Мѣ́сѧца тогѡ́же во в҃ї-й де́нь. Ст҃ы́хъ мꙋ́чєникъ, про́кла и҆ і҆ла́рїа: Пра́зднованїе прест҃ѣ́й влⷣцѣ на́шей бцⷣѣ и҆ приснодв҃ѣ мр҃і́и ра́ди і҆кѡ́ны є҆ѧ̀, нарица́емыѧ троерꙋ́чица, ꙗ҆́же на ст҃ѣ́й горѣ̀ а҆ѳѡ́нстѣй.
И҆ прпⷣбнагѡ ѻ҆тца̀ на́шегѡ мїхаи́ла малеина̀.
И҆ пра́зднованїе прест҃ѣ́й бцⷣѣ, въ че́сть є҆ѧ̀ і҆кѡ́ны троерꙋ́чица.
Слꙋ́жба сїѧ̀ пи́сана въ приложе́нїи.
Стїхи̑ры гла́съ а҃. Подо́бенъ: Нбⷭ҇ныхъ чинѡ́въ:
Многови̑дныѧ мꙋ̑ки претерпѣ́вше, ꙳ свѣтови̑дныѧ вѣнцы̀ прїѧ́сте вкꙋ́пѣ, і҆ла́рїе и҆ про́кле. ꙳ тѣ́мже ва́шꙋ всепра́зднственнꙋю па́мѧть ꙳ вѣ́рнѡ сотворѧ́емъ, ꙳ молѧ́щесѧ прилѣ́жнѡ, ꙳ є҆́же моли́ти ѡ҆ всѣ́хъ на́съ.
Растерза̑нїѧ пло́ти твоеѧ̀, ꙳ про́кле, претерпѣ́лъ є҆сѝ, ꙳ вѣ́чнꙋю сла́вꙋ прозрѧ̀, бл҃же́нне, ꙳ и҆ ра́йское пребыва́нїе, ꙳ и҆ свѣ́тъ невече́рнїй: ꙳ въ не́мже сы́й, ꙳ молѝ и҆ на́мъ просвѣти́тисѧ пою́щымъ тѧ̀.
Ꙗ҆́коже два̀ свѣти̑ла ꙳ мі́ръ просвѣща́ете чꙋде́съ лꙋче́ю, ꙳ страстоте́рпцы гдⷭ҇ни, і҆ла́рїе и҆ про́кле, ꙳ ѡ҆мраче́нїе страсте́й ѿгонѧ́ще. ꙳ тѣ́мже ва́съ воспѣва́емъ ра́достнѡ, пра́зднꙋюще па́мѧть ва́шꙋ.
И҆́ны стїхи̑ры прпⷣбнагѡ, гла́съ є҃. Подо́бенъ: Прпⷣбне ѻ҆́ч҃е:
Прпⷣбне ѻ҆́ч҃е, ѿ ю҆́ности равноа́гг҃льное ѡ҆блобыза́лъ є҆сѝ житїѐ, и҆ мі́ра кра̑снаѧ, ꙗ҆́кѡ ᲂу҆ме́ты вмѣни́въ: и҆ ꙗ҆́кѡ сѣ́нь сла́вы вре́менныѧ, не сꙋ́щїѧ, ѿбѣ́глъ є҆сѝ, сла́вы бжⷭ҇твенныѧ не забыва́ѧ. є҆ѧ́же ны́нѣ причаща́ешисѧ, ѿве́ргсѧ ᲂу҆́зъ до́лꙋ плотски́хъ, и҆ предстоѧ̀ свѣ́тꙋ трисо́лнечномꙋ, и҆ насыща́ѧсѧ хрⷭ҇то́ва свѣтоли́тїѧ. тогѡ̀ молѝ, томꙋ̀ моли́сѧ всегда̀, дарова́ти цр҃кви є҆диномы́слїе, ми́ръ и҆ ве́лїю ми́лость.
Прпⷣбне ѻ҆́ч҃е, сїѧ́нїе ᲂу҆миле́нїѧ, свѣти́льниче сꙋ́щымъ во тмѣ̀ ѿча́ѧнїѧ, незаходи́маѧ денни́ца, покаѧ́нїѧ ᲂу҆́гль пречестны́й, добродѣ́телей бжⷭ҇твенный би́серъ, и҆ ми́лостынѧ свѣ́щникъ вели́къ моли́твамъ, си̑рымъ предста́телю и҆ вдови́цамъ: зако́нное пра́вило цр҃кве, и҆ дѣ́тельный свѣти́льникъ воздержа́нїѧ, хрⷭ҇та̀ молѝ, хрⷭ҇то́ви моли́сѧ всегда̀, дарова́ти цр҃кви є҆диномы́слїе, ми́ръ и҆ ве́лїю ми́лость.
Прпⷣбне ѻ҆́ч҃е, ѡ҆свѧти́лсѧ є҆сѝ пре́жде рожде́нїѧ, ꙗ҆́коже і҆еремі́а свѧще́ннѣйшїй: тебе́ бо ро́ждшей, гдⷭ҇нѧ мт҃и прорече́ тѧ да́ти пло́дъ, и҆́же и҆ да́нъ бы́ти є҆́й ѿ пеле́нъ, и҆ провозвѣстѝ ꙗ҆́вѣ. и҆ прїѧ́тъ а҆́бїе мы́слїю пра́вою, житїѧ̀ мѧте́жъ бѣжа́ща тѧ̀, бг҃омꙋ́дре, и҆ безмо́лвное житїѐ возлюби́вша, є҆́же и҆ проше́лъ є҆сѝ. ꙗ҆́кѡ песо́къ собо́ри є҆диноѻбра́зныхъ, насади́лъ є҆сѝ при и҆схо́дищахъ во́дъ бж҃їѧ дх҃а.
Сла́ва, гла́съ ѕ҃:
Прпⷣбне ѻ҆́ч҃е мїхаи́ле, во всю̀ зе́млю и҆зы́де вѣща́нїе и҆справле́нїй твои́хъ. тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ безъ поро́ка поревнова́лъ є҆сѝ, дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: Подо́бенъ: Тридне́венъ:
На дре́вѣ живо́тъ на́шъ зрѧ́щи всенепоро́чнаѧ бцⷣа ви́сѧщъ, мт҃рски рыда́ющи вопїѧ́ше: сн҃е мо́й, и҆ бж҃е мо́й, спасѝ любо́вїю пою́щыѧ тѧ̀.
На стїхо́внѣ ѻ҆ктѡ́иха. Сла́ва, гла́съ и҃:
Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ мїхаи́ле: твое́ю бо стезе́ю вои́стиннꙋ пра́вѡ ходи́ти позна́хомъ. блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, и҆ прпⷣбныхъ соприча́стниче и҆ пра́ведныхъ: съ ни́миже моли́сѧ гдⷭ҇еви поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:
Ю҆́ница нескве́рнаѧ, ꙳ ю҆нца̀ ви́дѧщи на дре́вѣ ꙳ пригвожда́ема во́лею, ꙳ рыда́ющи жа́лостнѣ, ꙳ ᲂу҆вы̀ мнѣ̀, вопїѧ́ше, ꙳ люби́мѣйшее ча́до. ꙳ что́ ти со́нмъ воздадѐ безбл҃года́тный є҆вре́йскїй, ꙳ хотѧ́ мѧ ѡ҆безча́дствовати ꙳ ѿ тебє̀, вселюбе́зне;
Тропа́рь, гла́съ и҃:
Въ тебѣ̀, ѻ҆́ч҃е, и҆звѣ́стнѡ спасе́сѧ, є҆́же по ѻ҆́бразꙋ: прїи́мъ бо крⷭ҇тъ, послѣ́довалъ є҆сѝ хрⷭ҇тꙋ̀, и҆ дѣ́ѧ ᲂу҆чи́лъ є҆сѝ презира́ти ᲂу҆́бѡ пло́ть, прехо́дитъ бо, прилѣжа́ти же ѡ҆ дꙋшѝ, ве́щи безсме́ртнѣй. тѣ́мже и҆ со а҆́гг҃лы сра́дꙋетсѧ, прпⷣбне мїхаи́ле, дꙋ́хъ тво́й.
На ᲂу҆́трени є҆ди́нъ канѡ́нъ ѻ҆ктѡ́иха, и҆ ст҃ы́хъ два̀, на и҃.
Канѡ́нъ мꙋ́ченикѡвъ. Творе́нїе і҆ѡ́сифово:
Гла́съ д҃. Пѣ́снь а҃. І҆рмо́съ:
Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀ дꙋшѝ трича́стное потопѝ, молю́сѧ: да тебѣ̀, ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.
Соедини́вшесѧ съ бг҃омъ, и҆ бжⷭ҇твенными зарѧ́ми ѡ҆свѣща́еми при́снѡ до́блїю страда́льцы, дꙋ́шꙋ мою̀ просвѣти́те пою́щꙋ свѣтоно́сное и҆ честно́е ва́ше страда́нїе ᲂу҆миле́нїемъ се́рдца, блаже́ннїи.
Восперѝ ва́съ нбⷭ҇ное жела́нїе, тѣ́мже всѧ̑ кра̑снаѧ житїѧ̀, страда́льцы, вмѣни́сте ᲂу҆ме́ты, манове́ньми къ бг҃ꙋ ѡ҆божи́вшесѧ, и҆ всю̀ безбо́жныхъ крѣ́пость смири́вше.
Ѻ҆гне́мъ бг҃онача́льныѧ вже́гшесѧ трⷪ҇цы, ѕлоче́стїѧ разжжє́нїѧ ᲂу҆гаси́сте мꙋ́дрїи кро́вными течє́нїи. тѣ́мже и҆сцѣле́нїй чи́стыми ѡ҆дожде́нїи страсте́й на́шихъ скве́рнꙋ ѿмы́йте.
Безпеча́льнꙋю жи́знь, нбⷭ҇нꙋю сла́вꙋ, ра́йское наслажде́нїе, свѣ́тъ мы́сленный, кра́сное ра́дованїе мꙋ́чєницы взыскꙋ́юще, лю̑таѧ претерпѣ́сте треволнє́нїѧ до́блественнымъ ᲂу҆мо́мъ.
Нбⷭ҇нїи ли́цы ва́шемꙋ терпѣ́нїю ᲂу҆диви́шасѧ мꙋ́дрїи: бїє́нїѧ бо пло́ти, и҆ многоплетє́нныѧ мꙋ̑ки, мч҃ницы доблемꙋ́дреннѡ претерпѣ́сте ра́дꙋющесѧ, и҆ врага̀ ѕло́бꙋ сокрꙋши́вше.
Бг҃оро́диченъ:
Ꙗ҆́дъ ᲂу҆ше́съ прама́тере є҆́ѵы, гаврїи́лъ тебѣ̀ провозглаша́ѧ, ра́дꙋйсѧ, вои́стиннꙋ ѿтрѧсѐ, влⷣчце: є҆ди́на бо ты̀ посѣка́телѧ ѕло́бы ѕмі́евы, па́че ᲂу҆ма́ же и҆ сло́ва родила̀ є҆сѝ.
И҆́нъ канѡ́нъ прпⷣбнагѡ.
Гла́съ и҃. Пѣ́снь а҃. І҆рмо́съ:
Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.
Свѣтолꙋ́чными мо́лнїѧми дх҃а ѡ҆свѧща́емь, и҆ тогѡ̀ дохнове́нїемъ и҆спо́лненъ, ꙗ҆́коже ѻ҆рга́нъ, преблаже́нне, ѡ҆глаша́емь, дꙋшѝ моеѧ̀ мра́къ ѿженѝ, и҆ пода́ждь мѝ сло́во по достоѧ́нїю пѣ́ти тѧ̀.
Роди́телей любвѐ, предпоче́лъ є҆сѝ содѣ́телевꙋ, и҆ текꙋ́щагѡ житїѧ̀, житїѐ равноа́гг҃льно, и҆ мїрскі́ѧ красоты̀ нетлѣ́нное вои́стиннꙋ ᲂу҆краше́нїе всѣ́хъ цр҃ѧ̀: и҆́миже наслажда́ешисѧ ра́дꙋѧсѧ.
Восто́ка трисо́лнечнагѡ бы́лъ є҆сѝ зарѧ̀ всесвѣ́тлаѧ, трисїѧ́ннымъ свѣ́томъ житїѧ̀ твоегѡ̀, землѝ всѐ лицѐ ѡ҆сїѧ̀ бога́тнѡ, и҆ грѣха̀ тмꙋ̀, ѻ҆́ч҃е, разорѧ́ѧ словесы̀ твои́ми.
Бг҃оро́диченъ:
Клеща̀, ю҆́же ви́дѣ и҆са́їа дꙋ́хомъ, ᲂу҆́гль носѧ́щаѧ, ты̀ и҆здале́ча ꙗ҆ви́ласѧ є҆сѝ, ᲂу҆́гль бжⷭ҇тва̀ хрⷭ҇та̀ во чре́вѣ носи́вши, прест҃а́ѧ, неѡпа́льнѡ, и҆ на ѡ҆б̾ѧ́тїѧхъ поноси́вши ма́нїемъ всѧ̑ носѧ́щаго.
Пѣ́снь г҃. І҆рмо́съ:
Не мꙋ́дростїю, и҆ си́лою, и҆ бога́тствомъ хва́лимсѧ: но тобо́ю ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо свѧ́тъ, па́че тебє̀ чл҃вѣколю́бче.
Премꙋ́дростїю слове́съ бжⷭ҇твенныхъ немꙋ̑дрыѧ ѡ҆бличи́лъ є҆сѝ, и҆ терза̑нїѧ плотска̑ѧ крѣ́постїю дꙋ́ха претерпѣ́лъ є҆сѝ, про́кле всеблаже́нне, мꙋ́чениче бг҃одохнове́нне.
Распѧ́тꙋ тебѣ̀ бы́вшꙋ неми́лостивнѡ, повелѣ̀ дра́ти тѧ̀ безꙋ́мный, къ бг҃ꙋ дꙋшє́вныѧ ѻ҆́чи простира́юща, и҆ терпѣ́нїемъ тѝ ᲂу҆добрѧ́ема.
Сокрꙋше́нїе ᲂу҆дѡ́въ мꙋ́жески претерпѣ́лъ є҆сѝ, премꙋ́дре, кро́вїю же разжже́нїе безбо́жїѧ погаси́лъ є҆сѝ, про́кле, ᲂу҆крѣплѧ́емь бжⷭ҇твенною бл҃года́тїю.
Бг҃оро́диченъ:
Разрѣшѝ, дв҃о, соꙋ́зъ ѕѡ́лъ мои́хъ сосвѧза́ющи мѧ̀ любвѝ, и҆зъ тебє̀ рожде́ннагѡ сло́ва, всенепоро́чнаѧ: и҆ спаси́ мѧ, влⷣчце, моли́твами твои́ми.
И҆́нъ. І҆рмо́съ:
Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ па́че тебє̀, є҆ди́не чл҃вѣколю́бче.
Возненави́дѣвъ ѿ дꙋшѝ сласте́й го́ресть, и҆ до́льнїѧ возгнꙋша́всѧ сла́вы, мїрска́гѡ са́на во́лею по́ѧсъ ѿве́ргъ, сꙋ́щихъ на землѝ царе́й, предпоче́тъ всѣ́хъ цр҃ѧ̀.
Ѿ пеле́нъ ѡ҆свѧще́нъ, ѿ ложе́снъ и҆збра́нъ ꙗ҆ви́лсѧ є҆сѝ: честнѣ́й бо ма́тери твое́й ро́ждшаѧ хрⷭ҇та̀, ѡ҆бѣща̀ да́ти тѧ̀, и҆ ꙗ҆́кѡ ѡ҆свѧще́нъ да́ръ тѧ̀ а҆́бїе прїѧ́тъ.
Мѵ́ромъ ты̀ мы́сленнымъ дꙋ́шꙋ и҆ ᲂу҆́мъ ѡ҆чи́стивъ, и҆ тѣ́ло а҆́лчбою и҆стни́въ, всели́лъ є҆сѝ хрⷭ҇та̀, глаго́люща сего̀ и҆мѣ́ѧ въ себѣ̀, и҆ ходѧ́ща, и҆ мі́ръ бл҃гоꙋха́юща.
Бг҃оро́диченъ:
Во ᲂу҆тро́бѣ твое́й, чⷭ҇таѧ, ѻ҆ц҃ꙋ̀ сопресто́льное сло́во все́льсѧ, ѿ чⷭ҇тыхъ твои́хъ крове́й вопло́щсѧ, и҆ ро́ждьсѧ тва́рь ѿчи́стивъ і҆дѡлонеи́стовства, кропле́нїемъ своеѧ̀ кро́ве.
Конда́къ мꙋ́ченикѡвъ, гла́съ д҃. Подо́бенъ: Вознесы́йсѧ:
Ꙗ҆́кѡ денни́ца ѕвѣзда̀ возсїѧ̀ мꙋ́ченикѡвъ про́кла и҆ і҆ла́рїа честно́е страда́нїе, пред̾ѡзарѧ́ющи на́съ чꙋде́съ свѣтлостьмѝ. тѣ́мже пра́зднꙋемъ па́мѧть ва́шꙋ: хрⷭ҇та̀ бг҃а моли́те, да спасе́тъ дꙋ́шы на́шѧ.
Сѣда́ленъ, гла́съ а҃. Подо́бенъ: Гро́бъ тво́й, сп҃се:
І҆ла́рїа, вѣ́рнїи, и҆ сла́внаго про́кла, страда́вшыѧ тве́рдѡ, и҆ врага̀ низложи́вшыѧ, согла́снѡ почти́мъ, хрⷭ҇та̀ велича́юще: сі́и бо чꙋдесы̀ страсте́й мглꙋ̀ ѿго́нѧтъ, просвѣща́юще вѣ́рою къ ни̑мъ притека́ющыѧ.
Сла́ва, прпⷣбнагѡ, гла́съ и҃. Подо́бенъ: Премꙋ́дрости:
Хрⷭ҇то́въ а҆́гнецъ слове́сный, ᲂу҆пасы́й на ѕла́цѣ добродѣ́телей прпⷣбнѡ ѻ҆́вцы гдⷭ҇нѧ, ᲂу҆дивлѧ́емь є҆́сть ѿ а҆́гг҃лъ, мꙋ́жествомъ посрами́въ де́мѡны, въ человѣ́цѣхъ поживѐ ꙗ҆́кѡ безпло́тенъ. тѣ́мже и҆ трⷪ҇цѣ предста̀ досто́йнѡ, ᲂу҆пра́вити ста́до моли́твами не престае́тъ, къ немꙋ́же возопїе́мъ: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.
И҆ ны́нѣ, бг҃оро́диченъ:
Въ напа̑сти многоплетє́нныѧ впа́дъ, ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ, и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бла́гости: тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. Долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ, и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стрⷭ҇ти твоѧ̑.
Пѣ́снь д҃. І҆рмо́съ:
Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Послѣ́дова твои̑мъ словесє́мъ ве́щи тве́рдостное: и҆́бо кровоѧ́децъ возбранѧ́ше и҆тѝ къ прє́днимъ, до́ндеже хрⷭ҇та̀ всѣ́хъ є҆ди́наго гдⷭ҇а и҆сповѣ́далъ є҆сѝ, про́кле, бг҃а пресꙋ́щна.
Непобѣди́мымъ дерзнове́нїемъ, и҆ до́блимъ ᲂу҆мо́мъ, страстоте́рпче про́кле, ста́лъ є҆сѝ предъ сꙋди́щемъ, воплоще́нїе велегла́снѡ проповѣ́даѧ, и҆злїѧ́вшагѡ себѐ да́же до ра́бїѧгѡ ѻ҆́браза и҆зба́вителѧ на́шегѡ.
Безстꙋ́днѡ ᲂу҆́бѡ гони́тель, мꙋдрецє́мъ пока́зоваше мꙋ́къ ви́ды, и҆ нꙋ́жднѣйшꙋю сме́рть, непобѣди̑мыѧ же ви́дѧ дивлѧ́шесѧ, и҆ побѣжде́нїе зрѧ̀ своѐ, не домышлѧ́шесѧ.
Бг҃оро́диченъ:
Сокрꙋше́нное престꙋпле́нїемъ рꙋ́къ твои́хъ творе́нїе, ᲂу҆щедрѧ́ѧ, сло́ве, въ ложесна̀ неискꙋсобра̑чныѧ все́льсѧ, и҆ во двою̀ сꙋщєствꙋ̀ прише́лъ є҆сѝ, нетлѣ́нїѧ ѡ҆бновлѧ́ѧ пꙋти̑ вѣ́дꙋщымъ тѧ̀.
И҆́нъ. І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. Тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Стрꙋѧ̀ жи́зни твою̀ мы́сль напоѝ бжⷭ҇твеннагѡ дх҃а дѣ́йствомъ: ѿню́дꙋже го́ресть сласте́й ѿри́нꙋвши, бжⷭ҇твенныѧ сла́дости напо́лнисѧ. є҆́юже сы́тѡсти непреста̑нныѧ прїе́млющи, пое́тъ: си́лѣ твое́й сла́ва, чл҃вѣколю́бче.
Ѻ҆́гнь и҆скꙋше́нїй, и҆ страсте́й пе́щь, слеза́ми твои́хъ, ѻ҆́ч҃е, тече́нїй, и҆ дꙋхо́вною бога́тною ᲂу҆гаси́лъ є҆сѝ росо́ю, соблю́дсѧ неѡпале́нъ: ѡ҆палѧ́емь бо любо́вїю всѣ́хъ цр҃ѧ̀, вє́щнаѧ ᲂу҆вѧди́лъ є҆сѝ жела̑нїѧ.
Оу҆́мъ возне́съ къ житїю̀ нбⷭ҇номꙋ, плотско́е, ѻ҆́ч҃е, ѡ҆блегчи́лъ є҆сѝ ѡ҆тѧгча́вшее ве́щи страсте́й. тѣ́мже трⷪ҇цѣ неꙋкло́ннѡ послꙋжи́лъ є҆сѝ: мѡѷсе́а же нра́въ, и҆ и҆лїино̀ житїѐ подража́ѧ, ви́дѣлъ є҆сѝ гдⷭ҇а.
Бг҃оро́диченъ:
Всѧ̀ добра̀ ты̀ є҆сѝ, чⷭ҇таѧ, бли́жнѧѧ моѧ̀, сн҃ъ тво́й, влⷣчце, зове́тъ тебѣ̀, ст҃ѣ́йшꙋю а҆́гг҃льскагѡ є҆стества̀ ѡ҆брѣ́тъ тѧ̀, и҆ багрѧни́цꙋ тѣ́ла и҆стка̀ неизрече́ннѡ, ѿ чи́стыхъ твои́хъ крове́й, и҆ сла́витъ того̀ сла́вѧщыѧ.
Пѣ́снь є҃. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Ты̀, гдⷭ҇и, крѣ́пость мч҃никѡвъ и҆ ᲂу҆твержде́нїе, ты̀, свѧ́те ст҃ы́хъ, непоколеби́маѧ стѣно̀ стра́ждꙋщихъ ᲂу҆се́рднѡ.
Жела́нїемъ бжⷭ҇твеннымъ дꙋ́шꙋ ѡ҆палѧ́ѧ, терпѣ́лъ є҆сѝ свѣща́ми ѡ҆палѧ́емь, про́кле преблаже́нне досточꙋ́дне.
Ѻ҆гнѧ̀ то́чїю ᲂу҆жаса́юсѧ вѣ́чнагѡ, взыва́лъ є҆сѝ ѡ҆палѧ́емь, мꙋ́чениче про́кле, повелѣ́нїи мꙋчи́телѧ, и҆ во́лею ᲂу҆мерщвлѧ́емь.
Бг҃оро́диченъ:
Кто̀ мо́жетъ сказа́ти твоѐ та́инство, ѽ влⷣчце бцⷣе! зижди́телѧ бо всѣ́хъ несказа́ннѡ воплоти́ла є҆сѝ.
И҆́нъ. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ; но ѡ҆брати́ мѧ, и҆ къ свѣ́тꙋ за́повѣдей твои́хъ, пꙋти̑ моѧ̑ напра́ви, молю́сѧ.
Дрема́нїе ᲂу҆ны́нїѧ ѻ҆́чи се́рдца твоегѡ̀ не покры̀, но ᲂу҆ма̀ твоегѡ̀, и҆ жела́нїѧ бжⷭ҇твеннагѡ жа́ломъ ᲂу҆ѧзвлѧ́емь, всено́щнымъ стоѧ́нїемъ, и҆ въ моли́твѣ терпѣ́лъ є҆сѝ, пло́ти не покрыва́ѧ бро́ви.
Смиреномꙋ́дрїе сожи́тельно и҆мѣ́ѧ ѿ ю҆́ности, видѣ̑нїи бжⷭ҇твенными и҆ поꙋчє́нїи ᲂу҆́мъ просвѣща́ѧ, льсти́вагѡ по́мысломъ не ᲂу҆кра́лсѧ є҆сѝ: но смире́нно и҆мѣ́лъ є҆сѝ мꙋдрова́нїе.
Бг҃оро́диченъ:
Ꙗ҆́кѡ краснꙋ̀ добро́тою, добродѣ́телей ѡ҆брѣ́тъ тѧ̀ пала́тꙋ кра́сное сло́во, въ твоѧ̑ нетлѣ̑ннаѧ ложесна̀ всели́сѧ. и҆ и҆зъ тебє̀ роди́тисѧ неизмѣ́ннѡ благоизво́ли, вѣ́рныхъ ᲂу҆краша́ѧ ли́ца.
Пѣ́снь ѕ҃. І҆рмо́съ:
Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но, ꙗ҆́кѡ бг҃ъ, и҆зъ глꙋбины̀ возведѝ живо́тъ мо́й, многоми́лостиве.
Ни ѻ҆́гнь, нижѐ ра̑ны, ни ѕвѣ́рїе, нижѐ сме́ртное и҆скꙋше́нїе до́блїи, ва́съ разлꙋчи́ти бж҃їѧ чи́стыѧ и҆ непоро́чныѧ любвѐ возмого́ша.
Зако́нѡмъ хва́льнымъ не порабо́таетъ мꙋ́чєникъ вои́стиннꙋ до кро́ве мꙋ́жество: є҆ди́нъ са́мъ сла́вѧй гдⷭ҇ь, велича́етъ ꙗ҆́кѡ ᲂу҆го́дники.
Благопла́внѡ пꙋчи́нꙋ преше́дше лю́тыхъ мꙋ́къ, ᲂу҆стреми́стесѧ къ бжⷭ҇твенномꙋ приста́нищꙋ, є҆́же ѡ҆ хрⷭ҇тѣ̀, страстоте́рпцы мꙋ́чєницы, присносꙋ́щнагѡ наслажде́нїѧ.
Бг҃оро́диченъ:
Сѐ дв҃а, и҆са́їа вопїѧ́ше дре́вле, совѣ́та а҆́гг҃ла вели́каго ражда́етъ, є҆мманꙋ́ила бг҃а и҆ гдⷭ҇а, и҆ сп҃са дꙋ́шъ на́шихъ.
И҆́нъ. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Оу҆мертви́въ сла̑сти, ѡ҆живи́лсѧ є҆сѝ дꙋ́хомъ, и҆ свѧза́въ крѣ́пкаго, сосꙋ́ды расхи́тилъ є҆сѝ є҆гѡ̀, и҆ благопотрє́бнымъ добродѣ́телемъ прїѧ́тєлища разшири́лъ є҆сѝ ᲂу҆чє́нїи твои́ми.
Малосло́вїе лѣ́ностное ᲂу҆ма̀ ѿгна́въ, хлѣ́бъ живо́тный, и҆ є҆́же ко и҆з̾ѻби́лїю, рꙋко́ю и҆ ѧ҆зы́комъ твои́мъ раздава́ѧ, ѻ҆́ч҃е, сꙋгꙋ́бъ хотѧ́щымъ бы́лъ є҆сѝ.
И҆́же тала́нтъ ѿ бж҃їѧ ᲂу҆че́нїѧ ѡ҆брѣ́тъ, ꙗ҆́кѡ сы́й бж҃е́ственнымъ спѣ́хомъ возрасти́въ безъ мѣ́ры, гла́съ влⷣки твоегѡ̀ слы́шиши ра́достенъ, къ лꙋ́чшымъ зовꙋ́щь тѧ̀.
Бг҃оро́диченъ:
Зако́нныхъ кромѣ̀ въ тебѣ̀ вы́шнїй вочл҃вѣ́чисѧ, и҆ пло́ть непрело́жнѡ ꙗ҆́вльсѧ, съ человѣ́ки поживѐ, и҆ къ нбⷭ҇нѣй возвы́ситисѧ стезѝ хотѧ́щымъ показа̀.
Конда́къ, гла́съ в҃. Подо́бенъ: Твє́рдыѧ:
Плотскꙋ́ю тѧготꙋ̀ ᲂу҆тончи́лъ є҆сѝ дѣ́лы, дꙋше́внꙋю же бы́стрость впери́лъ є҆сѝ просвѣще́нїемъ, мїхаи́ле, и҆ ꙗ҆ви́лсѧ є҆сѝ трⷪ҇цѣ жили́ще: ю҆́же зрѧ̀, бл҃же́нне, ꙗ҆́снѡ, молѝ непреста́ннѡ ѡ҆ всѣ́хъ на́съ.
І҆́косъ:
Моли́твъ неподви́жимый сто́лпъ, соверше́нїе любвѐ го́рнѧгѡ благоꙋ́мїѧ, ᲂу҆миле́нїѧ бе́здна, не въ тре́тїю ча́сть взѧ́тъ бы́лъ є҆сѝ высоты̀, но и҆дѣ́же незаходи́мое бж҃ество̀ ꙗ҆́снѡ зрѧ́тъ херꙋві́ми, и҆ си́ми видѣ̑нїи сїѧ́ѧ покланѧ́ешисѧ, и҆ сла́вꙋ пребжⷭ҇твеннꙋю прїе́млеши, ѿѻнꙋ́дꙋ ѡ҆божа́емь. тѣ́мъ пѣ́ти тѧ̀ досто́йнѡ не возмога́емъ, про́симъ проще́нїѧ взыва́юще кꙋ́пнѡ: молѝ непреста́ннѡ ѡ҆ всѣ́хъ на́съ.
Пѣ́снь з҃. І҆рмо́съ:
А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е, бл҃гослове́нъ є҆сѝ.
Тѣлеса̀ ра́намъ преда́вше, любо́вїю вопло́щшагѡсѧ сло́ва мч҃ницы, ѿ сегѡ̀ вѣне́цъ пра́вды прїѧ́сте въ лѣ́потꙋ.
Свѣ́томъ бжⷭ҇твеннымъ ᲂу҆́мъ просвѣ́щше, вѣ́рою мꙋче́нїѧ тмꙋ̀ претеко́сте, вопїю́ще, прехва́льнїи: ѻ҆тє́цъ на́шихъ бж҃е, благослове́нъ є҆сѝ.
Тече́нїемъ твои́хъ ᲂу҆сте́нъ медото́чныхъ слове́съ, преблаже́нне про́кле, ꙗ҆́кѡ бжⷭ҇твеннымъ и҆сцѣле́нїемъ напоѧ́еши пою́щыѧ: ѻ҆тє́цъ на́шихъ бж҃е, бл҃гослове́нъ є҆сѝ.
Си́лою бжⷭ҇твенною ᲂу҆́мъ ᲂу҆крѣ́пль, мꙋ́къ гѡ́рькїѧ ви́ды претерпѣ́лъ є҆сѝ зовы́й, і҆ла́рїе: ѻ҆тє́цъ на́шихъ бж҃е, бл҃гослове́нъ є҆сѝ.
Бг҃оро́диченъ:
Ꙗ҆́кѡ вы́шши всѣ́хъ тва́рей, ражда́еши всѣ́хъ зижди́телѧ, пребы́вши дв҃ою нескве́рнаѧ, бл҃гослове́ннаѧ є҆ди́на, при́снѡ препросла́вленнаѧ.
И҆́нъ. І҆рмо́съ:
Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
Сѣ́мѧ прїе́мъ въ се́рдцы за́повѣдей бж҃їихъ па́че стори́цъ, и҆ ты́сѧща плѡ́дъ прине́слъ є҆сѝ кла́съ бжⷭ҇твенный, мона́хѡвъ вопїю́щихъ: бл҃гослове́нъ бг҃ъ ѻ҆тє́цъ на́шихъ.
Дх҃а сосꙋ́дъ прест҃а́гѡ ꙗ҆ви́шасѧ ᲂу҆стнѣ̀ твоѝ, и҆ ꙗ҆́коже наводне́нїе ѧ҆зы́къ честна̑ѧ ᲂу҆чє́нїѧ, трⷪ҇цѣ согла́снѡ зовꙋ́щымъ: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
Безъ сѣ́мене всели́сѧ во чре́во твоѐ созда́вый мѧ̀, и҆ и҆зъ тебє̀ плотоно́сецъ бг҃ъ и҆ чл҃вѣ́къ про́йде. не во двѣ̀ раздѣли́сѧ ѵ҆поста̑си, ни смѣше́нїѧ под̾ѧ́тъ, ѻ҆тцє́въ бг҃ъ бл҃гослове́нный.
Пѣ́снь и҃. І҆рмо́съ:
И҆зба́вителю всѣ́хъ, всеси́льне, посредѣ̀ пла́мене благоче́ствовавшыѧ, снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀, благослови́те, по́йте гдⷭ҇а.
По мно́гихъ мꙋ́кахъ стрѣлѧ́нїю свирѣ́пый вра́гъ тѧ̀ предае́тъ: ѿ ни́хже ссѣца́емь, всехва́льный про́кле, ра́дꙋѧсѧ въ рꙋ́цѣ бж҃їи пре́далъ є҆сѝ дꙋ́хъ тво́й.
Оу҆ѧзви́сѧ честно́е тѣ́ло твоѐ непреста́нными стрѣлѧ̑нїи, свѧ́те, и҆ неисцѣ́льнѡ ᲂу҆ѧзвѝ врагѝ безплѡ́тныѧ, не пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.
Просвѣща́емь заре́ю благода́ти, ꙗ҆́коже ка́мень на землѝ валѧ́емь, сокрꙋши́лъ є҆сѝ, і҆ла́рїе, ᲂу҆твержде́нїе пре́лести, поѧ̀ въ крѣ́пости: благослови́те, всѧ̑ дѣла̀ гдⷭ҇нѧ, гдⷭ҇а.
Ка̑пли крове́й твои́хъ поте́кше, нече́стїѧ ѻ҆́гнь ᲂу҆гаси́ша, вѣ̑рныѧ же напои́ша, пою́щыѧ непреста́ннѡ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Вопло́щсѧ ѿ чⷭ҇тыхъ крове́й твои́хъ бг҃ъ, сотвори́вый и҆ созда́вый мѧ̀, бг҃ороди́тельнице влⷣчце, ѡ҆бновѝ мі́ръ вопїю́щїй: благослови́те, всѧ̑ дѣла̀ гдⷭ҇нѧ, гдⷭ҇а.
И҆́нъ. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
И҆́же пренепостижи́мꙋю гдⷭ҇ню красотꙋ̀, є҆ли́кѡ жела́нїе бѧ́ше, во пло́ти зрѧ̀ ᲂу҆ма̀ свѣ́тлостїю, ны́нѣ пе́рсть ѡ҆ста́вль, и҆ къ нб҃сѝ до конца̀ пресели́всѧ, предъ лице́мъ предстои́ши трⷪ҇цы, зовы́й: лю́дїе, превозноси́те гдⷭ҇а во всѧ̑ вѣ́ки.
Многоцѣ́нный тебѣ̀ вѣне́цъ, по́двигъ сконча́вшꙋ, и҆́же на де́мѡны, влⷣка подадѐ, зла́та свѣтлѣ́йши, и҆ би́сера краснѣ́йши, црⷭ҇тва и҆ безсме́ртїѧ, ѽ ѻ҆́ч҃е! сїѧ́ѧ па́че со́лнца, зове́ши: лю́дїе, превозноси́те гдⷭ҇а во всѧ̑ вѣ́ки.
Ѽ сла́дкагѡ ѧ҆зы́ка твоегѡ̀, и҆́мже премꙋ́дрѡ ᲂу҆лови́лъ є҆сѝ поглощє́нныѧ враго́мъ льсти́вымъ! и҆ ко и҆змѣне́нїю бжⷭ҇твенномꙋ премѣни́лъ є҆сѝ, водрꙋзи́въ є҆диноѻбра́знѡ сѣ̑ни ꙗ҆́кѡ песо́къ, и҆ зовѧ̀ непреста́ннѡ, свѧще́нницы благослови́те, лю́дїе превозноси́те гдⷭ҇а во всѧ̑ вѣ́ки.
Бг҃оро́диченъ:
Оу҆мерщвлє́нныѧ жа́ломъ всепа́гꙋбнымъ ѕмїи́нымъ, є҆ди́на живода́вца бг҃а ро́ждшаѧ, дв҃о, ѡ҆живи́ла є҆сѝ. є҆го́же прилѣ́жнѡ молѝ, воста̑нїѧ страсте́й ᲂу҆тиши́ти, любо́вїю пою́щихъ: свѧще́нницы благослови́те, лю́дїе превозноси́те є҆го̀ во всѧ̑ вѣ́ки.
Пѣ́снь ѳ҃. І҆рмо́съ:
Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆сѝ: тѣ́мъ тѧ̀ всѝ велича́емъ.
Сѐ свѣтоза́рнаѧ и҆ свѧще́ннаѧ, и҆ благонаро́читаѧ мꙋ́чєникъ па́мѧть возсїѧ̀, всю̀ зе́млю просвѣща́ющи, мра́къ ѕло́бы ѿе́млющи, и҆ ѻ҆́блакъ дꙋша́мъ ѿгонѧ́щи, и҆ и҆сцѣле́нїй благода́ть точа́щи.
Ꙗ҆́коже два̀ сосца̑ дꙋхѡ́вна пролива́юща и҆сцѣле́нїй млеко̀, мꙋ́чєницы, всѧ̑ка напитава́ете сердца̀, го́ресть недꙋ́гѡвъ ѿгонѧ́ще, и҆ стра̑сти лю̑тыѧ и҆сцѣлѧ́юще. тѣ́мже досто́йнѡ блажи́ми є҆стѐ.
Ка́плѧми крове́й свѧще́нныхъ ѡ҆мочи́вше багрѧни́цꙋ, пресла́внїи, и҆ сїю̀ краснѡ̀ носѧ́ще, со хрⷭ҇то́мъ ца́рствꙋете всегда̀, є҆ди́нѣмъ цр҃е́мъ и҆ бг҃омъ на́шимъ, ѡ҆ мі́рѣ молѧ́щесѧ.
Землѧ̀ благослови́сѧ ва́шими кровьмѝ, и҆ моще́й положе́нїемъ, перворо́дныхъ це́рковь дꙋ́хомъ бжⷭ҇твеннѣ свѣтлѣ́етсѧ: въ не́йже съ мꙋ́чєники, ꙗ҆́кѡ мꙋ́чєницы, ѡ҆ мі́рѣ моли́тесѧ.
Бг҃оро́диченъ:
Свѣ́та жили́ще, чⷭ҇таѧ, твоѐ пречⷭ҇таѧ бы́сть чре́во, влⷣчце, тебє̀ ра́ди ꙗ҆́вльшагосѧ, въ ве́щи зри́мѣ тѣле́снѣй, и҆ всѧ̑ сꙋ́щыѧ во тмѣ̀ просвѣ́щша. тѣ́мже тѧ̀ вѣ́рою ᲂу҆блажа́емъ.
И҆́нъ. І҆рмо́съ:
Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти ѿ дв҃и́ческагѡ чре́ва бы́въ чл҃вѣ́къ. тѣ́мже пречи́стꙋю бцⷣꙋ вѣ́рнїи велича́емъ.
Дне́сь всѧ̀ землѧ̀ прїи́де, проповѣ́дающи хрⷭ҇то́во бжⷭ҇твенное и҆́мѧ, пресла́внꙋ и҆ бжⷭ҇твеннꙋю па́мѧть твою̀ торжествꙋ́ѧ: ты́ бо ѡ҆небеси́лъ є҆сѝ ю҆̀ монахоѻбра́зными ᲂу҆че́ньми, и҆ ᲂу҆ѧсни́лъ є҆сѝ а҆́гг҃льскимъ ревнꙋ́ющыѧ чинѡ́мъ.
Ѡ҆свѣти́ша мѡ́лнїи твои́хъ чꙋде́съ всѧ̑ концы̀: молѧ́щымбосѧ вѣ́рою, ра́ка твоѧ̀ и҆сточа́етъ и҆сцѣлє́нїѧ. и҆ тебѐ ᲂу҆́бѡ и҆́мать нб҃о, землѧ́ же земнꙋ́ю сѣ́нь тѣ́ла, ю҆́же пре́жде гро́ба и҆стни́вшꙋюсѧ воздержа́нїемъ твои́мъ.
Зе́мленъ ᲂу҆́мъ не мо́жетъ свѣ́тъ ѻ҆́нъ разꙋмѣ́ти, пресвѣ́тлый и҆ пренеизглаго́ланный трⷪ҇ческїй, є҆го́же ны́нѣ прїѧ́лъ є҆сѝ, и҆́мже и҆ ѡ҆божа́емь ꙗ҆́вѣ: помина́ющихъ тѧ̀, преблаже́нне, помѧнѝ, трⷪ҇цѣ ст҃ѣ́й предстоѧ̀.
Бг҃оро́диченъ:
Ꙗ҆ви́хомсѧ жи́зни бжⷭ҇твенныѧ ѿпаде́ни, дре́ва ра́ди разꙋ́мнагѡ: ты́ же родила̀ є҆сѝ жи́зни дре́во хрⷭ҇та̀ бг҃а, и҆́же ѿ а҆́довыхъ те́мныхъ жили́щъ и҆зведѐ, и҆ къ неѿе́млемѣй введѐ жи́зни пою́щыѧ тѧ̀.
Свѣти́ленъ. Подо́бенъ: Нб҃о ѕвѣзда́ми:
А҆́гг҃льскагѡ житїѧ̀ жела́ѧ, ᲂу҆дали́лъ є҆сѝ себѐ всѣ́хъ кра́сныхъ житїѧ̀, сели́лсѧ є҆сѝ во дво́рѣхъ за́повѣдей гдⷭ҇нихъ, и҆ со а҆́гг҃лы ра́дꙋешисѧ.
Бг҃оро́диченъ:
Ꙗ҆́же ѿ бг҃а мі́рови пода̑ннымъ благи̑мъ ты̀ вина̀ є҆сѝ, бцⷣе, но и҆ ны́нѣ ми́лостива сотворѝ ѡ҆ ѻ҆́бщемъ спасе́нїи благопремѣ́ннаго бг҃а.
Мѣ́сѧца тогѡ́же въ г҃ї-й де́нь. Пра́зднованїе прест҃ѣ́й влⷣцѣ на́шей бцⷣѣ и҆ приснодв҃ѣ мр҃і́и ра́ди і҆кѡ́ны є҆ѧ̀, нарица́емыѧ троерꙋ́чица, ꙗ҆́же на ст҃ѣ́й горѣ̀ а҆ѳѡ́нстѣй.
На ма́лѣй вече́рни:
На Гдⷭ҇и воззва́хъ: стїхи̑ры самогла́сны, гла́съ ѕ҃:
Ра́дꙋйсѧ, а҆ѳѡ́не ст҃ы́й, и҆мꙋ́ще въ себѣ̀ многоцѣле́бенъ да́ръ пречⷭ҇тыѧ дв҃ы бцⷣы і҆кѡ́ны чꙋде́сное ꙗ҆вле́нїе, є҆́юже въ трⷪ҇цѣ сла́витъ бг҃а вы́шнѧго.
Ра́дꙋйсѧ, а҆ѳѡ́не ст҃ы́й и҆ всѧ̑ вселе́ннаѧ, ликовствꙋ́й, ꙗ҆́кѡ ты̀ и҆́маши во ѻ҆гра́дѣ свое́й зало́гъ бл҃года́ти бж҃їѧ пречꙋ́днꙋю і҆кѡ́нꙋ влⷣчцы бцⷣы, є҆ѧ́же троерꙋ́чное ꙗ҆вле́нїе сла́вимъ.
Ра́дꙋйсѧ и҆ весели́сѧ, а҆ѳѡ́не ст҃ы́й, ты́ бо безцѣ́нное сокро́вище въ себѣ̀ храни́ши цѣльбоно́снꙋю і҆кѡ́нꙋ пречⷭ҇тыѧ дв҃ы и҆ влⷣчцы, ꙗ҆́же тре́тїю и҆ пречⷭ҇тꙋю рꙋ́кꙋ на і҆кѡ́нѣ и҆з̾ѻбразѝ всѣ̑мъ на застꙋпле́нїе.
Сла́ва, и҆ ны́нѣ, гла́съ и҃:
И҆скопа́йте, лю́дїе, и҆сто́чникъ въ высотѣ̀ а҆ѳѡ́нскїѧ горы̀, потече́тъ бо сла́дость во ве́сь мі́ръ неизрече́ннаѧ, напаѧ́ющи и҆сцѣле́нїи дꙋше́вными и҆ тѣле́сными ѿ ст҃ы́ѧ и҆ чꙋдотво́рныѧ і҆кѡ́ны влⷣчцы на́шеѧ приснодв҃ы бцⷣы, та́ бо вѣ̑рнымъ и҆сточа́етъ да́ры цѣлє́бныѧ и҆ созыва́етъ ви́дѣти, ка́кѡ двѣма̀ рꙋка́ма де́ржитъ во ѡ҆б̾ѧ́тїихъ держа́щаго всю̀ тва́рь, тре́тїею и҆збавлѧ́етъ на́съ ѿ всѣ́хъ бѣ́дъ.
На стїхо́внѣ стїхи̑ры, гла́съ з҃:
Восхвалѧ́юще чꙋ́до ѿ ст҃ы́ѧ твоеѧ̀ і҆кѡ́ны, толи́кѡ невѣ́домое, всѝ вопїе́мъ тебѣ̀, дв҃о пречⷭ҇таѧ: мл҃твами твои́ми сп҃сѝ дꙋ́шы на́шѧ.
Сті́хъ: Слы́ши, дщѝ, и҆ ви́ждь и҆ приклонѝ ᲂу҆́хо твоѐ.
Ликꙋ́юще, да пра́зднꙋетъ ве́сь мі́ръ пречꙋ́дное бг҃оро́ждшїѧ дв҃ы ꙗ҆вле́нїе, сплета́юще є҆́й пѣ́сни дх҃ѡ́вныѧ, потщи́мсѧ воспѣ́ти сщ҃е́нный ѻ҆́бразъ є҆ѧ̀, любо́вїю и҆ чꙋдесы̀ просла́вльшейсѧ, и҆ пред̾ ни́мъ вопїю́ще: пода́ждь млⷭ҇ть на́мъ, влⷣчце, и҆ сп҃сѝ дꙋ́шы на́шѧ.
Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.
Ликꙋ́йте, всѝ лю́дїе и҆ торжествꙋ́йте, ѻ҆́бразъ бо прест҃ы́ѧ трⷪ҇цы, всечⷭ҇тны́ми рꙋка́ми свои́ми пречⷭ҇таѧ дв҃а на і҆кѡ́нѣ и҆з̾ѻбража́етъ на́мъ, прїиди́те празднолю́бцы всѝ, ᲂу҆бл҃жи́мъ чꙋ́дное ꙗ҆вле́нїе бг҃ома́тере, да сп҃се́тъ дꙋ́шы на́шѧ.
Сла́ва, и҆ ны́нѣ, гла́съ и҃:
Влⷣчце, прїимѝ мл҃твы ра̑бъ твои́хъ и҆ и҆зба́ви на́съ ѿ всѧ́кїѧ нꙋ́жды и҆ печа́ли.
Тропа́рь пи́санъ на вели́цѣй вече́рни.
На вели́цѣй вече́рни:
На Гдⷭ҇и воззва́хъ: стїхи̑ры, гла́съ а҃:
Подо́бенъ: Ѽ, ди́вное чꙋ́до.
Ѽ ди́вное чꙋ́до! и҆сто́чникъ приснотекꙋ́щїй, пречⷭ҇тый ѻ҆́бразъ тво́й, влⷣчце бцⷣе, дарова́сѧ ст҃оимени́той горѣ̀, ᲂу҆дивлѧ́етъ же премі̑рнаѧ и҆ ᲂу҆жаса́етъ зємна́ѧ чꙋдесы̀ свои́ми, зрѧ́ще бо ѻ҆́бразъ ст҃ы́ѧ трⷪ҇цы, тремѝ рꙋка́ми твои́ми и҆з̾ѻбраже́нный: двѣма̀ де́ржиши сн҃а своего̀, хрⷭ҇та̀ бг҃а на́шегѡ, тре́тїею же ѿ напа́стей и҆ бѣ́дъ вѣ́рнѡ прибѣга́ющихъ и҆збавлѧ́еши, тѣ́мже бл҃года́рнѡ тебѣ̀ вопїе́мъ: ѡ҆бра́дованнаѧ, ра́дꙋйсѧ, съ тобо́ю гдⷭ҇ь, подаѧ́й мі́рови тобо́ю ве́лїю млⷭ҇ть.
Ѽ ве́лїе чꙋ́до и҆ неизрече́нное! ꙗ҆вѝ на́мъ на і҆кѡ́нѣ ст҃ѣ́й трѝ рꙋ́ки своѧ̑, ѽ дв҃о пребл҃гослове́ннаѧ! сїѐ бы́сть чꙋ́до чꙋдесе́мъ и҆ во все́мъ мі́рѣ ра́дость ве́лїѧ, неизрече́нное бога́тство возсїѧ̀ на́мъ бл҃года́ти бж҃їѧ, да всѝ, припа́дающе къ тебѣ̀, мо́лимсѧ: ѿвратѝ, бцⷣе, всѧ̑кїѧ напа́сти ѿ ра̑бъ твои́хъ и҆ покажѝ си́лꙋ и҆ бл҃года́ть цѣльбоно́сныѧ ст҃ы́ѧ і҆кѡ́ны твоеѧ̀, да вѣ́рнѡ тебѣ̀ вопїе́мъ: ѡ҆бра́дованнаѧ, ра́дꙋйсѧ, съ тобо́ю гдⷭ҇ь, подаѧ́й мі́рови тобо́ю ве́лїю млⷭ҇ть.
Ѽ, стра́нное чꙋ́до и҆ пресла́вное! да всѝ, притека́юще, ᲂу҆́зримъ, ка́кѡ тре́тїю и҆ пречⷭ҇тꙋю рꙋ́кꙋ на і҆кѡ́нѣ и҆з̾ѧвѝ, ѽ дв҃о пребл҃гослове́ннаѧ, на по́мощь вѣ̑рнымъ и҆ въ застꙋпле́нїе ѿ бѣ́дъ на́шихъ и҆ напа́стей, тебѣ̀ є҆ди́ной досто́йнѡ є҆́сть показа́ти сто́ль вє́лїѧ чꙋдеса̀, прїиди́те, вѣ́рнїи, приспѣ́ бо де́нь свѣ́тлагѡ є҆ѧ̀ торжества̀, припа́дающе, мо́лимсѧ и҆ ᲂу҆ми́льнѡ вопїе́мъ: ѡ҆бра́дованнаѧ, ра́дꙋйсѧ, съ тобо́ю гдⷭ҇ь, подаѧ́й мі́рови тобо́ю ве́лїю млⷭ҇ть.
Сла́ва, и҆ ны́нѣ, гла́съ в҃.
Ѽ, пресла́внагѡ чꙋдесѐ! воспѣ́ти досто́йнѡ недоꙋмѣва́етъ всѧ́къ ᲂу҆́мъ, ка́кѡ во а҆ѳѡ́нъ вхо́дитъ цр҃и́ца, цр҃ѧ̀ хрⷭ҇та̀ ро́ждшаѧ, и҆ прпⷣбномꙋ мїхаи́лꙋ малеинꙋ̀ ꙗ҆ви́сѧ чꙋ́днымъ ѻ҆́бразомъ, ѿкры̀ бл҃года́ть ѡ҆ горѣ̀, и҆ ѡ҆ се́мъ а҆ѳѡ́нъ ликовствꙋ́етъ, ꙗ҆́кѡ и҆мѣ́юще многобога́тый да́ръ во ѡ҆гра́дѣ свое́й, цѣльбоно́снꙋю, влⷣчце, твою̀ і҆кѡ́нꙋ, къ не́йже мы̀ возопїе́мъ: ѽ пребл҃гослове́ннаѧ, къ тебѣ̀ и҆мѣ́ютъ вѣ́рнїи сердца̀, любо́вїю распалє́ннаѧ, бл҃года́рственнꙋю пѣ́снь пою́ще, ꙗ҆́кѡ всенаде́жнѣй застꙋ́пницѣ ро́да на́шегѡ, ꙗ҆́же бл҃гоизво́ли дарова́ти на́мъ на прибѣ́жище пречⷭ҇тый зра́къ сво́й, въ не́мъ бо зри́мъ прославлѧ́емый въ тебѣ̀ ѻ҆́бразъ трїеди́нагѡ бжⷭ҇тва̀, просла́ви и҆ въ на́съ, чтꙋ́щихъ тѧ̀, влⷣчце, и҆́мѧ твоѐ, и҆ сподо́би млⷭ҇ть ᲂу҆лꙋчи́ти сн҃а твоегѡ̀, хрⷭ҇та̀ бг҃а на́шегѡ, того̀ молѧ́щи, ꙗ҆́кѡ милосе́рдъ.
Вхо́дъ. Прокі́менъ днѐ. И҆ чтє́нїѧ бцⷣѣ трѝ.
Бытїѧ̀ чте́нїе. (Глава̀ к҃и.)
И҆зы́де і҆а́кѡвъ ѿ стꙋденца̀ клѧ́твеннагѡ, и҆ и҆́де въ харра́нъ. и҆ ѡ҆брѣ́те мѣ́сто, и҆ спа̀ та́мѡ: за́йде бо со́лнце. и҆ взѧ́тъ ѿ ка́менїѧ мѣ́ста тогѡ̀, и҆ положѝ возгла́вїе себѣ̀, и҆ спа̀ на мѣ́стѣ ѻ҆́номъ. и҆ со́нъ ви́дѣ: и҆ сѐ лѣ́ствица ᲂу҆твержде́на на землѝ, є҆ѧ́же глава̀ досѧза́ше до небе́съ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й. гдⷭ҇ь же ᲂу҆твержда́шесѧ на не́й, и҆ речѐ: а҆́зъ бг҃ъ а҆враа́мовъ ѻ҆тца̀ твоегѡ̀ и҆ бг҃ъ і҆саа́ковъ, не бо́йсѧ: землѧ̀, и҆дѣ́же ты̀ спи́ши на не́й, тебѣ̀ да́мъ ю҆̀, и҆ сѣ́мени твоемꙋ̀ и҆ бꙋ́детъ сѣ́мѧ твоѐ ꙗ҆́кѡ песо́къ земны́й, и҆ распространи́тсѧ на мо́ре, и҆ лі́вꙋ, и҆ сѣ́веръ, и҆ на восто́ки: и҆ возбл҃гословѧ́тсѧ ѡ҆ тебѣ̀ всѧ̑ колѣ̑на зємна́ѧ, и҆ ѡ҆ сѣ́мени твое́мъ. и҆ сѐ а҆́зъ съ тобо́ю сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши, и҆ возвращꙋ́ тѧ въ зе́млю сїю̀: ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑, є҆ли̑ка глаго́лахъ тебѣ̀. и҆ воста̀ і҆а́кѡвъ ѿ сна̀ своегѡ̀, и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ. и҆ ᲂу҆боѧ́сѧ, и҆ речѐ: ꙗ҆́кѡ стра́шно мѣ́сто сїѐ: нѣ́сть сїѐ, но до́мъ бж҃їй, и҆ сїѧ̑ врата̀ нбⷭ҇наѧ.
Проро́чества і҆езекі́илева чте́нїе. (Главы̑ м҃г и҆ м҃д).
Та́кѡ глаго́летъ гдⷭ҇ь: бꙋ́детъ ѿ днѐ ѻ҆сма́гѡ и҆ про́чее сотворѧ́тъ і҆ере́и не ѻ҆лтарѝ всесожже́нїѧ ва́шегѡ и҆ ꙗ҆̀же сп҃се́нїѧ ва́шегѡ: и҆ прїимꙋ́ вы, глаго́летъ а҆дѡнаі̀ гдⷭ҇ь. и҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ, зрѧ́щихъ на восто́ки: и҆ сїѧ̑ бѧ́хꙋ затворє́на. и҆ речѐ гдⷭ҇ь ко мнѣ̀: врата̀ сїѧ̑ затворє́на бꙋ́дꙋтъ, и҆ не ѿве́рзꙋтсѧ, и҆ никто́же про́йдетъ сквозѣ̀ и҆́хъ: ꙗ҆́кѡ гдⷭ҇ь бг҃ъ і҆и҃левъ про́йдетъ и҆́ми, и҆ бꙋ́дꙋтъ затворє́на. ꙗ҆́кѡ и҆гꙋ́менъ сѧ́детъ въ ни́хъ снѣ́сти хлѣ́бъ: по пꙋтѝ є҆ла́мскихъ вра́тъ вни́детъ, и҆ по пꙋтѝ є҆гѡ̀ и҆зы́детъ. и҆ введе́ мѧ по пꙋтѝ вра́тъ ст҃ы́хъ сꙋ́щихъ къ сѣ́верꙋ, прѧ́мѡ хра́мꙋ: и҆ ви́дѣхъ, и҆ сѐ и҆спо́лнь сла́вы хра́мъ гдⷭ҇ень.
При́тчей чте́нїе (глава̀ ѳ҃):
Премꙋ́дрость созда̀ себѣ̀ до́мъ и҆ ᲂу҆твердѝ столпѡ́въ се́дмь. закла̀ своѧ̑ же́ртвєннаѧ, и҆ растворѝ въ ча́шѣ свое́й вїно̀, и҆ ᲂу҆гото́ва свою̀ трапе́зꙋ. посла̀ своѧ̑ рабы̀, созыва́ющи съ высо́кимъ проповѣ́данїемъ на ча́шꙋ, глаго́лющи: и҆́же є҆́сть безꙋ́менъ, да ᲂу҆клони́тсѧ ко мнѣ̀. и҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ и҆ пі́йте вїно̀, є҆́же раствори́хъ ва́мъ. ѡ҆ста́вите безꙋ́мїе и҆ жи́ви бꙋ́дете. и҆ взыщи́те ра́зꙋма, да поживе́те и҆ и҆спра́вите ра́зꙋмъ въ вѣ́дѣнїи. наказꙋ́ѧй ѕлы̑ѧ прїи́метъ себѣ̀ безче́стїе, ѡ҆блича́ѧй нечести́ваго ѡ҆поро́читъ себѐ, ѡ҆бличе́нїе бо нечести́вомꙋ ра̑ны є҆мꙋ̀. не ѡ҆блича́й ѕлы́хъ, да не возненави́дѧтъ тебѐ, ѡ҆блича́й премꙋ́дра, и҆ возлю́битъ тѧ̀. да́ждь премꙋ́дромꙋ винꙋ̀, и҆ премꙋ́дршїй бꙋ́детъ. сказꙋ́й пра́ведномꙋ, и҆ приложи́тъ прїима́ти. нача́ло премꙋ́дрости стра́хъ гдⷭ҇ень, и҆ совѣ́тъ ст҃ы́хъ ра́зꙋмъ. разꙋмѣ́ти бо зако́нъ по́мысла є҆́сть бл҃га́гѡ: си́мъ бо ѻ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ̑та живота̀.
На лїті́и стїхи̑ры, гла́съ є҃:
Ты̀ є҆сѝ мл҃твенница нело́жнаѧ ᲂу҆пова́ющихъ хрⷭ҇тїа́нъ, ты̀ є҆сѝ предста́тельница вѣ́рнаѧ всѣ̑мъ прибѣга́ющымъ, показа́ла бо є҆сѝ на́мъ во сп҃се́нїе троерꙋ́чный ѻ҆́бразъ тво́й, прїимѝ мѡльбы̀ ѿ на́съ, прилѣ́жнѡ призыва́ющихъ тѧ̀, и҆ пода́ждь ве́лїю и҆ бога́тꙋю млⷭ҇ть.
Ты̀ є҆сѝ ᲂу҆пова́нїе и҆ покро́въ вѣ́рнымъ, ѽ пребл҃гослове́ннаѧ влⷣчне, да́рꙋй на́мъ млⷭ҇ть сн҃а твоегѡ̀ и҆ гдⷭ҇а, ты́ бо є҆сѝ хода́таица къ немꙋ̀ си́льнаѧ, є҆ли́ко восхо́щеши, всѧ̑ ᲂу҆ негѡ̀ и҆спроси́ти мо́жеши, того̀ молѝ пода́ти ми́ръ и҆ ве́лїю млⷭ҇ть.
Ты̀ є҆сѝ прибѣ́жище на́ше, ты̀ є҆сѝ и҆збавле́нїе ѿ напа́стей и҆ бѣ́дъ, ᲂу҆милосе́рдисѧ, ѽ дв҃о пречⷭ҇таѧ, низпослѝ на́мъ щедрѡ́ты млⷭ҇рдїѧ ѿ ст҃ы́ѧ твоеѧ̀ і҆кѡ́ны, на ню́же ра́достнѡ взира́юще, про́симъ ᲂу҆мире́нїѧ дꙋша́мъ на́шымъ и҆ ве́лїю млⷭ҇ть.
Сла́ва, и҆ ны́нѣ: гла́съ и҃:
Ѽ, чꙋ́дное ᲂу҆краше́нїе хра́ма твоегѡ̀, гпⷭ҇жѐ цр҃и́це бцⷣе, і҆кѡ́ною твое́ю, є҆́йже предстоѧ́тъ вѣ́рнїи, молѧ́щесѧ, со слеза́ми вопїю́тъ: ѽ дв҃о всебл҃га́ѧ бцⷣе! ты̀ є҆сѝ нбⷭ҇ныхъ сла́ва, земны́хъ ᲂу҆пова́нїе, ѻ҆би́димыхъ застꙋ́пница, печа́льныхъ ᲂу҆тѣше́нїе. дне́сь пра́зднꙋемъ ꙗ҆вле́нїе чⷭ҇тна́гѡ ѻ҆́браза твоегѡ̀, преиспо́лненнагѡ си́лы и҆ чꙋде́съ трїеди́нагѡ бжⷭ҇тва̀, ꙗ҆́кѡ трѝ рꙋ́ки на не́мъ ви́димы є҆́сть: двѣма̀ де́ржиши держа́щаго всѧ̑, тре́тїею же защища́еши ѿ бѣ́дъ чтꙋ́щихъ тѧ̀, да всѝ болѧ́щїи, притека́юще, неѡскꙋ́днѡ прїе́млютъ и҆сцѣле́нїе, стра́ждꙋщїи ѿ бѣ́дъ и҆збавле́нїе, ты́ бо є҆сѝ всѣ̑мъ нело́жнаѧ на́мъ предста́тельница и҆ моле́бница ко хрⷭ҇тꙋ̀ бг҃ꙋ на́шемꙋ, того̀ молѝ сп҃сти́сѧ дꙋша́мъ на́шымъ.
На стїхо́внѣ стїхи̑ры самогла́сны, гла́съ д҃:
Ꙗ҆́кѡ пресвѣ́тлѣе со́лнца дне́сь возсїѧ̀ на́мъ свѣти́ло во хра́мѣ се́мъ, предстоѧ́щаѧ і҆кѡ́на влⷣчцы на́шеѧ бцⷣы, ѡ҆свѣща́етъ бо прибѣга́ющихъ къ не́й вѣ́рою и҆ позна́нїе подае́тъ ѡ҆ чꙋде́сномъ ꙗ҆вле́нїи свое́мъ, ꙗ҆́кѡ тричи́слєнныѧ рꙋ́ки є҆ѧ̀ прославлѧ́ютъ ст҃ꙋ́ю трⷪ҇цꙋ, и҆ бли́з̾ прⷭ҇то́ла трⷪ҇чнагѡ сама̀ сѣди́тъ, молѧ́щи ѡ҆ на́съ, и҆зба́витисѧ дꙋша́мъ на́шымъ ѿ всѣ́хъ бѣ́дъ, ѕѡ́лъ и҆ ѡ҆бстоѧ́нїй.
Гла́съ є҃:
Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ.
Ꙗ҆́кѡ свѣтоза́рнаѧ зарѧ̀, ѡ҆зарѝ въ сердца́хъ на́шихъ і҆кѡ́на твоѧ̀, ѽ дв҃о, ра́дость ве́лїю, показꙋ́етъ бо чꙋ́до пресла́вное, ка́кѡ ты̀, влⷣчце всепѣ́таѧ, двѣма̀ рꙋка́ма сн҃а и҆ гдⷭ҇а ѡ҆б̾е́млеши, тре́тїею же ди́вный покро́въ и҆ застꙋпле́нїе рабѡ́мъ твои̑мъ ꙗ҆влѧ́еши, сп҃сѝ, влⷣчце, дꙋ́шы на́шѧ ѡ҆ всѣ́хъ бѣ́дъ, ѕѡ́лъ и҆ ѡ҆бстоѧ́нїй.
Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.
Ꙗ҆́же ненаде́жныхъ ᲂу҆пова́нїе и҆звѣ́стное и҆ согрѣша́ющихъ сп҃се́нїе, мр҃і́е всепѣ́таѧ, чⷭ҇таѧ бцⷣе, прїимѝ ѿ на́съ моле́нїе сїѐ, зрѧ́щихъ на пречⷭ҇тнꙋ́ю і҆кѡ́нꙋ твою̀, ꙗ҆́кѡ ѿ неѧ̀ вѣ̑рнымъ и҆сточа́еши чꙋдеса̀, скорбѧ́щымъ скѡ́рби ѡ҆блегча́еши, немощны́хъ и҆сцѣлѧ́еши, ѡ҆жида́емъ и҆ мы̀ милосе́рдїѧ твоегѡ̀: пода́ждь бога́тꙋю твою̀ млⷭ҇ть и҆ сп҃сѝ дꙋ́шы на́шѧ ѿ всѣ́хъ бѣ́дъ, ѕѡ́лъ и҆ ѡ҆бстоѧ́нїй.
Сла́ва, и҆ ны́нѣ, гла́съ ѕ҃:
Наде́жда безмѣ́рнаѧ и҆ во все́мъ помо́щница и҆ застꙋ́пница гото́ваѧ ты̀ є҆сѝ, дв҃о пречⷭ҇таѧ, прїиди́те, вѣ́рнїи, соше́дшесѧ въ хра́мъ, пѣ́сньми дх҃о́вными ра́достнѡ є҆ѧ̀ почти́мъ, зрѧ́ще чꙋдотво́рнꙋю і҆кѡ́нꙋ є҆ѧ̀, и҆ со дерзнове́нїемъ моле́нїе принесе́мъ и҆ ᲂу҆ми́льнѡ возопїе́мъ: ра́дꙋйсѧ, влⷣчце мі́ра и҆ дꙋ́шъ на́шихъ сп҃се́нїе: ра́дꙋйсѧ, защи́тнице бѣ́дствꙋющихъ, подаю́щаѧ свою̀ неѡскꙋ́днꙋю млⷭ҇ть: ра́дꙋйсѧ, ᲂу҆толе́нїе печа́льныхъ: не преста́й, влⷣчце, ѡ҆ на́съ моли́ти хрⷭ҇та̀ бг҃а на́шего, поми́ловатисѧ дꙋша́мъ на́шымъ.
На бл҃гослове́нїи хлѣ́бѡвъ тропа́рь, гла́съ д҃:
Дне́сь всемі́рнаѧ ра́дость возсїѧ̀ на́мъ ве́лїѧ: дарова́сѧ ст҃ѣ́й горѣ̀ а҆ѳѡ́нстѣй цѣльбоно́снаѧ твоѧ̀, влⷣчце бцⷣе, і҆кѡ́на, со и҆з̾ѻбраже́нїемъ тричи́сленнѡ и҆ нераздѣ́льнѡ пречⷭ҇тыхъ рꙋ́къ тво́ихъ въ прославле́нїе ст҃ы́ѧ трⷪ҇цы, созыва́еши бо вѣ́рныхъ и҆ молѧ́щихсѧ тебѣ̀ ѡ҆ се́мъ позна́ти, ꙗ҆́кѡ двѣма̀ сн҃а и҆ гдⷭ҇а де́ржиши, тре́тїю же ꙗ҆вѝ на прибѣ́жище и҆ покро́въ чтꙋ́щымъ тѧ̀, ѿ всѧ́кихъ напа́стей и҆ бѣ́дъ и҆збавлѧ́ти, да всѝ, притека́ющїи къ тебѣ̀, вѣ́рою прїе́млютъ неѡскꙋ́днѡ ѿ всѣ́хъ ѕѡ́лъ свобожде́нїе, ѿ врагѡ́въ защище́нїе, сегѡ̀ ра́ди и҆ мы̀ вкꙋ́пѣ со а҆ѳѡ́номъ вопїе́мъ: ра́дꙋйсѧ, бл҃года́тнаѧ, гдⷭ҇ь съ тобо́ю.
Три́жды.
На ᲂу҆́трени:
На Бг҃ъ гдⷭ҇ь: тропа́рь бцⷣы, три́жды.
По а҃-мъ стїхосло́вїи сѣда́ленъ, гла́съ д҃.
Подо́бенъ: Оу҆диви́сѧ і҆ѡ́сифъ:
Чꙋ́до пресла́вное зри́тсѧ дне́сь, весели́тесѧ, лю́дїе, почита́юще ꙗ҆вле́нїе і҆кѡ́ны всенепоро́чныѧ дв҃ы бцⷣы, се́ бо возсїѧ̀ на́мъ бжⷭ҇твеннаѧ зарѧ̀, бл҃гоче́стнѡ ѿ всѣ́хъ родѡ́въ пою́щымъ, и҆ ны́нѣ мы̀ є҆́й, взыва́юще, прино́симъ бл҃года́рственнꙋю пѣ́снь, ꙗ҆́кѡ показꙋ́етъ на́мъ познава́ти є҆ди́наго въ трⷪ҇цѣ бг҃а на́шего.
Сла́ва, и҆ ны́нѣ, то́йже.
По в҃-мъ стїхосло́вїи сѣда́ленъ, гла́съ д҃.
Подо́бенъ: Оу҆диви́сѧ і҆ѡ́сифъ:
Чꙋ́до чꙋдесє́мъ ꙗ҆ви́сѧ на́мъ і҆кѡ́на твоѧ̀, влⷣчце бцⷣе, на не́йже пречⷭ҇тыми твои́ми рꙋка́ми ст҃ꙋ́ю трⷪ҇цꙋ нераздѣ́льнѡ въ трїе́хъ ѵ҆поста́сѣхъ прославлѧ́еши, сегѡ̀ ра́ди взира́юще на і҆кѡ́нꙋ, съ вѣ́рою мо́лимсѧ: прїимѝ, ѽ мт҃и и҆ дв҃о, на́съ въ сво́й покро́въ и҆ и҆зба́ви всѣ́хъ бѣ́дъ, пребл҃гослове́ннаѧ.
Велича́нїе со сладкопѣ́нїемъ, ли́къ а҃:
Велича́емъ тѧ̀, пренепоро́чнаѧ дв҃о, и҆ чти́мъ чꙋдеса̀ ѻ҆́браза ст҃а́гѡ твоегѡ̀, тре́хъ пречⷭ҇тыхъ рꙋ́къ твои́хъ ꙗ҆вле́нїе въ сла́вꙋ бжⷭ҇тва̀, въ трⷪ҇цѣ бг҃а на́шего.
Ли́къ в҃: Велича́емъ тѧ̀, прест҃а́ѧ дв҃о, и҆ чти́мъ тричи́сленное и҆з̾ѻбраже́нїе пречⷭ҇тыхъ рꙋ́къ твои́хъ, ты́ бо двѣма̀ сн҃а и҆ гдⷭ҇а держи́ши, тре́тїею ѿ напа́стей и҆ бѣ́дъ на́съ и҆збавлѧ́еши.
Ѱало́мъ и҆збра́нный: Помѧнѝ, гдⷭ҇и, дв҃да:
По полѷеле́и сѣда́ленъ, гла́съ и҃. Подо́бенъ: Повелѣ́нное та́йнѡ:
Ве́лїе чꙋ́до и҆ пресла́вное, а҆ѳѡ́нъ велегла́снѡ вопїе́тъ, и҆мꙋ́ще ѻ҆́бразъ въ себѣ̀ пречⷭ҇тыѧ дв҃ы бцⷣы, ꙗ҆́кѡ стра́жа наде́жнаго проти́вꙋ врагѡ́въ ви́димыхъ и҆ неви́димыхъ, и҆ мы̀ всѝ ᲂу҆ми́льнѡ вопїе́мъ: предварѝ, влⷣчце, мл҃твами твои́ми ко хрⷭ҇тꙋ̀ бг҃ꙋ на́шемꙋ, да сп҃се́тъ дꙋ́шы на́шѧ.
Сла́ва, и҆ ны́нѣ, то́йже.
Та́же степе́нна, а҃-й а҆нтїфѡ́нъ д҃-гѡ̀ гла́са. Прокі́менъ, гла́съ д҃: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ. Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи. Всѧ́кое дыха́нїе: Є҆ѵⷢ҇лїе ѿ лꙋ́ки, зача́ло д҃.
По н҃-мъ ѱалмѣ̀ стїхи́ра, гла́съ ѕ҃:
Дне́сь ра́дꙋйтесѧ, лю́дїе, прине́сше достодо́лжнꙋю пѣ́снь влⷣчцѣ на́шей приснодв҃ѣ бцⷣѣ, и҆ почерпи́те бл҃года́ть неѡскꙋ́днꙋю ѿ неистощи́магѡ и҆сто́чника і҆кѡ́ны є҆ѧ̀, свѣтлоблиста́ємыѧ чꙋдесы̀, ꙗ҆́кѡ тричи́сленнѡ и҆з̾ѻбразѝ пречⷭ҇тыѧ рꙋ́ки своѧ̑ во ѻ҆́бразъ трⷪ҇чнагѡ бжⷭ҇тва̀, и҆ прпⷣбномꙋ мїхаи́лꙋ малеинꙋ̀ возвѣща́ющи бл҃года́ть, го́рꙋ а҆ѳѡ́нскꙋю и҆збра̀ себѣ̀ ꙗ҆́кѡ мѣ́сто ᲂу҆го́дное, сп҃са́ти въ не́й тве́рдѡ ѡ҆бита́ющихъ и҆ прибѣга́ющихъ къ є҆ѧ̀ покро́вꙋ и҆ застꙋпле́нїю и҆ разсѣ́ѧнный ᲂу҆́мъ собра́ти во є҆ди́но ста́до, є҆́же прославлѧ́ти хрⷭ҇та̀ бг҃а на́шего, того̀ молѝ сп҃сти́сѧ дꙋша́мъ на́шымъ.
Канѡ́нъ, гла́съ а҃, є҆го́же краегране́сїе: Пресвѧта́ѧ дѣ́ва въ рꙋка́хъ свои́хъ сла́витъ свѧтꙋ́ю трⷪ҇цꙋ.
Пѣ́снь а҃. І҆рмо́съ:
Твоѧ̀ побѣди́тельнаѧ десни́ца бг҃олѣ́пнѡ въ крѣ́пости просла́висѧ: та́ бо, безсме́ртнѣ, ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ.
Ди́вны твоѧ̑ чꙋдеса̀, влⷣчце бцⷣе, ꙗ҆̀же и҆сцѣлѝ ᲂу҆сѣ́ченнꙋю рꙋ́кꙋ деснꙋ́ю прпⷣбномꙋ і҆ѡа́ннꙋ дамаски́нꙋ, є҆́юже по и҆сцѣле́нїи пѣснотворе́нїе написа̀ въ прославле́нїе и҆́мене твоегѡ̀, и҆ всѝ, таково́мꙋ чꙋдесѝ дивѧ́щесѧ, вопїю́тъ: ра́дꙋйсѧ, пребл҃гослове́ннаѧ, въ болѣ́знехъ на́шихъ и҆сцѣле́нїе.
Влⷣчце бцⷣе, и҆звлеки́ мѧ и҆з̾ глꙋбины̀ напа́стей и҆ бѣ́дъ, прибѣга́ю и҆ а҆́зъ под̾ кро́въ тво́й и҆ застꙋпле́нїе, да не и҆зы́дꙋ посра́мленъ и҆ лише́нъ млⷭ҇ти твоеѧ̀, слезѧ́щїй пред̾ чꙋдотво́рною і҆кѡ́ною твое́ю, на не́йже трѝ рꙋкѝ и҆з̾ѻбраже́ны въ сла́вꙋ бг҃а вы́шнѧгѡ.
Ѽ бг҃облаже́ннаѧ и҆ многоимени́таѧ дв҃о мт҃и, и҆сто́чникъ милосе́рдїѧ и҆ щедро́тъ, а҆́зъ и҆мѣ́ю къ тебѣ̀ вѣ́рꙋ ве́лїю, наде́ждꙋ и҆звѣ́стнꙋю и҆ любо́вь серде́чнꙋю, ѿвратѝ всѧ̑кїѧ напа̑сти ѿ ра̑бъ твои́хъ, сла́вимъ бо тричи́сленное и҆ нераздѣ́льное на і҆кѡ́нѣ пречⷭ҇тыхъ рꙋ́къ твои́хъ ꙗ҆вле́нїе, и҆́миже ты̀ ст҃ꙋ́ю трⷪ҇цꙋ во є҆ди́нствѣ прославлѧ́еши.
Влⷣчце дв҃о, кто̀ не ᲂу҆диви́тсѧ всечⷭ҇тны́ѧ твоеѧ̀ і҆кѡ́ны троерꙋ́чномꙋ ꙗ҆вле́нїю, сла́достнѡ бо зрѣ́ти, ка́кѡ ты̀ премꙋ́дро трїѷпоста́сное бжⷭ҇тво̀ прославлѧ́еши, ско́рѡ ᲂу҆слы́ши, пречⷭ҇таѧ, моле́нїе на́ше и҆ защитѝ рꙋко́ю твое́ю, ю҆́же тре́тїю ꙗ҆вѝ на́мъ на застꙋпле́нїе.
Катава́сїа, гла́съ и҃: Сокрꙋши́вшемꙋ бра̑ни:
Пѣ́снь г҃. І҆рмо́съ:
Є҆ди́не, вѣ́дый человѣ́ческагѡ сꙋщества̀ не́мощь и҆ млⷭ҇тивнѡ въ нѐ воѻбра́жсѧ, препоѧ́ши мѧ̀ съ высоты̀ си́лою, є҆́же вопи́ти тебѣ̀, ст҃ы́й, ѡ҆дꙋшевле́нный хра́ме неизрече́нныѧ сла́вы твоеѧ̀, чл҃вѣколю́бче.
Съ высоты̀ а҆ѳѡ́нскїѧ горы̀ повсю́дꙋ блиста́етъ бога́тство милосе́рдїѧ твоегѡ̀, влⷣчце бцⷣе, ѿ ст҃ы́ѧ і҆кѡ́ны, ю҆́же троерꙋ́чнѡ ꙗ҆вѝ на прибѣ́жище вѣ̑рнымъ, мы́ же къ тебѣ̀ воззове́мъ: ѽ мт҃и и҆ дв҃о! и҆зба́ви на́съ ѿ ѻ҆гнѧ̀, и҆ меча̀, и҆ всѣ́хъ бѣ́дъ, пребл҃гослове́ннаѧ.
Безмѣ́рнꙋю твою̀ млⷭ҇ть на мнѣ̀ славосло́влю и҆ велича́ю въ пѣ́снехъ бл҃года́рныхъ чⷭ҇тымъ се́рдцемъ и҆ ᲂу҆сты̀, ꙗ҆́кѡ и҆зба́вила є҆сѝ менѐ всѣ́хъ напа́стей и҆ бѣ́дъ и҆ не допꙋсти́ла є҆сѝ поги́бнꙋти до конца̀. и҆ а҆́зъ тебѐ, влⷣчцꙋ бцⷣꙋ, и҆ чꙋдеса̀ ѻ҆́браза твоегѡ̀ велича́ти и҆ прославлѧ́ти не преста́нꙋ во вѣ́ки.
Высота̀ вели́ка а҆ѳѡ́нскїѧ горы̀, но ꙗ҆вле́нїе и҆ чꙋдеса̀ і҆кѡ́ны твоеѧ̀ неизрече́ннѡ превы́ше горы̀, и҆ бл҃года́ть бж҃їѧ въ не́й, ꙗ҆́кѡ мо́ре неисчерпа́емое, приходѧ́щымъ вѣ́рою: прїе́млютъ бо ᲂу҆тѣше́нїе и҆ въ напа́стехъ и҆збавле́нїе: пода́ждь, ѽ пребл҃гослове́ннаѧ дв҃о, и҆ мнѣ̀, бѣ́дствꙋющемꙋ, защище́нїе ско́рое.
Ты̀ є҆сѝ всѣ́хъ скорбѧ́щихъ прибѣ́жище, и҆ ѻ҆би́димыхъ застꙋ́пница, и҆ нерꙋши́мый покро́въ въ бѣда́хъ стра́ждꙋщихъ. тѣ́мже, припа́даѧ, вопїе́мъ тебѣ̀, дв҃о пречⷭ҇таѧ: прїимѝ моле́нїе на́ше, ѿ всеѧ̀ дꙋшѝ чⷭ҇тнꙋ́ю и҆ преиспо́лненнꙋю чꙋде́съ і҆кѡ́нꙋ твою̀ почита́ющихъ.
Сѣда́ленъ, гла́съ є҃. Подо́бенъ: Собезнача́льное сло́во:
Ꙗ҆́кѡ возлюби́ла є҆сѝ па́ствꙋ твою̀, бг҃оро́ждшаѧ мт҃и, бл҃говолѝ дарова́ти є҆́й ст҃ꙋ́ю пречⷭ҇тнꙋ́ю свою̀ і҆кѡ́нꙋ, на не́йже премꙋ́дрость триѷпоста́снꙋю въ пречⷭ҇тыхъ рꙋка́хъ свои́хъ прославлѧ́еши, и҆ подае́ши познава́ти въ трⷪ҇цѣ є҆ди́наго бг҃а, и҆ мнѡ́гаѧ чꙋдеса̀ ѿ і҆кѡ́ны твоеѧ̀ вѣ́рою и҆ любо́вїю тѧ̀ призыва́ющымъ ꙗ҆влѧ́еши, и҆ па́ствꙋ свою̀ ѡ҆гражда́еши, и҆ подае́ши всемꙋ̀ мі́рꙋ, сп҃се́нїе и҆ ᲂу҆твержде́нїе.
Сла́ва, и҆ ны́нѣ, то́йже.
Пѣ́снь д҃. І҆рмо́съ:
Го́рꙋ тѧ̀, бл҃года́тїю бж҃їею приѡсѣне́ннꙋю, прозорли́выма а҆ввакꙋ́мъ ᲂу҆смотри́въ ѻ҆чи́ма, и҆з̾ тебѐ и҆зы́ти і҆и҃левꙋ провозглаша́ше ст҃о́мꙋ во сп҃се́нїе на́ше и҆ ѡ҆бновле́нїе.
Ѡ҆бнови́мъ сердца̀ вѣ́рою, зрѧ́ще во а҆ѳѡ́нстѣй горѣ̀ но́вое влⷣчцы бцⷣы троерꙋ́чное ꙗ҆вле́нїе. всѧ́къ, недоꙋмѣва́юще ѡ҆ се́мъ, то́кмѡ молѧ́щесѧ, тебѣ̀ вопїе́тъ: ѽ мт҃и и҆ дв҃о, прїимѝ моле́нїе на́ше и҆ пода́ждь млⷭ҇ть и҆ защище́нїе, и҆ и҆спо́лни ѧ҆зы́къ и҆ сердца̀ вѣ́рныхъ досто́йнагѡ тѝ хвале́нїѧ.
Ра́достною трꙋбо́ю а҆ѳѡ́нъ во всѧ̑ концы̀ землѝ гласи́тъ: прїиди́те и҆ ви́дите дѣла̀ бж҃їѧ, ка́кѡ пречⷭ҇таѧ дв҃а на і҆кѡ́нѣ въ рꙋка́хъ свои́хъ ꙗ҆влѧ́етъ трⷪ҇чный ви́дъ бжⷭ҇тва̀, и҆́миже держи́тъ любо́вь и҆ млⷭ҇рдїе, восписꙋ́емъ сꙋгꙋ́бо въ сердца́хъ на́шихъ ра́достнꙋю пѣ́снь досто́йнагѡ є҆ѧ̀ хвале́нїѧ.
Ꙗ҆́кѡ сподо́бисѧ прпⷣбный мїхаи́лъ малеи́нъ бл҃года́ть ꙗ҆́внѡ ѿ тебѐ, влⷣчце бцⷣе, ᲂу҆лꙋчи́ти, сподо́би и҆ менѐ, всепречⷭ҇таѧ, зрѣ́ти и҆ разꙋмѣ́ти, ка́кѡ ты̀ ст҃ꙋ́ю трⷪ҇цꙋ на і҆кѡ́нѣ въ рꙋка́хъ свои́хъ прославлѧ́еши, да восписꙋ́ю въ се́рдцѣ мое́мъ тво́й ѻ҆́бразъ и҆ молю́ тѧ: ѿве́рзи ѧ҆зы́къ мо́й и҆ и҆спо́лни є҆го̀ досто́йнагѡ тебѐ хвале́нїѧ.
Грѧди́те, лю́дїе, ко а҆ѳѡ́нꙋ дне́сь, є҆́же принестѝ моле́нїе приснодв҃ѣ чⷭ҇тѣй бцⷣѣ пред̾ чꙋ́дною є҆ѧ̀ і҆кѡ́ною, тричи́сленнѡ и҆ нераздѣ́льнѡ пречⷭ҇тыми рꙋка́ми и҆з̾ѻбража́ющꙋю є҆ди́нꙋю си́лꙋ бжⷭ҇тва̀, на сїю́ же врагѝ на́шѧ зрѣ́ти не мо́гꙋтъ, мы́ же, вѣ́рнїи, взира́юще на ѻ҆́нꙋю, вопїе́мъ: ѿве́рзи на́мъ ᲂу҆ста̀ пѣ́ти пѣ́снь досто́йнагѡ тебѐ хвале́нїѧ.
Пѣ́снь є҃. І҆рмо́съ:
Просвѣти́вый сїѧ́нїемъ прише́ствїѧ твоегѡ̀ хрⷭ҇тѐ, и҆ ѡ҆свѣти́вый кресто́мъ твои́мъ мі́ра концы̀, сердца̀ просвѣтѝ свѣ́томъ твоегѡ̀ бг҃оразꙋ́мїѧ правосла́внѡ пою́щихъ тѧ̀.
А҆ѳѡ́нскаѧ гора̀ преиспо́лнисѧ ст҃ы́нь, на не́йже ꙗ҆ви́сѧ и҆ просла́висѧ ст҃а́ѧ твоѧ̑, влⷣчце бцⷣе, і҆кѡ́на, кра́сѧщаѧсѧ и҆злїѧ́нїемъ ѿ неѧ̀ бл҃года́ти во и҆сцѣле́нїе скорбѧ́щихъ, и҆ всѝ таково́мꙋ чꙋдесѝ дивѧ́тсѧ, ꙗ҆́кѡ трѝ пречⷭ҇тыѧ твоѧ̑ рꙋ́ки на́мъ ꙗ҆вѝ.
Сїѧ́етъ добро́та, блиста́ютъ, ꙗ҆́кѡ сѡ́лнечныѧ лꙋчѝ, ѿ твоеѧ̀ ст҃ы́ѧ і҆кѡ́ны разли̑чнаѧ чꙋдеса̀, низпослѝ мнѣ̀, ѽ пребл҃гослове́ннаѧ, покро́въ и҆ застꙋпле́нїе твоѐ ѿ врагѡ́въ, гꙋ́бѧщихъ мѧ̀, ті́и бо ѿ рꙋкѝ твоеѧ̀ поги́бнꙋтъ, ꙗ҆́кѡ тре́тїю на і҆кѡ́нѣ и҆з̾ѧвѝ на́мъ на застꙋпле́нїе.
Пресла́вное чꙋ́до зри́тсѧ, всенепоро́чнаѧ дв҃о, на і҆кѡ́нѣ твое́й: во ѻ҆́бразъ ст҃ы́ѧ трⷪ҇цы рꙋ́ки своѧ̑ ꙗ҆вѝ и҆ позна́нїе подае́ши рабѡ́мъ твои̑мъ, ꙗ҆́кѡ двѣма̀ держи́ши держа́щаго всѧ̑, тре́тїею же защища́еши во всѣ́хъ напа́стехъ вѣ́рнѡ прибѣга́ющихъ къ тебѣ̀, мы́ же, вѣ́рнїи, вопїе́мъ: ра́дꙋйсѧ, застꙋ́пнице на́ша всенаде́жнаѧ.
Ѽ, неизмѣри́маѧ глꙋбина̀ ржⷭ҇тва̀ твоегѡ̀! ѽ, неизрече́нное бога́тство милосе́рдїѧ твоегѡ̀! ꙗ҆́кѡ безмѣ̑рныѧ пєча́ли и҆ напа́сти въ ра́дость на́мъ твори́ши, призыва́ющымъ тѧ̀ въ нꙋ́ждѣ и҆ ѡ҆бстоѧ́нїи, пода́ждь же млⷭ҇ть твою̀ въ стра́шный де́нь сꙋда̀ и҆ и҆спыта́нїѧ дѣ́лъ чл҃вѣ́ческихъ.
Пѣ́снь ѕ҃. І҆рмо́съ:
Ѡ҆бы́де на́съ послѣ́днѧѧ бе́здна, нѣ́сть и҆збавлѧ́ѧй, вмѣни́хомсѧ, ꙗ҆́кѡ ѻ҆́вцы заколе́нїѧ, сп҃сѝ лю́ди твоѧ̑, бж҃е на́шъ, ты́ бо крѣ́пость немощствꙋ́ющихъ и҆ и҆справле́нїе.
Во а҆ѳѡ́нъ ра́достнѡ всѝ притеце́мъ зрѣ́ти ꙗ҆вле́нїе і҆кѡ́ны влⷣчцы бцⷣы, ꙗ҆́кѡ сла́витъ нбⷭ҇наго творца̀ въ трⷪ҇цѣ трисо́лнечное є҆стество̀ и҆ на́съ тро́йческомꙋ покланѧ́тисѧ ᲂу҆́читъ бжⷭ҇твꙋ̀, є҆́йже припа́даѧ, со слеза́ми вопїе́мъ: ѽ дв҃о пречⷭ҇таѧ, ѿве́рзи на́ша ᲂу҆ста̀ и҆ и҆спо́лни се́рдце вопи́ти тебѣ̀ пѣ́снь досто́йнагѡ хвале́нїѧ.
Оу҆тѣше́нїе ве́лїе ѡ҆брѣто́хъ дꙋшѝ мое́й въ бѣда́хъ и҆ напа́стехъ прибѣга́ти къ тебѣ̀, бг҃ороди́тельницѣ, и҆ а҆́зъ къ цѣльбоно́снѣй твое́й і҆кѡ́нѣ со слеза́ми вопїю̀: не пре́зри, бцⷣе, сле́зъ и҆ воздыха́нїѧ моегѡ̀ и҆ возведѝ ѿ печа́лей въ ра́дость, ꙗ҆́кѡ и҆ а҆ѳѡ́нъ ра́достнѡ ликовствꙋ́етъ, и҆мꙋ́ще чⷭ҇тны́й ѻ҆́бразъ тво́й троерꙋ́чнагѡ ꙗ҆вле́нїѧ.
Влⷣчце, мі́ра сп҃се́нїе, вѣ́рныхъ наде́жда, покро́въ и҆ застꙋпле́нїе, всеꙋсе́рднѡ припа́даѧ къ тебѣ̀, вопїе́мъ: покажѝ на на́съ, погиба́ющихъ, си́лꙋ и҆ бл҃года́ть цѣльбоно́сныѧ ст҃ы́ѧ і҆кѡ́ны твоеѧ̀, и҆зба́ви на́съ всѣ́хъ напа́стей, да не преста́немъ велича́ти тебѐ, застꙋ́пницꙋ въ печа́лехъ вѣ́рнꙋю.
Ѽ всенепоро́чнаѧ дв҃о! бжⷭ҇твенное прорече́нїе ᲂу҆́стъ твои́хъ и҆спо́лнисѧ, є҆́же ѡ҆ рожде́нїи прпⷣбнагѡ мїхаи́ла малеина̀ пре́жде предрекла̀ є҆сѝ, ра́дꙋетсѧ всѧ̀ землѧ̀ ѡ҆ бжⷭ҇твеннѣй си́лѣ твое́й, весели́тсѧ гла́съ пра́зднꙋющихъ непреста́ннѡ, зрѧ́ще твоегѡ̀ лица̀ добро́тꙋ неизрече́ннꙋю, ве́селѡ воспѣва́юще: ра́дꙋйсѧ, дв҃о, хрⷭ҇тїа́нъ похвало̀.
Конда́къ, гла́съ и҃. Подо́бенъ: Взбра́нной воево́дѣ:
Дне́сь весе́лое наста̀ ны́нѣ твоѐ торжество̀ бг҃ома́ти пречⷭ҇таѧ, всѝ вѣ́рнїи и҆спо́лнишасѧ ра́дости и҆ весе́лїѧ, ꙗ҆́кѡ сподо́бльшесѧ и҆зрѧ́днѡ воспѣ́ти преди́вное ꙗ҆вле́нїе чⷭ҇тна́гѡ ѻ҆́браза твоегѡ̀ и҆ ро́ждшагосѧ и҆з̾ тебѐ млⷣнца, и҆́стинна же бг҃а, є҆го́же двѣма̀ рꙋка́ма ѡ҆б̾е́млеши, и҆ тре́тїею ѿ напа́стей и҆ бѣ́дъ на́съ и҆зыма́еши и҆ и҆збавлѧ́еши ѿ всѣ́хъ ѕѡ́лъ и҆ ѡ҆бстоѧ́нїй.
І҆́косъ:
А҆́гг҃лѡвъ творца̀, и҆́стиннагѡ свѣ́та хрⷭ҇та̀, неизрече́ннѡ и҆з̾ тебѐ, бг҃ома́ти, возсїѧ́вшагѡ, на і҆кѡ́нѣ чꙋде́снѣ ꙗ҆вѝ и҆ тричи́сленнымъ свои́мъ и҆з̾ѻбраже́нїемъ пречⷭ҇тыхъ рꙋ́къ твои́хъ всѧ̑ концы̀ землѝ ᲂу҆дивѝ, тѣ́мже бл҃года́рственнѡ дерза́емъ вопи́ти тебѣ̀ си́це: ра́дꙋйсѧ, по чл҃вѣ́чествꙋ двѣма̀ рꙋка́ма сн҃а и҆ бг҃а ѡ҆б̾е́млющаѧ: ра́дꙋйсѧ, по бжⷭ҇твꙋ̀ тре́тїею рꙋко́ю ѿ напа́стей и҆ бѣ́дъ на́съ и҆збавлѧ́ющаѧ: ра́дꙋйсѧ, стра́ждꙋщымъ въ печа́лехъ помога́ющаѧ: ра́дꙋйсѧ, бѡлѣ́зни вско́рѣ и҆сцѣлѧ́ющаѧ: ра́дꙋйсѧ, ꙗ҆́кѡ тобо́ю защища́емсѧ ѿ врагѡ́въ си́льныхъ, помышлѧ́ющихъ на ны̀ ѕла̑ѧ: ра́дꙋйсѧ, сохранѧ́ющаѧ ѿ всѣ́хъ ѕѡ́лъ и҆ ѡ҆бстоѧ́нїй.
Пѣ́снь з҃. І҆рмо́съ:
Тебѐ, ᲂу҆́мнꙋю, бцⷣе, пе́щь, разсмотрѧ́емъ, вѣ́рнїи, ꙗ҆́коже бо ѻ҆́троки сп҃сѐ трѝ превозноси́мый, мі́ръ ѡ҆бновѝ, во чре́вѣ твое́мъ всецѣ́лъ, хва́льный ѻ҆тцє́въ бг҃ъ и҆ препросла́вленъ.
Ѽ мт҃и бг҃а вы́шнѧгѡ, при́зри на моле́нїе вѣ́рою къ тебѣ̀ прибѣга́ющихъ: вразѝ на мѧ̀ ѡ҆полчи́шасѧ, и҆з̾ѡстри́ша ме́чь сво́й, ᲂу҆ѧзви́ти мѧ̀ хотѧ́ще. ты́ же, ꙗ҆́кѡ защи́тница на́ша, ѿымѝ поноше́нїѧ чл҃вѣ́чєскїѧ и҆ напра̑сныѧ клевєты̀, на тебѐ надѣ́юсѧ, ты́ бо моѧ̀ крѣ́пость и҆ защище́нїе.
Ненави́дѧщїи мѧ̀, творѧ́ще ѡ҆би́ды, низпꙋска́ютъ стрѣ́лы лꙋка́вствїѧ, хотѧ́ще мѧ̀ ѕѣлѡ̀ ᲂу҆ѧзви́ти, а҆́зъ же, пречⷭ҇таѧ влⷣчце, взира́ѧ на і҆кѡ́нꙋ твоегѡ̀ троерꙋ́чнагѡ ꙗ҆вле́нїѧ, ю҆́же дарова̀ на́мъ ꙗ҆́кѡ стра́жа на врагѝ, приношꙋ̀ тебѣ̀ моле́нїе: защитѝ, всепѣ́таѧ, рꙋко́ю твое́ю менѐ, погиба́ющаго.
Влⷣчце бцⷣе, сокрꙋшѝ ѕлы̑ѧ врагѡ́въ на мѧ̀ пѡ́мыслы и҆ клевєты̀ ᲂу҆ста́ви, и҆збавлѧ́ющи непови̑нныѧ ѿ ско́рби, и҆́мамы бо, пречⷭ҇таѧ дв҃о, твою̀ і҆кѡ́нꙋ, бл҃года́ти преиспо́лненнꙋю, врагѡ́въ ᲂу҆страша́ющꙋю и҆ вѣ́рнѡ прибѣга́ющихъ къ тебѣ̀ ᲂу҆веселѧ́ющꙋю.
Ѽ дв҃о пречⷭ҇таѧ! смирѝ сердца̀ ѕлы́хъ чл҃вѣ̑къ, ѡ҆би́дѧщихъ и҆ ненави́дѧщихъ мѧ̀, и҆ вражде́бнѡ клѧнꙋ́щихъ заградѝ ᲂу҆ста̀, да посрамѧ́тсѧ вразѝ и҆ ᲂу҆́зрѧтъ твою̀ сопроти́въ борю́щꙋю си́лꙋ, сѐ млⷭ҇тивнѡ ты̀ на́съ посѣща́еши и҆ зало́гъ бл҃года́ти і҆кѡ́нꙋ твою̀ ꙗ҆́кѡ стра́жа на врагѝ да́рꙋеши.
Пѣ́снь и҃. І҆рмо́съ:
Въ пещѝ ѻ҆́троцы і҆и҃лєвы, ꙗ҆́коже въ горни́лѣ, добро́тою благоче́стїѧ чи́стѣе зла́та блеща́хꙋсѧ, гл҃го́люще: бл҃гослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те во всѧ̑ вѣ́ки.
Оу҆слы́ши моле́нїе моѐ, влⷣчце всепѣ́таѧ, ѡ҆бле́гчи бре́мѧ бѣ́дъ мои́хъ и҆ напа́стей, ꙗ҆́кѡ да возмогꙋ̀ возда́ти тебѣ̀ ѻ҆бѣ́ты, ꙗ҆̀же въ печа́ли гл҃го́лаша ᲂу҆ста̀ моѧ̑, сла́влю бо толи́кѡ чꙋде́сное ꙗ҆вле́нїе і҆кѡ́ны твоеѧ̀, возведи́ мѧ рꙋко́ю твое́ю и҆з̾ глꙋбины̀ бѣ́дъ въ ра́дость, воспѣва́юща и҆ превозносѧ́ща тѧ̀ во вѣ́ки.
Ѽ пребл҃гослове́ннаѧ дв҃о! є҆гда̀ приспѣ̀ де́нь свѣ́тлагѡ торжества̀ ꙗ҆вле́нїѧ пречꙋ́днагѡ ѻ҆́браза твоегѡ̀, тогда̀ а҆ѳѡ́нскаѧ гора̀ кра́ситсѧ, ꙗ҆́кѡ прїе́млетъ многобога́тный да́ръ во ѡ҆гра́дꙋ свою̀ зарѝ бжⷭ҇твенныѧ. ѽ дв҃о, ѡ҆зарѝ сердца̀ на̑ша свѣ́томъ бжⷭ҇тва̀, є҆го́же въ рꙋка́хъ твои́хъ на і҆кѡ́нѣ прославлѧ́еши, пою́щихъ и҆ превозносѧ́щихъ тѧ̀ во вѣ́ки.
Оу҆́жасомъ ѡ҆б̾ѧ́ти бы́ша и҆ недоꙋмѣва́ша ѡ҆ се́мъ, ка́кѡ трѝ рꙋкѝ на і҆кѡ́нѣ на́мъ ꙗ҆вѝ, но то́кмѡ ра́достнѡ вопїе́мъ: ѽ влⷣчце дв҃о, є҆ди́ной тебѣ̀ сїѐ досто́йно є҆́сть двѣма̀ рꙋка́ма сн҃а и҆ гдⷭ҇а держа́ти, а҆ тре́тїею вѣ̑рныѧ ѿ бѣ́дъ и҆збавлѧ́ти, пою́щихъ и҆ превозносѧ́щихъ тѧ̀ во всѧ̑ вѣ́ки.
Пою́тъ тѧ̀ всѝ земноро́днїи и҆ славосло́вѧтъ си̑лы нбⷭ҇ныѧ, ꙗ҆́кѡ мт҃рь хрⷭ҇та̀ бг҃а на́шегѡ, ты́ бо, сѣдѧ́щи на чⷭ҇тнѣ́мъ прⷭ҇то́лѣ бли́з̾ прест҃ы́ѧ трⷪ҇цы, во ѻ҆́бразъ є҆ѧ̀ и҆ трѝ рꙋкѝ на і҆кѡ́нѣ ꙗ҆вѝ, молѝ ю҆̀ ѡ҆ на́съ, пречⷭ҇таѧ, и҆зба́витисѧ на́мъ мꙋ́къ, да возра́дꙋютсѧ всѝ, пою́щїи и҆ превозносѧ́щїи тѧ̀ во вѣ́ки.
Пѣ́снь ѳ҃. І҆рмо́съ:
Ѻ҆́бразъ чⷭ҇тагѡ ржⷭ҇тва̀ твоегѡ̀ ѻ҆гнепали́маѧ кꙋпина̀ показа̀ неѡпали́маѧ: и҆ ны́нѣ на на́съ напа́стей свирѣ́пѣющꙋю ᲂу҆гаси́ти, мо́лимсѧ, пе́щь, да тѧ̀, бцⷣе, непреста́ннѡ велича́емъ.
Безмѣ́рнѡ наслади́хсѧ щедро́тъ и҆ бл҃годѣѧ́нїй твои́хъ а҆́зъ, дв҃о пречⷭ҇таѧ, и҆ воспѣва́ю тѧ̀ бл҃года́рственными пѣ́сньми пред̾ і҆кѡ́ною твое́ю, на не́йже зри́тсѧ чꙋ́до чꙋдесє́мъ: тре́тїѧ пречⷭ҇таѧ рꙋка̀ твоѧ̀, на по́мощь и҆ защище́нїе тѧ̀ призыва́ющымъ.
Въ пѣ́снехъ бл҃года́рныхъ не преста́нꙋ велича́ти тѧ̀, всепречⷭ҇таѧ дв҃о бцⷣе, ꙗ҆́кѡ неисчє́тныѧ щедрѡ́ты низпосла́ла є҆сѝ, проповѣ́дꙋеши всѣ̑мъ чꙋдеса̀ цѣльбонѡ́сныѧ твоеѧ̀ і҆кѡ́ны, ꙗ҆́кѡ подае́ши въ болѣ́знехъ и҆сцѣле́нїе, въ напа́стехъ и҆збавле́нїе, ты́ бо є҆сѝ покро́въ всѣ̑мъ прибѣга́ющымъ.
Оу҆диви́ла є҆сѝ всѣ́хъ вои́стиннꙋ, пренепоро́чнаѧ дв҃о, застꙋпле́нїемъ и҆ покро́вомъ твои́мъ, вразѝ моѝ ѿстꙋпи́ша ѿ менѐ, вмѣ́сто печа́ли ра́дость мѝ дарова̀, и҆ а҆́зъ ра́достнѡ вопїю̀, ꙗ҆́кѡ цѣльбоно́снаѧ твоѧ̀ і҆кѡ́на ди̑внаѧ чꙋдеса̀ показа̀, да всѝ вѣ́дꙋще, ꙗ҆́кѡ ты̀ є҆сѝ застꙋ́пница всѣ̑мъ прибѣга́ющымъ.
Ви́ждь, влⷣчце бцⷣе, неможе́нїе моѐ, недоꙋмѣва́ю бо воспѣ́ти млⷭ҇рдїе твоѐ на мнѣ̀, пода́ждь ѡ҆бновле́нїе се́рдцꙋ моемꙋ̀ досто́йнѡ воспѣ́ти тебѣ̀ пѣ́снь, толи́кѡ чꙋ́дномꙋ на і҆кѡ́нѣ пречⷭ҇тыхъ тре́хъ рꙋ́къ твои́хъ и҆з̾ѻбраже́нїю, ты́ бо є҆сѝ нело́жнаѧ застꙋ́пница хрⷭ҇тїа́нъ.
Свѣти́ленъ. Подо́бенъ: Нб҃о ѕвѣзда́ми:
Гора̀ а҆ѳѡ́нскаѧ вопїе́тъ: грѧди́те, лю́дїе, къ неистощи́момꙋ и҆сто́чникꙋ цѣльбоно́снѣй і҆кѡ́нѣ влⷣчцы на́шеѧ бцⷣы прїѧ́ти щедро́тъ мно́жество, вси́ бо прибѣга́ющїи полꙋча́ютъ неисче́тнѡ да́ры цѣлє́бныѧ и҆ вопїю́тъ: вои́стиннꙋ ты̀ є҆сѝ, дв҃о бл҃гослове́ннаѧ, всѣ̑мъ крѣ́пость, держа́ва и҆ застꙋпле́нїе.
Сла́ва, и҆ ны́нѣ, то́йже.
На хвали́техъ стїхи̑ры самогла́сны, гла́съ є҃:
Тебѣ̀ воспои́мъ свѣ́тлѡ дв҃довскꙋю пѣ́снь, ꙗ҆́кѡ цр҃и́цѣ и҆ бцⷣѣ, лицꙋ̀ твоемꙋ̀ помо́лѧтсѧ бога́тїи лю́дстїи, и҆ а҆ѳѡ́нскаѧ гора̀ ра́достїю и҆сполнѧ́етсѧ, ꙗ҆́кѡ въ па́ствѣ твое́й сохранѧ́етсѧ, прпⷣбномꙋ мїхаи́лꙋ малеинꙋ̀ бл҃года́ть ѿкры́ла є҆сѝ, сегѡ̀ ра́ди и҆ мы̀, любо́вїю созыва́еми ви́дѣти ст҃ꙋ́ю и҆ пречꙋ́днꙋю твою̀, бцⷣе, і҆кѡ́нꙋ, въ не́йже бг҃онача́лїе въ трⷪ҇цѣ ꙗ҆влѧ́еши и҆з̾ѻбраже́нїемъ пречⷭ҇тыхъ рꙋ́къ твои́хъ, тѣ́мже къ тебѣ̀ вопїе́мъ: влⷣчце, молѝ хрⷭ҇та̀ бг҃а на́шего сп҃сти́сѧ дꙋша́мъ на́шымъ.
Тебѣ̀ припа́даемъ, гпⷭ҇жѐ, и҆ мо́лимсѧ, зрѧ́ще прчⷭ҇тнꙋ́ю і҆кѡ́нꙋ твою̀, сїю́ бо и҆ а҆ѳѡ́нъ ликовствꙋ́етъ, и҆мѣ́ѧ во ѡ҆гра́дѣ свое́й зало́гъ бл҃года́ти бж҃їѧ, да всѝ притека́ющїи прїе́млютъ неѡскꙋ́днѡ бл҃гопотре́бнагѡ проше́нїѧ своегѡ̀ и҆сполне́нїе, прїимѝ, влⷣчце всепѣ́таѧ, вѣ́рныхъ твои́хъ ра̑бъ мѡльбы̀, чествꙋ́ющихъ пра́здникъ ꙗ҆вле́нїѧ твоегѡ̀, ты́ бо на́мъ на і҆кѡ́нѣ свое́й трѝ рꙋкѝ ꙗ҆ви́ла є҆сѝ, въ сла́вꙋ бг҃а на́шегѡ, того̀ молѝ сп҃сти́сѧ дꙋша́мъ на́шымъ.
Тебѣ̀ припа́даѧ, мо́лимсѧ, ѽ дв҃о чⷭ҇таѧ бцⷣе, мт҃и бг҃а на́шегѡ, ви́дѧще і҆кѡ́нꙋ ст҃ꙋ́ю твою̀, сїѧ́ющꙋю па́че со́лнечныхъ лꙋ̑чъ, подае́ши бо млⷭ҇ти просѧ́щымъ, скорбѧ́щымъ скѡ́рби ѡ҆блегча́еши, немѡщны́мъ здра́вїе да́рꙋеши, ꙗ҆́кѡ полꙋчѝ и҆сцѣле́нїе десны́ѧ своеѧ̀ рꙋкѝ ст҃ы́й і҆ѡа́ннъ дамаски́нъ, є҆́йже и҆ мы̀ ны́нѣ со ᲂу҆миле́нїемъ предстоѧ́ще, мо́лимсѧ, и҆ любе́знѡ ѡ҆блобыза́въ, глаго́лемъ: сп҃сѝ на́съ, гпⷭ҇жѐ, ѿ гла́да, ѻ҆гнѧ̀, меча̀ и҆ всѣ́хъ бѣ́дъ, почита́ющихъ вѣ́рнѡ твоѐ ꙗ҆вле́нїе, и҆ пода́ждь по́мощь сп҃сти́сѧ дꙋша́мъ на́шымъ.
Сла́ва, и҆ ны́нѣ, гла́съ ѕ҃:
Дне́сь, собо́ри вѣ́рныхъ, соше́дшесѧ, восплещи́те рꙋка́ми весе́лїѧ, дх҃о́внѣ торжествꙋ́юще де́нь пресла́внагѡ ꙗ҆вле́нїѧ цѣльбоно́сныѧ і҆кѡ́ны приснодв҃ы чⷭ҇тыѧ бцⷣы, є҆́йже мы̀ предстои́мъ и҆ є҆диногла́снѡ возопїи́мъ: ра́дꙋйсѧ, пребл҃гослове́ннаѧ, ꙗ҆́кѡ и҆з̾ѻбраже́нїемъ на і҆кѡ́нѣ пречⷭ҇тыхъ рꙋ́къ твои́хъ въ трⷪ҇цѣ бг҃а сла́виши: ра́дꙋйсѧ, ꙗ҆́кѡ є҆ди́нꙋ си́лꙋ и҆ бл҃года́ть въ ни́хъ и҆мѣ́еши: ра́дꙋйсѧ, ꙗ҆́кѡ двѣма̀ рꙋка́ма сн҃а и҆ гдⷭ҇а де́ржиши, тре́тїею же ѿ всѣ́хъ напа́стей и҆ бѣ́дъ на́съ и҆збавлѧ́еши: ра́дꙋйсѧ, застꙋ́пнице на́ша всенаде́жнаѧ ко хрⷭ҇тꙋ̀ бг҃ꙋ на́шемꙋ, того̀ молѝ сп҃сти́сѧ дꙋша́мъ на́шымъ.
Славосло́вїе и҆ ѿпꙋ́стъ.
На лїтꙋргі́и: Бл҃жє́нны ѿ канѡ́на, пѣ̑сни г҃-ѧ и҆ ѕ҃-ѧ, на и҃. Прокі́менъ, гла́съ г҃, пѣ́снь бцⷣы: Вели́читъ дꙋша̀ моѧ̀ гдⷭ҇а, и҆ возра́довасѧ дꙋ́хъ мо́й ѡ҆ бз҃ѣ сп҃сѣ мое́мъ. Сті́хъ: Ꙗ҆́кѡ призрѣ̀ на смире́нїе рабы̀ своеѧ̀, се́ бо ѿны́нѣ ᲂу҆блажа́тъ мѧ̀ всѝ ро́ди. А҆по́столъ къ фїлїпписі́ємъ, зача́ло с҃м. А҆ллилꙋ́їа, гла́съ и҃: Слы́ши дщѝ и҆ ви́ждь, и҆ приклонѝ ᲂу҆́хо твоѐ. Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи. Є҆ѵⷢ҇лїе ѿ лꙋкѝ, зача́ло н҃д. Прича́стенъ: Ча́шꙋ сп҃се́нїѧ прїимꙋ̀:
Моли́тва.
Ѽ прест҃а́ѧ гпⷭ҇жѐ влⷣчце бцⷣе, ве́лїе чꙋ́до ст҃о́мꙋ і҆ѡа́ннꙋ дамаски́нꙋ ꙗ҆ви́вшаѧ, ꙗ҆́кѡ вѣ́рꙋ и҆́стиннꙋю, наде́ждꙋ несꙋмнѣ́ннꙋю показа́вшемꙋ! ᲂу҆слы́ши на́съ, грѣ́шныхъ, пред̾ чꙋдотво́рною твое́ю і҆кѡ́ною ᲂу҆се́рднѡ молѧ́щихсѧ и҆ просѧ́щихъ твоеѧ̀ по́мощи: не ѿри́ни моле́нїѧ сегѡ̀ мно́гихъ ра́ди прегрѣше́нїй на́шихъ, но ꙗ҆́кѡ мт҃и млⷭ҇рдїѧ и҆ щедро́тъ, и҆зба́ви на́съ ѿ болѣ́зней, скорбе́й и҆ печа́лей, простѝ содѣ̑ѧнныѧ на́ми грѣхѝ, и҆спо́лни ра́дости и҆ весе́лїѧ всѣ́хъ, чтꙋ́щихъ ст҃ꙋ́ю і҆кѡ́нꙋ твою̀, да ра́достнѡ воспое́мъ и҆ любо́вїю просла́вимъ и҆́мѧ твоѐ, ꙗ҆́кѡ ты̀ є҆сѝ ѿ всѣ́хъ родѡ́въ и҆збра́ннаѧ и҆ бл҃гослове́ннаѧ во вѣ́ки вѣкѡ́въ. а҆ми́нь.
И҆́на моли́тва.
Ѽ прест҃а́ѧ и҆ пребл҃гослове́ннаѧ дв҃о бцⷣе мр҃і́е! припа́даемъ и҆ покланѧ́емсѧ тѝ пред̾ ст҃о́ю троерꙋ́чною і҆кѡ́ною твое́ю, воспомина́ѧ пресла́вное чꙋ́до твоѐ, и҆сцѣле́нїемъ ᲂу҆сѣче́нныѧ десни́цы пра́веднагѡ і҆ѡа́нна дамаски́на ѿ і҆кѡ́ны сеѧ̀ ꙗ҆вле́нное, є҆го́же зна́менїе доны́нѣ ви́димо є҆́сть на не́й, во ѻ҆́бразѣ тре́тїѧ рꙋкѝ, къ и҆з̾ѻбраже́нїю твоемꙋ̀ приложе́нныѧ. мо́лимсѧ тѝ и҆ про́симъ тѧ̀, всебл҃гꙋ́ю и҆ всеще́дрꙋю ро́да на́шегѡ застꙋ́пницꙋ: ᲂу҆слы́ши на́съ, молѧ́щихъ ти сѧ, и҆ ꙗ҆́коже бл҃же́ннаго і҆ѡа́нна, въ ско́рби и҆ болѣ́зни къ тебѣ̀ возопи́вшаго, ᲂу҆слы́шала є҆сѝ, та́кѡ и҆ на́съ не пре́зри, скорбѧ́щихъ и҆ болѣ́знꙋющихъ ра́нами страсте́й многоразли́чныхъ и҆ къ тебѣ̀ ѿ дꙋшѝ сокрꙋше́нныѧ и҆ смире́нныѧ ᲂу҆се́рднѡ прибѣга́ющихъ. ты̀ зри́ши, гпⷭ҇жѐ всемлⷭ҇тиваѧ, не́мѡщи на́шѧ, ѡ҆ѕлобле́нїе на́ше, нꙋ́ждꙋ, потре́бꙋ на́шꙋ въ твое́й по́мощи и҆ застꙋпле́нїи, ꙗ҆́кѡ ѿвсю́дꙋ врага́ми ѡ҆крꙋже́ни є҆смы̀, и҆ нѣ́сть помога́ющагѡ, нижѐ застꙋпа́ющагѡ, а҆́ще не ты̀ ᲂу҆милосе́рдишисѧ ѡ҆ на́съ, влⷣчце. є҆́й, мо́лимъ ти сѧ, вонмѝ гла́сꙋ болѣ́зненномꙋ на́шемꙋ и҆ помозѝ на́мъ ст҃оѻте́ческꙋю правосла́внꙋю вѣ́рꙋ до конца̀ дне́й на́шихъ непоро́чнѡ сохрани́ти, во всѣ́хъ за́повѣдехъ гдⷭ҇нихъ неꙋкло́ннѡ ходи́ти, покаѧ́нїе и҆́стинное ѡ҆ грѣсѣ́хъ на́шихъ всегда̀ бг҃ꙋ приноси́ти и҆ сподо́битисѧ ми́рныѧ хрⷭ҇тїа́нскїѧ кончи́ны и҆ до́брагѡ ѿвѣ́та на стра́шнемъ сꙋдѣ̀ сн҃а твоегѡ̀ и҆ бг҃а на́шегѡ, є҆го́же ᲂу҆молѝ за на́съ ма́тернею мл҃твою твое́ю, да не ѡ҆сꙋ́дитъ на́съ по беззако́нїємъ на́шымъ, но да поми́лꙋетъ на́съ по вели́цѣй и҆ неизрече́ннѣй млⷭ҇ти свое́й. ѽ всебл҃га́ѧ! ᲂу҆слы́ши на́съ и҆ не лишѝ на́съ по́мощи твоеѧ̀ держа́вныѧ, да тобо́ю сп҃се́нїе полꙋчи́вше, воспое́мъ и҆ просла́вимъ тѧ̀ на землѝ живы́хъ и҆ ро́ждшагосѧ ѿ тебє̀ и҆скꙋпи́телѧ на́шего гдⷭ҇а і҆и҃са хрⷭ҇та̀, є҆мꙋ́же подоба́етъ сла́ва и҆ держа́ва, че́сть и҆ поклоне́нїе, кꙋ́пнѡ со ѻ҆ц҃е́мъ и҆ ст҃ы́мъ дх҃омъ, всегда̀, ны́нѣ, и҆ при́снѡ, и҆ во вѣ́ки вѣкѡ́въ. а҆ми́нь.
Канѡ́нъ моле́бный ко прест҃ѣ́й влⷣчцѣ бцⷣѣ, ра́ди і҆кѡ́ны є҆ѧ̀ и҆менꙋ́емыѧ троерꙋ́чица.
Тропа́рь, гла́съ д҃:
Дне́сь свѣ́тлѡ красꙋ́етсѧ ца́рствꙋющїй гра́дъ москва̀, и҆мѣ́ющи въ себѣ̀, ѽ всемлⷭ҇тивѣйшаѧ, всеѧ̀ тва́ри чⷭ҇тнѣ́йшаѧ, застꙋ́пнице на́ша дв҃о бцⷣе, чⷭ҇тны́й ѻ҆́бразъ тво́й, и҆́мже подсѡ́лнечныѧ концы̀ землѝ ᲂу҆дивлѧ́еши и҆ ми́ръ мі́рови да́рꙋеши, во ѻ҆́бразъ бо ст҃ы́ѧ трⷪ҇цы ꙗ҆влѧ́еши трїѐ рꙋцѣ̀: двѣма̀ ᲂу҆́бѡ сн҃а своего̀, хрⷭ҇та̀ бг҃а на́шего, но́сиши, тре́тїею ѿ напа́стей и҆ бѣ́дъ вѣ́рнѡ къ тебѣ̀ прибѣга́ющихъ и҆збавлѧ́еши, ѿ потопле́нїѧ и҆зыма́еши, и҆ всѣ̑мъ полє́знаѧ да́рꙋеши, и҆ прпⷣбномꙋ мїхаи́лꙋ малео́нскꙋю го́рꙋ показа̀, и҆ всѣ́хъ всегда̀ ми́лꙋеши, чⷭ҇тно́ю ри́зою свое́ю покрыва́еши жи́тельство сїѐ и҆ всѧ̑ гра́ды и҆ страны̀ на̑ша, да зове́мъ тѝ: ра́дꙋйсѧ, ѡ҆бра́дованнаѧ.
Канѡ́нъ, гла́съ д҃.
Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.
Припѣ́въ ѻ҆со́бый: Прест҃а́ѧ гпⷭ҇жѐ бцⷣе, ᲂу҆слы́ши мл҃твꙋ ра̑бъ свои́хъ, молѧ́щихсѧ тебѣ̀.
Оу҆милосе́рдисѧ ѡ҆ мнѣ̀, грѣ́шнѣмъ, погиба́ющемъ, прест҃а́ѧ бцⷣе, и҆ въ мѣ́сто печа́ли да́рꙋй мѝ ра́дость, ра́дꙋйсѧ, воспѣва́ти, всест҃а́ѧ влⷣчце.
Оу҆тишѝ дꙋшѝ моеѧ̀ свирѣ́пство, поне́же мнѡ́гїѧ скѡ́рби и҆ пєча́ли нападо́ша, и҆ ѿ си́хъ, влⷣчце, сп҃си́ мѧ, грѣ́шнаго, да не поги́бнꙋ, ѕлѣ̀ стра́ждꙋщи.
Ты̀ моѧ̀ крѣ́пость, и҆ ᲂу҆твержде́нїе, и҆ ѿ врагѡ́въ защище́нїе. сегѡ̀ ра́ди не бою́сѧ вра́жїѧ преще́нїѧ, но при́снѡ пою́ тѧ и҆ сла́влю, всесла́внаѧ.
Напа̑сти, и҆ бѣ́ды, и҆ скѡ́рби мнѡ́гїѧ прїидо́ша на́мъ и҆ ѡ҆тѧготи́ша, и҆зба́ви, бг҃ороди́тельнице, и҆ ѿ си́хъ ѡ҆бдержа́щихъ мѧ̀ ѕѡ́лъ и҆ весе́лїѧ и҆спо́лни.
Пѣ́снь г҃. І҆рмо́съ:
Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѐ совокꙋ́пльшыѧ, дх҃о́внѡ ᲂу҆твердѝ: въ бж҃е́ственнѣй твое́й сла́вѣ вѣнцє́въ сла́вы сподо́би.
Ты̀ є҆сѝ те́плаѧ предста́тельница и҆ милосе́рдаѧ застꙋ́пница, и҆зба́ви мѧ̀, всепѣ́таѧ, ѿ наше́дшихъ на мѧ̀ напа́стей, ты́ бо є҆сѝ, влⷣчце, па́дшихъ и҆збавле́нїе.
И҆зба́ви мѧ̀, пречⷭ҇таѧ, ѿ си́хъ напа́стей, и҆ бѣ́дъ, и҆ преще́нїѧ дїа́вольскагѡ, и҆ ᲂу҆ны́нїѧ, и҆ всѧ̑ стра̑сти ѿженѝ ѿ менє̀, пречⷭ҇таѧ, да при́снѡ сла́влю тѧ̀.
Сѐ къ тебѣ̀, пречⷭ҇таѧ, притека́ю, не пре́зри моеѧ̀ болѣ́зни и҆ воздыха́нїѧ, но при́зри на мѧ̀ въ ско́рби сꙋ́щаго, и҆ сїю̀ мою̀ печа́ль на ра́дость преложѝ, бг҃оневѣ́стнаѧ.
Ви́ждь, влⷣчце, бѣдꙋ̀ мою̀ и҆ ско́рбь, ꙗ҆́кѡ лꙋка́вый вра́гъ поглоти́ти мѧ̀ хо́щетъ, пречⷭ҇таѧ бцⷣе, проженѝ тогѡ̀ ѕлохи́трое кова́рство, да и҆зба́влюсѧ и҆ сла́влю тѧ̀.
Катава́сїа: Сп҃сѝ ѿ бѣ́дъ рабы̑ твоѧ̑, бцⷣе, ꙗ҆́кѡ всѝ по бз҃ѣ къ тебѣ̀ прибѣга́емъ, ꙗ҆́кѡ нерꙋши́мѣй стѣнѣ̀ и҆ предста́тельствꙋ.
Сѣда́ленъ, гла́съ в҃:
Моле́нїе те́плое и҆ стѣна̀ неѡбори́маѧ, млⷭ҇ти и҆сто́чниче, мі́рови прибѣ́жище, прилѣ́жнѡ вопїе́мъ тѝ: бцⷣе влⷣчце, предварѝ и҆ ѿ бѣ́дъ и҆зба́ви на́съ, є҆ди́на вско́рѣ предста́тельствꙋющаѧ.
Пѣ́снь д҃. І҆рмо́съ:
Сѣдѧ́й въ сла́вѣ, на прⷭ҇то́лѣ бж҃ества̀, ѻ҆́блацѣ ле́гцѣ прїи́де і҆и҃съ пребж҃е́ственный, нетлѣ́нною дла́нїю, и҆ спасѐ зовꙋ́щыѧ: сла́ва хрⷭ҇тѐ, си́лѣ твое́й.
Ты̀ є҆сѝ, пречⷭ҇таѧ влⷣчце, наде́жда и҆ ᲂу҆твержде́нїе моѐ, и҆ ѿ лю́тыхъ мѝ бѣ́дъ свобожде́нїе, и҆ въ печа́ли ᲂу҆тѣше́нїе, дꙋшѝ мое́й просвѣще́нїе и҆ во ᲂу҆пова́нїи мое́мъ непобѣди́маѧ помо́щница.
Ты̀ во всѣ́хъ печа́лехъ бꙋ́ди мѝ сла́дкое ᲂу҆тѣше́нїе, и҆ въ бѣда́хъ ско́раѧ помо́щница, и҆ въ мл҃твахъ предста́тельница, ты́ бо є҆сѝ мт҃и бж҃їѧ, стѧжа́вшаѧ ѿ всѧ́кихъ бѣ́дъ и҆збавле́нїе.
Преклони́сѧ къ мольба́мъ раба̀ своегѡ̀, влⷣчце, и҆ не закоснѝ и҆зба́вити мѧ̀ ѿ си́хъ всѣ́хъ скорбе́й, ю҆́же ѡ҆держа́тъ мѧ̀, ви́димыхъ и҆ неви́димыхъ врагѡ́въ ѿженѝ ѿ менѐ, да не ѕлѣ̀ поги́бнꙋ, ѡ҆каѧ́нный.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Ѻ҆рꙋ́жїѧ сꙋпоста́та и҆ ѿ напра́снагѡ ѡ҆скорбле́нїѧ и҆зба́ви мѧ̀, ѡ҆сꙋжде́ннаго, ꙗ҆́кѡ ты̀ є҆сѝ всенепоро́чнаѧ мт҃и, и҆́же бꙋ́детъ сꙋди́ти комꙋ́ждо по дѣлѡ́мъ.
Ты̀ въ напа́стехъ и҆ ско́рбехъ ми́лостивнѡ защища́еши, и҆́же под̾ кро́въ тво́й прибѣга́емъ, прїимѝ всест҃а́ѧ, сїѐ моле́нїе ѿ ᲂу҆ны́нїѧ се́рдца моегѡ̀, да ѕлѣ̀ во ѿча́ѧнїи не поги́бнꙋ.
Млⷭ҇тивнымъ и҆ кро́ткимъ ѻ҆́комъ, бг҃ороди́тельнице, воззрѝ на мѧ̀, недосто́йнаго, милосе́рдїемъ свои́мъ при́зри на мѧ̀, и҆ ѡ҆бстоѧ́нїѧ, и҆ бѣды̀, и҆ напа́сти свободѝ призыва́юща тѧ̀, всест҃а́ѧ.
Первозда́нный а҆да́мъ и҆ є҆́ѵа тобо́ю, пречⷭ҇таѧ, и҆зба́вльшесѧ ѿ ѕлы́хъ, съ ни́миже и҆ а҆́зъ припа́даю тѝ и҆ молю̀: млⷭ҇тїю свое́ю ѿрѣшѝ моѧ̑ болѣ̑зненныѧ сле́зы и҆ да́ждь мѝ поле́зное ᲂу҆тѣше́нїе.
Пѣ́снь ѕ҃. І҆рмо́съ:
Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Внꙋшѝ печа́льный во́пль раба̀ твоегѡ̀, тре́бꙋющагѡ по́мощи твоеѧ̀, бг҃ома́ти, ты̀ є҆сѝ ᲂу҆пова́нїе моѐ, потщи́сѧ печа́ль мою̀ на ра́дость преложи́ти.
И҆зба́ви мѧ̀ ѿ льстѝ вра́жїѧ, ѿ ѧ҆зы́ка льсти́ва и҆ ѿ чл҃вѣ́ка непра́веднагѡ и҆зба́ви мѧ̀ без̾ па́кости, всѧ̑ бо мо́жеши, ꙗ҆́кѡ мт҃и зижди́телѧ сꙋ́щи.
Вѣ́мъ тѧ̀, бг҃облагода́тнаѧ, многотрꙋ́дныхъ цѣле́бницꙋ, и҆ а҆́зъ немощны́мъ дꙋ́хомъ и҆ ᲂу҆сты̀ зовꙋ̀: ѿ напа́сти сеѧ̀ и҆ печа́ли свободѝ и҆ сп҃си́ мѧ, влⷣчце, прибѣга́ющаго.
И҆зба́ви мѧ̀ ѿ ле́сти сеѧ̀ и҆ бѣды̀, бг҃оневѣ́сто, тѧ̀ ᲂу҆стро́и бг҃ъ хода́таицꙋ на сп҃се́нїе и҆ застꙋпле́нїе на́ше, сегѡ̀ ра́ди и҆ мнѣ̀, недосто́йномꙋ, и҆схода́тайствꙋй ѿ всеѧ̀ печа́ли свобожде́нїе.
Конда́къ, гла́съ и҃:
Взбра́нной воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ ѕлы́хъ, бл҃года́рствєннаѧ восписꙋ́емъ тѝ, рабѝ твоѝ, бцⷣе: но ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ, да зове́мъ тѝ: ра́дꙋйсѧ, невѣ́сто неневѣ́стнаѧ.
І҆́косъ:
А҆́гг҃лъ предста́тель съ нб҃сѐ по́сланъ бы́сть рещѝ бцⷣѣ: ра́дꙋйсѧ, и҆ со безпло́тнымъ гла́сомъ воплоща́ема тѧ̀ зрѧ̀, гдⷭ҇и, ᲂу҆жаса́шесѧ и҆ стоѧ́ще, зовы́й къ не́й такѡва́ѧ: ра́дꙋйсѧ, є҆́юже ра́дость возсїѧ́етъ: ра́дꙋйсѧ, є҆́юже клѧ́тва и҆сче́знетъ. ра́дꙋйсѧ, па́дшагѡ а҆да́ма воззва́нїе: ра́дꙋйсѧ, сле́зъ є҆́ѵиныхъ и҆збавле́нїе. ра́дꙋйсѧ, высото̀ неꙋдобовосходи́маѧ чл҃вѣ́ческими пѡ́мыслы: ра́дꙋйсѧ, глꙋбино̀ неꙋдобозри́маѧ и҆ а҆́гг҃льскима ѻ҆чи́ма. ра́дꙋйсѧ, ꙗ҆́кѡ є҆сѝ цр҃е́во сѣда́лище: ра́дꙋйсѧ, ꙗ҆́кѡ но́сиши носѧ́щаго всѧ̑. ра́дꙋйсѧ, ѕвѣздо̀, ꙗ҆влѧ́ющаѧ со́лнце: ра́дꙋйсѧ, ᲂу҆тро́бо бжⷭ҇твеннагѡ воплоще́нїѧ. ра́дꙋйсѧ, є҆́юже ѡ҆бновлѧ́етсѧ тва́рь: ра́дꙋйсѧ, є҆́юже поклонѧ́емсѧ творцꙋ̀. ра́дꙋйсѧ, невѣ́сто неневѣ́стнаѧ.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.
Ты̀ є҆сѝ, пречⷭ҇таѧ дв҃о, покрови́тельница моѧ̀ и҆ непреста́нное ᲂу҆пова́нїе дꙋшѝ мое́й, ѽ влⷣчце, прїими́ мѧ, ѡ҆держи́ма лю́тою бѣдо́ю, и҆ ᲂу҆тѣ́ши мою̀ печа́ль.
Ты̀ є҆сѝ крѣ́пость моѧ̀, пречⷭ҇таѧ влⷣчце, и҆ наше́дшихъ на мѧ̀ си́хъ скорбе́й ᲂу҆тѣше́нїе. сегѡ̀ ра́ди и҆ а҆́зъ, недосто́йный ра́бъ тво́й, всенаде́жнѡ вопїю́ ти: поми́лꙋй мѧ̀, па́дшаго.
И҆сцѣлѝ дꙋшѝ моеѧ̀ ꙗ҆́звы, влⷣчце, и҆ застꙋпи́ мѧ, раба̀ твоего̀, и҆ и҆зба́ви мѧ̀ ѿ всѧ́кагѡ ѡ҆бава́нїѧ непра́веднагѡ и҆ ѿ сопроти́внагѡ навѣ́та и҆ развраще́нїѧ и҆зми́ мѧ, всебл҃гослове́ннаѧ.
Пѣ́снь и҃. І҆рмо́съ:
Ѻ҆́троки бл҃гочести́выѧ въ пещѝ рождество̀ бг҃оро́дичо сп҃сло̀ є҆́сть: тогда̀ ᲂу҆́бѡ ѻ҆бразꙋ́емое, ны́нѣ же дѣ́йствꙋемое, вселе́ннꙋю. всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Сокрꙋшѝ совѣ́ты непра́вєдныѧ, ꙗ҆̀же на мѧ̀ и҆зощрє́ны сꙋ́ть, а҆́зъ бо и҆ны́ѧ по́мощи не и҆́мамъ, ра́звѣ тебѐ, чⷭ҇таѧ, къ тебѣ̀ прибѣга́ю, не попꙋсти́ ми: всѧ̑ бо тебѣ̀ возмѡ́жна сꙋ́ть.
Дꙋ́шꙋ мою̀ сохранѝ кро́вомъ крилꙋ̀ твое́ю, пребл҃гослове́ннаѧ бцⷣе, ѿ разли́чныхъ належа́щихъ бѣ́дъ и҆ скорбе́й и҆зба́ви мѧ̀, да не пора́дꙋетсѧ вра́гъ мо́й ѡ҆ мое́й не́мощи, но да сла́витсѧ бж҃їѧ мт҃рь во вѣ́ки.
А҆́зъ ᲂу҆̀бо по́мощи чл҃вѣ́ческїѧ и҆ска́ти не прибѣго́хъ, но къ тебѣ̀, пренепоро́чнаѧ: ты̀ є҆сѝ всенаде́жнаѧ храни́тельница хрⷭ҇тїа́нѡмъ.
Ты̀ є҆сѝ, бцⷣе, просвѣще́нїе и҆ и҆збавле́нїе, ты̀ є҆сѝ побо́рница моѧ̀ прера́дованнаѧ. ты̀ є҆сѝ наде́жда нерꙋши́маѧ, стѣна̀ и҆ сла́ва хвали́маѧ, пренепоро́чнаѧ дв҃о. тебѣ̀ всеꙋсе́рднѡ поклонѧ́юсѧ и҆ вопїю̀: сп҃си́ мѧ ѿ печа́ли сеѧ̀ и҆ напа́сти.
Пѣ́снь ѳ҃. І҆рмо́съ:
Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ, ра́дꙋйсѧ всебл҃же́ннаѧ бцⷣе, чⷭ҇таѧ приснодв҃о.
И҆́зсше, ꙗ҆́кѡ скꙋде́ль, крѣ́пость моѧ̀, и҆ ко а҆́дꙋ приложи́хсѧ дꙋшепа́гꙋбныхъ ѕѡ́лъ. предвари́ мѧ, мт҃и бж҃їѧ, застꙋпле́нїемъ свои́мъ, и҆схи́ти мѧ̀ ѿ ѡ҆держа́щихъ скорбе́й рꙋко́ю млⷭ҇ти твоеѧ̀.
Сѣ́ти лꙋка́выхъ и҆ ѕлочести́выхъ сокрꙋшѝ, чⷭ҇таѧ бг҃ороди́тельнице, и҆схи́ти мѧ̀ неврежде́на, тво́й бо є҆́смь ра́бъ: ѽ, ра́дꙋйсѧ ѡ҆бра́дованнаѧ.
Всенепоро́чнаѧ ѻ҆трокови́це, всѣ̑мъ вѣ̑рнымъ хрⷭ҇тїа́нѡмъ по́мощь, бꙋ́ди и҆ мнѣ̀ неѡскꙋ́днаѧ помо́щница къ сн҃ꙋ своемꙋ̀ и҆ бг҃ꙋ, сла́вимомꙋ въ трⷪ҇цѣ, и҆ свободи́ мѧ ѿ сеѧ̀ наше́дшїѧ ско́рби.
Ты̀ є҆сѝ крѣ́пость моѧ̀, пречⷭ҇таѧ, и҆ прибѣ́жище, и҆ стѣна̀ неѡбори́маѧ, ты̀ є҆сѝ къ бг҃ꙋ мл҃твенница, всѧ́кихъ мѧ̀ напа́стей и҆ бѣ́дъ свободѝ, є҆ди́на бл҃гослове́ннаѧ.