(л. рм҃ѳ ѡ҆б.) Знамєна́нїѧ ко є҆фесе́ємъ посла́нїѧ.

[а҃] Ѡ҆ и҆збра́нїи на́шемъ хрⷭ҇то́мъ, и҆ наказа́нїи, и҆ соверше́нїи.

[в҃] Моли́тва ѡ҆ ра́зꙋмѣ бл҃ги́хъ, введе́ныхъ въ на́съ хрⷭ҇то́мъ.

[г҃] Ѡ҆ присвое́нїи къ бг҃ꙋ ꙗ҆зы̑къ и҆ і҆ꙋдє́й хрⷭ҇то́мъ.

[д҃] Ѡ҆ да́ннѣй є҆мꙋ̀ бж҃е́ственнѣй премꙋ́дрости на просвѣще́нїе ꙗ҆зы̑къ, и҆ ѡ҆бличе́нїе бѣсѡ́въ.

[є҃] Моли́тва ѡ҆ цр҃кви, въ си́лꙋ и҆ любо́вь бж҃їю.

[ѕ҃] Оу҆че́нїе ѡ҆ любвѝ соедини́тельнѣй, а҆́ще и҆ дарова̑нїѧ раздѣле́на сꙋ́ть ко ѻ҆́бщей по́льзѣ.

[з҃] Ѡ҆ цѣломꙋ́дрїи и҆ пра́вдѣ, творѧ́щихъ на́съ бг҃ови́дны.

[и҃] Ѡ҆ є҆́же жи́ти на́мъ досто́йнѡ ст҃ы́ни, ѕло́бꙋ ѡ҆блича́юще не словесы̀, но дх҃омъ, и҆спо́лнены ѱалмы̀, а҆ не вїно́мъ.

[ѳ҃] Разчине́нїе дома́шнихъ слꙋже́нїй, нача́льствꙋємымъ, и҆ нача́льствꙋющымъ.

[і҃] Оу҆че́нїе во ѻ҆́бразѣ ѡ҆полче́нїѧ, ѡ҆ є҆́же по хрⷭ҇тѣ̀ си́лѣ. (л. р҃н)

Сказа́нїе ко є҆фесе́ємъ посла́нїѧ ст҃а́гѡ а҆пⷭ҇ла па́ѵла.

Сїѐ посыла́етъ ѿ ри́ма, не ᲂу҆̀ ви́дѣвъ ᲂу҆́бѡ и҆̀хъ, слы́шавъ же ѡ҆ ни́хъ. Вина́ же посла́нїѧ сїѧ̀ є҆́сть: є҆фе́сѧне вѣ́ровавше въ гдⷭ҇а на́шего і҆и҃са хрⷭ҇та̀, и҆́скреннюю и҆мѣ́ѧхꙋ въ него̀ вѣ́рꙋ и҆ во всѧ̀ ст҃ы̑ѧ любо́вь, и҆ хотѧ́хꙋ ѿ па́ѵла ᲂу҆тверди́тисѧ: ᲂу҆вѣ́дѣвъ ᲂу҆̀бо сїѐ а҆пⷭ҇лъ, пи́шетъ къ ни́мъ сїѐ посла́нїе ᲂу҆чи́тельно. И҆ пе́рвѣе ᲂу҆́бѡ сказꙋ́етъ не но́вꙋ бы́ти, є҆́же по на́съ та́инствꙋ, но и҆з̾ нача́ла, и҆ пре́жде сложе́нїѧ мі́ра, бы́вше сїѐ благоволе́нїе бж҃їе, ꙗ҆́кѡ хрⷭ҇тꙋ̀ ѡ҆ на́съ страда́ти, и҆ на́мъ тѣ́мъ спасти́сѧ. Та́же ѡ҆ призва́нїи ꙗ҆зы̑къ бесѣ́дꙋетъ, да пока́жетъ и҆̀хъ досто́йнѡ вѣ́ровавшихъ: и҆ ꙗ҆влѧ́етъ, ꙗ҆́кѡ призва́нїе на́ше бы́сть не человѣ́комъ, но і҆и҃съ хрⷭ҇то́мъ, и҆́же є҆́сть сн҃ъ бж҃їй. Да и҆ ѿ тогѡ̀ навы́кнꙋтъ, ꙗ҆́кѡ не человѣкослꙋжи́телє бы́ша вѣ́ровавше во хрⷭ҇та̀, но и҆́стиннїи бг҃очести́вїи. Сказꙋ́етъ же и҆ себѐ сегѡ̀ ра́ди по́слана бы́вша, да проповѣ́дꙋетъ є҆ѵⷢ҇лїе: и҆ ꙗ҆́кѡ и҆ ѡ҆ ни́хъ печа́шесѧ. Пото́мъ ᲂу҆чи́тєльна словеса̀, мꙋжє́мъ и҆ жена́мъ, ѻ҆тцє́мъ и҆ ча́дѡмъ, господє́мъ и҆ рабѡ́мъ, полага́етъ въ посла́нїи: вкꙋ́пѣ всѣ́хъ ѡ҆полчева́етъ на дїа́вола, и҆ бѣсѡ́въ є҆гѡ̀, глаго́лѧ проти́вꙋ и҆́хъ бы́ти на́шей бра́ни: и҆ ꙗ҆́кѡ нѣ́кїй до́бръ подви́жникъ, воѡрꙋжи́лъ всѣ́хъ словесы̀ на бѣсо́вское ѕлохи́трїе. И҆ си́це скончава́етъ посла́нїе. (л. р҃н ѡ҆б.)

КО Є҆ФЕСЕ́ЄМЪ ПОСЛА́НІЕ

СТ҃А́ГѠ А҆ПО́СТОЛА ПА́ѴЛА.

Глава̀ пе́рваѧ.

(заⷱ҇ сѕ҃і) [а҃] сⷯ а҃ Па́ѵелъ посла́нникъ Въ четверто́къ ѕ҃і недѣ́ли: Па́ѵелъ посла́нникъ і҆и҃съ хрⷭ҇то́въ, во́лею бж҃їею, ст҃ы̑мъ сꙋ́щымъ во є҆фе́сѣ, и҆ вѣ̑рнымъ ѡ҆ хрⷭ҇тѣ̀ і҆и҃сѣ: в҃ Блгⷣть ва́мъ и҆ ми́ръ, ѿ бг҃а ѻ҆ц҃а̀ на́шегѡ, и҆ гдⷭ҇а і҆и҃са хрⷭ҇та̀. г҃ Блгⷭ҇ве́нъ бг҃ъ и҆ ѻ҆ц҃ъ гдⷭ҇а на́шегѡ і҆и҃са хрⷭ҇та̀, блгⷭ҇ви́вый на́съ всѧ́цѣмъ бл҃гослове́нїемъ дх҃о́внымъ, въ нбⷭ҇ныхъ ѡ҆ хрⷭ҇тѣ̀. д҃ Ꙗ҆́коже и҆збра̀ на́съ въ не́мъ пре́жде сложе́нїѧ мі́ра, бы́ти на́мъ ст҃ы̑мъ и҆ непорѡ́чнымъ пред̾ ни́мъ въ любвѝ. є҃ Пре́жде наре́къ на́съ во ᲂу҆сыне́нїе і҆и҃съ хрⷭ҇то́мъ въ него̀, по благоволе́нїю хотѣ́нїѧ є҆гѡ̀, ѕ҃ Въ похвалꙋ̀ сла́вы бл҃года́ти є҆гѡ̀, въ не́йже ѡ҆благодатѝ на́съ ѡ҆ возлю́бленнѣмъ. з҃ Ѡ҆ не́мже

(заⷱ҇ сз҃і) И҆́мамы и҆збавле́нїе кро́вїю є҆гѡ̀, ꙳꙳ Въ пѧто́къ ѕ҃і-ѧ недѣ́ли: Бра́тїе, и҆́мамы и҆збавле́нїе кро́вїю хрⷭ҇то́вою, ꙳꙳ и҆ ѡ҆ставле́нїе прегрѣше́нїй, по бога́тствꙋ бл҃года́ти є҆гѡ̀: и҃ Ю҆́же (л. рн҃а) преꙋмно́жилъ є҆́сть въ на́съ, во всѧ́кой премꙋ́дрости и҆ ра́зꙋмѣ, ѳ҃ Сказа́въ на́мъ та́йнꙋ во́ли своеѧ̀, по бл҃говоле́нїю є҆гѡ̀,

Коне́цъ четверткꙋ̀.

є҆́же пре́жде положѝ въ не́мъ: і҃ Въ смотре́нїе и҆сполне́нїѧ време́нъ, возгла́вити всѧ́чєскаѧ ѡ҆ хрⷭ҇тѣ̀, ꙗ҆̀же на нб҃сѣ́хъ, и҆ ꙗ҆̀же на землѝ въ не́мъ, а҃і Въ не́мже и҆ наслѣ̑дницы бы́хомъ, пре́жде нарече́ни бы́вше, по прозрѣ́нїю бж҃їю, всѧ̑ дѣ́йствꙋющагѡ по совѣ́тꙋ во́ли своеѧ̀: в҃і Ꙗ҆́кѡ бы́ти на́мъ въ похвале́нїе сла́вы є҆гѡ̀, пре́жде ᲂу҆пова́вшымъ во хрⷭ҇та̀. г҃і Въ не́мже и҆ вы̀ слы́шавше сло́во и҆́стины, бл҃говѣствова́нїе спасе́нїѧ на́шегѡ, въ не́мже и҆ вѣ́ровавше зна́менастесѧ дх҃омъ ѡ҆бѣтова́нїѧ ст҃ы́мъ: д҃і И҆́же є҆́сть ѡ҆брꙋче́нїе наслѣ́дїѧ на́шегѡ, во и҆збавле́нїе снабдѣ́нїѧ, въ похвалꙋ̀ сла́вы є҆гѡ̀. [в҃] є҃і Сегѡ̀ ра́ди и҆ а҆́зъ слы́шавъ ва́шꙋ вѣ́рꙋ ѡ҆ хрⷭ҇тѣ̀ і҆и҃сѣ, и҆ любо́вь ꙗ҆́же ко всѣ́мъ ст҃ы̑мъ:

(заⷱ҇ си҃і) ѕ҃і Не престаю̀ благодарѧ̀ Въ сꙋббѡ́тꙋ к҃и-ю: Бра́тїе, не престаю̀ благодарѧ̀ ѡ҆ ва́съ, помина́нїе ѡ҆ ва́съ творѧ̀, въ мл҃твахъ мои́хъ: з҃і Да бг҃ъ гдⷭ҇а на́шегѡ і҆и҃са хрⷭ҇та̀, ѻ҆ц҃ъ сла́вы, да́стъ ва́мъ дх҃а премꙋ́дрости и҆ ѿкрове́нїѧ,

Коне́цъ пѧткꙋ̀.

въ позна́нїе є҆гѡ̀: и҃і Просвѣщє́нна ѻ҆чеса̀ се́рдца ва́шегѡ, ꙗ҆́кѡ ᲂу҆вѣ́дѣти ва́мъ, ко́е є҆́сть ᲂу҆пова́нїе зва́нїѧ є҆гѡ̀: и҆ ко́е бога́тство сла́вы достоѧ́нїѧ є҆гѡ̀ во ст҃ы́хъ: ѳ҃і И҆ ко́е преспѣ́ющее вели́чество си́лы є҆гѡ̀ въ (л. рн҃а ѡ҆б.) на́съ, вѣ́рꙋющихъ по дѣ́йствꙋ держа́вы крѣ́пости є҆гѡ̀, к҃ Ю҆́же содѣ́ѧ ѡ҆ хрⷭ҇тѣ̀, воскреси́въ є҆го̀ ѿ ме́ртвыхъ, и҆ поса́ждь ѡ҆деснꙋ́ю себѐ на нбⷭ҇ныхъ, к҃а Превы́ше всѧ́кагѡ нача́льства, и҆ вла́сти, и҆ си́лы, и҆ гдⷭ҇ьства, и҆ всѧ́кагѡ и҆́мене и҆менꙋ́емагѡ, не то́чїю въ вѣ́цѣ се́мъ, но и҆ во грѧдꙋ́щемъ.

(заⷱ҇ сѳ҃і) к҃в И҆ всѧ̑ Въ понедѣ́льникъ з҃і-ѧ недѣ́ли: Бра́тїе, бг҃ъ и҆ ѻ҆ц҃ъ гдⷭ҇а на́шегѡ і҆и҃са хрⷭ҇та̀, всѧ̑ покорѝ под̾ но́зѣ є҆гѡ̀: и҆ того̀ дадѐ главꙋ̀ вы́ше всѣ́хъ цр҃кви, к҃г Ꙗ҆́же є҆́сть тѣ́ло є҆гѡ̀, и҆сполне́нїе и҆сполнѧ́ющагѡ всѧ́чєскаѧ во всѣ́хъ.

Коне́цъ сꙋббѡ́тѣ.

Глава̀ втора́ѧ.

[г҃] сⷯ а҃ И҆ ва́съ сꙋ́щихъ прегрѣше́ньми ме́ртвыхъ, и҆ грѣхѝ ва́шими, в҃ Въ ни́хже и҆ногда̀ ходи́сте, по вѣ́кꙋ мі́ра сегѡ̀, по кнѧ́зю вла́сти воздꙋ́шныѧ: дꙋ́ха и҆́же ны́нѣ дѣ́йствꙋетъ въ сынѣ́хъ противле́нїѧ. г҃ Въ ни́хже и҆ мы̀ всѝ жи́хомъ и҆ногда̀, въ по́хотехъ пло́ти на́шеѧ, творѧ́ще во́лю пло́ти и҆ помышле́нїй: и҆ бѣ́хомъ є҆стество́мъ ча̑да гнѣ́ва, ꙗ҆́коже и҆ про́чїи.

Коне́цъ понедѣ́льникꙋ.

(заⷱ҇ с҃к) д҃ Бг҃ъ же, бога́тъ сы́й ꙳꙳ Недѣ́лѧ к҃г: Бра́тїе, бг҃ъ бога́тъ сы́й ꙳꙳ въ млⷭ҇ти, за премно́гꙋю любо́вь свою̀, є҆́юже возлюбѝ на́съ: є҃ И҆ сꙋ́щихъ на́съ ме́ртвыхъ прегрѣше́ньми, соѡживѝ хрⷭ҇то́мъ: [бл҃года́тїю є҆стѐ спасе́ни:] ѕ҃ И҆ съ ни́мъ воскресѝ, и҆ спосадѝ (л. рн҃в) на нбⷭ҇ныхъ во хрⷭ҇тѣ̀ і҆и҃сѣ: з҃ Да ꙗ҆ви́тъ въ вѣ́цѣхъ грѧдꙋ́щихъ преѕѣ́льное бога́тство бл҃года́ти своеѧ̀, бл҃госты́нею на на́съ ѡ҆ хрⷭ҇тѣ̀ і҆и҃сѣ. и҃ Бл҃года́тїю бо є҆стѐ спасе́ни чрез̾ вѣ́рꙋ: [и҆ сїѐ не ѿ ва́съ, бж҃їй да́ръ:] ѳ҃ Не ѿ дѣ́лъ, да никто́же похва́литсѧ. і҃ Тогѡ́ бо є҆смы̀ творе́нїе, созда́ни ѡ҆ хрⷭ҇тѣ̀ і҆и҃сѣ на дѣла̀ блага́ѧ, ꙗ҆̀же пре́жде ᲂу҆гото́ва бг҃ъ, да въ ни́хъ хо́димъ.

Коне́цъ недѣ́ли.

(заⷱ҇) а҃і Тѣ́мже помина́йте, Въ сꙋббѡ́тꙋ к҃ѳ: Бра́тїе, помина́йте, ꙗ҆́кѡ вы̀, и҆̀же и҆ногда̀ ꙗ҆зы́цы во пло́ти, глаго́лемїи неѡбрѣ́занїе, ѿ реко́магѡ ѡ҆брѣ́занїѧ во пло́ти рꙋкотворе́ннагѡ: в҃і Ꙗ҆́кѡ бѣ́сте во вре́мѧ ѻ҆́но без̾ хрⷭ҇та̀, ѿчꙋжде́ни житїѧ̀ і҆и҃лева, и҆ чꙋ́жди ѿ завѣ̑тъ ѡ҆бѣтова́нїѧ, ᲂу҆пова́нїѧ не и҆мꙋ́ще, и҆ безбо́жни въ мі́рѣ. г҃і Ны́нѣ же ѡ҆ хрⷭ҇тѣ̀ і҆и҃сѣ, вы̀ бы́вшїи и҆ногда̀ дале́че, бли́зъ бы́сте кро́вїю хрⷭ҇то́вою.

Коне́цъ сꙋббѡ́тѣ.

(заⷱ҇ ск҃а) д҃і То́й бо є҆́сть ꙳꙳ Недѣ́лѧ к҃д: Бра́тїе, хрⷭ҇то́съ є҆́сть ꙳꙳ ми́ръ на́шъ, сотвори́вый ѻ҆боѧ̑ є҆ди́но, и҆ средостѣ́нїе ѡ҆гра́ды разори́вый, враждꙋ̀ пло́тїю свое́ю, є҃і Зако́нъ за́повѣдей ᲂу҆че́ньми ᲂу҆праздни́въ, да ѻ҆́ба сози́ждетъ собо́ю во є҆ди́наго но́ваго человѣ́ка, творѧ̀ ми́ръ: ѕ҃і И҆ примири́тъ ѻ҆бои́хъ во є҆ди́номъ тѣ́лѣ бг҃ови крⷭ҇то́мъ, ᲂу҆би́въ враждꙋ̀ на не́мъ. з҃і И҆ прише́дъ, бл҃говѣстѝ ми́ръ ва́мъ, да̑льнимъ (л. рн҃в ѡ҆б.) и҆ бли̑жнимъ: и҃і Занѐ тѣ́мъ и҆́мамы приведе́нїе ѻ҆́бои во є҆ди́номъ дс҃ѣ ко ѻ҆ц҃ꙋ̀.

(заⷱ҇ ск҃в) ѳ҃і Тѣ́мже ᲂу҆́бѡ ктомꙋ̀ Во вто́рникъ з҃і-ѧ недѣ́ли: Бра́тїе, ктомꙋ̀ нѣ́сте стра́нни и҆ прише́льцы, но сожи́телє ст҃ы̑мъ, и҆ при́снїи бг҃ꙋ: к҃ Назда́ни бы́вше на ѡ҆снова́нїи а҆по́стѡлъ и҆ прорѡ́къ, сꙋ́щꙋ краеꙋго́льнꙋ самомꙋ̀ і҆и҃сꙋ хрⷭ҇тꙋ̀, (чеⷦ҇) к҃а Ѡ҆ не́мже всѧ́ко созда́нїе составлѧ́емо расте́тъ въ цр҃ковь ст҃ꙋ́ю ѡ҆ гдⷭ҇ѣ: к҃в Ѡ҆ не́мже и҆ вы̀ созида́етесѧ въ жили́ще бж҃їе дх҃омъ.

Коне́цъ недѣ́ли.

Глава̀ тре́тїѧ.

[д҃] сⷯ а҃ Сегѡ̀ ра́ди а҆́зъ па́ѵелъ, ю҆́зникъ і҆и҃съ хрⷭ҇то́въ, ѡ҆ ва́съ ꙗ҆зы́цѣхъ похвалю́сѧ: в҃ ꙾А҆́ще ᲂу҆́бѡ꙾꙾поне́же꙾ слы́шасте смотре́нїе бл҃года́ти бж҃їѧ да́нныѧ мнѣ̀ въ ва́съ, г҃ Ꙗ҆́кѡ по ѿкрове́нїю сказа́ ми сѧ та́йна, ꙗ҆́коже преднаписа́хъ вма́лѣ. д҃ ꙳Ѡ҆ не́мже꙳꙳по є҆ли́кꙋ꙳ мо́жете чтꙋ́ще разꙋмѣ́ти ра́зꙋмъ мо́й въ та́йнѣ хрⷭ҇то́вѣ: є҃ Ꙗ҆́же во и҆нѣ́хъ ро́дѣхъ не сказа́сѧ сынѡ́мъ человѣ́чєскимъ, ꙗ҆́коже ны́нѣ ѿкры́сѧ свѧты́мъ є҆гѡ̀ а҆пⷭ҇толѡмъ и҆ проро́кѡмъ дх҃омъ ст҃ы́мъ: ѕ҃ Ꙗ҆́кѡ бы́ти ꙗ҆зы́кѡмъ снаслѣ́дникѡмъ, и҆ стѣле́сникѡмъ, и҆ сприча́стникѡмъ ѡ҆бѣтова́нїѧ є҆гѡ̀ ѡ҆ хрⷭ҇тѣ̀ і҆и҃сѣ, благовѣствова́нїемъ: з҃ Є҆мꙋ́же бы́хъ слꙋжи́тель по да́рꙋ бл҃года́ти бж҃їѧ, да́нныѧ мнѣ̀ по дѣ́йствꙋ си́лы є҆гѡ̀.

Коне́цъ вто́рникꙋ. (л. рн҃г)

(заⷱ҇ ск҃г) и҃ Мнѣ̀ Въ сре́дꙋ з҃і-ѧ недѣ́ли: Бра́тїе, мнѣ̀ ме́ньшемꙋ всѣ́хъ ст҃ы́хъ дана̀ бы́сть бл҃года́ть сїѧ̀, во ꙗ҆зы́цѣхъ благовѣсти́ти неизслѣ́дованное бога́тство хрⷭ҇то́во, ѳ҃ И҆ просвѣти́ти всѣ́хъ: что̀ є҆́сть смотре́нїе та́йны сокрове́нныѧ ѿ вѣкѡ́въ въ бз҃ѣ, созда́вшемъ всѧ́чєскаѧ і҆и҃съ хрⷭ҇то́мъ. і҃ Да ска́жетсѧ ны́нѣ нача́лѡмъ и҆ властє́мъ на нбⷭ҇ныхъ це́рковїю, многоразли́чнаѧ премꙋ́дрость бж҃їѧ, а҃і По предложе́нїю вѣ̑къ, ꙗ҆̀же сотворѝ ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ: в҃і Ѡ҆ не́мже и҆́мамы дерзнове́нїе, и҆ приведе́нїе въ надѣ́ѧнїи, вѣ́рою є҆гѡ̀. г҃і Тѣ́мже молю́ вы, не стꙋжа́ти сѝ въ ско́рбехъ мои́хъ ꙗ҆̀же ѡ҆ ва́съ, ꙗ҆́же є҆́сть сла́ва ва́ша. [є҃] д҃і Сегѡ̀ ра́ди преклонѧ́ю кѡлѣ́на моѧ̀ ко ѻ҆ц҃ꙋ̀ гдⷭ҇а на́шегѡ і҆и҃са хрⷭ҇та̀, є҃і И҆з̾ негѡ́же всѧ́ко ѻ҆те́чество на небесѣ́хъ и҆ на землѝ и҆менꙋ́етсѧ: ѕ҃і Да да́стъ ва́мъ по бога́тствꙋ сла́вы своеѧ̀, си́лою ᲂу҆тверди́тисѧ дх҃омъ є҆гѡ̀, во внꙋ́треннѣмъ человѣ́цѣ, з҃і Всели́тисѧ хрⷭ҇тꙋ̀ вѣ́рою въ сердца̀ ва́ша, въ любвѝ вкорене́ни и҆ ѡ҆снова́ни: и҃і Да возмо́жете разꙋмѣ́ти со всѣ́ми ст҃ы́ми, что̀ широта̀, и҆ долгота̀, и҆ глꙋбина̀, и҆ высота̀: ѳ҃і Разꙋмѣ́ти же преспѣ́ющꙋю ра́зꙋмъ любо́вь хрⷭ҇то́вꙋ, да и҆спо́лнитесѧ во всѧ́ко и҆сполне́нїе бж҃їе. к҃ Могꙋ́щемꙋ же па́че всѧ̑ твори́ти по преизбы́точествїю, и҆̀хже про́симъ, и҆лѝ разꙋмѣ́емъ, по си́лѣ дѣ́йствꙋемѣй въ на́съ: к҃а Томꙋ̀ сла́ва въ це́ркви ѡ҆ хрⷭ҇тѣ̀ і҆и҃сѣ, во всѧ̀ ро́ды вѣ́ка вѣкѡ́въ, а҆ми́нь.

Коне́цъ средѣ̀. (л. рн҃д ѡ҆б.)

Глава̀ четве́ртаѧ.

(заⷱ҇ ск҃д) [ѕ҃] сⷯ а҃ Молю̀ ᲂу҆̀бо вы̀ а҆́зъ Недѣ́лѧ к҃є: Бра́тїе, молю̀ вы̀ а҆́зъ ю҆́зникъ ѡ҆ гдⷭ҇ѣ, досто́йнѡ ходи́ти зва́нїѧ, въ не́же зва́ни бы́сте, в҃ Со всѧ́кимъ смиреномꙋ́дрїемъ и҆ кро́тостїю, съ долготерпѣ́нїемъ, терпѧ́ще дрꙋгъдрꙋ́га любо́вїю: г҃ Тща́щесѧ блюстѝ є҆дине́нїе дꙋ́ха, въ сою́зѣ ми́ра. д҃ Є҆ди́но тѣ́ло, є҆ди́нъ дꙋ́хъ, ꙗ҆́коже и҆ зва́ни бы́сте во є҆ди́номъ ᲂу҆пова́нїи зва́нїѧ ва́шегѡ. є҃ Є҆ди́нъ гдⷭ҇ь, є҆ди́на вѣ́ра, є҆ди́но креще́нїе: ѕ҃ Є҆ди́нъ бг҃ъ и҆ ѻ҆ц҃ъ всѣ́хъ, и҆́же над̾ всѣ́ми, и҆ чрез̾ всѣ́хъ, и҆ во всѣ́хъ на́съ.

Коне́цъ недѣ́ли.

(заⷱ҇) з҃ Є҆ди́номꙋ же ꙳꙳ Недѣ́лѧ по просвѣще́нїи: Бра́тїе, є҆ди́номꙋ ꙳꙳ Сїе́ же и҆ і҆ера́рхѡмъ. комꙋ́ждо на́съ даде́сѧ благода́ть по мѣ́рѣ дарова́нїѧ хрⷭ҇то́ва. и҃ Тѣ́мже глаго́летъ: возше́дъ на высотꙋ̀, плѣни́лъ є҆сѝ плѣ́нъ, и҆ дадѐ даѧ̑нїѧ человѣ́кѡмъ. ѳ҃ А҆ є҆́же, взы́де, что̀ є҆́сть, а҆́ще не то́чїю, ꙗ҆́кѡ и҆ сни́де пре́жде въ до́льнѣйшыѧ страны̑ землѝ; і҃ Сше́дый, то́й є҆́сть и҆ возше́дый превы́ше всѣ́хъ небе́съ, да и҆спо́лнитъ всѧ́чєскаѧ. а҃і И҆ то́й да́лъ є҆́сть, ѻ҆́вы ᲂу҆́бѡ а҆по́столы, ѻ҆́вы же проро́ки, ѻ҆́вы же благовѣ́стники, ѻ҆́вы же па́стыри и҆ ᲂу҆чи́тели, в҃і Къ соверше́нїю ст҃ы́хъ, въ дѣ́ло слꙋже́нїѧ, въ созида́нїе тѣ́ла хрⷭ҇то́ва: г҃і До́ндеже дости́гнемъ всѝ во є҆дине́нїе вѣ́ры, и҆ позна́нїѧ сн҃а (л. рн҃д) бж҃їѧ, въ мꙋ́жа соверше́нна, въ мѣ́рꙋ во́зраста и҆сполне́нїѧ хрⷭ҇то́ва.

Коне́цъ недѣ́ли по просвѣще́нїи, и҆ і҆ера́рхѡмъ.

(заⷱ҇ ск҃є) д҃і Да не быва́емъ Въ четверто́къ з҃і недѣ́ли: Бра́тїе, да не быва́емъ ктомꙋ̀ младе́нцы, вла́ющесѧ и҆ скита́ющесѧ всѧ́кимъ вѣ́тромъ ᲂу҆че́нїѧ, во лжѝ человѣ́честѣй, въ кова́рствѣ ко́зней льще́нїѧ. є҃і И҆́стинствꙋюще же въ любвѝ, да возрасти́мъ въ него̀ всѧ́чєскаѧ, и҆́же є҆́сть глава̀ хрⷭ҇то́съ: ѕ҃і И҆з̾ негѡ́же всѐ тѣ́ло составлѧ́емо и҆ счинѣва́емо прили́чнѣ, всѧ́цѣмъ ѡ҆сѧза́нїемъ подаѧ́нїѧ по дѣ́йствꙋ въ мѣ́рѣ є҆ди́ныѧ коеѧ́ждо ча́сти, возраще́нїе тѣ́ла твори́тъ, въ созда́нїе сама́гѡ себѐ любо́вїю.

(заⷱ҇ ск҃ѕ) [з҃] з҃і Сїѐ ᲂу҆́бѡ глаго́лю, ꙳꙳ Въ пѧто́къ з҃і недѣ́ли: Бра́тїе, сїѐ глаго́лю, ꙳꙳ и҆ послꙋшествꙋ́ю ѡ҆ гдⷭ҇ѣ, ктомꙋ̀ не ходи́ти ва́мъ, ꙗ҆́коже и҆ про́чїи ꙗ҆зы́цы хо́дѧтъ, въ сꙋетѣ̀ ᲂу҆ма̀ и҆́хъ, и҃і Помраче́ни смы́сломъ, сꙋ́ще ѿчꙋжде́ни ѿ жи́зни бж҃їѧ, за невѣ́жество сꙋ́щее въ ни́хъ, за ѡ҆камене́нїе серде́цъ и҆́хъ: ѳ҃і И҆̀же въ неча́ѧнїе вло́жшесѧ, преда́ша себѐ стꙋдодѣѧ́нїю, въ дѣ́ланїе всѧ́кїѧ нечистоты̀ въ лихоима́нїи.

Коне́цъ четверткꙋ̀.

к҃ Вы́ же не та́кѡ позна́сте хрⷭ҇та̀. к҃а ҃꙾А҆́ще ᲂу҆́бѡ꙾꙾поне́же꙾ слы́шасте є҆го̀ и҆ ѡ҆ не́мъ наꙋчи́стесѧ, ꙗ҆́коже є҆́сть и҆́стина ѡ҆ і҆и҃сѣ: к҃в Ѿложи́ти ва́мъ по пе́рвомꙋ житїю̀ (л. рн҃д ѡ҆б.) ве́тхаго человѣ́ка, тлѣ́ющаго въ по́хотехъ преле́стныхъ: к҃г Ѡ҆бновлѧ́тисѧ же дꙋ́хомъ ᲂу҆ма̀ ва́шегѡ: к҃д И҆ ѡ҆блещи́сѧ въ но́ваго человѣ́ка, созда́ннаго по бг҃ꙋ въ пра́вдѣ, и҆ въ преподо́бїи и҆́стины.

(заⷱ҇ ск҃з) к҃є Тѣ́мже ѿло́жше лжꙋ̀, Въ понедѣ́льникъ и҃і недѣ́ли: Бра́тїе, ѿло́жше лжꙋ̀ глаго́лите и҆́стинꙋ кі́йждо ко и҆́скреннемꙋ своемꙋ̀:

Коне́цъ пѧткꙋ̀.

занѐ є҆смы̀ дрꙋгъдрꙋ́гꙋ ᲂу҆́дове. к҃ѕ Гнѣ́вайтесѧ, и҆ не согрѣша́йте: со́лнце да не за́йдетъ въ гнѣ́вѣ ва́шемъ: к҃з Нижѐ дади́те мѣ́ста дїа́волꙋ. к҃и Крады́й, ктомꙋ̀ да не кра́детъ: но па́че да трꙋжда́етсѧ дѣ́лаѧ свои́ма рꙋка́ма благо́е, да и҆́мать подаѧ́ти тре́бꙋющемꙋ. к҃ѳ Всѧ́ко сло́во гни́ло да не и҆схо́дитъ и҆з̾ ᲂу҆́стъ ва́шихъ: но то́чїю є҆́же є҆́сть бла́го, къ созда́нїю вѣ́ры, да да́стъ благода́ть слы́шащымъ. л҃ И҆ не ѡ҆скорблѧ́йте дх҃а ст҃а́гѡ бж҃їѧ, ѡ҆ не́мже зна́менастесѧ въ де́нь и҆збавле́нїѧ. л҃а Всѧ́ка го́ресть, и҆ гнѣ́въ, и҆ ꙗ҆́рость, и҆ кли́чь, и҆ хꙋла̀, да во́зметсѧ ѿ ва́съ со всѧ́кою ѕло́бою. л҃в Быва́йте же дрꙋ́гъ ко дрꙋ́гꙋ бла́зи, милосе́рди, проща́юще дрꙋгъдрꙋ́гꙋ, ꙗ҆́коже и҆ бг҃ъ во хрⷭ҇тѣ̀ прости́лъ є҆́сть ва́мъ.

Коне́цъ понедѣ́льникꙋ.

Глава̀ пѧ́таѧ.

(заⷱ҇ ск҃и) сⷯ а҃ Быва́йте ᲂу҆́бѡ ꙳꙳ Въ сꙋббѡ́тꙋ л҃: Бра́тїе, быва́йте ꙳꙳ подража́тели бг҃ꙋ, ꙗ҆́коже ча́да возлю́блєннаѧ: в҃ И҆ ходи́те въ любвѝ ꙗ҆́коже и҆ хрⷭ҇то́съ возлюби́лъ є҆́сть на́съ, и҆ предадѐ (л. рн҃є) себѐ за ны̀ приноше́нїе и҆ же́ртвꙋ бг҃ꙋ, въ воню̀ благоꙋха́нїѧ. [и҃] г҃ Блꙋ́дъ же, и҆ всѧ́ка нечистота̀, и҆ лихои́мство, нижѐ да и҆менꙋ́етсѧ въ ва́съ, ꙗ҆́коже подоба́етъ свѧты̑мъ: д҃ И҆ скверносло́вїе, и҆ бꙋесло́вїе, и҆ кощꙋ́ны, и҆ ꙗ҆̀же неподѡ́бнаѧ, но па́че бл҃годаре́нїе. є҃ Сїе́ бо да є҆стѐ вѣ́дꙋще, ꙗ҆́кѡ всѧ́къ блꙋдни́къ, и҆лѝ нечи́стъ, и҆лѝ лихои́мецъ, и҆́же є҆́сть і҆дѡлослꙋжи́тель, не и҆́мать достоѧ́нїѧ въ црⷭ҇твїи хрⷭ҇та̀ и҆ бг҃а. ѕ҃ Никто́же ва́съ да льсти́тъ сꙋ́етными словесы̀: си́хъ бо ра́ди грѧде́тъ гнѣ́въ бж҃їй на сы́ны непокори́выѧ. з҃ Не быва́йте ᲂу҆́бѡ соприча́стницы си̑мъ. и҃ Бѣ́сте бо и҆ногда̀ тма̀, ны́нѣ же свѣ́тъ ѡ҆ гдⷭ҇ѣ.

Коне́цъ сꙋббѡ́тѣ.

(заⷱ҇ ск҃ѳ) ѳ҃ Ꙗ҆́коже ча̑да Недѣ́лѧ к҃ѕ: Бра́тїе, ꙗ҆́кѡ ча̑да ꙳ Сїе́ же и҆ въ понедѣ́льникъ ст҃а́гѡ дх҃а. свѣ́та ходи́те: [Пло́дъ бо дх҃о́вный є҆́сть во всѧ́кой бл҃госты́ни и҆ пра́вдѣ и҆ и҆́стинѣ:] і҃ И҆скꙋша́юще, что́ є҆сть благоꙋго́дно бг҃ови. а҃і И҆ не прїѡбща́йтесѧ къ дѣлѡ́мъ неплѡ́днымъ тмы̀, па́че же и҆ ѡ҆блича́йте. в҃і Быва́ємаѧ бо ѡ҆́тай ѿ ни́хъ, сра́мно є҆́сть и҆ глаго́лати. г҃і Всѧ̑ же ѡ҆блича́ємаѧ, ѿ свѣ́та ꙗ҆влѧ́ютсѧ: все́ бо ꙗ҆влѧ́емое свѣ́тъ є҆́сть. д҃і Сегѡ̀ ра́ди глаго́летъ: воста́ни спѧ́й, и҆ воскрⷭ҇нѝ ѿ ме́ртвыхъ, и҆ ѡ҆свѣти́тъ тѧ̀ хрⷭ҇то́съ. є҃і Блюди́те ᲂу҆̀бо, ка́кѡ ѻ҆па́снѡ хо́дите, не ꙗ҆́коже немꙋ́дри, но ꙗ҆́коже премꙋ́дри: ѕ҃і И҆скꙋпꙋ́юще вре́мѧ, ꙗ҆́кѡ дні́е лꙋка́ви сꙋ́ть. з҃і Сегѡ̀ ра́ди не быва́йте несмы́сленни, но разꙋмѣва́юще, что́ є҆сть во́лѧ бж҃їѧ. и҃і И҆ не ᲂу҆пива́йтесѧ (л. рн҃є ѡ҆б.) вїно́мъ, въ не́мже є҆́сть блꙋ́дъ: но па́че и҆сполнѧ́йтесѧ дх҃омъ, ѳ҃і Глаго́люще себѣ̀ во ѱалмѣ́хъ и҆ пѣ́нїихъ, и҆ пѣ́снехъ дх҃о́вныхъ, воспѣва́юще и҆ пою́ще въ сердца́хъ ва́шихъ гдⷭ҇ви.

Коне́цъ недѣ́ли, и҆ понедѣ́льникꙋ н҃-мꙋ.

(заⷱ҇ с҃л) [ѳ҃] к҃ Бл҃годарѧ́ще Во вто́рникъ и҃і-ѧ недѣ́ли: Бра́тїе, бл҃годарѧ́ще всегда̀ ѡ҆ всѣ́хъ, ѡ҆ и҆́мени гдⷭ҇а на́шегѡ і҆и҃са хрⷭ҇та̀, бг҃ꙋ и҆ ѻ҆ц҃ꙋ̀: к҃а Повинꙋ́ющесѧ дрꙋгъдрꙋ́гꙋ въ стра́сѣ бж҃їи. к҃в Жєны̀, свои́мъ мꙋжє́мъ повинꙋ́йтесѧ, ꙗ҆́коже гдⷭ҇ꙋ: к҃г Занѐ мꙋ́жъ глава̀ є҆́сть жены̀, ꙗ҆́коже и҆ хрⷭ҇то́съ глава̀ цр҃кве, и҆ то́й є҆́сть сп҃си́тель тѣ́ла. к҃д Но ꙗ҆́коже цр҃ковь повинꙋ́етсѧ хрⷭ҇тꙋ̀, та́кожде и҆ жєны̀ свои́мъ мꙋжє́мъ во все́мъ.

(заⷱ҇ сл҃а) к҃є Мꙋ́жїе, люби́те ꙳꙳ Въ сре́дꙋ и҃і-ѧ недѣ́ли: Бра́тїе, люби́те ꙳꙳ своѧ̀ жєны̀, ꙗ҆́коже и҆ хрⷭ҇то́съ возлюбѝ цр҃ковь, и҆ себѐ предадѐ за ню̀: к҃ѕ Да ѡ҆свѧти́тъ ю҆̀, ѡ҆чи́стивъ ба́нею водно́ю въ глаго́лѣ.

Коне́цъ вто́рникꙋ.

к҃з Да предста́витъ ю҆̀ себѣ̀ сла́внꙋ цр҃ковь, не и҆мꙋ́щꙋ скве́рны, и҆лѝ поро́ка, и҆лѝ нѣ́что ѿ таковы́хъ: но да є҆́сть ст҃а̀ и҆ непоро́чна. к҃и Та́кѡ до́лжни сꙋ́ть мꙋ́жїе люби́ти своѧ̀ жєны̀, ꙗ҆́кѡ своѧ̀ тѣлеса̀: любѧ́й бо свою̀ женꙋ̀, себѐ сама́го лю́битъ. к҃ѳ Никто́же бо когда̀ свою̀ пло́ть возненави́дѣ: но пита́етъ, и҆ грѣ́етъ ю҆̀, ꙗ҆́коже и҆ гдⷭ҇ь цр҃ковь. л҃ Занѐ ᲂу҆́ди є҆смы̀ тѣ́ла є҆гѡ̀, ѿ пло́ти є҆гѡ̀, и҆ ѿ косте́й є҆гѡ̀. л҃а Сегѡ̀ ра́ди (л. рн҃ѕ) ѡ҆ста́витъ человѣ́къ ѻ҆тца̀ своего̀ и҆ ма́терь, и҆ прилѣпи́тсѧ къ женѣ̀ свое́й, и҆ бꙋ́дета два̀ въ пло́ть є҆ди́нꙋ. л҃в Та́йна сїѧ̀ вели́ка є҆́сть: а҆́зъ же глаго́лю во хрⷭ҇та̀, и҆ во цр҃ковь.

(заⷱ҇ сл҃в) л҃г Ѡ҆ба́че и҆ вы̀, по є҆ди́номꙋ кі́йждо Въ четверто́къ и҃і-ѧ недѣ́ли: Бра́тїе, по є҆ди́номꙋ кі́йждо ва́съ свою̀ женꙋ̀ си́це да лю́битъ, ꙗ҆́коже и҆ себѐ:

Коне́цъ средѣ̀.

а҆ жена̀ да бои́тсѧ своегѡ̀ мꙋ́жа.

Глава̀ шеста́ѧ.

(пѧⷦ҇) сⷯ а҃ Ча̑да, послꙋ́шайте свои́хъ роди́телей ѡ҆ гдⷭ҇ѣ: сїе́ бо є҆́сть пра́ведно. в҃ Чтѝ ѻ҆тца̀ твоего̀ и҆ ма́терь, [ꙗ҆́же є҆́сть за́повѣдь пе́рваѧ во ѡ҆бѣтова́нїи:] г҃ Да бл҃го тѝ бꙋ́детъ, и҆ бꙋ́деши долголѣ́тенъ на землѝ. д҃ И҆ ѻ҆тцы̀, не раздража́йте ча̑дъ свои́хъ, но воспитова́йте и҆̀хъ въ наказа́нїи и҆ ᲂу҆че́нїи гдⷭ҇ни. є҃ Рабѝ, послꙋ́шайте госпо́дїй свои́хъ по пло́ти, со стра́хомъ и҆ тре́петомъ, въ простотѣ̀ се́рдца ва́шегѡ, ꙗ҆́коже и҆ хрⷭ҇та̀: ѕ҃ Не пред̾ ѻ҆чи́ма то́чїю рабо́тающе, ꙗ҆́кѡ чл҃вѣкоꙋгѡ́дницы, но ꙗ҆́коже рабѝ хрⷭ҇то́вы, творѧ́ще во́лю бж҃їю ѿ дꙋшѝ, з҃ Со бл҃горазꙋ́мїемъ слꙋжа́ще ꙗ҆́коже гдⷭ҇ꙋ, а҆ не ꙗ҆́кѡ человѣ́кѡмъ: и҃ Вѣ́дѧще, ꙗ҆́кѡ ко́ждо, є҆́же а҆́ще сотвори́тъ бл҃го́е, сїѐ прїи́метъ ѿ гдⷭ҇а, а҆́ще ра́бъ, а҆́ще свобо́дь. ѳ҃ И҆ госпо́дїе та̑ѧжде твори́те къ ни́мъ, (л. рн҃ѕ ѡ҆б.) послаблѧ́юще и҆̀мъ прещє́нїѧ: вѣ́дꙋще, ꙗ҆́кѡ и҆ ва́мъ самѣ́мъ и҆ тѣ̑мъ гдⷭ҇ь є҆́сть на нб҃сѣ́хъ, и҆ ѡ҆бинове́нїѧ лица̀ нѣ́сть ᲂу҆ негѡ̀.

Коне́цъ четверткꙋ̀.

(заⷱ҇ сл҃г) [і҃] і҃ Про́чее же бра́тїе моѧ̀, возмога́йте во гдⷭ҇ѣ, Недѣ́лѧ к҃з: Бра́тїе, возмога́йте ѡ҆ гдⷭ҇ѣ, ꙳ Сїе́ же и҆ въ сꙋббѡ́тꙋ по просвѣще́нїи. и҆ въ держа́вѣ крѣ́пости є҆гѡ̀: а҃і Ѡ҆блецы́тесѧ во всѧ̀ ѻ҆рꙋ́жїѧ бж҃їѧ, ꙗ҆́кѡ возмощѝ ва́мъ ста́ти проти́вꙋ ко́знемъ дїа́вольскимъ. в҃і Ꙗ҆́кѡ нѣ́сть на́ша бра́нь ꙾къ꙾꙾проти́вꙋ꙾ кро́ви и҆ пло́ти: но къ нача́лѡмъ и҆ ко властє́мъ, и҆ къ мїродержи́телємъ тмы̀ вѣ́ка сегѡ̀, къ дꙋховѡ́мъ ѕло́бы поднебє́снымъ. г҃і Сегѡ̀ ра́ди прїими́те всѧ̀ ѻ҆рꙋ́жїѧ бж҃їѧ, да возмо́жете проти́витисѧ въ де́нь лю́тъ, и҆ всѧ̑ содѣ́ѧвше ста́ти. д҃і Ста́ните ᲂу҆̀бо препоѧ́сани чресла̀ ва́ша и҆́стиною, и҆ ѡ҆бо́лкшесѧ въ бронѧ̀ пра́вды, є҃і И҆ ѡ҆бꙋ́вше но́зѣ во ᲂу҆гото́ванїе бл҃говѣствова́нїѧ ми́ра: з҃і Над̾ всѣ́ми же воспрїи́мше щи́тъ вѣ́ры: въ не́мже возмо́жете всѧ̀ стрѣ́лы лꙋка́вагѡ разжжє́нныѧ ᲂу҆гаси́ти. И҆ шле́мъ спасе́нїѧ воспрїими́те, и҆ ме́чь дх҃о́вный, и҆́же є҆́сть глаго́лъ бж҃їй.

Коне́цъ недѣ́ли.

(заⷱ҇ сл҃д) и҃і Всѧ́кою ꙳꙳ Въ пѧто́къ и҃і-ѧ недѣ́ли: Бра́тїе, всѧ́кою ꙳꙳ моли́твою и҆ моле́нїемъ, молѧ́щесѧ на всѧ́кое вре́мѧ дх҃омъ: и҆ въ сїѐ и҆́стое бдѧ́ще во всѧ́комъ терпѣ́нїи и҆ мл҃твѣ, ѡ҆ всѣ́хъ ст҃ы́хъ, ѳ҃і И҆ ѡ҆ мнѣ̀, да да́стсѧ мѝ сло́во во ѿверзе́нїе ᲂу҆́стъ (л. рн҃з) мои́хъ, съ дерзнове́нїемъ сказа́ти та́йнꙋ благовѣствова́нїѧ: к҃ Ѡ҆ не́мже посо́льствꙋю во ᲂу҆́захъ, да въ не́мъ дерза́ю, ꙗ҆́коже подоба́етъ мѝ глаго́лати. к҃а Да ᲂу҆вѣ́сте же и҆ вы̀ ꙗ҆̀же ѡ҆ мнѣ̀, что̀ дѣ́лаю: всѧ̑ ска́жетъ ва́мъ тѷхі́къ возлю́бленный бра́тъ, и҆ вѣ́ренъ слꙋжи́тель ѡ҆ гдⷭ҇ѣ: к҃в Є҆го́же посла́хъ къ ва́мъ на сїѐ и҆́стое, да ᲂу҆вѣ́сте ꙗ҆́же ѡ҆ на́съ, и҆ да ᲂу҆тѣ́шитъ сердца̀ ва́ша. к҃г Ми́ръ бра́тїи, и҆ любо́вь съ вѣ́рою, ѿ бг҃а ѻ҆ц҃а̀ и҆ гдⷭ҇а і҆и҃са хрⷭ҇та̀. к҃д Бл҃года́ть со всѣ́ми лю́бѧщими гдⷭ҇а на́шего і҆и҃са хрⷭ҇та̀ въ неистлѣ́нїи. а҆ми́нь.

Коне́цъ пѧткꙋ̀.

Коне́цъ посла́нїѧ є҆́же ко є҆фесе́ємъ: напи́сано бы́сть ѿ ри́ма тѷхі́комъ: и҆́мать въ себѣ̀ гла́въ, ѕ҃: зача́лъ цр҃ко́вныхъ, к҃: стїхѡ́въ рн҃є: знамена́нїй че́рныхъ, і҃: без̾ червле́ныхъ.


Комментарии для сайта Cackle