Вослѣдова́нїе моле́бнагѡ пѣ́нїѧ къ Гд҃ꙋ Бг҃ꙋ на́шемꙋ за Царѧ̀ и҆ за лю́ди, пѣва́емагѡ въ вре́мѧ Бра́ни, проти́въ сꙋпоста́тѡвъ, находѧ́щихъ на́ ны

І҆єре́ѵ꙼ начина́етъ:

Благослове́нъ Бг҃ъ на́шъ: Та́жъ Трсто́е: и по Ѿч҃е на́шъ:

І҆єре́ѵ гл҃етъ:

Ꙗ҆́кѡ твоє̀ є҆́стъ ца́рство:

Чте́цъ же:

Гд҃и поми́лꙋй, в҃і. Прїйдѣ́те поклони́мсѧ: гⷤ.

Ѱало́мъ, ѳ҃і: Ꙋ҆слы́шитъ тѧ Гд҃ь въ де́нь печа́ли:

И҆ к҃: Гд҃и, си́лою твое́ю воꙁвесели́тсѧ Ца́ръ:

А҆́ще же Царѧ̀ тꙋ нѣ́сть, не чте́мъ ᲃїѧ предполо́женныѧ ѱалмы̀: но чте́мъ Ѱал: л҃д: Сꙋдѝ Гд҃и ѡ҆бидѧ́щїѧ мѧ̀:

Сла́ва: И҆ ны́нѣ: А҆ллилꙋ́іѧ, гⷤ.

Дїа́конъ же глаголе́тъ Е҆кте́нїѧ вели́каѧ:

Ми́ромъ Гд҃ꙋ помоли́мсѧ. И҆ проч: да́же до плава́ющихъ: И҆ а҆́бїє прилага́етъ ᲃїѧ.

Ꙍ҆ є҆́же не помѧнꙋ́ти грѣхѡ́въ и҆ беꙁꙁако́нїй на́шихъ, но ꙗ҆́кѡ благосе́рдъ, ми́лостивъ на́мъ бы́ти недосто́йным рабѡ́мъ свои́мъ въ бѣда́хъ сꙋ́щимъ, и҆ и҆ꙁба́вити на́съ ѿ вра́гъ на́шихъ, Гд҃ꙋ помоли́мсѧ.

Ꙍ҆ є҆́же пода́ти си́лꙋ и҆ крѣ́постъ Хрⷭ҇толюби́вомꙋ Во́инствꙋ, и҆ мꙋжестве́нное и҆ хра́брое сопроти́въ всѧ́кагѡ вра́га и҆ сꙋпоста́та всегда̀ покаꙁа́ти, и҆ рабѡ́мъ свои́мъ ми́ръ и҆ ᲂу҆твержденїе, и҆ ѿ всѣ́хъ бѣ́дъ и҆ нꙋ́ждъ и҆ вра́жїихъ навѣ́тѡвъ ско́рое свобожде́нїе дарова́ти, Гд҃ꙋ помоли́мсѧ.

Ꙍ҆ є҆́же ми́ръ и҆ сла́вꙋ всели́ти въ землѝ на́шей, и҆ꙁба́вити на́съ ѿ всѣ́хъ вра́жїихъ навѣ́тѡвъ и҆ бѣ́дныхъ нахожде́нїй, Гд҃ꙋ помоли́мсѧ.

Ꙍ҆ є҆́же не преда́ти на́съ въ попра́нїе и҆ раꙁоре́нїе врагѡ́мъ и҆ сꙋпоста́тѡмъ на́шимъ, но въ бѣ́гство всѐ дерꙁнове́нїе и҆́хъ претвори́ти, и҆ мы́шцꙋ и҆́хъ сокрꙋши́ти, и҆ подъ но́ги вѣ́рных свои́хъ покори́ти, Гд҃ꙋ помоли́мсѧ.

Ꙍ҆ є҆́же стꙋ́да и҆ беꙁче́стїѧ лица̀ сопроти́вныхъ и҆сполни́ти, ᲃе́рдце же и҆́хъ стра́ха и҆ ᲂу҆жа́са: и҆ А҆́гг҃лъ Гн҃ь да бꙋ́детъ поганѧ́ѧй и҆ поража́ѧй и҆́хъ, Гд҃ꙋ помоли́мсѧ.

Ꙍ҆ є҆́же лꙋ́къ мѣ́дѧнъ положи́ти мы́шца вѣ́рныхъ свои́хъ, и҆ ᲂу҆крѣпи́ти десни́цꙋ и҆́хъ, си́лою крѣ́пости свое́ѧ въ побѣжде́нїе и҆ попра́нїе врагѡ́въ, и҆ сꙋпоста́товъ воста́ющихъ на́ ны, Гд҃ꙋ помоли́мсѧ.

Ꙍ҆ є҆́же премѣни́ти всю̀ ᲃко́рбъ и҆ сѣтова́нїе на́ше на ра́достъ и҆ весе́лїе, и҆ бѣдова́нїе въ тве́рдый ми́ръ, и҆ непреобори́мыхъ ѿ всѣ́хъ вра́жїихъ навѣ́тѡвъ всегда̀ сотвори́ти, Гд҃ꙋ помоли́мсѧ.

Ꙍ҆ є҆́же сокрꙋши́ти щи́тъ, ѡ҆рꙋ́жїе, и҆ бра́нь всѣ́хъ борꙋ́щыхъсѧ съ на́ми, и҆ подъ но́ги Хрⷭ҇толюби́вомꙋ во́инствꙋ тѣ́хъ покори́ти, Гд҃ꙋ помоли́мсѧ.

Ꙍ҆ є҆́же неѡсла́бнꙋ, непребори́мꙋ, побѣдителнꙋ же ᲃи́лꙋ, крѣ́постъ, и҆ мꙋ́жество съ хра́бростїю Хрⷭ҇тоимени́томꙋ Во́инствꙋ на́шемꙋ, на сокрꙋше́нїе лꙋ́кѡвъ ᲃи́лныхъ врагѡ́въ на́шихъ пода́ти, Гд҃ꙋ помоли́мсѧ.

Ꙍ҆ є҆́же пода́ти и҆ꙁба́вꙋ вѣ́рнымъ рабѡ́мъ свои́мъ ѿ наше́ствїй и҆ноплеме́нникъ, и҆ всѣ́хъ бра́немъ хотѧ́щихъ чл҃ове́къ, и҆ ра́тныхъ нахожде́нїй, и҆ въ ми́рѣ глꙋбо́цѣ Це́рковъ, Царѧ́ же и҆ лю́ди своѧ̀ соблюстѝ, побѣ́дꙋ и҆́мъ на врагѝ всегда̀ дарꙋ́ѧ, Гд҃ꙋ помоли́мсѧ.

Ꙍ҆ є҆́же и҆ꙁба́витисѧ на́мъ: Застꙋпѝ, спасѝ, поми́лꙋй: Прест҃ꙋю чⷭ҇тꙋю преблгⷭ҇веннꙋю ᲃла́внꙋю:

Посе́мъ:

Бг҃ъ Гд҃ь и҆ ꙗ҆ви́сѧ на́мъ: На Гла́съ, а҃. Тропа́ръ Гла́съ тожъ.

Спасѝ Гд҃и лю́ди своѧ̀, и҆ благословѝ достоѧ́нїе твоє̀, побѣ́ды вели́комꙋ Гпⷭ҇дарꙋ на́шемꙋ на сопроти́вныѧ дарꙋ́ѧ: и҆ своѧ̀ сохранѧ́ѧ Крⷭ҇то́мъ си лю́ди.

Сла́ва: тожъ. И҆ ны́нѣ: Бг҃оро́диченъ:

Предста́телнице стра́шнаѧ и҆ непосты́днаѧ, не пре́ꙁри блага́ѧ моли́твъ на́шихъ всепѣтаѧ Бц҃е.

Ꙋ҆твердѝ Правосла́вныхъ жи́тїе, и҆ спасѝ є҆мꙋ́же повелѣ́ла є҆сѝ царствова́ти.

И҆ пода́ждъ є҆мꙋ̀ съ небесѐ побѣ́дꙋ, ꙗ҆́кѡ Бг҃а роди́ла є҆сѝ, є҆дина̀ блⷭ҇веннаѧ.

Та́жъ. ѱаломъ н҃:

Поми́лꙋй мѧ̀ Бж҃е по вели́цѣй:

Канѡ́нъ, Гла́съ, и҃.

Пѣ́снь, а҃. И҆рмо́съ:

Въѡрꙋже́нна Фараѡ́на погрꙋꙁѝ:

Припѣ́лъ:

Многѡмлⷭ҇тиве Гд҃и, съкрꙋшѝ врагѝ подъ нѡ́ги на́шѧ.

Свѣдꙋ́ще твою неиꙁрече́ннꙋю ми́лость и҆ чл҃кѡлю́бїе, къ тебѣ̀ припада́емъ є҆динѐ ᲃъдѣ́телю: пре́ꙁри моли́мъ тѧ̀, прегрѣше́нїѧ на́шѧ: и҆ и҆ꙁба́ви лю́ди твоѧ̀, съпроти́вныѧ же на́мъ ниꙁложѝ.

Ꙗ҆́коже дре́вле на А҆малика, млⷭ҇тиве Бж҃е, да́лъ є҆сѝ побѣ́дꙋ, воево́дствомъ Мѡѵ꙼се́ѧ ᲂу҆го́дника твое́гѡ: та́кѡ и҆ ны́нѣ, моли́мъ тѧ̀, держа́вномꙋ Гдⷭ҇рꙋ на́шемꙋ побѣ́дꙋ и҆ꙁвѣ́стнꙋю, на ви́димыѧ и҆ не ви́димыѧ врагѝ, пода́ждъ.

Сла́ва:

Крⷭ҇таѡбраꙁнѡ просте́ртыма рꙋка́ма Мꙍѵ꙼сеѡвыма, ᲃи́лꙋ А҆мали́ковꙋ побѣжда́ѧ ниꙁложи́вый Бж҃е, и҆ ны́нѣ моли́мъ тѧ̀, побѣдѝ ми́лостиве воста́ющыѧ на́ ны Ва́рварскїѧ по́лки, и҆ Крⷭ҇то́мъ твои́мъ въѡрꙋжѝ вели́кагѡ Гдⷭ҇рѧ̀ на́шегѡ.

И҆ ны́нѣ:

Си́лою неиꙁрече́нною тѝ многѡмлⷭ҇тиве Хрⷭ҇те, защитѝ лю́ди своѧ̀ ѿ всѧ́кїѧ на́пасти: на ви́димыѧ и҆ неви́димыѧ врагѝ вели́комꙋ Гдⷭ҇рꙋ на́шемꙋ побѣ́ды да́рꙋ́ѧ, ра́ди Прчⷭ҇тыѧ тѝ Мт҃ре, и҆ всѣ́хъ ᲃт҃ы́хъ.

Катава́сїа:

Спасѝ ѿ бѣ́дъ рабы̀ своѧ̀ млⷭ҇тиве, ꙗ҆́кѡ ᲂу҆се́рднѡ къ тебѣ̀ прибѣга́емъ, къ млⷭ҇тивомꙋ и҆ꙁбави́телю всѣ́хъ Владыцѣ Гд҃ꙋ І҆и҃сꙋ.

Пѣ́снь, г҃. И҆рмо́съ:

Нбⷭ҇номꙋ крꙋ́гꙋ:

Неиꙁрече́нною си млⷭ҇тїю, и҆ неиꙁгл҃а́ннымъ милосе́рдїемъ твои́мъ Хє҃, защитѝ лю́ди твоѧ̀, де́рꙁость пога́н̾скꙋю подъ но́ꙁѣ покарѧ́ѧ вели́комꙋ Господарꙋ̀ на́шемꙋ.

Ꙗ҆́коже дре́вле преда́лъ є҆сѝ Бж҃е и҆ноплеме́нникѡвъ вѣ́рномꙋ тѝ рабꙋ̀ І҆исꙋ́сꙋ На́ввинꙋ, та́кѡ и҆ ны́нѣ млⷭ҇тиве, покорѝ проти́вныѧ врагѝ, подъ нѡ́ги вели́комꙋ Гдⷭ҇рꙋ на́шемꙋ.

Сла́ва:

Не преда́ждъ на́съ, Влады́ко, беꙁꙁакѡ́нїй ра́ди на́шихъ, въ рꙋ́цѣ врагѡ́въ, гнѣ́вомъ твои́мъ: но ни́щихъ рабѡ́въ свои́хъ моли́твы послꙋ́ша́въ, ѡ҆братѝ ꙗ҆́рость твою̀ на ра́дость на́шꙋ.

И҆ ны́нѣ:

И҆ꙁба́ви на́съ моли́мъ тѧ неиꙁрече́нною тѝ милостїю, Влады́чце, лю́ди твоѧ̀, и҆ ѡ҆крилѧ́ющи защитѝ: тѧ́ бо, по Гдⷭ҇ѣ Бꙁ҃ѣ є҆ди́нꙋ и҆ма́мы застꙋ́пницꙋ.

Катава́сїа:

Спасѝ ѿ бѣ́дъ рабы̀:

Та́жъ, Дїа́конъ Е҆кте́нїѧ ᲃїѧ.

Поми́лꙋй на́съ Бж҃е по вели́цѣй мил:

Гд҃и Бж҃е на́шъ, си́лный и҆ крѣпкїй въ бра́нехъ, тебѐ въ по́мощъ недосто́йнїи приꙁыва́емъ, и҆ смире́ннѡ мо́лимъ, прїймѝ ѡ҆рꙋ́жїе крѣ́пости твое́ѧ, и҆ щи́тъ защище́нїѧ, и҆ и҆ꙁба́ви: въста́ни въ по́мощъ на́шꙋ, и҆ и҆ꙁмѝ мечъ преще́нїѧ и҆ побѣ́ды, и҆ заврѝ сопроти́въ ратꙋ́ющихъ и҆ гонѧ́щихъ на́съ, и҆ воꙁвратѝ воспѧтъ съ стꙋ́домъ мыслѧ́щихъ на́мъ зла́ѧ, подъ но́ги вѣ́рныхъ свои́хъ тѣ́хъ покарѧ́ѧ, мо́лимъ тѝ сѧ, ско́рѡ ꙗ҆́кѡ ще́дръ ᲂу҆слы́ши, и҆ ми́лостивнѡ поми́лꙋй.

Гд҃и Бж҃е на́шъ, при́ꙁри съ небесѐ и҆ ви́ждъ, ꙗ҆́кѡ сопроти́внїи на́ши ме́чъ и҆ꙁвлеко́ша, и҆ напрѧго́ша лꙋ́къ сво́й сострѣлѧ́ти ни́щыхъ и҆ ᲂу҆бо́гихъ рабѡ́въ твои́хъ, и҆ закла́ти правовѣ́рнѡ тебѐ славѧ́щихъ, и҆ си́лою твое́ю вседержа́вною лꙋ́ки и҆́хъ сокрꙋшѝ, и҆ ме́чъ и҆́хъ ско́рѡ сотворѝ внитѝ въ сердца̀ и҆́хъ, побѣ́дꙋ на́нѧ и҆ ѡ҆долѣ́нїе рабѡ́мъ твои́мъ дарꙋ́ѧ: мо́лимтисѧ вседержа́вный Цр҃ю, ᲂу҆слы́ши и҆ поми́лꙋй.

Не на лꙋ́къ сво́й ᲂу҆пова́емъ, ни ѡ҆рꙋ́жїе на́ше спасе́тъ на́съ Гд҃и, но твою̀ всемогꙋ́щꙋю по́мощъ приꙁыва́емъ, и҆ на твою̀ ᲃи́лꙋ дерꙁа́юще на врагѝ на́шѧ ѡ҆полча́емсѧ, и҆ и҆мѧ̀ твоє̀ вѣ́рнѡ приꙁыва́емъ, ты́же воспѧтѝ и҆ погꙋбѝ и҆́хъ, и҆ въ рꙋ́ки вѣ́рномꙋ си во́инствꙋ и҆ Царꙋ̀ на́шемꙋ пода́ждъ, мо́лимъ тѝ сѧ, ᲂу҆слы́ши и҆ поми́лꙋй.

Послѝ стрѣ́лы твоѧ̀ Гд҃и, и҆ смѧте́нїе сотворѝ врагѡ́мъ на́шимъ, блеснѝ мо́лнїѧ и҆ ражденѝ ѧ҆̀, послѝ рꙋ́кꙋ твою̀ свы́ше, и҆ потребѝ ѧ҆̀ ѿ землѧ̀, и҆ и҆ꙁмѝ на́съ, и҆ и҆ꙁба́ви и҆менѝ твое́го ра́ди: мо́лимтисѧ, ᲂу҆слы́ши и҆ поми́лꙋй.

І҆ере́ѵ꙼ Воꙁглаш:

Оу҆слы́ши ны Бж҃е ᲃп҃си́телю на́шъ:

Ли́къ:

А҆ми́нь.

Сѣда́ленъ, Гла́съ, з҃.

Це́ркви вопїетъ тѝ Хє҃ Бж҃е, на Кѵпари́сѣ, Пе́вꙁѣ, и҆ Ке́дрѣ покланѧ́емый, побѣ́дꙋ вели́комꙋ Царꙋ̀ на́шемꙋ Крⷭ҇то́мъ твои́мъ, Бц҃а ра́ди пода́ждъ, и҆ поми́лꙋй на́съ.

Богоро́дичен:

Ꙗ҆́кѡ и҆мꙋ́щаѧ милосе́рдїе на не́мощъ на́шꙋ, и҆ зрѧ́щаѧ сꙋ́щыхъ на землѝ: на бѣдствꙋ́ющїѧ лю́ди ᲂу҆млⷭ҇рди́сѧ, блгⷭ҇ве́ннаѧ Бц҃е: пребꙋ́де же молѧ́щисѧ Дх҃а не поги́бнемъ лю́тѣ, и҆ ᲂу҆молѝ ꙗ҆́кѡ чⷭ҇таѧ, ско́рѡ благопремѣ́ннагѡ Бг҃а, спасти́сѧ дꙋша́мъ на́шимъ прест҃а́ѧ Дв҃о.

Пѣ́снь, д҃. И҆рмо́съ:

Ты́ мѝ Хє҃ Гдⷭ҇ь:

Ты Влады́ко Бж҃е, милосердїемъ щадѧ́й лю́ди ᲃвоѧ̀, на́пастми же и҆ ра́тми ѡ҆браща́ѧй и҆́хъ па́ки къ себѣ̀, ꙗ҆́рость гнѣ́ва твое́гѡ ны́нѣ ᲂу҆кротѝ и҆ ᲂу҆тишѝ: ѡ҆брати́ же въ ра́дость печа́лъ и҆ ско́рбъ на́шꙋ, побѣ́дꙋ на сопроти́вныѧ подава́ѧ.

Не гнѣ́вомъ твои́мъ Хє҃ ѡ҆бличѝ на́съ, ни ꙗ҆́ростїю твое́ю млⷭ҇тве: но щедрѡты̀ твоѧ̀ Влады́ко, ꙗ҆вѝ на лю́ди твоѧ̀, ниꙁлага́ѧ вра́жїѧ нахо́ды пога́нскїѧ, и҆ бра́ни всѧ́кїѧ покарѧ́ѧ подъ но́ꙁѣ вели́комꙋ Гпⷭ҇дрꙋ̀ на́шемꙋ.

Сла́ва:

Влады́ко Гд҃и, рꙋко́ю свое́ю всеси́лною въ глꙋбинѣ̀ погрꙋꙁи́вый Фараꙍ́на, ты и҆ ни́нѣ де́рꙁость беꙁбо́жныхъ ва́рваръ ᲃи́лою Крⷭ҇та̀ твое́гѡ Хє҃ раꙁорѝ: преꙁрѧ̀ грѣхѝ на́шѧ, ꙗ҆́кѡ є҆ди́нъ бл҃гі́й: мл҃тва́ми ро́ждшїѧ тѧ.

И҆ ны́нѣ:

Ты́ є҆сѝ, по Бꙁ҃ѣ Хрⷭ҇тїѧ́нѡмъ застꙋ́пница, Прчⷭ҇таѧ: ты стра́стїй на́шихъ цѣли́тел̾ница: ты Гжⷭ҇е вели́каѧ въ бра́нехъ помо́щница: тѣ́мъ же тѧ мы ны́нѣ согла́снѡ ᲃлавѧ́ще моли́мъ, ᲃн҃а и҆ Бг҃а твое́гѡ за́ ны ᲂу҆мл҃ѝ, и҆ꙁба́вити лю́ди своѧ̀ ѿ всѧ́кїѧ бѣды̀: Дх҃а тѧ прⷭ҇нѡ велича́емъ.

Пѣ́снь, є҃. И҆рмо́съ:

Въскꙋ́ю мѧ̀ ѿринꙋлъ є҆сѝ:

Не помина́й, Влады́ко, беꙁъчисле́нныѧ со́блаꙁны на́шѧ: но воско́рѣ преложи́въ ꙗ҆́рость твою̀ на милосе́рдїе, ниꙁложѝ врагѝ всѧ̀, и҆ лю́ди твоѧ̀ ᲃохранѝ милостїю си.

При́ꙁри млⷭ҇тве, на лю́ди твоѧ̀ сꙋ́щїѧ въ стра́сти, и҆ пода́ждъ на́мъ съвы́ше твою̀ по́мощъ, ꙗ҆́коже и҆́ногда на А҆мали́ка Мѡѵ꙼се́ю, ᲂу҆годникꙋ твое́мꙋ, и҆ ᲂу҆крѣпѝ вели́кагѡ Гпⷭ҇дрѧ̀ на́шегѡ на врагѝ воѡрꙋже́нныѧ на́ ны.

Сла́ва:

Ꙋ҆крѣпи́вый дре́вле на го́рдагѡ Голїа́ѳа, мы́шцꙋ Дави́да Пррⷪ҇ка твое́гѡ: ты и҆ ны́нѣ Влады́ко ᲂу҆крѣпѝ вели́кагѡ Гдⷭ҇рѧ̀ на́шегѡ, побѣ́дꙋ даѧ̀ є҆мꙋ̀ на врагѝ и҆ ниꙁлага́ѧ сопроти́вныѧ подъ нѡ́ꙁѣ є҆гѡ̀.²³

Тѧ̀ є҆динꙋ̀ Прчⷭ҇тꙋю, застꙋ́пницꙋ и҆ма́мы непобѣди́мꙋю, и҆ на́шѧ грѣхѝ потреблѧ́ющꙋю: къ не́й же вопїемъ припада́юще, и҆ꙁба́ви на́съ Гжⷭ҇е ѿ всѣ́хъ бѣ́дъ и҆ зѡ́лъ.

Пѣ́снь, ѕ҃. И҆рмо́съ:

Ѻ҆чи́сти мѧ ᲃп҃се:

И҆ꙁбавле́й Влады́ко въ ско́рби сꙋ́щыѧ лю́ди є҆ѵре́йскїѧ, и҆ Самѱѡ́нꙋ пода́вый крѣ́пост̾ твое́ю ᲃи́лою: ты и҆ ны́нѣ, ми́лостиве, и҆ꙁба́ви лю́ди твоѧ̀ ѿ бра́ни сопроти́вныхъ, и҆ покорѝ ѧ҆̀ подъ но́ꙁѣ вѣ́рномꙋ Цр҃ю нш҃мꙋ.

Ди́венъ є҆сѝ Бж҃е, твое́ю всеси́лною десни́цею и҆ꙁбавлѧ́ѧй лю́ди ра́тїю ѡ҆держи́мыѧ: все́ бо рꙋка̀ твоѧ̀ мо́жетъ: тѣ́мже и҆ ны́нѣ мл҃и́мъ тѧ и҆ꙁба́ви на́съ ѿ вра́гъ на́шихъ

Сла́ва:

Ѻ҆комъ си всевидѧ́щимъ, видѧ̀ наслѣ́дїе твоѐ Бж҃е, ѿ сопроти́вныхъ насилꙋ́емо, ᲂу҆млⷭ҇ди́сѧ Влады́ко на лю́ди своѧ̀, пога́нскꙋю же де́рꙁостъ ниꙁложѝ и҆ подъ но́ги держа́вномꙋ Гдⷭ҇рꙋ на́шемꙋ покорѝ.

И҆ ны́нѣ:

Ты держа́ва є҆сѝ непобѣди́маѧ, Прчⷭ҇таѧ Бц҃е: ты грѣ́хъ ра́ди на́шихъ и҆ стра́стїй, пра́веднѣ на́съ нака́ꙁꙋеши: но мл҃и́мъ тѧ Гжⷭ҇е, и҆ꙁба́ви на́съ лю́ди ᲃвоѧ̀, ѿ всѧ́кїѧ на́пасти и҆ бра́ни, и҆ побѣ́дꙋ съ нб҃сѐ пода́ждъ, ꙗ҆́коже и҆́ногда Кꙍнстанти́нꙋ, вѣ́рномꙋ Цр҃ю нш҃мꙋ, и҆ всѣ́мъ люде́мъ твои́мъ.

Катава́сїѧ:

Спасѝ ѿ бѣ́дъ рабы̀:

Та́же, Е҆кте́нїѧ Мала́ѧ.

И҆ по Воꙁгла́сѣ, Конда́къ Гла́съ, д҃.

Воꙁнесы́йсѧ на Крⷭ҇тъ во́лею, теꙁоимени́томꙋ тѝ гражда́нствꙋ щедрѡты̀ твоѧ̀ дарꙋ́й Хє҃ Бж҃е: воꙁвеселѝ си́лою свое́ю вѣ́рнагѡ Царѧ̀ на́шегѡ, побѣ́ды даѧ̀ є҆мꙋ̀ на сꙋпоста́ты, посо́бїе и҆мꙋ́щꙋ твоє̀ ѡ҆рꙋ́жїе, мїра непобѣди́мꙋю побѣ́дꙋ.

Посе́мъ Сте́пенна, ѕ҃-гѡ Гла́са, А҆нтіфѡ́нъ, г҃.

Надѣ́ющїисѧ на Гд҃а, врагѡ́мъ стра́шнїи, и҆ всѣ́мъ ди́внїи, го́рѣ бо зрѧ́тъ. Въ беꙁꙁако́нїихъ рꙋ́къ свои́хъ, пра́ведныхъ жре́бїй, помо́щника тѧ и҆мѣ́ѧ ᲃп҃се, не простре́тъ.

Ст҃а́гѡ Дх҃а держа́ва на всѣ́хъ: є҆мꙋ́же вы́шнѧѧ Во́инства покланѧ́ютсѧ съ всѧ́кимъ дыха́нїемъ до́лнимъ.

Прок: Гла́с, д҃.

Гд҃и си́лою твое́ю воꙁвесели́тсѧ Ца́ръ, и҆ ѡ҆ сп҃се́нїи твоє́мъ воꙁра́дꙋетсѧ ѕѣ́лѡ.

Сті́хъ:

Жела́нїе ᲃердца є҆го̀ да́лъ є҆сѝ ємꙋ̀.

Посе́мъ:

Всѧ́кѡ дыха́нїе Дх҃а хва́литъ Гд҃а.

Сті́хъ:

Хвали́те Бг҃а въ ᲃт҃ы́хъ є҆гѡ̀.

Е҆ѵⷢ҇: Мк: Зачало н҃а.

Речѐ Гд҃ь свои́мъ Ꙋ҆ченикѡмъ: И҆мѣ́йте вѣ́рꙋ Бж҃ію: А҆ми́нь бо гл҃ю̀ ва́мъ, ꙗ҆́кѡ и҆́же а҆́ще рече́тъ горѣ̀ се́й, двигни́сѧ и҆ въвержи́сѧ въ мо́ре, и҆ не раꙁмы́слитъ въ се́рдци свое́мъ, но вѣ́рꙋ и҆ме́тъ ꙗ҆́кѡ є҆́же гл҃етъ быва́етъ, бꙋ́детъ є҆мꙋ̀ є҆́же а҆́ще рече́тъ. Сегѡ̀ ра́ди гл҃ю̀ ва́мъ, всѧ̀ є҆ли́ка а҆́ще молѧ́щесѧ про́сите, вѣ́рꙋйте ꙗ҆́кѡ прїймете, и҆ бꙋ́детъ ва́мъ.

И҆ є҆гда стоитѐ мл҃ѧ́щесѧ, ѿпꙋща́йте а҆́ще и҆́мате на когѡ̀: да и҆ Ѻ҆ц҃ъ ва́шъ и҆́же є҆́стъ на нб҃се́хъ ѿпꙋ́ститъ ва́мъ согрѣше́нїѧ ва́ша.

А҆́ще ли же вы не ѿпꙋща́ете, ни Ѻ҆ц҃ъ ва́шъ и҆́же є҆́стъ на нб҃се́хъ ѿпꙋ́ститъ ва́мъ съгрѣше́нїѧ ва́шѧ.

Та́же Сла́ва: Гла́съ, д҃.

Ѿч҃е, ᲃло́ве:

И҆ ны́нѣ:

Мл҃твъ ра́ди прест҃ы́ѧ Бц҃а:

Поми́лꙋй на́съ Бж҃е по велиц:

Та́же, Пою́т ᲃтхі́рꙋ сїю Гла́съ, д҃.

Пособи́вый Гд҃и кро́ткомꙋ Дв҃дꙋ, побѣди́ти и҆ноплеме́н̾ника: вѣ́рномꙋ Царꙋ̀ на́шемꙋ пособѝ, и҆ ѡ҆рꙋ́жїемъ Крⷭ҇тнымъ ниꙁложѝ на́ша, покажѝ млⷭ҇рде дре́внѧѧ твоѧ̀ млⷭ҇тѝ на на́съ, и҆ раꙁꙋмѣ́ютъ вои́стиннꙋ, ꙗ҆́кѡ ты́ є҆сѝ Бг҃ъ, и҆ на́тѧ ᲂу҆пова́юще побежда́емъ: молѧ́щесѧ тебѣ̀ приле́жнѡ, и҆ пречи́стѣй тѝ Мт҃ри, дарова́ти на́мъ ми́ръ и҆ ве́лїю млⷭ҇ть.

А҆бїе же Посе́мъ Дїа́кон гл҃етъ.

Спасѝ Бж҃е лю́ди твоѧ̀:

Ли́къ:

Гд҃и поми́лꙋй: є҃і.

І҆ере́ѵ꙼ же воꙁглаш:

Млⷭ҇тїю и҆ щедрота́ми:

Пѣ́снь, з҃. И҆рмо́съ:

Бж҃іа съхожденїѧ:

Преста́ни ѿ гнѣ́ва, и҆ при́ꙁри на ско́рбїю ѡ҆держи́мыхъ на́съ, ᲂу҆до́бнѡ бо є҆́стъ ѻ҆чи́ма твои́ма, млⷭ҇тиве, живи́ти и҆ мертви́ти: тѣ́мже ᲂу҆ми́лнѡ въпїе́мъ тѝ Влады́ко: Ѿц҃ъ на́шихъ Бж҃е блⷭ҇ве́нъ є҆сѝ.

Съгрѣши́хомъ всѝ и҆ беꙁꙁаконова́хѡмъ в̾кꙋ́пѣ, щедрѡты҆ же твоѧ̀ Влады́ко, беꙁꙋ́мїемъ на́шимъ ѡ҆брати́хѡмъ на гнѣ́въ: но ѡ҆сла́би долготерпе́ливе, и҆ стра́хъ тво́й вмѣнѝ въ покаѧ́нїе, и҆ и҆ꙁба́ви на́съ ѿ съпроти́вныхъ беꙁбо́жнагѡ ѡ҆бстоѧ́нїѧ, вѣ́рнѡ въпїю́щихъ тѝ: Ѻ҆ц҃ъ на́шихъ Бж҃е благослове́нъ є҆сѝ.

Сла́ва:

Трⷪ҇цꙋ беꙁнача́лнꙋю сла́вимъ, въ є҆ди́номъ ᲃꙋществѣ̀ покланѧ́емꙋю, ли́ци же раꙁдѣлѧ́емꙋю, и҆ сво́йствы и҆ и҆мены̀, Ѿц҃а̀ беꙁнача́лна, и҆ ᲃн҃а ᲃъбеꙁнача́лна, и҆ съпрⷭ҇нѡсꙋ́щна Прⷭ҇та́гѡ Дх҃а: є҆ди́нице и҆ Трⷪ҇це Прⷭ҇та́ѧ: Божестве́нною си ᲃи́лою и҆ꙁба́ви на́съ въпїю́щихъ тѝ: Ѿц҃ъ на́шихъ Бж҃е благослове́нъ є҆сѝ.

И҆ ны́нѣ:

Подвигнѝ Влады́чице А҆́гг҃лы и҆ А҆рха́гг҃лы, Ли́ки же Прⷪ҇ро́кѡвъ, А҆пⷭ҇лъ, и҆ Мч҃никъ, съгла́снѡ ᲂу҆моли́ти, ᲃн҃а тѝ и҆ Бг҃а, да и҆ꙁба́витъ ны ѿ стра́стїй и҆ бра́ни всѧ́кїѧ, блⷭ҇ве́ннаѧ Дв҃о Гжⷭ҇е млⷭ҇тиваѧ.

Пѣ́снь, и҃. И҆рмо́съ:

Се́дмь седми́цею пе́щъ:

Кто̀ и҆ꙁ̾чте́тъ Хрⷭ҇те неиꙁрече́ннꙋю тѝ млⷭ҇ть; преꙁира́еши бо грѣхѝ ка́ющих̾сѧ, бо́лѣꙁни же и҆сцѣлѧ́еши, и҆ бра́ни всѧ̀ мимово́диши, и҆ беꙁꙋ́мныѧ ᲂу҆крочава́еши стра́сти: тѣ́мжетисѧ мл҃и́мъ: млⷭ҇тивый Влады́ко чл҃колю́бче, и҆ Гд҃и щедрѡ́тъ, ѡ҆братѝ ꙗ҆́рость твою̀ въ млⷭ҇рдїе къ на́мъ.

Неви́димыѧ, и҆ ви́димыѧ ражденѝ врагѝ на́ша рꙋко́ю твое́ю Гд҃и, и защитѝ на́съ лю́ди твоѧ̀: побѣ́дꙋ ꙗ҆́коже дре́вле Дв҃дꙋ и҆ І҆исꙋ́сꙋ На́ввинꙋ на и҆ноплеме́нники, подаѧ̀ ны́нѣ держа́вномꙋ тобо́ю вѣнча́нномꙋ Гдⷭ҇рꙋ на́шемꙋ, на всѧ̀ борꙋ́щыѧ на́съ сꙋпоста́ты.

Сла́ва:

Прⷪ҇рѡ́ци съ А҆пⷭ҇лы, Мч҃ници съ ᲃт҃и́тели, и҆ Преподо́бнїи Ѿц҃ѝ съ всѣ́ми ᲃт҃ы́ми, мл҃твꙋ творѣ́те къ Хрⷭ҇тꙋ̀ за́ны приле́жнѡ: Дх҃а ѡ҆брати́тъ ꙗ҆́рость свою̀ на млⷭ҇т̾: побѣ́дꙋ подаѧ̀ на́мъ на съпроти́вныѧ врагѝ.

И҆ ны́нѣ:

И҆ꙁба́ви на́съ ѿ бѣ́дъ Бц҃е всепѣ́таѧ, мл҃и́мъ тѧ лю́ди ѡ҆скорбле́нныѧ беꙁчисле́нными страⷭ҇тми: ты́ бо всѧ̀ можеши ᲂу҆ беꙁнача́лнагѡ тѝ ᲃн҃а, є҆го́же беꙁсѣ́меннѡ въ чре́вѣ зачала̀ є҆сѝ стогѡ̀ ᲂу҆́бѡ ꙗ҆́кѡ мт҃и млⷭ҇тиваѧ за́ны ᲂу҆мл҃ѝ, съхрани́ти ны ѿ всѧ́кїѧ бѣды̀: да тѧ непреста́ннѡ велича́емъ.

Пѣ́снь, ѳ҃. И҆рмо́съ:

Ꙋ҆диви́сѧ ᲂу҆́бѡ ѡ҆ се́мъ нб҃о:

Ꙋ҆диви́шасѧ Хє҃ щедрѡты̀ твоѧ̀, ꙗ҆́же на съгрѣ́шшїѧ тѝ покаꙁа́лъ є҆сѝ и҆спе́рва ѡ҆би́лнѡ: на нѧ́же ᲂу҆пова́юще мы грѣ́шнїи, припада́емъ тѝ, и҆ мл҃и́мсѧ: ꙗ҆́коже дре́вле Нинівви́ѧнѡмъ, покаѧ́нїѧ ра́ди, гнѣ́ва твое́гѡ ꙗ҆́рость, на млⷭ҇ть преложи́лъ є҆сѝ: и҆ на́мъ ны́нѣ благоꙋтро́бїе и҆ щедрѡты̀ твоѧ̀ ꙗ҆вѝ, да тѧ непреста́ннѡ велича́емъ.

Прїймѝ на́ша, ᲃп҃се, мл҃енїѧ, ꙗ҆́коже дре́вле прїѧ́лъ є҆сѝ Нинівви́тѧнъ проше́нїе ᲃле́ꙁное, пла́чъ блꙋ́дницѧ, и҆ воꙁдыха́нїе Раꙁбо́йника на Крⷭ҇тѣ̀: и҆ и҆ꙁба́ви на́съ лю́ди своѧ̀ ѿ належа́щїѧ бра́ни: да тѧ непреста́ннѡ велича́емъ.

Сла́ва:

Ꙗ҆́кѡ ѻ҆́чи рабѡ́въ въ рꙋ́кꙋ госпо́дїй свои́хъ та́кѡ всегда̀ ѻ҆́чи на́ши къ тебѣ̀ многомлⷭ҇тиве Гд҃и Бж҃е на́шъ: при́ꙁри ᲂу҆́бѡ млⷭ҇тивнѡ на́ ны, и҆ ниꙁложѝ ᲃи́лою твое́ю Бг҃опроти́вныхъ горды́ню врагѡ́въ на́шихъ, и҆ подъ нѡ́ꙁѣ вели́комꙋ Гдⷭ҇рꙋ на́шемꙋ тѣ́хъ покорѝ: да тѧ непреста́ннѡ велича́емъ.

И҆ ны́нѣ:

Покорѝ Гд҃и, мл҃и́мъ тѧ подъ нѡ́ги Гдⷭ҇рꙋ нш҃мꙋ, съпроти́вныѧ врагѝ: ꙗ҆́коже дре́вле Дв҃дꙋ, Самѱѡ́нꙋ и҆ Гедеѡ́нꙋ, беꙁбо́жнѡ хвалѧ́щыѧсѧ покори́лъ є҆сѝ: да тѧ є҆ди́нагѡ защи́тника нш҃гѡ, непреста́ннѡ велича́емъ.

Катава́сїѧ:

Сп҃сѝ ѿ бѣдъ. Та́же, Досто́йнѡ є҆стъ: Трⷭ҇то́е, по Ѿч̀е на́шъ:

Тропарѝ вы́шше пре́дъ Канѡ́номъ поло́женыѧ на Ли́стѣ, ч҃е²⁴.

Посе́мъ ѿ Дїакона и҆лѝ Преꙁвѵ́тера гл҃и́тсѧ Е҆кте́нїѧ та́ѧжде ꙗ҆́же и҆ по г҃, пѣ́снь.

По Во́ꙁгласѣ же Дїа́конъ высоча́йшим гла́сомъ глаголє́тъ.

Во́нмѣ́мъ, и҆ въ ᲂу҆миле́нїи ᲃе́рдца колѣ́нѣ дꙋ́шъ и҆ тѣле́съ на́шихъ прекло́нше, Гд҃ꙋ помоли́мсѧ.

І҆єре́ѵ꙼ же а҆́бїе съ всѧ́кимъ ᲂу҆миле́нїємъ съ всѣ́ми предстоѧ́щими прекло́нь колѣ́нѣ, чте́тъ Мл҃твы сїѧ, и҆лѝ всѧ̀, и҆лѝ на дво́е раꙁдѣли́въ ѧ҆̀ на и҆́ный де́нь.

Гд҃и Бж҃е на́шъ, премꙋ́дростїю свое́ю, и҆ ᲃло́вомъ є҆ди́нѣмъ всѧ́ческаѧ содѣла́вый, и҆ въ є҆дино̀ неиꙁрече́нною твое́ю си́лою и҆ дѣ́йствомъ собра́вый и҆ сочета́вый, всѧ́ бо воꙁмо́жна тебѣ̀ ᲃꙋ́тъ, и҆ не невоꙁмо́жнѡ ничто́же. И҆ сегѡ̀ ра́ди вре́мена, и҆ лѣ́та, и҆ гѡ́ды свои́м Бжⷭ҇тве́ннымъ повелѣ́нїемъ совокꙋпи́въ и҆ ᲃочета́въ, соста́вилъ є҆сѝ є҆ди́нъ ᲃе́й ви́димый мїръ, нб҃о просте́ръ ꙗ҆́кѡ ко́жꙋ и҆ тогѡ̀ пречꙋ́днѡ мнѡ́жествомъ согꙋще́нныхъ звѣ́ꙁдъ ᲂу҆пестри́въ, и҆ прⷭ҇нѡдвижи́мое и҆́мъ тече́нїе да́въ, въ чи́нꙋ положи́лъ є҆сѝ сі́ѧ, храни́ти сво́й предѣ́лъ, є҆́же ѿню́дъ не поврежда́ти на́съ: но движе́нїемъ свои́мъ чи́ннымъ по во́ли твое́й къ по́лꙁѣ на́шей беꙁъпреста́ни тещѝ: ᲃо́лнце же положи́лъ є҆сѝ въ свѣ́тъ и҆ ѻ҆́бластъ дне́ви, и҆ лꙋнꙋ̀ въ ѻ҆́бластъ но́щи: зе́млю же неви́димꙋ сꙋ́щꙋю первѣ́е и҆ те́мнꙋю ѿкры́въ преѡбраꙁи́лъ є҆сѝ въ добротꙋ̀, члчⷭ҇кагѡ ра́ди є҆стⷭ҇тва̀, и҆ надъ всѣ́ми на не́й и҆ въ мо́ри сꙋ́щими, и҆ на во́ꙁдꙋсѣ паренствꙋ́ющими пти́цами, чл҃кꙋ владѣ́ти повелѣ́лъ є҆сѝ, чи́ннагѡ ра́ди въ все́мъ строе́нїѧ. Ты и҆ мнѡ́жество ѻ҆́но, и҆ тмочисле́нный родъ є҆вре́йскїй и҆ꙁъ Е҆гѵ́пта и҆ꙁве́дъ, въ чи́нꙋ и҆ є҆диномы́слїи къ землѝ ѡ҆бѣтова́нной, посыла́ѧ Мꙍѵ꙼се́ѧ, надъ ни́ми десни́цеи твое́ю и҆ крѣ́пкою мы́шцею людоводи́телѧ поста́вилъ є҆сѝ, є҆ди́нагѡ во́жда и҆ нача́лника и҆́мъ тогѡ̀ пода́въ, и҆ тогѡ̀ мꙋ́дрымъ строе́нїемъ ѿ тебѐ є҆мꙋ̀ дарова́ннымъ сохрани́лъ є҆сѝ и҆́хъ въ свое́мъ кро́вѣ подъ держа́вною тѝ рꙋко́ю невреди́мыхъ ѿ мнѡ́гихъ и҆ раꙁли́чныхъ врагѡ́въ: Ты и҆ ны́нѣ ᲃт҃ы́й Цр҃ю ᲃла́вы, вѣ́рнагѡ Цр҃ѧ̀ на́шегѡ є҆мꙋ́же благоволи́лъ є҆сѝ владѣ́ти надъ на́ми блⷭ҇вѝ, премꙋ́дрост̾ же, совѣ́тъ бл҃гъ, крѣ́постъ, ᲃи́лꙋ, и҆ мꙋ́жество, и́ побѣ́дꙋ съ нб҃сѐ на воста́ющїѧ на́ ны беꙁбо́жныѧ врагѝ, млⷭ҇твнѡ пода́ждъ. И҆ ꙗ҆́коже съ А҆враа́момъ и҆́ногда врагѝ своѧ̀ погна́вшимъ пꙋт̾ шествовалъ є҆сѝ, и҆ Бжⷭ҇тве́нною тѝ ᲃи́лою врагѝ є҆гѡ̀ въ рꙋ́цѣ є҆мꙋ̀ преда́лъ є҆сѝ, ᲃи́це и ны́нѣ ᲃмѣре́ннѡ мо́лимъ тѧ̀, рабꙋ̀ ᲃвое́мꙋ Цр҃ю нш҃мꙋ И҆мⷬ҇къ: ᲃопꙋт̾шествꙋ́й, и҆ поборѝ по не́мъ на врагѝ на́шѧ и҆ покорѝ тѣ́хъ подъ нѡ́ꙁѣ є҆гѡ̀. И҆ ꙗ҆́коже Мѡѵ꙼се́ѡмъ є҆вре́йскїй родъ, ѿ го́ркїѧ работы̀ фараꙍ́нѧ, тогѡ̀ непребори́мою тѝ ᲃи́лою и҆ держа́вною рꙋко́ю съ во́и потопи́въ свободи́лъ є҆сѝ: и҆ ны́нѣ рабѡ́мъ твои́мъ Цр҃емъ на́шимъ, ѿ вра́гъ налѣга́ющихъ на́мъ, всеси́лною тѝ десни́цею тѣ́хъ побѣди́въ и҆ꙁба́ви. Гедіꙍ́на ᲃи́лою твое́ю ᲂу҆крепи́вый, и҆ тѣ́мъ сопроти́вныхъ мнѡ́жества съте́рый, и҆ въ ничто́же ѻ҆брати́вый: и҆ ны́нѣ раба̀ твое́гѡ Царѧ̀ нш҃гѡ, нбⷭ҇ною тѝ крѣ́постїю мꙋжестве́нна и крѣ́пка сотвори́въ, побѣдѝ и҆ сътрѝ врагѝ нш҃а. Цр҃ѧ и҆ Пррⷪ҇ка твое́гѡ Дв҃да, на прего́рдагѡ и҆ хꙋ́лнагѡ бо́рца Голїа́ѳа ᲂу҆крѣпи́вый, и҆ тѣ́мъ тогѡ̀ ниꙁложи́въ погꙋби́вый: и҆ ны́нѣ Царѧ̀ нш҃гѡ и҆ хрⷭ҇толюби́выѧ во́ѧ є҆гѡ̀, си́лою тѝ десни́цею подкрѣпи́въ, дерꙁнове́нных и҆ си́лныхъ въ бра́нехъ сотворѝ, и҆ стра́шныхъ и҆ гро́ꙁныхъ врагѡмъ покажѝ, ꙗ҆́кѡ да тѣ́хъ врагѝ ᲂу҆ꙁрѣ́вше въ бѣ́гство своѐ дерꙁнове́нїе претво́рѧтъ, и҆ подъ нога́ма вѣ́рныхъ твои́хъ, А҆́гг҃ломъ твои́мъ погна́ни и҆ пора́жени па́дꙋтъ. Е҆́й Гд҃и Бж҃е нш҃ъ ᲂу҆слы́ши мѧ смире́ннагѡ и҆ недосто́йнагѡ раба̀ твое́гѡ въ ча́съ се́й, и҆ не ѡ҆ста́ви жеꙁла̀ нечести́выхъ, на жре́бїи вѣ́рныхъ свои́хъ: но пода́ждъ рабꙋ̀ твое́мꙋ Царю̀ на́шемꙋ ми́рное и҆ беꙁмѧте́жное Ца́рство: и҆ всѧ́кїѧ междосо́бныѧ бра́ни, и҆ мѧте́жа и҆ во́лны тогѡ̀ и҆ꙁба́ви: и҆ вы́шша всѣ́хъ бѣ́дъ и҆ нꙋ́ждъ сотворѝ: и҆ всѧ̀ вра́жды и҆ крамѡ́лы воста́ющїѧ на держа́вꙋ є҆гѡ̀ раꙁдрꙋшѝ: непребори́ма же твое́ю непобѣди́мою ᲃи́лою ѿ всѧ́кагѡ вра́жїѧгѡ навѣ́та и҆ наше́ствїѧ тогѡ̀ ꙗ҆вѝ во́ѧ є҆гѡ̀ ве́ꙁде на всѧ̀ врагѝ ᲂу҆крѣпѝ, и҆ въ є҆диномы́слїи пра́веднѣмъ повинове́нїи сочета́й, и҆ ми́ръ глꙋбо́кїй и҆ беꙁъмѧте́жный и҆ побѣ́дꙋ на всѧ̀ ᲃопроти́вныѧ, на землѝ и҆ на мо́ри и҆́мъ пода́ждъ, всѧ̀ ꙗ҆́же на по́лꙁꙋ дш҃евнꙋю и҆ тѣле́снꙋю и҆́мъ всегда̀ подава́ѧ: ꙗ҆́кѡ да воꙁдвиꙁа́емыѧ на́ ны бра́ни и҆ мо́л̾бы ѿтрѧ́сше, є҆ди́нѣми ᲂу҆сты̀, и҆ є҆ди́нѣмъ ᲃе́рдцемъ просла́вимъ тѧ чꙋдесе́мъ Бг҃а. Ты́ бо є҆сѝ Цр҃ъ ми́ра, и҆ ᲃп҃съ дш҃а́мъ на́шимъ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ во вѣ́ки вѣкѡ́въ, А҆ми́нь.

Гд҃и Бж҃е ѡ҆т҃цъ на́шихъ, ты́ є҆си Бг҃ъ є҆ди́нъ на нб҃сѝ го́рѣ и҆ на землѝ ни́ꙁꙋ, ты владѣ́еши всѣмѝ ца́рствы и҆ ꙗ҆ꙁы́ки: и҆ въ рꙋ́кꙋ твое́ю є҆́стъ крѣ́постъ и҆ си́ла, и҆ никто́же тебѣ̀ сопроти́витисѧ мо́жетъ: въ на́съ же нѣ́сть толи́ки си́лы и҆ крѣ́пости, ꙗ҆́кѡ да воꙁмо́жемъ мнѡ́жествꙋ семꙋ̀ находѧ́щомꙋ на́ ны сопроти́вꙋ ста́ти, и҆ что̀ твори́ти недоꙋмѣва́емсѧ: но то́чїю ѻ҆́чи нш҃и къ тебѣ̀ ѡ҆браща́емъ и҆ воꙁво́димъ: ᲂу҆ тебе́ бо Гд҃и є҆дино̀ є҆́стъ, сице въ ма́лости, ꙗ҆́коже и҆ въ мнѡ́жествѣ да́ти побѣ́дꙋ. Помоꙁѝ на́мъ Гд҃и Бж҃е на́шъ, на́ тѧ́ бо и҆ на и҆мѧ̀ твоѐ ᲂу҆повающе, во́инство сі́е сопроти́въ мнѡ́жествꙋ семꙋ̀ и҆схо́дитъ.

Гд҃и ты́ є҆сѝ Бг҃ъ на́шъ да не премо́жетъ сопроти́въ тебѐ чл҃къ. Гд҃и Бж҃е ᲃи́лъ, Бж҃е хрⷭ҇тїѧ́нскїй, ᲃѣдѧ́й на Херꙋві́мѣхъ, ты́ є҆сѝ Бг҃ъ є҆ди́нъ и҆ Цр҃ъ всемꙋ̀ Ца́рствꙋ земномꙋ: ты сотвори́лъ є҆сѝ нб҃о и҆ зе́млю.

Приклонѝ Гд҃и ᲂу҆́хо твоѐ, и҆ ᲂу҆слы́ши: ѿверꙁѝ ѻ҆́чи твоѝ, и҆ ви́ждъ врагѡ́въ на́шихъ шата́нїе, и҆ ꙗ҆́же на́ тѧ и҆́стиннагѡ жива́гѡ Бг҃а на́шегѡ, въ Трⷪ҇ци ᲃт҃ѣ́й ᲃлави́магѡ и҆ покланѧ́емагѡ беꙁꙁако́ннаѧ и҆́хъ хꙋле́нїѧ, и҆ ꙗ҆́кѡ ще́дръ и҆ ᲃи́ленъ и҆ꙁба́ви на́съ ѿ рꙋкѝ и҆́хъ, ꙗ҆́кѡ Дх҃а поꙁна́ютъ всѧ̀ Ца́рствїѧ земнаѧ ꙗ҆́кѡ ты́ є҆сѝ Гдⷭ҇ь Бж҃е є҆ди́нъ Блⷭ҇ве́нъ є҆сѝ ᲃп҃се и҆ И҆ꙁбави́телю люде́й твои́хъ, сокрꙋши́вый стремле́нїе си́лнагѡ рꙋко́ю раба̀ твое́гѡ Дв҃да, и҆ преда́вый ѡ҆полче́нїе и҆ноплеме́нныхъ въ рꙋ́кꙋ І҆ꙍнаѳа́на ᲃы́на Саꙋ́лова, и҆ ѻ҆рꙋжено́сца є҆гѡ̀.

Преда́ждъ и҆ ны́нѣ, ᲃе́рдцемъ сокрꙋше́ннымъ и҆ дх҃омъ смѣре́ннымъ моли́мъ тѧ во́ѧ врагѡ́въ на́шихъ въ рꙋ́ки хрⷭ҇толюби́выхъ люді́й твои́хъ: и҆ Дх҃а постыдѧ́тсѧ съ во́и и҆ кѡ́нники свои́ми. Да́ждъ и҆́мъ бо́ѧꙁнь, и҆ раста́й крѣ́постъ си́лы и҆́хъ, и҆ да поколѣ́блютсѧ сътрѣ́нїемъ свои́мъ. Ниꙁложѝ и҆ ᲂу҆бі́й ѧ҆̀ мече́мъ любѧ́щихъ тѧ̀, и҆ восхвалѧтъ тѧ въ пѣ́снехъ, всѝ зна́ющїи и҆мѧ̀ твоѐ, и҆ ᲃи́лꙋ твою̀ вѣдꙋ́щїи.

Бж҃е Бж҃е на́шъ, є҆ди́нъ ты́ є҆си творѧ́й чꙋдеса̀: и҆́же не по ѻ҆рꙋ́жїи си́лныхъ, но ꙗ҆́коже го́дѣ тебѣ̀ само́мꙋ є҆́стъ, досто́йнымъ дае́ши ѡ҆долѣ́нїе и҆ побѣ́дꙋ: Ты Влады́ко ꙗ҆́коже посла́лъ є҆сѝ и҆́ногда А҆́гг҃ла твое́гѡ при Е҆ꙁе́кїи Цр҃и І҆ꙋ́д҃скомъ, и҆ ᲂу҆би́лъ є҆сѝ ѿ во́евъ Сенахири́мовыхъ ᲃто ѻ҆смъдесѧтъ и҆ пѧтъ ти́сѧщъ: и ны́нѣ ѽ Влады́ко нбⷭ҇ный, послѝ А҆́гг҃ла твое́гѡ бл҃га пре́дъ во́йми си́ми въ стра́сѣ и҆ тре́петѣ вели́чества мы́шцѧ твое́ѧ, да ᲂу҆боѧ́тсѧ съ хꙋле́ніемъ приходѧ́щїи на вѣ́рныѧ люди твоѧ̀, и҆ въ бѣ́гство да претво́рѧтсѧ: пора́жени же, и҆ нога́ми вѣ́рныхъ твои́хъ попра́ни Дх҃а бꙋ́дꙋтъ. Ты́ бо є҆сѝ крѣ́постъ и́ ᲂу҆твержденїе, и҆ побѣ́да, вѣ́рнѡ на́ тѧ ᲂу҆пова́ющихъ: и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

Гдⷭ҇и Бж҃е на́шъ, є҆динѐ крѣ́пкїй и҆ си́лный въ бра́нехъ: є҆динѐ и҆мѣ́ѧй вла́стъ живи́ти и҆ мертви́ти, всѣ́хъ ᲃе́рдца въ рꙋцѣ̀ ᲃвое́й и҆мѣѧй, и҆ по во́ли твое́й є҆мꙋ́же ты ᲃа́мъ хо́щеши, досто́йнымъ дае́ши крѣ́постъ и҆ мꙋ́жество, и҆ побѣди́телны и҆ беꙁнаде́жныхъ на врагѝ ꙗ҆влѧ́еши: не́мощныхъ рꙋ́кꙋ подкрѣплѧ́еши, си́лныхъ же ᲃердца боѧꙁне́нны и҆ сла́бы тво́риши, и҆ совѣ́ты и҆́хъ раꙁарѧ́еши, и҆ мꙋ́жество и҆ де́рꙁость и҆́хъ въ малодꙋ́шїе и҆ бѣ́гство претворѧ́еши. Ты А҆враа́мꙋ на плѣни́вшихъ Лꙍ́та ᲃн҃а бра́та є҆гѡ̀, въ ма́лемъ числѣ̀ люді́й, приꙁва́вшꙋ тѧ на по́мощь, побѣ́дꙋ дарова́лъ є҆сѝ, и҆ съ мнѡ́гою кори́стїю воꙁврати́лъ є҆сѝ.

Ты Гедіѡ́на дре́вле на крѣ́постъ твою̀ ᲂу҆пова́вшагѡ, съ тремѝ сты̀ мꙋже́й, трꙋ́бы и҆ ѻ҆гне́мъ, и҆ водоно́сѡвъ съкрꙋше́нїемъ, беꙁъчисле́нное мнѡ́жество Мадїа́млихъ во́й ᲂу҆стра́шивъ, въ бѣ́гство претвори́лъ є҆сѝ, и҆ сто̀ и҆ два́десѧтъ ти́сѧщъ поби́лъ є҆сѝ. Ты и҆ Дв҃дꙋ ѻ҆трокꙋ твое́мꙋ въ мнѡ́гихъ и҆ тѧ́жкихъ бра́нехъ, на́ тѧ ᲂу҆пова́вшомꙋ, и҆ ѿ тебѐ по́мощъ поиска́вшомꙋ, ᲃи́лꙋ и҆ крѣ́постъ, и҆ мꙋ́жество, и҆ побѣ́дꙋ дарова́лъ є҆сѝ. Ты и́ ны́нѣ ѽ всеси́лный, пребл̀гі́й и҆ въсемлⷭ҇тивый Влады́ко, при́ꙁри на на́съ недосто́йных рабѡ́въ твои́хъ въ смѣре́нїи, и҆ покаѧ́нїи пре́дъ лице́мъ ᲃла́вы твое́ѧ припада́ющихъ, и҆ тебѐ ᲃама́гѡ є҆ди́нагѡ и҆́стиннагѡ въ Трⷪ҇ци ᲃт҃ѣ́й слави́магѡ Бг҃а, вѣ́рою приꙁыва́ющихъ, и҆ ѿ тебѐ є҆ди́нагѡ по́мощь и҆ застꙋпле́нїе и҆́щꙋщихъ, и҆ пода́ждъ Царю̀ нш҃мꙋ (и҆лѝ Ге́тманꙋ, И҆мⷬ҇къ:) и҆ хрⷭ҇толюби́вомꙋ є҆гѡ̀ во́инствꙋ ᲃи́лꙋ и҆ крѣ́постъ, дерꙁнове́нїе же и҆ ᲃе́рдце мꙋжестве́нно, сопроти́въ врагѡ́мъ на́шимъ, на́ ны събра́вшимсѧ растерꙁа́ти на́съ и҆ ᲃт҃а́ѧ на́шѧ, и҆ погꙋби́ти на́съ и҆ Вѣ́рꙋ на́шꙋ Правосла́внꙋю и҆́щꙋщихъ: врагѡ́м же на́шимъ вложѝ стра́хъ и҆ тре́петъ в҆ ᲃердцѧ и҆́хъ, и҆ малодꙋ́шныхъ, и҆ беꙁънаде́ждныхъ сотвори́въ, въ бѣ́гство дерꙁнове́нїе и҆́хъ претворѝ, и҆ подъ нѡ́ги вѣ́рныхъ свои́хъ покорѝ, ꙗ҆́кѡ да ᲂу҆ви́дѧтъ всѝ ꙗ҆ꙁы́ци, ꙗ҆́кѡ мы лю́дїе твоѝ сꙋ́ще, и҆ма́мы тебѐ и҆ꙁбавлѧ́ющагѡ, и҆ ᲃпаса́ющагѡ на́съ и҆ꙁъ рꙋкѝ врагѡ́въ на́шихъ. Нѣ́стъ бо ра́ꙁн̾ства пре́дъ тобо́ю Бг҃омъ нбⷭ҇нымъ, є҆́же спⷭ҇тѝ въ мнѡ́ꙁѣ и҆ въ ма́лѣ: не въ мнѡжествѣ́ бо во́й ѡ҆долѣ́нїе бра́ни є҆́стъ, но ѿ тебѐ съ нб҃сѐ крѣ́пость дае́тсѧ за вѣ́рꙋ ᲃт҃ꙋ́ю ꙗ҆́же въ тебѐ, и҆ за за́коны твоѧ̀, и҆ за дш҃ꙋ свою̀ ѡ҆полча́ющимсѧ. Ты́ бо є҆сѝ крѣ́постъ застꙋпле́нїе и҆ спⷭ҇нїе люде́мъ свои́мъ, и҆ тебѣ̀ ᲃла́вꙋ, че́стъ, и҆ поклоне́нїе воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

Гд҃и Бж҃е ᲃи́лъ, Бж҃е ᲃпⷭ҇нїѧ на́шегѡ, Бж҃е творѧ́й чꙋдеса̀ є҆ди́нъ, при́ꙁри ни́нѣ въ млⷭ҇тѝ и҆ шедрѡта́хъ на смире́нныѧ лю́ди своѧ̀, и҆ чл҃кѡлю́бнѡ ᲂу҆слы́ши и҆ пощадѝ и҆ пом҃лꙋй на́съ: Се́ бо вра́ꙁи на́ши събра́шасѧ на́ ны, є҆́же расто́ргнꙋти и҆ погꙋби́ти на́съ и҆ ᲃт҃ы́нѧ на́шѧ: Ты́ же всѧ̀ вѣ́дый вѣ́си є҆́же ѡ҆нѝ на на́съ помышлѧ́ютъ, и҆ ꙗ҆́кѡ не мо́жемъ мы ста́ти пре́дъ лице́мъ и҆́хъ, а҆́ще не ты̀ помо́жеши на́мъ. Но ꙗ҆́коже и҆́ногда при Мѡѵ꙼се́и, Е҆вре́йстїи лю́дїе ᲃловеса̀ твоѧ̀, тѣ́мъ рече́ннаѧ: Дерꙁа́йте, сто́йте, и҆ ᲂу҆́ꙁрите ᲃп҃се́нїе ѿ Гд҃а, є҆́же сътво́ритъ ва́мъ дне́сь, Гд҃ь бо побо́ретъ по на́съ. ᲂу҆слы́шавше, благодꙋ́шни бы́шѧ, и҆ ѡ҆ на́съ сі́ѧ рцѝ: и҆ воста́ни ꙗ҆́кѡ ᲃи́ленъ и҆ шꙋ́менъ ѿ вина̀, и҆ꙁъсꙋ́ни ᲃи́лы твое́ѧ непобѣди́мое ѡ҆рꙋ́жїе, и҆ заврѝ съпроти́въ воста́ющихъ непра́веднѡ на́ ны, и҆ и҆ꙁгони́ти на́съ ѿ ѡ҆держа́нїѧ на́шегѡ є҆́же да́лъ є҆сѝ на́мъ въ пре́жднихъ на́шихъ хотѧ́щихъ, и҆ пода́ждъ рабѡ́мъ твои́мъ съпроти́въ тѣ́хъ въ и҆мѧ̀ твоѐ ѡ҆полча́ющимсѧ, дерꙁнове́нїе и҆ крѣ́пост̾, ᲃи́лꙋ и҆ мꙋ́жествѡ: положѝ лꙋ́къ мѣ́дѧнъ мы́шцамъ и҆́хъ, и да́ждъ и҆́мъ защище́нїе ᲃпⷭ҇нїѧ, и҆ препоѧшѝ и҆́хъ си́лою на бра́нь: прїймѝ ѡрꙋ́жїе и҆ щи́тъ, и҆ воста́ни въ по́мощъ на́шꙋ: рцѝ дш҃и на́шей ᲃпⷭ҇нїе твоѐ є҆́см̾ а҆́ꙁ, да постыдѧ́тсѧ и҆ посрамѧ́тсѧ и҆́щꙋщїи дш҃ѧ̀ на́шѧ, да воꙁвратѧ́тсѧ воспѧ́тъ, и҆ постыдѧ́тсѧ мыслѧ́щїи на́мъ зла́ѧ: да бꙋ́дꙋтъ пре́дъ лице́мъ вѣ́рнагѡ тѝ во́инства, ꙗ҆́кѡ пра́хъ пре́дъ лице́мъ вѣ́трꙋ, и҆ А҆́гг҃лъ тво́й ᲃи́лный да прі́йдетъ и҆́мъ сѣ́ть ю҆́же не свѣ́даютъ, и҆ лови́тва ю҆́же сокры́шѧ, да ѡ҆бы́йметъ и҆́хъ, да па́дꙋтъ подъ нога́ма рабѡ́въ твои́хъ, и҆ въ попра́нїе во́емъ на́шимъ да бꙋ́дꙋ́тъ. Е҆́й Гд҃и Бж҃е ᲃп҃си́телю на́шъ, крѣ́пости и҆ ᲂупова́нїе и҆ застꙋпле́нїе на́ше, не помѧнѝ беꙁꙁакѡ́нїй и҆ непра́вдъ люді́й твои́хъ, и҆ не ѿврати́сѧ гнѣ́вомъ и҆ ꙗ҆́ростїю ѿ на́съ, но въ млⷭ҇тѝ и҆ щедрота́хъ твои́хъ, ꙗ҆́кѡ бл҃гъ посѣтѝ вѣ́рныѧ рабы̀ своѧ̀, и҆ пода́ждъ во́инствꙋ нш҃емꙋ на́ тѧ ᲂу҆пова́ющомꙋ побѣ́дꙋ на врагѝ, ꙗ҆́кѡ же Мꙍѵ꙼се́и на А҆мали́ка, Гедіѡ́нꙋ на Мадїа́ма, и҆ Дв҃дꙋ на Голиа́ѳа, и҆ и҆́нѣмъ мнѡ́гимъ рабѡ́мъ твои́мъ не на ѡ҆рꙋ́жїи свои́хъ, но на тебѐ и҆́стиннагѡ Бг҃а, ᲃпⷭ҇тѝ могꙋ́щагѡ ᲂу҆пова́вшихъ, пресла́внаѧ ѡ҆долѣ́нїѧ и҆ побѣ́ды дарова́лъ є҆сѝ. И҆ ᲂу҆́бѡ ꙗ҆́кѡ же А҆враа́мъ, И҆ꙍ́сифъ, Фінее́съ, І҆сꙋ́съ, Ха́левъ, И҆лїѧ̀, А҆на́нїѧ, А҆ꙁа́рїѧ, Мисаи́лъ, Данїи́л, и҆ про́чїи ѿ ро́да до ро́да ᲂу҆го́дници твоѝ, въ и҆скꙋше́нїихъ, ско́рбехъ, бѣда́х же и҆ тѣснота́хъ, на тебѐ и҆ на млⷭ҇ть твою̀ ще́дрꙋю ᲂу҆пова́юще, не ослабѣ́ша, и҆́же не то́чїю не ѡ҆ста́влени бы́шѧ, но па́че и҆ пресла́внѡ просла́вишасѧ, и҆ мы̀ грѣ́шнїи и҆ недосто́йнїи рабѝ твоѝ ничто́же бл҃го́е пре́дъ ѡ҆чи́ма твои́ма сътво́ршїи, на щедрѡты̀ твоѧ̀ самы́ѧ ᲂу҆пова́емъ: вѣдꙋ́ще ꙗ҆́кѡ не въ си́лѣ ко́нстѣй, ни въ лы́стехъ мꙋ́жескихъ благоволи́ши, но въ боѧ́щихсѧ тебѐ, и҆ на млⷭ҇ть твою̀ ᲂу҆пова́ющихъ. Тебѐ бои́мсѧ, и҆ въ тебѣ̀ всѐ ᲂу҆пова́нїе на́ше воꙁлага́емъ, къ тебѣ̀ прибѣга́ем, тебѣ̀ припада́емъ, къ тебѣ̀ рꙋ́цѣ на́ши воꙁво́димъ, и҆ тебѣ̀ ᲃмире́ннѡ въ покаѧ́нїи мл҃и́мсѧ: Помоꙁѝ на́мъ Бж҃е ᲃп҃си́телю на́шъ ᲃла́вы ра́ди И҆менѝ твое́гѡ, и҆ и҆ꙁба́ви на́съ И҆менѝ ра́ди твое́гѡ ᲃт҃а́гѡ: Дх҃а не когда̀ рекꙋ́тъ вра́ꙁи нш҃и, Бг҃ъ ѡ҆ста́вилъ є҆́стъ и҆́хъ, и҆ нѣ́сть и҆ꙁбавлѧ́ѧй и҆ сп҃са́ѧй и҆́хъ. Но ты̀ и҆́стинный Гд҃и Бж҃е на́шъ вне́гоже вѣ́рꙋемъ, и҆ на него́же ᲂу҆пова́емъ, не посрамѝ на́съ, ѿчаѧ́нїѧ млⷭ҇тѝ твое́ѧ, и҆ сътворѝ съ на́ми зна́менїе въ бла́го, ꙗ҆́кѡ да ви́дѧтъ ненавидѧ́щїи на́съ, и҆ Правосла́внꙋю Вѣ́рꙋ на́шꙋ, и҆ посра́мѧтсѧ, и҆ поги́бнꙋтъ: и҆ да ᲂу҆вѣ́дѧтъ всѧ̀ стра́ны ꙗ҆́кѡ и҆мѧ̀ тебѣ̀ Гд҃ь, и҆ мы̀ лю́дїе твоѝ. Ꙗ҆вѝ на́мъ Гд҃и ны́нѣ млⷭ҇ть твою̀, и҆ ᲃпⷭ҇нїе твоѐ да́ждъ на́мъ: въꙁвеселѝ се́рдце рабѡ́въ твои́хъ ѡ҆ млⷭ҇тѝ твое́й: Пораꙁѝ врагѝ на́ши и҆ съкрꙋшѝ и҆́хъ подъ нѡ́ги вѣ́рныхъ твои́хъ воско́рѣ: ѡ҆братѝ въ стра́хъ и҆ бѣ́гство и҆́хъ нечити́вое, и҆ непра́ведное дерꙁнове́нїе, и҆ да́ждъ рабѡ́мъ твои́мъ въ мнѡ́ꙁѣмъ дерꙁнове́нїи, и҆ си́лѣ, и҆ мꙋ́жествѣ погна́ти и҆ пости́гнꙋти и҆́хъ, и҆ ѡ҆ и҆менѝ твое́мъ побѣди́ти и҆ погꙋби́ти ѧ҆̀. Ты́ бо є҆сѝ застꙋпле́нїе, по́мощъ, и҆ побѣ́да ᲂу҆пова́ющимъ на́тѧ: и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.