31-й день

Предпра́зднство происхожде́ния Честна́го и Животворя́щаго Креста́ Госпо́дня и свята́го пра́веднаго Евдоки́ма

Священному́ченика Вениами́на, митрополи́та Петрогра́дскаго

Чте́ния Богоро́дичныя

НА ВЕЧЕ́РНИ

На Го́споди, воззва́х: стихи́ры Креста́, глас 1.

Подо́бен: Небе́сных чино́в:

Вся́кое естество́ челове́ческое, ны́не предпра́зднуя,/ ра́достно да игра́ет:/ Кре́стное бо Дре́во хо́щет предположи́тися,/ всем ве́рным врачевство́ неиждива́емое,/ и неду́гов реши́тельно, и страсте́й,/ и вся́каго озлобле́ния.

Прииди́те, ви́дим, ве́рнии, стра́нное чу́до,/ ка́ко Кре́стное Дре́во/ уставля́ет опале́ние вся́каго неду́га/ и страсте́й зной угаша́ет/ предпра́зднующих ве́рою/ и того́ почита́ющих торжество́.

Живу́щии вку́пе и уме́ршии, предпра́зднуйте:/ жи́зни бо дре́во, е́же а́да умори́вшее,/ храни́тель челове́ков,/ ме́ртвых воскресе́ние гряде́т,/ всем незави́стную благода́ть ны́не пода́ти,/ челове́ком исцеле́ния.

И́ны стихи́ры свята́го, глас 8.

Подо́бен: О, пресла́внаго чудесе́:

Блаже́нне Богому́дре Евдоки́ме,/ чи́стая твоя́ душа́,/ правове́рным смы́слом сия́ющи,/ облиста́ет доброде́телей све́тлостию/ и озаря́ет ве́рных исполне́ние,/ бесо́в тьму отгоня́ющи./ Те́мже я́ко прича́стника невече́рния благода́ти/ тя благоче́стно вси почита́ем, досточу́дне.

Име́я ду́шу ми́лостиву,/ и чист по́мысл, и се́рдце бо́дрое,/ ве́ру небла́зненную/ и любо́вь вои́стинну нелицеме́рную,/ от земли́ преста́вился еси́ к Небе́сным/ и с ли́ки пра́ведных водворя́ешися./ Те́мже чтим тя свяще́нными пе́сньми/ и благочести́вно вси ублажа́ем,/ блаже́нне Евдоки́ме.

Боже́ственными уче́нии укрепля́яся,/ стра́сти плотски́я от души́ отгна́л еси́/ и Святы́я Тро́ицы селе́ние чи́сто был еси́./ Те́мже к Боже́ственному наслажде́нию отше́л еси́,/ Бо́гу, соблюда́ющу ны́не неруши́мо/ твое́, блаже́нне, те́ло,/ Боже́ственными судьба́ми, и́миже Сам весть,/ прославля́яй тя а́ве, Евдоки́ме.

Сла́ва, глас 1:

Ка́ко не диви́мся благоу́мию твоему́/ или́ не похва́лим, преподо́бне Евдоки́ме, житие́ твое́ равноа́нгельное,/ по́мысла целому́дрию, кро́тости твое́й,/ и смире́нию, и безмо́лвию, и ми́лостыни непреста́нней?/ Все́ми бо доброде́тельми украси́лся еси́, блаже́нне,/ те́мже ждет тебе́ неизглаго́ланная ра́дость/ и Небе́сное Ца́рствие.

И ны́не, глас то́йже:

Днесь я́ко вои́стинну/ святовеща́нный глаго́л Дави́дов коне́ц прия́т,/ се бо я́ве пречи́стых ног Твои́х покланя́емся подно́жию/ и, на сень крилу́ Твое́ю наде́ющеся,/ Всеще́дрый, вопие́м Ти:/ да зна́менается на нас свет лица́ Твоего́,/ правосла́вных люде́й Твои́х рог вознеси́/ Честна́го Креста́ Твоего́ воздви́жением,/ Христе́ Многоми́лостиве.

На стихо́вне Окто́иха.

Сла́ва, и ны́не, глас 2, самогла́сен:

Ты ми покро́в держа́вен еси́,/ трича́стный Кре́сте Христо́в,/ освяти́ мя си́лою твое́ю,/ я́ко да ве́рою и любо́вию покланя́юся и сла́влю тя.

Тропа́рь свята́го, глас 4:

От земли́ воззва́вый тя к Небе́сным селе́нием/ соблюда́ет и по сме́рти невреди́мо те́ло твое́, свя́те Евдоки́ме:/ ты бо в целому́дрии и чи́стом жи́тельстве, блаже́нне,/ жи́тельствовал еси́, не оскверни́в пло́ти./ Те́мже со дерзнове́нием моли́ Христа́ Бо́га спасти́ся нам.

Сла́ва, и ны́не, тропа́рь Креста́, глас 1:

Спаси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя/ и Твое́ сохраня́я Кресто́м Твои́м жи́тельство.

На У́трени

На Бог Госпо́дь: тропа́рь Креста́, два́жды. Сла́ва, свята́го. И ны́не, Креста́. Кано́н Окто́иха еди́н, и Креста́ на 4, и свята́го на 4.

Кано́н Креста́, глас 1.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Крест предгряды́й Боже́ственный испуща́ет зарю́ благода́ти/ и просвеща́ет вся, покланя́ющияся ему́/ и воспева́ющия благоче́стно распе́ншагося Христа́.

Креста́ поклоня́ние возвыша́ет любо́вию и ве́рою сла́вящия/ я́ко Бо́га и Го́спода, пострада́вшаго пло́тию/ и назда́вшаго нас Боже́ственными страда́нии.

Креста́ поклоня́ние источа́ет благово́ние дарова́ний,/ и вся, я́же Христа́ сла́вящия, объюха́ет при́сно,/ и смрад душ отъе́млет весь.

Богоро́дичен: Позна́вше Го́спода, вопло́щшагося из Тебе́, Богоневе́сто,/ и Крест и смерть прие́мша,/ пое́м Его́, Изба́вителя, Тя ублажа́юще.

Кано́н свята́го, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.

Высоко́ житие́ име́я и восхожде́нни Боже́ственными весь све́тел быв,/ просвеще́ние ми испроси́, восхваля́ющему честны́я твоя́ по́двиги,/ и́миже до́бре пожи́в, получи́л еси́, Евдоки́ме, и́хже наде́ялся еси́.

Мирово́нная любя́ уче́ния и во чте́нии Свяще́нных Писа́ний упражня́яся,/ сласте́й уклони́лся еси́, всеблаже́нне, смра́дных и безче́стных/ и облагово́нился еси́, Боже́ственными дарова́нии украша́емь.

Дрема́ние о́чию от души́, блаже́нне, отгна́л еси́, бдя и Бо́гу приединя́яся,/ всено́щными стоя́нии, непрекло́нен ну́ждами естества́,/ те́мже ко дню невече́рнему дости́гл еси́.

Богоро́дичен: я́ко черто́г одушевле́н Бо́жий и кади́льницу мы́сленнаго и светоно́снаго у́гля,/ при́сно благода́тную ублажа́ем Богоро́дицу, зову́ще:/ ра́дуйся, Хода́таице спаси́тельнаго воскресе́ния.

Песнь 3

Ирмо́с: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми не́бо утвержде́й второ́е/ и основа́вый на вода́х зе́млю, Всеси́льне.

И́же во о́бразех проначерта́емый, соверша́я пресла́вная чудеса́,/ ны́не покланя́емый Крест де́йствует чу́днейшая,/ освяща́я и просвеща́я Зижди́теля сла́вящия.

И́же во бране́х Боже́ственная побе́да, Крест Христо́в покланя́емь,/ ополче́ния враго́в побежда́яй,/ подава́ет лю́дем правосла́вным кре́пкия побе́ды.

Жезл Госпо́день предположе́нный,/ Крест во хра́мех и жили́щах основа́ния незы́блема сих соблюда́ет/ и всяк прило́г и кова́рство сопроти́вных побежда́ет.

И́же Госпо́день покланя́емый Крест благоче́стно/ Боже́ственныя благода́ти и каже́ния мы́сленна исполня́ет покланя́ющияся ему́/ и о́блаки напа́стей отъе́млет и скорбе́й.

Богоро́дичен: От глубины́ ле́стныя извлече́ челове́чество/ из Тебе́ Рожде́йся Дре́вом Кре́стным, Богоро́дице,/ и возвы́си к разуме́нию Своему́ благоче́стно Тя сла́вящия.

Ин

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́ Го́споди.

Глаго́лом живото́чным внима́я, испи́л еси́ во́ду спасе́ния,/ возгнуша́вся го́рькаго греха́, и, поя́, глаго́лал еси́ Бо́гу, Евдоки́ме:/ я́ко несть свят, па́че Тебе́, Го́споди.

Ми́лование стяжа́л еси́ христоподража́тельное, разда́л еси́ бога́тство тре́бующим,/ Небе́сное же бога́тство, хода́тайствующее тебе́, получи́л еси́, вопия́, Евдоки́ме:/ я́ко несть свят, па́че Тебе́, Го́споди.

Присво́ився Зижди́телю любо́вию Боже́ственною,/ прия́л еси́ Небе́сное насле́дие, и дре́ва живо́тнаго прича́стник еси́,/ обще́нием обожа́емь, и, поя́, сла́вне, глаго́лал еси́:/ я́ко несть свят, па́че Тебе́, Го́споди.

Богоро́дичен: Су́щи А́нгел честне́йши,/ Зижди́теля А́нгелов во утро́бе носи́ла еси́ и родила́ еси́ неизрече́нно./ Ему́же вси пое́м:/ Ты еси́ Бог наш, и несть свят, па́че Тебе́, Го́споди.

Седа́лен свята́го, глас 4:

Благоволи́в благи́ми дея́нии, искуси́лся еси́, я́ко зла́то в пещи́, напа́стьми, Евдоки́ме сла́вне,/ те́мже и по сме́рти источа́еши бога́тно чудеса́, я́ко во́ды,/ и неду́ги уставля́еши, о нас при́сно моли́ся,/ я́ко да согреше́ний проще́ние прии́мем.

Сла́ва, и ны́не, Креста́, глас 4.

Подо́бен: Вознесы́йся:

Све́тло не́бо показу́ется па́че со́лнца све́том Кре́стным,/ просвеща́ет вся́ческая заре́ю свое́ю./ Те́мже Ты, Человеколю́бче, Спа́се вся́ческих,/ просвети́ ум наш его́ ра́ди и чу́вства:/ мы бо и́мамы того́ ору́жие ми́ру, непобеди́мую побе́ду.

Песнь 4

Ирмо́с: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том– позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди.

Вообража́емь, Боже́ственный и Честны́й Крест тьмы нача́льника отгоня́ет тве́рдо от возду́ха,/ и благода́ти лучи́ вообража́ющим простира́ет,/ и озаря́ет сих, пою́щия Христа́ Бо́га.

Вообража́емь, Боже́ственный и пречестны́й Крест в сердца́х/ мо́ре утиша́ет страсте́й, и уставля́ет бед треволне́ния,/ и в тишину́ прево́дит пра́вости вся, любо́вию вообража́ющия того́.

Я́коже у́глие, испуща́я, Честны́й Крест де́йствия вся попаля́ет вра́жия,/ и отго́нит си́лу, и облегча́ет мно́гия в ве́ре,/ хва́лящия и пою́щия любо́вию на нем пригво́ждшагося Христа́.

Всечестны́й и Боже́ственный Крест, ве́рою покланя́емь,/ источа́ет струи́ мы́сленныя дарова́ний и во́ды исцеле́ний/ и напая́ет непреста́нно сему́ покланя́ющияся и чту́щия.

Богоро́дичен: Я́ко всех Цари́цу и Влады́чицу на́шу Тя любо́вию сла́вим, Пресвята́я Чи́стая,/ просве́щшиися страстьми́ Сы́на Твоего́ и позна́вшии Сего́ всем Благоде́теля:/ сла́ва благода́ти Его́.

Ин

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Тн: сла́ва си́ле Твое́й, Го́споди.

Уче́ния оте́ческая храня́ невреди́мо,/ правосла́вным мудрова́нием, ты от младе́нства име́л еси́ житие́ нескве́рное/ и ми́лостивен нрав, досточу́дне.

Ни молва́ мирска́я, ни вла́сти держа́ние, ни сла́ва вре́менная/ твоего́ к Бо́гу жела́ния преврати́, Евдоки́ме,/ но благоволи́л еси́ вои́стинну Боже́ственным дея́нием.

Возвыша́емь Боже́ственными поуче́нии всегда́, врага́ смири́л еси́,/ исцеле́ний де́йство прия́л еси́, Евдоки́ме,/ судо́м пра́ведным вся Управля́ющаго.

Иска́пающи сла́дость ра́ка моще́й твои́х бога́тых исцеле́ний,/ стра́сти отгоня́ет, Евдоки́ме, ве́рою чту́щих тя/ и попаля́ет бесо́в вся полки́.

Богоро́дичен: Всепе́тая, во́инствы Го́рними пева́емаго Бо́га родила́ еси́,/ Челове́ка вои́стинну бы́вша,/ Его́же о рабе́х Твои́х моля́щи не преста́й, Присноде́во.

Песнь 5

Ирмо́с: Све́тлый нам возсия́й Свет Присносу́щный,/ у́тренюющим о судьба́х за́поведей Твои́х,/ Влады́ко Человеколю́бче, Христе́, Бо́же наш.

Держа́вному на́шему и недви́жимому ору́жию предлежа́щу,/ ны́не покланя́ющеся пресвято́му Кресту́ ве́рою,/ си́лу непобеди́му на враги́ прие́млем.

Вообража́емаго и несеко́маго ка́мене сотво́рша во́ду источи́ти/ ны́не держа́ще и покланя́ющеся Честно́му Кресту́,/ исто́чник дарова́ний прие́млем.

Златосия́нен нам Крест Христо́в явля́яся,/ дарова́ния душа́м подава́ет благода́тию,/ покланя́ющимся ему́ и Го́спода и Бо́га пою́щим при́сно.

Богоро́дичен: Жезл си́лы, Богоневе́сто, ве́рою держа́ще,/ Сы́на Твоего́ и Бо́га на́шего Крест,/ пое́м Тя, Цари́цу всех, ублажа́юще.

Ин

Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.

Заре́ю чи́сто Святы́я Тро́ицы просвеще́н, зако́ном же Сея́ огражде́н,/ нощь жития́ непреткнове́нно премину́л еси́,/ виде́нии Боже́ственными окриля́емь, блаже́нне,/ и в Боже́ственную жизнь всели́лся еси́.

Ны́не на тебе́ чу́до ве́лие зри́тся и у́жаса испо́лнено:/ ка́ко по погребе́нии вои́стинну мно́го лет соблюде́ся неруши́мо, блаже́нне, твое́ те́ло, во гро́бе лежа́щее,/ судьба́ми, и́миже весть Сам, прославля́яй тя.

Бла́гоже твоему́ к Бо́гу дерзнове́нию, бла́гоже жела́нию, е́же в се́рдцы к Нему́ име́л еси́:/ бла́го пожи́в тезоиме́нно, просия́л еси́ пресла́вно Боже́ственными светлостьми́/ и уясни́л еси́ ве́рных совокупле́ния.

Богоро́дичен: О нас из Тебе́ воплоще́ннаго, Де́во Ма́ти, всегда́ моли́,/ благоче́стно Тя блажа́щих, изба́витися бед, и душетле́нных страсте́й и печа́лей,/ и ве́чнующаго пла́мене муче́ния.

Песнь 6

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Пречестны́й Крест, покланя́емый ны́не,/ воскресе́ния ра́дость провозвеща́ет Христо́ва,/ и смерть злонача́льника благовеству́ется.

Водрузи́л еси́ на земли́ Честны́й Крест,/ ле́ствица быва́ет ве́рным мы́сленна к Небеси́/ и возше́ствие покланя́ющимся ему́ и чту́щим.

И́же посреде́ земли́ насади́выйся, Честны́й Крест/ и ны́не ве́тви простира́ет дарова́ний в себе́/ и вся осеня́ет, покланя́ющияся ему́.

Пресеки́й Чермно́е, пропису́емь, Крест, покланя́емь ны́не,/ бед и страсте́й мо́ре пресека́ет,/ и спаса́ет покланя́ющияся ему́.

Богоро́дичен: От земли́ привлече́ нас Сын Твой и Бог к Небе́сней жи́зни, возше́д на Крест,/ любо́вию Тя, Ма́терь Сего́, вои́стинну чту́щих.

Ин

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Тече́ния сла́дкая иска́паху, блаже́нне, по́тове твои́ и ра́дования,/ исцеле́ний сия́ние во хвалу́ Христа́ Бо́га на́шего.

Во дво́рех Бо́жиих процве́л еси́, виногра́д многопло́ден прозябы́й,/ и доброде́телей гро́здие де́лателю душа́м оби́льно пода́в.

Ца́рства Бо́жия возжеле́л еси́ и, над страстьми́ ца́рствовав, Евдоки́ме, по благоволе́нию лу́чшему ра́дость пра́ведных получи́л еси́.

Богоро́дичен: Избра́нна Бо́гу бы́вши, я́ко кра́сное село́ и простра́нное,/ Сему́, Де́во, была́ еси́ и черто́г, и све́щник, и трапе́за.

Конда́к, глас 2:

Вы́шних жела́я, с вы́шними совокупля́яся,/ и колесни́цу о́гненную, Боже́ственными восхожде́ньми доброде́телей, соверши́л еси́ ду́шу,/ преблаже́нне Евдоки́ме,/ на земли́ пожи́в, я́ко Безпло́тен,/ Зижди́телю всех благоугоди́л еси́.

И́кос:

Житие́ сугу́бо показа́л еси́ пра́вою, блаже́нне, ве́рою,/ во обое́м Бо́гу благоугоди́в, Евдоки́ме./ Те́мже обре́л еси́ Небе́снаго Ца́рствия насле́дие/ и, со святы́ми ны́не живы́й, Влады́це всех предстои́ши;/ твое́ же те́ло скве́рны соблю́л еси́ кроме́/ и неруши́мое любо́вию чту́щим тя оста́вил еси́:/ чи́сто бо пожи́в, сла́вне, Зижди́телю всех благоугоди́л еси́.

Песнь 7

Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́, огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших.

И́же честно́ю кро́вию Христо́вою Крест Его́ напои́вся,/ источа́ет ре́ки сия́нии мы́сленных дарова́ний/ и напая́ет вся, покланя́ющияся и воспева́ющия его́ ве́рно.

И́же смерть и враги́ низло́ж Крест Христо́в и вереи́ сокруши́ мы́сленныя,/ и ны́не тому́ чи́стою ве́рою и любо́вию покланя́ющимся/ всем две́ри отверза́ет жи́зни и нетле́нныя пи́щи.

И́же покланя́ющеся любо́вию Кресту́, огражда́ются си́лою сего́,/ и враги́ мы́сленныя и ви́димыя отго́нят,/ и невреди́мы соблюда́ются песносло́вящии Христа́.

Богоро́дичен: Кре́пость нам и держа́ва на враги́ даровася –/ Крест Христа́, Сы́на Твоего́, прия́тным и ма́терним Твои́м дерзнове́нием,/ и́мже, Богоневе́сто, прило́ги вра́жия побежда́ем.

Ин

Ирмо́с: Богопроти́вное веле́ние/ беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Кре́постию вжили́вся Живода́вца, пло́ти удержа́л еси́ жела́ния, пребога́те,/ и ум впери́л еси́ к Небе́сным, поя́ кре́пко:/ сый благослове́н Бог и препросла́влен.

Сам ся неблагоро́дна сотво́рь, благоро́дны нра́вы стяжа́в ума́ це́лостию,/ поуче́нием же упражня́яся богодохнове́нных писа́ний,/ все твое́ жела́ние на Бо́га Всеви́дца, блаже́нне, возложи́л еси́.

Вы́шняго Ца́рства, Вы́шняго же гра́да, Бо́жия рая́,/ пра́ведных наслажде́ния пи́щи нетле́нныя и бога́тства некра́домаго,/ Све́та невече́рняго сподо́бился еси́, блаже́нне Евдоки́ме.

Богоро́дичен: Его́же родила́ еси́, Влады́чице, при́сно моли́/ от рабо́ты изба́вити мя страсте́й и осужде́ния, и стужа́ющаго ми лю́таго отча́яния,/ и от оскорбля́ющих мя, Чи́стая, одержа́ния, Богора́дованная.

Песнь 8

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

Его́же водрузи́ смерть, поста́вленный Крест, ны́не покланя́ема зря́ще,/ мы́сленная вра́жия ополче́ния скрыва́ются под земле́ю,/ и покланя́ющиися ему́ обновля́ются.

Его́же, дре́вле прообразу́ема, на высоте́ Небе́сней Христо́с показа́, пресве́тлаго Креста́,/ тому́ ны́не покланя́ющеся, благоче́стно ве́рнии возвыша́ются/ и сего́ уясня́ются заре́ю.

Его́же дре́вле пропове́даша проро́цы нело́жно, е́же Христо́ву подно́жию яви́тися Креста́,/ ему́же ны́не мы и́стинно покланя́ющеся ве́рно,/ того́ бога́тых даро́в наслажда́емся.

Богоро́дичен: И́же стра́стию безстра́стие источи́в земны́м, Сын Твой и Госпо́дь, Де́во,/ Тобо́ю нас, Тя любо́вию пою́щия, при́сно обновля́ет,/ я́ко Благоде́тель.

Ин

Ирмо́с: В пещи́ о́трочестей прообрази́л еси́ иногда́ Твою́ Ма́терь, Го́споди,/ о́браз же Сия́ из огня́ изыма́ше неопа́льно входя́щия./ Ю́же пое́м я́вльшуюся Тобо́ю конце́м днесь,/ и превозно́сим во вся ве́ки.

Огнь помышля́я стра́шный, пред престо́лом Христо́вым хотя́щ изы́ти,/ умиле́ннем се́рдца те́плы излива́еши ка́пли слез,/ погаша́ющия тебе́ страсте́й пещь, Евдоки́ме Богому́дре.

Все приложи́л еси́ к Бо́гу, му́дре, душе́вное о́ко/ и Тому́ прилепи́лся еси́, вопия́ псало́мски:/ Христе́ мой, ка́ла мя изба́ви и смертоно́сных страсте́й во ве́ки.

Терпе́нием пожда́тель и се́рдцем смире́н ты был еси́,/ ми́лостив тре́бующим и, обы́чай принося́ благ и нра́вы доброде́тельны, всече́стне,/ в ни́хже до́бре пожи́в, чуде́с то́чиши благода́ть.

Ра́зум име́я Боже́ствен, испо́лнитель Влады́чних яви́лся еси́ слове́с,/ десны́я любя́ стези́, ле́вых я́ве уклоня́яся, я́ко благоу́мен и мудр./ Те́мже тя почита́ем, Богому́дре, во ве́ки.

Богоро́дичен: Ада́мов Соде́тель от крове́й Твои́х чи́стых зи́ждется/ и млеко́м пита́ется, Пита́яй вся́кое дыха́ние, Де́во Богоро́дице,/ те́мже я́ко Бо́жию Тя сла́вим Ма́терь.

Песнь 9

Ирмо́с: Светоно́сный о́блак,/ в о́ньже всех Влады́ка,/ я́ко дождь с Небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси я́ко Ма́терь Бо́га на́шего Чи́стую.

Безсме́ртия то́чит и нетле́ния незави́стны ка́пли Честны́й Крест кла́няющимся ему́,/ оживля́ет, очища́ет, и обновля́ет, и сла́вы лу́чшия и благодати сподобля́ет/ воспева́ющия на том пригво́здшагося Иису́са.

Де́йства испуща́я, я́коже пресве́тлы зари́, всечестны́й Крест/ тому́ покланя́ющияся любо́вию и ве́рою чи́стою/ к све́ту непристу́пному и невеще́ственному, озаря́я, направля́ет,/ воспева́ющия всех Творца́.

Освяти́вый Дре́во пресвята́го Креста́ Твоего́ честно́ю кро́вию Твое́ю, Преблаги́й Сло́ве,/ де́йством его́ нас просвети́ и освяти́, тому́ кла́няющияся/ и воспева́ющия Влады́ку вся́ческих.

Богоро́дичен: Па́че со́лнца всем просия́вшая благода́ть о́блаки бед и страсте́й отго́нит, Де́во,/ и Богоразу́мия све́том просвеща́ет любо́вию Тя сла́вящия/ и пою́щия непреста́нно Сы́на Твоего́, я́ко Влады́ку всех.

Ин

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Ви́дети жела́я сла́ву Бо́га на́шего, доброде́тельми Богоразу́мия тебе́ удобри́л еси́/ и свещено́сец во све́тлый черто́г вшел еси́,/ со А́нгелы живы́й, и ясне́е наслажда́ешися Боговиде́ния.

Я́ко у́тро, я́ко со́лнце, возсия́ па́мять твоя́, су́щая во мра́це сердца́ просвеща́ющи:/ ты бо и све́та и дне вои́стинну сын яви́лся еси́, Богому́дре Евдоки́ме./ Сего́ ра́ди тя почита́ем.

Му́дростию украша́емь и ра́зумом просвеще́н, смире́нием се́рдца удобре́н,/ высото́ю жития́ сия́я, к мы́сленным преше́л еси́ дворо́м,/ иде́же нас помяни́, почита́ющих тя, Евдоки́ме.

День пра́зднственный и по́льзы хода́тайственный честны́й твой соверша́ем, от земли́ преставле́ния:/ ты бо Госпо́день уго́дник и Того́ за́поведей де́латель яви́лся еси́ непосты́ден,/ досточу́дне Евдоки́ме.

Богоро́дичен: Све́та прия́телище утро́ба Твоя́ бысть, просве́щшаго мир, Богора́дованная,/ те́мже молю́ тя, окая́нный:/ све́тлы зари́ ми пода́ждь мольба́ми, Богоневе́сто, Евдоки́ма Богому́драго.

Свети́лен Окто́иха. Сла́ва, свята́го:

Я́коже со́лнце, блиста́я, зари́ испуща́еши чуде́с,/ просвеща́я всех сердца́, твою́ сла́вную па́мять творя́щих ве́рно, треблаже́нне,/ и спаса́еши, Евдоки́ме.

И ны́не, Креста́:

Подо́бен: Жены́, услы́шите:

Крест предпра́зднуется, и мир освяща́ется,/ чи́ни А́нгельстии пою́т нас ра́ди распе́ншагося,/ и торжеству́ют с на́ми, и сра́дуются, дави́дски зову́ще:/ соде́ла спасе́ние посреде́ земли́, Влады́ко.

На стихо́вне Окто́иха. Сла́ва, глас 1:

Ка́ко не диви́мся благоу́мию твоему́/ или́ не похва́лим, преподо́бне Евдоки́ме, житие́ твое́ равноа́нгельное,/ по́мысла целому́дрию, кро́тости твое́й,/ и смире́нию, и безмо́лвию, и ми́лостыни непреста́нней?/ Все́ми бо доброде́тельми украси́лся еси́, блаже́нне,/ те́мже ждет тебе́ неизглаго́ланная ра́дость/ и Небе́сное Ца́рствие.

И ны́не, Креста́, глас 6:

Проро́честии гла́си Дре́во свято́е провозвести́ша,/ и́мже дре́вния кля́твы сме́ртныя свободи́ся Ада́м,/ тварь же, днесь возноси́му, тому́ совозвыша́ет глас,/ я́же от Бо́га прося́щи бога́тыя ми́лости./ Но, еди́ный во благоутро́бии безме́рный Влады́ко,/ очище́ние бу́ди нам/ и спаси́ ду́ши на́ша.

НА ЛИТУРГИ́И

Проки́мен, глас 7: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода: Стих: Си́льно на земли́ бу́дет се́мя его́. Ева́нгелие от Матфе́я, зача́ло 43. Прича́стен: В па́мять ве́чную бу́дет пра́ведник:

Святой праведный Евдоким родился в IX веке в Каппадокии (Малая Азия) в семье благочестивых христиан Василия и Евдокии. В царствование императора Феофила (829–842) он служил в его войске. Святой Евдоким отличался добродетельной жизнью, усердно исполнял заповеди Божии, благоговейно постился и любил молитву, слезно каялся в своих грехах. Он прилежно изучал Священное Писание, которое научило его быть целомудренным и милосердным: помогать вдовам и сиротам, жертвовать от своего имения на храмы и монастыри. Уже в юности праведный Евдоким дал обет целомудрия и никогда не только не общался с женщинами, но избегал даже случайных разговоров с ними. Только с матерью, которую глубоко почитал, он вел душеспасительные беседы. Святой Евдоким избегал празднословия и устранялся от тех, кто осуждает других и пустословит. Среди суетного мира он, усердно исполняя свои гражданские обязанности, совершал внутреннее духовное делание, вел непрестанную борьбу с грехом и немощной плотью.

Добродетельная жизнь праведного Евдокима расположила к нему императора Феофила, который назначил святого правителем Харсианской области в западной части Каппадокии. Святой Евдоким справедливо управлял народом, помогал бедным, защищал обиженных. Угодив своей святой жизнью Богу, он мирно скончался 31 июля в тридцатитрехлетнем возрасте. Перед блаженной кончиной он завещал совершить погребение в тех одеждах, в которых застанет его смерть. Он молил Бога, чтобы никто не присутствовал при его кончине, и Господь исполнил желание праведника.

Сразу же после кончины праведного Евдокима Господь прославил его святые мощи, от которых стали совершаться исцеления больных и бесноватых. Со всех сторон Харсианской области к могиле святого стали стекаться страждущие различными недугами, которые исцелялись даже от земли, взятой с могилы праведного Евдокима. Благодарный народ построил над могилой праведника надгробную сень с теплившейся в ней лампадой. Масло от лампады становилось также целебным.

Через полтора года известия о чудесах достигли Константинополя. Мать праведного Евдокима посетила могилу своего сына в Харсианской области и по ее просьбе гроб извлекли из-под земли. Когда гроб открыли, все увидели праведника, как бы спящего. От его нетленных мощей исходило благоухание. Некий иеромонах по имени Иосиф облачил святые мощи в новую одежду, и они были положены в новой гробнице на поверхности земли. Евдокия хотела увезти мощи сына в Константинополь, но местные жители не позволили этого сделать.

Иеромонах Иосиф стал хранителем святых мощей. Через некоторое время он перенес святыню в Константинополь, где честные мощи были положены в храме в честь Пресвятой Богородицы, построенном родителями праведного Евдокима. Предполагают, что перенесение святых мощей состоялось 6 июля. По дороге, а также в самом Константинополе совершились многие исцеления болящих. Жизнеописатель праведника, который был или его современником, или жил вскоре после его кончины, пишет: «Не достанет ни времени, ни слова, ни рук к описанию чудес, которые он (праведный Евдоким) совершил на месте погребения и которые совершает теперь по перенесении сюда (в Константинополь)».

Русский паломник Антоний, посетивший Константинополь в 1200 году, так писал о святых мощах праведного Евдокима: «У столпа, по стороне Богородицына монастыря, лежит новый чудотворец Евдоким в серебряне гробе, аки жив». В Русской Церкви праведный Евдоким почитается особым покровителем и молитвенником перед Богом. В одной старинной рукописи отображено народное верование о помощи праведного Евдокима в житейских делах: «Когда в новый дом всходишь, то вспомяни себе святых праведных Богоотец Акима и Анну и святого праведного Евдокима, то тебе и дому всегда защитники будут... Еще, когда венчаться будешь, то вспомяни ангела Евдокима...»

Литература:

1. Димитрий (Самбикин), архиепископ. Месяцеслов святых, всею Русскою Церковью или местно чтимых. Вып. 11, июль. Тверь, 1901, с.354.

2. Сергий (Спасский), архимандрит. Полный месяцеслов Востока, т.2. М., 1876, с.221.

3. Избранные жития святых Православной Церкви. Июль. Сост. Кутейников. СПб., 1886, с. 662–664.

Тропа́рь, глас 1:

Свети́льник всесве́тлый во гра́де свята́го Петра́ яви́лся еси́,/ па́стырю до́брый, священному́чениче о́тче Вениами́не./ Любо́вь и милосе́рдие в сердца́х ве́рных насажда́я,/ благотвори́ти призыва́л еси́ терпя́щим глад и нищету́./ Сего́ ра́ди и мы к тебе́ прибега́ем и с ве́рою вопие́м ти:/ моли́ ми́лостиваго Бо́га/ оте́чество на́ше в Правосла́вии и благоче́стии утверди́ти,/ мир Це́ркви дарова́ти/ и душа́м на́шим ве́лию ми́лость.

Конда́к, глас 6:

От ю́ности и́го Христо́во на ра́мо взем,/ и́стинный страж Правосла́вныя Це́ркве яви́лся еси́,/ священному́чениче Вениами́не./ Клевету́, у́зы, страда́ния и суд непра́ведный/ от беззако́нных му́жественне претерпева́я,/ святы́ню церко́вную на поруга́ние не пре́дал еси́./ Те́мже и Христо́с да́ром терпе́ния и любве́ тя испо́лни,/ во е́же пред му́ченическою кончи́ною/ со благодаре́нием взыва́ти:// за вся, Го́споди, сла́ва Тебе́.

Священномученик Вениамин, митрополит Петроградский и Гдовский, (в миру Василий) родился в 1873 году на Нименском погосте Андреевской волости Каргопольского уезда, ныне Архангельской области, в семье священника Павла и Марии Казанских. Родители воспитывали сына в христианском благочестии. Полюбив чтение житий святых, отрок восхищался их духовными подвигами, сожалея о том, что в современном ему мире он лишен возможности пострадать за веру православную. После окончания Петрозаводской духовной семинарии юноша поступил в Санкт-Петербургскую духовную академию. В 1895 году он принял монашеский постриг с именем Вениамин и был рукоположен во иеродиакона, а в следующем году – во иеромонаха. По окончании академии в 1897 году со степенью кандидата богословия иеромонах Вениамин был назначен преподавателем Священного Писания в Рижскую духовную семинарию. С 1898 года он – инспектор Холмской, спустя год – Санкт-Петербургской семинарии. В 1902 году, после возведения в сан архимандрита, отец Вениамин назначен ректором Самарской, а через три года – Санкт-Петербургской семинарии. Священник по призванию, архимандрит Вениамин вскоре был возведен на более высокую ступень пастырского служения: 24 января 1910 года в Свято-Троицком соборе Александро-Невской Лавры он был рукоположен во епископа Гдовского, Петербургского викария. Святительский сан владыка Вениамин воспринял как обязанность пастырского подвига и апостольской проповеди. Его часто видели в самых отдаленных и бедных кварталах столицы, куда он спешил по первому зову, словно приходской священник, в простой рясе, без внешних отличий епископского сана, и где крестил ребенка или напутствовал умирающего. Немало труда приложил он к спасению падших женщин, выступая с проповедями в «Обществе Пресвятой Богородицы». Воздействие его наставлений было велико, и многие заблудшие раскаялись в греховной жизни.

События 1917 года вызвали перемены и в жизни Церкви: после февральской революции правящие архиереи стали избираться на епархиальных съездах клира и мирян. Если в некоторых епархиях это вызвало распри и нестроения, то выборы в Петрограде прошли на редкость спокойно – подавляющее большинство голосов было отдано епископу Вениамину, который становится архиепископом Петроградским и Ладожским, а затем митрополитом Петроградским и Гдовским. Сразу же после избрания на Петроградскую кафедру святитель заявил: «Я стою за свободную Церковь. Она должна быть чужда политики, ибо в прошлом она много от нее пострадала. Самая главная задача сейчас – это устроить и наладить нашу приходскую жизнь». Приступив к осуществлению своей программы, митрополит Вениамин все силы направил на защиту православного народа России от жесточайших гонений, воздвигнутых на него врагами истины Христовой. По сути, они начались в январе 1918 года после издания декрета «Об отделении Церкви от государства и школы от Церкви», который на деле воспринимался властью на местах как сигнал к повсеместному уничтожению Русской Православной Церкви и ее служителей, к грабежу церковного имущества. Насилие над Церковью не прекратилось и после окончания гражданской войны. Небывалая разруха и голод, охватившие страну в 1921 году, послужили поводом для новых гонений, которые проводились под лозунгом «похода пролетариата на церковные ценности». Митрополит Вениамин, являя пример высокой христианской любви, благословил передачу церковных ценностей, не имеющих богослужебного употребления, на нужды бедствующих, рассматривая это решение как исполнение своего пастырского долга. «Мы все отдадим сами», – говорил святитель. Однако к голосу владыки Вениамина власти не посчитали нужным прислушаться. Они объявили, что ценности будут изъяты в формальном порядке как «принадлежащее государству» имущество. Изъятие ценностей сопровождалось волнениями народа, но серьезных беспорядков, острых столкновений и арестов пока еще не было. Однако чувствовалось приближение расправы. Ее ускорило опубликованное в «Петроградской правде» письмо двенадцати лиц – организаторов обновленческого раскола: они обвиняли все верное Святейшему Патриарху Тихону духовенство в сопротивлении изъятию церковных ценностей и в участии в контрреволюционном заговоре против советской власти. Вскоре последовал арест митрополита Вениамина, а затем началось слушание дела, к которому было привлечено еще 86 человек.

Святитель Вениамин на процессе был, как и всегда, простым, спокойным, благостным, стремился доказать невиновность других людей. Перед лицом ожидавшей его смерти он, обращаясь к трибуналу, произнес: «Я не знаю, что вы мне объявите в вашем приговоре, жизнь или смерть, но что бы вы в нем ни провозгласили, я с одинаковым благоговением обращу свои очи горе́, возложу на себя крестное знамение (святитель при этом широко перекрестился) и скажу: «Слава Тебе, Господи Боже, за все».

22 июня 1922 года трибунал объявил приговор, а в ночь с 30 на 31 июля того же года митрополит Вениамин и вместе с ним архимандрит Сергий (Шеин), миряне Юрий Новицкий и Иоанн Ковшаров были расстреляны на окраине Петрограда.

Память священномучеников митрополита Вениамина, архимандрита Сергия, мучеников Юрия и Иоанна празднуется 31 июля и в день Собора новомучеников и исповедников Российских.

Бытия́ чте́ние (глава́ 28):

Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней,/ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю́ и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко е́сть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ не́сть сие́, но дом Бо́жий,/ и сия́ врата́ Небе́сная.

Проро́чества Иезеки́илева чте́ние (главы́ 43 и 44):

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адона́й Госпо́дь./ И обрати́ мя на пу́ть врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х,/ су́щих к се́веру, пря́мо хра́му, и ви́дех,/ и се испо́лнь сла́вы храм Госпо́день.

При́тчей чте́ние (глава́ 9):

Прему́дрость созда́ Себе́ дом/ и утверди́ столпо́в се́дмь./ Закла́ своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же е́сть безу́мен, да уклони́тся ко Мне,/ и тре́бующим ума́ рече́:/ прииди́те, яди́те Мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй зльія, прии́мет себе́ безче́стие,/ облича́яй же нечести́ваго, опоро́чит себе́,/ обличе́ния бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Да́ждь прему́дрому вину́, и прему́дрший бу́дет;/ сказу́й пра́ведному, и приложи́т приима́ти./ Нача́ло прему́дрости – страх Госпо́день,/ и сове́т святы́х–ра́зум:/ разуме́ти бо зако́н, по́мысла е́сть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.

БОГОРО́ДИЧНЫ ВОСКРЕ́СНЫ

на о́смь гласо́в всего́ ле́та

Глас 1 Богоро́дичен:

Всеми́рную сла́ву,/ от челове́к прозя́бшую/ и Влады́ку ро́ждшую,/ Небе́сную две́рь воспои́м, Мари́ю Де́ву,/ Безпло́тных пе́снь и ве́рных удобре́ние:/ Сия́ бо яви́ся не́бо и храм Божества́,/ Сия́, прегражде́ние вражды́ разруши́вши,/ мир введе́ и Ца́рствие отве́рзе;/ Сию́ у́бо иму́ще ве́ры утвержде́ние,/ Побо́рника и́мамы, из Ней ро́ждшагося Го́спода./ Дерза́йте у́бо, дерза́йте, лю́дие Бо́жии,/ и́бо Той победи́т враги́,/ я́ко Всеси́лен.

На стихо́вне Богоро́дичен:

Се испо́лнися Иса́иино прорече́ние:/ Де́ва бо родила́ еси́/ и по рождестве́, я́ко пре́жде рождества́ пребыла́ еси́,/ Бог бо бе рожде́йся, те́мже и естества́ новопресече́./ Но, о Богома́ти,/ моле́ния Твои́х рабо́в, в Твое́м хра́ме приноси́мая Тебе́, не пре́зри,/ но, я́ко Благоутро́бнаго Твои́ма рука́ма нося́щи,/ на Твоя́ рабы́ умилосе́рдися/ и моли́ спасти́ся душа́м на́шим.

Глас 2 Богоро́дичен:

Пре́йде се́нь зако́нная,/ благода́ти прише́дши:/ я́коже бо купина́ не стара́ше, опаля́ема,/ та́ко Де́ва родила́ еси́/ и Де́ва пребыла́ еси́./ Вме́сто столпа́ о́гненнаго/ пра́ведное возсия́ Со́лнце,/ вме́сто Моисе́я –/ Христо́с, спасе́ние душ на́ших.

На стихо́вне Богоро́дичен:

О, чудесе́ но́ваго, всех дре́вних чуде́с!/ Кто бо позна́ Ма́терь, без му́жа ро́ждшую/ и на ру́ку нося́щую всю тва́рь Содержа́щаго?/ Бо́жие е́сть изволе́ние Ро́ждшееся./ Его́же я́ко Младе́нца, Пречи́стая,/ Твои́ма рука́ма носи́вшая/ и ма́терне дерзнове́ние к Нему́ иму́щая,/ не преста́й моля́щи о чту́щих Тя,/ уще́дрити и спасти́ души́ на́ша.

Глас 3 Богоро́дичен:

Ка́ко не диви́мся/ Богому́жному Рождеству́ Твоему́, Пречестна́я?/ Искуше́ния бо му́жескаго не прие́мши, Всенепоро́чная,/ родила́ еси́ без отца́ Сы́на пло́тию,/ пре́жде век от Отца́ рожде́ннаго без ма́тере,/ ника́коже претерпе́вшаго измене́ния, или́ смеше́ния, или́ разделе́ния,/ но обою́ существу́ сво́йство це́ло сохра́ншаго./ Те́мже, Ма́ти Де́во Влады́чице,/ Того́ моли́ спасти́ся душа́м,/ правосла́вно Богоро́дицу испове́дающих Тя.

На стихо́вне Богоро́дичен:

Без се́мене от Боже́ственнаго Ду́ха/ во́лею же О́тчею зачала́ еси́ Сы́на Бо́жия,/ от Отца́ без ма́тере пре́жде век су́ща,/ нас же ра́ди, из Тебе́ без отца́ бы́вша, пло́тию родила́ еси́/ и Младе́нца млеко́м пита́ла еси́./ Те́мже не преста́й моли́ти/ изба́вится от бед душа́м на́шим.

Глас 4 Богоро́дичен:

И́же Тебе́ ра́ди Богооте́ц проро́к Дави́д/ пе́сненно о Тебе́ провозгласи́/ вели́чия Тебе́ Сотво́ршему,/ предста́ Цари́ца одесну́ю Тебе́,/ Тя бо Ма́терь, Хода́таицу Живота́ показа́/ без отца́ из Тебе́ вочелове́читися благоволи́вый Бог,/ да Свои́ па́ки обнови́т о́браз, истле́вший страстьми́,/ и заблу́ждшее горохи́щное обре́т овча́,/ на ра́мо восприи́м, ко Отцу́ принесе́т,/ и Своему́ хоте́нию/ с Небе́сными совокупи́т Си́лами,/ и спасе́т, Богоро́дице, мир/ Христо́с, име́яй ве́лию и бога́тую ми́лость.

На стихо́вне Богоро́дичен:

При́зри на моле́ния Твои́х раб, Всенепоро́чная,/ утоля́ющи лю́тая на ны воста́ния,/ вся́кия ско́рби нас изменя́ющи,/ Тя бо Еди́ну тве́рдое и изве́стное утвержде́ние и́мамы/ и Твое́ предста́тельство стяжа́хом,/ да не постыди́мся, Влады́чице, Тя призыва́ющим,/ потщи́ся на умоле́ние Тебе́ ве́рно вопию́щих:/ ра́дуйся, Влады́чице,/ всех по́моще, ра́досте и покро́ве,/ и спасе́ние душ на́ших.

Глас 5 Богоро́дичен:

В Чермне́м мо́ри/ Неискусобра́чныя Неве́сты о́браз написа́ся иногда́:/ та́мо Моисе́й, раздели́тель воды́,/ зде же Гаврии́л, служи́тель чудесе́;/ тогда́ глубину́ ше́ствова немо́кренно Изра́иль,/ ны́не же Христа́ роди́ безсе́менно Де́ва;/ мо́ре по проше́ствии Изра́илеве пребы́сть непрохо́дно,/ Непоро́чная по рождестве́ Емману́илеве пребы́сть нетле́нна./ Сый и пре́жде Сый,/ явле́йся я́ко Челове́к,/ Бо́же, поми́луй нас.

На стихо́вне Богоро́дичен:

Храм и две́рь еси́,/ пала́та и престо́л Царе́в,/ Де́во Всечестна́я,/ Е́юже Изба́витель мой, Христо́с Госпо́дь,/ во тьме́ спя́щим яви́ся,/ Со́лнце Сый пра́вды, просвети́ти хотя́,/ я́же созда́ по о́бразу Своему́ руко́ю Свое́ю./ Те́мже, Всепе́тая,/ я́ко ма́терне дерзнове́ние к Нему́ стяжа́вшая,/ непреста́нно моли́ спасти́ся душа́м на́шим.

Глас 6 Богоро́дичен:

Кто Тебе́ не ублажи́т, Пресвята́я Де́во?/ Кто ли не воспое́т Твоего́ Пречи́стаго Рождества́?/ Безле́тно бо от Отца́ возсия́вый Сын Единоро́дный,/ То́йже от Тебе́, Чи́стыя, про́йде,/ неизрече́нно вопло́щся:/ естество́м Бог Сый/ и естество́м быв Челове́к нас ра́ди;/ не во двою́ лицу́ разделя́емый,/ но во двою́ естеству́/ несли́тно познава́емый./ Того́ моли́, Чи́стая Всеблаже́нная,/ поми́ловатися душа́м на́шим.

На стихо́вне Богоро́дичен:

Творе́ц и Изба́витель мой, Пречи́стая,/ Христо́с Госпо́дь, из Твои́х ложе́сн проше́д,/ в мя оболки́йся,/ пе́рвыя кля́твы Ада́ма свободи́./ Те́мже Ти, Всечи́стая,/ я́ко Бо́жии Ма́тери же и Де́ве,/ вои́стинну вопие́м немо́лчно:/ ра́дуйся а́нгельски, ра́дуйся, Влады́чице,/ предста́тельство, и покро́ве,/ и спасе́ние душ на́ших.

Глас 7 Богоро́дичен:

Ма́ти у́бо позна́лася еси́,/ па́че естества́, Богоро́дице,/ пребыла́ же еси́ Де́ва,/ па́че сло́ва и ра́зума,/ и чудесе́ Рождества́ Твоего́ сказа́ти язы́к не мо́жет./ Пресла́вну бо су́щу зача́тию, Чи́стая,/ непости́жен е́сть о́браз рожде́ния,/ иде́же бо хо́щет Бог, побежда́ется естества́ чин./ Те́мже, Тя в си́ Ма́терь Бо́жию ве́дуще,/ мо́лимтися приле́жно:/ моли́ спасти́ся душа́м на́шим.

На стихо́вне Богоро́дичен:

Под кров Твой, Влады́чице,/ вси земноро́днии, прибега́юще, вопие́м Ти:/ Богоро́дице, упова́ние на́ше,/ изба́ви ны от безме́рных прегреше́ний/ и спаси́ души́ на́ша.

Глас 8 Богоро́дичен:

Ца́рь Небе́сный за человеколю́бие на земли́ яви́ся/ и с челове́ки поживе́,/ от Де́вы бо Чи́стыя пло́ть прие́мый/ и из Ней проше́дый с восприя́тием,/ Еди́н е́сть Сын, сугу́б естество́м,/ но не Ипоста́сию./ Те́мже, соверше́нна Того́ Бо́га/ и соверше́нна Челове́ка вои́стинну пропове́дающе,/ испове́дуем Христа́ Бо́га на́шего:/ Его́же моли́, Ма́ти Безневе́стная,/ поми́ловатися душа́м на́шим.

На стихо́вне Богоро́дичен:

Безневе́стная Де́во,/ Я́же Бо́га неизрече́нно заче́нши пло́тию,/ Ма́ти Бо́га Вы́шняго,/ Твои́х рабо́в мольбы́ приими́, Всенепоро́чная,/ всем подаю́щи очище́ние прегреше́ний,/ ны́не на́ша моле́ния прие́млющи,/ моли́ спасти́ся всем нам.

БОГОРО́ДИЧНЫ ОСМИ́ ГЛАСО́В,

пое́мыя, егда́ е́сть Сла́ва: свято́му в Мине́и, И ны́не: по гла́су сия́

Глас 1

В неде́лю ве́чера Богоро́дичен:

Небе́сных чино́в ра́дование,/ на земли́ челове́ков кре́пкое предста́тельство,/ Пречи́стая Де́во,/ спаси́ ны, и́же к Тебе́ прибега́ющия,/ я́ко на Тя упова́ние по Бо́зе, Богоро́дице, возложи́хом.

В понеде́льник на у́трени Богоро́дичен:

Святе́йшая святы́х всех Сил,/ честне́йшая всея́ тва́ри, Богоро́дице, Влады́чице ми́ра,/ спаси́ ны, Спа́са ро́ждшая,/ от прегреше́ний тмори́чных и бед/ я́ко Блага́я моли́твами Твои́ми.

В понеде́льник ве́чера Богоро́дичен:

Де́во Всепе́тая,/ ю́же в Тебе́ та́йну Моисе́й проро́ческима ви́де очи́ма,/ купину́ горя́щу и неопаля́ему,/ Божества́ бо О́гнь утро́бу Твою́, Чи́стая, не опали́./ Те́мже мо́лим Тя я́ко Ма́терь Бо́га на́шего,/ мир испроси́ти ми́рови и ве́лию ми́лость.

Во вто́рник у́тра Богоро́дичен:

Блудни́цу, и блу́днаго аз, и разбо́йника победи́х,/ и мытаря́ прегреше́нии премину́х, и ниневи́тяны./ Увы́ мне, что бу́ду?/ Ка́ко убе́гну му́ки, аз, окая́нный?/ Чи́стая, припа́даю Ти,/ уще́дри мя ми́лостию Твое́ю,/ я́коже о́ныя Сын Твой спасл е́сть.

В сре́ду ве́чера Богоро́дичен:

Ра́дуйся, ра́досте пра́дедов,/ апо́столов и му́чеников весе́лие/ и покро́в нас, Де́во, Твои́х рабо́в.

В четверто́к у́тра Богоро́дичен:

Ра́дуйся, Богоро́дице Де́во,/ ра́дуйся, похвало́ всея́ вселе́нныя,/ ра́дуйся, Пречи́стая Ма́ти Бо́жия, Благослове́нная.

В пято́к ве́чера Богоро́дичен:

Вои́стинну па́че ума́/ чу́дная Твоя́ вели́чия, рождества́ Твоего́, Богоневе́сто,/ я́же пропове́даша проро́цы вси,/ вся пресла́вная,/ зача́тие и рождество́, Всепе́тая, недомьісленно и несказа́нно,/ и́мже мир спасл е́сть я́ко Милосе́рд.

В суббо́ту у́тра Богоро́дичен:

Ра́дуйся, от нас Свята́я Богоро́дице Де́во,/ чи́стый сосу́де всея́ вселе́нныя,/ свеще́ неугаси́мая, вмести́лище Невмести́маго,/ хра́ме необори́мый;/ ра́дуйся, из Нея́же роди́ся А́гнец Бо́жий,/ взе́мляй грехи́ всего́ ми́ра.

Глас 2

В неде́лю ве́чера Богоро́дичен:

Ра́дуйся, Мари́е Богоро́дице, хра́ме неразруши́мый,/ па́че же святы́й, я́коже вопие́т проро́к:/ свят храм Твой, ди́вен в пра́вде.

В понеде́льник у́тра Богоро́дичен:

На Тя упова́ние, Богоро́дице, возложи́хом,/ ча́яния да не отпаде́м,/ спаси́ нас от бед, Помо́щнице недоуме́емым,/ и сопроти́вных сове́ты разори́:/ Ты бо еси́ на́ше спасе́ние,/ Благослове́нная.

В понеде́льник ве́чера Богоро́дичен:

Непроходи́мая врата́, та́йно запеча́тствованная,/ Благослове́нная Богоро́дице Де́во,/ приими́ моле́ния на́ша/ и принеси́ Твоему́ Сы́ну и Бо́гу,/ да спасе́т Тобо́ю души́ на́ша.

Во вто́рник у́тра Богоро́дичен:

Ра́дуйся, Мари́е Богоро́дице, хра́ме неразруши́мый,/ па́че же святы́й, я́коже вопие́т проро́к:/ свят храм Твой, ди́вен в пра́вде.

В сре́ду ве́чера Богоро́дичен:

Я́ко плодови́та ма́слина,/ Де́ва израсти́ Тебе́,/ Плода́ Живо́тнаго,/ плодоноси́ти ми́рови/ ве́лию и бога́тую ми́лость.

В четверто́к у́тра Богоро́дичен:

Все упова́ние мое́/ на Тя возлага́ю, Ма́ти Бо́жия,/ сохрани́ мя под кро́вом Твои́м.

В пято́к ве́чера Богоро́дичен:

Спаси́ от бед рабы́ Твоя́, Богоро́дице Де́во,/ я́ко вси по Бо́зе к Тебе́ прибега́ем,/ я́ко к неруши́мей стене́ и предста́тельству.

В суббо́ту у́тра Богоро́дичен:

Прииди́те, Ма́терь Све́та, пе́сньми немо́лчными зову́ще,/ вси просла́вим,/ Та бо роди́ Спасе́ние на́ше,/ и ра́дуйся принесе́м, я́ко Еди́ной, ро́ждшей всех Начаьнейінаго,/ И́же пре́жде век Бо́га;/ ра́дуйся, Я́же Е́ву па́дшую па́ки назда́вшая;/ ра́дуйся, Пречи́стая Де́во, Неискусобра́чная.

Глас 3

В неде́лю ве́чера Богоро́дичен:

Богоро́дице, Предста́тельнице всех, моля́щихся Тебе́,/ Тобо́ю дерза́ем и Тобо́ю хва́лимся,/ и к Тебе́ все упова́ние на́ше е́сть,/ моли́ Ро́ждшагося из Тебе́/ за непотре́бныя рабы́ Твоя́.

В понеде́льник у́тра Богоро́дичен:

Святопервочи́стая похвало́ су́щи Небе́сных чино́в,/ апо́столов пе́ние/ и проро́ков сбытие́, Влады́чице,/ приими́ моли́твы на́ша.

В понеде́льник ве́чера Богоро́дичен:

В жена́х Свята́я Богоро́дице,/ Ма́ти Безневе́стная,/ моли́, Его́же родила́ еси́, Царя́ и Бо́га:/ да спасе́т нас я́ко Человеколю́бец.

Во вто́рник у́тра Богоро́дичен:

Без се́мене зачала́ еси́ от Ду́ха Свята́го/ и, славосло́вяще, воспева́ем Тя:/ ра́дуйся, Пресвята́я Де́во.

В сре́ду ве́чера Богоро́дичен:

Вельми́ согреша́юща мя, Отрокови́це,/ исхити́ вели́кою Твое́ю моли́твою пла́мене ну́жднаго/ и испра́ви, Чи́стая, Твои́ми мольба́ми,/ ко спасе́нным стезя́м наставля́ющи мя/ ма́терними Твои́ми моли́твами.

В четверто́к у́тра Богоро́дичен:

Без се́мене зачала́ еси́/ от Ду́ха Свята́го,/ и, славосло́вяще, воспева́ем Тя:/ ра́дуйся, Пресвята́я Де́во.

В пято́к ве́чера Богоро́дичен:

В жена́х Свята́я Богоро́дице,/ Ма́ти Безневе́стная,/ моли́, Его́же родила́ еси́, Царя́ и Бо́га:/ да спасе́т нас я́ко Человеколю́бец.

В суббо́ту у́тра Богоро́дичен:

Без се́мене зачала́ еси́/ от Ду́ха Свята́го,/ и, славосло́вяще, воспева́ем Тя:/ ра́дуйся, Пресвята́я Де́во.

Глас 4

В неде́лю ве́чера Богоро́дичен:

Ра́дуйся, Све́та о́блаче;/ ра́дуйся, све́щниче све́тлый;/ ра́дуйся, ру́чко, в не́йже ма́нна;/ ра́дуйся, же́зле Ааро́нов;/ ра́дуйся, купино́ неопали́мая;/ ра́дуйся, черто́же; ра́дуйся, престо́ле;/ ра́дуйся, горо́ свята́я;/ ра́дуйся, прибе́жище;/ ра́дуйся, Боже́ственная трапе́зо;/ ра́дуйся, две́ре та́йная;/ ра́дуйся, всех ра́досте.

В понеде́льник у́тра Богоро́дичен:

Богоро́дице, всех Цари́це,/ правосла́вных похвалы́ ерети́чествующих шата́ния разори́/ и ли́ца их посрами́,/ не кла́няющихся, ниже́ чту́щих, Пречи́стая,/ честны́й Твой о́браз.

В понеде́льник ве́чера Богоро́дичен:

Изба́ви нас от нужд на́ших,/ Ма́ти Христа́ Бо́га,/ ро́ждшая всех Творца́,/ да вси зове́м Ти:/ ра́дуйся, еди́но предста́тельство душ на́ших.

Во вто́рник у́тра Богоро́дичен:

От всех бед рабы́ Твоя́ сохраня́й,/ Благослове́нная Богоро́дице,/ да Тя сла́вим, наде́жду душ на́ших.

В сре́ду ве́чера Богоро́дичен:

Иму́ще Тя, Богоро́дице, упова́ние и предста́тельство,/ вра́жиих наве́т не убои́мся,/ я́ко спаса́еши души́ на́ша.

В четверто́к у́тра Богоро́дичен:

Тя, сте́ну стяжа́хом, Богоро́дице Пречи́стая,/ и благоути́шное приста́нище, и утвержде́ние./ Те́мже молю́ся,/ и́же в жи́тий обурева́емы/ окорми́ и спаси́ мя.

В пято́к ве́чера Богоро́дичен:

Свеще́ неугаси́мая, престо́ле пра́ведный,/ Пречи́стая Влады́чице,/ моли́ спасти́ся душа́м на́шим.

В суббо́ту у́тра Богоро́дичен:

Еди́на Чи́стая и Пречи́стая Де́во,/ И́же Бо́га безсе́менно ро́ждшая,/ моли́ спасти́ся душа́м на́шим.

Глас 5

В неде́лю ве́чера Богоро́дичен:

Стра́шно, и пресла́вно, и ве́лие та́инство:/ Невмести́мый во чре́ве вмести́ся/ и Ма́ти по рождестве́ па́ки пребы́сть Де́ва/ Бо́га бо роди́, из Нея́ воплоще́нна./ Тому́ возопии́м, Тому́ пе́снь рцем,/ со А́нгелы воспева́юще:/ Свят еси́, Христе́ Бо́же,/ И́же нас ра́ди вочелове́чивыйся, сла́ва Тебе́.

В понеде́льник у́тра Богоро́дичен:

Обра́дованная, хода́тайствуй Твои́ми моли́твами/ и испроси́ душа́м на́шим мно́жество щедро́т/ и очище́ние мно́гих прегреше́ний, мо́лимся.

В понеде́льник ве́чера Богоро́дичен:

Утоли́ боле́зни/ многовоздыха́ющия души́ мое́й,/ утоли́вшая вся́ку сле́зу от лица́ земли́:/ Ты бо челове́ков боле́зни отго́ниши/ и гре́шных ско́рби разруша́еши./ Тебе́ бо вси стяжа́хом наде́жду и утвержде́ние,/ Пресвята́я Ма́ти Де́во.

Во вто́рник у́тра Богоро́дичен:

Обра́дованная, хода́тайствуй Твои́ми моли́твами/ и испроси́ душа́м на́шим мно́жество щедро́т/ и очище́ние мно́гих прегреше́ний, мо́лимся.

В сре́ду ве́чера Богоро́дичен:

Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу/ и прибе́жище душ на́ших.

В четверто́к у́тра Богоро́дичен:

Блажи́м Тя, Богоро́дице Де́во,/ я́ко из Тебе́ возсия́ Со́лнце пра́вды, Христо́с,/ име́яй ве́лию ми́лость.

В пято́к ве́чера Богоро́дичен:

Тебе́ мо́лимся я́ко Бо́жии Ма́тери:/ Благослове́нная, моли́/ о спасе́нии душ на́ших.

В суббо́ту у́тра Богоро́дичен:

О́ле окая́нная душе́!/ Кий отве́т и́маши рещи́ Судии́ во он час,/ егда́ Престо́ли поста́вятся на Суде́ и Судия́ прии́дет от Небе́с,/ соше́д со тьма́ми а́нгельскими?! Егда́ ся́дет на Суди́щи/ прю сотвори́ти с рабы́ непотре́бными, подо́бными мне,/ что отвеща́ти и́маши?/ что же принести́ тогда́?/ Пои́стинне ничто́же,/ ум и те́ло оскверни́вши твое́./ Те́мже припади́ к Де́ве и зови́ непреста́нно,/ пода́ти тебе́ бога́тно грехо́в проще́ние.

Глас 6

В неде́лю ве́чера Богоро́дичен:

Арха́нгельски воспои́м, ве́рнии,/ Небе́сный черто́г и две́рь запеча́танну вои́стинну:/ ра́дуйся, Ея́же ра́ди отрасте́ нам Спас всех, Христо́с,/ Жизнода́вец и Бог,/ низложи́, Влады́чице, мучи́тели,/ безбо́жныя враги́ на́ша/ руко́ю Твое́ю, Пречи́стая,/ упова́ние христиа́н.

В понеде́льник у́тра Богоро́дичен:

Арха́нгельское сло́во прия́ла еси́,/ и Херуви́мский престо́л показа́лася еси́,/ и на объя́тиих Твои́х носи́ла еси́, Богоро́дице,/ Наде́жду душ на́ших.

В понеде́льник ве́чера Богоро́дичен:

Никто́же, притека́яй к Тебе́,/ посра́млен от Тебе́ исхо́дит,/ Пречи́стая Богоро́дице Де́во,/ но про́сит благода́ти/ и прие́млет дарова́ние к поле́зному проше́нию.

Во вто́рник у́тра Богоро́дичен:

Вели́ких дарова́ний, Чи́стая Де́во Богома́ти,/ Ты сподо́билася еси́,/ я́ко родила́ еси́ пло́тию Еди́наго от Тро́ицы,/ Христа́ Жизнода́вца/ во спасе́ние душ на́ших.

В сре́ду ве́чера Богоро́дичен:

О́ко се́рдца моего́/ воспуща́ю к Тебе́, Влады́чице:/ не пре́зри ма́лаго моего́ воздыха́ния/ в час, егда́ су́дит Сын Твой ми́ру,/ бу́ди ми покро́в и Помо́щница.

В четверто́к у́тра Богоро́дичен:

Преложе́ние скорбя́щих,/ премене́ние боля́щих еси́, Богоро́дице Всепе́тая,/ спаси́ град и лю́ди,/ бори́мых умире́ние, обурева́емых тишина́,/ Еди́на Предста́тельнице ве́рных.

В пято́к ве́чера Богоро́дичен:

Моли́твами Ро́ждшия Тя, Христе́,/ му́ченик Твои́х, и апо́стол, и проро́к,/ и святи́телей, преподо́бных, и пра́ведных, и всех святы́х/ усо́пшия рабы́ Твоя́ упоко́й.

В суббо́ту у́тра Богоро́дичен:

Бо́га, из Тебе́ воплоти́вшагося, разуме́хом, Богоро́дице Де́во:/ Того́ моли́ о спасе́нии душ на́ших.

Глас 7

В неде́лю ве́чера Богоро́дичен:

Е́же ра́дуйся, Тебе́ зове́м со А́нгелом, Богоневе́сто,/ черто́г, и две́рь, и престо́л о́гненный нарица́юще Тебе́,/ и несеко́мую го́ру, и купину́ неопали́мую.

В понеде́льник у́тра Богоро́дичен:

Умири́ моли́твами Богоро́дицы жи́знь на́шу,/ вопию́щих Ти:/ Ми́лостиве Го́споди, сла́ва Тебе́.

В понеде́льник ве́чера Богоро́дичен:

Ра́дуйся, Со́лнца о́блаче мы́сленнаго и неизрече́ннаго, Влады́чице;/ ра́дуйся, всесве́тлая свеще́;/ Ра́дуйся, све́щниче всезлаты́й./ Тобо́ю, Пресвята́я, да изба́вися от кля́твы./ Но я́ко иму́щи дерзнове́ние/ ко Благопреме́нному Сы́ну Твоему́ и Бо́гу,/ ма́тернею Твое́ю моли́твою/ не оскуде́й моли́тися, Пречи́стая.

Во вто́рник у́тра Богоро́дичен:

Цвет, Христе́, прозя́бл еси́ от Де́вы/ и просвети́л еси́ род челове́ческий./ Го́споди, сла́ва Тебе́.

В сре́ду ве́чера Богоро́дичен:

Еди́ну по Рождестве́ Пречи́стую Де́ву воспои́м,/ я́ко Ма́терь Бо́га Сло́ва,/ глаго́люще: сла́ва Тебе́.

В четверто́к у́тра Богоро́дичен:

Роди́лся еси́ от Де́вы несказа́нно, Христе́,/ и просвети́л еси́ су́щия во тьме́, вопию́щия:/ Го́споди, сла́ва Тебе́.

В пято́к ве́чера Богоро́дичен:

И́же, Еди́на Невмести́маго прии́мши/ и ро́ждши Бо́га Сло́ва воплоще́нна,/ моли́ спасти́ся душа́м на́шим.

В суббо́ту у́тра Богоро́дичен:

Моли́, Де́во, со апо́столы и му́ченики/ обрести́ на Суде́ преста́вльшимся/ ве́лию ми́лость.

Глас 8

В неде́лю ве́чера Богоро́дичен:

Арха́нгела Гаврии́ла глас восприи́мше, рцем:/ ра́дуйся, Ма́ти Бо́жия,/ И́же Жизнода́вца Христа́ ми́ру ро́ждши.

В понеде́льник у́тра Богоро́дичен:

Небе́сная пою́т Тя,/ Обра́дованная, Ма́ти Безневе́стная,/ и мы славосло́вим неизсле́дованное Твое́ Рождество́,/ Богоро́дице, моли́ спасти́ся душа́м на́шим.

В понеде́льник ве́чера Богоро́дичен:

Ра́дуйся, вселе́нныя похвало́;/ ра́дуйся, хра́ме Госпо́день;/ ра́дуйся, горо́ приосене́нная;/ ра́дуйся, всех прибе́жище;/ ра́дуйся, све́щниче златы́й;/ ра́дуйся, сла́во правосла́вных честна́я;/ ра́дуйся, Мари́е, Ма́ти Христа́ Бо́га;/ ра́дуйся, раю́; ра́дуйся, Боже́ственная трапе́зо;/ ра́дуйся, се́не; ра́дуйся, ру́чко всезлата́я;/ ра́дуйся, всех упова́ние.

Во вто́рник у́тра Богоро́дичен:

Кров Твой, Богоро́дице Де́во,/ врачевство́ е́сть духо́вное:/ в о́нь бо прибега́юще,/ от душе́вных неду́г избавля́емся.

В сре́ду ве́чера Богоро́дичен:

Аз, Де́во Свята́я Богоро́дице,/ к Покро́ву Твоему́ прибега́ю,/ вем, я́ко обря́щу Тобо́ю спасе́ние,/ мо́жеши бо, Чи́стая, помощи́ мне.

В четверто́к у́тра Богоро́дичен:

Исхи́ти мя, Влады́чице,/ руки́ зми́я человекоуби́йцы,/ хотя́ща мя лука́вством поглоти́ти до конца́;/ сокруши́ че́люсти его́, молю́ Тя,/ и ко́зни разори́,/ я́ко да, избы́в от ногте́й его́,/ велича́ю заступле́ние Твое́.

В пято́к ве́чера Богоро́дичен:

Чи́стая Де́во,/ Сло́ва врата́, Бо́га на́шего Ма́ти,/ моли́ спасти́ся нам.

В суббо́ту у́тра Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

ОТПУСТИ́ТЕЛЬНЫЯ ВОСКРЕ́СНЫ ОСМИ́ ГЛАСО́В БОГОРО́ДИЧНЫ

Глас 1, Богоро́дичен:

Гаврии́лу веща́вшу Тебе́, Де́во, ра́дуйся,/ со гла́сом воплоща́шеся всех Влады́ка/ в Тебе́, святе́м киво́те,/ я́коже рече́ пра́ведный Дави́д,/ яви́лася еси́ ши́ршая Небе́с,/ поноси́вши Зижди́теля Твоего́:/ сла́ва Все́льшемуся в Тя;/ сла́ва Проше́дшему из Тебе́;/ сла́ва Свободи́вшему нас Рождество́м Твои́м.

Глас 2, Богоро́дичен:

Вся, па́че смы́сла,/ вся пресла́вная Твоя́, Богоро́дице, та́инства,/ чистоте́ запеча́танной и де́вству храни́му,/, Ма́ти позна́лася еси́ нело́жна,/ Бо́га ро́ждши И́стиннаго./ Того́ моли́ спасти́ся душа́м на́шим.

Глас 3, Богоро́дичен:

Тя, хода́тайствовавшую спасе́ние ро́да на́шего,/ воспева́ем, Богоро́дице Де́во:/ пло́тию бо, от Тебе́ восприя́тою, Сын Твой и Бог наш,/ Кресто́м восприи́м стра́сть,/ изба́ви нас от тли, я́ко Человеколю́бец.

Глас 4, Богоро́дичен:

Е́же от ве́ка утае́ное/ и А́нгелом несве́домое та́инство,/ Тобо́ю, Богоро́дице, су́щим на земли́ яви́ся Бог,/ в несли́тном соедине́нии воплоща́емь/ и, Крест во́лею нас ра́ди восприи́м,/ и́мже воскреси́в первозда́ннаго,/ спа́се от сме́рти души́ на́ша.

Глас 5, Богоро́дичен:

Ра́дуйся, две́ре Госпо́дня непроходи́мая;/ ра́дуйся, стено́ и покро́ве притека́ющих к Тебе́;/ ра́дуйся, необурева́емое приста́нище и Неискусобра́чная,/ ро́ждшая пло́тию Творца́ Твоего́ и Бо́га,/ моля́щи не оскудева́й о воспева́ющих/ и кла́няющихся Рождеству́ Твоему́.

Глас 6, Богоро́дичен:

Благослове́нную нареки́й Твою́ Ма́терь,/ прише́л еси́ на стра́сть во́льным хоте́нием,/ возсия́в на Кресте́, взыска́ти хотя́ Ада́ма,/ глаго́ля А́нгелом:/ сра́дуйтеся Мне, я́ко обре́теся поги́бшая дра́хма./ Вся му́дре устро́ивый,/ Бо́же наш, сла́ва Тебе́.

Глас 7, Богоро́дичен:

Я́ко на́шего воскресе́ния сокро́вище,/ на Тя наде́ющияся, Всепе́тая,/ от ро́ва и глубины́ прегреше́ний возведи́,/ Ты бо пови́нныя греху́ спасла́ еси́,/ ро́ждшая Спасе́ние на́ше,/ Я́же пре́жде рождества́ Де́ва, и в рождестве́ Де́ва,/ и по рождестве́ па́ки пребыва́еши Де́ва.

Глас 8, Богоро́дичен:

И́же нас ра́ди рожде́йся от Де́вы/ и, распя́тие претерпе́в, Благи́й,/ испрове́ргий сме́ртию сме́рть/ и Воскресе́ние явле́й я́ко Бог,/ не пре́зри, я́же созда́л еси́ руко́ю Твое́ю,/ яви́ человеколю́бие Твое́, Ми́лостиве./ Приими́ ро́ждшую Тя, Богоро́дицу, моля́щуюся за ны,/ и спаси́, Спа́се наш, лю́ди отча́янныя.

БОГОРО́ДИЧНЫ ОТПУСТИ́ТЕЛЬНЫЯ

по тропаре́х святы́х, пое́мыя во все ле́то, в вече́рню же и на Бог Госпо́дь: во у́трени и па́ки в коне́ц у́трени

Глас 1

В неде́лю ве́чера и в понеде́льник на Бог Госпо́дь:

Чу́до чуде́с, Благода́тная, в Тебе́ зря́щи,/ тва́рь ра́дуется,/ зачала́ бо еси́ безсе́менно [ и родила́ еси́ неизрече́нно,/ Его́же чинонача́лия А́нгелов ви́дети не мо́гут,/ Того́ моли́ о душа́х на́ших.

В коне́ц у́трени:

Пречи́стая Богоро́дице,/ на Небесе́х Благослове́нная/ и на земли́ славосло́вимая,/ ра́дуйся, Неве́сто Неневе́стная.

В понеде́льник ве́чера и во вто́рник на Бог Госпо́дь:

Заче́ншая неопа́льно О́гнь Боже́ственный/ и ро́ждшая безсе́менно Исто́чника Жи́зни, Го́спода,/ Благода́тная Богоро́дице,/ спаса́й Тя велича́ющия.

В коне́ц у́трени:

Безма́терняго на Небеси́, па́че мы́сли и слу́ха,/ на земли́ без отца́ родила́ еси́;/ Того́, Богоро́дице,/ моли́ о душа́х на́ших.

Во вто́рник ве́чера и в сре́ду на Бог Госпо́дь:

Твое́ предста́тельство иму́ще, Пречи́стая,/ и Твои́ми моли́твами лю́тых избавляемы,/ Кресто́м Сы́на Твоего́ везде́ соблюда́емы,/ по до́лгу Тя вси благоче́стно велича́ем.

В коне́ц у́трени: Пречи́стая Богоро́дице, на Небесе́х:

В сре́ду ве́чера и в четверто́к на Бог Госпо́дь: Заче́ншая неопа́льно О́гнь Боже́ственный:

В коне́ц у́трени: Безма́терняго на Небеси́:

В четверто́к ве́чера и в пято́к на Бог Госпо́дь: Твое́ предста́тельство иму́ще:

В коне́ц у́трени: Пречи́стая Богоро́дице:

В пято́к ве́чера и в суббо́ту на Бог Госпо́дь:

Гаврии́лу веща́вшу Тебе́, Де́во, ра́дуйся,/ со гла́сом воплоща́шеся всех Влады́ка/ в Тебе́, святе́м киво́те,/ я́коже рече́ пра́ведный Дави́д,/ яви́лася еси́ ши́ршая Небе́с,/ поноси́вши Зижди́теля Твоего́:/ сла́ва Все́льшемуся в Тя;/ сла́ва Проше́дшему из Тебе́;/ сла́ва Свободи́вшему нас Рождество́м Твои́м.

В коне́ц у́трени: Безма́терняго на Небеси́:

Глас 2

В неде́лю ве́чера и в понеде́льник на Бог Госпо́дь:

Благоутро́бия су́щи исто́чник,/ ми́лости сподо́би нас, Богоро́дице,/ при́зри на лю́ди согреши́вшия,/ яви́, я́ко при́сно, си́лу Твою́,/ на Тя бо упова́юще, ра́дуйся, вопие́м Ти,/ я́коже иногда́ Гаврии́л, Безпло́тных Архистрати́г.

В коне́ц у́трени:

Ма́ти Свята́я неизрече́ннаго Све́та,/ а́нгельскими Тя пе́сньми почита́юще,/ благоче́стно велича́ем.

В понеде́льник ве́чера и во вто́рник на Бог Госпо́дь:

Боже́ственнаго бы́хом о́бщницы естества́/ Тобо́ю, Богоро́дице Присноде́во,/ Бо́га бо нам воплоти́вшагося родила́ еси́./ Те́мже по до́лгу Тя вси благоче́стно велича́ем.

В коне́ц у́трени:

Тя велича́ем, Богоро́дице, вопию́ще:/ ра́дуйся, незаходи́маго Све́та о́блаче,/ Того́ носи́вши в не́дрех Сла́вы Го́спода.

Во вто́рник ве́чера и в сре́ду на Бог Госпо́дь:

Препросла́вленна еси́, Богоро́дице Де́во,/ пое́м Тя:/ Кресто́м бо Сы́на Твоего́ низложи́ся ад/ и сме́рть умертви́ся,/ умерщвле́ннии, воста́хом и Живота́ сподо́бихомся:/ рай восприя́хом, дре́внее наслажде́ние./ Тем благодаря́ще, славосло́вим/ я́ко держа́внаго Христа́ Бо́га на́шего/ и Еди́наго Многоми́лостиваго.

В коне́ц у́трени:

Тя велича́ем, Богоро́дице, вопию́ще:/ ра́дуйся, же́зле,/ от него́же безсе́менно Бог прозябы́й,/ погуби́ на Дре́ве сме́рть.

В сре́ду ве́чера и в четверто́к на Бог Госпо́дь: Боже́ственнаго бы́хом о́бщницы:

В коне́ц у́трени: Тя велича́ем, Богоро́дице, вопию́ще:/ ра́дуйся, незаходи́маго Све́та о́блаче:

В четверто́к ве́чера и в пято́к на Бог Госпо́дь: Препросла́вленна еси́, Богоро́дице Де́во:

В коне́ц у́трени: Тя велича́ем, Богоро́дице, вопию́ще:/ ра́дуйся, же́зле:

В пято́к ве́чера и в суббо́ту на Бог Госпо́дь:

Вся па́че смы́сла,/ вся пресла́вная Твоя́, Богоро́дице, та́инства,/ чистоте́ запеча́танной и де́вству храни́му,/, Ма́ти позна́лася еси́ нело́жна,/ Бо́га ро́ждши И́стиннаго./ Того́ моли́ спасти́ся душа́м на́шим.

В коне́ц у́трени: Ма́ти Свята́я неизрече́ннаго Све́та:

А́ще прилучи́тся аллилу́ия: в ко́ем-ли́бо гла́се, глаго́лются сия́:

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га, моли́те,/ спасти́ся, мо́лимся, душа́м на́шим.

Помяни́, Го́споди, я́ко Благ, души́ раб Твои́х/ и, ели́ка в житии́ согреши́ша, прости́,/ никто́же бо безгре́шен, то́кмо Ты,/ моги́й и преста́вленным да́ти поко́й.

Ма́ти Свята́я неизрече́ннаго Све́та:

Глас 3

В неде́лю ве́чера и в понеде́льник на Бог Госпо́дь:

Красоте́ де́вства Твоего́ и пресве́тлой чистоте́ Твое́й/ Гаврии́л удиви́вся, вопия́ше Ти, Богоро́дице:/ ку́ю Ти похвалу́ принесу́ досто́йную?/ Что же возъимену́ю Тя?/ Недоумева́ю и ужаса́юся./ Те́мже, я́ко повеле́н бых, вопию́ Ти:/ ра́дуйся, Благода́тная.

В коне́ц у́трени:

Ки́йждо, иде́же спаса́ется,/ та́мо пра́ведно и притека́ет,/ и ко́е ино́е таково́е прибе́жище,/ я́ко Ты, Богоро́дице,/ покрыва́ющее души́ на́ша.

В понеде́льник ве́чера и во вто́рник на Бог Госпо́дь:

Прибе́жище и си́ла на́ша, Богоро́дице,/ держа́вная по́мощь ми́ра,/ моли́твами Твои́ми покры́й рабы́ Твоя́/ от вся́кия ну́жды,/ Еди́на Благослове́нная.

В коне́ц у́трени: Ки́йждо, иде́же спаса́ется:

Во вто́рник ве́чера и в сре́ду на Бог Госпо́дь:

Жезл си́лы стяжа́вшии, Крест Сы́на Твоего́, Богоро́дице,/ тем низлага́ем враго́в шата́ния,/ любо́вию Тя непреста́нно велича́юще.

В коне́ц у́трени: Прибе́жище и си́ла на́ша:

В сре́ду ве́чера и в четверто́к на Бог Госпо́дь:

Проро́цы пропове́даша,/ апо́столи научи́ша,/ му́ченицы испове́даша/ и мы ве́ровахом Богоро́дицу Тя вои́стинну су́щую./ Тем и велича́ем Рождество́ Твое́ неизрече́нное.

В коне́ц у́трени: Ки́йждо, иде́же спаса́ется:

В четверто́к ве́чера и в пято́к на Бог Госпо́дь: Жезл си́лы:

В коне́ц у́трени: Прибе́жище и си́ла на́ша:

В пято́к ве́чера и в суббо́ту на Бог Госпо́дь:

Тя, хода́тайствовавшую спасе́ние ро́да на́шего,/ воспева́ем, Богоро́дице Де́во:/ пло́тию бо, от Тебе́ восприя́тою, Сын Твой и Бог наш,/ Кресто́м восприи́м стра́сть,/ изба́ви нас от тли я́ко Человеколю́бец.

В коне́ц у́трени: Проро́цы пропове́даша:

Глас 4

В неде́лю ве́чера и в понеде́льник на Бог Госпо́дь:

Воспита́вшейся во хра́ме во свята́я святы́х,/ оде́янней ве́рою и прему́дростию и безме́рным де́вством,/ Архистрати́г Гаврии́л принесе́ с Небесе́ целова́ние/ и, е́же ра́дуйся, ра́дуйся, Благослове́нная,/ ра́дуйся, Препросла́вленная, Госпо́дь с Тобо́ю.

В коне́ц у́трени:

Я́ко всех еси́ творе́ний вы́шшая,/ воспева́ти Тя досто́йно недоумева́юще, Богоро́дице,/ ту́не, мо́лим Тя, поми́луй нас.

В понеде́льник ве́чера и во вто́рник на Бог Госпо́дь:

К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи,/ Тя бо и еди́ну наде́жду и́мамы.

В коне́ц у́трени:

Тя велича́ем, Богоро́дице, вопию́ще:/ Ты еси́ купина́, в не́йже неопа́льно Моисе́й ви́де,/ я́ко пла́мень, О́гнь Божества́.

Во вто́рник ве́чера и в сре́ду на Бог Госпо́дь:

Де́во Пренепоро́чная, Ма́ти Христа́ Бо́га,/ ору́жие про́йде Твою́ пресвяту́ю ду́шу,/ егда́ распина́ема ви́дела еси́ во́лею Сы́на и Бо́га Твоего́;/ Его́же, Благослове́нная, моля́щи не преста́й/ проще́ние прегреше́ний нам дарова́ти.

В коне́ц у́трени:

Тя велича́ем, Богоро́дице, вопию́ще:/ Ты еси́ гора́, от нея́же неизглаго́ланно отсече́ся Ка́мень/ и врата́ а́дова сокруши́.

В сре́ду ве́чера и в четверто́к на Бог Госпо́дь:

Сло́во О́тчее, Христа́ Бо́га на́шего,/ от Тебе́ воплоти́вшагося, позна́хом, Богоро́дице Де́во,/ Еди́на Чи́стая,/ Еди́на Благослове́нная./ Тем непреста́нно Тя, воспева́юще, велича́ем.

В коне́ц у́трени: Я́ко всех еси́ творе́ний:

В четверто́к ве́чера и в пято́к на Бог Госпо́дь: Де́во Пренепоро́чная, Ма́ти:

В коне́ц у́трени: Тя велича́ем, Богоро́дице, вопию́ще: Ты еси́ гора́:

В пято́к ве́чера и в суббо́ту на Бог Госпо́дь:

Е́же от ве́ка утае́ное/ и А́нгелом несве́домое та́инство,/ Тобо́ю, Богоро́дице, су́щим на земли́ яви́ся Бог,/ в несли́тном соедине́нии воплоща́емь,/ и, Крест во́лею нас ра́ди восприи́м,/ и́мже воскреси́в первозда́ннаго,/ спасе́ от сме́рти души́ на́ша.

В коне́ц у́трени: Тя велича́ем, Богоро́дице, вопию́ще: Ты еси́ купина́:

Глас 5

В неде́лю ве́чера и в понеде́льник на Бог Госпо́дь:

Со А́нгелы Небе́сная, с челове́ки земна́я,/ гла́сом ра́дования, Богоро́дице, вопие́м Ти:/ ра́дуйся, врата́, Небе́с ши́ршая;/ ра́дуйся, Еди́на земноро́дных спасе́ние;/ ра́дуйся, Чи́стая Благода́тная,/ ро́ждшая Бо́га воплоти́вшагося.

В коне́ц у́трени:

От Де́вы возсия́вый ми́ру, Христе́ Бо́же,/ сы́ны Све́та То́ю показа́вый, поми́луй нас.

В понеде́льник ве́чера и во вто́рник на Бог Госпо́дь:

Ско́рый Твой покро́в, и по́мощь,/ и ми́лость покажи́ на рабы́ Твоя́,/ и во́лны, Чи́стая, укроти́ су́етных по́мыслов,/ и па́дшую мою́ ду́шу возста́ви, Богоро́дице:/ вем бо, вем, Де́во,/ я́ко мо́жеши, ели́ка и хо́щеши.

В коне́ц у́трени:

Ма́ти Бо́жия Пресвята́я, стено́ христиа́н,/ изба́ви лю́ди Твоя́ обы́чно, зову́щия Ти приле́жно,/ сопроти́вися сра́мным и го́рдым по́мыслом, да вопие́м Ти:/ ра́дуйся, Присноде́во.

Во вто́рник ве́чера и в сре́ду на Бог Госпо́дь:

Кресто́м Сы́на Твоего́, Богоблагода́тная,/ и́дольская пре́лесть вся упраздни́ся/ и де́монская кре́пость попра́ся./ Сего́ ра́ди, ве́рнии, по до́лгу Тя при́сно пое́м и благослови́м/ и, Богоро́дицу вои́стинну испове́дающе Тя, велича́ем.

В коне́ц у́трени: От Де́вы возсия́вый ми́ру:

В сре́ду ве́чера и в четверто́к на Бог Госпо́дь:

Стра́нное Де́вы та́инство ми́ру показа́ся спаси́тельное:/ от Ней бо роди́лся еси́ без се́мене/ и пло́тию показа́лся еси́ без истле́ния,/ всех ра́досте,/ Го́споди, сла́ва Тебе́.

В коне́ц у́трени: Ма́ти Бо́жия Пресвята́я:

В четверто́к ве́чера и в пято́к на Бог Госпо́дь: Кресто́м Сы́на Твоего́:

В коне́ц у́трени: От Де́вы возсия́вый ми́ру:

В пято́к ве́чера и в суббо́ту на Бог Госпо́дь:

Ра́дуйся, две́ре Госпо́дня непроходи́мая;/ ра́дуйся, стено́ и покро́ве притека́ющих к Тебе́;/ ра́дуйся, необурева́емое приста́нище и Неискусобра́чная,/ ро́ждшая пло́тию Творца́ Твоего́ и Бо́га,/ моля́щи не оскудева́й о воспева́ющих/ и кла́няющихся Рождеству́ Твоему́.

В коне́ц у́трени: От Де́вы возсия́вый ми́ру:

Глас 6

В неде́лю ве́чера и в понеде́льник на Бог Госпо́дь:

Нача́ло спасе́ния/ Гаврии́лово провеща́ние к Де́ве бы́сть,/ слы́ша бо, е́же ра́дуйся, и не убеже́ целова́ния,/ не усумне́ся, я́ко Са́рра в се́ни,/ но си́це глаго́лаше:/ се раба́ Госпо́дня,/ бу́ди Мне по глаго́лу твоему́.

В коне́ц у́трени:

Арха́нгельское сло́во прия́ла еси́,/ и Херуви́мский престо́л показа́лася еси́,/ и на объя́тиих Твои́х носи́ла еси́, Богоро́дице,/ Наде́жду душ на́ших.

В понеде́льник ве́чера и во вто́рник на Бог Госпо́дь:

Упова́ние ми́ра,/ Блага́я Богоро́дице Де́во,/ Твое́ и еди́но держа́вное предста́тельство про́сим:/ умилосе́рдися на безпредста́тельственныя лю́ди,/ моли́ Ми́лостиваго Бо́га/ изба́вится душа́м на́шим от вся́каго преще́ния,/ Еди́на Благослове́нная.

В коне́ц у́трени:

Никто́же, притека́яй к Тебе́,/ посра́млен от Тебе́ исхо́дит,/ Пречи́стая Богоро́дице Де́во,/ но про́сит благода́ти/ и прие́млет дарова́ние к поле́зному проше́нию.

Во вто́рник ве́чера и в сре́ду на Бог Госпо́дь:

Богоро́дице Де́во,/ моли́ Сы́на Твоего́,/ во́лею пригвозди́вшагося на Кресте́/ и мир от пре́лести свобо́ждшаго, Христа́ Бо́га на́шего,/ поми́ловати души́ на́ша.

В коне́ц у́трени:

Пре́жде век от Отца́ без ма́тере рожде́нна,/ Сы́на и Сло́ва Бо́жия,/ в после́дняя ле́та родила́ еси́/ воплоти́вшагося от чи́стых крове́й Твои́х, Богороди́тельнице, без му́жа./ Его́же моли́/ дарова́тися нам грехо́в оставле́нию пре́жде конца́.

В сре́ду ве́чера и в четверто́к на Бог Госпо́дь:

Свята́я Влады́чице,/ Чи́стая Бо́га на́шего Ма́ти,/ всех Творца́ неизрече́нно ро́ждшая,/ моли́ со апо́столы свяще́нными всегда́ бла́гость Его́,/ страсте́й нас изба́вити/ и оставле́ние нам да́ти грехо́в.

В коне́ц у́трени:

Вели́ких дарова́ний,/ Чи́стая Де́во Богома́ти,/ Ты сподо́билася еси́,/ я́ко родила́ еси́ пло́тию/ Еди́наго от Тро́ицы, Христа́ Жизнода́вца,/ во спасе́ние душ на́ших.

В четверто́к ве́чера и в пято́к на Бог Госпо́дь: Богоро́дице Де́во, моли́ Сы́на Твоего́:

В коне́ц у́трени: Пре́жде век от Отца́ без ма́тере:

В пято́к ве́чера и в суббо́ту на Бог Госпо́дь:

Предповеству́ет Гедео́н зача́тие/ и сказу́ет Дави́д Рождество́ Твое́, Богоро́дице:/ сни́де бо, я́ко до́ждь на руно́,/ Сло́во во чре́во Твое́,/ и прозябла́ еси́ без се́мене,/ земле́ свята́я, ми́ра Спасе́ние,/ Христа́ Бо́га на́шего, Благода́тная.

В коне́ц у́трени: Пре́жде век от Отца́ без ма́тере:

Глас 7

В неде́лю ве́чера и в понеде́льник на Бог Госпо́дь:

Богоро́дице Де́во Нескве́рная,/ Сы́на Твоего́ моли́ с Го́рними си́лами/ проще́нию прегреше́ний/ нам пре́жде конца́ дарова́тися,/ ве́рно Тя сла́вящим.

В коне́ц у́трени:

Превозшла́ еси́ си́лы Небе́сныя,/ зане́ храм показа́лася еси́ Боже́ственный,/ Благослове́нная Богоро́дице,/ я́ко ро́ждшая Христа́,/ Спа́са душ на́ших.

В понеде́льник ве́чера и во вто́рник на Бог Госпо́дь:

Ра́дуйся, Тебе́ приво́дим, Богоро́дице,/ А́нгелов бо вы́шшая показа́лася еси́,/ Бо́га ро́ждшая.

В коне́ц у́трени:

Умири́ моли́твами Богоро́дицы жи́знь на́шу,/ вопию́щих Ти:/ Ми́лостиве Го́споди, сла́ва Тебе́.

Во вто́рник ве́чера и в сре́ду на Бог Госпо́дь:

Распе́ншагося за ны Христа́ Бо́га/ и разруши́вшаго сме́рти держа́ву,/ непреста́нно моли́,/ Богоро́дице Де́во,/ да спасе́т души́ на́ша.

В коне́ц у́трени:

Изба́ви, Богоро́дице, от содержа́щих нас грехо́в,/ я́ко ина́го упова́ния, ве́рнии, не и́мамы ра́зве Тебе́/ и от Тебе́ ро́ждшагося Бо́га.

В сре́ду ве́чера и в четверто́к на Бог Госпо́дь:

Плод чре́ва Твоего́, Пречи́стая,/ проро́ков е́сть и зако́на исполне́ние./ Тем Тя, Богоро́дицу,/ в ве́дении сла́вяще,/ благоче́стно велича́ем.

В коне́ц у́трени:

Плод чре́ва Твоего́, Богоневе́сто,/ челове́ком показа́ся спасе́ния хода́тайственный./ Тем Тя, Богоро́дицу,/ ра́зумом и язы́ком сла́вяще,/ ве́рнии, велича́ем.

В четверто́к ве́чера и в пято́к на Бог Госпо́дь: Распе́ншагося за ны Христа́ Бо́га:

В коне́ц у́трени: Изба́ви, Богоро́дице:

В пято́к ве́чера и в суббо́ту на Бог Госпо́дь:

Я́ко на́шего воскресе́ния сокро́вище,/ на Тя наде́ющияся, Всепе́тая,/ от ро́ва и глубины́ прегреше́ний возведи́,/ Ты бо пови́нныя греху́ спасла́ еси́,/ ро́ждшая Спасе́ние на́ше:/ Я́же пре́жде рождества́ Де́ва, и в рождестве́ Де́ва,/ и по рождестве́ па́ки пребыва́еши Де́ва.

В коне́ц у́трени:

Ра́дуйся, Невмести́маго в Небесе́х/ вмести́вшая во утро́бе Твое́й;/ ра́дуйся, Де́во, проро́ков пропове́дание,/ Е́юже возсия́ Емману́ил;/ ра́дуйся, Ма́ти Христа́ Бо́га.

Глас 8

В неде́лю ве́чера и в понеде́льник на Бог Госпо́дь: Ра́дуйся, А́нгелом Ра́дость ми́ра прие́мшая;/ ра́дуйся, ро́ждшая Творца́ Твоего́ и Го́спода;/ ра́дуйся, сподо́бльшаяся бы́ти Ма́ти Бо́жия.

В коне́ц у́трени:

Ра́дуйся, Врата́ Царя́ Сла́вы,/ я́же Вы́шний Еди́н про́йде/ и Еди́ну запеча́тану сохрани́/ во спасе́ние душ на́ших.

В понеде́льник ве́чера и во вто́рник на Бог Госпо́дь:

Недви́жимое утвержде́ние ве́ры/ и честны́й дар душ на́ших,/ Богоро́дицу пе́сньми велича́ем, ве́рнии:/ ра́дуйся, Ка́мень Жи́зни во чре́ве Твое́м вмести́вшая;/ ра́дуйся, конце́й наде́ждо, скорбя́щих заступле́ние;/ ра́дуйся, Неве́сто Неневе́стная.

В коне́ц у́трени:

Де́во Пречи́стая, спаси́ ны моли́твами Твои́ми,/ дви́жущи утро́бу ма́тернюю,/ Сы́ну Твоему́ и Бо́гу на́шему.

Во вто́рник ве́чера и в сре́ду на Бог Госпо́дь:

А́гнца, и Па́стыря, и Спа́са ми́ра, на Кресте́ зря́щи,/ Ро́ждшая Тя, глаго́лаше, слезя́щи:/ мир у́бо ра́дуется, прие́мля избавле́ние,/ утро́ба же Моя́ гори́т, зря́щи Твое́ распя́тие,/ е́же за всех терпи́ши, Сы́не и Бо́же Мой.

В коне́ц у́трени:

Плод чре́ва Твоего́, Пречи́стая,/ проро́ков е́сть и зако́на исполне́ние./ Тем Тя, Богоро́дицу, в ве́дении сла́вяще, благоче́стно велича́ем.

В сре́ду ве́чера и в четверто́к на Бог Госпо́дь:

Мы́сленная врата́ Жи́зни, Пречи́стая Богоро́дице,/ притека́ющия к Тебе́ ве́рно изба́ви от бед:/ да сла́вим пресвято́е Рождество́ Твое́ во спасе́ние душ на́ших.

В коне́ц у́трени: Де́во Пречи́стая, спаси́ ны:

В четверто́к ве́чера и в пято́к на Бог Госпо́дь: А́гнца, и Па́стыря:

В коне́ц у́трени: Плод чре́ва Твоего́, Пречи́стая:

В пято́к ве́чера и в суббо́ту на Бог Госпо́дь:

И́же нас ра́ди рожде́йся от Де́вы/ и распя́тие претерпе́в, Благи́й,/ испрове́ргий сме́ртию сме́рть/ и Воскресе́ние явле́й я́ко Бог,/ не пре́зри, я́же созда́л еси́ руко́ю Твое́ю,/ яви́ человеколю́бие Твое́, Ми́лостиве,/ приими́ ро́ждшую Тя Богоро́дицу, моля́щуюся за ны,/ и спаси́, Спа́се наш, лю́ди отча́янныя.

В коне́ц у́трени: Де́во Пречи́стая, спаси́ ны: