Чин, бываемый на основание храма и водружение креста

Основа́нием украсившымся иму́щаго воздви́гнутися хра́ма, прихо́дит та́мо архиере́й, и наложи́в епитрахи́ль, и омофо́рий свой (или́ по́сланный от архиере́а архимандри́т, или́ протопресвитер, или́ иере́й, его́же благоволи́т посла́ти, наложи́в епитрахи́ль, и фело́нь), глаго́лет:

Благослове́н Бог наш, всегда́, ны́не и при́сно, и во ве́ки веко́в.

Лик: Ами́нь.

Та́же: Трисвято́е. Пресвята́я Тро́ице: О́тче наш: Я́ко Твое́ е́сть Ца́рство:

Нача́льствуяй же кади́т основа́ние о́крест. Певцы́ же глаго́лют отпусти́тельный тропа́рь свята́го, в его́же и́мя и́мать воздви́гнутися храм, и ины́я тропари́, я́же хо́щет предстоя́тель. Та́же став на ме́сте, на не́мже святы́й же́ртвенник и́мать бы́ти, глаго́лет моли́тву сию́:

Диа́кон: Го́споду помо́лимся.

Лик: Го́споди поми́луй.

Нача́льствуяй:

Го́споди Бо́же наш, изво́ливый и на сем ка́мени созда́тися Тебе́ це́ркви, Сам Твоя́ от Твои́х Тебе́ принося́щих, на воздви́жение и́же к Твоему́ славосло́вию созида́емаго хра́ма, мно́жеством Твои́х небе́сных благ возда́ждь, и де́лающыя укрепи́, невреди́мы соблюда́я я̀, основа́ния его́ неразруши́ма и непозы́блема соблюди́, и соверше́н покажи́ дом Твой, я́ко да и в нем всехва́льными пе́сньми и славословенми воспева́ем Тя и́стиннаго Бо́га на́шего.

Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

И по моли́тве твори́т отпу́ст. Та́же взем еди́н от ка́мений, и начерта́в им крест, сам нача́льствуяй полага́ет его́ в основа́ние, глаго́ля:

Основа́ ѝ Вы́шний, Бог посреде́ его́, и не подви́жется: помо́жет ему́ Бог у́тро зау́тра.

И а́бие взе́млет на сие́ предуготовленный крест, и водружа́ет его́ на ме́сте, иде́же и́мать бы́ти свята́я трапе́за, глаго́ля моли́тву сию́:

Го́споди Бо́же Вседержи́телю прообрази́вый жезл Моисе́ов, в честны́й и животворя́щий крест возлю́бленнаго Сы́на Твоего́, Го́спода на́шего Иису́са Христа́, Сам благослови́ и освяти́ ме́сто сие́, си́лою и де́йством честна́го и животворя́щаго, и пречи́стаго дре́ва креста́, в отгна́ние де́монов и вся́каго сопроти́внаго, сохраня́яй и ме́сто, и дом сей, и живу́щих зде, моли́твами пресла́вныя Влады́чицы на́шея Богоро́дицы и Присноде́вы Мари́и. Я́ко благослови́ся и просла́вися Твое́ ца́рство, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Соверше́ну же бы́вшу хра́му и же́ртвеннику, и освящену су́щу, взе́млется крест от ме́ста, иде́же бе водруже́н, на не́мже пи́шется си́це:

Освяти́ся же́ртвенник Го́спода Бо́га и Спа́са на́шего Иису́са Христа́ во хра́ме, и́мярек, Го́спода Бо́га и Спа́са на́шего Иису́са Христа́ (или́ Пресвяты́я Богоро́дицы, и́мярек, или́ свята́го, и́мярек), при Держа́ве Благочести́вейшаго, Самодержа́внейшаго, Вели́каго Госуда́ря на́шего ИМПЕРА́ТОРА АЛЕКСА́НДРА АЛЕКСА́НДРОВИЧА всея́ Росси́и, и при Супру́ге Его́, Благочести́вейшей Госуда́рыне ИМПЕРАТРИ́ЦЕ МАРИ́И ФЕО́ДОРОВНЕ; при Насле́днике Его́, Благове́рном Госуда́ре, Цесаре́виче и Вели́ком Кня́зе Нико́лае Алекса́ндровиче, по благослове́нию Святе́йшаго Правительствующего Сино́да (а́ще во епа́рхии, митрополи́та или́ епи́скопа, и́мярек), в ле́то, и́мярек, инди́кта, и́мярек, ме́сяца и числа́, и́мярек, на па́мять свята́го, и́мярек.

Та́же поставля́ется о́ный крест на восто́чней стране́ в же́ртвеннике.

Подоба́ет у́бо ве́дати сие́:

Когда́ бы́ти освяще́нию це́ркви в воскре́сныя дни, и когда́ не бы́ти.

Егда́ у́бо а́ще прилучи́тся свята́го Симео́на в неде́лю; или́ Покро́в Богоро́дицы; или́ Дими́трия Солу́нскаго; и в две неде́ли пред Рождество́м Христо́вым святы́х пра́отец и святы́х оте́ц; и в неде́лю по Рождестве́ Христо́ве; или́ егда́ бу́дет обре́зание, и Васи́лия Вели́каго в неде́лю: и в неде́лю по Креще́нии. Та́кожде же и с неде́ли мытаря́ и фарисея по неде́лю всех святы́х; и во ины́я неде́ли, я́же святы́х оте́ц собо́ров, Иу́лия 16, и Октября́ 11; и во все те неде́ли Влады́чним хра́мом, и Богоро́дицы, или́ свята́го, или́ святы́я, освяще́нию хра́му не вме́стно бы́ти. Зане́же в стихи́рах, и в Сла́вах, и в кано́нех, и в хвали́тных стихи́рах быва́ет вели́ко утеше́ние иде́же и всено́щное бде́ние быва́ет на освяще́ние Хра́ма. А иде́же не быва́ет всено́щнаго бде́ния, та́мо и наипа́че не вме́стно бы́ти отню́д во все те неде́ли освяще́нию хра́ма, кроме́ четвёртой и пя́той неде́ли Вели́каго поста́. Зане́ не пое́тся в те две неде́ли в трио́ди ничто́, кроме́ самогла́сных стихи́р на хвали́тех с запе́вом, ни разреше́ния ра́ди пи́щнаго, по завеща́нию святы́х пра́вил, не возмо́жно и тогда́ святи́ти хра́ма. Та́кожде не вме́стно бы́ти освяще́нию хра́ма свята́го, и святе́й, на все Госпо́дския пра́здники, и Богородицины и вели́ких Святы́х полиелеосных.

А́ще же изво́лит настоя́й святи́ти храм влады́чень:

То кроме́ у́бо неде́ль в 40-це, и кроме́ преполове́ния, и отда́ния Па́схи в седми́це ко́ей ни бу́ди, последи́ све́тлыя неде́ли, да твори́т освяще́ние хра́му сицевы́м о́бразом:

На ма́лой вече́рни пое́м: На Го́споди воззва́х, стихи́ры хра́му, на 4. Сла́ва, обновле́нию: И ны́не, хра́му. Та́же Све́те ти́хий: Посе́м проки́мен дню, Сподо́би Го́споди:

На стихо́вне: Обновле́нию. Сла́ва, обновле́нию: И ны́не, хра́му. По Ны́не отпуща́еши: Трисвято́е. И по О́тче наш: тропа́рь пра́зднику. Сла́ва, тропа́рь обновле́нию; И ны́не, тропа́рь хра́му, и отпу́ст.

На вели́цей вече́рни: Пое́м Блаже́н муж, пе́рвый антифо́н. На Го́споди воззва́х, поста́вим стихо́в 10. И пое́м пра́здника 3; Обновле́нию, 3; И хра́му 4. Сла́ва, пра́зднику; И ны́не, хра́му. И вход. Та́же чте́ние хра́му, и обновле́нию. А иде́же бде́ния не бу́дет, то чте́ние пре́жде быва́ет обновле́нию, пото́м же хра́му. Посе́м, ектении́. И лити́а хра́му (и пра́зднику. И стихо́вна у́тренняя, и Сла́вы. Та́же), Сла́ва пра́зднику; И ны́не, хра́му.

На стихо́вне: Хра́му. Сла́ва, пра́зднику; И ны́не, хра́му. На благослове́нии хле́бов глаго́лем тропа́рь хра́му, три́жды. Та́же, Бу́ди и́мя Госпо́дне: три́жды, пе́нием. И быва́ет чте́ние хра́ма. Параекклисиа́рх же взем благослове́ние от настоя́теля, звони́т во все ко́локола. По сконча́нии же тре́тьяго часа́ зво́на, и чте́ния, псало́мщик глаго́лет, ами́нь. Сла́ва в вы́шних Бо́гу: И ексапсалмы.

На у́трени, на Бог Госпо́дь: Тропа́рь пра́зднику, два́жды. Сла́ва, обновле́нию; И ны́не, хра́му. Та́же стихосло́вим две кафи́смы. По 1-й кафи́сме седа́лен пра́зднику, что по 2-м стихосло́вии. Сла́ва, и ны́не, други́й седа́лен. Та́же, полиеле́й. И псало́м избра́нный хра́му. И седа́лен хра́му, и чте́ние хра́му. Та́же, степе́нна; антифо́н 1-й 4-го гла́са; проки́мен, и Ева́нгелие хра́му. Та́же Воскресе́ние Христо́во ви́девше: Сла́ва, Моли́твами апо́стол: И ны́не, Моли́твами Богоро́дицы:

А на ины́я пра́здники пое́м, вме́сто, Моли́твами апо́стол: и вме́сто Моли́твами Богоро́дицы:

Сла́ва: Вся́ческая дне́сь: И ны́не, то́йже. Посе́м, Поми́луй мя Бо́же: Та́же стихи́ра хра́му. И псало́м 50. Посе́м моли́тва: Спаси́ Бо́же лю́ди Твоя́: и Го́споди поми́луй, 12. Та́же кано́н хра́му, со ирмосо́м на 6: и обновле́нию, на 4; и пра́зднику, на 4. Катава́сия, пра́здника. По 3-й пе́сни, конда́к и и́кос, обновле́нию. Та́же, конда́к и и́кос пра́зднику. И седа́лен, обновленю. Та́же, Сла́ва, седа́лен пра́зднику; И ны́не, хра́му. По 6-й пе́сни, конда́к и и́кос хра́му; на 9-й пе́сни пое́м, Честне́йшую: Свети́лен, хра́му, Сла́ва, свяще́нию; И ны́не, пра́здника. На звалитех, стихи́ры, на 6; обновле́нию, 3; и хра́му 3. Сла́ва, обновле́нию; И ны́не, хра́му; и славосло́вие. По славосло́вию тропа́рь пра́зднику. Сла́ва, свяще́нию; И ны́не, хра́му. На 1-м часе́ тропа́рь хра́му, и конда́к. На 3-м часе́ тропа́рь свяще́нию, и конда́к. На 6-м часе́ тропа́рь пра́зднику, и конда́к. На 9-м часе́ тропа́рь хра́му, и конда́к.

На литурги́и: Блаже́нна свяще́нию, пе́снь 3; И хра́му, пе́снь 6. По вхо́де тропа́рь пра́зднику. Та́же хра́му, и свяще́нию. Посе́м конда́к свяще́нию. Та́же, Сла́ва, конда́к пра́зднику; И ны́не, конда́к хра́му. Проки́мен, апо́стол, аллилу́иа, Ева́нгелие и прича́стен, свяще́нию, и хра́му. Дневны́й же рядовы́й апо́стол и Ева́нгелие вычита́ем пре́жде, или́ под главу́. Та́кожде твори́м и во ины́я попразднества, в седми́чныя дни освяще́ние влады́чнему хра́му, в просты́я дни кроме́ неде́ли. Не твори́м же свяще́ния влады́чним хра́мом и во вся неде́ли во ве́сь год, но то́кмо в просты́я дни, и то кроме́ Вели́каго поста́. В Вели́кий же у́бо пост, и в просты́я дни свяще́ния це́ркви не твори́м ни кото́рым хра́мом, ка́чества ра́ди пи́щнаго, я́же да не разреши́м на ры́бу и вино́ и ма́сло.

Ука́з о хра́ме Христо́ва Воскресе́ния. А́ще изво́лит настоя́тель святи́ти храм Воскресе́ния Христо́ва:

То свяще́ние твори́м ему́ в неде́лю, в какову́ ни прилучи́тся кроме́ 40-цы и 50-цы, и кроме́ неде́ли святы́х пра́отец, и кроме́ неде́ль святы́х оте́ц, и кроме́ пра́здников Богоро́дицыных. А́ще прилучи́тся в неде́лю покро́в Богоро́дицы, и положе́ние ри́зы, и по́яса (и сре́тение ико́ны, и Зна́мение, и Явле́ние Богоро́дицы Каза́нския), или́ ины́х пра́здников Богоро́дицы подо́бных таковы́м, и Септембрия пе́рвое число́; та́коже Ианнуария пе́рвое число́. (На поля́х: зри). А́ще бу́дет в неде́лю, или́ неде́ля по Рождестве́ Христо́ве, и неде́ля по Креще́нии Госпо́дни. Твори́м же в неде́лю свяще́ние сицевы́м о́бразом, по гла́су кото́рый прилучи́тся. На ма́лей вече́рни, по предначина́тельном псалме́, на Го́споди воззва́х, стихи́ры пое́м, на 4. Воскре́сны 4. Сла́ва, свяще́нию; И ны́не, богоро́дичен воскре́сный, ма́лыя вече́рни. Та́же проки́мен: Госпо́дь воцари́ся? На стихо́вне, свяще́нию. Сла́ва, свяще́нию; И ны́не, богоро́дичен воскре́сный, по гла́су Сла́вника. По Ны́не отпуща́еши, тропа́рь воскре́сный. Сла́ва, и ны́не, тропа́рь свяще́нию, и отпу́ст. На вели́цей вече́рни пое́м: Блаже́н муж: кафи́сму всю. На Го́споди воззва́х, пое́м стихи́ры, на 10; воскре́сны, 6; и свяще́нию, 4. Сла́ва, свяще́нию; И ны́не, богоро́дичен воскре́сный, догма́тик. Вход, проки́мен дне; и чте́ние хра́му. И обновле́нию и хра́му паремии́, пи́саны в Суббо́ту Вели́кую; ве́чер. Пе́рвая паремиа́, От пророчестваа Иса́иина, глава́ 60: Свети́ся, свети́ся Иерусали́ме; Коне́ц, Изимаяй Тя Бог, Святы́й Изра́илев. Втора́я паремиа́, От проро́чества Софо́ниева, глава́ 3: Та́ко глаго́лет Госпо́дь, потерпи́ Мене́ в де́нь воскресе́ния Моего́, во свиде́тельство Мое́; Коне́ц, Воцари́тся Госпо́дь посреди́ тебе́, и не у́зриши ктому́ зла. Тре́тия паремиа́, От проро́чества Иса́иина, глава́ 61: Да возра́дуется душа́ моя́ о Го́споде; Коне́ц, Та́ко возвесели́ся Госпо́дь о тебе́. На лити́и стихи́ры аммореовы. Сла́ва и ны́не, богоро́дичен воскре́сный, по гла́су. На стихо́вне воскре́сны. Сла́ва, обновле́нию; И ны́не, богоро́дичен воскре́сный. На благослове́нии хле́бов тропа́рь: Богоро́дице Де́во ра́дуйся: три́жды. Та́же, бу́ди и́мя Госпо́дне: три́жды. Та́же псало́м, Благословлю́ Го́спода: глаго́лет его́ до Не лиша́тся вся́каго бла́га. Иере́й же, зря к за́падом, глаго́лет: Благослове́ние Госпо́дне на вас: И быва́ет чте́ние, и звон; и по чте́нии по́сле зво́ну глаго́лет псало́мщик: Ами́нь. Сла́ва в вы́шних Бо́гу: И ексапсалмы. На у́трени, на Бог Госпо́дь, тропа́рь воскре́сен, два́жды. Сла́ва, и ны́не, свяще́нию. По 1-й кафи́сме седа́лен воскре́сен, с запе́вом, Сла́ва, и ны́не, богоро́дичен вече́рний, кото́рый быва́ет по́сле тропаря́. И чте́ние ряд. По 2-й кафи́сме седа́лен воскре́сен, с запе́вом. Сла́ва, и ны́не, богоро́дичен. И чте́ние. Та́же, полиеле́й, Велича́ние, и псало́м избра́нный, пи́сан в неде́лю Фомину́. Та́же тропари́: А́нгельский собо́р: И ипакои́, и седа́лен хра́му воскре́сен, два́жды, ина́го гла́са, кой ин бу́ди, без запева, и чте́ние. Та́же, степе́нна гла́су, и проки́мен. Ева́нгелие у́треннее, ряд, по столпу́. Воскресе́ние Христо́во: Глаго́лем псало́м 50. Стихи́ра, Воскре́с Иису́с: Посе́м моли́тва: Спаси́ Бо́же лю́ди Твоя́: И Го́споди поми́луй, 12. И возгла́с: Ми́лостию и щедро́тами: Кано́н воскре́сный, со ирмосо́м на 4. Ирмо́с еди́нощи. Крестовоскре́сен, и Богоро́дице на 6. Освяще́нию на 4. Катава́сия: Отве́рзу уста́ моя́: По 3-й пе́сни, конда́к и и́кос, освяще́нию; Сла́ва, и ны́не, седа́лен, освяще́нию. По 6-й пе́сни конда́к, и и́кос воскре́сен.

Глас 4. Подо́бен: Яви́лся еси́ дне́сь:

Спас и Изба́витель мой, из гро́ба я́ко Бог воскреси́в от уз земноро́дныя, и врата́ а́дова сокруши́в, я́ко Влады́ка воскре́се тридне́вен.

И́кос: Воскре́сшаго из ме́ртвых Христа́ Жизнода́вца, тридне́внаго из гро́ба, врата́ сме́ртная дне́сь сокруши́вшаго си́лою Свое́ю, и а́да умертви́вшаго, и жа́ло сме́ртное сте́ршаго, и Ада́ма с Е́вою свободи́вшаго, воспои́м вси земноро́днии благода́рственно, вопюще хвалу́ приле́жно; Той бо я́ко еди́н кре́пкий Бог и Влады́ка, воскре́се тридне́вен.

Свети́лен воскре́сен, два́жды. Сла́ва, и ны́не, свяще́нию.

На хвали́тех воскре́сны, 4. И свяще́нию 4, со Сла́вным. Стихи́ же глаго́лем: Госпо́дь воцари́ся, в ле́поту облече́ся. 2-й: До́му твоему́ подоба́ет святы́ня: Сла́ва, стихи́ра ева́нгельская. И ны́не, Преблагослове́нна еси́ Богоро́дице Де́во: По славосло́вии тропа́рь воскре́сен, по гла́су. На ча́стых тропа́рь воскре́сен. Сла́ва, тропа́рь свяще́нию. Конда́к пременя́ем.

На литурги́и: Блаже́нна воскре́сна, на 6; И свяще́нию, пе́снь 6 на 4. По вхо́де, тропа́рь воскре́сен; Та́же свяще́нию. Сла́ва, конда́к воскре́сен; И ны́не, конда́к свяще́нию. Проки́мен, апо́стол, аллилу́иа, Ева́нгелие, и прича́стен, преже свяще́нию, пото́м хра́му.

А во ины́я дни просты́я кроме́ неде́ли, хра́ма воскресе́ния Христо́ва не святи́ти, зане́же воскресней слу́жбе пе́тися не досто́йно.

Ука́з о хра́ме Пресвято́й Богоро́дицы

А́ще изво́лит настоя́й святи́ти храм Богоро́дицы в 50-це, в седми́це ко́ей ни бу́ди, кроме́ неде́ль, и кроме́ преполове́ния, и отда́ния Па́схи.

На ма́лой вече́рни, на Го́споди воззва́х:

Стихи́ры хра́ма на 4: И проки́мен дню. Посе́м, Сподо́би Го́споди на ве́чер: На стихо́вне, обновле́нию. Сла́ва, свяще́нию. И ны́не, хра́му. По ны́не отпуща́еши: Трисвято́е. И по О́тче наш, тропа́рь пра́зднику. Сла́ва, тропа́рь свяще́нию; И ны́не, тропа́рь хра́му. И про́чее. И отпу́ст.

На вели́цей вече́рни пое́м 1-й антифо́н.

На Го́споди воззва́х, поста́вим стихо́в 10. И пое́м пра́зднику 3; и обновле́нию 3; и хра́му 4. Сла́ва, пра́зднику. И ны́не, хра́му. Та́же, вход. И чте́ние обновле́нию, и хра́му. И посе́м, ектениа́:

Рцем вси: и́ Сподо́би Го́споди: и́ ектениа́ исполне́нию.

По лити́и стихи́ры, [в трио́ди.

Стихо́вны у́тренния и] хра́му. Сла́ва, пра́зднику: И ны́не, хра́му.

На стихо́вне, хра́му; Сла́ва, обновле́нию; И ны́не, пра́зднику. На благослове́нии хле́бов глаго́лем тропа́рь хра́му, три́жды. Та́же, Бу́ди и́мя Госпо́дне: три́жды, пе́нием. И быва́ет чте́ние. Параекклисиа́рх же взем благослове́ние у настоя́теля, звони́т во все ко́локола. По сконча́нии же третьего часа́ зво́ну чте́ния, псало́мщик глаго́лет: Сла́ва в вы́шних Бо́гу: И ексапсалмы.

На у́трени на Бог Госпо́дь, тропа́рь:

Пра́зднику, два́жды. Сла́ва, тропа́рь свяще́нию; И ны́не, тропа́рь хра́му. Та́же, стихосло́вим 2 кафи́смы. По 1-й кафи́сме седа́лен пра́здника, и́же по 2-й кафи́сме. Сла́ва, и ны́не, то́йже без запевов. По 2-й кафи́сме седа́лен хра́му; Сла́ва и ны́не, други́й седа́лен. Та́же полиеле́й. И псало́м избра́нный. И седа́лен хра́му; И чте́ние хра́му. Та́же, степе́нна, антифо́н 1-й, 4-го гла́са. Проки́мен, и Ева́нгелие, хра́му. Та́же, Сла́ва, Моли́твами Богоро́дицы: И ны́не, Моли́твами Богоро́дицы: Посе́м, псало́м 50. Стихи́ра хра́му. Та́же, моли́тва: Спаси́ Бо́же лю́ди Твоя́: Го́споди поми́луй, 12. И возгла́с: Ми́лостию и щедро́тами: Кано́н пра́зднику, со ирмосо́м на 6; И свяще́нию на 4; И хра́му, на 4. Катава́сия, пра́здника. По 4-й пе́сни конда́к и и́кос свяще́нию. Та́же, конда́к, и и́кос, пра́зднику. Посе́м седа́лен свяще́нию; Сла́ва, седа́лен пра́зднику; И ны́не, седа́лен хра́му. По 6-й пе́сни конда́к, и и́кос, хра́му. На 9-й пе́сни пое́м, Честне́йшую: Свети́лен, пра́зднику; Сла́ва, свяще́нию; И ны́не, хра́му.

На хвали́тех поста́вим стихо́в 6:

Свяще́нию, 3, хра́му, 3. Сла́ва, свяще́нию; И ны́не, хра́му; И славосло́вие. По славосло́вии, тропа́рь пра́зднику; Сла́ва, свяще́нию; И ны́не, хра́му. На 1-м часе́ тропа́рь и конда́к хра́му. На 3-м часе́ тропа́рь и конда́к, свяще́нию. На 6-м часе́ тропа́рь и конда́к пра́зднику. На 9-м часе́ тропа́рь и конда́к хра́му.

На литурги́и: Блаже́нна свяще́нию, пе́снь 3, на 4; И хра́му пе́снь 6-я, на 4. По вхо́де тропа́рь пра́здника, та́же, тропа́рь свяще́нию, и тропа́рь хра́му; Та́же конда́к свяще́нию; Сла́ва, конда́к пра́зднику; И ны́не, конда́к хра́му. Проки́мен, апо́стол, аллилу́иа, Ева́нгелие и прича́стный, свяще́нию, и хра́му. За Досто́йно, ирмо́с пра́зднику.

А иде́же ну́жды ра́ди не быва́ет бде́ние на освяще́ние хра́ма Госпо́дскаго и Богоро́дицы, в попра́зднстве, или́ предпра́зднстве, Госпо́дских пра́здников и Богоро́дицы, или́ в 50-це.

На вели́цей вече́рни кафи́сма:

Блаже́н муж: 1-й антифо́н. Стихи́ры на 10. Свяще́нию, 4; пра́зднику, 3; и хра́му, 4. Сла́ва, обновле́нию; И ны́не, хра́му. Вход. И проки́мен дню. И паремии́ обновле́нию, и хра́му. На лити́и стихи́ры стихо́вныя обновле́нию и лити́я хра́му, и у́тренняя стихо́вна, пра́здника; и Сла́вы, у́тренняя хвалитная, и стиховная, и вече́рняя стиховенная. Сла́ва, пра́здника, ю́же ве́чер, на Го́споди воззва́х; И ны́не хра́му.

На стихо́вне: хра́му; Сла́ва обновле́нию; И ны́не, хра́му. По Ны́не отпуща́еши, тропари́ пра́зднику. Сла́ва, тропа́рь обновле́нию; И ны́не, тропа́рь хра́му. И отпу́ст. Повече́рие пое́м по обы́чаю, на не́мже пое́м кано́н Богоро́дице во окто́ихе, [и свято́му прилучи́вшемуся тогда́ в мине́и]. А́ще ли же в 50-це, то пое́м и трипесенц трио́ди, и́же прилучи́тся тогда́. На литурги́и, на блаже́ннах, сицевы́м о́бразом: егда́ приспе́ет пе́снь трипе́снца в трио́ди, тогда́ кано́н во окто́ихе оставля́ем, и пое́м ирмо́с в трио́ди, одиножды; стихи́ же глаго́лем на 4, без Сла́вы.

Запе́в: Сла́ва Тебе́ Бо́же наш, сла́ва Тебе́. А в мине́и ря́дом глаго́лем, со сла́вою. А по 3-й пе́сни глаго́лем: Го́споди поми́луй, три́жды. И Сла́ва, и ны́не. Та́же, седа́лен свято́му; Сла́ва, и ны́не, богоро́дичен в мине́и (На по́ле: зри). А́ще ли бу́дет конда́к свято́му в мине́и; то по 6-й пе́сни глаго́лем, Го́споди поми́луй, три́жды. И Сла́ва, и ны́не; Та́же конда́к свято́му и и́кос. А седа́лен Богоро́дицы во окто́ихе оставля́ется. По Досто́йне, и по трисвято́м, конда́к хра́му; Сла́ва, и ны́не, конда́к обновле́нию. А́ще ли предпра́зднство, или́ попра́зднство, глаго́лем конда́к хра́му. Сла́ва, и ны́не, конда́к пра́зднику. А́ще ли в 50-це, глаго́лем та́кожде. А́ще ли храм Влады́чень, или́ Богородицын, глаго́лем пре́жде конда́к хра́му. Та́же, Сла́ва, и ны́не, конда́к пра́зднику. Та́же отпу́ст. Полу́нощницу пое́м по обы́чаю. А́ще бу́дет кроме́ неде́ли свяще́ние хра́му свята́го, или́ святы́я, то глаго́лем по 1-м Трисвято́м, вме́сто, Се жени́х: тропа́рь хра́му. Сла́ва, и ны́не, тропа́рь обновле́нию. По 2-м Трисвято́м глаго́лем, вме́сто Помяни́ Го́споди я́ко Благ: конда́к хра́му. Сла́ва, и ны́не, конда́к обновле́нию. А́ще ли храм Влады́чень, или́ храм Богоро́дицы, пре́жде глаго́лем тропа́рь и конда́к обновле́нию, та́же хра́му. Посе́м, Го́споди поми́луй, 12. И отпу́ст. А моли́твы, Помяни́ Го́споди в наде́жди воскресе́ния, не глаго́лем.

А́ще ли в неде́лю прилучи́тся свяще́ние хра́ма свята́го, или́ святы́я, на полу́нощницу глаго́лем кано́н тро́ичен гла́су, и все поря́ду гла́су. А по Досто́йне, ипакои́ и отпу́ст. На у́трени же и на литурги́и пое́м все поря́ду, я́коже указа́ся пре́жде (На по́ле: зри). А́ще прилучи́тся пра́здник Влады́чень, или́ Богородицын, или́ свята́го, или́ святы́я, в кото́рый де́нь ни бу́ди во ве́сь год; и в той де́нь на са́мый пра́здник, его́же бу́дет во и́мя храм неосвящен, и того́ хра́ма на свой пра́здник отню́д не святи́ти. А святи́ти храм, кото́рый ни бу́ди, пре́жде своего́ пра́здника, а не в той де́нь. И пото́м пра́здновати хра́му соверше́нно, кроме́ освяще́ния, зане́же пра́здник пра́зднуется настоя́щий, в той де́нь непреме́нно собо́ю, кроме́ вся́каго ино́го прило́гу.

А́ще же прилучи́тся бы́ти свяще́ние хра́ма, кроме́ неде́ль, и кроме́ предпразднств, и попразднств Госпо́дских, и Богродичных пра́здников, и кроме́ трио́ди, и а́ще е́сть Госпо́дский храм, или́ Богоро́дицы:

На ма́лей вече́рни пое́м, на Го́споди воззва́х, стихи́ры хра́му на 4. Сла́ва, обновле́нию; И ны́не, хра́му. Све́те ти́хий: Проки́мен дне. Та́же, Сподо́би Го́споди: На стихо́вне, обновле́нию; Сла́ва, обновле́нию; И ны́не, хра́му. По Трисвято́м тропа́рь обновле́нию; Сла́ва и ны́не, хра́му. Ектениа́, и отпу́ст.

На вели́цей ве́чери пое́м пе́рвый антифо́н.

На Го́споди воззва́х, поста́вим стихо́в 8; и пое́м обновле́нию 3, и хра́му 5. Сла́ва, обновле́нию; И ны́не, хра́му. Та́же вход. И чте́ние обновле́нию, и хра́му. На лити́и стихи́ры хра́му; Сла́ва, и ны́не хра́му. На стихо́вне, хра́му; Сла́ва, обновле́нию; И ны́не, хра́му. На благослове́нии хле́бов глаго́лем тропа́рь хра́ма три́жды; и про́чая, я́ко обы́чай. На у́трени, на Бог Госпо́дь, тропа́рь обновле́нию, два́жды; Сла́ва, и ны́не, хра́му. На кафи́смах седа́льны обновле́нию; Сла́ва, и ны́не, седа́лен хра́му. Та́же, полиеле́й, и псало́м избра́нный хра́му. И чте́ние хра́му. И Ева́нгелие хра́му. Та́же Сла́ва, Моли́твами апо́стол; И ны́не, Моли́твами Богоро́дицы. На ины́я же пра́здники Госпо́дския, вме́сто Моли́твами апо́стол, и вме́сто Моли́твами Богоро́дицы пое́м: Сла́ва, Вся́ческая дне́сь: И ны́не, то́йже. Посе́м, Поми́луй мя Бо́же: Та́же стихи́ра хра́му; и псало́м 50. Та́же, Спаси́ Бо́же лю́ди Твоя́: Та́же кано́н. А́ще Госпо́дский пра́здник, храм со ирмосо́м на 8; и обновле́нию, на 4. А́ще же Богоро́дицы обновле́нию со ирмосо́м на 6, и Богоро́дице на 6. Катава́сия по обы́чаю. По 3 пе́сни конда́к и и́кос обновле́нию, и седа́лен обновле́нию; Сла́ва, и ны́не, седа́лен хра́му. По 6 пе́сни конда́к и и́кос хра́му. На 9 пе́сни пое́м, Честне́йшую: Свети́лен обновле́нию; Сла́ва, и ны́не, хра́му. На хвали́тех стихи́ры на 6; обновле́нию 4, и хра́му 4; Сла́ва, обновле́нию; И ны́не, хра́му. Та́же, Славосло́вие вели́кое, и тропа́рь обновле́нию; Сла́ва, и ны́не, хра́му. На 1-м часе́ тропа́рь хра́му, и конда́к. На 3-м часе́ тропа́рь обновле́нию, и конда́к. На 6-м часе́ тропа́рь хра́му, и конда́к. На 9-м часе́ тропа́рь обновле́нию, и конда́к. На литурги́и блаже́нна обновле́нию пе́снь 3, и хра́му пе́снь 6. По вхо́де, а́ще е́сть Госпо́дский храм, глаго́лем тропа́рь хра́му, та́же обновле́нию. А́ще же Богоро́дичен, глаго́лем обновле́нию, та́же хра́му. Сла́ва, конда́к обновле́нию; И ны́не, хра́му. Проки́мен, апо́стол, аллилу́иа, Ева́нгелие, и прича́стный, а́ще е́сть храм Госпо́дский, пре́жде хра́му. А́ще же Богоро́дичен, то пре́жде обновле́нию, пото́м хра́му.

А́ще же храм свята́го или́ святы́я прилучи́тся свящати, то пое́тся си́це:

На ма́лой вече́рни, на Го́споди воззва́х, стихи́ры хра́му, на 4; Сла́ва, хра́му; И ны́не, обновле́нию. Све́те ти́хий: Проки́мен дне, и сподо́би Го́споди; По Трисвято́м, тропа́рь свято́му; Сла́ва, и ны́не, обновле́нию. На вели́цей вече́рни пое́м, Блаже́н муж; пе́рвый антифо́н. На Го́споди воззва́х, поста́вим стихо́в 8. И пое́м обновле́нию, 4; И хра́му свята́го 4. Сла́ва, хра́му; И ны́не, обновле́нию. Та́же вход. И чте́ние обновле́нию, и хра́му. На лити́и, а́ще и́мать, хра́му; Сла́ва, хра́му; И ны́не, богоро́дичен по гла́су. А́ще ли ни, на стихо́вне, обновле́нию; Сла́ва, хра́му; И ны́не, обновле́нию. На благослове́нии хле́бов тропа́рь свято́му и обновле́нию, и Богоро́дице де́во: По кафи́смах седа́льны хра́му, по два́жды; Сла́ва, и ны́не, обновле́нию. Полиеле́й, и седа́лен хра́му, два́жды; Сла́ва, и ны́не, богродичен; Степе́нна, 4-го гла́са, 1-й антифо́н. Проки́мен и Ева́нгелие хра́му свята́го. По Ева́нгелии, Сла́ва, Моли́твами свята́го, и́мярек; И ны́не; Моли́твами Богоро́дицы; Поми́луй мя Бо́же; Стихи́ра хра́му свята́го. Та́же кано́н обновле́нию, со ирмосо́м на 8; и хра́му свята́го на 6. Катава́сия по обы́чаю. По 3-й пе́сни конда́к и и́кос хра́му свята́го, и седа́лен его́; Сла́ва, и ны́не, седа́лен обновле́нию. По 6-й пе́сни конда́к и и́кос обновле́нию. По 9-й пе́сни свети́лен хра́му свята́го; Сла́ва, и ны́не, обновле́ние. На хвали́тех, стихи́ры на 6; обновле́нию 3; и хра́му свята́го, 3. Сла́ва, хра́му свята́го; И ны́не, обновле́нию. Та́же Славосло́вие. По Трисвято́м тропа́рь хра́му свята́го; Сла́ва, и ны́не, обновле́нию. На часе́х тропа́рь обновле́нию, и хра́му свята́го; конда́к же пременя́юще глаго́лем. На литурги́и блаже́нна, от кано́на обновле́нию, пе́снь 3; и хра́му свята́го; Сла́ва, конда́к хра́му свята́го; И ны́не, конда́к обновле́нию. Проки́мен, апо́стол, аллилу́иа, Ева́нгелие и прича́стен обновле́нию, и хра́му свята́го.

На вече́рни стихи́ры самогла́сны, глас 6:

Обновле́ния почита́ти, ве́тхий зако́н и до́бре име́ющся, па́че же но́вая почита́ти обновленми: обновля́ются бо о́строви к Бо́гу, я́ко глаго́лет Иса́иа: я́же разуме́ти подоба́ет от язы́к це́ркви, ны́не устроя́емыя, и водруже́ние прие́млющыя тве́рдое Бо́гом. Те́мже и мы настоя́щая обновле́ния духо́вно да торжеству́им.

Обновля́йтеся бра́тие, и ве́тхаго челове́ка отложи́вше, в но́вости жи́зни жи́тельствуйте, всем узду́ наложи́вше, от ни́хже сме́рть; вся у́ды нака́жем, вся́кую лука́вую дре́ва сне́дь возненави́девше, и сего́ ра́ди то́чию помина́юще, дре́вних да бежи́м. Та́ко да обновля́ется челове́к, си́це чти́тся обновле́ний де́нь.

Положи́л еси́ столп кре́пости це́рковь Твою́ Христе́, преве́чный Сло́ве: основа́л еси́ бо сию́ на ка́мени ве́ры. Те́мже недви́жна пребыва́ет во век, иму́щи Тя, тоя́ ра́ди в после́дняя, невра́щно бы́вша челове́ка. Благодаря́ще у́бо воспева́ем Тя, глаго́люще: Ты еси́ пре́жде веко́в, и на век, и еще́, Ца́рь наш, сла́ва Тебе́.

Сла́ва, глас 6: Па́мять обновле́ний соверша́юще Го́споди, тя святы́ни да́теля сла́вяще мо́лим, освяти́тися на́шым чу́вством душ, моли́твами сла́вных страстоте́рпец, Бла́же Всеси́льне.

И ны́не, Богоро́дичен воскре́сен.

Та́же, Све́те ти́хий; Проки́мен дне.

Царств тре́тиих чте́ние. Глава́ 8:

Ста Соломо́н пред лице́м же́ртвенника Госпо́дня, пред всем собо́ром Изра́илевым, и возде́в ру́це свои́ на Не́бо, и рече́: Го́споди Бо́же Изра́илев, не́сть Бог, я́коже Ты на небеси́ горе́, и на земли́ до́ле. А́ще бо Не́бо и Не́бо Небесе́ не довле́ют Тебе́, ка́ко дом сей, его́же созда́х и́мени Твоему́; Оба́че и при́зриши на моли́тву мою́, Го́споди Бо́же Изра́илев, услы́шати моле́ние и моли́тву, е́юже раб Твой мо́лится пред Тобо́ю к Тебе́ дне́сь. Да бу́дут о́чи Твои́ отве́рсты на дом сей де́нь и но́щь, на ме́сто сие́, о не́мже глаго́лал еси́: бу́дет и́мя Мое́ та́мо, е́же услы́шати моли́тву, е́юже мо́лится раб Твой на ме́сте сем, во дни и но́щи: И послу́шати мольбу́ раба́ Твоего́, и люде́й Твои́х Изра́иля. Ели́ка а́ще помо́лятся к Тебе́ на ме́сте сем, и Ты услы́шиши на ме́сте жили́ща Твоего́ на небеси́: и сотвори́ши, и ми́лостив бу́деши им.

При́тчей чте́ние. Глава́ 3:

Бог прему́дростию основа́ зе́млю, угото́ва же небеса́ ра́зумом, в чу́встве Его́ бе́здны разверго́шася, о́блацы же источи́ша ро́су. Сы́не, да не премине́ши, соблюди́ же мой сове́т, и мы́сль, да живе́т душа́ твоя́, и благода́ть бу́дет на твое́й вы́и; бу́дет же исцеле́ние пло́тем твои́м, и попече́ние косте́м твои́м, да хо́диши наде́яся в ми́ре во всех путе́х твои́х, нога́ же твоя́ не по́ткнется. А́ще бо ся́деши, безбоя́знен бу́деши: а́ще же поспи́ши, сла́достно поспи́ши. И не убои́шися боя́зни наше́дшия, ниже́ стремле́ний нечести́вых находя́щих. Госпо́дь бо бу́дет на всех путе́х твои́х, и утверди́т твою́ но́гу, да не позы́блешися. Не отрецы́ся благотвори́ти тре́бующему, внегда́ а́ще и́мать рука́ твоя́ помога́ти. Не рцы: отше́д возврати́ся, и у́тро дам, си́льну ти су́щу благотвори́ти: не ве́си бо, что породи́т находя́й. Не де́лай на дру́га твоего́ зла, прише́льствующа и упова́юща на тя. Не любовра́жствуй на челове́ка всу́е, да не что на тя соде́лает зло́е. Не стяжи́ злых муже́й поноше́ния, ниже́ ревну́й путе́м их. Нечи́ст бо пред Го́сподем вся́кий законопресту́пник, с пра́ведными же не сочетава́ется. Кля́тва Госпо́дня в доме́х нечести́вых, дворы́ же пра́ведных благословля́ются. Госпо́дь го́рдым проти́вится, смире́нным же дае́т благода́ть.

При́тчей чте́ние. Глава́ 9:

Прему́дрость созда́ себе́ дом, и утверди́ столпо́в се́дмь. Закла́ своя́ же́ртвенная, и раствори́ в ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи с высо́ким пропове́данием на ча́шу, глаго́лющи: И́же е́сть безу́мен, да уклони́тся ко мне. И тре́бующым ума́ рече́: Прииди́те, яди́те мой хлеб, и пи́йте вино́, е́же раствори́х вам. Оста́вите безу́мие, и жи́ви бу́дете; и взыщи́те ра́зума, да поживете́, и испра́вите ра́зум в ве́дении. Наказу́яй злы́я, прии́мет себе́ безче́стие; облича́яй же нечести́ваго, опоро́чит себе́; обличе́ние бо нечести́вому, ра́ны ему́. Не облича́й злых, да не возненави́дят тя: облича́й прему́дра, и возлю́бит тя. Да́ждь прему́дрому вину́, и прему́дрший бу́дет: сказу́й пра́ведному, и приложи́т приима́ти. Нача́ло прему́дрости страх Госпо́день, и сове́т святы́х, ра́зум. Разуме́ти бо зако́н, по́мысла е́сть блага́го. Сим бо о́бразом мно́гое поживе́ши вре́мя, и приложа́тся тебе́ ле́та живота́.

На стихо́вне стихи́ры, глас 6. Подо́бен: А́нгельския предидите:

Влады́ко Христе́, безсме́ртная прему́дросте манове́нием Твои́м прииди́ с высоты́ на сий храм, и непоколеби́мь сохрани́ до сконча́ния ве́ка, с ве́рою же в сий при́сно притека́ющих неприкоснове́ннаго све́та сподо́би Го́споди.

Стих: До́му твоему́ подоба́ет святы́ня Го́споди, в долготу́ дний.

И па́ки, ту́же стихи́ру.

Стих: Свят храм Твой, ди́вен в пра́вде.

Дре́вле Соломо́н храм созда́в, кро́ви живо́тных в же́ртву Тебе́ принесе́, во о́браз це́ркве Твоея́, ю́же стяжа́л еси́ Человеколю́бче честно́ю Твое́ю кро́вию, во́лею: ны́не же Тя во хра́ме сем мо́лим, Еди́наго благоутро́бнаго, я́ко да Дух пра́вый по́слеши на ны при́сно.

Сла́ва, глас 2: Обновле́ние соверша́юще всесвяще́ннаго хра́ма Твоего́ воскресе́ния, Тебе́ сла́вим Го́споди, освяти́вшаго сего́ и соверши́вша самосоверше́нною Твое́ю благода́тию: и крася́щаго в нем свяще́нствуемыми от ве́рных та́инственными и свяще́нными же́ртвами: и прие́млюща от рук раб Твои́х безкро́вныя и пречи́стыя же́ртвы, воздава́юща же пра́во принося́щым грехо́в очище́ние, и ве́лию ми́лость.

И ны́не, Богоро́дичен:

Тропа́рь, глас 4:

Я́коже вы́шния тве́рди благоле́пие, и ни́жнюю споказа́л еси́ красоту́ свята́го селе́ния сла́вы Твоея́, Го́споди: утверди́ сие́ во век ве́ка, и приими́ на́ша в нем непреста́нно приноси́мая Тебе́ моле́ния, Богоро́дицею, всех животе́ и воскресе́ние.

На у́трени по 1 стихосло́вии седа́лен, глас 8.

Подо́бен: Повеле́нное та́йно:

Свиде́тельства ски́нию Христо́с показа́, и боже́ственный Моисе́й на земли́ водрузи́, и храм обновля́ет Соломо́н в же́ртвах: мы же к но́вому Иерусали́му ве́рою прибега́юще, Дави́дски дади́м боже́ственное воспева́ние распе́ншемуся нас ра́ди, прося́ще проще́ния всех, и́миже согреши́хом, два́жды.

По 2 стихосло́вии седа́лен, глас 4. Подо́бен: Ско́ро предвари́:

Пра́зднственный дне́сь обновле́ний ве́рнии де́нь дости́же нас, повелева́ющий избра́нию Христо́ву, всем обнови́тися, и све́тлым лице́м пе́сни Влады́це из глубины́ се́рдца воспе́ти ве́рно, я́ко изба́вителю, и нас обновля́ющему. Два́жды.

Кано́н, глас 4. Пе́снь 1. Ирмо́с: Мо́ря чермну́ю:

И́же столпо́м наставля́яй дре́вле избра́ннаго Изра́иля, ба́нею креще́ния Христе́ в Сио́не, насади́л еси́ це́рковь зову́щу: пои́м пе́снь Бо́гу на́шему.

Дне́сь непристу́пныя Твоея́ сла́вы прише́ствие, и́же на земли́ водруженнаго Тебе́ хра́ма Не́бо устро́и, в не́мже согла́сно пои́м пе́снь Бо́гу на́шему.

Му́ченичен: Благода́ть исцеле́ний му́ченицы, от нетле́ннаго исто́чника, я́коже ту́не прия́сте, ве́рным ту́не раздава́ете: и́бо души́ и те́ла стра́сти разли́чныя уврачу́ете.

Богоро́дичен: Без се́мене О́тчею во́лею, от Боже́ственнаго Ду́ха, Бо́жия зачала́ еси́ Сы́на, и пло́тию родила́ еси́, от Отца́ без ма́тере, и нас ра́ди из Тебе́ без Отца́.

Пе́снь 3. Ирмо́с: Весели́тся о тебе́ Це́рковь:

Освяти́л еси́ на земли́ це́рковь Твою́ Христе́ Ду́хом, пома́зав сию́ дне́сь, Твоего́ ра́дования ми́лостию.

Основа́ние тя Христе́ це́рковь неруши́мо иму́щи, твои́м Кресто́м венчава́ется, я́коже ца́рскою диади́мою.

Му́ченичен: Мудрова́ние плотско́е, я́коже вражды́ на Бо́га вино́вно жи́зни, Ду́хом му́ченицы Христу́ покори́сте.

Богоро́дичен: Ты еди́на на земли́ па́че естества́ благи́х хода́таица, ма́ти Бо́жия, была́ еси́: те́мже Тебе́ е́же ра́дуйся прино́сим.

Седа́лен, глас 4. Подо́бен: Ско́ро предвари́:

Вся просвети́ прише́ствием Христо́с, мир обнови́ Ду́хом боже́ственным Свои́м, ду́шы обновля́ются: дом бо возложи́ся ны́не в сла́ву Госпо́дню, иде́же и обновля́ет ве́рных се́рдца Христо́с Бог наш, во спасе́ние челове́ков.

Сла́ва, и ны́не, то́йже.

Пе́снь 4. Ирмо́с: Вознесе́на Тя ви́девши:

Не же́ртвами безслове́сных це́рковь, но Твое́ю честно́ю из ребр живоно́сною Кро́вию окропля́ется, вле́поту взыва́ющи: сла́ва Си́ле твое́й Го́споди.

Образу́ющи пома́зание це́рковь избра́нных люде́й Твои́х, многоце́нным ми́ром дне́сь помазу́ется, боже́ственную Ду́ха благода́ть неви́димо прие́млющи.

Му́ченичен: Ра́дующеся святи́и о Го́споде, я́ко победи́тели вопия́ху на враги́ безпло́тныя: Бог нам си́ла е́сть непобеди́ма, и́хже в весе́лии сла́вим.

Богоро́дичен: Неискусобра́чно родила́ еси́ О Де́во, и по рождестве́ яви́лася еси́ де́вствующи па́ки: те́мже немо́лчными гла́сы, е́же ра́дуйся Тебе́ Влады́чице, ве́рою несумне́нною зове́м.

Пе́снь 5. Ирмо́с: Ты Го́споди мой свет:

Ты дре́вле в Сина́и ски́нию нерукотворе́нную показа́л еси́ богови́дцу Моисе́ю, пропису́я Христе́, це́рковь Твою́.

Ты Го́споди, ски́нию на земли́ устро́ил еси́, Ты чино́м небе́сным челове́ков ликостоя́ния сочетава́еши Си́лою Твое́ю.

Тя Го́споди исто́чник живота́ сведаем, Ты Святы́й, мир прише́д благовести́л еси́ Христе́, це́ркви Твое́й.

Богоро́дичен: Тя ору́жие тве́рдое на враги́ предлага́ем: Тя держа́ву и наде́жду на́шего спасе́ния, богоневе́сто, и́мамы.

Пе́снь 6. Ирмо́с: Пожру́ Ти со гла́сом:

Добро́ты Ца́рь Христо́с возжеле́ ны́не честны́я це́ркве, и язы́ков ма́терь показа́, от рабо́ты сынотворимым Ду́хом.

Не песо́к, но Христа́ основа́ние иму́щи, я́же от язы́к це́рковь венчава́ется добро́тою неприкоснове́нною, и диади́мою ца́рскою украша́ется.

Му́ченичен: Ни бога́тство я́же во Христа́ любве́ разлучи́, ни уязвляемое те́ло, ни сме́рте нарече́ние претимо, в соедине́ние Бо́жии наслажда́ющыяся му́ченики.

Богоро́дичен: О чу́до всех чуде́с новее! Я́ко Де́ва во утро́бе, вся содержа́щаго неискусому́жно заче́ншая, и не утеснися.

Конда́к, глас 4. Подо́бен: Яви́лся еси́:

Не́бо многосве́тлое це́рковь яви́ся, всех просвеща́ющи ве́рных, в не́йже стоя́ще зове́м: сей дом утверди́ Го́споди.

И́кос: Прише́дшу к нам Сло́ву по пло́ти, гро́мов у́бо сын глаго́лет напису́я: ви́дехом све́тло сла́ву, ю́же имя́ше Сын от Отца́, и́стины благода́тию. Ели́цы же ве́рою сего́ прия́хом, даде́ всем вла́сть бы́ти ча́дом Бо́жиим, и́же не от крове́й, ниже́ от во́ли плотски́я па́ки роди́вшеся, но от Ду́ха Свята́го возрастившеся, дом моли́твы водрузихом, и вопие́м: сей дом утверди́ Го́споди.

Пе́снь 7. Ирмо́с: В пещи́ авраа́мстии о́троцы:

Росодатель у́бо пе́щный пла́мень показа́ся иногда́: ны́не же от еле́а пома́зание Духо́вное освяща́ет зову́щыя: благослове́н еси́ в хра́ме сла́вы Твоея́ Го́споди.

Я́коже в пещи́ богоприя́тней, но́вей сей ски́нии, вси и́же от Изра́иля Духо́внаго ороша́еми возопии́м: благослове́н еси́ в хра́ме сла́вы Твоея́ Го́споди.

Му́ченичен: Я́же в пещи́ авраа́мския о́троки подража́юще, ре́вностию благоче́стия, повеле́ние мучи́телево укори́сте страстоно́сцы, пою́ще: благослове́н еси́ в це́ркви сла́вы Твоея́ Го́споди.

Богоро́дичен: Вы́шняго освяще́нное боже́ственное Селе́ние ра́дуйся, Тобо́ю бо даде́ся ра́дость Богоро́дице зову́щым: благослове́на Ты в жена́х еси́, всенепоро́чная Влады́чице.

Пе́снь 8. Ирмо́с: Ру́це распросте́р:

Дне́сь ри́зою у́мною, свы́ше истка́нною от боже́ственныя благода́ти, це́рковь Твоя́ Го́споди, я́коже неве́ста украси́ся, и своя́ созыва́ет к весе́лию лю́ди, вопию́щыя: благослови́те вся дела́ госпо́дня Го́спода.

Дне́сь вторы́й Ада́м Христо́с, показа́ рай у́мный, но́вую сию́ ски́нию, нося́щу нам дре́во ра́зума, живоно́сное кре́стное дре́во, пою́щым: благослови́те вся дела́ госпо́дня Го́спода.

Му́ченичен: Христа́ облеко́шася ве́рою, ве́тхаго челове́ка совле́кшеся, и обличи́ша му́ченицы, и́же тьмы́ мироде́ржца, и во псалме́х ра́достно усе́рдно поя́ху: благослови́те вся дела́ госпо́дня Го́спода.

Богоро́дичен: Ты еди́на во всех ро́дех, Де́во Пречи́стая, Ма́ти яви́лася еси́ Бо́жия: ты Божества́ была́ еси́ пребыва́лище Всенепоро́чная, не опали́вшися огне́м непристу́пнаго све́та. Те́мже вси Тя благослови́м Мари́е богоневе́сто.

Пе́снь 9. Ирмо́с: Ка́мень нерукосе́чный:

Прииди́те чи́стым се́рдцем, и трезвящими у́мными очесы́ царе́вы дще́ре, це́ркве красоту́, па́че зла́та сия́ющу, сматря́юще велича́ем.

Ра́дуйся и весели́ся неве́сто Царя́ вели́каго, созерцающи све́тло Твоего́ жениха́ красоту́, с людьми́ твои́ми зову́щи: Тя Жизнода́вче велича́ем.

Му́ченичен: Прииди́те, ле́тнюю па́мять духо́вне ве́рнии соверша́юще, за́поведи сохране́нием страстоте́рпцем вси поревну́им, и с ни́ми возопии́м: Тя велича́ем Трисвяты́й.

Богоро́дичен: Ра́дуйся Благода́тная, Неве́сто Царя́ Вели́каго, я́ко Тобо́ю от кля́твы е́вины вси Чи́стая изба́вихомся, и живо́т обрето́хом в рождестве́ Твое́м неневе́стная.

Свети́лен. Подо́бен: Ду́хом во святи́лищи:

Ю́же пречи́стою кро́вию искупи́л еси́ Сло́ве, всечу́дную и всечестну́ю и святу́ю це́рковь обнови́ Ду́хом Бла́же, и удобри́ заря́ми боже́ственнейшими, сла́вою прославля́я, досто́йно Твоего́ хра́ма обновле́ние соверша́ющих.

Други́й. Подо́бен: Посети́л ны:

От Де́вы Христо́с сла́ва и Свет возсия́: те́мже свети́ся, свети́ся но́вый Иерусали́ме, и обновля́йся дне́сь, я́ко воскресе́ние всем нам обновля́еши.

На хвали́тех стихи́ры, глас 4. Подо́бен: Дал еси́ зна́мение:

Дне́сь боже́ственный, и свяще́нный, и честны́й Христо́ва воскресе́ния, све́тло обновля́ется светоно́сный дом: и дае́т ми́ру гроб боже́ственный живо́т: и вруча́ет исто́чник безсме́ртный, то́чит струи́ благода́ти чуде́с: оби́лует во́ды, и да́рует исцеле́ния, Того́ ве́рою пою́щым.

И́ны стихи́ры самогла́сны, глас 1. Иоа́нна мона́ха:

Обновля́йся, обновля́йся но́вый Иерусали́ме: прии́де бо Твой свет, и Сла́ва госпо́дня на Тебе́ возсия́. Сей дом Оте́ц созда́; сей дом Сын утверди́; сей дом Дух Святы́й обнови́, просвеща́яй, и утвержда́яй, и освяща́яй души́ на́шя.

Глас то́йже. Анато́лиа:

Дре́вле у́бо обновля́я храм Соломо́н, безслове́сных, живо́тных же́ртвы и всесожже́ния принесе́, Го́споди. Егда́ же благоволи́л еси́ Спа́се, о́бразом у́бо упраздни́тися, позна́тися же и́стине, безкро́вныя же́ртвы ро́ди челове́честии прино́сят сла́ве Твое́й: все́ми бо влады́чествуяй вся́ческая освяща́еши Святы́м Ду́хом.

Глас 4. Иоа́нна мона́ха: Обновля́ется дне́сь я́же от язы́к це́рковь, честно́ю и живото́чною кро́вию, от пречи́стых и нетле́нных ребр вопло́щшагося от Святы́я Де́вы, Христа́ Бо́га на́шего. Те́мже собра́вшеся ве́рных ли́цы, просла́вим Отца́, и Сы́на, и Свята́го Ду́ха, Еди́но божество́, содержа́щее вся́ческая.

Сла́ва, глас 3: К себе́ восходи́ челове́че, бу́ди нов вме́сто ве́тхаго: и души́ пра́зднуй обновле́ния, до́ндеже вре́мя жития́: да обновля́ется тебе́ вся́каго жития́ пу́ть, дре́вняя бо преидо́ша, се бы́ша вся но́ва. Сие́ пра́зднику плодопринеси́, до́брым измене́нием изменя́емь: си́це обновля́ется челове́к, та́ко чти́тся обновле́ний де́нь.

И ны́не, Богоро́дичен.

Хра́му соверше́ну бы́вшу, прихо́дит по́сланный, ему́же повели́т архиере́й, и поставля́ет освяще́нный антими́нс на анало́гий, на пра́вой стране́, проти́в Спа́сова о́браза, украси́в на ди́скосе, и поста́вив над ним святу́ю звезду́, и покрыва́ет покро́вом, и возжже́т свещу́ пред ним. И повели́т принести́ стол нов чист, и поста́вит его́ среди́ це́ркве, и покры́ет его́ плащани́цею бе́лою чи́стою, и верху́ ея́ пелено́ю, и положи́т верху́ их свято́е Ева́нгелие, и честны́й крест, и срачи́цу престо́ла, долгото́ю су́щу престо́л до земли́ покры́ти, и инди́тию, и ве́рвь, е́юже обвязовати святы́й престо́л по срачи́це, и сосу́ды святы́я, и покро́вы, и про́чыя вся церко́вныя потре́бы; и возжже́т 4 свещы́ в све́щницех, и поставля́ет их на четы́рех у́глех стола́. И пое́тся ма́лая вече́рня. По вре́мени же всено́щное бде́ние по уста́ву пое́тся обновле́ния, и хра́ма. По у́трени же быва́ет освяще́ние во́ды си́це: Поставля́ется стол и на нем ча́ша, и влива́ет в ню во́ду, и полага́ется на блю́де честны́й крест с василками. И одева́ется нача́льствуяй во всю обы́чную свяще́нническую оде́жду, и про́чии свяще́нницы ели́цы су́ть, и диа́кони. И всем свяще́нником и диа́коном даю́тся свещы́. И начина́ет нача́льствуяй пе́ти моле́бен и свяще́ние во́ды, е́же соверша́ется в 1-й де́нь А́вгуста. И по сконча́нии свяще́ния во́ды, прие́мше свяще́нницы во́ду святу́ю, су́щую на блю́де, и с честны́м кресто́м, та́кожде и стол, на не́мже потре́бы лежа́т, и прино́сят во олта́рь, и олтарю́ затворену бы́вшу, и не сме́ют та́мо стоя́ти от мирски́х никто́же, то́кмо свяще́нницы и диа́кони облече́ни во свяще́нныя оде́жды. Прие́млют же свяще́нницы дску трапе́зы. Нача́льствуяй же кропи́т свято́ю водо́ю столпы́, или́ единостолпие, ничто́же глаго́ля; иукрепляется дска трапе́зы я́коже ле́по, и отмыва́ется те́плою водо́ю, и отира́ется. И па́ки кропи́тся свято́ю водо́ю. Внегда́ же устроя́ется трапе́за, и омывается,

глаго́лют псало́м 144:

Вознесу́ Тя Бо́же мой, Царю́ мой, и благословлю́ и́мя Твое́ в век и в век ве́ка. На всяк де́нь благословлю́ Тя, и восхвалю́ и́мя Твое́ в век, и в век ве́ка. Ве́лий Госпо́дь и хва́лен зело́, и вели́чию Его́ не́сть конца́. Род и род восхва́лят дела́ Твоя́, и си́лу Твою́ возвестя́т. Великоле́пие сла́вы святы́ни Твоея́ возглаго́лют, и чудеса́ Твоя́ пове́дят: И си́лу стра́шных Твои́х реку́т, и вели́чие твое́ пове́дят. Па́мять мно́жества бла́гости Твоея́ отры́гнут, и пра́вдою Твое́ю возра́дуются. Щедр и ми́лостив Госпо́дь, долготерпели́в и многоми́лостив. Благ Госпо́дь вся́ческим, и щедро́ты Его́ на всех де́лех его́. Да испове́дятся Тебе́, Го́споди, вся дела́ Твоя́, и преподо́бнии Твои́ да благословя́т Тя. Сла́ву Ца́рствия Твоего́ реку́т, и си́лу Твою́ возглаго́лют; Сказа́ти сыново́м челове́ческим си́лу Твою́, и сла́ву великоле́пия Ца́рствия Твоего́. Ца́рство Твое́, Ца́рство всех веко́в, и Влады́чество Твое́ во вся́ком ро́де и ро́де; Ве́рен Госпо́дь во всех словесе́х Свои́х, и преподо́бен во всех де́лех Свои́х. Утвержда́ет Госпо́дь вся низпа́дающыя, и возставля́ет вся низве́рженныя. О́чи всех на Тя упова́ют, и Ты дае́ши им пи́щу во благовре́мении; Отверза́еши Ты ру́ку Твою́, и исполня́еши вся́кое живо́тно благоволе́ния. Пра́веден Госпо́дь во всех путе́х Свои́х, и преподо́бен во всех де́лех Свои́х. Близ Госпо́дь всем призыва́ющым Его́, всем призыва́ющым его́ во и́стине. Во́лю боя́щихся Его́ сотвори́т, и моли́тву их услы́шит, и спасе́т я̀. Храни́т Госпо́дь вся лю́бящыя его́, и вся гре́шники потреби́т. Хвалу́ Госпо́дню возглаго́лют уста́ моя́: и да благослови́т вся́ка пло́ть и́мя свято́е Его́ в век, и в век ве́ка.

И псало́м 22.

Госпо́дь пасе́т мя, и ничто́же мя лиши́т. На ме́сте зла́чне, та́мо всели́ мя; на воде́ поко́йне воспита́ мя. Ду́шу мою́ обрати́, наста́ви мя на стези́ пра́вды, и́мене ра́ди своего́. А́ще бо и пойду́ посреде́ се́ни сме́ртныя, не убою́ся зла, я́ко Ты со мно́ю еси́; жезл Твой и па́лица Твоя́, та мя уте́шиста. Угото́вал еси́ предо мно́ю трапе́зу, сопроти́в стужа́ющым мне; ума́стил еси́ еле́ом главу́ мою́, и ча́ша твоя́ упоява́ющи мя, я́ко держа́вна. И ми́лость Твоя́ пожене́т мя вся дни живота́ моего́; и е́же всели́тимися в дом Госпо́день, в долготу́ дний.

И псало́м 83.

Ко́ль возлю́бленна селе́ния Твоя́, Го́споди сил! Жела́ет и скончава́ется душа́ моя́ во дворы́ Госпо́дни; се́рдце мое́ и пло́ть моя́ возра́довастася о Бо́зе жи́ве. И́бо пти́ца обре́те себе́ хра́мину, и го́рлица гнездо́ себе́, иде́же положи́т птенцы́ своя́; олтари́ Твоя́, Го́споди сил, Царю́ мой и Бо́же мой. Блаже́ни живу́щии в до́му Твое́м, во ве́ки веко́в восхва́лят Тя. Блаже́н муж, ему́же е́сть заступле́ние его́ у тебе́: восхожде́ния в се́рдце Свое́м положи́ во юдо́ль плаче́вную, в ме́сто е́же положи́: и́бо благослове́ние даст законополага́яй. По́йдут от си́лы в си́лу, яви́тся Бог бого́в в Сио́не. Го́споди Бо́же сил, услы́ши моли́тву мою́, внуши́ Бо́же Иа́ковль. Защи́тниче наш ви́ждь Бо́же, и при́зри на лице́ Христа́ Твоего́. Я́ко лу́чше де́нь еди́н во дво́рех Твои́х, па́че ты́сящ; изво́лих примета́тися в до́му Бо́га моего́ па́че, не́же жи́ти ми в селе́ниих гре́шничих. Я́ко ми́лость и и́стину лю́бит Госпо́дь, Бог благода́ть и сла́ву даст, Госпо́дь не лиши́т благи́х, ходя́щих незло́бием. Го́споди Бо́же сил, блаже́н челове́к упова́яй на Тя.

Та́же кропи́тся срачи́ца свято́ю водо́ю, и полага́ется на святу́ю трапе́зу, и обвязуется [про́сто] вервью на то устроенною, и окропленную свято́ю водо́ю. Та́же кропи́тся и индития, и одева́ют е́ю святу́ю трапе́зу глаго́люще псало́м 92:

Госпо́дь воцари́ся, в ле́поту облече́ся, облече́ся Госпо́дь в си́лу, и препоя́сася; и́бо утверди́ вселе́нную, я́же не подви́жится. Гото́в Престо́л твой отто́ле; от ве́ка Ты еси́. Воздвиго́ша ре́ки Го́споди, воздвиго́ша ре́ки гла́сы своя́; Во́змут ре́ки сотре́ния своя́, от гласо́в вод мно́гих, ди́вны высоты́ морски́я, ди́вен в высо́ких Госпо́дь. Свиде́ния Твоя́ уве́ришася зело́: до́му Твоему́ подоба́ет святы́ня Го́споди, в долготу́ дний.

И полага́ется свято́е Ева́нгелие и честны́й крест, и покрыва́ется плащани́цею, я́же е́сть пелена́. Вся же сия́ кропя́тся свято́ю водо́ю. Та́же украша́ется предложе́ние со кропле́нием святы́я во́ды. И поставля́ются сосу́ды и покро́вы, и пелено́ю покрыва́ются. Та́же кропи́т олта́рь, и храм ве́сь свято́ю водо́ю. И кади́т олта́рь и храм ве́сь. И глаго́лет нача́льствуяй: С ми́ром изы́дем. И е́млют Ева́нгелие, и крест, и во́ду святу́ю и про́чыя ико́ны, подо́бно я́коже быва́ет ход со кресты́. Та́же кади́в освяще́нный антими́нс нача́льствуяй, подъе́млет на главу́ с ди́скосом, покрыт покро́вом по звезде́, и обхо́дят храм о́крест на ю́жную страну́, диа́коном кадящим святы́й антими́нс, носи́мый на главе́; кадя́т же и храм, егда́ ко две́рем приходя́щым им, ю́жную страну́, васточную, се́верную и за́падную, теже диаакони, и́же антими́нс кадя́т, в не́мже святы́я мо́щи. Вторы́й же иере́й, воследуя нося́щему антими́нс, кропи́т свято́ю водо́ю храм. Обходя́ще же пою́т Тропа́рь, во глас 3: И́же на ка́мени ве́ры созда́вый це́рковь Твою́ Бла́же, в той испра́ви моле́ния на́ша, и приими́ лю́ди, ве́рою вопию́щыя Тебе́: спаси́ ны Бо́же наш, спаси́ ны. И други́я тропари́, глас 7: Святи́и му́ченицы, и́же до́бре страда́вше и венча́вшеся, моли́теся ко Го́споду спасти́ся душа́м на́шым.

Сла́ва Тебе́, Христе́ Бо́же, апо́столов похвало́, и му́чеников весе́лие, и́хже про́поведь Тро́ица единосу́щная. И прише́дшим ко врато́м вели́ким я́же к за́паду, ста́вше зря на восто́к, и глаго́лет нача́льствуяй: Благослове́н еси́ Христе́ Бо́же наш, всегда́, ны́не и при́сно, и во ве́ки веко́в. Певцы́ же вну́трь хра́ма су́щии отвеща́ют: Ами́нь. Нача́льствуяй же глаго́лет: Возми́те врата́ кня́зи ва́шя, и возми́теся врата́ ве́чная и вни́дет Ца́рь сла́вы. Певцы́ же вну́трь хра́ма отвеща́ют пе́нием: Кто е́сть сей Ца́рь сла́вы; Посе́м диа́кону ре́кшу: Го́споду помо́лимся. Певцы́ отвеща́ют: Го́споди поми́луй.

Нача́льствуяй моли́тву:

Бо́же и О́тче Го́спода на́шего Иису́са Христа́, И́же сый благослове́н во ве́ки, и́же заве́сою пло́ти его́ обновле́й нам пе́рвенец це́ркви, и́же на Небесе́х впи́саных вход, иде́же глас пра́зднующих, и глас ра́дости; Сам Человеколю́бче Влады́ко, при́зри на ны гре́шныя и недосто́йныя рабы́ Твоя́, обновле́ние пра́зднующыя честна́го хра́ма, [и́мярек,] во о́браз святе́йшия Твоея́ це́ркве; си́речь, сама́го телесе́ на́шего, е́же у́бо и храм Твой, и у́ды Христа́ Твоего́, всехва́льным апо́столом Па́влом именова́ти сподо́бил еси́. И сего́ утверди́ до сконча́ния ве́ка, непоколеби́ма и просла́влена Тобо́ю; и сподо́би нас в том хвалы́ и славосло́вия незазо́рна приноси́ти сла́ве Твое́й, и единоро́дному Твоему́ Сы́ну, Го́споду на́шему Иису́су Христу́, и Свято́му Твоему́ Ду́ху, в ра́зуме и вся́ком чу́встве, покланя́ющымся Тебе́ во стра́се Твое́м, Боже́ственных щедро́т досто́йным показа́тися; и благоприя́тным Твое́й бла́гости бы́ти мольба́м сим, о нас и всех лю́дех Твои́х неизрече́нному Твоему́ благоутро́бию приноси́мым; моли́твами Пречи́стыя Влады́чицы на́шея Богоро́дицы, и Присноде́вы Мари́и, и всех святы́х Твои́х.

А́бие глаго́лет и сию́ входну́ю моли́тву:

Влады́ко Го́споди Бо́же наш, уста́вивый на Небесе́х чи́ны, и во́инства а́нгел и арха́нгел, во служе́ние Твоея́ сла́вы, сотвори́ со вхо́дом на́шим, вхо́ду святы́х а́нгелов бы́ти, сослужа́щих нам и сославосло́вящих Твою́ бла́гость.

Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь. Та́же глаго́лет: Госпо́дь сил, Той е́сть Ца́рь сла́вы. Певцы́ пою́т то́йжде. И па́ки нача́льствуяй глаглет: Госпо́дь сил, той е́сть Ца́рь сла́вы. И зна́менует врата́ хра́ма антими́нсом со святы́ми мощми́ крестообра́зно. И вхо́дят во храм. Певцы́ же пою́т, Тропа́рь, глас 4:

Я́коже вы́шния тве́рди благоле́пие, и ни́жнюю споказа́л еси́ красоту́ свята́го селе́ния сла́вы Твоея́, Го́споди; утверди́ сие́ во век ве́ка, и приими́ на́ша в нем непреста́нно приноси́мая Тебе́ моле́ния Богоро́дицею, всех животе́ и воскресе́ние.

Нача́льствуяй же полага́ет освяще́нный антими́нс на святе́й трапе́зе; и полага́ет на нем свято́е Ева́нгелие, и покади́в, глаго́лет моли́тву пред свято́ю трапе́зою. Диа́кону ре́кшу: Па́ки и па́ки прикло́ньше коле́на, Го́споду помо́лимся.

И нача́льствуяй приклони́в коле́на своя́ [та́кожде и наро́д стоя́щий во хра́ме приклоня́ет коле́на своя́], чтет моли́тву сию́ во услы́шание всем:

Го́споди Бо́же наш, И́же тва́рь еди́ным сло́вом созда́вый, и во е́же бы́ти приведы́й, неизрече́нными же о́бразы разли́чно сию́ изобрази́вый; и́же надноси́мый на ню Твой Дух спрятавый, и со́лнечный сей свет на ню излия́вый, во обновле́ние ея́; И́же уго́днику Твоему́ Моисе́ю вдохну́вый хвалу́ не́кую изря́дну, приложи́ти добре́йшему Твоему́ созда́нию, и рещи́, ви́дети Тя свет я́ко до́брый, и де́нь нарещи́ сей. И́же у́бо и мы ви́дяще, и светле́йшее сие́ со́лнце, обновля́ющее на всяк де́нь тва́рь, Тя вои́стинну дне сла́вим со́лнце, и свет твой невече́рний; И́же Сыно́м Твои́м нам запове́давый обнови́тися на́шему естеству́ Святы́м Твои́м Ду́хом, я́коже и да́ром сим пра́ведным возсия́ти я́ко со́лнцу; Тебе́ мо́лимся, и Тебе́ милися де́ем Отцу́ Сло́ва, Го́спода и Бо́га на́шему; поне́же неизрече́нным Твои́м человеколю́бием, и безме́рною Твое́ю ми́лостию, тва́рь обновле́ние прия́т, и дре́вний зако́н во о́браз но́ваго заве́та во Твое́м боговиде́нии у Сина́йския го́ры, и в купине́ о́ной ди́вной, и в се́ни свиде́ния, и в предо́брейшем хра́ме Соломо́на о́наго; ми́лостивным о́ком при́зри на ны гре́шныя и недосто́йныя рабы́ Твоя́, живу́щыя в сем до́му небошироком, вселе́нныя похвале́, же́ртвеннице и́стинном неизрече́нныя Твоея́ сла́вы, и низпосли́ Пресвята́го Твоего́ Ду́ха на ны, и на насле́дие Твое́. И по Боже́ственному Дави́ду, обнови́ в сердца́х на́ших дух пра́вый и Ду́хом Влады́чним утверди́ нас. И ИМПЕРА́ТОРУ (у́бо) на́шему победи́тельная, и побе́ды на ви́димыя и неви́димыя враги́ да́руй, нам же единомы́слие и мир. Сотво́ршым же созда́ние сие́ и хра́ма обновле́ние, раче́нием Бо́жиим тща́тельно, оставле́ние согреше́ний пода́ждь; да́руй им я́же ко спасе́нию проше́ния. Воздви́гни я̀ к де́ланию за́поведей Твои́х, да́руй им обновле́ние да́ра Свята́го Твоего́ Ду́ха, да неосужде́нно покло́нятся Тебе́ еди́ному и́стинному Бо́гу, и Его́же посла́л еси́ Иису́са Христа́, моли́твами Богоро́дицы, и всех святы́х Твои́х, ами́нь. И по моли́тве воста́в нача́льствуяй, и прочие. Диа́кон глаго́лет: Заступи́, спаси́, поми́луй, возста́ви и сохрани́ нас Бо́же, Твое́ю благода́тию. Пресвяту́ю, Пречи́стую, и про́чая. Свяще́нник, возгла́с: Я́ко свят еси́ Бо́же наш, и на святы́х о Тебе́ пострада́вших, честны́х му́ченицех почива́еши, и Тебе́ сла́ву возсыла́ем Отцу́, и Сы́ну, и Свято́му Ду́ху, ны́не и при́сно и во ве́ки веко́в. Та́же лик: Ами́нь.

Нача́льствуяй прие́млет честны́й крест, и став посреди́ хра́ма осеня́ет по три́жды, на четы́ре страны́: на восто́к, на за́пад, на юг, на се́вер. Диа́кону же кадя́щу честны́й крест по обы́чаю, я́коже в ходех быва́ет. Пе́рвее глаго́лет: Го́споду помо́лимся. Кли́рицы же пою́т, [и́ лю́дие ки́йждо в себе́ глаго́лет]: Го́споди поми́луй, по три́жды, на вся́кую страну́ осене́нием. И нача́льствуяй же целу́ет честны́й крест [по не́мже и прочие служи́телие], и кропи́т свято́ю водо́ю; лю́дие же целу́ют честны́й крест на ру́це его́, и кропи́т лю́ди свято́ю водо́ю, и начина́ет часы́. Вшед же во олта́рь, твори́т проскоми́дию о обы́чаю; и быва́ет свята́я литурги́я. Ина́го же де́йства архиере́йскаго ничесо́же да де́йствует, ниже́ ины́х моли́тв глаго́лет; зане́ от архиере́а соверши́шася вся на свято́м антими́нсе. И си́це це́рковь о́ная освяще́на быва́ет, и соверше́на чрез антими́нс от архиере́а освяще́нный и по́сланный к ней. Ве́стно бу́ди, чего́ ра́ди в сем евхологии чин, зри и после́дование вели́каго освяще́ния церко́внаго не вчини́ся (На по́ле: зри). Сего́ ра́ди, зане́ не иерейское сие́ де́йство е́сть, но сама́го архиере́а. Три у́бо де́йства су́ть, от ни́хже ни еди́наго свяще́нник кроме́ сама́го то́чию архиере́а совершать мо́жет. Пе́рвое, ми́ра свяще́ние. Второ́е, же́ртвенника и хра́ма свяще́ние. Тре́тие, рукоположе́ние свяще́нства. По боже́ственнаго апо́стола ученику́ Диони́сию Ареопаги́ту, е́же той свиде́тельствует в кни́зе свое́й о священноначалии церко́вном, во главе́ пя́той. И по свиде́тельству того́ свяще́ннаго и ди́внаго в му́дрости му́жа, небе́сных и земны́х иера́рхий сказа́теля, Макси́ма свята́го испове́дника, истолкователя того́ свяще́нных слове́с.

1. Рукополагаяй вне своего́ преде́ла, с рукополага́емым да изве́ржется по три́десять пя́тому пра́вилу святы́х апо́стол.

2. И́же на пенязех рукополагаяй, с рукополага́емым да изве́ржется, и отлучи́тся по два́десять осьмому пра́вилу святы́х апо́стол.

3. Приче́тник споручаяйся, да изве́ржется по двадесятому пра́вилу святы́х апо́стол.

4. Епи́скоп, или́ свяще́нник, или́ диякон, а́ще бие́т ве́рна, или́ неве́рна, да изве́ржется, по два́десять седмо́му пра́вилу святы́х апо́стол; Та́кожде а́ще подъе́млет ме́чь, и уда́рит кого́.

5. (На по́ле: ниже́ прав. 194 со сард. прав. 2) Приче́тник а́ще приведе́т кня́зя, или́ боля́рина, да умо́лит митрополи́та за епископию, или́ сан, или́ епи́скопа, да изве́ржется, и отлучи́тся, по двадесят девя́тому пра́вилу святы́х апо́стол.

6. (На по́ле: ниже́ прав. 121) Приче́тник а́ще укорит епи́скопа в лице́, да изве́ржется, по 55-му пра́вилу, святы́х апо́стол.

7. (На по́ле: ниже́ прав. 17) Уби́вый самово́льне челове́ка, 20 лет да не причасти́тся, по 56-му пра́вилу, Вели́каго Васи́лиа.

8. А́ще нево́лею убие́т, де́сять лет, по пе́рвому на́десять пра́вилу, того́жде.

9. И́же убие́т на бра́ни, или́ в разбо́йницех, егда́ прии́дут на́нь с меча́ми, ле́та три не причасти́тся, по 13 пра́виле, того́жде. Ащеже разбо́йник с мечи́ не прии́дет, ра́зве да укра́дет (На по́ле: вы́ше прав. 7), или́ во́змет не́что от свои́х ему́, и той могии бежа́ти, и не бежа́, но ме́чь употреби́, и уби́ разбо́йника, я́ко уби́йца запреще́н бу́дет, по 6 главе́, 30, стихи́а в Матфе́и, си́речь, 20 лет.

10. Свяще́нник же изверзается, якаковолюбо уби́йство сотвори́в, по 66-му пра́вилу святы́х апо́стол, и по 55-му, пра́вилу, Вели́каго Васи́лиа.

11. Христа́ отверги́йся без ну́жды, при кончи́не живота́ да сподо́бится прича́стия, по 73-му пра́вилу Вели́каго Васи́лиа.

12. А и́же мук ра́ди отве́ржется Христа́, 8 лет да не причасти́тся, по 81 пра́вилу Вели́каго Васи́лиа. Ищи́ о сих исправле́ниях во свято́м Иоа́нне Постнице. Матфе́й, соста́в, О.

13. (На по́ле: ниже́ прав. 22 и 55) Чароде́й, си́речь, волхв и прорицатель, восколей, и оловолей, или́ превязуяй живо́тная, да не сне́сть их волк, или́ му́жа и жену́, да не совокупля́ются, или́ чародействуяй в бу́рю, двадесят лет да не причасти́тся, по 65-му, и по 72-му пра́вилу Вели́каго Васи́лиа.

14. А́ще ли свяще́нник во еди́но от сих впаде́т, си́речь, а́ще сицево́ зло худо́жество прохо́дит, изверга́ется, и отлуча́ется, си́есть, отсеца́ется приобще́ния, по 36-му пра́вилу, и́же в Лаодики́и собо́ре. И а́ще у́бо хо́щеши, ищи́ о сих толкова́ния в Матфе́и, ки́и су́ть чароде́и, и обая́тели, в 40-м, стихи́а, глава́, 1; я́коже чароде́и су́ть, и́же волшебство́м бе́сы привлача́т на своя́ хоте́ния, и зве́ри связуют и га́ды, во е́же не повреди́тися скоту́, а́ще не́где вне оста́нет. Та́кожде у Зонары, по 36-му пра́вилу собо́ра Лаодики́йскаго (На по́ле: Глава́ 176), обря́щеши подо́бне.

О чарова́нии

Чаровницы си́и су́ть, и́же не́гли Давидския псалмы́ пою́ще, му́ченическая имена́, (На по́ле: ниже́ пра́вило 51) и са́мыя Пресвяты́я Богоро́дицы воспомина́юще, и си́ми, е́же от бесо́в слага́ют чарова́ния. Чарова́ния у́бо, бесо́в злотво́рных и́мут призыва́ния, о́крест гробо́в обаваема я́ко е́же разсла́бити у́ды кому́, или́ житие́м в зле жи́ти, и нежительно ему́ бы́ти житие́; си́це чарова́ния преименовашася, от е́же над гро́бы во́пля и пла́ча. Чаровник, и обая́тель, еди́но е́сть. Чарование у́бо е́сть, е́же обава́нием, и призыва́нием бесо́в, сотвори́ти не́кое дея́ние яковолюбо, на вред ины́м; я́ко же на разслабле́ние удо́м, и на продолже́ние боле́зни, или́ на чрезвсежительное возлежа́ние, и на ина́я сим подо́бная (На по́ле: Псало́м 57:5; Мф. 18:10; 1Цар. 5).

О отравах:

Отрава же е́сть, е́же напоенми смертоносными устро́ити не́что сне́дно, и отравити челове́ка, или́ от ра́зума извести́, и жела́тельну сотвори́ти сме́рть стра́ждущему; или́ е́же прили́чными челове́ку, или́ любовных ра́ди, иногда́ бывамая низумляти, и та́ко уготовля́ти. Вле́поту у́бо си́и, со уби́йцами ра́вно запрещаваются, я́коже глаго́лет Вели́кий Васи́лий; И́же чарование, или́ отраву испове́сть, уби́йцы ле́та покая́нием да испо́лнит (На по́ле: Кано́н 64). И идолослужи́тели бы́ти глаго́лет пра́вило, и́же призыва́ния бесово́м творя́т, чарова́ния не́кая, и от тех и́щут по́мощи. Чароде́и же и волше́бство творя́щыя, идолослужи́тели нарече́.

О прорицании:

Прорицателие же глаго́лются, и́же бесово́м себе́ возложи́ша, и тех наказанми, чрез не́кая зна́мения покуша́ются, и явля́ются ве́дети бу́дущая.

О волховании:

Волсви́ у́бо су́ть и́же не́гли благотво́рныя бе́сы призыва́ют, а́ще и в блага́я не́кия ве́щи составле́ния, скверноуби́йцы су́ть вси, и лестцы́ произволе́нием.

15. (На по́ле: Иса́ии 47 ст. 12) А́ще ки́я хо́дят к волхво́м, и волхвуют, или́ звездословят, или́ связуют во́лки, или́ му́жа и жену́, да не схо́дятся, или́ да навы́кнут что, о них же не ве́дят, я́ко да воск излие́т им волхв, или́ о́лово, ше́сть лет да не причастя́тся, по шестьдеся́т пе́рвому пра́вилу, е́же в Тру́лле, и по осмьдесятому Вели́каго Васи́лиа; свяще́нник же сие́ творяи да изве́ржется.

16. Ели́цы волхвуют с цыганки, и ели́цы приво́дят волхва́ в дом свой, и чаруют им, иде́же бо́лен е́сть, или́ и́но что, лет пя́ть да не причастя́тся, по 24 пра́вилу Агки́рскаго собо́ра; шестьдеся́т же пе́рвое пра́вило 6-го собо́ра и́же в Тру́лле, сицевы́х шестолетием запреща́ет, свяще́нныя же изверга́ет. И а́ще хо́щеши, ищи́ сказа́ние сему́ широчайшее в Зонаре Иоа́нне, глава́ 175.

17. Та́кожде и ячменем, или́ бобом волхвующии, ше́сть лет да не причастя́тся, по пе́рвой главе́, 40, стиха́ в Матфе́и.

18. Та́кожде и ели́цы но́сят, храни́тельная от отра́в, или́ что от сицевы́х, (На по́ле: уроки) или́ обвязания на де́ти свои́, и на живо́тная возлага́ют, урока ра́ди, ше́сть лет, по 61-му, пра́вилу е́же в Тру́лле, да не причасти́тся.

19. А и́же призыва́ет волхвы́, да сотворя́т ча́ры, на па́кость ине́м челове́ком, и сей я́ко же он запреща́ется, си́речь, 20 лет, а́ки во́лею уби́вый, по 56 пра́вилу Вели́каго Васи́лиа, и по се́дмьдесят второ́му. Матфе́й же в пе́рвой главе́, 40-го стиха́ глаго́лет: я́ко и́же медведи, и ины́я зве́ри на ругалища на вред просте́йших влеку́т, или́ о́блаки разгонят, или́ подаю́т храни́тельная, или́ щастие и родосло́вие ве́руют, я́ко ов у́бо в де́нь благ (На по́ле: звездосло́вцы), ов же в зол роди́ся: или́ метнословие, или́ опоя́сания, си́речь кону́ры, и шо́лки, на главу́ свою́, и на вы́ю возлага́ют, я́ко неду́ги отгони́ти, и уроки, буесловят, или́ зми́я обно́сят в не́дрех, или́ на о́чи, или́ на уста́ своя́, привлача́т сих кожицы, я́ко за здра́вие не́где непщу́юще, или́ усерязи в Вели́кий Четверто́к свои́м детям творя́т, или́ Давидския псалмы́, и имена́ му́ченическая помина́юще, на вы́ю си́ вешают; или́ в воспомина́ние страсте́й Христо́вых в Пято́к Вели́кий узолки себе́ по числу́ Ева́нгелий вяжут; или́ характиры, или́ хартию́ сдержащую моли́тву нежита, или́ ба́бы призыва́ют, на главоболения и сплины (На по́ле: Леви́т 17 ст. 7), или́ на боле́зни, и неду́ги превязания творя́т, и ужа, призыва́юще благотво́рныя бе́сы, в по́мощь и здра́вие им, или́ звере́м, и му́жу и жене́ привязания изволя́ют (На по́ле: 3 Моисе́я 20 стих 27),или́ ду́ха пытлива иму́щим ве́руют, и́же от бесо́в навыцающе, предглаголют бу́дущая (На по́ле: Деян. 16); или́ бобу ве́рующе, или́ и́но волше́бство, возвеща́ют изгибшее; или́ чарование, за и́ну не́кую не́мощь, и за бу́рю чаровают, или́ и́но что от сицевы́х беззако́нных притецающе, шестолетием да запретятся, си́речь, 6 лет да не причастя́тся, свяще́нныя же изверга́ет; и па́че вле́поту, си́речь, по вся́кой пра́вде, зане́же вся сия́ от бесо́в де́йствуются, и соверша́ются. Глаго́лет бо святы́й Иоа́нн Златоу́ст (На по́ле: Злат. на посл. Колос. прав. 8 (50?) и на (Феевда?) прав. 3 и 1Кор. прав 12 и в Тру́лле прав. 61, толкова́ние (неразб.) на кано́н 61, 6 собо́ра. (неразб.) окшым то́йжде суд ворожейт иу́дино 1Цар. 28): я́ко а́ще и Святы́я Тро́ицы и́мя глаго́лется на сицевы́х, а́ще и святы́х бу́дут призыва́ния, а́ще и зна́мение кре́стное наводится, бежа́ти подоба́ет сицевы́х и отвраща́тися. Низлагаютжеся мно́жицею и свяще́нницы на собо́ре, е́же не́коему случи́ся, и́же хлеб Вели́каго Четвертка́ даде́ не́киим я́сти, да́же укра́денная обря́щутся, от е́же неудобне сего́ пожре́ти. Ин не́кий свяще́нник со Ева́нгелием, ему́ же дре́во свя́зано бы́сть, и круговидно обраща́шеся, обвине́н, я́ко испыта́ния творя́ше о некоих ве́щех, с псалмы́ Дави́довыми, а́бие изве́ржен бы́сть. Сицево́му суду́ подлежа́т, и́же имена́ на хартиях пи́шут, и ключи́ во Псалтырь влага́ют, отту́ду ло́жная веща́юще. Но и святы́м ико́нам приседящия жены́, и от сих крепящыяся прорица́ти бу́дущая, я́ко же иногда́ пытли́вый дух иму́щии, тому́жде подпа́дают запреще́нию; оба́че еди́ною прельстившыяся, та́же от зла преставшыя, ме́нше запрещени бу́дут.

21. (На по́ле: ниже́ прав. 339) Тому́жде запреще́нию подпа́дают, и и́же глаго́лемыя вуркулаки сжигают, и от них курятся, ше́сть лет да не причастя́тся.

22. Та́кожде и ели́цы ме́щут де́тища своя́ на распутиях, да крести́т ѐ обреты́й, не́гли да жи́во бу́дет, я́коже буесловят; а́ще же обря́щет ѐ турчин, и а́ще крести́т свяще́нник отроча́ с турчином я́ко с кумом, да изве́ржется, по 46-му пра́вилу святы́х апо́стол. То́жде да постра́ждет и с еретико́м и отсту́пником крести́вый.

23. В тре́тией же главе́, 5 стихи́а, Матфе́й глаго́лет о ве́рных, после́дующих еллинским обы́чаем, и пляса́нием на брацех (На по́ле: Иерем. 7), и на сто́гнах творя́щих, или́ русалкам, или́ гласово́м птичиим ве́рующим, или́ новомесячию, или́ устретению, или́ истязанием внима́ющих, или́ огня́ палению на сто́гнах, я́же творя́ху е́ллини дре́вле (На по́ле: Купала); а ны́не я́коже ви́дим християнския де́ти сия́ творя́т, в на́вечерия пра́здничная, по не́коему обы́чаю дре́внему, или́ зва́ния я́же творя́т не́цыи, в де́нь Вознесе́ния, да от о́наго щастие свое́ разсмотрят; или́ во оде́жду же́нскую му́жие облача́тся, и жены́ в му́жескую; или́ наличники, я́ко же в страна́х лати́нских зле обыкше творя́т (На по́ле: наличник латинк), разли́чная лица́ себе́ притворя́юще, и те́ми мно́гажды и са́мый чин церко́вный поругающе. Те́мже сия́ творя́щих в ра́зуме свяще́нных у́бо изверже́нию, людинов же, отлуче́нию предае́т. Та́кожде и 66 пра́вило, шеста́го собо́ра, возбраня́ет ве́рным отходи́ти, и ви́дети ристания конская, и на Па́сху, или́ во и́но вре́мя. Вели́кий же Васи́лий, в 70-м свое́м пра́виле (На по́ле: вы́ше пра́вило 7, 13 и 14) отравники, и идолослужи́тели, и убиицы, на 20, лет, осужда́ет. Прелюбоде́я же и мужеложца, и скотоложца, на 15, лет; идолослужи́телей же глаго́лет, не испе́рва явле́нныя нечести́выя, но по́сле креще́ния волше́бства деющыя и чарова́ния, о́бразом не́коим и́долом слу́жат и си́и, призыва́юще де́моны в по́мощь себе́, и во устрабление страда́ния, и не́мощи своея́. О́вии у́бо из нача́ла идолослужи́телие крещаемии, а́бие приступа́ют к боже́ственному причаще́нию; грех бо их пе́рвый, грех бы́сть неве́дения. О́вии же по креще́нии пожершии и́долом, си́речь, бесово́м, чарованми не́киими, да чрез все житие́ свое́ и́мут покая́ние, при кончи́не же живота́ своего́ прича́стие да прии́мут.

24. От жития́ свята́го Андре́я Христа́ ра́ди юро́диваго.

Вопроше́н быв де́мон, от треблаже́ннаго Андре́я, Христа́ ра́ди уродиваго (На по́ле: трепе́щи чтый, и ка́йся и исправляйся): отку́ду ве́си и предглаго́леши не́кая?

Отвеща́в же де́мон, рече́: от огня́ е́сть оте́ц наш, и седя́й во а́де и волхвуяй, всех учи́т нас, поне́же естество́ на́ше отню́д ничто́же зна́ет.

Блаже́нный глаго́лет: о ко́их согреше́ниих наипа́че услажда́ется естество́ ва́ше?

Рече́ де́мон, о идолослуже́нии, и волшебстве́, чарова́нии же, и о отраве, изря́днее же о уби́йстве, и памятозлобии, и о содомстем де́лании, и прелюбодея́нии (На по́ле: Быт. 9).

Преподо́бный рече́: а́ще кто отве́ржется страсте́й ва́ших, и присту́пит покая́нием ко Го́споду Бо́гу, ка́ко ви́дится вам? (На по́ле: ниже́ пра́вило 77. Злат. на Деян. лист 493 и 494).

Рече́ де́мон, еда́ ли и ты не зна́еши, я́ко огорчеваемся на него́ гне́вающеся? Оба́че же упова́ем па́ки обрати́тися ему́, в след хоте́ний на́ших; мно́зи бо отве́ргшеся нас покая́нием, возврати́шася па́ки в начина́ния на́ша, и приобретохом их.

Сия́ слы́шав преподо́бный, ду́ну на него́, и а́бие нея́влен бы́сть.

И от Отечника

(На по́ле: сло́во 7) Брат борим блудо́м, и́де к ста́рцу и моля́шеся ему́, помоли́тися о нем, да облегчится бра́нь от него́. Поболе́ же ста́рец и моли́ Бо́га о нем дний се́дмь. Во осмы́й же де́нь вопроси́ бра́та, глаго́ля: ка́ко бра́нь, бра́те? Глаго́ла ему́ он: зле, ве́руй о́тче, я́ко ни ма́лы легчины ощуща́х. Ста́рец же удиви́ся. И се у́бо в но́щи яви́ся ему́ сатана́, глаго́ля ему́: ве́руй ста́рче, я́ко от пе́рваго дни, егда́ помоли́ся Бо́гу о нем, а́бие отидо́х от него́; но своего́ бе́са и свою́ бра́нь и́мать от гортаня своего́. Аз же вины́ не и́мам о бра́ни его́, но сам бра́нь твори́т, пия́й и ядяй и спяй.

28. (На по́ле: Вас. Вел. пра́вило 58, 59 и 63) Прелюбоде́й, или́ мужеложник, или́ скотоло́жник, или́ птицеложник, а́ще пока́ется, 15 лет запреще́ние да прии́мет. Блудни́к 7 лет да не причасти́тся, по 59-му пра́вилу Вели́каго Васи́лиа.

28. (На по́ле: ниже́ пра́вило 153) Свяще́нник соблудивый, или́ прелюбоде́йство, или́ мужело́жство, или́ скотоло́жство, или́ птицеложство соде́явый, или́ муженеистовствовавый на свою́ жену́, или́ волхво́м себе́ преда́вый, да изве́ржется, по пятьдеся́т пе́рвому пра́вилу Вели́каго Васи́лиа.

29. Со свое́ю сестро́ю единоотечнею, и единоматернею соблудивый, и оскверни́выйся, 20 лет да не причасти́тся, по 66 пра́вилу, Вели́каго Васи́лиа. Матфе́й же в Постнице глаго́лет, 15 лет; а я́же от сама́го отца́, или́ от са́мыя ма́тере е́сть сестра́, 12 лет, по пра́вилу Вели́каго Васи́лиа.

30. А и́же с неве́стою сыно́внею, и с тещею, и с ма́терию тещиною соблудит, 12 лет, по 77-му, и 79-му пра́вилу, того́жде.

31. С бра́тнею же неве́стою, де́сять лет.

32. С сестриною пе́рвою сестро́ю, де́сять лет.

33. С второсестриною, де́вять лет.

34. С кумо́ю, си́речь, с ма́терию приемницы своея́, 11 лет.

35. С приемницею же свое́ю, два́десять лет.

36. С жениною сестро́ю, 11 лет.

37. С двема́ сестрама, 11 лет. Та́кожде и жена́ с двема́ бра́тома 11 лет.

38. И́же на ма́чеху вознеистовися, 12 лет, я́ко же и с сестро́ю от отца́ того́жде, по 79-му пра́вилу Вели́каго Васи́лиа (На по́ле: 3 Мои́. 2, ст. 11).

39. Деторастление же́нска по́ла, си́речь, нижа́е двана́десять лет, Матфе́й на 12 лет, по свято́му Иоа́нну По́стнику запреща́ет.

О жена́х:

40. (На по́ле: (Сава́? 1, гу). Глава́ 19). Та́кожде запреща́ются и жены́, егда́ не и́мут му́жа. А́ще же и́мут му́жа, прелюбодействова держи́ пра́вило: си́речь, мно́жайшая ле́та всегда́ держи́, (ми́ряном от жен воздержа́тися ве́сь святы́й Вели́кий пост. А́ще ли паде́тся с жено́ю свое́ю во святы́й пост, то ни на Па́сху да причасти́тся, зане́же ве́сь пост обезчествова; Бельцем бо от жен свои́х зако́нных соблюда́тися, я́коже рече́ся, на ве́сь пост).

41. И́же на жену́ свою́ му́жеско вознеистовися, си́речь, во е́же чрез естество́, 15 лет да не причасти́тся, свяще́нник же да не быва́ет (На по́ле: ниже́ прав 153, 154 и 272).

42. Та́кожде и жена́, управля́ется, а́ще по во́ли ей бы́сть; а́ще ли по ну́жде, легча́е и мне́е, я́коже ве́си быва́емое. Та́кожде и на чужду́ю му́жеско вознеистовлься, 15 лет.

43. Ротитель, си́есть, клятвопресту́пник, лет 10, по 63-му пра́вилу Вели́каго Васи́лиа.

44. А и́же по ну́жде, 6 лет, по 82-му пра́вилу того́жде; та́кожде и лжесвидетель.

45. Свяще́нник ротивыйся, а́ще и по ну́жде, да изве́ржется, по 25-му пра́вилу, святы́х апо́стол.

46. Та́ть а́ще испове́стся самохо́тне, еди́но ле́то да не причасти́тся, и да пла́тит татьбу́, а́ще возмо́жно; а́ще ли обличе́н бу́дет, 2 ле́та, по 61-му пра́вилу Вели́каго Васи́лиа.

47. Тате́м прииматель, я́ко та́ть запреща́ется, си́речь, еди́но ле́то да не причасти́тся.

48. Разбо́йник я́ко уби́йца запреща́ется, по 6-му пра́вилу, свята́го Григо́риа Ни́сскаго.

49. Гробокопатель, си́речь, и́же раскапывает гро́бы, да укра́дет не́что отту́ду, 10 лет да не причасти́тся, по 62-му пра́вилу Вели́каго Васи́лиа.

50. Святотатец, си́есть, и́же укра́дет что из це́ркве свяще́нное от свята́го же́ртвенника, 15 лет да не причасти́тся, по свято́му Григо́рию Ни́сскому.

51. Двоебрачный еди́но ле́то да не причасти́тся, по 4-му пра́вилу Вели́каго Васи́лиа. Ини́и же глаго́лют, два ле́та.

52. Троебрачный, а́ще у́бо не и́мать дете́й, ле́та 4 да не причасти́тся; а́ще же и́мать де́ти, лет 5, егда́ е́сть ниже́ 40 лет челове́к. А́ще же е́сть вы́ше 40 лет, и и́мать де́ти, непрощено е́сть троебра́чие, по боже́ственным пра́вилом Матфе́а, 3, стихи́и, 4 главы́, кни́ги соедине́ния, и не оста́ви да бу́дет.

53. Свяще́нник а́ще в ве́дении благослови́т возбраненный брак от сро́дства, или́ кумовства, или́ четверобрачия, или́ неиму́ща во́зраста: си́речь, а́ще не́сть муж 15 лет, а жена́ 13 лет, да изве́ржется, и брак да бу́дет нетвердый.

54. А́ще кто со обру́чницею свое́ю смеси́тся пре́жде венча́ния, ле́то еди́но да запрети́тся, удержаваяся от прича́стия, я́ко же 69 пра́вило Вели́каго Васи́лиа, о четце повелева́ет: свяще́нник же сицевы́й не быва́ет, я́ко брак окрадый.

55. А́ще ли кто пре́жде бра́ка, паде́тся с ма́терию обру́чницы своея́, или́ со ине́м лице́м ро́да ея́, возбраня́ется таковы́й брак. А́ще ли по́сле бра́ка бы́сть согреше́ние, не распущаются, но запреща́ются, я́ко и кровосмеше́ние сотво́ршии, по 15 главе́, 3 стиха́, е́же в Матфе́и. Кано́н же сицевы́м е́сть 11 лет.

56. Пра́вило 62 шеста́го Собо́ра, свяще́нники и́же в ра́зуме на брацех лику́ют, изверже́нию подлага́ет, мирски́я же отлуча́ет, а наипа́че жены́, я́ко мно́гих врежда́ющыя.

57. Того́жде Собо́ра пра́вило 24, свяще́нником повелева́ет, ниже́ ви́дети ли́ки и глумилища, или́ конская ристания; но и на брак а́ще по́йдет, да благослови́т то́кмо трапе́зу, егда́ же вни́дут та́мо игралищныя орга́ны, да воста́в а́бие оти́дет. Пра́вило же 13, собо́ра Лаодики́йскаго, отню́д возбраня́ет, ве́рным име́ти и́грища на бра́це.

58. Пра́вило 6-го Собо́ра повелева́ет: не ле́по е́сть правосла́вному му́жу со ерети́чкою совокупи́тися жено́ю, ниже́ со ерети́ческим муже́м жене́ правосла́вней. А́ще же и бу́дет, нетвердый да вмени́тся брак, и беззако́нное да разреши́тся сожи́тие. А́ще же обеща́ется ка́ятися ерети́ческое лице́, да пребу́дет брак, до́ндеже обеща́ние утверди́тся, по 14 пра́вилу того́жде собо́ра. Подо́бне и с латины а́ще правосла́вная жена́ совокупи́тся, с разреше́ния бра́ка, и преще́нием подлага́ти во 12 главе́ 3 стихи́и, в Матфе́и. А́ще же кто престу́пит повеле́нное, да отлучи́тся.

59. И́же малакию сотвори́, да су́хо яст 40 дней, по свято́му Иоа́нну По́стнику, и да твори́т на всяк де́нь покло́нов сто. А́ще же не мо́жет су́хо я́сти, да удержи́тся от прича́стия еди́но ле́то, и покло́н пятьдеся́т на всяк де́нь.

60. Смешающиися друг со друго́м, я́ко сугу́бу де́лающе малакию, сухоясти и́мут дний 80, или́ да не причастя́тся два ле́та, творя́ще покло́нов пятьдеся́т на всяк де́нь.

61. А́ще ли кто от приче́тник, пре́жде свяще́ния в стра́сть малаки́и паде́т, пе́рвее подлежи́т кано́ну малаки́и, та́же рукополага́ется. По рукоположе́нии же в неве́дении сие́ сотвори́вый, свяще́нства да е́сть пра́зден ле́то еди́но; в ве́дении же па́ки что сотво́рь, да изве́ржется.

62. Мона́х же неве́жа, дний 60 запреща́ется сухояде́нием, по Вели́кому Васи́лию. А́ще же свяще́нник е́сть, свяще́нническими запреща́ется.

О жена́х:

63. И жены́ ели́цы валяются с му́жи, или́ са́ми малакию творя́т, запреще́ние малаки́и да прии́мут: и́бо и ти́и малакию творя́т, я́коже и му́жие.

64. Тимофе́я Александри́йскаго пра́вило 7. Жена́ в тече́нии су́щая, си́речь обы́чная своя́ иму́щая, не причаща́ется в Па́сху, до́ндеже очи́стится; ниже́ вхо́дит в це́рковь до 7 дний; ниже́ смешается с муже́м свои́м сицева́я, до́ндеже очи́стится, по свято́му Иоа́нну По́стнику. В ино́е же вре́мя друг дру́га не лишают, по апо́столу, то́чию во вре́мя прича́стия, и анти́дора в неде́лях, и в нарочитыя пра́здники, и сие́ по согла́сию.

65. Ро́ждшая в Вели́кую Седми́цу, яст ма́сло, и вино́ пие́т, по 8-му пра́вилу свята́го Тимофе́я.

66. Мирсти́и во святы́й олта́рь да не вхо́дят, ни му́жие ни жены́, по 69-му пра́вилу, е́же в Тру́лле. И́нокиня же вхо́дит, и помета́ет, по 15-му пра́вилу свята́го Ники́фора Царегра́дскаго. Но ниже́ вноси́ти в же́ртвенник и́но что, ра́зве то́чию свяще́нная, по 4-му пра́вилу святы́х апо́стол, ниже́ излишныя просфоры́, но вне во хра́ме полага́ются.

67. А́ще мона́хиня насилуема бу́дет, или́ деви́ца от господа́ря своего́ или́ ина́я жена́ от кого́, и яви́тся пе́рвое житие́ ея́ чи́сто, 40 дней запреща́ется, или́ еди́но ле́то да не причасти́тся. А́ще ли испе́рва житие́ ея́ бя́ше скве́рно, (е́же) блуд творя́щих, запреще́ние прии́мет, по 20-му пра́вилу свята́го Ники́фора Царегра́дскаго. Вели́кий же Васи́лий, в 49-м свое́м пра́виле, насилованную рабы́ню от господи́на своего́, без епитемии и́мать; а я́же во́лею, я́ко блудни́ца управля́ется.

И́же в Халкидо́не святы́х оте́ц.

68. А́ще чие́ отроча́ нераде́ния ра́ди у́мрет некрещено, три ле́та сицевы́й да не причасти́тся, и на всяк де́нь да твори́т покло́нов две́сте, и да пости́тся понеде́льник, сре́ду и пято́к. А́ще ли теку́т к свяще́ннику, а свяще́нник небреже́т, грех е́сть свяще́ннику.

69. Жена́ спящая, и у сосцу́ младе́нца своего́ умертви́вша, лет се́дмь да не причасти́тся.

70. Пренебре́гшая чревоноше́ние свое́, си́речь ро́ждшееся на пути́ де́тище, и сие́ у́мрет, я́ко убиица запреща́ется, по 33-му пра́вилу Вели́каго Васи́лиа.

71. А́ще ли за просты́ню и недоуме́ние, или́ ску́дости ра́ди ну́ждных, или́ я́ко пу́сто е́сть ме́сто, не запреща́ется, по 52-му пра́вилу того́жде.

72. А́ще ка́я жена́ сне́сть бы́лие, или́ ино́е что сотвори́т, и убие́т отроча́ во чре́ве свое́м; убиица е́сть, по 2-му пра́вилу Вели́каго Васи́лиа. Та́кожде сотво́ршая, и да́вшая сицево́е бы́лие, по свято́му Иоа́нну По́стнику.

73. А и́же в Агки́ре святы́й собо́р в 21-м свое́м пра́виле, блудницам растлившим и погу́бльшым младе́нцы своя́, десятолетием запреща́ет; та́кожде и давшым такова́я растлительная.

74. Тем же запреще́нием подлежа́т, по Иоа́нну По́стнику, а́ще поверга́ют де́тища своя́ на распу́тии, или́ во врате́х гра́дских, и а́ще не е́млет его́ кто в воспита́ние и прилежа́ние свое́; зане́ ели́ко по наме́рению своему́, уби́йцы су́ть.

75. А́ще жена́ изве́ржет де́тище свое́ нево́лею, ле́то еди́но да не причасти́тся.

76. И́же напая́ет де́тище своя́, глаго́лемыми антисикотии, еди́но ле́то да не причастя́тся; а́ще же некрещенное, ни еди́н грех.

О мона́сех.

77. Мона́х или́ мона́хиня, а́ще прии́дут во обще́ние бра́ка, си́речь, а́ще оженятся, не су́дится то брак, но блуд; или́ наипа́че рещи́, прелюбоде́йство. Сего́ ра́ди доне́леже не распустятся, в це́рковь да не вхо́дят, но да отлуча́тся, по 6-му пра́вилу Вели́каго Васи́лиа. А́ще ли случи́тся им умре́ти без покая́ния, да не погреба́ют их, ниже́ да творя́т им помин; и́бо чу́жди су́ть христиа́н.

78. А е́же в Тру́лле пра́вило 44, сицевы́х по распущении, се́дмь лет запреща́ет, а́ще от своего́ я́ве произволе́ния, на покая́ние прии́дут. А́ще же не повину́тся, но пребу́дут в нечистоте́, па́че же прекосло́вити начну́т, прелюбодея́ния пра́вилом да запретятся. Подо́бне и блуд сотво́рша мона́ха то́ежде пра́вило управля́ет, а не я́коже прелюбоде́я, и сие́ мню пра́вило держа́ти кроме́ вели́каго о́браза.

79. А́ще кто де́рзнет пострищи мона́ха без приимца, си́речь без ста́рца, да изве́ржется, по 2-му пра́вилу второперваго собо́ра; си́речь, а́ще не́сть ста́рец ку́пно в постригании, и́же бы прия́л, и име́л его́ в повинове́нии.

80. Не досто́ит без иску́са постригати мона́хи, или́ ря́су возложи́ти на них со трисвяты́м, но со иску́сом; иску́с же зна́емых, и ме́стных да бу́дет шестомесячия вре́мя, или́ егда́ уви́дит игу́мен наме́рение доброде́тели их, и прилежа́ния. А́ще же стра́ннии су́ть и незнаемии, в трех ле́тех иску́с да бу́дет, по боже́ственным пра́вилом; иску́с же с мирски́ми оде́ждами до́лжен е́сть бы́ти, а не со и́ноческими. А́ще ли кто обличи́тся черная нося́, или́ в ря́су облече́ся вну́трь иску́са, а́ще и кроме́ трисвята́го, да не де́рзнет совлещи сего́ ктому́ про́чее; но и нево́лею понужде́н бу́дет пострищи́ся, от ме́стнаго епи́скопа с запреще́нием и отлуче́нием, по тре́тией главе́, единонадеся́таго ти́тла, ца́рских пра́вил. А́ще ли кто престу́пит преде́лы святы́х оте́ц, и без иску́са и приемника пострижет кого́, или́ в ря́су облече́т, пра́вильно ка́знь да прии́мет, по 5-му пра́вилу, глаго́лемаго второперваго собо́ра, и́же в Константинопо́ле бы́вшаго. А́ще же не́мощь случи́тся су́щим во иску́се, да постризаются без прия́тия даро́в, ту су́щу и приимцу, хотя́щему их име́ти в повинове́нии, а́ще когда́ здра́ви бу́дут.

О жена́х.

81. А жены́ да искуша́ются, седя́ще в до́му свое́м, и за тримесячием вопрашаемыя, а́ще у́бо ли в до́бром сем наме́рении пребыва́ют; и та́ко да постризаются и даю́тся приемницам, хотя́щим их име́ти в повинове́нии, си́речь, ста́рицами я́ко же и му́жие, без вся́каго да́ра.

82. Мирски́й поп да не постризает мона́ха, по завеща́нию и́же в Никии свята́го собо́ра; ка́ко бо даст ино́му, его́же сам не и́мать; Повелева́ет 10 глава́, 9-го ти́тла: да никто́же от роди́телей де́рзнет препинати ча́дом свои́м, приходя́щым к мона́шескому житию́, или́ оттерзати от монастыря́, или́ сего́ ра́ди отчюждати их насле́дия. А́ще же кто обличи́тся сие́ сотвори́ти, да бу́дет отлуче́н от це́ркве, до́ндеже пока́ется.

83. И́же во и́ноческий облече́ся о́браз, за страх бра́ни, или́ за ино́е не́кое кова́рство, я́ко не́гли посмеваяся, и сие́ по́сле ну́жды и лицеме́рия отложи́в, в четыренадесятницах три дни запреща́ется, и та́ко приступа́ет ко свято́му прича́стию, по 21-му пра́вилу свята́го Ники́фора Царегра́дскаго.

84. Мона́х свяще́нник не венча́ет жени́тву, си́речь, не благословля́ет неприли́чно бо е́сть; ниже́ восприе́мник быва́ет мона́х де́тища.

85. Мона́ху свяще́ннику, и́нокам служа́щему, не досто́ит причасти́тися от него́ по 22-му пра́вилу свята́го Ники́фора.

86. А́ще свяще́нник или́ мона́х, не чтет часа́ 1, 3, 6, 9, не́сть я́сти досто́ин, и а́ще не пра́вит всего́ пра́вила своего́, я́ко ме́ртва вменя́ет сего́ Бог, и да запрети́тся, я́коже подоба́ет.

87. А́ще некнижный е́сть мона́х, да твори́т на вся́кий час покло́нов пятьдеся́т, глаго́ля: Го́споди поми́луй, на всяк час, 40. А́ще ли не мо́жет твори́ти покло́нов, да глаго́лет пятьсот моли́тв на час, глаго́ля со внима́нием. Го́споди Исусе Христе́, Богоро́дицею поми́луй мя гре́шнаго.

Па́ки того́жде Васи́лиа Вели́каго, друго́е завеща́ние:

Да твори́т безкнижный мона́х, за полу́нощницу, вервиц де́сять; за у́треню, вервиц два́десять; за часы́, вервиц де́сять; за девя́тый час, и вече́рню, де́сять; за павечерню, де́сять. Вервица же да и́мать узлы, сто и три; на вся́ком же узле да чтет преднаписаную моли́тву. Кано́н же им е́сть: су́щим у́бо ма́лаго о́браза, покло́нов три́ста, схи́мником же, покло́нов, шестьсот.

Того́жде Васи́лиа Вели́каго:

88. А́ще кий мона́х смее́тся, или́ бесе́дует на пра́виле свое́м, запреще́ние да и́мать, покло́нов пятдеся́т.

89. А́ще кий мона́х стоя́ на всем собо́ре церко́внем, при конце́ же не обря́щется, да сотвори́т, покло́нов пятдеся́т.

90. Мона́х свяще́нник, а́ще и премени́т о́браз, си́речь, в бо́льшую схи́му посту́пит, да литургиса́ет; ника́яже бо сему́ препона постриже́ние е́сть. Архиере́й же а́ще премени́т о́браз, си́речь, а́ще ста́нет схи́мником, да не де́йствует к тому́ святи́тельское что отню́д, ниже́ свяще́нническое, по 29-му пра́вилу, 5 стихи́а в Матфе́и.

91. Мона́х схимник соблудив, я́ко прелюбоде́й запреща́ется, 15 лет, ма́лаго же о́браза сый, я́ко блудни́к, си́речь 7 лет.

92. Мона́х а́ще седи́т на пиру́ с мирски́ми, соблуди́л е́сть.

93. Мона́х а́ще седи́т в до́му свое́м, я́ко миряни́на сего́ вменя́ет Бог.

94. Мона́х а́ще оста́вит ло́же свое́, и у́снет у дру́га своего́ без благосло́вныя вины́, и́мать запреще́ние, покло́нов пятьсот.

95. Мона́х а́ще упие́тся, соблуди́л е́сть; и а́ще изблю́ет от многопития, та́кожде соблуди.

96. Мона́х а́ще что укра́дет из монастыря́, или́ та́йно яст, та́кожде соблуди́л е́сть.

97. Мона́х а́ще солжет во́льным хоте́нием, и́мать запреще́ние, сто покло́нов вели́ких; а́ще ли да спасе́т ду́шу, греха́ не и́мать.

98. Мона́х а́ще оти́дет на бра́нь, и́мать кано́н дний три́десять.

99. Мона́х а́ще посмее́тся, па́че усклабления, и́мать покло́нов пятьдеся́т.

100. Мона́х а́ще и́дет с жено́ю по́прище еди́но, да отлучи́тся дний се́дмь.

101. Мона́х а́ще лобжет жену́, или́ отроча́, и́мать запреще́ние, дний 40 да не причасти́тся: и́бо ни на свято́е воскресе́ние Госпо́дне досто́ит и́ноку лобыза́ти отроча́, ниже́ свою́ ма́терь.

102. Пресви́тер мона́х врачу́яй, или́ жилу секии, да е́сть пра́зден священноде́йства дний 7.

103. Мона́х свяще́нник а́ще изве́ржен е́сть, трапе́зу то́чию да благослови́т (На по́ле: пра 267).

104. Мона́х просты́й бия́й кого́, да сотвори́т покло́нов три́ста.

105. Мона́х по́сле павечерия яды́й и пия́й, да пости́тся еди́ну седми́цу, сухояде́нием, и покло́нов на всяк де́нь две́сте (На по́ле: павечерие).

106. Мона́х а́ще распояшется на ло́жи свое́м, да сотвори́т покло́нов пятьдеся́т (На по́ле: по́яс).

107. Мона́ха пострижена в монастыри́, не досто́ит приима́ти в други́й монасты́рь, по 40-му пра́вилу, и́же в Халкидо́не свята́го собо́ра; а́ще же игу́мен прии́мет его́, лиша́ется игу́менства (На по́ле: о переходе мона́хов ма... со... 40, глава́ 15).

108. А́ще ли же епи́скоп прии́мет сицева́го, и я́коже причетника и́мать его́, да бу́дет епи́скоп, свои́х люде́й то́чию обще́нием дово́лен, други́м ему́ сообщающымся, по 83-му пра́вилу, и́же в Карфаге́не собо́ра (На по́ле: ниже́ пра́вило 148).

109. Мона́х, егда́ избежи́т о́тай из монастыря́, иде́же постриже́ся, неприча́стен да бу́дет 12 лет, отлуча́яйся и от це́ркве по 4-му пра́вилу четве́ртаго собо́ра. А́ще ли бы́сть ему́ душе́вный вред, и сего́ ра́ди бежи́т, до́лжен е́сть обрести́ отца́ иску́сна, и прия́ти от него́ заве́т, или́ я́ко и́мать, кано́н да́ти ему́.

110. Игу́мен, а́ще с прилежа́нием не взы́щет мона́ха избегшаго, да отлучи́тся, по 3-му пра́вилу второперваго собо́ра, и́же в Константинопо́ли.

111. А́ще кто ве́сть бра́та, хотя́ща тай отити́ из монастыря́, и не возвести́т игу́мену, да отлучи́тся.

Ники́фора Царегра́дскаго пра́вило 17.

112. Три глави́зны изго́нят мона́хов из монастыря́ их: пе́рвое, а́ще ерети́к е́сть игу́мен. Второ́е, а́ще е́сть пу́ть жена́м. Тре́тие, а́ще уча́тся мирсти́и де́ти (На по́ле: 1, 2, 3).

113. Глаго́лет бо Вели́кий Васи́лий: а́ще кий мона́х, в коемлюбо словеси́, ко спасе́нию его́ изглаголанному, сопротивится игу́мену своему́ или́ ста́рцу, или́ духо́вному своему́ отцу́, я́ко сопе́рник Бо́жий обрета́ется; (лу́чше бо е́сть к Бо́гу согреши́ти, не́жели к еди́ному от сих) (На по́ле: ниже́ пра́вило 6 и 85).

114. И́же разоря́ет уста́в, духо́внаго отца́ своего́, са́мою подстрекаем зло́бою, при животе́ и при сме́рти, про́клят да бу́дет; та́кожде и роди́телей свои́х в ко́ей ве́щи благочести́вой преслу́шаяй.

Васи́лиа Вели́каго.

115. А́ще хо́щет кто оста́вити оби́тель (в ню́же зван бы́сть, отца́ и бра́тию, кроме́ е́реси; но) за укори́зну, или́ я́зву, или́ я́ко ви́дел е́сть на час смути́вшуюся оби́тель, или́ бде́ния ра́ди, и ни́зу легания, и неумывания, или́ я́ко мний еси́ всех, или́ я́ко жела́ет ми́ра, и я́же в ми́ре, или́ я́ко преогорчи́ его́ оте́ц его́ игу́мен, или́ брат его́, и сего́ ра́ди хо́щет изы́ти, горе́ ему́! Кому́ его́ уподо́блю, то́кмо Иу́де преда́телю, разлучившемуся от Христа́, и ученико́в Его́.

Святы́х апо́стол.

116. А́ще кий муж или́ жена́, отда́вше своя́ це́ркви, или́ монастырю́, или́ за ду́шу разда́вше своя́, по́слежде раска́явшеся о отда́нии, восхо́щут взя́ти не́что от тех; а́ще у́бо в неве́дении су́ть, да запретятся, ниже́ во ум сие́ приима́ти, а́ще ли в ра́зуме, и не повину́ются, да отринове́ни бу́дут, я́коже Ана́ния и Сапфи́ра от апо́стола Петра́; еди́ною бо преданая це́ркви, недви́жима су́ть, и не досто́ит двиза́ти. Зане́ пи́сано е́сть и и́нде: и́же отда́ст село́, не́сть господи́н се́ла. (На по́ле: Зона́р глава́ 22).

От по́стных Вели́каго Васи́лиа.

117. Вопро́с: А́ще подоба́ет что, в бра́тстве свое́ име́ти?

Отве́т: Сие́ сопроти́вно е́сть, е́же в дея́ниих о ве́ровавших свиде́тельству, в них же пи́сано е́сть: я́ко ниже́ еди́н что от име́ний глаго́лаше свое́ бы́ти. Те́мже, глаго́ляй бы́ти что свое́ во о́бщем житии́, сам себе́ чу́жда Бо́жия це́ркве сотвори́, и Госпо́дни любве́, уча́щаго сло́вом и де́лом, ду́шу свою́ полага́ти по друзех, а не я́же вне́шняя.

118. То́жде. А́ще кто и́мать что во о́бщем житии́, вну́трь монастыря́, или́ вне монастыря́, да пребу́дет непричащен.

119. Духовни́к ино́го духовника́, суд реши́ти и вяза́ти вла́сти не и́мать; а́ще у́бо ин связа́, а други́й разреши́, разделе́ние е́сть; Христо́с не раздели́ся; но досто́ит, да связа́вый и разреши́т, по 32-му пра́вилу святы́х апо́стол. Духовники же глаго́лем в вресноту́ и пои́стинне зако́нныя духовники, и́же по Бо́зе, о спасе́нии челове́честем промышляют; а не тщесла́вныя, неискусныя и ло́жныя, и́же купством скве́рнаго ра́ди прибы́тка во о́бразе духо́внем, врачева́ние наво́дят. Ты́я бо су́ть уби́йцы, я́ко ду́шы челове́ческия убивающии, за нераде́ние и неиску́сство свое́; оба́че архиере́ови досто́ит разсуди́ти.

120. Духо́вный оте́ц, а́ще испове́сть кому́ грех испове́давшагося, и́мать епитимию́, три ле́та да е́сть пра́зден, то́кмо да причаща́ется в ме́сяц еди́ною, и да твори́т на всяк де́нь покло́нов сто; гражда́нский же зако́н глаго́лет, ископа́ти язы́к созади́ сицево́му. А́ще епи́скоп, или́ иере́й испове́сть грех на сы́на своего́ духо́внаго, на и́споведи от него́ слышаный, ника́ко же подоба́ет ве́рити сицево́му свиде́тельству, по пра́вилу 133-го, собо́ра Карфаге́нскаго. Святе́йший патриа́рх Лука́ запреще́нию, е́же не литургисовати, подложи́ игу́мена оби́тели Гиротрофия, су́щаго архиепи́скопа Ираклийскаго, зане́ свиде́тельствова на духо́вное свое́ ча́до. Арменополь кни́га, 3. сино́д, 1, глава́, 7.

Четве́ртаго Собо́ра:

121. Я́ко не досто́ит про́сту укори́ти свяще́нника, или́ би́ти, или́ поноша́ти, или́ клевета́ти, или́ облича́ти в лице́, а́ще у́бо и и́стинна су́ть. А́ще же пости́гнет сие́ сотвори́ти, да прокленется мирски́й, да отме́щется из це́ркве, разлуче́н бо е́сть от Святы́я Тро́ицы, и по́слан бу́дет во Июдино ме́сто. Пи́сано бо е́сть: кня́зю люде́й твои́х да не рече́ши зла. Та́кожде, и настоя́теля безчествуяй.

Седма́го Собо́ра:

122. Я́ко не подоба́ет мирски́м, повелева́ти свяще́ннику входи́ти во святи́лище, или́ в куюлюбо ве́щь, да́же и до ма́ла, но свое́ю во́лею, егда́ восхо́щет и возмни́тся ему́ литургиса́ти и пе́ти.

Апо́стола Па́вла:

123. А́ще кто и́мать вражду́ на кого́, в це́рковь да не вхо́дит, ниже́ прино́сы его́, до́ндеже примирится; и́бо моли́тва его́ в кля́тву, и грех вменя́ется, да твори́т же, на всяк де́нь, покло́нов пятьдеся́т.

124. А́ще кто во вре́мя прича́стия печа́ль име́я на бра́та, не даст ему́ ми́ра, да бу́дет отлуче́н. А́ще ли свяще́нник со враждо́ю литургиса́ет, да бу́дет пра́зден 60 дний.

125. Укоря́яй и проклина́яй искреняго, да отлучи́тся три дни су́хо яды́й с водо́ю. Пи́сано бо е́сть: глаго́ляй бра́ту своему́ ра́ка, или́ уроде, пови́нен е́сть гее́нне о́гненней (На по́ле: ниже́ пра́вило 350 (308?), Матфе́я 5, зач. 12).

126. А́ще ли кто укорит свяще́нника, да запрети́тся ле́то еди́но. А́ще даст ему́ зауше́ние, или́ с дре́вом, да запрети́тся три ле́та; а́ще и свяще́нник прости́т ему́ согреше́ния. (На по́ле: вы́ше пра́вило 121)

127. А́ще кто и́мать зло́бу с не́ким, и преста́вится еди́на ча́сть, да запрети́тся друга́я, о уме́ршем ле́то еди́но и кано́н, отходя́ на гроб сконча́вшагося дней 40 глаго́ля в себе́: прости́ ми бра́те, и Бог да тя прости́т.

Пи́сано бо е́сть:

128. А́ще кто досади́т отцу́, или́ ма́тери свое́й, сме́ртию да у́мрет. А́ще ли пока́ется о том е́же соде́ла, да запрети́тся, я́коже подоба́ет. А́ще и доса́ду прие́мый роди́тель прости́т ему́. А́ще ли двигнет дре́во, и уда́рит их, да отсе́чена бу́дет рука́. А́ще ли пока́ется, я́ко же возмни́тся архиере́ю, да ему́ даст кано́н.

129. А́ще кто своя́ ча́да, я́ко между́ себе́ воспита́на любя́, еди́но проклинает, друго́е же благословля́ет, еди́но ненави́дит, друга́го же лю́бит, и неравно им свое́ име́ние разделя́яй, я́ко чадоненавистник, не причасти́тся боже́ственных та́ин, до́ндеже не испра́вится, да отлучи́тся и от це́ркве.

130. А́ще кто за е́же мона́шествовати сы́ну своему́, лиши́т его́ ча́сти и насле́дия, та́кожде и той да отлучи́тся, по пятьдеся́т тре́тией главе́, 30, ти́тла.

131. И́же яст мертвечи́ну, или́ зверохищное, си́речь, волко́м снедаемое, или́ пти́цею пораженое, си́речь от крагуя, или́ от ины́я пти́цы, или́ кро́вь, или́ удавлену, обрета́емая в тенетах, или́ от тех я́же удавляют латини: свяще́нник у́бо изве́ржется, мирски́й отлучи́тся, по 63-му пра́вилу святы́х апо́стол, си́речь да не причасти́тся ле́та два, и кано́н.

132. Та́кожде и яды́й мя́со, или́ сыр, в вели́кую четыредеся́тницу, или́ в сре́ду и в пято́к, ле́та два да не причасти́тся.

133. А́ще кто по́йдет на пра́здник ва́рварский, или́ ерети́ческий, и сне́сть в той де́нь с ни́ми от них жремая за ду́шу их, или́ спра́зднует им, ле́та два да не причасти́тся, по 7-му пра́вилу, и́же во Агки́ре свята́го собо́ра. А́ще ли свяще́нник е́сть да изве́ржется, по 70-му пра́вилу святы́х апо́стол. Но ниже́ от них жремая я́сти подоба́ет, а́ще и прино́сят нам: возбранибося от 38, 39 и 40-го пра́вила, и́же в Лаодики́и.

134. Пра́вило же 11, Шеста́го Собо́ра, и́же в Тру́лле повелева́ет: а́ще кто в боле́зни де́рзнет призва́ти евре́ина врача́, и от него́ врачу́ется, а́ще у́бо свяще́нник е́сть, да изве́ржется, мирски́й же да отлучи́тся.

135. Свяще́нник лове́ц, или́ птицоятель, да е́сть пра́зден три ме́сяца.

136. Свяще́нник а́ще из це́ркви во́змет воск, или́ еле́й, да отлучи́тся по 72-му пра́вилу, святы́х апо́столов.

137. Епи́скоп или́ свяще́нник или́ диякон ли́хву взима́яй, или́ да преста́нет, или́ да изве́ржется, по 44-му пра́вилу, святы́х апо́стол.

138. И́нок же или́ и́нокиня ли́хву взимающе да отлуча́тся, и от прича́стия, да возбранятся, до́ндеже преста́нут.

139. Свяще́нник упива́яся, или́ глумствуяй, или́ ку́плю де́яй, или́ да преста́нет, или́ да изве́ржется, по 42-му пра́вилу святы́х апо́стол.

140. Свяще́нник а́ще и́щет зла́то, или́ что ино́е прича́стия ра́ди, да изве́ржется по 23-му пра́вилу, е́же в Тру́лле.

141. Свяще́нник а́ще по́слет чтеца́, или́ ино́го кого́, да причасти́т челове́ка, да отлучи́тся, по 14-му пра́вилу, е́же в Лаодики́и собо́ра.

142. Свяще́нник а́ще стыди́тся причасти́ти жену́ свою́, и даст ча́шу, и причасти́т ю̀ ин, прокля́тию сицева́го подлага́ет 103 пра́вило, е́же в Тру́лле.

143. Подо́бне проклинает четве́ртое пра́вило е́же в Агки́ре Собо́ра, и́же отвраща́ется от мирска́го свяще́нника, и не хо́щет от него́ причасти́тися.

144. Свяще́нник а́ще изблю́ет в той де́нь, в о́ньже литургиса́ше, от многопития, 40 дней да бу́дет пра́зден, по свято́му Иоа́нну По́стнику.

А́ще ли без литурги́и изблю́ет, от многопития, пол сих; а́ще ли хо́дит в корче́мницу, да отлучи́тся. Подо́бне и мирски́й, 40 дней запреща́ется, творя́ на всяк де́нь покло́нов сто, и псало́м, 50: Поми́луй мя Бо́же; да чтет а́ще изблю́ет по причаще́нии.

145. А́ще кто удержи́т прича́стие во усте́х свои́х, и пове́ржет ѐ в скоты́ или́ в пче́лы своя́, 4 ле́та да не причасти́тся.

146. А́ще приче́тницы иму́ще прю между́ себе́, и оставяют епи́скопа своего́, и на мирско́е суди́ще и́дут, да отлуча́тся на вре́мя, по 9-му пра́вилу, е́же в Халкидо́не свята́го собо́ра.

147. Свяще́нник а́ще сотвори́т кля́тву с латины, или́ собо́р на епи́скопа, или́ и́но что за мирску́ю вину́, или́ ка́мения собра́ние, да изве́ржется, по 80-му пра́вилу, е́же в Халкидо́не свята́го собо́ра, и по 34-му, е́же в Тру́лле, мирсти́и же, да отлуча́тся.

148. Свяще́нник от своего́ епи́скопа отлуче́н быв, и де́рзнет литургиса́ти, пре́жде да́же бу́дет испытано прегреше́ние его́, и прости́т епи́скоп, а́ще и безвиновен, да изве́ржется, по 32-му пра́вилу в Карфаге́не свята́го собо́ра; пра́вило же 133 и 4, того́жде собо́ра, запреще́нию подлага́ет епи́скопы, и́же отлуча́ют кого́ без благосло́вныя вины́.

149. А́ще кий архиере́й прие́млет пра́здна свяще́нника от ина́го архиере́я, или́ причетника, и простят его́ служи́ти, да бу́дут изве́ржени по 12-му пра́вилу святы́х апо́стол.

150. Пра́вило 33 святы́х апо́стол возбраня́ет приима́ти стра́нныя свяще́нники без писа́ния; 17 же пра́вило, е́же в Тру́лле, изверже́нию подлага́ет епи́скопа прие́мшаго стра́ннаго свяще́нника без отпустныя гра́моты своего́ епи́скопа.

151. А и́же по изверже́нии литургисавый свяще́нник, соверше́нно отмета́ется от це́ркве, си́речь отлуча́ется, по 28-му пра́вилу святы́х апо́стол.

152. А́ще кий от приче́тник слу́жит ему́, и той да бу́дет изве́ржен, по 11-му пра́вилу святы́х апо́стол.

153. Свяще́нник а́ще прии́мет же́ртву ерети́ческую, или́ крести́т турчину де́тищ, или́ прии́мет же́ртву его́, или́ я́ко приемника де́тищу во́змет его́, или́ я́ко дру́га жениха́ на брак, да изве́ржется, по 46-му пра́вилу, святы́х апо́стол. Ка́я бо ча́сть ве́рному с неве́рным, я́коже глаго́лет апо́стол?

154. Пра́вило 64 святы́х апо́стол глаго́лет, от входя́щих на поклоне́ние помоли́тися, си́речь, в глаго́лемыя их це́ркви, я́же и собо́рища нарица́ются; а́ще у́бо свяще́нник е́сть, да изве́ржется, а́ще ли же мирски́й, да отлучи́тся.

155. Тимофе́й же Александри́йский, в 9-й главе́ свои́х пра́вил содержи́т, я́ко не приима́ти еретика́ в Це́рковь благочести́вых, приноше́нию бываемому помоли́тися, а́ще не обеща́ется пока́ятися; я́коже бо преподо́бнии освяща́ют, та́ко ме́рзцыи оскверня́ют.

156. Пра́вило же 33, и́же в Лаодики́и собо́ра, возбраня́ет с ни́ми моли́тися, или́ я́сти, или́ приима́ти что от благослове́ния их, си́речь ми́лостыню.

157. Пра́вило же 10 святы́х апо́стол повелева́ет: я́ко моля́йся со отлуче́нными, а́ще и не в це́ркви, но в до́му, да бу́дет отлуче́н, и той та́кожде.

158. Свяще́нник а́ще по де́йству сопротивничу пролие́т свята́я, ше́сть ме́сяц да е́сть пра́зден, по единонадесятому пра́вилу свята́го Иоа́нна епи́скопа Китру. А́ще ли самохо́тне пролие́т я̀, да изве́ржется (На по́ле: О та́йна пролияных ниже́ пра́вило 226 и 233. ма... со... От). Оба́че до́лжен е́сть собра́ти свята́я до́бре, и стругав зе́млю, иде́же падо́ша, да изнурит огне́м, и водо́ю, си́речь пе́рвее да вло́жит их во о́гнь; та́же да вве́ржет в мо́ре, или́ в реку́, или́ в е́зеро, иде́же никогда́же сохнет; подо́бне и ка́мень а́ще е́сть, да вве́ржет и его́, я́коже ре́хом.

159. Свяще́нник а́ще литургиса́ет, и низпа́дает звезда́ с ди́скоса, да бу́дет пра́зднен дний 8. (На поле: ниже правила 107)

160. А́ще случи́тся святы́м да́ром погубля́тися, и не́мощи в снеде́ние приити́, ниже́ сожещи́ досто́ит, ниже́ поврещи́, но с вино́м сла́дким устро́ити ча́шу, и изнури́ти, си́речь сне́сти. (На поле: ма бо.

161. Свяще́ннику искусившуся во сне, недосто́ит литургиса́ти в той де́нь, кроме́ вели́кия ну́жды, а́ще и вельми́ безстра́стен бы́сть, по тридесятому пра́вилу свята́го Иоа́нна епи́скопа Китру, и по второ́му на́десять Тимофе́я Александри́йскаго.

162. В неде́лях, и в пра́здниках завещавай не де́лати, но приходи́ти в це́рковь, я́коже подоба́ет християном; а́ще кто де́лает в неде́лю, и в пра́здники, да отлучи́тся.

163. Маслосвящение не быва́ет за кано́н, ра́зве то́чию за неду́жных, по апо́стольскому уста́ву.

164. Над уме́ршим же маслосвящения, да не дерза́еши твори́ти отню́д.

165. Та́кожде и братотворения да не твори́ши, законопреступна бо су́ть сия́.

166. А́ще умира́ет челове́к, а́ще и яде́, да причасти́тся, то́чию да исповесться, по 9-му пра́вилу свята́го Ники́фора Царегра́дскаго.

167. Те́ло ме́ртвое да не прие́млет прича́стия, по 84-му пра́вилу, е́же в Тру́лле.

168. А́ще кто сведе́ согреша́ющаго, и моги́й возбрани́ти греху́, не возбрани́, или́ обличе́н быв от епи́скопа, скры; толи́ко вре́мя и той запреще́н да бу́дет, ели́ко же и грех сотвори́вый, по 70-му пра́вилу Вели́каго Васи́лиа.

Когда́ престаю́т помяновения.

169. В дванадесятодневном, в пе́рвую седми́цу 40-цы, и в Вели́кую седми́цу, и в све́тлую неде́лю, в неде́льныя дни, и в вели́кия пра́здники, помины не быва́ют; про́чее же во все ле́то помина́ются правосла́внии християне. (На по́ле: па́мяти)

170. Пелены́ я́же прино́сят християне в це́рковь, никто́же да де́рзнет в свое́ употребле́ние обрати́ти: законопреступно бо е́сть, по 73-му пра́вилу святы́х апо́стол.

171. В це́ркви пи́рове не быва́ют: законопреступно бо е́сть и сие́, по 74-му пра́вилу, е́же в Тру́лле.

172. Ниже́ спят в же́нском припрате в це́ркви, кроме́ ну́жды, по 38-му пра́вилу свята́го Ники́фора.

173. Ме́ртвых погреба́ти вну́трь це́ркви освяще́нной не подоба́ет; возбранибося, по 9-му пра́вилу свяще́ннейшаго епи́скопа Китрскаго.

174. Не досто́ит пе́ти велегла́сно, и естество́ на во́пль понуждати, но ти́хо, и со умиле́нием, по 75-му пра́вилу, и́же в Тру́лле.

175. А́ще кто заста́вит боля́ры, да упросят епи́скопа о свяще́нстве, или́ са́не, да изве́ржется, и да отлучи́тся, и приобща́ющиися ему́ вси, по 30-му пра́вилу святы́х апо́стол.

176. Пра́вило же 16 Седма́го Собо́ра, запреще́нию подлага́ет епи́скопы, и приче́тники, украша́ющия себе́ све́тлыми оде́ждами.

177. Матфе́й же в девя́той главе́, 3, стихи́а, возбраня́ет ве́рным украша́ти себе́, или́ власы́ брады стрищи́, и ушаряти ю̀, или́ плести́ власы́ главы́ своея́. Не повину́ющихся же отлуча́ти повелева́ет. Се же приво́дит от пра́вила, 97-го, 6-го собо́ра, и́же в Тру́лле (На по́ле: (по мищя. вати?)).

178. А́ще убие́т сам себе́ челове́к, ни пою́т над ним, ниже́ помина́ют его́, ра́зве а́ще бя́ше изумле́н, си́речь, вне ума́ своего́, по 14 отве́ту Тимофе́я Александри́йскаго.

179. Прелюбоде́й, или́ явленый блудни́к, не прие́млется в це́рковь, а́ще не оста́вит греха́; ниже́ прино́сы его́, по 39-му пра́вилу Вели́каго Васи́лиа.

180. И брак законопресту́пный, и́же от сро́дства не прие́млется в це́рковь, а́ще не разлучи́тся; по разлуче́нии же я́ко кровосмеше́ние сотво́рь запреща́ется, си́речь, 15 лет да не причасти́тся, по 74-му пра́вилу Вели́каго Васи́лиа.

181. И четвероженец не прие́млется в це́рковь, а́ще не разлучи́тся четвероженства; по разлуче́нии да не причасти́тся о́смь лет.

182. Двоеже́нец не быва́ет поп, по 12-му пра́вилу Вели́каго Васи́лиа.

Собра́ние от разли́чных пра́вил, о е́же ка́я согреше́ния возбраня́ют бы́ти свяще́ннику, и внима́й сему́ со опасе́нием.

183. А́ще растлено е́сть отроча́ от кого́ (На по́ле: ниже́ прав. 258), или́ сам сый о́трок растли́л ино́го о́трока, или́ блуд сотвори́ с жено́ю, или́ с муже́м, или́ со ското́м, или́ с птицей, или́ с жено́ю свое́ю чрез естество́, или́ жена́ его́ не бя́ше де́ва, или́ обручен быв ино́ю, или́ жена́ его́ со ины́м, или́ двоеже́нец е́сть, или́ пре́жде венча́ния растли́ обру́чницу свою́, или́ прелюбодействова жена́ его́, или́ сотвори́ уби́йство (На по́ле: вы́ше прав. 13, 14, 18, 21, 66, 183, и 189 М..) , или́ кля́тся, или́ коня́ укра́де, или́ вола́, или́ от свяще́нных же́ртвенника, или́ от сосу́д церко́вных и от оде́жди укра́де что, и е́сть святотатец; или́ разбойничествова, или́ бы́сть звездослов, или́ волхв, или́ чароде́й, или́ воск лияше и о́лово, или́ превязоваше зве́ря, или́ во́лки (На по́ле: 270 Иоан. Пост), или́ женомужие; или́ отве́ржется когда́ Христа́, или́ и́но не́что сотвори́ от отреченных, да не смееши свиде́тельствовати ему́ бы́ти попу, и́бо сожже́н бу́деши и ты и он, и внима́й сим, ели́ко по си́ле свое́й, да не насле́диши ве́чнаго огня́, и бу́деши я́ко Иу́да: зане́же предае́ши свяще́нство недосто́йным.

184. А́ще свяще́нник бу́дет, паде́т во еди́но от сих, да изве́ржется, по 51-му пра́вилу Вели́каго Васи́лиа; причаща́ется же егда́ хо́щет.

185. А́ще ли пре́жде рукоположе́ния согреши́, теле́сным грехо́м, и по́слежде обличе́н быв, или́ испове́сть то, да изве́ржется, по девя́тому пра́вилу, и́же в Неокесари́и собо́ра; и́но бо врачевство́ сицеви́и не и́мут, по Вели́кому Васи́лию, а́ще подви́гнутся я́ко и ме́ртвых воскреси́ти.

186. А́ще кто сый отроча́ прия́т от ино́го истицание в бедра́, да запрети́тся пе́рвее, пото́м да освяти́тся, по свято́му Иоа́нну По́стнику, зане́ не бы́сть соверше́нное паде́ние, и не вни́де педогонон в афедрон (На по́ле: растле́ся). А́ще ли вни́де, да не де́рзнет свяще́нство прия́ти; не зане́же согреши́ несоверше́н сый во́зрастом, но я́ко сосу́д просе́деся, и оскверне́ние пострада́, и бы́сть неключим в свяще́нство.

187. Та́кожде и он во и́но лице́ истицание творя́, а́ще и не вни́де педогонон его́, а́ще и несовершено бы́сть, возбраня́ется свяще́нства.

188. Ели́цы держа́т кано́н свой покая́ния, и по разсужде́нию отца́ духо́внаго не причаща́ются, тех име́й сы́ны духо́вныя.

189. О́нех же, и́же не держа́т пра́вила своего́, отжени́ их, да не поги́бнеши и ты с ни́ми, чужды́х сприобщаяся грех, по 84-му, и пя́тому пра́вилу Вели́каго Васи́лиа. Та́ко име́й грехи́, я́же испове́дают тебе́, я́коже бы бы́ли твои́, и та́ко име́й попече́ние да отвеща́еши Бо́гу. Сего́ ра́ди у́бо внемли́ до́бре, да не усрами́шися кого́ и убои́шися, и впаде́ши в такову́ вели́ку беду́. Внемли́ и сему́, да не пои́щеши что когда́ от исповедающаготися, или́ сло́вом или́ ма́нием, да тебе́ даст не́что: неключимо бо сие́ духо́вным отце́м, па́че же и законопреступно.

190. Не хотя́й держа́ти пра́вила своего́, и отгнаный от Тебе́, а́ще ли прии́дет па́ки, и изво́лит держа́ти, приими́ его́ па́ки; и да положи́т нача́ло, по 52-му пра́вилу святы́х апо́стол. А́ще ли не хо́щет, оста́ви его́, не убо́йся у́бо, той сам понесе́т грех; оба́че до́лжен еси́ нака́зовати его́ по свое́й си́ле.

О возрасте́ начина́ющих испове́датися, Фео́дор Валсамо́н, патриа́рх Антиохи́йский, в вопросе 48, к патриа́рху Ма́рку Александри́йскому (На по́ле: де. 15, 18, арминопо бни 5, ди, 387, ни́ко сло́во 4)

191. До́лжни су́ть му́жеский пол и же́нский, по шести́ ле́тех испове́данием исправля́тися и освяща́ти, в Матфе́и, сост. О, пра́вило 4, епи́скопа Китрскаго.

192. А́ще чия́ жена́ прелюбоде́йствует, сей в свяще́нство приити́ не мо́жет. По рукоположе́нии же прелюбодействовавшую, или́ да отпу́стит, или́ да оста́вит свяще́нство, по 13-му пра́вилу, и́же в Неокесари́и собо́ра.

193. Хотя́щаго свяще́нство прия́ти, до́лжен еси́ истяза́ти, и жену́ его́ со опасе́нием.

О возрасте́ рукополага́емых.

194. Повелева́ет 14 пра́вило и́же в Тру́лле: я́ко и́же быва́ет свяще́нник, пре́жде 30-ти лет; диа́кон, пре́жде 25 лет, иподиа́кон, пре́жде 20-ти лет, изве́ржени да бу́дут, а́ще и вельми́ достосла́внии су́ть. Тем же внима́й духовниче́, да не свиде́тельствуеши ему́, а́ще не бу́дет соверше́н в ле́тех, да не поставляетжеся неучителен, по пра́вилу 58-му святы́х апо́стол.

О е́же ки́и изверга́ются и отлуча́ются.

194. Подоба́ет ве́дати и сие́: я́ко а́ще падутся в не́кия отреченныя стра́сти свяще́нницы, изверга́ются то́кмо, но не отлуча́ются от прича́стия; и́бо довле́ет, им осужде́ние изверже́ния, по 25-му пра́вилу святы́х апо́стол, кроме́ трие́х сих вели́ких законопреступлений: си́речь и́же на сре́бреницех рукополага́ют, с рукополага́емыми да изве́ргутся, по 29-му пра́вилу, святы́х апо́стол, и ины́х мно́гих пра́вил, то́жде явля́ющих.

195. Пременяющиися епи́скопи, и митрополи́ты, от ма́лаго гра́да в высоча́йший, по 1-му и 2-му пра́вилу, и́же в Сардикии свята́го собо́ра. И хотя́щии прия́ти епископию, или́ сан, или́ свяще́нство, хода́тайством кня́жеским, или́ болярским, по 30-му пра́вилу святы́х апо́стол: в такова́ законопреступле́ния падшиися, изверга́ются и отлуча́ются, си́речь изгонятся от прича́стия.

196. Подо́бне изверга́ется, и отлуча́ется и чароде́й, си́речь, волхв, и прорицатель, и звездочтец свяще́нник, и храни́тельная подая́й, и превязуяй зве́ри, по 36-му пра́вилу, и́же в Лаодики́и Собо́ра.

197. Изго́нится же и свяще́нник, и́же не по́стничества ра́ди, мерзится бра́ка, и мяса́, по 51-му пра́вилу святы́х апо́стол.

О ГОРНИ́ЛЕ.

198. В же́ртвеннице име́й ме́сто непопираемое, ключи́мое, отлуче́нное во еди́ном у́гле, да умываешися по боже́ственей литурги́и, и помытие о́ное внима́й, да не паде́т вне, и попра́но бу́дет.

199. Та́кожде па́ки да и́маши ино́е ме́сто непопираемое, на излия́ние вели́кия агиасмы о́ныя, я́же остае́тся от креще́ния, егда́ крещаеши де́тище: и́бо вели́кая е́сть агиа́сма.

О е́же ка́ко подоба́ет креща́ти.

200. Отроча́ же о́но, е́же крещаеши, да и́маши купе́ль, или́ ночвицы, или́ блю́до, си́речь миса, или́ ин сосу́д разлучён; и егда́ влиеши еле́й в купе́ль, я́ко же повелева́ет после́дование, возми́ от блю́да еле́а треми́ пе́рсты, и пома́жи отроча́ по всех у́дех, я́коже сказу́ет уста́в, и тогда́ вземлеши его́ на́га, и став про́сто, крещаеши в три погруже́ния, глаго́ля си́це: креща́ется раб Бо́жий, и́мярек, во и́мя Отца́, ами́нь, и низводиши ѐ в купе́ль, и погружа́еши ѐ си́речь мочиши ѐ все. И па́ки да ста́неши ма́ло про́сто, возводя́й отроча́, и низводиши ѐ втори́цею в во́ду, и омочиши ѐ, глаго́ля: и Сы́на, ами́нь. И па́ки ста́неши про́сто, и низводиши ѐ трети́цею, и погружа́еши ѐ, подо́бне глаго́ля: и Свята́го Ду́ха, ами́нь, и куплеши коне́чне. Та́же взем от купе́ли, дае́ши ѐ восприемнику. Посе́м глаго́леши моли́тву свята́го ми́ра, и мируеши то по всех у́дех, я́коже глаго́лет после́дование. В купе́ль же да не де́рзнет восприе́мник простре́ти ру́ку свою́ крести́ отроча́, законопреступно бо е́сть сие́; то́чию да прии́мет ѝ от ру́ку свяще́нническу. Сего́ ра́ди глаго́лется и восприе́мник, я́ко прие́млет ѐ от свята́го креще́ния, и быва́ет его́ сын, да научи́т его́ благоче́стию.

201. Глаго́лет 49 пра́вило святы́х апо́стол, я́ко свяще́нник не креща́яй в три погруже́ния, я́коже предписа́ся, еди́но О́тчее, друго́е Сыно́внее, и тре́тие Свята́го Ду́ха, и си́це не творя́й в еди́ной та́йне, да изве́ржется.

Ки́и па́ки второкрещаются.

202. Ели́цы не зна́ют, я́ко крести́шася, от плене́ния не́гли, или́ от ино́го не́коего недоуме́ния и не́сть никто́ же, да извести́т их опа́сно, да креща́ются па́ки, по 72-му пра́вилу, и́же в Карфаге́не свята́го собо́ра.

203. А́ще же ага́рянския де́ти, креще́ни бы́вше по вре́мени от кого́, па́ки креща́ются и ти́и по́слежде, а́ще от произволе́ния обратя́тся ко и́стине.

204. Подо́бне второкрещаются, и елице от несвяще́нных крести́шася, си́речь, мирски́х, по 3 главе́, 2, стихи́а, е́же в Матфе́и. Оба́че не второкрещаются, и́же от приче́тник, или́ от простца и́нока, или́ диа́кона, или́ от отца́ самого́, или́ христиа́нина не́коего правосла́внаго, по ну́жде, не су́щу свяще́ннику, креще́ни су́ть, то́чию а́ще не рука́ ерети́ческая бя́ше пе́рвее.

205. О еретицех же, ки́и па́ки креща́ются, и ки́и то́кмо ми́ром помазу́ются, ищи́ в Матфе́и, за мно́жество, глава́ 2, 1, стихи́а. В конце́ же та́мошних пра́вил, я́коже в глави́зне всех пи́сано е́сть, я́ко вси во еди́но погруже́ние крещаемии еретицы́, па́ки креща́ются.

206. Свяще́нник а́ще яде́, да не крести́т, поне́же и то е́сть, слу́жба Бо́жия, оба́че су́щей ну́жде да крести́т.

207. Подо́бне и в вели́кую 40-цу креща́ти не подоба́ет, кроме́ вели́кия ну́жды.

208. Свято́е креще́ние пре́жде боже́ственныя литурги́и до́лжно бы́ти, да причасти́тся отроча́ на литурги́и, егда́ сицево́е случи́тся вре́мя, си́речь кроме́ ну́жды, зане́же с литурги́ею до́лжно бы́ти. И́мя же отроча́ти на литурги́и нарица́ется.

209. А́ще не́сть ин поп, свяще́нник сам да креща́ет свое́ отроча́; креща́ет же и той, со ине́м приимцем. А́ще ли бу́дет приимец де́тища своего́, разлуча́ется своея́ жены́, си́речь ма́тере де́тища: зане́же бы́ша себе́ кумове.

210. Та́кожде и сы́на своего́ жени́тву благословля́ет, со ине́м друго́м женихо́вым а́ще ин не́сть поп.

О духо́внем сро́дстве.

211. А́ще муж и жена́ крестят еди́ному челове́ку дитя́, повелева́ем к тому́ не смеситися другъдру́гу: поне́же кумове вменя́ются. А́ще ли совокупя́тся, име́ют запреще́ние, лет 17, и мета́ний по вся дни сто, су́хо яду́ще сре́ду, и пято́к; проща́яй же сих, да бу́дет про́клят.

О друзе́м сро́дстве духо́внем.

212. Два не́кая, и́же не име́ют кого́ сро́дника, а́ще детца их еди́н кум крести́т, си́речь, от купе́ли свята́го креще́ния прие́млет, де́ти о́ны не прихо́дят в бракопричастие, до осма́го степене, поне́же бра́тия су́ть: еди́н бо оте́ц ро́ди тех духо́вный святы́м креще́нием.

О свято́й проскоми́дии, и коли́ко просфо́р име́ти до́лжен еси́.

213. На свято́й проскоми́дии божественыя литурги́и пя́ть просфо́р да и́маши. Пе́рвая, за Госпо́дьский хлеб; Втора́я, Пресвяты́я Богоро́дицы; Тре́тия, за святы́х; Четве́ртая, за живы́х челове́к, и́хже хо́щеши помина́ти; пя́тая, за усо́пших, еди́но пря́мо еди́ному осо́бно ко́ждо чино́м свои́м, я́коже в служе́бниках ука́зано и изображено и́маши. Оба́че же да бу́дет пе́рвая просфора́ це́ла, да измеши Госпо́дьский хлеб, или́ ка́ко разуме́еши, да ти довле́ет за ана́фору; ины́я же да бу́дут мнии то́кмо. А́ще ли мног е́сть наро́д, и не довле́ет еди́на просфора́ за ана́фору, вложи́ и Пресвяты́я Богоро́дицы целу́ю просфору́, а ины́я да бу́дут ма́ли.

214. А́ще ли литургиса́ет с тобо́ю диа́кон, той ча́сти да не взима́ет, ра́зве то́чию свяще́нник, по апо́стольскому изображе́нию, во второ́м пра́виле Петра́ и Па́вла.

215. Подоба́ет ве́дати и сие́, я́ко не благословля́ет свяще́нник на свято́м предложе́нии, внегда́ глаго́лати ему́ моли́тву предложе́ния, си́речь, Бо́же Бо́же наш, небе́сный хлеб; по 12-му пра́вилу свята́го Ники́фора.

О свято́й четыредеся́тнице, и о вся́кой среде́ и пятку́, пра́вило 69, святы́х апо́стол.

216. А́ще кто епи́скоп, или́ свяще́нник, или́ диа́кон, или́ чтец, или́ певе́ц святы́я па́схи четыредеся́тницы не постит, и вся́кая среды́, и пятка́ всего́ ле́та, кроме́ не́мощи, да изве́ржется, люди́н же да отлучи́тся.

Сказа́ние:

Смотри́, я́ко пра́вило святы́х апо́столов во святу́ю четыредеся́тницу, и вся́кую сре́ду и пято́к всего́ ле́та ра́вно узаконоположи́ пост, я́коже во святу́ю четыредеся́тницу, яди́м та́коже и в сре́ду и пято́к всего́ ле́та, кроме́ не́мощи и пра́здников. Глаго́лет бо пра́вило: я́ко не постя́йся в сих, свяще́нник у́бо изверга́ется, мирски́й же отлуча́ется, си́речь, разлуча́ется от причаще́ния на вре́мя, си́речь управля́ется.

217. Царегра́дский же патриа́рх Ники́фор, в 50-м свое́м пра́виле глаго́лет, я́ко от свяще́нника непостящагося сре́ду и пято́к всего́ ле́та, недосто́ит причасти́тися от него́: и́бо от ча́сти благоче́ствовати, а от ча́сти нече́ствовати безме́стно.

218. Вели́кий же Афана́сий глаго́лет: разреша́яй сре́ду и пято́к, сей распина́ет Го́спода я́коже и иуде́е; и́бо в сре́ду предаде́ся, а в пято́к распя́тся, ра́зве то́чию богоявленских. И в пентико́стии, сия́ бо разреша́яй непови́нен е́сть.

219. Мона́хи же, и понеде́льник да храня́т всего́ ле́та, я́коже сре́ду и пято́к, я́коже от оте́ц прия́хом; ко́е бо проще́ние е́сть мона́ху, егда́ не преизбы́точествует пост его́, наипа́че же я́ко и благогове́йнии миря́не сие́ храня́т. Глаго́лет же святы́й Симео́н чудотво́рец в свое́м житии́: я́ко да пости́тся мона́х на всяк де́нь, и кроме́ о́бщих посто́в, не мне́е девятого часа́; то́жде и вси отцы́ глаго́лют. О о́бщих же посте́х святы́й собо́р, и́же в Га́нгре, в 18 свое́м пра́виле глаго́лет: А́ще кто от подви́жных мона́хов кроме́ не́мощи теле́сныя разгордится, и пре́данныя посты́ во о́бще храни́мыя от це́ркве разоря́ет, су́щу в нем соверше́нному ра́зуму, ана́фема да бу́дет.

Просвеще́ния, и Христо́ва Рождества́.

220. В на́вечерии Просвеще́нии, и Христо́ва Рождества́, в о́ньже де́нь случи́тся, пости́мся: рыб и ма́сла не я́мы, то́чию пие́м вино́, а́ще ли случи́тся в суботу, или́ в неде́лю, по вече́рни я́мы ма́сло, и пие́м вино́.

221. Де́нь Просвеще́ния, и Христо́ва Рождества́ а́ще случи́тся в сре́ду или́ пято́к: миря́не у́бо ядя́т мя́со, и́ноцы же сыр и яйца́.

222. Подо́бне пости́мся и в де́нь Воздви́жения честна́го и животворя́щаго Креста́, в 14 Септембрия ме́сяца, в о́нь же де́нь случи́тся, или́ в суббо́ту, или́ в неде́лю. Яди́м же в той де́нь, бы́вшаго ра́ди обре́тения честна́го Креста́, ма́сло и вино́, и вя́щше ничто́же.

О посте́ вели́кия 40-цы.

223. Во святу́ю и вели́кую 40-цу, я́мы еди́ною на де́нь, сухояде́нием, со́чива, то́чию без ма́сла; вина́ же и ма́сла в суббо́ту, и в неде́лю я́мы; та́кожде и от черепокожных.

224. Ры́бы же не я́мы, то́чию в де́нь Благове́щения, по боже́ственным пра́вилом; а́ще же случи́тся Благове́щение в Вели́кую седми́цу, не я́мы ры́бы, то́чию ма́сло и вино́.

О Вели́ком Четвертке.

225. По ниже́ в Вели́кий Четверто́к, я́мы ма́сло, по 50-му пра́вилу, и́же в Лаодики́и собо́ра: яду́щии же ры́бу, в де́нь пра́веднаго Ла́заря, или́ в неде́лю Креста́, или́ свята́го Фео́дора, я́коже ви́дим мно́гия, сие́ творя́щыя, суд себе́ восприи́мут, наипа́че же и в Па́сху не причаща́ются боже́ственнаго причаще́ния, в преще́ние их сластолю́бия; ка́ко бо дерза́ют в сицевые дни, иде́же ниже́ цветносную неде́лю повелева́ет пра́вило мирски́м разреша́ти на ры́бу; а́ще и не́ции уста́вы сие́ глаго́лют, по 24-му пра́вилу свята́го Ники́фора Константинопо́льскаго.

О посте́ святы́х апо́стол, и Христо́ва Рождества́, и Пресвяты́я Богоро́дицы.

226. В посты́ святы́х апо́стол, и Рождества́ Христо́ва, и Богоро́дицы, су́хо я́мы, три дни, си́речь, понеде́льник, сре́ду и пято́к, хранимся от ры́бы, и ма́сла, и вина́, кроме́ не́мощи, я́мы же со́чива без еле́а, я́коже и в Вели́кую четыредеся́тницу (На по́ле: Ни́кон сло́во 60); хотя́щии же благоугоди́ти Бо́гу, в суботу, и в неде́лю то́кмо ядя́т ры́бу и еле́й.

О е́же когда́ и где разреша́ется пост среды́ и пятка́.

227. Ве́домо же бу́ди и сие́, я́ко разреша́ется пост среды́ и пятка́, на ры́бы всего́ ле́та, то́чию в Госпо́дския пра́здники и Богоро́дицы. А́ще ли случи́тся на́вечерие сих пра́здников в сре́ду, или́ в пято́к, не разреша́ется пост в ве́чер, утрешняго ра́ди пра́здника, я́коже глаго́лет свяще́ннейший Иоа́нн, епи́скоп Китрский, в 28-м свое́м пра́виле, в Матфе́и. Разреша́ют же и всея́ 50-це среды́ и пятки́, миря́не у́бо на ры́бу, мона́си же на еле́й и вино́ то́кмо, но не в 9 час; оба́че в наиерении коего́ждо лежи́т. В пра́здники же святы́х апо́стол, и святы́х му́ченик, и святи́телей, не разреша́ем на ры́бу, а́ще случи́тся в сре́ду, и пято́к, то́чию на еле́й и вино́, и вя́щше ничто́же. Я́мы же то́кмо ры́бу на Рождество́ честна́го Предте́чи, во ин же пра́здник сего́ ника́коже, то́чию ма́сло и вино́. Та́кожде и в де́нь верхо́вных апо́стол Петра́ и Па́вла, разреша́ем на ры́бу, я́коже глаго́лет святы́й Фео́дор Студит, во свое́м уста́ве.

Когда́ до́лжни су́ть причасти́тися правоживущии боже́ственных та́инств.

228. Ве́домо бу́ди и сие́, я́ко до́лжни су́ть правоживущии, и сре́ду, и пято́к, храня́щии всего́ ле́та, да причастя́тся пречи́стых та́ин: си́речь в Вели́кую Па́сху, в де́нь Рождества́, в пра́здники святы́х апо́стол, и Богоро́дицы; а́ще и сия́ посты́ храня́т, си́речь, и ели́цы су́ть вне пра́вил. А́ще ли кто не храни́т святы́х апо́стол, и Рождества́ Христо́ва пост, и Богоро́дицы, в це́рковь сего́ да не прие́млеши, ниже́ чад его́; а́ще и та не́гли не постя́тся сих, си́речь, не храня́тся от бра́шна.