21-й де́нь

Преподо́бнаго отца́ на́шего и испове́дника Иа́кова епи́скопа

Стихи́ры, глас 4.

Подо́бен: Дал еси́ зна́мение:

Преве́чнующее и ника́коже претека́ющее/ возжела́в благосла́вие,/ сла́ву пренебре́гл еси́,/ преходя́щую и погиба́ющую,/ и, крест восприе́м,/ Распе́ншемуся после́довал еси́/ и пло́ть покори́л еси́ по́стническими по́двиги./ Сего́ ра́ди па́мять твою́/ соверша́ем, Иа́кове.

Ми́ру и страсте́м распина́емь, Иа́кове,/ ду́шу соблю́л еси́/ нескве́рну и небла́зненну,/ несме́шенну до́льными, о́тче, начерта́ньми,/ и виде́нии та́йными воскрили́вся к Небе́сным./ В ни́хже твое́ житие́ предвозложи́л еси́, преподо́бне,/ я́ко Христо́в друг и́скренний,/ я́ко уго́дник ве́рнейший.

Незло́бив, цел,/ ми́лостив и братолюби́в,/ смиренному́др и кро́ток,/ любве́ испо́лнен,/ ми́лостынею укра́шен,/ терпе́нием пожда́телен,/ ве́рою и наде́ждою украша́емь,/ показа́лся еси́, всеприснопа́мятне,/ моли́твами удобря́емь/ и Боже́ственными светлостьми́ свяще́нно облиста́емь.

Сла́ва, и ны́не, Богоро́дичен:

Скве́рну отмы́й стра́стнаго се́рдца моего́,/ Богоро́дице Всепе́тая,/ и вся я́звы и гное́ния сего́,/ я́же от греха́,/ очи́сти, Чи́стая,/ и ума́ моего́ уста́ви непостоя́ние,/ я́ко да си́лу Твою́/ и вели́кое заступле́ние/ велича́ю, окая́нный/ и непотре́бный раб Твой.

Крестобогоро́дичен:

Распина́ема Христа́ Человеколю́бца/ ви́дящи Пречи́стая/ и ре́бра ископова́ема копие́м,/ пла́чущи, вопия́ше:/ что сие́, Сы́не Мой?/ Что Ти безблагода́тнии лю́дие возда́ша,/ за я́же сотвори́л еси́ до́брая им,/ и тщи́шися безча́дствовати Мя, Вселюбе́знейший?/ Удивля́юся, Благоутро́бне,/ Твоему́ во́льному распя́тию.

Кано́н. Иа́ков. Глас 2.

Пе́снь 1

Ирмо́с: Гряди́те, лю́дие,/ пои́м пе́снь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Просвеще́ние Тро́йческое, Иа́кове, в ду́шу прие́м,/ ми́ра оста́вил еси́ те́мную пре́лесть/ и преми́рную сла́ву получи́л еси́.

Ты, крест на ра́мо взем,/ Распе́ншемуся, преподо́бне, после́довал еси́/ и, мона́шествовав прему́дре,/ стра́сти воздержа́нием, о́тче, изсуши́л еси́.

Вмести́телен дарова́ний Ду́ха от млады́х ногте́й твои́х сосу́д был еси́/ и Вы́шняго граждани́н Сио́на и насле́дник, блаже́нне Иа́кове.

Богоро́дичен: Еди́на Бо́га, все́ми су́ща невмести́ма,/ Тебе́ вме́стна бы́вша за бла́гость, родила́ еси́, Отрокови́це,/ Его́же моли́ спасти́ воспева́ющия Тя.

Пе́снь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Житие́ твое́ красно́,/ сло́во со́лию любве́, Богому́дре, растворе́но,/ се́рдце благоумиле́нно:/ сего́ ра́ди тя ве́рою ублажа́ем.

Христа́, нас ра́ди я́вльшагося пло́тию, Боже́ственный почита́я о́браз,/ гоне́ния, о́тче, претерпе́л еси́,/ и беды́, и ско́рби, всеблаже́нне.

Я́ко же́ртву чи́сту, тебе́ сама́го прине́сл еси́ Го́сподеви умерщвле́нием греха́/ и же́ртвы безкро́вныя Тому́, я́ко святи́тель зако́нен, прине́сл еси́.

Богоро́дичен: Зла́ту я́ко вои́стинну кади́льницу,/ и ста́мну ма́нны,/ и Боже́ственную го́ру,/ и пала́ту прекра́снейшую Бо́жию Тя, Де́во, имену́ем.

Седа́лен, глас 4.

Подо́бен: Ско́ро предвари́:

Христу́ после́довал еси́, мир оста́вив/ и пло́ть покори́в воздержа́нием я́ве, преблаже́нне Иа́кове,/ отню́дуже свяще́нства пома́зание свято́е име́л еси́,/ ны́не же к невеще́ственным преста́вился еси́ лико́м,/ моля́ о всех нас, восхваля́ющих тя.

Сла́ва, и ны́не, Богоро́дичен:

Еди́на, ро́ждшая Творца́ всему́,/ еди́на, украси́вшая челове́чество Рождество́м Твои́м, Богоневе́сто,/ изба́ви мя от се́ти льсти́ваго врага́,/ поста́ви мя на ка́мени Христо́вых хоте́ний,/ Того́ моля́щи приле́жно, Его́же воплоти́ла еси́.

Крестобогоро́дичен:

На Кресте́ Тя возвы́шена я́ко узре́ Пречи́стая Ма́ти Твоя́, Сло́ве Бо́жий,/ ма́терски рыда́ющи, веща́ше:/ что но́вое и стра́нное сие́ чу́до, Сы́не Мой?/ Ка́ко – Жи́знь всех – вкуша́еши сме́рти,/ оживи́ти ме́ртвыя хотя́, я́ко Благоутро́бен?

Пе́снь 4

Ирмо́с: Услы́шах, Го́споди,/ слух Твоего́ смотре́ния/ и просла́вих Тя,/ Еди́не Человеколю́бче.

Всено́щными мольба́ми сла́сти теле́сныя умертви́в,/ безстра́стия яви́лся еси́ свети́льник неусы́пный, преподо́бне.

Слез тече́ньми всегда́ омыва́яся, преблаже́нне,/ чи́сто прия́телище яви́лся еси́ Свята́го Ду́ха.

Смире́н же, и кро́ток, и сострада́телен, и незло́бив,/ и целому́др святи́тель, преподо́бне, был еси́.

Богоро́дичен: Неискусобра́чная Влады́чице, Я́же Бо́га во чре́ве заче́нши,/ напа́стей и печа́лей вся изба́ви.

Пе́снь 5

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас,/ ра́зве бо Тебе́, ино́го бо́га не зна́ем.

Сла́вы жела́ний вои́стинну, е́же в челове́цех высо́каго, преподо́бне,/ прея́вственно, о́тче, возгнуша́лся еси́/ и был еси́ свети́льник, смиренному́дрия сия́я све́тлостию.

Воздержа́нием мно́гим и во бде́нии приле́жнем, преподо́бне,/ в моли́тве и в злострада́нии взыска́л еси́ Бо́га,/ тя к Вы́шним оби́телем преложи́вшаго.

Упражня́я себе́ всено́щными моли́твами, стоя́л еси́,/ душе́вным о́ком Боже́ственныя прие́мля зари́,/ о́тче святи́телю Богому́дре Иа́кове.

Богоро́дичен: Уязви́вшееся прило́ги лука́ваго, Пречи́стая,/ я́ко сострада́тельна, уврачу́й се́рдце мое́,/ Су́щаго, на Кресте́ пло́тию уя́звленнаго, неизрече́нно ро́ждшая.

Пе́снь 6

Ирмо́с: В бе́здне грехо́вней валя́яйся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

То́ки слез твои́х, преподо́бне, мо́ре лю́тых страсте́й изсуши́ша/ и та́мошнее утеше́ние честне́й твое́й души́ исхода́таиша.

Незло́бив, кро́ток, цел, преподо́бен,/ сла́док, смиренному́др, и тих, и просвеще́ния испо́лнен,/ пресла́вне о́тче, был еси́.

С Боже́ственными па́стыри па́мять твоя́, о́тче, спросла́вися,/ я́коже па́стыря до́браго, па́стырю му́дре Иа́кове,/ я́ко преподо́бне ста́до упа́сл еси́.

Богоро́дичен: Во́лею вся соде́лавый во утро́бу, восхоте́в, неискусобра́чную всели́ся,/ тле́нием неду́говавшия нетле́нием почти́в, я́ко Милосе́рд.

Пе́снь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Мно́гая гоне́ния и неосла́бная искуше́ния претерпе́л еси́,/ иконобо́рцы побежда́я, правосла́вием сия́я,/ вся зря́щия просвеща́я и взыва́я, Иа́кове:/ благослове́н еси́, Бо́же оте́ц на́ших.

Христо́во стра́шное прише́ствие помышля́я, во умиле́нии все житие́ сконча́л еси́,/ до́ндеже обре́л еси́, блаже́нне, очище́ние прегреше́ний соверше́нное/ и ве́чное утеше́ние, просвеще́ние и́стинное и сла́ву неизрече́нную.

Па́стыря Христа́ в кро́тости души́ яви́лся еси́ а́гня/ и, Сим наставля́емь, па́стырь ове́ц в ду́се, о́тче, слове́сных позна́лся еси́,/ с ни́ми поя́ всегда́:/ благослове́н еси́, Бо́же оте́ц на́ших.

Богоро́дичен: Де́во сла́вная, Неискусобра́чная Чи́стая, Благослове́нная,/ па́дающих исправле́ние, согреша́ющих избавле́ние,/ спаси́ мя, блу́днаго, спаси́, Сы́ну Твоему́ зову́ща:/ благослове́н еси́, Бо́же оте́ц на́ших.

Пе́снь 8

Ирмо́с: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода/ и превозноси́те во вся ве́ки.

Чисте́йший твой ум, чистото́ю Боже́ственною просвеще́н,/ бесо́вския тьмы́ и мглы страсте́й разу́мно уклони́ся, преподо́бне, зовы́й:/ по́йте, вся дела́, Го́спода и превозноси́те во вся ве́ки.

Разжже́нныя врага́ стре́лы угаси́л еси́, му́дре, одожде́ньми непреста́нных слез/ и, разжже́гся Христо́вою любо́вию, всеблаже́нне,/ попали́л еси́ вещенеи́стовное сласте́й те́рние.

Сие́ ста́до, прему́дре, е́же собра́л еси́ твои́ми уче́нии,/ и ве́рою соверша́ющия свяще́нную, и честну́ю,/ и по́лну све́та Боже́ственную па́мять твою́/ сохрани́ моли́твами твои́ми от искуше́ний и бед.

Богоро́дичен: Живы́й су́щи исто́чник, Я́же во́ду жи́зни ро́ждшая,/ ду́шу мою́, иста́явшую грехо́вным пла́менем, Де́во Богоро́дице, напо́й,/ да Тя сла́влю во вся ве́ки.

Пе́снь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

По мно́гих труде́х и боле́знех безчи́сленных,/ по́тех же и ско́рбех вои́стинну,/ в приста́нищи почи́л еси́, Небе́сное нося́ бога́тство Боже́ственных доброде́телей,/ свяще́ннейше о́тче, преподо́бных удобре́ние.

Разсужде́ния свети́льник, чу́вствия престо́л,/ незло́бив, кро́ток, и ми́лостив, и благоуми́лен был еси́,/ рыда́яй же и омыва́я одр, я́коже рече́ Дави́д,/ с ни́мже вся, ве́рою чту́щия тя, помина́й.

Я́ко дневну́ю звезду́, я́ко Ду́ха храм,/ я́ко ши́пок благово́ния та́инственнаго, о́тче, сын испо́лнен,/ я́ко высокове́твенно дре́во, я́ко сла́вы ве́чныя о́бщника/ и я́ко му́дра святи́теля чтим тя, Иа́кове.

Сле́зныя пото́ки, в зе́млю се́рдца посыла́емы бога́тно,/ вои́стинну клас возрасти́ша зрел,/ ду́ши пита́ющ ве́рою чту́щия тя при́сно,/ святи́телю Богому́дре, о́тче наш Иа́кове.

Богоро́дичен: Пощади́ мя, Го́споди, пощади́, егда́ хо́щеши ми суди́ти,/ и не осуди́ мене́ во о́гнь, ни я́ростию Твое́ю обличи́ мене́, –/ мо́лит Тя Де́ва, ро́ждшая Тя, Христе́,/ А́нгел мно́жества и с преподо́бными му́ченики.

Преподо́бный Иа́ков, епи́скоп и испове́дник

Преподобный Иаков, епископ и исповедник с раннего возраста был увлечен высоким идеалом подвижнической жизни. Юношей оставил он мир и стал иноком Студийского монастыря. Эта прославленная обитель, из которой воссияло много святых подвижников, была в VIII–IX веках оплотом иконопочитания.

Сохранив душу «нескверной и неблазненной», «страсти воздержанием иссушив», кроткий, милостивый и братолюбивый инок, превосходно знавший Священное Писание, со временем был возведен на епископскую кафедру в городе Катаны в Сицилии.

Первым епископом, занимавшим эту кафедру, был святой Кирилл, ученик святого апостола Петра. Он превратил горькие воды источника в сладкие силою веры и молитвы и обратил этим чудом многих ко Христу. В глубокой старости почил святой епископ Катанский Кирилл (память 21 марта).

Святому Иакову Исповеднику, слово которого было «солию любве растворено», уготовал Господь в преклонных годах скорби и испытания. Во время царствования императора. иконоборца Константина V Копронима (741–745) святого Иакова принуждали к отказу от почитания святых икон. За непоколебимую преданность святой вере он был подвергнут многим мучениям. Его морили голодом и томили жаждой, истязали. Святой епископ Иаков скончался в изгнании и заточении. Позднейшее предание смешало святого епископа Иакова с блаженным Иаковом, учеником преподобного Феодора Студита, также пострадавшим за почитание святых икон, – однако блаженный Иаков епископом не был.

Преподо́бнаго Пахомия Нерехтскаго, игу́мена Сыпанова монастыря́ во И́мя Живонача́льныя Тро́ицы, Костромского чудотво́рца

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 4.

Подо́бен: Зва́нный свы́ше:

Егда́ восле́д Бо́га возгоре́ся ду́хом, преподо́бне,/ тогда́ воспали́ Боже́ственный о́гнь ду́шу твою́ взыска́ти Го́спода,/ па́че же, – реку́, – Госпо́дь тебе́ взыска́,/ и́же от ю́ности оста́вя мирско́е пребыва́ние,/ и восприя́ а́нгельский о́браз, и рабо́тая Го́сподеви/ во мно́зех труде́х, и по́двизех, и коленопреклоне́ниих, и в поще́ниих,/ Христа́ Бо́га моли́, блаже́нне Пахо́мие,/ спасти́ и просвети́ти души́ на́ша.

В ми́ре житие́ возненави́де,/ и тогда́ ми́ра красоты́ отве́ржеся, пребога́те,/ и восприя́ и́ноческий чин,/ и в живоно́сную ме́ртвость оде́яся,/ и, сокро́вище доброде́телей стяжа́в, пло́ть порабо́ти ду́ху,/ и бы́сть жи́тель пусты́нный,/ возрасти́л еси́ ве́лия кро́тости и смире́ния плоды́,/ Христа́ Бо́га моли́, преподо́бне Пахо́мие,/ спасти́ и просвети́ти ду́ши на́ша.

Жела́я улучи́ти Небе́сную добро́ту,/ земна́я вся оста́вил еси́,/ в вы́шних ум свой восприя́ благода́тию Боже́ственнаго Ду́ха,/ па́стырь и́стинен показа́ся,/ ве́тви смире́ния возрасти́л еси́/ и освяще́н дом Пресвята́го Ду́ха соде́я,/ ско́рбным путе́м и те́сным ше́ствоваше,/ сего́ ра́ди уго́дник Бо́жий све́тел ми́ру показа́ся./ Тем ны́не, пречи́стому Све́ту причаща́яся,/ не забу́ди ста́до твое́, преподо́бне,/ Христа́ Бо́га моли́, о́тче Пахо́мие,/ спасти́ и просвети́ти души́ на́ша.

Сла́ва, глас 6:

Богови́димаго в по́двизех восхва́лим пустыннолюби́теля,/ смире́ния рачи́теля и кро́тости учи́теля,/ церко́внаго строи́теля,/ и́же любве́ ра́ди Бо́жия мир оста́вльшаго/ и трудолю́бие поне́сшаго,/ благоче́стия подража́теля,/ Пахо́мия пе́ньми и пе́сньми почти́м,/ честну́ю и многоцеле́бную его́ ра́ку зря́ще,/ се бо вопию́т чудеса́ его́,/ мы же, обстоя́ще, любе́зно облобыза́ем, глаго́люще:/ ра́дуйся, пресла́вне о́тче Пахо́мие,/ с ра́достию от Ду́ха Свя́та Ца́рство Небе́сное пожа́л еси́/ и на подо́бствие, я́коже мо́щно, возше́л еси́./ И ны́не на Небесе́х чи́сте зри́ши Святу́ю Тро́ицу,/ испроси́ стране́ на́шей одоле́ние на сопоста́ты,/ и це́рквам благоле́пие,/ и душа́м на́шим ве́лию ми́лость.

И ны́не, Богоро́дичен: Кто Тебе́ не ублажи́т, Пресвята́я Де́во:

Вход, проки́мен дне, чте́ния 3 преподо́бническая (зри 17 марта).

На стихо́вне стихи́ры, глас 2.

Подо́бен: До́ме Евфра́фов:

К моще́м твои́м прибега́ем,/ свя́те Пахо́мие,/ исцели́ на́ша стра́сти,/ я́коже исцели́л еси́ разли́чныя мно́гая боле́зни.

Стих: Честна́ пред Го́сподем/ сме́рть преподо́бных Его́.

Что ти принесе́м, блаже́нне,/ за твоя́ е́же к нам щедро́ты?/ Но мо́лим тя, свя́те, всегда́ за ны моли́ся Христу́,/ тебе́ бо и́мамы хода́тая ко Христу́,/ испроси́ да́ти нам оставле́ние грехо́в.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Зерца́ло, и звезда́ Бо́жия,/ и моли́твенник ко Христу́/ за ны, гре́шныя,/ целу́ем мо́щи твоя́ честны́я,/ раби́ многогре́шнии.

Сла́ва, глас 8:

И́нок мно́жества,/ наста́вника тя чтим, о́тче наш Пахо́мие,/ тобо́ю бо пу́ть вои́стинну пра́вый ходи́ти позна́хом,/ блаже́н еси́, я́ко Христу́ рабо́тав,/ и вра́жию обличи́л еси́ си́лу,/ А́нгелом собесе́дниче, преподо́бным единокро́вне и пра́ведным,/ с ни́миже моли́ся Го́сподеви/ поми́ловатися душа́м на́шим.

И ны́не, Богоро́дичен: Безневе́стная Де́во: Тропа́рь, глас 4:

Жите́йских молв, преподо́бне, отве́ргся/ и, я́ко птищ обре́те себе́ в пусты́ни безмо́лвие,/ в моли́твах и бде́нии прилежа́ Бо́гови,/ преподо́бне о́тче Пахо́мие,/ и оста́ви дре́внее пребыва́ние,/ и оты́де в пусты́ню, и в ней водвори́ся,/ и соста́ви оби́тель во И́мя Пресвяты́я Тро́ицы,/ и процве́л еси́, а́ки фи́никс,/ и бы́сть о́браз утеше́ния духо́внаго./ Те́мже, преподо́бне Пахо́мие,/ моли́ Пресвяту́ю Тро́ицу спасти́ся душа́м на́шим.

НА У́ТРЕНИ

По 1-м стихосло́вии Седа́лен, глас 4:

Светоли́тием сия́я, я́ко заря́,/ просия́л еси́ в пусты́ни чудесы́ свои́ми, Пахо́мие,/ с ве́рою приходя́щим к тебе́.

Сла́ва, и ны́не, Богоро́дичен:

В кров Твой, Пречи́стая Де́во, прибега́ющих, моли́тву прие́мши от нас,/ не преста́й моля́щи Человеколю́бца спасти́ся рабо́м Твои́м.

По 2-м стихосло́вии седа́лен, глас 1:

Повеле́нием Бо́жиим до́йде в пусты́ню/ и оби́тель соста́ви на ме́сте, нарица́емом Сыпа́нове, во И́мя Пресвяты́я Тро́ицы,/ Е́йже предстои́ши, преподо́бне Пахо́мие,/ моли́ о спасе́нии душ на́ших.

Сла́ва, и ны́не, Богоро́дичен:

Упова́ние христиа́ном, Пречи́стая Де́во,/ Его́же родила́ еси́ па́че ума́, Сло́ва,/ непреста́нно моли́ с Вы́шними си́лами/ да́ти оставле́ние грехо́в всем и исправле́ние жития́,/ ве́рою и любо́вию при́сно Тя сла́вящим.

По полиеле́и седа́лен, глас 1:

Бо́гови примеси́ся, преподо́бне о́тче наш Пахо́мие,/ Госпо́дне дарова́ние улучи́л еси́,/ благода́тию Его́ мно́жество ополче́ния бесо́в отгна́л еси́,/ те́мже пресла́вно подвиза́ся непреста́нною свое́ю моли́твою ко Христу́ Бо́гу,/ и о нас, ча́дех свои́х, моли́, грехо́в оставле́ние дарова́ти нам.

Сла́ва, и ны́не, Богоро́дичен:

Светоно́сен Тя све́щник позна́хом, Деви́це,/ Боже́ственное сия́ние во утро́бе носи́вший,/ те́мже мо́лим Тя, Чи́стая,/ све́том Свои́м озари́ ду́ши пою́щих Тя.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче Пахо́мие,/ во всю зе́млю изы́де веща́ние исправле́ний твои́х,/ тем на Небесе́х обре́те мзду трудо́в свои́х,/ бесо́вская разори́л еси́ по́лчища/ и А́нгельския дости́гл еси́ чи́ны,/ и́хже житию́ без поро́ка поревнова́л еси́,/ дерзнове́ние име́я ко Го́споду,/ мир испроси́ душа́м на́шим.

Кано́н Богоро́дице со ирмосо́м на 6 и преподо́бному Пахо́мию на 8, глас 6.

Пе́снь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь/ пои́м, вопия́ше.

Наста́ви мя, Го́споди Бо́же мой,/ да возмогу́ благоче́стно уго́дника Твоего́, преподо́бнаго Пахо́мия,/ сла́вное и честно́е восхвали́ти торжество́.

Отве́рзи ми, Го́споди, ум мой и да́руй ми смысл,/ е́же хвале́ние принести́ Твоему́ уго́днику, преподо́бному Пахо́мию.

Живоно́сным ору́жием кре́стным прии́м на враги́ ополче́ние,/ озари́ ум мой, молю́ся,/ оби́льно всю зе́млю напая́я сло́вом уче́ния,/ а́ки прему́др чинонача́льник наш.

Богоро́дичен: Пресу́щное Сло́во существо́ прии́м,/ от чи́стых крове́й Твои́х богосоде́ла,/ нас нетле́ния изба́ви, Чи́стая,/ сего́ ра́ди Тя при́сно сла́вим.

Пе́снь 3

Ирмо́с: Не́сть свят,/ я́коже Ты, Го́споди, Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Боле́зньми свои́ми бразду́ душе́вную, му́дре Пахо́мие, до́бре соде́ла/ и клас безстра́стия чу́ден израсти́л еси́.

Кро́тостию смиря́шеся, молча́нием украша́шеся,/ ум всегда́ в вы́шних име́я,/ во пло́ти а́нгельски, о́тче, пожи́л еси́.

А́ще и в ми́ре су́щая, о́тче Пахо́мие, преоби́дел еси́,/ но та́мо преми́рная и нетле́нная стяжа́л еси́,/ иде́же глас пра́зднующих и ра́йское наслажде́ние.

Богоро́дичен: Спа́са Ро́ждшая, спаси́ мя,/ и́же в бу́ре всех сласте́й обурева́ема,/ Христа́, тишину́, моли́ о пою́щих Тя.

Седа́лен, глас 4:

Всено́щное стоя́ние и ва́ра дневна́го тяготу́ понесе́ и мно́гии труды́ показа́/ и сего́ ра́ди уго́дник бы́сть, блаже́нне Пахо́мие,/ моли́ спасти́ся душа́м на́шим.

Сла́ва, и ны́не, Богоро́дичен:

Чи́стая, Всенепоро́чная и Неискусобра́чная же,/ Еди́на Безле́тнаго Сы́на и Сло́ва Бо́жия в ле́та поро́ждши,/ Сего́ со святы́ми и честны́ми патриа́рхи, с ученики́, и проро́ки, и преподо́бными моли́/ дарова́ти нам очище́ние и ве́лию ми́лость.

Пе́снь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Егда́ прии́де в пусты́ню и еди́н с Бо́гом безмо́лвствуя,/ древие, возра́стшее от земли́, собесе́дники себе́ име́яше,/ до́ндеже снидо́шася к тебе́ бра́тия.

Христа́ Животво́рца оде́яся ме́ртвостию и стопа́м Его́ после́дуя,/ те́мже Ему́ предстоя́ и моли́твою благода́ть восприя́.

Зарю́ невече́рнюю вну́трь в се́рдцы прии́м,/ и от нея́ просия́л еси́, и всестра́стную мглу потреби́л еси́.

Богоро́дичен: Чистоте́ жили́ще, селе́ние Влады́ки всех/ и проро́ком всем сбытие́,/ Благодарова́нная Чи́стая, пою́щия Тя уще́дри.

Пе́снь 5

Ирмо́с: Бо́жиим све́том Твои́м, Бла́же,/ у́тренюющих Ти души́ любо́вию озари́, молю́ся,/ Тя ве́дети, Сло́ве Бо́жий,/ И́стиннаго Бо́га,/ от мра́ка грехо́внаго взыва́юща.

Егда́ в жи́зни сей бы́сть стро́ящий в пусты́ни оби́тель,/ Бог же ви́де твоя́ труды́ и дая́ше благода́ть,/ мно́зи лю́дие помога́ше ти.

Боже́ственным манове́нием, о́тче, плотско́е житие́ отри́нув,/ после́довал еси́ любо́вию зову́щему Христу́, преподо́бне Пахо́мие.

Преблаже́нне, Богоприя́тне о́тче наш Пахо́мие,/ непреста́нно ста́до твое́ вопие́т ти:/ моли́твами свои́ми ко Го́споду спаси́ нас, мо́лим тя.

Богоро́дичен: Ме́сто освяще́ния и мы́сленную трапе́зу, Чи́стая,/ Хлеб – Христа́ – Жи́знь всех прие́мшую, пое́м Тя.

Пе́снь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостива.

Ка́плями по́тов твои́х, преподо́бне, враго́в ополче́ния попра́л/ и дости́гл еси́ А́нгельский невеще́ственныя ли́ки.

Храм быв Трисо́лнечнаго Божества́,/ стра́шныя куми́ры потреби́л еси́, преподо́бне Пахо́мие,/ от ни́хже и нас изба́ви.

Терпе́ние и моли́тву стяжа́в, держа́вна смире́ния испо́лнь/ и тве́рдо любле́ние ко Христу́, о́тче, стяжа́л еси́.

Богоро́дичен: Богоро́дице, Ро́ждшая незаходи́мое Со́лнце,/ всего́ мя просвети́, омраче́ннаго страстьми́.

Конда́к, глас 4:

В пусты́ни безмо́лвствуя,/ еди́нствующу тя, Богоно́се, взыску́ющу ти Го́спода,/ Бо́гу же тебе́ не оста́вльшу еди́ному бы́ти в пусты́ни,/ и Того́ повеле́нием снидо́шася к тебе́ не́колико бра́тии,/ с ни́миже ти моля́щуся Го́сподеви,/ Тро́ице прече́стен храм воздви́же,/ в не́мже предстоя́ще, преподо́бне Пахо́мие,/ моли́ся о спасе́нии душ на́ших.

И́кос:

Пусты́нный граждани́н, о́тче, показа́ся,/ оста́вил оте́чество свое́ град Влади́мир и честну́ю оби́тель царя́ Константи́на/ и хожда́ше по страна́м мно́гим и по честны́м оби́телем/ и, Бо́гом наставля́емь, дои́де в пусты́ню и в ней селе́ние сотвори́./ Мы же к тебе́ сицева́я рцем:/ ра́дуйся, преподо́бне о́тче Пахо́мие,/ и́же в пусты́ни Тро́ице прече́стен храм созда́вый/ и в нем Бо́жие славосло́вие устро́и и о́бщее житие́ соста́ви;/ ра́дуйся, поуча́я ве́рныя ко спасе́нию;/ ра́дуйся, стра́нным корми́телю, па́че всего́ прилежа́вый о церко́вном строе́нии;/ ра́дуйся, распространи́вый пусты́ню и многочелове́чну устро́и ю;/ ра́дуйся, устро́ивый общежи́тельный монасты́рь, нарица́емый на Сыпа́нове;/ ра́дуйся, я́ко Бог тебе́ показа́ наста́вника о́бласти гра́да Костромы́;/ ра́дуйся, я́ко вели́кий град Кострома́ тобо́ю хва́лится,/ име́я мо́щи твоя́ во о́бласти свое́й;/ ра́дуйся, я́ко нарица́емому ме́сту Не́рехте хвала́ и утвержде́ние;/ ра́дуйся, преподо́бне Пахо́мие, моли́ся о спасе́нии душ на́ших.

Пе́снь 7

Ирмо́с: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Умертви́ пло́ти свое́й мудрова́ние, Богоно́се,/ и де́йством Свята́го Ду́ха, Пахо́мие, отце́м собесе́дник яви́ся/ и непреста́нно вопие́ши:/ благослове́н Бог оте́ц на́ших.

Яви́лся еси́ отгони́тель духово́м нечи́стым,/ Боже́ственнаго Ду́ха селе́ние чи́сто был еси́, взыва́ше:/ благослове́н Бог оте́ц на́ших.

Хва́лится, преподо́бне, град твой,/ я́ко во о́бласти его́ сокрове́нны бы́ста мо́щи твоя́/ и я́ко добра́ граждани́на от Бо́га прия́л е́сть.

Богоро́дичен: Спаси́ мя, Ма́ти Спа́сова, содержи́ма глубино́ю согреше́ний,/ да Твое́ заступле́ние велича́ем, Чи́стая,/ и Сы́на Твоего́, Христа́, Бо́га на́шего:/ благослове́н Бог оте́ц на́ших.

Пе́снь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Ви́де у́бо преподо́бный оби́тель устро́ену,/ и яви́ся ле́пота церко́вная соста́влена,/ и па́ки от земли́ к Небе́сным взы́ти тща́ся и всех пе́ти науча́я:/ Го́спода по́йте и превозноси́те Его́ во ве́ки.

По успе́нии твое́м не́кий брат бори́м бы́сть по́мыслом душевре́дным,/ и́же пло́ть на дух вою́ет,/ ты же явле́нием свои́м сего́ исцели́, Христо́ви вопия́:/ Го́спода по́йте и превозноси́те Его́ во ве́ки.

Блаже́нне Богогла́се, прово́диши пою́щия тя ко Христу́/ очище́ны от тиме́ния стра́стнаго моли́твами твои́ми,/ вопию́щих, Пахо́мие, и глаго́лющих:/ благослове́н Бог оте́ц на́ших.

Богоро́дичен: Ты Ада́ма, Де́во, па́дшаго Дщи яви́ся,/ Бо́жия же Ма́ти, обнови́вшаго мое́ существо́,/ Его́же пое́м и превозно́сим во ве́ки.

Пе́снь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти:/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Сла́ву Вседержи́теля жела́я ви́дети,/ обнови́л еси́ души́ кре́пость и сла́вою обогати́ся Небе́сною.

Честно́е украше́ние благода́ти, о́тче преподо́бне Пахо́мие,/ испроси́ свяще́нником на́шим,/ во́ином во бране́х кре́пость и здра́вие телесе́м,/ я́ко да непреста́нно тя велича́ем.

Пра́веден и непоро́чен, о́тче, был еси́,/ Бо́гови послужи́л еси́ в преподо́бии,/ те́мже почи́ла е́сть Тро́ица в се́рдце твое́м,/ Ея́же ны́не наслажда́ешися, досточу́дне.

Богоро́дичен: Тя дре́вле Авваку́м прови́де го́ру несеко́мую,/ из Нея́же Бог яви́ся,/ истле́вшия ны обнови́ла е́сть.

Свети́лен:

Устро́ивый оби́тель и созда́ хра́мы Бо́жия/ и собра́вый и́нок мно́жества,/ в моли́твах прилежа́ Го́сподеви/ и ны́не, со дерзнове́нием предстоя́ Христо́ви,/ моли́ся о ста́де свое́м, Пахо́мие, о́тче наш.

Богоро́дичен:

Еди́н Чи́стый, Еди́н Госпо́дь Тя Еди́ну избра́,/ Чисте́йшу всея́ тва́ри, Пренепоро́чная,/ от чи́стых крове́й Твои́х воплоти́ся.

На хвали́тех стихи́ры, глас 8. Самогла́сны:

Боже́ственною си́лою оде́явся,/ умертви́л еси́ себе́ ми́рови/ и, житие́ непоро́чно пожи́в, пресла́вне,/ единожи́тель святи́телю Алекси́ю,/ Боже́ственному митрополи́ту, был еси́.

По́двиг трудо́в твои́х/ чистоты́ сосу́д показа́ся,/ и Бо́жиим повеле́нием исцеле́ние челове́ком да́руеши,/ по́стником удобре́ние, и́нокующим похвала́,/ Пахо́мие, преподо́бне о́тче наш.

Сла́ва, глас 6:

Преподо́бне о́тче Пахо́мие,/ во всю зе́млю изы́де веща́ние исправле́ний твои́х,/ тем на Небесе́х обре́те мзду трудо́в свои́х,/ бесо́вская разори́л еси́ по́лчища/ и А́нгельския дости́гл еси́ чи́ны,/ и́хже житию́ без поро́ка поревнова́л еси́,/ дерзнове́ние име́я ко Го́споду,/ мир испроси́ душа́м на́шим.

И ны́не: Богоро́дице, Ты еси́ лоза́ и́стинная:

Славосло́вие вели́кое и отпу́ст.

НА ЛИТУРГИ́ И СЛУ́ ЖБА ПРЕПОДО́ БНИЧЕСКАЯ

Преподо́бный Пахо́мий Нерехтский

Преподобный Пахомий Нерехтский в миру Иаков, мродился во Владимире-на-Клязьме в середине XIV века в семье священника Никольской церкви Игнатия. С детства отец приучил его к послушанию, сам обучил грамоте и Закону Божию. Уроки родителя запали в душу ребенка: он сделался мальчиком благонравным, отличался усердием ко храму Божию. Особенно он любил ходить в обитель Рождества Богородицы, где в то время почивали мощи святого князя Александра Невского. После смерти отца 12-летним отроком Иаков, получив благословение матери, принял постриг в Рождественской обители с именем Пахомий. Для руководства в духовной жизни настоятель обители отдал Пахомия под присмотр опытного старца. Вскоре ему дано было нелегкое послушание– выпекать хлеб и готовить на монастырской кухне. Много лет провел он в этом многотрудном занятии – днем работал в пекарне, а ночь проводил на молитве. Смирение и кротость преподобного Пахомия обратили на себя внимание настоятеля, который просил святого Алексия, епископа Владимирского (в последствии Митрополит Московский), посвятить молодого инока во диакона. В сане диакона преподобный Пахомий служил в обители Рождества Пресвятой Богородицы до 1360 года. В том году Святитель Алексий, ставший уже Митрополитом Московским и всея Руси, устроил в 15-ти верстах от г. Владимира монастырь во имя святых благоверных царей Константина и Елены и прибыл туда для освящения обители. Святитель Алексий посвятил преподобного Пахомия во игумена новоустроенного монастыря. Стремясь к мирному уединению, преподобный Пахомий вскоре покинул монастырь. Странствуя по Владимирской земле, он пришел к устью речки Гридевки, сливающейся с рекою Солоницею, в 2-х верстах от города Нерехты. Сыпаново – как исстари называлась эта местность – было покрыто густым лесом и очень понравилось преподобному.

Желая тут остаться, он пошел в Нерехту просить у жителей разрешения поселиться на их земле. Жители города очень радушно приняли преподобного Пахомия и оказали ему содействие в устройстве новой обители. Преподобный собрал достаточно средств для сооружения церкви и с одним из своих постриженников отправился в Москву за благословением святителя Алексия воздвигнуть церковь в честь Живоначальной Троицы. Получив благословение, с радостью принялся он за святое дело, приходя на работу раньше других и уходя после всех. После построения церкви преподобный Пахомий вскоре возвел несколько братских келлий и на восток от Сыпанова соорудил странноприимный дом. Трудясь таким образом, преподобный расширил обитель и ввел в ней строгий общежительный устав.

Достигнув глубокой старости, преподобный Пахомий почувствовал скорое приближение смерти. В последний раз он созвал своих учеников и преподал им отеческое назидание. «Братие, – говорил он,– терпите беды и скорби, да на сем месте обрящете благодать от Бога». Когда преподобный сказал братии, что ныне отходит от них и поэтому им нужно избрать себе пастыря, они стали упрашивать, чтобы он сам назначил своего преемника. Преподобный Пахомий выбрал Феодора, с которым он был пострижен в Рождественском монастыре и с которым жил некоторое время в Цареконстантиновской обители. «Господи, в руце Твои предаю дух мой!» – последние слова преподобного Пахомия. Блаженная кончина его наступила в княжение Димитрия Иоанновича Донского 21 марта 1384 года. Ученики при многолюдном стечении народа погребли преподобного в созданной им обители, близ алтаря, по правую сторону Троицкой церкви. На следующий год над его гробом поставили гробницу, а один из учеников преподобного Пахомия, Иринарх, написал икону, которую и установили тогда же в храме. Весной 1675 года, при игумене Харалампии, начали в Сыпановской обители строить новую соборную каменную церковь. Во время рытья бута под алтарь той церкви, 6 мая 1675 года нашли тело преподобного Пахомия нетленным. В 1764 году Сыпановская обитель была закрыта и обращена в приходскую церковь.

Память преподобного совершается 21 марта (в некоторых месяцесловах указано 23 марта), а также 15 мая, в день тезоименитства святого.


Источник: Минея - М. : Издательский Совет Русской Православной Церкви, 2002-. 12 том. / Минея март. - 2002. / Ч. 1. – 424; Ч. 2. - 400 с.

Комментарии для сайта Cackle