(л. рч҃г ѡ҆б.) Знамєна́нїѧ къ фїлимо́нꙋ є҆пїсто́лїи.

[а҃] Похвале́нїе къ фїлимо́нꙋ, и҆ благодаре́нїе ѡ҆ не́мъ.

[в҃] Оу҆строе́нїе ѻ҆ни́сїма ᲂу҆бо́гагѡ раба̀, и҆ моле́нїе ѡ҆ не́мъ спасе́нꙋ бы́вшꙋ вѣ́рою.

Сказа́нїе къ фїлимо́нꙋ посла́нїѧ ст҃а́гѡ а҆пⷭ҇ла па́ѵла

Сїѐ посыла́етъ ѿ ри́ма. Вина́ же посла́нїѧ сїѧ̀: ѻ҆ни́сїмъ ра́бъ фїлимо́новъ бѣжа̀, и҆ пристꙋ́пль ко а҆пⷭ҇лꙋ, наꙋче́нъ бы́сть ѿ негѡ̀, и҆ бы́сть є҆мꙋ̀ потре́бенъ въ слꙋже́нїе. Ѡ҆ се́мъ ᲂу҆́бѡ пи́шетъ къ фїлимо́нꙋ, прика́зываѧ є҆мꙋ̀ ѻ҆ни́сїма, да прилѣжи́тъ ѡ҆ не́мъ и҆́скреннѡ: и҆ не мнѣ́ти є҆го̀ ктомꙋ̀ а҆́ки раба̀, но ꙗ҆́коже бра́та. Завѣщава́етъ же є҆мꙋ̀ и҆ ѻ҆би́тель пригото́вити є҆мꙋ̀, да а҆́ще та́мѡ по́йдетъ, ѡ҆брѧ́щетъ гдѣ̀ пребꙋ́детъ. И҆ та́кѡ скончава́етъ посла́нїе.

Вѣ́домо же да бꙋ́детъ, ꙗ҆́кѡ се́й ѻ҆ни́сїмъ свидѣ́тельствꙋ сподо́бисѧ, си́рѣчь мꙋче́нїю, въ ри́мстѣмъ гра́дѣ: тертѵ́ллꙋ ᲂу҆́бѡ ѻ҆́бласть держа́щꙋ, го́леней сокрꙋше́нїе, и҆ ме́чное претерпѣ̀ мꙋче́нїе. (л. рч҃д)

КЪ ФІЛИМО́НꙊ ПОСЛА́НІЕ

СТ҃А́ГѠ А҆ПО́СТОЛА ПА́ѴЛА.

Глава̀ пе́рваѧ.

(заⷱ҇) сⷯ а҃ Па́ѵелъ Мѣ́сѧца ное́мврїа к҃в. На па́мѧть ст҃а́гѡ а҆пⷭ҇ла фїлимо́на. ю҆́зникъ і҆и҃съ хрⷭ҇то́въ и҆ тїмоѳе́й бра́тъ фїлимо́нꙋ возлю́бленномꙋ и҆ споспѣ́шникꙋ на́шемꙋ, в҃ И҆ а҆пфі́и сестрѣ̀ возлю́бленнѣй, и҆ а҆рхі́ппꙋ сово́инственникꙋ на́шемꙋ, и҆ дома́шнѣй твое́й цр҃кви: г҃ Бл҃года́ть ва́мъ и҆ ми́ръ ѿ бг҃а ѻ҆ц҃а̀ на́шегѡ, и҆ гдⷭ҇а і҆и҃са хрⷭ҇та̀. [а҃] д҃ Бл҃годарю̀ бг҃а моего̀, всегда̀ па́мѧть ѡ҆ тебѣ̀ творѧ̀ въ моли́твахъ мои́хъ, є҃ Слы́шавъ любо́вь твою̀ и҆ вѣ́рꙋ, ю҆́же и҆́маши ко гдⷭ҇ꙋ і҆и҃сꙋ, и҆ ко всѣ̑мъ ст҃ы́мъ: ѕ҃ Ꙗ҆́кѡ да ѻ҆бще́нїе твоеѧ̀ вѣ́ры дѣ́йственно бꙋ́детъ, въ ра́зꙋмѣ всѧ́кагѡ бла́га є҆́же въ ва́съ, ѡ҆ хрⷭ҇тѣ̀ і҆и҃сѣ. з҃ Ра́дость (л. рч҃д ѡ҆б.) бо и҆́мамъ мно́гꙋ, и҆ ᲂу҆тѣше́нїе ѡ҆ любвѝ твое́й, ꙗ҆́кѡ ᲂу҆трѡ́бы ст҃ы́хъ почи́ша тобо́ю, бра́те. и҃ Сегѡ̀ ра́ди мно́гое дерзнове́нїе и҆мѣ́ѧ во хрⷭ҇тѣ̀ повелѣва́ти тебѣ̀, є҆́же потре́бно є҆́сть: ѳ҃ Любве́ же ра́ди па́че молю̀, тако́въ сы́й, ꙗ҆́коже па́ѵелъ ста́рецъ, ны́нѣ же и҆ ю҆́зникъ і҆и҃са хрⷭ҇та̀: [в҃] і҃ Молю́ тѧ ѡ҆ мое́мъ ча́дѣ, є҆го́же роди́хъ во ᲂу҆́захъ мои́хъ ѻ҆ни́сїма: а҃і И҆ногда̀ тебѣ̀ непотре́бнаго, ны́нѣ же тебѣ̀ и҆ мнѣ̀ бл҃гопотре́бна: в҃і Є҆го́же возпосла́хъ тѝ, ты́ же є҆го̀, си́рѣчь мою̀ ᲂу҆тро́бꙋ, прїимѝ. г҃і Є҆го́же а҆́зъ хотѣ́хъ ᲂу҆ себѐ держа́ти, да въ тебѐ мѣ́сто послꙋ́житъ мѝ во ᲂу҆́захъ благовѣствова́нїѧ. д҃і Без̾ твоеѧ́ же во́ли ничто́же восхотѣ́хъ сотвори́ти: да не а҆́ки по нꙋ́жди бл҃го́е твоѐ бꙋ́детъ, но по во́ли. є҃і Не́гли бо ра́ди сегѡ̀ разлꙋчи́сѧ на ча́съ, да вѣ́чна того̀ прїи́меши: ѕ҃і Не ктомꙋ̀ а҆́ки раба̀, но вы́ше раба̀, бра́та возлю́бленна, па́че же мнѣ̀, кольми́ же па́че тебѣ̀, и҆ по пло́ти, и҆ ѡ҆ гдⷭ҇ѣ. з҃і А҆́ще ᲂу҆́бѡ и҆́маши менѐ ѻ҆́бщника, прїимѝ сего̀ ꙗ҆́коже менѐ. и҃і А҆́ще же въ чесо́мъ ѡ҆би́дѣ тебѐ, и҆лѝ до́лженъ є҆́сть, мнѣ̀ сїѐ вмѣнѝ. ѳ҃і А҆́зъ па́ѵелъ написа́хъ рꙋко́ю мое́ю, а҆́зъ возда́мъ: да не рекꙋ̀ тебѣ̀, ꙗ҆́кѡ и҆ са́мъ себе́ ми є҆сѝ до́лженъ. к҃ Є҆́й, бра́те, а҆́зъ ꙾да полꙋчꙋ̀, є҆́же прошꙋ̀ ᲂу҆ тебѐ꙾꙾да по́льзꙋюсѧ тобо́ю꙾ ѡ҆ гдⷭ҇ѣ: ᲂу҆поко́й мою̀ ᲂу҆тро́бꙋ ѡ҆ гдⷭ҇ѣ. к҃а Надѣ́ѧвсѧ послꙋша́нїю твоемꙋ̀ написа́хъ тебѣ̀, вѣ́дый, ꙗ҆́кѡ и҆ па́че є҆́же глаго́лю, сотвори́ши. к҃в Кꙋ́пнѡ же и҆ ᲂу҆гото́ви мѝ ѻ҆би́тель: ᲂу҆пова́ю бо, ꙗ҆́кѡ моли́твами ва́шими дарова́нъ бꙋ́дꙋ ва́мъ. к҃г Цѣлꙋ́етъ тѧ̀ є҆пафра́съ сплѣ́нникъ мо́й, ѡ҆ хрⷭ҇тѣ̀ (л. рч҃є) і҆и҃сѣ: к҃д Ма́рко, а҆рїста́рхъ, дима́съ, лꙋка̀, споспѣ́шницы моѝ. к҃є Бл҃года́ть гдⷭ҇а на́шегѡ і҆и҃са хрⷭ҇та̀ со дх҃омъ ва́шимъ. а҆ми́нь.

Коне́цъ посла́нїѧ, є҆́же къ фїлимо́нꙋ и҆ а҆пфі́и, гдⷭ҇и́нѡмъ ѻ҆ни́сїмѡвымъ, и҆ а҆рхі́ппꙋ дїа́конꙋ колосса́йскїѧ цр҃кве: напи́сано бы́сть ѿ ри́ма, чрез̾ ѻ҆ни́сїма раба̀: и҆́мать въ себѣ̀ главꙋ̀, а҃: стїхѡ́въ, к҃є: знамена́нїй че́рныхъ, в҃: без̾ червле́ныхъ.


Комментарии для сайта Cackle