Ꙋ҆ка́ꙁъ ѡ҆ є҆́же чесо́ради А҆́бїе по Бжⷭ҇тве́нной Лѵтꙋргїи Вече́рнѧ непосредстве́ннѣ ᲃверша́етсѧ въ ᲃт҃ꙋ́ю Неде́лю Пѧтдесѧ́тницы
И҆ꙁрѧднѣ́йшїе и҆ꙁвѣ́ты и҆ вины̀ ᲃи́цевагѡ Вослѣдова́нїѧ, ᲃꙋтъ три ᲃі́ѧ.
Пе́рваѧ ᲂу҆́бѡ є҆́стъ, ꙗ҆́кѡ А҆пⷭ҇ли Бж҃естве́ннїи а҆́ще и҆ тре́тїѧгѡ ча́са днѐ Дх҃ъ ᲃт҃ы́й прїѧ́ша, но по прїѧ́тїи, не а҆́бїе къ ѻ҆бѣ́дѡмъ ᲂу҆стреми́шасѧ, но ве́съ де́нь въ проповѣда́нїи Бж҃їѧ ᲃло́ва, и҆ Креще́нїи трі́ехъ ти́сѧчъ дш҃ъ, не ꙗ҆́дше пребы́ша, ꙗ҆́коже А҆пⷭ҇лскаѧ Дѣѧ́нїѧ свѣдител̾ствꙋ́ют, въ Главѣ̀ в҃ ᲃті́хъ д҃і. Ничто́же бо ѡ҆ ѻ҆бѣ́дахъ та́мѡ повѣствꙋ́ютъ, но ᲃи́це вѣща́ютъ: И҆ приложи́шасѧ въ то́й де́нь дш҃ъ ꙗ҆́кѡ трѝ ти́сѧща, бѧ́хꙋ же терпѧ́ще въ ᲂу҆че́нїи Апⷭ҇лъ, и҆ въ ѻ҆бще́нїи и҆ в преломле́нїи хлѣ́ба, и҆ въ моли́твахъ. Ѻ҆бще́нїе же и҆ Преломле́нїе Хлѣ́ба, не про́стое бѣ̀ тогда̀, но Бжⷭ҇тве́ннаѧ Лѵтꙋ́ргїѧ, въ не́й же є҆́стъ ѻ҆бще́нїе Крвѐ Хв҃ой и҆ преломле́нїе Хлѣ́ба въ Тѣ́ло Хв҃о пресꙋществова́ннагѡ. Знамена́й ᲂу҆́бѡ ꙗ҆́кѡ по Лѵтꙋ́ргїи и҆ моли́твы а҆́бїе бы́шѧ. Ви́ждъ ᲂу҆бѡ ꙗ҆́кѡ А҆пⷭ҇ли ве́съ то́й де́нь во́нже Дх҃ъ ᲃт҃ы́й приѧ́шѧ, въ ᲂу҆че́нїи Бж҃їѧгѡ ᲃло́ва, Кр҃ще́нїи, ᲃлꙋже́нїи Бжⷭ҇тве́нныѧ Лѵтꙋ́ргїѧ, и҆ моли́твахъ да́же до ве́чера пребы́шѧ. Тѣ́мже Цр҃ковъ ᲃт҃а́ѧ, и҆ Бжⷭ҇тве́нныхъ А҆пⷭ҇лъ ве́съ де́нь не ꙗ҆́дшихъ, подража́ѧ, и҆ Пра́вилѡмъ ᲃт҃ы́мъ въ Нѣде́лю по́стити запрѣща́ющимъ ᲂу҆гажда́ѧ, не въ самы́й ве́черъ, (ꙗ҆́коже въ Навече́рїѧхъ твори́ти ѡ҆бы́че) Бжⷭ҇тве́нныѧ Лѵтꙋ́ргїю въ Вече́рнею съверша́етъ: но въ полꙋ́дне наче́нши Лѵтꙋ́ргїю, по не́й а҆́бїе и Вече́рню съ моли́твами съверша́етъ. И҆ ᲃи́це и҆ А҆пⷭ҇лѡвъ ᲃт҃ы́хъ лѣ́потнѣ подража́етъ, и҆ Пра́вилѡмъ наси́л̾ствїѧ не тво́ритъ.
Вто́раѧ же є҆́стъ ᲃі́ѧ: Ꙗ҆́кѡ ника́коже досто́итъ ᲃі́ѧ Колѣнопрекло́нныѧ моли́твы, въ ни́хъ же ѡ҆ Прише́ствїи на́ ны ᲃта́гѡ Дх҃а про́симъ (ꙗ҆́же Це́рковъ ᲃт҃а́ѧ Восто́чнаѧ на Вече́рни съверша́ти ѡ҆быче) по ѡ҆бѣ́де съверша́ти: Ст҃і́и бо А҆пⷭ҇ли, ни ꙗ҆́дше ни пи́вше ᲃт҃ы́й Дх҃ъ прїѧ́ша. Тѣ́мже Церко́вномꙋ ᲃт҃о́мꙋ ᲃемꙋ̀ ѡ҆бы́чаю противѧ́щїйсѧ, и҆ ꙗ҆́дше ᲃі́ѧ съверша́ющїи, Дх҃ꙋ ᲃт҃о́мꙋ, (съ ѡ҆́нѣми гл҃а́вшими А҆пⷭ҇лѡмъ, ꙗ҆́кѡ мсто́мъ и҆спо́лнени сꙋ́тъ,) нарꙋга́ютсѧ. Рече́тъ ли кто̀, чесо̀ ра́ди не пре́дъ Лѵтꙋ́ргїею, и҆лѝ въ само́й Лѵтꙋ́ргїи по Е҆ѵⷢ҇лїи съверша́ютсѧ; Ѿвѣща́ю: А҆пⷭ҇ли Бжⷭ҇тве́ннїи, чи́сти ѿ всѣ́хъ ᲃкве́рнъ бѣ́шѧ, ꙗ҆́коже ᲃа́мъ Гд҃ь ᲃвѣдите́л̾твꙋ́етъ, Вы чи́сти є҆стѐ. І҆ѡа́ннъ. Глава̀ г҃і. Зач: м҃д. Тѣ́мже пре́жде Лѵтꙋ́ргїи Дх҃ъ ᲃт҃ы́й прїѧ́шѧ, не требова́хꙋ бо Же́ртвою беꙁ̾кро́вною пре́жде ѡ҆чи́ститисѧ. и҆ Соше́ствїе ᲃт҃а́гѡ Дх҃а Кр҃ще́нїе А҆пⷭ҇лѡмъ по гл҃ꙋ Гдⷭ҇ню бы́сть: Вы́ же и҆́мате крⷭ҇ти́тисѧ Дх҃омъ ᲃт҃ы́мъ, не по мно́ꙁѣхъ си́хъ дне́хъ.
Дѣѧ́н: а҃, Глава̀. Кр҃ще́нїе же пре́жде Лѵтꙋ́ргїи быва́етъ. Мы́ же грѣхѡ́въ и҆спо́лнени ᲃꙋ́ще, требꙋ́емъ пре́жде Же́ртвою сею̀ грѣхочисти́телною ѿ скве́рнъ ѡ҆чи́ститисѧ, та́же Благода́ть ᲃⷮ: Дх҃а є҆́же на на́съ прїйтѝ приꙁыва́ти: въ чⷭ҇тыѧ бо а҆ не въ ѡ҆скверненныѧ дꙋшѧ̀ ᲃі́ѧ вселѧ́етсѧ. В Лѵтꙋ́ргїи же, ᲃі́ѧ не гл҃емъ: Лѵтꙋ́ргїѧ бо Бжⷭ҇тве́ннаѧ и҆́матъ сво́й ѡ҆бы́чный чи́нъ, и҆́же ника́коже ни чи́мже пресѣ́щи досто́итъ.
Къ семꙋ̀ (ꙗ҆́коже рѣ́хѡмъ,) пре́жде ѡ҆ на́съ Же́ртвѣ приноси́тисѧ подоба́етъ, и҆ Бг҃а ѡ҆ грѣсе́хъ ᲂу҆милостиви́ти, и҆ тогда̀ тогѡ̀ Же́ртвою ми́рною Тѣ́ла и҆ Крвѐ ᲃн҃а є҆гѡ̀ примири́телна сꙋ́ща, ѡ҆ Благода́ть проси́ти.
Тре́тѧѧ же є҆́стъ: Дре́внїй Цр҃кве ᲃт҃ы́ѧ Восто́чныѧ ѡ҆бы́чай и҆́же Це́рковъ на́шѧ Рꙍссі́йскаѧ ѿ Кꙍнстантінопо́лскїѧ А҆пⷭ҇лскїѧ Це́ркві вкꙋ́пе съ Кр҃ще́нїемъ прїѧ́ла є҆́стъ. И҆ ᲂу҆́бѡ, поне́же непремѣ́нно ᲃи́це да́же до дне́сь се́й чи́нъ въ ᲃт҃ꙋ́ю Пѧтдесѧ́тницꙋ съде́ржитъ. Ни́ же пре́жде Лѵтꙋ́ргїѧ, ни въ Лѵтꙋ́ргїю, но ни́ же по Лѵтꙋ́ргїю кро́мѣ Вече́рнѧ, поне́же и҆ все́мъ А҆пⷭ҇лѡвъ на́мъ подража́ти подоба́етъ, и҆́же ве́съ де́нь да́же до ве́чера не ꙗ҆́дше въ ᲃло́вѣ и҆ моли́твѣ пребы́шѧ, а҆́ще не до ве́чера, понѐ до Вече́рни не ꙗ҆́дше въ моли́твахъ пребыва́юще. и҆ ни́ же пе́рвѣе чре́вꙋ послꙋжи́вше, и҆ пре́жде ꙗ҆́кожебы нарꙋга́вшесѧ Дх҃ꙋ ᲃт҃о́мꙋ, пото́мъ томꙋ̀ ᲃлꙋжи́ти, и҆ тогѡ̀ приꙁыва́ти лѣ́по є҆́стъ. Тѣ́мже ᲂу҆бѡ поне́же се́й ᲃт҃олѣ́пный ѡ҆бы́чай, є҆́стъ дре́внее Церко́вное преда́нїе, по Златосло́вномꙋ Оу҆чт҃лю, на Посла́н: в҃, къ Солꙋнѧ́н: Глава̀ в҃. Зач: со҃ѕ. Сті́хъ, є҃і. въ Бесѣ́д: д҃.
Ꙗ҆́коже А҆пⷭ҇лское ра́внѣ и҆ Церко́вное преда́нїе, достовѣ́рно бы́ти в̾мѣнѧ́ймѡ: и҆ поне́же Преда́нїе є҆́стъ, ничто́же вѧ́щше (прекосло́внѣ) рцѣ́мъ: но подо́лгꙋ повини́мсѧ Церко́вномꙋ ѡ҆бы́чаю, и҆ благоговѣ́ннѡ ᲂу҆молкнѣ́мъ.