Библиотеке требуются волонтёры

В 16-й де́нь

Преподо́бнаго Фео́дора Освяще́ннаго, ученика́ преподо́бнаго Пахо́мия Вели́каго

НА ВЕЧЕ́РНИ

Стихи́ры Фео́дора, глас 6.

Подо́бен: Всю отложи́вше:

О́блак восхожде́ние пре́жде положи́вый,/ я́ко Влады́ка,/ на о́блаце ле́гце ны́не соше́д во Еги́пет,/ просия́ти избра́нныя пронарече́,/ восхища́емый на о́блацех,/ я́ко Богому́дрыя,/ с ни́миже Фео́дор Освяще́нный, оте́ц наш,/ столп непоколеби́мый,/ в доброде́тели неукло́нный,/ пресве́тлыми сия́нии сия́я Христо́выми,/ со дерзнове́нием мо́лится о душа́х на́ших.

Еги́пет пе́рвее,/ де́монскими неи́стовяся же́ртвами и страстьми́,/ по́стническими ны́не чи́нми украша́ется/ и разли́чными добро́тами,/ добреде́тельми Боже́ственными украша́емь показу́ется./ В не́мже просия́ Боже́ственных даро́в тезоимени́тый/ Фе́одор преподо́бный,/ и Богови́дный, и Богоприя́тный,/ и́же, чу́дным смире́нием подо́бяся Христу́,/ со дерзнове́нием мо́лится о душа́х на́ших.

Поще́ние, воздержа́ние,/ смире́ние, терпе́ние,/ оша́яние зло́бы, доброде́тели прия́тие/ от ю́ности му́дрый Фео́дор,/ по́стник вели́кий, Богому́дрый показа́ся,/ тепл быв Боже́ственныя любве́ рачи́тель,/ и вся ви́димая, ра́дуяся, превзы́де, чу́дный,/ жи́тельством возвыша́емый,/ бесе́дуя Бо́гу,/ со дерзнове́нием мо́лится ны́не о душа́х на́ших.

Сла́ва, и ны́не, пра́здника

Тропа́рь, глас 1:

Пусты́нный жи́тель, и в телеси́ А́нгел,/ и чудотво́рец яви́лся еси́, Богоно́се о́тче наш Фео́доре:/ посто́м, бде́нием, моли́твою небе́сная дарова́ния прии́м,/ исцеля́еши неду́жныя и ду́ши ве́рою притека́ющих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кано́н, его́же краегране́сие: Пою́ Бо́гу тя да́ра свяще́нна.Глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь, сла́вно бо просла́вися.

Песнопе́нии хотя́щему твое́ пе́ти ны́не торжество́,/ Боже́ственных даро́в я́ко сый тезоимени́т,/ дар пода́ждь ми светоно́сен,/ от сокро́вищ почерпа́я неиздае́мых благода́ть Боже́ственную, всеприснопа́мятне.

Поуча́яся зако́ну приле́жно, о́тче, чи́стому,/ весь чист и пречи́ст был еси́,/ Всечи́стому же Сло́ву совокупля́яся,/ чистоты́ све́тел сосу́д показа́лся еси́ и освяще́н, всеблаже́нне.

Богоро́дичен: Умертви́в себе́ ми́ру,/ жизнь, о́тче, равноа́нгельну на земли́ благоче́стно проходя́,/ Возсия́вшему от ложе́сн деви́ческих после́довал еси́,/ крест твой на ра́мо взем, Богому́дре преблаже́нне.

Песнь 3

Ирмо́с: Процвела́ есть пусты́ня, я́ко крин, Го́сподин/ язы́ческая неплодя́щая, Це́рковь/ прише́ствием, Твои́м,/ в не́йже утверди́ся мое́ се́рдце.

Я́ко дар люби́м, Влады́це, преподо́бне,/ твою́ ду́шу, Фео́доре, спаса́ему/ и воздержа́нием от страсте́й измене́нну прине́сл еси́.

Бо́гу освяще́н, превозше́л еси́, всему́дре, зри́мых чу́вство,/ чи́стым же умо́м бесе́довал еси́ уму́ превы́спреннему, преблаже́нне.

Богоро́дичен: Удали́лся еси́ в пусты́ни, бе́гая, сла́вне,/ и́же от Де́вы просия́вшаго Бо́га Сло́ва ты прии́м,/ о Не́мже и спа́слся еси́, досточу́дне.

Конда́к, глас 2

Подо́бен: Вы́шних ища́:

В дому́ Бо́жии, я́ко фи́никс, процве́л еси́,/ плоды́ же доброде́телей Го́сподеви прине́сл поще́нием изря́дным,/ о́тче преподо́бне,/ те́мже и убла́жаешися,/ я́ко Безпло́тных равностоя́телен.

Седа́лен, глас 3

Подо́бен: Боже́ственный ве́ры:

Боже́ственною си́лою оде́ян,/ обнажи́л еси́ полки́ супроти́вных сил, Богоно́се,/ и, доброде́телей просия́в све́тлостию,/ исцеле́ний зарю́ облиста́л еси́, о́тче преподо́бне:/ Христа́ Бо́га моли́ дарова́ти нам ве́лию ми́лость.

Сла́ва, и ны́не, пра́здника или́ Богоро́дичен:

Боже́ственная ски́ния была́ еси́ Сло́ва,/ еди́на Пречи́стая Ма́ти Де́во, чистото́ю А́нгелы превозше́дшая,/ па́че всех мене́, персть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

Крестобогоро́дичен:

Нескве́рная А́гница Сло́ва, нетле́нная Де́ва Ма́ти,/ на Кресте́ зря́щи пове́шена из Нея́ без боле́зни прозя́бшаго,/ ма́терски подо́бно, рыда́ющи, вопия́ше:/ увы́ Мне, Ча́до Мое́, ка́ко стра́ждеши во́лею,/ хотя́ изба́вити от страсте́й безче́стия челове́ка?

Песнь 4

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Купносе́льник Пахо́мию Боже́ственному быв,/ нра́вы подража́л еси́, о́тче Богому́дре Фео́доре,/ того́ воздержа́нию и правосла́вней ве́ре подо́бяся.

Пева́емаго Ца́рства и Боже́ственнаго сия́ния, досто́йно получи́л еси́,/ я́ко быв худо́г46, о́тче, чистото́ю, к прича́стию неизрече́нныя красоты́.

Се́ла ефио́пская, де́монская со́нмища твоего́ ужасо́шася терпе́ния, и смире́ния,/ и непреста́ннаго во бде́ниих твоего́ стоя́ния, досточу́дне.

Богоро́дичен: Во изступле́нии главы́ си́льных ссеко́шася/ стра́хом рождества́ Твоего́, Богороди́тельнице Всенепоро́чная,/ собо́р же преподо́бных удиви́ся досто́йно Боже́ственною благода́тию.

Песнь 5

Ирмо́с: Ходата́й Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/ приведе́ние и́мамы.

Уче́ния те́пле честна́я име́в,/ разори́л еси́ всех ересе́й преле́стная прия́тия, му́дре,/ Тро́йческою ве́рою огражда́я ста́до твое́.

Я́ко свет вои́стинну на земли́ был еси́, Фео́доре,/ житие́ непоро́чно пожи́в, всеприснопа́мятне,/ по́стников украше́ние, мона́шествующих похвала́.

Богоро́дичен: Тече́нием по́стнических слез напая́я се́рдце твое́,/ плодоно́сно показа́л еси́ возсия́вшему Влады́це Христу́ от Де́вы Святы́я,/ Фео́доре пребога́те.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Све́тлое и Богоуго́дное житие́ твое́/ тебе́ Небе́сную, о́тче, све́тлость святы́х показа́,/ в се́лех небе́сных, Фео́доре.

Победи́тель, одолева́я, Фео́доре, лука́вствия духо́в, был еси́,/ Уте́шителя Ду́ха помо́щника стяжа́в, Богоприя́тне.

Богоро́дичен: О́блак ле́гкий еси́, Чи́стая,/ на не́мже седя́, прии́де во Еги́пет Вседержи́тель Госпо́дь/ и свети́льники преподо́бныя соде́ла.

Конда́к, и и́кос пра́здника.

Песнь 7

Ирмо́с: Богопроти́вное веле́ние/ беззако́ннующаго мучи́теля/ высо́к пла́мень вознесло́ есть,/ Христо́с же простре́ Богочести́вым отроко́м ро́су духо́вную,/ Сын благослове́н и препросла́влен.

Разу́мно возжела́л еси́, я́коже Богови́дец,/ Боже́ственную све́тлость ви́дети, Фео́доре,/ те́мже ви́димая вся оста́вил еси́,/ во мрак же вшед, зре́ти сподо́бился еси́ Непостижи́маго.

Я́да ты змии́на душетле́ннаго, преблаже́нне Фео́доре, ника́коже прии́м,/ сего́ па́мять, о́тче, погуби́л еси́,/ па́мять непреста́нно Бо́жию в се́рдцы, блаже́нне, стяжа́в.

Богоро́дичен: Святы́х Свята́го, во святы́х почива́ющаго,/ свя́то породила́ еси́, Де́во Всенепоро́чная,/ за милосе́рдие мно́гое Челове́ка бы́вша, из Тебе́ воплоще́нна,/ пре́жде Безпло́тнаго.

Песнь 8

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Ты светови́ден, Све́ту пресве́тлому бесе́довав, яви́лся еси́, преблаже́нне Фео́доре,/ едине́нием же лу́чшим па́че естества́ обожа́емь, зовы́й ны́не:/ благослови́те, вся дела́ Госпо́дня, Го́спода.

Му́ченик быв тверд ко греху́, да́же до кро́ве проти́влься, Богому́дре Фео́доре,/ венце́м страда́ния твою́ главу́ украси́л еси́, зовы́й ны́не:/ благослови́те, вся дела́ Госпо́дня, Го́спода.

Богоро́дичен: Яви́ся нам из Тебе́, Богороди́тельнице, пра́вды све́тлое Со́лнце,/ просвеща́я вся́ческая заре́ю Божества́,/ вопло́щся Вы́шний, Его́же ны́не воспева́ем:/ благослови́те, вся дела́ Госпо́дня, Го́спода.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Ны́не не в гада́ниих тебе́ Христо́с ви́дим есть,/ к лицу́ же па́че ви́дится лице́м, и́стинным явле́нием,/ и́же сено́вным разре́шшимся зерца́лом,/ даро́в тезоимени́те, Спа́са и Бо́га на́шего.

Жела́ние Боже́ственное твое́ испо́лнися, Фео́доре,/ я́ко дости́г кончи́ну, е́же поще́нием издале́ча зря́ше со умиле́нием,/ его́же и получи́в, жела́ния уста́вил еси́,/ по́стников похвало́, мона́шествующих благоле́пие.

Богоро́дичен: Неду́говав растле́тися преслуша́нием, пе́рвый Ада́м Тобо́ю, Богома́ти, обнови́ся:/ Ты бо, воплоще́нна Сло́ва ро́ждши без истле́ния неизрече́нно,/ тлю искорени́вши, нетле́ние процвела́ еси́.

Преподобный Феодор

Преподобный Феодор назван «Освященным» потому, что первым в своей обители был рукоположен во священники.

Преподобный Феодор происходил из Египта и был сыном богатых и знатных родителей-христиан. У него рано появилось стремление к иноческой жизни. Однажды, когда в доме родителей в честь праздника Богоявления было большое угощение, отрок, не желая принимать участие в пиршестве, скорбел, что за радости земной жизни будет лишен будущей. 14-ти лет он тайно ушел из дома и поселился в одном из монастырей. Услыхав о преподобном Пахомии Великом, он возгорелся желанием увидеть подвижника. Преподобный Пахомий с любовью принял пришедшаго отрока, будучи предуведомлен Богом о приходе его. Оставшись в обители, преподобный Феодор быстро преуспел во всех иноческих подвигах, особенно же в полном послушании своему наставнику и в сострадании к окружающим братиям. Мать Феодора, узнав, что он находится в Тавеннисской обители, с письмом от епископа пришла к преподобному Пахомию, моля о свидании с сыном. Но инок Феодор, опасаясь нарушить обет отречения от мира, отказался видеться с матерью.

Видя разум и способности святого Феодора, преподобный Пахомий однажды просил его сказать поучение братии от Божественного Писания. Святому Феодору тогда было 20 лет. Он беспрекословно повиновался и стал говорить, но некоторые из старших братии оскорбились тем, что им читает поучение новоначальный инок, и удалились. Тогда преподобный Пахомий сказал им: «Вы покорились дьяволу и своим самомнением погубили свои труды. Вы не Феодора отвергли, но отвергли Слово Божие и лишились Святого Духа».

Святой Пахомий назначил преподобного Феодора строителем Тавеннисской обители, а сам удалился в более уединенный монастырь. Святой Феодор продолжал с сыновней любовью заботиться о своем наставнике, в предсмертной болезни преподобного Пахомия ухаживал за ним. Когда великий авва преставился ко Господу, он закрыл ему глаза. После смерти преподобного Пахомия святой Феодор управлял Тавеннисским монастырем, а позднее стал во главе всех фиваидских обителей. Преподобный Феодор Освященный прославился святостью жизни и обильным даром чудотворений, он был хорошо известен святителю Афанасию, Патриарху Александрийскому. Блаженная кончина святого Феодора последовала в 368 году.

Преподо́бнаго отца́ на́шего Ефре́ма Переко́мскаго

НА ВЕЧЕ́РНИ

На Го́споди, воззва́х:стихи́ры глас 5.

Подо́бен: Ра́дуйся:

Преподо́бне о́тче Ефре́ме,/ любо́вию Боже́ственною разжиза́емь,/ оте́чество и род оста́вил еси́/ и, в пусты́ню дости́г/ и та́мо ма́лу хлеви́ну созда́в,/ в ней до́бре подвиза́лся еси́./ Те́мже и по преставле́нии твое́м/ благода́ть от Го́спода прия́л еси́ чуде́с,/ моли́ спасти́ся тебе́ почита́ющим.

Преподо́бне о́тче Ефре́ме,/ любве́ ра́ди учи́теля твоего́,/ вся, я́же на земли́, преоби́дел еси́,/ и, в пусты́ню всели́вся,/ пло́ти по́хотное мудрова́ние умертви́л еси́,/ и по́стническими труды́ твое́ житие́ уясни́л еси́./ Отону́дуже и ученики́ собра́в,/ ревну́ющия твоему́ житию́,/ сих Христу́ приве́л еси́,/ Его́же моли́ спасти́ всех, тебе́ пою́щих.

И́же непра́ведно разбо́йнически/ наше́дших на оби́тель твою́, преподо́бне,/ хотя́щих оскорби́ти ученики́ твоя́,/ ты же от ке́ллии я́ко тех ви́дел еси́,/ то́кмо жезла́ ударе́нием устраши́л еси́./ Отону́дуже, я́ко позна́вше свое́ безчелове́чное суровство́,/ со студо́м бе́гству устреми́шася./ Христу́ моли́ся спасти́ ду́ши на́ша.

Сла́ва, глас 6:

На у́стьи Вере́нды,/ на о́строве водвори́вся, преподо́бне,/ и в пусты́ню безмо́лвия вшед,/ та́мо ке́ллию созда́л еси́,/ в не́йже Небе́сное бога́тство стяжа́л еси́,/ слеза́ми у́бо постя́ся,/ ра́достию пожина́еши плоды́ трудо́в твои́х./ Те́мже оби́тель, ю́же труды́ твои́ми стяжа́л еси́,/ со ученики́ не оста́ви,/ но ми́лостивно посеща́й,/ Христу́, о́тче Ефре́ме, моли́ся спасти́ ду́ши на́ша.

И ны́не, пра́здника.

Вход. Проки́мен дне. И чте́ния три преподо́бническая (зри 21 мая)

На стихо́вне стихи́ры, глас 2

Подо́бен: Доме Евфра́фов:

Я́ко преходя́щую жизнь/ на земли́ презре́в, блаже́нне,/ та́мо сподо́бился еси́ улучи́ти/ жизнь Боже́ственную/ и тоя́ сия́ние прия́л еси́, Богоно́се.

Стих: Честна́ пред Го́сподем/ смерть преподо́бных Его́.

Любве́ ра́ди Христо́вы,/ преподо́бне Ефре́ме,/ пло́ти рачи́тельное умертви́л еси́ мудрова́ние/ и ду́шу, от страсте́й свобо́дну,/ Бо́гу предста́вил еси́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Бо́дренными моли́твами/ и сле́зными исто́чники/ Це́рковь ве́рных/ обогати́л еси́,/ Богоблаже́нне Ефре́ме.

Сла́ва, глас 8:

Мона́хов мно́жества/ наста́вника тя почита́ем, о́тче наш Ефре́ме:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

И ны́не, пра́здника.

Тропа́рь, глас 4:

От ю́ности твоея́ весь Бо́гови порабо́тился еси́, блаже́нне,/ и Того́ ра́ди любве́ оте́чество и род оста́вил еси́,/ в пусты́ню всели́вся,/ в не́йже жесто́кое житие́ показа́в,/ и чуде́с дарова́ния от Бо́га прия́л еси́,/ Ефре́ме преподо́бне./ Моли́ Христа́ Бо́га, да спасе́т ду́ши на́ша.

НА У́ТРЕНИ

На Бог Госпо́дь:тропа́рь пра́здника, два́жды. Сла́ва,свята́го. И ны́не,пра́здника.

По 1-й стихоло́гии седа́лен, глас 4:

Ю́ность твою́, преподо́бне, воздержа́нием увяди́л еси́,/ стра́сти теле́сныя, я́ко пле́нника ху́да, связа́в, ду́хови повину́л еси́,/ и сего́ ра́ди, о́тче Ефре́ме, Христо́с чудесы́ пресла́вно тебе́ венча́ет,/ еди́н, прославля́яй святы́х Свои́х.

Сла́ва, и ны́не, Богоро́дичен:

Умертви́ся вся кре́пость моя́ от мно́жества безме́рных зол мои́х/ и, мно́гими скорбьми́ одержи́м, уже́ отча́яхся,/ но помози́ ми, Влады́чице, Ефре́ма блаже́ннаго предста́тельством,/ я́ко ра́дость ро́ждшая, пла́чущим утеше́ние.

По 2-й стихоло́гии седа́лен, глас 5.

Подо́бен: Собезнача́льное:

По́стника Госпо́дня пе́сньми почти́м,/ я́ко умертви́вша вся прило́ги страсте́й/ воздержа́нием тве́рдым и кре́пким терпе́нием вои́стинну/ и посрами́вша зе́ло сопроти́внаго всю горды́ню,/ ны́не моля́щася Го́сподеви поми́ловатися душа́м на́шим.

Сла́ва, и ны́не, Богоро́дичен:

Ужа́сно чу́до зача́тия и несказа́нен о́браз рождества́/ в Тебе́ позна́ся, Присноде́во Чи́стая,/ ужаса́ет мой ум и удивля́ет помышле́ние:/ сла́ва Твоя́, Богоро́дице, во всех простре́ся, ко спасе́нию душ на́ших.

По полиеле́и седа́лен, глас 4:

Я́ко со́лнце, возсия́л еси́ заря́ми всему́ ми́ру,/ издале́ча чудесы́ твои́ми, чудотво́рче Ефре́ме,/ светоно́сче блаже́нне, преподо́бных похвало́.

Сла́ва, и ны́не, Богоро́дичен:

В кров Твой, Де́во, вен прибега́юще, вопие́м Ти:/ мольбу́ приими́ от нас и не преста́й моля́щися Человеколю́бцу/ спасти́ся рабо́м Твои́м.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́.Стих: Что́ возда́м Го́сподеви о всех, я́же воздаде́ ми?Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудов твоих,/ демонския погубил еси́ полки/ и а́нгельский дости́гл еси́ чины,/ и́хже житию́ без поро́ка поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

Кано́н пра́здника на 6 и преподо́бнаго Ефре́ма на 8, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Смири́лся еси́ Христа́ ра́ди, о́тче,/ и, Крест взем, от оте́чества и сро́дник, я́ко от зми́я, бе́гал еси́./ Отону́дуже в пусты́ню вшед,/ в не́йже трудолю́бно подвиза́лся еси́, преподо́бне.

От ю́ности твоея́, о́тче Ефре́ме,/ ум к Бо́гу впери́в,/ тле́нными нетле́нная, я́ко до́брый купе́ц, искупи́л еси́,/ те́мже, ны́не соше́дшеся, па́мять твою́ почита́ем.

Христо́вым раче́нием, о́тче Ефре́ме, па́че огня́ распала́емь,/ настоя́щая, я́ко ничто́же су́щая, презре́л еси́,/ сего́ ра́ди в поко́ища всели́лся еси́, иде́же пра́ведных ду́ши веселя́тся.

Богоро́дичен: Боля́ща исцели́ душе́ю же и те́лом, Влады́чице, раба́ Твоего́,/ блаже́ннаго Ефре́ма моле́нием:/ Тебе́ бо Предста́тельницу вси су́щии в печа́ли стяжа́хом,/ я́ко ро́ждшую спасе́ние на́ше.

Катава́сия пра́здника.

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик Себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Сна твои́ма очи́ма не дал еси́, блаже́нне Ефре́ме,/ ни ве́ждома дрема́ния,/ до́ндеже сподо́бился еси́ пра́ведных селе́ния,/ е́же угото́ва Бог, преподо́бне, лю́бящим Его́.

Бо́дренными твои́ми моли́твами, о́тче Ефре́ме,/ и жесто́ким воздержа́нием Го́споду на земли́ до́бре угоди́л еси́,/ сего́ ра́ди стра́шен враго́м и сла́вен челове́ком был еси́.

Ра́йскую жизнь и та́мо святы́х весе́лие всегда́ во уме́ твое́м помина́я, преподо́бне,/ в слеза́х и воздыха́ниих всю твою́ жизнь, о́тче Ефре́ме, проше́л еси́,/ сего́ ра́ди и по сме́рти от Христа́ чудесы́ просла́вился еси́.

Богоро́дичен: Источа́еши исцеле́ний струи́ боля́щим, Де́во, всю́ду:/ Тя бо исто́чник показа́ милосе́рдия, Влады́чице,/ И́же ми́лости Госпо́дь, из Тебе́ рожде́йся па́че ума́.

Седа́лен, пи́сан по 1-й стихоло́гии.

Песнь 4

Ирмо́с: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Житие́ твое́, о́тче Ефре́ме, чу́дно на земли́ показа́л еси́,/ вели́ко поще́ние и смире́ние,/ сего́ ра́ди та́мо вели́чество насле́довав,/ моли́ спасти́ся от бед пою́щим тя.

Се́ргия вели́каго житию́ после́дуя, преподо́бне,/ те́мже того́, ели́ко мо́щно, именова́ние от жития́ стяжа́л еси́,/ Ефре́ме пребога́те.

Посто́м и моли́твами те́ло твое́ изнури́л еси́/ и сего́ ра́ди сподо́бился еси́ ви́дети неизрече́нная блага́я, я́же святы́м угото́вана,/ с ни́миже, о́тче Ефре́ме, о нас моли́ся.

Богоро́дичен: Кров, и заступле́ние, и прибе́жище бу́ди ми, Де́во, рабу́ Твоему́/ и исцели́ мя от безме́рных зол воспева́ти, Пречи́стая:/ сла́ва Рождеству́ Твоему́.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Чи́сто житие́ твое́ от ю́ности потща́лся еси́, преподо́бне, сохрани́ти,/ те́мже, чистоту́ твою́ ви́дев, Пресвяты́й Дух в тя всели́ся.

Я́ко преоби́дев тле́нная, ве́чная, о́тче, сподо́бился еси́ прия́ти/ по нело́жному словеси́: проси́те и прии́мете./ И е́же я́ко проси́л еси́, сия́ по досто́инству прия́л еси́.

Ме́сто, е́же сподо́бися прия́ти честны́я мо́щи твоя́, преподо́бне, освяти́ся,/ и по мно́гим страна́м прославля́емо есть,/ я́ко в себе́ мо́щи твоя́ име́ет.

Богоро́дичен: Не преста́й моля́щи, Его́же родила́ еси́, Богоневе́сто, я́ко Спа́са и Влады́ку,/ разреше́ние пода́ти ско́рбем и боле́знем,/ к ра́дости нетле́нней мя возведи́, проща́я ми согреше́ния.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Твое́ вели́кое жити́е и чистоту́,/ к сим же безме́рное смире́ние прови́дев, Пресвяты́й Дух/ сла́вна тя, о́тче, всем показа́./ Те́мже, от сего́ жития́ ко о́ному ве́ку преше́д,/ полу́чил еси́ с пра́ведными весе́лие.

Днесь начина́ема свяще́нная па́мять твоя́, преподо́бне Ефре́ме, весели́т ученики́ твоя́,/ воспева́ющия любо́вию по́двиги твоя́ и честно́е успе́ние сла́вящия, торжеству́юще,/ и́хже моли́твами твои́ми, о́тче, соблюди́.

Разбо́йницы пе́рвее прише́дше тебе́ оскорби́ти, преподо́бне,/ но ты, тех разуме́в лука́вство, воздви́гнути тем дре́во рекл еси́,/ не могу́щим же мно́гим тебе́ еди́ному проти́витися./ Те́мже, я́ко посра́млени про́чее, со стра́хом отбежа́ша,/ па́че побежде́ни бы́вше, не́жели победи́ша.

Богоро́дичен: Твою́ пода́ждь ми по́мощь/ и изба́ви мя, Влады́чице, от бед и скорбе́й, и прегреше́ний мои́х,/ Я́же всех ро́ждшая избавле́ние.

Конда́к, глас 8

Подо́бен: Взбра́нной:

А́нгельскому житию́ поревнова́в, преподо́бне,/ вся земна́я оста́вив, ко Христу́ прите́кл еси́/ и, Того́ за́поведьми огра́ждся,/ яви́лся еси́ столп непоколеби́м от вра́жиих напа́даний./ Тем зове́м ти:/ ра́дуйся, Ефре́ме, свети́ло пресве́тлое.

И́кос:

И́же в ме́ртвеннем те́ле А́нгельскому уподо́блься житию́ па́че естества́/ и с те́ми на Небесе́х лику́я,/ прииди́те, вси ве́рнии, воспое́м преподо́бнаго Ефре́ма:/ той бо, я́ко уме́ты, вмени́ мирска́я вся кра́сная, я́ко да Небе́сных получи́т,/ вшед на го́ру, я́коже дре́вле Моисе́й и вели́кий Илия́,/ посто́м очи́щся, сподо́бися ви́дети Тро́йческую све́тлость/ не во мра́це, ни в ви́хре, но во све́те благода́ти Бо́жия./ Тем и чуде́с лучи́ испуща́я све́тло/ и ре́ки исцеле́ния источа́я ве́рным от гро́ба, я́ко неду́гов исцели́тель,/ ра́дуйся, о́тче Ефре́ме, свети́ло пресве́тлое.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Источа́ет чудеса́ честна́я ра́ка твоя́, преподо́бне, преизоби́лующи благода́тию,/ ве́рою приходя́щим здра́вие да́рует, Христу́ от души́ вопию́щим:/ благослове́н еси́, Го́споди, Бо́же оте́ц на́ших.

Дре́вним о́нем вели́ким отце́м, в посте́ провозсия́вшим,/ житие́м подо́бяся, преподо́бне, в пусты́ню всели́лся еси́/ и та́мо в поще́ниих многа́ ле́та пребы́л еси́.

Я́ко и́стиннаго и кро́ткаго Пастыренача́льника Христа́/ незло́бивое овча́, о́тче Ефре́ме, был еси́,/ те́мже незло́бив к хотя́щим тебе́ озло́бити был еси́, Христо́ви вопия́:/ Бо́же, благослове́н еси́.

Богоро́дичен: Обощре́ны боле́зни ран мои́х от безме́рных мои́х прегреше́ний, Влады́чице,/ веду́т в смерть душе́вную и теле́сную,/ но исхи́ти, я́ко сильна́, вся́ких скорбе́й и неду́гов.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Из мла́да, преподо́бне о́тче, потща́лся еси́/ твою́ со́весть и се́рдце с душе́ю чи́стою Го́сподеви предста́вити./ Те́мже и Христо́с чудесы́ тебе́ прославля́ет, Тому́ вопию́ща:/ Го́спода воспева́йте, дела́, и превозноси́те Его́ во вся ве́ки.

Ны́не пусты́ня весе́лием, о́тче, красу́ется,/ иму́щи мо́щи твоя́ в себе́, Ефре́ме преподо́бне,/ ученицы́ же твои́, твоему́ житию́ ревну́юще,/ о твое́й па́мяти ра́дующеся, Творцу́ вопию́т:/ Го́спода воспева́йте, дела́, и превозноси́те Его́ во вся ве́ки.

В пусты́ни, преподо́бне, иде́же селе́ние име́л еси́,/ та́мо прече́стен храм в сла́ву Христо́ву воздви́гл еси́,/ в нем прославля́тися пречи́стому Того́ и́мени и всем вопи́ти:/ Го́спода воспева́йте, дела́, и превозноси́те Его́ во вся ве́ки.

Богоро́дичен: Све́щниче Све́та трисо́лнечнаго су́щи,/ заре́ю благоутро́бия Твоего́ тьму отыми́ прегреше́ний мои́х, Богороди́тельнице,/ избавле́ние ну́ждных боле́зней подаю́щи/ ве́рою пою́щему и превознося́щему пречи́стое Твое́ рождество́.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

От пусты́ннаго жития́ к преми́рному и ве́чному житию́ я́ко преше́д, блаже́нне,/ не преста́й моля́ Изба́вителя от разли́чных напа́стей и бед изба́вити/ любо́вию честно́е твое́ успе́ние ны́не пе́сньми сла́вящих.

Певце́в, и́скреннею любо́вию пою́щих/ и ве́рою тебе́ пе́ние хвале́ния принося́щих, преблаже́нне Ефре́ме,/ от вся́ких бед и скорбе́й избавля́й, да тя вси любо́вию велича́ем.

От рук мои́х недосто́йных ма́лое сие́ пе́сненное хвале́ние/ принося́щаго ти с любо́вию, приими́, блаже́нне Ефре́ме:/ не бо возмого́х проти́ву твоего́ вели́чества украси́ти,/ но ма́лое сие́, я́ко вели́ко, приими́,/ да тебе́ всегда́ велича́ем в пе́снех.

Богоро́дичен: Пе́ние с пе́снию и хвале́ние исплете́ное от боле́зненныя души́/ приношу́ с любо́вию Тебе́, ро́ждшей Христа́, естество́м Бо́га,/ е́же благоприя́тно прии́мши, проше́ния моя́, Богоро́дице, испо́лни/ и моли́твами Твои́ми соблюди́.

Свети́лен:

А́нгельскаго жития́ жела́я, удали́л еси́ себе́ в пусты́нях/ и, стра́сти покори́в плотски́я, ра́вен А́нгелом яви́лся еси́,/ о́тче наш Богоно́се Ефре́ме.

Богоро́дичен:

Держа́вным Твои́м покро́вом от враго́в наве́та/ нас, Чи́стая, Твои́х раб, соблюди́ всех невре́дных,/ Тя бо еди́ну и́мамы прибе́жище в ну́ждах.

На хвали́тех стихи́ры на 4, глас 8.

Подо́бен: О, пресла́внаго чудесе́:

Преподо́бне о́тче Ефре́ме,/ ты, и́го Христо́во на ра́мо взем,/ до́блественне наи́тие вра́жие попра́л еси́./ Сего́ ра́ди тя,/ ве́рнии вси, почита́ем,/ о преблаже́нне, мона́шествующих похвало́./ Те́мже Христа́ непреста́нно моли́/ спасти́ ду́ши на́ша.

Ве́рою соше́дшеся вси,/ я́ко по́стника тя Христо́ва почита́ем, Ефре́ме:/ ра́дуяся у́бо, ше́ствовал еси́ в пусты́ню непроходи́мую, му́дре,/ наста́вник был еси́ че́стен./ Те́мже тебе́ мы ве́рою взыва́ем,/ блаже́нне, по́стников похвало́:/ о нас моли́ся ко Го́споду,/ поми́ловатися душа́м на́шим.

Преподо́бне о́тче наш,/ бу́дущия ра́ди жи́зни/ при е́зере на о́строве Переко́ме всели́лся еси́,/ ника́коже боя́ся неви́димых враго́в,/ мно́гажды толца́ния творя́щих к тебе́,/ ты же моли́твами сих без ве́сти твори́л еси́,/ о терпели́вый душе́ю,/ в пу́сте ме́сте, чу́дное овча́,/ Христа́ А́гнца Па́стыря име́я./ Те́мже тя ве́рою вси чтим и ублажа́ем.

Сла́ва, глас то́йже. Самогла́сен:

На Не́бо теку́щую возше́д колесни́цу, чу́дне, доброде́телей,/ дости́гл еси́ кра́йнее житие́ воздержа́нием,/ из пусты́ни смотря́я Вы́шняго Иерусали́ма красоты́/ и, боле́зненным подвиго́м досто́йно по́чести прие́м,/ с Небе́сными ра́дуешися чинонача́лии, преблаже́нне,/ ве́чных благи́х насле́дник/ и Ца́рствия жи́тель быв./ Моли́ся, преподо́бне Ефре́ме, Спа́су всех/ умири́ти мир и спасти́ ду́ши на́ша.

И ны́не, пра́здника. Славосло́вие вели́кое.

На Литурги́и слу́жба преподо́бническая.

Преподобный Ефрем Перекомский, Новгородский

Преподобный Ефрем Перекомский, Новгородский, родился 20 сентября 1412 года в г. Кашине. Б святом Крещении назван Евстафием. Его родители, Стефан и Анна, проживали недалеко от Кашинского женского монастыря в честь Успения Пресвятой Богородицы. Склонный к уединению, Евстафий еще в юные годы оставил родительский дом и поселился в Калязянской обители во Имя Пресвятой Троицы. Родители хотели возвратить сына домой, но он сам убедил их оставить мир и принять монашество. Впоследствии они и завершили земной путь в отшельничестве. Пробыв в обители три года, Евстафий по чудесному откровению перешел в монастырь преподобного Саввы Вишерского (память 1 октября) и там в 1437 году принял постриг с именем Ефрем. Находясь в обители, преподобный Ефрем получил откровение от Господа, повелевавшего ему удалиться в пустынное место. Получив благословение преподобного Саввы, он в 1450 году перешел на озеро Ильмень, к устью реки Веренды, и на берегу реки Черной поставил келлию. Через некоторое время к преподобному Ефрему пришли старец Фома и два инока и поселились неподалеку от его келлии. Со временем к новой обители стали собираться и другие отшельники. По их просьбе преподобный Ефрем принял в Новгороде от святителя Евфимия († 1458; память 11 марта) сан священника.

Возвратившись из Новгорода, преподобный Ефрем основал храм в честь Богоявления Господня на острове, находившемся в устье реки Веренды. Для удобной доставки монастырю воды преподобный прокопал в озеро Ильмень проток, отчего обитель получила название Перекопской, или Перекомской. Впоследствии преподобный Ефрем основал каменный храм во имя Святителя Николая Чудотворца. Ввиду недостатка искусных строителей он послал к великому князю Василию Иоанновичу нескольких иноков с прошением о присылке каменщиков, после чего в 1466 году строительство храма было завершено. Преставился преподобный Ефрем 26 сентября 1492 года и был погребен в храме Святителя Николая. В 1509 году из-за частых наводнений, грозивших монастырю разрушением, обитель была перенесена в другое место на берегу озера Ильмень. Явившийся игумену Роману преподобный Ефрем указал место Клинково для расположения обители. На месте погребения преподобного была построена часовня, поскольку все монастырские храмы были разобраны. 16 мая 1545 года мощи преподобного Ефрема были перенесены в новую обитель. С того дня в монастыре ежегодно совершалась память преподобного Ефрема Перекомского, утвердившаяся окончательно после прославления святого подвижника на Соборе Русской Церкви в 1549 году. Сведения о преподобном Ефреме помещены также в Минее 26 сентября.

* * *

46

Худо́г – опытный, умелый, богобоязненный.


Источник: Минея - М. : Издательский Совет Русской Православной Церкви, 2002-. 12 том. / Минея май. - 2002. / Ч. 1. – 456 с.; Ч. 2. – 536 с.; Ч. 3. - 400 с.

Комментарии для сайта Cackle