Минея. Январь

21-й день 22-й день 23-й день

22-й день

Свята́го апо́стола Тимофе́я и свята́го преподобному́ченика Анаста́сия Пе́рсскаго

На Го́споди, воззва́х: стихи́ры апо́стола, глас 1.

Подо́бен: Всехва́льнии му́ченицы:

Луча́ми Ду́ха я́ве ты просвеща́емь/, священноявле́нне Тимофе́е/, светле́йший я́ко свети́льник яви́лся еси́,/ обтека́я всю зе́млю и просвеща́я благода́тию/. И ны́не моли́ся дарова́ти душа́м на́шим/ мир и ве́лию ми́лость.

Богому́дре Тимофе́е/, сла́дости пото́к пил еси́/ и Богому́дренно напои́л еси́/ ра́зума Бо́жия те́пле жела́ющия/, Христу́ подража́я/. К Нему́же ны́не ра́достно отше́л еси́/, сла́ву созерца́я Тро́ицы пресве́тлую/ и мир безмерноси́льный.

Па́влу повину́яся/, писа́нием бесе́дуя Ду́ха,/ светосия́нен весь был еси́/, де́латель неску́ден/ и тепл уго́дник Госпо́день, всему́дре/, целому́дренне, благоче́стне, о Тимофе́е! жи́тельствовав/, и венце́в сподо́бился еси́ побе́ды/, я́ко зако́нный страда́лец.

Стихи́ры преподобному́ченика, глас и подо́бен то́йже:

Му́чеников похвала́/, све́тлы возста́вив побе́ды на пре́лесть/, тезоимени́тное, всеблаже́нне, благосла́вие/ твои́м зва́нием но́сиши, всю́ду обноси́мь/, я́ко тверд победи́тель, Анаста́сие/, и ны́не возста́ви от грехо́вных паде́ний/ ве́рою чту́щия па́мять твою́.

Му́чениче Анаста́сие/, све́тлую возста́вив побе́ду на лесть/, восприя́л еси́ сугу́б вене́ц/ по́стничества твоего́, и тве́рдаго страда́ния/, и да́же до сме́рти противле́ния/, и чуде́с тебе́ досто́йно де́йство/ Влады́ка Христо́с дарова́.

Ми́ра концы́ твоя́ ны́не пою́т чудеса́/, чудоде́йственне Анаста́сие/, чудоде́йствиями бо возме́здив, Христо́с украси́ тя/, му́ки Его́ ра́ди претерпе́вша/, и по сме́рти безсме́ртнаго удосто́ился еси́/ благосла́вия и блаже́нства.

Сла́ва, глас 8:

Бо́гом предопределе́н/ и му́дрому Па́влу учени́к быв/, научи́лся еси́ Боже́ственным, до́бре жи́тельствовав/ и ве́ру да́же до кро́ве несомне́нно соблю́д/, и ве́рен архиере́й показа́лся еси́/, Тимофе́е апо́столе/. Те́мже идолонеи́стовствующия обличи́л еси́/, дреко́лием и ка́мением ураня́емь/, прия́л еси́ муче́ния вене́ц/. Сего́ ра́ди, всеблаже́нне, моли́ся о нас/, ве́рою соверша́ющих всечестну́ю па́мять твою́.

И ны́не, Богоро́дичен и́ли Крестобогоро́дичен.

Подо́бен: Му́ченицы Госпо́дни:

Ю́ница Нескве́рная/, Юнца́ ви́дящи, на Дре́ве пригвожда́ема во́лею/, рыда́ющи жа́лостне,-/ увы́ Мне,– вопия́ше, – люби́мейшее Ча́до!/ Что Ти сонм воздаде́ безблагода́тный евре́йский/, хотя́ Мя обезча́детвовати от Тебе́, Вселюбе́зне?

На стихо́вне Окто́иха, таже глаго́лем припе́в: Во всю зе́млю изы́де веща́ние их/ и в концы́ вселе́нныя глаго́лы их.

И пое́м стихи́ру самогла́сну апо́стола, глас 1:

Свети́льника ве́рных и апо́стола/, во Ева́нгелии просия́вшего Тимофе́я/, прииди́те, лю́дие, воспои́м, глаго́люще/: ра́дуйся, кра́сное ве́ры прозябе́ние,/ Боже́ственнаго Па́вла сынотворе́ния/. Ра́дуйся, честны́й зна́телю доброде́телей/, многому́драя уста́ Сло́ва/. Ра́дуйся, конце́в Боговеща́нная цевни́це/. Ра́дуйся, ве́ры сто́лпе и Це́ркве утвержде́ние.

Сла́ва, глас 2:

Возвели́чил еси́, Христе́/, я́ко во Иуде́и и в Вавило́не/ честна́го Креста́ си́лу/, уве́деша бо его́ ра́ди животво́рнаго воста́ния пра́здник/, и бысть им плене́нный свободи́тель идолонеи́стовства/ и му́ченик неопи́сан чуде́с/, ны́не благохва́льный Анаста́сий, сла́вный страда́лец/, со А́нгелы лику́я/ и моля́ся о душа́х на́ших.

И ны́не, Богоро́дичен и́ли Крестобогоро́дичен.

Подо́бен: Егда́ от Дре́ва:

Боле́зни претерпе́вши мно́гия/ в распя́тии Сы́на и Бо́га Твоего́, Пречи́стая/, стоня́ше, слезя́щи и восклица́ющи/: увы́ Мне, Ча́до сла́дкое/, без пра́вды ка́ко стра́ждеши/, хотя́ изба́вити я́же от Ада́ма земноро́дныя?/ Те́мже, Пречи́стая Де́во, Тебе́ мо́лим ве́рою/: ми́лостива нам Того́ соде́лай.

Тропа́рь апо́стола, глас 4:

Бла́гости научи́вся и трезвя́ся во всех/, благо́ю со́вестию священноле́пно обо́лкся/, поче́рпл еси́ от сосу́да избра́ннаго неизрече́нная/ и, ве́ру соблю́д, ра́вное тече́ние соверши́л еси́/, апо́столе Тимофе́е/. Моли́ Христа́ Бо́га/ спасти́ся душа́м на́шим.

Тропа́рь му́ченика, глас то́йже:

Му́ченик Твой, Го́споди, Анаста́сий/ во страда́нии свое́м вене́ц прия́т нетле́нный от Тебе́, Бо́га на́шего,/ име́яй бо кре́пость Твою́/, мучи́телей низложи́,/ сокруши́ и де́монов немощны́я. де́рзости/. Того́ моли́твами/ спаси́ ду́ши на́ша.

На у́трени

Кано́н Окто́иха еди́н и святы́х два, на 8. Кано́н апо́стола, его́же краегране́сие: Тимофе́я апо́стола пе́сньми честву́ю. Творе́ние Феофа́ново, глас 1.

Песнь 1

Ирмо́с: Твоя́ победи́тельная десни́ца/ боголе́пно в кре́пости просла́вися/: та бо, Безсме́ртне/, я́ко всемогу́щая, проти́вныя сотре́/, изра́ильтяном путь глубины́ новосоде́лавшая.

Воста́ния страсте́й и неве́дения мрак/ моли́твами твои́ми, блаже́нне, разори́ све́тлою безстра́стия благода́тию/, я́ко да Богоявле́нна ны́не досто́йно воспою́ тя.

Ви́дев Предве́дец и Бог твоего́ ума́ добро́ту, Тимофе́е/, Боже́ственным апо́столом тя, сослужи́теля удосто́ив, показа́/, му́дрым про́мыслом о нас промышля́я.

Еди́но Пресу́щественное Нача́ло, проразумева́ющее вся, ве́мы/: от е́ллин бо апо́стол, Христо́вою просвеще́н благода́тию/, ны́не Боже́ственному Па́влу счисля́ется Тимофе́й.

Му́ченика

У́тром светле́йшим Твоего́, Христе́, воста́ния осиява́емь/, сего́ тезоимени́тый, от восто́ка устреми́вся,/ я́ко со́лнце, ны́не Це́рковь озаря́ет чудесы́.

Боже́ственный любве́ испо́лнен/, терпели́вно му́ки претерпе́л еси́, му́чениче Анаста́сие/, и Христу́, по́стническими укра́шен добро́тами, ра́дуяся, приве́лся еси́/, благово́нная же́ртва, блаже́нне.

Богоро́дичен: Ра́дуйся, благода́ти исто́чниче,/ ра́дуйся, ле́ствице и две́ре Небе́сная/, ра́дуйся, све́щниче, и ста́мно злата́я, и горо́ несеко́мая,/ Я́же Жизнода́вца Христа́ ми́ру Ро́ждшая.

Песнь 3

Ирмо́с: Еди́не, ве́дый челове́ческаго существа́ не́мощь/и ми́лостивно в не вообра́жся,/препоя́ши мя с высоты́ си́лою/, е́же вопи́ти Тебе́, Святы́й/: одушевле́нный хра́ме неизрече́нный сла́вы Твоея́, Человеколю́бче.

Излия́ся, всеблаже́нне, бога́тно благода́ть во устна́х твои́х/ и ре́ки догма́тов источи́, Це́рковь Христо́ву напая́ющия/ и многопло́ден принося́щий плод,/ Тимофе́е Христопропове́дниче, Богому́дре апо́столе.

Но́ги твоя́ проро́чески, всеблаже́нне, украси́шася,/ всяк бо ум, я́ве преиму́щий, благовести́л еси́ мир, всему́дре/, дре́внюю разруши́вшаго челове́ков брань Спа́са всех и Го́спода.

Умертви́в твоя́ у́ды плотски́я/, Сло́ву повину́л еси́ ху́ждшая, блаже́нне Тимофе́е, влады́чество пода́в лу́чшему/, и, стра́сти удержа́в, ду́шу уясни́л еси́,/ наставля́емь Па́вловыми уче́нии.

Му́ченика

Стезю́ ше́ствовав те́сную/, пе́рвее у́бо поще́нием к му́ченической сла́ве предуспе́л еси́/, муче́ния ра́ди наслажде́ние обре́т боле́зньми/, сла́вне му́чениче Анаста́сие, Небе́сную красоту́ прие́мля.

Боле́знь страда́ния твоего́ во всю изы́де вселе́нную, му́чениче непобеди́ме/: проти́ву бо греха́ да́же до кро́ве сопроти́вився/, победоно́сец был еси́ и венце́м побе́ды украси́лся еси́.

Богоро́дичен: Из Тебе́ прозябе́, Чи́стая, Цвет неувяда́емый/, благоуха́ющий все челове́чество Боже́ственным ми́ром естества́ Своего́/, И́же Отцу́ Собе́значальный,/ и из Тебе́ быв под ле́том, Де́во Всенепоро́чная.

Седа́лен, глас 4.

Подо́бен: Ско́ро предвари́:

Боже́ственными дарова́нии укра́шен/, удобри́л еси́, сла́вне, Ефе́сскую све́тлую митропо́лию, апо́столе,/ пропове́дник бо показа́лся еси́/, с Па́влом Боже́ственным всем провозвести́л еси́ спаси́тельное сло́во/. Те́мже торжеству́ем ве́рою па́мять твою́.

Сла́ва, му́ченика, глас то́йже:

Сла́вою соверше́нства яви́лся еси́ прече́стен,/ я́ко Боже́ственными просвети́в светозаре́нии ум и позна́в Креста́ кре́пость/, преподо́бен посто́м и кровьми́ му́ченик был еси́, Богому́дренне, Анаста́сие блаже́нне/. Те́мже и чуде́с тобо́ю то́чит дар , Христо́с.

И ны́не, Богоро́дичен:

Де́во Всенепоро́чная, я́же Пресу́щнаго Бо́га ро́ждшая,/ со безпло́тными Того́ непреста́нно моли́/ оставле́ние прегреше́ний, и исправле́ние жития́ да́ти нам пре́жде конца́/, ве́рою и любо́вию пою́щим Тя по до́лгу, Еди́на Всепе́тая.

Крестобогоро́дичен:

На Кресте́ Тя возвы́шена я́ко узре́/ Пречи́стая Ма́ти Твоя́, Сло́ве Бо́жий/, ма́терски рыда́ющи, веща́ше/: что но́вое и стра́нное сие́ чу́до, Сы́не Мой?/ Ка́ко, Жизнь всех, вкуша́еши смерть/, оживи́ти ме́ртвыя хотя́, я́ко Милосе́рд?

Песнь 4

Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма/, из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.

Зако́нно, всеблаже́нне, пострада́ти изво́лив,/ воздержа́нием всеконе́чным треволне́ния страсте́й уму́ покори́л еси́/, доброде́тели прие́м соверше́ние,/ великопропове́дниче Богому́дре Тимофе́е.

Облиста́в, я́ко со́лнце, Па́вел, испусти́, я́коже зарю́ све́тлу/, вселе́нную бога́тным све́том просвеща́я,/ светоявле́нно тя, Богоявле́ние Тимофе́е, к наставле́нию на́шему и утвержде́нию.

Возжела́в те́пле жела́ний кра́йнейшее и любо́вию сраствори́вся/, раче́нием на другу́ю жизнь преше́л еси́, Богоприя́тне/, всегда́ твоего́ с озира́я Рачи́теля и Того́ виде́ния насыща́яся.

Му́ченика

Ничто́же тя су́щия ко Христу́ любве́ отлучи́/: ни удо́в отсече́ние, ни ран преще́ние/, ни меч, ни смерть/, но ниже́ огнь, ниже́ глад/, Анаста́сие, Небе́снаго ликова́ния купносе́льниче.

Со усе́рдием на ра́мо крест твой взем/, после́довал еси́ Христо́вым спаси́тельным за́поведей/ и, Сего́ быв подража́тель да́же до сме́рти, всеизря́днейше,/ ны́не наслажда́ешися Того́ све́тлости.

Богоро́дичен: Ра́дость Тебе́ я́ве с Небесе́ прише́д, – Архистрати́г, Чи́стая, благовести́, рек/: Бог изы́дет с пло́тию из Тебе́, Де́во Всечи́стая,/ во спасе́ние любо́вию пою́щих Тя.

Песнь 5

Ирмо́с: Бог Сын ми́ра, Оте́ц щедро́т/, Вели́каго Сове́та Твоего́ А́нгела/, мир подава́юща, посла́л еси́ нам/: тем, Богоразу́мия к све́ту наста́вльшеся,/ от но́щи у́тренююще, славосло́вим Тя, Человеколю́бче.

Пе́рваго и всех Вино́внаго Све́та невеще́ственными сия́нии просвеща́емь/, мир уясни́л еси́ пропове́данием честны́м/, свети́льник благоче́стия, жи́зни сло́во преиме́ния77 проявле́нно яви́лся еси́/, священнотаи́нниче всеблаже́нне.

Па́вла Боже́ственнаго и́стинный учени́к учи́теля стопа́м после́дует/, сего́ се́я уче́ния ве́рным,/ и́миже благоче́стия к све́ту наставля́еми/, из но́щи у́тренююще, славосло́вим Тя, Человеколю́бче.

Просвеще́нием Па́вел вторы́й явля́ешися/, служа́щий пе́рвей све́тлости, сея́ позна́нием просвети́ нас/. Сего́ сво́инник Тимофе́й яви́ся/, Того́ всеору́жием победи́тельно огражда́емь.

Му́ченика

Дре́вле хваля́йся безме́рно, и зе́млю претя́ объя́ти,/ и всу́е гордя́ся, му́дре, все потреби́ти/, твои́ми благому́жествы, Анаста́сие му́чениче, попира́ется богопроти́вный.

Зако́нно пострада́в му́ченик Христо́в и победи́в,/ страда́ний возме́здия, чуде́с де́йство прие́млет я́ве/: неду́ги бо цели́т и де́моны отгоня́ет/, Христо́вою си́лою чудоде́йствуя, Анаста́сий.

Богоро́дичен: Прокля́тие Е́вы, всех ма́тере, Твои́м Рождество́м, Де́во, упраздни́ла еси́/, ми́ру благослове́ние израсти́вши, Христа́/: тем Тя, ра́дующеся, и усты́, и язы́ком, Богоро́дицу вои́стинну испове́дающе, велича́ем.

Песнь 6

Ирмо́с: Из утро́бы Ио́ну младе́нца изблева́ морски́й зверь/, якова́ прия́т/; в Де́ву же все́льшееся Сло́во/ и плоть прие́мшее про́йде, сохра́ншее нетле́нну/. Его́же, бо не пострада́ истле́ния/, Ро́ждшую сохрани́ неврежде́нну.

Колесни́ца Бо́жия яви́лся еси́, Тимофе́е/, нося́щи Того́ Боже́ственное И́мя/, пред лице́м безбо́жных мучи́телей, Богоприя́тне, не ужаса́яся сих свере́пства/: ты бо в непобеди́мую Спа́са кре́пость оде́ялся еси́.

Вене́ц благоле́пен прия́л еси́, пребога́те Тимофе́е, Богому́дре апо́столе/, и диади́мою Ца́рствия досто́йно обложи́лся еси́/, и предста́л еси́ престо́лу Влады́ки твоего́/, с Па́влом ра́дуяся в се́лех Небе́сных, блаже́нне.

Ми́ром у́мнаго, Тимофе́е всече́стне, пло́тию нас ра́ди истоще́ннаго Христа́ обонява́емь/, благово́ние Сего́ прия́л еси́ и пре́дал еси́ ве́рою тебе́ притека́ющим,/ таи́нниче неизрече́нных свя́те, Того́ мы́сленныя любве́.

Му́ченика

Заре́ю Кре́стного я́ве просвеща́емь, пре́лести мрак разреши́л еси́ и победи́л еси́/, спле́тся с мучи́телем, всесла́вне/, и, ра́дуяся, прия́л еси́ твоя́ победи́тельная,/ му́чениче Христо́в Анаста́сие/, лику́я с му́ченическими во́инствы.

Богоро́дичен: Весь лик от Бо́га науче́н проро́ческий/ Твое́ прорече́ та́инство несказа́ннаго и Боже́ственнаго зача́тия/, е́же из Тебе́ Боже́ственнаго Сло́ва, Ма́ти Де́во/: Ты бо и́стиннейший и дре́вний сове́т яви́ла еси́.

Конда́к, глас 1.

Подо́бен: Лик А́нгельский:

Боже́ственнаго ученика́ и спутеше́ственника Па́влова Тимофе́я/, ве́рнии, воспои́м вси/, с сим почита́юще му́драго Анаста́сия/, возсия́вшаго от Перси́ды, я́ко звезду́/, и отгоня́щаго душе́вныя на́ша стра́сти/ и неду́ги теле́сныя.

И́кос:

Со́лнца мно́жае возсия́ ле́тнее святы́х торжество́,/ и ве́рныя просвети́, и де́монскую тьмообра́зную си́лу отгна́ всю/, и неду́ги очи́сти, и проше́ния прося́щих испо́лни/. Те́мже притека́ю аз, окая́нный/, и молю́ся от боле́зни стра́стнаго моего́ се́рдца/, да прииму́, я́же хощу́, и обря́щу, я́же тре́бую/: премене́ние печа́ли, и житие́ безпеча́льно, и прегреше́ний оставле́ние,/ и Боже́ственное врачева́ние душе́вное и теле́сное.

Песнь 7

Ирмо́с: Тебе́, у́мную, Богоро́дице, пещь,/ разсмотря́ем, ве́рнии/, я́коже бо о́троки спасе́ три Превозноси́мый/, мир обнови́, во чре́ве Твое́м всеце́л,/ хва́льный отце́в Бог и препросла́влен.

Слико́вник Небе́снаго чи́на ты по досто́инству быв, весели́шися ра́достно/, зари́ светода́тельныя, блаже́нне, насыща́яся, священнотаи́нниче Тимофе́е,/ хва́льнаго возвеща́я Бо́га и препросла́вленнаго.

Священноде́йствуя Христо́во Ева́нгелие/, от доброде́тельных высо́т Богопи́санная Посла́ния Па́вел Боже́ственнейший, ра́дуяся, посла́/ я́ко ученику́ тебе́, Тимофе́е,/ хва́льнаго возвеща́я Бо́га и препросла́вленнаго.

Немощно́е пло́ти укрепля́ше благомо́щием души́/: я́ко безтеле́сен бо, на земли́ ты жи́тельствовав,/ му́ченик был еси́, во главу́ сокруша́емь/, священноде́телю та́инств Бо́жиих, Богоблаже́нне.

Му́ченика

Страда́лец ве́рныя поуща́ет/, я́ве о́браз показа́в му́жество свое́ Боже́ственней ны́не подража́ти стра́сти во́льней/, ю́же за ны претерпе́ хва́льный отце́в Бог и препросла́влен.

Равномо́щная Тро́ица ве́руется благоче́стия рачи́телем/: до́блии бо страда́льцы за Сию́ пострада́ша/, кро́ви излива́юще, му́ченически борю́щеся/, и ду́ши предаю́ще я́ве, и убива́еми.

Богоро́дичен: Ра́дуйся, Чи́стая/, из Тебе́ про́йде Па́стырь, И́же во Ада́мову ко́жу оде́явся,/ вои́стинну превозноси́мый во всего́ мя, челове́ка, за благоутро́бие непости́жное/, хва́льный отце́в Бог и препросла́влен.

Песнь 8

Ирмо́с: Чу́да преесте́ственнаго/ росода́тельная изобрази́ пещь о́браз/: не бо, я́же прия́т, пали́т ю́ныя/, я́ко ниже́ огнь Божества́ Де́вы/, в Ню́же вни́де утро́бу/. Тем, воспева́юще, воспое́м/: да благослови́т тварь вся Го́спода/ и превозно́сит во вся ве́ки.

Стоя́ния А́нгельскаго сподобля́емь/, показа́лся еси́, Тимофе́е блаже́нне, Небе́сных чино́в/, научи́вся бо преесте́ственно, све́тлости сих подража́л еси́, му́дре/. С ни́миже воспева́еши, веселя́ся/: да благослови́т тварь вся Го́спода и превозно́сит во вся ве́ки.

Си́лою оде́явся с Небесе́, я́ко апо́стол, яви́лся еси́, Богому́дре/, наше́дшею страннообра́зно ученико́м Сло́ва и самови́дцем, о Тимофе́е!/ С ни́миже воспева́еши, ра́дуяся/: да благослови́т тварь вся Го́спода и превозно́сит во вся ве́ки.

Стал еси́ жела́ния я́ве, всеблаже́нне, кра́йнейшаго,/ я́ко дости́гл до́брых, Тимофе́е Богопропове́дниче,/ всегда́ осия́емь све́том Тро́йческим я́сно/, и ны́не воспева́еши, веселя́ся/: да благослови́т тварь вся Го́спода и превозно́сит во вся ве́ки.

Му́ченика

От земли́ ты к Небесе́м венцено́сец, му́чениче Анаста́сие, возлете́л еси́/, ле́сти вся́кия де́монския избе́г/, и попра́л еси́ и́дольская чти́лища/. Те́мже и зове́ши ны́не, ра́дуяся/: да благослови́т тварь вся Го́спода и превозно́сит во вся ве́ки.

Омочи́л еси́ му́ченическими твои́ми кровьми́ твою́ оде́жду, пребога́те му́чениче/, крест же, я́ко скиптр, нося́/, со Христо́м ца́рствуеши во ве́ки, Анаста́сие,/ Ему́же ны́не воспева́еши, ра́дуяся/: да благослови́т тварь вся Го́спода и превозно́сит во вся ве́ки.

Богоро́дичен: Арха́нгельскими песносло́вии сла́вимый, Бога́тное Сло́во нас ра́ди обнища́/, Тя Ма́терь, добро́ту Иа́ковлю, Благослове́нная, избра́в/. Те́мже, воспева́юще, пое́м/: да благослови́т тварь вся Го́спода и превозно́сит во вся ве́ки.

Песнь 9

Ирмо́с: О́браз чи́стаго Рождества́ Твоего́/ огнепали́мая купина́ показа́ неопа́льная/, и ны́не на нас напа́стей свире́пеющую угаси́ти, мо́лимся, пещь,/да Тя, Богоро́дице/, непреста́нно велича́ем.

Рече́ние Дави́дово испо́лнися/, я́ко бо мо́лния, вселе́нней яви́лся еси́/, пропове́данием озаря́я концы́, всеприснопа́мятне блаже́нне Тимофе́е/, тем тя, Богоявле́ние, непреста́нно велича́ем.

Заре́ю светонача́льною, прему́дре/, Богонача́льным Трисо́лнечным осия́нием насыща́яся и чи́сто наслажда́яся,/ пою́щия тя, блаже́нне, спаса́й от мра́ка прегреше́ний,/ священнотаи́нниче всече́стне.

Ра́вна Тя Отцу́ и Ду́ху, Единоро́дне, пра́ве му́дрствующе, сла́вим/, уче́ньми апо́столов Твои́х, Влады́ко, утвержда́еми,/ Па́вла, пропове́дника Твоего́ смотре́ния, и Тимофе́я Богому́драго.

Му́ченика

Струя́ми твои́х крове́й, сла́вне, и́дольскую лесть всю погаси́л еси́/, исполне́ние же Це́ркве уясни́л еси́/, о не́йже моля́ся, всеизря́днейше, не преста́й Влады́це/, да тя вси блажи́м.

О, па́че сло́ва сла́вы твоея́/ и неизрече́ннаго Боже́ственнаго вои́стинну осия́ния!/ Его́же причасти́лся еси́ я́ко победи́тель, Анаста́сие, Влады́це Христу́ предстоя́/, Его́же и ны́не моли́ о нас, воспева́ющих тя.

Богоро́дичен: О, стра́шнаго Твоего́ чудесе́!/ Ты бо, Де́во Богоро́дице/, та́инство, пре́жде родо́в и пре́жде веко́в сокрове́нное в Бо́зе, вся созда́вшем,/ ро́ждши Бо́га Сло́ва несказа́нно, яви́ла еси́.

Свети́лен.

Подо́бен: Све́те неизме́нный:

Два свети́ла в ми́ре сия́ют светоно́сно/, Тимофе́й же вели́кий во Христо́вых апо́столех/ и Анаста́сий му́ченик во единообра́зных/, и́хже восхва́лим вку́пе.

Богоро́дичен:

Вси ве́рнии, Тя Хода́таицу ко из Тебе́ ны́не Ро́ждшемуся предлага́ем, Пресвята́я/, мы же лу́чшаго ра́ди сраспина́емся Сему́/. Те́мже не преста́й о нас моля́щи.

На стихо́вне Окто́иха.

Сла́ва, глас 5:

Преподо́бне о́тче/, победи́тель ми́дон и халде́ев быв мы́сленных/, всю Вавило́на пре́лесть низложи́в си́лою Креста́/, ни гла́дкостию сласте́й умягчи́лся еси́/, ни огня́ искуше́ний убоя́лся еси́/. Сего́ ра́ди Христо́с Бог наш/ почестьми́ победи́тельными тя венча́/. Те́мже, со А́нгелы предстоя́, ко Го́споду моли́ся,/ прося́ ми́ра и душа́м на́шим ве́лия ми́лости.

И ны́не, Богоро́дичен и́ли Крестобогоро́дичен.

Подо́бен: Ра́дуйся:

Егда́ Грозд, ненасажде́н сущ/, я́ко лоза́, отрасти́ла еси́/, узре́вши на Дре́ве пове́шена/, прободе́на же копие́м в Боже́ственная ре́бра, -/ что сие́, – глаго́лала еси́, – Сы́не и Бо́же Мой -/ Ка́ко, И́же неду́ги вся и стра́сти исцеля́яй/, стра́сти терпи́ши, Безстра́стен сый по естеству́ Боже́ственному?/ Что Тебе́ безблагода́тнии лю́дие/, Благоде́телю, сия́ возда́ша, вме́сто благодея́ний? -/вопия́ла еси́, Пречи́стая/. Но Того́ страстьми́ страсте́й мя свободи́ти моли́ непреста́нно/, я́ко да сла́влю Тя.

На литурги́и

Блаже́нны Окто́иха, на 4, и апо́стола песнь 3-я, на 4. Проки́мен, глас 8: Во всю зе́млю изы́де веща́ние их/, и в концы́ вселе́нныя глаго́лы их. Стих: Небеса́ пове́дают сла́ву Бо́жию: Апо́стол к Тимофе́ю, зача́ло 290, от полу́: Ча́до Тимофе́е, благодарю́ Бо́га: Аллилу́йя. Испове́дят Небеса́ чудеса́ Твоя́, Го́споди,/ и́бо и́стину Твою́ в Це́ркви святы́х. Ева́нгелие от Луки́, зача́ло 50. Прича́стен: Во всю зе́млю изы́де веща́ние их:

Святой апостол Тимофей

Любимый ученик апостола Павла, родился в г. Листре Ликаонской области (юго-восточная часть Малой Азии). Отец его был язычником, эллином, известным своим нечестием и враждебностью к христианам. Мать же и бабушка, еврейки по происхождению, отличались праведной жизнью. Истинную веру блаженный Тимофей воспринял от своей матери, сохранившей честное вдовство после смерти мужа.

Когда святой апостол Павел вместе с апостолом Варнавою прибыл в Листру (Деян. 14, 5–6) и совершил там чудо исцеления хромого, многие язычники обратились в христианство, в том числе и мать святого Тимофея, Евниния, овдовевшая к тому времени. Она с радостью приняла в свой дом святого апостола Павла.

Увидев в юноше Тимофее кротость и расположенность к добру и прозрев в нем благодать Божию, апостол Павел поручил его попечению искусных учителей, которые ознакомили юношу со Священным Писанием и истинами христианской веры. Вскоре апостол Павел, побитый камнями по наущению иудеев, ушел из Листры.

Вновь прибыв в Листру через несколько лет, апостол Павел в лице святого Тимофея нашел прекрасно образованного, известного добродетельной жизнью ученика, которого взял с собой на благовестив Слова Божия

Вместе со своим учителем святой Тимофей проповедовал в Ефесе и Коринфе, в различных городах Македонии, Италии и Испании. Вот как об этом свидетельствует апостол Павел во 2-м Послании к Тимофею: «Ты последовал мне в учении, житии, расположении, вере, великодушии, терпении, в гонениях, страданиях» (2Тим. 3,10–11). Во многих посланиях святой апостол Павел называет святого Тимофея своим братом. Святой Тимофей не превозносился этим и жил в смиренномудрии и строгом, иногда чрезмерном, соблюдении поста, так что учитель убеждал его впредь пить не одну воду, но ради частых недугов употреблять немного вина (1Тим. 5, 23).

Святой Тимофей был проницателен в рассуждении, быстр в ответах, искусно проповедовал Слово Божие, замечательно толковал Священное Писание. Видя ученика своего столь преуспевающим в добродетелях, святой апостол Павел поставил его сначала диаконом, затем пресвитером и, наконец, – епископом.

Во всей своей деятельности, несмотря на недуги и слабость тела, святой Тимофей обнаруживал величие духа. Достойно внимания, что он имел своим учителем также святого апостола Иоанна († нач.II в., память 26 сентября и 8 мая), возлюбленного ученика Христова, когда апостол Иоанн проповедовал в Ефесе. На епископской кафедре г. Ефеса святой Тимофей явился преемником апостола Иоанна, который был сослан на остров Патмос императором Домицианом (81–96). Здесь же, в Ефесе, спустя некоторое время, апостол Тимофей и пострадал за свое свидетельство об Иисусе Христе. Видя однажды скверные, постыдные пляски идолопоклонников во время языческой процессии по городу, святой Тимофей открыто изобличил нечестие богопротивного зрелища. Идолопоклонники жестоко избили апостола, попирая его ногами, и замучили до смерти (†ок. 97).

Христиане погребли тело святого мученика за городом, на месте, называемом по-гречески Лион.

В IV веке честные мощи святого апостола Тимофея, по повелению царя Констанция (337–361), были перенесены святым мучеником Артемием из Ефеса в Константинополь и положены в церкви во имя Святых Апостолов, рядом с мощами святых апостолов Луки и Андрея Первозванного.

Святой преподобномученик Анастасий Персянин

Первоначальное имя которого было Магундат, родился в Персии, в селении Раснуни. Отец его Вав был магом, знаменитым учителем чародейства, которому обучил и своего сына.

Когда пришла пора, юноша поступил на военную службу. В то время по всей Персии распространилась молва о славе и могуществе Животворящего Креста Господня. Святыня Креста Господня была захвачена персидским шахом Хозроем в Иерусалиме и вывезена в Персию, где находилась с 614 до 628 г. Крестное древо изумляло необычайными чудесами, так что многие говорили: «Бог христианский пришел в Персию». Прослышав об этом, юноша Магундат стал расспрашивать о земной жизни Спасителя. Знакомство с Евангельским повествованием затеплило в его душе огонь веры.

Когда полк, в котором служил Магундат, был послан на войну в Грецию и достиг христианского города Халкидона, юноша предпочел остаться жить с христианами в бедности и безвестности, нежели в богатстве и почете среди язычников Персии. Некоторое время Магундат жил в Иераполе (западная область Малой Азии), где был учеником у персахристианина, золотых дел мастера. Учитель рассказывал юноше о подвигах и жизни святых, изображенных на стенах церкви, куда они приходили молиться. Сердце Магундата воспламенилось любовью ко Христу, и он отправился в Иерусалим, чтобы принять там святое Крещение.

В Иерусалиме пресвитер великой церкви Воскресения Христова святой Илия по благословению святого Патриарха Модеста (614–628, 633–634) крестил Магундата с именем Анастасий. Блаженный Анастасий не только словами утверждал, но и кротким нравом обнаруживал, что желает иноческого звания. Пресвитер Илия отправил святого Анастасия в 620 году в один из иерусалимских монастырей. Под руководством настоятеля, мудрого старца, святой Анастасий получил наставление в иноческой жизни, научился греческому языку и пониманию Священных Книг. Блаженный Анастасий был ревностным иноком и охотно исполнял всякую монастырскую работу. Особенно он любил читать о страданиях святых исповедников Христовых, усердно моля Господа о том, чтобы ему самому сподобиться мученического венца.

После семи лет пребывания в монастыре, в канун светлого праздника Воскресения Христова, святому Анастасию во сне было видение светоносного мужа, который передал ему золотую чашу, наполненную вином, и сказал: «Возьми и пей». Это явилось для Святого знамением желаемой кончины. Святой Анастасий рассказал настоятелю о сонном видении. На другой день, приобщившись Святых Тайн во время Божественной литургии, святой Анастасий покинул монастырь. Он пришел в Кесарию Палестинскую, пробыл два дня в церкви Пречистой Богородицы и отправился поклониться в церковь святой и веехвальной мученицы Евфимии.

Кесарией в то время владели персы. Святой Анастасий увидел, как в доме одного перса занимались волшебством. Он стал с гневом пояснять, сколь противны Богу и вредны для людей чародейская хитрость и обольщение. Святой Анастасий убеждал персов обратиться ко Христу, поклоняться не тварному, видимому миру, а Создателю всего сущего – Единому Богу. Однако они не послушали его. Персидские воины, находившиеся неподалеку, думая, что святой Анастасий – лазутчик, схватили его и отправили к своему начальнику; тот повелел содержать святого под строгим присмотром в тюрьме.

В то время в Кесарию прибыл персидский хан Марзаван. Он захотел увидеть мученика и повелел привести его к себе на допрос. Святой Анастасий, три дня не принимавший пищи из рук тюремщиков, мужественно исповедал, что он, бывший маг и воин, оставил тьму идолопоклонства и стал христианином, обрел Истинный Свет, просвещающий и спасающий душу. Марзаван повелел возложить на святого железные цепи и отвести на каменотесные работы.

Угодник Божий с радостью переносил все труды ради имени Господа Иисуса Христа. Ночью, скованный с другим узником одной цепью, святой Анастасий молился не вставая, чтобы не разбудить своего напарника. Не один раз вызывал его к себе Марзаван, соблазняя, угрожая и истязая побоями. На уговоры Марзавана показать искусство волхвования святой Анастасий отвечал: «Сохрани меня Бог, я христианин и не хочу осквернять ни ума своего воспоминанием о волшебных хитростях, ни языка своего речью о них».

Настоятель монастыря, где постригся святой Анастасий, узнал о тяжких страданиях своего духовного сына и послал двух иноков с утешительным письмом, чтобы они тайно навещали его и ободряли.

Однажды один из соузников святого увидел двух Ангелов в блистающих одеждах, с золотою кадильницею, окруживших мученика и кадивших вокруг него. Тем временем Марзаван убедился, что ничем нельзя поколебать мученика, и отправил его к персидскому шаху Хозрою II (590–628). Святого Анастасия сопровождал один из иноков, присланных его духовным отцом.

По прибытии в Персию святой Анастасий был заключен в темницу в городе Вифсалии (Сергиополисе). Напрасно судьи пытались убедить Святого отречься от Христа, соблазняя его почестями, золотом и обещая сделать знатным сановником. На все это святой Анастасий отвечал: «Все это противно мне, как сор и нечистота. Могу ли я прельститься дарами царя временного и имеющего скоро погибнуть?»

Тогда шах Хозрой повелел предать святого еще более жестоким пыткам, В темнице его навещали и утешали тайные христиане, лобызая оковы и прося молиться за них. Спустя 15 дней шах осудил святого Анастасия на смерть вместе с другими узниками, числом около семидесяти, среди которых было много христиан.

Когда наступило утро, их вывели из темницы за город и там, на берегу реки, поодиночке удушили всех, спрашивая всякий раз святого Анастасия, что он выбирает – такую же смерть или отречение. После того как был убит святой Анастасий (†22 января 628), удавленный последним, палачи отрезали его голову и отнесли шаху. Тело святого было брошено на съедение псам, но ни один не прикоснулся к нему.

Инок, посланный из иерусалимского монастыря, подкупил стражу, взял тело и похоронил его в монастыре святого мученика Сергия. Впоследствии святые мощи преподобномученика Анастасия были перенесены в иерусалимскую обитель, где он начинал свой иноческий путь, оттуда – в Константинополь, а затем в Рим, где они хранятся доныне

Преподо́бнаго Мака́рия Жабы́нскаго, Беле́вскаго чудотво́рца

На ма́лой вече́рни

На Го́споди, воззва́х: стихи́ры на 4, самогла́сны, глас 4:

Да весели́тся све́тло и игра́ет/ честна́я оби́тель Жабы́нская/, христоимени́тый град Беле́в и страна́,/ свяще́нную па́мять преподо́бнаго отца́ на́шего Мака́рия пра́зднующе/, при́сно моля́щагося о нас ко Го́споду.

Соше́дшеся днесь, христоимени́тии лю́дие/, пе́сньми похва́льными венча́им/ вели́каго во смире́нии свое́м Мака́рия/, блаже́нству соиме́ннаго/, осеня́ющаго нас покро́вом моли́тв свои́х.

Христо́ва тя раба́, преподо́бне, ве́дуще/ и подви́жника благоче́стия вели́ка/, к тебе́ возво́дим душе́вная и теле́сная очеса́ на́ша/, твои́ми предста́тельствы ко Го́споду/ ча́юще спасе́ние улучи́ти.

Земны́й А́нгел и Небе́сный челове́к/ яви́лся еси́, всеблаже́нне/, и, от Христа́ прии́м чуде́с дарова́ния,/ душе́вныя и теле́сныя на́ша неду́ги/ си́лою твое́ю до конца́ потреби́.

Сла́ва, глас 6:

Весели́тся и ра́дуется Це́рковь Росси́йская/, ликовству́ет же оби́тель Жабы́нская/, Влады́це своему́ Христу́,/ я́ко дар благоприя́тен/, Мака́рия преподо́бнаго принося́,/ его́же моли́твами/ сохрани́ и спаси́ ны, Го́споди.

И ны́не, Богоро́дичен, глас то́йже:

Тебе́ мо́лимся, я́ко Бо́жий Ма́тери/, Благослове́нная,/ моли́ о спасе́нии душ на́ших.

На стихо́вне стихи́ры, глас 2:

Оста́вив мир, преподо́бне/, и крест Христо́в на рамена́ своя́ взем/, Тому́ после́довал еси́/ и свети́льник ми́ру христиа́нскому яви́лся еси́/, ему́же моли́ спасти́ся.

Стих: Честна́ пред Го́сподем/ смерть преподо́бных Его́.

Пучи́ну жити́я/ по́стнически преплы́в/, в ти́хое приста́нище Небе́снаго поко́я/ вшел еси́, блаже́нне,/ его́же дости́гнути и нам помоли́ся.

Стих: Блаже́н муж, боя́йся Го́спода/, в за́поведех Его́ восхо́щет зело́.

Егда́ преста́вился еси́, о́тче/, прия́ша тя ли́цы А́нгельстии, срето́ша пра́ведных ли́цы/, с ни́ми же ликовству́я во сла́ве Небе́сней/ и Боговиде́ния насыща́емь,/ помяни́ ны ко Го́споду Преблаго́му.

Сла́ва, и ны́не, Богоро́дичен, глас то́йже:

Предста́тельница и покро́в/ Ты еси́, Пречи́стая,/ изба́ви нас от бед лю́тых и обстоя́ний/ и ду́ши на́ша спаси́/ Боже́ственными Твои́ми моли́твами.

Тропа́рь пи́сан на вели́цей вече́рни.

На вели́цей вече́рни

Блаже́н муж: 1-й антифо́н. На Го́споди, воззва́х: стихи́ры на 8, глас 4.

Подо́бен: Зва́нный свы́ше:

Преподо́бне о́тче/, мяте́ж мирски́й оста́вив/ и крест твой взем/, после́довал еси́ нас ра́ди распе́ншемуся Христу́/, посто́м и жа́ждею плотски́я стра́сти умерщвля́я,/ грехо́вное же те́рние всено́щными по́двиги искорени́л еси́/, сле́зными исто́чники напои́л еси́ ни́ву души́ твоея́/, возде́лав плод стори́чный/, и ны́не предстои́ши всех Царю́/, Его́же моли́ спасти́ и просвети́ти ду́ши на́ша.

Преподо́бне о́тче Мака́рие/, ду́шу и се́рдце от страсте́й очи́стив/, дом Ду́ха Пресвята́го показа́лся еси́/, Его́же де́йствием све́тло укра́шен быв/, зрел еси́ бу́дущая, я́ко настоя́щая/, и далеча́йшая, я́ко близ су́щая/, весть бо Госпо́дь прославля́ти Своя́ уго́дники/, Ему́же ны́не во сла́ве Небе́сней в ли́це святы́х предстоя́/, моли́ спасти́ и просвети́ти ду́ши на́ша.

Преподо́бне о́тче Мака́рие/, кто испове́сть труды́ твоя́/, бде́ния же и сухояде́ния/, и е́же на земли́ лега́ния/, и пусты́нная озлобле́ния?/ Безстра́стия сосу́д был еси́/, благода́ти испо́лнен Свята́го Ду́ха,/ А́нгелом собесе́дниче и преподо́бным сожи́телю/, Вседержи́телю Бо́гу возложи́в себе́/, Его́же моли́ спасти́ и просвети́ти ду́ши на́ша.

Преподо́бне о́тче Мака́рие/, стра́нника и прише́льца себе́ на земли́ помышля́я/, душе́вныя твоя́ оче́са ко Иерусали́му Небе́сному при́сно возводи́л еси́,/ слеза́ми посте́лю твою́ омыва́я/. Ны́не же Небе́снаго ра́дования в собо́ре святы́х наслажда́яся/ и Бо́гови вы́ну предстоя́/, моли́ спасти́ и просвети́ти ду́ши на́ша.

И́ны стихи́ры, глас 2.

Подо́бен: Егда́ от Дре́ва:

Егда́ Боже́ственное раче́ние на́йде на тя, преподо́бне,/ мирски́й мяте́ж оста́вль/, во оби́тель всели́лся еси́,/ в не́йже трудолю́бие подвиза́вся/, украси́л еси́ ду́шу твою́ доброде́тельми/ и, наста́вник лю́дем христоимени́тым я́влься/, ввел еси́ ты́я во огра́ду Небе́сную/, иде́же, ра́дуяся с тобо́ю, взыва́ют ко Го́споду/: сла́ва, Человеколю́бче, Твоему́ смотре́нию.

Егда́ искуше́ние ве́лие/ наведе́ враг на оби́тель твою́, преподо́бне/, ю́же ва́рвары разори́ша/, ты, ре́вности Боже́ственныя испо́лнився/ и упова́ние свое́ на по́мощь Ма́тере Бо́жия возложи́в/, трудо́м сугу́бым вдал еси́ себе́/ и, из пе́пела ту́ю возсозда́в и бра́тию собра́в/, с не́ю ку́пно в ра́довании ду́ха воспе́л еси́ Бо́гу/: сла́ва, Человеколю́бче, Твоему́ благосе́рдию.

Егда́ к после́дним ле́том живота́ твоего́, блаже́нне,/ прибли́зился еси́/, вся попече́ния земна́я отве́рг/ и в пучи́ну безмо́лвия вшед/, наедине́ еди́ному Бо́гови рабо́тал еси́/, душе́вному твоему́ спасе́нию то́кмо внима́я/ и о ми́ре всего́ ми́ра моля́йся/, наипа́че же о бла́ге возгражде́нныя тобо́ю оби́тели/, немо́лчно Христу́ вопия́/: сла́ва, Человеколю́бче, Твоему́ смотре́нию.

Егда́ преставле́ния твоего́ к Бо́гу вре́мя приспе́,/ тогда́ непоро́чная твоя́ душа́/ непреткнове́нно от возду́шных мыта́рств/, я́ко небопа́рный оре́л/, крило́ма доброде́телей на Небеса́ востече́/ и ра́дости избра́нных сподо́бися/, и та́мо с Серафи́мы Го́сподеви пое́ши/: сла́ва, Человеколю́бче, Твоему́ смотре́нию.

Сла́ва, глас 8:

Прииди́те, по́стников сосло́вия/ и ве́рных мно́жества,/ све́тлую и свяще́ннейшую па́мять отца́ на́шего Мака́рия восхва́лим/, зову́ще ему́ си́це/: ра́дуйся, свети́льниче благода́ти пресве́тлый/; ра́дуйся, звездо́ ми́ру светлосия́нная/. Ра́дуйся, пусты́ни благоукраси́телю и оби́тели возгради́телю/; ра́дуйся, исто́чниче чуде́с преизоби́льнейший/ и неусыпа́ющий моли́твенниче/ о чту́щих па́мять твою́, преблаже́нне.

И ны́не, Богоро́дичен: Царь Небе́сный:

Вход. Проки́мен дне, и чте́ния три преподо́бническая (зри страни́цы 40 42).

На ли́тии стихи́ры самогла́сны, глас 2:

Ки́ими похва́льными венцы́/ увязе́м Мака́рия преподо́бнаго,/ всея́ страны́ Росси́йския украше́ние?/ Той бо моли́твами свои́ми оби́тель Богоро́дичну возгради́78/, той и по преставле́нии свое́м ве́рным явля́ется/ и моли́твы возно́сит о прибега́ющих под кров его́ ко Христу́,/ иму́щему ве́лию и бога́тую ми́лость.

Всем предста́тельствуеши, преподо́бне/, притека́ющим с ве́рою под кров твой/, явля́еши бо ся в ско́рбех уте́шитель/, в боле́знех благосе́рдый врач/, на пути́ спасе́ния наста́вник прему́дрый/, о всех пред Бо́гом моли́твенник тепле́йший/. Сего́ ра́ди, чту́ще святу́ю па́мять твою́/, к тебе́, я́ко отцу́ милосе́рдому, взыва́ем/: моли́ Бо́га о нас, свя́те Мака́рие.

Сла́ва, глас 8:

Па́стырю до́брый/, Пастыренача́льника Сы́на Бо́жия усе́рдный подража́телю/, услы́ши нас, гре́шных/, призыва́ющих в по́мощь твое́ немо́лчное хода́тайство/, и моли́ о нас Всеми́лостиваго Бо́га/, да избе́гнем вся́ких зол и напа́стей/ и улучи́м ве́чное блаже́нство/, во е́же ку́пно с тобо́ю, преподо́бне Мака́рие/, сла́вити и воспева́ти Святу́ю Тро́ицу.

И ны́не, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

На стихо́вне стихи́ры, глас 5.

Подо́бен: Ра́дуйся:

Ра́дуйся, преподо́бне Мака́рие/, Це́ркве Росси́йския преела́вное украше́ние/, оби́тели твоея́ све́тлая похвало́/, Правосла́вия сто́лпе непоколеби́мый/, чудотво́рче пресла́вный/; ра́дуйся, те́плый наш предста́телю пред Бо́гом/. Ему́же вы́ну предстоя́ со все́ми святы́ми,/ моли́ся о спасе́нии душ на́ших.

Стих: Честна́ пред Господем/ смерть преподо́бных Его́.

Ра́дуйся, свяще́нная главо́/, и́ноков наста́вниче Богому́дрый/, от ю́ности Христа́ возлюби́вый/ и и́го Его́ благо́е с ра́достию понесы́й/; ра́дуйся, не сло́вом то́кмо/, но па́че де́лом и о́бразом жития́ твоего́ всех к Бо́гу приводя́й/. Ему́же и ньше предстоя́,/ моли́ся о ча́дех твои́х/, ве́рою и любо́вию чту́щих святу́ю па́мять твою́/, о́тче преподо́бне Мака́рие.

Стих: Блаже́н муж, боя́йся Го́спода/, в за́поведех Его́ восхо́щет зело́.

Ра́дуйся, А́нгелом собесе́дниче/, преподо́бне Мака́рие,/ благоче́стно бо на земли́ пожи́в/, мно́ги, приходя́щия к тебе́, стра́ху Госпо́дню научи́л еси́/, благода́тию Пресвята́го Ду́ха озаря́емь/, зрел еси́ бу́дущая, я́ко настоя́щая/, и умиле́ния и ра́дости мно́ги, скорбя́щия душа́ми, исполня́л еси́/. Тем же мо́лимся ти/: моли́ся Го́сподеви о чту́щих тя.

Сла́ва, глас 8:

Что́ тя нарече́м, преподо́бне Мака́рие?/ па́стыря до́браго/, я́ко ду́шу свою́ за па́ству свою́ положи́ти гото́в был еси́/; оби́тели возгради́теля79/, по́стников похвалу́ и мона́хов украше́ние/, я́ко труды́, бде́ния и поще́ния и́ноческая подъя́л еси́/; земна́го А́нгела и Небе́снаго челове́ка/, присносу́щнаго Све́та ны́не насыща́ющася/. Тем же моли́ся Христу́ Бо́гу/ умири́ти мир и спасти́ ду́ши на́ша.

И ны́не, Богоро́дичен: Безневе́стная Де́во:

Тропа́рь, глас 4:

От мирска́го жития́ изше́д/ в ти́хое приста́нище жи́зни и́ноческия/, преподо́бне Мака́рие, вшел еси́,/ в не́йже до́бре подвиза́вся/, ду́шу твою́ доброде́тельми превысо́кими обогати́л еси́/ и яви́лся еси́ добр па́стырь и учи́тель и́ноческому собо́ру/, ему́же и оби́тель возгради́л еси́/, та́же в безмо́лвие вшед и Богови́дения сподо́бився/, ко Го́споду преста́вился еси́/, И́же да́ром чуде́с тя обогати́/. Его́же ны́не моли́/, да спасе́т ве́рою и любо́вию/ почита́ющих святу́ю па́мять твою́.

На благослове́нии хле́бов тропа́рь преподо́бнаго, два́жды, и Богоро́дице Де́во: еди́ножды.

На у́трени

На Бог Госпо́дь: тропа́рь преподо́бнаго, два́жды. Сла́ва, и ны́не, Богоро́дичен: Е́же от ве́ка утае́нное:

По 1-м стихосло́вии седа́лен, глас 4:

Вре́менных и до́льних возгнуша́вся/, высо́кая, при́сно пребыва́ющая, возлюби́л еси́/, Боже́ственным жела́нием распаля́я Боголюби́вую твою́ ду́шу/, и, сотвори́в Всевы́шняго во́лю/, восприя́л еси́ бла́га Небе́сная.

Сла́ва, и ны́не, Богоро́дичен:

Твою́ по́мощь пода́ждь нам, рабо́м Твои́м, Де́во Влады́чице/, вразуми́ и руково́дствуй нас на пути́ спасе́ния/, избавля́я ны от бед и скорбе́й/, я́ко ро́ждшая всех Избавле́ние.

По 2-м стихосло́вии седа́лен, глас 8:

Непостижи́мый Свет от Све́та – Христо́с Госпо́дь, почи́в в тебе́, преподо́бне/, пресве́тлу свещу́ показа́ тя ми́ру/, я́ко блиста́еши све́тлым житие́м и сия́еши чудесы́/. Тем же ра́достно пра́зднуем па́мять твою́, преблаже́нне Мака́рие.

Сла́ва, и ны́не, Богоро́дичен:

От любве́ душе́вныя вопию́ Ти, Влады́чице/: пресве́тлаго Со́лнца заре́, спасе́ния дверь/, Небе́сная врата́, мы́сленная ле́ствице всех христиа́н/, мольбы́ приими́ Тя блажа́щих/, наде́жду душ на́ших, и спасе́ние нам дару́й.

По полиеле́и седа́лен, глас 4:

Псало́мски процве́л еси́, я́ко фи́никс, в посте́ и по́двизех/, и бесо́вския полки́ прогоня́еши/, и да́руеши цельбы́ незави́стно всем/. Тем же жите́йскими помышле́ньми ум наш мяту́щийся уцелому́дри/, да чи́сте воспои́м Христа́.

Сла́ва, и ны́не, Богоро́дичен:

Пречи́стая Де́во/, не пре́зри ве́рою к Тебе́, Милосе́рдней, прибега́ющих/ и те́плаго Твоего́ заступле́ния прося́щих,/ моля́щи Сы́на Твоего́, Христа́ Бо́га на́шего/, спасти́ся рабо́м Твои́м.

Таже степе́нна, 1-й антифо́н 4-го гла́са. Проки́мен, глас 4: Честна́ пред Господем/ смерть преподо́бных Его́. Стих: Что возда́м Господеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Уго́дниче Бо́жий/, соприча́стниче Христо́в/, преподо́бне о́тче Мака́рие/, по и́мени твоему́ та́ко и житие́ твое́/, блаже́нства тезоиме,нне/, жизнь твоя́ славна́ и успе́ние со святы́ми/, моли́ Христа́ Бо́га о душа́х на́ших.

Кано́н Богоро́дице пара́клисис со ирмосо́м на 6 и свято́му на 8. Глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла/, вопло́щщееся же Сло́во всезло́бный грех потреби́ло есть/: Препросла́вленный Госпо́дь сла́вно бо просла́вися.

Госпо́дь, Царь Сла́вы, прославля́ющия Его́ просла́вити обетова́/, на тебе́ же, преподо́бне, обоя́ устрои́шася,/ я́коже бо ты просла́вил еси́ Го́спода в житии́ твое́м,/ си́це и тя просла́ви тобо́ю просла́вленный Госпо́дь.

Вели́кий а́нгельский о́браз прия́л еси́/, кра́йняго смире́ния не оста́вль в житии́ твое́м/, с ли́ки же а́нгельскими на Небеси́ ны́не лику́еши/. За ны у́бо помоли́ся, о́тче/, а́нгельскими хвала́ми Препросла́вленному Го́споду.

Труда́ми насади́л еси́/, слеза́ми моли́твенными ороси́в, я́ко сад Бо́жий, оби́тель твою́, преподо́бне/. Приими́ у́бо и на́ша сле́зы умиле́ния/ и ходата́йственно вознеси́ я к Престо́лу Препросла́вленнаго Го́спода.

Богоро́дичен: К Богоро́дице о нас помоли́ся, о́тче преподо́бне/, да умоли́т Сы́на Своего́ поми́ловати нас/, сла́вно да просла́вится в ми́лости Свое́й Препросла́вленный Госпо́дь.

Песнь 3

Ирмо́с: Процвела́ есть пусты́ня, я́ко крин, Го́споди,/язы́ческая неплодя́щая, Це́рковь/прише́ствием Твои́м/, в не́йже утверди́ся мое́ се́рдце.

Процвела́ есть Жабы́нская пусты́ня/ за моли́твы избра́нника Твоего́, Го́споди, преподо́бнаго пустынножи́теля Мака́рия/, в не́йже да обря́щем утеше́ние/, здра́вие же и спасе́ние заступле́нием преподо́бнаго.

Чуде́с дарова́нием благоволи́ Госпо́дь тя просла́вити, смире́ннаго/ и мно́го лет я́ко бы забве́ннаго/, да немощны́м нам пода́ст благовре́менную по́мощь/ и ве́ре на́шей оскудева́ющей укрепле́ние.

Богоно́се о́тче Мака́рие/, Бо́гу непреста́нный о нас был еси́ моли́твенник/ и Пресвята́го Уте́шителя Ду́ха в се́рдце твое́м носи́л еси́/. Но у́бо воздви́гни от сна грехо́внаго/ и от искуше́ния диа́вольскаго огради́ ны, моля́щияся тебе́.

Богоро́дичен: Богороди́тельнице Блага́я, моли́ о нас/ и на́ша недосто́йныя моли́твы принеси́ ко Престо́лу Блага́го Сы́на Твоего́/, и Твои́м да бу́дет сомоли́твенником о нас Мака́рий преподо́бный.

Седа́лен, глас 4:

На тве́рдем ве́ры ка́мени утвержде́н сый/, в безмо́лвии подвиза́яся, тече́ние по́стничества до́бре сконча́л еси́/ и мздовоздая́ние от Христа́ прия́л еси́/, Ему́же ны́не моли́ся, всеблаже́нне/, в ве́ре и доброде́телех нас утверди́ти.

Сла́ва, и ны́не, Богоро́дичен:

Ты покро́в мой от напа́стей вра́жиих, Влады́чице,/ Ты свет се́рдцу моему́/, печа́льми жите́йскими омраче́нному, при́сно буди́, Богоро́дице, и спаси́ мя.

Песнь 4

Ирмо́с: Прише́л еси́ от Де́вы, не хода́таи, ни А́нгел/, но Сам, Го́споди, вопло́щся/, и спасл еси́ всего́ мя, челове́ка/. Тем зову́ Ти: сла́ва си́ле Твое́й, Го́споди.

От Де́вы Пречи́стыя на зе́млю прише́л еси́, во е́же спасти́ нас, Го́споди/, и от спасе́нных вели́кое мно́жество просла́вил еси́/, да не то́кмо Тя у Престо́ла Твоего́ славосло́вят/, но и о нас хода́тайствуют/. Ве́руем убо, я́ко в со́нме том пресве́тлом/ предста́тельствует о нас преподо́бный оте́ц наш Мака́рий.

От оте́чества на́шего взят был еси́ в Небе́сное Ца́рствие, о́тче преподо́бне/. Не забу́ди у́бо чад твои́х, избра́нниче Бо́жий Мака́рие/, еще́ прише́льствующих на земли́.

Буди́ с на́ми, о́тче наш Мака́рие/, да с тобо́ю дерзнове́нно Бо́га Отца́ просла́вим/, Сы́на превознесе́м и Свято́му Ду́ху покло́нимся.

Богоро́дичен: С Богоро́дицею, вслед Ея́, мы́слию во свята́я вни́дем/ и к Ней во смире́нии притеце́м, в покая́нии зову́ще/: Спаси́тельнице, спаси́ нас.

Песнь 5

Ирмо́с: Хода́тай Бо́гу и челове́ком был еси́, Христе́ Бо́же/: Тобо́ю бо, Влады́ко, к Светонача́льнику, Отцу́ Твоему́/, от но́щи неве́дения/приведе́ние и́мамы.

Но́щи неве́дения преше́дшей прибли́жися день спасе́ния,/ и Свет ми́ру возсия́ – Христо́с Госпо́дь/. К Сему́ у́бо ны́не, моли́твами преподо́бнаго Мака́рия/, от грехо́вныя но́щи приведе́ние и́мамы.

Но́щию в петлоглаше́ние/, и́мже Госпо́дь прише́ствие Свое́ второ́е назна́менова/, к тебе́ Госпо́дь прии́де ду́шу твою́ прия́ти, преподо́бне/, моли́твами же твои́ми вложи́ в ду́ши на́ша па́мять сме́ртную.

Нощь многоле́тняя пре́йде/, в ню́же бе под спу́дом па́мять твоя́, о́тче наш/, но сия́ ны́не яви́ся, светя́щи всем/, я́же в твое́й хра́мине суть/, в ню́же мы, ве́рою и любо́вию влеко́ми, приведе́ние и́мамы.

Богоро́дичен: Не бо́йся, ма́лое ста́до/, я́ко благоизво́ли Оте́ц ваш да́ти вам Ца́рство, глаго́лет Госпо́дь/. И не изнемо́же глаго́л сей у Го́спода,/ уже́ бо дости́же заве́щаннаго Ца́рства па́стырь наш,/ да привлече́т с собо́ю все ста́до свое́ моли́твами Богоро́дицы.

Песнь 6

Ирмо́с: В бе́здне грехо́вней валя́лся/, неизсле́дную милосе́рдия Твоего́ призыва́ю бе́здну/: от тли, Бо́же, мя возведи́.

Бе́здна милосе́рдия Бо́жия бе́здну грехо́в на́ших да превозмо́жет/, ничесо́же от нас взыску́ющи, ра́зве слез покая́ния умиле́ннаго/, о сем помоли́ся за ны, преподо́бне о́тче наш.

От бе́здны грехо́вной помози́ нам, Бо́же, возни́кнути,/ моли́твами преподо́бнаго Мака́рия сподо́би ны пре́жде конца́ пока́ятися/ и Твои́х Боже́ственных Тайн прича́стником бы́ти.

Сла́вим Тя, Свята́я Тро́ице/, и диви́мся бе́здне милосе́рдия Твоего́ к нам, мно́го согреша́ющим/. Но еще́ долготерпи́ о нас, Бо́же наш/, до́ндеже пока́емся со слеза́ми/, при́сно помина́юще после́дняя своя́.

Богоро́дичен: Чи́стую чи́сто почти́м/ и устыди́мся пред лице́м Ея́ скве́рнаго жития́ на́шего, о́тче преподо́бне!/ Ты у́бо наста́ви ны досто́йно чти́ти Ма́терь Бо́жию Пречи́стую,

Конда́к, глас 8:

Житие́ чи́стое, терпе́ние, кро́тость и любо́вь нелицеме́рну/, воздержа́ние соверше́нное/, умиле́ние Боже́ственное/, ве́ру же и наде́жду и́стинну и милосе́рдие стяжа́в/, равноа́нгельно, Мака́рие, на земли́ пожи́л еси́/ и на Небеси́ Бо́гови с ли́ки Безпло́тных предстои́ши/. С ни́ми же, свя́те, моли́ся/ мир Росси́стей Це́ркви дарова́ти/ и душа́м на́шим ве́лию ми́лость.

И́кос:

А́нгельски на земли́ пожи́вша/, преподо́бнаго отца́ на́шего Мака́рия, прииди́те, лю́дие, соше́дшеся, восхва́лим,/ си́це к нему́ реку́ще/: ра́дуйся, на земли́ пожи́вый небе́сно; ра́дуйся, во пло́ти, а́ки безпло́тен, подвиза́выйся/. Ра́дуйся, стра́сти до конца́ умертви́вый и безстра́стия дости́гнувый/; ра́дуйся, ду́шу твою́ дарова́ньми Ду́ха Свята́го испо́лнивый/. Ра́дуйся, оби́тель возгради́вый и и́ноков собра́вый/; ра́дуйся, па́стырским жезло́м твои́м во огра́ду Небе́сную ты́я упра́вивый/. Ра́дуйся, гра́да Беле́ва похвало́/; ра́дуйся, пусты́ни твоея́ непоколеби́мое утвержде́ние/. Ра́дуйся, при́сно моля́щийся Господеви мир Росси́йстей Це́ркви дарова́ти/ и душа́м на́шим ве́лию ми́лость.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть/. Христо́с же простре́ Богочести́вым о́троком ро́су духо́вную,/ Сый благослове́н и препросла́влен.

Сый благослове́нный Христо́с Бог наш/ да изба́вит нас огня́ гее́нскаго/, со слеза́ми покая́нными о сем помо́лимся/. Кто же ны́не даст очесе́м на́шим исто́чник слез/, а́ще не ты, о́тче, блаже́нство пла́ча позна́вый в житии́ твое́м.

Высо́кий пла́мень неве́рия и нече́стия возно́сит беззако́ннующий/. Но мы сохрани́ти ве́ру потщи́мся,/ убежи́м нече́стия, убои́мся пла́мене гее́нскаго,/ ко Христу́ притеце́м и у Него́ с Мака́рием блаже́нство улучи́м.

Еди́н Сый Святы́я Тро́ицы, Христе́ Бо́же наш!/ Сотвори́ в нас оби́тель, по обетова́нию Твоему́,/ с Преблагослове́нным и Препросла́вленным Твои́м Отце́м и со Святы́м Ду́хом/, жи́зни и утеше́ния Пода́телем.

Богоро́дичен: Ра́дуйся, Влады́чице, и ра́дость нам пода́ждь, от бед спаси́/, в ми́ре Це́рковь Сы́на Твоего́ сохрани́/ и умоли́, да благослови́т я́ко достоя́ние Свое́.

Песнь 8

Ирмо́с: Пещь иногда́ о́гненная в Вавило́не де́йства разделя́ше/, Бо́жиим веле́нием халде́и опаля́ющая,/ ве́рныя же ороша́ющая, пою́щия/: благослови́те, вся, дела́ Госпо́дня, Го́спода.

В телеси́ А́нгела, почти́м Мака́рия, блаже́нству тезоимени́таго/, и, подража́я его́ житию́ во Христе́,/ поне́ еди́наго от блаже́нств Ева́нгельских дости́гнути потщи́мся.

Огнь искуше́ний грехо́вных пали́т мя/, но стра́ждущую мою́ ду́шу ороси́ росо́ю благода́ти Христо́вой/ и твои́ми моли́твами, блаже́нне.

Да пребу́дет благослове́ние твое́ Богоуго́дное во И́мя Пресвяты́я Тро́ицы/ на оби́тели твое́й, и на земли́ оте́чествия твоего́/, и на всех, тебе́ усе́рдно призыва́ющих, о́тче преподо́бне.

Богоро́дичен: Доны́не и во ве́ки блажи́м Тя, вси ро́ди, Свята́я Богороди́тельнице/. Спаси́ нас, я́ко Спа́са родила́ еси́ душ на́ших.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся/, омраче́нная просвети́ти, собра́ти расточе́нная/. Тем Всепе́тую Богоро́дицу велича́ем.

Со а́нгельскими чи́нми, хва́лящими Го́спода/, и с Богоро́дицею Того́ хвали́ти сподо́бился еси́/, сподо́би же и нас, преподо́бне о́тче наш/, да с тобо́ю Го́спода сла́вим и Богоро́дицу велича́ем.

А́нгели, вхожде́ние Пречи́стыя во свята́я святы́х зря́ще, удиви́шася/. Мы же диви́мся/, ка́ко во святы́й храм, труда́ми твои́ми созда́нный на ме́сте, ва́рвары разоре́нном/, чудотво́рною ико́ною Свое́ю вни́де Пречи́стая,/ Ю́же, я́ко Всепе́тую Богоро́дицу, велича́ем.

Бо́га Отца́ просла́вим, тебе́, Богоно́сному отцу́ на́шему, после́дующе/, Боже́ственнаго Сы́на возвели́чим,/ да с Ним и всыновле́ние О́тчее прии́мем/, Свято́му Ду́ху поклони́мся, да научи́т ны моли́тися, я́коже подоба́ет/, да и Сам, вопия́ в душа́х на́ших/, укрепи́т нас к Бо́гу сыно́вне вопи́ти: А́вво, О́тче!

Богоро́дичен: Ра́дуйся, Ра́досте на́ша!/ Пребу́ди с на́ми, я́ко да и Госпо́дь, И́же с Тобо́ю, в нас пребу́дет/. Собери́ во двор церко́вный о́вцы расточе́нныя,/ отпа́дшия возврати́ к соедине́нию/, просвети́ омраче́нных неве́рием/, да вси вку́пе Тя, Всепе́тую Богоро́дицу, велича́ем.

Свети́лен:

Светоза́рна свети́льника ве́ры, во стране́ на́шей возсия́вша/ и со́лнца светле́йше чудесы́ свои́ми нас просве́щша/, Мака́рия преподо́бнаго, блаже́нству тезоиме́ннаго, пе́сньми восхва́лим.

Богоро́дичен:

Богоро́дице Де́во, ра́дуйся/, от А́нгела ра́дость прии́мшая/, ра́дуйся, Влады́чице, и спаси́ на Тя упова́ющия.

На хвали́тех стихи́ры, глас 8:

Те́сным путе́м в житии́ твое́м/, преподо́бне Мака́рие, ше́ствовал еси́/, по́двигом до́брым в пусты́ни подвиза́лся/ и, тече́ние благо́е в преподо́бии соверша́я/, тем и превели́кое воздая́ние обре́л еси́ у Бо́га/, Ему́ же, свя́те, моли́ся/ дарова́ти душа́м на́шим ве́лию ми́лость.

Возсия́ нам Богоуго́дное житие́ твое́/, пресла́вне Мака́рие/, всем бо яви́лся еси́ пра́вило ве́ры и о́браз кро́тости/, по́двигов и́ноческих и воздержа́ния зерца́ло,/ любве́ же и смире́ния бога́тство/, и́хже ра́ди просла́влен еси́ от Го́спода/, Его́же моли́ спасе́ние душа́м на́шим дарова́ти.

Зна́меньми и чудесы́ тебе́ Госпо́дь просла́ви,/ преподо́бне Мака́рие/, прого́ниши бо ду́хи и врачу́еши стра́сти/, ду́ши просвеща́я ве́рных/, приходя́щих ко свято́му твоему́ гро́бу/, А́нгелов собесе́дниче и преподо́бных сожи́телю.

Вся оста́вив земна́я/, к Небе́сным ум твой впери́л еси́/, в слеза́х и воздыха́ниих жизнь твою́ препроводи́в,/ и́хже ра́ди Небе́сных селе́ний дости́гл еси́/, иде́же свет невече́рний сия́ет/ Христа́ Бо́га на́шего/, Его́же непреста́нно моли́ спасти́ ду́ши на́ша.

Сла́ва, глас то́йже:

Оте́ц сиро́т и вдов защи́тник/, бога́тство ни́щих, боля́щих утеше́ние и исцеле́ние/ и су́щих в бога́тстве наста́вник/, ста́рости жезл, и наказа́ние ю́ности,/ и мона́шествующим доброде́телей пра́вило яви́лся еси́,/ преблаже́нне о́тче наш Мака́рие.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от всякия ну́жды и печа́ли.

Славосло́вие вели́кое и отпу́ст.

На литурги́и

Блаже́нны, от кано́на пе́сни 3-я и 6-я. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Ева́нгелие от Луки́, зача́ло 24, или́ от Матфе́я, зача́ло 10. Прича́стен: В па́мять ве́чную:

Моли́тва

О свяще́нная главо́! Вели́кий чудотво́рче, преподо́бне о́тче наш Мака́рие, преблаже́нне и пресла́вне, Ду́ха Свята́го испо́лненне! По́стников похвало́, мона́шествующих сла́во, пусты́ни Жабы́нския возгради́телю и украси́телю, те́плый о нас, гре́шных, моли́твенниче! Ны́не со а́нгельскими во́инствы предстоя́й у Престо́ла всех Царя́ сла́вы, Го́спода, и наслажда́яйся све́та Единосу́щныя Тро́ицы, и с го́рними си́лами воспева́яй Трисвяту́ю песнь, я́ко дерзнове́ние име́яй, моли́ся Всеми́лостивому Влады́це спасти́ вся ве́рующия во и́мя Его́, испроси́ мир и тишину́ Святы́м Церква́м низпосла́ти, ве́ре правосла́вней укрепле́ние, проти́вныя язы́ки, бра́ни хотя́щия, ви́димыя и неви́димыя враги́ низложи́ти, гра́ды, ве́си и оби́тели на́ши утверди́ти, мир весь уми́рити. Моли́ Ми́лостиваго Бо́га, да твои́м благоприя́тным хода́тайством вся правосла́вныя христиа́ны изба́вит Он от гла́да, губи́тельства, тру́са, пото́па, огня́, меча́, от наше́ствия иноплеме́нник и междоусо́бныя бра́ни, ста́рыя да подкрепи́т, ю́ныя да наста́вит, нему́дрых умудри́т, боля́щия исцели́т, плене́нныя и ю́зники свободи́т, сиро́т засту́пит, младе́нцы воспита́ет и вся лю́ди сохрани́т от бед и напа́стей, и от нападе́ния вра́жия, и смертоно́сныя я́звы, внеза́пныя сме́рти и от вся́каго зла. Днесь же с ве́рою приходя́щих рабо́в твои́х, со стра́хом и любо́вию припа́дающих к честны́м моще́м твои́м и о́браз подо́бия твоего́ любе́зно целу́ющих, я́ко те́плый нам засту́пниче, сохрани́, в ско́рбных обстоя́ниих на́ших предста́ни, душе́вных и теле́сных страсте́й свободи́, в день Стра́шнаго суда́ шу́ияго стоя́ния изба́ви и с десны́ми овца́ми моли́твами твои́ми ста́ти сподо́би и блаже́нный о́ный глас Влады́ки, Христа́ Бо́га на́шего услы́шати: «Прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра». Ему́же подоба́ет всякая сла́ва, честь и поклоне́ние, со Безнача́льным Его́ Отце́м и со Пресвяты́м, и Благи́м, и Животворя́щим Его́ Ду́хом, ны́не и при́сно и во ве́ки веко́в. Ами́нь.

Преподобный Макарий Жабынский, Бедевский чудотворец

Родился в XVI веке, в царствование Иоанна Грозного. О его рождении, жнзни в миру, а также о месте первоначалъных иноческих подвигов сведений не сохранилось. Монашеский постриг он принял в ранней, молодости и, очевидно, большую часть своей подвижнической жизни провел в Жабынской Введенской пустыни. Пустынь была основана старцем Онуфрием в 1585 году, в пяти верстах от г. Белева Тульской губернии, при впадении речки Жабынки в Оку. Существует мнение, что старец Онуфрий и преподобный Макарий – одно и то же лицо: Онуфрий – имя преподобного Макария до принятия схимы. В начале XVII столетия г. Белев и его окрестности неоднократно подвергались разорению от поляков, вторгшихся тогда в пределы России. В 1615 году Жабынская пустынь была разрушена войском пана Лисовского – на ее месте остались развалины. Своим вторым рождением пустынь обязана преподобному Макарию, который после ухода захватчиков вернулся на пепелище родной обители и принялся за ее восстановление. Прежде всего он построил церковь в честь Введения во храм Пресвятой Богородицы. Как гласит синодик Жабынской пустыни, преподобный Макарий «... монастырь возгради, братию собра...», то есть после восстановления обители стал первым ее игуменом.

Для братии преподобный Макарий был не только мудрым наставником, но и любимым аввою, который назидал и словом, и примером терпеливой, истинно подвижнической жизни. Об аскетических подвигах преподобного Макария в синодике говорится: «... в терпении иночески плотию стражда, мраз, зной во алчбе и жажде претерпе...». Описатель жития святого, желая отметить высоту духовного совершенства угодника Божия, говорит, что преподобный Макарий «врага человекоубийцу – диавола под нозе свои покори». Силу веры преподобного Макария и степень его любви к ближним показывает следующий случай из жизни святого. Однажды преподобный по обычаюушел в лес для уединенной молитвы. Там он неожиданно увидел умиравшего от жажды польского воина, который, очевидно, отстал от своего отряда и заблудился. Только одно слово мог прошептать ослабевший от долгих блужданий человек: «Пить!» Памятуя заповедь Господа (Мф. 5,44), преподобный Макарий не колебался; уповая на милосердие Божие, он сотворил молитву и ударил посохом по земле. Забил источник воды, напоивший жаждущего. Позднее на месте источника были построены часовня и две купальни, в которых через омовение исцелялись больные.

Незадолго до своей блаженной кончины преподобный Макарий принял схиму и поселился в верховье Жабынки, где в пустынной тишине предался усиленным подвигам поста и молитвы. 22 января 1623 года (по другим источникам, в 1622 году) он мирно преставился ко Господу. Братия погребли честное тело святого наставника около церкви у входа в обитель. На могиле святого происходили многие исцеления.

Церковное почитание преподобного Макария установилось в конце ХVII – нач. XVIII в. В 1764 году, при императрице Екатерине II, бедные монастыри, не владевшие землей, были упразднены, в их числе и Жабынская Введенская пустынь (соборный храм обители стал приходским). Из-за неблагоприятных для обители обстоятельств память о преподобном Макариb померкла и чествование его как всероссийского святого прекратилось. Но преподобный Макарий призрел свою обитель и спас ее от запустения. В 1776 году в Жабынскую пустынь, строения которой еще не были сломаны, пришли иноки сгоревшего Успенского Шаровского монастыря Калужской губернии. С того времени началось постепенное укрепление Жабынской обители.

В 1816 году при копании рвов для закладки новой каменной Никольской церкви на месте прежней, деревянной, были обнаружены нетленные мощи преподобного Макария и вновь опущены в землю под алтарь нового храма. Восстановление памяти святого было установлено указом Святейшего Синода 2 января 1888 года по ходатайству граждан города Белева, полтора столетия хранивших память о чудесах и подвигах преподобного Макария. 17 октября 1889 года была торжественно совершена закладка каменного храма во имя преподобного Макария Жабынского на месте прежней Никольской церкви, где находились мощи святого. Во время строительства храма игумен Иона (прежний настоятель монастыря, в то время проживавший на покое) и начальник строительных работ задумали открыть святые мощи. Преподобный Макарий явился им в сонном видении и воспретил это.

22 января 1902 года было совершено торжественное празднование памяти преподобного Макария Жабынского в Туле и Тульской губернии. Память преподобного Макария совершается также 22 сентября.

В «Иконописном подлиннике» XVIII века сохранилось описание внешности преподобного Макария: «... подобием сед, брада невелика, ризы монашеские и в схиме».

Преподобному́ченика и диа́кона Анаста́сия, в Бли́жних пеще́рах почива́ющаго

Тропа́рь, глас 4:

Плотско́е, я́ко безпло́тный А́нгел,вознена́видевши препита́ние/, духо́вную во и́ноческом чи́ну возлюби́л еси́ пи́щу/, и в не́м Богови́дцу на Сина́и Моисе́ю/ до́брым жития́ твоего́ по́двигом уподобля́яйся/, мно́гими на горе́ Бо́жией Пече́рской возвы́сился еси́ доброде́телъми,/ иде́же в моле́нии к Вы́шнему непреста́нно пребыва́л еси́/, ны́не же со отцы́ преподо́бными Пече́рскими,/ а́ки би́сер многоце́нен, мощми́ нетле́нными/ в пеще́ре твои́ми пресве́тло сия́еши/, а душе́ю со А́нгелы пред Престо́лом Бо́жиим/, святы́й преподобному́чениче Анаста́сие, предстои́ши/, о нас всегда́ моля́ся ко Го́споду/ спасти́ся душа́м на́шим.

Конда́к, глас 8:

По́стническим пло́ти твоея́ умерщвле́нием/ ду́шу оживи́л еси́/, и́бо твоего́ ра́ди презе́льнаго воздержа́ния/ и привре́меннаго терпе́ния/, жизнь непрее́мная и диади́ма неувяда́емая/ от пострада́вшего за ны пло́тию/ и из ме́ртвых воскре́сшаго Христа́ Бо́га на́шего/, тебе́, свя́те, преподобному́чениче Анаста́сие/, я́ко злочести́вых победи́телю/ несумне́нно и вои́стинну угото́вася,/ зане́же Бо́жие тридне́вное Воскресе́ние/ всем, живу́щим на земли́/, тобо́ю, я́коже иногда́ от отроко́в Ефе́сских правосла́вно воспропове́дася/, и сего́ ра́ди, о́тче, днесь к тебе́ вси вопие́м немо́лчно/: святы́й преподобному́чениче Анаста́сие Пече́рский/, моли́ приле́жно воста́вшаго Христа́ тридне́вно из ме́ртвых/, да изба́вит от сме́рти ве́чныя ду́ши на́ша.

Стихи́ра на литии́, глас 2:

Прииди́те, ве́рнии/, восхва́лим диа́конов украше́ние,/ му́чеников сострада́льника, преподо́бным собесе́дника,/ отце́в сла́ву, чистоты́ рачи́теля/, по́стников вели́каго наста́вника/, Воскресе́ния именнопропове́дника -/ Анаста́сия преподобному́ченика/, до́блественно Христа́ ра́ди пострада́вшего/, и вене́ц нетле́ния и побе́ды от Него́ восприе́мшаго/, и ме́ртвых воста́ние неве́рующим в и́мени возвести́вшаго/, и за ны Влады́ку всех моля́щаго,/ того́ моли́твами, Спа́се, поми́луй нас.

Преподобномученик Анастасий, диакон, Печерский

Подвизался в Ближних пещерах. Иеромонах Афанасий Кальнофийский называет его братом преподобного Тита пресвитера († не ранее 1190, память 27 февраля). В рукописных святцах он называется диаконом. В службе Собору отцов Ближних пещер о преподобномученике Анастасии говорится, что он имел такое дерзновение к Богу, что получал все просимое. Память его празднуется также 28 сентября и во 2-ю Неделю Великого поста.

* * *

77

Преиме́ния – превосходтво, высота, изобилия

78

Возгради́ – вновь построил, востановил

79

Возгради́теля – востановителя


21-й день 22-й день 23-й день