(л. сѯ҃в) А҆нтїфѡ́ны по всѧ̀ днѝ.

А҆нтїфѡ́нъ а҃: Бл҃го є҆́сть и҆сповѣ́датисѧ гдⷭ҇ви. Мл҃твами бцⷣы сп҃се, спасѝ на́съ. Сті́хъ: Бл҃го є҆́сть и҆сповѣ́датисѧ гдⷭ҇ви, и҆ пѣ́ти и҆́мени твоемꙋ̀ вы́шнїй. Мл҃твами бцⷣы сп҃се, спасѝ на́съ. Сті́хъ: Возвѣща́ти заꙋ́тра ми́лость твою̀, и҆ и҆́стинꙋ твою̀ на всѧ́кꙋ но́щь. Мл҃твами бцⷣы сп҃се, спасѝ на́съ. Сті́хъ: Ꙗ҆́кѡ пра́въ гдⷭ҇ь бг҃ъ на́шъ, и҆ нѣ́сть непра́вды въ не́мъ. Мл҃твами бцⷣы сп҃се, спасѝ на́съ. Сла́ва: Мл҃твами бцⷣы сп҃се, спасѝ на́съ. И҆ ны́нѣ: Мл҃твами бцⷣы сп҃се, спасѝ на́съ. А҆нтїфѡ́нъ в҃: Гдⷭ҇ь воцр҃и́сѧ въ лѣ́потꙋ ѡ҆блече́сѧ. Мл҃твами ст҃ы́хъ твои́хъ сп҃се, спасѝ на́съ. Сті́хъ: Гдⷭ҇ь воцр҃и́сѧ, въ лѣ́потꙋ ѡ҆блече́сѧ, ѡ҆блече́сѧ гдⷭ҇ь въ си́лꙋ и҆ препоѧ́сасѧ. Мл҃твами ст҃ы́хъ твои́хъ сп҃се, спасѝ на́съ. Сті́хъ: И҆́бо ᲂу҆твердѝ вселе́ннꙋю, ꙗ҆́же не подви́житсѧ. Мл҃твами ст҃ы́хъ твои́хъ сп҃се, спасѝ на́съ. Сті́хъ: Свидѣ̑нїѧ твоѧ̀ ᲂу҆вѣ́ришасѧ ѕѣлѡ̀: до́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й. Мл҃твами ст҃ы́хъ твои́хъ сп҃се, спасѝ на́съ. Сла́ва, и҆ ны́нѣ: Є҆диноро́дный сн҃е: А҆нтїфѡ́нъ г҃: Прїиди́те возра́дꙋемсѧ гдⷭ҇ви, воскли́кнемъ бг҃ꙋ сп҃си́телю на́шемꙋ. А҆́ще є҆́сть недѣ́лѧ, глаго́лемъ: Спаси́ ны сн҃е бж҃їй, воскр҃сы́й и҆з̾ ме́ртвыхъ пою́щыѧ тѝ: А҆ллилꙋ́їа. А҆́ще ли и҆́нъ де́нь, глаго́лемъ: Спаси́ ны сн҃е бж҃їй, во ст҃ы́хъ ди́венъ сы́й, пою́щыѧ тѝ: А҆ллилꙋ́їа. Сті́хъ: Предвари́мъ лицѐ є҆гѡ̀ во и҆сповѣ́данїи, и҆ во ѱалмѣ́хъ воскли́кнемъ є҆мꙋ̀. Спаси́ ны сн҃е бж҃їй, во ст҃ы́хъ ди́венъ сы́й, пою́щыѧ тѝ: А҆ллилꙋ́їа. Сті́хъ: Ꙗ҆́кѡ бг҃ъ ве́лїй гдⷭ҇ь и҆ цр҃ь ве́лїй по все́й землѝ. Спаси́ ны сн҃е бж҃їй, во ст҃ы́хъ ди́венъ (л. сѯ҃в ѡ҆б.) сы́й, пою́щыѧ тѝ: А҆ллилꙋ́їа. Сті́хъ: Ꙗ҆́кѡ въ рꙋцѣ̀ є҆гѡ̀ всѝ концы̀ землѝ, и҆ высѡты̀ го́ръ тогѡ̀ сꙋ́ть. Спаси́ ны сн҃е бж҃їй, во ст҃ы́хъ ди́венъ сы́й, пою́щыѧ тѝ: А҆ллилꙋ́їа. Сті́хъ: Ꙗ҆́кѡ тогѡ̀ є҆́сть мо́ре, и҆ то́й сотворѝ є҆̀, и҆ сꙋ́шꙋ рꙋ́цѣ є҆гѡ̀ созда́стѣ. Спаси́ ны сн҃е бж҃їй, во ст҃ы́хъ ди́венъ сы́й, пою́щыѧ тѝ: А҆ллилꙋ́їа. Вхо́дное: Прїиди́те поклони́мсѧ, и҆ припаде́мъ ко хрⷭ҇тꙋ̀. Спаси́ ны сн҃е бж҃їй:

Коне́цъ, и҆ бг҃ꙋ сла́ва.


Комментарии для сайта Cackle