(л. рѯ҃г ѡ҆б.) Знамєна́нїѧ къ колосса́ємъ посла́нїѧ.

[а҃] Похвала̀ ѡ҆ колосса́ехъ, позна́вшихъ бг҃а вѣ́рою.

[в҃] Моли́тва ѡ҆ ни́хъ въ премꙋ́дрость дѣ́йственнꙋ, въ си́лꙋ терпѣ́нїѧ съ похвало́ю, позна́нїемъ чистоты̀.

[г҃] Ѡ҆ є҆́же во хрⷭ҇тѣ̀ тва́ри, и҆ возсозда́нїи по снѧ́тїю бж҃їю.

[д҃] Ѡ҆ приведе́нїи ꙗ҆зы̑къ, хрⷭ҇то́вымъ тѣ́ломъ и҆ стра́стїю вѣ́ры ра́ди.

[є҃] Оу҆че́нїе зва̑ннымъ страстьмѝ є҆гѡ̀ во предста́нїе бг҃ꙋ.

[ѕ҃] Ѡ҆ є҆́же не прельща́тисѧ чл҃вѣ́ческою фїлосо́фїею, и҆мꙋ́щымъ премꙋ́дрость хрⷭ҇то́вꙋ.

[з҃] Ꙗ҆́кѡ є҆́же къ бг҃ꙋ соедине́нїе проти́вꙋ зако́на є҆́сть, во є҆́же со хрⷭ҇то́мъ жи́ти.

[и҃] Ꙗ҆́кѡ плотска́гѡ зако́на ѻ҆́брази плотски̑мъ потре́бни, а҆ не дх҃ѡ́внымъ, си́лою бж҃їею живꙋ́щымъ.

[ѳ҃] Оу҆че́нїе ѡ҆чище́нїѧ ст҃ы́ни, человѣколю́бїѧ, пѣ́нїѧ, похва́льна житїѧ̀.

[і҃] Ѡ҆ є҆́же къ при́снымъ є҆динодꙋ́шїи, и҆ къ чꙋжы́мъ, мꙋ́дреннѡ и҆ смотрели́внѡ. (л. рѯ҃д)

Сказа́нїе къ колосса́ємъ посла́нїѧ ст҃а́гѡ а҆пⷭ҇ла па́ѵла.

(нлⷣѧ) Сїѐ посыла́етъ ѿ ри́ма, не ви́дѣвъ ᲂу҆́бѡ и҆́хъ, слы́шавъ же ѡ҆ ни́хъ. Вина́ же посла́нїѧ сїѧ̀: Колосса́євъ хотѣ́ша нѣ́цыи прельсти́ти є҆́ллинскими хитросло́вїи, ѿ вѣ́ры ꙗ҆́же во хрⷭ҇та̀, и҆ ѡ҆ зако́нныхъ бра́шнѣхъ, и҆ ѡ҆брѣ́занїи. Сїѧ̑ ᲂу҆́бѡ ᲂу҆вѣ́дѣвъ а҆пⷭ҇лъ, пи́шетъ посла́нїе сїѐ къ ни́мъ а҆́ки ᲂу҆чи́тельное. И҆ пе́рвѣе ᲂу҆́бѡ благодари́тъ бг҃а, и҆ сказꙋ́етъ ѿ тмы̀ прише́дшихъ и҆̀хъ къ свѣ́тꙋ и҆́стины: и҆ ꙗ҆́кѡ хрⷭ҇то́съ, въ него́же вѣ́роваша, ѻ҆́бразъ є҆́сть бж҃їй и҆ сло́во, и҆́мже всѧ̑ бы́ша. И҆ ꙗ҆́кѡ подоба́ше є҆мꙋ̀ содѣ́телю сꙋ́щꙋ, бы́ти є҆мꙋ̀ перворожде́нꙋ тва́ри, и҆ пе́рвенцꙋ ѿ ме́ртвыхъ, да ѻ҆боѧ̑ совокꙋпи́тъ, и҆ ѡ҆животвори́тъ всѧ́чєскаѧ. Повелѣва́етъ же и҆̀мъ пребыва́ти въ вѣ́рѣ, сказꙋ́ѧ, ꙗ҆́кѡ са́мъ па́ѵелъ слꙋжи́тель є҆́сть є҆ѵⷢ҇лїю, є҆мꙋ́же наꙋчи́шасѧ. Та́же и҆ ѡ҆ зако́нѣ, и҆ ꙗ҆̀же по не́мъ бра́шнѣхъ, и҆ ѡ҆ дне́хъ, и҆ ѡ҆ лѣ́тѣхъ повѣствꙋ́етъ, и҆ показꙋ́етъ ᲂу҆праздни́вшымсѧ дрє́внимъ, и҆ ѡ҆брѣ́занїю: и҆ совѣ́тꙋетъ и҆̀мъ не прельща́тисѧ ѿ ᲂу҆хишрѧ́ющихъ и҆ соблазнѧ́ющихъ и҆̀хъ. И҆ про́чее завѣща́въ и҆ въ то́мъ роди́телємъ и҆ ча́дѡмъ, мꙋжє́мъ же и҆ жена́мъ, господє́мъ же и҆ рабѡ́мъ, и҆ къ про́чымъ ѻ҆бы́чаємъ наказа́въ и҆̀хъ, скончава́етъ посла́нїе. Завѣщава́етъ же и҆̀мъ, да є҆гда̀ прочте́но бꙋ́детъ ᲂу҆ ни́хъ посла́нїе сїѐ, сотворѧ́тъ да прочте́но бꙋ́детъ и҆ въ цр҃кви лаодїкі́йстѣй, и҆ є҆́же ѿ лаодїкі́и, ᲂу҆ ни́хъ да прочте́но бꙋ́детъ. (л. рѯ҃д ѡ҆б.)

КЪ КОЛОССА́ЄМЪ ПОСЛА́НІЕ

СТ҃А́ГѠ А҆ПО́СТОЛА ПА́ѴЛА.

Глава̀ пе́рваѧ.

(заⷱ҇ см҃ѳ) сⷯ а҃ Па́ѵелъ Во вто́рникъ к҃а недѣ́ли: Па́ѵелъ а҆по́столъ і҆и҃съ хрⷭ҇то́въ, во́лею бж҃їею, и҆ тїмоѳе́й бра́тъ, в҃ Сꙋ́щымъ въ колосса́ехъ свѧты̑мъ, и҆ вѣ̑рнымъ бра́тїѧмъ ѡ҆ хрⷭ҇тѣ̀ і҆и҃сѣ:

Престꙋпѝ вто́рникꙋ.

(заⷱ҇) [а҃] г҃ Бл҃года́ть ва́мъ ꙳꙳ Въ сꙋббѡ́тꙋ л҃а недѣ́ли: Бра́тїе, бл҃года́ть ва́мъ ꙳꙳ и҆ ми́ръ ѿ бг҃а ѻ҆ц҃а̀ на́шегѡ, и҆ гдⷭ҇а і҆и҃са хрⷭ҇та̀, благодари́мъ бг҃а и҆ ѻ҆ц҃а̀ гдⷭ҇а на́шегѡ і҆и҃са хрⷭ҇та̀, всегда̀ ѡ҆ ва́съ молѧ́щесѧ: д҃ Слы́шавше вѣ́рꙋ ва́шꙋ, ꙗ҆́же ѡ҆ хрⷭ҇тѣ̀ і҆и҃сѣ, и҆ любо́вь ю҆́же и҆́мате ко всѣ́мъ ст҃ы̑мъ: є҃ За ᲂу҆пова́нїе ѿложе́нное ва́мъ на небесѣ́хъ, є҆́же пре́жде слы́шасте въ словесѝ и҆́стины бл҃говѣствова́нїѧ, ѕ҃ Сꙋ́щагѡ въ ва́съ, ꙗ҆́коже и҆ во все́мъ мі́рѣ: и҆ є҆́сть плодоно́сно и҆ (л. рѯ҃є) расти́мо, ꙗ҆́коже и҆ въ ва́съ, ѿ негѡ́же днѐ слы́шасте, и҆ разꙋмѣ́сте бл҃года́ть бж҃їю во и҆́стинѣ.

Коне́цъ сꙋббѡ́тѣ. Чтѝ вто́рникꙋ:

з҃ Ꙗ҆́коже и҆ ᲂу҆вѣ́дѣсте ѿ є҆пафра́са возлю́бленнагѡ срабо́тника на́шегѡ, и҆́же є҆́сть вѣ́ренъ ѡ҆ ва́съ слꙋжи́тель хрⷭ҇то́въ, и҃ И҆́же и҆ ꙗ҆вѝ на́мъ ва́шꙋ любо́вь въ дс҃ѣ. [в҃] ѳ҃ Сегѡ̀ ра́ди и҆ мы̀ ѿ негѡ́же днѐ слы́шахомъ, не престае́мъ ѡ҆ ва́съ молѧ́щесѧ, и҆ просѧ́ще, да и҆спо́лнитесѧ въ ра́зꙋмѣ во́ли є҆гѡ̀, во всѧ́кой премꙋ́дрости и҆ ра́зꙋмѣ дꙋхо́внѣмъ: і҃ Ꙗ҆́кѡ ходи́ти ва́мъ досто́йнѣ бг҃ꙋ, во всѧ́комъ ᲂу҆гожде́нїи, и҆ всѧ́комъ дѣ́лѣ бла́зѣ плодоносѧ́ще, и҆ возраста́юще въ ра́зꙋмѣ бж҃їи, а҃і Всѧ́кою си́лою возмога́юще, по держа́вѣ сла́вы є҆гѡ̀ во всѧ́комъ терпѣ́нїи и҆ долготерпѣ́нїи съ ра́достїю.

Коне́цъ вто́рникꙋ.

(заⷱ҇ с҃н) [г҃] в҃і Благодарѧ́ще Недѣ́лѧ к҃и: Бра́тїе, благодарѧ́ще бг҃а и҆ ѻ҆ц҃а̀, призва́вшаго ва́съ въ прича́стїе наслѣ́дїѧ ст҃ы́хъ во свѣ́тѣ: г҃і И҆́же и҆зба́ви на́съ ѿ вла́сти те́мныѧ, и҆ преста́ви въ црⷭ҇тво сн҃а любвѐ своеѧ̀: д҃і Ѡ҆ не́мже и҆́мамы и҆збавле́нїе кро́вїю є҆гѡ̀, и҆ ѡ҆ставле́нїе грѣхѡ́въ: є҃і И҆́же є҆́сть ѻ҆́бразъ бг҃а неви́димагѡ, перворожде́нъ всеѧ̀ тва́ри. ѕ҃і Ꙗ҆́кѡ ѡ҆ не́мъ создана̀ бы́ша всѧ́чєскаѧ, ꙗ҆̀же на небесѝ, и҆ ꙗ҆̀же на землѝ, ви̑димаѧ, и҆ неви̑димаѧ: а҆́ще престо́ли, а҆́ще гдⷭ҇ьствїѧ, а҆́ще нача̑ла, а҆́ще вла̑сти, всѧ́чєскаѧ тѣ́мъ и҆ ѡ҆ не́мъ созда́шасѧ. з҃і И҆ то́й є҆́сть пре́жде всѣ́хъ, и҆ всѧ́чєскаѧ ѡ҆ не́мъ состоѧ́тсѧ. (л. рѯ҃є ѡ҆б.)

(заⷱ҇ сн҃а) и҃і И҆ то́й є҆́сть Въ сре́дꙋ к҃а на недѣ́ли: Бра́тїе, хрⷭ҇то́съ є҆́сть глава̀ тѣ́лꙋ це́ркве, и҆́же є҆́сть нача́токъ, перворожде́нъ и҆з̾ ме́ртвыхъ, ꙗ҆́кѡ да бꙋ́детъ во всѣ́хъ то́й пе́рвенствꙋѧ.

Коне́цъ недѣ́ли.

ѳ҃і Ꙗ҆́кѡ въ не́мъ благоизво́ли всемꙋ̀ и҆сполне́нїю всели́тисѧ. к҃ И҆ тѣ́мъ примири́ти всѧ́чєскаѧ къ себѣ̀, ᲂу҆миротвори́въ кро́вїю крⷭ҇та̀ є҆гѡ̀ чрез̾ него̀, а҆́ще земна̑ѧ, а҆́ще ли небє́снаѧ. [д҃] к҃а И҆ ва́съ и҆ногда̀ сꙋ́щихъ ѡ҆чꙋжде́ныхъ, и҆ врагѡ́въ помышле́ньми въ дѣ́лѣхъ лꙋка́выхъ, к҃в Ны́нѣ же примирѝ въ тѣ́лѣ пло́ти є҆гѡ̀ сме́ртїю є҆гѡ̀, предста́вити ва́съ ст҃ы, и҆ непоро́чны и҆ непови́нны пред̾ собо́ю. к҃г А҆́ще ᲂу҆̀бо пребыва́ете въ вѣ́рѣ ѡ҆снова́ни и҆ тве́рди, и҆ неподви́жими ѿ ᲂу҆пова́нїѧ благовѣствова́нїѧ, є҆́же слы́шасте, проповѣ́даное все́й тва́ри поднебе́снѣй, є҆мꙋ́же бы́хъ а҆́зъ па́ѵелъ слꙋжи́тель.

Коне́цъ средѣ̀.

(заⷱ҇ сн҃в) [є҃] к҃д Ны́нѣ ра́дꙋюсѧ ꙳꙳ Въ четверто́къ к҃а недѣ́ли: Бра́тїе, ны́нѣ ра́дꙋюсѧ ꙳꙳ во страда́нїихъ мои́хъ ѡ҆ ва́съ, ꙗ҆́кѡ и҆сполнѧ́ю лише́нїе скорбе́й хрⷭ҇то́выхъ во пло́ти мое́й, за тѣ́ло є҆гѡ̀, є҆́же є҆́сть це́рковь: к҃є Є҆́йже бы́хъ а҆́зъ слꙋжи́тель, по смотре́нїю бж҃їю да́нномꙋ мнѣ̀ въ ва́съ, и҆спо́лнити сло́во бж҃їе: к҃ѕ Та́йнꙋ сокрове́ннꙋю ѿ вѣ́къ и҆ ѿ родѡ́въ, ны́нѣ же ꙗ҆ви́сѧ свѧты̑мъ є҆гѡ̀. к҃з И҆̀мже восхотѣ̀ бг҃ъ сказа́ти, ко́е бога́тство сла́вы та́йны сеѧ̀ во ꙗ҆зы́цѣхъ, и҆́же (л. рѯ҃ѕ) є҆́сть хрⷭ҇то́съ въ ва́съ, ᲂу҆пова́нїе сла́вы: к҃и Є҆го́же мы̀ проповѣ́дꙋемъ, наказꙋ́юще всѧ́каго человѣ́ка, и҆ ᲂу҆ча́ще всѧ́кой премꙋ́дрости: да предста́вимъ всѧ́каго человѣ́ка соверше́нна ѡ҆ хрⷭ҇тѣ̀ і҆и҃сѣ: к҃ѳ Въ не́мже и҆ трꙋжда́юсѧ и҆ подвиза́юсѧ по дѣ́йствꙋ є҆гѡ̀, дѣ́йствꙋемомꙋ во мнѣ̀ си́лою.

Коне́цъ четверткꙋ̀.

Глава̀ втора́ѧ.

(заⷱ҇ сн҃г) сⷯ а҃ Хощꙋ̀ ᲂу҆́бѡ ва́съ Въ пѧто́къ к҃а недѣ́ли: Бра́тїе, хощꙋ̀ ва́съ вѣ́дѣти, коли́къ по́двигъ и҆́мамъ ѡ҆ ва́съ, и҆ ѡ҆ сꙋ́щихъ въ лаодїкі́и, и҆ во і҆ерапо́ли, и҆ є҆ли́цы не ви́дѣша лица̀ моегѡ̀ во пло́ти, [ѕ҃] в҃ Да ᲂу҆тѣ́шатсѧ сердца̀ и҆́хъ, сне́мшихсѧ въ любвѝ, и҆ во всѧ́комъ бога́тствѣ и҆звѣще́нїѧ ра́зꙋма, въ позна́нїе та́йны бг҃а и҆ ѻ҆ц҃а̀, и҆ хрⷭ҇та̀: г҃ Въ не́мже сꙋ́ть всѧ̀ сокрѡ́вища премꙋ́дрости, и҆ ра́зꙋма сокровє́нна. д҃ Сїе́ же глаго́лю, да никто́же ва́съ прельсти́тъ въ словопрѣ́нїи. є҃ А҆́ще бо и҆ пло́тїю ѿстою̀, но дꙋ́хомъ съ ва́ми є҆́смь, ра́дꙋѧсѧ, и҆ ви́дѧ ва́шъ чи́нъ, и҆ ᲂу҆твержде́нїе ва́шеѧ вѣ́ры ꙗ҆́же во хрⷭ҇та̀. ѕ҃ Ꙗ҆́коже ᲂу҆̀бо прїѧ́сте хрⷭ҇та̀ і҆и҃са гдⷭ҇а, та́коже въ не́мъ ходи́те, з҃ Оу҆корене́ни, и҆ назда́ни въ не́мъ, и҆ и҆звѣ́ствовани вѣ́рою, ꙗ҆́коже наꙋчи́стесѧ, и҆збы́точествꙋюще въ не́й благодаре́нїемъ.

Коне́цъ пѧткꙋ̀.

(заⷱ҇ сн҃д) и҃ Бра́тїе, блюди́тесѧ, ꙳꙳ На ѡ҆брѣ́занїе гдⷭ҇не: Бра́тїе, блюди́тесѧ, ꙳꙳ да никто́же ва́съ бꙋ́детъ прельща́ѧ фїлосо́фїею, и҆ тще́тною ле́стїю, по (л. рѯ҃ѕ ѡ҆б.) преда́нїю человѣ́ческомꙋ, по стїхі́амъ мі́ра, а҆ не по хрⷭ҇тѣ̀: ѳ҃ Ꙗ҆́кѡ въ то́мъ живе́тъ всѧ́ко и҆сполне́нїе бж҃ества̀ тѣле́снѣ: і҃ И҆ да бꙋ́дете въ не́мъ и҆спо́лнени, и҆́же є҆́сть глава̀ всѧ́комꙋ нача́лꙋ и҆ вла́сти: [з҃] а҃і Ѡ҆ не́мже и҆ ѡ҆брѣ́зани бы́сте ѡ҆брѣ́занїемъ нерꙋкотворе́ннымъ, въ совлече́нїи тѣ́ла грѣхо́внагѡ пло́ти, во ѡ҆брѣ́занїи хрⷭ҇то́вѣ, в҃і Спогре́бшесѧ є҆мꙋ̀ креще́нїемъ: ѡ҆ не́мже и҆ совоста́сте вѣ́рою, дѣ́йствомъ бг҃а, воскреси́вшагѡ є҆го̀ и҆з̾ ме́ртвыхъ.

Коне́цъ ѡ҆брѣ́занїю.

(заⷱ҇ сн҃є) г҃і И҆ ва́съ мє́ртвы сꙋ́щѧ въ прегрѣше́нїихъ и҆ въ неѡбрѣ́занїи пло́ти ва́шеѧ, соѡживи́лъ є҆́сть съ ни́мъ, Въ понедѣ́льникъ к҃в недѣ́ли: Бра́тїе, бг҃ъ вы̀ мє́ртвы сꙋ́щѧ въ прегрѣше́нїихъ, и҆ въ неѡбрѣ́занїи пло́ти ва́шеѧ, соѡживи́лъ є҆́сть со хрⷭ҇то́мъ, дарова́въ на́мъ всѧ̀ прегрѣшє́нїѧ: д҃і И҆стреби́въ є҆́же на на́съ рꙋкописа́нїе ᲂу҆че́ньми, є҆́же бѣ̀ сопроти́вно на́мъ, и҆ то̀ взѧ́тъ ѿ среды̀, пригвозди́въ є҆̀ на крⷭ҇тѣ̀: є҃ Совле́къ нача̑ла и҆ вла̑сти, и҆зведѐ въ позо́ръ дерзнове́нїемъ, ꙾и҆з̾ѡбличи́въ и҆̀хъ въ себѣ̀꙾꙾побѣди́въ и҆̀хъ на не́мъ꙾. [и҃] ѕ҃і Да никто́же ᲂу҆̀бо ва́съ ѡ҆сꙋжда́етъ ѡ҆ ꙗ҆де́нїи, и҆лѝ ѡ҆ питїѝ, и҆лѝ ѡ҆ ча́сти пра́здника, и҆лѝ ѡ҆ новомѣ́сѧчїихъ, и҆лѝ ѡ҆ сꙋббѡ́тахъ: з҃і Ꙗ҆̀же сꙋ́ть стѣ́нь грѧдꙋ́щихъ, тѣ́ло же хрⷭ҇то́во. и҃і Никто́же ва́съ да прельща́етъ и҆зволе́ннымъ є҆мꙋ̀ смиреномꙋ́дрїемъ, и҆ слꙋ́жбою а҆́гг҃льскою, ꙳ꙗ҆̀же не ᲂу҆вѣ́дѣ ᲂу҆чѧ̀, без̾ ᲂу҆ма̀꙳꙳ꙗ҆̀же не ᲂу҆вѣ́дѣ [въ тѣ́хъ] ходѧ̀, всꙋ́е꙳ дмѧ́сѧ ѿ ᲂу҆ма̀ пло́ти своеѧ̀: ѳ҃і И҆ не держѧ̀ главы̀, и҆з̾ неѧ́же всѐ тѣ́ло, соста́вы и҆ соꙋ́зы подае́мо, и҆ сне́млемо, расти́тъ возраще́нїе бж҃їе. (л. рѯ҃з)

(заⷱ҇ сн҃ѕ) к҃ А҆́ще ᲂу҆̀бо ᲂу҆мро́сте Во вто́рникъ к҃в-ѧ недѣ́ли: Бра́тїе, а҆́ще ᲂу҆мро́сте со хрⷭ҇то́мъ ѿ стїхі́й мі́ра почто̀ а҆́ки живꙋ́ще въ мі́рѣ стѧза́етесѧ;

Коне́цъ понедѣ́льникꙋ.

к҃а Не косни́сѧ, нижѐ вкꙋсѝ, ни ѡ҆сѧжѝ: к҃в Ꙗ҆̀же сꙋ́ть всѧ̑ во и҆стлѣ́нїе ᲂу҆потребле́нїемъ, по за́повѣдемъ и҆ ᲂу҆че́нїємъ чл҃вѣ́ческимъ: к҃г Ꙗ҆̀же сꙋ́ть сло́во ᲂу҆́бѡ и҆мꙋ́ще премꙋ́дрости, въ самово́льнѣй слꙋ́жбѣ, и҆ смиреномꙋ́дрїи, и҆ непощадѣ́нїи тѣ́ла, не въ че́сти ко́ей къ сы́тости пло́ти.

Глава̀ тре́тїѧ.

сⷯ а҃ А҆́ще ᲂу҆́бѡ воскреснꙋ́сте со хрⷭ҇то́мъ, вы́шнихъ и҆щи́те, и҆дѣ́же є҆́сть хрⷭ҇то́съ ѡ҆деснꙋ́ю бг҃а сѣдѧ̀: в҃ Гѡ́рнѧѧ мꙋ́дрствꙋйте, а҆ не земна̑ѧ. г҃ Оу҆мро́сте бо, и҆ живо́тъ ва́шъ сокрове́нъ є҆́сть со хрⷭ҇то́мъ въ бз҃ѣ.

Коне́цъ вто́рникꙋ.

(заⷱ҇ сн҃з) [ѳ҃] д҃ Є҆гда́ же ꙳꙳ Недѣ́лѧ к҃ѳ-ѧ: Бра́тїе, є҆гда̀ ꙳꙳ Сїе́ же и҆ недѣ́лѧ пра́ѻц҃ємъ. хрⷭ҇то́съ ꙗ҆ви́тсѧ живо́тъ ва́шъ, тогда̀ и҆ вы̀ съ ни́мъ ꙗ҆вите́сѧ въ сла́вѣ. є҃ Оу҆мертви́те ᲂу҆̀бо ᲂу҆́ды ва́шѧ, ꙗ҆̀же на землѝ, блꙋ́дъ, нечистотꙋ̀, стра́сть, по́хоть ѕлꙋ́ю, и҆ лихоима́нїе, є҆́же є҆́сть і҆дѡлослꙋже́нїе: ѕ҃ И҆́хже ра́ди грѧде́тъ гнѣ́въ бж҃їй на сы́ны противле́нїѧ, з҃ Въ ни́хже и҆ вы̀ и҆ногда̀ ходи́сте, є҆гда̀ живѧ́сте въ ни́хъ. и҃ Ны́нѣ же ѿложи́те и҆ вы̀ та̀ всѧ̑: гнѣ́въ, ꙗ҆́рость, ѕло́бꙋ, хꙋле́нїе, срамосло́вїе (л. рн҃з ѡ҆б.) ѿ ᲂу҆́стъ ва́шихъ. ѳ҃ Не лжи́те дрꙋгъдрꙋ́гꙋ, совле́кшесѧ ве́тхагѡ человѣ́ка съ дѣѧ́ньми є҆гѡ̀: і҃ И҆ ѡ҆бле́кшесѧ въ но́ваго ѡ҆бновлѧ́емаго въ ра́зꙋмъ, по ѻ҆́бразꙋ созда́вшагѡ є҆го̀: а҃і И҆дѣ́же нѣ́сть є҆́ллинъ, ни і҆ꙋде́й: ѡ҆брѣ́занїе, и҆ неѡбрѣ́занїе: ва́рваръ, и҆ скѵ́ѳъ: ра́бъ, и҆ свобо́дь: но всѧ́чєскаѧ, и҆ во всѣ́хъ хрⷭ҇то́съ.

Коне́цъ недѣ́ли.

(заⷱ҇ сн҃и) в҃і Ѡ҆блецы́тесѧ ᲂу҆̀бо Недѣ́лѧ л҃-ѧ: Бра́тїе, ѡ҆блецы́тесѧ ᲂу҆̀бо ꙳ Сїе́ же и҆ преподѡ́бнымъ. [ꙗ҆́коже и҆збра́ннїи бж҃їи, ст҃и, и҆ возлю́бленни,] во ᲂу҆трѡ́бы щедро́тъ, бл҃гость, смиреномꙋ́дрїе, кро́тость, и҆ долготерпѣ́нїе: г҃і Прїе́млюще дрꙋгъдрꙋ́га, и҆ проща́юще себѣ̀, а҆́ще кто̀ на кого̀ и҆́мать порече́нїе: ꙗ҆́коже и҆ хрⷭ҇то́съ прости́лъ є҆́сть ва́мъ, та́кѡ и҆ вы̀. д҃і Над̾ всѣ́ми же си́ми стѧжи́те любо́вь, ꙗ҆́же є҆́сть соꙋ́зъ соверше́нства. є҃і И҆ ми́ръ бж҃їй да водворѧ́етсѧ въ сердца́хъ ва́шихъ, во́ньже и҆ зва́ни бы́сте во є҆ди́номъ тѣ́лѣ: и҆ благода́рни быва́йте. [і҃] (пнⷣе) ѕ҃і Сло́во хрⷭ҇то́во да вселѧ́етсѧ въ ва́съ бога́тнѡ, во всѧ́кой премꙋ́дрости, ᲂу҆ча́ще и҆ вразꙋмлѧ́юще себѐ самѣ́хъ во ѱалмѣ́хъ, и҆ пѣ́нїихъ и҆ пѣ́снехъ дꙋхо́вныхъ, ѡ҆ благода́ти пою́ще въ сердца́хъ ва́шихъ гдⷭ҇ви.

Коне́цъ недѣ́ли, и҆ преподѡ́бнымъ.

(заⷱ҇ сн҃ѳ) з҃і И҆ всѐ є҆́же ꙳꙳ Въ сре́дꙋ к҃в-ѧ недѣ́ли: Бра́тїе, всѐ є҆́же ꙳꙳ а҆́ще что̀ творитѐ сло́вомъ, и҆лѝ дѣ́ломъ, всѧ̑ во и҆́мѧ гдⷭ҇а і҆и҃са хрⷭ҇та̀, благодарѧ́ще бг҃а и҆ ѻ҆ц҃а̀ тѣ́мъ. и҃і Жєны̀, повинꙋ́йтесѧ свои́мъ (л. рѯ҃и) мꙋжє́мъ, ꙗ҆́коже подоба́етъ ѡ҆ гдⷭ҇ѣ. ѳ҃і Мꙋ́жїе, люби́те жєны̀ ва́шѧ, и҆ не ѡ҆горча́йтесѧ къ ни́мъ. к҃ Ча́да, послꙋ́шайте роди́телей свои́хъ во все́мъ: сїе́ бо ᲂу҆го́дно є҆́сть гдⷭ҇ви. к҃а Ѻ҆ц҃ы̀, не раздража́йте ча̑дъ ва́шихъ, да не ᲂу҆ныва́ютъ. к҃в Рабѝ, послꙋ́шайте по всемꙋ̀ плотски́хъ госпо́дїй ва́шихъ, не пред̾ ѻ҆чи́ма то́чїю рабо́тающе а҆́ки чл҃вѣкоꙋго́дницы, но въ простотѣ̀ се́рдца, боѧ́щесѧ бг҃а. к҃г И҆ всѧ́ко, є҆́же а҆́ще что̀ творитѐ, ѿ дꙋшѝ дѣ́лайте, ꙗ҆́коже гдⷭ҇ꙋ, а҆ не человѣ́кѡмъ: к҃д Вѣ́дѧще, ꙗ҆́кѡ ѿ гдⷭ҇а прїи́мете воздаѧ́нїе достоѧ́нїѧ: гдⷭ҇ꙋ бо хрⷭ҇тꙋ̀ рабо́таете. к҃д А҆ ѡ҆би́дѧй, воспрїи́метъ є҆́же ѡ҆би́дѣ, и҆ нѣ́сть лица̀ ѡ҆бинове́нїѧ.

Глава̀ четве́ртаѧ.

сⷯ а҃ Госпо́дїе, пра́вдꙋ и҆ ᲂу҆равне́нїе рабѡ́мъ подава́йте, вѣ́дѧще, ꙗ҆́кѡ и҆ вы̀ и҆́мате гдⷭ҇а на нб҃сѣ́хъ.

Коне́цъ средѣ̀.

(заⷱ҇ с҃ѯ) в҃ Въ мл҃твѣ Въ четверто́къ к҃в-ѧ недѣ́ли: Бра́тїе, въ моли́твѣ терпи́те, бо́дрствꙋюще въ не́й со бл҃годаре́нїемъ. г҃ Молѧ́щесѧ и҆ ѡ҆ на́съ вкꙋ́пѣ, да бг҃ъ ѿве́рзетъ на́мъ двє́ри сло́ва, проглаго́лати та́йнꙋ хрⷭ҇то́вꙋ, є҆ѧ́же ра́ди и҆ свѧ́занъ є҆́смь, д҃ Да ꙗ҆влю̀ ю҆̀, ꙗ҆́коже подоба́етъ мѝ глаго́лати.

(заⷱ҇) є҃ Въ премꙋ́дрости ꙳꙳ Лꙋкѣ̀ є҆ѵⷢ҇лі́стꙋ: Бра́тїе, въ премꙋ́дрости ꙳꙳ ходи́те ко внѣ́шнимъ, вре́мѧ и҆скꙋпꙋ́юще. ѕ҃ Сло́во ва́ше да быва́етъ всегда̀ во (л. рѯ҃и ѡ҆б.) благода́ти, со́лїю растворе́но, вѣ́дѣти, ка́кѡ подоба́етъ ва́мъ є҆ди́номꙋ комꙋ́ждо ѿвѣщава́ти. з҃ А҆ ꙗ҆̀же ѡ҆ мнѣ̀, всѧ̑ ска́жетъ ва́мъ тѷхі́къ возлю́бленный бра́тъ, и҆ вѣ́ренъ слꙋжи́тель, и҆ срабо́тникъ ѡ҆ гдⷭ҇ѣ. и҃ Є҆го́же посла́хъ къ ва́мъ на сѐ и҆́стое, ꙗ҆́кѡ да разꙋмѣ́етъ ꙗ҆̀же ѡ҆ ва́съ, и҆ ᲂу҆тѣ́шитъ сердца̀ ва́ша, ѳ҃ Со ѻ҆ни́сїмомъ вѣ́рнымъ, и҆ возлю́бленнымъ бра́томъ на́шимъ, и҆́же є҆́сть ѿ ва́съ: всѧ̑ ва́мъ ска́жꙋтъ ꙗ҆̀же здѣ̀.

Коне́цъ четверткꙋ̀. Престꙋпѝ лꙋкѣ̀.

(заⷱ҇ сѯ҃а) і҃ Цѣлꙋ́етъ Въ пѧто́къ к҃в-ѧ недѣ́ли: Бра́тїе, цѣлꙋ́етъ вы̀ а҆рїста́рхъ сплѣ́нникъ мо́й, и҆ ма́рко а҆неѱе́й варна́винъ, ѡ҆ не́мже прїѧ́сте за́пѡвѣди: а҆́ще же прїи́детъ къ ва́мъ, прїими́те є҆го̀: а҃і И҆ і҆исꙋ́съ нарече́нный і҆ꙋ́стъ, сꙋ́щїи ѿ ѡ҆брѣ́занїѧ: сі́и є҆ди́ни споспѣ́шницы во црⷭ҇тво бж҃їе, и҆̀же бы́ша мѝ ᲂу҆тѣше́нїе. в҃і Цѣлꙋ́етъ вы̀ є҆пафра́съ, и҆́же ѿ ва́съ, ра́бъ і҆и҃са хрⷭ҇та̀, всегда̀ подвиза́ѧйсѧ ѡ҆ ва́съ въ моли́твахъ, да бꙋ́дете соверше́ни и҆ и҆спо́лнени во всѧ́кой во́ли бж҃їей. г҃і Свидѣ́тельствꙋю бо ѡ҆ не́мъ, ꙗ҆́кѡ и҆́мать ре́вность мно́гꙋ, и҆ болѣ́знь ѡ҆ ва́съ, и҆ ѡ҆ сꙋ́щихъ въ лаодїкі́и, и҆ во і҆ерапо́ли.

Чтѝ лꙋкѣ̀:

д҃і Цѣлꙋ́етъ вы̀ лꙋка̀ вра́чь возлю́бленный, и҆ дима́съ.

Престꙋпѝ лꙋкѣ̀.

є҃і Цѣлꙋ́йте бра́тїю сꙋ́щꙋю въ лаодїкі́и, и҆ нѷмфа́на, и҆ дома́шнюю є҆гѡ̀ цр҃ковь. ѕ҃і И҆ є҆гда̀ прочте́тсѧ посла́нїе сїѐ ѿ ва́съ, сотвори́те, да и҆ въ лаодїкі́йстѣй цр҃кви (л. рѯ҃ѳ) прочте́но бꙋ́детъ, и҆ напи́санное ѿ лаодїкі́и, да и҆ вы̀ прочте́те. з҃і И҆ рцы́те а҆рхі́ппꙋ: блюдѝ слꙋже́нїе, є҆́же прїѧ́лъ є҆сѝ ѡ҆ гдⷭ҇ѣ, да доверши́ши є҆̀.

Чтѝ лꙋкѣ̀:

и҃і Цѣлова́нїе мое́ю рꙋко́ю па́ѵлею. помина́йте моѧ̀ ᲂу҆́зы. бл҃года́ть со всѣ́ми ва́ми. а҆ми́нь.

Коне́цъ пѧткꙋ̀, и҆ лꙋкѣ̀.

Коне́цъ посла́нїѧ, є҆́же къ колосса́ємъ: напи́сано бы́сть ѿ ри́ма, тѷхі́комъ и҆ ѻ҆ни́сїмомъ: и҆́мать въ себѣ̀ главы̑, д҃: зача̑лъ цр҃ко́вныхъ, г҃і: стїхѡ́въ, ч҃є: знамена́нїй че́рныхъ, г҃: без̾ червле́ныхъ.


Комментарии для сайта Cackle