Мѣ́сѧца тогѡ́же въ л҃-й де́нь. Собо́ръ ст҃ы́хъ сла́вныхъ и҆ всехва́льныхъ а҆пⷭ҇тѡлъ в҃і.
На Гдⷭ҇и, воззва́хъ, стїхи̑ры на ѕ҃: петра̀ и҆ па́ѵла, г҃, гла́съ в҃.
Самоподо́бенъ: Кі́ими похва́льными:
Кі́ими похва́льными вѣнцы̑, ᲂу҆вѧзе́мъ петра̀ и҆ па́ѵла, раздѣлє́нныѧ тѣлесы̀, и҆ совокꙋ́плєнныѧ дх҃омъ, бг҃опроповѣ́дникѡвъ первостоѧ́тели; ѻ҆́ваго ᲂу҆́бѡ ꙗ҆́кѡ а҆пⷭ҇лѡвъ преднача́льника, ѻ҆́ваго же ꙗ҆́кѡ па́че и҆нѣ́хъ трꙋди́вшасѧ: си́хъ бо вои́стиннꙋ досто́йнѡ безсме́ртныѧ сла́вы вѣнцы̀ вѣнча́етъ хрⷭ҇то́съ бг҃ъ на́шъ, и҆мѣ́ѧй ве́лїю ми́лость.
Кі́ими пѣ́сненными добро́тами воспои́мъ петра̀ и҆ па́ѵла; бг҃оразꙋ́мїѧ крилѣ̑, прелетѣ́вшыѧ концы̀, и҆ къ небесѝ возне́сшыѧсѧ, рꙋ́цѣ є҆ѵⷢ҇лїа благода́ти, но́зѣ и҆́стиннагѡ проповѣ́данїѧ, рѣ́ки премꙋ́дрости, крⷭ҇тныѧ ро́ги, и҆́миже де́мѡнѡвъ бро́вь хрⷭ҇то́съ низложѝ, и҆мѣ́ѧй ве́лїю ми́лость.
Кі́ими дꙋхо́вными пѣ́сньми похва́лимъ петра̀ и҆ па́ѵла; безбо́жїѧ закла́вшыѧ незатыка́ємаѧ ᲂу҆ста̀, стра̑шныѧ дх҃а мечѝ, ри́ма свѣ̑тлаѧ ᲂу҆добрє́нїѧ, всеѧ̀ вселе́нныѧ пита́тели, но́вагѡ завѣ́та бг҃опи̑санныѧ скрижа̑ли мы́слєнныѧ, ꙗ҆̀же въ сїѡ́нѣ хрⷭ҇то́съ возгласѝ, и҆мѣ́ѧй ве́лїю ми́лость.
И҆́ны стїхи̑ры двана́десѧтихъ а҆пⷭ҇лъ, гла́съ д҃.
Подо́бенъ: Ꙗ҆́кѡ до́блѧ:
Ꙗ҆́кѡ самови́дцы ꙳ и҆ свидѣ́телїе сло́ва воплоще́нїѧ, ꙳ ᲂу҆ч҃ницы̀ пребога́тїи ᲂу҆блажа́етесѧ: и҆ ꙗ҆́кѡ мо́лнїѧ бо сїѧ́ющїи ꙳ мі́рꙋ ꙗ҆ви́стесѧ, ꙳ и҆ ꙗ҆́кѡ го́ры мы́слєнныѧ сла́дость и҆ска́паете: ꙳ ꙗ҆́кѡ приснотекꙋ́щыѧ рѣ́ки ра́йскїѧ раздѣли́вшесѧ, ꙳ ꙗ҆зы́чєскїѧ цр҃кви ꙳ бжⷭ҇твенными напаѧ́ете вода́ми.
Ꙗ҆́кѡ лꙋчѝ блиста́ющїи ꙳ зарѧ́ми дꙋхо́вными, ꙳ въ мі́ръ ве́сь по́слани бы́сте, ꙳ чꙋде́съ дѣ́йство незави́стнѡ подаю́ще, ꙳ слꙋжи́телїе хрⷭ҇то́выхъ та̑инъ бы́вше, ꙳ и҆ бг҃опи̑санныѧ скрижа̑ли ꙳ бж҃їѧ бл҃года́ти напи̑санныѧ, ꙳ бг҃онаꙋче́ннагѡ зако́на, ꙳ сщ҃еннотаи́нницы пребога́тїи.
Ры́барскаѧ тро́сть, ꙳ любомꙋ́дрыхъ шата́нїе, ꙳ и҆ виті̑йскїѧ стрꙋи̑ пречерта̀, ꙳ бг҃омꙋ̑драѧ ᲂу҆чє́нїѧ, ꙳ и҆з̾ѡбраже́нїй догма́ты, ꙳ и҆ та̑инъ благи́хъ ꙗ҆́снѡ и҆зложи́вше є҆ѵⷢ҇лїе, ꙳ и҆ пи́щи присносꙋ́щныѧ прича́стїе, ꙳ и҆ а҆́гг҃льское наслажде́нїе, и҆ пребыва́ющꙋю сла́вꙋ.
Сла́ва, гла́съ ѕ҃:
Всечестны́й а҆пⷭ҇лѡвъ приспѣ̀ пра́здникъ цр҃кви хрⷭ҇то́вѣ, хода́тайствꙋющїй спасе́нїе всѣ̑мъ на́мъ. та́йнѡ ᲂу҆́бѡ восплеска́вше, къ си̑мъ рце́мъ: ра́дꙋйтесѧ, свѣти̑льницы сꙋ́щымъ во тмѣ̀, мы́сленнагѡ сл҃нца зари̑ ѡ҆блиста́ющїи: ра́дꙋйтесѧ, пе́тре и҆ па́ѵле, ᲂу҆че́нїй бжⷭ҇твенныхъ ѡ҆снова̑нїѧ незы́блєма, дрꙋ́зи хрⷭ҇тѡ́вы, сосꙋ́ди честні́и, прїиди́те посредѝ на́съ неви́димѡ, сподоблѧ́юще дарѡ́въ невеще́ственныхъ, ва́шъ пра́здникъ восхвалѧ́ющихъ пѣ́сньми.
И҆ ны́нѣ, бг҃оро́диченъ: Кто̀ тебѐ не ᲂу҆блажи́тъ:
На стїхо́внѣ стїхи̑ры, гла́съ д҃. Подо́бенъ: Да́лъ є҆сѝ зна́менїе:
Да́лъ є҆сѝ хвале́нїе ꙳ цр҃кви твое́й, гдⷭ҇и, ꙳ чєстны́ѧ а҆пⷭ҇лы твоѧ̑, ꙳ въ не́йже просїѧва́ютъ мы́сленнїи свѣти́льницы, ꙳ пе́тръ же и҆ па́ѵелъ, ꙗ҆́коже ѕвѣ́зды словє́сныѧ, ꙳ вселе́ннꙋю ѡ҆зарѧ́юще: ꙳ и҆́миже просвѣти́лъ є҆сѝ за́падный мра́къ, і҆и҃се всеси́льне, ꙳ сп҃се дꙋ́шъ на́шихъ.
Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.
Да́лъ є҆сѝ ᲂу҆твержде́нїе ꙳ цр҃кви твое́й, гдⷭ҇и, ꙳ петро́вꙋ тве́рдость, ꙳ и҆ па́ѵловъ ра́зꙋмъ, ꙳ и҆ свѣ́тлꙋю мꙋ́дрость, и҆ ѻ҆бои́хъ бг҃огла́сїе и҆́стинное, ꙳ є҆́ллинскꙋю пре́лесть ѿгонѧ́щее. ꙳ тѣ́мже тайноводи́ми ѿ ѻ҆бои́хъ, ꙳ пое́мъ тѧ̀, і҆и҃се всеси́льне, ꙳ сп҃се дꙋ́шъ на́шихъ.
Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.
Да́лъ є҆сѝ ѻ҆́бразъ ѡ҆браще́нїѧ согрѣша́ющымъ, ꙳ ѻ҆́ба а҆пⷭ҇лы твоѧ̑, ꙳ ѻ҆́ваго ᲂу҆́бѡ ѿве́ргшагосѧ тебє̀ во вре́мѧ стрⷭ҇ти, ꙳ и҆ пока́ѧвшасѧ, ꙳ ѻ҆́ваго же про́повѣди твое́й ꙳ сопротивлѧ́ющасѧ, и҆ вѣ́ровавша: ꙳ и҆ ѻ҆бою̀ собѡ́рꙋ первостоѧ́тельствꙋющихъ дрꙋгѡ́въ твои́хъ, ꙳ і҆и҃се всеси́льне, ꙳ сп҃се дꙋ́шъ на́шихъ.
Сла́ва, гла́съ ѕ҃:
Пра́здникъ ра́достенъ возсїѧ̀ концє́мъ дне́сь, всечестна́ѧ па́мѧть премꙋ́дрыхъ а҆пⷭ҇лъ и҆ верхо́вныхъ петра̀ и҆ па́ѵла: тѣ́мже и҆ ри́мъ сра́дꙋетсѧ ликовствꙋ́ѧ, въ пѣ́снехъ и҆ пѣ́нїихъ. пра́зднꙋемъ и҆ мы̀, бра́тїе, всечестны́й се́й де́нь соверши́вше: ра́дꙋйсѧ, пе́тре а҆пⷭ҇ле, и҆́скреннїй дрꙋ́же твоегѡ̀ ᲂу҆ч҃телѧ, хрⷭ҇та̀ бг҃а на́шегѡ: ра́дꙋйсѧ, па́ѵле вселюбе́знѣйшїй, и҆ проповѣ́дниче вѣ́ры, и҆ ᲂу҆чи́телю вселе́нныѧ: ꙗ҆́кѡ и҆мѣ́ѧ дерзнове́нїе, сꙋпрꙋ́же свѧтоизбра́нный, хрⷭ҇та̀ бг҃а на́шего моли́те, спасти́сѧ дꙋша́мъ на́шымъ.
И҆ ны́нѣ, бг҃оро́диченъ: Бцⷣе, ты̀ є҆сѝ лоза̀ и҆́стиннаѧ:
Тропа́рь, гла́съ д҃:
А҆пⷭ҇лѡвъ первопресто́льницы, и҆ вселе́нныѧ ᲂу҆чи́телїе, влⷣкꙋ всѣ́хъ моли́те, ми́ръ вселе́ннѣй дарова́ти, и҆ дꙋша́мъ на́шымъ ве́лїю ми́лость.
На ᲂу҆́трени
По а҃-й каѳі́смѣ сѣда́ленъ, гла́съ а҃. Подо́бенъ: Гро́бъ тво́й, сп҃се:
Ли́къ дꙋхо́вный а҆пⷭ҇льскїй мі́рꙋ посла́сѧ та́йнѡ ѿ бг҃а вы́шнѧгѡ, и҆ нево́лею стра́ждꙋщымъ вра́чеве ꙗ҆ви́шасѧ: трїѷпоста́снагѡ є҆ди́нственнѣ призыва́юще, бжⷭ҇твенное воплоще́нїе є҆мманꙋ́ила гдⷭ҇а мꙋ́дрѣ написа́ша.
Два́жды.
Сла́ва, и҆ ны́нѣ, бг҃оро́диченъ:
Кꙋпинꙋ̀, ю҆́же мѡѷсе́й неѡпали́мꙋ ви́дѣ, го́рꙋ бж҃їю, ст҃ы́й ѻ҆́блакъ, сѣ́нь нескве́рнꙋю, бг҃опрїѧ́тнꙋю трапе́зꙋ, пала́тꙋ высо́кагѡ цр҃ѧ̀, всесвѣ́тлꙋю и҆ непроходи́мꙋю две́рь, дв҃о, пое́мъ тѧ̀.
По в҃-й каѳі́смѣ сѣда́ленъ, гла́съ г҃. Подо́бенъ: Бжⷭ҇твенныѧ вѣ́ры:
Бжⷭ҇твєнныѧ трꙋбы̑ ᲂу҆тѣ́шителѧ, возглаша́юще дыха́нїе слове́съ спасе́нїѧ, мі́рꙋ возгласи́те, и҆ и҆̀же во мра́цѣ пре́лести спѧ́щыѧ, къ свѣ́тꙋ бг҃оразꙋ́мїѧ возста́вивше приведи́те, бжⷭ҇твеннагѡ свѣ́та а҆пⷭ҇ли, молѧ́ще хрⷭ҇та̀ бг҃а, спасти́сѧ дꙋша́мъ на́шымъ.
Два́жды.
Сла́ва, и҆ ны́нѣ, бг҃оро́диченъ:
Бжⷭ҇твеннагѡ є҆стества̀ не ѿлꙋ́чсѧ, пло́ть бы́въ во чре́вѣ твое́мъ: но бг҃ъ вочл҃вѣ́чсѧ и҆ пребы́сть, и҆́же по ржⷭ҇твѣ̀ мт҃рь тѧ̀ дв҃ꙋ, ꙗ҆́кѡ пре́жде ржⷭ҇тва̀ сохрани́въ всенепоро́чнꙋ, є҆ди́нъ гдⷭ҇ь: того̀ прилѣ́жнѡ молѝ, дарова́ти на́мъ ве́лїю ми́лость.
Канѡ́нъ петра̀ и҆ па́ѵла, со і҆рмосо́мъ на и҃ є҆гѡ́же краегране́сїе:
Петра̀ почита́ю, па́ѵла пою̀ разꙋ́мнѡ.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ чꙋдеса̀.
Пода́ждь мѝ, гдⷭ҇и, прест҃а́гѡ твоегѡ̀ дх҃а, ка̑пли дарова́нїй, сло́во наро́чито, и҆ возвеселю́сѧ вѣ́рнѡ похвалѧ́ѧ пе́рвыхъ а҆пⷭ҇лъ твои́хъ и҆справлє́нїѧ.
Ѡ҆ста́вилъ є҆сѝ, прехва́льне пе́тре, ᲂу҆се́рднѡ вре́мєннаѧ, и҆ хрⷭ҇тѡ́вымъ стопа́мъ послѣ́довалъ є҆сѝ: невѣ́рство же ѡ҆ста́вивъ, па́ѵле, и҆ призва́вшемꙋ тѧ̀ послѣ́довалъ є҆сѝ.
Благода́ть а҆пⷭ҇ли сꙋще́ственнѣ наше́дшꙋю ва́мъ прїе́мше бжⷭ҇твеннагѡ дх҃а, проидо́сте зе́млю всю̀, пе́тре и҆ па́ѵле, ᲂу҆ча́ще концы̀.
Бг҃оро́диченъ:
Виті́йстїи многовѣща́ннїи, и҆ мꙋсїкі́йстїи велегла́снїи ѧ҆зы́цы тѧ̀ не мо́гꙋтъ чти́ти и҆лѝ пѣ́ти, чⷭ҇таѧ: па́че бо человѣ́ка содѣ́ѧшасѧ въ тебѣ̀ є҆ди́нѣй бжⷭ҇твєннаѧ та̑инства.
И҆́нъ канѡ́нъ в҃і а҆пⷭ҇лѡвъ, на ѕ҃, є҆гѡ́же краегране́сїе:
Хрⷭ҇то́вы почита́ю мꙋ̑дрыѧ а҆пⷭ҇лы. Ѳеофа́ново.
Гла́съ то́йже. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.
Ли́къ а҆пⷭ҇льскїй пѣ́ти мѝ жела́ющꙋ, хрⷭ҇тѐ, моли́твами и҆́хъ ꙗ҆́кѡ бг҃ъ зарю̀ прест҃а́гѡ дх҃а да́рꙋй мѝ, и҆ свѣ́тъ премꙋ́дрости твоеѧ̀.
Оу҆крѣ́пльшесѧ си́лою твое́ю и҆ бл҃года́тїю, хрⷭ҇тѐ, си́лꙋ проти́вныхъ вра̑гъ разрꙋши́ша, честні́и твоѝ а҆пⷭ҇ли, бг҃ови́дцы бы́вше неѡскꙋ́днымъ къ тебѣ̀ манове́нїемъ.
И҆сцѣлє́нїѧ творѧ́ще, влⷣко, твои́мъ и҆́менемъ, ꙗ҆зы́чєскаѧ совокꙋплє́нїѧ твои́мъ позна́нїемъ ᲂу҆лови́ша, сла́внїи а҆пⷭ҇ли, и҆ свѣ́томъ твои́мъ просвѣти́ша.
Премꙋ́дрости нбⷭ҇ныѧ наꙋчи́вшесѧ, пресла́внїи хрⷭ҇тѡ́вы а҆пⷭ҇ли, ꙗ҆́вственнѡ премꙋ́дрїи ѡ҆бꙋи́сте многослѡ́вїѧ нечести́выхъ, поспѣше́нїемъ проповѣ́данїѧ.
Бг҃оро́диченъ:
Ѿ трⷪ҇цы пребжⷭ҇твенныѧ є҆ди́наго, пречⷭ҇таѧ, родила̀ є҆сѝ, и҆зъ тебє̀ пло́тїю ꙗ҆́вльшагосѧ по на́мъ, благоволе́нїемъ ро́ждшагѡ и҆̀, и҆ дѣ́йствомъ дх҃а прест҃а́гѡ, дв҃о мт҃и.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ сла́вы сподо́би.
Сро́дникъ, пе́тре, тебѣ̀ а҆ндре́й проѧвлѧ́етъ мессі́ю хрⷭ҇та̀, къ немꙋ́же вѣ́рою пристꙋпи́лъ є҆сѝ: и҆ ты̀, па́ѵле чꙋ́дный, бг҃одѣ́тельнымъ креще́нїемъ ѿ а҆на́нїи просвѣти́лсѧ є҆сѝ.
Ле́стнѡ и҆́же писа́нїемъ зако́на, па́дающїй ро́дъ і҆и҃левъ, просвѣще́нїемъ бл҃года́ти пе́тръ приве́дъ: ꙗ҆зы̑къ же стада̀ па́ѵелъ ѿ пре́лести и҆зба́ви.
На̑ги и҆ прѡ́сты во ꙗ҆зы́ки посла́лъ є҆сѝ твоѧ̑ ᲂу҆ч҃никѝ, вмѣ́стѡ ѻ҆рꙋ́жїѧ твоѐ и҆́мѧ носѧ́ще ст҃о́е, и҆ ле́стнꙋю бра́нь хрⷭ҇тѐ, вѣ́рою разрꙋши́ша.
Бг҃оро́диченъ:
И҆спо́лнисѧ, а҆пⷭ҇ли, позна́ти гдⷭ҇а всѧ̀ землѧ̀ ѿ дв҃ы возсїѧ́вшаго, и҆ мі́ръ ѡ҆бно́вльша бжⷭ҇твеннымъ ва́шимъ проповѣ́данїемъ, пе́тре и҆ па́ѵле прехва́льнїи.
И҆́нъ. І҆рмо́съ:
Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе.
Нбⷭ҇наѧ и҆ честна́ѧ бг҃овѣща́юще на землѝ ᲂу҆чє́нїѧ, ѧ҆зы̑ки ѻ҆́гненными и҆звѣствꙋ́юще: проповѣ́дницы хрⷭ҇тѡ́вы пре́дали є҆стѐ.
Показа́лъ є҆сѝ нб҃са̀ словє́снаѧ, ᲂу҆ч҃никѝ твоѧ̑, влⷣко, сла́вꙋ твою̀ повѣ́дающыѧ всѣ̑мъ концє́мъ.
Напи́сани бы́вше на нб҃сѣ́хъ, и҆ ꙗ҆́вльшесѧ хрⷭ҇тꙋ̀ ссє́льницы, чтꙋ́щихъ ва́съ любо́вїю ны́нѣ, премꙋ́дрїи, сохрани́те.
Бг҃оро́диченъ:
Всели́выйсѧ въ на́съ, и҆́же въ вы́шнихъ живы́й, пречⷭ҇таѧ, пло́ть бо прїи́мъ ѿ тебє̀ безъ сѣ́мене, ꙗ҆ви́сѧ.
Сѣда́ленъ, гла́съ д҃: Подо́бенъ: Вознесы́йсѧ:
Всели́вшесѧ во свѣ́тѣ непристꙋ́пнѣмъ, ꙗ҆́кѡ жили́ще свѣ́та сꙋ́щїи, хра́мъ ва́шъ ст҃ы́й просвѣща́ете при́снѡ бжⷭ҇твенными проповѣ̑данїи. тѣ́мже вѣ́рою вопїе́мъ: тмы̀ на́съ и҆збавлѧ́йте, и҆ всѧ́ческихъ бѣ́дъ, и҆ лю́тагѡ ꙗ҆зы́ческагѡ наше́ствїѧ, ᲂу҆молѧ́юще зижди́телѧ, а҆пⷭ҇ли.
Сла́ва, гла́съ и҃. Подо́бенъ: Премꙋ́дрости:
Вели̑кїѧ свѣти́льники и҆ свѣ̑тлыѧ, верхо́вники ꙗ҆́вльшыѧсѧ ᲂу҆ч҃никѡ́въ, петра̀ восхва́лимъ, и҆ премꙋ́драго па́ѵла: и҆́бо ѻ҆гне́мъ бжⷭ҇твеннагѡ возсїѧ́вше дх҃а, мглꙋ̀ пре́лести попали́ша всю̀. тѣ́мже и҆ вы́шнѧгѡ црⷭ҇твїѧ гра́ждане досто́йнѡ ꙗ҆ви́шасѧ, и҆ бл҃года́ти сопресто́льни. сегѡ̀ ра́ди вопїе́мъ и҆̀мъ: моли́те хрⷭ҇та̀ бг҃а, согрѣше́нїй ѡ҆ставле́нїе дарова́ти, пра́зднꙋющымъ любо́вїю свѧтꙋ́ю па́мѧть ва́шꙋ.
И҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Пѣ́снь д҃. І҆рмо́съ:
Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ, тебє̀ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и.
Съ крѣ́пкими ᲂу҆́бѡ немощні́и, съ виті́ѧми же невѣ́жди, спле́тшесѧ благоче́стнѡ, пе́тре и҆ па́ѵле, взе́мше побѣ́дꙋ хрⷭ҇то́вы а҆пⷭ҇толи.
Ѿстꙋ́пника сі́мѡна волхва̀ лю́таго, ꙗ҆́кѡ златолю́бца ѡ҆бличѝ бжⷭ҇твенный пе́тръ, и҆ ны́нѣ па́ѵелъ мꙋ́дрый, стєзѝ развраща́ющаго хрⷭ҇тѡ́вы є҆лѵ́ма ѡ҆слѣпи́лъ є҆́сть.
Невѣ́жественно ры́барь и҆ ᲂу҆сма́рь сло́во и҆мꙋ́ще, но растворе́нно бжⷭ҇твеннꙋю со́лїю дꙋ́шы любомꙋ́дрыхъ ᲂу҆слади́ша, и҆ хрⷭ҇тꙋ̀ вѣ́рою приведо́ша.
Бг҃оро́диченъ:
Рѣ́чїю бг҃одохнове́нною пре́жде а҆ввакꙋ́мъ го́рꙋ тѧ̀ чи́стꙋ и҆ присѣ́ннꙋ бжⷭ҇твенный речѐ, преходѧ́щаго ѿ ю҆́га, и҆ тобо́ю воплоща́ема, влⷣчце, возвѣща́ѧ ꙗ҆вле́ннѡ.
И҆́нъ. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Глаго́лѡвъ бжⷭ҇твенныхъ а҆пⷭ҇лъ вѣща́нїе ѻ҆гнеѻбра́знѡ про́йде вселе́ннꙋю всю̀, ле́сти ᲂу҆́бѡ ве́щь попалѧ́ющее, и҆ просвѣща́ющее бл҃года́тїю благочести́выхъ совокꙋплє́нїѧ.
Почернѣ́вшїй мра́комъ безбо́жїѧ мі́ръ, бг҃озра̑чнаѧ свѣти̑ла, просвѣти́ша зарѧ́ми бл҃года́ти, ᲂу҆ч҃ницы̀ гдⷭ҇ни ꙗ҆́вльшесѧ сїѧ́нїемъ проповѣ́данїѧ.
Свѧще́нными зарѧ́ми просвѣще́ни мы́сленнагѡ сл҃нца, ꙗ҆́кѡ со́лнце въ мі́рѣ сїѧ́ете, прехва́льнїи, свѣ́томъ бж҃е́ственнымъ пре́лести мглꙋ̀ ѿгонѧ́юще.
Же́злъ си́лы и҆мꙋ́ще крⷭ҇тъ тво́й, сла́ное житїѧ̀ самови́дцы твоѝ, сло́ве, мо́ре пресѣко́ша, ꙗ҆́кѡ ко́ни смꙋща́юще многобо́жїѧ во́ды.
Бг҃оро́диченъ:
Оу҆кра́шена разли́чнымъ свѣтоли́тїемъ, нб҃о ѡ҆дꙋшевле́нное, тебѐ царѧ̀ ца́рствꙋющихъ, хрⷭ҇тѐ, дв҃и́ца пречⷭ҇таѧ, ны́нѣ ꙗ҆́кѡ бцⷣа сла́вима є҆́сть.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Ꙗ҆́кѡ сꙋ́ща тве́рда, хрⷭ҇то́съ тѧ̀ ка́мень наречѐ, пе́тре, и҆ на тебѣ̀ цр҃ковь, є҆ѧ́же а҆́дѡва врата̀ не ѡ҆долѣ́ютъ: тебе́ же, па́ѵле, сосꙋ́дъ и҆збра́нъ речѐ, сегѡ̀ пронестѝ предъ ꙗ҆зы́ки и҆́мѧ.
Пе́тръ ѿве́ргсѧ ᲂу҆ч҃телѧ три́жды, три́жды є҆́же люби́ти приглаше́нїемъ присво́исѧ: па́ѵелъ, и҆́же пе́рвѣе хꙋ́льникъ сы́й, тѧ́жкѡ же ѡ҆скорблѧ́ѧ вѣ̑рныѧ, по́слѣжде проповѣ́даше, є҆го́же гонѧ́ше пе́рвѣе.
Нетлѣ́нно зва́нїе, и҆ сла́вꙋ присносꙋ́щнꙋ пе́тръ ѿ хрⷭ҇та̀ ѡ҆брѣ́те съ па́ѵломъ. ѻ҆́въ ᲂу҆́бѡ ключѝ нбⷭ҇ныѧ прїѧ́тъ, се́й же въ ра́й восхи́щсѧ, глаго́лы неизречє́нныѧ навы́къ па́че человѣ́ка.
Бг҃оро́диченъ:
Ѿ бжⷭ҇твеннагѡ дх҃а и҆са́їа и҆спо́лнь, ржⷭ҇тво̀ безъ ѻ҆тца̀ проречѐ, и҆зъ тебє̀, дв҃о, ро́ждшагѡсѧ є҆мманꙋ́ила, и҆́же є҆́сть съ на́ми бг҃ъ, є҆го́же, чⷭ҇таѧ, родила̀ є҆сѝ. тѣ́мже всѝ пое́мъ тѧ̀.
И҆́нъ. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Бжⷭ҇твєнныѧ твоѧ̑ и҆ премꙋ̑дрыѧ слꙋжи́тели свѣ́тъ показа́лъ є҆сѝ въ мі́рѣ, тебѐ незаходи́маго свѣ́та всѣ̑мъ возвѣща́ющыѧ.
И҆̀же всѧ́кꙋ добродѣ́тель ꙗ҆́вственнѡ проше́дше, а҆пⷭ҇ли, разли̑чныѧ бѣсо́вскїѧ ѕло́бы сплетє́нїѧ разрꙋши́сте.
Ꙗ҆ви́ша на́мъ трⷪ҇ческое сїѧ́нїе, во є҆ди́нствѣ бж҃ества̀, ѻ҆́гненными ѧ҆зы́ки вѣща́юще, а҆пⷭ҇ли.
Бг҃оро́диченъ:
Тѧ̀ ѻ҆рꙋ́жїе непобѣди́мое на врагѝ предлага́емъ, тѧ̀ ᲂу҆твержде́нїе, и҆ наде́ждꙋ на́шегѡ спасе́нїѧ, бг҃оневѣ́сто, стѧжа́хомъ.
Пѣ́снь ѕ҃. І҆рмо́съ:
Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Свѣтла̑ петрѡ́ва чꙋдеса̀, чє́стна же и҆ па̑ѵлова зна́мєнїѧ: и҆́бо ри̑зы и҆ сѣ̑ни и҆́хъ недꙋ́ги болѧ́щихъ и҆сцѣлѣва́ютъ прилага́емїи.
Пе́тръ вои́стиннꙋ сла́вный, и҆ па́ѵелъ пои́стиннѣ чꙋ́дный, дво́ица бжⷭ҇твеннаѧ, и҆ честнѣ̑йша жили̑ща живонача́льныѧ трⷪ҇цы, всѣ́ми помина́етсѧ.
Болѧ́щихъ дꙋ́шы и҆ тѣлеса̀, ꙗ҆́кѡ бжⷭ҇твенный вра́чь и҆зрѧ́денъ пе́тръ и҆сцѣлѝ, па́ѵелъ ꙗ҆зы́ки ѡ҆зарѝ, и҆ свѣ́томъ гдⷭ҇нимъ назна́мена.
Бг҃оро́диченъ:
Пѣ́ти тѧ̀ до́лжни є҆смы̀, но вои́стиннꙋ по достоѧ́нїю не мо́жемъ. тѣ́мже пое́мъ тѧ̀ молча́нїемъ, чтꙋ́ще несказа́нное, є҆́же на тебѣ̀, дв҃о, содѣ́ѧнное та́инство.
И҆́нъ. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Оу҆тверди́въ ᲂу҆ченикѝ твоѧ̑, сп҃се, премꙋ́дростїю и҆ чꙋдесы̀, си́льнѣйшыѧ содѣ́лалъ є҆сѝ є҆́ллинскагѡ бꙋесло́вїѧ: и҆ си́хъ прелє́стнаѧ разрꙋши́ша велѣ̑нїѧ.
Бжⷭ҇твенныѧ рѣ́ки премꙋ́дрости, напо́лниша спаси́тельныхъ во́дъ ᲂу҆дѡ́лїа всѧ̑ цр҃кѡ́внаѧ, ѿ и҆стѡ́чникъ спаси́тельныхъ стрꙋѧ́ми ѡ҆бога́щше.
Ꙗ҆́вльшесѧ живѡ́тныѧ ѕвѣ́зды, прехва́льнїи, разори́сте всю̀ мра́чнꙋю пре́лесть свѣтоза́рными сїѧ̑нїи, и҆ бг҃оразꙋ́мїѧ свѣ́тъ возсїѧ́вше.
Бг҃оро́диченъ:
Всю́ тѧ голꙋби́цꙋ соверше́ннꙋ и҆ предобрꙋ̀, свѣ́тлый ѡ҆брѣ́тъ крі́нъ, и҆ ᲂу҆до́льный цвѣ́тъ, ѽ бг҃ома́ти! жени́хъ мы́сленный въ тѧ̀ всели́сѧ.
Конда́къ, гла́съ в҃. Подо́бенъ: Вы́шнихъ и҆щѧ̀:
Ка́мень хрⷭ҇то́съ, ка́менѧ вѣ́ры прославлѧ́етъ свѣ́тлѡ, ᲂу҆ченикѡ́въ преизрѧ́дна, и҆ съ па́ѵломъ ве́сь дванадесѧточи́сленный собо́ръ дне́сь: и҆́хже па́мѧть соверша́юще вѣ́рнѡ, си́хъ просла́вльшаго прославлѧ́емъ.
І҆́косъ:
Всечестнꙋ́ю и҆ преблаже́ннꙋю па́мѧть ва́шꙋ творѧ́щїи ны́нѣ, въ пѣ́снехъ прилѣ́жнѡ вопїе́мъ къ ва́мъ: пресвѣ̑тлаѧ и҆ бг҃озра̑чнаѧ свѣти̑ла мі́ра, возлю́бленнїи ᲂу҆ченицы̀ хрⷭ҇тѡ́вы двана́десѧте, ꙗ҆́кѡ и҆мꙋ́ще къ немꙋ̀ дерзнове́нїе моли́тисѧ за ны̀: ва́мъ бо дана̀ є҆́сть бл҃года́ть и҆сцѣле́нїй, и҆ грѣхѡ́въ проще́нїѧ: прилѣ́жнѡ ᲂу҆́бѡ є҆го̀ моли́те, грѣхѡ́въ и҆ напа́стей и҆зба́витисѧ на́мъ, да є҆ди́наго чл҃вѣколю́бца, ва́съ просла́вльшаго прославлѧ́емъ.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, бл҃гослове́нъ є҆сѝ.
Оу҆блажи́сѧ пе́тръ ѿ хрⷭ҇та̀, ꙗ҆́кѡ семꙋ̀ ре́кшꙋ сн҃а бг҃а жива́гѡ, и҆ па́ѵелъ почте́сѧ, ꙗ҆́кѡ сосꙋ́дъ благопотре́бенъ, и҆ взыва́хꙋ: ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.
Законослꙋже́бники ᲂу҆́бѡ пе́тръ ᲂу҆мꙋдрѧ́ше, ꙗ҆́коже завѣща́сѧ є҆мꙋ̀: па́ѵелъ же ꙗ҆зы́чники, ѻ҆́ба же бл҃года́тїю хрⷭ҇тꙋ̀ привожда́хꙋ, и҆ взыва́хꙋ: ѻ҆тє́цъ на́шихъ бж҃е, бл҃гослове́нъ є҆сѝ.
Ꙗ҆́кѡ преизрѧ́денъ пе́тръ хрⷭ҇то́въ па́стырь, ста́до прїѧ́тъ, цр҃кви же па́ѵелъ ᲂу҆чи́тель бжⷭ҇твенъ бы́сть, взыва́юще: ѻ҆тє́цъ на́шихъ бж҃е, бл҃гослове́нъ є҆сѝ.
Бг҃оро́диченъ:
Всенепоро́чнаѧ марі́е, и҆ и҆зрѧ́днаѧ свѧ́тостїю, ꙗ҆́же бг҃а пло́тїю, дв҃о, ро́ждши, неискꙋсобра́чнаѧ чⷭ҇таѧ, того̀ молѝ ѿ всѧ́кагѡ на́съ и҆зба́вити наведе́нїѧ и҆ грѣха̀.
И҆́нъ. І҆рмо́съ:
Въ пе́щи а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Сы́ны сотвори́въ ᲂу҆ч҃никѝ твоѧ̑, и҆́же пре́жде є҆стество́мъ бг҃ъ, любо́вїю наслѣ́дники показа́лъ є҆сѝ, ѻ҆те́ческагѡ наслѣ́дїѧ пребл҃гі́й, и҆ ходи́ти съ тобо́ю ꙗ҆́кѡ съ бг҃омъ и҆ влⷣкою и҆зво́лилъ є҆сѝ.
Премꙋ́дрости и҆зли́тїе, серде́чнꙋю широтꙋ̀, ѧ҆зы́къ доброглаго́ливъ, сло́ве, пода́въ, бжⷭ҇твєннымъ ᲂу҆ч҃никѡ́мъ твои̑мъ, посла́лъ є҆сѝ проповѣ́дати є҆ѵⷢ҇лїе црⷭ҇твїѧ всѣ̑мъ концє́мъ.
Ꙗ҆́вльшесѧ ꙗ҆́кѡ ѻ҆́блацы бж҃їѧ свѣ́та а҆пⷭ҇ли, всѣ̑мъ ѡ҆дождева́ютъ во́дꙋ животворѧ́щꙋю, зовꙋ́ще: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Бг҃оро́диченъ:
Преꙋкраше́нна бж҃їею сла́вою ꙗ҆ви́ласѧ є҆сѝ, пречⷭ҇таѧ, є҆ди́на ѿ вѣ́ка сло́во бж҃їе заче́ншаѧ, мт҃и дв҃о. бл҃гослове́нна ты̀ въ жена́хъ, всенепоро́чнаѧ влⷣчце.
Пѣ́снь и҃. І҆рмо́съ:
Ѻ҆́троки бл҃гочести̑выѧ въ пе́щи ржⷭ҇тво̀ бг҃оро́дичо спасло̀ є҆́сть тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.
Си́лою ᲂу҆крѣ́пльсѧ пе́тръ бжⷭ҇твенною, ᲂу҆ме́ршꙋю таві́ѳꙋ воскресѝ: па́ѵелъ же є҆ѵтѵ́ха съ высоты̀ па́дша, и҆ ᲂу҆мерщвле́нна возста́ви, ѻ҆́ба взыва́ющѧ: гдⷭ҇а воспѣва́йте дѣла̀, и҆ превозноси́те є҆го̀ во всѧ̑ вѣ́ки.
Видѣ́нїемъ ᲂу҆жа́снымъ и҆ чꙋ́днымъ корни́лїа ᲂу҆́бѡ пе́тръ просвѣтѝ: па́ѵелъ же га́їа, крі́спа и҆ пане́стїа, и҆ стефані́на крестѝ, ѻ҆́ба зовꙋ́щѧ: гдⷭ҇а воспѣва́йте дѣла̀, и҆ превозноси́те є҆го̀ во всѧ̑ вѣ́ки.
Блюдо́ма петра̀ свѧ́зана хрⷭ҇то́съ ᲂу҆́бѡ а҆́гг҃ломъ но́щїю разрѣшѝ: па́ѵла же и҆ сі́лꙋ, а҆́бїе молѧ́щымсѧ, въ кла́дѣ но́ги тве́рдѡ стѧ̑гнꙋты и҆зведѐ и҆ темни́цꙋ потрѧ́съ. тѣ́мже воспое́мъ хрⷭ҇та̀ во вѣ́ки.
Бг҃оро́диченъ:
И҆зба́ви страсте́й всепа́гꙋбныхъ, плени̑цы же согрѣше́нїй ны́нѣ расто́ргни, и҆́миже ко́ждо стѧ́жетсѧ: вси́ бо согрѣши́хомъ, и҆ ѡ҆чище́нїѧ про́симъ, сꙋ́ще пови́ннїи. є҆́же пода́ждь, бцⷣе, мольба́ми твои́ми, превозносѧ́щымъ хрⷭ҇та̀ во вѣ́ки.
И҆́нъ. І҆рмо́съ:
Рꙋ́цѣ распросте́ръ, данїи́лъ львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.
Бжⷭ҇твенный премꙋ́дрый ли́къ а҆пⷭ҇лъ хрⷭ҇то́выхъ, ѻ҆гне́мъ дх҃а, ꙗ҆́коже пле́велы попали́ша многоразли̑чнаѧ бѣсѡ́вскаѧ чти̑лища, и҆ вѣ́рныхъ сердца̀ просвѣти́ша, вопїю́ще: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Согла́снѡ бжⷭ҇твєнныѧ ᲂу҆ч҃никѝ хрⷭ҇тѡ́вы а҆пⷭ҇лы, ꙗ҆̀же возгремѣ́вшыѧ на́мъ бжⷭ҇твєннаѧ велѣ̑нїѧ, приста̑нища вѣ́рныхъ, благода́тели ѻ҆́бщыѧ человѣ́чествꙋ, сп҃сꙋ слꙋжи́тели почти́мъ.
Всечестны̑ѧ, и҆ вмѣсти̑тельныѧ сосꙋ́ды добродѣ́телей, человѣ̑ческїѧ нача́тки, проповѣ́данїѧ трꙋбы̑, пото́ки нетлѣ́нныѧ жи́зни, бг҃онѡ́сныѧ мѡ́лнїи, и҆сцѣле́нїй и҆сто́чники, кра̑сныѧ но́ги є҆ѵⷢ҇лїа почти́мъ.
Бг҃оро́диченъ:
По́лный сы́й смирѧ́етсѧ на́съ ра́ди, да и҆сполне́нїѧ є҆гѡ̀ причасти́мсѧ: въ пречⷭ҇тое бо чре́во твоѐ вше́дъ неѡбыме́нный, ѿ ѻ҆ч҃ескихъ нѣ́дръ не ѿстꙋ́пль воплоти́сѧ. тѣ́мъ тѧ̀ всѝ благослови́мъ, марі́е бг҃оневѣ́стнаѧ.
Пѣ́снь ѳ҃. І҆рмо́съ:
Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ: ра́дꙋйсѧ, всеблаже́ннаѧ бцⷣе, чи́стаѧ приснодв҃о.
Ве́сь всю́дꙋ мі́ръ проидо́сте, ꙗ҆́коже крила́ти, и҆ є҆ѵⷢ҇лїе колѣ́нѡмъ всѣ̑мъ, ꙗ҆зы́кѡмъ и҆ страна́мъ, хрⷭ҇то́во проповѣ́давше, всѧ̑ привлеко́сте къ вѣ́рѣ, пе́тре преблаже́нный и҆ чꙋ́дный па́ѵле а҆пⷭ҇ле.
Прини́къ во глꙋбо́кꙋю ста́рость, и҆ є҆стества̀ до́лгъ, пе́тре, и҆сполнѧ́ѧ, ᲂу҆ч҃телѧ твоегѡ̀ хрⷭ҇та̀ подо́бїемъ, крⷭ҇тъ претерпѣ́лъ є҆сѝ: ты́ же во главꙋ̀ твою̀, па́ѵле, ᲂу҆сѣ́ченъ бы́въ, ѽ чꙋ́до стра́шно! вмѣ́стѡ кро́ве млека̀ и҆сточи́лъ є҆сѝ пото́ки, и҆ невѣ̑рныѧ ѡ҆брати́лъ є҆сѝ.
Ѽ бжⷭ҇твеннаѧ дво́ице, мꙋ́дрѣ врꙋчи́вшаѧсѧ всегѡ̀ мі́ра дꙋша́мъ, и҆ ко благоче́стїю ѿ нече́стїѧ претво́рше, и҆ по сме́рти спаса́юще є҆щѐ вѣ́рныхъ дꙋ́шы, и҆ ны́нѣ на́съ помѧни́те, и҆ предста́вите хрⷭ҇тꙋ̀, верхо́внїи а҆пⷭ҇ли.
Бг҃оро́диченъ:
Сп҃се бл҃гі́й, и҆́же є҆стество́мъ чл҃вѣколю́бецъ, и҆ многомилосе́рдъ, препѣ́тыѧ твоеѧ̀ мт҃ре дв҃ы бжⷭ҇твенными мольба́ми, петра̀ моли́твами и҆ па́ѵла а҆пⷭ҇лъ твои́хъ, ми́лость твою̀ и҆ по́мощь съ нб҃сѐ на́мъ послѝ.
И҆́нъ. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.
Рѣши́ти плени̑цы прегрѣше́нїй, вла́сть прїе́мше ѿ влⷣки, бг҃ови́дцы, воспѣва́ющихъ ва́съ, ми́лостивнѡ грѣхѝ ѡ҆чи́стите, и҆ спасе́нїѧ сподо́бите.
Вседꙋхо́внꙋю зарю̀ сꙋ́щественнѡ ва́мъ ꙗ҆́вльшꙋюсѧ, всѝ воспрїѧ́сте, а҆пⷭ҇ли сла́внїи, въ го́рницѣ наꙋчи́вшесѧ высѡ́кимъ проповѣ́данїємъ и҆ ᲂу҆че́нїємъ, и҆ ны́нѣ досто́йнѡ блажи́ми є҆стѐ.
Ва́мъ хрⷭ҇то́съ ны́нѣ дрꙋгѡ́мъ свои̑мъ почи́вшымъ вѣнцы̀ подае́тъ неꙋвѧда́ємыѧ, и҆ видѣ́нїѧ бжⷭ҇твеннагѡ и҆сполнѧ́етъ: є҆мꙋ́же ны́нѣ моли́тесѧ, цр҃кви всѧ̑ спастѝ.
Бг҃оро́диченъ:
Пло́тїю прїитѝ восхотѣ́въ, ᲂу҆краси́вый сло́вомъ всѧ́чєскаѧ, въ тѧ̀ всели́сѧ, є҆ди́нꙋ ст҃ѣ́йшꙋю всѣ́хъ ѡ҆брѣ́те, и҆ бцⷣꙋ показа̀ и҆́стиннꙋю, мт҃и дв҃о.
Свѣти́ленъ. Подо́бенъ: Оу҆ченикѡ́мъ:
Оу҆ченикѡ́въ всечестнꙋ́ю двоенадесѧ́тицꙋ ра́достнѡ восхвали́ти стеце́мсѧ, ра́дꙋйтесѧ, и҆̀же всю̀ подсо́лнечнꙋю ѡ҆бше́дше, и҆ ꙗ҆зы́кѡвъ ᲂу҆ло́вльше ѕловѣ̑рныѧ чреды̑, наꙋчи́вшесѧ бжⷭ҇твєннымъ.
Сла́ва:
Двоенадесѧточи́сленный ли́къ дне́сь восхва́лимъ всѝ вѣ́рнїи, ꙗ҆́кѡ ᲂу҆тверди́вшесѧ ѿ ни́хъ, и҆ хрⷭ҇тꙋ̀ возопїе́мъ: моли́твами и҆́хъ, сп҃се, мі́ръ тво́й ᲂу҆мирѝ.
И҆ ны́нѣ, бг҃оро́диченъ:
Мы̀ ѡ҆ тебѣ̀ хва́лимсѧ, бцⷣе, и҆ къ бг҃ꙋ тѧ̀ и҆́мамы предста́тельство, прострѝ рꙋ́кꙋ твою̀ ст҃ꙋ́ю, и҆ сокрꙋшѝ врагѝ на́шѧ, твои̑мъ низпослѝ рабѡ́мъ по́мощь ѿ ст҃а́гѡ.
На хвали́техъ стїхи̑ры на д҃, гла́съ д҃. Подо́бенъ: Зва́нный свы́ше:
Верхо́вное ѡ҆снова́нїе а҆пⷭ҇лѡвъ, ꙳ ты̀ всѧ̑ ѡ҆ста́вивъ, ꙳ и҆ послѣ́довалъ є҆сѝ ᲂу҆ч҃телю, ꙳ вопїѧ̀ є҆мꙋ̀: съ тобо́ю ᲂу҆мрꙋ̀, ꙳ да и҆ живꙋ̀ бл҃же́ннꙋю жи́знь. ꙳ ри́ма же ты̀ бы́лъ є҆сѝ пе́рвый є҆пі́скопъ, ꙳ превели́кагѡ градѡ́въ сла́ва и҆ похвала̀, ꙳ и҆ цр҃кве пе́тре ᲂу҆твержде́нїе, ꙳ и҆ врата̀ а҆́дѡва не ѡ҆долѣ́ютъ вои́стиннꙋ є҆ѧ̀, ꙳ ꙗ҆́коже хрⷭ҇то́съ предречѐ. ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.
И҆́же и҆зъ чре́ва ма́тернѧ ѿлꙋче́нъ, ꙳ ве́щнагѡ велича́нїѧ тѧ́жести всѧ́кїѧ и҆збѣ́глъ є҆сѝ, ꙳ впери́всѧ раче́нїемъ вои́стиннꙋ бжⷭ҇твенныѧ, па́ѵле, любвѐ, ꙳ къ высотѣ̀ бжⷭ҇твеннѣй: ꙳ и҆дѣ́же въ пресвѣ́тлый мра́къ ꙳ бжⷭ҇твеннагѡ свѣ́та возше́дый, ꙳ ꙗ҆́кѡ нѣ́кїй безпло́тный, ꙳ неизрече́нныхъ глагѡ́лъ ѡ҆богати́всѧ ᲂу҆чє́нїи, ꙳ и҆ посла́лсѧ є҆сѝ сꙋ́щымъ во тмѣ̀, ꙳ свѣ́тъ проповѣ́дꙋѧй хрⷭ҇та̀ бг҃а на́шего. ꙳ є҆го́же молѝ, спастѝ и҆ просвѣти́ти дꙋ́шы на́шѧ.
И҆́же свѣ́тъ сы́й пре́жде всѣ́хъ вѣ̑къ, ꙳ є҆гда̀ и҆зво́лилъ є҆сѝ ко мнѣ̀ человѣ́кꙋ прїитѝ, неизрече́ннагѡ ра́ди чл҃вѣколю́бїѧ, ꙳ и҆ пло́ть бы́ти за благосты́ню. ꙳ тогда̀ свѣ́ты вторы̑ѧ ꙳ твоеѧ̀ свѣ́тлости, ꙳ и҆ мѡ́лнїѧ блеща̑щаѧ, ꙳ а҆пⷭ҇лы и҆ ᲂу҆ч҃никѝ твоѧ̑, ꙳ сп҃се, показа́лъ є҆сѝ. ꙳ и҆̀же и҆ по́слани бы́вше, ꙳ тва́рь всю̀ бжⷭ҇твеннымъ свѣ́томъ твои́мъ ѡ҆зари́ша, ꙳ молѧ́ще тѧ̀, ꙳ спастѝ и҆ просвѣти́ти дꙋ́шы на́шѧ.(с. 460)
Пе́тре и҆ па́ѵле, ꙳ сло́ва дѣ́лателїе: а҆ндре́е, і҆а́кѡве и҆ і҆ѡа́нне премꙋ́дре: ꙳ варѳоломе́е и҆ фїлі́ппе, ꙳ ѳѡмо̀ и҆ матѳе́е: ꙳ сі́мѡне, і҆ꙋ́до, бжⷭ҇твенне і҆а́кѡве, ꙳ всемі́рнаѧ всечестна́ѧ ᲂу҆ч҃никѡ́въ двоенадесѧ́тице: ꙳ и҆̀же въ мі́рѣ проповѣ́давшїи всест҃ꙋ́ю трⷪ҇цꙋ, ꙳ є҆стество́мъ бг҃а присносꙋ́щнаго: цр҃кве неразори̑мыѧ вои́стиннꙋ стѣ́ны, ꙳ и҆ непоколеби́мїи столпѝ, ꙳ влⷣцѣ всѣ́хъ моли́тесѧ спасти́сѧ на́мъ.
Сла́ва, гла́съ и҃: Космы̀ мона́ха:
Ю҆́же проидо́сте тва́рь, просвѣ́щше сп҃сѡвы ᲂу҆ч҃ницы̀, ле́сть і҆́дѡльскꙋю ꙗ҆́кѡ хвра́стїе попали́вше ᲂу҆чє́нїи ва́шими, ꙗ҆зы́ки ѿ неразꙋ́мїѧ глꙋбины̀ къ бжⷭ҇твенномꙋ ра́зꙋмꙋ ᲂу҆лови́вше, спасо́сте: и҆ ны́нѣ моли́тесѧ хрⷭ҇тꙋ̀, ꙗ҆́кѡ да ми́лостивъ на́мъ бꙋ́детъ въ де́нь сꙋ́дный.
И҆ ны́нѣ, бг҃оро́диченъ: Влⷣчце, прїимѝ моли̑твы ра̑бъ:
Славосло́вїе вели́кое: и҆ ѿпꙋ́стъ.
На лїтꙋргі́и, бл҃жє́нна ѿ канѡ́на в҃і-хъ а҆пⷭ҇лѡвъ, пѣ́снь г҃-ѧ и҆ ѕ҃. Прокі́менъ, гла́съ и҃: Во всю̀ зе́млю: Сті́хъ: Нб҃са̀ повѣ́даютъ сла́вꙋ бж҃їю: А҆пⷭ҇лъ къ корі́нѳѧнѡмъ, зача́ло рл҃а. А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и. Є҆ѵⷢ҇лїе ма́рка, зача́ло в҃і. Прича́стенъ: Во всю̀ зе́млю.