Мл҃тва, ѿ ѡ҆скверне́нїѧ

Хотѧ́й ѿ І҆ере́ѧ ᲃи́цевꙋю прїѧ́ти Мл҃твꙋ, до́лжен є҆́стъ пе́рвѣе и҆сповѣ́сти приклю́чшеесѧ є҆мꙋ̀ ѡ҆скверне́нїе. И҆ ᲂу҆́бѡ а҆́ще І҆ере́ѵ꙼ раꙁсꙋ́дитъ ꙗ҆́кѡ ѿ вели́кихъ сме́ртныхъ грѣхѡ́въ є҆́стъ, да повели́тъ є҆мꙋ̀ чи́ннѡ и҆сповѣда́тисѧ, и҆ Е҆піти́мїю и҆ раꙁдрѣше́нїе прїѧ́ти ᲃею́ бо Мл҃твою не ѡ҆ста́витсѧ є҆мꙋ̀ си́цевый грѣ́хъ. А҆́ще же ѿ малы́хъ повседне́вныхъ грѣхѡ́въ что̀ бꙋ́детъ, да прочте́тъ надъ ни́мъ сі́ю Мл҃твꙋ си́мъ ѻ҆́браꙁомъ.

Вꙁе́мъ на себѐ Е҆пітра́хиль, ѡ҆бы́чнѡ да начне́тъ. Блⷭ҇ве́нъ Бг҃ъ на́шъ: Тртⷭ҇о́е: Ѿч҃е на́шъ: и҆ Троп: сі́ѧ Гла́съ, ѕ҃.

Поми́лꙋй на́съ Гд҃и, поми́лꙋй на́съ.

Сла́ва:

Гд҃и, поми́лꙋй на́съ.

И҆ ны́нѣ:

Млⷭ҇рдїѧ две́ри ѿвер:

И҆ рекъ:

Гд҃ꙋ помоли́мсѧ, и҆ Гд҃и поми́лꙋй.

Да прочте́тъ надъ ни́м Мл҃твꙋ ᲃі́ю, повелѣ́въ є҆мꙋ̀ колѣ́нѣ преклони́ти.

Гд҃и Бж҃е на́шъ, є҆ди́не бл҃же и҆ чл҃кѡлю́бче, є҆ди́не ᲃт҃е и҆ на ᲃт҃ы́хъ почива́ѧй, верхо́вномꙋ твое́мꙋ А҆пⷭ҇лꙋ Петрꙋ̀ ꙗ҆ви́вый видѣ́нїемъ, ничто́же скве́рно и҆лѝ нечи́сто мнѣ́ти ѿ тебѐ сотворе́нных бы́ти: И҆ сосꙋ́домъ чи́стымъ бы́ти заповѣда́вый.

Ты ᲃамъ Влады́ко прⷭ҇ты́й, приꙁыва́нїемъ стра́шнагѡ и҆ прⷭ҇та́гѡ ти И҆́мени, и҆ ѻ҆́браꙁомъ чⷭ҇тнагѡ и҆ животворѧ́щагѡ Кртⷭ҇а, мно́ю недосто́йнымъ рабо́мъ твои́мъ блⷭ҇гвѝ и҆ ѡ҆чи́сти раба̀ твое́гѡ, И҆мⷬ҇къ: ѡ҆скве́рн̾шагосѧ ѿ всѧ́кагѡ сатани́на мечта́нїѧ, и҆ ѿ всѧ́кїѧ є҆гѡ̀ непрїѧ́ꙁненныѧ ве́щи, и҆ всѧ́кагѡ нечи́стагѡ ꙗ҆де́нїѧ: ѿ всѧ́кагѡ же беꙁмѣ́стїѧ, и҆ всѧ́кїа потво́ры: ѿ всѧ́кїѧ ле́сти и҆ сꙋеты̀, и҆ всѧ́кагѡ злодѣ́йства и҆ проти́вныѧ ве́щи проти́внагѡ дїа́вола въ днѝ и҆ въ но́щи бы́вшїѧ: и҆ сотворѝ є҆гѡ̀ нескве́рна и҆ непоро́чна и҆ въ про́чаѧ днѝ живота̀ є҆гѡ̀, ѿ всѧ́кагѡ грѣха̀ и҆ злобы̀ неприкоснове́нна сохранѝ, и҆ да́ждъ є҆мꙋ̀ Гд҃и слꙋжи́ти тебѣ̀ въ преподо́бїи и҆ пра́вдѣ до послѣ́днѧгѡ днѐ и҆ ча́са и҆ꙁдыха́нїа: Ты́ бо є҆сѝ блⷭ҇вѧ́й и҆ ст҃ѧ́й всѧ́ческаѧ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

И҆ а҆́бїе тво́ритъ ѡ҆бы́чный дне́вный ѿпꙋ́стъ.