Акафист святым праведным Марфе и Марии, сестрам Лазаря
Празднование в Неделю святых жен-мироносиц
Кондак 1
Избра́нныя от Бога служительницы новыя благодати, праведнаго Ла́заря боголюбивыя сестры́, Марфо и Марие, вы дея́нием и разумением в вере и любви Христу последовали есте́ и ныне с лики святых жен пребываете, наслаждающеся райских красот и веселия. Темже, яко иму́щия дерзновение ко Господу, Того прилежно молите от бед и скорбе́й и падений греховных избавити нас, да вами научившеся угождати Христу Богу, не престанем со умилением взывати Ему: Аллилуиа.
Икос 1
Ангелов и человеков Царь и Господь, добро́ту душ ваших прови́дев и до конца вас возлюбив, во дни земныя жизни Своея́ благословенный дом ваш посеща́ше и брата вашего Ла́заря от мертвых воскреси́. Мы же грешнии, таковое человеколюбное снисхождение Его воспоминающе, во умилении сердец наших вопием вам та́ко: Радуйтеся, всем сердцем, всею душе́ю и всею мыслию вашею Бога возлюбившия; радуйтеся, любовь вашу не словом или язы́ком, но делом и истиною яви́вшия. Радуйтеся, любовию веру во Христа Сына Божия от Отца Небеснаго сниска́вшия; радуйтеся, верой, послуша́нием, де́лы любве́ и милосердия Ему послужившия. Радуйтеся, тем Царствие Небесное наследовавшия; радуйтеся, дев непорочных и жен целомудренных похвало́ и украшение. Радуйтеся, Марфо и Марие, образ веры и любве́ нам показу́ющия.
Кондак 2
Ведяще, праведныя жены́, яко Господь, не имы́й где главы подклони́ти, прии́дет к вам, потща́лися есте́ в дому́ вашем, Его яко Божественнаго Учителя с верою и любовию послу́шати, и со усердием многим послужи́ти Ему. Темже научаете и нас, Ему яко Богу нас ра́ди воплотившемуся, неленостно служити и благоговейно воспевати: Аллилуиа.
Икос 2
Научая нас и страннолюбия не оставля́ти, и о слове Божием усердно прилежа́ти, не о хлебе бо единем жив будет человек, но о всяком слове Божием, Господь и Учитель наш и службы Марфы трудолюбныя не отве́рже, и Марии́но седе́ние у ног Его попремногу ублажи́. Темже и мы боголюбивей дво́ице оной воспоем: Радуйся, Марфо, Христа, нас ра́ди воплотившагося, в дому́ твоем прия́вшая; радуйся, в служении твоем на потребу плоти Его не отверже́нная. Радуйся, и нас де́лы милосердия служити Ему научающая; радуйся, Марие, у ног Иисусовых словом уст Его насыща́вшаяся. Радуйся, единое на потребу, яко благую часть, избравшая; радуйся, ревности ра́ди о слы́шании словес Господних со блаженными Им сопричте́нная. Радуйтеся, Марфо и Марие, образ веры и любве́ нам показу́ющия.
Кондак 3
Силою Божественною укрепля́ем, унынием не уязви́лися есте́, егда узре́ли брата вашего болезнию лютою истоща́ема, но к Целителю неду́гов, Господу Иисусу со упованием послали, глаголюще: «Господи, егоже лю́биши, боли́т». Сим после́дующе, и мы во всяком обстоя́нии унынию да не предадимся, со упованием Христу Богу вопиюще: Аллилуиа.
Икос 3
Любля́ше Иисус Марфу и сестру ея и Ла́заря и, веру их в грядущее Царствие жизни вечныя испыту́я и утверждая, рече́: «Сия́ болезнь несть к смерти, но к славе Божией, да прославится Сын Божий ея ра́ди». Вы же, о боголюбивыя сестры, и пред лице́м смерти брата вашего верою и любовию ко Христу духом горяще, в Божественней силе Его не усумнилися есте́. Сего ра́ди приими́те от нас похваления таковая: Радуйтеся, во уныние безнадежное во обстоя́нии и скорби не впа́дшия; радуйтеся, обремене́нных скорбьми́ житейскими тем ободряющия. Радуйтеся, печали вашей ко Врачу душ и телес, Господу Иисусу, со смиренным упованием помыслы своя обратившия; радуйтеся, лица́ Его не ви́дяще, во блазей покорности Ему пребывшия. Радуйтеся, во испытании сем веру кре́пку яко Авраамову яви́вшия; радуйтеся, в злостраданиих терпение твердое, яко И́ов, показавшия. Радуйтеся, Марфо и Марие, образ веры и любве́ нам показу́ющия.
Кондак 4
Ведая, я́же хо́щет сотворити, Всемогущий Господь и Спас наш, рече́ учеником Своим: «Ла́зарь, друг наш у́спе. Но иду́, да возбужу́ его»; науча́я всех во свете лица Божия ходити и Пода́телю жизни воспевати: Аллилуиа.
Икос 4
Мнозии от иудей приидо́ша к Марфе и Марии, да уте́шат их о Ла́заре, брате их. Сестры же, отбего́ша их, яко не иму́щих о Христе Иисусе упования. Марфа к Единому Уте́шителю стопы́ своя с радостию напра́ви, егда Той Вифании дости́же. Таковую крепкую любовь сестер Лазаревых ко Христу и веру их зря́ще, радостными гла́сы воспоем им таковая: Радуйтеся, добро́тою душ ваших неверных иудеев окамене́нная сердца́ покорити возмо́гшия; радуйтеся, не су́етному унынию, но Божию благоволе́нию себя предавшия. Радуйтеся, на единую благость Христову в печали вашей надежду возложи́вшия; радуйтеся, в сре́тение Его со тща́нием стопы́ ваша направившия. Радуйтеся, во уповании вашем от Могу́щаго спасти оправданныя; радуйтеся, утешения в ско́рбех не от людей, но от Бога искати нас научающия. Радуйтеся, Марфо и Марие, образ веры и любве́ нам показу́ющия.
Кондак 5
Марфа блаженная, егда сре́те Господа, утешения от Него и́щущи, рече́: «Господи, аще бы Ты зде был, не у́мерл бы брат мой. Но и ныне вем, яко ели́ка аще просиши от Бога, даст Тебе Бог». Емуже от всея́ души нашея и мы вопием: Аллилуиа.
Икос 5
Божественное Свое смотрение о нашем спасении показу́я, Господь Иисус, яко жизни и смерти Владыка, благоволи́ рещи́ тебе, блаженная Марфо: «Воскреснет брат твой». И паки: «Ве́руяй в Мя, а́ще и у́мрет, оживе́т. Ве́риши ли сему?» – вопроси тя. Ты же отвеща́ Ему: «Ей, Господи, верую, яко Ты Христос, Сын Божий, гряду́щий в мир». Сего ра́ди, вере во Христа, Сына Божия, тобою науча́емии, восхваляем тя си́це: Радуйся, блаженная Марфо, обетова́ние о воскресении брата твоего от Сама́го Жизнодавца услышавшая; радуйся, яко вопроше́нная от Него о вере твоей, не плоти и кро́ве, но гла́са Отца Небеснаго послу́шавшая. Радуйся, яко от Него науче́нная, Христа Сына Божия твердо исповедала еси; радуйся, яко тем камень веры, на немже созда́ Господь Церковь Свою, яви́вшая. Радуйся, во испове́дании твоем Петру Первоверхо́вному апостолу уподо́бившаяся; радуйся, равноапостольнаго ублаже́ния воистину достойная. Радуйтеся, Марфо и Марие, образ веры и любве́ нам показу́ющия.
Кондак 6
Трости надло́мленныя не преломля́яй, Человеколюбец Господь, егда виде Марию и пришедшии с ней иудеи плачущии, якоже любля́ше Лазаря, прослези́ся Сам. Да и мы немощни́и, в ско́рбех су́ще, безтрепетно к Нему со слеза́ми притекаем, вопиюще Ему: Аллилуиа.
Икос 6
Воистину благословен о брате твоем плач твой, Марие, егоже видя прослези́ся Иисус. Сего ра́ди со умилением ублажаем тя си́це: Радуйся, боголюбивая Марие, в серафи́мстей любви твоей ко Господу, и к сро́дником любве́ своея́ не угаси́вшая; радуйся, плачем твоим о Ла́заре нас, во окамене́нии сердечнем пребывающих, обличи́вшая. Радуйся, Христа Бога сле́зы о падшем создании Своем источи́ти подви́гшая; радуйся, в слезах Господа Иисуса, не́мощем нашим состра́ждущи, еле́й утешения всем плачущим и боле́знующим показа́вшая. Радуйся, и сама в ско́рбех наших сострадати нам могу́щая; радуйся, с сестрою твое́ю Марфою милосердия сестрам первоначальница богоугодная. Радуйтеся, Марфо и Марие, образ веры и любве́ нам показу́ющия.
Кондак 7
Всеве́дый по Божеству Своему, человеческое естество́ показу́юще, о Ла́заре вопроша́л еси, Господи Иисусе: «Где положили его». И камень от гроба взя́ти повелел еси, да возсмерде́нием смерти заградятся неверных уста. Мы же, ве́рнии, со дерзновением Тебе, победити смерть пришедшему, вопием: Аллилуиа.
Икос 7
Немощь естества́ человеческаго явля́ющи, сестра умершаго, Марфа, глаго́ла Иисусу: «Господи, уже смерди́т: четверодне́вен бо есть». Мария же, зря́ще камень отвале́н от гроба, в молчании пребыва́ше. Сему Мари́ину молчанию со умилением внима́юще, с Марфою же маловерие свое Господу дерзновенно исповедующе, воззовем к ним таковая: Радуйся, Марие, яко ко гробу смердя́щаго в претре́петнем молчании за Христом, пришедшая; радуйся, яко сим всех нас в послуша́ние веры разум покоряти научившая. Радуйся, Марфо, яко немощь веры нашея превозмогати научающая; радуйся, яко всем нам: ей, Господи, верую, яко Ты Христос, Сын Божий, глаго́лати указавшая. Радуйтеся, блаженныя сестры, в не́мощех душ и телес ваших от Христа не отступившия и Ему любовию последовавшия; радуйтеся, на высоту благодатнаго разумения Самим Всеведцем возведе́нныя. Радуйтеся, Марфо и Марие, образ веры и любве́ нам показу́ющия.
Кондак 8
Славу Свою, яко Единороднаго от Отца, всем верным явля́я, хвалу Отцу Своему воздав, Иисус гласом великим воззва́: «Ла́заре, гряди́ вон». И бездыха́нный, дающаго дыхание послу́шав, от смерти возста́ и от гроба изы́де; да чудо сие́ зря́ще, ку́пно и мы с ним Победителю смерти воспои́м: Аллилуиа.
Икос 8
Чудо ве́лие и страшное сотвори Христос Бог наш, Ла́заря четверодне́внаго от мертвых воздви́гнув. Да и нас всех веру в Него, яко Сына Божия, утверди́т, безсмертие души и общее всех воскресение уверя́я. Мы же, Божественное поклонение Сотворшему сие́ воздаю́ще, ублажи́м сестры воскреше́ннаго Им и воззовем к ним сицева́я: Радуйтеся, праведнаго Ла́заря сестры, Христа нелицемерне возлюбившия; радуйтеся, Христом за верность вашу возлюбленныя. Радуйтеся, общее воскресение прежде Страсте́й Христовых в вере узре́вшия; радуйтеся, верою вашею и нашу веру укрепляющия. Радуйтеся, ученицы́ Христовы достосла́вныя; радуйтеся, лика апостольскаго истинныя причастницы. Радуйтеся, Марфо и Марие, образ веры и любве́ нам показу́ющия.
Кондак 9
Сыны́ тмы́, зря умершаго и гласом Божиим от тления возставшаго, в ожесточении сердец не вероваша Христу даже до сего дне, во осле́плении су́ще. Мы же, сих безумию не прилага́ющеся, но в общее воскресение по гласу Сына Божия верующе, Ему, яко Жизнодавцу, велегла́сно и вседушно возопии́м: Аллилуиа.
Икос 9
Преславная и страшная в Вифа́нии сотворив, Иисус, прежде шести дней Пасхи, паки прии́де в весь сию́. И сотвори Ему вечерю, и бе Ла́зарь един от возлежа́щих с Ним. Вы же, присноблаженныя сестры, Пода́телю всяческих благодарны су́ще, Марфа служа́ше Ему всеусердне, Мария же ми́ро на но́зе Его возлия́. Сего ра́ди, в радость вашу вни́ти жела́юще, и мы со умилением зовем вам: Радуйтеся, богомудрыя жены́, хвалы́ и благодарения благоде́ющему Господу преиспо́лненныя; радуйся, Марфо трудолю́бная, се уже другой раз на ве́чери Господу послужившая. Радуйся, в благодарнем служении сем Господем милостивно прия́тая; радуйся, Марие, Сладчайшему Иисусу но́зе ми́ром многоценным пома́завшая. Радуйся, во обличе́ние Иудиных злохуле́ний похваления Иисусова сподо́бившася; радуйся, яко многоценнаго мира на но́зе Христовы возлия́нием и нас благоле́пие дому Божия любити и о том прилежа́ти поучаеши. Радуйтеся, Марфо и Марие, образ веры и любве́ нам показу́ющия.
Кондак 10
Марфе и Марии ве́рнии подражающе, кийждо во своем чи́не, ко Христу Спасу припаде́м и, прося́ще от Того исцеления не́мощей наших и от сна греховнаго воскрешения, благодарными усты́ воспои́м Ему: Аллилуиа.
Икос 10
Верныя до конца во служении вашем Христу, во днех плоти Его пребывшия, и самовидцы Страсте́й Его быти сподо́бившияся, к погребению Воскресителя Ла́зарева, славныя Марфо и Марие, посреде́ мироносиц яви́лися есте. С ними предстоя́ще ныне Престолу Славы Божия, молитвами вашими к песнопенному тех лику совокупи́те и нас, ваши подвиги прославляющих: Радуйся, Марфо, в твоем Христу многопопечи́тельнем служении, якоже и во испове́дании, поревновавшая; радуйся, странноприи́мницам и милосердия сестрам подвигоположница. Радуйся, Марие, возлюбленному ученику Христову Иоанну, в пламенней любви к Тому уподо́бившаяся; радуйся, непорочных дев, Христу в житии своем уневе́стившихся, руководительница нело́жная. Радуйтеся, боголюби́выя сестры, и де́ятельным житием, и вниманием сердечным последования Христу ревнительницы изрядныя; радуйтеся, на обоих сих путях угождения Господу жити братии вку́пе му́дре нас научающия. Радуйтеся, Марфо и Марие, образ веры и любве́ нам показу́ющия.
Кондак 11
Кий глагол довле́ет по достоянию воспети Воскресения Христова радость всемирную, ея́же вы, со прочими жена́ми мироносицами, в сей ве́лий и святы́й день причасти́лися; темже и мы, Воскресения Христова величие боголепное сла́вяще, пое́м Христу: Аллилуиа.
Икос 11
Всякое искушение преити́ моля́щеся и живот вечный улучи́ти хотя́ще, яко верныя ученицы́ Христовы, ка́яждо во своем пути, оба́че единым духом веры и любве́ Ему порабо́тали, отоню́дуже и радостей во Царствии Его сподо́билися есте́. Сеrо ра́ди, труды и подвиги ваша воспоминающе и славе вашей во Царствии Христовом радующеся, воспеваем вам таковая: Радуйтеся, верныя ученицы́ Христовы, не человеком, но Богу в житии вашем угодившия; радуйтеся, нищетою духовною Царствие Небесное стяжа́вшия. Радуйтеся, духом кротости землю обетования насле́довавшия; радуйтеся, милосердия де́лы милостей от Господа во Царствии Его сподо́бившияся. Радуйтеся, сердцем чистым Бога Слова зря́щия; радуйтеся, исповедницы веры Христовы, мзду мно́гу на небесе́х прия́вшия. Радуйтеся, Марфо и Марие, образ веры и любве́ нам показу́ющия.
Кондак 12
Благодатию Всемилостиваго Бога прия́ли дерзновение ве́лие к Нему, о блаженныя сестры. Моления ваша и проше́ния о нас грешных к Престолу Славы Его вознесите, да спаса́еми предста́тельством вашим, Воскресшему и вся с Собою воскресившему ангельскую песнь воспои́м: Аллилуиа.
Икос 12
Пою́ще ныне со всеми небесными силами Трисвятую песнь дивному во святых Своих Богу, о преблаже́нныя сестры Ла́заревы, при́зрите с высоты небесныя на нас грешных, волна́ми моря житейскаго обурева́емых, тихаго пристанища жаждущих и вас си́це любовию величающих: Радуйтеся, на небеси́ во славе со ангелы и всеми святыми царствующия; радуйтеся, и на земли́, в Церкви Христовой песненно прославляемыя. Радуйтеся, яко зве́зды небесныя во тьме века сего добродетельми вашими сияющия; радуйтеся, Богом данныя нам в житии нашем наставницы. Радуйтеся, милосердия служением Христу первоначальницы; радуйтеся, теплыя о нас к Богу молитвенницы. Радуйтеся, Марфо и Марие, образ веры и любве́ нам показу́ющия.
Кондак 13
О предивная боголюбивая дво́ице, верные ученицы́ Христовы, Марфо и Марие преславныя, огнь любве́ и веры в душа́х ваших возже́гшия и сих ра́ди в Царство Славы силою Воскресшаго вшедшия, испроси́те нам у Христа Бога нашего помощи пути вашими зде на земли́ жительствовати, да во обители Отца Небеснаго всели́вшеся, ку́пно с вами и всеми святыми и мы на Престоле Славы Седящему воспои́м ангельскую песнь: Аллилуиа.
Этот кондак читается трижды, затем 1-й икос «Ангелов и человеков Царь...» и 1-й кондак «Избранныя от Бога...».
Молитва святым праведным Марфе и Марии, сестрам Лазаря
О святы́я и всехвальныя ученицы́ Христовы, боголюбивыя Марфо и Марие! Умолите возлюбленнаго вами и вас возлюбившаго Сладчайшаго Иисуса, егоже вы испове́дали есте́ Христа, Сына Божия, да даст и нам грешным грехов оставление, в вере правой нелицемерное и твердое стоя́ние. Всели́те в сердца́ наша дух страха Божия, смиреннаго на Бога упования, терпения и к ближним милосердия. Избавите нас молитвами вашими от искушений житейских, бед и напастей, да тихое и мирное житие пожи́вше зде, с помыслы непорочными и сердцем чистым, с дерзновением веры и упования предста́нем на оный Страшный Суд и, добрый ответ на нем воздавше, радости неизрече́нныя в Царствии Небеснем сподо́бимся во веки веков.
Молитва иная, одной жены молящейся
О блаженныя и святы́я жены, верою и любовию Христу Богу последовавшия и во обители Отца Небеснаго всели́вшияся! К вам ныне аз грешная (имя) прибегаю и смиренно молю: Научи́те мя и помози́те ми ходи́ти пред Богом путями вашими непреткновенно и вечную ку́пно с вами жизнь наследовати. О Марфо праведная, твердым испове́данием веры твоея́ Христу угодившая, укрепи слабую веру мою. О службе Господу и братиям нелицемерне и всеусердне прилежа́вшая, помози́ и мне служение мое безропотно и вседушевно проходи́ти. Сестру твою, некогда в скорби су́щу, ко Христу воззва́ла еси, ре́кши ей: «Учитель пришел и глаша́ет тя». Ныне предста́ни мне в трудный час испытания веры и любве́ моея́ и в глубине сердца возвести́ ми, яко Господь Иисус незримо́ гряде́т, да путе́м испытаний привлече́т мя к Себе! Испроси мне, о мати святая, у Господа нашего силу и крепость, да возставши скоро, притеку́ к Нему, поклонюся Ему и в смиренней любви Его мир и спасение души моей обря́щу. И ты, о боголюбивая Марие, у ног Иисусовых единое на потре́бу обре́тшая, помолися Ему благу́ю часть спасаемых и мне грешней улучи́ти. Ми́ро благовонное в дар благодарения Христу Жизнодавцу прине́сшая, умоли ныне Его и душе́ моей пода́ти: ми́ро молитвы и покаяния сле́зы, чистоты и добрых дел благоухание, яко да во обновле́нное всеми сими сердце мое Господь прии́дет и обитель Себе сотвори́т. К вам, о святы́я праведныя жены Марфо и Марие, припа́даю и смиренно молю: Не оста́вите мя в дни тяжких испытаний, да не соблазню́ся тленными прелестьми мира сего, наипаче же в час горький разлуче́ния души моея́ с телом, предста́ните мне и общаго Владыку нашего умоли́те, да при́зрит на мя во оскуде́нии сил моих милостивым оком и, простив вся прегрешения моя, возста́вит мя к жизни нескончаемой во блаженных обителех Отца Небеснаго. Аминь.