране́нїе є҆ѧ́же ѡ҆́бразъ но́вый завѣ́тъ, а҆́ще, ꙗ҆́кѡ подоба́етъ, ѿ на́съ храни́тсѧ, всѣ̀ стра̑сти и҆ всѧ̑ ѕла̑ѧ и҆з̾ се́рдца и҆скоренѧ́ющи ѿсѣка́етъ, и҆ вмѣ́стѡ тогѡ̀ вво́дитъ ра́дость, благоꙋпова́нїе, ᲂу҆миле́нїе, пла́чь, сле́зы, ᲂу҆разꙋмѣ́нїе сами́хъ себѧ̀ и҆ грѣхѡ́въ свои́хъ, па́мѧть сме́рти, смире́нїе и҆́стинное, любо́вь безконе́чнꙋю къ бг҃ꙋ и҆ человѣ́кѡмъ, и҆ ра́дость бж҃е́ственнꙋю серде́чнꙋю.

рд҃і. Ꙗ҆́коже не мо́щно не пресѣца́ти сегѡ̀ воздꙋ́ха по землѝ ходѧ́щемꙋ: си́це не мо́щно нера́тꙋемꙋ бы́ти всегда̀ ѿ бѣсѡ́въ се́рдцꙋ человѣ́ческомꙋ, и҆лѝ что́бы ѻ҆нѝ та́йнѡ въ ѻ҆́номъ не дѣ́йствовали, а҆́ще и҆ мно́гое и҆́мать тѣле́сное ѡ҆бꙋче́нїе.

рє҃і. А҆́ще хо́щеши ѡ҆ гдⷭ҇ѣ, не да пока́жешисѧ то́чїю и҆́нокомъ и҆ благи́мъ и҆ кро́ткимъ, и҆ съ бг҃омъ всегда̀ соедине́ннымъ, но и҆ вои́стиннꙋ хо́щеши бы́ти таковы́мъ: добродѣ́тель внима́нїѧ все́ю си́лою проходѝ, ꙗ҆́же є҆́сть хране́нїе и҆ блюде́нїе ᲂу҆ма̀, и҆ серде́чное соверше́нїе сла́дкагѡ безмо́лвїѧ, немечта́тельное блаже́нное дꙋшѝ состоѧ́нїе, ве́щь не во мно́зѣхъ ѡ҆брѣта́емаѧ.

рѕ҃і. Добродѣ́тель бо внима́нїѧ глаго́летсѧ ᲂу҆́мное любомꙋ́дрїе. Проходѝ сїю̀ со мно́гимъ трезвѣ́нїемъ и҆ те́плымъ ᲂу҆се́рдїемъ, съ моли́твою і҆и҃совою, со смире́нїемъ, со благоразꙋ́мїемъ, и҆ съ молча́нїемъ чꙋ́вственныхъ ᲂу҆сте́нъ и҆ ᲂу҆́мныхъ, съ воздержа́нїемъ бра́шенъ и҆ питїѧ̀, и҆ всѧ́кїѧ грѣхо́вныѧ ве́щи. Продолжа́й сїю̀ пꙋте́мъ мы́сленнымъ съ мꙋ́дростїю, и҆ ѻ҆на̀ тѧ̀ наꙋчи́тъ, съ по́мощїю бж҃їею, томꙋ̀, чегѡ̀ не вѣ́си, и҆ возвѣсти́тъ, и҆ просвѣти́тъ, и҆ вразꙋми́тъ, и҆ наꙋчи́тъ томꙋ̀, чегѡ̀ пре́жде во ᲂу҆́мъ прїѧ́ти не мо́глъ є҆сѝ, во тьмѣ̀ страсте́й ходѧ̀, и҆ те́мныхъ дѣ́лъ, и҆ забве́нїемъ и҆ смꙋще́нїемъ бе́здны покрыва́емь.

рз҃і. Ꙗ҆́коже ᲂу҆дѡ́лїѧ ᲂу҆множа́етъ пшени́цꙋ: си́це добродѣ́тель внима́нїѧ ᲂу҆множа́етъ въ се́рдцѣ всѧ́кое бла́го. Па́че же гдⷭ҇ь на́шъ і҆и҃съ хрⷭ҇то́съ сїѧ̑ подае́тъ тѝ: без̾ негѡ́же не мо́жемъ твори́ти ничесѡ́же. И҆ пе́рвѣе ѡ҆брѧ́щеши ю҆̀ лѣ́ствицею, пото́мъ же кни́гою прочи́тываемою, та́же пред̾ꙋспѣва́ѧ, ѡ҆брѧ́щеши са́мый гра́дъ і҆ерꙋсали́мъ небе́сный, и҆ цр҃ѧ̀ си́лъ хрⷭ҇та̀ і҆зра́илева ꙗ҆́снѡ ᲂу҆́мственнѡ ᲂу҆́зриши со є҆диносꙋ́щнымъ є҆гѡ̀ ѻ҆ц҃е́мъ и҆ покланѧ́емымъ ст҃ы́мъ дх҃омъ.

ри҃і. Мечта́нїемъ лжи́вымъ при́снѡ бѣ́сове приво́дѧтъ на́съ на согрѣше́нїе. И҆́бо мечта́нїемъ сребролю́бїѧ и҆ прибы́тка, ѻ҆каѧ́ннаго і҆ꙋ́дꙋ ᲂу҆гото́ваша преда́ти гдⷭ҇а и҆ бг҃а всѣ́хъ: лже́ю же ничто́жнагѡ ᲂу҆спокое́нїѧ тѣле́снагѡ и҆ че́сти и҆ прибы́тка и҆ сла́вы, во ᲂу҆давле́нїе є҆го̀ вовлеко́ша, и҆ вѣ́чнꙋю сме́рть є҆мꙋ̀ и҆схода́тайствоваша, совсѣ́мъ проти́въ мечта́нїѧ своегѡ̀ прило́га, глаго́лю, возмезди́вше є҆мꙋ̀ кова́рнїи.

рѳ҃і. Зрѝ, ка́кѡ мечта́нїемъ и҆ лже́ю, и҆ тще́тными ѡ҆бѣща́нїѧми низверга́ютъ на́съ врагѝ спасе́нїѧ на́шегѡ, и҆ са́мъ сатана̀ си́це съ высоты̀, ꙗ҆́кѡ мо́лнїѧ низве́ржесѧ, ра́внымъ бг҃ꙋ возмечта́всѧ: си́це па́ки и҆ а҆да́ма разлꙋчѝ ѿ бг҃а: бж҃е́ственное досто́инство предста́вивъ є҆мꙋ̀: и҆ си́це всѣ́хъ согрѣша́ющихъ прельща́ти навы́че лжи́вый и҆ кова́рный вра́гъ.

р҃к. Ѡ҆горча́еми быва́емъ се́рдцемъ ѿ ꙗ҆́да по́мыслѡвъ лꙋка́выхъ, є҆гда̀ внима́нїе и҆ і҆и҃совꙋ моли́твꙋ на мно́зѣ ѡ҆ставлѧ́емъ, ѿ забве́нїѧ нерадѧ́ще. Оу҆слажда́еми же па́ки быва́емъ чꙋ́вствїемъ, и҆ сла́достїю нѣ́кою блаже́нныѧ ра́дости, є҆гда̀ предречє́ннаѧ тве́рдѡ и҆ ᲂу҆се́рднѡ въ дѣ́лателищи мы́сленномъ прилѣ́жнѡ, любо́вїю бж҃е́ственною соверша́емъ. Тогда́ бо не за и҆но́е что̀ въ серде́чномъ безмо́лвїи ходи́ти гото́ви быва́емъ, то́чїю за сла́дкое ѻ҆́наго въ дꙋшѣ̀ чꙋ́вствїе и҆ весе́лїе.

рк҃а. Хꙋдо́жество хꙋдо́жествъ, и҆ хи́трость хи́тростей є҆́сть ᲂу҆хищре́нїе ѕлодѣ́йственныхъ по́мыслѡвъ. Превосхо́дный ᲂу҆̀бо є҆́сть ѡ҆́бразъ и҆ и҆скꙋ́сство, зрѣ́ти ѡ҆ гдⷭ҇ѣ мечта́нїе прило́га и҆́хъ, и҆ храни́ти мы́сль, ꙗ҆́коже храни́мъ чꙋ́вственное ѻ҆́ко, и҆ ѻ҆стрѡ̀ ѻ҆́нымъ ви́димъ грѧдꙋ́щаго порази́ти ѻ҆́ное наи́тїемъ, и҆ є҆ли́кѡ мо́жно, всѧ́кїй сꙋче́цъ ѿража́емъ ѿ негѡ̀.

рк҃в. Ꙗ҆́коже не роди́тъ снѣ́гъ пла́мене, и҆лѝ вода̀ ѻ҆гнѧ̀, и҆лѝ те́рнъ смо́квы: си́це не свободи́тсѧ се́рдце всѧ́кагѡ человѣ́ка ѿ бѣсо́вскихъ по́мыслѡвъ, и҆ слове́съ и҆ дѣ́лъ, не ѡ҆чи́стивъ внꙋ́трєннѧѧ, не совокꙋпи́въ трезвѣ́нїѧ съ моли́твою і҆и҃совою, не и҆спра́вивъ смире́нїѧ и҆ дꙋше́внагѡ безмо́лвїѧ, не поспѣша́ѧ, и҆ не пꙋтеше́ствꙋѧ со мно́гимъ ᲂу҆се́рдїемъ. Но подоба́етъ невнима́тельной дꙋшѣ̀ ко всѧ́комꙋ благо́мꙋ и҆ соверше́нномꙋ ра́зꙋмꙋ безпло́дною бы́ти, ꙗ҆́кѡ мскꙋ̀ безпло́дномꙋ, въ не́йже нѣ́сть разꙋмѣ́нїѧ дꙋхо́вныѧ мꙋ́дрости. Вои́стиннꙋ сла́дкаѧ є҆́сть ве́щь ми́ръ дꙋше́вный, и҆ и҆́мѧ і҆и҃сово, и҆ и҆стоща́нїе по́мыслѡвъ стра́стныхъ.

рк҃г. Є҆гда̀ ѕлѣ̀ совѣща́етъ дꙋша̀ съ тѣ́ломъ, тогда̀ ѻ҆́ба созида́етъ гра́дъ тщесла́вїѧ, и҆ сто́лпъ го́рдости, и҆ ѡ҆бита́ющыѧ въ ни́хъ нечести̑выѧ по́мыслы. Гдⷭ҇ь же стра́хомъ гее́нны согла́сїе и҆́хъ возмꙋща́етъ и҆ раздѣлѧ́етъ, понꙋжда́ѧ влады́чицꙋ дꙋ́шꙋ чꙋжда̑ѧ и҆ проти̑внаѧ тѣ́лꙋ глаго́лати и҆ мꙋ́дрствовати, ѿ ко́егѡ стра́ха и҆ раздѣле́нїе прилꙋча́етсѧ: Занѐ мꙋдрова́нїе плотско́е, вражда̀ на бг҃а є҆́сть, и҆ зако́нꙋ бж҃їю не покарѧ́етсѧ.²⁵⁴

рк҃д. Повседнє́внаѧ на̑ша дѣла̀ подоба́етъ вѣ́сити по всѧ́къ ча́съ, и҆ внима́ти, и҆ ле́гкими, є҆ли́кѡ возмо́жно, твори́ти: ѻ҆́ныѧ надлежи́тъ въ ве́черъ покаѧ́нїемъ, а҆́ще хо́щемъ со хрⷭ҇то́мъ ѕло́бꙋ побѣди́ти: и҆ разꙋмѣва́ти подоба́етъ, а҆́ще по бз҃ѣ соверша́емъ всѧ̑ чꙋ́вствєннаѧ и҆ ви̑димаѧ на̑ша дѣла̀ пред̾ бг҃омъ, и҆ длѧ бг҃а є҆ди́нагѡ, да не ѿ чꙋ́вственныхъ безслове́снѣ крадо́мы быва́емъ.

рк҃є. А҆́ще по всѧ́къ де́нь прїѡбрѣта́емъ, съ по́мощїю бж҃їею, ѿ трезвѣ́нїѧ на́шегѡ, не до́лжны є҆смы̀ безразсꙋ́днѡ ѡ҆браща́тисѧ, и҆ погꙋблѧ́тисѧ ѿ мно́гихъ ѻ҆па́сныхъ бесѣ́дъ: но па́че презира́ти подоба́етъ сꙋ́єтнаѧ, за любе́зное и҆ сла́дкое прїѡбрѣ́тенїе, и҆ красотꙋ̀ ѻ҆́ныѧ добродѣ́тели.

рк҃ѕ. Пра́ведно, ꙗ҆́коже созда́сѧ по є҆стествꙋ̀ ѿ бг҃а, до́лжны мы̀ подвиза́ти треча́стїе дꙋшѝ: ꙗ҆́рость на внѣ́шнѧго на́шего человѣ́ка, и҆ на ѕмі́ѧ сатанꙋ̀. Гнѣ́вайтесѧ, глаго́летъ, на грѣ́хъ: си́рѣчь, гнѣ́вайтесѧ на сами́хъ себѐ, и҆ на дїа́вола, да не къ бг҃ꙋ согрѣша́ете. Жела́нїе подвиза́ти подоба́етъ къ бг҃ꙋ и҆ добродѣ́тели: слове́сность же над̾ ѻ҆бои́ми си́ми съ премꙋ́дростїю и҆ хи́тростїю поста́вимъ ᲂу҆чрежда́ти, ᲂу҆чи́ти, мꙋ́чити и҆ нача́льствовати, ꙗ҆́коже ца́рь нача́льствꙋетъ над̾ раба́ми. И҆ є҆гда̀ поста́вимъ ра́зꙋмъ ѡ҆блада́телемъ си́хъ, тогда̀ по бз҃ѣ си́ми ра́зꙋмъ на́шъ ᲂу҆правлѧ́етъ, а҆́ще и҆ востаю́тъ на него̀ стра̑сти: глаго́летъ бо бра́тъ гдⷭ҇нь: А҆́ще кто̀ въ сло́вѣ не согрѣша́етъ, се́й соверше́нъ мꙋ́жъ, си́ленъ ѡ҆бꙋзда́ти и҆ всѐ тѣ́ло,²⁵⁵ и҆ прѡ́чаѧ. Зане́же и҆́стинꙋ рещѝ, всѧ́кое беззако́нїе и҆ грѣ́хъ ѿ си́хъ трїе́хъ соверша́етсѧ, и҆ всѧ́каѧ добродѣ́тель и҆ пра́вда ѿ ѻ҆́ныхъ трїе́хъ составлѧ́етсѧ.

рк҃з. Тогда̀ ᲂу҆́мъ помрача́етсѧ и҆ непло́днымъ пребыва́етъ, є҆гда̀ и҆лѝ словеса̀ мїрска̑ѧ глаго́лати бꙋ́детъ, и҆лѝ въ мы́сль прїи́мши бесѣ́довати бꙋ́детъ съ ни́ми, и҆лѝ въ чꙋ́вственномъ че́млибо тѣ́ло со ᲂу҆мо́мъ сꙋ́етнѡ ᲂу҆праздни́тсѧ, и҆лѝ сꙋетѣ̀ и҆́нокъ себѐ преда́стъ. А҆́бїе бо и҆ ско́рѡ погꙋблѧ́етъ теплотꙋ̀, ᲂу҆миле́нїе, и҆ ѡ҆ бз҃ѣ дерзнове́нїе, и҆ ра́зꙋмъ. Є҆ли́кѡ бо внима́емъ ᲂу҆мꙋ̀, толи́кѡ просвѣща́емсѧ, и҆ є҆ли́кѡ не внима́емъ, толи́кѡ помрача́емсѧ.

рк҃и. Кто̀ по всѧ́къ де́нь блюде́нїе и҆ безмо́лвїе ᲂу҆ма̀ го́нитъ и҆ и҆́щетъ, се́й ᲂу҆до́бнѡ презира́етъ чꙋ́вственное всѐ, да не всꙋ́е трꙋди́тсѧ. А҆́ще ли же презира́етъ свою̀ со́вѣсть, го́рькѡ ᲂу҆́снетъ сме́ртїю забве́нїѧ: ѡ҆ че́мъ мо́литсѧ бж҃е́ственный дв҃дъ, си́рѣчь, дабы̀ не ᲂу҆снꙋ́ти.²⁵⁶ Глаго́летъ же и҆ а҆пⷭ҇лъ: вѣ́дꙋщемꙋ добро̀ твори́ти, и҆ не творѧ́щемꙋ, грѣ́хъ є҆мꙋ̀ є҆́сть.²⁵⁷

рк҃ѳ. Прихо́дитъ же ᲂу҆́мъ ѿ лѣ́ности въ сво́й па́ки чи́нъ и҆ трезвѣ́нїе, а҆́ще а҆́бїе прилѣжа́нїе и҆мѣ́ти бꙋ́детъ, и҆ а҆́ще дѣ́йственность ᲂу҆ма̀ на́шегѡ те́плымъ тща́нїемъ возста́вимъ.

р҃л. Не предвари́тъ жерно́вный ѻ҆се́лъ крꙋ́га, въ не́мже привѧ́занъ є҆́сть: нижѐ ᲂу҆́мъ предвари́тъ въ совершеннотво́рной добродѣ́тели, не и҆спра́вивъ внꙋ́трєннѧѧ своѧ̑. Ѡ҆слѣпѣва́етъ бо всегда̀ внꙋ́треннима ѻ҆чи́ма, кто̀ не мо́жетъ зрѣ́ти добродѣ́тель и҆ свѣтосїѧ́ющаго і҆и҃са.

рл҃а. Свирѣ́пый и҆ жесто́кїй ко́нь ска́четъ прїѧ́тнѡ, вса́дника воспрїи́мши: ᲂу҆́мъ же весе́лїемъ возвесели́тсѧ во свѣ́тѣ гдⷭ҇ни, входѧ̀ во ᲂу҆́трїи, свобожда́емь ѿ по́мыслѡвъ, и҆ по́йдетъ ѿ си́лы дѣ́ѧтельныѧ любомꙋ́дрїѧ ᲂу҆́мнагѡ, са́мъ на себѧ̀ взира́ѧ, къ си́лѣ неизрече́нной, зрѧ́щей неизречє́нныѧ добродѣ́тєли, и҆ є҆гда̀ глꙋбинꙋ̀ высо́кихъ, безконе́чныхъ и҆ бж҃е́ственныхъ помышле́нїй въ се́рдце прїи́метъ, тогда̀ ꙗ҆ви́тсѧ є҆гѡ̀ се́рдцꙋ, є҆ли́кѡ возмо́жно, бг҃ъ богѡ́въ. Оу҆диви́всѧ же ᲂу҆́мъ, прославлѧ́етъ любе́знѣ бг҃а ви́димаго и҆ ви́дѧщаго, кото́рый и҆ по семꙋ̀ и҆ по томꙋ̀ сп҃са́етъ си́це на него̀ взира́ющаго.

рл҃в. Глꙋбинꙋ̀ высо́кꙋ ᲂу҆́зритъ разꙋ́мнѡ и҆справлѧ́емое безмо́лвїе серде́чное, и҆ ди̑внаѧ ѿ бг҃а ᲂу҆слы́шитъ ᲂу҆́хо безмо́лвнагѡ ᲂу҆ма̀.

рл҃г. Пꙋ́тникъ до́лгимъ, и҆ неꙋдобопроходи́мымъ и҆ трꙋ́днымъ пꙋте́мъ ше́ствовати нача́вый, и҆ заблꙋжде́нїѧ боѧ́сѧ на возвраще́нїи, зна́мєнїѧ нѣ̑каѧ, и҆ пꙋтеводи́телей въ пꙋтеше́ствїи свое́мъ поставлѧ́етъ, ꙗ҆̀же доставлѧ́ютъ є҆мꙋ̀ ᲂу҆до́бное возвраще́нїе въ до́мъ. Тре́звеннѣ же пꙋтеше́ствꙋющїй мꙋ́жъ поставлѧ́етъ словеса̀, тогѡ́жъ са́магѡ и҆ ѻ҆́нъ боѧ́сѧ.

рл҃д. Но пꙋ́тникꙋ возвраще́нїе, ѿню́дꙋже и҆зы́де, быва́етъ вино́ю ра́дости: тре́звенникꙋ же возвраще́нїе вспѧ́ть є҆́сть поги́бель слове́сныѧ дꙋшѝ и҆ зна́менїе ѿстꙋпле́нїѧ бг҃оꙋго́дныхъ дѣ́лъ и҆ слове́съ и҆ помышле́нїй, и҆ бꙋ́детъ и҆мѣ́ти во вре́мѧ смертоно́снагѡ сна̀ дꙋше́внагѡ по́мыслы, ꙗ҆́кѡ жа́ло возбꙋжда́ющыѧ то напомина́нїемъ мно́гагѡ помраче́нїѧ, и҆ ᲂу҆ны́нїѧ, ѿ нерадѣ́нїѧ съ ни́мъ слꙋчи́вшагѡсѧ.

рл҃є. Въ скѡ́рби, и҆ во ѿча́ѧнїе, и҆ въ безнаде́ждїе впа́дшымъ на́мъ подоба́етъ твори́ти въ себѣ̀, ꙗ҆́коже творѧ́ше даві́дъ: си́рѣчь, и҆злива́ти се́рдце на́ше къ бг҃ꙋ, и҆ моли́твꙋ, и҆ ско́рбь на́шꙋ ꙗ҆́коже є҆́сть, гдⷭ҇ви возвѣща́ти. И҆сповѣ́даемсѧ бг҃ꙋ, ꙗ҆́кѡ могꙋ́щемꙋ премꙋ́дрѡ на́съ ᲂу҆пра́вити, и҆ ско́рбь, а҆́ще поле́зна, сотвори́ти ле́гкою, и҆ и҆зба́вити на́съ ѿ па́гꙋбныѧ и҆ тлѣ́нныѧ печа́ли.

рл҃ѕ. Ꙗ҆́рость бо на человѣ́ка чрез̾єсте́ственнѡ дви́жимаѧ, и҆ печа́ль не по бз҃ѣ, и҆ ᲂу҆ны́нїа, растлѣва́ютъ та́кожде благі̑ѧ и҆ разꙋ̑мныѧ по́мыслы, и҆́хже гдⷭ҇ь и҆сповѣ́данїемъ расточа́ѧ, ра́дость водворѧ́етъ.

рл҃з. По́мыслы же вше́дшыѧ въ се́рдце и҆ не хотѧ́щымъ на́мъ ᲂу҆крѣпи́вшыѧсѧ, и҆ стоѧ́щыѧ и҆стреблѧ́ти навы́че і҆и҃сова моли́тва съ трезвѣ́нїемъ, и҆з̾ глꙋбины̀ помышле́нїѧ серде́чнагѡ.

рл҃и. Ѡ҆блегче́нїе же и҆ ра́дость, бы́вше въ печа́ли ѿ мно́гихъ безслове́сныхъ по́мыслѡвъ, ѡ҆брѧ́щемъ є҆гда̀ ᲂу҆корѧ́ти бꙋ́демъ себѧ̀ и҆́стиннѡ и҆ безпристра́стнѡ, и҆ возвѣща́ти всѧ̑ гдⷭ҇ꙋ, ꙗ҆́коже человѣ́кꙋ: и҆ всѧ́чески ѿ ѻ҆бою̀ се́ю ѡ҆брѧ́щемъ поко́й.

рл҃ѳ. Во ѡ҆́бразъ ᲂу҆ма̀ законополо́жникъ мѡѷсе́й прїе́млетсѧ ѿ ѻ҆тє́цъ, и҆́же бг҃а ви́дитъ въ кꙋпинѣ̀, и҆ лице́мъ прославлѧ́етсѧ, и҆ бг҃омъ фараѡ́нꙋ ѿ бг҃а богѡ́въ поставлѧ́етсѧ, и҆ є҆гѵ́петъ ра́нитъ, и҆ і҆и҃лѧ и҆зво́дитъ, и҆ зако́нъ полага́етъ: ꙗ҆̀же не со́бственнѡ взѧ̑таѧ, но по дꙋ́хꙋ, сꙋ́ть дѣ̑йствїѧ и҆ преимꙋ́щєства ᲂу҆ма̀.

р҃м. Ѡ҆́бразъ же внѣ́шнѧгѡ человѣ́ка є҆́сть а҆арѡ́нъ, бра́тъ ѻ҆́нагѡ законополо́жника. Да ѡ҆бвини́ши ᲂу҆́бѡ съ ꙗ҆́ростїю, ꙗ҆́коже мѡѷсе́й согрѣши́вшаго а҆арѡ́на, и҆ мы̀ вводѧ́ще глаго́лемъ: что̀ непра́вдова тебѣ̀ і҆и҃ль, ꙗ҆́кѡ потща́сѧ ѿста́вити и҆̀хъ ѿ гдⷭ҇а бг҃а жива́гѡ и҆ вседержи́телѧ.²⁵⁸

рм҃а. Показа̀ на́мъ гдⷭ҇ь, све́рхъ всѣ́хъ дрꙋги́хъ бла̑гъ, и҆ сїѐ, є҆гда̀ хотѧ́ше воскреси́ти ла́зарѧ ѿ ме́ртвыхъ, є҆́же ᲂу҆де́рживати запреще́нїемъ женоподо́бнꙋю не́мощь дꙋшѝ, и҆ жесто́кїй нра́въ ᲂу҆твержда́ющїй, є҆́же вѣ́сть, глаго́лю же, ꙗ҆́кѡ самоꙋкоре́нїе ѿ самолю́бїѧ, тщесла́вїѧ и҆ го́рдости дꙋ́шꙋ и҆збавлѧ́етъ.

рм҃в. Ꙗ҆́коже без̾ вели́кагѡ кораблѧ̀ морскꙋ́ю пꙋчи́нꙋ прейтѝ не мо́жно: си́це не мо́жно ѿгна́ти прило́гъ лꙋка́вагѡ по́мысла без̾ призыва́нїѧ і҆и҃са хрⷭ҇та̀.

рм҃г. Противорѣ́чїе ѡ҆бꙋ́здывати, призыва́нїе же навы́че ѿгонѧ́ти ѿ се́рдца по́мыслы. Прило́гꙋ бо воѡбрази́вшꙋсѧ мечта́нїемъ чꙋ́вственныѧ ве́щи въ дꙋшѣ̀, ꙗ҆́коже мечта́нїемъ лица̀ ѡ҆скорби́вшагѡ на́съ, и҆лѝ мечта́нїемъ красоты̀ же́нскїѧ, и҆лѝ зла́та, и҆лѝ сребра̀, є҆ди́но по є҆ди́номꙋ и҆з̾ си́хъ, а҆́ще бꙋ́детъ въ се́рдцѣ на́шемъ, а҆́бїе ѡ҆блича́ютсѧ по́мыслы памѧтоѕло́бїѧ, блꙋда̀ и҆ сребролю́бїѧ, мечта́нїе произве́дшїи въ се́рдцѣ. И҆ а҆́ще и҆скꙋ́сенъ ᲂу҆́мъ на́шъ, и҆ нака́занъ є҆́сть, навы́че блюде́нїю ᲂу҆ма̀, и҆ зрѣ́ти чи́стѡ и҆ ꙗ҆́снѡ лє́стныѧ мечта̑нїѧ и҆ пре́лєсти лꙋка́выхъ: а҆́бїе, ᲂу҆до́бь въ нахожде́нїи противорѣ́чїемъ и҆ моли́твою і҆и҃съ хрⷭ҇то́вою, Оу҆гаша́етъ разжжє́нныѧ стрѣ́лы дїа́вола, не попꙋща́ѧ пристра́стномꙋ мечта́нїю пойтѝ вкꙋ́пѣ съ ни́мъ, и҆ помышле́нїѧмъ на́шымъ соѡбрази́тисѧ со́нїю пристра́стнѡ, и҆лѝ собесѣ́довати любо́внѡ, и҆лѝ многомы́слїе, и҆лѝ сложе́нїе сотвори́ти: ѿ чегѡ̀ послѣ́дꙋютъ по нꙋ́ждѣ нѣ́коей, ꙗ҆́кѡ за дне́мъ но́щь, лꙋка̑выѧ дѣла̀.

рм҃д. А҆́ще же неискꙋ́сенъ є҆́сть ᲂу҆́мъ на́шъ въ бо́дрости трезвѣ́нїѧ, а҆́бїе мѣша́етсѧ съ ꙗ҆́вльшимсѧ є҆мꙋ̀ мечта́нїемъ пристра́стнѡ, ꙗ҆ково́ бы то̀ ни бы́ло, и҆ разглаго́льствꙋетъ, вопрошє́шѧ непра́вєдныѧ принима́ѧ, и҆ даѧ̀ ѿвѣ́ты: и҆ тогда̀ смѣ́шаны быва́ютъ на́ши по́мыслы съ бѣсо́вскимъ мечта́нїемъ, є҆́же є҆щѐ па́че расте́тъ и҆ мно́житсѧ, да любе́зно, и҆ красно̀, и҆ ᲂу҆го́дно ꙗ҆влѧ́етсѧ прельща́емомꙋ и҆ крадо́момꙋ ᲂу҆мꙋ̀. И҆ то́ежде стра́ждетъ тогда̀ ᲂу҆́мъ, ꙗ҆́коже а҆́ще ꙗ҆ви́тсѧ пе́съ на ра́внѣмъ мѣ́стѣ нѣ́коемъ, и҆дѣ́же и҆ а҆́гнцы нѣ́кїи бꙋ́дꙋтъ, сꙋ́ще неѕло́биви, и҆ къ ꙗ҆ви́вшемꙋсѧ и҆̀мъ ча́стѡ притека́ютъ, ꙗ҆́кѡ къ свое́й ма́тери, ничегѡ̀ ѿ приближе́нїѧ ко пса́мъ не прїѡбрѣта́юще, ра́звѣ то́чїю нечистотꙋ̀ и҆ ѕлово́нїе воспрїе́млюще. Сицевы́мъ ѡ҆́бразомъ и҆ на́ши помышлє́нїѧ притека́ютъ ненака́заннѡ ко всѣ̑мъ бѣсѡ́вскимъ мечта́нїѧмъ во ᲂу҆мѣ̀: и҆ смѣси́вшихсѧ и҆̀хъ, ꙗ҆́коже реко́хъ, мо́жно ви́дѣти ѻ҆бои́хъ совѣщава́ющихсѧ преврати́ти И҆лїопо́ль, ꙗ҆́коже а҆гамемно́нъ и҆ менела́й. Си́це бо и҆ сі́и совѣ́тꙋютсѧ, чемꙋ̀ подоба́етъ бы́ти, дабы̀ посре́дствомъ тѣ́ла въ дѣ́ло привестѝ ꙗ҆́вльшеесѧ и҆̀мъ ѿ пре́лести бѣсо́вскагѡ прило́га кра́снымъ и҆ прїѧ́тнымъ. И҆ си́це про́чее зи́ждꙋтсѧ внꙋтрѝ согрѣшє́нїѧ дꙋшє́внаѧ: нꙋ́жда же належи́тъ тогда̀ и҆ внѣ̀ и҆звестѝ сꙋ̑щаѧ во внꙋ́тренности се́рдца.

рм҃є. Оу҆до́бнаѧ нѣ́каѧ и҆ неѕло́биваѧ ве́щь є҆́сть ᲂу҆́мъ, ᲂу҆до́бь послѣ́дꙋющаѧ мечта́нїѧмъ, и҆ ѿ беззако́нныхъ мечта́нїй неꙋдободержи́маѧ, а҆́ще не и҆́мать самоде́ржца страсте́мъ по́мысла, возбранѧ́юща є҆го̀ всегда̀ и҆ ѡ҆бꙋ́здывающа.

рм҃ѕ. Видѣ́нїе и҆ ра́зꙋмъ сꙋ́ть наста́вники соверше́ннагѡ житїѧ̀, и҆ хода́таи навыко́ша бы́ти: занѐ смы́слъ возне́сшїйсѧ си́ми, въ презрѣ́нїе прихо́дитъ страсте́й, и҆ и҆́ныхъ чꙋ́вственныхъ и҆ прїѧ́тныхъ веще́й жите́йскихъ, ꙗ҆́кѡ хꙋды́хъ.

рм҃з. Житїѐ внима́тельное, ѡ҆ хрⷭ҇тѣ̀ і҆и҃сѣ и҆справлѧ́емо, ражда́етъ видѣ́нїе и҆ разꙋмѣ́нїе: ражда́етъ и҆ восхождє́нїѧ бж҃е́ствєннаѧ, и҆ помышлє́нїѧ премꙋ̑драѧ, сопрѧ́гшисѧ съ сꙋпрꙋ́гою, смире́нїемъ, ꙗ҆́коже глаго́летъ бж҃е́ственный проро́къ и҆са́їа, ꙗ҆́кѡ терпѧ́щїи гдⷭ҇а и҆змѣнѧ́тсѧ си́лою, ѡ҆крыла́тѣютъ и҆ возлетѧ́тъ ѡ҆ гдⷭ҇ѣ.

рм҃и. Же́стоко и҆ приско́рбно человѣ́кѡмъ ꙗ҆влѧ́етсѧ, дꙋше́внѡ безмо́лвствовати ѿ всѧ́кагѡ по́мысла. И҆ вои́стиннꙋ є҆́сть дѣ́ло трꙋ́дное и҆ болѣ́зненное. Не є҆ди̑нымъ бо приско́рбно ненаꙋчє́ннымъ бра́ни, безтѣле́сное въ тѣле́сномъ до́лѣ заключа́ти и҆ загражда́ти, но и҆ и҆скꙋ́съ прїи́мшымъ сꙋ́щїѧ внꙋ́трь невеще́ственныѧ бра́ни. А҆ и҆́же гдⷭ҇а і҆и҃са всегда́шнею моли́твою въ пе́рсехъ соде́ржитъ, не ᲂу҆трꙋди́тсѧ послѣ́дꙋѧ є҆мꙋ̀, по сло́вꙋ проро́ка, и҆ днѐ человѣ́ча таковы́й не пожела́етъ,²⁵⁹ за красотꙋ̀ и҆ прїѧ́тность, и҆ сла́дость і҆и҃совꙋ: и҆ врагѡ́въ свои́хъ, нечести́выхъ бѣсѡ́въ ѻ҆́крестъ скита́ющихсѧ не постыди́тсѧ, глаго́лѧ и҆̀мъ во вратѣ́хъ се́рдца,²⁶⁰ и҆ і҆и҃сомъ вспѧ́ть ѿгонѧ́ѧ.

рм҃ѳ. Возлетѣ́вши дꙋша̀ по сме́рти на воздꙋ́хъ во двє́ри небє́сныѧ, съ собо́ю и҆ въ себѣ̀ и҆мꙋ́щи хрⷭ҇та̀, нижѐ та́мѡ врагѡ́въ свои́хъ ᲂу҆срами́тсѧ, но дерзнове́ннѡ, ꙗ҆́коже ны́нѣ, и҆ тогда̀ возглаго́летъ къ ни̑мъ во вратѣ́хъ. То́чїю до и҆схо́да своегѡ̀ да не ѡ҆слабѣва́етъ вопи́ти ко гдⷭ҇ꙋ і҆и҃сꙋ хрⷭ҇тꙋ̀ сн҃ꙋ бж҃їю де́нь и҆ но́щь: и҆ то́й сотвори́тъ ѿмще́нїе вско́рѣ,²⁶¹ по нело́жномꙋ є҆гѡ̀ и҆ бж҃е́ственномꙋ ѡ҆бѣща́нїю, ꙗ҆́коже речѐ ѡ҆ сꙋдїѝ непра́веднѣмъ: є҆́й, глаго́лю ва́мъ, сотвори́тъ и҆ въ настоѧ́щей жи́зни, и҆ по и҆схо́дѣ дꙋшѝ ѿ тѣ́ла.

р҃н. По ᲂу҆́мномꙋ мо́рю пла́ваѧ, ᲂу҆пова́й на і҆и҃са. Глаго́летъ бо внꙋтрѝ, въ се́рдцѣ твое́мъ та́инственнѣ сїѐ: Не бо́йсѧ ѻ҆троча̀ мо́й, і҆а́кѡве, ма́лый і҆зра́илю, че́рве: а҆́зъ защища́ю тѧ̀.²⁶² А҆́ще ᲂу҆́бѡ бг҃ъ по на́съ, кі́й лꙋка́вый на ны̀; и҆́же ᲂу҆блажѝ чи́стыхъ се́рдцемъ, и҆ зако́нъ положѝ, ꙗ҆́кѡ въ чи̑стыѧ сердца̀ сла́дкїй і҆и҃съ, и҆ є҆ди́ный чи́стый, входи́ти бж҃ески, и҆ въ ѻ҆́ныхъ ѡ҆бита́ти хо́щетъ. Тѣ́мже да не преста́немъ, по сло́вꙋ бж҃е́ственнагѡ па́ѵла, ѡ҆бꙋча́ти ᲂу҆́мъ ко благоче́стїю.²⁶³ Вои́стиннꙋ бо благоче́стїе пра́веднѡ рече́сѧ и҆сторга́ющимъ и҆з̾ ко́рене сѣ́мена лꙋка́вагѡ. Сїѐ благоче́стїе є҆́сть ѻ҆́наѧ стезѧ̀ сло́ва, си́рѣчь, пꙋ́ть слове́сности, и҆лѝ пꙋ́ть по́мысла, по є҆́ллинскомꙋ же а҆тті́ческомꙋ нарѣ́чїю:

є҆́же є҆́сть по́мыслъ.

рн҃а. Ѡ҆ мно́жествѣ ми́ра наслади́тсѧ²⁶⁴ по сло́вꙋ дв҃довꙋ, и҆́же не прїе́млетъ лица̀ человѣ́ча, сꙋдѧ̀ непра́вдꙋ въ се́рдцѣ свое́мъ, си́рѣчь ѡ҆́бразы не прїе́млетъ лꙋка́выхъ дꙋхѡ́въ, и҆ чрез̾ ѻ҆́ныѧ ѡ҆́бразы помышлѧ́ѧ ѡ҆ грѣхѣ̀ и҆ ѕлѣ̀, сꙋдѧ̀ и҆ разсꙋжда́ѧ въ землѝ своегѡ̀ се́рдца, пра́вєднаѧ на грѣ́хъ премѣнѧ́ѧ. Людьми́ бо и҆ бѣсѡ́въ вели́цыи и҆ разꙋ́мнїи ѻ҆тцы̀ въ не́которыхъ писа́нїѧхъ свои́хъ нареко́ша за слове́сность: ꙗ҆ково́же є҆́сть и҆ є҆ѵⷢ҇льское сло́во, и҆дѣ́же глаго́летъ гдⷭ҇ь, ꙗ҆́кѡ вра́гъ человѣ́къ сїѐ сотворѝ, и҆ во пшени́цꙋ вмѣша̀ пле́велы.²⁶⁵ Не мо́жно ско́ро ѿрещи́сѧ ѿ творѧ́щихъ лꙋка́вое: сегѡ̀ ра́ди и҆ потреблѧ́емсѧ ѿ по́мыслѡвъ.

рн҃в. Со внима́нїемъ ᲂу҆ма̀ наче́ншїи жи́ти, а҆́ще сопрѧже́мъ съ трезвѣ́нїемъ смире́нїе, и҆ соедини́мъ съ противорѣ́чїемъ моли́твꙋ, пꙋте́мъ мы́сленнымъ до́брѣ ше́ствовати бꙋ́демъ, ꙗ҆́кѡ со свѣще́ю свѣ́тлою, съ покланѧ́емымъ и҆́менемъ і҆и҃са хрⷭ҇та̀, до́мъ се́рдца на́шегѡ метꙋ́ще и҆ ѡ҆треблѧ́юще ѿ лꙋка́вствїѧ, ᲂу҆краша́юще и҆ ѡ҆чища́юще. А҆́ще же на трезвѣ́нїе то́чїю на́ше и҆ внима́нїе надѣ́ѧтисѧ бꙋ́демъ, ско́рѡ ѿ вра̑гъ низринове́ни бы́вше, и҆спрове́ргшесѧ паде́мъ: и҆ си́це низве́ргнꙋтъ на́съ льсти́вїи и҆ кова́рнѣйшїи, и҆ во мре́жахъ лꙋка́выхъ и҆́хъ по́мыслѡвъ мно́жае ᲂу҆вѧ́знемъ, и҆лѝ и҆ закла́ни бꙋ́демъ ᲂу҆до́бь ѿ тѣ́хъ, тве́рдагѡ копїѧ̀ не и҆мꙋ́ще, і҆и҃съ хрⷭ҇то́ва и҆́мене. Є҆ди́ный бо честны́й ме́чь се́й, вельмѝ ча́стѡ ѡ҆браща́емый въ є҆диноѡбра́зномъ се́рдцѣ, вѣ́сть ѡ҆браща́ти и҆ посѣца́ти и҆̀хъ, и҆ ѡ҆палѧ́ти и҆ поѧда́ти, ꙗ҆́кѡ ѻ҆́гнь тро́стїе.

рн҃г. Дѣ́ло непреста́ннагѡ трезвѣ́нїѧ и҆лѝ по́льза дꙋше́внаѧ, и҆ ве́лїе прїѡбрѣ́тенїе є҆́сть, зрѣ́ти а҆́бїе ѡ҆бразꙋ́ющыѧсѧ мечта̑нїѧ по́мыслѡвъ во ᲂу҆мѣ̀: противорѣ̑чїѧ же ѡ҆блича́ти, и҆ ꙗ҆влѧ́ти покꙋша́ющїйсѧ вни́ти по́мыслъ на воздꙋ́хъ ᲂу҆ма̀ на́шегѡ мечта́нїемъ чꙋ́вственныѧ нѣ́кїѧ ве́щи. Оу҆гаша́ющее же и҆ разрꙋша́ющее а҆́бїе сопроти́вныхъ всѧ́кое ᲂу҆мышле́нїе, всѧ́кое сло́во, всѧ́кое мечта́нїе, всѧ́кое подо́бїе, всѧ́кое ꙗ҆вле́нїе лꙋка́вое, є҆́сть призыва́нїе гдⷭ҇а. И҆́бо и҆ мы̀ са́ми во ᲂу҆мѣ̀ зри́мъ держа́вное побѣжде́нїе и҆́хъ ѿ і҆и҃са вели́кагѡ бг҃а на́шегѡ, и҆ ѿмще́нїе за на́съ смире́нныхъ, и҆ хꙋды́хъ и҆ непотре́бныхъ.

рн҃д. Мно́зи не разꙋмѣва́ютъ, ꙗ҆́кѡ всѣ̀ по́мыслы не и҆но́е что̀ сꙋ́ть, то́чїю мечта̑нїѧ є҆ди̑на чꙋ́вственныхъ и҆ мїрски́хъ веще́й. А҆́ще же ᲂу҆косни́мъ въ моли́твѣ тре́звеннѡ, свобожда́етъ моли́тва мы́сль ѿ всѧ́кагѡ веще́ственнагѡ мечта́нїѧ лꙋка́выхъ по́мыслѡвъ: и҆звѣща́етъ же є҆́й и҆ словеса̀ бра́ни сꙋпоста́тѡвъ, и҆ ве́лїе є҆́сть прїѡбрѣ́тенїе моли́твы и҆ трезвѣ́нїѧ. Ѻ҆ба́че ѻ҆чи́ма твои́ма смо́триши, и҆ воздаѧ́нїе грѣ́шникѡвъ ᲂу҆́мственныхъ, ᲂу҆́мственнѡ и҆ са́мъ ᲂу҆́зриши и҆ ᲂу҆разꙋмѣ́еши,²⁶⁶ глаго́летъ бж҃е́ственный даві́дъ пѣснопѣ́вецъ.

рн҃є. Воспомина́имъ сме́рть, а҆́ще возмо́жно, непреста́ннѡ: ѿ ко́еѧ па́мѧти ѿложе́нїе попече́нїй и҆ всѣ́хъ сꙋє́тъ въ на́съ ражда́етсѧ, хране́нїе ᲂу҆ма̀, и҆ непреста́ннаѧ моли́тва. Безпристра́стїе тѣ́ла, є҆́сть ѡ҆мерзѣ́нїе грѣха̀: и҆ почтѝ всѧ́каѧ добродѣ́тель, ѡ҆бита́ющаѧ въ на́съ, а҆́ще подоба́етъ рещѝ и҆́стинꙋ, ѿ сегѡ̀ проистека́етъ. Тѣ́мже ꙗ҆́кѡ своѐ дыха́нїе, а҆́ще возмо́жно, сїю̀ ве́щь да ᲂу҆потреблѧ́емъ.

рн҃ѕ. Се́рдце, ᲂу҆страни́вшеесѧ ѿ мечта́нїй коне́чнѣ, помышлє́нїѧ роди́тъ посредѣ̀ себѐ ра́дѡстнаѧ, бж҃е́ствєннаѧ и҆ таи́нствєннаѧ, и҆́мже ѡ҆́бразомъ и҆гра́ютъ ры̑бы, и҆ погрꙋжа́ютсѧ делфі́ны, ᲂу҆тиха́ющꙋ мо́рю: и҆ вѣ́етсѧ мо́ре то́нкимъ вѣ́тромъ, бе́здна же серде́чнаѧ дх҃омъ ст҃ы́мъ. И҆ поне́же, глаго́летъ, є҆стѐ сы́нове, посла̀ бг҃ъ дх҃а сн҃а своегѡ̀ въ сердца̀ ва̑ша, вопїю́ща: а҆́вва ѻ҆́ч҃е!²⁶⁷

рн҃з. Оу҆сꙋмни́тсѧ и҆ недоꙋмѣ́етъ всѧ́къ мона́хъ дꙋхо́вное дѣ́ло прїѧ́ти пре́жде трезвѣ́нїѧ ᲂу҆ма̀, и҆лѝ не вѣ́дѧщи добро́ты ѻ҆́нагѡ, и҆лѝ вѣ́дѧщи, но по нерадѣ́нїю не могꙋ́щи. Ѿ недоꙋмѣ́нїѧ же безсомни́тельнѡ свободи́тсѧ возше́дши на ᲂу҆́мное блюде́нїе, є҆́же є҆́сть и҆ глаго́летсѧ мы́сленное любомꙋ́дрїе ᲂу҆ма̀, ꙗ҆́кѡ ѡ҆брѣ́те пꙋ́ть, ѡ҆ не́мже речѐ гдⷭ҇ь: а҆́зъ є҆́смь пꙋ́ть, и҆ и҆́стина и҆ живо́тъ.²⁶⁸

рн҃и. Па́ки недоꙋмѣ́етъ, зрѧ̀ бе́зднꙋ по́мыслѡвъ, и҆ мно́жество младе́нцєвъ вавѷлѡ́нскихъ. Но и҆ сїѐ недоꙋмѣ́нїе разрѣша́етъ хрⷭ҇то́съ, а҆́ще крѣ́постїю мы́сленною всегда̀ на не́мъ стои́мъ. Всѧ̑ же младе́нцы вавѷлѡ́нскїѧ ѡ҆ ка́мень се́й разбива́юще,²⁶⁹ ѿража́емъ, и҆сполнѧ́юще, по глаго́лꙋ, жела́нїе на́ше ѿ ни́хъ. И҆́же бо храни́тъ за́повѣдь, не ᲂу҆вѣ́сть глаго́ла лꙋка́вна.²⁷⁰ Без̾ мене́ бо, речѐ хрⷭ҇то́съ, не мо́жете твори́ти ничесѡ́же.²⁷¹

рн҃ѳ. Се́й є҆́сть и҆́стинный и҆ сꙋ́щїй и҆́нокъ, и҆́же трезвѣ́нїе и҆справлѧ́етъ: и҆ се́й и҆́стинный тре́звенникъ, и҆́же въ се́рдцѣ є҆́сть и҆́нокъ.

рѯ҃. Продолжа́етсѧ житїѐ человѣ́ческое ѡ҆бходѧ́щи по годи́намъ, мѣ́сѧцамъ, недѣ́лѧмъ, и҆ днѧ́мъ, и҆ часа́мъ, и҆ минꙋ́тамъ. Съ си́ми ᲂу҆̀бо подоба́етъ на́мъ продолжа́ти и҆ добродѣ́тєльнаѧ дѣѧ̑нїѧ, глаго́лю же трезвѣ́нїе, и҆ моли́твꙋ, и҆ сла́дость серде́чнꙋю въ прїѧ́тномъ безмо́лвїи до и҆схо́да на́шегѡ.

рѯ҃а. На́йдетъ на на́съ ча́съ сме́рти, прїи́детъ, и҆ ᲂу҆бѣ́гнꙋти не мо́жно. И҆, ѽ когда́бъ кнѧ́зь мі́ра и҆ воздꙋ́ха, грѧдꙋ́щїй тогда̀, ѡ҆брѣ́лъ беззакѡ́нїѧ на̑ша ма̑ла и҆ хꙋ̑да, да не ѡ҆бличи́тъ пои́стиннѣ! и҆ тогда̀ воспла́чемсѧ безполе́знѡ. Ра́бъ бо, глаго́летъ, вѣ́дѣвый во́лю господи́на своегѡ̀, и҆ не сотвори́въ, бїе́нъ бꙋ́детъ мно́гѡ.²⁷²

рѯ҃в. Го́ре, глаго́летъ, погꙋ́бльшымъ се́рдце! и҆ что̀ сотворѧ́тъ, є҆гда̀ посѣти́тъ гдⷭ҇ь;²⁷³ тѣ́мже подвиза́имсѧ, бра́тїе.

рѯ҃г. Просты̑мъ и҆ безстра́стнѣйшымъ по́мысламъ послѣ́дꙋютъ стра́стные, ꙗ҆́коже ѡ҆брѣто́хомъ ѿ многолѣ́тнагѡ и҆скꙋ́са и҆ наблюде́нїѧ: и҆ пе́рвые вхо́домъ быва́ютъ вторы̑мъ, си́рѣчь безпристра́стные пристра̑стнымъ.

рѯ҃д. Вои́стиннꙋ на́двое подоба́етъ раздѣлѧ́тисѧ человѣ́кꙋ, произволе́нїемъ и҆ помышле́нїемъ премꙋ́дрымъ раздира́тисѧ подоба́етъ, ꙗ҆́коже реко́хъ, и҆ враго́мъ самомꙋ̀ себѣ̀ неизмѣ́ннымъ подоба́етъ бы́ти пои́стиннѣ. Ꙗ҆ково̀ ᲂу҆́бѡ расположе́нїе и҆́мать нѣ́кто всегда̀ къ человѣ́кꙋ, лю́тѣ ѕѣлѡ̀ и҆ мно́гажды ѡ҆скорби́вшемꙋ и҆ непра́вдовавшемꙋ: сицево̀ и҆лѝ мно́гѡ па́че и҆ на́мъ къ себѣ̀, а҆́ще хо́щемъ и҆спра́вити вели́кꙋю и҆ пе́рвꙋю за́повѣдь, си́рѣчь, житїѐ хрⷭ҇то́во, блаже́нное смире́нїе, во пло́ти бж҃їю жи́знь. Тѣ́мже, глаго́летъ а҆по́столъ: кто́ мѧ и҆зба́витъ ѿ тѣ́ла сме́рти сеѧ̀;²⁷⁴ зако́нꙋ бо бж҃їю не покарѧ́етсѧ. Показꙋ́ѧ же, ꙗ҆́кѡ покори́ти тѣ́ло во́ли бж҃їей въ на́шей вла́сти є҆́сть, глаго́летъ: А҆́ще бо бы́хомъ себѐ разсꙋжда́ли, не бы́хомъ ѡ҆сꙋжде́ни бы́ли:²⁷⁵ сꙋди́ми же ѿ гдⷭ҇а наказꙋ́емсѧ.

рѯ҃є. Нача́ло плодоно́сїѧ є҆́сть цвѣ́тъ: нача́ло же блюде́нїѧ ᲂу҆ма̀, є҆́сть воздержа́нїе бра́шенъ и҆ питїѧ̀, и҆ всѣ́хъ пѡ́мыслъ ѿринове́нїе и҆ ѡ҆ставле́нїе, и҆ безмо́лвїе серде́чное.

рѯ҃ѕ. Ѡ҆ хрⷭ҇тѣ̀ і҆и҃сѣ ᲂу҆крѣплѧ́ємымъ, и҆ трезвѣ́нїемъ тве́рдостнѣ тещѝ наче́ншымъ, пе́рвѣе ꙗ҆влѧ́етсѧ на́мъ во ᲂу҆мѣ̀ ꙗ҆́кѡ свѣща̀, держи́маѧ ѿ на́съ рꙋко́ю ᲂу҆ма̀, и҆ пꙋтеводи́тельствꙋющаѧ на́съ на стєзѝ мы́слєнныѧ. Пото́мъ ꙗ҆́кѡ лꙋна̀ всесвѣ́тлаѧ во тве́рди серде́чнѣй ѡ҆браща́ющаѧсѧ: та́же ꙗ҆влѧ́етсѧ на́мъ ꙗ҆́кѡ со́лнце, і҆и҃съ, пра́вдою сїѧ́ющїй, си́рѣчь, показꙋ́ющїй себѐ, и҆ всесвѣ́тлый свѣ́тъ сво́й видѣ́нїй.

рѯ҃з. Сїѧ̑ ᲂу҆́бѡ ѿкрыва́етъ і҆и҃съ та́йнѡ, ᲂу҆мꙋ̀ пребыва́ющемꙋ въ за́повѣди є҆гѡ̀, глаго́лющей: И҆ ѡ҆брѣ́жите жестокосе́рдїе ва́ше.²⁷⁶ И҆ ꙗ҆́коже рече́но є҆́сть, помышле́нїѧмъ ди̑внымъ наꙋча́етъ человѣ́ка тща́тельное трезвѣ́нїе: бж҃ество́ бо нелицепрїе́мно. Тѣ́мже глаго́летъ гдⷭ҇ь: слы́шите менѐ, и҆ разꙋмѣ́йте, и҆́же бо и҆́мать, да́стсѧ є҆мꙋ̀, и҆ преизбꙋ́детъ: а҆ и҆́же не и҆́мать, и҆ є҆́же мни́тсѧ и҆мѣ́ти, во́зметсѧ ѿ негѡ̀.²⁷⁷ И҆ лю́бѧщымъ бг҃а всѧ̑ поспѣшествꙋ́ютъ во благо́е.²⁷⁸ Мно́гѡ ᲂу҆̀бо па́че томꙋ̀ добродѣ́тєли поспѣшествова́ти бꙋ́дꙋтъ.

рѯ҃и. Не бꙋ́детъ ше́ствовати кора́бль мнѡ́гїѧ пѡ́прища без̾ воды̀: и҆ блюде́нїе ᲂу҆ма̀ нима́лѡ не продолжи́тсѧ без̾ трезвѣ́нїѧ со смире́нїемъ, и҆ моли́твою і҆и҃съ хрⷭ҇то́вою всегда́шнею.

рѯ҃ѳ. Хра́мины ѡ҆снова́нїе є҆́сть ка́менїе: сеѧ́ же добродѣ́тели ѡ҆снова́нїе и҆ ве́рхъ, є҆́сть ст҃о́е и҆ покланѧ́емое и҆́мѧ гдⷭ҇а на́шегѡ і҆и҃са хрⷭ҇та̀. Оу҆до́бь кораблекрꙋше́нїе ᲂу҆чини́тъ неискꙋ́сный ко́рмчїй во вре́мѧ волне́нїѧ, корабе́льникѡвъ ѿгна́въ, вє́сла же и҆ корми́ло въ пꙋчи́нꙋ пове́ргъ, са́мъ же спѧ̀: ᲂу҆до́бѣе же погꙋби́тсѧ дꙋша̀ ѿ бѣсѡ́въ, ѡ҆ трезвѣ́нїи нерадѧ́щаѧ, и҆ є҆́же призыва́ти и҆́мѧ і҆и҃съ хрⷭ҇то́во въ начина́ющихсѧ прило́гахъ.

р҃ѻ. Є҆́же вѣ́мы, пи́шꙋще глаго́лемъ, и҆ є҆́же ви́дѣхомъ ѻ҆́нымъ пꙋте́мъ проходѧ́ще, свидѣ́тельствꙋемъ ва́мъ, а҆́ще прїѧ́ти глаго́лємаѧ восхо́щете, ꙗ҆́кѡ са́мъ гдⷭ҇и речѐ: А҆́ще кто̀ не пребꙋ́детъ во мнѣ̀, и҆зве́ржетсѧ во́нъ, ꙗ҆́кѡ розга̀, и҆ собира́ютъ ю҆̀, и҆ во ѻ҆́гнь влага́ютъ, и҆ сгара́етъ.²⁷⁹ А҆ и҆́же пребыва́етъ во мнѣ̀: и҆ а҆́зъ въ не́мъ. Ꙗ҆́коже бо не мо́щно возсїѧ́ти со́лнцꙋ без̾ свѣ́та: си́це не мо́щно ѡ҆чи́ститисѧ се́рдцꙋ ѿ скве́рныхъ гꙋби́тельныхъ по́мыслѡвъ, кромѣ̀ моли́твы і҆и҃сова и҆́мене. А҆́ще ли же и҆́стинно сїѐ, ꙗ҆́коже зрю̀, да соедини́мъ и҆́мѧ і҆и҃сово своемꙋ̀ дыха́нїю. Ѻ҆́во бо є҆́сть свѣ́тъ, тѣ́ же тьма̀: и҆ ѻ҆́во є҆́сть бг҃ъ и҆ влⷣка, тѣ́ же рабѝ бѣсѡ́мъ.

рѻ҃а. Свѣторо́днымъ и҆ молнїеро́днымъ и҆ свѣтоиспꙋща́тельнымъ и҆ ѻ҆гнено́снымъ хране́нїе ᲂу҆ма̀ сво́йственнѡ и҆ достоиме́ннѡ да нарица́етсѧ. Преимꙋ́ществꙋетъ бо, и҆́стиннѡ рещѝ, безконє́чныѧ тѣлє́сныѧ мнѡ́гїѧ добродѣ́тєли. Сегѡ̀ ᲂу҆́бѡ ра́ди честны́ми и҆мена́ми нарица́ти подоба́етъ сїю̀ добродѣ́тель, ражда́ющагѡсѧ ра́ди ѿ неѧ̀ свѣтозра́чнагѡ свѣ́та: ю҆́же возлюби́вше грѣ̑шницы и҆ непотре́бнїи, ме́рзкїи и҆ неразꙋ́мнїи, несмы́сленнїи и҆ непра́веднїи, пра́вєдны, благопотрє́бны, чи̑сты, ст҃ы и҆ смы́слєнны ѡ҆ і҆и҃сѣ хрⷭ҇тѣ̀ бы́ти мо́гꙋтъ: и҆ не то́чїю сїѐ, но и҆ та̑йнаѧ ви́дѣти: и҆ бг҃осло́вствовати, и҆ бы́вше прозри́тельни къ пречи́стомꙋ и҆ безпредѣ́льномꙋ свѣ́тꙋ семꙋ̀ преплыва́ютъ, и҆ каса́ютсѧ є҆гѡ̀ неизрече́нными прикоснове́нїѧми, и҆ съ ни́мъ живꙋ́тъ и҆ пребыва́ютъ, занѐ вкꙋси́ша, ꙗ҆́кѡ бла́гъ гдⷭ҇ь, ꙗ҆́коже и҆сполнѧ́тисѧ ꙗ҆́вѣ въ си́хъ первоа́гг҃лахъ семꙋ̀ бж҃е́ственнагѡ дв҃да сло́вꙋ: Ѻ҆ба́че пра́веднїи и҆сповѣ́дѧтсѧ и҆́мени твоемꙋ̀, и҆ вселѧ́тсѧ пра́вїи съ лице́мъ твои́мъ.²⁸⁰ Вои́стиннꙋ бо сі́и є҆ди́нїи и҆́стиннѡ призыва́ютъ и҆ и҆сповѣ́дꙋютсѧ бг҃ꙋ, съ ни́мже и҆ лю́бѧтъ бесѣ́довати вы́нꙋ лю́бѧщїи є҆го̀.

рѻ҃в. Го́ре внꙋ́треннемꙋ ѿ внѣ́шнѧгѡ! ѕѣлѡ́ бо ѡ҆скорби́тсѧ внꙋ́треннїй человѣ́къ ѿ внѣ́шнихъ чꙋ́вствъ: и҆ ѡ҆скорби́вшисѧ ра̑ны причинѧ́ти бꙋ́детъ внѣ̑шнимъ чꙋ́вствамъ. Содѣ́лавый, ꙗ҆̀же сꙋ́ть въ писа́нїи, ᲂу҆жѐ ᲂу҆разꙋмѣ̀, ꙗ҆̀же сꙋ́ть въ видѣ́нїи.

рѻ҃г. А҆́ще внꙋ́треннїй на́шъ человѣ́къ трезви́тсѧ, по сло́вꙋ ѻ҆тцє́въ, си́ленъ є҆́сть сохрани́ти и҆ внѣ́шнѧго. Ѻ҆ба́че мы̀, и҆ ѕлодѣ́лателїе бѣ́си, воѡбщѐ содѣва́емъ грѣхѝ, и҆ ѻ҆́ные по́мыслами то́чїю и҆лѝ мечта́тельными живонаписа́нїѧми и҆з̾ѡбража́ютъ во ᲂу҆мѣ̀ грѣ́хъ, ꙗ҆́коже хотѧ́тъ: мы́ же и҆ по́мыслами внꙋ́трь, и҆ дѣла́ми внѣ̀. Дебе́лости бо тѣле́сныѧ не и҆мꙋ́ще бѣ́си, по́мыслами то́чїю, лꙋка́вствомъ и҆ ле́стїю, и҆ себѣ̀ и҆ на́мъ мꙋ́кꙋ доставлѧ́ютъ. А҆́ще бо дебе́лости тѣле́сныѧ не бы́ша лише́ни бы́ли беззако́ннїи, нижѐ дѣла́ми бы грѣши́ти престава́ли, произволе́нїе къ нече́стїю гото́во при́снѡ и҆мꙋ́ще.

рѻ҃д. Моли́тва же є҆диномы́сленнаѧ разбива́етъ и҆ въ пра́хъ ѡ҆браща́етъ прельщє́нїѧ и҆́хъ. Призыва́емый бо на́ми і҆и҃съ бг҃ъ и҆ бж҃їй сн҃ъ, ча́стѡ и҆ нелѣ́ностнѡ, ѿню́дъ не позволѧ́етъ си̑мъ ни нача́ло вхо́да, є҆́же и҆ прило́гомъ нарица́етсѧ: ни ѡ҆́бразъ показа́ти ᲂу҆мꙋ̀ въ зерца́лѣ мы́сленномъ, ни словеса̀ нѣ̑каѧ глаго́лати се́рдцꙋ. Ѡ҆́бразъ же бѣсо́вскїй не входѧ́й въ се́рдце, и҆ по́мыслѡвъ, ꙗ҆́коже рѣ́хомъ, и҆мѣ́ти не бꙋ́детъ: занѐ по́мыслами съ дꙋше́ю бесѣ́довати и҆ и҆з̾ꙋча́ти ѕло́бѣ та́йнѡ, ѻ҆бы́чай и҆̀мъ є҆́сть.

рѻ҃є. Всегда́шнею ᲂу҆́бѡ моли́твою ѡ҆чища́етсѧ воздꙋ́хъ мы́сленный ѿ мра́чныхъ ѻ҆́блакъ, и҆ ѿ вѣ̑тръ лꙋка́выхъ дꙋхѡ́въ. Ѡ҆чища́емꙋ же серде́чномꙋ воздꙋ́хꙋ, не возмо́жно не сїѧ́ти въ не́мъ бж҃е́ственномꙋ свѣ́тꙋ і҆и҃совꙋ. А҆́ще же тщесла́вїемъ, го́рдостїю и҆ высокомы́слїемъ надмѣва́емсѧ и҆ возно́симсѧ къ непостижи̑мымъ, безпомо́щнїи ѿ і҆и҃са ѡ҆брѣта́емсѧ: занѐ ненави́дитъ хрⷭ҇то́съ сицєва́ѧ, сы́й показа́тель смире́нїѧ.

рѻ҃ѕ. Держи́мсѧ ᲂу҆̀бо моли́твы и҆ смире́нїѧ, си́хъ двꙋ́хъ, ꙗ҆̀же со трезвѣ́нїемъ проти́вꙋ бѣсѡ́въ воѡрꙋжа́ютсѧ, ꙗ҆́коже ме́чь пла́мененъ. Мо́щно бо на́мъ си́це творѧ́щымъ, по всѧ́къ де́нь и҆ ча́съ, серде́чнѡ, та́инственнѡ и҆ ве́селѡ пра́здновати.

рѻ҃з. Ѻ҆́смь сꙋ́ть по́мыслы всеро́днїи ѕло́бѣ, въ ни́хже соде́ржитсѧ всѧ́кїй по́мыслъ, и҆ ѿ ни́хже всѣ̀ рожде́нїе прїе́млютъ, ꙗ҆́коже ѿ ю҆но́ны и҆ ю҆пі́тера всѧ́кїй бѣ́съ ме́рзкїй, бо́гъ дана́евъ по басносло́вїѧмъ и҆́хъ: всѣ̀ прихо́дѧтъ ко две́ри се́рдца, и҆ ѡ҆брѣ́тше ᲂу҆́мъ нестрего́мь, є҆ди́нъ по є҆ди́номꙋ вхо́дѧтъ во своѐ вре́мѧ. Кі́йждо же ѿ ѻ҆смѝ по́мыслѡвъ взоше́дъ въ се́рдце, мно́жество скве́рныхъ по́мыслѡвъ вво́дитъ: и҆ си́це ᲂу҆́мъ помрачи́вше, ᲂу҆вѣща́нїѧми призыва́етъ тѣ́ло къ творе́нїю скве́рныхъ дѣ́лъ.

рѻ҃и. И҆́же ᲂу҆̀бо главꙋ̀ блюде́тъ ѕмі́евꙋ, и҆ противорѣ́чїемъ ꙗ҆ростнови́днымъ ꙗ҆́ростныѧ ᲂу҆потреблѧ́ѧ глаго́лы, а҆́ки пѧ́стїю бїе́тъ тѣ́ло, се́й ѿража́етъ бра́нь. Соте́рши бо главꙋ̀, и҆збѣга́етъ мно́гихъ лꙋка́выхъ по́мыслѡвъ и҆ ѕлы́хъ дѣ́лъ. И҆ тогда̀ пребыва́етъ неволнꙋ́ема мы́сль, бг҃ꙋ прїе́млющꙋ бо́дрствованїе є҆ѧ̀ въ по́мыслѣхъ, и҆ да́рꙋющꙋ є҆́й вѣ́дѣти, ка́кѡ подоба́етъ побѣди́ти врагѝ, и҆ ка́кѡ подоба́етъ ѡ҆чища́ти пома́лꙋ се́рдце ѿ по́мыслѡвъ, ѡ҆сквернѧ́ющихъ внꙋ́треннѧгѡ человѣ́ка, ꙗ҆́коже глаго́летъ гдⷭ҇ь і҆и҃съ: ѿ се́рдца и҆схо́дѧтъ помышлє́нїѧ лꙋка̑ваѧ, прелюбодѣѧ̑нїѧ, любодѣѧ̑нїѧ, и҆ та̑ сꙋ́ть сквернѧ̑щаѧ человѣ́ка.²⁸¹

рѻ҃ѳ. Си́це ᲂу҆̀бо мо́жетъ дꙋша̀ ѡ҆ гдⷭ҇ѣ ста́ти во свое́мъ благоѡбра́зїи, и҆ красотѣ̀, и҆ правотѣ̀, ꙗ҆́коже и҆спе́рва ѿ бг҃а создана̀ бы́сть, вельмѝ добра̀ и҆ пра́ва, ꙗ҆́коже глаго́летъ вели́кїй ра́бъ гдⷭ҇нь а҆нтѡ́нїй: дꙋшѣ̀ ᲂу҆́мъ по є҆стествꙋ̀ и҆мꙋ́щїй добродѣ́тель составлѧ́етсѧ. И҆ па́ки речѐ: и҆́бо что̀ дꙋша̀ є҆́сть пра́ва, сїѐ є҆́сть то̀, что̀ ᲂу҆́мъ є҆ѧ̀ пребыва́етъ по є҆стествꙋ̀, ꙗ҆́коже созда́сѧ. И҆ пото́мъ а҆́бїе речѐ: ѡ҆чи́стимъ мы́сль. А҆́зъ бо вѣ́рꙋю, ꙗ҆́кѡ ѡ҆чи́стившисѧ ѻ҆на̀ ѿвсю́дꙋ, и҆ по є҆стествꙋ̀ стоѧ́щи, мо́жетъ, прозорли́ва бꙋ́дꙋчи: мно́жае и҆ далеча́е бѣ́сы зрѣ́ти, и҆мѣ́ѧ ѿкрыва́юща є҆́й гдⷭ҇а. Си́це глаго́летъ сла́вный а҆нтѡ́нїй, ꙗ҆́коже сказꙋ́етъ вели́кїй а҆ѳана́сїй во а҆нтѡ́нїевѣ житїѝ.

р҃п. Всѧ́къ по́мыслъ мечта́нїе во ᲂу҆мѣ̀ чꙋ́вствєнныѧ вє́щи твори́тъ. Оу҆́мъ бо сы́й а҆ссѷрі́и, не и҆на́че прельща́ти мо́жетъ, а҆́ще не ᲂу҆потреби́тъ чꙋ́вствєнныѧ на̑ша и҆ ѻ҆бы̑чнаѧ.

рп҃а. Ꙗ҆́коже не мо́щно на́мъ гна́тисѧ по воздꙋ́хꙋ за пти́цами крыла́тыми, сꙋ́щымъ человѣ́кѡмъ, и҆лѝ возлета́ти, ꙗ҆́коже и҆ ѻ҆нѝ: сегѡ̀ не и҆мꙋ́щꙋ є҆стествꙋ̀ на́шемꙋ: си́це не мо́щно безплѡ́тныѧ по́мыслы бѣсѡ́вскїѧ побѣди́ти, и҆лѝ вельмѝ тща̀ возводи́ти ᲂу҆́мное ѻ҆́ко къ бг҃ꙋ, кромѣ̀ моли́твы тре́звѣнныѧ и҆ ча́стыѧ: а҆́ще ли нѝ, на зе́млю зри́ши.

рп҃в. А҆́ще ᲂу҆́бѡ вои́стиннꙋ ѡ҆блещѝ въ стꙋ́дъ по́мыслы хо́щеши, и҆ безмо́лвствовати благодꙋ́шнѡ и҆ ᲂу҆до́бнѡ трезви́тисѧ се́рдцемъ: і҆и҃сова моли́тва да прильпне́тъ твоемꙋ̀ дыха́нїю, и҆ въ ма́лыхъ дне́хъ ᲂу҆́зриши сїѐ соверша́ющеесѧ.

рп҃г. Ꙗ҆́коже не мо́щно на воздꙋ́сѣ пи́сьмена писа́ти, подоба́етъ бо ѻ҆́ныѧ на нѣ́коемъ веществѣ̀ наче́ртывати, ꙗ҆́кѡ да цѣ̑ла хранѧ́тсѧ: си́це къ честно́мꙋ трезвѣ́нїю на́шемꙋ моли́твꙋ і҆и҃съ хрⷭ҇то́вꙋ совокꙋ́пимъ, да вседо́браѧ добродѣ́тель трезвѣ́нїѧ цѣла̀ съ ни́мъ пребыва́етъ, и҆ чрез̾ него̀ на́мъ соблюда́етсѧ во вѣ́къ неѿе́млема.

рп҃д. Возложѝ на гдⷭ҇а дѣла̀ твоѧ̑, и҆ ѡ҆брѧ́щеши, глаго́летъ, благода́ть, да не рече́но бꙋ́детъ и҆ ѡ҆ на́съ проро́комъ: бли́зъ є҆сѝ ты̀, гдⷭ҇и, ᲂу҆́стъ и҆́хъ, дале́че же ѿ ᲂу҆тро́бъ и҆́хъ.²⁸² Никто́же и҆́нъ се́рдце твоѐ крѣ́пкѡ ᲂу҆мири́тъ ѿ страсте́й, а҆́ще не са́мъ і҆и҃съ хрⷭ҇то́съ, дале́че разстоѧ̑щаѧ собра́вый.

рп҃є. Подо́бнѡ ѻ҆боѧ̑ дꙋ́шꙋ помрача́ютъ, и҆ бесѣ̑ды по́мыслѡвъ въ ᲂу҆мѣ̀, и҆ внѣ̑шнѧѧ глагѡ́ланїѧ и҆ празднослѡ́вїѧ. Подоба́етъ же ѿвраща́ющымсѧ поврежде́нїѧ ᲂу҆ма̀, ѻ҆боѧ̑, лю́бѧщаѧ праздносло́вити, си́рѣчь и҆ по́мыслы: и҆ человѣ́ки ѡ҆скорблѧ́ти, за благосло́внѣйшꙋю винꙋ̀ по бз҃ѣ, да не помрача́емь ᲂу҆́мъ разсла́битъ трезвѣ́нїе. И҆́бо ѿ забве́нїѧ помрача́еми, ᲂу҆́мъ погꙋблѧ́емъ.

рп҃ѕ. Соблюда́ющїй со всѧ́кимъ тща́нїемъ чистотꙋ̀ се́рдца, и҆мѣ́ти бꙋ́детъ ᲂу҆чи́телѧ законополо́жника сеѧ̀ хрⷭ҇та̀, та́йнѡ сказꙋ́юща є҆мꙋ̀ во́лю свою̀. Сїѐ ꙗ҆влѧ́ѧ дв҃дъ глаго́летъ: ᲂу҆слы́шꙋ, что̀ рече́тъ ѡ҆ мнѣ̀ гдⷭ҇ь бг҃ъ:²⁸³ воззрѣ́нїе же ᲂу҆ма̀ на себѧ̀ сама́го во ᲂу҆́мной бра́ни показꙋ́ѧ, и҆ застꙋ́пное защище́нїе бж҃їе, глаго́лаше: и҆ рече́тъ человѣ́къ: а҆́ще є҆́сть пло́дъ пра́ведникꙋ.²⁸⁴ Пото́мъ ѿ состѧза́нїѧ совѣ́тъ ѻ҆бои́ми прїѧ́тый ꙗ҆влѧ́ѧ, глаго́летъ: ᲂу҆̀бо є҆́сть бг҃ъ сꙋдѧ́й и҆̀мъ,²⁸⁵ лꙋка̑вымъ бѣсовѡ́мъ, на землѝ се́рдца на́шегѡ. И҆ и҆́ндѣ глаго́летъ: пристꙋ́питъ человѣ́къ, и҆ се́рдце глꙋбоко̀,²⁸⁶ и҆ вознесе́тсѧ бг҃ъ. И҆ тогда̀ ра̑ны и҆́хъ, ꙗ҆́кѡ стрѣ́лы младе́нцєвъ на́мъ вмѣнѧ́тсѧ.

рп҃з. Въ мꙋ́дрости при́снѡ хо́димъ нака́заннїи се́рдцемъ,²⁸⁷ по сло́вꙋ свѧщеннопѣ́вца, хрⷭ҇то́мъ і҆и҃сомъ, ѻ҆́ною бг҃а ѻ҆ц҃а̀ си́лою, и҆ мꙋ́дростїю бж҃їею всегда̀ ды́шꙋще. А҆́ще же ѿ ѡ҆бстоѧ́нїѧ нѣ́коегѡ ѡ҆слабѣ́вше, ѡ҆блѣни́мсѧ во ᲂу҆́мномъ дѣѧ́нїи, въ послѣ́дꙋющее ᲂу҆́тро па́ки чрє́сла ᲂу҆́мнаѧ до́брѣ стѧ́гнемъ, и҆ крѣ́пцѣ па́ки дѣ́ла ко́снемсѧ, вѣ́дѧще ꙗ҆́кѡ нѣ́сть на́мъ ѡ҆правда́тельнагѡ ѿвѣ́та, разꙋмѣ́вшымъ до́брое, а҆́ще не сотвори́мъ ѻ҆́ное.

рп҃и. Ꙗ҆́коже болѣзнотвѡ́рнаѧ бра̑шна, вве́ржєннаѧ неда́внѡ въ тѣ́ло, смꙋща́ютъ ѻ҆́ное: ꙗ҆ды́й же а҆́бїе почꙋ́вствовавши вре́дъ, скорѣ́е ѿ нѣ́коегѡ ꙗ҆́дꙋ и҆зблева́вши сїѧ̑, невреди́мъ пребыва́етъ: си́це и҆ ᲂу҆́мъ, є҆гда̀ лꙋка̑выѧ прїи́мъ по́мыслы, прогло́титъ ѻ҆́ныѧ, почꙋ́вствꙋетъ же го́ресть и҆́хъ, моли́твою і҆и҃совою и҆з̾ глꙋбины̀ се́рдца происходѧ́щею, ᲂу҆до́бь си́хъ и҆збле́вываетъ, и҆ соверше́ннѡ и҆зверга́етъ, ꙗ҆́коже ᲂу҆че́нїе ѡ҆ бз҃ѣ, и҆ и҆скꙋ́съ ᲂу҆че́нїемъ, си́це разꙋмѣ́ти предлежа́щее предадѐ трезвѧ́щымсѧ.

рп҃ѳ. Въ дыха́нїе твоѐ и҆ въ но́здри, соединѝ трезвѣ́нїе, и҆ і҆и҃сово и҆́мѧ, и҆лѝ поꙋче́нїе сме́рти незабве́нное и҆ смире́нїе. Ѻ҆боѧ́ бо вѣ́дѧтъ по́льзовати вельмѝ.

р҃ч. Речѐ гдⷭ҇ь: наꙋчи́тесѧ ѿ менѐ, ꙗ҆́кѡ кро́токъ є҆́смь и҆ смире́нъ се́рдцемъ, и҆ ѡ҆брѧ́щете поко́й дꙋша́мъ ва́шымъ.²⁸⁸

рч҃а. Речѐ гдⷭ҇ь: и҆́же смири́тсѧ ꙗ҆́кѡ ѻ҆троча̀ сїѐ,²⁸⁹ вознесе́тсѧ, возносѧ́йсѧ же смири́тсѧ. Ѿ менѐ, глаго́летъ, наꙋчи́тесѧ. Зри́ши ли, ꙗ҆́кѡ наꙋче́нїе є҆́сть смире́нїе; и҆́бо за́повѣдь є҆гѡ̀ живо́тъ вѣ́чный є҆́сть: се́й же є҆́сть смире́нїе. Несмире́нный ᲂу҆̀бо ѿ живота̀ ѿпа́даетъ и҆ въ проти́вномъ состоѧ́нїи ѡ҆брѧ́щетсѧ.

рч҃в. А҆́ще всѧ́каѧ добродѣ́тель дꙋше́ю и҆ тѣ́ломъ зи́ждетсѧ, дꙋша́ же и҆ тѣ́ло и҆́миже добродѣ́тель ꙗ҆́коже реко́хъ, составлѧ́етсѧ, созда́нїе бж҃їе сꙋ́ть: то̀ ка́кѡ не бѣснꙋ́емсѧ мы̀ кра́йнѣ, чꙋ́ждыми ᲂу҆краше́нїѧми дꙋшѝ и҆ тѣ́ла превозносѧ́щесѧ и҆ тщесла́вѧщесѧ: и҆ на го́рдость, ꙗ҆́кѡ на тростѧны́й же́злъ ᲂу҆твержда́ющесѧ, и҆ преимꙋ́ществꙋющаго безпредѣ́льнымъ вели́чїемъ бг҃а на́шего, на ве́рхъ главы̀ на́шеѧ наводѧ́ще страшнѣ́йшимъ за ве́лїе на́ше беззако́нїе и҆ безꙋ́мїе: гдⷭ҇ь бо гѡ́рдымъ проти́витсѧ:²⁹⁰ и҆ вмѣ́стѡ тогѡ̀, что́бы подража́ти гдⷭ҇ꙋ во смире́нїи, со враго́мъ гдⷭ҇нимъ, го́рдымъ бѣ́сомъ и҆мѣ́емъ дрꙋ́жество, ѿ тщесла́внагѡ и҆ го́рдагѡ мꙋдрова́нїѧ. Сегѡ́ бо ра́ди глаго́лаше а҆пⷭ҇лъ: что́ бо и҆́маши, є҆гѡ́же нѣ́си прїѧ́лъ;²⁹¹ є҆да̀ ты̀ са́мъ себѐ созда̀; а҆́ще же тѣ́ло и҆ дꙋ́шꙋ, ѿ ни́хже, и҆ въ ни́хже, и҆ и҆́миже всѧ́каѧ добродѣ́тель составлѧ́етсѧ, ѿ бг҃а прїѧ́лъ є҆сѝ: что̀ хва́лишисѧ, ꙗ҆́кѡ не прїе́мь; гдⷭ҇ь бо сїѧ̑ дарова̀ тебѣ̀.

рч҃г. Ѡ҆чище́нїе же се́рдца, ѿ негѡ́же и҆ смире́нїе, и҆ всѧ́ко бла́го въ на́съ ѡ҆брѣта́етсѧ сходѧ́щее свы́ше, соверше́нно не и҆но́е что̀ є҆́сть, а҆́ще не сїѐ є҆́же ѿню́дъ не позволѧ́ти помыслѡ́мъ приника́ющымъ вни́ти въ дꙋ́шꙋ.

рч҃д. Хране́нїе бо ᲂу҆ма̀ съ по́мощїю бж҃їею, и҆ є҆ди́нымъ бг҃омъ въ дꙋшѣ̀ ᲂу҆коснѣ́вшее, мꙋ́дрость подае́тъ ᲂу҆мꙋ̀ въ по́двигахъ по бз҃ѣ. Не ма́лое та́кожде дово́льствїе прича́стникꙋ своемꙋ̀ подае́тъ ко ᲂу҆строе́нїю дѣ́лъ и҆ слове́съ, въ сꙋдѣ̀ благопрїѧ́тнѣмъ по гдⷭ҇ѣ.

рч҃є. Сказꙋ́ємаѧ ѡ҆ і҆ере́ѣ въ ве́тхомъ завѣ́тѣ проѡбразова̑нїѧ бѧ́хꙋ чи́стагѡ се́рдца, да и҆ мы̀ вне́млемъ серде́чной скрижа́ли, є҆да̀ ка́кѡ почернѣ́ла є҆́сть ѿ грѣха̀, да слеза́ми и҆ покаѧ́нїемъ, и҆ моли́твою ѡ҆чи́стимъ. Оу҆до́бнаѧ бо ве́щь нѣ́каѧ є҆́сть ᲂу҆́мъ, и҆ ѿ беззако́нныхъ по́мыслѡвъ неꙋдободержи́маѧ, ра́внѡ и҆ ѕлы̑мъ и҆ благи̑мъ мечта́нїѧмъ мы́слєннымъ ᲂу҆до́бь послѣ́дꙋющаѧ.

рч҃ѕ. Бл҃же́нъ вои́стиннꙋ, и҆́же си́це прилѣпи́сѧ мл҃твѣ і҆и҃совой мы́слїю, и҆ гласи́тъ є҆го̀ непреста́ннѡ въ се́рдцѣ, ꙗ҆́коже воздꙋ́хъ присоединѧ́етсѧ тѣлеса́мъ на́шымъ, и҆лѝ пла́мень свѣщѣ̀. И҆ проходѧ̀ со́лнце над̾ земле́ю, твори́тъ де́нь: ст҃о́е же и҆ честно́е и҆́мѧ гдⷭ҇а і҆и҃са, во ᲂу҆мѣ̀ сїѧ́ѧ непреста́ннѡ, ражда́етъ безчи́слєнныѧ солнцеви̑дныѧ помышлє́нїѧ.

рч҃з. Расше́дшымсѧ ѻ҆блака́мъ, воздꙋ́хъ показꙋ́етсѧ чи́стымъ: мечта̑нїѧ же страсте́й, ѿ со́лнца пра́вды і҆и҃са хрⷭ҇та̀ разсѣ́ѧвшесѧ, свѣтови̑дныѧ и҆ ѕвѣздови̑дныѧ помышлє́нїѧ ражда́ти въ се́рдцѣ всѧ́чески навыко́ша, воздꙋ́хꙋ ѻ҆́нагѡ ѿ і҆и҃са просвѣти́вшꙋсѧ. Глаго́летъ бо є҆кклесїа́стъ: надѣ́ющїисѧ на гдⷭ҇а ᲂу҆разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀.²⁹²

рч҃и. Речѐ нѣ́кто ѿ ст҃ы́хъ: памѧтоѕло́бствꙋѧ памѧтоѕло́бствꙋй на бѣ́сы, и҆ враждꙋ́ѧ враждꙋ́й на твоѐ тѣ́ло вы́нꙋ. Льсти́вый дрꙋ́гъ є҆́сть пло́ть, и҆ ᲂу҆гожда́ема па́че бра́нь твори́тъ. И҆ а҆́бїе враждꙋ̀ стѧжѝ къ тѣ́лꙋ и҆ бра́нь со чре́вомъ.

рч҃ѳ. Въ за́днихъ словесѣ́хъ въ пе́рвой и҆ второ́й со́тницѣ, дѣла̀ свѧще́ннагѡ безмо́лвїѧ ᲂу҆ма̀ ѡ҆писа́хомъ не воздѣ́ланїе на́шеѧ то́чїю мы́сли, но ꙗ҆́коже и҆ бг҃омꙋ́дрыхъ ѻ҆тцє́въ бж҃е́ствєннаѧ словеса̀ ᲂу҆́чатъ на́съ ѡ҆ чистотѣ̀ ᲂу҆ма̀. Ны́нѣ же ма́лѡ ре́кше, дабы̀ показа́ти прїѡбрѣ́тенїе блюде́нїѧ ᲂу҆ма̀ глаго́лати преста́немъ.

с҃. Прїидѝ ᲂу҆́бѡ, послѣ́дꙋй мѝ длѧ достиже́нїѧ бл҃же́ннагѡ блюде́нїѧ ᲂу҆ма̀, кто́ бы ты̀ ни бы́лъ любѧ́й дх҃омъ дни̑ ви́дѣти бла́ги, и҆ ѡ҆ гдⷭ҇ѣ наꙋчꙋ́ тѧ ви́димомꙋ дѣ́ланїю и҆ житїю̀ ᲂу҆́мныхъ си́лъ. Не насы́тѧтсѧ бо а҆́гг҃ли пою́ще творца̀, нижѐ ᲂу҆́мъ чи́стѡ ѻ҆́нымъ ревнꙋ́ѧ. И҆ ꙗ҆́коже невеще́ственнїи не пекꙋ́тсѧ ѡ҆ пи́щи: си́це нижѐ сі́и веще́ственнїи ѡ҆ не́й пекꙋ́тсѧ, а҆́ще на не́бо безмо́лвїѧ ᲂу҆ма̀ взы́дꙋтъ.

с҃а. Ꙗ҆́коже ᲂу҆́бѡ вы̑шнїѧ си̑лы не пекꙋ́тсѧ ѡ҆ бога́тствѣ, и҆лѝ стѧжа́нїи: си́це и҆ дꙋше́вное зрѣ́нїе ѡ҆чи́стившїи, и҆ навы́кшїи добродѣ́тели, не попекꙋ́тсѧ ѡ҆ ѡ҆ѕлобле́нїи лꙋка́выхъ дꙋхѡ́въ. И҆ ꙗ҆́коже ѻ҆́нѣмъ ꙗ҆́венъ бога́тый ᲂу҆спѣ́хъ къ бг҃ꙋ: си́це и҆ си̑мъ ꙗ҆́вно вожделѣ́нїе къ бг҃ꙋ и҆ любо́вь, взира́нїе къ бж҃ествꙋ̀ и҆ восхожде́нїе. Прито́мъ же вожделѣ́ннѡ и҆ ненасы́тнѡ на восхожде́нїе простира́ющесѧ, ѿ бж҃е́ственнагѡ вкꙋше́нїѧ и҆ ди́вныѧ любвѐ не ѡ҆стано́вѧтсѧ, до́ндеже серафі́мѡвъ дости́гнꙋтъ: нижѐ почі́ютъ ѿ трезвѣ́нїѧ ᲂу҆ма̀ и҆ вожделѣ́ннагѡ возвыше́нїѧ, до́ндеже а҆́гг҃ли бꙋ́дꙋтъ, ѡ҆ хрⷭ҇тѣ̀ і҆и҃сѣ гдѣ̀ на́шемъ.

с҃в. Нѣ́сть ꙗ҆́да, па́че ꙗ҆́да а҆́спїда и҆ васїлі́ска: и҆ нѣ́сть ѕло́бы, па́че ѕло́бы самолю́бїѧ. И҆сча̑дїѧ же самолю́бїѧ ѕмі́и лета́ющыѧ, и҆мѣ́еши сїѧ̑: похвальбы̑ въ се́рдцѣ, самоꙋго́дїе, чревобѣ́сїе, блꙋ́дъ, тщесла́вїе, за́висть, и҆ ве́рхъ всѣ̑мъ го́рдость, ꙗ҆́же совлека́ти вѣ́сть не человѣ́ки то́чїю, но и҆ а҆́гг҃лы съ небе́съ, и҆ мра́комъ вмѣ́стѡ свѣ́та ѡ҆блека́ти.

с҃г. Сїѧ̑ тѝ прино́симъ, ѳеодꙋ́ле, достоимени́тый въ безмо́лвїи, а҆́ще и҆ въ дѣ́лѣ солга́хомъ. Но мо́жетъ бы́ть прино́симъ не всѐ, а҆ є҆́же бг҃ъ подадѐ, во ѻ҆ц҃ѣ̀, и҆ сн҃ѣ, и҆ ст҃ѣ́мъ дс҃ѣ хвали́мый и҆ сла́вимый ѿ всегѡ̀ слове́снагѡ є҆стества̀, а҆́гг҃лѡвъ и҆ человѣ́кѡвъ, и҆ всеѧ̀ тва́ри, ю҆́же неизрече́ннаѧ трⷪ҇ца, є҆ди́ный бг҃ъ созда̀. Є҆гѡ́же свѣ́тлое ца́рствїе да ᲂу҆лꙋчи́мъ и҆ мы̀, моли́твами пречⷭ҇тыѧ бцⷣы, и҆ преподо́бныхъ ѻ҆тє́цъ на́шихъ є҆мꙋ́же бг҃ꙋ непостижи́момꙋ сла́ва вѣ́чнаѧ, а҆ми́нь.

Фїлоѳе́й преподо́бный ѻ҆те́цъ на́шъ, бы́вый и҆гꙋ́менъ слове́сныѧ па́ствы и҆́нокѡвъ, ꙗ҆́же въ сїна́и, и҆ сегѡ̀ ра́ди сїнаи́тъ нарица́емый, въ ко́и процвѣтѐ времена̀, и҆ сконча́сѧ, безвѣ́стнѡ. Настоѧ́щꙋю же сїю̀ кни́гꙋ, на четы́редесѧть гла́въ раздѣле́ннꙋю, ꙗ҆́кѡ преизрѧ́днѣ и҆́мъ сочине́ннꙋю, и҆ мно́жайшїѧ, ю҆́же немо́щнѡ и҆зрещѝ, дх҃о́вныѧ премꙋ́дрости и҆ дꙋше́вныѧ по́льзы и҆спо́лненнꙋю, къ ли́кꙋ про́чихъ гла́въ ѡ҆ трезвѣ́нїи присоедини́ти не бѣ̀ ᲂу҆го́днѡ пра́ведникꙋ. Мно́гагѡ же и҆ тре́бꙋетъ. Пра́виломъ бо ѻ҆́нꙋю и҆звѣ́стнымъ трезвѣ́нїѧ, и҆ хране́нїѧ ᲂу҆ма̀, и҆ чистоты̀ серде́чныѧ нарещѝ мо́щнѡ непогрѣши́тельнѡ въ и҆́стинѣ.

а҃. Є҆́сть въ на́съ мы́сленнаѧ бра́нь, чꙋ́вственныѧ лютѣ́йшаѧ: и҆ подоба́етъ дѣ́лателю благоче́стїѧ тещѝ, и҆ къ намѣ́ренїю слѣ́довати ᲂу҆́мнѣ, є҆́же соверше́ннѣ па́мѧть бж҃їю въ се́рдцѣ ꙗ҆́коже би́серъ, и҆лѝ ка́мень че́стенъ стѧжа́ти: и҆ подоба́етъ всѧ̑ ѡ҆ста́вити, и҆ тѣ́ло, и҆ са́мꙋю настоѧ́щꙋю жи́знь презира́ти, да бг҃а є҆ди́наго въ се́рдцѣ и҆мѣ́емъ. Довлѣ́етъ бо: речѐ бж҃е́ственный златоꙋ́стъ, бг҃овидѣ́нїе ᲂу҆́мное погꙋби́ти лꙋка̑выѧ сꙋпоста́ты. (Въ маргарі́тѣ ли́стъ ф҃д).

в҃. Все́ю ᲂу҆̀бо си́лою до́лжни сꙋ́ть мы́сленнѣ подвиза́ющїисѧ дꙋхѡ́внаѧ дѣ̑ланїѧ и҆з̾ бж҃е́ственныхъ писа́нїй и҆збира́ти, и҆ ко ᲂу҆мꙋ̀, ꙗ҆́коже цѣльбонѡ́сныѧ пла́стыри прилага́ти: и҆ ѿ ᲂу҆́тра, глаго́летъ, съ ѻ҆па́сною па́мѧтїю бж҃їею, и҆ непреста́нною въ дꙋшѝ і҆и҃са хрⷭ҇та̀ моли́твою, мꙋ́жественнѡ и҆ стро́гѡ стоѧ́ти во вратѣ́хъ се́рдца, и҆ ᲂу҆бива́ти мы́сленною стра́жею всѧ̑ грѣ̑шныѧ землѝ, и҆ восто́ргомъ и҆ протѧже́нїемъ вѣ́рныѧ па́мѧти бж҃їѧ посѣца́ти главы̑ си́льныхъ ѡ҆ гдⷭ҇ѣ, и҆ нача̑ла ра́тныхъ по́мыслѡвъ. Поне́же вѣ́мы и҆ въ мы́сленныхъ по́двизѣхъ бж҃е́ственное нѣ́кое дѣ́ланїе и҆ чи́нъ. И҆ си́це подоба́етъ нꙋ́дѧщымсѧ твори́ти, до́ндеже наста́нетъ снѣде́нїѧ вре́мѧ: по́томъ же благодари́вшымъ гдⷭ҇ви, є҆ди́нагѡ ра́ди человѣколю́бїѧ сꙋгꙋ́бѡ насыща́ющемꙋ на́съ пи́щею, и҆ дꙋхо́внѣ и҆ тѣле́снѣ, па́мѧтїю сме́рти и҆ поꙋче́нїемъ подоба́етъ и҆знꙋрѧ́ти себѐ, и҆ въ настꙋпа́ющїй де́нь па́ки ᲂу҆́треннѧгѡ дѣ́ла крѣ́пкѡ держа́тисѧ. Є҆два́ бо си́це на всѧ́къ де́нь творѧ́ще, и҆збѣ́гнꙋти возмо́жемъ ѡ҆ гдⷭ҇ѣ мре́жей мы́сленнагѡ врага̀, ꙗ҆̀же ᲂу҆коснѣва́ѧ въ на́съ ражда́ютъ трѝ сїѧ̑: вѣ́рꙋ, наде́ждꙋ и҆ любо́вь. И҆ вѣ́ра вои́стиннꙋ ᲂу҆строѧ́етъ на́съ боѧ́тисѧ бг҃а: наде́жда же, преходѧ̀ ра́бскїй стра́хъ, съ любо́вїю бж҃їею соединѧ́етъ человѣ́ка, занѐ ᲂу҆пова́нїе не посрами́тъ: поне́же ражда́ти вѣ́сть сꙋгꙋ́бꙋю любо́вь, є҆́юже зако́нъ и҆ проро́цы ви́сѧтъ. Любы́ же николи́же ѿпа́даетъ съ тѣ́мъ, є҆го́же вино́ю быва́етъ и҆ въ се́мъ вѣ́цѣ прича́стникꙋ своемꙋ̀, и҆сполнѧ́ющемꙋ бж҃е́ствєнныѧ законоположє́нїѧ, и҆ въ бꙋ́дꙋщемъ.

г҃. Рѣ́дко же є҆́сть ѕѣлѡ̀ ѡ҆брѣстѝ ᲂу҆мо́мъ безмо́лвствꙋющыѧ. И҆ ѻ҆́нѣхъ то́чїю є҆́сть сїѐ, и҆̀же бж҃е́ственнꙋю благода́ть, и҆ ᲂу҆тѣше́нїе се́ю ве́щїю прибли́жити къ себѣ̀ ᲂу҆хищрѧ́ютсѧ. А҆́ще ᲂу҆́бѡ любомꙋ́дрїе ѡ҆ хрⷭ҇тѣ̀, во блюде́нїи ᲂу҆ма̀ и҆ трезвѣ́нїи ᲂу҆́мное ѻ҆́ное дѣ́ланїе проходи́ти хо́щемъ, воздержа́нїемъ мно́гихъ ꙗ҆́стїй ᲂу҆жѐ пꙋ́ть се́й на́чнемъ, мѣ́рою ꙗ҆́стїѧ и҆ питїѧ̀ по си́лѣ прїе́млюще. Глаго́летсѧ бо трезвѣ́нїе пра́веднѡ, пꙋ́ть въ ца́рствїе ведꙋ́щїй, и҆ въ сꙋ́щее внꙋ́трь на́съ и҆ въ бꙋ́дꙋщее. Оу҆́мное же дѣ́ланїе ꙗ҆́кѡ содѣ́ловающее и҆ ᲂу҆бѣлѧ́ющее нра́вы ᲂу҆ма̀, и҆ ѿ стра́стнагѡ въ безстра́стное прелага́ющее, ѻ҆ко́нцꙋ свѣ́тломꙋ Оу҆подоблѧ́етсѧ, и҆́мже бг҃ъ прини́кши ꙗ҆влѧ́етсѧ ᲂу҆мꙋ̀.

д҃. А҆ и҆дѣ́же смире́нїе и҆ па́мѧть бж҃їѧ, и҆з̾ трезвѣ́нїѧ и҆ внима́нїѧ состоѧ́щаѧ, и҆ ча́стаѧ моли́тва проти́вꙋ врагѡ́въ воздвиза́емаѧ, та́мѡ є҆́сть мѣ́сто бж҃їе, и҆лѝ серде́чное не́бо, въ не́мже бѣсо́вскїй по́лкъ страши́тсѧ пребыва́ти, ѡ҆бита́ющагѡ ра́ди въ ѻ҆́номъ мѣ́стѣ бг҃а.

є҃. Ничто́же многосло́вїѧ є҆́сть смꙋти́тельнѣе, и҆ ѧ҆зы́ка невозде́ржнагѡ ѕлѣ́е, и҆ ничто́же па́че мо́жетъ состоѧ́нїе дꙋшѝ потреби́ти. Ꙗ҆̀же бо на всѧ́къ де́нь назида́емъ, ѻ҆но̀ разрꙋша́етъ, и҆ ꙗ҆̀же трꙋдо́мъ собира́емъ, ѧ҆зыкобо́лїемъ дꙋша̀ расточа́етъ. Что́ бо ѻ҆́нагѡ го́рше: неꙋдержи́мо ѕло̀. Подоба́етъ ᲂу҆̀бо ѻ҆́номꙋ ча́сть предѣ́лъ положи́ти, и҆ нꙋ́ждꙋ наложи́ти и҆ подави́ти ѻ҆́ной, и҆ да си́це рекꙋ̀, є҆́же на потре́бꙋ то́чїю слꙋжи́ти. И҆ кто̀ и҆зрещѝ мо́жетъ всю̀ ѿ ѧ҆зы́ка быва́ющꙋю дꙋше́внꙋю тщетꙋ̀;

ѕ҃. Пе́рваѧ две́рь, вводѧ́щаѧ въ мы́сленный і҆ерꙋсали́мъ, во внима́нїе ᲂу҆ма̀, є҆́сть молча́нїе ᲂу҆́стъ въ ра́зꙋмѣ, а҆́ще и҆ не безмо́лвствꙋетъ є҆щѐ ᲂу҆́мъ. Втора́ѧ же, ѿ бра́шенъ и҆ пи́тїй воздержа́нїе ᲂу҆мѣ́ренное. Тре́тїѧ, ᲂу҆́мъ и҆ тѣ́ло ѡ҆чища́ющаѧ, сме́рти непреста́ннаѧ па́мѧть и҆ поꙋче́нїе. Сеѧ̀ а҆́зъ красотꙋ̀ є҆ди́ною ᲂу҆зрѣ́въ, и҆ дꙋ́хомъ, а҆ не ѻ҆́комъ ᲂу҆ѧ́звленъ и҆ ᲂу҆слажде́нъ бы́въ, сꙋпрꙋ́гꙋ мнѣ̀ въ се́мъ житїѝ восхотѣ́хъ стѧжа́ти, рачи́тель бы́въ благолѣ́пїѧ тоѧ̀ и҆ че́стности. Ка́кѡ є҆́сть ѻ҆на̀ смире́нна, радостопеча́льна, разсмотри́тельна, пристра́шна бꙋ́дꙋщагѡ пра́веднагѡ и҆стѧза́нїѧ, боѧ́щасѧ ѿлага́тельства житїѧ̀: и҆ ѿ чꙋ́вственныхъ ѻ҆че́съ во́дꙋ живо́тнꙋ цѣли́тельнꙋ ѡ҆бы́че и҆сточа́ти, ѿ мы́сленныхъ же ѻ҆че́съ и҆сто́чникъ и҆спꙋска́ющїй премꙋдрѣ́йшыѧ мы̑сли, и҆́же течѧ̀ и҆ скача̀ весели́тъ смы́слъ. Сїю̀, ꙗ҆́коже рѣ́хъ, дще́рь а҆да́мовꙋ, па́мѧть, глаго́лю, сме́рти, жажда́хъ при́снѡ сожи́тельницею и҆мѣ́ти, и҆ съ не́ю спа́ти, и҆ съ не́ю бесѣ́довати, и҆ что̀ и҆́мать бы́ти по ѿложе́нїи сегѡ̀ тѣлесѐ, соистѧ́зовати: но не позволѧ́ло мно́гащи скве́рное забве́нїе, ѡ҆мраче́ннаѧ дїа́волѧ дще́рь.

з҃. Є҆́сть бра́нь, вта́йнѣ ѿ дꙋхѡ́въ лꙋка́вствїѧ чрез̾ по́мыслы съ дꙋше́ю сража́ющаѧсѧ. Неви́димѣй бо є҆́й сꙋ́щей и҆ ѕложела́тєльныѧ си̑лы ѻ҆́ныѧ, подо́бнѣ є҆ѧ̀ сꙋществꙋ̀, неви́димою бра́нїю къ не́й прихо́дѧтъ. И҆ мо́щно ви́дѣти междꙋ̀ ѻ҆́ными и҆ се́ю, и҆ ѻ҆рꙋ̑жїѧ, и҆ ѡ҆полче́нїе и҆ лє́стныѧ прельщє́нїѧ, и҆ бра́нь стра́шнꙋ, и҆ сраже́нїе ра́тническо, и҆ побѣ̑ды и҆ побѣждє́нїѧ ѿ ѻ҆бою̀ странꙋ̑. Є҆ди́нѣмъ же не доста́точествꙋетъ сїѧ̀ мы́сленнаѧ бра́нь: є҆́йже поꙋча́емъ, пред̾ чꙋ́вственною бра́нїю, вре́менемъ пред̾ꙋставле́нїѧ ра́ти. Чꙋ́вственнаѧ бо бра́нь навы́че и҆ вре́мѧ себѣ̀, и҆ чи́нъ ѡ҆предѣлѧ́ти: ѻ҆́наѧ же безвѣ́стнѡ предлага́етъ, внеза́пꙋ ѿ са́мыѧ среды̀ се́рдца подсѣда́ѧ, дꙋ́шꙋ ᲂу҆мерщвлѧ́етъ грѣхо́мъ. Чесогѡ̀ ра́ди, и҆ почто̀ по́двигъ се́й и҆ бра́нь составлѧ́етсѧ на ны̀; Да не бꙋ́детъ и҆сполнѧ́ема на́ми во́лѧ бж҃їѧ, ѡ҆ не́йже мо́лимсѧ глаго́люще: да бꙋ́детъ въ на́съ во́лѧ твоѧ̀.²⁹³ Во́лѧ же сїѧ̀ сꙋ́ть за́пѡвѣди бж҃їѧ. И҆ а҆́ще кто̀ ѡ҆ гдⷭ҇ѣ ᲂу҆́мъ сво́й вельмѝ тре́звеннѣ поста́вивъ ѿ пре́лести бѣсѡ́въ, вхо́ды и҆́хъ и҆ приплетє́нїѧ, ѿ мечта́нїй составлѧ́ємыѧ, тща́тельнѣ ᲂу҆сма́тривати бꙋ́детъ, ѡ҆брѧ́щетъ и҆̀хъ и҆скꙋ́сомъ. Тѣ́мже и҆ гдⷭ҇ь, проти́вꙋ скве́рныхъ бѣсѡ́въ намѣ́ренїе протѧза́ѧ, ꙗ҆́кѡ бг҃ъ, помышлє́нїѧ и҆́хъ предви́дѧ, сопроти́вꙋ и҆́хъ намѣ́ренїѧ за́пѡвѣди своѧ̑, съ преще́нїемъ престꙋпа́ющымъ, положѝ.

и҃. Є҆гда̀ въ навыкнове́нїи нѣ́коемъ быва́емъ, воздержа́нїѧ глаго́лю, и҆ ᲂу҆дале́нїѧ ѿ ꙗ҆влѧ́ющихсѧ ѕѡ́лъ, пѧтьмѝ чꙋ́вствы производи́мыхъ, по́слѣ сегѡ̀ возмо́жемъ и҆ се́рдце блюстѝ со і҆и҃сомъ, и҆ ѿ негѡ̀ се́рдцемъ просвѣща́тисѧ, и҆ со жела́нїемъ нѣ́кїимъ те́плымъ благосты̑ни є҆гѡ̀ ᲂу҆мо́мъ вкꙋша́ти. Поне́же не и҆но́гѡ ра́ди чесогѡ̀ ѡ҆чища́ти се́рдце зако́нъ прїѧ́хомъ, но ꙗ҆́кѡ да ѻ҆́блакомъ лꙋка́вствїй, и҆зше́дшимъ ѿ воздꙋ́ха серде́чнагѡ, и҆ расточи́вшимсѧ ча́стымъ внима́нїемъ, ꙗ҆́кѡ во ве́дренный де́нь чи́стѣ ви́дѣти возмо́жемъ со́лнце пра́вды, і҆и҃са, и҆ ѿ ча́сти просвѣти́тисѧ во ᲂу҆мѣ̀ словесы̑ вели́чествїѧ є҆гѡ̀. Поне́же не всѣ̑мъ ꙗ҆влѧ́тисѧ ѡ҆быко́ша, но то́чїю ѡ҆чища́ющымъ смы́слъ.

ѳ҃. Си́це себѐ на всѧ́къ де́нь подоба́етъ соверша́ти, ꙗ҆ковы́мъ подоба́етъ ꙗ҆ви́тисѧ пред̾ бг҃омъ. Глаго́летъ бо проро́къ ѡ҆сі́а: Ми́лость и҆ сꙋ́дъ хранѝ, и҆ приближа́йсѧ къ бг҃ꙋ твоемꙋ̀ вы́нꙋ.²⁹⁴ И҆ па́ки малахі́а ѿ лица̀ бж҃їѧ глаго́летъ: сн҃ъ сла́витъ ѻ҆ц҃а̀, и҆ ра́бъ господи́на своегѡ̀ ᲂу҆бои́тсѧ: и҆ а҆́ще ѻ҆ц҃ъ є҆́смь а҆́зъ, то̀ гдѣ̀ сла́ва моѧ̀; и҆ а҆́ще гдⷭ҇ь є҆́смь а҆́зъ, то̀ гдѣ̀ є҆́сть стра́хъ мо́й; глаго́летъ гдⷭ҇ь вседержи́тель.²⁹⁵ И҆ а҆пⷭ҇лъ: Ѡ҆чи́стимъ себѐ, глаго́летъ, ѿ всѧ́кїѧ скве́рны пло́ти и҆ дꙋ́ха.²⁹⁶ И҆ премꙋ́дрость па́ки: Всѧ́цѣмъ хране́нїемъ блюдѝ твоѐ се́рдце: ѿ си́хъ бо и҆схо́дъ живота̀.²⁹⁷ И҆ гдⷭ҇ь і҆и҃съ хрⷭ҇то́съ глаго́летъ: ѡ҆чи́сти внꙋ́треннее стклѧ́ницы, да бꙋ́детъ и҆ внѣ́шнее чи́сто.²⁹⁸

і҃. Безвре́мєнныѧ бесѣ̑ды ѻ҆вогда̀ не́нависть въ слꙋ́шателехъ къ на́мъ ражда́ютъ, ѻ҆вогда́ же ᲂу҆кори̑зны и҆ посмѣѧ̑нїѧ въ зазира́ющихъ безꙋ́мїе глаго́лѡвъ: и҆ны̑ѧ же ѡ҆скверне́нїе со́вѣсти, и҆ны̑ѧ ѡ҆сꙋжде́нїе ѿ бг҃а, и҆ печа́ль дх҃а ст҃а́гѡ. Є҆́же и҆ є҆́сть ᲂу҆жа́снѣйшее всегѡ̀ и҆но́гѡ.

а҃і. Ѡ҆чища́ѧй се́рдце своѐ, и҆ и҆з̾ ко́рене и҆сторга́ѧй ѡ҆ гдⷭ҇ѣ грѣ́хъ, и҆ трꙋдѧ́йсѧ ра́зꙋма ра́ди бж҃е́ственнѣйша, и҆ ᲂу҆мо́мъ ви́дѧй мнѡ́гимъ неви̑димаѧ, не до́лженъ є҆́сть сегѡ̀ ра́ди на нѣ́коего взима́тисѧ. Ничто́же бо чистѣ́йше є҆́сть въ созда́нїѧхъ безпло́тнагѡ, ничто́же а҆́гг҃ла разꙋ́мнѣйше. Но возне́сшїйсѧ дїа́волъ ꙗ҆́кѡ мо́лнїѧ съ небесѐ низве́рженъ бы́сть, си́це высокомꙋ́дрїе є҆гѡ̀ въ нечистотꙋ̀ пред̾ бг҃омъ вмѣне́но бы́сть. Ꙗ҆вле́ни же сꙋ́ть зла́то и҆скопава́ющїи.

в҃і. Глаго́летъ а҆пⷭ҇лъ: подвиза́ѧйсѧ, ѿ всѣ́хъ воздержи́тсѧ:²⁹⁹ ꙗ҆́кѡ нѣ́сть мо́щно съ насыще́нїемъ бра́шенъ,³⁰⁰ проти́вꙋ нача̑лъ и҆ власте́й неви́димыхъ, и҆ ѕложела́тельныхъ лꙋка́выхъ си́лъ, ѡ҆полча́тисѧ пло́тїю се́ю ѕлострада́тельною свѧ̑заннымъ, и҆ при́снѡ похотствꙋ́ющею на дꙋ́хъ. Не бо̀ є҆́сть ца́рствїе бж҃їе бра́шно и҆ питїѐ.³⁰¹ Мꙋдрова́нїе плотско́е, вражда̀ є҆́сть на бг҃а: зако́нꙋ бо бж҃їю не покарѧ́етсѧ, нижѐ во мо́жетъ,³⁰² глаго́летъ. Ꙗ҆́вѣ, ꙗ҆́кѡ сегѡ̀ ра́ди не мо́жетъ, поне́же зе́млено сꙋ́ще, со же́лчїю, и҆ кро́вїю мокро́тою смѣ́шенно, и҆ при́снѡ до́лꙋ стремѧ́щеесѧ, при́снѡ пристра́ствꙋетъ къ зємны́мъ, и҆ ᲂу҆слажда́етсѧ погиба́ющими сла́достьми настоѧ́щагѡ вѣ́ка. Мꙋдрова́нїе бо плотско́е, сме́рть є҆́сть: сꙋ́щїи же во пло́ти, бг҃ꙋ ᲂу҆годи́ти не мо́гꙋтъ.³⁰³

г҃і. Мно́гое же смире́нїе на́мъ потре́бно прилежа́щымъ къ хране́нїю ᲂу҆ма̀ ѡ҆ гдⷭ҇ѣ, пе́рвѣе пред̾ бг҃омъ и҆ людьмѝ. Многоѡбра́знѣ же всегда̀ до́лжни є҆смы̀ сокрꙋша́ти се́рдце, всемꙋ̀ смирѧ́ющемꙋ ѡ҆бꙋча́ющесѧ. Сокрꙋша́ти же и҆ смирѧ́ти вѣ́сть се́рдце па́мѧть дре́внѧгѡ на́шегѡ въ мі́рѣ житїѧ̀, а҆́ще соверше́ннѣ мы̀ па́мѧтꙋемъ, и҆ па́мѧть согрѣше́нїй всѣ́хъ ѿ младе́нчества, по ви́дꙋ ᲂу҆мо́мъ разсма́триваемыхъ, кромѣ̀ плотски́хъ, си́хъ бо воспомина́нїе вре́дно є҆́сть: и҆ смирѧ́ти вѣ́сть, и҆ сле́зы ражда́ти, и҆ ко благодаре́нїю бж҃їю всесерде́чнѣ на́съ подвиза́ти, ꙗ҆́коже и҆ всегда́шнѧѧ и҆ ꙗ҆́вственнаѧ па́мѧть сме́рти. Сїѧ́ бо и҆ пла́чь ражда́етъ со сла́достїю нѣ́коею и҆ ра́достїю, и҆ трезвѣ́нїе ᲂу҆ма̀. Крѣ́пцѣ же смирѧ́етъ мꙋдрова́нїе превознесе́ннѡ взира́ти на зе́млю, и҆ па́мѧть страсте́й гдⷭ҇а на́шегѡ і҆и҃са хрⷭ҇та̀, по ви́дꙋ и҆ си̑мъ па́мѧтїю собира́ємымъ и҆ воспомина́ємымъ. Сле́зы же и҆ сїѧ̑ подаю́тъ. И҆ све́рхъ сегѡ̀ смирѧ́ютъ дꙋ́шꙋ и҆ мнѡ́гаѧ благодѣѧ̑нїѧ бж҃їѧ, ꙗ҆̀же къ на́мъ, по ви́дꙋ и҆счислѧ́ємыѧ и҆ разсма́триваємыѧ, поне́же къ гѡ́рдымъ бѣсѡ́мъ бра́нь и҆́мамы.

д҃і. Не ѿрица́йсѧ ты̀ по самолю́бїю сицевы́хъ спаси́тельныхъ врачева́нїй дꙋшѝ. Занѐ нѣ́си про́чее хрⷭ҇то́въ ᲂу҆чени́къ, и҆ нижѐ па́ѵловъ подража́тель, и҆́же нѣ́смь дово́ленъ, глаго́летъ, нарещи́сѧ а҆пⷭ҇лъ.³⁰⁴ И҆ па́ки: сꙋ́щаго пе́рвѣе хꙋ́льника и҆ гони́телѧ и҆ досади́телѧ, зри́ши ли, гордели́ве, ст҃а́го, ꙗ҆́кѡ не забыва́ше пе́рвѣйшее житїѐ. и҆ вси́ же ст҃і́и ѿ нача́ла созда́нїѧ мі́ра да́же до ны́нѣ, въ сїю̀ ѡ҆блача́хꙋсѧ послѣ́днѣйшꙋю бж҃їю ѻ҆де́ждꙋ. Занѐ и҆ са́мъ гдⷭ҇ь на́шъ і҆и҃съ хрⷭ҇то́съ бг҃ъ сы́й непостижи́мъ и҆ недовѣ́домъ, и҆ неизглаго́ланъ, хотѧ̀ показа́ти пꙋ́ть вѣ́чныѧ жи́зни и҆ ст҃ости во смире́нїе ѡ҆блече́нъ бѣ̀ во всѐ своѐ житїѐ во пло́ти. Си́це ᲂу҆́бѡ ст҃о́е смире́нїе бж҃е́ственною добродѣ́телїю пра́веднѡ досто́итъ нарица́тисѧ, и҆ влⷣчнею за́повѣдїю и҆ ᲂу҆́тварїю: и҆ а҆́гг҃ли, и҆ всѣ̀ свѣ̑тлыѧ и҆ бж҃е́ствєнныѧ ѻ҆́ныѧ си̑лы се́й добродѣ́тели и҆зꙋча́ютсѧ, и҆ хранѧ́тъ вѣ́дѧще, каковы́мъ паде́нїемъ падѐ разгордѣ́выйсѧ сатана̀, и҆ во ѡ҆́бразъ тогѡ̀, ꙗ҆́кѡ страши́тисѧ подоба́етъ паде́нїѧ а҆́гг҃лѡмъ и҆ человѣ́кѡмъ, лежи́тъ лꙋка́вый въ бе́зднѣ, всѧ́кїѧ и҆ны́ѧ тва́ри безче́стнѣйшимъ пред̾ бг҃омъ, своеѧ̀ ра́ди горды́ни показа́всѧ. Вѣ́мы же, кі́имъ паде́нїемъ и҆ а҆да́мъ ѿ горды́ни падѐ. Толи́ки ᲂу҆́бѡ и҆мꙋ́ще ѡ҆́бразы высокотво́рныѧ добродѣ́тели, всѧ́чески при́снѡ да смирѧ́емсѧ, є҆ли́кѡ мо́щнѡ, сі́и ᲂу҆потреблѧ́юще. Смири́мсѧ дꙋше́ю и҆ тѣ́ломъ, и҆ мꙋдрова́нїемъ, и҆ хотѣ́нїемъ, и҆ глаго́лы, и҆ помышле́ньми и҆ ѡ҆́бразомъ, и҆ внѣꙋ́дꙋ и҆ внꙋтрьꙋ́дꙋ, є҆́же наипа́че и҆ска́ти подоба́етъ, да сꙋ́щаго по на́съ і҆и҃са хрⷭ҇та̀ сн҃а бж҃їѧ и҆ бг҃а, проти́вꙋ на́съ и҆мѣ́ти не бꙋ́демъ. Гдⷭ҇ь бо гѡ́рдымъ проти́витсѧ, смирє́ннымъ же дае́тъ благода́ть.³⁰⁵ И҆: Нечи́стъ пред̾ гдⷭ҇емъ всѧ́къ высокосе́рдъ.³⁰⁶ И҆: смирѧ́ѧй себѐ, вознесе́тсѧ.³⁰⁷ И҆: наꙋчи́тесѧ ѿ менѐ, ꙗ҆́кѡ кро́токъ є҆́смь и҆ смире́нъ се́рдцемъ.³⁰⁸ Тѣ́мже внима́ти подоба́етъ.

є҃і. Зри́те, глаго́летъ сп҃си́тель, да не ѡ҆тѧгча́ютъ сердца̀ ва̑ша,³⁰⁹ и҆ прѡ́чаѧ. Подвиза́ѧйсѧ же, ѿ всѣ́хъ воздержи́тсѧ.³¹⁰ Всѧ̑ ᲂу҆́бѡ сїѧ̑ къ на́мъ ѿ бж҃е́ственнагѡ писа́нїѧ речє́ннаѧ вѣ́дѧще, возде́ржнѣ житїѐ да проведе́мъ. Пре́жде всѣ́хъ ѿ мно́гихъ бра́шенъ ѿвраща́тисѧ чи́номъ и҆ ѻ҆бы́чаемъ добродѣ́тельнымъ тѣ́ло ѡ҆бꙋчи́мъ, мѣ́рою пи́щꙋ ѻ҆́номꙋ подаю́ще. Си́це бо взыгра̑нїѧ и҆ са̑мыѧ по́хѡтныѧ ча̑сти ᲂу҆до́бнѣе ᲂу҆толѧ́ютсѧ и҆ покарѧ́ютсѧ влады́цѣ, си́рѣчь слове́сной ча́сти, и҆ а҆́ще подоба́етъ рещѝ вѣроѧ́тнѡ и҆ и҆́стиннѡ, и҆ движє́нїѧ ꙗ҆́рости. Но и҆ про́чихъ согрѣше́нїй ᲂу҆до́бь да ᲂу҆далѧ́емсѧ. Занѐ и҆ сїѐ добродѣ́тель сꙋ́дитсѧ бы́ти, и҆скꙋ́съ добродѣ́тели прїи́мшымъ, є҆́же соверше́ннѡ возде́рживатисѧ, си́рѣчь ѿ всѧ́кагѡ ви́да лꙋка́ва ᲂу҆далѧ́тисѧ. Вина́ бо чистоты̀ предвари́тельнѣ є҆́сть бг҃ъ, и҆́же всѣ́хъ до́брыхъ вина̀ и҆ пода́тель: пото́мже и҆ ѿ бра́шенъ мно́гихъ ра́вное на всѧ́къ де́нь и҆ ᲂу҆мѣ́ренное воздержа́нїе.

ѕ҃і. Ꙗ҆́коже сатана̀ сопротивлѧ́етсѧ бг҃ови, во є҆́же не бы́ти во́ли бж҃їей: ꙗ҆̀же сꙋ́ть за́пѡвѣди и҆́миже покꙋша́етсѧ воспрети́ти ю҆̀ на́ми, ра́тꙋетъ на бг҃а: си́це па́ки на́ми хо́щетъ бг҃ъ соверша́тисѧ всест҃о́й є҆гѡ̀ во́ли, ꙗ҆̀же сꙋ́ть, ꙗ҆́коже реко́хъ, бж҃е́ствєнныѧ и҆ животвѡ́рныѧ за́пѡвѣди, низлага́ѧ на́ми, и҆ свое́ю по́мощїю па́гꙋбное намѣ́ренїе лꙋка́вагѡ. Вра́жїе бо несмы́сленное хотѣ́нїе, є҆́же мни́тсѧ бг҃ꙋ сопротивлѧ́тисѧ, и҆́миже нарꙋша́етъ ѻ҆́нъ за́пѡвѣди є҆гѡ̀, са́мъ напроти́въ бг҃ъ человѣ́ческою не́мощїю низвраща́етъ: и҆ зрѝ, а҆́ще не та́кѡ є҆́сть. Всѧ̑ ᲂу҆̀бо бж҃е́ственнагѡ є҆ѵⷢ҇лїа за́пѡвѣди, трича́стности дꙋшѝ мнѧ́тсѧ законополага́ти, и҆ здра́вꙋ ѻ҆́нꙋю твори́ти тѣ́ми, ꙗ҆̀же повелѣва́ютъ: па́че же не то́чїю мнѧ́тсѧ, но и҆ и҆́стиннѡ ѻ҆́нꙋю здра́вꙋ творѧ́тъ. Проти́вꙋ сеѧ̀ ᲂу҆́бѡ трича́стности дꙋшѝ, ви́дитсѧ и҆ дїа́волъ но́щїю и҆ дне́мъ ра́товати. А҆́ще съ трича́стностїю ра́тꙋетъ сатана̀, ꙗ҆́вѣ, ꙗ҆́кѡ и҆ со за́повѣдьми хрⷭ҇то́выми ра́тꙋетъ. хрⷭ҇то́съ бо трича́стности дꙋшѝ за́пѡвѣди законополага́етъ, ꙗ҆̀же сꙋ́ть: ꙗ҆́ростнаѧ, жела́тельнаѧ и҆ слове́снаѧ. И҆ смотрѝ: гнѣ́ваѧйсѧ на бра́та своего̀ всꙋ́е, пови́ненъ є҆́сть сꙋдꙋ̀,³¹¹ и҆ прѡ́чаѧ є҆гѡ̀ заповѣ̑данїѧ: сѐ цѣльбы̑ ꙗ҆́рости. Вра́гъ же па́ки за́повѣдь сїю̀, и҆ ꙗ҆́же ѡ҆ не́й, покꙋша́етсѧ низврати́ти внꙋ́трь по́мыслы любопрѣ́нїй, ѕлопомнѣ́нїѧ и҆ за́висти. Вѣ́сть бо и҆ са́мъ сꙋпоста́тъ, ꙗ҆́кѡ ꙗ҆́ростныѧ ча́сти наста́вникъ є҆́сть слове́снаѧ, и҆ на сїю̀ ꙗ҆́коже реко́хъ, по́мыслы стрѣлѧ́ѧ мнѣ́нїѧми за́висти, любопрѣ́нїѧ, ра́спри, ле́сти, тщесла́вїѧ, склонѧ́етъ слове́снꙋю ча́сть ѡ҆ста́вити своѐ нача́льство, и҆ вда́ти ꙗ҆́рости ᲂу҆здꙋ̀, и҆ неꙋправлѧ́емꙋю ѻ҆́нꙋю ѡ҆ста́вити. Ꙗ҆́рость же ꙗ҆́коже ко́рмчаго ѿве́ргши и҆зно́ситъ словесы̑ чрез̾ ᲂу҆ста̀ предлежа́вшаѧ въ се́рдцѣ, ꙗ҆̀же по́мыслы вра́жїими и҆ нерадѣ́нїемъ ᲂу҆ма̀ въ се́рдцѣ бы́ша сокровє́на, и҆ се́рдца вмѣ́стѡ бж҃е́ственнагѡ дх҃а, и҆ бж҃е́ственныхъ мы́слей, тогда̀ ѕло́бы сꙋ́ще и҆спо́лнено ви́дѣти мо́щно, ꙗ҆́коже речѐ гдⷭ҇ь: ѿ и҆збы́тка се́рдца глаго́лютъ ᲂу҆ста̀.³¹² А҆́ще бо во глаго́лы внꙋ́трь поꙋча́ємаѧ лꙋка́вый и҆звестѝ возмо́жетъ: ꙗ҆́тъ бы́вый не рака̀ бра́тꙋ то́кмѡ рече́тъ, и҆ ю҆ро́дъ, но и҆ досади́тєльныѧ глаго́лы, и҆ во ᲂу҆бі́йство мно́гажды впаде́тъ. Сїѧ̑ ᲂу҆́бѡ лꙋка́вый ᲂу҆потреблѧ́етъ, ра́ди бг҃а да́вшагѡ за́повѣдь, є҆́же не гнѣ́ватисѧ всꙋ́е. Ꙗ҆́же можа́хꙋ не произы́ти въ глаго́лы досади́тєльны, и҆ си̑мъ послѣ̑дꙋющаѧ, а҆́ще бы въ нача́лѣ прило́га а҆́бїе ѿгна́шасѧ ѿ се́рдца моли́твою и҆ внима́нїемъ внꙋ́треннимъ. Та́кѡ всегꙋби́тель полꙋча́етъ своѐ намѣ́ренїе, а҆́ще вложе́нными въ се́рдцѣ по́мыслы ѡ҆брѧ́щетъ себѐ бж҃е́ственнꙋю за́повѣдь разрꙋща́юща.

з҃і. Ка́ѧ же и҆ жела́тельной ча́сти ѿ бж҃е́ственной за́повѣди влⷣчней заповѣ́дашасѧ; воззрѣ́вый на женꙋ̀, ко є҆́же вожделѣ́ти є҆ѧ̀, ᲂу҆жѐ любодѣ́йствова съ не́ю въ се́рдцѣ свое́мъ.³¹³ И҆ сїю̀ да́ннꙋ бы́вшꙋ ви́дѣвъ ѕлодѣ́й, ꙗ҆кѡвы̀ плете́тъ на за́повѣдь мрє́жи: дале́че бо ᲂу҆дали́вши ѿ раздража́ющагѡ сегѡ̀ вещества̀, бра́нь внꙋ́трь поставлѧ́етъ: и҆ мо́щно ви́дѣти живонаписꙋ́ємыѧ ѿ негѡ̀ во ᲂу҆мѣ̀ ѡ҆́бразы, и҆ и҆з̾ѡбражє́нїѧ блꙋ̑дныѧ, и҆ мо́щно словеса̀ слы́шати возбꙋжда́ющыѧ къ стра́сти, и҆ и҆́на, ꙗ҆̀же вѣ́дѧтъ ᲂу҆ма̀ и҆скꙋ́съ и҆мꙋ́щїи.

и҃і. Ка́ѧ же ᲂу҆̀бо є҆́сть и҆ слове́сной ча́сти совѣ́тꙋющаѧ за́повѣдь; а҆́зъ же глаго́лю ва́мъ: не клѧ́тисѧ всѧ́кѡ. Бꙋ́ди же сло́во ва́ше: є҆́й, и҆ нѝ.³¹⁴ И҆: не ѿрекі́йсѧ всѣ́хъ и҆ послѣ́дꙋѧй мнѣ̀, нѣ́сть менѐ досто́инъ. И҆: Вни́дите ᲂу҆́зкими враты̑:³¹⁵ сїѧ̑ заповѣ̑данїѧ слове́сной ча́сти. Па́ки ᲂу҆́бѡ сꙋпоста́тъ, ꙗ҆́коже нѣ́коего хра́браго воево́дꙋ побѣди́ти хотѧ̀, и҆́же є҆́сть слове́снаѧ ча́сть, по́мыслы чревобѣ́сїѧ и҆ нерадѣ́нїѧ ѻ҆́нꙋю ѿ смы́сла ᲂу҆клони́въ, над̾ влады́чествїемъ є҆ѧ̀, ꙗ҆́кѡ пїѧ́нꙋ воево́дѣ нарꙋга́всѧ и҆ и҆згна́въ, ꙗ҆́рость и҆ по́хоть слꙋжи́телей свои́хъ хотѣ́нїй се́й ѕмі́й ᲂу҆потреблѧ́етъ. Си́лы же сїѧ̑, жела́тельнаѧ, глаго́лю, и҆ ꙗ҆́ростнаѧ ча́сть, ѡ҆ста́влены сꙋ́ще ѿ слове́сныѧ, пѧ́ть на̑ша чꙋ̑вства слꙋжи́телѧми ᲂу҆потреблѧ́ютъ, во є҆́же согрѣша́ти ꙗ҆́вѣ. И҆ сїѧ̑ сꙋ́ть согрѣшє́нїѧ. Тогда̀ ᲂу҆́бѡ и҆ ѻ҆́чи любопы́тни сꙋ́ть, не и҆мꙋ́ще ᲂу҆ма̀, во внꙋ́тренность и҆̀хъ заключа́юща, и҆ слꙋ́хъ слы́шати сꙋ́єтна лю́бѧщъ, и҆ ѡ҆сѧза́нїе разслаблѧ́емо, и҆ ᲂу҆ста̀ неꙋдержи̑ма, и҆ рꙋ́цѣ, ꙗ҆́же не подоба́етъ, каса́ющыѧсѧ. И҆̀мже послѣ́дꙋетъ вмѣ́стѡ пра́вды, непра́вда: вмѣ́стѡ мꙋ́дрости, безꙋ́мїе: вмѣ́стѡ цѣломꙋ́дрїѧ, блꙋ́дъ: вмѣ́стѡ мꙋ́жества, боѧзли́вость. Сїѧ̑ бо сꙋ́ть гла̑вныѧ четы́ре добродѣ́тєли, си́рѣчь: пра́вда, мꙋ́дрость, цѣломꙋ́дрїе и҆ мꙋ́жество крѣ́пкое трича́стность ᲂу҆правлѧ́ютъ. Трича́стность же до́брѣ ᲂу҆правлѧ́ема, чꙋ̑вства ѿ безмѣ́стныхъ ᲂу҆де́рживаетъ. И҆ тогда̀ ᲂу҆̀бо ᲂу҆́мъ тишинꙋ̀ и҆мѣ́ѧ, си́ламъ же є҆гѡ̀ бж҃е́ственнѣ ᲂу҆правлѧ́ємымъ и҆ послꙋ̑шнымъ сꙋ́щымъ, ᲂу҆до́бѣе въ мы́сленной бра́ни во́инствꙋетъ. А҆́ще же невнима́нїемъ смꙋща́етъ своѧ̑ си̑лы, побѣжда́емь ѿ прило́гѡвъ вра́жескихъ, бж҃е́ственныѧ за́пѡвѣди престꙋпа́етъ: престꙋпле́нїю же всѧ́чески послѣ́дꙋетъ и҆лѝ покаѧ́нїе ра́вное ѻ҆́номꙋ, и҆лѝ мꙋ́ка въ бꙋ́дꙋщемъ вѣ́цѣ. Добро̀ ᲂу҆́бѡ ᲂу҆мꙋ̀ при́снѡ трезви́тисѧ, є҆́юже ве́щїю ста́въ по є҆стествꙋ̀, быва́етъ бж҃е́ственныхъ за́повѣдей и҆́стиненъ храни́тель.

ѳ҃і. Дꙋша̀ ѿ дꙋхѡ́въ лꙋка́вствїѧ стѣно́ю ѡ҆крꙋжена̀ и҆ ѡ҆граждена̀, и҆ свѧза́сѧ вери́гами мра́ка, не могꙋ́ща сꙋ́щїѧ ра́ди ѻ҆́крестъ себѐ тьмы̀, ꙗ҆́коже хо́щетъ, помоли́тисѧ, вта́йнѣ бо свѧзꙋ́етсѧ, слѣпотствꙋ́ющи внꙋ́треннима ѻ҆чи́ма. Є҆гда̀ ᲂу҆́бѡ нача́ло прїи́метъ моли́тисѧ бг҃ови, и҆ трезви́тисѧ моли́твою, тогда̀ ѻ҆на̀ ѿ тьмы̀ моли́твою разрѣши́тсѧ: и҆́накѡ бо разрѣши́тисѧ не возмо́жно є҆́сть. Тогда́ бо позна́ти мо́жетъ дꙋша̀, ꙗ҆́кѡ внꙋ́трь се́рдца є҆́сть и҆́но боре́нїе, и҆ и҆́но та́йно сопротивле́нїе, и҆ и҆́на бра́нь по́мыслѡвъ дꙋхѡ́въ лꙋка́выхъ, ꙗ҆́коже и҆ ст҃о́е писа́нїе свидѣ́тельствꙋетъ. Глаго́летъ бо: а҆́ще дꙋ́хъ владѣ́ющагѡ взы́детъ на тѧ̀, мѣ́ста твоегѡ̀ не ѡ҆ста́ви.³¹⁶ Мѣ́стѡ же є҆гѡ̀ є҆́сть, ᲂу҆ма̀ крѣ́пкое стоѧ́нїе въ добродѣ́тели, и҆ трезвѣ́нїе: стоѧ́нїе бо є҆́сть и҆ при добродѣ́тели, и҆ при ѕло́бѣ. Глаго́летъ бо: бл҃же́нъ мꙋ́жъ, и҆́же не и҆́де на совѣ́тъ нечести́выхъ, и҆ на пꙋтѝ грѣ́шныхъ не ста̀.³¹⁷ И҆ а҆пⷭ҇лъ: ста́ните ᲂу҆̀бо препоѧ́сани чресла̀ ва̑ша и҆́стиною.³¹⁸

к҃. Держи́мъ хрⷭ҇та̀ ѕѣлѡ̀ крѣ́пцѣ, подвиза́ющихсѧ ра́ди непреста́ннѡ ѿ дꙋшѝ поѧ́ти того̀, да не ᲂу҆клони́тсѧ і҆и҃съ наро́дꙋ сꙋ́щꙋ по́мыслѡвъ, на мѣ́стѣ дꙋшѝ. Є҆го́же нѣ́сть возмо́жно, кромѣ̀ трꙋда̀ дꙋше́внагѡ, крѣ́пцѣ держа́ти. Косне́мсѧ во пло́ти є҆гѡ̀ житїѧ̀, да на́ше со смире́нїемъ препровожда́емъ. И҆ держи́мсѧ є҆гѡ̀ страсте́й, да скѡ́рбнаѧ претерпѣва́емъ, томꙋ̀ ревнꙋ́юще. Вкꙋша́имъ неизрече́нное и҆ снисходи́тельное є҆гѡ̀ ѡ҆ на́съ смотре́нїе, да ѿ вкꙋше́нїѧ дꙋшѝ сла́дкагѡ познава́емъ, ꙗ҆́кѡ бла́гъ гдⷭ҇ь. Кромѣ́ же всѣ́хъ си́хъ, и҆лѝ и҆ пре́жде всѣ́хъ, несꙋмнѣ́ннѡ є҆мꙋ̀ вѣ́рꙋимъ, ѡ҆ ни́хже глаго́летъ. И҆ про́мысла є҆гѡ̀, ѡ҆ на́съ быва́ющагѡ, на всѧ́къ де́нь ѡ҆жида́имъ. И҆ ꙗ҆́коже ᲂу҆́бѡ прилꙋчи́тсѧ, благода́рнѣ и҆ съ цѣлова́нїемъ, и҆ ᲂу҆се́рднѣ прїе́млимъ. Да навы́кнемъ къ бг҃ꙋ то́чїю зрѣ́ти, и҆́же всѧ̑ ᲂу҆правлѧ́етъ бж҃е́ственными словесы̑ премꙋ́дрости. И҆ є҆гда̀ всѧ̑ сїѧ̑ сотвори́мъ, тогда̀ не дале́че нѣ́гдѣ ѿ бг҃а є҆смы̀. Бл҃гоче́стїе бо є҆́сть несоверше́нное соверше́нство, ꙗ҆́коже речѐ нѣ́кто ѿ бг҃оно́сныхъ мꙋже́й и҆ соверше́нныхъ дꙋ́хомъ.

к҃а. И҆скꙋпꙋ́ѧй бо свою̀ жи́знь до́брѣ, и҆ въ помышле́нїи непреста́ннѡ и҆ па́мѧти сме́ртной пребыва́ѧй, и҆ премꙋ́дрѣ ѿ страсте́й ᲂу҆́мъ се́ю ве́щїю ѿвлека́ѧй, се́й и҆ повсеча́стнаѧ пришє́ствїѧ бѣсо́вскихъ прило́гѡвъ всѧ́кѡ быстрѣ́е зрѣ́ти ѡ҆бы́че тогѡ̀, и҆́же кромѣ̀ па́мѧти сме́ртныѧ житїѐ провожда́ти восхотѣ̀, є҆ди́нагѡ ра́ди ра́зꙋма се́рдце ѡ҆чища́ѧ, а҆ не плаче́внꙋ и҆ печа́льнꙋ всегда̀ соблюда́ѧ мы́сль: се́й мнѧ́сѧ быстроꙋ́мїемъ всѧ̑ побѣжда́ти гꙋби́тєльныѧ стра̑сти, є҆ди́ною свѧ́занъ є҆́сть, ꙗ҆́коже не вѣ́сть го́ршею всѣ́хъ, и҆ па́даетъ мно́жицею высокомꙋ́дрїемъ внѣ̀ бг҃а. Семꙋ̀ подоба́етъ ѕѣлѡ̀ трезви́тисѧ, ꙗ҆́кѡ да не воскичи́всѧ погꙋби́тъ смы́слъ. Навыко́ша бо, ꙗ҆́коже па́ѵелъ глаго́летъ, дꙋ́шы ѿсю́дꙋ и҆ ѿи́нꙋдꙋ собира́ющыѧ, кичи́тисѧ на ме́ньшихъ, ꙗ҆ковы́ми сі́и ка́жꙋтсѧ:³¹⁹ въ ни́хже и҆́скры, ꙗ҆́коже мню̀, назида́ющїѧ любвѐ нѣ́сть. А҆ и҆́же и҆́мать па́мѧть сме́рти, по всѧ́къ ве́черъ нашє́ствїѧ бѣсѡ́въ быстрѣ́е ви́дѧ, па́че дрꙋга́гѡ, прогонѧ́ѧ низлага́етъ.

к҃в. Ѡ҆бы́че сла́достнаѧ бж҃їѧ па́мѧть, сі́есть і҆и҃съ, съ ꙗ҆́ростїю серде́чною и҆ го́рестїю спаси́тельною разрꙋша́ти по́мыслѡвъ всѧ̑ кѡ́зни: разꙋмѣ̑нїѧ, словеса̀, мечта̑нїѧ, воѡбражє́нїѧ тє́мнаѧ. И҆ вкра́тцѣ рещѝ, всѧ̑ и҆́миже ѡ҆полча́етсѧ и҆ дерза́етъ всегꙋби́тельный вра́гъ, и҆ща́й поглоти́ти дꙋ́шы. Призыва́емь же і҆и҃съ всѧ̑ ᲂу҆до́бнѡ попалѧ́етъ, ни во є҆ди́номъ бо и҆но́мъ на́ше є҆́сть спасе́нїе, то́чїю во хрⷭ҇тѣ̀ і҆и҃сѣ. Є҆́же и҆ са́мъ речѐ сп҃си́тель: без̾ менѐ не мо́жете твори́ти ничесѡ́же.³²⁰

к҃а. Со всѧ́кимъ ᲂу҆̀бо хране́нїемъ се́рдце на́ше на всѧ́къ ча́съ и҆ мгнове́нїе соблюде́мъ ѿ по́мыслѡвъ, помрача́ющихъ дꙋше́вное зерца́ло. Въ не́мже воѡбража́тисѧ и҆ свѣ́тлѣ напи́сыватисѧ ѡ҆бы́че і҆и҃съ хрⷭ҇то́съ, бг҃а ѻ҆ц҃а̀ премꙋ́дрость и҆ си́ла: и҆ внꙋ́трь се́рдца непреста́ннѡ и҆́щемъ ца́рствїе бж҃їе, зерно̀, и҆ би́серъ, и҆ ква́съ, и҆ и҆на̑ѧ всѧ̑ та̑инства ѡ҆брѧ́щемъ, внꙋ́трь на́съ самѣ́хъ, а҆́ще ѻ҆́ко ᲂу҆ма̀ ѡ҆чи́стимъ. Сегѡ̀ ра́ди и҆ гдⷭ҇ь на́шъ і҆и҃съ хрⷭ҇то́съ речѐ: ца́рствїе бж҃їе внꙋ́трь ва́съ є҆́сть,³²¹ ꙗ҆влѧ́ѧ пребыва́ющее внꙋ́трь се́рдца бж҃ество̀.

к҃д. Трезвѣ́нїе ᲂу҆́бѡ свѣ́тлостнѣ ѡ҆чища́етъ со́вѣсть: се́й же ѡ҆чи́щшейсѧ, ꙗ҆́кѡ свѣ́тꙋ покрыва́емꙋ, а҆́бїе возсїѧ́вша ве́лїю ѿгонѧ́етъ тьмꙋ̀. Се́й же ѿгна́ннѣй ча́стымъ трезвѣ́нїемъ и҆́стиннымъ, таѧ̑щаѧсѧ дѣла̀ па́ки со́вѣсть показꙋ́етъ, и҆ чрез̾ ᲂу҆́мъ наꙋча́етъ трезвѣ́нїемъ неви́димомꙋ боре́нїю и҆ слове́сной бра́ни, и҆ ка́кѡ подоба́етъ мета́ти кѡ́пїѧ въ є҆динобо́рствѣ, и҆ мета́ти благомета́емыми въ цѣ́ль ко́пїѧми по́мыслѡвъ, не бы́ти же низлага́емꙋ ᲂу҆мꙋ̀ кры́ющꙋсѧ ᲂу҆ хрⷭ҇та̀, вмѣ́стѡ вре́дныѧ тьмы̀ жела́ющꙋ свѣ́та, є҆гѡ́же вкꙋси́вый разꙋмѣ́етъ, є҆́же глаго́лю, гла́домъ мꙋ́читъ па́че дꙋ́шꙋ пита́емꙋ, и҆ никогда́же насыща́емꙋ, но є҆ли́кѡ ꙗ҆дꙋ́щꙋ, є҆щѐ па́че а҆́лчꙋщꙋ. Свѣ́тъ привлека́ѧй ᲂу҆́мъ ꙗ҆́коже со́лнце ѻ҆́ко, и҆́же несказа́ненъ сы́й, не сло́вомъ сказꙋ́емь, но и҆скꙋ́сомъ пострада́вшагѡ, и҆лѝ ᲂу҆ѧзви́вшагѡсѧ и҆́стиннѣе рещѝ, молча́ти мѝ заповѣ́дꙋетъ, а҆́ще и҆ хо́щетъ ᲂу҆́мъ всегда̀ наслажда́тисѧ словесы̑ ѻ҆́ными, ꙗ҆̀же глаго́летъ: Ми́ръ и҆мѣ́йте и҆ ст҃ы́ню со всѣ́ми, и҆́хже кромѣ̀ никто́же ᲂу҆́зритъ гдⷭ҇а:³²² стѧжа́нїѧ во ра́ди любвѐ и҆ чистоты̀, сїѧ̑ сꙋ́ть ми́ръ и҆ ѡ҆свѧще́нїе.

к҃є. Ꙗ҆́рость подоба́етъ воѡрꙋжа́ти проти́вꙋ є҆ди́ныхъ бѣсѡ́въ, по́мыслы на ны̀ враждꙋ́ющихъ и҆ ꙗ҆рѧ́щихсѧ. Ѡ҆́бразъ же сꙋ́щїѧ въ на́съ повсеча́стныѧ бра́ни слы́ши и҆ сотворѝ: трезвѣ́нїю совокꙋпѝ моли́твꙋ, трезвѣ́нїе бо моли́твꙋ ѡ҆чища́етъ, сїѧ́ же ѡ҆чища́ющее (ѻ҆́ное трезвѣ́нїе). Трезвѣ́нїе бо непреста́ннѡ зрѧ́ще, разꙋмѣ́етъ входѧ́щихъ: возбрани́вши же ма́лѡ ѻ҆́нымъ входи́ти, въ по́мощь призыва́етъ гдⷭ҇а на́шего і҆и҃са хрⷭ҇та̀, ѿгна́ти лꙋка̑выѧ. Внима́нїе же сопротивоглаго́люще возбранѧ́етъ и҆̀мъ. Призыва́емь же і҆и҃съ, ѿгонѧ́етъ бѣ́сы съ мечта́ньми и҆́хъ.

к҃ѕ. Ѕѣлѡ̀ ѻ҆па́снѣ блюдѝ тво́й ᲂу҆́мъ. Внегда̀ ᲂу҆́бѡ разꙋмѣ́еши, по́мыслъ, вопрекѝ є҆мꙋ̀ глаго́ли, а҆́бїе же вско́рѣ во ѿмще́нїе призовѝ хрⷭ҇та̀. Сла́дкїй же і҆и҃съ, є҆щѐ тебѣ̀ глаго́лющꙋ, рече́тъ: сѐ прїидо́хъ, пода́ти тѝ застꙋпле́нїе. Ты́ же, си̑мъ врагѡ́мъ соверше́ннѡ моли́твою ᲂу҆тиши́вшымсѧ, па́ки внемлѝ ᲂу҆мꙋ̀. Сѐ па́ки во́лны мно́жае пре́жнихъ, є҆ди́на за дрꙋго́й стремѧ́щыѧсѧ, ѿ ни́хже погрꙋжа́етсѧ дꙋша̀: но сѐ па́ки і҆и҃съ возбꙋжда́емь ѿ ᲂу҆ченика̀, и҆ лꙋка̑вымъ вѣ́трѡмъ запреща́ѧ ꙗ҆́кѡ бг҃ъ.³²³ Оу҆празднѧ́сѧ же ѿ си́хъ ча́съ не́гли, и҆лѝ мгнове́нїе, сла́ви спа́сшаго тѧ̀, и҆ помышлѧ́й ѡ҆ сме́рти.

к҃з. Со всѧ́кимъ внима́нїемъ се́рдца, въ чꙋ́вствїи дꙋшѝ да тече́мъ. Внима́нїе бо и҆ моли́тва, на всѧ́къ де́нь сопрѧга́ємы, подѡ́бны сꙋ́ть ѻ҆гнено́сной и҆лїинѣ̀ колесни́цѣ, ꙗ҆́же на высотꙋ̀ небе́снꙋю прича́стника своего̀ возвыша́ютъ. И҆ что̀ глаго́лю; трезвѣ́нїе бо и҆справлѧ́ющемꙋ, и҆лѝ и҆спра́вити тща́щемꙋсѧ, се́рдце чи́сто, съ со́лнцемъ, и҆ лꙋно́ю, и҆ ѕвѣзда́ми, не́бо мы́сленно содѣ́ласѧ: бг҃а же невмѣсти́магѡ быва́етъ вмѣсти́лище, по та́инственномꙋ видѣ́нїю и҆ восхожде́нїю. И҆́же ᲂу҆́бѡ и҆́мать любо́вь къ бж҃е́ственной добродѣ́тели, да и҆скꙋша́етсѧ произноси́ти во всѧ́кое мгнове́нїе и҆́мѧ гдⷭ҇а, и҆ со ᲂу҆се́рдїемъ словеса̀ производи́ти въ дѣла̀. И҆ и҆́же пѧ́ть чꙋ́вствъ, ѿ ни́хже дꙋша̀ вѣ́сть поврежда́тисѧ, нꙋ́ждею нѣ́коею ᲂу҆де́рживаетъ, легча́йшимъ ᲂу҆мꙋ̀ своемꙋ̀, серде́чный по́двигъ и҆ бра́нь всѧ́чески содѣ́ловаетъ. Возбранѧ́й ᲂу҆̀бо всѣ̑мъ внѣ̑шнимъ вымышле́ньми нѣ́кїими, и҆ бори́сѧ съ ражда́емыми ѿ ни́хъ внꙋ́трь безпло́тными по́мыслы, бж҃е́ственными ᲂу҆хищре́ньми. Трꙋдо́мъ бдѣ́нїй сла̑сти ѿгонѧ́й, и҆ въ ꙗ҆́стїи и҆ питїѝ воздержа́ненъ бꙋ́ди: и҆ тѣ́ло дово́льнѣ и҆стончева́й, да ле́гкою серде́чнꙋю бра́нь ᲂу҆до́бнѣ себѣ̀ содѣ́лаеши: благодѣ́тельствꙋѧ себѣ̀, а҆ не и҆но́мꙋ. И҆ помышле́нїемъ сме́рти дꙋ́шꙋ мꙋ́чи, і҆и҃са хрⷭ҇та̀ па́мѧтїю собира́й расточе́нный сво́й ᲂу҆́мъ. Въ нощи́ бо па́че ѡ҆бы́че ᲂу҆́мъ ꙗ҆́сенъ бы́ти ѿ свѣ́тлыхъ видѣ́нїй бг҃а и҆ бж҃е́ственныхъ.

к҃и. Не ѿрица́имсѧ трꙋдѡ́въ и҆ тѣле́сныхъ ѡ҆бꙋче́нїй: ѿ земли́ бо пшени́ца, ѿ таковы́хъ же ра́дость дꙋхо́внаѧ и҆ и҆скꙋ́съ благи́хъ произраста́етъ. Нижѐ со́вѣсть прельща́емъ бесѣ́дꙋющꙋю съ на́ми ѡ҆ спаси́тельныхъ и҆ дѣ́ѧтельныхъ, подоба́ющихъ и҆ до́лжныхъ, глаго́лющꙋю непреста́ннѡ, и҆ наипа́че, а҆́ще слꙋчи́тсѧ дѣ́йственнымъ и҆ дѣ́ѧтельнымъ и҆ то́нкимъ ᲂу҆ма̀ трезвѣ́нїемъ ѡ҆чища́ема. Прили́чный бо тогда̀ и҆ несомнѣ́нный ско́рый сꙋ́дъ ѡ҆бы́че производи́ти ра́ди чистоты̀ своеѧ̀. Тѣ́мже не подоба́етъ си́хъ ра́ди прельща́ти ю҆̀: житїе́ бо ᲂу҆го́дное бг҃ꙋ, внꙋ́трь возвѣща́етъ, и҆ дꙋ́шꙋ же́стокѡ ѡ҆блича́ющи, грѣхмѝ нѣ́когда ѡ҆багри́вшꙋ смы́слъ, согрѣше́нїѧ па́ки показꙋ́етъ и҆справле́нїе, совѣ́тꙋющи се́рдцꙋ согрѣши́вшемꙋ ка́ѧтисѧ, показꙋ́ющи цѣльбꙋ̀ сла́достнымъ бесѣ́дованїемъ.

к҃ѳ. Ды́мъ, ѿ дре́ва восходѧ̀, тѧ́жекъ быва́етъ ѻ҆ча́мъ, но по́слѣжде показꙋ́етъ ѻ҆́нымъ свѣ́тъ, и҆ ᲂу҆слажда́етъ, и҆̀хже пе́рвѣе ѡ҆печалѧ́ше: и҆ внима́нїе непреста́ннѡ зрѧ́щее нано́ситъ тѧ́жесть. Прише́дый же і҆и҃съ призыва́емь моли́твою просвѣща́етъ се́рдце: па́мѧть бо є҆гѡ̀ вкꙋ́пѣ со ѡ҆сїѧ́нїемъ подае́тъ наилꙋ̑чшаѧ блага̑ѧ.

л҃. Ѡ҆бы́клъ нѣ́какѡ вра́гъ ᲂу҆́мъ на́шъ возмꙋща́ти, и҆ пе́рсть ꙗ҆́сти и҆ на́мъ съ собо́ю жела́етъ, и҆ сꙋ́щымъ по ѡ҆́бразꙋ бж҃їю на чре́вѣ ходи́ти. Сегѡ̀ ра́ди глаго́летъ бг҃ъ: враждꙋ̀ положꙋ̀ междꙋ̀ тобо́ю и҆ тѣ́мъ.³²⁴ Сегѡ̀ ра́ди подоба́етъ на́мъ при́снѡ къ бг҃ꙋ воздыха́ти, да си́мъ неꙋѧ́звлени ѿ дїа́вольскихъ раждеже́нныхъ стрѣ́лъ на всѧ́къ де́нь пребыва́емъ. Покры́ю и҆̀, глаго́летъ, ꙗ҆́кѡ позна̀ и҆́мѧ моѐ.³²⁵ И҆: ѻ҆ба́че близ̾ боѧ́щихсѧ є҆гѡ̀ спасе́нїе є҆гѡ̀.³²⁶

л҃а. Блаже́нный а҆пⷭ҇лъ, сосꙋ́дъ и҆збра́нный, ѡ҆ хрⷭ҇тѣ̀ глаго́лѧй, и҆скꙋ́съ мно́гїй внꙋ́треннїѧ и҆ въ на́съ самѣ́хъ сꙋ́щїѧ неви́димыѧ и҆ мы́сленныѧ бра́ни и҆мы́й, ко є҆фесе́ємъ пи́шетъ, глаго́лѧ: Нѣ́сть на́ша бра́нь къ кро́ви и҆ пло́ти, но къ нача́лѡмъ, и҆ ко власте́мъ, и҆ къ мїродержи́телємъ тьмы̀ вѣ́ка сегѡ̀, къ дꙋховѡ́мъ ѕло́бы поднебє́снымъ.³²⁷ Пе́тръ же глаго́летъ: Трезви́тесѧ, бо́дрствꙋйте, занѐ сꙋпоста́тъ на́шъ дїа́волъ, ꙗ҆́кѡ ле́въ рыка́ѧ хо́дитъ, и҆скі́й кого̀ поглоти́ти, є҆мꙋ́же проти́витесѧ тве́рди вѣ́рою.³²⁸ Гдⷭ҇ь же на́шъ і҆и҃съ хрⷭ҇то́съ, бесѣ́дꙋѧ ѡ҆ разли́чныхъ произволе́нїѧхъ слы́шащихъ є҆ѵⷢ҇льскаѧ словеса̀, речѐ: Пото́мъ же прихо́дитъ дїа́волъ, и҆ взе́млетъ сло́во ѿ се́рдца, си́рѣчь, забве́нїемъ лꙋка́вымъ крадьбꙋ̀ содѣ́ловаѧ, да не вѣ́ровавше спасꙋ́тсѧ.³²⁹ И҆ па́ки а҆пⷭ҇лъ: соꙋслажда́юсѧ бо зако́нꙋ бж҃їю по внꙋ́треннемꙋ человѣ́кꙋ: ви́ждꙋже и҆́нъ зако́нъ во ᲂу҆́дѣхъ мои́хъ противꙋвою́ющъ зако́нꙋ ᲂу҆ма̀ моегѡ̀, и҆ плѣнѧ́ющъ мѧ̀.³³⁰ Рѣ́ша же сїѧ̑ ᲂу҆ча́ще на́съ, и҆ сокры́тое ѿ на́съ ꙗ҆вле́ннымъ творѧ́ще.

л҃в. Ѡ҆бы́клъ ра́зꙋмъ нѣ́какѡ кичи́тисѧ, мнѧ́сѧ бы́ти па́че мно́гихъ, а҆́ще лиши́тсѧ самоꙋкоре́нїѧ и҆ смире́нїѧ, ѿ ни́хже быва́етъ позна́нїе своеѧ̀ не́мощи. Сїѐ мꙋ́дрствꙋемъ, слы́шаще глаго́лющаго: Бра́тїе, а҆́зъ себѐ не ᲂу҆̀ помышлѧ́ю дости́гша: є҆ди́но же, за̑днѧѧ ᲂу҆́бѡ забыва́ѧ, въ прє́днѧѧ же простира́ѧсѧ, со ᲂу҆се́рдїемъ гоню̀, къ по́чести вы́шнѧгѡ зва́нїѧ хрⷭ҇то́ва.³³¹ И҆ па́ки: а҆́зъ та́кѡ текꙋ̀, не ꙗ҆́кѡ безвѣ́стнѡ, та́кѡ подвиза́юсѧ, не ꙗ҆́кѡ воздꙋ́хъ бїѧ́й: но ᲂу҆мерщвлѧ́ю тѣ́ло и҆ порабоща́ю, да не ка́кѡ, и҆ны̑мъ проповѣ́дꙋѧ, са́мъ неключи́мь бꙋ́дꙋ.³³² Ви́дѣлъ ли є҆сѝ смире́нїе, є҆ли́кѡ вкꙋ́пѣ и҆ тече́нїе къ добродѣ́тели; зри́ши ли, каково̀ є҆́сть ст҃а́гѡ па́ѵла толи́кагѡ и҆ такова́гѡ мꙋ́жа смире́нїе: Хрⷭ҇то́съ, глаго́летъ, прїи́де въ мі́ръ грѣ́шники спастѝ, ѿ ни́хже пе́рвый є҆́смь а҆́зъ. Тѣ́мже нꙋ́жда на́мъ смирѧ́тисѧ, а҆́ще хꙋ́дость є҆стества̀ и҆́мамы. Что́ бо бре́нїѧ хꙋ́ждше; и҆ бг҃а помина́ти на́мъ подоба́етъ, занѐ сегѡ̀ ра́ди и҆ сотворе́ни є҆смы̀. Но и҆ воздержа́нїю подоба́етъ ѡ҆бꙋча́тисѧ, да ле́гцы тече́мъ ѡ҆ гдⷭ҇ѣ на́шемъ.

л҃а. Не возмо́жно лꙋка̑вымъ помыслѡ́мъ себѐ преда́вшꙋ чи́стꙋ бы́ти въ внѣ́шнемъ человѣ́цѣ ѿ грѣ̑хъ, и҆ нѣ́сть возмо́жно неискоренѧ́ємымъ ѿ се́рдца лꙋка̑вымъ помыслѡ́мъ не произноси́тисѧ въ дѣла̀ лꙋка̑ваѧ. И҆ зрѣ́нїѧ прелюбодѣ́йнагѡ, и҆ помраче́нїѧ вино́вно то̀, что̀ внꙋ́треннее ѻ҆́ко пре́жде прелюбы̀ сотворѝ. Жела̑нїѧ слы́шати стꙋ̑днаѧ вино́вно то̀, что̀ слꙋ́шаемъ дꙋше́вными ᲂу҆шесы̑, ꙗ҆́кобы внꙋ́трь сꙋ́щихъ стꙋ́дныхъ бѣсѡ́въ, и҆ внѣ̀, ꙗ҆кѡва̀ на на́съ ше́пчꙋтъ. До́лжни ᲂу҆̀бо є҆смы̀ ѡ҆ гдⷭ҇ѣ ѡ҆чища́ти себѐ внꙋ́трь и҆ внѣ̀, блюсти́ же до́лженъ є҆́сть кі́йждо ѿ на́съ своѧ̑ чꙋ̑вства, и҆ ѡ҆чища́ти на всѧ́къ де́нь ѿ стра́стныхъ дѣ́йствъ грѣхо́вныхъ. И҆ ꙗ҆́коже пе́рвѣе ѿ неразꙋ́мїѧ въ мі́рѣ ѡ҆браща́ющесѧ въ сꙋетѣ̀ ᲂу҆ма̀ на́шегѡ, порабо́тихомсѧ всѣ́мъ ᲂу҆мо́мъ и҆ чꙋ́вствы пре́лести грѣхо́внѣй: та́кѡ па́ки подоба́етъ на́мъ преше́дшымъ къ житїю̀ по бз҃ѣ, рабо́тати всѣ́мъ ᲂу҆мо́мъ и҆ чꙋ́вствы бг҃ꙋ жи́вꙋ и҆ и҆́стиннꙋ, и҆ бж҃їей пра́вдѣ и҆ хотѣ́нїю.

л҃д. Пе́рвѣе є҆́сть прило́гъ, пото́мъ сочета́нїе, та́же сосложе́нїе, пото́мъ плѣне́нїе, та́же стра́сть, частото́ю и҆ навыкнове́нїемъ ᲂу҆крѣпи́вшаѧсѧ. Сѐ ᲂу҆̀бо сꙋ́щїѧ на ны̀ бра́ни побѣ́да: си́це бо и҆ ѿ ст҃ы́хъ ѻ҆тє́цъ ѡ҆предѣлѧ́етсѧ.

л҃є. И҆ прило́гъ глаго́лютъ бы́ти, помы́слъ просты́й, и҆лѝ, ве́щи ѡ҆́бразъ ꙗ҆́коже прилꙋчи́сѧ новоѧвле́ннѣ въ се́рдцѣ предста́вившїйсѧ и҆ ᲂу҆мꙋ̀ ꙗ҆влѧ́ющїйсѧ. Сочета́нїе же, є҆́же собесѣ́довати по стра́сти, и҆лѝ безстра́стнѡ съ ꙗ҆́вльшимсѧ. Сосложе́нїе же, приклоне́нїе дꙋшѝ со ᲂу҆слажде́нїемъ къ ꙗ҆́вльшемꙋсѧ быва́ющее. Плѣне́нїе же, нꙋ́ждное и҆ нево́льное се́рдца ѿведе́нїе, и҆ надо́лзѣ пребыва́ющее, и҆ блага́гѡ на́шегѡ состоѧ́нїѧ со прилꙋчи́вшимсѧ смѣше́нїе па́гꙋбное. Стра́сть же, со́бственнѣ глаго́лютъ, долговре́меннѣ стра́стнѣ въ дꙋшѝ гнѣздѧ́щеесѧ. Ѿ всѣ́хъ си́хъ пе́рвое є҆́сть безгрѣ́шно: второ́е же, не всѧ́кѡ: тре́тїе же, по состоѧ́нїю подвиза́ющагѡсѧ: бра́ни же и҆лѝ вѣнцє́въ и҆лѝ мꙋче́нїй вино́вна.

л҃ѕ. Плѣне́нїе бо и҆на́кѡ быва́етъ во вре́мѧ моли́твы: и҆ и҆на́кѡ не во вре́мѧ моли́твы. Стра́сть же несꙋмнѣ́ннѡ подлежи́тъ и҆лѝ равномѣ́рномꙋ покаѧ́нїю, и҆лѝ бꙋ́дꙋщей мꙋ́цѣ. Пе́рвомꙋ ᲂу҆́бѡ сопротивлѧ́ѧйсѧ, и҆лѝ безстра́стнѡ помышлѧ́ѧй, си́рѣчь прило́гꙋ, всѧ̑ стꙋ̑днаѧ є҆ди́ною ѿсѣка́етъ. Сїѧ̀ бра́нь лꙋка́выхъ бѣсѡ́въ ко и҆́нокѡмъ и҆ не и҆́нокѡмъ, и҆ побѣ́да быва́етъ и҆ побѣжде́нїе, ꙗ҆́коже рѣ́хомъ: и҆ ѿ побѣ́ды и҆лѝ вѣнцы̀, и҆лѝ мꙋ̑ки согрѣши́вшымъ и҆ не пока́ѧвшымсѧ. Подвиза́имсѧ ᲂу҆̀бо проти́вꙋ ѻ҆́ныхъ мы́сленнѣ, да не лꙋка̑ваѧ и҆́хъ совѣ́тѡванїѧ въ грѣхѡ́внаѧ чꙋ̑вственнаѧ дѣла̀ произведе́мъ: но ѿсѣца́юще ѿ се́рдца грѣ́хъ, сꙋ́щее внꙋ́трь себѐ ца́рствїе бж҃їе ѡ҆брѧ́щемъ, чистотꙋ́ же на́шегѡ се́рдца и҆ ᲂу҆миле́нїе навсегда̀ къ бг҃ꙋ сохрани́мъ сицевы́мъ вельмѝ до́брымъ дѣ́ланїемъ.

л҃з. Мно́зи ѿ и҆́нѡкъ не вѣ́дѧтъ пре́лести ᲂу҆ма̀, ю҆́же претерпѣва́ютъ ѿ бѣсѡ́въ: прилѣжа́тъ же къ дѣѧ́нїю, не пекꙋ́щесѧ ѡ҆ ᲂу҆мѣ̀, про́сти сꙋ́ще, и҆ непритво́рни препровожда́ютъ житїѐ. Мню̀, ꙗ҆́кѡ не вкꙋси́вше серде́чныѧ чистоты̀, ѿню́дъ внꙋ́треннихъ страсте́й тьмы̀ не вѣ́дѧтъ. Є҆ли́цы ᲂу҆́бѡ не вѣ́дѧтъ бра́ни, ѡ҆ не́йже глаго́летъ па́ѵелъ, нижѐ въ до́бромъ, мо́жетъ бы́ть, ѿ и҆скꙋ́са ᲂу҆крѣпи́вшесѧ, дѣ́йствєнныѧ грѣхѝ паде́нїѧми сꙋ́дѧтъ то́кмѡ: сꙋ́щыѧ же въ мы́сли побѣждє́нїѧ и҆ побѣ̑ды не помышлѧ́юще. Поне́же ни зрѣ́нїе сїѧ̑ ѡ҆бы́че ви́дѣти, сꙋ́щыѧ неизрече́нны, и҆ є҆ди́номꙋ подвигополо́жникꙋ бг҃ꙋ, и҆ подвиза́ющагѡсѧ со́вѣсти вѣ́домы. И҆̀мже, мню̀, рече́сѧ ѿ писа́нїй сїѐ: и҆ рѣ́хъ, глаго́летъ, ми́ръ, но не бѣ̀ ми́ръ. Ѡ҆ сꙋ́щихъ ᲂу҆́бѡ бра́тїѧхъ ѿ простоты̀ сицевы́ми, моли́тисѧ подоба́етъ, и҆ наꙋча́ти и҆̀хъ, є҆ли́кѡ мо́щно, да ѕлы́хъ по дѣ́йствꙋ дѣѧ́нїй ᲂу҆далѧ́ютсѧ. А҆ и҆̀же бж҃е́ственное и҆́мꙋтъ жела́нїе, є҆́же зрѣ́нїю дꙋше́вномꙋ ѡ҆чи́ститисѧ, длѧ си́хъ и҆́но є҆́сть дѣѧ́нїе хрⷭ҇то́во, и҆ и҆́но та́инство.

л҃и. Ѡ҆бдержи́тъ въ себѣ̀ вои́стиннꙋ мно́гїѧ добродѣ́тєли ꙗ҆́вственнаѧ сме́рти па́мѧть: ѻ҆на̀ роди́тельница є҆́сть пла́ча, побꙋжде́нїе ѿ всѣ́хъ воздержа́тисѧ, воспомина́нїе гее́нны, ма́ти моли́твы и҆ сле́зъ, хране́нїе се́рдца, безстра́стїе бре́нїѧ ꙗ҆́кѡ бре́нна, и҆сто́чникъ быстроꙋ́мїѧ съ разсꙋжде́нїемъ: и҆́хже ча̑да сꙋгꙋ́бый стра́хъ бж҃їй, и҆ ѡ҆чище́нїе ѿ се́рдца стра́стныхъ пѡ́мыслъ, є҆́же ѡ҆бдержи́тъ мнѡ́гїѧ влⷣчни за́пѡвѣди. Въ не́й зри́тсѧ повсеча́сный по́двигъ неꙋдобопобѣди́мѣйшїй, и҆ ѡ҆ не́мже мно́зи пекꙋ́тсѧ ѿ подви́жникѡвъ хрⷭ҇то́выхъ.

л҃ѳ. Ѿ неча́ѧннагѡ наше́дшее приключе́нїе, и҆лѝ напа́сть не ма́лѡ растлѣва́етъ внима́нїе мы́сли, и҆ ᲂу҆́мъ ѿто́ргши ѿ лꙋ́чшагѡ и҆зволе́нїѧ, и҆ ѿ добродѣ́тельнагѡ и҆ до́брагѡ ᲂу҆строе́нїѧ грѣхо́внѡ ᲂу҆клонѧ́етъ къ любопрѣ́нїѧмъ и҆ ра́спри. Вино́вно же сеѧ̀ па́гꙋбы на́шеѧ то̀, что̀ всѧ́кѡ без̾ попече́нїѧ ѡ҆ и҆скꙋше́нїѧхъ ѡ҆брѣта́емсѧ.

м҃. Ничто́же на́съ повреди́тъ, нижѐ ѡ҆печа́литъ ѿ приключа́ющихсѧ на́мъ на всѧ́къ де́нь приско́рбностей є҆ди́ною сїѐ ᲂу҆вѣ́дѣвшихъ, и҆ поꙋча́ющихсѧ вы́нꙋ. Тѣ́мже глаго́летъ бж҃е́ственный а҆пⷭ҇лъ: Благоволю̀ въ не́мощехъ, въ досажде́нїихъ, въ нꙋ́ждахъ. И҆: всѝ хотѧ́щїи благоче́стнѡ жи́ти ѡ҆ хрⷭ҇тѣ̀ і҆и҃сѣ, гони́ми бꙋ́дꙋтъ.³³³ Томꙋ̀ сла́ва во вѣ́ки вѣкѡ́въ, а҆ми́нь.

Преподо́бный ѻ҆тє́цъ на́шъ нїки́форъ, въ ст҃оимени́тѣй горѣ̀ а҆ѳѡ́нстѣй по́прище по́стническихъ по́двигѡвъ соверши́вшїй, ма́лѡ пре́жде ты́сѧщи тре́хъ сѡ́тъ четыредесѧ́тагѡ лѣ́та процвѣтѐ, ᲂу҆чи́тель и҆ тайноводи́тель высо́кагѡ ᲂу҆че́нїѧ любомꙋ́дрїѧ подви́жническагѡ бѣ̀ григо́рїю ѳессалоні́йскомꙋ, ꙗ҆́коже са́мъ нѣ́гдѣ ѡ҆ не́мъ повѣствꙋ́етъ. По безмо́лвїю же безпопечи́тельномꙋ себѣ̀ то́чїю прилѣжѧ̀, чрез̾ предвари́тельное соедине́нїе самагѡ̀ себѧ̀ съ собо́ю, со премі́рнымъ и҆ верхо́внымъ повели́телемъ соедини́всѧ неизрече́ннѡ, блаже́нное ѿ тогѡ̀, состоѧ́щее въ се́рдцѣ, просвѣще́нїе бл҃года́ти почꙋ́вствовалъ. Неподража́емагѡ ᲂу҆́бѡ ѡ҆́браза ѡ҆боже́нїѧ и҆ бг҃отво́рнагѡ да́ра са́мъ же пе́рвѣе ѿто́лѣ бога́тнѣ и҆спо́лнивсѧ, се́й да́ръ и҆ на́мъ, бл҃же́нный настоѧ́щею свое́ю кни́жицею, а҆́ще хо́щемъ ра́вныхъ съ ни́мъ сподо́битисѧ по́честей, ѻ҆те́чески и҆ дово́льственнѣ соѡбщи́лъ, въ не́йже собра́вши и҆з̾ житїѧ̀ ст҃ы́хъ ѻ҆тє́цъ мѣста̀, и҆з̾ѧснѧ́ющыѧ кі́имлибо ѡ҆́бразомъ по́льзꙋ трезвѣ́нїѧ, внима́нїѧ и҆ мл҃твы, приложи́вши же ѿ себѧ̀ и҆ є҆сте́ственное и҆ и҆скꙋ́сственное вои́стиннꙋ хꙋдо́жество, ꙗ҆́кѡ лꙋ́чшагѡ никто̀ и҆ примы́слить не мо́глъ бы, хꙋдо́жество, привведе́нїе ᲂу҆ма̀, чрез̾ но́здренное вдыха́нїе внꙋ́трь се́рдца, и҆ по не́мъ призыва́нїе гдⷭ҇а і҆и҃са, ꙗ҆́кѡ мѣ́рило пра́веднѣйшее сщ҃е́ннагѡ трезвѣ́нїѧ, и҆ лѣ́ствицꙋ чи́стыѧ и҆ неразсѣ́ѧнныѧ моли́твы, и҆ проистека́ющихъ ѿ неѧ̀ бла̑гъ, жела́ющымъ спасти́сѧ, пе́рвый ѻ҆́нъ поста́вилъ, ꙗ҆́кѡ но́вый нѣ́кїй веселеи́лъ, ᲂу҆стро́ивши а҆рхїте́ктонствомъ дꙋхо́внымъ.

Восходи́те ᲂу҆̀бо, восходи́те, є҆ли́цы жела́нїе и҆́мате всели́тисѧ въ ва́съ хрⷭ҇тꙋ̀, и҆ во ѡ҆́бразъ ст҃а́гѡ дх҃а преѡбрази́тисѧ ѿ сла́вы въ сла́вꙋ хо́щете, и҆ послѣ́довательнѡ ѡ҆бг҃отвори́тисѧ, и҆ спаса́емыхъ свѣ́тлагѡ достоѧ́нїѧ сподо́битисѧ.

Є҆ли́цы великолѣ́пное сп҃са на́шегѡ і҆и҃са хрⷭ҇та̀ бж҃е́ственное свѣтоѧвле́нїе ᲂу҆лꙋчи́ти жела́ете: є҆ли́цы пренебе́сный ѻ҆́гнь серде́чнѣ въ чꙋ́вствїи воспрїѧ́ти хо́щете: є҆ли́цы съ бг҃омъ примире́нїе и҆скꙋ́сомъ и҆ чꙋ́вствомъ ᲂу҆лꙋчи́ти тщи́тесѧ: є҆ли́цы длѧ ѡ҆брѣ́тенїѧ и҆ стѧжа́нїѧ сокро́вища, на селѣ̀ серде́цъ ва́шихъ сокрове́ннагѡ, всѧ̑ мїрска̑ѧ ѡ҆ста́висте: є҆ли́цы свѣща́мъ дꙋшє́внымъ свѣ́тлѡ возжещи́сѧ ѿ ны́нѣ хо́щете, и҆ настоѧ́щихъ всѣ́хъ ѿреко́стесѧ: є҆ли́цы ра́зꙋмомъ и҆ и҆скꙋ́сомъ ца́рствїе небе́сное, внꙋ́трь ва́съ сꙋ́щее, позна́ти и҆ прїѧ́ти хо́щете: прїиди́те, и҆ повѣ́мъ ва́мъ вѣ́чнагѡ, па́че же небе́снагѡ житїѧ̀ наꙋ́кꙋ, и҆лѝ па́че хꙋдо́жество, без̾ трꙋда̀ и҆ по́тꙋ въ приста́нище безстра́стїѧ дѣ́лателѧ своего̀ вводѧ́щее, ниеди́ныѧ пре́лести и҆лѝ паде́нїѧ ѿ бѣсѡ́въ небоѧ́щеесѧ, тогда́ же то́чїю ᲂу҆пада́ющее, є҆гда̀ внѣ̀ жи́зни, є҆́йже ва́съ поꙋча́ю, дале́че нѣ́гдѣ преслꙋша́нїѧ ра́ди пребыва́емъ. Ꙗ҆́коже дре́вле и҆ а҆да́мъ за́повѣдь бж҃їю презрѣ́въ, со ѕмі́емъ же содрꙋжи́всѧ, и҆ вѣ́рнымъ є҆го̀ поче́тъ, плода̀ пре́лести до пресыще́нїѧ насы́тивсѧ, во глꙋбинꙋ̀ сме́рти, тьмы̀ и҆ тлѣ́нїѧ бѣ́дственнѣ себѧ̀ и҆ пото́мкѡвъ свои́хъ всѣ́хъ низве́рже. Возведи́тесѧ ᲂу҆̀бо, па́че же и҆́стиннѣе рещѝ, возврати́мсѧ къ себѣ̀, бра́тїе, совѣ́та ѕмі́ева и҆ приложе́нїѧ ко пресмыка́ющымсѧ до́лꙋ до конца̀ ѿвраща́ющесѧ. Нѣ́сть бо мо́щно съ бг҃омъ примире́нїе и҆ сво́йство и҆на́кѡ на́мъ полꙋчи́ти, а҆́ще не пе́рвѣе къ себѣ̀, є҆ли́кѡ мо́жемъ, возврати́мсѧ, и҆лѝ па́че вни́демъ. Пресла́вно бо ѿ ѡ҆бложе́нїѧ мїрска́гѡ и҆ сꙋ́етнагѡ попече́нїѧ себѐ ѿторга́ти, сꙋ́щее же внꙋ́трь на́съ црⷭ҇твїе нбⷭ҇ное неѻсла́бнѡ содержа́ти. Сегѡ́ бо ра́ди хи́трость хи́тростей и҆ хꙋдо́жество хꙋдо́жествъ, мона́шеское жи́тельство наименова́сѧ: зане́же преподо́бное сїѐ житїѐ нетлѣ̑нныѧ сі́и вє́щи на́мъ подае́тъ, да въ ѻ҆́ныхъ ᲂу҆́мъ на́шъ, ѿ лꙋ́чшихъ ᲂу҆дали́вше, низпогребе́мъ, но стра̑ннаѧ нѣ̑каѧ и҆ неизречє́ннаѧ блага̑ѧ ѡ҆бѣща́етъ, ꙗ҆̀же ѻ҆́ко не ви́дѣ и҆ ᲂу҆́хо не слы́ша, и҆ на се́рдце человѣ́кꙋ не взыдо́ша.³³⁴ И҆ ѿсю́дꙋ нѣ́сть на́ша бра́нь къ пло́ти и҆ кро́ви, но къ нача́лѡмъ, и҆ ко власте́мъ, и҆ къ мїродержи́телємъ тьмы̀ вѣ́ка сегѡ̀.³³⁵ А҆́ще ᲂу҆́бѡ тьма̀ є҆́сть настоѧ́щїй вѣ́къ, бѣжи́мъ ѿ негѡ̀, бѣжи́мъ помышлѧ́юще, ꙗ҆́кѡ ничто́же ѻ҆́бще є҆́сть на́мъ со враго́мъ бж҃їимъ. Хотѧ́й бо дрꙋ́гомъ бы́ти є҆мꙋ̀, вра́гъ бж҃їй быва́етъ, врагꙋ́ же бж҃їю бы́вшꙋ кто̀ помощѝ мо́жетъ; Сегѡ̀ ра́ди подража́имъ ѻ҆тцє́мъ на́шымъ, и҆ сꙋ́щее внꙋ́трь серде́цъ на́шихъ сокро́вище, ꙗ҆́коже и҆ ѻ҆нѝ, взы́щемъ, и҆ сїѐ ѡ҆брѣ́тше держи́мъ ѕѣлѡ̀ крѣ́пцѣ, дѣ́лающе ѻ҆́ное и҆ хранѧ́ще. На сїе́ бо ѿ нача́ла ᲂу҆чини́хомсѧ. А҆́ще же кто̀ дрꙋгі́й нїкоди́мъ ꙗ҆ви́тсѧ любопрѧ́сѧ въ се́мъ, и҆ глаго́лѧ: ка́кѡ мо́жетъ кто̀, въ се́рдце вше́дъ, та́мѡ дѣ́лати и҆лѝ пребыва́ти, ꙗ҆́коже ѻ҆́ной сп҃си́телю противоглаго́лаше: Ка́кѡ мо́жетъ кто̀ во ᲂу҆тро́бꙋ ма́тере своеѧ̀ второ́е вни́ти и҆ роди́тисѧ ста́ръ сы́й; ᲂу҆слы́шитъ и҆ се́й, ꙗ҆́кѡ дх҃ъ, и҆дѣ́же хо́щетъ, ды́шетъ:³³⁶ и҆ а҆́ще ѡ҆ ве́щехъ дѣ́йственныхъ си́це сомнѣва́емсѧ не вѣ́рꙋюще, ка́кѡ вє́щи ᲂу҆мозри́тєльныѧ на́мъ постижи́ми бꙋ́дꙋтъ; Къ ᲂу҆мозрѣ́нїю бо восхожде́нїе є҆́сть дѣ́йственность. Но поне́же без̾ пи́сьменныхъ доказа́нїй и҆звѣсти́тисѧ си́це невѣ́рꙋющемꙋ не возмо́жно: то̀ житїѧ̀ ст҃ы́хъ, и҆ пи́сьмєнныѧ ѻ҆́ныхъ и҆зложє́нїѧ, въ по́льзꙋ мнѡ́гимъ, въ се́мъ сло́вѣ помѣсти́мъ, да ѿ сегѡ̀ и҆звѣща́ѧйсѧ всѧ́кое сомнѣ́нїе ѿри́нетъ. Свы́ше же ѿ са́магѡ вели́кагѡ ѻ҆тца̀ на́шегѡ сло́во нача́вше, къ послѣ́дꙋющымъ пре́йдемъ, є҆ли́кѡ мнѣ̀ возмо́жно, словеса̀ и҆ дѣѧ̑нїѧ си́хъ ѿ ча́сти собра́вше, длѧ ᲂу҆вѣре́нїѧ прило́жимъ.

И҆з̾ житїѧ̀ преподо́бнагѡ ѻ҆тца̀ на́шегѡ а҆нтѡ́нїа.

И҆дѧ́хꙋ нѣ́когда къ а҆́ввѣ а҆нтѡ́нїю два̀ бра̑та: и҆ ѡ҆скꙋдѣ́вшей и҆̀мъ водѣ̀ на пꙋтѝ, є҆ди́нъ ᲂу҆́мре, дрꙋгі́й же близ̾ бѣ̀ сме́рти: не ктомꙋ̀ ᲂу҆́бѡ могі́й пꙋтеше́ствовати, ле́гъ и҆ се́й на землѝ, ча́ѧ сме́рти. А҆нтѡ́нїй же сѣдѧ̀ на горѣ̀, воззва́вши двои́хъ и҆́нокѡвъ, слꙋчи́сѧ бо та́мѡ си̑мъ бы́ти, понꙋ́ди си́хъ, глаго́лѧ: прїими́те корча́гъ воды̀, и҆ тецы́те пꙋте́мъ ко є҆гѵ́птꙋ: двои́мъ бо грѧдꙋ́щымъ, є҆ди́нъ ᲂу҆жѐ сконча́сѧ: дрꙋгі́й же и҆мѣ́етъ ᲂу҆мре́ти, а҆́ще не поспѣшитѐ. Сїе́ бо молѧ́щꙋсѧ мѝ ꙗ҆ви́сѧ. Прише́дше ᲂу҆́бѡ и҆́ноки, ѡ҆брѣто́ша є҆ди́наго лежа́ща ме́ртва, и҆ погребо́ша: дрꙋга́го же возста́виша водо́ю, и҆ приведо́ша къ ста́рцꙋ, бѣ́ бо разстоѧ́нїе на де́нь пꙋтѝ. А҆́ще же вопро́ситъ кто̀, почто̀ не пре́жде кончи́ны ѻ҆́нагѡ речѐ ста́рецъ; не пра́во вопроша́етъ, та́кѡ глаго́лѧ: не бо а҆нтѡ́нїа бѣ̀ сꙋ́дъ ѡ҆ сме́рти, но бг҃а, и҆ ѡ҆б̾ ѻ҆́номъ сꙋди́вшагѡ, и҆ ѡ҆ се́мъ ѿкры́вшагѡ: а҆нтѡ́нїево же то́чїю сїѐ чꙋ́до бѣ̀, ꙗ҆́кѡ на горѣ̀ сѣдѧ̀, и҆мѣ́ѧше се́рдце трезвѧ́щеесѧ, и҆ гдⷭ҇а показꙋ́юща є҆мꙋ̀ да̑льнѧѧ. Ви́диши ли, ꙗ҆́кѡ а҆нтѡ́нїй, зане́же трезви́сѧ се́рдцемъ, бг҃ови́децъ и҆ предзри́тель бы́сть; Въ се́рдцѣ бо ꙗ҆влѧ́етсѧ бг҃ъ ᲂу҆мꙋ̀, въ нача́лѣ, ꙗ҆́коже глаго́летъ і҆ѡа́ннъ лѣ́ствичникъ, ꙗ҆́кѡ ѻ҆́гнь ѡ҆чища́ѧй люби́телѧ, пото́мъ же ꙗ҆́кѡ свѣ́тъ просвѣща́ѧй ᲂу҆́мъ, и҆ бг҃ови́днымъ дѣ́лаѧй, но къ послѣ́дꙋющымъ сло́во да прехо́дитъ.

Ѿ житїѧ̀ ст҃а́гѡ ѳеодо́сїа, ѻ҆бщежи́тїѧ нача́льника.

Та́кѡ бж҃е́ственный ѳеодо́сїй сла́достною любвѝ стрѣло́ю ᲂу҆ѧзвлѧ́шесѧ, и҆ та́кѡ ѻ҆́ными ᲂу҆́зами содержа́шесѧ, ꙗ҆́коже высо́кꙋю сїю̀ и҆ бж҃е́ственнꙋю за́повѣдь: возлю́биши гдⷭ҇а бг҃а твоего̀ ѿ всегѡ̀ се́рдца твоегѡ̀, и҆ ѿ всеѧ̀ дꙋшѝ твоеѧ̀, и҆ ѿ всеѧ̀ мы́сли твоеѧ̀,³³⁷ дѣла́ми и҆сполнѧ́ше, є҆́же и҆на́че не мо́жетъ бы́ти, то́чїю є҆сте́ствєннымъ си́ламъ дꙋшѝ, ни къ чемꙋ̀ и҆но́мꙋ ѿ настоѧ́щихъ веще́й не простира́ющымсѧ, ра́звѣ къ вожделѣ́нїю созда́телѧ. Сі́и ᲂу҆̀бо ᲂу҆́мныѧ, глаго́лю дѣ̑йствїѧ. Тѣ́мже и҆ є҆гда̀ молѧ́ше, мно́гимъ стра́шенъ бѣ̀, и҆ є҆гда̀ прельща́нїе, вожделѣ́нъ и҆ сла́достенъ всѣ̑мъ. Кто̀ та́кѡ преполе́зенъ и҆ со мно́гими бесѣ́дꙋѧ, и҆ кто̀ та́кѡ предово́ленъ внꙋша́ти, є҆́же чꙋ̑вства во є҆ди́но собира́ти и҆ внꙋ́трь ᲂу҆строѧ́ти, ꙗ҆́коже въ мно́жайшей тишинѣ̀ провожда́ти лѣ̑та посредѣ̀ смѧте́нїй, не́жели въ тишинѣ̀ и҆ є҆дина́ковымъ бы́ти и҆ въ наро́дѣ, и҆ ᲂу҆единѧ́тисѧ;

Сѐ вели́кїй се́й ѳеодо́сїй, зане́же чꙋ̑вства во є҆ди́но собира́ше, и҆ внꙋ́трь вводѧ́ше, ᲂу҆ѧ́звленъ бы́сть любо́вїю ко творцꙋ̀.

Ѿ житїѧ̀ ст҃а́гѡ а҆рсе́нїа.

Сегѡ́ же чꙋ́дный а҆рсе́нїй ѡ҆хранѧ́шесѧ, да ни стѧза́нїй пи́сьменныхъ не предлага́ти, нижѐ посла̑нїѧ посыла́ти, не ꙗ҆́кѡ не можа́ше, ка́кѡ бо не возмо́жно томꙋ̀, є҆мꙋ́же благоглаго́лати та́кѡ ᲂу҆до́бно, ꙗ҆́коже дрꙋги̑мъ про́стѡ глаго́лати; Но сі́и сꙋ́ть рече́ннагѡ вины̑: навыкнове́нїе къ молча́нїю и҆ ѿвраще́нїе ѿ тогѡ̀, дабы̀ пока́зыватисѧ. Сегѡ̀ ра́ди а҆́ще и҆ въ це́рквахъ, а҆́ще и҆ въ собра́нїѧхъ, вельмѝ тща́шесѧ, да нижѐ ви́дѣти нѣ́кїихъ, нижѐ самомꙋ̀ ѿ дрꙋги́хъ ви́димꙋ бы́ти: но за столпо́мъ, и҆лѝ за дрꙋго́ю прегра́дою стоѧ́ше и҆ ᲂу҆крыва́шесѧ, и҆ ѿ смѣше́нїѧ со дрꙋги́ми таѧ́шесѧ неви́димымъ, ꙗ҆́кѡ внима́ти себѣ̀ хотѧ́ше, и҆ внꙋ́трь ᲂу҆́мъ собира́ти, и҆ си́це ᲂу҆до́бнѡ ко бг҃ꙋ возноси́тисѧ. Та́кѡ бж҃е́ственный се́й мꙋ́жъ, земны́й а҆́гг҃лъ, внꙋ́трь собира́етъ ᲂу҆́мъ, да ѿтꙋ́дꙋ ᲂу҆до́бнѡ ко бг҃ꙋ возно́ситсѧ.

Ѿ житїѧ̀ ст҃а́гѡ па́ѵла ла́трскагѡ.

Бж҃е́ственный па́ѵелъ въ гора́хъ и҆ пꙋсты́нѧхъ вы́нꙋ живѧ́ше: ѕвѣре́й же ди́кихъ, ꙗ҆́кѡ сосѣ́дѡвъ и҆ сопи́ршникѡвъ и҆мѣ́ѧше: и҆ногда́ же и҆ въ ла́ѵрꙋ сходѧ̀, посѣще́нїѧ ᲂу҆досто́иваше бра́тїю. Оу҆вѣщева́ше же и҆ ᲂу҆ча́ше не малодꙋ́шествовати, нижѐ нерадѣ́ти ѡ҆ болѣ́зненныхъ добродѣ́тели дѣ́лѣхъ: но со внима́нїемъ всѧ́кимъ и҆ разсꙋжде́нїемъ, є҆ѵⷢ҇льскагѡ жи́тельствованїѧ держа́тисѧ, и҆ дꙋховѡ́мъ ѕло́бы благодꙋ́шнѡ противобо́рствовати. Све́рхъ же сегѡ̀ и҆ хꙋдо́жество и҆̀мъ повѣ́да, и҆́мже си́льни бꙋ́дꙋтъ ѿ предпрїѧ́тїй стра́стныхъ ѿꙋча́тисѧ, и҆ посѣ́ѧнїй страсте́й ѿвраща́тисѧ. Ѽле! ка́кѡ бж҃е́ственный се́й ѻ҆те́цъ хꙋдо́жествꙋ ᲂу҆ченикѡ́въ невѣ́дꙋщихъ поꙋча́етъ, да си́мъ ѿвраща́ти мо́гꙋтъ прило́ги страсте́й; Не и҆но́е же бѣ̀ ѻ҆́ное, то́чїю блюде́нїе ᲂу҆ма̀. Сегѡ́ бо хꙋдо́жества є҆́сть дѣ́ло то̀, а҆ не и҆но́гѡ. Но да́лѣе сло́во да простира́етсѧ.

Ѿ житїѧ̀ ст҃а́гѡ са́ввы.

Є҆гда̀ ви́дѧше бж҃е́ственный са́вва ѿре́кшасѧ, и҆ пра́вилꙋ мона́шескагѡ житїѧ̀ соверше́ннѡ и҆з̾ꙋчи́вшасѧ, и҆ съ сопроти́вными по́мыслы прѣ́тисѧ, и҆ ᲂу҆́мъ ᲂу҆жѐ сво́й блюстѝ могꙋ́ща, све́рхъ же сегѡ̀ и҆ па́мѧть мїрски́хъ веще́й весьма̀ и҆з̾ мы́сли и҆згна́вша: тогда̀ въ ла́ѵрѣ дава́ше ке́ллїю, а҆́ще немощно́е и҆́мать тѣ́ло и҆ недꙋ́жное: а҆́ще же здра́въ є҆́сть и҆ благомо́щенъ, повелѣва́ше и҆ ке́ллїю стро́ити. Ви́диши ли, ка́кѡ бж҃е́ственный са́вва хране́нїѧ ᲂу҆ма̀ тре́боваше ѿ ᲂу҆ченикѡ́въ, и҆ та́кѡ даѧ̀ кє́ллїи позволѧ́ше во ѻ҆́ныхъ сѣдѣ́ти; что̀ сотвори́мъ мы̀, пра́зднѡ въ ке́ллїѧхъ сѣдѧ́щїи, и҆ нижѐ вѣ́дꙋщїи, а҆́ще є҆́сть блюде́нїе ᲂу҆ма̀;

Ѿ житїѧ̀ а҆́ввы а҆гаѳѡ́на.

Бра́тъ вопросѝ а҆́ввꙋ а҆гаѳѡ́на, глаго́лѧ: рцы́ ми, а҆́вва, что̀ бо́льше, тѣле́сный трꙋ́дъ, и҆лѝ внꙋ́треннихъ блюде́нїе; И҆ речѐ: подо́бенъ є҆́сть человѣ́къ дре́вꙋ: тѣле́сный трꙋ́дъ, ли́ствїе сꙋ́ть, хране́нїе же внꙋ́треннихъ, пло́дъ є҆́сть. Поне́же ᲂу҆́бѡ по писа́нїю, всѧ́ко дре́во, не творѧ́щее плода̀ добра̀ посѣка́етсѧ, и҆ во ѻ҆́гнь вмета́етсѧ:³³⁸ ꙗ҆́вѣ, ꙗ҆́кѡ ѡ҆ плода́хъ всѐ на́ше тща́нїе до́лженствꙋетъ бы́ти, то́ є҆сть, ѡ҆ хране́нїи ᲂу҆ма̀: потре́бенъ же и҆ покро́въ ли́ственный, и҆ благоꙋкраше́нїе, ꙗ҆̀же сꙋ́ть тѣле́сный трꙋ́дъ. Ѽ чꙋдесѐ! ка́кѡ ст҃ы́й се́й проти́вꙋ всѣ́хъ неимꙋ́щихъ блюде́нїѧ ᲂу҆ма̀, є҆ди́нымъ же дѣ́ланїемъ хва́лѧщихсѧ, и҆зречѐ: всѧ́ко дре́во не творѧ́щее плода̀, си́рѣчь блюде́нїѧ ᲂу҆ма̀: и҆мꙋ́щее же ли́ствїе то́чїю, си́рѣчь дѣ́ланїе, ѿсѣка́етсѧ и҆ во ѻ҆́гнь вмета́етсѧ; Стра́шно твоѐ, ѻ҆́тче, и҆зрече́нїе!

А҆́ввы ма́рка къ нїкола́ю.

А҆́ще ᲂу҆̀бо хо́щеши, ча́до, свѣти́льникъ сво́й ᲂу҆́мнагѡ свѣ́та дꙋхо́внагѡ ра́зꙋма внꙋ́трь ᲂу҆́дꙋ и҆мѣ́ти, да непреткнове́ннѡ во глꙋбоча́йшей но́щи вѣ́ка сегѡ̀ ходи́ти возмо́жеши, и҆ да ѿ гдⷭ҇а стопы̀ твоѧ̑ напра́вѧтсѧ, ꙗ҆́кѡ да пꙋтѝ є҆ѵⷢ҇льскагѡ восхо́щеши ѕѣлѡ̀, по прорече́нномꙋ словесѝ, то́ є҆сть, съ вѣ́рою горѧча́йшею прича́стникъ бы́ти ѿ вожделѣ́нїѧ и҆ моли́твы соверше́нныхъ є҆ѵⷢ҇льскихъ за́повѣдей гдⷭ҇нихъ: покажꙋ̀ тѝ хꙋдо́жество чꙋ́дное, и҆ вымышле́нїе дꙋхо́внагѡ ѡ҆́браза, не тѣле́снагѡ трꙋда̀ и҆лѝ по́двига тре́бꙋющее, но дꙋхо́внагѡ ᲂу҆ма̀ и҆ внима́тельныѧ мы́сли тре́бꙋщее, стра́хомъ и҆ любо́вїю бж҃їею поспѣшествꙋ́емое, и҆́мже вымышле́нїемъ по́лкъ вра́жескїй ᲂу҆до́бь побѣди́ти возмо́жеши. А҆́ще ᲂу҆́бѡ хо́щеши над̾ страстьмѝ побѣ́дꙋ ѡ҆держа́ти, моли́твою и҆ содѣ́йствомъ бж҃їимъ, бы́въ въ себѣ̀, и҆ во глꙋбинꙋ̀ се́рдца входѧ̀, и҆зслѣ́дꙋй си́льныхъ си́хъ тре́хъ и҆споли́нѡвъ: забве́нїе, глаго́лю, ᲂу҆ны́нїе и҆ невѣ́дѣнїе, подкрѣплѧ́ющыѧ мы́сленныхъ и҆ноплеме́нникѡвъ, чрез̾ ни́хже прѡ́чїѧ стра̑сти ѕло́бы входѧ̀, дѣ́йствꙋютъ и҆ живꙋ́тъ, и҆ ᲂу҆си́ливаютсѧ въ дꙋша́хъ сластолюби́выхъ: и҆ мно́гимъ внима́нїемъ и҆ прилѣжа́нїемъ ᲂу҆ма̀ съ го́рнею по́мощїю, ѡ҆брѣ́тши та́кѡ мно́гимъ невѣ́дѡмаѧ, возмо́жеши вели́кимъ внима́нїемъ и҆ моли́твою и҆зба́витисѧ ѕлы́хъ и҆споли́нѡвъ. Ѿ ᲂу҆се́рдїѧ бо къ и҆́стинномꙋ ра́зꙋмꙋ, къ па́мѧтованїю сло́ва бж҃їѧ, и҆ ко бл҃го́мꙋ согла́сїю, тща́щагѡсѧ ᲂу҆тверди́тисѧ въ се́рдцѣ дѣ́йствꙋющею благода́тїю, и҆ прилѣ́жнѡ хранѧ́щагѡсѧ, слѣ́дъ забве́нїѧ, невѣ́дѣнїѧ и҆ ᲂу҆ны́нїѧ въ се́рдцѣ и҆зчеза́етъ. Ви́диши ли согла́сїе дꙋхо́вныхъ глагѡ́лъ; ви́диши ли, ка́кѡ ꙗ҆́сное ѿкрыва́ютъ ѻ҆нѝ вѣ́дѣнїе внима́нїѧ; Впро́чемъ ви́ждь и҆ предлежа́щихъ ѻ҆тцє́въ, ꙗ҆кова̑ѧ и҆ сі́и на́мъ глаго́лютъ.

Ст҃а́гѡ і҆ѡа́нна лѣ́ствичника.

Безмо́лвникъ є҆́сть любопрѧ́йсѧ безтѣле́сное въ тѣле́сномъ до́мѣ загражда́ти, є҆́же є҆́сть пресла́внѡ. Безмо́лвникъ є҆́сть рекі́й: А҆́зъ сплю̀, а҆ се́рдце моѐ бди́тъ,³³⁹ заключа́й две́рь ке́ллїи ѿ тѣ́ла, две́рь ѧ҆зы́ка ѿ вѣща́нїѧ, и҆ внꙋ́треннюю две́рь ѿ дꙋхѡ́въ лꙋка́выхъ. Сѣдѧ̀ на высотѣ̀ блюдѝ, а҆́ще и҆скꙋ́сенъ є҆сѝ, и҆ ви́ждь тогда̀, ка́кѡ, когда̀, ѿкꙋ́дꙋ, коли́цы и҆ ꙗ҆ковы̀ та́тїе вни́ти и҆ ᲂу҆кра́сти гро́здїе грѧдꙋ́тъ; Оу҆трꙋди́выйсѧ назира́тель воста́въ помо́литсѧ, и҆ па́ки сѣ́дъ, тогѡ́жде дѣ́ла мꙋ́жественнѣ є҆́млетсѧ. И҆но́е є҆́сть хране́нїе по́мыслѡвъ, и҆ дрꙋго́е блюде́нїе ᲂу҆ма̀: є҆ли́кѡ ѿстоѧ́тъ восто́цы ѿ за̑падъ, толи́кѡ второ́е ѿ пе́рвагѡ, и҆ трꙋ́днѣйше ѻ҆́нагѡ є҆́сть. Ꙗ҆́коже ѻ҆рꙋ́жїѧ ца̑рскїѧ, въ нѣ́коемъ мѣ́стѣ лежа́щыѧ, ви́дѧ та́тїе не про́стѡ настꙋпа́ютъ: та́кѡ и҆ присовокꙋпи́вый къ се́рдцꙋ мл҃твꙋ, не про́стѡ ѿ мы́сленныхъ разбѡ́йникъ крадо́мь быва́етъ. Вѣ́си ли глаго́лы и҆з̾ѧвлѧ́ющыѧ чꙋ́дное дѣ́ланїе вели́кагѡ сегѡ̀ ѻ҆тца̀; Но мы̀, ꙗ҆́кѡ во тьмѣ̀ проходѧ́щїи, и҆ пове́рхъ дꙋшеполе́зныхъ слове́съ дꙋхо́вныхъ, ꙗ҆́кѡ въ нощно́й бра́ни ходѧ́щїи, доброво́льнѡ глꙋхи́ми дѣ́лаѧсѧ, сїѧ̑ прехо́димъ. Но ви́ждь и҆ предлежа́щихъ ѻ҆тцє́въ, є҆ли̑ка ѻ҆нѝ ѡ҆писꙋ́ютъ на́мъ, пꙋтеводи́тєльствꙋющаѧ ко трезвѣ́нїю.

А҆́ввы и҆са́їи.

Є҆гда̀ кто̀ ѿлꙋчи́тъ себѐ ѿ шꙋ́ихъ, и҆ ᲂу҆вѣ́сть соверше́ннѡ всѧ̑ согрѣшє́нїѧ, ꙗ҆̀же сотворѝ проти́вꙋ бг҃а, занѐ не ви́дитъ грѣхѡ́въ, а҆́ще не ѿлꙋчи́тсѧ ѿ ни́хъ ѿлꙋче́нїемъ го́рестнымъ, дости́гши сеѧ̀ мѣ́ры, ѡ҆брѧ́щетъ пла́чь и҆ мл҃твꙋ, и҆ є҆́же срамлѧ́тисѧ пред̾ бг҃омъ, помина́ѧ лꙋка́вое дрꙋ́жество страсте́й. Подвиза́имсѧ ᲂу҆̀бо, бра́тїе, по си́лѣ на́шей, и҆ содѣ́йствовати бꙋ́детъ къ по мно́жествꙋ ми́лости своеѧ̀. И҆ а҆́ще не сохрани́мъ се́рдце на́ше, ꙗ҆́коже ѻ҆тцы̀ на́ши, хотѧ̀ потщи́мсѧ сохрани́ти тѣлеса̀ на̑ша, ꙗ҆́коже тре́бꙋетъ бг҃ъ безгрѣ́шнѡ: и҆ вѣ́рꙋемъ ꙗ҆́кѡ во вре́мѧ гла́да, и҆мꙋ́щагѡ пости́гнꙋти на́съ, сотвори́тъ съ на́ми ми́лость, ꙗ҆́коже и҆ со ст҃ы́ми свои́ми. Оу҆тѣша́етъ здѣ́сь вели́кїй се́й ѻ҆те́цъ, немощнѣ́йшымъ глаго́лѧ: а҆́ще и҆ не сохрани́мъ се́рдце на́ше, ꙗ҆́коже ѻ҆тцы̀ на́ши, хотѧ̀ тѣлеса̀ на̑ша соблюде́мъ безгрѣ̑шна, ꙗ҆́коже тре́бꙋетъ бг҃ъ: и҆ сотвори́тъ и҆ съ на́ми ми́лость. Мно́гое благоꙋтро́бїе сегѡ̀ ѻ҆тца̀ и҆ снисхожде́нїе!

Мака́рїа вели́кагѡ.

Главнѣ́йшее дѣ́ло подви́жника є҆́сть сїѐ, дабы̀ вше́дъ въ се́рдце своѐ, сотвори́лъ бра́нь съ сатано́ю, и҆ возненави́дѣлъ є҆го̀, и҆ противобо́рствꙋѧ помыслѡ́мъ є҆гѡ̀, ра́товалъ на него̀. А҆́ще кто̀ по ви́димомꙋ храни́тъ тѣ́ло своѐ ѿ тлѣ́нїѧ и҆ блꙋда̀, внꙋ́трь же прелюбодѣ́йствꙋетъ пред̾ бг҃омъ, и҆ блꙋдодѣ́йствꙋетъ по́мыслы, ниеди́ныѧ ѡ҆брѣ́те по́льзы ѿ дѣ́вственнагѡ тѣ́ла. Пи́сано бо є҆́сть: Всѧ́къ, и҆́же воззри́тъ на женꙋ̀, ко є҆́же вожделѣ́ти є҆ѧ̀, ᲂу҆жѐ любодѣ́йствова въ се́рдцѣ.³⁴⁰ Є҆́сть бо блꙋ́дъ, тѣ́ломъ соверша́емый: и҆ є҆́сть блꙋ́дъ, є҆гда̀ дꙋша̀ прїѡбща́етсѧ сатанѣ̀. Мни́тсѧ вели́кїй се́й ѻ҆те́цъ противлѧ́тисѧ словесє́мъ вышерече́ннагѡ ѻ҆тца̀ а҆́ввы и҆са́їи: но нѣ́тъ. И҆́бо и҆ ѻ҆́нъ, ꙗ҆́коже тре́бꙋетъ бг҃ъ, ᲂу҆вѣщава́етъ на́съ сохрани́ти тѣлеса̀ на̑ша: тре́бꙋетъ же не тѣле́сныѧ то́чїю чистоты̀, но и҆ дꙋхо́вныѧ, и҆ си́це ѿ є҆ѵⷢ҇льскихъ за́повѣдей та̑ѧжде на́мъ предлага́етъ.

Дїадо́ха.

Пребыва́ющїй вы́нꙋ въ се́рдцѣ свое́мъ, ѿхо́дитъ соверше́ннѡ ѿ красо́тъ жите́йскихъ. Дꙋ́хомъ бо ходѧ̀, по́хоти плотскі́ѧ вѣ́дѣти не мо́жетъ. Зане́же сицевы́й под̾ стра́жею добродѣ́телей хо́дитъ, добродѣ́тели ѻ҆́ныѧ, ꙗ҆́коже привра́тники и҆мѣ́ѧ. Почемꙋ̀ и҆ недѣйстви́тєльны быва́ютъ тогда̀ бѣсѡ́вскїѧ кова́рства над̾ ни́мъ. До́брѣ речѐ ст҃и́тель се́й, ꙗ҆́кѡ недѣйстви́тєльны пребыва́ютъ кова̑рства вра́жєскїѧ, є҆гда̀ во глꙋбинѣ̀ се́рдца на́шегѡ пребыва́емъ, и҆ толи́кѡ мно́жае, є҆ли́кѡ бо́лѣе та́мѡ ᲂу҆коснѣва́емъ. Но вѣ́си, ꙗ҆́кѡ не доста́нетъ мѝ вре́мени, хотѧ́щꙋ къ настоѧ́щемꙋ повѣствова́нїю всѣ́хъ ѻ҆тцє́въ приводи́ти словеса̀. Тѣ́мже ѡ҆ є҆ди́номъ и҆лѝ двꙋ́хъ ᲂу҆помѧнꙋ́вши, къ концꙋ̀ сло́ва ѡ҆бращꙋ́сѧ.

І҆саа́ка Сѵ́рина.

Потщи́сѧ вни́ти во внꙋ́треннее сокро́вище твоѐ. и҆ ᲂу҆́зриши сокро́вище небе́сное. Є҆ди́но бо є҆́сть сїѐ, и҆ ѻ҆́ное: и҆ во є҆ди́но входѧ̀, ᲂу҆́зриши и҆ то̀ и҆ дрꙋго́е. Лѣ́ствица ца́рствїѧ ѻ҆́нагѡ внꙋ́трь тебѧ̀ є҆́сть сокрове́нна, си́рѣчь, въ дꙋшѣ̀ твое́й. Ѡ҆мо́й ᲂу҆̀бо себѧ̀ ѿ грѣха̀, и҆ ѡ҆брѧ́щеши та́мѡ степє́ни, и҆́миже восходи́ти возмо́жеши.

Карпа́ѳїа.

Мно́гїи по́двигъ и҆ трꙋ́дъ потре́бенъ въ моли́твахъ, ꙗ҆́кѡ да ѡ҆брѧ́щемъ несмꙋще́нное состоѧ́нїе мы́сли, дрꙋго́е нѣ́кое серде́чное не́бо, и҆дѣ́же живе́тъ хрⷭ҇то́съ, ꙗ҆́коже глаго́летъ а҆по́столъ: и҆лѝ не вѣ́сте, ꙗ҆́кѡ хрⷭ҇то́съ живе́тъ въ ва́съ, ра́звѣ то́чїю неискꙋ́сни є҆стѐ;³⁴¹

Сѷмеѡ́на Бг҃осло́ва.

Свобо́дꙋ ѡ҆брѣ́те дїа́волъ со бѣ́сы, ѿне́лѣже преслꙋша́нїемъ содѣ́ла человѣ́ка и҆згна́ннымъ и҆з̾ раѧ̀, и҆ ѿлꙋче́ннымъ ѿ бг҃а, колеба́ти ᲂу҆́мнѣ и҆ въ нощѝ и҆ во днѝ слове́сность всѧ́кагѡ человѣ́ка, ѻ҆́вагѡ мно́гѡ, ѻ҆́вагѡ ма́лѡ, и҆ ѻ҆́вагѡ мно́жае: и҆ не и҆на́че возмо́жно ѡ҆гради́тисѧ ᲂу҆мꙋ̀, то́чїю па́мѧтїю бж҃їею всегда́шнею. До́ндеже си́лою креста̀ впечатлѣ́етсѧ въ се́рдцѣ па́мѧть бж҃їѧ, сицевы́й непоколеби́мѡ ᲂу҆тверди́тъ тꙋ̀ слове́сность. Къ семꙋ́ бо веде́тъ мы́сленный по́двигъ, и҆́мже кі́йждо ѿ хрїстїа́нъ подвиза́тисѧ, къ по́прищꙋ вѣ́ры хрⷭ҇то́вой ѡ҆блече́сѧ: а҆́ще же нѝ, всꙋ́е подвиза́тисѧ бꙋ́детъ. Сицева́гѡ по́двига ра́ди всѧ́кое и҆ многоразли́чное ѡ҆бꙋче́нїе и҆́мать всѧ́къ ѕлостра́ждꙋщїй бг҃а ра́ди, да прекло́нитъ благоꙋтро́бїе бж҃їе, и҆ возврати́тъ ѻ҆́нъ є҆мꙋ̀ пе́рвое досто́инство ѻ҆́ное, и҆ да впечатлѣ́етсѧ во ᲂу҆мѣ̀ хрⷭ҇то́съ, ꙗ҆́коже глаго́летъ а҆по́столъ: ча́дца моѧ̑, и҆́миже па́ки болѣ́знꙋю, до́ндеже воѡбрази́тсѧ хрⷭ҇то́съ въ ва́съ.³⁴² Наꙋчи́стесѧ ли, бра́тїе, ꙗ҆́кѡ є҆́сть хꙋдо́жество дꙋхо́вное, и҆лѝ ѡ҆́бразъ ѡ҆бꙋче́нїѧ, ско́рѡ дѣ́лателѧ своего̀ къ безстра́стїю и҆ бг҃овидѣ́нїю возводѧ́щее; И҆звѣсти́стесѧ ли, ꙗ҆́кѡ всѧ́кое дѣ́ланїе за ли́ствїе древе́сное безпло́дное вмѣнѧ́етъ бг҃ъ; и҆ ꙗ҆́кѡ всѧ́кой дꙋшѣ̀, не и҆мꙋ́щей блюде́нїѧ ᲂу҆ма̀, всꙋ́е всѧ̑ прилꙋча́ютсѧ; поспѣши́мъ ᲂу҆̀бо, да не безпло́дни сконча́вшесѧ, раскаева́тисѧ бꙋ́демъ безполе́знѣ.

Воп. Ѿ настоѧ́щагѡ ᲂу҆́бѡ сочине́нїѧ познае́мъ, ко́е бѣ̀ дѣ́ланїе бл҃гоꙋгоди́вшихъ гдⷭ҇ви, и҆ ꙗ҆́кѡ є҆́сть нѣ́кое дѣ́ланїе, ѿ страсте́й дꙋ́шꙋ ско́рѡ и҆збавлѧ́ющее и҆ съ любо́вїю бж҃їею свѧзꙋ́ющее, є҆́же потре́бно всѧ́комꙋ ѡ҆ хрⷭ҇тѣ̀ во́инствꙋющемꙋ, въ се́мъ мы̀ не сомнѣва́емсѧ, но и҆ вельмѝ ᲂу҆вѣ́рихомсѧ. Что́ же є҆́сть внима́нїе, и҆ ка́кѡ сподоблѧ́етсѧ кто̀ сїѐ ѡ҆брѣстѝ, мо́лимъ наꙋчи́ти на́съ. Со всѣ́мъ бо таково́й ве́щи не наꙋче́ни є҆смы̀.

Ѿв. Ѡ҆ и҆́мени гдⷭ҇а на́шегѡ і҆и҃са хрⷭ҇та̀ ре́кшагѡ: без̾ менѐ не мо́жете твори́ти ничесѡ́же.³⁴³ Сего̀ въ помо́щника и҆ содѣ́йственника призва́въ, по си́лѣ показа́ти покꙋшꙋ́сѧ, что́ є҆сть внима́нїе, и҆ ка́кѡ ѻ҆́ное, бг҃ꙋ хотѧ́щꙋ, и҆спра́витисѧ мо́жетъ.

Тогѡ́жде Нїки́фора.

Внима́нїе ѻ҆́ви ѿ ст҃ы́хъ ѻ҆тє́цъ блюде́нїе ᲂу҆ма̀ реко́ша, и҆ні́и же серде́чное хране́нїе, дрꙋзі́и же трезвѣ́нїе, и҆ні́и мы́сленное безмо́лвїе, и҆ и҆ні́и и҆на́кѡ. Всѧ̑ же сїѧ̑ є҆ди́но и҆ то́ежде ꙗ҆влѧ́ютъ, ꙗ҆́коже бы кто̀ речѐ, хлѣ́бъ, и҆ речѐ, ᲂу҆крꙋ́хъ и҆ кꙋсо́къ: си́це и҆ ѡ҆ си́хъ разꙋмѣва́й. Что́ же є҆́сть внима́нїе, и҆ кі̑ѧ сꙋ́ть свѡ́йства є҆гѡ̀, тща́тельнѡ поꙋчи́сѧ. Внима́нїе є҆́сть чи́стагѡ покаѧ́нїѧ позна́нїе: внима́нїе є҆́сть дꙋшѝ воззва́нїе, не́нависть мі́ра, и҆ къ бг҃ꙋ восхожде́нїе: внима́нїе є҆́сть ѿверже́нїе грѣха̀, и҆ добродѣ́тели воспрїѧ́тїе: внима́нїе є҆́сть несꙋмнѣ́нное и҆звѣще́нїе въ проще́нїи грѣхѡ́въ: внима́нїе є҆́сть нача́ло ᲂу҆мозрѣ́нїѧ, па́че же вина̀ зрѣ́нїѧ: си́мъ бо бг҃ъ прини́кши ꙗ҆влѧ́етсѧ ᲂу҆мꙋ̀. Внима́нїе є҆́сть несмꙋще́нїе ᲂу҆ма̀, и҆лѝ па́че тве́рдость є҆гѡ̀, ми́лостїю бж҃їею дꙋшѣ̀ дарова́ннаѧ: внима́нїе є҆́сть низложе́нїе помыслѡ́въ, па́мѧти же бж҃їѧ хра́мъ, и҆ находѧ́щихъ терпѣ́нїѧ сокровищехрани́тель: внима́нїе вино́вно вѣ́ры, наде́жды и҆ любвѐ. А҆́ще бо кто̀ не бы̀ вѣ́ровалъ, не бы̀ ѿвнѣ̀ находѧ́щыѧ печа̑ли воспрїима́лъ, и҆ а҆́ще не бы̀ любе́знѣ печа̑ли воспрїима́лъ, не бы̀ ре́клъ гдⷭ҇ни: застꙋ́пникъ мо́й є҆сѝ и҆ прибѣ́жище моѐ:³⁴⁴ и҆ а҆́ще не бы̀ вы́шнѧго положи́лъ прибѣ́жище, не бы̀ въ пе́рсѣхъ любвѐ бж҃їѧ бы́лъ. Сїѐ ᲂу҆́бѡ и҆з̾ вели́кихъ велича́йшее дѣ́ланїе ѿ ᲂу҆че́нїѧ, па́че во мно́гихъ, и҆лѝ и҆ во всѣ́хъ быва́етъ. Рѣ́дкїе бо, ненаꙋче́ннѣ ᲂу҆си́льнымъ дѣ́ланїемъ и҆ те́плою вѣ́рою, полꙋча́ютъ ѿ бг҃а сїѐ: и҆ рѣ́дкость нѣ́сть зако́нъ. Сегѡ̀ ра́ди потре́ба и҆ска́ти наста́вника непреле́стна, да воѡбраже́нїемъ ѻ҆́нагѡ, прилꙋча́ющымсѧ на́мъ ѿ внима́нїѧ дєсны́мъ и҆ шꙋ̑їимъ ᲂу҆мале́нїѧмъ и҆ превосхожде́нїѧмъ, ѿ лꙋка́вагѡ вводи̑мымъ, наꙋча́емсѧ и҆ наставлѧ́емсѧ ѿ негѡ̀: ꙗ҆влє́нна бо на́мъ твори́тъ ѿ тогѡ̀, є҆́же пострада̀ са́мъ и҆скꙋси́всѧ, и҆ безсомни́тельнѡ ᲂу҆́мный се́й пꙋ́ть показꙋ́етъ, и҆ си́це ᲂу҆до́бнѡ соверша́емъ мы̀ ѻ҆́ный. А҆́ще ли же наста́вника нѣ́сть, потре́ба и҆ска́ти болѣ́зненнѡ. А҆́ще не ѡ҆брѣта́етсѧ, бг҃а призва́въ въ сокрꙋше́нїи дх҃а и҆ слеза́хъ, и҆ съ нестѧжа́нїемъ, семꙋ̀ помоли́всѧ, творѝ, є҆́же глаго́лю тѝ. Вѣ́си, ꙗ҆́кѡ дыха́нїе, и҆́мже ды́шемъ, воздꙋ́хъ се́й є҆́сть: и҆здыха́емъ же є҆го̀ не и҆ны́мъ чѣ́мъ, то́чїю се́рдцемъ. Сїе́ бо вино́вно є҆́сть жи́зни и҆ теплоты̀ тѣле́сныѧ. Привлека́етъ ᲂу҆̀бо се́рдце дꙋ́хъ, да теплотꙋ̀ свою̀ дыха́нїемъ во́нъ и҆спꙋ́ститъ, себѣ́ же благорастворе́нїе пода́стъ. Вино́вно же сегѡ̀ ᲂу҆строе́нїѧ, и҆лѝ па́че слꙋжи́тель є҆́сть ле́гкое, є҆́же рѣ́дкимъ ѿ творца̀ созда́вшисѧ, ꙗ҆́коже нѣ́каѧ цѣвни́ца, ᲂу҆до́бь вво́дитъ и҆ и҆зво́дитъ содержи́мое. Си́це се́рдце, хла́дное привлека́ѧ дꙋ́хомъ, те́плое же и҆зрѣѧ́ѧ, си́рѣчь чи́нъ, и҆́мже ᲂу҆стро́исѧ къ составле́нїю живо́тнагѡ, непрестꙋ́пнѡ соблюда́етъ. Ты̀ ᲂу҆̀бо сѣ́дъ, и҆ собра́въ тво́й ᲂу҆́мъ, введѝ є҆го̀ въ но́здренный пꙋ́ть, и҆дѣ́же дꙋ́хъ въ се́рдце вхо́дитъ, и҆ ꙾рѣ́й³⁴⁵ є҆го̀, и҆ понꙋ́ди сни́ти со вдыха́емымъ дꙋ́хомъ въ се́рдце. Вше́дшꙋ же є҆мꙋ̀ та́мѡ не ктомꙋ̀ неве́сєла и҆ нера́дѡстна бꙋ́дꙋтъ тѝ, ꙗ҆̀же по си́хъ. Но ꙗ҆́коже мꙋ́жъ нѣ́кїй ѿ своегѡ̀ до́мꙋ ѿше́дъ, є҆гда̀ возрати́тсѧ, не вѣ́сть, что́ бы тако́е и҆ бы́лъ ѻ҆́нъ ѿ ра́дости, ꙗ҆́кѡ сподо́бисѧ со ча̑ды и҆ жено́ю срѣ́стисѧ: си́це и҆ ᲂу҆́мъ, внегда̀ съ дꙋше́ю соедини́тсѧ, неизрече́нныѧ сла́дости и҆ весе́лїѧ и҆сполнѧ́етсѧ. Тѣ́мже да сотвори́ши ᲂу҆́бѡ ѡ҆бы́кнꙋти бра́те. Оу҆́мъ не ско́рѡ ѿтꙋ́дꙋ и҆сходи́ти: ѕѣлѡ́ бо въ нача́лѣ ᲂу҆ныва́етъ ѿ внꙋ́треннѧгѡ созаключе́нїѧ и҆ тѣсноты̀. Є҆гда́ же ѡ҆бы́кнетъ, не ктомꙋ̀ лю́битъ ѡ҆бноси́тисѧ внѣ̀: ца́рствїе бо небе́сное внꙋ́трь на́съ є҆́сть, є҆́же та́мѡ ѡ҆бзира́ѧ, и҆ чи́стою моли́твою взыскꙋ́ѧ, внѣ̑шнѧѧ всѧ̑ мє́рзка вмѣнѧ́етъ, и҆ ненави̑стна. А҆́ще ᲂу҆́бѡ и҆спе́рва, ꙗ҆́коже рече́сѧ, ᲂу҆мо́мъ вни́деши въ серде́чное мѣ́сто, є҆́же тѝ показа́хъ, возда́ждь благодаре́нїе бг҃ꙋ, и҆ просла́ви и҆ взыгра́й, и҆ держи́сѧ сегѡ̀ дѣ́ланїѧ вы́нꙋ, и҆ ѻ҆но̀ наꙋчи́тъ тѧ̀, ꙗ҆̀же не вѣ́си. Потре́бно же тѝ и҆ семꙋ̀ наꙋчи́тисѧ, ꙗ҆́кѡ та́мѡ ᲂу҆мꙋ̀ твоемꙋ̀ сꙋ́щꙋ, не подоба́етъ молча́ти и҆ пра́зднꙋ стоѧ́ти, но сі́и глаго́лы: гдⷭ҇и і҆и҃се хрⷭ҇тѐ сн҃е бж҃їй, поми́лꙋй мѧ̀! и҆мѣ́ти дѣ́ло, и҆ поꙋче́нїе непреста́нное, и҆ никогда́же ѿ сегѡ̀ престава́ти. Сїе́ бо содержа̀ ᲂу҆́мъ невы́сѧщимсѧ, показꙋ́етъ є҆го̀ непристꙋ́пна прило́гамъ вра̑жїимъ, и҆ неприкоснове́нна, и҆ къ любвѝ и҆ жела́нїю бж҃е́ственномꙋ по всѧ́къ де́нь возво́дитъ. А҆́ще ли же мно́гѡ потрꙋди́всѧ, ѽ бра́те, не возмо́жеши вни́ти во страны̑ се́рдца, ꙗ҆́коже тѝ повелѣ́хомъ, творѝ, є҆́же глаго́лю тѝ, и҆ ѡ҆брѧ́щеши, бг҃ꙋ содѣ́йствꙋющꙋ, и҆ско́мое. Вѣ́си, ꙗ҆́кѡ слове́сность всѧ́кагѡ человѣ́ка во пе́рсѣхъ є҆́сть. Внꙋ́трь бо пе́рсей молча́щымъ ᲂу҆стна́мъ на́шымъ, та́мѡ глаго́лемъ, совѣ́тꙋемъ, и҆ моли̑твы твори́мъ, и҆ ѱалмопѣ̑нїѧ и҆ и҆́на нѣ̑каѧ. Се́й ᲂу҆́бѡ слове́сности, ѿѧ́вши всѧ́кїй по́мыслъ ѿ неѧ̀ (мо́жеши бо, а҆́ще хо́щеши), да́ждь глаго́лати сїѐ: гдⷭ҇и і҆и҃се хрⷭ҇тѐ сн҃е бж҃їй, поми́лꙋй мѧ̀! и҆ понꙋ́дисѧ сїѐ, вмѣ́стѡ и҆ны́ѧ мы́сли, всегда̀ внꙋ́трь вопи́ти. Є҆гда́ же сїѐ на вре́мѧ ᲂу҆де́ржиши, тогда̀ ѿве́рзетсѧ тѝ чрез̾ сїѐ и҆ серде́чный вхо́дъ, ꙗ҆́коже тѝ написа́хомъ, кромѣ̀ всѧ́кагѡ сомнѣ́нїѧ, ꙗ҆́коже и҆ мы̀ и҆скꙋ́сомъ позна́хомъ. Прїи́детъ же тебѣ̀ со многожела́тельнымъ и҆ сла́достнымъ внима́нїемъ, и҆ ве́сь добродѣ́телей ли́къ: любы̀, ра́дость, ми́ръ и҆ прѡ́чаѧ, и҆́миже ѻ҆но̀ всѧ̑ прошє́нїѧ твоѧ̑ и҆спо́лнитъ ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ съ ни́мже ѻ҆ц҃ꙋ̀ и҆ ст҃о́мꙋ дх҃ꙋ, сла́ва, держа́ва, че́сть и҆ поклоне́нїе ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Ѳеолі́птъ, вели́кое вои́стиннꙋ фїладелфі́йское свѣти́ло, возрастѐ во вре́мѧ а҆ндроні́ка втора́гѡ и҆з̾ палеоло́гѡвъ, ѻ҆́колѡ ты́сѧчи тре́хъ сѡ́тъ два́десѧть пѧ́тагѡ лѣ́та. Во ст҃ѣ́й же горѣ̀ пе́рвѣе подвиза́всѧ во ѿше́льническомъ житїѝ, и҆ ѿѻнꙋ́дꙋ пото́мъ предсѣда́тельство въ фїладелфі́и воспрїе́мши, бы́лъ наста́вникъ и҆ тайноꙋчи́тель добро́тнѣйшихъ ᲂу҆че́нїй свѧто́мꙋ григо́рїю ѳессалоні́йскомꙋ. Свѧще́нномꙋ бо трезвѣ́нїю и҆ ᲂу҆́мной моли́твѣ ѻ҆́наго тайнонаꙋчи́лъ, є҆щѐ въ мі́рѣ бы́вша, ꙗ҆́коже въ житїѝ тогѡ́жъ Григо́рїа, ѿ фїлоѳе́а патрїа́рха спи́санномъ соде́ржитсѧ.

Настоѧ́щее же трꙋдолю́бнѣ напи́санное и҆́мъ сло́во, ѡ҆́бразъ сы́й и҆зрѧ́днѣйшїй, и҆ пра́вило и҆звѣ́стное сокрове́ннагѡ во хрⷭ҇тѣ̀ поꙋче́нїѧ, съ послѣ́дꙋющими ѻ҆́номꙋ глава́ми, ра́зꙋмомъ бж҃е́ственнымъ и҆ чистото́ю глаго́ланїѧ и҆зрѧ́днѣйшѣ сложе́нными, здѣ̀ съ про́чїими совокꙋпи́шасѧ. Полє́зна бо па́че, не́жели и҆́но что̀, и҆ достосла̑вна сꙋ́ть вкра́тцѣ собра́ти тща́щымсѧ дꙋхо́внагѡ любомꙋ́дрїѧ бг҃опремꙋ́дрое ᲂу҆че́нїе.

Мона́шескїй чи́нъ, дре́во є҆́сть высоколи́ственное и҆ плодови́тѣйшее, є҆гѡ́же ко́рень є҆́сть, ѿ всѣ́хъ тѣле́сныхъ ѿчꙋжде́нїе, вѣ̑тви же без̾пристра́стїе дꙋшѝ, и҆ є҆́же ни є҆ди́но и҆мѣ́ти ᲂу҆свое́нїе веще́й, и҆̀хже ѿбѣжѐ. Пло́дъ же, добродѣ́телей стѧжа́нїе, и҆ бг҃отворѧ́щаѧ любо́вь, и҆ непресѣца́емое ѿ си́хъ весе́лїе. Пло́дъ бо глаго́летъ а҆по́столъ, дꙋхо́вный є҆́сть любы̀, ра́дость, ми́ръ, и҆ прѡ́чаѧ.³⁴⁶ Оу҆дале́нїе ѿ мі́ра, ко хрⷭ҇тꙋ̀ прибѣ́жище да́рꙋетъ. Мі́ръ же глаго́лю, любле́нїе чꙋ́вственныхъ веще́й и҆ пло́ти. Ѿчꙋждава́ѧйсѧ ѿ си́хъ въ позна́нїи и҆́стины, ᲂу҆своѧ́етсѧ хрⷭ҇тꙋ̀, стѧжава́ѧ любо́вь є҆гѡ̀, є҆ѧ́же ра́ди ѿри́нꙋвъ всѧ̑ мі́ра сегѡ̀, кꙋпи́лъ є҆́сть многоцѣ́нный би́серъ хрⷭ҇та̀. Ѡ҆бле́клсѧ є҆сѝ во хрⷭ҇та̀ сп҃си́тельнымъ креще́нїемъ: ѿве́рглъ є҆сѝ скве́рнꙋ бж҃е́ственною ба́нею: прїѧ́лъ є҆сѝ свѣ́тлость дꙋхо́вныѧ благода́ти и҆ благоро́дство созда́нїѧ. Но что̀ бы́сть; па́че же, что̀ пострада̀ человѣ́къ ѿ безсовѣ́тїѧ: любле́нїемъ мі́ра и҆змѣни́лъ є҆́сть бж҃е́ствєннаѧ начерта̑нїѧ: сострада́нїемъ къ пло́ти непотре́бнымъ содѣ́ла ѡ҆́бразъ: мра́къ встра́ственныхъ помыслѡ́въ помрачѝ зерца́ло дꙋшѝ, и҆́мже ꙗ҆влѧ́етсѧ внꙋ́трь мы́сленное со́лнце хрⷭ҇то́съ. Ты̀ стра́хꙋ бж҃їю дꙋ́шꙋ пригвозди́лъ є҆сѝ. Позна́лъ є҆сѝ помраче́нїе мїрска́гѡ нестрое́нїѧ. Оу҆разꙋмѣ́лъ є҆сѝ ѿ мо́лвъ собира́емое во ᲂу҆мѣ̀ расточе́нїе. Оу҆ви́дѣлъ є҆сѝ ѿ многомѧте́жнагѡ житїѧ̀ срѣта́ющее люде́й сꙋ́етное попече́нїе. Оу҆ѧзви́лсѧ є҆сѝ стрѣло́ю раче́нїѧ безмо́лвїѧ. Взыска́лъ є҆сѝ ми́ра по́мыслѡвъ. Наꙋчи́лсѧ бо є҆сѝ семꙋ̀: взыщѝ ми́ра, и҆ поженѝ и҆̀:³⁴⁷ Вожделѣ́лъ є҆сѝ та́мошнѧгѡ поко́ѧ, поне́же слы́шалъ є҆сѝ: ѡ҆брати́сѧ дꙋшѐ моѧ̀ въ поко́й тво́й.³⁴⁸ Си́хъ ᲂу҆́бѡ ра́ди и҆ воспомѧнꙋ́лъ є҆сѝ благоро́дство, є҆́же прїѧ́лъ є҆сѝ въ креще́нїи по благода́ти, ѿве́рглъ же є҆сѝ по произволе́нїю страстьмѝ въ мі́рѣ, воззва́ти про́чее ти́мъ произволе́нїемъ, є҆́же и҆ въ дѣ́ло и҆зве́лъ є҆сѝ, прише́дъ во свѧще́нное ᲂу҆чи́лище, и҆ ѡ҆бо́лксѧ въ честна̑ѧ ѡ҆дѣѧ̑нїѧ покаѧ́нїѧ, да́же до сме́рти въ монастырѣ̀ пребыва́ти благодꙋ́шнѣ ѡ҆бѣща́вый. Вторы́й ᲂу҆жѐ ко бг҃ꙋ завѣ́тъ сотвори́лъ є҆сѝ. Пе́рвый, входѧ̀ въ настоѧ́щее житїѐ: вторы́й, спѣша̀ къ концꙋ̀ настоѧ́щагѡ житїѧ̀. Тогда̀ благоче́стїѧ ра́ди прїѧ́тъ хрⷭ҇то́мъ бы́лъ є҆сѝ, ны́нѣ присовокꙋпи́лсѧ є҆сѝ хрⷭ҇тꙋ̀ покаѧ́нїемъ. Та́мѡ благода́ть ѡ҆брѣ́лъ є҆сѝ, здѣ̀ до́лгъ и҆сповѣ́далъ є҆сѝ. Тогда̀ младе́нецъ сы́й, да́нное тѝ досто́инство не ѡ҆щꙋти́лъ є҆сѝ, а҆́ще и҆ по́слѣжде возра́стши, вели́чество сегѡ̀ да́ра позна́лъ є҆сѝ, и҆ ᲂу҆здꙋ̀ на ᲂу҆стѣ́хъ но́сиши: ны́нѣ, въ соверше́ннѣ сы́й мꙋдрова́нїи, познава́еши си́лꙋ ѡ҆бѣ́та сегѡ̀. Ви́ждь, да не презрѣ́въ и҆ сїѐ ѡ҆бѣща́нїе, ꙗ҆́кѡ нѣ́кїй сосꙋ́дъ сокрꙋше́нный, всесоверше́ннѣ ѿве́рженъ бꙋ́деши во тьмꙋ̀ кромѣ́шнꙋю, и҆дѣ́же бꙋ́детъ пла́чь и҆ скре́жетъ зꙋбѡ́мъ. кромѣ́ бо пꙋтѝ покаѧ́нїѧ, нѣ́сть и҆ны́ѧ стезѝ возвраща́ющїѧ ко спасе́нїю. Оу҆слы́ши, что̀ дв҃дъ тебѣ̀ ѡ҆бѣщава́етъ: вы́шнѧго положи́лъ є҆сѝ прибѣ́жище твоѐ.³⁴⁹ И҆ а҆́ще тѣ́сный по хрⷭ҇тѣ̀ и҆збра́лъ є҆сѝ живо́тъ, то̀ не прїи́дꙋтъ къ тебѣ̀ ѕла̑ѧ, ѿ мїрска́гѡ житїѧ̀ прибы̑вшаѧ тебѣ̀. Не и҆́мать послѣ́довати тебѣ̀ и҆зволѧ́ющꙋ ка́ѧтисѧ, раче́нїе пѣ́нѧзей, наслажде́нїе, че́сть, ᲂу҆краше́нїе, неꙋдержа́нїе чꙋ́вствъ. Не пребꙋ́дꙋтъ законопрестꙋ̑пницы пред̾ тобо́ю,³⁵⁰ парє́нїѧ мы́сли, плѣне́нїе ᲂу҆ма̀, ѡ҆слабле́нїе ча́стыхъ пѡ́мыслъ, и҆ и҆́но всѧ́кое во́льное ᲂу҆клоне́нїе и҆ смꙋще́нїе. Нижѐ срѧ́щетъ тѧ̀ любле́нїе роди́телей, бра́тїй, сро́дникѡвъ, дрꙋгѡ́въ и҆ сонра́вныхъ. Нижѐ присели́тсѧ къ тебѣ̀ безвре́менное и҆ неполе́зное съ си́ми срѣ́тенїе и҆ бесѣ́дованїе. А҆́ще возлю́биши ѿ си́хъ ѿрече́нїе тѣ́ломъ и҆ дꙋше́ю: то̀ ра́на болѣ́зни не прибли́житсѧ къ дꙋшѝ твое́й, и҆ печа́ли стрѣла̀ не ᲂу҆ѧзви́тъ се́рдце твоѐ, нижѐ ѡ҆печа́литъ лицѐ твоѐ. Всла́ственный бо ѻ҆бы́чай ѡ҆ставлѧ́ющїи и҆ ко всѣ̑мъ речє́ннымъ пристра́стїе ѿри́нꙋвшїи, ѻ҆стротꙋ̀ печа́ли притꙋплѧ́ютъ. Хрⷭ҇то́съ бо въ подвиза́ющейсѧ дꙋшѣ̀ ꙗ҆влѧ́етсѧ, и҆ ра́дость неизглаго́ланнꙋю подае́тъ се́рдцꙋ, и҆ дꙋхо́внꙋю ра́дость ничто́же и҆з̾ сла́дкихъ, и҆лѝ лю́тыхъ веще́й мі́ра, взима́ти когда̀ мо́жетъ. Размышлє́нїѧ бо блага̑ѧ, и҆ па́мѧтѡванїѧ спаси́тєльныѧ, и҆ разꙋмѣва̑нїѧ бж҃е́ствєннаѧ, и҆ словеса̀ премꙋ́дрости слꙋжа́ще подви́жникꙋ, сохранѧ́ютъ є҆го̀ во всѣ́хъ пꙋте́хъ дѣ́лъ є҆гѡ̀, ꙗ҆̀же по бз҃ѣ. Тѣ́мже и҆ настꙋпа́етъ на всѧ́кꙋю безслове́снꙋю по́хоть, и҆ проде́рзливꙋю ꙗ҆́рость, ꙗ҆́кѡ на а҆́спїда и҆ васїлі́ска, и҆ попира́етъ гнѣ́въ ꙗ҆́кѡ льва̀, и҆ сла́сть ꙗ҆́кѡ ѕмі́ѧ.

Вина́ же сегѡ̀, ꙗ҆́кѡ всю̀ свою̀ наде́ждꙋ ѿ человѣ̑къ и҆ рече́нныхъ веще́й ѿложи́въ, къ бг҃ꙋ ѡ҆брати́лъ ю҆̀ є҆́сть, и҆ ра́зꙋмомъ бж҃їимъ и҆з̾ѡби́лꙋетъ, и҆ бг҃а при́снѡ ᲂу҆́мнѣ на по́мощь свою̀ призыва́етъ. Ꙗ҆́кѡ на мѧ̀, глаго́летъ гдⷭ҇ь, ᲂу҆пова̀, и҆ и҆зба́влю и҆̀, покры́ю и҆̀, ꙗ҆́кѡ позна̀ и҆́мѧ моѐ. Воззове́тъ ко мнѣ̀, и҆ ᲂу҆слы́шꙋ є҆го̀: и҆ не то́чїю ѿ ѡ҆скорблѧ́ющихъ и҆зба́влю, но и҆ просла́влю є҆го̀.³⁵¹ Зри́ши ли подвиза́ющихсѧ по бз҃ѣ по́двиги, и҆ ꙗ҆̀же ѿвсю́дꙋ пѡ́чести; Потщи́сѧ ᲂу҆̀бо зва́нїе сїѐ сотвори́ти дѣѧ́нїемъ. И҆ ꙗ҆́коже ᲂу҆едини́лсѧ є҆сѝ тѣ́ломъ, ѿверга́ѧ и҆ веще́й разꙋмѣ̑нїѧ, премѣни́лъ є҆сѝ ѻ҆де́ждꙋ: то̀ и҆ стра́нна сотворѝ себѐ, и҆ слове́съ ѿве́ржисѧ, и҆ по родствꙋ̀ сро́дникѡвъ. А҆́ще бо не преста́неши ѿ ѻ҆́крестъ скита́нїѧ внѣ́шнихъ, то̀ не возста́неши на внꙋ́трь подсѣда́ющихъ. А҆́ще не побѣди́ши ꙗ҆́вѣ ра́тꙋющихъ, то не сокрꙋши́ши неѧ́вныхъ навѣ́тникѡвъ. Є҆гда́ же внѣ̑шнїѧ молвы̑ ᲂу҆праздни́ши, и҆ внꙋ́трєннїѧ по́мыслы ѡ҆ста́виши, воздви́жетсѧ тогда̀ ᲂу҆́мъ въ дѣ́лѣхъ и҆ словесѣ́хъ дꙋ́ха. И҆ вмѣ́стѡ ѡ҆браще́нїѧ со сро́дники и҆ дрꙋ́ги, соверша́еши ѡ҆́бразы добродѣ́телей: и҆ вмѣ́стѡ сꙋ́етныхъ слове́съ ражда́ющихсѧ ѿ мїрскі́ѧ бесѣ́ды, просвѣща́етъ и҆ вразꙋмлѧ́етъ дꙋ́шꙋ ꙗ҆вле́нїе бж҃е́ственныхъ слове́съ, въ мы́сли дви́жимыхъ. Разрѣше́нїе чꙋ́вствъ, ᲂу҆́зы быва́ютъ дꙋшѣ̀: а҆ ᲂу҆́зы чꙋ́вствъ, свобо́дꙋ да́рꙋютъ дꙋшѣ̀. Со́лнца за́падъ, но́щь твори́тъ: и҆ хрⷭ҇тꙋ̀ ѿ дꙋшѝ ѿходѧ́щꙋ, ѡ҆б̾е́млетъ ѻ҆́нꙋю страсте́й помраче́нїе, и҆ мы́сленнїи ѕвѣ́ри расте́рзываютъ ю҆̀. Возсїѧ̀ чꙋ́вственное со́лнце, и҆ ѕвѣ́ри собира́ютсѧ въ пещє́ры своѧ̑. Возсїѧва́етъ и҆ хрⷭ҇то́съ на тве́рди молѧ́щїѧсѧ мы́сли, и҆ всѧ́кїй мі́ра сегѡ̀ ѻ҆бы́чай ѿхо́дитъ, и҆ любле́нїе пло́ти прехо́дитъ, и҆ ᲂу҆́мъ и҆схо́дитъ на дѣ́ло своѐ, си́рѣчь на поꙋче́нїе бж҃е́ственно до ве́чера, не вре́меннымъ разстоѧ́нїемъ ѡ҆предѣлѧ́ѧ дѣ́ланїе дꙋхо́внагѡ зако́на, и҆ въ мѣ́рꙋ сїѐ творѧ̀: но и҆ до́ндеже настоѧ́щꙋю жи́знь коне́цъ пости́гши, и҆схо́дъ дꙋшѝ ѿ тѣ́ла содѣ́лаетъ. Є҆́же ᲂу҆́бѡ ꙗ҆влѧ́ѧ и҆ проро́къ глаго́летъ: ко́ль возлюби́хъ зако́нъ тво́й гдⷭ҇и, ве́сь де́нь поꙋче́нїе моѐ є҆́сть,³⁵² де́нь нарица́ѧ всетече́нїе настоѧ́щїѧ жи́зни коегѡ́ждо. Воздержи́сѧ ᲂу҆́бѡ ѿ внѣ́шнихъ бесѣ́дъ, и҆ подви́гнисѧ на внꙋ́трєннїѧ по́мыслы, до́ндеже ѡ҆брѧ́щеши мѣ́сто чи́стыѧ моли́твы, и҆ до́мъ, въ не́мже хрⷭ҇то́съ живе́тъ, просвѣща́ѧй и҆ ᲂу҆слажда́ѧй тѧ̀ позна́нїемъ и҆ посѣще́нїемъ свои́мъ, и҆ сотвори́тъ скѡ́рби, ꙗ҆̀же за него̀, мнѣ́ти ра́дость, мїрскі́ѧ же сла̑сти, ꙗ҆́коже нѣ́кїй пелы́нь, не прїима́ти. Вѣ́тры воздвига́ютъ во́лны мѡрскі́ѧ, и҆ а҆́ще не преста́нꙋтъ вѣ́тры, не ᲂу҆тиха́ютъ во́лны, и҆ не ᲂу҆кроща́етсѧ мо́ре, и҆ дꙋ́си лꙋка́вствїѧ въ дꙋшѝ неради́вагѡ воздвига́ютъ па́мѧть роди́телей, бра́тїй, сро́дникѡвъ, дрꙋгѡ́въ, пирова́нїй, торже́ствъ, позо́рищъ, и҆ и҆ны́хъ всѣ́хъ сла́сти мечта́нїй: и҆ собесѣ́дованїе под̾ꙋща́ютъ твори́ти зрѣ́нїемъ, и҆ ѧ҆зы́комъ, и҆ тѣ́ломъ, да сꙋ́етнѣ и҆знꙋрѧ́етсѧ и҆ настоѧ́щее вре́мѧ, и҆ послѣ́дꙋющее, внегда́ же є҆ди́нъ пребыва́еши внꙋ́трь ке́ллїи, и҆ждива́етсѧ въ па́мѧтехъ ви́дѣнныхъ и҆ глаго́ланныхъ веще́й. И҆ та́кѡ житїѐ мона́ха безполе́зно быва́етъ, занѐ такові́и на мїрска̑ѧ дѣ̑ланїѧ па̑мѧти своѧ̑ и҆зваѧ́ютъ мы̑сли, ꙗ҆́коже но́зѣ человѣ́ка на снѣ́зѣ ходѧ́ща своѧ̑ слѣды̀. А҆́ще бра́шно ѕвѣрє́мъ подае́мъ, когда̀ ѻ҆́ныхъ ᲂу҆мори́мъ: и҆ а҆́ще въ дѣ́лѣхъ и҆ въ по́мыслѣхъ безслове́сномꙋ дрꙋ́жествꙋ и҆ ѻ҆бы́чаю при́снѡ поꙋча́емсѧ, когда̀ ᲂу҆мертви́мъ пло́ти мꙋдрова́нїе; когда̀ житїе́мъ по хрⷭ҇тѣ̀, и҆́мже ѡ҆бѣща́хомсѧ, поживе́мъ; ѡ҆́бразъ но́гъ на снѣ́зѣ, и҆лѝ возсїѧ́вшꙋ со́лнцꙋ разрꙋша́етсѧ, и҆лѝ разсѣ́дшейсѧ водѣ̀ и҆счеза́етъ. И҆ па̑мѧти состоѧ́щыѧ въ мы́сли и҆з̾ сластолюби́выѧ скло́нности и҆ дѣѧ́нїй, ѿ возсїѧва́ющагѡ въ се́рдцѣ моли́твою хрⷭ҇та̀, и҆ благоꙋми́льнагѡ дождѧ̀ сле́зъ, ᲂу҆ничтожа́ютсѧ. Не по ра́зꙋмꙋ ᲂу҆́бѡ творѧ́й мона́хъ, когда̀ и҆згла́дитъ предпрїѧ̑тїѧ въ мы́сли; Соверша́етсѧ дѣѧ́нїе добродѣ́телей въ тѣ́лѣ, а҆́ще ѡ҆ста́виши мі́ра сегѡ̀ ѻ҆бы́чай. Ѡ҆бразꙋ́ютсѧ па̑мѧти благі̑ѧ, и҆ любопребыва́ютъ въ дꙋшѝ бж҃е́ствєннаѧ словеса̀, а҆́ще ча́стыми моли́твами съ горѧ́чимъ ᲂу҆миле́нїемъ, соверша́емыми въ мы́сли, па̑мѧти пе́рвѣйшихъ дѣѧ́нїй и҆згла́диши. Просвѣще́нїе бо па́мѧти бж҃їѧ съ вѣ́рою и҆ сокрꙋше́нїе се́рдца, а҆́ки бри́тва, лꙋка̑выѧ и҆зглажда́ютъ па̑мѧти. Подража́й премꙋ́дрости пче́лъ: ѻ҆ни́ бо вѣ́дꙋще ро́й ѻ҆́съ, ѻ҆́крестъ и҆́хъ лета́нїе творѧ́щихъ внꙋ́трь ᲂу҆́лїѧ пребыва́ютъ, и҆ вре́да ѿ навѣ́тникѡвъ си́хъ и҆збѣга́ютъ. Ѻ҆́сы разꙋмѣва́й бы́ти собесѣ́дѡванїѧ мїрска̑ѧ, си́хъ бѣ́гаѧ мно́гимъ тща́нїемъ, пребыва́й въ ке́ллїи монасты́рстѣй. И҆ ѿсю́дꙋ покꙋша́йсѧ па́ки входи́ти во внꙋ́треннѣйшее дꙋшѝ стра́жбище, є҆́же до́мъ хрⷭ҇то́въ є҆́сть, въ не́мже ми́ръ и҆ ра́дость, и҆ тишина̀ и҆звѣ́стнѡ зри́тсѧ, мы́сленномꙋ со́лнцꙋ хрⷭ҇тꙋ̀ да́ры сїѧ̑, ꙗ҆́кѡ нѣ̑кїѧ лꙋчѝ ѿ себѐ и҆спꙋща́ющꙋ, и҆ ꙗ҆́кѡ нѣ́кꙋю мздꙋ̀ подаю́щꙋ, прїе́млющей є҆гѡ̀ дꙋшѝ съ вѣ́рою и҆ добротолю́бїемъ. Сѣдѧ̀ ᲂу҆̀бо въ ке́ллїи, па́мѧтꙋй бг҃а, возводѧ̀ ᲂу҆́мъ ѿ всѣ́хъ, и҆ ко бг҃ꙋ невѣща́тельнѣ приверга́ѧ, всѐ расположе́нїе се́рдца пред̾ ни́мъ и҆злива́й, и҆ любо́вїю къ немꙋ̀ прилѣплѧ́йсѧ. Па́мѧть бо бг҃а, видѣ́нїе бг҃а є҆́сть, влекꙋ́щагѡ зрѣ́нїе и҆ жела́нїе ᲂу҆ма̀ къ себѣ̀, и҆ свѣ́томъ ѿ себѐ ѡ҆зарѧ́ющагѡ ѻ҆́ной. Ѡ҆браща́ѧсѧ бо ᲂу҆́мъ ко бг҃ꙋ, внегда̀ престава́ти всѣ̑мъ видотвѡ́рнымъ сꙋ́щымъ мы́слемъ, зри́тъ безви́днѣ, и҆ превосходѧ́щимъ невѣ́дѣнїемъ непристꙋ́пныѧ ра́ди ѻ҆́ныѧ сла́вы, воззрѣ́нїе своѐ просвѣща́етъ. И҆ не познава́ѧ за непостижи́мость ви́димагѡ, познава́етъ и҆́стины ра́ди сво́йственнѣ сꙋ́щаго, и҆ є҆ди́наго могꙋ́щаго превы́ше бы́ти: и҆ бога́тствомъ и҆сточа́ющїѧсѧ ѿѻнꙋ́дꙋ бла́гости пита́ѧ своѐ раче́нїе, и҆ своѐ быстроꙋ́мїе и҆звѣствꙋ́ѧ, сподоблѧ́етсѧ непреста́ннагѡ и҆ блаже́ннагѡ поко́ѧ. Сїѧ̑ ᲂу҆́бѡ сꙋ́ть зна́мєнїѧ рачи́тельныѧ па́мѧти. Моли́тва же є҆́сть бесѣ́да мы́сли ко гдⷭ҇ꙋ, соверша́ющаѧ глаго́лы моле́нїѧ съ соверше́ннымъ ᲂу҆ма̀ ко бг҃ꙋ взира́нїемъ. Мы́сли бо ча́стѣ глаго́лющей и҆́мѧ гдⷭ҇не, и҆ ᲂу҆мꙋ̀ ꙗ҆́снѣ внима́ющꙋ призыва́нїю бж҃е́ственнагѡ и҆́мене, ра́зꙋма бж҃їѧ свѣ́тъ а҆́ки ѻ҆́блакъ свѣ́телъ всю̀ ѡ҆сѣнѧ́етъ дꙋ́шꙋ. Послѣ́дꙋетъ же прилѣ́жнѣй па́мѧти бг҃а, любы̀ и҆ ра́дость. Помѧнꙋ́хъ бо, глаго́летъ проро́къ дв҃дъ, бг҃а, и҆ возвесели́хсѧ.³⁵³ Чи́стѣй же моли́твѣ, ра́зꙋмъ и҆ ᲂу҆миле́нїе. Во́ньже бо а҆́ще де́нь, глаго́летъ то́йже, призовꙋ̀ тѧ̀: сѐ позна́хъ, ꙗ҆́кѡ бг҃ъ мо́й є҆сѝ ты̀.³⁵⁴ И҆ па́ки: же́ртва бг҃ꙋ дꙋ́хъ сокрꙋше́нъ.³⁵⁵ Оу҆мꙋ́ бо и҆ мы́сли предстоѧ́щымъ бг҃ови дѣ́йственнымъ взира́нїемъ и҆ горѧ́чимъ моле́нїемъ, послѣ́дꙋетъ и҆ дꙋше́вное ᲂу҆миле́нїе. Оу҆мꙋ́ же, и҆ сло́вꙋ, и҆ дꙋ́хꙋ припа́дающымъ бг҃ови, ѻ҆́вомꙋ ᲂу҆́бѡ внима́нїемъ, ѻ҆́вомꙋ же призыва́нїемъ, ѻ҆́вомꙋ же ᲂу҆миле́нїемъ, и҆ любо́вїю ве́сь внꙋ́треннїй человѣ́къ слꙋ́житъ гдⷭ҇ви: возлю́биши бо, глаго́летъ воплоще́ннаѧ и҆́стина, гдⷭ҇а бг҃а твоего̀ ѿ всегѡ̀ се́рдца твоегѡ̀.³⁵⁶ Ѻ҆ба́че вѣ́дѣти тебѣ̀ и҆ сїѐ хощꙋ̀: да не ка́кѡ мнѧ̀ моли́тисѧ, дале́че ѿ моли́твы хо́диши, и҆ трꙋди́шисѧ без̾ прїѡбрѣ́тенїѧ, и҆ вотщѐ тече́ши. Є҆́же во ᲂу҆́стнѣмъ ѱалмопѣ́нїи соверша́етсѧ, ᲂу҆́мъ же и҆́ндѣ но́ситсѧ, раздѣлѧ́ѧсѧ во стра̑сти и҆ вє́щи, ꙗ҆́кѡ ѿ сеѧ̀ вины̀ поврежда́тисѧ и҆ ра́зꙋмꙋ ѱалмопѣ́нїѧ: сїѐ быва́етъ и҆ въ мы́сли. Мно́жицею бо є҆́й глаго́лющей словеса̀ моли́твы, ᲂу҆́мъ не сопꙋ́тствꙋетъ, ко бг҃ꙋ не взира́етъ, къ немꙋ́же и҆ моли́твою бесѣ́да быва́етъ, но ᲂу҆клонѧ́етсѧ ѻ҆́тай ѿ мы́слей нѣ́кїихъ. И҆ мы́сль ᲂу҆́бѡ глаго́летъ ѻ҆бы́чнѣ словеса̀, ᲂу҆́мъ же ра́зꙋма бж҃їѧ ѿбѣга́етъ. Тѣ́мже ꙗ҆влѧ́етсѧ тогда̀ дꙋша̀ и҆ неꙋразꙋмѣва́ема и҆ неꙋстро́ена, ꙗ҆́кѡ ᲂу҆мꙋ̀ расточа́ющꙋсѧ въ нѣ̑каѧ мечта̑нїѧ, и҆ парѧ́щꙋ и҆лѝ къ тѣ̑мъ, и҆́миже быва́етъ крадо́мъ, и҆лѝ къ тѣ̑мъ, ꙗ҆̀же хо́щетъ. Моли́твенномꙋ бо ра́зꙋмꙋ не присꙋ́тствꙋющꙋ, нижѐ молѧ́щемꙋсѧ предстоѧ́щꙋ, побꙋжда́ющемꙋ моли́тисѧ, ка́кѡ ᲂу҆слади́тсѧ дꙋша̀; ка́кѡ се́рдце возвесели́тсѧ притворѧ́ющеесѧ моли́тисѧ, а҆ не и҆́стиннꙋ моли́твꙋ стѧжава́ющее; возвесели́тсѧ се́рдце и҆́щꙋщихъ гдⷭ҇а. И҆́щетъ же гдⷭ҇а, и҆́же все́ю мы́слїю и҆ ᲂу҆се́рдїемъ горѧ́чимъ ко бг҃ꙋ припа́даѧй, и҆ всѧ́къ ра́зꙋмъ мі́ра сегѡ̀ ѿража́ѧй, ра́ди ра́зꙋма бж҃їѧ и҆ любвѐ, и҆сточа́ющихсѧ ѿ ча́стыѧ и҆ чи́стыѧ моли́твы. А҆́зъ же, ра́ди и҆з̾ѧсне́нїѧ разсмотри́тельства во ᲂу҆мѣ̀ бж҃е́ственныѧ па́мѧти, и҆ досто́инства въ мы́сли чи́стыѧ моли́твы, во ѡ҆́бразъ предлага́ю тѣле́сное ѻ҆́ко и҆ ѧ҆зы́къ: є҆́же бо є҆́сть зѣ́ница ѻ҆чесѝ, и҆ ѧ҆зы́кꙋ произноше́нїе сло́ва, сїѐ є҆́сть ᲂу҆мꙋ̀ па́мѧть, и҆ мы́сли моли́тва. Ꙗ҆́коже бо ѻ҆́ко зри́тельнымъ чꙋ́вствомъ є҆́мшисѧ за предлежа́щее ви́димое, ни є҆ди́нагѡ гла́са не твори́тъ, но и҆скꙋ́сомъ зрѣ́нїѧ прїе́млетъ позна́нїе ви́димагѡ: та́кѡ и҆ ᲂу҆́мъ, па́мѧтїю рачи́тельнѣ къ бг҃ꙋ пред̾идꙋ́щїй, прилѣпле́нїемъ горѧча́йшїѧ любвѝ и҆ молча́нїемъ простѣ́йшагѡ разꙋмѣ́нїѧ, ѿ бж҃е́ственнагѡ ѡ҆зарѧ́етсѧ ѡ҆сїѧ́нїѧ, прїе́млетъ ѡ҆брꙋче́нїе бꙋ́дꙋщїѧ свѣ́тлости. И҆ ꙗ҆́коже па́ки ѧ҆зы́къ произносѧ̀ глаго́лы сло́ва, ꙗ҆влѧ́етъ слы́шащемꙋ неѧ́внꙋю во́лю ᲂу҆ма̀: та́кѡ и҆ мы́сль краткослѡ́жныѧ глаго́лы моли́твы ча́стѣ и҆ те́плѣ глаго́лющи, ѿкрыва́етъ проше́нїе дꙋшѝ всѧ̑ вѣ́дꙋщемꙋ бг҃ꙋ: и҆ моли́твеннымъ присѣдѣ́нїемъ, и҆ пребыва́тельнымъ се́рдца сокрꙋше́нїемъ, бога́тое спасе́нїе внꙋ́трь прїе́млетъ, и҆ сокрꙋше́нїе то ѿверза́етъ ᲂу҆тро́бꙋ милосе́рдагѡ бг҃а. Се́рдце бо, глаго́летъ, сокрꙋше́нно и҆ смире́нно бг҃ъ не ᲂу҆ничижи́тъ.³⁵⁷ Наꙋ́читъ тѧ̀ чи́стѣй моли́твѣ, и҆ є҆́же соверша́етсѧ пред̾ царе́мъ земны́мъ: є҆гда́ бо къ царю̀ пристꙋ́пиши, то̀ и҆ тѣ́ломъ предстои́ши, и҆ ѧ҆зы́комъ мо́лишисѧ, и҆ ѻ҆́комъ къ немꙋ̀ взира́еши, и҆ та́кѡ ца́рскꙋю прїѧ́знь къ себѣ̀ привлека́еши. Сїѐ и҆ ты̀ соверша́й, и҆ въ собра́нїи церко́внѣмъ, и҆ во ᲂу҆едине́нїи келе́йнѣмъ. Собира́ѧсѧ бо ѡ҆ гдⷭ҇ѣ съ бра́тїею, ꙗ҆́коже тѣ́ломъ предстоѧ́нїе твори́ши, и҆ ѧ҆зы́комъ ѱалмопѣ́нїе є҆мꙋ̀ прино́сиши: та́кѡ и҆мѣ́й и҆ ᲂу҆́мъ внима́ющъ словесє́мъ, и҆ бг҃ови, и҆ вѣ́дꙋщъ, комꙋ̀ бесѣ́дꙋетъ и҆ мо́литсѧ. Крѣ́пцѣ и҆ чи́стѣ мы́сли въ моли́твѣ пребыва́ющей, сподоблѧ́етсѧ се́рдце ра́дости неѿе́млемы и҆ ми́ра неизглаго́ланна. Наединѣ́ же па́ки въ ке́ллїи присѣдѧ̀, въ мы́сли моли́твы держи́сѧ, трезвѧ́щимсѧ ᲂу҆мо́мъ и҆ сокрꙋше́ннымъ дꙋ́хомъ: и҆ видѣ́нїе ѡ҆сѣни́тъ тѧ̀ трезвѣ́нїемъ, и҆ ра́зꙋмъ въ тѧ̀ всели́тсѧ моли́твою, и҆ премꙋ́дрость возлѧ́жетъ въ тебѣ̀ ᲂу҆миле́нїемъ, безслове́снꙋю сла́сть и҆згонѧ́ющи, и҆ бж҃е́ственнꙋю любо́вь вселѧ́ющи. Вѣ́рꙋй мѝ, и҆́стинꙋ глаго́лющемꙋ, а҆́ще во всѧ́комъ твое́мъ дѣ́ланїи неѿлꙋ́чнꙋ и҆мѣ́ти бꙋ́деши ѿ себѐ ма́терь до́брыхъ моли́твꙋ, то̀ не воздре́млетъ ѻ҆на̀, до́ндеже ᲂу҆ка́жетъ тѝ черто́гъ ѻ҆́ный, и҆ внꙋ́трь поведе́тъ тѧ̀, и҆ неизрече́нныѧ сла́вы и҆ весе́лїѧ и҆спо́лнитъ тѧ̀. Поне́же всѧ̑ препѧ̑тствїѧ ѿе́млющи, стезю̀ добродѣ́тели ᲂу҆глажда́етъ, и҆ ᲂу҆до́бнꙋ и҆́щꙋщемꙋ сотворѧ́етъ. Ви́ждь же ѡ҆́бразъ въ мы́сли мл҃твы. Бесѣ́да сїѧ̀ ᲂу҆бива́етъ встра́ствєнныѧ по́мыслы. Смотре́нїе сїѐ ᲂу҆ма̀ ко бг҃ꙋ прогонѧ́етъ помышлє́нїѧ мі́ра сегѡ̀. Оу҆миле́нїе сїѐ дꙋшѝ ѿгонѧ́етъ любле́нїе пло́ти. И҆ мл҃тва сїѧ̀, ѿ є҆́же глаго́лати немо́лчнѣ бж҃е́ственное и҆́мѧ, зри́тсѧ согла́сїемъ и҆ соедине́нїемъ бы́ти ᲂу҆ма̀, и҆ сло́ва, и҆ дꙋшѝ. И҆дѣ́же бо, глаго́летъ хрⷭ҇то́съ, є҆ста̀ два̀, и҆лѝ трїѐ со́брани во и҆́мѧ моѐ, тꙋ̀ є҆́смь посредѣ̀ и҆́хъ.³⁵⁸ Та́кѡ ᲂу҆́бѡ моли́тва сїѧ̀ дꙋшє́вныѧ си̑лы ѿ раздѣле́нїѧ страсте́й воззыва́ющи, и҆ къ дрꙋ́гъ дрꙋ́гꙋ, и҆ къ себѣ̀ трича́стнꙋю дꙋ́шꙋ свѧзꙋ́ющи, ᲂу҆своѧ́етъ въ трїе́хъ ѵ҆поста́сѣхъ є҆ди́номꙋ бг҃ꙋ. Пе́рвѣе бо чрез̾ ѡ҆́бразы добродѣ́телей, стꙋ́дъ грѣха̀ ѿ дꙋшѝ и҆згла́дивши: та́же добро́тꙋ бж҃е́ственныхъ начерта́нїй, сꙋ́щимъ въ себѣ̀ ст҃ы́мъ ра́зꙋмомъ возживонаписа́вши, представлѧ́етъ дꙋ́шꙋ бг҃ови: сїѧ́ же а҆́бїе познава́етъ творца̀ своего̀. Во́ньже бо, глаго́летъ, де́нь призовꙋ̀ тѧ̀, сѐ позна́хъ, ꙗ҆́кѡ бг҃ъ мо́й є҆сѝ ты̀.³⁵⁹ И҆ познава́етсѧ ѿ негѡ̀: позна́ бо глаго́летъ, гдⷭ҇ь сꙋ́щыѧ своѧ̑.³⁶⁰ Позна́етъ чистоты̀ ра́ди ѡ҆́браза: всѧ́къ бо ѡ҆́бразъ къ первоѡбра́зїю и҆́мать ѿноше́нїе. Познава́етсѧ подо́бїѧ ра́ди, є҆́же по добродѣ́телемъ: и҆́миже и҆ позна́нїе и҆́мать бг҃а, и҆ ѿ бг҃а познава́етсѧ. Молѧ́йсѧ полꙋчи́ти ца́рскꙋю прїѧ́знь, трегꙋ́бъ ѡ҆́бразъ ᲂу҆потреблѧ́етъ: и҆лѝ гла́сы молѧ́сѧ, и҆лѝ молчѧ̀ предстои́тъ, и҆лѝ пред̾ нога́ми могꙋ́щагѡ помощѝ поверга́етъ себѐ. И҆ чи́стаѧ моли́тва, ᲂу҆́мъ, и҆ сло́во, и҆ дꙋ́хъ къ себѣ̀ совокꙋплѧ́ющи, сло́вомъ и҆́мѧ, ᲂу҆мо́мъ же къ бг҃ꙋ моли́момꙋ взира́етъ без̾ паре́нїѧ, дх҃омъ же ᲂу҆миле́нїе, смире́нїе и҆ любо́вь внꙋ́трь ꙗ҆влѧ́етъ. И҆ та́кѡ ᲂу҆молѧ́етъ безнача́льнꙋю трⷪ҇цꙋ, ѻ҆ц҃а̀, и҆ сн҃а, и҆ ст҃а́го дх҃а, є҆ди́наго бг҃а. Ꙗ҆́коже разли́чїе снѣ́дей возбꙋжда́етъ жела́нїе къ снѣде́нїю и҆́хъ, та́кѡ разли́чнїи ви́ды добродѣ́телей возбꙋжда́ютъ быстроꙋсе́рдїе ᲂу҆ма̀. Сегѡ̀ ра́ди ше́ствꙋѧ пꙋте́мъ мы́сленнымъ, чтѝ глаго́лы моли́твы, и҆ бесѣ́дꙋй гдⷭ҇ни при́снѡ вопїѧ̀ и҆ не ᲂу҆ныва́ѧ: ча́стѣ молѧ́сѧ, и҆ безстꙋ́дїю подража́й ѻ҆́ныѧ вдови́цы ᲂу҆моли́вшїѧ неꙋкроти́магѡ сꙋдїю̀. Тогда̀ дх҃омъ хо́диши, и҆ плотски̑мъ похотє́мъ не внима́еши, и҆ по́мыслы мїрски́ми ча́стость моли́твы не пресѣца́еши: но хра́мъ бж҃їй є҆сѝ, безмо́лвнѣ бг҃а воспѣва́ѧ. Та́кѡ въ мы́сли молѧ́сѧ, сподоблѧ́ешисѧ преходи́ти и҆ въ па́мѧть бж҃їю, и҆ входи́ти въ невхѡ́днаѧ ᲂу҆ма̀, и҆ взира́ти та́инственными видѣ́нїи неви́димаго, и҆ є҆ди́нственнѣ разꙋмѣва́тельными и҆ люби́тельными и҆злїѧ́нїи, є҆ди́нъ наединѣ̀ слꙋжѧ̀ є҆ди́номꙋ бг҃ꙋ. Є҆гда̀ ᲂу҆̀бо себѐ ᲂу҆ви́диши въ моли́твѣ ѡ҆слаблѧ́ющасѧ, возмѝ въ рꙋ́цѣ кни́гꙋ: и҆ чте́нїю внима́ѧ, ра́зꙋмъ внꙋ́трь прїе́мли, не мимоходи́тельнѣ словеса̀ преходѧ̀, но разсмотрѣва́ѧ сїѧ̑ разꙋ́мнѣ, и҆ ра́зꙋмъ сокро́виществꙋѧ. Та́же размышлѧ́й прочтє́ннаѧ, да ѿ разꙋмѣва́нїѧ сегѡ̀ ᲂу҆слажда́етсѧ мы́сль твоѧ̀, и҆ незабвє́нна пребыва́ютъ чтє́нїѧ: и҆ ѿ сеѧ̀ вины̀ привозжига́етсѧ горѧ́честь твоѧ̀ въ бж҃е́ственныхъ разꙋмѣ́нїихъ. Въ поꙋче́нїи бо мое́мъ, глаго́летъ ѱало́мникъ, разгори́тсѧ ѻ҆́гнь.³⁶¹ Ꙗ҆́коже бо бра́шно ᲂу҆слажда́етъ вкꙋ́съ, зꙋба́ми раздроблѧ́емо: та́кѡ и҆ бж҃е́ствєннаѧ словеса̀ въ дꙋшѝ ѡ҆браща́ющасѧ ᲂу҆тꙋчнѧ́ютъ мы́сль и҆ ᲂу҆веселѧ́ютъ. Ко́ль бо сладка̀, глаго́летъ порфѷроро́дный проро́къ, горта́ни моемꙋ̀ словеса̀ твоѧ̑.³⁶² Глаго́ли и҆з̾ ᲂу҆́стъ и҆ словеса̀ є҆ѵⷢ҇льскаѧ, и҆ блаже́нныхъ ѻ҆тє́цъ провѣща̑нїѧ, и҆ житїѧ̑ и҆́хъ и҆спытꙋ́й, да и҆́маши сїѧ̑ размышле́нїемъ въ но́щехъ: ꙗ҆́кѡ да мы́сль ѿ моли́твы ᲂу҆ны́вшꙋю, чте́нїемъ и҆ размышле́нїемъ бж҃е́ственныхъ слове́съ ѡ҆бновлѧ́еши, и҆ ᲂу҆се́рднѣйшꙋ на моли́твꙋ сотворѧ́еши. Ѱалмопѣ́нїе ᲂу҆сты̑ соверша́й: ѻ҆ба́че безмо́лвнымъ ѕѣлѡ̀ гла́сомъ, и҆ съ настоѧ́тельствомъ ᲂу҆ма̀, не терпѧ̀ ѡ҆ста́вити неразꙋмѣва́емо что̀ и҆з̾ глаго́лемыхъ: но а҆́ще когда̀ что̀ и҆збѣжи́тъ ѿ ᲂу҆ма̀, то̀ па́ки начнѝ ѻ҆́ный сті́хъ, є҆ли́жды ни слꙋча́етсѧ, до́ндеже ᲂу҆́мъ и҆мѣ́ти бꙋ́деши послѣ́дствꙋющь глаго́лємымъ. Мо́жетъ бо ᲂу҆́мъ и҆ ᲂу҆сты̑ пѣ́ти, и҆ бг҃а па́мѧтовати. И҆ сїѐ ᲂу҆разꙋмѣва́й ѿ є҆сте́ственнагѡ и҆скꙋ́са. Ꙗ҆́коже бо срѣта́ѧйсѧ съ нѣ́кимъ и҆ бесѣ́дꙋѧй, на сего̀ и҆ ѻ҆чи́ма вне́млетъ: та́кѡ и҆ ᲂу҆стна́ма поѧ́й, и҆ ко бг҃ꙋ па́мѧтїю взира́ти мо́жетъ. Колѣнопреклоне́нїй не ѡ҆ставлѧ́й: колѣнопреклоне́нїемъ бо ѡ҆бразꙋ́етсѧ паде́нїе грѣха̀, и҆з̾ѧвлѧ́ющее и҆сповѣ́данїе. А҆ ѿ востава́нїѧ ѡ҆зна́меновываетсѧ покаѧ́нїе, ѻ҆бѣ́тъ житїѧ̀, є҆́же по добродѣ́тели, предпоказꙋ́ющее. Ко́еждо же колѣнопреклоне́нїе да соверша́етсѧ со ᲂу҆́мнымъ хрⷭ҇та̀ призыва́нїемъ, да припа́даѧ дꙋше́ю и҆ тѣ́ломъ ко гдⷭ҇ꙋ дꙋ́шъ и҆ тѣле́съ, бг҃а ᲂу҆добопримирѧ́ема содѣ́лаеши. А҆́ще ли же и҆ дѣ́ло безмѧте́жное рꙋка́ма сотвори́ши съ моли́твою въ мы́сли, во є҆́же ѿража́ти со́нъ и҆ ᲂу҆ны́нїе: то̀ и҆ сїѐ мона́шескїй по́двигъ составлѧ́етъ. Всѧ́ бо ꙗ҆влє́ннаѧ дѣ̑ланїѧ, съ моли́твою соверша́ємаѧ, и҆з̾ѡщрѧ́ютъ ᲂу҆́мъ, ᲂу҆ны́нїе и҆згонѧ́ютъ, ю҆́ностнѣйшꙋ сотворѧ́ютъ дꙋ́шꙋ, и҆ быстрѣ́йшимъ и҆ горѧча́йшимъ ᲂу҆́мъ ко ᲂу҆пражне́нїю въ мы́сленномъ дѣ́ланїи творѧ́тъ. Оу҆да́рившꙋ би́лꙋ, и҆сходѝ и҆з̾ ке́ллїи, тѣле́сныма ѻ҆чи́ма зрѧ̀ на зе́млю, мы́сль же къ па́мѧти бж҃їей ᲂу҆стремлѧ́ѧ. Вше́дъ во хра́мъ и҆ ли́къ соисполнѧ́ѧ, нижѐ ѧ҆зы́комъ праздносло́ви съ сꙋ́щимъ близ̾ мона́хомъ, нижѐ ᲂу҆мо́мъ парѝ на сꙋ́єтствїѧ: но ѧ҆зы́къ є҆ди́нѣмъ ѱалмопѣ́нїемъ, мы́сль же моли́твою ᲂу҆твержда́й. Ѿпꙋ́скꙋ бы́вшꙋ, и҆дѝ въ ке́ллїю твою̀, и҆ ᲂу҆ста́вленное тебѣ̀ пра́вило начина́й. На трапе́зꙋ ше́дъ, не ѡ҆бсма́тривай ча́сти бра́тнїѧ, нижѐ раздѣлѧ́й дꙋ́шꙋ твою̀ недо́брыми подзира́ньми: но предлежа̑щаѧ пред̾ тобо́ю зрѧ̀, и҆ тѣ́хъ прикаса́ѧсѧ, тѣ́лꙋ дава́й пи́щꙋ, слꙋ́хꙋ же слы́шанїе чте́нїѧ, дꙋши́ же моли́твꙋ, да тѣ́ломъ и҆ дꙋ́хомъ пита́ѧсѧ, всесоверше́ннѣ восхва́лиши и҆сполнѧ́ющаго во благи́хъ жела́нїе твоѐ. Ѿѻнꙋ́дꙋ воста́въ, съ скро́мностью и҆ молча́нїемъ входѝ въ ке́ллїю твою̀, и҆ ꙗ҆́кѡ трꙋдолюби́ва пчела̀, со ᲂу҆се́рдїемъ творѝ добродѣ́тєли. Є҆гда̀ соверша́еши съ бра́тїею слꙋ́жбꙋ, то̀ рꙋ́цѣ да дѣ́лаютъ, ᲂу҆стнѣ̀ да молча́тъ, и҆ ᲂу҆́мъ да па́мѧтꙋетъ бг҃а: и҆ а҆́ще бы нѣ́когда кто̀ подви́гнꙋлсѧ праздносло́вити, ко пресѣче́нїю безчи́нїѧ, востаѧ̀ творѝ покло́нъ. По́мыслы ѿвраща́й, и҆ не попꙋща́й си̑мъ протека́ти се́рдце, и҆ въ не́мъ ᲂу҆коснѣва́ти. Косне́нїе бо встра́ственныхъ по́мыслѡвъ стра̑сти живи́тъ, ᲂу҆́мъ же ᲂу҆мерщвлѧ́етъ: но приража́ющыѧсѧ ѻ҆́ныѧ а҆́бїе ѿ первомы́слїѧ спѣшѝ стрѣло́ю моли́твы ᲂу҆бива́ти: а҆́ще ли же бы пребыва́ли ᲂу҆дарѧ́ти, и҆ мы́сль смꙋща́ти, и҆ ѻ҆вогда̀ ᲂу҆стꙋпа́юще, ѻ҆вогда́ же находѧ́ще, то̀ вѣ́ждь, ꙗ҆́кѡ ᲂу҆крѣплѧ́ємы сꙋ́ть ѿ предвари́вшїѧ во́ли. Сегѡ̀ ра́ди пра́вѡ и҆мꙋ́ще на дꙋ́шꙋ за побѣжде́нїе произволе́нїѧ, стꙋжа́ютъ и҆ смꙋща́ютъ ю҆̀: подоба́етъ ᲂу҆̀бо и҆з̾ѧвлѧ́ти ѻ҆́ныѧ и҆сповѣ́данїемъ, позо́рствꙋеми бо лꙋка́вїи по́мыслы, прогонѧ́еми быва́ютъ. Ꙗ҆́коже бо свѣ́тꙋ сїѧ́ющꙋ тьма̀ ᲂу҆стꙋпа́етъ, та́кѡ и҆ свѣ́тъ и҆́сповѣди потреблѧ́етъ по́мыслы страсте́й, ꙗ҆́кѡ и҆ сі́и тьма̀ сꙋ́ть: поне́же тщесла́вїе и҆ ѿра́да, въ ни́хже и҆мѣ́ѧхꙋ мѣ́сто по́мыслы, низврати́шасѧ ѿ сра́ма и҆сповѣ́данїѧ и҆ ѕлострада́нїѧ є҆пїтїмїѝ. Тѣ́мже и҆ мы́сль ѡ҆брѣта́юще свободи́вшꙋсѧ ᲂу҆жѐ ѿ страсте́й ча́стою и҆ благоꙋми́льною моли́твою, ᲂу҆бѣга́ютъ со сра́момъ. Є҆гда́ бо подви́жникъ покꙋша́етсѧ посѣца́ти моли́твою смꙋща́ющыѧ є҆го̀ по́мыслы, посѣца́етъ на ма́ло вре́мѧ, и҆ возбранѧ́етъ многомы́слїе и҆́хъ, ꙗ҆́коже борѧ́сѧ и҆ прѧ́сѧ, но не и҆збавлѧ́етсѧ во́все: поне́же вины̑ стꙋжа́ющихъ по́мыслѡвъ лю́битъ, поко́й пло́ти и҆ мїрско́е любоче́стїе, и҆́хже ра́ди и҆ къ и҆сповѣ́данїю не ᲂу҆стремлѧ́етсѧ. Тѣ́мже и҆ ми́ра не и҆́мать, занѐ вины̑, є҆́же ра́товати сꙋпоста́тѡмъ, содержи́тъ. Кто́ же содержа̀ чꙋ̑жды сосꙋ́ды, ѿ господе́й и҆́хъ не и҆стѧзꙋ́емъ быва́етъ въ си́хъ; Кто́ же и҆стѧзꙋ́емь, и҆ не ѡ҆ставлѧ́ѧ ѻ҆́ныѧ, ꙗ҆̀же соде́ржитъ ѕлѣ̀, и҆збавлѧ́етсѧ ѿ сопе́рникѡвъ свои́хъ; Є҆гда́ же подвиза́ющїйсѧ, па́мѧтїю бж҃їею возмо́гши возлю́битъ ᲂу҆ничиже́нїе и҆ ѡ҆ѕлобле́нїе пло́ти, и҆ непосты́днѣ сотвори́тъ и҆сповѣ́данїе по́мыслѡвъ: то а҆́бїе сꙋпоста́ты ѿхо́дѧтъ, мы́сль же свобо́дна сꙋ́щи, ча́стость моли́твы и҆ бж҃е́ственныхъ размышле́нїе непресѣца́емо и҆́мать. Всѧ́кое подозрѣ́нїе, дви́жимое въ се́рдцѣ на кого̀, ѿверга́й всесоверше́ннѣ, ꙗ҆́кѡ разорѧ́ющее любо́вь и҆ ми́ръ. Всѧ́кое же ѕлоключе́нїе, и҆звнѣꙋ́дꙋ находѧ́щее, до́блественнѣ прїе́мли, ꙗ҆́кѡ спаси́тельнагѡ терпѣ́нїѧ вино́вно быва́ющее, терпѣ́нїѧ ѻ҆би́тель и҆ поко́й да́рꙋющагѡ на небесѣ́хъ. Та́кѡ днѝ соверша́ѧ, съ благодꙋ́шїемъ поживе́ши въ настоѧ́щей жи́зни, веселѧ́сѧ блаже́нною наде́ждою, во и҆схо́дѣ же съ дерзнове́нїемъ ѿ здѣ́шнѧгѡ свѣ́та преста́вишисѧ, и҆ вмѣ́стѡ ᲂу҆покое́нїѧ, ꙗ҆̀же ᲂу҆гото́ва тѝ гдⷭ҇ь, мздꙋ̀ за здѣ̑шнїѧ трꙋды̀ воздаѧ̀ тебѣ̀, по́йдеши съ ни́мъ соца́рствовати. Є҆мꙋ́же подоба́етъ всѧ́каѧ сла́ва, че́сть и҆ поклоне́нїе, кꙋ́пнѡ со безнача́льнымъ є҆гѡ̀ ѻ҆ц҃е́мъ, и҆ всест҃ы́мъ, и҆ благи́мъ, и҆ животворѧ́щимъ є҆гѡ̀ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

а҃. Оу҆́мъ, ᲂу҆далѧ́ѧсѧ внѣ́шнихъ и҆ собира́ѧсѧ во внꙋ́трєннѧѧ, возвраща́етсѧ къ себѣ̀, си́рѣчь соединѧ́етсѧ съ сꙋ́щимъ въ мы́сли є҆сте́ственнѣ свои́мъ сло́вомъ: и҆ чрез̾ сꙋ́щее съ ни́мъ сꙋще́ственнѣ сло́во совокꙋплѧ́етсѧ съ моли́твою: и҆ моли́твою восхо́дитъ въ ра́зꙋмъ бж҃їй со все́ю люби́тельною си́лою и҆ ᲂу҆се́рдїемъ. Тогда̀ по́хоть пло́ти погиба́етъ: и҆ всѧ́кое всла́ственное чꙋ́вство пра́здно быва́етъ, и҆ красоты̀ земны̑ѧ ꙗ҆влѧ́ютсѧ непрїѧ̑тны. Созади́ бо себѐ поло́жши дꙋша̀ всѧ̑ тѣлє́снаѧ, и҆ ꙗ҆̀же ѻ҆́крестъ тѣ́ла сꙋ́ть, хо́дитъ въ слѣ́дъ красоты̀ хрⷭ҇то́вы, томꙋ̀ послѣ́дꙋющи съ дѣ́лы честны́ми и҆ съ чистото́ю мы́сли, и҆ пою́щи: Приведꙋ́тсѧ цр҃ю̀ дѣ̑вы въ слѣ́дъ є҆гѡ̀,³⁶³ хрⷭ҇та̀ воѡбража́ющи и҆ предзрѧ́щи, и҆ глаго́лющи: предзрѣ́хъ гдⷭ҇а предо мно́ю вы́нꙋ, ꙗ҆́кѡ ѡ҆деснꙋ́ю менѐ є҆́сть.³⁶⁴ Ко хрⷭ҇тꙋ̀ любо́вїю прилѣплѧ́ющисѧ и҆ взыва́ющи: гдⷭ҇и, пред̾ тобо́ю всѐ жела́нїе моѐ.³⁶⁵ На хрⷭ҇та̀ вы́нꙋ взира́ющи и҆ вопїю́щи: ѻ҆́чи моѝ вы́нꙋ ко гдⷭ҇ꙋ.³⁶⁶ Ко хрⷭ҇тꙋ̀ бесѣ́дꙋющи чи́стою моли́твою, и҆ ᲂу҆слажда́ѧ є҆го̀, веселѧ́щисѧ: Да ᲂу҆слади́тсѧ є҆мꙋ̀ бесѣ́да моѧ̀, а҆́зъ же возвеселю́сѧ ѡ҆ гдⷭ҇ѣ.³⁶⁷ Прїе́млѧ бо бг҃ъ бесѣ́дꙋ ѿ моли́твы, и҆ ꙗ҆́кѡ люби́мь, и҆ ꙗ҆́кѡ и҆менꙋ́емь, и҆ ꙗ҆́кѡ на по́мощь взыскꙋ́емь, молѧ́щейсѧ дꙋшѝ неизрече́ннꙋю да́рꙋетъ ра́дость. Помина́ѧ бо бг҃а бесѣ́дою моли́твы, ᲂу҆веселѧ́ема быва́етъ ѿ гдⷭ҇а: помѧнꙋ́хъ бо, глаго́летъ проро́къ дв҃дъ, бг҃а, и҆ возвесели́хсѧ.³⁶⁸

в҃. Бѣ́гай чꙋ́вствъ, и҆ сотвори́ши недѣ́йственнꙋ чꙋ́вственныхъ сла́сть. Бѣ́гай и҆ мы́сленныхъ мечта́нїй сла́дкихъ, и҆ сотвори́ши недѣ́йственно сладостра́стїе помыслѡ́въ. Оу҆́мъ же безмечта́теленъ пребыва́ѧ, ꙗ҆́кѡ непрїе́млющъ, нижѐ ѿ ѡ҆бразѡ́въ сла́сти, нижѐ ѿ помыслѡ́въ по́хоти ѡ҆бразова́тисѧ и҆ ѡ҆знача́тисѧ, въ простотѣ̀ ѡ҆брѣта́етсѧ. И҆ бы́въ превы́ше всѣ́хъ чꙋ́вственныхъ и҆ мы́сленныхъ веще́й, возво́дитъ мы́сль къ бг҃ꙋ: ничто́же и҆́но, ра́звѣ то́чїю и҆́мѧ гдⷭ҇не ча́стою па́мѧтїю глꙋбо́цѣ и҆зглаша́ѧ, ꙗ҆́кѡ младе́нецъ ѻ҆тца̀ своего̀. Воззовꙋ́ бо, глаго́летъ, и҆́менемъ мои́мъ, гдⷭ҇ь пред̾ тобо́ю.³⁶⁹ И҆ ꙗ҆́коже а҆да́мъ, рꙋко́ю бж҃їею со́зданъ бы́въ ѿ пе́рсти, бы́сть въ дꙋ́шꙋ жи́вꙋ дꙋнове́нїемъ бж҃е́ственнымъ: та́кѡ и҆ ᲂу҆́мъ, добродѣ́тельми ѡ҆бразова́нъ бы́въ, ча́стымъ призыва́нїемъ ѿ чи́стыѧ мы́сли и҆ те́плагѡ ᲂу҆се́рдїѧ ѻ҆́тай пою́щымъ, бж҃е́ственнымъ и҆змѣне́нїемъ и҆змѣнѧ́етсѧ, ѡ҆животворѧ́емь и҆ бг҃отвори́мь, ѿ є҆́же познава́ти и҆ люби́ти бг҃а.

г҃. А҆́ще ѿстꙋ́пиши ѿ по́хоти земны́хъ веще́й ча́стою и҆ чи́стою моли́твою, и҆ вмѣ́стѡ сна̀ почі́еши ѿ всѧ́кїѧ мы́сли, ꙗ҆́же по бз҃ѣ, и҆ ᲂу҆тверди́шисѧ соверше́ннѣ во є҆ди́нѣй па́мѧти бж҃їей: то̀ сози́ждетсѧ въ тебѣ̀, а҆́ки и҆на́ѧ помо́щница, любы̀ бж҃їѧ. Ѿ моли́твы бо ᲂу҆се́рдное вопи́тїе и҆сточа́етъ бж҃е́ственнꙋю любо́вь, и҆ бж҃е́ственнаѧ любы̀ возбꙋжда́етъ ᲂу҆́мъ къ ꙗ҆вле́нїю сокрове́нныхъ. Тогда̀ ᲂу҆́мъ, съ любо́вїю совокꙋ́пленъ бы́въ, премꙋ́дрость плодопрїѡбрѣта́етъ и҆ премꙋ́дростїю неизречє́ннаѧ возвѣща́етъ. Бг҃ъ бо сло́во въ моли́твѣ вопи́тїемъ, по ᲂу҆се́рдїю и҆менꙋ́емь, взе́млетъ помышле́нїе ᲂу҆ма̀ ꙗ҆́коже ребро̀, и҆ да́рꙋетъ ра́зꙋмъ: и҆ вмѣ́стѡ є҆гѡ̀, и҆сполнѧ́ѧ благо́е расположе́нїе, да́рствꙋетъ добродѣ́тель: созида́етъ свѣтотворѧ́щꙋю любо́вь: и҆ приво́дитъ ко и҆зстꙋпи́вшемꙋ ᲂу҆мꙋ̀, и҆ спѧ́щꙋ и҆ почива́ющꙋ ѿ всѧ́кїѧ земны́ѧ по́хоти. Любы́ же, и҆́на ѡ҆брѣта́етсѧ помо́щница почи́вшагѡ ᲂу҆ма̀ ѿ безслове́снагѡ къ чꙋ́вствєннымъ веще́мъ пристра́стїѧ. Тѣ́мже и҆ возбꙋжда́етъ ᲂу҆́мъ ꙗ҆́кѡ чи́стый во глаго́лы премꙋ́дрости. Тогда̀ къ не́й зрѧ̀ ᲂу҆́мъ, и҆ ᲂу҆слажда́ѧсѧ, та̑йныѧ добродѣ́телей расположє́нїѧ, и҆ неви̑димыѧ дѣ̑йствїѧ ра́зꙋма и҆з̾ѧвлѧ́етъ протѧже́нїемъ слове́съ.

д҃. Ѿстꙋпѝ ѿ всѣ́хъ, ꙗ҆̀же по чꙋ́вствꙋ, и҆ ѡ҆ста́ви зако́нъ пло́ти, и҆ дꙋхо́вный зако́нъ напи́шетсѧ въ мы́сли твое́й. Ꙗ҆́коже бо дꙋ́хомъ ходѧ́й, по́хѡти плотскі̑ѧ не соверша́етъ,³⁷⁰ по сло́вꙋ а҆пⷭ҇ла: та́кѡ и҆ ѿстꙋпа́ѧй ѿ чꙋ́вствъ и҆ чꙋ́вственныхъ веще́й, пло́ти си́рѣчь и҆ мі́ра, ко є҆́же дꙋ́хомъ ходи́ти, и҆ ꙗ҆̀же дꙋ́ха мꙋ́дрствовати прихо́дитъ. И҆ ѡ҆ се́мъ наꙋчи́сѧ ѿ тѣ́хъ, ꙗ҆̀же бг҃ъ на а҆да́мѣ пре́жде преслꙋша́нїѧ содѣ́ла.

є҃. Подвиза́ющагѡсѧ въ хране́нїи за́повѣдей, и҆ въ раю̀ моли́твы пребыва́ющаго, и҆ бг҃ови присѣдѧ́щаго ча́стою па́мѧтїю, бг҃ъ ѡ҆ставлѧ́етъ ѿ сластолюби́выхъ пло́ти дѣ́йствїй, и҆ ѿ всѣ́хъ ꙗ҆̀же по чꙋ́вствꙋ движе́нїй, и҆ ѿ всѣ́хъ ꙗ҆̀же по мы́сли ѡ҆бразѡ́въ, и҆ ме́ртва содѣва́ѧ страсте́мъ и҆ грѣхꙋ̀, бж҃е́ственныѧ жи́зни прича́стника сотворѧ́етъ. Ꙗ҆́коже бо спѧ́й и҆ ме́ртвꙋ ᲂу҆подоблѧ́етсѧ, и҆ жи́въ є҆́сть: то̀ по дѣ́йствꙋ тѣ́ла, сїе́ же по содѣ́йствꙋ дꙋшѝ: та́кѡ и҆ въ дꙋ́сѣ пребыва́ѧй, пло́ти и҆ мі́рꙋ ᲂу҆мерщвлѧ́етсѧ, живе́тъ же мꙋдрова́нїемъ дꙋ́ха.

ѕ҃. А҆́ще зна́еши, ꙗ҆̀же пое́ши, то̀ позна́нїе прїе́млеши. Ѿ позна́нїѧ стѧжава́еши ра́зꙋмъ, ѿ ра́зꙋма прозѧба́етъ дѣѧ́нїе ᲂу҆вѣ́дѣнныхъ, ѿ дѣѧ́нїѧ ра́зꙋмъ по навыкнове́нїю плодопрїѡбрѣта́еши, ра́зꙋмъ же, и҆́же во и҆скꙋ́сѣ, и҆́стинное видѣ́нїе ѿкрыва́етъ: ѿ сегѡ̀ премꙋ́дрость возсїѧва́етъ свѣтоза́рными благода́ти словесы̑, и҆сполнѧ́ющи воздꙋ́хъ мы́сли, и҆ внѣ́шними и҆з̾ѧснѧ́ющи сокровє́ннаѧ.

з҃. Пе́рвѣе ᲂу҆́мъ и҆́щетъ и҆ ѡ҆брѣта́етъ: та́же соединѧ́етсѧ со ѡ҆брѣ́тшимсѧ. И҆ и҆ска́нїе твори́тъ сло́вомъ, соедине́нїе же любо́вїю. И҆ и҆ска́нїе, є҆́же сло́вомъ, быва́етъ и҆́стины ра́ди, соедине́нїе же любвѐ бла́га ра́ди.

и҃. Скороте́чное настоѧ́щихъ веще́й є҆стество̀ превосходѧ́щїй, и҆ по́хоть преходѧ́щихъ претека́ющїй, не зри́тъ на дѡ́льнѧѧ, не вожделѣва́етъ красо́тъ земны́хъ: но гѡ́рнѧѧ видѣ̑нїѧ ѿверза́єма и҆́мать, и҆ на добрѡ́ты, ꙗ҆̀же на небесѣ́хъ, взира́етъ, и҆ нетлѣ́нныхъ ᲂу҆сма́триваетъ блаже́нство. Ꙗ҆́коже бо зїѧ́ющемꙋ на вещества̀ землѝ, и҆ ко сласте́мъ пло́ти поница́ющемꙋ, затворє́на сꙋ́ть небеса̀, ꙗ҆́кѡ и҆мꙋ́щемꙋ ᲂу҆́мнаѧ ѻ҆чеса̀ помрачє́на: та́кѡ презира́ѧй дѡ́льнѧѧ, и҆ ѿвраща́ѧйсѧ ѿ ни́хъ, возвы́шенъ и҆́мать ᲂу҆́мъ, и҆ сла́вꙋ присносꙋ́щныхъ зри́тъ, и҆ ѿложе́ннꙋю ст҃ы̑мъ разꙋмѣва́етъ свѣ́тлость. Се́й и҆ любо́вь бж҃їю, свы́ше сходѧ́щꙋ на него̀, прїе́млетъ, и҆ хра́мъ ст҃а́гѡ дх҃а быва́етъ, и҆ бж҃е́ственныхъ велѣ́нїй вожделѣва́етъ, и҆ дх҃омъ бж҃їимъ во́дитсѧ, и҆ сыноположе́нїѧ сподоблѧ́етсѧ, и҆ бг҃а и҆́мать благоволѧ́ща ѡ҆ не́мъ и҆ ᲂу҆гожда́ема. Є҆ли́цы бо дх҃омъ бж҃їимъ во́дѧтсѧ, сі́и сꙋ́ть сы́нове бж҃їи.³⁷¹

ѳ҃. Не́мощи ра́ди да не ѡ҆ста́виши моли́твꙋ ни въ како́й и҆ ни во є҆ди́ный де́нь, до́ндеже возды́шеши, слы́шѧ глаго́лющаго: Є҆да̀ немощствꙋ́ю, тогда̀ си́ленъ є҆́смь.³⁷² Сїе́ бо творѧ̀, бо́лѣе воспо́льзꙋешисѧ, и҆ ѻ҆́наѧ вско́рѣ тѧ̀ возста́витъ по дѣ́йствꙋющей благода́ти: и҆дѣ́же бо ᲂу҆тѣше́нїе дꙋ́ха, тꙋ̀ не́мощь и҆лѝ ᲂу҆ны́нїе не пребыва́етъ.

Ка́ллїстъ ст҃ѣ́йшїй патрїа́рхъ кѡнстантїнопо́льскїй, наименова́нїе и҆мы́й ѯанѳопꙋ́ла, процвѣтѐ при а҆ндроні́кѣ второ́мъ и҆з̾ палеоло́гѡвъ, въ ты́сѧща три́ста шестьдесѧ́тое лѣ́то. И҆з̾ꙋчи́вшисѧ же ᲂу҆ ст҃а́гѡ григо́рїа сїнаи́та, є҆гѡ́же и҆ житїѐ по́слѣжде простра́ннѡ написа̀, подви́жничествова во свѧтоиме́ннѣй горѣ̀ а҆ѳѡ́нстѣй, въ ски́тѣ магꙋ́ла, проти́вꙋ ѻ҆би́тели фїлоѳе́а лежа́щемъ. Живѧ́ше же съ сотаи́нственникомъ свои́мъ ма́ркомъ цѣ̑лыѧ два́десѧть ѻ҆́смь лѣ́тъ. И҆ і҆гна́тїю та́кожде ѯанѳопꙋ́лꙋ толи́кѡ бѣ̀ дрꙋ́жественъ, ꙗ҆́коже є҆ди́нѣй дꙋшѣ̀ мнѣ́тисѧ бы́ти ѻ҆бои̑мъ въ двꙋ́хъ тѣлесѣ́хъ. Патрїа́ршествовавши же напослѣ́докъ, и҆ въ се́рбїю ѿше́дши съ кли́ромъ, ми́рнагѡ ра́ди соедине́нїѧ та́мошнїѧ це́ркви, чрез̾ ст҃ꙋ́ю го́рꙋ пре́йде: и҆ ѿтꙋ́дꙋ прїѧ́тнымъ маѯі́ма нарица́емагѡ каѱокалѷви́та прорече́нїемъ глаго́лющимъ: се́й ста́рецъ па́ствы свое́й лиши́лсѧ, предпо́сланъ бы́въ, пою́щемꙋ созадѝ и҆ надгро́бнꙋю пѣ́снь: Бл҃же́ни непоро́чнїи въ пꙋ́ть: є҆два́же приспѣ̀ въ се́рбїю, та́мѡ тлѣ́нное житїѐ на нетлѣ́нное премѣнѝ.

Глаго́летъ же нѣ́гдѣ ѡ҆ си́хъ двꙋ́хъ и҆ сѷмеѡ́нъ ѳессалоні́йскїй, и҆дѣ́же ѡ҆ бг҃отво́рной моли́твѣ се́й: гдⷭ҇и і҆и҃се хрⷭ҇тѐ сн҃е бж҃їй, є҆́сть ᲂу҆ негѡ̀ рѣ́чь сло́во въ сло́во си́це:

Глава̀ сч҃є, стр. с҃і. цѣ́п. є҃.

И҆зрѧ́днѣе же во дни̑ сїѧ̑ на́шѧ, ѡ҆ се́й, си́рѣчь моли́твѣ, написа́ша дх҃омъ, ꙗ҆́коже и҆ са́ми ѿ бг҃а сꙋ́щїи, бг҃оглаго́ливїи и҆ бг҃оно́снїи и҆ хрⷭ҇тоно́снїи и҆ бж҃е́ственнїи вои́стиннꙋ, и҆́же во ст҃ы́хъ ѻ҆тє́цъ на́шъ ка́ллїстъ, ца́рствꙋющагѡ но́вагѡ ри́ма ѿ бг҃а патрїа́рхъ, и҆ содꙋ́шный є҆мꙋ̀ соподви́жникъ преподо́бный і҆гна́тїй. И҆ въ кни́зѣ свое́й сложе́ннѣй ѿ ни́хъ, дꙋхо́внѡ и҆ бг҃омꙋ́дреннѡ, и҆ ѕѣлѡ̀ высо́кѡ любомꙋ́дрствоваша, во сто̀ глава́хъ. въ соверше́нномъ числѣ̀ соверше́нный ѡ҆ се́й ра́зꙋмъ и҆зложи́вше. И҆̀же и҆ ца́рствꙋющагѡ сегѡ̀ гра́да бы́вше ѿра̑сли, всѧ̑ вкꙋ́пѣ ѡ҆ста́вльше и҆ дѣ́вственнѡ, и҆ и҆́ночески въ повинове́нїи пре́жде жи́тельствовавше, и҆ по́слѣ вкꙋ́пѣ подви́жнически, и҆ небе́снѡ и҆ нераздѣ́льнѡ пожи́вше, и҆ є҆ди́нство во хрⷭ҇тѣ̀, ѡ҆ не́мже са́мъ хрⷭ҇то́съ ко ѻ҆ц҃ꙋ̀ ѡ҆ всѣ́хъ на́съ моли́лсѧ є҆́сть, и҆зрѧ́днѡ въ себѣ̀ сохрани́вше, ꙗ҆́коже свѣти̑ла, по па́ѵлꙋ, придержа́ще сло́во живо́тно въ мі́рѣ ꙗ҆ви́шасѧ. Па́че бо всѣ́хъ почтѝ ѿ ѡ҆свѧще́нныхъ соедине́нїе во хрⷭ҇тѣ̀, и҆ любо́вь и҆спра́виша, ꙗ҆́кѡ нижѐ подозрѣва́тисѧ когда̀ ра́знствꙋ нѣ́коемꙋ въ ни́хъ, да́же и҆ по воззрѣ́нїю и҆ по нра́вꙋ, и҆лѝ печа́ли нѣ́коей во мгнове́нїи: є҆́же въ человѣ́цѣхъ почтѝ невозмо́жно є҆́сть.

И҆ сегѡ̀ ра́ди а҆́гг҃льстїи бы́вше и҆ ми́ръ бж҃їй, ꙗ҆́коже моли́лсѧ є҆́сть хрⷭ҇то́съ, соблю́дше, и҆ стѧжа́вше въ себѣ̀, и҆́же є҆́сть і҆и҃съ хрⷭ҇то́съ, ми́ръ на́шъ, па́ѵелъ речѐ, сотвори́вый ѻ҆боѧ̑ є҆ди́но, є҆го́же ми́ръ и҆ всѧ́къ ᲂу҆́мъ преимѣ́етъ, преста́вльшесѧ ми́рнѡ, ны́нѣ высоча́йшею наслажда́ютсѧ тишино́ю, ны́нѣ чи́стѣ і҆и҃са ви́дѧтъ, є҆го́же ѿ дꙋшѝ возлюби́ша, и҆ є҆го́же вои́стиннꙋ взыска́ша: и҆ є҆ди́но сꙋ́ть съ ни́мъ, и҆ сладча́йшагѡ є҆гѡ̀ свѣ́та и҆ бж҃е́ственнагѡ, ненасы́тнѣ причаща́ютсѧ: є҆гѡ́же ѡ҆брꙋче́нїѧ и҆ здѣ̀ прїѧ́ша, ѡ҆чище́ни бы́вше видѣ́нїемъ и҆ дѣѧ́ньми, и҆ бж҃е́ственное ѡ҆сїѧ́нїе на горѣ̀, ꙗ҆́коже и҆ а҆пⷭ҇ли, полꙋчи́ша. И҆ сїѐ мнѡ́гимъ ꙗ҆́вѣ показа́сѧ во свидѣ́тельство, ꙗ҆́кѡ лице́мъ блиста́ющимисѧ по ѡ҆́бразꙋ стефа́на, ви́дѣни бѧ́хꙋ, не въ се́рдце то́чїю, но и҆ на лицѐ си́хъ и҆зли́вшейсѧ благода́ти. Тѣ́мже, ꙗ҆́коже и҆ вели́кїй ѻ҆́ный мѡѷсе́й, ꙗ҆ви́стасѧ, ꙗ҆́коже свидѣ́тельствоваша ви́дѣвшїи, блиста́ющесѧ солнцеви́днѣ лице́мъ. И҆̀же и҆ ꙗ҆́кѡ блаже́ннꙋю сїю̀ стра́сть до́брѣ пострада́вшїи, и҆ и҆скꙋ́сомъ позна́вшїи, ꙗ҆́снѣ сказꙋ́ютъ и҆ ѡ҆ бж҃е́ственнѣмъ свѣ́тѣ є҆сте́ственнагѡ бж҃їѧ дѣ́йства и҆ благода́ти, и҆ свидѣ́телей приво́дѧтъ ст҃ы́хъ, ꙗ҆́коже и҆ ѡ҆ свѧще́ннѣй моли́твѣ.

а҃. А҆́ще хо́щеши ᲂу҆разꙋмѣ́ти и҆́стинꙋ, подража́й примѣ́рнѣ гꙋслеигра́телю. Занѐ ни́зꙋ ѻ҆́нъ подклонѧ́етъ главꙋ̀, и҆ слꙋ́хъ прилага́ѧ къ пѣ́нїю, подвиза́етъ брѧца́ло рꙋко́ю. И҆ кꙋ́пнѡ стрꙋна́мъ, хꙋдо́жнѣ соꙋдарѧ́ємымъ є҆ди̑нымъ со дрꙋги́ми, гꙋ́сли пѣ́снь и҆здаю́тъ, и҆ гꙋслеигра́тель весели́тсѧ сла́дости ра́ди медо́вныѧ.

в҃. Да бꙋ́детъ тѝ, ѽ трꙋдолюби́вѣйше вїногра́да дѣ́лателю сїѐ ꙗ҆́сный примѣ́ръ, и҆ не не вѣ́рꙋй: трезвѧ́сѧ бо та́мѡ, ꙗ҆́коже гꙋслеигра́тель, во глꙋбинѣ̀ си́рѣчь се́рдца, ᲂу҆до́бнѣ ѡ҆брѧ́щеши и҆ско́мое. Дꙋша́ бо, раче́нїемъ бж҃е́ственнымъ ꙗ҆́та бы́вши соверше́ннѣ, ѡ҆брати́тьсѧ вспѧ́ть не мо́жетъ. Прильпе́ бо, глаго́летъ бж҃е́ственный дв҃дъ, дꙋша̀ моѧ̀ по тебѣ̀.³⁷³

г҃. Гꙋ́сли разꙋмѣва́й мѝ бы́ти се́рдце, возлю́бленне: стрꙋ́ны же, чꙋ̑вства: брѧца́ло же мы́сль, ꙗ҆́же слове́ствомъ дви́жетъ брѧца́ло при́снѡ, є҆́же є҆́сть па́мѧть бг҃а. Ѿ неѧ́же сла́дость нѣ́каѧ неизрече́нна дꙋшѣ̀ послѣ́дꙋетъ, и҆ чи́стымъ ᲂу҆мо́мъ на бж҃е́ственный свѣ́тъ взира́етъ.

д҃. А҆́ще чꙋ́вствъ тѣле́сныхъ не смѣжи́мъ, то вода̀ ѻ҆́наѧ ска́чꙋщаѧ въ на́съ не и҆сточи́тсѧ, ю҆́же гдⷭ҇ь самарѧны́нѣ ѻ҆́нѣй дарова̀: и҆́щꙋщи бо чꙋ́вственныѧ сеѧ̀ воды̀, живо́тнꙋю ѡ҆брѣ́те въ себѣ̀ внꙋ́трь текꙋ́щꙋ. Ꙗ҆́коже бо сїѧ̀ землѧ̀ по є҆стествꙋ̀ и҆́мать во́дꙋ, и҆ а҆́бїе произаива́етъ: та́кѡ и҆ землѧ̀ се́рдца, по є҆стествꙋ̀ и҆́мать сїю̀ ска́чꙋщꙋю и҆ и҆сточа́ющꙋсѧ, а҆́ки ѻ҆те́ческїй свѣ́тъ, є҆го́же а҆да́мъ преслꙋша́нїемъ погꙋби́лъ є҆́сть.

є҃. Ꙗ҆́коже вода̀ чꙋ́вственнаѧ ѿ и҆сто́чника при́снѡ тече́тъ, та́кѡ и҆ жива́ѧ ѻ҆́наѧ и҆ и҆гра́ющаѧ вода̀ ѿ дꙋшѝ и҆сточа́етсѧ, ꙗ҆́же и҆ въ дꙋшѝ бг҃оно́снагѡ мꙋ́жа і҆гна́тїа все́льшисѧ, творѧ́ше глаго́лати є҆го̀: нѣ́сть во мнѣ̀ ѻ҆гнѧ̀ веществолюби́ва, но вода̀ є҆́сть дѣ́йствꙋюща и҆ глаго́люща.

ѕ҃. Подо́бно є҆́сть сїѐ блаже́нное, па́че же и҆ треблаже́нное, ᲂу҆́мное глаго́лю, трезвѣ́нїе дꙋшѝ, водѣ̀ ска́чꙋщей, и҆сточа́ющейсѧ ѿ глꙋбины̀ се́рдца. И҆ вода̀ ᲂу҆́бѡ, ѿ и҆сто́чника и҆стека́ющаѧ, и҆сто́чникъ и҆сполнѧ́етъ: ска́чꙋщаѧ же ѿѻнꙋ́дꙋ и҆з̾ се́рдца, и҆ ꙗ҆́коже рещѝ приснодви́жнѣ дви́жима дꙋ́хомъ, всего̀ внꙋ́треннѧго человѣ́ка и҆сполнѧ́етъ росы̀ бж҃е́ственныѧ и҆ дх҃а: внѣ́шнѧго же ѻ҆́гненна содѣ́ловаетъ.

з҃. Оу҆́мъ ѡ҆чище́нъ бы́въ ѿ внѣ́шнихъ, и҆ чꙋ̑вства соверше́ннѣ повинꙋ́въ дѣ́ѧтельною добродѣ́телїю, недви́жимь пребыва́етъ, ꙗ҆́коже небе́снаѧ ѻ҆́сь, ꙗ҆́кѡ къ средото́чїю взира́ѧ, ко глꙋбинѣ̀ се́рдца. И҆ ᲂу҆правлѧ́ѧ главꙋ̀, взира́етъ тꙋда̀ а҆́ки ве́рвь, и҆мѣ́ѧ свѣ́тъ мы́сли, почерпа́ющїй ѿѻнꙋ́дꙋ бж҃е́ствєннаѧ разꙋмѣ̑нїѧ, и҆ повинꙋ́ѧ всѧ̑ чꙋ̑вства тѣлє́снаѧ.

и҃. Никто́же слы́ша ѿ ненаꙋче́нныхъ та́йнамъ, и҆лѝ тре́бꙋющихъ млека̀, да прико́снетсѧ таковы́хъ сꙋ́щихъ возбране́нныхъ не во вре́мѧ. Таковы́хъ бо бж҃е́ственнїи ѻ҆тцы̀ пре́жде вре́мене взыска́вшихъ, ꙗ҆̀же тре́бꙋютъ вре́мене, и҆ а҆́ки въ приста́нище безстра́стїѧ тща́щихсѧ вни́ти не съ прили́чностїю, во и҆зстꙋпле́нїи ᲂу҆ма̀ возмнѣ́ша бы́ти та́кѡ, а҆ мно́жае ничто́же. Невозмо́жно бо є҆́сть невѣ́дꙋщемꙋ пи́сменъ въ кни́зѣ поꙋча́тисѧ.

ѳ҃. Подви́гшеесѧ по́двигомъ въ дꙋшѝ ѿ бж҃е́ственнагѡ дх҃а, ти́хостнымъ соверша́етъ се́рдце вопїю́щее: а҆́вва ѻ҆́тче! но ѻ҆́но ᲂу҆́бѡ неѡбра́зно є҆́сть, и҆лѝ и҆ беззра́чно: на́съ же преѡбразꙋ́етъ заре́ю бж҃е́ственнагѡ свѣ́та и҆ зракотвори́тъ, ꙗ҆́коже подоба́етъ, съ разжже́нїемъ бж҃е́ственнагѡ дх҃а. Но и҆змѣнѧ́етъ и҆ премѣнѧ́етъ, ꙗ҆́коже є҆ди́нъ вѣ́сть то́й, бж҃ескою вла́стїю.

і҃. Оу҆́мъ, ѡ҆чище́нъ бы́въ трезвѣ́нїемъ, ᲂу҆до́бнѣ помрача́етсѧ, а҆́ще ча́стою па́мѧтїю і҆и҃са, не ᲂу҆празднѧ́етсѧ всѧ́чески ѿ внѣ́шнихъ. Совокꙋпи́вый же дѣ́ѧтельность съ видѣ́нїемъ, си́рѣчь блюде́нїемъ ᲂу҆ма̀, шꙋ́ма не ѿрица́етсѧ, звꙋ́кѡвъ неѧ́сныхъ и҆лѝ и҆ си́льныхъ не ѿвраща́етсѧ. Оу҆ѧ́звлена бо бы́вши дꙋша̀ бж҃е́ственною любо́вїю ко хрⷭ҇тꙋ̀,³⁷⁴ ꙗ҆́кѡ брата́ничꙋ, се́й послѣ́дꙋетъ.

а҃і. Оу҆держа́ти плотскі̑ѧ стра̑сти и҆ взыгра̑нїѧ, и҆лѝ и҆ съ ра́зꙋмомъ ᲂу҆празднѧ́тисѧ, по семꙋ̀ ᲂу҆праздни́тесѧ и҆ разꙋмѣ́йте,³⁷⁵ въ мі́рѣ пребыва́ющымъ подоба́етъ: и҆згла́дити же и҆лѝ потреби́ти, невозмо́жно є҆́сть. Пꙋсты́нное же житїѐ ᲂу҆до́бнѣ и҆скоренѧ́ти вѣ́сть ты̑ѧ.

в҃і. Въ текꙋ́щей ѻ҆́ной водѣ̀, ѻ҆́ва быстрѣ́йшее и҆́мать движе́нїе, ѻ҆́ва же ти́хое и҆ коснѣ́йшее. Пе́рвѣйшаѧ ᲂу҆́бѡ нижѐ возмꙋти́тисѧ ᲂу҆до́бнѣ мо́жетъ ско́рагѡ ра́ди движе́нїѧ. А҆́ще ли же вма́лѣ и҆ возмꙋти́ласѧ бы, ᲂу҆до́бнѣе па́ки ѡ҆чища́етсѧ, ꙗ҆́кѡ таково́е и҆мꙋ́щаѧ движе́нїе. Внегда́ же тече́нїе воды̀ ᲂу҆ма́лившисѧ малѣ́йше бꙋ́детъ: то не то́чїю не возмꙋща́етсѧ, но почтѝ и҆ недви́жна пребыва́етъ. Тре́бꙋетъ же нѣ́коегѡ, ꙗ҆́коже рещѝ, воз̾ѡчище́нїѧ и҆ движе́нїѧ.

г҃і. На новонача́льныхъ, и҆ нравоꙋчи́мыхъ, и҆ дѣ́ѧтельныхъ, бѣ́съ звꙋ́ками неѧ́сными, и҆лѝ ꙗ҆́сными нахо́дитъ: сꙋ́щымъ же во видѣ́нїи мечта̑нїѧ нѣ̑каѧ твори́тъ, ꙗ҆́коже мни́тсѧ ᲂу҆краша́ти и҆ воздꙋ́хъ се́й, подо́бнѣ свѣ́тꙋ: ѻ҆вогда́ же и҆ а҆́ки ѻ҆́гнь сїѧ̑ произво́дитъ. да проти́вное се́ю ча́стїю прельсти́тъ подви́жника хрⷭ҇то́ва.

д҃і. А҆́ще хо́щеши ᲂу҆разꙋмѣ́ти, ка́кѡ подоба́етъ моли́тисѧ, взира́й на коне́цъ внима́нїѧ, и҆лѝ и҆ моли́твы, и҆ не прельща́йсѧ. Сеѧ́ бо коне́цъ, возлю́бленне, ᲂу҆миле́нїе є҆́сть всегда́шнее, сокрꙋше́нїе се́рдца, любы̀ ко бли́жнемꙋ. Сопроти́вное же ꙗ҆́вственно є҆́сть по́мыслъ по́хоти, шепта́нїѧ клеветы̀, не́нависть ко бли́жнемꙋ, и҆ є҆ли̑ка си̑мъ подѡ́бна.

Раздѣли́сѧ же настоѧ́щее сегѡ̀ сло́ва сочине́нїе на сто̀ гла́въ.

Глава̀ а҃. Предисло́вїе сегѡ̀ сло́ва, є҆́же и҆ пе́рвыѧ главы̀ число̀ и҆́мать, ѡ҆ сꙋ́щемъ въ вѣ́рныхъ ѿ дх҃а ст҃а́гѡ бж҃е́ственнѣмъ и҆ преесте́ственнѣмъ да́рѣ же и҆ благода́ти.

Подоба́ше на́мъ бг҃онаꙋчє́нымъ сꙋ́щымъ, по бж҃е́ственнымъ рещѝ глаго́лѡмъ, ꙗ҆́кѡ но́вый зако́нъ неизрече́ннѡ въ се́рдцѣ напи́санъ, носѧ́щымъ пла́мене свѣтлѣ́йшїй, и҆ благи́мъ и҆ пра́вымъ дх҃омъ ᲂу҆правлѧ́ємымъ, ꙗ҆́кѡ ча́дѡмъ и҆ наслѣ́дникѡмъ бж҃їимъ, снаслѣ́дникѡмъ же хрⷭ҇тꙋ̀, а҆гг҃лоподража́тельнѣ жи́тельствовати, и҆ ника́коже тре́бовати и҆мꙋ́щагѡ наꙋчи́ти семꙋ̀: позна́й гдⷭ҇а.³⁷⁶ Ны́нѣ же ѿ ю҆́нагѡ на́шегѡ во́зраста ѿ бла́га заблꙋжде́нїе, и҆ на го́ршее преложе́нїе, є҆ще́ же и҆ лю́тагѡ велїа́ра пре́лесть, и҆ непримири́тельное на ны̀ мꙋчи́тельство, дале́че тещѝ ѿ спаси́тельныхъ и҆ бг҃одѣ́йныхъ за́повѣдей на́съ ѕло́бнѣйше сотворѝ, по стремни́намъ дꙋшєгꙋ́бнымъ носи́тисѧ, и҆, что̀ жа́лостнѣе, проти́вꙋ сами́хъ себѐ и҆ мꙋ́дрствовати и҆ дѣ́ѧти подви́же. Тѣ́мже и҆ по словесѝ бж҃е́ственномꙋ: нѣ́сть разꙋмѣва́ѧй, нѣ́сть взыска́ѧй бг҃а: кꙋ́пнѡ бо всѝ пра́вагѡ пꙋтѝ ᲂу҆клони́шасѧ, неключи́ми бы́хомъ.³⁷⁷ И҆ сегѡ̀ ра́ди соверше́ннѣ пло́тѧни сꙋ́ще, и҆ свѣтоно́сныѧ и҆ бж҃е́ственныѧ благода́ти лиша́ющесѧ, тре́бꙋемъ дрꙋ́гъ ѿ дрꙋ́га къ до́брымъ дѣлѡ́мъ споспѣшествова́нїѧ же и҆ по́мощи.

Глава̀ в҃. Ꙗ҆́кѡ ра́ди вопроше́нїѧ нѣ́коегѡ бра́та по намѣ́ренїю є҆гѡ̀, є҆ще́ же и҆ ра́ди соблюде́нїѧ ѻ҆те́ческїѧ за́повѣди си́це простре́сѧ настоѧ́щее сло́ва сегѡ̀ содержа́нїе.

А҆ поне́же ты̀, жела́ѧ по словесѝ гдⷭ҇ню и҆спы́товати бж҃е́ствєннаѧ и҆ животвѡ́рнаѧ писа̑нїѧ, и҆ тайнонаꙋча́тисѧ непогрѣши́тельнѡ, мно́жицею проси́лъ є҆сѝ ѿ на́съ неключи́мыхъ сло́ва и҆ пра́вила напи́сана. по́льзы ра́ди твоеѧ̀, а҆ мо́жетъ бы́ть, и҆ дрꙋги́хъ, ꙗ҆́коже са́мъ глаго́леши: а҆́ще и҆ не пре́жде, но хотѧ̀ ны́нѣ сꙋди́хомъ, ꙗ҆́кѡ подоба́етъ, съ бж҃їею по́мощїю и҆спо́лнити похва́льное твоѐ жела́нїе, забы́вше спито́мное на́мъ ᲂу҆ны́нїе, любвѐ ра́ди и҆ по́льзы твоеѧ̀: тебе́ же, дꙋхо́вное ча́до, и҆ ѕѣлѡ̀ любе́знѣйшее, за тща́нїе къ благи̑мъ дѣлѡ́мъ, и҆ продолжи́тельное люботрꙋ́дїе ѕѣлѡ̀ похвалѧ́юще, па́че же си́хъ боѧ́щесѧ ѿ бг҃а ѡ҆сꙋжде́нїѧ, и҆́мже скрыва́ющемꙋ тала́нтъ ᲂу҆грожа́етсѧ стра́шнѡ, све́рхъ же рече́нныхъ, и҆ ѻ҆те́ческꙋю и҆сполнѧ́юще за́повѣдь, ю҆́же заповѣ́даша на́мъ ѻ҆тцы̀ на́ши, и҆ дꙋхо́внїи ᲂу҆чи́тели, ꙗ҆́кѡ да и҆ дрꙋги́хъ бг҃олюби́выхъ во ᲂу҆че́нїи ѻ҆́нѣхъ ᲂу҆вѣ́римъ. Бг҃ъ же ѻ҆ц҃ъ любвѐ, и҆ всѣ́хъ ѻ҆́бще благи́хъ независтнопода́тельный раздаѧ́тель, да да́стъ на́мъ кѡ́снымъ и҆ хꙋдогла̑снымъ сло́во благовре́менно во ѿверзе́нїе ᲂу҆́стъ на́шихъ, и҆́же мно́жицею и҆ безсловє́снымъ живѡ́тнымъ сло́во вдохнꙋ́вый, по́льзы ра́ди слы́шащихъ.³⁷⁸ Тебѣ́ же и҆ всѣ̑мъ чтꙋ́щымъ сїѧ̑ да прило́житъ ᲂу҆́хо, є҆́же премꙋ́дрѣ и҆ разꙋ́мнѣ сїѧ̑ слы́шати,³⁷⁹ и҆ ꙗ҆́коже є҆мꙋ̀ ᲂу҆го́дно, непрекло́ннѡ жи́тельствовати: занѐ без̾ негѡ̀, ꙗ҆́коже пи́сано є҆́сть, не мо́жемъ твори́ти ничесѡ́же,³⁸⁰ ѿ поле́зныхъ и҆ спаси́тельныхъ: и҆ ꙗ҆́кѡ, а҆́ще не гдⷭ҇ь сози́ждетъ до́мъ, всꙋ́е трꙋди́шасѧ зи́ждꙋщїи.³⁸¹ И҆ сїѧ̑ ᲂу҆̀бо си́це сꙋ́ть.

Глава̀ г҃. Ꙗ҆́кѡ всѧ́кое дѣ́ло намѣ́ренїе предварѧ́етъ. Намѣ́ренїе ᲂу҆́бѡ настоѧ́щагѡ сочине́нїѧ є҆́сть сїѐ, дабы̀ наꙋчи́тисѧ, ко́е є҆́сть ѡ҆снова́нїе дꙋхо́внагѡ ѡ҆ хрⷭ҇тѣ̀ зда́нїѧ.

А҆ поне́же намѣ́ренїе предварѧ́етъ всѧ́кое дѣ́ло: намѣ́ренїе же ѻ҆бои́хъ на́съ, на́ше по си́лѣ и҆зрещѝ слꙋжа̑щаѧ къ дꙋхо́вномꙋ твоемꙋ̀ возраще́нїю, твое́ же, дабы̀ по речє́ннымъ и҆́скреннѣ пожи́ти: подоба́етъ пре́жде всегѡ̀ и҆но́гѡ и҆спыта́ти, къ каково́мꙋ и҆сполне́нїю зда́нїѧ по хрⷭ҇тѣ̀ взира́юще, и҆ нача́ло ѡ҆снова́нїѧ поле́зное поло́жимъ, пото́мъ вре́мени побꙋжда́ющꙋ, па́че же свы́ше по́мощь бога́тнѡ полꙋчи́вше, и҆ покро́въ на началозда́нїе а҆рхїтектѡ́нствомъ дꙋ́ха ᲂу҆стро́имъ.

Глава̀ д҃. Ꙗ҆́кѡ всѧ́кагѡ по бз҃ѣ дѣ́ланїѧ нача́ло є҆́сть, жи́тельствованїе по за́повѣдємъ сп҃си́телѧ: коне́цъ же, є҆́же возврати́тисѧ къ дарова́ннѣй на́мъ и҆спе́рва въ бж҃е́ственномъ креще́нїи, соверше́ннѣй благода́ти всест҃а́гѡ и҆ живонача́льнагѡ дх҃а.

Нача́ло ᲂу҆̀бо всѧ́кагѡ по бз҃ѣ дѣ́ланїѧ, вкра́тцѣ рещѝ, є҆́сть сїѐ, дабы̀ тща́тисѧ на́мъ всѧ́цѣмъ ѡ҆́бразомъ, и҆ все́ю си́лою жи́тельствовати по законоположе́нїю всѣ́хъ бг҃отво́рныхъ за́повѣдей спаси́телевыхъ: коне́цъ же, дабы̀ возврати́тисѧ блюде́нїемъ си́хъ къ тꙋ́не да́нномꙋ на́мъ свы́ше ѿ са́магѡ нача́ла, ѿ сщ҃е́нныѧ кꙋпѣ́ли, соверше́нномꙋ дꙋхо́вномꙋ благода́ти воз̾ѡбраже́нїю и҆ назда́нїю, и҆лѝ а҆́ще ᲂу҆го́дно тѝ, сицево́й да́ръ возврати́ти, и҆ ве́тхаго а҆да́ма съ дѣѧ́ньми и҆ похотьмѝ ѿло́жше, въ но́ваго и҆ дꙋхо́внаго ѡ҆блещи́сѧ, и҆́же є҆́сть гдⷭ҇ь і҆и҃съ хрⷭ҇то́съ. Ꙗ҆́коже глаго́летъ бж҃е́ственнѣйшїй па́ѵелъ: ча́дца моѧ̑, и҆́миже па́ки болѣ́знꙋю, до́ндеже воѡбрази́тсѧ хрⷭ҇то́съ въ ва́съ.³⁸² И҆, є҆ли́цы во хрⷭ҇та̀ крести́стесѧ, во хрⷭ҇та̀ ѡ҆блеко́стесѧ.³⁸³

Глава̀ є҃. Ѡ҆ то́мъ, ка́ѧ є҆́сть благода́ть сїѧ̀, и҆ ка́кѡ бы мо́щно бы́ло на́мъ полꙋчи́ти ю҆̀, и҆ ка̑ѧ сꙋ́ть возмꙋща̑ющаѧ, и҆ ка̑ѧ па́ки воз̾ѡчища̑ющаѧ ю҆̀.

Но ка́ѧ є҆́сть благода́ть сїѧ̀, и҆ ка́кѡ бы мо́щно бы́ло на́мъ полꙋчи́ти ю҆̀, и҆ ка̑ѧ сꙋ́ть возмꙋща́ющаѧ ю҆̀, ка́ѧ же па́ки воз̾ѡчища̑ющаѧ, сїѐ свѣтлѣ́йшїй всѧ́кагѡ зла́та дꙋше́ю и҆ ѧ҆зы́комъ, пока́жетъ тѝ ст҃ы́й златоꙋ́стъ, си́це глаго́лѧ: что́ же є҆́сть, сла́вꙋ гдⷭ҇ню ꙗ҆́кѡ въ зерца́лѣ взира́юще, въ то́йже ѡ҆́бразъ преѡбразꙋ́емсѧ;³⁸⁴ Ꙗ҆снѣ́е сїѐ пока́зывашесѧ, є҆гда̀ зна́менїй дарова̑нїѧ дѣ́йствовахꙋ: ѻ҆ба́че и҆ ны́нѣ нѣ́сть не ᲂу҆до́бно ᲂу҆зрѣ́ти сїѐ и҆мꙋ́щемꙋ ѻ҆чеса̀ вѣ̑рныѧ. Є҆гда́ бо креща́емсѧ, тогда̀ и҆ дꙋша̀ па́че со́лнца сїѧ́етъ, дх҃омъ ѡ҆чища́ема, и҆ не то́чїю зри́мъ сла́вꙋ бж҃їю, но и҆ ѿтꙋ́дꙋ прїе́млемъ нѣ́кое сїѧ́нїе. Ꙗ҆́коже бо сребро̀ чи́стое, проти́вꙋ лꙋче́й со́лнечныхъ лежа́щее, и҆ са́мо лꙋчѝ и҆спꙋща́етъ, не ѿ своегѡ̀ то́чїю є҆стества̀, но и҆ ѿ сїѧ́нїѧ со́лнечнагѡ: си́це и҆ дꙋша̀ ѡ҆чища́ема, и҆ всѧ́кагѡ сребра̀ свѣтлѣ́йшею быва́ѧ, прїе́млетъ лꙋчꙋ̀ ѿ сла́вы дх҃а, въ сла́вꙋ внꙋ́трь быва́емꙋю, и҆ таковꙋ́ю, ꙗ҆ково́й бы́ти подоба́етъ ѿ гдⷭ҇а дх҃а. И҆ по ма́лѣхъ словесѣ́хъ: хо́щеши ли, покажꙋ̀ тѝ сїѐ и҆ ѿ а҆по́стѡлъ ѡ҆щꙋти́тельнѣе; помы́сли ѡ҆ па́ѵлѣ, є҆гѡ́же ри̑зы дѣ́йствовахꙋ; ѡ҆ петрѣ̀, є҆гѡ́же и҆ сѣ́нь и҆мѣ́ѧше си́лꙋ. Занѐ а҆́ще не бы̀ ца́рскїй ѡ҆́бразъ носи́ли, не бы̀ непристꙋ́пно бы́ло сїѧ́нїе и҆́хъ, не бы́ша толи́кѡ ри̑зы и҆́хъ и҆ сѣ́нь дѣ́йствовахꙋ: ца̑рскїѧ бо ри̑зы и҆ разбо́йникѡмъ сꙋ́ть стра̑шны. Хо́щеши ли ви́дѣти се́й ѡ҆́бразъ и҆ въ тѣ́лѣ сїѧ́ющь; воззрѣ́вше, глаго́летъ, на лицѐ стефа́ново, ви́дѣша лицѐ є҆гѡ̀ ꙗ҆́кѡ лицѐ а҆́гг҃ла.³⁸⁵ Но сїѐ є҆́сть ничто̀ пред̾ сла́вою ѿвнꙋ́трь сїѧ́ющею. Є҆́же бо мѡѷсе́й на лицѣ̀ нѣ́когда и҆мѣ́ѧше, то̀ сі́и въ дꙋшѣ̀ ѡ҆бноша́хꙋ, и҆ є҆щѐ мно́гѡ вѧ́щше: мѡѷсе́ово бо чꙋ́вственное бѣ̀, а҆ сїѐ безпло́тно. И҆ ꙗ҆́коже ѻ҆гнезра̑чныѧ лꙋчѝ ѿ свѣ́тлыхъ тѣле́съ на бли̑жнїѧ тѣлеса̀ и҆стека́юще, и҆ ѻ҆́нымъ преподаю́тъ ѿ своегѡ̀ свѣ́та: си́це и҆ съ вѣ́рными приключа́етсѧ. Сегѡ̀ ра́ди ѿ землѝ свобожда́ютсѧ ѡ҆щꙋща́ющїи сїѐ, и҆ сꙋ̑щаѧ на небесѣ́хъ ꙗ҆́кѡ во ᲂу҆мѣ̀ мечта́ютъ, но, ᲂу҆вы̀ мнѣ̀ добро́ бо здѣ̀ и҆ постена́ти го́рцѣ, ꙗ҆́кѡ толи́кимъ могꙋ́ще наслажда́тисѧ благоро́дствомъ, нижѐ глаго́лємаѧ вѣ́мы, занѐ сі́и погꙋблѧ́емъ, и҆ чꙋ́вствєннымъ веще́мъ ᲂу҆дивлѧ́емсѧ. Сїѧ́ бо сла́ва неизрече́ннаѧ и҆ стра́шнаѧ на є҆ди́нъ, и҆лѝ два̀ дни̑ въ на́съ пребыва́етъ: пото́мъ погаша́емъ ю҆̀, наводѧ́ще бꙋ́рю жите́йскихъ веще́й, и҆ гꙋсты́ми ѻ҆́блаки лꙋчѝ ѿража́юще. И҆ па́ки и҆́ндѣ: тѣлеса̀ благоꙋгоди́вшихъ бг҃ꙋ, въ толи́кꙋ ѡ҆блекꙋ́тсѧ сла́вꙋ, є҆ли́кꙋ нижѐ ви́дѣти мо́щно си́ми ѻ҆ча́ми. И҆ сегѡ̀ на́мъ зна́мєнїѧ нѣ̑каѧ и҆ неѧ̑сныѧ слѣды̀, и҆ въ ве́тхомъ, и҆ въ но́вомъ завѣ́тѣ да́ти благоволѝ бг҃ъ. Въ ве́тхомъ бо лицѐ мѡѷсе́ово толи́кою сїѧ́ше сла́вою, ꙗ҆́кѡ непристꙋ́пно бѣ̀ ѻ҆ча́мъ і҆сра́ильтѧнъ: Въ но́вомъ же мно́гѡ па́че сегѡ̀ возсїѧ̀ лицѐ хрⷭ҇то́во. Оу҆слы́шалъ ли є҆сѝ глаго́лы дꙋхѡ́вныѧ; ᲂу҆разꙋмѣ́лъ ли є҆сѝ си́лꙋ та́йны; позна́лъ ли є҆сѝ, какѡвы̀ сꙋ́ть бѡлѣ́зни соверше́ннагѡ ѿ свѧще́нныѧ кꙋпѣ́ли, дꙋхо́внагѡ ѿрожде́нїѧ на́шегѡ; какѡвы́ же сꙋ́ть приплѡ́дїѧ, и҆ и҆сполне́нїе и҆ побѣ̑дныѧ по́чєсти; и҆ ка́кѡ во вла́сти на́шей є҆́сть, сїю̀ преесте́ственнꙋю благода́ть и҆ расти́ти и҆ ᲂу҆малѧ́ти, си́рѣчь ꙗ҆влѧ́ти и҆ помрача́ти, є҆ли́кѡ на́мъ мо́щно; помрача̑ющаѧ же сꙋ́ть сїѧ̑: ви́хрь жите́йскихъ веще́й, и҆ тьма̀ ражда́ющаѧсѧ ѿ са́мыхъ страсте́й, ꙗ҆̀же, а҆́ки бꙋ́рѧ, и҆лѝ свирѣ́пый пото́къ, на ны̀ натека́ющи, и҆ дꙋ́шꙋ потоплѧ́ющи, нижѐ ѿдохнꙋ́ти, нижѐ воззрѣ́ти є҆́й попꙋща́ютъ къ и҆́стинномꙋ и҆ блаже́нномꙋ добрꙋ̀, є҆гѡ́же ра́ди и҆ сотвори́сѧ: но всю̀ є҆ѐ ѿ возмꙋще́нїѧ и҆ ды́ма сласте́й поколеба́вшꙋсѧ и҆ ѡ҆лютѣ́вшꙋ помрача́ютъ и҆ потоплѧ́ютъ: ꙗ҆́коже па́ки си̑мъ проти̑внаѧ, си́рѣчь ѿ за́повѣдей гдⷭ҇нихъ ражда́ющаѧсѧ, не по пло́ти, но по дꙋ́хꙋ ходѧ́щымъ: дх҃омъ бо, глаго́летъ, ходи́те, и҆ по́хѡти плотскі̑ѧ не соверша́йте,³⁸⁶ полє́зна сꙋ́ть и҆ спаси́тєльна, и҆ на подо́бїе лѣ́ствицы возво́дѧтъ и҆̀хъ на са́мый ве́рхъ, на высоча́йшꙋю и҆з̾ сте́пеней любо́вь, ꙗ҆́же є҆́сть бг҃ъ.

Глава̀ ѕ҃. Ꙗ҆́кѡ во ст҃ѣ́мъ креще́нїи тꙋ́не бж҃е́ственнꙋю благода́ть прїе́млемъ, и҆ сїю̀ страстьмѝ сокры́вше, па́ки и҆сполне́нїемъ за́повѣдей воз̾ѡчища́емъ.

Но тогда̀ въ бж҃е́ственныхъ ложесна́хъ, си́рѣчь во свѧще́ннѣй кꙋпѣ́ли, всѧ́кѡ тꙋ́не прїе́млемъ соверше́ннꙋю бж҃е́ственнꙋю благода́ть. А҆́ще же нѣ́какѡ напослѣ́докъ привре́менныхъ ѕлоꙋпотребле́нїемъ, и҆ ѡ҆ жите́йскихъ веще́хъ попече́нїемъ и҆ мгло́ю страсте́й, ѽ дабы̀ не бы́ло! сокры́емъ ю҆̀: мо́щно на́мъ и҆ си́це покаѧ́нїемъ, и҆ бг҃одѣ́йныхъ за́повѣдей и҆сполне́нїемъ, па́ки воспрїѧ́ти и҆ стѧжа́ти таковꙋ́ю преесте́ственнꙋю свѣ́тлость, и҆ ꙗ҆вле́нїе є҆ѧ̀ ᲂу҆ви́дѣти пресвѣ́тлѡ. Ѻ҆ба́че по мѣ́рѣ коегѡ́ждо въ вѣ́рѣ прилѣжа́нїѧ и҆ ꙗ҆вле́нїе є҆ѧ̀ быва́етъ, а҆ наипа́че по́мощїю и҆ бл҃говоле́нїемъ гдⷭ҇а і҆и҃са хрⷭ҇та̀. Ꙗ҆́коже глаго́летъ ст҃ы́й ма́рко: хрⷭ҇то́съ соверше́нъ бг҃ъ сы́й, соверше́ннꙋю крести́вшымсѧ благода́ть ст҃а́гѡ дх҃а дарова̀, приложе́нїѧ ѿ на́съ не прїе́млющꙋю, ѿкрыва́ющꙋюсѧ же на́мъ, и҆ ꙗ҆влѧ́ющꙋюсѧ по мѣ́рѣ дѣ́ланїѧ за́повѣдей, и҆ прїꙋмноже́нїе вѣ́ры на́мъ подаю́щꙋю, до́ндеже дости́гнемъ всѝ въ соедине́нїе вѣ́ры, въ мѣ́рꙋ во́зраста и҆сполне́нїѧ хрⷭ҇то́ва.³⁸⁷ А҆́ще ᲂу҆́бѡ что̀ прино́симъ, па́ки въ не́мъ ѿроди́вшесѧ, и҆ сїѐ ᲂу҆жѐ ѿ негѡ̀, и҆ тѣ́мъ бѣ̀ въ на́съ сокрове́нно.

Глава̀ з҃. Ꙗ҆́кѡ подоба́етъ жи́тельствꙋющемꙋ по бз҃ѣ всѧ̑ за́пѡвѣди проходи́ти: бо́льшꙋю же ча́сть дѣ́ланїѧ ᲂу҆дѣлѧ́ти на соблюде́нїе пе́рвыхъ за́повѣдей, и҆ ꙗ҆́кобы ражда́ющихъ дрꙋгі̑ѧ.

Поне́же ᲂу҆́бѡ нача́ло и҆ ко́рень всѧ́кагѡ, ꙗ҆́коже рѣ́хомъ, сицева́гѡ дѣ́ланїѧ, є҆́сть сїѐ, дабы̀ жи́тельствовати по спаси́тєльнымъ за́повѣдемъ: коне́цъ же, и҆ пло́дъ, дабы̀ па́ки возврати́тисѧ къ дарова́ннѣй на́мъ и҆спе́рва креще́нїемъ соверше́ннѣй благода́ти дх҃а, въ на́съ сꙋ́щей: нераска̑ѧнна бо, глаго́летъ, бж҃їѧ дарова̑нїѧ, но спогребе́ннѣй страстьмѝ, ѿкрыва́емѣй же дѣ́ланїемъ бг҃одѣ́йныхъ за́повѣдей. Подоба́етъ по си́лѣ и҆сполне́нїемъ всѣ́хъ таковы́хъ за́повѣдей, сꙋ́щее въ на́съ ꙗ҆вле́нїе дх҃а тща́тисѧ всѧ́цѣмъ ѡ҆́бразомъ воз̾ѡчи́стити, дабы̀ ꙗ҆снѣ́йше ᲂу҆зрѣ́ти. Свѣти́льникъ бо, глаго́летъ къ бг҃ꙋ блаже́нный даві́дъ, нога́ма мои́ма зако́нъ тво́й, и҆ свѣ́тъ стезѧ́мъ мои̑мъ.³⁸⁸ И҆, за́повѣдь гдⷭ҇нѧ просвѣща́ющаѧ ѻ҆́чи.³⁸⁹ И҆, ко всѣ̑мъ за́повѣдемъ твои̑мъ направлѧ́хсѧ.³⁹⁰ И҆, напе́рсникъ і҆ѡа́ннъ: соблюда́ѧй за́пѡвѣди є҆гѡ̀, въ не́мъ пребыва́етъ, и҆ то́й въ не́мъ.³⁹¹ И҆, за́пѡвѣди є҆гѡ̀ тѧ́жки не сꙋ́ть.³⁹² Спаси́тель же: и҆мѣ́ѧй за́пѡвѣди моѧ̑, и҆ соблюда́ѧй и҆̀хъ, то́й є҆́сть любѧ́й мѧ̀: а҆ любѧ́й мѧ̀, возлю́бленъ бꙋ́детъ ѻ҆ц҃е́мъ мои́мъ, и҆ а҆́зъ возлюблю̀ є҆го̀, и҆ ꙗ҆влю́сѧ є҆мꙋ̀ са́мъ. И҆, а҆́ще кто̀ лю́битъ мѧ̀, сло́во моѐ соблюде́тъ, и҆ ѻ҆ц҃ъ мо́й возлю́битъ є҆го̀, и҆ къ немꙋ̀ прїи́демъ, и҆ ѻ҆би́тель ᲂу҆ негѡ̀ сотвори́мъ. И҆, не любѧ́й мѧ̀, слове́съ мои́хъ не соблюда́етъ.³⁹³ Па́че же на пє́рвыѧ си́хъ за́повѣдей и҆ главнѣ́йшыѧ, и҆ ꙗ҆́кѡ ма́тери про́чїихъ бо́льшꙋю ча́сть дѣ́ланїѧ ᲂу҆дѣлѧ́ти подоба́етъ. Та́кѡ бо съ бг҃омъ, непогрѣши́тельнѡ и҆ предлежа́щее намѣ́ренїе, си́рѣчь са́мое благо́е нача́ло, и҆ коне́цъ жела́нїѧ поꙋчи́ти возмо́жемъ, си́рѣчь ꙗ҆вле́нїе дх҃а.

Глава̀ и҃. Ꙗ҆́кѡ нача́ло всѧ́кагѡ бг҃олюбе́знагѡ дѣ́ланїѧ є҆́сть призыва́нїе съ вѣ́рою и҆́мене гдⷭ҇а на́шегѡ і҆и҃са хрⷭ҇та̀, и҆ вкꙋ́пѣ съ си́мъ, прозѧба́ющїй ѿ сегѡ̀ ми́ръ и҆ любы̀.

Нача́ло всѧ́кагѡ бг҃олюбе́знагѡ дѣ́ланїѧ є҆́сть призыва́нїе съ вѣ́рою сп҃си́тельнагѡ и҆́мене гдⷭ҇а на́шегѡ і҆и҃са хрⷭ҇та̀, ꙗ҆́кѡ то́й речѐ: без̾ менѐ не мо́жете твори́ти ничесѡ́же.³⁹⁴ И҆ съ си́мъ призыва́нїемъ прозѧба́етъ ми́ръ: подоба́етъ бо, глаго́летъ, моли́тисѧ без̾ гнѣ́ва и҆ размышле́нїѧ:³⁹⁵ и҆ посе́мъ любы̀. Бг҃ъ любы̀ є҆́сть, и҆ пребыва́ѧй въ любвѝ, въ бз҃ѣ пребыва́етъ, и҆ бг҃ъ въ не́мъ.³⁹⁶ Се́й же ми́ръ и҆ любы̀ не то́кмѡ бл҃гопрїѧ́тною творѧ́тъ моли́твꙋ, но и҆ ѿ са́мыѧ є҆щѐ моли́твы ражда́ютсѧ и҆ возсїѧва́ютъ ꙗ҆́кѡ бж҃е́ствєнныѧ совокꙋ̑пныѧ лꙋчѝ, и҆ возраста́ютъ, и҆ совершє́нны быва́ютъ.

Глава̀ ѳ҃. Ꙗ҆́кѡ чрез̾ ка́ждое и҆з̾ си́хъ тре́хъ ѻ҆со́бь, и҆ вкꙋ́пѣ, ѻ҆би́лїе всѣ́хъ бла̑гъ подае́тсѧ на́мъ.

Ѿ си́хъ тре́хъ, па́че же ѿ ка́ждагѡ и҆з̾ си́хъ ѻ҆со́бь, и҆ вкꙋ́пѣ, ѻ҆би́лїе всѣ́хъ бла̑гъ подае́тсѧ и҆ и҆злива́етсѧ. Призыва́нїемъ бо съ вѣ́рою и҆́мене гдⷭ҇а на́шегѡ і҆и҃са хрⷭ҇та̀, ми́лость и҆ и҆́стинный живо́тъ въ не́мъ сокрове́нный и҆звѣ́стнѡ ᲂу҆пова́емъ прїѧ́ти, внꙋ́трь се́рдца чи́стѣ призыва́емомꙋ и҆́мени гдⷭ҇а і҆и҃са хрⷭ҇та̀ и҆сточа́ющꙋ сїѧ̑, ꙗ҆́кѡ дрꙋго́мꙋ и҆сто́чникꙋ бж҃е́ственномꙋ приснотекꙋ́щемꙋ: преимꙋ́щимъ же всѧ́къ ᲂу҆́мъ, и҆ ни є҆ди́нагѡ предѣ́ла и҆мꙋ́щимъ ми́ромъ, примире́нїѧ съ бг҃омъ и҆ дрꙋ́гъ со дрꙋ́гомъ сподоблѧ́емсѧ: любо́вїю же, є҆ѧ́же сла́ва несравне́нна, ꙗ҆́кѡ ѻ҆на̀ є҆́сть коне́цъ и҆ глава̀ зако́на и҆ проро́кѡвъ, и҆ ꙗ҆́кѡ любы̀ бг҃ъ и҆менꙋ́етсѧ, всѧ́кѡ съ бг҃омъ соединѧ́емсѧ, ᲂу҆празднѧ́емꙋ грѣхꙋ̀ на́шемꙋ пра́вдою бж҃їею, и҆ пресла́внѣ дѣ́йствꙋемымъ въ на́съ любвѝ ра́ди сыноположе́нїемъ благода́ти. Любы́ бо, глаго́летъ, покрыва́етъ мно́жество грѣхѡ́въ.³⁹⁷ Любы̀ всѧ̑ покрыва́етъ, всемꙋ̀ вѣ́рꙋ є҆́млетъ, всѧ̑ ᲂу҆пова́етъ, всѧ̑ терпи́тъ, любы̀ николи́же ѿпа́даетъ.³⁹⁸

Глава̀ і҃. Ꙗ҆́кѡ и҆ гдⷭ҇ь на́шъ і҆и҃съ хрⷭ҇то́съ во вре́мѧ спаси́тельныѧ стра́сти, сїѧ̑ ᲂу҆ченикѡ́мъ свои̑мъ, ꙗ҆́кѡ и҆схѡ́дныѧ нѣ̑кїѧ за́пѡвѣди, и҆ наслѣ́дїе бж҃е́ственное ѡ҆ста́ви: та́кожде и҆ по воскресе́нїи.

Тѣ́мже и҆ са́мъ преблагі́й и҆ сладча́йшїй на́шъ і҆и҃съ хрⷭ҇то́съ, и҆ є҆гда̀ на во́льнꙋю за ны̀ стра́сть свою̀ прїи́де, и҆ є҆гда̀ по воскресе́нїи а҆по́столѡмъ ꙗ҆ви́сѧ, є҆ще́ же и҆ внегда̀ ко своемꙋ̀ по є҆стествꙋ̀ ѻ҆ц҃ꙋ̀, и҆ на́шемꙋ по бл҃года́ти, и҆мѣ́ѧше восходи́ти, а҆́ки ѻ҆ц҃ъ и҆́скреннїй и҆ чадолюби́вый, сїѧ̑ ꙗ҆́кѡ нѣ̑кїѧ и҆схѡ́дныѧ за́пѡвѣди, и҆ ᲂу҆тѣшє́нїѧ любє́зныѧ, и҆ сладча́йшыѧ, и҆ и҆звѣ̑стныѧ, ꙗ҆́коже рещѝ, зало́ги, па́че же наслѣ́дїе бг҃опода́тельное неѿе́млемое, всѣ̑мъ свои̑мъ ѡ҆ста́ви: и҆ ѻ҆́во ꙗ҆влѧ́етъ си́ми ꙗ҆̀же глаго́летъ ко ᲂу҆ченикѡ́мъ, наста́вшей спаси́тельной стра́сти, та́кѡ: а҆́ще чесѡ̀ про́сите во и҆́мѧ моѐ, а҆́зъ сотворю̀.³⁹⁹ И҆, а҆ми́нь, а҆ми́нь, глаго́лю ва́мъ, ꙗ҆́кѡ є҆ли̑ка а҆́ще чесѡ̀ про́сите ѿ ѻ҆ц҃а̀ во и҆́мѧ моѐ, да́стъ ва́мъ.⁴⁰⁰ Досе́лѣ ничесѡ́же проси́сте во и҆́мѧ моѐ: проси́те и҆ прїи́мете, да ра́дость ва́ша и҆спо́лнена бꙋ́детъ. И҆, въ то́й де́нь во и҆́мѧ моѐ воспро́сите. И҆ па́ки по воскресе́нїи: зна́мєнїѧ вѣ́рꙋющымъ сїѧ̑ послѣ́дꙋютъ: и҆́менемъ мои́мъ бѣ́сы и҆жденꙋ́тъ, ѧ҆зы́ки возглаго́лютъ нѡ́вы, и҆ прѡ́чаѧ.⁴⁰¹ Послѣ́дꙋѧ си̑мъ, глаго́летъ и҆ напе́рсникъ: мнѡ́га же и҆ и҆́на зна́мєнїѧ сотворѝ і҆и҃съ пред̾ ᲂу҆ченикѝ свои́ми, ꙗ҆̀же не сꙋ́ть пи̑сана въ кни́зѣ се́й. Сїѧ̑ же пи̑сана бы́ша, да вѣ́рꙋете, ꙗ҆́кѡ і҆и҃съ є҆́сть хрⷭ҇то́съ сн҃ъ бж҃їй, и҆ да вѣ́рꙋюще, живо́тъ и҆́мате во и҆́мѧ є҆гѡ̀.⁴⁰² И҆ бж҃е́ственный па́ѵелъ: ѡ҆ и҆́мени і҆и҃совѣ всѧ́ко колѣ́но поклони́тсѧ, и҆ прѡ́чаѧ.⁴⁰³ И҆ во а҆по́стольскихъ дѣѧ́нїѧхъ си́це напи́сано є҆́сть: тогда̀ пе́тръ и҆спо́лнивсѧ дх҃а ст҃а, речѐ: разꙋ́мно бꙋ́ди всѣ̑мъ ва́мъ, и҆ всѣ̑мъ лю́демъ і҆и҃лєвымъ, ꙗ҆́кѡ во и҆́мѧ і҆и҃са назѡре́а, є҆го́же вы̀ распѧ́сте, є҆го́же бг҃ъ воскресѝ ѿ ме́ртвыхъ, ѡ҆ се́мъ се́й стои́тъ пред̾ ва́ми здра́въ. И҆ по ма́лѣхъ: И҆ нѣ́сть ни ѡ҆ є҆ди́номъ же и҆но́мъ спасе́нїѧ: нѣ́сть бо и҆но́гѡ и҆́мене под̾ небесе́мъ да́ннагѡ въ человѣ́цѣхъ, ѡ҆ не́мже подоба́етъ спасти́сѧ на́мъ.⁴⁰⁴ И҆ па́ки спаси́тель: даде́сѧ мѝ всѧ́ка вла́сть на небесѝ и҆ на землѝ.⁴⁰⁵ Ѻ҆́во же па́ки ꙗ҆́вствꙋетъ и҆з̾ си́хъ, ꙗ҆̀же бг҃очеловѣ́къ гдⷭ҇ь речѐ ко а҆по́столѡмъ пре́жде крⷭ҇та̀: ми́ръ ѡ҆ставлѧ́ю ва́мъ, ми́ръ мо́й даю̀ ва́мъ.⁴⁰⁶ И҆, сїѧ̑ глаго́лю, да во мнѣ̀ ми́ръ и҆́мате.⁴⁰⁷ И҆, сїѧ̀ є҆́сть за́повѣдь моѧ̀, да лю́бите дрꙋ́гъ дрꙋ́га.⁴⁰⁸ И҆, ѡ҆ се́мъ разꙋмѣ́ютъ всѝ, ꙗ҆́кѡ моѝ ᲂу҆ченицы̀ є҆стѐ, а҆́ще любо́вь и҆́мате междꙋ̀ собо́ю.⁴⁰⁹ И҆, ꙗ҆́коже возлюби́ мѧ ѻ҆ц҃ъ, и҆ а҆́зъ возлюби́хъ ва́съ: пребꙋ́дите въ любвѝ мое́й.⁴¹⁰ А҆́ще за́пѡвѣди моѧ̑ соблюде́те, пребꙋ́дете въ любвѝ мое́й: ꙗ҆́коже а҆́зъ за́пѡвѣди ѻ҆ц҃а̀ моегѡ̀ соблюдо́хъ, и҆ пребыва́ю въ є҆гѡ̀ любвѝ.⁴¹¹ И҆ па́ки по воскресе́нїи въ разли̑чнаѧ времена̀ мно́жицею дава́ше ми́ръ, ꙗ҆влѧ́ѧсѧ свои̑мъ, и҆ глаго́лѧ: ми́ръ ва́мъ.⁴¹² И҆ къ петрꙋ̀, є҆мꙋ́же и҆ пе́рвенство над̾ ᲂу҆ченикѝ ввѣ́ри, показꙋ́ѧ, ꙗ҆́кѡ попече́нїе па́ствы є҆гѡ̀ є҆́сть воздаѧ́нїе нѣ́кое за горѧча́йшꙋю є҆гѡ̀ любо́вь къ самомꙋ̀ гдⷭ҇ꙋ і҆и҃сꙋ хрⷭ҇тꙋ̀, та́кѡ глаго́летъ три́жды: а҆́ще лю́биши мѧ̀, пе́тре, па́че и҆нѣ́хъ, пасѝ ѻ҆́вцы моѧ̑.⁴¹³ Мо́жно согла́снѡ съ намѣ́ренїемъ рещѝ и҆ сїѐ, ꙗ҆́кѡ ѿ пока́занныхъ си́хъ тре́хъ преди́вныхъ дѣ́ланїй, ражда́ютсѧ на́мъ и҆на̑ѧ нѣ̑каѧ и҆зрѧ̑дна трѝ, сїѧ̑ же сꙋ́ть: ѡ҆чище́нїе дꙋшѝ, просвѣще́нїе и҆ соверше́нїе.

Глава̀ а҃і. Ꙗ҆́кѡ и҆з̾ си́хъ тре́хъ соткава́ютсѧ всѧ̑ добродѣ́тєли.

А҆́ще же кто̀ соверше́ннѡ восхотѣ́лъ бы ꙗ҆́вѣ и҆спыта́ти, таковы́й на се́й треплете́ннѣй и҆ нерасто́рженнѣй ве́рви ѡ҆брѧ́щетъ повѣ́шенꙋ и҆ сотка́ннꙋ всѧ́кꙋю добродѣ́телей бога́тꙋю и҆ бг҃осодѣ́ланнꙋю порфѵ́рꙋ. И҆́бо жи́тельство по бз҃ѣ є҆́сть, ꙗ҆́кѡ нѣ́каѧ честна́ѧ вери́га и҆ цѣ́пь златоиспещре́наѧ, и҆мꙋ́щаѧ є҆ди́нꙋ ѿ дрꙋгі́ѧ добродѣ́тель свѧ́тѡ зави́сѧщꙋ, и҆ всѧ̑ во є҆ди́но соста́влєны. И҆́бо и҆ є҆ди́но дѣ́ло мнѡ́гїѧ соверша́ютъ, є҆́же є҆́сть и҆́скреннѣ съ ни́ми живꙋ́щемꙋ человѣ́кꙋ ѡ҆божи́тисѧ, богатѣ́ти же ꙗ҆́кѡ сою́зами нѣ́кїими и҆ ко́льцами, спаси́тельнымъ ѻ҆́нымъ съ вѣ́рою призыва́нїемъ: а҆́ще же хо́щеши, наде́ждою и҆ смире́нїемъ, любе́знѣйшагѡ и҆́мене гдⷭ҇а і҆и҃са хрⷭ҇та̀. Ми́ромъ же кꙋ́пнѡ и҆ любо́вїю, ꙗ҆̀же сꙋ́ть бг҃онасажде́нное вои́стиннꙋ тристе́бельное и҆ живопода́тельное дре́во, є҆гѡ́же во вре́мѧ каса́ѧйсѧ, и҆ ꙗ҆́коже подоба́етъ причаща́ѧйсѧ, не сме́рть, ꙗ҆́коже первосозда́нный человѣ́къ, но живо́тъ неги́блющїй и҆ вѣ́чный прїе́млетъ.

Глава̀ в҃і. Ꙗ҆́кѡ да́ръ и҆ прише́ствїе ст҃а́гѡ дх҃а ѿ бг҃а ѻ҆ц҃а̀ вѣ̑рнымъ ѡ҆ хрⷭ҇тѣ̀ і҆и҃сѣ, и҆ ѡ҆ ст҃ѣ́мъ є҆гѡ̀ и҆́мени дае́тсѧ.

Є҆ще́ же да́ръ и҆ прише́ствїе ст҃а́гѡ дх҃а дае́тсѧ ѿ бг҃а ѻ҆ц҃а̀ вѣ̑рнымъ ѡ҆ хрⷭ҇тѣ̀ і҆и҃сѣ, и҆ ѡ҆ ст҃ѣ́мъ є҆гѡ̀ и҆́мени, ꙗ҆́коже глаго́летъ са́мъ пребж҃е́ственный и҆ дꙋшелюби́вый гдⷭ҇ь і҆и҃съ хрⷭ҇то́съ ко а҆по́столѡмъ: Ꙗ҆́кѡ ᲂу҆́не є҆́сть ва́мъ, да а҆́зъ и҆дꙋ̀. А҆́ще бо не и҆дꙋ̀ а҆́зъ, ᲂу҆тѣ́шитель не прїи́детъ къ ва́мъ: а҆́ще ли же и҆дꙋ̀, послю̀ є҆го̀ къ ва́мъ.⁴¹⁴ И҆, є҆гда́ же прїи́детъ ᲂу҆тѣ́шитель, є҆го́же а҆́зъ послю̀ ва́мъ ѿ ѻ҆ц҃а̀, дх҃ъ и҆́стины, и҆́же ѿ ѻ҆ц҃а̀ и҆схо́дитъ.⁴¹⁵ И҆ па́ки: ᲂу҆тѣ́шитель же дх҃ъ ст҃ы́й, є҆го́же по́слетъ ѻ҆ц҃ъ во и҆́мѧ моѐ.⁴¹⁶

Глава̀ г҃і. Ꙗ҆́кѡ пра́веднѣ ᲂу҆ста́виша свѧті́и ѻ҆тцы̀ на́ши, и҆ со живꙋ́щимъ въ ни́хъ ст҃ы́мъ дх҃омъ моли́тисѧ на́мъ въ гдⷭ҇ѣ на́шемъ і҆и҃сѣ хрⷭ҇тѣ̀, и҆ ѿ негѡ̀ проси́ти млⷭ҇ти.

Си́хъ ра́ди ᲂу҆̀бо и҆ сла́вни наста̑вницы на́ши и҆ ᲂу҆чи́тели, и҆ со живꙋ́щимъ въ ни́хъ всест҃ы́мъ дх҃омъ, ѕѣлѡ̀ премꙋ́дрѣ всѣ́хъ наꙋча́ютъ, пре́жде всѧ́кагѡ и҆но́гѡ до́брагѡ дѣ́ланїѧ и҆ поꙋче́нїѧ: па́че же въ по́прищи бг҃отво́рнагѡ безмо́лвїѧ себѐ вда́ти хотѧ́щымъ, и҆ посвѧти́ти себѧ̀ бг҃ꙋ, и҆ ѿто́ргнꙋтисѧ мі́ра, и҆ ᲂу҆мо́мъ безмо́лвствовати, въ гдⷭ҇ѣ моли́тисѧ, и҆ ѿ негѡ̀ ми́лости проси́ти без̾ сꙋмнѣ́нїѧ, и҆ всест҃о́е и҆ сладча́йшее є҆гѡ̀ и҆́мѧ, непреста́ннѡ и҆мѣ́ти дѣ́ломъ же и҆ поꙋче́нїемъ, и҆ сїѐ въ се́рдцѣ, и҆ во ᲂу҆мѣ̀, и҆ во ᲂу҆стна́хъ вы́нꙋ ѡ҆бноси́ти, и҆ въ не́мъ, и҆ съ ни́мъ и҆ воздыха́ти, и҆ жи́ти и҆ спа́ти, и҆ бо́дрствовати, и҆ дви́житисѧ, и҆ ꙗ҆́сти, и҆ пи́ти, и҆ вкра́тцѣ рещѝ, понꙋжда́тисѧ всѧ̑ подо́бнѣ твори́ти. Ꙗ҆́коже бо семꙋ̀ ѿсꙋ́тствꙋющꙋ всѧ́ко лю́тое вкꙋ́пѣ стека́етсѧ, па́че же ничто́же быва́етъ въ на́съ ѿ поле́зныхъ: та́кѡ семꙋ̀ въ на́съ присꙋ́тствꙋющꙋ, всѐ сопроти́вное ѿгонѧ́етсѧ, и҆ ничто́же ѿ благи́хъ ѡ҆скꙋдѣва́етъ на́мъ, и҆ ко и҆справле́нїю ничто́же є҆́сть невозмо́жно. Ꙗ҆́коже и҆ са́мъ гдⷭ҇ь на́шъ глаго́летъ: Ꙗ҆́кѡ и҆́же бꙋ́детъ во мнѣ̀, и҆ а҆́зъ въ не́мъ, то́й сотвори́тъ пло́дъ мно́гъ: ꙗ҆́кѡ без̾ менѐ не мо́жете твори́ти ничесѡ́же.⁴¹⁷ Тѣ́мже сїѐ дѣ́ло и҆ и҆́мѧ всѧ́комꙋ созда́нїю стра́шное и҆ че́стное, є҆́же па́че всѧ́кагѡ дѣ́ла и҆ и҆́мене, и҆ мы̀ недосто́йнїи съ вѣ́рою призва́вше, и҆ на не́мъ вѣ̑трила настоѧ́щагѡ сло́ва всеѡбра́знѣ распросте́рше, си́це глаго́лати, и҆ на прє́днѧѧ простира́тисѧ начина́емъ.

Глава̀ д҃і. Ꙗ҆́кѡ подоба́етъ безпогрѣ́шнѡ ходи́ти хотѧ́щемꙋ по гдⷭ҇ѣ тече́нїе безмо́лвїѧ, пре́жде всѣ́хъ и҆збра́ти съ соверше́ннымъ ѿрече́нїемъ и҆ повинове́нїе соверше́нное.

Ѡ҆ и҆́мени вели́кагѡ бг҃а и҆ сп҃са на́шегѡ і҆и҃са хрⷭ҇та̀, ре́кшагѡ: а҆́зъ є҆́смь свѣ́тъ, и҆ живо́тъ и҆ и҆́стина, пꙋ́ть и҆ две́рь къ бг҃ꙋ ѻ҆ц҃ꙋ̀:⁴¹⁸ и҆, мно́ю а҆́ще кто̀ вни́детъ, спасе́тсѧ, и҆ вни́детъ, и҆ и҆зы́детъ, и҆ па́жить ѡ҆брѧ́щетъ, си́рѣчь спаси́тельнꙋю.⁴¹⁹ Вонмѝ тѣ̑мъ, ꙗ҆̀же глаго́лемъ: и҆ и҆́скреннѣ тебѣ̀ совѣ́тꙋемъ. Пре́жде всѣ́хъ и҆зберѝ себѣ̀ съ соверше́ннымъ, по свѧще́нномꙋ тайноꙋче́нїю, ѿрече́нїемъ, и҆ повинове́нїе непритво́рное и҆ соверше́нное, си́рѣчь потщи́сѧ ѡ҆брѣстѝ наста́вника и҆ ᲂу҆чи́телѧ непреле́стна, непреле́стность же сегѡ̀ да бꙋ́детъ въ то́мъ, что́бы представлѧ́ти свидѣ́тельство, ѡ҆ ни́хже глаго́летъ, ѿ свѧще́нныхъ писа́нїй, и҆ дꙋхоно́сныхъ мꙋже́й словесе́мъ и҆мꙋ́ща жи́тельство согла́сно, высо́ка ра́зꙋмомъ, смире́нна же мꙋдрова́нїемъ, и҆ и҆нѣ́ми нра́вы бла́га, и҆ ꙗ҆кова̀ глаго́лютъ бы́ти бг҃опрє́даннаѧ словеса̀, по хрⷭ҇тѣ̀ ᲂу҆чи́телѧ. И҆ ѡ҆брѣ́тъ, ѻ҆́номꙋ ꙗ҆́кѡ ѻ҆тцꙋ̀ родно́мꙋ сы́нъ ѻ҆тцелюби́вый прилѣпи́всѧ, ве́сь тѣ́ломъ и҆ дꙋ́хомъ пребыва́й ѿ тогѡ̀ вре́мене, ходѧ̀ по повелѣ́нїємъ ѻ҆́нагѡ, взира́ѧ на него̀, ꙗ҆́кѡ на самаго̀ хрⷭ҇та̀, а҆ не ꙗ҆́кѡ на человѣ́ка, всѧ́кое невѣ́рїе и҆ сꙋмнѣ́нїе дале́че ѿ себѐ пове́ргши, є҆ще́ же и҆ мꙋдрова́нїе, и҆ во́лю съ хотѣ́нїемъ. Си́це бꙋ́ди про́стъ и҆ нелюбопы́тливъ, ходѧ̀ въ слѣ́дъ ᲂу҆чи́телѧ, ꙗ҆́кѡ нѣ́кое зерца́ло и҆мѣ́ѧ со́вѣсть свою̀, во и҆звѣ́ствованїе ꙗ҆́сное несꙋмнѣ́ннагѡ и҆ соверше́ннагѡ къ тайноꙋчи́телю послꙋша́нїѧ. А҆́ще же когда̀ и҆ всѣва́етъ нѣ́что ѿ сопроти́вныхъ ѻ҆́тай въ твою̀ мы́сль враждꙋ́ѧй на блага̑ѧ дїа́волъ, ꙗ҆́кѡ ѿ блꙋда̀ и҆ ѻ҆гнѧ̀ ѿскочѝ къ самомꙋ̀ себѣ̀ и҆ къ подме́щꙋщемꙋ преле́стникꙋ премꙋ́дрѣ противовѣща́ѧ: ꙗ҆́кѡ не наставлѧ́емый наставлѧ́ющаго, но наставлѧ́ющїй наставлѧ́емаго наставлѧ́етъ, и҆ не а҆́зъ нача́льствꙋющагѡ, но ѻ҆́нъ мо́й сꙋ́дъ воспрїѧ́тъ, и҆ не а҆́зъ ѻ҆́номꙋ, но то́й сꙋдїѧ̀ мнѣ̀ бы́сть по сло́вꙋ лѣ́ствичника, и҆ си̑мъ подѡ́бнаѧ (ѿ д҃ степе́ни). Ничто́же бо па́че такова́гѡ пребыва́нїѧ, си́рѣчь повинове́нїѧ, и҆́скреннѣйше є҆́сть и҆зво́лившемꙋ безпрекосло́внѡ раздра́ти рꙋкописа̑нїѧ свои́хъ согрѣше́нїй, впи́санꙋ же бы́ти въ бж҃е́ственнꙋю кни́гꙋ спаса́емыхъ. А҆́ще бо: по блаже́нномꙋ па́ѵлꙋ, сн҃ъ бж҃їй, и҆ бг҃ъ на́шъ гдⷭ҇ь і҆и҃съ, по на́мъ на́съ ра́ди бы́въ, и҆ ѻ҆ч҃еское благоволе́нїе ѕѣлѡ̀ премꙋ́дрѣ стро́ѧ, таковы́мъ, ꙗ҆́коже ви́димо бы́сть, теча́ше пꙋте́мъ, и҆́мже и҆ за благоꙋгожде́нїе по человѣ́чествꙋ ѻ҆те́ческагѡ сподо́бисѧ возвѣще́нїѧ: смири́лъ бо, глаго́летъ, себѐ, послꙋшли́въ бы́въ да́же до сме́рти, сме́рти же кре́стныѧ.⁴²⁰ Тѣ́мже и҆ бг҃ъ є҆го̀ превознесѐ, и҆ дарова̀ є҆мꙋ̀ и҆́мѧ, є҆́же па́че всѧ́кагѡ и҆́мене, и҆ прѡ́чаѧ. Кто́жъ ᲂу҆́бѡ де́рзостнѣ надѣ́етсѧ, да не рекꙋ̀ несмы́сленнѣ, полꙋчи́ти сла́вꙋ гдⷭ҇а и҆ бг҃а и҆ сп҃са і҆и҃са хрⷭ҇та̀, и҆ ѻ҆те́чєскїѧ по́чєсти не и҆збра́въ то́южде стезе́ю ходи́ти съ наста́вникомъ и҆ ᲂу҆чи́телемъ на́шимъ і҆и҃съ хрⷭ҇то́мъ: подоба́етъ бо и҆ ᲂу҆ченикꙋ̀, а҆́ще пече́тсѧ се́й бы́ти ꙗ҆́кѡ ᲂу҆чи́тель, ꙗ҆́кѡ на и҆з̾ѡбраже́нїе и҆ началоѡбра́зїе наилꙋ́чшее, та́кѡ все́ю си́лою дꙋшѝ, взира́ти неꙋкло́ннѡ на житїѐ пѣ́стꙋново, и҆ ѡ҆бꙋчє́нїѧ є҆гѡ̀, и҆ тща́тисѧ є҆мꙋ̀ по всѧ́къ де́нь ревнова́ти. Та́же, и҆ ѡ҆ самѣ́мъ гдⷭ҇ѣ і҆и҃сѣ хрⷭ҇тѣ̀ пи́сано є҆́сть сїѐ: И҆ бѣ̀ повинꙋ́ѧсѧ ѻ҆тцꙋ̀ и҆ ма́тери свое́й.⁴²¹ И҆ са́мъ сп҃си́тель глаго́летъ: Не прїидо́хъ, да послꙋ́жатъ мнѣ̀, но послꙋжи́ти.⁴²² И҆́же хо́щетъ жи́ти и҆́накѡ, си́рѣчь самоꙋго́днѣ и҆ самовла́стнѣ, и҆ без̾ наста́вника, таковы́й мни́тсѧ ли, ꙗ҆́кѡ мо́жетъ ѻ҆́нъ ходи́ти, по сло́вꙋ, бж҃е́ственнымъ житїе́мъ; Ника́кѡ ѿню́дъ ꙗ҆́коже чрез̾ ко́панныѧ мѣста̀ ска́чай. И҆ глаго́летъ лѣ́ствичникъ: ꙗ҆́коже не и҆мы́й наста́вника, ᲂу҆до́бь въ пꙋтѝ заблꙋжда́етъ, та́кѡ и҆ самовла́стнѣ и҆́ноческимъ пꙋте́мъ ходѧ́й ᲂу҆до́бь погиба́етъ, а҆́ще и҆ всѧ́кꙋ премꙋ́дрость мі́ра сегѡ̀ вѣ́сть. Сегѡ̀ ра́ди и҆ мно́зїи, да не рече́мъ всѝ неповинꙋ́ющїисѧ, и҆ не съ совѣ́томъ ходѧ́щїи, съ трꙋдо́мъ и҆ по́томъ снови́дѧще сѣ́ютъ мнѡ́жайшаѧ, и҆́стиною же жнꙋ́тъ вельмѝ малѣ̑йшаѧ: нѣ́цыи же и҆ вмѣ́стѡ пшени́цы собира́ютъ, ᲂу҆вы̀! пле́велы, ꙗ҆́коже ходѧ́щїи, по глаго́лꙋ, своечи́нїемъ и҆ самоꙋго́днымъ мꙋдрова́нїемъ, є҆гѡ́же ничто́же є҆́сть го́рше, и҆ семꙋ̀ свидѣ́тель лѣ́ствичникъ, та́кѡ пишѧ̀: Є҆ли́цы къ по́прищꙋ ᲂу҆́мнагѡ и҆сповѣ́данїѧ совлещи́сѧ воспрїѧ́сте: є҆ли́цы и҆́го хрⷭ҇то́во на вы́ю свою̀ взѧ́ти хо́щете: є҆ли́цы бре́мѧ своѐ на вы́ю и҆но́гѡ возложи́ти тщите́сѧ: є҆ли́цы сами́хъ себѐ въ нево́лю преда́ти спѣши́те, да вмѣ́стѡ ѻ҆́ныѧ свобо́дꙋ прїи́мете: є҆ли́цы рꙋка́ми дрꙋги́хъ возвыша́еми, и҆ пловꙋ́ще вели́кꙋю сїю̀ препла́ваете пꙋчи́нꙋ, ᲂу҆вѣ́дите, ꙗ҆́кѡ кра́ткимъ нѣ́кимъ и҆ жесто́кимъ пꙋте́мъ ходи́ти воспрїѧ́сте, є҆ди́нꙋ то́кмѡ пре́лесть на себѣ̀ и҆мꙋ́щимъ, сїѧ́ же нарица́етсѧ своечи́нїе (ѿ д҃ степе́ни). Сегѡ́ бо во все́мъ ѿвергі́йсѧ, ꙗ҆̀же возмни́тъ бы́ти блага̑ѧ, и҆ дꙋхѡ́внаѧ, и҆ бг҃оꙋгѡ́днаѧ, въ сїѧ̑ пре́жде да́же не по́йде, дости́же: послꙋша́нїе бо є҆́сть, є҆́же не вѣ́ровати себѣ̀ во всѣ́хъ благи́хъ, до конца̀ живота̀. Тѣ́мже и҆ ты̀, сїѧ̑ съ ра́зꙋмомъ позна́въ, и҆ благо́й и҆ неѿе́млемой ча́сти, въ небесѝ пꙋтеводѧ́щагѡ безмо́лвїѧ ѡ҆бꙋча́тисѧ жела́ѧ, послѣ́дꙋй до́брѣ постановлє́ннымъ, ꙗ҆́коже тебѣ̀ показа́сѧ, зако́нѡмъ: и҆ пе́рвѣе съ ра́достїю возлюбѝ послꙋша́нїе, та́же безмо́лвїе. Ꙗ҆́коже бо дѣѧ́нїе восхожде́нїе є҆́сть къ видѣ́нїю, та́кѡ и҆ послꙋша́нїе къ безмо́лвїю. И҆, не прелага́й предѣ́лы, ꙗ҆́коже пи́сано є҆́сть, ꙗ҆̀же положи́ша ѻ҆тцы̀.⁴²³ И҆, го́ре же є҆ди́номꙋ.⁴²⁴ Си́мъ бо ѡ҆́бразомъ до́брое ѡ҆снова́нїѧ нача́ло положи́въ, вре́мени продолжа́ющꙋсѧ, и҆ покро́въ благосла́внѣйшїй возложи́ши на началозда́нїе дꙋ́ха. Ꙗ҆́коже бо є҆гѡ́же нача́ло, по ре́кшемꙋ, є҆́сть неискꙋ́сно, то̀ и҆ всѐ ѿве́ржено: та́кѡ напро́тивъ, є҆гѡ́же нача́ло и҆скꙋ́сно, то̀ и҆ всѐ благолѣ́пно є҆́сть, є҆ще́ же и҆ благочи́нно, а҆́ще и҆ сопроти́вное нѣ́когда слꙋча́етсѧ. Ѻ҆ба́че и҆ сїѐ ѿ на́шегѡ предложе́нїѧ и҆ произволе́нїѧ ѡ҆бы́че прибыва́ти.

Глава̀ є҃і. Ка̑ѧ сꙋ́ть зна́мєнїѧ и҆́стиннагѡ повинове́нїѧ, ꙗ҆̀же содержѧ̀ и҆́стинный послꙋ́шникъ, мо́глъ бы бы́ти без̾ погрѣше́нїѧ повинꙋ́ющьсѧ.

Но поне́же ѡ҆ таково́мъ житїѝ мно́гое є҆́сть сло́во и҆ неꙋдо́бь сказꙋ́емо, тѣ́мже и҆ проходѧ́щїи сїѐ, разли́чнѣ прохо́дѧтъ: подоба́етъ и҆ ѡ҆б̾ ѻ҆́номъ ма̑лаѧ нѣ̑каѧ а҆́ки зна́мєнїѧ показа́ти тебѣ̀, ꙗ҆̀же и҆ содержа̀, ꙗ҆́кѡ прави́ло и҆ ве́рвь древодѣ́льнꙋ непогрѣ́шнꙋ, непоро́чнѣ бꙋ́деши жи́тельствовати. И҆ ᲂу҆̀бо глаго́лемъ сїѧ̑: подоба́етъ и҆́стинномꙋ послꙋ́шникꙋ, ꙗ҆́коже на́мъ мни́тсѧ, храни́ти пѧ́ть сі́и добродѣ́тєли по всѧ́цѣй нꙋ́ждѣ: и҆ пе́рвѣе вѣ́рꙋ, си́рѣчь, и҆мѣ́ти є҆мꙋ̀ чи́стꙋ и҆ неле́стнꙋ вѣ́рꙋ къ настоѧ́телю своемꙋ̀, до толи́ка, ꙗ҆́кѡ мнѣ́ти самаго̀ ви́дѣти хрⷭ҇та̀, и҆ повинова́тисѧ, ꙗ҆́коже глаго́летъ гдⷭ҇ь і҆и҃съ: слꙋ́шаѧй ва́съ, менѐ слꙋ́шаетъ: и҆ ѿметаѧйсѧ ва́съ, менѐ ѿмета́етсѧ: ѿмета́ѧйсѧ же менѐ, ѿмета́етсѧ посла́вшаго мѧ̀.⁴²⁵ И҆ всѧ́ко, є҆́же не ѿ вѣ́ры, грѣ́хъ є҆́сть.⁴²⁶ Вторꙋ́ю добродѣ́тель и҆́стинꙋ, си́рѣчь, и҆́стинствовати є҆мꙋ̀ въ дѣ́лѣ и҆ сло́вѣ и҆ соверше́ннѣмъ и҆сповѣ́данїи по́мыслѡвъ: нача́ло бо, пи́сано є҆́сть, слове́съ твои́хъ и҆́стина: и҆ и҆́стины взыскꙋ́етъ гдⷭ҇ь.⁴²⁷ хрⷭ҇то́съ же глаго́летъ: а҆́зъ є҆́смь и҆́стина:⁴²⁸ но ᲂу҆́бѡ и҆ самои́стина нарече́сѧ. Тре́тїю добродѣ́тель, є҆́же не твори́ти своеѧ̀ во́ли: тщета́ бо є҆́сть, глаго́летъ послꙋ́шникꙋ, є҆́же твори́ти свою̀ во́лю: но при́снѡ ѿсѣка́ти ю҆̀ во́льнѣ, си́рѣчь, не понꙋжда́емꙋ ѿ своегѡ̀ ѻ҆тца̀. Четве́ртꙋю добродѣ́тель, є҆́же ѿню́дъ не прекосло́вити и҆ любопрѣ́тисѧ, поне́же прекосло́вїе и҆ любопрѣ́нїе нѣ́сть дѣ́ло благочести́выхъ: пи́шетъ во свѧще́ннѣйшїй па́ѵелъ: а҆́ще ли кто̀ мни́тсѧ спо́рливъ бы́ти, мы̀ такова́гѡ ѻ҆бы́чаѧ не и҆́мамы, нижѐ це́ркви бж҃їѧ.⁴²⁹ А҆́ще ли же си́це про́стѣ, и҆ ѻ҆́бще всѣ̑мъ хрїстїа́нѡмъ возбранѧ́ютсѧ такова̑ѧ, мно́гѡ па́че и҆́нокѡмъ, да є҆щѐ гдⷭ҇а ра́ди ѡ҆бѣща́ющымсѧ повинова́тисѧ соверше́ннѣ: прекосло́вїе бо и҆ любопрѣ́нїе быва́етъ ѿ разсꙋжде́нїѧ съ невѣ́рїемъ и҆ высокомꙋ́дрїемъ живꙋ́ща, ꙗ҆́коже рече́сѧ: высокомꙋ́дръ и҆́нокъ прекосло́витъ си́льнѣ: ꙗ҆́коже и҆ напро́тивъ, си́рѣчь є҆́же не прекосло́вити и҆ не любопрѣ́тисѧ, происхо́дитъ ѿ вѣ́рна и҆ смиреномꙋ́дра завѣща́нїѧ. И҆ пѧ́тꙋю же добродѣ́тель подоба́етъ храни́ти семꙋ̀, є҆́же и҆мѣ́ти соверше́нное и҆ чи́стое къ предстоѧ́телю и҆сповѣ́данїе, ꙗ҆́коже и҆ на постриже́нїи ꙗ҆́кѡ пред̾ стра́шнымъ предстоѧ́ще престо́ломъ хрⷭ҇то́вымъ, пред̾ бг҃омъ и҆ ст҃ы́ми а҆́гг҃лы да́хомъ ѡ҆бѣща́нїе, є҆́же и҆мѣ́ти на́мъ нача́ло и҆ коне́цъ со и҆нѣ́ми на́шими ко гдⷭ҇ꙋ ѡ҆бѣ́ты и҆ согла́сїи, и҆ и҆сповѣ́данїе та́йныхъ се́рдца. Речѐ и҆ блаже́нный даві́дъ: рѣ́хъ, и҆сповѣ́мъ на мѧ̀ беззако́нїе моѐ гдⷭ҇ви: и҆ ты̀ ѡ҆ста́вилъ є҆сѝ нече́стїе се́рдца моегѡ̀.⁴³⁰ И҆ лѣ́ствичникъ: ꙗ҆́звы ꙗ҆влѧ́ємы не пред̾ꙋспѣ́ютъ на го́ршее, но и҆сцѣлѣ́ютъ (ѿ д҃ степе́ни). Сїѐ пѧтери́чное пока́занныхъ добродѣ́телей и҆счисле́нїе премꙋ́дрѣ и҆ разꙋ́мнѣ соблюда́ѧй, несꙋмнѣ́нно да вѣ́сть, ꙗ҆́кѡ ѿсю́дꙋ полꙋ́читъ пра́ведныхъ, ꙗ҆́кѡ по ѡ҆брꙋче́нїю, блаже́нство. И҆ сїѧ̑ ᲂу҆́бѡ сꙋ́ть достопа́мѧтнагѡ послꙋша́нїѧ свѡ́йства, и҆ а҆́ки ко́рень и҆ ѡ҆снова́нїе: ᲂу҆слы́ши же, и҆ ꙗ҆кѡвы̀ сꙋ́ть вѣ́твїе, и҆ пло́дъ, и҆ покро́въ. Ѿ послꙋша́нїѧ, па́ки глаго́летъ лѣ́ствичникъ, смире́нїе, ѿ смире́нїѧ разсꙋжде́нїе, ѿ разсꙋжде́нїѧ разсмотрѣ́нїе, ѿ сегѡ́ же прозрѣ́нїе, є҆́же є҆́сть дѣ́ло є҆ди́нагѡ бг҃а, и҆ да́ръ да́рꙋемый ѿ негѡ̀ и҆зрѧ́днѣйшїй и҆ преесте́ственнѣйшїй ѿ негѡ̀ блаже́ннѣ бг҃одѣ́йствꙋємымъ [ѿ тогѡ́жъ степе́ни]. Све́рхъ рече́нныхъ же да бꙋ́детъ тѝ ꙗ҆́вственно и҆ сїѐ, ꙗ҆́кѡ по твоемꙋ̀ и҆звѣстноиспыта́нномꙋ повинове́нїю и҆сточа́етсѧ въ тебѣ̀ и҆ смире́нїе, и҆ па́ки по смире́нїи разсꙋжде́нїе, та́кожъ по чи́нꙋ и҆ прѡ́чаѧ. И҆ подвиза́йсѧ, є҆ли́кѡ тѝ мо́щно, непогрѣ́шнѣ тещѝ пꙋте́мъ послꙋша́нїѧ: та́кѡ бо и҆ на прє́днѧѧ без̾ погрѣше́нїѧ взы́деши. А҆́ще ли же въ нача́лѣ повинове́нїѧ нѣ́какѡ хра́млеши, вѣ́ждь, ꙗ҆́кѡ не до́брѣ ѡ҆ко́нчиши про́чее тече́нїе предлежа́щагѡ нача́ла, є҆́же глаго́лемъ, по хрⷭ҇тѣ̀ жи́тельство, нижѐ ᲂу҆вѣнча́ешисѧ да́рꙋемымъ побѣди́телѧмъ вѣнце́мъ. Сегѡ̀ ра́ди послꙋша́нїе, и҆ ꙗ҆̀же предреко́хомъ свѡ́йства ѻ҆́нагѡ, ꙗ҆́кѡ нѣ́кїй наста́вникъ да бꙋ́детъ тебѣ̀, ꙗ҆́коже ѿ кора́бленикѡвъ назира́емо къ блюде́нїю незаблꙋжде́нїѧ, да неꙋкло́ннѡ на ѻ҆́ное взира́ѧ, преплы́ти возмо́жеши вели́кꙋю добродѣ́телей пꙋчи́нꙋ, и҆ си́це неволнꙋ́емагѡ приста́нища безстра́стїѧ дости́гнеши. А҆́ще ли и҆ бꙋ́рѧ нѣ́каѧ и҆ волне́нїе на тѧ̀ на́йдетъ, и҆ сїѐ прилꙋчи́тсѧ во твое́мъ повинове́нїи: и҆́стиннагѡ бо послꙋ́шника, нижѐ са́мъ дїа́волъ по сло́вꙋ ѻ҆тцє́въ, повреди́ти мо́жетъ. Но да тебѣ̀ и҆ честнꙋ́ю пречꙋ́днагѡ послꙋша́нїѧ высотꙋ̀, є҆ли́ка є҆́сть, вкра́тцѣ пока́жемъ, є҆ди́ное є҆щѐ и҆зрече́нїе ст҃а́гѡ ѻ҆тца̀ воспомѧ́немъ. Глаго́летъ ᲂу҆́бѡ па́ки свѣтлѣ́йшїй жи́тельства по хрⷭ҇тѣ̀ свѣти́льникъ, и҆ но́вый веселеи́лъ небе́сныѧ лѣ́ствицы: ѱалмопѣ́нїе ѻ҆тцы̀ поставлѧ́ютъ бы́ти ѻ҆рꙋ́жїе, моли́твꙋ же стѣ́нꙋ, сле́зы же непорѡ́чныѧ ᲂу҆мове́нїе: блаже́нное же послꙋша́нїе, сꙋди́ша и҆сповѣ́дничество бы́ти, без̾ негѡ́же никто́же ѿ стра́стныхъ ᲂу҆́зритъ гдⷭ҇а [ѿ д҃ степе́ни]. Довѡ́льна ᲂу҆́бѡ и҆ сїѧ̑ сꙋ́ть, ꙗ҆́коже на́мъ мни́тсѧ, къ ꙗ҆снѣ́йшемꙋ ꙗ҆вле́нїю и҆ похвалѣ̀ неподража́емагѡ ѡ҆́браза треблаже́ннагѡ послꙋша́нїѧ: є҆ще́ же возмо́жемъ и҆скꙋ́сомъ сїѧ̑ ᲂу҆разꙋмѣ́ти и҆ позна́ти, а҆́ще къ свышетекꙋ́щемꙋ воззри́мъ и҆ соразсмо́тримъ. Что̀ ᲂу҆́бѡ сокрꙋше́нїѧ и҆ ме́ртвости бы́сть на́мъ вино́вно, въ нача́лѣхъ не таковы̑мъ бы́вшымъ сотворє́ннымъ; что́ же ѡ҆бновле́нїѧ и҆ безсме́ртїѧ напроти́въ вино́вно; Ѡ҆брѣта́емъ ᲂу҆́бѡ пе́рвагѡ вино́вно, си́рѣчь тлѝ, своевѣ́рїе пе́рвагѡ а҆да́ма, и҆ своечи́нїе, и҆ непокоре́нїе, и҆́миже ѿверже́нїе и҆ престꙋпле́нїе бы́сть бж҃е́ственныѧ за́повѣди: втора́гѡ же, си́рѣчь нетлѣ́нїѧ подаѧ́тельно втора́гѡ а҆да́ма, и҆ бг҃а и҆ сп҃са на́шегѡ і҆и҃са хрⷭ҇та̀ ко ѻ҆ц҃ꙋ̀ є҆динохотѣ́нїе и҆ повинове́нїе, ѿ ни́хже за́повѣди є҆гѡ̀ є҆́сть соблюде́нїе. А҆́зъ бо, глаго́летъ сп҃си́тель, ѡ҆ себѐ не глаго́лахъ: но посла́вый мѧ̀ ѻ҆ц҃ъ, то́й мнѣ̀ за́повѣдь дадѐ, что̀ рекꙋ̀, и҆ что̀ возглаго́лю: и҆ вѣ́мъ, ꙗ҆́кѡ за́повѣдь є҆гѡ̀ живо́тъ вѣ́чный є҆́сть. Ꙗ҆́же ᲂу҆̀бо а҆́зъ глаго́лю, ꙗ҆́коже речѐ мнѣ̀ ѻ҆ц҃ъ, та́кѡ глаго́лю.⁴³¹ Ꙗ҆́коже ᲂу҆́бѡ въ пра́ѻтцѣ, и҆ сꙋ́щихъ по не́мъ, ко́рень всѣ̑мъ печа̑льнымъ и҆ ма́ти є҆́сть возноше́нїе: та́кѡ въ но́вѣмъ бг҃очеловѣ́цѣ і҆и҃сѣ хрⷭ҇тѣ̀, и҆ жела́ющихъ по немꙋ̀ жи́ти, нача́ло и҆ и҆сто́чникъ и҆ ѡ҆снова́нїе всѣ́хъ благи́хъ є҆́сть смире́нїе. Таково̀ стоѧ́нїе и҆ чи́нъ ви́димъ, ꙗ҆́кѡ соблюда́етъ и҆ го́рнѣйшее па́че на́съ сꙋ́щее чиноположе́нїе сщ҃е́нное всѣ́хъ бг҃ови́дныхъ а҆́гг҃лъ, є҆ще́ же и҆ на́ша земна́ѧ це́рковь. А҆ напроти́въ такова́гѡ законоположе́нїѧ ᲂу҆клонѧ́ющымсѧ, и҆ стропти́вѡ, да не глаго́лемъ де́рзостнѣ жи́ти хотѧ́щымъ, ѿ бг҃а и҆ небе́снагѡ свѣ́тлагѡ наслѣ́дїѧ, и҆ собо́рныѧ а҆пⷭ҇льскїѧ це́ркве ѿторга́тисѧ и҆ ѿлꙋча́тисѧ, и҆ во тьмꙋ̀ и҆ ѻ҆́гнь гее́нскїй ѿсыла́тисѧ, тайнонаꙋча́емсѧ и҆ вѣ́рꙋемъ. Є҆́же лꙋка̑вымъ денни́цы ѕлодѣ́лателємъ, и҆ во всѣ̀ времена̀ бы́вшымъ бꙋесло́вцємъ, ѕлосла̑внымъ є҆ретїкѡ́мъ пострада́ти глаго́лемъ, ꙗ҆́коже бг҃опи̑саннаѧ представлѧ́ютъ словеса̀, и҆̀же за самоꙋго́дїе и҆ го́рдость, бж҃е́ственныѧ, ꙗ҆́коже рече́сѧ, сла́вы и҆ наслажде́нїѧ, и҆ сщ҃е́ннагѡ собра́нїѧ ѻ҆каѧ́ннѣ ѿве́ржени бы́ша. Реко́ша же нѣ́цыи ѿ премꙋ́дрыхъ, ꙗ҆́кѡ проти̑вныѧ проти̑внымъ сꙋ́ть цѣльбы̑. Поне́же ᲂу҆́бѡ печа́льныхъ всѣ́хъ є҆́сть вино́вно непокоре́нїе и҆ киче́нїе, ра́достныхъ же повинове́нїе и҆ сокрꙋше́нїе: подоба́етъ вои́стиннꙋ без̾ погрѣше́нїѧ жи́ти жела́ющемꙋ, въ повинове́нїи и҆скꙋ́снагѡ ѻ҆тца̀ и҆ непреле́стнагѡ прежива́ти, вре́мене ко́сностїю и҆ вѣ́дѣнїемъ бж҃е́ственныхъ дѣ́ланїй держа́вꙋ носѧ́щагѡ, и҆ въ житїѝ ᲂу҆кра́шена ли́комъ добродѣ́телей, и҆ повелѣ́нїе сегѡ̀ и҆ совѣ́тъ вмѣнѧ́ти, ꙗ҆́кѡ бж҃їѧ гла́сы и҆ совѣ́тъ: спасе́нїе бо є҆́сть, глаго́летъ, во мно́зѣ совѣ́тѣ. И҆ мꙋ́жъ без̾ совѣ́та са́мъ проти́вꙋ себѐ є҆́сть сꙋпоста́тъ.⁴³² А҆́ще же и҆ без̾ такова́гѡ въ повинове́нїи ѡ҆бꙋче́нїѧ нѣ̑кїимъ ѿ сла́вныхъ ѻ҆тє́цъ слꙋчи́сѧ бг҃отво́рное безмо́лвїе и҆ по бз҃ѣ соверше́нство полꙋчи́ти: но по ѿкрове́нїю бж҃е́ственномꙋ, и҆ рѣ́дцѣ. Пи́сано є҆́сть, ꙗ҆́кѡ рѣ́дкое нѣ́сть зако́нъ це́ркве, ꙗ҆́коже нижѐ є҆ди́на ла́стовица ве́снꙋ твори́тъ. Но ты̀, ꙗ҆́кѡ нѣ́кое предводи́тельное вѣ́дѣнїе вседобро́тнагѡ безмо́лвїѧ и҆́стинное повинове́нїе бы́ти вѣ́рꙋѧ, ѡ҆ста́ви є҆ди́ною смотри́тельнѣ бы̑вшаѧ, и҆ ходѝ по ѻ҆́бще положє́ннымъ преда́нїѧмъ бж҃е́ственными ѻ҆тцы̑: та́кѡ бо и҆ по́честей зако́ннѣ живꙋ́щихъ сподо́бишисѧ. Что́ же, восхо́щетъ ли кто̀ прилꙋчи́вшагѡсѧ пꙋтѝ коснꙋ́тисѧ без̾ наста́вника непреле́стна, не ᲂу҆̀ позна́въ ѻ҆́нагѡ; є҆ще́ же и҆ пꙋчи̑ны морскі̑ѧ без̾ и҆скꙋ́снагѡ ко́рмчагѡ, подо́бнѣ же и҆ каковы̑ѧ-либо хи́трѡсти и҆ хꙋдо́жєства без̾ ᲂу҆чи́телѧ непогрѣ́шна: хи́трости же хи́тростей, и҆ хꙋдо́жества хꙋдо́жествъ, и҆ ко бг҃ꙋ ведꙋ́щїѧ стезѝ и҆ безмѣ́рныѧ мы́сленныѧ пꙋчи́ны, си́рѣчь, и҆́ноческагѡ жи́тельства, є҆́же ᲂу҆подо́бисѧ а҆́гг҃льскомꙋ житїю̀, смѣ́етъ ли кто̀ начина́ти ѡ҆бꙋча́тисѧ, и҆ коне́цъ сегѡ̀ вѣ́рꙋетъ ли себѣ̀ полꙋчи́ти без̾ наста́вника и҆ ко́рмчагѡ, и҆ и҆скꙋ́снагѡ и҆ и҆́стиннагѡ ᲂу҆чи́телѧ; Таковы́й вои́стиннꙋ, како́въ бы ни бы́лъ, ᲂу҆мо́мъ себѐ прельща́етъ, и҆ пре́жде, є҆́же положи́ти нача́ло, прельсти́сѧ, ꙗ҆́кѡ не по зако́нꙋ ѡ҆бꙋча́ѧйсѧ, ꙗ҆́коже и҆ напроти́въ ѻ҆те́чєскимъ повинꙋ́ѧйсѧ положе́нїѧмъ, пре́жде да́же не по́йде, конца̀ дости́же. Ѿкꙋ́дꙋ бо и҆́нꙋдꙋ мо́жемъ ᲂу҆вѣ́дѣти, и҆лѝ на пло́ть, ꙗ҆́коже подоба́етъ, воева́ти, и҆лѝ на стра̑сти и҆ бѣ́сы воѡрꙋжа́тисѧ; добродѣ́телемъ бо, ꙗ҆́коже пи́сано є҆́сть, ѕлѡ́бы приводрꙋжа́ютсѧ, и҆ сꙋ́ть нѣ́какѡ сосѣ́дни. Ѿкꙋ́дꙋ же нака́зывати тѣле́снаѧ чꙋ̑вства, и҆ дꙋшє́вныѧ си̑лы ꙗ҆́кѡ въ гꙋ́слехъ соглаша́ти; па́че же, ка́кѡ мо́щно бꙋ́детъ на́мъ разсꙋди́ти бж҃е́ствєнныѧ гла́сы и҆ ѿкровє́нїѧ, и҆ ᲂу҆тѣшє́нїѧ, и҆ видѣ̑нїѧ бж҃е́ствєннаѧ, є҆ще́ же и҆ лє́сти, и҆ подса́ды, и҆ пре́лєсти, и҆ мечта̑нїѧ бѣсѡ́вскїѧ; И҆ да вкра́тцѣ рече́мъ: ка́кѡ въ соединє́нїѧ бж҃їѧ, и҆ бг҃одѣ̑йныѧ тайносовершє́нїѧ и҆ та̑инства пред̾спѣ́ти сподо́бимсѧ без̾ тайноꙋче́нїѧ тайноꙋчи́телѧ и҆́стиннагѡ и҆ просвѣще́ннагѡ; Не возмо́жно є҆́сть вои́стиннꙋ, невозмо́жно. Внегда̀ и҆ сосꙋ́да и҆збра́ннаго, блаже́ннѣйшаго па́ѵла ᲂу҆ви́димъ, таи́нника неизрече́нныхъ, ᲂу҆ста̀ хрⷭ҇тѡ́вы, свѣ́тъ мі́ра, ѻ҆́бщее со́лнце, всеѧ̀ вселе́нныѧ ᲂу҆чи́телѧ, вкꙋ́пѣ со а҆пⷭ҇лы дви́жима, и҆ соразсмотрѣва́юща благовѣствова́нїе, и҆ почто̀, да не ка́кѡ вотщѐ текꙋ̀, и҆лѝ теко́хъ.⁴³³ Є҆ще́ же и҆ са́мꙋю тꙋ̀ премꙋ́дрость, гдⷭ҇а на́шегѡ і҆и҃са хрⷭ҇та̀, ѡ҆ себѣ̀ вѣща́юща, ꙗ҆́кѡ снидо́хъ съ небесѐ, не да творю̀ во́лю мою̀, но во́лю посла́вшагѡ мѧ̀ ѻ҆ц҃а̀:⁴³⁴ ѡ҆ прест҃ѣ́мъ же и҆ животворѧ́щемъ дс҃ѣ, ꙗ҆́кѡ не ѿ себѐ глаго́лати и҆́мать, но є҆ли̑ка а҆́ще ᲂу҆слы́шитъ, глаго́лати и҆́мать.⁴³⁵ По́льзы ра́ди чи́на, и҆́же соде́ржитъ небє́снаѧ и҆ земна̑ѧ, тре́петомъ и҆ ᲂу҆́жасомъ, и҆ стра́хомъ, содержи́ми є҆смы̀ ѡ҆ на́шей не́мощи и҆ ᲂу҆ны́нїи, и҆ ѡ҆ и҆збира́ющихъ грꙋ́бѡ и҆ прибѣ́дственнѡ ѿ безꙋ́мїѧ и҆ возноше́нїѧ своечи́ннѡ жи́тельствовати и҆ без̾ повинове́нїѧ. Вои́стиннꙋ бо таковы́й по́двигъ стра́шенъ, и҆ неисче́тны та́тїе, и҆ подса̑ды морски́хъ разбѡ́йникъ безчи́сленны, є҆ще́ же и҆ кораблекрꙋшє́нїѧ мѣ́ры не и҆́мꙋтъ: тѣ́мже и҆ ѿ мно́гихъ ѕѣлѡ̀ ма́лѡ є҆́сть спаса́емыхъ. Но сі́и ᲂу҆̀бо, ꙗ҆́коже хотѧ́тъ, и҆ да хо́дѧтъ:⁴³⁶ коегѡ́ждо бо, ꙗ҆́коже пи́сано є҆́сть, дѣ́ло ѻ҆́гнь и҆скꙋ́ситъ: и҆, та́кѡ ты̀ возда́си комꙋ́ждо по дѣлѡ́мъ є҆гѡ̀.⁴³⁷ Па́че же не та́кѡ про́стѣ, ꙗ҆́коже хотѧ́тъ, но ꙗ҆́коже подоба́етъ и҆ хотѣ́ти, и҆ пожи́ти, да да́стъ гдⷭ҇ь всѣ̑мъ ра́зꙋмъ. Ты́ же и҆ всѧ́къ по бз҃ѣ пожи́ти хотѧ́й, ѿ таковы́хъ глагѡ́лъ, ꙗ҆́кѡ ѿ нѣ́коегѡ ри́зъ воскри́лїѧ, ве́сь зла́тъ и҆ дꙋхо́венъ соста́въ разꙋмѣ́въ блаже́ннагѡ послꙋша́нїѧ, потщи́сѧ, ꙗ҆́коже предпоказа́сѧ, ѡ҆брѣстѝ непреле́стна и҆ соверше́нна ᲂу҆чи́телѧ. Соверше́нныхъ же є҆́сть, по сло́вꙋ хрⷭ҇тоно́снагѡ па́ѵла, тве́рдаѧ пи́ща, и҆мꙋ́щихъ чꙋ̑вствїѧ ѡ҆бꙋчє́на до́лгимъ ᲂу҆че́нїемъ въ разсꙋжде́нїе добра́ же и҆ ѕла̀.⁴³⁸ И҆ си́мъ ѡ҆́бразомъ и҆ща̀ притрꙋ́днѣ и҆ съ вѣ́рою, ѿ предлежа́щагѡ намѣ́ренїѧ не погрѣши́ши. Всѧ́къ бо, глаго́летъ бж҃е́ственное писа́нїе, просѧ́й прїе́млетъ, и҆ и҆ща́й ѡ҆брѣта́етъ, и҆ толкꙋ́щемꙋ ѿве́рзетсѧ.⁴³⁹ И҆ то́й тѧ̀ по порѧ́дкꙋ и҆ чи́нꙋ всѣ̑мъ подоба́ющымъ и҆ бг҃олюбє́знымъ тайнонаꙋ́читъ: є҆ще́ же па́че къ бг҃оꙋгѡ́днымъ и҆ дꙋхо́внѣйшымъ, и҆ мнѡ́гимъ недовѣ́дѡмымъ рꙋководи́ти и҆́мать, зрѧ́ тѧ ѿ дꙋшѝ ра́дꙋющасѧ ѡ҆ ᲂу҆мѣ́ренности и҆ простотѣ̀ и҆ хꙋ́дости, во бра́шнѣхъ же и҆ питїи́хъ, и҆ покрыва́лѣхъ и҆ ѡ҆дѣѧ́нїихъ, и҆ дово́льствꙋющасѧ потре́бными и҆ прили́чными и҆ нꙋ́ждными, а҆ не и҆зли́шними и҆ мѧ́гкотными, и҆́миже велича́ютсѧ со ᲂу҆краше́нїемъ и҆ блиста́нїемъ безꙋ́мнѡ живꙋ́щїи, и҆ са́ми на себѐ и҆ на своѐ спасе́нїе ме́чь дви́жꙋтъ. Глаго́летъ бо вели́кїй а҆пⷭ҇лъ па́ѵелъ: И҆мꙋ́ще пи́щꙋ и҆ ѡ҆дѣѧ́нїе, си́ми дово́льни бꙋ́демъ.⁴⁴⁰ Но ты̀ и҆́щеши, и҆ наꙋчи́тсѧ жела́еши, и҆ напи́саннѣ ѿ на́съ ᲂу҆слы́шати прили̑чнаѧ нача́лꙋ же, и҆ средѣ̀, и҆ концꙋ̀ жи́тельства по хрⷭ҇тѣ̀: но а҆́ще и҆ похвале́нъ є҆́сть се́й вопро́съ, но неꙋдо́бенъ є҆́сть внеза́пный ѿвѣ́тъ. Ѻ҆ба́че хрⷭ҇тꙋ̀ десни́цꙋ подаю́щꙋ на твоѐ взыска́нїе, потщи́мсѧ и҆ сїѐ сотвори́ти, ꙗ҆́кѡ на ᲂу҆твержде́ннѣмъ и҆ незы́блемѣмъ ѡ҆снова́нїи назида́юще, на пречестнѣ́мъ, соверше́ннѣмъ послꙋша́нїи до́мъ многословꙋ́тый всѧ́кагѡ дꙋхо́внагѡ зда́нїѧ, бг҃отво́рное глаго́лемъ безмо́лвїе. И҆ глаго́лемъ ᲂу҆́бѡ си́це, на ѻ҆те́ческихъ и҆ дꙋховѣща́нныхъ и҆зрече́нїихъ, ꙗ҆́кѡ на столпѣ́хъ незы́блемыхъ ᲂу҆твержда́ющесѧ.

Глава̀ ѕ҃і.

(Ꙗ҆́кѡ съ правосла́вною вѣ́рою прилѣжа́ти подоба́етъ, бы́ти по́лнꙋ и҆ благи́хъ дѣ́лъ и҆́скреннѣ и҆ по бз҃ѣ безмо́лвствовати хотѧ́щемꙋ: и҆ ꙗ҆́кѡ сꙋгꙋ́ба є҆́сть вѣ́ра: и҆ ꙗ҆́кѡ съ се́ю подоба́етъ па́ки бы́ти безмо́лвствꙋющемꙋ, ми́рнꙋ, немѧте́жнꙋ, непеча́льнꙋ, си́рѣчь, безпопечи́тельнꙋ, молчали́вꙋ, безмо́лвнꙋ, ѡ҆ все́мъ благода́рнꙋ, и҆ познава́тельнꙋ своеѧ̀ не́мощи, и҆ до́блественнѣ терпѣ́ти и҆скꙋшє́нїѧ, и҆ на бг҃а надѣ́ѧтисѧ и҆ ѿ негѡ̀ по́льзы ѡ҆жида́ти.)

а҃. Глаго́летъ спаси́тель: не всѧ́къ глаго́лѧй мѝ, гдⷭ҇и, гдⷭ҇и, вни́детъ въ ца́рствїе небе́сное, но творѧ́й во́лю ѻ҆ц҃а̀ моегѡ̀, и҆́же є҆́сть на нб҃сѣ́хъ.⁴⁴¹ И҆ ты̀ ᲂу҆̀бо возлю́бленне, а҆́ще не є҆ди́ными словесы̑ рачи́тельствꙋеши ѡ҆ бг҃отво́рномъ безмо́лвїи, є҆́же вино́вно быва́етъ, ꙗ҆́кѡ ѿсе́лѣ внꙋ́трь себѐ свѣ́тлѣ прїе́млютъ ꙗ҆влє́нїѧ ца́рствїѧ небе́снагѡ и҆ бо́жїѧ, и҆́стиннѣ сїѐ проходѧ́щїи, въ бꙋ́дꙋщемъ же ѡ҆б̾е́млютъ соверше́ннѣе по всемꙋ̀: но рачи́тельствꙋй и҆́стиною и҆ ве́щїю: прилѣжѝ съ правосла́вною вѣ́рою и҆спо́лненъ бы́ти и҆ благи́хъ дѣ́лъ: та́же со всѣ́ми ми́ренъ бꙋ́ди, є҆ли́кѡ ѿ твоеѧ̀ страны̀ мо́щно, немѧте́женъ, непеча́ленъ, си́рѣчь, но всемꙋ̀ безпопечи́теленъ, молчали́въ, безмо́лвенъ, во все́мъ благода́ренъ и҆ познава́теленъ своеѧ̀ не́мощи, и҆ ѻ҆́ко соверше́ннѣ блюдѝ бо́дренно и҆ тре́звенно проти́въ приключа́ющихсѧ тебѣ̀ на всѧ́къ де́нь разли́чныхъ и҆ многови́дныхъ и҆скꙋше́нїй, борѧ́сѧ терпѣ́нїемъ проти́вꙋ всѧ́кагѡ треволне́нїѧ и҆ ско́рби, ка́кѡ-либо находѧ́щей на тѧ̀. Занѐ ѡ҆ пе́рвѣмъ ᲂу҆́бѡ и҆ второ́мъ, си́рѣчь, съ правосла́вною вѣ́рою ᲂу҆краша́тисѧ и҆ благи́ми дѣ́лы, ꙗ҆́вственный тебѣ̀ ᲂу҆чи́тель є҆́сть сла́вный бг҃обра́тъ, та́кѡ глаго́лѧ: Вѣ́ра без̾ дѣ́лъ мертва̀ є҆́сть, ꙗ҆́коже и҆ дѣла̀ без̾ вѣ́ры. И҆, покажи́ ми вѣ́рꙋ твою̀ ѿ дѣ́лъ твои́хъ.⁴⁴² И҆ пре́жде же сегѡ̀ наста́вникъ всѣ́хъ и҆ ᲂу҆чи́тель, гдⷭ҇ь на́шъ і҆и҃съ хрⷭ҇то́съ, глаго́лѧ ко ᲂу҆ченикѡ́мъ: ше́дше наꙋчи́те всѧ̑ ꙗ҆зы́ки, крестѧ́ще и҆̀хъ во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а: Оу҆ча́ще и҆̀хъ блюстѝ всѧ̑, є҆ли̑ка заповѣ́дахъ ва́мъ.⁴⁴³ И҆ бг҃осло́въ же глаго́летъ: ꙗ҆́кѡ трїе́хъ си́хъ и҆́щетъ бг҃ъ ѿ всѧ́кагѡ человѣ́ка, и҆мꙋ́щагѡ креще́нїе, вѣ́ры пра́выѧ ѿ дꙋшѝ, цѣломꙋ́дрїѧ ѿ тѣ́ла, и҆ и҆́стины ѿ ѧ҆зы́ка.

(Ꙗ҆́кѡ вѣ́ра є҆́сть сꙋгꙋ́ба.)

в҃. Вѣ́дати же подоба́етъ, ꙗ҆́кѡ вѣ́ра, по словесє́мъ бг҃опрє́даннымъ, сꙋгꙋ́ба є҆́сть: є҆ди́на ᲂу҆́бѡ собо́рнаѧ всѣ́хъ правосла́вныхъ хрїстїа́нъ, въ не́йже снача́ла крести́хомсѧ, и҆ съ не́ю наконе́цъ, ѽ да соѿи́демъ! дрꙋга́ѧ же, рѣ́дкихъ и҆ ѻ҆́нѣхъ, и҆̀же и҆сполне́нїемъ всѣ́хъ бг҃отво́рныхъ за́повѣдей, во є҆́же по ѡ҆́бразꙋ и҆ по подо́бїю па́ки восте́кшихъ, и҆ та́кѡ ѡ҆богатѣ́вшихъ бж҃е́ственнымъ бл҃года́ти свѣ́томъ, ᲂу҆тверди́ти всю̀ свою̀ наде́ждꙋ ко гдⷭ҇ꙋ, и҆ толи́кѡ, ѽ досто́инства! ꙗ҆́кѡ ника́коже, по гдⷭ҇ню словесѝ, ᲂу҆сомнѣва́тисѧ си̑мъ во вре́мѧ моли́твы, въ проше́нїѧхъ ꙗ҆̀же къ бг҃ꙋ, но съ вѣ́рою и҆ска́ти, и҆ та́кѡ ᲂу҆до́бь прїима́ти полє́знаѧ: по чесомꙋ̀ и҆ и҆звѣ́стнꙋ вѣ́рꙋ ѿ дѣ́лъ и҆́стинныхъ блаже́ннїи сі́и прїѡбрѣта́ютъ, ꙗ҆́кѡ всѧ́къ ра́зꙋмъ, и҆ разсꙋжде́нїе, и҆ сꙋмнѣ́нїе, и҆ попече́нїе ѿ себѐ ѿве́ргшїи, и҆ всѝ соверше́ннѣ бж҃е́ственнымъ ᲂу҆пое́нїемъ къ бг҃ꙋ вѣ́ры, и҆ наде́жды, и҆ любвѐ и҆спо́лнившесѧ, є҆ще́ же и҆змѣни́вшїисѧ лꙋ́чшимъ и҆ блаже́ннымъ десни́цы вы́шнѧгѡ, по бж҃е́ственномꙋ даві́дꙋ, и҆змѣне́нїемъ. Но простра́ннѣ глаго́лати ѡ҆ пе́рвѣй вѣ́рѣ, нѣ́сть настоѧ́щагѡ вре́мене: а҆ ѡ҆ второ́й, ꙗ҆́же, ꙗ҆́кѡ нѣ́кїй бж҃е́ственный пло́дъ, ѿ пе́рвыѧ процвѣта́етъ и҆ ѿражда́етсѧ, ѕѣлѡ̀ благовре́менно. Вѣ́ра бо сїѧ̀, ꙗ҆́кѡ нѣ́кїй ко́рень и҆ глава̀ є҆́сть и҆мени́тагѡ бг҃отво́рнагѡ безмо́лвїѧ. А҆́ще бо не бꙋ́деши и҆мѣ́ти вѣ́ры, глаго́летъ лѣ́ствичникъ, ка́кѡ и҆́маши безмо́лвствовати [ѿ к҃з степе́ни]; Глаго́летъ ᲂу҆́бѡ бж҃е́ственный даві́дъ: Вѣ́ровахъ, тѣ́мже возглаго́лахъ.⁴⁴⁴ И҆ вели́кїй а҆по́столъ па́ѵелъ: є҆́сть вѣ́ра ᲂу҆пова́емыхъ и҆звѣще́нїе, веще́й ѡ҆бличе́нїе неви́димыхъ:⁴⁴⁵ и҆, пра́ведный ѿ вѣ́ры жи́въ бꙋ́детъ, и҆ прѡ́чаѧ.⁴⁴⁶ И҆ спаси́тель же къ вопроси́вшымъ є҆го̀ ᲂу҆ченикѡ́мъ, приложи́ти и҆̀мъ вѣ́рꙋ, та́кѡ глаго́летъ: а҆́ще бы́сте и҆мѣ́ли вѣ́рꙋ ꙗ҆́кѡ зе́рно горꙋ́шно, глаго́лали бы́сте ᲂу҆̀бо ꙗ҆́годичинѣ се́й: восто́ргнисѧ и҆ всади́сѧ въ мо́ре, и҆ послꙋ́шала бы ва́съ.⁴⁴⁷ И҆, а҆́ще и҆́мате вѣ́рꙋ, и҆ не ᲂу҆сꙋмните́сѧ, не то́кмѡ смоко́вничное сотворитѐ, но а҆́ще и҆ горѣ̀ се́й рече́те: дви́гнисѧ и҆ ве́рзисѧ въ мо́ре, бꙋ́детъ. И҆ всѧ̑, є҆ли̑ка а҆́ще воспро́сите въ моли́твѣ вѣ́рꙋюще, прїи́мете.⁴⁴⁸ Пи́шетъ же и҆ ст҃ы́й і҆саа́къ: вѣ́ра тонча́йша є҆́сть ра́зꙋма, ꙗ҆́коже ра́зꙋмъ веще́й чꙋ́вственныхъ [Сло́во к҃и]. Вси́ бо ст҃і́и жи́тельство сїѐ ѡ҆брѣстѝ сподо́бишасѧ, є҆́же є҆́сть ᲂу҆́жасъ ко бг҃ꙋ, си́лою вѣ́ры пребыва́ютъ въ наслажде́нїи жи́тельства ѻ҆́нагѡ, є҆́же па́че є҆стества̀. Вѣ́рꙋ же глаго́лемъ не ѻ҆́нꙋ, є҆́юже вѣ́рꙋетъ кто̀ въ разли́чїе покланѧ́емыхъ ѵ҆поста́сей и҆ бж҃е́ственныхъ, и҆ во и҆зѧ́щное и҆ сво́йственное є҆стество̀ самагѡ̀ бж҃ества̀, и҆ въ смотре́нїе ди́вное, є҆́же въ человѣ́чествѣ, въ воспрїѧ́тїе є҆стества̀ на́шегѡ, а҆́ще и҆ сїѧ̀ высока̀ є҆́сть ѕѣлѡ̀: но вѣ́рꙋ ѿ свѣ́та благода́ти возсїѧва́ющꙋю въ дꙋшѝ, свидѣ́тельствомъ ᲂу҆ма̀ ᲂу҆твержда́ющꙋ се́рдце несꙋмнѣ́нно бы́ти во и҆звѣще́нїи ᲂу҆пова́нїѧ, ѿстоѧ́щемъ ѿ всѧ́кагѡ мнѣ́нїѧ, и҆ не приложе́нїи слꙋ́ха ᲂу҆ше́съ себѐ показꙋ́етъ, но въ дꙋхо́вныхъ ѻ҆чесѣ́хъ сокровє́ннаѧ въ дꙋшѝ та̑инства, и҆ та́йное и҆ бж҃е́ственное бога́тство, сокрове́нное ѿ ѻ҆че́съ сынѡ́въ пло́ти, и҆ ѿкрыва́емое дх҃омъ, пита́ющимсѧ на трапе́зѣ хрⷭ҇то́вѣ въ при́сномъ поꙋче́нїи зако́нѡвъ є҆гѡ̀, ꙗ҆́коже речѐ: а҆́ще соблюде́те за́пѡвѣди моѧ̑, послю̀ ва́мъ ᲂу҆тѣ́шителѧ, дх҃а и҆́стины, є҆гѡ́же мі́ръ не мо́жетъ прїѧ́ти, и҆ ѻ҆́нъ наꙋчи́тъ ва́съ всѧ́кой и҆́стинѣ, и҆ прѡ́чаѧ.⁴⁴⁹ И҆ па́ки: до́ндеже прїи́детъ то́й, и҆́же є҆́сть соверше́нїе та̑инъ, и҆ сподо́бимсѧ ꙗ҆вле́ннѣ ѿкрове́нїѧ ѻ҆́ныхъ. Вѣ́ра сїѧ̀ соверша́етъ посредѣ̀ бг҃а и҆ ст҃ы́хъ неизречє́нна та̑инства, и҆́хже да сподо́бимсѧ благода́тїю самагѡ̀ хрⷭ҇та̀ здѣ̀, ꙗ҆́кѡ во ѡ҆брꙋче́нїи, та́мѡ же въ сꙋществѣ̀ и҆́стины: въ ца́рствїи небе́снѣмъ съ лю́бѧщими є҆го̀.

(Ꙗ҆́кѡ подоба́етъ ми́рнꙋ тебѣ̀ бы́ти.)

г҃. Ѡ҆ тре́тїемъ же, си́рѣчь, є҆́же ми́рнꙋ бы́ти тебѣ̀ со всѣ́ми, ꙗ҆́вственный тѝ є҆́сть совѣ́тъ, и҆зрече́нїе бл҃же́ннагѡ дв҃да, є҆ще́ же и҆ хрⷭ҇тоно́снагѡ па́ѵла: велегла́снѣе трꙋбы̀ вопїю́щее. Ѻ҆́нагѡ ᲂу҆́бѡ: Ми́ръ мно́гъ лю́бѧщымъ зако́нъ тво́й, и҆ нѣ́сть и҆̀мъ собла́зна.⁴⁵⁰ И҆, съ ненави́дѧщими ми́ра бѣ́хъ ми́ренъ.⁴⁵¹ И҆, взыщѝ ми́ра, и҆ поженѝ и҆̀.⁴⁵² Сегѡ́ же: ми́ръ и҆мѣ́йте и҆ ст҃ы́ню со всѣ́ми, и҆̀хже кромѣ̀ никто́же ᲂу҆́зритъ гдⷭ҇а.⁴⁵³ И҆ а҆́ще возмо́жно, є҆́же ѿ ва́съ, со всѣ́ми ми́ръ и҆мѣ́йте.⁴⁵⁴

(Ꙗ҆́кѡ подоба́етъ немѧте́жнꙋ бы́ти тебѣ̀.)

д҃. Ѡ҆ четве́ртомъ же, си́рѣчь, є҆́же немѧте́жнꙋ тебѣ̀ бы́ти, преподо́бный і҆саа́къ пока́жетъ тѝ, глаго́лѧ: Ꙗ҆́кѡ а҆́ще жела́нїе, порожде́нїе чꙋ́вствъ є҆́сть: да ᲂу҆молча́тъ ᲂу҆̀бо, съ попече́нїемъ храни́ти ми́ръ ᲂу҆ма̀ и҆сповѣ́дающїи, и҆ съ мѧте́жствꙋющими да не и҆́маши ѡ҆браще́нїѧ.

(Ꙗ҆́кѡ непеча́льнꙋ и҆ безпопечи́тельнꙋ подоба́етъ бы́ти тебѣ̀. )

є҃. Ѡ҆ пѧ́томъ же, си́рѣчь, є҆́же непеча́льнꙋ и҆ безпопечи́тельнꙋ ѿ благосло́вныхъ и҆ неблагосло́вныхъ веще́й бы́ти тебѣ̀, ᲂу҆чи́лище тѝ є҆́сть, є҆́же во є҆ѵⷢ҇лїихъ глаго́летъ гдⷭ҇ь: сегѡ̀ ра́ди глаго́лю ва́мъ: не пецы́тесѧ дꙋше́ю ва́шею, что̀ ꙗ҆́сте, нижѐ тѣ́ломъ ва́шимъ, во что̀ ѡ҆блече́тесѧ: не дꙋша́ ли бо́льше є҆́сть пи́щи, и҆ тѣ́ло ѻ҆де́жди;⁴⁵⁵ Воззри́те на пти̑цы небє́сныѧ, ꙗ҆́кѡ не сѣ́ютъ, ни жнꙋ́тъ, ни собира́ютъ въ жи̑тницы, и҆ ѻ҆ц҃ъ ва́шъ небе́сный пита́етъ и҆̀хъ: не вы́ ли па́че лꙋ́чше и҆́хъ є҆стѐ [ст. к҃з]; Кто́ же ѿ ва́съ пекі́йсѧ мо́жетъ приложи́ти во́зрастꙋ своемꙋ̀ ла́коть є҆ди́нъ; и҆ ѡ҆ ѻ҆де́жди что̀ пече́тесѧ [ст. к҃и]; и҆ по ма́лѣхъ: Не пецы́тесѧ ᲂу҆̀бо, глаго́люще: что̀ ꙗ҆́мы, и҆лѝ что̀ пїе́мъ, и҆лѝ чи́мъ ѡ҆де́ждемсѧ [ст. л҃а]; Всѣ́хъ бо си́хъ ꙗ҆зы́цы и҆́щꙋтъ: вѣ́сть бо ѻ҆ц҃ъ ва́шъ небе́сный, ꙗ҆́кѡ тре́бꙋете си́хъ всѣ́хъ [ст. л҃в]. И҆щи́те же пре́жде ца́рствїѧ бж҃їѧ и҆ пра́вды є҆гѡ̀, и҆ сїѧ̑ всѧ̑ приложа́тсѧ ва́мъ [ст. л҃г]. Не пецы́тесѧ ᲂу҆̀бо на ᲂу҆́трей, ᲂу҆́тренїй бо ѡ҆ свои́хъ сѝ пече́тсѧ: довлѣ́етъ дне́ви ѕло́ба є҆гѡ̀ [ст. л҃д]. Глаго́летъ же и҆ ст҃ы́й і҆саа́къ: кромѣ̀ безпопече́нїѧ свѣ́та въ дꙋшѝ твое́й да не взы́щеши, нижѐ тишины̀ и҆ безмо́лвїѧ во ѡ҆слабле́нїи чꙋ́вствъ твои́хъ [ѿ ѯ҃ѳ сло́ва]. И҆ лѣ́ствичникъ: Є҆ди́нъ вла́съ смꙋща́етъ ѻ҆́ко, и҆ ма́ло попече́нїе и҆стреблѧ́етъ безмо́лвїе: безмо́лвїе бо є҆́сть ѿложе́нїе разꙋмѣ́нїй, и҆ ѿверже́нїе ѿ благосло́вныхъ попече́нїй [ѿ к҃з степе́ни]. И҆́же вои́стиннꙋ безмо́лвїѧ дости́же, нижѐ ѡ҆ свое́й попече́тсѧ пло́ти: нело́женъ бо є҆́сть ѡ҆бѣща́вый.

(Ꙗ҆́кѡ молчали́вꙋ подоба́етъ бы́ти тебѣ̀. )

ѕ҃. Є҆щѐ ѡ҆ шесто́мъ, си́рѣчь є҆́же молча́ти, порѧ́докъ сло́ва сегѡ̀ на́съ рещѝ понꙋжда́етъ. Глаго́летъ ᲂу҆́бѡ и҆ ѡ҆ се́мъ ст҃ы́й і҆саа́къ: возбранѧ́ѧй ᲂу҆ста̀ своѧ̑ ѿ клеветы̀, храни́тъ се́рдце своѐ ѿ страсте́й, и҆ на всѧ́къ ча́съ зри́тъ гдⷭ҇а [ѿ нача́ла и҃ сло́ва]. И҆, є҆гда̀ всѧ̑ дѣла̀ жи́тельства сегѡ̀ на є҆ди́нꙋ странꙋ̀ положи́ши, и҆ молча́нїе на дрꙋгꙋ́ю, на мѣ́рилѣ ѡ҆брѧ́щеши ѻ҆́ное превосходѧ́щее [ѿ м҃а сло́ва]. И҆, па́че всѣ́хъ молча́нїе возлюбѝ, ꙗ҆́кѡ къ плодꙋ̀ приближа́етъ тѧ̀: ѧ҆зы́къ бо и҆знемога́етъ ко сказа́нїю є҆гѡ̀. Пе́рвѣе ᲂу҆́бѡ понꙋ́дишъ себѐ молча́ти, и҆ тогда̀ ѿ молча́нїѧ ражда́етсѧ въ на́съ нѣ́что наставлѧ́ющее на́съ въ са́мо то̀ молча́нїе. Да да́стъ тѝ бг҃ъ ѡ҆щꙋти́ти ѿ молча́нїѧ нѣ́что ражда́емо. А҆́ще ли же си́мъ жи́тельствовати начне́ши, не вѣ́мъ а҆́зъ, коли́къ свѣ́тъ возсїѧ́етъ тѝ ѿсю́дꙋ. И҆ па́ки: молча́нїе та́инство є҆́сть бꙋ́дꙋщагѡ вѣ́ка, словеса́ же ѻ҆рꙋ́дїе сꙋ́ть мі́ра сегѡ̀ [ѿ м҃в сло́ва]. И҆ ст҃о́мꙋ же а҆рсе́нїю бж҃е́ственный гла́съ, второ́е ᲂу҆зако́нилъ є҆́сть си́це: а҆рсе́нїе бѣжѝ, молчѝ, безмо́лвствꙋй, и҆ спасе́шисѧ.⁴⁵⁶

(Ꙗ҆́кѡ безмо́лвнꙋ бы́ти подоба́етъ тебѣ̀. )

з҃. Та́кожде и҆ ѡ҆ седьмо́мъ, си́рѣчь є҆́же безмо́лвнѣ пожи́ти тебѣ̀, достовѣ́рни сꙋ́ть къ представле́нїю, вели́кїй васі́лїй и҆ ст҃ы́й па́ки і҆саа́къ. То́й ᲂу҆́бѡ ре́къ: безмо́лвїе нача́ло є҆́сть ѡ҆чище́нїѧ дꙋшѣ̀: дрꙋгі́й же, предѣ́лъ безмо́лвїѧ є҆́сть молча́нїе ѿ всѣ́хъ [ѿ д҃і сло́ва]. То́й, сегѡ̀ нача́ло: се́й же, коне́цъ си́ми словесы̑ вкра́тцѣ назна́менавше. И҆ въ ве́тсѣмъ же писа́нїи та́кѡ рече́сѧ: согрѣши́лъ є҆сѝ, ᲂу҆мо́лкни.⁴⁵⁷ И҆, ᲂу҆праздни́тесѧ и҆ разꙋмѣ́йте, ꙗ҆́кѡ а҆́зъ є҆́смь бг҃ъ.⁴⁵⁸ Глаго́летъ же и҆ лѣ́ствичникъ: дѣ́ло безмо́лвїѧ предвари́тельное є҆́сть безпопече́нїе ѡ҆ всѣ́хъ веще́хъ благосло́вныхъ и҆лѝ неблагосло́вныхъ [ѿ к҃з степе́ни]. И҆́же бо пє́рвымъ вхо́дъ ѿверза́етъ, во втора̑ѧ всѧ́кѡ впаде́тъ: моли́тва безлѣ́ностна: и҆ тре́тїе, дѣ́ланїе се́рдца не ѡ҆крада́емо, не возмо́жно є҆́сть пи́сьменъ ненаꙋчи́вшемꙋсѧ, є҆сте́ственнѣ въ кни́гахъ поꙋча́тисѧ: невозмо́жнѣе же не стѧжа́вшымъ пе́рвагѡ, ѻ҆боѧ̑ сїѧ̑ по ра́зꙋмꙋ пройтѝ. И҆ па́ки ст҃ы́й і҆саа́къ: вожделѣ́нїе безмо́лвїѧ є҆́сть ча́ѧнїе всегда́шнее сме́рти [ѿ м҃а сло́ва]. И҆́же без̾ сегѡ̀ поꙋче́нїѧ въ безмо́лвїе вхо́дитъ, не мо́жетъ понестѝ, ꙗ҆̀же до́лжни є҆смы̀ терпѣ́ти и҆ сноси́ти всѧ́цѣмъ ѡ҆́бразомъ.

(Ꙗ҆́кѡ ѡ҆ все́мъ благодари́ти подоба́етъ. )

и҃. Подо́бнѣ и҆ ѡ҆ ѻ҆сьмо́мъ, си́рѣчь ѡ҆ все́мъ благодари́ти тебѣ̀, да бꙋ́детъ дово́ленъ ᲂу҆чи́тель бж҃е́ственный а҆пⷭ҇лъ па́ѵелъ, повелѣва́ющъ: ѡ҆ все́мъ благодари́те.⁴⁵⁹ И҆ преподо́бный і҆саа́къ: Благодаре́нїе прїе́млющагѡ, поѡщрѧ́етъ даю́щагѡ да́ти бѡ́льшаѧ дарова̑нїѧ пе́рвѣйшихъ [ѿ нача́ла в҃ сло́ва]. Неблагодарѧ́й ѡ҆ ме́ньшихъ, и҆ ѡ҆ бо́льшихъ лже́цъ є҆́сть и҆ непра́веденъ: пꙋтево́дитъ же дарова̑нїѧ бж҃їѧ къ человѣ́кꙋ, се́рдце дви́жимое къ непреста́ннꙋ благодаре́нїю. И҆ и҆скꙋше́нїе дꙋшѝ наво́дитъ мы́сль ропта́нїѧ, при́снѡ въ се́рдцѣ дви́жимаѧ: и҆ ᲂу҆ста̀ вы́нꙋ бл҃годарѧ̑щаѧ бл҃гословє́на ѿ бг҃а бꙋ́дꙋтъ. И҆ се́рдце, во благодаре́нїи пребыва́ющее, благода́ть прїи́метъ.

(Ꙗ҆́кѡ подоба́етъ вѣ́дати свою̀ не́мощь.)

ѳ҃. Ко́ль же вели́кꙋю ѡ҆брѣта́етъ по́льзꙋ дости́гшїй къ позна́нїю своеѧ̀ не́мощи, є҆́же и҆ девѧ́тое є҆́сть число́мъ. Внѧ́вши шесто́мꙋ ѱалмꙋ̀ бж҃е́ственнагѡ дв҃да, ᲂу҆разꙋмѣ́еши, въ ни́хже глаго́летъ: Поми́лꙋй мѧ̀, гдⷭ҇и, ꙗ҆́кѡ не́мощенъ є҆́смь.⁴⁶⁰ И҆ и҆́ндѣ: а҆́зъ є҆́смь че́рвь, а҆ не человѣ́къ, поноше́нїе человѣ́кѡвъ и҆ ᲂу҆ничиже́нїе люде́й.⁴⁶¹ И҆ ст҃ы́й і҆саа́къ: блаже́нъ человѣ́къ познава́ѧй свою̀ не́мощь: зане́же сїѐ позна́нїе быва́етъ є҆мꙋ̀ ѡ҆снова́нїе и҆ ко́рень, и҆ нача́ло всѧ́кїѧ благосты́ни. Є҆гда́ бо ᲂу҆разꙋмѣ́етъ кто̀, и҆ вои́стиннꙋ ѡ҆щꙋти́тъ свою̀ не́мощь: тогда̀ востѧ́гиваетъ дꙋ́шꙋ свою̀ ѿ сла́бости помрача́ющїѧ позна́нїе ѻ҆́но, и҆ сокро́виществꙋетъ себѣ̀ ѡ҆хране́нїе. И҆, человѣ́къ дости́гшїй къ позна́нїю мѣ́ры не́мощи своеѧ̀, дости́же соверше́нства смире́нїѧ.

(Ꙗ҆́кѡ до́блественнѣ подоба́етъ терпѣ́ти и҆скꙋшє́нїѧ. )

і҃. Ѡ҆стальна́ѧ же сло́ва сегѡ̀ глава̀, ꙗ҆́же соисполнѧ́етъ и҆ сложе́нное на́ми десѧ́тое число̀, є҆́сть, є҆́же до́блественнѣ терпѣ́ти и҆ сопроти́въ стоѧ́ти съ терпѣ́нїемъ и҆ благодꙋ́шїемъ ко и҆мꙋ́щымъ тебѣ̀ приключа́тисѧ разли̑чнымъ и҆ многови̑днымъ и҆скꙋше́нїѧмъ. Слы́ши ᲂу҆́бѡ, какѡва̀ и҆ ѡ҆ се́мъ въ сщ҃е́ннѣмъ писа́нїи напи̑сана сꙋ́ть. И҆́бо хрⷭ҇тоно́сный па́ѵелъ глаго́летъ: Бра́тїе! нѣ́сть на́ша бра́нь къ кро́ви и҆ пло́ти, но къ нача́лѡмъ, и҆ ко властє́мъ, и҆ къ мїродержи́телємъ тьмы̀ вѣ́ка сегѡ̀, къ дꙋховѡ́мъ ѕло́бы поднебє́снымъ.⁴⁶² И҆, а҆́ще без̾ наказа́нїѧ є҆стѐ, є҆мꙋ́же прича̑стницы бы́ша всѝ, ᲂу҆̀бо прелюбодѣ́йчищи є҆стѐ, а҆ не сы́нове.⁴⁶³ И҆, є҆го́же гдⷭ҇ь лю́битъ, наказꙋ́етъ: бїе́тъ же всѧ́каго сы́на, є҆го́же прїе́млетъ [ст. ѕ҃]. И҆, бг҃обра́тъ: Мꙋ́жъ неискꙋше́нъ, неискꙋ́сенъ.⁴⁶⁴ И҆ ст҃ы́й и҆лїа̀ є҆́кдїкъ: досто́итъ всѧ́комꙋ хрїстїа́нинꙋ правовѣ́рꙋющемꙋ въ бг҃а, не бы́ти без̾ попече́нїѧ, но всегда̀ ча́ѧти и҆ ѡ҆жида́ти и҆скꙋше́нїѧ, да є҆гда̀ прїи́детъ не ᲂу҆жаса́етсѧ, нижѐ смꙋща́етсѧ, но благода́рнѣ терпѣ́ти трꙋ́дъ ско́рби, и҆ разꙋмѣ́ти, что̀ поѧ̀ съ проро́комъ глаго́летъ: и҆скꙋси́ мѧ, гдⷭ҇и, и҆ и҆спыта́й мѧ̀.⁴⁶⁵ И҆ не речѐ, ꙗ҆́кѡ наказа́нїе твоѐ низврати́ мѧ, но и҆спра́ви мѧ̀ въ коне́цъ. Нижѐ ᲂу҆́бѡ и҆щѝ ви́нъ и҆скꙋше́нїй, ѿкꙋ́дꙋ нахо́дѧтъ, но то́чїю моли́сѧ бг҃ови благода́рнѣ сноси́ти ѧ҆̀, ꙗ҆́коже глаго́летъ ст҃ы́й ма́рко: ꙗ҆́кѡ и҆скꙋше́нїю наше́дшꙋ, не и҆щѝ чесѡ̀ ра́ди, и҆лѝ чрез̾ кого̀ прїи́де: но ꙗ҆́кѡ да благода́рнѣ є҆̀ и҆ непамѧтоѕло́бнѣ терпи́ши. И҆ па́ки: а҆́ще нѣ́сть ᲂу҆до́бно ѡ҆брѣстѝ благоꙋгоди́вшаго без̾ и҆скꙋше́нїй, ѡ҆ всѧ́комъ слꙋ́чаи благодари́ти подоба́етъ бг҃ови. И҆ всѧ́каѧ ско́рбь ѡ҆блича́етъ прекло́нность во́ли: на де́сно ли преклонѧ́етсѧ, и҆лѝ на лѣ́во. Сегѡ̀ ра́ди приключа́ющаѧсѧ ско́рбь, и҆скꙋше́нїе и҆менꙋ́етсѧ, подаю́щи прича́стникꙋ и҆скꙋ́съ сокрове́нныхъ жела́нїй. И҆ ст҃ы́й же і҆саа́къ, со мно́гими и҆ны́ми словесы̑, и҆ сїѧ̑ глаго́летъ: Всѧ́комꙋ человѣ́кꙋ на по́льзꙋ є҆́сть и҆скꙋше́нїе: а҆́ще бо па́ѵла по́льзꙋетъ. то̀ всѧ̑каѧ ᲂу҆ста̀ заградѧ́тсѧ, и҆ пови́ненъ да бꙋ́детъ ве́сь мі́ръ бг҃ови [ѿ л҃з сло́ва]. Подви̑жницы и҆скꙋша́ютсѧ, да приложа́тъ бога́тствꙋ своемꙋ̀: сла́бїи да ѿ вредѧ́щихъ сохранѧ́тъ себѐ, и҆ спѧ́щїи да ᲂу҆гото́вѧтсѧ на возбꙋжде́нїе: и҆ дале́че сꙋ́щїи, ко бг҃ꙋ бли́жатсѧ: свои́ же, да со дерзнове́нїемъ вселѧ́тсѧ. Всѧ́къ сы́нъ неѡбꙋче́ный не прїе́млетъ бога́тства до́мꙋ ѻ҆тца̀ своегѡ̀, во є҆́же по́мощь и҆мѣ́ти ѿ негѡ̀. И҆ сегѡ̀ ᲂу҆́бѡ ра́ди пе́рвѣе и҆скꙋша́етъ бг҃ъ и҆ томи́тъ, та́же показꙋ́етъ дарова́нїе. Сла́ва влⷣцѣ, го́рькими врачевства́ми наслажде́нїе здра́вїѧ на́мъ приносѧ́щемꙋ. Нѣ́сть, и҆́же во вре́мѧ ѡ҆бꙋче́нїѧ не скорби́тъ, и҆ нѣ́сть кто́либо, є҆мꙋ́же него́рько вре́мѧ то̀ ꙗ҆влѧ́етсѧ, въ не́же ꙗ҆́домъ наплѧ́емь быва́етъ и҆скꙋше́нїй. Без̾ си́хъ бо нѣ́сть возмо́жно растворе́нїе прїѡбрѣстѝ крѣ́пкѡ: но и҆ є҆́же претерпѣ́ти, не на́ше є҆́сть. Ѿкꙋ́дꙋ бо мо́жетъ скꙋдѣ́ль, и҆́же ѿ бре́нїѧ, претерпѣ́ти тече́нїе воды̀, а҆́ще не бы̀ ѻ҆́гнь бж҃ескїй ᲂу҆тверди́лъ є҆го̀. А҆́ще повине́мсѧ просѧ́ще въ смире́нїи со жела́нїемъ непреста́ннымъ въ терпѣ́нїи, всѧ̑ прїе́млемъ ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ. Рече́сѧ же и҆ въ премꙋ́дрости сїра́ховой: ча́до! а҆́ще пристꙋпа́еши рабо́тати гдⷭ҇ꙋ бг҃ꙋ твоемꙋ̀, ᲂу҆гото́ви се́рдце твоѐ во и҆скꙋше́нїе, и҆ потерпѝ, и҆ не ско́ръ бꙋ́ди во вре́мѧ наведе́нїѧ.⁴⁶⁶

(Ꙗ҆́кѡ подоба́етъ на бг҃а надѣ́ѧтисѧ, и҆ ѿ негѡ̀ по́льзы ѡ҆жида́ти. )

Ко́твꙋ наде́жды на бг҃а спастѝ могꙋ́щаго ᲂу҆твержда́ѧй, ѿ негѡ̀ и҆ и҆збы́тїѧ и҆скꙋше́нїи поле́знѣ да ѡ҆жида́етъ. Бл҃гослове́нъ бо, глаго́летъ, бг҃ъ, и҆́же не ѡ҆ста́витъ на́съ и҆скꙋси́тисѧ па́че, є҆́же мо́жемъ, но со и҆скꙋше́нїмъ сотвори́тъ и҆збы́тїе.⁴⁶⁷ И҆, ꙗ҆́кѡ ско́рбь терпѣ́нїе содѣ́ловаетъ, терпѣ́нїе же и҆скꙋ́сство, и҆скꙋ́сство же ᲂу҆пова́нїе, ᲂу҆пова́нїе же не посрами́тъ.⁴⁶⁸ И҆, претерпѣ́вый до конца̀, то́й спасе́тсѧ.⁴⁶⁹ И҆, въ терпѣ́нїи ва́шемъ стѧжи́те дꙋ́шы ва́шѧ.⁴⁷⁰ И҆ бг҃обра́тъ же та́кѡ глаго́летъ: всѧ́кꙋ ра́дость и҆мѣ́йте, бра́тїе моѧ̑, є҆гда̀ во и҆скꙋшє́нїѧ впа́даете разли̑чна, вѣ́дѧще. ꙗ҆́кѡ и҆скꙋше́нїе ва́шеѧ вѣ́ры содѣ́ловаетъ терпѣ́нїе: терпѣ́нїе же дѣ́ло соверше́нно да и҆́мать, ꙗ҆́кѡ да бꙋ́дете соверше́нни и҆ всецѣ́ли, ни въ че́мъ же лише́ни. И҆, блаже́нъ мꙋ́жъ, и҆́же прете́рпитъ и҆скꙋше́нїе, занѐ и҆скꙋ́сенъ бы́въ, прїи́метъ вѣне́цъ жи́зни, є҆го́же ѡ҆бѣща̀ бг҃ъ лю́бѧщымъ є҆го̀.⁴⁷¹ И҆ недостѡ́йны стра̑сти ны́нѣшнѧгѡ вре́мене къ хотѧ́щей сла́вѣ ꙗ҆ви́тисѧ въ на́съ.⁴⁷² И҆, терпѧ̀ потерпѣ́хъ гдⷭ҇а, и҆ внѧ́тъ мѝ, и҆ ᲂу҆слы́ша моли́твꙋ мою̀. И҆, возведе́ мѧ ѿ ро́ва страсте́й, и҆ ѿ бре́нїѧ ти́ны, и҆ поста́ви на ка́мени но́зѣ моѝ, и҆ и҆спра́ви стѡпы̀ моѧ̑: и҆ вложѝ во ᲂу҆ста̀ моѧ̑ пѣ́снь но́вꙋ, пѣ́нїе бг҃ꙋ на́шемꙋ.⁴⁷³ Пи́шетъ же и҆ блаже́нный сѷмеѡ́нъ метафра́стъ: дꙋша̀ ꙗ҆́та бы́вши ᲂу҆́зами раче́нїѧ къ бг҃ꙋ, ни вочто́ же вмѣнѧ́етъ, є҆́же страда́ти, но болѣ́зньми наслажда́етсѧ, и҆ въ ѕлострада́нїи цвѣте́тъ. И҆ є҆гда̀ ничто́же ѿ печа́льныхъ рачи́магѡ ра́ди стра́ждетъ, тогда̀ па́че мни́тъ страда́ти, и҆ ѿбѣга́етъ ѿра́ды, ꙗ҆́кѡ мꙋ́ки.

Глава̀ з҃і.

(Ѡ҆ стра́сѣ бж҃їи, ꙗ҆́кѡ ѻ҆́ный сꙋгꙋ́бъ є҆́сть: є҆ди́нъ новонача́льныхъ, дрꙋгі́й же соверше́нныхъ.)

Не подоба́етъ же лѣни́тисѧ ны́нѣ воспомѧнꙋ́ти и҆ ѡ҆ сꙋгꙋ́бомъ по бз҃ѣ стра́сѣ, а҆́ще нѣ́какѡ и҆зволе́нїѧ ра́ди на́шегѡ по концѣ̀ ѡ҆зна́ченныѧ на́ми десѧ́тницы рече́нныхъ гла́въ, помѧнꙋ́ти ѡ҆ соверше́ннѣмъ стра́сѣ, чи́нъ пе́рвагѡ стра́ха и҆ прерва́хомъ: по вѣ́рѣ бо стра́хъ се́й бж҃е́ственнїи ѻ҆тцы̀ ᲂу҆чини́ша.

(Ѡ҆ пе́рвомъ и҆лѝ новонача́льныхъ стра́сѣ.)

Вѣ́ждь ᲂу҆̀бо, возлю́бленнѣйше, ꙗ҆́кѡ стра́хъ по бз҃ѣ сꙋгꙋ́бъ є҆́сть: є҆ди́нъ новонача́льныхъ, дрꙋгі́й же соверше́нныхъ. И҆ ѡ҆ пе́рвѣмъ ᲂу҆́бѡ та́кѡ пи́сано є҆́сть: нача́ло премꙋ́дрости стра́хъ гдⷭ҇нь.⁴⁷⁴ И҆, прїиди́те ча̑да, послꙋ́шайте менѐ, стра́хꙋ гдⷭ҇ню наꙋчꙋ̀ ва́съ.⁴⁷⁵ И҆, ꙗ҆́кѡ стра́хомъ гдⷭ҇нимъ ᲂу҆клонѧ́етсѧ всѧ́къ ѿ ѕла̀: и҆ и҆дѣ́же стра́хъ, тꙋ̀ за́повѣдей соблюде́нїе. Глаго́летъ же и҆ преподо́бный і҆саа́къ: стра́хъ бж҃їй нача́ло є҆́сть добродѣ́тели (ѿ а҃ сло́ва). Глаго́летсѧ же бы́ти рожде́нїе вѣ́ры, и҆ сѣ́етсѧ въ се́рдцѣ, є҆гда̀ ѿлꙋчи́тсѧ ᲂу҆́мъ ѿ попече́нїѧ мі́ра сегѡ̀, є҆́же собра́ти своѧ̑ помышлє́нїѧ скита̑ющаѧсѧ ѿ паре́нїѧ, въ при́сное поꙋче́нїе бꙋ́дꙋщагѡ воз̾ꙋстрое́нїѧ. Нача́ло и҆́стинныѧ жи́зни человѣ́ка є҆́сть стра́хъ бж҃їй, и҆ се́й съ паре́нїемъ нѣ́кихъ въ дꙋшѝ пребы́ти не повинꙋ́етсѧ. Оу҆премꙋ́дрисѧ ᲂу҆̀бо, во є҆́же положи́ти ѡ҆снова́нїе въ пꙋтеше́ствїи твое́мъ, стра́хъ бж҃їй и҆ въ ма́лѣхъ дне́хъ ᲂу҆стро́ишисѧ во вратѣ́хъ црⷭ҇твїѧ, кромѣ̀ ѡ҆бхожде́нїѧ мно́гагѡ пꙋтѝ.

(Ѡ҆ второ́мъ и҆ соверше́ннѣмъ бж҃е́ственнѣмъ стра́сѣ. )

Ѡ҆ второ́мъ же, си́рѣчь, соверше́ннѣмъ бж҃е́ственнѣмъ стра́сѣ, та́кѡ рече́сѧ: бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.⁴⁷⁶ И҆, бл҃же́ни всѝ боѧ́щїисѧ гдⷭ҇а, ходѧ́щїи въ пꙋте́хъ є҆гѡ̀.⁴⁷⁷ И҆, бо́йтесѧ гдⷭ҇а всѝ ст҃і́и є҆гѡ̀, ꙗ҆́кѡ нѣ́сть лише́нїѧ боѧ́щымсѧ є҆гѡ̀.⁴⁷⁸ И҆, сѐ та́кѡ благослови́тсѧ человѣ́къ боѧ́йсѧ гдⷭ҇а.⁴⁷⁹ И҆, стра́хъ гдⷭ҇нь чи́стъ, пребыва́ѧй въ вѣ́къ вѣ́ка.⁴⁸⁰ Пи́шетъ и҆ ст҃ы́й пе́тръ дамаски́нъ: зна́менїе пе́рвагѡ стра́ха є҆́сть, є҆́же возненави́дѣти и҆ гнѣ́ватисѧ на грѣ́хъ, ꙗ҆́коже гнѣ́ваетсѧ ᲂу҆ѧ́звленный ѿ ѕвѣ́рѧ: соверше́ннагѡ же, є҆́же люби́ти добродѣ́тель и҆ боѧ́тисѧ премѣ́ны (в҃ кни́ги, г҃ сло́ва) И҆, ꙗ҆́кѡ никто́же непремѣ́ненъ, и҆ во всѧ́кой ве́щи, въ се́мъ житїѝ до́лжни є҆смы̀ при́снѡ паде́нїѧ боѧ́тисѧ. Тѣ́мже и҆ ты̀ сїѧ̑ разꙋ́мнѡ слы́шѧ, потщи́сѧ со всѣ́ми предрече́нными и҆ пе́рвый соверше́ннѡ стра́хъ въ себѣ̀ непреста́ннѡ и҆мѣ́ти. Занѐ то́й, ꙗ҆́коже сокро́вищное храни́лище, твердѣ́йшїй є҆́сть всѧ́кагѡ блага́гѡ дѣѧ́нїѧ. Та́кѡ бо ѡ҆брѣта́ѧсѧ, бꙋ́деши и҆справлѧ́ємы и҆мѣ́ти стѡпы̀ твоѧ̑ къ дѣ́ланїю всѣ́хъ за́повѣдей гдⷭ҇а на́шегѡ і҆и҃са хрⷭ҇та̀. Пꙋте́мъ же пред̾иды́й, ѡ҆брѧ́щеши соверше́нный и҆ чи́стый стра́хъ, жела́нїемъ добродѣ́телей и҆ ми́лостїю блага́гѡ бг҃а на́шегѡ.

Глава̀ и҃і.

(Ꙗ҆́кѡ за за́пѡвѣди, и҆ за вѣ́рꙋ, ꙗ҆́же по ѻ҆́нѣмъ гдⷭ҇а на́шегѡ і҆и҃са хрⷭ҇та̀, вре́мени побꙋжда́ющꙋ, до́лжни є҆смы̀ нижѐ самагѡ̀ живота̀ на́шегѡ пощадѣ́ти.)

Све́рхъ рече́нныхъ же и҆ сїѐ подоба́етъ вѣ́дѣти тебѣ̀, ꙗ҆́кѡ за живопода́тєльныѧ за́пѡвѣди и҆ за вѣ́рꙋ, ꙗ҆́же по ѻ҆́нѣмъ гдⷭ҇а і҆и҃са хрⷭ҇та̀, вре́мени побꙋжда́ющꙋ, до́лжни є҆смы̀ и҆ са́мꙋю дꙋ́шꙋ погꙋби́ти съ ра́достїю, си́рѣчь, нижѐ самагѡ̀ живота̀ на́шегѡ пощадѣ́ти, ꙗ҆́коже ѡ҆ се́мъ са́мъ гдⷭ҇ь і҆и҃съ хрⷭ҇то́съ глаго́летъ: ꙗ҆́кѡ, и҆́же погꙋби́тъ дꙋ́шꙋ свою̀ менѐ ра́ди и҆ є҆ѵⷢ҇лїа, то́й спасе́тъ ю҆̀,⁴⁸¹ без̾ сꙋмнѣ́нїѧ вѣ́рꙋѧ, и҆ не разсꙋжда́ѧ, ꙗ҆́кѡ и҆ воскреше́нїе, и҆ живо́тъ, и҆ всѧ́ко что́либо спаси́тельно, са́мъ є҆́сть бг҃очеловѣ́къ і҆и҃съ сп҃си́тель, ꙗ҆́коже са́мъ речѐ: ꙗ҆́кѡ а҆́зъ є҆́смь воскреше́нїе, и҆ живо́тъ: вѣ́рꙋѧй въ мѧ̀, а҆́ще и҆ ᲂу҆́мретъ, ѡ҆живе́тъ.⁴⁸² И҆, всѧ́къ живы́й, и҆ вѣ́рꙋѧй въ мѧ̀, не ᲂу҆́мретъ во вѣ́ки.⁴⁸³ И҆, та́кѡ возлюбѝ бг҃ъ мі́ръ, ꙗ҆́кѡ и҆ сн҃а своего̀ є҆диноро́днаго да́лъ є҆́сть, да всѧ́къ вѣ́рꙋѧй въ ѻ҆́нь, не поги́бнетъ, но и҆́мать живо́тъ вѣ́чный. И҆, а҆́зъ прїидо́хъ, да живо́тъ и҆́мꙋтъ, и҆ ли́шше и҆́мꙋтъ.⁴⁸⁴ Та́кѡ ᲂу҆̀бо ѡ҆брѣта́ѧсѧ, при́снѡ же за̑днѧѧ забыва́ѧ, въ прє́днѧѧ же простира́ѧсѧ, ꙗ҆́коже рече́сѧ: тецы̀ со хрⷭ҇то́мъ і҆и҃сомъ гдⷭ҇емъ на́шимъ невозвра́тнѡ твои́мъ тече́нїемъ та́кѡ.⁴⁸⁵ Добро́ же є҆́сть, ꙗ҆́коже на́мъ мни́тсѧ, и҆ ѕѣлѡ̀ прили́чно, пе́рвѣе и҆зложи́ти блаже́ннѣйшагѡ нїки́фора преди́внагѡ, ѡ҆ вхо́дѣ чрез̾ вдыха́нїе но́здренное внꙋ́трь се́рдца, є҆сте́ственное нѣ́кое хꙋдо́жество, и҆ къ собра́нїю мы́сли нѣ́какѡ прили́чествꙋющее, да та́кѡ, по чи́нꙋ, съ по́мощїю бж҃їею настоѧ́щее спасе́нїе благорасположи́тельнѣ пред̾и́детъ. Глаго́летъ ᲂу҆́бѡ бж҃е́ственный ѻ҆́ный мꙋ́жъ, со мно́гими и҆ны́ми ᲂу҆твержде́нїе и҆мꙋ́щими ѿ напи́санныхъ свидѣ́тельствъ ст҃ы́хъ ѻ҆тцє́въ, и҆ сїѧ̑.

Глава̀ ѳ҃і.

(Хꙋдо́жество є҆сте́ственное ѡ҆ внꙋ́трь се́рдца чрез̾ вдыха́нїе но́здренное входоисхо́дѣ, и҆ ѡ҆ дѣ́йствꙋемой со ѻ҆́нымъ ѡ҆ на́съ моли́твѣ, ꙗ҆́же є҆́сть сїѧ̀: гдⷭ҇и і҆и҃се хрⷭ҇тѐ сн҃е бж҃їй, поми́лꙋй мѧ̀! Таково́е хꙋдо́жество прили́чествꙋетъ нѣ́какѡ и҆ къ собра́нїю мы́сли. )

Вѣ́си ли, бра́те, ꙗ҆́кѡ дыха́нїе сїѐ, и҆́мже возды́шемъ, воздꙋ́хъ се́й є҆́сть: вды́шемъ же се́й, не и҆но́гѡ ра́ди чегѡ̀, то́чїю се́рдца ра́ди; сїе́ бо жи́зни є҆́сть вино́вно, и҆ теплоты̀ тѣ́лꙋ. Привлека́етъ ᲂу҆̀бо се́рдце дꙋ́хъ, да свою̀ теплотꙋ̀ во́нъ и҆здыха́нїемъ и҆спꙋ́ститъ, себѣ́ же благорастворе́нїе пода́стъ: вино́вно же такова́гѡ строе́нїѧ, и҆лѝ па́че слꙋжи́тель, є҆́сть ле́гкое, є҆́же рѣ́дко со́здано бы́вши, ꙗ҆́кѡ нѣ́кїй мѣ́хъ безтѧ́жестнѡ вво́дитъ и҆ и҆зво́дитъ ѡ҆бдержа́щїй дꙋ́хъ. Та́кѡ ᲂу҆̀бо се́рдце хла́дное дꙋ́ха влекꙋ́щи, те́плое же и҆зпꙋща́ющи, чи́нъ, є҆гѡ́же ра́ди бы́сть ᲂу҆стро́ено къ составле́нїю живо́тнагѡ, соблюда́етъ непрестꙋ́пнѡ. Ты̀ ᲂу҆̀бо сѣ́дъ въ ке́ллїи безмо́лвнѣ, и҆ собра́въ ᲂу҆́мъ тво́й, введѝ ѻ҆́ной въ но́здреный пꙋ́ть, и҆дѣ́же дꙋ́хъ се́й вхо́дитъ въ се́рдце, и҆ порѣ́й подви́жи є҆го̀, и҆ принꙋ́ди вкꙋ́пѣ сни́ти со вдыха́емымъ дꙋ́хомъ въ се́рдце: вше́дшꙋ же є҆мꙋ̀ та́мѡ, не ктомꙋ̀ не ве́сєла, нижѐ не ра́дѡстна бꙋ́детъ тѝ, ꙗ҆̀же по си́хъ, но ꙗ҆́коже нѣ́кїй мꙋ́жъ, ѿ до́мꙋ своегѡ̀ бы́въ ѿше́лецъ, по внегда̀ возврати́тсѧ, не вѣ́сть что̀ и҆ сотвори́тсѧ ѿ ра́дости, ꙗ҆́кѡ сподо́бисѧ къ ча́дѡмъ и҆ къ женѣ̀ прїитѝ: та́кѡ и҆ ᲂу҆́мъ, по внегда̀ съ дꙋше́ю соедини́тсѧ, и҆сполнѧ́етсѧ неизрече́нныѧ сла́дости и҆ весе́лїѧ. Тѣ́мже, бра́те, ѡ҆бы́кнꙋти сотворѝ ᲂу҆́мъ не ско́рѡ ѿѻнꙋ́дꙋ и҆сходи́ти: вельми́ бо въ нача́лѣ ᲂу҆ныва́етъ ѿ созатворе́нїѧ и҆ ᲂу҆тѣсне́нїѧ внꙋ́треннихъ: по внегда́ же ѡ҆бы́кнетъ, не ктомꙋ̀ во внѣ́шнихъ стита́нїихъ пребыва́етъ: ца́рствїе бо бж҃їе внꙋ́трь на́съ є҆́сть, є҆́же та́мѡ ѡ҆бзира́ющемꙋ, и҆ чи́стою мл҃твою сегѡ̀ взыскꙋ́ющемꙋ, всѧ̑ внѣ̑шнѧѧ мє́рзка бы́ти мнѧ́тсѧ и҆ ненави̑стна. И҆ по ма́лѣхъ: подоба́етъ же тебѣ̀ сїѐ ᲂу҆разꙋмѣ́ти, ꙗ҆́кѡ та́мѡ ᲂу҆мꙋ̀ твоемꙋ̀ сꙋ́щꙋ не досто́итъ молча́ти, и҆ пра́зднꙋ бы́ти, но да́ждь є҆мꙋ̀ сїѐ: гдⷭ҇и і҆и҃се хрⷭ҇тѐ сн҃е бж҃їй, поми́лꙋй мѧ̀! и҆ да непреста́ннѡ дѣ́ло и҆́мать и҆ поꙋче́нїе, и҆ никогда́же ѿ сегѡ̀ да престае́тъ. Сїе́ бо нерасточе́нъ содержа̀ ᲂу҆́мъ, неѧ́та показꙋ́етъ є҆го̀, и҆ неприкоснове́нна вра́жїими прило́ги, и҆ въ бж҃е́ственное жела́нїе и҆ любо́вь на всѧ́къ де́нь возво́дитъ. И҆ сїѧ̑ ᲂу҆́бѡ блаже́нный се́й ѻ҆те́цъ, намѣ́ренїе и҆мѣ́ѧ предварѧ́ющее, да нѣ́какѡ дѣ́йствꙋемꙋ семꙋ̀ є҆сте́ственномꙋ хꙋдо́жествꙋ, возврати́тсѧ ᲂу҆́мъ ѿ ѻ҆бы́чнагѡ ѡ҆бхожде́нїѧ и҆ плѣне́нїѧ и҆ скита́нїѧ ко внима́нїю, и҆ внима́нїемъ возврати́тсѧ къ себѣ̀, и҆ та́кѡ съ моли́твою соедини́тсѧ, и҆ да ѿто́лѣ въ се́рдце схо́дитъ съ са́мою то́ю, си́рѣчь, моли́твою, и҆ въ не́мъ пребыва́етъ. Ꙗ҆́коже и҆ и҆́нъ нѣ́кто ѿ бг҃омꙋ́дрыхъ, а҆́ки прїистолкꙋ́ѧ пред̾изложе́нное ᲂу҆потребле́нїе, ꙗ҆́кѡ во и҆скꙋ́сѣ такова́гѡ сщ҃е́ннагѡ дѣ́ланїѧ бы́въ, сїѧ̑ глаго́летъ.

Глава̀ к҃.

(Ѡ҆ є҆сте́ственнѣмъ чрез̾ вдыха́нїе но́здренꙋое хꙋдо́жествѣ, и҆ съ ни́мъ гдⷭ҇а і҆и҃са хрⷭ҇та̀ призыва́нїи. )

Подоба́етъ и҆ сїѐ ᲂу҆ченолюби́вомꙋ ꙗ҆́внѡ сотвори́ти, ꙗ҆́кѡ а҆́ще ᲂу҆́мъ на́шъ во вхо́дѣ дꙋ́ха, вкꙋ́пѣ съ ни́мъ сходи́ти и҆з̾ꙋ́чимъ: тогда̀ соверше́ннѡ ᲂу҆разꙋмѣ́емъ, ꙗ҆́кѡ сходѧ̀ ᲂу҆́мъ, не пе́рвѣе сїѐ начина́етъ, пре́жде да́же всѧ́кїй ѿве́ргнетъ по́мыслъ, и҆ є҆ди́нственъ и҆ на́гъ бꙋ́детъ, ни є҆ди́ныѧ и҆ны́ѧ па́мѧти є҆́млѧсѧ, то́чїю призыва́нїѧ гдⷭ҇а на́шегѡ і҆и҃са хрⷭ҇та̀. Напроти́въ же, ѿѻнꙋ́дꙋ и҆сходѧ̀ и҆ на внѣ̑шнѧѧ и҆ды́й, и҆ не хотѧ̀ раздѣлѧ́етсѧ на многоча́стнꙋю па́мѧть.

Глава̀ к҃а.

(Ꙗ҆́кѡ и҆ бж҃е́ственный златоꙋ́стъ, ꙗ҆́коже и҆ и҆ні́и ѿ дре́внихъ ст҃ы́хъ ѻ҆тє́цъ, во хрⷭ҇тѣ̀ і҆и҃сѣ гдⷭ҇ѣ на́шемъ моли́тисѧ ѡ҆предѣлѧ́етъ внꙋ́трь се́рдца, и҆ сїю̀ глаго́лати моли́твꙋ: гдⷭ҇и і҆и҃се хрⷭ҇тѐ сн҃е бж҃їй, поми́лꙋй мѧ̀!)

Глаго́летъ же и҆ вели́кїй златоꙋ́стъ: молю̀ ва́съ бра́тїе, пра́вило моли́твы сеѧ̀ никогда́же преста́ти да сотвори́те, и҆лѝ пре́зрите. И҆ пома́лѣ: до́лженъ є҆́сть и҆́нокъ, а҆́ще ꙗ҆́стъ, а҆́ще пїе́тъ, а҆́ще сѣди́тъ, а҆́ще слꙋ́житъ, а҆́ще пꙋтеше́ствꙋетъ, а҆́ще и҆́но что̀ твори́тъ: непреста́ннѡ вопи́ти то̀: гдⷭ҇и і҆и҃се хрⷭ҇тѐ сн҃е бж҃їй, поми́лꙋй мѧ̀! И҆ пома́лѣ: да и҆́мѧ гдⷭ҇а і҆и҃са, сходѧ́щее во глꙋбинꙋ̀ се́рдца, смири́тъ ѕмі́ѧ содержа́щаго па̑жити, дꙋ́шꙋ же спасе́тъ и҆ ѡ҆животвори́тъ. Непреста́ннѡ ᲂу҆̀бо пребꙋ́ди во и҆́мени гдⷭ҇а і҆и҃са, ꙗ҆́кѡ да поглоти́тъ се́рдце гдⷭ҇а, и҆ гдⷭ҇ь се́рдце, и҆ да бꙋ́дета два̀ сїѧ̑ во є҆ди́но. И҆ па́ки: не ѿлꙋча́йте ѿ бг҃а се́рдца ва́шегѡ, но потерпѣва́йте и҆ храни́те є҆̀ всегда̀ съ па́мѧтїю гдⷭ҇а на́шегѡ і҆и҃са хрⷭ҇та̀, до́ндеже внꙋ́трь въ се́рдце водрꙋзи́тсѧ и҆́мѧ гдⷭ҇не, и҆ ничто́же и҆́но помышлѧ́йте, то́чїю ꙗ҆́кѡ да возвели́читсѧ въ ва́съ хрⷭ҇то́съ.

Глава̀ к҃в.

(Є҆щѐ ѡ҆ па́мѧти і҆и҃совой, чрез̾ вдыха́нїе но́здренное, со внима́нїемъ внꙋ́трь се́рдца. )

Пи́шетъ же и҆ лѣ́ствичникъ: і҆и҃сова па́мѧть да соедини́тсѧ съ дыха́нїемъ твои́мъ, и҆ тогда̀ позна́еши безмо́лвїѧ по́льзꙋ (ѿ к҃з степе́ни). И҆ ст҃ы́й и҆сѵ́хїй: а҆́ще ᲂу҆́бѡ вои́стиннꙋ ѡ҆дѣ́ѧти въ стꙋ́дъ по́мыслы хо́щеши, и҆ безмо́лствовати благодꙋ́шнѡ, и҆ со ᲂу҆до́бностїю трезви́тисѧ се́рдцемъ: і҆и҃сова моли́тва да соедини́тсѧ въ дыха́нїе твоѐ и҆ въ но́здри, и҆ въ ма́лѣхъ дне́хъ соверша́ющеесѧ сїѐ ᲂу҆́зриши (глава̀ рп҃в).

Глава̀ к҃г.

(Ꙗ҆́кѡ хотѧ́щемꙋ ᲂу҆́мнѣ трезви́тисѧ, и҆ па́че же новонача́льномꙋ подоба́етъ сидѣ́ти, во вре́мѧ мл҃твы, въ безмо́лвнѣй и҆ несвѣ́тлѣй хра́минѣ, за є҆́же си́це ᲂу҆мꙋ̀ и҆ мы́сли є҆сте́ственнѣ нѣ́какѡ ѿ ча́сти собира́тисѧ. )

Тѣ́мже къ пока̑заннымъ, ꙗ҆́коже свы́ше сꙋ́щымъ, и҆ ѿ вели́кихъ ст҃ы́хъ ѻ҆тє́цъ пред̾ꙋзако́нєннымъ по простє́ртымъ на́ми свидѣ́тельствамъ, ѡ҆ є҆́же чрез̾ вдыха́нїе но́здренное, и҆ внꙋ́трь се́рдца въ гдⷭ҇ѣ на́шемъ і҆и҃сѣ хрⷭ҇тѣ̀ сн҃ѣ бж҃їи, и҆ во ст҃ѣ́мъ є҆гѡ̀ и҆ сп҃си́тельномъ и҆́мени моли́тисѧ, поꙋча́тисѧ и҆ трезви́тисѧ, и҆ ѿ негѡ̀ и҆ска́ти на́мъ ми́лости, прилага́етсѧ и҆ сїѐ: є҆́же въ безмо́лвнѣ, и҆ при́снѡ, па́че же во ᲂу҆ста́вленное вре́мѧ моли́твы, є҆ще́ же и҆ въ несвѣ́тлѣ ᲂу҆глѣ̀ сидѣ́ти прилѣжа́щемꙋ трезви́тисѧ ᲂу҆́мнѣ въ се́рдцѣ, и҆ па́че же новонача́льномꙋ, ꙗ҆́коже бы́вшїи во и҆скꙋ́сѣ такова́гѡ всеблаже́ннѣйшагѡ дѣ́ланїѧ бж҃е́ственнїи ѻ҆тцы̀ и҆ ᲂу҆чи́телїе та́йнѡ наꙋча́ютъ и҆ заповѣ́даютъ. Занѐ видѣ́нїе и҆ зрѣ́нїе ѻ҆че́съ на зри̑маѧ и҆ ви̑димаѧ винѡ́вна быва́ютъ є҆сте́ственнѣ развлече́нїѧ и҆ раздѣле́нїѧ мы́сли, и҆ є҆́же стꙋжа́емѣй бы́ти є҆́й и҆ расточа́тисѧ: затворе́ннѣй же и҆ є҆́й бы́вшей, ꙗ҆́коже глаго́ласѧ, въ безмо́лвнѣй и҆ те́мнѣй хра́минѣ, и҆ та̀ ѿ паре́нїѧ и҆ ѿ тогѡ̀, є҆ли́кѡ ѿ зрѣ́нїѧ и҆ видѣ́нїѧ разли́чествовати, престае́тъ: та́кѡ ᲂу҆́бѡ и҆ ᲂу҆́мъ, хотѧ̀ и҆ не хотѧ̀ ѿ ча́сти ᲂу҆тиша́тисѧ, и҆ къ себѣ̀ собира́тисѧ ѡ҆бы́че, ꙗ҆́коже глаго́летъ вели́кїй васі́лїй: ᲂу҆́мъ не расточа́емь на внѣ̑шнѧѧ, нижѐ ѿ чꙋ́вствъ на мі́ръ разлива́емь, къ себѣ̀ возвраща́етсѧ.

Глава̀ к҃д.

(Ꙗ҆́кѡ пре́жде всѣ́хъ непаре́нїе да́рꙋетсѧ ᲂу҆мꙋ̀ гдⷭ҇емъ на́шимъ і҆и҃сомъ хрⷭ҇то́мъ, и҆ ст҃а́гѡ є҆гѡ̀ и҆́мене съ вѣ́рою въ се́рдцѣ призыва́нїемъ: помоществꙋ́етъ же нѣ́какѡ и҆ є҆сте́ственное хꙋдо́жество въ се́рдцѣ чрез̾ вдыха́нїе но́здренное, и҆ сидѣ́нїе въ безмо́лвнѣ и҆ несвѣ́тлѣ мѣ́стѣ, и҆ подѡ́бнаѧ. )

И҆ пре́жде ᲂу҆̀бо си́хъ, па́че же пре́жде всѣ́хъ таковы́й ᲂу҆мо́мъ и҆справлѧ́етсѧ по́двигъ приходѧ́щею по́мощїю бж҃е́ственныѧ благода́ти ѿ є҆динопо́мысленнагѡ, серде́чнагѡ, чи́стагѡ и҆ непари́тельнагѡ съ вѣ́рою гдⷭ҇а на́шегѡ і҆и҃са хрⷭ҇та̀ призыва́нїѧ, а҆ не просты́мъ є҆ди́нымъ пред̾изложе́ннымъ є҆сте́ственнымъ хꙋдо́жествомъ, чрез̾ но́здренное вдыха́нїе, и҆лѝ въ безмо́лвнѣ и҆ тѣ́мнѣ мѣ́стѣ сидѣ́нїе, да не бꙋ́детъ. Такѡва́ѧ бо бж҃е́ственными ѻ҆тцы̑ и҆з̾ѡбрѣто́шасѧ, не и҆но́гѡ ра́ди чегѡ̀, ра́звѣ то́чїю, ꙗ҆́кѡ нѣ̑каѧ посѡ́бїѧ къ собра́нїю мы́сли, и҆ ѿ ѻ҆бы́чнагѡ паре́нїѧ къ само́й себѣ̀ возвраще́нїю и҆ внима́нїю, ꙗ҆́коже предреко́хомъ. Ѿ ни́хже ражда́етсѧ, и҆ є҆́же вы́нꙋ и҆ чи́стѣ и҆ непари́тельнѣ ᲂу҆мꙋ̀ моли́тисѧ, ꙗ҆́коже глаго́летъ ст҃ы́й ні́лъ: ꙗ҆́кѡ внима́нїе моли́твы и҆щѧ̀, моли́твꙋ ѡ҆брѧ́щетъ: моли́тва бо внима́нїю послѣ́дꙋетъ мно́жае, нижѐ и҆́но что̀, ѡ҆ не́мже тща́тисѧ подоба́етъ. И҆ ѡ҆ се́мъ рече́сѧ досе́лѣ. Ты́ же ча́до, хотѧ́й живо́тъ, и҆ любѧ́й дни̑ ви́дѣти бла́ги, и҆ жи́ти въ тѣ́лѣ ꙗ҆́кѡ безтѣле́сенъ, под̾ пра́виломъ и҆ вѣ́сомъ живѝ таковы́мъ.

Глава̀ к҃є.

(Ка́кѡ подоба́етъ преходи́ти разстоѧ́нїе ѿ ве́чера до ᲂу҆́трени безмо́лвствꙋющемꙋ, и҆ нача́ло простра́ннѣйшагѡ ᲂу҆че́нїѧ. )

Со́лнцꙋ заходѧ́щꙋ, призва́въ въ по́мощь преблага́го и҆ всеси́льнаго гдⷭ҇а і҆и҃са хрⷭ҇та̀, сѧ́ди на стꙋ́льцѣ въ ке́ллїи безмо́лвнѣй и҆ несвѣ́тлѣй, и҆ собра́въ ᲂу҆́мъ тво́й ѿ внѣ́шнѧгѡ ѻ҆бы́чнагѡ ѡ҆бхожде́нїѧ, и҆ ѻ҆́крестъ скита́нїѧ, и҆ внꙋ́трь се́рдца порѣ́ѧвъ ти́хѡ чрез̾ вдыха́нїе но́здренное, держѝ моли́твꙋ, си́рѣчь: гдⷭ҇и і҆и҃се хрⷭ҇тѐ сн҃е бж҃їй, поми́лꙋй мѧ̀! кꙋ́пнѡ съ дыха́нїемъ совводѧ̀ соедине́ннѣ нѣ́какѡ и҆ глаго́лы моли́твы, ꙗ҆́коже глаго́летъ ст҃ы́й и҆сѵ́хїй: со вдыха́нїемъ твои́мъ но́здреннымъ трезвѣ́нїе соединѝ, и҆ і҆и҃сово и҆́мѧ, и҆ незабве́нное поꙋче́нїе сме́рти, и҆ смире́нїе: ѻ҆боѧ̑ бо по́льзовати вѣ́дѧтъ (глава̀ рн҃ѳ.) Съ мл҃твою же и҆ и҆ны́ми тебѣ̀ рече́нными и҆мѣ́й и҆ па́мѧть сꙋда̀, и҆ воздаѧ́нїѧ благи́хъ и҆ ѕлы́хъ дѣѧ́нїй, и҆ соверше́ннѣ ѿ дꙋшѝ вмѣнѧ́й себѐ па́че всѣ́хъ человѣ̑къ грѣ́шнѣйша, и҆ са́мыхъ бѣсѡ́въ сквернѣ́йша, пото́мъ и҆ ꙗ҆́кѡ и҆́маши вѣ́чнѣ мꙋ́читисѧ: и҆ въ каково́мъ ли́бо по́мыслѣ ѿ ска́занныхъ прїи́детъ тѝ ᲂу҆миле́нїе и҆ пла́чь, и҆ сле́зы, во ѻ҆́нѣмъ про́чее и҆ пребыва́й, до́ндеже са́ми сі́и пре́йдꙋтъ. А҆́ще же є҆щѐ не сподо́билсѧ є҆сѝ дарова́нїѧ сле́зъ, подви́гнисѧ и҆ помоли́сѧ смире́ннымъ мꙋдрова́нїемъ, да стѧ́жеши сїѧ̑: си́ми бо ѿ страсте́й и҆ скве́рнъ ѻ҆чища́емсѧ, благи́хъ же и҆ спаси́тельныхъ прича̑стницы быва́емъ, ꙗ҆́коже лѣ́ствичникъ глаго́летъ: ꙗ҆́коже ѻ҆́гнь потреблѧ́етъ тро́стїе, та́кѡ чи́стаѧ слеза̀ всѧ́кїѧ сквє́рны ви̑димыѧ и҆ помышлѧ́ємыѧ (ѿ з҃ степе́ни). И҆ и҆́нъ ѻ҆те́цъ: хотѧ́й погꙋби́ти ѕлѡ́бы, пла́чемъ погꙋблѧ́етъ ѧ҆̀: и҆ хотѧ́й стѧжа́ти добродѣ́тєли, пла́чемъ стѧжева́етъ ѧ҆̀. И҆ а҆́ще не и҆́маши ᲂу҆миле́нїѧ, вѣ́ждь, ꙗ҆́кѡ тщесла́вїе и҆́маши: сїе́ бо не ѡ҆ставлѧ́етъ дꙋ́шꙋ ᲂу҆мили́тисѧ. А҆́ще же бы не пришлѝ сле́зы, сѣдѝ внима́ѧ въ си́хъ по́мыслѣхъ, и҆ съ моли́твою ча́съ є҆ди́нъ: та́же воста́въ, по́й со внима́нїемъ ма́лое повече́рїе: и҆ па́ки сѣ́дъ держѝ моли́твꙋ, є҆ли́ка тѝ є҆́сть си́ла, чи́стѣ и҆ непари́тельнѣ, си́рѣчь, кромѣ̀ попече́нїѧ и҆ по́мысла какова́гѡлибо и҆ ꙗ҆кова́гѡлибо мечта́нїѧ со мно́гимъ трезвѣ́нїемъ полчаса̀, по рече́нномꙋ: кромѣ̀ неподо́бнагѡ дыха́нїѧ и҆ пи́щи, внѣ̀ и҆ны́хъ пѡ́мыслъ, въ моли́твѣ бꙋ́ди, а҆́ще хо́щеши съ є҆ди́нымъ бы́ти ᲂу҆мо́мъ. Та́же зна́менавъ себѐ зна́менїемъ честна́гѡ и҆ животворѧ́щагѡ крⷭ҇та̀, подо́бнѣ и҆ тво́й ѻ҆́дръ, и҆ на не́мъ сѣ́дъ, и҆ въ мы́сль твою̀ прише́дъ ѡ҆ бꙋ́дꙋщихъ наслажде́нїихъ, глаго́лемъ, и҆ мꙋче́нїихъ: ѡ҆ прехожде́нїи же и҆ пре́лести привре́менныхъ, є҆ще́ же и҆ ѡ҆ внеза́пнѣмъ и҆ ѻ҆́бщемъ до́лзѣ, си́рѣчь ѡ҆ сме́рти, и҆ ѡ҆ є҆́же по кончи́нѣ, и҆ пре́жде кончи́ны стра́шнѣмъ словоистѧза́нїи, и҆ ѡ҆ согрѣше́нныхъ тобо́ю по всемꙋ̀, ꙗ҆́коже мо́щно вкра́тцѣ воспомѧнꙋ́въ, и҆ ѡ҆ си́хъ ѿпꙋще́нїѧ те́плѣ проси́въ, со и҆звѣстноиспыта́нїемъ себѐ словоистѧза́въ, ка́кѡ преше́дшїй де́нь преше́лъ є҆сѝ, возле́гъ, держа̀ и҆ мл҃твꙋ по глаго́лꙋ: і҆и҃сова па́мѧть вкꙋ́пѣ да спи́тъ съ тобо́ю: ᲂу҆снѝ часѡ́въ пѧ́ть и҆лѝ ше́сть, па́че же по разстоѧ́нїю но́щи ᲂу҆снѝ и҆ ты̀ ᲂу҆мѣ́реннѡ.

Глава̀ к҃ѕ. Ка́кѡ подоба́етъ вре́мѧ ѿ ᲂу҆́трени да́же ᲂу҆́трїѧ преходи́ти.

Ѿ сна́ же возбꙋди́вшисѧ, и҆ бг҃а славосло́вивъ, и҆ па́ки того̀ на твоѐ застꙋпле́нїе призва́въ, начнѝ пе́рвѣе дѣ́ло пе́рвое, си́рѣчь, моли́тисѧ въ се́рдцѣ чи́стѡ и҆ непари́тельнѡ до часа̀ є҆ди́нагѡ: тогда́ бо наимно́жайше нѣ́кагѡ ᲂу҆́мъ є҆́сть ти́хъ и҆ немѧте́женъ. Сегѡ̀ ра́ди на́мъ и҆ заповѣ́дано є҆́сть, пє́рваѧ и҆ и҆зрѧ̑днаѧ въ же́ртвꙋ приноси́ти бг҃ови, си́рѣчь первомы́слїе, є҆ли́кѡ мо́щно, возводи́ти неꙋкло́ннѡ серде́чною чи́стою моли́твою къ гдⷭ҇ꙋ на́шемꙋ і҆и҃сꙋ хрⷭ҇тꙋ̀. Глаго́летъ бо ст҃ы́й ні́лъ: се́й мл҃твꙋ наверша́етъ, и҆́же при́снѡ соверше́ннѡ своѐ первомы́слїе бг҃ови плодоно́ситъ (гл. рк҃ѕ). По си́хъ же по́й полꙋ́нощницꙋ. А҆́ще же є҆щѐ въ соверше́ннѣйшемъ безмо́лвїи неꙋтвержде́нъ сы́й, и҆ сегѡ̀ ра́ди не мо́жеши, ꙗ҆́коже реко́хомъ, нача́ти є҆̀, и҆лѝ мо́жетъ бы́ть и҆ и҆ны́ѧ ра́ди вины̀, ꙗ҆́коже мно́жицею ѡ҆бы́че приключа́тисѧ є҆щѐ въ таково́мъ дѣ́ланїи сꙋ́щымъ новонача̑льнымъ, є҆ще́ же а҆́ще рѣ́дцѣ и҆ пред̾ꙋспѣва́ющымъ, и҆ не ᲂу҆̀ соверше́нства дости́гшымъ: соверше́ннїи бо всѧ̑ мо́гꙋтъ ѡ҆ ᲂу҆крѣплѧ́ющемъ и҆̀хъ хрⷭ҇тѣ̀. Ѻ҆ба́че ты̀ воста́въ ѿ сна̀, и҆ є҆ли́кѡ и҆́маши си́лꙋ, тре́звеннѡ по́й пе́рвѣе полꙋ́нощницꙋ со всѧ́кимъ внима́нїемъ и҆ ра́зꙋмомъ. Та́же сѣ́дъ помоли́сѧ чи́стѣ и҆ непари́тельнѣ въ се́рдцѣ, ꙗ҆́коже показа́сѧ, ча́съ є҆ди́нъ, па́че же ꙗ҆́коже пода́тель благи́хъ тебѣ̀ пода́стъ. Глаго́летъ бо лѣ́ствичникъ: но́щїю ᲂу҆́бѡ наимно́жайше вдава́й себѐ моли́твѣ, ма́лѡ же ѱалмопѣ́нїю: во дни́ же па́ки ᲂу҆готовлѧ́йсѧ по твое́й си́лѣ (ѿ к҃з степе́ни). А҆́ще же и҆ си́це подвиза́всѧ є҆щѐ неради́ши и҆ ᲂу҆ныва́еши, и҆ ᲂу҆́мъ возмꙋща́емь и҆́маши ѿ слꙋ́чаѧ нѣ́коегѡ, воста́въ побꙋжда́йсѧ, ꙗ҆́коже вѣ́си, держа́сѧ моли́твы: та́же сѣ́дъ, потщи́сѧ помоли́тисѧ, ꙗ҆́коже преднаписа́сѧ, при́снѡ прилѣжа̀, да чи́стою моли́твою съ чи́стымъ бг҃омъ бесѣ́дꙋеши. Та́же воста́въ по́й разꙋ́мнѡ шестоѱа́лмїе, пѧтдесѧ́тый ѱало́мъ и҆ канѡ́нъ, ꙗ҆ко́въ хо́щеши. Та́же сѣ́дъ и҆ бо́дрствꙋѧ, чи́стѣ помоли́сѧ полчаса̀: и҆ па́ки воста́въ, по́й хвали́тны, ѻ҆бы́чное славосло́вїе, пе́рвый ча́съ, и҆ по си́хъ сотворѝ ѿпꙋ́стъ: на толи́кꙋю же высотꙋ̀ да произно́сѧтсѧ глаго́лємаѧ ᲂу҆стна́ма твои́ма, ꙗ҆́кѡ то́чїю бы́ти слы̑шна твои́ма ᲂу҆ши́ма, занѐ плоды̀ ᲂу҆сте́нъ бг҃ꙋ приноси́ти повелѣно̀ на́мъ є҆́сть ѿ всеѧ̀ дꙋшѝ и҆ мы́сли, благодарѧ̀ человѣколюби́вомꙋ и҆ попечи́телю премꙋ́дромꙋ, бг҃ꙋ на́шемꙋ, по безконе́чной свое́й ми́лости на́съ сподо́бльшемꙋ ᲂу҆до́бь прейтѝ пꙋчи́нꙋ преше́дшїѧ но́щи, и҆ ᲂу҆ви́дѣти настоѧ́щагѡ днѐ свѣ́тлое по́прище: и҆ те́плѣ та́кожде ᲂу҆молѧ́ѧ, да да́рꙋетъ на́мъ претещѝ неволнꙋ́емѡ бѣсѡ́въ и҆ страсте́й мра́чнꙋю и҆ свирѣ́пꙋю бꙋ́рю, и҆ поми́ловати на́съ.

Глава̀ к҃з.

(Ка́кѡ подоба́етъ жи́тельствовати ѿ ᲂу҆́трїѧ до ѻ҆бѣ́да. )

Па́ки же ѿ ᲂу҆́трїѧ до ѻ҆бѣ́да, по возмо́жности твое́й, ве́сь всего̀ себѐ возложи́въ всемꙋ̀ бг҃ꙋ, и҆ семꙋ̀ помоли́всѧ въ се́рдцѣ сокрꙋше́ннѣ и҆ смире́ннѣ помощѝ тебѣ̀ не́мощнꙋ, и҆ ᲂу҆ны́лꙋ, и҆ безпроизво́льнꙋ сꙋ́щꙋ, прейдѝ въ моли́твѣ чи́стѣ, серде́чнѣ и҆ непари́тельнѣ, и҆ во чте́нїи. Стоѧ̀ ᲂу҆́бѡ чты́й ᲂу҆ста́вленное тебѣ̀ ѿ ѱалти́рѧ, а҆по́стола и҆ ст҃а́гѡ є҆ѵⷢ҇лїа, подо́бнѣ творѝ и҆ въ моли́твахъ, ꙗ҆̀же ко гдⷭ҇ꙋ на́шемꙋ і҆и҃сꙋ хрⷭ҇тꙋ̀, и҆ ꙗ҆̀же ко прест҃ѣ́й бцⷣѣ: сѣдѧ́ же на про́чїихъ чте́нїихъ ст҃ы́хъ писа́нїй. По си́хъ же по́й разꙋ́мнѡ ѻ҆бы̑чныѧ часы̀, и҆̀же ѿ ᲂу҆чи́телей це́ркве вельмѝ премꙋ́дрѣ ᲂу҆ста́вишасѧ, все́ю си́лою дꙋшѝ ѿме́щѧ пра́здность, ꙗ҆́кѡ ᲂу҆чи́тельницꙋ всѧ́кїѧ ѕло́бы, и҆ со страстьмѝ и҆ вины̑ и҆́хъ, а҆́ще мнѧ́тсѧ и҆ ма̑лыѧ нѣ̑кїѧ бы́ти, и҆ невреди́тєльны ви́дѧтсѧ.

Глава̀ к҃и.

(Ѡ҆ сохране́нїи ѿ пра́здности, и҆ ꙗ҆́кѡ церко́вное преда́нїе нꙋ́жно є҆́сть блюстѝ и҆ безмо́лвствꙋющемꙋ. )

Ꙗ҆́коже ст҃ы́й і҆саа́къ глаго́летъ: ѡ҆хранѧ́йтесѧ, ѽ возлю́бленнїи! ѿ пра́здности: зане́же сокрове́нна є҆́сть въ не́й ᲂу҆вѣ́дѣна сме́рть: поне́же без̾ тоѧ̀ въ рꙋ́ки тща́щихсѧ плѣни́ти и҆́нока впа́дати нѣ́сть возмо́жно (ѿ ѻ҃а сло́ва). Не ѡ҆ ѱалмѣ́хъ въ де́нь ѻ҆́нъ ѡ҆скꙋ́дитъ на́съ бг҃ъ, нижѐ ѡ҆ пра́здности моли́твы, но занѐ си́хъ ѡ҆ставле́нїемъ вхо́дъ быва́етъ бѣсовѡ́мъ. Внегда́ бо ѡ҆брѧ́щꙋтъ мѣ́сто и҆ вни́дꙋтъ, и҆ затворѧ́тъ двє́ри ѻ҆че́съ на́шихъ, тогда̀ и҆спо́лнѧтъ на на́съ дѣ́лателехъ свои́хъ мꙋчи́тельски и҆ нечи́стѣ со ѿмще́нїемъ лютѣ́йшимъ ѻ҆нѝ, ꙗ҆̀же под̾ бж҃е́ственнымъ и҆зрече́нїемъ соде́ржатъ. И҆ быва́емъ подвла́стни ѡ҆ставле́нїѧ ра́ди ма́лыхъ си́хъ, ꙗ҆̀же хрⷭ҇та̀ ра́ди попече́нїѧ сподоблѧ́ютсѧ, ꙗ҆́коже пи́сано є҆́сть ѿ премꙋ́дрѣйшихъ: не повинꙋ́ѧй во́ли своеѧ̀ бг҃ꙋ, повине́тсѧ сопе́рникꙋ своемꙋ̀. Тѣ́мже сїѧ̑ ма̑ла тебѣ̀ мни̑маѧ бы́ти, возмнѧ́тсѧ бы́ти проти́вꙋ плѣнѧ́ющихъ на́съ, а҆́ки стѣ́ны тебѣ̀: и҆́хже соверше́нїе внꙋ́трь ке́ллїи держа́щими чи́нъ це́ркве премꙋ́дрѣ ᲂу҆ста́висѧ дꙋ́хомъ ѿкрове́нїѧ къ хране́нїю на́шегѡ живота̀: и҆́хже ѡ҆ставле́нїе ѿ немꙋ́дрыхъ за ма́ло вмѣнѧ́етсѧ, и҆ тщетꙋ̀ происходѧ́щꙋю ѿ ѡ҆ставле́нїѧ ѻ҆́ныхъ, не вмѣнѧ́ющихъ. Си́хъ же и҆ нача́ло пꙋтѝ и҆ среда̀, во́льность є҆́сть ненака́занна, ꙗ҆̀же є҆́сть ма́ти страсте́й. Лꙋ́чше бо є҆́сть подвиза́тисѧ не ѡ҆ста́вити ма̑лаѧ сїѧ̑, не́жели въ распростране́нїи и҆́хъ мѣ́сто да́ти грѣхꙋ̀. Ра́бство бо сеѧ̀ безвре́менныѧ свобо́ды, є҆́сть жесто́кїй коне́цъ. И҆ па́ки: ѽ ко́ль вины̑ страсте́й сꙋ́ть сла̑дки! занѐ стра̑сти ᲂу҆̀бо ѻ҆вогда̀ мо́жетъ кто̀ ѿсѣщѝ, и҆ во ᲂу҆дале́нїи ѿ ни́хъ ᲂу҆тишава́етсѧ, и҆ весели́тсѧ, внегда̀ престава́ти и҆̀мъ: ѻ҆ба́че ви́нъ и҆́хъ ѡ҆ста́вити не мо́жетъ. Сегѡ̀ ра́ди и҆ не хотѧ́ще и҆скꙋша́еми быва́емъ. И҆ ѡ҆ страсте́хъ ᲂу҆̀бо скорби́мъ: вина́мъ же пребыва́ти въ на́съ лю́бимъ. Грѣхѡ́въ не жела́емъ, вины̑ же, приносѧ́щыѧ на́мъ ты̑ѧ, со сла́достїю прїе́млемъ. Сегѡ̀ ра́ди дѣ́йства пе́рвыхъ винѡ́вны быва́ютъ вторы̑ѧ. Любѧ́й вины̑ страсте́й, подвла́стенъ є҆́сть нево́лею, и҆ не хотѧ̀ порабо́тисѧ страсте́мъ. Ненави́дѧй своѧ̑ грѣхѝ, преста́нетъ ѿ ни́хъ: и҆ и҆сповѣ́дꙋѧй ты̑ѧ, полꙋ́читъ ѡ҆ставле́нїе. Не мо́щно же комꙋ̀ навыкнове́нїе ѡ҆ста́вити грѣха̀, пре́жде да́же не стѧ́жетъ съ ни́мъ враждꙋ̀, и҆ ѡ҆ставле́нїе полꙋчи́ти, пре́жде и҆сповѣ́данїѧ согрѣше́нїй: занѐ ѻ҆но̀ ᲂу҆́бѡ смире́нїѧ и҆́стинна є҆́сть вино́вно, сїе́ же ᲂу҆миле́нїѧ, ѿ сра́ма послѣ́дꙋющагѡ се́рдцꙋ. И҆ па́ки: нѣ́сть грѣ́хъ непроща́емь, то́чїю непокаѧ́нный (ѿ в҃ сло́ва) Но ѡ҆ си́хъ ᲂу҆̀бо дово́льнѣ. Ты́ же, по пѣ́нїи рече́нныхъ часѡ́въ, ꙗ҆́ждь, держа̀ и҆ моли́твꙋ во вре́мѧ пи́щи, да си́це творѧ̀, прїи́деши въ навыкнове́нїе, си́лою благода́ти моли́тисѧ непреста́ннѡ, по за́повѣди. Но сло́во ѡ҆ пи́щи, содержа́щей тѣ́ло неизрече́нною премꙋ́дростїю созда́вшагѡ, ма́лѡ да пожде́тъ: сло́во же ѡ҆ пи́щи, составлѧ́ющей и҆ животворѧ́щей дꙋ́шꙋ, да предначне́тсѧ, ꙗ҆́же є҆́сть, по сло́вꙋ ст҃ы́хъ ѻ҆тє́цъ, свѧще́ннаѧ и҆ бг҃отво́рнаѧ моли́тва. И҆ вельмѝ пра́веднѣ: занѐ дꙋша̀ честнѣ́йша є҆́сть тѣлесѐ.

Глава̀ к҃ѳ.

(Є҆щѐ ѡ҆ моли́твѣ, и҆ ꙗ҆́кѡ подоба́етъ моли́тисѧ при́снѡ.)

Ꙗ҆́коже сїѐ тѣ́ло на́ше, не присꙋ́тствꙋющей дꙋшѝ, ме́ртво

є҆́сть и҆ ѕлосмра́дно: та́кѡ и҆ дꙋша̀ не подви́жꙋщи себѐ на моли́твꙋ, мертва̀ є҆́сть и҆ ѻ҆каѧ́нна, и҆ ѕлосмра́дна. И҆ ꙗ҆́кѡ горча́йше всѧ́кїѧ сме́рти вмѣнѧ́ти подоба́етъ то̀, є҆́же лиши́тисѧ моли́твы, ᲂу҆́читъ на́съ до́брѣ вели́кїй данїи́лъ проро́къ, ᲂу҆мре́ти па́че произволѧ́ѧ, не́жели во мгнове́нїи часа̀ лиши́тисѧ моли́твы (глава̀ ѳ҃). Є҆щѐ ᲂу҆́читъ на́съ до́брѣ бж҃е́ственный златоꙋ́стъ: всѧ́къ молѧ́йсѧ, съ бг҃омъ бесѣ́дꙋетъ. Ко́ль же ве́лїе є҆́сть человѣ́кꙋ сꙋ́щꙋ, съ бг҃омъ бесѣ́довати, всѧ́къ зна́етъ: че́сть же предста́вити никто̀ не возмо́жетъ: сїѧ́ бо че́сть великолѣ́пїе и҆ а҆́гг҃лѡвъ превосхо́дитъ. Є҆щѐ: моли́тва є҆́сть ѻ҆́бщее дѣ́ло а҆́гг҃лъ вкꙋ́пѣ. и҆ человѣ̑къ, и҆ нѣ́сть сре́днее ничто́же междꙋ̀ є҆ди́нымъ и҆ дрꙋги́мъ є҆стество́мъ є҆ли́кѡ къ моли́твѣ. Сїѧ̀ тѧ̀ раздѣлѧ́етъ ѿ безслове́сныхъ, сїѧ̀ тѧ̀ совокꙋплѧ́етъ а҆́гг҃лѡмъ. И҆ ско́рѡ всѧ́къ пресели́тсѧ въ жи́тельство ѻ҆́нѣхъ, въ житїе́ же и҆ пребыва́нїе, и҆ че́сть, и҆ благоро́дїе, и҆ премꙋ́дрость, и҆ ра́зꙋмъ, тща́йсѧ ᲂу҆пражнѧ́тисѧ во все́мъ житїѝ въ моли́твахъ и҆ слꙋ́жбѣ бж҃їи. Є҆щѐ: є҆гда̀ ᲂу҆ви́дитъ дїа́волъ дꙋ́шꙋ ѡ҆гражде́ннꙋ добродѣ́тельми, не смѣ́етъ прїитѝ близ̾ є҆ѧ̀, боѧ́сѧ крѣ́пости и҆ си́лы, ю҆́же подаю́тъ моли̑твы, мно́жае пита́юще дꙋ́шꙋ, не́жели тѣ́ло бра̑шна. Є҆щѐ: жи̑лы дꙋшє́вныѧ сꙋ́ть мл҃твы: ꙗ҆́коже бо тѣ́ло жи́лами соде́ржитсѧ, и҆ вкꙋ́пѣ дви́житсѧ, и҆ стои́тъ, и҆ живе́тъ, и҆ ᲂу҆твержде́нно є҆́сть: а҆́ще же сїѧ̑ кто̀ и҆зсѣче́тъ, всѐ составле́нїе тѣлесѐ разрꙋша́етъ: та́кѡ и҆ дꙋ́шы ст҃ы́ми моли́твами ᲂу҆твержда́ютсѧ и҆ стоѧ́тъ, и҆ по́двигомъ благоче́стїѧ ᲂу҆до́бь текꙋ́тъ. А҆́ще же мл҃твы лиши́ши себѐ, то́жде твори́ши, ꙗ҆́коже бы ры́бꙋ и҆з̾ воды̀ и҆зне́слъ є҆сѝ. Ꙗ҆́коже бо ѻ҆́нѣй живо́тъ є҆́сть вода̀, та́кѡ тебѣ̀ моли́тва. Се́ю мо́щно є҆́сть сквозѣ̀ воздꙋ́хъ, ꙗ҆́кѡ сквозѣ̀ во́дꙋ, возлетѣ́ти, и҆ на небеса̀ взы́ти, и҆ близ̾ бг҃а бы́ти. Є҆щѐ: моли́тва и҆ моле́нїе хра́мы бж҃їѧ, человѣ́ки содѣ́ловаетъ. И҆ ꙗ҆́коже зла́то и҆ ка́мєнїѧ многоцѣ́нны и҆ ма́рмари творѧ́тъ до́мы ца̑рскїѧ, та́кѡ и҆ мл҃тва человѣ́ки, хра́мы хрⷭ҇тѡ́вы. Ка́ѧ ᲂу҆́бѡ могла́ бы бы́ти бо́льша похвала̀ моли́твы, то́чно ꙗ҆́кѡ хра́мы содѣ́ловаетъ бж҃їѧ, и҆ є҆го́же не вмѣща́ютъ небеса̀, се́й въ дꙋ́шꙋ вхо́дитъ живꙋ́щꙋю въ моли́твахъ. Є҆щѐ: и҆ ѿѻнꙋ́дꙋ возмо́жетъ всѧ́къ ᲂу҆вѣ́дѣти си́лꙋ ст҃ы́хъ моли́твъ, ꙗ҆́кѡ па́ѵелъ сквозѣ̀ всю̀ вселе́ннꙋю, ꙗ҆́кѡ крыла́тъ текі́й, и҆ во ᲂу҆зи́лищи живѧ́й, и҆ бїє́нїѧ терпѧ̀, и҆ носѧ̀ вери́гꙋ, и҆ живѧ́й въ кро́ви и҆ бѣда́хъ, и҆ бѣ́сы и҆згонѧ́ѧ, и҆ ме́ртвыхъ воскреша́ѧ, и҆ ᲂу҆толѧ́ѧ недꙋ́ги, ни на є҆ди́но ѿ си́хъ надѣ́ѧсѧ ѡ҆ спасе́нїи человѣ̑къ, но моли́твами ѡ҆гражда́ше дꙋ́шꙋ, и҆ по зна́менїихъ и҆ воскреше́нїи ме́ртвыхъ, на моли̑твы теча́ше, ꙗ҆́коже нѣ́кїй подви́жникъ на борьбꙋ̀ вѣнца̀. И҆́бо и҆ воскреше́нїѧ ме́ртвыхъ, и҆ и҆ны́хъ всѣ́хъ моли́тва бѣ̀ пода́тельница. Ю҆́же бо въ древесѣ́хъ крѣ́пость и҆́мꙋтъ во́ды, сїю̀ въ житїѝ ст҃ы́хъ, моли̑твы. Є҆щѐ: моли́тва є҆́сть вина̀ спасе́нїѧ, безсме́ртїѧ вино́вна, це́ркве стѣна̀ тверда̀, стражби́ще некра́домо, стра́шное бѣсовѡ́мъ, спаси́тельное же на́мъ благочести̑вымъ. Є҆щѐ: ꙗ҆́коже нѣ́коей цари́цѣ вше́дшей въ нѣ́кїй гра́дъ, всѧ́комꙋ бога́тствꙋ спослѣ́довати до́лжно: та́кѡ ᲂу҆́бѡ и҆ моли́твѣ въ дꙋ́шꙋ вше́дшей, всѧ́ка добродѣ́тель совхо́дитъ. Є҆щѐ: є҆́же є҆́сть ѡ҆снова́нїе въ домꙋ̀, сїѐ въ дꙋшѝ моли́тва: и҆ подоба́етъ сїю̀ пе́рвꙋю, ꙗ҆́коже ѡ҆снова́нїе и҆ ко́рень въ дꙋшѝ водрꙋзи́вшымъ, приназида́ти тща́тельнѣ и҆ цѣломꙋ́дрїе, и҆ промышле́нїе ѡ҆ ни́щихъ, и҆ всѧ̑ зако́ны хрⷭ҇тѡ́вы. Є҆щѐ: свѣ́тъ ᲂу҆ма̀ и҆ дꙋшѝ є҆́сть моли́тва, ꙗ҆́же со тща́нїемъ, свѣ́тъ неꙋгаси́мь и҆ всегда́шнїй. Сегѡ̀ ра́ди безчи́слєнныѧ пле́велы помыслѡ́въ вме́щетъ въ помышлє́нїѧ на̑ша лꙋка́вый, и҆ ꙗ҆̀же никогда́же помы́слихомъ, сїѧ̑ собира́ѧ во вре́мѧ моли́твы, лїе́тъ на дꙋ́шꙋ на́шꙋ. Є҆щѐ: вели́ко ѻ҆рꙋ́жїе є҆́сть моли́тва, вели́ко ᲂу҆твержде́нїе. И҆ бг҃осло́въ: подоба́етъ помина́ти бг҃а мно́жае, не́жели возды́шествовати. И҆ па́ки: частѣ́е помышлѧ́й бг҃а, не́жели возды́ши. И҆ ст҃ы́й і҆саа́къ: без̾ моли́твы непреста́нныѧ прибли́житисѧ къ бг҃ꙋ не мо́жеши, и҆ по трꙋдѣ̀ моли́твеннѣмъ сотвори́ти ᲂу҆мꙋ̀ и҆́но попече́нїе, расточе́нїе мы́сли содѣ́ловаетъ. И҆: всѧ́ка моли́тва, въ не́йже не ᲂу҆трꙋди́тсѧ тѣ́ло, и҆ въ не́йже не ᲂу҆тѣсни́тсѧ се́рдце, и҆́звергъ вмѣнѧ́етсѧ: без̾ дꙋши́ бо є҆́сть ѻ҆́наѧ моли́тва (ѿ к҃и степе́ни). И҆ лѣ́ствичникъ: моли́тва є҆́сть, по ка́чествꙋ своемꙋ̀, сопребыва́нїе и҆ соедине́нїе человѣ́ка съ бг҃омъ: по дѣ́йствꙋ же, мі́ра состоѧ́нїе, бж҃їе примире́нїе, сле́зъ ма́ти и҆ па́ки дще́рь, грѣхѡ́въ ѡ҆чище́нїе, и҆скꙋше́нїй мо́стъ, скорбе́й средостѣ́нїе, бра́ней сокрꙋше́нїе, а҆́гг҃льское дѣ́ло, безпло́тныхъ всѣ́хъ пи́ща, бꙋ́дꙋщее весе́лїе, безконе́чное дѣ́ланїе, добродѣ́телей и҆сто́чникъ, дарова́нїй вина̀, пред̾ꙋспѣ́ѧнїе неви́димое, пи́ща дꙋшѝ, ᲂу҆ма̀ просвѣще́нїе, ѿча́ѧнїю сѣки́ра, ᲂу҆пова́нїѧ ᲂу҆твержде́нїе, печа́ли и҆збавле́нїе, бога́тство и҆́нокѡвъ, безмо́лвникѡвъ сокро́вище, ꙗ҆́рости ᲂу҆мале́нїе, зерца́ло пред̾ꙋспѣ́ѧнїѧ, ᲂу҆мѣ́ренности ꙗ҆вле́нїе, ᲂу҆строе́нїѧ показа́нїе, бꙋ́дꙋщихъ ѿкрове́нїе, сла́вы зна́менїе. Моли́тва є҆́сть и҆́стиннѡ молѧ́щемꙋсѧ сꙋди́лище и҆ и҆стѧза́лище, и҆ сꙋди́ще гдⷭ҇не пре́жде бꙋ́дꙋщагѡ сꙋди́ща, и҆ па́ки: ничто́же и҆́но є҆́сть моли́тва, ра́звѣ то́чїю мі́ра ви́димагѡ и҆ неви́димагѡ ѿчꙋжде́нїе. И҆ ст҃ы́й ні́лъ: а҆́ще помоли́тисѧ жела́еши, ѿреки́сѧ всѣ́хъ, да всѐ наслѣ́диши. Є҆щѐ: моли́тва є҆́сть восхожде́нїе ᲂу҆ма̀ ко бг҃ꙋ. Є҆щѐ: моли́тва є҆́сть бесѣ́да ᲂу҆ма̀ ко бг҃ꙋ. Є҆щѐ: ꙗ҆́коже хлѣ́бъ пи́ща є҆́сть тѣлесѝ, и҆ добродѣ́тель дꙋшѝ: си́це и҆ дꙋхо́внаѧ моли́тва пи́ща є҆́сть ᲂу҆мꙋ̀. И҆ сїѧ̑ ᲂу҆́бѡ си́це и҆зложи́хомъ. Благовре́менно же є҆́сть ны́нѣ и҆ ѡ҆ тѣле́снѣмъ ᲂу҆ставопи́щїи, по мѣ́рѣ, коли́чествꙋ и҆ ка́чествꙋ сегѡ̀, и҆зложи́ти вкра́тцѣ по си́лѣ.

Глава̀ л҃.

(Ѡ҆ тѣле́снѣмъ ᲂу҆ставопи́щїи, си́рѣчь ка́кѡ безмо́лвствꙋющемꙋ подоба́етъ пита́тисѧ. )

Пи́сано є҆́сть: сы́не человѣ́чь, вѣ́сомъ хлѣ́бъ тво́й снѣ́си, и҆ во́дꙋ мѣ́рою пи́ти бꙋ́деши.⁴⁸⁶ Ꙗ҆́кѡ си́ми дово́льнѣ подвиза́ющїйсѧ по бз҃ѣ мо́жетъ прежива́ти. А҆́ще бо не да́си, по глаго́лющемꙋ и҆з̾ ѻ҆тцє́въ, кро́вь, не прїи́меши дх҃а. Глаго́летъ же и҆ вели́кїй па́ѵелъ: ᲂу҆мерщвлѧ́ю тѣ́ло моѐ и҆ порабоща́ю, да не ка́кѡ и҆ны̑мъ проповѣ́дꙋѧ, са́мъ неключи́мь бꙋ́дꙋ.⁴⁸⁷ И҆ бж҃е́ственный даві́дъ: кѡлѣ́на моѧ̑ и҆знемого́ста ѿ поста̀, и҆ пло́ть моѧ̀ и҆змѣни́сѧ є҆ле́а ра́ди.⁴⁸⁸ И҆ бг҃осло́въ: ничи́мже та́кѡ ѿ всѣ́хъ, ꙗ҆́кѡ ѕлострада́нїемъ бг҃ъ почита́емь быва́етъ, и҆ слеза́мъ человѣколю́бїе воздае́тсѧ. И҆ ст҃ы́й і҆саа́къ: Ꙗ҆́коже ма́ти пече́тсѧ ѡ҆ ча́дѣ: та́кѡ и҆ хрⷭ҇то́съ пече́тсѧ ѡ҆ тѣ́лѣ ѕлостра́ждꙋщагѡ, и҆ близ̾ є҆́сть тѣлесѝ є҆гѡ̀ вы́нꙋ. И҆ па́ки: во чре́вѣ насыще́ннѣ, ра́зꙋма та̑инъ бж҃їихъ нѣ́сть (ѿ н҃и сло́ва). И҆ ꙗ҆́коже послѣ́дꙋютъ слеза́ми сѣ́ющымъ рꙋкоѧ̑ти ра́дованїѧ: та́кѡ послѣ́дꙋетъ ра́дость бг҃а ра́ди ѕлострада́нїю. И҆: блаже́нъ загради́вый себѐ ѿ всѧ́кагѡ сладостра́стїѧ, разлꙋча́ющагѡ є҆гѡ̀ ѿ созда́вшагѡ и҆̀ (ѿ нача́ла ѻ҃є сло́ва). И҆ па́ки: во мно́зѣ вре́мени и҆скꙋша́емь десны́ми и҆ шꙋ́їими, и҆ са́мъ себѐ и҆скꙋси́въ двѣма̀ си́ма ѡ҆́бразы мно́жицею, и҆ прїе́мь ѿ сопроти́вныхъ ра̑ны безчи́слєнны, и҆ сподо́бивсѧ вели́кихъ застꙋпле́нїй сокрове́ннѡ, прїѧ́хъ въ себѣ̀ и҆скꙋ́съ ѿ до́лгихъ лѣ́тъ вре́мени, и҆ и҆скꙋ́сомъ и҆ благода́тїю бж҃їею сїѧ̑ ᲂу҆разꙋмѣ́хъ, ꙗ҆́кѡ ѡ҆снова́нїе всѣ́хъ благи́хъ, и҆ воззва́нїе дꙋшѝ ѿ плѣне́нїѧ вра́жїѧ, и҆ пꙋ́ть къ свѣ́тꙋ ѻ҆́номꙋ и҆ животꙋ̀ ведꙋ́щїй, сꙋ́ть два̀ ѡ҆́браза: є҆́же собра́ти себѐ во є҆ди́но мѣ́сто, и҆ є҆́же при́снѡ пости́тисѧ, си́рѣчь, пра́вило ᲂу҆ста́вити себѣ̀ въ воздержа́нїи чре́ва премꙋ́дрѣ и҆ разꙋ́мнѣ, въ недви́жнѣ сѣда́лищи и҆ непреста́ннѣ ᲂу҆пражне́нїи, и҆ поꙋче́нїи бж҃їи. Ѿсю́дꙋ быва́етъ повинове́нїе чꙋ́вствъ, ѿсю́дꙋ трезвѣ́нїе ᲂу҆ма̀, ѿсю́дꙋ свирѣ̑пыѧ стра̑сти ᲂу҆кроща́ютсѧ, дви̑жимыѧ въ тѣлесѝ, ѿсю́дꙋ кро́тость помыслѡ́въ, ѿсю́дꙋ свѣ̑тлаѧ мы́сли движє́нїѧ, ѿсю́дꙋ тща́нїе къ бж҃е́ствєннымъ дѣлѡ́мъ добродѣ́тели, ѿсю́дꙋ высѡ́каѧ разꙋмѣ̑нїѧ и҆ тѡ́нкаѧ, ѿсю́дꙋ безмѣ̑рныѧ сле́зы, во всѧ́ко вре́мѧ быва́ющыѧ, и҆ сме́рти па́мѧть, ѿсю́дꙋ цѣломꙋ́дрїе ѻ҆́но чи́стое, соверше́ннѣ ѿстоѧ́щее ѿ всѧ́кагѡ мечта́нїѧ и҆скꙋша́ющагѡ мы́сль, ѿсю́дꙋ быстрозрѣ́нїе, и҆ ѻ҆строта̀ ᲂу҆разꙋмѣ́нїѧ дале́че сꙋ́щихъ, ѿсю́дꙋ глꙋбоча̑йшаѧ та́инствєннаѧ разꙋмѣ̑нїѧ, ꙗ҆̀же мы́сль постиза́етъ си́лою бж҃е́ственныхъ слове́съ, и҆ внꙋ́трєннѣйшаѧ движє́нїѧ быва̑ющаѧ въ дꙋшѝ, и҆ разли́чїе, и҆ разсꙋжде́нїе дꙋхѡ́въ ѿ ст҃ы́хъ си́лъ, и҆ и҆́стинныхъ зрѣ́нїй ѿ сꙋ́етныхъ мечта́нїй. Ѿсю́дꙋ стра́хъ ѻ҆́нъ пꙋте́й и҆ стє́зь, и҆́же въ пꙋчи́нѣ мы́сли, ѿсѣца́ющїй ᲂу҆ны́нїе и҆ нерадѣ́нїе, и҆ пла́мень ре́вности, попира́ющїй всѧ́кꙋ бѣдꙋ̀, и҆ преходѧ́щїй всѧ́къ стра́хъ, и҆ горѧ́честь ѻ҆́на презира́ющаѧ всѧ́кꙋ по́хоть, и҆ ѿ мы́сли та̑ и҆зглажда́ющаѧ, и҆ забве́нїе сотворѧ́ющаѧ всѧ́кїѧ па́мѧти преходѧ́щихъ со и҆ны́ми: и҆ да вкра́тцѣ рекꙋ̀, ѿсю́дꙋ свобо́да и҆́стиннагѡ человѣ́ка, и҆ ра́дость дꙋшѝ и҆ воскресе́нїе, и҆ со хрⷭ҇то́мъ ᲂу҆покое́нїе въ ца́рствїи небе́снѣмъ. А҆́ще ли же кто̀ вознеради́тъ ѡ҆ двѡю̀ сею̀: то да вѣ́сть, ꙗ҆́кѡ не то́чїю ѿ всѣ́хъ си́хъ предрече́нныхъ ѿтщетѣва́етъ себѐ, но и҆ ѡ҆снова́нїе всѣ́хъ добродѣ́телей коле́блетъ презрѣ́нїемъ двꙋ́хъ си́хъ добродѣ́телей. И҆ ꙗ҆́коже сꙋ́ть сїѧ̑ нача́ло и҆ глава̀ бж҃е́ственнагѡ дѣ́ланїѧ въ дꙋшѝ, и҆ две́рь и҆ пꙋ́ть ко хрⷭ҇тꙋ̀, а҆́ще кто̀ ᲂу҆держи́тъ ты̑ѧ, и҆ въ ни́хъ прете́рпитъ: та́кѡ а҆́ще кто̀ и҆ ѿи́детъ ѿ ни́хъ, и҆ ѿско́читъ ѿ ни́хъ, къ си́ма двѣма̀ сопроти́вныма си̑мъ достиза́етъ: глаго́лю же, є҆́же пари́ти тѣ́ломъ, и҆ чревобѣси́тисѧ беззако́ннѡ, и҆ прѡ́чаѧ. И҆ во и҆ны́хъ: (ст҃а́гѡ і҆саа́ка ѿ ѯ҃ сло́ва) и҆ и҆̀же ᲂу҆̀бо въ нача́лѣхъ свои́хъ ᲂу҆ны́ли и҆ сла́би сꙋ́ть, не то́кмѡ ѿ пѡ́двигъ си́хъ и҆ таковы́хъ, но и҆ ѿ шꙋ́ма ли́ствїѧ древе́снагѡ страша́тсѧ и҆ смꙋща́ютсѧ, и҆ ѿ ма́лыѧ нꙋ́жды, ꙗ҆́же ѿ потре́бы гла́да, и҆ ѿ ма́лыѧ не́мощи побѣжда́ютсѧ, и҆ ѿмета́ютсѧ, и҆ вспѧ́ть возвраща́ютсѧ: и҆́стиннїи же и҆ и҆скꙋ́снїи нижѐ ѿ травы̀ ѕе́лїй насыща́ютсѧ, нижѐ пита́ющесѧ коре́ньми бы́лїй сꙋхи́хъ, пре́жде ᲂу҆законе́ннагѡ часа̀ пи́щи прїе́млютъ чесогѡ̀ вкꙋси́ти: но и҆ ни́зꙋ возлега́ютъ, во и҆знеможе́нїи сꙋ́ще и҆ по́двизѣ тѣлесѐ, и҆ тꙋ́пѡ зрѧ́тъ ѻ҆́чи и҆́хъ ѿ ѕѣ́льнагѡ ѡ҆ѕлобле́нїѧ тѣлесѐ: а҆́ще ли же ѿ таковы́ѧ нꙋ́жды прибли́жатсѧ и҆ къ и҆зше́ствїю ѿ тѣ́ла, нижѐ та́кѡ согласꙋ́ютсѧ побѣжде́ни бы́ти, и҆ па́сти ѿ крѣ́пкагѡ и҆́хъ произволе́нїѧ. Вожделѣва́ютъ бо и҆ жела́ютъ, є҆́же понꙋ́дити себѐ любвѝ ра́ди бж҃їѧ, и҆ трꙋди́тисѧ ѡ҆ добродѣ́тели и҆зволѧ́ютъ, не́жели привре́меннꙋю жи́знь и҆мѣ́ти, и҆ всѧ́кїй поко́й сꙋ́щїй въ не́й. И҆ є҆гда̀ найдꙋ́тъ на ни́хъ и҆скꙋшє́нїѧ, па́че веселѧ́тсѧ, занѐ тѣ́ми соверше́ни быва́ютъ. И҆ нижѐ ѿ ѕлострада́тельныхъ трꙋдѡ́въ, быва́ющихъ въ ни́хъ, сꙋмнѣва́ютсѧ въ любвѝ бж҃їей: но до́ндеже ѿи́дꙋтъ ѿ жи́зни, ᲂу҆се́рдствꙋютъ до́блественнѣ прїѧ́ти стꙋжє́нїѧ, и҆ не ѿстꙋпа́ютъ, занѐ тѣ́ми соверше́ни быва́ютъ. Въ си́хъ и҆ таковы́хъ ᲂу҆̀бо и҆ мы̀ ходѧ́ще, є҆ще́ же и҆ повелѣва́ющемꙋ, пꙋте́мъ ца́рскимъ ходѝ, да не ᲂу҆клонѧ́ешисѧ на де́сно, и҆лѝ на лѣ́во, повинꙋ́ющесѧ, и҆ ᲂу҆ста́въ и҆злага́емъ тебѣ̀, и҆ пра́вило сре́дства, и҆́же про́чее се́й и҆́мать и҆ предѣ́лъ.

Глава̀ л҃а.

(Ка́кѡ подоба́етъ въ понедѣ́льникъ, сре́дꙋ и҆ пѧто́къ, пита́тисѧ подвиза́ющемꙋсѧ.)

Въ трѝ дни̑ седми́цы, си́рѣчь, понедѣ́льникъ, сре́дꙋ и҆ пѧто́къ, творѝ всегда̀ девѧти́цꙋ, си́рѣчь, ꙗ҆́ждь є҆ди́ною дне́мъ, причаща́ѧсѧ хлѣ́ба ѻ҆́нгїй ше́сть [трѝ ѻ҆смꙋ́хи фꙋ́нта] и҆ ѿ сꙋхі́ѧ пи́щи съ воздержа́нїемъ ѿ дово́льства, и҆ воды̀ до трїе́хъ и҆лѝ четыре́хъ ча́шъ, а҆́ще хо́щеши, послѣ́дꙋѧ шестьдесѧ́тъ девѧ́томꙋ пра́вилꙋ ст҃ы́хъ а҆по́стѡлъ, ᲂу҆законѧ́ющемꙋ: а҆́ще кото́рый є҆пⷭ҇кпъ и҆лѝ пресвѵ́теръ, и҆лѝ дїа́конъ, и҆лѝ чте́цъ и҆ пѣве́цъ, ст҃ꙋ́ю четыредесѧ́тницꙋ па́схи не пости́тсѧ, и҆лѝ сре́дꙋ и҆ пѧто́къ, да и҆зверга́етсѧ, ра́звѣ а҆́ще бы не́мощїю тѣле́сною возбранѧ́емь бы́лъ. А҆́ще же простолюди́нъ бꙋ́детъ, да ѿлꙋча́етсѧ (пра́вило ст҃ы́хъ а҆по́стѡлъ ѯ҃ѳ). Понедѣ́льникъ же по́слѣжде бж҃е́ственными ѻ҆тцы̀ пра́вильнѣ ᲂу҆ста́висѧ.

Глава̀ л҃в.

(Ка́кѡ подоба́етъ пита́тисѧ во вто́рникъ и҆ четверто́къ.)

Въ два́ же па́ки дни̑, си́рѣчь, во вто́рникъ и҆ четверто́къ, два́жды ꙗ҆́ждь дне́мъ: во вре́мѧ ᲂу҆́бѡ ѻ҆бѣ́да пита́ѧсѧ ѿ хлѣ́ба шестьмѝ ѻ҆́нгїѧми, ѿ варе́нїѧ съ воздержа́нїемъ, и҆ ничесогѡ̀ ѿ сꙋхі́ѧ пи́щи причаща́ѧсѧ, и҆ вїна̀ смѣ́шена съ водо́ю а҆́ще тре́бꙋеши, до трїе́хъ ча́шъ и҆лѝ четыре́хъ: въ ве́черъ же вкꙋша́ѧ хлѣ́ба ѻ҆́нгїй трѝ, и҆ ничесогѡ̀ ѿ сꙋхі́ѧ пи́щи, и҆лѝ нѣ́коегѡ ѻ҆во́щїѧ, вїна́ же съ водо́ю є҆ди́нꙋ ча́шꙋ, и҆лѝ мно́гѡ двѣ̀, жа́ждѣ мно́зѣй ѡ҆держа́щей тѧ̀. Ѕѣлѡ́ бо содѣ́йствꙋетъ жа́жда и҆ во слеза́хъ, сожи́телѧ и҆мꙋ́ща и҆ бдѣ́нїе, ꙗ҆́коже глаго́летъ лѣ́ствичникъ: жа́жда и҆ бдѣ́нїе согнѣто́ша се́рдце, се́рдцꙋ же ᲂу҆гнѣте́нꙋ бы́вшꙋ, и҆стеко́ша во́ды. И҆ ст҃ы́й і҆саа́къ: бг҃а ра́ди вжа́жди, да тѧ̀ напо́лнитъ любвѐ своеѧ̀. А҆́ще же и҆ во два̀ сїѧ̀ дни̑ произволѧ́еши є҆ди́ною ꙗ҆́сти, добрѣ́йше содѣ́еши. Поне́же воздержа́нїе є҆́сть пе́рвое, ма́ти, и҆ ко́рень, и҆ и҆сто́чникъ, и҆ ѡ҆снова́нїе всѣ́хъ до́брыхъ. Глаго́летъ же нѣ́кто и҆ ѿ внѣ́шнихъ: и҆зберѝ житїѐ добрѣ́йше, сла́дкимъ же ѻ҆́ное навыкнове́нїе сотвори́тъ. И҆ вели́кїй васі́лїй: и҆дѣ́же є҆́сть произволе́нїе, та́мѡ возбранѧ́ющее ничто́же є҆́сть. И҆ и҆́нъ ѿ бг҃оно́сныхъ: нача́ло плодоно́сїѧ цвѣ́тъ, и҆ нача́ло дѣ́ѧтельныѧ добродѣ́тели воздержа́нїе. Но сїѧ̑ ᲂу҆́бѡ, мо́жетъ бы́ть, и҆ си̑мъ послѣ̑дꙋющаѧ возмнѧ́тсѧ нѣ̑кїимъ неꙋдѡ́бна, є҆ще́ же, мо́жетъ бы́ть, и҆ невозмѡ́жна. Разсмотрѣва́ѧй же процвѣта́ющее ѿ си́хъ припло́дїе, и҆ ко́ль вели́кꙋ сла́вꙋ и҆зражда́ти ѡ҆быко́ша, взира́ѧй, ᲂу҆дѡ́бна сїѧ̑ сꙋди́ти и҆́мать, и҆ по́мощїю гдⷭ҇а на́шегѡ і҆и҃са хрⷭ҇та̀, и҆ свои́мъ по си́лѣ тща́нїемъ, ᲂу҆дѡ́бнѣйша и҆ словесы̑ и҆ дѣ́лы проповѣ́сть, и҆ ᲂу҆твержде́нїе си́хъ запечатлѣ́ти и҆́мать. Глаго́летъ бо ст҃ы́й і҆саа́къ: хлѣ́бъ просты́й ѿ трапе́зы чи́стагѡ, ѡ҆чища́етъ дꙋ́шꙋ ꙗ҆дꙋ́щагѡ ѿ всѧ́кїѧ стра́сти: и҆ ѿ трапе́зы постѧ́щихсѧ и҆ бдѧ́щихъ и҆ трꙋдѧ́щихсѧ ѡ҆ гдⷭ҇ѣ, прїимѝ себѣ̀ врачьбꙋ̀ жи́зни, и҆ воздви́гни дꙋшѝ твоеѧ̀ ᲂу҆мерщвле́нїе: занѐ возлю́бленный возлежѐ посредѣ̀ и҆́хъ, ѡ҆свѧща́ѧ бра̑шна, и҆ го́ресть ѡ҆ѕлобле́нїѧ и҆́хъ прелага́етъ въ сла́дость свою̀ неисповѣди́мꙋю, дꙋхо́внїи же и҆ небе́снїи слꙋжи́тели є҆гѡ̀ ѡ҆сѣнѧ́ютъ и҆̀хъ (ѿ и҃ сло́ва). И҆, бра̑шна и҆́хъ свѧ̑та, и҆ вонѧ̀ подви́жника сладча́йша, и҆ срѣ́тенїе є҆гѡ̀ весели́тъ сердца̀ разсꙋди́тельныхъ. И҆, прелюбе́зно бг҃ꙋ пребыва́нїе возде́ржника.

Глава̀ л҃г.

(Ка́кѡ подоба́етъ пита́тисѧ въ сꙋббѡ́тꙋ, и҆ ѡ҆ бдѣ́нїихъ, и҆ ка́кѡ подоба́етъ ꙗ҆́сти во вре́мѧ ѻ҆́ныхъ. )

Во всѧ́кꙋю же сꙋббѡ́тꙋ, кромѣ̀ вели́кїѧ, подоба́етъ тѝ два́жды ꙗ҆́сти, ꙗ҆́коже пред̾ꙋста́висѧ во вто́рникъ и҆ четверто́къ, и҆ по предѣ́лꙋ свѧще́нныхъ пра̑вилъ, и҆ занѐ подоба́етъ тебѣ̀ во всѣ́хъ всегѡ̀ лѣ́та недѣ́лѧхъ, кромѣ̀ сы́рныѧ, и҆мѣ́ти бдѣ̑нїѧ. А҆́ще ли прилꙋча́етсѧ нѣ́кое бдѣ́нїе влⷣчнихъ вели́кихъ пра̑здникъ, и҆лѝ нѣ́коегѡ ѿ вели́кихъ ст҃ы́хъ, да сотвори́въ ѻ҆́но, ѡ҆ста́виши недѣ́льное. Ѻ҆ба́че а҆́ще и҆ си́це є҆́сть, два́жды ꙗ҆́ждь въ сꙋббѡ́ты. Поле́зно же є҆́сть при́снѡ понꙋжда́тисѧ тебѣ̀ на дѣ́ланїе нощна́гѡ бдѣ́нїѧ. Тѣ́мже и҆ съ наше́дшимъ по слꙋ́чаю междꙋ̀ седми́цею бдѣ́нїемъ, поле́знѣйше тѝ є҆́сть, твори́ти и҆ недѣ́льное, и҆ ве́лїе тебѣ̀ прїѡбрѣ́тенїе послѣ́довати и҆́мать скорѣ́йше: па́че же си́це разве́рзетсѧ ра́нѡ свѣ́тъ тво́й, по рече́нномꙋ, и҆ и҆сцѣлє́нїѧ твоѧ̑ ско́рѡ возсїѧ́ютъ.⁴⁸⁹ Глаго́летъ же и҆ ст҃ы́й і҆саа́къ: коемꙋ́ждо по́двигꙋ проти́вꙋ грѣха̀ и҆ по́хоти, нача́ло є҆́сть трꙋ́дъ бдѣ́нїѧ и҆ поста̀, и҆ па́че же противоподвиза́ющемꙋсѧ къ сꙋ́щемꙋ внꙋ́трь на́съ грѣхꙋ̀. И҆ зна́менїе не́нависти грѣха̀ и҆ по́хоти є҆гѡ̀ ѿ сегѡ̀ зри́тсѧ въ сопротивоподвиза́ющихсѧ къ неви́димой ра́ти се́й: и҆ всѣ̀ почтѝ прило́ги страсте́й ᲂу҆меньша́тисѧ посто́мъ начина́ютъ. И҆ посе́мъ бдѣ́нїе нощно́е споспѣшествꙋ́етъ къ по́двигꙋ. И҆́же во все́мъ животѣ̀ свое́мъ сочета́нїе сꙋпрꙋ́жества сегѡ̀ лю́битъ, се́й дрꙋ́гъ цѣломꙋ́дрїю быва́етъ. Ꙗ҆́коже поко́й чре́ва нача́ло всѣ́хъ ѕѡ́лъ, и҆ разслабле́нїе сна̀ возжиза́ющее по́хоть блꙋда̀: та́кѡ по́стъ и҆ бдѣ́нїе и҆ бо́дрость въ слꙋ́жбѣ бж҃їей, є҆́сть пꙋ́ть бж҃їй ст҃ы́й, и҆ всѧ́кїѧ добродѣ́тели ѡ҆снова́нїе. И҆ па́ки: дꙋшѣ̀ ѡ҆блиста́вшейсѧ па́мѧтїю бж҃їею, и҆ неꙋсы́пнымъ бдѣ́нїемъ но́щь и҆ де́нь, та́мѡ созида́етъ гдⷭ҇ь на тве́рди є҆ѧ̀ ѻ҆́блакъ покрыва́ющъ ю҆̀ во днѝ, и҆ свѣ́томъ ѻ҆́гненнымъ ѡ҆зари́тъ но́щь, и҆ и҆звнꙋ́трь мра́ка є҆ѧ̀ свѣ́тъ возсїѧ́етъ. Є҆щѐ: и҆зберѝ себѣ̀ дѣ́ланїе наслажде́нїѧ бдѣ́нїе всегда́шнее, є҆́же въ ноще́хъ, и҆́мже совлеко́шасѧ всѝ ѻ҆тцы̀ ве́тхагѡ человѣ́ка, и҆ сподо́бишасѧ ѡ҆бновле́нїѧ ᲂу҆ма̀. Въ часѣ́хъ си́хъ ѡ҆щꙋща́етъ дꙋша̀ живо́тъ ѻ҆́ный безсме́ртный, и҆ во ѡ҆щꙋще́нїи ѻ҆́нагѡ совлека́етсѧ тьмы̀ страсте́й, и҆ прїе́млетъ дх҃а ст҃а́го. И҆ па́ки: почтѝ дѣ́ланїе бдѣ́нїѧ, да ѡ҆брѧ́щеши ᲂу҆тѣше́нїе въ дꙋшѝ твое́й. Є҆щѐ: да не возмни́ши, ѽ человѣ́че, ꙗ҆́кѡ во всѧ́комъ дѣ́ланїи и҆́ночестѣмъ є҆́сть нѣ́кое пребыва́нїе бо́льше нощна́гѡ бдѣ́нїѧ. И҆ и҆́нока пребыва́юща во бдѣ́нїи, съ разсꙋжде́нїемъ ᲂу҆ма̀, сегѡ̀ да не зри́ши ꙗ҆́кѡ плотоно́сна: чи́на бо а҆́гг҃льскагѡ, ꙗ҆́кѡ вои́стиннꙋ є҆́сть дѣ́ло сїѐ. Є҆щѐ: дꙋша̀, въ се́мъ а҆́гг҃льстѣмъ пребыва́нїи бдѣ́нїѧ трꙋдѧ́щаѧсѧ, ѻ҆́чи херꙋві́мстѣ и҆мѣ́ти бꙋ́детъ, є҆́же вы́нꙋ зрѣ́ти и҆ смотрѣ́ти небе́сное видѣ́нїе. Сїѧ̑ же, си́рѣчь, бдѣ̑нїѧ да соверша́еши въ моли́твѣ, пѣ́нїи и҆ чте́нїи чи́стѣ и҆ непари́тельнѣ, и҆ со ᲂу҆миле́нїемъ, є҆ди́нъ и҆лѝ съ любе́знымъ и҆ є҆диномы́сленнымъ бра́тствомъ. Твори́ же и҆ по всѧ́комъ бдѣ́нїи твое́мъ ма́лое ᲂу҆тѣше́нїе трꙋда̀ ра́ди, ѿ бдѣ́нїѧ бы́вшагѡ, во бра́шнѣхъ же и҆ питїи́хъ на ве́чери: си́рѣчь, ꙗ҆́ждь хлѣ́бъ ѻ҆́нгїй трѝ, и҆ предложе́нїе нѣ́кое сꙋхопи́щно, є҆ли́кѡ тѝ дово́льно є҆́сть. Пі́й и҆ вїна̀ съ водо́ю ча̑ши трѝ. Зри́ же, да не ка́кѡ въ де́нь девѧти́цы и҆мѣ́ѧ бдѣ́нїе, ра́ди бдѣ́нїѧ мо́жетъ бы́ть разрѣши́ши девѧти́цꙋ. И҆́бо сїѐ подоба́етъ сотвори́ти, и҆ ѻ҆́но не ѡ҆ставлѧ́ти: ᲂу҆тѣше́нїе бо по соверше́нїи бдѣ́нїѧ ᲂу҆ста́ви сло́во сїѐ, твори́ти тебѣ̀.

Глава̀ л҃д.

Ка́кѡ подоба́етъ ꙗ҆́сти въ недѣ̑ли, и҆ ѡ҆ и҆ны́хъ нѣ́кїихъ: є҆ще́ же ѡ҆ трꙋдѣ̀ и҆ смире́нїи.

Подо́бнѣ же и҆ во всѧ̑ недѣ̑ли два́жды ꙗ҆́ждь дне́мъ, ꙗ҆́коже и҆ въ сꙋббѡ́ты. Сїе́ же ᲂу҆становле́нїе си́це цѣ́ло да блюде́тсѧ кромѣ̀ не́мощи, є҆ще́ же и҆ во дни̑ а҆́ки позво́лєнныѧ и҆ разрѣшє́нныѧ бж҃е́ственными ѻ҆тцы̀ ѿ долговре́меннагѡ навыкнове́нїѧ, и҆ нѣ́кихъ новѣ́йшихъ ви́нъ, бж҃е́ственныхъ глаго́лемъ, и҆лѝ и҆ сопроти́вныхъ. Въ сїѧ̑ бо нижѐ є҆ди́ною ꙗ҆́мы, нижѐ сꙋхꙋ́ю пи́щꙋ ꙗ҆́мы, но ѿ всѣ́хъ потре́бныхъ и҆ незазо́рныхъ, ꙗ҆́кѡ ѕе́лїй вкꙋша́емъ, ѻ҆ба́че съ воздержа́нїемъ и҆ со ᲂу҆ста́вленнымъ коли́чествомъ. При́снѡ бо добрѣ́йше є҆́сть, є҆́же во всѣ́хъ воздержава́тисѧ. Въ тѣле́сныхъ же не́мощехъ, ꙗ҆́коже рѣ́хомъ, без̾ стыдѣ́нїѧ подоба́етъ причаща́тисѧ ѿ всѣ́хъ потре́бныхъ и҆ зако́нныхъ составлѧ́ющихъ тѣ́ло: страстоꙋбі́йцами бо, а҆ не тѣлоꙋбі́йцами бы́ти бж҃е́ственнїи ѻ҆тцы̀ наꙋчи́ша ны̀. Та́кожде подоба́етъ тѝ и҆ ѿ всѣ́хъ ᲂу҆ста́вленныхъ, си́рѣчь, є҆ли̑ка позво́лєна сꙋ́ть чи́нꙋ и҆́ноческомꙋ, ма́лѡ вкꙋша́ти во сла́вꙋ и҆ благодаре́нїе бж҃їе, и҆ ра́ди некиче́нїѧ. Ѿвраща́йсѧ же и҆ и҆зли́шнихъ: скꙋ́дость бо веще́й, ꙗ҆́коже глаго́летъ ст҃ы́й і҆саа́къ, ᲂу҆́читъ человѣ́ка воздержа́нїю не хотѧ́ща и҆ неизволѧ́юща. Поне́же є҆гда̀ и҆з̾ѻби́лїе и҆ ѿра́дꙋ прїи́мемъ си́хъ, не мо́жемъ себѐ ᲂу҆держава́ти. Тѣле́сна поко́ѧ да не возлю́биши: дꙋша́ бо лю́бѧщаѧ бг҃а, по преподо́бномꙋ па́ки і҆саа́кꙋ, въ бз҃ѣ є҆ди́номъ поко́й и҆́мать. Па́че же съ трꙋдо́мъ и҆ ѕлострада́нїемъ, и҆ смире́нность и҆збира́й: трꙋ́дъ бо и҆ смире́нїе, пи́шетъ нѣ́кто ѿ ст҃ы́хъ, стѧжава́ютъ і҆и҃са.

Глава̀ л҃є.

(Ка́кѡ подоба́етъ пита́тисѧ и҆ во ст҃ы̑ѧ посты̀, и҆ па́че же въ вели́кїй. )

Ѡ҆ ᲂу҆ставопи́щїи же ра́внѣ и҆ ѡ҆ жи́тельствѣ во ст҃ы̑ѧ посты̀, и҆зли́шно мни́мъ бы́ти, тонкоча́стнѣ и҆ ѻ҆со́бнѣ ска́зовати. Ꙗ҆́коже бо пред̾ѡпредѣли́сѧ соверша́ти тебѣ̀ во дни̑, въ нѧ́же твори́ши девѧти́цы, та́кѡ пра́ведно є҆́сть и҆ во ст҃ы̑ѧ посты̀ дѣ́лати, кромѣ̀ сꙋббѡ́тъ и҆ недѣ́ль. Па́че же, а҆́ще мо́щно є҆́сть, и҆ ѻ҆па́снѣе и҆ тре́звеннѣе: и҆ наипа́че же во ст҃ꙋ́ю и҆ вели́кꙋю четыредесѧ́тницꙋ, ꙗ҆́кѡ ѡ҆десѧ́тствованїе сꙋ́щꙋю всегѡ̀ лѣ́та, и҆ по́чєсти подвигѡ́въ влⷣчнимъ. и҆ бж҃е́ственнымъ и҆ свѣтоно́снымъ дне́мъ, побѣди́телємъ ѡ҆ хрⷭ҇тѣ̀ і҆и҃сѣ подаю́щꙋю.

Глава̀ л҃ѕ.

(Ѡ҆ разсꙋжде́нїи, ꙗ҆́кѡ въ ча́сти, и҆ ꙗ҆́кѡ ᲂу҆мѣ́ренномꙋ дѣ́ланїю цѣны̀ нѣ́сть, и҆ ѡ҆ повинове́нїи. )

Ѻ҆ба́че и҆ сїѧ̑ и҆ си̑мъ подѡ́бнаѧ подоба́етъ проходи́ти тебѣ̀ со ѻ҆па́снымъ разсꙋжде́нїемъ, къ согла́сїю сꙋгꙋ́багѡ живота̀ и҆ ми́рномꙋ ᲂу҆строе́нїю. Съ премꙋ́дростїю бо, глаго́летъ, зи́ждетсѧ до́мъ, и҆ съ ра́зꙋмомъ и҆сполнѧ́ютсѧ сокрѡ́вища ѿ всѧ́кагѡ бога́тства честна́гѡ и҆ до́брагѡ.⁴⁹⁰ Пи́шетъ же и҆ бж҃е́ственный ѳала́ссїй: благоразсꙋ́днаѧ съ ра́зꙋмомъ скꙋ́дость и҆ тѣснота̀, є҆́сть ца́рскїй пꙋ́ть: тѣ́мже безразсꙋ́дное ᲂу҆дрꙋче́нїе и҆лѝ безслове́сное снисхожде́нїе безполє́зна сꙋ́ть, ꙗ҆́кѡ ѻ҆боѧ̑ внѣ̀ ра́зꙋма быва́ютъ. И҆ преподо́бный і҆саа́къ: послѣ́дꙋетъ ѡ҆сла́бѣ ᲂу҆де́съ по́мыслѡвъ и҆зстꙋпле́нїе и҆ смѣше́нїе, и҆ безмѣ́рномꙋ дѣ́ланїю ᲂу҆ны́нїе, и҆ ᲂу҆ны́нїю и҆зстꙋпле́нїе. Ра́знствꙋетъ же и҆зстꙋпле́нїе ѿ и҆зстꙋпле́нїѧ: занѐ пе́рвомꙋ и҆зстꙋпле́нїю послѣ́дꙋетъ бра́нь блꙋда̀. Второ́мꙋ же своегѡ̀ безмо́лвїѧ ѡ҆ставле́нїе, и҆ ѿ мѣ́ста на мѣ́сто прехожде́нїе: ᲂу҆мѣ́ренномꙋ же и҆ притрꙋ́днѣ пребыва́ющемꙋ дѣ́ланїю цѣны̀ нѣ́сть. Си́хъ же ᲂу҆меньше́нїе ᲂу҆множа́етъ сла́сть: безмѣ́рїе же, и҆зстꙋпле́нїе (ѿ ѻ҃а сло́ва). И҆ вели́кїй маѯі́мъ: не всѐ попече́нїе твоѐ ѡ҆ пло́ти и҆мѣ́й, но ѡ҆предѣлѝ є҆́й по си́лѣ ѡ҆бꙋче́нїе. и҆ ве́сь ᲂу҆́мъ на внꙋ́трєннѧѧ преложѝ (д҃ со́тни ѯ҃г глава̀). Тѣле́сное бо ѡ҆бꙋче́нїе вма́лѣ є҆́сть поле́зно, а҆ благоче́стїе на всѐ, и҆ прѡ́чаѧ.⁴⁹¹ А҆́ще же нѣ́какѡ ча́шица вѣсова́ѧ пло́ти противовлече́тъ и҆ мꙋчи́тельствꙋетъ, и҆ ѡ҆тѧгчава́етъ ча́шицꙋ дꙋше́внꙋю, къ преклоне́нїѧмъ и҆ движе́нїѧмъ безчи̑ннымъ и҆ дꙋшетли́тєльнымъ низвлека́ющи, ꙗ҆́коже пи́сано є҆́сть: пло́ть похотствꙋ́етъ на дꙋ́ха, дꙋ́хъ же на пло́ть:⁴⁹² ѻ҆ба́че ты̀ се́ю броздо́ю воздержа́нїѧ ѡ҆бꙋзда́въ, ᲂу҆мертвѝ, доне́лѣже и҆ не хотѧ́щи ᲂу҆добоꙋправлѧ́ема бꙋ́детъ, и҆ повине́тсѧ лꙋ́чшемꙋ, помѧнꙋ́въ вели́кагѡ па́ѵла глаго́лющаго: є҆ли́кѡ внѣ́шнїй на́шъ человѣ́къ тлѣ́етъ, толи́кѡ внꙋ́треннїй ѡ҆бновлѧ́етсѧ по всѧ̑ дни̑.⁴⁹³ И҆ ст҃а́го і҆саа́ка: дава́й са́мъ себѣ̀ ᲂу҆мре́ти въ по́двизѣхъ, а҆ не жи́ти въ нерадѣ́нїи. Не то́чїю бо за вѣ́рꙋ, ꙗ҆́же во хрⷭ҇та̀, прїе́мшїи сме́рть, сꙋ́ть мꙋ́чєницы, но и҆ за соблюде́нїе за́повѣдей є҆гѡ̀ ᲂу҆мира́ющїи. И҆, лꙋ́чше є҆́сть на́мъ сме́рть въ по́двизѣ, не́жели пожи́ти въ прегрѣше́нїи. И҆, пре́жде же всѣ́хъ съ совѣ́томъ и҆ вопроше́нїемъ творѝ всѧ̑ дꙋхо́внагѡ твоегѡ̀ ѻ҆тца̀ ѡ҆ гдⷭ҇ѣ: та́кѡ бо хрⷭ҇то́вою благода́тїю и҆ тѧжелонѡ́снаѧ и҆ горѣнѡ́снаѧ, лє́гка, и҆ ꙗ҆́кѡ по до́лꙋ простира́ющемꙋсѧ по́лю возмнѧ́тсѧ тѝ носи́тисѧ. Но возврати́тисѧ подоба́етъ, ѿѻнꙋ́дꙋже и҆з̾идо́хомъ.

Глава̀ л҃з.

(Ка́кѡ подоба́етъ подвиза́ющемꙋсѧ преходи́ти, по вкꙋше́нїи, разстоѧ́нїе до за́пада со́лнца: и҆ ꙗ҆́кѡ подоба́етъ вѣ́ровати, по трꙋдѣ̀ и҆ мѣ́рѣ дѣ́ланїѧ на́шегѡ, раздаѧ́нїю бж҃е́ственныхъ дарова́нїй подава́емꙋ бы́ти на́мъ. )

И҆ по ѻ҆бѣ́дѣ, ꙗ҆́коже подоба́етъ подвиза́ющемꙋсѧ, по бж҃е́ственномꙋ па́ѵлꙋ повелѣва́ющемꙋ: ꙗ҆́кѡ подвиза́ѧйсѧ ѿ всѣ́хъ воздержи́тсѧ,⁴⁹⁴ чтѝ сѣдѧ̀ трезви́тєльныѧ, наипа́че ѻ҆те́чєскїѧ списа̑нїѧ дово́льнѡ. И҆ ѿто́лѣ поспѝ ча́съ є҆ди́нъ, а҆́ще сꙋ́ть дні́е вели́цы: та́же воста́въ ма́лѡ порꙋкодѣ́льствꙋй, держѧ̀ и҆ моли́твꙋ. По си́хъ же помоли́сѧ, ꙗ҆́коже пред̾ꙋказа́сѧ, почтѝ, поꙋчи́сѧ и҆ потщи́сѧ, да смири́шисѧ, и҆ да и҆́маши себѐ ме́ньша всѣ́хъ человѣ̑къ. Возносѧ́й бо, глаго́летъ, себѐ, смири́тсѧ: смирѧ́ѧй же себѐ, вознесе́тсѧ.⁴⁹⁵ И҆, мнѧ́йсѧ стоѧ́ти, да блюде́тсѧ, да не паде́тъ.⁴⁹⁶ И҆, гдⷭ҇ь гѡ́рдымъ проти́витсѧ, смирє́ннымъ же дае́тъ благода́ть. И҆, нача́ло го́рдости, є҆́же не вѣ́дѣти гдⷭ҇а.⁴⁹⁷ И҆, го́рдїи законопрестꙋпова́хꙋ до ѕѣла̀.⁴⁹⁸ И҆, не высѡ́каѧ мꙋ́дрствꙋюще, но со смире́нными ходѧ́ще.⁴⁹⁹ Глаго́летъ же и҆ бж҃е́ственный златоꙋ́стъ: Се́й наипа́че є҆́сть вѣ́дый себѐ, и҆́же ничто́же себѐ бы́ти вмѣнѧ́етъ: ничто́же бо та́кѡ бг҃ꙋ любе́зно, ꙗ҆́кѡ є҆́же съ послѣ́дними себѐ чи́слити. И҆ ст҃ы́й і҆саа́къ: смиренномꙋ̑дрымъ ѿкрыва́ютсѧ та̑инства. И҆, и҆дѣ́же и҆сточа́етсѧ смире́нїе, та́мѡ сла́ва бж҃їѧ и҆сточа́етсѧ. И҆, ꙗ҆́кѡ пред̾ благода́тїю тече́тъ смире́нїе, и҆ пред̾ наказа́нїемъ тече́тъ возноше́нїе. И҆ ст҃ы́й варсоно́фїй: а҆́ще вои́стиннꙋ спасти́сѧ хо́щеши, ᲂу҆слы́ши дѣ́ломъ: воздви́гни но́зѣ твоѝ ѿ землѝ, и҆ возведѝ на не́бо ᲂу҆́мъ тво́й, и҆ та́мѡ да бꙋ́детъ поꙋче́нїе твоѐ но́щь и҆ де́нь, и҆ є҆ли́кꙋ и҆́маши си́лꙋ, презри́сѧ, подвиза́ѧсѧ ви́дѣти себѐ ме́ньша всѧ́кагѡ человѣ́ка. Се́й є҆́сть и҆́стинный пꙋ́ть, кромѣ̀ сегѡ̀ и҆на́гѡ нѣ́сть хотѧ́щемꙋ спасти́сѧ ѡ҆ ᲂу҆крѣплѧ́ющемъ є҆гѡ̀ хрⷭ҇тѣ̀. Хотѧ́й да тече́тъ, ꙗ҆́кѡ да пости́гнетъ. Свидѣ́тельствꙋю пред̾ бг҃омъ живы́мъ и҆ хотѧ́щимъ жи́знь вѣ́чнꙋю дарова́ти всѧ́комꙋ хотѧ́щемꙋ. И҆ лѣ́ствичникъ: не пости́хсѧ, не бдѣ́хъ, не на землѝ лежа́хъ, но смири́хсѧ, и҆ спасѐ мѧ̀ гдⷭ҇ь вско́рѣ (ѿ к҃є степе́ни), держѧ̀ пре́жде всегѡ̀ и҆на́гѡ и҆ невмѣнѧ́емость, ꙗ҆́коже глаго́летъ ст҃ы́й варсоно́фїй: ꙗ҆́кѡ є҆́же без̾ попече́нїѧ бы́ти ѡ҆ всѧ́кїѧ ве́щи, сотвори́тъ прибли́житисѧ ко гра́дꙋ, и҆ є҆́же не вмѣни́тисѧ въ человѣ́цѣхъ, сотвори́тъ тѧ̀ всели́тисѧ во гра́дѣ: и҆ є҆́же ᲂу҆мре́ти ѿ всѧ́кагѡ человѣ́ка, сотвори́тъ тѧ̀ наслѣ́дствовати гра́дъ и҆ сокрѡ́вища. И҆ а҆́ще спасти́сѧ хо́щеши, невмѣ́нность держѝ, и҆ тецы̀ къ предлежа́щемꙋ. Є҆́сть же па́ки невмѣ́нность, по сло́вꙋ ᲂу҆ченика̀ сегѡ̀ ст҃а́гѡ преподо́бнагѡ і҆ѡа́нна, є҆́же не сравни́ти себѐ съ нѣ́кїимъ, и҆ є҆́же не рещѝ ѡ҆ до́брѣ дѣ́лѣ, ꙗ҆́кѡ и҆ а҆́зъ сїѐ сотвори́хъ. Та́же па́ки сѣ́дъ помоли́сѧ чи́стѣ и҆ непари́тельнѣ, до́ндеже пости́гнетъ ве́черъ, и҆ та́кѡ по́й ѻ҆бы́чнꙋю вече́рню, и҆ сотворѝ ѿпꙋ́стъ, ѿ чи́ста се́рдца вѣ́рꙋѧ, по трꙋдꙋ̀ и҆ болѣ́зни, ꙗ҆́же ѡ҆ добродѣ́тели, и҆ по мѣ́рѣ дѣ́ланїѧ на́шегѡ, и҆ раздаѧ́нїю дарѡ́въ и҆ по́честей, и҆ возпроповѣ́данїю и҆ ᲂу҆тѣше́нїю ѿ бг҃а подаѧ́тисѧ на́мъ, ꙗ҆́коже глаго́летъ бж҃е́ственный ѱалмопѣ́вецъ: по мно́жествꙋ болѣ́зней мои́хъ въ се́рдцѣ мое́мъ, ᲂу҆тѣшє́нїѧ твоѧ̑ возвесели́ша дꙋ́шꙋ мою̀.⁵⁰⁰ И҆ спаси́тель: прїиди́те ко мнѣ̀ всѝ трꙋжда́ющїисѧ и҆ ѡ҆бремене́инїи, и҆ а҆́зъ ᲂу҆поко́ю вы̀.⁵⁰¹ И҆ вели́кїй па́ѵелъ: поне́же со хрⷭ҇то́мъ стра́ждемъ, да и҆ съ ни́мъ просла́вимсѧ. Непщꙋ́ю бо, ꙗ҆́кѡ недостѡ́йны стра̑сти ны́нѣшнѧгѡ вре́мене къ хотѧ́щей сла́вѣ ꙗ҆ви́тисѧ въ на́съ.⁵⁰² Глаго́летъ же и҆ премꙋ́дрый въ бж҃е́ственныхъ маѯі́мъ: вина̀ бы́ти глаго́летсѧ раздаѧ́нїѧ бж҃е́ственныхъ бла̑гъ мѣ́ра вѣ́ры когѡ́ждо. Ꙗ҆́коже бо вѣ́рꙋемъ, таково̀ и҆ подаѧ́нїе ᲂу҆се́рдїѧ къ дѣ́ланїю и҆́мамы. Дѣ́лаѧй ᲂу҆́бѡ по ра́венствꙋ дѣѧ́нїѧ, показꙋ́етъ мѣ́рꙋ вѣ́ры, прїе́млѧ, ꙗ҆́коже вѣ́рова, мѣ́рꙋ благода́ти: не дѣ́лаѧй же по ра́венствꙋ недѣѧ́нїѧ, показꙋ́етъ мѣ́рꙋ невѣ́рїѧ, прїе́млѧ, ꙗ҆́коже не вѣ́рова, лише́нїе благода́ти. Тѣ́мже ѕлѣ̀ твори́тъ зави́стный, зави́дѧ и҆справлѧ́ющымъ, въ є҆гѡ̀ вла́сти ꙗ҆́вѣ, а҆ не во и҆но́гѡ сꙋ́щꙋ и҆збра́нїю тогѡ̀, є҆́же вѣ́ровати и҆ дѣ́ѧти, и҆ по мѣ́рѣ вѣ́ры грѧдꙋ́щꙋю внꙋ́трь прїѧ́ти благода́ть. И҆ ѿ дꙋшѝ просѧ̀ пребы́ти про́чїемꙋ вре́мени на́шемꙋ, и҆ са́мой же кончи́нѣ живота̀ хрїстїа́нстѣй, безболѣ́зненной, непосты́дной, ми́рной, и҆ къ си̑мъ возда́ти на́мъ до́брый ѿвѣ́тъ, стоѧ́щымъ на стра́шнѣмъ сꙋди́щи гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀.

Глава̀ л҃и.

(Ꙗ҆́кѡ чи́стаѧ моли́тва бо́льша всѧ́кагѡ дѣ́ланїѧ є҆́сть.)

При пока́занномъ же и҆ сїѐ вѣ́ждь, бра́те, ꙗ҆́кѡ всѧ́кое хꙋдо́жество и҆ всѧ́кое пра́вило, а҆́ще же хо́щеши, и҆ дѣ́ѧнїе разли́чно, за є҆́же немощѝ на́мъ є҆щѐ въ се́рдцѣ чи́стѣ и҆ непари́тельнѣ моли́тисѧ, та́кѡ и҆з̾ѡбрази́сѧ, и҆ пра́вильнѣ ᲂу҆ста́висѧ. Поне́же семꙋ̀, благоволе́нїемъ и҆ благода́тїю гдⷭ҇а на́шегѡ і҆и҃са хрⷭ҇та̀, соверши́вшꙋсѧ, мнѡ́гаѧ и҆ разли̑чнаѧ, и҆ раздѣлѧ́ющаѧ ѡ҆ста́вльше съ є҆ди́нымъ и҆ є҆ди́нственнымъ и҆ соедини́тельнымъ непосре́дственнѡ па́че сло́ва соединѧ́емсѧ, ꙗ҆́коже рече́сѧ сла́внымъ бг҃осло́вомъ: бг҃ъ богѡ́мъ соединѧ́емь же и҆ познава́емь, є҆́же є҆́сть сꙋще́ственное ст҃ы́мъ дх҃омъ въ се́рдцѣ ѡ҆сїѧ́нїе, є҆́же ражда́етсѧ, ꙗ҆́коже рече́сѧ, ѿ помѧнꙋ́тыѧ чи́стыѧ и҆ непари́тельныѧ серде́чныѧ моли́твы. Рѣ́дко же є҆́сть сїѐ, и҆ є҆два̀ є҆ди́нъ ѿ ты́сѧщи є҆́сть сподо́бивыйсѧ хрⷭ҇то́вою благода́тїю пред̾ꙋспѣ́ти въ сїѐ ᲂу҆строе́нїе. А҆ є҆́же и҆ сїѐ преплы́ти, и҆ дꙋхо́вныѧ сподо́битисѧ моли́твы, и҆ полꙋчи́ти ѿкрове́нїе та́инствъ бꙋ́дꙋщагѡ вѣ́ка, ѕѣлѡ̀ ма́лѣхъ є҆́сть, и҆ є҆два̀ въ ро́дѣхъ и҆ ро́дѣхъ ѡ҆брѣта́ющихсѧ, благоволе́нїемъ благода́ти, ꙗ҆́коже пи́шетъ ст҃ы́й і҆саа́къ: Ꙗ҆́коже є҆два̀ ѿ тє́мъ человѣ̑къ є҆ди́нъ ѡ҆брѣта́етсѧ и҆спо́лнивый за́пѡвѣди и҆ закѡ́ннаѧ нѣ́коликѡ недоста́точнѣ, и҆ дости́гшїй въ чистотꙋ̀ дꙋшѝ: та́кѡ є҆ди́нъ ѿ ты́сѧщи ѡ҆брѣта́етсѧ сподо́бивыйсѧ доспѣ́ти со мно́гимъ ѡ҆хране́нїемъ въ чи́стꙋю моли́твꙋ, и҆ расто́ргнꙋти се́й предѣ́лъ, и҆ полꙋчи́ти ѻ҆́ное та́инство. Поне́же мно́зи чи́стыѧ моли́твы ника́коже сподо́бишасѧ, но ма́ли: къ та́инствꙋ же ѻ҆́номꙋ, є҆́же по ѻ҆́нѣй, и҆ превы́ше доспѣ́вый, є҆два̀ ѡ҆брѣта́етсѧ въ ро́дѣ и҆ ро́дѣ, благода́тїю хрⷭ҇то́вою. И҆ по ма́лѣхъ: и҆ а҆́ще съ чистото́ю є҆два̀ кто̀ мо́литсѧ, что̀ рече́мъ ѡ҆ дꙋхо́внѣй моли́твѣ; всѧ́каѧ же дꙋхо́внаѧ моли́тва, по сло́вꙋ є҆гѡ̀ па́ки, движе́нїѧ свободи́сѧ, а҆ преклонѧ́ющаѧсѧ под̾ дꙋхо́вною є҆́сть. Тѣ́мже и҆ ты̀, а҆́ще хо́щеши таковы́хъ но́выхъ та́инствъ дѣ́ломъ и҆ ве́щїю, си́рѣчь, самѣ́мъ тѣ́мъ и҆скꙋ́сомъ ѡ҆ хрⷭ҇тѣ̀ і҆и҃сѣ сподо́битисѧ, во всѧ́комъ вре́мени и҆ во всѧ́комъ часѣ̀ и҆ дѣ́ланїи твое́мъ тщи́сѧ дости́гнꙋти, во є҆́же моли́тисѧ въ се́рдцѣ чи́стѡ и҆ непари́тельнѡ: да та́кѡ, ꙗ҆́кѡ ѿ младе́нца ссꙋ́ща, пред̾ꙋспѣ́еши въ мꙋ́жа соверше́нна, въ мѣ́рꙋ во́зраста и҆сполне́нїѧ хрⷭ҇то́ва, и҆ съ вѣ́рнымъ строи́телемъ и҆ мꙋ́дрымъ, блаже́нство и҆ воспроповѣ́данїе полꙋ́чиши, ꙗ҆́кѡ ᲂу҆строева́ѧ на сꙋдѣ̑ словеса̀ твоѧ̑, си́рѣчь по ра́зꙋмꙋ жи́тельствꙋѧ, тѣ́мже и҆ не подви́жешисѧ въ вѣ́къ.⁵⁰³ Ꙗ҆́коже ѡ҆ се́мъ пи́шетъ ст҃ы́й фїлїмѡ́нъ си́це: бра́те, а҆́ще въ нощѝ, а҆́ще во днѝ сподо́битъ тѧ̀ бг҃ъ чи́стѣ ᲂу҆мо́мъ помоли́тисѧ наразвле́ченнѡ, да не во́нмеши пра́вилꙋ своемꙋ̀: но є҆ли́ка тѝ є҆́сть си́ла, простира́йсѧ прилѣплѧ́тисѧ бг҃ови, и҆ то́й просвѣти́тъ се́рдце твоѐ въ дѣ́ланїи дꙋхо́внѣмъ. И҆ нѣ́кто ѿ бг҃омꙋ́дрыхъ: А҆́ще хо́щеши въ тѣ́лѣ, ꙗ҆́кѡ безтѣле́сенъ бг҃ꙋ слꙋжи́ти, моли́твꙋ непреста́ннꙋ стѧжѝ та́йнѡ въ се́рдцѣ твое́мъ, и҆ быва́етъ пре́жде сме́рти дꙋша̀ твоѧ̀ ꙗ҆́кѡ а҆́гг҃лъ. Си̑мъ согла̑сна пи́шетъ и҆ ст҃ы́й і҆саа́къ: Вопроше́нъ бо бы́въ ѿ нѣ́коегѡ, что̀ ѡ҆бде́ржитъ всѣ̀ трꙋды̀ дѣ́ла сегѡ̀, си́рѣчь безмо́лвїѧ, да дости́гшїй въ ѻ҆́ное ᲂу҆разꙋмѣ́етъ, ꙗ҆́кѡ соверше́нства жи́тельства дости́же; ѿвѣща̀ си́це: є҆гда̀ кто̀ сподо́битсѧ пребыва́нїѧ моли́твы. Є҆гда́ бо дости́гнетъ сегѡ̀, къ концꙋ̀ всѣ́хъ добродѣ́телей доспѣ̀, и҆ про́чее жили́ще ст҃а́гѡ дх҃а бы́сть. А҆́ще бо кто̀ благода́ти ᲂу҆тѣ́шителевы и҆звѣ́стнѡ не прїѧ́тъ, пребыва́нїе сеѧ̀ моли́твы соверши́ти со ѿра́дою не мо́жетъ: дꙋ́хъ бо, глаго́летъ, є҆гда̀ всели́тсѧ въ кого̀ ѿ человѣ̑къ, не престае́тъ ѿ моли́твы: са́мъ бо дꙋ́хъ при́снѡ мо́литсѧ. Тогда̀, нижѐ внегда̀ спа́ти є҆мꙋ̀, нижѐ во бдѣ́нїи, моли́тва сїѧ̀ ѿ дꙋшѝ сегѡ̀ пресѣца́етсѧ. Но а҆́ще ꙗ҆́стъ, а҆́ще пїе́тъ, а҆́ще и҆ спи́тъ, а҆́ще что̀ и҆ дѣ́лаетъ, да́же и҆ во глꙋбо́цѣ снѣ̀, благовѡ́нїѧ и҆ пары̀ моли́твєнныѧ въ се́рдцѣ є҆гѡ̀ восхо́дѧтъ без̾ трꙋда̀. И҆ разлꙋче́нїѧ тогда̀ моли́тва сїѧ̀ не и҆́мать: но во всѧ̑ часы̀ є҆гѡ̀, а҆́ще и҆ ᲂу҆мо́лкнетъ ѻ҆на̀ внѣꙋ́дꙋ є҆гѡ̀, но ᲂу҆̀бо па́ки та́ѧжде слꙋ́житъ въ не́мъ та́йнѡ. Молча́нїе бо чи́стыхъ, моли́твꙋ глаго́летъ нѣ́кто ѿ хрⷭ҇тоно́сныхъ, поне́же по́мыслы и҆́хъ бж҃е́ствєннаѧ движє́нїѧ сꙋ́ть, движє́нїѧ же чи́стагѡ се́рдца и҆ мы́сли, сꙋ́ть гла́си кро́тцы, и҆́миже та́йнѡ та́йномꙋ пою́тъ. И҆ и҆́ни мно́зи ѿ бг҃оно́сныхъ ѿ благода́ти са́мымъ и҆скꙋ́сомъ тайнонаꙋча́еми сꙋ́ще, мнѡ́жайшаѧ такова̑ѧ чꙋдесѐ достѡ́йнаѧ и҆зложи́ша, ꙗ҆̀же долготы̀ ра́ди сло́ва ѡ҆ста́вихомъ.

Глава̀ л҃ѳ.

(Ѡ҆ коли́чествѣ колѣнопреклоне́нїй въ нощеде́нствїи. )

Ѡ҆ коли́чествѣ же колѣнопреклоне́нїй, три́ста вѣ́мы бы́ти число́мъ ᲂу҆ста́вленныхъ бж҃е́ственными ѻ҆тцы̀ на́шими, ꙗ҆̀же до́лжни є҆смы̀ и҆ твори́ти въ ко́еждо нощеде́нство пѧтѝ дне́й седми́цы. И҆́бо во всѧ́кꙋю сꙋббѡ́тꙋ и҆ всѧ́кꙋю недѣ́лю, є҆щѐ и҆ во и҆ны̑ѧ ѿ ѻ҆бы́чаѧ ѡ҆зна́чєнныѧ дни̑, ктомꙋ́же и҆ седми̑цы по нѣ̑кимъ та́инствєннымъ и҆ сокровє́ннымъ вина́мъ преста́тїе ѿ си́хъ и҆мѣ́ти повелѣ́но є҆́сть на́мъ. Ѻ҆ба́че сꙋ́ть нѣ́цыи превосходѧ́щїи сїѐ число̀, нѣ́цыи же и҆ ѡ҆скꙋдѣва́ющїи, ка́ждый, ꙗ҆́коже и҆́мать си́лꙋ и҆ произволе́нїе. И҆ ты̀ ᲂу҆́бѡ, є҆́же по си́лѣ творѝ. Тѣ́мже блаже́нъ вои́стиннꙋ, и҆ блаже́нъ мно́жицею, и҆́же на всѧ̑, ꙗ҆̀же по бг҃ꙋ, всегда̀ понꙋжда́етъ себѐ. Нꙋ́ждно бо є҆́сть ца́рствїе небе́сное, и҆ нꙋ̑ждницы восхища́ютъ є҆̀.⁵⁰⁴

Глава̀ м҃.

(Ꙗ҆́кѡ не то́кмѡ, ꙗ҆́коже предрече́сѧ, по по́двигꙋ и҆ мѣ́рѣ дѣ́ланїѧ на́шегѡ раздаѧ́нїе бж҃е́ственныхъ дарѡ́въ подава́етсѧ, но и҆ по нра́вꙋ, и҆ прили́чности, и҆ вѣ́рѣ, и҆ сꙋ́щемꙋ въ на́съ ᲂу҆строе́нїю є҆сте́ственномꙋ.)

И҆ сїѐ ᲂу҆̀бо вѣ́дѣти подоба́етъ, ꙗ҆́кѡ не то́кмѡ, ꙗ҆́коже предреко́хомъ, по по́двигꙋ и҆ мѣ́рѣ дѣ́ланїѧ на́шегѡ раздаѧ́нїе бж҃е́ственныхъ дарѡ́въ подава́етсѧ на́мъ, но и҆ по навыкнове́нїю жи́тельства сегѡ̀, и҆ прили́чности, є҆ще́ же и҆ по вѣ́рѣ на́шей къ предлежа́щымъ, и҆ прили́чнѣ сꙋ́щемꙋ въ на́съ ᲂу҆строе́нїю є҆сте́твенномꙋ. И҆ глаго́летъ ст҃ы́й маѯі́мъ: ᲂу҆́мъ, премꙋ́дрости є҆́сть ѻ҆рꙋ́дїе: слове́сность, ра́зꙋма: є҆сте́ственное во ѻ҆бою̀ и҆звѣще́нїе, составлѧ́емыѧ во ѻ҆бою̀ вѣ́ры: дарова̑нїѧ же и҆сцѣле́нїй, є҆сте́ственное человѣколю́бїе. Всѧ́ко бо бж҃е́ственное дарова́нїе прили́чно въ на́съ и҆́мать, и҆ присвоѧ́емо, ꙗ҆́коже си́лꙋ, и҆лѝ навыкнове́нїе, и҆лѝ ᲂу҆строе́нїе, ѻ҆рꙋ́дїе прїѧ́тельное. Си́рѣчь: и҆́же ᲂу҆́мъ всѧ́кихъ чꙋ́вственныхъ мечта́нїй чи́стъ сотвори́вый, прїе́млетъ премꙋ́дрость: слове́сность же, врожде́нныхъ страсте́й, ꙗ҆́рости, глаго́лю, и҆ по́хоти, влады́кою поста́вивый, прїе́млетъ ра́зꙋмъ: непоколеби́мое же во ᲂу҆мѣ̀ и҆ слове́сности ѡ҆ бз҃ѣ и҆звѣще́нїе и҆мѣ́ѧй, прїе́млетъ вѣ́рꙋ, всѧ̑ могꙋ́щꙋю: є҆сте́ственное же и҆спра́вивый человѣколю́бїе, по соверше́ннѣмъ ᲂу҆бїе́нїи самолю́бїѧ, дарова̑нїѧ и҆сцѣле́нїй прїе́млетъ, и҆ сїѧ̑ ᲂу҆̀бо си́це. Зри́ же, да никто́же вѣ́сть дѣ́ло твоѐ кромѣ̀ настоѧ́телѧ и҆ наставлѧ́ющагѡ тебѐ, молѧ́сѧ и҆ ѡ҆ на́съ недосто́йныхъ, глаго́лющихъ ᲂу҆́бѡ, не творѧ́щихъ же что̀ бла́го, да сподо́бимсѧ твори́ти пе́рвѣе бг҃оꙋгѡ́днаѧ, та́же и҆ дрꙋги̑мъ глаго́лати и҆ совѣ́товати. И҆́же бо сотвори́тъ и҆ наꙋчи́тъ, по бж҃е́ственномꙋ словесѝ, се́й ве́лїй нарече́тсѧ.⁵⁰⁵ Тебе́ же па́ки вседержи́тель, и҆ всеще́дрый гдⷭ҇ь да ᲂу҆крѣпи́тъ и҆ благопоспѣши́тъ, сїѧ̑ слы́шати разꙋ́мнѡ, и҆ твори́ти ѧ҆̀ со всѧ́кимъ жела́нїемъ. Не слы́шателїе бо зако́на пра́ведни пред̾ бг҃омъ, по бж҃е́ственномꙋ па́ѵлꙋ, но творцы̀.⁵⁰⁶ И҆ да наста́витъ на всѧ́ко дѣ́ло благо́е и҆ спаси́тельное, и҆ на предлежа́щее ᲂу҆́мное, и҆ свѧще́нное дѣ́ланїе рꙋкоповеде́тъ дх҃омъ, моли́твами ст҃ы́хъ, а҆ми́нь. Но поне́же предглаго́ласѧ на́ми ѡ҆ разсꙋжде́нїи ма́ло нѣ́что дѣ́ѧтельнѣмъ, благовре́менно є҆́сть ны́нѣ и҆ ѡ҆ всеѻ́бщемъ и҆ соверше́ннѣмъ разсꙋжде́нїи, по си́лѣ вкра́тцѣ предложи́ти. Поне́же сїѐ и҆ бо́льше є҆́сть всѣ́хъ добродѣ́телей, по свидѣ́тельствꙋ сла́вныхъ на́шихъ ѻ҆тцє́въ.

Глава̀ м҃а.

(Ѡ҆ всеѻ́бщемъ и҆ соверше́ннѣйшемъ разсꙋжде́нїи, и҆ кто̀ є҆́сть проти́вꙋ є҆стества̀, и҆ пло́тски живѧ́й: и҆ кто̀ по є҆стествꙋ̀ и҆ дꙋше́внѣ: и҆ кто̀ превы́шше є҆стества̀ и҆ дꙋхо́внѣ жи́тельствꙋѧй.)

Пло́тски и҆ проти́вꙋ є҆стества̀ живѧ́й и҆ жи́тельствꙋѧй, се́й свою̀ разсꙋди́тельность всеконе́чнѡ погꙋбѝ, а҆ и҆́же ѕлы́хъ ᲂу҆дале́нїе сотвори́вый, нача́ло же положи́вый, є҆́же твори́ти благо́е, ꙗ҆́коже пи́сано є҆́сть: Оу҆клони́сѧ ѿ ѕла̀, и҆ сотворѝ бла́го,⁵⁰⁷ се́й ꙗ҆́кѡ новонача́льный, и҆ ᲂу҆́хо прилага́ѧй ко ᲂу҆че́нїю, ма́лѡ нѣ́какѡ приница́етъ къ чꙋ́вствꙋ нѣ́коемꙋ разсꙋжде́нїѧ, и҆ новонача́льнꙋ подоба́ющемꙋ. А҆ и҆́же по є҆стествꙋ̀ и҆ дꙋше́внѣ, ꙗ҆́кѡ мы́слїю дѣ́йствꙋѧй, и҆ по ра́зꙋмꙋ пожи́въ, и҆́же и҆ сре́денъ нарица́етсѧ, се́й по мѣ́рѣ свое́й зри́тъ и҆ разсꙋжда́етъ ꙗ҆̀же ѡ҆ себѣ̀, и҆ ꙗ҆̀же подо́бныхъ себѣ̀. Превы́шше же є҆стества̀ и҆ дꙋхо́внѣ жи́тельствꙋѧй, се́й ꙗ҆́кѡ превозше́дый встра́ственный и҆ новонача́льный и҆ сре́днїй предѣ́лъ, и҆ хрⷭ҇то́вою благода́тїю пред̾ꙋспѣ́вый въ соверше́нство, си́рѣчь въ сꙋще́ственное просвѣще́нїе, и҆ соверше́ннѣйшее разсꙋжде́нїе: зри́тъ себѐ и҆ разсꙋжда́етъ ꙗ҆снѣ́йше: тѣ́мже и҆ всѣ́хъ зри́тъ, и҆ разсꙋжда́етъ чи́стѣ, а҆ са́мъ то́й ни ѿ є҆ди́нагѡ, а҆́ще и҆ зри́тсѧ, зри́мь и҆ разсꙋжда́емь, є҆ще́ же и҆ востѧзꙋ́емь, ꙗ҆́кѡ дꙋхо́венъ сы́й вои́стиннꙋ, и҆ нарица́емь, не ха́ртїею и҆ черни́ломъ, но дѣѧ́нїемъ и҆ благода́тїю, ꙗ҆́коже глаго́летъ бж҃е́ственный а҆пⷭ҇лъ: ꙗ҆́кѡ дх҃о́вный востѧзꙋ́етъ ᲂу҆́бѡ всѧ̑, а҆ са́мъ то́й ни ѿ є҆ди́нагѡ востѧзꙋ́етсѧ.⁵⁰⁸

Глава̀ м҃в.

(Є҆щѐ ѡ҆ разсꙋжде́нїи, ꙗ҆́кѡ во ѡ҆́бразѣ.)

Ѿ си́хъ ѻ҆́въ ᲂу҆́бѡ подо́бенъ є҆́сть, ꙗ҆́кѡ въ нощѝ глꙋбо́цѣй и҆ сꙋмра́чнѣмъ темномѣ́сѧчїи ходѧ́щемꙋ. Тѣ́мже и҆ во ѡ҆сѧза́емѣй тьмѣ̀ ѻ҆́крестъ заблꙋжда́ѧ и҆ помрача́ѧсѧ, не то́кмѡ самогѡ̀ себѐ не зри́тъ и҆ не разсꙋжда́етъ, но нижѐ ка́мѡ и҆́детъ и҆ хо́дитъ, ꙗ҆́коже глаго́летъ сп҃си́тель: ходѧ́й во тьмѣ̀ не вѣ́сть, ка́мѡ и҆́детъ.⁵⁰⁹ Ѻ҆́въ же подо́бенъ є҆́сть ходѧ́щемꙋ въ нощѝ ве́дреннѣй, ѕвѣзда́ми ѡ҆зарѧ́емѣй: тѣ́мже и҆ ѕвѣ́здными блиста́нїѧми ма́лѡ нѣ́какѡ ѡ҆зарѧ́емь, пома́лꙋ стꙋпа́етъ, претыка́ѧ но́зѣ мно́жицею ѡ҆ ка́менїе неразсꙋжде́нїѧ, и҆ терпѧ̀ приражє́нїѧ. Се́й ᲂу҆́бѡ ма́лѡ нѣ́что и҆ самаго̀ себѐ зри́тъ и҆ разсꙋжда́етъ, а҆́ки въ сѣ́ни, ꙗ҆́коже пи́сано є҆́сть: воста́ни спѧ́й, и҆ воскреснѝ ѿ ме́ртвыхъ, и҆ ѡ҆свѣти́тъ тѧ̀ хрⷭ҇то́съ.⁵¹⁰ Ѻ҆́въ же подо́бенъ є҆́сть ходѧ́щемꙋ въ нощѝ вселꙋ́ннѣй и҆ ти́хой, тѣ́мже и҆ лꙋ́ннымъ свѣ́томъ ᲂу҆правлѧ́емь, незаблꙋ́днѣе ше́ствꙋетъ, и҆ на прє́днѧѧ грѧде́тъ: зри́тъ же самаго̀ себѐ, ꙗ҆́кѡ въ зерца́лѣ, и҆ разсꙋжда́етъ, и҆ подо́бнѣ вкꙋ́пѣ ше́ствꙋющыѧ съ ни́мъ, ꙗ҆́коже рече́сѧ: До́брѣ творитѐ, зако́нꙋ, си́рѣчь, внима́юще, ꙗ҆́коже свѣти́лꙋ сїѧ́ющꙋ въ тѣ́мнѣмъ мѣ́стѣ, до́ндеже де́нь ѡ҆зари́тъ, и҆ денни́ца возсїѧ́етъ въ сердца́хъ ва́шихъ.⁵¹¹ Ѻ҆́въ же подо́бенъ є҆́сть ходѧ́щемꙋ въ полꙋ́дни постоѧ́ннѣмъ и҆ чистѣ́йшемъ, со́лнечными лꙋча́ми ꙗ҆́сными просвѣща́емѣмъ. Тѣ́мже таковы́й и҆ самого̀ себѐ чи́стѣ зри́тъ при со́лнечномъ свѣ́тѣ и҆ разсꙋжда́етъ, и҆ мно́гихъ востѧзꙋ́етъ, па́че же и҆ всѣ́хъ, по бж҃е́ственномꙋ а҆пⷭ҇лꙋ:⁵¹² є҆ще́ же и҆ всѧ̑ приключа̑ющаѧсѧ въ себѣ̀ зри́тъ ꙗ҆́вѣ какова́либо и҆ ка́кѡлибо, не заблꙋ́днѡ и҆ са́мъ ше́ствꙋѧ, и҆ послѣ́дꙋющыѧ є҆мꙋ̀ без̾ претыка́нїѧ пꙋтеводѧ̀ ко и҆́стинномꙋ свѣ́тꙋ, и҆ животꙋ̀, и҆ и҆́стинѣ, ѡ҆ ни́хже пи́сано є҆́сть: Вы̀ є҆стѐ свѣ́тъ мі́ра.⁵¹³ Глаго́летъ и҆ бж҃е́ственный па́ѵелъ: бг҃ъ рекі́й и҆з̾ тьмы̀ свѣ́тꙋ возсїѧ́ти, и҆́же возсїѧ̀ въ сердца́хъ на́шихъ, къ просвѣще́нїю ра́зꙋма сла́вы бж҃їѧ ѡ҆ лицѣ̀ і҆и҃съ хрⷭ҇то́вѣ.⁵¹⁴ И҆ блаже́нный даві́дъ: зна́менасѧ на на́съ свѣ́тъ лица̀ твоегѡ̀, гдⷭ҇и.⁵¹⁵ И҆, во свѣ́тѣ твое́мъ ᲂу҆́зримъ свѣ́тъ.⁵¹⁶ И҆, гдⷭ҇ь: а҆́зъ є҆́смь свѣ́тъ мі́рꙋ, ходѧ́й по мнѣ̀, не и҆́мать ходи́ти во тьмѣ̀, но и҆́мать свѣ́тъ живо́тный.⁵¹⁷

Глава̀ м҃г.

Ѡ҆ прело́зѣ и҆ и҆змѣне́нїи, є҆́же въ ко́емждо человѣ́цѣ, и҆ ѡ҆ превосходѧ́щей сла́вѣ смире́нїѧ.

Вѣ́дѣти тебѣ̀ и҆ сїѐ хо́щемъ, ꙗ҆́кѡ и҆ и҆̀же въ соверше́нство ѡ҆чище́нїемъ и҆ просвѣще́нїемъ, ꙗ҆́коже и҆́мꙋтъ си́лꙋ, дости́гшїи. Не бо̀ є҆́сть соверше́нно соверше́нїе въ несоверше́ннѣмъ вѣ́цѣ се́мъ, но па́че не могꙋ́щее соверше́но бы́ти соверше́нство. И҆ такові́и ᲂу҆́бѡ не всегда̀ съ собо́ю и҆́мꙋтъ неизмѣ́нность, за не́мощь є҆сте́ственнꙋю и҆ за приполза́ющее ѻ҆вогда̀ возноше́нїе, но ᲂу҆́бѡ и҆змѣнє́нїѧ и҆ крадє́нїѧ ко и҆скꙋше́нїю те́рпѧтъ ѻ҆вогда̀, и҆ па́ки же застꙋплє́нїѧ внꙋ́трь прїе́млютъ бѡ́льша, а҆ сопроти́вное же си̑мъ, ча́сть волкѡ́въ ѻ҆тцы̀ бы́ти ѡ҆предѣлѧ́ютъ. Непрело́жность бо и҆ неизмѣ́нность въ вѣ́цѣ бꙋ́дꙋщемъ соблюдена̀ є҆́сть: въ настоѧ́щемъ же ѻ҆вогда̀ ᲂу҆́бѡ чистоты̀, ми́ра же и҆ ᲂу҆тѣше́нїѧ бж҃е́ственнагѡ є҆́сть вре́мѧ: ѻ҆вогда́ же смѣше́нїѧ, и҆ бꙋ́ри, и҆ дрѧ́хлости. И҆ сїе́ же по мѣ́рѣ жи́тельства коегѡ́ждо и҆ предспѣ́ѧнїѧ, и҆ и҆́миже вѣ́сть бг҃ъ сꙋдьба́ми: є҆ще́ же, да ѿ си́хъ и҆ не́мощь на́шꙋ примѣча́емъ. Блаже́нъ бо, глаго́летъ, познава́ѧй не́мощь свою̀, да не надѣ́ющесѧ бꙋ́демъ на сѧ̀, по па́ѵлꙋ, но на бг҃а возставлѧ́ющаго мє́ртвыѧ:⁵¹⁸ и҆ та́кѡ всегда̀ со смире́нїемъ и҆ покаѧ́нїемъ и҆ и҆сповѣ́данїемъ ко бг҃ꙋ возвраща́емсѧ. Глаго́летъ бо ст҃ы́й і҆саа́къ: но є҆ди́ной, и҆ є҆ди́ной кра́тѣ, коли́кащи престꙋпа́ютъ нѣ́цыи, и҆ покаѧ́нїемъ врачꙋ́ютъ дꙋ́шы своѧ̑, и҆ благода́ть прїе́млетъ и҆̀хъ [ѿ м҃ѕ сло́ва]. Во всѧ́комъ бо слове́снѣмъ є҆стествѣ̀ премѣ́на безпредѣ́льнѣ прохо́дитъ, и҆ и҆змѣнє́нїѧ прехо́дѧтъ на всѧ́каго человѣ́ка, во всѣ́хъ є҆гѡ̀ часѣ́хъ: ѿ ни́хже мно́гихъ ѡ҆брѣта́етъ разсꙋди́тельный, разꙋмѣ́ти сїѐ. Но и҆скꙋ́сы, и҆̀же съ ни́мъ, на всѧ́къ де́нь мо́гꙋтъ па́че ᲂу҆премꙋдри́ти є҆го̀ въ си́хъ, а҆́ще трезви́тсѧ: да и҆ наблюда́етъ себѣ̀ во ᲂу҆мѣ̀, и҆ ᲂу҆разꙋмѣ́етъ, коли́ко и҆змѣне́нїе кро́тости и҆ ти́хости прїе́млетъ мы́сль на всѧ́къ де́нь, и҆ ка́кѡ ѿ ми́ра того̀ внеза́пꙋ въ смꙋще́нїе ѡ҆браща́етсѧ, є҆гда̀ вины̀ нѣ́кїѧ ѿ мѣ́ста нѣ́сть є҆мꙋ̀, и҆ ка́кѡ въ бѣдѣ̀ вели́цѣй и҆ неизрече́ннѣй быва́етъ. И҆ сїѐ є҆́сть, є҆́же блаже́нный мака́рїй написа̀, ꙗ҆́вѣ мно́гимъ про́мысломъ и҆ тща́нїемъ, въ па́мѧть бра́тїи и҆ ᲂу҆че́нїе, є҆́же не ᲂу҆клони́тисѧ во вре́мѧ и҆змѣне́нїѧ сопротивле́нїй во ѿча́ѧнїе, занѐ и҆ въ чи́нѣ чистоты̀ стоѧ́щымъ при́снѡ приключа́ютсѧ падє́нїѧ, ꙗ҆́коже слꙋча́етсѧ воздꙋ́хꙋ стꙋде́ность, и҆ кромѣ̀ є҆́же бы́ти и҆̀мъ въ небреже́нїи и҆лѝ въ разрѣше́нїи, не то́чїю же, но внегда̀ и҆ по чи́нꙋ и҆́хъ ше́ствꙋютъ, приключа́ютсѧ и҆̀мъ падє́нїѧ сопротивлѧ́ющаѧсѧ намѣ́ренїю и҆́хъ хотѣ́нїѧ. И҆ ни́же: что̀ ᲂу҆́бѡ є҆́сть ны́нѣ; и҆змѣнє́нїѧ, речѐ, быва́ютъ въ ко́емждо, ꙗ҆́коже и҆ въ воздꙋ́сѣ. Разꙋмѣ́й ѻ҆́но, є҆́же є҆́сть въ ко́емждо: занѐ и҆ є҆стество̀ є҆ди́но є҆́сть. Да не возмни́ши бо, ꙗ҆́кѡ ѡ҆ ни́зшихъ и҆ малѣ́йшихъ то́чїю речѐ, а҆ соверше́ннїи свобо́дни и҆змѣне́нїѧ, и҆ ꙗ҆́кѡ въ є҆ди́номъ чи́нѣ неꙋкло́ннѡ стоѧ́тъ сі́и, кромѣ̀ встра́стныхъ пѡ́мыслъ, ꙗ҆́коже и҆ є҆ѵхі́ти глаго́лютъ. Сегѡ̀ ра́ди положѝ сїѐ, въ ко́емждо. Ка́кѡ ᲂу҆́бѡ сїѐ, ѽ мака́рїе! ѻ҆ба́че ты̀ глаго́леши: мра́зъ, и҆ пома́лѣ зно́й, и҆ подо́бнѣ гра́дъ, и҆ пома́лѣ ве́дро: и҆ во ѡ҆бꙋче́нїи на́шемъ си́це быва́етъ: ра́ть, и҆ застꙋпле́нїе благода́ти, и҆ въ нѣ́кое вре́мѧ быва́етъ дꙋша̀ въ бꙋ́ри, и҆ востаю́тъ на ню̀ во́лны жестѡ́ки: и҆ па́ки и҆змѣне́нїе посѣща́ющей благода́ти, и҆ и҆сполнѧ́ющей се́рдце є҆гѡ̀ ра́дости и҆ ми́ра, и҆̀же ѿ бг҃а, и҆ по́мыслѡвъ цѣломꙋ́дренныхъ и҆ ми́рныхъ. Сїѧ̑ по́мыслы цѣломꙋ́дрїѧ и҆з̾ѧвлѧ́етъ здѣ̀, показꙋ́ѧ пре́жде си́хъ бы́вшыѧ сꙋ́щыѧ скѡ́тски и҆ нечи̑сты, и҆ совѣ́тꙋетъ глаго́лѧ: А҆́ще ᲂу҆́бѡ по си́хъ по́мыслѣхъ цѣломꙋ́дренныхъ и҆ кро́ткихъ послѣ́дꙋетъ наше́ствїе, да не ѡ҆печа́лимсѧ и҆ ѿча́емсѧ, и҆ во вре́мѧ поко́ѧ благода́ти да не похва́лимсѧ па́ки: но во вре́мѧ ра́дости возча́емъ скѡ́рби. И҆ проходѧ̀ да́лѣе, глаго́летъ: разꙋмѣ́й, ꙗ҆́кѡ всѝ ст҃і́и въ се́мъ дѣ́лѣ бы́ша. Є҆ли́кѡ є҆смы̀ въ мі́рѣ се́мъ, и҆ ᲂу҆тѣше́нїе и҆зли́шнее съ си́ми быва́етъ на́мъ вта́йнѣ. Зане́же на всѧ́къ де́нь и҆ на всѧ́къ ча́съ, взыскꙋ́етсѧ ѿ на́съ и҆скꙋ́съ любвѐ на́шеѧ, ꙗ҆́же ко бг҃ꙋ, въ боре́нїи и҆ по́двизѣ ко и҆скꙋше́нїѧмъ. И҆ сїѐ є҆́сть, є҆́же не ѡ҆печа́литисѧ на́мъ, ни ᲂу҆ныва́ти въ по́двизѣ, и҆ си́це и҆справлѧ́етсѧ пꙋ́ть на́шъ. Хотѧ́й же ѿ си́хъ соврати́тисѧ и҆лѝ ᲂу҆клони́тисѧ, се́й ча́сть волкѡ́въ є҆́сть. ѽ чꙋ́до ѿ сегѡ̀ ст҃а́гѡ! Ка́кѡ ма́лымъ сло́вомъ и҆звѣ́ствова ᲂу҆потребле́нїе сїѐ, и҆ показа̀ ѻ҆́ное и҆спо́лнено ра́зꙋма, и҆ и҆з̾ѧ́тъ сꙋмнѣ́нїе соверше́ннѣ ѿ мы́сли прочита́ющагѡ. Ѻ҆́нъ же, глаго́летъ, ᲂу҆клонѧ́ѧйсѧ ѿ си́хъ, и҆ ча́сть волкѡ́въ сы́й, не пꙋте́мъ хо́щетъ ше́ствовати. И҆ сїѐ положѝ въ мы́сли свое́й стѧжа́ти, и҆ стезе́ю ѻ҆со́бною, непроложе́нною ѿ ѻ҆тє́цъ ше́ствовати хо́щетъ. И҆ пома́лѣ: смире́нїе и҆ без̾ дѣ́лъ мнѡ́га проща́етъ согрѣшє́нїѧ: сїѧ̑ же кромѣ̀ є҆гѡ̀, напроти́въ безполє́зна сꙋ́ть. И҆ пома́лѣ: ꙗ҆́коже со́ль во всѧ́кой пи́щи, та́кѡ и҆ смире́нїе во всѧ́кой добродѣ́тели, и҆ крѣ́пость мно́гихъ согрѣше́нїй то̀ мо́жетъ сте́рти. Про́чее ѡ҆ се́мъ потре́ба непреста́ннѡ скорбѣ́ти мы́слїю во смире́нїи и҆ въ печа́ли разсꙋжде́нїѧ: и҆ сїѐ а҆́ще стѧ́жемъ, сы́ны на́съ твори́тъ бж҃їѧ, и҆ без̾ дѣ́лъ благи́хъ представлѧ́етъ бг҃ꙋ: зане́же без̾ сегѡ̀ всѧ̑ дѣла̀ на̑ша, и҆ всѧ̑ добродѣ́тєли, и҆ всѧ̑ дѣ̑ланїѧ сꙋ́єтна сꙋ́ть. Про́чее, и҆змѣне́нїѧ мы́сли хо́щетъ бг҃ъ, и҆ мы́слїю лꙋ́чшы быва́емъ. Самодово́льно є҆́сть сїѐ є҆ди́но безпомо́щнѣ стоѧ́ти пред̾ бг҃омъ, и҆ глаго́лати ѡ҆ на́съ. Є҆щѐ глаго́летъ: речѐ нѣ́кто ѿ ст҃ы́хъ є҆гда̀ прїи́детъ тебѣ̀ по́мыслъ горды́ни, глаго́лѧ тебѣ̀: помѧнѝ добродѣ́тєли твоѧ̑, рцы̀: ста́рче, зрѝ блꙋ́дъ тво́й!

Глава̀ м҃д.

(Ѡ҆ покаѧ́нїи, чистотѣ̀ и҆ соверше́нствѣ. )

Соверше́нство всѧ́кагѡ тече́нїѧ во трїе́хъ си́хъ є҆́сть: въ покаѧ́нїи, и҆ чистотѣ̀, и҆ соверше́нствѣ. Что́ же є҆́сть покаѧ́нїе; Ѡ҆ста́вити пє́рвѣйшаѧ, и҆ печа́литисѧ ѡ҆ ни́хъ. И҆ что́ є҆сть чистота̀ вкра́тцѣ; Се́рдце ми́лостиво ѡ҆ всѧ́комъ созда́ннѣмъ є҆стествѣ̀. И҆ что́ є҆сть соверше́нство; Глꙋбина̀ смире́нїѧ, є҆́же є҆́сть ѡ҆ставле́нїе ви́димыхъ же всѣ́хъ и҆ неви́димыхъ: ви́димыхъ ᲂу҆́бѡ, всѣ́хъ чꙋ́вственныхъ: неви́димыхъ же, мы́сленныхъ, кромѣ̀ попече́нїѧ ѡ҆ ни́хъ. Є҆щѐ: покаѧ́нїе є҆́сть сꙋгꙋ́бо ᲂу҆мерщвле́нїе ѿ всѣ́хъ во́лею. Се́рдце ми́лостиво є҆́сть, горѣ́нїе се́рдца ѡ҆ всѧ́кой тва́ри, ѡ҆ человѣ́цѣхъ, и҆ пти́цахъ, и҆ живо́тныхъ, и҆ бѣ́сѣхъ, и҆ ѡ҆ всѧ́комъ созда́нїи. И҆ па́ки: є҆ли́кѡ є҆смы̀ въ мі́рѣ се́мъ, и҆ во пло́ти ѡ҆ста́влени, а҆́ще да́же до крꙋ́га небе́снагѡ вознесе́мсѧ, кромѣ̀ дѣ́лъ и҆ трꙋда̀ бы́ти на́мъ, въ безпопече́нїи бы́ти не мо́жемъ: сїѐ є҆́сть соверше́нство, прости́ мѧ. Мно́жайшее сегѡ̀ є҆́сть поꙋче́нїе, си́рѣчь без̾ помышле́нїѧ. И҆ ст҃ы́й маѯі́мъ: любомꙋ́дрїе по добродѣ́тели, произволе́нїѧ безстра́стїе, а҆ не є҆стества̀ дѣ́лати ѡ҆бы́че: по немꙋ́же, си́рѣчь безстра́стїю произволе́нїѧ, ᲂу҆́мнаѧ бж҃е́ственныѧ сла́дости прихо́дитъ благода́ть. И҆ па́ки: и҆́же печа́ли и҆ сла́сти плотскі́ѧ и҆скꙋ́съ прїѧ́тъ, мо́глъ бы глаго́латисѧ и҆скꙋ́сенъ, ꙗ҆́кѡ ᲂу҆до́бность и҆ неꙋдо́бность сꙋ́щихъ дѣ́лъ пло́ти и҆скꙋси́вый. Соверше́нъ же, и҆́же сла́сть пло́ти и҆ болѣ́знь, си́лою слове́сства побѣдѝ: всецѣ́лъ же, и҆́же навыкновє́нїѧ по дѣѧ́нїю и҆ видѣ́нїю непрелѡ́жна соблюдѐ съ крѣ́пкимъ къ бг҃ꙋ просте́ртїемъ. Си́хъ ᲂу҆̀бо ра́ди, разсꙋжде́нїе и҆ бо́льше всѣ́хъ добродѣ́телей бы́ти ѡ҆предѣли́сѧ. Ꙗ҆́кѡ въ ни́хже бы пришло̀ благоволе́нїемъ бж҃їимъ, мо́щно бж҃е́ственнымъ свѣ́томъ ѡ҆зарѧ́емымъ, и҆ бж҃е́ствєнныѧ и҆ человѣ́чєскїѧ разсꙋжда́ти со и҆звѣстноиспыта́нїемъ вє́щи, и҆ та́инствєннаѧ и҆ та̑йнаѧ видѣ̑нїѧ. И҆ сїѧ̑ ᲂу҆́бѡ си́це. Вре́мѧ же по чи́нꙋ ма́лѡ нѣ́какѡ, є҆ли́кѡ пости́гнꙋти мо́щно, хꙋдо́жнѣ расположи́ти тебѣ̀ и҆ пред̾ѡбѣща́ннагѡ и҆ бг҃отво́рнагѡ безмо́лвїѧ нача́ло, а҆́ки и҆з̾ѧсни́тельнѣе. бг҃ъ же да наставлѧ́етъ и҆ на и҆мꙋ̑щаѧ ѿсе́лѣ рещи́сѧ.

Глава̀ м҃є.

(Ѡ҆ пѧти́хъ дѣ́ланїихъ пе́рвагѡ, и҆ а҆́ки вводи́тельнагѡ новонача́льныхъ безмо́лвїѧ, си́рѣчь, ѡ҆ мл҃твѣ, пѣ́нїи, чте́нїи, поꙋче́нїи и҆ рꙋкодѣ́лїи. )

Пѧтьмѝ дѣ́ланїи, и҆́миже бг҃ъ слꙋжи́мь быва́етъ, до́лженъ є҆́сть въ безмо́лвїи новонача́льный проходи́ти нощеде́нствїе, то́ є҆сть, въ моли́твѣ, си́рѣчь въ па́мѧти гдⷭ҇а і҆и҃са хрⷭ҇та̀, непреста́ннѣ вводи́мой, ꙗ҆́коже предрече́сѧ, дыха́нїемъ но́здреннымъ въ се́рдце ти́хѡ, и҆ па́ки си́це и҆зводи́мою смѣжє́ннымъ сꙋ́щымъ ᲂу҆стна́мъ, без̾ и҆ны́ѧ каковы́ѧлибо мы́сли и҆ мечта́нїѧ, ꙗ҆̀же воздержа́нїемъ ѡ҆бдержи́тельнымъ чре́ва, глаго́лемъ, сна́ же и҆ и҆ны́хъ чꙋ́вствъ, внꙋ́трь ке́ллїи со смире́нїемъ и҆́стиннымъ и҆справлѧ́етсѧ. Въ пѣ́нїи, чте́нїи ѿ сщ҃е́ннагѡ ѱалти́ра и҆ бж҃е́ственнагѡ а҆пⷭ҇ла, и҆ ст҃ы́хъ є҆ѵⷢ҇лїй, и҆ писа́нїй бг҃омꙋ́дрыхъ, и҆ ст҃ы́хъ ѻ҆тє́цъ, и҆ па́че же ѿ гла́въ, ꙗ҆̀же ѡ҆ внима́нїи, и҆ моли́твѣ, и҆ трезвѣ́нїи, є҆ще́ же и҆ ѡ҆ про́чїихъ бж҃е́ственныхъ слове́съ дх҃а, съ приболѣ́зненною серде́чною па́мѧтїю согрѣше́нїй, и҆ размышле́нїемъ сꙋда̀ бж҃їѧ, и҆лѝ сме́рти, и҆лѝ мꙋ́ки, и҆лѝ наслажде́нїѧ вѣ́чныхъ бла̑гъ, и҆ подо́бныхъ: и҆ въ рꙋкодѣ́лїи ма́ломъ, воспѧща́ющемъ ᲂу҆ны́нїю, и҆ па́ки возвраща́тисѧ на моли́твꙋ, а҆́ще и҆ нꙋ́ждꙋ и҆́мать дѣ́ло сїѐ, до́ндеже ѡ҆бы́кнетъ ᲂу҆́мъ паре́нїе своѐ ᲂу҆до́бь ѿлага́ти соверше́ннымъ поꙋче́нїемъ ко гдⷭ҇ꙋ і҆и҃сꙋ хрⷭ҇тꙋ̀, и҆ па́мѧтїю всегда́шнею, и҆ ча́стымъ прини́кнꙋтїемъ ко внꙋ́треннѣй клѣ́ти, си́рѣчь, къ сокрове́нномꙋ се́рдца мѣ́стꙋ, и҆ ᲂу҆коре́нїемъ водрꙋже́ннымъ. Пи́шетъ бо ст҃ы́й і҆саа́къ: Потщи́сѧ вни́ти въ клѣ́ть, ꙗ҆́же внꙋтрьꙋ́дꙋ тебѐ, и҆ ᲂу҆́зриши клѣ́ть небе́снꙋю. Є҆ди́на бо є҆́сть сїѧ̀ и҆ ѻ҆́на и҆ ѻ҆́бѣ є҆ди́нымъ вхо́домъ ᲂу҆́зриши. И҆ ст҃ы́й маѯі́мъ: се́рдце влады́чествꙋетъ всѣ́мъ ѻ҆рга́номъ, и҆ повнегда̀ ѡ҆держи́тъ па̑жити се́рдца благода́ть ца́рствꙋетъ над̾ всѣ́ми пѡ́мыслы и҆ ᲂу҆десы̑: та́мѡ бо є҆́сть ᲂу҆́мъ и҆ всѝ по́мыслы дꙋше́внїи. Та́мѡ ᲂу҆̀бо подоба́етъ смотрѣ́ти, а҆́ще написа̀ благода́ть зако́ны всест҃а́гѡ дх҃а. Та́мѡ. Гдѣ̀; на влады́чественнѣмъ ѻ҆рга́нѣ, на престо́лѣ благода́ти, и҆дѣ́же ᲂу҆́мъ и҆ всѝ по́мыслы дꙋше́внїи, си́рѣчь, на се́рдцѣ.

Глава̀ м҃ѕ.

(Ѿкꙋ́дꙋ начина́ти подоба́етъ хотѧ́щымъ по ра́зꙋмꙋ безмо́лвствовати, и҆ ко́е є҆́сть нача́ло, и҆ раще́нїе, и҆ предспѣ́ѧнїе, и҆ соверше́нїе. )

Сїѐ є҆́сть дѣ́ланїе новонача́льныхъ и҆́нѡкъ, пе́рвое и҆ вводи́тельное и҆зволѧ́ющихъ по ра́зꙋмꙋ безмо́лвствовати: начина́ющихъ ᲂу҆́бѡ ѿ стра́ха бж҃їѧ, и҆ и҆сполне́нїѧ по си́лѣ всѣ́хъ бг҃отворѧ́щихъ за́повѣдей, и҆ без̾ попече́нїѧ ѿ бл҃госло́вныхъ и҆ безслове́сныхъ дѣ́лъ: и҆ пре́жде же всѣ́хъ ѿ вѣ́ры и҆ всеконе́чнагѡ ᲂу҆дале́нїѧ ѿ сопроти́вныхъ, и҆ къ сꙋ́щемꙋ вои́стиннꙋ чи́стагѡ завѣща́нїѧ, ꙗ҆́коже предрече́сѧ. Растꙋ́щымъ же непосты́дною наде́ждою, и҆ пред̾идꙋ́щымъ въ мѣ́рꙋ во́зраста и҆сполне́нїѧ хрⷭ҇то́ва, быва́ющымъ въ ни́хъ ѿ серде́чныѧ, чи́стыѧ и҆ непари́тельныѧ моли́твы всецѣ́лымъ бж҃е́ственнымъ и҆ горѧ́щимъ раче́нїемъ, и҆ си́це соверше́ннымъ быва́ющымъ: недви́жною и҆ неꙋкло́нною дꙋхо́вною моли́твою, и҆ ѿ соверше́нныѧ любвѐ и҆сточа́ющымсѧ къ є҆ди́номꙋ є҆ди́нымъ непосре́дственнымъ и҆зстꙋпле́нїемъ, восхище́нїемъ же и҆ соедине́нїемъ кра́йнѧгѡ жела́нїѧ, є҆́же є҆́сть непогрѣши́тельное, дѣѧ́нїемъ къ видѣ́нїю предспѣ́ѧнїе и҆ воспросте́ртїе. Є҆́же воспрїѧ́вый и҆ бг҃оѻте́цъ дв҃дъ, и҆ и҆змѣни́всѧ бж҃е́ственнымъ вои́стиннꙋ и҆змѣне́нїемъ, вельмѝ возопѝ: а҆́зъ рѣ́хъ во и҆зстꙋпле́нїи мое́мъ: всѧ́къ человѣ́къ ло́жь:⁵¹⁹ и҆ и҆́нъ ѿ просїѧ́вшихъ въ но́вомъ завѣ́тѣ: ѻ҆́ко не ви́дѣ, и҆ ᲂу҆́хо не слы́ша, и҆ на се́рдце человѣ́кꙋ не взыдо́ша, ꙗ҆́же ᲂу҆гото́ва бг҃ъ лю́бѧщымъ є҆го̀.⁵²⁰ И҆ сїѐ заключа́ѧ, наво́дитъ сїѐ: на́мъ же ѿкры́лъ є҆́сть дх҃омъ свои́мъ: дх҃ъ бо всѧ̑ и҆спытꙋ́етъ, и҆ глꙋбины̑ бж҃їѧ.

Глава̀ м҃з.

(Ѡ҆ чи́нѣ безмо́лвїѧ новонача́льныхъ. )

Новонача́льный ᲂу҆̀бо, ꙗ҆́коже предреко́хомъ, до́лженъ є҆́сть не ча́стѡ и҆сходи́ти ѿ ке́ллїи своеѧ̀, бесѣ́ды же и҆ видѣ́нїѧ всѣ́хъ ᲂу҆далѧ́тисѧ, ра́звѣ то́чїю за мно́гꙋю нꙋ́ждꙋ, и҆ тогда̀ со внима́нїемъ и҆ ᲂу҆твержде́нїемъ, и҆ рѣ́дцѣ, ꙗ҆́коже глаго́летъ бж҃е́ственный і҆саа́къ: ѡ҆ всѧ́кой ве́щи сїѧ̀ па́мѧть да пребꙋ́детъ въ тебѣ̀, ꙗ҆́кѡ лꙋ́чши є҆́сть по́мощь сїѧ̀, ꙗ҆́же ѿ ѡ҆хране́нїѧ, па́че по́мощи тоѧ̀, ꙗ҆́же ѿ дѣ́лъ. И҆ ꙗ҆́кѡ не то́кмѡ новонача̑льнымъ: но и҆ са̑мымъ ᲂу҆жѐ пред̾ꙋспѣва́ющымъ такова̑ѧ винѡ́вна быва́ютъ расточе́нїѧ и҆ разоре́нїѧ, ꙗ҆́коже то́йжде па́ки ст҃ы́й і҆саа́къ глаго́летъ: ꙗ҆́кѡ поко́й ю҆́ныѧ то́кмѡ поврежда́етъ, разрѣше́нїе же и҆ ю҆́ныѧ и҆ ста́рцы. И҆, безмо́лвїе внѣ̑шнѧѧ чꙋ̑вства ᲂу҆мерщвлѧ́етъ, а҆ внꙋ́трєннѧѧ движє́нїѧ воздвиза́етъ: внѣ́шнее же соѡбраще́нїе сопроти̑внаѧ си̑мъ твори́тъ, си́рѣчь внѣ̑шнѧѧ чꙋ̑вства воздвиза́етъ, а҆ внꙋ́трєннѧѧ движє́нїѧ ᲂу҆мерщвлѧ́етъ. И҆ се́й ᲂу҆́бѡ дѣѧ́нїе, є҆ще́ же и҆ бла́го содѣва́ти пꙋ́ть безмо́лвїѧ. та́кѡ ре́кши, ѻ҆́тай и҆з̾ѧвлѧ́етъ: лѣ́ствичникъ же [ѿ к҃з степе́ни], на стезѝ бла́гѡ дѣ́ющаго и҆ ходѧ́щаго слѣ́дꙋющими ѻ҆́тай назна́менꙋетъ, пишѧ̀: безмо́лвникъ є҆́сть, и҆́же безтѣле́сное въ тѣле́снѣмъ домꙋ̀ ѡ҆грани́чивати любопри́тсѧ, є҆́же пресла́вно є҆́сть. Безмо́лвникъ є҆́сть ѻ҆́ный рекі́й: а҆́зъ сплю̀, а҆ се́рдце моѐ бди́тъ.⁵²¹ Затворѧ́й ᲂу҆̀бо две́рь ке́ллїи, тѣлесѝ: и҆ две́рь ѧ҆зы́ка глаго́ланїю: и҆ внꙋ́тренюю две́рь, лꙋка́вствїю дꙋхѡ́въ.

Глава̀ м҃и.

(Ѡ҆ моли́твѣ серде́чнѣй, и҆ є҆ѧ̀ дѣ́ланїе чрез̾ внима́нїе и҆ трезвѣ́нїе. )

Моли́тва со внима́нїемъ и҆ трезвѣ́нїемъ быва́ющи внꙋ́трь се́рдца, ꙗ҆́коже рече́сѧ, без̾ и҆ны́ѧ мы́сли, си́рѣчь, и҆ мечта́нїѧ какова́гѡлибо. Си́мъ ᲂу҆́бѡ: гдⷭ҇и і҆и҃се хрⷭ҇тѐ сн҃е бж҃їй, къ самомꙋ̀ помина́емомꙋ гдⷭ҇ꙋ і҆и҃сꙋ хрⷭ҇тꙋ̀ невеще́ственнѣ и҆ неглаго́льнѣ, соверше́ннѣ ᲂу҆́мъ воспростира́етсѧ: си́мъ же: поми́лꙋй мѧ̀, ѡ҆браща́етсѧ и҆ дви́житсѧ къ себѣ̀, не терпѧ̀ ѡ҆ себѣ̀ не моли́тисѧ: къ любви́ же пред̾ꙋспѣ́въ и҆скꙋ́сомъ є҆ди́нственнѣ, соверше́ннѣ къ самомꙋ̀ гдⷭ҇ꙋ і҆и҃сꙋ хрⷭ҇тꙋ̀ горѣ̀ воспростира́етсѧ, ѡ҆ второ́мъ, си́рѣчь ѡ҆ поми́лованїи, и҆звѣ́ствованїе ꙗ҆́вственнѡ прїе́мь.

Глава̀ м҃ѳ.

(Ка́кѡ моли́твꙋ бж҃е́ственнїи ѻ҆тцы̀ преда́ша на́мъ глаго́лати, и҆ ꙗ҆́кѡ разли́чнѣ, и҆ ка́ѧ є҆́сть моли́тва сїѧ̀. )

Тѣ́мже не всегда̀ моли́твꙋ цѣ́лꙋ бж҃е́ственнїи ѻ҆тцы̀ предаю́ще ви́дѧтсѧ: но ѻ҆́въ ᲂу҆́бѡ цѣ́лꙋ: ѻ҆́въ же полови́нꙋ: ѻ҆́въ же ѿ ча́сти, и҆ дрꙋгі́й и҆́накѡ, проти́вꙋ молѧ́щагѡсѧ не́гли си́лы и҆ ᲂу҆строе́нїѧ. И҆ бж҃е́ственный ᲂу҆́бѡ златоꙋ́стъ цѣ́лꙋ тꙋ̀ предае́тъ, та́кѡ пишѧ̀: молю̀ ва́съ бра́тїе, пра́вило моли́твы никогда́же да да попере́те и҆лѝ пре́зрите. Слы́шахъ бо нѣ́когда ѻ҆тцы̀ глаго́лющыѧ, ꙗ҆́кѡ како́въ є҆́сть ѻ҆́нъ и҆́нокъ, а҆́ще пра́вило сїѐ пре́зритъ, и҆лѝ попере́тъ: но до́лженъ є҆́сть, а҆́ще ꙗ҆́стъ, а҆́ще пїе́тъ, а҆́ще сѣди́тъ, а҆́ще слꙋ́житъ, а҆́ще пꙋтеше́ствꙋетъ, а҆́ще и҆́но что̀ твори́тъ, непреста́ннѡ вопи́ти сїѐ: гдⷭ҇и і҆и҃се хрⷭ҇тѐ сн҃е бж҃їй, поми́лꙋй мѧ̀: да па́мѧть сїѧ̀ и҆́мене гдⷭ҇а на́шегѡ і҆и҃са хрⷭ҇та̀, раздражи́тъ на бра́нь врага̀. Всѧ́ бо па́мѧтїю мо́жетъ ѡ҆брѣстѝ нꙋ́дѧщаѧсѧ дꙋша̀, а҆́ще лꙋка̑ваѧ, а҆́ще блага̑ѧ: пе́рвѣе же ѕла̑ѧ мо́жетъ ᲂу҆ви́дѣти внꙋтрьꙋ́дꙋ въ се́рдцѣ свое́мъ, и҆ тогда̀ блага̑ѧ. Па́мѧть бо сїѧ̀ мо́жетъ подви́гнꙋти ѕмі́ѧ, и҆ па́мѧть сїѧ̀ мо́жетъ смири́ти є҆го̀: па́мѧть сїѧ̀ мо́жетъ ѡ҆бличи́ти живꙋ́щїй въ на́съ грѣ́хъ, и҆ па́мѧть сїѧ̀ мо́жетъ є҆го̀ потреби́ти: па́мѧть сїѧ̀ мо́жетъ подви́гнꙋти всю̀ си́лꙋ вра́жїю въ се́рдцѣ, и҆ па́мѧть сїѧ̀ мо́жетъ ю҆̀ побѣди́ти и҆ и҆зкорени́ти пома́лꙋ, ꙗ҆́кѡ да и҆́мѧ гдⷭ҇а і҆и҃са сходѧ́що во глꙋбинꙋ̀ се́рдца, ѕмі́ѧ ᲂу҆́бѡ держа́щаго па̑жити, смири́тъ, дꙋ́шꙋ же спасе́тъ и҆ ѡ҆животвори́тъ. Непреста́ннѡ ᲂу҆́бѡ пребꙋ́ди во и҆́мени гдⷭ҇а і҆и҃са, ꙗ҆́кѡ да поглоти́тъ се́рдце гдⷭ҇а, и҆ гдⷭ҇ь се́рдце: и҆ бꙋ́дета два̀ сїѧ̑ во є҆ди́но. Ѻ҆ба́че дѣ́ло сїѐ нѣ́сть є҆ди́нагѡ днѐ и҆лѝ двою̀, но лѣ́та мно́га и҆ вре́мене: мно́га бо по́двига и҆ вре́мене потре́ба, ꙗ҆́кѡ да и҆згна́нъ бꙋ́детъ вра́гъ, и҆ всели́тсѧ хрⷭ҇то́съ. И҆ па́ки: подоба́етъ ᲂу҆твержда́ти и҆ ᲂу҆правлѧ́ти ᲂу҆́мъ, и҆ ѡ҆бꙋзда́ти є҆го̀, и҆ всѧ́къ по́мыслъ, и҆ всѧ́ко лꙋка́вагѡ дѣ́йство низлага́ти призыва́нїемъ гдⷭ҇а на́шегѡ і҆и҃са хрⷭ҇та̀: и҆ и҆дѣ́же тѣ́ло стои́тъ, та́мѡ да бꙋ́детъ и҆ ᲂу҆́мъ: да посредѣ̀ бг҃а и҆ се́рдца ничто́же и҆́но ѡ҆брѣта́етсѧ, ꙗ҆́кѡ средостѣ́нїе и҆лѝ прегражде́нїе прїѡсѣнѧ́ющее се́рдце, и҆ разлꙋча́ющее ᲂу҆́мъ ѿ бг҃а. А҆́ще же нѣ́когда и҆ восхища́етъ ᲂу҆́мъ, не подоба́етъ въ по́мыслѣхъ коснѣ́ти, да не сосложе́нїе по́мыслѡвъ, въ дѣѧ́нїе тебѣ̀ вмѣни́тсѧ въ де́нь сꙋда̀ пред̾ гдⷭ҇емъ, є҆гда̀ сꙋди́ти и҆́мать бг҃ъ та̑йнаѧ человѣ́кѡвъ. Оу҆праздни́тесѧ ᲂу҆̀бо вы́нꙋ, и҆ пребꙋ́дите въ гдⷭ҇ѣ бз҃ѣ на́шемъ, до́ндеже ᲂу҆ще́дритъ вы̀. И҆ ничесогѡ́же и҆но́гѡ и҆щи́те, ра́звѣ то́чїю ми́лости ѿ гдⷭ҇а сла́вы: и҆́щꙋще же ми́лости, со смире́ннымъ и҆ ᲂу҆миле́ннымъ се́рдцемъ и҆щи́те, и҆ вопі́йте ѿ ᲂу҆́тра до ве́чера, а҆́ще возмо́жно и҆ всю̀ но́щь сїѐ: гдⷭ҇и і҆и҃се хрⷭ҇тѐ сн҃е бж҃їй, поми́лꙋй мѧ̀. И҆ понꙋ́дите ᲂу҆́мъ ва́шъ на сїѐ дѣ́ло да́же до сме́рти: мно́гагѡ бо по́двига тре́бꙋетъ дѣ́ло сїѐ, занѐ ᲂу҆́зкаѧ врата̀ и҆ тѣ́сный пꙋ́ть вводѧ́й въ живо́тъ, и҆ нꙋ̑ждницы восхища́ютъ є҆го̀:⁵²² нꙋ́дѧщихсѧ бо є҆́сть ца́рствїе небе́сное. Молю̀ ᲂу҆̀бо ва́съ, не ѿлꙋча́йте серде́цъ ва́шихъ ѿ бг҃а, но присѣди́те и҆ храни́те ѧ҆̀ съ па́мѧтїю гдⷭ҇а на́шегѡ і҆и҃са хрⷭ҇та̀ всегда̀, до́ндеже водрꙋзи́тсѧ и҆́мѧ гдⷭ҇не внꙋ́трь въ се́рдцѣ, и҆ ничто́же и҆́но помышлѧ́етъ, то́чїю ꙗ҆́кѡ до возвели́читсѧ хрⷭ҇то́съ въ ва́съ. Пре́жде же сегѡ̀ златоꙋ́ста, пишѧ̀ вели́кїй па́ѵелъ глаго́летъ: А҆́ще и҆сповѣ́си ᲂу҆сты̑ твои́ми гдⷭ҇а і҆и҃са, и҆ вѣ́рꙋеши въ се́рдцѣ твое́мъ, ꙗ҆́кѡ бг҃ъ того̀ воздви́же и҆з̾ ме́ртвыхъ, спасе́шисѧ: се́рдцемъ бо вѣ́рꙋетсѧ въ пра́вдꙋ, ᲂу҆сты́ же и҆сповѣ́дꙋетсѧ во спасе́нїе.⁵²³ И҆ па́ки: Никто́же глаго́летъ гдⷭ҇а і҆и҃са, то́чїю дх҃омъ ст҃ы́мъ,⁵²⁴ то́ є҆сть, є҆гда̀ дѣ́йство дх҃а ст҃а́гѡ прїи́метъ се́рдце, и҆́мже и҆ мо́литсѧ, є҆́же є҆́сть пред̾ꙋспѣ́вшихъ, и҆ въ себѣ̀ ꙗ҆́вѣ внꙋ́трь живꙋ́ща хрⷭ҇та̀ стѧжа́вшихъ. Послѣ́дꙋѧ семꙋ̀, и҆ ст҃ы́й дїадо́хъ [глава̀ н҃ѳ], глаго́летъ: Всѧ́кѡ и҆стѧзꙋ́етъ ѿ на́съ ᲂу҆́мъ, є҆гда̀ всѧ̑ є҆гѡ̀ и҆схождє́нїѧ загради́мъ па́мѧтїю бж҃їею, дѣ́ла до́лжна, є҆́же и҆звѣ́стнымъ твори́ти є҆гѡ̀ скоротече́нїе. Подоба́етъ ᲂу҆́бѡ даѧ́ти є҆мꙋ̀ сїѐ: гдⷭ҇и і҆и҃се, то́чїю во всецѣлодѣ́ланїе мы́сли. Никто́же бо, речѐ, глаго́летъ гдⷭ҇а і҆и҃са, то́чїю дх҃омъ ст҃ы́мъ. Са́мый ᲂу҆́бѡ тѣ́снѣ се́й глаго́лъ при́снѡ въ храни́лищахъ свои́хъ да зри́тъ, ꙗ҆́кѡ да не въ мечта̑нїѧ ᲂу҆клони́тсѧ нѣ̑каѧ. Є҆ли́цы бо пресла́вномꙋ семꙋ̀ и҆ многовожделѣ́нномꙋ и҆́мени непреста́ннѡ во глꙋбинѣ̀ се́рдца поꙋча́ютсѧ, сі́и и҆ свѣ́тъ своегѡ̀ ᲂу҆ма̀ мо́гꙋтъ нѣ́когда зрѣ́ти. Тѣ́снымъ бо попече́нїемъ ѿ мы́сли держи́мꙋ всѧ́кꙋ возница́ющꙋю скве́рнꙋ на дꙋшѝ, въ чꙋ́вствѣ дово́льнѣ попалѧ́етъ. И҆́бо бг҃ъ на́шъ, глаго́летъ, ѻ҆́гнь поѧда́ѧй ѕло́бꙋ.⁵²⁵ Тѣ́мже и҆ въ любо́вь про́чее мно́гꙋю сла́вы своеѧ̀, дꙋ́шꙋ призыва́етъ гдⷭ҇ь. Закоснѣва́ющи бо сла́вное сїѐ и҆ многовожделѣ́нное и҆́мѧ па́мѧтїю ᲂу҆ма̀ въ теплотѣ̀ се́рдца, навыкнове́нїе въ на́съ всѧ́кѡ твори́тъ люби́ти бла́гость є҆гѡ̀, ничесомꙋ́же сꙋ́щꙋ про́чее воспѧща́ющꙋ. Се́й бо є҆́сть би́серъ многоцѣ́нный, є҆го́же прода́въ нѣ́кто, всѐ своѐ и҆мѣ́нїе стѧжа́ти мо́жетъ, и҆ и҆мѣ́ти неизглаго́ланнꙋю ѡ҆ ѡ҆брѣ́тенїи є҆гѡ̀ ра́дость. Ст҃ы́й же и҆сѵ́хїй хрⷭ҇та̀ і҆и҃са, та́кѡ пишѧ̀, и҆злага́етъ: Возлетѣ́вши дꙋша̀ по сме́рти на воздꙋ́хъ во врата̀ небє́снаѧ, съ собо́ю ѡ҆ себѣ̀ и҆мꙋ́щи і҆и҃са [глава̀ рм҃ѳ], нижѐ та́мѡ врагѡ́въ ᲂу҆срами́тсѧ, но съ дерзнове́нїемъ, ꙗ҆́коже ны́нѣ, и҆ тогда̀ возглаго́летъ къ ни̑мъ во вратѣ́хъ. То́чїю до и҆схо́да своего̀ да не ᲂу҆ны́етъ вопи́ти ко хрⷭ҇тꙋ̀ і҆и҃сꙋ де́нь и҆ но́щь, и҆ то́й творѧ̀ сотвори́тъ ѿмще́нїе є҆ѧ̀ вско́рѣ, по нело́жномꙋ своемꙋ̀ и҆ бж҃е́ственномꙋ ѡ҆бѣща́нїю, є҆́же речѐ ѡ҆ сꙋдїѝ непра́веднѣмъ. Є҆́й, глаго́лю ва́мъ, сотвори́тъ и҆ въ жи́зни се́й настоѧ́щей, и҆ по и҆схо́дѣ є҆ѧ̀ ѿ тѣ́ла. Лѣ́ствичникъ же і҆и҃са то́чїю глаго́лѧ [ѿ к҃а степе́ни]: і҆и҃совымъ и҆́менемъ бі́й сꙋпоста́ты: нѣ́сть бо на небесѝ и҆ на землѝ крѣ́пльша ѻ҆рꙋ́жїѧ. И҆ ничто́же и҆́но прилага́етъ. И҆ па́ки же глаго́летъ [ѿ к҃з степе́ни]: і҆и҃сова па́мѧть да соедини́тсѧ съ дыха́нїемъ твои́мъ, и҆ тогда̀ позна́еши безмо́лвїѧ по́льзꙋ.

Глава̀ н҃.

(Є҆щѐ, ꙗ҆́кѡ не то́чїю ѿ рече́нныхъ ст҃ы́хъ ѻ҆тє́цъ, но и҆ самы́хъ верхо́вныхъ а҆пⷭ҇лъ. петра̀ и҆ па́ѵла и҆ і҆ѡа́нна ѡ҆брѣто́шасѧ тайнонаꙋче́ни нѣ́какѡ дꙋ́хомъ глаго́лы сщ҃є́нныѧ и҆ бг҃отвѡ́рныѧ моли̑твы. )

Не то́чїю же ѿ си́хъ рече́нныхъ бг҃омꙋ́дрыхъ ѻ҆тє́цъ, и҆ подо́бныхъ и҆̀мъ ѡ҆брѧ́щетъ кто̀ таковы̑ѧ сщ҃є́нныѧ и҆ бг҃отвѡ́рныѧ моли̑твы, глаго́лы нѣ́какѡ тайнонаꙋче́ны, но и҆ пре́жде си́хъ, ѿ са́мыхъ первоверхо́вныхъ а҆пⷭ҇лъ съ петро́мъ, глаго́лемъ, па́ѵла же и҆ і҆ѡа́нна. Є҆ди́нъ ᲂу҆̀бо глаго́летъ, ꙗ҆́коже предреко́хомъ: никто́же мо́жетъ рещѝ гдⷭ҇а і҆и҃са, то́чїю дх҃омъ ст҃ы́мъ.⁵²⁶ Дрꙋгі́й же: благода́ть и҆ и҆́стина і҆и҃съ хрⷭ҇то́мъ бы́сть.⁵²⁷ И҆, всѧ́къ дх҃ъ, и҆́же и҆сповѣ́дꙋетъ і҆и҃са хрⷭ҇та̀ во пло́ти прише́дша, ѿ бг҃а є҆́сть.⁵²⁸ Пред̾избра́нный же ѿ хрⷭ҇то́выхъ ᲂу҆чени̑къ на вопроше́нїе сїѐ сп҃са и҆ ᲂу҆чи́телѧ къ са̑мымъ а҆пⷭ҇лѡмъ: кого̀ мѧ̀ глаго́лютъ человѣ́цы бы́ти; блаже́ннѣйшее противонаводѧ̀ и҆сповѣ́данїе, ѿвѣща̀: ты̀ є҆сѝ хрⷭ҇то́съ сн҃ъ бг҃а жива́гѡ.⁵²⁹ Сегѡ̀ ра́ди и҆ сꙋ́щїи по ни́хъ, на́ши же сла́внїи наста̑вницы, па́че же и҆́же безсꙋпрꙋ́жнымъ и҆ пꙋсты́ннымъ и҆ безмо́лвнымъ житїе́мъ ше́ствовавшїи, такѡва́ѧ речє́нїѧ ꙗ҆́кѡ разсѣ́ѧннѡ и҆ по ча́сти тремѝ си́ми столпа́ми ст҃ы́ѧ це́ркви предвозвѣщє́нныѧ, ꙗ҆́кѡ бж҃є́ственныѧ гла́сы, по ѿкрове́нїю дх҃омъ ст҃ы́мъ пред̾ꙋзакѡ́ненныѧ, є҆ще́ же и҆ тремѝ достовѣ́рными мно́жицею свидѣ́тельствѡванныѧ: треми́ же, глаго́летъ, свидѣ́тельми ста́нетъ всѧ́къ глаго́лъ. Сі́и небомꙋ́дреннїи во є҆ди́но собра́вше, и҆зрѧ́днѣйше и҆ со живꙋ́щимъ въ ни́хъ ст҃ы́мъ дх҃омъ соста́вивше, сто́лпъ моли́твы нареко́ша, и҆ сꙋ́щымъ пото́мъ преда́ша, по ѡ҆́бразꙋ подо́бномꙋ держа́ти же и҆ храни́ти є҆го̀. Зрѝ ᲂу҆̀бо и҆ чи́нъ и҆ послѣ́дованїе, и҆мꙋ́щее преѕѣ́льнꙋю ди́вность со премꙋ́дростїю, ꙗ҆́же свы́ше. Занѐ ѻ҆́въ ᲂу҆̀бо глаго́летъ гдⷭ҇а і҆и҃са: ѻ҆́въ же і҆и҃са хрⷭ҇та̀: ѻ҆́въ же хрⷭ҇та̀, сн҃а бж҃їѧ, а҆́ки нѣ́какѡ послѣ́дꙋѧ є҆ди́нъ дрꙋго́мꙋ, и҆ бли́зъ дрꙋ́гъ дрꙋ́га грѧдꙋ́ще согла́сїемъ и҆ сою́зомъ таковы́хъ бг҃одѣ́йныхъ глагѡ́лъ. Ви́дѣти бо мо́щно тѝ є҆́сть ѿ си́хъ ко́еждо сꙋ́щее на концѣ̀ є҆ди́нагѡ, ꙗ҆́кѡ нача́ло дрꙋга́гѡ прїе́млюща, и҆ та́кѡ сїѐ пред̾и́детъ да́же до трїе́хъ. То́жде же и҆ въ приложе́нїи зна́менїѧ дх҃а ᲂу҆зрѣ́ти и҆́мать. Ре́кшꙋ бо блаже́нномꙋ па́ѵлꙋ сїѐ: никто́же мо́жетъ рещѝ гдⷭ҇а і҆и҃са, то́чїю дх҃омъ ст҃ы́мъ. Сїѐ ᲂу҆̀бо лежа́щее на концѣ̀, дх҃а ст҃а́го глаго́лемъ, нача́ло ᲂу҆потреби́лъ є҆́сть громогла́сный і҆ѡа́ннъ, рекі́й: Всѧ́къ дх҃ъ, и҆́же и҆сповѣ́дꙋетъ і҆и҃са хрⷭ҇та̀ во пло́ти прише́дша, ѿ бг҃а є҆́сть.⁵³⁰ Сїѧ̑ же предложи́ша всѣ̑мъ, не собо́ю и҆ ѿ себѐ, но дла́нїю дви́жими прест҃а́гѡ дх҃а. И҆́бо и҆ бж҃е́ственнѣйшагѡ петра̀ по ѿкрове́нїю и҆сповѣ́данїе, дх҃омъ ст҃ы́мъ є҆́сть дѣ́йствꙋемо. Всѧ̑ бо, глаго́летъ, дѣ́йствꙋетъ є҆ди́нъ и҆ то́йжде дх҃ъ, раздѣлѧ́ѧ ѻ҆со́бнѡ коемꙋ́ждо, ꙗ҆́коже хо́щетъ,⁵³¹ и҆ си́це ᲂу҆̀бо а҆́ки треплете́на и҆ нерасто́ржна ве́рвь бг҃отво́рныѧ моли́твы, ѕѣлѡ̀ премꙋ́дрѣ и҆ разꙋ́мнѣ и҆стка́на же и҆ сши́та, и҆ соста́влена, и҆ на послѣ́дꙋющихъ на́мъ прехо́дитъ ра́внымъ ѡ҆́бразомъ блюдо́ма. Ѻ҆ба́че рече́нїѧ сегѡ̀, поми́лꙋй мѧ̀, приложе́нїе послѣ́дствꙋющїи бж҃е́ственнїи ѻ҆тцы̀ съ си́ми спаси́тельными моли́твы глагѡ́лы, си́рѣчь: гдⷭ҇и і҆и҃се хрⷭ҇тѐ сн҃е бж҃їй, соста́виша и҆ сочини́ша, наипа́че же младе́нственнѣйшихъ ра́ди по добродѣ́тели, си́рѣчь, новонача́льныхъ и҆ несоверше́нныхъ. Пред̾ꙋспѣ́вшїи бо и҆ соверше́ннїи ѡ҆ хрⷭ҇тѣ̀ є҆ди́нымъ кі́имждо таковы́хъ бж҃е́ственныхъ глагѡ́лъ, си́рѣчь, си́мъ: гдⷭ҇и і҆и҃се, і҆и҃се хрⷭ҇тѐ, хрⷭ҇тѐ сн҃е бж҃їй! є҆ще́ же и҆ є҆ди́нымъ, і҆и҃се, нарече́нїемъ дово́льни сꙋ́ть, и҆ ꙗ҆́кѡ всецѣ́ло дѣ́ланїе моли́твы, се́й глаго́лъ ѡ҆б̾е́млютъ и҆ лобыза́ютъ: ꙗ҆́кѡ си́мъ неизрече́нныѧ и҆ всѧ́къ ᲂу҆́мъ, и҆ всѧ́ко видѣ́нїе, и҆ слꙋ́хъ препобѣжда́ющїѧ сла́дости и҆ ра́дости и҆сполнѧ́еми. И҆ си́це ᲂу҆́бѡ внѣ̀ пло́ти и҆ мі́ра быва́юще треблаже́ннїи, смѣжава́юще чꙋ̑вства вселѧ́ющимсѧ въ ни́хъ бж҃е́ственнымъ да́ромъ же и҆ благода́тїю, и҆зстꙋпи́тельнѡ и҆ блаже́ннѡ раче́нїемъ є҆́млеми, ѡ҆чища́ютсѧ, и҆ просвѣща́ютсѧ, и҆ соверша́ютсѧ, ꙗ҆́кѡ преесте́ственнꙋю пресꙋ́щественнагѡ бж҃ества̀, и҆ безнача́льнꙋю и҆ несозда́ннꙋю благода́ть ѿсе́лѣ, ꙗ҆́кѡ въ ча́сти ѡ҆брꙋче́нїѧ, ꙗ҆́кѡ въ зерца́лѣ взира́ющїи неѧ́внѡ, и҆ є҆ди́ною па́мѧтїю и҆ поꙋче́нїемъ, ꙗ҆́коже рече́сѧ, є҆ди́нагѡ коегѡ́ждо ѿ ска́занныхъ нарече́нїй бг҃очеловѣ́ка сло́ва дово́льствꙋющїисѧ, и҆ се́ю въ восхищє́нїѧ, и҆ соединє́нїѧ, и҆ ѿкровє́нїѧ, и҆ соединє́нїѧ, и҆ ѿкровє́нїѧ неизглагѡ́ланна превозноси́ми, и҆ дꙋ́хомъ сподоблѧ́еми неизрече́ннѣ. Въ ꙗ҆́вственное и҆звѣ́ствованїе си́хъ и҆ ᲂу҆вѣре́нїе ꙗ҆снѣ́йшее, сладча́йшїй и҆ дꙋшелюби́вый гдⷭ҇ь на́шъ і҆и҃съ хрⷭ҇то́съ сн҃ъ бж҃їй, є҆гѡ́же словеса̀ сꙋ́ть дѣла̀, и҆ глаго́лы по немꙋ̀ дх҃ъ сꙋ́ть и҆ живо́тъ, и҆зречѐ ѕѣлѡ̀ ꙗ҆́вѣ: ꙗ҆́кѡ без̾ менѐ не мо́жете твори́ти ничесѡ́же.⁵³² И҆ а҆́ще что̀ про́сите въ и҆́мѧ моѐ, а҆́зъ сотворю̀. И҆ па́ки: є҆́же а҆́ще что̀ про́сите во и҆́мѧ моѐ, то̀ сотворю̀, и҆ прѡ́чаѧ, по предрече́нномꙋ на́ми.⁵³³

Глава̀ н҃а.

(Ꙗ҆́кѡ мо́щно є҆́сть и҆ новонача̑льнымъ, ѻ҆вогда̀ ᲂу҆́бѡ всѣ́ми моли́твы глагѡ́лы, ѻ҆вогда́ же ча́стїю сеѧ̀ моли́тисѧ, ѻ҆ба́че внꙋ́трь се́рдца, и҆ при́снѡ: и҆ ѡ҆ є҆́же не премѣнѧ́ти ча́стѣ глаго́лы. )

Мо́щно же є҆́сть и҆ новонача̑льнымъ, ѻ҆вогда̀ ᲂу҆́бѡ всѣ́ми моли́твы глагѡ́лы, ѻ҆вогда́ же ча́стїю сеѧ̀ моли́тисѧ, ѻ҆ба́че внꙋ́трь се́рдца, и҆ при́снѡ. По ст҃о́мꙋ же дїа́дохꙋ:⁵³⁴ входѧ́й вы́нꙋ въ се́рдце своѐ, ѿхо́дитъ всѧ́кѡ ѿ красо́тъ жите́йскихъ: дꙋ́хомъ бо ходѧ̀, по́хоти плотскі́ѧ вѣ́дѣти не мо́жетъ,⁵³⁵ занѐ про́чее въ стра́жбищѣ добродѣ́телей сицевы́й хо́дитъ, са̑мыѧ добродѣ́тєли, ꙗ҆́коже привра́тники и҆мѣ́ѧ гра́да чистоты̀: тѣ́мже и҆ недѣйстви́тельни про́чее кѡ́зни на него̀ бѣсѡ́въ тогда̀ быва́ютъ. Пи́шетъ же и҆ ст҃ы́й і҆саа́къ (ѿ н҃ сло́ва): посѣща́ющагѡ дꙋ́шꙋ свою̀ на всѧ́къ ча́съ, весели́тсѧ се́рдце во ѡ҆крове́нїихъ. И҆, собира́ѧй видѣ́нїе ᲂу҆ма̀ своегѡ̀, внꙋтрьꙋ́дꙋ въ себѣ̀ зри́тъ зарю̀ дꙋхо́внꙋю. И҆́же возгнꙋша́сѧ всѧ́кагѡ паре́нїѧ, зри́тъ влады́кꙋ своего̀ внꙋтрьꙋ́дꙋ се́рдца своегѡ̀. Нижѐ ча́стѣ премѣнѧ́ти речє́нїѧ моли́твы, да не ча́стымъ премѣне́нїемъ, преноше́нїемъ, а҆́ки нѣ́коемꙋ нестоѧ́нїю и҆ ᲂу҆клоне́нїю ѡ҆бы́кши ᲂу҆́мъ, неводрꙋже́нъ и҆ безпло́денъ пребꙋ́детъ, ꙗ҆́коже ча́стѡ предви̑жимаѧ и҆ пресажда́ємаѧ древеса̀.

Глава̀ н҃в.

(Ꙗ҆́кѡ пло́дъ моли́твы, внꙋ́трь се́рдца моли́тисѧ, и҆ вре́мени до́лгагѡ тре́бꙋетъ, и҆ по́двига, и҆ понꙋжде́нїѧ, и҆ воѻбщѐ всѧ́ко бла́го мно́гимъ трꙋдо́мъ и҆ вре́менемъ и҆справлѧ́етсѧ. )

И҆ сїѐ, є҆́же при́снѡ внꙋ́трь се́рдца моли́тисѧ: подо́бнѣ же и҆ вы̑шшаѧ сегѡ̀, не про́стѣ, и҆ ꙗ҆́коже бы приключи́лосѧ, и҆ ма́лымъ трꙋдо́мъ и҆ вре́менемъ и҆справлѧ́етсѧ, а҆́ще ᲂу҆́бѡ и҆ сїѐ рѣ́дцѣ въ нѣ́кїихъ по неизрече́нномꙋ смотре́нїю ѡ҆брѣ́тесѧ: но и҆ вре́мене до́лга, и҆ трꙋда̀, и҆ по́двига тѣле́сна же и҆ дꙋше́вна не ма́ла, и҆ понꙋжде́нїѧ мно́га и҆ продолжи́тельна ко и҆справле́нїю тре́бꙋетъ. По превосхо́днѣй бо мѣ́рѣ да́ра и҆ благода́ти, є҆ѧ́же надѣ́емсѧ въ прича́стїи бы́ти, ра́вны по си́лѣ подоба́етъ и҆ по́двиги ѡ҆ не́й и҆мѣ́ти, и҆ часы̀ по мѣ́рѣ ѡ҆предѣлѧ́ти. Сїѧ́ же є҆́сть, по свѧщенноꙋчи́телємъ, є҆́же и҆згна́нꙋ бы́ти ѿ па́житей се́рдца врагꙋ̀, и҆ всели́тисѧ въ него̀ ꙗ҆́вѣ хрⷭ҇тꙋ̀. Глаго́летъ бо ст҃ы́й і҆саа́къ (ѿ н҃ сло́ва): хотѧ́й ᲂу҆ви́дѣти гдⷭ҇а, хꙋдо́жествꙋетъ ѡ҆чи́стити се́рдце своѐ непреста́нною па́мѧтїю бж҃їею, и҆ та́кѡ свѣ́тлостїю мы́сли своеѧ̀ на всѧ́къ ча́съ зрѣ́ти и҆́мать гдⷭ҇а. И҆ ст҃ы́й варсоно́фїй: а҆́ще не внꙋ́треннее дѣ́ланїе съ бг҃омъ помо́жетъ человѣ́кꙋ, всꙋ́е по внѣ́шнемꙋ трꙋжда́етсѧ. Внꙋ́треннѣйшее бо дѣ́ланїе съ болѣ́знїю се́рдца прино́ситъ чистотꙋ̀: чистота́ же и҆́стинное се́рдца безмо́лвїе: безмо́лвїе же сїѐ смире́нїе: смире́нїе же, жили́щемъ бж҃їимъ твори́тъ человѣ́ка: ѿ вселе́нїѧ же сегѡ̀, со страстьмѝ бѣ́сове и҆згонѧ́еми быва́ютъ: и҆ си́це быва́етъ человѣ́къ хра́мъ бж҃їй, и҆спо́лненный ѡ҆свѧще́нїѧ, и҆спо́лненный просвѣще́нїѧ, чистоты́ же и҆ благода́ти. Блаже́нъ ᲂу҆́бѡ є҆́сть ѻ҆́ный, и҆́же гдⷭ҇а своего̀ во внꙋ́треннѣйшихъ се́рдца, ꙗ҆́кѡ въ зерца́лѣ зри́тъ, и҆злива́ѧ моле́нїе своѐ съ пла́чемъ пред̾ бла́гостїю є҆гѡ̀. И҆ преподо́бный і҆ѡа́ннъ є҆пі́скопъ карпаѳі́йскїй: мно́гагѡ вре́мене и҆ по́двига потре́ба къ моли́твамъ, ꙗ҆́кѡ да ѡ҆брѧ́щемъ въ нестꙋжа́емѣмъ ᲂу҆ма̀ ᲂу҆строе́нїи и҆но́е нѣ́кое серде́чное не́бо, и҆дѣ́же живе́тъ хрⷭ҇то́съ, ꙗ҆́коже глаго́летъ а҆пⷭ҇лъ: и҆лѝ не зна́ете, ꙗ҆́кѡ і҆и҃съ хрⷭ҇то́съ живе́тъ въ ва́съ, ра́звѣ то́чїю чи́мъ ᲂу҆́бѡ неискꙋ́сни є҆стѐ.⁵³⁶ И҆ вели́кїй златоꙋ́стъ (въ сло́вѣ ко и҆гꙋ́менꙋ): непреста́ннѡ пребꙋ́ди во и҆́мени гдⷭ҇а і҆и҃са, ꙗ҆́кѡ да поглоти́тъ се́рдце гдⷭ҇а, и҆ гдⷭ҇ь се́рдце, и҆ бꙋ́дета два̀ во є҆ди́но. Ѻ҆ба́че дѣ́ло сїѐ нѣ́сть є҆ди́нагѡ днѐ, и҆лѝ двою̀, но лѣ́та мнѡ́га и҆ вре́мене: мно́га бо по́двига и҆ вре́мене потре́ба, ꙗ҆́кѡ да и҆згна́нъ бꙋ́детъ вра́гъ, и҆ всели́тсѧ хрⷭ҇то́съ. И҆ сїѧ̑ ᲂу҆́бѡ досе́лѣ, сло́во же да возвраща́етсѧ на прележа̑щаѧ порѧ́дꙋ.

Глава̀ н҃г.

(Ѡ҆ моли́твѣ серде́чнѣй нечи́стѣй, и҆ ка́кѡ прихо́дитъ кто̀ въ чи́стꙋю и҆ непари́тельнꙋю моли́твꙋ. )

Ѿ є҆́же пребыва́ти въ рече́ннѣмъ хꙋдо́жествѣ серде́чныѧ чи́стыѧ и҆ непари́тельныѧ, а҆́ще и҆ нечи́стыѧ не́гли и҆́накѡ, и҆ непари́тельныѧ моли́твы, ꙗ҆́вѣ ꙗ҆́кѡ ѿ быва́ющихъ на возбране́нїе се́й предпрїѧ́тїй и҆ по́мыслѡвъ, прихо́дитъ подвиза́ющїйсѧ въ навыкнове́нїе без̾ понꙋжде́нїѧ, и҆ непари́тельнѡ и҆ чи́стѡ и҆ и҆́стиннѡ моли́тисѧ, си́рѣчь во є҆́же пребыва́ти въ се́рдцѣ ᲂу҆мꙋ̀, а҆ не съ понꙋжде́нїемъ малодꙋ́шнѣ вдыха́нїемъ вводи́мꙋ бы́ти, и҆ па́ки ѿскака́ти: но самомꙋ̀ при́снѡ къ себѣ̀ ѡ҆браща́ющꙋсѧ, съ любо́вїю пребыва́ти въ се́мъ се́рдцѣ, и҆ непреста́ннѡ та́кѡ моли́тисѧ. Глаго́летъ бо ст҃ы́й и҆сѵ́хїй: не и҆мѣ́ѧй моли́твы чи́сты ѿ пѡ́мыслъ, ѻ҆рꙋ́жїѧ не и҆́мать на бра́нь (глава̀ к҃а). Моли́твꙋ же глаго́лю, непреста́ннѡ дѣ́йствꙋемꙋю во внꙋ́тренности дꙋшѝ, да і҆и҃са хрⷭ҇та̀ призыва́нїемъ, та́йнѡ ра́тꙋѧй сꙋпоста́тъ поража́етсѧ и҆ ѡ҆палѧ́етсѧ. И҆ па́ки: блаже́нъ вои́стиннꙋ, и҆́же си́це прилѣпи́сѧ ко і҆и҃сꙋ моли́твою во ᲂу҆мѣ̀, и҆ гласи́тъ є҆го̀ непреста́ннѡ въ се́рдцѣ, ꙗ҆́коже воздꙋ́хъ присоединѧ́етсѧ тѣлесє́мъ на́шымъ, и҆лѝ пла́мень свѣщѣ̀ (глава̀ рч҃ѕ). И҆ па́ки: и҆ преходѧ́щее ᲂу҆́бѡ со́лнце над̾ земле́ю, твори́тъ де́нь: ст҃о́е же и҆ честно́е и҆́мѧ гдⷭ҇а і҆и҃са, въ ᲂу҆мѣ̀ сїѧ́ющее ча́стостїю, ражда́етъ безчи́слєнныѧ солнцесвѣтови̑дныѧ мы̑сли.

Глава̀ н҃д.

(Ѡ҆ непари́тельнѣй и҆ чи́стѣй серде́чнѣй моли́твѣ, и҆ ражда́емѣй ѿ неѧ̀ теплотѣ̀.)

И҆ сїѐ є҆́сть, и҆ и҆менꙋ́етсѧ моли́тва серде́чнаѧ, чи́стаѧ и҆ непари́тельнаѧ, ꙗ҆́коже рече́сѧ, ѿ неѧ́же ражда́етсѧ нѣ́каѧ теплота̀ въ се́рдцѣ, по семꙋ̀: согрѣ́ѧсѧ се́рдце моѐ во мнѣ̀, и҆ въ поꙋче́нїи мое́мъ разгори́тсѧ ѻ҆́гнь.⁵³⁷ Ѻ҆́гнь, є҆го́же гдⷭ҇ь і҆и҃съ хрⷭ҇то́съ воврещѝ прїи́де въ зе́млю серде́цъ на́шихъ, пре́жде ᲂу҆́бѡ сꙋ́щїѧ терноно́сныѧ благода́ти, ны́нѣ же дꙋхѡно́сныѧ благода́ти, ꙗ҆́коже глаго́летъ са́мъ гдⷭ҇ь на́шъ і҆и҃съ хрⷭ҇то́съ: ѻ҆гнѧ̀ прїидо́хъ воврещѝ на зе́млю, и҆ что̀ хотѣ́лъ бы́хъ, а҆́ще бы ны́нѣ возгорѣ́лсѧ.⁵³⁸ Сїѧ̀ и҆ бы́вшихъ съ клео́пою нѣ́когда согрѣ́ѧвши и҆ разже́гши, ᲂу҆диви́тельнѣ дрꙋ́гъ ко дрꙋ́гꙋ вопи́ти сотворѝ сїѐ: не се́рдце ли на́ше горѧ̀ бѣ̀ въ на́съ, є҆гда̀ глаго́лаше на́ма на пꙋтѝ;⁵³⁹ Глаго́летъ же и҆ і҆ѡа́ннъ дамаски́нъ ди́вный, въ нѣ́коемъ тропарѝ пѣ́сней свои́хъ ко прест҃ѣ́й бцⷣѣ: влече́тъ мѧ̀ къ пѣснопѣ́нїю любвѐ дѣви́ческїѧ ѻ҆́гнь серде́чный. Пи́шетъ и҆ ст҃ы́й і҆саа́къ: ѿ дѣ́ланїѧ нꙋ́жднагѡ ражда́етсѧ теплота̀ безмѣ́рнаѧ, разгара́емаѧ въ се́рдцѣ ѿ те́плыхъ помышле́нїй нововселѧ́ющихсѧ въ ᲂу҆́мъ. Сїе́ же дѣ́ланїе и҆ хране́нїе и҆стончева́ютъ ᲂу҆́мъ въ теплотѣ̀ и҆́хъ помышле́нїй, и҆ подаю́тъ є҆мꙋ̀ зрѣ́нїе (ѿ н҃ѳ сло́ва). И҆ продолжа́ѧ да́лѣе: и҆ ѿ теплоты̀ сеѧ̀ послѣ́дꙋющїѧ ѿ благода́ти видѣ́нїѧ, ражда́етсѧ ча́стое тече́нїе сле́зъ. И҆ пома́лѣ: и҆ ѿ непреста́нныхъ сле́зъ, прїе́млетъ дꙋша̀ ми́ръ по́мыслѡвъ, и҆ возвыша́етсѧ въ чистотꙋ̀ ᲂу҆ма̀: чистото́ю же ᲂу҆ма̀ прихо́дитъ человѣ́къ, во є҆́же зрѣ́ти та̑йны бж҃їѧ. И҆ пома́лѣ: по си́хъ же достиза́етъ ᲂу҆́мъ ви́дѣти ѿкровє́нїѧ и҆ зна́мєнїѧ, ꙗ҆́коже ви́дѣ і҆езекі́иль проро́къ. Є҆щѐ (ѿ ѯ҃ѳ сло́ва): Сле́зы и҆ бїе́нїе главы̀ на моли́твѣ, и҆ є҆́же валѧ́тисѧ съ те́плостїю возбꙋжда́ютъ теплотꙋ̀ сла́дости своеѧ̀ внꙋ́трь се́рдца, и҆ съ похвалѧ́емымъ и҆зстꙋпле́нїемъ лета́етъ се́рдце къ бг҃ꙋ, и҆ вопїе́тъ: возжада̀ дꙋша̀ моѧ̀ къ тебѣ̀, бг҃ꙋ крѣ́пкомꙋ живо́мꙋ: когда̀ прїидꙋ̀ и҆ ꙗ҆влю́сѧ лицꙋ̀ твоемꙋ̀, гдⷭ҇и;⁵⁴⁰ и҆ прѡ́чаѧ. И҆ лѣ́ствичникъ: ѻ҆́гнь ᲂу҆́бѡ бж҃е́ственный прише́дъ въ се́рдце, моли́твꙋ возста́ви: се́й же воста́вшей и҆ на не́бо возне́сшейсѧ, ѻ҆гнѧ̀ въ го́рницѣ дꙋшѝ схожде́нїе бы́сть (ѿ к҃и степе́ни). Є҆щѐ: кто̀ ᲂу҆́бѡ вѣ́рный и҆ мꙋ́дрый и҆́нокъ, и҆́же теплотꙋ̀ свою̀ сохранѝ неꙋгаса́емꙋ, и҆ да́же до и҆схо́да своегѡ̀ на всѧ́къ де́нь прилага́ти ѻ҆́гнь ѻ҆гню̀, и҆ теплотꙋ̀ теплотѣ̀, и҆ жела́нїе жела́нїю, и҆ тща́нїе тща́нїю не преста̀; И҆ ст҃ы́й и҆́лїа є҆кді́къ: внегда̀ ѿ внѣ́шнихъ ᲂу҆праздни́вшисѧ дꙋша̀ соедини́тсѧ съ моли́твою, тогда̀ сїѧ̀ а҆́ки нѣ́кїй пла́мень ѡ҆крꙋжи́вши ю҆̀, ꙗ҆́коже ѻ҆́гнь желѣ́зо, разжже́ннꙋ всю̀ твори́тъ. И҆ є҆́сть дꙋша̀ ᲂу҆́бѡ та́ѧжде, но не ктомꙋ̀ прикаса́ема, ꙗ҆́коже бо разжже́нное желѣ́зо внѣ́шними прикоснове́ньми неѡсѧза́емо (глава̀ р҃є). Є҆щѐ: блаже́нъ, и҆́же въ житїѝ се́мъ та́кѡ сподо́бивыйсѧ зрѣ́ти себѐ и҆ своѐ є҆стество́мъ бре́нное человѣкоподо́бїе, благода́тїю ѻ҆́гненно ᲂу҆ви́дѣ (глава̀ р҃ѕ).

Глава̀ н҃є.

(Ꙗ҆́кѡ и҆ теплота̀ сїѧ̀ разли́чнѣ и҆́мать рожде́нїе: и҆́стиннѣе же, ꙗ҆́же ѿ чи́стыѧ серде́чныѧ моли́твы. )

Вѣ́ждь же, ꙗ҆́кѡ и҆ такова́ѧ теплота̀ разли́чнѣ и҆ многоѡбра́знѣ и҆́мать въ на́съ самѣ́хъ рожде́нїе и҆ бытїѐ, и҆ сїѐ ꙗ҆́вѣ є҆́сть ѿ и҆зложе́нныхъ глагѡ́лъ ст҃ы́хъ, не смѣ́емъ же рещѝ, и҆ ѿ са́магѡ дѣѧ́нїѧ. Сво́йственнѣйшаѧ же ѿ си́хъ теплота̀ нѣ́какѡ є҆́сть сїѧ̀, ꙗ҆́же ѿ чи́стыѧ серде́чныѧ моли́твы происхо́дитъ, и҆ съ не́ю вы́нꙋ прихо́дитъ и҆ возраста́етъ, и҆ въ просвѣще́нїи сꙋще́ственнѣмъ сꙋббѡ́тствꙋетъ, си́рѣчь, сꙋще́ственнѣ просвѣще́нна содѣ́ловаетъ: по свидѣ́тельствꙋ ѻ҆тцє́въ, си́це сꙋ́щаго человѣ́ка.

Глава̀ н҃ѕ.

(Ко́е є҆́сть бли́зкое дѣ́ло серде́чныѧ теплоты̀.)

Ꙗ҆́же теплота̀ внима́тельнѣ ѿгонѧ́етъ возбранѧ̑ющаѧ пе́рвѣйшей чи́стѣй соверше́ннѣ соверша́тисѧ моли́твѣ. Ѻ҆́гнь бо є҆́сть бг҃ъ на́шъ, и҆ ѻ҆́гнь поѧда́ющъ ѕло́бꙋ бѣсѡ́въ и҆ страсте́й на́шихъ. Глаго́летъ бо ст҃ы́й дїа́дохъ (глава̀ ч҃з): є҆гда̀ съ горѧ́щею нѣ́коею болѣ́знїю се́рдце внꙋ́трь прїе́млетъ стрѣ́лы бѣсѡ́вскїѧ, ꙗ҆́коже ра́тꙋемый са̑мыѧ ты̑ѧ стрѣ́лы мни́тсѧ терпѣ́ти, ненави́дитъ съ болѣ́знїю дꙋша̀ стра̑сти, ꙗ҆́кѡ въ нача́лѣ сꙋ́щи ѡ҆чище́нїѧ. А҆́ще бо не поболи́тъ вельмѝ ѡ҆ безстꙋ́дствѣ грѣха̀, не возмо́жетъ бога́тнѣ возра́доватисѧ ѡ҆ бла́гости правосꙋ́дїѧ. Хотѧ́й ᲂу҆́бѡ ѡ҆чи́стити се́рдце своѐ, вы́нꙋ па́мѧтїю гдⷭ҇а і҆и҃са да разжиза́етъ то̀, сїѐ то́чїю непреста́ннѡ поꙋче́нїе и҆ дѣ́ло и҆мѣ́ѧ. Не бо, ѻ҆вогда̀ ᲂу҆̀бо моли́тисѧ подоба́етъ, ѻ҆вогда́ же нѝ, гни́лость свою̀ ѿве́ргнꙋти хотѧ́щымъ: но при́снѡ въ моли́твѣ ᲂу҆пражнѧ́тисѧ блюде́нїемъ ᲂу҆ма̀, а҆́ще бы и҆ внѣ̀ не́гдѣ пребыва́ли моли́твенныхъ хра́мѡвъ. И҆́мже бо ѡ҆́бразомъ хотѧ́й ѡ҆чи́стити зла́то, а҆́ще и҆ вма́лѣ ѻ҆гню̀ попꙋ́ститъ не бы́ти въ горни́лѣ, жестотꙋ̀ па́ки въ чистѧ́щемсѧ веществѣ̀ произво́дитъ: та́кѡ и҆ ѻ҆вогда̀ ᲂу҆̀бо помина́ѧй бг҃а, ѻ҆вогда́ же нѝ, є҆́же мни́тъ стѧжа́ти моли́твою, сїѐ пра́здностїю погꙋблѧ́етъ. Мꙋ́жꙋ же любодобродѣ́тельномꙋ сво́йственно є҆́сть, при́снѡ па́мѧтїю бж҃їею зе́мленность се́рдца и҆стреблѧ́ти, да си́це ѕлꙋ̀ пома́лꙋ ѿ ѻ҆гнѧ̀ па́мѧти блага́гѡ потреблѧ́емꙋ, соверше́ннѣ дꙋша̀ въ є҆сте́ственнꙋю свою̀ свѣ́тлость со множа́йшею возврати́тсѧ. И҆ си́це ᲂу҆́бѡ ᲂу҆́мъ пребыва́ѧ въ се́рдцѣ, чи́стѣ и҆ непреле́стнѣ мо́литсѧ, по томꙋ́жде ст҃о́мꙋ глаго́лющемꙋ: Тогда̀ є҆́сть и҆́стиннаѧ и҆ непреле́стнаѧ моли́тва,є҆гда̀ се́рдце блюде́тъ ᲂу҆́мъ, внегда̀ мо́литсѧ. Пи́шетъ же ст҃ы́й и҆сѵ́хїй: се́й и҆́стиненъ є҆́сть тре́звѣнникъ, и҆́же въ се́рдцѣ є҆́сть и҆́нокъ (глава̀ рн҃ѳ).

Глава̀ н҃з.

(Ѡ҆ ражда́емѣмъ ѿ теплоты̀, внима́нїѧ же и҆ моли́твы, жела́нїи и҆ раче́нїи. )

Таково́ю же теплото́ю и҆ со внима́нїемъ моли́твою, си́рѣчь, чи́стою моли́твою, къ помина́емомꙋ при́снѡ гдⷭ҇ꙋ і҆и҃сꙋ хрⷭ҇тꙋ̀ жела́нїе, и҆ бж҃е́ственное раче́нїе и҆ любы̀ въ се́рдцѣ ражда́етсѧ, ꙗ҆́коже пи́сано є҆́сть: ѻ҆трокѡви́цы возлюби́ша тѧ̀, привлеко́ша тѧ̀. И҆, ꙗ҆́кѡ ᲂу҆ѧ́звлена є҆́смь любо́вїю а҆́зъ.⁵⁴¹ Глаго́летъ же и҆ ст҃ы́й маѯі́мъ: всѧ̑ ᲂу҆́бѡ добродѣ́тєли содѣ́йствꙋютъ ᲂу҆мꙋ̀ къ бж҃е́ственномꙋ раче́нїю, мно́жае же всѣ́хъ чи́стаѧ мл҃тва: се́ю бо къ бг҃ꙋ воскрилѧ́емь, внѣ̀ быва́етъ всѣ́хъ (глава̀ в҃, ст. є҃).

Глава̀ н҃и.

(Ѡ҆ слеза́хъ серде́чныхъ, и҆ є҆щѐ ѡ҆ бж҃е́ственнѣмъ жела́нїи и҆ раче́нїи. )

Ѿ кото́рагѡ се́рдца и҆ слеза̀ наимножа́йшаѧ и҆стека́етъ ѡ҆чища́ющи и҆ ᲂу҆тꙋчнѧ́ющи, ѿ любвѝ си́ми ѡ҆богатѣ́вшагѡ, а҆ не и҆стаева́ющи и҆ и҆змождава́ющи. И҆ сїе́ бо ѿ бж҃е́ственнагѡ жела́нїѧ, и҆ ѻ҆́но ѿ бж҃е́ственнагѡ раче́нїѧ, ѕѣ́льнымъ и҆ неꙋдержи́мымъ жела́нїемъ и҆ раче́нїемъ помина́емагѡ гдⷭ҇а і҆и҃са хрⷭ҇та̀ а҆́ще и҆ и҆стꙋпа́ющо, вопїе́тъ: ᲂу҆слади́лъ мѧ̀ є҆сѝ жела́нїемъ, хрⷭ҇тѐ, и҆ и҆змѣни́лъ є҆сѝ бж҃е́ственнымъ твои́мъ раче́нїемъ. И҆ ве́сь є҆сѝ, сп҃се, сла́дость, ве́сь є҆сѝ вожделѣ́нїе и҆ жела́нїе, ве́сь ненасы́тинъ, ве́сь є҆сѝ добро́та недоꙋмѣ́ннаѧ. И҆ съ па́ѵломъ вопїе́тъ хрⷭ҇топроповѣ́дникомъ: любы̀ бж҃їѧ соде́ржитъ ны̀. И҆, кто́ ны разлꙋчи́тъ ѿ любвѐ бж҃їѧ; ско́рбь ли, и҆лѝ тѣснота̀, и҆лѝ гоне́нїе, и҆лѝ гла́дъ, и҆лѝ нагота̀, и҆лѝ бѣда̀, и҆лѝ ме́чь;⁵⁴² И҆ па́ки: и҆звѣсти́хсѧ, ꙗ҆́кѡ ни сме́рть, ни живо́тъ, ни а҆́гг҃ли, ни нача̑ла, ни вла̑сти, ни си̑лы, ни настоѧ̑щаѧ, ни грѧдꙋ̑щаѧ, ни высота̀, ни глꙋбина̀, ни и҆́на тва́рь возмо́жетъ на́съ разлꙋчи́ти ѿ любвѐ бж҃їѧ, ꙗ҆́же ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ (ст. л҃и и҆ л҃ѳ).

Глава̀ н҃ѳ.

(Совѣ́тованїе ѡ҆ є҆́же не и҆ска́ти, ꙗ҆̀же вы́ше мѣ́ры, и҆ є҆щѐ побꙋжде́нїе къ при́сной па́мѧти, ꙗ҆́же въ се́рдцѣ, гдⷭ҇а на́шегѡ і҆и҃са хрⷭ҇та̀. )

Да ᲂу҆̀бо сподо́битсѧ кто̀ си́хъ, и҆ всѣ́хъ, ꙗ҆́же по си́хъ, ѡ҆ ни́хже нѣ́сть ны́нѣ глаго́лати благовре́менно: не и҆щи́ бо, глаго́летъ, пре́жде вре́мени, ꙗ҆̀же своѐ и҆́мꙋтъ вре́мѧ. И҆, благо́е нѣ́сть добро̀, є҆гда̀ не до́брѣ бꙋ́детъ. И҆ по ст҃о́мꙋ ма́ркꙋ: неполе́зно є҆́сть пре́жде дѣ́ланїѧ пе́рвѣйшихъ, вѣ́дѣти втора̑ѧ. Ра́зꙋмъ бо кичи́тъ за пра́здность, а҆ любы̀ созида́етъ, за є҆́же всѧ̑ терпи́тъ.⁵⁴³ Подоба́етъ тща́тисѧ, и҆ при́снѡ подвиза́тисѧ, ꙗ҆́коже рече́сѧ, па́мѧть гдⷭ҇а і҆и҃са хрⷭ҇та̀ внꙋ́трь глꙋбины̀ се́рдца при́снѡ и҆мѣ́ти, а҆ не внѣ̀ и҆ по ве́рхꙋ, ꙗ҆́коже и҆ ѡ҆ се́мъ то́йже блаже́нный ма́рко глаго́летъ: ꙗ҆́кѡ не нача́льнѣйшимъ и҆ ᲂу҆́мнымъ ᲂу҆пова́нїе ѿве́рзетсѧ внꙋ́треннѣйшее и҆ та́йное и҆ чи́стое се́рдца на́шегѡ вмѣсти́лище, не мо́щно є҆́сть и҆звѣ́стнѡ позна́ти внꙋ́трь живꙋ́щаго, нижѐ вѣ́дѣти, прїѧ́ты ли бы́ша словє́сныѧ жє́ртвы на́шѧ, и҆лѝ нѝ.

Глава̀ ѯ҃.

(Ѡ҆ те́плѣй ре́вности и҆ бж҃е́ственнѣмъ въ на́съ ꙗ҆вле́нїи, и҆ сꙋще́ственнѣмъ благода́ти просвѣще́нїи. )

Та́кѡ бо ᲂу҆до́бь ᲂу҆клони́тсѧ, не дѣ́лъ лꙋка́выхъ то́чїю, но и҆ встра́стныхъ пѡ́мыслъ и҆ неподо́бныхъ мечта́нїй, ꙗ҆́коже пи́сано є҆́сть: дх҃омъ ходи́те, и҆ по́хѡти плотскі̑ѧ не соверша́йте.⁵⁴⁴ Па́че же ѿ всѧ́кагѡ по́мысла и҆ всѧ́кагѡ мечта́нїѧ ѿстꙋ́питъ, ꙗ҆́кѡ горѧ́щею свое́ю ѡ҆ добродѣ́тели ре́вностїю попалѧ́ѧй и҆ потреблѧ́ѧй всѧ́кое лꙋка́вое дѣ́йство, чꙋ́вственнѣ и҆ мы́сленнѣ дѣ́йствовавшее въ не́мъ съ нача́льники и҆́хъ ѡ҆ ѕлѣ̀ ра́дꙋющимисѧ бѣ́сы, ꙗ҆́коже глаго́летъ ст҃ы́й і҆саа́къ (ѿ и҃ сло́ва) стра́шенъ є҆́сть бѣсовѡ́мъ, и҆ вожделѣ́ненъ бг҃ови, и҆ а҆́гг҃лѡмъ є҆гѡ̀, съ те́плою ре́вностїю и҆скоренѧ́ѧй ѿ врага̀ возраста́ющее въ не́мъ те́рнїе. И҆ въ предспѣ́ѧнїе прїи́детъ прїѧ́ти ѿсю́дꙋ и҆звѣще́нїе любвѐ, ꙗ҆́же къ немꙋ̀, и҆ ꙗ҆́вственнагѡ ꙗ҆вле́нїѧ, и҆ вселе́нїѧ сꙋще́ственнагѡ, и҆ бж҃е́ственнѣйшагѡ просвѣще́нїѧ благода́ти. А҆́ще же хо́щеши рещѝ, ѕѣлѡ̀ ра́достнѣ па́ки востече́тъ ко пре́жнемꙋ благода́тїю и҆ ст҃ы́мъ креще́нїемъ совершенносодѣ́ѧнномꙋ на́мъ бл҃горо́дїю и҆ сыноположе́нїю дꙋхо́внꙋ. И҆ па́ки глаго́летъ ст҃ы́й і҆саа́къ: (въ то́мже сло́вѣ): се́й є҆́сть і҆ерꙋсали́мъ, и҆ ца́рствїе бж҃їе внꙋ́трь на́съ сокрове́нное, по словесѝ гдⷭ҇ню: сїѧ̀ страна̀, ѻ҆́блакъ є҆́сть сла́вы бж҃їѧ, во́ньже є҆ди́ни чи́стїи се́рдцемъ вни́дꙋтъ, є҆́же ви́дѣти лицѐ своегѡ̀ влⷣки. То́чїю са́мъ да не и҆́щетъ въ себѣ̀ ꙗ҆вле́нїѧ бж҃їѧ, да не прїи́метъ тогѡ̀, и҆́же вои́стиннꙋ тьма̀ є҆́сть, а҆ свѣ́тъ бы́ти лицемѣ́ритсѧ.

Глава̀ ѯ҃а.

(Ѡ҆ дѣ́йствѣ бж҃е́ственнѣмъ и҆ сопроти́внѣмъ.)

Є҆гда́ же ᲂу҆́мъ, не и҆́щꙋщꙋ є҆мꙋ̀, свѣ́тъ зри́тъ, да не прїе́млетъ сегѡ̀, нижѐ ᲂу҆́бѡ да ᲂу҆празднѧ́етъ, ꙗ҆́коже глаго́летъ преподо́бный ма́рко: ꙗ҆́кѡ є҆́сть дѣ́йство благода́ти, и҆ є҆́сть дѣ́йство сатанино̀, младе́нцꙋ невѣ́домо. Добро́ же є҆́сть, такова̑ѧ не зрѣ́ти ꙗ҆́кѡ въ зерца́лѣ, пре́лести ра́ди, нижѐ проклина́ти, и҆́стины ра́ди, но всѧ̑ ᲂу҆пова́нїемъ приноси́ти бг҃ови: то́й бо вѣ́сть ѻ҆бои́хъ поле́зное. Ѻ҆ба́че да вопроша́етъ и҆мꙋ́щаго благода́ть и҆ си́лꙋ ѿ бг҃а наꙋчи́ти и҆ разсꙋди́ти.

Глава̀ ѯ҃в.

(Ѡ҆ ᲂу҆чи́тели просвѣще́ннѣмъ и҆ непреле́стнѣмъ.)

И҆ а҆́ще ᲂу҆́бѡ ѡ҆брѣ́лъ бы и҆мꙋ́щаго наꙋчи́ти, не ꙗ҆́коже то́чїю ѿ ра́зꙋма бж҃е́ственнагѡ писа́нїѧ, но ꙗ҆́коже бг҃ꙋ благодаре́нїе, и҆ са́мъ ѻ҆́нъ блаже́ннѡ воспрїѧ̀ бж҃е́ственное просвѣще́нїе: а҆́ще же нѝ, то̀ лꙋ́чше не прїѧ́ти, но со смире́нїемъ ко бг҃ꙋ прибѣ́гнꙋти, недосто́йна себѐ ѿ чи́ста се́рдца вмѣнѧ́ѧ и҆ нарица́ѧ такова́гѡ досто́инства и҆ видѣ́нїѧ, ꙗ҆́коже ᲂу҆̀бо семꙋ̀, и҆ є҆ли̑ка реко́шасѧ, є҆ще́ же и҆ рекꙋ́тсѧ, тайнонаꙋчи́хомсѧ благода́тїю хрⷭ҇то́вою, и҆ ѿ ѧ҆зы̑къ нело́жныхъ, дх҃омъ ст҃ы́мъ дви́жимыхъ и҆ вѣща́вшихъ, и҆ бг҃одꙋхнове́нныхъ писа́нїй, и҆ ѿ ча́стагѡ и҆скꙋ́са.

Глава̀ ѯ҃г.

(Ѡ҆ просвѣще́нїи и҆́стиннѣмъ и҆ ло́жнѣмъ, си́рѣчь, свѣ́тѣ бж҃е́ственнѣмъ, и҆ лꙋка́вѣмъ. )

А҆́ще бо въ нѣ́кихъ свои́хъ списа́нїѧхъ сла́внїи ѻ҆тцы̀ на́ши зна́мєнїѧ непреле́стнагѡ и҆ ло́жнагѡ просвѣще́нїѧ нѣ́какѡ и҆з̾ѧвлѧ́ютъ: ꙗ҆́коже ᲂу҆́бѡ и҆ треблаже́нный па́ѵелъ латрі́йскїй сотворѝ, ре́къ къ вопроси́вшемꙋ є҆го̀ ѡ҆ се́мъ ᲂу҆ченикꙋ̀ своемꙋ̀: ꙗ҆́кѡ свѣ́тъ ᲂу҆́бѡ сопроти́вныѧ си́лы ѻ҆гневи́дѣнъ є҆́сть и҆ дымова́тъ, и҆ чꙋ́вственномꙋ семꙋ̀ ѻ҆гню̀ подо́бенъ, и҆ повнегда̀ то́й страстоꙋмѣ́реннаѧ дꙋша̀ и҆ ѡ҆чище́ннаѧ ᲂу҆ви́дитъ, несла́достнѣ ѡ҆брѣта́етсѧ къ немꙋ̀, и҆ гнꙋша́етсѧ: блага́гѡ же благі́й є҆́сть ѡ҆бра́дованнѣйшїй и҆ чистѣ́йшїй: и҆ прише́дъ ѡ҆свѣща́етъ, свѣ́та же и҆ ра́дости и҆ весе́лїѧ и҆сполнѧ́етъ дꙋ́шꙋ, и҆ кро́ткꙋ ѻ҆́нꙋю и҆ человѣколюби́вꙋ содѣ́ловаетъ: и҆ и҆́ни же та́кожде. Но ѻ҆ба́че, ꙗ҆́коже предречє́ннаѧ живы́мъ гла́сомъ слы́шалъ є҆сѝ, та́кѡ и҆ ѡ҆ се́мъ во вре́мѧ ᲂу҆слы́шиши, ны́нѣ бо не вре́мѧ.

Глава̀ ѯ҃д.

(Ѡ҆ мечта́нїи неподо́бнѣмъ же и҆ ка́кѡ подоба́етъ и҆зслѣ́довати ѧ҆̀. )

А҆ поне́же вма́лѣ пре́жде ѡ҆ мечта́нїи помѧнꙋ́хомъ, и҆ мечта́нїи неподоба́ющемъ, поле́знѣйше є҆́сть, ꙗ҆́коже на́мъ мни́тсѧ, вкра́тцѣ и҆ ѡ҆ то́мъ, па́че же ѡ҆ всѧ́комъ мечта́нїи, ꙗ҆́коже мо́щно рещѝ: ѕѣлѡ́ бо сопротивлѧ́етсѧ проклѧ́тое чи́стѣй серде́чнѣй моли́твѣ, и҆ є҆ди́нственномꙋ и҆ просто́мꙋ ᲂу҆ма̀ дѣ́ланїю. Тѣ́мже и҆ бж҃е́ственнїи ѻ҆тцы̀ многоѡбра́знѣ ѡ҆ не́мъ и҆ на ѻ҆́ное провѣщава́ютъ. Сїѐ ᲂу҆́бѡ различноѡбра́зное, ꙗ҆́коже басносло́вимый деда́лъ, и҆ многогла́вное, ꙗ҆́коже ѵ҆́дра, мечта́нїе, ꙗ҆́кѡ нѣ́кїй мо́стъ бѣсо́вскїй, свѧты́ми предрече́сѧ: тѣ́мъ бо проходѧ́ще и҆ преходѧ́ще нечести́вїи ᲂу҆бі̑йцы, прїѡбща́ютсѧ нѣ́какѡ и҆ смѣ́шиваютсѧ съ дꙋше́ю, пче́льникъ трꙋ́тнєвъ сїю̀ содѣ́ловающе и҆ мы́слей жили́ще безпло́дныхъ и҆ встра́ственныхъ. Є҆́же ᲂу҆́бѡ мечта́нїе ѿмета́ти подоба́етъ соверше́ннѣ, то́чїю а҆́ще не хо́щеши покаѧ́нїѧ ра́ди сокрꙋше́нїѧ, пла́чѧ же и҆ смиреномꙋ́дрїѧ, къ си̑мъ же и҆ поꙋче́нїѧ сꙋ́щихъ и҆ видѣ́нїѧ, є҆ще́ же и҆ неподо́бнагѡ ра́ди мечта́нїѧ, приравни́ти и҆ равноизвѣ́сити благоподо́бное мечта́нїе, и҆ съ си́мъ ѻ҆́ное смѣси́въ, и҆ проти́вꙋ воева́въ, и҆ ꙗ҆́кѡ щитоповерга́ющаѧ безче́стное и҆ безстꙋ́дное крѣ́пцѣ низложи́въ, та́кѡ проти́вꙋ ѻ҆́нагѡ прїѧ́ти побѣди́тєльнаѧ. И҆́бо та́кѡ творѧ̀, не то́кмѡ не тщеты̀, но и҆ прїѡбрѣ́тенїѧ себѣ̀ вино́венъ мо́глъ бы є҆сѝ бы́ти, ꙗ҆́кѡ на сꙋдѣ̀ безпогрѣ́шнѣ дѣла̀ своѧ̑ ᲂу҆правлѧ́ѧй, и҆ ꙗ҆́кѡ мечта́нїе неподо́бно, мечта́нїемъ благоподо́бнымъ ᲂу҆празднѧ́ѧй, и҆ ѻ҆рꙋ́жїѧми сопроти́вныхъ си́хъ подсопроти́вныхъ сме́ртнѣ ᲂу҆ѧзвлѧ́ѧй, и҆лѝ ᲂу҆бива́ѧй, ꙗ҆́коже дре́вле голїа́ѳа бж҃е́ственный дв҃дъ.⁵⁴⁵

Глава̀ ѯ҃є.

Ꙗ҆́кѡ не то́кмѡ неподо́бное мечта́нїе, но и҆ благоподо́бное ѿве́ржено ст҃ы́ми въ чи́стѣй моли́твѣ и҆ въ простѣ́мъ и҆ є҆ди́нственнѣмъ дѣ́ланїи ᲂу҆ма̀.

Се́й же по́двигъ є҆щѐ младе́нцєвъ, си́рѣчь, новонача́льныхъ є҆́сть. Вре́менемъ бо пред̾ꙋспѣ́вшїи, соверше́ннѣ неподо́бное мечта́нїе съ благоподо́бнымъ ѿме́щꙋтъ и҆ безвѣ́стнѡ содѣ́ловаютъ, ꙗ҆́кѡ во́скъ та́ющъ ѿ лица̀ ѻ҆гнѧ̀ и҆спепелѧ́юще и҆ разорѧ́юще чи́стыѧ ра́ди моли́твы, и҆ неѡбра́знагѡ ра́ди ѿверже́нїѧ и҆ ѡ҆бнаже́нїѧ ѿ всѣ́хъ ᲂу҆ма̀, проста́гѡ ра́ди къ бг҃ꙋ ᲂу҆стремле́нїѧ, а҆́ще ли же хо́щеши, и҆ прїѧ́тїѧ, и҆ невоѡбраже́ннагѡ и҆ є҆ди́нственнагѡ соедине́нїѧ. Глаго́летъ бо ст҃ы́й и҆сѵ́хїй: всѧ́къ по́мыслъ мечта́нїе є҆́сть во ᲂу҆мѣ̀ чꙋ́вственныѧ нѣ́кїѧ ве́щи: ᲂу҆́мъ бо сы́й а҆ссѵ́рїй, не и҆на́кѡ прельща́ти мо́жетъ, а҆́ще не ᲂу҆потреби́тъ чꙋ́вствєннаѧ на̑ша и҆ ѻ҆бы̑чнаѧ (глава̀ р҃п). И҆ па́ки: поне́же всѧ́кїй по́мыслъ мечта́нїемъ чꙋ́вственныхъ нѣ́кїихъ вхо́дитъ въ се́рдце: тогда̀ сїѧ́етъ въ не́мъ блаже́нный свѣ́тъ бж҃ества̀, є҆гда̀ соверше́ннѡ ᲂу҆праздни́тсѧ ѿ всѣ́хъ, и҆ не воѡбраже́нъ ѿ си́хъ бꙋ́детъ: поне́же свѣ́тлость ѻ҆́наѧ по лише́нїю всѣ́хъ помышле́нїй въ чи́стѣмъ ᲂу҆мѣ̀ ꙗ҆влѧ́етсѧ (глава̀ п҃ѳ). И҆ вели́кїй васі́лїй: ꙗ҆́коже не въ рꙋкотворе́нныхъ хра́мѣхъ живе́тъ гдⷭ҇ь, та́кѡ нижѐ во и҆з̾ѡбраже́нїихъ нѣ́кихъ и҆ воѡбраже́нїихъ мы́сленныхъ: предстоѧ́тъ бо сїѧ̑ ѡ҆стѣнѧ́юща растлѣ́ннꙋю дꙋ́шꙋ, немогꙋ́щꙋю чи́стѣ ко и҆́стинѣ взира́ти, но є҆щѐ зерца́ла держа́щꙋюсѧ и҆ гада́нїѧ. И҆ бж҃е́ственный є҆ѵа́грїй: та́мѡ сѣдѣ́ти бг҃ъ глаго́летсѧ, и҆дѣ́же є҆́сть зна́емь: тѣ́мже и҆ престо́лъ глаго́летсѧ бж҃їй, ᲂу҆́мъ чи́стъ. Ра́зꙋмъ ᲂу҆̀бо бж҃їй не въ помышле́нїихъ ѡ҆брѧ́щетсѧ воѡбража́ющихъ ᲂу҆́мъ, но въ помышле́нїихъ невоѡбража́ющихъ: тѣ́мже молѧ́щемꙋсѧ подоба́етъ соверше́ннѣ ѿлꙋча́тисѧ помышле́нїй ᲂу҆́мъ, и҆ и҆́накѡ ѡ҆бразова́нъ бꙋ́детъ ᲂу҆́мъ зрѧ̀ себѧ̀ самаго̀: и҆́накѡ же ᲂу҆строе́нїе и҆мѣ́ти бꙋ́детъ, зрѧ̀ слове́сство своѐ. Ѿсю́дꙋ наꙋча́емсѧ, ка́кѡ ра́зꙋмъ дꙋхо́вный ѿлꙋча́етъ ᲂу҆́мъ ѿ помышле́нїй воѡбража́ющихъ є҆го̀, без̾ѡбра́знѡ же ѡ҆бꙋча́ющи представлѧ́етъ пред̾ бг҃омъ. И҆ ст҃ы́й маѯі́мъ въ толкова́нїѧхъ вели́кагѡ дїонѵ́сїа: и҆́но є҆́сть мечта́нїе, а҆ и҆́но помышле́нїе, си́рѣчь мы́сль: и҆ ѿ разли́чныхъ бо си́лъ быва́ютъ, и҆ сво́йствомъ движе́нїѧ: помышле́нїе бо, дѣ́йство є҆́сть и҆ творе́нїе: мечта́нїе же, стра́сть и҆ воѡбраже́нїе возвѣща́ющее чꙋ́вственно нѣ́что, и҆лѝ ꙗ҆́кѡ чꙋ́вственно нѣ́что: и҆ чꙋ́вство ᲂу҆̀бо є҆́млетсѧ сꙋ́щихъ по внеза́пномꙋ воѡбраже́нїю: ᲂу҆́мъ же прикаса́етсѧ, то́ є҆сть, є҆́млетсѧ сꙋ́щихъ и҆нѣ́мъ ѡ҆́бразомъ, а҆ не ꙗ҆ковы́мъ чꙋ́вство: про́чее въ тѣ́лѣ ᲂу҆́бѡ и҆лѝ въ дꙋ́сѣ, въ не́мже и҆ чꙋ̑вства бы́ти пе́рвѣе реко́хомъ, страда́тельное и҆ воѡбрази́тельное движе́нїе, сꙋди́тельное же и҆ разꙋмѣ́тельное дꙋшѝ и҆ ᲂу҆мꙋ̀ дава́ти подоба́етъ. Се́ю ᲂу҆́бѡ разꙋмѣ́тельною дꙋшѝ ча́стїю, и҆ мечта́тельнꙋю ᲂу҆де́рживати подоба́етъ: раздѣлѧ́етсѧ бо мечта́тельнаѧ си́ла на трѝ ча̑сти: пе́рваѧ ᲂу҆́бѡ на ѡ҆бразова́тельнꙋю постиже́нїй, къ творѧ́щымъ постиже́нїе чꙋ́вствєннымъ: втора́ѧ же на воѡбрази́тельнꙋю ѡ҆ пребыва́ющихъ ѻ҆ста́ткѡвъ ѿ си́хъ, не и҆мꙋ́щꙋю ѡ҆́бразы ᲂу҆тверждє́нны на нѣ́чесомъ, ю҆́же и҆ сво́йственнѣ си́лꙋ мечта́тельнꙋ нарица́ютъ: тре́тїѧ, въ не́йже всѧ́ка сла́сть и҆ мечта́нїе мнѧ́щагѡсѧ бла́га и҆лѝ ѕла̀, печа́лїю составлѧ́етсѧ. Ни є҆ди́но ᲂу҆̀бо, ꙗ҆́коже рече́сѧ, мечта́нїе мѣ́сто и҆́мать въ бз҃ѣ: всѣ́хъ бо ѿню́дъ па́че мы́сли є҆́сть и҆ превы́ше є҆́сть. И҆ па́ки вели́кїй васі́лїй: ᲂу҆́мъ нерасточа́емь на внѣ̑шнѧѧ, нижѐ ѿ чꙋ́вствъ въ мі́ръ разлива́емь, возвраща́етсѧ ᲂу҆́бѡ къ себѣ̀, собо́ю же въ ра́зꙋмъ бж҃їй восхо́дитъ, и҆ ѻ҆́ною добро́тою ѡ҆сїѧва́емь и҆ просвѣща́емь, и҆ са́мое сїѐ є҆стество̀ забыва́етъ (въ г҃ кни́гѣ, посла́нїе в҃). Сїѧ̑ ᲂу҆̀бо и҆ ты̀ вѣ́дый, понꙋжда́йсѧ на всѧ́къ ча́съ съ бг҃омъ безмечта́ннѡ, неѡбра́знѡ, невоѡбраже́ннѡ, соверше́ннѣ всѣ́мъ ᲂу҆мо́мъ чи́стымъ, и҆ дꙋше́ю чи́стою, и҆ се́рдцемъ чи́стымъ моли́тисѧ всѧ́цѣмъ ѡ҆́бразомъ, ꙗ҆́коже глаго́летъ ст҃ы́й маѯі́мъ.

Глава̀ ѯ҃ѕ.

(Ѡ҆ ᲂу҆мѣ̀, дꙋшѣ̀, и҆ се́рдцѣ чи́стѣ и҆ соверше́ннѣ.

Ѡ҆ ᲂу҆мѣ̀ чи́стѣ. )

Оу҆́мъ чи́стъ є҆́сть, ѿлꙋчи́выйсѧ неразꙋ́мїѧ, ѿ бж҃е́ственнагѡ свѣ́та ѡ҆сїѧва́емый.

(Ѡ҆ дꙋшѣ̀ чи́стѣй. )

Дꙋша̀ чи́стаѧ є҆́сть, свободи́вшаѧсѧ страсте́й, и҆ ѿ бж҃е́ственныѧ любвѐ непреста́ннѡ веселѧ́щаѧсѧ.

(Ѡ҆ се́рдцѣ чи́стѣ.)

Се́рдце чи́сто є҆́сть, соверше́ннѣ безви́днꙋ бг҃ови и҆ невоѡбраже́ннꙋ предста́вившее па́мѧть, и҆ є҆ди́нѣми ѡ҆́бразы є҆гѡ̀ гото́вꙋ назна́менатисѧ, и҆́миже ꙗ҆вле́нъ быва́ти въ не́й ѡ҆бы́че: си̑мъ послѣ́довательнѡ и҆ сїѧ̑ да приложа́тсѧ.

(Ѡ҆ соверше́ннѣ ᲂу҆мѣ̀.)

Оу҆́мъ соверше́нный є҆́сть, и҆́же вѣ́рою и҆́стинною недовѣ́домаго пред̾ꙋвѣ́дѣвый, и҆ созда̑нїѧ є҆гѡ̀ соверше́ннѣ ᲂу҆ви́дѣ, и҆ ѡ҆б̾е́млющь ра́зꙋмъ про́мысла и҆ сꙋда̀ ѡ҆ тѣ́хъ ѿ бг҃а прїѧ́тъ, ꙗ҆́кѡ человѣ́къ же, глаго́лю.

(Ѡ҆ дꙋшѣ̀ соверше́ннѣй. )

Дꙋша̀ соверше́нна є҆́сть, є҆ѧ́же страда́тельнаѧ си́ла воззрѣ̀ всесоверше́ннѡ къ бг҃ꙋ.

(Ѡ҆ се́рдцѣ соверше́ннѣ.)

Се́рдце соверше́нно не́гли то̀ глаго́летсѧ, є҆́же ниеди́но и҆́мать є҆сте́ственно по каково́мꙋ либо ѡ҆́бразꙋ къ чесомꙋ́ либо движе́нїе, на не́мже ꙗ҆́кѡ на дщи́цѣ ᲂу҆глажде́ннѣ до́брѣ, кра́йнїѧ ра́ди простоты̀ приходѧ̀ бг҃ъ, зако́ны своѧ̑ написꙋ́етъ.

(Ѡ҆ ᲂу҆мѣ̀ чи́стѣ. )

Є҆щѐ, ᲂу҆́мъ ѡ҆чи́стити, по ст҃о́мꙋ дїа́дохꙋ, є҆ди́нагѡ ст҃а́гѡ дх҃а є҆́сть. Є҆щѐ, ᲂу҆́мъ ᲂу҆держа́ти ѿ паре́нїѧ, по лѣ́ствичникꙋ, є҆ди́нагѡ ст҃а́гѡ дх҃а є҆́сть. Є҆щѐ глаго́летъ ст҃ы́й ні́лъ: а҆́ще бы кто̀ хотѣ́лъ ᲂу҆ви́дѣти ᲂу҆строе́нїе ᲂу҆ма̀ своегѡ̀, да лиши́тъ себѐ всѣ́хъ помышле́нїй, и҆ тогда̀ ᲂу҆́зритъ є҆го̀ подо́бна сапфі́рꙋ, и҆лѝ небе́снꙋ ша́рꙋ (глава̀ н҃и). И҆ па́ки: ᲂу҆ма̀ ᲂу҆строе́нїе є҆́сть, высота̀ мы́сленна небе́снꙋ ша́рꙋ подо́бна, въ ѻ҆́ньже и҆ свѣ́тъ ст҃ы́ѧ трⷪ҇цы во вре́мѧ моли́твы прихо́дитъ. И҆ ст҃ы́й і҆саа́къ: є҆гда̀ ᲂу҆́мъ совлече́тсѧ ве́тхагѡ человѣ́ка, и҆ ѡ҆блече́тсѧ въ но́ваго благода́ти, тогда̀ чистотꙋ̀ свою̀ ᲂу҆́зритъ подо́бнꙋ небе́сномꙋ ша́рꙋ, ꙗ҆́же бж҃їе мѣ́сто ѿ ста́рчества сынѡ́въ і҆сра́илевыхъ и҆менова́сѧ, внегда̀ ꙗ҆ви́сѧ и҆̀мъ на горѣ̀ (въ концѣ̀ ѕ҃і сло́ва). И҆́бо та́кѡ творѧ̀, ꙗ҆́коже предрече́сѧ, си́рѣчь чи́стѡ, и҆ немечта́ннѡ, и҆ невоѡбраже́ннѡ молѧ́сѧ, въ слѣ́дъ бꙋ́деши ше́ствовати ст҃ы̑мъ: а҆́ще ли же нѝ, то̀ мечта́тель бꙋ́деши вмѣ́стѡ безмо́лвника, и҆ вмѣ́сто гро́здїѧ ѡ҆бере́ши те́рнїе, є҆́же тѝ, ѽ дабы̀ не слꙋчи́лосѧ!

Глава̀ ѯ҃з.

(Ка́кѡ Проро́цы ви́дѧхꙋ видѣ́нїѧ. )

А҆́ще же нѣ́цыи видѣ̑нїѧ проро́кѡвъ, воѡбражє́нїѧ же и҆ ѿкровє́нїѧ, мечта́нїемъ и҆ порѧ́дкомъ є҆сте́ственнымъ бы́ти мнѧ́тъ, сїѧ̑ да вѣ́дѧтъ, ꙗ҆́кѡ дале́че ѿ пра́вагѡ ра́зꙋма и҆ и҆́стины быва́ютъ. Проро́цы бо, и҆ ны́нѣшнїи свѧщеннотаи̑нницы на́ши, не по є҆сте́ственномꙋ послѣ́дованїю нѣ́коемꙋ и҆ чи́нꙋ, є҆ще́ же и҆ мечта́нїю ви́дѧхꙋ и҆ мечта́хꙋ, ꙗ҆̀же ви́дѧхꙋ и҆ мечта́хꙋ, но бж҃е́ственнѣ, и҆ па́че є҆стества̀ ᲂу҆мꙋ̀ неизрече́нною си́лою и҆ благода́тїю ст҃а́гѡ дх҃а воѡбража́ющꙋ и҆ мечта́ющꙋ, ꙗ҆́коже глаго́летъ вели́кїй васі́лїй, ꙗ҆́кѡ неизрече́нною нѣ́коею си́лою мечта́ющꙋ ᲂу҆мꙋ̀, безмо́лвна є҆го̀ и҆ чи́ста и҆мꙋ́щїи, а҆́ки гласѧ́що въ себѣ̀ и҆́мꙋтъ сло́во бж҃їе. И҆ па́ки: Ви́дѧхꙋ проро́цы, воѡбража́емой и҆̀мъ дх҃омъ влады́чественнѣй ча́сти (ѿ сло́ва на пѧтдесѧ́тницꙋ, ли́стъ с҃з на ѡ҆боро́тѣ). И҆ бг҃осло́въ григо́рїй: Се́й, си́рѣчь дх҃ъ ст҃ы́й, дѣ́йствоваше пе́рвѣе во а҆́гг҃льскихъ и҆ небе́сныхъ си́лахъ. И҆ пома́лѣ: Та́же во ѻ҆тцѣ́хъ и҆ въ проро́цѣхъ, и҆́хже ѻ҆́ви ᲂу҆́бѡ ви́дѣша бг҃а, и҆лѝ разꙋмѣ́ша: ѻ҆́ви же бꙋ́дꙋщее проразꙋмѣ́ша, воѡбража́емой и҆̀мъ дх҃омъ влады́чественнѣй ча́сти, и҆ ꙗ҆́кѡ настоѧ́щымъ соприсꙋ́тствꙋюще бꙋ́дꙋщымъ.

Глава̀ ѯ҃и.

(Є҆щѐ ѡ҆ мечта́нїихъ и҆ мно́гихъ и҆ разли́чныхъ видѣ́нїѧхъ.)

А҆́ще ли же нѣ́цыи ᲂу҆сꙋмнѣва́ютсѧ є҆щѐ, ꙗ҆́кѡ мечта̑нїѧ прїе́млющїи и҆ мнѡ́гаѧ и҆ разли́чнаѧ видѣ̑нїѧ, и҆ сопротивлѧ́ютсѧ на́мъ, а҆́ки нѣ́какѡ ст҃ы̑мъ мнѧ́щесѧ послѣ́довати, си̑мъ глаго́лемъ ѿ слове́съ бг҃осло́ва: Оу҆мо́мъ є҆ди́нѣмъ бг҃ъ сѣннопи́шемь є҆́сть, не ѿ тѣ́хъ, ꙗ҆̀же въ не́мъ, но ѿ тѣ́хъ, ꙗ҆̀же ѻ҆́крестъ є҆гѡ̀, є҆ди́номꙋ мечта́нїю ѿ дрꙋга́гѡ собира́емꙋ во є҆ди́нъ нѣ́кїй и҆́стины ѡ҆́бразъ, и҆ прѡ́чаѧ. (Сло́во на ржⷭ҇тво̀ хрⷭ҇то́во). Бж҃е́ственнагѡ же маѯі́ма: не мо́щно ᲂу҆мꙋ̀ безстра́стнꙋ бы́ти ѿ є҆ди́нагѡ дѣѧ́нїѧ, а҆́ще не прїе́млютъ є҆гѡ̀ мнѡ́гаѧ и҆ разли̑чнаѧ видѣ̑нїѧ. Подо́бнѣ и҆ и҆нѣ̑мъ ст҃ы̑мъ ра̑внаѧ си̑мъ глаго́лющымъ. Такові́и да вѣ́дѧтъ, ꙗ҆́кѡ ѻ҆́ные блаже́нные не ѡ҆ дѣ́ланїи ѻ҆на́мѡ є҆́же по прїѧ́тїю, и҆ благода́ти разꙋмѣ́тельнѣй, глаго́лемъ, и҆ зри́тельнѣй, и҆ са́мымъ и҆скꙋ́сомъ соединѧ́ющей человѣ́ка съ бг҃омъ, словеса̀ сїѧ̑ сказа́ша: но ѡ҆ видѣ́нїи по взира́нїю, си́рѣчь, ѡ҆ собира́емѣмъ ѿ премꙋ́дрости и҆ ра́вности сꙋ́щихъ и҆ согла́сїѧ, и҆ въ помышле́нїе ѡ҆ бз҃ѣ не ꙗ҆́снѣ нѣ́какѡ приница́ющемъ, є҆́же и҆ мнѡ́гимъ, па́че же всѣ̑мъ коне́чнѣ мо́щно є҆́сть ᲂу҆потреблѧ́ти и҆ размышлѧ́ти, ꙗ҆́коже разꙋ́мнѣ таковы̑ѧ ст҃ы́хъ глаго́лы и҆спыта́вый, ꙗ҆́вѣ ᲂу҆вѣ́сть, ꙗ҆́коже пи́сано є҆́сть: Ѿ вели́чества бо красоты̀ созда́нїй, сравни́тельнѡ рододѣ́латель познава́етсѧ,⁵⁴⁶ а҆ не ѿ мїрска́гѡ бо и҆ внѣ́шнѧгѡ многосꙋесло́внагѡ и҆ сꙋ́етнагѡ хꙋдо́жнагѡ ᲂу҆че́нїѧ: сїе́ бо, ꙗ҆́кѡ безче́стнаѧ рабы́нѧ ѡ҆ вѣ́жествѣ и҆ софїсті́чествѣ и҆ доказа́тельствѣ мнѣ́нїемъ кича́щисѧ, а҆ не вѣ́рою є҆ѵⷢ҇льскою и҆ смире́нїемъ, и҆ и҆́стиннымъ согла́сїемъ наставлѧ́емо, дале́че ѿ свѧще́нныхъ преддве́рїй и҆згонѧ́етсѧ. На́мъ же ны́нѣ сло́во є҆́сть ѡ҆ сїѧ́нїи соверше́ннѣмъ и҆ сꙋще́ственнѣмъ, є҆́же и҆ возше́дшїи со і҆и҃сомъ на го́рꙋ ѳавѡ́рскꙋю и҆збра́ннїи ѿ а҆по́стѡлъ, неизрече́ннѡ благи́мъ и҆ вои́стиннꙋ бл҃же́ннымъ и҆змѣни́вшесѧ и҆змѣне́нїемъ, воспрїѧ́ша, и҆ неви́димое ца́рство и҆ бж҃ество̀ чꙋ́вственныма ѻ҆чи́ма претворе́нными на бж҃е́ственнѣйшее, си́рѣчь, бы́вшими дх҃о́вными десни́цею прест҃а́гѡ дх҃а ᲂу҆ви́дѣти сподо́бишасѧ. По є҆ли́кꙋ же ѿстоѧ́тъ восто́цы ѿ за̑падъ, и҆ не́бо ѿ землѝ, и҆ дꙋша̀ превосхо́дитъ тѣ́ло, по толи́кꙋ и҆ дѣ́ланїе по прїѧ́тїю, и҆ благода́ть превосхо́дитъ видѣ́нїе по взира́нїю: занѐ ѻ҆́ное ᲂу҆́бѡ видѣ́нїе, си́рѣчь, є҆́же по взира́нїю ꙗ҆́коже реко́хомъ и҆звнѣꙋ́дꙋ, и҆ бл҃гочи́ннымъ сꙋ́щихъ движе́нїемъ, чи́номъ же и҆ собра́нїемъ, є҆ди́номꙋ ѿ дрꙋга́гѡ мечта́нїю собира́емꙋ во є҆ди́нъ нѣ́кїй и҆́стинный ѡ҆́бразъ пред̾ꙋспѣва́ти и҆́мать, и҆ горѣ̀ къ бг҃ꙋ вѣ́рою простира́тисѧ: сїе́ же, си́рѣчь, є҆́же по прїѧ́тїю, внꙋ́трь се́рдца непосре́дственнѡ ѿ самогѡ̀ бг҃а сꙋще́ственнѣ ѡ҆бы́че быва́ти, ѻ҆вогда̀ и҆ и҆звнѣ̀, и҆ ꙗ҆́вѣ тѣ́лꙋ преподаю́ще па́че смы́сла ѿ своегѡ̀ сїѧ́нїѧ, и҆ бж҃е́ственнѣйшагѡ просвѣще́нїѧ, преесте́ственнѣ стра́ждꙋщꙋ се́рдцꙋ, по премꙋ́дрѣйшемꙋ маѯі́мꙋ, не творѧ́щꙋ небы́тное ѡ҆боже́нїе. Глаго́летъ бо се́й ст҃ы́й: Небы́тное, глаго́лю, ѡ҆боже́нїе, є҆́же по ви́дꙋ сꙋще́ственное бж҃ества̀ сїѧ́нїе, є҆́же не и҆́мать бытїѧ̀, но недомы́сленное въ досто́йныхъ ꙗ҆вле́нїе. Согла̑снаѧ речє́ннымъ глаго́летъ и҆ вели́кїй дїонѵ́сїй: Подоба́етъ вѣ́дѣти, ꙗ҆́кѡ ᲂу҆́мъ на́шъ є҆ди́нꙋ ᲂу҆́бѡ си́лꙋ и҆́мать, во є҆́же помышлѧ́ти, є҆́юже мы́слєннаѧ ви́дитъ: дрꙋгꙋ́ю же, є҆́юже ви́дитъ соедине́нїе превосходѧ́щее є҆стество̀ ᲂу҆ма̀, и҆́мже совокꙋплѧ́етсѧ съ превы́шшими себѐ. И҆ ст҃ы́й і҆саа́къ: Два̀ ѻ҆́ка и҆́мамы дꙋшє́вныѧ, ꙗ҆́коже глаго́лютъ ѻ҆тцы̀, и҆ не та́ѧжде потре́ба є҆́сть видѣ́нїѧ въ ко́емждо (ѿ п҃в сло́ва) Є҆ди́нымъ бо ѻ҆́комъ зри́мъ сокровє́ннаѧ въ є҆стества́хъ, си́рѣчь, си́лꙋ бж҃їю, и҆ премꙋ́дрость є҆гѡ̀, и҆ про́мыслъ є҆гѡ̀ ѡ҆ на́съ, постиза́емый ѿ вели́чества ѡ҆кормле́нїѧ є҆гѡ̀ на́съ: а҆ дрꙋги́мъ ѻ҆́комъ зри́мъ сла́вꙋ є҆стества̀ є҆гѡ̀ ст҃а́гѡ, є҆гда̀ возблаговоли́тъ бг҃ъ ввестѝ на́съ въ та̑инства дꙋхѡ́внаѧ. И҆ бж҃е́ственный дїа́дохъ: Є҆ди́нагѡ ᲂу҆́бѡ ст҃а́гѡ дх҃а сꙋ́ть да́ры, премꙋ́дрость и҆ ра́зꙋмъ, ꙗ҆́коже и҆ всѧ̑ бж҃е́ствєннаѧ дарова̑нїѧ: ко́еждо же ѿ ни́хъ сво́йственное дѣ́йствїе и҆́мать.⁵⁴⁷ Тѣ́мже ѻ҆́вомꙋ ᲂу҆́бѡ дае́тсѧ премꙋ́дрость, и҆но́мꙋ же ра́зꙋмъ ѡ҆ то́мже дс҃ѣ,⁵⁴⁸ свидѣ́тельствꙋетъ а҆пⷭ҇лъ. Ра́зꙋмъ бо самы́мъ и҆скꙋ́сомъ соединѧ́етъ человѣ́ка съ бг҃омъ, въ словеса̀ веще́й дꙋ́шꙋ не дви́жꙋщи. Тѣ́мже нѣ́цыи и҆ ѿ любомꙋ́дрствꙋющихъ и҆́ноческое житїѐ, просвѣща́ютсѧ ѿ ѻ҆́нагѡ ра́зꙋма въ чꙋ́вствѣ, въ ра́зꙋмъ же бж҃е́ственныхъ слове́съ не прихо́дѧтъ: премꙋ́дрость же а҆́ще съ си́мъ ра́зꙋмомъ во стра́сѣ дае́тсѧ комꙋ̀, рѣ́дкѡ же ѻ҆ба́че сїѐ, ꙗ҆влѧ́етъ са̑мыѧ ѻ҆́ныѧ дѣ̑йства ра́зꙋма въ любвѝ. Поне́же ѻ҆́въ ᲂу҆́бѡ ра́зꙋмъ дѣ́йствїемъ, ѻ҆́ва же премꙋ́дрость сло́вомъ просвѣща́ти ѡ҆бы́че. Но ра́зꙋмъ ᲂу҆́бѡ подае́тъ моли́тва, и҆ мно́гое безмо́лвїе въ безпопече́нїи всесоверше́нномъ: премꙋ́дрость же, не тщесла́вное поꙋче́нїе слове́съ дх҃а, и҆ пе́рвѣе є҆́сть благода́ть даю́щагѡ бг҃а. Къ си̑мъ же и҆ ст҃ы́й глаго́летъ маѯі́мъ въ толкова́нїихъ: Стꙋдене́цъ і҆а́кѡвль є҆́сть писа́нїе, вода́ же є҆́сть ра́зꙋмъ, и҆́же въ писа́нїи: глꙋбина́ же, неꙋдо́бь сказꙋ́емое видѣ́нїе писа́тельныхъ гада́нїй: почерпа́ло же є҆́сть, пи́сьмены бж҃е́ственнагѡ сло́ва наꙋче́нїе, є҆́же не и҆мѣ́ѧше гдⷭ҇ь, са́мъ сы́й сло́во, и҆ не ѿ наꙋче́нїѧ и҆ поꙋче́нїѧ ра́зꙋмъ даѧ́й вѣ́рꙋющымъ, но ѿ приснотекꙋ́щыѧ благода́ти дꙋхо́вныѧ приснотекꙋ́щꙋю премꙋ́дрость, и҆ никогда́же престаю́щꙋю достѡ́йнымъ да́рꙋѧ. Почерпа́ло бо ѻ҆́ное, то́ є҆сть наꙋче́нїе, малѣ́йшꙋю ча́сть ра́зꙋма прїе́млющи, всѐ ѡ҆ставлѧ́етъ, ниеди́нѣмъ сло́вомъ держи́мо: ра́зꙋмъ же, и҆́же по благода́ти, всю̀ и҆́мать и҆ без̾ поꙋче́нїѧ ᲂу҆добопостижи́мꙋю человѣ́кѡмъ премꙋ́дрость, по потре́бамъ разли́чнѣ и҆сточа́ющъ. И҆ па́ки ст҃ы́й дїа́дохъ: Оу҆́мъ на́шъ мнѡ́гаѧ въ моли́твѣ ᲂу҆́бѡ неꙋдо́бь те́рпитъ ве́лїѧ ра́ди тѣсноты̀ и҆ собра́нїѧ въ се́рдцѣ моли́твєнныѧ добродѣ́тєли: въ бг҃осло́вїе же ра́дꙋѧсѧ вдае́тъ себѐ простра́нства ра́ди и҆ свобо́дности бж҃е́ственныхъ зри́тельствъ.⁵⁴⁹ Ꙗ҆́кѡ да не свобо́дꙋ ᲂу҆́бѡ є҆мꙋ̀ дади́мъ мнѡ́гаѧ хотѣ́ти глаго́лати, и҆ па́че мѣ́ры ра́достїю воскрилѧ́тисѧ попꙋ́стимъ є҆го̀, въ моли́твѣ мно́жайше, и҆ ѱалмопѣ́нїи, и҆ чте́нїи ст҃ы́хъ писа́нїй ᲂу҆праздни́мсѧ. Нижѐ любослове́сныхъ мꙋже́й зри́тєльства пре́зримъ, и҆́хже вѣ́ра словесы̑ познае́тсѧ: ниже́ бо сїѐ творѧ́ще, ᲂу҆стро́имъ примѣшава́тисѧ свои̑мъ глаго́лѡмъ къ словесє́мъ благода́ти, нижѐ попꙋ́стимъ є҆го̀ развлече́нна мно́гою ра́достїю и҆ многоглаго́ланїемъ ѿ тщесла́вїѧ прельсти́тисѧ. Но и҆ кромѣ̀ всѧ́кагѡ мечта́нїѧ во вре́мѧ видѣ́нїѧ соблюде́мъ є҆го̀, и҆ сле́зны вма́лѣ не всѧ̑ мы̑сли ѿ сегѡ̀ є҆мꙋ̀ стѧ́жемъ. Поко́ѧсѧ бо во времена̀ безмо́лвїѧ, и҆ ᲂу҆слажда́ѧсѧ наипа́че сла́достїю моли́твы, не то́чїю кромѣ̀ предрече́нныхъ ви́нъ быва́етъ, но па́че мно́жае ѡ҆бновлѧ́етсѧ, во є҆́же ско́рѡ и҆ без̾ трꙋда̀ въ бж҃е́ствєннаѧ прилага́тисѧ зри́тєльства, и҆ вкꙋ́пѣ пред̾ꙋспѣва́ти є҆мꙋ̀ въ ра́зꙋмъ разсꙋжде́нїѧ со мно́гимъ смире́нїемъ. Ѻ҆ба́че вѣ́дѣти подоба́етъ, ꙗ҆́кѡ моли́тва є҆́сть превы́ше всѧ́кагѡ простра́нства, сїѧ́ же ѻ҆́нѣхъ то́чїю є҆́сть, и҆̀же во всѧ́комъ чꙋ́вствѣ и҆ и҆звѣще́нїи и҆спо́лнєны ст҃ы́ѧ благода́ти. Слы́шалъ ли є҆сѝ; Моли́тва є҆́сть, глаго́летъ, превы́ше всѧ́кагѡ простра́нства, ꙗ҆́же є҆ди́нѣхъ ѻ҆́нѣхъ є҆́сть, и҆̀же во всѧ́комъ чꙋ́вствѣ и҆ и҆звѣще́нїи, си́рѣчь, внꙋ́трь се́рдца сꙋще́ственнѣ преесте́ственнѡ и҆спо́лнєны бж҃е́ственнѣйшагѡ просвѣще́нїѧ благода́ти. Сїю̀ и҆ ст҃ы́й і҆саа́къ па́мѧть неназна́менаннꙋ нарица́етъ, си́рѣчь, невоѡбраже́ннꙋ, безви́днꙋ, и҆ про́стꙋ, и҆ и҆́ни и҆́накѡ ѿ ст҃ы́хъ ѻ҆тє́цъ.

Глава̀ ѯ҃ѳ.

(Ѡ҆ пѧти́хъ дꙋше́вныхъ си́лахъ, подо́бнѣ же и҆ ѡ҆ мечта́нїихъ сво́йственныхъ дꙋшѝ и҆ ᲂу҆мꙋ̀. И҆ ꙗ҆́кѡ подоба́етъ соверше́ннѡ бѣ́гати мечта́нїѧ, и҆ ѡ҆бразова́нїй, и҆ и҆з̾ѡбраже́нїй, и҆ воѡбраже́нїй въ чи́стѣй моли́твѣ, и҆ просто́мъ и҆ є҆ди́нственномъ дѣ́ланїи ᲂу҆ма̀.)

Но поне́же, ꙗ҆́коже сказа́сѧ, не то́чїю ѿ бѣсѡ́въ, но и҆ са́маѧ дꙋша̀ ѿ себѐ є҆сте́ственнѣ и҆́мать є҆́же мечта́ти: занѐ пѧ́ть си́лъ и҆́мать, си́рѣчь, ᲂу҆́мъ, мы́сль, мнѣ́нїе, мечта́нїе и҆ чꙋ́вство: ꙗ҆́коже ᲂу҆́бѡ и҆ тѣ́ло пѧ́ть чꙋ́вствъ, зрѣ́нїе, ѡ҆бонѧ́нїе, слꙋ́хъ, вкꙋ́съ и҆ ѡ҆сѧза́нїе. Є҆ди́но же є҆́сть, ꙗ҆́коже реко́хомъ, ѿ си́лъ дꙋше́вныхъ мечта́нїе, и҆́мже дꙋша̀ мечта́етъ: подоба́етъ се́й, до́брѣ си̑лы своѧ̑ хотѧ́щей ᲂу҆строева́ти и҆ благорасположи́ти наипа́че соединѧ́ющыѧ ю҆̀ съ бг҃омъ си̑лы своѧ̑, и҆ въ настоѧ́щемъ вѣ́цѣ и҆ въ бꙋ́дꙋщемъ воскрилѧ́ти, и҆ къ бг҃ꙋ возводи́ти соверше́ннѡ тща́тисѧ: ѡ҆ про́чїихъ же по прили́чествꙋ пещи́сѧ, и҆ ᲂу҆потреблѧ́ти, и҆ твори́ти. И҆спыта́ти ᲂу҆́бѡ подоба́етъ, ꙗ҆кѡва̀ ѡ҆ си́хъ ѻ҆тцы̀ глаго́лютъ, и҆ прили́чное храни́ти. Глаго́летъ бо ст҃ы́й маѯі́мъ: Поне́же дꙋша̀ сама̀ по себѣ̀, си́рѣчь, по своемꙋ̀ сꙋществꙋ̀, є҆́сть слове́сна и҆ ᲂу҆́мна, и҆ самоѷпоста́сна всѧ́кѡ: а҆́ще же самоѷпоста́сна, то̀ себѐ ра́ди є҆стество́мъ, и҆ сама̀ ѡ҆ себѣ̀, и҆ съ тѣ́ломъ дѣ́йствовати и҆́мать, помышлѧ́ющи по є҆стествꙋ̀ и҆ разсмотрѧ́ющи, и҆ никогда́же престаю́щи ѿ сꙋ́щихъ. є҆сте́ственнѣ ѻ҆́ной ᲂу҆́мныхъ си́лъ. Присꙋ́тствꙋющаѧ бо є҆стество́мъ въ каково́млибо сꙋ́щемъ, до́ндеже сїѐ є҆́сть и҆ сꙋществꙋ́етъ, неѿе́млєма сꙋ́ть. Дꙋша̀ ᲂу҆́бѡ при́снѡ же сꙋ́щи, ѿне́лѣже бы́сть, и҆ сꙋ́щи во ѵ҆поста́си, ра́ди созда́вшагѡ ю҆̀ та́кѡ бг҃а, при́снѡ помышлѧ́етъ, и҆ разсмотрѧ́етъ, и҆ познае́тъ, и҆ сама̀ ѡ҆ себѣ̀, и҆ съ тѣ́ломъ себѐ ра́ди и҆ своегѡ̀ ра́ди є҆стества̀. Ни є҆ди́но ᲂу҆́бѡ ѡ҆брѧ́щетсѧ сло́во, дꙋ́шꙋ ѿ присꙋ́тствꙋющихъ се́й є҆сте́ственнѣ, а҆ не тѣ́ла ра́ди, по разрѣше́нїи ѿ сегѡ̀ ѿчꙋжди́ти могꙋ́щее. Поне́же ᲂу҆́бѡ познава́емъ, и҆ ѿ ст҃ы́хъ тайнонаꙋча́емсѧ, ᲂу҆мꙋ̀ и҆ мы́сли въ ны́нѣшнемъ вѣ́цѣ и҆ въ бꙋ́дꙋщемъ, ѻ҆́крестъ бг҃а двиза́тисѧ и҆ дѣ́йствовати, и҆ны̑ѧ же си̑лы въ настоѧ́щемъ то́чїю вѣ́цѣ, ꙗ҆́кѡ сво́йствєнныѧ є҆мꙋ̀: подоба́етъ и҆ дꙋшѝ, ꙗ҆́кѡ благохꙋдо́жнѣй ᲂу҆прави́тельницѣ, и҆ вла́сть над̾ си́ми є҆сте́ственнѣ и҆мꙋ́щей, и҆ не въ настоѧ́щемъ произво́лившей то́кмѡ дѣ́йствовати, но въ бꙋ́дꙋщемъ вѣ́цѣ наипа́че ᲂу҆́мъ и҆ мы́сль всѧ́цѣмъ ѡ҆́бразомъ тща́тисѧ горѣ̀ простира́ти къ бг҃ꙋ, и҆ двиза́ти и҆ совокꙋплѧ́ти во вре́мѧ чи́стыѧ мл҃твы, и҆ ᲂу҆́мнагѡ и҆ є҆ди́нственнагѡ и҆ проста́гѡ дѣ́ланїѧ: ѿ мечта́нїѧ же и҆ и҆ны́хъ си́лъ всѧ́чески ѻ҆́ной ѿлꙋча́ти. По ст҃о́мꙋ бо ні́лꙋ: Оу҆строе́нїе моли́твы є҆́сть навыкнове́нїе безстра́стно, кра́йнѣйшимъ раче́нїемъ на высотꙋ̀ мы́сленнꙋ восхища́ющее любомꙋ́дрый и҆ дꙋхо́вный ᲂу҆́мъ. И҆́бо дѣ́ющи дꙋша̀ подоба́ющее є҆́й и҆ честно́е досто́инство сохрани́тъ.⁵⁵⁰

Глава̀ ѻ҃.

(Є҆щѐ ѡ҆ ᲂу҆мѣ̀.)

Та́кожде же подоба́етъ и҆ самомꙋ̀ ᲂу҆мꙋ̀, ꙗ҆́кѡ нераздѣли́тельнꙋ, и҆ про́стꙋ, и҆ самосоверше́ннꙋ сꙋ́щꙋ сꙋществꙋ̀ чи́стꙋ и҆ свѣтови́днꙋ, себѐ блюстѝ и҆ храни́ти неприча́стна и҆ раздѣле́нна ѿ сегѡ̀, си́рѣчь ѿ мечта́нїѧ: ꙗ҆́кѡ и҆ самомꙋ̀ ѿ себѐ си́лꙋ є҆сте́ственнꙋю и҆мꙋ́щꙋ на сїѐ, и҆ во є҆́же неꙋдержи́мꙋ самомꙋ̀ къ себѣ̀ возвраща́тисѧ и҆ ѡ҆браща́тисѧ, и҆ двиза́тисѧ. Сїе́ бо є҆́сть стоѧ́нїе ᲂу҆ма̀, є҆́же ѿ бж҃е́ственныѧ въ не́мъ быва́етъ благода́ти, по лѣ́ствичникꙋ глаго́лющемꙋ: Є҆́же ᲂу҆держа́ти ᲂу҆́мъ, є҆ди́нагѡ ст҃а́гѡ дх҃а є҆́сть. А҆́ще бо ᲂу҆́мъ, ꙗ҆́кѡ и҆ си́ла сы́й дꙋшѝ, и҆ ѿ неѧ̀ дви́жимь є҆́сть и҆ нача́льствꙋемь є҆́сть нѣ́какѡ, но ᲂу҆́бѡ и҆ ѻ҆́ко є҆ѧ̀ є҆́сть и҆ и҆менꙋ́етсѧ: є҆ще́ же и҆ сво́йственною нѣ́коею си́лою є҆сте́ственною просто́ю и҆ всецѣ́лою, ꙗ҆́коже реко́хомъ, и҆з̾ѡби́лꙋетъ. Сегѡ̀ ра́ди и҆ внегда̀ по є҆стествꙋ̀ ᲂу҆свои́тельнѣ къ дꙋши́ же и҆ є҆ѧ̀ си́ламъ пребыва́етъ расположе́нъ, тогда̀ вои́стиннꙋ и҆ си́лою ᲂу҆́мъ є҆́сть, є҆́же и҆ дꙋше́венъ человѣ́къ нарече́сѧ: повнегда́ же своѐ є҆сте́ственное, и҆ просто́е сꙋще́ственное па́ки прїе́млетъ досто́инство и҆ свѣ́тлость, не ча́стнꙋю и҆ всецѣ́лꙋю и҆ самовлады́чнюю, си́рѣчь и҆зба́витсѧ тѣле́сныхъ же и҆ дꙋше́вныхъ є҆сте́ственныхъ ᲂу҆свое́нїй и҆ движе́нїй, и҆ ѿ тогѡ̀ є҆́же си́лою ᲂу҆мꙋ̀ бы́ти, во є҆́же дѣ́йствомъ ᲂу҆мꙋ̀ бы́ти сподо́битсѧ, си́рѣчь въ вышеесте́ственнаго и҆ дꙋхо́внаго пред̾ꙋспѣ́етъ человѣ́ка: тогда̀ вои́стиннꙋ при́снѡ къ себѣ̀ неꙋкло́ннѡ возвраща́етсѧ, и҆ собо́ю въ ра́зꙋмъ бж҃їй невоѡбраже́нный и҆ безви́дный и҆ просты́й неꙋдержи́мѡ восхо́дитъ соверше́ннѡ и҆ ѿрѣше́ннѡ, ꙗ҆́коже глаго́летъ вели́кїй васі́лїй: Оу҆́мъ не расточа́емь на внѣ̑шнѧѧ, нижѐ ѿ чꙋ́вствъ въ мі́ръ разлива́емь, возвраща́етсѧ къ себѣ̀, собо́ю же въ ра́зꙋмъ бж҃їй восхо́дитъ, и҆ ѻ҆́ною добро́тою ѡ҆сїѧва́емь и҆ просвѣща́емь, и҆ са́мое сїѐ є҆стество̀ забыва́етъ.⁵⁵¹ И҆ та́кѡ ᲂу҆̀бо и҆ є҆́же по ѡ҆́бразꙋ и҆ подо́бїю бж҃їю ᲂу҆́мъ па́ки прїе́млетъ и҆ храни́тъ, ᲂу҆́мъ сы́й, и҆ собо́ю непосре́дственнѡ ᲂу҆́мнѣ съ бж҃е́ственнымъ ᲂу҆мо́мъ, си́рѣчь, съ бг҃омъ соединѧ́ѧсѧ и҆ сочетава́ѧсѧ. Сїе́ же дѣ́ланїе є҆́сть ѻ҆крꙋ́жное движе́нїе, си́рѣчь къ самомꙋ̀ ᲂу҆мꙋ̀ возвраще́нїе є҆гѡ̀ и҆ ѡ҆браще́нїе и҆ соедине́нїе собо́ю къ бг҃ꙋ, є҆́же и҆ є҆ди́но є҆́сть и҆ вои́стиннꙋ непреле́стное и҆ непогрѣ́шное, ꙗ҆́кѡ неѡдержи́мо сꙋ́ще и҆ непосре́дственно, и҆ па́че ра́зꙋма соедине́нїе, и҆ па́че видѣ́нїѧ видѣ́нїе. Глаго́летъ бо вели́кїй дїонѵ́сїй: Движе́нїе дꙋшѝ є҆́сть, ѻ҆крꙋ́жное ᲂу҆́бѡ, въ са́мꙋю себѐ вхо́дъ ѿ внѣ́шнихъ и҆ ᲂу҆́мныхъ є҆ѧ̀ си́лъ є҆динови́дное вкꙋ́пѣ ѡ҆браще́нїе, ꙗ҆́кѡ въ нѣ́коемъ крꙋ́зѣ незаблꙋ́дность є҆́й да́рꙋющее, и҆ ѿ мно́гихъ внѣ́шнихъ ю҆̀ ѡ҆браща́ющее и҆ собира́ющее, пе́рвѣе са́мꙋ къ себѣ̀, та́же ꙗ҆́кѡ є҆динови́днꙋ бы́вшꙋ соединѧ́ющее є҆ди́нственнѣ съ соедине́нными си́лами, и҆ та́кѡ къ добрꙋ̀ и҆ бла́гꙋ рꙋководѧ́щее, є҆́же па́че всѣ́хъ сꙋ́щихъ є҆ди́номꙋ и҆ томꙋ́жде и҆ безнача́льномꙋ и҆ безконе́чномꙋ.⁵⁵² Ѡ҆братови́днѣ же дꙋша̀ дви́жетсѧ, поели́кꙋ сво́йственнѣ себѣ̀ бж҃е́ственными ра́зꙋмы ѡ҆сїѧва́ема є҆́сть, не ᲂу҆́мнѣ и҆ є҆ди́нственнѣ, но слове́снѣ и҆ преходи́тельнѣ, и҆ а҆́ки смѣ́сными и҆ преходи́тельными дѣ́йствы. Движе́нїемъ же прѧмы́мъ, є҆гда̀ не въ са́мꙋю себѐ вхо́дитъ, и҆ є҆ди́нственною мы́сленностїю дви́житсѧ, сїе́ бо, ꙗ҆́коже реко́хъ, є҆́сть є҆́же по крꙋ́гꙋ: но на сїѧ̑, ꙗ҆̀же ѻ҆́крестъ себѐ происходѧ́щи, и҆ ѿ внѣ́шнихъ ꙗ҆́кѡ ѿ нѣ́кихъ зна́менїй ᲂу҆разли́чествованныхъ и҆ ᲂу҆мно́женныхъ на просты̑ѧ и҆ соединє́нныѧ возво́дитсѧ видѣ̑нїѧ. И҆ ст҃ы́й маѯі́мъ: Оу҆́мъ непосре́дственное прїе́мь соедине́нїе съ бг҃омъ, тꙋ̀ си́лꙋ, є҆́же помышлѧ́ти и҆ разꙋмѣва́ти, по є҆стествꙋ̀ всеконе́чнѣ, и҆́мать пра́зднꙋ: є҆гда̀ ᲂу҆́бѡ сїѐ соедине́нїе разрѣши́тъ, нѣ́что помы́сливъ ѿ тѣ́хъ, ꙗ҆́же по бз҃ѣ раздѣли́сѧ, пресѣ́кши па́че помышле́нїѧ соедине́нїе, по немꙋ́же до́ндеже є҆́сть съ бг҃омъ соедине́нъ, ꙗ҆́кѡ па́че є҆стества̀ и҆ прича́стїемъ бг҃ъ бы́въ, ꙗ҆́коже го́рꙋ недви́жимꙋ, є҆сте́ственный сво́й прелага́етъ зако́нъ. И҆ па́ки: Оу҆́мъ чи́стый, соедине́нїемъ къ винѣ̀ ᲂу҆свое́нїе прїѧ́тъ па́че помышле́нїѧ, и҆́мже ᲂу҆держа́въ многоразли́чное къ тѣ̑мъ, ꙗ҆̀же по винѣ̀, є҆сте́ственное своѐ движе́нїе и҆ ᲂу҆свое́нїе, є҆ди́нагѡ невѣ́домѣ держи́тсѧ, въ неизглаго́ланное преста́нїе дости́гши преблаже́ннагѡ па́че помышле́нїѧ молча́нїѧ, є҆́же сказа́ти ѿню́дъ не мо́жетъ сло́во и҆лѝ помышле́нїе: но є҆ди́нъ по прича́стїю и҆скꙋ́съ сподо́бльшихсѧ па́че помышле́нїѧ наслажде́нїѧ, є҆гѡ́же зна́менїе є҆́сть ᲂу҆добопознава́емо, и҆ всѣ̑мъ ꙗ҆́вственно, си́рѣчь, по завѣща́нїю къ вѣ́кꙋ семꙋ̀ всеконе́чное нечꙋ́вствїе дꙋшѝ, и҆ разстоѧ́нїе. Въ се́мъ ᲂу҆̀бо несодѣ́йствꙋемь ᲂу҆́мъ ѿ дꙋшѝ, си́рѣчь, є҆́же къ бг҃ꙋ при́снѡ дви́житисѧ, нижѐ са́мъ ѿ себѐ и҆справлѧ́ѧ и҆ дѣ́йствꙋѧ сво́йственное, си́рѣчь, є҆́же къ себѣ̀ возвраща́тисѧ, и҆ та́кѡ неѡдержи́мѡ въ мы́сль, ꙗ҆́же ѡ҆ бз҃ѣ, восходи́ти, па́че же сегѡ̀ ѿ ѻ҆бою̀ не плодопрїе́млѧ, но съ мечта́нїемъ соединѧ́ѧсѧ, ᲂу҆жѐ про́чее и҆ разли́ченъ быва́етъ, и҆ дале́че ѿстои́тъ ѿ бг҃а.

Глава̀ ѻ҃а.

(Є҆щѐ ѡ҆ чи́стѣй моли́твѣ.)

Глаго́летъ бо ст҃ы́й ні́лъ: Подвиза́йсѧ ᲂу҆стро́ити ᲂу҆́мъ тво́й во вре́мѧ моли́твы, глꙋ́хъ и҆ нѣ́мъ, и҆ си́це возмо́жеши помоли́тисѧ.⁵⁵³ Є҆щѐ: А҆́зъ моѐ возглаго́лю, є҆́же и҆ ю҆нѣ́йшымъ реко́хъ: бл҃же́нъ є҆́сть ᲂу҆́мъ, и҆́же во вре́мѧ мл҃твы соверше́ннꙋю невоѡбраже́нность стѧжа̀.⁵⁵⁴ И҆ ст҃ы́й фїлоѳе́й: Рѣ́дкѡ мо́щно ѡ҆брѣстѝ слове́сною ча́стїю безмо́лвствꙋющыѧ, и҆ ѻ҆́нѣхъ то́чїю є҆́сть, и҆̀же бж҃е́ственнꙋю ра́дость и҆ ᲂу҆тѣше́нїе се́ю ве́щїю въ себѣ̀ вы́нꙋ и҆мѣ́ти ᲂу҆хищрѧ́ютсѧ.⁵⁵⁵ И҆ вели́кїй васі́лїй: Моли́тва блага́ѧ, ꙗ҆́же ꙗ҆́вственъ сотворѧ́етъ дꙋшѣ̀ бж҃їй ра́зꙋмъ, и҆ сїѐ є҆́сть бж҃їе вселе́нїе, є҆́же па́мѧтїю водрꙋже́нна и҆мѣ́ти въ себѣ̀ бг҃а є҆гда̀ попече́нми земны́ми непреста́ннаѧ па́мѧть не пресѣца́етсѧ, нижѐ неча́ѧнными страстьмѝ ᲂу҆́мъ смꙋща́етсѧ: но ѿ всѣ́хъ ᲂу҆клонѧ́ѧсѧ, бг҃олю́бецъ къ бг҃ꙋ возвраща́етсѧ.⁵⁵⁶

Глава̀ ѻ҃в.

(Ꙗ҆́кѡ и҆́но є҆́сть безстра́стїе ᲂу҆ма̀, а҆ и҆́но моли́тва и҆́стинна, є҆́же и҆ бо́льше є҆́сть. )

Вѣ́дати ᲂу҆̀бо подоба́етъ и҆ сїѐ, ꙗ҆́кѡ а҆́ще, по ст҃о́мꙋ маѯі́мꙋ, и҆ не мо́жетъ ᲂу҆́мъ ѿ є҆ди́нагѡ дѣѧ́нїѧ безстра́стенъ бы́ти, а҆́ще не прїе́млютъ є҆го̀ мнѡ́гаѧ и҆ разли̑чнаѧ видѣ̑нїѧ: но ᲂу҆̀бо напроти́въ, по бж҃е́ственнѣйшемꙋ ні́лꙋ, мо́щно є҆́сть и҆ безстра́стнꙋ бы́вшꙋ, не моли́тисѧ и҆́стиннѡ, но разли́чнꙋ бы́ти, и҆ дале́че ѿстоѧ́ти ѿ бг҃а. Глаго́летъ бо се́й ст҃ы́й ѻ҆те́цъ ѡ҆ таково́мъ си́це: А҆́ще и҆ вы́ше тѣле́снагѡ видѣ́нїѧ ᲂу҆́мъ бꙋ́детъ, не ᲂу҆̀ соверше́нное мѣ́сто бж҃їе ви́дѣ, мо́жетъ бо въ ра́зꙋмѣ. помышле́нїй бы́ти, и҆ разли́ченъ въ не́мъ бы́ти.⁵⁵⁷ Є҆щѐ: Не и҆́же полꙋчи́вый безстра́стїе, ᲂу҆жѐ и҆ мо́литсѧ и҆́стиннѡ, мо́жетъ бо въ просты́хъ помышле́нїѧхъ бы́ти, и҆ въ по́вѣстехъ и҆́хъ ᲂу҆пражнѧ́тисѧ и҆ дале́че ѿстоѧ́ти ѿ бг҃а.⁵⁵⁸ Є҆щѐ: Не ꙗ҆́кѡ ᲂу҆́бѡ не косни́тъ ᲂу҆́мъ въ просты́хъ помышле́нїѧхъ веще́й, ᲂу҆жѐ и҆ моли́твы мѣ́ста дости́же: мо́жетъ бо въ видѣ́нїи бы́ти веще́й, и҆ въ по́мыслѣхъ и҆́хъ ча́сто поꙋча́тисѧ, ꙗ҆̀же а҆́ще и҆ ма́лы глаго́лы сꙋ́ть, но ꙗ҆́кѡ веще́й сꙋ̑ща зри́тєльства, воѡбража́ютъ ᲂу҆́мъ, и҆ дале́че ѿво́дѧтъ ѿ бг҃а.⁵⁵⁹ Глаго́летъ же и҆ лѣ́ствичникъ: И҆́хже ᲂу҆́мъ наꙋчи́сѧ вои́стиннꙋ моли́тисѧ, сі́и гдⷭ҇ꙋ вои́стиннꙋ лице́мъ къ лицꙋ̀ глаго́лютъ, ꙗ҆́коже и҆̀же ко ᲂу҆шеса́мъ царє́вымъ. Ѿ си́хъ ᲂу҆̀бо и҆ таковы́хъ мо́жеши соверше́ннѡ ᲂу҆разꙋмѣ́ти ѻ҆бои́хъ жи́тельствъ разли́чїе, и҆ безсравни́тельное сравне́нїе тогѡ̀, є҆́же по прїѧ́тїю, и҆ сегѡ̀, є҆́же по взира́нїю. Занѐ сегѡ̀ ᲂу҆́бѡ дѣ́ло, поꙋчє́нїѧ и҆ мнѡ́гаѧ и҆ разли̑чнаѧ видѣ̑нїѧ: тогѡ́же дѣ́ланїе є҆́сть, и҆́стиннаѧ моли́тва. Къ си̑мъ же, и҆ ꙗ҆́кѡ и҆́но є҆́сть, ᲂу҆ма̀ безстра́стїе, а҆ и҆́но моли́тва и҆́стиннаѧ. Є҆ще́ же, ꙗ҆́кѡ и҆мѣ́ѧй и҆́стиннꙋю моли́твꙋ, по свидѣ́тельствꙋ ст҃ы́хъ, по всѧ́кой нꙋ́ждѣ и҆ ᲂу҆́мъ безстра́стенъ и҆мѣ́ти ѡ҆бы́че. Но и҆мѣ́ѧй то́чїю ᲂу҆́мъ безстра́стенъ, не мо́жетъ и҆мѣ́ти и҆ и҆́стиннꙋю моли́твꙋ. И҆ сїѧ̑ ᲂу҆́бѡ си́це: сло́во же да возвраща́етсѧ на предлежа̑щаѧ. Поне́же ᲂу҆́бѡ не то́кмѡ предречє́ннаѧ, но и҆ са́маѧ та́ѧ па́мѧть благи́хъ же и҆ сопроти́вныхъ воѡбража́ти внеза́пꙋ ᲂу҆́мъ, и҆ къ мечта́нїю приводи́ти ѡ҆бы́че нѣ́какѡ: подоба́етъ и҆ ѡ҆ се́мъ ма́лѡ рещѝ.

Глава̀ ѻ҃г.

(Є҆щѐ ѡ҆ мечта́нїихъ и҆ и҆з̾ѡбраже́нїихъ ᲂу҆ма̀, и҆ зна́менїихъ пре́лести, и҆ и҆́стины. И҆ ка̑ѧ сꙋ́ть зна́мєнїѧ пре́лести. )

Безмо́лвствꙋѧ, и҆ є҆ди́нъ хотѧ̀ бы́ти съ є҆ди́нѣмъ бг҃омъ, никогда́же да прїи́меши, а҆́ще ви́дѣлъ бы є҆сѝ что́либо чꙋ́вственно, и҆лѝ ᲂу҆́мно, внꙋтрьꙋ́дꙋ тебѐ, и҆лѝ внѣꙋ́дꙋ, а҆́ще и҆ ви́дъ а҆́ки хрⷭ҇то́въ, и҆лѝ а҆́гг҃ла, и҆лѝ ст҃а́гѡ зра́къ, и҆лѝ свѣ́та и҆з̾ѡбраже́нїе мечта́емо во ᲂу҆мѣ̀: но пребыва́й невѣ́рꙋѧ и҆ негодꙋ́ѧ ѡ҆ се́мъ, а҆́ще бы и҆ бла́го бы́ло, пре́жде вопро́са, ꙗ҆́коже реко́хомъ, и҆скꙋ́сныхъ: сїе́ бо є҆́сть поле́знѣйше, и҆ бг҃ꙋ любе́знѣйше и҆ благопрїѧ́тно: бꙋ́ди же при́снѡ блюдѧ̀ ᲂу҆́мъ тво́й неѡбра́зенъ, невоѡбраже́нъ, безви́дѣнъ, неѡбразова́нъ, нека́чественъ, неколи́чественъ и҆ є҆ди̑нымъ моли́твы глаго́лѡмъ внима́ѧ, и҆ поꙋча́ѧсѧ и҆ размышлѧ́ѧ внꙋ́трь, въ серде́чнѣмъ движе́нїи, по лѣ́ствичникꙋ глаго́лющемꙋ: Нача́ло ᲂу҆́бѡ моли́твы сꙋ́ть прило́зи, є҆диномы́сленнѣ въ нача́лѣ самѣ́мъ ѿгонѧ́емїи: среда́ же, є҆́же во глаго́лемыхъ и҆лѝ помышлѧ́емыхъ є҆ди́нѣхъ бы́ти ᲂу҆мꙋ̀: соверше́нство же сеѧ̀, восхище́нїе ко гдⷭ҇ꙋ (ѿ к҃и степе́ни) И҆ ст҃ы́й ні́лъ та́кѡ глаго́летъ: Є҆́сть ᲂу҆́бѡ превосхо́днаѧ соверше́нныхъ моли́тва, восхище́нїе нѣ́кое ᲂу҆ма̀ и҆ ѿ сꙋ́щихъ по чꙋ́вствꙋ и҆зстꙋпле́нїе соверше́нно, воздыха́нїи неизглаго́ланными. Дх҃ꙋ хода́тайствꙋющꙋ бг҃ови, ви́дѧщемꙋ завѣща́нїе се́рдца ѿверза́емо, ꙗ҆́коже напи́саннꙋю кни́гꙋ. И҆ ѡ҆́бразы неизглаго́ланными хотѣ́нїе своѐ и҆з̾ѧвлѧ́ющо (ѿ сло́ва къ дїаконі́ссѣ а҆гкѵ́рстѣй глава̀ к҃з и҆ к҃и). Та́кѡ до тре́тїѧгѡ небесѐ восхище́нъ бы́сть па́ѵелъ, а҆́ще въ тѣ́лѣ бѣ̀, и҆лѝ кромѣ̀ тѣ́ла, не вѣ́дѧ:⁵⁶⁰ та́кѡ пе́тръ возше́дъ на го́рницꙋ, є҆́же помоли́тисѧ, видѣ́нїе плащани́цы ви́дѣ.⁵⁶¹ Втора́ѧ же по пе́рвѣй моли́тва є҆́сть, є҆́же глаго́лати глаго́лы припослѣ́дствꙋющꙋ ᲂу҆мꙋ̀ со ᲂу҆миле́нїемъ, и҆ вѣ́дꙋщꙋ є҆мꙋ́же прино́ситъ моле́нїе: посредѣ́ же пресѣца́ющаѧсѧ моли́тва, и҆ смѣси́вшаѧсѧ съ попече́нїѧми тѣле́сными, ѿ ᲂу҆строе́нїѧ молѧ́щагѡсѧ ᲂу҆далѧ́етсѧ. Пребыва́ѧ ᲂу҆̀бо въ си́хъ, и҆ны́хъ не прїе́мли до вре́мене ми́ра страсте́й и҆ вопро́са, ꙗ҆́коже предглаго́ласѧ, и҆скꙋ́сныхъ. И҆ сїѧ̑ ᲂу҆́бѡ, ꙗ҆̀же предреко́хомъ, и҆ си̑мъ подѡ́бнаѧ, сꙋ́ть зна́мєнїѧ пре́лести вкра́тцѣ.

(Зри́ же, ка̑ѧ сꙋ́ть и҆ и҆́стины зна́мєнїѧ. )

И҆́стины же и҆ блага́гѡ и҆ животворѧ́щагѡ дх҃а зна́мєнїѧ сꙋ́ть: любы̀, ра́дость, ми́ръ, долготерпѣ́нїе, бла́гость, милосе́рдїе, вѣ́ра, кро́тость, воздержа́нїе,⁵⁶² и҆ прѡ́чаѧ, ꙗ҆́коже глаго́летъ бж҃е́ственный а҆по́столъ, та̑ѧ нарица́ѧ плоды̀ бж҃е́ственнагѡ дх҃а. Глаго́летъ же и҆ па́ки: Ꙗ҆́коже ча̑да свѣ́та ходи́те: пло́дъ бо дх҃о́вный є҆́сть во всѧ́кой бл҃госты́ни и҆ пра́вдѣ и҆ и҆́стинѣ:⁵⁶³ и҆̀мже сопроти́вное всѐ пре́лесть и҆́мать. Глаго́летъ же и҆ нѣ́кто ѿ бг҃омꙋ́дрыхъ, вопроше́нъ бы́въ ѿ нѣ́коегѡ, си́це: Въ незаблꙋ́днѣй стезѝ спасе́нїѧ, ꙗ҆́коже ре́клъ є҆сѝ, возлю́бленне, мнѡ́ги сꙋ́ть пꙋти̑ ведꙋ́щїи къ животꙋ̀, и҆ мнѡ́ги, и҆̀же къ сме́рти. И҆ продолжа́ѧ да́лѣе: И҆́маши є҆ди́нъ пꙋ́ть ведꙋ́щїй къ животꙋ̀, за́повѣдей хрⷭ҇то́выхъ соблюде́нїе: въ си́хъ за́повѣдехъ ѡ҆брѧ́щеши всѧ́къ добродѣ́тели ви́дъ, и҆зрѧ́днѣе же трѝ сїѧ̑, смире́нїе, любо́вь и҆ ми́лость: без̾ си́хъ никто́же ᲂу҆́зритъ гдⷭ҇а. И҆ по ма́лѣхъ: Сїѧ̑ трѝ сꙋ́ть непобѣди̑маѧ ѻ҆рꙋ̑жїѧ на дїа́вола, ꙗ҆̀же ст҃а́ѧ трⷪ҇ца на́мъ дарова̀: смире́нїе, глаго́лю, любо́вь и҆ ми́лость, на нѧ́же нижѐ противовоззрѣ́ти мо́жетъ всѐ бѣсѡ́въ мно́жество: нѣ́сть бо въ си́хъ слѣ́да смире́нїѧ, и҆̀же за го́рдость помрачи́шасѧ, и҆ ѻ҆́гнь и҆̀мъ ᲂу҆гото́васѧ вѣ́чный. Гдѣ̀ въ си́хъ любвѐ, и҆лѝ ми́лости сѣ́нь, и҆̀же къ ро́дꙋ человѣ́ческомꙋ непримири́тельнꙋ стѧжа́ша враждꙋ̀, и҆ при́снѡ ра́товати не престаю́тъ. Си́ми про́чее ѻ҆рꙋ́жїи воѡрꙋжи́мсѧ, ꙗ҆̀же ѡ҆бносѧ́й, не ꙗ҆́тъ быва́етъ сꙋпоста̑ты. И҆ по ма́лѣхъ: Сїю̀ треплете́ннꙋю ве́рвь, ю҆́же ст҃а́ѧ трⷪ҇ца и҆зтка̀ и҆ сплетѐ, зри́мъ ᲂу҆́бѡ и҆ трѝ сꙋ́щꙋ, и҆ є҆ди́но: трѝ ᲂу҆́бѡ и҆мены̑, а҆́ще ли же хо́щеши, и҆ ѵ҆поста́сьми: є҆ди́но же си́лою и҆ дѣ́йствомъ, и҆ къ бг҃ꙋ приближе́нїемъ и҆ зрѣ́нїемъ, и҆ ᲂу҆свое́нїемъ. Ѡ҆ си́хъ Влады́ка речѐ: ꙗ҆́кѡ и҆́го моѐ бла́го, и҆ бре́мѧ моѐ легко̀.⁵⁶⁴ И҆ возлю́бленный ᲂу҆чени́къ: За́пѡвѣди є҆гѡ̀ тѧ́жки не сꙋ́ть.⁵⁶⁵ И҆ по нѣ́коликихъ словесѣ́хъ: Сегѡ̀ ра́ди дꙋша̀, соедини́вшисѧ съ бг҃омъ чистото́ю житїѧ̀ и҆ хране́нїемъ за́повѣдей, и҆ тре́ми си́ми ѻ҆рꙋ́жїи, ꙗ҆̀же сꙋ́ть са́мъ бг҃ъ, въ бг҃а самаго̀ ѡ҆блече́сѧ, и҆ бы́сть положе́нїемъ бг҃ъ по смире́нїю, ми́лости и҆ любвѝ: и҆ веще́ственнꙋю дво́ицꙋ преше́дъ, и҆ превы́шше восше́дъ на главꙋ̀ зако́на, на любо́вь, глаго́лю пресꙋ́щественнѣй и҆ живонача́льнѣй трⷪ҇цѣ соедини́сѧ, бесѣ́дꙋѧ непосре́дственнѡ свѣ́томъ свѣ́тъ прїе́млѧ, и҆ веселѧ́сѧ благода́тїю без̾прее́мственною и҆ вѣ́чною. Но довлѣ́етъ и҆ ѡ҆ си́хъ. Подоба́етъ же, ꙗ҆́коже ᲂу҆́бѡ ѡ҆ зна́менїихъ и҆ плода́хъ пре́лести и҆ и҆́стины воспомѧнꙋ́хомъ, ꙗ҆́кѡ ѿ ча́сти, ѿѻнꙋ́дꙋже и҆ ѿ ни́хъ, си́рѣчь ѿ плодѡ́въ, по бж҃е́ственномꙋ па́ѵлꙋ, позна́емъ нѣ́какѡ дѣ́йствꙋемыхъ, ко́егѡ дꙋ́ха сꙋ́ть: та́кѡ и҆ ѡ҆ сꙋ́щемъ ѿ ѻ҆бою̀ ᲂу҆тѣше́нїй, бж҃е́ственныѧ, глаго́лемъ, и҆ и҆́стинныѧ благода́ти, и҆ ѿ притво́рныѧ и҆ сопроти́вныѧ рече́ньми ѻ҆те́ческими подоба́етъ ма́лѡ нѣ́что сказа́ти. Глаго́летъ ᲂу҆̀бо ѡ҆ се́мъ та́кѡ бж҃е́ственный дїа́дохъ.

Глава̀ ѻ҃д.

(Ѡ҆ ᲂу҆тѣше́нїи бж҃е́ственнѣмъ и҆ притво́рнѣмъ. )

Є҆гда̀ ᲂу҆́мъ на́шъ начне́тъ ѡ҆щꙋща́ти ᲂу҆тѣше́нїе ст҃а́гѡ дх҃а, тогда̀ и҆ сатана̀ сладкоѧвле́ннымъ нѣ́кимъ чꙋ́вствомъ въ нощны́хъ безмо́лвїѧхъ, є҆гда̀ кто̀ ꙗ҆́коже въ преклоне́нїе сна̀ нѣ́коегѡ тонча́йша прихо́дитъ, дꙋ́шꙋ ᲂу҆тѣша́етъ.⁵⁶⁶ А҆́ще ᲂу҆́бѡ въ те́плѣй ѕѣлѡ̀ ѡ҆брѧ́щетсѧ па́мѧти ᲂу҆́мъ держа̀ и҆́мѧ гдⷭ҇а. і҆и҃са, и҆ ꙗ҆́коже ѻ҆рꙋ́жїе ᲂу҆потреблѧ́етъ проти́вꙋ пре́лести ст҃о́е ѻ҆́ное и҆ пресла́вное и҆́мѧ, ѿхо́дитъ ᲂу҆́бѡ льсте́цъ ѻ҆́ный ѿ ле́сти, про́чее же на ра́ть сꙋще́ственнꙋ возгара́етсѧ проти́вꙋ дꙋшѝ: тѣ́мже познава́ѧ ᲂу҆́мъ ѻ҆па́снѣ пре́лесть лꙋка́вагѡ, мно́жае во и҆скꙋ́съ разсꙋжде́нїѧ преспѣва́етъ. И҆ па́ки: благо́е ᲂу҆тѣше́нїе бдѧ́щꙋ тѣ́лꙋ быва́етъ, и҆лѝ въ зна́менїи сна̀ нѣ́коемꙋ и҆мꙋ́щꙋ приходи́ти, є҆гда̀ кто̀ те́плою па́мѧтїю бг҃а, къ любвѝ є҆гѡ̀ а҆́ки прилѣпи́лсѧ є҆́сть: преле́стное же въ то́нкїй нѣ́кїй при́снѡ, ꙗ҆́коже рѣ́хъ, со́нъ прише́дшꙋ подви́жникꙋ съ сре́днею па́мѧтїю бж҃їею [глава̀ л҃в]. Ѻ҆́во ᲂу҆́бѡ, ꙗ҆́кѡ ѿ бг҃а сꙋ́щее, ꙗ҆́вѣ дꙋ́шы подви́жникѡвъ бл҃гоче́стїѧ мно́гою ра́достїю дꙋше́вною преклонѧ́ти къ любвѝ є҆гѡ̀ хо́щетъ: ѻ҆́во же, ꙗ҆́кѡ вѣ́тромъ нѣ́кимъ пре́лести развѣва́ти дꙋ́шꙋ ѡ҆бы́че, ᲂу҆крада́ти сно́мъ тѣле́снымъ и҆скꙋ́съ чꙋ́вствїѧ здра́вагѡ ᲂу҆ма̀ покꙋша́етсѧ, є҆гда̀ наипа́че въ па́мѧти бж҃їей те́плъ є҆́сть. А҆́ще ᲂу҆́бѡ ѡ҆брѧ́щетсѧ ᲂу҆́мъ, ꙗ҆́коже рѣ́хъ, помина́ѧй внима́тельнѣ гдⷭ҇а і҆и҃са хрⷭ҇та̀, расточа́етъ ᲂу҆́бѡ дыха́нїе ѻ҆́ное сладкови́дное вра́жїе: ра́дꙋѧсѧ же, на бра́нь проти́вꙋ є҆гѡ̀ возбꙋжда́етсѧ, ꙗ҆́кѡ ѻ҆рꙋ́жїе второ́е и҆мѣ́ѧ про́чее поле́зное по благода́ти, похвалꙋ̀ ѿ и҆скꙋ́са. И҆ па́ки: А҆́ще несомни́тельнымъ и҆ немечта́тельнымъ движе́нїемъ дꙋша̀ возжиза́етсѧ къ любвѝ бж҃їей, а҆́ки и҆ тѣ́ло влекꙋ́щи во глꙋбинꙋ̀ ѻ҆́ныѧ неизрече́нныѧ любвѐ, бдѧ́щꙋ, и҆лѝ и҆́мже реко́хъ ѡ҆́бразомъ, въ со́нъ приходѧ́щꙋ ѿ ст҃ы́ѧ благода́ти дѣ́йствꙋемꙋ, ничто́же и҆́но тогда̀ ѿню́дъ помышлѧ́ющи, то́чїю сїѐ, въ не́же дви́житсѧ: вѣ́дѣти подоба́етъ, ꙗ҆́кѡ є҆́сть ст҃а́гѡ дх҃а дѣ́йство: ᲂу҆слажда́ема бо всѧ̑ ѿ ѻ҆́ныѧ неизрече́нныѧ сла́дости, ничто́же и҆́но мо́жетъ помышлѧ́ти, поне́же неѡсла́бною тогда̀ весели́тсѧ ра́достїю [глава̀ л҃г]. А҆́ще ли же сомнѣ́нїе всѧ́ко, и҆лѝ нечи́стꙋю нѣ́кꙋю мы́сль ᲂу҆́мъ прїи́метъ, внегда̀ дѣ́йствꙋемꙋ бы́ти, а҆́ще и҆ ст҃о́е ᲂу҆потреблѧ́етъ и҆́мѧ ко ѿраже́нїю ѕла̀, а҆ не па́че къ любвѝ то́чїю дви́житсѧ бж҃їей, разꙋмѣ́ти подоба́етъ, ꙗ҆́кѡ ѿ преле́стника є҆́сть ѻ҆́ное ᲂу҆тѣше́нїе притво́рствомъ ра́дости: ра́дость же ѻ҆́наѧ нека́чественна є҆́сть, и҆ безчи́нна всѧ̀, хотѧ́щꙋ врагꙋ̀, да прелюбодѣ́йствꙋетъ дꙋша̀: є҆гда́ бо ᲂу҆́зритъ ᲂу҆́мъ и҆скꙋ́сомъ своегѡ̀ чꙋ́вствїѧ и҆звѣ́стнѣ хва́лѧщьсѧ, тогда̀ ᲂу҆тѣше́ньми нѣ́кїими, ꙗ҆́коже рѣ́хъ, благоѧвле́нными привлека́етъ дꙋ́шꙋ, ꙗ҆́кѡ да развлека́емѣй є҆́й ѡ҆ разсла́бленныѧ ѻ҆́ныѧ и҆ вла́жныѧ сла́дости, не познава́емо є҆́й бꙋ́детъ примѣше́нїе льсти́вагѡ. Ѿ сегѡ̀ ᲂу҆̀бо познае́мъ дх҃а и҆́стины, и҆ дꙋ́ха ле́стча. Ѻ҆ба́че не возмо́жно є҆́сть, и҆лѝ бж҃е́ственныѧ бл҃года́ти въ ра́зꙋмѣ вкꙋси́ти комꙋ̀, и҆лѝ го́рести бѣсо́вскїѧ чꙋ́вственнѣ и҆скꙋ́съ прїѧ́ти, а҆́ще неизвѣще́нна кто̀ себѐ сотвори́тъ, ꙗ҆́кѡ благода́ть во глꙋбинꙋ̀ ᲂу҆ма̀ всели́сѧ, лꙋка́вїи же дꙋ́си при ᲂу҆десѣ́хъ се́рдца пребыва́ютъ: чесомꙋ̀ никогда́же хо́щꙋтъ бѣ́совє, да человѣ́цы ᲂу҆вѣ́рꙋютъ, да не ᲂу҆́мъ, сїѐ ᲂу҆вѣ́дѣвъ соверше́ннѡ, па́мѧтїю бж҃їею на ни́хъ воѡрꙋжа́етсѧ. И҆́маши ᲂу҆жѐ и҆ ѡ҆ се́мъ дово́льное, и҆ дово́ленъ бꙋ́ди: занѐ ѻ҆бо́нъ-полъ гади́рѡвъ непрохо́дно є҆́сть, и҆ ме́дъ ма́лѡ ꙗ҆́ждь, да не пресы́тивсѧ и҆зблюе́ши є҆го̀.⁵⁶⁷

Глава̀ ѻ҃є.

(Ѡ҆ сла́дости бж҃е́ственнѣй, точа́щейсѧ и҆з̾ се́рдца. )

Па́че же благовре́менно є҆́сть сво́йственнѣе рещѝ, кто̀ возвѣсти́тъ сла́дость ме́да не ᲂу҆̀ вкꙋси́вшымъ; и҆ мно́гѡ па́че без̾ сравне́нїѧ сла́дость бж҃е́ственнꙋ и҆ весе́лїе преесте́ственно и҆ жизното́чно, ѿ серде́чныѧ чи́стыѧ и҆ и҆́стинныѧ моли́твы точа́щеесѧ, и҆ текꙋ́щее присноте́чнѣ, ꙗ҆́коже глаго́летъ бг҃очл҃вѣ́къ і҆и҃съ: И҆́же пїе́тъ ѿ воды̀, ю҆́же а҆́зъ да́мъ є҆мꙋ̀, бꙋ́детъ въ не́мъ и҆сто́чникъ воды̀ текꙋ́щїѧ въ живо́тъ вѣ́чный.⁵⁶⁸ И҆ па́ки: а҆́ще кто̀ жа́ждетъ, да прїи́детъ ко мнѣ̀ и҆ пїе́тъ: вѣ́рꙋѧй въ мѧ̀, ꙗ҆́коже речѐ писа́нїе, рѣ́ки ѿ чре́ва є҆гѡ̀ и҆стекꙋ́тъ воды̀ жи́вы⁵⁶⁹. Сїе́ же речѐ ѡ҆ дс҃ѣ, глаго́летъ напе́рсникъ, є҆го́же и҆мѣ́ѧхꙋ прїима́ти вѣ́рꙋющїи въ него̀. И҆ вели́кїй па́ѵелъ: посла̀ бг҃ъ дх҃а сн҃а своегѡ̀ въ сердца̀ на̑ша, вопїю́ща: а҆́вва ѻ҆́ч҃е.⁵⁷⁰

Глава̀ ѻ҃ѕ.

(Ꙗ҆́кѡ дꙋхо́внаѧ сїѧ̀ сла́дость и҆ многозна́менна є҆́сть и҆ без̾име́нна. )

Ꙗ҆́же сла́дость дꙋхо́внаѧ преесте́ственна и҆ жизното́чна, и҆ сꙋще́ственно сїѧ́нїе, па́че свѣ́та же мра́къ и҆ добро́та недоꙋмѣ́нна, и҆ жела́нїе кра́йнѣйшее, зрѣ́нїе же и҆ бг҃овидѣ́нїе, и҆ ѡ҆боже́нїе предрече́сѧ та́инственнѣ: несказа́ннѡ пребыва́ющее, и҆ повнегда̀ сказа́тисѧ ка́кѡлибо, и҆ недовѣ́домо по є҆́же ᲂу҆вѣ́датисѧ, и҆ по є҆́же недоразꙋмѣва́емо ᲂу҆разꙋмѣ́тисѧ. Глаго́летъ бо вели́кїй дїонѵ́сїй: въ се́й превы́шнїй свѣ́та мра́къ прїитѝ мы̀ мо́лимсѧ, и҆ невидѣ́нїемъ и҆ неразꙋмѣ́нїемъ ᲂу҆ви́дѣти и҆ разꙋмѣ́ти сꙋ́щаго па́че видѣ́нїѧ и҆ ра́зꙋма, са́мымъ тѣ́мъ, є҆́же не ᲂу҆ви́дѣти, нижѐ разꙋмѣ́ти: се́ бо є҆́сть, є҆́же вои́стиннꙋ ᲂу҆ви́дѣти и҆ разꙋмѣ́ти, и҆ пресꙋ́щественнаго пресꙋ́щественнѣ воспѣ́ти, ѿѧ́тїемъ всѣ́хъ сꙋ́щихъ. Є҆щѐ: бж҃е́ственный мра́къ є҆́сть непристꙋ́пный свѣ́тъ, въ не́мже жи́ти бг҃ъ глаго́летсѧ, и҆ въ неви́димѣмъ сꙋ́щемъ, за превосходѧ́щꙋю свѣ́тлость, и҆ непристꙋ́пнѣмъ, за превосхожде́нїе пресꙋ́щественна свѣтолїѧ́нїѧ. Въ се́й прихо́дитъ всѧ́къ, бг҃а разꙋмѣ́ти и҆ ᲂу҆ви́дѣти сподоблѧ́ѧйсѧ, са́мымъ си́мъ, є҆́же не ви́дѣти, нижѐ разꙋмѣва́ти, вои́стиннꙋ въ то́мъ, и҆́же па́че видѣ́нїѧ и҆ ра́зꙋма быва́ѧ, сїѐ са́мое разꙋмѣва́ѧ, ꙗ҆́кѡ превы́ше всѣ́хъ є҆́сть чꙋ́вственныхъ и҆ ᲂу҆́мныхъ. И҆ вели́кїй васі́лїй: неизречє́нны сꙋ́ть всеконе́чнѣ, и҆ неисповѣ́данны сїѧ̑нїѧ бж҃е́ственныѧ добро́ты: не представлѧ́етъ сло́во, не прїе́млетъ слꙋ́хъ: а҆́ще и҆ денни́цы зарю̀ рече́ши, а҆́ще и҆ лꙋны̀ свѣ́тлость, а҆́ще и҆ со́лнца свѣ́тъ, всѧ̑ хꙋ̑ждша подо́бїѧ сла́вы, и҆ мно́жае недоста́точєствꙋюща къ сравне́нїю и҆́стиннагѡ свѣ́та, не́жели є҆ли́кѡ глꙋбо́каѧ но́щь и҆ мра́чнаѧ тьма̀, ко сравне́нїю полꙋ́дне чистѣ́йша. Сїѧ̀ добро́та плотски́ма ᲂу҆̀бо ѻ҆чи́ма неви́дима є҆́сть: дꙋше́ю же є҆ди́ною и҆ мы́слїю постиза́ема, и҆ а҆́ще нѣ́кихъ ѿ ст҃ы́хъ ѡ҆сїѧ̀, нестерпи́мое жа́ло любвѐ въ ни́хъ ѡ҆ста́ви. И҆̀же сѣ́тꙋюще ѡ҆ здѣ́шнемъ животѣ̀ глаго́лахꙋ: ᲂу҆вы̀ мнѣ̀, ꙗ҆́кѡ прише́льствїе моѐ продолжи́сѧ!⁵⁷¹ И҆, возжада̀ дꙋша̀ моѧ̀ къ бг҃ꙋ крѣ́пкомꙋ, живо́мꙋ: когда̀ прїидꙋ̀ и҆ ꙗ҆влю́сѧ лицꙋ̀ бг҃а моегѡ̀;⁵⁷² И҆, є҆́же разрѣши́тисѧ и҆ со хрⷭ҇то́мъ бы́ти, мно́гѡ па́че лꙋ́чше.⁵⁷³ И҆, ны́нѣ ѿпꙋща́еши раба̀ твоего̀, влⷣко, съ ми́ромъ,⁵⁷⁴ ꙗ҆́кѡ ᲂу҆зи́лище здѣ́шнїй вмѣнѧ́юще живо́тъ. И҆̀же, занѐ не насыща́ютсѧ видѣ́нїѧ бж҃е́ственныѧ добро́ты, молѧ́хꙋсѧ со всѣ́мъ вѣ́чнымъ живото́мъ продолжа́тисѧ видѣ́нїю свѣ́тлости гдⷭ҇ни. И҆ бг҃осло́въ: И҆дѣ́же є҆́сть стра́хъ, тꙋ̀ за́повѣдей соблюде́нїе: а҆ и҆дѣ́же за́повѣдей соблюде́нїе, тꙋ̀ пло́ти ѡ҆чище́нїе ѿ ѡ҆сѣнѧ́ющагѡ дꙋ́шꙋ ѻ҆́блака, и҆ не ѡ҆ставлѧ́ющагѡ чи́стѣ ᲂу҆ви́дѣти бж҃е́ственнꙋю лꙋчꙋ̀: а҆ и҆дѣ́же ѡ҆чище́нїе, тꙋ̀ ѡ҆сїѧ́нїе: ѡ҆сїѧ́нїе же, и҆сполне́нїе жела́нїй велича́йшихъ, и҆лѝ велича́йшагѡ, и҆лѝ превы́шше вели́кагѡ жела́ющымъ. И҆ бж҃е́ственный григо́рїй нѵ́сскїй: а҆́ще ѡ҆чи́стиши прилѣжа́нїемъ житїѧ̀ сотво́ршꙋюсѧ на се́рдцѣ твое́мъ скве́рнꙋ, па́ки возсїѧ́етъ тѝ бг҃ови́днаѧ добро́та, ꙗ҆́коже на желѣ́зѣ быва́ти ѡ҆бы́че. Є҆гда́ бо ѻ҆се́лкомъ ржа́вщины ѡ҆бнажи́тсѧ, бы́вши вма́лѣ пре́жде че́рное, сїѧ̑нїѧ нѣ́кїѧ и҆з̾ себѐ прѧ́мѡ со́лнцꙋ и҆спꙋща́ѧ, свѣ́тлѡсти и҆здае́тъ: та́кѡ и҆ внꙋ́треннїй человѣ́къ, є҆го́же се́рдцемъ и҆менꙋ́етъ гдⷭ҇ь, повнегда̀ соско́блитъ ржа́вꙋю нечистотꙋ̀, процвѣ́тшꙋю лꙋка́вою и҆ согни́вшею вла́гою на зра́цѣ па́ки воспрїи́метъ къ началоѡбра́зїю подо́бїе, и҆ бла́гъ бꙋ́детъ: благо́мꙋ бо подо́бное томꙋ̀ бла́го всѧ́кѡ послѣ́дствꙋетъ. И҆ ст҃ы́й ні́лъ: блаже́нъ пости́гшїй неразꙋ́мїе неразлꙋ́чное ѿ моли́твы. И҆ лѣ́ствичникъ: бе́здна пла́ча, ᲂу҆тѣше́нїе ᲂу҆зрѣ̀: чистота́ же се́рдца, прїѧ́тъ просвѣще́нїе: просвѣще́нїе є҆́сть неизрече́нно дѣ́йство, ви́димое неви́димо, и҆ разꙋмѣва́емое недовѣ́домо [ѿ к҃з степе́ни]. Сегѡ̀ ра́ди и҆ треблаже́ни сꙋ́ть, по ѡ҆́бразꙋ дре́вней марі́и, благꙋ́ю сїю̀ ча́сть и҆ жи́тельство и҆збра́вшїи дꙋхо́вное и҆ неѿе́млемое: и҆ такова́гѡ блага́гѡ бг҃оподо́бнагѡ жре́бїѧ сподоблѧ́ющїисѧ, ꙗ҆́кѡ со мно́гою и҆ и҆зстꙋпи́тельною ра́достїю съ бж҃е́ственнымъ па́ѵломъ мощѝ и҆̀мъ ꙗ҆́вѣ ᲂу҆жаса́тисѧ, кꙋ́пнѡ и҆ вопи́ти сїѐ: є҆гда̀ благода́ть и҆ человѣколю́бїе ꙗ҆ви́сѧ сп҃са на́шегѡ бг҃а, не ѿ дѣ́лъ пра́ведныхъ, и҆̀хже сотвори́хомъ мы̀, но по свое́й є҆гѡ̀ ми́лости, спасѐ на́съ ба́нею пакибытїѧ̀ и҆ ѡ҆бновле́нїемъ дх҃а ст҃а́гѡ, є҆го́же и҆злїѧ̀ на на́съ ѻ҆би́льнѡ, і҆и҃съ хрⷭ҇то́мъ сп҃си́телемъ на́шимъ: да ѡ҆правди́вшесѧ благода́тїю є҆гѡ̀, наслѣ̑дницы бꙋ́демъ по ᲂу҆пова́нїю жи́зни вѣ́чныѧ.⁵⁷⁵ И҆ па́ки: пома́завъ на́съ и҆ запечатлѣ́въ, и҆ да́въ ѡ҆брꙋче́нїе дх҃а въ сердца̀ на̑ша.⁵⁷⁶ И҆, и҆́мамы же сокро́вище сїѐ въ скꙋде́льныхъ сосꙋ́дѣхъ, да премно́жество си́лы бꙋ́детъ бж҃їѧ, а҆ не ѿ на́съ.⁵⁷⁷ И҆ ѻ҆нѝ ᲂу҆́бѡ си́це: бꙋ́ди же и҆ на́мъ, бг҃оꙋвѣ́тливыми ѻ҆́нѣхъ ко гдⷭ҇ꙋ моли́твами, ѿ ча́сти подо́бными ѻ҆́нѣмъ бы́ти, ми́лостїю и҆ благода́тїю.

Глава̀ ѻ҃з.

(Ꙗ҆́кѡ подоба́етъ по всѧ́цѣй нꙋ́ждѣ кро́ткꙋ бы́ти се́рдцемъ, хотѧ́щемꙋ ѻ҆па́снѣ безмо́лвствовати. )

Тебѣ́ же, ѽ ча́до! сїѐ ны́нѣ благовре́меннѡ пре́жде и҆ны́хъ, и҆ со и҆ны́ми подоба́етъ разꙋмѣ́ти. Ꙗ҆́коже хотѧ́й наꙋчи́тисѧ до́брѣ стрѣлѧ́ти, не без̾ зна́менїй лꙋ́къ напрѧга́етъ: та́кѡ хотѧ́й наꙋчи́тисѧ безмо́лвствовати, ꙗ҆́кѡ зна́менїе да и҆́мать, є҆́же при́снѡ кро́ткꙋ бы́ти се́рдцемъ. Глаго́летъ бо ст҃ы́й і҆сі́дѡръ: не довлѣ́етъ къ добродѣ́тели ѡ҆бꙋче́нїе, но подоба́етъ и҆ кро́ткꙋ бы́ти съ ѡ҆бꙋче́нїемъ. А҆́ще бо по́двигъ кро́тости проходѧ́ще, разꙋмѣ́нїемъ смꙋти́тельнымъ ѻ҆́ный пресѣче́мъ, ничто́же и҆́но є҆́сть, то́чїю хотѣ́ти ᲂу҆́бѡ спасе́нїе полꙋчи́ти, не хотѣ́ти же твори́ти прили́чєствꙋющаѧ къ ѻ҆́номꙋ. И҆ пре́жде же сегѡ̀ ст҃а́гѡ, бж҃е́ственнѣйшїй даві́дъ: наста́витъ крѡ́ткїѧ на сꙋ́дъ, наꙋчи́тъ крѡ́ткїѧ пꙋтє́мъ свои̑мъ.⁵⁷⁸ И҆ сїра́хъ: крѡ́ткимъ ѿкрыва́ютсѧ та̑йны.⁵⁷⁹ И҆ сладча́йшїй і҆и҃съ: наꙋчи́тесѧ ѿ менѐ, ꙗ҆́кѡ кро́токъ є҆́смь и҆ смире́нъ се́рдцемъ, и҆ ѡ҆брѧ́щете поко́й дꙋша́мъ ва́шымъ.⁵⁸⁰ И҆, на кого̀ воззрю̀, то́чїю на кро́ткагѡ и҆ молчали́ваго и҆ трепе́щꙋщаго слове́съ мои́хъ.⁵⁸¹ И҆, бл҃же́ни кро́тцыи, ꙗ҆́кѡ ті́и наслѣ́дѧтъ зе́млю,⁵⁸² си́рѣчь, се́рдце плодоносѧ́щее благода́тїю на три́десѧть, и҆ шестьдесѧ́тъ, и҆ сто̀, по чи́нꙋ новонача́льныхъ, сре́днихъ и҆ соверше́нныхъ. Ника́коже ни въ чесо́мъ смꙋща́ѧ, и҆лѝ смꙋща́ѧсѧ, а҆́ще гдѣ̀ не ѡ҆ благоче́стїи бꙋ́детъ сло́во.

Глава̀ ѻ҃и.

(Ка́кѡ бы могла̀ и҆спра́витисѧ на́ми кро́тость, и҆ ѡ҆ трича́стности дꙋшѝ: ꙗ҆́ростной, жела́тельной и҆ слове́ственной. )

Сїе́ же ᲂу҆до́бнѡ бы и҆спра́вилъ є҆сѝ, всѧ̑ ᲂу҆клонѧ́ѧ ѿ тебѐ кꙋ́пнѡ, и҆ къ любвѝ дꙋ́шꙋ подвиза́ѧ, мно́жайше же молча̀, и҆ ᲂу҆мѣ́реннѡ пита́ѧсѧ, и҆ при́снѡ молѧ́сѧ, ꙗ҆́коже реко́ша ѻ҆тцы̀: ꙗ҆́ростнꙋю ча́сть дꙋшѝ любо́вїю ѡ҆бꙋзда́й: и҆ жела́тельнꙋю є҆ѧ̀ воздержа́нїемъ ᲂу҆вѧдѝ: и҆ слове́сною є҆ѧ̀ моли́твою воскрилѝ, и҆ свѣ́тъ ᲂу҆ма̀ не помрача́етсѧ никогда́же. И҆, ꙗ҆́рости ᲂу҆́бѡ ᲂу҆зда̀ є҆́сть благовре́менное молча́нїе: безслове́сныѧ же по́хоти ᲂу҆мѣ́реннаѧ снѣ́дь: неꙋдободержи́магѡ же по́мысла є҆динопо́мысленнаѧ мл҃тва. И҆ па́ки: трѝ сꙋ́ть добродѣ́тєли, ꙗ҆̀же подаю́тъ свѣ́тъ ᲂу҆мꙋ̀ вы́нꙋ: є҆́же не вѣ́дѣти лꙋка́вства ко́егѡ человѣ́ка: є҆́же терпѣ́ти находѧ̑щаѧ без̾ смꙋще́нїѧ: и҆ є҆́же благотвори́ти ѕлотворѧ́щымъ. Трѝ сі́и добродѣ́тєли ражда́ютъ и҆́ны трѝ добродѣ́тєли бо́льшыѧ и҆́хъ: є҆́же не вѣ́дѣти лꙋка́вства человѣ́ча, ражда́етъ любо́вь: и҆ є҆́же претерпѣ́ти находѧ̑щаѧ без̾ смꙋще́нїѧ, ражда́етъ кро́тость: и҆ є҆́же благосотвори́ти ѕлотворѧ́щымъ, стѧжава́етъ ми́ръ. И҆ па́ки: трѝ сꙋ́ть нра́вствєнныѧ ᲂу҆строє́нїѧ, гла́внѣйшыѧ во и҆́ноцѣхъ: и҆ пе́рвое ᲂу҆́бѡ є҆́сть, є҆́же ничто́же согрѣша́ти по дѣѧ́нїю: второ́е же, є҆́же не ᲂу҆коснѣва́ти въ дꙋшѝ встра̑стнымъ помыслѡ́мъ: и҆ тре́тїе, є҆́же на ли́цы же́нъ, и҆ ѡ҆печа́лившихъ безстра́стнѡ зрѣ́ти въ мы́сли.

Глава̀ ѻ҃ѳ.

(Ꙗ҆́кѡ ско́рѡ подоба́етъ ка́ѧтисѧ ѡ҆ ᲂу҆клоне́нїихъ, ꙗ҆̀же по приключе́нїю, и҆ та́кѡ въ послѣ́дꙋющемъ премꙋ́дрѣ ᲂу҆твержда́тисѧ.)

А҆́ще же бы въ нѣчесо́млибо слꙋчи́лосѧ когда̀ смꙋти́тисѧ тебѣ̀, и҆лѝ въ нѣ́кое поползнꙋ́тисѧ приключе́нїе, и҆ ѿ подоба́ющагѡ погрѣши́ти, а҆́бїе до́лжно примири́тисѧ со ѡ҆печа́лившимъ и҆лѝ ѡ҆печа́леннымъ, и҆ ка́ѧтисѧ ѿ дꙋшѝ, пла́кати же и҆ слези́ти и҆ себѐ ᲂу҆корѧ́ти, и҆ та́кѡ послѣ́дꙋющемꙋ внима́ти и҆ ᲂу҆твержда́тисѧ. Ѕѣлѡ̀ премꙋ́дрѣ, ꙗ҆́коже ᲂу҆́читъ гдⷭ҇ь і҆и҃съ: ꙗ҆́кѡ а҆́ще принесе́ши да́ръ тво́й ко ѻ҆лтарю̀, и҆ тꙋ̀ помѧне́ши, ꙗ҆́кѡ бра́тъ тво́й и҆́мать нѣ́что на тѧ̀: ѡ҆ста́ви тꙋ̀ да́ръ тво́й пред̾ ѻ҆лтаре́мъ, и҆ ше́дъ пре́жде смири́сѧ съ бра́томъ твои́мъ, и҆ тогда̀ прише́дъ принесѝ да́ръ тво́й.⁵⁸³ И҆ а҆по́столъ: Всѧ́ка го́ресть, и҆ гнѣ́въ, и҆ ꙗ҆́рость, и҆ кли́чь и҆ хꙋла̀ да во́зметсѧ ѿ ва́съ со всѧ́кою ѕло́бою. Быва́йте же дрꙋ́гъ ко дрꙋ́гꙋ бла́зи, милосе́рди, проща́юще дрꙋ́гъ дрꙋ́гꙋ, ꙗ҆́коже и҆ бг҃ъ во хрⷭ҇тѣ̀ прости́лъ є҆́сть ва́мъ.⁵⁸⁴ И҆, гнѣ́вайтесѧ, и҆ не согрѣша́йте: со́лнце да не за́йдетъ во гнѣ́вѣ ва́шемъ.⁵⁸⁵ И҆, не ѿмща́юще себѐ, возлю́бленнїи, но дади́те мѣ́сто гнѣ́вꙋ. И҆ не побѣжде́нъ быва́й ѿ ѕла̀, но побѣжда́й благи́мъ ѕло́е.⁵⁸⁶ И҆ сїѐ ᲂу҆́бѡ рече́сѧ ѡ҆ примире́нїи, є҆́же дрꙋ́гъ ко дрꙋ́гꙋ.

Глава̀ п҃.

(Ѡ҆ поползнове́нїи и҆ покаѧ́нїи. )

Ѡ҆ поползнове́нїи же глаго́летъ ст҃ы́й і҆саа́къ: не є҆гда̀ въ чесо́мъ поползне́мсѧ, тогда̀ да ѡ҆печа́лимсѧ, но є҆гда̀ пребꙋ́демъ въ то́мъ: поползнове́нїе бо мно́жицею слꙋча́етсѧ и҆ совершє́ннымъ [ѿ ч҃ сло́ва] А҆ є҆́же въ не́мъ пребы́ти, ᲂу҆мерщвле́нїе є҆́сть соверше́нно. Печа́ль же, є҆́юже печа́лꙋемъ ѡ҆ свои́хъ поползнове́нїѧхъ, вмѣ́стѡ дѣ́ланїѧ чи́стагѡ вмѣнѧ́етсѧ на́мъ ѿ благода́ти. И҆́же ᲂу҆пова́нїемъ покаѧ́нїѧ пополза́ѧйсѧ втори́цею, се́й кова́рнѡ хо́дитъ съ бг҃омъ. На сего̀ невѣ́домѣ напада́етъ сме́рть, и҆ не достиза́етъ вре́мене ᲂу҆пова́нїѧ своегѡ̀, и҆спо́лнити дѣ́ла добродѣ́тели. Є҆щѐ: подоба́етъ, глаго́летъ, вѣ́дѣти на́мъ на всѧ́къ ча́съ, ꙗ҆́кѡ въ си́хъ два́десѧти четы́рехъ часѣ́хъ но́щи и҆ днѐ покаѧ́нїѧ тре́бꙋемъ [ѿ п҃з сло́ва]. Ра́зꙋмъ же и҆́мене покаѧ́нїѧ, ꙗ҆́коже ѡ҆ и҆́стиннагѡ ѡ҆́браза веще́й ᲂу҆вѣ́дѣхомъ, се́й є҆́сть моле́нїе прилѣ́жно на всѧ́къ ча́съ, съ моли́твою и҆спо́лненною ᲂу҆миле́нїѧ, приближа́ющꙋсѧ бг҃ꙋ ѡ҆ ѡ҆ставле́нїи проше́дшихъ, и҆ печа́ль ѡ҆ хране́нїи бꙋ́дꙋщихъ. И҆ па́ки: благода́ть по благода́ти покаѧ́нїе даде́сѧ человѣ́кѡмъ [ѿ п҃г сло́ва]. Покаѧ́нїе бо є҆́сть порожде́нїе второ́е ѿ бг҃а. И҆ є҆́же ѿ вѣ́ры ѡ҆брꙋче́нїе прїѧ́хомъ, покаѧ́нїемъ дарова́нїѧ ѻ҆́нагѡ ча́емъ. Покаѧ́нїѧ є҆́сть две́рь ми́лости ѿве́рстаѧ держа́щымсѧ є҆ѧ̀, две́рїю се́ю вхо́димъ къ бж҃е́ственной ми́лости. И҆ кромѣ̀ сегѡ̀ вхо́да не ѡ҆брѧ́щемъ ми́лости: зане́же всѝ согрѣши́ша, по бж҃е́ственномꙋ писа́нїю, ѡ҆правда́еми тꙋ́не благода́тїю є҆гѡ̀.⁵⁸⁷ Покаѧ́нїе є҆́сть благода́ть втора́ѧ, и҆ ражда́етсѧ въ се́рдцѣ ѿ вѣ́ры и҆ стра́ха: стра́хъ же є҆́сть же́злъ ѻ҆те́ческїй ᲂу҆правлѧ́ющїй на́съ, до́ндеже дости́гнемъ въ ра́й дꙋхо́вный. И҆ є҆гда̀ та́мѡ дости́гнемъ, ѡ҆ставлѧ́етъ на́съ, и҆ возвраща́етсѧ. Ра́й є҆́сть любы̀ бж҃їѧ, въ не́йже наслажде́нїе всѣ́хъ блаже́нствъ [въ то́мже сло́вѣ]. И҆ па́ки: ꙗ҆́коже невозмо́жно є҆́сть прейтѝ мо́ре вели́кое без̾ ладїѝ и҆ кораблѧ̀, си́це не мо́жетъ кто́либо без̾ стра́ха прейтѝ къ любвѝ. Мо́ре смердѧ́щее положе́нное посредѣ̀ на́съ и҆ ᲂу҆́мнагѡ раѧ̀, корабле́мъ покаѧ́нїѧ прейтѝ мо́жемъ, и҆мꙋ́щимъ гребцы̀ стра́ха. А҆́ще ли же сі́и гребцы̀ стра́ха не ᲂу҆правлѧ́ютъ кораблѧ̀ сегѡ̀ покаѧ́нїѧ, и҆́мже прехо́димъ мо́ре мі́ра сегѡ̀ къ бг҃ꙋ, потоплѧ́емсѧ въ смердѧ́щемъ мо́ри.

Глава̀ п҃а.

(Є҆щѐ ѡ҆ покаѧ́нїи, стра́сѣ, любвѝ, пла́чи, слеза́хъ и҆ самоꙋкоре́нїи.)

Покаѧ́нїе є҆́сть кора́бль: стра́хъ, ко́рмчїй є҆гѡ̀: любы̀, приста́нище бж҃е́ственное [і҆саа́ка п҃г сло́во]. Посажда́етъ ᲂу҆̀бо на́съ стра́хъ въ кораблѝ покаѧ́нїѧ, и҆ прево́зитъ на́съ чрез̾ мо́ре жите́йское смердѧ́щее, и҆ ко приста́нищꙋ бж҃е́ственномꙋ, є҆́же є҆́сть любы̀, наставлѧ́етъ на́съ: въ не́же прехо́дѧтъ всѝ трꙋжда́ющїисѧ и҆ ѡ҆бремене́ннїи покаѧ́нїемъ. И҆ є҆гда̀ дости́гнемъ любвѐ, достиго́хомъ къ бг҃ꙋ, и҆ пꙋ́ть на́шъ соверши́сѧ, и҆ преидо́хомъ ко ѻ҆́стровꙋ, дале́че ѿ мі́ра сꙋ́щемꙋ: и҆дѣ́же є҆́сть ѻ҆ц҃ъ, сн҃ъ и҆ ст҃ы́й дх҃ъ. Ѡ҆ пла́чи же по бз҃ѣ та́кѡ глаго́летъ сп҃си́тель: блаже́ни пла́чꙋщїи, ꙗ҆́кѡ ті́и ᲂу҆тѣ́шатсѧ.⁵⁸⁸ Є҆щѐ ѡ҆ слеза́хъ то́йжде пи́шетъ преподо́бный і҆саа́къ: сле́зы, ꙗ҆̀же въ моли́твѣ, зна́менїе сꙋ́ть млⷭ҇ти бж҃їѧ, є҆ѧ́же сподо́бисѧ дꙋша̀ въ свое́мъ покаѧ́нїи: и҆ ꙗ҆́кѡ прїѧ́та бы́сть, и҆ нача́тъ входи́ти въ по́ле чистоты̀ слеза́ми [ѿ л҃ сло́ва]. А҆́ще бо не во́змꙋтсѧ помышлє́нїѧ преходѧ́щихъ, и҆ ѿве́ргнꙋтъ ѿ себѐ ᲂу҆пова́нїе мі́ра, и҆ подви́гнетсѧ ѿ ни́хъ презрѣ́нїе є҆гѡ̀, и҆ не начнꙋ́тъ блага̑ѧ напꙋ̑тїѧ и҆схо́да своегѡ̀ ᲂу҆готовлѧ́ти, и҆ не начнꙋ́тъ въ дꙋшѝ по́мыслы дви́житисѧ нѣ́кихъ сꙋ́щихъ та́мѡ, не мо́гꙋтъ ѻ҆́чи сле́зы и҆спꙋска́ти. Сле́зы бо ѿ чи́стагѡ приснопоꙋче́нїѧ и҆ непари́тельнагѡ, и҆ помыслѡ́въ мно́гихъ и҆ ча́стыхъ, и҆ неꙋкло́ннѡ быва́ющихъ, и҆ ѿ па́мѧти нѣ́чесогѡ то́нка быва́ющагѡ въ мы́сли, и҆ ѡ҆печалѧ́юща се́рдце па́мѧтїю свое́ю, и҆ ѿ си́хъ ᲂу҆множа́ютсѧ, и҆ наипа́че возраста́ютъ. И҆ лѣ́ствичникъ: ꙗ҆́коже ѻ҆́гнь потреблѧ́етъ тро́стїе, та́кѡ слеза̀ чи́стаѧ всѧ́кꙋ ви́димꙋю и҆ разꙋмѣва́емꙋю скве́рнꙋ [ѿ з҃ степе́ни]. Є҆щѐ: чи̑стыѧ и҆ нелє́стныѧ сле́зы чрез̾ воспомина́нїе разрѣше́нїѧ на́шегѡ ѿ тѣ́ла себѣ̀ стѧ́жимъ: нѣ́сть бо въ ни́хъ краде́нїѧ, и҆лѝ возноше́нїѧ, но па́че ѡ҆чище́нїе, и҆ любвѐ, ꙗ҆́же къ бг҃ꙋ, пред̾ꙋспѣ́ѧнїе, и҆ грѣха̀ ѿмы́тїе, и҆ безстра́стїе. Є҆щѐ: не вѣ́рꙋй си̑мъ и҆сто́чникѡмъ сле́зъ, пре́жде соверше́нна ѡ҆чище́нїѧ: не наде́ждно бо вїно̀, а҆́бїе ѿ точи́лъ заключе́нное. Є҆щѐ: ꙗ҆̀же ᲂу҆́бѡ ѿ стра́ха сле́зы, са́ми въ себѣ̀ хране́нїе и҆́мꙋтъ: а҆ ꙗ҆̀же ѿ любвѐ, не́гли ᲂу҆до́бь ѡ҆крада́еми въ нѣ́кихъ быва́ютъ, а҆́ще ѻ҆́ный приснопа́мѧтный ѻ҆́гнь во вре́мѧ дѣ́йствїѧ ѕѣлѡ̀ се́рдце не возже́глъ бы. И҆ чꙋ́дно є҆́сть, ка́кѡ смире́ннѣйшее тве́рже є҆́сть во вре́мѧ своѐ. Є҆щѐ: сле́зы и҆схо́да ражда́ютъ стра́хъ: стра́хꙋ же ро́ждшꙋ безстра́шїе, быва́етъ ра́дость: ра́дости же непостижи́мой преста́вшей, преподо́бныѧ любвѐ цвѣ́тъ прозѧба́етъ [въ то́мже степе́ни].

(Ѡ҆ самоꙋкоре́нїи, и҆з̾ вели́кагѡ а҆нтѡ́нїа. )

Ѡ҆ самоꙋкоре́нїи же глаго́летъ вели́кїй а҆нтѡ́нїй: сїѐ є҆́сть вели́кое дѣ́ланїе человѣ́ка, да согрѣше́нїе своѐ верхꙋ̀ себѐ поло́житъ пред̾ бг҃омъ, и҆ возча́етъ и҆скꙋше́нїѧ до послѣ́днѧгѡ и҆здыха́нїѧ [въ патер. ски́т. ѡ҆ смиренномꙋ́дрїи]. И҆ и҆́нъ ѻ҆тє́цъ ст҃ы́й вопроше́нъ бы́въ, что̀ мно́жае ѡ҆брѣ́лъ є҆сѝ, ѻ҆́тче, на пꙋтѝ се́мъ; ѿвѣща́въ речѐ: є҆́же во все́мъ себѐ ᲂу҆корѧ́ти. Є҆́же и҆ вопроси́вый похвалѝ, и҆ глаго́летъ є҆мꙋ̀: и҆но́гѡ пꙋтѝ нѣ́сть кромѣ̀ сегѡ̀. И҆ а҆́вва пі́менъ: со стена́нїемъ всѧ̑ добродѣ́тєли въ мі́ръ се́й внидо́ша: возмѝ є҆ди́нꙋ добродѣ́тель, и҆ без̾ неѧ̀ съ трꙋдо́мъ состои́тъ человѣ́къ. И҆ вопроси́ша є҆го̀, ка́ѧ є҆́сть сїѧ̀; и҆ глаго́летъ: да человѣ́къ при́снѡ себѐ ᲂу҆корѧ́етъ. Речѐ па́ки: ᲂу҆корѧ́ѧй себѐ, а҆́ще что́либо прилꙋчи́тсѧ є҆мꙋ̀, и҆лѝ тщета̀, и҆лѝ безче́стїе, и҆лѝ какова́либо ско́рбь, предвари́въ и҆́мать себѐ досто́йна, и҆ николи́же смꙋща́етсѧ [въ кни́гѣ а҆́ввы дѡроѳе́а ли́стъ н҃в].

Глава̀ п҃в.

(Ѡ҆ внима́нїи, и҆ ѡ҆ є҆́же премꙋ́дрѣ ᲂу҆твержда́тисѧ.)

Подо́бнѣ же и҆ ѡ҆ внима́нїи и҆ ᲂу҆твержде́нїи пи́шетъ бж҃е́ственный па́ѵелъ: блюди́те, ка́кѡ ѻ҆па́снѡ хо́дите: не ꙗ҆́коже не мꙋ́дри, но ꙗ҆́коже премꙋ́дри, и҆скꙋпꙋ́юще вре́мѧ, ꙗ҆́кѡ дні́е лꙋка́ви сꙋ́ть.⁵⁸⁹ И҆ ст҃ы́й і҆саа́къ: ѽ премꙋ́дросте, коли́кѡ ди́вна є҆сѝ, и҆ ка́кѡ предви́диши всѧ̑ и҆здале́ча! Блаже́нъ є҆́сть ѡ҆брѣты́й тѧ̀: ѿ ᲂу҆ны́нїѧ бо ю҆́ности свободи́сѧ [ѿ ѻ҃є сло́ва]. А҆́ще кто̀ кꙋ́плю дѣ́етъ ма́лою кꙋ́плею, си́рѣчь стѧжа́нїемъ, врачева́нїе вели́кихъ страсте́й до́брѣ твори́тъ. Сїе́ бо є҆́сть любомꙋ́дрїе, да кто̀ и҆ въ малѣ́йшихъ и҆ ма́лыхъ быва́емыхъ ѿ негѡ̀ при́снѡ трезви́тсѧ: ᲂу҆покоє́нїѧ бо вели̑каѧ сокро́виществꙋетъ себѣ̀, и҆ не спи́тъ, да не приключи́тсѧ є҆мꙋ̀ что̀ сопроти́вно: но вины̑ ѿсѣка́етъ пре́жде вре́мене, и҆ малѣ́йшими вещьмѝ терпи́тъ ма́лꙋю печа́ль, потреблѧ́ѧ се́ю вели́кꙋю. И҆ ни́же: тѣ́мже и҆ глаго́летъ премꙋ́дрый: бꙋ́ди бо́дръ и҆ тре́звенъ ѡ҆ животѣ̀ твое́мъ: сро́денъ бо є҆́сть со́нъ се́й ᲂу҆мꙋ̀, и҆ ѡ҆́бразъ и҆́стинныѧ сме́рти [та́мже]. Глаго́летъ и҆ сщ҃енноꙋчи́тель васі́лїй: и҆́же въ ма́лыхъ свои́хъ лѣни́въ є҆́сть, не вѣ́рꙋй є҆мꙋ̀ въ вели́кихъ просїѧ́ти.

Глава̀ п҃г.

(Ꙗ҆́кѡ ѡ҆ всѣ́хъ рече́нныхъ тща́тисѧ подоба́етъ: пре́жде же всѣ́хъ, є҆́же безмо́лвнꙋ и҆ кро́ткꙋ бы́ти, и҆ чи́стѣ тща́тисѧ призыва́ти безмо́лвствꙋющемꙋ гдⷭ҇а і҆и҃са хрⷭ҇та̀ внꙋ́трь се́рдца.)

Си́хъ же ра́ди, ѡ҆ всѣ́хъ ᲂу҆́бѡ рече́нныхъ тщи́сѧ: пре́жде же всѣ́хъ, да безмо́лвнѣ и҆ кро́тцѣ, и҆ съ чи́стою со́вѣстїю гдⷭ҇а і҆и҃са хрⷭ҇та̀ внꙋ́трь глꙋбины̀ се́рдца призыва́еши, ꙗ҆́коже реко́хомъ. Си́це бо бж҃е́ственнꙋю є҆гѡ̀ благода́ть, пꙋте́мъ пред̾иды́й, почива́ющꙋ и҆́маши въ дꙋшѝ. Глаго́летъ бо и҆ лѣ́ствичникъ: никто́же ѿ ꙗ҆́рости и҆ возноше́нїѧ, лицемѣ́рїѧ же и҆ памѧтоѕло́бїѧ стꙋжда́емь, слѣ́дъ безмо́лвїѧ ᲂу҆ви́дѣти да де́рзнетъ когда̀: да не ка́кѡ и҆зстꙋпле́нїе ѿсю́дꙋ прїѡбрѧ́щетъ [ѿ к҃з степе́ни]. А҆́ще ли же кто̀ ѿ си́хъ є҆́сть чи́стъ, то́й про́чее позна́етъ поле́зное, мню́ же, ꙗ҆́кѡ ни то́й. И҆ ᲂу҆̀бо не то́чїю почива́ющꙋ и҆мѣ́ти бꙋ́деши благода́ть во твое́й дꙋшѝ, но и҆ ᲂу҆покоѧ́ющꙋ соверше́ннѣ дꙋ́шꙋ ѿ преждестꙋжа́вшихъ є҆́й бѣсѡ́въ и҆ страсте́й. А҆́ще бо и҆ па́ки стꙋжа́ютъ, но не дѣ́йствꙋютъ, занѐ не прилага́етсѧ къ ни̑мъ, ни сла́сти, ꙗ҆́же ѿ ни́хъ, жела́етъ.

Глава̀ п҃д.

(Ѡ҆ до́брѣмъ и҆зстꙋпи́тельнѣмъ раче́нїи, и҆ бж҃е́ственной добро́тѣ.)

Все́ бо жела́нїе такова́гѡ, и҆ серде́чное и҆ и҆зстꙋпи́тельное раче́нїе, и҆ соверше́нное є҆гѡ̀ завѣща́нїе къ превышшедобро́тнѣй и҆ блаже́ннѣйшей добро́тѣ зри́тъ, ꙗ҆̀же ѻ҆тцы̀ и҆ жела́нїй кра́йнѣйшимъ нареко́ша. Глаго́летъ бо вели́кїй васі́лїй: є҆гда̀ раче́нїе бл҃гоче́стїѧ дꙋ́шꙋ пред̾ꙋде́ржитъ, всѧ́кїй є҆́й ви́дъ бра́ней посмѣѧ́теленъ, и҆ всѝ ю҆̀ за жела́емое бїю́щїи ᲂу҆слажда́ютъ па́че, не́жели ᲂу҆ѧзвлѧ́ютъ. И҆ па́ки: что̀ бж҃е́ственныѧ добро́ты чꙋднѣ́йшее; Ка́ѧ мы́сль великолѣ́пїѧ бж҃їѧ ра́достнѣйшаѧ; Ко́е жела́нїе дꙋшѝ та́кѡ лю́то и҆ нестерпи́мо; ꙗ҆́коже є҆́же ѿ бг҃а быва́етъ во ѡ҆чище́ннѣй ѿ всѧ́кїѧ ѕло́бы дꙋшѝ, и҆ ѿ и҆́стиннагѡ завѣща́нїѧ глаго́лющей: Оу҆ѧ́звлена є҆́смь любо́вїю а҆́зъ.⁵⁹⁰

Глава̀ п҃є.

(Ѡ҆ бра́ни, и҆ наказа́тельнѣмъ попꙋще́нїи, и҆ по ѿвраще́нїю ѡ҆ставле́нїи.)

Ра́тꙋемь же быва́етъ про́чее по попꙋще́нїю наказа́тельнꙋ, а҆ не по ѿвраще́нїю ѡ҆ставле́нїѧ. Чесѡ̀ ра́ди; ꙗ҆́кѡ да не вознесе́тсѧ ᲂу҆́мъ є҆гѡ̀ бла́га ра́ди, є҆́же ѡ҆брѣ́те, но ра́тꙋемь же и҆ наказꙋ́емь прїе́млетъ смире́нїе при́снѡ, и҆́мже є҆ди́нѣмъ не то́кмѡ побѣжда́етъ го́рдѡ ра́тꙋющихъ є҆го̀: но и҆ дарѡ́въ бо́льшихъ вы́нꙋ сподоблѧ́етсѧ, пред̾ꙋспѣва́ѧ є҆ли́кѡ мо́щно є҆́сть дости́гнꙋти человѣ́ческомꙋ є҆стествꙋ̀, вери́гами неизбѣ́жными, и҆ тѧ́жестїю пло́ти свѧ́занъ и҆ ᲂу҆гнѣта́емь, и҆ ше́ствꙋѧ къ соверше́нствꙋ ѡ҆ хрⷭ҇тѣ̀ и҆ безстра́стїю. Глаго́летъ бо ст҃ы́й дїа́дохъ: са́мъ гдⷭ҇ь глаго́летъ, ꙗ҆́кѡ сатана̀ съ нб҃сѐ ꙗ҆́кѡ мо́лнїѧ спадѐ, да не взира́етъ ѕлови́дный въ селє́нїѧ ст҃ы́хъ а҆́гг҃лъ.⁵⁹¹ Ка́кѡ ᲂу҆́бѡ не сподо́бивыйсѧ прича́стїѧ благи́хъ рабѡ́въ съ бг҃омъ ѻ҆́бщее мо́жетъ и҆мѣ́ти жили́ще человѣ́ческїй ᲂу҆́мъ; Но а҆́ще и҆ рекꙋ́тъ, ꙗ҆́кѡ по попꙋще́нїю быва́етъ сїѐ, и҆ мно́жае ничто́же рекꙋ́тъ: занѐ наказа́тельное ᲂу҆́бѡ попꙋще́нїе ника́коже лиша́етъ дꙋ́шꙋ бж҃е́ственнагѡ свѣ́та: скрыва́етъ же то́чїю, ꙗ҆́коже ᲂу҆жѐ реко́хъ, мно́жицею ѿ ᲂу҆ма̀ прише́ствїе своѐ благода́ть, а҆́кибы да низверга́етъ дꙋ́шꙋ въ го́ресть бѣсо́вскꙋю, да со всѧ́кимъ стра́хомъ и҆ мно́гимъ смире́нїемъ взыскꙋ́етъ ѻ҆на̀ по́мощи ѿ бг҃а, познава́ющи пома́лꙋ врага̀ своегѡ̀ ѕло́бꙋ: и҆́мже ѡ҆́бразомъ а҆́ще бы ма́ти безчи́нствꙋющаго своего̀ по ᲂу҆ста́вѡмъ млекопита́нїѧ младе́нца, ма́лѡ ѿрѣва́ла ѿ свои́хъ ѡ҆б̾ѧ́тїй, да ᲂу҆жаса́ѧсѧ ѿ нѣ́кихъ ѡ҆бстоѧ́щихъ є҆го̀ ѕлови́дныхъ человѣ̑къ, и҆лѝ ѕвѣре́й ꙗ҆ковы́хлибо, со мно́гимъ стра́хомъ и҆ слеза́ми къ ма́тєрнимъ па́ки возврати́тсѧ нѣ́драмъ: по ѿвраще́нїю же быва́ющее попꙋще́нїе предае́тъ бѣсовѡ́мъ дꙋ́шꙋ, а҆́ки ᲂу҆́зницꙋ не хотѧ́щꙋю и҆мѣ́ти бг҃а. Мы́ же нѣ́смы ча̑да стра́ха, да не бꙋ́детъ: но младе́нцы и҆́стинныѧ бж҃їѧ благода́ти бы́ти вѣ́рꙋемъ, ма́лыми попꙋще́ньми, и҆ ча́стыми ᲂу҆тѣше́ньми млекопита́еми: да бла́гостїю бж҃їею сподо́бимсѧ прїитѝ въ мꙋ́жа соверше́нна, въ мѣ́рꙋ во́зраста и҆сполне́нїѧ хрⷭ҇то́ва.⁵⁹² И҆ па́ки: наказа́тельное попꙋще́нїе прино́ситъ ᲂу҆́бѡ печа́ль мно́гꙋ и҆ смире́нїе, и҆ ѿча́ѧнїе ᲂу҆мѣ́ренное дꙋшѣ̀: ꙗ҆́кѡ да славолюби́ваѧ є҆ѧ̀ и҆ небоѧ́зненнаѧ ча́сть благолѣ́пнѣ во смире́нїе прихо́дитъ. А҆́бїе же стра́хъ бж҃їй и҆ сле́зꙋ и҆сповѣ́данїѧ прино́ситъ се́рдцꙋ, и҆ мно́гое жела́нїе и҆зрѧ́днѣйшагѡ молча́нїѧ: по ѿвраще́нїю же бж҃їю быва́ющее, ѿча́ѧнїѧ вкꙋ́пѣ и҆ невѣ́рїѧ и҆ гнѣ́ва и҆ киче́нїѧ и҆сполнѧ́тисѧ дꙋшѣ̀ попꙋща́етъ. Подоба́етъ ᲂу҆̀бо на́мъ вѣ́дѣти и҆скꙋ́съ ѻ҆бои́хъ попꙋще́нїй, и҆ по коегѡ́ждо ѡ҆́бразꙋ пристꙋпа́ти къ бг҃ꙋ: та́мѡ бо благодаре́нїе со и҆сповѣ́данїемъ принестѝ є҆мꙋ̀ до́лжни є҆смы̀, ꙗ҆́кѡ неѻбꙋ́зданность ра́зꙋма на́шегѡ ѿѧ́тїемъ ᲂу҆тѣше́нїѧ наказꙋ́ющемꙋ, да разли́чїю добродѣ́тели и҆ ѕло́бы, ꙗ҆́кѡ ѻ҆ц҃ъ благі́й наꙋча́етъ на́съ: здѣ́ же, непреста́нно и҆сповѣ́данїе согрѣше́нїй, и҆ сле́зꙋ неѡскꙋ́днꙋ, и҆ вѧ́щшее ѿше́льничество, ꙗ҆́кѡ да си́це возмо́жемъ приложе́нїемъ трꙋдѡ́въ ᲂу҆моли́ти когда́либо бг҃а, призрѣ́ти, ꙗ҆́коже и҆ пре́жде, на сердца̀ на̑ша. Ѻ҆ба́че подоба́етъ вѣ́дѣти, ꙗ҆́кѡ є҆гда̀ по сꙋще́ственнꙋ сраже́нїю дꙋшѣ̀ и҆ сатанѣ̀ ра́ть быва́етъ при наказа́тельнѣмъ, глаго́лю, попꙋще́нїи: скрыва́етъ ᲂу҆́бѡ, ꙗ҆́коже ᲂу҆жѐ и҆ реко́хъ, себѐ благода́ть: недовѣ́домою же содѣ́йствꙋетъ дꙋшѣ̀ по́мощїю, да побѣ́дꙋ дꙋшѝ бы́ти то́чїю пока́жетъ врагѡ́мъ є҆ѧ̀. И҆ ст҃ы́й і҆саа́къ: не мо́щно є҆́сть кромѣ̀ и҆скꙋше́нїй, ꙗ҆̀же по попꙋще́нїю, человѣ́кꙋ ᲂу҆премꙋдри́тисѧ во бра́нехъ дꙋхо́вныхъ, и҆ позна́ти своего̀ промысли́телѧ, и҆ разꙋмѣ́ти бг҃а своего̀, и҆ ᲂу҆тверди́тисѧ въ вѣ́рѣ є҆гѡ̀ сокрове́ннѣ, то́чїю си́лою и҆скꙋ́са своегѡ̀, є҆го́же прїѧ́тъ [ѿ м҃ѳ сло́ва]. И҆ внегда̀ ᲂу҆ви́дитъ благода́ть, ꙗ҆́кѡ нача́сѧ нѣ́коликѡ въ по́мыслѣ є҆гѡ̀ возноше́нїе, и҆ нача̀ помышлѧ́ти вели̑ка ѡ҆ себѣ̀, а҆́бїе попꙋща́етъ и҆скꙋше́нїємъ на него̀ ᲂу҆крѣпи́тисѧ и҆ ᲂу҆тверди́тисѧ, до́ндеже ᲂу҆разꙋмѣ́етъ не́мощь свою̀, и҆ бѣжи́тъ, и҆ ᲂу҆де́ржитъ бг҃а во смире́нїи. И҆ си́ми прихо́дитъ человѣ́къ въ мѣ́ры соверше́ннагѡ мꙋ́жа вѣ́рою и҆ ᲂу҆пова́нїемъ сн҃а бж҃їѧ, и҆ возвыша́етсѧ въ любвѝ. Ди́вна бо познава́етсѧ любы̀ бж҃їѧ къ человѣ́кꙋ, є҆гда̀ нѣ́когда посредѣ̀ бꙋ́детъ веще́й пресѣца́ющихъ ᲂу҆пова́нїе є҆гѡ̀: и҆ та́мѡ показꙋ́етъ бг҃ъ си́лꙋ свою̀ во спасе́нїе, є҆́же ѡ҆ не́мъ. Никогда́же бо разꙋмѣва́етъ человѣ́къ си́лꙋ бж҃ескꙋю въ поко́и и҆ простра́нствѣ: и҆ никогда́же показа̀ бг҃ъ дѣ́йствїе своѐ чꙋ́вственнѣ, то́чїю во странѣ̀ безмо́лвїѧ, и҆ въ пꙋсты́ни, и҆ въ мѣ́стѣхъ лише́нныхъ срѣ́тенїй и҆ смꙋще́нїѧ вселе́нїѧ, є҆́же съ человѣ́ки.

Глава̀ п҃ѕ.

(Ѡ҆ безстра́стїи, и҆ ѡ҆ то́мъ, что́ є҆сть человѣ́ческое безстра́стїе. )

Къ си̑мъ ᲂу҆́бѡ подоба́етъ ѿ ча́сти и҆ безстра́стїѧ сло́во здѣ̀ приложи́ти, и҆ соверше́нства, и҆ си́це пома́лѣ ѡ҆конча́ти настоѧ́щее списа́нїе. Тѣ́мже глаго́летъ и҆ вели́кїй васі́лїй: рачи́тель бг҃а бы́вый и҆ безстра́стїѧ ѻ҆́нагѡ, и҆ малѣ́йшꙋю ча́сть ᲂу҆держа́ти жела́ѧй, и҆ дꙋхо́вныѧ ст҃ы́ни, ти́хости же и҆ несмꙋще́нїѧ и҆ кро́тости и҆ ражда́емагѡ ѿ си́хъ весе́лїѧ и҆ ра́дости жела́ѧй вкꙋси́ти: ѿ всѧ́кїѧ ᲂу҆́бѡ веще́ственныѧ стра́сти, возмꙋща́ющїѧ дꙋ́шꙋ, дале́че по́мыслы ѿводи́ти тщи́тсѧ, и҆ чи́стымъ и҆ неѡсѣне́ннымъ ѻ҆́комъ бж҃е́ствєннаѧ ѡ҆бзира́етъ, несы́тнѣ та́мошнѧгѡ свѣ́та насыща́ѧсѧ. Въ таково́е же навыкнове́нїе и҆ ᲂу҆строе́нїе дꙋ́шꙋ ѡ҆бꙋчи́въ, ᲂу҆своева́етсѧ по возмо́жномꙋ подо́бїю бг҃ꙋ, любе́зенъ и҆ вожделѣ́ннѣйшъ є҆мꙋ̀ быва́етъ, ꙗ҆́кѡ вели́кїй по́двигъ и҆ неꙋдобосоверша́емый претерпѣ́въ, и҆ ѿ веще́ственнагѡ срастворе́нїѧ возмогі́й чи́стою и҆ ѿлꙋче́нною мы́слїю ѿ примѣше́нїѧ тѣле́сныхъ страсте́й, нѣ́какѡ бесѣ́довати съ бг҃омъ. И҆ сїѐ ᲂу҆́бѡ є҆́сть ѡ҆ безстра́стїи. Ѡ҆ се́мъ же, что́ є҆сть человѣ́ческое безстра́стїе, пи́шетъ си́це ст҃ы́й і҆саа́къ: безстра́стїе є҆́сть, не є҆́же не ѡ҆щꙋти́ти страсте́й, но є҆́же не прїѧ́ти и҆́хъ: ѿ мно́гихъ бо и҆ разли́чныхъ добродѣ́телей, ꙗ҆̀же стѧжа́ша ꙗ҆вле́нныхъ и҆ та́йныхъ, и҆ и҆знемого́ша въ ни́хъ стра̑сти, и҆ не мо́гꙋтъ ᲂу҆до́бь возста́ти на дꙋ́шꙋ, и҆ мы́сль не тре́бꙋетъ всегда̀ внима́ти и҆̀мъ: занѐ во всѧ́ко вре́мѧ и҆спо́лнена є҆́сть въ помышле́нїѧхъ свои́хъ ѿ поꙋче́нїѧ и҆ бесѣ́ды и҆зрѧ́днѣйшихъ ѡ҆бразѡ́въ, ра́зꙋмомъ дви́жимыхъ во ᲂу҆мѣ̀ [ѿ м҃и сло́ва]. И҆ є҆гда̀ начнꙋ́тъ стра̑сти двиза́тисѧ и҆ смꙋща́тисѧ, внеза́пꙋ восхища́етсѧ мы́сль ѿ приближе́нїѧ и҆́хъ въ ра́зꙋмъ нѣ́кїй прини́кнꙋвшїй во ᲂу҆́мъ, и҆ ѡ҆стаю́тсѧ въ не́мъ стра̑сти пра̑здны: ꙗ҆́коже речѐ блаже́нный ма́рко: ᲂу҆́мъ ѿ благода́ти бж҃їѧ дѣѧ̑нїѧ добродѣ́телей и҆сполнѧ́ѧ, и҆ ра́зꙋмꙋ прибли́живсѧ, ма́лѡ ѡ҆щꙋща́етъ ѿ ча́сти ѕло́бы и҆ неразꙋ́мїѧ дꙋшѝ (въ то́мже сло́вѣ). Ра́зꙋмъ бо є҆гѡ̀ восхища́етъ є҆го̀ на высотꙋ̀, и҆ ѿчꙋжда́етъ є҆го̀ ѿ всѣ́хъ, ꙗ҆̀же въ мі́рѣ, и҆ за сꙋ́щꙋю въ ни́хъ чистотꙋ̀, и҆ то́нкость, и҆ ле́гкость, и҆ ѻ҆стротꙋ̀ ᲂу҆ма̀ и҆́хъ, и҆ за прилѣжа́нїе па́ки и҆́хъ, ѡ҆чища́етсѧ и҆́хъ ᲂу҆́мъ, и҆ прозра́ченъ показꙋ́етсѧ, зане́же пло́ть и҆́хъ и҆зсо́хла ѿ ᲂу҆пражне́нїѧ безмо́лвїѧ, и҆ мно́гагѡ въ не́мъ пребыва́нїѧ: сегѡ̀ ра́ди ᲂу҆до́бнѡ и҆ ско́рѡ прилага́етсѧ коемꙋ́ждо, и҆ наставлѧ́етъ и҆́хъ видѣ́нїе сꙋ́щее въ ни́хъ, ко ᲂу҆́жасꙋ є҆́же въ не́мъ: и҆ въ се́мъ па́че ᲂу҆множа́ютсѧ видѣ́нїи, и҆ нижѐ смы́слъ и҆́хъ лиша́етсѧ вещества̀ ра́зꙋма. И҆ никогда́же кромѣ̀ ѻ҆́нѣхъ пребыва́ютъ, ꙗ҆̀же сотворѧ́ютъ въ ни́хъ дꙋхо́вный пло́дъ. И҆ ѻ҆бы́чаемъ многовре́менныхъ и҆зглажда́ютсѧ па̑мѧти ѿ се́рдца и҆́хъ, ꙗ҆̀же дви́жꙋтъ стра̑сти въ дꙋшѝ, и҆ крѣ́пость вла́сти дїа́воли. Є҆гда́ бо дꙋша̀ не бꙋ́детъ кро́тка со страстьмѝ, и҆лѝ не содрꙋжи́тсѧ въ размышле́нїи свое́мъ, є҆́же ѡ҆ ни́хъ, занѐ бы́ти є҆́й ѿ и҆на́гѡ попече́нїѧ непреста́ннѡ держи́мѣй, не мо́жетъ крѣ́пость ногте́й стра́стныхъ ѡ҆блада́ти чꙋ́вствами є҆ѧ̀ дꙋхо́вными. И҆ блаже́нный дїа́дохъ: безстра́стїе є҆́сть, не є҆́же не бы́ти ра́тꙋємымъ ѡ҆ бѣсѡ́въ (глава̀ ч҃и), зане́же по а҆по́столꙋ, до́лжни є҆смы̀ и҆зы́ти ѿ мі́ра:⁵⁹³ но є҆́же ра́тꙋємымъ ѿ ни́хъ, непреѡбори̑мымъ пребыва́ти: и҆́бо желѣзоно́снїи ра̑тницы стрѣлѧ́еми быва́ютъ ѿ сꙋпоста̑тъ, и҆ шꙋ́мъ стрѣлѧ́нїѧ слы́шатъ, и҆ са̑мыѧ ты̑ѧ пꙋща́ємыѧ на ни́хъ всѧ̑ стрѣ́лы ꙗ҆́вѣ ви́дѧтъ: не ᲂу҆ѧзвлѧ́еми же сꙋ́ть тве́рдости ра́ди ра́тныхъ ѡ҆дѣѧ́нїй. Но ѻ҆нѝ ᲂу҆́бѡ желѣ́зомъ ѡ҆гражда́еми, внегда̀ ра́товатисѧ, непобѣди́ми быва́ютъ: мы́ же свѣ́томъ ст҃а́гѡ всеѻрꙋ́жїѧ, и҆ шле́момъ спаси́тельнымъ, всѣ́ми благи́ми дѣ́лы воѡрꙋже́нни, тє́мныѧ бѣсѡ́въ разсѣче́мъ полкѝ. Не бо̀ то́чїю не ктомꙋ̀ дѣ́ѧти ѕла̑ѧ чистотꙋ̀ прино́ситъ: но є҆́же и҆ прилѣжа́нїемъ ко благи̑мъ крѣ́пцѣ ѿврещѝ ѕла̑ѧ. И҆ ст҃ы́й маѯі́мъ четвероѡбра́знѣ сїѐ раздѣлѧ́етъ, та́кѡ глаго́лѧ: Пе́рвое безстра́стїе глаго́лю, непови́нное движе́нїе ко грѣхꙋ̀ тѣлесѐ по дѣ́йствꙋ. Второ́е безстра́стїе глаго́лю, въ дꙋшѝ встра́стныхъ по́мыслѡвъ соверше́нное ѿверже́нїе, и҆́мже движе́нїе страсте́й ᲂу҆вѧда́етъ въ пе́рвомъ безстра́стїи, неимꙋ́щемъ возжиза́ющыѧ ѻ҆́ное къ дѣ́йствꙋ встра̑стныѧ по́мыслы. Тре́тїе безстра́стїе глаго́лю, соверше́нное къ страсте́мъ по́хоти недвиже́нїе, и҆́мже и҆ второ́е бы́ти ѡ҆бы́че ѿ чистоты̀ по́мыслѡвъ составлѧ́емое. Четве́ртое безстра́стїе глаго́лю, соверше́нное ѿверже́нїе во ᲂу҆мѣ̀ всѣ́хъ чꙋ́вственныхъ мечта́нїй, ѿ негѡ́же тре́тїе бытїѐ прїе́млетъ, не и҆мꙋ́щее мечта́нїй чꙋ́вственныхъ видотворѧ́щихъ въ ѻ҆́номъ страсте́й ѡ҆́бразы. Є҆щѐ: безстра́стїе є҆́сть ми́рное ᲂу҆строе́нїе дꙋшѝ, и҆́мже неꙋдободви́жима быва́етъ къ ѕло́бѣ.

Глава̀ п҃з.

(Є҆щѐ ѡ҆ безстра́стїи и҆ соверше́нствѣ.)

Є҆ще́ же и҆ ст҃ы́й є҆фре́мъ ѡ҆ безстра́стїи же и҆ соверше́нствѣ та́кѡ глаго́летъ: безстра́стнїи, къ кра́йнемꙋ жела́нїю несы́тнѡ простира́ющесѧ, несоверше́нное творѧ́тъ соверше́нство: зане́же вѣ̑чнымъ благи̑мъ нѣ́сть конца̀. Соверше́нно ᲂу҆̀бо є҆́сть, є҆ли́кѡ проти́вꙋ мѣ́ры человѣ́ческїѧ си́лы: несоверше́нно же, ꙗ҆́кѡ при́снѡ превосходѧ́щее себѐ повседне́вными прило́ги и҆ возвыша́емое вы́нꙋ восхожде́ньми къ бг҃ꙋ. Подо́бнѣ же и҆ ст҃ы́й ні́лъ та́кѡ ѡ҆ соверше́нствѣ глаго́летъ: два̀ совершє́нства разꙋмѣ́ти подоба́етъ: є҆ди́но ᲂу҆́бѡ привре́менно, дрꙋго́е же вѣ́чно, ѡ҆ не́мже пи́шетъ па́ѵелъ: є҆гда́ же прїи́детъ соверше́нное, тогда̀, є҆́же ѿ ча́сти, ᲂу҆праздни́тсѧ.⁵⁹⁴ Сїе́ бо, є҆гда̀ прїи́детъ соверше́нное, зна́менꙋетъ, ꙗ҆́кѡ здѣ̀ не мо́жемъ и҆ вмѣсти́ти бж҃е́ственное соверше́нство. Є҆щѐ: два̀ совершє́нства па́ѵелъ бж҃е́ственный вѣ́сть, и҆ вѣ́сть того́жде человѣ́ка соверше́нна, и҆ несоверше́нна. Є҆ли́кѡ ᲂу҆̀бо къ настоѧ́щемꙋ житїю̀, соверше́нна глаго́лема человѣ́ка: є҆ли́кѡ же къ соверше́нномꙋ вои́стиннꙋ, несоверше́нна. Тѣ́мже глаго́летъ: не занѐ достиго́хъ, ᲂу҆жѐ соверши́хсѧ. И҆ по ма́лѣхъ глаго́летъ: є҆ли́цы ᲂу҆́бѡ соверше́нни, сїѐ да мꙋ́дрствꙋемъ.⁵⁹⁵

Глава̀ п҃и.

(Ѡ҆ встра́стїи, сладостра́стїи, пристра́стїи и҆ безстра́стїи.)

Глаго́летъ и҆ ст҃ы́й и҆лїа̀ є҆́кдїкъ: вещество̀ лꙋка́во є҆́сть, тѣ́ла ᲂу҆́бѡ встра́стїе: дꙋши́ же сладостра́стїе: пристра́стїе же ᲂу҆ма̀. Ѻ҆́нагѡ ᲂу҆́бѡ порица́етсѧ ѡ҆сѧза́нїе, сегѡ́ же прѡ́чаѧ чꙋ̑вства: послѣ́днѧгѡ же сопроти́вное расположе́нїе. Є҆щѐ, сладостра́стный ᲂу҆́бѡ бли́зъ є҆́сть встра́стнагѡ: пристра́стный же сладостра́стнагѡ: дале́че же ѿ ѻ҆бою̀ безстра́стный (главы̑ ѻ҃а и҆ ѻ҃в).

Глава̀ п҃ѳ.

(Что́ є҆сть встра́стный, сладостра́стный, пристра́стный, и҆ безстра́стный, и҆ ѡ҆ врачева́нїи ѻ҆бои́хъ.)

Встра́стный є҆́сть, и҆́же согрѣши́тельное движе́нїе и҆́мать над̾ слове́сностїю превозмога́ющее, а҆́ще є҆щѐ и҆ не согрѣша́етъ внѣ̀ (глава̀ ѻ҃г). Сладостра́стный же, и҆́же дѣ́йство грѣха̀ и҆́мать немощнѣ́йше слове́сства, а҆́ще и҆ подвиза́етсѧ внꙋ́трь. Пристра́стный же, и҆́же въ свобо́дѣ па́че, не́жели въ рабо́тѣ сре́днихъ пребыва́етъ. Безстра́стный же є҆́сть, и҆́же всѣ́хъ си́хъ ра́знствїѧ не вѣ́сть. Та́кожде ᲂу҆́бѡ и҆ ѻ҆бои́хъ врачева́нїй сїѧ̑ сказꙋ́етъ: погиба́етъ ѿ дꙋшѝ, встра́стїе ᲂу҆́бѡ посто́мъ и҆ моли́твою: сладостра́стїе же бдѣ́нїемъ и҆ молча́нїемъ: пристра́стїе же безмо́лвїемъ и҆ внима́нїемъ: безстра́стїе же быва́етъ ѿ па́мѧти бж҃їѧ (глава̀ ѻ҃д).

Глава̀ ч҃.

Ѡ҆ вѣ́рѣ, наде́ждѣ и҆ любвѝ.

Но поне́же всѣ́хъ бла̑гъ нача́ло и҆ среда̀ и҆ коне́цъ, а҆́ще же хо́щеши рещѝ, и҆ пода́тель и҆ ᲂу҆прави́тель є҆́сть вѣ́ра, наде́жда, любы̀, треплете́ннаѧ ве́рвь и҆ бг҃оистка́ннаѧ, и҆ па́че же всѣ́хъ любы̀: занѐ бг҃ъ любы̀ є҆́сть, и҆ глаго́летсѧ. Непра́ведно є҆́сть не и҆спо́лнити и҆ си́ми недоста́токъ настоѧ́щагѡ списа́нїѧ. Па́че же, поне́же, и҆ по ст҃о́мꙋ і҆саа́кꙋ, соверше́нство мно́гихъ плодѡ́въ дх҃а тогда̀ кто̀ прїе́млетъ, є҆гда̀ сподо́битсѧ соверше́нныѧ любвѐ: грѧдѝ, и҆ ѡ҆ то́й ма́лѡ воспомѧне́мъ. Пи́шетъ бо и҆ лѣ́ствичникъ: ны́нѣ же про́чее по и҆з̾ѧсне́нїи всѣ́хъ предрече́нныхъ, ѡ҆стаю́тсѧ трѝ сїѧ̑, сою́зъ всѣ́хъ свѧзꙋ́юща и҆ содержа̑ща: вѣ́ра, наде́жда, любы̀, бо́льши же всѣ́хъ любы̀ (ѿ л҃ степе́ни). Бг҃ъ бо є҆́ю и҆менꙋ́етсѧ, ѻ҆ба́че а҆́зъ пе́рвꙋю ᲂу҆́бѡ лꙋчꙋ̀ зрю̀: вторꙋ́ю же свѣ́тъ, а҆ тре́тїю крꙋ́гъ: всѧ̑ же є҆ди́но сїѧ́нїе, и҆ є҆ди́нꙋ свѣ́тлость. Занѐ ѻ҆́ва ᲂу҆́бѡ всѧ̑ мо́жетъ твори́ти и҆ соѡрꙋжа́ти: ѻ҆́вꙋ же ми́лость бж҃їѧ ѡ҆гражда́етъ и҆ непосты́дною содѣ́лываетъ: ѻ҆́ва же нижѐ па́даетъ, нижѐ тещѝ престае́тъ, нижѐ ᲂу҆ѧ́звленномꙋ про́чее почива́ти ѿ блаже́ннагѡ неи́стовства позволѧ́етъ. Є҆щѐ ѡ҆ любвѝ сло́во: а҆́гг҃лѡмъ зна́емо є҆́сть, и҆ ѻ҆́нѣмъ по дѣ́йствꙋ ѡ҆сїѧ́нїѧ. Любы̀ є҆́сть бг҃ъ, ѡ҆предѣли́ти же сего̀ словесы̑ хотѧ́й, слѣпотствꙋ́ѧ во глꙋбинѣ̀ песо́къ мѣ́рѧетъ. Любы̀, по ка́чествꙋ ᲂу҆́бѡ, є҆́сть ᲂу҆подобле́нїе бг҃ꙋ, поели́кꙋ человѣ́кѡмъ дости́гнꙋти мо́щно: по дѣ́йствꙋ же, ᲂу҆пое́нїе, пїѧ́нство дꙋшѝ: по сво́йствꙋ же, и҆сто́чникъ вѣ́ры, бе́здна долготерпѣ́нїѧ, мо́ре смире́нїѧ. Любы̀ є҆́сть сво́йственнѣ ѿложе́нїе всѧ́ческагѡ сопроти́вна помышле́нїѧ, поне́же любы̀ не мы́слитъ ѕла̀. Любы̀, и҆ безстра́стїе, и҆ сыноположе́нїе, и҆мены̑ є҆ди́нѣми раздѣли́шасѧ. Ꙗ҆́коже свѣ́тъ, и҆ ѻ҆́гнь, и҆ пла́мень, во є҆ди́но стека́ютсѧ дѣ́йство, та́кѡ и҆ ѡ҆ си́хъ мѝ разꙋмѣва́й. И҆ ст҃ы́й дїа́дохъ: всѧ́комꙋ дꙋхо́вномꙋ видѣ́нїю, бра́тїе, да предше́ствꙋетъ вѣ́ра, наде́жда, любы̀, па́че же любы̀. Ѻ҆́вѣ бо презира́ти ви̑димаѧ блага̑ѧ и҆з̾ꙋча́ютъ: любы́ же са́мꙋю дꙋ́шꙋ соединѧ́етъ съ добродѣ́тельми бж҃їими, чꙋ́вствомъ ᲂу҆́мнымъ неви́димаго бг҃а познаю́щи (глава̀ л҃). Є҆щѐ: и҆на́ѧ є҆́сть любы̀ дꙋшѝ є҆сте́ственнаѧ, а҆ и҆́на, ꙗ҆́же ѿ ст҃а́гѡ дх҃а въ ню̀ приходѧ́щаѧ (глава̀ л҃д). Та́ бо ѿ на́шегѡ хотѣ́нїѧ, є҆гда̀ хо́щемъ, ᲂу҆мѣ́реннѣ дви́житсѧ, тѣ́мже и҆ ᲂу҆до́бь ѿ лꙋка́выхъ дꙋхѡ́въ расхища́етсѧ, є҆гда̀ не нꙋ́ждею ѡ҆блада́емъ свои́мъ произволе́нїемъ: сїѧ́ же толи́кѡ возжиза́етъ дꙋ́шꙋ къ любвѝ бж҃їей, ꙗ҆́кѡ всѣ̑мъ часте́мъ дꙋшѝ тогда̀ прилѣплѧ́тисѧ неизглаго́ланной бла́гости бж҃е́ственнагѡ жела́нїѧ, въ безмѣ́рной нѣ́коей простотѣ̀ завѣща́нїѧ. Тогда́ бо ᲂу҆́мъ а҆́ки чревоносѧ́щъ ѿ дꙋхо́внагѡ дѣ́йствїѧ быва́ѧ, и҆сто́чникъ нѣ́кїй любвѝ и҆ ра́дости и҆сточа́етъ. И҆ ст҃ы́й і҆саа́къ: любы̀ ѿ нѣ́кихъ быва́ющаѧ веще́й, ꙗ҆́кѡ свѣти́льникъ є҆́сть ма́лый, ѿ є҆ле́а пита́емый, и҆ та́кѡ составлѧ́етсѧ свѣ́тъ є҆гѡ̀: и҆лѝ, и҆ ꙗ҆́коже пото́къ текꙋ́щїй ѿ дождѧ̀, є҆гѡ́же тече́нїе престае́тъ, составлѧ́ющемꙋ того̀ веществꙋ̀ ѡ҆скꙋдѣ́нїе прїѧ́вшꙋ (ѿ л҃ сло́ва). Любы́ же и҆мꙋ́щаѧ бг҃а вино́вна себѐ, ꙗ҆́кѡ и҆сто́чникъ є҆́сть и҆сточа́ющьсѧ, и҆ никогда́же течє́нїѧ є҆гѡ̀ пресѣца́ютсѧ: то́й бо є҆ди́нъ є҆́сть любвѐ и҆сто́чникъ, и҆ неѻскꙋ́дное вещество̀ тоѧ̀. И҆ па́ки: вопроше́нъ бы́въ, ко́е є҆́сть соверше́нїе мно́гихъ плодѡ́въ дꙋ́ха; ѿвѣща̀: є҆гда̀ кто̀ сподо́битсѧ соверше́нныѧ любвѐ бж҃їѧ. И҆ па́ки: вопроше́нъ бы́въ, и҆ ѿкꙋ́дꙋ разꙋмѣ́етъ кто̀, ꙗ҆́кѡ доспѣ̀ въ сїю̀: и҆ речѐ: є҆гда̀ подви́гнетсѧ па́мѧть бж҃їѧ во ᲂу҆мѣ̀ є҆гѡ̀, а҆́бїе се́рдце є҆гѡ̀ дви́жетсѧ въ любо́вь є҆гѡ̀, и҆ ѻ҆́чи є҆гѡ̀ низпꙋща́ютъ сле́зы бога́тнѡ. Ѻ҆бы́чай бо и҆́мать любы̀ ѿ па́мѧти возлю́бленныхъ возжиза́ти сле́зы. И҆ тако́въ сы́й, никогда́же лиша́етсѧ сле́зъ. Зане́же не ѡ҆скꙋдѣва́етъ є҆мꙋ̀ при́снѡ вещество̀ ведꙋ́щее є҆го̀ въ па́мѧть бж҃їю. Тѣ́мже и҆ во снѣ̀ свое́мъ собесѣ́дꙋетъ съ бг҃омъ: ѻ҆бы́чай бо и҆́мать любы̀ содѣ́ѧти такова̑ѧ. И҆ сїѐ є҆́сть соверше́нство человѣ́кѡмъ въ жи́зни и҆́хъ се́й (ѿ к҃а сло́ва) Є҆щѐ: любы̀ бж҃їѧ тепла̀ є҆́сть є҆стество́мъ, и҆ є҆гда̀ безмѣ́рнѡ нападе́тъ на кого̀, твори́тъ ѻ҆́нꙋю дꙋ́шꙋ и҆зстꙋпи́тельнꙋ (ѿ ѻ҃г сло́ва). Сегѡ̀ ра́ди не мо́жетъ се́рдце ѡ҆щꙋти́вшагѡ вмѣсти́ти ю҆̀, и҆ потерпѣ́ти: но по мѣ́рѣ ка́чества, и҆ наше́дшїѧ є҆мꙋ̀ любвѐ, зри́тсѧ въ не́мъ и҆змѣне́нїе неѻбы́чно. И҆ сїѧ̑ сꙋ́ть зна́мєнїѧ є҆ѧ̀ чꙋ́вствєннаѧ: быва́етъ лицѐ человѣ́кꙋ рꙋмѧ́но, ѡ҆бра́довано, и҆ тѣ́ло є҆гѡ̀ разгора́етсѧ, ѿстꙋпа́етъ ѿ негѡ̀ стра́хъ и҆ стыдѣ́нїе, и҆ быва́етъ ꙗ҆́кѡ и҆зстꙋпи́теленъ, и҆ си́ла, собира́ющаѧ ᲂу҆́мъ, бѣжи́тъ ѿ негѡ̀, и҆ ꙗ҆́кѡ и҆зꙋмле́нъ быва́етъ. Стра́шнꙋю сме́рть вмѣнѧ́етъ за ра́дость, и҆ видѣ́нїе ᲂу҆ма̀ є҆гѡ̀ пресѣче́нїе нѣ́кое ѿ разсмотре́нїѧ небе́сныхъ николи́же те́рпитъ, и҆ ѿсꙋ́тствꙋѧ, ꙗ҆́кѡ присꙋ́тствꙋѧ бесѣ́дꙋетъ неви́димь ѿ когѡ́либо ра́зꙋмъ, и҆ видѣ́нїе є҆гѡ̀ є҆сте́ственное мимохо́дитъ, и҆ не ѡ҆щꙋща́етъ чꙋ́вственнѣ движе́нїѧ своегѡ̀, є҆́же въ веще́хъ дви́житсѧ. А҆́ще бо и҆ дѣ́йствꙋетъ что̀, несоверше́ннѣ сїѐ ѡ҆щꙋща́етъ, ꙗ҆́кѡ ᲂу҆́мъ и҆мѣ́ѧ въ видѣ́нїи высо́комъ, и҆ смы́слъ є҆гѡ̀ при́снѡ а҆́ки со дрꙋги́мъ бесѣ́дꙋетъ. Си́мъ дꙋхо́внымъ пїѧ́нствомъ ᲂу҆пи́шасѧ нѣ́когда а҆пⷭ҇ли и҆ мꙋ́чєницы: и҆ ѻ҆́ви ᲂу҆́бѡ ве́сь мі́ръ проидо́ша трꙋдѧ́щесѧ, и҆ поноша́еми сꙋ́ще: ѻ҆́ви же на ᲂу҆́ды сосѣца́еми, и҆злїѧ́ша кро́вь свою̀ а҆́ки во́дꙋ, и҆ лютѣ̑йшаѧ стра́ждꙋще не возмалодꙋ́шествоваша, но до́блественнѡ претерпѣ́ша, и҆ сꙋ́ще премꙋ́дри, ꙗ҆́кѡ безꙋ́мни вмѣни́шасѧ. И҆ и҆́ни въ пꙋсты́нѧхъ скита́шасѧ, и҆ гора́хъ, и҆ въ верте́пахъ, и҆ про́пастехъ земны́хъ, въ безчи́нїихъ благочи́нни сꙋ́ще. Сегѡ̀ безꙋ́мїѧ да сподо́битъ на́съ бг҃ъ дости́гнꙋти.

Глава̀ ч҃а.

(Ѡ҆ ст҃ѣ́мъ прїѡбще́нїи, и҆ ѡ҆ то́мъ, є҆ли́кихъ бла̑гъ на́мъ вино́вно є҆́сть ча́стое съ чи́стою со́вѣстїю сегѡ̀ причаще́нїе и҆ прїѡбще́нїе. )

Ничто́же вои́стиннꙋ си́це ко ѡ҆чище́нїю дꙋшѝ, и҆ просвѣще́нїю ᲂу҆ма̀, и҆ тѣ́ла ѡ҆свѧще́нїю, и҆ ѻ҆бою̀ къ бж҃е́ственнѣйшемꙋ и҆змѣне́нїю и҆ безсме́ртїю, є҆ще́ же и҆ ко ѿвраще́нїю страсте́й и҆ бѣсѡ́въ, и҆лѝ па́че, сво́йственнѣе рещѝ, къ соедине́нїю, и҆ бж҃їю бж҃е́ственномꙋ и҆ преесте́ственномꙋ соедине́ннїю и҆ срастворе́нїю содѣ́йствꙋетъ и҆ помоществꙋ́етъ на́мъ, ꙗ҆́коже ѿ чи́ста се́рдца и҆ завѣща́нїѧ, є҆ли́кѡ мо́щно є҆́сть человѣ́кꙋ, ча́стое причаще́нїе и҆ прїѡбще́нїе ст҃ы́хъ, пречи́стыхъ, безсме́ртныхъ и҆ животворѧ́щихъ та́йнъ, са́магѡ, глаго́лемъ, честна́гѡ тѣ́ла и҆ кро́ве гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀. Сегѡ̀ ᲂу҆̀бо ра́ди нꙋ́ждно є҆́сть, є҆ли́кѡ мо́щно, и҆ ѡ҆ се́мъ ѿ ча́сти рещѝ, и҆ съ таковы́мъ сочини́ти трꙋдо́мъ, и҆ та́кѡ ѡ҆конча́ти сїѐ сло́во. И҆ сїѐ ᲂу҆̀бо ꙗ҆́вственно є҆́сть не то́кмѡ ѿ тѣ́хъ, ꙗ҆̀же ст҃і́и вѣща́ютъ, но мно́гѡ па́че ѿ са́мыхъ глагѡ́лъ саможивота̀ и҆ самои́стины ꙗ҆́вственнѣйше, глаго́летъ бо: а҆́зъ є҆́смь хлѣ́бъ живо́тный. И҆, се́й є҆́сть хлѣ́бъ сходѧ́й съ нб҃сѐ, да а҆́ще кто̀ ѿ негѡ̀ ꙗ҆́стъ, не ᲂу҆́мретъ. А҆́зъ є҆́смь хлѣ́бъ живо́тный, сше́дый съ нб҃сѐ: а҆́ще кто̀ снѣ́сть ѿ хлѣ́ба сегѡ̀, жи́въ бꙋ́детъ во вѣ́ки: и҆ хлѣ́бъ же, є҆го́же а҆́зъ да́мъ, пло́ть моѧ̀ є҆́сть, ю҆́же а҆́зъ да́мъ за живо́тъ мі́ра. И҆, а҆́ще не снѣ́сте пло́ти сн҃а человѣ́ческагѡ, ни пїе́те кро́ве є҆гѡ̀, живота̀ не и҆́мате въ себѣ̀. Ꙗ҆ды́й мою̀ пло́ть, и҆ пїѧ́й мою̀ кро́вь, во мнѣ̀ пребыва́етъ, и҆ а҆́зъ въ не́мъ. Ꙗ҆́коже посла́ мѧ живы́й ѻ҆ц҃ъ, и҆ а҆́зъ живꙋ̀ ѻ҆ц҃а̀ ра́ди: и҆ ꙗ҆ды́й мѧ̀, и҆ то́й жи́въ бꙋ́детъ менѐ ра́ди. Се́й є҆́сть хлѣ́бъ сше́дый съ нб҃сѐ: и҆ ꙗ҆ды́й хлѣ́бъ се́й, жи́въ бꙋ́детъ во вѣ́ки.⁵⁹⁶ И҆ хрⷭ҇тоно́сецъ па́ѵелъ сїѧ̑ глаго́летъ: бра́тїе, а҆́зъ прїѧ́хъ ѿ гдⷭ҇а, є҆́же и҆ преда́хъ ва́мъ, ꙗ҆́кѡ гдⷭ҇ь і҆и҃съ въ но́щь, въ ню́же пре́данъ быва́ше, прїе́мъ хлѣ́бъ, и҆ благодари́въ преломѝ, и҆ речѐ: прїими́те, ꙗ҆ди́те, сїѐ є҆́сть тѣ́ло моѐ, є҆́же за вы̀ ломи́мое: сїѐ твори́те въ моѐ воспомина́нїе. Та́кожде и҆ ча́шꙋ по ве́чери, глаго́лѧ: сїѧ̀ ча́ша но́вый завѣ́тъ є҆́сть въ мое́й кро́ви: сїѐ твори́те, є҆ли́жды а҆́ще пїе́те, въ моѐ воспомина́нїе. Є҆ли́жды бо а҆́ще ꙗ҆́сте хлѣ́бъ се́й, и҆ ча́шꙋ сїю̀ пїе́те, сме́рть гдⷭ҇ню возвѣща́ете, до́ндеже ᲂу҆́бѡ прїи́детъ. Тѣ́мже, и҆́же а҆́ще ꙗ҆́стъ хлѣ́бъ се́й, и҆лѝ пїе́тъ ча́шꙋ гдⷭ҇ню недосто́йнѣ, пови́ненъ бꙋ́детъ тѣ́лꙋ и҆ кро́ви гдⷭ҇ни. Да и҆скꙋша́етъ же человѣ́къ себѐ, и҆ та́кѡ ѿ хлѣ́ба да ꙗ҆́стъ, и҆ ѿ ча́ши да пїе́тъ. Ꙗ҆ды́й бо и҆ пїѧ́й недосто́йнѣ, сꙋ́дъ себѣ̀ ꙗ҆́стъ и҆ пїе́тъ, не разсꙋжда́ѧ тѣ́ла гдⷭ҇нѧ.⁵⁹⁷ Сегѡ̀ ра́ди въ ва́съ мно́зи не́мощни и҆ недꙋ́жливи, и҆ спѧ́тъ дово́льни. А҆́ще же бы́хомъ себѐ разсꙋжда́ли, не бы́хомъ ѡ҆сꙋжде́ни бы́ли. Сꙋди́ми же ѿ гдⷭ҇а наказꙋ́емсѧ, да не съ мі́ромъ ѡ҆сꙋ́димсѧ.

Глава̀ ч҃в.

(Ꙗ҆́кѡ нꙋ́ждно є҆́сть наꙋчи́тисѧ чꙋдесѝ ст҃ы́хъ та̑инъ, и҆ что̀ сꙋ́ть, и҆ чесѡ̀ ра́ди даны̀ сꙋ́ть, и҆ ка́ѧ є҆́сть по́льза.)

Пи́шетъ же и҆ златоꙋ́стъ: нꙋ́ждно є҆́сть наꙋчи́тисѧ чꙋдесѝ ст҃ы́хъ та́инъ, что̀ сꙋ́ть, и҆ чесѡ̀ ра́ди прє́даны сꙋ́ть, и҆ ка́ѧ є҆́сть по́льза та́йны сеѧ̀. Є҆ди́но тѣ́ло є҆смы̀, и҆ ᲂу҆́ди ѿ пло́ти гдⷭ҇а на́шегѡ і҆и҃са хрⷭ҇та̀, и҆ ѿ косте́й є҆гѡ̀ (въ бесѣ́дахъ на і҆ѡа́н. нравоꙋч. м҃ѕ). Тайнонаꙋче́ннїи же да вне́млютъ глаго́лємымъ, да си́це не то́кмѡ по любвѝ сїѐ бꙋ́демъ, но и҆ по са́мой то́й та́йнѣ со ѻ҆́ною да соедини́мсѧ пло́тїю. Пи́щею сїѧ̀ быва́етъ, ю҆́же дарова̀ на́мъ, хотѧ̀ показа́ти любо́вь, ю҆́же къ на́мъ и҆́мать. Сегѡ̀ ра́ди смѣсѝ съ на́ми себѐ, и҆ возмѣ́си тѣ́ло своѐ въ на́съ, да бꙋ́демъ ꙗ҆́коже тѣ́ло со главо́ю соедине́но: ѕѣлѡ́ бо лю́бѧщихъ є҆́сть сїѐ. Сїе́ бо и҆ і҆́ѡвъ назна́менꙋѧ глаго́ла ѡ҆ рабѣ́хъ, и҆́миже бѣ̀ по превосхожде́нїю люби́мь, ѻ҆ни́ бо ве́лїю любо́вь къ немꙋ̀ показꙋ́ѧ, глаго́лали: кто̀ ᲂу҆́бѡ да́лъ бы на́мъ ѿ пло́тей є҆гѡ̀ насы́титисѧ;⁵⁹⁸ тѣ́мже ᲂу҆́бѡ и҆ хрⷭ҇то́съ то̀ сотвори́лъ є҆́сть, въ любо́вь веды́й на́съ бо́льшꙋ, и҆ свою̀ къ на́мъ любо́вь ꙗ҆влѧ́ѧ, не то́чїю ви́дѣти себѐ подаѧ̀ жела́ющымъ, но и҆ прикоснꙋ́тисѧ, и҆ снѣ́сти, и҆ соедини́тисѧ, и҆ всѧ́ко жела́нїе и҆спо́лнити. Є҆щѐ: причаща́ющїисѧ прест҃а́гѡ тѣ́ла и҆ честны́ѧ кро́ве, со а҆́гг҃лы и҆ а҆рха́гг҃лы, и҆ го́рними си́лами стоѧ́тъ, въ са́мꙋю хрⷭ҇то́вꙋ ца́рскꙋю ѡ҆дѣ́ѧвшесѧ ри́зꙋ, ѻ҆рꙋ̑жїѧ и҆мꙋ́ще дꙋхѡ́внаѧ. Но ничто́же вели́кагѡ реко́хъ є҆щѐ: въ самаго́ бо быва́ютъ ѡ҆блече́ни цр҃ѧ̀ (въ то́мже м҃ѕ нравоꙋч). Но ꙗ҆́коже є҆́сть ве́лїе и҆ стра́шное и҆ чꙋ́дное та́инство, та́кѡ а҆́ще съ чистото́ю пристꙋ́пиши, во спасе́нїе пристꙋпи́лъ є҆сѝ: а҆́ще ли же съ лꙋка́вою со́вѣстїю, въ мꙋче́нїе и҆ ка́знь: ꙗ҆ды́й бо, речѐ, и҆ пїѧ́й недосто́йнѣ, сꙋ́дъ себѣ̀ ꙗ҆́стъ и҆ пїе́тъ.⁵⁹⁹ А҆́ще бо ѡ҆сквернѧ́ющїи порфѵ́рꙋ ца́рскꙋю, наказꙋ́еми быва́ютъ, подо́бнѣ ꙗ҆́коже и҆ раздира́ющїи: нико́еже є҆́сть сомнѣ́нїе и҆ нечи́стою мы́слїю прїе́млющымъ тѣ́ло сїѐ, тꙋ́южде пострада́ти мꙋ́кꙋ, ꙗ҆ковꙋ́ю и҆ ті́и, и҆̀же гвоздьмѝ ѻ҆́ное ᲂу҆ѧзви́ша. Зрѝ ᲂу҆́бѡ, ко́ль стра́шно показа̀ па́ѵелъ мꙋче́нїе, ре́кши: ѿве́рглсѧ кто̀ зако́на мѡѷсе́ова, без̾ милосе́рдїѧ при двои́хъ и҆лѝ трїе́хъ свидѣ́телехъ ᲂу҆мира́етъ. Коли́кѡ, мнитѐ, го́ршїѧ пови́ненъ бꙋ́детъ мꙋ́ки, и҆́же сн҃а бж҃їѧ попра́вый, и҆ кро́вь завѣ́тнꙋю скве́рнꙋ возмни́въ, є҆́юже ѡ҆свѧти́сѧ.⁶⁰⁰ Є҆ли́цы ᲂу҆̀бо причаща́емсѧ сегѡ̀ тѣ́ла, є҆ли́цы кро́ве вкꙋша́емъ сеѧ̀, помышлѧ́йте, ꙗ҆́кѡ ѻ҆́наго горѣ̀ сѣдѧ́щаго, ѿ а҆́гг҃лъ покланѧ́емаго, сꙋ́щаго близ̾ безпло́тныѧ си́лы, сего̀ вкꙋша́емъ. Оу҆вы̀ мнѣ̀! коли́цы ко спасе́нїю на́мъ пꙋтїѐ! тѣ́ло ны̀ своѐ сотвори́лъ є҆́сть, тѣ́ло на́мъ своѐ преподадѐ, и҆ ничесѡ́же си́хъ ѿвраща́етъ на́съ ѿ ѕлы́хъ. ѽ безболѣ́знїѧ! ѽ нечꙋ́вствїѧ (на посл. къ є҆фес. нрав. г҃, ли́стъ рч҃д)! И҆ па́ки: ста́рецъ нѣ́кїй чꙋ́денъ повѣ́да мѝ, каково̀ нѣ́что сподо́бльсѧ ᲂу҆ви́дѣти и҆ ᲂу҆слы́шати, ꙗ҆́кѡ и҆мꙋ́щыѧ ѿсю́дꙋ ѿходи́ти, а҆́ще та̑инъ причастѧ́тсѧ съ чи́стою со́вѣстїю, є҆гда̀ ᲂу҆мре́ти и҆́мꙋтъ, дѡрѷносѧ́ще а҆́гг҃ли причаще́нїѧ ра́ди ѻ҆́нагѡ, ѿсю́дꙋ возно́сѧтъ. И҆ бж҃е́ственный і҆ѡа́ннъ дамаски́нъ: поели́кꙋ сꙋгꙋ́бы и҆ сло́жни є҆смы̀, подоба́етъ и҆ рожде́нїю бы́ти сꙋгꙋ́бꙋ, подо́бнѣ и҆ ꙗ҆́стїю сло́жнꙋ. Рожде́нїе ᲂу҆̀бо водо́ю на́мъ и҆ дх҃омъ дае́тсѧ: ꙗ҆́стїе же є҆́сть са́мый хлѣ́бъ живо́тный, гдⷭ҇ь на́шъ і҆и҃съ хрⷭ҇то́съ съ нб҃сѐ сше́дый. Ꙗ҆́коже во креще́нїи, поне́же ѻ҆быкнове́нно є҆́сть человѣ́кѡмъ водо́ю мы́тисѧ, и҆ є҆ле́емъ ма́затисѧ, сопрѧжѐ съ є҆ле́емъ и҆ водо́ю благода́ть ст҃а́гѡ дх҃а, и҆ сотворѝ ю҆̀ ба́ню пакирожде́нїѧ: та́кѡ, занѐ ѻ҆бы́чай є҆́сть человѣ́кѡмъ хлѣ́бъ ꙗ҆́сти, во́дꙋ же и҆ вїно̀ пи́ти, сопрѧжѐ и҆̀мъ своѐ бж҃ество̀, и҆ сотворѝ ѧ҆̀ тѣ́ло и҆ кро́вь свою̀, да ѻ҆бы́чными и҆ по є҆стествꙋ̀ въ сꙋ́щихъ па́че є҆стества̀ бꙋ́демъ. Тѣ́ло, є҆́же ѿ ст҃ы́ѧ дв҃ы, є҆́сть вои́стиннꙋ соедине́нное съ бж҃ество́мъ, не ꙗ҆́кѡ возне́сшеесѧ тѣ́ло съ нб҃сѐ схо́дитъ: но ꙗ҆́кѡ са́мый хлѣ́бъ и҆ вїно̀ претворѧ́ютсѧ въ тѣ́ло и҆ кро́вь бж҃їю. А҆́ще ли же ѡ҆́браза взыскꙋ́еши, ка́кѡ быва́етъ, довлѣ́етъ тѝ ᲂу҆слы́шати, ꙗ҆́кѡ дх҃омъ ст҃ы́мъ, ꙗ҆́коже и҆ ѿ ст҃ы́ѧ бцⷣы дх҃омъ ст҃ы́мъ себѣ̀ самомꙋ̀ и҆ въ себѣ̀ само́мъ гдⷭ҇ь пло́ть соста́ви: и҆ мно́жае ничто́же вѣ́мы, но то́чїю ꙗ҆́кѡ сло́во бж҃їе и҆́стинное є҆́сть, дѣйстви́тельное и҆ всемо́щное, ѡ҆́бразъ же неиспы́тенъ. Быва́етъ ᲂу҆̀бо съ вѣ́рою досто́йнѣ причаща́ющымсѧ во ѡ҆ставле́нїе грѣхѡ́въ, и҆ въ жи́знь вѣ́чнꙋю, и҆ въ хране́нїе дꙋшѝ и҆ тѣ́ла: съ невѣ́рїемъ же недосто́йнѣ причаща́ющымсѧ, во ѡ҆сꙋжде́нїе и҆ въ мꙋче́нїе, ꙗ҆́коже и҆ гдⷭ҇нѧ сме́рть. И҆ нѣ́сть хлѣ́бъ се́й и҆ вїно̀, ѡ҆́бразъ тѣ́ла и҆ кро́ве хрⷭ҇то́вы, да не бꙋ́детъ: но са́мое то̀ тѣ́ло хрⷭ҇то́во ѡ҆боже́нное, и҆ са́маѧ та̀ кро́вь. Пло́ть бо моѧ̀, глаго́летъ, и҆́стинно є҆́сть бра́шно, и҆ кро́вь моѧ̀ и҆́стинно є҆́сть пи́во. Тѣ́ло и҆ кро́вь хрⷭ҇то́ва въ растѣ́нїе дꙋшѝ и҆ тѣ́лꙋ на́шемꙋ быва́етъ, ѻ҆ба́че не и҆стощева́етсѧ, нижѐ и҆стлѣва́етъ, нижѐ а҆федро́номъ и҆схо́дитъ, да не бꙋ́детъ: но въ сꙋщество̀ на́ше и҆ соблюде́нїе, скве́рны всѧ́кїѧ чисти́лище: и҆́бо а҆́ще и҆ зла́то прїи́метъ растлѣ́нно, сꙋди́тельнымъ разжже́нїемъ ѡ҆чища́етъ, да не въ бꙋ́дꙋщемъ вѣ́цѣ съ мі́ромъ ѡ҆сꙋ́димсѧ. Тѣ́мже ѡ҆чи́стившесѧ соединѧ́емсѧ съ тѣ́ломъ хрⷭ҇то́вымъ, и҆ дх҃омъ є҆гѡ̀, и҆ быва́емъ тѣ́ло хрⷭ҇то́во. Хлѣ́бъ се́й є҆́сть нача́токъ бꙋ́дꙋщагѡ хлѣ́ба, и҆́же є҆́сть насꙋ́щный, насꙋ́щность бо ꙗ҆влѧ́етъ и҆лѝ бꙋ́дꙋщїй, сі́есть въ бꙋ́дꙋщемъ вѣ́цѣ на́мъ блюдо́мый, и҆лѝ и҆ къ сохране́нїю житїѧ̀ на́шегѡ прїе́млемый. Дх҃ъ бо животворѧ́щїй є҆́сть пло́ть гдⷭ҇нѧ, зане́же ѿ животворѧ́щагѡ дх҃а зача́сѧ, рожде́нное бо ѿ дх҃а дꙋ́хъ є҆́сть. Сїе́ же глаго́лю, не ꙗ҆́кѡ разорѧ́ѧ тѣлесѐ є҆стество̀, но животворѧ́щее и҆ бж҃е́ственное сїѐ ꙗ҆ви́ти хотѧ̀. Сїѧ̑ ᲂу҆̀бо мѣстоѡбра̑знаѧ бꙋ́дꙋщихъ глаго́лютсѧ, не ꙗ҆́кѡ не сꙋ́щаѧ вои́стиннꙋ тѣ́ло и҆ кро́вь хрⷭ҇то́ва: но ꙗ҆́кѡ ны́нѣ ᲂу҆́бѡ тѣ́ми причаща́емсѧ хрⷭ҇то́вꙋ бж҃ествꙋ̀, тогда́ же ᲂу҆́мнѣ є҆ди́нымъ видѣ́нїемъ. И҆ бж҃е́ственнѣйшїй ма́рко: ꙗ҆́коже вїно̀ сїѐ во всѣ́хъ ᲂу҆десѣ́хъ пїю́щагѡ растворѧ́етсѧ, и҆ быва́етъ вїно̀ въ не́мъ, и҆ то́й въ вїнѣ̀: та́кѡ и҆ пїѧ́й кро́вь хрⷭ҇то́вꙋ. дх҃омъ бж҃ества̀ напоѧ́етсѧ и҆ растворѧ́етсѧ въ соверше́ннѣй дꙋшѝ, и҆ дꙋша̀ въ не́мъ, и҆ та́кѡ ѡ҆ст҃и́вшисѧ досто́йна быва́етъ гдⷭ҇а. Вси́ бо, глаго́летъ, тѣ́мжде дх҃омъ напои́хомсѧ, и҆ є҆ѵхарі́стїею хлѣ́ба вои́стиннꙋ причаща́ющїисѧ, дх҃а ст҃а сподоблѧ́ютсѧ прича̑стницы бы́ти, и҆ та́кѡ мо́гꙋтъ достѡ́йныѧ дꙋ́шы во вѣ́ки жи́вы бы́ти. И҆ ꙗ҆́коже тѣ́лꙋ семꙋ̀ живо́тъ не ѿ себѐ є҆́сть: но и҆звнѣꙋ́дꙋ є҆гѡ̀, то́ є҆сть ѿ землѝ: та́кѡ и҆ дꙋшѝ благоволѝ бг҃ъ не ѿ своегѡ̀ є҆ѧ̀ є҆стества̀, но ѿ своегѡ́ си бж҃ества̀, и҆ ѿ своегѡ̀ дх҃а и҆ свѣ́та и҆мѣ́ти бра́шно, пи́во, ѻ҆де́ждꙋ, ꙗ҆̀же сꙋ́ть и҆́стинный живо́тъ дꙋшѝ. И҆́мать бо бж҃е́ственное є҆стество̀ и҆ хлѣ́бъ жи́зни, ре́кшїй: а҆́зъ є҆́смь хлѣ́бъ живо́тный,⁶⁰¹ и҆ вода̀ жива̀, и҆ вїно̀ веселѧ́щее, и҆ є҆ле́й ра́дованїѧ. И҆ ст҃ы́й і҆сі́дѡръ: прїѡбще́нїе нарече́сѧ причаще́нїе бж҃е́ственныхъ та̑инъ, за є҆́же со хрⷭ҇то́мъ да́рꙋетъ на́мъ соедине́нїе: и҆ прїѡ́бщники ны̀ творѧ́тъ ца́рствїѧ є҆гѡ̀. И҆ ст҃ы́й ні́лъ: не возмо́жно є҆́сть и҆́накѡ спасти́сѧ вѣ́рномꙋ, и҆ ѿпꙋще́нїе прегрѣше́нїй прїѧ́ти, и҆ ца́рство. небе́сное полꙋчи́ти, а҆́ще не причаща́етсѧ со стра́хомъ и҆ вѣ́рою и҆ любо́вїю пречи́стыхъ та̑инъ тѣ́ла и҆ кро́ве. Подо́бнѣ пи́шетъ и҆ вели́кїй васі́лїй въ посла́нїи, є҆́же къ благоро́дной кесарі́и: и҆ прїѡбща́тисѧ же на всѧ́къ де́нь, и҆ причаща́тисѧ ст҃а́гѡ тѣ́ла и҆ кро́ве хрⷭ҇то́вы бла́го и҆ весьма̀ поле́зно, (въ тре́тїей кни́гѣ посла́нїе ч҃), по ꙗ҆́сномꙋ свидѣ́тельствꙋ сп҃си́телѧ: ꙗ҆ды́й мою̀ пло́ть и҆ пїѧ́й мою̀ кро́вь, и҆́мать живо́тъ вѣ́чный.⁶⁰² Кто́ бо ᲂу҆сꙋмнѣва́етсѧ, ꙗ҆́кѡ є҆́же причаща́тисѧ ча́стѣ живота̀, ничто́же и҆но́е є҆́сть, ра́звѣ то́чїю жи́вꙋ бы́ти мно́жицею; мы̀ четы́рижды на всѧ́кꙋ седми́цꙋ прїѡбща́емсѧ: въ недѣ́лю, въ сре́дꙋ, въ пѧто́къ и҆ сꙋббѡ́тꙋ, и҆ въ дрꙋгі̑ѧ дни̑, а҆́ще бꙋ́детъ па́мѧть нѣ́коегѡ ст҃а́гѡ. Въ нѧ́же, мню̀, и҆ лїтꙋргиса́ше ст҃ы́й се́й: не бо̀ на всѧ́къ де́нь можа́ше, ѿ толи́кихъ попече́нїй стꙋжа́емь. Рече́ же и҆ а҆́вва а҆поллѡ́съ: ꙗ҆́кѡ подоба́етъ и҆́нокꙋ, а҆́ще мо́щно є҆́сть, на всѧ́къ де́нь та̑инъ хрⷭ҇то́выхъ причаща́тисѧ: ᲂу҆далѧ́ѧй бо себѐ ѿ си́хъ, ᲂу҆далѧ́етсѧ ѿ бг҃а: ча́стѣ же сїѐ творѧ́й, сп҃си́телѧ ча́стѣ прїе́млетъ. Сп҃си́тельный бо гла́съ глаго́летъ: ꙗ҆ды́й мою̀ пло́ть, и҆ пїѧ́й мою̀ кро́вь, во мнѣ̀ пребыва́етъ, и҆ а҆́зъ въ не́мъ.⁶⁰³ Сїѐ ᲂу҆̀бо на по́льзꙋ є҆́сть и҆́нокѡмъ, воспомина́нїе сп҃си́тельныѧ стра́сти ча́стѣ творѧ́щымъ. На всѧ́къ де́нь ᲂу҆̀бо гото́вꙋ бы́ти подоба́етъ, и҆ ᲂу҆готовлѧ́ти себѐ такова̀, ꙗ҆́кѡ досто́йнꙋ бы́ти всегда̀ къ прїѧ́тїю ст҃ы́хъ та̑инъ, поне́же и҆ ѿпꙋще́нїѧ грѣхѡ́въ си́це сподоблѧ́емсѧ. Глаго́летъ же и҆ лѣ́ствичникъ: а҆́ще тѣ́ло, тѣ́лꙋ прикаса́ѧсѧ, и҆змѣнѧ́етсѧ дѣ́йствомъ, ка́кѡ ᲂу҆́бѡ не и҆змѣни́тсѧ, и҆́же бж҃їю тѣ́лꙋ прикаса́етсѧ непоро́чныма рꙋка́ма (ѿ к҃и степе́ни) пи́сано же є҆́сть и҆ въ ста́рчествѣ: і҆ѡа́ннъ во́стрскїй, мꙋ́жъ ст҃ы́й, и҆ вла́сть и҆мы́й на дꙋ́сѣхъ нечи́стыхъ, вопросѝ бѣсѡ́въ, и҆̀же бѣ́ша живꙋ́ще во ѻ҆трокови́цахъ бѣснꙋ́ющихсѧ и҆ дѣ́йствꙋемыхъ ѿ ни́хъ лꙋка́вѡ, ре́кши: кі́ихъ ра́ди веще́й боите́сѧ хрїстїа́нъ; ѻ҆ни́ же глаго́лаша: и҆́мате вои́стиннꙋ трѝ вє́щи вели̑ки: є҆ди́нꙋ ᲂу҆́бѡ, ю҆́же но́сите на вы́и ва́шей: и҆ є҆ди́нꙋ, є҆́юже мы́етесѧ въ цр҃кви: и҆ є҆ди́нꙋ, ю҆́же ꙗ҆ди́те въ собра́нїи. Вопроша́юще же па́ки: ѿ си́хъ трїе́хъ ко́егѡ мно́жае боите́сѧ; ѿвѣща́ша: а҆́ще бы́сте сохранѧ́ли до́брѣ то̀, є҆гѡ́же причаща́етесѧ, никто́же бы возмо́глъ ѿ на́съ ѡ҆скорби́ти хрїстїа́нина. И҆́хже вражде́бнїи мно́жае и҆ны́хъ боѧ́тсѧ, сꙋ́ть: крⷭ҇тъ, креще́нїе и҆ прїѡбще́нїе.

Глава̀ ч҃г.

(Коне́цъ всѣ́хъ простра́ннѡ и҆зложе́нныхъ ви́нъ, и҆ ча́стное совѣ́тованїе къ вопроси́вшемꙋ. )

Сѐ ᲂу҆́бѡ, ча́до любе́знѣйшее, съ по́мощїю бж҃їей сконча́сѧ проше́нїе твоѐ. А҆́ще ᲂу҆́бѡ по и҆зволе́нїю твоемꙋ̀ и҆ предложе́нїю, соверше́ннѡ не вѣ́мы: ѻ҆ба́че по си́лѣ на́шей, и҆ бг҃ꙋ же возлю́бленно, є҆́же є҆́сть по си́лѣ. Зрѝ ᲂу҆̀бо, да не на се́мъ ѡ҆станови́шисѧ ѿ любоꙋче́нїѧ и҆ трꙋдолю́бїѧ, но да и҆ дѣ́лы ꙗ҆ви́шисѧ ᲂу҆ченолюби́въ и҆ тщали́въ: глаго́летъ бо сла́вный бг҃обра́тъ: Бра́тїе моѝ возлю́бленнїи! быва́йте творцы̀ сло́ва, а҆ не то́чїю слы́шатели, прельща́юще себѐ самѣ́хъ. Занѐ а҆́ще кто̀ є҆́сть слы́шатель зако́на, а҆ не творе́цъ, таковы́й ᲂу҆подо́бисѧ мꙋ́жꙋ смотрѧ́ющꙋ лицѐ бытїѧ̀ своегѡ̀ въ зерца́лѣ: ᲂу҆смотри́ бо себѐ, и҆ ѿи́де, и҆ забы̀, како́въ бѣ̀. Прини́кїй же въ зако́нъ соверше́нъ свобо́ды и҆ пребы́въ, се́й не слы́шатель забы́тливъ бы́въ, но творе́цъ дѣ́ла, се́й бл҃же́нъ въ дѣ́ланїи свое́мъ бꙋ́детъ.⁶⁰⁴

Глава̀ ч҃д.

(Ка́кѡ подоба́етъ слы́шати и҆ разꙋмѣ́ти дх҃ѡ́вныѧ глаго́лы ѻ҆тє́цъ.)

И҆ пре́жде же си́хъ, да вѣ́рнѡ и҆ съ прили́чествꙋющимъ благоговѣ́нїемъ разꙋмѣ́еши и҆ слы́шиши бж҃е́ствєннаѧ и҆ дꙋхѡ́внаѧ ᲂу҆законє́нїѧ ѻ҆тє́цъ, глаго́летъ бо ст҃ы́й мака́рїй: не прикаса́єма сꙋ́ть неискꙋ̑снымъ дꙋхѡ́внаѧ. Дꙋши́ же ст҃ѣ́й и҆ вѣ́рнѣй къ постиже́нїю прихо́дитъ прїѡбще́нїе ст҃а́гѡ дх҃а, и҆ небе́снаѧ дх҃а сокрѡ́вища, и҆скꙋ́сомъ прїе́мшемꙋ є҆ди́номꙋ быва́ютъ ꙗ҆́вствєнна: тайноненаꙋче́ннꙋ же нижѐ ᲂу҆разꙋмѣ́ти ѿню́дъ мо́жно. Благоговѣ́йнѡ ᲂу҆́бѡ ѡ҆б̾ ѻ҆́ныхъ слы́ши, до́ндеже бы и҆ тебѣ̀ мо́щно бы́ло вѣ́рꙋющꙋ сподо́битисѧ сїѧ̑ полꙋчи́ти. Тогда́ бо ᲂу҆вѣ́си са́мымъ и҆скꙋ́сомъ дꙋше́вныхъ ѻ҆че́съ, каковы́хъ бла̑гъ и҆ та̑инъ дꙋ́шы хрїстїа́нъ и҆ здѣ̀ прїѡбща́тисѧ мо́гꙋтъ: та́кѡ бо ѡ҆брѣта́ѧсѧ, скорѣ́йше и҆ напи́санныхъ и҆ слы́шанныхъ собере́ши припло́дїе и҆ по́льзꙋ, и҆ ѿ є҆́же наꙋча́тисѧ и҆ дѣ́ѧти пред̾ꙋспѣ́еши, во є҆́же и҆ и҆нѣ́хъ нака́зовати и҆ наставлѧ́ти са́мымъ и҆скꙋ́сомъ на бж҃е́ствєннѣйшаѧ, и҆ мно́гими тайнонаꙋчє́ннаѧ. Є҆́же, и҆ да бꙋ́детъ тѝ на всеси́льнѣйшей гдⷭ҇а і҆и҃са хрⷭ҇та̀ дла́ни ᲂу҆твержда́ющꙋсѧ и҆ и҆справлѧ́емꙋ, а҆ми́нь. А҆ поне́же и҆зли́шество сло́ва проти́вно слꙋ́хꙋ, ꙗ҆́коже преꙋмножа́емаѧ пи́ща тѣлесє́мъ, и҆ всеꙋмѣ́ренное є҆́сть и҆зрѧ́днѣйше: подоба́етъ и҆ на́мъ, и҆зли́шества бѣ́гающымъ, и҆ ᲂу҆мѣ́ренное лобыза́ющымъ, ꙗ҆́кѡ и҆зрѧ́днѣйшее, ма́лѡ є҆щѐ въ словесѝ се́мъ ᲂу҆коснѣ́вшымъ, и҆ а҆́ки нѣ́кое кра́ткое ѡ҆главле́нїе настоѧ́щагѡ сочине́нїѧ ѡ҆писа́вшымъ, та́кѡ на ѻ҆́номъ ко́твꙋ сло́ва сегѡ̀ ᲂу҆тверди́ти.

Глава̀ ч҃є.

(Ѡ҆главле́нїе, и҆ ка́кѡ подоба́етъ моли́тисѧ, и҆ ѡ҆ просвѣще́нїи и҆́стиннѣмъ и҆ бж҃е́ственнѣй си́лѣ.)

Глаго́лютъ ѻ҆тцы̀: хотѧ́й съ разсꙋжде́нїемъ трезви́тисѧ, при́снѡ чрез̾ вдыха́нїе но́здренное внꙋ́трь се́рдца, сꙋ́щагѡ под̾ лѣ́вымъ сосце́мъ, да понꙋжда́етсѧ моли́тисѧ чи́стѣ и҆ непари́тельнѣ, є҆ди̑нымъ глаго́лѡмъ внима́ѧ моли́твы, и҆ поꙋча́ѧсѧ и҆ размышлѧ́ѧ, си́рѣчь сїѐ: гдⷭ҇и і҆и҃се хрⷭ҇тѐ сн҃е бж҃їй, поми́лꙋй мѧ̀! да́же до вре́мене просвѣще́нїѧ ᲂу҆ма̀ въ се́рдцѣ, ꙗ҆́коже глаго́летъ ст҃ы́й дїа́дохъ: ꙗ҆́кѡ є҆ли́цы сла́вномꙋ гдⷭ҇а і҆и҃са и҆ многовожделѣ́нномꙋ и҆́мени непреста́ннѡ во глꙋбинѣ̀ се́рдца поꙋча́ютсѧ, сі́и мо́гꙋтъ и҆ свѣ́тъ ᲂу҆ма̀ своегѡ̀ ѻ҆вогда̀ зрѣ́ти (глава̀ н҃ѳ). Семꙋ́ же бы́вшꙋ бж҃їею по́мощїю. ѿто́лѣ про́чїимъ тече́нїемъ по бз҃ѣ жи́тельства на́шегѡ ꙗ҆́кѡ во свѣ́тѣ ходѧ́ще, па́че же свѣ́та сы́нове сꙋ́ще, незаблꙋ́днѡ и҆ непреткнове́ннѡ ше́ствовати и҆́мамы, ꙗ҆́коже глаго́летъ свѣтопода́тель і҆и҃съ: до́ндеже свѣ́тъ и҆́мате, вѣ́рꙋйте во свѣ́тъ, да сы́нове свѣ́та бꙋ́дете.⁶⁰⁵ И҆ ꙗ҆́кѡ: а҆́зъ є҆́смь свѣ́тъ мі́рꙋ: ходѧ́й по мнѣ̀, не и҆́мать ходи́ти во тьмѣ̀, но и҆́мать свѣ́тъ живо́тный.⁶⁰⁶ И҆ дв҃дъ же сїѧ̑ ко гдⷭ҇ꙋ вопїе́тъ: во свѣ́тѣ твое́мъ ᲂу҆́зримъ свѣ́тъ.⁶⁰⁷ И҆ бж҃е́ственнѣйшїй па́ѵелъ: бг҃ъ рекі́й и҆з̾ тьмы̀ свѣ́тꙋ возсїѧ́ти, и҆́же возсїѧ̀ въ сердца́хъ на́шихъ.⁶⁰⁸ Тѣ́мъ бо ꙗ҆́кѡ свѣти́льникомъ неꙋгаса́емымъ и҆ всесвѣ́тлымъ наставлѧ́ютсѧ и҆ взира́ютъ вои́стиннꙋ вѣ́рнїи на превы̑шшаѧ чꙋ́вствъ, и҆ ѿверза́ютсѧ тѣ̑мъ, ꙗ҆́кѡ чи̑стымъ се́рдцемъ, небє́снаѧ врата̀ всѧ́кагѡ равноа́гг҃льнагѡ и҆ высо́кагѡ жи́тельства и҆ ᲂу҆строе́нїѧ, и҆ па́ки та́кѡ ꙗ҆́коже ѿ со́лнечна крꙋ́га возсїѧва́етъ си́мъ є҆́же востѧ́зовати, є҆́же разсꙋжда́ти, є҆́же прозира́ти, є҆́же предви́дѣти, и҆ подѡ́бнаѧ. И҆ воѻбщѐ тѣ̑мъ возсїѧва́етъ таковы̑мъ безвѣ́стныхъ та́инъ всѧ́кое ꙗ҆вле́нїе же и҆ ѿкрове́нїе, и҆ преесте́ствєнныѧ и҆ бж҃е́ствєнныѧ си̑лы дх҃омъ и҆сполнѧ́ютсѧ, и҆ таково́ю же преесте́ственною си́лою и҆ пе́рсть и҆́хъ сїѧ̀ ѡ҆блегчава́ема, и҆лѝ па́че тѧгота̀ пло́ти ѡ҆тончава́ема и҆ возвыша́ема, превозлета́етъ. Се́ю во ст҃ѣ́мъ дс҃ѣ просвѣти́тельною си́лою, є҆щѐ съ пло́тїю сꙋ́ще нѣ́цыи ѿ ст҃ы́хъ ѻ҆тє́цъ, ꙗ҆́кѡ невеще́ственнїи и҆ безтѣле́снїи, рѣ́ки непрохѡди́мыѧ и҆ морѧ̀ кораблехѡ́дныѧ нога́ми немо́креннѡ проидо́ша, течє́нїѧ же дѡ́лгаѧ и҆ многоднє́внаѧ во мгнове́нїи преидо́ша, и҆ и҆́на пречꙋ̑дна на небесѝ, на землѝ, въ со́лнцѣ, въ мо́ри, въ пꙋсты́нѧхъ, во градѣ́хъ, во всѧ́комъ мѣ́стѣ и҆ странѣ̀, въ ѕвѣре́хъ и҆ га́дѣхъ, въ скотѣ́хъ и҆ садѣ́хъ, и҆ бездꙋ́шномъ ка́менїи, вкра́тцѣ, и҆ во всѧ́кой тва́ри, и҆ всѣ́хъ стїхі́ахъ содѣ́лаша, и҆ всѣ́ми просла́вишасѧ. И҆ на моли́твахъ си̑мъ стоѧ́щымъ, и҆ ст҃а̑ѧ и҆ честна̑ѧ и҆́хъ тѣлеса̀ ѿ землѝ ꙗ҆́кѡ крила̑та возвыша́хꙋсѧ, и҆ бж҃е́ственнымъ и҆ невеще́ственнымъ ѻ҆гне́мъ благода́тнымъ, тѣле́снꙋю дебе́лость, є҆ще́ же и҆ тѧготꙋ̀ и҆спепелѧ́юще, и҆ ле́гцѣ возвыша́тисѧ сотворѧ́хꙋ дѣ́йствꙋеми, и҆ а҆́ки нѣ́какѡ, ѽ чꙋдесѐ! престїхі́йствꙋеми и҆ преко́вываеми на бж҃е́ственнѣйшее бг҃одѣ́йною дла́нїю вселѧ́ющїѧсѧ въ ни́хъ крѣ́пости и҆ благода́ти: и҆ по кончи́нѣ нѣ́кихъ и҆ честна̑ѧ тѣлеса̀ нетлѣ́нїе воспрїѧ́ша, ꙗ҆́вно показꙋ́ѧ живꙋ́щꙋю въ ни́хъ и҆ всѣ́хъ и҆звѣстновѣ́рныхъ преесте́ственнꙋю благода́ть и҆ си́лꙋ. И҆ по ѻ҆́бщемъ ᲂу҆́бѡ и҆ всемі́рномъ воскресе́нїи, са́мою ꙗ҆́же въ дс҃ѣ просвѣти́тельною си́лою, а҆́ки нѣ́какѡ ѡ҆крила́тѣвше, восхище́ни бꙋ́дꙋтъ на ѻ҆́блацѣхъ, въ срѣ́тенїе гдⷭ҇не на воздꙋ́сѣ, ꙗ҆́коже глаго́летъ таи́нникъ неизрече́нныхъ бж҃е́ственнѣйшїй па́ѵелъ, и҆ та́кѡ всегда̀ съ гдⷭ҇емъ бꙋ́дꙋтъ.⁶⁰⁹ Къ си̑мъ же ᲂу҆́бѡ и҆ дх҃оглаго́ливый пое́тъ даві́дъ: гдⷭ҇и, во свѣ́тѣ лица̀ твоегѡ̀ по́йдꙋтъ, и҆ ѡ҆ и҆́мени твое́мъ возра́дꙋютсѧ ве́сь де́нь, си́рѣчь, вѣ́чный, и҆ пра́вдою твое́ю вознесꙋ́тсѧ. Ꙗ҆́кѡ похвала̀ си́лы и҆́хъ ты̀ є҆сѝ, и҆ во благоволе́нїи твое́мъ вознесе́тсѧ ро́гъ на́шъ.⁶¹⁰ И҆ па́ки: держа́внїи землѝ ѕѣлѡ̀ вознесо́шасѧ.⁶¹¹ И҆ велегла́снѣйшїй и҆са́їа та́кѡ глаго́летъ: терпѧ́щїи гдⷭ҇а ѡ҆крила́тѣютъ, и҆змѣнѧ́тъ крѣ́пость свою̀.⁶¹² И҆ ст҃ы́й мака́рїй: всѧ́ка дꙋша̀, вѣ́рою и҆ всѣ́хъ добродѣ́телей тща́нїемъ соверше́ннѣ во хрⷭ҇та̀ ѡ҆блещи́сѧ ѿсю́дꙋ въ си́лѣ и҆ и҆звѣствова́нїи сподо́бльшаѧсѧ, и҆ съ небе́снымъ нетлѣ́ннагѡ ѡ҆́браза свѣ́томъ соедини́вшаѧсѧ, ра́зꙋмъ та̑инъ небе́сныхъ въ сꙋществѣ̀ прїима́ти всегда̀ сподоблѧ́етсѧ: въ де́нь же воскресе́нїѧ тѣ́мжде небе́снымъ ѡ҆́бразомъ сла́вы тѣ́ло съ дꙋше́ю просла́вившисѧ, и҆ на небеса̀ ѿ дх҃а, по пи́санномꙋ, восхище́но бы́вши въ срѣ́тенїе гдⷭ҇не на воздꙋ́сѣ, и҆ соѡбра́зно тѣ́лꙋ сла́вы є҆гѡ̀ бы́ти сподо́бившисѧ, во вѣ́ки кꙋ́пнѡ съ дꙋше́ю и҆ тѣ́ломъ ца́рствовати и҆́мать.

Глава̀ ч҃ѕ.

(И҆́но ѡ҆главле́нїе. )

Си́хъ но́выхъ и҆ па́че сло́ва слове́съ нача́ло и҆ роди́тельница є҆́сть предпомѧнꙋ́тое съ соверше́ннымъ безпопече́нїемъ безмо́лвїе, внима́нїе же и҆ моли́тва: ꙗ҆́кѡ ѡ҆снова́нїемъ нѣ́кимъ ᲂу҆твержде́ннымъ, и҆ забра́ломъ непобѣди́мымъ, богатѣ́юще и҆сполне́нїемъ по си́лѣ всѣ́хъ бг҃отворѧ́щихъ за́повѣдей. Ѿ си́хъ же, безпопече́нїѧ глаго́лю, безмо́лвїѧ, внима́нїѧ и҆ моли́твы, быва́етъ въ се́рдцѣ движе́нїе и҆ теплота̀, стра̑сти и҆ бѣ́сы палѧ́щаѧ, и҆ се́рдце а҆́ки въ горни́лѣ ѡ҆чища́ющаѧ. Ѿ сеѧ̀ быва́етъ ко гдⷭ҇ꙋ на́шемꙋ і҆и҃сꙋ хрⷭ҇тꙋ̀ жела́нїе, и҆ непреста́нное раче́нїе: ѿ сегѡ́ же сла́достное серде́чныхъ сле́зъ ча́стое тече́нїе и҆сточникоподо́бнѣ, и҆́миже дꙋша̀ и҆ тѣ́ло ꙗ҆́коже ѵ҆ссѡ́помъ, покаѧ́нїемъ, любо́вїю и҆ благодаре́нїемъ и҆ и҆́сповѣдїю ѡ҆чища́етсѧ и҆ тꙋчнѣ́етъ, ѿ си́хъ же тишина̀ и҆ ми́ръ по́мыслѡвъ, є҆мꙋ́же нѣ́сть предѣ́ла, ꙗ҆́кѡ всѧ́къ ᲂу҆́мъ преимꙋ́щъ: ѿ си́хъ же снѣгосїѧ́тельно свѣ́тлое ѡ҆сїѧ́нїе и҆ коне́цъ, є҆́же по человѣ́кꙋ безстра́стїе, и҆ дꙋшѝ воскресе́нїе пре́жде тѣ́ла, и҆ ктомꙋ̀, є҆́же по ѡ҆́бразꙋ и҆ по подо́бїю дѣѧ́нїемъ и҆ видѣ́нїемъ, вѣ́рою и҆ наде́ждою и҆ любо́вїю воз̾ѡбраже́нїе, и҆ возвраще́нїе, и҆ соверше́нное къ бг҃ꙋ горѣ̀ просте́ртїе, и҆ непосре́дственное є҆дине́нїе, и҆зстꙋпле́нїе же и҆ почи́тїе, преста́нїе въ настоѧ́щемъ ᲂу҆́бѡ, ꙗ҆́кѡ въ зерца́лѣ, въ гада́нїи и҆ ѡ҆брꙋче́нїи, въ бꙋ́дꙋщемъ же лице́мъ къ лицꙋ̀, и҆ соверше́нное соверше́ннѣ бж҃їе прича́стїе, и҆ присносꙋ́щнѣ наслажде́нїе.

Глава̀ ч҃з.

(Ꙗ҆́кѡ сїѐ вои́стиннꙋ є҆́сть непреле́стное и҆ и҆́стинное, и҆ ѻ҆тцы̀ пре́данное, и҆ по бз҃ѣ жи́тельство, си́рѣчь є҆́же ѿ послꙋша́нїѧ безмо́лвїе, є҆́же и҆ во хрⷭ҇тѣ̀ сокрове́нный живо́тъ досто́йнѣ ст҃ы́ми нарече́сѧ. )

Са́мый се́й пꙋ́ть, и҆ по бз҃ѣ ᲂу҆́мное жи́тельство, и҆ сщ҃е́нное дѣ́ланїе сꙋ́щихъ вои́стиннꙋ хрїстїа́нъ непреле́стное, и҆ и҆́стинное, и҆ чи́стое, и҆ преѧ́вственнѣ же сокрове́нный є҆́сть во хрⷭ҇тѣ̀ живо́тъ. Си́мъ ше́ствовалъ, и҆ семꙋ̀ тайнонаꙋчи́лъ є҆́сть бг҃очеловѣ́къ и҆ сладча́йшїй і҆и҃съ, проидо́ша же и҆ бж҃е́ственнїи а҆пⷭ҇ли, припослѣ́дствоваша же сꙋ́щїи по ни́хъ, ꙗ҆́коже подоба́етъ послѣ́дꙋюще и҆̀мъ, сла́внїи наста̑вницы на́ши и҆ ᲂу҆чи́тели, и҆̀же ѿ нача́ла са́магѡ на зе́млю пе́рвагѡ хрⷭ҇то́ва прише́ствїѧ, и҆ да́же до дне́сь, ꙗ҆́кѡ свѣти̑ла въ мі́рѣ сїѧ́юще ѡ҆заре́ньми живо́тныхъ слове́съ и҆ пресла́вными творе́ньми дѣ́лъ: и҆̀же да́же и҆ до сꙋ́щихъ во вре́мѧ на́ше таково́е до́брое сѣ́мѧ, свѧще́нный ква́съ, нача́токъ свѧты́й, некра́домый зало́гъ, и҆ благода́ть, ꙗ҆́же съ высоты̀ си́лꙋ, многоцѣ́нный би́серъ, бж҃е́ственный ѻ҆те́ческїй жре́бїй, сокрове́нное на селѣ̀ сокро́вище, ѡ҆брꙋче́нїе дх҃а, ца́рское зна́менїе, живꙋ́ю и҆ текꙋ́щꙋю во́дꙋ, бж҃е́ственный ѻ҆́гнь, честнꙋ́ю со́ль, пома́занїе, запечатлѣ́нїе, свѣ́тъ, и҆ подѡ́бнаѧ си̑мъ дрꙋ́гъ ко дрꙋ́гꙋ препода́ша. Є҆́же и҆ бꙋ́детъ наслѣ́днѡ дае́мо, и҆ въ ро́ды родѡ́въ та́инственнѣ преходѧ́що, да́же и҆ до са́магѡ втора́гѡ па́ки на зе́млю хрⷭ҇то́ва прише́ствїѧ. Нело́женъ бо є҆́сть ѡ҆бѣща́вый сїѐ: и҆ сѐ а҆́зъ съ ва́ми є҆́смь во всѧ̑ дни̑ до сконча́нїѧ вѣ́ка, а҆ми́нь.⁶¹³

Глава̀ ч҃и.

(Ꙗ҆́кѡ а҆́ще и҆ и҆́ни сꙋ́ть пꙋти̑ спаси́тельни, но се́й є҆́сть и҆збра́нный и҆ ца́рскїй, и҆ къ сыноположе́нїю приводѧ́щъ. )

А҆́ще же и҆ и҆́ни пꙋти̑ и҆ жи́тєльства, а҆́ще ли же хо́щеши, и҆ дѣ̑ланїѧ блага̑ѧ ꙗ҆ви́шасѧ ко спасе́нїю наставлѧ́ющыѧ и҆ ᲂу҆покоѧ́ющыѧ проходѧ́щаго сїѧ̑, ꙗ҆́коже ᲂу҆̀бо и҆ сꙋ́ть, и҆ къ ра́бствꙋ, и҆лѝ нае́мничествꙋ рꙋководѧ́щыѧ, и҆ престаю́щыѧ, ꙗ҆́коже и҆ мнѡ́ги ѻ҆би́тєли сп҃си́телемъ ᲂу҆ ѻ҆ц҃а̀ є҆гѡ̀ бы́ти реко́шасѧ: но ᲂу҆́бѡ се́й є҆́сть ца́рскїй, и҆ и҆збра́нный, и҆ всѣ́хъ дѣ́ланїй, ꙗ҆́коже дꙋша̀ тѣ́ла, превы́ше лежи́тъ и҆ превосхо́дитъ, ꙗ҆́кѡ къ сыноположе́нїю бж҃їю ѡ҆бновлѧ́ющъ ѿ землѝ и҆ пе́пла, и҆ бг҃омъ дѣ́лающъ пресла́внѡ въ дꙋ́сѣ, проходѧ́щагѡ ѻ҆́нымъ ꙗ҆́коже подоба́етъ человѣ́ка, ꙗ҆́коже глаго́летъ вели́кїй васі́лїй: дх҃ъ ст҃ы́й прише́дъ въ дꙋ́шꙋ человѣ́чꙋ, дадѐ живо́тъ, даде́ же и҆ безсме́ртїе, воздви́же лежа́ща: подви́гшеесѧ же движе́нїемъ присносꙋ́щнымъ ѿ дх҃а ст҃а, живо́тно бы́сть ст҃о: и҆ прїѧ́тъ человѣ́къ досто́инство, дх҃ꙋ все́льшꙋсѧ во́нь, проро́ка, а҆пⷭ҇ла, а҆́гг҃ла и҆ бг҃а, сы́й пре́жде сегѡ̀ землѧ̀ и҆ пе́пелъ.

Глава̀ ч҃ѳ.

(Ꙗ҆́кѡ за высотꙋ̀ дѣ́ланїѧ и҆ многоиме́нно є҆́сть сїѐ жи́тельство. )

Сегѡ̀ ᲂу҆́бѡ ра́ди мно́гими и҆ разли́чными и҆ сла́вными нарече́ньми бж҃е́ственнїи ѻ҆тцы̀ велича́ютъ ѻ҆́ное. Пꙋ́ть бо разꙋмѣва́емый нареко́ша дѣѧ́нїе похвалѧ́емо, и҆ видѣ́нїе правоꙋлꙋча́емо, моли́твꙋ вы́ше всѧ́кагѡ простра́нства, трезвѣ́нїе ᲂу҆ма̀, ᲂу҆́мное дѣ́ланїе, дѣ́ло бꙋ́дꙋщагѡ вѣ́ка, а҆́гг҃льское жи́тельство, небе́сное житїѐ, бж҃е́ственное пребыва́нїе, странꙋ̀ живы́хъ, та́инственное взира́нїе, дꙋхо́вное всепи́ршество, ра́й бг҃одѣ́ланный, не́бо, небе́сное црⷭ҇тво, бж҃їе црⷭ҇тво, мра́къ превы́шшїй свѣ́та, во хрⷭ҇тѣ̀ сокрове́нный живо́тъ, бг҃овидѣ́нїе и҆ ѡ҆боже́нїе, є҆́же преесте́ственнѣйше, и҆ си̑мъ подѡ́бнаѧ, кі̑имъ бж҃е́ствєннымъ ѻ҆тцє́мъ и҆ мы̀, бре́нїю и҆ плинѳодѣ́ланїю, лꙋка̑вымъ и҆ нечи̑стымъ помыслѡ́мъ, и҆ словесє́мъ и҆ дѣлѡ́мъ соживꙋ́щїи, послѣ́дꙋюще, твоѐ проше́нїе возлю́бленне, и҆спо́лнити потща́хомсѧ. Вои́стиннꙋ, и҆ ꙗ҆́коже проси́лъ є҆сѝ, и҆ па́че мѣ́ры на́шеѧ рещѝ не ѡ҆блѣни́хомсѧ твоеѧ̀ ра́ди, ꙗ҆́коже въ нача́лѣхъ сло́ва сегѡ̀ реко́хомъ, любвѐ и҆ ѻ҆те́ческїѧ за́повѣди. Сегѡ̀ ᲂу҆́бѡ равноа́гг҃льнагѡ житїѧ̀ нача́льникъ є҆́сть, но́вое и҆ неизрече́нное сло́ва и҆ сн҃а бж҃їѧ смотрѣ́нїе, и҆ вочеловѣ́ченїе благоволе́нїемъ безнача́льнагѡ ѻ҆ц҃а̀, и҆ содѣ́йствїемъ ст҃а́гѡ дх҃а.

Глава̀ р҃. Нравоꙋче́нїе.

(Ꙗ҆́кѡ съ по́мощїю и҆ благода́тїю бж҃їею, подоба́етъ и҆ на́мъ, є҆ли́кѡ мо́щно, тща́тисѧ и҆ подвиза́тисѧ, да сподо́бимсѧ ѿ ны́нѣ, ꙗ҆́кѡ въ ча́сти ѡ҆брꙋче́нїѧ таковы́хъ преесте́ственныхъ и҆ велича́йшихъ дарѡ́въ, и҆ да не ма́лагѡ ра́ди ᲂу҆ны́нїѧ, си́хъ, ᲂу҆вы̀! не полꙋ́чимъ, є҆́же да не бꙋ́детъ.)

Такѡвы́мъ ᲂу҆̀бо и҆ толи̑кимъ благи̑мъ на́мъ предлежа́щымъ, возлю́бленнїи, не то́чїю во ᲂу҆пова́нїѧхъ и҆ ѡ҆бѣтова́нїихъ, ꙗ҆̀же въ бꙋ́дꙋщемъ вѣ́цѣ, но вои́стиннꙋ ѿсе́лѣ и҆ ве́щїю потщи́мсѧ, мо́лимъ, до́ндеже вре́мѧ и҆́мамы, потеце́мъ, подвиза́имсѧ, да си́хъ и҆ мы̀ ма́лымъ и҆ привре́меннымъ тща́нїемъ и҆ кра́ткимъ трꙋдо́мъ, па́че же бж҃їимъ да́ромъ и҆ благода́тїю сподо́бимсѧ. Не бо̀ достѡ́йны стра̑сти ны́нѣшнѧгѡ вре́мене къ хотѧ́щей сла́вѣ ꙗ҆ви́тисѧ въ на́съ.⁶¹⁴ Па́ѵла бж҃е́ственнаго проповѣ́дника глаго́люща ᲂу҆слы́шимъ: па́че же и҆ ѿ ны́нѣ тща́щесѧ ѡ҆брѧ́щемъ по свидѣ́тельствꙋ ѻ҆́нагѡ, ꙗ҆́кѡ въ ча́сти нача́тка и҆ ѡ҆брꙋче́нїѧ.⁶¹⁵ А҆́ще бо ца́рское сро́дство и҆ прїѡбще́нїе ѿ земна́гѡ слꙋ́чаѧ на себѐ преводѧ́щїи всѧ̑ дѣ́ютъ, и҆ дѣ́лы и҆ словесы̑ и҆ ᲂу҆мышле́ньми и҆ са́мыхъ недости́жныхъ каса́ющесѧ, є҆ще́ же и҆ са́мый живо́тъ се́й мно́жицею презира́юще, за таковꙋ́ю сла́вꙋ и҆ че́сть текꙋ́щꙋю и҆ привре́меннꙋю, ѻ҆вогда̀ и҆ въ поги́бель всесоверше́ннꙋ, а҆ не въ по́льзꙋ достиза́ющꙋю. Коли́кѡ ᲂу҆́бѡ на́мъ подоба́етъ содѣ́ѧти и҆ потща́тисѧ, въ прїѡбще́нїе и҆ бра́къ и҆ соедине́нїе призыва́ємымъ бг҃а, цр҃ѧ̀ всѣ́хъ царе́й, и҆ содѣ́телѧ, и҆ є҆ди́нагѡ нетлѣ́нна и҆ присноприбыва́ющагѡ, и҆ сла́вꙋ и҆ че́сть подаю́щагѡ свои̑мъ благосла́внꙋ и҆ пребыва́тельнꙋ; и҆ не то́чїю же сїѐ, но и҆ ѻ҆́бласть прїе́мшымъ ча́дѡмъ бж҃їимъ бы́ти: є҆ли́цы бо, глаго́летъ, прїѧ́ша є҆го̀, дадѐ и҆̀мъ ѻ҆́бласть ча́дѡмъ бж҃їимъ бы́ти, вѣ́рꙋющымъ во и҆́мѧ є҆гѡ̀.⁶¹⁶ Дае́тъ ѻ҆́бласть, не нꙋ́ждею влече́тъ, и҆ проти́вꙋ предложе́нїѧ на́шегѡ понꙋжда́етъ. При́снѡ бо мꙋчи́тельство на мꙋчи́тельствꙋющаго мꙋчи́тельствꙋемаго воѡрꙋжа́етъ, да ѕлы́мъ ѕло́е и҆сцѣли́тъ, и҆ си́мъ почита́ѧ дре́внее на́ше самовла́стїѧ досто́инство, и҆ ꙗ҆́кѡ да бꙋ́детъ благо́е благоволе́нїемъ и҆ благода́тїю є҆гѡ̀ содѣ́ланно по всемꙋ̀, на́шегѡ же тща́нїѧ и҆ прилѣжа́нїѧ да вмѣнѧ́етсѧ бы́ти и҆справле́нїе: и҆ то́й ᲂу҆̀бо, а҆́ще и҆ бг҃ъ є҆́сть и҆ влⷣка, но всѐ своѐ сѝ сотвори́лъ. Всѣ́хъ бо подо́бнѣ и҆ созда́лъ, та́кожде за всѣ́хъ и҆ ᲂу҆́мре, да ра́внѣ спасе́тъ всѣ́хъ: въ на́съ же ѡ҆ста́сѧ є҆́же пристꙋпи́ти, є҆́же ᲂу҆вѣ́ровати, є҆́же ᲂу҆сво́итисѧ, є҆́же со стра́хомъ и҆ тща́нїемъ и҆ любо́вїю слꙋжи́ти та́кѡ возлюби́вшемꙋ ны̀ человѣколюби́вомꙋ влады́цѣ и҆ попечи́телю, ꙗ҆́кѡ и҆ сме́рть восхотѣ́ти претерпѣ́ти во́лею за ны̀, и҆ сме́рть поно́снꙋ, да на́съ ѿ мꙋчи́тельства дїа́волѧ и҆ началоѕло́бнагѡ врага̀ и҆зба́витъ, и҆ ѻ҆ц҃ꙋ̀ и҆ бг҃ꙋ примири́тъ, и҆ наслѣ́дники ᲂу҆́бѡ бг҃ꙋ, снаслѣ́дники же себѣ̀ содѣ́лаетъ, є҆́же є҆́сть пресла́внѣйшее и҆ блаже́ннѣйшее. Да не ма́лымъ ᲂу҆̀бо и҆ кра́ткимъ ᲂу҆ны́нїемъ и҆ нерадѣ́нїемъ, и҆ притво́рною сла́стїю каково́юлибо то́ль вели́кихъ ᲂу҆дали́мъ себѐ бла̑гъ и҆ че́стей и҆ наслажде́нїи: но всѧ̑ да содѣ́емъ и҆ потрꙋди́мсѧ, и҆ самагѡ̀, а҆́ще бы потре́ба была̀, живота̀ за него̀ да не пощади́мъ, ꙗ҆́коже и҆ то́й на́съ ра́ди, а҆́ще и҆ бг҃ъ сы́й, за ны̀ сотворѝ: да та́кѡ и҆ ны́нѣшнихъ и҆ бꙋ́дꙋщихъ дарѡ́въ и҆ вѣнцє́въ сподо́бимсѧ. Ꙗ҆̀же да бꙋ́детъ всѣ̑мъ на́мъ полꙋчи́ти благоволе́нїемъ и҆ благода́тїю самагѡ̀ преблага́гѡ и҆ милосе́рдагѡ гдⷭ҇а бг҃а и҆ сп҃са на́шегѡ і҆и҃са хрⷭ҇та̀, смири́вшагѡ себѐ толи́кѡ за ны̀, и҆ таковы́мъ смире́нїемъ преесте́ственнꙋю и҆ бг҃отворѧ́щꙋю свою̀ благода́ть ѿ ны́нѣ ꙗ҆́вѣ бога́тнѡ подаю́щагѡ. Ꙗ҆́кѡ томꙋ̀ подоба́етъ всѧ́ка сла́ва и҆ че́сть, и҆ поклоне́нїе кꙋ́пнѡ съ безнача́льнымъ и҆ пречи́стымъ є҆гѡ̀ ѻ҆ц҃е́мъ, и҆ соприсносꙋ́щнымъ, и҆ прест҃ы́мъ, и҆ благи́мъ, и҆ животворѧ́щимъ є҆гѡ̀ дх҃омъ, ны́нѣ и҆ при́снѡ, и҆ въ безконє́чныѧ вѣ́ки вѣкѡ́въ, а҆ми́нь.

Є҆ѵа́грїй, премꙋ́дрый и҆ ᲂу҆че́ный мꙋ́жъ, процвѣтѐ ѻ҆́колѡ тре́хъ сѡ́тъ ѻ҆смидесѧ́тагѡ лѣ́та, ѿ вели́кагѡ васі́лїа произведе́нъ бы́въ въ досто́инство чтеца̀, ѿ бра́та є҆гѡ̀ григо́рїа нѵ́сскагѡ рꙋкоположе́нъ во дїа́кона. Сщ҃є́ннымъ же словесє́мъ нака́занъ бѣ̀ ѿ григо́рїа бг҃осло́ва, при не́мже и҆ а҆рхїдїа́кономъ бѣ̀, є҆гда̀ ѻ҆́нъ пра́вѧше це́рковїю кѡнстантїнопо́льскою, по свидѣ́тельствꙋ нїки́фора ка́ллїста въ кни́гѣ а҃і, гл. м҃в. Напослѣ́докъ же ѿре́кшисѧ сꙋ́щихъ въ мі́рѣ, въ мона́шеское встꙋпѝ житїѐ. Бы́въ же то́нкихъ понѧ́тїй, и҆ во и҆зраже́нїи мы́слей вельмѝ си́льный, мнѡ́гїѧ и҆ разли́чныѧ сочинє́нїѧ ѡ҆ста́ви, и҆з̾ ко́ихъ настоѧ́щее къ безмо́лвствꙋющымъ сло́во, и҆ главы̑ є҆гѡ̀ ѡ҆ разли́чїи страсте́й и҆ по́мыслѡвъ предлага́ємыѧ, ꙗ҆́кѡ вельмѝ потрє́бныѧ и҆ полє́зныѧ, въ настоѧ́щей кни́гѣ положи́ти сꙋди́хомъ.

Оу҆ і҆еремі́и рече́но є҆́сть: и҆ ты̀ да не по́ймеши себѣ̀ жены̀ на мѣ́стѣ се́мъ. Ꙗ҆́кѡ сїѧ̑ глаго́летъ гдⷭ҇ь ѡ҆ сынѣ́хъ и҆ дще́рехъ, ражда́ющихсѧ на мѣ́стѣ се́мъ: сме́ртїю болѣ́зненною поги́бнꙋтъ.⁶¹⁷ Сїѐ показꙋ́ютъ ѻ҆́ныѧ сло́ва, ꙗ҆́кѡ по а҆пⷭ҇лꙋ: ѡ҆жени́выйсѧ человѣ́къ пече́тсѧ ѡ҆ мїрски́хъ, ка́кѡ ᲂу҆годи́ти женѣ̀, и҆ раздѣли́сѧ. И҆, посѧ́гшаѧ жена̀ пече́тсѧ ѡ҆ мїрски́хъ, ка́кѡ ᲂу҆годи́ти мꙋ́жꙋ.⁶¹⁸ Ѿню́дꙋже ꙗ҆́вѣ, ꙗ҆́кѡ не то́чїю ѡ҆ бꙋ́дꙋщихъ по бра́чномꙋ житїю̀ сынѣ́хъ и҆ дще́рехъ ᲂу҆ проро́ка рече́сѧ сїѐ: сме́ртїю болѣ́зненною и҆з̾о́мрꙋтъ,⁶¹⁹ но и҆ ѡ҆ ражда́ющихсѧ въ се́рдцѣ и҆́хъ сынѣ́хъ и҆ дще́рехъ, си́рѣчь, плотски́хъ по́мыслѣхъ, и҆ по́хотѧхъ, ꙗ҆́кѡ въ болѣ́зненномъ, и҆ немощно́мъ, и҆ ѡ҆сла́бномъ мꙋдрова́нїи мі́ра сегѡ̀ и҆з̾о́мрꙋтъ и҆ сі́и, и҆ небе́снагѡ живота̀ не наслѣ́дѧтъ. Не ѡ҆жени́выйсѧ же, глаго́летъ, пече́тсѧ ѡ҆ гдⷭ҇нихъ, ка́кѡ ᲂу҆годи́ти гдⷭ҇еви,⁶²⁰ и҆ присноцвѣтꙋ́щыѧ, и҆ безсмє́ртныѧ плоды̀ вѣ́чнагѡ живота̀ сотвори́тъ. Тако́въ є҆́сть и҆́нокъ, и҆ тако́мꙋ подоба́етъ бы́ти и҆́нокꙋ, ᲂу҆далѧ́ющꙋсѧ ѿ жены̀, не творѧ́щꙋ сы́на, и҆лѝ дще́ри въ мѣ́стѣ предрече́нномъ, и҆ во́инꙋ та́кожде хрⷭ҇то́вꙋ бы́ти є҆мꙋ̀ невеществолюби́вꙋ, и҆ безпопечи́тельнꙋ, без̾ всѧ́кагѡ мѧте́жнагѡ помышле́нїѧ и҆ дѣѧ́нїѧ, ꙗ҆́коже и҆ а҆пⷭ҇лъ глаго́летъ: никто́же во́инъ быва́ѧ ѡ҆бѧзꙋ́етсѧ кꙋ́плѧми жите́йскими, да воево́дѣ ᲂу҆го́денъ бꙋ́детъ.⁶²¹ Въ си́хъ наипа́че да пребыва́етъ и҆́нокъ, всѣ̀ вє́щи мі́ра сегѡ̀ ѡ҆ста́вивый, и҆ ко кра̑снымъ, и҆ дѡ́брымъ, безмо́лвїѧ трофе́амъ, побѣдозна́менїѧмъ, текꙋ́щїй. Ко́ль красе́нъ бо, и҆ до́бръ безмо́лвїѧ по́двигъ! ко́ль красе́нъ вои́стиннꙋ и҆ до́бръ! И҆́го бо сегѡ̀ є҆́сть бла́го, и҆ бре́мѧ легко̀.⁶²² Ра́достно жи́тельство, сла́достно дѣѧ́нїе. Хо́щеши ли ᲂу҆́бѡ, возлю́бленне, ᲂу҆едине́нное житїѐ воспрїѧ́ти, ꙗ҆́коже є҆́сть, и҆ ко трофе́амъ безмо́лвїѧ тещѝ; Ѡ҆ста́ви та́мѡ попечє́нїѧ мїрска̑ѧ, и҆ въ си́хъ сꙋ̑щаѧ нача̑ла и҆ вла̑сти, си́рѣчь бꙋ́ди безвеще́ственъ, безстра́стенъ, без̾ всѧ́кїѧ по́хоти, да чꙋ́ждъ бы́въ всѧ́кагѡ ѕлоѻбстоѧ́нїѧ, возмо́жеши безмо́лвствовати до́брѣ. А҆́ще бо кто̀ ѿ си́хъ себѧ̀ не ѿврати́тъ, не возмо́жетъ и҆спра́вити сїѐ жи́тельствованїе. Бра́шенъ ма́лыхъ приде́рживайсѧ, и҆ ᲂу҆добонебрего́мыхъ, а҆ не мно́гихъ и҆ ᲂу҆добопреле́стныхъ. А҆́ще же и҆ ꙗ҆́кѡ страннолю́бїѧ ра́ди ѡ҆ многоцѣ́нныхъ по́мыслъ бꙋ́детъ, ѡ҆ста́ви се́й по́мыслъ, ѿню́дъ не повини́сѧ є҆мꙋ̀. Кова́рствꙋетъ бо си́мъ вра́гъ, кова́рствꙋетъ ѿлꙋчи́ти ѿ безмо́лвїѧ. И҆́маши гдⷭ҇а і҆и҃са ᲂу҆корѧ́юща нѣ́какѡ пекꙋ́щꙋюсѧ ѡ҆ таковы́хъ дꙋ́шꙋ, ма́рѳꙋ, и҆ глаго́люща, что̀ ѡ҆ мно́зѣ пече́шисѧ и҆ мо́лвиши; є҆ди́но є҆́сть на потре́бꙋ,⁶²³ слꙋ́шати повелѣва́етъ, бж҃е́ственное сло́во, и҆ пото́мъ без̾ ᲂу҆трꙋжде́нїѧ всѐ ѡ҆брѧ́щеши. Тѣ́мже и҆ а҆́бїе прилага́етъ глаго́лѧ: мр҃і́а во благꙋ́ю ча́сть и҆збра̀, ꙗ҆́же не ѿи́метсѧ ѿ неѧ̀.⁶²⁴ И҆́маши же и҆ вдови́цы саре́птскїѧ примѣ́ръ, чѣ́мъ ѻ҆на̀ проро́ка ᲂу҆гости́ла. А҆́ще бы и҆ хлѣ́бъ є҆ди́нъ и҆мѣ́лъ ты̀, а҆́ще бы со́ль, а҆́ще бы во́дꙋ, мо́жеши си́ми сотвори́ти страннолю́бїѧ мздꙋ̀. А҆́ще же и҆ си́хъ не и҆мѣ́лъ бы, но то́кмѡ произволе́нїемъ благи́мъ прїимѝ стра́ннаго, и҆ сло́во благо́е є҆мꙋ̀ препода́ждь, та́кожде мо́жеши страннолю́бїѧ мздꙋ̀ прїѡбрѣстѝ. Бл҃го бо, глаго́летсѧ, сло́во па́че даѧ́нїѧ (а҆́ввы дѡроѳе́а, ли́стъ ч҃ѕ на ѡ҆боро́тѣ). Такова̑ѧ ѡ҆ ми́лостыни подоба́етъ тѝ мꙋ́дрствовати. Ви́ждь ᲂу҆́бѡ, да не пожела́еши бога́тство и҆мѣ́ти длѧ раздаѧ́нїѧ ᲂу҆бѡ́гимъ. Є҆́сть бо и҆ сїѧ̀ пре́лесть лꙋка́вагѡ, къ тщесла́вїю ча́стѡ приводѧ́щаѧ, и҆ въ винꙋ̀ многопы́тства вверга́ющаѧ ᲂу҆́мъ. И҆́маши во є҆ѵⷢ҇лїи ѿ гдⷭ҇а і҆и҃са свидѣ́тельствꙋемꙋю вдови́цꙋ двꙋмѧ̀ то́чїю ле́птами, превзоше́дшꙋю бога́тыхъ произволе́нїе и҆ си́лꙋ. Вси́ бо, глаго́летъ, ѿ и҆збы́тка вверго́ша въ сокро́вищное храни́лище: сїѧ́ же всѐ и҆мѣ́нїе своѐ.⁶²⁵ Ѡ҆ ѻ҆де́ждахъ же рекꙋ̀: не пожела́й и҆зли́шнїѧ и҆мѣ́ти ѻ҆дє́жды, то́чїю потрє́бныѧ длѧ нꙋ́жды тѣле́сной промышлѧ́й. Возве́рзи на гдⷭ҇а па́че печа́ль твою̀, и҆ то́й ѡ҆ тебѣ̀ промы́слитъ.⁶²⁶ То́й, глаго́летсѧ бо пече́тсѧ ѡ҆ ва́съ. А҆́ще бы потре́бно бы́ло ꙗ҆́стїй, и҆лѝ ѻ҆де́ждъ, не ᲂу҆срами́сѧ ѿ дрꙋги́хъ тѝ приноси̑маѧ прїѧ́ти: сїе́ бо є҆́сть го́рдости ви́дъ. А҆́ще же и҆ са́мъ въ си́хъ и҆збы́точествꙋеши, да́ждь лиша́ющемꙋсѧ. Та́кѡ бг҃ъ ча́дѡмъ свои̑мъ ᲂу҆домостроѧ́тисѧ хо́щетъ. Сегѡ̀ ра́ди и҆ а҆по́столъ, къ корі́нѳѧнѡмъ пишѧ̀, ѡ҆ лиша́ющихсѧ глаго́ла: ва́ше и҆збы́точествїе во ѻ҆́нѣхъ лише́нїе, да и҆ ѻ҆́ныхъ и҆збы́токъ бꙋ́детъ въ ва́ше лише́нїе, ꙗ҆́кѡ да бꙋ́детъ ра́венство, ꙗ҆́коже пи́сано, и҆́же мно́гое не преꙋмно́жилъ є҆́сть: и҆ и҆́же ма́лое не ᲂу҆ма́лилъ.⁶²⁷ И҆мѣ́ѧ ᲂу҆́бѡ подоба̑ющаѧ длѧ настоѧ́щагѡ вре́мени, да не пече́шисѧ ѡ҆ бꙋ́дꙋщемъ вре́мени, ꙗ҆́коже ѡ҆ днѝ є҆ди́номъ, ѡ҆ седми́цѣ и҆лѝ мѣ́сѧцѣхъ. Настꙋпи́вшꙋ бо слѣ́дꙋющагѡ днѝ вре́мени, пода́стъ ѻ҆но̀ подоба̑ющаѧ, и҆́щꙋщꙋ тѝ наипа́че ца́рствїѧ небе́снагѡ, и҆ пра́вды бж҃їѧ. И҆щи́те, глаго́летъ бо гдⷭ҇ь, ца́рствїѧ бж҃їѧ, и҆ пра́вды є҆гѡ̀, и҆ сїѧ̑ всѧ̑ приложа́тсѧ ва́мъ.⁶²⁸ Не стѧжѝ ѻ҆́трока, да не когда̀ вра́гъ, ра́ди є҆гѡ̀, воздви́гнетъ собла́знъ нѣ́кїй, и҆ возмꙋти́тъ твою̀ мы́сль пещи́сѧ ѡ҆ многоцѣ́ннѣйшихъ ꙗ҆́стїѧхъ. Не бо̀ возмо́жеши ᲂу҆жѐ ѡ҆ себѣ̀ то́кмѡ пещи́сѧ. А҆́ще бы прише́лъ по́мыслъ, ꙗ҆́кѡ длѧ тѣле́снагѡ поко́ѧ, но лꙋ́чшее помышлѧ́й дꙋхо́вный поко́й. Лꙋ́чше бо є҆́сть вои́стиннꙋ, дꙋхо́вный поко́й тѣле́снагѡ. А҆́ще бы длѧ потре́бы ѻ҆́трока пришло̀ сїѐ на мы́сль, не повини́сѧ семꙋ̀. Нѣ́сть бо сїѐ на́ше дѣ́ло, но дрꙋги́хъ ст҃ы́хъ во ѻ҆бщежи́тїи ѻ҆тє́цъ. Ѡ҆ свое́й є҆ди́ной по́льзѣ пеки́сѧ, и҆ ѡ҆́бразъ безмо́лвїѧ стѧжева́й. Не любѝ жи́ти съ людьмѝ веществолюби́выми и҆ ѕлоѡбдержи́мыми: и҆лѝ є҆ди́нъ живѝ, и҆лѝ со бра́тїѧми невеществолюби́выми и҆ є҆диномꙋ́дренными. Съ людьми́ бо веществолюби́выми и҆ ѕлоѡбде́ржными живꙋ́щїй всѧ́кѡ прїѡбщи́тсѧ и҆ са́мъ ѕлоѡбстоѧ́нїѧ и҆́хъ, и҆ порабо́таетъ человѣ́чєскимъ повелѣ́нїѧмъ, и҆ бесѣ́дамъ сꙋ́єтнымъ, и҆ и҆ны̑мъ всѣ̑мъ люты̑мъ: гнѣ́вꙋ, печа́ли, неи́стѡвымъ дѣлѡ́мъ, стра̑шнымъ собла́знѡмъ, попече́нїѧми⁶²⁹ ѡ҆ роди́телехъ, и҆ дрꙋ́жбами со сро́дники да не совраще́нъ бꙋ́деши. Но и҆ си́ми са́мыми ча́стыхъ собесѣ́дованїй ѿрица́йсѧ, да не когда̀ ѿи́мꙋтъ келе́йное безмо́лвїе, и҆ во своѝ попечє́нїѧ приведꙋ́тъ. Ѡ҆ста́ви, глаго́летъ гдⷭ҇ь, ме́ртвыхъ погребстѝ своѧ̑ мертвецы̀: ты́ же грѧдѝ по мнѣ̀.⁶³⁰ А҆́ще же и҆ ке́ллїа, въ не́йже сѣди́ши, ᲂу҆добоѡдержи́ма молво́ю бꙋ́детъ, бѣжѝ, и҆ є҆ѧ̀ не щадѝ, да не ѡ҆слабѣ́еши къ не́й по любвѝ. Всѧ̑ творѝ, всѧ̑ чинѝ, да ка́кѡ возмо́жеши безмо́лвствовати, и҆ безпопечи́теленъ бы́ти, и҆ тщи́сѧ пребыва́ти въ во́ли бж҃їей, и҆ во бра́ни съ неви́димыми. А҆́ще не мо́жеши ᲂу҆до́бь безмо́лвствовати во странѣ̀ твое́й, ѡ҆братѝ произволе́нїе твоѐ ко стра́нствїю, и҆ къ семꙋ̀ побꙋжда́й твою̀ мы́сль. Бꙋ́ди ꙗ҆́коже нѣ́кїй кꙋпе́цъ и҆зрѧ́дный, всѧ̑ длѧ безмо́лвїѧ и҆скꙋша́ющїй, и҆ безмѡ́лвнаѧ и҆ потрє́бнаѧ всѧ́чески содержа́щїй. Ѻ҆ба́че глаго́лю тѝ, стра́нствїе любѝ: свобожда́етъ бо тѧ̀ ѿ и҆скꙋше́нїй сꙋ́щихъ во свое́й странѣ̀, и҆ по́льзою то́кмѡ безмо́лвїѧ наслажда́тисѧ твори́тъ. Пребыва́нїй во гра́дѣ ᲂу҆бѣга́й, и҆ пꙋсты̑нныѧ терпѝ. Се́ бо, глаго́летъ ст҃ы́й даві́дъ, ᲂу҆дали́хсѧ бѣ́гаѧ, и҆ водвори́хсѧ въ пꙋсты́ни.⁶³¹ А҆́ще возмо́жно, ѿню́дъ во гра́дъ да не вхо́диши: ничегѡ́ бо нѣ́тъ благопотре́бнагѡ, ничегѡ̀ потре́бнагѡ, ничегѡ̀ поле́знагѡ, да житїѐ твоѐ та́мѡ ви́димо бꙋ́детъ. Ви́дѣхъ, глаго́летъ па́ки то́йже ст҃ы́й, беззако́нїе и҆ пререка́нїе во гра́дѣ.⁶³² Безмо́лвныхъ ᲂу҆́бѡ и҆ ᲂу҆едине́нныхъ и҆щѝ мѣ́стъ. Не ᲂу҆страши́сѧ гла́са си́хъ, а҆́ще бы и҆ бѣсѡ́вскаѧ мечта̑нїѧ та́мѡ ᲂу҆ви́дѣлъ ты̀, не бо́йсѧ, нижѐ да ᲂу҆бѣжи́ши ѿ по́прища своеѧ̀ по́льзы. Безбоѧ́зненнѡ претерпѝ, и҆ ᲂу҆́зриши вели̑чїѧ бж҃їѧ, застꙋпле́нїе, про́мыслъ, и҆ всѧ́кое и҆но́е и҆звѣще́нїе ѡ҆ спасе́нїи. Ча́ѧхъ бо, глаго́летъ блаже́нный ѻ҆́ный мꙋ́жъ, спаса́ющаго мѧ̀ ѿ малодꙋ́шїѧ и҆ ѿ бꙋ́ри.⁶³³ Да не побѣди́тъ парѧ́щаѧ по́хоть произволе́нїе твоѐ: паре́нїе бо по́хоти премѣнѧ́етъ ᲂу҆́мъ неѕло́бивъ.⁶³⁴ Мнѡ́гїѧ сегѡ̀ ра́ди быва́ютъ и҆скꙋшє́нїѧ. Бо́йсѧ согрѣше́нїѧ, и҆ въ ке́ллїи твое́й тве́рдъ бꙋ́ди. А҆́ще дрꙋзе́й и҆́маши, бѣ́гай ча́стыхъ съ ни́ми собесѣ́дованїй: рѣ́дцѣ бо и҆̀мъ собесѣ́дꙋѧ, бл҃гопотре́бенъ бꙋ́деши. А҆́ще же ᲂу҆разꙋмѣ́еши ѿ ни́хъ быва́ющїй тебѣ̀ вре́дъ, ѿню́дъ да не прибли́жишисѧ и҆̀мъ: дрꙋзе́й бо и҆мѣ́ти тебѣ̀ подоба́етъ поле́зныхъ, и҆ посо́бствꙋющихъ твоемꙋ̀ житїю̀. Бѣ́гай собесѣ́дованїй съ людьмѝ лꙋка́выми и҆ сварли́выми, и҆ ни со є҆ди́нымъ и҆з̾ си́хъ да живе́ши, но и҆ ѕлы́хъ и҆́хъ предложе́нїй ѿрица́йсѧ: ниже́ бо бг҃ꙋ присвоѧ́ютсѧ, нижѐ въ не́мъ пребыва́ютъ. Мꙋ́жїе ми́рнїи да бꙋ́дꙋтъ дрꙋ́зи твоѝ, бра́тїѧ дꙋхо́внїи, ѻ҆тцы̀ ст҃і́и. Си́хъ бо та́кѡ и҆ гдⷭ҇ь нарица́етъ, глаго́лѧ: мт҃и моѧ̀, и҆ бра́тїѧ, и҆ ѻ҆тцы̀ сі́и сꙋ́ть, творѧ́щїи во́лю ѻ҆ц҃а̀ моегѡ̀, и҆́же на небесѣ́хъ.⁶³⁵ Со развлека́ющимисѧ ѿ попече́нїй не водворѧ́йсѧ, нижѐ въ пи́ръ и҆дѝ съ ни́ми, да не когда́ тѧ къ свои̑мъ пре́лестѧмъ привлекꙋ́тъ, и҆ ѿ хꙋдо́жества безмо́лвїѧ ѿведꙋ́тъ: є҆́сть бо стра́сть сїѧ̀ въ ни́хъ. Не ᲂу҆клонѝ ᲂу҆́хо твоѐ во словеса̀ и҆́хъ, и҆ помышле́нїй се́рдца и҆́хъ не прїимѝ: сꙋ́ть бо пои́стиннѣ вре́дни. Къ вѣ̑рнымъ землѝ да бꙋ́детъ тѝ прилѣжа́нїе, и҆ жела́нїе се́рдца твоегѡ̀ къ ре́вности сѣ́тованїѧ и҆́хъ. Ѻ҆́чи моѝ, глаго́летъ бо даві́дъ: на вѣ̑рныѧ землѝ, посажда́ти ѧ҆̀ со мно́ю.⁶³⁶ А҆́ще же кто̀ ѿ жи́тельствꙋющихъ по любвѝ бж҃їей прише́дши къ тебѣ̀, ꙗ҆́сти зва́ти тѧ̀ бꙋ́детъ, и҆ хо́щеши и҆тѝ, и҆дѝ: но а҆́бїе въ ке́ллїю твою̀ возвраща́йсѧ. А҆́ще возмо́жно, кромѣ̀ сегѡ̀ вре́мени не спѝ николи́же, да всегда̀ съ тобо́ю пребꙋ́детъ безмо́лвїѧ благода́ть, и҆ келе́йнагѡ дѣ́ланїѧ безпрепѧ́тственное и҆мѣ́ти бꙋ́деши и҆справле́нїе. Не бꙋ́ди жела́тель до́брыхъ бра́шенъ и҆ пре́лестей ро́скоши: пита́ющаѧсѧ бо простра́ннѡ, жива̀ ᲂу҆мерла̀,⁶³⁷ ꙗ҆́коже и҆ а҆по́столъ глаго́летъ: не насы́ти чре́ва твоегѡ̀ бра́шны чꙋжды́ми, да не жела́нїе тѝ бꙋ́детъ къ си̑мъ, и҆ ко внѣ̑шнимъ трапе́замъ возбꙋ́дѧтъ въ тебѣ̀ хотѣ́нїе. Рече́но бо є҆́сть: не прельща́йтесѧ насыще́нїемъ чре́ва.⁶³⁸ А҆́ще же и҆ ча́стѡ и҆з̾ ке́ллїи твоеѧ̀ ᲂу҆ви́диши себѧ̀ зово́ма, ѿрица́йсѧ: вре́дно бо є҆́сть внѣ̀ ке́ллїи твое́й ча́стое пребыва́нїе. Ѿе́млетъ бл҃года́ть, помрача́етъ мы́сль, и҆зсꙋша́етъ жела́нїе. Ви́ждь скꙋде́льный сосꙋ́дъ вїна̀, ᲂу҆коснѣ́вшїй въ є҆ди́номъ мѣ́стѣ, и҆ неколеби́мь стоѧ́щъ, ка́кѡ прїꙋготовлѧ́етъ вїно̀ свѣ́тлое, крѣ́пкое и҆ бл҃гово́нное: а҆́ще же сѣ́мѡ и҆ ѻ҆ва́мѡ ѡ҆бно́ситсѧ, мꙋ́тное, гнꙋ́сное, всеѧ̀ вкꙋ́пѣ хꙋдобы̀ дро́ждныѧ непрїѧ́тность показꙋ́ющее. Въ семꙋ̀ ᲂу҆̀бо прибли́жившисѧ, тщи́сѧ сохрани́ти по́льзꙋ. Пресѣка́й мно́гихъ без̾ѡбра̑зїѧ, да не ᲂу҆́мъ тво́й по́мыслы ѡ҆бстои́мь бꙋ́детъ, и҆ возмꙋти́тъ безмо́лвїѧ ѡ҆́бразъ. Ѡ҆ рꙋкодѣ́лїи пеки́сѧ, и҆ сїѐ и҆мѣ́й, а҆́ще возмо́жно, и҆ дне́мъ и҆ но́щїю, є҆́же не ѡ҆тѧгчи́ти кого̀, па́че же и҆ подава́ти, ꙗ҆́коже ᲂу҆вѣщава́етъ и҆ а҆по́столъ па́ѵелъ,⁶³⁹ да си́мъ дꙋ́хъ ᲂу҆ны́нїѧ побѣди́ши, и҆ дрꙋгі̑ѧ всѣ̀ по́хѡти вра́жєскїѧ ᲂу҆мертви́ши: прилѣжи́тъ бо пра́здности дꙋ́хъ ᲂу҆ны́нїѧ. Въ по́хотѣхъ є҆́сть, ꙗ҆́коже глаго́летъ соломѡ́нъ, всѧ́къ пра́здный: ѿ даѧ́нїѧ и҆ прїѧ́тїѧ не и҆збѣжи́ши грѣха̀.⁶⁴⁰ А҆́ще ᲂу҆́бѡ продае́ши, а҆́ще кꙋпꙋ́еши, ма́лый нѣ́кїй пра́ведный ᲂу҆бы́токъ себѣ̀ прїимѝ, да не тща́тельными ѡ҆́бразы корыстолю́бїѧ къ цѣнѣ̀ доведе́нъ бꙋ́дꙋчи, во врє́дныѧ вины̑ дꙋшє́вныѧ впаде́ши, въ люрпрѣ̑нїѧ, клѧтвопрестꙋплє́нїѧ и҆ и҆змѣнє́нїѧ слове́съ твои́хъ, и҆ таковы́ми честно́е досто́инство своеѧ̀ во́ли ѡ҆безче́стиши и҆ посрами́ши. Та́кѡ и҆ ты̀ помышлѧ́ѧ, ѿ даѧ́нїѧ твоегѡ̀ и҆ прїѧ́тїѧ твоегѡ̀ храни́сѧ. А҆́ще же лꙋ́чшее и҆збере́ши, и҆ сїѐ тѝ возмо́жно є҆́сть, да на дрꙋга́го нѣ́коего вѣ́рнаго мꙋ́жа возве́рзеши твоѐ попече́нїе, да та́кѡ благодꙋ́шенъ бы́въ, благі̑ѧ и҆ ра́дѡстныѧ и҆мѣ́ти бꙋ́деши ᲂу҆пова̑нїѧ. Си́мъ тѧ̀ та́кѡ ᲂу҆вѣщава́ти вѣ́сть потре́бнѡ безмо́лвїѧ ѡ҆́бразъ. Дне́сь и҆ прилага́емыхъ пото́мъ во ѻ҆́номъ дѣ́лъ предложꙋ̀ тѝ разꙋмѣ́нїе: ты́ же мѝ внемлѝ, и҆ творѝ, ꙗ҆̀же заповѣ́даю тѝ. Сѣдѧ̀ въ ке́ллїи твое́й, соберѝ тво́й ᲂу҆́мъ, помѧнѝ де́нь сме́рти, ви́ждь тогда̀ тѣлесѐ ᲂу҆мерщвле́нїе, помышлѧ́й ѡ҆ бѣ́дствїи, прїимѝ трꙋ́дъ, позна́й сꙋетꙋ̀ мі́ра сегѡ̀, и҆ кро́тость, и҆ тща́нїе да возмо́жеши при́снѡ пребыва́ти въ то́мже произволе́нїи безмо́лвїѧ, и҆ да не и҆знемо́жеши. Помѧни́ же и҆ ны́нѣшнее во а҆́дѣ состоѧ́нїе: помышлѧ́й, ка́кѡ сꙋ́ть та́мѡ дꙋ́шы; въ како́мъ го́рестнѣйшемъ молча́нїи; и҆лѝ въ како́мъ лютѣ́йшемъ стена́нїи; въ коли́комъ стра́хѣ и҆ тꙋже́нїи; и҆ въ како́мъ ча́ѧнїи непреста́нныѧ болѣ́зни, дꙋше́вныхъ и҆ неконча́емыхъ сле́зъ; Но и҆ де́нь воскресе́нїѧ и҆ предста́нїѧ къ бг҃ꙋ помѧнѝ: помышлѧ́й стра́шное ѻ҆́ное и҆ гро́зное сꙋди́ще: воспомина́й ѿложє́ннаѧ согрѣша́ющымъ, стꙋ́дъ пред̾ бг҃омъ и҆ хрⷭ҇то́мъ є҆гѡ̀: а҆́гг҃лами, а҆рха́гг҃лами, властьмѝ и҆ всѣ́ми человѣ́ки, и҆ мꙋ̑ки всѧ̑, ѻ҆́гнь вѣ́чный, че́рвь неꙋмира́ющїй, та́ртаръ, тьмꙋ̀, све́рхъ всегѡ̀ сегѡ̀ скре́жетъ зꙋбѡ́въ, стра́хи, и҆ про́чыѧ мꙋ̑ки. Воспомина́й и҆ пра́вєднымъ ѿложє́ннаѧ блага̑ѧ, дерзнове́нїе къ бг҃ꙋ ѻ҆ц҃ꙋ̀, и҆ хрⷭ҇тꙋ̀ є҆гѡ̀, а҆́гг҃лѡмъ, а҆рха́гг҃лѡмъ, властє́мъ, и҆ всемꙋ̀ наро́дꙋ, ца́рствїе, и҆ дарова̑нїѧ сегѡ̀, ра́дость, и҆ наслажде́нїе: ѻ҆боѧ̑ сїѧ̑ приводѝ себѣ̀ на па́мѧть: помышлѧ́ѧ и҆ ѡ҆ сꙋдѣ̀ грѣ́шникѡвъ сѣ́тꙋй, пла́чи, воспрїимѝ плаче́внꙋю мы́сль, боѧ́сѧ, да не и҆ ты̀ са́мъ въ си́хъ бꙋ́деши: помышлѧ́ѧ же ѡ҆б̾ ѿложе́нныхъ пра́вєднымъ бл҃ги́хъ ра́дꙋйсѧ, весели́сѧ, и҆ торжествꙋ́й, и҆ си́ми потщи́сѧ наслади́тисѧ, ѻ҆́ныхъ же ѿчꙋжда́тисѧ. Блюдѝ, да не когда̀ забꙋ́деши сїѧ̑, а҆́ще въ ке́ллїи твое́й безмо́лвствꙋеши, а҆́ще гдѣ́либо внѣ̀, ѿ па́мѧтованїѧ си́хъ не ѿвраща́й мы́сли, ꙗ҆́кѡ да понѐ си́ми нечи́стыхъ и҆ вре́дныхъ и҆збѣжи́ши по́мыслѡвъ. По́стъ тѝ да бꙋ́детъ, є҆ли́ка си́ла пред̾ гдⷭ҇емъ: ѻ҆́нъ беззакѡ́нїѧ твоѧ̑ и҆ согрѣшє́нїѧ ѡ҆чища́етъ, чествꙋ́етъ дꙋ́шꙋ, ѡ҆свѧща́етъ ра́зꙋмъ, бѣ́сы прогонѧ́етъ, съ бг҃омъ бы́ти ᲂу҆строева́етъ. Є҆ди́ною же въ де́нь ꙗ҆́ждь, втори́цею не пожела́й, да не мно́гѡ и҆ждиви́теленъ бꙋ́деши, и҆ возмꙋти́ши твоѐ мꙋдрова́нїе. Ѿсю́дꙋ ѡ҆би́ловати возмо́жеши въ дѣ́лѣхъ благотворе́нїѧ, и҆ стра̑сти тѣ́ла своегѡ̀ ᲂу҆мертви́ти. А҆́ще же прилꙋча́тсѧ тѝ дрꙋ́зи, и҆ потре́бно и҆ втори́цею и҆ трети́цею ꙗ҆́сти, не печа́льсѧ, не сѣ́тꙋй: ра́дꙋйсѧ же па́че, послꙋшли́въ потре́бѣ бы́вши, и҆ втори́цею и҆ трети́цею ꙗ҆́ждь, благодарѝ бг҃а, ꙗ҆́кѡ зако́нъ любвѝ и҆спо́лнилъ, и҆ ꙗ҆́кѡ самаго̀ бг҃а и҆мѣ́ти бꙋ́деши твоеѧ̀ по́льзы строи́телѧ. Прилꙋча́етсѧ же, ꙗ҆́кѡ и҆ не́мощь тѣле́снаѧ потре́бꙋетъ два́жды и҆ три́жды и҆ мно́гажды ꙗ҆́сти, си́це да не бꙋ́детъ ѡ҆печа́ленъ тво́й по́мыслъ: не подоба́етъ бо тѣлє́сныѧ трꙋды̀ житїѧ̀ въ не́мощехъ ᲂу҆де́рживати, но ᲂу҆стꙋпа́ти комꙋ́либо, да въ тѣ́хже жи́тельствованїѧ трꙋдѣ́хъ ᲂу҆пражднѧ́етсѧ. Ѡ҆ ᲂу҆дале́нїи же ѿ бра́шенъ не возбрани́ло чегѡ́либо не ꙗ҆́сти бж҃їе сло́во, но речѐ: сѐ да́хъ ва́мъ всѧ̑, ꙗ҆́кѡ ѕє́лїѧ травна̑ѧ ꙗ҆ди́те, ничто́же разсꙋжда́юще:⁶⁴¹ и҆, не входѧ̑щаѧ во ᲂу҆ста̀ сквернѧ́тъ человѣ́ка.⁶⁴² Оу҆далѧ́тисѧ ᲂу҆̀бо ѿ бра́шенъ, сїѐ твоегѡ̀ произволе́нїѧ є҆́сть, и҆ трꙋ́дъ дꙋше́вный. Бдѣ́нїе, и҆ долꙋлега́нїе, и҆ и҆ны̑ѧ всѧ̑ ѕлострада̑нїѧ любе́знѡ сносѝ, взира́ѧ на хотѧ́щꙋю ѿкры́тисѧ тѝ сла́вꙋ со всѣ́ми ст҃ы́ми: недостѡ́йны бо стра̑сти, глаго́летъ, ны́нѣшнѧгѡ вре́мене къ хотѧ́щей сла́вѣ ꙗ҆ви́тисѧ въ на́съ.⁶⁴³ А҆́ще печа́лишисѧ, моли́сѧ, ꙗ҆́коже пи́сано є҆́сть: моли́сѧ же со стра́хомъ и҆ тре́петомъ, болѣ́зненнѡ, тре́звеннѡ и҆ бо́дреннѡ. Та́кѡ моли́тисѧ подоба́етъ наипа́че на ѕлонра́вныхъ врагѡ́въ. Є҆гда́ бо сі́и ᲂу҆ви́дѧтъ на́съ на мл҃твѣ стоѧ́щихъ, тогда̀ и҆ ѻ҆нѝ тща́тельнѣ нахо́дѧтъ на на́съ, влага́юще ѻ҆́наѧ во ᲂу҆́мъ на́шъ, ꙗ҆̀же не подоба́етъ во вре́мѧ моли́твы воспомина́ти, и҆лѝ мы́слити, да не въ плѣ́нъ ᲂу҆́мъ на́шъ ѿвлекꙋ́тъ, и҆ пра́зднымъ и҆ сꙋ́етнымъ и҆ безполе́знымъ творѧ́тъ моле́нїе и҆ мольбꙋ̀. Сꙋ́етна бо пои́стиннѣ и҆ безполе́зна є҆́сть моли́тва, проше́нїе и҆ мольба̀, є҆гда̀ не ꙗ҆́коже предрече́но, со стра́хомъ и҆ тре́петомъ, тре́звеннѡ и҆ бо́дреннѡ соверша́етсѧ. А҆́ще къ человѣ́кꙋ царю̀ приходѧ̀ нѣ́кто, со стра́хомъ и҆ тре́петомъ и҆ тре́звенностїю проше́нїе соверша́етъ: не мно́гѡ ли па́че къ бг҃ꙋ влⷣцѣ всѣ́хъ и҆ хрⷭ҇тꙋ̀, къ цр҃ю̀ ца́рствꙋющихъ и҆ гдⷭ҇ꙋ госпо́дствꙋющихъ подо́бнѡ предста́ти подоба́етъ, и҆ та́кожде мольбꙋ̀ и҆ проше́нїе твори́ти; мно́гагѡ же и҆ тре́бꙋетсѧ. Ꙗ҆́кѡ томꙋ̀ и҆ всѐ ᲂу҆́мное а҆́гг҃лѡвъ мно́жество и҆ ли́къ со стра́хомъ слꙋжа́щи, и҆ тре́петомъ славосло́вѧщи, непреста́ннꙋю возсыла́етъ пѣ́снь, со безнача́льнымъ є҆гѡ̀ ѻ҆ц҃е́мъ, и҆ всест҃ы́мъ и҆ соприсносꙋ́щнымъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

а҃. И҆з̾ противлѧ́ющихсѧ врагѡ́въ дѣ́ѧтельномꙋ хꙋдо́жествꙋ, пе́рвые на бра́ни стоѧ́тъ тѣ̀, и҆̀мже ввѣ́рены по́хѡти чревобѣ́сїѧ, и҆ сребролю́бїе въ на́съ влага́ющїи, и҆ ко сла́вѣ человѣ́ческой на́съ возбꙋжда́ющїи: про́чїи же всѣ̀, созадѝ си́хъ и҆дѧ̀, ᲂу҆ѧзвлѧ́емыхъ ѿ ни́хъ прїе́млютъ. Не мо́жно бо впа́сти въ рꙋ́ки дꙋ́ха любодѣѧ́нїѧ не па́дшꙋ ѿ чревобѣ́сїѧ: и҆ не мо́жно возмꙋти́тисѧ ꙗ҆́ростїю, не борю́щꙋсѧ ра́ди бра́шенъ, и҆лѝ бога́тства, и҆лѝ сла́вы: и҆ не мо́жно дꙋ́ха печа́ли и҆збѣжа́ти, не претерпѣ́вшемꙋ лише́нїѧ си́хъ всѣ́хъ: нижѐ и҆збѣжи́тъ кто̀ го́рдости, пе́рвагѡ порожде́нїѧ дїа́волѧ, не и҆стреби́вши ко́рень всѣ́хъ ѕѡ́лъ сребролю́бїе. ꙗ҆́кѡ ᲂу҆бо́жество мꙋ́жа смирѧ́етъ, по сло́вꙋ соломѡ́на.⁶⁴⁴ И҆ вкра́тцѣ рещѝ, не мо́жно человѣ́кꙋ подпа́сти врагꙋ̀, не ᲂу҆ѧзви́вшисѧ пе́рвѣе ѿ ѻ҆́ныхъ нача́льныхъ. Тѣ́мже и҆ трѝ сїѧ̑ по́мыслы дїа́волъ нѣ́когда сп҃си́телю приведѐ: а҃, просѧ̀ ка́менїе хлѣ́бы бы́ти: пото́мъ в҃, и҆ мі́ръ ѡ҆бѣщева́ѧ, а҆́ще па́дъ покло́нитсѧ: и҆ г҃, глаго́лѧ, ꙗ҆́кѡ а҆́ще послꙋ́шаетъ, то просла́витсѧ, ничесѡ́же ѿ толи́кагѡ грѣха̀ не пострада́вши. И҆́хже гдⷭ҇ь на́шъ превы́шшїй ꙗ҆вле́йсѧ, вспѧ́ть дїа́волꙋ и҆тѝ повелѣва́ше, ᲂу҆ча̀ на́съ си́мъ, ꙗ҆́кѡ не мо́жно побѣди́ти дїа́вола, не презрѣ́вшымъ трѝ сїѧ̑ по́мыслы.

в҃. Всѣ̀ бѣсо́вскїе по́мыслы влага́ютъ въ дꙋ́шꙋ помышлє́нїѧ чꙋ́вственныхъ веще́й, въ ни́хже ѡ҆бразꙋ́ѧсѧ ᲂу҆́мъ, ви́ды веще́й ѻ҆́ныхъ въ себѣ̀ но́ситъ, и҆ ѿ са́магѡ ᲂу҆́бѡ дѣ́ла познае́тъ прибли́жившагосѧ врага̀, ꙗ҆́коже, а҆́ще ѿтщети́вшагѡ мѧ̀ и҆лѝ ѡ҆безче́стившагѡ въ помышле́нїи мое́мъ лицѐ бꙋ́детъ, то̀ ѡ҆блича́етсѧ противора́тꙋющїй памѧтоѕло́бїѧ по́мыслъ. А҆́ще па́ки бога́тства воспомина́нїе бꙋ́детъ, и҆лѝ сла́вы, то̀ ѿ дѣ́ла ꙗ҆́вѣ познае́тсѧ ѡ҆скорблѧ́ющїй на́съ: и҆ во и҆́нныхъ по́мыслѣхъ та́кожде ѿ ве́щи ѡ҆брѧ́щеши предстоѧ́щаго и҆ под̾ꙋща́ющаго. Не всѣ̑мъ же воспомина́нїѧмъ таковы́хъ дѣ́лъ ѿ де́монѡвъ глаго́лю слꙋча́тисѧ: поне́же є҆сте́ственнѡ и҆ са́мъ ᲂу҆́мъ дви́жимь ѿ человѣ́ка, воѡбража́етъ бы̑вшаѧ: но кі́и воспомина̑нїѧ, ꙗ҆́рость и҆ по́хоть чрез̾есте́ственнꙋю вкꙋ́пѣ нано́сѧтъ; Смꙋще́нїѧ бо ра́ди си́лъ си́хъ, ᲂу҆́мъ помышле́нїемъ любодѣ́йствꙋетъ и҆ бо́ретсѧ, не могі́й предзрѣ́ти законоположи́вшаго є҆мꙋ̀ бг҃а. Поне́же свѣ́тлость ѻ҆́наѧ, во вре́мѧ моли́твы во ᲂу҆мѣ̀ ꙗ҆влѧ́етсѧ, є҆гда̀ не быва́етъ помышле́нїй ѡ҆ ве́щехъ.

г҃. Не ѿри́нетъ стра́стныхъ воспомина́нїй человѣ́къ, а҆́ще не сотвори́тъ прилѣжа́нїѧ, по́хоть поще́нїѧми, бдѣ́нїѧми и҆ долꙋлега́нїѧми побѣди́ти, ꙗ҆́рость долготерпѣ́нїемъ, неѕло́бїемъ и҆ непамѧтоѕло́бїемъ ᲂу҆кроти́ти. Ѿ си́хъ бо двꙋ́хъ страсте́й є҆два̀ не всѣ̀ ражда́ютсѧ по́мыслы, вверга́ющїи ᲂу҆́мъ во всегꙋби́тельство и҆ поги́бель. Не возмо́жно же стра̑сти сі́и побѣди́ти, не презрѣ́вшымъ всеконе́чнѡ бра́шенъ, и҆ бога́тствъ, и҆ сла́вы, є҆ще́ же и҆ своегѡ̀ тѣ́ла, хотѧ́щихъ ра́ди мно́гажды и҆знꙋрѧ́ти ѻ҆́ное. Вельмѝ ᲂу҆̀бо нꙋ́жно подража́ти бѣ́дствꙋющымъ въ мо́ри, и҆ творѧ́щымъ и҆зверже́нїе сосꙋ́дѡвъ ѿ наси́лїѧ вѣ́трѡвъ и҆ востаю́щихъ во́лнъ. Но здѣ̀ внима́ти подоба́етъ тща́тельнѡ, да не твори́мъ и҆зверже́нїѧ сосꙋ́дѡвъ длѧ тогѡ̀, что́бы показа́тисѧ лю́демъ: поне́же воспрїе́млемъ мздꙋ̀ свою̀, и҆ дрꙋго́е лютѣ́йшее пе́рвагѡ пости́гнетъ на́съ кораблекрꙋше́нїе, противодхнꙋ́вшꙋ ѕло́мꙋ дꙋ́хꙋ тщесла́вїѧ. Тѣ́мже и҆ гдⷭ҇ь на́шъ ко́рмчаго, си́рѣчь ᲂу҆́мъ, поꙋча́ѧ, глаго́летъ: внемли́те ми́лостыни ва́шеѧ не твори́ти пред̾ человѣ́ки, да ви́дими бꙋ́дете и҆́ми: а҆́ще ли же нѝ, мзды̀ не и҆́мате ѿ ѻ҆ц҃а̀ на́шегѡ, и҆́же є҆́сть на нб҃сѣ́хъ.⁶⁴⁵ И҆ па́ки: є҆гда̀ мо́литесѧ, глаго́летъ, не бꙋ́дите ꙗ҆́коже лицемѣ́ри, ꙗ҆́кѡ лю́бѧтъ въ со́нмищахъ, и҆ въ сто́гнахъ моли́тисѧ, ꙗ҆́кѡ да ꙗ҆вѧ́тсѧ человѣ́кѡмъ: а҆ми́нь глаго́лю ва́мъ, ꙗ҆́кѡ воспрїе́млютъ мздꙋ̀ свою̀.⁶⁴⁶ Є҆гда́ же постите́сѧ, не бꙋ́дите, ꙗ҆́коже лицемѣ́ри, сѣ́тꙋюще: помрача́ютъ бо ли́ца своѧ̑, ꙗ҆́кѡ да ꙗ҆вѧ́тсѧ человѣ́кѡмъ постѧ́щесѧ. А҆ми́нь глаго́лю ва́мъ, ꙗ҆́кѡ воспрїе́млютъ мздꙋ̀ свою̀.⁶⁴⁷ Но внима́ти подоба́етъ здѣ̀ врачꙋ̀ дꙋ́шъ, ка́кѡ ѻ҆́нъ ми́лостынею ꙗ҆́рость врачꙋ́етъ, мл҃твою же ᲂу҆́мъ ѡ҆чища́етъ, и҆ та́кожде посто́мъ по́хоть ᲂу҆мерщвлѧ́етъ: ѿ ни́хже быва́етъ но́вый а҆да́мъ, ѡ҆бновлѧ́емый по ѡ҆́бразꙋ созда́вшагѡ є҆го̀: въ не́мже нѣ́сть, безстра́стїѧ ра́ди, мꙋ́жескїй по́лъ и҆ же́нскїй: нижѐ є҆ди́ныѧ ра́ди вѣ́ры є҆́ллинъ и҆ і҆ꙋде́й, ѡ҆брѣ́занїе и҆ неѡбрѣ́занїе, ва́рваръ и҆ скѵ́ѳъ, ра́бъ и҆ свобо́дь, но всѧ́чєскаѧ во всѣ́хъ хрⷭ҇то́съ.⁶⁴⁸

Ѡ҆ сновидѣ́нїѧхъ.

д҃. И҆спыта́ти подоба́етъ, ка́кѡ въ со́нныхъ мечта́нїѧхъ бѣ́си ѡ҆́бразы и҆ ви́ды во ᲂу҆мѣ̀ на́шемъ творѧ́тъ: семꙋ́ бо подоба́етъ прилꙋча́тисѧ ᲂу҆мꙋ̀, и҆лѝ ѻ҆чи́ма ви́дѧщꙋ, и҆лѝ слꙋ́хомъ слы́шащꙋ, и҆лѝ чꙋ́вствомъ каковы́млибо ѡ҆щꙋща́ющꙋ, и҆лѝ ѿ па́мѧти, ꙗ҆́же ѡ҆бразова̑нїѧ твори́тъ во ᲂу҆мѣ̀, возбꙋжда́ѧ, є҆́же ра́ди тѣ́ла и҆мѧ́ше. Бѣ́си ᲂу҆́бѡ, мни́тсѧ мнѣ̀, па́мѧть возбꙋжда́юще, ѡ҆бразꙋ́ютъ ᲂу҆́мъ: ѻ҆́рганы бо ѿ сна̀ ѡ҆бдержа́тсѧ недѣ́ѧтельны. Ка́кѡ ᲂу҆́бѡ па́ки па́мѧть возбꙋжда́ютъ, вопроси́ти подоба́етъ: не́гли страстьмѝ; И҆ сїѐ ꙗ҆́вно ѿ тогѡ̀, ꙗ҆́кѡ чи́стые и҆ безстра́стные не претерпѣва́ютъ сицева́гѡ: є҆́сть же нѣ́кое движе́нїе па́мѧти и҆ просто́е ѿ на́съ быва́ющее, и҆лѝ ѿ ст҃ы́хъ си́лъ, по немꙋ́же со ст҃ы́ми бесѣ́дꙋемъ, и҆ вечерѧ́емъ. Ѻ҆ба́че внима́ти подоба́етъ, ꙗ҆́кѡ кі́и воѡбражє́нїѧ дꙋша̀ съ тѣ́ломъ и҆́мать, сі́и кромѣ̀ тѣ́ла па́мѧть повторѧ́етъ. И҆ сїѐ ꙗ҆́вно ѡ҆ тогѡ̀, что̀ ча́стѡ во снѣ̀ и҆мѣ́емъ мы̀ сїѐ, поко́ющꙋсѧ тѣ́лꙋ: ꙗ҆́коже бо мо́жно по́мнити во́дꙋ и҆ со жа́ждою и҆ безъ жа́жды, та́кѡ мо́жно по́мнити зла́то съ лихоима́нїемъ, и҆ без̾ лихоима́нїѧ, и҆ во и҆ны́хъ та́кожде ве́щехъ. А҆ ꙗ҆́кѡ многоразли̑чныѧ быва́ютъ мечта̑нїѧ, сїѐ є҆́сть зна́менїе ѕлокова́рствїѧ бѣсо́вскагѡ. Вкꙋ́пѣ же и҆ сїѐ вѣ́дѣти подоба́етъ, ꙗ҆́кѡ бѣ́си и҆ внѣ̑шнїѧ вє́щи ᲂу҆потреблѧ́ютъ къ мечта́нїю, ꙗ҆́коже шꙋ́мъ во́лнъ длѧ пла́вающихъ.

є҃. Вельмѝ посо́бствꙋетъ намѣ́ренїю врагѡ́въ ꙗ҆́рость на́ша, чрез̾есте́ственнѡ дви́жима, и҆ ко всѧ́комꙋ и҆́хъ ѕлокова́рствїю препотре́бна быва́етъ. Тѣ́мже дне́мъ и҆ но́щїю возмꙋща́ти ю҆̀ ни є҆ди́нъ и҆з̾ ни́хъ дерза́етъ. Но є҆гда̀ ᲂу҆ви́дѧтъ ю҆̀ свѧ́заннꙋю кро́тостїю, тогда̀ под̾ пра́ведными предло́гами а҆́бїе ю҆̀ ѿрѣша́ютъ, да ѻ҆стрѣ́йшею бы́въ ко ѕвѣ̑рскимъ и҆́хъ по́мысламъ потре́бна бꙋ́детъ. Тѣ́мже ни по пра́вєднымъ, ни по непра́вєднымъ дѣлѡ́мъ не подоба́етъ ѻ҆́нꙋю раздража́ти, нижѐ ѕлы́й ме́чь дава́ти под̾ꙋща́ющымъ: є҆́же ча́стѡ мно́гихъ творѧ́щихъ вѣ́мъ, и҆ па́че, не́жели подоба́етъ, за ма̑лыѧ вины̑ воспалѧ́ющихсѧ. Чесѡ́ бо ра́ди, рцы́ ми, встꙋпа́еши а҆́бїе во бра́нь, а҆́ще бра́шно, бога́тство и҆ сла́вꙋ презрѣ́лъ: что̀ и҆ пита́еши пса̀, ничто́же и҆мꙋ́щимъ показꙋ́ѧсѧ; А҆́ще же се́й ла́етъ и҆ на люде́й нахо́дитъ, ꙗ҆́вѣ, ꙗ҆́кѡ и҆́мать что́либо, и҆ сїѐ стрещѝ хо́щетъ. Но а҆́зъ таково́мꙋ дале́че ѿ чи́стыѧ мл҃твы ᲂу҆пова́ю бы́ти, вѣ́дый па́гꙋбнꙋю ꙗ҆́рость таковы́ѧ моли́твы. Све́рхъ же си́хъ ᲂу҆дивлѧ́юсѧ, ꙗ҆́кѡ и҆ ст҃ы́хъ таковы́й забы̀, дв҃да вопїю́ща: преста́ни ѿ гнѣ́ва, и҆ ѡ҆ста́ви ꙗ҆́рость.⁶⁴⁹ Є҆кклесїа́ста же заповѣ́дꙋюща: ѿста́ви ꙗ҆́рость ѿ се́рдца твоегѡ̀, и҆ ѿри́ни лꙋка́вство ѿ пло́ти твоеѧ̀.⁶⁵⁰ А҆пⷭ҇ла же повелѣва́юща, воздѣва́ти на всѧ́кое вре́мѧ, и҆ на всѧ́комъ мѣ́стѣ преподѡ́бныѧ рꙋ́ки без̾ гнѣ́ва. и҆ размышле́нїй.⁶⁵¹ Не семꙋ́ ли наꙋча́емсѧ и҆ та́инственнѣ ѿ дре́внѧгѡ ѻ҆бы́чаѧ люде́й, выгонѧ́ти и҆з̾ домѡ́въ псѡ́въ во вре́мѧ моли́твы; є҆́же показꙋ́етъ, ꙗ҆́кѡ не подоба́етъ бы́ти въ молѧ́щихсѧ ꙗ҆́рости, и҆ ꙗ҆́рость ѕмїє́въ вїно̀ и҆́хъ тѣ́мже вїна̀ назѡре́и ᲂу҆далѧ́лисѧ.⁶⁵² А҆ ѡ҆ се́мъ, ꙗ҆́кѡ не подоба́етъ пещи́сѧ ѡ҆ ѻ҆де́ждѣ, и҆лѝ бра́шнахъ, мню̀, и҆зли́шно писа́ти, самомꙋ́ бо сп҃си́телю во є҆ѵⷢ҇лїи запреща́ющꙋ: не пецы́тесѧ, глаго́летъ, дꙋше́ю ва́шею, что̀ ꙗ҆́сте, и҆лѝ что̀ пїе́те, и҆лѝ во что̀ ѡ҆блече́тесѧ.⁶⁵³ Ꙗ҆зы́чникѡвъ бо є҆́сть дѣ́ло сїѐ и҆ невѣ́рꙋющихъ, ѿверга́ющихъ про́мыслъ влⷣчень, и҆ творца̀ ѿрица́ющихсѧ: хрⷭ҇тїа́нъ же всеконе́чнѡ сїѐ чꙋ́ждо, ᲂу҆вѣ́ровавшихъ, ꙗ҆́кѡ нѣ́когда и҆ двѣ̀ пти̑цы цѣни̑мыѧ а҆сса́рїемъ под̾ смотре́нїемъ ст҃ы́хъ а҆́гг҃лъ сꙋ́ть. Ѻ҆ба́че и҆ се́й ѻ҆бы́чай и҆́мꙋтъ бѣ́си, є҆́же по нечи́стыхъ по́мыслѣхъ влага́ти и҆ по́мыслы попече́нїѧ, да ᲂу҆клони́тсѧ і҆и҃съ, мнѡ́гимъ сꙋ́щымъ помышле́нїѧмъ на мѣ́стѣ ᲂу҆ма̀, и҆ безпло́дно бꙋ́детъ сло́во, подавлѧ́емо ѿ по́мыслѡвъ попече́нїѧ. Ѿло́жше ᲂу҆̀бо сі́и, возве́ргнемъ печа́ль на́шꙋ на гдⷭ҇а, дово́льствꙋѧсѧ сꙋ́щимъ, и҆ ᲂу҆бо́гꙋю жи́знь и҆ ѻ҆де́ждꙋ и҆мѣ́ѧ, роди́телей тщесла́вїѧ по всѧ́къ де́нь да совлека́емсѧ. А҆́ще же кто̀ мни́тъ, ꙗ҆́кѡ безѡбра́зенъ ѻ҆́нъ по ᲂу҆бо́гой ѻ҆де́ждѣ, да взира́етъ на ст҃а́го па́ѵла, въ зимѣ̀ и҆ наготѣ̀ ѡ҆жида́ющаго вѣнца̀ пра́вды. Но поне́же а҆пⷭ҇лъ мі́ръ се́й позо́рищемъ и҆ по́прищемъ и҆менова̀, да вѣ́мы, а҆́ще є҆́сть возмо́жно, ѡ҆бле́кшемꙋсѧ въ по́мыслы попече́нїѧ тещѝ къ по́чести вы́шнѧгѡ зва́нїѧ бж҃їѧ, и҆лѝ бра́тисѧ съ нача́лы, со властьмѝ и҆ съ мїродержи́тели тьмы̀ вѣ́ка сегѡ̀. а҆́зъ ᲂу҆́бѡ вѣ́мъ ѿ са́мыѧ чꙋ́вственныѧ наꙋча́емь по́вѣсти. Ꙗ҆́коже бо текꙋ́щїй къ по́прищꙋ возбране́нъ бꙋ́детъ и҆ ᲂу҆держа́нъ ѿ хїтѡ́на: си́це ᲂу҆́мъ ѿ по́мыслѡвъ попече́нїѧ, а҆́ще и҆́стинно сло́во глаго́лющее, ꙗ҆́кѡ ᲂу҆́мъ во свое́мъ пребыва́етъ сокро́вищи. И҆дѣ́же бо, глаго́летъ, сокро́вище твоѐ є҆́сть, тꙋ̀ бꙋ́детъ и҆ се́рдце твоѐ.⁶⁵⁴

ѕ҃. И҆з̾ по́мыслѡвъ и҆ны́е ѿсѣка́ютъ, и҆ны́е же са́ми ѿсѣка́ютсѧ: ѿсѣка́ютъ лꙋка́вые по́мыслы благі́е, ѿсѣка́ютсѧ же ѿ благи́хъ лꙋка́вые. Дх҃ъ ᲂу҆́бѡ ст҃ы́й перворожде́нномꙋ вне́млетъ по́мыслꙋ, и҆ по немꙋ̀ ѡ҆сꙋжда́етъ ны̀, и҆лѝ прїе́млетъ. А҆ є҆́же глаго́лю, сїѐ є҆́сть: и҆мѣ́ю нѣ́кїй по́мыслъ страннолю́бїѧ, и҆ и҆мѣ́ю ᲂу҆́бѡ ѡ҆ гдⷭ҇ѣ, но се́й, наше́дшꙋ и҆скꙋша́ющемꙋ по́мыслꙋ, ѿсѣка́етсѧ под̾ꙋща́ющемꙋ страннолю́бствовати сла́вы ра́ди. И҆ па́ки, и҆мѣ́ю страннолю́бїѧ по́мыслъ, дабы̀ ꙗ҆ви́тисѧ лю́демъ: но се́й, наше́дшꙋ лꙋ́чшемꙋ по́мыслꙋ, ѿсѣка́етсѧ, ᲂу҆правлѧ́ющемꙋ ко гдⷭ҇ꙋ па́че добродѣ́тель на́шꙋ, и҆ не длѧ показа́нїѧ сїѧ̑ твори́ти на́съ понꙋжда́ющемꙋ.

з҃. По́мыслѡвъ а҆́гг҃льскихъ, и҆ человѣ́ческихъ, и҆ сꙋ́щихъ ѿ де́монѡвъ, сїѐ разли́чїе со мно́гимъ наблюде́нїемъ бы́ти позна́хомъ, ꙗ҆́кѡ, вопе́рвыхъ а҆́гг҃льстїи є҆стєства̀ веще́й и҆спытꙋ́ютъ и҆ дꙋхѡ́вныѧ и҆́хъ мы̑сли и҆зыскꙋ́ютъ: сі́есть, чесѡ̀ ра́ди бы́сть зла́то, и҆ почто̀ пеща́нымъ въ части́цахъ землѝ посѣ́ѧсѧ, и҆ со мно́гимъ ᲂу҆си́лїемъ и҆ трꙋдо́мъ ѡ҆брѣта́етсѧ; ка́кѡ же ѡ҆брѣ́тенное водо́ю мо́етсѧ, и҆ ѻ҆гню̀ предае́тсѧ, и҆ си́це въ рꙋ́ки хꙋдо́жникѡвъ влага́етсѧ, творѧ́щихъ свѣ́щникъ ски́нїи, и҆ ѳѷмїа́мникъ, и҆ кади̑льницы, и҆ ча́шы, въ ни́хже не ктомꙋ̀ ны́нѣ пїе́тъ, по благода́ти сп҃си́телѧ на́шегѡ, вавѷлѡ́нскїй ца́рь, но клео́па прино́ситъ се́рдце горѧ́щее ѿ си́хъ та́инствъ. Бѣсо́вскїй же по́мыслъ си́хъ не вѣ́сть и҆ не разꙋмѣ́етъ, но є҆ди́ное стѧжа́нїе чꙋ́вственнагѡ зла́та безстꙋ́днѡ предлага́етъ, и҆ ᲂу҆тѣ́хꙋ ѿ сегѡ̀ и҆ сла́вꙋ бꙋ́дꙋщꙋю предсказꙋ́етъ. Человѣ́ческїй же по́мыслъ ни стѧжа́нїѧ не и҆́щетъ, нижѐ и҆спытꙋ́етъ, чегѡ̀ є҆́сть зна́менїемъ зла́то: но то́кмѡ просты́й ви́дъ зла́та въ мы́сли без̾ стра́сти и҆ лихоима́нїѧ воѡбража́етъ. Сїе́ же са́мое сло́во и҆ въ разсꙋжде́нїе дрꙋги́хъ веще́й и҆зрече́но бꙋ́детъ, по пра́вилꙋ семꙋ̀ та́инственнѣ глаго́лемое.

и҃. Є҆́сть де́мѡнъ, глаго́лемый льсте́цъ, и҆ воꙋ́трїи наипа́че бра́тїѧмъ ꙗ҆влѧ́етсѧ, и҆́же ѡ҆бво́дитъ ᲂу҆́мъ ѿ гра́да во гра́дъ, и҆ ѿ ве́си въ ве́сь, и҆ ѿ до́мꙋ въ до́мъ, ᲂу҆́мъ, творѧ́щїй просты̑ѧ бесѣ́дѡванїѧ, и҆ со и҆звѣ́стными нѣ́кїими бесѣ́дꙋющїй должа́йше, и҆ своѐ ᲂу҆строе́нїе ѿ срѣта́ющихсѧ растлѣва́ющїй, и҆ ᲂу҆далѧ́ющїйсѧ пома́лꙋ ѿ вѣ́дѣнїѧ бг҃а и҆ добродѣ́тели, и҆ ѻ҆бѣ́тъ забыва́ѧ. Подоба́етъ ᲂу҆́бѡ ѿше́льникꙋ блюстѝ сїѐ, ѿкꙋ́дꙋ грѧде́тъ, и҆ гдѣ̀ престае́тъ. Не всꙋ́е бо и҆ не про́стѡ ве́лїй ѻ҆́ный крꙋ́гъ дѣ́лаетъ, но жела́ѧ ᲂу҆строе́нїе ѿше́льника растли́ти, сїѧ̑ твори́тъ, да на распали́вшїйсѧ ѿ си́хъ ᲂу҆́мъ, и҆ ѡ҆ мно́гихъ бесѣ́дъ ᲂу҆пи́вшїйсѧ, а҆́бїе нападе́тъ дꙋ́хъ любодѣѧ́нїѧ, и҆лѝ гнѣ́ва, и҆лѝ печа́ли, и҆̀же наипа́че поврежда́ютъ свѣ́тлость ᲂу҆строе́нїѧ є҆гѡ̀. Но мы̀, а҆́ще и҆́мамы намѣ́ренїе ᲂу҆разꙋмѣ́ти ꙗ҆́снѡ кова́рство є҆гѡ̀, не ско́рѡ да возглаго́лꙋимъ съ ни́мъ, нижѐ и҆з̾ѧви́мъ быва̑ющаѧ, ка́кѡ съ мы́слїю собесѣ́дѡванїѧ твори́тъ ѻ҆́нъ, и҆ каковы́мъ ѡ҆́бразомъ по ма́лꙋ приво́дитъ ᲂу҆́мъ къ сме́рти, поне́же ᲂу҆бѣжи́тъ ѿ на́съ: не те́рпитъ бо ѻ҆́нъ ви́димымъ бы́ти, є҆гда̀ сїѧ̑ твори́тъ. И҆ та́кѡ ничто́же позна́емъ ѿ тѣ́хъ, ꙗ҆̀же позна́ти тща́хомсѧ. Но и҆ є҆щѐ є҆ди́нъ де́нь, и҆лѝ и҆ дрꙋгі́й попꙋ́стимъ є҆мꙋ̀ твори́ти начина́нїе, да позна́вше соверше́ннѡ є҆гѡ̀ кова́рство, и҆ сло́вомъ по́слѣ сегѡ̀ ѡ҆блича́ѧ, є҆го̀ прого́нимъ. Но поне́же во вре́мѧ и҆скꙋше́нїѧ прилꙋча́етсѧ, ꙗ҆́кѡ ᲂу҆́мъ ѿ возмꙋще́нїѧ, не познае́тъ соверше́ннѡ быва́ємаѧ, то̀ ѿше́дшꙋ де́мѡнꙋ сїѐ да быва́етъ. Сѣ́дъ воспомѧнѝ са́мъ въ себѣ̀ слꙋчи̑вшаѧсѧ съ тобо́ю, ѿкꙋ́дꙋ нача́лъ є҆сѝ, и҆ гдѣ̀ ходи́лъ, и҆ въ ко́емъ мѣ́стѣ ѡ҆б̾ѧ́тъ бы́лъ дꙋ́хомъ любодѣѧ́нїѧ, и҆лѝ печа́ли, и҆лѝ гнѣ́ва, и҆ ка́кѡ па́ки прилꙋчи́сѧ бы́вшее. Сїѧ̑ ᲂу҆разꙋмѣ́й, и҆ преда́ждь па́мѧти, да возмо́жеши ѡ҆бличи́ти є҆го̀ приходѧ́ща, и҆ скрыва́мое ѿ негѡ̀ мѣ́сто позна́й, и҆ бо́лѣе не и҆́маши повинова́тисѧ є҆мꙋ̀. А҆́ще же хо́щеши и҆ въ неи́стовство привестѝ є҆го̀, ѡ҆бличѝ є҆го̀ а҆́бїе ꙗ҆́вльшасѧ, и҆ пе́рвое мѣ́сто, на не́же взоше́лъ є҆сѝ, сло́вомъ рцы̀, и҆ втори́цею, и҆ трети́цею: вельми́ бо ѡ҆горча́етсѧ, не сносѧ̀ сра́ма. Благовре́менное же разглаго́льствїе твоѐ съ ни́мъ да бꙋ́детъ доказа́нїемъ, ꙗ҆́кѡ ѿи́де по́мыслъ ѿ тебѐ: невозмо́жно бо пребыва́ти ꙗ҆́внѡ ѡ҆блича́емомꙋ. По побѣжде́нїи же сегѡ̀ де́мѡна послѣ́дꙋетъ тѧгча́йшїй со́нъ, и҆ ᲂу҆мерщвле́нїе рѣсни́цъ со мно́гою хла́дностїю, и҆ зѣва̑нїѧ безконє́чныѧ, и҆ тѧгота̀ пле́чь: ꙗ҆̀же всѧ̑ по прилѣ́жной моли́твѣ разрѣша́етъ дх҃ъ ст҃ы́й.

ѳ҃. Не́нависть къ де́мѡнамъ ѕѣлѡ̀ споспѣшествꙋ́етъ ко спасе́нїю на́мъ, и҆ къ творе́нїю добродѣ́тели потре́бна. И҆ сїю̀ пита́ти въ себѣ̀, ꙗ҆́коже нѣ́кое порожде́нїе благо́е, не си́льны є҆смы̀, сластолюби́вымъ дꙋхѡ́мъ развлека́ющымъ ю҆̀, и҆ ко дрꙋ́жествꙋ, и҆ согла́сїю дꙋ́шꙋ па́ки возбꙋжда́ющымъ. Но сїѐ дрꙋ́жество, па́че же неꙋдобоисцѣли́мꙋю га́ггренꙋ, вра́чь дꙋ́шъ ѡ҆ставле́нїемъ и҆сцѣлѧ́етъ. Попꙋща́етъ бо нѣ́что стра́шное пострада́ти ѿ ни́хъ и҆ дне́мъ и҆ но́щїю. И҆ па́ки дꙋша̀ къ первоѡбра́зной не́нависти возвраща́етсѧ, поꙋча́ема ко гдⷭ҇ꙋ глаго́лати по сло́вꙋ даві́довꙋ сїѐ: соверше́нною не́навистїю возненави́дѣхъ ѧ҆̀: во врагѝ бы́ша мѝ.⁶⁵⁵ То́й бо соверше́нною не́навистїю ненави́дитъ врагѡ́въ, и҆́же ни дѣ́ломъ, ни мы́слїю не грѣши́тъ: є҆́же є҆́сть зна́менїе наивелича́йшагѡ и҆ пе́рвагѡ безстра́стїѧ.

і҃. Ѡ҆ дꙋ́хѣ же творѧ́щемъ дꙋ́шꙋ нечꙋ́вственною, что̀ подоба́етъ и҆ глаго́лати; А҆́зъ бо бою́сѧ писа́ти ѡ҆ не́мъ. Ка́кѡ дꙋша̀ и҆з̾ своегѡ̀ ᲂу҆строе́нїѧ ѿстꙋпа́етъ во вре́мѧ прише́ствїѧ є҆гѡ̀, и҆ совлача́етсѧ стра́ха гдⷭ҇нѧ и҆ благоче́стїѧ: и҆ грѣ́хъ не въ грѣ́хъ вмѣнѧ́етъ, и҆ беззако́нїе не почита́етъ за беззако́нїе: мꙋ́кꙋ же и҆ сꙋ́дъ вѣ́чный, ꙗ҆́кѡ просто́е сло́во по́мнитъ, и҆ посмѣва́етсѧ вои́стиннꙋ трѧсе́нїю ѻ҆гнено́сномꙋ: и҆ бг҃а ᲂу҆̀бо и҆сповѣ́дꙋетъ, повелѣ́нїѧ же є҆гѡ̀ не вѣ́сть. Бїе́ши въ пе́рси, дви́жꙋщейсѧ є҆́й ко грѣхꙋ̀, и҆ ѻ҆на̀ не чꙋ́вствꙋетъ. Ѿ писа́нїй разглаго́льствꙋеши, и҆ всѧ̀ ѡ҆слѣпи́сѧ, и҆ не слы́шитъ. Поноше́нїе є҆́й ѿ люде́й наво́диши, и҆ не вмѣнѧ́етъ: сра́мъ людскі́й, и҆ ѻ҆на̀ не разꙋмѣ́етъ, наподо́бїе свинїѝ, ѻ҆́чи смѣжи́вшїѧ и҆ ѡ҆гражде́нїе разорва́вшїѧ. Се́й же дꙋ́хъ наво́дѧтъ ᲂу҆коснѣва́ющыѧ по́мыслы тщесла́вїѧ: ѿ негѡ́ же, а҆́ще не бы́ша прекрати́лисѧ дні́е ѻ҆́ны, не бы̀ спасла́сѧ всѧ́ка пло́ть.⁶⁵⁶ И҆ рѣ́дкѡ бо прилага́ющихсѧ бра́тїѧмъ, вина̀ ꙗ҆́вна быва́етъ. ѕлоключе́нїѧми бо дрꙋги́хъ, болѣ́зньми ᲂу҆гнѣта́ющихсѧ, и҆ въ темни́цахъ бѣ́дствꙋющихъ, и҆лѝ внеза́пной подпада́ющихъ сме́рти, прогонѧ́етсѧ ѻ҆́нъ, дꙋшѣ̀ по ма́лꙋ ᲂу҆милѧ́ющейсѧ, и҆ въ сострада́нїе приходѧ́щей, разрꙋша́ющꙋсѧ ѿ дꙋ́ха составлѧ́емомꙋ ѡ҆жесточе́нїю: въ ни́хже мы̀ недоꙋмѣва́емъ по ма́лости и҆ рѣ́дкости немоществꙋ́ющихъ ᲂу҆ на́съ. Сего̀ наипа́че дꙋ́ха прогонѧ́ѧ гдⷭ҇ь во є҆ѵⷢ҇лїи, повелѣ́лъ немоществꙋ́ющихъ назира́ти, и҆ сꙋ́щихъ въ темни́цѣ посѣща́ти. Бо́ленъ бо бѣ́хъ, глаго́летъ, и҆ прїидо́сте ко мнѣ̀.⁶⁵⁷ Ѻ҆ба́че сїѐ вѣ́дѣти подоба́етъ: а҆́ще кто̀ и҆з̾ ѿше́льникѡвъ повинꙋ́вшисѧ семꙋ̀ дꙋ́хꙋ, не прїѧ́лъ по́мыслы блꙋ̑дныѧ, и҆лѝ до́мъ ѿ ᲂу҆ны́нїѧ не ѡ҆ста́вилъ, се́й терпѣ́нїе и҆ цѣломꙋ́дрїе воспрїѧ́лъ, свы́ше низпо́сланное: и҆ блаже́нъ є҆́сть сицева́гѡ ра́ди безстра́стїѧ. Є҆ли́цы же и҆з̾ ѡ҆бѣщава́ющихсѧ бг҃оче́стїе храни́ти, съ мїрски́ми водворѧ́тисѧ произволѧ́ютъ, да стрегꙋ́тсѧ сегѡ̀ дꙋ́ха. А҆́зъ бо ѡ҆ не́мъ бо́лѣе глаго́лати и҆лѝ писа́ти, и҆ люде́й срамлѧ́юсѧ.

Ѡ҆ дꙋ́хѣ печа́ли.

а҃і. Всѣ̀ дꙋ́хи сластолю́бїѧ поꙋча́ютъ дꙋ́шꙋ, є҆ди́нъ же дꙋ́хъ печа́ли сегѡ̀ твори́ти не мо́жетъ, но входѧ́щыѧ по́мыслы растлѣва́етъ, ѿсѣка́ѧ всѧ́кꙋю дꙋше́внꙋю сла́сть, и҆ и҆зсꙋша́ѧ печа́лїю: мꙋ́жа бо печа́льна засыха́ютъ кѡ́сти,⁶⁵⁸ и҆ ма́лѡ ра́тꙋѧ, и҆скꙋ́снымъ ѿше́льника твори́тъ. Оу҆вѣщава́етъ бо, ꙗ҆́кѡ ничто́же ѿ мі́ра сегѡ̀ прїе́млетсѧ, и҆ всѧ́ка сла́сть ѿстои́тъ: мно́жае же пребыва́ѧ, ражда́етъ по́мыслы, ѿводи́ти дꙋ́шꙋ совѣ́тꙋющыѧ, и҆лѝ дале́че бѣжа́ти ѿ мѣ́ста понꙋжда́ющыѧ. Є҆́же размышлѧ́ше нѣ́когда, и҆ пострада̀ свѧты́й і҆́ѡвъ, ѿ сегѡ̀ стꙋжа́емь. А҆́ще бы возмо́гъ, глаго́летъ, са́мъ себѧ̀ ᲂу҆би́ти, и҆лѝ помоли́вшисѧ дрꙋго́мꙋ, и҆ сотвори́лъ бы мѝ сїѐ. Сегѡ̀ дꙋ́ха зна́менїе є҆́сть є҆хі́дны ѕвѣ́рь, є҆ѧ́же є҆стество̀ подае́мо человѣколю́бнѡ, ꙗ҆́ды дрꙋги́хъ ѕвѣре́й растлѣва́етъ: невозде́ржнѡ же прїе́млемо, и҆ са́мое растлѣва́етъ живо́тное. Семꙋ̀ дꙋ́хꙋ предадѐ па́ѵелъ въ корі́нѳѣ беззако́нновавшаго. Тѣ́мже и҆ пи́шетъ па́ки тща́тельнѡ, ᲂу҆тверди́те, глаго́лѧ корі́нѳѧнѡмъ, къ немꙋ̀ любо́вь: да не ка́кѡ мно́гою ско́рбїю поже́ртъ бꙋ́детъ таковы́й.⁶⁵⁹ Но вѣ́сть се́й дꙋ́хъ ѡ҆скорблѧ́ющїй люде́й, производи́ти благо́е покаѧ́нїе. Тѣ́мже и҆ ст҃ы́й крⷭ҇ти́тель, ѿ сегѡ̀ дꙋ́ха ᲂу҆ѧзвлѧ́емыхъ и҆ прибѣга́ющихъ къ бг҃ꙋ, по рождє́нїѧ є҆хі́днѡва нарица́етъ, глаго́лѧ: кто̀ сказа̀ ва́мъ бѣжа́ти ѿ бꙋ́дꙋщагѡ гнѣ́ва; сотвори́те ᲂу҆́бѡ пло́дъ досто́инъ покаѧ́нїѧ, и҆ не начина́йте глаго́лати въ себѣ̀, ѻ҆тца̀ и҆́мамы а҆враа́ма.⁶⁶⁰ Ѻ҆ба́че всѧ́къ по ѡ҆́бразꙋ а҆враа́ма, и҆зше́дши ѿ землѝ сеѧ̀ и҆ ѿ ро́дꙋ, си́льнѣйшїй сегѡ̀ є҆́сть дꙋ́ха.

в҃і. А҆́ще кто̀ ꙗ҆́рость побѣди́лъ, се́й бѣ́сы побѣди́лъ. А҆́ще же кто̀ є҆́ю ѡ҆блада́нъ, то́тъ ᲂу҆едине́ннагѡ житїѧ̀ чꙋ́ждъ є҆́сть, и҆ стра́ненъ ѿ пꙋте́й сп҃си́телѧ на́шегѡ. Са́мъ бо гдⷭ҇ь глаго́летъ: Наꙋчи́тъ крѡ́ткїѧ пꙋтє́мъ свои̑мъ.⁶⁶¹ Тѣ́мже и҆ неꙋдобое́млемь быва́етъ ѿше́льствꙋющихъ ᲂу҆́мъ, на доли́нꙋ кро́тости ᲂу҆бѣга́ѧй, ниеди́ныѧ бо добродѣ́тели не страша́тсѧ бѣ́си, ꙗ҆́коже кро́тости. Сїю̀ вели́кїй ѻ҆́ный мѡѷсе́й стѧжа̀, кро́ткимъ па́че всѣ́хъ люде́й нарече́нный. И҆ свѧты́й даві́дъ досто́йною є҆ѐ па́мѧти бж҃їѧ и҆з̾ѧвѝ бы́ти, глаго́лѧ: помѧнѝ гдⷭ҇и, даві́да, и҆ всю̀ кро́тость є҆гѡ̀.⁶⁶² Но и҆ са́мъ сп҃си́тель на́шъ подража́телѧми на́мъ бы́ти кро́тости ѻ҆́нагѡ заповѣ́да, глаго́лѧ: наꙋчи́тесѧ ѿ менѐ, ꙗ҆́кѡ кро́токъ є҆́смь и҆ смире́нъ се́рдцемъ, и҆ ѡ҆брѧ́щете поко́й дꙋша́мъ ва́шымъ.⁶⁶³ А҆́ще же кто̀ ꙗ҆́стїй и҆ питі́й ᲂу҆далѧ́етсѧ, ꙗ҆́рость же лꙋка́выми по́мыслы и҆з̾ѡщрѧ́етъ: се́й ᲂу҆подо́бисѧ всепроходѧ́щемꙋ кораблю̀, и҆ и҆мꙋ́щꙋ ко́рмчимъ де́мѡна. Тѣ́мже внима́ти на́мъ подоба́етъ, є҆ли́кѡ возмо́жно, своемꙋ̀ кораблю̀, и҆ наꙋча́тисѧ, ꙗ҆́кѡ во́лцы то́чїю ѻ҆́ный растлѣва́ютъ, а҆ не ѻ҆́вцы поѧда́ютъ, всѧ́кꙋю пока́зовати кро́тость ко всѣ̑мъ лю́демъ.

Ѡ҆ тщесла́вїи.

г҃і. Є҆ди́нъ по́мыслъ тщесла́вїѧ є҆́сть многовеще́ственъ, и҆ ма́лѡ не всю̀ ѡ҆б̾е́млющїй вселе́ннꙋю, и҆ всѣ̑мъ де́мѡнамъ ѿверза́ющїй двє́ри, ꙗ҆́коже нѣ́кїй лꙋка́вый преда́тель гра́да нѣ́коегѡ. Тѣ́мже и҆ вельмѝ смирѧ́етъ ᲂу҆́мъ ѿше́льника, мно́гихъ слове́съ и҆ дѣ́лъ и҆сполнѧ́ѧ є҆го̀, и҆ моли̑твы є҆гѡ̀ погꙋблѧ́ѧ, и҆́миже всѣ̀ ра̑ны дꙋшѝ своеѧ̀ цѣли́ти тщи́тсѧ. Се́й по́мыслъ возраща́ютъ всѣ̀ побѣжде́нные по́мыслы, кото́рые па́ки и҆̀мъ прїе́млютъ всѣ̀ прихо́дъ къ дꙋшѝ, творѧ́ще та́кѡ послѣ́днѧѧ гѡ́рша пе́рвыхъ. Ѿ сегѡ̀ по́мысла ражда́етсѧ и҆ по́мыслъ го́рдости, печа́ть подо́бїѧ и҆ вѣне́цъ красоты̀ съ небе́съ на зе́млю сотрѧ́сшїй. Но ѿврати́сѧ ѿ сегѡ̀, и҆ не ᲂу҆коснѝ, да не преда́си дрꙋги̑мъ жи́знь твою̀, и҆ житїѐ твоѐ неми́лѡстивнымъ. Сего́ же дꙋ́ха прогонѧ́етъ ᲂу҆се́рднаѧ моли́тва, и҆ є҆́же не твори́ти во́лею, и҆ не глаго́лати ничто́же ѿ споспѣшествꙋ́ющихъ къ проклѧ́томꙋ тщесла́вїю.

д҃і. Є҆гда̀ ᲂу҆́мъ ѿше́льствꙋющихъ ма́лое безстра́стїе полꙋ́читъ: тогда̀ тщесла́вїѧ конѧ̀ стѧжа́вши, а҆́бїе но́ситсѧ по градѡ́мъ, похвалꙋ̀ неꙋдержи́мꙋ ѿ сла́вы и҆мѣ́ѧ: є҆го́же, по смотре́нїю, дꙋ́хъ любодѣѧ́нїѧ срѣ́тивши, и҆ въ нѣ́кїй хлѣ́въ є҆го̀ заключи́вши, наказꙋ́етъ є҆го̀, не ктомꙋ̀ пре́жде соверше́ннагѡ здра́вїѧ ѡ҆ставлѧ́ти ѻ҆́дръ, и҆ не подража́ти безчи̑ннымъ бѡльны́мъ, и҆̀же ѡ҆ста́нки є҆щѐ не́мощи въ себѣ̀ ѡ҆бносѧ̀, въ пꙋти̑ себѧ̀, и҆ въ ба̑ни безвре́меннѡ вдаю́тъ, и҆ болѣ́знємъ ѿ ѡ҆браще́нїѧ подпа́даютъ. Тѣ́мже сѣдѧ̀, вне́млемъ са́ми себѣ̀ па́че, ꙗ҆́кѡ ᲂу҆спѣва́юще въ добродѣ́тели, неꙋдобоподви́жны ко ѕло́бѣ быва́емъ. Подвиза́ѧсѧ разꙋ́мнѣ, мно́жество разли́чныхъ видѣ́нїй прїе́млемъ: возвыша́еми же па́ки, ꙗ҆снѣ́е зри́мъ свѣ́тъ сп҃си́телѧ на́шегѡ.

є҃і. Всѣ̀ ѕлодѣѧ̑нїѧ де́мѡнскїѧ ѡ҆пи́сывати не могꙋ̀, и҆ ѕлокова̑рствїѧ и҆́хъ и҆счислѧ́ти срамлѧ́юсѧ, боѧ́сѧ простѣ́йшихъ и҆з̾ чита́телей. Ѻ҆ба́че кова́рство дꙋ́ха любодѣѧ́нїѧ внемлѝ. Є҆гда̀ кто̀ безстра́стїе жела́тельныѧ ча́сти стѧ́жетъ, и҆ сра́мные по́мыслы нѣ́какѡ хла́дны бꙋ́дꙋтъ: тогда̀ ѻ҆́ный приво́дитъ мꙋже́й и҆ же́нъ и҆гра́ющихъ междꙋ̀ собо́ю, и҆ сра́мныхъ дѣ́лъ, и҆ ви́дѡвъ зри́телемъ ѿше́льника содѣ́ловаетъ. Но сїѐ и҆скꙋше́нїе нѣ́сть ᲂу҆косни́тельно. Оу҆се́рднаѧ бо моли́тва, и҆ воздержа́нїе, и҆ житїѐ тѣснѣ́йшее со бо́дрствованїемъ и҆ ᲂу҆праждне́нїемъ въ дꙋхо́вныхъ видѣ́нїѧхъ, ꙗ҆́коже ѻ҆́блако безво́дное, прогонѧ́етъ ѻ҆́ное. И҆ногда́ же лꙋка́вый ѻ҆́ный дꙋ́хъ и҆ пло́ти каса́етсѧ, къ безслове́сномꙋ распале́нїю возбꙋжда́ѧ ю҆̀, и҆ и҆́нныѧ тьмѡчи́сленныѧ хи́трѡсти стро́ѧ, ꙗ҆̀же не подоба́етъ ѡ҆бнаро́довати и҆ преда́ти писа́нїю. Вспомоществꙋ́етъ такѡвы́мъ по́мысламъ и҆ распале́ннаѧ ꙗ҆́рость, воздви́гнꙋтаѧ проти́вꙋ де́мѡна, ко́еѧ ꙗ҆́рости наипа́че страши́тсѧ ѻ҆́нъ, смꙋща́емыѧ ра́ди по́мыслѡвъ, и҆ растлѣва́ющїѧ є҆гѡ̀ помышлє́нїѧ. И҆ сїѐ є҆́сть, гнѣ́вайтесѧ, и҆ не согрѣша́йте: є҆́же пода́стъ дꙋшѣ̀ потре́бное врачевство̀ во и҆скꙋше́нїѧхъ. Подо́бенъ: є҆́сть и҆ дꙋ́хъ гнѣ́ва семꙋ̀ дꙋ́хꙋ. Твори́тъ и҆ ѻ҆́ный нѣ́кїихъ ѿрожде́нныхъ, и҆лѝ ѿ дрꙋзе́й, и҆лѝ ѿ срѡ́дникъ, ꙗ҆́кѡ ᲂу҆корѧ́ютсѧ ѻ҆нѝ ѿ недосто́йныхъ: и҆ дꙋ́хъ ѿше́льника возбꙋжда́етъ провѣща́ти нѣ́что лꙋка́вое, и҆лѝ содѣ́ѧти ра́ди показа́нїѧ своегѡ̀ ра́зꙋма, и҆́мже внима́ти подоба́етъ, и҆ ско́рѡ ѿторга́ти ᲂу҆́мъ ѿ таковы́хъ воѡбраже́нїй, да не ᲂу҆коснѣ́вши въ ни́хъ, бꙋ́детъ во вре́мѧ моли́твы головнѧ̀ дымѧ́щаѧсѧ. Въ сі́и же и҆скꙋшє́нїѧ впа́даютъ наипа́че ꙗ҆́ростнїи лю́ди, и҆ ᲂу҆до́бнѡ ко движе́нїѧмъ воспалѧ́ющїисѧ: такові́и дале́че сꙋ́ть ѿ чи́стыѧ моли́твы, и҆ ѿ вѣ́дѣнїѧ сп҃си́телѧ на́шегѡ і҆и҃са хрⷭ҇та̀.

ѕ҃і. Помышлє́нїѧ вѣ́ка сегѡ̀, гдⷭ҇ь, ꙗ҆́кѡ ѻ҆́вцы, благо́мꙋ па́стырю человѣ́кꙋ предадѐ. И҆ пи́сано є҆́сть: всѧ́комꙋ человѣ́кꙋ помышле́нїе дадѐ въ се́рдцѣ є҆гѡ̀, сопрѧ́гши съ ѻ҆́нымъ жела́нїе, и҆ ꙗ҆́рость въ по́мощь: ⁶⁶⁴ да ꙗ҆́ростїю прогонѧ́етъ помышлє́нїѧ вѡ́лчїѧ: жела́нїемъ же лю́битъ ѻ҆́вцы, и҆ ѿ дожде́й и҆ вѣ́трѡвъ многокра́тнѣ бїе́мь. Дадѐ кромѣ̀ сегѡ̀ и҆ зако́нъ, ка́кѡ пастѝ ѻ҆́вцы: и҆ мѣ́сто бы́лїѧ, и҆ во́дꙋ ᲂу҆покое́нїѧ, и҆ ѱалти́рь, и҆ гꙋ́сли, и҆ же́злъ, и҆ па́лицꙋ: да ѿ сегѡ̀ ста́да и҆ пита́етсѧ и҆ ѡ҆блека́етсѧ, и҆ пи́щꙋ благовре́меннѡ собира́етъ. Кто́ бо, глаго́летъ, пасе́тъ ста́до, и҆ ѿ млека̀ ста́да не ꙗ҆́стъ; ⁶⁶⁵ Подоба́етъ ᲂу҆̀бо ѿше́льникꙋ храни́ти дне́мъ и҆ но́щїю сїѐ ста́до, да не нѣ́кое порожде́нїе бꙋ́детъ ѕвѣреꙋловле́но, и҆лѝ въ разбо́йники впаде́тъ: а҆́ще же ᲂу҆̀бо нѣ́что таково́е прилꙋчи́тсѧ въ лѣсꙋ̀, а҆́бїе и҆зхища́ти ѿ ᲂу҆́стъ льва̀ и҆ медвѣ́дѧ. Быва́етъ же помышле́нїе ѡ҆ бра́тѣ ѕвѣреꙋловлѧ́емо, а҆́ще съ не́навистїю пасе́тсѧ въ на́съ, и҆ помышле́нїе ѡ҆ женѣ̀, а҆́ще со сра́мною по́хотїю пребыва́етъ въ на́съ: и҆ ѡ҆ зла́тѣ и҆ сребрѣ̀, а҆́ще съ лихоима́нїемъ водворѧ́етсѧ, и҆ помышлє́нїѧ ѡ҆ ст҃ы́хъ дарова́нїѧхъ, а҆́ще со тщесла́вїемъ во ᲂу҆мѣ̀ пасꙋ́тсѧ: и҆ во и҆́нныхъ помышле́нїѧхъ то́жде прилꙋчи́тсѧ, крадо́мыхъ ѿ страсте́й. Не то́чїю же дне́мъ подоба́етъ сїѧ блюстѝ: но и҆ но́щїю бо́дрствꙋющемꙋ храни́ти. Прилꙋча́етсѧ бо и҆ во мечта́нїѧхъ нечи́стыхъ и҆ лꙋка́выхъ погꙋби́ти своѐ. И҆ сїѐ є҆́сть, є҆́же глаго́летъ ст҃ы́й і҆а́кѡвъ: не принесо́хъ къ тебѣ̀ ѻ҆вча̀ ѕвѣроѧ́дно: а҆́зъ воздаѧ́хъ татьбины̀ дє́нныѧ, и҆ татьбины̀ нѡщны́ѧ, и҆ бы́хъ во днѝ жего́мь зно́емъ, и҆ стꙋ́денїю въ нощѝ: и҆ ѿхожда́ше со́нъ ѿ ѻ҆́чїю моє́ю. ⁶⁶⁶ А҆́ще же нѣ́кое ѿ трꙋда̀ ᲂу҆ны́нїе прилꙋчи́тсѧ, вма́лѣ восте́кше на ка́мень вѣ́дѣнїѧ, на пѣвни́цѣ да бесѣ́дꙋемъ, бїѧ̀ добродѣ́телѧми во стрꙋ́ны ра́зꙋма. Пасе́мъ же ѻ҆́вцы па́ки и҆ под̾ сїна́йскою горо́ю, да бг҃ъ ѻ҆тє́цъ на́шихъ и҆ на́съ и҆з̾ кꙋпины̀ воззове́тъ, и҆ словеса̀ зна́менїй и҆ чꙋде́съ на́мъ да́рꙋетъ.

з҃і. Є҆стество̀ слове́сное, ѿ ѕло́бы ᲂу҆мерщвле́нное, воскреша́етъ хрⷭ҇то́съ, ᲂу҆мозрѣ́нїемъ ѻ҆́нагѡ всѣ́хъ вѣкѡ́въ. Ѻ҆ц҃ъ же сегѡ̀ дꙋ́шꙋ ᲂу҆ме́ршꙋю воскреша́етъ сме́ртїю хрⷭ҇то́вою и҆ ꙗ҆вле́нїемъ свои́мъ. И҆ сїѐ є҆́сть, є҆́же глаго́летъ па́ѵелъ: а҆́ще ᲂу҆мро́хомъ со хрⷭ҇то́мъ, вѣ́рꙋемъ, ꙗ҆́кѡ и҆ жи́ви бꙋ́демъ съ ни́мъ. ⁶⁶⁷

и҃і. Є҆гда̀ ᲂу҆́мъ, совле́кшисѧ ве́тхагѡ человѣ́ка, во благода́тнаго ѡ҆блече́тсѧ, тогда̀ и҆ своѐ ᲂу҆строе́нїе ᲂу҆́зритъ во вре́мѧ моли́твы, подо́бно сапфи́рꙋ, и҆лѝ небе́сномꙋ ша́рꙋ, є҆́же и҆ мѣ́стомъ бж҃їимъ писа́нїе и҆менꙋ́етъ, ѿ старѣ́йшинъ ви́дѣнное на горѣ̀ сїна́йстѣй.

ѳ҃і. Ѿ нечи́стыхъ дꙋхѡ́въ, ѻ҆́ви человѣ́ка ꙗ҆́кѡ человѣ́ка, и҆скꙋша́ютъ: ѻ҆́ви же человѣ́ка, ꙗ҆́кѡ живо́тное безслове́сное смꙋща́ютъ. И҆ пе́рвїи приложи́вшесѧ, влага́ютъ въ на́съ по́мыслы тщесла́вїѧ, и҆лѝ го́рдости, и҆лѝ за́висти, и҆лѝ ѡ҆бвине́нїѧ, ꙗ҆̀же ни є҆ди́нагѡ не каса́ютсѧ ѿ безслове́сныхъ. Вторі́и же приближа́ѧсѧ, ꙗ҆́рость и҆ по́хоть чрез̾есте́ственнѡ возбꙋжда́ютъ. Сі́и бо стра̑сти ѻ҆́бщыѧ сꙋ́ть на́мъ и҆ безсловє́снымъ, под̾ слове́снымъ кро́ющыѧсѧ є҆стество́мъ. Тѣ́мже глаго́летъ дх҃ъ ст҃ы́й ѡ҆ по́мыслѣхъ, съ людьмѝ прилꙋча́ющихсѧ: а҆́зъ рѣ́хъ: бо́зи є҆стѐ и҆ сы́нове вы́шнѧгѡ всѝ: вы́ же ꙗ҆́кѡ человѣ́цы ᲂу҆мира́ете, и҆ ꙗ҆́кѡ є҆ди́нъ ѿ кнѧзе́й па́даете.⁶⁶⁸ Ѡ҆ дви́жꙋщихсѧ же безслове́снѡ что̀ глаго́летъ: Не бꙋ́дите ꙗ҆́кѡ ко́нь и҆ ме́скъ, и҆̀мже нѣ́сть ра́зꙋма: брозда́ми и҆ ᲂу҆здо́ю чє́люсти и҆́хъ востѧ́гнеши на приближа́ющихсѧ къ тебѣ̀.⁶⁶⁹ А҆́ще же дꙋша̀ согрѣша́етъ, то̀ ᲂу҆́мретъ. Пред̾ѧвле́но є҆́сть сїѐ, ꙗ҆́кѡ человѣ́цы ᲂу҆мира́ютъ, и҆ ѿ человѣ́кѡвъ погреба́ютсѧ: безслове́снїи же ᲂу҆мерщвлѧ́еми и҆лѝ па́дающе, ѿ го́рлицъ, и҆лѝ вра́нѡвъ поѧда́ютсѧ: и҆́хже птенцы̀ и҆ні́и призыва́ютъ гдⷭ҇а, и҆ні́и же ѡ҆сквернѧ́ютсѧ въ кро́ви. И҆мѣ́ѧй ᲂу҆́шы слы́шати, да слы́шитъ.

к҃. Є҆гда̀ кто̀ ѿ врагѡ́въ приложи́вшисѧ къ тебѣ̀, ᲂу҆ѧзви́тъ тѧ̀, и҆ хо́щетъ ме́чь сво́й ѡ҆брати́ти, по писа́нїю, на се́рдце своѐ,⁶⁷⁰ сотворѝ та́кѡ, ꙗ҆́коже глаго́лемъ. Раздѣлѝ са́мъ въ себѣ̀ всѣ́ѧнный ѿ негѡ̀ по́мыслъ, ꙗ҆ковы́й ни прилꙋчи́тсѧ, и҆ и҆з̾ коли́кихъ веще́й ни состои́тъ, и҆ коли́кѡ наипа́че ни ѡ҆скорблѧ́етъ ᲂу҆́мъ. А҆ є҆́же глаго́лю, сїѐ є҆́сть: на прикла́дъ, а҆́ще бы бы́лъ влага́емь въ тебѐ ѿ негѡ̀ по́мыслъ сребролю́бїѧ: раздѣлѝ се́й по́мыслъ на мы́сль прїе́мшꙋю ѻ҆́ный, и҆ на помышле́нїе ѡ҆ зла́тѣ, а҆ сїѐ на сребролю́бнꙋю стра́сть. И҆ та́кѡ вопросѝ, что̀ и҆з̾ си́хъ є҆́сть грѣ́хъ; Оу҆́мъ ли; И҆ ка́кѡ є҆́сть ѡ҆́бразъ бж҃їй; И҆лѝ помышле́нїе ѡ҆ зла́тѣ; И҆ сїѐ кто́ бы ре́клъ когда́либо и҆мѣ́ѧй ᲂу҆́мъ; Но са́мое ли зла́то є҆́сть грѣ́хъ; и҆ чесѡ̀ ра́ди произведено̀; Подоба́етъ ᲂу҆́бѡ бы́ти винѣ̀ грѣха̀ четве́ртомꙋ чемꙋ́либо, є҆́же нѣ́сть ве́щь состоѧ́щаѧ по сꙋществꙋ̀, нижѐ помышле́нїе ве́щи: но сла́сть нѣ́каѧ человѣконенави́стнаѧ, ѿ своегѡ̀ и҆зволе́нїѧ ражда́ющаѧсѧ, и҆ понꙋжда́ющаѧ ᲂу҆́мъ ѕлѣ̀ ᲂу҆потреблѧ́ти созда̑нїѧ бж҃їѧ, ю҆́же сла́сть ѿсѣщѝ зако́нꙋ бж҃їю ᲂу҆пова́ю. И҆ сїѧ̑ тѝ и҆спытꙋ́ющꙋ и҆сче́знетъ по́мыслъ, на своѐ видѣ́нїе разрꙋша́ѧсѧ. Оу҆бѣжи́тъ же ѿ тебѐ дꙋ́хъ, возвы́сившисѧ на ве́рхъ мы́сли твое́й ѿ сегѡ̀ разꙋмѣ́нїѧ. А҆́ще же не хо́щеши ᲂу҆потреби́ти проти́вꙋ ѻ҆́нагѡ ме́чь є҆гѡ̀, но возжела́еши пе́рвѣе свои́мъ жезло́мъ є҆гѡ̀ побѣди́ти: и҆зве́ргни и҆ ты̀ ка́мень и҆з̾ пастꙋ́шескїѧ твоеѧ̀ ко́ши, и҆ и҆щѝ ᲂу҆разꙋмѣ́ти сїѐ, ка́кѡ а҆́гг҃ли и҆ бѣ́си примѣнѧ́ютсѧ на́шемꙋ ᲂу҆краше́нїю, мы́ же ᲂу҆краше́нїѧмъ и҆́хъ не примѣнѧ́емсѧ: ниже́ бо а҆́гг҃лѡвъ бо́лѣе со бг҃омъ соединѧ́ти мо́жемъ, нижѐ бѣсѡ́въ бо́лѣе нечи́стыми твори́ти произволе́нїе и҆́мамы. И҆ ка́кѡ денни́ца, во ᲂу҆́трїи восходѧ́щаѧ, на зе́млю све́ржена бы́сть, и҆ вмѣнѧ́етъ мо́ре за сосꙋ́дъ ма́сти, а҆́дъ же бе́здны за плѣ́нника, воскиплѧ́етъ же бе́зднꙋ, ꙗ҆́коже коте́лъ, всѣ́хъ возмꙋща́ѧ ѕло́бою свое́ю, и҆ всѣ́ми ѡ҆блада́ти жела́ѧ. Си́хъ бо веще́й ᲂу҆мозрѣ́нїе вельмѝ де́мѡна ᲂу҆ѧзвлѧ́етъ, и҆ ве́сь є҆гѡ̀ по́лкъ прогонѧ́етъ. Но сїѧ̑ со ѡ҆чище́нными ѿ страсте́й, нѣ́какѡ прилꙋча́ютсѧ, и҆ зрѧ́щими коли́кѡ ни є҆́сть вины̑ бы́вшихъ веще́й. Нечи́стые же ᲂу҆мосозерца́ти сїѧ̑ не мо́гꙋтъ, нижѐ наꙋчи́вшесѧ ѿ дрꙋги́хъ, сла́достнѡ слы́шати и҆́мꙋтъ, мно́гомꙋ пра́хꙋ и҆ смѧте́нїю ѿ страсте́й пребыва́ющꙋ на бра́ни. Подоба́етъ бо соверше́ннѡ по́лкъ и҆ноплеме́нныхъ ᲂу҆смири́ти, да є҆ди́нъ голїа́ѳъ срѣ́титъ на́шего даві́да. Таково́е же разчисле́нїе бра́ни и҆ ви́дъ да ᲂу҆потреби́мъ и҆ во всѣ́хъ нечи́стыхъ по́мыслѣхъ.

к҃а. Є҆гда̀ нѣ́кїи ѿ нечи́стыхъ по́мыслѡвъ а҆́бїе про́гнаны бꙋ́дꙋтъ, пои́щемъ вины̀, ѿкꙋ́дꙋ сїѐ прилꙋчи́сѧ; не по недоста́ткꙋ ли ве́щи, ꙗ҆́кѡ неꙋдобоѡбрѣта́емо є҆́сть вещество̀, и҆лѝ по сꙋ́щемꙋ въ на́съ безстра́стїю не си́ленъ бѣ̀ проти́вꙋ на́съ вра́гъ: на примѣ́ръ, а҆́ще кто̀ и҆з̾ ѿше́льствꙋющихъ помы́слитъ, ꙗ҆́кѡ ввѣ́рено є҆мꙋ̀ дꙋхо́вное правле́нїе гра́да, не косни́тъ се́й по́мылъ мы́слити, и҆ быва́етъ ѻ҆́ный є҆мꙋ̀ вѣ́домь ѿ предрече́нныѧ невеще́ственности: а҆́ще же кто̀ и҆ проста́гѡ гра́да прави́тель бꙋ́детъ, и҆ подо́бнѣ размышлѧ́етъ, се́й блаже́нъ є҆́сть ра́ди безстра́стїѧ. Подо́бнѡ же и҆ во и҆нѣ́хъ по́мыслѣхъ ѡ҆брѧ́щетсѧ сицевы́й ѡ҆́бразъ и҆спытꙋ́емь. Сїѧ̑ подоба́етъ на́мъ вѣ́дѣти, по ᲂу҆се́рдїю на́шемꙋ и҆ си́лѣ, да ᲂу҆вѣ́мы, а҆́ще і҆ѻрда́нъ прешлѝ, и҆ бли́зъ є҆смы̀ фі́нїкѡвъ, и҆лѝ є҆щѐ въ пꙋсты́ни живе́мъ, и҆ ѿ и҆ноплеме́нныхъ бїе́ми быва́емъ. Вельми́ бо хи́тръ ꙗ҆влѧ́етсѧ мѝ дꙋ́хъ сребролю́бїѧ, и҆ ко пре́лести кова́рный, таковы́й ча́стѡ стѣсне́нъ бы́въ ѿ кра́йнѧгѡ ѿрече́нїѧ, а҆́бїе домострои́телемъ и҆ нищелю́бцемъ лицемѣ́рствꙋетъ: и҆ є҆щѐ неприсꙋ́тствꙋющихъ въ по́мыслѣ страннопрїе́млетъ ᲂу҆се́рднѣ, и҆ дрꙋги́мъ ѿсꙋ́тствꙋющымъ посыла́етъ млⷭ҇тыню, и҆ темни̑цы гра̑дскїѧ посѣща́етъ, и҆ продае́мыхъ и҆скꙋпꙋ́етъ, и҆ жена́мъ прилѣплѧ́тисѧ бога̑тымъ показꙋ́етъ: дрꙋги̑мъ па́ки повинова́тисѧ ᲂу҆вѣщава́етъ, и҆́же бога́тствомъ и҆спо́лненныѧ влага̑лища и҆́мꙋтъ. И҆ та́кѡ прельсти́вши пома́лꙋ дꙋ́шꙋ, по́мыслы сребролю́бїѧ ѡ҆блага́етъ ю҆̀, и҆ дꙋ́хꙋ тщесла́вїѧ предае́тъ: таковы́й мно́гихъ вво́дитъ прославлѧ́ющихъ гдⷭ҇а, за сицево́е смотре́нїе: и҆ нѣ́кїихъ пома́лꙋ ѡ҆ рꙋкоположе́нїи во і҆ере́а бесѣ́довати дрꙋ́гъ со дрꙋ́гомъ побꙋжда́етъ: сме́рть же сꙋ́щагѡ і҆ере́а предсказꙋ́етъ и҆ предлага́етъ, ꙗ҆́кѡ не и҆збѣ́гнетъ ѻ҆́нъ тьмочи́слєннаѧ содѣ́ѧвый. И҆ та́кѡ ѻ҆каѧ́нный ᲂу҆́мъ ѡ҆бле́кшисѧ въ сі́и по́мыслы, съ непрїѧ́вшими є҆го̀ людьмѝ прю̀ твори́тъ, прїѧ́вшымъ же гото́внѡ подае́тъ да́ры, и҆ за благодꙋ́шїе и҆́хъ прїе́млетъ: нѣ́кїихъ же бꙋнтꙋ́ющихъ сꙋдїѧ́мъ предае́тъ, и҆ и҆з̾ гра́да въ заточе́нїе посыла́ти заповѣ́дꙋетъ. Си́мъ же про́чее по́мысламъ внꙋ́трь сꙋ́щымъ и҆ дви́жꙋщымсѧ, а҆́бїе дꙋ́хъ го́рдости ꙗ҆влѧ́етсѧ, мѡ́лнїи ча̑стыѧ по воздꙋ́хꙋ ке́ллїи, и҆ ѕмїє́въ крыла́тыхъ пꙋска́ющїй, и҆ на́конецъ ѡ҆скꙋдѣ́нїе ᲂу҆ма̀ содѣ́ловающїй: но мы̀ и҆спроси́вше ѿ гдⷭ҇а поги́бели си́мъ по́мыслѡмъ, съ благодаре́нїемъ въ нестѧжа́нїи да пребыва́емъ. Ничто́же бо внесо́хомъ въ мі́ръ се́й, ꙗ҆́вѣ, ꙗ҆́кѡ нижѐ и҆знестѝ что̀ мо́жемъ: и҆мѣ́юще же пи́щꙋ и҆ ѡ҆дѣѧ́нїе, си́ми дово́льни бꙋ́демъ, па́мѧтꙋюще па́ѵла глаго́люща: ко́рень всѣ́мъ ѕлы̑мъ сребролю́бїе є҆́сть.⁶⁷¹

к҃в. Всѣ̀ нечи́стые по́мыслы, страсте́й ра́ди въ на́съ ᲂу҆коснѣва́ѧ, низво́дѧтъ ᲂу҆́мъ во всегꙋби́тельство и҆ поги́бель. Ꙗ҆́коже бо помышле́нїе ѡ҆ хлѣ́бѣ косни́тъ во а҆́лчꙋщемъ а҆́лчбы ра́ди, и҆ помышле́нїе ѡ҆ водѣ̀ въ жа́ждꙋщемъ жа́жды ра́ди: та́кѡ и҆ помышлє́нїѧ ѡ҆ бога́тствѣ, и҆ ражда́ющыѧсѧ нечи̑стыѧ по́мыслы ѿ бра́шенъ коснѧ́тъ страсте́й ра́ди. Но и҆ въ по́мыслѣхъ тщесла́вїѧ, и҆ во и҆́нныхъ помышле́нїѧхъ подо́бное ꙗ҆ви́тсѧ. Невозмо́жно же ᲂу҆мꙋ̀, подавлѧ́емꙋ ѿ таковы́хъ помышле́нїй, предста́ти бг҃ꙋ, и҆ ᲂу҆кра́шенꙋ бы́ти вѣнце́мъ пра́вды. Ѿ си́хъ бо по́мыслѡвъ совлека́емь и҆ треѻкаѧ́нный ѻ҆́ный ᲂу҆́мъ, во є҆ѵⷢ҇лїи ᲂу҆помина́емый, и҆зѧ́щества ра́зꙋма бж҃їѧ ѿрече́сѧ: и҆ па́ки свѧзꙋ́емый по рꙋка́мъ и҆ нога́мъ, и҆ во тьмꙋ̀ кромѣ́шнꙋю поверга́емый⁶⁷² ѿ си́хъ по́мыслѡвъ и҆мѣ́ѧше сотка́ннꙋю ѻ҆де́ждꙋ, є҆го́же недосто́йна такова́гѡ бра́ка зва́вый гдⷭ҇ь ѡ҆предѣлѝ бы́ти. Тѣ́мже ѻ҆де́жда бра́чнаѧ є҆́сть безстра́стїе слове́сныѧ дꙋшѝ, ѿре́кшїѧсѧ мїрски́хъ похоте́й. Ка́ѧ же вина̀, ꙗ҆́кѡ помышлє́нїѧ чꙋ́вственныхъ веще́й ᲂу҆коснѣва́юще растлѣва́ютъ ра́зꙋмъ, ѡ҆ се́мъ во глава́хъ ѡ҆ моли́твѣ ска́зано бы́ло.

к҃г. И҆з̾ противлѧ́ющихсѧ дѣ́ѧтельности де́монѡвъ трѝ сꙋ́ть первонача́льнїи, и҆̀мже послѣ́дꙋетъ ве́сь по́лкъ и҆ноплеме́нникѡвъ, и҆̀же пе́рвїи на бра́ни стоѧ́тъ, и҆ нечи́стыми пѡ́мыслы возбꙋжда́ютъ дꙋ́шы къ ѕло́бѣ, и҆̀мже по́хоти чревобѣ́сїѧ ввѣ́рены сꙋ́ть, къ сребролю́бїю на́съ под̾ꙋща́юще, и҆ ко сла́вѣ человѣ́ческой возбꙋжда́ющїе. Жела́ѧ ᲂу҆̀бо чи́стыѧ моли́твы, блюди́сѧ ѿ ꙗ҆́рости, и҆ любѧ̀ цѣломꙋ́дрїе, ᲂу҆держѝ чре́во, и҆ не да́ждь є҆мꙋ̀ въ сы́тость хлѣ́ба, и҆ водо́ю ᲂу҆дрꙋчѝ є҆̀. Бо́дрствꙋй въ моли́твѣ, и҆ памѧтоѕло́бїе ѿ себѧ̀ ᲂу҆далѝ, да не ѡ҆скꙋдѣ́ютъ тѝ словеса̀ ст҃а́гѡ дх҃а, и҆ во двє́ри писа́нїѧ толцы̀ рꙋка́ми добродѣ́телей: тогда̀ возсїѧ́етъ тѝ безстра́стїе се́рдца, и҆ ᲂу҆́мъ ѕвѣздозри́теленъ ᲂу҆́зриши въ моли́твѣ.

а҃. Таковꙋ̀ подоба́етъ бы́ти всегда̀ и҆́нокꙋ, ꙗ҆́кѡ ᲂу҆́трѣ ᲂу҆мре́ти и҆мꙋ́щꙋ: и҆ та́кѡ ᲂу҆потреби́ти тѣ́ло, ꙗ҆́кѡ мнѡ́гїѧ лѣта̀ жи́ти и҆мꙋ́щꙋ. Пе́рвое бо ѿсѣка́етъ по́мыслы ᲂу҆ны́нїѧ, и҆ тща́тельнѣйшимъ содѣ́ловаетъ и҆́нока: второ́е же здра́вымъ сохранѧ́етъ тѣ́ло, и҆ равномѣ́рнѣ соблюда́етъ воздержа́нїе.

в҃. Дости́гшїй ра́зꙋма и҆ сла́дость ѿ негѡ̀ вкꙋси́вшїй, не ктомꙋ̀ дꙋ́хꙋ тщесла́вїѧ повине́тсѧ, приводѧ́щемꙋ всѣ̀ сла́дѡсти є҆мꙋ̀ мі́ра сегѡ̀. Что́ бо ѻ҆́нъ ѡ҆бѣща́ти мо́жетъ вѧ́щше дꙋхо́внагѡ видѣ́нїѧ; Доко́лѣ же ра́зꙋма не вкꙋси́хомъ, дѣ́ѧтельность ᲂу҆се́рднѡ да произво́димъ, намѣ́ренїе на́ше показꙋ́ѧ бг҃ꙋ, ꙗ҆́кѡ всѧ̑ твори́мъ позна́нїѧ ра́ди є҆гѡ̀.

г҃. Потре́бно и҆ пꙋти̑ предше́ствовавшихъ и҆́нокѡвъ и҆з̾ѧви́ти, є҆́же къ ѻ҆́нымъ направлѧ́тисѧ: мнѡ́га бо сꙋ́ть и҆ содѣ̑ѧннаѧ и҆ речє́ннаѧ и҆́ми до́брѣ. Междꙋ̀ про́чимъ и҆ сїѐ глаго́летъ нѣ́кто ѿ ѻ҆́ныхъ, ꙗ҆́кѡ не тꙋ́чнаѧ и҆ равномѣ́рнаѧ пи́ща, съ любо́вїю сопрѧже́ннаѧ, ско́рѡ вво́дитъ и҆́нока во приста́нище безстра́стїѧ.

д҃. Срѣ́тесѧ нѣ́кто въ глꙋбо́кꙋю но́щь со ст҃ы́мъ мака́рїемъ, и҆ вельмѝ жа́ждою томи́мь, просѧ́ше ᲂу҆ негѡ̀ воды̀ пи́ти. Ѻ҆́нъ же глаго́ла: бꙋ́ди дово́ленъ сѣ́нїю: мно́зи бо пꙋтеше́ствꙋюще ны́нѣ и҆ пла́вающе, и҆ сеѧ̀ сꙋ́ть лише́ни. Та́же ᲂу҆праждни́всѧ разсꙋжде́нїемъ съ ни́мъ ѡ҆ воздержа́нїи, дерза́й, речѐ, ча́до: а҆́зъ бо въ цѣ̑лыѧ два́десѧть лѣ́тъ, нижѐ хлѣ́ба, нижѐ воды̀, нижѐ сна̀ въ сы́тость прїѧ́хъ, но хлѣ́бъ мо́й ꙗ҆до́хъ вѣ́сомъ, и҆ во́дꙋ пїѧ́хъ мѣ́рою, къ стѣна́мъ же ма́лѡ приклони́всѧ, нѣ́коликѡ сна̀ воспрїима́хъ.

є҃. Оу҆́мъ прельща́емый и҆справлѧ́етъ чте́нїе, бдѣ́нїе и҆ моли́тва: по́хоть же жего́мꙋю и҆зсꙋша́етъ а҆́лчба: трꙋ́дъ и҆ ѿше́льничество. Ꙗ҆́рость же возмꙋща́ющꙋю ᲂу҆кроща́етъ ѱалмопѣ́нїе, долготерпѣ́нїе и҆ ми́лость. Безмѣ̑рнаѧ бо и҆ безвре́мєннаѧ маловре́мєнна сꙋ́ть, па́че врє́дна и҆ неполє́зна.