Мѣ́сѧца тогѡ́же въ є҃-й де́нь. Ст҃ы́ѧ мꙋ́ченицы а҆га́ѳїи.
И҆ ст҃и́телѧ ѳеодо́сїѧ черни́говскагѡ. Слꙋ́жба є҆гѡ̀ пи́сана септе́мбрїа ѳ҃ днѝ.
И҆ пра́зднованїе прест҃ѣ́й бцⷣѣ, въ че́сть і҆кѡ́ны є҆ѧ̀ взыска́нїе поги́бшихъ. Слꙋ́жба сїѧ̀ пи́сана въ приложе́нїи.
На Гдⷭ҇и, воззва́хъ, стїхи̑ры пра́здника г҃, и҆ мꙋ́ченицы г҃.
Стїхи̑ры пра́здника, гла́съ а҃. Подо́бенъ: Нбⷭ҇ныхъ чинѡ́въ:
Бг҃оѧвле́нїѧ неизрече́ннагѡ ꙳ ны́нѣ пра́зднꙋемъ спаси́тельнꙋю бл҃года́ть: ꙳ ѿ дв҃ы бо ѻ҆трокови́цы непрело́жнѡ младе́нствовавъ хрⷭ҇то́съ бг҃ъ, ꙳ въ цр҃ковь бг҃ꙋ и҆ ѻ҆ц҃ꙋ̀ ꙳ мт҃рїю ны́нѣ прино́ситсѧ, ꙳ є҆го́же прїи́мъ сѷмеѡ́нъ рꙋка́ми ѡ҆б̾ѧ́тъ.
Во проро́цѣхъ ви́дѣнъ бы́лъ є҆сѝ, ꙳ ꙗ҆́коже мо́щно бѧ́ше, і҆и҃се, тебѐ ви́дѣти дре́вле: ꙳ но ны́нѣ, бж҃їй сло́ве, пло́тїю всемꙋ̀ мі́рꙋ ꙗ҆ви́лсѧ є҆сѝ во́лею, ꙳ ѿ дв҃ы мр҃і́и, хрⷭ҇тѐ, твоѐ спасе́нїе всѣ̑мъ сꙋ́щымъ ѿ а҆да́ма ꙗ҆ви́лъ є҆сѝ, ꙳ ꙗ҆́кѡ человѣколю́бецъ.
На сїна́йстѣй горѣ̀ зако́нъ ᲂу҆чини́вый дре́вле, ꙳ ны́нѣ въ сїѡ́нѣ гра́дѣ и҆сполнѧ́ѧ закѡ́ннаѧ, ꙳ рꙋка́ми бцⷣы, ꙳ младе́нецъ, хрⷭ҇тѐ, со всесожжє́нїи, ꙳ на рꙋка́хъ сѷмеѡ́на ꙳ во хра́мъ внести́сѧ восхотѣ́лъ є҆сѝ пло́тїю.
И҆́ны стїхи̑ры ст҃ы́ѧ, гла́съ д҃. Подо́бенъ: Да́лъ є҆сѝ зна́менїе:
Нетлѣ́ннѡ соблюла̀ є҆сѝ тѣ́ло ꙳ хрⷭ҇тꙋ̀ женихꙋ̀ твоемꙋ̀, ꙳ дѣ́вства добро́тами, ꙳ а҆га́ѳїе бг҃оневѣ́сто, ᲂу҆кра́шена, ꙳ и҆ просвѣще́на мꙋ́ченическими блиста́ньми, ꙳ и҆ въ черто́гъ бжⷭ҇твенный вмѣсти́ласѧ є҆сѝ. ꙳ тѣ́мже твоѐ всемі́рное соверша́емъ торжество̀, ꙳ сп҃са сла́вѧще, ꙳ при́снѡ тѧ̀ сла́вѧщаго.
Сосцє́въ ѿрѣ́занїе, ꙳ и҆ ѻ҆гнѧ̀ ѡ҆пале́нїе, ꙳ и҆ строга̑нїѧ тѣлесѐ претерпѣ́ла є҆сѝ, сла́внаѧ, ꙳ вѣ̑чнꙋющаѧ ѻ҆чи́ма (с. 114) серде́чныма смотрѧ́ѧ воздаѧ̑нїѧ, ꙳ и҆ ѿѻнꙋ́дное блаже́нство, ꙳ и҆ вѣне́цъ неꙋвѧда́емый, ꙳ є҆́же тебѣ̀ хрⷭ҇то́съ ны́нѣ дарова̀, ꙳ за него́же пострада́вши, ꙳ стрⷭ҇тоте́рпице многострада́льнаѧ.
Стремле́нїе неꙋде́ржное ꙳ ѻ҆гнѧ̀ свирѣ́пагѡ ᲂу҆ста́вила є҆сѝ, ꙳ моли́твами твои́ми, благоимени́таѧ, ꙳ и҆ гра́дъ спасла̀ є҆сѝ, ꙳ честны̑ѧ твоѧ̑, мꙋ́ченице, мо́щи чтꙋ́щїй: ꙳ ѿ ни́хже ѡ҆б̾е́млетъ рѣ́ки и҆сцѣле́нїй, ꙳ бжⷭ҇твеннымъ дх҃омъ. ꙳ въ се́мъ бо пострада́вши, врага̀ смири́ла є҆сѝ, ꙳ и҆ побѣ́ды вѣне́цъ прїѧ́ла є҆сѝ, всехва́льнаѧ.
А҆́ще є҆́сть по́стъ, Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: пи̑саны въ к҃и де́нь. А҆́ще ли нѣ́сть поста̀, пое́мъ самогла́сенъ ст҃ы́ѧ.
Сла́ва гла́съ и҃. сѷкеѡ́та:
Пресла́вно чꙋ́до бы́сть во страда́нїи всесла́вныѧ а҆га́ѳїи, и҆ мꙋ́ченицы хрⷭ҇та̀ бг҃а, подо́бно мѡѷсе́ови. ѻ҆́нъ бо лю́демъ законополага́ѧ, на горѣ̀ напи̑сана на скрижа́лехъ бг҃оначерта̑ннаѧ пи́сьмєна прїѧ́тъ: здѣ́ же а҆́гг҃лъ съ нб҃сѐ, на гро́бъ скрижа́ль принесѐ напи́санꙋ, ᲂу҆́мъ преподо́бенъ самоизво́ленъ, че́сть ѿ бг҃а и҆ ѻ҆те́чествꙋ и҆збавле́нїе.
И҆ ны́нѣ, пра́здника, гла́съ то́йже. А҆ндре́а кри́тскагѡ:
И҆́же на херꙋві́мѣхъ носи́мый и҆ пѣва́емый ѿ серафі̑мъ, дне́сь въ бжⷭ҇твенное ст҃и́лище по зако́нꙋ приноси́мь, на ста́рческихъ, ꙗ҆́кѡ на престо́лѣ, сѣди́тъ рꙋка́хъ, и҆ ѿ і҆ѡ́сифа прїе́млетъ да́ры бг҃олѣ́пнѡ, ꙗ҆́кѡ сꙋпрꙋ́гъ го́рличищъ, нескве́рнꙋю цр҃ковь, и҆ ѿ ꙗ҆зы̑къ новоизбра̑нныѧ лю́ди: голꙋби̑на же два̀ птенца̑, ꙗ҆́кѡ нача́льникъ ве́тхагѡ же и҆ но́вагѡ, є҆́же къ немꙋ̀ ѡ҆бѣща́нїѧ, сѷмеѡ́нъ коне́цъ прїе́мъ, благосло́вѧ дв҃ꙋ мр҃і́ю бцⷣꙋ, страсте́й ѻ҆́бразы и҆́же и҆зъ неѧ̀ провозгласѝ, и҆ ѿ негѡ̀ проша́ше ѿпꙋще́нїѧ, вопїѧ̀: ны́нѣ ѿпꙋсти́ мѧ, влⷣко, ꙗ҆́коже пре́жде возвѣсти́ ми: ꙗ҆́кѡ ви́дѣхъ тѧ̀ первовѣ́чнаго свѣ́та, и҆ сп҃са гдⷭ҇а, хрⷭ҇тоимени̑тымъ лю́демъ. (с. 115)
На стїхо́внѣ стїхи̑ры, гла́съ ѕ҃. Подо́бенъ: Тридне́венъ:
Воспрїимѝ, речѐ, сѷмеѡ́не, зижди́телѧ всѧ́ческихъ рꙋка́ми. ѽ ста́рче! под̾имѝ хрⷭ҇та̀, є҆го́же дв҃а ѻ҆трокови́ца родѝ безсѣ́меннѡ, на ра́дость ро́да на́шегѡ.
Сті́хъ: Ны́нѣ ѿпꙋща́еши раба̀ твоего̀, влⷣко, по глаго́лꙋ твоемꙋ̀, съ ми́ромъ.
Зако́нꙋ творца̀ и҆ бг҃а, є҆гѡ́же трепе́щꙋтъ а҆́гг҃льскаѧ мно́жєства, соше́дшесѧ воспои́мъ, лю́дїе, є҆ди́наго бл҃годѣ́телѧ и҆ зако́на законода́телѧ, во спасе́нїе дꙋ́шъ на́шихъ.
Сті́хъ: Свѣ́тъ во ѿкрове́нїе ꙗ҆зы́кѡвъ, и҆ сла́вꙋ люде́й твои́хъ і҆и҃лѧ.
Ны́нѣ ѿпꙋща́еши, влⷣко, раба̀ твоего̀, ꙗ҆́коже ре́клъ є҆сѝ, съ ми́ромъ, ꙗ҆́кѡ ви́дѣхъ тѧ̀, хрⷭ҇тѐ, свѣ́та первовѣ́чнаго, соꙋ̑зъ мѧ̀ плотски́хъ, во ѿкрове́нїе ꙗ҆зы́кѡвъ и҆ і҆и҃лю.
Сла́ва, и҆ ны́нѣ, гла́съ в҃. а҆ндре́а пѵ́рра:
Є҆мꙋ́же вы́шнїи слꙋжи́телїе съ тре́петомъ мо́лѧтсѧ, до́лꙋ ны́нѣ сѷмеѡ́нъ ве́щными рꙋка́ми прїе́мъ, бг҃а человѣ́кѡмъ соедини́тисѧ проповѣ́да, и҆ чл҃вѣ́ка нбⷭ҇на бг҃а ви́дѧй, ѿлꙋча́ѧсѧ сꙋ́щихъ на землѝ ра́достнѡ взыва́ше: и҆́же во тмѣ̀ сꙋ́щымъ невече́рнїй свѣ́тъ ѿкрыва́ѧй, гдⷭ҇и, сла́ва тебѣ̀.
Тропа́рь ст҃ы́ѧ, гла́съ д҃:
А҆́гница твоѧ̀, і҆и҃се, а҆га́ѳїа зове́тъ ве́лїимъ гла́сомъ: тебѐ, женишѐ мо́й, люблю̀, и҆ тебѐ и҆́щꙋщи страда́льчествꙋю, и҆ сраспина́юсѧ, и҆ спогреба́юсѧ кр҃ще́нїю твоемꙋ̀, и҆ страждꙋ̀ тебє̀ ра́ди, ꙗ҆́кѡ да ца́рствꙋю въ тебѣ̀. и҆ ᲂу҆мира́ю за тѧ̀, да и҆ живꙋ̀ съ тобо́ю: но ꙗ҆́кѡ же́ртвꙋ непоро́чнꙋю, прїими́ мѧ съ любо́вїю поже́ршꙋюсѧ тебѣ̀. тоѧ̀ моли́твами, ꙗ҆́кѡ ми́лостивъ, спасѝ дꙋ́шы на́шѧ.
Сла́ва, и҆ ны́нѣ, пра́здника, гла́съ а҃.
Ра́дꙋйсѧ, бл҃года́тнаѧ бцⷣе дв҃о, и҆зъ тебє́ бо возсїѧ̀ сл҃нце пра́вды хрⷭ҇то́съ бг҃ъ на́шъ, просвѣща́ѧй сꙋ́щыѧ во тмѣ̀: (с. 116) весели́сѧ и҆ ты̀, ста́рче пра́ведный, прїе́мый во ѡ҆б̾ѧ̑тїѧ свободи́телѧ дꙋ́шъ на́шихъ, да́рꙋющаго на́мъ воскресе́нїе.
На ᲂу҆́трени, по а҃-й стїхоло́гїи сѣда́ленъ, гла́съ а҃. Самоподо́бенъ:
Ли́къ а҆́гг҃льскїй да ᲂу҆диви́тсѧ чꙋдесѝ: земні́и же гла́сы возопїе́мъ пѣ́нїе, зрѧ́ще неизрече́нное бж҃їе снисхожде́нїе. є҆го́же бо трепе́щꙋтъ нбⷭ҇ныѧ си̑лы, ны́нѣ ста̑рчи ѡ҆б̾е́млютъ рꙋ́цѣ є҆ди́наго чл҃вѣколю́бца.
Сла́ва, и҆ ны́нѣ, то́йже.
По в҃-й стїхоло́гїи сѣда́ленъ, гла́съ и҃. Поⷣ: Свирѣ́лей па́стырскихъ:
Роди́лсѧ є҆сѝ на землѝ, собезнача́льный ѻ҆ц҃ꙋ̀, прине́слсѧ є҆сѝ въ це́рковь, непостижи́мый: ра́дꙋѧсѧ же ста́рецъ на рꙋ́ки тѧ̀ воспрїѧ́тъ, зовы́й: ны́нѣ ѿпꙋща́еши, є҆го́же посѣти́лъ є҆сѝ, по глаго́лꙋ твоемꙋ̀, благоизво́ливый спастѝ ꙗ҆́кѡ бг҃ъ ро́дъ человѣ́ческїй.
Сла́ва, и҆ ны́нѣ, то́йже.
Канѡ́нъ пра́здника, на и҃: и҆ ст҃ы́ѧ на д҃. Канѡ́нъ пра́здника.
Гла́съ г҃. Пѣ́снь а҃. І҆рмо́съ:
Сꙋ́шꙋ глꙋбороди́тельнꙋю зе́млю со́лнце наше́ствова и҆ногда̀, ꙗ҆́кѡ стѣна́ бо ѡ҆гꙋстѣ̀ ѻ҆бапо́лы вода̀, лю́демъ пѣшомореходѧ́щымъ, и҆ бг҃оꙋго́днѡ пою́щымъ: пои́мъ гдⷭ҇еви, сла́внѡ бо просла́висѧ.
Да ка́плютъ во́дꙋ ѻ҆́блацы, со́лнце бо на ѻ҆́блацѣ ле́гцѣ носи́мо наста́ло є҆́сть на нетлѣ́ннꙋю рꙋкꙋ̀, хрⷭ҇то́съ въ це́ркви, ꙗ҆́кѡ младе́нецъ. тѣ́мже, вѣ́рнїи, возопїе́мъ: пои́мъ гдⷭ҇еви, сла́внѡ бо просла́висѧ.
Крѣпи́тесѧ, рꙋ́цѣ сѷмеѡ́ни, ста́ростїю ѡ҆сла́бленнїи, лы́ста же претрꙋждє́нна ста̑рча, пра́вѡ быстрѡ̀ движи́тасѧ хрⷭ҇тꙋ̀ на срѣ́тенїе, ли́къ со безпло́тными соста́вльше: пои́мъ гдⷭ҇еви, сла́внѡ бо просла́висѧ.
Ра́зꙋмомъ просте́ртаѧ нб҃са̀ весели́тесѧ, и҆ ра́дꙋйсѧ, землѐ: и҆зъ пребжⷭ҇твенныхъ бо нѣ́дръ хитре́цъ проше́дъ хрⷭ҇то́съ, мт҃рїю дв҃ою бг҃ꙋ ѻ҆ц҃ꙋ̀ прино́ситсѧ, младе́нецъ, и҆́же пре́жде всѣ́хъ: сла́внѡ бо просла́висѧ. (с. 117)
Канѡ́нъ ст҃ы́ѧ, є҆гѡ́же краегране́сїе:
Благꙋ́ю благи́ми воспои́мъ пѣ́сньми. Ѳеофа́ново:
Гла́съ в҃. Пѣ́снь а҃. І҆рмо́съ:
Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.
Благи́хъ пе́рвꙋю винꙋ̀ возжела́вши, благоимени́тагѡ зва́нїѧ, мꙋ́ченице, сподо́биласѧ є҆сѝ, несказа́ннагѡ промышле́нїѧ, нра́вѡвъ твои́хъ проразꙋмѣ́вши благосты́ню.
Взѧла́сѧ є҆сѝ, чⷭ҇таѧ, къ житїю̀ пресвѣ́тломꙋ, плотско́е мꙋдрова́нїе презрѣ́вши, и҆ къ жела́ннѣйшемꙋ женихꙋ̀ твоемꙋ̀ крѣ́пкѡ взира́ющи.
Невѣ́ста хрⷭ҇то́ва бжⷭ҇твенною бла́гостїю ᲂу҆краси́ласѧ є҆сѝ, и҆ дѣ́вства добро́тами, и҆ бжⷭ҇твенными кровьмѝ честна́гѡ мꙋче́нїѧ сꙋгꙋ́быми вѣнцы̀ вѣнча́ема, сла́внаѧ.
Бг҃оро́диченъ:
Бг҃олѣ́пное селе́нїе, чⷭ҇таѧ, ты̀ была̀ є҆сѝ, нб҃съ простра́ннѣйшее и҆ чистѣ́йшее, бцⷣе дв҃о: и҆ ны́нѣ ѡ҆ тебѣ̀ ра́дꙋетсѧ дѣ́вственный ли́къ.
Пѣ́снь г҃. І҆рмо́съ:
Оу҆твержде́нїе на тѧ̀ надѣ́ющихсѧ, ᲂу҆твердѝ, гдⷭ҇и, цр҃ковь, ю҆́же стѧжа́лъ є҆сѝ честно́ю твое́ю кро́вїю.
Перворожде́нъ и҆зъ ѻ҆ц҃а̀ пре́жде вѣ̑къ, перворожде́нъ младе́нецъ и҆з̾ дв҃ы нетлѣ́нныѧ, а҆да́мꙋ рꙋ́кꙋ простира́ѧ ꙗ҆ви́сѧ.
Младоꙋ́мна бы́вша пре́лестїю первозда́ннаго, па́ки и҆справлѧ́ѧй бг҃ъ сло́во, младе́нствовавъ ꙗ҆ви́сѧ.
Землѝ и҆сча́дїе, па́ки поте́кшее въ ню̀, бж҃ества̀ соѻбра́зное є҆стество̀ зижди́тель, ꙗ҆́кѡ непрело́жнѣ младе́нствовавъ, ꙗ҆вѝ.
И҆́нъ. І҆рмо́съ:
Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, и҆ стра́хъ твоѝ всадѝ въ сердца̀ на́съ пою́щихъ тѧ̀.
А҆га́ѳїе, ꙗ҆́сный и҆ краснѣ́йшїй бжⷭ҇твенныхъ мꙋ́чєникъ (с. 118) цвѣ́тъ и҆ сла́ва, дꙋшѝ моеѧ̀ ты̀ ѡ҆ѕлобле́нїе и҆сцѣли́вши, мꙋ́ченице, ᲂу҆добрѝ.
Ро́дными добродѣ́тельми себѐ ᲂу҆ѧсни́ла є҆сѝ, а҆га́ѳїе, и҆ мꙋ́ченица пронарекла́сѧ є҆сѝ, ѡ҆ привре́менныхъ небре́гши, и҆ бж҃їе црⷭ҇тво возлюби́вши.
Всѣ́хъ кра́сныхъ хрⷭ҇та̀ предпочла̀ є҆сѝ, а҆га́ѳїе, привлечена̀ бжⷭ҇твеннымъ жела́нїемъ, и҆ мꙋчи́телей свирѣ̑пства бл҃годе́рзостнѡ и҆ мꙋ́жески попра́ла є҆сѝ.
Бг҃оро́диченъ:
Бг҃оневѣ́сто чⷭ҇таѧ, бг҃а, є҆го́же родила̀ є҆сѝ, молѝ и҆зба́вити тѧ̀ пою́щыѧ ѿ и҆скꙋше́нїй и҆ ѡ҆бстоѧ́нїй, и҆ страсте́й и҆ бѣ́дъ, всебл҃же́ннаѧ.
Конда́къ, гла́съ д҃. Подо́бенъ: Ꙗ҆ви́лсѧ є҆сѝ:
Да ᲂу҆краси́тсѧ дне́сь це́рковь порфѵ́рою сла́вною, ѡ҆моче́ною ѿ чи́стыхъ крове́й а҆га́ѳїи мч҃ницы, ра́дꙋйсѧ, вопїю́щи, ката́нскаѧ похвало̀.
Сѣда́ленъ ст҃ы́ѧ, гла́съ г҃. Подо́бенъ: Бжⷭ҇твенныѧ вѣ́ры:
Сла́вою вѣ́ры, и҆ благоче́стїемъ, преподо́бствомъ, и҆ дѣ́вствомъ, и҆ ᲂу҆се́рдїемъ ᲂу҆кра́шена страда́нїѧ, нарекла́сѧ є҆сѝ ᲂу҆́мъ преподо́бенъ, самоизво́ленъ, вои́стиннꙋ че́сть къ бг҃ꙋ, ѻ҆те́чествꙋ и҆збавле́нїе, хрⷭ҇тꙋ̀ ꙗ҆́кѡ невѣ́ста молѧ́щисѧ дарова́ти на́мъ ве́лїю ми́лость.
Сла́ва, и҆ ны́нѣ, пра́здника, гла́съ то́йже:
Ѿ дв҃ы тѧ̀ воплоще́нна, хрⷭ҇тѐ, ра́дꙋѧсѧ под̾ѧ́тъ свѧще́нный сѷмеѡ́нъ, ны́нѣ ѿпꙋща́еши, вопїѧ̀, раба̀ твоего̀, влⷣко: а҆́нна же непоро́чнаѧ прⷪ҇ро́чица и҆ сла́внаѧ, ны́нѣ и҆сповѣ́данїе и҆ пѣ́нїе прино́ситъ тебѣ̀, мы́ же, жизнода́вче, вопїе́мъ тѝ: сла́ва та́кѡ благоволи́вшемꙋ.
А҆́ще є҆́сть по́стъ, Сла́ва, и҆ ны́нѣ, бг҃оро́диченъ, а҆́ще ли среда̀ и҆лѝ пѧто́къ, крⷭ҇тобг҃оро́диченъ: пи̑саны сегѡ̀ мѣ́сѧца во и҃і де́нь.
Пѣ́снь д҃. І҆рмо́съ:
Покры́ла є҆́сть нб҃са̀ добродѣ́тель твоѧ̀, хрⷭ҇тѐ: и҆зъ кївѡ́та бо (с. 119) проше́дъ, ст҃ы́ни твоеѧ̀ нетлѣ́нныѧ мт҃ре, въ хра́мѣ сла́вы твоеѧ̀ ꙗ҆ви́лсѧ є҆сѝ, ꙗ҆́кѡ млⷣнецъ рꙋконоси́мь: и҆ и҆спо́лнишасѧ всѧ̑ твоегѡ̀ хвале́нїѧ.
Ра́дꙋѧсѧ, сѷмеѡ́не, неизрече́нныхъ таи́нниче, бцⷣа вопїѧ́ше: є҆го́же ѿ ст҃а́гѡ дре́вле и҆звѣсти́сѧ тебѣ̀ дх҃а, младе́нствовавшаго сло́ва, хрⷭ҇та̀ на рꙋ́ки прїимѝ, зовы́й є҆мꙋ̀: и҆спо́лнишасѧ всѧ̑ твоегѡ̀ хвале́нїѧ.
На него́же ᲂу҆пова́лъ є҆сѝ, сѷмеѡ́не, во́зрастъ дѣ́тищный, ра́дꙋѧсѧ под̾имѝ хрⷭ҇та̀, і҆и҃лѧ бжⷭ҇твеннагѡ ᲂу҆тѣше́нїе, зако́на творца̀ и҆ влⷣкꙋ, и҆сполнѧ́ющаго зако́на чи́нъ, зовы́й є҆мꙋ̀: и҆спо́лнишасѧ всѧ̑ твоегѡ̀ хвале́нїѧ.
Ви́дѧ сѷмеѡ́нъ сло́во безнача́льное, съ пло́тїю, ꙗ҆́кѡ на прⷭ҇то́лѣ херꙋві́мстѣмъ, дв҃ою носи́мо, вино́внаго є҆́же бы́ти всѧ́ческихъ, ꙗ҆́кѡ младе́нцꙋ дивѧ́сѧ, вопїѧ́ше є҆мꙋ̀: и҆спо́лнишасѧ всѧ̑ твоегѡ̀ хвале́нїѧ.
И҆́нъ. І҆рмо́съ:
Пою́ тѧ, слꙋ́хомъ бо, гдⷭ҇и, ᲂу҆слы́шахъ, и҆ ᲂу҆жасо́хсѧ, до менє́ бо и҆́деши, менѐ и҆щѧ̀ заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многомлⷭ҇тиве.
Посрами́сѧ льсти́вагѡ ѕмі́ѧ безꙋ́мїе, и҆ ѡ҆бличи́сѧ: дв҃ы бо сегѡ̀ ны́нѣ свирѣ́пство попира́ютъ, хрⷭ҇тꙋ̀ ѿ дв҃ы возсїѧ́вшꙋ на землѝ и҆ всѣ́хъ ѡ҆зари́вшꙋ.
Зако́нно цѣломꙋ́дрїе нескве́рно ᲂу҆держа́вши, страстоте́рпице, дꙋ́хи ра́дꙋющисѧ низложи́ла є҆сѝ лꙋка́вствїѧ, хрⷭ҇то́вою воѡрꙋжи́вшисѧ бл҃года́тїю, и҆ крⷭ҇тъ сегѡ̀ на ра́мѣхъ взе́мши.
Бꙋ́ди мѝ предста́тельница всемꙋ́драѧ, лю́тыхъ мѧ̀ и҆зима́ющи и҆ напа́стей, бꙋ́ри же и҆ ско́рби, и҆ наси́лїѧ и҆зба́ви вра́жїѧ, ꙗ҆́кѡ да и҆зба́вльсѧ, воспою́ тѧ, ꙗ҆́кѡ благꙋ́ю предста́тельницꙋ, благоимени́таѧ.
Бг҃оро́диченъ:
Неизмѣ́рнѡ а҆́гг҃льскаѧ, пречⷭ҇таѧ, свѣ́тлѡсти превозшла̀ є҆сѝ, мы́сленнаго со́лнца ро́ждши несказа́ннѡ хрⷭ҇та̀, зарѧ́ми бж҃ества̀ вѣ́рныхъ мы̑сли ѡ҆зарѧ́ющаго. (с. 120)
Пѣ́снь є҃. І҆рмо́съ:
Ꙗ҆́кѡ ви́дѣ и҆са́їа ѻ҆бра́знѡ на престо́лѣ превознесе́на бг҃а, ѿ а҆́гг҃лъ сла́вы дѡрѷноси́ма, ѽ ѻ҆каѧ́нный, вопїѧ́ше, а҆́зъ: прови́дѣхъ бо воплоща́ема бг҃а, свѣ́та невече́рнѧ и҆ ми́ромъ влады́чествꙋюща.
Разꙋмѣ́въ бжⷭ҇твенный ста́рецъ проѧвле́ннꙋю дре́вле проро́кꙋ сла́вꙋ, рꙋка́ми сло́во зрѧ̀ ма́терними держи́мо, ѽ ра́дꙋйсѧ, вопїѧ́ше, чⷭ҇таѧ: ꙗ҆́кѡ прⷭ҇то́лъ бо держи́ши бг҃а, свѣ́та невече́рнѧго, и҆ ми́ромъ влады́чествꙋюща.
Покло́нсѧ ста́рецъ, и҆ стопа́мъ бжⷭ҇твеннѣ прикоснꙋ́всѧ неискꙋсобра́чныѧ и҆ бг҃омт҃ре, ѻ҆́гнь, речѐ, но́сиши, чⷭ҇таѧ: младе́нца бою́сѧ ѡ҆б̾ѧ́ти бг҃а, свѣ́та невече́рнѧго, и҆ ми́ромъ влады́чествꙋюща.
Ѡ҆чища́етсѧ и҆са́їа, ѿ серафі́ма ᲂу҆́гль прїе́мъ, ста́рецъ вопїѧ́ше бг҃омт҃ри, ты̀ ꙗ҆́коже клеща́ми рꙋка́ми просвѣща́еши мѧ̀, пода́вши, є҆го́же но́сиши, свѣ́та невече́рнѧго, и҆ ми́ромъ влады́чествꙋюща.
И҆́нъ. І҆рмо́съ:
Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀, и҆но́гѡ бо́га не зна́емъ.
Бжⷭ҇твенными велѣ̑нїи пра́вима, сла́внаѧ, ѻ҆бра́знѡ плотска́гѡ пристра́стїѧ разрѣши́ласѧ є҆сѝ ю҆́зъ, а҆га́ѳїе, ма́слина ꙗ҆́вльшисѧ плодови́та.
Все́ю любо́вїю хрⷭ҇то́вою свѣтлѣ́йшаѧ, блиста̑нїѧ зрѧ́щи, ꙗ҆̀же на землѝ до́лꙋ влекꙋ́щыѧ презрѣ́ла є҆сѝ сла̑сти, ѻ҆́нагѡ и҆ є҆ди́нагѡ жела́ющи красоты̀.
Да неизрече́ннꙋю сподо́бишисѧ жи́знь, сла́внаѧ, и҆збра́нныхъ ви́дѣти, мꙋ̑ки претерпѣ́ла є҆сѝ крѣ́пкѡ, ра́дꙋющисѧ, а҆га́ѳїе всехва́льнаѧ.
Бг҃оро́диченъ:
Тебѣ̀ ро́ждшей хрⷭ҇та̀ всѣ́хъ содѣ́телѧ зове́мъ: ра́дꙋйсѧ, чⷭ҇таѧ, ра́дꙋйсѧ, свѣ́тъ возсїѧ́вшаѧ на́мъ: ра́дꙋйсѧ, вмѣсти́вшаѧ бг҃а невмѣсти́маго. (с. 121)
Пѣ́снь ѕ҃. І҆рмо́съ:
Возопѝ къ тебѣ̀, ви́дѣвъ ста́рецъ ѻ҆чи́ма спасе́нїе, є҆́же лю́демъ прїи́де ѿ бг҃а, хрⷭ҇тѐ, ты̀ бг҃ъ мо́й.
Сїѡ́нꙋ ты̀ ка́мень возложи́лсѧ є҆сѝ, непокори̑вымъ претыка́нїе, и҆ собла́зна ка́мень, нерꙋши́мое вѣ́рныхъ спасе́нїе.
И҆звѣ́стнѣ носѧ̀ начерта́нїе, и҆́же пре́жде вѣ̑къ тѧ̀ и҆зрасти́вшагѡ, земны́хъ за милосе́рдїе ны́нѣ не́мощїю ѡ҆бложи́сѧ.
Сн҃ꙋ вы́шнѧгѡ, сн҃ꙋ дв҃ы, бг҃ꙋ ѻ҆троча́ти бы́вшемꙋ, покло́ншасѧ тебѣ̀ ны́нѣ ѿпꙋстѝ съ ми́ромъ.
И҆́нъ. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
Сꙋемꙋ́дренъ сы́й мꙋчи́тель, тѧ̀ до́брꙋю дѣ́вꙋ ᲂу҆кра́сти надѣ́ѧшесѧ: но безстꙋ́денъ ѡ҆бличи́сѧ, прирази́всѧ тве́рдомꙋ твоемꙋ̀ ра́зꙋмꙋ.
И҆злїѧ́сѧ бл҃года́ть во ᲂу҆стна́хъ твои́хъ, мꙋ́ченице бл҃гоимени́таѧ: ꙗ҆́снѡ бо ѡ҆бличи́ла є҆сѝ ꙗ҆́вѣ безстꙋ́днаго, бг҃онаꙋче́ннымъ сло́вомъ ѡ҆богати́вшисѧ.
Ка́мень всече́стенъ ꙗ҆ви́ласѧ є҆сѝ, всехва́льнаѧ, ᲂу҆́мъ самоизво́ленъ преподо́бенъ и҆мꙋ́щи, и҆ ѻ҆те́чествꙋ и҆збавле́нїе тве́рдо бы́вши, а҆га́ѳїе честна́ѧ.
Бг҃оро́диченъ:
Ѱало́мски восхвалѧ́юще, вопїе́мъ тѝ: ра́дꙋйсѧ, тꙋ́чнѣйшаѧ горо̀ хрⷭ҇та̀ бг҃а, въ ню́же всели́тисѧ благоволѝ за на́ше спасе́нїе, бг҃оневѣ́сто.
Конда́къ пра́здника, гла́съ а҃:
Оу҆тро́бꙋ дв҃и́чꙋ ѡ҆ст҃и́вый ржⷭ҇тво́мъ твои́мъ, и҆ рꙋ́цѣ сѷмеѡ́нѣ благослови́вый, ꙗ҆́коже подоба́ше, предвари́въ, и҆ ны́нѣ спа́слъ є҆сѝ на́съ, хрⷭ҇тѐ бж҃е. но ᲂу҆мирѝ во бранѣ́хъ жи́тельство, и҆ ᲂу҆крѣпѝ лю́ди, и҆́хже возлюби́лъ є҆сѝ, є҆ди́не чл҃вѣколю́бче.
І҆́косъ:
Къ бцⷣѣ притеце́мъ, хотѧ́щїи сн҃а є҆ѧ̀ ви́дѣти, къ (с. 122) сѷмеѡ́нꙋ носи́ма, є҆го́же съ нб҃сѐ безпло́тнїи ви́дѧще, дивлѧ́хꙋсѧ, глаго́люще: чꙋ̑днаѧ зри́мъ ны́нѣ и҆ пресла̑внаѧ, непостижи̑маѧ, несказа̑ннаѧ: и҆́же бо а҆да́ма созда́вый но́ситсѧ, ꙗ҆́кѡ младе́нецъ, невмѣсти́мый вмѣща́етсѧ на рꙋка́хъ ста́рчихъ: и҆́же въ нѣ́дрѣхъ неѡпи́санныхъ сы́й ѻ҆ц҃а̀ своегѡ̀, во́лею ѡ҆писꙋ́етсѧ пло́тїю, а҆ не бж҃ество́мъ, є҆ди́нъ чл҃вѣколю́бецъ.
Пѣ́снь з҃. І҆рмо́съ:
Тебѐ во ѻ҆гнѝ ѡ҆роси́вшаго ѻ҆́троки бг҃осло́вившыѧ, и҆ въ дв҃ꙋ нетлѣ́ннꙋ все́льшагосѧ, бг҃а сло́ва пои́мъ, благоче́стнѡ пою́ще: благослове́нъ бг҃ъ ѻ҆тє́цъ на́шихъ.
А҆да́мꙋ и҆звѣсти́ти хотѧ́й и҆дꙋ̀, во а҆́дѣ живꙋ́щꙋ, и҆ є҆́ѵѣ принестѝ благовѣ́стїе, сѷмеѡ́нъ вопїѧ́ше, со прⷪ҇рѡ́ки ликꙋ́ѧ: благослове́нъ бг҃ъ ѻ҆тє́цъ на́шихъ.
Ро́да зе́мна и҆збавлѧ́ѧй бг҃ъ, да́же до а҆́да прїи́детъ: плѣ̑ннымъ же пода́стъ всѣ̑мъ ѡ҆ставле́нїе, и҆ прозрѣ́нїе слѣпы̑мъ, ꙗ҆́кѡ и҆ нѣмы̑мъ вопи́ти: благослове́нъ бг҃ъ ѻ҆тє́цъ на́шихъ.
И҆ твоѐ се́рдце нетлѣ́ннаѧ, ѻ҆рꙋ́жїе про́йдетъ, сѷмеѡ́нъ бцⷣѣ провозгласѝ, на крⷭ҇тѣ̀ зрѧ́щи твоего̀ сн҃а, є҆мꙋ́же вопїе́мъ: бл҃гослове́нъ бг҃ъ ѻ҆тє́цъ на́шихъ.
И҆́нъ. І҆рмо́съ:
Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: благослове́нъ є҆сѝ, бж҃е ѻ҆тє́цъ на́шихъ.
Ꙗ҆́кѡ ѕѣлѡ̀ свѣ́тлѡ вѣща́ющи, и҆ ꙗ҆́вѣ мꙋчи́телѧ ᲂу҆страши́ла є҆сѝ, сло́вомъ премꙋ́дрости и҆ благода́ти: терпѣ́нїемъ же мꙋ́къ ᲂу҆́глїе ѻ҆́гненное неболѣ́зненнѡ терпѧ́щи, взыва́ла є҆сѝ: бл҃гослове́нъ є҆сѝ, бж҃е ѻ҆тє́цъ на́шихъ.
Неи́стовствомъ лю́тымъ содержи́мь ѕлосе́рдый, недоꙋмѣва́ше лю́тѣ, твою̀ ви́дѧ ю҆́ность, и҆ сосцє́въ твои́хъ прозѧбе́нїе: ра́дꙋющибосѧ, мꙋ́ченице, вопїѧ́ла є҆сѝ, твоемꙋ̀ женихꙋ̀ взыва́ющи: бл҃гослове́нъ є҆сѝ, бж҃е ѻ҆тє́цъ на́шихъ. (с. 123)
Предста̀ свѣ́тлѡ хрⷭ҇то́въ ᲂу҆ч҃ни́къ тебѣ̀ стрего́мѣй, твоѧ̑ и҆сцѣлѧ́ѧ лю̑тыѧ ра̑ны, ꙗ҆̀же под̾ѧ́ла є҆сѝ, непобѣди́маѧ мꙋ́ченице, сп҃сова дѣви́це, ра́дꙋющисѧ и҆ глаго́лющи: бл҃гослове́нъ є҆сѝ, бж҃е ѻ҆тє́цъ на́шихъ.
Бг҃оро́диченъ:
Оу҆мерщвлѧ́етсѧ а҆да́мъ, престꙋпи́въ за́повѣдь вседержи́телѧ: ты́ же ро́ждши вѣ́чнꙋю жи́знь, дв҃о всенепоро́чнаѧ, сего̀ и҆зба́вила є҆сѝ ѿ сме́рти, сн҃ꙋ твоемꙋ̀ взыва́юща: бл҃гослове́нъ є҆сѝ, бж҃е ѻ҆тє́цъ на́шихъ.
Пѣ́снь и҃. І҆рмо́съ:
Нестерпи́момꙋ ѻ҆гню̀ соедини́вшесѧ, бг҃оче́стїѧ предстоѧ́ще ю҆́ноши, пла́менемъ же неврежде́ни, бжⷭ҇твеннꙋю пѣ́снь поѧ́хꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.
Лю́дїе і҆и҃лєвы, твою̀ сла́вꙋ є҆мманꙋ́ила, зрѧ́ще ѻ҆троча̀ и҆зъ дв҃ы, предъ лице́мъ бжⷭ҇твеннагѡ ковче́га ны́нѣ ликꙋ́йте: благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.
Сѐ, сѷмеѡ́нъ вопїѧ́ше, прерѣка́емое зна́менїе се́й бꙋ́детъ, бг҃ъ сы́й и҆ ѻ҆троча̀. семꙋ̀, вѣ́рнїи, возопїе́мъ: бл҃гослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.
Живо́тъ сы́й, се́й бꙋ́детъ паде́нїе непокори̑вымъ, младе́нствовавъ бг҃ъ сло́во, ꙗ҆́кѡ воста́нїе всѣ̑мъ вѣ́рою пою́щымъ: бл҃гослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.
И҆́нъ. І҆рмо́съ:
Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Въ весе́лїи и҆ ра́дости превѣ́чнѣй жи́ти сподо́бившисѧ, неизрече́нною твое́ю сла́вою ѡ҆зари́тисѧ чтꙋ́щымъ тѧ̀, а҆га́ѳїе, гдⷭ҇еви помоли́сѧ, и҆ нетлѣ́нныѧ жи́зни наслади́тисѧ. (с. 124)
Оу҆мо́мъ и҆ се́рдцемъ, и҆ дꙋше́ю возлю́бльши хрⷭ҇та̀ па́че сло́ва, многорачи́тельнаго є҆ди́наго, впери́ласѧ є҆сѝ томꙋ̀ вопїю́щи: текꙋ̀ вслѣ́дъ тебє̀, и҆ вселю́сѧ съ тобо́ю во вѣ́ки.
Преесте́ственными рѧ́снами, и҆ кра́сною ѻ҆де́ждею ᲂу҆кра́шена ꙗ҆́кѡ царе́ва дщѝ, въ че́сти хрⷭ҇то́вѣ предстои́ши, а҆га́ѳїе, взыва́ющи: тѧ̀ превозно́симъ гдⷭ҇а во вѣ́ки.
Бг҃оро́диченъ:
Мѵ́ро и҆злїѧ́нное на́мъ, бцⷣе, хрⷭ҇та̀ во чре́вѣ носѧ́щи, ѡ҆благоꙋха́ла є҆сѝ мі́ръ бг҃одохнове́нными вонѧ́ми. тѣ́мже тебѣ̀, дв҃о, взыва́емъ: ра́дꙋйсѧ, мѷрополо́жнице мѷрово́ннагѡ мѵ́ра.
Пѣ́снь ѳ҃. І҆рмо́съ:
Въ зако́нѣ сѣ́ни и҆ писа́нїй ѻ҆́бразъ ви́димъ, вѣ́рнїи, всѧ́къ мꙋ́жескїй по́лъ, ложесна̀ разверза́ѧ, ст҃ъ бг҃ꙋ. тѣ́мъ перворожде́нное сло́во ѻ҆ц҃а̀ безнача́льна, сн҃а первородѧ́щасѧ мт҃рїю неискꙋсомꙋ́жнѡ, велича́емъ.
И҆̀же дрє́внимъ новорожде́нныхъ го́рличищъ сꙋпрꙋ́гъ, дво́ица же бѧ́ше птенцє́въ, въ ни́хже мѣ́сто бжⷭ҇твенный ста́рецъ, и҆ цѣломꙋ́дреннаѧ а҆́нна прⷪ҇ро́чица, ѿ дв҃ы рожде́нномꙋ, и҆ сн҃ꙋ є҆диноро́дномꙋ ѻ҆́ч҃ꙋ, въ це́рковь приноси́мꙋ, слꙋ́жатъ велича́юще.
Возда́лъ є҆сѝ мнѣ̀, вопїѧ́ше сѷмеѡ́нъ, спасе́нїѧ твоегѡ̀, хрⷭ҇тѐ, ра́дованїе: воспрїимѝ твоего̀ слꙋжи́телѧ сѣ́нїю претрꙋжде́ннаго, но́выѧ благода́ти свѧщеннопроповѣ́дника та́йнаго, во хвале́нїи велича́юща.
Свѧщеннолѣ́пнѡ и҆сповѣ́дашесѧ а҆́нна прорица́ющи, цѣломꙋ́дреннаѧ и҆ преподо́бнаѧ, и҆ ста́рица влⷣцѣ въ це́ркви ꙗ҆́вственнѡ: бцⷣꙋ же проповѣ́дающи всѣ̑мъ сꙋ́щымъ велича́ше.
И҆́нъ. І҆рмо́съ:
Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ: ѿ ст҃ы́ѧ дв҃ы (с. 125) неизрече́ннѡ воплоти́вшагосѧ на́съ ра́ди, вѣ́рнїи, є҆диномꙋ́дреннѡ пѣ́сньми велича́емъ.
Побѣди́тельными вѣнцы̀ ᲂу҆краси́вшисѧ, бг҃омꙋ́драѧ а҆га́ѳїе, десни́цею живонача́льною, ны́нѣ и҆зба́витисѧ помоли́сѧ, ꙗ҆́коже ѻ҆те́чествꙋ твоемꙋ̀, ѿ бꙋ́ри, ꙗ҆́кѡ пе́рвѣе ѻ҆гнѧ̀ ᲂу҆ста́вила є҆сѝ стремле́нїе, да вси́ тѧ пѣ́сньми непреста́ннѡ велича́емъ.
Бжⷭ҇твеннымъ про́мысломъ снабдѣва́ѧ всѧ́чєскаѧ хрⷭ҇то́съ, ны́нѣ воздаѧ̀ твое́й, мꙋ́ченице, до́блести, вселѧ́етъ тѧ̀ въ се́лѣхъ нбⷭ҇ныхъ, ꙗ҆́кѡ невѣ́стꙋ всенепоро́чнꙋю свою̀, и҆ ра́доватисѧ со а҆́гг҃лы и҆ съ мꙋ́ченики сподо́билъ є҆́сть.
Ми́лостивна, ѽ страстоте́рпице, сꙋдїю̀ всѧ́ческихъ хрⷭ҇та̀ сотворѝ мнѣ̀, честна́ѧ, мольба́ми твои́ми, пресла́внаѧ, и҆ прегрѣше́нїй мои́хъ мно́жество ѡ҆чи́стити, благоꙋтро́бнаго при́снѡ молѧ́щи не преста́й, мꙋ́ченикѡвъ ᲂу҆добре́нїе.
Бг҃оро́диченъ:
Вопло́щсѧ неизрече́ннѡ ѿ чи́стыхъ твои́хъ крове́й, ꙗ҆́кѡ со́лнце ꙗ҆ви́сѧ на́мъ, пречⷭ҇таѧ мт҃и безневѣ́стнаѧ, пре́жде вѣ̑къ всѣ́хъ ѻ҆ц҃ꙋ̀ собезнача́льный сн҃ъ, и҆ тмꙋ̀ ѿгна́въ просвѣтѝ всѧ́чєскаѧ.
Свѣти́ленъ мꙋ́ченицѣ. Подо́бенъ: Жены̑ ᲂу҆слы́шите:
Сосцє́въ твои́хъ ѿѧ̑тїѧ претерпѣ́ла є҆сѝ, до́браѧ дѣви́це, и҆ всѧ̑кїѧ и҆ны̑ѧ мꙋ̑ки хрⷭ҇та̀ ра́ди, страстоте́рпице: тѣ́мъ и҆ въ черто́гъ тѧ̀ кра́сный вселѝ тво́й жени́хъ, сла́внаѧ, ликꙋ́ющꙋ со а҆́гг҃лы, дѣ́во мꙋ́ченице а҆га́ѳїе.
Сла́ва, и҆ ны́нѣ, пра́здника:
Дх҃омъ во ст҃и́лищи предста́въ ста́рецъ, на рꙋ́ки воспрїѧ́тъ зако́на влⷣкꙋ, вопїѧ̀: ны́нѣ соꙋ̑зъ мѧ̀ плотски́хъ разрѣшѝ, ꙗ҆́коже ре́клъ є҆сѝ, съ ми́ромъ: ви́дѣхъ бо ѻ҆чи́ма ѿкрове́нїе ꙗ҆зы́кѡвъ и҆ і҆зра́илю спасе́нїе.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Стра́хомъ же и҆ ра́достїю ꙳ на рꙋка́хъ влⷣкꙋ ꙳ (с. 126) сѷмеѡ́нъ держѧ̀, ꙳ живота̀ проша́ше разрѣше́нїѧ, ꙳ поѧ̀ бг҃ороди́тельницꙋ.
Сті́хъ: Ны́нѣ ѿпꙋща́еши раба̀ твоего̀, влⷣко, по глаго́лꙋ твоемꙋ̀, съ ми́ромъ.
Ны́нѣ мѧ̀ къ жи́зни ꙳ ѿпꙋстѝ и҆́стиннѣй, ꙳ сѷмеѡ́нъ вопїѧ́ше, сп҃се мо́й: ꙳ ви́дѣхъ бо тѧ̀, ꙳ свѣ́та мі́ра, влⷣко.
Сті́хъ: Свѣ́тъ во ѿкрове́нїе ꙗ҆зы́кѡвъ, и҆ сла́вꙋ люде́й твои́хъ і҆и҃лѧ.
А҆́нна прⷪ҇ро́чески, ꙳ цѣломꙋ́дреннаѧ и҆ преподо́бнаѧ, ꙳ ны́нѣ и҆сповѣ́дашесѧ, ꙳ ѿ дв҃ы прозѧ́бшемꙋ, ꙳ земны́хъ на и҆збавле́нїе.
Сла́ва, и҆ ны́нѣ, гла́съ и҆ подо́бенъ то́йже:
Ра́дꙋйсѧ, ꙗ҆́же ра́дость ꙳ мі́рꙋ прїе́мшаѧ, ꙳ хрⷭ҇та̀ жизнода́вца, ꙳ и҆ ᲂу҆ста́вльшаѧ печа́ль, ꙳ дв҃о, прама́тернюю.
Мѣ́сѧца тогѡ́же въ є҃-й де́нь. Пра́зднованїе прест҃ѣ́й бцⷣѣ въ че́сть є҆ѧ̀ і҆кѡ́ны, и҆менꙋ́емыѧ взыска́нїе поги́бшихъ.
На вели́цѣй вече́рни. На Гдⷭ҇и, воззва́хъ: стїхи̑ры на и҃, пра́здника г҃, и҆ бцⷣы є҃.
Стїхи̑ры пра́здника, гла́съ а҃. Подо́бенъ: Нбⷭ҇ныхъ чинѡ́въ:
Бг҃оѧвле́нїѧ неизрече́ннагѡ ны́нѣ пра́зднꙋемъ сп҃си́тельнꙋю бл҃года́ть: ѿ дв҃ы бо ѿрокови́цы непрело́жнѡ младе́нствовавъ, хрⷭ҇то́съ бг҃ъ въ цр҃ковь бг҃ꙋ и҆ ѻ҆ц҃ꙋ̀ мт҃рїю ны́нѣ прино́ситсѧ, є҆го́же прїи́мъ, сѷмеѡ́нъ рꙋка́ми ѡ҆б̾ѧ́тъ.
Во проро́цѣхъ ви́дѣнъ бы́лъ є҆сѝ, ꙗ҆́коже мо́щнѡ бѧ́ше, і҆и҃се, тебѐ ви́дѣти дре́вле, но ны́нѣ, бж҃їй сло́ве, пло́тїю всемꙋ̀ мі́рꙋ ꙗ҆ви́лсѧ є҆сѝ во́лею ѿ дв҃ы мр҃і́и, хрⷭ҇тѐ, твоѐ сп҃се́нїе всѣ̑мъ сꙋ́щымъ ѿ а҆да́ма ꙗ҆ви́лъ є҆сѝ, ꙗ҆́кѡ чл҃вѣколю́бецъ.
На сїна́йстѣй горѣ̀ зако́нъ ᲂу҆чини́вый дре́вле, ны́нѣ въ сїѡ́нѣ гра́дѣ и҆сполнѧ́ѧ закѡ́ннаѧ, рꙋка́ми бцⷣы, младе́нецъ хрⷭ҇тѐ, со всесожже́нїи на рꙋка́хъ сѷмеѡ́на во хра́мъ внести́сѧ восхотѣ́лъ є҆сѝ пло́тїю.
Стїхи̑ры бцⷣы, гла́съ а҃:
Сїѧ́нїе сла́вы ѻ҆́ч҃їѧ, сн҃ъ ѿ свѣ́та, свѣ́те присносꙋ́щный, ѡ҆зарѝ, мо́лимъ тѧ̀, ᲂу҆́мъ и҆ се́рдце (с. 440) на́ше, і҆и҃се, и҆ напо́лни на́съ дх҃а, да воспѣва́емъ, ра́дꙋющесѧ, ро́ждшꙋю тѧ̀ дв҃ꙋ чи́стꙋю и҆ воспѣва́емъ ди̑внаѧ є҆ѧ̀ чꙋдеса̀.
Свѣ́тлый составлѧ́етъ ли́къ і҆кѡ́на твоѧ̀, влⷣчце, къ не́йже мы̀ взира́юще, се́рдцемъ и҆ ᲂу҆сты̀ бл҃гослови́мъ, пое́мъ и҆ велича́емъ твоѐ ма́тернее бл҃гоꙋтро́бїе и҆ кꙋ́пнѡ ѿ тебѐ ро́ждшагосѧ бг҃а сла́вимъ.
Пое́мъ се́рдцемъ и҆ ᲂу҆сты̀ не дре́внюю златꙋ́ю ста́мнꙋ, въ не́йже бѣ̀ ма́нна, но пое́мъ дв҃ꙋ бцⷣꙋ, хрⷭ҇та̀ во чре́вѣ носи́вшꙋю, и҆ сла́вимъ твоегѡ̀ ѻ҆́браза бг҃осоверша́емаѧ чꙋдеса̀.
Ꙗ҆́коже лꙋна̀ свѣтоза́рнаѧ, ꙗ҆ви́сѧ твоѧ̀, влⷣчце, і҆кѡ́на, ѡ҆зарѧ́ѧ сꙋ́щыѧ во тьмѣ̀ и҆ приводѧ̀ къ свѣ́тꙋ бг҃оразꙋ́мїѧ, и҆ на́съ, во грѣсѣ́хъ погиба́ющихъ, мо́лимъ тѧ̀ со слеза́ми: сп҃сѝ ѿ тьмы̀ неразꙋ́мїѧ и҆ твоѧ̑ пѣвцы̀ вѣ́чной сла́вы сподо́би.
Тѧ̀, є҆ди́нꙋ въ жена́хъ бл҃гослове́ннꙋю, мы̀, грѣ́шнїи, пою́ще, мо́лимъ: и҆зба́ви на́съ, пречⷭ҇таѧ, ѿ страсте́й грѣхо́вныхъ бл҃года́тїю сн҃а твоегѡ̀ и҆ ᲂу҆крѣпѝ на́съ въ за́повѣдехъ є҆гѡ̀ ходи́ти вре́мѧ про́чее непоро́чнѡ, сп҃са́ѧ въ ми́рѣ дꙋ́шы на́шѧ.
Сла́ва, гла́съ є҃:
И҆сполне́нїе зако́на и҆ прⷪ҇ро́кѡвъ, ро́ждшаѧ хрⷭ҇та̀ бг҃а, и҆спо́лни ра́дости и҆ весе́лїѧ всѣ́хъ, чтꙋ́щихъ ст҃ꙋ́ю і҆кѡ́нꙋ твою̀, влⷣчце, да, свѣ́тло дне́сь пра́зднꙋюще, тѧ̀ ра́достнѡ воспое́мъ и҆ любо́вїю и҆́мѧ твоѐ просла́вимъ, ꙗ҆́кѡ ты̀ є҆сѝ є҆ди́на, ѿ всѣ́хъ родѡ́въ и҆збра́ннаѧ, бл҃гослове́ннаѧ и҆ препросла́вленнаѧ. (с. 441)
И҆ ны́нѣ, пра́здника, гла́съ є҃, ге́рманово:
Ве́тхїй де́ньми младе́нствовавъ пло́тїю, ма́терїю дв҃ою въ це́рковь прино́ситсѧ, своегѡ̀ зако́на и҆сполнѧ́ѧ ѡ҆бѣща́нїе, є҆го́же сѷмеѡ́нъ прїи́мъ, глаго́лаше: ны́нѣ ѿпꙋща́еши съ ми́ромъ, по глаго́лꙋ твоемꙋ̀, раба̀ твоего̀, ви́дѣша бо ѻ҆́чи моѝ сп҃се́нїе твоѐ, ст҃ы́й.
Вхо́дъ. Прокі́менъ днѐ. И҆ чтє́нїѧ.
Бытїѧ̀ чте́нїе.
[Глава̀ к҃и] И҆зы́де і҆а́кѡвъ ѿ стꙋденца̀ клѧ́твеннагѡ, и҆ и҆́де въ харра́нь. И҆ ѡ҆брѣ́те мѣ́сто, и҆ спа̀ та́мѡ: за́йде бо сл҃нце. И҆ взѧ́тъ ѿ ка́менїѧ мѣ́ста тогѡ̀, и҆ положѝ возгла́вїе себѣ̀, и҆ спа̀ на мѣ́стѣ ѻ҆́номъ. И҆ со́нъ ви́дѣ: и҆ сѐ лѣ́ствица ᲂу҆твержде́на на землѝ, є҆ѧ́же глава̀ досѧза́ше до нб҃съ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й, гдⷭ҇ь же ᲂу҆твержда́шесѧ на не́й. И҆ речѐ: а҆́зъ бг҃ъ а҆враа́мовъ ѻ҆ц҃а̀ твоегѡ̀, и҆ бг҃ъ і҆саа́ковъ, не бо́йсѧ: землѧ̀ и҆дѣ́же ты̀ спи́ши на не́й, тебѣ̀ да́мъ ю҆̀, и҆ сѣ́мени твоемꙋ̀. И҆ бꙋ́детъ сѣ́мѧ твоѐ ꙗ҆́кѡ песо́къ земны́й, и҆ распространи́тсѧ на мо́ре, и҆ лі́вꙋ, и҆ сѣ́веръ, и҆ на восто́ки: и҆ возбл҃гословѧ́тсѧ ѡ҆ тебѣ̀ всѧ̑ колѣ̑на зємна́ѧ, и҆ ѡ҆ сѣ́мени твое́мъ. И҆ сѐ а҆́зъ съ тобо́ю сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши, и҆ возвращꙋ́ тѧ въ зе́млю сїю̀: ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑, є҆ли̑ка глаго́лахъ тебѣ̀. И҆ воста̀ і҆а́кѡвъ ѿ сна̀ своегѡ̀, и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ. И҆ ᲂу҆боѧ́сѧ, и҆ речѐ: ꙗ҆́кѡ стра́шно мѣ́сто сїѐ: нѣ́сть сїѐ, но до́мъ бж҃їй, и҆ сїѧ̑ врата̀ нбⷭ҇наѧ. (с. 442)
Прⷪ҇ро́чества і҆езекі́илева чте́нїе.
[Гла́вы м҃г и҆ м҃д] Та́кѡ глаго́летъ гдⷭ҇ь: бꙋ́детъ ѿ днѐ ѻ҆сма́гѡ и҆ про́чее, сотворѧ́тъ і҆ерє́и на ѻ҆лтарѝ всесожже́нїѧ ва́шегѡ, и҆ ꙗ҆̀же спасе́нїѧ ва́шегѡ: и҆ прїимꙋ̀ вы̀, глаго́летъ а҆дѡнаі̀ гдⷭ҇ь. И҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ, зрѧ́щихъ на восто́ки, и҆ сїѧ̑ бѧ́хꙋ затворе́на. И҆ речѐ гдⷭ҇ь ко мнѣ̀: врата̀ сїѧ̑ затворє́на бꙋ́дꙋтъ, и҆ не ѿве́рзꙋтсѧ, и҆ никто́же про́йдетъ сквозѣ̀ и҆́хъ: ꙗ҆́кѡ гдⷭ҇ь бг҃ъ і҆и҃левъ про́йдетъ и҆́ми, и҆ бꙋ́дꙋтъ затворє́на. Ꙗ҆́кѡ и҆гꙋ́менъ сѧ́детъ въ ни́хъ снѣ́сти хлѣ́бъ: по пꙋтѝ є҆ла́мскихъ вра́тъ вни́детъ, и҆ по пꙋтѝ є҆гѡ̀ и҆зы́детъ. И҆ введе́ мѧ по пꙋтѝ вра́тъ ст҃ы́хъ сꙋ́щихъ къ сѣ́верꙋ, прѧ́мѡ хра́мꙋ: и҆ ви́дѣхъ, и҆ сѐ и҆спо́лнь сла́вы хра́мъ гдⷭ҇нь.
При́тчей чте́нїе.
[Глава̀ ѳ҃] Премꙋ́дрость созда̀ себѣ̀ до́мъ, и҆ ᲂу҆твердѝ столпѡ́въ се́дмь. Закла̀ своѧ̑ же́ртвєннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. Посла̀ своѧ̑ рабы̀, созыва́ющи съ высо́кимъ проповѣ́данїемъ на ча́шꙋ, глаго́лющи: и҆́же є҆́сть безꙋ́менъ, да ᲂу҆клони́тсѧ ко мнѣ̀. И҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ, и҆ пі́йте вїно̀, є҆́же раствори́хъ ва́мъ. Ѡ҆ста́вите безꙋ́мїе, и҆ жи́ви бꙋ́дете. И҆ взыщи́те ра́зꙋма, да поживетѐ: и҆ и҆спра́вите ра́зꙋмъ въ вѣ́дѣнїи. Наказꙋ́ѧй ѕлы̑ѧ, прїи́метъ себѣ̀ безче́стїе: ѡ҆блича́ѧй же нечести́ваго, ѡ҆поро́читъ себѐ: ѡ҆бличе́нїѧ бо нечести́вомꙋ, ра̑ны є҆мꙋ̀. Не ѡ҆блича́й ѕлы́хъ, да не возненави́дѧтъ тебѐ: ѡ҆блича́й премꙋ́дра, и҆ возлю́битъ тѧ̀. Да́ждь премꙋ́дромꙋ винꙋ̀, и҆ (с. 443) премꙋ́дршїй бꙋ́детъ: сказꙋ́й пра́ведномꙋ, и҆ приложи́тъ прїима́ти. Нача́ло премꙋ́дрости стра́хъ гдⷭ҇нь, и҆ совѣ́тъ ст҃ы́хъ, ра́зꙋмъ: разꙋмѣ́ти бо зако́нъ, по́мысла є҆́сть бл҃га́гѡ. Си́мъ бо ѡ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ́та живота̀.
На лїті́и стїхи̑ры, гла́съ д҃:
Торжествꙋ́юще ны́нѣ ра́достнѡ во хра́мѣ твое́мъ, пречⷭ҇таѧ, и҆ твоемꙋ̀ припа́дающе честно́мꙋ ѻ҆́бразꙋ, мо́лимъ тѧ̀ ᲂу҆миле́ннѡ: сотворѝ на́съ досто́йны бы́ти ли́ка пра́зднꙋющихъ и҆ въ торжествѣ̀ и҆збра́нныхъ сн҃а твоегѡ̀.
Сердца̀ на̑ша привлекла̀ є҆сѝ, дв҃о чⷭ҇таѧ, и҆ ди́внымъ ѻ҆́браза твоегѡ̀ бл҃голѣ́пїемъ и҆ бг҃олѣ́пными ѻ҆́нагѡ чꙋдесы̀, тѣ́мже, пою́ще, мо́лимъ тѧ̀: и҆ на́шѧ дꙋ́шы свѣ́тлы содѣ́лай, влⷣчце.
Въ премі́рномъ ликꙋ́ѧ свѣ́тѣ, не пре́зри на́съ, до́лꙋ сꙋ́щихъ во тьмѣ̀ земно́й, но, ѡ҆сѣнѧ́ѧ і҆кѡ́ною, при́зри ма́тернимъ бл҃гоꙋтро́бїемъ на рабы̀ твоѧ̑ и҆ свѣ́томъ сн҃а твоегѡ̀, влⷣчце, ѿженѝ ѿ на́съ мра̑чныѧ прило́ги лꙋка́вагѡ.
Оу҆твердѝ, просла́ви, вознесѝ вѣ̑рныѧ лю́ди твоѧ̑, вѣ́рныхъ помо́щнице, гра́дъ се́й и҆ всѧ̑ гра́ды и҆ страны̀ въ ми́рѣ сохранѝ и҆ всѣ́хъ, лю́бѧщихъ сла́вити чⷭ҇тны́й ѻ҆́бразъ тво́й, вѣнцє́въ сла́вы сподо́би.
Сла́ва, гла́съ ѕ҃:
Не надѣ́емсѧ на кнѧ̑зи, на сы́ны человѣ̑ческїѧ, но всѐ на́ше ᲂу҆пова́нїе на твоего̀ сн҃а, бцⷣе, возлага́емъ и҆ вѣ́рꙋемъ непрело́жнѡ, ꙗ҆́кѡ то́й є҆́сть сп҃се́нїе на́ше, и҆ да не постыди́мсѧ. (с. 444)
И҆ ны́нѣ пра́здника, гла́съ ѕ҃:
Да ѿве́рзетсѧ две́рь нбⷭ҇наѧ дне́сь: безнача́льное бо сло́во ѻ҆́ч҃ее, нача́ло прїи́мъ подъ лѣ̑ты, не ѿстꙋ́пль своегѡ̀ бжⷭ҇тва̀, ѿ дв҃ы ꙗ҆́кѡ младе́нецъ четыредесѧтодне́венъ мт҃рїю во́льнѣ прино́ситсѧ въ це́рковь зако́ннꙋю, и҆ сего̀ на рꙋ́ки прїе́млетъ ста́рецъ, ѿпꙋстѝ, зовы́й, раба̀, влⷣко, и҆́бо ѻ҆́чи моѝ ви́дѣста сп҃се́нїе твоѐ. прише́дый въ мі́ръ сп҃стѝ ро́дъ человѣ́чь, гдⷭ҇и, сла́ва тебѣ̀.
Стїхо́вна бцⷣы, гла́съ є҃:
Неисповѣди́мое чꙋде́съ мо́ре, вѣ́мы тѧ̀, бцⷣе, па́че бо херꙋві́мѡвъ и҆ серафі́мѡвъ просла́виласѧ є҆сѝ, тѣ́мже и҆ ны́нѣ тѧ̀ ꙗ҆́кѡ мт҃рь бж҃їю въ пѣ́снехъ велича́емъ, рабѝ твоѝ, бл҃года́рственнѡ.
Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ.
Не тва́ри преклонѧ́емъ колѣ̑на, падо́ша бо и҆стꙋка́ны, но тебѣ̀, пренепоро́чнаѧ дв҃о, и҆ ѻ҆́бразъ тво́й лобыза́юще, мо́лимсѧ: сп҃сѝ лю́ди твоѧ̑ ѿ ѻ҆гнѧ̀ страсте́й, ѿ бѣ́дъ и҆ напа́стей рꙋко́ю бг҃а бл҃гослове́ннагѡ.
Сті́хъ: Приведꙋ́тсѧ цр҃ю̀ дѣ́вы въ слѣ́дъ є҆ѧ̀, и҆́скрєннїѧ є҆ѧ̀ приведꙋ́тсѧ тебѣ̀.
Ты̀ ти́хое ѡ҆бꙋрева́ємымъ, бцⷣе, приста́нище, ты̀ ра́дость въ печа́ль погрꙋжє́ннымъ, болѧ́щымъ ты̀ и҆сцѣле́нїе и҆ покро́въ всѣ̑мъ, къ тебѣ̀ прибѣга́ющымъ. влⷣчце, є҆ди́на чⷭ҇таѧ и҆ бл҃гослове́ннаѧ.
Сті́хъ: Приведꙋ́тсѧ въ весе́лїи и҆ ра́дованїи, введꙋ́тсѧ въ хра́мъ цр҃е́въ.
Тобо́ю возстаю́тъ разсла́бленнїи, недꙋ́гꙋющїи и҆сцѣлѧ́ютсѧ, слѣпі́и прозира́ютъ, ѿ бѣсѡ́въ томи́мїи (с. 445) свобожда́ютсѧ, ра́дꙋйсѧ, и҆сто́чниче дарова́нїй, бг҃обл҃года́тнаѧ.
Сла́ва, гла́съ ѕ҃:
Соберѝ разстоѧ́щыѧ во є҆ди́но, ми́ръ мі́рови ро́ждшаѧ, правосла́вїе ᲂу҆твердѝ непоколеби́мѡ и҆ всѣ́хъ на́съ соблюдѝ непреткнове́нныхъ бы́ти во и҆сповѣ́данїи сн҃а твоегѡ̀, ꙗ҆́кѡ є҆ди́на вѣ́рныхъ помо́щнице.
И҆ ны́нѣ, пра́здника, гла́съ ѕ҃:
На рꙋка́хъ ста́рческихъ во дне́шнїй де́нь, ꙗ҆́кѡ на колесни́цѣ херꙋві́мстѣй, восклони́тисѧ бл҃гоизво́ливый, хрⷭ҇тѐ бж҃е, и҆ на́съ, пою́щихъ тѧ̀, страсте́й мꙋчи́тельства призыва́емый и҆зба́ви и҆ сп҃сѝ, ꙗ҆́кѡ чл҃вѣколю́бецъ.
Стїхо́вна пра́здника, гла́съ ѕ҃: Подо́бенъ: Тридне́венъ:
Воспрїимѝ, речѐ, сѷмеѡ́не, зижди́телѧ всѧ́ческихъ рꙋка́ми, ѽ ста́рче, подымѝ хрⷭ҇та̀, є҆го́же дв҃а ѻ҆трокови́ца родѝ безсѣ́меннѡ на ра́дость ро́да на́шегѡ.
Сті́хъ: Ны́нѣ ѿпꙋща́еши раба̀ твоего̀, влⷣко, по глаго́лꙋ твоемꙋ̀ съ ми́ромъ.
Зако́нꙋ творца̀ и҆ бг҃а, є҆гѡ́же трепе́щꙋтъ а҆́гг҃льскаѧ мнѡ́жества, соше́дшесѧ, воспои́мъ лю́дїе є҆ди́наго бл҃годѣ́телѧ и҆ зако́на законода́телѧ во сп҃се́нїе дꙋ́шъ на́шихъ.
Сті́хъ: Свѣ́тъ во ѿкрове́нїе ꙗ҆зы́кѡвъ и҆ сла́вꙋ люде́й твои́хъ і҆и҃лѧ.
Ны́нѣ ѿпꙋща́еши, влⷣко, раба̀ твоего̀, ꙗ҆́коже ре́клъ є҆сѝ, съ ми́ромъ, ꙗ҆́кѡ ви́дѣхъ тѧ̀, хрⷭ҇тѐ, свѣ́та первовѣ́чнаго, соꙋ́зъ мѧ̀ плотски́хъ, во ѿкрове́нїе ꙗ҆зы́кѡвъ и҆ і҆и҃лю. (с. 446)
Сла́ва, и҆ ны́нѣ, гла́съ в҃. А҆ндре́ѧ пѵ́рра:
Є҆мꙋ́же вы́шши слꙋжи́телїе съ тре́петомъ мо́лѧтсѧ, до́лꙋ ны́нѣ сѷмеѡ́нъ ве́щными рꙋка́ми прїе́мъ, бг҃а человѣ́кѡмъ соедини́тисѧ проповѣ́да, и҆ чл҃вѣ́ка нбⷭ҇на бг҃а ви́дѧй, ѿлꙋча́ѧсѧ сꙋ́щихъ на землѝ, ра́достнѡ взыва́ше: и҆́же во тьмѣ̀ сꙋ́щымъ невече́рнїй свѣ́тъ ѿкрыва́ѧй, гдⷭ҇и, сла́ва тебѣ̀.
Тропа́рь, гла́съ з҃:
Ра́дꙋйсѧ, бл҃года́тнаѧ бцⷣе дв҃о, во ѡ҆б̾ѧ́тїѧхъ свои́хъ превѣ́чнаго младе́нца и҆ бг҃а носи́вшаѧ, просѝ є҆го̀ да́ти мі́рꙋ ᲂу҆мире́нїе и҆ дꙋша́мъ на́шымъ сп҃се́нїе. сн҃ъ бо тебѣ̀, бг҃ома́ти, вѣща́етъ, ꙗ҆́кѡ всѧ̑ прошє́нїѧ твоѧ̑ во бл҃го́е и҆спо́лнитъ. сегѡ̀ ра́ди и҆ мы̀, припа́дающе, мо́лимсѧ и҆, надѣ́ющїисѧ на тѧ̀, да не поги́бнемъ, и҆́мѧ твоѐ и҆менꙋ́емъ: ты́ бо є҆сѝ, влⷣчце, взыска́нїе поги́бшихъ.
И҆́нъ тропа́рь, гла́съ д҃:
Взыщѝ на́съ, погиба́ющихъ, прест҃а́ѧ дв҃о, не по грѣхѡ́мъ бо на́шымъ наказꙋ́еши на́съ, но по чл҃вѣколю́бїю ми́лꙋеши, и҆зба́ви на́съ ѿ а҆́да, болѣ́зни и҆ нꙋ́жды и҆ сп҃сѝ на́съ.
Тропа́рь пра́здника, гла́съ а҃:
Ра́дꙋйсѧ, бл҃года́тнаѧ бцⷣе дв҃о, и҆зъ тебе́ бо возсїѧ̀ со́лнце пра́вды, хрⷭ҇то́съ бг҃ъ на́шъ, просвѣща́ѧй сꙋ́щыѧ во тьмѣ̀. весели́сѧ и҆ ты̀, ста́рче пра́ведный, прїе́мый во ѡ҆б̾ѧ́тїѧ свободи́телѧ дꙋ́шъ на́шихъ, да́рꙋющаго на́мъ воскресе́нїе.
На ᲂу҆́трени. На Бг҃ъ гдⷭ҇ь: тропа́рь пра́здника два́жды. Сла́ва, бцⷣы. И҆ ны́нѣ, пра́здника. (с. 447)
По а҃-й стїхоло́гїи сѣда́ленъ, гла́съ а҃. Самоподо́бенъ:
Ли́къ а҆́гг҃льскїй да ᲂу҆диви́тсѧ чꙋдесѝ, земні́и же гла́сы, возопїе́мъ пѣ́нїе, зрѧ́ще неизрече́нное бж҃їе снизхожде́нїе. є҆гѡ́же бо трепе́щꙋтъ нбⷭ҇ныѧ си̑лы, ны́нѣ ста́рчи ѡ҆б̾е́млютъ рꙋ́цѣ є҆ди́наго чл҃вѣколю́бца.
Сла́ва, и҆ ны́нѣ, то́йже.
По в҃-й стїхоло́гїи сѣда́ленъ, гла́съ и҃. Подо́бенъ: Свирѣ́лей па́стырскихъ:
Роди́лсѧ є҆сѝ на землѝ, собезнача́льный ѻ҆ц҃ꙋ̀, прине́слсѧ є҆сѝ въ цр҃ковь, непостижи́мый, ра́дꙋѧсѧ же, ста́рецъ на рꙋ́ки тѧ̀ воспрїѧ́тъ, зовы́й: ны́нѣ ѿпꙋща́еши, є҆го́же посѣти́лъ є҆сѝ по глаго́лꙋ твоемꙋ̀, бл҃гоизво́ливый сп҃стѝ ꙗ҆́кѡ бг҃ъ ро́дъ человѣ́ческїй.
Сла́ва, и҆ ны́нѣ, то́йже.
По полѷеле́и сѣда́ленъ, гла́съ д҃. Подо́бенъ: Оу҆диви́сѧ і҆ѡ́сифъ:
Младе́нствꙋеши менѐ ра́ди, ве́тхїй де́ньми, чище́нїемъ прїѡбща́ешисѧ, чⷭ҇тѣ́йшїй бж҃е, да пло́ть ᲂу҆вѣ́риши мнѣ̀, ю҆́же ѿ дв҃ы. и҆ си́мъ сѷмеѡ́нъ, поꙋча́ѧсѧ, позна́ тѧ, бг҃а, ꙗ҆́вльшагосѧ пло́тїю, и҆, ꙗ҆́кѡ жи́знь, лобза́ше и҆ ра́дꙋѧсѧ, ста́рчески взыва́ше: ѿпꙋстѝ менѐ, тебе́ бо ви́дѣхъ, живота̀ всѧ́ческихъ.
Сла́ва, и҆ ны́нѣ, то́йже.
Та́же степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ. Сті́хъ: Ѿры́гнꙋ се́рдце моѐ сло́во бла́го: Всѧ́кое дыха́нїе: Є҆ѵⷢ҇лїе ѿ лꙋкѝ, зача́ло д҃. (с. 448) По н҃-мъ ѱалмѣ̀ стїхи́ра лїті́йнаѧ на Сла́вѣ, гла́съ ѕ҃: Не надѣ́емсѧ на кнѧ́зи:
Канѡ́ны пра́здника съ і҆рмосо́мъ на ѕ҃, і҆рмосы̀ по два́жды и҆ бцⷣы на и҃. Катава́сїа пра́здника. По г҃-й пѣ́сни конда́къ и҆ і҆́косъ пра́здника, сѣда́ленъ бцⷣы. По ѕ҃-й пѣ́сни конда́къ и҆ і҆́косъ бцⷣы.
Канѡ́нъ пра́здника, гла́съ г҃ (зрѝ л. є҃і ѡ҆б.).
Канѡ́нъ прест҃ы́ѧ бцⷣы, гла́съ д҃.
Пѣ́снь а҃.
І҆рмо́съ: Ѿве́рзꙋ ᲂу҆ста̀ моѧ̀, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ, тоѧ̀, чꙋдеса̀.
Оу҆милосе́рдисѧ ѡ҆ на́съ, грѣ́шныхъ, погиба́ющихъ, прест҃а́ѧ бцⷣе, но вмѣ́стѡ печа́ли да́рꙋй на́мъ ра́дость, да воспѣва́емъ тѧ̀, всест҃а́ѧ влⷣчце.
Оу҆тишѝ дꙋ́шъ на́шихъ свирѣ́пство, поне́же мнѡ́гїѧ скѡ́рби и҆ пєча́ли нападо́ша на на́съ, грѣ́шныхъ, да не поги́бнемъ во ѕлѣ̀, ѡ҆каѧ́ннїи.
Ты̀ є҆сѝ на́ша крѣ́пость и҆ ᲂу҆твержде́нїе и҆ ѿ врагѡ́въ защище́нїе, и҆ сегѡ̀ ра́ди не бои́мсѧ вра́жїѧ навѣ́та, но при́снѡ пое́мъ тѧ̀ и҆ сла́вимъ, всесла́внаѧ.
Напа̑сти, и҆ бѣ̑ды, и҆ скѡ́рби мнѡ́ги прїидо́ша на на́съ и҆ ѡ҆тѧготи́ша на́съ, и҆ ѿ всегѡ̀ се́рдца мо́лимъ тѧ̀, вопїю́ще: и҆зба́ви, бг҃ороди́тельнице, ѿ ѡ҆бдержа́щихъ на́съ ѕѡ́лъ и҆ весе́лїѧ и҆спо́лни.
Пѣ́снь г҃.
І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѐ совокꙋ́пльшыѧ, дꙋхо́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ сла́вы сподо́би. (с. 449)
Ты̀ є҆сѝ те́плаѧ предста́тельница и҆ тве́рдое застꙋпле́нїе, и҆зба́ви на́съ, всест҃а́ѧ, ѿ наше́дшихъ на на́съ напа́стей, ты́ бо є҆сѝ, влⷣчце, па́дшихъ и҆справле́нїе.
И҆зба́ви на́съ, пречⷭ҇таѧ, ѿ напа́стей, и҆ бѣ́дъ, и҆ ѡ҆мраче́нїѧ дꙋше́внагѡ, и҆ ᲂу҆ны́нїѧ, всѧ̑ стра̑сти ѿженѝ ѿ на́съ, чⷭ҇таѧ, да при́снѡ тѧ̀ сла́вимъ.
Къ тебѣ̀ притека́емъ, пречⷭ҇таѧ, не пре́зри на́шеѧ болѣ́зни и҆ воздыха́нїѧ, но при́зри на на́съ, сꙋ́щихъ въ ско́рби, и҆ сїю̀ на́шꙋ печа́ль на ра́дость преложѝ, бг҃облаже́ннаѧ.
Ви́ждь, влⷣчце, бѣдꙋ̀ на́шꙋ и҆ ско́рби, ꙗ҆́кѡ въ тѣ́хъ лꙋка́вый вра́гъ поглоти́ти на́съ тщи́тсѧ, но ты̀, пречⷭ҇таѧ, препнѝ є҆гѡ̀ ѕлохи́трое кова́рство, да, и҆зба́вльшисѧ, сла́вимъ тѧ̀, тве́рдꙋю застꙋ́пницꙋ за ны̀, во грѣсѣ́хъ погиба́ющихъ.
Сѣда́ленъ, гла́съ в҃:
Моле́нїе те́плое и҆ стѣна̀ неѡбори́маѧ, ми́лости и҆сто́чниче, мі́рови прибѣ́жище, приле́жнѡ вопїе́мъ тѝ: бцⷣе, влⷣчце, предварѝ и҆ ѿ бѣ́дъ и҆зба́ви на́съ, є҆ди́на, вско́рѣ предста́тельствꙋющаѧ.
Пѣ́снь д҃.
І҆рмо́съ: Сѣдѧ́й въ сла́вѣ на прⷭ҇то́лѣ бж҃ества̀ во ѻ҆́блацѣ ле́гцѣ, прїи́де і҆и҃съ пребж҃е́ственный нетлѣ́нною дла́нїю и҆ сп҃сѐ зовꙋ́щыѧ: сла́ва, хрⷭ҇тѐ, си́лѣ твое́й.
Ты̀ є҆сѝ, пречⷭ҇таѧ дв҃о, наде́ждо и҆ ᲂу҆твержде́нїе на́ше нерꙋши́мое, и҆ лю́тыхъ бѣ́дъ ѡ҆свобожде́нїе, и҆ ѿ печа́ли ᲂу҆тѣше́нїе, и҆ дꙋ́шъ на́шихъ просвѣще́нїе, и҆ во ᲂу҆пова́нїи на́шемъ непоколеби́мый сто́лпе.
Въ си́хъ печа́лехъ бꙋ́ди сла́дкое ᲂу҆тѣше́нїе, и҆ въ бѣда́хъ ско́раѧ помо́щница, и҆ въ моли́твахъ (с. 450) предста́тельница, тѧ́ бо, мт҃и бж҃їѧ, стѧжа́вши, ѿ всѧ́кихъ бѣ́дъ и҆збавлѧ́емсѧ и҆ ко сп҃се́нїю тобо́ю наставлѧ́емсѧ.
Ты̀ є҆сѝ, пречⷭ҇таѧ дв҃о, сꙋ́щымъ въ бѣда́хъ прибѣ́жище, немощны́мъ помога́еши, грѣ́шныхъ и҆справлѧ́еши и҆ ко сп҃се́нїю наставлѧ́еши, ꙗ҆́кѡ мт҃и бж҃їѧ сꙋ́щаѧ.
Сꙋдѝ ѡ҆би́дѧщихъ, и҆ поборѝ борю́щихъ на́съ, и҆ ѿ напра́снагѡ ѡ҆скорбле́нїѧ и҆зба́ви на́съ, ѡ҆сꙋжде́нныхъ, ꙗ҆́кѡ ты̀ сꙋдїю̀ пра́веднаго родила̀ є҆сѝ, всенепоро́чнаѧ. и҆́же хо́щетъ сꙋди́ти комꙋ́ждо по дѣлѡ́мъ є҆гѡ̀.
Пѣ́снь є҃.
І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а всѣ̑мъ воспѣва́ющымъ тѧ̀ ми́ръ подава́ющаѧ.
Преклони́сѧ къ мольба́мъ рабѡ́въ твои́хъ, влⷣчце, и҆ не закоснѝ и҆зба́вити на́съ ѿ всѣ́хъ скорбе́й и҆ бѣ́дъ, ꙗ҆̀же ѡ҆бдержа́тъ на́съ, ви́димыхъ и҆ неви́димыхъ врагѡ́въ ѿженѝ ѿ на́съ, да не ѕлѣ̀ поги́бнемъ, ѡ҆каѧ́ннїи.
Ты̀ въ напа́стехъ и҆ ско́рбехъ ми́лостивѡ защища́еши, и҆̀же подъ кро́въ тво́й прибѣга́ютъ, прїимѝ, пречⷭ҇таѧ, и҆ на́ше сїѐ ма́лое ѿ ᲂу҆ны́лагѡ се́рдца моле́нїе, да не ѕлѣ̀ въ ѿча́ѧнїи поги́бнемъ.
Ми́лостивымъ и҆ кро́ткимъ ѻ҆́комъ, бг҃ороди́тельнице, и҆ милосе́рдїемъ твои́мъ при́зри на на́съ, недосто́йныхъ, и҆ ѿ ѡ҆бстоѧ́нїѧ напа́сти на́съ свободѝ, призыва́ющихъ тѧ̀ на по́мощь, всепречⷭ҇таѧ. (с. 451)
Первозда́нный а҆да́мъ и҆ є҆́ѵа тобо́ю, влⷣчце, и҆зба́вистасѧ ѿ сле́зъ, съ ни́ми же и҆ на́съ, припа́дающихъ и҆ молѧ́щихсѧ тѝ, и҆зба́ви сле́зъ, печа́лей и҆ скорбе́й и҆ пода́ждь поле́зное на́мъ ᲂу҆тѣше́нїе ѡ҆ бз҃ѣ, сп҃сѣ на́шемъ.
Пѣ́снь ѕ҃.
І҆рмо́съ: Бж҃е́ственное сїѐ и҆ всечⷭ҇тно́е соверша́юще пра́зднество, бг҃омꙋ́дрїи, бг҃омт҃ре, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Оу҆слы́ши печа́льный во́пль ра́бъ твои́хъ, тре́бꙋющихъ по́мощи твоеѧ̀, бг҃ома́ти, ты́ бо є҆сѝ ᲂу҆пова́нїе на́ше, потщи́сѧ печа́ль на́шꙋ на ра́дость преложи́ти.
И҆зба́ви на́съ, влⷣчце, ѿ ꙗ҆зы́ка льсти́ва и҆ ѿ человѣ́ка непра́ведна и҆змѝ на́съ, всѧ̑ бо ты̀ мо́жеши, ꙗ҆́кѡ мт҃и зижди́телѧ на́шегѡ сꙋ́щи.
Вѣ́мы тѧ̀, бг҃облагода́тнаѧ, ско́рое поги́бшихъ взыска́нїе, на́съ, немощны́хъ, крѣ́пость и҆ ᲂу҆твержде́нїе, дꙋ́хомъ, ᲂу҆сты̀ и҆ се́рдцемъ зове́мъ тѝ: ѿ напа́стей и҆ печа́ли свободѝ на́съ, влⷣчце, къ тебѣ̀ прибѣга́ющихъ.
И҆зба́ви на́съ ѿ напа́стей и҆ бѣ́дъ, бг҃оневѣ́сто, тѧ́ бо ᲂу҆стро́и бг҃ъ на сп҃се́нїе и҆ застꙋпле́нїе на́ше хода́таицꙋ, сегѡ̀ ра́ди и҆ на́мъ, недостѡ́йнымъ, и҆схода́тайствꙋй ѿ печа́ли и҆збавле́нїе.
Конда́къ, гла́съ ѕ҃:
Предста́тельство хрⷭ҇тїа́нъ непосты́дное, хода́тайство ко творцꙋ̀ непрело́жное, не пре́зри грѣ́шныхъ моле́нїй гла́сы, но предварѝ, ꙗ҆́кѡ бл҃га́ѧ, на по́мощь на́съ, вѣ́рнѡ зовꙋ́щихъ тѝ: ᲂу҆скорѝ на моли́твꙋ и҆ потщи́сѧ (с. 452) на ᲂу҆моле́нїе, предста́тельствꙋющи при́снѡ, бцⷣе, чтꙋ́щихъ тѧ̀.
Дрꙋгі́й конда́къ, гла́съ то́йже:
Не и҆́мамы и҆ны́ѧ по́мощи, не и҆́мамы и҆ны́ѧ наде́жды, ра́звѣ тебѐ, пречⷭ҇таѧ дв҃о, ты̀ на́мъ помозѝ, на тебѐ надѣ́емсѧ и҆ тобо́ю хва́лимсѧ: твои́ бо є҆смы̀ рабѝ, да не постыди́мсѧ.
Пѣ́снь з҃.
І҆рмо́съ: Не послꙋжи́ша тва́ри бг҃омꙋ́дрїи, па́че созда́вшагѡ, но, ѻ҆́гненное преще́нїе мꙋ́жески попра́вше, ра́довахꙋсѧ, пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.
Ты̀ є҆сѝ, пречⷭ҇таѧ дв҃о, покрови́тельница на́ша и҆ непреста́нное ра́дованїе дꙋ́шъ на́шихъ, не пре́зри на́съ, ѡ҆держи́мыхъ лю́тою бѣдо́ю и҆ неꙋтѣши́мою печа́лїю, но застꙋпѝ и҆ поми́лꙋй рабы̀ твоѧ̑.
Ты̀ є҆сѝ крѣ́пость на́ша, пречⷭ҇таѧ влⷣчце, и҆ въ наше́дшихъ неча́емыхъ ско́рбехъ ᲂу҆тѣше́нїе, и҆ сегѡ̀ ра́ди мы̀, недосто́йнїи рабѝ твоѝ, всенаде́жнѡ вопїе́мъ тѝ: поми́лꙋй на́съ, па́дшихъ.
И҆сцѣлѝ дꙋшє́вныѧ ꙗ҆́звы, влⷣчце, и҆ застꙋпѝ на́съ, рабѡ́въ твои́хъ, и҆зба́ви на́съ ѿ па́гꙋбныѧ сѣ́ти лꙋка́вагѡ, ѿ всѧ́кагѡ паде́нїѧ и҆ ѿ развраще́нїѧ и҆змѝ на́съ, пребл҃гослове́ннаѧ.
Сокрꙋшѝ совѣ́ты непра́вєдныѧ, и҆̀же и҆з̾ѡщре́ны сꙋ́ть на ны̀, мы́ бо и҆ны́ѧ по́мощи не и҆́мамы, ра́звѣ тебѐ, чⷭ҇таѧ, и҆ къ тебѣ̀ прибѣга́емъ: не попꙋстѝ поги́бнꙋти, ꙗ҆́кѡ всѧ̑ тебѣ̀ возмѡ́жна сꙋ́ть.
Пѣ́снь и҃.
І҆рмо́съ: Ѿроки бл҃гочєсти́выѧ въ пещѝ рожⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, (с. 453) вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀ и҆ превозноси́те є҆го̀ во всѧ̑ вѣ́ки.
Дꙋ́шы на́шѧ сохранѝ под̾ кро́вомъ твои́мъ, пребл҃гослове́ннаѧ бцⷣе, и҆ ѿ разли́чныхъ належа́щихъ на на́съ бѣ́дъ и҆ скорбе́й и҆зба́ви на́съ, да не пора́дꙋетсѧ вра́гъ на́шъ ѡ҆ на́шей поги́бели, но да сла́вимъ тѧ̀, бж҃їю мт҃рь, во вѣ́ки.
Оу҆боѧ́хомсѧ по́мощи человѣ́ческїѧ и҆ска́ти, прибѣго́хомъ къ тебѣ̀, всенепоро́чнаѧ, ты̀ є҆сѝ храни́тельница хрⷭ҇тїа́нѡмъ, дне́сь къ покро́вꙋ притеко́хомъ, надѣ́ѧсѧ на ми́лость бл҃гоꙋтро́бїѧ твоегѡ̀, матери́нски поми́лꙋй на́съ, да сла́вимъ тѧ̀ во вѣ́ки.
Ты̀ є҆сѝ, пречⷭ҇таѧ дв҃о, просвѣще́нїе и҆ и҆збавле́нїе, ты̀ є҆сѝ помо́щница на́ша всера́достнаѧ и҆ стѣна̀ нерꙋши́маѧ, сла́ва и҆ хвала̀ на́ша, всенепоро́чнаѧ, да просла́вимъ тѧ̀ во вѣ́ки.
На тѧ̀ всю̀ наде́ждꙋ сп҃се́нїѧ на́шегѡ возложи́хомъ, неискꙋсобра́чнаѧ бг҃ороди́тельнице, и҆ на по́мощь призыва́емъ тѧ̀: сп҃сѝ на́съ ѿ печа́ли сїѧ̀ и҆ напа́сти и҆ ѿ всѣ́хъ скорбе́й и҆зба́ви на́съ, да сла́вимъ тѧ̀ во вѣ́ки.
На ѳ҃-й пѣ́сни пое́мъ припѣ́вы пра́здника.
Пѣ́снь ѳ҃.
І҆рмо́съ: Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.
И҆́зсше, ꙗ҆́кѡ скꙋде́ль, ѿ печа́ли крѣ́пость на́ша, и҆ ко а҆́дꙋ прибли́жихомсѧ, ѿ ꙗ҆зы́къ дꙋшепа́гꙋбныхъ (с. 454) предварѝ, мт҃и бж҃їѧ, застꙋпле́нїемъ твои́мъ и҆ ѿ ѡ҆бдержа́щихъ на́съ скорбе́й рꙋко́ю, мт҃и, твое́ю и҆зба́ви на́съ, да сла́вимъ тѧ̀, чⷭ҇таѧ приснодв҃о.
Два́жды.
Всенепоро́чнаѧ ѻ҆трокови́це, всѣ̑мъ вѣ̑рнымъ крѣ́пкаѧ помо́щнице, и҆ ᲂу҆пова́нїе хрⷭ҇тїа́нѡмъ, бꙋ́ди и҆ ѡ҆ на́съ неѿстꙋ́пнаѧ моле́бница къ сн҃ꙋ твоемꙋ̀ и҆ бг҃ꙋ ѡ҆ ѡ҆свобожде́нїи ѿ наше́дшїѧ сїѧ̀ напа́сти, да вопїе́мъ тѝ: ра́дꙋйсѧ, чⷭ҇таѧ приснодв҃о.
Ты̀ є҆сѝ крѣ́пость на́ша, прибѣ́жище и҆ стѣна̀ неѡбори́маѧ, ты̀ є҆сѝ те́плаѧ къ бг҃ꙋ моли́твенница, всѧ́кихъ напа́стей и҆ бѣ́дъ свободѝ, є҆ди́наѧ бл҃гослове́ннаѧ, да вопїе́мъ тѝ: ра́дꙋйсѧ, пребл҃же́ннаѧ бцⷣе, приснодв҃о.
Свѣти́ленъ пра́здника.
На хвали́техъ стїхи̑ры пра́здника г҃ и҆ бцⷣы г҃, лїті̑йныѧ.
Стїхи̑ры пра́здника, гла́съ в҃. Подо́бенъ: До́ме є҆ѵфра́ѳовъ:
Стра́хомъ же и҆ ра́достїю на рꙋка́хъ влⷣкꙋ сѷмеѡ́нъ держа̀, живота̀ проша́ше разрѣше́нїѧ, поѧ̀ бг҃ороди́тельницꙋ.
Ны́нѣ мѧ̀ къ жи́зни ѿпꙋстѝ и҆́стиннѣй, сѷмеѡ́нъ вопїѧ́ше, сп҃се мо́й, ви́дѣхъ бо тѧ̀, свѣ́та, ми́ра влⷣко.
А҆́нна прⷪ҇ро́чески, цѣломꙋ́дреннаѧ и҆ прпⷣбнаѧ, ны́нѣ и҆сповѣ́дашесѧ ѿ дв҃ы прозѧ́бшемꙋ земны́хъ на и҆збавле́нїе.
Сла́ва, бцⷣы. И҆ ны́нѣ, пра́здника, гла́съ в҃:
Ра́дꙋйсѧ, ꙗ҆́же ра́дость мі́рꙋ прїе́мшаѧ, хрⷭ҇та̀ жизнода́вца, и҆ ᲂу҆ста́вльшаѧ печа́ль, дв҃о, прама́тернюю. (с. 455)
Моли́тва а҃.
Ѽ, прест҃а́ѧ и҆ пребл҃гослове́ннаѧ дв҃о, влⷣчце бцⷣе! при́зри ми́лостивымъ твои́мъ ѻ҆́комъ на на́съ, предстоѧ́щихъ предъ ст҃о́ю і҆кѡ́ною твое́ю и҆ со ᲂу҆миле́нїемъ молѧ́щихсѧ тебѣ̀, воздви́гни на́съ и҆зъ глꙋбины̀ грѣхо́вныѧ, просвѣтѝ ᲂу҆́мъ на́шъ, ѡ҆мраче́нный страстьмѝ, и҆ ᲂу҆врачꙋ́й ꙗ҆́звы дꙋ́шъ и҆ тѣле́съ на́шихъ. не и҆́мамы и҆ны́ѧ по́мощи, не и҆́мамы и҆ны́ѧ наде́жды, ра́звѣ тебѐ, влⷣчце, ты̀ вѣ́си всѧ̑ не́мѡщи и҆ согрѣшє́нїѧ на́шѧ, къ тебѣ̀ прибѣга́емъ и҆ вопїе́мъ: не ѡ҆ста́ви на́съ твое́ю нбⷭ҇ною по́мощїю, но предста́ни на́мъ при́снѡ и҆ твои́мъ неизрече́ннымъ милосе́рдїемъ и҆ щедро́тами сп҃сѝ и҆ поми́лꙋй на́съ, погиба́ющихъ. да́рꙋй на́мъ и҆справле́нїе грѣхо́вныѧ жи́зни на́шеѧ и҆ и҆зба́ви на́съ ѿ скорбе́й, бѣ́дъ и҆ болѣ́зней, ѿ напра́сныѧ сме́рти, а҆́да и҆ вѣ́чныѧ мꙋ́ки. ты́ бо, цр҃и́це и҆ влⷣчце, ско́раѧ помо́щница и҆ застꙋ́пница всѣ̑мъ, притека́ющымъ къ тебѣ̀, и҆ крѣ́пкое прибѣ́жище грѣ́шникѡвъ ка́ющихсѧ. пода́ждь ᲂу҆́бѡ на́мъ, пребл҃га́ѧ и҆ всенепоро́чнаѧ дв҃о, хрⷭ҇тїа́нскїй коне́цъ живота̀ на́шегѡ, ми́ренъ и҆ непосты́денъ, и҆ сподо́би на́съ твои́мъ хода́тайствомъ всели́тисѧ въ ѻ҆би́телѧхъ нбⷭ҇ныхъ, и҆дѣ́же непреста́нный гла́съ пра́зднꙋющихъ ра́достїю сла́витъ прст҃ꙋ́ю трⷪ҇цꙋ, ѻ҆ц҃а̀, и҆ сн҃а, и҆ ст҃а́го дх҃а, ны́нѣ, и҆ при́снѡ, и҆ во вѣ́ки вѣкѡ́въ. а҆ми́нь.
Моли́тва в҃.
Застꙋ́пнице ᲂу҆се́рднаѧ, бл҃гоꙋтро́бнаѧ гдⷭ҇а мт҃и, къ тебѣ̀ прибѣга́ю а҆́зъ, ѻ҆каѧ́нный и҆ па́че всѣ́хъ человѣ̑къ грѣшнѣ́йшїй, вонмѝ гла́сꙋ моле́нїѧ моегѡ̀, (с. 456) во́пль мо́й и҆ стена́нїѧ ᲂу҆слы́ши, ꙗ҆́кѡ беззакѡ́нїѧ моѧ̑ превзыдо́ша главꙋ̀ мою̀, и҆ а҆́зъ, ꙗ҆́коже кора́бль въ пꙋчи́нѣ, погрꙋжа́юсѧ въ мо́ре грѣхѡ́въ мои́хъ. но ты̀, всебл҃га́ѧ и҆ милосе́рдаѧ влⷣчце, не пре́зри менѐ, ѿча́ѧннаго и҆ во грѣсѣ́хъ погиба́ющаго, поми́лꙋй мѧ̀, ка́ющагосѧ въ ѕлы́хъ дѣ́лѣхъ мои́хъ, и҆ ѡ҆братѝ на пꙋ́ть пра́вый заблꙋ́ждшꙋю ѡ҆каѧ́ннꙋю дꙋ́шꙋ мою̀. на тебѐ, влⷣчце моѧ̀ бцⷣе, возлага́ю всѐ ᲂу҆пова́нїе моѐ. ты̀, мт҃и бж҃їѧ, сохранѝ и҆ соблюди́ мѧ подъ кро́вомъ твои́мъ, ны́нѣ, и҆ при́снѡ, и҆ во вѣ́ки вѣкѡ́въ. а҆ми́нь.
Моли́тва г҃.
Ѽ прест҃а́ѧ влⷣчце и҆ бцⷣе, вы́сшаѧ херꙋві̑мъ и҆ честнѣ́йшаѧ серафі̑мъ, бг҃оизбра́ннаѧ ѻ҆трокови́це, поги́бшихъ взыска́нїе и҆ всѣ́хъ скорбѧ́щихъ ра́досте, пода́ждь ᲂу҆тѣше́нїе и҆ на́мъ, въ поги́бели и҆ ско́рби сꙋ́щымъ, ра́звѣ бо тебѐ, и҆но́го прибѣ́жища и҆ по́мощи не и҆́мамы. ты̀ є҆ди́на є҆сѝ ра́дости на́шеѧ хода́таица и҆ ꙗ҆́кѡ мт҃рь бж҃їѧ и҆ мт҃и милосе́рдїѧ, предстоѧ̀ ᲂу҆ прⷭ҇то́ла прест҃ы́ѧ трⷪ҇цы, мо́жеши на́мъ помощѝ: никто́же бо, притека́ѧй къ тебѣ̀, посра́мленъ ѿхо́дитъ. ᲂу҆слы́ши ᲂу҆́бѡ и҆ на́съ ны́нѣ, въ де́нь поги́бели и҆ печа́ли, предъ твое́ю і҆кѡ́ною припа́дающихъ и҆ со слеза́ми тебѣ̀ молѧ́щихсѧ: ѿженѝ ѿ на́съ належа́щыѧ на на́съ скѡ́рби и҆ бѣ́ды въ се́й вре́меннѣй жи́зни, не лише́ны же ны̀ сотворѝ твои́мъ всеси́льнымъ хода́тайствомъ и҆ вѣ́чныѧ несконча́емыѧ ра́дости въ црⷭ҇твїи сн҃а твоегѡ̀ и҆ бг҃а на́шегѡ. а҆ми́нь.