Воследова́нїе моле́бного пѣ́нїѧ, пѣва́емаго въ нашествїи ва́рваръ и҆ въ нахожде́нїи ꙗ҆ꙁы́кѡвъ

І҆ере́ѵ꙼ начина́етъ:

Блгⷭ҇ве́нъ Бг҃ъ на́шъ:

Та́же, Трⷭ҇то́е: и҆ по Ѿч҃е на́шъ:

І҆єре́ѵ꙼ гл҃етъ:

Ꙗ҆́кѡ твоє̀ є҆́стъ ца́рство:

Чте́цъ же:

Гд҃и поми́лꙋй, в҃і. Прїйдѣ́те поклони́мсѧ: гⷤ.

Ѱал: о҃и. Бж҃е прїйдѡ́ша ꙗ҆ꙁы́ци въ дост:

Сла́ва: И҆ ны́нѣ: А҆ллил: гⷤ.

Дїа́конъ же глаголе́тъ Е҆кте́нїѧ вели́каѧ.

Ми́ромъ Гд҃ꙋ помоли́мсѧ. И҆ проч: даже до ѡ҆ плава́ющихъ:

И҆ а҆́бїє прилага́етъ ᲃїѧ.

Ꙍ҆ є҆́же прости́ти на́мъ всѧ̀ согрѣше́нїѧ на́ша, и҆́миже ꙗ҆́ростъ є҆гѡ̀ раꙁдражи́хѡмъ на́сѧ, и҆ чл҃кѡлю́бїе є҆гѡ̀ прогнѣва́хѡмъ, Гд҃ꙋ помол:

Ꙍ҆ є҆́же млⷭ҇тивъ бы́ти, благоꙋвѣтли́въ, и҆ благопремѣни́тел̾ рабѡ́мъ свои́мъ, и҆ ѿврати́ти ѿ на́съ ве́съ гнѣ́въ сво́й пра́веднѡ движи́мый на́ ны и҆ поми́ловати на́съ, Гд҃ꙋ помоли́мсѧ.

Ꙍ҆ є҆́же ѡ҆брати́ти воско́рѣ въспѧтъ, и҆ въ бѣ́гство претвори́ти дерꙁнове́нїе по́лкѡвъ беꙁбо́жныхъ ꙗ҆ꙁы́къ, и҆ въ попра́нїе Хрⷭ҇тоимени́томꙋ Во́инствꙋ подъ но́ги покори́ти, Гд҃ꙋ помоли́мсѧ.

Ꙍ҆ є҆́же воско́рѣ сокрꙋши́ти ᲃи́лꙋ и҆ Бг҃обо́рное дерꙁнове́нїе ѡ҆полча́ющихсѧ на́ ны пога́ныхъ ꙗ҆ꙁы́кѡвъ, стра́хъ же и҆ тре́петъ и҆ ᲂу҆жа́съ, съ малодꙋ́шїемъ въ сердца и҆́хъ всади́ти, вѣ́рнымъ же люде́мъ побѣ́дꙋ на́нѧ и҆ ѻ҆долѣ́нїе мꙋжестве́нное ᲃи́лою свое́ю пода́ти, Гд҃ꙋ помоли́мсѧ.

Ꙍ҆ є҆́же при́ꙁрѣти на пла́чъ стена́нїѧ и҆ во́пль людїй свои́хъ и҆ запꙋстѣ́нїе достоѧ́нїѧ свое́гѡ, ѿ беꙁбо́жныхъ ни́нѣ ꙗ҆ꙁыкъ сꙋ́щее, и҆ сокрꙋши́ти и҆ и҆стни́ти вражде́бнꙋю и҆́хъ си́лꙋ, побѣ́дꙋ и҆ ѡ҆долѣ́нїе вѣ́рнымъ свои́мъ на́нѧ подава́ѧ, Гд҃ꙋ помоли́мсѧ.

Ꙍ҆ є҆́же пода́ти си́лꙋ, крѣ́пость, и҆ мꙋ́жество Хрⷭ҇тоимени́томꙋ Во́инствꙋ, и҆ ᲂу҆крѣпи́ти мы́шцѧ и҆́хъ на пле́щи беꙁбо́жныхъ врагѡ́въ ратꙋ́ющихъ на́съ, Гд҃ꙋ помоли́мсѧ.

Ꙍ҆ є҆́же ꙗ҆́кѡ и҆щеꙁаетъ ды́мъ да и҆ще́ꙁнꙋтъ беꙁбо́жнїи вра́ѕи на́ши, и҆ ꙗ҆́коже пра́хъ воꙁмѣта́етсѧ ѿ лица̀ вѣ́трꙋ, та́кѡ да поги́бнꙋтъ А҆гарѧ́нстїи внꙋ́ци ѿ лица̀ хрⷭ҇тїѧ́нски во́инствъ, Гд҃ꙋ помоли́мсѧ.

Ꙍ҆ є҆́же посла́ти ꙗ҆́рость, гнѣ́въ, ско́рбъ, и҆ а҆́нгелы ли́тыѧ на всѧ̀ Хрⷭ҇тонена́вистныѧ ꙗ҆ꙁы́ки, є҆́же потреби́ти ѧ҆̀ съ всѣ́мъ беꙁбо́жїемъ и҆́хъ, и҆ раꙁдрꙋши́ти ца́рство и҆ вла́сть и҆́хъ, ѡ҆чи́стити же зе́млю людїй свои́хъ сла́вы ра́ди и҆менѝ свое́го, Гд҃ꙋ помоли́мсѧ.

Ꙍ҆ є҆́же бы́ти пꙋ́ть находѧ́щихъ на́ ны ꙗ҆ꙁы́кѡвъ тма̀ и҆ по́лꙁокъ, и҆ А҆́гг҃лъ Гн҃ь да пожене́тъ и҆ ѡ҆скорби́тъ и҆́хъ, и҆ преда́сть и҆́хъ въ рꙋ́ки Хрⷭ҇толюби́выхъ во́ин, Гд҃ꙋ помоли́мсѧ.

Ꙍ҆ є҆́же невреди́мыхъ на́съ соблюстѝ и҆ непребори́мыхъ ѿ всѧ́кагѡ зла́гѡ ѡ҆бстоѧ́нїѧ и́ вра́жїѧгѡ сꙋро́вства, и҆ держа́вное ѡ҆долѣ́нїе, сопроти́въ мꙋчи́тел̾скїѧ и҆́хъ де́рꙁости вѣ́рнымъ свои́мъ ми́лостивнѡ пода́ти, Гд҃ꙋ помоли́мсѧ.

Застꙋпѝ, спасѝ, помилꙋй: Прест҃ꙋ́ю чⷭ҇тꙋю:

І҆ереѵ꙼ воꙁглаша́єтъ.

Ꙗ҆́кѡ подоба́єтъ тѝ всѧ́каѧ сла́ва:

Посе́мъ:

Бг҃ъ Гд҃ь и҆ ꙗ҆ви́сѧ на́мъ: на Гла́съ, ѕ.

И҆ Тропарѝ ᲃїѧ, Гла́съ тожъ.

Стра́шенъ є҆сѝ Гд҃и, и҆ кто̀ проти́вꙋ пра́ведномꙋ твое́мꙋ гнѣ́вꙋ ста́нетъ; и҆лѝ кто̀ ᲂу҆мо́литъ тѧ Бл҃же; кто́же ли ᲂу҆толи́тъ тѧ за лю́ди согрѣши́вшїѧ и҆ ненача́емыѧ; то́кмѡ нбⷭ҇нїи Чи́нѡве, А҆рха́гг҃ли, и҆ А҆́гг҃ли, Го́сподства, Херꙋві́ми, и҆ Серафі́ми, ѡ҆са́нна непреста́ннѡ тѝ вопїю́щїи: съ ни́миже и҆ мы̀ согла́снѡ зове́мъ: Ст҃ъ, ᲃⷮ: ᲃⷮ: є҆сѝ Бж҃е, пом҃лꙋй на́съ.

Сла́ва:

Гд҃и, Гд҃и, тебѐ всѧ́ческаѧ боѧ́тсѧ и҆ трепе́щꙋтъ пре́дъ лице́мъ ᲃла́вы твое́ѧ: тебѣ̀ и҆ мы̀ грѣ́шнїи съ бо́ѧꙁнїю и҆ тре́петомъ припада́емъ беꙁсме́ртне: тебѣ̀ мо́лимсѧ ᲃт҃ый: сп҃сѝ дша̀ нш҃а мл҃твами А҆пⷭ҇лъ, Прⷪ҇ркъ, и҆ всѣ́хъ ст҃ыхъ твои́хъ.

И҆ ны́нѣ:

Мт҃и Бж҃іѧ Прчⷭ҇таѧ, прибѣжи́ще и҆ покро́ве христїа́нскїй, ᲂу҆крѣ́пѝ, си́лнаже и҆ дерꙁнове́нна сотворѝ Гпⷭ҇дарѧ̀ на́шегѡ, и вѡ́ѧ є҆гѡ̀, и҆ лю́ди всѧ̀ ѡ҆бы́чно молѧ́щїѧтисѧ, въ є҆́же ᲂу҆до́бъ побѣди́ти и҆ ниꙁложи́ти Христонена́вистныѧ врагѝ и҆ го́рдыѧ Ва́рвары, да всѝ вопїемъ тѝ: Ра́дꙋйсѧ прерадова́ннаѧ.

Та́же, Ѱаломъ, н҃. Поми́лꙋй мѧ̀ Бж҃е, по вели́цѣй млⷭ҇тѝ:

Канꙍ́нъ мл҃бный къ Прⷭ҇тѣ́й Бц҃и, въ чаѧ́нїи бра́ни. Творе́нїѧ Кѵръ І҆ѡа́ннова. Е҆мꙋ́же Краегра́нь сі́ѧ.

Твои́мъ Пречⷭ҇таѧ ᲃопоборѝ рабѡ́мъ. Гла́съ, ѕ҃.

Пѣ́снь а҃. И҆рмо́съ:

Ꙗ҆́кѡ по сꙋ́хꙋ ходи́въ І҆и҃ль.

Припѣ́лъ:

Прⷭ҇та́ѧ Влады́чице ᲂу҆слы́ши, и҆ бꙋ́ди на́мъ застꙋ́пница.

Тропа́ріѡнъ:

Держа́внагѡ въ крѣ́пости, и҆ си́лнагѡ въ бра́нехъ Гд҃а, ро́ждшаѧ чⷭ҇таѧ: держа́вною тѝ и҆ всеси́лною рꙋко́ю, сопоборѝ на́мъ на врагѝ борꙋ́щїѧ на́съ.

Въ мо́ри потопи́вый пре́жде Фараꙍ́на, и҆ ны́нѣ въ по́мощь нш҃ꙋ востанѝ Хє҃, ро́ждшїѧ тѧ мл҃твами.

Вра́чевскѡ ᲂу҆́бѡ є҆сѝ є҆́же рѣ́ꙁати, и҆ жещѝ, здра́вїѧ ра́ди: но ты на́съ ᲃн҃е Бж҃ій, мѧ́гкими лѣчба́ми щедрѡ́тъ твои́хъ ᲂу҆врачꙋ́й, Мт҃ре твое́ѧ мол̾ба́ми.

Сла́ва:

Сенахери́мово ꙗ҆́коже дре́вле все во́инство зѣ́лѡ и҆счеꙁнове́нно сотвори́лъ є҆́стъ рождейсѧ и҆ꙁъ тебѐ Бг҃ъ: си́це и́ ны́нѣ ты, всѐ во́инство ѡ҆бше́дше на́съ ва́рварское, держа́вною рꙋко́ю си ниꙁложѝ Влады́чице.²⁵

Тебѐ на борꙋ́щїѧ на́съ гордыѧ врагѝ, въмѣ́сто себѐ въѡ҆рꙋжа́емъ, и҆ дви́жемъ на́нѧ къ сопроти́въ ѡ҆полче́нїю и҆́хъ чⷭ҇таѧ: ты́ бо є҆сѝ христїѧ́нѡмъ нача́лный Воево́да.

Катава́сїѧ:

Спасѝ ѿ бѣдъ:

Пѣ́снь, г҃. И҆рмо́съ:

Нѣ́сть ᲃт҃а ꙗ҆́коже ты:

Сі́и въ колесни́цахъ мнѡ́гихъ, и҆ на мнѡжа́йшихъ кѡ́нехъ, мы́ же лю́дїе твоѝ, и҆мѧ̀ твоѐ приꙁыва́емъ ны́нѣ, и҆ вопїе́мъ: сп҃си́ ны Влады́чице.

Крѣ́пост̾ и҆ си́лꙋ даѧ́й не́мощнымъ, и҆ рогъ воꙁносѧ́й рабѡ́въ твои́хъ Хє҃, вѣ́рномꙋ твое́мꙋ ны́нѣ во́инствꙋ на ва́рвары врагѝ, крѣ́пость подава́й, ро́ждшїѧ тѧ ра́ди.

Во́инство ва́рварское, собра́вшеесѧ ѿ ꙗ҆ꙁы́къ беꙁъбо́жныхъ, ѻ҆гнемъ и҆ зрѧ́щее и҆ ды́шꙋщее, ра́дꙋетсѧ ѡ҆ ᲂу҆бі́йствахъ и҆ закла́нїѧх, и҆ бра́нь дви́жетъ съ рабы̀ твои́ми, и҆́мже ты Влады́чице помоꙁѝ.

Сла́ва:

Мꙋ́жїе кро́вїй сꙋро́ви, л̾стѝ и҆спо́лнени, на́ ны собра́вшесѧ, поꙋчи́шасѧ тще́тнымъ воꙁшата́вшесѧ: но ты Пречⷭ҇таѧ ᲃовѣ́ты и҆́хъ мол̾ба́ми си воско́рѣ раꙁорѝ.

И҆ ны́нѣ:

Рꙋ́къ протѧже́нїемъ Мꙍѵ꙼сѝ Крⷭ҇та̀ ѻ҆́браꙁъ въѡбраꙁи́въ, ѡ҆долѣ̀ ѻ҆трокови́це А҆мали́кꙋ вражде́бномꙋ: ты́ же рꙋко́ю ᲂу҆́мною, люді́й твои́хъ врагѝ ниꙁложѝ.

Катава́сїѧ:

Спасѝ ѿ бѣ́д:

Та́же Дїа́конъ Е҆кте́нїѧ:

Поми́лꙋй на́съ Бж҃е по велицей:

Слеꙁъ и҆спо́лненнаѧ сѣтова́нїѧ же, и҆ рыда́нїю досто́йнаѧ постигѡ́ша на́съ ны́нѣ Гд҃и, тѣ́мъ же къ тебѣ̀ є҆ди́номꙋ Бг҃ꙋ нш҃мꙋ въ ᲂу҆миле́нїи, ᲃе́рдцемъ сокрꙋше́ннымъ зове́мъ, ꙗ҆́кѡ млⷭ҇рдъ ско́рѡ пре́жде да́же не поработи́мсѧ помощѝ на́мъ потщи́сѧ, мл҃и́мтисѧ защи́тниче на́шъ, ᲂу҆слы́ши и҆ поми́лꙋй.

Ѻ҆комъ всевидѧ́щимъ млⷭ҇тивнѡ при́ꙁри Гд҃и, и҆ ви́ждъ, ꙗ҆́кѡ прїйдѡ́ша ꙗ҆ꙁы́ци въ достоѧ́нїе твоѐ, и҆ ѡ҆скверни́ша хра́мы ᲃт҃ы́ѧ твоѧ̀, положи́ша трꙋ́пїе рабѡ́въ твои́хъ бра́шнѡ пти́цамъ нбⷭ҇нымъ, пло́ти преподо́бныхъ твои́хъ звѣ́ремъ зе́мнымъ, пролива́ютъ кро́вь и҆́хъ ꙗ҆́кѡ во́дꙋ, и҆ нѣ́сть погрѣба́ѧй, ᲂу҆млⷭ҇рди́сѧ и҆ де́рꙁость и҆́хъ раꙁорѝ, и҆ подъ нѡ́ги хрⷭ҇толюби́вымъ Во́емъ ско́рѡ покорѝ, моли́мтисѧ въ бра́нехъ крѣ́пкомꙋ, ᲂу҆слы́ши и҆ поми́лꙋй.

Согрѣши́хѡмъ всѝ и҆ беꙁꙁаконова́хѡмъ въкꙋ́пѣ, и҆ щедрѡты̀ млⷭ҇рдїѧ твое́гѡ Влады́ко беꙁꙋ́мїемъ свои́мъ ѡ҆брати́хѡмъ на гнѣ́въ, и҆ сегѡ̀ ра́ди въ попра́нїе беꙁꙁакѡ́ннымъ врагѡ́мъ преда́хѡмсѧ, но ѡ҆сла́би долготерпе́ливе, и҆ стра́хъ тво́й въ на́съ сꙋ́щїй въмѣ́сто покаѧ́нїѧ прїи́мъ, ѿ сопроти́вных беꙁбо́жнаго ѡ҆бстоѧ́нїѧ, ско́рѡ и҆ꙁба́ви, моли́мтисѧ ско́ромꙋ въ по́мощи, и҆ крѣ́пкомꙋ въ застꙋпле́нїи, ᲂу҆слы́ши и҆ поми́лꙋй.

Мꙍѵ꙼се́ю на А҆мали́ка, Самѱꙍ́нꙋ на и҆ноплеме́нники, и҆ Дв҃дꙋ на Голїа́ѳа держа́вное ѡ҆долѣ́нїе дарова́вый, и҆ ны́нѣ ꙗ҆́кѡ си́ленъ въ крѣ́пости сы́й воста́ющихъ на́ ны Бг҃обо́рныхъ ꙗ҆ꙁы́къ, си́лꙋ и҆ крѣ́постъ сокрꙋшѝ, и҆ де́рꙁость сꙋро́вства и҆́хъ въ малодꙋ́шїе и҆ бѣ́гство претвори́въ сотрѝ, и҆ подъ нѡ́ги Гдⷭ҇рꙋ на́шемꙋ И҆мⷬ҇къ: и҆ хрⷭ҇толюби́вомꙋ є҆гѡ̀ во́инствꙋ держа́внѡ покорѝ, мы́шцею высо́кою сокрꙋша́ющомꙋ бра́ни, моли́мътисѧ ᲂу҆слы́ши и҆ поми́лꙋй.

И҆ере́ѵ꙼ Воꙁглаша́етъ.

Ꙋ҆слы́ши ны Бж҃е ᲃп҃си́телю на́шъ.

Сѣда́ленъ Гла́с, в҃.

Мл҃тве́ннице те́плаѧ, и҆ ᲃтѣ́но непребори́маѧ: млⷭ҇тѝ и҆сто́чниче и҆ мїрови прибѣ́жище, приле́жнѡ вопїємъ тѝ Бц҃е Влады́чице, предварѝ и҆ ѿ бѣ́дъ и҆ꙁба́ви на́съ, є҆ди́на воско́рѣ застꙋпа́ющаѧ.

Пѣ́снь д҃. И҆рмо́съ:

Хᲃ҃ мнѣ си́ла, Бг҃ъ:

Мечъ и҆ꙁлїй Чтⷭ҇аѧ, и҆ заколѝ всѣ́хъ проти́вныхъ, ны́нѣ на́ ны борꙋ́щихъ врагѡ́въ: сопобори́ же на́мъ на́нѧ крѣ́постїю мо́л̾бы твое́ѧ.

Стꙋ́да и҆сполнѝ вра́жїѧ лица̀, и҆ мнѡ́гагѡ беꙁчестїѧ и҆ срамоты̀: и҆ да воꙁвратѧ́тсѧ воспѧ́тъ, ѱало́мски, тще́тни Влады́чице, и҆ беꙁдѣ́лни.

И҆ ны́нѣ поꙁна́имъ ѡ҆ се́мъ, Влады́чице, ꙗ҆́кѡ восхотѣ́ла є҆сѝ всѣ́хъ люді́й твои́хъ гра́да твое́гѡ сегѡ̀, а҆́ще не воꙁра́дꙋетсѧ ѡ҆ на́съ вра́гъ бори́тель.

Сла́ва:

Е҆́же хотѣ́ти, помо́щника и҆́маши на є҆́же мощѝ, ꙗ҆́кѡ ро́ждшаѧ всѧ̀ самы́мъ то́кмѡ про́стымъ ма́нїем могꙋ́щагѡ: а҆́ще ᲂу҆́бѡ восхо́щеши нш҃гѡ ᲃпⷭ҇нїѧ, ᲃпасе́мсѧ.

И҆ ны́нѣ:

Въ гнѣ́вѣ твое́гѡ застꙋпле́нїѧ, си́лныхъ бори́телїй вражде́бныѧ раꙁсѣцѝ гла́вы: ᲃотрѧсꙋ́тъ бо сѧ въ себѣ̀, ѿ стра́ха твое́ѧ держа́вы чⷭ҇таѧ.

Пѣ́снь, є҃. И҆рмо́съ:

Бжⷭ҇тве́ннымъ свѣ́томъ тѝ:

Сатра́пи, тира́нни, Ца́рїе и҆ нача́лници стра́нъ ва́рварскихъ, на зло є҆диномы́сл̾ници бы́вше, на ᲃта́до твоѐ ᲃі́е, ꙗ҆́коже л̾вы̀ и҆ звѣ́рїе ди́вїи ꙗ҆́ростїю рыка́ютъ, но ты и҆́хъ ниꙁложѝ Влады́чице.

Сн҃а ро́ждшаѧ Бж҃іѧ, предстателствꙋ́юща ᲂу҆́мнѡ нбⷭ҇ныхъ ᲃи́лъ А҆́гг҃ла, побо́рника послѝ Дв҃о Бц҃е, въ по́мощъ на́шꙋ.

Слеꙁъ и҆спо́лненнаѧ, сѣтова́нїѧ же и҆ рида́нїѧ досто́йнаѧ постигѡ́шѧ ны́нѣ Влады́чице: но ты предвари́вши ᲂу҆щедрѝ, и҆ па́ки беꙁбо́жныѧ врагѝ ниꙁложѝ.

Сла́ва:

Не преда́ждъ въ рꙋ́цѣ ꙗ҆ꙁы́кѡвъ наслѣ́дїе твоѐ чⷭ҇таѧ: да не когда̀ рекꙋ́тъ, гдѐ є҆сѝ Богороди́телница на ню́же ᲂу҆пова́шѧ: но беꙁъ сокрꙋше́нїѧ ста́до своѐ сохранѝ.

И҆ ны́нѣ:

Црⷭ҇твїѧ всѧ̀ зе́мнаѧ, да поꙁна́ютъ держа́вꙋ твою̀, чⷭ҇таѧ, и҆ крѣ́пость твою̀ неѡбори́мꙋю: ꙗ҆ꙁы́ци же да смѧтꙋ́тсѧ, и҆ да сотрѧсꙋ́тсѧ лю́дїе невѣдꙋ́щїи вла́сти твое́ѧ.

Пѣ́снь, ѕ҃. И҆рмо́съ:

Жите́йское мо́ре воꙁ:

Лꙋ́къ мѣ́дѧ́нъ содѣла́й, люді́й твои́хъ вѣ́рныхъ, и҆ и҆ꙁбра́нныхъ мы́шцѧ: и҆ ѡ҆поѧшѝ и҆́хъ си́лою и҆ крѣ́постїю Пренепоро́чнаѧ, съ нб҃сѐ подаѧ̀ и҆́мъ побѣ́дꙋ.

На́съ вѣ́рꙋющихъ въ имѧ̀, Чтⷭ҇аѧ, Ѿц҃а и҆ ᲃн҃а и҆ ст҃гѡ Дх҃а, и҆ кла́нѧющихсѧ рождествꙋ̀ твое́мꙋ почита́емомꙋ, не преда́ждъ врагѡ́м на́шимъ: но въ коне́ц си́х ѻ҆трокови́це сотрѝ.

Стенѧ́ще, колѣ́нѣ же прекланѧ́юще къ землѝ, и҆ рꙋ́цѣ на высотꙋ̀ воꙁдѣ́юще зове́мъ: согрѣши́хѡмъ Влады́чице, къ Бг҃ꙋ: сегѡ̀ млⷭ҇тва сотворѝ, да не ꙗ҆ꙁы́ци ва́рварстїи нака́жꙋтъ на́съ.

Сла́ва:

Не терпи́мъ Влады́чице, и҆бѡ̀ речѐ вра́гъ: Гна́въ пости́гнꙋ, раꙁдѣлю̀ кори́сть, и҆сполню̀ дꙋ́шꙋ мою̀, ᲂу҆бі́ю мечемъ мои́мъ, и҆ ѡ҆долѣ́етъ рꙋка̀ моѧ̀: тѣ́мже предвари́вши застꙋпѝ на́съ.

И҆ ны́нѣ:

Хра́мы ᲃт҃ы́ѧ твоѧ̀, и҆ ѻ҆́лтарѧ сщ҃енныѧ, и҆ чⷭ҇тныѧ и҆́кѡны твоѧ̀ и҆ всѣ́хъ ст҃ыхъ ѡ҆́браꙁы: ᲃосꙋ́ды же и҆ сщ҃еннаѧ сокро́вища, враꙁѝ твоѝ Дв҃о и҆ꙁнꙋри́ша: но ты ѿда́ждъ и҆́мъ по дѣлѡ́мъ и҆́хъ, сокрꙋша́ѧ вражде́бнꙋю тѣ́хъ си́лꙋ.

Катава́сїѧ:

Спасѝ ѿ бѣдъ рабы̀ своѧ̀:

Тажъ, Е҆кте́нїѧ Мала́ѧ.

И҆ по Воꙁгла́сѣ, Код: Богоро́диченъ.

Воꙁбра́нной воево́дѣ побед:

Посе́мъ Сте́пенна, ѕ҃-гѡ Гла́са, А҆нтіфꙍнъ, г҃.

Надѣющїисѧ на Гд҃а, врагѡ́мъ стра́шнїи, и҆ всѣ́мъ ди́внїи, го́рѣ бо зрѧ́тъ. Въ и҆мѧ̀ Ѿц҃а̀, и҆ ᲃн҃а, и҆ ᲃт҃а́гѡ Дх҃а, А҆ми́нь. беꙁꙁако́нїи҆́хъ рꙋ́къ свои́хъ, пра́ведныхъ жре́бїй, помо́щника тѧ и҆мѣ́ѧ ᲃп҃се, не простре́тъ.

Ст҃агѡ Дх҃а держа́ва на всѣ́хъ: є҆мꙋ́же вы́шнѧѧ Во́инства покланѧ́ютсѧ съ всѧ́кимъ дыха́нїемъ до́лнымъ.

Та́же. Прок: Гла́съ, д҃.

Да воскре́снетъ Бг҃ъ и҆ раꙁы́дꙋтсѧ вра́ѕи є҆гѡ̀.

Сті́хъ.

Ꙗ҆́кѡ и҆щеꙁа́ет ды́м да и҆ще́ꙁнꙋтъ.

По се́м:

Всѧ́кѡ дыха́нїе да хва́литъ Гд҃а.

Сті́хъ.

Хвали́те Бг҃а въ ᲃт҃ыхъ є҆гѡ̀.

Е҆ѵⷢ҇: Мат: зач: н҃а. Нача́ло є҆гѡ̀ сїе.

Рече҃ Гд҃ь: Кто̀ ѿ ва́съ и҆мѣ́ѧй дрꙋ́га.

Коне́ц же сей.

Ѿпꙋ́ститъ ва́мъ согрѣше́нїѧ ва́ши.

Та́же, Сла́ва: Гла́съ, ѕ҃.

И҆ ны́нѣ:

Моли́твъ ра́ди прⷭ҇ты́ѧ Бц҃а млⷭ҇тиве ѡ҆чи́сти: Помл҃ꙋй на́съ Бж҃е по вели́цѣй мил:

И҆ а҆́бїе ᲃтихирꙋ сїю Гла́съ, ѕ҃. Под:

Все воꙁло́жше:

Не ѡ҆ста́ви на́съ въ члчⷭ҇кое предстоѧ́нїе Пречⷭ҇таѧ Влады́чице, но прїймѝ моле́нїе рабѡ́въ свои́хъ: ᲃко́рби бо ѡ҆бде́ржатъ ны, терпѣ́ти не мо́жемъ ѿ бѣсо́вскагѡ стрѣлѧ́нїѧ, и҆ сопроти́вныхъ врагѡ́въ наше́ствїѧ: покро́ва не стѧжа́хѡмъ нигде́же прибѣ́гнꙋти стра́стнїи, всегда̀ побѣжда́еми: ᲂу҆тѣше́нїѧ неима́мы ра́ꙁвѣ тебѐ Влады́чице мі́ра: ᲂу҆пова́нїе и҆ предста́тельнице вѣ́рныхъ, не пре́ꙁри моле́нїѧ нш҃а, но соверше́нна ѧ҆̀ сотворѝ.

Дїа́конъ гл҃єтъ.

Сп҃сѝ Бж҃е лю́ди своѧ̀:

Во́ꙁглаш:

Млⷭ҇тїю и҆ щедрот:

Пѣ́снь, з҃. И҆рмо́съ:

Росода́телнꙋ ᲂу҆́бѡ пещъ:

Не къ и҆́номꙋ Бг҃ꙋ па́че тебѐ распростро́хѡмъ рꙋ́ки на́шѧ Влады́ко: а҆́ще бо и҆ съгрѣши́хѡмъ, но не ѿстꙋпи́хѡм ѿ тебѐ, и҆ и҆́нагѡ ра́ꙁвѣ тебѐ Бг҃а не вѣ́мы: тѣ́мъ же пом҃лꙋй на́съ, Бц҃а мл҃ьбами.

Се ꙗ҆́кѡ ѱи мнѡ́ꙁи ѡ҆быйдѡ́ша, и҆ ꙗ҆́кѡ ю҆́нци, тꙋ́чнїи ѡ҆бдержа́ша на́съ, и҆ ры́щꙋтъ на́ ны, растерꙁа́ти ны́нѣ звѣ́рски рабы̀ твоѧ̀, Влады́чице чⷭ҇таѧ: и҆́хже жеꙁло́мъ Боже́ственнагѡ твое́гѡ манове́нїѧ, дале́че ѿженѝ.

Мі́рꙋ ᲃп҃си́телнице, Цр҃и́це всепѣ́таѧ, гра́дъ сей съхранѧ́й, Цр҃ꙋ́ющагѡ надъ Цармѝ рождшаѧ Ха҃: вꙁѧ́тїѧ и҆ плѣне́нїѧ, пожира́нїѧ же и҆ нашествїѧ го́ркагѡ и҆ꙁбавлѧ́ѧ.

Сла́ва:

Ѿ междосо́бныѧ бра́ни, ви́хра лꙋка́вагѡ, мо́лвы, смꙋще́нїѧ, лови́твы, кова́рства вта́й вра́жїѧ, навѣ́та же и҆ ча́ѧнїѧ лсти́вагѡ, гра́дъ тво́й се́й пренепоро́чнаѧ и҆ꙁба́ви.

И҆ ны́нѣ:

Стѣнꙋ̀ нераꙁдрꙋши́мꙋ, неиспроверже́нꙋ же, и҆ непоꙁибле́мꙋ: и҆ пѵ́ргъ непревра́тенъ въ нахожде́нїѧхъ, и҆ сориста́нїѧх Ва́рварскихъ ꙗ҆ꙁы́къ ра́дꙋющихсѧ крвѝ, тебѐ стѧжа́хѡмъ, и҆ къ тебѣ̀ прибѣга́юще, чⷭ҇таѧ, спаса́емсѧ.

Пѣ́снь, и҃. И҆рмо́съ:

И҆ꙁъ пла́мене преподо́бным:

Кровоѧ́дци ѕвѣ́рїе, и҆ во́лци хи́щнїи, рабы̀ твоѧ̀ ꙗ҆́кѡ ᲃта́до ѡ҆быйдѡ́ша: и҆ слове́сныѧ твоѧ̀ а҆́гн̾ца растерꙁа́ютъ: но ты предварѝ Дв҃о ᲃт҃а́ѧ Бц҃е, и҆ ско́рѡ ѿ тѣ́хъ ᲂу҆́стъ и҆ꙁба́ви на́съ.

Беꙁчи́сл̾ный ѧ҆ꙁы́къ, гордый, высокосе́рдый, бра́нь любѧ́щий рѡ́д, клѧ́твы престꙋпа́ющїй, ра́т̾ на́ ны непримири́тел̾нꙋ подвижѐ, но ты предварѝ Дв҃о ᲃт҃аѧ Бц҃е, и҆ ско́рѡ ѿ тѣ́х ѡ҆ꙁлобле́нїѧ и҆ꙁба́ви на́съ.

Вѡ́инства нбⷭ҇нагѡ ѡ҆полче́нїемъ ᲂу҆́мнымъ, ѡ҆градѝ гра́дъ тво́й и҆ ѡ҆стѣнѝ: вра́жїѧ же прило́ги ѡ҆сꙋети́ти ᲂу҆скорѝ, Дв҃о ᲃт҃аѧ Бц҃е.

Ꙗ҆́коже А҆́даръ ѻ҆́ный беꙁꙁаконнѣ́йшїй на Соломꙍ́на, си́це А҆га́ръ лю́тый, и҆ꙁмаилъ нарече́ный, на́ ны воста̀: но ты̀ предварѝ ст҃а́ѧ Бц҃е, и҆ воско́рѣ ѿ тѣ́хъ и҆ꙁба́ви на́съ.

Сла́ва:

Ко́пїемъ ꙗ҆́ты положи́ти тщи́тсѧ рабы̀ твоѧ̀, во́инство на ѻ҆рꙋ́жїѧ ᲂу҆пова́ющее и҆ ко́пїѧ: но мы на́тѧ надѣ́ющесѧ зове́м: предварѝ Дв҃о ᲃта́ѧ Бц҃е, и҆ ско́рѡ и҆ꙁба́ви на́съ.

И҆ ны́нѣ:

Держа́вы лꙋ́къ дре́вле соте́ршаѧ, и҆ ва́рварскаѧ нахожде́нїѧ мнѡжи́цею въ бѣ́гство ѻ҆брати́вшаѧ, ᲃотрѝ и҆ ны́нѣ ме́чъ и҆ бра́нь, тѣ́хъ Влады́чце Дв҃о ᲃт҃а́ѧ Бц҃е, и҆ ско́рѡ и҆ꙁба́ви на́съ.

Пѣ́снь, ѳ҃. И҆рмо́съ:

Бг҃а члове́кѡмъ:

Крѣ́постъ и҆ держа́ва мꙋжестве́ннаѧ, бꙋ́ди твои́мъ люде́мъ Пренепоро́чнаѧ, храни́телница же и҆ си́ла, и҆ ѻ҆рꙋ́жїе и҆ ме́чъ ѡ҆бою́дꙋ ѻ҆́стрый, сопроти́вныхъ по́лки сѣкꙋ́щїй, и҆ ѡ҆полче́нїѧ врагѡ́въ въ є҆дино̀ ᲃосѣца́ющїй.

Ꙗ҆́кѡ стѣна̀ нераꙁдрꙋши́маѧ, и҆ неиспрове́рженаѧ хрⷭ҇тїѧ́нѡмъ, ꙗ҆́кѡ про́волъ и҆ пи́ргъ непоꙁы́блемый: лю́тыхъ и҆ беꙁбо́жныхъ шата́нїѧ, и҆ въꙁдымѣ́вшеесѧ мꙋчи́телїй наше́ствїе, и҆ ва́рварскаѧ преще́нїѧ, чⷭ҇таѧ раꙁдрꙋшѝ.

А҆́гг҃лꙋ и҆́ногда защища́ющꙋ, Гедїꙍ́нъ Мадіа́мскїѧ пѡ́лки и҆ꙁсѣчѐ: и҆ ни́нѣ Пречⷭ҇таѧ, и҆ꙁъ тебѐ рождшагѡсѧ ᲂу҆м҃лѝ, того́жде А҆́гг҃ла посла́ти, ва́рварскїѧ пѡ́лки прогонѧ́юща, и҆ до конца̀ сътира́юща врагѝ борꙋ́щыѧ на́съ.

Побѣжда́етсѧ є҆́стества чи́нъ Влады́чце, и҆де́же Бг҃ъ всѧ̀ творѧ́й ма́нїемъ хо́щетъ: ты́ же сегѡ̀ па́че є҆́стества ро́ждшаѧ, мо́жеши ᲂу҆ не́гѡ є҆ли́ка хо́щеши: тѣ́мже хотѧ́щихъ гра́дъ тво́й се́й погꙋби́ти до зѣ́ла, ни во что́ же сотворѝ.

Ꙋ҆слы́ши ѿ хра́ма твое́гѡ ᲃт҃гѡ, рабы̀ твоѧ̀ чⷭ҇таѧ: и҆ гнѣ́въ Бж҃ій и҆ꙁлі́й на ꙗ҆ꙁы́ки не вѣдꙋ́щїѧ тѧ̀, и҆ на ца́рства ꙗ҆́же и҆́мене твое́гѡ не приꙁва́ша вѣ́рнѣ, многѡжела́телнагѡ.

Сла́ва:

Раꙁдрꙋши́вый ᲃло́ве ве́лїю бра́нь, и́ до́лгое ѻ҆́ное дре́внее раꙁстоѧ́нїе, и҆ совокꙋпи́вый съ зе́мными нбⷭ҇наѧ: раꙁдрꙋшѝ Бц҃а ра́ди, бра́нь сі́ю но́вꙋю и҆ тѧ́жкꙋю, и҆ на́съ ᲂу҆мирѝ.

И҆ ны́нѣ:

Распрострѝ покро́въ тво́й Влады́чце, ꙗ҆́коже свѣ́тлый ѻ҆́блакъ, и҆ гра́дъ тво́й покры́й, и҆ рꙋка́ма и҆́маже носи́ла є҆сѝ Ха҃, ѡ҆бъи́мши, ᲃе́й неиспроверже́нъ соблюдѝ, и҆ ѡ҆ и҆менѝ твое́мъ хвалѧ́щїйсѧ прⷭ҇нѡ.

Сп҃сѝ ѿ бѣ́дъ:

Досто́йно є҆́стъ: Трⷭ҇то́е: и҆ по Ѿч҃е на́шъ: Тропаръ:

Вы́ше пре́дъ Канꙍ́ном поло́женныѧ на Ли́стѣ, рн҃и²⁶.

По си́хъ же Дїа́конъ воꙁглаша́етъ:

Во́нмѣмъ, и҆ всѝ въ ᲂу҆миле́нїи ᲃе́рдца колѣ́нѣ дш҃ъ и҆ тѣле́съ на́шихъ прекло́нше, Гд҃ꙋ помоли́мсѧ.

І҆ере́ѵ꙼ же а҆́бїе съ всѧ́кимъ ᲂу҆миле́нїемъ прекло́нь колѣ́нѣ съ всѣ́ми предстоѧ́щими, чтетъ Мл҃твы сі́ѧ, и҆лѝ всѧ̀, и҆лѝ на дво́е раꙁдѣли́въ ѧ҆̀ на и҆́ный день.

Гд҃ꙋ помоли́мсѧ.

Влады́ко Гд҃и Бж҃е на́шъ, кто̀ ᲂу҆подоби́тсѧ тебѣ̀: кто̀ подо́бенъ тебѣ̀ въ бо́ꙁѣхъ Гд҃и Бж҃е на́шъ; кто бо́гъ ве́лїй ꙗ҆́кѡ Бг҃ъ на́шъ; ᲃи́лный въ млⷭ҇тѝ, и҆ бл҃гі́й въ крѣ́пости, въ є҆́же ᲂу҆тѣша́ти и҆ ᲃп҃са́ти всѣ́хъ на́съ, не премолчѝ, ни ᲂу҆кротѝ Бж҃е воꙁдаѧ́нїѧ го́рдымъ: ꙗ҆́кѡ се вра́ꙁи твоѝ воꙁшꙋмѣ́шѧ, и҆ ненавидѧ́щїи тебѐ воꙁдвигѡ́шѧ гла́вꙋ:

На лю́ди твоѧ̀ лꙋкавнова́шѧ во́лею, и҆ совѣща́ша на ᲃт҃ы́ѧ твоѧ̀:

Рѣ́шѧ, прїйдѣ́те и҆ потреби́мъ ѧ҆̀ и҆ не воспомѧне́тсѧ и҆мѧ̀ І҆и҃лево ктомꙋ̀.

Прїйдѡ́шѧ ꙗ҆ꙁы́ци въ достоѧ́нїе твоѐ, ѡ҆скверни́шѧ Цр҃ковъ ᲃт҃ꙋ́ю твою̀: положи́шѧ чⷭ҇тный тво́й І҆ерⷭ҇ли́мъ ꙗ҆́кѡ ѻ҆́вощное храни́лище: положи́шѧ трꙋ́пїѧ рабъ твои́хъ бра́шнѡ пти́цамъ нбⷭ҇нымъ, пло́ти преподо́бныхъ твои́хъ звѣре́мъ зе́мны́мъ: пролїѧ́шѧ кро́вь и҆́хъ ꙗ҆́кѡ во́дꙋ ѻ҆́крестъ І҆ерⷭ҇ли́ма, и҆ не бѣ̀ погрѣба́ѧй.

Но доко́лѣ Гд҃и воꙁгори́тсѧ ꙗ҆́кѡ ѻ҆́гнь гнѣ́въ доко́лѣ грѣ́шници восхва́лѧтсѧ: доко́лѣ ᲂу҆потребѧ́ти и҆́матъ законопрестꙋ́пный вла́стїю: доко́лѣ воꙁнесе́тсѧ же́ꙁлъ нечести́выхъ, на жре́бїй ѡ҆сщ҃енныхъ;

Оу҆вы́ мнѣ, ꙗ҆́кѡ ᲂу҆мнѡжи́сѧ смире́нїе на́ше, и҆ ᲂу҆мале́ни є҆смы̀ па́че всѧ̀ ꙗ҆ꙁы́ки.

Оу҆вы́ мнѣ, ꙗ҆́кѡ ѡ҆скорбѧ́ѡїи на́съ зѣ́лѡ ѡ҆долѣва́ютъ, и҆ ра́на на́ша тве́рда бы́стъ.

И҆ ты Гд҃и вели́кїй и҆ крѣ́пкїй, доко́лѣ не поми́лꙋеши І҆ерⷭ҇ли́ма: воспла́чꙋбосѧ ꙗ҆́кѡ І҆еремі́ѧ ѡ҆ сокрꙋше́нїи моє́мъ го́рцѣ, ꙗ҆́кѡ и҆спадо́хомъ ꙗ҆́коже ли́ствїѧ беꙁꙁако́нїй ра́ди, и҆ съ мертвы́ми и҆́же въ а҆́дѣ въмѣни́хѡмсѧ.

Но ᲂу҆пова́ю па́ки ꙗ҆́коже заха́рїѧ на́тѧ Гд҃и воли́телѧ млⷭ҇тѝ, ꙗ҆́кѡ Бг҃ъ щедрѡ́тъ ты́ є҆сѝ, ᲂу҆ничижа́ѧй совѣ́ты крѣ́пкихъ, смѣре́нныхъ же мл҃твы прїемлѧ́й.

Что̀ ꙗ҆́кѡ бы́хѡмъ поноше́нїе бли́ꙁъ и҆ дале́че сꙋ́щим, ᲂу҆кланѧ́ющимсѧ ѿ пꙋ́ти пра́веднагѡ, въ ѿмѣне́нїи До́гматъ, и҆ ѿмѣта́ющимъ є҆ди́ною въ нече́стїе, и҆́же сло́во премꙋ́драгѡ про́мысла твое́гѡ не вѣдꙋ́ще, посѣще́нїе наше ꙗ҆́коже ѡ҆ставле́нїе ѡ҆клевета́ютъ:

Подоба́ше ᲂу҆́бѡ си́мъ ѿ сщ҃е́нныхъ ᲂу҆слышати слове́съ, ꙗ҆́кѡ ѻ҆блича́еми ѿ Гд҃а, накаꙁꙋ́емсѧ, да не съ мі́ромъ ѡ҆сꙋди́мсѧ: ѻ҆́нѣмже ѿ ѻ҆́бщихъ навы́кнꙋти ра́ꙁꙋмѡвъ, ꙗ҆́кѡ не ᲂу҆мира́ющїи, ни́ же мр҃твїи вра́чевскагѡ прилежа́нїѧ сподоблѧ́ютсѧ: но жи́ви сꙋ́щїи въ бо́лѣꙁни, лѣ́чꙋщихъ про́мыслъ воспрїемлютъ: и҆ всеми́рнꙋю сі́ю ра́нꙋ въ преми́рное прелага́емꙋю весе́лїе, по́ꙁдѣ нѣ́когда раꙁꙋмѣ́ти:

Но не ви́дѣша, ни́же раꙁꙋмѣ́шѧ, и҆ сего̀ ра́ди нече́стїемъ поно́сѧтъ на́мъ, и҆ ᲂу҆пова́нїе на́тѧ и҆́стиннагѡ Бг҃а, беꙁꙁако́нїе нарица́ютъ.

И҆ ꙗ҆́кѡ тебѐ є҆диноро́днагѡ беꙁнача́лномꙋ Ѿц҃ꙋ̀, Сн҃а є҆диносꙋ́щна съра́сльномꙋ твое́мꙋ Ѿц҃ꙋ̀, и҆ пребл҃го́мꙋ твое́мꙋ Дх҃ꙋ проповѣда́юще, є҆ди́номꙋ є҆́стествꙋ, є҆ди́ной си́лѣ Божества̀, и҆ Ца́рствꙋ покланѧ́емсѧ, сі́ѧ страда́ти непщꙋ́ютъ, и҆ ме́ст̾ нече́стїѧ, ра́нꙋ плѣне́нїѧ, а҆ не погрѣшенїй мнѧ́тъ беꙁꙋ́мнїи: и҆ твое́мꙋ рꙋга́ющесѧ терпѣ́нїю хꙋ́лѧтъ твоѐ Божество̀, и҆ мїроспси́телное посмѣва́ютъ ᲃмотре́нїе твоѐ.

Но ѡ҆сла́би Гд҃и, ѡ҆сла́би чл҃кѡлюби́вѣйшїй Бж҃е: ᲂу҆щедрѝ благосерднѣ́йшїй, и҆ млⷭ҇тивый Влады́ко: и҆ да не ꙗ҆́ростїю твое́ю твое́ю ѡ҆бличи́ши на́съ на мнѡ́ꙁѣ да не сотрі́емсѧ: ни́ же гнѣ́вомъ твои́мъ нака́жеши на́съ, да не бꙋдемъ ꙗ҆́коже и҆ꙁъ нача́ла, и҆ пре́жде є҆́же бы́ти на́мъ: но бꙋ́ди съ на́ми ꙗ҆́кѡ крѣ́пкїй бо́рецъ: ꙗ҆́кѡ не не воꙁмога́етъ ѿ тебѐ є҆́же сп҃са́ти въ мнѡ́гихъ и҆ въ малы́хъ.

Оу҆крѣпѝ на́съ Гд҃и Бж҃е на́шъ, ꙗ҆́кѡ на́тѧ ᲂу҆пова́хѡмъ, и҆ въ И҆мѧ̀ твоѐ дерꙁа́емъ.

И҆ да вѣ́ренъ ны́нѣ гл҃ъ тво́й Гд҃и, и҆́же гл҃а́лъ є҆сѝ къ на́мъ, ꙗ҆́кѡ съ на́ми є҆сѝ въ всѧ̀ днѝ до сконча́нїѧ вѣ́ка:

И҆ да воꙁнесе́тсѧ ро́гъ Христїа́нскїй: и҆ да постыдѧ́тсѧ гонѧ́щїи на́съ, и҆ да ᲂу҆боѧ́тсѧ ᲂу҆страша́ющїи на́съ, и҆ посра́мѧтсѧ и҆ поги́бнꙋтъ, и҆ крѣ́пость и҆́хъ да съкрꙋ́шитсѧ, и҆ могꙋ́тство и҆́хъ да не бꙋ́детъ: и҆ поꙁна́ютъ всѝ ꙗ҆́кѡ И҆мѧ̀ тебѣ̀ Гд҃ь: и҆ ты є҆ди́нъ Вы́шнїй по все́й землѝ, и҆ твоѐ є҆́стъ Црⷭ҇тво, и҆ ᲃи́ла, и҆ ᲃла́ва: и҆ тебѣ̀ подоба́етъ кла́нѧтисѧ и҆́стинномꙋ Бг҃ꙋ и҆ ᲃп҃сꙋ на́шемꙋ, ᲃъбеꙁнача́лнымъ тѝ Ѿц҃емъ, и҆ Прⷭ҇ты́мъ, и҆ бл҃гимъ, и҆ животворѧ́щимъ тѝ Дх҃омъ, ны́нѣ и҆ прⷭ҇нѡ, и҆ въ вѣ́ки вѣкѡ́въ.

Ли́къ:

А҆ми́нь.

Влады́ко Гд҃и Бж҃е на́шъ, тебѣ́ сѧ моли́мъ, и҆ тебѐ про́симъ мы грѣ́шнїи и҆ недосто́йнїи рабѝ твоѝ, ꙗ҆́кѡ да при́ꙁриши на моле́нїе на́съ грѣ́шных и҆ непотре́бныхъ ра́бъ твои́хъ, и҆ поми́лꙋеши на́съ: ꙗ҆́кѡ Влады́ко беꙁꙁакѡ́нїѧ на́шѧ и҆ грѣхѝ превꙁыйдѡ́ша гла́вы на́шѧ, и҆ бы́хѡмъ поноше́нїе ꙗ҆ꙁы́кѡмъ насмѣѧ́нїе и҆ порꙋга́нїе сꙋ́щимъ ѻ҆́крестъ беꙁбо́жнымъ А҆гарѧ́нѡмъ: и҆ смѣре́ни бы́хѡмъ да́же до сме́рти, грѣ́хъ ра́ди и҆ беꙁꙁакѡ́нїй и҆ хꙋле́нїй на́шихъ.

Кто не воспла́четъ на́съ си́це пребыва́ющихъ; кто не воꙁрида́етъ толи́кагѡ плѣне́нїа на́шегѡ: ꙗ҆́кѡ сі́ѧ всѧ̀ прїйдѡ́ша на́ ны грѣ́хъ ра́ди и беꙁꙁакѡ́ний и҆ хꙋле́нїй на́шихъ.

Сегѡ̀ ра́ди ᲃн҃ы сіꙍ́новы чⷭ҇тнїи, въмѣни́хѡмсѧ ꙗ҆́кѡ съсꙋ́ды ᲃкꙋде́л̾нича: ᲃегѡ̀ ра́ди ѡ҆черни́сѧ зла́то, и҆ и҆ꙁмѣни́сѧ ᲃре́бро бл҃го́е: ᲃегѡ̀ ра́ди Наꙁире́и ᲃіꙍ́новы, па́че ᲃнѣ́га просїѧ́вшїи, бы́хѡмъ ꙗ҆́кѡ мꙋ́рини: па́че мле́ка ᲂу҆бѣ́лшїисѧ, па́че черни́ла помрачи́хомсѧ: пита́емїи на рꙋнѣ̀, ѡ҆блеко́хѡмсѧ въ стꙋ́дъ: и҆ воꙁвели́чишасѧ беꙁꙁакѡ́нїѧ на́шѧ па́че беꙁꙁакѡ́нїй ᲃодо́мскихъ.

Сегѡ̀ ра́ди ᲃынѡ́ве днѧ̀ и҆ ᲃвѣ́та, ᲃыны̀ бы́хѡмъ но́щи и҆ тмѣ̀: ᲃегѡ̀ ра́ди ᲃн҃ѡ́ве Црⷭ҇твїѧ, рабѝ бы́хѡмъ беꙁꙁакѡ́нныхъ, и҆ невѣ́рныхъ ꙗ҆ꙁы́къ: ꙗ҆́кѡ съгрѣши́хѡмъ: беꙁꙁакѡнова́хѡмъ, и҆ ѡ҆неправди́хѡмъ престꙋпа́юще за́повѣди Гд҃а Бг҃а нш҃гѡ: но не преда́ждъ на́съ въ коне́цъ И҆менѝ твое́гѡ ра́ди Гд҃и, и҆ не раꙁорѝ завѣ́тъ тво́й, и҆ не ѿста́ви млⷭ҇ть твою̀ ѿ на́съ, щедрѡ́тъ твои́хъ ра́ди Ѿч҃е на́шъ и҆́же є҆сѝ на нб҃сехъ, и҆ ᲂу҆трѡ́бъ ра́ди є҆диноро́днагѡ тѝ Сн҃а, и҆ млⷭ҇тѝ ра́ди ᲃт҃а́гѡ твое́гѡ Дх҃а: ни́ же помѧнѝ беꙁꙁакѡ́нїѧ и҆ грѣхѝ на́шѧ.

Но ско́рѡ да предварѧ́тъ ны щедрѡты̀ твоѧ̀ Гд҃и, ꙗ҆́кѡ ѡ҆бнища́хѡмъ зѣ́лѡ.

Помоꙁѝ на́мъ Бж҃е ᲃп҃си́телю на́шъ, сла́вы ра́ди и҆менѝ твое́гѡ.

Прїймѝ и҆сповѣда́нїе грѣ́шныхъ и҆ непотре́бныхъ ра́бъ твои́хъ, чⷭ҇тныѧ ра́ди и҆ ᲃт҃ы́ѧ крвѐ ᲃн҃а твое́гѡ, Гд҃а же на́шегѡ І҆и҃с Ха҃, ю҆́же за мїра живо́тъ и҆ꙁлїѧ: ᲃт҃ы́хъ ра́ди А҆пⷭ҇лъ є҆гѡ̀, и҆ Мч҃нкъ и҆́же подвиꙁа́ющесѧ и҆́мени ра́ди є҆гѡ̀, свою̀ кро́вь пролїѧ́ша: ᲃт҃ыхъ ра́ди Прⷪ҇ркъ и҆ Ѿц҃ъ, и҆ Патріа́рхъ, и҆́же подвиꙁа́шасѧ благоꙋгоди́ти ᲃт҃о́мꙋ твое́мꙋ И҆менѝ.

Не пре́ꙁри мл҃енїѧ на́ша Гд҃и, ни́же оста́ви на́съ до конца̀: небо̀ на пра́вды на́шѧ надѣ́ющиѧ є҆смы̀, но на млⷭ҇ть твою̀, є҆ю́же ро́дъ на́шъ снабдѣва́еши. Мо́лимсѧ ᲂу҆́бѡ и҆ про́симъ твою̀ бла́гость, не ѿтвержѝ на́съ ѿ лица̀ твое́гѡ, ни́ же воꙁгнꙋша́йсѧ недосто́инствомъ на́шимъ:

Но пом҃лꙋй на́съ по вели́цѣй млⷭ҇тѝ твоей, и҆ по мнѡ́жествꙋ щедрѡ́тъ твои́хъ пре́ꙁри беꙁꙁакѡ́нїѧ и҆ грѣхѝ на́шѧ.

Е҆й Влады́кѡ всеси́лне, ᲂу҆слы́ши моле́нїѧ на́съ грѣ́шныхъ, и҆ помоꙁѝ люде́мъ твои́мъ, и҆ ᲂу҆крѣпѝ во́инство въ ча́съ бра́ни: и҆ си́лно, и҆ крѣ́пко сотворѝ є҆̀.

Ꙗ҆́коже да́лъ є҆сѝ крѣ́пост̾ І҆сꙋ́сꙋ На́ѵинꙋ, и҆ Дв҃дꙋ Прⷪ҇ркꙋ твое́мꙋ на сопроти́вныѧ, ᲃи́це Гд҃и Бж҃е на́шъ ᲂу҆крѣпѝ и҆ помоꙁѝ людемъ твои́мъ приꙁыва́ющимъ и҆мѧ̀ твоє̀ ᲃт҃о́е, ꙗ҆́кѡ кро́мѣ тебѐ и҆́нагѡ бо́га не вѣ́мы, и҆ и҆мѧ̀ твоє̀ и҆менꙋ́ємъ:

Ты́ бо є҆сѝ дѣйствꙋ́ѧй всѧ̀ въ всѣ́х, и҆ ѿ тебѐ и҆́щемъ по́мощи.

При́ꙁри ᲂу҆́бѡ съ нб҃се Гд҃и, и҆ ви́ждъ ѿ ᲃт҃агѡ до́мꙋ сла́вы твое́ѧ.

Где́ є҆́стъ ре́вность твоѧ̀, и҆ крѣ́пость твоѧ̀; Где́ є҆́стъ мнѡ́жество млⷭ҇тѝ и҆ щедрѡ́тъ твои́х; ты́ бо є҆сѝ Бг҃ъ на́шъ, и҆ имѧ̀ твоє̀ на на́съ є҆́стъ.

Ꙍ҆брати́сѧ Гд҃и раб́ъ твои́хъ ра́ди, це́ркве твое́ѧ ра́ди ст҃ы́ѧ, всѣ́хъ ра́ди ѿ вѣ́ка ᲃт҃ыхъ твои́хъ.

Проти́вници на́ши попра́ша ᲃт҃и́ню твою̀. бы́хѡмъ ꙗ҆́кѡ и҆ꙁъ нача́ла, є҆гда̀ не владѣ́лъ є҆сѝ на́ми: ꙗ҆́кѡ нечи́сти всѝ мы бы́хѡмъ, ꙗ҆́кѡ рꙋ́бище свве́рное всѧ̀ пра́вда на́ша, и҆ падо́хѡмъ ꙗ҆́кѡ ли́ствїѧ беꙁꙁако́нїй ра́ди на́шихъ: и҆ нѣ́сть приꙁыва́ѧй и҆мѧ̀ твоє̀, и҆ вспомина́ѧй тебѣ̀ є҆́же застꙋпи́ти на́съ.

И҆ ѿврати́лъ є҆сѝ лицѐ твоє̀ ѿ на́съ, и҆ преда́лъ є҆сѝ на́съ грѣ́хъ ра́ди, и҆ беꙁꙁако́нїй, и҆ хꙋле́нїй на́шихъ, врагѡ́мъ напыще́ннымъ, го́рдымъ, и҆ невѣ́рнымъ ꙗ҆ꙁы́кѡмъ.

И҆ ни́нѣ Гд҃и Бж҃е на́шъ, не прогнѣва́йсѧ до ѕѣ́ла: ꙗ҆́кѡ а҆́ще ѿверꙁе́ши нб҃о, тре́петъ прїймꙋтъ ѿ тебѐ гѡ́ры, и҆ та́ютъ, и҆ сожже́тъ ѻ҆́гнь сопроти́вныѧ и҆ беꙁбо́жныѧ врагѝ на́ша, и҆ стра́шно бꙋ́дет и҆мѧ̀ твоє̀ проти́вникѡмъ твои́мъ.

Ѿ вѣ́ка не воꙁрѣ́ша ѻ҆́чи на́ши къ бо́гꙋ чꙋ́ждемꙋ.

Тѣ́мъ ни́нѣ Влады́ко при́ꙁри съ небесѐ и҆ ви́ждъ, и҆ сп҃сѝ на́съ и҆менѝ твое́гѡ ра́ди ᲃт҃гѡ, и҆ и҆ꙁба́ви на́съ ѿ беꙁбо́жныхъ врагѡ́въ на́шихъ, и҆ ѿ ко́ꙁнъ, и҆ кова́рствъ, и҆ сѣ́тїй и҆́хъ свободѝ.

И҆ не ѿста́ви ѿ на́съ твою̀ держа́внꙋю по́мощъ, ꙗ҆́кѡ мы не дово́лни є҆смы̀ къ є҆́же побѣжда́ти сопроти́въ напада́ющихъ: ты́же си́ленъ є҆сѝ ко є҆́же спаса́ти на́съ ѿ сопроти́вныхъ и҆ невѣ́рныхъ врагѡ́въ на́шихъ.

Ꙋ҆крѣпѝ лю́ди твоѧ̀, и҆ во́инство на́ше, и҆ ᲂу҆твердѝ и҆ си́лнѡ и҆ держа́внѡ сотворѝ є҆̀ въ вре́мѧ бра́ни, и҆ ниꙁложѝ и҆ сотрѝ, и҆ въ ничто́ же сотворѝ беꙁбо́жныѧ и҆ невѣ́рныѧ ва́рвары, и҆ а҆гарѧ́ны врагѝ на́шѧ: и҆ да́ждъ сла́вꙋ и҆менѝ твое́мꙋ ᲃт҃мꙋ: да не когда̀ рекꙋ́тъ ꙗ҆ꙁы́ци, где́ є҆́стъ Бг҃ъ и҆́хъ; но ско́рꙋю и҆ꙁба́вꙋ и҆ ѿра́дꙋ лю́демъ твои́мъ млⷭ҇тивнѡ пода́ждъ, мл҃твами и҆ мл҃енїемъ всепреблⷭ҇ве́нныѧ Влады́чца на́шеѧ Бц҃а, и҆ всѣ́хъ ᲃт҃ы́хъ твои́хъ.

Ꙗ҆́кѡ ты́ є҆сѝ по́мощъ и҆ крѣ́постъ на́ша, и҆ тебѣ̀ сла́вꙋ воꙁсыла́емъ, беꙁнача́лномꙋ Ѿц҃ꙋ, съ є҆диноро́днымъ тѝ ᲃн҃омъ, и҆ престымъ и҆ бл҃гимъ, и҆ животворѧ́щим тѝ Дх҃омъ, ни́нѣ и҆ при́снѡ, и҆ въ вѣ́ки вѣ́кѡвъ, А҆ми́нь.

Гд҃и и҆ Бж҃е млⷭ҇тѝ, всѧ́кїѧ блгⷭ҇тѝ пода́телю, чꙋ́дный Бж҃е, Ѿч҃е щедрѡ́тъ, приста́ни́ще млⷭ҇рдїѧ, чл҃кѡлю́бїѧ неистощи́мый и҆сто́чниче: премꙋ́дростїю ᲃтроѧ́й всѧ̀: ᲃвѧ́ꙁꙋѧй, и҆ па́ки и҆ꙁводѧ́й: ᲃмирѧ́ѧй, и҆ па́ки воꙁвыша́ѧй го́рдымъ противлѧ́ѧйсѧ, ᲃмире́ннымъ даѧ́й благода́ть: є҆го́же держа́вою съдержи́тсѧ всѧ̀ тваръ, є҆ли́кѡ ᲂу҆́мнаѧ, и҆ є҆ли́кѡ чꙋвстве́ннаѧ: є҆го́же сꙋдьбы̀ бе́ꙁдна мнѡ́га, и҆ пꙋ́тїе неиꙁслѣди́ми: є҆го́же Дх҃омъ всѧ̀ во́дѧтсѧ: є҆мꙋ́же въ рꙋ́кꙋ дыха́нїе всѣ́хъ живы́х: є҆го́же послꙋша́ютъ звѣ́ꙁды: є҆мꙋ́же всѧ̀ повинꙋ́ютсѧ: є҆мꙋ́же всѧ̀ ᲃи́лы трепе́щꙋтъ, и҆ непреста́нными ᲃлавосло́вїи почита́ютъ: є҆го́же всѧ́ческаѧ гла́сы неиꙁгл҃а́нными воспѣва́етъ.

Ты ᲂу҆́бѡ ᲂу҆́мное ᲃл҃нце пра́вды, Бж҃е и҆́стинный, всѧ̀ творѧ́й и҆ претворѧ́й то́кмѡ самы́мъ хотѣ́нїемъ, благопрїе́мнымъ и҆ млⷭ҇тивымъ ѻ҆́комъ воꙁрѝ на лю́ди твоѧ̀ согрѣши́вшїѧ и҆ ѿча́ѧвшїѧсѧ, и҆ ниꙁпослѝ на́ ны млⷭ҇тѝ твоѧ̀ бога́тыѧ: пощадѝ наслеѣ́дїе твоѐ: пощадѝ лю́ди твоѧ̀: пощадѝ виногра́дъ и҆́же насадѝ десни́ца твоѧ̀, преестестве́ннꙋю блгⷭ҇ть твою̀ за ны̀ и҆мѣ́ѧ мл҃ѧ́щꙋю тѧ.

Помѧнѝ крвѐ ра́бъ твои́хъ и҆ꙁлїѧ́нныѧ: помѧнѝ ᲃты́ѧ твоѧ̀ ѻ҆́лтарѧ, ꙗ҆́же скве́рными нѡга́ми попра́ны и҆ ѡ҆гню̀ преда́ны бы́шѧ: помѧнѝ ѡ҆каѧ́нный во́ꙁрастъ, въ плѣне́нїе нечести́вымъ преда́нный, и҆ ѿческое ᲂу҆́бѡ благоче́стїе беꙁꙋ́мною мы́слїю проклѧ́вшїй, дїа́волꙋ же написа́вшїйсѧ, и҆ ᲂу҆ста́ви ᲂу҆жѐ же́ꙁлъ грѣ́шных на жре́бїй пра́ведныхъ пꙋща́емый.

Не преда́ждъ на́съ до конца̀ и҆менѝ твое́гѡ ра́ди ᲃт҃а́гѡ, и҆ неиꙁрече́нныѧ ра́ди ми́лости, и҆ꙁѡби́лнѡ пролива́емыѧ ѿ твое́ѧ бла́гости, но да́ждъ ны́нѣ хрⷭ҇толюби́вомꙋ Царю̀ на́шемꙋ ѡ҆сла́бꙋ ѿ содержа́щихъ си́хъ ско́рбныхъ, и҆ и҆ꙁмѣне́нїе междосо́бныхъ крамѡ́лъ, и҆ мѡ́л̾въ, и҆ растоѧ́нїй: ᲂу҆крѣпѝ мы́шцꙋ є҆гѡ̀, и҆ востаю́щихъ на́нь томꙋ̀ покорѝ, и҆ совокꙋпѝ во́инства є҆гѡ̀, въ є҆диномы́слїи и҆ ми́рѣ, и҆ ѿ всѧ́кагѡ навѣ́та ви́димыхъ и҆ неви́димыхъ врагѡ́въ невре́дна є҆гѡ̀ соблюдѝ: А҆́гг҃ла є҆мꙋ̀ храни́телѧ ѿ ᲃт҃а́гѡ жи́лища твое́гѡ ниꙁпослѝ ꙗ҆́вѣ, борꙋ́ща пре́дъ Царе́мъ твои́мъ: беꙁмо́л̾внѡ въ тишинѣ̀ глꙋбо́цѣй Ца́рство є҆мꙋ̀ дарꙋ́й, ꙗ҆́кѡ да ꙗ҆зы́къ тво́й ᲃт҃ы́й, въ тишинѣ̀ ти́хо и҆ беꙁмо́л̾внѡ жи́тїе прово́дитъ, и҆ всѧ́кое и҆́ное воста́ющее на́нь смꙋще́нїе и҆ навѣ́тъ, непребори́мою си десни́цею раꙁорѝ, и҆ беꙁнавѣ́тенъ и҆ до́лгїй живо́тъ є҆мꙋ̀ дарꙋ́й: мл҃тва́ми всесла́вныѧ и҆ преблⷭ҇венныѧ Влады́чца на́шеѧ Бц҃а, невеществе́нныхъ твои́хъ слꙋжи́телїй, и҆ всѣ́хъ ᲃт҃ы́хъ ѿ вѣ́ка тебѣ̀ благоꙋгоди́вшихъ.

Ли́къ:

А҆ми́нь.

Беꙁнача́лне Цр҃ю, невиди́ме, неиꙁслѣди́ме, непостижи́ме, и҆ неиꙁрече́нне: го́рстїю всю̀ ѡ҆бдержа́й тва́ръ и҆ соблюда́ѧй: содержа́й и҆ ᲂу҆правлѧ́ѧй ю҆̀ неиꙁрече́ннымъ ти ᲃло́вомъ: Ниніввитѧ́нѡмъ беꙁꙁакѡ́нїѧ, пе́рвѣе ᲂу҆́бѡ претерпѣ́вый, послѣ́диже, покаѧ́нїе и҆ ѡ҆браще́нїе прїи́мый, и҆ дарова́вый и҆́мъ запреимꙋ́щꙋю блгⷭ҇ть и҆ долготерпѣ́нїе всѧ̀ беꙁꙁакѡ́нїѧ и҆ прегрѣше́нїѧ ѡ҆бы́чнымъ и҆ неиꙁрече́ннымъ свои́мъ чл҃кѡлю́бїемъ: прїймѝ и҆ на́ша Мл҃твы по є҆ли́кꙋ, (ꙗ҆́коже рече́сѧ) Нинівви́тѧнъ ѡ҆браще́нїе и҆ покаѧ́ние: прїймѝ сле́ꙁы и҆ воꙁдыха́нїѧ: прїймѝ смире́ннꙋю на́шꙋ мо́лбꙋ: ни́же бо мо́жемъ ѿню́дъ грѣха́ми ѡ҆бремене́ни ᲃꙋ́ще, къ тебѣ̀ є҆дино́мꙋ беꙁгрѣ́шномꙋ вꙁира́ти: прїймѝ и҆ꙁъ глꙋбины̀ ꙗ҆́кѡжды́мъ воꙁсыла́емыѧ тебѣ̀ влады́цѣ во́плѧ: Прїймѝ ѡ҆ꙁлоблѧ́емыхъ людїй проше́нїе. Да побѣди́тъ бе́ꙁдна твое́гѡ бл҃гоꙋтро́бїѧ, множествѡ̀ на́шихъ грѣхѡ́въ: и҆ да́ждъ люде́мъ твои́мъ и҆ꙁбавле́нїе, и҆ свобожде́нїе на́пастїй, и҆ сме́ртагѡ посѣче́нїѧ ѡ҆ставле́нїе.

Е҆́й Гд҃и Бж҃е на́шъ, ᲂу҆слы́ши лю́дїй твои́хъ въ ча́съ сїй, и҆ менѐ грѣ́шнагѡ, и҆ ᲂу҆ста́ви же́ꙁлъ грѣ́шныхъ воꙁдвиꙁа́емый на жре́бїи пра́ведныхъ, и҆́хже ты са́мъ вѣ́си и҆ раꙁꙋмѣ́еши, ѿ ни́хъ зна́емъ сы́й: ꙗ҆́кѡ да и҆ на́ми твои́ми непотре́бными рабы̀, сла́витсѧ прест҃о́е и҆мѧ̀ твоѐ, Ѿц҃а, и҆ ᲃн҃а, и҆ ᲃт҃гѡ Дх҃а, ни́нѣ и҆ при́снѡ, и҆ въ вѣ́ки вѣкѡ́въ, А҆ми́нь.

Тебѣ́ сѧ моли́мъ, и҆ тебѐ про́симъ приле́жнѡ, Бг҃а и҆ Ѿц҃а Гд҃а на́шегѡ І҆и҃с Ха҃, ꙗ҆́кѡ да млⷭ҇тивнымъ ѻ҆́комъ при́ꙁриши на лю́ди твоѧ̀, и҆ на наслѣ́дїе твоє̀, ᲂу҆милосерди́всѧ на́ ны, и҆ на́ землю на́шꙋ ѡ҆пꙋстѣ́въшꙋю беꙁꙁако́нїй ра́ди на́шихъ, и҆ плѣне́ннꙋ бы́вшꙋю, и҆ рабꙋ̀ сꙋпоста́тѡмъ: бл҃говолѝ па́ки воꙁврати́тисѧ на пе́рвꙋю свободꙋ̀, ꙗ҆́коже и҆́ногда и҆ дре́внемꙋ І҆а́ковꙋ ѡ҆́номꙋ носи́вшомꙋ ѡ҆́браꙁъ є҆диноча́днагѡ твое́гѡ ᲃн҃а и҆ Бг҃а на́шегѡ, бл҃говоле́нїемъ и҆ хоте́нїемъ твои́мъ воꙁвра́щшꙋ домоча́децъ всѣ́хъ, къ ѡ҆бѣтова́нныхъ твои́хъ бл҃гъ: и҆́бѡ надъ ѡ҆́нѣми ѡ҆бы́чное твоѐ чл҃кѡлю́бїемъ ᲂу҆потреблѧ́ѧ, ѿпꙋсти́лъ є҆сѝ беꙁꙁакѡ́нїѧ и҆́хъ, ᲂу҆кроти́лъ є҆сѝ ве́сь гнѣ́въ тво́й, воꙁврати́лсѧ є҆сѝ ѿ гнѣ́ва ꙗ҆́рости твое́ѧ.

Ꙍ҆братѝ ᲂу҆́бѡ и҆ на́съ Бж҃е, и҆ ѡ҆ сп҃си́телныхъ твои́х за́повѣдехъ пещи́сѧ сподобѝ: ѿвратѝ ꙗ҆́рость твою̀ ѿ на́съ, и҆ да не въ вѣ́ки прогнѣва́ешисѧ на́ ны, и҆лѝ простре́ши гнѣ́въ тво́й ѿ ро́да въ ро́дъ. Бж҃е ты ѡ҆бра́щсѧ живи́ ны, и҆ лю́дїе твоѝ воꙁвеселѧ́тсѧ въ тебѣ̀: покажѝ и҆ на на́съ млⷭ҇ть твою̀, и҆ ᲂу҆слы́шимъ ми́ръ и҆ весе́лиїе ѡ҆ тебѣ̀.

Е҆́й Гд҃и ᲂу҆слы́ши на́съ грѣ́шныхъ и҆ непотре́бныхъ ра́бъ твои́хъ въ ча́съ се́й, є҆́же всели́ти сла́вꙋ и҆ ми́ръ въ землѝ на́шей:

На твое́ бо съподвиже́нїе и҆ по́мощъ дерꙁа́юще мы недосто́йнїи, надѣ́емсѧ млⷭ҇ти и҆ и҆́стиннѣ пре́дъ на́ми предитѝ: кро́мѣ бо тебѐ и҆́нагѡ не вѣ́мы, и҆ и҆мѧ̀ твоѐ и҆менꙋ́емъ: да не ѿврати́шисѧ ѿ на́съ до конца̀, но подвигни́сѧ и҆ воста́ни на по́мощъ на́съ грѣ́шныхъ и҆ смире́нных: и҆ ꙗ҆́кѡ не памѧтоꙁлоби́вый, и҆ ка́ѧйсѧ ѡ҆ зло́бахъ на́шихъ, ѿвратѝ плѣне́нїе на́ше: ᲂу҆ста́ви бꙋ́рю злоключе́нїй: ѡ҆сла́би на́мъ прегрѣше́нїѧ на́шѧ: ꙗ҆́кѡ да ѡ҆сла́бою злоключе́нїй, просла́вимъ тѧ Ѿц҃а Гд҃а на́шегѡ І҆и҃с Ха҃, съ є҆диноро́днымъ ти ᲃн҃омъ, и҆ ᲃт҃ы́мъ твои́мъ Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

Дв҃о Влады́чце Бц҃е, є҆диноро́днагѡ Бг҃а ᲃло́ва, всѧ́коѧ ви́димыѧ и́ ᲂу҆́мныѧ тва́ри Тво́рца и҆ Влады́кꙋ, є҆ди́нагѡ ѿ Трⷪ҇ца Гд҃а, Бг҃а же и҆ чл҃ка па́че є҆стества̀ и҆ ᲃло́ва ро́ждшаѧ: въмѣсти́лище Бжⷭ҇тве́нное всѧ́коѧ ᲃт҃ы́ни, и҆ бл҃года́ти прїѧ́телище, въ не́мъ же пребыва́етъ и҆сполне́нїе Бжⷭ҇тва̀ пло́тски, бл҃говоле́нїемъ Бг҃а и҆ Ѻ҆ц҃а̀, и҆ дѣйствїемъ ᲃт҃а́гѡ Дх҃а: и҆ꙁбра́ннаѧ ѿ всеѧ̀ тва́ри, и҆ бг҃оподо́бнымъ достоѧ́нїемъ неиꙁрече́ннѡ превꙁима́ющаѧсѧ, и҆ превосходѧ́щаѧ ᲃла́ва, и҆ неиꙁгл҃а́нное весе́лїе А҆́гг҃лѡмъ Црⷭ҇ки: А҆пⷭ҇лѡвъ и҆ Прⷪ҇ро́кѡвъ вѣ́нче: чꙋ́дное и҆ всехва́лное Мч҃никѡвъ мꙋ́жествѡ, по́двигѡвъ же и҆́хъ и побѣ́дъ вина̀ сꙋ́щаѧ, и҆ страда́лческихъ вѣнча́нїй прⷭ҇носꙋщихъ, и҆ Бг҃оподо́бныхъ воꙁдаѧ́нїй ходота́йце Прчⷭ҇таѧ: Прпⷣбныхъ чⷭ҇ти и҆ сла́во: молча́нїѧ неꙁаблꙋ́днагѡ пꙋ́ти ᲂу҆чи́телю: ѿкрове́нїй дх҃ѡ́вныхъ та́инствъ две́ри: и҆сто́чниче свѣ́та: млⷭ҇ти неистощи́маѧ рѣ́ко: всѧ́кихъ Бг҃оподо́бныхъ дарова́нїй и҆ чꙋде́съ неисчерпа́емое мо́ре: тебѐ мл҃и́мъ, и҆ тебѣ́сѧ ми́лидѣ́емъ, млⷭ҇тивной Мт҃ри чловеколю́бца Влады́ки, помл҃ова́тисѧ на́мъ ᲃмире́ннымъ, и҆ недосто́йнымъ рабѡ́мъ твои́мъ: При́ꙁри млⷭ҇тивнѣ на плѣне́нїе на́ше, и҆ и҆сцѣлѝ ᲃъкрꙋше́нїе дш҃ъ и҆ тѣле́съ на́шихъ: ви́димыѧ и҆ неви́димыѧ ра́ти раꙁорѝ: ᲃто́лпъ крѣ́покъ, ѡ҆рꙋ́жїе въ бра́ни, и҆ поꙁо́рище тве́рдое, и҆ Воево́да, спобо́рникъ же непобѣ́ди́мъ бꙋ́ди недосто́йнымъ на́мъ ѿ лица̀ вра́гъ на́шихъ: покажѝ на на́съ дре́внѧѧ млⷭ҇ти твоѧ̀ и҆ чꙋдеса̀: дне́сь покажѝ беꙁꙁакѡ́нным врагѡ́мъ на́шимъ, ꙗ҆́кѡ є҆ди́нъ є҆́стъ Цр҃ъ и҆ Влады́ка ᲃн҃ъ тво́й и҆ Бг҃ъ, и҆ ты Бц҃а по и҆́стиннѣ є҆сѝ и҆́стиннагѡ Бг҃а по пло́ти ро́ждшаѧ, и҆ ꙗ҆́кѡ мо́жеши всѧ̀, и҆ си́лна є҆сѝ дѣйствова́ти є҆ли́ка а҆́ще воли́ши на нб҃сѝ и҆ на землѝ, и҆ всѧ́кое проше́нїе на по́лꙁꙋ коемꙋ́ждѡ да́рꙋй Влады́чце, недꙋгꙋ́ющимъ цѣ́лбꙋ̀: въ мо́ри тишинꙋ̀, и҆ ѡ҆кормле́нїе: съпꙋтшествꙋ́ющимъ шествꙋ́й и҆ соблюда́й: плѣне́нныѧ го́ркїѧ и҆ꙁба́ви работы̀: скорбѧ́щихъ ᲂу҆тѣша́й нищетꙋ̀, и҆ всѧ́кое тѣле́сное ѡ҆блегчѝ ѡ҆ꙁлобле́нїе: дщ҃е́вныхъ неможе́нїй и҆ стра́стїй, пре́жде всѣ́хъ и҆ꙁима́й твои́ми невиди́мыми предста́тельствы и҆ наставле́н̾ми: ꙗ҆́кѡ да пꙋ́ть вре́менныѧ сеѧ̀ жи́ꙁни до́брѣ и҆ непреткнове́ннѡ сконча́емъ, и҆ вѣ́чныхъ ѡ҆́ныхъ бл҃гъ тебѐ ра́ди въ Црⷭ҇твїи нбⷭ҇номъ полꙋ́чимъ.

Вѣ́рныѧ же Цр҃ѧ на́шѧ, ᲃтра́шнымъ є҆диноро́днагѡ Сн҃а твое́гѡ почте́нныѧ И҆менемъ, и҆ на твоѐ ᲂу҆пова́ющїѧ предста́телствѡ и҆ бл҃года́ть, и҆ тебѐ предлага́ющїѧ ве́ꙁде ходота́ицꙋ и҆ помо́щницꙋ, на ѡ҆бстоѧ́щїѧ врагѝ невиди́мѡ ᲂу҆крѣпѝ: раꙁорѝ дш҃ъ и҆́хъ належа́щїй пренемага́нїѧ ѻ҆́блакъ: ѿимѝ бо́лѣꙁни дш҃ъ и҆ серде́цъ и҆́хъ, и҆ свѣ́тлое бл҃годꙋ́шїе, и҆ ра́дость введѝ: ми́рнꙋ и҆ непоколѣбле́мꙋ держа́вꙋ и҆ Црⷭ҇тво и҆́хъ ᲂу҆ста́вивши. И҆ꙁба́ви Влады́чице Мл҃тва́ми си, и҆ꙁрѧ́днѣе тебѣ̀ налага́емый гра́дъ се́й, и҆ всѧ́къ гра́дъ и҆ ᲃтра́нꙋ, ѿ гла́да, па́гꙋбы, трꙋ́са, пото́па, ѻ҆гнѧ̀, меча̀, наше́ствїѧ и҆ноплеме́нник, и҆ междосо́бныѧ бра́ни: и҆ всѧ́къ гнѣ́въ пра́веднѣ на на́съ движи́мый ѿвратѝ: Бл҃говоле́нїемъ и҆ бл҃гостїю є҆диноро́днагѡ ᲃн҃а твое́гѡ: є҆мꙋ́же подоба́етъ всѧ́каѧ ᲃла́ва, чⷭ҇ть и҆ поклоне́нїе съ беꙁнача́лнымъ є҆гѡ̀ Ѿц҃емъ, и҆ прⷭ҇носꙋ́щнымъ и҆ животворѧ́щимъ Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.