Источник

14-й день

Пра́зднование Пресвяте́й Влады́чице на́шей Богоро́дице в че́сть ико́ны Ея́, нарица́емыя Фео́доровская, и́же во гра́де Костроме́

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 1:

Подо́бен: Небе́сных чино́в:

Ны́не свяще́нных ли́цы,/ благогове́ющии к Бо́жией Ма́тери,/ к весе́лию град Кострому́/ и все ве́рных сосло́вие созыва́ют,/ возвеща́юще Цари́цы/ пречу́днаго о́браза прише́ствие.

И́же чуде́снаго о́браза/ Пресвяты́я Влады́чицы прише́ствие/ благогове́йно прие́мше костромсти́и жи́телие,/ ра́дости вси испо́лнишася,/ призыва́юще всех дне́сь/ на пресла́вное торжество́ Бо́жия Ма́тере.

С чи́нми свяще́нных дне́сь/ вси ро́ди ве́рных,/ духо́вно возвесели́мся,/ пра́зднующе торжество́ Бо́жия Ма́тере,/ яви́вшия нам исто́чник приснотеку́щий,/ незави́стныя да́ры исцеле́ний всем подаю́щий.

Фео́доре, му́чениче Христо́в, ра́дуйся и лику́й,/ при́сный ра́бе Всепе́тыя Богома́тере,/ я́ко сподо́бился еси́ Тоя́ всечестну́ю ико́ну/ рука́ми твои́ми подъя́ти и носи́ти,/ и гра́ду Костроме́ препода́ти,/ я́коже ца́рскую у́тварь, во спасе́ние душ на́ших.

Сла́ва, и ны́не, глас 5:

Собра́вшеся, ве́рнии,/ на свяще́нное торжество́ Де́вы дне́сь,/ предочи́стим себе́ воздержа́нием страсте́й,/ да Чи́стую нескве́рными устна́ми/ и чи́стыми душа́ми воспои́м, глаго́люще:/ ра́дуйся, преизя́щная красото́ и похвало́ гра́ду Твоему́,/ ему́же при́сно благотвори́ши,/ хода́тайствующи поле́зная всем,/ с любо́вию к Тебе́ притека́ющим.

На стихо́вне стихи́ры, глас 2:

Подо́бен: Егда́ от Дре́ва:

Я́коже прише́ствием иногда́ ко Елисаве́ти Твои́м/ подви́гла еси́ со устна́ми утро́бу ея́/ к благохвале́нию Твоего́ вели́чия,/ си́це и ны́не прише́ствие Твоего́ чуде́снаго о́браза пра́зднующим/ моли́твами Твои́ми исхода́тайствуй благода́ть,/ по достоя́нию воспева́ти Тебе́, Благослове́нная в жена́х,/ и благослове́нный Плод чре́ва Твоего́.

Стих: Слы́ши, Дщи, и ви́ждь,/ и приклони́ у́хо Твое́.

Не́сть красна́ пе́снь во усте́х гре́шника,/ я́коже рече́ Писа́ние,/ сего́ ра́ди мы, пови́ннии мно́гим грехо́м,/ не мо́жем досто́йне пе́ти Тя,/ просла́вленную от Сама́го святы́х Святе́йшаго./ Те́мже, припа́дающе, вопие́м Ти:/ Богоблаже́нная Отрокови́це,/ Твои́м предста́тельством соде́лай,/ да чи́стыми душа́ми и нескве́рными устна́ми/ блажи́м Тя, Всепе́тая.

Стих: Лицу́ Твоему́ помо́лятся/ бога́тии лю́дстии.

А́ще к высоте́ вели́чия и чуде́с Твои́х/ не довле́ет немощно́е сло́во и ум наш,/ Ты Сама́, Богороди́тельнице,/ недостаю́щее в нас Твои́ми моли́твами ны́не испо́лни,/ хода́тайствующи нам благода́ть Ду́ха,/ И́мже дви́жима иногда́, Предте́чева Ма́ти/ Тебе́, Ма́терь Го́спода Своего́,/ по достоя́нию велича́ше.

Сла́ва, и ны́не, глас то́йже. Самогла́сен:

Се покрови́тельствуемый Тобо́ю град наш,/ в ра́дости Ду́ха срета́я/ све́тлый пра́здник прише́ствия всечестна́го Твоего́ о́браза,/ уми́льно взыва́ет к Тебе́:/ прииди́ к нам, Богоневе́сто,/ и неви́димо ста́ни с на́ми,/ вложи́ пе́ние во уста́ на́ша/ и о́ным предначни́ торжество́.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, глас 2:

Прииди́те, во гла́се шу́ма пра́зднующаго/ воспои́м Го́сподеви, благоде́явшему нам/ явле́нием чуде́снаго о́браза Пречи́стыя Твоея́ Ма́тере,/ прославля́юще бога́тство благода́ти,/ ю́же предста́тельством Ея́ излива́ет оби́льно на всех,/ под се́нь пречи́стаго лица́ Ея́ притека́ющих с ве́рою,/ Иису́с Человеколю́бец и Спас душ на́ших.

Благознамени́т бы́сть Изра́илю де́нь о́ный,/ в о́ньже руко́ю Моисе́я от го́рькия рабо́ты/ во блаже́нную свобо́ду лю́дие Бо́жии превожда́хуся,/ си́це и нам ра́достен наро́читый сей пра́здника на́шего де́нь,/ я́ко дне́сь руко́ю вели́каго кня́зя и госуда́ря Михаи́ла Фео́доровича,/ от Костромски́х преде́лов возсия́вшаго,/ вся страны́ оте́чествия на́шего умири́л еси́, Го́споди,/ да в ми́ре глубо́це прославля́ем/ благодея́ния и чудеса́ Твоя́.

Благи́ми преизоби́ловаше дом Аведда́ров,/ бы́вшу иногда́ в нем киво́ту Заве́та,/ си́це и град наш, име́я в селе́нии свое́м о́браз Твой, Влады́ко,/ и Пренепоро́чныя Твоея́ Ма́тере,/ наслажда́ется бога́тых даро́в Твои́х,/ прославля́я Тебе́ и с Тобо́ю ро́ждшую Тя,/ Хода́таицу ми́ра и ве́лия ми́лости.

Обраща́ше дре́вний Изра́иль в бе́гство полки́ чужи́х,/ разруша́ше тверды́ни иноплеме́нных градо́в/ и всех бе́дственных нахожде́ний от супоста́тов свобожда́шеся,/ егда́ ковче́г Заве́та имя́ше с собо́ю,/ но сия́ дре́вния ми́лости/ преизоби́льно удиви́л еси́ на гра́де на́шем, Го́споди,/ егда́ нечести́вых, на достоя́ние Твое́ ополчи́вшихся,/ стра́хом смяте́нных бежа́ти вспя́ть сотвори́л еси́,/ пода́в нам зна́мение по́мощи Твоея́/ в чуде́снем о́бразе одушевле́ннаго Твоего́ Киво́та.

Сла́ва, и ны́не, глас 6:

Соше́дшеся, ве́рных совокупле́ния,/ на пресла́вное торжество́ Бо́жия Ма́тере,/ согла́сно воспои́м благодея́ния и чудеса́,/ и́миже Госпо́дь сла́вы,/ в Костромски́х преде́лех пресла́вно просла́ви Ма́терь Свою́:/ се бо чуде́сно яви́ нам всечестны́й о́браз Ея́./ О Всеми́лостивый Го́споди, Спа́се наш,/ творя́й чудеса́ еди́н,/ удиви́ и на нас дре́вния о́ныя Твоя́ ми́лости,/ име́я о сем моля́щую Тя Ма́терь Твою́,/ Покрови́тельницу и Предста́тельницу гра́ду на́шему,/ да и мы, при́сно исполня́ющеся благи́х до́му Твоего́,/ непреста́нно славосло́вим Тя,/ я́ко Ты вчера́, и дне́сь, и во ве́ки То́йже еси́/ Госпо́дь и Промысли́тель наш.

Вход. Проки́мен дне. И чте́ния три.

Бытия́ чте́ние (глава́ 28):

Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа та́мо,/ за́йде бо со́лнце./ И взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица, утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней./ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся,/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки./ И возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще по́йдеши./ И возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко е́сть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ не́сть сие́, но дом Бо́жий,/ и сия́ врата́ Небе́сная.

Проро́чества Иезеки́илева чте́ние (гла́вы 43 и 44):

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы,– глаго́лет Адонаи́ Госпо́дь./ И обрати́ мя на пу́ть врат святы́х вне́шних, зря́щих на восто́ки,/ и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му,/ и ви́дех, и се испо́лнь сла́вы храм Госпо́день.

При́тчей чте́ние (глава́ 9):

Прему́дрость созда́ Себе́ дом/ и утверди́ столпо́в се́дмь./ Закла́ Своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же е́сть безу́мен, да уклони́тся ко Мне./ И тре́бующим ума́ рече́:/ прииди́те, яди́те Мой хлеб и пи́йте вино́,/ е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ния бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Да́ждь прему́дрому вину́, и прему́дрший бу́дет,/ сказу́й пра́ведному, и приложи́т приима́ти./ Нача́ло прему́дрости – страх Госпо́день,/ и сове́т святы́х – ра́зум./ Разуме́ти бо зако́н – по́мысла е́сть блага́го,/ сим бо о́бразом мно́гое поживе́ши вре́мя,/ и приложа́тся тебе́ ле́та живота́.

На лити́и стихи́ры, глас 4:

Воспои́м, ве́рнии,/ е́же о нас Бо́жия благоволе́ния вели́чие,/ я́ко прославля́яй разли́чными чудеса́ми/ вся про́чия ца́рствия Своего́ преде́лы Госпо́дь/ призре́ и на смире́ние нас, рабо́в Свои́х,/ дарова́в гра́ду на́шему зна́мение Своего́ всеблага́го о нас про́мысла,/ чудеса́ми зде просла́вленный Ма́тере Своея́ о́браз./ К нему́ же ве́рою притека́юще,/ прие́млем вся блага́я и спаси́тельная нам,/ да та́ко непреста́нно Богома́терь воспева́ем/ и рожде́ннаго из Нея́ Иису́са Человеколю́бца/ и Спа́са душ на́ших.

Глас 6:

Пусты́ня, я́же бя́ше несла́вна и ненаселе́нна иногда́,/ за явле́ние Бо́жие,/ многоча́стне и многообра́зне в ней бы́вшее,/ сотвори́ся напосле́док духо́вныя прему́дрости учи́лищем/ изше́дшему из Еги́пта Изра́илю,/ си́це и мра́чное о́ное ме́сто,/ в не́мже Богосве́тлое пречестна́го сего́ явле́ние о́браза/ просия́ благода́тию изображе́ннаго на нем Богомладе́нца Иису́са/ и предста́тельством Пречи́стыя Ма́тере Его́,/ устро́ися ме́сто душе́внаго све́та,/ и́мже духо́внии вожди́ но́ваго Изра́иля наставля́ются/ ко благоуспе́шному вели́каго сего́ служе́ния прохожде́нию./ Сего́ ра́ди мы, бра́тие,/ толи́кую благода́ть пресла́вным явле́нием/ чуде́сныя о́ныя ико́ны прие́мше,/ благодари́м Просвети́теля душ на́ших/ и, благодаря́ще, воззове́м к Нему́:/ Све́те И́стинный,/ просвеща́яй вся́каго челове́ка, в мир гряду́щаго,/ не преста́й при́сно исполня́я/ све́том Твоего́ Богоразу́мия,/ всех му́дростию, я́же свы́ше просвеща́емых,/ во сла́ву И́мене Твоего́/ и во спасе́ние Твоего́ достоя́ния.

Сла́ва, и ны́не, глас 8:

Отку́ду мне сие́,/ да прии́де Ма́ти Го́спода моего́ ко мне? –/ взыва́ше Ти Предте́чева ма́ти,/ егда́ пришла́ еси́ в дом Заха́риин, Богома́ти Пресвята́я,/ си́це покрови́тельствуемый Тобо́ю град Кострома́,/ прие́мля во преде́лы своя́ всечестны́й о́браз Твой/ и с ним бога́тство Небе́сных дарова́ний,/ а́ки Са́мую Тебе́ и с Преве́чным Сыно́м Твои́м прие́млет,/ те́мже от неопи́санныя ра́дости недоумева́ет:/ ко́е сло́во принесе́т Ти?/ Или́ ки́ими благохвале́нии/ в настоя́щий пра́здник явле́ния ико́ны Твоея́ возвели́чит Тя?/ То́чию, е́же Дух Святы́й подаде́ иногда́ Елисаве́ти,/ сие́ вси взыва́ем о Тебе́:/ отку́ду нам сие́?/ Я́ко цельбоно́сным о́бразом Свои́м/ прии́де Ма́ти Го́спода на́шего,/ ра́ди Ея́ подаю́щаго нам мир и ве́лию ми́лость.

На стихо́вне стихи́ры самогла́сны, глас 4:

Принесе́нней бы́вшей ико́не Твое́й,/ Богоневе́сто Влады́чице,/ во избра́нный Тобо́ю град наш,/ испо́лнися премно́гия ра́дости вели́кий кня́зь/ и с ним вси ве́рных собо́ри,/ иму́ще с собо́ю ви́димое зна́мение Твоего́ о себе́ благоволе́ния,/ на не́же и мы, сы́нове их, при́сно взира́юще,/ в весе́лии ду́ха прино́сим Ти дне́сь и Ро́ждшемуся из Тебе́/ пе́снь благодаре́ния.

Стих: Слы́ши, Дщи, и ви́ждь,/ и приклони́ у́хо Твое́.

Во о́блацех дугу́ положи́вый во зна́мение/ ве́чнаго земли́ с Небеса́ми ми́ра,/ дал еси́ зна́мение гра́ду на́шему/ Твоего́ всеблага́го о нем про́мысла, Влады́ко,/ утверди́в во святи́лищи его́ всечестну́ю Ма́тере Твоея́ ико́ну,/ на ню́же взира́юще,/ воспомина́ем ве́лия и пресла́вная,/ я́же явля́еши к нам,/ ве́рою Тя сла́вящим/ и к хода́тайству Ма́тере Твоея́ с любо́вию прибега́ющим.

Стих: Лицу́ Твоему́ помо́лятся/ бога́тии лю́дстии.

Волсви́, прише́дшии от восто́к,/ узре́вше звезду́,/ е́юже ко Христу́, в Вифлее́ме ро́ждшемуся, руководи́ми бя́ху,/ возра́довахуся ра́достию ве́лиею зело́,/ си́це и мы, ве́рнии, ра́дуемся и весели́мся,/ благодаря́ще Человеколю́бца Иису́са,/ чрез ико́ну сию́ руководя́щаго нас к позна́нию/ вочелове́чения Его́ от Пренепоро́чныя Де́вы.

Сла́ва, и ны́не, глас 8:

Во днех пло́ти Твоея́, Иису́се, Бо́же наш,/ преде́лы еди́наго до́му Изра́илева/ проше́л еси́, благоде́тельствуя/ и всяк неду́г и вся́ку я́зю в лю́дех Его́ исцеля́я,/ но по днех воста́ния Твоего́,/ седя́ со Отце́м на Престо́ле вели́чествия,/ вся концы́ вселе́нныя сла́вою чуде́с/ и мно́жеством щедро́т Твои́х испо́лнил еси́,/ и́хже да не лише́н бу́дет и смире́нный град наш/ со преде́лы свои́ми:/ благоволи́л еси́, дарова́в ему́ пречестну́ю Ма́тере Твоея́ ико́ну,/ всем, к Тебе́ ве́рою приходя́щим,/ ощуща́ти Боже́ственную Твою́ си́лу./ Сего́ ра́ди и мы, толи́ких дарова́ний наслажда́ющеся,/ в ра́дости Ду́ха взыва́ем Ти:/ сла́ва Твоему́ всеблаго́му о нас про́мыслу,/ Еди́не Человеколю́бче и Спа́се душ на́ших.

На благослове́нии хле́бов тропа́рь, глас 4:

Прише́ствием честны́я Твоея́ ико́ны, Богоотрокови́це,/ обра́дованный дне́сь Богохрани́мый град Кострома́,/ я́коже дре́вний Изра́иль к киво́ту Заве́та,/ притека́ет ко изображе́нию лица́ Твоего́/ и воплоти́вшагося от Тебе́ Бо́га на́шего,/ да Твои́м Ма́терним к Нему́ предста́тельством/ при́сно хода́тайствуеши всем,/ под се́нь кро́ва Твоего́ прибега́ющим,/ мир и ве́лию ми́лость. (Три́жды)

НА У́ТРЕНИ

На Бог Госпо́дь: тропа́рь Богоро́дице, три́жды.

По 1-м стихосло́вии седа́лен, глас 4:

Сте́кшеся на пе́ния чуде́с,/ я́же хода́тайством Ма́тере Своея́ яви́ нам Госпо́дь сил во сла́ву Свою́,/ подража́им, ве́рнии, Богоприя́тней доброде́тели Ея́,/ к сла́ве рожде́ннаго из Нея́ Иису́са Человеколю́бца и Спа́са душ на́ших.

Сла́ва, и ны́не:

Я́коже светоно́сное Тя и сладча́йшее со́лнце,/ о́бразом Твои́м Боже́ственным, Влады́чице, приходя́щую,/ град наш Кострома́ со стра́хом срета́ет,/ освяща́ющую на́ша ду́ши и телеса́,/ тем мо́лим Тя, Всепречи́стая:/ моли́твами Твои́ми изба́ви ны от вся́кия напа́сти и ско́рби.

По 2-м стихосло́вии седа́лен, глас 3:

Блаже́нно чре́во бы́сть При́сноде́вы, я́ко носи́вшее Христа́ Госпо́дня,/ блаже́ннейше же бы́сть се́рдце Ея́, я́ко прие́мшее и сохра́ншее словеса́ Его́./ Сего́ ра́ди и мы, бра́тие, подража́им любому́дрию Ея́,/ да услы́шим от пра́веднаго Мздовоздая́теля сла́дкий о́ный глас:/ блаже́ни и вы, слы́шавшии сло́во Мое́ и сохра́ншии е.

Сла́ва, и ны́не:

Я́ко иму́щая неизрече́нное дерзнове́ние/ к ро́ждшемуся из Тебе́ Христу́, Бо́гу на́шему,/ Пречи́стая Госпоже́ Богоро́дице,/ умоли́ поми́ловатися всем, пою́щим Боже́ственная вели́чия Твоя́/ и испове́дающим Тя, су́щую Богороди́тельницу.

По полиеле́и седа́лен, глас 6:

Да хода́тайство, е́же о нас, Богоотрокови́цы де́йственно бу́дет ко Спа́су на́шему,/ сотвори́м вся, от Христа́ повеле́нная,/ и та́ко моли́твы Ма́тере Его́ исхода́тайствуют блага́я,/ исполня́ющая лише́ние и нищету́ душ и теле́с на́ших.

Сла́ва, и ны́не:

Боже́ственный приспе́ пра́здник чуде́снаго прише́ствия во град Кострому́/ пречестны́я ико́ны Всенепоро́чныя и еди́ныя Богома́тере,/ ра́дуйтеся у́бо вси, христоимени́тии лю́дие,/ прославля́я вели́чие Бо́га на́шего/ и Того́ ро́ждшия Присноде́вы.

Степе́нна, 1-й антифо́н, 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и ви́ждь, и приклони́ у́хо Твое́. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 8: Отку́ду мне сие́ – да прии́де Ма́ти: (зри сла́вник на лити́и).

Кано́н, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Отве́рзый ум разуме́ти Писа́ния ученико́м Твои́м, Го́споди,/ отве́рзи ны́не и на́ша сердца́ к разуме́нию вели́чия Твоего́ и Ма́тери Твоея́,/ да с Не́ю боголе́пно просла́вим Тя.

Отве́рсти толку́щим две́ри милосе́рдия Твоего́ обетова́вый, Влады́ко наш,/ отве́рзи нам утро́бы человеколю́бия Твоего́,/ име́я на сие́ моля́щую Тя Хода́таицу.

Отве́рсто иногда́ бы́сть моли́твою Илиино́ю не́бо,/ ра́ди беззако́нновавшаго Изра́иля заключе́нное,/ отве́рст да бу́дет и нам, гре́шным, вход в Небе́сная предста́тельством Твои́м, Богороди́тельнице.

Отве́рзшая рождество́м Твои́м врата́ ве́чная, Богороди́тельница Пречи́стая,/ отве́рзи предста́тельством Твои́м заключе́нныя серде́ц на́ших две́ри,/ да Сын Твой и Бог наш вни́дет и освяти́т я.

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Твоего́ плотска́го е́же на земли́ смотре́ния/ да незабве́нно устро́иши воспомина́ние,/ дал еси́ нам, Влады́ко, ико́ну Твою́ и Ро́ждшия Тя,/ те́мже, взира́юще на о́ную, мо́лим Тя:/ руководи́ нас к позна́нию и любле́нию Тебе́,/ воплоще́ннаго Бо́га и Спа́са душ на́ших.

Твоея́ Пренепоро́чныя Ма́тере всечестны́й о́браз любо́вию объе́млюще,/ из глубины́ души́ взыва́ем к Тебе́, живу́щему на Небесе́х:/ начерта́й на сердца́х на́ших кра́сный о́браз доброде́телей Ея́,/ да велича́ем Тя, Го́спода и Спа́са на́шего.

Твой всечестны́й о́браз, Влады́чице, любе́зно на земли́ прие́млюще,/ зове́м к Тебе́, су́щей во сла́ве Небе́сней,/ да при́сно хода́тайствуеши нам благода́ть мы́слити и твори́ти досто́йная Твоего́ вели́чия,/ е́же сотвори́ Тебе́ Си́льный.

Твои́х благодея́ний воспомина́ние, твори́мое дне́сь,/ дви́жет сердца́ на́ша со устна́ми к благохвале́нию Твоему́, Влады́чице,/ но сотвори́, да и кра́сный лик Твои́х доброде́телей/ привлече́т сердца́ на́ша к любле́нию и подража́нию о́ных.

Седа́лен, глас 3:

Сии́ лю́дие устна́ми чтут Мя,/ се́рдце же их дале́че отстои́т от Мене́,–/ рече́ иногда́ Госпо́дь Вседержи́тель ко иуде́ем, еди́н вне́шний вид благоче́стия являющим./ Но да и мы не ту́южде с ни́ми ча́сть и осужде́ние восприи́мем, бра́тие,/ вся́чески блюде́мся дел, подо́бных лицеме́рию./ Сего́ ра́ди пра́зднующе и всечестны́й сей пра́здник,/ да не яви́мся извне́ то́чию благогове́йны,/ вну́трь же у́ду зли и нечести́вии пред Испыту́ющим сердца́ и утро́бы,/ в простоте́ се́рдца поклони́мся Ему́, я́коже Сам рече́, Ду́хом и и́стиною,/ да та́ко бу́дем подража́тели Пресвяте́й Де́ве,/ в Не́йже не глас то́чию, но па́че душа́ велича́ше Го́спода/ и Дух ра́довашеся о Бо́зе, Спа́се Свое́м.

Сла́ва, и ны́не:

Покро́ва Твоего́ Боже́ственнаго, Пречи́стая Богоро́дице Влады́чице,/ да не отъи́меши от рабо́в Твои́х, мо́лят Тя уго́дники Сы́на Твоего́:/ великому́ченик Фео́дор Стратила́т и преподо́бнии чудотво́рцы,/ страны́ сея́ Костромски́я и Га́лицкия засту́пницы,/ и́хже моле́ние приими́ и поми́луй нас.

Песнь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Седя́й одесну́ю Престо́ла вели́чествия на высо́ких,/ снизше́л еси́ к до́льнейшим страна́м земли́/ и, всели́вся во чре́во смиренному́дрыя Ма́тере Де́вы,/ яви́л еси́ ми́рови, я́ко Ты призира́еши на смире́ние рабо́в Твои́х/ и дае́ши им благода́ть Твою́,/ ея́же да и мы сподо́бимся, да́руй нам бы́ти ревни́тели смиренному́дрыя Твоея́ Ма́тере.

Седя́й на ра́мех Херуви́м и Серафи́м,/ благоволи́л еси́ пло́тию седе́ти на объя́тиях Чисте́йшия Отрокови́цы,/ да сим пока́жеши нам, я́ко Ты, Свя́те святы́х,/ обита́еши в сердца́х еди́ных любителей чистоты́ и целому́дрия,/ его́же рачи́тели и нас покажи́ моли́твами ро́ждшия Тя.

Седя́щему во сла́ве на Престо́ле Божества́/ сподо́билася еси́ Ма́терь бы́ти,/ ра́ди изя́щнейшия чистоты́ и смиренному́дрия,/ и́хже люби́тели и нас покажи́ моли́твами Твои́ми,/ да и мы сподо́бимся ча́сти, угото́ванной рачи́телем чистоты́ и смиренному́дрия Твоего́.

Седе́ти во сла́ве Сы́на Твоего́ сподо́бившаяся, Пренепоро́чная Де́во,/ не преста́й моля́щи бла́гость Его́,/ да и мы, взира́юще на о́браз святы́я жи́зни Твоея́/ и о́ному на́шим жи́тельством сообразу́ющеся,/ тоя́жде сла́вы на Небесе́х бу́дем прича́стницы.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Ужаса́хуся и смуща́хуся костромсти́и жи́телие,/ мне́вше зна́мение Твоего́ о них про́мысла,/ ико́ну Ма́тере Твоея́, во пла́мени сгоре́вшу,/ но сие́ смуще́ние премени́л еси́ в ра́дость, Го́споди,/ показа́в им а́бие о́браз сей, от огня́ и пе́пела невреди́м./ Си́це да и мы, по обурева́ющих нас искуше́ниях и напа́стех,/ при́сно ра́дуемся о Твое́м, е́же о нас благоволе́нии,/ мо́лим Тя, Человеколю́бче.

Ужасо́шася иногда́ полки́ наше́дших на град Кострому́ супоста́тов,/ егда́ от воображе́ния зра́ка лица́ Твоего́, Го́споди, и Пресвяты́я Твоея́ Ма́тере/ пусти́л еси́ на сих стре́лы мо́лниины,/ но сей у́жас да вложи́ши в сердца́/ и всех, стремящихся ратобо́рствовати достоя́ние Твое́,/ мо́лим Тя с Хода́таицею на́шего избавле́ния.

Ужа́сни и ско́рбни бы́вше жи́телие Городца́,/ узре́вше ико́ну Твою́, Богома́ти, пренесе́ну во град Кострому́:/ мня́ху бо себе́ сим пренесе́нием лише́нных бы́ти Твоего́ о них Ма́терняго благоволе́ния,/ но да не и мы, таково́ю же иногда́ ско́рбию объя́ти,/ бу́дем лише́ни зна́мений Твоего́ покровительства,/ не преста́й, Влады́чице, пребыва́ющи с на́ми Твое́ю ми́лостию.

Я́ко о́чи рабы́ни в руку́ госпожи́ своея́,/ та́ко о́чи на́ши всегда́ к Тебе́ возво́дим,/ о Многоблагоутро́бная Госпоже́ на́ша и Спаси́тельнице Всесвята́я Богоро́дице!/ При́зри у́бо на ны ми́лостивно,/ ца́рствующая на Небеси́ с Сыно́м Твои́м и Бо́гом,/ и уще́дрити ны, гре́шныя, потщи́ся,/ я́ко вся Тебе́ возмо́жна су́ть.

Песнь 6

Ирмо́с: Боже́ственное сне и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Боже́ственное Твое́ разуме́ем истоща́ние, Иису́се, Бо́же наш,/ егда́, взира́юще на о́браз Ма́тере Твоея́,/ зрим Тя с Не́ю я́ко Младе́нца, рука́ми Ея́ держи́ма,/ те́мже благодаря́ще сему́ Твоему́ е́же к нам снизхожде́нию,/ мо́лим Тя, нас ра́ди младе́нствовавшаго,/ бы́ти нам ми́лостива о гресе́х на́ших.

Боже́ственнаго Твоего́ воплоще́ния е́же от Де́вы, да при́сно сла́вится та́инство,/ дарова́л еси́ нам, Христе́ Царю́, всечестну́ю Ма́тере Твоея́ ико́ну/ с воображе́нным на ней ви́дом Пречи́стаго лица́ Твоего́,/ те́мже и мо́лим Тя, Вседарови́тый Го́споди,/ да да́си нам при́сно сла́вити воплоще́ние Твое́,/ и́мже челове́цы Божеству́ соединихомся.

Боже́ственнаго Ду́ха наше́ствие бы́сть на де́вственную утро́бу Твою́, Богома́ти,/ егда́ Сы́на Преве́чнаго пло́тию зачала́ еси́,/ Его́же да и мы в сердца́х на́ших при́сно и́мамы,/ хода́тайствуй нам благода́ть Того́жде Всесвята́го Ду́ха,/ е́юже быва́ют челове́цы та́инственною оби́телию Отца́ и Сы́на.

Боже́ственных писа́ний любомудрое раче́ние с при́сным во хра́ме Госпо́дни пребыва́нием/ сотвори́ Тя избра́нный ипоста́сныя Бо́жия прему́дрости Храм,/ но да и мы устро́имся хра́мы Того́жде Бо́га Жи́ва,/ исхода́тайствуй нам благода́ть усе́рдно внима́ти и после́довати Сы́на Твоего́ гла́су,/ И́же при́сно во хра́мех Его́ пропове́дуется.

Конда́к, глас 8:

Благода́рственная принося́ще Ти, раби́ Твои́, Богороди́тельнице, о всех,/ и́миже благоде́яла еси́ гра́ду на́шему,/ из глубины́ души́ взыва́ем к Тебе́ и ми́ли ся де́ем:/ не преста́ни, Влады́чице,/ Ма́терними к Сы́ну Твоему́ и Бо́гу на́шему моли́твами/ подава́ти вся блага́я и спаси́тельная всем,/ ве́рою и любо́вию вопию́щим Ти:/ ра́дуйся, Де́во, христиа́н похвало́.

И́кос:

Стена́ еси́ де́вам, Богоро́дице Де́во,/ и всем, к Тебе́ прибега́ющим,/ и́бо Небесе́ и земли́ Творе́ц устро́и Тя, Пречи́стая, все́лься во утро́бе Твое́й/ и вся приглаша́ти Тебе́ научи́в:/ ра́дуйся, сто́лпе де́вства;/ ра́дуйся, две́рь спасе́ния./ Ра́дуйся, Нача́льнице мы́сленнаго назда́ния;/ ра́дуйся, Пода́тельнице Боже́ственныя бла́гости./ Ра́дуйся, Ты бо обнови́ла еси́ зача́тыя сту́дно;/ ра́дуйся, Ты бо наказа́ла еси́ окра́денныя умо́м./ Ра́дуйся, тли́теля смы́слов упраждня́ющая;/ ра́дуйся, Се́ятеля чистоты́ ро́ждшая./ Ра́дуйся, черто́же безсе́меннаго уневе́щения;/ ра́дуйся, ве́рных Го́сподеви сочета́вшая./ Ра́дуйся, до́брая Младопита́тельнице де́вам;/ ра́дуйся, Невестокраси́тельнице душ святы́х./ Ра́дуйся, Неве́сто Неневе́стная.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Не служи́ти тва́ри па́че Творца́ законоположи́вый челове́ком, Спа́се наш,/ сотвори́, усе́рдно мо́лим Тя с Богоро́дицею,/ да Ду́хом Твои́м просвеща́еми,/ не к рукотворе́нным изображе́нием отно́сим Боголе́пное служе́ние,/ но чрез о́браз Твой возно́симся умы́ и се́рдцы,/ к Еди́ному Тебе́, отце́в Бо́гу благослове́нному.

Не послужи́ша бы́вшии в пещи́ Вавило́нстей му́дрии ю́ноши безду́шному истука́ну,/ но Еди́ному Тебе́, во о́бразе А́нгела посреде́ пла́мене я́вльшемуся Сы́ну Бо́жию, поклони́шася,/ и́хже ли́ку и ча́сти сопричти́ и всех, изображе́нием сладча́йшаго зра́ка Твоего́ дви́жимых/ к прославле́нию Тебе́, отце́в Бо́га благослове́ннаго.

Не послужи́ла еси́ Бо́гу нра́вом плотски́х иуде́ев, Пренепоро́чная Де́во,/ но ду́хом и и́стиною, я́ко и́стинная Раба́ Его́, покланя́лася еси́ Ему́./ Те́мже да и мы с Тобо́ю и́стиннии бу́дем покло́нницы Его́,/ хода́тайствуй нам благода́ть,/ е́же не в суеве́рном Богопочита́нии, но во и́стинном благоче́стии и ве́ре/ служи́ти отце́в Бо́гу благослове́нному.

Не послужи́ла еси́ ми́ру и суете́ его́, Богороди́тельнице,/ но, всему́ предпоче́тши еди́наго Бо́га и зако́н Его́,/ была́ еси́ усе́рднейшая всех Раба́ Госпо́дня,/ те́мже и сподо́билася еси́ послужи́ти ве́лией та́йне Бо́жия воплоще́ния, я́ко Богома́терь,/ но сотвори́, да и мы, отве́ргшеся ми́ра и я́же су́ть в ми́ре,/ вседу́шно прилепи́мся и послу́жим Еди́ному Отце́в Бо́гу благослове́нному.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́: Го́спода по́йте, дела́,/ и превозноси́те Его́ во вся ве́ки.

Отроча́ мла́до на́шего ра́ди спасе́ния был еси́, Безле́тный Бо́же наш Иису́се,/ Его́же воображе́ние зря́ще на свяще́нней ико́не,/ усе́рдною в Тя ве́рою вопие́м Ти:/ бу́ди Воспита́тель, Наста́вник и Покрови́тель младе́нцем и отроко́м на́шим,/ да и си́и во и́стинней ве́ре навы́кнут глаго́лати Тебе́:/ Го́спода по́йте, дела́,/ и превозноси́те Его́ во вся ве́ки.

О́трок дванадесятоле́тен бы́вый, Иису́се,/ посреде́ ста́рец и учи́телей во святи́лищи пребыва́я, послу́шал еси́ их/ и, совопроша́ся с ни́ми, явля́л еси́ святу́ю ре́вность к Боже́ственному зако́ну,/ да сим и на́ша о́троки наста́виши/ тща́тися во вре́мя ю́ности стяжава́ти духо́вную, я́же от зако́на Твоего́ прему́дрость,/ да и они́ науча́тся сердцы́ и усты́,/ словесы́ же и де́лы превозноси́ти Тя во вся ве́ки.

О́троки от пещи́ Вавило́нския изба́вльшему Го́споду/ моли́ся приле́жно, Богоневе́стная Отрокови́це,/ да да́рует всем, под кров Твой прибега́ющим,/ неврежде́нным бы́ти от огня́ искуше́ний и пла́мене по́хотей,/ да, та́ко Тобо́ю изба́вльшеся,/ чи́стыми душа́ми и нескве́рными устна́ми благослови́м с Тобо́ю Еди́наго Изба́вителя Го́спода/ и превозно́сим Его́ во вся ве́ки.

Отрокови́цам Твое́ целому́дрие и чистота́ да бу́дет красота́ и сла́ва,/ чревонося́щим Твое́ безболе́зненное и свято́е рождество́/ да бу́дет сла́дкое утеше́ние и отра́да,/ всем же, вся́каго по́ла и во́зраста чту́щим Тя, Богоневе́сто,/ доброде́тели Твоя́ да бу́дут еди́ным упражне́нием их,/ я́ко си́ми то́кмо досто́йне от челове́ка прославля́ется Госпо́дь, живы́й во ве́ки.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Вся́кое коле́но Небе́сных, и земны́х, и преиспо́дних да покланя́ется Тебе́,/ я́ко нося́щему в Себе́ неизме́нный Преблаже́ннаго Отца́ Твоего́ о́браз, Иису́се./ С ни́миже и мы, ве́рою просвеща́еми,/ Тя, И́стиннаго Бо́га, о́браз челове́ч от Де́вы прии́мшаго, боголе́пно велича́ем.

Вся́ка уста́ да заградя́тся суесло́вящих,/ я́ко не́сть досто́йно чествова́ти Твою́ и Пречи́стыя Ма́тере Твоея́ ико́ну, Влады́ко:/ се бо, просла́вив сию́ чудеса́ми,/ научи́л еси́ достоя́ние Твое́ Тебе́ и во о́бразе пло́ти Твоея́/ с Пренепоро́чною Твое́ю Ма́терию прославля́ти и велича́ти.

Вси ро́ди ве́рных, по прорече́нию Твоему́, блажа́т Тя,/ Благослове́нная, Христа́ Бо́га на́шего Ма́ти./ С ни́ми же и мы, ве́рою совоку́плени,/ благогове́йно чту́ще свяще́нное лица́ Твоего́ изображе́ние,/ прославля́ем Твоя́ вели́чия, я́же сотвори́ Тебе́ Госпо́дь сил,/ с Ним же Тя велича́ем.

Всяк язы́к сме́ртных, по достоя́нию, изнемога́ет велича́ти Тя,/ над все́ми превознесе́нную, о Богоневе́сто!/ Те́мже и мы, прославля́юще Тя дне́сь, испове́дуем на́ше кра́йнее неможе́ние,/ но, сие́ испове́дующе, мо́лим Тя,/ да по мно́жеству щедро́т Твои́х, прии́меши ма́лое сие́ приноше́ние,/ во зна́мение мно́гия любве́ и усе́рдия нас, велича́ющих Тя.

Свети́лен:

Свет Лица́ Твоего́ и Пресвяты́я Твоея́ Ма́тере/ яви́вый нам, Влады́ко, во всечестне́й ико́не сей,/ сотвори́ нас, я́ко ча́да све́та ходи́ти во све́те за́поведей Твои́х,/ да, егда́ яви́шися во сла́ве с Ро́ждшею Тя,/ сообра́зны бу́дем светле́йшему со́лнца о́бразу Твоея́ сла́вы.

Сла́ва, и ны́не:

Бо́жия тезоимени́тый да́ра страда́лец Христо́в Фео́дор/ Боже́ственный вои́стинну дар, пречестну́ю Пречи́стыя Богома́тере ико́ну,/ гра́ду на́шему Костроме́ прине́с, вруча́ет,/ ю́же мы с неизрече́нною ра́достию, я́ко Небе́сное сокро́вище, прие́млюще,/ игра́им духо́вне и ликовству́ем, просвеща́еми све́том Боже́ственнаго лица́ Мари́и При́сноде́вы,/ от Нея́же возсия́ Пра́ведное Со́лнце – Христо́с,/ просвеща́яй вся́каго челове́ка, гряду́щаго в мир.

На хвали́тех стихи́ры на 4, глас 1:

Хвали́мый по мно́жеству вели́чествия Твоего́ от Небе́сных сил,/ приими́ и от на́ших бре́нных усте́н пе́снь благодаре́ния,/ е́же возсыла́ем Тебе́ за мно́жество щедро́т,/ и́миже при́сно благоде́еши нам,/ дарова́в Пречи́стыя Богома́тере ико́ну/ во утвержде́ние, и защище́ние, и спасе́ние на́ше.

В наро́читый сей пра́здника на́шего де́нь/ соста́вим благокра́сны ли́ки,/ орга́нами усте́н на́ших прославля́юще/ посети́вшую град наш чуде́сною Свое́ю ико́ною Богоро́дицу,/ Ея́же предста́тельством прекланя́емь, Всевы́шний Влады́ка/ подае́т нам со мно́жеством щедро́т/ мир и ве́лию ми́лость.

Пра́зднующе всечестны́й сей Богома́тере пра́здник,/ да не бу́дем, бра́тие, я́ко ме́дь звеня́щи/ или́ кимва́л звяца́яй,/ но да ве́рою живо́ю/ и одушевля́ющею вся на́ша дела́/ любо́вию ликовству́ем дне́сь:/ сицево́е бо то́кмо чествова́ние Богома́тери/ и сицево́е славосло́вие Сы́ну Ея́ и Бо́гу на́шему благоприя́тно е́сть./ Те́мже глаго́лем или́ де́ем дне́сь,/ ве́рою и любо́вию нам да быва́ют.

Сла́ва, и ны́не, глас 8:

Прииди́те, вси Росси́йстии ве́рных собо́ри,/ воспо́йте дне́сь с на́ми Го́сподеви пе́снь Богокра́сную,/ прославля́юще благодея́ния и щедро́ты Его́,/ да мы си́ми вы́ну наслажда́ющеся,/ непреста́нно хва́лим, благослови́м и велича́ем Спаси́теля на́шего,/ из глубины́ души́ вопию́ще к Нему́:/ о Влады́ко, всех Преще́дре и Всеси́льне!/ не преста́й и ны́не продолжа́ти к нам дре́вния о́ныя Твоя́ ми́лости,/ сохраня́я Боже́ственным Твои́м Про́мыслом лю́ди Твоя́,/ да, в ми́ре и тишине́ живу́ще,/ непреста́нно с Ро́ждшею Тя велича́ем.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 3, пе́снь Богоро́дицы: Вели́чит душа́ Моя́ Го́спода,/ и возра́довася дух Мой о Бо́зе, Спа́се Мое́м. Стих: Я́ко призре́ на смире́ние рабы́ Своея́, се бо от ны́не ублажа́т Мя вси ро́ди. Апо́стол к Филипписи́ем, зача́ло 240. Ева́нгелие от Луки́, зача́ло 54. Прича́стен: Ча́шу спасе́ния прииму́ и И́мя Госпо́дне призову́.

Моли́тва

О Премилосе́рдая Госпоже́, Цари́це, Богоро́дице, приими́ смире́нное моле́ние на́ше, и не отри́ни нас, заступле́ние и прибе́жище на́ше, и не возгнуша́йся нас, недосто́йных, но, я́ко Милосе́рдая, не преста́ни моля́щи, Его́же родила́ еси́, да да́рует нам проще́ние мно́гих согреше́ний на́ших, да спасе́т нас, и́миже ве́сть судьба́ми. Поми́луй нас, Влады́чице, поми́луй нас, не́смь бо нам спасе́ние от дел. Те́мже ве́рно вопие́м Ти: поми́луй рабы́ Твоя́ и непло́дное се́рдце на́ше покажи́ плодоно́сно благи́х дел. При́зри на нас, недосто́йных, Ты бо упова́ние и покро́в наш, жи́знь и свет се́рдцу на́шему. Я́ко Невече́рний Свет от чре́ва Твоего́ воздви́гшая, озари́ ду́шу на́шу, Чи́стая, и отжени́ вся́ку мглу се́рдца на́шего. Да́руй нам умиле́ние, покая́ние и сокруше́ние серде́чное. Сподо́би нас по вся дни живота́ на́шего твори́ти во́лю Сы́на Твоего́ и Бо́га на́шего и во всем благоугожда́ти Ему́ Еди́ному. О Богома́ти, не преста́ни моля́щи Ро́ждшагося от Тебе́ за вся, притека́ющия с ве́рою к сему́ чудотво́рному о́бразу Твоему́, и подава́й им ско́рую по́мощь и утеше́ние в ско́рбех и напа́стех и злострада́ниих, изба́ви их от клеветы́ и зло́бы челове́ческия, от враг ви́димых и неви́димых и ве́яния ну́жды и печа́ли. Спаси́ оте́чество на́ше, град сей и вся гра́ды и страны́ от вся́ких бед и нужд и сотвори́ ми́лостива нам бы́ти Бо́га на́шего, отврати́ вся́кий гнев Его́, на ны дви́жимый, и изба́ви ны от належа́щаго и пра́веднаго Его́ преще́ния. О Боголюби́вая Влады́чице, А́нгелов украше́ние, му́чеников сла́во и всех святы́х ра́досте, с ни́ми моли́ Го́спода, да сподо́бит нас в покая́нии сконча́ти живота́ на́шего тече́ние. В сме́рти же час, Пресвята́я Де́во, изба́ви нас от вла́сти бесо́вския и осужде́ния, и отве́та, и стра́шнаго испыта́ния, и мыта́рств го́рьких, и огня́ ве́чнаго, да, сподо́бльшеся сла́внаго Ца́рствия Бо́жия, велича́ем Тя и сла́вим вопло́щшагося от Тебе́ Христа́, Бо́га на́шего, Ему́же сла́ва со Отце́м и Святы́м Ду́хом, ны́не, и при́сно, и во ве́ки веко́в. Ами́нь.

Феодоровская-Костромская икона Божией Матери

Феодоровская-Костромская икона Божией Матери написана, по преданию, святым евангелистом Лукой, подобно Владимирской и Смоленской иконам. По иконографии Феодоровская икона очень близка к Владимирской: Богомладенец изображен на ней нежно прильнувшим к Пресвятой Богородице, Которая держит Его на правой руке.

Название свое икона получила от великого князя Владимирского Ярослава Всеволодовича († 1246), носившего во Святом Крещении имя Феодор (в честь святого великомученика Феодора Стратилата). Первоначально икона была обретена его старшим братом святым Георгием (Юрием) Всеволодовичем († 1238; память 4 февраля) в старинной часовне, близ селения Городца, Нижегородской области. После гибели святого Георгия Всеволодовича в битве с татарами на реке Сити, его брат Ярослав-Феодор, ставший великим князем Владимирским, торжественно перенес в 1239 году мощи святого Георгия из Ростова Великого в Успенский собор Владимира-на-Клязьме. Оставшейся от брата иконой он благословил в том же году своего сына святого Александра Невского (память 23 ноября) на брак с полоцкой княжной, дочерью полоцкого князя Брячислава.

Чудотворная Феодоровская икона Божией Матери – благословение родителя – стала моленным образом святого Александра Невского и постоянно находилась при нем. После смерти святого Александра Невского († 14 ноября 1263) икона была взята его младшим братом Василием Ярославичем, в то время князем Костромским (в 1272–1276 – великий князь Владимирский).

Феодоровская икона была перенесена князем Василием в Кострому, в собор святого великомученика Феодора Стратилата. В 1272 году, когда к Костроме подступили татары, икона была обнесена перед русским войском. При приближении татар от нее стали исходить яркие лучи, вызвавшие у захватчиков невольный страх. Они были разгромлены русскими и бежали.

После кончины князя Василия, обретшего место последнего упокоения в Костроме († 1276), Феодоровская икона была вновь поставлена в соборе во имя святого Феодора Стратилата. Через чудотворную икону жители Костромы не раз получали благодатную помощь Царицы Небесной в течение нескольких столетий. Знаменательно, что конец Смутного времени (вызванного польско-шведской интервенцией и выступлениями самозванцев Лжедимитрия I и Лжедимитрия II) связан с благословением Феодоровской иконой, которое преподала инокиня Марфа своему сыну Михаилу Феодоровичу Романову при избрании его на царство в Костромском Ипатиевском монастыре 14 марта 1613 года. В память об этом историческом событии было установлено празднование Феодоровской иконе Божией Матери 14 марта. Царица Марфа принесла с собой в Москву список с чудотворной иконы, появились и другие списки. Со второй половины ХVII века получили распространение иконы Феодоровской Божией Матери с клеймами, изображающими события из истории чудотворного образа. В 1670 году иеродиаконом Ипатиевского монастыря Лонгином было составлено «Сказание о явлении и чудесах Феодоровской иконы Богоматери в Костроме».

Городецкий монастырь (на месте часовни, близ селения Городец) с храмом в честь Феодоровской иконы Божией Матери, устроенный в незапамятные времена, был вновь освящен после возобновления в 1767 году, во время посещения Екатериной II. В 1830 году в г. Балахне прославился избавлением от холеры один из списков Феодоровской иконы.

Феодоровская икона Богородицы – двусторонняя. На обратной стороне ее изображен образ святой великомученицы Параскевы, облаченной в княжеское одеяние. Есть предположение, что появление этого образа связано с супругой святого Александра Невского, получившей во Святом Крещении имя Параскевы (по другим сведениям, она была тезоименита супругу). Празднование Феодоровской иконе Божией Матери совершается также 16 августа, в день обретения.

Преподобнаго отца нашего Венедикта

На Го́споди, воззва́х: стихи́ры, глас 2.

Подо́бен: Егда́ от Дре́ва:

Ве́рою и любо́вию и́стинною,/ ми́ра отре́кся, о́тче,/ от младе́нства, преподо́бне,/ ра́дуяся, после́довал еси́ распе́ншемуся Христу́/ и, мно́гими по́двиги пло́ть умертви́в,/ благода́ть исцеле́ний бога́тно прия́л еси́/ утоля́ти не́мощи разли́чныя/ и лука́выя отгоня́ти ду́хи, вельми́ удивля́емь.

Красота́ мона́шествующих быв,/ собра́л еси́ неизче́тное мно́жество пе́ти Го́спода,/ преподо́бне Венеди́кте,/ и к Небе́сней вся стези́ наста́вил еси́,/ до́бре после́дующия Боже́ственным твои́м уче́нием/ и подо́бящияся твоему́ житию́ доброде́тельному, о́тче./ С ни́миже тя почита́ем свяще́нно,/ в преставле́нии твое́м ра́дующеся.

Я́коже дре́вле Илия́, до́ждь, о́тче,/ с Небе́с моли́твою Боже́ственною низве́л еси́,/ точи́ти же еле́й сосу́д сотвори́л еси́,/ и мертвеца́ воскреси́л еси́,/ и ина́я премно́гая чудеса́ сотвори́л еси́/ в сла́ву, преподо́бне, всех Спа́са и Бо́га./ Те́мже твою́ сла́вную па́мять/ любо́вию пра́зднуем, Венеди́кте.

Сла́ва, и ны́не, Богоро́дичен, глас и подо́бен то́йже:

Всех скорбя́щих ра́досте,/ и оби́димых Предста́тельнице,/ и убо́гих Пита́тельнице,/ стра́нных же утеше́ние/ и же́зле слепы́х,/ немощны́х посеще́ние,/ тружда́ющихся покро́ве и засту́пнице/ и си́рых помо́щнице,/ Ма́ти Бо́га Вы́шняго/ Ты еси́, Пречи́стая,/ потщи́ся, мо́лимся,/ спасти́ся рабо́м Твои́м.

Крестобогоро́дичен. Подо́бен то́йже:

Доса́ды претерпе́вшаго мно́ги/ и на Крест вознесе́наго вся́ческих Творца́/ ви́девши, Пречи́стая, стеня́ше, глаго́лющи:/ препе́тый Го́споди, Сы́не и Бо́же Мой,/ ка́ко почести́ хотя́ созда́ние Твое́, Влады́ко,/ терпи́ши пло́тию безче́стие?/ Сла́ва мно́гому милосе́рдию и соше́ствию Твоему́, Человеколю́бче.

Кано́н, его́же краегране́сие: Пе́снь принесу́ му́дрому Венедикту. Творе́ние Ио́сифа. Глас 2.

Песнь 1

Ирмо́с: Гряди́те, лю́дие,/ пои́м пе́снь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Песносло́вити достохва́льную па́мять твою́ усе́рдствующему, преподо́бне,/ благода́ть да́ти мне моли́ся, Венеди́кте,/ и всех прегреше́ний избавле́ние.

Мона́шески, твой от младе́нства взем крест,/ после́довал еси́ Вседержи́телю/ и, умертви́в пло́ть, жи́зни сподо́бился еси́, преблаже́нне.

Зако́ну Бо́жию повину́вся, досточу́дне,/ и страсте́й взыгра́ния увяди́л еси́ воздержа́ния по́двиги,/ и безстра́стия благода́тию обогати́лся еси́.

Богоро́дичен: И́же Тебе́ ра́ди нетле́нием обога́щшеся, Богороди́тельнице Всечи́стая,/ ра́дуйся, вопие́м Ти, обра́дованней,/ преподо́бных и пра́ведных удобре́ние.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в се́рдца нас, пою́щих Тя.

Вод живо́тных Боже́ственнаго Ду́ха испо́лнившися, Богоно́се,/ душа́ твоя́ ре́ки чуде́с источи́,/ неду́гов изсуша́ющия тече́ние.

К широте́ ра́йстей пресели́лся еси́, всеблаже́нне, те́сную ше́ствовав стезю́,/ и де́монов кова́рствия,/ и ше́ствия безчи́нная утесни́л еси́.

Тече́нии твои́х слез напая́емь, я́ко дре́во, Венеди́кте, плодоно́сно,/ благопло́дие Боже́ственно прине́сл еси́ доброде́телей/ и чуде́с Боже́ственною благода́тию.

Богоро́дичен: Еди́н Благи́й Твою́, воплоща́емь, про́йде, Пренепоро́чная, утро́бу/ и Челове́к ви́ден бы́сть соверше́н,/ Его́же моли́ спасти́ пою́щия Тя.

Ин конда́к, глас 4:

Возгоре́вся раче́нием Го́рним и Святы́м Ду́хом,/ вся просвети́л еси́, о́тче преподо́бне Венеди́кте свяще́нне,/ непреста́нно моли́ Христа́ Бо́га, преблаже́нне, о всех нас.

Седа́лен, глас 1.

Подо́бен: Ка́мени запеча́тану:

Мона́шествовав богоуго́дно, доброде́тельно пожи́л еси́/ и благода́ть исцеле́ний прия́л еси́, Венеди́кте, чудеса́ соверши́в стра́шна,/ оби́тель же совоку́пль свяще́нну, приве́л еси́ Го́споду спаса́емых мно́жества, пребога́те./ Сла́ва Бо́гу, просвети́вшему тя,/ сла́ва венча́вшему тя,/ сла́ва святу́ю твою́ па́мять просла́вльшему.

Сла́ва, и ны́не, Богоро́дичен:

Ру́це Твои́ Боже́ственныя,/ и́миже Созда́теля понесла́ еси́, Де́во Пресвята́я, вопло́щшагося благосты́нею,/ просте́рши, умоли́ Его́ изба́вите нас от искуше́ний, и страсте́й, и бед,/ хва́лящих Тя любо́вию и вопию́щих:/ сла́ва Все́льшемуся в Тя,/ сла́ва Проше́дшему из Тебе́,/ сла́ва Изба́вльшему нас рождество́м Твои́м.

Крестобогоро́дичен:

На Кресте́ Тебе́ распе́ншуся от беззако́нных и от во́ин, Спа́се,/ копие́м ре́бром Твои́м прободе́нным, Пречи́стая рыда́ше го́рько/ и, мно́гому Твоему́ и стра́шному терпе́нию ужаса́ющися, вопия́ше:/ сла́ва к челове́ком Твое́й любви́,/ сла́ва Твое́й бла́гости,/ сла́ва сме́ртию Твое́ю челове́ки обезсме́ртившему.

Песнь 4

Ирмо́с: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ища́, заблу́ждшаго./ Тем мно́гое Твое́ снизхожде́ние, е́же на мя,/ прославля́ю, Многоми́лостиве.

Распе́н себе́ сама́го страсте́м и ми́ру, Богому́дре о́тче,/ на Кресте́ просте́ршему во́лею дла́ни Христу́ угоди́л еси́, Венеди́кте./ Его́же моли́ спасти́ ду́ши на́ша.

По́двиги воздержа́ния, преподо́бне, плотски́я умертви́л еси́ у́ды,/ ме́ртвыя же моли́твою возста́вил еси́,/ и разсла́бленным благотече́ние, ве́рно чуди́м, дарова́л еси́,/ и всяк неду́г, о́тче, исцели́л еси́.

Сухи́я же и невла́жныя, преподо́бне,/ соде́лал еси́ ду́ши ро́дны живи́тельным сло́вом твои́м,/ плодо́в духо́вных и Боже́ственных, му́дре,/ богопрови́ден быв и мона́шествующих красота́, свяще́ннейший.

Богоро́дичен: Я́ко до́ждь на руно́, Чи́стая,/ в честно́е чре́во Твое́ Сло́во сни́де, воплоща́емо,/ и уста́ви многобо́жия я́ве одожде́ния, Всенепоро́чная,/ и го́рькую зи́му разори́ло е́сть.

Песнь 5

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Су́щаго в ми́лости Бо́га моля́, о́тче преподо́бне,/ напо́лнил еси́, я́коже Илия́ чва́нец еле́я, сосу́д вели́к,/ от зря́щих ве́рно удивля́емь.

Я́ко чист душе́ю, ты, во изступле́нии быв,/ ви́дел еси́ всю зе́млю, я́ко под заре́ю сия́ющу еди́ною,/ Бо́гу тя почита́ющу, всеблаже́нне Венеди́кте.

Чудоде́йствуя о Христе́,/ воде́ истещи́ моли́твою, преподо́бне, мо́лиши Подвигополо́жника,/ я́же пребыва́ет, возпропове́дающи чудеса́, Венеди́кте.

Богоро́дичен: Живы́й на Небесе́х, хотя́й всели́ся в ложесна́ Твоя́, Чи́стая,/ я́ко да нас до́мы Тро́ице сотвори́т,/ Тя, Богоро́дицу, пропове́дающих, Чи́стая.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Светозаре́ньми просвеща́емь Ду́ха,/ тьму́ лука́вых де́монов отгна́л еси́, чудотво́рче Венеди́кте,/ мона́шествующих свети́льниче светле́йший.

Я́ко пресла́вно, блаже́нне, житие́ твое́,/ я́ко пресве́тло честно́е жи́тельство твое́,/ и́мже стада́ привле́кл еси́ мона́шествующих к ра́зуму спаси́тельному.

Ца́рствия жи́тель быв Небе́снаго, Богому́дре Венеди́кте,/ сего́ улучи́ти моли́ ве́рно тя при́сно блажа́щим.

Богоро́дичен: Из утро́бы Твоея́ святы́я/ возсия́ Пра́вды невече́рнее Со́лнце/ и ве́рныя просвети́, Богоро́дице Де́во Всепе́тая.

Конда́к, глас 6:

Благода́тию Бо́жиею обогати́лся еси́,/ де́лы же извести́л еси́ зва́ние,/ и яви́лся еси́, Венеди́кте, уго́дниче Христа́ Бо́га,/ в моли́твах и посте́х дарова́ний Бо́жия Ду́ха испо́лнен,/ и был еси́ неду́жным исцели́тель,/ и прогони́тель враго́м,/ и засту́пник ско́рый душа́м на́шим.

Песнь 7

Ирмо́с: Вети́и яви́шася о́троцы/ любому́дрейшии дре́вле,/ от богоприя́тныя бо души́, богосло́вяще устна́ми, поя́ху:/ Пребоже́ственный отце́в и наш Бо́же, благослове́н еси́.

Ме́ртвость живоно́сну стяжа́л еси́ сласте́й отложе́нием./ Те́мже ме́ртвыя возставля́ти сподо́бился еси́, блаже́нне Венеди́кте, вопия́:/ Пребоже́ственный отце́в и наш Бо́же, благослове́н еси́.

Удивля́емь от мно́жества ве́рных,/ я́ко Илия́ вели́кий, соде́лал еси́ преподо́бными твои́ми труды́ огра́ду, водрузи́в, мона́хом,/ я́же при́сно пребыва́ет, остеня́ема моли́твами твои́ми, блаже́нне.

Непщева́вше умори́ти без ума́ чарова́ньми, о́тче, лука́вными/ тя, блюдо́маго Боже́ственною Вседе́теля дла́нию,/ несмы́сленнии постыде́шася, обличе́ни бы́вше/ су́щим в тебе́, Венеди́кте, проразуме́нием.

Богоро́дичен: Исцели́ души́ моея́ стра́сти/ безстра́стия исто́чника заче́ншая несказа́нно, Де́во,/ и умиле́ния ту́чу пода́ждь ми,/ хода́тайствующую ми утеше́ние та́мо, Свята́я Богоро́дице.

Песнь 8

Ирмо́с: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода/ и превозноси́те во вся ве́ки.

Над страстьми́ тлетво́рными ца́рствовал о Христе́, Богому́дре о́тче,/ в Небе́снем Ца́рствии сподо́бился еси́ жи́ти со все́ми, до́бре пожи́вшими/ и Всеви́дца Бо́га возлюбившими.

Твоя́ святы́я моли́твы прие́мля, Бог/ су́щим во оскуде́нии тобо́ю подава́ше я́же к житию́ вины́,/ вельми́ на земли́ прославля́я тя чудоде́йствы, Венеди́кте треблаже́нне.

Украси́вся добро́тами Боже́ственных доброде́телей,/ к кра́сным черто́гам преста́вился еси́, о́тче, пребыва́ти с Бо́гом/ и сего́ Боже́ственныя красоты́ в безконе́чныя ве́ки наслажда́тися.

Богоро́дичен: Се роди́ся из Тебе́, я́коже вопие́т Иса́ия, Чи́стая, Отроча́, Сын Вы́шняго/ и Твой зрим е́сть Сын, Де́во,/ сы́ны сотворя́я Небе́снаго Отца́, Тя почита́ющия.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Яви́лся еси́, я́ко со́лнце вели́кое,/ озаря́я зда́ние зна́меньми, Богоно́се, стра́шными и доброде́телей сия́нии,/ сего́ ра́ди, соверша́юще па́мять твою́, пои́стинне светоза́рную,/ просвеща́емся, о́тче, серде́чными чу́вствы.

Тя мона́шествующих стада́, тобо́ю собра́нна, де́нь восхваля́ют и но́щь,/ посреди́ те́ло твое́ иму́ще, источа́ющее бога́тно чуде́с ре́ки, о́тче му́дре,/ и просветя́ще сих непреста́нно стопы́.

Па́че со́лнечных луч облиста́л еси́, о́тче, испо́лнив Бо́жия за́поведи,/ и к Све́ту невече́рнему преста́вился еси́,/ моля́ пода́тися оставле́нию грехо́в ве́рно тя чту́щим,/ приснопа́мятне Венеди́кте.

Богоро́дичен: Светороди́тельнице Де́во, души́ моея́ стра́сти отжени́/ и да́ждь чи́сто зре́ти, Влады́чице,/ спаси́тельную добро́ту возсия́вшаго неизрече́нно из Твоея́ пречи́стыя утро́бы/ во свет язы́ков, Всепе́тая.

Преподо́бный Венеди́кт (Бенедикт) Нурсийский

Преподобный Венедикт (Бенедикт) Нурсийский, основатель старейшего в Европе монашеского ордена бенедиктинцев, родился 14 (27) марта 480 года в итальянском селении Нурсии, расположенном к северо-востоку от Рима (ныне местечко Норча в провинции Умбрия, недалеко от г. Сполето).

Святой Венедикт (или Бенедикт, от лат. Benediktus – благословенный) происходил из знатной и состоятельной семьи. Еще в детстве он отличался смышленостью и удивлял своими способностями. Получив первоначальное и довольно основательное домашнее образование, он был отправлен в 492 году родителями в Рим, чтобы завершить образование в столице. В Риме преподобный Венедикт изучал риторику, философию и другие науки, занимался и литературной деятельностью. Через два года, достигнув 14-летнего возраста, юноша оставил училище, в котором царили легкомысленные нравы и нельзя было приобрести подлинную ученость, тем более обрести духовность. Вняв призыву свыше, святой Венедикт решил удалиться от мирских соблазнов и всецело посвятить себя служению Богу. Вначале юноша поселился при храме во имя святого апостола Петра в местечке Абруццо (ныне Альфидена), близ Рима, где вел строгую аскетическую жизнь. Неожиданно стал известен чудесный случай, свидетельствовавший об особом духовном даре подвижника, который привлек к нему внимание. Избегая соблазна мирской славы, святой Венедикт покинул Рим (родители его к этому времени умерли). Он поселился в пещере малодоступной горной местности Субиако (Субъяко). Здесь, в Сабинских горах, святой проводил дни в строгом посте и неустанной молитве, подражая пустынножителям египетской Фиваиды. Отшельник из близлежащего монастыря по имени Роман, встреченный святым Венедиктом, постриг его в монашество и помогал в течение трех лет: он приносил в условленные дни хлеб и спускал его в пещеру святому Венедикту на веревке, к которой был привязан колокольчик.

Три года провел святой Венедикт в полном уединении, пока Господь не открыл его местопребывание пастухам и одному пресвитеру, который стал всем рассказывать о великом подвижнике. В это время в одной из окрестных обителей, в пещерном монастыре Виковаро, умер игумен. После настойчивых просьб иноков святой Венедикт в 510 году согласился стать настоятелем этой обители, но предупредил, что его строгий нрав придется им не по душе. Так и случилось. Через некоторое время иноки возроптали, не выдержав строгих правил, установленных святым Венедиктом.

Однажды, во время трапезы, когда святой Венедикт по обыкновению сотворил над едой крестное знамение, чаша с вином разбилась, как будто от удара камнем. Святой догадался, что кто-то из братии, желая избавиться от него, подал ему отравленное питие. Призвав к себе испуганную братию, он сказал: «Да помилует вас Милосердный Господь, о чада!.. Зачем вы замыслили сотворить мне такое? Не говорил ли вам прежде, что мои нравы с вашими не согласуются?..»

После этого святой Венедикт оставил обитель и вернулся в свою пещеру. Добрая молва о нем не утихала, и к нему стали приходить люди за духовным советом и наставлениями, а также взыскующие иноческой жизни. Некоторые из них оставались и устраивали себе поблизости маленькие келлии. Через несколько лет, около 520 года, число братии столь возросло, что святой Венедикт разделил их на двенадцать общин. Каждая из общин состояла, в свою очередь, из двенадцати иноков и имела свой отдельный скит. При себе святой Венедикт оставил немногих, наиболее нуждавшихся в его духовной помощи, или тех, образованием которых считал необходимым заниматься сам.

«Многие уважаемые патриции отдавали своих детей на воспитание святому Бенедикту: так, сенатор Эквиций привел к нему своего сына Мавра, Тертулл – своего сына Плацида, и оба эти юноши, воспитанники Бенедикта, стали впоследствии апостолами в Галлии и Сицилии» (Ф. Грегоровиус. История города Рима в Средние века. Т. 2. СПб., 1903, с. 7).

Враг рода человеческого возбудил в жившем неподалеку пресвитере Флоренции зависть к святому и склонил его к злословию и клевете. Но святой Венедикт смиренно все сносил, не переставая молиться за обидчика. Тогда, по наущению диавольскому, тот начал совращать иноков, подсылая к ним развратных женщин. Святой Венедикт вынужден был, не желая подвергать искушениям братию, покинуть с наиболее юными и нестойкими обжитое место в 528 году.

В горной местности, близ полуразрушенного городка Монте-Кассино, бывшего некогда крепостью (провинция Кампанья, между Римом и Неаполем), святой Венедикт основал новый монастырь на участке земли, подаренном римским сенатором Тертуллом. 8 апреля 529 года, в праздник Светлого Воскресения Христова, монахи с пением «Аллилуия» ниспровергли статую Аполлона, возвышавшуюся на горе над Монте-Кассино. Античное святилище было вскоре перестроено ими и превращено в христианский храм, освященный во имя святого Иоанна Крестителя (основание монастыря запечатлено на фреске «Строительство аббатства Монте-Кассино» известного флорентийского живописца Луки Синьорелли, 1440–1523 гг.). Здесь же была построена часовня во имя святого Мартина Турского. Через некоторое время число насельников монастыря довольно значительно возросло, обитель была обнесена высокими стенами. Она служила надежным прибежищем окрестным жителям от нападений остготов, лангобардов и других варваров. Преподобный Венедикт устроил при Монте-Кассинском монастыре замечательную библиотеку, с богатым собранием рукописных книг. Старшим инокам монастыря он поручил обучение грамоте детей окрестных жителей и переписывание священных и богослужебных книг (это помогло впоследствии сохранить многие памятники раннехристианской письменности). Таким образом, монастырь постепенно превратился в центр духовного просвещения и богословского образования. Еще при жизни святого Венедикта близ Монте-Кассино возник другой монастырь – Террачина. В Монте-Кассинском монастыре преподобный Венедикт создал в 530–540 годах общежительный Устав, состоящий из 73 глав, в основу которого положил правила восточных пустынников и 12 книг «О постановлениях киновий» преподобного Иоанна Кассиана Римлянина († 435; память 29 февраля). Устав этот, написанный латинским языком, приближающимся к народному, получил широкое распространение в Западной Европе и был принят впоследствии многими монастырями (до 1595 года он выдержал более 100 изданий). Особенность Устава заключается в том, что он соединил монашеские идеалы Востока с правилами подвижнической жизни Западной Европы. Каждый желающий поступить в монастырь должен был пробыть в нем послушником в течение года, чтобы изучить Устав, привыкнуть к монастырской жизни и убедиться в готовности (или неспособности) принять монашеский постриг.

Приняв постриг, монах-бенедиктинец дает обет постоянства (stabilitas loci) и уже не имеет права покидать монастырь (кроме исключительных случаев); он должен на всякое дело испрашивать благословения настоятеля (аббата).

Настоятель обители, избираемый монахами, хотя и выслушивает советы старших и опытных братий, но решения принимает самостоятельно, его духовная власть в монастыре является пожизненной. Исполнение Устава рассматривается как важная ступень в духовном восхождении. Необходимыми условиями такого восхождения являются нестяжание, целомудрие, смирение, молитва и труд. Святой Венедикт справедливо считал лень матерью всех пороков и настаивал на необходимости физического и умственного труда. Сам он неутомимо трудился с раннего утра до позднего вечера, подавая добрый пример братии.

«Из монастыря Монте-Кассино бенедиктинский устав с необычайной быстротой распространяется по христианскому Западу; он воспитывал из века в век дисциплинированную армию монахов, способную корчевать пни и распахивать целину в необжитых местах, поддерживать в правильном состоянии раз налаженное хозяйство, систематической пропагандой обращать в новую веру языческое население. Эта равномерная, бесперебойная, согласованная работа многих людей, каждый из которых приносил свою личную своеобычность в жертву сверхличному распорядку, во многом заложила основы средневекового духовного строя» (Из истории культуры Средних веков и Возрождения. М., 1976, с. 41).

За свою праведность и святость преподобный Венедикт удостоился от Господа дара прозорливости и ясновидения. Так, например, он предузнал о кончине епископа Капуанского Германа, увидев, как Ангелы возносят на Небо его душу.

Предводителю готов Тотилле святой Венедикт пророчески возвестил, что он возьмет Рим, но будет убит через 10 лет; это предсказание сбылось в 552 году. Известны также многие случаи, когда святой Венедикт исцелял страждущих и больных.

Сестра преподобного Венедикта святая Схоластика также прославилась своей подвижнической жизнью. Она сохранила девство и с юных лет посвятила себя служению Богу. Раз в году святая Схоластика имела обычай навещать брата; известно, что она попрощалась с ним за три дня до своей блаженной кончины.

Свою собственную кончину преподобный Венедикт предсказал за шесть суток. Причастившись Святых Тайн и воздев руки к Небу, он преставился ко Господу 21 марта 543 года.

Через несколько лет (в середине VI века) инок Монте-Кассинского монастыря поэт Марк написал в похвалу святому Венедикту 33 дистиха.

Впоследствии святому Венедикту посвятил стихотворение известный церковный историк, первый комментатор Бенедиктинского устава Павел Диакон (VIII в.). Житие святого Венедикта написал его современник Папа Римский святой Григорий I Двоеслов (590–604); оно переведено с латинского на греческий язык Папой Римским Захарией (741–772).

Монте-Кассинский монастырь подвергся разорению при нашествии лангобардов в 581 году, но впоследствии был восстановлен.

При аббате Дезидерии (1027–1087) в 1068 году были обретены мощи святого Венедикта, место захоронения которого в период нашествий варваров было потеряно.

В 1349 году Монте-Кассинский монастырь сильно пострадал от землетрясения. С помощью Папы Римского Урбана V (1362–1370), бенедиктинца, обитель была восстановлена, но гробница святого Венедикта вновь оказалась утраченной. В 1569 году она была обретена при перестройке собора.

При раскопках, проведенных в 1944 году во время восстановительных работ (ранее, 15 февраля 1944 года Монте-Кассинский монастырь был полностью разрушен бомбардировкой американской авиации), открыли некрополь в соборном храме; близ алтаря были в третий раз обретены мощи святого Венедикта. Благодаря помощи итальянского правительства и усилиям ордена бенедиктинцев, Монте-Кассинский монастырь вскоре возродился из руин.

В 1980 году торжественно праздновалось 1500-летие со времени рождения святого Венедикта Нурсийского.

Источники и литература:

Migne I.P. Patrologia curpus comletus. Serias Latina. t. 66. Монашеские уставы. Перев. епископа Феофана (Говорова) Затворника.– В кн.: «Древние иноческие уставы преп. Пахомия Великого, св. Василия Великого, преп. Иоанна Кассиана и преп. Венедикта». М, 1892, с. 591–653.

Св. Григорий Двоеслов. Собеседования о жизни италийских отцов и о бессмертии души. Казань, 1858; Л. П. Карсавин. Монашество в Средние века. СПб., 1912; И. Н. Голенищев-Кутузов. Средневековая латинская литература Италии, М., 1972, с. 120–122 (на с. 121 фреска Пьетро Перуджини с изображением св. Венедикта, Рим, Ватикан); Игумен Августин (Никитин). Преподобный Венедикт Нурсийский. – Богословские труды, сб. 21, М., 1980, с. 221–240; К 1500-летию со времени рождения преподобного Венедикта Нурсийского. – Журнал Московской Патриархии, 1980, №5, с. 61–71.

Пра́зднование Пресвяте́й Влады́чице на́шей Богоро́дице в че́сть ико́ны Ея́ Се́бежския, нарица́емыя «Умиле́ние»

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 1.

Подо́бен: Прехва́льнии му́ченицы:

Пала́то одушевле́нная Христо́ва,/ уми́льно вопие́м Ти, Влады́чице:/ честну́ю ико́ну о́браза Твоего́,/ в це́ркви Бо́жией предстоя́щу,/ да́руй, ве́рным держа́ву и сте́ну необори́мую,/ от нея́же зна́мение ужа́сно ви́девше:/ сле́зы из обою́ оку́ точа́щи./ Сего́ ра́ди мо́лим Тя:/ град Твой, Богома́ти, спаси́,/ воспева́ющий держа́ву Твою́.

Храм Преображе́ния Спа́сова,/ Твою́, Влады́чице, чудотво́рную ико́ну име́я в себе́,/ всегда́ освяща́ет вся,/ ве́рою притека́ющия и Тя по до́лгу ублажа́ющия,/ всем вы́ну Ты еси́ упова́ние/ и душа́м на́шим тве́рдый покро́в и держа́ва.

Мног наро́д гра́да Опо́чки,/ почита́ющий Тя и по до́лгу сла́вящий,/ огражда́еши, Всепе́тая,/ от безбо́жных, Чи́стая, иноплеме́нник,/ от гла́да же, и тру́са, и напра́сныя сме́рти,/ и междоусо́бныя бра́ни, всегда́,/ Де́во Неискусобра́чная,/ сего́ ра́ди сла́вим Тя, Пречи́стая Богоневе́сто,/ челове́ком Помо́щнице.

О́браз зра́ка Твоего́, Пречи́стая Влады́чице,/ благода́ть дарова́ и бога́тство неотъе́млемо,/ покро́в же, и сла́ву, и необори́мую сте́ну,/ исцеле́нием сокро́вище бы́сть,/ чудесе́м исто́чник при́сно теку́щ/ и приста́нище спаси́тельное обурева́емым всегда́,/ сего́ ра́ди пое́м Тя, Препе́тая.

Почерпи́те, челове́цы, спасе́нное душа́м здра́вие/ от о́браза Присноде́вы,/ честны́м источа́юща чуде́с струи́,/ омыва́юща серде́ц омраче́ние и страсте́й скверне́ние/ и ду́ши освяща́юща/ Боже́ственною благода́тию.

Добро́ту Тя Иа́ковлю и ле́ствицу Небе́сную ве́мы,/ по Ней же сни́де Госпо́дь на зе́млю/ и тогда́ прообрази́ Твою́ че́сть и сла́ву,/ Ты бо, Влады́чице, породи́ Бо́га всех,/ Тя блажа́т Небе́снии А́нгели и земни́и челове́цы,/ я́ко за ве́сь мир мо́лишися/ и покрыва́еши ми́лостию/ и́же Твой честны́й соверша́ющих зна́мения пра́здник.

Злата́я кади́льнице,/ ру́чко и же́зле,/ свети́льниче светоза́рный,/ сви́тче Боже́ственный,/ в не́мже пе́рстом Бо́жиим написа́ся Сло́во,/ спаси́ Тебе́ велича́ющих.

Сла́ва, и ны́не, глас 8:

Ужасо́шася вся разу́мная чинонача́лия,/ духо́вно совокупи́вше лик,/ и недоумева́хуся с на́ми ду́си пра́ведных/ бы́вшу виде́нию преужа́сному и зна́мению преди́вну,/ от о́браза Цари́цы всех,/ ви́дяще Ю, из о́чию сле́зы испуща́ющу,/ Свои́ пречестны́я дла́ни просте́ршу к Ро́ждшемуся из Нея́,/ вообрази́вшу 35 гнев, подвиза́ющийся на ны,/ и прося́щу ми́ру смире́ние,/ и святи́телем кре́пости и утвержде́ния,/ и Бо́жиим це́рквам благостоя́ние,/ и спасе́ние душа́м на́шим.

Вход. Проки́мен дне и чте́ния 3

Бытия́ чте́ние (глава́ 28):

Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа та́мо,/ за́йде бо со́лнце./ И взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица, утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней./ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся,/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки./ И возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще по́йдеши./ И возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко е́сть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ не́сть сие́, но дом Бо́жий,/ и сия́ врата́ Небе́сная.

Проро́чества Иезеки́илева чте́ние (гла́вы 43 и 44):

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы,– глаго́лет Адонаи́ Госпо́дь./ И обрати́ мя на пу́ть врат святы́х вне́шних, зря́щих на восто́ки,/ и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му,/ и ви́дех, и се испо́лнь сла́вы храм Госпо́день.

При́тчей чте́ние (глава́ 9):

Прему́дрость созда́ Себе́ дом/ и утверди́ столпо́в се́дмь./ Закла́ Своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же е́сть безу́мен, да уклони́тся ко Мне./ И тре́бующим ума́ рече́:/ прииди́те, яди́те Мой хлеб и пи́йте вино́,/ е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ния бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Да́ждь прему́дрому вину́, и прему́дрший бу́дет,/ сказу́й пра́ведному, и приложи́т приима́ти./ Нача́ло прему́дрости – страх Госпо́день,/ и сове́т святы́х – ра́зум./ Разуме́ти бо зако́н – по́мысла е́сть блага́го,/ сим бо о́бразом мно́гое поживе́ши вре́мя,/ и приложа́тся тебе́ ле́та живота́.

На лити́и стихи́ры, глас 4.

Подо́бен: Я́ко до́бля:

Я́ко светоно́сная пала́та и одр всезлаты́й,/ Ты еси́, Богоро́дице Влады́чице,/ Ты бо Сло́во Бо́жие во Свои́х ложесна́х вмести́ла еси́,/ и, ро́ждши нам Со́лнце Незаходи́мое, Свет Невече́рний,/ на́ша пре́жде неразуме́нием омраче́нная се́рдца/ благоразу́мием освети́ла еси́,/ и ле́сти тьму́ разори́ла еси́.

Твои́м рождество́м а́дова кре́пость разори́ся/ и все челове́чество спасе́но бы́сть,/ ны́не же Твои́ми моли́твами враго́в на́ших шата́ния низложи́,/ и кре́пость их сокруши́,/ и лю́дем Твои́м побе́ды на враги́ да́руй,/ да посра́мятся вси, явля́ющии рабо́м Твои́м зла́я.

Богоро́дице Влады́чице,/ Держа́вная Помо́щнице,/ укрепи́ сла́вящия Тя на враги́,/ да я́коже дре́вле спасла́ еси́ Ца́рский град 36 от нахожде́ния пога́ных,/ та́ко и ны́не спаси́ страну́ Росси́йскую от нахожде́ния вра́жия,/ от междоусо́бныя ра́ти,/ от гла́да же и тру́са,/ Де́во Неискусобра́чная,/ сего́ ра́ди Тя сла́вит страна́ Росси́йская,/ челове́ком Помо́щницу.

Ны́не страна́ Росси́йская/ о Тебе́ хва́лится и весели́тся,/ име́ющи Тя Засту́пницу непосты́дную/ и сте́ну неруши́му,/ гра́ду на́шему непоколеби́мое основа́ние,/ стра́жа неусы́пна земли́ Росси́йския,/ не преста́й ны́не Твои́ми, Госпоже́, моли́твами/ избавля́ти Твой град и лю́ди от всех бед.

Тебе́ припа́дают, Госпоже́,/ святи́телей сосло́вие и свяще́нников собо́ри,/ мона́хов совокупле́ние и ве́сь наро́д,/ уми́льно моля́щеся, Тебе́ ны́не кла́няются/ и, любе́зно целу́юще Твой о́браз, глаго́лют:/ чту́щий Тя град/ всегда́ спаса́й от всех бед.

Сла́ва, и ны́не, глас 8:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

На стихо́вне стихи́ры, глас 2.

Подо́бен: Егда́ от Дре́ва:

Всем предста́тельствуеши, Блага́я,/ прибега́ющим с ве́рою в держа́вный Твой покро́в,/ ино́го бо не и́мамы, гре́шнии, к Бо́гу/ в беда́х и ско́рбех при́сно избавле́ния,/ обремене́ни грехи́ мно́гими,/ Ма́ти Бо́га Вы́шняго,/ тем же Ти припа́даем:/ изба́ви от вся́каго обстоя́ния рабы́ Твоя́.

Стих: Воскресни́, Го́споди, в поко́й Твой,/ Ты и Киво́т святы́ни Твоея́.

Всех скорбя́щих Ра́досте,/ и оби́димых Засту́пнице,/ и а́лчущих Пита́тельнице,/ стра́нных утеше́ние,/ обурева́емых приста́нище,/ больны́х посеще́ние,/ немощны́х покро́в и Засту́пнице,/ же́зле ста́рости,/ Ма́ти Бо́га Вы́шняго Ты еси́, Пречи́стая,/ потщи́ся, мо́лимся, спасти́ся рабо́м Твои́м.

Стих: Лицу́ Твоему́ помо́лятся/ бога́тии лю́дстии.

Ра́дуйся, Пречи́стая Де́во;/ ра́дуйся, честны́й ски́птре Царя́ Христа́;/ ра́дуйся, прозя́бшая Грозд та́йный;/ ра́дуйся, две́ре Небе́сная и неопали́мая купино́;/ ра́дуйся, всеми́рный све́те;/ ра́дуйся, всех ра́досте;/ ра́дуйся, ве́рных спасе́ние;/ ра́дуйся, Засту́пнице всех христиа́н и прибе́жище, Влады́чице.

Сла́ва, и ны́не, глас 8

Ра́дуйся, вселе́нныя похвало́;/ ра́дуйся, хра́ме Госпо́день;/ ра́дуйся, горо́ приосене́нная;/ ра́дуйся, всех прибе́жище;/ ра́дуйся, све́щниче златы́й;/ ра́дуйся, сла́во правосла́вных честна́я;/ ра́дуйся, Мари́е, Ма́ти Христа́ Бо́га;/ ра́дуйся, раю́;/ ра́дуйся, Боже́ственная трапе́зо;/ ра́дуйся, се́не;/ ра́дуйся, ру́чко всезлата́я;/ ра́дуйся, всех упова́ние.

Тропа́рь, глас 8:

Взы́дем, правосла́внии наро́ди гра́да Опо́чки,/ на ту́чную го́ру, я́ко на Фаво́рскую,/ в дом Спаси́теля своего́, в че́сть боголе́пнаго Преображе́ния Его́,/ оби́лующу чуде́с и стокра́тный клас израсти́вшую,/ и у́зрим сла́ву чудесе́ от чудотво́рнаго о́браза/ Пресвяты́я Богома́тере Умиле́ния Се́бежския:/ я́ко мо́ре пролия́ся и Евфра́т, теки́й из рая́,/ та́ко сле́зы Ея́ бы́ша, из обою́ оку́ пролиты́я,/ о наше́дшем гне́ве Созда́теля Своего́ за на́ше согреше́ние,/ припаде́м, каменносерде́чнии, и возрыда́ем, прося́ще:/ о Влады́чице, умоли́ Сы́на Своего́ и Го́спода на́шего/ си́ми пресвяты́ми Свои́ми слеза́ми,/ да изба́вит нас от вся́каго зла́го обстоя́ния,/ и о́гненнаго запале́ния, и междоусо́бныя бра́ни,/ от мо́ра и гла́да,/ и наше́ствия иноплеме́нных в гряду́щия времена́,/ и, ра́дующеся, со Гаврии́лом благове́стником возопие́м Ти:/ ра́дуйся, Обра́дованная, Госпо́дь с Тобо́ю.

НА У́ТРЕНИ

По 1-м стихосло́вии седа́лен, глас 4:

О́чи мы́сленнии очи́стивше,/ прии́дем, торжеству́ем, све́тло чту́ще Богоотрокови́цу,/ добро́ту Иа́ковлю и Неве́сту всех Царя́, Бо́га на́шего,/ Сия́ бо показа́ся Не́ба кра́сная пала́та и Це́рковь одушевле́нна,/ и Ея́ си́лою сопроти́вных побежда́ем.

Сла́ва, и ны́не, то́йже.

По 2-м стихосло́вии седа́лен, глас 4:

Не умолчи́м никогда́, Богоро́дице,/ си́лы Твоя́ глаго́лати, недосто́йнии,/ а́ще бо Ты не бы предстоя́ла, моля́щи,/ кто бы нас изба́вил от толи́ких бед,/ кто же бы сохрани́л до ны́не свобо́дны?/ Не отсту́пим, Влады́чице, от Тебе́,/ Твоя́ бо рабы́ спаса́еши при́сно от вся́ких лю́тых.

Сла́ва, и ны́не, то́йже.

Велича́ние о́бщее Богоро́дице или́ сие́:

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой честны́й,/ и́мже показа́ла еси́ нам пречу́дное зна́мение.

По полиеле́и седа́лен, глас 8:

И́же – Небе́с превы́сшую су́щи,/ и Херуви́м вои́стинну сла́внейшую,/ и всея́ тва́ри честне́йшую,–/ Де́во Пречи́стая, дне́сь благода́рственно, раби́ Твои́, прино́сим пе́снь о́бразу честна́го Твоего́ подо́бия,/ Ты бо стра́нно и преди́вно зна́мение показа́ла еси́ от пречи́стаго Твоего́ о́браза,/ те́мже согла́сно вопие́м Ти:/ Влады́чице Богоро́дице, моли́ Христа́ Бо́га/ согреше́нием оставле́ние дарова́ти,/ Тебе́ бо и́мамы, раби́ Твои́, Засту́пницу усе́рдную.

Сла́ва, и ны́не, то́йже.

Степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и ви́ждь, и приклони́ у́хо Твое́. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 6:

Да́руй нам по́мощь, Богоро́дице,/ да́ждь нам по́мощь от печа́ли, на Тя наде́ющимся,/ ве́рным прибе́жище,/ избавля́й от бед рабы́ Своя́, Деви́це,/ к Тебе́ бо по Бо́зе упова́ние вси возлага́ем.

Кано́н, глас 6.

Песнь 1

Ирмо́с: Волно́ю морско́ю/ Скры́вшаго дре́вле гони́теля мучи́теля–/ под земле́ю скры́вша спасе́нных о́троцы,/ но мы, я́ко отрокови́цы,/ Го́сподеви пои́м,/ сла́вно бо просла́вися.

Прииди́те, ве́рных благочести́вая мно́жества,/ духо́вно лик совоку́пльше,/ Пречи́стую Ма́терь Сло́ва Боже́ственными пе́сньми воспои́м,/ зря́ще Те́плую Засту́пницу,/ от Пречи́стаго о́браза Ея́ преужа́сное зна́мение показу́ющую.

Я́коже ле́ствицу высо́кую, зрим Тя, Де́во Всенепоро́чная,/ е́юже к Небе́сней высоте́ восхо́дим,/ и, Тя Предста́тельницу и утвержде́ние непобеди́мое стяжа́вше, Пречи́стая,/ наве́т и сете́й вра́жиих избавля́емся,/ да яви́мся и спасе́мся, ве́рою к Тебе́ притека́ющии.

В рождестве́ Сы́на Твоего́ тли не прие́мши,/ от тле́ния всех нас изба́ви и печа́ли,/ просвеща́ющи ма́терним Свои́м дерзнове́нием, Богора́дованная.

Наде́жду иму́ще Тя, Богороди́тельнице, и несумне́нну ве́ру,/ гра́да сего́ наро́ди Тебе́, я́ко забра́ло, гра́ду поло́жше,/ Де́во Неискусобра́чная.

Катава́сия: Отве́рзу уста́ моя́:

Песнь 3

Ирмо́с: Тобо́ю, Христе́, Небеса́ утвержда́ема вся,/ Сло́во Бо́жие и Си́ла,/ испове́дуют сла́ву неизрече́нну/ и вседе́тельныя руки́ Твоея́ сотворе́ние,/ не́сть бо пресвя́т, ра́зве Тебе́, Го́споди.

Умилосе́рдися на ста́до Свое́, Пречи́стая,/ и смире́ние гра́ду Твоему́ да́руй,/ сопроти́вных че́люсти сокруши́/ и тех до конца́ не́мощны покажи́.

О́бщаго Па́стыря и Влады́ку поро́ждши Христа́, Де́во Неискусобра́чная,/ Тому́ помоли́ся, настоя́щаго гне́ва изба́витися нам,/ и́стиннаго обстоя́ния, Влады́чице.

Ми́лостива еси́, Влады́чице, Ми́лостиваго ро́ждши Спа́са,/ ви́ждь озлобле́ние и воздыха́ние люде́й Свои́х,/ ускори́, Пречи́стая, уще́дрити ны.

Пою́т Тя, Богоро́дице, А́нгельстии чи́ни/ и пра́зднуют патриа́рхи со святи́тели,/ с ни́ми же тогда́ и Боголюби́вии наро́ди теку́ще во святу́ю Твою́ Це́рковь,/ ви́деша Тя, Цари́це, за ны, гре́шныя, моля́щуюся к Сы́ну Своему́,/ поми́ловати град Твой и лю́ди, в нем живу́щия/ от Твоего́ о́браза преди́вным зна́мением.

Седа́лен, глас 8:

Ю́же дре́вле лик проро́ческий пропове́да –/ две́рь Небе́сную и неопали́мую купину́,/ све́щник многосве́тлый, злату́ю кади́льницу,/ ру́чку и жезл,/ пресла́вно дне́сь и ди́вно зна́мение показа́,/ те́мже благода́рственное пе́ние возсыла́ем Ти, раби́ Твои́, Богоро́дице,/ моли́ Христа́ Бо́га на́шим согреше́нием оставле́ние дарова́ти,/ Тебе́ бо наде́жду и́мамы, раби́ Твои́.

Сла́ва, и ны́не, то́йже.

Песнь 4

Ирмо́с: Удиви́ся Твой ра́зум от Мене́,/ услы́шавшу пресла́вная веле́ния смотре́ния Твоего́,/ укрепи́ся же возлюбле́нием Твоего́ схожде́ния,/ Ты бо моея́ нищеты́ не отве́рглся еси́.

Почита́ющия Тя гра́ждане, Пречи́стая, и по до́лгу сла́вящия/ огражда́й от безбо́жных, Чи́стая, иноплеме́нник,/ Ты бо тем еси́, Пречи́стая, бога́тство неотъе́млемо, покро́в же и держа́ва.

Не мо́жет язы́к и сло́во челове́ческое похвали́ти Тя досто́йно,/ от Тебе́ бо без се́мене Жизнода́вец Бог воплоти́тися, Пречи́стая, благоизво́ли.

При́зри, Пречи́стая, спасти́ся рабо́м Твои́м, пою́щим Тя,/ и изба́ви от сопроти́вных и наше́дшаго гне́ва, Богороди́тельнице.

Бога́тный дар и неотъе́млемо сокро́вище дарова́ла еси́ гра́ду Твоему́,/ о́браз Твой, Пречи́стая и Ма́ти Сло́ва,/ и сего́ по́мощию проти́вных низлага́ем.

Песнь 5

Ирмо́с: Сою́зом любве́/ связу́еми, апо́столи,/ влады́чествующему все́ми себе́ Христу́ возло́жше,/ красны́ но́ги очища́ху,/ благовеству́юще всем мир.

Те́плая Засту́пнице к Тебе́ притека́ющим и ненаде́ющимся наде́ждо,/ ви́ждь озлобле́ние люде́й Твои́х/ и пода́ждь Свою́ по́мощь, Пречи́стая.

И́же О́гнь ро́ждши Боже́ственный, Де́во,/ проти́вных, Пречи́стая, моли́твою Твое́ю – огне́м– попали́,/ я́ко су́щи Зижди́теля умоля́ющи, Всепе́тая.

Вели́кий преднапису́ет во проро́цех Моисе́й/ Тя ковче́г, и трапе́зу, и све́щник, и ру́чку,/ обра́зне явля́я воплоще́ние е́же от Тебе́ Вы́шняго, Ма́ти Де́во.

Ты бога́тство неистощи́мое/ исцеле́нием исто́чник еси́ ве́рою притека́ющим к хра́му Твоему́,/ иде́же пребыва́ет о́браз Твой, Влады́чице.

Песнь 6

Ирмо́с: Ят бы́сть,/ но не удержа́н в пе́рсех ки́товых Ио́на:/ Твой бо о́браз нося́,/ Страда́вшаго и погребе́нию да́вшагося,/ я́ко от черто́га, от зве́ря изы́де ./ Приглаша́ше же кустоди́и:/ храня́щии су́етная и ло́жная,/ ми́лость сию́ оста́вили есте́.

Изба́ви язы́ческаго наше́ствия град Твой, Препе́тая,/ и не преда́ждь до конца́ поги́бнути насле́дию Твоему́, Пречи́стая,/ но си́лою Ро́ждшагося из Тебе́, Влады́чице,/ проти́вных низложи́.

Мно́госогреши́вших к Тебе́, Го́споди, не пре́зри,/ но приими́ мольбу́ Ма́тере Твоея́ о нас, Ще́дре,/ да не хва́лятся сопроти́внии,– где е́сть Бог их? – глаго́люще,/ но да разуме́ют вси, я́ко Ты, Изба́вителю, с на́ми еси́.

Честну́ю ико́ну Твою́ ра́достно се́рдцем и душе́ю облобыза́ем,/ веселя́щеся и те́плою ве́рою прикаса́ющеся,/ исцеле́ние почерпа́ем неоску́дно.

Конда́к, глас 4:

Притеце́м, лю́дие, бога́тии и убо́зии,/ си́рии и вдови́цы, ста́рии и ю́нии,/ в ти́хое приста́нище,/ под покро́в цельбоно́снаго исто́чника Богома́тере./ Сле́зы бо, я́ко ре́ки, источа́ет/ из обою́ оку́ чудотво́рнаго о́браза Се́бежския/ о находя́щем гне́ве за на́ша зла́я согреше́ния/ и укрепля́ет град, его́же возлюби́ла еси́, на сопроти́вныя,/ утвержда́ет ве́ру правосла́вных христиа́н/ и избавля́ет от вся́каго зла/ моли́твами Свои́ми.

И́кос:

Разреши́ тьму́ мои́х согреше́ний,/ ю́же во уме́ мое́м лежа́щую,/ и Твои́м мя све́том просвети́, Де́во,/ я́ко да возмогу́ Тебе́ похвалу́ принести́,/ Ю́же Оте́ц восхвали́ и Дух Святы́й осени́,/ Сын же и Сло́во Бо́жие в Ню́же всели́ся нетле́нно,/ от Пречи́стую Твое́ю боку́ произы́де и с челове́ки поживе́,/ те́мже мы, гре́шнии и недосто́йнии раби́ Твои́,/ дне́сь соверша́юще свяще́нное торжество́ –/ зна́мение, бы́вшее от честны́я ико́ны Твоея́,/ в не́мже преди́вное чу́до показа́ла еси́,/ и, Твоему́ чудеси́ уди́вльшеся и Твои́х бога́тых даро́в испо́лньшеся,/ вме́сто благово́нных арома́т, ели́ко возмо́жно нам, земны́м,/ похва́льная пе́ния прино́сим Ти, глаго́люще:/ ра́дуйся, ра́досте А́нгелом и челове́ком;/ ра́дуйся, покро́ве, и утвержде́ние, и наде́ждо гра́ду Твоему́;/ ра́дуйся, проти́вных си́лою Твое́ю низлага́ющая;/ ра́дуйся, Разу́мнаго Со́лнца Ма́ти, ве́рных просвеща́ющая, неве́рных же помрача́ющая./ Ра́дуйся, христиа́ном похвало́.

Песнь 7

Ирмо́с: Неизрече́нное чу́до:/ в пещи́ Изба́вивый преподо́бныя о́троки из пла́мене/ во Гро́бе мертв, бездыха́нен полага́ется,/ во спасе́ние нас, пою́щих:/ Изба́вителю Бо́же,/ благослове́н еси́.

Вои́стинну сокро́вище че́стно гра́ду Твоему́, ико́на Твоя́, дарова́ся, Пречи́стая,/ ю́же са́ми зря́ще, о чудеси́ удивля́емся, Сы́ну Твоему́ вопию́ще:/ благослове́н Бог оте́ц на́ших.

Во храм Боголе́пнаго Преображе́ния, Влады́чице, притека́юще, лю́дие,/ ру́це простира́юще, на моли́тву дви́жем Тя:/ ви́ждь озлобле́ние на́ше и пода́ждь Твою́ по́мощь, Богоро́дице.

Светоно́сная благода́ть, исцеле́ние гра́ду Твоему́ даде́ся, о́браз Твой, Пречи́стая,/ его́же любе́зно облобыза́юще, веселя́щеся, вопие́м:/ благослове́н Бог оте́ц на́ших.

Свеща́ Боже́ственнаго сия́ния и Незаходи́маго Све́та яви́ся,/ све́щник, светосия́ющ и мир ве́сь озаря́ющ заре́ю чи́стаго де́вства,/ Тя пою́щия спаса́еши, Благослове́нная,/ Я́же Бо́га пло́тию ро́ждшая.

Песнь 8

Ирмо́с: Ужасни́ся, боя́йся, Не́бо,/ и да подви́жатся основа́ния земли́:/ се бо в мертвеце́х вменя́ется в Вы́шних Живы́й/ и во Гроб мал странноприе́млется./ Его́же, о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Собезнача́льное Сло́во Отцу́ Де́ва породи́ Пречи́стая нетле́нно,/ Того́ моли́, Богороди́тельнице,/ от сопроти́вных напа́стей спасти́ся гра́ду Твоему́ и в нем лю́дем, пою́щим:/ Го́спода воспева́йте, дела́,/ и превозноси́те Его́ во ве́ки.

Еди́на су́щи Блага́я,/ Преблага́го Сло́ва умоли́ приле́жно/ настоя́щаго гне́ва гра́ду Твоему́ изба́витися,/ да несумне́нною ве́рою Сы́ну Твоему́ зове́м, пою́ще:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки.

Сопроти́вных разжже́ния и пламеннови́дныя стре́лы, испуща́емии на нас, угаси́, Влады́чице,/ я́ко да Тя пое́м и превозно́сим, Чи́стая, во ве́ки.

Я́ко нетле́нное зерца́ло, име́я во гра́де Твою́ чудотво́рную ико́ну, Пречи́стая,/ сопротивля́ющихся низлага́ем и Сы́ну Твоему́ вопие́м:/ благослови́те, вся дела́ Госпо́дня, Го́спода/ по́йте и превозноси́те Его́ во ве́ки.

Песнь 9

Ирмо́с: Стра́нствия Влады́чная/ и Безсме́ртныя Трапе́зы/ на Го́рнем ме́сте высо́кими умы́,/ ве́рнии, прииди́те, наслади́мся,/ возше́дша Сло́ва,/ от Сло́ва научи́вшеся, Его́же велича́ем.

О́ком милосе́рдным свы́ше при́зри на град и в нем лю́ди Твоя́, Пречи́стая,/ ины́я бо по́мощи не и́мамы, то́кмо Тя, Всенепоро́чную,/ те́мже вси я́ко Ма́терь Бо́жию велича́ем.

Раби́ Твои́, вопие́м Ти, Пречи́стая Ма́ти Бо́жия:/ обы́чныя ми́лости Твоя́ на град и лю́ди ми́лостивно покажи́/ и сопроти́вных обстоя́ний нас изми́,/ да Тя непреста́нно велича́ем.

Мы́сли очи́стивше и ум,/ празднолю́бнаго гра́да Опо́чки собо́ры/ со свяще́нным чино́м и всех ве́рных благочести́вое мно́жество,/ восхвали́те Ма́терь Сло́ва,/ я́ко от Тоя́ о́браза бы́сть преди́вное зна́мение,/ ему́же со стра́хом кла́няющеся, Тя велича́ем.

Я́коже Боже́ственною све́тлостию озаря́ему/ зрим дне́сь, Пречи́стая, ико́ну Твою́ честну́ю,/ е́йже кла́няющеся, Тя велича́ем.

Свети́лен:

Возжеле́в, Пречи́стая, Твоея́ добро́ты, Иису́с в Тя всели́ся,/ и Засту́пницу Тя Твоему́ гра́ду Сло́во Бо́жие дарова́,/ его́же сохраня́й заступле́нием Твои́м при́сно,/ я́ко да Тя ублажа́ем, Пренепоро́чная Отрокови́це.

Стихи́ры на хвали́тех, глас 6. Самогла́сен:

Что Твою́, Богороди́тельнице,/ нареку́ це́рковь Боже́ственную,/ вертогра́д Еде́мский имену́емую/ и Но́ев, Чи́стая, ковче́г,/ ре́ку, освяща́ющую нас,/ ца́рское свяще́ние, всесвя́т язы́к,/ Христа́ Бо́га на́шего собо́р,/ Моисе́еву киво́ту уподобля́ю ю,/ в не́мже очисти́лище и жезл прозя́бший,/ в не́мже све́щник и ру́чка,/ кади́льница всезлата́я,/ к не́йже прибега́ем, вси ве́рнии,/ прося́ще ве́лия ми́лости.

Се храм пресве́тел и ме́сто свяще́ния,/ иде́же честна́я ико́на Твоея́ Ма́тере, Сло́ве./ Приступи́те, челове́цы, исцеле́ние почерпи́те,/ я́ко спасе́ние Тоя́ ра́ди,/ дарова́ся ро́ду челове́ческому.

И́же ненаде́жным упова́ние изве́стно,/ согреша́ющим спасе́ние,/ Мари́е Всепе́тая, Пречи́стая Богороди́тельнице,/ приими́ моле́ние на́ше,/ испроси́ долго́в разреше́ние, и́же согреши́хом в житии́,/ и ма́терними Свои́ми моли́твами/ спаси́ от бед и бу́дущаго Суда́, Влады́чице,/ вели́кия ра́ди Твоея́ ми́лости.

Ра́дуйся, Непосты́дная Предста́тельнице;/ ра́дуйся, Преблага́я Богоро́дице;/ ра́дуйся, очисти́лище ми́ру;/ ра́дуйся, скорбя́щим и ни́щим приста́нище и обурева́емым наде́ждо,/ И́же всем немощны́м в ну́ждах сохране́ние, Влады́чице,/ всех нас изба́ви скорбе́й, Всенепоро́чная,/ почита́ющих Твое́ зна́мение.

Сла́ва, и ны́не, глас 5:

Востру́бим трубо́ю пе́сней,/ прекло́ньшибося свы́ше, всех Царя́ Ма́ти Де́ва/ благослове́нием венчава́ет воспева́ющих Ю,/ и цари́цы да воспле́щут в пе́снех Цари́ Ро́ждшую,/ И́же сме́ртию одержи́мыя пре́жде/ отреши́ти человеколю́бно благоизво́лившаго,/ па́стыри и учи́телие, до́браго Па́стыря Пречи́стую Ма́терь Сло́ва,/ в честне́м хра́ме соше́дшеся, восхва́лим,/ све́щник светоно́сный, о́блак, Небе́с ши́рший,/ одушевле́нный ковче́г,/ огнезра́чный Влады́чний престо́л,/ манноприи́мную злату́ю кади́льницу и ру́чку/ и затворе́нную Сло́ва две́рь,/ всем христиа́ном прибе́жище,/ пе́сньми Богогла́сными си́це рцем:/ Пала́то Сло́ва,/ сподо́би всех нас Небе́снаго Ца́рствия,/ ничто́же бо немо́щно хода́тайству Твоему́.

Славосло́вие вели́кое и отпу́ст.

НА ЛИТУРГИ́И СЛУ́ЖБА ПРЕСВЯТЕ́Й БОГОРО́ДИЦЕ

Опочецкая, или Себежская, икона Божией Матери «Умиление»

Опочецкая, или Себежская, икона Божией Матери «Умиление» была принесена в 1634 году стрельцами города Опочки (Псковская область) в местный Спасо-Преображенский собор из города Себежа, в связи с тем, что Себеж переходил к Польше (по условиям договора от 14 июля 1634 года между царем Михаилом Феодоровичем и польским королем Владиславом Сигизмундовичем), а часть жителей Себежа, состоявшая из бывших опочан, не хотела оставлять полякам чудотворной иконы.

На Себежской иконе Умиления Божией Матери по сторонам Пресвятой Богородицы изображены святой праведный Симеон Богоприимец и святой первомученик архидиакон Стефан, которого стрельцы считали своим Небесным покровителем.

14 и 16 марта 1681 года (в понедельник и среду первой седмицы Великого поста, а также на Вербной и Страстной седмицах) от Себежского образа было знамение: из очей Пресвятой Богородицы исходили слезы («излия слезы, яко струп»). Знамение это повторилось в июле следующего года. Тогда же, в 1682 году, попечением Опочецкого воеводы Герасима Феодотовича Лазарева-Станищева была составлена служба Себежской иконе, ежегодно совершавшаяся в Опочецком Спасо-Преображенском соборе 14 марта.

Литература: Л. И. Софистский. Город Опочка и его уезд в прошлом и настоящем (1414–1914). Псков, 1914, с. 98–99; Рукопись «Сказание о чудеси от образа Пресвятыя Богородицы Умиления Себежския во граде Опочки». – ЦГИАЛ, ф. 834, оп. 1, №765.

* * *

35

вообрази́вшу гнев – возвести гнев, изобразив грядущее бедствие.

36

ца́рский град – царьград, Константинополь.


Источник: Минея - М. : Издательский Совет Русской Православной Церкви, 2002-. 12 том. / Минея март. - 2002. / Ч. 1. – 424; Ч. 2. - 400 с.

Комментарии для сайта Cackle