Мѣ́сѧца тогѡ́же въ и҃-й де́нь.
Ст҃а́гѡ великомꙋ́ченика ѳео́дѡра стратила́та.
Стїхи̑ры на ѕ҃, гла́съ в҃. Подо́бенъ: Є҆гда̀ ѿ дре́ва:
Ве́сь приве́лъ є҆сѝ себѐ тебѣ̀ да́вшемꙋ, пребл҃же́нне, жи́знь соверше́ннꙋ, ꙗ҆́кѡ всепло́дїе жи́во и҆ ѡ҆дꙋшевле́но, и҆ же́ртвꙋ благопрїѧ́тнꙋ и҆ пречи́стꙋ. тѣ́мже моли́твенникъ бы́лъ є҆сѝ благопрїѧ́тенъ, бꙋ́ри и҆зима́ѧ всѧ̑ вѣ́рою пою́щыѧ тѧ̀, мꙋ́чениче, и҆ призыва́ющыѧ тѧ̀, ѳео́дѡре.
Сѣ́мѧ воздѣ́лавъ прилѣ́жнѡ всѣ́ѧнное сло́ва, въ чи́стѣй твое́й дꙋшѝ, сїѐ ᲂу҆мно́жилъ є҆сѝ болѣ́зньми страда́нїѧ, и҆ мꙋ́дрѣ положе́нъ въ нбⷭ҇ныхъ жи́тницахъ, нетлѣ́нно ѡ҆брѣ́лъ є҆сѝ наслажде́нїе: є҆гѡ́же ны́нѣ насыща́ѧсѧ, бл҃же́нне, твои́ми ко крⷭ҇тꙋ̀ хода́тайствы вѣ́рнѡ пою́щыѧ тѧ̀ спаса́й.
Мꙋ́чениче стрⷭ҇тоте́рпче хрⷭ҇то́въ, и҆̀же въ разли́чныхъ нꙋ́ждахъ спаса́й мольба́ми твои́ми, всѧ́ко ᲂу҆́бѡ ѡ҆бстоѧ́нїе ѿрѣва́ѧ, и҆ ѿгонѧ̀ дꙋшегꙋби́тельнꙋю печа́ль, бл҃года́ть же и҆ ми́лость на́мъ просѧ̀: ꙗ҆́кѡ да моли́твами твои́ми спа́сшїисѧ, ра́дꙋющесѧ воспое́мъ всѝ честны̑ѧ по́двиги твоѧ̀, ѳео́дѡре.
И҆́ны стїхи̑ры, гла́съ д҃. Подо́бенъ: Ꙗ҆́кѡ до́блѧ:
Страда́лецъ до́блественный, ꙳ во́инъ непобѣди́мь, ꙳ дх҃омъ ст҃ы́мъ показа́лсѧ є҆сѝ, ꙳ низло́жь бори́телѧ ꙳ мꙋ́дростїю слове́съ твои́хъ, ꙳ и҆ дѣ́лъ твои́хъ мꙋ́дрѣ терпѣли́вными ꙗ҆вле́ньми. ꙳ тѣ́мже прїѧ́лъ є҆сѝ вѣнцы̀ побѣ̑дныѧ, ꙳ и҆ съ вы́шними ли̑ки сочета́лсѧ є҆сѝ, ꙳ великомꙋ́чениче ѳео́дѡре.
Бжⷭ҇твенный сто́лпъ бы́лъ є҆сѝ, ꙳ благоче́стїѧ, пребога́те, ꙳ ѕлочести́выхъ ка́пищъ возгнꙋша́всѧ, ꙳ и҆ ѻ҆вча̀ всесоверше́нно, ꙳ и҆ заколе́нїе благопрїѧ́тно, ꙳ закла́вшемꙋсѧ тебє̀ ра́ди чи́стѣ приводи́мь, ꙳ просла́вльшемꙋ ст҃ꙋ́ю твою̀ па́мѧть, ꙳ и҆ чꙋде́съ сокро́вище тѧ̀ сꙋ́щымъ въ мі́рѣ ꙳ дарова́вшемꙋ, ѳео́дѡре.
На кре́стъ воздви́женъ, ꙳ и҆ пло́ти стрꙋ́жемѣ, ꙳ и҆ ѻ҆́стрыми стрѣла́ми ᲂу҆ѧзвлѧ́емь, ꙳ и҆ на дре́вѣ протѧза́емь, ꙳ и҆ мечи̑ ᲂу҆сѣка́емь, ꙳ и҆ всѧ́кими хитростьмѝ болѣ́зней ѡ҆крꙋжа́емь, ꙳ непрекло́ненъ и҆ непобѣди́мь ꙗ҆ви́лсѧ є҆сѝ ꙳ си́лою на крестѣ̀ пригвожде́ннагѡ, ꙳ сла́ва мꙋ́ченикѡвъ ѳео́дѡре.
Сла́ва, гла́съ є҃: Дне́сь возсїѧ̀ па́че денни́цы честна́ѧ па́мѧть страстоте́рпца хрⷭ҇то́ва, вѣ́рныхъ сердца̀ неви́димѡ просвѣща́ющи, и҆ ѻ҆́блаки дꙋ́шъ ѿгонѧ́ющи дѣ́йствомъ благода́ти дх҃а. къ немꙋ́же, мꙋчениколю́бцы, воззове́мъ: ра́дꙋйсѧ, и҆́же вѣ̑рнымъ ꙗ҆́вльсѧ бг҃одарова́ннаѧ благода́ть, и҆ чꙋде́съ мно́жєства простира́ѧ къ тебѣ̀ притека́ющымъ, ѳео́дѡре блаже́нне: хрⷭ҇та̀ непреста́ннѡ молѧ̀, не ѡ҆скꙋдѣ́й вѣ́чныхъ бла̑гъ полꙋчи́ти, вѣ́рою творѧ́щымъ па́мѧть твою̀.
И҆ ны́нѣ, пра́здника, и҆лѝ бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Ра́дꙋйсѧ:
А҆́гнца своего̀ а҆́гница и҆ногда̀ зрѧ́щи, къ заколе́нїю тща́щасѧ, ᲂу҆се́рднѡ послѣ́доваше, сїѧ̑ вопїю́щи є҆мꙋ̀: ка́мѡ и҆́деши, ча́до моѐ сладча́йшее, хрⷭ҇тѐ; чесѡ̀ ра́ди ско́рое тече́нїе сїѐ, долготерпѣли́ве, тече́ши нелѣ́ностнѡ; і҆и҃се возжелѣ́ннѣйшїй, безгрѣ́шне, многоми́лостиве гдⷭ҇и, да́ждь мѝ сло́во, рабѣ̀ твое́й, сн҃е мо́й вселюбе́знѣйшїй. не пре́зри, ще́дре, молчѧ̀, тѧ̀ стра́ннѡ ро́ждшꙋю, бж҃е всеще́дре, да́рꙋѧй мі́рови ве́лїю ми́лость.
На стїхо́внѣ ѻ҆ктѡ́иха. Сла́ва, гла́съ и҃. Самогла́сенъ:
Бж҃їихъ дарѡ́въ ꙗ҆́кѡ тезоимени́та, и҆ того̀ наслѣ́дника блаже́нства, всѝ восхва́лимъ, вѣ́рнїи, и҆ ᲂу҆блажи́мъ по достоѧ́нїю ѳео́дѡра до́блѧго великомꙋ́ченика, вселе́нныѧ побо́рника: мо́литбосѧ хрⷭ҇тꙋ̀ бг҃ꙋ ѡ҆ дꙋша́хъ на́шихъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Ѽ пресла́внагѡ чꙋдесѐ!
Не терплю̀, ча́до, ꙳ ви́дѧщи тѧ̀ на дре́вѣ ᲂу҆снꙋ́вша, ꙳ бо́дрость всѣ̑мъ подаю́щаго, ꙳ ꙗ҆́кѡ да дре́вле престꙋпле́нїѧ плодо́мъ, ꙳ сно́мъ поги́бельнымъ ᲂу҆снꙋ́вшымъ, ꙳ бжⷭ҇твеннꙋю и҆ спаси́тельнꙋю бо́дрость пода́си, ꙳ дв҃а глаго́лаше пла́чꙋщисѧ, ꙳ ю҆́же велича́емъ.
Тропа́рь, гла́съ д҃:
Воинствосло́вїемъ и҆́стиннымъ, страстоте́рпче, нбⷭ҇нагѡ цр҃ѧ̀ воево́да предо́брый бы́лъ є҆сѝ, ѳео́дѡре: ѻ҆рꙋ́жїѧми бо вѣ́ры ѡ҆полчи́лсѧ є҆сѝ мꙋ́дреннѡ, и҆ побѣди́лъ є҆сѝ де́мѡнѡвъ полкѝ, и҆ побѣдоно́сный ꙗ҆ви́лсѧ є҆сѝ страда́лецъ: тѣ́мже тѧ̀ вѣ́рою при́снѡ ᲂу҆блажа́емъ.
На ᲂу҆́трени ѻ҆́ба канѡ́на ѻ҆ктѡ́иха, безъ мꙋ́ченичнѡвъ: и҆ ст҃а́гѡ, на ѕ҃.
Канѡ́нъ ст҃а́гѡ, є҆гѡ́же краегране́сїе:
Пою́ тѧ дарѡ́въ бжⷭ҇твенныхъ тезоимени́та, хвала́ми бжⷭ҇твенными.
Творе́нїе ѳеофа́ново.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крⷭ҇тоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.
Мꙋ́ченикъ ꙗ҆́вѣ свѣтлостьмѝ ᲂу҆краша́емь, добротво́рцꙋ предстои́ши хрⷭ҇тꙋ̀, ѿ негѡ̀ ᲂу҆добрѧ́емь, ꙗ҆́кѡ дарѡ́въ тезоимени́тъ бжⷭ҇твенныхъ, мꙋ́чениче ѳео́дѡре.
Бжⷭ҇твенными воѡрꙋжи́всѧ, ѳео́дѡре, ѻ҆рꙋ̑жїи вѣ́ры, вра̑жїѧ ссѣ́клъ є҆сѝ тве́рдѡ дꙋшетлѣ̑нныѧ полкѝ: и҆ побѣди́тель бы́въ съ мꙋ́чєники вѣнча́лсѧ є҆сѝ.
Свѣ́тлое твоеѧ̀ дꙋшѝ хра́брство показꙋ́ѧ ѕлочести́вомꙋ, бг҃омꙋ́дре, цр҃ю̀, премꙋ́дростїю слове́съ твои́хъ, и҆ благода́тїю дѣ́лъ, сего̀ посрами́лъ є҆сѝ, ѳео́дѡре.
Бг҃оро́диченъ:
Безъ сѣ́мене ѻ҆́ч҃ею во́лею ѿ бжⷭ҇твеннагѡ дх҃а, бж҃їѧ зачала̀ є҆сѝ сн҃а, и҆ пло́тїю родила̀ є҆сѝ, и҆́же и҆зъ ѻ҆ц҃а̀ безъ ма́тере, на́съ же ра́ди и҆зъ тебє̀ безъ ѻ҆тца̀.
Пѣ́снь г҃. І҆рмо́съ:
Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.
Ѡ҆полче́нїе ѕлочести́вое. ꙗ҆́кѡ воево́да си́ленъ побѣди́лъ є҆сѝ, и҆ стропти́вагѡ ѕмі́ѧ всѧ̑ хи́трѡсти попра́лъ є҆сѝ.
Ꙗ҆́кѡ ᲂу҆се́рденъ дꙋше́ю, ᲂу҆мышле́нїемъ благочести́вымъ, сла́вне, ѕлочести́выхъ погꙋби́лъ є҆сѝ прелюбодѣ́йствєннаѧ чти̑лища.
Крѣ́постїю по́мысла лю́тыхъ наношє́нїѧ претерпѣ́лъ є҆сѝ, животво́рнѣй ме́ртвости подвигополо́жника подо́бѧсѧ.
Бг҃оро́диченъ:
Ты̀ є҆ди́на сꙋ́щымъ на землѝ, па́че є҆стества̀ благи́хъ хода́таица, мт҃и бж҃їѧ была̀ є҆сѝ. тѣ́мже тѝ, ра́дꙋйсѧ, вопїе́мъ.
Сѣда́ленъ, гла́съ и҃. Подо́бенъ: Премꙋ́дрости:
Бжⷭ҇твенное всеѻрꙋ́жїе воспрїи́мъ, и҆ і҆́дѡльскꙋю ле́сть низложи́въ, а҆́гг҃лы возста́вилъ є҆сѝ восхвали́ти по́двиги твоѧ̑: и҆́бо бжⷭ҇твенною любо́вїю ᲂу҆́мъ распали́въ, на ѻ҆́гненнꙋю сме́рть до́блественнѡ дерзнꙋ́лъ є҆сѝ. тѣ́мже тезоимени́тнѡ просѧ́щымъ тѧ̀ дае́ши бжⷭ҇твєннаѧ дарова̑нїѧ, страстоте́рпче ѳео́дѡре. сегѡ̀ ра́ди вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю па́мѧть твою̀.
Два́жды.
Сла́ва, и҆ ны́нѣ, пра́здника и҆лѝ бг҃оро́диченъ:
Въ напа̑сти многоплетє́нныѧ впа́дъ ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ: и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бла́гости. тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ моли́сѧ прилѣ́жнѡ ѡ҆ всѣ́хъ рабѣ́хъ свои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀.
Крⷭ҇тобг҃оро́диченъ:
Дв҃а и҆ мт҃и і҆и҃сова на дре́вѣ зрѧ́щи творца̀, стенѧ́ше слезѧ́щи, и҆ лю́тѣ ᲂу҆ѧзвлѧ́шесѧ, дꙋ́шꙋ и҆ тѣ́ло растерза́ющи, бїю́щисѧ, и҆ къ немꙋ̀ вопїю́щи го́рькѡ, и҆ взыва́ющи: ᲂу҆вы̀ мнѣ̀, ѽ сн҃е мо́й! ка́кѡ претерплю̀ стра́сть твою̀, гво́здїе и҆ копїѐ, ꙗ҆́же безъ болѣ́зни тѧ̀ ро́ждши; но потщи́сѧ воста́ти, и҆ ви́дѣти тѧ̀, сн҃е мо́й и҆ бж҃е, и҆ ѿ рыда́нїѧ преста́ти и҆ болѣ́зни, и҆ пою́щїи твоѧ̑ стрⷭ҇ти согрѣше́нїй разрѣше́нїе прїи́мꙋтъ.
Пѣ́снь д҃. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Оу҆ѧзви́лъ є҆сѝ ѕмі́ѧ, ᲂу҆ѧзви́ти тѧ̀ хотѧ́щаго, и҆ терпѣли́выми сопротивлє́нїи, мꙋ́ченикъ ꙗ҆ви́лсѧ є҆сѝ, поѧ̀ прилѣ́жнѡ тѧ̀ ᲂу҆крѣ́пльшемꙋ: сла́ва си́лѣ твое́й, гдⷭ҇и.
И҆знꙋри́въ пло́ть мно́гими ра́нами, по́мыслъ непрекло́ненъ поста́вилъ є҆сѝ, треблаже́нне, поѧ̀ ᲂу҆се́рднѡ, тѧ̀ ᲂу҆крѣ́пльшемꙋ: сла́ва си́лѣ твое́й, гдⷭ҇и.
Оу҆краси́лсѧ є҆сѝ страда́ньми влⷣки, твоѧ̑ честна̑ѧ страда̑нїѧ, премꙋ́дре, совокꙋ́пль: и҆ сподо́билсѧ є҆сѝ тогѡ̀ свѣ́тлости, и҆ жела́емыѧ красоты̀.
Бг҃оро́диченъ:
Неискꙋсобра́чнѡ родила̀ є҆сѝ, ѽ дв҃о, и҆ по рождествѣ̀ ꙗ҆ви́ласѧ є҆сѝ дѣ́вствꙋющи па́ки. тѣ́мже немо́лчными гла̑сы, є҆́же ра́дꙋйсѧ, тебѣ̀, влⷣчце, вѣ́рою несꙋмнѣ́нною взыва́емъ.
Пѣ́снь є҃. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀.
Кропле́нїемъ плотски́хъ крове́й ᲂу҆ста́вилъ є҆сѝ де́мѡнскꙋю на па́гꙋбꙋ приноси́мꙋю кро́вь, непобѣди́ме ѳео́дѡре.
Ѽ нра́ва благочести́ва! ѽ до́блественна ра́зꙋма! ѽ вѣ́ры теплѣ́йшїѧ честна́гѡ страстоте́рпца, є҆́юже бг҃а полꙋчѝ!
Оу҆́мъ и҆мѣ́ѧ свѣ́томъ бж҃їимъ ѡ҆сїѧ́емь, побо́рника ѕло́бы ѡ҆мрачи́лъ є҆сѝ ѕмі́ѧ, бг҃оно́се ѳео́дѡре.
Бг҃оро́диченъ:
Тѧ̀ ѻ҆рꙋ́жїе непобѣди́мое на врагѝ предлага́емъ, тѧ̀ ᲂу҆твержде́нїе и҆ наде́ждꙋ на́шегѡ спасе́нїѧ, бг҃оневѣ́сто, стѧжа́хомъ.
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Побѣди́лъ є҆сѝ ᲂу҆се́рдїемъ де́рзостнымъ низлага́ющихъ, на крестѣ̀ просте́ртъ, и҆ гвоздьмѝ пробода́емь, блаже́нне, и҆з̾ѡбража́ѧ спаси́тельнꙋю стра́сть зижди́телѧ.
Зако́ннѡ стра́ждꙋщемꙋ хрⷭ҇то́съ тебѣ̀ ꙗ҆влѧ́етсѧ въ темни́цѣ затворе́нꙋ, воздвиза́ѧ ꙗ҆́кѡ подвигополо́жникъ къ подвигѡ́мъ на врагѝ борє́нїѧ, пресла́вне.
Же́ртвꙋ чи́стꙋ и҆ ст҃ꙋ, и҆ непоро́чнꙋ, тебє̀ ра́ди во́лею себѐ же́ртвꙋ прине́сшемꙋ приве́лъ є҆сѝ себѐ, страстоте́рпче ѳео́дѡре.
Бг҃оро́диченъ:
Ѽ чꙋ́до всѣ́хъ чꙋде́съ новѣ́йшее! ꙗ҆́кѡ дв҃а во ᲂу҆тро́бѣ, всѧ̑ содержа́щаго, неискꙋсомꙋ́жнѡ заче́нши, не тѣсновмѣстѝ.
Конда́къ, гла́съ в҃. Подо́бенъ: Вы́шнихъ и҆щѧ̀:
Мꙋ́жествомъ дꙋшѝ въ вѣ́рꙋ ѡ҆болкі́йсѧ, и҆ глаго́лъ бж҃їй а҆́ки копїѐ въ рꙋ́кꙋ взе́мъ, врага̀ побѣди́лъ є҆сѝ, мꙋ́ченикѡвъ преве́лїй ѳео́дѡре, съ ни́ми хрⷭ҇тꙋ̀ бг҃ꙋ молѧ́сѧ не преста́й ѡ҆ всѣ́хъ на́съ.
І҆́косъ:
Страда́льцєвъ пресвѣ́тлꙋю добро́тꙋ, прїиди́те всѝ, пѣ́сненными вѣнцы̑, вѣ́рнїи, ѳео́дѡра вѣнча́емъ: да́ръ бо бж҃їй вели́къ мі́рꙋ ꙗ҆ви́сѧ сїѧ́ньми чꙋде́съ. врага́ бо побѣ́ждь велїа́ра страда̑нїи честны́ми, ѡ҆дождѧ́етъ вмѣ́стѡ кро́вныхъ ка́плей и҆сцѣле́нїй то́ки: съ си́ми ᲂу҆́бѡ всѣ́ми ра́дꙋетсѧ хрⷭ҇тꙋ̀, и҆ дае́тъ ми́ръ неѡскꙋде́нъ. тѣ́мъ вопїе́мъ є҆мꙋ̀: молѝ непреста́ннѡ ѡ҆ всѣ́хъ на́съ.
Пѣ́снь з҃. І҆рмо́съ:
Въ пе́щи а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Въ пещѝ твои́хъ подвигѡ́въ, мꙋ́чениче сла́вне, ве́щь ѕлоче́стїѧ попали́лъ є҆сѝ, и҆ свѣти́ло благоче́стїѧ, поѧ̀, бы́лъ є҆сѝ: благослове́нъ є҆сѝ въ хра́мѣ сла́вы твоеѧ̀, гдⷭ҇и.
Ꙗ҆́кѡ воево́да, ꙗ҆́кѡ смы́сленъ, и҆ тре́звеникъ дѣ́ломъ, царѧ̀ несмы́сленна и҆ ѕлочести́ва премо́глъ є҆сѝ, и҆ показа́лъ є҆сѝ сего̀ некрѣ́пка, ᲂу҆крѣпи́всѧ си́лою дꙋхо́вною.
Зако́нъ побѣжда́етсѧ похвала́ми вели́чества твоегѡ̀: ты́ бо пресвѣ́тлыми просїѧ́лъ є҆сѝ ѡ҆блиста̑нїи мꙋче́нїѧ, влⷣцѣ твоемꙋ̀ вопїѧ̀, ѳео́дѡре: благослове́нна держа́ва твоегѡ̀ влады́чества.
Бг҃оро́диченъ:
Вы́шнѧгѡ ѡ҆свѧще́нное бжⷭ҇твенное селе́нїе, ра́дꙋйсѧ: тобо́ю бо даде́сѧ ра́дость, бцⷣе, зовꙋ́щымъ: благослове́на ты̀ въ жена́хъ є҆сѝ, всенепоро́чнаѧ влⷣчце.
Пѣ́снь и҃. І҆рмо́съ:
Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.
На тѧ̀ ᲂу҆пова́въ, менє̀ ра́ди кре́стъ и҆ сме́рть претерпѣ́вшаго, на кре́стъ воздвиго́хсѧ, влⷣко, и҆ ᲂу҆ѧзвлѧ́емь стрѣлѧ́ньми, и҆ лю̑тымъ прикаса́ѧсѧ ра́намъ, гдⷭ҇и, вопїѧ́лъ є҆сѝ, мꙋ́чениче, стражда̀, доблемꙋ́дренне ѳео́дѡре.
Приве́лъ є҆сѝ же́ртвꙋ чи́стꙋ тебѐ зижди́телю твоемꙋ̀, ра́дꙋѧсѧ, ѳео́дѡре, и҆ ѿлꙋчи́всѧ, сла́вне, къ црⷭ҇твꙋ нбⷭ҇номꙋ, съ мꙋ́чєники свѧще́ннѡ взыва́ѧ всегда̀: благослови́те, всѧ̑ дѣла̀ гдⷭ҇нѧ, гдⷭ҇а.
Ꙗ҆́кѡ крі́нъ, ꙗ҆́кѡ ши́покъ разꙋ́мный, вонѧ́ми страда́нїй твои́хъ благоꙋха́еши на́съ, ѿгонѧ̀ благода́тїю всегда̀ ѕлосмра́дїе страсте́й на́шихъ, и҆ понꙋжда́ѧ вопи́ти благово́нною дꙋше́ю: благослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Ты̀ є҆ди́на во всѣ́хъ родѣ́хъ, дв҃о пречⷭ҇таѧ, мт҃и ꙗ҆ви́ласѧ є҆сѝ бж҃їѧ: ты̀ бжⷭ҇тва̀ была̀ є҆сѝ жили́ще, всенепоро́чнаѧ, не ѡ҆па́льшисѧ ѻ҆гне́мъ непрестꙋ́пнагѡ свѣ́та. тѣ́мже вси́ тѧ благослови́мъ, мр҃і́е бг҃оневѣ́сто.
Пѣ́снь ѳ҃. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.
Ны́нѣ со блаже́нными собѡ́ры, и҆ мꙋ́ченическими ли̑ки, ꙗ҆́кѡ ᲂу҆кра́шенъ страда́ньми, соводворѧ́ѧсѧ и҆ свеселѧ́сѧ, вѣне́цъ носѧ̀, предстои́ши жела́емомꙋ тебѣ̀, ѳео́дѡре.
Къ высотѣ̀ нбⷭ҇нѣй взѧ́тсѧ, ѡ҆ земны́хъ небре́гъ, и҆ жела́емагѡ тебѣ̀ конца̀ сподо́билсѧ є҆сѝ, то̀ са́мое соверше́нїе жела́нїй, ѳео́дѡре, воспрїе́мъ ра́дꙋѧсѧ.
И҆мы́й къ бг҃ꙋ дерзнове́нїе, ꙗ҆́кѡ до́бль и҆ мꙋ́дръ страда́лецъ, восхвалѧ́ющымъ тѧ̀ любо́вїю согрѣше́нїй ѡ҆ставле́нїе просѝ, ѿ страсте́й и҆ скорбе́й всѣ́хъ на́съ и҆збавлѧ́ѧ.
Є҆ди́наго тѧ̀ безсме́ртна сло́ва пло́тїю пострада́вша и҆ ᲂу҆ме́рша, мꙋ́ченикъ бг҃омꙋ́дрый возжела́въ, безсме́ртїѧ твоегѡ̀ полꙋчи́въ, на нб҃са̀ всели́сѧ, къ зижди́телю всѣ́хъ всеси́льнꙋ.
Бг҃оро́диченъ:
Благослове́ннꙋю мр҃і́ю, и҆ бж҃їю мт҃рь дв҃ꙋ, прїиди́те всѝ, вѣ́рою и҆ любо́вїю непреста́ннѡ восхва́лимъ, є҆ѧ́же ра́ди ѡ҆брѣ́тше вѣ́чное ра́дованїе.
Свѣти́ленъ. Подо́бенъ: Нб҃о ѕвѣзда́ми:
Ты̀ красе́нъ добро́тою, и҆ воево́да благомо́щенъ, и҆ сла́вный во страда́льцѣхъ во́инъ, прине́слсѧ є҆сѝ хрⷭ҇тꙋ̀, и҆ мі́рꙋ да́ръ бжⷭ҇твенный, ѳео́дѡре, показа́лсѧ є҆сѝ.
Сла́ва, и҆ ны́нѣ, пра́здника, и҆лѝ бг҃оро́диченъ:
Держа́внымъ твои́мъ кро́вомъ, ѿ вра̑гъ навѣ́та, на́съ, чⷭ҇таѧ, твоѧ̑ рабы̑ сохранѧ́й всѧ̑ неврє́дны: тѧ́ бо стѧжа́хомъ є҆ди́нꙋ прибѣ́жище въ нꙋ́ждахъ.
На стїхо́внѣ ѻ҆ктѡ́иха. Сла́ва, гла́съ и҃:
Страда́льческїй соста́вль по́двигъ, на пре́лесть мꙋ́жествовалъ є҆сѝ, ѳео́дѡре, ѻ҆гневѣща́ннымъ ѧ҆зы́комъ твои́мъ посрами́лъ є҆сѝ лїкїні́ево безчеловѣ́чество. тѣ́мже и҆ со а҆́гг҃лы ра́дꙋѧсѧ, блаже́нне, молѝ хрⷭ҇та̀ бг҃а, да ми́лостивъ бꙋ́детъ на́мъ въ де́нь сꙋ́дный.
И҆ ны́нѣ, пра́здника, и҆лѝ бг҃оро́диченъ, крⷭ҇тобг҃оро́диченъ: пи́санъ ве́черъ на стїхо́внѣ.
На лїтꙋргі́и блажє́нна пра́здника, и҆лѝ ѻ҆ктѡ́иха, и҆ ст҃а́гѡ пѣ́снь г҃-ѧ. Прокі́менъ, гла́съ з҃: Возвесели́тсѧ пра́ведникъ ѡ҆ гдⷭ҇ѣ: Сті́хъ: Оу҆слы́ши, бж҃е, гла́съ мо́й, внегда̀ моли́тимисѧ къ тебѣ̀: А҆пⷭ҇лъ къ тїмоѳе́ю, зача́ло сч҃в. А҆ллилꙋ́їа, гла́съ д҃: Пра́ведникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. Є҆ѵⷢ҇лїе матѳе́а, зача́ло л҃ѕ. Прича́стенъ: Въ па́мѧть вѣ́чнꙋю бꙋ́детъ пра́ведникъ: