Чинопоследование Исповеди

Иере́й: Благослове́н Бо́г на́ш всегда́, ны́не и при́сно, и во ве́ки веко́в.

Сла́ва Тебе́, Бо́же на́ш, Сла́ва Тебе́.

Царю́ Небе́сный, Утеш́ителю, Ду́ше и́стины, И́же везде́ сы́й и вся́ исполня́яй, Сокро́вище благи́х и жи́зни Пода́телю, прииди́ и всели́ся в ны́, и очи́сти ны́ от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй на́с. (Три́жды.)

Сла́ва Отцу́ и Сы́ну и Свято́му Ду́ху и ны́не, и при́сно, и во ве́ки веко́в. Ами́нь.

Пресвята́я Тро́ице, поми́луй на́с; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Три́жды.) Сла́ва, и ны́не:

О́тче на́ш, И́же еси́ на небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хле́б на́ш насу́щный да́ждь на́м дне́сь; и оста́ви на́м до́лги на́ша, я́коже и мы́ оставля́ем должнико́м на́шим; и не введи́ на́с во искуше́ние, но изба́ви на́с от лука́ваго.

Го́споди, поми́луй. (12 ра́з.) Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

ПСАЛОМ 50

Поми́луй мя́, Бо́же, по вели́цей ми́лости Твое́й и по мно́жеству щедро́т Твои́х очи́сти беззако́ние мое́. Наипа́че омы́й мя́ от беззако́ния моего́ и от греха́ моего́ очи́сти мя́. Я́ко беззако́ние мое́ а́з зна́ю и гре́х мо́й пре́до мно́ю е́сть вы́ну. Тебе́ еди́ному согреши́х и лука́вое пре́д Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се́ бо в беззако́ниих зача́т е́смь, и во гресе́х роди́ мя́ ма́ти моя́. Се́ бо и́стину возлюби́л еси́, безве́стная и та́йная прему́дрости Твоея́ яви́л ми́ еси́. Окропи́ши мя́ иссо́пом, и очи́щуся; омы́еши мя́, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от гре́х мои́х и вся́ беззако́ния моя́ очи́сти. Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отъими́ от мене́. Возда́ждь ми́ ра́дость спасе́ния Твоего́ и Ду́хом Влады́чним утверди́ мя́. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя́ от крове́й, Бо́же, Бо́же спасе́ния моего́, возра́дуется язы́к мо́й пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, да́л бы́х у́бо: всесожже́ния не благоволи́ши. Же́ртва Бо́гу – ду́х сокруше́н: се́рдце сокруше́нно и смире́нно Бо́г не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на олта́рь Твой тельцы́.

ТРОПАРИ, гл. 6:

Поми́луй на́с, Го́споди, поми́луй на́с: вся́каго бо отве́та недоуме́юще, сию́ Ти́ моли́тву, я́ко Влады́це, гре́шнии, прино́сим: поми́луй на́с.

Слава: Го́споди, поми́луй на́с, на Тя́ бо упова́хом; не прогне́вайся на ны́ зело́, ниже́ помяни́ беззако́ний на́ших, но при́зри и ны́не, я́ко благоутро́бен, и изба́ви ны́ от вра́г на́ших: Ты́ бо еси́ Бо́г на́ш, и мы́ лю́дие Твои́, вси́ дела́ руку́ Твое́ю и и́мя Твое́ призыва́ем.

И ны́не: Милосе́рдия две́ри отве́рзи на́м, благослове́нная Богоро́дице, наде́ющиися на Тя́ да не поги́бнем, но да изба́вимся Тобо́ю от бе́д, Ты́ бо еси́ спасе́ние ро́да христиа́нского.

Го́споди, поми́луй. (40 раз).

Иере́й: Го́споду помо́лимся. (И читает моли́тву).

МОЛИТВА

Бо́же Спаси́телю на́ш, и́же проро́ком Твои́м Нафа́ном пока́явшемуся Дави́ду о свои́х согреше́ниях оставле́ние дарова́вый, и Манасси́ину в покая́ние моли́тву прие́мый. Са́м и раба́ Твоего́ (и́мя ре́к), ка́ющагося о ни́хже соде́ла согреше́ниих, приими́ обы́чным Твои́м человеколю́бием, презира́яй ему́ вся́ соде́янная, оставля́яй непра́вды и превосходя́й беззако́ния. Ты́ бо ре́кл еси́, Го́споди: хоте́нием не хощу́ сме́рти гре́шника, но я́ко е́же обрати́тися и жи́ву бы́ти ему́; и я́ко се́дмьдесят кра́т седмери́цею оставля́ти грехи́. Поне́же я́ко вели́чество Твое́ безприкла́дное и ми́лость Твоя́ безме́рная. А́ще бо беззаконие на́зриши, кто́ постои́т; я́ко Ты́ еси́ Бо́г ка́ющихся, и Тебе́ сла́ву возсыла́ем Отцу́ и Сы́ну и Свято́му Ду́ху ны́не и при́сно, и во ве́ки веко́в. Ами́нь.

МОЛИТВА ИНАЯ

Го́споди Иису́се Христе́, Сы́не Бо́га Жива́го, Па́стырю и А́гнче, взе́мляй гре́х ми́ра, и́же заимова́ния дарова́вый двема́ должнико́ма и гре́шнице да́вый оставле́ние грехо́в ея́. Са́м, Влады́ко, осла́би, оста́ви, прости́ грехи́, беззако́ния, согреше́ния во́льная и нево́льная, я́же в ве́дении и не в ве́дении, я́же в преступле́нии и преслуша́нии, бы́вшая от раба́ Твоего́ сего́. И а́ще что́, я́ко челове́к, пло́ть нося́й и в ми́ре живя́й, от диа́вола прельсти́ся: а́ще же в сло́ве или́ в де́ле, или́ в ве́дении, или́ в неве́дении: или́ сло́во свяще́нническое попра́, или́ под кля́твою свяще́нническою бы́сть, или́ под свою́ ана́фему паде́, или́ под кля́тву веде́ся. Са́м, я́ко бла́г и незло́бивый Влады́ко, сего́ раба́ Твоего́ сло́вом разреши́тися благоволи́, проща́я ему́ и свою́ его́ ана́фему и кля́тву по вели́цей Твое́й ми́лости. Е́й, Влады́ко, Человеколю́бче Го́споди, услы́ши на́с, моля́щихся Твое́й бла́гости о рабе́ Твое́м се́м и пре́зри, я́ко многоми́лостив, прегреше́ния его́ вся́, измени́ его́ ве́чныя му́ки. Ты́ бо ре́кл еси́, Влады́ко: ели́ка а́ще свя́жете на земли́, бу́дут свя́зана на небеси́, и, ели́ка а́ще разреши́те на земли́, бу́дут разреше́на на небеси́. Я́ко Ты́ еси́ еди́н безгре́шен, и Тебе́ сла́ву возсыла́ем, Отцу́ и Сы́ну и Свято́му Ду́ху ны́не и при́сно, и во ве́ки веков. Ами́нь.

УВЕЩАНИЕ КАЮЩЕМУСЯ

Се́, ча́до, Христо́с неви́димо стои́т, прие́мля испове́дание твое́; не устыди́ся, ниже́ убо́йся, и да не скры́еши что́ от мене́; но не обину́яся рцы́ вся́, ели́ка соде́лал еси́, да прии́меши оставле́ние от Го́спода на́шего Иису́са Христа́. Се́, и ико́на Его́ пре́д на́ми, а́з же то́чию свиде́тель е́смь, да свиде́тельствую пре́д Ни́м вся́, ели́ко рече́ши мне́. А́ще ли что́ скры́еши от мене́, сугу́б гре́х име́ти бу́деши. Внемли у́бо: поне́же бо прише́л еси́ во враче́бницу, да не неисцеле́н оты́деши.

СИМВОЛ ВЕРЫ

Ве́рую во еди́наго Бо́га Отца́, Вседержи́теля, Творца́ не́бу и земли́, ви́димым же все́м и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде все́х ве́к; Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся́ бы́ша. На́с ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы, и вочелове́чшася. Распя́таго же за ны́ при Понти́йстем Пила́те, и страда́вша, и погре́бенна. И воскре́сшаго в тре́тий де́нь по Писа́нием. И возше́дшаго на небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых и жи́зни бу́дущаго ве́ка. Ами́нь.

Испове́дуем мы́, многогре́шные (назови́те ва́ши имена́), Го́споду Бо́гу Вседержи́телю, во Святе́й Тро́ице сла́вимому и покланя́емому Отцу́ и Сы́ну и Свято́му Ду́ху все́ на́ши грехи́ во́льные и нево́льные сло́вом, или́ де́лом, или́ помышле́нием.

Согреши́ли: несохране́нием свои́х обе́тов, да́нных на́ми при Креще́нии, но во все́м мы́ солга́ли и преступи́ли, и непотре́бными себя́ соде́лали пре́д лицем Бо́жиим.

Прости́ на́с, Го́споди!

Согреши́ли: малове́рием, неве́рием, сомне́нием, колеба́нием в ве́ре, от врага́ всева́емым про́тив Бо́га и свято́й Це́ркви, самомне́нием и во́льным мне́нием, суеве́рием, гада́нием, самонаде́янностью, нераде́нием, отча́янием в свое́м спасе́нии, наде́ждою на самого́ себя́ и на люде́й бо́лее, че́м на Бо́га.

Согреши́ли: забве́нием о правосу́дии Бо́жием и неиме́нием доста́точной пре́данности во́ле Бо́жией; непоко́рностью к де́йствиям Про́мысла Бо́жия, упо́рным жела́нием, что́бы все́ бы́ло по-сво́ему, человекоугодием и пристра́стною любо́вью к тва́ри и веща́м.

Согреши́ли: нестара́нием раскры́ть в себе́ по́лного позна́ния Бо́га, во́ли Его́, ве́ры в Него́, благогове́ния к Нему́, стра́ха пре́д Ни́м, наде́жды на Него́́, и ре́вности о сла́ве Его́.

Согреш́или: неблагода́рностью к Го́споду Бо́гу за все́ Его́ вели́кие и непреста́нные благодея́ния, в изоби́лии излива́емые на ка́ждого из на́с и в це́лом на ве́сь челове́ческий ро́д и непа́мятованием о ни́х, ро́потом на Бо́га, малоду́шием, уны́нием, ожесточе́нием своего́ се́рдца, неиме́нием к Нему́ любви́, ниже́ стра́ха и неисполне́нием свято́й во́ли Его́.

Согреши́ли: порабоще́нием себя́ страстя́м: сладостра́стию, корыстолю́бию, го́рдости, самолю́бию, тщесла́вию, честолю́бию, любостяжа́нию, чревоуго́дию, ла́комству, тайнояде́нию, объяде́нию, пья́нству, пристра́стию к и́грам, зре́лищам и увеселе́ниям.

Согреши́ли: божбо́ю, неисполне́нием обе́тов, принужде́нием други́х к божбе́ и кля́тве, неблагогове́нием к святы́не, хуло́ю на Бо́га, на святы́х, на вся́кую святы́ню, кощу́нством, призыва́нием и́мени Бо́жия всу́е, в худы́х дела́х, жела́ниях.

Согреши́ли: непочита́нием пра́здников Бо́жиих, нехожде́нием в хра́м Бо́жий по ле́ности и по нераде́нию, неблагогове́йным стоя́нием в хра́ме Бо́жием; разгово́рами и сме́хом, невнима́нием к чте́́нию и пе́нию, разсе́янностью ума́, блужда́нием мы́слей, хожде́нием по хра́му во вре́мя богослуже́ния, преждевре́менными вы́ходами из хра́ма; в нечистоте́ приходи́ли в хра́м и прикаса́лись к святы́ням его́.

Согреш́или: нераде́нием к моли́тве, оставле́нием у́тренних и вече́рних моли́тв, нехране́нием внима́ния во вре́мя моли́твы, оставле́нием чте́ния свято́го Ева́нгелия, Псалти́ри и други́х боже́ственных кни́г.

Согреши́ли: ута́иванием грехо́в на и́споведи, самооправда́нием в ни́х и умале́нием и́х тя́жести, покая́нием без серде́чного сокруше́ния, и нестара́нием о до́лжном приготовле́нии к Причаще́нию святы́х Та́йн Христо́вых; не примири́вшись со свои́ми бли́жними приходи́ли на и́споведь, и в тако́м грехо́вном состоя́нии дерза́ли приступа́ть к Прича́стию.

Согреши́ли: наруше́нием посто́в и нехране́нием по́стных дне́й: среды́ и пя́тницы; невоздержа́нием в пи́щи и питии́, небре́жным и неблагогове́йным изображе́нием на себе́ кре́стнаго зна́мения.

Согреши́ли: непослуша́нием, самонаде́янностью, самонра́вием, самооправда́нием; ле́ностью к труду́ и недобросо́вестным исполне́нием пору́ченных рабо́т и де́л по до́лгу слу́жбы.

Согреши́ли: непочита́нием роди́телей свои́х и ста́рших себя́ по во́зрасту, де́рзостию, самонра́вием и непоко́рством.

Согреши́ли: неиме́нием любви́ к бли́жнему, нетерпели́востью, оби́дчивостью, раздражи́тельностью, гне́вом, причине́нием вреда́ бли́жнему, неусту́пчивостью, враждо́ю, зло́ за зло́ воздая́нием, непроще́нием оби́д, злопа́мятством, ре́вностью, за́вистью, зложела́тельством, мсти́тельностью, осужде́нием, оклевета́нием, лихои́мством, несострада́тельностью к несча́стным, немилосе́рдием к бе́дным, ску́постью, расточи́тельностью, корыстолю́бием, неве́рностью, несправедли́востью, жестокосе́рдием.

Согреши́ли: лука́вством про́тив бли́жних, обма́ном и́х, неи́скренностью в обраще́нии с ни́ми, подозри́тельностью, двоеду́шием, остро́тами, ло́жью, лицеме́рным обраще́нием с други́ми и ле́стью.

Согреши́ли: забве́нием о бу́дущей ве́чной жи́зни, непа́мятованием своей сме́рти и Стра́шного Суда́ и неразу́мною пристра́стной привя́занностью к земно́й жи́зни и ея́ удово́льствиям.

Согреши́ли: невоздержа́нием своего́ языка́, пустосло́вием, праздносло́вием, смехотво́рством, разглаше́нием грехо́в и сла́бостей бли́жнего, соблазни́тельным поведе́нием, во́льностью, де́рзостию.

Согреши́ли: невоздержа́нием свои́х душе́вных и теле́сных чу́вств, пристра́стием, сладостра́стием, нескро́мным воззре́нием на ли́ц друго́го по́ла, во́льным с ни́ми обраще́нием, блудо́м и прелюбодея́нием, изли́шним щегольство́м, жела́нием нра́виться и прельща́ть других.

Согреши́ли: неиме́нием прямоду́шия, и́скренности, простоты́, ве́рности, правди́вости, уважи́тельности, степе́нности, осторо́жности в слова́х, благоразу́мной молчали́вости, охране́ния и защище́ния че́сти други́х, неиме́нием любви́, воздержа́ния, целому́дрия, скро́мности в слова́х и посту́пках, чистоты́ се́рдца, нестяжа́тельности, милосе́рдия и смиренному́дрия.

Согреши́ли: уны́нием, печа́лью, зре́нием, слу́хом, вку́сом, обоня́нием, осяза́нием, по́хотью, нечистото́й и все́ми на́шими чу́вствами, помышле́ниями, слова́ми, жела́ниями, дела́ми и в про́чих на́ших греха́х, кото́рых из-за безпа́мятства на́шего мы́ не помяну́ли.

Прости́ на́с, Го́споди!

Ка́емся, что́ прогне́вали Го́спода Бо́га на́шего все́ми свои́ми греха́ми, и́скренно об э́том жале́ем и жела́ем всевозмо́жно возде́рживаться от грехо́в на́ших.

Го́споди, Бо́же на́ш, со слеза́ми мо́лим Тебя́, Спа́са на́шего, помоги́ на́м утверди́ться в свято́м наме́рении жи́ть по-христиа́нски, а испове́данные на́ми грехи́ прости́, я́ко бла́г и Человеколю́бец.

Не перечисленные здесь тяжкие грехи надо сказать духовнику особо, Грехи, исповеданные и разрешенные ранее, повторять на исповеди не следует, ибо они уже прощены, но если мы их снова повторяем, то снова в них нужно каяться. Каяться необходимо и в таких грехах, которые были забыты, но вспомнились теперь.

Говоря о грехах, не следует называть других лиц, соучастников греха. Таковые должны сами раскаяться за себя.

Испове́даю а́з, многогре́шный (и́мя ре́к), Го́споду Бо́гу моему́ Иису́су Христу́ и тебе́, честны́й о́тче, вся́ согреше́ния моя́; я́же соде́ях во вся́ дни́ живота́ моего́; я́же помы́слих и я́же глаго́лах, я́же во́лею мое́ю сотвори́х и нево́лею.

Согреши́х: Свята́го Креще́ния обе́тов не соблюдо́х, любви́ к Бо́гу и бли́жним не сохрани́х.

Согреши́х: церко́внаго и келе́йнаго пра́вила неисполне́нием, к церко́вным слу́жбам нераде́нием; к настоя́телю и к ста́ршим бра́тиям непослуша́нием; ропта́нием, самонра́вием, самочи́нием, самоуго́дием, го́рдостию, самомне́нием, самолю́бием, тщесла́вием, прекосло́вием, самооправда́нием, спо́рами; праздносло́вием; неправдоглаго́ланием, сме́хом, де́рзостию, во́льным обраще́нием, божбо́ю, кощу́нством; осужде́нием, оклевета́нием, презо́рством, зазре́нием бли́жних, укоре́нием, досажде́нием, злосло́вием, оскорбле́нием, смуще́нием, насмея́нием, нетерпе́нием, уны́нием, малоду́шием; гне́вом, я́ростию, памятозло́бием; не́навистию, за́вистию, ревнова́нием, зла́ за зло́ воздая́нием; лука́вством, ле́стию, обма́ном, ле́ностию, небреже́нием, сребролю́бием, многостяжа́нием, похище́нием, утае́нием, ску́постию; многояде́нием, винопи́тием, ла́комством, тайнояде́нием, несоблюде́нием посто́в; пристра́стием, сладостра́стием, прия́тием нечи́стых по́мыслов со услажде́нием и медле́нием в ни́х, невоздержа́нием чу́вств: зре́ния, слу́ха, вку́са, осяза́ния и про́чими мои́ми грехи́ душе́вными и теле́сными.

(Объяви, что имеешь.)

Но о все́х си́х ка́юся и жале́ю, и пови́нна себе́ Го́споду Бо́гу моему́ представля́ю. Ты́ же, о́тче, прости́ мя́, благослови́, разреши́ и помоли́ся о мне́ гре́шном.

Испове́даю а́з, многогре́шный (и́мя ре́к), Го́споду Бо́гу моему́ Иису́су Христу́ и тебе́, честны́й о́тче, вся́ согреше́ния моя́ и вся́ зла́я дела́ моя́, я́же соде́ях во вся́ дни́ живота́ моего́: я́же помы́слих и я́же глаго́лах, я́же во́лею мое́ю сотвори́х и нево́лею.

Согреши́х: Свята́го Креще́ния обе́тов не соблюдо́х и и́ноческих свои́х обеща́ний не сохрани́х, но во все́м солга́х и преступи́х.

Согреши́х: любви́ к Бо́гу и бли́жнему не сохрани́х; Зако́ну Бо́жию и святы́х оте́ц преда́ниям от ле́ности и небреже́ния о свое́м спасе́нии не поуча́хся.

Согреши́х: церко́внаго и келе́йнаго пра́вила неисполне́нием; хожде́нием в це́рковь без усе́рдия, с ле́ностию и небреже́нием, во вре́мя слу́жбы праздносло́вием, сме́хом, дрема́нием, безвре́менным сиде́нием, невнима́нием к чте́нию и пе́нию, разсе́янностью ума́, нехожде́нием в це́рковь по ле́ности, исхожде́нием из це́ркви во вре́мя слу́жбы и пре́жде отпу́ста.

Согреши́х: дерза́я в нечистоте́ ходи́ти в це́рковь, взима́ти антидо́р и вся́кия святы́ни прикаса́тися.

Согреши́х: неповинове́нием к настоятелю и к стар́шим бра́тиям и осужде́нием и́х; исправле́нием да́нного послуша́ния с ро́птанием и небреже́нием; хуле́нием пи́щи.

Согреши́х: непочита́нием пра́здников, наруше́нием посто́в и нехране́нием по́стных дне́й; невоздержа́нием в пи́щи и питии́, тайнояде́нием, ла́комством и винопи́тием; свое́й во́ли и ра́зума исполне́нием, непослуша́нием, самонра́вием, самочи́нием; хожде́нием по чужи́м ке́ллиям без ну́жды, а то́кмо ра́ди пра́здности; самооправда́нием.

Согреши́х: неве́рием, сомне́нием, малове́рием, отча́янием, уны́нием, ху́льными по́мыслами, кощу́нством, божбо́ю ло́жною.

Согреши́х: го́рдостию, самомне́нием, высокоу́мием, самолю́бием, тщесла́вием, славолю́бием, честолю́бием, за́вистию, превозноше́нием, презо́рством.

Согреши́х: осужде́нием, злосло́вием, гне́вом, памятозло́бием, не́навистью, зла́ за зло́ воздая́нием, оклевета́нием, укоре́нием, лука́вством, ле́стию, обма́ном, лицеме́рием, пересу́дами, спо́рами, упря́мством, нежела́нием уступи́ть и услужи́ть бли́жним, злора́дством, зложела́тельством, злосове́тием, смуще́нием, досажде́нием, оскорбле́нием, насмея́нием.

Согреши́х: праздносло́вием, смехотво́рством, слу́шанием и воспомина́нием мирски́х пе́сней, кни́г и разгово́ров, ри́зным украше́нием, соблазни́тельным поведе́нием, во́льностью, де́рзостию, непочте́нием.

Согреши́х: невоздержа́нием душе́вных и теле́сных чу́вств, услажде́нием и медле́нием в нечи́стых по́мыслах, пристра́стием, сладостра́стием, нескро́мным воззре́нием на же́н и ю́ношей; во сне́ блу́дным истица́нием оскверни́хся; многоспа́нием.

Согреши́х: нетерпе́нием боле́зней и скорбе́й, любле́нием удо́бств жи́зни сея́, чрезме́рною привя́занностью к роди́телям, сро́дником и друго́м, плене́нием ума́ и окамене́нием се́рдца; непонужде́нием себя́ на вся́кое добро́.

Согреши́х: любостяжа́нием, сребролю́бием, непра́ведным приобрете́нием, похище́нием, татьбо́й, утае́нием де́нег и веще́й церко́вных и бра́тских, ску́постию и пристра́стием к ра́зным веща́м.

Согреши́х: осужде́нием и ослуша́нием отце́в мои́х духо́вных и неисполне́нием да́нной мне́ от ни́х за грехи́ моя́ епитимии́ и неиспове́данием пе́ред ни́ми грехо́в мои́х по забве́нию, нераде́нию и по ло́жному стыду́.

Согреши́х: сло́вом, де́лом, помышле́нием, зре́нием, слу́хом, вку́сом, осяза́нием и все́ми мои́ми чу́вствы.

(Объяви, в чем еще укоряет совесть.)

Но о все́х си́х изрече́нных и, безпа́мятства ра́ди, за мно́жество и неизрече́нных, ка́юся и жале́ю, и пови́нна себе́ Го́споду Бо́гу моему́ бы́ти представля́ю, и и́мам во́лю ка́ятися, и впре́дь, ели́ко возмо́жно, по́мощию Бо́жиею блюсти́ся. Ты́ же прости́ мя́, о́тче честны́й, благослови́, разреши́ и помоли́ся о мне́ гре́шнем.

Испове́даю а́з, многогре́шная (и́мя ре́к), Го́споду Бо́гу моему́ Иису́су Христу́ и тебе́, честны́й о́тче, вся́ согреше́ния моя́, я́же соде́яла во вся́ дни́ живота́ моего́: я́же помы́слила и я́же глаго́лала, и я́же во́лею мое́ю сотвори́ла и нево́лею.

Согреши́ла: Свята́го Креще́ния обе́тов не соблюла́, любви́ к Бо́гу и бли́жним не сохрани́ла.

Согреши́ла: церко́внаго и келе́йнаго пра́вила неисполне́нием; к церко́вным слу́жбам нераде́нием; к настоя́тельнице и к ста́ршим се́страм непослуша́нием; ропта́нием, самонра́вием, самочи́нием, самоуго́дием, го́рдостию, самомне́нием, самолю́бием, тщесла́вием, прекосло́вием, самооправда́нием, спо́рами; праздносло́вием, неправдоглаго́ланием, сме́хом, де́рзостию, во́льным обраще́нием, божбо́ю, кощу́нством, осужде́нием, оклевета́нием, презо́рством, зазре́нием бли́жних, уко́рением, досажде́нием, злосло́вием, оскорбле́нием, смуще́нием, насмея́нием, нетерпе́нием, уны́нием, малоду́шием, гне́вом, я́ростию, памятозло́бием, не́навистию, за́вистию, ревнова́нием, зла́ за зло́ воздая́нием, лука́вством, ле́стию, обма́ном, ле́ностию, небреже́нием, сребролю́бием, многостяжа́нием, похище́нием, утае́нием, ску́постию, многояде́нием, винопи́тием, ла́комством, тайнояде́нием, несоблюде́нием посто́в, пристра́стием, сладостра́стием, прия́тием нечи́стых по́мыслов со услажде́нием и медле́нием в ни́х, невоздержа́нием чу́вств: зре́ния, слу́ха, вку́са, осяза́ния и про́чими мои́ми грехи́ душе́вными и теле́сными.

(Объяви, что имеешь.)

Но о все́х си́х ка́юся и жале́ю, и пови́нну себе́ Го́споду Бо́гу моему́ представля́ю. Ты́ же, о́тче, прости́ мя́, благослови́, разреши́ и помоли́ся о мне́ гре́шней.

Испове́даю а́з, многогре́шная (и́мя ре́к), Го́споду Бо́гу моему́ Иису́су Христу́ и тебе́, честны́й о́тче, вся́ согреше́ния моя́ и вся́ зла́я дела́ моя́, я́же соде́яла во вся́ дни́ живота́ моего́: я́же помы́слила и я́же глаго́лала, я́же во́лею мое́ю сотвори́ла и нево́лею.

Согреши́ла: Свята́го Креще́ния обе́тов не соблюла́ и и́ноческих свои́х обеща́ний не сохрани́ла, но во все́м солга́ла и преступи́ла.

Согреши́ла: любви́ к Бо́гу и бли́жнему не сохрани́ла; Зако́ну Бо́жию и святы́х отце́в преда́ниям от ле́ности и небреже́ния о свое́м спасе́нии не поуча́юся.

Согреши́ла: церко́внаго и келе́йнаго пра́вила неисполне́нием; хожде́нием в це́рковь без усе́рдия, с ле́ностию и небреже́нием, во вре́мя слу́жбы праздносло́вием, сме́хом, дрема́нием, безвре́менным сиде́нием, невнима́нием к чте́нию и пе́нию, разсе́янностью ума́, исхожде́нием из це́ркви во вре́мя слу́жбы и пре́жде отпу́ста и нехожде́нием в це́рковь по ле́ности.

Согреши́ла: дерза́я в нечистоте́ ходи́ти в це́рковь, взима́ти антидо́р и вся́кия святы́ни прикаса́тися.

Согреши́ла: неповинове́нием к настоя́тельнице и к ста́ршим се́страм и осужде́нием их; исправле́нием да́нного послуша́ния с ропта́нием и небреже́нием; хуле́нием пи́щи.

Согреши́ла: непочита́нием пра́здников; наруше́нием посто́в и нехране́нием по́стных дне́й; невоздержа́нием в пи́́щи и питии́, тайнояде́нием, ра́ноядением, ла́комством и винопи́тием; свое́й во́ли и ра́зума исполне́нием, непослуша́нием, самонра́вием, самочи́нием, хожде́нием по чужи́м ке́ллиям без ну́жды, а то́лько ра́ди пра́здности; самоопра́вданием.

Согреши́ла: неве́рием, малове́рием, сомне́нием; отча́янием, уны́нием, ху́льными помы́слами; кощу́нством и божбо́ю ло́жною.

Согреши́ла: го́рдостию, самомне́нием, высокоу́мием, самолю́бием, тщесла́вием, славолю́бием, честолю́бием, за́вистию, превозноше́нием, презо́рством.

Согреши́ла: осужде́нием, злосло́вием, гне́вом, памятозло́бием, не́навистью, зла́ за зло́ воздая́нием, оклевета́нием, укоре́нием, лука́вством, ле́стью, обма́ном, лицеме́рием, пересу́дами, спо́рами, упря́мством, нежела́нием уступи́ть и услужи́ть бли́жнему, злора́дством, зложела́тельством, злосло́вием, смуще́нием, досажде́нием, оскорбле́нием, насмея́нием.

Согреши́ла: праздносло́вием, смехотво́рством, слу́шанием и воспомина́нием мирски́х пе́сней, кни́г и разгово́ров, ри́зным украше́нием, соблазни́тельным поведе́нием, во́льностью, де́рзостию, непочте́нием.

Согреши́ла: невоздержа́нием душе́вных и теле́сных чу́вств, услажде́нием и медле́нием в нечи́стых по́мыслах, пристра́стием, сладостра́стием, нескро́мным воззре́нием на муже́й и ю́ношей, во сне́ блу́дным истица́нием оскверни́лась; многоспа́нием.

Согреши́ла: нетерпе́нием боле́зней и скорбе́й, любле́нием удо́бств жи́зни сея́, чрезме́рною привя́занностию к роди́телям, сро́дником и друго́м, плене́нием ума́ и окамене́нием се́рдца; непонужде́нием себя́ на вся́кое добро́.

Согреши́ла: любостяжа́нием, сребролю́бием, непра́ведным приобрете́нием, похище́нием, татьбо́й, утае́нием де́нег и веще́й церко́вных и се́стринских, ску́постию и пристра́стием к ра́зным веща́м.

Согреши́ла: осужде́нием и ослуша́нием отце́в мои́х духо́вных и неисполне́нием да́нной мне́ от ни́х за грехи́ моя́ епитимии́ и неиспове́данием пе́ред ни́ми грехо́в мои́х по забве́нию, нераде́нию и по ло́жному стыду́.

Согреши́ла: сло́вом, де́лом, помышле́нием, зре́нием, слу́хом, вку́сом, осяза́нием и все́ми мои́ми чу́вствы.

(Объяви, в чем еще укоряет совесть.)

Но о все́х си́х изрече́нных и, безпа́мятства ра́ди, за множество и неизрече́нных, ка́юся и жале́ю, и пови́нна себе́ Го́споду Бо́гу моему́ бы́ти представля́ю, и и́мам во́лю ка́ятися, и впре́дь, ели́ко возмо́жно, по́мощию Бо́жиею блюсти́ся. Ты́ же прости́ мя́, о́тче честны́й, благослови́, разреши́ и помоли́ся о мне́ гре́шной.

Испове́даю а́з, многогре́шный (и́мя ре́к), Го́споду Бо́гу моему́ Иису́су Христу́ и тебе́, честны́й о́тче, вся́ согреше́ния моя́ и вся́ зла́я дела́ моя́, я́же соде́ях во вся́ дни́ живота́ моего́: я́же помы́слих и я́же глаго́лах, я́же во́лею мое́ю сотвори́х и нево́лею.

Согреш́их: забве́нием о да́ре благода́ти свяще́нства, услажде́нием в по́чести, в и́грах и му́зыке, небре́жностью в служе́нии, каса́тельством к святы́не в нечистоте́, Прича́стием без приготовле́ния, опуще́нием пра́вила, неблагогове́нием, упуще́нием и сокраще́нием слу́жбы, нераде́нием о пасо́мых, разсе́янностью на моли́тве, моле́нием ра́ди коры́сти, жа́дностью, гру́бостью, отягоще́нием пла́ты за тре́бы, гне́вом на пасо́мых, раздраже́нием при служе́нии, нераде́нием к моли́тве и хра́му, ле́ностию к изуче́нию Свяще́нного Писа́ния и уче́ния святы́х отце́в, ле́ностью к пропове́данию, нераска́янием, жела́нием награ́д и повыше́ний, человекоуго́дием, потво́рством поро́кам, сла́быми епитимия́ми, изли́шней снисходи́тельностью ко греха́м, допуще́нием ко Прича́стию неиспове́давшихся, лише́нием их слы́шания пра́вила, боязли́востью, ло́жным стыдо́м своего́ са́на и оде́жды, Причаще́нием без и́споведи, мсти́тельностью, несохране́нием та́йны испове́данных грехо́в, ле́стью пред вы́сшими и вла́сть иму́щими, предпочте́нием ли́ц, ласка́тельством, притесне́нием подчине́нных, соблазни́тельным поведе́нием, униже́нием своего́ са́на, услажде́нием суето́й, и́грами, пе́снями и праздносло́вием, чте́нием душевре́дных кни́г и писа́ний, винопи́тием, утае́нием церко́вных веще́й, наруше́нием посто́в (в пи́ще, в супру́жестве), праздносло́вием, шу́тками, го́рдостию и высокоу́мием, тщесла́вием, уны́нием, несохране́нием пасо́мых от инове́рия, печа́лью, чревоуго́дием, блу́дными по́мыслами, гне́вом, отка́зом в тре́бах: напу́тствовать или крести́ть.

Согреши́х Бо́гу: де́лом, сло́вом, помышле́нием, зре́нием, слу́хом, обоня́нием, вку́сом, осяза́нием и все́ми мои́ми чу́вствы душе́вными и теле́сными, грехо́вным состоя́нием, прельще́нным положе́нием, стремле́нием ко греху́, скло́нностью к услажде́ниям.

Но о все́х си́х жале́ю и ка́юся, пови́нна себя́ Го́споду Бо́гу представля́ю; про́сти мя́, честны́й о́тче, благослови́, разреши́ и помоли́сь о́бо мне́ гре́шном.

Господу помолимся:

Го́споди Бо́же, спасе́ние рабо́в Твои́х, ми́лостиве и ще́дре и долготерпели́ве, ка́яйся о на́ших зло́бах, не хотя́й сме́рти гре́шника, но е́же обрати́тися и жи́ву бы́ти ему́: С́ам и ны́не умилосе́рдися о рабе́ Твое́м (и́мя ре́к), и пода́ждь ему́ о́браз покая́ния, проще́ние грехо́в и отпуще́ние, проща́я ему́ вся́кое согреше́ние во́льное же и нево́льное; примири́ и соедини́ его́ Святе́й Твое́й Це́ркви о Христе́ Иису́се Го́споде на́шем: с Ни́мже Тебе́ подоба́ет держа́ва и великоле́пие ны́не и при́сно и во ве́ки веко́в. Ами́нь.

Го́сподь и Бо́г на́ш Иису́с Христо́с благода́тию и щедро́тами Своего́ человеколю́бия да прости́т ти́, ча́до (и́мя ре́к), вся́ согреше́ния твоя́; и а́з, недосто́йный иере́й, вла́стию Е́го, мне́ да́нною, проща́ю и разреша́ю тя́ от все́х грехо́в твои́х во и́мя О́тца и Сы́на и Свята́го Ду́ха. Ами́нь.

Коне́ц же разреше́ния сего́ глаго́ля, иеромона́х зна́менует крестоо́бразно десни́цею ка́ющегося.

Та́же, Досто́йно есть... Сла́ва, и ны́не: И отпу́ст.

Сущность Таинства Исповеди состоит не во многоглаголании, а в силе внутреннего сознания своей греховности и безответности перед Богом, и в искреннем глубоком сокрушении за все соделанное. Перед тем как идти на исповедь, нужно старательно припомнить все свои дурные поступки, слова и мысли, сознать их греховность, осудить себя в чувстве сердца и затем положить твердое намерение во всем обличить себя пред духовным отцом, который есть посредник между Богом и нашей совестью, приемлющий наше исповедание; он будет свидетельствовать о нашем раскаянии в День Судный: «Беззаконие мое познах и греха моего не покрых» (Пс.31:5).

Кающемуся не должно дожидаться вопрошения духовника, а самому нужно обнажить свою греховную рану, как говорится в Писании: глаголи ты беззакония твоя прежде да оправдишися (Ис.45:26).

Покаявшемуся должно иметь веру в то, что аще что будет разрешено на земли, будет разрешено и на небеси (Мф.18:18) чрез посредство благодати, данной духовнику.

Но при всем этом надо помнить твердо, что приносить покаяние нужно не одними словами, а необходимо принести плоды в жизни, достойной покаяния. Покаяние есть исправление; покаявшийся должен всем сердцем возненавидеть прежнюю греховную жизнь и положить твердое намерение воздерживаться от всего неугодного Богу. Наша внутренняя борьба – вот что может привлечь на нас милость и помощь Божию.

Духовный отец должен иметь к кающемуся снисхождение и внимание к его покаянию, дабы мог свидетельствовать праведному Судии вся елико рекут ему. Он должен выслушивать исповедание с молитвой и с терпением, миром и кротостию, ибо для спасения кающегося очень полезно сочувствие духовника. «Недугующее нужно исцелять, а не сокрушать» (свт. Григорий Богослов).