Мѣ́сѧца тогѡ́же въ з҃і-й де́нь. Ст҃а́гѡ великомч҃ника ѳео́дѡра тѵ́рѡна.
И҆ сщ҃енномꙋ́ченика є҆рмоге́на патрїа́рха моско́вскагѡ.
Слꙋ́жба є҆гѡ̀ пи́сана въ приложе́нїи.
На Гдⷭ҇и, воззва́хъ, стїхи̑ры на ѕ҃, гла́съ в҃. Подо́бенъ: Є҆гда̀ ѿ дре́ва:
Да́ръ хрⷭ҇то́съ богатотво́ренъ тѧ̀ вселе́ннѣй подадѐ, ꙗ҆́кѡ благодѣ́тель бг҃ъ, да́ръ тво́й честнꙋ́ю кро́вь, ѳео́дѡре, тогѡ̀ ра́ди и҆злїѧ́ннꙋю, и҆ бг҃оче́стїѧ ре́вностїю приноси́мꙋю є҆мꙋ̀ прїе́мъ. є҆мꙋ́же ны́нѣ благоче́стнымъ дерзнове́нїемъ, мч҃ниче, предстоѧ̀, всѧ̑, и҆̀же къ тебѣ̀ притека́ющыѧ, спаса́й. (с. 306)
Сто́лпъ є҆сѝ тве́рдъ, сопроти́вныхъ нашє́ствїѧ ѿрѣва́ѧ, побо́рникъ непобѣди́мь хва́лѧщымъ тѧ̀, скорѣ́йшее застꙋпле́нїе, те́плое предста́тельство, тща́тельное и҆збавле́нїе, ѻ҆́бщаѧ по́мощь, моли́твенникъ си́льнѣйшїй, блаже́нне, и҆зба́витель гото́вѣйшїй всѣ̑мъ вѣ́рнѡ молѧ́щымъ тѧ̀, ѳео́дѡре.
И҆мѣ́ѧ пото́къ сла́дости, и҆ ѡ҆ставле́нїѧ во́дꙋ, хрⷭ҇та̀ бл҃гопремѣни́телѧ, свидѣ́тель и҆́стиннѣйшїй тогѡ̀ бы́въ, пото́кѡвъ и҆зба́ви мѧ̀ грѣхо́вныхъ, во́дꙋ мѝ ᲂу҆ти́ши непостоѧ́ннꙋю, ᲂу҆ста́ви напа́стей бꙋ̑ри, ᲂу҆пра́ви къ вы́шнѣй тишинѣ̀, достоблаже́нне ѳео́дѡре.
И҆́ны стїхи̑ры, гла́съ д҃. Подо́бенъ: Ꙗ҆́кѡ до́блѧ:
Ре́вностїю бжⷭ҇твенною дви́жимь, ꙳ и҆ дꙋше́ю распалѧ́емь, ꙳ любо́вїю, сла́вне, сп҃са хрⷭ҇та̀, ꙳ съ хра́момъ попали́лъ є҆сѝ ꙳ боги́ню лжеиме́ннꙋю, ꙳ влⷣки и҆ бг҃а возвѣща́ѧ и҆́мѧ, ꙳ и҆ посрами́лъ є҆сѝ мꙋчи́телей шата̑нїѧ, страстоте́рпче, ꙳ и҆ ра́дости вѣ́чнѣй ꙳ сподо́билсѧ є҆сѝ, ѳео́дѡре.
На высотꙋ̀, ѳео́дѡре, ꙳ хрⷭ҇то́ва разꙋмѣ́нїѧ возше́дъ, ꙳ прете́клъ є҆сѝ ви̑димаѧ, ꙳ и҆ сегѡ̀ то́кмѡ взыска́лъ є҆сѝ, ꙳ и҆ ѡ҆брѣ́тъ, возлюби́лъ є҆сѝ, ꙳ и҆ до́блественною дꙋше́ю тогѡ̀ ра́ди пострада́лъ є҆сѝ. ꙳ є҆го́же молѝ, ѿ тлѝ и҆ бѣ́дъ и҆зба́витисѧ, ꙳ вѣ́рою творѧ́щымъ ꙳ пресла́внꙋю па́мѧть твою̀.
Бг҃одарова́нною си́лою, ꙳ страстоте́рпче ѳео́дѡре, ꙳ и҆ подви́жными ра́нами ѡ҆бложе́нъ, ꙳ цр҃ю̀ всеѧ̀ тва́ри предста́лъ є҆сѝ хрⷭ҇тꙋ̀ бг҃ꙋ, ꙳ вѣнцы̀ ѿ негѡ̀ по́чести прїе́млѧ: ꙳ є҆го́же молѝ, ꙳ ѿ тлѝ и҆ бѣ́дъ и҆зба́витисѧ, ꙳ вѣ́рою творѧ́щымъ ꙳ пресла́внꙋю па́мѧть твою̀.
Сла́ва, гла́съ ѕ҃. Самогла́сенъ:
Свѧще́нїѧ да́ръ, и҆ бога́тство бжⷭ҇твенныѧ жи́зни ꙗ҆ви́лсѧ є҆сѝ мі́рꙋ, ѳео́дѡре: хрⷭ҇то́съ бо твою̀, мꙋ́дре, па́мѧть (с. 307) просла́ви, въ не́йже согла́снѡ вѣ́рнїи ра́дꙋющесѧ пое́мъ по́двиги болѣ́зней твои́хъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Всѐ ѿло́жше:
Ѻ҆рꙋ́жїе, ꙗ҆́коже речѐ сѷмеѡ́нъ, ꙳ се́рдце твоѐ про́йде, ꙳ пречⷭ҇таѧ влⷣчце, ꙳ є҆гда̀ ᲂу҆зрѣ́ла є҆сѝ и҆зъ тебє̀ возсїѧ́вшаго, ꙳ неизрече́ннымъ сло́вомъ, ѿ беззако́нныхъ ꙗ҆́кѡ ѡ҆сꙋжде́на возноси́ма на крⷭ҇тъ, ꙳ ѻ҆́цтомъ и҆ же́лчїю напаѧ́емаго, ꙳ рє́бра же пробода́єма, ꙳ и҆ рꙋ́цѣ и҆ но́зѣ пригвожда́ємы, ꙳ и҆ рыда́ющи восклица́ла є҆сѝ, ꙳ мт҃рски вопїю́щи: ꙳ что̀ сїѐ, ча́до сладча́йшее, но́вое та́инство;
На стїхо́внѣ ѻ҆ктѡ́иха. Сла́ва, гла́съ и҃. Самогла́сенъ:
Страда́льческимъ мꙋ́жествомъ благоче́стнѡ воѡрꙋжи́всѧ, страстоте́рпче хрⷭ҇то́въ, и҆ слове́снѣй слꙋ́жбѣ та́йнѡ спобора́ѧ си́лою є҆гѡ̀, і҆́дѡльское ѕлоче́стїе, и҆ мꙋчи́тельское преще́нїе не́мощно показа́лъ є҆сѝ, неради́въ ѡ҆ мꙋ́кахъ и҆ вре́меннѣмъ ѻ҆гнѝ. но, ѽ бжⷭ҇твенныхъ дарѡ́въ! и҆ ве́щь, и҆ и҆́мѧ, ѿ всѧ́кагѡ ѡ҆бстоѧ́нїѧ, моли́твою твое́ю спаса́й соверша́ющыѧ па́мѧть твою̀.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Ѽ пресла́внагѡ чꙋдесѐ!
Ю҆́ница нескве́рнаѧ, ꙳ ю҆нца̀ ви́дѧщи на дре́вѣ ꙳ пригвожда́ема во́лею, ꙳ рыда́ющи жа́лостнѣ, ꙳ ᲂу҆вы̀ мнѣ̀, вопїѧ́ше, люби́мѣйшее ча́до, ꙳ что́ ти со́нмъ воздадѐ ꙳ безблагода́тный є҆вре́йскїй, ꙳ хотѧ́ мѧ ѡ҆безча́дствовати ꙳ ѿ тебє̀, вселюбе́зне.
Тропа́рь, гла́съ в҃:
Ве́лїѧ вѣ́ры и҆справлє́нїѧ, во и҆сто́чницѣ пла́мене, ꙗ҆́кѡ на водѣ̀ ᲂу҆покое́нїѧ, ст҃ы́й мч҃никъ ѳео́дѡръ ра́довашесѧ: ѻ҆гне́мъ бо всесожже́гсѧ, ꙗ҆́кѡ хлѣ́бъ сла́дкїй трⷪ҇цѣ принесе́сѧ. тогѡ̀ моли́твами, хрⷭ҇тѐ бж҃е, спасѝ дꙋ́шы на́шѧ. (с. 308)
На ᲂу҆́трени ѻ҆́ба канѡ́на ѻ҆ктѡ́иха: и҆ ст҃а́гѡ на ѕ҃. Канѡ́нъ, є҆гѡ́же краегране́сїе: Призыва́ющыѧ тѧ̀ спаса́й, всеблаже́нне.
Гла́съ и҃. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Бжⷭ҇твеннымъ по́двигомъ, мч҃ниче хрⷭ҇то́въ, подви́гсѧ, и҆ тече́нїе сконча́въ, вѣ́рꙋ соблю́лъ є҆сѝ бжⷭ҇твеннꙋю, пра́вды ѡ҆брѣ́лъ є҆сѝ вѣне́цъ.
Преесте́ственнꙋ сла́вꙋ ѿ хрⷭ҇та̀ прїи́мъ, страстоте́рпче, зе́млю всю̀ ѡ҆бхо́диши, и҆збавлѧ́ѧ всѧ̑, вѣ́рою съ благоговѣ́нїемъ къ тебѣ̀ притека́ющыѧ.
Нбⷭ҇ный сла́вне лико́вникъ, со безпло́тными сы́й, на землѝ призыва́ющыѧ тѧ̀ ѿ бѣ́дъ и҆ напа́стей и҆збавлѧ́й.
Бг҃оро́диченъ:
Премꙋ́дрость и҆ сло́во ѻ҆́ч҃ее несказа́ннѡ ро́ждшаѧ, дꙋшѝ моеѧ̀ лю́тꙋю и҆сцѣлѝ ꙗ҆́звꙋ, и҆ се́рдца болѣ́знь ᲂу҆кротѝ.
Пѣ́снь г҃. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Ѻ҆́гнь мꙋче́нїй тѧ̀ не ᲂу҆страшѝ, тѣ́мже ѻ҆́гнь напа́стей, къ тебѣ̀ прибѣга́ющымъ, ᲂу҆тиша́еши, ѳео́дѡре.
И҆зба́ви моли́твами твои́ми ѡ҆держа́щїѧ мѧ̀ печа́ли, мꙋ́чениче хрⷭ҇то́въ, всѐ ᲂу҆глажда́ѧ жите́йское стропо́тство.
Всѐ се́рдце моѐ и҆ помышле́нїе простира́ю къ тебѣ̀ и҆ дꙋ́шꙋ, твоеѧ̀, страстоте́рпче, по́мощи тре́бꙋѧ.
Бг҃оро́диченъ:
Оу҆ста́ви непостоѧ́нное помышле́нїй мои́хъ смꙋще́нїе, мт҃и бж҃їѧ, є҆́же къ сн҃ꙋ твоемꙋ̀ направлѧ́ющи движе́нїе.
Сѣда́ленъ, гла́съ д҃. Подо́бенъ: Вознесы́йсѧ:
Мꙋ́ченическими добро́тами ᲂу҆кра́шенъ, цр҃ю̀ нбⷭ҇номꙋ, (с. 309) мꙋ́чениче, ра́дꙋѧсѧ, вѣнцено́сецъ предстои́ши, ѳео́дѡре, на крⷭ҇тъ бо воздви́женъ бы́лъ є҆сѝ є҆гѡ̀ ра́ди, и҆ гвозде́й пригвожде́нїе, и҆ воло́выхъ жи́лъ, и҆ ногте́й, и҆ ѻ҆чны́хъ зѣ́ницъ и҆звертѣ́нїе претерпѣ́лъ є҆сѝ тве́рдѡ. тѣ́мже тѧ̀ вѣ́рою почита́емъ, превели́кїй.
Два́жды.
Сла́ва, и҆ ны́нѣ, бг҃оро́диченъ. Подо́бенъ:
И҆́же на прⷭ҇то́лѣ херꙋві́мстѣмъ сѣдѧ́й, и҆ въ нѣ́дрѣхъ ѻ҆́ч҃ихъ водворѧ́ѧсѧ, ꙗ҆́кѡ на прⷭ҇то́лѣ ст҃ѣ́мъ сѣди́тъ свое́мъ, влⷣчце, въ нѣ́дрѣхъ твои́хъ, вопло́щсѧ бо бг҃ъ вои́стиннꙋ, воцр҃и́сѧ надъ всѣ́ми ꙗ҆зы́ки, и҆ разꙋ́мнѡ ны́нѣ пои́мъ є҆мꙋ̀. є҆го́же ᲂу҆молѝ спасти́сѧ рабѡ́мъ твои̑мъ.
Крⷭ҇тобг҃оро́диченъ:
И҆́же ѿ безнача́льнагѡ ѻ҆ц҃а̀ рожде́ннаго, напослѣ́докъ тѧ̀ пло́тїю ро́ждшаѧ, на крⷭ҇тѣ̀ ви́сѧща зрѧ́щи, хрⷭ҇тѐ, ᲂу҆вы̀ мнѣ̀, любе́знѣйшїй і҆и҃се, вопїѧ́ше: ка́кѡ сла́вимый ꙗ҆́кѡ бг҃ъ ѿ а҆́гг҃лъ, ѿ беззако́нныхъ ны́нѣ человѣ̑къ, сн҃е, хотѧ̀ распина́ешисѧ; пою́ тѧ, долготерпѣли́ве.
Пѣ́снь д҃. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.
Прави́телѧ тѧ̀ предлага́ю, бж҃їй ᲂу҆го́дниче, ты́ мѧ ᲂу҆пра́ви вѣ́триломъ дх҃а? и҆ бжⷭ҇твенными вѣ́тры, пресла́вне.
Ѿ всѧ́кагѡ, мо́лимсѧ, и҆зба́ви преще́нїѧ, всеблаже́нне ѳео́дѡре, тѧ̀ вѣ́рою блажа́щыѧ, и҆ бжⷭ҇твеннꙋю па́мѧть твою̀ почита́ющыѧ.
Ни живо́тъ, ни сме́рть, ни настоѧ̑щаѧ, ни грѧдꙋ̑щаѧ, ни ѻ҆́гнь, ни ра̑ны, ѿ хрⷭ҇та̀, бг҃омꙋ́дре, ѿлꙋчи́ша тебѐ.
Бг҃оро́диченъ:
Подъ лѣ́томъ бы́вша, ѿ ѻ҆ц҃а̀ безлѣ́тнѡ возсїѧ́вшаго, бг҃ома́ти, на́мъ родила̀ є҆сѝ: є҆го́же молѝ спастѝ пою́щыѧ тѧ̀. (с. 310)
Пѣ́снь є҃. І҆рмо́съ:
Оу҆́тренююще вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀, и҆но́гѡ не вѣ́мы.
Мч҃никѡвъ бы́въ ᲂу҆добре́нїе, мч҃ниче хрⷭ҇то́въ, вѣ́рныхъ по́мощь бꙋ́ди, и҆ стѣна̀ нерꙋши́ма.
Є҆дине́нїѧ насла́ждсѧ лꙋ́чшагѡ, и҆̀же па́че ᲂу҆ма̀ благи́хъ, ѳео́дѡре, тѧ̀ чтꙋ́щыѧ спасѝ.
Побѣжда́емь любо́вїю зижди́телѧ, житє́йскаѧ ѿтрѧ́слъ є҆сѝ пристра̑стїѧ, и҆ бг҃ꙋ благоꙋгоди́лъ є҆сѝ.
Бг҃оро́диченъ:
Є҆го́же родила̀ є҆сѝ, дв҃о всенепоро́чнаѧ, бг҃а сло́ва, прилѣ́жнѡ молѝ ѡ҆ на́съ пою́щихъ тѧ̀.
Пѣ́снь ѕ҃. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Побо́рникъ сы́й благоче́стїѧ теплѣ́йшїй, и҆ пре́лести ѡ҆бличи́тель і҆́дѡльскїѧ бы́въ, де́мѡнѡвъ мечта̑нїѧ, и҆ страсте́й ѻ҆́бразы дꙋшѝ моеѧ̀ потребѝ.
Оу҆твержде́нїе мѝ бꙋ́ди и҆ стѣна̀, мч҃ниче, непобѣди́ма, не́мощь и҆ гни́лость ᲂу҆ма̀ моегѡ̀ ᲂу҆твержда́ѧ, ѳео́дѡре, твои́ми предста́тельствы, и҆ сохранѧ́ѧ невре́днѡ.
Во́инства тлетво́рнагѡ и҆ тлѣ́ннагѡ ѿре́клсѧ є҆сѝ, во́инство же жи́зни, всеблаже́нне ѳео́дѡре, до конца̀ возлюби́лъ є҆сѝ, въ не́мже побѣдоно́сецъ показа́лсѧ є҆сѝ, досточꙋ́дне.
Бг҃оро́диченъ:
Возсїѧ̀ ѿ сїѡ́на вы́шнѧгѡ благолѣ́пїе, прїѧ́тїемъ пло́ти по соедине́нїю неизглаго́ланномꙋ, и҆зъ тебє̀, неискꙋсобра́чнаѧ, ѡ҆дѣ́ѧвсѧ, и҆ мі́ръ просвѣтѝ.
Конда́къ, гла́съ и҃:
Вѣ́рꙋ хрⷭ҇то́вꙋ, ꙗ҆́кѡ щи́тъ, внꙋ́трь прїи́мъ въ се́рдцѣ (с. 311) твое́мъ, проти̑вныѧ си̑лы попра́лъ є҆сѝ, многострада́льче: и҆ вѣнце́мъ нбⷭ҇нымъ вѣнча́лсѧ є҆сѝ вѣ́чнѡ, ѳео́дѡре, ꙗ҆́кѡ непобѣди́мый.
І҆́косъ:
На престо́лѣ свѣ́та носи́маго, благода́рственнѡ вѣ́рою воспѣва́емъ тѧ̀: ꙗ҆́кѡ дарова́нїе бжⷭ҇твенное дарова́лъ є҆сѝ, до́блѧго во страда́нїи ѳео́дѡра, въ житїѝ треблаже́ннаго, ꙗ҆́кѡ побо́рника сꙋ́щаго и҆́стины, благочести́вымъ по́мысломъ тѧ̀ жела́юща, хрⷭ҇тѐ, крѣ́пка побѣди́телѧ на льсти́ваго, ꙗ҆́кѡ непобѣди́мый.
Пѣ́снь з҃. І҆рмо́съ:
Ѿ і҆ꙋде́и доше́дше ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, благослове́нъ є҆сѝ.
Тѧ̀ живота̀ моегѡ̀ предста́телѧ, и҆ застꙋ́пника и҆́мамъ спасе́нїѧ моегѡ̀, и҆ храни́телѧ, бг҃омꙋ́дре, ᲂу҆твержде́нїе даю́ща вѣ́рою зовꙋ́щымъ: ѻ҆тє́цъ на́шихъ бж҃е, бл҃гослове́нъ є҆сѝ.
Ꙗ҆́кѡ красно̀ заколе́нїе, са́мъ себѐ гдⷭ҇еви, и҆ свѧще́ннѣйшее приве́лъ є҆сѝ, всеблаже́нне: и҆ ѻ҆гне́мъ мꙋче́нїй всесоже́глсѧ є҆сѝ, сла́вне, вопїѧ̀: ѻ҆тє́цъ на́шихъ бж҃е, бл҃гослове́нъ є҆сѝ.
Живо́тнагѡ вдохнове́нїѧ насыща́ѧсѧ, блаже́нне, бжⷭ҇твеннагѡ дх҃а, дꙋ́хи ѿгонѧ́еши, недꙋ́ги и҆сцѣлѧ́еши, и҆ зове́ши ра́дꙋѧсѧ: ѻ҆тє́цъ на́шихъ бж҃е, бл҃гослове́нъ є҆сѝ.
Бг҃оро́диченъ:
И҆зъ ᲂу҆тро́бы твоеѧ̀ про́йде, вопло́щсѧ всѧ́ческихъ, дв҃о, гдⷭ҇ь. тѣ́мъ тѧ̀ бцⷣꙋ мꙋ́дрствꙋюще правосла́внѡ, сн҃ꙋ твоемꙋ̀ взыва́емъ: ѻ҆тє́цъ на́шихъ бж҃е, бл҃гослове́нъ є҆сѝ.
Пѣ́снь и҃. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки. (с. 312)
Всѧ́ческими, прехва́льне, треволнє́нїи ѻ҆крꙋжа́еми, и҆ напа́стьми жите́йскими содержи́ми, предста́телѧ скорѣ́йша, и҆ помо́щника, и҆ спобо́рника, всѝ вѣ́рнїи тѧ̀ моли́твенника влⷣцѣ приво́димъ, вопїю́ще: не преста́й моли́ти ѡ҆ воспѣва́ющихъ всечестнꙋ́ю твою̀ па́мѧть.
Грѣхо́вными вери́гами свѧ́занъ, пребога́те, и҆ прегрѣше́нїй мои́хъ плени́цами ѡ҆ко́ванъ, прибѣга́ю къ покро́вꙋ твоемꙋ̀, вѣнцено́сче, разрѣше́нїе просѧ̀: но ꙗ҆́кѡ чꙋ́дно ко влⷣцѣ всѣ́хъ, бг҃омꙋ́дре, дерзнове́нїе и҆мѣ́ѧ, молѝ спасти́сѧ хрⷭ҇та̀ пою́щымъ во вѣ́ки всѧ̑.
Мꙋ́ченическими свѣтлостьмѝ просвѣще́нъ, всехва́льне, а҆́гг҃льскимъ счисли́лсѧ є҆сѝ чинѡ́мъ: съ ни́миже ра́дꙋѧсѧ, и҆ сликꙋ́ѧ, мч҃ниче, при́снѡ, чꙋдотво́рными и҆сцѣлє́нїи ᲂу҆ѧснѧ́еши, любо́вїю тѧ̀ чтꙋ́щыѧ, и҆ вѣ́рнѡ пою́щыѧ: лю́дїе, превозноси́те хрⷭ҇та̀ во вѣ́ки всѧ̑.
Бг҃оро́диченъ:
Пло́тїю приѡбщи́сѧ къ человѣ́кѡмъ, ꙗ҆́кѡ бл҃гоꙋтро́бенъ, содѣ́тель и҆ творе́цъ тва́ри, и҆зъ тебє̀, неискꙋсобра́чнаѧ бг҃ороди́тельнице, сїю̀ прїе́мъ: тѣ́мже бцⷣꙋ вѣ́рнїи тѧ̀ и҆́стиннѡ сла́вимъ, вопїю́ще, и҆ вѣ́рнѡ пою́ще: лю́дїе, превозноси́те хрⷭ҇та̀ во вѣ́ки всѧ̑.
Пѣ́снь ѳ҃. І҆рмо́съ:
Тѧ̀ неискꙋсобра́чнꙋю мт҃рь бг҃а вы́шнѧгѡ, тѧ̀ па́че ᲂу҆ма̀ ро́ждшꙋю сло́вомъ вои́стиннꙋ бг҃а, вы́шшꙋю пречⷭ҇тыхъ си́лъ, немо́лчными славословлє́нїи велича́емъ.
Бо́дра тѧ̀ храни́телѧ, великомꙋ́чениче, стѧжа́вше, врагѡ́въ ѕлоꙋ́мїе ᲂу҆до́бь ѿгонѧ́ща, и҆ цр҃квамъ подаю́ща ми́ръ, страстоте́рпче, непреста́ннѡ ᲂу҆блажа́емъ.
Крѣ́пость тебѣ̀ на де́мѡны дарова̀ влⷣка, стра̑сти же дꙋшѝ и҆ тѣлесѐ и҆сцѣлѧ́ти, бл҃же́нне, всеблагочести́вѣйшимъ дерзнове́нїемъ, молѧ́сѧ сп҃сꙋ: тѣ́мже тѧ̀ всѝ ᲂу҆блажа́емъ.
Зарю̀ трисо́лнечнꙋю и҆ є҆ди́нственнꙋю созерца́ѧй, є҆ди́но (с. 313) въ тре́хъ бж҃ество̀, и҆ нача́ло пренача́льное, и҆ и҆сто́чникъ бла́гости, страстоте́рпче, тѧ̀ пою́щыѧ сохранѧ́й.
Бг҃оро́диченъ:
И҆зми́ мѧ, всенепоро́чнаѧ, мы́сленнагѡ плѣне́нїѧ, и҆збавле́нїе воздаю́щи, влⷣчце, сн҃а твоегѡ̀ распѧ́тїе, є҆́же за всѣ́хъ бы́вшее и҆збавле́нїе, и҆ ми́ръ, и҆ спасе́нїе пою́щымъ тѧ̀.
Свѣти́ленъ. Подо́бенъ: Нб҃о ѕвѣзда́ми:
И҆скꙋси́всѧ ꙗ҆́коже зла́то ѻ҆гне́мъ и҆ мꙋ́ками, досто́инъ ꙗ҆ви́лсѧ є҆сѝ да́ръ бг҃а вы́шнѧгѡ, ѳео́дѡре страстоте́рпче, ѡ҆ на́съ ны́нѣ моли́сѧ.
Сла́ва, и҆ ны́нѣ, бг҃оро́диченъ:
Держа́внымъ твои́мъ покро́вомъ, ѿ врагѡ́въ навѣ́та на́съ, чⷭ҇таѧ, твоѧ̑ рабы̑ сохранѝ всѧ̑ невреди̑мы: тѧ́ бо стѧжа́хомъ є҆ди́нꙋ прибѣ́жище въ нꙋ́ждахъ.
На стїхо́внѣ стїхи̑ры ѻ҆ктѡ́иха. Сла́ва, гла́съ в҃:
Бжⷭ҇твенныхъ дарѡ́въ тезоимени́та тѧ̀, треблаже́нне, почита́ю, ѳео́дѡре: свѣ́та бо бжⷭ҇твеннагѡ незаходи́мое свѣти́ло ꙗ҆́вльсѧ, просвѣти́лъ є҆сѝ страда́ньми твои́ми всю̀ тва́рь: и҆ ѻ҆гнѧ̀ крѣпча́йшїй ꙗ҆ви́всѧ, пла́мень погаси́лъ є҆сѝ, и҆ льсти́вагѡ ѕмі́ѧ главꙋ̀ сокрꙋши́лъ є҆сѝ. тѣ́мже во страда́нїихъ твои́хъ хрⷭ҇то́съ, приклони́всѧ, вѣнча̀ бжⷭ҇твеннꙋю главꙋ̀ твою̀, великомч҃ниче страда́льче, ꙗ҆́кѡ и҆мѣ́ѧ дерзнове́нїе къ бг҃ꙋ, прилѣ́жнѡ моли́сѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Є҆гда̀ ѿ дре́ва:
Гро́здъ всезрѣ́лый, чⷭ҇таѧ, є҆го́же невоздѣ́ланнѡ во ᲂу҆тро́бѣ носи́ла є҆сѝ, на дре́вѣ ꙗ҆́кѡ ᲂу҆зрѣ̀ сего̀ повѣ́шена, рыда́ющи восклица́ше и҆ взыва́ше: ча́до, сла́дость и҆ска́пай, є҆́юже ѿи́метсѧ пїѧ́нство всѧ́кое страсте́й, благодѣ́телю, менє̀ ра́ди тебѐ ро́ждшїѧ, твои́мъ благоꙋтро́бїемъ ᲂу҆молѧ́емь. (с. 314)
На лїтꙋргі́и блажє́нна, ѻ҆ктѡ́иха на д҃: и҆ ст҃а́гѡ пѣ́снь г҃-ѧ, на д҃. Прокі́менъ, гла́съ з҃: Возвесели́тсѧ пра́ведникъ ѡ҆ гдⷭ҇ѣ, и҆ ᲂу҆пова́етъ на него̀. Сті́хъ: Оу҆слы́ши, бж҃е, гла́съ мо́й, внегда̀ моли́тимисѧ къ тебѣ̀. А҆пⷭ҇лъ къ тїмоѳе́ю, зача́ло сч҃в. А҆ллилꙋ́їа, гла́съ д҃: Пра́ведникъ ꙗ҆́кѡ фі́нїѯъ процвѣте́тъ, и҆ ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. Сті́хъ: Насажде́ни въ домꙋ̀ гдⷭ҇ни, въ дво́рѣхъ бг҃а на́шегѡ процвѣтꙋ́тъ. Є҆ѵⷢ҇лїе і҆ѡа́нна, зача́ло н҃в. Прича́стенъ: Въ па́мѧть вѣ́чнꙋю бꙋ́детъ пра́ведникъ:
Мѣ́сѧца тогѡ́же въ з҃і-й де́нь. Слꙋ́жба ст҃и́телю и҆ чꙋдотво́рцꙋ є҆рмоге́нꙋ, патрїа́рхꙋ моско́вскомꙋ и҆ всеѧ̀ рꙋсѝ.
На ма́лѣй вече́рни, на Гдⷭ҇и воззва́хъ, стїхи̑ры на д҃, гла́съ а҃-й. Подо́бенъ: Прехва́льнїи мч҃нцы:
Прехва́льный є҆рмоге́не мч҃нче, тѧ̀ ни темни́ца потаи́ла є҆́сть, но дх҃а бж҃їѧ бл҃года́ть прїѧ́тъ тѧ̀, и҆ и҆спо́лнилсѧ є҆сѝ дх҃а ра́зꙋма, и҆ внꙋ́трь тебє̀ бы́вшее бж҃їе црⷭ҇тво созерца́лъ є҆сѝ. хрⷭ҇тꙋ̀ моли́сѧ, дарова́ти дꙋша́мъ на́шымъ ми́ръ и҆ ве́лїю ми́лость.
Прехва́льный є҆рмоге́не мч҃нче, тѧ̀ ни темни́ца потаи́ла є҆́сть: возсѣ́лъ бо є҆сѝ та́мѡ, ꙗ҆́кѡ на престо́лѣ, и҆ ѿверзо́шасѧ ᲂу҆ста̀ твоѧ̑, и҆ внꙋ́трь є҆ѧ̀ бы́въ, всю̀ рꙋ́сь къ ратобо́рствꙋ за вѣ́рꙋ и҆ ѻ҆те́чество призва́лъ є҆сѝ. хрⷭ҇тꙋ̀ моли́сѧ, дарова́ти дꙋша́мъ на́шымъ ми́ръ и҆ ве́лїю ми́лость.
Прехва́льный є҆рмоге́не мч҃нче, тѧ̀ нѝ темни́ца и҆знꙋри́ла є҆́сть, но ве́лїѧ ре́вность бж҃їѧ ѡ҆б̾ѧ́тъ тѧ̀, и҆ и҆спо́лнилсѧ є҆сѝ ѻ҆гнѧ̀, поѧ́сти хотѧ́щагѡ сопроти̑вныѧ, и҆ внꙋ́трь темни́цы бы́въ, ꙗ҆́кѡ (с. 458) свѣти́льникъ пред̾ бг҃омъ сгора́лъ є҆сѝ. хрⷭ҇тꙋ̀ моли́сѧ, дарова́ти дꙋша́мъ на́шымъ ми́ръ и҆ ве́лїю ми́лость.
Прехва́льный є҆рмоге́не мч҃нче, тѧ̀ ни землѧ̀ потаи́ла є҆́сть, но нб҃о прїѧ́тъ тѧ̀, и҆ ѿверзо́шасѧ тѝ ра̑йскїѧ двє́ри, и҆ внꙋ́трь бы́въ, дре́ва живо́тнагѡ наслажда́ешисѧ. хрⷭ҇тꙋ̀ моли́сѧ, дарова́ти дꙋша́мъ на́шымъ ми́ръ и҆ ве́лїю ми́лость.
Сла́ва, и҆ ны́нѣ, бг҃оро́диченъ: Подо́бенъ то́йже:
Дне́сь сщ҃енномч҃нкъ є҆рмоге́нъ предстои́тъ бж҃їей мт҃ри и҆ неви́димѡ за ны̀ мо́литсѧ съ на́ми: застꙋ́пнице ᲂу҆се́рднаѧ, застꙋпѝ, сп҃сѝ и҆ поми́лꙋй рꙋ́сь правосла́внꙋю и҆ сохранѝ ю҆̀ покро́вомъ твоеѧ̀ бл҃гости.
На стїхо́внѣ стїхи̑ры, гла́съ в҃-й. Подо́бенъ: До́ме є҆ѵфра́ѳовъ:
Гра́де москва̀, се́рдце рꙋ́си правосла́вныѧ, гра́де вели́кихъ ст҃и́телей, красꙋ́йсѧ но́вымъ чꙋдотво́рцемъ є҆рмоге́номъ.
Сті́хъ: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀.
До́ме темни́чный, до́ме ст҃ы́й, въ не́мже ст҃и́тель сконча́сѧ, весели́сѧ, ѡ҆брѣ́лъ бо є҆сѝ бл҃года́ть: престо́лъ бж҃їѧ хра́ма.
Сті́хъ: Въ па́мѧть вѣ́чнꙋю бꙋ́детъ првⷣникъ, ѿ слꙋ́ха ѕла̀ не ᲂу҆бои́тсѧ.
До́ме сщ҃е́нный, гро́бе ст҃ы́й, правосла́вныхъ сла́во, ѿве́рзисѧ и҆ бꙋ́ди и҆сто́чникъ жи́зни приснотекꙋ́щїѧ.
Сла́ва, и҆ ны́нѣ: Подо́бенъ то́йже:
Застꙋ́пнице ᲂу҆се́рднаѧ, мт҃и бг҃а на́шегѡ и҆ предста́тельнице чⷭ҇таѧ, со ст҃и́телемъ молѝ сн҃а твоего̀ ѡ҆ твои́хъ рабѣ́хъ. (с. 459)
Тропа́рь, гла́съ д҃, пи́санъ на вели́цѣй вече́рни. Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́нное:
На вели́цѣй вече́рни, Бл҃же́нъ мꙋ́жъ: а҃-й а҆нтїфѡ́нъ.
На Гдⷭ҇и воззва́хъ, стїхи̑ры на и҃, гла́съ г҃-й.
Гла́съ ст҃ы́ѧ цр҃кве правосла́вныѧ со ᲂу҆миле́нїемъ любвѐ взыва́етъ: прїиди́те, ча̑да моѧ̑, и҆́миже болѣ́знꙋю. прїиди́те къ ст҃и́телю вели́комꙋ, прїиди́те къ сщ҃енномч҃нкꙋ преди́вномꙋ, прїиди́те къ мл҃твенникꙋ за рꙋ́сь неѿстꙋ́пномꙋ, припади́те и҆ моли́тесѧ и҆з̾ глꙋбины̀ дꙋшѝ: сщ҃енномч҃нче є҆рмоге́не, сп҃са́й и҆ ны́нѣ, ю҆́же возлюби́лъ є҆сѝ, рꙋ́сь правосла́внꙋю мл҃твами твои́ми.
Кто̀ се́й колѣ̑на тѣлесѐ и҆ дꙋшѝ со ᲂу҆миле́нїемъ преклони́вый; кто̀ се́й на лицѐ своѐ пады́й; кто̀ се́й наде́ждею ѻ҆́чи на не́бо возводѧ́й и҆ со ᲂу҆пова́нїемъ нело́жнымъ рꙋ́цѣ своѝ воздѣва́ѧй; кто̀ се́й пла́чай и҆ рыда́ѧй, ты̀ є҆сѝ, сщ҃енномч҃нче є҆рмоге́не, ты̀ є҆сѝ, печа́льниче землѝ на́шеѧ, преложѝ пла́чь є҆ѧ̀ на ра́дость.
Гдⷭ҇и, а҆́ще не бы́хомъ ст҃а́го твоего̀ сщ҃енномч҃нка є҆рмоге́на и҆мѣ́ли мл҃твенника, и҆ благосты́ню твою̀ ми́лꙋющꙋю на́съ, ка́кѡ смѣ́ли, сп҃се, стоѧ́ти пред̾ лице́мъ твои́мъ во грѣсѣ́хъ на́шихъ да́же до сегѡ̀ днѐ, ка́кѡ смѣ́ли бы́хомъ противꙋста́ти врагѡ́мъ на́шымъ и҆ ѡ҆гради́ти вѣ́рꙋ ѻ҆тє́цъ на́шихъ и҆ ᲂу҆тверди́ти ца́рство правосла́вное; но ᲂу҆слы́шалъ є҆сѝ мл҃твꙋ ст҃и́телѧ вели́кагѡ, є҆рмоге́на сщ҃енномч҃нка преди́внагѡ, и҆ собра́лъ є҆сѝ под̾ крилѣ̀ є҆гѡ̀ рꙋ́сь правосла́внꙋю, и҆ побѣго́ша вразѝ є҆ѧ̀ пред̾ лице́мъ (с. 460) є҆ѧ̀. и҆ ны́нѣ мл҃твами ст҃и́телѧ пощадѝ и҆ сп҃сѝ на́съ, гдⷭ҇и.
Жи́во сло́во гдⷭ҇не и҆ дѣ́йственно: не ᲂу҆бо́йтесѧ ѿ ᲂу҆бива́ющихъ тѣ́ло, дꙋши́ же не могꙋ́щихъ ᲂу҆би́ти: ᲂу҆бо́йтесѧ же па́че могꙋ́щагѡ и҆ дꙋ́шꙋ и҆ тѣ́ло погꙋби́ти въ гее́ннѣ. потерпѣ̀ дꙋша̀ твоѧ̀ въ сло́во сїѐ, сщ҃енномч҃нче є҆рмоге́не: є҆ди́нагѡ бою́сѧ живꙋ́щагѡ на нб҃сѣ́хъ, ре́клъ є҆сѝ беззакѡ́ннымъ и҆змѣ́нникѡмъ. что́ ми є҆́сть заточе́нїе, сла́дость мл҃твы ᲂу҆едине́нныѧ. что́ ми є҆́сть мра́зъ и҆ гла́дъ; ᲂу҆мира́нїе жи́зни грѣхо́вныѧ. что́ ми є҆́сть сме́рть; ра́дость ѿше́ствїѧ ко хрⷭ҇тꙋ̀. не бою́сѧ стра́ха сме́ртнагѡ: всѧ̑ потерплю̀ за возлюби́вшаго менѐ, потерплю̀ и҆ не ѿве́ргꙋсѧ, ꙗ҆́кѡ сп҃се́нїе рꙋ́си ѿ цр҃кве правосла́вныѧ и҆ ѿ пома́занника є҆ѧ̀ держа́внагѡ. сїѐ разꙋмѣ́йте и҆ семꙋ̀ покарѧ́йтесѧ, ꙗ҆́кѡ съ на́ми бг҃ъ свое́ю бл҃года́тїю.
Разꙋмѣ́йте ꙗ҆зы́цы и҆ покарѧ́йтесѧ, ᲂу҆слы́шите до послѣ́днихъ землѝ: а҆́ще бо па́ки возмо́жете, и҆ па́ки побѣжде́ни бꙋ́дете, не дре́млютъ бо ѻ҆́чи ст҃и́телѧ є҆рмоге́на на стра́жѣ рꙋ́си правосла́вныѧ, не ᲂу҆молка́ютъ ᲂу҆ста̀ во всеѡрꙋ́жїи и҆́стины, се́рдце же бди́тъ ѿ стра́жи ᲂу҆́треннїѧ до но́щи, ᲂу҆пова́ющꙋ є҆мꙋ̀ на гдⷭ҇а и҆ молѧ́щꙋсѧ: да вознесе́тъ на рꙋ́си цр҃ковь правосла́внꙋю и҆ да ᲂу҆крѣпи́тъ на вѣ́ки странꙋ̀ рѡссі́йскꙋю.
Постиго́ша рꙋ́сь грѣсѝ є҆ѧ̀, пото́цы беззако́нїѧ смѧто́ша ю҆̀: приложи́ бо беззако́нїе къ беззако́нїю и҆ погиба́ше за беззако́нїе своѐ, но ѡ҆брати́сѧ ко гдⷭ҇ꙋ и҆ сп҃се́сѧ, ст҃и́телю є҆рмоге́нꙋ проповѣ́дꙋющꙋ и҆ къ покаѧ́нїю зовꙋ́щꙋ и҆ глаго́лющꙋ: прїиди́те ча̑да, послꙋ́шайте менє̀, и҆сповѣ́дайте на сѧ̀ грѣхѝ ва́шѧ и҆ (с. 461) въ беззако́нїихъ ва́шихъ смири́тесѧ: лю́битъ бо гдⷭ҇ь смирє́нныѧ се́рдцемъ и҆ сокрꙋшє́нныѧ дꙋ́хомъ прїе́млетъ, ꙗ҆́кѡ ᲂу҆ гдⷭ҇а млⷭ҇ть и҆ мно́гое ᲂу҆ негѡ̀ и҆збавле́нїе.
Си́це ре́клъ є҆сѝ, ст҃и́телю є҆рмоге́не, врагѡ́мъ ца́рства правосла́внагѡ: та́кѡ вѣ́рꙋю и҆ та́кѡ и҆сповѣ́дꙋю: подоба́етъ царю̀ рꙋ́си бы́ти правосла́внꙋ, и҆ ѡ҆ цр҃кви ст҃ѣ́й рачи́тельнꙋ, и҆ ѡ҆ ча́дѣхъ цр҃кве попечи́тельнꙋ, и҆ ѡ҆ наро́дѣхъ ца́рства промысли́тельнꙋ: да хва́лѧтъ гдⷭ҇а всѝ лю́дїе и҆ всѝ ꙗ҆зы́цы да похва́лѧтъ є҆го̀, да бꙋ́дꙋтъ всѝ є҆ди́но ста́до под̾ ски́петромъ держа́вы є҆гѡ̀, и҆ да пою́тъ всѝ є҆ди́нѣми ᲂу҆сты̑ и҆ є҆ди́нѣмъ се́рдцемъ вели́кое и҆́мѧ ст҃ы́ѧ трⷪ҇цы.
Мл҃твами ст҃и́телѧ є҆рмоге́на прїѧ́лъ є҆́сть гдⷭ҇ь покаѧ́нїе рыда́ющихъ пред̾ ни́мъ и҆ ᲂу҆тверди́лъ є҆́сть гдⷭ҇ь млⷭ҇ть свою̀ на боѧ́щихсѧ є҆гѡ̀: и҆ сѐ, на рꙋ́си правосла́внѣй ра́дꙋютсѧ ѡ҆ гдⷭ҇ѣ и҆ веселѧ́тсѧ ѡ҆ дс҃ѣ ст҃ѣ, си́лою хрⷭ҇то́вою хва́лѧтсѧ и҆ сла́вою ст҃ы́ѧ цр҃кве велича́ютсѧ, лю́дїе гѡ́рнѧѧ мꙋ́дрствꙋютъ, и҆́щꙋще нбⷭ҇нагѡ і҆ерⷭ҇ли́ма, и҆́стина правосла́вїѧ наро́дѡмъ бл҃говѣствꙋ́етсѧ во сп҃се́нїе всеѧ̀ землѝ. та́кѡ и҆́стина гдⷭ҇нѧ пребыва́етъ въ ро́дѣ на́шемъ и҆ млⷭ҇ть є҆гѡ̀ на на́съ ᲂу҆твержда́етсѧ.
Сла́ва, и҆ ны́нѣ, бг҃оро́диченъ: Ка́кѡ не диви́мсѧ:
Вхо́дъ. Прокі́менъ. Чтє́нїѧ свѧти́тєльскаѧ трѝ (зрѝ л. рк҃и):
На лїті́и стїхи́ра хра́ма: та́же стїхи̑ры є҆рмоге́на, гла́съ а҃-й, самогла́сны.
Что̀ сїѐ є҆́сть пра́зднество; что̀ є҆́сть ве́лїй гла́съ ѡ҆сщ҃е́ннагѡ собо́ра; что̀ сїѐ є҆́сть бл҃гохва́льное и҆ кра́сное собра́нїе; сщ҃е́нницы ра́дꙋютсѧ, лю́дїе въ весе́лїе (с. 462) ѡ҆блека́ютсѧ, и҆ всѧ̑ правосла́внаѧ рꙋ́сь торжествꙋ́етъ, ст҃и́телю є҆рмоге́нꙋ предлежа́щꙋ и҆ всѣ́хъ ѿ ра́ки моще́й свои́хъ бл҃гословлѧ́ющꙋ и҆ всѣ́хъ бл҃года́тнѡ ᲂу҆тѣша́ющꙋ и҆ та́йнѡ глаго́лющꙋ: не бо́йсѧ, ма́лое ста́до, не потопи́ти мо́рю жите́йскомꙋ кораблѧ̀ і҆и҃сова, не поги́бнетъ рꙋ́сь правосла́внаѧ и҆ бг҃омъ люби́маѧ, ꙗ҆́кѡ бл҃гоизво́ли гдⷭ҇ь да́ти на́мъ ца́рство, на ка́мени бо вѣ́ры и҆ пра́вды стои́мъ.
Прїиди́те, всѝ вѣ́рнїи, ст҃и́телѧ є҆рмоге́на восхва́лимъ, ѕвѣздꙋ̀ ѿ востѡ́къ со́лнца возсїѧ́вшꙋю и҆ за́падъ со́лнца правосла́вїемъ вѣ́ры ѡ҆зари́вшꙋю и҆ ны́нѣ ѕвѣздꙋ̀ но́вꙋ на сла́вныхъ нб҃сѣ́хъ въ со́нмѣ сщ҃енномч҃нкъ ꙗ҆вле́ннꙋю, въ по́мощь цр҃кви и҆ ѻ҆те́чествꙋ проти́вꙋ врагѡ́въ на́шихъ и҆ во ᲂу҆твержде́нїе вѣ́ры ѻ҆тцє́въ на́шихъ: гдⷭ҇и, мл҃твами ст҃и́телѧ ми́ръ тво́й пода́ждь на́мъ и҆ ве́лїю млⷭ҇ть.
Сла́ва, гла́съ и҃.
Что́ тѧ нарече́мъ, ст҃и́телю є҆рмоге́не; а҆́гг҃ла ли, занѐ ꙗ҆́кѡ храни́тель правосла́вныѧ рꙋ́си бы́лъ є҆сѝ, и҆лѝ а҆пⷭ҇ла, ꙗ҆́кѡ невѣ̑рныѧ наꙋчи́лъ є҆сѝ, мч҃нка ли, ꙗ҆́кѡ за правосла́вїе ца́рства дꙋ́шꙋ свою̀ хрⷭ҇та̀ ра́ди положи́лъ є҆сѝ: є҆го́же молѝ поми́ловати дꙋ́шы на́шѧ.
И҆ ны́нѣ, бг҃оро́диченъ, гла́съ то́йже.
Притеце́мъ ны́нѣ къ мт҃ри гдⷭ҇а вы́шнѧгѡ и҆ вкꙋ́пѣ со ст҃и́телемъ є҆рмоге́номъ воспое́мъ застꙋ́пницꙋ ᲂу҆се́рднꙋю: за всѣ́хъ мо́литъ бо сн҃а своего̀, хрⷭ҇та̀ бг҃а на́шего и҆ всѣ̑мъ твори́тъ сп҃сти́сѧ, въ держа́вный є҆ѧ̀ покро́въ прибѣга́ющымъ. (с. 463)
На стїхо́внѣ стїхи̑ры, гла́съ ѕ҃. Подо́бенъ: Тридне́венъ воскре́слъ є҆сѝ:
Ст҃и́телю є҆рмоге́не, мо́лимъ тѧ̀: при́зри на рꙋ́сь и҆ посѣтѝ ю҆̀ мл҃твою: гдⷭ҇и, да и҆сче́знꙋтъ вразѝ рꙋ́си, ꙗ҆́кѡ ды́мъ, и҆ ꙗ҆́кѡ во́скъ ѿ лица̀ ѻ҆гнѧ̀ да поги́бнꙋтъ.
Сті́хъ: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀.
Мл҃твꙋ твою̀ пролїѧ́лъ є҆сѝ ко гдⷭ҇ꙋ, ст҃и́телю є҆рмоге́не, и҆ томꙋ̀ возвѣсти́лъ є҆сѝ печа̑ли твоѧ̑ глаго́лѧ: сѐ, а҆́зъ дꙋ́шꙋ мою̀ полага́ю за ѻ҆́вцы моѧ̑. гдⷭ҇и, прїимѝ ю҆̀, ꙗ҆́кѡ кади́ло мл҃твы ѡ҆ рꙋ́си правосла́внѣй, да пребꙋ́детъ ст҃а и҆ правовѣ́рна во вѣ́ки.
Сті́хъ: Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ.
Ѡ҆блецы̀ на́съ мл҃твами твои́ми, ст҃и́телю ѻ҆́тче на́шъ, и҆ наꙋчѝ на́съ правосла́внѡ моли́тисѧ: гдⷭ҇и, гдⷭ҇и, сп҃сѝ на́съ, пре́жде да́же до конца̀ не поги́бнемъ.
Сла́ва, и҆ ны́нѣ, бг҃оро́диченъ: Подо́бенъ то́йже.
Ст҃и́телю є҆рмоге́нꙋ предстоѧ́щꙋ бж҃їей мт҃ри и҆ молѧ́щꙋсѧ ѡ҆ рꙋ́си, припаде́мъ и҆ мы̀ ко пречⷭ҇тѣй: прест҃а́ѧ бцⷣе, помога́й на́мъ.
На бл҃гослове́нїи хлѣ́бѡвъ тропа́рь, два́жды, и҆ Бцⷣе дв҃о: є҆ди́ножды.
А҆ и҆дѣ́же нѣ́сть всено́щнагѡ бдѣ́нїѧ: на вели́цѣй вече́рни по Ны́нѣ ѿпꙋща́еши: глаго́лемъ тропа́рь є҆ди́ножды: Сла́ва, и҆ ны́нѣ, бг҃оро́диченъ воскре́сенъ.
Тропа́рь на преставле́нїе, гла́съ д҃.
Рѡссі́йскїѧ землѝ первопресто́льниче и҆ неꙋсы́пный ѡ҆ не́й къ бг҃ꙋ моли́твенниче! за вѣ́рꙋ хрⷭ҇то́вꙋ и҆ (с. 464) па́ствꙋ твою̀ дꙋ́шꙋ свою̀ положи́въ, странꙋ̀ на́шꙋ ѿ нече́стїѧ и҆зба́вилъ є҆сѝ. тѣ́мже вопїе́мъ тѝ: сп҃са́й на́съ моли́твами твои́ми, сщ҃енномч҃ниче є҆рмоге́не, ѻ҆́тче на́шъ.
Тропа́рь на прославле́нїе, гла́съ д҃.
Приспѣ̀ де́нь свѣ́тлагѡ торжества̀, гра́дъ москва̀ ра́дꙋетсѧ, и҆ съ ни́мъ рꙋ́сь правосла́внаѧ ликовствꙋ́етъ пѣ́сньми и҆ пѣ́ньми дꙋхо́вными: дне́сь бо сщ҃е́нное торжество̀ въ ꙗ҆вле́нїи честны́хъ и҆ многоцѣле́бныхъ моще́й ст҃и́телѧ и҆ чꙋдотво́рца є҆рмоге́на, ꙗ҆́коже со́лнце незаходи́мое возсїѧ̀ свѣтоза́рными лꙋча́ми, разгонѧ́ѧ тьмꙋ̀ и҆скꙋше́нїй же и҆ бѣ́дъ ѿ вопїю́щихъ вѣ́рнѡ: сп҃са́й на́съ, ꙗ҆́кѡ предста́тель на́шъ, вели́кїй є҆рмоге́не.
На ᲂу҆́трени,
На Бг҃ъ гдⷭ҇ь, тропа́рь ст҃и́телѧ, два́жды. Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́нное:
По а҃-мъ стїхосло́вїи сѣда́льны, гла́съ д҃. Подо́бенъ: Ꙗ҆ви́лсѧ є҆сѝ:
Строи́телѧ землѝ на́шеѧ во дни̑ нестрое́нїѧ, вѣ́рнїи, соше́дшесѧ восхва́лимъ: ꙗ҆́кѡ ца́рствꙋ на́шемꙋ пꙋ́ть правосла́внагѡ строи́тельства проповѣ́да, и҆ самозва́нныѧ бг҃опроти́вныѧ вла̑сти ѡ҆бличи́въ дерзнове́ннѣ, въ темни́цѣ гла́домъ замꙋ́ченъ бы́сть: и҆ ны́нѣ со сщ҃енномч҃нки живы́й, хрⷭ҇тꙋ̀ мо́литсѧ, сп҃сти́сѧ на́мъ.
Сла́ва:
Свѣ́тлꙋю твою̀ па́мѧть дне́сь творѧ́ще, сп҃са и҆ гдⷭ҇а моли́ти приле́жнѡ тѧ̀ мо́лимъ, сщ҃енномч҃нче є҆рмоге́не, зако́нѡмъ да́ти правосла́вное ᲂу҆твержде́нїе. (с. 465)
И҆ ны́нѣ, бг҃оро́диченъ:
Те́плое застꙋпле́нїе сꙋ́щымъ въ бѣда́хъ, и҆ помо́щницꙋ на́шꙋ, є҆́юже ра́бства и҆нозе́мнагѡ и҆зба́вихомсѧ, бцⷣꙋ, вѣ́рнїи, ᲂу҆бл҃жа́емъ.
По в҃-мъ стїхосло́вїи сѣда́льны, то́йже гла́съ и҆ подо́бенъ.
Ꙗ҆ви́лсѧ є҆сѝ дне́сь рꙋ́си правосла́внѣй, и҆ свѣ́тъ твоегѡ̀ бл҃говоле́нїѧ зна́менасѧ на на́съ, въ ра́зꙋмѣ пою́щихъ тѧ̀: прише́лъ є҆сѝ, и҆ ꙗ҆ви́лсѧ є҆сѝ, чꙋдотво́рецъ пресла́вный.
Сла́ва:
Притеце́мъ, вѣ́рнїи, къ ра́цѣ моще́й ст҃и́телѧ є҆рмоге́на, и҆ пролїе́мъ пред̾ ни́мъ печа́ль на́шꙋ, и҆ ско́рбь на́шꙋ пред̾ ни́мъ возвѣсти́мъ, да ѡ҆брѧ́щемъ ве́лїе ᲂу҆тѣше́нїе: всѧ́къ бо вѣ́рꙋѧй не ѿи́детъ то́щь.
И҆ ны́нѣ:
Дне́сь влⷣчца мі́ра ра́дꙋетсѧ, зрѧ́щи ст҃и́телѧ є҆рмоге́на, ѿ хрⷭ҇та̀ вѣнча́ннаго си́лою мно́гою и҆ при́снѡ ѡ҆ правосла́внѣй рꙋ́си молѧ́щасѧ. є҆гѡ́же мл҃твами мт҃и бг҃а вы́шнѧгѡ, покры́й на́съ покро́вомъ твоеѧ̀ бл҃гости.
По полѷеле́и сѣда́льны, гла́съ и҆ подо́бенъ то́йже.
Премꙋ́драго і҆ера́рха восхва́лимъ, ꙗ҆́кѡ ко́рмчаго рꙋ́си правосла́вныѧ, къ го́рнемꙋ і҆ерⷭ҇ли́мꙋ пꙋтево́дствꙋюща, и҆ на всѧ́кꙋ пра́вдꙋ наставлѧ́юща, и҆ ѿ всѧ́кагѡ ѕла̀ сп҃са́юща.
Сла́ва:
Премꙋ́драго і҆ера́рха восхва́лимъ, ꙗ҆́кѡ а҆́гг҃ла храни́телѧ рꙋ́си правосла́вныѧ странꙋ̀ на́шꙋ въ правосла́внѣй вѣ́рѣ ᲂу҆твержда́юща, и҆ хрⷭ҇та̀ въ не́й воѡбража́юща. (с. 466)
Оу҆бл҃жи́мъ чⷭ҇тнѣ́йшꙋю го́рнихъ во́инствъ: та́ бо помогла̀ є҆́сть ст҃и́телю є҆рмоге́нꙋ ᲂу҆поко́итисѧ въ вѣ́чныхъ ѡ҆би́телехъ, та́ бо сп҃се́тъ и҆ на́съ грѣ́шныхъ.
По н҃-мъ ѱалмѣ̀ стїхи́ра, гла́съ д҃. Подо́бенъ: Ꙗ҆ви́лсѧ є҆сѝ:
Предста́тель теплѣ́йшїй ца́рства правосла́внагѡ показа́лсѧ є҆сѝ, є҆рмоге́не, и҆ и҆носла̑внаѧ ᲂу҆чє́нїѧ ѿверга́ѧ со дерзнове́нїемъ, пра́вило показа́лсѧ є҆сѝ всѣ̑мъ правосла́вїѧ, ѡ҆ всѣ́хъ молѧ́сѧ послѣдꙋ́ющихъ твои̑мъ бжⷭ҇твєннымъ ᲂу҆чє́нїемъ и҆ наказа́нїємъ.
Канѡ́нъ бцⷣы, со і҆рмосо́мъ на ѕ҃, гла́съ и҃. Во́дꙋ проше́дъ: и҆ ст҃и́телѧ, [є҆гѡ́же краегране́сїе, Вонмѝ, землѐ, гла́сꙋ ст҃и́телѧ є҆рмоге́на: ст҃а́ѧ и҆ бг҃омъ люби́маѧ рꙋ́сь не поги́бнетъ ] на и҃, гла́съ то́йже.
Пѣ́снь а҃.
І҆рмо́съ: Пѣ́снь возсле́мъ лю́дїе, чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще и҆ вопїю́ще: пои́мъ тебѣ̀ є҆ди́номꙋ влⷣцѣ.
Вѣ́дꙋщїи воскликнове́нїе, по́йте и҆ велича́йте ст҃и́телѧ вели́каго, и҆ взира́юще на кончи́нꙋ є҆гѡ̀, подража́йте вѣ́рѣ є҆гѡ̀.
Ѻ҆би́лїе бл҃года́ти ѡ҆бита́етъ въ ра́цѣ моще́й твои́хъ, ст҃и́телю є҆рмоге́не, є҆ѧ́же ра́ди прославлѧ́емъ тѧ̀, ꙗ҆́кѡ новоѧвле́нна чꙋдотво́рца, и҆ про́симъ и҆сцѣле́нїй.
Нача́ло премꙋ́дрости стра́хъ гдⷭ҇нь, наꙋчи́вый и҆ тѧ̀, ст҃и́телю, рабо́тати гдⷭ҇еви съ тре́петомъ и҆ ра́доватисѧ пред̾ лице́мъ є҆гѡ̀. да́ждь и҆ на́мъ, по мл҃твѣ твое́й, положи́ти сїѐ нача́ло бл҃го́е. (с. 467)
Мнѡ́ги скѡ́рби првⷣнымъ и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь. по словесѝ семꙋ̀ бы́сть житїѐ твоѐ, ст҃и́телю. и҆ сѐ, ны́нѣ ра́дꙋешисѧ на нб҃сѣ́хъ и҆ ра́дꙋеши всѣ́хъ чтꙋ́щихъ па́мѧть твою̀.
И҆спыта́ѧй свидѣ̑нїѧ бж҃їѧ бы́лъ є҆сѝ, ст҃и́телю: въ зако́нѣ бо хрⷭ҇то́вѣ поꙋча́лсѧ є҆сѝ де́нь и҆ но́щь, и҆ ѡ҆правда̑нїѧ гдⷭ҇нѧ пра̑ва сꙋ́ть: въ селє́нїѧ бо првⷣныхъ всели́ тѧ гдⷭ҇ь.
За́пѡвѣди гдⷭ҇ни ѿ ю҆́ности возлюби́лъ є҆сѝ и҆ преда̑нїѧ ст҃ы́хъ ѻ҆тє́цъ да́же до сме́рти соблю́лъ є҆сѝ, ст҃и́телю, и҆ ны́нѣ съ ни́ми сопрославлѧ́еши бг҃а, є҆го́же молѝ, да сп҃се́тъ тобо́ю дꙋ́шы на́шѧ.
Є҆го́же возлюби́лъ є҆сѝ и҆ є҆мꙋ́же ре́вностнѡ порабо́талъ є҆сѝ, ны́нѣ съ ли́ки ст҃ы́хъ воспѣва́еши и҆ мо́лишисѧ за ны̀.
Бг҃оро́диченъ:
Мл҃твеннице те́плаѧ, застꙋ́пнице ро́да хрⷭ҇тїа́нскагѡ, прїимѝ мѡльбы̀ ѿ на́съ, приле́жнѡ призыва́ющихъ и҆ молѧ́щихсѧ тебѣ̀: покры́й странꙋ̀ на́шꙋ правосла́внꙋю покро́вомъ твоеѧ̀ бл҃гости.
Пѣ́снь г҃.
І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и: ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Лѣ̑та дрє́внѧѧ помѧнꙋ́хъ и҆ поꙋчи́хсѧ во всѣ́хъ дѣ́лѣхъ твои́хъ, ст҃и́телю, и҆ ѡ҆брѣто́хъ вѣ́дѣнїе, ка́кѡ жи́ти въ мі́рѣ се́мъ, ѿ ст҃ы́хъ ѻ҆тє́цъ и҆ ѿ житі́й ст҃ы́хъ вразꙋмлѧ́ѧсѧ.
Є҆пі́скопъ мꙋ́дрый лю́демъ и҆ ца́рствꙋ бы́лъ є҆сѝ, ст҃и́телю: ᲂу҆подо́билсѧ є҆сѝ мꙋ́жꙋ смотрѧ́щꙋ лицѐ бытїѧ̀ ца́рства правосла́внагѡ въ лѣ́тописехъ дре́внихъ, (с. 468) ꙗ҆́коже въ зерца́лѣ, поꙋча́ющꙋсѧ премꙋ́дрости правосла́вїѧ во дне́хъ дре́внихъ.
Гдⷭ҇и гдⷭ҇ь на́шъ, ꙗ҆́кѡ чꙋ́дно и҆́мѧ твоѐ по все́й рꙋ́си. гдⷭ҇ь посмѣе́тсѧ врагѡ́мъ на́шымъ. гдⷭ҇ь застꙋ́пникъ на́шъ. сїю̀ пра́вдꙋ живописа́лъ є҆сѝ, ст҃и́телю, поꙋча́ѧ ро́ды родѡ́въ, ꙗ҆́кѡ лѣтопи́сецъ правосла́вныѧ рꙋ́си.
Лю́дїе, поꙋчи́тесѧ, лю́дїе, ᲂу҆мили́тесѧ, вразꙋмлѧ́юще себѐ самѣ́хъ въ пѣ́нїихъ и҆ пѣ́снехъ дꙋхо́вныхъ, и҆́миже просла́вилъ є҆́сть ст҃и́тель є҆рмоге́нъ застꙋ́пницꙋ ро́да на́шегѡ.
А҆́ще не гдⷭ҇ь сози́ждетъ до́мъ, всꙋ́е трꙋди́шасѧ зи́ждꙋщїи. сїю̀ и҆́стинꙋ внꙋша́лъ є҆сѝ, ст҃и́телю, стра́жємъ землѝ на́шеѧ, да не ѡ҆сꙋетѧ́тсѧ помышлє́нїи свои́ми и҆ да не всꙋ́е мѧтꙋ́тсѧ.
Сщ҃е́нникъ цр҃кве ст҃и́телѧ нїкола́ѧ бы́лъ є҆сѝ, є҆рмоге́не, и҆ возгрѣва́ѧ да́ръ, живы́й въ тебѣ̀, ве́лїю любо́вь бг҃ома́тере стѧжа́лъ є҆сѝ, є҆́юже ѿ сла́вы въ сла́вꙋ да́же до нб҃сѐ влеко́мъ бы́лъ є҆сѝ и҆ въ селе́нїихъ првⷣныхъ всели́лсѧ є҆сѝ.
Оу҆подо́билсѧ є҆сѝ кꙋпцꙋ̀, многоцѣ́ненъ би́серъ ѡ҆брѣ́тшꙋ, є҆гда̀ і҆кѡ́нꙋ бг҃омт҃ре ѿ землѝ под̾ѧ́лъ є҆сѝ, ꙗ҆́кѡ сокро́вище бл҃года́ти, ни́щыѧ дꙋ́хомъ ѡ҆богаща́ющее.
Бг҃оро́диченъ:
Сказа́нїе чꙋде́съ твои́хъ, бцⷣе, є҆́же написа̀ ст҃и́тель є҆рмоге́нъ во сла́вꙋ і҆кѡ́ны твоеѧ̀ каза́нскїѧ, воздвиза́етъ всю̀ рꙋ́сь правосла́внꙋю при́снѡ прибѣга́ти къ тебѣ̀ во всѣ́хъ ѡ҆бстоѧ́нїихъ и҆ приле́жнѡ моли́ти: прест҃а́ѧ бцⷣе, помога́й на́мъ. (с. 469)
Сѣда́ленъ, гла́съ и҃. Подо́бенъ: Премꙋ́дрости:
Возше́дъ на высотꙋ̀ нбⷭ҇нꙋю, и҆ бжⷭ҇твенными ѿтꙋ́дꙋ, ѻ҆́тче, ѡ҆зари́всѧ сїѧ̑нїи чꙋде́съ, пресвѣ́телъ вои́стинꙋ ꙗ҆ви́лсѧ є҆сѝ правосла́внѣй рꙋ́си па́стырь, на́мъ въ напа́стехъ сы́й предста́тель непобѣди́мъ: тѣ́мже пресла́внѡ врагѝ побѣди́въ, лжꙋ̀ и҆носла́вїѧ ѿгна́лъ є҆сѝ, и҆ ца́рство правосла́вное спа́слъ є҆сѝ ѿ поги́бели, є҆рмоге́не. молѝ хрⷭ҇та̀ бг҃а: грѣхѡ́въ ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.
Сла́ва, и҆ ны́нѣ, бг҃оро́диченъ:
Ст҃и́телю є҆рмоге́нꙋ подража́юще, почти́мъ пресвѣ́тлꙋю і҆кѡ́нꙋ бг҃омт҃ре, ꙗ҆́кѡ и҆сто́чникъ неисчерпа́емый и҆сцѣле́нїй, и҆ ᲂу҆бл҃жи́мъ мт҃рь бг҃а вы́шнѧгѡ, ꙗ҆́кѡ дв҃ꙋ и҆ є҆ди́нꙋ въ жена́хъ, без̾ сѣ́мене ро́ждшꙋю бг҃а пло́тїю.
Пѣ́снь д҃.
І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.
Возвѣсти́те во ꙗ҆зы́цѣхъ дѣла̀ бж҃їѧ, ꙗ҆̀же ꙗ҆ви́лъ на́мъ є҆́сть гдⷭ҇ь вседержи́тель ѿ і҆кѡ́ны своеѧ̀ мт҃ре, ре́клъ є҆сѝ, ст҃и́телю: да не рекꙋ́тъ ꙗ҆зы́цы: гдⷭ҇ѣ є҆́сть бг҃ъ и҆́хъ, въ него́же вѣ́рꙋютъ; и҆ да заградѧ́тсѧ ᲂу҆ста̀ и҆́хъ.
Ꙗ҆́та бы́сть земле́ю, но не ᲂу҆держа́нна, і҆кѡ́на пречⷭ҇тыѧ, да бꙋ́детъ во ᲂу҆твержде́нїе новопросвѣщє́ннымъ, блꙋжда́ющымъ же во тьмѣ̀ невѣ́дѣнїѧ во ѿкрове́нїе свѣ́та и҆́стины, ꙗ҆́коже мꙋ́дрствꙋетъ ѡ҆ се́мъ ст҃и́тель є҆рмоге́нъ. (с. 470)
Ты̀ є҆сѝ и҆зрѧ́дное пѣ́нїе чꙋде́съ пренепоро́чныѧ, ты̀ є҆сѝ ᲂу҆твержде́нїе немощствꙋ́ющихъ въ вѣ́рѣ, ты̀ є҆сѝ просвѣще́нїе ѡ҆мраче́нныхъ тьмо́ю невѣ́рїѧ, и҆ пое́тъ тѧ̀ дꙋ́хъ мо́й.
И҆́го бл҃го́е и҆ бре́мѧ ле́гкое под̾ѧ́лъ є҆сѝ, є҆рмоге́не, є҆гда̀ ѻ҆́бразъ а҆́гг҃льскїй воспрїѧ́лъ є҆сѝ, да прїи́деши въ во́зрастъ мꙋ́жа соверше́нна.
Тебѐ, ѡ҆дѣ́ющагосѧ мл҃твою, ꙗ҆́кѡ ри́зою, добродѣ́телей подви́жника, сп҃сова ѡ҆би́тель ви́дѧ, ѕѣлѡ̀ ра́довасѧ: грѧде́тъ бо сщ҃енно-а҆рхїмандрі́тъ ѡ҆бнови́ти ѡ҆би́тель и҆ ᲂу҆тверди́ти бл҃гоче́стїе.
Є҆рмола́ю тезоимени́тый ᲂу҆соверши́лсѧ є҆сѝ: є҆рмоге́нꙋ же сожи́тельствꙋѧ ᲂу҆подо́билсѧ є҆сѝ: и҆ сѐ, ꙗ҆́кѡ свѣти́льникъ немерца́ѧй, поставлѧ́ешисѧ на свѣ́щницѣ каза́нскїѧ цр҃кве.
Лѣ́пѡ є҆́сть премꙋ́дромꙋ немꙋ̑дрыѧ превѣща́ти, си́льномꙋ ѡ҆ гдⷭ҇ѣ немощны̑ѧ ᲂу҆крѣплѧ́ти: лѣ́пѡ є҆́сть свѧти́тельствовати є҆рмоге́нꙋ, всѧ̑ могꙋ́щемꙋ ѡ҆ хрⷭ҇тѣ̀ і҆и҃сѣ.
Бг҃оро́диченъ:
Ꙗ҆́кѡ гпⷭ҇жꙋ̀ цр҃и́цꙋ и҆ влⷣчцꙋ, застꙋпа́ющꙋ всѣ́хъ на́съ, въ держа́вный тво́й покро́въ прибѣга́ющихъ, пое́тъ тѧ̀ ст҃ы́й є҆рмоге́нъ, съ ни́мже прїимѝ и҆ на̑ша молє́нїѧ и҆ сп҃сѝ дꙋ́шы на́шѧ.
Пѣ́снь є҃.
І҆рмо́съ: Оу҆́тренююще вопїе́мъ тѝ: гдⷭ҇и, сп҃си́ ны ты́ бо є҆сѝ бг҃ъ на́шъ, ра́звѣ тебє̀ и҆но́гѡ не зна́емъ.
Є҆гда̀ бы́лъ є҆сѝ въ каза́ни, невѣ́дꙋщыѧ и҆́стиннагѡ бг҃а просвѣща́лъ є҆сѝ и҆ рабо́тати є҆ди́номꙋ бг҃ꙋ наꙋча́лъ (с. 471) є҆сѝ. сегѡ̀ ра́ди со а҆пⷭ҇лы ра́дꙋешисѧ, прїе́млѧ награ́дꙋ бл҃говѣ́стника хрⷭ҇то́ва.
Ре́вностїю бж҃їею по сла́вѣ ди́вныхъ во ст҃ы́хъ: гꙋ́рїа, варсоно́фїа и҆ ге́рмана поревнова́лъ є҆сѝ, є҆рмоге́не, и҆ тѣ́хъ мл҃твами вспомоществꙋ́емый, въ ѡ҆би́тєли ст҃и́телей пресели́лсѧ є҆сѝ, предстоѧ̀ є҆ди́номꙋ пастыренача́льникꙋ, є҆го́же молѝ сп҃сти́сѧ всѣ̑мъ на́мъ.
Ми́лꙋѧ нака́зывалъ є҆сѝ и҆ наказꙋ́ѧ ми́ловалъ є҆сѝ, ст҃и́телю, и҆ се́ю мꙋ́дростїю ѡ҆гражда́лъ є҆сѝ ѿ волкѡ́въ хи́щныхъ новопросвѣщє́ннаѧ ча̑да твоѧ̑ и҆ всѧ̑ ѻ҆́вцы твоѧ̑.
Ѡ҆пло́томъ во́ли царе́вой, ревнꙋ́ющїѧ по правосла́вїю ца́рства, немощны̑ѧ въ вѣ́рѣ ѡ҆гражда́лъ є҆сѝ и҆ къ попече́нїю ѡ҆ сп҃се́нїи ца́рства во хрⷭ҇тѣ̀ і҆и҃сѣ царѧ̀ ѳео́дѡра призыва́лъ є҆сѝ, ᲂу҆казꙋ́ѧ ца́рствꙋ сп҃си́тельное преѡбраже́нїе.
Гра́дъ москва̀ и҆ съ ни́мъ всѧ̀ рꙋ́сь пла́касѧ го́рькѡ, самозва́ннꙋ повели́телю воцари́вшꙋсѧ и҆ въ нече́стїе ѡ҆бле́кшꙋсѧ, ты́ же є҆ди́нъ, ꙗ҆́кѡ крѣ́пкїй побо́рникъ, семꙋ̀ нече́стїю противоста́лъ є҆сѝ и҆ вѣ́рꙋ правосла́внꙋю со дерзнове́нїемъ и҆сповѣ́далъ є҆сѝ.
Є҆рмоге́на и҆сповѣ́дника, и҆́же не ᲂу҆боѧ́сѧ преще́нїѧ сме́ртнагѡ и҆ слове́съ жесто́кихъ ѿ нечести́вагѡ врага̀, пѣ́сньми ᲂу҆бл҃жа́емъ.
На него́же ра́дꙋющесѧ взира́ютъ чи́ни а҆́гг҃льстїи и҆ всѝ ст҃і́и, томꙋ̀ предстои́ши ны́нѣ, є҆рмоге́не, и҆ ꙗ҆́кѡ и҆сповѣ́дникъ хода́тайствꙋеши при́снѡ за рꙋ́сь правосла́внꙋю. (с. 472)
Бг҃оро́диченъ:
А҆да́мово воззва́нїе, пренепоро́чнаѧ дв҃о, съ тобо́ю гдⷭ҇ь и҆ тобо́ю съ на́ми бг҃ъ: разꙋмѣ́йте сїѐ, ꙗ҆зы́цы, и҆ покарѧ́йтесѧ.
Пѣ́снь ѕ҃.
І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.
Собо́ра ѡ҆сщ҃е́ннагѡ и҆збра́нїемъ и҆ повелѣ́нїемъ ца́рскимъ возше́лъ є҆сѝ, ст҃и́телю, на престо́лъ патрїа́ршїѧ вла́сти, да сп҃се́ши рꙋ́сь, напа́стьми мно́гими ѡ҆бꙋрева́емꙋ.
Вѣ́ры нелицемѣ́рныѧ и҆сповѣ́данїе непоколе́блемое начерта́лъ є҆сѝ, ст҃и́телю, рꙋко́ю твое́ю и҆ сїю̀ вѣ́рꙋ пред̾ лице́мъ всеѧ̀ цр҃кве въ собо́рѣ ᲂу҆спе́нїѧ пречⷭ҇тыѧ и҆сповѣ́далъ є҆сѝ, да ᲂу҆́зритъ всѧ̑ рꙋ́сь ка́мень и҆́стинныѧ вѣ́ры, на не́мже сози́ждетсѧ ца́рство и҆ ᲂу҆тверди́тсѧ въ правосла́вїи.
Ѧ҆зы́къ тво́й тро́сть кни́жника скоропи́сца, и҆́мже загради́шасѧ ᲂу҆ста̀ грѣ́шнича и҆ ᲂу҆ста̀ льсти́вагѡ и҆ ᲂу҆смири́сѧ мѧте́жъ нечести́выхъ.
Тьмꙋ̀ лжѝ, ꙗ҆́же бы́сть ѡ҆́крестъ престо́ла ца́рскагѡ, разгонѧ́ѧ сло́вомъ и҆́стины, и҆ на борьбꙋ̀ съ и҆змѣ́нниками правосла́вное во́инство бл҃гословлѧ́ѧ и҆зне́слъ є҆сѝ на стѡ́гна гра́да москвы̀ покро́въ ѿ чꙋдото́чныхъ моще́й цр҃е́вича дими́трїа, да возвѣсти́тсѧ пра́вда бж҃їѧ и҆ да ᲂу҆крѣпи́тсѧ страна̀ правосла́внаѧ.
А҆́ще ца́рь бл҃гочести́въ ре́клъ є҆сѝ, ст҃и́телю, и҆ по вѣ́рѣ правосла́внѣй побора́тель, бл҃гослови́те ѡ҆ не́мъ (с. 473) гдⷭ҇а, и҆ возлюби́те є҆го̀, и҆ въ стра́сѣ бж҃їи повинꙋ́йтесѧ є҆мꙋ̀ и҆ покарѧ́йтесѧ.
Ꙗ҆́кѡ дре́во при и҆схо́дищихъ во́дъ бы́лъ є҆сѝ ᲂу҆ престо́ла бл҃года́ти, ст҃и́телю, ѡ҆сѣнѧ́ѧ прохла́дою ᲂу҆тѣше́нїѧ и҆ многопло́дїемъ пра́вды царѧ̀ правосла́вныѧ рꙋ́си.
И҆ проповѣ́дꙋеши, и҆ ѡ҆блича́еши, и҆ призыва́еши, и҆ мо́лишисѧ, и҆ моли́тисѧ во всѣ́хъ хра́мѣхъ повелѣва́еши, ст҃и́телю, ѡ҆ сп҃се́нїи ѡ҆ ᲂу҆мире́нїи страны̀ правосла́вныѧ.
Бг҃оро́диченъ:
Бцⷣе дв҃о, ᲂу҆пова́нїе хрⷭ҇тїа́нѡмъ, покры́й, соблюдѝ, сохранѝ и҆ сп҃сѝ рꙋ́сь, прибѣга́ющꙋ ко твоемꙋ̀ застꙋпле́нїю.
Конда́къ, гла́съ ѕ҃.
Темни́цею и҆ гла́домъ и҆знꙋрѧ́емь, да́же до сме́рти вѣ́ренъ пребы́лъ є҆сѝ, бл҃же́нне є҆рмоге́не, малодꙋ́шїе ѿ серде́цъ люде́й твои́хъ ѿгонѧ́ѧ и҆ на ѻ҆́бщїй по́двигъ всѧ̑ призыва́ѧ. тѣ́мже и҆ нечести́выхъ мѧте́жъ низложи́лъ є҆сѝ и҆ ски́птры ца́рства ᲂу҆тверди́лъ є҆сѝ, да всѝ зове́мъ тѝ: ра́дꙋйсѧ, застꙋ́пниче рѡссі́йскїѧ землѝ.
І҆́косъ:
Прїиди́те, правосла́внїи лю́дїе, пѣ́сньми ᲂу҆бл҃жи́мъ пресвѣ́тла свѣти́льника цр҃кве рѡссі́йскїѧ, непоколеби́ма столпа̀ вѣ́ры правосла́вныѧ, те́пла мл҃твенника и҆ предста́телѧ за зе́млю на́шꙋ, крѣ́пка стоѧ́телѧ проти́вꙋ врагѡ́въ, стро́гаго ѡ҆бличи́телѧ на преда́телей и҆ разори́телей правосла́внагѡ ца́рства, до́браго па́стырѧ, дꙋ́шꙋ свою̀ за ѻ҆́вцы своѧ̑ положи́вша и҆ (с. 474) сегѡ̀ ра́ди вѣнце́мъ сла́вы ѿ гдⷭ҇а вѣнча́нна, къ немꙋ́же припаде́мъ, вѣ́рою и҆ любо́вїю зовꙋ́ще си́це: ра́дꙋйсѧ, вели́кїй въ і҆ера́рсѣхъ рѡссі́йскихъ ст҃и́телю хрⷭ҇то́въ, ѻ҆́тче на́шъ є҆рмоге́не.
Пѣ́снь з҃.
І҆рмо́съ: Ѻ҆́троцы бл҃гочести́вїи въ вавѷлѡ́нѣ ѻ҆́бразꙋ злато́мꙋ не поклони́шасѧ: но посредѣ̀ пе́щи ѻ҆́гненныѧ ѡ҆роша́еми, пѣ́снь воспѣва́хꙋ, глаго́люще: превозноси́мый ѻ҆тцє́въ и҆ на́съ бж҃е, бл҃гослове́нъ є҆сѝ.
Ѻ҆гне́мъ лю́тыѧ ѕло́бы ѡ҆палѧ́ема, пе́щи ѻ҆́гненнѣй ᲂу҆подо́биласѧ є҆́сть правосла́внаѧ рꙋ́сь во днѝ разоре́нїѧ и҆ мѧте́жа лю́тагѡ, си́лою же слове́съ твои́хъ, ст҃и́телю, ѡ҆роша́ема и҆ до дне́сь пое́тъ правосла́внѡ: ѻ҆тцє́въ и҆ на́съ бж҃е, бл҃гослове́нъ є҆сѝ.
Гла́съ въ собо́рѣ ᲂу҆спе́нїѧ пречⷭ҇тыѧ слы́шанъ бы́сть: пока́йтесѧ ѡ҆ ѕло́бѣ ва́шей, вразѝ царю̀ правосла́вномꙋ и҆ бг҃ови, и҆́бо бг҃омъ вѣнча́нъ є҆́сть на ца́рство и҆ бг҃омъ ца́рствꙋетъ во ᲂу҆твержде́нїе хрⷭ҇то́вы пра́вды, пою́ще гдⷭ҇еви: ѻ҆тцє́въ бж҃е, бл҃гослове́нъ є҆сѝ.
Ѻ҆те́цъ всеѧ̀ рꙋ́си въ дни̑ ско́рби и҆ ѡ҆бстоѧ́нїй ꙗ҆ви́лсѧ ст҃и́тель бж҃їй є҆рмоге́нъ: сегѡ̀ ра́ди призыва́йте є҆го̀ и҆ по́йте съ ни́мъ и҆́мени всевы́шнѧгѡ: ѻ҆тцє́въ и҆ на́съ бж҃е бл҃гослове́нъ є҆сѝ.
Моли́тесѧ и҆ пости́тесѧ и҆ и҆змѣни́тесѧ въ но́вагѡ человѣ́ка, ѡ҆дѣ́ѧна въ добродѣ́тєли бг҃олю́бїѧ и҆ бл҃гоче́стїѧ, да пода́стъ всѣ̑мъ на́мъ гдⷭ҇ь ми́ръ и҆ любо́вь, землѝ на́шей крѣ́пкое є҆дине́нїе, странѣ̀ побѣ́дꙋ на врагѝ и҆ ѡ҆долѣ́нїе.
Любо́вїю къ царю̀ согрѣва́ѧйсѧ и҆ ре́вностїю по вѣ́рѣ па́че ѻ҆гнѧ̀ разгора́ѧйсѧ, попалѧ́лъ є҆сѝ, ст҃и́телю, (с. 475) тє́рнїѧ грѣхолюби́вагѡ мѧте́жа, ѡ҆бновлѧ́ѧ и҆ ᲂу҆твержда́ѧ ѡ҆бветша́вшее ца́рство.
Ю҆нцы̀ тꙋ́чнїи: самозва́нцы мѧте́жнїи, ца́рїе и҆нозе́мнїи и҆ и҆змѣ̑нницы нечести́вїи ѡ҆держа́ша рꙋ́сь, пред̾ лице́мъ же твоеѧ̀ пра́вды, ст҃и́телю, и҆счезо́ша ꙗ҆́кѡ ды́мъ ѿ ѻ҆гнѧ̀, да весели́тсѧ правосла́внаѧ рꙋ́сь ѡ҆ гдⷭ҇ѣ и҆ да торжествꙋ́етъ правосла́вїе.
Бг҃ови рабѡ́тницы и҆ тебѣ̀ помѡ́щницы бы́ша ст҃и́тели хрⷭ҇тѡ́вы: фїларе́тъ рѡсто́вскїй, є҆фре́мъ каза́нскїй, ѳеокті́стъ тверскі́й и҆ галактїѡ́нъ сꙋ́здальскїй, и҆́миже во всю̀ зе́млю и҆зы́де сло́во твоѐ, є҆рмоге́не ст҃и́телю, и҆ въ концы̀ рꙋ́си вѣща́нїе твоѐ.
Бг҃оро́диченъ:
И҆̀же въ напа́стехъ и҆ въ ско́рбехъ, и҆ въ болѣ́знехъ ѡ҆бремене́ннїи грѣхѝ мно́гими, прїиди́те къ застꙋ́пницѣ ᲂу҆се́рднѣй, мт҃ри гдⷭ҇а вы́шнѧгѡ: та́ бо и҆сцѣли́тъ вы̀ и҆ ᲂу҆тѣ́шитъ и҆ ᲂу҆поко́итъ.
Пѣ́снь и҃.
І҆рмо́съ: Бг҃оглаго́ливїи ѻ҆́троцы въ пещѝ, со ѻ҆гне́мъ пла́мень попира́юще, поѧ́хꙋ: бл҃гослови́те, дѣла̀ гдⷭ҇нѧ, гдⷭ҇а.
Ми́лѡстыни мнѡ́ги твори́лъ є҆сѝ лю́демъ, ст҃и́телю, є҆гда̀ бога́тїи ѡ҆бнища́ша ми́лостїю и҆ сребролю́бїѧ ра́ди не внима́хꙋ є҆́же помощѝ неимꙋ́щымъ: ты́ же ре́клъ є҆сѝ ке́ларю се́ргїевой ѡ҆би́тели а҆враа́мїю, и҆ жи̑тницы ѿверзо́шасѧ и҆ а҆́лчꙋщїи насы́тишасѧ и҆ бл҃гослови́ша гдⷭ҇а.
А҆́ще и҆ пѣ́нитсѧ жите́йское мо́ре, а҆́ще и҆ бѣснꙋ́етсѧ воздвиза́емо напа́стей бꙋ́рею, не потопи́ти є҆мꙋ̀ кораблѧ̀ і҆и҃сова: на ка́мени бо вѣ́ры и҆ пра́вды стои́мъ. (с. 476) та́кѡ ре́клъ є҆сѝ, ст҃и́телю, и҆ бы́сть та́кѡ, и҆ сѐ, торжествꙋ́ютъ правосла́внїи и҆ бл҃гословѧ́тъ гдⷭ҇а.
Ꙗ҆́кѡ до́брый ко́рмчїй, приве́лъ є҆сѝ, ст҃и́телю, кора́бль рѡссі́йскїѧ держа́вы къ ти́хой при́стани правосла́вныѧ цр҃кве: и҆ сѐ, страна̀ на́ша ѡ҆солѧ́етсѧ бл҃года́тїю ст҃а́гѡ дх҃а и҆ бл҃гословлѧ́етъ гдⷭ҇а.
Ре́клъ є҆сѝ, ст҃и́телю, боѧ́щымсѧ гдⷭ҇а: не бо́йсѧ, ма́лое ста́до, ꙗ҆́кѡ бл҃гоизво́лилъ є҆́сть ѻ҆ц҃ъ нбⷭ҇ный дарова́ти на́мъ ца́рство. та́кѡ вѣ́ровалъ є҆сѝ и҆ та́кѡ по вѣ́рѣ воспрїѧ́лъ є҆сѝ. и҆ сѐ, ст҃а́ѧ цр҃ковь ра́дꙋетсѧ ѡ҆ правосла́вїи страны̀ на́шеѧ и҆ благословлѧ́етъ гдⷭ҇а.
Оу҆ничижи́ша тѧ̀ возстаю́щїи на тѧ̀, мета́юще пра́хъ и҆ песо́къ въ лицѐ твоѐ, да ѿрече́шисѧ ѿ бж҃їѧ пома́занника, ты́ же всѧ̑ претерпѣ́лъ є҆сѝ пра́вды ра́ди, бл҃гословлѧ́ѧ гдⷭ҇а.
Ст҃а́ѧ и҆ бг҃омъ люби́маѧ рꙋ́сь не поги́бнетъ, ре́клъ є҆сѝ, ст҃и́телю, и҆змѣ́нникѡмъ и҆ преда́телємъ и҆ всѣ̑мъ врагѡ́мъ на́шымъ: всꙋ́е трꙋжда́етесѧ, а҆́ще не гдⷭ҇ь созида́етъ, пока́йтесѧ и҆ бл҃гослови́те гдⷭ҇а.
Не вѣ́даемъ, ка́кѡ и҆ нарещѝ ва́съ, ре́клъ є҆сѝ, ст҃и́телю, мѧте́жникѡмъ и҆ и҆змѣ́нникѡмъ: ѿстꙋпи́ли бо є҆стѐ ѿ бг҃а, ѿпа́ли ѿ собо́рныѧ и҆ а҆пⷭ҇льскїѧ цр҃кве, ѿстꙋпи́ли ѿ бг҃омъ и҆ ст҃ы́мъ є҆ле́емъ пома́заннагѡ царѧ̀, забы́ли є҆стѐ ѡ҆бѣ́ты правосла́вныѧ вѣ́ры на́шеѧ: стоѧ́ти до сме́рти за до́мъ прест҃ы́ѧ бцⷣы и҆ за ца́рство правосла́вное. пока́йтесѧ и҆ ѡ҆брати́тесѧ и҆ бл҃гослови́те гдⷭ҇а.
Бг҃оро́диченъ:
Є҆́же ѡ҆ на́съ и҆спо́лнивъ смотре́нїе бж҃їе и҆ ꙗ҆̀же на землѝ соедини́въ небє́снымъ, носи́ла є҆сѝ во чре́вѣ ѿ (с. 477) дх҃а ст҃а, пренепоро́чнаѧ, и҆ родила̀ є҆сѝ на́мъ всѣ́хъ бг҃а, є҆го́же всѧ̑ дѣла̀ гдⷭ҇нѧ пою́тъ и҆ превозно́сѧтъ во всѧ̑ вѣ́ки.
Пѣ́снь ѳ҃.
І҆рмо́съ: Вои́стинꙋ бцⷣꙋ тѧ̀ и҆сповѣ́дꙋемъ, сп҃се́нїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.
Пречⷭ҇тѣй влⷣчцѣ ввѣ́рилъ є҆сѝ, ст҃и́телю, правосла́вное во́инство, и҆ стоѧ́ти за вѣ́рꙋ неподви́жнѡ да́же до сме́рти бл҃гослови́лъ є҆сѝ, и҆ боѧ́тисѧ є҆ди́нагѡ на нб҃сѣ́хъ живꙋ́щагѡ наꙋчи́лъ є҆сѝ. сегѡ̀ ра́ди со и҆сповѣ́дники правосла́вныѧ пра́вды ра́дꙋешисѧ.
Ѡ҆каѧ̑нныѧ и҆змѣ́нники а҆наѳема́тствовалъ є҆сѝ, правосла̑внымъ же во́инѡмъ и҆ всѣ̑мъ ревни́телємъ правосла́внагѡ ца́рства млⷭ҇ть ѿ гдⷭ҇а бг҃а и҆ ѿ своегѡ̀ смире́нїѧ бл҃гослове́нїе препода́лъ є҆сѝ, ст҃и́телю, и҆́мже бы́сть побѣ́да и҆ ѡ҆долѣ́нїе на врагѝ и҆ всеѧ̀ рꙋ́си сп҃се́нїе, тебѣ́ же вѣне́цъ ѿ бг҃а, ꙗ҆́кѡ строи́телю ст҃ы́ѧ жи́зни.
Гла́съ ѻ҆́гненныѧ ре́вности ѡ҆ сп҃се́нїи ѻ҆те́чества не вѧ́жетсѧ, а҆́ще и҆ заключа́етсѧ во хра́минѣ пꙋ́стѣ, ꙗ҆́кѡ во гро́бѣ: сегѡ̀ ра́ди и҆ заповѣ́далъ є҆сѝ ᲂу҆ченикꙋ̀ твоемꙋ̀ дїѡнѵ́сїю и҆гꙋ́менꙋ и҆ и҆́нокѡмъ ѡ҆би́тели ст҃а́гѡ се́ргїа ѡ҆гласи́ти всю̀ рꙋ́сь правосла́внꙋю, да воздви́жетсѧ сп҃си́тельнаѧ бра́нь во сла́вꙋ ст҃ы́ѧ цр҃кве и҆ во ᲂу҆твержде́нїе держа́вы рѡссі́йскїѧ, ю҆́же возлюби́лъ є҆сѝ и҆ ѡ҆ не́йже мо́лишисѧ бг҃ꙋ.
И҆ первопресто́льникъ а҆пⷭ҇льскїѧ цр҃кве, и҆ и҆сповѣ́дникъ правосла́вныѧ вѣ́ры, и҆ вторы́й златоꙋ́стъ во ѡ҆бличе́нїе грѣхолюби́выхъ и҆ мѧте́жныхъ, и҆ (с. 478) строи́тель правосла́внагѡ ца́рства бы́лъ є҆сѝ, ст҃и́телю, и҆ за сїѐ произволе́нїе темни́цею и҆ гла́домъ мꙋ́чимъ бы́лъ є҆сѝ и҆ прїѧ́въ ѿ бг҃а неꙋвѧда́емый вѣне́цъ, съ мч҃нки весели́шисѧ.
Бг҃ꙋ на́шемꙋ тобо́ю сла́ва, тебѣ́ же, сщ҃енномч҃нче є҆рмоге́не, довлѣ́етъ ра́доватисѧ во свѣ́тѣ лица̀ є҆гѡ̀ и҆ непреста́ннѡ моли́тисѧ, да не поги́бнетъ рꙋ́сь ст҃а́ѧ, но да бꙋ́детъ да́же до конца̀ свѣ́тъ во ѿкрове́нїе ꙗ҆зы́кѡмъ правосла́вныѧ пра́вды.
Ни́щь и҆ болѧ́й є҆́смь а҆́зъ, ст҃и́телю, и҆ во смире́нїи свое́мъ припа́даю къ цѣльбоно́снѣй ра́цѣ твое́й, и҆сцѣле́нїѧ тре́бꙋѧ.
Є҆го́же возлюби́лъ є҆сѝ, є҆мꙋ́же дꙋ́шꙋ свою̀ пре́далъ є҆сѝ и҆ ны́нѣ предстои́ши со дерзнове́нїемъ ꙗ҆́кѡ мч҃нкъ: молѝ бг҃а ѡ҆ на́съ, ст҃ы́й сщ҃енномч҃нче є҆рмоге́не.
Бг҃оро́диченъ:
Тѧ̀ и҆сповѣ́дꙋемъ, ꙗ҆́кѡ мт҃рь гдⷭ҇а вы́шнѧгѡ, и҆ невозвра́тнꙋ наде́ждꙋ и҆мꙋ́ще на тѧ̀, мо́лимсѧ тебѣ̀ ᲂу҆миле́нною дꙋше́ю и҆ сокрꙋше́ннымъ се́рдцемъ: всѣ́мъ полє́знаѧ да́рꙋй, и҆ всѧ̑ сп҃сѝ, бцⷣе дв҃о, ты́ бо є҆сѝ бжⷭ҇твенный покро́въ рабѡ́мъ твои̑мъ.
Свѣти́ленъ. Подо́бенъ: Жєны̀, ᲂу҆слы́шите:
Во свѣ́тѣ правосла́вїѧ, є҆гѡ́же ревни́тель бы́лъ є҆сѝ, ст҃и́телю є҆рмоге́не, зри́мъ свѣ́тъ и҆́стины, въ не́мже полнота̀ дарова́нїй дх҃а, ра́дꙋемсѧ ѡ҆ гдⷭ҇ѣ и҆ велича́емъ ѡ҆зари́вшаго тѧ̀ свѣ́томъ присноживо́тнымъ. (с. 479)
Сла́ва, и҆ ны́нѣ, бг҃оро́диченъ:
Мт҃рь незаходи́магѡ свѣ́та, ѡ҆сїѧва́ющꙋ рꙋ́сь покро́вомъ мт҃рнѧгѡ застꙋпле́нїѧ, пѣ́сньми велича́емъ, ꙗ҆́кѡ свѣтлѣ́йшꙋю го́рнихъ во́инствъ.
На хвали́техъ стїхи̑ры на ѕ҃, гла́съ з҃.
Сотвори́те въ пѣ́снехъ сꙋ́дъ напи́санъ: сла́ва сїѧ̀ бꙋ́детъ вели́комꙋ є҆рмоге́нꙋ: то́й бо є҆́сть правосла́вїѧ ревни́тель и҆ всеѧ̀ рꙋ́си храни́тель, ꙗ҆́кѡ ѻ҆ре́лъ птенцы̀ своѧ̑ покрыва́ѧй.
Хвали́те бг҃а во ст҃ѣ́мъ є҆гѡ̀: то́й бо возвели́чилъ є҆́сть є҆го̀ и҆ во всѣ́хъ дѣ́лѣхъ є҆гѡ̀ ѡ҆правда́лъ є҆́сть є҆го̀ ᲂу҆твержде́нїемъ си́лы є҆гѡ̀.
Хвали́те ст҃а́го въ си́лѣ є҆гѡ̀: всѧ̑ бо мо́жетъ ѡ҆ ᲂу҆крѣплѧ́ющемъ і҆и҃сѣ. хвали́те є҆го̀ по мно́жествꙋ чꙋде́съ є҆гѡ̀: всѧ̑ бо недꙋ̑жныѧ и҆сцѣлѧ́етъ ѡ҆ и҆́мени гдⷭ҇немъ.
Хвали́те ст҃а́го во ѱалмѣ́хъ и҆ пѣ́снехъ, хвали́те є҆го̀ въ пѣ́нїихъ дꙋхо́вныхъ, велича́йте сла́вꙋ ѻ҆тє́цъ на́шихъ, воспѣва́йте ᲂу҆твержде́нїе землѝ на́шеѧ, ра́дꙋйтесѧ ѡ҆ не́мъ и҆ весели́тесѧ.
Хвали́те ст҃а́го въ собо́рѣ ѡ҆сщ҃е́нныхъ, похвали́те є҆го̀, всѝ лю́дїе: то́й бо є҆́сть красота̀ цр҃ко́внаѧ, то́й бо є҆́сть добро́та наро́днаѧ, то́й бо є҆́сть ра́дость на́ша.
Хвали́те ст҃а́го во ст҃и́телехъ, похвали́те є҆го̀ во ст҃ѣ́йшихъ патрїа́рсѣхъ, ᲂу҆бл҃жи́те є҆го̀ во и҆сповѣ́дницѣхъ и҆ просла́вите є҆го̀ во сщ҃енномч҃нцѣхъ. хвали́те є҆го̀ во всѣ́хъ дѣ́лѣхъ є҆гѡ̀. (с. 480)
Сла́ва, гла́съ то́йже.
Прїиди́те, ᲂу҆бл҃жи́мъ па́стырѧ до́браго землѝ на́шеѧ, за вѣ́рꙋ рꙋ́си всѧ̑ претерпѣ́вшаго, и҆ за правосла́вїе ца́рства дꙋ́шꙋ свою̀ положи́вшаго, и҆ ны́нѣ млⷭ҇тїю бж҃їею чꙋдотво́рца, ꙗ҆вле́ннаго во ᲂу҆твержде́нїе вѣ́ры немощствꙋ́ющихъ, и҆ во и҆сцѣле́нїе всѣ́хъ недꙋ́гꙋющихъ, и҆ во ᲂу҆покое́нїе ѡ҆ѕло́бленныхъ грѣхѝ мно́гими, да всѝ возра́дꙋемсѧ и҆ да пое́мъ є҆мꙋ̀: ра́дꙋйсѧ, любы̀, на́съ согрѣва́ющаѧ. ра́дꙋйсѧ, си́ло, на́съ и҆сцѣлѧ́ющаѧ. ра́дꙋйсѧ, ра́зꙋме, всѣ́хъ просвѣща́ѧй. ра́дꙋйсѧ, стра́же, правосла́вїе на́ше ѡ҆хранѧ́ѧй. ра́дꙋйсѧ, ст҃и́телю є҆рмоге́не.
И҆ ны́нѣ, бг҃оро́диченъ, гла́съ то́йже:
Прїиди́те восхва́лимъ прехва́льнꙋю, сла́внѣйшꙋю всѣ́хъ земноро́дныхъ и҆ чⷭ҇тнѣ́йшꙋю нбⷭ҇ныхъ во́инствъ мт҃рь гдⷭ҇а вы́шнѧгѡ, застꙋ́пницꙋ ᲂу҆се́рднꙋю.
Славосло́вїе вели́кое: И҆ ѿпꙋ́стъ. Дае́тсѧ же и҆ є҆ле́й бра́тїи ѿ канди́ла ст҃а́гѡ, и҆ ча́съ а҃-й.
На лїтꙋргі́и: Бл҃жє́нна ѿ канѡ́на ст҃а́гѡ, пѣ̑сни г҃-ѧ и҆ ѕ҃-ѧ. Прокі́менъ, гла́съ з҃. Возвесели́тсѧ првⷣникъ ѡ҆ гдⷭ҇ѣ и҆ ᲂу҆пова́етъ на него̀. Сті́хъ: Оу҆слы́ши, бж҃е, гла́съ мо́й. А҆пⷭ҇толъ къ є҆вре́ємъ, зача́ло тл҃є. А҆ллилꙋ́їа, гла́съ д҃: Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ. Є҆ѵⷢ҇лїе і҆ѡа́нна, зача́ло л҃ѕ. Прича́стенъ: Въ па́мѧть вѣ́чнꙋю.