Февраль

На велицей вечерни

На Господи воззвах, стихиры праздника – 3,

и новомученикам – 5, гл. 5, подобен «Радуйся»:

Радуйтеся, новомученицы Клинстии! / Упование на Господа возложивше, / лютую смерть от безбожных претерпесте / Сладчайшаго ради Иисуса, / не убоястеся от убивающих тело, / лишше же что не могущих сотворити, // сего ради нарекостеся чада Христова.

Радуйтеся, стражие небеснии земли нашея! / День от дне в заточении мучемии, / нощь же от нощи сна лишаемии, / от лукавых человек притворно вопрошаемии, / утесняемии и устрашаемии, / за всеми же сими беззаконно убиваемии, / верни в любви ко Господу пребывше, / Царствия венцы улучили есте, // на небеси и на земли прославляемии друзи Христовы.

Радуйтеся, новии исповедницы Клинстии! / В скорбех и страданиях ваших / чающе избавления от Господа,/ не пеклися есте, како или что отвещавати, / или что рещи, вопрошаеми, / от Духа же Свята научени бысте, / яже подобает рещи безбожным: / нимало не согласилися есте лжи оклеветающих, / но Сына Божия исповедали яве пред человеки, / сего ради и Христос нарече вы во Царствии Своем // равныя ангелом сыны воскресения.

Радуйтеся, доблии наши сродницы, / священнии мученицы Петре и Алексие / купно с преподобномучеником Серафимом! / Созовите в день памяти вашея, / вся Клинския новомученики и исповедники / моление соборное составити / о чадех ваших, зде предстоящих и молящихся, / память вашу днесь верно совершающих, / Господа прославляющих вас прославившаго, // и молитвами вашими нас спасающаго.

Радуйтеся, Клина новии мученицы, / священницы, монаси и мирстии, / мужие и жены, / веру сохраньшии в годину страшную, / Церкве Православныя утверждение и похвало, / просиявшии яко солнце во Царствии Отца Небеснаго, // яко страданьми за Христа праведницы явистеся.

Слава, гл. 6:

Кую песнь воспоим Господеви, / память совершающе новых мучеников земли нашея? / Кую похвалу принесем образную их подвигом? / Кое ли слово не обличит нашего недостоинства? / Со дерзновением воскликнем же, братие: / молитвами Тебе ради пострадавших / спаси, Господи, люди Твоя, // соборную их память днесь совершающих.

И ныне, праздника.

Вход. Прокимен дне. Чтения новомучеников.

(см. службу Собору новомучеников и исповедников Российских).

На литии, стихиры, гл. 8.

Страстоносцы преславнии, / подвигом добрым подвизастеся, / правды ради и кротости пострадавшии, / течение скончасте, / земнаго жительства лишеннии, / верою взыскасте основания имущаго града, / емуже художник и содетель Бог, / граждане небеснии явилися. / Поминайте нас, память вашу празднующих, // и молите спастися душам нашим.

Клина града цвети духовнии, / терпеливодушнии мученицы, / аще и безвестно погребена быша телеса ваша, / душами ныне Всеведцу предстоите, / Церкви Христовой явлени есте. / Лобызаем образы ваши преславныя, / благочестно соборную память вашу совершаем, // и молим спастися душам нашим.

Слава, гл. 6.

Небеснии наши хранителие и молитвенницы, / кровьми вашими восход спасительный совершивше, / небесная славная дарования прияли есте / от руки Судии Праведнейшаго. / Безмезднии врачеве душ и телес наших, / поминайте нас, страдания ваша поминающих, // и молите спастися душам нашим.

И ныне, праздника.

На стиховне стихиры праздника,

Слава, новомучеником, гл. 4:

Непрестанно гоними и преследуеми, / окружени скорбьми и злохуленьми, / с места на место преходяще, / подражатели Христовы явистеся, / новомученицы Клинстии. / Терпением души ваша стяжавше, / смертная же страдания приемше, / достигли есте Царствия Небеснаго, // молятся присно о душах наших.

Ины стихиры, новомучеников, гл. 2,

подобен «Доме Евфрафов»

Земле Клинская / днесь память совершает, / сонма новомучеников своих,/ собравшися в Дому Божием / единомышлением.

Стих: Господи, Господь наш, / яко чудно Имя Твое по всей земли.

Нивы Господней пределов Клинских / стократное приношение, / чада Христтовы Петр и Серафим со Алексием / купно с братиями и сестрами прославленнии // ныне во славе небесней на земное отечество милостивно взирают.

Стих: Святым, иже суть на земли Его, / удиви Господь вся хотения Своя в них.

Соборе святых пастырей Клинских, / заповедь Христову до конца исполнивше, / души за чада духовныя положили есте. / Умолите Судию Всемилостиваго о земном отечестве вашем // и о паствы вашея наследницех.

Слава, глас и подобен той же.

Новый Доме Евфрафов, / небесныя избранницы, / возвеселитеся ныне, / о земном отечестве вашем, // и веру православную в нем утвердите.

И ныне, глас 8, подобен «О, преславнаго чудесе»

О, преславнаго чудесе! / Во пророцех предуведенное ныне исполняется,/ яко от мертвых воскресает Отечество наше, / и в немощех наших сила Божия совершается: / православная вера расцветает, / храмы святыя из руин возстают, / новомученицы российстии прославляются, / и народ ко истинней вере возвращается, / и Христос от всех величается, / зима безбожия истаевает, / и лето Господне приятно к нам вновь приходит / молитвами святых, за веру пострадавших, / наипаче же предстательством Пречистыя Владычицы нашея Богородицы // и Приснодевы Марии.

Тропарь новомучеников, гл. 4

Первопрославленнии святии Клинския земли, / новомученицы и исповедницы ея, / в годину безбожную за Христа пострадавшии / и до смерти верни Ему пребывшии, / в небесней славе ныне ликуют, блаженнии, /и молятся о земнем отечествии своем // и спасении душ наших.

На утрени

По 1-м стихословии, Седален, гл. 1:

Новомученицы Клинстии, / рцыте нам, како в темницах воспевасте: / «На Тя, Господи, уповахом, да не постыдимся во веки». / Рцыте нам, како смерти лютыя не убоястеся, / како помощию Вышняго победисте врага и местника, / како вкушаете ныне манну сокровенную / и плоды древа жизни посреде рая Божия. / Научите нас, обнищавших верою, // да последуем стопам вашим.

Слава, и ныне, праздника.

По 2-м стихословии, Седален, гл. 7:

Преподобномученицы Акатовския, / Анастасие, Екатерино и Александро, / купно с сестрами вашими о Господе / по всей земли нашей на страдания безбожными разсеянныя, / ныне же во обителех небесных совокупльшияся / и вечныя жизни наслаждающияся, / услышите нас, память вашу днесь совершаюших, // и молитеся о душах наших.

Слава, и ныне, праздника.

По полиелее, Седален, гл. 5.

Пастырие духовнии, / стадо Христово добре упасшии / и от раскола погибельнаго паству Клинскую сохраншии, / за верность преданию Церкви Православныя, / преданы бысте в темницы и на мучения, / ведоми ко властем и владыкам, / да мнимозаконно умертвят вы, / во еже разрушити Православие на Раси. / Не ведаша бо гонители безумнии, / ни Писания, ни силы Божия: // не одолеют бо врата адова Церковь Христову.

Слава, и ныне, праздника.

Прокимен новомучеников, гл. 4: Проидохом сквозе огнь и воду,/ и извел ны еси в покой. Стих: Разжегл ны еси, якоже разжизается сребро. Евангелие от Матфея, зачало 36.

По 50-м псалме, стихира, гл. 6.

Отца Безначальнаго чада возлюбленная, / Сына Единороднаго друзи истиннии, / Духа Святаго сосуди избрании, / новомученицы земли нашея, / Бога прослависте в телесех ваших, / ихже пройде оружие смертное, / яко жертва чистая принесостеся Святей Троице, // и ныне молятся о душах наших.

Канон праздника со ирмосом на 4, и канона два новомучеником, на 8.

Канон новомучеников 1-й, глас 8.

Песнь 1.

Ирмос: Поим Господеви, проведшему люди Своя сквозе Чермное море, яко Един славно прославися.

Новомученицы Клинстии, удела Божия людие избраннии, царское священие, кую песнь празднственную ныне воспоем о вас Господеви, Един бо славно прославися.

Огустеша волны моря житейского, внегда шествовати вам путем крестным; воинство же фараонитское мгла вечная покры, внегда восходити вам во обители света невечерняго, идеже ныне пение хвалебное приносите Господеви, Един бо славно прославися.

Владыки Едомския новыя и князи Моавитския беззаконныя страх и трепет постиже, егда видеша даже до смерти верность вашу Господеви, святии мученицы, Той бо Един в вас славно прославися.

Богородичен: О, Всепетая Мати! Не презри грешных молений гласы, но с мученицами новыми умоли о нас Сына Твоего водворитися купно с ними в уготованном жилищи святыни Его, Един бо славно прославися.

Ин канон, глас тойже, те же и ирмосы.

Песнь 1.

В скорбное время гонения безбожнаго не устрашился еси прещений и преследований князей века сего, Петре священномучениче, Троицкаго села окормителю, но добре упасл еси стадо Христово, в чадех духовных веру утверждая, и в домех , и в храме непрестанно убеждая их пребывати внутрь спасительнаго ковчега – Церкви Православныя, вне же Ея море погибельное фараона мысленнаго.

Апостолу первоверховному тезоименитый, сему уподобился еси, агнцы Христовы на пажити верности Богу изводя и пред ними усердно шествуя, сего ради восприял еси и славную кончину онаго, во исполнения вящшей заповеди: ты по мне гряди.

Проповедию о мире Христовом злобу мира сего обезсилил еси, Петре священнейший, и четыредесятолетное служение алтарю Господню безпорочно исполнив, яко пустынное шествие среди гонений и уз темничных совершил еси, не в землю обетования, но в самое Небесное Царствие восшел еси, венцем мученическим увенчанный и в Церкви Божией прославленный.

Богородичен: К Пречистей Богоматери молитвенное воздыхание усердно принесем, да сподобит и нас, недосойных, блаженной части Царствия Сына Своего.

Песнь 3.

Ирмос: Утверждей в начале небеса разумом, и землю на водах основавый, на камени мя Христе заповедей Твоих утверди, яко несть свят, паче Тебе, Едине Человеколюбче.

Миру якоже отребие вменистеся, святии новомученицы, поносими и оклеветаеми Господа ради, велия радования исполнястеся, многу мзду на небесех провидяще и вопиюще: несть свят паче Тебе, Господи!

Утвердися в Бозе сердце твое, Петре священномучениче, града Клина похвало и собора святых его возглавителю, апостольскою бо ревностию преукрашен, стадо Христово добре упасл еси, душу свою за овцы полагая и взывая: несть свят паче Тебе, Господи!

Человече Божий Петре досточудне, Единому Владыце дванадесятолетное служение благочиннаго принесл еси, адаманте веры несокрушимый, казнь лютую от безбожных приял еси, и по смерти возвещаеши: несть свят паче Тебе, Господи!

Богородичен: Едина Чистая, Едина Благословенная, благословила еси смиреннаго угодника Божия Петра на служение во храме Твоем, всем скорбящим от безбожных радость сотворяющи, не лиши и нас Покрова Твоего, но возстави пети: несть свят паче Тебе, Господи!

Ин.

Милосердствуя о страждущем народе Божием, Сергие свщен-номучениче, посещал еси жен немощных в непосильных трудехпребывавших, участием и словом укрепляя веру их, добрый патырю Христов.

Прроповедию о милости Божией утешал еси заблудших чад стада Христова, сего ради возненавиден был еси служителями тьмы века сего, и от них в темницу ввержен, и жизнию и смертию своею прославил Бога.

От лжесвидетелей оклеветанный, паче всякаго железа крепчайший духом показался еси, пастырю Николо-Железовский, аще и пятидневно истязуемый непрестанно, и советом нечестивых безвинно осужденный. Смертию же своею зубы львов зловерных сокрушил еси, непобедимою благодатию Божиею осененный кроткий служителю Христов.

Богородичен: Мати Дево Всемилостивая! Святыми молитвами Твоими умягчи окаменевшия сердца нашада возможем и мы милосердовать о ближних наших, и да помиловании будем по слову Сына Твоего.

Кондак и икос праздника.

Седален мученикам, глас 5

Благословени есте, Господни мученицы, цвети благоуханнии земли нашея, невечерняго света причастницы и славы Божественныя восприемницы! Молите непрестанно Благосердаго Владыку ущедрити и спасти души наша.

Слава и ныне, праздника

Песнь 4.

Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив, тем с пророком Аввакумом зову Ти: силе Твоей слава Человеколюбче.

Ныне отпущаеши рабы Твоя, Владыко, по глаголу Богоприимца Твоего, ко оному блаженному покою; ныне собирается пшеница в житницу Господню, скорбьми от плевел очищенная, ныне плоду созревшему серп посылается, – новии мученицы в веселии взываху, – яко слышим слух Твой, и разумеем дела Твоя, и прославляем премудрость Твою, Человеколюбче.

Инок от юности пребыл еси славныя Лавры Александро-Невския, новый воин Христов явился еси, суеты мира сего отвергшеся, преподобномучениче Серафиме. Богоотступниками от столиц изгнанный, притекл еси ко граду нашему и обрел тамо святаго Петра пастыря, емуже неразлучно даже до кончины сослужил еси, благодаряще Господа: смотрению Твоему слава, Человеколюбче.

Клина града прославление, Церковь Христова тобою украсися, преподобномучениче, ангелом небесным уподобился еси, мучителем безбожным посрамление и вечное осуждение быв, яко не прияша, Клинский Серафиме, свидетельства твоего: силе Твоей слава, Человеколюбче.

Богородичен: О преславнаго чудесе! Небесе и земли Царица избранных служителей Своих Петра и Серафима во единый день раеви сподобила еси, уготованныя славы венцы возлагая сим, взывающим: Царствию Твоему слава, Человеколюбче.

Ин.

Купли житейския изведав, служение сим оставил еси, богомудре Алексие свщенномучениче, ко служению церковному притекл еси, и талант приемши бытии верным Христу, Тому усердно последовал, и куплю истинную совершив, приобрел еси един многоценен бисер Царствия Нетленнаго.

Соблазны мира сего отвергл еси, священномучениче Алексие, Успенскаго храма усердный служителю, и собрания татей церковных, учинявших раскол, обличил , богомудре, и верность Церкви патриаршей сохранил еси,темничнаго заключения нимало не смущаясь, и вся ради Христа претерпел еси.

Трикратное темничное заключение и изгнания многолетная смиренно подъял еси, блаженнее Алексие, и в крае северном течение верно скончав, в руце Отца Небеснаго душу свою предал еси, и Судии Всемилостивейшаго услышал еси глас: «Вниди в радость Господа Твоего, рабе Мой верный» .

Богородичен: Ублажаем Тя, Всеблаженная, Богородице Приснодево, и молим Тя прилежно, умоли Сына Твоего и Господа нашего, да наставит нас благодатию Своею со страхом Божиим и верою прейти стезю жизни нашея и сподобиться Царствия Его.

Песнь 5.

Ирмос: Просвети нас повелении Твоими, Господи, и мышцею Твоею высокою, Твой мир подаждь нам Человеколюбче.

Мир Божий, иже паче всякаго ума, в сердцах ваших ношасте, Свет во откровение языков, иже паче всякаго света зрясте, славу людей Божиих вовеки восприясте, сродницы наши духовнии, сладость Христову вечную вкушаете, блаженнии, поюще: разве Тебе инаго Бога не вемы.

Клинстей земли явился еси украшение, Алексие священниче: тридесять лет во единем храме непорочное служение совершая, и Правду Божию возвещая на земли, небеснаго отечества достигл еси, праведне. От лжесвидетелей оклеветанный, служителями тьмы века сего осужденный, умерщвлен был еси злодеями во един день с собратиями твоими Петром и Серафимом, с нимиже ныне всех Владыке сладко возглашаеши: разве Тебе, Христе, инаго Бога не вемы.

Ликостояния блаженных сподобился еси, священне Алексие, на земли бо воздвизая руки горе в предстоянии претолу Божию храма Крестовоздвиженскаго, созерцал еси умно славу страстей Христовых, и о сей единей ревновал еси. Сего ради и Господь воздвиже тя во свидетельство пред властьми нечестивыми исповедати силу крестную и веру истинную, яко разве Христа инаго Бога не знал еси.

Богородичен: Иверия славится и Казань веселится, Тихвин умиляется и Почаев ликует, Владимир красуется и Смоленск торжествует, ликами чудотворными Твоими, Пресвятая, украшени. Ныне же и град Клин, аще и малый в братии своей, не отлучен есть Твоея милости, Всечистая – имеяй бо чудный образ Твой, новомучениками своими воспевает Ти: разве Сына Твоего инаго Бога не вемы.

Ин.

Многотрудную жизнь мирскаго служения прешед, священномучениче Иоанне, напоследок призван был еси от всевидящаго Бога на служение церковное, яко пришедый во единонадесятый час, нимало не смущаясь временам гонений пришедшим, со всеусердною ревностию труды пастырския подял еси, словом и делом, и самым обличием своим благолепным вверенную ти паству наставлял еси, научая богобоязненному исполнению заповедей евангельских.

Многократно премещаемый от священноначалия, во еже избавити тя от преследований врагов Церкви Божией, с радостию приимал еси всякое новое служение, предзрев Господа выну одесную себе, надежду полагая на Его крепкую десницу, и всюду пребывал еси яко свеща горящая на свещнике Христовом.

Егда прииде исполнения времени жизни твоея, неколебиме Иоанне, по слову псалмопевца семидесятолетное, заключен был еси в темницу от бебожных, и оклеветанный от лжесвидетелей, осужден был яко повинный смерти. Обаче за пределом жизни временныя провидел еси жизнь истинную и вечную, и с несумненною верою и надеждою воскресения, в Царствие Света Невечерняго восшел еси, венцем мученическим увенчанный.

Богородичен: Моливами Пречистыя Твоея Матери и святых новомучеников Клинских, Господи Иисусе Христе Боже наш, избави нас от лукаваго ловления тьмы века сего сподоби деснаго предстояния при страшннем и славнем пришествии Твоем.

Песнь 6.

Ирмос: Молитву пролию ко Господу, и Тому возвещу печали моя, яко зол душа моя исполнися, и живот мой аду приближися, и молюся, яко Иона: от тли Боже, возведи мя.

Наказание народу нашему, лестию от безбожных уловленному и жизни евангельския отступившему, волею приясте, безвиннии; жертву себе Господеви уготовисте в подобие жертвы Христовы, из глубины души вопиюще, блаженнии мученицы: от тли, Боже, возведи ны.

Алексие, священниче Селинский, Преображенскаго храма настоятелю, дерзновенно проповедал еси держатися Патриаршия Церкве, в нейже единей истина пребывает и сей не отвращатися во след раскольников новых. Сего ради изгнание претерпел еси от беззаконных, узником Соловецким совокупился еси, единеми усты с ними моляся: от тли, Боже, возведи ны.

Проходя путь узкий и прискорбный, Алексие священномучениче, врат тесных достигл еси Царствия в празднование славного Преображения Господня, молился бо еси выну ко Христу: от рова истления, Боже, возведи мя в гору святую Твою.

Богородичен: Егда постиже страну нашу година испытания, открышася помышления сердец многих, на падение вечное неверных и на славу нескончаемую избранных, иже возлюбиша Крест Сына Твоего, Пречистая, и душу Свою уготовиша на пронзающее оружие. И ныне молим Тя: изведи от тли живот наш, якоже и оных помиловала еси.

Ин.

Измлада в служении церковном пребывал еси, священномучениче Георгие Доршевский, егда же прииде година великаго мятежа и богоборнаго гонения на Церковь Христову в земле Российстей, и чада века сего отвергались веры истинныя и преходили к безбожному зловерию, ты отвергл еси сумнительныя страхования, и прием на рамо благое иго священнаго служения, добре упасл еси стадо словесных овец, вверенных тебе десницей Божией.

Верный в малом, на большее призван был еси, священне Георгие, егда инокинь разоренной Зосимовой пустыни приял ко храмовому служению и духовному окормлению. Тем и ярость и рыкание звериное от ненавистников Церкви навлекл еси на себе, избранный Божий служителю.

За верность Христу и безпорочное служение Ему от безбожных в темницу ввержен быв, Георгие непобедиме, жестокие избиения претерпел еси, лжебратиями оклеветанный, язвы Господа на теле своем носити сподобился еси, и тако достигл еси вскоре и смерти за Христа, и славы безконечнаго Царствия Его.

Богородичен: Воспеваем Тя, Пресвятая Дево, и молимся усердно, да заступлением Твоим сподобимся милости Господней и прощения безчисленных грехов и прегрешений наших.

Кондак, гл. 5

Жертва Богу благоприятная, / благодатный начаток земли Клинския, / новомученицы и исповедницы ея, / празднующе днесь память вашу, / лобызаем за Христа приятыя раны и страдания, / восхваляем неколебимое в вере и правде стояние, / величаем и бесстрашное мук смертных попрание, / и молимся прилежно: // умолите Господа о спасении душ наших.

Икос

О, святи мученицы преславнии! Молитвами вашими Церковь Русская утверждается, храмы Божии созидаются, лесть бесовская и тьма идольская отгоняются, люди же безбожнии к покаянию обращаются и во умилении благодарственно взывают: радуйтеся, новомученицы и исповедницы края Клинскаго.

Песнь 7.

Ирмос: Божия снисхождения огнь устыдеся в Вавилоне иногда, сего ради отроцы в пещи радованною ногою яко во цветнице ликующе, пояху: благословен еси Боже отец наших.

Новых мучеников Российских дружина добрая святии Клинстии, мужие и жены, монаси и священницы, простецы и премудрии, вернии послушницы явистеся Евангелия, обретосте бо души своя, погубивше их Христа ради, огненнаго искушения не отвергостеся, но очистившись, злату уподобистеся и воспевасте яко отроческими гласы: благословен еси, Боже отец наших.

Иерее блаженне Василие Спас-Коркодинский, смирением и терпением и непоколебимою верою силы вражия преобидел еси, изгнание и безместное пребывание, унижения, оклеветания и поношения приял еси, благословляя радостно Бога отец наших.

Егда приближися день славнаго отшествия твоего, священномучениче Василие, от непрестающего притеснения к свободе вечной чад Божиих, благодатию предвкусив уготованную ти славу, всем сердцем возопил еси: благословен еси, Боже отец наших.

Богородичен: Препетая, Пречистая Богоневесто Владычице, со святыми мученики Клинскими умоли Сына Твоего, да низпослет мир Отечеству нашему и душам нашим велию милость: да будем Ему чада верныя, благословловляюще единими усты Бога отец наших.

Ин.

От юности отверглся еси мира, и безумных соблазнов исуетных мятежей его, богоразумный Гаврииле преподобномучениче, и посреде бед и гонений безбожных строителей рая земнаго, узким путем следования Христу потекл еси, верность ему превыше всякаго блага предъизбрав.

Пастырское служение восприял еси, преподобномучениче, яко послушание от Господа, правдой Божией зловерие и ложь суемудрых служителей тьмы безбожныя обличая, овцы стада Церковнаго во истинней вере наставил еси, во еже последовати Христу даже до смерти, якоже древни мученицы, и жизнию своею слово сие исполнил еси.

Первое заключение в северном крае претерпев правды ради Христовой, вернулся еси ко церковному священнослужению, обаче по пришествии лютейшаго гонения от лукавых лжесвидетелей оклеветан быв, мученическою смертию Бога прославил еси, Гаврииле, преподобномучение всеблаженне.

Богородичен: Архангельское обрадование древле услышавши, Благодатная, умоли о нас сына Твоего, да пребудет с нам милость его вовеки, и да сподобит вечнаго радования Царствия Своего со всеми избранными Божиими.

Песнь 8.

Ирмос: Седмерицею пещь, халдейский мучитель, богочестивым неистовно разжже, силою же лучшею, спасены сия видев, Творцу и Избавителю вопияше: отроцы благословите, священницы воспойте, людие превозносите во вся веки.

Радостотворным благоуханием кровей ваших, пролитых за Христа, исполнили Отечество наше, новомученицы Клинстии, телеса же ваша, купно со тысящами и тьмами безвинно убиенных, во общих рвах погребенныя, яко святыя мощи от бесов избавление и от страстей свобождение даруют нам, егда память вашу в соборе со всеми Бутовскими мученики совершаем. Сего ради Избавителю нашему поим: отроцы благословите, священницы воспойте, людие, превозносите Христа во веки.

Иныя не ведехом красоты и доброты, еже токмо жити нам о Господе вкупе, – плакашася сестры обители Акатовския, изгоняемыя и преследуемыя. Прощай же, драгая обителе, отныне не услышиши зде гласа нашего: отроцы благословите, священницы воспойте, людие, превозносите Христа во веки.

Николиже тако бысть в земли Российстей, обаче грех ради наших претерпим вся, вне стен спасительных якоже внутрь суща, прейдем служение наше Господеви, за люди Его умоляюща, – реша святыя инокини и послушницы, – и да воскликнем во отвержении нашем: отроцы благословите, священницы воспойте, людие, превозносите Христа во веки.

Богородичен: О Тебе возрадовашася, Благодатная, инокини и послушницы, обители Александро-Невския иже во Акатове лишенные, но Тобою не оставленныя и хранимыя, от них Екатерину, Анастасию и Александру избранных венцем преподобномучениц увенчала еси, всегда хваливших, благословлявших и поклонявшихся Господеви, и ныне поющих и присно превозносящих Его во веки веков.

Ин.

От юности твоея в дому Божииизволил еси приметатисямучениче Андрее Воздвиженский, чтением церковным яко хлебом насыщаяся и пением божественных служб яко вином наслаждаяся. Хором церковным умело руководствуя, своея жизни поприще десною стезею шествовал еси, от трудов крестьянских питаяся и Бога благодаря в простоте сердца. Ненавистниками всякия правды и тьмодержителями века сего осужденный и безвинно убиенный, заповедь блаженства Евангельскаго исполнил еси.

Благолепию службы Божественней и благостоянию святаго храма Божия посвятил еси жизнь свою, наипаче стоянию в правде, блаженне мучениче Андрее. Вверженный же в пещь искушений смертных новаго Вавилона, вся до конца претерпел еси, дóндеже удостоился орошения благодатию Духа во Царствии возлюбленнаго тобою Христа, Емуже пения небесныя с ангельскими вои присно воспеваеши.

Новомученицы святи, не всуе прешел путь тернисиый вашего служения землю Клинскую, но в ней ли, вне ли ея скончали славное свое течение, во веки память ваша здесь совершается и чадами церковными чтится и прославляется.

Богородичен: Богородице и Мати Живота! Призри на немощь нашу, и нищету духовную, и укрепи к правому хождению в заповедех Христовых спасительных, и отврати от лукаваго последования путей погибельных.

Песнь 9.

Ирмос: Ужасеся о сем Небо, и земли удивишася концы, яко Бог явися человеком плотски, и чрево Твое бысть пространнейшее небес: тем Тя Богородицу, ангелов и человек чиноначалия величают.

Святии края Клинскаго, новии мученицы Христовы, ни смерть, ни живот, ни ангели, ни ина кая тварь не разлучиша вы от любве Божия. Такожде ни настоящая, ни грядущая, ни высота, ни глубина да не разлучат нас от любве вашея и заступничества пред Господем, вас бо присно величаем.

Ин мир ожидает нас, жительство уготованное избранным на небеси, идеже вы, святии новомученицы, в незаходимем свете пребываете. Умолите за ны Господа удостоитися части блаженнаго Царствия Его, да тамо ходатаев наших безмездных присно величаем.

Моления и молитвы многи на земли творили есте, богоноснии мученицы, во стяжание крепости душ ваших ко безбоязненному исповеданию веры Христовой. И ныне на небеси умолите Всемилостиваго Создателя всяческих, сподобити и нас доброты оныя душевныя и веры спасительныя сердечныя, да купно с вами присно Его величаем.

Богородичен: О, Преславная Мати, Богоневесто Владычице! Не отрини грешных молений наших, но предстательством святых мучеников края Клинскаго приими их милостивно и принеси Сыну Твоему и Богу во спасение наше, да Тя, Богородицу, мы, недостойнии, присно величаем.

Ин.

Вас, святи священномученицы, пастырие Клинстии, Петре, Алексие, Иоанне, Георгие, Алексие, Василие, Алексие, Сергие и Петре, ныне прославляем, воспоминая труды и страдания ваша, и молим вас,непрестанно молитеся о нас, чадех ваших, да пребудем в вере спасительней, да исполнимся надежды несумненныя, и да достигнем любви истинныя, и да сподобимся внити в вечное Царствие Христово.

Вас, святи преподобномученицы Серафиме и Гаврииле, купно со Акатовскими преподобномученицами Александрою, Анастасиею и Екатериною, ныне ублажаем, и тя, мучениче Христов Андрее, купно со онеми величаем радосто, и молимся вам: испросите нам от Господа дар истиннаго покаяния, смирения, терпения, Богу и ближним неленостнаго служния, чистоты и целомудрия, благодарнаго скорбей пренесения и всех добродетелей чистаго исполнения. Наипаче научите нас молитве внимательней и сердечней, да вашим стопам последуя, сподобимся десную часть спасаемых улучити.

Святи новомученицы Клинстии, ведомии и неведомии, прославлении и Промыслом Божиим доныне сокровеннии! Не отлучайтеся от нас, чад ваших, но яко имущии велие дерзновение ко Господу, умолите избавитися нам от безумнаго служения пагубным страстем, исправити стопы наша к хождению во спасительных заповедях Евангельских, и помиловати нас, недостойных рабов Его.

Богородичен: О, Воеводо Возбранная! О, Сладчайшая Мати и всея вселенныя упование! Услыши моление наше, от недостойных уст Тебе приносимое, и умоли Сына Твоего, непостижимом Советом Божиим воплотившагося от Тебе нашего ради спасения, да Ему Единому ведомыми путями приведет нас к покаянному исправлению жизни нашея и спасет души наша, молитвами святых новомучеников Клинских и Твоим всесильным предстательством.

Светилен, глас 8:

Светолития Божественнаго таинницы, сосуды избраннии благодати, соборную вашу память ныне празднующе, молимся усердно о еже просветитися сердцам нашим светом познания Божия – сия бо есть жизнь вечная, страдании вашими улученная.

На хвалитех стихиры, праздника – 3 , и новомученикам – 3, гл. 8,

подобен «О преславнаго чудесе»:

О преславнаго чудесе! / Новомученицы Клинстии / песнопеньми всехвальными / прославляют днесь Отца Небеснаго / и молят Вседержителя / о земном отечестве своем, / во еже утвердити в нем Церковь Православную, / разширити ю, умножити, умирити, / и непреобориму адовы враты сохранити / до скончания века, // и помиловати души наша.

О преславнаго чудесе! / Собезначальное Слово Отчее, / Божий Сын Единородный, / днесь милостивно приемлет новомучеников Клинских молитву: / о, Иисусе Пречудный, / славословим Твое безмерное благоутробие, / пощади и помилуй град сей, / и люди Твоя в нем и окрест сущия, / приведи их к покаянию / и богоугодному жительству, // и души их спаси и помилуй.

О преславнаго чудесе! / Новомученицы Клинстии / молят Царя Небеснаго Утешителя, / везде сущаго и вся исполняющаго: / о вожделеннейший Душе Истины, / прииди к людем заблуждающим земли нашея, / и очисти их от всякия скверны, / благодатию Твоею просвети сердца их, / во еже знати Единаго Истиннаго Бога / и посланнаго Им Иисуса Христа, // и спаси, Блаже, души их.

Слава, гл. 6.

Да отверзется дверь небесная днесь, / во еже умно узрети преславное: / новомученицы Клинстии / прославляются вои небесными, / и предстояще престолу Владычню, / воздевают честныя своя руки, / умоляюще всеблагаго Господа, / освятити благостию Своею души наша // и помиловати нас.

И ныне, праздника.

На Литургии

Блаженна праздника на 4, и новомучеников, от втораго канона Песнь 9., на 4.

Прокимен, Апостол, Аллилуарий, Евангелие, Причастен – дне и новомучеников (см. службу Собору новомучеников и исповедников Российских).

На ма́лей вече́рни

На Го́споди воззва́х ста́вим стихо́в 6 и пое́м стихи́ры, глас 1.

Подо́бен: Небе́сных чино́в:

Ди́вное сопряже́ние по́стников Христо́вых, зве́зды всесве́тлыя преподо́бных доброде́телей, вели́каго Варсоно́фия в пе́снех свяще́нных восхва́лим со Иоа́нном, благода́ть от него́ проро́ческую прия́вшим Ду́хом боже́ственным.

Светоза́рнейший све́щник боже́ственнаго по́двига, с небесе́ стяжа́вый благода́ть бога́тную, ве́лий Варсоно́фий мона́шеския ли́ки увеща́ет лу́чшим ревнова́ти сло́вом су́щественным: прииди́те у́бо вси притеце́м.

Паракли́та прия́телище чисте́йшее, проро́чески ви́дяй и я́сно провещава́яй всем нам хотя́щая бы́ти, свои́ми бра́нями Иоа́нн преподо́бный к жи́зни наставля́ет небе́сней.

Яко а́нгельскаго подо́бник жития́ све́тлостию, о́браз и столп и подо́бие Бо́жие вои́стинну, всеблаже́нне Варсоно́фие, Иоа́нна преподо́бнаго, яко ученика́ боже́ственнаго, име́л еси: те́мже вас согла́сно ублажа́ем.

Слава, глас 4.

По́стническими боре́нии в му́дрости всю веще́ственную тяготу́ отри́нувше, невеще́ственныя благода́ти вмести́лища бы́сте, преподо́бнии отцы́, па́че естества́ бо пожи́сте, и пачеесте́ственно просла́вистеся неоску́дным дая́нием Уте́шителя: оба́че, о Варсоно́фие и Иоа́нне, а́нгелом равноче́стнии и преподо́бных нача́тки , с ни́ми моли́те о душа́х на́ших

И ны́не, Богоро́дичен:

Днесь Свяще́нная Ма́ти, и святи́лища вы́шши, во святи́лище прии́де, я́вльшая ми́ру Законода́вца, и зако́на Творца́, Его́же на ру́ки прие́м ста́рец Симео̂н, ра́дуяся взыва́ше: ны́́не отпуща́еши раба́ Твоего́, яко ви́дех Тя, Спа́са душ на́ших.

На стиховне, глас 2.

Подо́бен: Доме Евфрафов:

Ра́дуйся, по́стников дво́ице свята́я, со Варсоно́фием боже́ственный Иоа́нне, Тро́ицы служи́телие.

Стих: Восхва́лятся преподо́бнии во сла́ве и возра́дуются на ло́жах свои́х.

Уста́ вои́стинну Бо́жии проро́чески яви́лся еси, неоску́дно источа́я уче́ние боже́ственное, всеблаже́нне Варсоно́фие.

Стих: Воспо́йте Го́сподеви песнь но́ву, хвале́ние Его в Це́ркви преподо́бных.

Таи́нник богови́дный Варсоно́фия яви́лся еси, богому́дре Иоа́нне, и мона́шествующих о́браз де́лом и сло́вом, преподо́бне.

Сла́ва, Тро́ичен:

Осия́ние от Тебе́, Трисо́лнечное Божество́, дво́ица преподо́бных све́тло восприя́вши, свети́льницы ми́ру яви́шася.

И ны́не, Богоро́дичен:

Еди́на Бо́га неизрече́нно ро́ждшая, чи́стая Девома́ти, Ада́ма кля́тву разруши́ла еси рождество́м Твои́м.

Ны́не отпуща́еши, Трисвято́е.

Тропа́рь, глас 5.

Подо́бен: Собезнача́льное сло́во.

Равноа́нгельное житие́ пожи́вше, Варсоно́фие о́тче со Иоа́нном вку́пе, по́стничества све́тлые зве́зды яви́стеся и мона́хом наста́вницы на лу́чшую стезю́, яко испо́лнени све́та боже́ственнаго, моля́ще непреста́нно поми́ловатися душа́м на́шим.

Сла́ва и ны́не пра́здника, глас 1.

Ра́дуйся, благода́тная Богоро́дице Де́во из Тебе́ бо возсия́ Со́лнце Пра́вды – Христо́с, Бог наш, просвеща́яй су́щия во тьме. Весели́ся и ты, ста́рче пра́ведный, прие́мый во объя́тия Свободи́теля душ на́ших, да́рующаго нам воскресе́ние.

Отпу́ст.

На вели́цей вече́рни

Благослови́вшу иере́ю, входно́е и Блаже́н муж.

На Го́споди воззва́х ста́вим стихо́в 6 и пое́м стихи́ры, глас 2.

Подо́бен: Ки́ими похва́льными венцы́:

Ки́ими похва́льными венцы́ увязе́м богоно́сныя? Два в телесе́х су́щия и еди́ным мудрова́нием просия́вшия в равноа́нгельнем жи́тельстве, вели́каго Варсоно́фия богоглаго́ливаго, с ни́мже и Иоа́нна богоприя́тнаго, во пло́ти безпло́тныя и бога́тством боже́ственных дарова́ний препросла́вленныя, всем прося́щия у Христа́ ве́лию ми́лость.

Ки́ими пе́сненными пе́ньми воссла́вим богоно́сныя? Варсоно́фия богови́днаго и Иоа́нна преподо́бнаго? Паракли́та свещено́сныя, о́ва яко во уче́ниих исто́чника богото́чнаго, о́ва же во проро́честве уста́ богодохнове́нная, жития́ свята́го о́трасли цвету́щия, плодонося́ще доброде́телей боже́ственных гре́зны на весе́лие душа́м на́шим.

Ки́ими сладкозву́чными пе́сньми восхва́лим богоно́сныя? Наставля́ющия ны словесы́ богому́дрыми и де́лы ко преспе́янию спаси́тельному, пло́ти и ми́ра кроме́ жи́тельствовавшия и боже́ственнаго осия́ния испо́лньшияся от исто́чника Трисве́тлаго, со Варсоно́фием Иоа́нна чу́днаго, боже́ственныя служи́тели Спа́са душ на́ших.

Стихи́ры и́ны, глас 6.

Подо́бен: Все отло́жше:

Весь богодохнове́н и богоно́сен яви́лся еси, о́тче Варсоно́фие, себе́ сама́го Творцу́ возложи́вый и мно́гих боже́ственных дарова́ний прича́стник быв, плотско́е мудрова́ние умертви́вый и яко а́нгел пожи́вый в ми́ре, блаже́нне: отону́ду мона́шествующих собо́ри тя, наста́вника богому́драго жития́ вы́шшаго стяжа́вше и о́браз непреле́стный, по до́лгу пра́зднуют святу́ю па́мять твою́.

И́менем свои́м изобрази́л еси благода́ть, е́юже обогати́лся еси, жития́ преподо́бием просвеща́ем, боже́ственных бо доброде́телей Варсоно́фия подо́бник яви́лся еси богоприя́тный и таи́нник богодохнове́нный, с ним купножи́тельствовав, блаже́нне, с ни́мже и подвиза́лся еси, о́тче, по́двигом красне́йшим: и ны́не оба, в ра́дости наслажда́ющеся сла́вы несконча́емыя, нам испроси́те, мо́лимся, просвеще́ния небе́снаго.

Сосу́ди драгоце́ннии боже́ственнаго разуме́ния и язы́цы богому́дрии боже́ственных снисхождений показа́стеся, по́стником утвержде́ние, мона́шествующим свети́льницы, смиренному́дрия сокро́вища и разсужде́ния свети́ла неле́стная и незаходи́мая, всеблаже́нне Варсоно́фие со Иоа́нном блаже́нным: те́мже чту́щия ваш светоно́сный пра́здник просвеще́ния сподо́бите Свята́го Ду́ха.

Сла́ва, глас 6.

Днесь яко двусве́тлии свети́льницы возсия́ша во святу́ю па́мять их Варсоно́фий и Иоа́нн, богоно́снии отцы́: трисо́лнечнаго бо све́та доброде́тельнаго ра́ди жи́тельства заря́ми обогати́вшеся, та́инственно озаря́ют им вопию́щия: ра́дуйтеся, а́нгелски в ми́ре пожи́вшии, и равноа́нгельныя че́сти и сла́вы све́тло сподо́бившиися: ра́дуйтеся, мона́шествующих наста́вницы ко мно́гому преспе́янию и путевожди́ спаси́тельнии со мно́гим разсужде́нием: ра́дуйтеся, жи́зни гряду́щия достоя́ние в нача́тке яви́вшии, ея́же ра́ди нас воздви́гните к ре́вности боже́ственней: но о, отцы́ преподо́бнии, Пресвяте́й Тро́ице моли́теся поми́ловатися душа́м на́шим.

И ны́не, пра́здника:

Да отверзе́тся дверь небе́сная днесь: безнача́льное бо Сло́во О́тчее, нача́ло прии́м под ле́ты, не отсту́пль Своего́ Божества́, от Де́вы яко Младе́нец четыредесятодне́вен, Ма́терию во́льне прино́сится в це́рковь зако́нную: и Сего́ на ру́ки прие́млет ста́рец, отпусти́, зовы́й, раба́, Влады́ко, яко ви́деста о́чи мои́ спасе́ние Твое́: прише́дый в мир спасти́ род челове́чь, Го́споди, Сла́ва Тебе́.

Вход. Све́те ти́хий. Проки́мен дне. Чте́ния три.

Прему́дрости Соломо́новы чте́ние. (3:1)

Пра́ведных ду́ши в руце́ Бо́жией, и не прико́снется их му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д их, и еже от нас ше́ствие сокруше́ние: они же суть в ми́ре. Ибо пред лице́м челове́ческим аще и му́ку прии́мут, упова́ние их безсме́ртия испо́лнено: и вма́ле нака́зани бы́вше, вели́кими благоде́тельствовани бу́дут, яко Бог искуси́ их и обре́те их досто́йны себе́: яко зла́то в горни́ле искуси́ их, и яко всепло́дие же́ртвенное прия́т я. И во вре́мя посеще́ния их возсия́ют, и яко и́скры по сте́блию потеку́т: су́дят язы́ком и облада́ют людьми́, и воцари́тся Госпо́дь в них во ве́ки. Наде́ющиися Нань разуме́ют и́стину, и ве́рнии в любви́ пребу́дут Ему, яко благода́ть и ми́лость в преподо́бных Его и посеще́ние во избра́нных Его.

Прему́дрости Соломо́новы чте́ние (7:7):

Пра́ведник, аще пости́гнет сконча́тися, в поко́и бу́дет. Ста́рость бо честна́ не многоле́тна, ниже́ в числе́ лет исчита́ется. Седи́на же есть му́дрость челове́ком, и во́зраст ста́рости – житие́ нескве́рное. Благоуго́ден Бо́гови быв, возлю́блен бысть, и живы́й посреде́ гре́шник, преста́влен бысть. Восхище́н бысть, да не зло́ба изме́нит ра́зума его или лесть прельсти́т ду́шу его. Раче́ние бо зло́бы помрача́ет до́брая и паре́ние по́хоти пременя́ет ум незло́бив. Сконча́вся вма́ле, испо́лни ле́та до́лга, уго́дна бо бе Го́сподеви душа́ его, сего́ ра́ди потща́ся от среды́ лука́вствия. Лю́дие же ви́девше, и не разуме́вше, ниже́ поло́жше в помышле́нии таково́е, яко благода́ть и ми́лость в преподо́бных Его и посеще́ние во избра́нных Его.

Прему́дрости Соломо́новы чте́ние (5:15):

Пра́ведницы во ве́ки живу́т, и в Го́споде мзда их, и попече́ние их у Вы́шняго. Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни, зане́ десни́цею покры́ет я и мы́шцею защити́т их. Прии́мет всеору́жие рве́ние свое́ и вооружи́т тварь в месть враго́м. Облече́тся в броня́ пра́вды и возложи́т шлем – суд нелицеме́рен. Прии́мет щит непобеди́мый – преподо́бие, поостри́т же напра́сный гнев во ору́жие, спобо́рет же с ним мир на безу́мныя. По́йдут праволу́чныя стре́лы мо́лниины и, яко от благокру́гла лу́ка облако́в, на наме́рение полетя́т. И, от каменоме́тныя я́рости испо́лнь, паду́т гра́ды. Вознегоду́ет на них вода́ морска́я, ре́ки же потопя́т я на́гло. Сопроти́в ста́нет им дух си́лы, и яко ви́хор разве́ет их, и опустоши́т всю зе́млю си́льных. Слы́шите убо, ца́рие, и разуме̂йте, навы́кните, судии́ конце́в земли́. Внуши́те, держа́щии мно́жества и гордя́щиися о наро́дех язы́к. яко дана́ есть от Го́спода держа́ва вам и си́ла от Вы́шняго.

На лити́и стихи́ры самогла́сны, глас 1.

Узы мирски́я отве́ргше, Христу́ присво́истеся по́стническим жи́тельством, отцы́́ преподо́бнии, и единому́дрени су́ще во всех, и ра́вных трудо́в ревни́телие и де́лателие, ра́вныя благода́́ти сподо́бистеся, равноче́стно просла́вившеся. Бога́тным бо обои́́м благода́́ть даде́ся достоя́нием боже́ственныя любве́: но о, Варсоно́фие богому́дре и Иоа́нне богонра́вне, в сою́зе любве́ и нас сохрани́те, прося́ще нам ве́лию ми́лость.

Глас 2.

От Еги́пта, яко звезда́ всесве́тлая, Варсоно́фие о́тче, возше́л еси и в Палести́не просия́л еси чи́стым жи́тельством твои́м, всех озаря́я све́тлостию Сло́ва, и богому́дрыя удивляя́ неоску́дным в тебе́ боже́ственным дарова́нием: сокро́вище бо духо́вное стяжа́л еси, преподо́бне, и мона́хом му́дрый наста́вник, яко во всех де́телен: отону́ду жития́ твоего́ обре́л еси Иоа́нна преподо́бнаго подо́бника боже́ственнаго и о́бщника благода́ти: с ни́мже всегда́ моли́ся о душа́х на́ших.

Глас 3.

Преподо́бных оте́ц богови́дное сопряже́ние, Варсоно́фия, вели́каго ста́рца и Иоа́нна, ста́рца друга́го согла́сно почти́м: по́стническим бо житие́м а́нгели во пло́ти яви́шася, яко возвы́шени ду́хом и боготворя́щаго да́ра бога́тно сподо́бишася: ов бо сло́вом благода́ти апо́стольскую явля́ет власть, ов же прови́дческим зре́нием предзри́т гряду́щая, яко проро́к боже́ственный: и оба, чудотворя́ще о Христе́, мо́лятся о душа́х на́ших.

Глас 4.

Яко стра́ннии и прише́льцы в ми́ре показа́стеся, ева́нгельски себе́ саме́х отве́ргшеся, отцы́ преподо́бнии, и очище́нием соверше́нным и молча́нием и безмо́лвием, та́инственных зре́ний и неизрече́нных та́ин вои́стинну сподо́бистеся, во мрак бо невхо́дный вше́дше в Ду́се, Бо́гу сраствори́стеся, чудоде́йственне обожи́вшеся, и боже́ственныя сла́вы зна́мения всем яви́вше, свет во тьме яви́стеся и заблу́ждшим путевожди́ ко спасе́нию: но о, Варсоно́фие и Иоа́нне, неприкрове́нно зря́ще, и́хже о́бразы пре́жде стяжа́сте, моли́теся и нам улучи́ти блаже́нства Бо́жия.

Сла́ва, глас то́йже:

А́нгельски пожи́вше, по́стническаго жи́тельства провозве́стницы и яви́телие показа́стеся, отцы́ богоно́снии: яко бо де́лавше до́бре, му́дро у́чите, спаси́тельная иму́ще во и́стиннем разсужде́нии и во све́те благода́ти, Варсоно́фие преподо́бне со Иоа́нном, прося́щии всем просвеще́ния и прегреше́ний оставле́ния.

И ны́не. Пра́здника.

Зижди́тель небесе́ и земли́ на рука́х ноша́шеся, святы́м Симео́ном ста́рцем днесь: той бо Ду́хом Святы́м глаго́лаше: ны́не свободи́хся, ви́дех бо Спа́са моего́.

На стихо́вне стихи́ры, глас 5. Ра́дуйся, по́стников.

Ра́дуйся, преподо́бных дво́ице, доброде́телей чи́стая вмести́лища, зве́зды световодя́щия, безстра́стия свяще́ние и жития́ боже́ственнаго све́тлосте, му́дре Варсоно́фие, по́стников нача́ток, и Иоа́нне, проро́чества испо́лнь Боже́ственнаго Ду́ха, гу́сли благозву́чныя, свети́льницы разсужде́ния, прему́дрости сокро́вища, по́стническаго жи́тельства богоно́снии учи́телие, Христа́ моли́те дарова́ти душа́м на́шим ве́лию ми́лость.

Восхва́лятся преподо́бнии во сла́ве и возра́дуются на ло́жах свои́х.

Ра́дуйся, преподо́бных дво́ице, а́нгелом подража́телие и единонра́внии, в ми́ре пожи́вшии душе́ю богоприя́тною, в созву́чии боже́ственных восхожде́ний, в по́стничестве ра́внии и житие́м равностоя́телие, небе́сных озаре́ний испо́лнени, яко очи́стивше ду́шу и помышле́ние, преподо́бне Варсоно́фие, Христо́в дру́же и́скренний и Иоа́нне богому́дрый, таи́нниче благода́ти святы́й, всегда́ моли́те душа́м на́шим дарова́ти ве́лию ми́лость.

Стих: Воспо́йте Го́споду пе́снь но́ву, хвале́ние Его в це́ркви преподо́бных.

Ра́дуйся, преподо́бных дво́ице, наста́вницы мона́хов де́тельнейшии, иже всем во изве́стве и му́дрем по Бо́зе ра́зуме жития́ боже́ственный о́браз изъясни́вшии, нрав боже́ственный и преспе́яние вся́кое, и́мже душа́ восхо́дит на лу́чшая, и пре́лести явле́ние отвраща́ется: преподо́бне Варсоно́фие, отце́в украше́ние и Иоа́нне всеблаже́нне, мона́хов пра́вило, Христа́ моли́те дарова́ти душа́м на́шим ве́лию ми́лость.

Сла́ва, Глас 8.

Кто досто́йно воспое́т в по́стничестве жи́тельство ва́ше и бога́тство ва́ших дарова́ний, Варсоно́фие и Иоа́нне блаже́ннии, яко бо а́нгели на земли́ с пло́тию яви́стеся, умертви́вше яже суть веще́ственная со страстьми́ и похотьми́, и животворя́щим де́йствованием возде́лавше цве́ты, благоуха́ние источа́ете нетле́ния душа́м на́шим: и ны́не со а́нгелы спребыва́юще, моли́те дарова́ти нам ве́лию ми́лость.

И ны́не. Пра́здника.

Иже на Херуви́мех носи́мый и пева́емый от Серафи́м, днесь в Боже́ственное святи́лище по зако́ну приноси́м, на ста́рческих яко на престо́ле седи́т рука́х и от Ио́сифа прие́млет да́ры боголе́пно, яко супру́г го́рличищ, нескве́рную Це́рковь и от язы́к новоизбра́нныя лю́ди, голуби́на же два птенца́, яко Нача́льник Ве́тхаго же и Но́ваго. Еже к Нему́ обеща́ния Симео́н коне́ц прие́м, благословя́ Де́ву Мари́ю Богоро́дицу, страсте́й о́бразы иже из Нея́ провозгласи́ и от Него́ проша́ше отпуще́ния, вопия́: ны́́не отпусти́ мя, Влады́ко, я́коже пре́жде возвести́ ми, яко ви́дех Тя, Первове́чнаго Све́та и Спа́са Го́спода христоимени́тым лю́дем.

Ны́не отпуща́еши, Трисвято́е.

Тропа́рь, глас 5. Собезнача́льное Сло́во.

Равноа́нгельное житие́ пожи́вше, Варсоно́фие о́тче со Иоа́нном вку́пе, по́стничества зве́зды све́тлыя яви́стеся и мона́хом путевожди́ на лу́чшую стезю́, яко све́та боже́ственнаго испо́лнени, моля́ще непреста́нно спасти́ся душа́м на́шим.

Сла́ва, и ны́не: Пра́здника, глас 1.

Ра́дуйся, благода́тная Богоро́дице Де́во, из Нея́же возсия́ со́лнце пра́вды Христо́с Бог наш, просвеща́яй су́щия во тьме: весели́ся и ты, ста́рче пра́ведный, прие́мый во объя́тия свободи́теля душ на́ших, да́рующаго нам воскресе́ние.

Отпуст.

На у́трени

По 1 стихосло́вии седа́лен, глас 1.

Подо́бен: Гроб Твой, Спа́се:

Яко две у́мныя зве́зды небосве́тлыя возсиява́ете нам та́инственная светозаре́ния, богому́дре Варсоно́фие, и Иоа́нне преподо́бне, и облиста́ете трисо́лнечнаго свети́ла свет незаходи́мый све́тлую ва́шу па́мять ра́достно соверша́ющим.

Сла́ва и ны́не, Богоро́дичен:

Во объя́тиих Симео́них носи́тися изво́лил еси, иже всех Творе́ц, во́лею младе́нствовав, и нося́й тя ра́довашеся ста́рец и вопия́ше: ны́не отпуща́еши раба́ Твоего́, ще́дре, яко ви́дех Тя, воплоти́вшагося непрело́жно в назда́ние ми́ра.

По 2 стихосло́вии седа́лен, глас 3.

Подо́бен: Боже́ственныя ве́ры:

Ве́лий яви́лся еси в по́двизе и сла́вный де́лом и сло́вом, Варсоно́фие, отце́в украше́ние, и проро́чества пря́л еси дарова́ние, о Иоа́нне, помышле́ние очи́стив: но моли́те, отцы́ боголаже́ннии, дарова́ти нам ве́лию ми́лость.

Сла́ва и ны́не, Богоро́дичен:

Ра́дуяся, во объя́тия прия́т, яко младе́нца, всех Зижди́теля, Симео́н яко жда́ше со стра́хом: и Анна богоглаго́ливая принесе́ испове́дание Тому́ и хвалу́: и́хже моли́твами, Ще́дре, низпосли́ нам то́ки ми́лости Твоея́, яко благоутро́бен.

По полиеле́и седа́лен, глас 4.

Подо́бен: Вознесы́йся на крест:

Богоно́сных оте́ц сопряже́ние, Варсоно́фий, служи́тель Христо́в, и Иоа́нн, тому́ единоду́шен, всем предлага́ют честны́я книги своея́ словеса́ , яко сла́дость небе́сную и жи́зни боже́ственную ма́нну: да насы́тимся вси от нея, яко да страсте́й го́речь изве́ргнем.

Сла́ва, и ны́не, Богоро́дичен:

Иже в зако́не и проро́цех глаго́лавый зако́нным веле́нием во́льно подклоня́ется и ко хра́му прино́сится, яко младе́нец, Его́же Симео́н во объя́тиих объе́млет, и разреше́ние плотско́е от Него́ прия́т. О, покланя́ющеся ве́рно, рцем, сла́ва бла́гости Твое́й, Ще́дре.

Таже степе́нна, 1 антифо́н 4-го гла́са.

Проки́мен: Восхва́лятся преподо́бнии во сла́ве и возра́дуются на ло́жах свои́х.

Стих: Воспо́йте Го́сподеви песнь но́ву, хвала́ Его пребыва́ет во ве́ки .

Ева́нгелие преподо́бническое.

50 псало́м.

Сла́ва: Моли́твами преподо́бных:

И ны́не: Моли́твами Богоро́дицы:

Стихи́ра самогла́сна, глас 6.

Стих: Поми́луй мя, Бо́же:

Яже в ми́ре кра́сным умертви́вшеся, все́ю душе́ю Живода́вцу Сло́ву после́довасте, отцы́ всеблаже́ннии, и жи́зни яже в Нем блага́я сокро́виществовавше, ко прича́стию тем сердца́ на́ша обраща́ете, Ду́хом Святы́м провеща́юще уче́ний боже́ственныя глаго́лы: в ни́хже, мо́лимся, сердца́ на́ша утверди́те, Варсоно́фие и Иоа́нне, яко да жи́зни ве́чныя улучи́м.

Та́же кано́ны пра́здника и преподо́бных.

Кано́н Сре́тения, его́же краегране́сие: Христа́ ра́достне ста́рец объе́млет. Творе́ние Космы́ мона́ха.

И преподо́бных, Его́же краегране́сие: Варсоно́фию и Иоа́нну хвала́. Гера́сима.

Песнь 1.

Пра́здника: Ирмо́с: Су́шу глубороди́тельную:

Преподо́бных: Глас 8.

Ирмо́с: Колесницегони́теля фарао́на погрузи́, чудотворя́й иногда́ Моисе́йский жезл, крестообра́зно порази́в и раздели́в мо́ре: Исра́иля же беглеца́ пешехо́дца спасе́, песнь Бо́гови воспева́юща.

Варсоно́фия преподо́бнаго, Го́споди, и Иоа́нна моли́твами, Тя просла́вльших жития́ чистото́ю, ум мой световоди́ и пода́ждь ми сло́во, Сло́ве Бо́жий преблаги́й, воспе́ти их по́двиги.

Возложи́выйся всеце́ло, блаже́нне, всеви́дцу Бо́гу и боже́ственною Того́ любо́вию уя́звлен, Тому́ после́довал еси несумне́нным се́рдцем по́стническими по́двиги, о́тче свяще́нне Варсоно́фие.

Си́лою боже́ственною держа́вно укрепля́ем, совле́клся еси тве́рдо, о́тче Иоа́нне, на по́двиги по́стническия и боре́ния, и те́ми потреби́л еси, смири́вый ся о Го́споде, о́ко врага́ вы́сящееся.

Богоро́дичен: Вопло́щшагося от чи́стых крове́й Твои́х, пре́жде безпло́тнаго, богонача́льное Сло́во О́тчее и сопресто́льное неизрече́нно родила́ еси, Богоро́дице Де́во, сугу́ба естество́м су́щаго, еди́ну же ипоста́сь нося́щаго.

Песнь 3.

Пра́здника: Ирмо́с: Утверждение на Тя надеющихся:

Преподо́бных:

Ирмо́с: Утвержде́й в нача́ле небеса́ ра́зумом, и зе́млю на вода́х основа́вый, на ка́мени мя, Христе́, за́поведей Твои́х утверди́, яко несть свят паче Тебе́, Еди́не Человеколю́бче.

Невозвра́тным по́мыслом Еги́пет оста́вив, зе́млю, возрасти́вшую тя, прему́дро, Варсоно́фие му́дре, в Палести́ну прите́кл еси, к го́рнему Сио́ну по́стнически ускоря́я , преподо́бне.

Зако́ном Бо́жиим покоря́яся, вся́кое попече́ние о яже в ми́ре веща́х, Иоа́нне, отри́нул еси, и безмо́лвно Христу́ рабо́тати прише́д, от вся́каго соводворе́ния с челове́ки удали́лся еси.

Иже преподо́бных доброде́телей тайново́дцы и наста́вницы и му́дрии мона́хом путевожди́, да восхва́лятся вку́пе ве́лий Варсоно́фий и Иоа́нн а́бие, тому таи́нник и совсельник.

Богоро́дичен:

Пачеесте́ственно Творца́ и Царя́ всех восприи́мшая и ро́ждшая Де́во, кля́тву Ада́мову в коне́ц потреби́ла еси и благослове́ние всем и нетле́ние источи́ла еси.

Седа́лен, глас 4. Ско́ро предвари́:

Житие́м единосе́льницы, в согла́сии душе́внем, му́дре Варсоно́фие и Иоа́нне сла́вне, всем общницы бывше, яви́стеся мона́шествующим небосве́тлии столпи́, наставля́юще их на зе́млю кро́тких: сего́ ра́ди ва́шу па́мять све́тло пра́зднуем.

Сла́ва и ны́не, Богоро́дичен:

Ко хра́му принесе́ся от Де́вы Ма́тери яко младе́нец Госпо́дь, Зако́н да́вый Моисе́ови, обновля́яй челове́ка: его́же во объя́тиих Симео́н яко прия́т, ма́нию Того́ ра́дуяся, пло́тию разреши́ся и потече́ су́щим во аде разреше́ния провозве́стник.

Песнь 4.

Пра́здника: Ирмо́с: Покры небеса доброде́тель Твоя, Христе:

Преподо́бных:

Ирмо́с: Ты моя кре́пость, Го́споди, Ты моя и си́ла, Ты мой Бог, Ты мое ра́дование, не оста́вль не́дра О́тча, и на́шу нищету́ посети́в: тем с проро́ком Авваку́мом зову́ Ти: си́ле Твое́й Сла́ва, Человеколю́бче.

Стра́хом Бо́жиим от младе́нства утвержда́ем , подчини́лся еси Марке́ллу, преподо́бне, и покори́л еси пло́ти все удобострастие душевною чистотою: отону́ду Велиа́ра сокруши́л еси си́лу, Варсоно́фие, ору́жием ве́ры.

Жития́ ме́ру душе́вною теплото́ю сверши́л еси Иоа́нне ста́рче, ра́вную вели́кому Варсоно́фию свяще́нному. Те́мже други́й ста́рец му́дрый во всех яви́лся еси и наста́вник по Бо́зе, вдохнове́нием боже́ственным провозвеща́я яве хотя́щая бы́ти.

О да́нныя вам благода́ти бога́тныя! Изве́ством жи́тельства, преподо́бнии: чудеса́ источа́ете бо ве́рным и исполня́ете всех спаси́тельная проше́ния, яко проро́цы Бо́жии, Варсоно́фие о́тче и му́дре Иоа́нне блаже́нне.

Ми́ра всего удали́вся, Варсоно́фие, испо́лнился еси боже́ственных просвеще́ний и озаря́еши све́том уче́ний: темже мона́хов и свяще́нник собо́ры приходя́щих к тебе́, яко му́дрый наста́вник, направля́еши на стезю́ спаси́тельную.

Богоро́дичен: Без се́мене, кроме́ истле́ния, па́че помышле́ния, оба́че Бо́жиим Ду́хом зачала́ еси О́́тчее Сло́во соесте́ственное, от Твои́х крове́й плоть прия́вшее, и разреши́вшее тле́ние сме́ртное, и исто́чник нетле́ния пою́щим Тя, Отрокови́це, источи́вшее.

Песнь 5.

Ирмо́с: Яко ви́де Иса́иа:

И Преподо́бных:

Ирмо́с: Вску́ю мя отри́нул еси от лица́ Твоего́, Све́те незаходи́мый, и покры́ла мя есть чужда́я тьма окая́ннаго? Но обрати́ мя, и к све́ту за́поведей Твои́х пути́ моя напра́ви, молю́ся.

Нра́вом тих и богови́ден в житии́ быв, сло́во спасе́ния и живота́ увеща́ния источа́л еси от уст твои́х, му́дростию тебе́ да́нною, Варсоно́фие, о́тче блаже́нне.

Стопа́м преподо́бным Варсоно́фия богому́драго после́дуя, тому́, Иоа́нне, подо́бник и единонра́вен яви́лся еси. Те́мже нестаре́емаго живота́ сподо́бившеся, зрите́ добро́ту неизрече́нную.

Яко служи́тели боже́ственныя и во пло́ти а́нгелы прия́т от Бо́га по́сланныя преподо́бный Сери́д и те́плым се́рдцем вам служа́ше во всех, богоно́снии, ра́зумом ва́шим наказу́ем.

Богоро́дичен: Неискусому́жно ро́ждшая Зижди́теля всех и Го́спода, яви́лася еси превы́ше а́нгел и всея́ тва́ри, Обра́дованная, еди́на Де́во Богоро́дице, и Ада́ма па́дшаго возвы́сившая.

Песнь 6.

Ирмо́с: Возопи́ ти, ви́дя ста́рец:

Преподо́бных:

Ирмо́с: Очи́сти мя, Спа́се, мно́га бо беззако́ния моя, и из глубины́ зол возведи́, молю́ся: к Тебе́ бо возопи́х, и услы́ши мя, Бо́же спасе́ния моего́.

Умертви́вше пло́ти тле́нныя мудрова́ние, ве́чнаго живота́ де́йство боже́ственное, му́дре Варсоно́фие, со Иоа́нном возрасти́сте оби́льно.

Вода́ми та́инственными испо́лнени су́ще, преподо́бнии, прозяба́ете оби́льно уче́ния богодохнове́нная, му́дре Варсоно́фие со Иоа́нном, ду́ши на́ша напоя́ющая.

Сопряже́ние боже́ственное, мона́хом учи́тели, вели́кий в по́стницех Варсоно́фий боже́ственный и Иоа́нн, ему купножи́тель да просла́вятся в пе́снех.

Богоро́дичен: А́нгелов ра́дость и лю́дем помо́щница Ты еси, Де́во Чи́стая, Бо́га воплоти́вшая. Сего́ ра́ди мо́лим Тя, помози́ во всех прибега́ющим к покро́ву Твоему́.

Кондак пра́здника , глас 1.

Утро́бу Деви́чу освяти́вый Рождество́м Твои́м, и ру́це Симео́не благослови́вый, я́коже подоба́ше, предвари́в, и ны́не спасл еси нас, Христе́ Бо́же, но умири́ во бра́нех жи́тельство, и укрепи́ лю́ди, и́хже возлюби́л еси, Еди́не Человеколю́бче.

Кондак, глас 3.

Подо́бен: Де́ва днесь:

Дво́ица богодохнове́нная богоно́сных оте́ц доброде́телей благода́ть тайново́дствуют всем, вели́кий Варсоно́фий, ста́рец сый, други́й же Иоа́нн, преподо́бный ста́рец. Тех восхва́лим согла́сно, яко Тро́ицы боже́ственныя служи́телие.

И́кос:

От Еги́пта, му́дре Варсоно́фие, я́коже со́лнце ве́лие возсия́л еси и све́тлыми лучи́ доброде́телей твои́х ди́вных светово́диши всегда́ мона́шествующих ли́ки: в Палести́не же житие́м по́стническим, в согла́сии боже́ственных восхожде́ний, а́нгел в телеси́ и пресла́вная гусль вы́шния му́дрости яви́лся еси, и преподо́бнаго Иоа́нна обре́л еси, яко друга́го проро́ка, ди́вно просла́вльшагося проро́ческим да́ром Уте́шителевым: те́мже вас вку́пе почита́ем, яко провеща́тели доброде́тельнаго жития́ и наказа́тели преподо́бных дел и неле́стныя нам путеводи́тели и наста́вники и Тро́ицы боже́ственныя служи́тели.

Синакса́рий.

6-го сего месяца память преподобнаго Варсоно́фия Великаго старца и преподобнаго Иоа́нна, пророка именуемаго, ученика святаго Варсоно́фия:

Ихже святыми молитвами, Христе Боже, помилуй и спаси нас. Аминь.

Песнь 7.

Ирмо́с: Тебе́ во огни́ ороси́вшаго:

Преподо́бных:

Ирмо́с: Бо́жия снизхожде́ния огнь устыде́ся в Вавило́не иногда́. Сего́ ра́ди о́троцы в пещи́, ра́дованною ного́ю, яко во цве́тнице лику́юще, поя́ху: благослове́н еси Бо́же оте́ц на́ших.

Кре́пость и си́лу, и просвеще́ние же и боже́ственный ра́зум нам всем подае́т уче́ния ва́шего, блаже́ннии, сви́ток богоначерта́нный зову́щим: благослове́н Бог оте́ц на́ших.

Ума́ твоего́ зре́ние очи́стив, о Варсоно́фие, неизрече́нно зрел и созерца́л еси боже́ственная виде́ния и весь свет быв, взыва́ше: благослове́н Бог оте́ц на́ших.

Ум свой просвети́в осия́нием Паракли́та, прови́дети и проглаго́лати сподо́бился еси гряду́щая, преподо́бне, и яко проро́к богоглаго́ливый пел еси: благослове́н Бог отец на́ших.

Богоро́дичен: Пло́ти подо́бием неопи́санно, Отрокови́це, родила́ еси пребоже́ственное Сло́во, боготворя́щее нас ми́лости ра́ди: те́мже пло́ти моея́ стра́сти исцели́ и безстра́стия све́том ум мой озари́.

Песнь 8.

Ирмо́с: Нестерпи́мому огню́ соедини́вшеся:

Преподо́бных:

Ирмо́с: Седмери́цею пещь Халде́йский мучи́тель Богочести́вым неи́стовно разжже́, си́лою же лу́чшею спасе́ны сия ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся ве́ки.

Зна́нием соверше́нным, преподо́бне, и све́том Ду́ха просвеще́н, усе́рднейшим по́двигом твои́м свети́льник небосве́тлый и мона́хом учи́тель и наста́вник, о Варсоно́фие, яви́лся еси, ве́рою вопию́щим: Свяще́нницы, воспо́йте, лю́дие благослови́те во вся ве́ки.

В по́двизе единому́дрени и сла́вою равноче́стнии и чудесы́ и мно́гими дарова́нии та́кожде соприча́стницы, всеблаже́нне Варсоно́фие со Иоа́нном, яви́стеся всем, вку́пе вопию́ще: свяще́нницы благослови́те, лю́дие, превозноси́те Христа́ во ве́ки.

Кре́пость душа́м подае́те сло́вом благода́ти, немощству́ющим прило́гами змии́ными, оба́че и теле́сне стра́ждущим, блаже́нне, подае́те ско́рое вои́стинну исцеле́ние: прикоснове́нием же телесе́м ва́шим и одея́нием си́лу и благослове́ние благочести́вии обрета́ют.

Богоро́дичен: А́нгельстии чи́ни сла́ву Твою́ почита́ют и безпло́тнии ли́цы великоле́пие Твое́ велича́ют, Чи́стая, Бо́гом возвели́ченная, челове́цы же вси от Тебе́ бы́вшее ми́ру спасе́ние воспева́ют, Де́во: кля́твы убо рождество́м Твои́м Ада́ма изба́вила еси.

Песнь 9.

Велича́ния, пое́мые на пе́сни сей. Глас 3.

Непости́жно есть соверши́вшееся о тебе́ и а́нгелом и челове́ком, Матероде́во чи́стая.

Рука́ми объе́млет ста́рец Симео́н зако́на Творца́ и Влады́ку вся́ческих.

Восхоте́в Соде́тель, да спасе́т Ада́ма, в ложесна́ Твоя́ всели́ся, Де́вы чи́стыя.

Весь род челове́ческий ублажа́ет Тя, Чи́стая, и сла́вит Тя ве́рно, яко Ма́терь Бо́жию.

Прииди́те, ви́дите Христа́, Влады́ку вся́ческих, Его́же Симео́н днесь прино́сит в храм.

Призира́еши на зе́млю и твори́ши ю трясти́ся, и ка́ко ста́рец согбе́нный рука́ма объе́млет тя?

Пожи́л еси ле́та, Симео́не, до́ндеже узре́л еси Христа́, и вопия́ше к Нему́: ны́не отпуще́ния прошу́.

Клеще́ та́инственная, яже угль Христа́ нося́щая во чре́ве, ты еси, Мариа́м.

Во́лею вочелове́чился еси, пребезнача́льный Бо́же, и ко хра́му прино́сишися четыредесятодне́вен.

Соше́дша с небесе́ Влады́ку вся́ческих, прия́т Его Симео́н свяще́нник.

Просвети́ мою ду́шу, и свет чу́вственный пода́ждь, яко да ви́жду чи́сто и возвещу́ Бо́га.

Матероде́во чи́стая, что прино́сиши ко хра́му отроча́ мла́до, предава́я на ру́ки Симео́ни.

Ны́не разреше́ния прошу́ от Тебе́, Соде́телю, яко ви́дех тя, Христе́, све́те мой спаси́тельный.

Его же го́рнии служи́тели со тре́петом мо́лят, до́лу ны́не Симео́н рука́ми объе́млет .

Сла́ва: Естество́м Еди́нице, Ли́цы же Тро́ице, сохрани́ рабы́ твоя́, ве́рующия в Тя.

И ны́не: Богоро́дице, упова́ние всех христиа́н, покры́й, огради́, сохрани́ упова́ющия на Тя .

Ирмо́с: В законе сени и Писаний:

Преподо́бных:

Ирмо́с: Ужасе́ся о сем не́бо, и земли́ удиви́шася концы́, яко Бог яви́ся челове́ком пло́тски, и чре́во Твое́ бысть простра́ннейшее небе́с. Тем Тя Богоро́дицу, а́нгелов и челове́к чинонача́лия велича́ют.

Прему́дростию осиява́яй духо́вною и мно́гим разсужде́нием укра́шен, пресла́вно, о́тче Варсоно́фие свяще́нне, всем подае́ши, преподо́бне, спаси́тельная дая́ния всегда́: твоя́ бо боже́ственная словеса́, яко ма́нна душепита́тельная, ра́зум наш пита́ют.

Ти́ну пе́рстную отря́с небе́сным мудрова́нием, преподо́бне, а́нгельским пожи́л еси в ми́ре жи́тельством, и учени́к и совсе́льник Варсоно́фия свяще́ннаго был еси, Иоа́нне: С ни́мже вы́шния сла́вы улучи́л еси све́тлость.

Вели́ких сподо́бистеся воздая́ний, яко вели́кими на земли́ по́двиги мы́слию тве́рдою подвиза́чвшеся по́стнически, богому́дре Варсоно́фие со Иоа́нном благосла́вным: сего́ ра́ди вас велича́ем, изба́вите от бед и нало́га вра́жия.

Свети́льницы Восто́ка невеще́ственнаго , страсте́й мглу отгоня́ющии све́тлыми ва́шими моле́ньми к Бо́гу, о ве́лий Варсоно́фий со Иоа́нном ди́вным, ко стяжа́нию лу́чших на́ше разуме́ние стра́хом Бо́жиим воздви́гните.

Богоро́дичен: Ум мой, лука́вством до́лу па́дший, Богоро́дице, возвыше́н покажи́ любо́вию те́плою и к де́ланию доброде́телей небрегу́щее всегда́ воздви́гни се́рдце мое, молю́ся, и спаси́ мя, Де́во, от одержа́ния во мне преве́са ху́дшаго.

Свети́лен: Дво́ицу пречестну́ю по́стников почти́м, доброде́тельных трудо́в наста́вников и свети́льников, вели́каго Варсоно́фия, мона́хов предъизя́щнаго, и Иоа́нна преподо́бнаго, тому́ таи́нника до́бляго и в по́двизех сотру́дника.

И пра́здника: Во объя́тиих прия́т Симео́н пра́ведный в хра́ме Спаси́теля яко во́лею младе́нца и испове́да Бо́га и всех Го́спода, разреше́ния прося́ плотска́го, сла́вя младе́нствующее Сло́во.

На хвалитех, глас 8.

Подо́бен: О, пресла́внаго чудесе́:

О́тче му́дре Варсоно́фие, яже в ми́ре кра́сная яко преходя́щая презре́в, все стремле́ние свое к пребыва́ющим напра́вил еси и житие́ равноа́нгельное пожи́в, Паракли́та яви́лся еси сокро́вище. О, подвиго́в твои́х и па́че помышле́ния от Бо́га дарова́ний, свя́те! И́миже просла́вился еси.

О́тче Иоа́нне преподо́бне, ду́шу облагода́тивый боже́ственным по́двигом твои́м, сосу́д многоце́нен благода́ти яви́лся еси и сподо́бился еси зре́ти гряду́щая и хотя́щая сбы́тися провещава́ти. Те́мже проро́ка тя друга́го имену́ем, яко Христо́ва служи́теля боже́ственнаго и дру́га и́скренняго.

Уста́ свяще́нная стяжа́вше, по́стническаго жи́тельства провозве́стницы богому́дрии и нра́вов чистоты́ и боже́ственнаго едине́ния еже тва́ри и Лу́чшаго, души́ и Творца́, наста́вницы яви́стеся, о Варсоно́фие, мона́хов учи́телю, и свя́те Иоа́нне преподо́бне, во пло́ти а́нгели.

Дщи́цу востинну богопи́́санную, кни́гу ва́шу, му́дрии, глаго́лы живота́ иму́щу и словеса́ богодохнове́нная, стяжа́вше, святи́и, благода́ть от нея и вся́кую по́льзу всегда́ почерпа́ем, ве́рою приника́юще: Те́мже почита́ем вас, Варсоно́фие со сла́вным Иоа́нном, воспева́юще по́двиги ва́ша.

Сла́ва, глас 6.

Дво́ица преподо́бных чу́дных подо́бно звезда́м светоно́сным сия́ют вселе́нней, Варсоно́фий вели́кий и Иоа́нн богодохнове́нный: све́та бо невече́рняго облиста́ния улучи́вше, страсте́й мглу разоря́ют, де́лом и сло́вом уча́ще во све́те Госпо́дни жи́тельствовати непреле́стно тех, иже избра́ша рабо́тати Христу́ в преподо́бии и пра́вде, и мо́лятся непреста́нно о душа́х на́ших.

Вели́кое славосло́вие и отпу́ст.

Мегалина́рий.

Ра́дуйся, Варсоно́фие свяще́нне, жития́ преподо́бнаго богоно́сный наста́вниче: ра́дуйся, Иоа́нне, благода́ти вмести́лище, путевожди́ боже́ственнии на́ши и назира́телие.

Месяца февраля в 23-й день

Преподобнаго Поликарпа Брянскаго

На велицей вечерни

На Господи, воззвах: стихиры на 8, глас 5.

Подобен: Радуйся, Живоносный Кресте:

Приспе светлая память/ преподобнаго отца нашего Поликарпа,/ да празднуем убо, братие, воспевающе того,/ яко отечества нашего славу,/ земли Брянской украшение,/ иноком мудраго наставника,/ печальным милостиваго утешителя,/ болящим скораго целителя/ и всем верным теплаго молитвенника.

Преподобне отче Поликарпе,/ угодниче Христов усердный,/ ты, безмолвия взыскуя,/ от мирскаго мятежа изшел еси/ и, ангельский образ восприем,/ обитель иноком во граде Брянске основал еси./ Ныне, во обителех Небесных с лики святых водворяяся,/ моли спастися душам нашим.

Радуйся, преподобне Поликарпе,/ отче наш богомудрый,/ кротости и смирения образе,/ незлобия и терпения учителю,/ общаго иноческаго жития рачителю,/ милости источниче, оружниче Царя Небеснаго,/ Емуже молися/ отечеству нашему победы на враги даровати/ и душам нашим велию милость.

Слава, глас 8:

Преподобне отче Поликарпе,/ во всеоружие Божие облекся,/ мирови и страстем себе умертвил еси/ и, трудолюбне подвизаяся,/ иноков множество ко Христу привел еси,/ егоже моли грехов оставление даровати/ чтущим любовию святую память твою.

И ныне, Богородичен.

Вход. Прокимен дне. Чтения три преподобническая.

На литии стихиры, глас 2:

Преподобне отче Поликарпе,/ ты, премудрости Божественныя измлада рачитель быв,/ в напастех мирских перст Божий уразумел еси/ и, совершен хотя быти,/ привременная блага оставил еси,/ евангельски же Христу последовав,/ постом, бдением и молитвами Тому угодил еси/ и Небесных благ сподобился еси.

Слава, глас 6:

Божиим Духом подвизаемь,/ обитель Спасу Христу воздвигл еси,/ блаженне Поликарпе,/ и многия ученики, житию твоему ревнующия, собрал еси,/ душу же твою, воздержанием крепким/ и слезными токи очистив,/ в жилище Святыя Троицы уготовал еси,/ Юже моли спастися душам нашим.

И ныне, Богородичен:

Возвеличим вси Пренепорочную Матерь Бога нашего,/ Юже освяти Дух Пресвятый,/ и со умилением Той возопиим:/ о, Пречистая Дево Богородице,/ Оружие наше и Стено/ и отечества нашего Заступнице,/ избави от бед рабы Твоя/ и спаси души наша.

На стиховне стихиры, глас 2.

Подобен: Доме Евфрафов:

В славнем граде Брянске/ верою Православною/ и подвиги иноческими/ просиял еси, отче Поликарпе,/ молитвенниче о душах наших.

Стих: Честна пред Господем/ смерть преподобных Его.

Блаженне отче Поликарпе,/ иноческими труды твоими/ благодать чудес восприял еси,/ недуги исцеляти/ и прошения наша исполняти.

Стих: Блажен муж, бояйся Господа,/ в заповедех Его восхощет зело.

Преподобне отче Поликарпе,/ приими пение чад твоих/ и подаждь нам крепость и силу/ на невидимыя и видимыя враги наша/ благодатными твоими к Богу молитвами.

Слава, глас и подобен тойже:

Дом добродетелей быв,/ привременная блага отринул еси,/ отче преподобне Поликарпе,/ и, в храме Божии приметатися изволив,/ обители Спаса Христа игумен мудрый явился еси.

И ныне, Богородичен, глас и подобен тойже:

Дево Мати Пречистая,/ предстоящи пред Богом,/ моли о нас, грешных,/ с преподобным Поликарпом,/ о спасении душ наших.

Тропарь, глас 1:

Ветрилом креста душевный корабль окормив,/ житейская красная оставил еси/ и, от мирскаго мятежа изшед,/ плотския похоти воздержанием многим, отче, умертвил еси,/ пощением же и слезами, молитвами и песньми непрестанно прилепляяся Богу,/ жилище достойное Духа Пресвятаго показался еси./ Моли, Поликарпе преподобне, Христа Бога,/ оставление прегрешений даровати нам и велию милость.

На утрени

По 1-м стихословии седален, глас 8:

Непрестанно исход от временнаго сего жития помышляя и о усопших братиях неустанно псаломский глас вознося, богоносне отче Поликарпе, на молитвенней стражи бодренно предстоял еси, темже и в час кончины твоея бдяща обрете тя Христос Бог. Мы же о тебе вопием: честна пред Господем смерть преподобных Его.

Слава, и ныне, Богородичен:

Помышляю суд и испытания страшная, трепещу и ужасаюся мук, и огня болезни, и тьмы же и тартара. Увы, что сотворю? Студ како претерплю, егда книги разгнутся и деяния обличатся? Сего ради припадаю Ти, Богородице Пречистая: тогда предстани ми, нужды оныя изымающи, Тебе бо имам прибежище, Владычице.

По 2-м стихословии седален, глас 4:

Тесным и прискорбным путем шествуя и злострадания кротко претерпевая, труды велия подъял еси и, о спасении ближних болезнуя, в Царствие Небесное узкими враты вшел еси, богомудре отче Поликарпе, верных утверждение, преподобных похвало и земли Брянския заступниче.

Слава, и ныне, Богородичен:

Стена непобедимая христианом еси, Богородице Дево, к Тебе бо прибегающе, невредими пребываем, и паки согрешающе, имамы Тя Молитвенницу. Темже, благодаряще, вопием Ти: радуйся, Обрадованная, Господь с Тобою.

Величание:

Ублажаем тя,/ преподобне отче Поликарпе,/ и чтим святую память твою,/ наставниче монахов/ и собеседниче Ангелов.

Псалом избранный: Терпя, потерпех Господа:

По полиелеи седален, глас 3:

Отложив земное попечение и от мирскаго мятежа изшед, евангельски Христу последовал еси, блаженне Поликарпе. Ныне же, с безплотными воинствы водворяяся, поминай нас, чтущих святую память твою, да радостно воспеваем Господа Человеколюбца, Даровавшаго тебе благодать исцелений.

Слава, и ныне, Богородичен:

Небесная веселяхуся и земная с трепетом ужасахуся, егда Пречистый глас найде на Тя, Богородице, едино бо торжество обоим возсия, егда Безплотный радость Тебе принесе. Темже со Ангелом Тебе вопием: радуйся, Обрадованная.

Степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Матфеа, зачало 43.

По 50-м псалме стихира, глас 6:

Яко солнце раннее землю оживляет,/ тако образ подвигов твоих время постное услаждает,/ отче наш Поликарпе./ Молися, преподобне, Христу Богу,/ Церковь Русскую в Православии невредиму соблюсти,/ отечество наше миром оградити/ и спасти души наша.

Канон святаго, глас 8, егоже краегранесие: Преподобнаго Поликарпа поем любовию.

Песнь 1.

Ирмос: Воду прошед, яко сушу,/ и египетскаго зла избежав,/ израильтянин вопияше:/ Избавителю и Богу нашему поим.

Просвети ми ум и озари моя чувства, Христе Боже, и согрешений мрак от души моея отгони, да воспою угодника Твоего, Поликарпа блаженнаго.

Ревность по Бозе от юности с благородием души сочетав, добродетельным житием море житейское преити тщался еси.

Егда суету мирскаго мятежа познал еси, отче Поликарпе, тогда мира сего красная Христа ради во уметы вменил еси.

Богородичен: Пренепорочная Отроковице, Богомати Владычице, призри на рабы Твоя и моли Сына Твоего от всяких бед избавити нас.

Песнь 3.

Ирмос: Ты ecи Утверждение/ притекающих к Тебе, Господи,/ Ты ecu Свет омраченных,/ и поет Тя дух мой.

Отложив попечения суетная, преподобне Поликарпе, цветы добродетелей благоухал еси.

Дар Божий земли Брянской явился еси, образом жития твоего и чудес дарованием благоверие утверждая.

О Царствии Небеснем непрестанно помышляя, вся земная оставил еси и над страстьми царствовал еси, богомудре.

Богородичен: Богоматерь Чистую воспоим, рождшую Свет неприступный, Иже весь мир просвещает зарями Своего Божества.

Седален, глас 8:

Скорый в бедах утешитель и в болезнех целитель, монахов наставник и всех верных покровитель, таже и уставов церковных усердный хранитель явился еси, преподобне отче Поликарпе, града Брянска похвало и отечества нашего славо и украшение.

Слава, и ныне, Богородичен:

Теплая Предстательнице и усердная Заступнице, Упование христиан непостыдное, Стено и Покрове, и Пристанище прибегающих к Тебе, земных и Небесных Владычице, Сына Твоего и Бога нашего моли, даровати мирови умирение, и спасение и велию милость.

Песнь 4.

Ирмос: Услышах, Господи,/ смотрения Твоего таинство,/ разумех де¬ла Твоя/ и прославих Твое Божество.

Научен быв Божественным заповедем, якоже Ангел на земли преизяществовал еси плотию, молитвою и постом страсти греховныя обуздавая.

Алчуща и жаждуща Христовы правды зрим тя, преподобне Поликарпе, вольною нищетою дарования духовная стяжавшаго.

Гордаго змия послушанием и смирением попрал еси, блаженне, и чада духовная богоугождению научил еси.

Богородичен: О, Пречистая, души моея страсти исцели и печали недоумения победи, Яже Бога рождшая на спасение человеком.

Песнь 5.

Ирмос: Просвети нас повелении Твоими, Господи,/ и мышцею Твоею высокою/ Твой мир подаждь нам,/ Человеколюбче.

Престолу Всещедраго Бога ныне предстоя, отче Поликарпе, не престай молитися о нас и отечестве нашем, еже в мире ему пребывати.

Отче преподобне Поликарпе, основателю и первоначальниче Брянския обители Спаса Христа, град твой поминай и возрождению обители твоея пособствуй.

Ликостоянием Небесным причащаяся, призри на немощныя и грешныя чада твоя, исцеления душам и телесем даруя.

Богородичен: Избавителя и Спаса нашего родила еси, Всенепорочная Дево, Сего убо моли чтущим Тя прегрешений оставление даровати.

Песнь 6.

Ирмос: Ризу мне подаждь светлу,/ одеяйся светом, яко ризою,/ Многомилостиве Христе Боже наш.

Крепкое заступление буди всем, притекающим к твоей помощи в недузех и печалех, преподобне отче Поликарпе, теплый наш молитвенниче.

Ангелом на земли подражая, молитву непрестанную Богу возносил еси и всего себе в жертву Ему приносил еси.

Ратоборец на видимыя и невидимыя враги буди нам и щит несокру¬шимый отечеству нашему, от бед и напастей его избавляя.

Богородичен: Призре Господь на смирение Твое, Пречистая, и Тобою посещение сотвори удалившимся от Него, яко Многомилостив.

Кондак, глас 4:

Долу влекущее мудрование умертвив/ и суету мирскую презрев,/ Божественным законом последовал еси/ и образ благонравнаго жития иноком явил еси./ Мы же, восхваляюще подвиги твоя,/ со умилением и верою вопием ти:/ преподобне отче Поликарпе,/ моли Христа Бога/ спасти и просветити души наша.

Икос:

Преподобне отче Поликарпе, богоугодное житие твое души верных возвышает и к подражанию тебе подвизает: ты бо, обетов иноческих изрядный хранитель быв, кротостию злобу победил еси и, в скорбех упованием на Бога терпение неистощимое явив, древнему иерарху Смирнскому подобник изрядный показался еси. Темже, восхваляюще честную память твою, зовем ти: моли Христа Бога спасти и просветити души наша.

Песнь 7.

Ирмос: Отроцы еврейстии в пещи/ попраша пламень дерзновенно/ и на росу огнь преложиша, вопиюще:/ благословен ecu, Господи Боже, во веки.

Ангельскую ревность о спасении Богом врученнаго ти словеснаго стада являя, наставниче неусыпный, отче преподобне, волю Пастыреначальника Христа творити научал еси.

Призри на нас, чад твоих, преподобне Поликарпе, предстоящих твоему честному образу, и подаждь отеческая твоя даяния, да поем: благословен еси, Боже отец наших.

Оставив временная и избрав вечная, изволил еси усердне хранити заповеди Господни и, яко сотворивый и научивый, велий в Царствии Небеснем нареклся еси.

Богородичен: Ева убо недугом преслушания клятву всели, Ты же, Дево Богородице, прозябением чревоношения Благословение мирови изнесла еси.

Песнь 8.

Ирмос: Богоглаголивии отроцы, в пещи/ со огнем пламень попирающе, пояху:/ благословите, дела Господня, Господа.

Молим тя, преподобне Поликарпе, утоли наша болезни и скорби, и в Православней вере утверди, да превозносим Господа во веки.

Любве Божия пламенный рачителю, еже питати чада твоя, напитай и нас пищею духовною, да причастницы жизни вечныя будем.

Юдоль плачевная томит нас, отвергших Духа благодать, преподобне отче, обаче молитвами твоими возвесели нас, кающихся Господу.

Богородичен: Безлетный из Тебе воплотися боголепне, егоже моли, Дево, страсти плоти моея умертвити и оживити душу мою.

Песнь 9.

Ирмос: Чистую славно почтим,/ людие, Богородицу,/ огнь Божества приимшую во чреве неопально,/ песньми величаем.

О, многаго твоего дерзновения, имже ко Владыце всех обогатился еси, отче преподобне, в сердце Ему, якоже другу, собеседуя.

Вем, яко недоумеет язык восхвалити тя по достоянию, обаче от любве приносимыя тебе похвалы сия приими, яко отец чадолюбивый.

Избави нас ходатайством твоим от мук вечных, преподобне Поли¬карпе, и деснаго стояния на Страшнем Суде сподоби.

Богородичен: Юже древле предвозвести пророческое сословие, стамну, и жезл, и скрижаль, и несекомую гору, Богородицу Деву, вернии, да восхвалим.

Светилен:

Благолепною простотою удобренный, отче Поликарпе, добродетелей небовосходными крилы, яко мысленный орел, сетей князя мира сего избегл еси и от земныя обители к Небесней востекл еси, отонудуже осиявай попечением твоим град Брянск, и землю Русскую, и всех, любовию тя почитающих.

Слава, и ныне, Богородичен:

Всю надежду спасения нашего на Тя возлагаем, Богомати Неискусобрачная, и на помощь присно Тя призываем: от напасти врага и печали спаси нас, греховныя пленицы зол наших разрешающи, и вечнаго огня исхити, да Тя, Предстательницу рода нашего, присно величаем.

На хвалитех стихиры, глас 1.

Подобен: Небесных чинов радование:

Равноангельным житием твоим/ течение добре совершая/ и тело, изнуренное постом и бдением,/ непрестанно вериги тяжкими сокрушая,/ в ничтоже подвиги твоя вменял еси, отче Поликарпе./ Темже тя с любовию ублажаем.

Смирение и кротость/ с твердостию духа сочетавая,/ беды от лжебратий и злых человек поношения/ Христа ради претерпел еси,/ отраду изнемогающей души твоей/ в молитве у преподобных лавры Печерския обретая.

В келлии убозей и ризах раздраных/ богатством добродетелей возсиял еси, преподобне,/ себе самаго образ стаду твоему подавая,/ благоуветливый же глас словес твоих,/ силою духа и любовию растворенный,/ к Богу сердца верных обращаше.

Течение скончавая пощения твоего,/ преподобне отче Поликарпе,/ при празе церковнем погребсти/ многотрудное тело твое завещал еси,/ обаче весть Господь славящия Его прославляти./ Темже и тя по кончине даром чудес обогати.

Слава, глас 8.

Подобен: О, преславнаго чудесе:

О, угодниче Божий,/ отче наш Поликарпе,/ града Брянска покровителю,/ и Русския земли заступниче,/ Православныя веры поборниче,/ верным утверждение и воином пособниче,/ Безплотных подражателю и преподобных сожителю,/ и всем страждущим помощниче,/ моли спастися душам нашим.

И ныне, Богородичен, глас и подобен тойже:

О, преславнаго чудесе!/ Небесе и земли Царица,/ от святых сродников наших умоляемая,/ доныне землю Русскую покрывает/ и лика Своего изображении милостивно обогащает./ О, Владычице Державная!/ Не престани и на будущее время/ во утверждение на Руси Православия/ милости и чудеса изливати до века. Аминь.

На Литургии

Блаженны от канона святаго, Песнь 3.-я и 6-я, на 4. Прокимен, глас 7: Честна пред Господем смерть преподобных Его: Стих: Что воздам Господеви о всех, яже воздаде ми? Апостол к Галатом, зачало 213. Алиллуиа, глас 6: Блажен муж, бояйся Господа, в заповедех Его восхощет зело. Стих: Сильно на земли будет семя его. Евангелие от Луки, зачало 24. Причастен: В память вечную будет праведник:

Молитва

О, пастырю добрый, наставниче неусыпный, преподобне отче Поликарпе! Ты, от мятежа мира сего изшед, отвержением благ преходящих евангельски Христу последовал еси и, равноангельное житие пожив, Безплотных почести сподобился еси. Сего ради, любовь твою к людем памятующе, яко чада ко отцу, к тебе прибегаем и со умилением молимся: о преподобне угодниче Божий, избави от всякаго навета вражия грады и веси земли нашея и не остави заступлением твоим нас, немощных, грехми и скорбьми многими обремененных. Умоли Христа Бога нашего даровати нам помыслов мир, от пагубных страстей и всякия скверны воздержание, братолюбие долготерпеливное, благочестие же нелицемерное, да не во зло обратим благая, нам свыше присно посылаемая. Молися, преблаженне, да озарится ум наш светом лица Божия, да укрепится благодатию Господнею произволение наше, да, в законе Христове утвердившеся, неленостно по пути заповедей святых потечем. Осени горним твоим благословением нас и всех, в скорбех сущих, болезньми душевными и телесными одержимых, исцеление, утешение и избавление тем даруя; над всеми же сими испроси нам свыше дух кротости и смиренномудрия, дух терпения и покаяния, да прочее время жития нашего в вере и сокрушении сердечнем поживем и тако в час скончания нашего благодарне восхвалим прославльшаго тя Господа, Безначальнаго Отца, Единороднаго Его Сына и Единосущнаго Всеблагаго Духа, Троицу Нераздельную, во веки веков. Аминь.

Источник: Текст службы утвержден на заседании Священного Синода 8 декабря 2020 года (журнал № 99).

Месяца февраля в 23-й день

Святаго священномученика Павла Кушникова, пресвитера.

На велицей вечерни

Блаже́н муж: 1-й антифо́н. На Господи, воззвах: стихиры, глас 4:

Приидите, мучениколюбцы,/ собор составим и прославим иерея славнаго/ и мученика венценоснаго,/ той бо, о пастве попечение неленостное имея,/ течение живота своего добре сконча/ и во обители Царя Христа вселися,/ идеже, с лики мучеников Престолу Божию предстоя,/ явственне зрит Лице Господне./ Темже, священне Павле,/ моли Человеколюбца Бога оставление согрешений даровати/ празднующим любовию память твою.

Почтим, людие, память иерея Господня Павла,/ Устюже́нския земли красное прозябение/ и Череповецкия страны священное украшение,/ той бо, Христу Пастыреначальнику подражая,/ на муки разумно иде/ и, яко заколение приятное, Богови себе принесе./ Темже, Небесныя славы общник явився/ и венцем нетленным увенчався,/ с лики ангельскими и святых множеством Престолу Божию предстоит/ и молится о спасении душ наших.

Притецем, братие, ко Источнику всех благ Богу/ и со умилением Ему возопиим:/ Человеколюбче Господи,/ прославляяй достойныя и венчаяй славныя,/ приими молитвы пастыря усерднаго/ и наставника богомудраго,/ священномученика Павла славнаго,/ от богоборных властей смерть и поругание приемшаго/ и кровьми своими землю нашу оросившаго,/ егоже ходатайством и заступлением/ милостив нам буди/ и славы Твоея причастники нас сотвори.

Слава, глас 6:

Почтим, братие, всех святых земли нашея/ в пределех Белаезера потрудившихся,/ паче же звезду новую, на Небе возсиявшую,/ Павла священномученика преславнаго./ Той бо, милосердия исполнен,/ паству свою добре упасл есть,/ духовне и телесне ю питавый,/ от беззаконных же поругание и смерть приим,/ ныне Престолу Божию предстоит/ и прославляет Отца и Сына и Святаго Духа,/ Троицу Единосущную и Нераздельную.

И ныне, Богородичен, глас тойже: Кто Тебе не ублажит:

Таже прокимен дне. И чтения три.

Пророчества Исаиина чтение (глава́ 26, 2–10):

Отверзите врата, да внидут людие, хранящии правду и хранящии истину, приемлющии истину и хранящии мир. Яко на Тя надеянием надеяшася, Господи, во век, Боже Великий, Вечный, Иже смирив низвел еси живущия в высоких: грады крепкия разориши и обнизиши я даже до земли. И поперут я ноги кротких и смиренных. Путь благочестивых прав бысть, и приуготован путь благочестивых. Путь бо Господень суд: уповахом на Имя Твое и память, еяже желает душа наша. От нощи утренюет дух мой к Тебе, Боже, зане свет повеления Твоя на земли: правде научитеся, живущии на земли. Преста бо нечестивый: всяк, иже не научится правде на земли, истины не сотворит: да возмется нечестивый, да не видит славы Господни.

Пророчества Малахиина чтение (главы 3, 16–18 и 4, 1–2):

Сия рекоша боящиися Господа, кийждо ко искреннему своему: и внят Господь, и услыша, и написа книгу памяти пред Собою боящимся Господа и благоговеющим Имя Его. И будут Ми, глаголет Господь Вседержитель, в день, егоже Аз творю в снабдение, и изберу я, имже образом избирает человек сына своего, добре работающа ему. И обратитеся и увидите между праведным и между беззаконным, и между служащим Богови и не служащим Ему. Яко се, день грядет горящь яко пещь и попалит я, и будут вси иноплеменницы и вси творящии беззаконная яко стеблие: и возжжет я день Господень грядый, глаголет Господь Вседержитель, и не останется от них корень, ниже ветвь. И возсияет вам, боящимся Имене Моего, солнце правды и изцеление в крилех его.

Притчей чтение (глава 12, 21–28):

Ничтоже неправедное угодно есть праведному: нечестивии же исполнятся злых. Мерзость Господеви устне лживы: творяй же верно приятен Ему. Муж разумивый престол чувствия: сердце же безумных срящет клятвы. Рука избранных одержит удобь: льстивии же будут во пленении. Страшное слово сердце мужа праведна смущает, весть же благая веселит его. Разумив праведник себе друг будет: мысли же нечестивых некротки: согрешающих постигнут злая, путь же нечестивых прельстит я. Не улучит льстивый ловитвы: стяжание же честное муж чистый. В путех правды живот, путие же злопомнящих в смерть.

На лити́и стихи́ры, глас 1:

Ныне Церковь исполнися веселия,/ совершающи торжество новомученика,/ во времена последняя явленнаго./ Помолимся вси Богу, сего прославльшему,/ да предстательством того сподобит нас непостыдныя кончины/ и добраго ответа на Судищи Страшнем.

Иерей бе мудр и мученик терпеливодушен,/ Павле доброхвальне,/ отрасль славная родителей твоих,/ милосердия и попечения исполненный,/ во дни тяжкия смуты народныя/ люди ти врученныя питавый и учивый,/ да покорны Промыслу Господню явятся/ и братолюбию не чужди будут./ Сие все памятствующе, молим тя:/ не остави нас в скудости житейстей пребывающих/ и во след тебе тещи хотящих.

Пролияша кровь их, яко воду,/ вменихомся, яко овцы заколения,/ тако рече Давид во псалмех,/ ты же, священномучениче Павле,/ жития течение благочестно прошед,/ кончину страдальческую приял еси/ и кровию своею землю нашу оросил еси./ Ныне же, Престолу Господню предстоя,/ поминай нас, благочестно совершающих святую память твою.

Слава, глас 2:

Прославим днесь иерея славнаго,/ многострадальнаго и терпеливодушнаго,/ на Небеси нетленным венцем увенчаннаго/ и на земное Отечество свое милостивно взирающаго./ егоже молитвами, Всеблагий Господи,/ спаси души наша.

И ныне, Богородичен, глас тойже:

Спаси от бед рабы Твоя, Богородице Дево,/ яко вси по Бозе к Тебе прибегаем,/ яко к нерушимей стене и предстательству.

На стиховне стихиры, глас 2.

Подобен Доме Евфрафов:

Веселися и ликуй, Церковь Русская,/ совершающи память священномученика Павла,/ единаго от первых в земли нашей пострадавшаго/ кровь пролиявшаго и верность Христу соблюдшаго/ и венцем нетленным от Него увенчаннаго.

Стих: Священницы Твои облекутся в правду/ и преподобнии Твои возрадуются.

Радостию исполнися, земле Устюже́нская,/ чадо Царствия породившая и воспитавшая,/ помощника крепкаго на враги безтелесныя,/ предстателя пред Богом милостиваго/ и молитвенника неусыпнаго.

Стих: Честна пред Господем/ смерть преподобных Его.

Воспоим людие,/ пастыря добраго и попечения о людех исполненнаго,/ такожде и мученика добропобеднаго,/ разумно на страдания изшедшаго,/ Павла, страдальцев похвалу.

Слава, глас 4:

Приими пение чад твоих,/ богомудре Павле священномучениче,/ предстателю наш теплый,/ и помози нам сердца от скверны греховныя очистити/ и тьму суетную от умов наших отгнати,/ да узрим Свет присносущный.

И ныне, Богородичен, глас тойже: Призри на моления Твоих раб, Всенепорочная:

Тропарь, глас 2:

Днесь восхвалим, вернии,/ Павла мученика и иерея славнаго,/ Устюже́нския земли благое прозябение,/ кровьми своими тую удобрившаго/ и душею к Горнему Престолу возлетевшаго,/ ныне в лице новомучеников веселящагося/ и молящагося о душах наших.

На утрени

По 1-м стихословии седален, глас 4:

Церкве украшение и богатство благочестия явился еси, священномучениче Павле, темже на житие твое взирающе, любви и состраданию поучаемся и молимся тобою улучити от Христа Бога милость в День судный.

Слава, и ныне, Богородичен, глас тойже:

Присносущное Слово Отчее миру всему родила еси, Богородице, за милосердие Человека бывшаго. Темже Тя, яко Божию Матерь и Деву исповедуем, Марие Преблагословенная.

По 2-м стихословии седален, глас 6:

Ходатая верна о нас к Богу имамы тя, священномучениче Павле, страдании бо твоими верных утвердил еси. Сего ради моли непрестанно Всесвятую Троицу о еже спастися нам.

Слава, и ныне, Богородичен, глас тойже:

Чистотою жизни к приятию Духа Всеочищающаго уготовала еси Себе, Дево, темже из Тебе Жизнь вечнующая и всеспасающая источися.

Величание:

Величаем тя,/ священномучениче Павле,/ и чтим честная страдания твоя,/ яже за Христа во утверждение на Руси Православия/ претерпел еси.

Псалом избранный:

Бог нам Прибежище и Сила.

Господи, воздвигни силу Твою и прииди, во еже спасти ны.

Глаголах о свидениих Твоих пред цари и не стыдяхся.

Вси язы́цы обыдоша мя и именем Господним противляхся им.

Тебе ради умерщвляемся весь день, вменихомся, яко овцы заколения.

Крепость моя и пение мое Господь и бысть мне во спасение.

Пролияша кровь их яко воду.

Яко Тебе ради умерщвляеми есмы весь день.

По полиелеи седален, глас 1:

Пастыря верна Христова стада восхвалим днесь Павла, пресвитера богомудраго, суровство клевретов безбожных превозмогшаго и смирением своим сих посрамившаго, новомучеников земли Устюженския и Череповецкия первоцвет красный.

Слава и ныне, Богородичен, глас тойже:

Владычице Пречистая, Богородительнице, всего мира Прибежище и Утверждение! Уврачуй страсти неисцельныя рабов Твоих, Ты бо Благаго Спаса и Целителя душ наших родила еси.

Степенна, 1-й антифон 4-го гласа. Прокимен, глас 4: Проидохом сквозе огнь и воду,/ и извел еси ны в покой. Стих: Разжегл ны еси, якоже разжизается сребро. Вся́кое дыха́ние: Ева́нгелие от Матфе́а, зача́ло 36.

По 50-м псалме стихира, глас 6:

Павлу апостолу подражатель быв,/ якоже той Христу,/ люди многия учении Божественными просветил еси,/ священномучениче Павле,/ тяготу же гонений претерпевая/ и светом Христовым область темную поборая,/ не токмо словесы, но и дел творением/ ко спасению паству твою наставил еси,/ яко пастырь добрый и верный.

Канон, глас 4, егоже краегранесие: Священномучениче Павле, сим славим тя.

Песнь 1.

Ирмос: Моря чермную пучину/ невлажными стопами/ древний пешешествовав, Израиль/ крестообразныма Моисеовыма рукама/ Амаликову силу в пустыни победил есть.

Припев: Священномучениче Павле, моли Бога о нас.

Стопами твоими Христу последовав, всехвальне Павле, на Голгофу русскую мужественне возшел еси.

Волнами искушений непотопляемь явился еси, священномучениче Павле, крестом честным клокощущую пучину усмиряя.

Яко кораблец малый, ветры страстей гонимый, житие наше, отче Павле. Темже молим тя: в тихое пристанище покаяния направи ны молитвами твоими.

Богородичен: Щедрот Источниче, Мати Вседержителя, Пречистая Дево Богородице, любити Сына Твоего, Христа Бога нашего, всех нас вразуми.

Песнь 3.

Ирмос: Веселится о Тебе Церковь Твоя, Христе, зовущи:/ Ты моя крепость, Господи,/ и прибежище, и утверждение.

Егда постиже землю Русскую скорбь велия, душу твою за паству положил еси, Павле священне, да, подвигом добрым труды своя увенчав, славиши Христа во веки.

Небоязненно и кротко страдания и злую смерть Христа ради от людей нечестивых приял еси, блаженне Павле, богомудре.

Новая звезда озари землю Устюже́нскую, егда Господь в годину лютую яви тя миру, отче Павле, веры Православныя светильниче златозарный.

Богородичен: О, Пресвятая Дево, Мати Христа Бога! Того моли о нас, яко Сына Твоего, да в любви и единомыслии поживем, с верою зовуще: Ты моя крепость, Господи, прибежище и утверждение.

Седален, глас 8:

Днесь, вернии, восхвалим песньми духовными священномученика Павла, добродетельным житием просиявшаго и мученический венец от Христа приемшаго, и сице ему возопиим: Павле блаженне, моли Всемилостиваго Бога, оставление согрешений даровати чтущим любовию святую память твою.

Слава, и ныне, Богородичен:

О, Всенепорочная Владычице, Пресвятая Дево Богородице! Ты безсеменно Слово Отчее родила еси, Того моли спастися душам нашим.

Песнь 4.

Ирмос: Вознесена Тя видевши Церковь на Кресте,/ Солнце Праведное,/ ста в чине своем,/ достойно взывающи:/ слава силе Твоей, Господи.

Мучениче Христов, всехвальне Павле, ты, кончину свою провидя, со умилением ко Владыце всех взывал еси: слава силе Твоей, Господи.

Учителю премудрый, отче Павле, ты себе и паству твою словесы апостольскими утверждал еси, взывая: ни смерть, ни живот, ни ина тварь кая возможет нас разлучити от любве Божия.

Чашу страданий смиренно приял еси, пастырю добрый Павле, Пастыреначальнику коленопреклоненно моляся: не моя воля, но Твоя да будет.

Богородичен: Едиными усты и единем сердцем научи нас, Дево Пречистая, исповедати Сына Твоего, Христа Бога нашего, яко Творца и Промыслителя и Спаса душ наших.

Песнь 5.

Ирмос: Ты, Господи, мой Свет,/ в мир пришел еси,/ Свет Святый, обращаяй/ из мрачна неведения/ верою воспевающия Тя.

Новаго Елеазара яви нам Господь, священномученика Павла, вернаго Богу во всем житии своем.

Истины проповедниче, Павле, святче Божий, помози нам шествовати путем заповедей Господних и подвигом добрым подвизатися.

Чада твоя не остави, отче Павле, но молитвами твоими укрепи и вся ко спасению полезная даруй.

Богородичен: Егда Сына Твоего, Богомати, безмужно родила еси, тогда свет спасения миру возсия. Темже сердца наша любовию просвети, тьмы неверия избавляющи.

Песнь 6.

Ирмос: Пожру Ти со гласом хваления, Господи,/ Церковь вопиет Ти,/ от бесовския крове очищшися/ ради милости от ребр Твоих/ истекшею Кровию.

Принесл еси всего себе в жертву Богови, мучениче Павле, яко агнец на заколение безмолвно шед, смирением Христу подражая.

Авраамлю веру, Иовле человеколюбие стяжал еси, Павле блаженне, темже и нам молитвами твоими поучатися в сих помози.

Веры крепосте несокрушимая, святый Павле, храбрый воине Христов, буди и нам на поли брани духовней споспешник.

Богородичен: Леность и небрежение от сердец наших отжени, Радосте наша, Дево Богородице, всегда радоватися, непрестанно молитися и о всем благодарити Бога наставляющи.

Кондак, глас 4:

Днесь воспеваем память твою, угодниче Божий,/ священномучениче отче Павле,/ добрый пастырю словесному стаду/ и славный страдальче Христа ради./ Яко милостивый отец не остави нас,/ но Владыку всех прилежно моли,/ да спасет души наша.

Икос:

Восхвалим ныне преславнаго иерея Господня, Павла богомудраго, пастыря добраго, нищих и сирых питателя, вдов и убогих заступника, слова Божия вернаго проповедника, от безбожных мученическую смерть приемшаго, ныне же на Небеси пред Престолом Всевышняго за нас молящагося, и сице ему возопиим:

Радуйся, Павле, светильниче многосветлый земли Устюже́нския;

радуйся, угодниче Христов, людем помощниче богодарованный.

Радуйся, Церкве Русския украшение;

радуйся, священников православных укрепление.

Радуйся, молитвами твоими нас от падений греховных соблюдаяй;

радуйся, на путь спасения многих наставляяй.

Радуйся, священномучениче Павле, скорый заступниче и усердный молитвенниче о душах наших.

Песнь 7.

Ирмос: В пещи авраамстии/ отроцы персидстей,/ любовию благочестия паче,/ нежели пламенем, опаляеми, взываху:/ благословен еси в храме славы Твоея, Господи.

Елеем дел благих исполненный, отче Павле, светильник, путь ко спасению озаряяй, показался еси притекающим к тебе, да, шествующе к Богови, зовут: благословен еси в храме славы Твоея, Господи.

Смерти напрасныя и горькия не убоялся еси, мучениче Павле, любовию ко Христу распалаемь. Мы же, мужеству твоему дивящеся, вопием: благословен еси в храме славы Твоея, Господи.

Исповедал еси небоязненно веру Православную, пастырю богомудрый, темже, на подвиг твой взирающе, взываем: благословен еси в храме славы Твоея, Господи.

Богородичен: Мати Божия, Богородице Дево, молитвами священномученика Павла, от всех бед и скорбей нас свободи, поющих: благословен еси в храме славы Твоея, Господи.

Песнь 8.

Ирмос: Руце распростер, Даниил/ львов зияния в рове затче;/ огненную же силу угасиша,/ добродетелию препоясавшеся,/ благочестия рачители,/ отроцы, взывающе:/ благословите, вся дела Господня, Господа.

Сетей вражиих, Павле богомудре, помози избегнути нам, зовущим: благословите, вся дела Господня, Господа.

Любовию немощныя утверждаяй, скорбящия утешаяй, падшия возставляяй, святе Павле, буди и нам во Христе отец милостивный, да поем вси: благословите, вся дела Господня, Господа.

Аще и маловерни есмы и, яко трости ветром колеблеми, но молим тя, мучениче Павле, в вере Православной утверди нас, да зовем: благословите, вся дела Господня, Господа.

Богородичен: Владычице Премилостивая, вразуми и помози нам творити волю Сына Твоего, Христа Бога нашего, да, Тобою наставляеми, взываем: благословите, вся дела Господня, Господа.

Песнь 9.

Ирмос: Камень нерукосечный/ от несекомыя горы, Тебе, Дево,/ краеугольный отсечеся,/ Христос, совокупивый разстоящаяся естества./ Тем, веселящеся, Тя, Богородице, величаем.

Иерею славный Павле, всех нас научи поклонятися Творцу в Дусе и истине и любити друг друга нелицемерно.

Мечтания прелестная и помыслы греховныя от сердец наших отжени, Павле священный, молитвами твоими.

Тя любящим и почитающим, священномучениче Павле, жития исправление у Господа испроси и спасение душам нашим.

Богородичен: Яко Мати Вседержителя, под кровом Твоея милости всех нас сохрани, да веселящеся, Тя, Богородице, величаем.

Светилен:

Почтим, вси людие, Павла богомудраго, той бо, сопричастник страстей Христовых быв и крест на рамена своя взем, невинно от беззаконных пострада и, яко заколение приятное, Богови себе принесе.

Слава, и ныне, Богородичен:

Величаем Тя, Пречистая Богородице, из Тебе бо Христос Бог прошед, расточенныя во единство собра и седящия в сени смертней свободи.

Или сей: Яко одушевленный Кивот, Стамну златую и манны Приятилище воспеваем Тя, Дево, рождеством бо Твоим Адам от уз разрешается и Ева веселия исполняется. Мы же Ти, Богородице, любовию вопием: Ты еси, Владычице, Радость ангелом и человеком.

На хвалитех стихиры, глас 4.

Подобен: Яко добля:

Притецем, братие,/ ко Источнику всех благ Богу/ и тако Ему возопием:/ Человеколюбче Господи,/ приими о нас молитвы пастыря и учителя добраго,/ Павла священнаго,/ от богоборных властей смерть и поругание приемшаго,/ кровьми своими землю нашу обильно напоившаго/ и Славы Твоея причастника явившагося.

Рачение спасительное исполни душу твою,/ священномучениче Павле,/ ты бо, жертву безкровную первее благоговейне совершая,/ послежде, яко всеплодие чистое,/ себе самаго в жертву живую принесл еси./ Темже Христос тя прият/ и венцем мученическим увенча,/ егоже моли благостояние Церкви даровати/ и спасти души наша.

Священномучениче Павле всечестне,/ многи скорби претерпел еси,/ от безбожных же убиен быв,/ во Обителех святых вселился еси/ и многия славы от Владыки Христа сподобился еси./ Темже усердно молим тя,/ простри руце твои ко Господу,/ да не отвратит Лица Своего от нас,/ но в мире сохранит Отечество наше.

Слава, глас 8:

Церкве Русския славо и украшение,/ Агнца Божия ревностный служителю,/ священномучениче Павле,/ ты, Промыслу Божию покорився,/ яко агнец незлобив, от безбожных заклание приял еси./ Темже помози и нам, святе отче,/ волю Божию и спасительную исполняти/ и в дусе любве житие свое провождати.

И ныне, Богородичен, глас тойже:

Владычице, приими молитвы раб Твоих/ и избави нас/ от всякия нужды и печали.

Славословие великое. И отпуст.

На Литургии

Блаженна от канона песни 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Римляном, зачало 99 (8, 28–39). Аллилуиа, глас 2: Священницы Твои облекутся в правду/ и преподобнии Твои возрадуются. Стих: Бог нам Прибежище и Сила, Помощник в скорбех, обретших ны зело. Евангелие от Луки, зачало 106, (21, 12–19). Конец: В терпении вашем стяжите душя вашя. Причастен: В память вечную будет праведник:

Источник: Текст службы утвержден к общецерковному богослужебному употреблению на заседании Священного Синода 24 августа 2023 года (журнал № 68).