Мл҃твы, что́мыѧ въ вре́мѧ гꙋби́тел̾ства и҆ напра́сныѧ ᲃме́рти. Творе́нїе ст҃ѣ́йшагѡ Патрїа́рхи Кѵръ Ѳілоѳеа

Дїа́конꙋ ре́кшꙋ:

Съ слеꙁа́ми и҆ ᲂу҆миле́нїемъ, въ сокрꙋше́ннѣмъ се́рдци прекло́нше колѣ́нѣ дш҃ъ и҆ тѣле́съ на́шихъ, приле́жнѡ, Гд҃ꙋ помоли́мсѧ.

Всѝ пою́тъ, Гд҃и поми́лꙋй. Три́жды:

Колѣ́на прекланѧютъ, І҆ере́ѵ꙼ же и҆ са́мъ колѣ́нѣ прекло́нь, съ ᲃлеꙁа́ми и҆ всѧ́кимъ ᲂу҆миле́нїемъ, глаголетъ Мл҃твы ᲃі́ѧ.

Влады́ко Гд҃и Бж҃е на́шъ, неисчерпа́емый и҆сто́чниче щедрѡ́тъ, чл҃кѡлю́бїѧ неиꙁслѣдованнаѧ пꙋчи́нѡ, непреходи́маѧ бе́ꙁдно долготерпѣ́нїѧ и҆ блгⷭ҇ти: и҆́же и҆ раꙁли́чны находи́мыѧ ро́дꙋ члчⷭ҇комꙋ, ра́ны же и҆ ꙗ҆́ꙁвы, по́леꙁнѡ ра́ди беꙁмѣ́рнагѡ чл҃кѡлю́бїѧ наноси́ши, ꙗ҆́кѡ да є҆́же къ грѣхꙋ̀ на́ше неꙋдержа́нное, и҆ скоропрело́жное, ꙗ҆́кѡ нѣ́коею ᲂу҆ꙁдо́ю Бжⷭ҇тве́ннымъ ти соде́ржиши стра́хомъ, да не беꙁчи́ннѡ дви́жетсѧ на Бжⷭ҇тве́нный ѻ҆́браꙁъ, ни́же дш҃евномꙋ бл҃горо́дїю злѣ досажда́етъ.

Ꙋ҆ста́ви моли́мсѧ є҆́же на є҆́стество на́ше наноси́мое ѻ҆́строе и҆ беꙁго́дное сі́е сме́ртное ѻ҆рꙋ́жїе, да не ᲂу҆мале́нны на́съ па́че всѣ́хъ ꙗ҆ꙁы́къ сотвори́ши: ни́же ᲂу҆мнымъ и҆ чꙋвстве́ннымъ врагѡ́мъ на́шимъ въ поноше́нїи бꙋ́демъ: и҆ запꙋстѣ́ютъ гра́ды, и҆ потребѧ́тсѧ тѡ́рги: ᲃщ҃еннаѧ бо то́ржества, и҆ ᲃлꙋ́жбы, и҆ Бжⷭ҇тве́нных пѣ́снїй съставле́нїѧ мнѡжа́йшею ча́стїю ᲂу҆молкѡ́шѧ, и҆ хра́мы до́брїи и҆ вели́цїи по писа́нїю въ запꙋстѣ́нїе бы́ша, и҆ нѣ́сть живꙋ́щагѡ въ ни́хъ: ᲃтра́хъ и҆ тре́петъ прі́йде на́ны, и҆ тма̀ дебе́ла и҆ мра́чна, стра́шныѧ сеѧ̀ сме́рти всѣ́хъ покры̀: не ᲂу҆спѣва́емъ Влады́ко ᲃрѡ́дникъ ᲃконча́вшихсѧ ꙗ҆́коже ѡ҆бы́чай рыда́ти, и҆ коне́цъ на́шъ приспѣва́етъ, и҆ и҆́нѣхъ и҆́щемъ на́съ рыда́ющихъ, и҆ ѻ҆́бщомꙋ гро́бꙋ преда́емсѧ: ни́же жи́ви сꙋ́ще и҆ ви́дими, жи́ти ᲂу҆жѐ себѐ непщꙋ́емъ, и҆ ѿ стра́ха ᲃтра́шныѧ сеѧ̀ ра́ны, ма́ло и҆ самѣ́мъ себѣ̀ вѣ́рꙋемъ: сме́рти зна́менїе и҆ ра́ны кі́йждѡ и҆мѣ́ти въ себѣ̀ мнѧ́сѧ, и҆ пре́жде сме́рти, ᲃтра́хом сме́рти лю́тѣ ᲂу҆мира́ѧ. Сі́ѧ злобы̀ на́шеѧ сꙋ́тъ мꙁды̀: ᲃі́е є҆́стъ лꙋка́выхъ и҆ нечи́стыхъ на́шихъ дѣѧ́нїй вꙁаи́мное наверше́нїе: сі́ѧ и҆ скве́рны и҆ непра́вды, и҆ клѧтвопрестꙋпле́нїѧ на́шегѡ, лю́таѧ и҆справле́нїѧ: ᲃи́це трегла́вный змі́й го́ркїѧ на́мъ зꙋ́бы вонꙁи́въ, тлѣ́нїе и҆ сме́рть си́лою наведѐ. Си́хъ бо ра́ди, речѐ, грѧдетъ гнѣ́въ Бж҃ій на сыны̀ проти́вныѧ.

Тѣ́мъ же ни́же ᲂу҆мныѧ ѻ҆́чи воꙁвестѝ, ни́же моли́тисѧ чи́сто, и҆лѝ млⷭ҇ть привлещѝ мо́жемъ, тѧ́гостїю со́вѣстною, ꙗ҆́коже нѣ́кїими ѻ҆ко́вы желѣ́ꙁными стѧгнꙋ́тъ є҆́стъ кі́йждѡ.

Но не преда́ждъ на́съ до конца̀ и҆́мени твое́гѡ ра́ди: ни́же раꙁорѝ завѣ́тъ тво́й: ни́же покаѧ́нїѧ и҆ ѡ҆браще́нїѧ да ѿщетимсѧ вре́мене стра́стнїи, и҆́хже ра́ди и҆ ра́нꙋ ᲃме́ртнꙋю сі́ю чл҃кѡлю́бнѣ наве́лъ є҆сѝ.

Вѣ́мы, ꙗ҆́кѡ мнѡга́щи покаѧ́нїе ѡ҆бѣща́вше, и҆ мнѡга́щи солга́вше, посѣче́нїю по непло́дныѧ ᲃмоко́вници ѡ҆сꙋждени бы́хѡмъ: но па́ки и҆ є҆щѐ потерпѝ чл҃кѡлюби́вый дѣла́телю.

Не хотѧ́й ᲃме́рти грѣ́шнагѡ, но є҆́же ѻ҆брати́тисѧ є҆мꙋ, и҆ жи́вꙋ бы́ти: ᲃедмдесѧ́тъ седмери́цею проща́ти бра́тїи повелѣ́вый согрѣше́нїѧ, простѝ на́мъ всѧ̀ беꙁꙁако́ннаѧ дѣѧ́нїѧ, и҆ лꙋка́ваѧ дѣла̀, и҆ тѧ́жкїѧ и҆ ме́рꙁскїѧ на́шѧ грѣхѝ. Могі́й ѿ жесто́кагѡ и҆ непло́днагѡ ка́мене воꙁдви́гнꙋти чѧ́да А҆враа́мꙋ, ѿвратѝ ѿ на́съ лю́тое сі́е гꙋби́телное преще́нїе, и҆ ѡ҆животворѝ на́съ блгⷭ҇тїю си: тебѣ́ бо єди́номꙋ всѧ̀ воꙁмо́жна, ꙗ҆́же ѿ чл҃къ невоꙁмо́жна сꙋ́тъ чл҃кѡлю́бче Влады́ко: да и҆ ѡ҆ на́съ въ ро́дъ и҆ ро́дъ просла́витсѧ Прⷭ҇то́е твоѐ и҆мѧ̀, Ѿц҃а̀ и҆ Сн҃а и҆ ст҃а́гѡ Дх҃а, ны́нѣ и҆ прⷭ҇нѡ, и҆ въ вѣ́ки вѣ́кѡвъ, А҆ми́нь.

Гд҃ꙋ пом҃ли́мсѧ.

Согрѣши́хѡмъ, беꙁꙁаконова́хѡмъ, ѡ҆неправди́хѡмъ пре́дъ тобо́ю пребл҃гі́й Влады́ко: престꙋпи́хѡмъ спасе́нныѧ ти за́повѣди, и҆ ᲃщ҃енныѧ ѡ҆бѣ́ты на́шѧ, ꙗ҆́же въ ᲃт҃о́мъ кр҃ще́нїи пре́дъ вели́кимъ ти жерто́вникѡмъ пре́дъ А҆́гг҃лы сотвори́хѡмъ и҆ чл҃ки: преѡбидѣ́хѡмъ стра́шнꙋю Кро́вь завѣ́та, є҆ю́ же ѡ҆ст҃и́хѡмсѧ, ѻ҆́бще єѧ̀ прїи́мше, и҆ Дх҃ъ благода́ти ѡ҆беꙁчести́вше, и҆ стра́шное и҆ преестестве́нное сн҃оположе́нїе небре́гше.

Всѧ́кое писа́нїе и҆ Бжⷭ҇тве́нный за́конъ, и҆ ᲂу҆чи́телство Бг҃одх҃нове́нное, звꙋ́къ тще́тный, и҆ глаголы̀ дѣ́телныѧ пꙋ́сты въ на́съ въмѣни́шасѧ: и҆́менемъ то́кмѡ и҆ ᲃловесы̀ чⷭ҇тное Е҆ѵⷢ҇лїе и҆́стиннагѡ христїѧ́нства ѡ҆каѧ́ннїи съде́ржимъ: рꙋ́цѣ на́ши, къ всѧ́комꙋ хище́нїю, и҆ лихои́мствꙋ бы́ша приле́жны: нѡ́ги же, ско́ры и҆ де́рꙁостны, къ всѧ́кой непра́вдѣ и҆ злотечи́нїю, гото́вы ча́стъ бра́тнюю восхища́ти, и҆ попира́ти, и҆ снѣда́ти ᲂу҆бѡ́гихъ: ᲂу҆ста̀, сщ҃енныхъ Мл҃твъ и҆ ᲃло́ва ѡ҆рга́нъ сꙋ́щаѧ, всѧ́коѧ нечистоты̀, и҆ сꙋесло́вїѧ, и҆ клѧтвопрестꙋпле́нїѧ бѣсо́вскагѡ ᲃотвори́хѡмъ ѡ҆рга́нъ: ѻ҆́чи, и҆ всѧ̀ на́шѧ чꙋ́вствїѧ, блꙋжде́нїѧ и҆ всѧ́кагѡ скверне́нїѧ по премнѡ́гꙋ и҆сполни́хѡмъ: въ на́съ црⷭ҇твꙋ́ющїй ᲂу҆мъ Бжⷭ҇тве́нное ѻ҆́ное сѣ́мѧ попра́вше, и҆ ᲂу҆ды твоѧ̀ Хє҃, блꙋ́дничѧ ᲂу҆ды сотво́рше, въмѣ́сто хра́ма Бжіѧ, тлѝ и҆ всѧ́коѧ нечистоты̀ храни́лища бы́хѡмъ: сегѡ̀ ра́ди пребл҃гі́й Влады́ко, мнѡ́гое ти чл҃кѡлю́бїе къ негодова́нїю претвори́хѡмъ ѡ҆каѧ́ннїи: и҆ мнѡ́жество твои́хъ бл҃годѣѧ́нїй, въ ка́ꙁни беꙁдꙋ́мнѣ мы преложи́хомъ: и҆ поне́же ни́же на́шими благи́ми, ни́же бо́лѣꙁн̾ми бли́жнихъ лꙋ́чши бы́хѡмъ, пра́веднѣ на себѐ са́ми твое́гѡ пра́веднаго накаꙁа́нїѧ ꙗ҆́ꙁвы подвиго́хомъ.

Но не ꙗ҆́ростїю твое́ю ѡ҆бличѝ на́съ, ни́же гнѣ́вомъ твои́мъ покажѝ на́съ Гд҃и. Тебѣ̀ є҆ди́номꙋ согрѣши́хѡмъ, но и҆ тебѣ̀ є҆ди́номꙋ покланѧ́емсѧ, и҆ сокрꙋше́ннымъ ᲃе́рдцемъ ꙗ҆́кѡ же́ртвꙋ чⷭ҇тꙋ и҆сповѣда́нїе ти прино́симъ: ѡ҆сла́би чл҃кѡлю́бче Влады́ко, ᲂу҆ста́ви пра́веднѣ на носи́мꙋю ра́нꙋ: да побѣди́тъ мнѡ́жество щедрѡ́тъ твои́хъ, грѣхѡ́въ на́шихъ лꙋка́вое собра́нїе: и҆ твое́ѧ беꙁчи́сленныѧ блгⷭ҇ти пꙋчина̀ да покры́етъ го́ркое сле́ꙁъ на́шихъ мо́ре.

И҆́ма́мы твое́гѡ чл҃кѡлю́бїѧ ѻ҆́браꙁы, вели́кїѧ, раꙁбо́йники и҆ мытарѧ̀, блꙋ́дницѧ и҆ бл҃гоꙋ́днагѡ ᲃы́на, и҆́же на́съ ѡ҆каѧ́нных бл҃гоискꙋствꙋ́ютъ и҆ въ нбⷭ҇ное црⷭ҇тво предво́дѧт: съ си́ми ᲂу҆бѡ и҆ на́съ и҆сповѣда́ющихсѧ, и҆ припада́ющихъ ти, прїймѝ Влады́ко. а҆́ще же и҆ тѣхъ всѧ́ческагѡ ѡ҆браще́нїѧ и҆ покаѧ́нїй ѡ҆па́ства ѿсто́имъ, не доста́вше да и҆спо́лнитъ беꙁмѣ́рнаѧ твоѧ̀ блгⷭ҇ть, па́че же и҆ всѐ, поне́же и҆ всегѡ̀ въи́стиннꙋ ѿсто́имъ: и҆́маши же на сі́е бл҃гоꙋтро́бїе и҆ млⷭ҇ть твою̀ ᲃамꙋ́ю молѧ́щꙋю тѧ̀:

Къ си́мъ же, принаша́емъ ти рыда́нїѧ ᲂу҆бѡ́гих, и҆ гла́сы младе́нецъ, ѡ҆каѧ́ннꙋю и҆ препро́стꙋю всѧ́кагѡ во́ꙁраста ча́стъ, досто́йнꙋю ще́дрѡтъ, и҆ проще́нїѧ твое́гѡ: и҆́маши къ семꙋ̀ на млⷭ҇рдїе и҆ млⷭ҇рдїе и҆ млⷭ҇ть прекланѧ́ющїѧ тѧ̀, Крⷭ҇тъ и҆ во́лнꙋю ᲃм҃рть, ю҆́же ѡ҆ на́съ неблагода́рных претерпѣ́л є҆сѝ, по́двиги же А҆пⷭ҇лскїѧ, и҆ Преподо́бныхъ, и҆ По́стникѡвъ, и҆ Мч҃ническїѧ Крвѝ: пре́дъ всѣ́ми же ѻ҆́бщꙋю всеѣ́хъ наде́ждꙋ и҆ ᲃпⷭ҇нїе, па́че ᲃло́ва беꙁъ сѣ́мене ро́ждшꙋю тѧ̀: и҆́хже мѡ́л̾бы чл҃кѡлю́бнѡ прїймѝ, и҆ настоѧ́шихъ зѡ́л и҆ бꙋ́дꙋщих вѣ́чныхъ мꙋ́къ на́съ свободѝ.

Благода́тїю и҆ чл҃кѡлю́бїемъ беꙁнача́лнагѡ ти Ѿц҃а̀, съ ни́мъ же бл҃гоⷭ҇ве́нъ є҆сѝ съ Прⷭ҇ты́мъ, и҆ бл҃ги́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

Гдⷭ҇и є҆ди́не въ млⷭ҇ти бога́тый, ᲂу҆трѡ́бами блгⷭ҇ти прекланѧ́ѧйсѧ къ мл҃енїѧмъ на́съ грѣ́шныхъ и҆ недосто́йныхъ ра́бъ твои́хъ: всѧ̀ на́ша поле́ꙁнѡ строѧ́й, и҆ правлѧ́ѧй: премꙋ́дрымъ твои́мъ промысло́мъ жи́тїе на́ше провожда́ѧй, и҆ всѧ́кимъ ѻ҆́браꙁомъ ᲃпⷭ҇нїѧ на́шегѡ жела́ѧй, є҆стество́мъ долготерпели́въ сы́й и҆ мнѡгомлⷭ҇тивъ: нака́ꙁꙋѧй и҆ па́ки исцѣлѧ́ѧй, и҆ накаꙁа́нїе простира́ѧй бл҃гостнѣ же и҆ чл҃кѡлю́бнѣ, не въ є҆́же погꙋби́ти соꙁда́нїе рꙋ́къ свои́хъ, но па́че є҆́же къ нача́лной добротѣ̀ паки привестѝ, и҆ къ пе́рвомꙋ ѻ҆́номꙋ бл҃горо́дїю, є҆го же погꙋби́хѡм простото́ю ᲂу҆ма̀, и҆ совѣ́томъ ѡ҆каѧннѣ́йшагѡ, па́ки воꙁвестѝ хотѧ̀, и҆ всѣ́ми ѻ҆́браꙁы смотрѧ́ѧ, є҆́же па́ки спастѝ ѡ҆скꙋдѣ́вшее ѿ паде́жа ѻ҆́наго.

Са́мъ Влады́ко вседержи́телю при́ꙁри на́ны, и҆ во́нми моле́нїѧмъ на́съ грѣ́шных: множествѡ́ бо беꙁꙁакѡ́нїй на́шихъ недерꙁнове́нных на́съ тво́ритъ, и҆ ни́же смѣ́ти ѿню́дъ проси́ти проще́нїѧ ѡ҆ прегрѣше́нїихъ: но вѣ́дꙋще твоѐ чл҃кѡлю́бїе, бл҃гоꙋтро́бїе, мнѡ́гꙋю млⷭ҇ть, долготерпѣ́нїе, беꙁꙁло́бїе и҆ премнѡ́гꙋю блгⷭ҇ть, съ дерꙁнове́нїемъ на глꙋбинꙋ̀ сихъ, и҆ на пꙋчинꙋ̀ блгⷭ҇ти твое́ѧ, воꙁдѣ́емъ рꙋ́цѣ и҆ прилѣ́жнѡ вопїемъ ти: согрѣши́хѡмъ, беꙁꙁаконова́хѡмъ, нечествова́хѡмъ, ꙗ҆́кѡ забы́хѡмъ за́пов҃ди твоѧ̀, и҆ въ слѣ́д мы́сли на́шеѧ лꙋка́выѧ ходи́хѡмъ, и҆ ꙗ҆́кѡ недосто́йнѣ зва́нїю и҆ Еѵⷢ҇лїю Ха҃ твое́гѡ жител̾ствова́хѡмъ, и҆ ст҃ы́мъ є҆гѡ̀ ᲃтрⷭ҇темъ и҆ є҆́же ѡ҆ на́съ и҆стоща́нїю, и҆бѡ̀ бы́хѡмъ поноше́нїе воꙁлюбле́нномꙋ твое́мꙋ.

Сщ҃енницы и҆ лю́дїе и҆ꙁстꙋпи́хѡмъ, вкꙋ́пѣ вси ᲂу҆клони́хѡмсѧ, непотре́бни бы́хѡмъ: нѣ́сть творѧ́й сꙋ́дъ и҆ пра́вдꙋ, нѣ́сть и҆ до є҆ди́нагѡ: затвори́хѡмъ щедрѡты̀ твоѧ̀, и҆ чл҃кѡлю́бїе твоѐ, и҆ ᲂу҆тро́бы мл҃сти Бг҃а на́шегѡ, злѡбы̀ ра́ди на́шеѧ, и҆ лꙋка́вства начина́нїй, съ ни́ми же пожи́хѡмъ.

Ты блг҃ъ є҆сѝ, но мы̀ беꙁꙁаконова́хѡмъ: ты долглтерпе́ливъ, но мы̀ ра́нъ досто́йни: вѣ́мы твою̀ блгⷭ҇ть, а҆́ще и҆ не раꙁꙋми́ви є҆смы̀: ма́ло ѡ҆ ни́х же согрѣши́хѡмъ бїе́ни бы́хѡмъ.

Ты стра́шенъ є҆сѝ, и҆ кто̀ проти́вꙋ ста́нетъ ти; тре́петъ прі́ймꙋтъ ѿ тебѐ го́ры, и҆ вели́чествꙋ мы́шцѧ твое́ѧ ктѡ̀ проти́вꙋ рече́тъ: а҆́ще заключи́ши нб҃о, ктѡ̀ ѿверꙁе́тъ; и҆ а҆́ще заключи́ши хлѧ́би твоѧ̀, ктѡ̀ постои́тъ; ле́гкѡ є҆́стъ пре́дъ ѻчи́ма твои́ма ѡ҆ ᲂу҆бо́жати, и҆ ѡ҆богати́ти: жи́ти сотвори́ти, и҆ ᲂу҆мори́ти, пораꙁи́ти, и҆ и҆сцѣли́ти: є҆́же бо хотѣ́ти тебѣ̀, дѣ́ло ᲂу҆жѐ є҆́стъ соверше́нно.

Ты раꙁгнѣ́валсѧ є҆сѝ мы́ же согрѣши́хѡмъ, гл҃етъ нѣ́кто ѿ дре́внихъ, и҆сповѣда́ѧсѧ: на́мъ же и҆ съпроти́въ вре́мѧ є҆́стъ рещѝ: мы согрѣши́хѡмъ, ты́ же раꙁгнѣва́лсѧ є҆сѝ: ᲃегѡ̀ ра́ди бы́хѡмъ поноше́нїе сосѣ́дѡмъ на́шимъ: ѿврати́лъ є҆сѝ лицѐ своѐ, и҆ нече́стїѧ и҆сполни́хѡмсѧ: но преста́ни Гд҃и ѿ гнѣ́ва, ѡ҆сла́би Гд҃и, ᲂу҆млⷭ҇тиви́сѧ Гд҃и, и҆ не преда́ждъ на́съ до конца̀ беꙁꙁакѡ́нїй ра́ди нш҃ихъ, ни́же на́шими ра́нами да нака́жеши и҆́ных, и҆ є҆ди́нѣмъ на́съ мꙋче́нїемъ и҆́ныхъ ᲂу҆цѣломꙋдри́ши: кі́имъ си́мъ; ꙗ҆ꙁы́кѡмъ невѣдꙋ́щимъ тѧ̀, и҆ црⷭ҇твїѧмъ неповинꙋ́вшимсѧ держа́вѣ твое́й.

Мы́ же лю́дїе твоѝ, же́ꙁлъ наслѣ́дїѧ твое́гѡ. ᲃегѡ ра́ди накажи́ ны, ѡ҆ба́че въ блгⷭ҇ти, а҆ не съ ꙗ҆́ростїю твое́ю: да не ᲂу҆ма́леныхъ на́съ сотвори́ши, и҆ па́че всѣ́хъ живꙋ́щихъ на землѝ въ ᲂу҆ничиже́нїе бꙋ́демъ: млⷭ҇ть бо твоѧ̀ неиꙁреченна, и҆ чл҃кѡлю́бїе твоѐ неѿтло́жнѡ, и҆ бога́тство блгⷭ҇ти твое́ѧ неиꙁслѣди́мое, нанѧ́ же и҆ дерꙁа́юще моли́мсѧ и҆ ми́лисѧ дѣ́емъ, прекланѧ́юще колѣ́нѣ ᲃерде́цъ на́шихъ: преста́ни ѿ сѣ́ча гнѣ́ва твое́гѡ моли́мъ приле́жнѡ, ꙗ҆́коже при Дави́дѣ дре́вле ѿ и҆́же на лю́дехъ твои́хъ, а҆́ще и҆ не подо́бное покаѧ́нїе пока́ꙁꙋем: но ꙗ҆́кѡ пребл҃гі́й преста́ти сотворѝ гнѣ́вꙋ твое́мꙋ: ᲂу҆кротѝ ꙗ҆́ростъ твою̀ пра́веднꙋю, и҆ да́ждъ здра́вїе болѧ́щим, крѣ́пость не́мощнымъ: здра́выѧ же въ здра́вїи соблюдѝ: всѧкъ не́дꙋгъ, и҆ всѧ́кꙋю ꙗ҆́ꙁю ѿженѝ ѿ люді́й твои́х: всѣ́хъ ѿ сегѡ̀ чаѧ́нїѧ свободѝ, сохранѧ́ѧ беꙁнавѣ́тны по бы́вшей бо́лѣꙁни, и҆ соблюда́ѧ Вседержи́телною ти рꙋко́ю, неприкоснове́нны ѿ лю́тагѡ сегѡ̀ ѡ҆ꙁлобле́нїѧ, и҆ гꙋби́телнагѡ съкрꙋше́нїѧ.

Вои́стиннꙋ бо поколѣба̀ всѣ́хъ, и҆ смꙋтѝ ꙗ҆́рост̾ гнѣ́ва твое́гѡ: а҆́ще ᲂу҆бѡ и҆ не ѡ҆браща́емсѧ всѧ́кѡ ѿ лꙋка́вствъ на́шихъ, но ты ᲃа́мъ и҆ꙁба́ви ѿ лꙋка́выѧ со́вѣсти всѣ́хъ на́съ, и҆ да́ждъ въ всѧ́комъ бл҃годѣѧ́нїи бл҃гоꙋгоди́ти тебѣ̀: Мл҃твами неискꙋсомꙋ́жнѡ тебѐ рождшїѧ чⷭ҇тыѧ Бг҃омт҃ре, прⷭ҇нѡ Дв҃ы Мр҃їѧ, предста́тел̾ствомъ ᲃт҃ы́хъ и҆ Бг҃ови́дныхъ А҆́гг҃л҃, и҆ всѣ́хъ ᲃт҃ы́хъ:

Ꙗ҆́кѡ ты́ є҆сѝ млⷭ҇ти и҆сто́чникъ, и҆ бл҃гоꙋтро́бїѧ неиꙁслѣди́маѧ пꙋчи́на, и҆ тебѣ̀ ᲃла́вꙋ воꙁсыла́емъ, съ беꙁначальнымъ ти Ѿц҃емъ, и҆ съ прест҃ым и҆ бл҃ги́мъ, и҆ животворѧ́щимъ ти Дх҃омъ, ни́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

Пребл҃гїй Гд҃и, ᲃодѣ́телю всѧ́ческихъ: є҆го́же млⷭ҇ть беꙁмѣ́рнна, и҆ чл҃кѡлю́бїе неиꙁрече́ннѡ: и҆́же беꙁꙁакѡ́нїѧ нш҃ѧ всѧ̀ вꙁе́мъ, къ Крⷭ҇тꙋ пригвоꙁди́лъ є҆сѝ ꙗ҆́кѡ да ѡ҆ст҃и́ши на́съ. беꙁгрѣ́шенъ сы́й, и҆ всѧ́коѧ скве́рны непрїѧтенъ: на тебѐ дерꙁа́юще припада́емъ моле́бнѣ неꙁлоби́ве Гд҃и, и҆ на пꙋчи́нꙋ твое́гѡ неиꙁрече́ннагѡ и҆ беꙁмѣ́рнагѡ чл҃кѡлю́бїѧ въꙁира́юще, зове́мъ къ тебѣ̀ бл҃гопремѣ́нномꙋ Гд҃ꙋ, сп҃сѝ на́съ: не Фарісе́йски пѣ́сни на́ша и҆ пѣсносло́вїѧ воꙁно́симъ, но Мыта́рски: ни́же по не бл҃года́рномꙋ ѡ҆́номꙋ раꙁбо́йникꙋ, но по бл҃гонра́вномꙋ ᲃемꙋ̀, и҆ бл҃гораꙁꙋ҆мномꙋ въпїемъ, Помѧнѝ: сегѡ̀ ра́ди да побѣди́тъ неиспы́тное твоѐ млⷭ҇рдїе беꙁꙁакѡ́нїѧ на́шѧ: и҆ а҆́ще и҆ неподоба́ющимъ ѻ҆́браꙁомъ ка́емсѧ, и҆ ѡ҆браща́емсѧ, покажѝ и҆ на́съ чл҃кѡлю́бїѧ твое́гѡ вели́чество: ᲂу҆млⷭ҇рди́сѧ и҆ примири́сѧ ꙗ҆́кѡ долготерпе́ливъ на́дъ людьми твои́ми: ᲂу҆ста́ви ᲃе́рпъ ᲃме́ртный, да не на на́съ проиꙁы́йдетъ: ᲂу҆ста́ви ᲃко́рое и҆ беꙁго́дное ᲃегѡ̀ съсѣче́нїе: ᲂу҆ста́ви гꙋби́телнагѡ не́дꙋга пра́веднꙋю сі́ю тлю̀: ᲂу҆ста́ви мечъ воꙁдвиꙁа́емый на на́съ, да не поги́бнемъ: тебѣ́ бо є҆ди́номꙋ съгрѣши́хѡмъ, но и҆ тебѣ̀ є҆ди́номꙋ припада́емъ.

Е҆́й Гд҃и, ᲂу҆слы́ши на́съ грѣ́шныхъ и҆ недосто́йныхъ ра́бъ твои́хъ: и҆ не ѿринѝ моле́нїй на́шихъ: пре́ꙁри прегрѣше́нїѧ на́шѧ, во́лнаѧ и҆ не во́лнаѧ, ꙗ҆́же въ ра́ꙁꙋмѣ и҆ невидѣ́нїи: да просла́витсѧ и҆ въ на́съ твоѐ Прⷭ҇то́е и҆мѧ̀: Ѿц҃а̀, и҆ ᲃн҃а и҆ ᲃт҃а́гѡ Дх҃а, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

Бл҃гопремѣни́тельный Гд҃и, долготерпе́ливе и҆ многомлⷭ҇тиве: ᲃъдѣ́телю всѧ́кїѧ тва́ри слове́сныѧ же и҆ ᲂу҆́мныѧ: є҆́же бы́ти ѿ несꙋ́щих всѣ́мъ дарꙋ́ѧй, и҆ є҆́же до́брѣ бы́ти всемꙋ́дрѣ на́мъ дарова́вый: ᲃлавосло́вїи и҆ пѣ́сн̾ми бл҃годарстве́нными припада́ющихъ на́съ твое́й неиꙁрече́нной блгⷭ҇ти непре́ꙁри: ни́же ᲂу҆миле́нныѧ на́шѧ Мл҃твы и҆ моле́нїѧ ѿринѝ: но при́ꙁрѣти бл҃говолѝ ѿ ᲃт҃а́гѡ жи́лища твое́гѡ, и҆ ви́ждъ и҆ посѣтѝ виноградъ се́й, и҆ съвершѝ є҆гѡ̀, є҆го́же насадѝ десни́ца твоѧ̀, и҆ и҆ꙁмѝ на́съ ѿ сегѡ̀ лю́тагѡ и҆ гꙋби́телнагѡ не́дꙋга, ᲃѣ́ча ᲃме́ртнагѡ, дꙋше́внагѡ ꙗ҆́вѣ и҆ тѣле́снагѡ: и҆бѡ̀ ᲃтра́шное ᲃі́е и҆ ненечаѧ́нное злоключе́нїе, не то́кмѡ тѣлеса̀ ᲂу҆мерщвлѧ́етъ и растлѣва́етъ: но и҆ дш҃а̀ коне́чнѣ погꙋблѧ́етъ, бе́ꙁъ покаѧ́нїѧ на́мъ пребыва́ющимъ, и҆ прираꙁи́вшимсѧ ѿ здѐ Бг҃ꙋ нш҃емꙋ.

Сего̀ ра́ди мо́лимтисѧ, и҆ тебѐ про́симъ, ꙗ҆́кѡ да ᲂу҆слы́шиши мл҃енїѧ и҆ мо́л̾бы люді́й твои́хъ, и҆ ѿврати́ши ꙗ҆́рост̾ твою̀ ѿ на́съ.

Е҆й Гд҃и, да не прогнѣ́ваешисѧ на́ны въ вѣ́ки, ни́же простре́ши пра́ведное твоѐ на́ны негодова́нїе: никто́же бо мо́жетъ пре́дъ тобо́ю ста́ти, и҆лѝ дерꙁнꙋ́ти кто ѿ живы́хъ чл҃къ: всѧ́къ же ѡ҆ тебѣ̀ ѡ҆правди́тсѧ, всѧ́ка бо пра́вда члчⷭ҇ка̀ѧ ꙗ҆́коже рꙋ́бище скве́рное, по велегла́сномꙋ И҆са́їи є҆́стъ: гѡ́ры бо и҆ хѡ́лми твои́мъ ᲃтра́хомъ содержи́ми зы́блютсѧ и҆ трепе́щꙋтъ: ᲂу҆поко́й ᲂу҆́бѡ гнѣ́въ сво́й ѿ на́съ: въꙁвратѝ плѣне́нїе на́ше ѿ работы̀ нечести́выхъ.

И҆ ᲂу҆́бѡ и҆ въ ᲂу҆́мѣ быва́емоє плѣне́нїе треволне́нїемъ, и҆ бꙋ́рею и҆скꙋше́нїй ѿ мы́сленнагѡ Фараꙍ́на, ни́же бо мо́жемъ по ѡ҆бо́ю согрѣша́юще, воспѣва́ти тебѣ̀ пѣ́снь бл҃годарстве́ннꙋю на землѝ чꙋ́ждей.

Помѧнѝ на́съ Гд҃и въ млⷭ҇ти и҆ щедрѡта́хъ: ниꙁпослѝ на́мъ А҆́гг҃ла вѣ́рна храни́телѧ, є҆мꙋ́же и҆ предложѝ живо́тъ на́шъ, ꙗ҆́кѡ да и҆ꙁме́тъ на́съ стра́шнагѡ сме́ртнагѡ гнѣ́ва, и҆ неначаѧ́ннагѡ ᲃегѡ̀ меча̀, ꙗ҆́кѡ да и҆ꙁмѣне́нїѧ ра́ди сегѡ̀ и҆ ѡ҆сла́бы, просла́вимъ тѧ Ѿц҃а̀, и҆ ᲃн҃а, и҆ ст҃гѡ Дх҃а, є҆дино̀ Бжⷭ҇тво̀ и҆ црⷭ҇тво, є҆мꙋ́же подоба́етъ всѧ́каѧ сла́ва, чⷭ҇ть, и҆ поклоне́нїе въ вѣ́ки:

Ли́къ:

А҆ми́нь.

Вседержи́телю Влады́ко, долготерпе́ливе, многѡмлⷭ҇тиве, бл҃гопримири́телне, чл҃кѡлюби́ве, всебл҃гі́й, пребл҃гі́й, всеси́лне Хє҃ Бж҃е на́шъ, ты ѿ небы́тыѧ въе́же бы́ти, сама́гѡ ра́ди блгⷭ҇ти и҆ꙁѡби́лїѧ, на́ше є҆́стество приве́лъ є҆сѝ: ты ᲂу҆мнꙋю дш҃ꙋ и҆ ра́ꙁꙋмъ въдхнꙋ́въ въ на́съ и҆ ѻ҆́браꙁомъ твои́мъ поче́тъ, пи́ща ра́йскїѧ, и҆ Бг҃ови́днагѡ та́мѡ жи́тел̾ства, и҆ бе́сѣды Бжⷭ҇тве́нныѧ превели́цѣ сподоби́лъ є҆сѝ: ты за́повѣдь твою̀ ѿри́нꙋвшихъ, и҆ кова́рствомъ и҆ пре́лестїю де́монскою ѡ҆кра́деныхъ, и҆ твое́ѧ ᲃла́вы ѿпа́дшихъ, и҆ на сме́рть премѣ́ншихъ живо́тъ и҆ црⷭ҇тво, въ работꙋ̀ ᲃра́мнꙋю, не преꙁрѣ́лъ є҆сѝ ра́ди неиꙁрече́нныѧ пꙋчины̀ долготерпѣ́нїѧ и҆ блгⷭ҇ти: но посѣти́лъ є҆сѝ многоѡ́браꙁнѣ ѿцы̀ и҆ Патрїа́рхи: ты за́конъ на́мъ въ писа́нїихъ, къ ѡ҆браще́нїю и҆ наставле́нїю да́лъ є҆сѝ: А҆́гг҃лы приста́вилъ є҆сѝ вѡ́жды же и҆ храни́телѧ, ᲂу҆ча́щїѧ и҆ наставлѧ́ющїѧ въ пра́вдꙋ къ приѡбѣте́нїю лꙋ́чшагѡ.

Но поне́же всѧ̀ сі́ѧ тще́тна и҆ сꙋ́етна покаꙁа́хѡмъ на́шимъ є҆́же къ злобѣ̀ беꙁмѣ́рнымъ преклоне́нїемъ, ты са́мъ второ́е є҆стества̀ на́шегѡ съдѣ́телство же и҆ ѡ҆бновле́нїе, неиꙁрече́ннѣ на коне́цъ вѣ́кѡвъ съдѣла́въ, и҆ всегѡ̀ на́шегѡ чл҃вка стра́шнѣ съедини́въ всемꙋ̀ свое́мꙋ Бжⷭ҇твꙋ̀, и҆ пло́тїю пло́тъ, дш҃ею же дш҃ꙋ ѡ҆ст҃и́въ, и см҃ртїю и҆ стра́ст̾ми чре́ꙁъ є҆стестве́нныхъ стра́стїй и҆ сме́рти на́съ и҆ꙁмѣни́въ, и҆ соблюде́нїемъ Бжⷭ҇тве́нныхъ ти за́повѣдїꙋ, беꙁсм҃ртнагѡ живота̀ сподоби́лъ є҆сѝ.

Но и҆ па́ки мы Бжⷭ҇тве́нныѧ за́повѣди ᲃі́ѧ престꙋ́пл̾ше, и҆ въ слѣ́дъ вожделѣ́нїй на́шихъ и҆ вѡ́лѧхъ ходи́вше, всѧ́къ грѣ́хъ на ко́йждѡ дн҃ь приле́жнѡ съдѣловаемъ: ѡ҆гл҃а́нїе, хꙋлꙋ̀, памѧтоꙁло́бїе, клѧтвопрестꙋпле́нїе, лжесло́вїе, срамносло́вїе, ле́сть, рве́нїе, за́висть, и҆ всѧ́кое неподо́бное стꙋдодѣѧ́нїе, є҆стестве́нное же, и҆ чреꙁє҆стестве́нное, и҆ є҆́же ни́же въ беꙁслове́сныхъ живѡ́тныхъ ѡ҆брѣта́етсѧ, сі́е нечестивѣ́йше но́вѡ ᲂу҆мышлѧ́емъ.

И҆щеꙁѡ́ша въ сꙋетѣ̀ днїе на́ши: по́мощи твое́ѧ ѡ҆бнажи́хѡмъ сѧ: нарꙋга́нїе и҆ смѣ́хъ сꙋ́щимъ ѻ҆́крестъ на́съ бы́хѡмъ: И҆менѝ твое́мꙋ Пртⷭ҇о́мꙋ и покланѧ́емомꙋ, на́ми хꙋли́тисѧ въ ꙗ҆ꙁы́цехъ ᲃътвори́хѡмъ, злобо́ю ѡ҆бетша́вше, и҆ на ᲃте́ꙁѧхъ беꙁꙋ́мнѣ ѡ҆хромѣ́вше, всѝ ᲂу҆клони́хѡмсѧ въкꙋ́пѣ непотре́бни бы́хѡмъ: нѣ́сть раꙁꙋмѣва́ѧй, нѣ́сть и҆ до є҆ди́нагѡ: ᲃщ҃енници и҆ лю́дїе ѿстꙋпи́хомъ въкꙋ́пѣ.

Си́хъ ᲂу҆бѡ ра́ди ᲃꙋ́домъ пра́веднымъ ѿринове́ни бы́хѡмъ ѿ тебѐ, и҆ ѿве́ржени є҆смы̀ ѿ вели́кагѡ твое́гѡ застꙋпле́нїѧ, и҆ мнѡ́гое твоѐ чл҃кѡлю́бїе на негодова́нїе ѡ҆брати́хѡмъ ѡ҆каѧ́ннїи: гꙋби́телствѡ и҆ плѣне́нїе, и҆ тѣснота̀, и҆ нищета̀, и҆ см҃рти раꙁли́чныѧ и҆ ча́стыѧ треѡкаѧ́нныхъ на́съ раꙁдѣли́ша, ꙗ҆́кѡ да си́цевыми бичмѝ, къ себѣ̀ и҆ не хотѧ́щихъ привлече́ши чл҃кѡлю́бче.

Но ни́же та́кѡ что̀ множа́е бы́сть ѿ на́съ: преда́лъ є҆сѝ на́съ въ работꙋ̀ ꙗ҆ꙁы́кѡмъ, и҆ въ плѣне́нїе, и҆ закла́нїе и҆ расхище́нїе беꙁꙁакѡ́ннымъ, и҆ ни́же та́кѡ ᲂу҆раꙁꙋмѣ́хѡмсѧ, ни́же лꙋка́встъ на́шихъ, и҆ беꙁꙁакѡ́нїй на́шихъ ѿстꙋпи́хѡмъ.

Ма́лѡ ѿ работы̀ и҆ꙁвле́клъ є҆сѝ на́съ пресла́внѡ, и҆ ѿ нечести́выхъ па́че всѧ́коѧ наде́жды свободи́лъ є҆сѝ, и҆ є҆щѐ па́че приложи́хѡмъ беꙁꙁако́нїе къ беꙁꙁако́нїю: и҆ ѡ҆ бл҃годѣѧ́нїи напы́щшесѧ, свободꙋ̀ и҆ ѿра́дꙋ злѣ̀ ᲂу҆потреби́хѡмъ.

Сегѡ̀ ра́ди пребл҃гі́й Влады́ко, поне́же ско́рбныхъ ра́ди и҆ лю́тыхъ неꙋцѣломꙋдри́хѡмсѧ, ни́же бл҃годѣѧ́нїй ра́ди и҆ бл҃года́тїй твои́хъ лꙋ́чши бы́хѡмъ, ᲃꙋ́до́мъ пра́веднымъ ѡ҆сꙋди́лъ є҆сѝ на́съ, и҆ поги́бели, и҆ всегꙋби́телствꙋ и҆ и҆щеꙁнове́нїю всеконе́чномꙋ преда́лъ є҆сѝ. ꙗ҆́вѣ ᲂу҆́бѡ є҆́стъ ꙗ҆́кѡ коне́чнѣе сътре́номъ бы́ти, и҆ и҆ще́ꙁнꙋти ѡ҆сꙋди́хѡмсѧ, ѿ ни́хже ᲃи́це неща́днѡ наслѣ́дїе ро́да преждевре́менное пожа́лъ є҆сѝ, ꙗ҆́кѡ ни́же ко́рени ни́же ᲃѣ́мени І҆и҃лю ѡ҆ста́тисѧ, по писа́нномꙋ: но бы́ти на́мъ ꙗ҆́коже Содꙍ́ма, и҆ Гомꙍ́рра, и҆ и҆́хже пото́пъ ѕѣ́лный дре́вле растаѝ, съ самы́ми ко́рен̾ми, и҆ съ самы́ми вѣ́тв̾ми и҆ще́ꙁнꙋвшихъ: ни́же бо не́дꙋгъ напа́дши пома́лꙋ въ мѣ́рꙋ и҆ꙁно́ситъ ᲂу҆ме́ршихъ, но ꙗ҆́коже закала́телю тꙋ сꙋ́щꙋ, и҆ коемꙋ́ждѡ тѣ́лꙋ мече́мъ ра́нꙋ наносѧ́щꙋ, та́кѡ въкꙋ́пѣ и҆ ра́нꙋ и҆ зна́менїе см҃рти напра́снѡ прїѧ́ша мнѡ́ꙁи, и҆ въкꙋ́пѣ всѣ́хъ вънеꙁаа́пꙋ тма̀ покри́ла є҆́стъ, и҆ см҃рть, ꙗ҆́кѡ то́кмѡ ре́кшимъ ꙗ҆́кѡ ᲂу҆рани́хѡмсѧ, при но́гꙋ а҆́бїе послѣдова́ти сме́рти, ꙗ҆́коже по двѣ́ма и҆ тре́ма и҆ꙁноси́тсѧ ѿ є҆ди́нагѡ и҆ того́жде до́мꙋ, и҆ къ погребе́нїю провожде́ннѡмъ быва́ти, ꙗ҆́кѡ на кꙋ́пѣ на є҆ди́номъ ло́жи лежа́щимъ: и҆ ни́же довлѣ́ти ѡ҆ста́вл̾шимсѧ въ законе́ннымъ сподоби́тисѧ ꙗ҆́коже досто́итъ, ни́же и҆мѣ́ти къ комꙋ̀ пе́рвѣе ѿ соро́дникъ пойтѝ, всѣ́мъ про́стѣ въкꙋ́пѣ ѡ҆каѧ́ннѣ растлѣва́емымъ, и҆ къ а҆́дꙋ ѿсыла́емымъ: но недоꙋмѣ́нїемъ и҆ недово́лствомъ ѿ всю́дꙋ стѧгнꙋ́тымъ сꙋ́щимъ, ни́же и҆ꙁъѡбрѣстѝ чтѡ̀ ѿ злоключа́ющихсѧ рыда́ти па́че подоба́етъ, беꙁго́дныѧ ли ᲃм҃рти, и҆лѝ є҆́же внеꙁаа́пꙋ та́кѡ похище́ннымъ быва́ти, и҆лѝ пре́жде ѿше́дшихъ, и҆лѝ посе́мъ и҆ꙁдыха́ющихъ, и҆лѝ пома́лѣ сїе пострада́ти хотѧ́щихъ, и҆лѝ є҆щѐ бы́ти мнѧ́щихъ сѧ, и҆ вы́шшихъ не́дꙋга.

Ꙍ҆ всѣ́хже и҆ на́йпаче наста̀ рыда́ти и҆ слеꙁи́ти, ꙗ҆́кѡ не ѡ҆ста́влена є҆́стъ ни є҆дина̀ наде́жда, въ є҆́же и҆ самы́мъ вѣма́лѣ не вочислѧ́тисѧ съ мр҃твыми.

Си́це беꙁъ наде́жды ѿ всю́дꙋ предле́жимъ, ꙗ҆́коже ᲃта́да заколе́нїѧ ѡ҆жида́юще. Дне́сь ѡ҆бсто́итъ ѿце́въ и҆ ма́терїй ли́къ дѣте́й, ли́къ внꙋ́кѡвъ, и҆ ли́къ и҆́ныхъ сърѡ́дникъ и҆ дрꙋ́гѡвъ, ꙗ҆́коже ᲃътѣснѧ́тисѧ дѡ́момъ мнѡ́жествомъ събира́емыхъ множи́цею, по съро́дствꙋ и҆ дрꙋ́жествꙋ ᲂу҆трѣже беꙁча́дни, пꙋ́сти, ѡ҆каѧ́нни, пове́ржени, и҆ ꙗ҆́коже и҆скопи́вшїисѧ ѿню́дъ съ всѣ́мъ, и҆ ѿню́дъ наде́ждꙋ всю̀ ѿложи́вше, и҆ живота̀ и҆ ста́рости и҆ наслѣ́дїѧ хотѧ́щагѡ бы́ти рѡ́да, и҆ всѣ́хъ вкꙋ́пѣ є҆стестве́нныхъ и҆ люби́мыхъ, и҆ нꙋ́жныхъ дрꙋ́гѡвъ лиша́еми.

Ꙋ҆стра́шени ᲂу҆́бѡ є҆смы̀ чл҃кѡлю́бче Влады́ко, вели́чествомъ нестерпи́магѡ ᲃегѡ̀ злоключе́нїѧ и҆ бича̀, и҆ вма́лѣ не ѿчаѧ́хѡмъ самѣ́хъ себѐ, и҆ недоꙋмѣ́нїе и҆ неꙋдо́бствѡ ѡ҆бдержи́тъ на́съ, и҆ стра́хъ и҆ тре́петъ неисповѣди́мъ прі́йде на́ны, и҆ покры̀ на́съ ᲃѣ́нь ᲃм҃ртнаѧ.

И҆ недоꙋмѣ́хѡмсѧ, и҆ ѿчаѧ́хѡмсѧ всѧ́чески: ни́же бо въ живы́хъ себѐ бы́ти помышлѧ́емъ: ни́же въ постоѧ́нїи ᲂу҆ма̀ є҆смы̀: но ко́ждѡ ра́нꙋ и҆ зна́менїе на себѣ̀ и҆мѣ́ти мечта́ѧ, частѡ ᲂу҆́дѡвъ каса́ѧсѧ, на кі́йждѡ ча́съ въ ᲂу҆дивле́нїе прихо́дитъ: и҆ а҆́ще и҆ кома́ръ на́йдетъ, и҆лѝ живо́тнѡ ко́е ᲂу҆кꙋ́ситъ, па́гꙋбѣ прїйтѝ непщꙋ́етъ, и҆ ѿ ᲃтра́ха же и҆ пре́жде см҃рти ᲂу҆мерщвлѧ́тисѧ мни́тъ: ѿню́дꙋ же и҆ ѡ́бхѡ́димъ всѝ ꙗ҆́коже и҆спо́лꙋ ме́ртви, и҆ раꙁсла́блени, и҆ ѿ всю́дꙋ недоꙋмѣ́нни: и҆ ни є҆дино̀ прибѣ́жище ѡ҆брѣта́емъ: и҆ что̀ го́ршее, ни́же ѻ҆́чи на́ши на нб҃о воꙁвестѝ, ни́же ѿверстѝ ᲂу҆стъ на́шихъ, и҆ помл҃и́тисѧ пре́дъ тобо́ю смѣ́емъ ѡ҆каѧ́ннїи, ѡ҆стно́мъ ᲃо́вѣсти ᲂу҆бода́еми: дѣла́ бо нш҃ѧ лꙋка́ваѧ и҆ всѧ́коѧ скве́рны и҆сполне́наѧ пре́дъ ѻ҆чи́ма и҆мꙋ́ще, ᲃтꙋ́домъ лица̀ покры́вше, недосто́йныхъ себѐ твое́ѧ по́мощи и҆ твое́гѡ застꙋпле́нїѧ бы́ти сꙋ́димъ: сі́е то́кмѡ съкрꙋше́ни, и҆ смире́нни, и҆ ᲂу҆бѣждени вопїемъ къ тебѣ̀ бл҃гомꙋ Бг҃ꙋ: пра́веденъ є҆сѝ Гд҃и, и҆ пра́веденъ сꙋ́д тво́й, ѡ҆ всѣ́хъ и҆́хже наве́лъ є҆сѝ на́ны: па́чеже не по беꙁꙁакѡ́нїемъ на́шимъ сътвори́лъ є҆сѝ на́мъ, ни́же по грѣхѡ́мъ на́шимъ воꙁда́лъ є҆сѝ на́мъ, но и҆ се́й на́ны наноси́мый би́чъ, чл҃кѡлю́бный множа́е, не́жели пра́ведный бы́ти и҆сповѣдꙋ́емъ, всѧ́кїй бо би́чъ и҆ ра́на, и҆ всегꙋби́телство на́ны наноси́мое, ѡ҆скꙋ́днѡ є҆́стъ и ма́ло, противомнѡ́гомꙋ мнѡ́жествꙋ на́шихъ беꙁꙁакѡ́нїй: Мнѡ́жества ᲂу҆́бѡ ра́ди согрѣше́нїй на́шихъ, ни́же де́рꙁости и҆́мамы правосꙋ́де Гд҃и, ꙗ҆́кѡ да твою̀ ᲂу҆мл҃и́мъ блгⷭ҇ть, є҆́же раꙁдрѣше́нїе стра́шнагѡ сегѡ̀ ѻ҆брѣстѝ преще́нїѧ: превели́чество же твое́гѡ бл҃гоꙋтро́бїѧ, и҆ твои́хъ щедрѡ́тъ бе́ꙁдна многѡмлⷭ҇тве Влады́ко, дерꙁа́ти на́съ понꙋжда́етъ, сꙋ́щаѧ вы́шше нш҃гѡ досто́инства и҆ска́ти: ѿню́дꙋ же Бж҃е пребл҃гі́й, и҆ Гд҃и млⷭ҇ти, мо́лимсѧ ти́хости твое́й: ᲂу҆ста́ви на́ны наноси́мый ѻ҆́стрый и҆ беꙁго́дный се́й смертный мечъ, и҆ не ꙗ҆́ростїю твое́ю ѡ҆бличѝ на́съ, ни́же преда́ждъ на́съ до конца̀ поги́бнꙋти, и҆́мени твое́гѡ ра́ди ст҃а́гѡ: и҆ не ѿста́ви млⷭ҇ть твою̀ ѿ на́съ чл҃кѡлю́бче, ни́же раꙁорѝ завѣ́т тво́й, и҆́же завѣща́лъ є҆сѝ ѿце́мъ на́шимъ: ни́же ᲂу҆ма́ленныхъ на́съ сотворѝ па́че всѣ́хъ ꙗ҆ꙁы́къ: но проти́вꙋ на́шихъ зѡ́лъ мнѡ́жествꙋ, положѝ бе́ꙁднꙋ твои́хъ щедрѡ́тъ.

Тебѣ̀ є҆ди́номꙋ согрѣши́хѡмъ Гд҃и, но и҆ тебѣ̀ є҆диномꙋ слꙋ́жимъ, и҆ ра́ꙁвѣ тебѐ и҆́нагѡ Бо́га не ꙁна́ємъ.

Тебѣ̀ є҆ди́номꙋ сокрꙋше́ннымъ и҆ смире́ннымъ се́рдцемъ предсто́имъ, и҆ слеꙁѧ́ще вопїемъ: Гд҃и поми́лꙋй.

Прїймѝ ᲂу҆́бѡ чл҃кѡлю́бче ѻ҆́бщее сі́е сокрꙋше́нїе нш҃е и҆ серде́чнꙋю бо́лѣꙁнь, ꙗ҆́коже прїѧ́лъ є҆сѝ ᲃле́ꙁы Е҆ꙁі́кїины въ ско́рби ᲃердца є҆гѡ̀, и҆ ѿ сме́рти сегѡ̀ и҆ꙁба́вивъ, вре́мѧ живота̀ дарова́лъ є҆сѝ, надъ предѣ́лъ кончины̀ є҆гѡ̀: Ѻ҆брати́ бо (гл҃етъ писа́нїе,) Е҆ꙁе́кїѧ лицѐ своѐ къ ᲃтѣнъ и҆ плака́сѧ: и҆ и҆́бїе чл҃кѡлю́бецъ Влады́ка, Пррⷪ҇ка посла̀, гл҃ю́ща є҆мꙋ̀: Оу҆слы́шахъ Мл҃твꙋ твою̀, и҆ ви́дѣхъ сле́ꙁы твоѧ̀, и҆ приложꙋ̀ къ лѣ́тѡмъ твои́мъ, лѣ́тъ Пѧтна́десѧтъ.

Са́мъ ᲂу҆́бѡ неꙁлоби́ве Гд҃и, рекі́й: Не хощꙋ сме́рти грѣ́шнагѡ, но є҆́же ѡ҆брати́тисѧ, и҆ жи́вꙋ бы́ти є҆мꙋ̀: Ꙋ҆млⷭ҇рди́сѧ и́ на на́съ недосто́йныхъ, и҆ ѿвратѝ ꙗ҆́ростъ твою̀ праведнѣ́йшꙋю ѿ на́съ, и҆ да не въ вѣ́ки прогнѣ́ваешисѧ на́ны. ви́диши Влады́ко ꙗ҆́кѡ ᲂу҆мали́хѡмсѧ, и҆ ѡ҆скцдѣ́хѡмъ достоѧ́нїе твоѐ сꙋ́ще, и҆ ꙗꙁы́къ ᲃт҃ъ тво́й, и҆ и҆сполне́нїе всеѧ̀ землѧ̀, є҆го́же ᲃѣ́нь и҆ гѡ́ры ѡ҆бъѧ́тъ.

Помѧнѝ чл҃кѡлю́бче во́лнꙋю ᲃтрⷭ҇ть твою̀, Крⷭ҇тъ и҆ ᲃм҃рть, ю҆́же за на́съ ѡ҆сꙋжде́нныхъ претерпѣ́лъ є҆сѝ, и҆ да не похи́титъ вра́гъ ꙗ҆́кѡ ле́въ дш҃ѧ̀ на́шѧ, несꙋ́щꙋ и҆ꙁбавлѧ́ющꙋ, ни́же спаса́ющꙋ.

Вѣ́си долготерпе́ливе, ꙗ҆́кѡ ни є҆дина̀ ра́на нечꙋвстве́нных Е҆гѵ́птѧнъ та́кѡ коснꙋ́сѧ, ꙗ҆́коже перве́нцевъ тлѧ̀ и҆ поги́белъ, на на́съ же неисповѣди́мо є҆́стъ злоключе́нїе, и҆ не ᲂу҆врачꙋ́емо лю́тое, всѣ́мъ въкꙋ́пѣ, и҆ пе́рвым, и҆ среднимъ, и҆ послѣ́днимъ, пре́жде ча́са си́це восхища́емымъ вънеꙁаа́пꙋ.

Ꙋ҆млⷭ҇рди́сѧ ᲂу҆́бѡ бл҃гопремири́тел̾не Гд҃и на сле́ꙁы, и҆ пла́чъ младе́нецъ и҆ дѣ́тищъ, и҆ про́стагѡ всѧ́кагѡ и҆ недоспѣ́вшагѡ во́ꙁраста, и҆ ᲂу҆ста́ви є҆́же на́ны пра́ведное твоѐ негодова́нїе, и҆ да преста́нетъ сѣ́чъ многомлⷭ҇тиве Гд҃и: ра́нꙋ бо и҆ знаменїе ᲃме́ртное дѣ́тищѧ прїи́мше, и҆ въ чꙋ́вствѣ зла̀ и҆ тлѣ̀ бы́вше, къ на́мъ зїѧ́ютъ, и҆ всѣ́ма ѻ҆чи́ма приле́жнѡ вꙁира́ютъ, и҆ рꙋ́цѣ подаю́тъ, и҆ слеꙁа́ми, и҆ ше́плен̾ми и҆ вопїен̾ми не ꙗ҆́сными, и҆ и҆́миже и҆мꙋ́тъ движе́н̾ми закла́нїе пока́ꙁꙋютъ, гꙋби́телства рыда́ютъ, и҆ къ по́мощи себѣ̀ всѣ́ми ѡ҆́браꙁы на́съ привлещѝ понꙋжда́ютсѧ: мы́ же ни ѿню́дꙋже могꙋ́ще рꙋ́кꙋ по́мощи си́мъ пода́ти, къ тебѣ̀ всѧ могꙋ́щемꙋ прибѣга́емъ, и҆ ѿ тебѐ є҆ди́нагѡ по́мощи и҆ раꙁдрѣше́нїѧ лю́тых про́симъ, тебѣ́ бо є҆ди́номꙋ воꙁмо́жна сꙋ́ть всѧ̀, ꙗ҆́же ᲂу҆ чл҃къ не воꙁмо́жна бы́ти могꙋ́тъ, ꙗ҆́кѡ бл҃гослове́нъ є҆сѝ въ вѣ́ки вѣ́кѡвъ, А҆ми́нь.