Въ а҃-й де́нь: ст҃ы́хъ и҆ чꙋдотво́рцѡвъ, безсре́бреникѡвъ космы̀ и҆ дамїа́на, и҆̀же ѿ а҆сі́и.
Ве́черъ, на Гдⷭ҇и, воззва́хъ, стїхи̑ры ст҃ы́хъ на ѕ҃, гла́съ ѕ҃.
Подо́бенъ: Всѐ ѿло́жше.
Всю̀ ѿложи́вше ꙳ на нб҃сѣ́хъ наде́ждꙋ, ꙳ сокро́вище некра́домо ꙳ себѣ̀ ст҃і́и сокро́вищствоваша: ꙳ тꙋ́не прїѧ́ша, ꙳ тꙋ́не даю́тъ недꙋ́гꙋющымъ врачева̑нїѧ. ꙳ зла́та и҆лѝ сребра̀ є҆ѵⷢ҇льски не стѧжа́ша: ꙳ человѣ́кѡмъ же и҆ скотѡ́мъ ꙳ бл҃годѣѧ̑нїѧ препода́ша, ꙳ да, всѣ́ми послꙋшли́ви бы́вше хрⷭ҇тꙋ̀, ꙳ со дерзнове́нїемъ мо́лѧтсѧ ꙳ ѡ҆ дꙋша́хъ на́шихъ.
Ве́щи возгнꙋша́шасѧ ꙳ на землѝ тлѣ́емыѧ, ꙳ небесножи́телїе же во пло́ти, ꙳ ꙗ҆́коже а҆́гг҃ли ꙗ҆ви́шасѧ, ꙳ є҆диномꙋ́дреннїи сожи́телє, ꙳ сопрꙋ́гъ є҆динонра́вный ст҃ы́хъ, ꙳ и҆ є҆динодꙋ́шный. ꙳ тѣ́мже стра́ждꙋщымъ всѣ̑мъ врачєва́нїѧ подаю́тъ, ꙳ безсре́бреннѡ да́рꙋюще ꙳ благодѣѧ̑нїѧ тре́бꙋющымъ, ꙳ ꙗ҆̀же лѣ́тнымъ си́мъ досто́йнѡ почти́мъ пра́здникомъ, ꙳ хрⷭ҇тꙋ̀ со дерзнове́нїемъ молѧ́щыѧсѧ ꙳ ѡ҆ дꙋша́хъ на́шихъ.
Всю̀ все́льшаѧ въ себѐ трⷪ҇цꙋ ꙳ дво́ица приснопа́мѧтнаѧ, ꙳ косма̀ и҆ дамїа́нъ бг҃омꙋ́дрїи, ꙳ ꙗ҆́кѡ пото́цы и҆сточа́ютъ ꙳ ѿ и҆сто́чника живоно́снагѡ ꙳ во́ды врачева́нїй: ꙳ и҆́хже и҆ мѡ́щи ꙳ стра̑сти ѡ҆сѧза́нїемъ врачꙋ́ютъ: ꙳ и҆ са̑маѧ то́кмѡ и҆мена̀ ꙳ недꙋ́ги ѿ человѣ́кѡвъ ѿго́нѧтъ, ꙳ всѣ́хъ притека́ющихъ ꙳ спаси́тєльнаѧ приста̑нища ѡ҆ хрⷭ҇тѣ̀, ꙳ и҆ со дерзнове́нїемъ мо́лѧтсѧ ꙳ ѡ҆ дꙋша́хъ на́шихъ.
Всѐ ѿри́нꙋвше стра́стное мꙋчи́тельство, ꙳ и҆ всѧ́ко размышле́нїе ꙳ лꙋка́вагѡ ѕмі́ѧ попра́вше ѡ҆ хрⷭ҇тѣ̀, ꙳ ст҃і́и безмє́здницы, ꙳ космо̀ и҆ дамїа́не, ꙳ свѣтоѻбра́зни ꙗ҆ви́стесѧ, ꙗ҆́кѡ свѣти̑ла, ꙳ ѡ҆зарѧ́юще всю̀ подсо́лнечнꙋю, ꙳ бг҃озна́меньми всегда̀, ꙳ тмꙋ̀ ѿгонѧ́юще и҆ недꙋ́ги бл҃года́тїю, ꙳ и҆ всѣ̑мъ спаси́телїе ꙗ҆влѧ́ющесѧ, ꙳ вѣ́рою неꙋкло́нною ꙳ творѧ́щымъ сла́внꙋю па́мѧть ва́шꙋ, премꙋ́дрїи.
Сла́ва, гла́съ ѕ҃. А҆нато́лїа:
Безконе́чна є҆́сть ст҃ы́хъ бл҃года́ть, ю҆́же ѿ хрⷭ҇та̀ прїѧ́ша. тѣ́мже и҆ мѡ́щи и҆́хъ ѿ бжⷭ҇твенныѧ си́лы непреста́ннѡ дѣ́йствꙋютъ чꙋдеса̀: и҆́хже и҆ и҆мена̀, вѣ́рою призыва́єма, неисцѣ̑льныѧ болѣ̑зни и҆сцѣлѧ́ютъ. и҆́миже, гдⷭ҇и, и҆ на́съ дꙋше́вныхъ и҆ тѣле́сныхъ страсте́й свободѝ, ꙗ҆́кѡ чл҃вѣколю́бецъ.
И҆ ны́нѣ, Бцⷣе, ты̀ є҆сѝ лоза̀ и҆́стиннаѧ:
И҆лѝ крⷭ҇тобг҃оро́диченъ. Подо́бенъ: Всѐ ѿло́жше:
А҆́гнца своего̀ ꙳ а҆́гница нескве́рнаѧ дре́вле ꙳ и҆ непоро́чнаѧ влⷣчца ꙳ на дре́вѣ крⷭ҇тнѣмъ ꙗ҆́кѡ ᲂу҆зрѣ̀, ꙳ мт҃рски восклица́ше, ꙳ и҆ дивѧ́щисѧ, вопїѧ́ше: ꙳ ча́до сладча́йшее, ꙳ что̀ зрѣ́нїе сїѐ но́вое и҆ пресла́вное; ꙳ ка́кѡ со́нмъ безблагода́тный ꙳ сꙋди́щꙋ пїла́товꙋ предаде́ тѧ, ꙳ и҆ ѡ҆сꙋжда́етъ на сме́рть живота̀ всѧ́ческихъ; ꙳ но воспѣва́ю твоѐ неизрече́нное, ꙳ сло́ве, снизхожде́нїе.
На стїхо́внѣ ѻ҆ктѡ́иха.
(А҆ и҆дѣ́же хра́мъ ст҃ы́хъ, и҆лѝ восхо́щетъ кто̀ ст҃ы̑мъ пѣ́ти полѷеле́й: тогда̀ на стїхо́внѣ стїхи̑ры, и҆ на ᲂу҆́трени, по каѳі́смахъ, сѣда́льны, и҆ канѡ́нъ бцⷣѣ, и҆ ст҃ы́хъ канѡ́на два̀, и҆ хвали̑тны, и҆ славосло́вїе.)
На стїхо́внѣ стїхи̑ры, гла́съ в҃:
И҆сто́чникъ и҆сцѣле́нїй є҆ди́наго то́кмѡ въ лѣ́тѣ и҆сцѣлѣва́ше: хра́мъ же безсре́бреникѡвъ всѐ мно́жество и҆сцѣлѧ́етъ недꙋ́гꙋющихъ: неѡскꙋ́дно бо є҆́сть и҆ неиждива́емое бога́тство ст҃ы́хъ. тѣ́хъ моли́твами, хрⷭ҇тѐ, поми́лꙋй на́съ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Ѳеофа́ново:
Любо́вїю бжⷭ҇твенною и҆ жела́нїемъ бꙋ́дꙋщихъ дѣ́тельнѣ пожи́вше, спаси́тєльнаѧ пꙋти̑ и҆спра́висте. тѣ́мже чистотꙋ̀ дꙋше́внꙋю нескве́рнѡ соблю́дше, вє́щнымъ до конца̀ противоста́сте: дх҃омъ же бжⷭ҇твеннымъ позлати́вшесѧ, беззла́тно и҆сцѣле́нїе недꙋ́гꙋющымъ подаетѐ, дво́ица свѧще́ннаѧ, свѣтоза́рный соꙋ́зе, просвѣще́нный бжⷭ҇твенный сопрꙋ́же, безсре́брєницы, въ ско́рбехъ и҆ недꙋ́зѣхъ посѣща́юще на́съ, и҆ дꙋ́шъ на́шихъ недꙋ́ги безме́зднѡ врачꙋ́юще.
Сті́хъ: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ.
Ге́рманово:
Вели́кихъ сподо́бльшесѧ дарѡ́въ, всехва́льнїи, въ смире́нномъ житїѝ на землѝ пожи́сте: и҆ проходѧ́ще всю́дꙋ, тꙋ́не недꙋ́гꙋющихъ стра̑сти врачꙋ́юще, ꙗ҆ви́стесѧ а҆́гг҃лѡвъ собесѣ̑дницы, космо̀ съ дамїа́номъ мꙋ́дрымъ, бра́тїѧ прекра̑снаѧ: и҆ на́шѧ стра̑сти моли́твами ва́шими ᲂу҆врачи́те.
Сла́ва, гла́съ ѕ҃:
Всегда̀ и҆мꙋ́ще хрⷭ҇та̀, дѣ́йствꙋюща въ ва́съ, ст҃і́и безсре́брєницы, чꙋдодѣ́йствꙋете въ мі́рѣ, немощствꙋ́ющыѧ врачꙋ́ете. и҆́бо врачевство̀ ва́ше и҆сто́чникъ є҆́сть неисчерпа́емый. че́рплемь же, па́че преистека́етъ, и҆ и҆злива́емь, и҆з̾ѡби́лꙋетъ: на кі́йждо де́нь и҆стощава́емь, и҆ ᲂу҆множа́етсѧ, всѣ̑мъ подаѧ̀, и҆ неѡскꙋдѣва́емь пребыва́ѧ: и҆ че́рплющїи насыща́ютсѧ врачева́нїй, то́йже пребыва́етъ неиждивꙋ́щъ. что̀ ᲂу҆̀бо ва́съ нарече́мъ; цѣли́тельныхъ ли врачє́въ дꙋ́шъ же и҆ тѣле́съ; цѣли́телей страсте́й неисцѣ́льныхъ, тꙋ́не и҆сцѣлѧ́ющихъ всѣ́хъ прїе́мшихъ дарова́нїе ѿ сп҃са хрⷭ҇та̀, подаю́щагѡ на́мъ ве́лїю ми́лость.
И҆ ны́нѣ, бг҃оро́диченъ:
Никто́же притека́ѧй къ тебѣ̀, посра́мленъ ѿ тебє̀ и҆схо́дитъ, пречⷭ҇таѧ бцⷣе дв҃о: но про́ситъ бл҃года́ти, и҆ прїе́млетъ дарова́нїе къ поле́зномꙋ проше́нїю.
И҆лѝ крⷭ҇тобг҃оро́диченъ. Подо́бенъ: Тридне́венъ:
Ви́дѧщи тѧ̀ распина́ема, хрⷭ҇тѐ, тебѐ ро́ждшаѧ, вопїѧ́ше: что̀ стра́нное, є҆́же ви́ждꙋ та́инство, сн҃е мо́й; ка́кѡ на дре́вѣ ᲂу҆мира́еши пло́тїю повѣ́шенъ, жи́зни пода́телю.
Тропа́рь, гла́съ и҃:
Ст҃і́и безсре́брєницы и҆ чꙋдотво́рцы, космо̀ и҆ дамїа́не, посѣти́те не́мѡщи на́шѧ: тꙋ́не прїѧ́сте, тꙋ́не дади́те на́мъ.
На ᲂу҆́трени, по а҃-й каѳі́смѣ, сѣда́ленъ ѻ҆ктѡ́иха, и҆лѝ ст҃ы́хъ, гла́съ д҃. Подо́бенъ: Ско́рѡ предварѝ:
Въ мі́рѣ бг҃оꙋго́дно житїѐ стѧжа́вше, богатносвѣ́тлїи, и҆сцѣле́нїѧ на́мъ ра́дость прїе́млющымъ, и҆звѣще́нїе ст҃ы̑мъ, че́стнѣ наꙋчи́вшесѧ, подаетѐ: ꙗ҆ви́стесѧ бо пресла́внїи вра́чеве болѧ́щихъ, хрⷭ҇тꙋ̀ споспѣшествꙋ́ющꙋ ва́мъ, космо̀ и҆ дамїа́не, ст҃і́и безмє́здницы.
Два́жды.
Сла́ва, и҆ ны́нѣ, бг҃оро́диченъ:
Пое́мъ тѧ̀, бг҃оневѣ́сто и҆ мт҃и хрⷭ҇та̀ бг҃а, сла́вѧще ржⷭ҇тво̀ твоѐ непостижи́мое, и҆́мже и҆зба́вихомсѧ ѿ ле́сти дїа́воли и҆ всѧ́ческихъ бѣ́дъ, влⷣчце бцⷣе, и҆ вѣ́рнѡ взыва́емъ: поми́лꙋй ста́до твоѐ, є҆ди́на всепѣ́таѧ.
По в҃-й каѳі́смѣ сѣда́ленъ, гла́съ и҃. Поⷣ: Повелѣ́нное та́йнѡ:
Ѿ безме́здныхъ сокро́вищъ чꙋдеса̀ содѣва́юще, пречⷭ҇тыхъ дарѡ́въ бл҃года́тныхъ, ꙗ҆ви́стесѧ раче́нїемъ бг҃олѣ́пнѣ, бога́тство воспрїе́мше небе́сное, и҆ сла́вꙋ ѡ҆ста́вльше земнꙋ́ю. тѣ́мъ пѣ́снь прино́симъ всѣ́хъ содѣ́телю, бл҃года́ть дарова́вшемꙋ ва́мъ и҆сцѣле́нїй.
Два́жды.
Сла́ва, и҆ ны́нѣ, бг҃оро́диченъ:
Непремѣ́ннаго бг҃а ꙗ҆́кѡ ро́ждшаѧ, и҆змѣне́ннаго мѧ̀ при́снѡ грѣхо́мъ, ᲂу҆твердѝ се́рдце моѐ, блага́ѧ, моли́твами мт҃рними твои́ми, ꙗ҆́кѡ да и҆ а҆́зъ зовꙋ́ ти, бцⷣе марі́е: поми́лꙋй ста́до твоѐ, є҆́же стѧжа́ла є҆сѝ, всенепоро́чнаѧ.
По полѷеле́и сѣда́ленъ, гла́съ и҃. Подо́бенъ: Премꙋ́дрости:
И҆сцѣле́нїй да́телїе и҆ чꙋдотво́рцы, и҆ чꙋде́съ свѣти́льники свѣтопрїе́мнїи всѣ̑мъ ꙗ҆ви́стесѧ дꙋхо́вною бл҃года́тїю: страсте́й бо пла́мень вѣ́рою прохлажда́ете, и҆ вѣ́рныхъ въ не́й смы́слъ согрѣва́ете. тѣ́мъ, врачевство̀ дꙋше́вное стѧжа́вше, бжⷭ҇твеннꙋю цр҃ковь ва́шꙋ, къ не́йже прибѣга́юще, вопїе́мъ: бг҃оно́сцы безсре́брєницы, моли́те хрⷭ҇та̀ бг҃а, согрѣше́нїй ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть ва́шꙋ.
Два́жды.
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ. Сті́хъ: Предзрѣ́хъ гдⷭ҇а предо мно́ю вы́нꙋ: Всѧ́кое дыха́нїе, Є҆ѵⷢ҇лїе ма́рка, зача́ло к҃г.
По н҃-мъ ѱалмѣ̀ стїхи́ра, гла́съ в҃:
Сѐ, ко́ль добро̀, и҆ ко́ль красно̀, є҆́же жи́ти бра́тїи вкꙋ́пѣ, въ дс҃ѣ ст҃ѣ́мъ, ꙗ҆́коже речѐ бг҃оѻте́цъ дв҃дъ, любо́вїю нелицемѣ́рною, и҆ вѣ́рою несомнѣ́нною, сло́вомъ и҆́стиннымъ, ꙗ҆́кѡ рѧ̑сны зла̑ты, дрꙋ́гъ дрꙋ́зѣ себѐ придержа́щѧ. прїиди́те ны́нѣ, благослови́мъ гдⷭ҇а, да́вшаго на́мъ ст҃ы̑ѧ своѧ̑ безме́здники, космꙋ̀ и҆ дамїа́на, врачѝ болѧ́щихъ, свѣти̑ла те́мныхъ, прогони́тели де́мѡнѡвъ, и҆́миже болѧ́щїи и҆сцѣлѧ́ютсѧ, и҆́миже ме́ртвїи воскреса́ютъ, и҆́миже прокаже́ннїи ѡ҆чища́ютсѧ, по гла́сꙋ гдⷭ҇ню: тꙋ́не ᲂу҆́бѡ прїѧ́ша, тꙋ́не же и҆ подаю́тъ болѧ́щымъ и҆сцѣлє́нїѧ. и҆́хже моли́твами, хрⷭ҇тѐ бж҃е, просвѣтѝ дꙋ́шы на́шѧ.
Ѻ҆́ба канѡ́на ѻ҆ктѡ́иха безъ мч҃ничнѡвъ, и҆ ст҃ы́хъ канѡ́нъ на ѕ҃. А҆ и҆дѣ́же хра́мъ, канѡ́нъ бцⷣы со і҆рмосо́мъ на ѕ҃: и҆ ст҃ы́хъ ѻ҆́ба канѡ́на на и҃:
Канѡ́нъ,
є҆гѡ́же краегране́сїе: Сла̑вныѧ врачѝ земны̑мъ пѣ́ти подоба́етъ.
Гла́съ ѕ҃. Пѣ́снь а҃. І҆рмо́съ:
Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.
Ѡ҆зарѧ́еми сла́вою бжⷭ҇твенною, бг҃освѣ́тлїи безсре́брєницы, ѡ҆зари́те на́шѧ дꙋ́шы, разорѧ́юще стра́стнꙋю мглꙋ̀, ꙗ҆́кѡ да ва́съ вѣ́рою почита́емъ.
Тлетво́рныхъ ѡ҆чи́щшесѧ пе́рвѣе страсте́й, болѣ́зней преложе́нїемъ, ѡ҆чища́ете на́шѧ лю̑тыѧ недꙋ́ги, мꙋ́дрїи, и҆ болѣ̑зни дꙋшє́вныѧ ѡ҆блегча́ете.
Ѿ всѣ́хъ влⷣки да́ръ прїѧ́сте, ст҃і́и, чꙋде́съ дарова̑нїѧ, на́шѧ и҆сцѣли́те мнѡ́гїѧ и҆ неꙋдобоисцѣ́льныѧ пло́ти стра̑сти, мо́лимсѧ.
Моле́нїе, безсре́брєницы и҆ вра́чеве, бг҃ꙋ принеси́те, ꙗ҆́кѡ да и҆зба́витъ ны̀ и҆скꙋше́нїй и҆ скорбе́й мно́гихъ, и҆ тре́петнагѡ и҆ стра́шнагѡ тогда̀ мꙋче́нїѧ.
Бг҃оро́диченъ:
Зако́нѡвъ є҆сте́ственныхъ кромѣ̀ ро́ждши, чⷭ҇таѧ, законода́телѧ і҆и҃са, и҆зба́вителѧ, є҆го́же молѝ и҆зба́вити ны̀, бцⷣе, мно́гихъ беззако́нїй на́шихъ.
Дрꙋгі́й канѡ́нъ,
є҆гѡ́же краегране́сїе: Пѣ́сньми почита́ю мꙋ̑дрыѧ безсре́брєники.
Творе́нїе і҆ѡа́нна дамаскина̀.
Гла́съ а҃. Пѣ́снь а҃. І҆рмо́съ:
Пои́мъ всѝ лю́дїе, ѿ го́рькїѧ рабо́ты фараѡ́ни і҆и҃лѧ и҆змѣ́ншемꙋ, и҆ во глꙋбинѣ̀ морстѣ́й нога́ми немо́крыми наста́вльшемꙋ, пѣ́снь побѣ́днꙋю, ꙗ҆́кѡ просла́висѧ.
Ѿ бл҃года́ти нача́льныѧ трⷪ҇цы, дво́ица чꙋ́днаѧ и҆ честна́ѧ свѣща́ема, всѣ̑мъ и҆сцѣлє́нїѧ приходѧ́щымъ вѣ́рнѡ подае́тъ, при́снѡ и҆сточа́ющи.
Тайноꙋчи́ми живонѡ́снымъ словесє́мъ, ꙗ҆́кѡ свѣти̑ла въ мі́рѣ возсїѧ́вше, стра́стнꙋю мглꙋ̀ ᲂу҆до́бь разгонѧ́ете теплото́ю вѣ́ры, всебл҃же́ннїи.
Зако́нꙋ покарѧ́ющесѧ сп҃совꙋ, всесла́внїи, сладостра́стїе ᲂу҆́бѡ плотско́е ѿри́нꙋша: добродѣ́тельными же дꙋша́ми свѣтлѣ́йше просвѣща́ющесѧ, въ мі́рѣ преизѧ́ществоваша, досточꙋ́днїи.
Бг҃оро́диченъ:
Во всего̀ человѣ́ка, въ твою̀ ᲂу҆тро́бꙋ всели́выйсѧ, бг҃ома́ти, неизрече́ннѣ ѡ҆блече́сѧ, и҆зъ ѻ҆ц҃а̀ возсїѧ́вый сн҃ъ безлѣ́тнѣ пребжⷭ҇твенный: томꙋ̀ воспои́мъ, ꙗ҆́кѡ просла́висѧ.
Пѣ́снь г҃. І҆рмо́съ:
Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Мі́ръ пое́тъ ва̑ша, ст҃і́и, всегда̀ мнѡ́гаѧ бл҃годѣѧ̑нїѧ, и҆ чꙋде́съ мно́жєства, чꙋдотво́рцы и҆ вра́чеве, а҆́гг҃лъ всѣ́хъ равностоѧ́тели.
Ва́съ ѻ҆бои́хъ свѣтода́телей мо́лимъ, ѕвѣ́здъ на высотѣ̀ лежа́щихъ цр҃кве та́йнѡ, космо̀ и҆ дамїа́не, сердца̀ вѣ́рныхъ ѡ҆зари́те.
Ка̑пли и҆сточа́юще при́снѡ, ст҃і́и, и҆сцѣле́нїѧ, ѡ҆мы́йте, всѣ́хъ дꙋше́внꙋю скве́рнꙋ, и҆ стра́стныѧ пло́ти то́ки всѧ̑ ᲂу҆ста́вите.
Сѐ, совокꙋпи́вшесѧ лю́дїе, ст҃і́и, ѿвсю́дꙋ, ва́шѧ воспѣ́ти вели̑кїѧ да́ры, внꙋ́трь цр҃кве ва́шеѧ: но всѣ́хъ молє́нїѧ и҆спо́лните.
Бг҃оро́диченъ:
Ст҃а́ѧ влⷣчце чⷭ҇таѧ, прест҃о́е сло́во воплоти́вшаѧ сло́вомъ, безслове́сныхъ мѧ̀ страсте́й, пою́ща тѧ̀ благоче́стнѡ бжⷭ҇твенными словесы̀, и҆зба́ви, пренепоро́чнаѧ.
И҆́нъ. І҆рмо́съ:
Оу҆твердѝ менѐ, хрⷭ҇тѐ, на недви́жимомъ ка́мени за́повѣдей твои́хъ, и҆ просвѣти́ мѧ свѣ́томъ лица̀ твоегѡ̀: нѣ́сть бо свѧ́тъ па́че тебє̀, чл҃вѣколю́бче.
Врачева́нїй и҆сто́чники, дарѡ́въ же бжⷭ҇твенныхъ стрꙋи̑, невеще́ственнагѡ свѣ́та свѣтлѣ̑йшаѧ прїѧ́тєлища, всѝ досто́йнѣ воспои́мъ.
Ꙗ҆́кѡ тѣлє́сныѧ и҆ дꙋшє́вныѧ врачꙋ́юще стра̑сти и҆ болѣ̑зни приходѧ́щихъ къ ва́мъ, всечⷭ҇тні́и, ᲂу҆се́рднѡ ны́нѣ, ꙗ҆́кѡ благодѣ́телїе, и҆сцѣлѧ́ете.
Пло́дными добродѣ́тельми ᲂу҆краша́еми, всѧ́кꙋ тлѣ́емꙋю сла́дость жите́йскꙋю ꙗ҆́вѣ ѿрази́сте, къ бж҃їей добро́тѣ непреста́ннѡ взира́юще.
Бг҃оро́диченъ:
Въ ви́дѣ на́шемъ пре́жде неви́димый ꙗ҆ви́сѧ, ѽ бг҃ороди́тельнице! сте́кшꙋсѧ съ пло́тїю бж҃ествꙋ̀ во ᲂу҆тро́бѣ твое́й прест҃ѣ́й, бг҃оневѣ́сто.
Сѣда́ленъ, гла́съ и҃. Подо́бенъ: Премꙋ́дрости:
Ѿ и҆сто́чника бе́здны, і҆и҃са, чꙋде́съ стрꙋи̑ благолѣ́пнѡ поче́рпше, ст҃і́и, та́йными тꙋ́чами страсте́й мра̑чныѧ ѻ҆́блаки ѿгонѧ́ете, и҆ недꙋ́гꙋющымъ человѣ́кѡмъ и҆сцѣлє́нїѧ подае́те. тѣ́мъ, полꙋчи́вше здра́вое весе́лїе ва́ми, пресла́внїи, ᲂу҆дивлѧ́еми зове́мъ: бг҃оно́снїи безсре́брєницы, моли́те хрⷭ҇та̀ бг҃а, согрѣше́нїй ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть ва́шꙋ.
Два́жды.
Сла́ва, и҆ ны́нѣ, бг҃оро́диченъ:
Ꙗ҆́кѡ всенепоро́чнаѧ невѣ́сто творца̀, ꙗ҆́кѡ неискꙋсомꙋ́жнаѧ мт҃и и҆зба́вителѧ, прїѧ́телище ꙗ҆́кѡ сꙋ́щи, ᲂу҆тѣ́шителѧ, препѣ́таѧ, беззако́нїю мѧ̀ сꙋ́ща скве́рное ѡ҆би́телище, и҆ бѣсѡ́мъ и҆гра́лище въ ра́зꙋмѣ бы́вша, потщи́сѧ ѿ тѣ́хъ ѕлодѣ́йства мѧ̀ и҆зба́вити, и҆ свѣ́тлое жили́ще добродѣ́телей совершѝ, свѣтоно́снаѧ нетлѣ́ннаѧ, ѿженѝ ѻ҆́блакъ страсте́й, и҆ вы́шнѧгѡ прича́стїѧ сподо́би, и҆ свѣ́та невече́рнѧгѡ, моли́твами твои́ми.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе, вѣ́рою пою́щымъ бжⷭ҇твєнныѧ стрⷭ҇ти твоѧ̑.
Пѣ́снь д҃. І҆рмо́съ:
Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.
Бжⷭ҇твенное ро́ждїе вои́стиннꙋ благопло́дно, ло́зы бж҃е́ствєнныѧ, та́йное вїно̀ и҆ска́пающыѧ, въ весе́лїи мꙋ̑дрыѧ безсре́бреники ᲂу҆блажи́мъ.
Ѻ҆рꙋ́жїе ꙗ҆ви́стесѧ, ᲂу҆стрѣлѧ́ющее врагѝ неви̑димыѧ: и҆́хже и҆ на́съ стрѣ́лъ и҆зба́вите, застꙋпа́юще на́шꙋ жи́знь, мꙋ́дрїи безсре́брєницы.
Не є҆́сть человѣ́къ, и҆́же кто̀ не стѧжа̀ бл҃гі̑ѧ ва́съ моли́твенники ко хрⷭ҇тꙋ̀, ст҃і́и безсре́брєницы: є҆го́же моли́те, ѻ҆гнѧ̀ вѣ́чнагѡ на́съ и҆зба́вити. (с. 14)
Ва́съ, бл҃же́ннїи, и҆́же призыва́етъ, и҆ на землѝ и҆ въ мо́ри бѣ́дъ всѧ́кихъ свобожда́етсѧ: тѣ́мъ и҆зба́вите на́съ сопроти́внагѡ ѡ҆бстоѧ́нїѧ.
Бг҃оро́диченъ:
Всели́всѧ гдⷭ҇ь, чⷭ҇таѧ, посредѣ̀ тебє̀, вмѣсти́лище ст҃о́е, и҆сто́чникъ мно́гихъ ꙗ҆влѧ́етъ и҆сцѣле́нїй, и҆ ѡ҆чище́нїе страсте́й, бцⷣе приснодв҃о.
И҆́нъ. І҆рмо́съ:
Разꙋмѣ́хъ, всеси́льне, твоѐ смотре́нїе, и҆ со стра́хомъ просла́вихъ тѧ̀, сп҃се.
Рече́нїю бжⷭ҇твенномꙋ ꙗ҆́вѣ возслѣ́дꙋюще, не зла́та блиста́нїѧ, нижѐ сребра̀, бжⷭ҇твеннїи, стѧжа́сте.
Сїѧ́юще бжⷭ҇твенными чꙋдесы̀ безсре́брєницы, всѧ̑ бл҃годѣ́тельствꙋютъ, бл҃года́ть подаю́ще.
Вра́чеве мꙋ́дрїи показа́стесѧ страсте́й болѣ́знемъ, и҆сцѣли́тєльныѧ рꙋ́ки простира́юще.
Бг҃оро́диченъ:
Да залани́тствѧтсѧ ны́нѣ ли́ца, бцⷣꙋ тѧ̀ не и҆сповѣ́дающи, пречⷭ҇таѧ влⷣчце.
Пѣ́снь є҃. І҆рмо́съ:
Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Бжⷭ҇твенное привлеко́ша просвѣще́нїе, сїѧ́нїѧ и҆сто́чникъ всеꙋсе́рднѣ возлюби́вше, и҆ просвѣща́ютъ на́съ всегда̀ чꙋде́съ зарѧ́ми великоимени́тїи.
Кра́сный сопрꙋ́гъ сꙋ́ще, мꙋ́дрїи, бразды̑ воздѣ́лавше дꙋ́шъ бг҃озна́меньми, при́снѡ пожина́юще стра́сти ꙗ҆́коже пле́велы, и҆ здра́вїѧ кла́съ стори́чествꙋюще.
Вжилѧ́еми крѣ́постїю хрⷭ҇то́вою, въ ѕло́бѣ си́льнагѡ всю̀ крѣ́пость погꙋби́сте: є҆гѡ́же мꙋчи́тельства на́съ и҆зба́вите, неꙋсы́пнїи предста́тели на́ши безсре́брєницы.
Ше́ствовати стєзѝ на́мъ пра̑выѧ и҆ твори́ти во́лю бж҃їю, ᲂу҆крѣпи́те, ст҃і́и, ᲂу҆ставлѧ́юще стра̑сти серде́цъ на́шихъ, и҆ тѣле́съ недꙋ́ги ѡ҆блегчева́юще.
Бг҃оро́диченъ:
И҆зба́ви мѧ̀, влⷣчце бл҃га́ѧ, и҆скꙋше́нїй врага̀, и҆ гее́нны мꙋче́нїѧ, и҆ ѡ҆бдержа́щагѡ мѧ̀ плѣне́нїѧ: и҆ не посрамѝ менє̀ пѣсносло́вѧщагѡ тѧ̀.
И҆́нъ. І҆рмо́съ:
Ѿ но́щи ᲂу҆́тренююще, пое́мъ тѧ̀, хрⷭ҇тѐ, ѻ҆ц҃ꙋ̀ собезнача́льна, и҆ сп҃са дꙋ́шъ на́шихъ: ми́ръ мі́рови пода́ждь, чл҃вѣколю́бче.
Ꙗ҆́кѡ пото́ки бг҃отѡ́чныѧ, и҆сточа́ете вѣ̑рнымъ благодѣѧ́нїѧ во́ды, дꙋшє́вныѧ же кꙋ́пнѡ и҆ тѣлє́сныѧ и҆сцѣлѧ́юще недꙋ́ги, сла́внїи безсре́брєницы.
И҆сто́чникъ бл҃года́ти, честні́и безсре́брєницы, разверза́юще, всѣ̑мъ здра́вїе раздае́те, вѣ́рою и҆ любо́вїю къ ва́мъ ны́нѣ притека́ющымъ.
Свѣ́тлїи, и҆ всемꙋ́дрїи ѕвѣ́зды, и҆̀же зе́млю ꙗ҆́вѣ ѡ҆небеси́вше, подо́бїемъ свѣ́тлости а҆́гг҃льскїѧ, непреста́ннѡ ѡ҆зарѧ́ютъ на́съ.
Бг҃оро́диченъ:
Превы́шша ꙗ҆ви́ласѧ є҆сѝ всѣ́хъ, творца̀, ѻ҆ц҃ꙋ̀ собезнача́льнаго, заче́нши, мт҃и дв҃о, и҆ ро́ждшаѧ мі́рꙋ сп҃са и҆ гдⷭ҇а.
Пѣ́снь ѕ҃. І҆рмо́съ:
Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.
Живꙋ́ще, мч҃ницы, ра́достнѡ на нб҃сѣ́хъ, въ чⷭ҇тны́й хра́мъ ва́шъ прїитѝ потщи́тесѧ, и҆ на́шѧ недꙋ́ги тѣлє́сныѧ и҆ сердє́чныѧ стра̑сти и҆сцѣли́те.
Въ бжⷭ҇твенное благолѣ́пїѧ ѡ҆дѣ́ѧвшесѧ краснѡ̀, ꙗ҆́кѡ въ сꙋгꙋ́бицꙋ, ст҃і́и, на́ги ны̀ сꙋ́щѧ добродѣ́телей, бж҃е́ственнѡ ѡ҆дѣ́йте, и҆ страсте́й безче́стїѧ ны́нѣ ѡ҆бнажи́те.
Ꙗ҆́кѡ ᲂу҆краше́нїемъ чꙋде́съ ѻ҆дѣ́ѧни всегда̀, спаси́телїе мі́рꙋ ꙗ҆ви́стесѧ: мїрска́гѡ ᲂу҆́бѡ вре́да всѧ̑ ны̀ и҆зба́вите, ст҃і́и, и҆ страсте́й нече́стїѧ и҆ мꙋче́нїѧ.
Оу҆мертви́ше, ст҃і́и, стра̑сти всѧ̑ пло́ти смертоно́сныѧ бл҃года́тїю, животво́рными чꙋде́съ приложе́ньми, ѡ҆живлѧ́ете стра́ждꙋщыѧ, и҆ вра́тъ сме́рти и҆збавлѧ́ете.
Бг҃оро́диченъ:
Не ѡ҆пали́въ ᲂу҆тро́бы твоеѧ̀ ѻ҆́гнь сы́й і҆и҃съ, и҆зъ тебє̀ пло́тїю происхо́дитъ: сего̀, чⷭ҇таѧ, молѝ, ѻ҆гнѧ̀ и҆ всѧ́кихъ мꙋ́къ и҆зба́вити вѣ́рою воспѣва́ющыѧ тѧ̀.
И҆́нъ. І҆рмо́съ:
Прⷪ҇ро́ка спа́слъ є҆сѝ ѿ ки́та, чл҃вѣколю́бче, и҆ менѐ и҆зъ глꙋбины̀ прегрѣше́нїй возведѝ, молю́сѧ.
Спаси́тєльныѧ цѣли́тели, благодѣ́тели бг҃омꙋ̑дрыѧ, космꙋ́ же и҆ дамїа́на бжⷭ҇твєнныѧ, ᲂу҆се́рднѡ да почти́мъ.
Цѣломꙋ́дрїе соблю́дше, и҆ ра́зꙋмомъ ᲂу҆кра́шени, косма̀ и҆ дамїа́нъ бжⷭ҇твеннїи со хрⷭ҇то́мъ ра́дꙋютсѧ.
Є҆диномꙋ́дреннѡ пожи́вше, є҆динодꙋ́шнѡ по́стничествовавше, кꙋ́пнѡ врачева̑нїѧ подаѧ́ти на́мъ ввѣ́рени бы́сте.
Бг҃оро́диченъ:
Свѣ́тъ непристꙋ́пный родила̀ є҆сѝ пло́тїю, пречⷭ҇таѧ, ве́сь мі́ръ просвѣща́юща зарѧ́ми бж҃ества̀.
Конда́къ, гла́съ в҃. Подо́бенъ: Твє́рдыѧ:
Бл҃года́ть прїи́мше и҆сцѣле́нїй, простира́ете здра́вїе сꙋ́щымъ въ нꙋ́ждахъ, вра́чеве, чꙋдотво́рцы пресла́внїи: но ва́шимъ посѣще́нїемъ ра́тникѡвъ де́рзѡсти низложи́те, мі́ръ и҆сцѣлѧ́юще чꙋдесы̀.
І҆́косъ:
Всѧ́кагѡ ра́зꙋма и҆ мꙋ́дрости прехо́дитъ сло́во мꙋ́дрыхъ врачє́въ, и҆ всѣ̑мъ зна́нїе подаю́тъ: высоча́йшагѡ бо бл҃года́ть прїе́мше, неви́димѡ здра́вїе да́рꙋютъ всѣ̑мъ. ѿню́дꙋже и҆ мнѣ̀ по́вѣсти бл҃года́ть дарова́сѧ пѣ́ти, ꙗ҆́кѡ бг҃онѡ́сныѧ ᲂу҆го́дники хрⷭ҇тѡ́вы и҆ слꙋжи́тели, и҆сцѣле́нїй мно́жество подаю́щыѧ: болѣ́зней бо всѧ̑ и҆збавлѧ́ютъ, мі́ръ и҆сцѣлѧ́юще чꙋдесы̀.
Пѣ́снь з҃. І҆рмо́съ:
Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.
Впери́сте ᲂу҆́мъ на нбⷭ҇наѧ до́брыхъ приложе́ньми, и҆ бы́сте ѻ҆́бщницы бжⷭ҇твенныхъ дарѡ́въ: крила́ти сꙋ́ще ѻ҆рлѝ, всю̀ прохо́дите зе́млю, чꙋдодѣ́йствꙋюще при́снѡ.
Просвѣти́стесѧ, ꙗ҆́коже добросїѧ́нное, безсре́брєницы, зла́то, бжⷭ҇твенною бл҃года́тїю и҆сцѣле́нїй ѡ҆богати́сте мно́жєства. тѣ́мъ ᲂу҆ще́дрите ны̀, ѡ҆бꙋрева́ємыѧ лю́тыхъ нахожде́нїй и҆скꙋше́ньми.
Преложи́вше гдⷭ҇ꙋ чи́сты ва́шѧ дꙋ́хи, безсре́брєницы, да́ръ ѿ негѡ̀ прїѧ́сте, нечи̑стыѧ дꙋ́хи прогони́ти всегда̀: и҆́хже ѕло́бы го́рькїѧ и҆зба́вите всѣ́хъ на́съ.
Оу҆снꙋ́сте пра́веднѡ до́лжнымъ сно́мъ, мꙋ́дрїи безсре́брєницы, и҆ неꙋсы́пнїи моли́твєнницы є҆стѐ ѡ҆ вѣ́рныхъ: тѣ́мъ дꙋ́шъ на́шихъ при́снѡ, и҆ тѣле́съ лю̑тыѧ стра̑сти ᲂу҆спи́те.
Бг҃оро́диченъ:
Молѧ́щи не преста́й чл҃вѣколю́бца бг҃а на́шего, всенепоро́чнаѧ, ꙗ҆́кѡ да прїи́мемъ всеконе́чнѣ ѿпꙋще́нїе ѕлы́хъ, и҆ полꙋчи́мъ на нб҃сѣ́хъ ᲂу҆готѡ́ваннаѧ блага̑ѧ лю́бѧщымъ є҆го̀.
И҆́нъ. І҆рмо́съ:
Тебѐ ᲂу҆́мнꙋю, бцⷣе, пе́щь, разсмотрѧ́емъ, вѣ́рнїи: ꙗ҆́коже бо ѻ҆́троки спасѐ трѝ превозноси́мый, мі́ръ ѡ҆бновѝ, во чре́вѣ твое́мъ всецѣ́лъ, хва́льный ѻ҆тцє́въ и҆ препросла́вленъ.
Всецѣ̑лы бг҃ꙋ бг҃омꙋ́дреннѣ ꙗ҆ви́стесѧ, всѝ бг҃а вмѣсти́тєльны: мі́ръ бо ве́сь бг҃а ра́ди ѡ҆ста́висте, стопа́мъ послѣ́дꙋюще сп҃сѡвымъ, всесла́внїи, бг҃олѣ́пнѣ, ѻ҆тцє́въ бг҃а почита́юще.
Преесте́ственнѡ, вра́чевє всеизрѧ́днѣйшїи, немощны́хъ ꙗ҆́звы рꙋкодѣ́йствы та́инственными всѧ̑ и҆сцѣлѧ́ете, лѣчбы̑ спаси́тєльныѧ ѿ сокро́вищъ почерпа́юще бжⷭ҇твенныхъ, и҆ воспѣва́юще бг҃а пресла́внаго.
Вѣнце́мъ твоегѡ̀ црⷭ҇твїѧ, влⷣко, и҆ багрѧни́цею свѣ́тлою ᲂу҆краси́лъ є҆сѝ бг҃олѣ́пнѣ превозлю́бльшыѧ добро́тꙋ непости́жнꙋю, хрⷭ҇тѐ, твоеѧ̀ красоты̀, и҆ вѣ́рныхъ благодѣ́тєли ѻ҆́бщыѧ сїѧ̑ показа́лъ є҆сѝ.
Бг҃оро́диченъ:
Восто́кꙋ свы́ше, пречⷭ҇таѧ, ꙗ҆́вльшꙋсѧ на землѝ, показа́ласѧ є҆сѝ всеблаголѣ́пнаѧ две́рь и҆ всесвѣ́тлаѧ, мі́ръ ѡ҆зарѧ́ющи лꙋча́ми чистоты̀, и҆ вѣ̑рнымъ лꙋчы̀ чꙋде́съ при́снѡ посыла́ющи.
Пѣ́снь и҃. І҆рмо́съ:
И҆зъ пла́мене преподѡ́бнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. Тѧ̀ превозно́симъ во всѧ̑ вѣ́ки.
Недꙋ́гѡвъ всѧ́ческихъ сꙋ́ще ра̑тницы, посо́бїемъ бжⷭ҇твеннагѡ дх҃а, ст҃і́и, ᲂу҆толи́те на́шихъ дꙋ́шъ недꙋ́гѡванїѧ, и҆ тѣле́съ ѡ҆блегчи́те болѣ̑зни.
Ви́дителїе гдⷭ҇ни ны́нѣ красоты̀ сꙋ́ще и҆́стиннѡ, присѣща́йте се́й кра́сный бг҃оно́сный хра́мъ ва́шъ, и҆ и҆сто́чникъ чꙋде́съ мно́гихъ соверша́йте.
Ѿ и҆сто́чника ра́йска и҆сходѧ́ще, ꙗ҆́кѡ рѣ́ки двѣ̀, всѐ напаѧ́ете лицѐ землѝ и҆сцѣле́нїй стрꙋѧ́ми, недꙋ́гѡвъ и҆зсꙋша́юще тꙋ́чы.
Бл҃жє́нныѧ надє́жды прїи́мше, ѿ всѣ́хъ досто́йнѡ блажите́сѧ, ꙗ҆́кѡ и҆спо́лнителїе, блаже́ннїи, бг҃а на́шегѡ бжⷭ҇твенныхъ хотѣ́нїй, безсре́брєницы, ꙗ҆́вльшесѧ.
Вра́чевє неисцѣ́льныхъ страсте́й, безсре́брєницы, неисцѣ̑льныѧ стра̑сти на́шѧ и҆сцѣли́те, и҆ и҆скꙋше́нїй бꙋ́рю ᲂу҆толи́те, и҆ ᲂу҆ны́нїѧ разжени́те ѻ҆́блаки.
Бг҃оро́диченъ:
Со а҆́гг҃лы ст҃ы́ми, пѣсносло́вимъ ѻ҆ц҃а̀, и҆ сло́ва, и҆ дх҃а ст҃а́го, є҆ди́но въ тре́хъ ѵ҆поста́сѣхъ бжⷭ҇тво̀, є҆ди́но црⷭ҇тво, и҆ є҆ди́нꙋ вла́сть.
И҆́нъ. І҆рмо́съ:
Въ пещѝ ѻ҆́троцы і҆и҃лєвы, ꙗ҆́коже въ горни́лѣ, добро́тою благоче́стїѧ чистѣ́е зла́та блеща́хꙋсѧ, глаго́люще: бл҃гослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те во всѧ̑ вѣ́ки.
Оу҆ме́рше мі́ра сегѡ̀ кра̑снымъ, и҆ сребролю́бїе недꙋ́гъ ѿсѣ́кше, наименова́ни бы́сте, мꙋ́дрїи, всѣ́ми безсре́брєницы, вопїю́щими: всѧ̑ дѣла̀ гдⷭ҇а по́йте, и҆ превозноси́те во всѧ̑ вѣ́ки.
Вѣ̑чныѧ прича̑стницы жи́зни бы́сте проѧвле́ннѣ: жи́зни бо тлѣ́емыѧ всѧ̑ ѡ҆ста́висте кра̑снаѧ, согла́снѣ зовꙋ́ще: благослови́те всѧ̑ дѣла̀ гдⷭ҇а, по́йте и҆ превозноси́те во всѧ̑ вѣ́ки.
И҆зба́ви всѧ̑, влⷣко хрⷭ҇тѐ, лю́тыхъ болѣ́зней моли́твами безсре́бреникѡвъ, и҆ сподо́би при́снѡ согла́снѣ зва́ти тебѣ̀: бл҃гослови́те всѧ̑ дѣла̀ гдⷭ҇а, по́йте и҆ превозноси́те во всѧ̑ вѣ́ки.
Бг҃оро́диченъ:
Ра́дꙋющесѧ, всѝ вѣ́рнїи, и҆ бл҃года́тїю ᲂу҆крѣ́пльшесѧ, и҆̀же ржⷭ҇тво́мъ твои́мъ и҆зба́влени бы́вше, чⷭ҇таѧ, мт҃и дв҃о, непреста́ннѡ вопїе́мъ: бл҃гослови́те всѧ̑ дѣла̀ гдⷭ҇а, по́йте и҆ превозноси́те во всѧ̑ вѣ́ки.
Пѣ́снь ѳ҃. І҆рмо́съ:
Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ.
Се́й хра́мъ ва́шъ чꙋдесы̀ всеблаголѣ́пнѡ, ꙗ҆́кѡ ѕвѣзда́ми свѣ́тлыми, ᲂу҆краша́етсѧ, и҆, согла́снѡ веселѧ́сѧ, всегда̀ блажи́тъ, и҆ честнꙋ́ю ва́шꙋ па́мѧть пра́зднꙋетъ благоче́стнѡ, честні́и безсре́брєницы.
Ꙗ҆́кѡ свѣ́тъ, ꙗ҆́кѡ два̀ вели̑ка сл҃нца, разꙋ́мнꙋю тве́рдь ᲂу҆краша́ете, безсре́брєницы, и҆ зна́менїй зарѧ́ми просвѣща́ете всѣ́хъ вѣ́рныхъ сердца̀. тѣ́мъ зове́мъ: разрѣши́те тмꙋ̀ страсте́й на́шихъ, мо́лимсѧ.
Въ се́ла вы̑шнѧѧ вселѧ́еми, ст҃і́и, посредѣ̀ на́съ бы́ти неви́димѡ милосе́рдꙋйте, и҆̀же посредѣ̀ бжⷭ҇твеннагѡ хра́ма ва́шегѡ, пѣ̑сни возсыла́ющихъ вседержи́телю, и҆ блажа́щихъ прилѣ́жнѡ ва́съ, всехва́льнїи.
Землѧ̀ съ вы́шними весели́тсѧ въ свѣ́тлый бжⷭ҇твенный пра́здникъ ва́шъ, ст҃і́и: є҆го́же соверша́ющихъ на́съ и҆зба́вите тмы̀ и҆ болѣ́зней, и҆ всѧ́кїѧ тѣсноты̀, и҆ є҆́же во а҆́дѣ лю́тагѡ, мꙋ́дрїи, мꙋче́нїѧ.
Бг҃оро́диченъ:
Тре́петное рожде́нїе и҆мꙋ́щи, всечⷭ҇таѧ, въ стра́шный де́нь и҆спыта́нїѧ, молю́сѧ, стра́шнагѡ ѿвѣ́та и҆зба́ви мѧ̀, и҆ спаса́емыхъ стоѧ́нїѧ прича́стника сотворѝ, вѣ́рнѡ пою́ща тѧ̀, бг҃ора́дованнаѧ.
И҆́нъ. І҆рмо́съ:
Тебѐ свѣ́тлꙋю свѣщꙋ̀, и҆ мт҃рь бж҃їю, пречꙋ́днꙋю сла́вꙋ, и҆ вы́шшꙋю всѣ́хъ тва́рей, пѣ́сньми велича́емъ.
Пѣ́сньми мꙋ́дрꙋю дво́ицꙋ свѣ́та ᲂу҆́мнагѡ, ѡ҆блиста́ющꙋю зарю̀, и҆ просвѣще́нїе всѣ̑мъ подаю́щꙋ, непреста́ннѡ ᲂу҆блажа́емъ.
Крѣ́пость дꙋше́внагѡ здра́вїѧ творѧ́ще вѣ̑рнымъ, и҆ тѣлє́сныѧ врачꙋ́ете ввѣ́реннїи ва́мъ стра̑сти, ꙗ҆́кѡ спаси́телїе. тѣ́мже и҆ воспѣва́еми є҆стѐ при́снѡ.
Бг҃освѣ̑тлаѧ свѣти̑ла, ᲂу҆́мнѣ нб҃о честны́ѧ цр҃кве свѣтодаѧ́нїѧ ли́тїемъ, ны́нѣ свѣ́тъ подаю́ще, непреста́ннѣ ѡ҆зарѧ́ютъ.
Ѿ честны́ѧ трⷪ҇цы бг҃озва́ннаѧ дво́ица похвалѧ́ема, и҆сточа́етъ просѧ́щымъ врачева́нїй всѣ̑мъ подаѧ̑нїѧ, любо́вїю тѣ́хъ блажа́щымъ.
Бг҃оро́диченъ:
Тебѐ, свѣ́та ѻ҆́блакъ, и҆ ст҃ы́й кївѡ́тъ, и҆ всесвѣ́тлꙋю две́рь мы́сленнагѡ сл҃нца, ꙗ҆́кѡ бцⷣꙋ, пѣ́сньми велича́емъ.
Свѣти́ленъ. Подо́бенъ: Дх҃омъ во ст҃и́лищи:
Бл҃года́ть врачева́нїй ѿ бг҃а прїе́мше, безсре́брєницы бл҃же́ннїи, є҆́же врачева́ти недꙋ̑жныѧ, и҆ и҆сцѣлѧ́ти всѧ̑, вѣ́рнѡ притека́ющыѧ къ бжⷭ҇твенномꙋ ва́шемꙋ хра́мꙋ. сегѡ̀ ра́ди согла́снѡ ᲂу҆блажа́емъ, досто́йнѣ честнꙋ́ю ва́шꙋ па́мѧть.
Бг҃оро́диченъ:
Родила̀ є҆сѝ, пречⷭ҇таѧ, бж҃їе бг҃а сло́во, мі́рови спаси́тельное соверша́ющаго всемꙋ́дрѣ строе́нїе и҆зрѧ́дное. сегѡ̀ ра́ди тѧ̀ всѝ пѣсносло́вимъ досто́йнѣ, ꙗ҆́кѡ молѧ́щꙋюсѧ къ немꙋ̀, и҆зба́витисѧ на́мъ недꙋ́гѡвъ и҆ всѧ́кихъ бѣ́дъ.
На хвали́техъ стїхи̑ры, на д҃ гла́съ а҃. А҆нато́лїево:
Бл҃года́ть и҆сцѣле́нїй ѿ бг҃а прїе́мше, безсре́бреннѡ стра̑сти дꙋ́шъ и҆ тѣле́съ на́шихъ те́плѣ и҆сцѣлѧ́ете, всемі́рнїи безсре́брєницы: тѣ́мже ва́ми хрⷭ҇то́съ вѣ̑рнымъ да́нное здра́вїе да́рꙋѧ, свѣти̑ла нелє́стнаѧ, ва́съ показꙋ́етъ вселе́ннѣй. того̀ ᲂу҆моли́те, спасти́сѧ дꙋша́мъ на́шымъ.
Ѿ вы́шнѧгѡ про́мысла бе́зднꙋ и҆сцѣле́нїй поче́рпше, всѣ̑мъ и҆сточа́ете вѣ̑рнымъ и҆сцѣлє́нїѧ, безсре́брєницы: преесте́ственнѣ бо недꙋ́гꙋющихъ стра̑сти, рꙋкодѣ̑йствїи та́инственными, ѿ сокро́вищъ дх҃а лѣчбы̑ предлага́юще спаси́тєльныѧ, стра́ждꙋщихъ и҆сцѣлѧ́ете. тѣ́мже хра́мъ че́стенъ бы́вше живонача́льныѧ трⷪ҇цы, въ ва́съ бо ꙗ҆́вѣ ѻ҆би́тель сотворѝ: є҆́йже моли́тесѧ, спасти́сѧ дꙋша́мъ на́шымъ.
Гла́съ в҃. Ге́рманово:
Ра́дꙋетсѧ ли́къ ст҃ы́хъ во вѣ́ки, црⷭ҇тво бо нбⷭ҇ное наслѣ́доваша: землѧ̀ мо́щы и҆́хъ прїе́мши, благово́нїе возвѣ́ѧ: рабѝ хрⷭ҇то́вы бы́ша, всели́вшесѧ въ жи́знь вѣ́чнꙋю.
Вра́чевє немощствꙋ́ющихъ, сокрѡ́вища врачева́нїй, спаси́телїе вѣ́рныхъ, безсре́брєницы всесла́внїи, въ нꙋ́ждахъ зовꙋ́щыѧ и҆ болѧ́щыѧ и҆сцѣли́те, съ ѳеодо́тїею молѧ́ще бг҃а бл҃га́го, и҆зба́витисѧ на́мъ ѿ сѣ́тей вра́жїихъ.
Сла́ва, гла́съ д҃. Ѳеофа́ново:
И҆сто́чникъ и҆сцѣле́нїй и҆мꙋ́ще, ст҃і́и безсре́брєницы, и҆сцѣлє́нїѧ подае́те всѣ̑мъ тре́бꙋющымъ, ꙗ҆́кѡ велича́йшихъ дарѡ́въ сподо́бльшесѧ ѿ приснотекꙋ́щагѡ и҆сто́чника сп҃са хрⷭ҇та̀. рече́ бо къ ва́мъ гдⷭ҇ь, ꙗ҆́кѡ є҆диноревни́телємъ а҆по́столѡвъ: сѐ, да́хъ ва́мъ вла́сть надъ дꙋ̑хи нечи́стыми, ꙗ҆́коже ты́ѧ и҆згони́ти, и҆ лѣчи́ти всѧ́къ недꙋ́гъ и҆ всѧ́кꙋю ꙗ҆́зю. тѣ́мже въ повелѣ́нїихъ є҆гѡ̀ до́брѣ пожи́вше, тꙋ́не прїѧ́сте, тꙋ́не подае́те, врачꙋ́юще стра̑сти дꙋ́шъ и҆ тѣле́съ на́шихъ.
И҆ ны́нѣ, бг҃оро́диченъ. Подо́бенъ: Ꙗ҆́кѡ до́блѧ:
Ра́дꙋйсѧ, прибѣ́жище хрⷭ҇тїа́нъ и҆ ᲂу҆твержде́нїе. ꙳ ра́дꙋйсѧ, лѣ́ствице нбⷭ҇наѧ. ꙳ ра́дꙋйсѧ, сокро́вище дѣ́вства. ꙳ ра́дꙋйсѧ, бцⷣе, кївѡ́те слове́сный ꙳ бжⷭ҇твенныѧ сла́вы. ꙳ ра́дꙋйсѧ, похвало̀ всегѡ̀ мі́ра и҆ ᲂу҆твержде́нїе, ꙳ па́дшихъ воззва́нїе ꙳, ски́нїа всесвѣ́тлаѧ, ꙳ ст҃а́ѧ и҆ всекра́снаѧ.
Крⷭ҇тобг҃оро́диченъ. Подо́бенъ: то́йже:
Распина́ема хрⷭ҇та̀ чл҃вѣколю́бца ви́дѧщи, пречⷭ҇таѧ, ꙳ и҆ ре́бра и҆скопова́ема копїе́мъ ꙳ пла́чꙋщи вопїѧ́ше: ꙳ что̀ сїѐ, сн҃е мо́й; ꙳ что̀ тѝ безблагода́тнїи лю́дїе возда́ша, за ꙗ҆̀же сотвори́лъ є҆сѝ дѡ́браѧ и҆̀мъ; ꙳ и҆ тщи́шисѧ безча́дствовати мѧ̀, вселюбе́знѣйшїй: ꙳ ᲂу҆дивлѧ́юсѧ, бл҃гоꙋтро́бне, ꙳ твоемꙋ̀ во́льномꙋ распѧ́тїю.
А҆́ще же Славосло́вїю вели́комꙋ бы́ти, то̀ на Хвали́техъ и҆ сі́и стїхи̑ры двѣ̀ приложѝ, да бꙋ́детъ на ѕ҃. А҆́ще же нѝ, на стїхо́внѣ ѻ҆ктѡ́иха. Та́же сті́хъ: Сѐ, что̀ добро̀, и҆лѝ что̀ красно̀, но є҆́же жи́ти бра́тїи вкꙋ́пѣ;
Гла́съ ѕ҃:
Свѣ́тлаѧ и҆ просвѣще́ннаѧ возсїѧ̀ дне́сь па́мѧть безсре́бреникѡвъ хрⷭ҇то́выхъ, свѣ́тлѡ ѡ҆блиста́ющи лꙋча́ми чꙋде́съ по все́й землѝ мі́ръ. прїиди́те ᲂу҆́бѡ празднолю́бцы, вѣ́рнѡ торжествꙋ́емъ: прїиди́те къ моще́мъ ст҃ы́хъ ᲂу҆се́рднѡ всѝ стеце́мсѧ, ꙗ҆́кѡ да ско́рое и҆сцѣле́нїе ѿ ни́хъ прїи́мемъ неѡскꙋ́днѣ: безме́зднѡ бо подаю́тъ всѣ̑мъ, дѣ́йствомъ ст҃а́гѡ дх҃а, и҆сцѣле́нїй дарова̑нїѧ.
Сла́ва, гла́съ и҃:
Кто̀ не ᲂу҆диви́тсѧ; кто̀ не просла́витъ; кто̀ не воспое́тъ вѣ́рнѡ, мꙋ́дрыхъ и҆ пресла́вныхъ безсре́бреникѡвъ чꙋдеса̀; ꙗ҆́кѡ и҆ по ст҃о́мъ и҆́хъ преставле́нїи, всѣ̑мъ подаю́тъ, притека́ющымъ вѣ́рою, бога́тнѡ врачева̑нїѧ: и҆ честны̑ѧ и҆ ст҃ы̑ѧ мѡ́щи тѣ́хъ то́чатъ бл҃года́ть врачева́нїй. ѽ дво́ице ст҃а́ѧ! ѽ честны̑ѧ главы̑! ѽ мꙋ́дросте и҆ сла́во, ѿ бг҃а да́нныѧ ва́мъ бл҃года́ти! тѣ́мже пѣ́сньми зове́мъ бл҃годѣ́телю бг҃ꙋ, показа́вшемꙋ ты́ѧ на врачева́нїе дꙋ́шъ и҆ тѣле́съ на́шихъ.
И҆ ны́нѣ, бг҃оро́диченъ: Влⷣчце прїимѝ:
Крⷭ҇тобг҃оро́диченъ. Подо́бенъ: Мч҃ницы твоѝ:
Не терплю̀, ча́до, ви́дѧщи тѧ̀ на дре́вѣ ᲂу҆снꙋ́вша, бо́дрость всѣ̑мъ подаю́щаго: ꙗ҆́кѡ да, дре́вле престꙋпле́нїѧ плодо́мъ, сно́мъ поги́бельнымъ ᲂу҆снꙋ́вшымъ, бжⷭ҇твеннꙋю и҆ спаси́тельнꙋю бо́дрость пода́си, дв҃а гл҃го́лаше пла́чꙋщи, ю҆́же велича́емъ.
На лїтꙋргі́и, бл҃жє́нна ѻ҆ктѡ́иха на д҃: и҆ ѿ канѡ́на ст҃ы́хъ, пѣ́снь г҃. Прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ. Сті́хъ: Предзрѣ́хъ гдⷭ҇а предо мно́ю вы́нꙋ, ꙗ҆́кѡ ѡ҆деснꙋ́ю менє̀ є҆́сть, да не подви́жꙋсѧ. А҆пⷭ҇лъ къ корі́нѳѧнѡмъ, зача́ло рн҃г. А҆ллилꙋ́їа, гла́съ в҃. Сті́хъ: Сѐ, что̀ добро̀, и҆лѝ что̀ красно̀, но є҆́же жи́ти бра́тїи вкꙋ́пѣ; Є҆ѵⷢ҇лїе матѳе́а, зача́ло л҃д, ѿ полꙋ̀. Прича́стенъ. Ра́дꙋйтесѧ пра́веднїи: