Въ а҃-й де́нь, ст҃а́гѡ мꙋ́ченика і҆ꙋсті́на фїлосо́фа: и҆ дрꙋга́гѡ мꙋ́ченика і҆ꙋсті́на, и҆ и҆̀же съ ни́ми.
А҆ллилꙋ́їа, и҆лѝ тропа́рь.
И҆ преподо́бнагѡ ѻ҆ц҃а̀ на́шегѡ дїонѵ́сїа глꙋши́цкагѡ, но́вагѡ чꙋдотво́рца. Слꙋ́жба є҆гѡ̀ пи́сана по се́й слꙋ́жбѣ.
На Гдⷭ҇и, воззва́хъ, а҆́ще по́стъ, пое́мъ стїхи̑ры бцⷣы г҃, гла́съ в҃. Подо́бенъ: Є҆гда̀ ѿ дре́ва: И҆ ст҃а́гѡ г҃, гла́съ и҆ подо́бенъ то́йже.
Є҆гда̀ неразꙋ́мїѧ ле́дъ всю̀ ѡ҆бдержа́ше тва́рь навѣ̑ты вра́жїими, и҆ слꙋжи́мо бѧ́ше і҆́дѡльское мно́жество: тогда̀, сла́внїи мꙋ́чєницы, ᲂу҆се́рднымъ се́рдцемъ и҆ теплото́ю бжⷭ҇твенныѧ вѣ́ры, сїѐ ᲂу҆ста́висте, любо́вїю пролива́юще кро́вь, за и҆злїѧ́вшаго свою̀ кро́вь на крестѣ̀ ꙗ҆́вѣ.
Є҆гда̀ манове́нїемъ бжⷭ҇твеннымъ, къ вышеесте́ствєннымъ подвигѡ́мъ ѿлꙋчи́стесѧ, тѣлесѐ тлѣ́ющагѡ ѿве́ргшесѧ, тогда̀ си́лою ᲂу҆крѣплѧ́еми всеси́льнагѡ, ѻ҆гнѧ̀ не ᲂу҆жасо́стесѧ, ни меча̀ посѣка́ющагѡ. тѣ́мже бг҃ꙋ вы̑и прекло́нше, блаже́ннїи, кончи́нꙋ съ ра́достїю прїѧ́сте.
Пеѡ́нъ до́блїй страда́лецъ, валерїа́нъ и҆ харїтѡ́нъ, и҆ харі́та съ ни́мъ, и҆ бжⷭ҇твенный і҆ꙋсті́нъ, є҆ѵе́лпїстъ и҆ і҆ера́ѯъ сла́вный, ѻ҆де́ждꙋ ѿ крове́й бжⷭ҇твенныхъ ѡ҆багри́вшїи, и҆ ѡ҆дѣ́ѧвшесѧ вкꙋ́пѣ, влⷣцѣ всѣ́хъ на небесѣ́хъ, со а҆́гг҃лы цр҃ю̀ хрⷭ҇тꙋ̀ предстоѧ́тъ.
И҆́ны стїхи̑ры бцⷣы, гла́съ и҆ подо́бенъ то́йже:
Ра́дꙋйсѧ, солнцезра́чнаѧ ѕвѣздо̀, ра́дꙋйсѧ, вино́внаѧ всѣ́хъ до́брыхъ, пренепоро́чнаѧ: ра́дꙋйсѧ, вмѣсти́вшаѧ бг҃а невмѣсти́маго, ꙗ҆́же кла́съ прозѧ́бшаѧ безсме́ртїѧ. ра́дꙋйсѧ, бжⷭ҇твенное носи́ло и҆ две́ре всесвѣ́тлаѧ: ра́дꙋйсѧ, клѧ́твы ᲂу҆бїе́нїе прароди́тельныѧ на́шеѧ, ѻ҆трокови́це, благи́хъ хода́таица сꙋ́щи.
Всѣ́хъ скорбѧ́щихъ ра́досте, и҆ ѡ҆би́димыхъ предста́тельнице, и҆ ᲂу҆бо́гихъ пита́тельнице, стра́нныхъ же ᲂу҆тѣше́нїе, и҆ же́зле слѣпы́хъ, немощны́хъ посѣще́нїе, трꙋжда́ющихсѧ покро́ве и҆ застꙋ́пнице, и҆ си́рыхъ помо́щнице, мт҃и бг҃а вы́шнѧгѡ, ты̀ є҆сѝ пречⷭ҇таѧ: потщи́сѧ, мо́лимсѧ, спасти́сѧ рабѡ́мъ твои̑мъ.
Покро́въ и҆ застꙋпле́нїе на́мъ хрⷭ҇тїа́нѡмъ ты̀ є҆сѝ, и҆ прибѣ́жище держа́вно, мт҃и бг҃а вы́шнѧгѡ. Но и҆ ны́нѣ ꙗ҆́кѡ при́снѡ, бо́дренною твое́ю моли́твою, не преста́й молѧ̀ спастѝ рабы̑ твоѧ̑ ѿ ѡ҆бстоѧ́нїй всѣ́хъ. ꙗ҆́кѡ тѧ̀ съ бг҃омъ и҆́мамы застꙋпле́нїе всѝ хрⷭ҇тїа́не и҆ прибѣ́жище.
Сла́ва, и҆ ны́нѣ, бг҃оро́диченъ:
И҆но́гѡ держа́внагѡ прибѣ́жища, и҆ крѣ́пости столпа̀, и҆ стѣны̀ неѡбори́мыѧ, вои́стиннꙋ не стѧжа́хомъ, ра́звѣ тебє̀, пречⷭ҇таѧ, къ тебѣ̀ прибѣга́емъ, и҆ тебѣ̀ вопїе́мъ: влⷣчце, помозѝ, да не поги́бнемъ, покажѝ твою̀ бл҃года́ть на ны̀, и҆ крѣ́пости сла́вꙋ, и҆ милосе́рдїѧ твоегѡ̀ вели́чество.
Крⷭ҇тобг҃оро́диченъ:
Дре́вꙋ кре́стномꙋ тѧ̀, і҆и҃се, пригвожде́на зрѧ́щи неискꙋсобра́чнаѧ, пла́чꙋщи глаго́лаше: ча́до сла́дкое, почто̀ ѡ҆ста́вилъ є҆сѝ менѐ, ро́ждшꙋю тѧ̀ є҆ди́нꙋ, свѣ́те непристꙋ́пный пребезнача́льнагѡ ѻ҆ц҃а̀; потщи́сѧ и҆ просла́висѧ, ꙗ҆́кѡ да сла́вꙋ полꙋча́тъ бжⷭ҇твеннꙋю, и҆̀же бжⷭ҇твєнныѧ стра̑сти твоѧ̑ сла́вѧщїи.
На стїхо́внѣ ѻ҆ктѡ́иха. Тропа́рь, гла́съ д҃:
Мꙋ́чєницы твоѝ, гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебє̀ бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́мѡнѡвъ немощны̑ѧ де́рзѡсти: тѣ́хъ моли́твами спасѝ дꙋ́шы на́шѧ.
КАНѠ́НЪ.
Гла́съ в҃. Пѣ́снь а҃. І҆рмо́съ:
Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.
Мꙋ́ченическими ᲂу҆кра́шени свѣтлостьмѝ, чи́стомꙋ предстоитѐ, мꙋ́чєницы, престо́лꙋ влⷣки всѣ́хъ, на́шихъ согрѣше́нїй разрѣше́нїе подаю́ще.
Благочести́вїи и҆́стины побѡ́рницы, предъ мꙋчи́тельскимъ сꙋди́щемъ подви́гшесѧ є҆диномꙋ́дреннѡ, низложи́ша пре́лесть дїа́волю си́лою дꙋхо́вною.
Ра́нами, и҆ ꙗ҆́звами, и҆ скорбьмѝ, благозва́ннїи и҆скꙋпи́ша великомꙋ́чєницы хрⷭ҇то́во црⷭ҇тво, въ не́мже вѣнцено́сцы ны́нѣ живꙋ́тъ.
Бг҃оро́диченъ:
Оу҆щедрѧ́ѧ твои́хъ рꙋ́къ созда́нїе, въ ми́лости бога́тый, во ᲂу҆тро́бꙋ всели́лсѧ є҆сѝ неискꙋсомꙋ́жныѧ дв҃ы, и҆ сїю̀ предста́тельницꙋ на́мъ показа́лъ є҆сѝ.
Пѣ́снь г҃. І҆рмо́съ:
Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.
Оу҆твержде́нїе хрⷭ҇та̀ въ се́рдцы твое́мъ носѧ̀, мꙋ́жески сопроти́вилсѧ є҆сѝ, і҆ꙋсті́не, и҆стѧза́ющемꙋ, беззако́нновати пребеззако́ннѡ тебѣ̀ велѧ́щемꙋ.
Ли́къ бг҃осїѧ́ненъ, во́инство бг҃оизбра́нное ст҃ы́хъ мꙋ́чєникъ, ст҃ы́й собо́ръ собра́всѧ ны́нѣ, побѣдѝ врагѝ безплѡ́тныѧ съ тѣ́ломъ.
Тѣ́ло ра́намъ, веледꙋ́шнїи, преда́вше, ра́довахꙋсѧ, прозрѧ́ще вѣ́чное наслажде́нїе, и҆ бꙋ́дꙋщꙋю сла́вꙋ, и҆ свѣ́тлость.
Бг҃оро́диченъ:
Ѻ҆́блаки дꙋшѝ моеѧ̀ разорѝ, со́лнце сла́вы ле́гкїй ѻ҆́блаче, и҆ ᲂу҆́мъ мо́й свѣ́томъ наста́ви, почерне́нїемъ ѕло́бы ѡ҆мраче́нный.
Сѣда́ленъ, гла́съ є҃. Подо́бенъ: Собезнача́льное сло́во:
І҆ꙋсті́нъ и҆ харїтѡ́нъ, пеѡ́нъ, є҆ѵе́лпїстъ, харі́та и҆ і҆ера́ѯъ, и҆ валерїа́нъ, свѣти́льницы свѣ́тлїи, ѡ҆зарѧ́ющїи концы̀ земны̑ѧ лꙋча́ми подвигѡ́въ свои́хъ, велегла́снѡ да восхва́лѧтсѧ вѣ́рою, хрⷭ҇тꙋ̀ молѧ́щесѧ, спасти́сѧ на́мъ.
Сла́ва, и҆ ны́нѣ, бг҃оро́диченъ:
Те́плаѧ предста́тельнице и҆ непобѣди́маѧ, ᲂу҆пова́нїе и҆звѣ́стное и҆ непосты́дное, стѣно̀, и҆ покро́ве, и҆ приста́нище, прибѣга́ющымъ къ тебѣ̀, приснодв҃о чⷭ҇таѧ, сн҃а твоего̀ и҆ бг҃а молѝ со а҆́гг҃лы, ᲂу҆мире́нїе да́ти мі́рови и҆ спасе́нїе, и҆ ве́лїю ми́лость.
Крⷭ҇тобг҃оро́диченъ:
На крⷭ҇тѣ̀ зрѧ́щи тѧ̀, хрⷭ҇тѐ, мт҃и твоѧ̀, во́лею посредѣ̀ разбѡ́йникꙋ ви́сѧща, растерза́ющисѧ ᲂу҆тро́бою ма́терски, глаго́лаше: безгрѣ́шный сн҃е, ка́кѡ непра́веднѡ на крⷭ҇тѣ̀, ꙗ҆́коже ѕлодѣ́й прогвожде́нъ є҆сѝ, человѣ́ческїй ро́дъ хотѧ̀ ѡ҆живи́ти, ꙗ҆́кѡ благоꙋтро́бенъ;
Пѣ́снь д҃. І҆рмо́съ:
Оу҆слы́шахъ, гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀, є҆ди́не чл҃вѣколю́бче.
І҆ꙋсті́на, и҆ харїтѡ́на, и҆ харі́ты, и҆ пеѡ́на, страда́нїємъ а҆́гг҃льстїи чи́нове ᲂу҆диви́шасѧ.
Сокрꙋша́ема тѣлеса̀ ра́нами, бжⷭ҇твенное и҆схода́тайствоваша дѡ́блимъ блаже́нство.
Ꙗ҆́коже мы́сленное ᲂу҆́глїе, бжⷭ҇твеннымъ ѻ҆гне́мъ попали́сте ле́сть, и҆ свѣти̑ла мі́ра, мꙋ́чєницы ꙗ҆ви́стесѧ.
Є҆ѵе́лпїста, і҆ера́ѯа, непрекло́нныхъ мꙋ́чєникъ мꙋ́жествꙋ, тмы̀ кнѧ́зи ᲂу҆боѧ́шасѧ.
Бг҃оро́диченъ:
И҆́же ѻ҆́гнь бжⷭ҇тва̀ во ᲂу҆тро́бѣ, дв҃о, прїе́мшаѧ, ѻ҆гнѧ̀ мѧ̀ и҆зба́ви и҆ мꙋ́ки.
Пѣ́снь є҃. І҆рмо́съ:
Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀, и҆но́гѡ бо́га не зна́емъ.
Дх҃а бжⷭ҇твеннагѡ и҆спо́лнивсѧ, лꙋка́вствїѧ лю̑тыѧ дꙋ́хи течє́нїи крове́й твои́хъ, мꙋ́чениче і҆ꙋсті́не, ᲂу҆дави́лъ є҆сѝ, блаже́нне, пострада́въ крѣ́пкѡ.
Благода́ти тезоимени́таѧ, благода́ти бж҃їѧ и҆спо́льна бы́сть: и҆ же́нскꙋю забы́вши ꙗ҆́вѣ не́мощь, пострада̀ зако́ннѡ, и҆ сла́вꙋ полꙋчѝ.
Ѡ҆благода́тивъ дꙋ́шꙋ и҆сповѣ̑данїи свѧще́нными, притꙋпи́лъ є҆сѝ ве́тхагѡ врага̀ ѕло́бꙋ, харїтѡ́не страда́льне, бжⷭ҇твенныхъ страстоте́рпцєвъ честно́е ᲂу҆добре́нїе.
Бг҃оро́диченъ:
Ꙗ҆́же сп҃са хрⷭ҇та̀ ᲂу҆подо́бльшасѧ земны̑мъ ро́ждшаѧ премно́жествомъ бога́тства милосе́рдїѧ: того̀ ꙗ҆́кѡ бг҃а, чⷭ҇таѧ, молѝ спастѝ рабы̑ твоѧ̑.
Пѣ́снь ѕ҃. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
І҆ꙋсті́на и҆ харїтѡ́на, пеѡ́на и҆ валерїа́на, харі́ты же и҆ і҆ера́ѯа, и҆ є҆ѵе́лпїста, всѝ пресвѣ́тлꙋю па́мѧть просла́вимъ.
Безво́лненнѡ мꙋче́нїй пꙋчи́нꙋ бжⷭ҇твеннымъ правле́нїемъ проидо́сте, мꙋ́чєницы, и҆ ко приста́нищꙋ благоꙋти́шномꙋ хрⷭ҇то́ва црⷭ҇тва доидо́сте.
Ꙗ҆́коже нелє́стныѧ ѕвѣ́зды сїѧ́юще, це́ркви честны́мъ ᲂу҆твержде́нїемъ, вселе́ннꙋю всю̀ свѣтосїѧ́нїемъ страда́нїѧ просвѣща́ете.
Бг҃оро́диченъ:
Безмѣ́рнагѡ ѡ҆камене́нїѧ и҆зба́ви мѧ̀, ѡ҆держи́маго мно́гими согрѣшє́нїи, бг҃ороди́тельнице влⷣчце, и҆ гее́нскомꙋ ѻ҆гню̀ подлежа́щаго.
Конда́къ, гла́съ в҃:
Премꙋ́дростїю бжⷭ҇твенныхъ твои́хъ слове́съ, і҆ꙋсті́не, цр҃ковь бж҃їѧ всѧ̀ ᲂу҆кра́сившисѧ, житїѧ̀ твоегѡ̀ свѣ́тлостїю мі́ръ ѡ҆свѣща́етъ: и҆злїѧ́нїѧ же ра́ди кро́ве вѣне́цъ прїе́мъ, и҆ со а҆́гг҃лы предстоѧ̀ хрⷭ҇тꙋ̀, молѝ непреста́ннѡ ѡ҆ всѣ́хъ на́съ.
Пѣ́снь з҃. І҆рмо́съ:
Тѣ́лꙋ злато́мꙋ премꙋ̑дрыѧ дѣ́ти не послꙋжи́ша, и҆ въ пла́мень са́ми поидо́ша, и҆ бо́ги и҆́хъ ѡ҆брꙋга́ша, средѝ пла́мене возопи́ша, и҆ ѡ҆росѝ ѧ҆̀ а҆́гг҃лъ: ᲂу҆слы́шасѧ ᲂу҆жѐ ᲂу҆́стъ ва́шихъ моли́тва.
Пре́лести глꙋбинꙋ̀ крове́й рѣко́ю и҆зсꙋши́сте, то́ки чꙋде́съ и҆сточи́сте, ᲂу҆гаша́юще ᲂу҆́глїе, мꙋ́чєницы, лю́тыхъ страсте́й вопїю́щымъ всегда̀: благослове́нъ бг҃ъ ѻ҆тє́цъ на́шихъ.
Бжⷭ҇тва̀ ѻ҆гне́мъ любвѐ, мꙋ́дрїи, ве́щь ѕло́бы доблемꙋ́дреннѡ попали́сте, и҆ ꙗ҆́кѡ ѻ҆гнесїѧ́нни возсїѧ́вше, всѣ́хъ вопїю́щихъ сердца̀ благоче́стнѡ просвѣти́сте: благослове́нъ бг҃ъ ѻ҆тє́цъ на́шихъ.
Мꙋ́дростїю бж҃їею і҆ꙋсті́нъ мꙋ́дрый ᲂу҆кра́шенъ, є҆́ллинское ѡ҆бꙋѝ мꙋдрова́нїе благода́тїю, ᲂу҆вѣ́ривъ покланѧ́тисѧ трⷪ҇цѣ, и҆ правосла́внѡ зва́ти: благослове́нъ бг҃ъ ѻ҆тє́цъ на́шихъ.
Бг҃оро́диченъ:
Дв҃о чⷭ҇тна́ѧ, неискꙋсобра́чнаѧ, чⷭ҇таѧ, благослове́ннаѧ, низпа́дающихъ и҆справле́нїе, согрѣша́ющихъ проще́нїе, спаси́ мѧ блꙋ́днаго, спасѝ сн҃ꙋ твоемꙋ̀ зовꙋ́ща: благослове́нъ бг҃ъ ѻ҆тє́цъ на́шихъ.
Пѣ́снь и҃. І҆рмо́съ:
Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Ꙗ҆́коже въ пещѝ ѻ҆́гненнѣй, въ мꙋ́кахъ терпѣли́внѡ и҆скꙋси́вшесѧ, страстоте́рпцы гдⷭ҇ни, па́че зла́та вои́стиннꙋ бжⷭ҇твеннѡ, вопїю́ще, ѡ҆блиста́сте: хрⷭ҇та̀ превозно́симъ во всѧ̑ вѣ́ки.
Со і҆ꙋсті́номъ мꙋ́дрымъ да воспое́тсѧ харі́та, и҆ харїтѡ́нъ, и҆ пеѡ́нъ, и҆ і҆ера́ѯъ вели́кїй съ валерїа́номъ, страда́нїемъ ле́сть ѿгна́вшїи, и҆ а҆́гг҃льскимъ ликѡ́мъ совокꙋ́пльшїисѧ.
Къ вѣ́чнѣй жи́зни ведо́ми, мꙋ́дрїи, доблемꙋ́дреннѡ вы̑и мечꙋ̀, є҆диномы́слїемъ дꙋшѝ, всѝ преклони́сте, мꙋ́чєницы, ꙗ҆́кѡ жє́ртвы бг҃ꙋ приве́дшесѧ.
Бг҃оро́диченъ:
Живота̀ сꙋ́щи и҆сто́чникъ, ꙗ҆́кѡ во́дꙋ жи́зни поро́ждши дꙋ́шꙋ мою̀ и҆ста́ѧвшꙋю грѣхо́внымъ пла́менемъ, дв҃о бцⷣе, напо́й, да тѧ̀ сла́влю во всѧ̑ вѣ́ки.
Пѣ́снь ѳ҃. І҆рмо́съ:
Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи, є҆диномꙋ́дреннѡ пѣ́сньми велича́емъ.
Бжⷭ҇твенною сїѧ́ющи сла́вою стꙋ́день пре́лести разрꙋши́сте, до́блїи страда́льцы, и҆ ѻ҆́бщницы бы́сте свѧще́нныхъ страсте́й пло́ть прїи́мшагѡ на́съ ра́ди, съ ни́мъ вѣ́чнѡ на нб҃сѣ́хъ ра́дꙋетесѧ.
І҆ꙋсті́новѣ мꙋ́дрости и҆ харі́ты мꙋ́жествꙋ, и҆ харїтѡ́новѣ де́рзости вои́стиннꙋ, пеѡ́ны же и҆ і҆ера́ѯа дѡ́блимъ подвигѡ́мъ, и҆ валерїа́на къ лю̑тымъ мно́гомꙋ терпѣ́нїю, и҆ а҆́гг҃ли чꙋди́шасѧ.
Ꙗ҆́коже на колесни́цꙋ бжⷭ҇твеннꙋю всѣ́дше сла́внѡ, кро́вїю ва́шею къ нб҃сѝ ра́достнѡ востеко́сте, и҆ рꙋко́ю живоно́сною побѣ̑дныѧ прїѧ́сте, мꙋ́дрїи, вѣнцы̀, непреста́ннѡ ѡ҆ на́съ молѧ́щесѧ.
Бг҃оро́диченъ:
Неискꙋсомꙋ́жнѡ сло́во па́че сло́ва ро́ждшаѧ, дв҃о неискꙋсобра́чнаѧ, чⷭ҇таѧ, напа́стей и҆змѝ на́съ и҆ всѧ́кихъ бѣ́дъ, и҆ вре́да дꙋшетлѣ́нна, и҆ страсте́й, и҆ вѣ́чнꙋющагѡ пла́мене, и҆ ѡ҆сꙋжде́нїѧ.
Слꙋ́жба преподо́бнагѡ ѻ҆ц҃а̀ на́шегѡ дїонѵ́сїа, глꙋши́цкагѡ чꙋдотво́рца.
Ве́черъ, Бл҃же́нъ мꙋ́жъ: На Гдⷭ҇и, воззва́хъ, стїхи̑ры на ѕ҃, гла́съ д҃.
Подо́бенъ: Да́лъ є҆сѝ зна́менїе:
Пе́рвѣе пости́всѧ, ꙳ пло́ти взыгра̑нїѧ ꙳ воздержа́нїемъ ᲂу҆мертви́лъ є҆сѝ: ꙳ второ́е побѣ́дꙋ взѧ́лъ є҆сѝ на врагѝ, ꙳ и҆ низложи́лъ є҆сѝ и҆́хъ кова̑рства твои́ми пѡ́двиги, ꙳ дїонѵ́сїе бг҃облаже́нне. ꙳ Тѣ́мже тѧ̀ вѣнча̀ сꙋгꙋ́быми вѣнцы̑ ꙳ і҆и҃съ чл҃вѣколю́бецъ, ꙳ и҆ сп҃съ дꙋ́шъ на́шихъ.
Стрꙋѧ́ми сле́зъ твои́хъ ꙳ сѣ́мѧ бжⷭ҇твенное напои́лъ є҆сѝ, ꙳ ꙗ҆́кѡ землѧ̀ благоплодови́та, бг҃одꙋхнове́нне, ꙳ стори́цею воздаѧ̀, ꙳ преподо́бїѧ пло́дъ прозѧ́блъ є҆сѝ вои́стиннꙋ, ꙳ и҆ въ жи̑тницы собра́лъ є҆сѝ мы́слєнныѧ, ꙳ си́лою дꙋхо́вною, ꙳ тебѐ претво́ршагѡ премѣне́нїемъ лꙋ́чшимъ, ꙳ дїонѵ́сїе пресла́вне.
Вѣ́рою и҆ любо́вїю, ꙳ ѽ празднолю́бцы, соше́дшесѧ дне́сь, ꙳ ѱалмы̑ и҆ пѣ́сньми восхва́лимъ нбⷭ҇наго человѣ́ка, земна́го а҆́гг҃ла. ꙳ къ немꙋ́же возопїе́мъ: ꙳ ѽ всеблаже́нне преподо́бне, пꙋсты́нный жи́телю, по́стникѡвъ похвало̀, ѡ҆ на́съ моли́сѧ ко гдⷭ҇ꙋ, ѻ҆́ч҃е дїонѵ́сїе, ꙳ спасти́сѧ дꙋша́мъ на́шымъ.
Сла́ва, гла́съ и҃:
Прпⷣбне и҆ бг҃облаже́нне ѻ҆́ч҃е дїонѵ́сїе, вои́стиннꙋ сподо́билсѧ є҆сѝ бжⷭ҇твенныѧ жи́зни, посто́мъ и҆ бдѣ́нїемъ и҆знꙋрѧ́ѧ тѣ́ло твоѐ, ѻ҆́бразъ бы́въ мона́хѡмъ: а҆́ще бо и҆ тѣле́сный ѧ҆зы́къ ᲂу҆молчѐ, но чꙋдеса̀ свидѣ́тельствꙋютъ, пꙋсты́нѧ проповѣ́дающи хва́литсѧ, и҆мѣ́ющи въ себѣ̀ неѿе́млемое сокро́вище: лю́дїе бо зрѧ́ще честнꙋ́ю ра́кꙋ моще́й твои́хъ и҆ чꙋдеса̀ быва́ємаѧ, прославлѧ́ютъ просла́вльшаго тѧ̀ гдⷭ҇а. Є҆мꙋ́же моли́сѧ непреста́ннѡ, дарова́ти во́инствꙋ на́шемꙋ на врагѝ побѣ̑ды, и҆ вселе́ннѣй ми́ръ и҆ ве́лїю ми́лость.
И҆ ны́нѣ, бг҃оро́диченъ: Цр҃ь нбⷭ҇ный, за чл҃вѣколю́бїе:
А҆́ще н҃-ца, И҆ ны́нѣ, пра́здника.
Вхо́дъ. Прокі́менъ днѐ. Чтє́нїѧ трѝ.
Премꙋ́дрости соломѡ́ни чте́нїе.
[Глава̀ є҃] Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе благолѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ: прїи́метъ щи́тъ непобѣди́мый, преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ: по́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ благокрꙋ́гла лꙋ́ка ѻ҆блакѡ́въ на намѣ́ренїе полетѧ́тъ. И҆ ѿ каменоме́тныѧ ꙗ҆́рости, и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ: рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дх҃ъ си́лы, и҆ ꙗ҆́кѡ ви́хоръ развѣ́етъ и҆̀хъ, и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те, держа́щїи мно́жєства и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.
Премꙋ́дрости соломѡ́ни чте́нїе.
[Глава̀ г҃] Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѿ на́съ ше́ствїе, сокрꙋше́нїе, ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
Премꙋ́дрости соломѡ́ни чте́нїе.
[Глава̀ д҃] Првⷣникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть: и҆ живы́й посредѣ̀ грѣ̑шникъ, преста́вленъ бы́сть: восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Ꙗ҆ви́всѧ ѿ ма́тернихъ пеле́нъ, ꙳ бг҃оно́се преподо́бне дїонѵ́сїе, ꙳ сосꙋ́дъ, ѻ҆́ч҃е, бы́лъ є҆сѝ, ꙳ и҆ до́мъ прест҃а́гѡ дх҃а.
Сті́хъ: Честна̀ пред̾ гдⷭ҇емъ сме́рть преподо́бныхъ є҆гѡ̀.
Носѧ̀ на ра̑мꙋ твоє́ю гдⷭ҇ень крⷭ҇тъ, ꙳ дїонѵ́сїе ѻ҆́ч҃е преподо́бне, ꙳ бѣсо́вское мечта́нїе ꙳ до конца̀ потреби́лъ є҆сѝ, ꙳ и҆ вѣ̑рнымъ и҆сцѣле́нїе дарова́лъ є҆сѝ.
Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Пре́лесть лꙋка́выхъ бѣсѡ́въ ꙳ ѡ҆бличи́лъ є҆сѝ крⷭ҇тною си́лою, ꙳ бо́дренными моли́твами и҆ сле́зными и҆стѡ́чники, ꙳ цр҃кви вѣ́рныхъ ѡ҆богати́лъ є҆сѝ, ꙳ бг҃облаже́нне дїонѵ́сїе.
Сла́ва, гла́съ ѕ҃:
Є҆́же по ѻ҆́бразꙋ соблю́дъ невреди́мѡ, ᲂу҆́мъ влⷣкꙋ на стра̑сти па̑гꙋбныѧ по́стнически поста́вивъ, во є҆́же по подо́бїю ꙗ҆́кѡ мо́щно возше́лъ є҆сѝ: мꙋ́жески бо є҆стество̀ понꙋ́дивъ, потща́лсѧ є҆сѝ хꙋ́ждшее покори́ти лꙋ́чшемꙋ, и҆ пло́ть порабо́тити дꙋ́хꙋ. Тѣ́мже мона́шествꙋющихъ ꙗ҆ви́лсѧ є҆сѝ ве́рхъ, жи́тель пꙋсты́нный, благотекꙋ́щихъ ѡ҆бꙋчи́тель, пра́вило добродѣ́тели и҆звѣ́стнѣйшее. И҆ ны́нѣ на нб҃сѣ́хъ, зерца́лѡмъ разрѣ́шшымсѧ, ѻ҆́ч҃е на́шъ дїонѵ́сїе, чи́стѣ зри́ши ст҃ꙋ́ю трⷪ҇цꙋ, молѧ́сѧ несре́дственнѣ ѡ҆ и҆̀же вѣ́рою и҆ любо́вїю чтꙋ́щихъ тѧ̀.
И҆ ны́нѣ, бг҃оро́диченъ: Бцⷣе, ты̀ є҆сѝ лоза̀ и҆́стиннаѧ:
А҆́ще н҃-ца: И҆ ны́нѣ, пра́здника. Тропа́рь, гла́съ а҃:
Бж҃е́ственною любо́вїю ѿ ю҆́ности распала́емь, дїонѵ́сїе преподо́бне, всѧ̑ ꙗ҆̀же въ мі́рѣ кра̑снаѧ возненави́дѣвъ, хрⷭ҇та̀ є҆ди́наго возлюби́лъ є҆сѝ: и҆ сегѡ̀ ра́ди во внꙋ́треннюю пꙋсты́ню всели́лсѧ є҆сѝ, со ѕвѣрьмѝ живы́й ве́сь хрⷭ҇тꙋ̀: ѿѻнꙋ́дꙋже и҆ всеви́дѧщее ѻ҆́ко твоѧ̑ трꙋды̀ ви́дѣвъ, да́ромъ чꙋде́съ и҆ по преставле́нїи ѡ҆богати́лъ тѧ̀ є҆́сть. Тѣ́мже вопїе́мъ тѝ: молѝ непреста́ннѡ ѡ҆ всѣ́хъ на́съ, честнꙋ́ю па́мѧть твою̀ при́снѡ въ пѣ́снехъ почита́ющихъ.
Сла́ва, и҆ ны́нѣ, бг҃оро́диченъ: Гаврїи́лꙋ вѣща́вшꙋ тебѣ̀, дв҃о:
На ᲂу҆́трени, по а҃-й стїхоло́гїи, сѣда́ленъ, гла́съ г҃. Подо́бенъ: Красотѣ̀:
Сою́зомъ любвѐ привѧза́всѧ хрⷭ҇тꙋ̀, земна̑ѧ же и҆ мимотекꙋ̑щаѧ возненави́дѣвъ, пꙋсты́нное ѡ҆ѕлобле́нїе ᲂу҆се́рднѡ под̾ѧ́лъ є҆сѝ: бѣсѡ́вскаѧ же ѡ҆полчє́нїѧ, и҆ и҆́хъ многоко́зненнꙋю си́лꙋ до конца̀ посрами́лъ є҆сѝ, и҆ подвигополо́жникъ хрⷭ҇то́съ дарова́нїемъ чꙋде́съ ѡ҆богати́ тѧ. Тѣ́мже тѧ̀ почита́емъ, дїонѵ́сїе бг҃омꙋ́дре.
Два́жды.
Сла́ва, и҆ ны́нѣ, бг҃оро́диченъ:
Ꙗ҆́кѡ невоздѣ́ланнаѧ, дв҃о, лоза̀, краснѣ́йшїй гро́здъ прозѧбла̀ є҆сѝ, и҆сточа́ющь на́мъ вїно̀ спасе́нїѧ, всѣ́хъ веселѧ́щее дꙋ́шы же и҆ тѣлеса̀. Тѣ́мже ꙗ҆́кѡ винꙋ́ тѧ до́брыхъ бл҃жа́ще при́снѡ, со а҆́гг҃ломъ вопїе́мъ тѝ: ра́дꙋйсѧ, благода́тнаѧ.
По в҃-й стїхоло́гїи, сѣда́ленъ, гла́съ а҃. Подо́бенъ: Ли́къ а҆́гг҃льскїй:
Житїѐ благоче́стнѡ на землѝ стѧжа́въ, прїѧ́телище чи́сто дх҃ꙋ ты̀ ꙗ҆ви́лсѧ є҆сѝ, просвѣща́ѧ вѣ́рою къ тебѣ̀ притека́ющыѧ, блаже́нне. Тѣ́мже молѝ твоего̀ влⷣкꙋ, просвѣти́ти дꙋ́шы на́съ воспѣва́ющихъ тѧ̀, дїонѵ́сїе преподо́бне, ѻ҆́ч҃е на́шъ.
Два́жды.
Сла́ва, и҆ ны́нѣ, бг҃оро́диченъ:
Всѣ́хъ творца̀, и҆ бг҃а, и҆ содѣ́телѧ, всенепоро́чнаѧ чⷭ҇таѧ, дх҃омъ бж҃е́ственнымъ въ ложесна́хъ заче́нши, безъ и҆стлѣ́нїѧ родила̀ є҆сѝ. є҆го́же сла́вѧще, тѧ̀ воспѣва́емъ, дв҃о, ꙗ҆́кѡ пала́тꙋ цр҃ѧ̀ всѣ́хъ, и҆ мі́рꙋ застꙋпле́нїе.
По полѷеле́и, сѣда́ленъ, гла́съ и҃. Подо́бенъ: Премꙋ́дрости:
Ѡ҆кормлѧ́емь си́лою вседѣ́тельною, и҆ вѣ́триломъ кре́стнымъ ѡ҆бложе́нъ, легкѡ̀ преплы́лъ є҆сѝ житїѧ̀ мо́ре, и҆ къ бж҃е́ствєннымъ вои́стиннꙋ приста́нищємъ дости́глъ є҆сѝ, добродѣ́телей кꙋ́плю мно́гꙋ стѧжа́въ, ю҆́же всѣ́хъ влⷣцѣ прине́слъ є҆сѝ, и҆́же, благі́й ра́бе, слы́шалъ є҆сѝ. Недꙋ́гꙋющихъ и҆сцѣли́лъ є҆сѝ, ско́рчившихсѧ рꙋ́цѣ и҆спра́вилъ є҆сѝ, слѣпы̑ѧ просвѣща́ѧ, нѣмы̑мъ повелѣ́лъ є҆сѝ вопи́ти: дїонѵ́сїе преподо́бне, молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Въ напа̑сти многоплетє́нныѧ впа́дъ, ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ: и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бл҃гости. Тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ, моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀.
Степє́нна, а҃-й а҆нтїфѡ́нъ д҃-гѡ гла́са. Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе: Є҆ѵⷢ҇лїе матѳе́а, зача́ло м҃г.
Ѱало́мъ н҃. Стїхи́ра, гла́съ в҃:
Ра́дꙋйсѧ, преподо́бне ѻ҆́ч҃е дїонѵ́сїе, всече́стне, и҆́же зако́нъ гдⷭ҇ень до́брѣ и҆звы́клъ є҆сѝ, и҆ вѣ́рꙋ соблю́лъ є҆сѝ невреди́мꙋ, хода́тай ꙗ҆ви́всѧ ѡ҆ ста́дѣ твое́мъ хрⷭ҇тꙋ̀ бг҃ꙋ. того̀ молѝ ᲂу҆мири́ти мі́ръ, и҆ спастѝ дꙋ́шы на́шѧ.
Канѡ́нъ бцⷣы на ѕ҃: И҆ ст҃а́гѡ на и҃.
Гла́съ и҃.
Пѣ́снь а҃. І҆рмо́съ:
Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца, спасѐ, пѣ́снь бг҃ови воспѣва́юща.
Ѡ҆заре́нїемъ ст҃а́гѡ дх҃а ѡ҆зарѝ бл҃гоче́стнѡ любо́вїю пѣ́сньми восхвалѧ́ющихъ тѧ̀, по́стникѡвъ похвало̀, мона́шествꙋющихъ сла́во, пꙋсты́ни ᲂу҆краси́телю, бл҃гоче́стїѧ ᲂу҆чи́телю, дїонѵ́сїе.
Ѿ ю҆́ности жела́нїе къ бг҃ꙋ возложи́въ, и҆ къ немꙋ̀ ра́дꙋѧсѧ возше́лъ є҆сѝ, и҆мѣ́ѧ всѐ твоѐ помышле́нїе, взыгра́нїе пло́ти и҆ страсте́й нахожде́нїе воздержа́нїемъ ᲂу҆мертви́лъ є҆сѝ, дїонѵ́сїе прехва́льне.
Попра́въ ѕмі́ѧ, тогѡ̀ сѣ̑ти легкѡ̀ прелетѣ́лъ є҆сѝ, кри́лы бл҃гоче́стїѧ впери́всѧ, ѻ҆́ч҃е: живо́тъ бо ра́дꙋѧсѧ ѡ҆б̾ѧ́лъ є҆сѝ ѿ са́да крⷭ҇тнагѡ, блаже́нне дїонѵ́сїе.
Бг҃оро́диченъ:
Оу҆ста́ви неꙋста́вное помышле́нїе смꙋще́нїѧ, пречⷭ҇таѧ дв҃о, мт҃и бж҃їѧ, къ сн҃ꙋ твоемꙋ̀ направлѧ́ющи движє́нїѧ.
Пѣ́снь г҃. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ по́стъ тѧ̀ дꙋ́хъ мо́й.
Во свѣ́тѣ невеще́ственнѣ и҆ мы́сленнѣ, ѿ печа́лей веще́ственныхъ восте́къ къ нбⷭ҇нымъ невеще́ствєннымъ чинѡ́мъ, преподо́бне, моли́твами твои́ми на́съ просвѣтѝ.
Воздержа́нїѧ сла́дость и҆ска́павъ, ѿри́нꙋлъ є҆сѝ го́ресть страсте́й: тѣ́мже па́че ме́да и҆ со́та наслади́лъ є҆сѝ, ѻ҆́ч҃е, чꙋ̑вствїѧ на̑ша.
Возше́дъ на высотꙋ̀ добродѣ́телей, до́лꙋ влекꙋ́щыѧ ѡ҆плева́лъ є҆сѝ сла̑сти, сла́дость показа́всѧ спасе́нїѧ, ѻ҆́ч҃е преподо́бне, ста́дꙋ твоемꙋ̀ просѝ грѣхѡ́въ ѡ҆ставле́нїѧ.
Бг҃оро́диченъ:
Премꙋ́дрость и҆ сло́во ѻ҆́ч҃ее несказа́ннѡ родила̀ є҆сѝ, дꙋшѝ моеѧ̀ лю́тꙋю и҆сцѣлѝ ꙗ҆́звꙋ, и҆ серде́чнꙋю болѣ́знь ᲂу҆толѝ.
Сѣда́ленъ, гла́съ и҃:
Красоты̑ мїрскі̑ѧ ѿ млады́хъ ногте́й, преподо́бне, возненави́дѣвъ, є҆ди́наго хрⷭ҇та̀ ѿ се́рдца возлюби́лъ є҆сѝ, и҆ томꙋ̀ все́ю дꙋше́ю прилѣпи́всѧ, ꙗ҆́кѡ безпло́тенъ на землѝ пожи́лъ є҆сѝ съ пло́тїю: сла́вꙋ же мимотекꙋ́щꙋю, и҆ бога́тство нивочто́же вмѣни́въ, нбⷭ҇ное бога́тство воспрїѧ́лъ є҆сѝ, и҆ сла́вꙋ вѣ́чнꙋю. Тѣ́мже и҆ ᲂу҆блажа́емъ ст҃о́е твоѐ ᲂу҆спе́нїе, и҆ въ не́мъ торжествꙋ́юще вопїе́мъ тѝ: бг҃обл҃же́нне ѻ҆́ч҃е на́шъ дїонѵ́сїе, молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. Тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Пѣ́снь д҃. І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. Тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Дꙋше́вное ѡ҆чища́ѧ чꙋ́вство, и҆ разширѧ́ѧ бжⷭ҇твенными видѣ̑нїи, бж҃е́ственныхъ дарова́нїй сподо́билсѧ є҆сѝ, бг҃облаже́нне, къ ра́цѣ моще́й твои́хъ притека́ющымъ, дїонѵ́сїе преподо́бне, подае́ши ско́рое и҆сцѣле́нїе.
Зако́нѡмъ бж҃їимъ повинꙋ́ѧсѧ, прпⷣбне, къ смотре́нїю безпло́тныхъ и҆ мы́сленныхъ твоѐ хꙋдо́жество ᲂу҆пра́вилъ є҆сѝ, преходѧ̀ вы́нꙋ ѿ сла́вы въ сла́вꙋ, ѿ си́лы, ѻ҆́ч҃е, въ си́лꙋ.
Бг҃оꙋго́днѡ пожи́въ, пꙋсты̑ни ꙗ҆́кѡ гра́ды сотвори́лъ є҆сѝ, потрє́бны и҆ дꙋшеполє́зны, и҆сто́чникъ и҆сцѣле́нїй пролива́ѧ вѣ́рою покланѧ́ющымсѧ ра́цѣ моще́й твои́хъ.
Бг҃оро́диченъ:
Новора́сленный безсме́ртїѧ ра́й, и҆ красе́нъ вои́стиннꙋ показа́ласѧ є҆сѝ, дв҃о: дре́во бо жи́зни въ тебѣ̀ насади́сѧ бг҃онача́льно, є҆́же во чре́вѣ твое́мъ носѧ́щи родила̀ є҆сѝ, всѣ̑мъ и҆ска́пающее спасе́нїѧ наде́ждꙋ, вѣ́рнѡ, бцⷣе, и҆сповѣ́дающымъ тѧ̀.
Пѣ́снь є҃. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Оу҆гаси́въ пла́мень страсте́й росо́ю подвигѡ́въ твои́хъ, ѻ҆́ч҃е блаже́нне дїонѵ́сїе, бога́тнѡ вже́глъ є҆сѝ ѻ҆гне́мъ любвѐ вѣ́ры воздержа́нїѧ свѣти́льникъ, просвѣще́нїе безстра́стїѧ, и҆ сы́нъ днѐ ꙗ҆ви́лсѧ є҆сѝ.
Вѣ́ры гро́здъ бжⷭ҇твеннымъ дѣ́ланїемъ, ѻ҆́ч҃е, воспита́лъ є҆сѝ, и҆ въ точи́лѣхъ поста́вивъ, и҆згне́лъ є҆сѝ болѣ́зньми поще́нїѧ, и҆ ча́шꙋ напо́лнилъ є҆сѝ дꙋхо́внꙋю воздержа́нїѧ, весели́ши сердца̀ ста́да твоегѡ̀.
До́блественнѣ претерпѣ́въ бїє́нїѧ неви́димыхъ врагѡ́въ, показа́лсѧ є҆сѝ сто́лпъ непоколеби́мь, ᲂу҆твержда́ѧ ста́до твоѐ па́лицею бжⷭ҇твенною, словесы̀ медото́чными, бл҃же́нне дїонѵ́сїе преподо́бне.
Бг҃оро́диченъ:
Є҆ди́на ро́ждши дв҃ою, є҆ди́на мꙋженеискꙋ́снаѧ ꙗ҆ви́ласѧ є҆сѝ, всенепоро́чнаѧ, во ᲂу҆тро́бѣ сло́во ѻ҆́ч҃ее прїе́мши безнача́льное, млеко́мъ дои́ши, чⷭ҇таѧ, чꙋ́до стра́шно! дѣ́вствꙋеши, и҆ зако́ны ѡ҆бновлѧ́еши є҆стества̀.
Пѣ́снь ѕ҃. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
И҆сцѣле́нїй рѣ́ки и҆сточа́еши, стра̑сти земноро́дныхъ бж҃е́ственнѡ ѡ҆чища́еши, ра́дꙋющесѧ вѣ́рою, восхвалѧ́емъ твоѧ̑ по́двиги, чꙋ́дне.
Зако́ннѡ ѿ всѣ́хъ содѣ́телѧ десни́цею вѣнча́лсѧ є҆сѝ, преподо́бне дїонѵ́сїе, небе́сный граждани́не, а҆́гг҃лѡмъ равностоѧ́телю.
Нетлѣ́ннагѡ и҆ бжⷭ҇твеннагѡ пребыва́нїѧ, и҆ непости́жныхъ наслажда́ѧсѧ ны́нѣ бл҃ги́хъ. а҆́гг҃лѡмъ собесѣ́дниче, дїонѵ́сїе бг҃омꙋ́дре, восхвалѧ́ющыѧ тѧ̀ спаса́й.
Бг҃оро́диченъ:
Бг҃а ро́ждши, всѧ́кїѧ тва́ри влⷣчце, ꙗ҆́кѡ вои́стиннꙋ є҆ди́на бцⷣе, превы́шши ꙗ҆ви́ласѧ є҆сѝ.
Конда́къ, гла́съ и҃.
Всѐ твоѐ ᲂу҆́мное жела́нїе къ бг҃ꙋ впери́въ, томꙋ̀ невозвра́тнѡ ѿ дꙋшѝ послѣ́довалъ є҆сѝ, въ пꙋсты́ню всели́всѧ, и҆ та́мѡ а҆́гг҃льски пожи́въ, мнѡ́гимъ пꙋ́ть бы́лъ є҆сѝ ко спасе́нїю: сегѡ̀ ра́ди и҆ хрⷭ҇то́съ тебѐ просла́ви, и҆ да́ромъ чꙋде́съ ѡ҆богатѝ. тѣ́мже всѝ вопїе́мъ тѝ: ра́дꙋйсѧ, дїонѵ́сїе преподо́бне, пꙋсты́нный жи́телю.
І҆́косъ:
Хра́мъ бг҃ꙋ, ꙗ҆́кѡ вои́стиннꙋ себѐ содѣ́лавъ, ѻ҆́ч҃е, и҆ вы́шнѧгѡ і҆ерꙋсали́ма ꙗ҆ви́всѧ граждани́нъ, бж҃е́ственными добродѣ́тельми твои́ми безпло́тныхъ че́сти сподо́билсѧ є҆сѝ. тѣ́мже и҆ мы̀ зрѧ́ще чꙋдеса̀, похвале́нїю достѡ́йнаѧ, ꙗ҆̀же ᲂу҆дивлѧ́ютъ на́съ, и҆ наꙋча́ютъ тебѣ̀ зва́ти такова̑ѧ: ра́дꙋйсѧ, бл҃гочести́вагѡ ѻ҆тца̀ ѻ҆́трасль, и҆ ма́тере бл҃гоговѣ́йныѧ вѣ́твь: ра́дꙋйсѧ, цѣломꙋ́дрїѧ сто́лпе, и҆́мже бѣсѡ́вскаѧ шата̑тїѧ и҆скорени́шасѧ: ра́дꙋйсѧ, свѣти́льниче многосвѣ́тлый: ра́дꙋйсѧ, ꙗ҆́кѡ ᲂу҆вѧди́лъ є҆сѝ плотска̑ѧ мꙋдрова̑нїѧ: ра́дꙋйсѧ, пꙋсты́ни до́брое прозѧбе́нїе: ра́дꙋйсѧ, пра́ведныхъ бж҃е́ственное наслажде́нїе: ра́дꙋйсѧ, ꙗ҆́кѡ презрѣ́лъ є҆сѝ текꙋ̑щаѧ и҆ тлѣ̑ннаѧ: ра́дꙋйсѧ, ꙗ҆́кѡ на нб҃сѣ́хъ со а҆́гг҃лы живе́ши: ра́дꙋйсѧ, ꙗ҆́кѡ мона́шествꙋющихъ и҆звѣ́стное пра́вило: ра́дꙋйсѧ лѣнѧ́щихсѧ къ бг҃ꙋ дерзнове́нїе: ра́дꙋйсѧ, и҆сто́чниче чꙋде́съ бг҃ото́чный: ра́дꙋйсѧ, чⷭ҇тны́й дх҃а сосꙋ́де, наста́вниче на́шегѡ спасе́нїѧ: ра́дꙋйсѧ, дїонѵ́сїе преподо́бне, пꙋсты́нный жи́телю.
Пѣ́снь з҃. І҆рмо́съ:
Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆ц҃є́въ бж҃е, бл҃гослове́нъ є҆сѝ.
Вре́мєннаѧ ѿложи́въ, вѣ́чными ᲂу҆краси́лсѧ є҆сѝ: со а҆́гг҃лы ликꙋ́еши, ꙗ҆́кѡ а҆́гг҃льское пожи́въ житїѐ, съ ни́миже пое́ши: бл҃гослове́нъ бг҃ъ ѻ҆тє́цъ на́шихъ.
Непреста́ннѡ мо́лимъ, дїонѵ́сїе бг҃омꙋ́дре, ѡ҆ ста́дѣ твое́мъ прилѣ́жнѡ моли́сѧ, тебѐ на моли́твꙋ призыва́ющихъ и҆ плоды̀ приносѧ́щихъ, и҆ любо́вїю пою́щихъ: бл҃гослове́нъ бг҃ъ ѻ҆тє́цъ на́шихъ.
Въ ѕла́цѣ вы́шнѧгѡ црⷭ҇твїѧ ста́до твоѐ, ѻ҆́ч҃е, воспита́лъ є҆сѝ, и҆ жезло́мъ ᲂу҆че́нїй ᲂу҆па́слъ є҆сѝ вѣ́рнѡ пою́щыѧ: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
И҆зба́ви на́съ, хрⷭ҇тѐ, ѿ стрⷭ҇те́й и҆ бѣ́дъ, и҆ ѡ҆бстоѧ́нїй, и҆ недꙋ́гѡвъ многоѻбра́зныхъ, моли́твами пречⷭ҇тыѧ твоеѧ̀ мт҃ре и҆ преподо́бнагѡ дїонѵ́сїа, взыва́ющихъ: бл҃гослове́нъ бг҃ъ ѻ҆тє́цъ на́шихъ.
Пѣ́снь и҃. І҆рмо́съ:
Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.
Сто́лпъ тѧ̀ ѡ҆дꙋшевле́нъ ꙗ҆́кѡ вои́стиннꙋ, и҆ ѻ҆́бразъ воздержа́нїѧ, ѻ҆́ч҃е, стѧжа́вше, всѝ твою̀, дїонѵ́сїе, па́мѧть почита́емъ.
Собо́ръ ра́дꙋетсѧ мона́шескїй, и҆ ликꙋ́етъ преподо́бныхъ со́нмъ, съ ни́миже пра́ведныхъ вѣне́цъ досто́йнѡ воспрїѧ́лъ є҆сѝ.
Оу҆кра́шенъ добродѣ́тельми, въ невѣ́стницѣ неизрече́нныѧ сла́вы возле́глъ є҆сѝ, пѣ́снь воспѣва́ѧ хрⷭ҇тꙋ̀ во вѣ́ки всѧ̑.
Бг҃оро́диченъ:
Поглоще́на болѣ́зньми, и҆ па́дша возста́ви, бг҃ома́ти, ꙗ҆́кѡ да тѧ̀ сла́влю во всѧ̑ вѣ́ки.
Пѣ́снь ѳ҃. І҆рмо́съ:
Чтⷭ҇ꙋю сла́внѡ почти́мъ, лю́дїе, бцⷣꙋ, ѻ҆́гнь бж҃ества̀ прїи́мшꙋю во чре́вѣ неѡпа́льнѡ, пѣ́сньми велича́емъ.
Недꙋ́гꙋющихъ въ паде́нїи вра́чь ѿ бг҃а показа́лсѧ є҆сѝ, и҆ ѡ҆чи́стникъ, бл҃же́нне, и҆ прогони́тель лꙋка́выхъ дꙋхѡ́въ, бг҃оно́се дїонѵ́сїе, тѣ́мъ тѧ̀ всѝ велича́емъ.
Ꙗ҆́кѡ тлѣ́нно жили́ще, зе́млю ѡ҆ста́вивъ, ѻ҆́ч҃е, всели́лсѧ є҆сѝ въ зе́млю кро́ткихъ, и҆ съ ни́ми ра́дꙋешисѧ, бж҃е́ственнагѡ наслажда́ѧсѧ, ѻ҆́ч҃е, сїѧ́нїѧ.
Неꙋкло́ненъ къ вѣ́рѣ предѣ́лъ, и҆ ѻ҆́бразъ воздержа́нїѧ и҆мꙋ́ще, по́двиги твоѧ̑ къ зижди́телю вои́стиннꙋ, пѣ́сньми тѧ̀ велича́емъ.
Бг҃оро́диченъ:
Въ тѧ̀ всели́всѧ, всенепоро́чнаѧ, пе́рвѣе родонача̑льныѧ ѕлоѻбра́знѡ запе́ншаго, человѣкоꙋбі́йцꙋ низложѝ роди́выйсѧ, и҆ всѣ́хъ на́съ спасѐ.
Свѣти́ленъ:
Пристра́стїѧ мїрска́гѡ ꙗ҆́кѡ ѿ скве́рны ᲂу҆клони́лсѧ є҆сѝ, разꙋ́мнагѡ сл҃нца свѣтоза́рнаѧ лꙋча̀ возсїѧ̀, свѣти́льникъ многосвѣ́тлый, пꙋсты́нное воспита́нїе, и҆ чистоты̀ ѻ҆би́телище, хрⷭ҇тѡ́вы добрѡ́ты ꙗ҆́снѡ зрѧ̀, є҆гѡ́же сїѧ́нїемъ ᲂу҆́мъ тво́й ѡ҆зари́лъ є҆сѝ, и҆ сла́вою ѡ҆богати́лсѧ є҆сѝ нб҃сною, дїонѵ́сїе сла́вне. Мо́лимъ тѧ̀, въ ми́рѣ сохранє́нымъ бы́ти па́мѧть твою̀ почита́ющымъ.
Два́жды.
Сла́ва, и҆ ны́нѣ, бг҃оро́диченъ:
Ꙗ҆́кѡ и҆мꙋ́щи милосе́рдїе и҆ ми́лость ве́лїю, при́зри, препѣ́таѧ бцⷣе дв҃о, на моѐ смире́нїе, и҆ страсте́й молвꙋ̀, и҆ собла́знъ житїѧ̀ разорѝ, ѻ҆трокови́це, и҆ ѻ҆гнѧ̀ гее́нскагѡ и҆зба́ви мѧ̀ моли́твами твои́ми.
На хвали́техъ стїхи̑ры на д҃, гла́съ в҃. Подо́бенъ: Є҆гда̀ ѿ дре́ва:
Дїонѵ́сїе, мона́хѡвъ ᲂу҆добре́нїе, прозѧбе́нїе кра́сное пꙋсты́ни, преподо́бныхъ похвало̀, вѣ́рныхъ ᲂу҆твержде́нїе, любо́вїю творѧ́щихъ твою̀ всечестнꙋ́ю па́мѧть, и҆ къ ра́цѣ моще́й твои́хъ пристꙋпа́ющихъ, и҆зба́ви ѡ҆бстоѧ́нїѧ всѧ́кагѡ и҆ ѻ҆́гненнагѡ ѡ҆сꙋжде́нїѧ.
Два́жды.
Трⷪ҇цѣ хра́мъ са́мъ себѐ содѣ́лалъ є҆сѝ, ѻ҆́ч҃е бг҃обл҃же́нне, въ пꙋсты̑ни непрохѡ́дныѧ заше́дъ, ꙗ҆́кѡ мѡѷсе́й въ сїна́йскꙋю го́рꙋ, всели́лсѧ є҆сѝ: и҆дѣ́же прїи́мъ бж҃е́ственный зако́нъ, мона́хѡвъ же мно́жество вои́стиннꙋ наꙋчи́лъ є҆сѝ и҆зрѧ́дномꙋ житїю̀: и҆ ны́нѣ прикаса́ющымсѧ къ ра́цѣ моще́й твои́хъ, подае́ши всѣ̑мъ и҆сцѣле́нїе.
И҆мѣ́ѧ дерзнове́нїе ко хрⷭ҇тꙋ̀ бг҃ꙋ, моли́сѧ ѡ҆ ста́дѣ твое́мъ, преподо́бне, сохрани́тисѧ ѿ и҆скꙋше́нїй вра́жїихъ, и҆ ꙗ҆зы́ческихъ нахожде́нїй, ѻ҆гнѧ̀ и҆ меча̀, и҆ всѧ́кагѡ прило́га, и҆ навѣ́та лꙋка́вагѡ: тебе́ бо гра́дъ и҆ покро́въ и҆мꙋ́ще, на тѧ̀ наде́ждꙋ съ бг҃омъ стѧжа́хомъ, бл҃же́нне.
Сла́ва, гла́съ и҃. Самогла́сенъ.
На нб҃о текꙋ́щꙋю возше́дъ колесни́цꙋ, чꙋ́дне, добродѣ́телей дости́глъ є҆сѝ кра́йнее, житїѧ̀ воздержа́нїемъ: и҆зъ пꙋсты́ни смотрѧ́ѧ вы́шнѧгѡ і҆ерⷭ҇ли́ма красѡты̀, и҆ болѣ́зненныхъ подвигѡ́въ досто́йнѡ по́чєсти воспрїи́мъ, съ нб҃сными ра́дꙋешисѧ чинонача̑лїи, преблаже́нне, вѣ́чныхъ бла̑гъ наслѣ́дникъ ꙗ҆ви́лсѧ є҆сѝ, нбⷭ҇нагѡ црⷭ҇твїѧ жи́тель бы́въ. Моли́сѧ, бг҃оно́се дїонѵ́сїе, сп҃сꙋ всѣ́хъ, ᲂу҆мири́ти мі́ръ и҆ спастѝ дꙋ́шы на́шѧ.
И҆ ны́нѣ: Влⷣчце, прїимѝ моли́твꙋ:
А҆́ще ли пѧтьдесѧ́тница, И҆ ны́нѣ, пра́здника. Славосло́вїе вели́кое. И҆ ѿпꙋ́стъ.
На лїтꙋргі́и: Блажє́нна, ѿ канѡ́на пѣ́снь г҃-ѧ и҆ ѕ҃-ѧ: Прокі́менъ: Честна̀ предъ гдⷭ҇емъ: Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ къ гала́тѡмъ, зача́ло сг҃і. А҆ллилꙋ́їа, гла́съ ѕ҃: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀. Є҆ѵⷢ҇лїе лꙋкѝ, зача́ло к҃д. Прича́стенъ: Въ па́мѧть вѣ́чнꙋю бꙋ́детъ пра́ведникъ: