Мѣ́сѧца тогѡ́же въ г҃і-й де́нь. И҆́же во свѧты́хъ ѻ҆ц҃а̀ на́шегѡ і҆ѡа́нна, а҆рхїепі́скопа кѡнстанті́нѧ гра́да, златоꙋ́стагѡ.

На ма́лѣй вече́рни, стїхи̑ры, на д҃, гла́съ а҃. Поⷣ: Нбⷭ҇ныхъ чинѡ́въ:

Крⷭ҇ти́телѧ подража́лъ є҆сѝ тезоиме́ннаго до́брѣ ꙳ воздержа́нїемъ, ѻ҆́ч҃е, ꙳ и҆ и҆лїю̀ вели́каго посто́мъ и҆ чистото́ю: ꙳ ре́вностїю ᲂу҆ѧ́звленъ ѻ҆бои́хъ, златоꙋ́сте, ꙳ на ца́рское вели́чество смѣ́льствꙋеши, ꙳ ꙗ҆́кѡ па́стырь цр҃кве хрⷭ҇то́вы.

Два́жды.

Бжⷭ҇твеннымъ вдохнове́нїемъ сло́ва ꙳ проте́къ, по пи́санномꙋ, всю̀ зе́млю, ꙳ вѣща́нїе догма́тѡвъ твои́хъ, ѻ҆́ч҃е, просвѣтѝ мі́ръ: ꙳ ѿве́рзлъ є҆сѝ на́мъ покаѧ́нїѧ вхо́дъ, ꙳ ни́щихъ попече́нїемъ, ꙳ воз̾ѡбража́ѧ хрⷭ҇то́во є҆ѵⷢ҇лїе.

Чи́стый дꙋшѝ твоеѧ̀ и҆ нескве́рный свѣ́тъ ꙳ со́лнєчныѧ лꙋчы̀ ѡ҆сїѧва́етъ мі́рꙋ ꙳ догма́тѡвъ благоче́стїѧ, ꙳ ѻ҆́ч҃е мꙋ́дре і҆ѡа́нне златоꙋ́сте, ꙳ и҆ мглꙋ̀ ѿго́нитъ, ꙳ и҆ просвѣща́етъ вселе́ннꙋю ко благоче́стїю.

Сла́ва, гла́съ д҃:

Бы́лъ є҆сѝ, златоꙋ́сте, бг҃одохнове́нный ѻ҆рга́нъ, чрезъ є҆го́же на́мъ дх҃ъ ст҃ы́й провозгласѝ: благознамени́тымъ бо гла́сомъ протечѐ концы̀ вѣща́нїе ᲂу҆че́нїй твои́хъ: и҆ подража́тель бы́въ а҆пⷭ҇лѡвъ, прпⷣбне, ли́къ пости́же ѻ҆́ный, є҆гѡ́же вожделѣ́лъ є҆сѝ. моли́сѧ гдⷭ҇ꙋ, всеблаже́нне, ᲂу҆мири́ти мі́ръ и҆ спастѝ дꙋ́шы на́шѧ.

И҆ ны́нѣ, бг҃оро́диченъ:

И҆зба́ви ны̀ ѿ нꙋ́ждъ на́шихъ, мт҃и хрⷭ҇та̀ бг҃а, ро́ждшаѧ всѣ́хъ творца̀, да всѝ зове́мъ тѝ: ра́дꙋйсѧ, є҆ди́на предста́тельство дꙋ́шъ на́шихъ.

На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:

Трꙋба̀ златови́днаѧ ꙳, свѣ́тлѡ вопїю́щи ꙳ бж҃їѧ вели̑чїѧ, ꙳ показа́лсѧ є҆сѝ, і҆ѡа́нне, ꙳ мі́ра въ концѣ́хъ.

Сті́хъ: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ.

Зако́нъ, ꙗ҆́коже мѡѷсе́й, ꙳ прїѧ́лъ є҆сѝ ѿ гдⷭ҇а, златоꙋ́сте, ꙳ мі́ръ ᲂу҆мꙋдрѧ́ѧ и҆ просвѣща́ѧ ꙳ бжⷭ҇твенными твои́ми ᲂу҆чє́нїи.

Сті́хъ: Свѧще́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ.

Проповѣ́дникъ ꙗ҆́кѡ и҆́стиннѡ ꙳ бжⷭ҇твеннагѡ црⷭ҇твїѧ ꙳ бы́лъ є҆сѝ, златосло́ве, ꙳ вопїѧ̀: пока́йтесѧ, ꙳ погрꙋжа́ѧ ѿча́ѧнїе.

Сла́ва, гла́съ и҆ подо́бенъ: то́йже:

Трⷪ҇цы чⷭ҇тны́ѧ во є҆динонача́лїе ꙳ наꙋчи́лъ є҆сѝ вѣ́ровати, ꙳ ѻ҆ц҃а̀, сло́ва, дх҃а, ꙳ златоꙋ́сте, ѻ҆́ч҃е на́шъ.

И҆ ны́нѣ, бг҃оро́диченъ:

Дв҃о, ꙳ и҆зъ тебє̀ ро́ждшагосѧ ꙳ бг҃а сло́ва молѝ, бцⷣе, ꙳ съ златосло́внымъ і҆ѡа́нномъ, ꙳ є҆́же спастѝ дꙋ́шы на́шѧ.

Та́же, ны́нѣ ѿпꙋща́еши: Трист҃о́е. По Ѻ҆́ч҃е на́шъ:

Тропа́рь, гла́съ и҃:

Оу҆́стъ твои́хъ, ꙗ҆́коже свѣ́тлость ѻ҆гнѧ̀, возсїѧ́вши бл҃года́ть, вселе́ннꙋю просвѣтѝ: не сребролю́бїѧ мі́рови сокрѡ́вища сниска̀, высотꙋ̀ на́мъ смиреномꙋ́дрїѧ показа̀. но твои́ми словєсы̀ наказꙋ́ѧ, ѻ҆́ч҃е і҆ѡа́нне златоꙋ́сте, молѝ сло́ва хрⷭ҇та̀ бг҃а, спасти́сѧ дꙋша́мъ на́шымъ.

Сла́ва, и҆ ны́нѣ, бг҃оро́диченъ: И҆́же на́съ ра́ди:

На вели́цѣй вече́рни, стїхологисꙋ́емъ, Бл҃же́нъ мꙋ́жъ: а҃-й а҆нтїфѡ́нъ.

На Гдⷭ҇и, воззва́хъ, стїхи̑ры на и҃, гла́съ д҃: Поⷣ: Ꙗ҆́кѡ до́блѧ:

Златокова́ннꙋю трꙋбꙋ̀, ꙳ бг҃одохнове́нный ѻ҆рга́нъ, ꙳ догма́тѡвъ пꙋчи́нꙋ неисчерпа́емꙋю, ꙳ цр҃кве ᲂу҆твержде́нїе, ꙳ ᲂу҆́мъ нбⷭ҇ный, ꙳ премꙋ́дрости глꙋбинꙋ̀, ꙳ ча́шꙋ всезлатꙋ́ю, ꙳ и҆злива́ющꙋю рѣ́ки ᲂу҆че́нїй медото́чныхъ, ꙳ и҆ напаѧ́ющꙋю тва́рь, ꙳ пѣ́сненнѡ воспои́мъ.

Три́жды.

Ѕвѣздꙋ̀ незаходи́мꙋю, ꙳ зарѧ́ми просвѣща́ющꙋю ᲂу҆че́нїй ꙳ всю̀ подсо́лнечнꙋю, ꙳ покаѧ́нїѧ проповѣ́дника, ꙳ гꙋ́бꙋ всезлатꙋ́ю, ꙳ мокротꙋ̀ лю́тꙋю невѣ́дѣнїѧ взе́млющꙋю, ꙳ и҆ ѡ҆роша́ющꙋю и҆ста́ѧвшаѧ сердца̀ грѣхмѝ, ꙳ і҆ѡа́нна досто́йнѡ ꙳ златослове́снаго почти́мъ.

Три́жды.

Земны́й а҆́гг҃лъ и҆ нбⷭ҇ный человѣ́къ, ꙳ ла́стовица благоглаго́ливаѧ и҆ многогла́снаѧ, ꙳ добродѣ́телей сокро́вище, ꙳ ка́мень неразсѣ́дный, ꙳ вѣ́рныхъ воѡбраже́нїе, ꙳ мꙋ́ченикѡмъ подо́бенъ, ꙳ равностоѧ́тель ст҃ы́хъ а҆́гг҃лъ, а҆по́столѡвъ є҆динонра́венъ, ꙳ въ пѣ́снехъ да возвели́читсѧ златоꙋ́стъ.

Два́жды.

Сла́ва, гла́съ ѕ҃:

Прпⷣбне треблаже́нне ст҃ѣ́йшїй ѻ҆́ч҃е, па́стырю до́брый, и҆ началопа́стырѧ хрⷭ҇та̀ ᲂу҆ченичѐ, положи́вый дꙋ́шꙋ за ѻ҆́вцы: са́мъ и҆ ны́нѣ, всеблагохва́льне і҆ѡа́нне златоꙋ́сте, просѝ моли́твами твои́ми, дарова́ти на́мъ ве́лїю ми́лость.

И҆ ны́нѣ, бг҃оро́диченъ: Кто̀ тебѐ не ᲂу҆блажи́тъ:

Вхо́дъ, прокі́менъ днѐ, и҆ чтє́нїѧ.

При́тчей чте́нїе.

[Глава̀ і҃] Па́мѧть пра́веднагѡ съ похвала́ми, и҆ благослове́нїе гдⷭ҇не на главѣ̀ є҆гѡ̀. Блаже́нъ человѣ́къ, и҆́же ѡ҆брѣ́те премꙋ́дрость: и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ: все́ же честно́е недосто́йно є҆ѧ̀ є҆́сть. Долгота́ бо дне́й, и҆ лѣ̑та живота̀ въ десни́цѣ є҆ѧ̀: въ шꙋ́ицѣ же є҆ѧ̀ бога́тство и҆ сла́ва: ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ ми́лость на ѧ҆зы́цѣ но́ситъ. Послꙋ́шайте ᲂу҆̀бо менє̀, ѽ ча̑да! честна̑ѧ бо рекꙋ̀: и҆ бл҃же́нъ человѣ́къ, и҆́же пꙋти̑ моѧ̑ сохрани́тъ: и҆схо́ди бо моѝ, и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Сегѡ̀ ра́ди молю̀ ва́съ, и҆ предлага́ю мо́й гла́съ сыновѡ́мъ человѣ́чєскимъ: ꙗ҆́кѡ а҆́зъ премꙋ́дрость ᲂу҆стро́ихъ, совѣ́тъ и҆ ра́зꙋмъ и҆ смы́слъ а҆́зъ призва́хъ. Мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. А҆́зъ менѐ лю́бѧщыѧ люблю̀, и҆́щꙋщїи же менѐ ѡ҆брѧ́щꙋтъ бл҃года́ть. Разꙋмѣ́йте ᲂу҆́бѡ, неѕло́бивїи, кова́рство, ненака́заннїи же, прилага́йте сердца̀. Послꙋ́шайте менє̀ и҆ па́ки, честна̑ѧ бо рекꙋ̀: и҆ ѿве́рзꙋ ѿ ᲂу҆сте́нъ пра̑ваѧ, ꙗ҆́кѡ и҆́стинѣ поꙋчи́тсѧ горта́нь мо́й, мє́рзски же предо мно́ю ᲂу҆стны̀ лжи̑выѧ. Съ пра́вдою всѝ глаго́лы ᲂу҆́стъ мои́хъ: ничто́же въ ни́хъ стро́потно, нижѐ развраще́нно. Всѧ̑ пра̑ва сꙋ́ть разꙋмѣва́ющымъ, и҆ прѡ́ста ѡ҆брѣта́ющымъ ра́зꙋмъ. Наꙋча́ю бо ва́съ и҆́стинѣ, да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а.

Премꙋ́дрости соломѡ́ни чте́нїе.

[Глава̀ і҃] Оу҆ста̀ првⷣнагѡ ка́плютъ премꙋ́дрость: ᲂу҆стнѣ́ же мꙋже́й. мꙋ́дрыхъ вѣ́дѧтъ бл҃года́ть. Оу҆ста̀ мꙋ́дрыхъ поꙋча́тсѧ премꙋ́дрости, пра́вда же и҆збавлѧ́етъ и҆́хъ ѿ сме́рти. Сконча́вшꙋсѧ мꙋ́жꙋ пра́веднꙋ, не поги́бнетъ наде́жда. Сы́нъ бо пра́веденъ ражда́етсѧ въ живо́тъ, и҆ во бл҃ги́хъ свои́хъ пло́дъ пра́вды ѡ҆б̾и́метъ. Свѣ́тъ пра́вєднымъ всегда̀, и҆ ѿ гдⷭ҇а ѡ҆брѧ́щꙋтъ бл҃года́ть и҆ сла́вꙋ. Ѧ҆зы́къ мꙋ́дрыхъ дѡ́браѧ свѣ́сть, и҆ въ се́рдцѣ и҆́хъ почі́етъ мꙋ́дрость. Лю́битъ гдⷭ҇ь прпⷣбныѧ сердца̀, прїѧ́тни же є҆мꙋ̀ всѝ непоро́чнїи въ пꙋтѝ. [ѕ҃] Мꙋ́дрость гдⷭ҇нѧ просвѣща́етъ лицѐ разꙋ́мнагѡ. Постига́етъ бо жела́ющыѧ ю҆̀, пре́жде да́же разꙋмѣ́ти ю҆̀: и҆ ᲂу҆до́бь ᲂу҆́зритсѧ ѿ лю́бѧщихъ ю҆̀. [з҃] Оу҆́треневавый къ не́й не ᲂу҆трꙋди́тсѧ: и҆ бдѧ́й є҆ѧ̀ ра́ди вско́рѣ безъ печа́ли бꙋ́детъ. Ꙗ҆́кѡ досто́йныхъ є҆ѧ̀ сама̀ ѡ҆бхо́дитъ и҆́щꙋщи, и҆ во стезѧ́хъ є҆ѧ̀ ꙗ҆влѧ́етсѧ и҆̀мъ благопрїе́мнѣ. Мꙋ́дрости никогда́же ѡ҆долѣ́етъ ѕло́ба. [и҃] Си́хъ ра́ди и҆ рачи́тель бы́хъ добро́ты є҆ѧ̀: и҆ возлюби́хъ ю҆̀, и҆ поиска́хъ ѿ ю҆́ности моеѧ̀: и҆ взыска́хъ невѣ́стꙋ привестѝ себѣ̀, ꙗ҆́кѡ всѣ́хъ влⷣка возлюбѝ ю҆̀: Таи́нница бо є҆́сть бж҃їѧ хи́трости, и҆ ѡ҆брѣта́тельница дѣ́лъ є҆гѡ̀. Трꙋды̀ є҆ѧ̀ сꙋ́ть добродѣ́тєли: цѣломꙋ́дрїю же и҆ ра́зꙋмꙋ та̀ ᲂу҆чи́тъ, пра́вдѣ и҆ мꙋ́жествꙋ, и҆́хже потре́бнѣе ничто́же є҆́сть въ житїѝ человѣ́кѡмъ. А҆́ще же и҆ мно́гагѡ и҆скꙋ́сства жела́етъ кто̀, вѣ́сть дрє́внѧѧ, и҆ бы́ти хотѧ̑щаѧ разсмо́тритъ: свѣ́сть и҆зви̑тїѧ слове́съ, и҆ разрѣшє́нїѧ гада́нїй: зна́мєнїѧ и҆ чꙋдеса̀ проразꙋмѣ́етъ, и҆ сбытїѧ̑ време́нъ и҆ лѣ́тъ: и҆ всѣ̑мъ совѣ́тникъ є҆́сть бла́гъ, ꙗ҆́кѡ безсме́ртїе є҆́сть въ не́й, и҆ бл҃госла́вїе во ѻ҆бще́нїи слове́съ є҆ѧ̀. Сегѡ̀ ра́ди бесѣ́довахъ ко гдⷭ҇ꙋ, и҆ помоли́хсѧ є҆мꙋ̀, и҆ рѣ́хъ ѿ всегѡ̀ се́рдца моегѡ̀: [ѳ҃] бж҃е ѻ҆тцє́въ и҆ гдⷭ҇и ми́лости, сотвори́вый всѧ̑ сло́вомъ твои́мъ, и҆ мꙋ́дростїю твое́ю ᲂу҆стро́ивый человѣ́ка, да владѣ́етъ бы́вшими ѿ тебє̀ тварьмѝ, и҆ да ᲂу҆правлѧ́етъ мі́ръ въ прпⷣбїи и҆ пра́вдѣ, да́ждь мѝ твои́хъ престо́лѡвъ присѣдѧ́щꙋю премꙋ́дрость, и҆ не ѿлꙋчѝ менє̀ ѿ ѻ҆́трѡкъ твои́хъ, ꙗ҆́кѡ а҆́зъ ра́бъ тво́й, и҆ сы́нъ рабы́ни твоеѧ̀. Послѝ ю҆̀ съ нб҃съ ѿ ст҃а́гѡ жили́ща твоегѡ̀, и҆ ѿ престо́ла сла́вы твоеѧ̀, да сꙋ́щи со мно́ю наꙋчи́тъ мѧ̀, что̀ бл҃гоꙋго́дно є҆́сть предъ тобо́ю: и҆ наста́витъ мѧ̀ въ ра́зꙋмъ, и҆ сохрани́тъ мѧ̀ въ сла́вѣ свое́й. Помышлє́нїѧ бо сме́ртныхъ всѧ̑ боѧзли̑ва, и҆ погрѣши́тєльна ᲂу҆мышлє́нїѧ и҆́хъ.

Премꙋ́дрости соломѡ́ни чте́нїе.

[Глава̀ д҃] Похвалѧ́емꙋ пра́ведникꙋ, возвеселѧ́тсѧ лю́дїе: безсме́ртїе бо є҆́сть па́мѧть є҆гѡ̀, ꙗ҆́кѡ ѿ гдⷭ҇и познава́етсѧ, и҆ ѿ человѣ́кѡвъ: и҆ ᲂу҆го́да гдⷭ҇ꙋ дꙋша̀ є҆гѡ̀. [ѕ҃] Возлюби́те ᲂу҆́бѡ, ѽ мꙋ́жїе, мꙋ́дрость, и҆ поживетѐ: восхощи́те є҆ѧ̀, и҆ нака́зани бꙋ́дете: нача́ло бо є҆ѧ̀ любы̀ и҆ соблюде́нїе зако́на. Почти́те премꙋ́дрость, да во вѣ́ки ца́рствꙋете. [з҃] Возвѣщꙋ̀ ва́мъ, и҆ не скры́ю ѿ ва́съ та̑инъ бж҃їихъ: ꙗ҆́кѡ то́й мꙋ́дрости наста́вникъ є҆́сть, и҆ мꙋ́дрыхъ и҆спра́витель и҆ всѧ́комꙋ смы́слꙋ и҆ дѣ́лꙋ хитре́цъ. И҆ всѣ̑мъ смы́слѡмъ наꙋчи́тъ мꙋ́дрость: є҆́сть бо въ не́й дꙋ́хъ разꙋ́менъ и҆ ст҃ъ, и҆ сїѧ́нїе свѣ́та присносꙋ́щнагѡ, и҆ ѻ҆́бразъ бл҃гости бж҃їѧ: та́ѧ дрꙋ́ги бж҃їѧ и҆ прⷪ҇ро́ки ᲂу҆строѧ́етъ. Бл҃голѣ́пнѣйши же є҆́сть со́лнца, и҆ па́че всѧ́кагѡ сотворе́нїѧ ѕвѣ́здъ, свѣ́тꙋ сосꙋжда́ема, ѡ҆брѣта́етсѧ пе́рвѣйши. Та́ѧ ᲂу҆гожда́ющыѧ є҆́й ѿ болѣ́зни и҆зба́ви, и҆ наста́ви на стези̑ пра̑выѧ. Дадѐ и҆̀мъ ра́зꙋмъ и҆мѣ́ти ст҃ъ, и҆ сохранѝ ѿ ловѧ́щихъ, и҆ по́двигъ крѣ́покъ подадѐ и҆̀мъ. Да разꙋмѣ́ютъ всѝ, ꙗ҆́кѡ си́льнѣйши всегѡ̀ є҆́сть благоче́стїе: и҆ никогда́же премо́жетъ ѕло́ба мꙋ́дрости, нижѐ пре́йдетъ ѕлы̑ѧ, ѡ҆блича́ющи сꙋ́дъ. Реко́ша же въ себѣ̀, помы́сливши непра́веднѡ: наси́льствꙋемъ пра́веднаго, и҆ не пощади́мъ преподо́бства є҆гѡ̀, ни ᲂу҆срами́мсѧ сѣди́нъ ста́рости многолѣ́тны. Бꙋ́детъ бо на́мъ крѣ́пость зако́нъ: и҆ ᲂу҆лови́мъ пра́веднаго, ꙗ҆́кѡ неꙋго́денъ на́мъ є҆́сть: и҆ проти́витсѧ дѣлѡ́мъ на́шымъ, и҆ поно́ситъ на́мъ ѿпаде́нїе зако́на, и҆ ѡ҆блича́етъ на́мъ согрѣшє́нїѧ наказа́нїѧ на́шегѡ. Возвѣща́етъ на́мъ ра́зꙋмъ и҆мѣ́ти бж҃їй, и҆ ѻ҆́трока гдⷭ҇нѧ себѐ и҆менꙋ́етъ. Бы́сть на́мъ на ѡ҆бличе́нїе помышле́нїй на́шихъ, и҆ тѧ́жекъ на́мъ є҆́сть, и҆ ви́димь: ꙗ҆́кѡ неподо́бно и҆ны̑мъ житїѐ є҆гѡ̀, и҆ и҆змѣнє́ны стєзѝ є҆гѡ̀. въ порꙋга́нїе вмѣни́хомсѧ є҆мꙋ̀: и҆ ᲂу҆далѧ́етсѧ ѿ пꙋте́й на́шихъ, ꙗ҆́кѡ ѿ нечисто́тъ, и҆ блажи́тъ послѣ̑днѧѧ пра́ведныхъ. Оу҆ви́димъ ᲂу҆́бѡ, а҆́ще словеса̀ є҆гѡ̀ и҆́стинна сꙋ́ть, и҆скꙋ́симъ, ꙗ҆̀же сбыва́ютсѧ є҆мꙋ̀. Рꙋга́нїемъ и҆ мꙋ́кою и҆стѧ́жемъ є҆го̀, да разꙋмѣ́емъ кро́тость є҆гѡ̀, и҆ и҆скꙋ́симъ безѕло́бство є҆гѡ̀. Сме́ртїю без̾ѡбра́зною ѡ҆сꙋ́димъ є҆го̀, бꙋ́детъ бо посѣще́нїе ѿ слове́съ є҆гѡ̀. Сїѧ̑ помы́слиша, и҆ прельсти́шасѧ: ѡ҆слѣпи́ бо ѧ҆̀ ѕло́ба и҆́хъ. и҆ не разꙋмѣ́ша та̑инъ бж҃їихъ, и҆ не разсꙋди́ша, ꙗ҆́кѡ ты̀ є҆сѝ бг҃ъ є҆ди́нъ, живота̀ и҆мѣ́ѧй и҆ сме́рти вла́сть, и҆ спаса́ѧй во вре́мѧ ско́рби, и҆ и҆збавлѧ́ѧй ѿ всѧ́кагѡ ѕла̀. Ще́дръ и҆ ми́лостивъ, и҆ даѧ́й преподѡ́бнымъ свои̑мъ благода́ть, и҆ свое́ю мы́шцею гѡ́рдымъ противлѧ́ѧйсѧ.

На лїті́и стїхи́ра хра́ма: И҆ ст҃а́гѡ самогла́сны. Гла́съ а҃. А҆нато́лїево:

Свѣти́льниче і҆ѡа́нне, ᲂу҆ста̀ златосїѧ̑ннаѧ, ᲂу҆добре́нїе бг҃одѣ́ѧнныхъ добродѣ́телей, ѡ҆бита́лище писа́нїй тайнонача́льныхъ: ты̀ пречи́стое всест҃а́гѡ дх҃а нетлѣ́нное сокро́вище бы́лъ є҆сѝ, ѿню́дꙋже возвесели́лъ є҆сѝ всю̀ цр҃ковь спаси́тельнымъ твои́мъ сло́вомъ сꙋ́щимъ: дерзнове́нїе ᲂу҆́бѡ ѡ҆брѣ́тъ къ бг҃ꙋ, въ наслажде́нїи го́рнѧгѡ наслѣ́дїѧ, моли́сѧ ѡ҆ на́съ, ѻ҆́ч҃е ст҃ѣ́йшїй.

И҆злїѧ́сѧ бл҃года́ть во ᲂу҆стна́хъ твои́хъ, прпⷣбне ѻ҆́ч҃е і҆ѡа́нне златоꙋ́сте: сегѡ̀ ра́ди пома́за тѧ̀ бг҃ъ а҆рхїере́а лю́демъ свои̑мъ, па́ствити па́ствꙋ є҆гѡ̀ въ прпⷣбїи и҆ пра́вдѣ. тѣ́мже, препоѧ́санъ ѻ҆рꙋ́жїемъ си́льнагѡ, пресѣ́клъ є҆сѝ ѧ҆зыковрє́дїѧ є҆ресе́й, и҆ ны́нѣ не преста́й молѧ́сѧ ᲂу҆мири́ти мі́ръ и҆ спастѝ дꙋ́шы на́шѧ.

Гла́съ в҃. Стꙋді́тово:

Тѧ̀ вели́каго а҆рхїере́а и҆ па́стырѧ, неѕло́бива и҆ прпⷣбна, покаѧ́нїѧ проповѣ́дника, златословє́снаѧ ᲂу҆ста̀ бл҃года́ти, восхвалѧ́юще любо́вїю, мо́лимсѧ: препода́ждь на́мъ моли̑твы твоѧ̑, ѻ҆́ч҃е, во спасе́нїе дꙋ́шъ на́шихъ.

Геѡ́ргїа нїкомиді́йскагѡ:

Златы́ми словєсы̀ твои́ми, цр҃ковь ꙗ҆́кѡ ᲂу҆́тварїю злато́ю ᲂу҆краси́вшисѧ, і҆ѡа́нне златоꙋ́сте, невѣ́стнически ра́дꙋющисѧ, вопїе́тъ тебѣ̀: насы́тихсѧ ѿ твои́хъ златото́чныхъ во́дъ, ᲂу҆краси́вшисѧ златотка́нными и҆ медозлаты́ми питїи̑: ѿ дѣѧ́нїѧ бо въ видѣ́нїе возвождꙋ́сѧ, кро́ткихъ ра́ди твои́хъ поꙋче́нїй: и҆ со хрⷭ҇то́мъ, ᲂу҆́мнымъ женихо́мъ соединѧ́юсѧ, ца́рствꙋющи съ ни́мъ. тѣ́мъ и҆ мы̀, совокꙋ́пльшесѧ въ па́мѧть твою̀, зове́мъ: не преста́й молѧ́сѧ за ны̀ ко гдⷭ҇ꙋ, є҆́же спастѝ дꙋ́шы на́шѧ.

Прїѧ́лъ є҆сѝ, і҆ера́рше, го́рнѣйшꙋю фїлосо́фїю, и҆ внѣ̀ мі́ра бы́лъ є҆сѝ, живѧ̀ вы́ше ви́димыхъ, и҆ зерца́ло нескве́рное бж҃їе бжⷭ҇твеннѡ показа́лсѧ є҆сѝ: и҆ сы́й при́снѡ соедине́нъ свѣ́томъ, свѣ́тъ прїима́лъ є҆сѝ, и҆ ꙗ҆снѣ́йшїй блаже́нный полꙋчи́лъ є҆сѝ коне́цъ: моли́сѧ, златоꙋ́сте, ѡ҆ дꙋша́хъ на́шихъ.

Гла́съ д҃.

Глагѡ́лы златоза́рнѣйшими зе́млю ꙗ҆́вѣ напои́лъ є҆сѝ, златоточи́вꙋ и҆мѣ́ѧ дꙋ́шꙋ же и҆ тѣ́ло, всебл҃же́нне: всѧ̑ позлати́въ словєсы̀ твои́ми, златодѣ́лателю догма́тѡвъ твои́хъ, и҆ кни̑ги написа́въ златопи̑санныѧ, возлетѣ́лъ є҆сѝ на нб҃са̀. тѣ́мъ вопїе́мъ тѝ: златоточи́ве и҆ златоꙋ́сте, хрⷭ҇та̀ бг҃а молѝ, спастѝ дꙋ́шы на́шѧ.

Сла́ва, гла́съ то́йже. Ге́рманово:

Подоба́ше ца́рствꙋющемꙋ градѡ́въ, і҆ѡа́нна и҆мѣ́ти а҆рхїере́а, ꙗ҆́коже нѣ́кꙋю ᲂу҆́тварь ца́рскꙋю и҆ златокова́ннꙋю трꙋбꙋ̀, всѧ̑ ѡ҆глаша́ющꙋ концы̀ спаси́тельными догма̑ты: и҆ всѧ̑ совоздви́жꙋщꙋю къ ре́вности пѣ́нїй бг҃олѣ́пныхъ. къ немꙋ́же возопїи́мъ: златосло́ве и҆ златоꙋ́сте, хрⷭ҇та̀ бг҃а молѝ, спастѝ дꙋ́шы на́шѧ.

И҆ ны́нѣ, бг҃оро́диченъ:

Тѧ̀ стѣ́нꙋ стѧжа́хомъ, бцⷣе пречⷭ҇таѧ, и҆ благоꙋти́шное приста́нище, и҆ ᲂу҆твержде́нїе: тѣ́мже мо́лимъ, и҆̀же въ житїѝ ѡ҆бꙋрева́емїи, ᲂу҆пра́ви и҆ спаси́ ны.

На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ:

Ра́дꙋйсѧ, златоза́рный и҆ кра́сный, цр҃кве бг҃одохнове́нный ѻ҆рга́не: ѧ҆зы́че, человѣколю́бнѡ покаѧ́нїѧ на́мъ разли̑чныѧ ѻ҆́бразы подписꙋ́ющїй: ᲂу҆́ме златозра́чный: ла́стовице златоꙋ́стаѧ: голꙋби́це же, ѱало́мски, междора́мїѧми златосїѧ́ющаѧ добродѣ́телей на ѕла́цѣ: стрꙋѧ̀ златови́днѣйшаѧ, пролива́ющаѧ во́ды: ᲂу҆ста̀ бжⷭ҇твєннаѧ, и҆ бжⷭ҇твеннагѡ чл҃вѣколю́бїѧ порꙋчи́тєльнаѧ: хрⷭ҇та̀ молѝ, низпосла́ти дꙋша́мъ на́шымъ ве́лїю ми́лость.

Сті́хъ: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ.

Ра́дꙋйсѧ, сиро́тъ ѻ҆тє́цъ, ѡ҆би́димыхъ бы́страѧ по́мощь, ᲂу҆бѡ́гимъ подаѧ́нїе, а҆́лчꙋщихъ пи́ща, грѣша́щихъ и҆справле́нїе, дꙋ́шъ благоꙋго́днѣйшїй врачꙋ̀, и҆ честнѣ́йшїй: бг҃осло́вїѧ высо́кое и҆звѣ́ство, сказа́нїе писа́нїй дх҃о́вныхъ, зако́нъ дѣ́йственнѣйшїй, пра́вило пра́вѣйшее, видѣ́нїѧ, и҆ дѣѧ́нїѧ премꙋ́дросте кра́йнѣйшаѧ, хрⷭ҇та̀ низпосла́ти дꙋша́мъ на́шымъ молѝ ве́лїю ми́лость.

Сті́хъ: Оу҆ста̀ пра́веднагѡ поꙋча́тсѧ премꙋ́дрости, и҆ ѧ҆зы́къ є҆гѡ̀ возглаго́летъ сꙋ́дъ.

Ра́дꙋйсѧ, цр҃ковь вопїе́тъ тѝ женихꙋ̀ своемꙋ̀, ѽ златоꙋ́сте! просїѧ́вый во все́мъ мі́рѣ па́че лꙋ́чь со́лнечныхъ добродѣ́тельми и҆ словєсы̀ би́серными, па́че мꙋ́дрыхъ премꙋ́дрѣйшїй и҆ ри́торѡвъ превысоча́йшїй, и҆́стинныхъ догма̑тъ, побо́рниче, лжѝ ѡ҆бличи́телю, покаѧ́нїѧ ᲂу҆чи́телю. ра́дꙋйсѧ, тиша́йшаѧ зна́нїѧ пꙋчи́но, и҆́же по па́ѵлꙋ вели́комꙋ, ᲂу҆ста̀ и҆ ᲂу҆́мъ наслѣ́довавъ хрⷭ҇то́въ: є҆го́же молѝ, дꙋша́мъ на́шымъ да́ти ве́лїю ми́лость.

Сла́ва, гла́съ ѕ҃:

Трꙋба̀ златогла́снаѧ показа́лсѧ є҆сѝ, златоглаго́ливе златоꙋ́сте, златодѣ́йствꙋѧ сердца̀ вѣ́рныхъ златотрꙋ́дными твои́ми ᲂу҆чє́нїи: прⷪ҇ро́чески бо и҆зы́де вѣща́нїе и҆справле́нїй твои́хъ, прпⷣбне ѻ҆́ч҃е: и҆ мі́ра всегѡ̀ концы̀ просвѣти́лъ є҆сѝ.

И҆ ны́нѣ: Творе́цъ, и҆ и҆зба́витель мо́й:

На благослове́нїи хлѣ́бѡвъ, тропа́рь ст҃а́гѡ, два́жды.

и҆ Бцⷣе дв҃о, ра́дꙋйсѧ: є҆ди́ножды.

А҆ и҆дѣ́же всено́щное бдѣ́нїе не быва́етъ: по тропарѣ̀, Сла́ва, и҆ ны́нѣ, бг҃оро́диченъ, и҆ ѿпꙋ́стъ.

На ᲂу҆́трени, на Бг҃ъ гдⷭ҇ь, тропа́рь два́жды.

Сла́ва, и҆ ны́нѣ, бг҃оро́диченъ воскрⷭ҇ный.

По а҃-мъ стїхосло́вїи сѣда́ленъ, гла́съ в҃. Поⷣ: Ли́къ а҆́гг҃льскїй:

Златоѻбра́знаѧ ѕвѣзда̀ земны̑мъ возсїѧ́лъ є҆сѝ, златоꙋ́сте свѣ́тлѡ, і҆ѡа́нне всеблаже́нне, просвѣща́ѧ концы̀ зарѧ́ми слове́съ твои́хъ. тѣ́мъ, дне́сь всесвѧтꙋ́ю твою̀ па́мѧть пра́зднꙋюще, грѣхѡ́въ всѣ́хъ про́симъ ѡ҆ставле́нїѧ.

Два́жды.

Сла́ва, и҆ ны́нѣ, бг҃оро́диченъ:

Безневѣ́стнаѧ чⷭ҇таѧ бцⷣе дв҃о, є҆ди́на вѣ́рныхъ предста́тельнице и҆ покро́ве, бѣ́дъ и҆ скорбе́й и҆ лю́тыхъ ѡ҆бстоѧ́нїй всѧ̑ и҆зба́ви, на тѧ̀ ᲂу҆пова́нїе, ѻ҆трокови́це, и҆мꙋ́щыѧ, и҆ дꙋ́шы на́шѧ спасѝ бжⷭ҇твенными моли́твами твои́ми.

По в҃-мъ стїхосло́вїи сѣда́ленъ, гла́съ є҃. Поⷣ: Собезнача́льное сло́во:

Цвѣтника̀ слове́съ, бг҃одохнове́нныхъ писа́нїй, наставлѧ́ющаго на́съ къ покаѧ́нїю, мнѡ́гаѧ и҆скꙋшє́нїѧ претерпѣ́вша, златоꙋ́стаго вѣ́рнїи, ꙗ҆́кѡ наꙋчи́вшесѧ ѿ негѡ̀, почти́мъ по до́лгꙋ: мо́литсѧ бо гдⷭ҇ꙋ спасти́сѧ дꙋша́мъ на́шымъ.

Два́жды.

Сла́ва, и҆ ны́нѣ, бг҃оро́диченъ:

Оу҆жа́сно чꙋ́до зача́тїѧ, и҆ несказа́ненъ ѻ҆́бразъ рождества̀ въ тебѣ̀ позна́сѧ, приснодв҃о чⷭ҇таѧ, ᲂу҆жаса́етъ мо́й ᲂу҆́мъ и҆ ᲂу҆дивлѧ́етъ помышле́нїе: сла́ва твоѧ̀, бцⷣе, всѣ̑мъ простре́сѧ, ко спасе́нїю дꙋ́шъ на́шихъ.

По полѷеле́и сѣда́ленъ, гла́съ и҃. Подо́бенъ: Премꙋ́дрости:

Сокро́вище ꙗ҆ви́лсѧ є҆сѝ дꙋхо́вное бжⷭ҇твенными твои́ми словєсы̀, ꙗ҆́кѡ вои́стиннꙋ мі́ра, златоꙋ́сте, просїѧ́въ концє́мъ, бога́тство спаси́тельное всѣ̑мъ по́далъ є҆сѝ, наставлѧ́ѧ, бл҃же́нне, лю́ди къ покаѧ́нїю. тѣ́мъ и҆ тече́нїе соверши́въ житїѧ̀, прⷭ҇то́лꙋ предстои́ши вы́шнѧгѡ, приснопа́мѧтне і҆ѡа́нне златоꙋ́сте: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Нбⷭ҇нꙋю две́рь и҆ кївѡ́тъ, прест҃ꙋ́ю го́рꙋ, свѣ́тлый ѻ҆́блакъ воспои́мъ, неѡпали́мꙋю кꙋпинꙋ̀, слове́сный ра́й, є҆́ѵы воззва́нїе, вселе́нныѧ всеѧ̀ вели́кое сокро́вище, ꙗ҆́кѡ спасе́нїе въ не́й содѣ́ласѧ мі́ра, и҆ ѡ҆ставле́нїе дре́внихъ согрѣше́нїй. сегѡ̀ ра́ди вопїе́мъ є҆́й: моли́сѧ сн҃ꙋ твоемꙋ̀, прегрѣше́нїй ѡ҆ставле́нїе дарова́ти, благоче́стнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀.

Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃. Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ. Сті́хъ: Оу҆слы́шите сїѧ̑ всѝ ꙗ҆зы́цы: Всѧ́кое дыха́нїе Є҆ѵⷢ҇лїе і҆ѡа́нна, зача́ло л҃є, ѿ полꙋ̀: По н҃-мъ ѱалмѣ̀ стїхи́ра самогла́сна.

Гла́съ ѕ҃:

И҆злїѧ́сѧ благода́ть во ᲂу҆стна́хъ твои́хъ, прпⷣбне ѻ҆́ч҃е, и҆ бы́лъ є҆сѝ па́стырь хрⷭ҇то́вы цр҃кве, ᲂу҆ча̀ словє́сныѧ ѻ҆́вцы вѣ́ровати въ трⷪ҇цꙋ є҆диносꙋ́щнꙋю, во є҆ди́номъ бжⷭ҇твѣ̀.

Канѡ́нъ прест҃ы́ѧ бцⷣы, со і҆рмосо́мъ на ѕ҃:

Гла́съ и҃. Пѣ́снь а҃. І҆рмо́съ:

Во́дꙋ проше́дъ, ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Мно́гими содержи́мь напа́стьми, къ тебѣ̀ прибѣга́ю, спасе́нїѧ и҆скі́й: ѽ мт҃и сло́ва и҆ дв҃о! ѿ тѧ́жкихъ и҆ лю́тыхъ мѧ̀ спасѝ.

Страсте́й мѧ̀ смꙋща́ютъ прило́зи, мно́гагѡ ᲂу҆ны́нїѧ и҆спо́лнити мою̀ дꙋ́шꙋ: ᲂу҆мирѝ, ѻ҆трокови́це, тишино́ю сн҃а и҆ бг҃а твоегѡ̀, всенепоро́чнаѧ.

Сп҃са ро́ждшꙋю тѧ̀ и҆ бг҃а, молю̀, дв҃о, и҆зба́витисѧ мѝ лю́тыхъ: къ тебѣ́ бо ны́нѣ прибѣга́ѧ, простира́ю и҆ дꙋ́шꙋ и҆ помышле́нїе.

Недꙋ́гꙋюща тѣ́ломъ и҆ дꙋше́ю, посѣще́нїѧ бжⷭ҇твеннагѡ и҆ промышле́нїѧ ѿ тебє̀ сподо́би, є҆ди́на бг҃ома́ти, ꙗ҆́кѡ блага́ѧ, блага́гѡ же роди́тельнице.

Канѡ́нъ ст҃а́гѡ на и҃, є҆гѡ́же краегране́сїе:

Дх҃а пою́ тѧ злато́е ᲂу҆сто̀: Ѳеофа́ново.

Гла́съ и҃. Пѣ́снь а҃. І҆рмо́съ:

Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ, и҆ раздѣли́въ мо́ре: і҆и҃лѧ же бѣглеца̀ пѣшехо́дца спасѐ, пѣ́снь бг҃ови воспѣва́юща.

Покаѧ́нїѧ бы́въ теплѣ́йшїй проповѣ́дникъ, златоꙋ́сте, пока́ѧтисѧ мнѣ̀, ѻ҆́ч҃е, бг҃ꙋ моли́сѧ, ѿ всегѡ̀ се́рдца моегѡ̀, и҆ дре́внихъ прегрѣше́нїй и҆сцѣли́ти ꙗ҆́звы, твои́мъ страда́тельствомъ ᲂу҆молѝ.

Всю̀ зарю̀ ст҃а́гѡ дх҃а, ѻ҆́ч҃е, прїи́мъ, всесвѣ́телъ ꙗ҆ви́лсѧ є҆сѝ сто́лпъ, предводи́теленъ цр҃кве, прпⷣбне, свѣ́телъ же ѻ҆́блакъ, всебл҃же́нне, ѡ҆сѣнѧ́ющь правосла́вныхъ собо́ры.

Ѿ хрⷭ҇та̀ рꙋкоположе́нъ ᲂу҆чи́тель, бжⷭ҇твєннаѧ ᲂу҆чє́нїѧ златови́днымъ ѧ҆зы́комъ, мы́слїю же бг҃омꙋ́дрою бога́тнѡ ты̀ и҆сточи́лъ є҆сѝ: бж҃їѧ бо рѣка̀, во́дъ и҆спо́лненъ дх҃а, ꙗ҆ви́лсѧ є҆сѝ, бг҃оѧвле́нне златоꙋ́сте.

Бг҃оро́диченъ:

Преꙋкра́шена разли́чїемъ бл҃года́ти, бг҃ора́дованнаѧ, ѻ҆́ч҃ее сло́во, пло́ть бы́вшее за бл҃гоꙋтро́бїе мно́гое па́че ᲂу҆ма̀ и҆ словесѐ, бл҃гослове́ннаѧ, родила̀ є҆сѝ, пребы́вши дв҃а нескве́рнаѧ.

Катава́сїа: Ѿве́рзꙋ ᲂу҆ста̀ моѧ̑:

Пѣ́снь г҃. І҆рмо́съ:

Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Предста́тельство и҆ покро́въ жи́зни моеѧ̀ полага́ю тѧ̀, бг҃ороди́тельнице дв҃о, ты́ мѧ ѡ҆кормѝ ко приста́нищꙋ твоемꙋ̀, благи́хъ вино́вна, вѣ́рныхъ ᲂу҆твержде́нїе, є҆ди́на всепѣ́таѧ.

Молю̀, дв҃о, дꙋше́вное смꙋще́нїе и҆ печа́ли моеѧ̀ бꙋ́рю разори́ти: ты́ бо, бг҃оневѣ́стнаѧ, нача́льника тишины̀ хрⷭ҇та̀ родила̀ є҆сѝ, є҆ди́на пречⷭ҇таѧ.

Благодѣ́телѧ ро́ждши до́брыхъ вино́внаго, благодѣѧ́нїѧ бога́тство всѣ̑мъ и҆сточѝ: всѧ̑ бо мо́жеши, ꙗ҆́кѡ си́льнаго въ крѣ́пости хрⷭ҇та̀ ро́ждши, бг҃облаже́ннаѧ.

Лю́тыми недꙋ̑ги и҆ болѣ́зненными страстьмѝ и҆стѧза́емꙋ, дв҃о, ты́ ми помозѝ: и҆сцѣле́нїй бо неѡскꙋ́дное тѧ̀ зна́ю сокро́вище, пренепоро́чнаѧ, неиждива́емое.

И҆́нъ. І҆рмо́съ:

Оу҆твержде́й въ нача́лѣ нб҃са̀ ра́зꙋмомъ и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ па́че тебє̀, є҆ди́не чл҃вѣколю́бче.

Оу҆мо́мъ ты̀ хрⷭ҇то́вымъ ѡ҆бога́щсѧ, твои́мъ чи́стымъ житїе́мъ человѣ́кѡвъ спасе́нїѧ бы́лъ є҆сѝ споспѣ́шникъ и҆ повѣствова́тель, дѣ́йствитель, златоꙋ́сте, ᲂу҆чи́тєльства точа̀ спаси́тєльнаѧ, бг҃одохнове́нне.

Ѿ невеще́ственныхъ сокро́вищъ дх҃а ты̀ ѡ҆богати́всѧ, ѿ и҆сто́чникѡвъ спасе́нїе поче́рплъ є҆сѝ приснотекꙋ́щїй и҆сто́чникъ ᲂу҆че́нїй, и҆ напои́лъ є҆сѝ всѐ цр҃кве, прпⷣбне ѻ҆́ч҃е, лицѐ.

Ѡ҆лѧденѣ́вшыѧ дꙋшє́вныѧ, златоꙋ́сте, ни̑вы премꙋ́дрымъ земледѣ́ланїемъ слове́съ и҆зчи́стилъ є҆сѝ, мꙋ́дре, и҆ плодонѡ́сны показа́лъ є҆сѝ, нбⷭ҇ными тꙋ́чами сїѧ̑ напаѧ́ѧ, бг҃опрїѧ́тне.

Бг҃оро́диченъ:

Поро́ка въ тебѣ̀ и҆ скве́рны нѣ́сть ѿню́дъ, дв҃о, ѻ҆би́тель же па́че ꙗ҆ви́ласѧ є҆сѝ нбⷭ҇ныхъ бл҃гостей: въ тебѣ́ бо всели́сѧ добродѣ́телей всѧ̀ ст҃ы́нѧ, всенепоро́чнаѧ.

Сѣда́ленъ, гла́съ и҃. Подо́бенъ: Премꙋ́дрости:

Неизрече́нныѧ мꙋ́дрости бг҃ови́днѡ поче́рплъ є҆сѝ бога́тство ра́зꙋма, всѣ̑мъ сокро́вищствовалъ є҆сѝ правосла́вїѧ во́ды, вѣ́рныхъ ᲂу҆́бѡ сердца̀ бжⷭ҇твеннѣ веселѧ́щыѧ, невѣ́рныхъ же мнѣ̑нїѧ досто́йнѡ погрꙋжа́ющыѧ: тѣ́мъ ѿѻбою́дꙋ благоче́стїѧ по́тами, показа́лсѧ є҆сѝ непобѣ́дный трⷪ҇цы побо́рникъ, і҆ѡа́нне златоꙋ́сте. молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀.

Сла́ва, подо́бенъ то́йже.

Сꙋ́щꙋю свы́ше мꙋ́дрость позна́въ, и҆ бл҃года́ть слове́съ ѿ бг҃а всѣ̑мъ просїѧ́лъ є҆сѝ ꙗ҆́кѡ зла́то въ горни́лѣ, и҆ ст҃ꙋ́ю трⷪ҇цꙋ, є҆ди́ницꙋ проповѣ́далъ є҆сѝ, сребролю́бнꙋю ле́сть ᲂу҆стрѣли́въ словєсы̀ твои́ми. тѣ́мже и҆ ре́вностїю цари́цꙋ ѡ҆бличи́въ, а҆́рїево посрами́лъ є҆сѝ и҆ноплеме́нное киче́нїе, і҆ѡа́нне златоꙋ́сте, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.

И҆ ны́нѣ, бг҃оро́диченъ:

Пла́мень гее́нскїй и҆ сгорѣ́нїе, пла́чь, и҆́же въ не́мъ, и҆ рыда́нїе, ѕѣлѡ̀ ѻ҆каѧ́ннѣйшее разлꙋче́нїе и҆ горча́йшее, ст҃ы́хъ наслѣ́дїѧ и҆ собра́нїѧ ра́достнагѡ помышлѧ́ющи, содрогни́сѧ, дꙋшѐ моѧ̀, и҆ возстенѝ: и҆ писа̑нїѧ тми́нныхъ долгѡ́въ твои́хъ и҆стреби́ти потщи́сѧ ᲂу҆миле́нїѧ слеза́ми, споспѣ́шницꙋ непосты́днꙋю и҆мꙋ́щи, чⷭ҇тꙋю бг҃ома́терь: тоѧ́ бо ра́ди, прегрѣше́нїй дае́тсѧ ѡ҆ставле́нїе, сїю̀ бцⷣꙋ правосла́внѡ сла́вѧщымъ.

Пѣ́снь д҃. І҆рмо́съ:

Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.

Страсте́й мои́хъ смꙋще́нїе, ко́рмчїю ро́ждшаѧ гдⷭ҇а, и҆ бꙋ́рю ᲂу҆тишѝ мои́хъ прегрѣше́нїй, бг҃оневѣ́стнаѧ.

Милосе́рдїѧ твоегѡ̀ бе́зднꙋ призыва́ющꙋ пода́ждь мѝ, ꙗ҆́же благосе́рдаго ро́ждшаѧ, и҆ сп҃са всѣ́хъ пою́щихъ тѧ̀.

Наслажда́ющесѧ, пречⷭ҇таѧ, твои́хъ дарова́нїй, благода́рственное воспѣва́емъ пѣ́нїе, вѣ́дꙋще тѧ̀ бг҃ома́терь.

На ѻ҆дрѣ̀ болѣ́зни моеѧ̀ и҆ не́мощи низлежа́щꙋ мѝ, ꙗ҆́кѡ благолюби́ва помозѝ, бцⷣе, є҆ди́на приснодв҃о.

Наде́ждꙋ и҆ ᲂу҆твержде́нїе, и҆ спасе́нїѧ стѣ́нꙋ недви́жимꙋ и҆мꙋ́ще тѧ̀, всепѣ́таѧ, неꙋдо́бства всѧ́кагѡ и҆збавлѧ́емсѧ.

И҆́нъ. І҆рмо́съ:

Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

И҆на́го на́мъ, а҆пⷭ҇лѡвъ є҆динонра́внаго, и҆́же (с. 238) промышле́нїемъ всѣ́хъ промышлѧ́ѧ, ꙗ҆́кѡ бла́гъ, дадѐ хрⷭ҇то́съ тѧ̀, нбⷭ҇наго тайново́дства проповѣ́дника, и҆ бжⷭ҇твеннаго сказа́телѧ та̑инъ го́рнихъ, і҆ѡа́нне всебл҃же́нне, златоꙋ́сте.

Златоза́рнаго и҆ златослове́снаго почти́мъ златоꙋ́стаго і҆ѡа́нна, всѧ̑ позлати́вшаго златови́дными сїѧ̑нїи ᲂу҆че́нїѧ, и҆ мі́ръ ѧ҆зы́комъ просвѣти́вша, зла́та свѣтлѣ́йшимъ, и҆ свѣ́та по́лнѣйшимъ, и҆сточа́ющимъ благода́ть бжⷭ҇твеннꙋю.

Ве́сь бы́лъ є҆сѝ бж҃їе жили́ще, ве́сь ꙗ҆ви́лсѧ є҆сѝ ѻ҆рга́нъ дх҃а, возглаща́ющь всѧ́кїѧ добродѣ́тели бг҃одохнове́ннꙋю пѣ́снь и҆ спасе́нїѧ винꙋ̀, и҆ добро́тꙋ ꙗ҆влѧ́ѧ нбⷭ҇нагѡ црⷭ҇твїѧ, і҆ѡа́нне всеблаже́нне, златоꙋ́сте.

Ты̀ бж҃їе бл҃гоꙋтро́бїе проповѣ́далъ є҆сѝ, покаѧ́нїѧ ѻ҆́бразы и҆злага́ѧ, и҆ ѕлы́хъ ѿбѣжа́нїѧ и҆зѧ́щнѣйше поꙋча́ѧ, преблаже́нне и҆ всесоверше́ннѣйше, и҆ ѡ҆ дѣ́лѣхъ и҆зрѧ́дныхъ поꙋчє́нїѧ и҆сточа́ѧ, всече́стне, ѻ҆́ч҃е златоꙋ́сте.

Бг҃оро́диченъ:

По бз҃ѣ предста́тельницꙋ тѧ̀ стѧжа́хомъ: ты́ бо бж҃їѧ мт҃и была̀ є҆сѝ творца̀ и҆ содѣ́телѧ, и҆ на́шъ зра́къ прїе́мшагѡ, всенепоро́чнаѧ, и҆ се́й спа́сшагѡ ѿ тлѝ и҆ сме́рти, и҆ сла́вою бжⷭ҇твенною просла́вившагѡ.

Пѣ́снь є҃. І҆рмо́съ:

Просвѣтѝ на́съ повелѣ̑нїи твои́ми, гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, чл҃вѣколю́бче.

И҆спо́лни, чⷭ҇таѧ, весе́лїѧ се́рдце моѐ, твою̀ нетлѣ́ннꙋю даю́щи ра́дость, весе́лїѧ ро́ждшаѧ вино́внаго.

И҆зба́ви на́съ ѿ бѣ́дъ, бцⷣе чⷭ҇таѧ, вѣ́чное ро́ждши и҆збавле́нїе, и҆ ми́ръ, всѧ́къ ᲂу҆́мъ преимꙋ́щїй.

Разрѣшѝ мглꙋ̀ прегрѣше́нїй мои́хъ, бг҃оневѣ́сто, просвѣще́нїемъ твоеѧ̀ свѣ́тлости, свѣ́тъ ро́ждшаѧ бжⷭ҇твенный и҆ превѣ́чный.

И҆сцѣлѝ, чⷭ҇таѧ, дꙋшѝ моеѧ̀ неможе́нїе, посѣще́нїѧ твоегѡ̀ сподо́бльшаѧ, и҆ здра́вїе моли́твами твои́ми пода́ждь мѝ.

И҆́нъ. І҆рмо́съ:

Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Цр҃ко́внаго свѣти́льника вси́ тѧ вѣ́мы свѣтови́днѣйшаго, и҆ дꙋша́мъ спаси́тельнаго, восхища́ющаго сїѧ̑ и҆зъ горта́ни смертоно́сныѧ, и҆ къ жи́зни пꙋтеводѧ́ща вѣ́чнѣй, ѻ҆́ч҃е приснопѣва́емый.

Разрꙋша́еши ѡ҆полчє́нїѧ є҆реті́чествꙋющихъ, треблаже́нне, ѡ҆гради́всѧ благоче́стїѧ ѻ҆рꙋ̑жїи, и҆ мꙋ́жествомъ дꙋшѝ свѧще́ннѣйше: собира́еши же ра́дꙋѧсѧ пресвѣ́тлѡ правосла́вныхъ ли́ки сою́зомъ дꙋ́ха.

И҆спо́лнєны, ꙗ҆́коже фїа́лы, бжⷭ҇твенныхъ а҆рѡма̑тъ лани̑ты твоѧ̑, и҆ вселе́ннꙋю ᲂу҆́мными благовѡ́нїи веселѧ́тъ, мѷрова́рнымъ тайново́дствомъ разꙋмѣ́нїй и҆ добро́тою слове́съ твои́хъ, всемꙋ́дре.

Бг҃оро́диченъ:

Ꙗ҆́кѡ бг҃а заче́нши, содѣ́телѧ же и҆ зижди́телѧ и҆ гдⷭ҇а, ро́ди тѧ̀ всѝ человѣ́честїи, чⷭ҇таѧ, ᲂу҆блажа́ютъ, и҆ безтѣле́сныхъ разꙋ̑мнаѧ чинонача̑лїѧ, ꙗ҆́кѡ мт҃рь бж҃їю, тѧ̀ сла́вѧтъ.

Пѣ́снь ѕ҃. І҆рмо́съ:

Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.

Сме́рти и҆ тлѝ ꙗ҆́кѡ спа́слъ є҆́сть, са́мъ сѧ̀ и҆зда́въ сме́рти, тлѣ́нїемъ и҆ сме́ртїю моѐ є҆стество̀ ꙗ҆́то бы́вшее, дв҃о, молѝ гдⷭ҇а и҆ сн҃а твоего̀, врагѡ́въ ѕлодѣ́йствїѧ мѧ̀ и҆зба́вити.

Предста́тельницꙋ тѧ̀ живота̀ вѣ́мъ, и҆ храни́тельницꙋ тве́рдꙋ, дв҃о, и҆ напа́стей рѣша́щꙋ молвы̑, и҆ нало́ги бѣсѡ́въ ѿгонѧ́ющꙋ: и҆ молю́сѧ всегда̀, ѿ тлѝ страсте́й мои́хъ и҆зба́вити мѧ̀.

Ꙗ҆́кѡ стѣ́нꙋ прибѣ́жища стѧжа́хомъ, и҆ дꙋ́шъ всесоверше́нное спасе́нїе, и҆ простра́нство въ ско́рбехъ, ѻ҆трокови́це, и҆ просвѣще́нїемъ твои́мъ при́снѡ ра́дꙋемсѧ, ѽ влⷣчце, и҆ ны́нѣ на́съ ѿ страсте́й и҆ бѣ́дъ спасѝ.

На ѻ҆дрѣ̀ ны́нѣ немощствꙋ́ѧй лежꙋ̀, и҆ нѣ́сть и҆сцѣле́нїѧ пло́ти мое́й. но бг҃а и҆ сп҃са мі́рꙋ, и҆ и҆зба́вителѧ недꙋ́гѡвъ ро́ждшаѧ, тебѣ̀ молю́сѧ благо́й: ѿ тлѝ недꙋ́гъ возста́ви мѧ̀.

И҆́нъ. І҆рмо́съ:

Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Мꙋ́дростїю дꙋхо́вною, мі́ръ ве́сь ѡ҆богати́лъ є҆сѝ, словесѐ раздава́тель бы́въ бога́тый: бога́та бо свы́ше, і҆ера́рше, бл҃года́ть и҆злїѧ́сѧ твои̑мъ ᲂу҆стна́мъ.

Во всю̀, ꙗ҆́кѡ мо́лнїѧ, зе́млю и҆зы́де вѣща́нїе твоѐ, и҆ си́ла же твои́хъ глагѡ́лъ, златоꙋ́сте, ꙗ҆́кѡ трꙋба̀ велегла́снаѧ, вселе́нныѧ всѧ̑ ѡ҆гласѝ концы̀.

Свы́ше во и҆стка́ннꙋю ри́зꙋ ѡ҆дѣ́ѧвсѧ, всебл҃же́нне, добродѣ́телей, и҆ слове́съ красото́ю ѡ҆бложи́всѧ, и҆́стины ꙗ҆ви́лсѧ є҆сѝ сла́вное ᲂу҆твержде́нїе.

Бг҃оро́диченъ:

Вседержи́тельною си́лою носѧ́й всѧ́чєскаѧ, въ немощнꙋ́ю пло́ть и҆зъ тебє̀ ѡ҆дѣ́ѧвсѧ, дв҃о пренепоро́чнаѧ, на благодѣѧ́нїе человѣ́кѡвъ чл҃вѣколю́бецъ.

Конда́къ, гла́съ ѕ҃. Подо́бенъ: Є҆́же ѡ҆ на́съ и҆спо́лнивъ:

Ѿ нб҃съ прїѧ́лъ є҆сѝ бжⷭ҇твеннꙋю бл҃года́ть, и҆ твои́ми ᲂу҆стна́ми всѧ̑ ᲂу҆чи́ши покланѧ́тисѧ въ трⷪ҇цѣ є҆ди́номꙋ бг҃ꙋ, і҆ѡа́нне златоꙋ́сте, всебл҃же́нне прпⷣбне, досто́йнѡ хва́лимъ тѧ̀: є҆си́ бо наста́вникъ, ꙗ҆́кѡ бжⷭ҇твєннаѧ ꙗ҆влѧ́ѧ.

І҆́косъ:

Всѣ́хъ творцꙋ̀ преклонѧ́ю колѣ̑на, превѣ́чномꙋ сло́вꙋ рꙋ́ки простира́ю, сло́ва и҆щѧ̀ дарова́нїе, да воспою̀ преподо́бнаго, є҆го́же са́мъ возвели́чи: глаго́летъ бо прⷪ҇ро́комъ живы́й во вѣ́ки: просла́влю вѣ́рою сла́вѧщыѧ мѧ̀. и҆́же ᲂу҆́бѡ въ дре́внихъ самꙋи́ла, возвы́сивый просла́ви ны́нѣ і҆ера́рха: тала́нтъ бо, є҆мꙋ́же ввѣ́рисѧ, до́брѣ кꙋ́пльствовавъ, цр҃ю̀ принесѐ, тѣ́мъ, и҆ превозвы́шши є҆го̀ пресꙋ́щественный. сегѡ̀ благода́ти прошꙋ̀, недосто́йный а҆́зъ, сло́во прїѧ́ти мѝ, да возмогꙋ̀ благоче́стнѡ воспѣ́ти того̀: конце́й бо то́й є҆́сть наста́вникъ, ꙗ҆́кѡ бжⷭ҇твєннаѧ ꙗ҆влѧ́ѧ.

Пѣ́снь з҃. І҆рмо́съ:

Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.

На́ше спасе́нїе ꙗ҆́коже восхотѣ́лъ є҆сѝ, сп҃се, ᲂу҆стро́ити, во ᲂу҆тро́бꙋ дв҃ы всели́лсѧ є҆сѝ, ю҆́же мі́рꙋ предста́тельницꙋ показа́лъ є҆сѝ: ѻ҆тє́цъ на́шихъ бж҃е, бл҃гослове́нъ є҆сѝ.

Воли́телѧ ми́лости, є҆го́же родила̀ є҆сѝ, мт҃и чⷭ҇таѧ, ᲂу҆молѝ, и҆зба́витисѧ ѿ прегрѣше́нїй и҆ дꙋше́вныхъ, скве́рнъ вѣ́рою зовꙋ́щымъ: ѻ҆тє́цъ на́шихъ бж҃е, бл҃гослове́нъ є҆сѝ.

Сокро́вище спасе́нїѧ, и҆ и҆сто́чникъ нетлѣ́нїѧ, тѧ̀ ро́ждшꙋю, и҆ сто́лпъ ᲂу҆твержде́нїѧ, и҆ две́рь покаѧ́нїѧ зовꙋ́щымъ показа́лъ є҆сѝ: ѻ҆тє́цъ на́шихъ бж҃е, бл҃гослове́нъ є҆сѝ.

Тѣлє́сныѧ сла́бѡсти и҆ дꙋшє́вныѧ недꙋ́ги, бг҃ороди́тельнице, любо́вїю пристꙋпа́ющихъ къ кро́вꙋ твоемꙋ̀, дв҃о, и҆сцѣли́ти сподо́би, сп҃са хрⷭ҇та̀ на́мъ ро́ждшаѧ.

И҆́нъ. І҆рмо́съ:

Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Бла́гости бе́зднꙋ и҆ бл҃гоꙋтро́бїѧ навы́къ бж҃їѧ, порꙋ́чникъ ꙗ҆ви́лсѧ є҆сѝ спасе́нїѧ ка́ющымсѧ те́плѣ, и҆ вседꙋ́шнѡ гдⷭ҇ꙋ зовꙋ́щымъ: бл҃гослове́нъ бг҃ъ ѻ҆тє́цъ на́шихъ.

Оу҆правлѧ́еши, златоꙋ́сте, ᲂу҆чє́нїи твои́ми всѧ́кꙋю мы́сль, и҆ дꙋшє́вныѧ врачꙋ́еши не́мѡщи, ꙗ҆́кѡ сострада́тельнѣйшїй, и҆ благотекꙋ́щымъ спое́ши веселѧ́сѧ: бл҃гослове́нъ бг҃ъ ѻ҆тє́цъ на́шихъ.

Возвы́силсѧ є҆сѝ, бы́въ и҆збра́нъ, прпⷣбенъ, неѕло́бивъ, сщ҃е́нникъ высоча́йшагѡ, пра́вдою ѡ҆дѣ́ѧнъ свѣ́тлѡ, и҆ весе́лїемъ зовы́й, всебога́те: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ:

Зачала̀ є҆сѝ, пречⷭ҇таѧ сꙋ́щаго надъ всѣ́ми бг҃а и҆ гдⷭ҇а, бл҃говоли́вшаго спастѝ человѣ́ческїй ро́дъ ѿ тлѣ́нїѧ и҆ сме́рти, є҆го́же досто́йнѡ пою́ще, зове́мъ: бл҃гослове́нъ бг҃ъ ѻ҆тє́цъ на́шихъ.

Пѣ́снь и҃. І҆рмо́съ:

Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.

По́мощи, ꙗ҆́же ѿ тебє̀, тре́бꙋющыѧ не пре́зри, дв҃о, пою́щыѧ и҆ превозносѧ́щыѧ тѧ̀ во вѣ́ки.

Неможе́нїе дꙋшѝ моеѧ̀ и҆сцѣлѧ́еши, и҆ тѣлє́сныѧ болѣ̑зни, дв҃о, да тѧ̀ просла́влю, чⷭ҇таѧ, во вѣ́ки.

И҆сцѣле́нїй бога́тство и҆злива́еши вѣ́рнѡ пою́щымъ тѧ̀, дв҃о, и҆ превозносѧ́щымъ неизрече́нное твоѐ рождество̀.

Напа́стей ты̀ прило́ги ѿгонѧ́еши, и҆ страсте́й нахо́ды, дв҃о: тѣ́мже тѧ̀ пое́мъ во всѧ̑ вѣ́ки.

И҆́нъ. І҆рмо́съ:

Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

И҆̀же разꙋ́мнѡ словесє́мъ твои̑мъ бесѣ́дꙋюще, (с. 243) златоꙋ́сте, бг҃осло́вїѧ честно́мꙋ ᲂу҆чи́мсѧ, и҆ всепло́дствꙋемъ благи́хъ поле́зное, и҆ ѕло́бы ѿбѣга́емъ вре́да: ѻ҆́бщїй бо строи́тель спасе́нїѧ бы́лъ є҆сѝ, вопїѧ̀: превозноси́те хрⷭ҇та̀ во вѣ́ки.

За ны̀ молѝ влⷣкꙋ, златоꙋ́сте, сострада́тельнѣйшее дерзнове́нїе и҆мѣ́ѧ, и҆ ми́лостивною и҆ чл҃вѣколю́бною твое́ю, ѻ҆́ч҃е, любо́вїю: тѧ́ бо ко сп҃сꙋ предлага́емъ вѣ́рнїи хода́таѧ же и҆ предста́телѧ, и҆ теплѣ́йша моли́твенника, бг҃омꙋ́дре, і҆ера́рше всебл҃же́нне і҆ѡа́нне.

Ю҆́ношское противле́нїе, и҆ непрекло́нное мꙋдрова́нїе, и҆ ца́рствꙋющихъ непра́вдꙋ ѡ҆бличи́лъ є҆сѝ, те́плѣ предста́тельствꙋѧ ѡ҆би̑димыѧ, прпⷣбне: и҆ сиро́тъ, и҆ вдѡ́въ, и҆ ни́щихъ ѻ҆те́цъ бы́лъ є҆сѝ любо́внымъ предложе́нїемъ, превозноси́те, вопїѧ̀, хрⷭ҇та̀ во вѣ́ки.

Бг҃оро́диченъ:

Тѣле́сными ѡ҆бразова̑нїи, и҆ разли́чными гада̑нїи, и҆ сѷмволі́ческими и҆ знамена́тельными пред̾ѧвле́ньми, твоѐ провозвѣсти́ша бг҃оглаго́ливїи ржⷭ҇тво̀ преесте́ственное и҆ чꙋ́дное, дв҃о: тѣ́мъ тѧ̀, веселѧ́щесѧ, благоче́стнѡ воспѣва́емъ, хрⷭ҇та̀ превозносѧ́ще во всѧ̑ вѣ́ки.

Пѣ́снь ѳ҃. І҆рмо́съ:

Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.

То́ка сле́зъ мои́хъ не ѿврати́сѧ, ꙗ҆́же ѿ всѧ́кагѡ лица̀ всѧ́кꙋ сле́зꙋ ѿе́мшаго, дв҃о, хрⷭ҇та̀ ро́ждшаѧ.

Ра́дости моѐ се́рдце и҆спо́лни, дв҃о, ꙗ҆́же ра́дости прїе́мшаѧ и҆сполне́нїе, грѣхо́внꙋю печа́ль потреблѧ́ющи.

Свѣ́та твоегѡ̀ зарѧ́ми просвѣтѝ, дв҃о, мра́къ невѣ́дѣнїѧ ѿгонѧ́щи, благовѣ́рнѡ бцⷣꙋ тѧ̀ и҆сповѣ́дающихъ.

На мѣ́стѣ ѡ҆ѕлобле́нїѧ не́мощи смири́вшагосѧ, дв҃о, и҆сцѣлѝ, и҆зъ нездра́вїѧ во здра́вїе претворѧ́ющи.

И҆́нъ. І҆рмо́съ:

Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

И҆́стиннѡ наслажда́ѧсѧ, ѻ҆́ч҃е, жи́зни, ѡ҆ не́йже подвиза́лсѧ є҆сѝ, є҆ли́кѡ мо́щно, на землѝ житїе́мъ преизѧ́ществовавъ а҆́гг҃льскимъ, и҆ хрⷭ҇то́въ стѧжа́въ ѧ҆зы́къ, и҆ ᲂу҆ста̀ ти̑хаѧ: спасти́сѧ, бг҃оглаго́ливе, молѝ, тѧ̀ вѣ́рою и҆зѧ́щнѣ блажа́щымъ.

Словеса̀ твоѧ̑, требл҃же́нне, словеса̀ жи́зни, жи́знь хода́тайствꙋющаѧ неконе́чнꙋю: тѧ́ бо и҆сто́чника текꙋ́ща показа̀ хрⷭ҇то́съ, и҆ рѣкꙋ̀ пролива́ющꙋ бжⷭ҇твенныхъ пото́ки ᲂу҆че́нїй, сла́дости и҆́стиннѡ пото́къ, ѡ҆ставле́нїѧ же стрꙋю̀, и҆ покаѧ́нїѧ свѣ́тла проповѣ́дника.

Хода́тай ꙗ҆ви́лсѧ є҆сѝ, свѧщеннонача́льниче, бг҃а и҆ человѣ́кѡвъ пресвѣ́тлый: ты́ бо свѣти́льникъ ꙗ҆ви́лсѧ є҆сѝ бл҃гоче́стїѧ бг҃освѣ́тлый, и҆ бжⷭ҇твеннагѡ зна́нїѧ, и҆ ми́лостыни наказа́тель: тѣ́мъ тѧ̀, златосло́ве, серде́чною любо́вїю ны́нѣ досто́йнѡ велича́емъ.

Бг҃оро́диченъ:

Чтⷭ҇аѧ препросла́вленнаѧ мт҃и бж҃їѧ, пою́щыѧ тѧ̀ любо́вїю спаса́й, и҆скꙋше́нїй молвꙋ̀ разрѣша́ющи ми́лостивнѡ: ꙗ҆́кѡ бо бг҃а ро́ждши, всѧ̑, є҆ли̑ка хо́щеши, соверша́еши, ᲂу҆спѣва́еши невозбра́ннѡ, и҆ мо́жеши, дв҃о. тѣ́мъ тѧ̀ всѝ велича́емъ.

Свѣти́ленъ. Подо́бенъ: Дх҃омъ во ст҃и́лищи:

Златоза́рными словєсы̀ твои́ми хрⷭ҇то́ва цр҃ковь свѣтлѣ́етсѧ ꙗ҆́снѡ, ѽ златоꙋ́сте ѻ҆́ч҃е! дꙋ́шы же веселѧ́тсѧ вѣ́рныхъ, почита́ющыѧ всесвѧтꙋ́ю твою̀ па́мѧть: ты́ бо всѣ̑мъ показа́лсѧ є҆сѝ покаѧ́нїѧ наста́вникъ, и҆ во́ждь спасе́нїѧ.

Сла́ва, и҆ны́й. Подо́бенъ: Жєны̀ ᲂу҆слы́шите:

Великогла́снѣйшаго покаѧ́нїѧ проповѣ́дника, сокро́вище ᲂу҆бо́гихъ, ᲂу҆ста̀ цр҃кве злата̑ѧ и҆ благоглагѡ́ливаѧ, писа́нїй ꙗ҆вле́нїе, і҆ѡа́нна всемꙋ́драго да восхва́лимъ всѝ, ꙗ҆́кѡ ѿ тогѡ̀ ᲂу҆тверди́вшесѧ.

И҆ ны́нѣ, бг҃оро́диченъ:

Дв҃о всенепоро́чнаѧ, гпⷭ҇жѐ моѧ̀ и҆ влⷣчце, твоего̀ сн҃а ᲂу҆молѝ съ сла́внымъ златоꙋ́стомъ, напа́стей и҆зба́витисѧ всѧ́ческихъ пою́щымъ тѧ̀, и҆ вѣ́чныхъ полꙋчи́ти бла̑гъ, всест҃а́ѧ: мо́жеши бо, є҆ли̑ка хо́щеши.

На хвали́техъ стїхи̑ры, на д҃, гла́съ д҃. Поⷣ: Да́лъ є҆сѝ зна́менїе:

Сосꙋ́дъ честнѣ́йшїй бжⷭ҇твеннагѡ дх҃а бы́лъ є҆сѝ, ꙳ и҆ па́стырь свѧще́ннѣйшїй, ꙳ а҆́гг҃лъ на землѝ, ꙳ сто́лпъ церко́вный ꙳ и҆ догма́тѡвъ степе́нь, ꙳ грѣ́шныхъ порꙋ́чникъ, ꙳ ка́ющихсѧ бжⷭ҇твенное ᲂу҆тѣше́нїе, ꙳ ни́щихъ же промы́сленникъ и҆ сиро́тъ ᲂу҆тѣше́нїе, ꙳ і҆ѡа́нне златоꙋ́сте, ꙳ моли́твенниче ѡ҆ дꙋша́хъ на́шихъ.

Со́лнце многосвѣ́тлое, ꙳ вселе́ннꙋю словєсы̀ твои́ми ѡ҆зарѧ́ѧ, ꙳ бы́лъ є҆сѝ ѕвѣзда̀ свѣтлѣ́йшаѧ, ꙳ свѣща̀ свѣтѧ́щїѧ зарѝ, ꙳ и҆̀же въ мо́ри мі́ра всегда̀ ѡ҆бꙋрева́ємыѧ, ꙳ привлача́ѧ ко приста́нищꙋ тиша́йшемꙋ ꙳ спасе́нїѧ благода́тїю, ꙳ златосло́ве златоꙋ́сте, ꙳ моли́твенниче ѡ҆ дꙋша́хъ на́шихъ.

А҆́гг҃лъ земны́й и҆ нбⷭ҇ный человѣ́къ, ꙳ славі́й добропѣ́снивый, ꙳ рѣка̀ и҆сполнѧ́ема слове́сныхъ во́дъ, ꙳ ѻ҆́блакъ тꙋ́чи разꙋ́мныѧ, ꙳ всѣ̑мъ на́мъ бога́тнѡ ка́плющїй, ꙳ спасе́нїѧ ᲂу҆чи́тель ꙳ и҆ покаѧ́нїѧ поспѣ́шникъ, ꙳ і҆ѡа́нне златоꙋ́сте, ꙳ вои́стиннꙋ бы́лъ є҆сѝ.

Непра́веднѡ ѿ па́ствы твоѧ̀ ꙳ и҆згна́нъ, ѻ҆́ч҃е прпⷣбне, ꙳ приѡбщи́лсѧ є҆сѝ скорбе́мъ, ꙳ и҆ гѡ́рькимъ заточе́нїємъ, ꙳ въ ни́хже ᲂу҆досто́илсѧ є҆сѝ блаже́нныѧ кончи́ны, ꙳ а҆́ки до́блественный страда́лецъ, ꙳ побѣди́въ многоко́зненнаго, ꙳ и҆ побѣ́ды дїадѵ́мою тѧ̀ хрⷭ҇то́съ вѣнча̀, ꙳ і҆ѡа́нне златоꙋ́сте, ꙳ моли́твенниче ѡ҆ дꙋша́хъ на́шихъ.

Сла́ва, гла́съ и҃. А҆нато́лїево:

Златы́ми словєсы̀, и҆ бг҃овѣща́нными ᲂу҆чє́нїи ᲂу҆краси́въ бж҃їю цр҃ковь, бога́тство дꙋхо́вное сокро́вищствовалъ є҆сѝ въ не́й, твоѧ̑ бг҃опреда̑ннаѧ словеса̀. тѣ́мъ вѣне́цъ и҆зъ нетлѣ́нныхъ цвѣтѡ́въ спле́тши пѣ́сньми, свѧще́ннѣй твое́й прино́ситъ па́мѧти, всезлаты́й дꙋше́ю съ ѧ҆зы́комъ, і҆ѡа́нне бг҃омꙋ́дре. но, ꙗ҆́кѡ и҆мѣ́ѧ дерзнове́нїе, прпⷣбне, моли́сѧ ѡ҆ дꙋша́хъ на́шихъ.

И҆ ны́нѣ:

Влⷣчце, прїимѝ моли́твꙋ ра̑бъ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.

Славосло́вїе вели́кое, и҆ ѿпꙋ́стъ.

На лїтꙋргі́и, Бл҃жє́нна ѿ канѡ́на, пѣ́снь г҃-ѧ и҆ ѕ҃. Прокі́менъ, гла́съ а҃: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ. Сті́хъ: Оу҆слы́шите сїѧ̑ всѝ ꙗ҆зы́цы, внꙋши́те всѝ живꙋ́щїи по вселе́ннѣй. А҆пⷭ҇лъ, ко є҆вре́ѡмъ зача́ло ти҃і. А҆ллилꙋ́їа, гла́съ в҃: Оу҆ста̀ првⷣнагѡ, поꙋча́тсѧ премꙋ́дрости: Є҆ѵⷢ҇лїе і҆ѡа́нна, зача́ло л҃ѕ. Прича́стенъ: Въ па́мѧть вѣ́чнꙋю бꙋ́детъ првⷣникъ:

На трапе́зѣ быва́етъ бра́тїи вели́кое ᲂу҆тѣше́нїе.