Восле́дованїе моле́бнагѡ пѣ́нїѧ, пѣва́емагѡ въ вре́мѧ беꙁдо́ждїѧ

І҆ере́ѵ꙼ ѡ҆бы́чнѡ начина́етъ:

Блⷭ҇ве́нъ Бг҃ъ на́шъ:

Чте́цъ же а҆́бїе чте́тъ: Трⷭ҇то́е: Прⷭ҇та́ѧ трⷪ҇це: и҆ Ѿч҃е на́шъ: и҆ по Ꙗ҆́кѡ твоѐ є҆́стъ црⷭ҇тво: Гд҃и помил: в҃і. Сла́ва: И҆ ны́нѣ: Прїйдѣ́те поклон: гⷤ. и҆ Ѱало́мъ, ѯ҃д.

Тебѣ̀ подоба́етъ пѣ́снь Бж҃е въ Сіꙍ́нѣ:

Сла́ва: И҆ ны́нѣ: А҆лл҃ꙋ́іѧ, гⷤ, Сла́ва тебѣ̀ Бж҃е.

Дїа́конъ же а҆́бїе гл҃етъ Е҆кті́нїѧ Вели́каѧ.

Ми́ромъ Гд҃ꙋ помоли́мсѧ. Да́же до плава́ющихъ.

Та́же прилага́етъ ᲃі́ѧ.

Ꙍ҆ є҆́же не помѧнꙋ́ти беꙁꙁакѡ́нїй и҆ непра́вдъ люді́й свои́хъ, и҆ ѿврати́ти ѿ на́съ гнѣ́въ сво́й пра́веднѡ движи́мый на́ны, и҆ не ᲂу҆мори́ти на́съ гла́домъ и҆ жа́ждею, Гд҃ꙋ помоли́мсѧ.

Ꙍ҆ є҆́же бл҃горастворе́нныѧ во́ꙁдꙋхи, и҆ до́жды бл҃говре́менныѧ къ плодоноше́нїю, млⷭ҇твнѡ посла́ти землѝ, и҆ люде́мъ свои́м, Гд҃ꙋ помоли́мсѧ.

Ꙍ҆ є҆́же въ гнѣ́вѣ свое́мъ не погꙋби́ти люде́й свои́хъ, и҆ скѡ́ты, но повелѣ́ти ѻ҆́блакѡмъ свы́шше ѡ҆дожди́ти, и҆ къ плодоноше́нїю ѡ҆роси́ти землѝ проꙁѧба́ти плѡ́ды на весе́лїе, и҆ пи́щꙋ люді́й свои́хъ, и҆ зла́къ въ слꙋ́жбꙋ чл҃кѡмъ, травꙋ́ же ско́тѡмъ, Гд҃ꙋ помоли́мсѧ.

Ꙍ҆ є҆́же млⷭ҇твнѡ при́ꙁрѣти на во́пль, пла́чъ, ᲃтена́нїѧ и҆ ᲂу҆миле́нныѧ мл҃твы ᲃта́рыхъ и҆ ю҆нѡ́тъ младе́нецъ же и҆ всѣ́хъ люді́й свои́хъ, и҆ не погꙋби́ти на́съ гла́домъ грѣ́хъ ра́ди на́шихъ, но пощади́ти ѿ сме́рти дш҃а на́ша, и҆ препита́ти на́съ въ гла́дѣ, Гд҃ꙋ помоли́мсѧ.

Ꙍ҆ є҆́же бл҃гопрїѧ́тнымъ бы́ти мо́л̾бамъ на́шимъ, и҆ ꙗ҆́коже И҆лїю̀ и҆́ногда послꙋша́ти на́съ до́ждемъ, и҆ бл҃горастворе́нными во́ꙁдꙋхи, и҆ поми́ловати на́съ, Гд҃ꙋ помоли́мсѧ.

Ꙍ҆ є҆́же млⷭ҇твнѡ ᲂу҆слы́шати гла́съ мл҃твы нш҃еѧ, и҆ и҆ꙁба́вити на́съ ѿ гла́да, гꙋби́тел̾ства, трꙋ́са, пото́па, ѻ҆гнѧ̀, гра́да, меча̀, наше́ствїѧ и҆нопле́менникъ, междосо́бныѧ бра́ни, и҆ всѧ́кїѧ ᲃмертоно́сныѧ ра́ны, Гд҃ꙋ помоли́мсѧ.

Ꙍ҆ є҆́же и҆ꙁба́витисѧ на́мъ:

Застꙋпѝ сп҃сѝ: Прⷭ҇тꙋ́ю пребл:

Во́ꙁгласъ:

Ꙗ҆́кѡ подоба́етъ ти всѧ́каѧ сла́ва:

Ли́къ:

А҆ми́нь.

И҆ а҆́бїе пое́тъ, Бг҃ъ Гд҃ь: на Гла́съ, в҃. и҆ Троп: ᲃїѧ Гла́съ то́йжде.

Во́ꙁдꙋха растворе́нїе повелѣ́нїемъ си прелага́ѧй Гд҃и, во́лный до́ждъ съ бл҃горастворе́нными во́ꙁдꙋхи дарꙋ́й землѝ, є҆́же приноси́ти люде́мъ твои́мъ плѡ́ды и҆ꙁѡби́лныѧ, и҆ насыща́ти всѧ́кое живо́тѡ твои́мъ бл҃говоле́нїемъ, мл҃тва́ми Бц҃а и҆ всѣ́хъ ᲃт҃ы́хъ твои́хъ.

Сла́ва: Гла́съ, ѕ҃.

Всѣ́хъ тво́рца и҆ зижди́телѧ, и҆ бл҃ги́хъ да́телѧ тѧ свѣдꙋ́ще Гд҃и, къ тебѣ̀ припада́емъ, и҆ прилѣ́жнѡ моли́мъ, пощадѝ млⷭ҇рде, и҆ простѝ ꙗ҆́кѡ бл҃гъ беꙁꙁакѡ́нїѧ на́шѧ, и҆ настоѧ́щагѡ пра́веднагѡ гнѣ́ва и҆ꙁба́ви рабы̀ ᲃвоѧ̀, подаѧ̀ ꙗ҆́кѡ бл҃гъ жа́ждꙋщей землѝ бл҃гоплодныѧ до́жды, ꙗ҆́кѡ є҆ди́нъ многѡмлⷭ҇твъ.

И҆ ны́нѣ: Гла́съ то́жъ. Богоро́дичен:

Застꙋ́пнице хрⷭ҇тїа́нѡмъ:

Тажъ, Ѱаломъ, н҃:

Пом҃лꙋй мѧ Бж҃е:

И҆ а҆́бїе Ли́къ по Ѱалмѣ̀ пое́тъ Канꙍ́нъ Моле́бный въ беꙁдо́ждїи къ Гд҃ꙋ на́шемꙋ І҆и҃сꙋ Хꙋ҃ Гла́съ в҃. И҆рмо́съ:

Грѧдѣ́те лю́дїе пои́мъ пѣ́снь Хꙋ҃ Бг҃ꙋ, раꙁдѣ́лшомꙋ мо́ре, и́ проведшомꙋ лю́ди, ꙗ҆́же и҆спꙋстѝ и҆ꙁъ работы̀ Е҆гѵ́петскїѧ, ꙗ҆́кѡ просла́висѧ.

Припѣ́л:

Многѡмлⷭ҇тиве Гд҃и ᲂу҆слы́ши на́съ грѣ́шныхъ мл҃ѧ́щихъ ти сѧ.

Прїйми ᲃп҃се мл҃нїе ѿ недосто́йныхъ на́шихъ ᲂу҆стъ: и҆ ниꙁпослѝ съ нб҃сѐ землѝ до́жды плодонѡ́сны, ꙗ҆́кѡ чл҃кѡлю́бецъ и҆ многѡмлⷭ҇тивъ.

Пре́ꙁри ны́нѣ Гд҃и согрѣше́нїѧ на́шѧ, и҆ гнѣ́въ ѿвратѝ, и҆́же на́ны ᲃп҃се наведѡ́ша по пра́вдѣ, и҆ пода́ждъ съ нб҃сѐ дѡ́жды во́дныѧ, ꙗ҆́кѡ чл҃кѡлю́бецъ и҆ многѡми́лостивъ.

Сла́ва:

Прїйдѣ́те чл҃ци, воспла́чимсѧ пре́дъ всѣ́хъ Бг҃а, ᲂу҆миле́ннѡ вопїю́ще: пре́ꙁри чл҃кѡлю́бче на́шѧ прегрѣшае́нїѧ, и҆ послѝ съ нб҃сѐ дѡ́жды жа́ждꙋщей землѝ, ꙗ҆́кѡ многѡмлⷭ҇тивъ.

И҆ ны́нѣ:

Свѣ́тъ тобо́ю поꙁна́хѡмъ Бг҃ороди́телнице: тѣ́мъ же тѧ моли́мъ и҆ ми́лисѧ дѣ́емъ, мл҃ѧ́щи непреста́й Тво́рца и҆ Сн҃а свое́гѡ, посла́ти землѝ до́ждъ, ꙗ҆́кѡ чл҃кѡлю́бецъ, и҆ многѡмлⷭ҇тивъ.

Катава́сїѧ:

Спасѝ ѿ бѣ́дъ рабы̀ своѧ̀ млⷭ҇тиве, ꙗ҆́кѡ мы смѣре́ннѡ къ тебѣ̀ прибѣга́емъ, къ млⷭ҇тивомꙋ И҆ꙁбави́телю всѣ́хъ Влады́цѣ Гд҃ꙋ І҆и҃сꙋ.

Сі́ю по кое́йждѡ Пѣ́сни пое́мъ. Пе́снь г҃. И҆рмо́съ:

Ꙋ҆твердѝ на́съ собо́ю Гд҃и, дре́вомъ ᲂу҆мертви́вый грѣ́хъ, и҆ стра́хъ тво́й всадѝ въ ᲃе́рдца на́шѧ, ꙗ҆́кѡ чл҃кѡлю́бец пою́щихъ тѧ.

Всю тва́ръ длв́нїю содержа́й Гд҃и: ᲂу҆слы́ши ꙗ҆́кѡ ще́дръ моле́нїѧ рабѡ́въ свои́хъ, и҆ послѝ во́дꙋ на лицѐ всеѧ̀ землѝ.

Бл҃гъ сы́й и҆ бл҃гопремѣни́тель, ꙗ҆́кѡ и҆мы́й бе́ꙁднꙋ щедрѡ́тъ не пре́ꙁри мл҃нїѧ на́шѧ, но послѝ ми́рный до́ждъ на лицѐ всеѧ̀ землѝ.

Сла́ва:

Бога́тство є҆́же на́мъ да́лъ є҆сѝ расточи́хѡмъ блꙋ́днѡ: но ꙗ҆́кѡ и҆мѣ́ѧй Гд҃и бе́ꙁднꙋ млⷭ҇рдїѧ, и҆ Ѻ҆ц҃ъ бл҃гъ ᲃы́й ᲂу҆мили́сѧ, и҆ дѡ́жды бл҃гопло́дны пода́ждъ на лицѐ всеѧ̀ землѝ.

И҆ ны́нѣ: Богоро́диченъ:

Ꙗ҆́кѡ и҆мꙋ́щаѧ чⷭ҇таѧ къ чл҃кѡлю́бцꙋ ᲃн҃ꙋ свое́мꙋ, бл҃гопрїѧ́тное дерзнове́нїе: ᲂу҆мл҃ѝ пода́ти дѡ́жды плодоно́сны, ходота́йствы твои́ми, на лицѐ всеѧ̀ землѝ.

Пѣ́снь д҃. И҆рмо́съ:

Пою́ тѧ̀: ᲃлꙋ́хомъ бо Гд҃и ᲂу҆слы́шахъ и҆ ᲂу҆диви́хсѧ: да́же бо къ мнѣ прише́лъ є҆сѝ, менѐ и҆скїй заблꙋ́ждшагѡ: тѣ́мъ мнѡ́гое твоє̀ къ мнѣ сниꙁше́ствїе є҆́же на́ мѧ прославлѧ́ю, многѡми́лостиве.

Припѣ́л:

Многѡми́лостиве Гд҃и:

Свы́ше на́ ны при́ꙁри бл҃же, согрѣ́шшїѧ тебѣ̀ Гд҃и, и҆ дарꙋ́й млⷭ҇ть свою̀ по все́й земли҃, и҆ послѝ моли́мъ сѧ бога́тнѡ ми́лости твоѧ̀ рабо́мъ твои́мъ чл҃кѡлю́бче.

На́йде на на́съ согрѣша́ющих гнѣ́въ тво́й млⷭ҇тиве, нб҃са̀ заключи́лъ є҆сѝ не да́ти до́ждъ землѝ твое́й: тѣ́мже мо́лимти сѧ рабѝ твоѝ, да не ꙗ҆́ростїю твое́ю ᲃло́ве, пока́жеши на́съ чл҃кѡлю́бче.

Сла́ва:

Растворе́нїе прелага́ѧй Гд҃и во́ꙁдꙋха повелѣ́нїемъ си: во́л̾ный дарꙋ́й до́ждъ землѝ, приноси́ти плѡ́ды и҆ꙁѡби́л̾ныѧ твои́мъ рабѡ́мъ, и҆ всѧ́кое живо́тнѡ насыща́ти, бл҃говоле́нїемъ твои́мъ чл҃кѡлю́бче.

И҆ ны́нѣ: Богоро́дичен:

Ты Мт҃и Бц҃е была̀ є҆сѝ Бг҃ꙋ на́шемꙋ: тѣ́мже вѣ́рнїи тѧ всѝ моли́мъ Влады́чице, ꙗ҆́кѡ и҆мꙋ́щꙋю дерꙁнове́нїе, тогѡ̀ мл҃ѝ ѡ҆ всѣ́хъ на́съ, є҆́же посла́ти во́дꙋ плодоно́снꙋю землѝ мл҃тва́ми твои́ми, ꙗ҆́кѡ чл҃кѡлю́бецъ.

Пѣ́снь, є҃. И҆рмо́съ:

Свѣ́та пода́телю, и҆ вѣ́кѡвъ Тво́рче Гд҃и, въ свѣ́тѣ повелѣ́нїй твои́хъ наста́ви на́съ, ра́ꙁвѣ бо тебѐ и҆́нагѡ Бо́га не зна́емъ.

Мл҃тва́ми ᲃп҃се Беспло́тныхъ бл҃гоꙋвѣтли́внѡ ᲂу҆слы́ши всѣ́хъ на́съ, при́снѡ молѧ́щихсѧ держа́вѣ твое́й: и҆ да́ждъ до́ждъ землѝ твое́й жа́ждꙋщей, ꙗ҆́кѡ є҆ди́нъ бл҃гъ и҆ чл҃кѡлю́бецъ.

Бꙋ́ди на́мъ бл҃гоꙋвѣтли́въ, въ вре́мѧ на́пастїй Гд҃и: и҆ гнѣ́ва належа́щагѡ ᲃпасѝ на́съ, и҆ послѝ землѝ твое́й до́ждъ во́ленъ, ꙗ҆́кѡ є҆ди́нъ бл҃гъ и҆ чл҃кѡлю́бецъ.

Сла́ва:

Двоена́десѧтице А҆пⷭ҇лъ, съ ᲃтрⷭ҇тоте́рпцы къ Бг҃ꙋ мл҃твꙋ ѡ҆ на́съ твори́те: да и҆ꙁба́витъ на́съ ѿ всѧ́кїѧ нꙋ́жды, гнѣ́ва же и҆ ско́рби, ꙗ҆́кѡ є҆ди́нъ бл҃гъ и҆ чл҃кѡлю́бец.

И҆ ны́нѣ: Богоро́дичен:

Всѝ ходота́ицꙋ тѧ ны́нѣ къ Бг҃ꙋ, земноро́днїи и҆ма́мы Дв҃о ꙗ҆́кѡ въи́стиннꙋ: тѣ́мже моли́мсѧ, кро́вомъ чⷭ҇таѧ гра́дъ тво́й ᲃп҃са́й ѿ всѧ́кїѧ бѣ́ды: ты́ бо є҆ди́на є҆сѝ бл҃га́ѧ Влады́чица, и҆ чл҃кѡлюби́ваѧ.

Пѣ́снь, ѕ҃. И҆рмо́съ:

Въ бе́ꙁднѣ грѣхо́вной ѡ҆держи́мъ неиꙁслѣднꙋю млⷭ҇рдїѧ твое́гѡ приꙁыва́ю бе́ꙁднꙋ: ѿ тлѧ̀ Бж҃е мо́й воꙁведи́ мѧ̀.

Мнѡ́жество Мч҃никъ мл҃и́тесѧ, ꙗ҆́кѡ и҆мꙋ́щїи къ Гд҃ꙋ дерꙁнове́нїе мнѡ́гое ны́нѣ, до́ждъ дарова́ти, и҆ плодѡвъ и҆ꙁоби́лїе по все́й землѝ, свое́ю благода́тїю, ꙗ҆́кѡ млⷭ҇рдъ.

Моли́мсѧ Мл҃тва́ми твои́хъ Ꙋ҆ч҃никъ, ѡ҆сла́би ѡ҆ста́ви Гд҃и, прегрѣше́нїѧ на́шѧ, и҆ гнѣ́въ сво́й ѿвратѝ ѿ на́съ, и҆ землѝ твое́й пода́ждъ до́ждъ свое́ю благода́тїю, ꙗ҆́кѡ млⷭ҇рдъ.

Сла́ва:

Моли́мъ Влады́ко Гд҃и, тебѐ ꙗ҆́кѡ бл҃га́гѡ и҆ чл҃кѡлюби́вагѡ любо́вїю дш҃евною, пощадѝ на́съ и҆ дарꙋ́й до́жды плодонѡ́сны, жа́ждꙋщей землѝ свое́ю благода́тїю, ꙗ҆́кѡ милосе́рдъ.

И҆ ны́нѣ: Бг҃оро́диченъ:

Молѧ́щи непреста́й мл҃и́мсѧ ᲃн҃а свое́гѡ Прчⷭ҇таѧ Бг҃ороди́тельнице ѡ҆ на́съ рабе́хъ твои́хъ, ᲂу҆мири́ти, и҆ ᲃпасти́ ны ѿ всѧ́кагѡ гнѣ́ва, и҆ землѝ жа́ждꙋщей до́ждъ во́ленъ къ плодоноше́нїю свое́ю благодатїю посла́ти, ꙗ҆́кѡ є҆ди́нъ млⷭ҇рдъ.

Пѣ́снь, з҃. И҆рмо́съ:

Припѣ́лъ.

Мнѡгомлⷭ҇тиве Гд҃и:

Дш҃а́мъ бл҃же Гдⷭ҇твꙋ́ющагѡ всѣ́мъ, тебѐ вѣдꙋ́ще моли́мъ, пощадѝ, простѝ ꙗ҆́кѡ бл҃гъ и҆ чл҃кѡлю́бецъ, и҆ настоѧ́щагѡ пра́веднагѡ гнѣ́ва на́съ и҆ꙁба́ви, и҆ пода́ждъ ꙗ҆́кѡ бл҃гъ дѡ́жды жа́ждꙋщей землѝ. Ꙗ҆́коже и҆́ногда Мана́сїю ѿ ᲂу҆́ꙁъ мѣ́дѧныхъ ка́ющагосѧ ᲃп҃се и҆сто́ргъ, и҆ꙁба́вилъ є҆сѝ и҆̀ ѿ смертоно́сныѧ бѣды̀, бл҃госе́рде ще́дре пода́ждъ и҆ на́мъ млⷭ҇ть твою̀, и҆ сохранѝ на́съ ѿ гꙋби́тел̾ства и҆ трꙋ́са, до́ждъ дарꙋ́ѧ жа́ждꙋщей землѝ.

Сла́ва:

Ꙋ҆млⷭ҇ди́сѧ ны́нѣ на́ны ꙗ҆́кѡ бл҃гъ и҆ млⷭ҇тивъ, и҆бѡ̀ согрѣши́хѡмъ и҆ беꙁꙁаконова́хѡмъ, и҆ ѡ҆неправди́хѡмъ, вси, тѣ́мже моли́мъ тѧ съ стра́хомъ, не гнѣ́вомъ твои́мъ чл҃кѡлю́бче покажѝ при́четъ и҆ лю́ди: но во́дꙋ послѝ жа́ждꙋщей землѝ.

И҆ ны́нѣ: Бг҃оро́диченъ:

Тебѐ вси мертве́ннїи прибѣ́жище тве́рдое, и҆ ѻ҆рꙋ́жїе непобѣди́мое Бг҃ороди́телнице свѣ́мы, и҆ моли́мъ рабѝ твоѝ и҆ꙁба́ви наше́ствїѧ ꙗ҆ꙁы́ческагѡ лю́ди и҆ гра́дъ тво́й: ѿ гла́да же и҆ гꙋби́телства, трꙋ́са, и҆ всѧ́кагѡ вре́да: послѝ твои́ми мл҃твами, росꙋ̀ жа́ждꙋщей землѝ.

Пѣ́снь, и҃. И҆рмо́съ:

Въ пе́щъ ѡ҆гненнꙋю къ дѣте́мъ Е҆вре́ѵ꙼скимъ съше́дшагѡ, и҆ пла́мень на хла́дъ прело́жшагѡ Бг҃а: по́йте всѧ̀ дѣ́ла ꙗ҆́кѡ Гд҃а, и҆ превоꙁноси́те въ всѧ̀ вѣ́ки.

И҆лїѧ сло́вомъ и҆́ногда до́ждъ на зъмлѝ не бы́ти ᲂу҆держа̀, и҆ па́ки сло́вомъ съ нб҃сѐ: тѣ́мже мл҃и́мъ тѧ̀, тогѡ̀ мл҃тва́ми ще́дре, послѝ дѡ́жды во́дныѧ землѝ съ нб҃сѐ.

Съ А҆́гг҃лскими ли́ки, Прⷪ҇рокъ же и҆ Мч҃никъ ᲃщ҃енныхъ ᲃобо́ры, и҆ Преподо́бныхъ мнѡ́жества, ꙗ҆́кѡ зижди́телѧ всѣ́хъ и҆ Гд҃а тебѐ мо́лѧтъ, ᲃп҃стѝ пою́щихъ тѧ̀, и дѡ́жды во́дныѧ землѝ посла́ти съ нб҃сѐ.

Сла́ва:

Ꙗ҆́коже І҆ѡ́нꙋ ѿ звѣ́рѧ и҆ мо́рѧ ꙗ҆́кѡ Бг҃ъ и҆ꙁба́вилъ є҆сѝ, и҆ Данїи́ла ѿ ро́ва лвѡ́въ бл҃же: та́кѡ и҆ ни́нѣ ᲂу҆слы́ши рабы̀ твоѧ̀, и҆ и҆ꙁба́ви ѿ всѧ́кїѧ бѣ́ды лю́ди своѧ̀, и҆ дѡ́жды во́дныѧ послѝ съ нб҃сѐ.

И҆ ны́нѣ: Бг҃оро́диченъ:

Тебѐ ро́ждшꙋю ᲃн҃а Бц҃ꙋ, на Мл҃твꙋ ны́нѣ подвиꙁа́емъ, ᲂу҆щедрѝ и҆ ᲃп҃сѝ съгрѣ́шшїѧ лю́ди, и҆ гра́дъ любо́вїю тебѣ̀ прибѣга́ющїй: и҆ и҆спросѝ ᲂу҆рождшагосѧ и҆ꙁъ тебѐ Бг҃а, дѡ́жды вѡ́дныѧ посла́ти землѝ съ нб҃сѐ.

Пѣ́снь, ѳ҃. И҆рмо́съ:

Ѿ Бг҃а Бг҃а ᲃло́ва, неиꙁрече́нною мꙋ́дростїю съше́дшагѡ ѡ҆бнови́ти А҆да́ма: ꙗ҆дїю тлѣ́нїѧ па́дшагѡ лю́тѣ: ѿ ᲃт҃ы́ѧ же Дв҃ы неиꙁрече́ннѡ на́съ дѣ́лѧ въпло́щшеесѧ: вѣ́рнїи є҆диномꙋ́дрнѡ, пѣ́сн̾ми велича́емъ.

Припе́лъ:

Многомлⷭ҇тиве:

Землѝ жа́ждꙋщей ще́дре, и҆ на́мъ просѧ́щимъ твое́гѡ чл҃кѡлю́биѧ бл҃же, млⷭ҇тивъ Влады́ко ꙗ҆висѧ ꙗ҆́кѡ Бг҃ъ вседержи́тель: и҆ дарꙋ́й на́мъ ꙗ҆́кѡ бл҃гъ дѡ́жды плодоно́сны, и҆ сп҃сѝ дш҃а на́ша чл҃кѡлю́бче.

Поми́лꙋй млⷭ҇тиве рꙋ́кꙋ свое́ю дѣ́ло, простѝ на́мъ прегрѣше́нїѧ ꙗ҆́кѡ бл҃гъ: и҆ не гнѣ́вомъ твои́мъ накажѝ лю́ди: но приклонѝ ᲂу҆́хо твоѐ, и҆ вонмѝ мл҃твѣ на́шей, и҆ пода́ждъ землѝ свое́й то́ки вѡ́дныѧ Гд҃и, и҆ сп҃сѝ дш҃а на́ша чл҃кѡлю́бче.

Сла́ва:

И҆ꙁба́ви ѿ ꙗ҆ꙁы́къ и҆ врагѡ́въ, и҆ наше́ствїѧ и҆нопле́менникъ гра́дъ сво́й и҆ всѧ̀ лю́ди, и҆ дѡ́жды на́мъ дарꙋ́й плодоно́сны ще́дре, въ и҆ꙁѡби́лїе всѣ́хъ пло́дѡвъ, и҆ на́мъ ᲃпⷭ҇нїе ниꙁпослѝ чл҃кѡлю́бче.

И҆ ны́нѣ: Бг҃оро́диченъ:

Тебѐ проѡбраꙁꙋ́ющи халде́йскаѧ пе́щъ Бц҃е, ѡ҆тро́ки росо́ю прохлажда́ше, посре́дѣ пла́мене ликовствꙋ́ющїѧ: ны́нѣ же и҆ на́съ ꙗ҆́кѡ въ пе́щи ѡ҆гне́ннѣй горѧ́щихъ сꙋ́шею, до́ждемъ прохладѝ Влады́чице, и҆ ᲃп҃сѝ рабы̀ своѧ̀ твои́ми мл҃тва́ми, Мт҃и Бг҃а чл҃кѡлю́бца.

Посе́мъ а҆́бїе ѡ҆́ба ли́ка соше́дшесѧ пою́тъ, Досто́йнѡ є҆́стъ:

Чте́цъ же чте́тъ Трⷭ҇то́е: Прест҃а́ѧ Трⷪ҇це: Ѿч҃е на́шъ:

І҆ере́ѵ꙼ же:

Ꙗ҆́кѡ твоѐ є҆сѝ црⷭ҇тво: и҆ Тропарѝ Гла́съ, ѕ҃.

Пом҃лꙋй на́съ Гд҃и пом҃лꙋй: и҆ про́чаѧ и҆щѝ наза́ди.

Посе́мъ а҆́бїе І҆ере́ѵ꙼ воꙁглаша́етъ:

Ꙗ҆́кѡ ᲃт҃ є҆сѝ Бж҃е на́шъ, и҆ на ᲃт҃ы́хъ почива́еши, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Ли́къ:

А҆ми́нь.

И҆ а҆́бїе пое́тъ:

Ст҃ый Бж҃е:

Сла́ва: И҆ ны́нѣ: ѡ҆бы́чнѡ.

По сконча́нїи же Трⷭ҇та́гѡ пѣ́нїѧ, Дїа́конъ гл҃етъ:

Во́нмѣмъ.

І҆ере́ѵ꙼:

Ми́ръ всѣ́мъ.

Чте́цъ:

И҆ съ дх҃омъ твои́мъ.

Дїа́конъ:

Премꙋ́дрость во́нмѣмъ.

Чте́цъ:

Прок: Гла́съ, д҃.

Бра́ꙁды зе́мныѧ ᲂу҆по́й, и҆ ᲂу҆мнѡ́жи жи́та є҆́ѧ.

Стіі́хъ.

Въ ка́плѧхъ є҆ѧ̀ воꙁвесели́тсѧ воꙁсїѧ́ющи.

Посе́мъ Дїа́конъ:

Премꙋ́дрость.

Чте́цъ:

Собо́рнагѡ Посла́нїѧ І҆а́ковлѧ чте́нїе.

Дїа́конъ:

Во́нмѣмъ.

Чте́цъ же чте́тъ А҆пⷭ҇тлъ Глава̀ є҃. Зача́ло, н҃ѕ ²⁷.

Бра́тїе, долготерпи́те да́же до Прише́ствїѧ Гн҃ѧ. Сѐ земледѣ́лецъ жде́тъ чⷭ҇тна́гѡ пло́да землѧ̀, долготерпѧ̀ ѡ҆ не́мъ, до́ндеже прі́йметъ до́ждь ра́нъ и҆ по́зденъ. Долготерпи́те ᲂу҆́бо и҆ вы̀, ᲂу҆тверди́те ᲃердца̀ ва̑ша, ꙗ҆́кѡ Прише́ствїе Гдⷭ҇не приближи́сѧ. Не воздыха́йте дрꙋ́гъ на дрꙋ́га, бра́тїе, да не ѡ҆сꙋжде́ни бꙋ́дете: сѐ, ᲃꙋдїѧ̀ пре́дъ две́рьми стои́тъ.

И҆лїѧ̀ чл҃къ бѣ подобостра́стенъ на́мъ, и҆ мл҃твою помолисѧ є҆́же неѡдожди́ти, и҆ неѡдождѝ по землѝ лѣ́та трѝ и҆ Мцⷭ҇ей ше́сть.

И҆ па́ки пом҃ли́сѧ, и҆ нб҃о до́ждь дадѐ, и҆ землѧ̀ проꙁѧбѐ пло́дъ сво́й.

І҆ере́ѵ꙼:

Ми́ръ ти.

Чте́цъ:

И҆ дх҃ови твое́мꙋ.

Дїа́конъ:

Премꙋ́дрост̾, во́нмѣмъ.

Чте́цъ:

Ѱало́м Дави́довъ. Гла́съ и҃.

Певци́ же пою́тъ А҆ллилꙋ́іа:

Чте́цъ: же гл҃етъ ᲃтіхѝ.

Сті́хъ, а҃.

Блгⷭ҇ви́ши вѣнецъ лѣ́тꙋ блгⷭ҇ти твое́ѧ, и҆ по́лѧ твоѧ̀ насы́тѧтсѧ тꙋ́ка.

Сті́хъ, в҃.

Раꙁботѣ́ютъ кра́снаѧ пꙋсты́ни, и҆ ра́достїю хо́лми препоѧ́шꙋтсѧ.

Дїа́конъ:

Премꙋ́дрость про́сти ᲂу҆слы́шимъ ᲃт҃о́е Е҆ѵⷢ҇лїе.

І҆ере́ѵ꙼ же:

Ѿ Матѳе́ѧ ᲃт҃а́гѡ Е҆ѵⷢ҇лїа чте́нїе.

Ли́къ:

Сла́ва тебѣ̀ Гд҃и.

Дїа́конъ:

Во́нмемъ.

І҆ере́ѵ꙼ же чте́тъ Е҆ѵⷢ҇: Гла́съ ѕ҃і. Зач: ѯ҃е.

Въ вре́мѧ ѻ҆́нѡ: Пристꙋ́пл̾ше къ І҆и҃сꙋ Фарїсе́е и҆ ᲃаддꙋке́е, и҆скꙋша́юще проси́ша є҆го̀ зна́менїе съ нб҃сѐ покаꙁа́ти и҆́мъ. Ѻ҆́нъ же ѿвѣща́въ речѐ и҆́мъ. Ве́черꙋ бы́вшꙋ, гл҃ете: ве́дро, чермнꙋ́етбосѧ не́бо. И҆ ᲂу҆́трꙋ: дне́с̾ зима̀; чермнꙋ́етбосѧ дрѧселꙋ́ѧ нб҃о. Лицемѣ́ри! лицѐ ᲂу҆́бѡ нб҃сѝ ᲂу҆мѣ́ете раꙁсꙋжда́ти, зна́менїѧ же вре́менѡ́мъ, не ᲂу҆мѣ́ете: А҆ми́нь глю̀ ва́мъ. ꙗ҆́кѡ ни є҆ди́н Прⷪ҇ркъ прїѧ́тенъ є҆́стъ въ ѿчествїи свое́мъ.

По и҆́стиннѣ гл҃ю̀ ва́мъ: Мнѡ́ги вдови́цѧ бы́шѧ во днѝ И҆лїи́ны въ І҆и҃ли, є҆гда̀ заключи́сѧ нб҃о на трѝ лѣ́та, и҆ Мцⷭ҇ей ше́сть, и҆ бы́стъ гла́дъ вели́къ по все́й землѝ.

И҆ ни къ є҆дино́й и҆́хъ посла́нъ бы́сть И҆лїѧ, то́кмѡ въ Саре́фѳꙋ ᲃидо́нскꙋю, къ женѣ̀ вдови́ци.

Рѣ́ша же є҆мꙋ̀ І҆ꙋде́е; ко́е ᲂу҆́бѡ ты твори́ши зна́менїе, да ви́димъ и҆ вѣ́рꙋ и҆ме́мъ тебѣ̀, что̀ дѣ́лаеши? Ѿцѝ на́ши ꙗ҆дѡ́ша Ма́ннꙋ въ пꙋсты́ни, ꙗ҆́коже є҆́стъ пи́сано.

Хлѣ́бъ съ нб҃сѐ дадѐ и҆́мъ ꙗ҆́сти. Речѐ ᲂу҆́бѡ и҆́мъ І҆и҃с, А҆ми́нь, А҆ми́нь гл҃ю̀ ва́мъ, не Мѡѵ꙼сѝ дадѐ ва́мъ хлѣ́бъ съ нб҃сѐ, но Ѿц҃ъ мо́й дае́тъ ва́мъ хлѣ́бъ и҆́стинный съ нб҃сѐ. Хлѣ́бъ бо Бж҃ій є҆́стъ сходѧ́й съ нб҃сѐ, и҆ даѧ́й живо́тъ мі́рꙋ.

Ли́къ:

Сла́ва тебѣ̀ Гд҃и.

Дїа́конъ же а҆́бїе съ всѧ́кимъ ᲂу҆миле́нїемъ ничто́же борꙁѧ́сѧ, въ ᲂу҆слыша́нїе всѣ́мъ гл҃етъ Е҆кте́нїѧ сі́ѧ.

Поми́лꙋй на́съ Бж҃е по вели́цѣй млⷭ҇ти твое́й, мо́лимтисѧ ᲂу҆слы́ши и҆ поми́лꙋй.

Ли́къ:

Гд҃и поми́лꙋй, гⷤ.

Не хотѧ́й ᲃме́рти грѣ́шнагѡ, но ѡ҆жида́ѧй ѡ҆браще́нїѧ и҆ покаѧ́нїѧ є҆гѡ̀, ᲂу҆слы́ши на́съ въ покаѧ́нїи мл҃ѧ́щихтисѧ, и҆ пом:

Воꙁводѧ́й ѡ҆́блаки ѿ послѣ́днихъ землѧ̀, повелѝ тѣ́мъ пода́ти до́ждъ ми́ренъ наню̀: мо́лимтисѧ ᲂу҆слы́ши и҆ помил:

Приꙁыва́ѧй во́дꙋ мо́рскꙋю, и҆ и҆ꙁлива́ѧй ю҆̀ на лицѐ всеѧ̀ землѧ̀ ниꙁпослѝ блгⷭ҇венїе твоѐ на на́съ мл҃ѧ́щихтисѧ, и҆ поми́л:

Ꙗ҆́кѡ ѡ҆́чи рабѡ́въ въ рꙋ́цѣ господі́й свои́хъ, та́кѡ ѻ҆́чи на́ши къ тебѣ̀ Бж҃е: ми́лостивнымъ си ᲂу҆́бѡ при́ꙁри на́ны ѻ҆́комъ, мо́лимтисѧ ᲂу҆слы́ши и҆ поми́лꙋй.

До́ждъ во́ленъ и҆ тꙋ́чꙋ ми́рнꙋю и҆ бл҃гопло́днꙋю пода́ждъ землѝ жаждꙋщей, и҆ спасѝ всѧ́ческаѧ чл҃кѡлю́бче, и҆ на́съ молѧ́щихъ ти сѧ ᲂу҆слы́ши и҆ поми́лꙋй.

Ꙍ҆дѣва́ѧй нб҃о ѡ҆́блаки, и҆ готова́ѧй землѝ до́ждъ: ниꙁпослѝ на́мъ млсти твоѧ̀ молѧ́щимтисѧ, и҆ ми́лостивнѡ ᲂу҆слы́шавъ поми́лꙋй.

Проѕѧба́ѧй травꙋ̀ ᲃко́тѡмъ, и҆ зла́къ на слꙋ́жбꙋ чл҃кѡм, сп҃сѝ члове́ки съ скѡ́ты, мо́лимтисѧ у҆слы́ши и҆ поми́лꙋй.

Послѝ до́жды твоѧ̀ на требꙋ́ющаѧ и҆ просѧ́щаѧ мѣ́ста чл҃кѡлю́бче, и҆ на на́съ молѧ́щихтисѧ, и҆ поми́лꙋй.

Воꙁсїѧва́й ᲃо́лнце на злы́ѧ и҆ до́брыѧ, и҆ ѡ҆дожда́ѧй на пра́ведныѧ и҆ грѣ́шныѧ, при́ꙁри на́ ны бл҃госе́рднѡ, и҆ ᲂу҆мнѡжѝ сѣмена̀ зе́мныѧ, млⷭ҇тїю си, мл҃и́мтисѧ ᲂу҆слы́ши и҆ поми́лꙋй.

Ꙍ҆ ще́дре и҆ млⷭ҇тиве, ᲂу҆щедрѝ и҆ воꙁвеселѝ на́съ щедрота́ми твои́ми чл҃кѡлю́бче молѧ́щихтисѧ, и҆ поми́лꙋй.

Ꙍ҆деѧ́йсѧ свѣ́томъ ꙗ҆́кѡ ри́ꙁою, при́ꙁри на́ ны Влады́ко, и҆ и҆спꙋстѝ на́мъ до́ждъ млⷭ҇тїю си, мл҃и́мтисѧ ᲂу҆слы́ши и҆ поми́лꙋй.

Въ высо́кихъ живы́й, и҆ приꙁира́ѧй на смире́нныѧ, при́ꙁри бл҃гоꙋтро́бнѡ на лю́ди твоѧ̀ прогнѣва́вшїѧ тѧ чл҃кѡлю́бче ᲃт҃ы́й, и҆ приле́жнѡ молѧ́щїѧтисѧ, и҆ млⷭ҇стивнѡ ᲂу҆слы́шавъ, чловѣкѡлю́бнѡ поми́лꙋй.

Не помѧнѝ беꙁꙁакѡ́нїй на́шихъ Влады́кѡ: а҆́ще бо на беꙁꙁакѡ́нїѧ на́шѧ при́ꙁриши Гд҃и, Гд҃и кто̀ посто́итъ: мл҃и́мтисѧ ᲂу҆слы́ши и҆ ми́лостивнѡ поми́лꙋй.

Ꙋ҆слы́ши на́съ Гд҃и, ꙗ҆́кѡ кро́токъ и҆ ми́лостивъ є҆сѝ, и҆ ниꙁпослѝ землѝ твое́й бл҃гословенїе твоє̀ нбⷭ҇ное, мл҃и́мтисѧ ᲂу҆слы́ши и҆ поми́лꙋй.

Ꙋ҆слы́ши на́съ Бж҃е, ꙗ҆́кѡ бла҃га млⷭ҇ть твоѧ̀, и҆ пом҃лꙋй на́съ, твои́мъ бл҃гоꙋтро́бїемъ, и҆ напо́й зе́млю дожде́мъ и҆ бл҃гослове́нїемъ твои́мъ, моли́мтисѧ ᲂу҆слы́ши и҆ поми́лꙋй.

Ско́рѡ да предварѧ́тъ на́мъ Бж҃е сп҃си́телю на́шъ, и҆ при́ꙁри на́ зе́млю плодоно́снымъ до́ждемъ, мл҃и́мсѧ ᲂу҆слы́ши и҆ поми́лꙋй.

Е҆щѐ моли́мсѧ тебѣ̀ Гд҃и Бж҃е сп҃си́телю на́шъ: и҆ꙁба́ви (а҆́ще въ Монастырѝ, гл҃и сїе,) ѡ҆би́тель ᲃїю. (а҆́ще же въ гра́дѣ, гл҃и: гра́дъ ᲃе́й.) (а҆́ще же въ ве́си, гл҃и: ве́сь ᲃїю.) и҆ всѧ́кꙋю ѡ҆би́тель, и҆ гра́дъ, и҆ ве́сь, и҆ всѧ́кꙋю стра́нꙋ, и҆ вѣ́рою живꙋ́щихъ въ ни́хъ, ѿ гла́да, гꙋби́телства, трꙋ́са, пото́па, гра́да, ѻ҆гнѧ̀, меча̀, наше́ствїѧ и҆нопле́менникъ, и҆ междосо́бныѧ бра́ни, и҆ всѧ́кїѧ смертоно́сныѧ ра́ны: и҆ млⷭ҇тивъ, бл҃гоꙋвѣтли́въ, и҆ бл҃гопремѣни́тель бꙋ́ди, Бл҃же и҆ чл҃кѡлю́бче ѡ҆ грѣсѣ́хъ на́шихъ, и҆ ѿвратѝ ве́съ гнѣ́въ сво́й пра́веднѡ на́ны движи́мый, и҆ и҆ꙁба́ви на́съ належа́щагѡ пра́веднагѡ твое́гѡ преще́нїѧ: и҆ послѝ на́мъ до́ждъ ми́ренъ, и҆ ѡ҆дождѝ землѝ ро́сꙋ бл҃гꙋ́ю и҆ плодоно́снꙋю, и҆ поми́лꙋй на́съ въ покаѧ́нїи съ ᲂу҆миле́нїемъ молѧ́щихтисѧ, рцѣ́мъ всѝ, чл҃кѡлю́бче ско́рѡ ᲂу҆слы́ши и҆ млⷭ҇твнѡ поми́лꙋй.

І҆ере́ѵ꙼ же воꙁглаша́етъ:

Ꙋ҆слы́ши ны Бж҃е сп҃си́телю на́шъ:

Ст҃и́тель же и҆лѝ І҆ере́ѵ꙼ гл҃етъ:

Ми́ръ всѣ́мъ.

Ли́къ:

И҆ дх҃ови твое́мꙋ.

Дїа́конъ:

Съ ᲂу҆миле́нїемъ въ покаѧ́нїи всѝ колѣ́нѣ дꙋ́шъ и҆ тѣле́съ на́шихъ прекло́шше, Гд҃ꙋ помол:

Люде́м же всѣ́мъ гла́вы и҆ колѣ́на прекло́ншимъ, ᲃт҃и́тель, и҆лѝ І҆ере́ѵ꙼, и҆ са́мъ прекло́нь колѣ́нѣ съ всѧ́кимъ внима́нїем, и҆ ᲂу҆миле́нїемъ ᲃе́рдца, чте́тъ Мл҃твы сїѧ, ᲃт҃ѣ́йшагѡ Гдⷭ҇на Каллиста Патріа́рхи Кꙍнстанті́на гра́да.

Влады́ко Гд҃и Бж҃е на́шъ, послꙋша́вый И҆лїю̀ Ѳеꙁвитѧни́на рве́нїѧ ра́ди, и҆ въ времена̀ посыла́емомꙋ землѝ до́ждꙋ ᲂу҆держа́тисѧ повелѣ́вый, та́же па́ки мл҃твою є҆гѡ̀ до́ждъ плодонѡ́сный є҆́й дарова́вый, Ты и҆ ны́нѣ Влады́ко всѣ́хъ свои́мъ си бл҃госе́рдїемъ ᲂу҆м҃ле́й бы́въ, до́ждъ во́ленъ послѝ достоѧ́нїю твое́мꙋ: и҆ прегрѣше́нїѧ нш҃ѧ пре́ꙁрѣ́въ, дѡ́жды ниꙁпослѝ на требꙋ́ющаѧ и҆ просѧ́щаѧ мѣ́ста: Возвеселѝ лицѐ землѝ ни́щихъ ра́ди люді́й твои́хъ, младе́нецъ ра́ди и҆ ско́тѡвъ, и҆ и҆́ныхъ всѣ́хъ, требꙋ́ющихъ ѿ тебѐ млⷭ҇ти: ꙗ҆́кѡ на́тѧ ᲂу҆пова́ютъ, є҆́же да́ти пи́щꙋ и҆́мъ въ бл҃говре́мѧ: Ты́ бо є҆сѝ Бг҃ъ на́шъ, Бг҃ъ є҆́же ми́ловати и҆ сп҃са́ти, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

Гд҃ꙋ помол:

Гд҃и Бж҃е Вседержи́телю, воꙁводѧ́й ѻ҆́блаки ѿ послѣ́днихъ землѧ̀, и҆ мо́лнїю въ до́ждъ сътвори́вый: и҆ꙁводѧ́й вѣ́тры ѿ сокро́вищъ свои́хъ: приꙁыва́ѧй во́дꙋ мо́рскꙋю, и҆ пролива́ѧй ю҆̀ на лицѐ всеѧ̀ землѧ̀: тебѣ́сѧ мл҃и́мъ, и҆ тебѐ ᲂу҆мл҃ѧ́емъ, и҆сповѣда́юще грѣхѝ на́ша, и҆ ѿ тебѐ бога́тыѧ млⷭ҇ти просѧ́ще: ѿверꙁѝ хлѧ́би нбⷭ҇ныѧ: запове́ждъ ѻ҆́блакѡмъ ѡ҆дожди́ти до́ждъ, ᲂу҆щедрѝ всѧ̀ зе́мнаѧ, ᲂу҆млⷭ҇рди́сѧ на ᲃта́рца, и҆ ю҆́ноты, и҆ младе́нцѧ съсꙋ́щїѧ ᲃо́сцѧ, на рабы̀ и҆ рабы́нѧ, на ᲃн҃ы и҆ дще́рѧ, и҆ на всѧ̀ ᲃкѡ́ты зе́мныѧ: и҆ꙁведѝ на́мъ хлѣ́бъ въ снѣ́дь, и҆ зла́къ ско́тѡмъ.

Прїймѝ мл҃е́нїѧ всѣ́хъ люді́й твои́хъ, и҆ да не пре́ꙁриши воꙁдыха́нїѧ ᲂу҆бѡ́гихъ, ни́же ꙗ҆́ростїю твое́ю ѡ҆бличи́ши на́съ, ни гнѣ́вомъ твои́мъ пока́жеши ны, ни́же да растли́ши гла́домъ, и҆ жа́ждею лю́ди твоѧ̀.

Всѣ́хъ бо ѻ҆́чи на́тѧ ᲂу҆пова́ютъ, прїѧ́ти ѿ тебѐ пи́щꙋ въ бл҃говре́мѧ:

На́тѧ надѣ́емсѧ, и҆ ра́ꙁвѣ тебѐ и҆́нагѡ Бг҃а не зна́емъ, и҆ ѿ тебѐ бога́тыѧ млⷭ҇ти ѡ҆жида́емъ:

Ꙗ҆́кѡ бл҃гъ и҆ чл҃кѡлю́бецъ Бг҃ъ є҆сѝ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Ли́къ:

А҆ми́нь.

Гд҃и Бж҃е на́шъ, вѣ́мы ꙗ҆́кѡ недосто́йни є҆смы̀ твои́хъ щедрѡ́тъ, и҆ нѣ́смы досто́йни воꙁвестѝ ѻ҆́чи на́шѧ, и҆ зрѣ́ти на́ нб҃о, и҆ ста́ти пре́дъ тобо́ю, и҆ проше́нїѧ на́ша привноси́ти къ тебѣ̀, ничто́же бо бл҃го сотвори́хомъ, ꙗ҆́кѡ да проше́нїѧ нш҃ѧ полꙋ́чимъ, и҆бѡ̀ твое́ю неище́тною блгⷭ҇ты́нею, ѿ небы́тїѧ на́съ въ є҆́же бы́ти приве́дъ, ѻ҆́баꙁомъ твои́мъ поче́лъ є҆сѝ, и҆ тва́ръ всю̀ на́мъ покори́лъ є҆сѝ, но мы толи́кѡ ѡ҆бл҃годѣтел̾ствова́ни бы́вше, ꙗ҆́коже вра́ꙁи предста́вихѡмсѧ: и҆ тебѐ бл҃годѣ́телѧ за́повѣди пре́ꙁрѣхѡмъ, и҆ жи́тїе поро́чно, и҆ ᲂу҆́мъ скве́рный и҆ нечи́стый стѧжа́хѡмъ: и҆ не то́чїю твою̀ любо́въ ѿверго́хѡмъ, но и҆ ꙗ҆́коже звѣ́рїе дрꙋ́г къ дрꙋ́гꙋ быва́емъ, и҆ пло́ти дрꙋ́гъ дрꙋ́га снѣда́емъ, лихоимстве́ннагѡ ра́ди ѻ҆́браꙁа, и҆ непра́веднагѡ ра́ди нра́ва на́шегѡ: ка́кѡ ᲂу҆́бѡ досто́йни є҆смы̀, твоѧ̀ бл҃годѣ́телства воспрїѧ́ти: ты́ бо пра́веденъ є҆сѝ, мы́ же непра́ведни: ты люби́ши, мы́ же враждꙋ́емъ: ты бл҃госе́рдъ є҆сѝ, мы́ же небл҃госе́рди: ты бл҃годѣ́тель є҆сѝ, мы́ же хи́щници: коѐ ᲂу҆́бѡ ѻ҆бще́нїе къ тебѣ̀ и҆́мамы, ꙗ҆́кѡ да и҆ твои́мъ бл҃ги́мъ приѡбщи́мсѧ; и҆сповѣдꙋ́емъ пра́вдꙋ твою̀, поꙁнава́емъ же непра́вдꙋ на́шꙋ. проповѣдꙋ́емъ бл҃годѣѧ́нїѧ твоѧ̀, тма́мъ см҃ртємъ ѡ҆сꙋжде́нїѧ досто́йни сꙋ́ще.

Се подъ твою дѣйстви́телнꙋю, и҆ всесодержа́щꙋю рꙋ́кꙋ пребыва́емъ, ᲂу҆до́бнѡ ᲂу҆́бѡ є҆́стъ твое́й всеси́лной рꙋцѣ̀, ꙗ҆́кѡ въ мгнове́нїи ѻ҆́ка погꙋби́ти на́съ: и҆ є҆ли́кѡ ѿ на́шегѡ раꙁꙋмѣ́нїѧ и҆ ѿвраще́нїѧ, пра́веднѡ є҆́стъ на́съ поги́бели преда́ти, праведнѣ́йшїй ᲃꙋдїѐ.

Но твое́й непобѣди́мой блгⷭ҇ти, и҆ неиꙁрече́ннѣй добротѣ̀, нѣ́смы всѧ́кѡ досто́йни чл҃кѡлю́бивѣйшїй Влады́ко.

Сегѡ̀ ра́ди на неꙋсыпа́емое твоѐ млⷭ҇рдїе, и҆ непамѧтоꙁло́бнꙋю ᲂу҆тро́бꙋ дерꙁа́юще, прихо́димъ къ тебѣ̀ бл҃годѣ́телю, беꙁꙋ́мнїи и҆ небл҃года́рнїи, не преда́ждъ на́съ грѣ́хъ ра́ди на́шихъ въ рꙋ́цѣ сꙋ́щи, ни́же беꙁꙁакѡ́нїй ра́ди на́шихъ сокрꙋшѝ на́съ ᲂу҆́ꙁами гла́да: но бл҃гти ра́ди твое́ѧ пода́ждъ землѝ ю҆́же ѡ҆предѣлилъ є҆сѝ, и҆ достоѧ́нїю твое́мꙋ до́ждъ во́ленъ, и҆ и҆сполнѝ нѣ́дра зе́мнаѧ живоро́дными ти вода́ми: ᲃе́ бо предле́житъ ᲃі́ѧ ꙗ҆́коже Мт҃и и҆ᲃꙋше́нѣ и҆мꙋ́щаѧ со́сцѣ: ꙗ҆́коже ᲂу҆́бѡ ѻ҆́ныѧ со́сцы беꙁъмле́чна сме́рть принѡ́сѧтъ младе́нцꙋ, си́це и҆ землѧ̀ браꙁды своѧ̀ невла́жны и҆мѣ́ѧ, присвѧде́нїе тво́ритъ зла́кꙋ, и҆ растлѣ́нїе рожде́нїѧмъ свои́мъ прино́ситъ, и҆ гꙋби́тел̾ство на́мъ стра́шное и҆ см҃рть.

И҆бѡ̀ ѿ и҆ꙁъсꙋше́нїѧ гори́тъ, и҆ ꙗ҆́коже горѣ́нїемъ и҆ ꙗ҆́коже горѣ́нїемъ ѻ҆́гненнымъ проꙁѧбе́нїѧмъ присвѧда́ющимъ, поги́бель проѧвлѧ́етъ рожденїемъ є҆ѧ̀: но млⷭ҇тїю твое́ю посѣтѝ ю҆̀, и҆ водоно́сными ѻ҆́блаки во́ꙁдꙋхъ бл҃гораствоѝ, и҆ бога́тымъ твои́мъ до́ждемъ зе́млю ѡ҆росѝ, и҆ прꙁѧбе́нїѧ є҆ѧ̀ ѡ҆живѝ, и҆ воꙁвѣѧ́нїемъ добрѣ́йшихъ вѣ́трѡвъ плѡ́ды цѣ́лы и҆ по́лны сотворѝ, и҆ ᲂу҆множѝ ѧ҆̀ бл҃гоꙋтро́бїемъ си, тѣ́ми бо ѡ҆предѣли́лъ є҆сѝ тѣле́сный живо́тъ съдержа́ти. А҆́ще бо не ты во́лнымъ си до́ждемъ подасѝ блгⷭ҇ть, землѧ̀ на́шѧ не да́стъ пло́да свое́гѡ: но мнѡ́жества ра́ди щедрѡ́тъ твои́хъ ᲂу҆слы́ши мл҃нїе на́съ недосто́йныхъ рабѡ́въ твои́хъ.

Ты́ бо є҆сѝ и҆сто́чникъ млⷭ҇рдїѧ, и҆ бл҃ги́х пода́тель, и҆ тебѣ̀ сла́вꙋ воꙁсыла́емъ, съ беꙁнача́лнымъ ти Ѿц҃емъ, и҆ съ прⷭ҇ты́мъ и҆ бл҃ги́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

Влады́ко Гд҃и І҆и҃с Хє҃ Бж҃е на́шъ, ᲃло́вомъ ᲃвои́мъ всѧ́ческаѧ ѿ небы́тїѧ приведы́й, пе́рсть вꙁе́мый ѿ землѧ̀, и҆ ᲃъꙁда́вый чл҃ка, и҆ дш҃ею ᲂу҆́мною и҆ Ꙍ҆браꙁомъ твои́мъ почты́й тогѡ̀, и҆ рекі́й:

Растѣ́тесѧ и҆ множи́тесѧ, и҆ наполнѧ҆йте зе́млю: даѧ́й ᲃко́тѡмъ пи́щꙋ, и҆ пте́нцемъ вра́новымъ: и҆́же въ вели́цѣмъ и҆ ᲃп҃си́телномъ вопло́ти Прише́ствїи твое́мъ, пре́жде ᲂу҆́бѡ се́дмі́ю, пото́мъ же пѧ́тїю хлѣ́бѡвъ, ти́сѧща насыти́лъ є҆сѝ мнѡ́ги:

Са́мъ всебл҃гі́й Влады́ко, и҆ твоѧ̀ лю́ди сі́ѧ приꙁыва́ющїѧ Прст҃о́е твоѐ И҆мѧ̀, твое́ю вседѣ́телною, и҆ великодарови́телною дини́цею бога́тнѡ препита́й.

При́ꙁри Гд҃и на ᲂу҆бо́гїѧ лю́ди твоѧ̀, ѿверꙁа́ѧй рꙋ́кꙋ твою̀ и҆ насыща́ѧй всѧ́кое живо́тно бл҃говоле́нїѧ, и҆ ᲂу҆щедрѝ всѣ́хъ млⷭ҇тивнѡ: Ты́ бо Влады́ко чл҃кѡлю́бче є҆ди́нъ є҆сѝ Ѻ҆ц҃ъ всѣ́хъ на́съ, и҆ къ тебѣ̀ є҆ди́номꙋ ѻ҆́чи воꙁвѡ́димъ ꙗ҆́кѡ ѿдое́ное на мт҃ръ свою̀:

Твоѐ є҆́стъ ᲃло́во пребл҃гі́й Влады́ко, проси́те, и҆ да́ст̾сѧ ва́мъ: и҆щи́те, и҆ ѡ҆брѧ́щете.

Пода́ждъ ᲂу҆́бѡ просѧ́щимъ ны́нѣ Влады́ко, съ дх҃овною пи́щею, и҆ потре́бнꙋю пло́ти, и҆ препита́й а҆́чꙋщїѧ твоѧ̀ лю́ди, дѡ́жды вре́менны, и҆ бл҃горастворе́нїе во́ꙁдꙋхѡвъ, и҆ пло́дѡвъ и҆ꙁъѡби́лїе, плодонѡ́сїе же землѝ дарꙋ́й: въ не́дꙋꙁѣ, и҆ гꙋби́телствѣ, ѡ҆гне́вици, и҆ бѡ́лѣꙁнехъ раꙁли́чных бѣдствꙋ́ющихъ посѣтѝ.

И҆ꙁба́ви Гд҃и, И҆мѧ̀ твоѐ приꙁыва́ющїй се́й гра́дъ, и҆ всѧ́кїй гра́дъ и҆ стра́нꙋ, ѿ гла́да, гꙋби́телства, трꙋ́са, пото́па, ѻ҆гнѧ̀, меча̀, гнѣ́ва, дарꙋ́ѧ на́мъ млⷭ҇ти твоѧ̀:

Бл҃года́тїю беꙁнача́лнагѡ и҆ є҆диносꙋ́щнагѡ ти Ѿц҃а̀, и҆ Прⷭ҇та́гѡ и҆ є҆диночⷭ҇тнагѡ твое́гѡ Дх҃а:

Мл҃тва́ми же и҆ мл҃ен̾ми Преблⷭ҇ве́нныѧ Бц҃а, и҆ Бг҃опроповѣ́дныхъ твои́хъ А҆пⷭ҇лъ, и҆ всѣ́хъ ᲃт҃ы́хъ твои́хъ.

Ли́къ:

А҆ми́нь.

Гд҃и Гд҃и, Прⷪ҇ркомъ твои́мъ И҆́лїею раꙁдрѣши́вый беꙁдо́ждїе, и҆ дожде́вныѧ тꙋ́ча на лицѐ землѝ ѡ҆дожди́вый, и҆ ѻ҆би́лїемъ пло́дѡвъ напита́вый лю́ди твоѧ̀ бога́тнѡ:

Са́мъ и҆ ны́нѣ неиꙁрече́нною бл҃гостїю си ᲂу҆мл҃ѧ́емъ, дарꙋ́й землѝ дѡ́жды ми́рны, въ ᲂу҆мнѡже́нїе лѣ́тныхъ пло́дѡвъ.

Ты́ бо є҆сѝ вѡ́ды въ своѧ̀ мѣ́ста поста́вивый, и҆ зе́млю покрыва́ющꙋю ю҆̀ тмꙋ̀, ви́димꙋ соста́вивый.

Ты́ є҆сѝ повелѣ́вый є҆́й многораꙁли́чны проꙁѧба́ти плѡ́ды, въ наслажде́нїе на́ше.

Ты́ є҆сѝ, грѣха̀ ра́ди и҆́же прѝ Нѡ́и чл҃кѡвъ, и҆сто́чники бе́ꙁднъ раꙁверꙁы́й, и҆ хлѧ́би ѿверꙁы́й нбⷭ҇ныѧ, и҆ лицѐ землѝ наводни́вый въ и҆стребле́нїе всѧ́коѧ па́сти:

Ты́ є҆сѝ вѡда́ми покрыва́ѧй превы́спрнѧѧ своѧ̀.

Ты́ є҆сѝ ѻ҆́блаки воꙁводѧ́й, и҆ си́мъ повелѣва́й дожде́вныѧ и҆спꙋща́ти ка́плѧ.

Ты́ є҆сѝ и҆ꙁводѧ́й во́дꙋ мо́рскꙋю, и҆ и҆ꙁлива́ѧй ю҆̀ на лицѐ землѝ.

Ты́ є҆сѝ до́жды ѡ҆предѣли́вый, и҆ ка́плѧ дожде́вныѧ раꙁлꙋчи́вый, и҆ рѣ́ки во́дныѧ наполнѧ́ѧй, и҆ напаѧ́й зе́млю, и҆ ᲂу҆поева́ѧй бра́ꙁды є҆ѧ къ ᲂу҆множе́нїю кра́сныхъ є҆ѧ̀ пло́дѡвъ.

Ты́ є҆сѝ проходѧ́й мо́ре, и҆ рѣка́мъ прохѡ́дища съдѣлова́ѧй, и҆ во́дꙋ и҆ꙁъ ка́мене и҆сточа́ѧй, и҆ го́рестъ во́днꙋю въ сла́достъ прелага́ѧй.

Вѣ́ст̾ во́дное є҆стество̀ свое́гѡ тво́рца, зна́етъ свое́гѡ Влады́кꙋ: не несвѣ́стъ до́лжное своѐ слꙋже́нїе:

Е҆гда̀ ви́дитъ тебѐ гнѣ́вающагосѧ на́ ны, и҆лѝ беꙁмѣ́рнѡ движи́мѡ, поги́бель съдѣлова́етъ, и҆лѝ ᲂу҆де́ржанѡ быва́етъ, и҆ сꙋ́ша зе́млю ѡ҆бе́млетъ, и҆ палѧ́щїй во́ꙁдꙋхъ быва́етъ, и҆ зе́маѧ проꙁѧбе́нїѧ присвѧда́ютъ, и҆ мы̀ въ рꙋ́цѣ бедова́нїѧ впада́емъ:

Е҆́гда же па́ки ви́дитъ тебѐ чл҃кѡлю́бца Бг҃а, бл҃гоꙋвѣтлива и҆ бл҃гопремѣни́телна, до́жды готꙋ́етъ, и҆ ка́плѧ на́ зе́млю и҆спкща́єтъ, и҆ во́ꙁдꙋхъ бл҃годы́шꙋщїй быва́етъ, и҆ землѧ̀ твоѐ повелѣ́нїе ᲂу҆слы́шавши, и҆ꙁѡби́лныѧ плѡ́ды ѿ свои́хъ ᲂу҆до́лїй проꙁѧба́етъ.

Тебѐ ᲂу҆бѡ тво́рцꙋ и҆ съꙁда́телѧ всѧ́ческихъ мл҃имъ, вопїюще: Пом҃лꙋй на́съ Гд҃и, пом҃лꙋй на́съ: помѧнѝ ꙗ҆́кѡ дѣ́ла рꙋ́къ твои́хъ є҆смы̀, во́н̾ми неможе́нїю є҆стества̀ нш҃гѡ, ты́ бо сътвори́лъ є҆сѝ на́съ, ви́ждъ пти́цъ стена́нїе, и҆ ско́тѡвъ рыка́нїе, младе́нческїй пла́чъ, ю҆но́шеское въпїе́нїе, ста́рецъ ѡ҆каѧ́нствѡ, ни́щихъ лише́нїе, вдови́цъ ѡ҆ставле́нїе, ᲂу҆бо́гихъ недоста́тчество, и҆ всѣ́хъ люді́й твои́х мл҃ебный гла́съ, и҆ посѣтѝ зе́млю, и҆ ᲂу҆по́й ю҆̀ тꙋ́чными дѡ́жды: и҆ꙁѡбраꙁи́телнѣ бо недоꙋмѣва́етсѧ ᲂу҆вѧде́нїемъ свои́хъ си проꙁѧбе́нїй, члчⷭ҇кимъ же и҆ скѡ́тскимъ поги́белнымъ преще́нїемъ.

Водо́ю па́гꙋбꙋ наве́дъ и҆́ногда, помѧнꙋ́лъ є҆сѝ Нѡ́ѧ нии́магѡ въ Ковче́ꙁѣ ѿ беꙁмѣ́рныхъ вѡ́дъ ѡ҆́ныхъ, вспомѧнꙋ́л же є҆сѝ и҆ на пти́цѧ, и҆ скѡ́ты, и҆ звѣ́рѧ, и҆ полꙁа́ющаѧсѧ, и҆ наве́лъ є҆сѝ Дх҃ъ на землѝ, и҆ преста̀ вода̀: и҆ Нѡ́ѧ, и҆ съ ни́мъ живо́тнаѧ ꙗ҆́коже ᲃѣ́мѧ съблю́лъ є҆сѝ, въ бы́тїе вто́ромꙋ мі́рꙋ: и҆ ны́нѣ въ съдержа́щей сꙋ́щи во́ꙁдꙋхъ, гꙋби́телствомъ претѧ́щїй см҃ртїю бл҃горастворѝ, помѧнꙋ́въ ᲂу҆пова́ющїѧ на́ тѧ лю́ди: воспомѧнѝ и҆ на пти́цѧ, помѧнѝ и҆ ᲃкѡ́ты, и҆ дх҃ъ росы̀ наведѝ, и҆ сꙋ́ша да преста́нетъ, и҆ ᲃѣмена̀ зе́мнаѧ ᲂу҆плодоносѝ, въ препита́нїе чл҃кѡмъ и҆ живѡ́тнымъ: и҆ всѧ̀ па́ки и҆́же ѿ тебѐ про́мысла сподобѝ:

Ты́ бо є҆сѝ проꙁѧба́ѧй па́житъ ско́тѡмъ, и҆ травꙋ̀ на слꙋжбꙋ чл҃кѡмъ, и҆ ты́ є҆сѝ и҆ꙁводѧ́й хлѣ́бъ ѿ землѧ̀, и҆ вино̀ и҆сточа́ѧй, и҆ є҆ле́ѡмъ ᲂу҆маща́ѧй члчⷭ҇каѧ лица̀: ꙗ҆́кѡ да подава́емымъ ѿ тебѐ бл҃ги́мъ въ дово́лъ причаща́ющесѧ, во весе́лїи се́рдца сла́вимъ твою̀ бл҃гост̾ Ѿц҃а̀, и҆ ᲃн҃а, и҆ ᲃт: Дх҃а, ны́нѣ и҆ прⷭ҇нѡ и҆ во вѣ́ки вѣ́к: А҆ми́нь.