Мѣ́сѧца тогѡ́же въ д҃і де́нь. И҆́же во ст҃ы́хъ ѻ҆тца̀ на́шегѡ григо́рїа пала́мы, а҆рхїепі́скопа солꙋ́нскагѡ, чꙋдотво́рца.
А҆́ще хо́щетъ настоѧ́тель, твори́мъ бдѣ́нїе.
На вели́цѣй вече́рни.
Блаже́нъ мꙋ́жъ: На Гдⷭ҇и воззва́хъ: стїхи̑ры на и҃, гла́съ є҃.
Подо́бенъ: Прпⷣбне ѻ҆́тче:
Прпⷣбне ѻ҆́тче, сщ҃е́нне григо́рїе, ѿ ко́рене прозѧбѐ бг҃олюби́ва и҆ свѣ́тла вѣ́твь, ꙗ҆́коже дре́во, ᲂу҆зрѣ́сѧ, при и҆схо́дищихъ бжⷭ҇твенныхъ во́дъ до́брѣ насажде́но, и҆сточа́ѧ пре́жде вре́мене плоды̀ безсме́ртїѧ, ᲂу҆дивлѧ́ѧ всѧ́къ слꙋ́хъ є҆стество́мъ, и҆ сло́вомъ, и҆ дѣѧ́нїи бжⷭ҇твенными, виті́й въ виті́ахъ и҆ премꙋ́дръ въ любомꙋ́дрыхъ дѣѧ́нїихъ. сосꙋ́дъ держа́внагѡ бг҃овидѣ́нїѧ, хрⷭ҇то́ви молѧ́сѧ, хрⷭ҇та̀ жада́ѧ повсегда̀ и҆ превосходѧ̀ ѿ бжⷭ҇твенныѧ сла́вы въ сла́вꙋ и҆ ѿ си́лы въ си́лꙋ, вои́стиннꙋ нетлѣ́ннꙋю.
Прпⷣбне ѻ҆́тче, досточꙋ́дне григо́рїе, сла́вꙋ ѡ҆ста́вль вре́меннꙋю и҆ ни́зꙋ влекꙋ́щꙋю, нетлѣ́ннаѧ возлюби́въ и҆ гѡ́рнѧѧ, бога́тства мимотекꙋ́щагѡ мꙋ́дрѣ ѿстꙋпѝ, бога́тство пребы́тное нищетꙋ̀ вмѣни́въ, дꙋше́вное твоѐ ѻ҆́ко ѡ҆чи́стивъ воздержа́нїемъ, и҆ слеза́ми, и҆ мно́гимъ пла́чемъ, ѿню́дꙋже сосꙋ́дъ дх҃а свѣ́телъ ꙗ҆ви́сѧ, ве́сь благода́ти тогѡ̀ и҆спо́лнь, тогѡ̀ сїѧ́нїѧ и҆ тогѡ̀ сла́вы просѝ дарова́ти є҆ди́номꙋ бг҃ꙋ покланѧ́ющымсѧ, трⷪ҇цѣ всеси́льнѣй.
Прпⷣбне ѻ҆́тче, сщ҃е́ннѣйшїй григо́рїе, ме́чь ᲂу҆́бѡ сло́ва ѡ҆бостри́въ дх҃омъ, ѻ҆́гнь чинѡ́мъ бы́лъ є҆сѝ бг҃обо́рныхъ, ꙗ҆́коже съ высоты̀ мо́лнїѧ сходѧ̀, ѿсѣка́ѧ и҆ попалѧ́ѧ тѣ́хъ ѧ҆зыкобѡ́лїѧ, вѣ́рныхъ же всѣ́хъ наставлѧ́ѧ къ бжⷭ҇твеннѣй зарѝ трисо́лнечнѣй, є҆́юже просвѣща́емь, свѣ́тъ вторы́й ꙗ҆ви́лсѧ є҆сѝ, сопресто́ленъ и҆ є҆диночи́сленъ верхѡ́внымъ бг҃осло́вцємъ, съ ни́ми хвали́мъ, съ ни́ми пребыва́ѧ, и҆ ны́нѣ молѝ дарова́ти цр҃кви є҆ди́нство, ми́ръ и҆ ве́лїю ми́лость.
И҆́ны стїхи̑ры, гла́съ д҃.
Подо́бенъ: Ꙗ҆́кѡ до́блѧ:
Свѣти́льникъ неꙋгаса́емый, сїѧ́нїе неꙋсыпа́ющее, и҆̀же въ мо́ри пла́вающымъ сп҃си́тельное и҆ ти́хое приста́нище и҆ безмѧте́жное благода́ти, сше́дшесѧ, въ пѣ́снехъ досто́йнѣ пое́мъ тѧ̀, молѧ́щесѧ: ᲂу҆́мныѧ бꙋ́ри и҆зба́ви цр҃ковь твои́ми мл҃твами, ѡ҆ не́йже мꙋ́жески подвиза́ѧсѧ.
Гла́са тѧ̀ сло́вꙋ, дыха́нїе дꙋхо́вное, ѻ҆́гненный ѧ҆зы́къ неꙋгаса́емый бг҃осло́вїѧ, григо́рїе, собра́нїе скверне́ное є҆реті́ческое свѣ́тлѡ попали́ша бл҃года́тїю, мо́лимъ сопроти́вныхъ велѣ́нїй настоѧ́нїѧ и҆зба́витисѧ моли́твами тѝ правосла́внѡ воспѣва́ющымъ тѧ̀.
Въ трꙋдѣ́хъ пе́рвѣе и҆ безмо́лвїи просїѧ́вша и҆ писа́нїе неꙋдо́бь вѣ́домое и҆ глꙋбо́кое съ дх҃омъ возгремѣ́вша, хрⷭ҇то́съ свѣ́щника тѧ̀ возлага́етъ свѣ́тла цр҃кви, григо́рїе, мі́ръ всѧ́кїй ѡ҆свѣща́юща, ѻ҆́тче, твои́ми мл҃твами, и҆ словесы̀, и҆ чꙋде́съ си́лою, и҆ не ᲂу҆твержде́нныхъ ᲂу҆твержда́ѧ.
Сла́ва, гла́съ д҃:
Премꙋ́дростїю сло́во своѐ ᲂу҆краси́въ, и҆ добродѣ́телїю непоро́чною преꙋдобре́нъ во ѻ҆бои́хъ бы́лъ є҆сѝ, григо́рїе, бг҃овѣща́ннымъ тѝ глаго́ломъ ᲂу҆краша́ѧ и҆ веселѧ̀ лю́ди разꙋ́мнѡ, трⷪ҇цы є҆ди́но бжⷭ҇тво̀ премꙋ́дрѣ просте́ръ, тѣ́мже и҆ препросла́вленными ᲂу҆чє́нїи и҆ноплемє́нныѧ є҆́рєси попра́въ, держа́вꙋ вѣ́ры въ концѣ́хъ воздви́глъ є҆сѝ, хрⷭ҇то́ви предстоѧ̀ съ невеще́ственными слꙋжи́тели, и҆ дꙋша́мъ на́шымъ и҆спросѝ ми́ръ и҆ ве́лїю ми́лость.
И҆ ны́нѣ, бг҃оро́диченъ: И҆́же тебє̀ ра́ди:
Вхо́дъ. Прокі́менъ днѐ и҆ чтє́нїѧ трѝ ст҃и́тєльскаѧ [пи̑сана на ѡ҆боро́тѣ л. рв҃і].
На стїхо́внѣ стїхи̑ры, гла́съ є҃.
Подо́бенъ: Ра́дꙋйсѧ:
Ра́дꙋйсѧ, правосла́вїѧ свѣти́льниче, цр҃кви свѣ́тлое, ѻ҆́тче, сл҃нце, похвала̀ и҆́ночествꙋющымъ, цр҃ко́вное пра́вило, и҆́же бл҃годѣѧ́нїѧ ᲂу҆чи́тель и҆зрѧ́дный, ст҃и́телю григо́рїе, и҆́же премꙋ́дрости и҆ ра́зꙋма жили́ще, бли̑жнимъ и҆ да̑льнимъ ѻ҆рга́нъ дꙋхо́вный, пѣ́снивецъ ѡ҆дꙋшевле́нъ, ᲂу҆ста̀ гдⷭ҇нѧ, и҆зводѧ̀ ѿ недосто́инства досто́йнаго, хрⷭ҇та̀ молѝ низпосла́ти дꙋша́мъ на́шымъ ми́ръ и҆ ве́лїю ми́лость.
Сті́хъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.
Ра́дꙋйсѧ, высо́кїй ᲂу҆́ме, зри́телю та́инства, дх҃а сосꙋ́дъ дарова́нїй, свѣтоно́сный свѣ́щниче, блиста́нїе бжⷭ҇твеннагѡ ѡ҆сїѧ́нїѧ, любвѝ держа́вное и҆ честно́е спребыва́нїе, кро́ткїй вои́стиннꙋ, и҆ про́стъ ᲂу҆̀бо и҆ неѕло́бивъ, ѿкрове́нїе и҆ писа́нїй ꙗ҆вле́нїе, мо́ре разꙋмѣ́нїй бжⷭ҇твенныхъ, григо́рїе, бе́здна бжⷭ҇твенна сло́ва ᲂу҆че́нїѧ неизчерпа́ема, хрⷭ҇та̀ молѝ низпосла́ти дꙋша́мъ на́шымъ ми́ръ и҆ ве́лїю ми́лость.
Сті́хъ: Бл҃же́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Ра́дꙋйсѧ, бг҃осло́вїѧ глꙋбино̀, правосла́вїѧ пра́вило пра́вое, трⷪ҇цы є҆ди́но є҆стество̀ возвѣстѝ высокѡ̀, во є҆ди́номъ хотѣ́нїи и҆ дѣ́йствїи, про́сто бжⷭ҇тво̀, всеси́льно и҆ не со́здано, посрами́вый же бл҃года́тїю дх҃о́вною и҆ безлѣ́тною ѿве́ргшихсѧ ѡ҆боже́нїѧ, ᲂу҆ста̀ бг҃осло́вєцъ, ст҃и́телю григо́рїе, сла́во ѻ҆тцє́мъ бжⷭ҇твєннымъ и҆ соприча́стникъ и҆счи́сленъ, свѣти́льниче цр҃ко́вный, да́рꙋѧй на́мъ моли́твами тѝ ве́лїю млⷭ҇ть.
Сла́ва, гла́съ д҃:
Житїѐ бжⷭ҇твенно и҆спра́вль, видѣ́нїемъ дѣѧ́нїе ᲂу҆ѧсни́лъ є҆сѝ, бг҃оѧвле́нне григо́рїе, премꙋ́дрость бо возлюби́въ жела́нїемъ бжⷭ҇твеннымъ, и҆зъ ᲂу҆́стъ дх҃а бл҃года́ти ѡ҆богати́сѧ. ꙗ҆́кѡ со́тъ ме́двеный, сла́дость твои́хъ слове́съ и҆ска́паѧ, при́снѡ весели́ши ра́зꙋмы бжⷭ҇твенными цр҃ковь хрⷭ҇то́вꙋ, тѣ́мже, на нб҃сѣ́хъ со ст҃и́тели водворѧ́ѧсѧ, ѡ҆ на́съ непреста́ннѡ моли́сѧ, ѡ҆ творѧ́щихъ па́мѧть твою̀.
И҆ ны́нѣ, бг҃оро́диченъ:
При́зри на молє́нїѧ:
Тропа́рь, гла́съ и҃:
Правосла́вїю наста́вниче, ст҃и́телємъ ᲂу҆краше́нїе, бг҃осло́вцємъ побо́рниче непобѣди́мый, григо́рїе чꙋдотво́рче, солꙋ́ню вели́каѧ похвало̀, проповѣ́дниче бл҃года́ти, молѝ хрⷭ҇та̀ бг҃а сп҃сти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ: И҆́же на́съ ра́ди рожде́йсѧ:
На ᲂу҆́трени.
На Бг҃ъ гдⷭ҇ь: тропа́рь ст҃о́мꙋ два́жды.
Сла́ва, и҆ ны́нѣ, бг҃оро́диченъ.
По а҃-мъ стїхосло́вїи сѣда́ленъ, гла́съ а҃.
Подо́бенъ: Гро́бъ тво́й:
Бжⷭ҇твеннаго хрⷭ҇то́ва ст҃и́телѧ воспѣва́емъ, столпа̀ ѻ҆́гненнаго, свѣ́тꙋ ѻ҆́блака, дꙋ́хомъ предходѧ́ща і҆и҃леви но́вомꙋ де́нь и҆ вводѧ́ща въ разꙋ́мнꙋю зе́млю ми́ра, въ митропо́лїи же ѡ҆ хрⷭ҇тѣ̀ перворо́дныхъ, вели́каго григо́рїа.
Сла́ва, и҆ ны́нѣ, бг҃оро́диченъ:
Всели́сѧ въ тѧ̀ бжⷭ҇тва̀ всѐ и҆сполне́нїе, чⷭ҇таѧ, ꙗ҆́коже па́ѵелъ предречѐ, всѐ ѡ҆бг҃отворѝ тлѣ́нныхъ є҆стество̀, влⷣчце, ты́ же была̀ є҆сѝ нача́ло бл҃года́ти таковы́ѧ и҆ сп҃си́тельное рꙋково́дство и҆̀же вѣ́рою и҆ любо́вїю чтꙋ́щихъ тѧ̀.
По в҃-мъ стїхосло́вїи сѣда́ленъ, гла́съ а҃.
Подо́бенъ то́йже:
И҆змы́въ до́брѣ твои́хъ сле́зъ тече́ньми дꙋ́хъ, ᲂу҆́мнѣ воспрїѧ́лъ є҆сѝ бж҃е́ственныѧ бл҃года́ти, досточꙋ́дне, прича́стникъ бы́лъ є҆сѝ ѡ҆боже́нїѧ, є҆́же па́че є҆стества̀, сло́ва, є҆́же проповѣ́далъ є҆сѝ несо́здано всѣ̑мъ и҆ є҆ди́но, бг҃омꙋ́дре григо́рїе. (с. 678)
Сла́ва, и҆ ны́нѣ, бг҃оро́диченъ:
Свѣ́та разꙋ́мнагѡ свѣтлѣ́йшїй сосꙋ́дъ, тмꙋ̀ моегѡ̀ разрѣшѝ се́рдца, страсте́й же тѧжча́йшее бре́мѧ, молю́сѧ, ѡ҆блегчѝ, наставлѧ́ющи мѧ̀ къ покаѧ́нїю стезѧ́мъ и҆ бꙋ́дꙋщемꙋ сподоблѧ́ющи мѧ̀ свѣ́тꙋ, всебл҃же́ннаѧ влⷣчце.
По полѷеле́и сѣда́ленъ, гла́съ и҃. Подо́бенъ: Премꙋ́дрости:
Ѿстꙋ́пль текꙋ́щихъ, ѻ҆́тче премꙋ́дре григо́рїе, ца́рскихъ, и҆ дрꙋгѡ́въ, и҆ срѡ́дникъ, стѧжа́лъ є҆сѝ пребыва̑ющаѧ и҆ стоѧ̑щаѧ, бл҃же́нне, и҆ до́мъ ве́сь, и҆ ро́дъ приве́лъ є҆сѝ влⷣцѣ всѣ́хъ, честно́е всесожже́нїе. и҆́мже наставлѧ́емь, дꙋ́шꙋ ѡ҆свѧти́лъ є҆сѝ и҆ ᲂу҆́мъ съ тѣ́ломъ бг҃ови, григо́рїе, видѣ́нїемъ и҆ дѣѧ́нїемъ же молѧ́сѧ є҆мꙋ̀ прилѣ́жнѡ согрѣше́нїємъ ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀.
Сла́ва, и҆ ны́нѣ, бг҃оро́диченъ:
Въ пло́ть твою̀ ѡ҆дѣ́ѧвсѧ, ꙗ҆́кѡ бл҃гъ, зра́къ влⷣка ра́бїй ѡ҆божѝ, влⷣчце, совокꙋпи́всѧ по соста́вꙋ и҆ є҆стество̀ всѐ и҆спо́лнивъ дх҃омъ, ст҃ы́хъ собо́ры содѣ́лавъ благода́тїю, ѿню́дꙋже прїи́мъ винꙋ̀ неизрече́нныхъ дѣ́лъ и҆ пе́рвꙋю, дх҃омъ и҆спо́лньшꙋюсѧ, пою́ще тѧ̀ ѿ дꙋшѝ, зове́мъ тѝ: ра́дꙋйсѧ, сп҃се́нїѧ нача́льнице: ра́дꙋйсѧ, согрѣше́нїємъ разрѣше́нїе покланѧ́ющымсѧ вѣ́рою ржⷭ҇твꙋ̀ твоемꙋ̀.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.
Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;
Є҆ѵⷢ҇лїе ѿ і҆ѡа́нна, зача́ло л҃є.
По н҃-мъ ѱалмѣ̀ стїхи́ра самогла́сна, гла́съ ѕ҃:
Благоче́стїѧ и҆́стиннаго проповѣ́дника и҆ цр҃кви пресвѣ́тлꙋю ѕвѣздꙋ̀ пѣ́сньми похва́льными почти́мъ, солꙋ́ню свѣ́тлаго свѣти́льника, свѣ́тꙋ ᲂу҆ченика̀ и҆ дрꙋ́га хрⷭ҇то́ва, сѣ́ѧй сло́во благоче́стїѧ бжⷭ҇твенно въ сердца̀ всѣ́хъ вѣ́рныхъ, всѣ̑мъ ко сп҃се́нїю да́рꙋетъ и҆ мо́литсѧ прилѣ́жнѡ гдⷭ҇еви поми́ловатисѧ дꙋша́мъ на́шымъ.
Канѡ́нъ, творе́нїе патрїа́рха фїлоѳе́а. Гла́съ а҃.
Пѣ́снь. а҃.
І҆рмо́съ: Твоѧ̀ побѣди́тельнаѧ десни́ца бг҃олѣ́пнѡ въ крѣ́пости просла́висѧ, та́ бо, безсме́ртне, ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ.
Ты̀ дарова́нїй и҆сто́чникꙋ и҆ премꙋ́дрости дꙋхо́внѣй, пресла́вне, ᲂу҆ста̀ и҆ мы́сль приложи́въ, бл҃года́ти ꙗ҆ви́лсѧ є҆сѝ пꙋчи́на, ѿ неѧ́ же ка́плю, ѻ҆́тче, и҆ мнѣ̀ пода́ждь, пою́щемꙋ тѧ̀.
Оу҆ста́въ и҆ пра́вило па́че є҆стества̀ и҆́ноческомꙋ жи́тельствꙋ ты̀ бы́лъ є҆сѝ, ᲂу҆ста̀ бг҃осло́вєцъ же, и҆ ст҃и́тєль, и҆ ᲂу҆чи́тєль бж҃є́ственнаѧ, ѿню́дꙋже, соше́дшесѧ вкꙋ́пѣ, тебѣ̀ пѣ́нїе плетꙋ́тъ.
И҆́нъ ꙗ҆ви́лсѧ є҆сѝ ѿ чре́ва і҆еремі́а вѣ́домь, сотво́ршемꙋ ве́сь возло́женъ, ѡ҆свѧще́нъ, бг҃оно́се, ве́сь же, ѿню́дꙋже твоѧ̑ ᲂу҆ста̀ бж҃їѧ сло́ва воспрїѧ́ша.
Престо́лꙋ предстоѧ̀ бжⷭ҇твенномꙋ со а҆́гг҃лы, бг҃ови́дче григо́рїе, лꙋчꙋ̀ воспрїе́млѧ ны́нѣ ꙗ҆вле́ннѣ непристꙋ́пнꙋю, моли́сѧ тмы̀ грѣхо́вныѧ на́мъ разрѣши́тисѧ, мо́лимсѧ.
Бг҃оро́диченъ:
Свѣ́тъ возсїѧ́вый, бг҃ороди́тельнице, ѿ твоеѧ̀ ᲂу҆тро́бы, ви́дѣти жела́ѧ, григо́рїй, тебѐ, моли́твенницꙋ, и҆ содѣ́телѧ представлѧ́етъ и҆ жела́емыѧ ѿ тебє̀ полꙋчѝ бл҃года́ти.
Пѣ́снь г҃.
І҆рмо́съ: Є҆ди́не вѣ́дый человѣ́ческагѡ сꙋщества̀ не́мощь и҆ ми́лостивнѡ въ нѐ воѡбра́жьсѧ, препоѧ́ши мѧ̀ съ высоты̀ си́лою, є҆́же вопи́ти тебѣ̀: свѧ́тъ ѡ҆дꙋшевле́нный хра́мъ неизрече́нныѧ сла́вы твоеѧ̀, чл҃вѣколю́бче.
Ю҆ро́дство, премꙋ́дре, мїрскꙋ́ю мꙋ́дрость вмѣни́лъ є҆сѝ, кре́стное ю҆ро́дство возлюби́лъ є҆сѝ и҆ сего̀, на ра́мо прїи́мъ, показа́лъ є҆сѝ, ꙗ҆́коже па́ѵелъ речѐ, є҆́же ю҆ро́дствомъ мїрскі̑ѧ мꙋ́дрѡсти превше́дъ.
Возлюби́лъ є҆сѝ, ѻ҆́тче, ѿ дꙋшѝ нищетꙋ̀, и҆ смире́нїе, и҆ хꙋ́дость, и҆ нестѧжа́тельство, человѣ́къ бѣ́гаѧ, ѿню́дꙋже гони́мь є҆сѝ въ пꙋсты́ню, всегда̀, въ воню̀ мѵ́ръ твои́хъ, хрⷭ҇то́ви зовѧ́ше: текꙋ̀ вслѣ́дъ тебѣ̀.
Оу҆мертви́лъ є҆сѝ, премꙋ́дре, ве́тхаго тлѣ́ющаго человѣ́ка воздержа́нїемъ всѧ́кимъ и҆ пла́чемъ, и҆сто́чники сле́зными дово́льнѣ ѡ҆мыва́ѧсѧ, житїе́мъ воспрїѧ́лъ є҆сѝ дре́внюю свою̀ добро́тꙋ ѡ҆ хрⷭ҇тѣ̀ и҆ въ но́ваго ѡ҆дѣ́ѧвсѧ.
Восхва́лимъ, мнѡ́жества и҆́нѡкъ съ мѣ́стныхъ же состоѧ̑нїѧ, со сщ҃е́нники всѣ́ми и҆ пита̑тельницы, гла́сы кра́сными и҆ словесы̀ бжⷭ҇твенными дне́сь ѻ҆́бщаго ᲂу҆чи́телѧ, и҆́же на́съ ᲂу҆краси́вшаго дѣ́лы же и҆ словесы̀, григо́рїа.
Бг҃оро́диченъ:
Ви́дѣвъ, ю҆́же жела́ше, зарю̀ дꙋхо́внꙋю, григо́рїе, предста́тельствомъ бг҃ома́тере, ꙗ҆снѣ́йши же ны́нѣ то́ю ѡ҆свѣща́емь, тоѧ̀ молѝ тмы̀ страсте́й на́съ премѣни́ти свѣ́томъ благода́тнымъ.
Сѣда́ленъ, гла́съ и҃. Подо́бенъ: Премꙋ́дрости:
Воздержа́нїемъ, и҆ пла́чемъ, и҆ моли́твою, и҆ дѣ́йствомъ, и҆ нището́ю, и҆ ѻ҆́бщимъ ᲂу҆мове́нїемъ, григо́рїе, сле́знымъ ѡ҆чи́стилъ є҆сѝ своѐ се́рдце, ве́сь восхище́нъ бы́въ, и҆ хрⷭ҇то́ви совокꙋпи́сѧ дх҃омъ, ѿню́дꙋже, ꙗ҆́кѡ па́ѵелъ, неизрече́нныхъ ᲂу҆слы́шавъ и҆ сосꙋ́дъ бы́въ и҆збра́ненъ, ты̀ поне́слъ є҆сѝ хрⷭ҇то́во и҆́мѧ, несо́здано проповѣ́далъ є҆сѝ высо́цѣ и҆ про́стѡ є҆ди́но бжⷭ҇тво̀, є҆́же молѧ̀ не преста́й сп҃сти́сѧ ста́дꙋ твоемꙋ̀.
Сла́ва, и҆ ны́нѣ, бг҃оро́диченъ:
И҆́же пре́жде ѿ не сꙋ́щихъ приве́дъ сꙋ́щихъ є҆стества̀, сло́ве бж҃їй, поче́тъ ѻ҆́бразомъ же и҆ рꙋко́ю человѣ́ка, и҆стлѣ́вша того̀ пре́лестїю ѕмїи́ною, назда́въ па́ки крⷭ҇то́мъ честны́мъ тѝ, всѧ́кое же є҆стество̀ ѡ҆ст҃и́лъ є҆сѝ, ще́дре, ст҃ы́мъ твои́мъ дх҃омъ и҆ тѣле́снымъ воспрїѧ́тїемъ, мт҃ре твоеѧ̀ мольба́ми, влⷣко хрⷭ҇тѐ бж҃е, согрѣше́нїємъ ѡ҆ставле́нїе да́рꙋй покланѧ́ющымсѧ вѣ́рою держа́вѣ твое́й.
Пѣ́снь д҃.
І҆рмо́съ: Го́рꙋ тѧ̀, бл҃года́тїю бж҃їею прїѡсѣне́ннꙋю, прозорли́выма а҆ввакꙋ́мъ ᲂу҆смотри́въ ѻ҆чи́ма, и҆зъ тебє̀ и҆зы́ти і҆и҃левꙋ провозглаша́ше ст҃о́мꙋ во сп҃се́нїе на́ше и҆ ѡ҆бновле́нїе.
Но́щь безлꙋ́чнꙋю и҆ тмꙋ̀, григо́рїе, страсте́й моли́твенною па́лицею ра́нивъ, ꙗ҆́коже мѡѷсе́й є҆гѵ́пта, восте́клъ є҆сѝ па́че є҆стества̀ къ видѣ́нїю бжⷭ҇твенномꙋ и҆ законода́вецъ на́мъ бы́лъ є҆сѝ.
На высотꙋ̀ возше́дъ бжⷭ҇твеннꙋю, ѻ҆́тче григо́рїе, добродѣ́телей, ꙗ҆́коже на ѳавѡ́рѣ хрⷭ҇тѡ́вы дрꙋ́зи и҆ ᲂу҆ченицы̀, ѻ҆́наго ᲂу҆зрѣ́лъ є҆сѝ, є҆сте́ственнꙋю и҆ бжⷭ҇твеннꙋю сла́вꙋ ꙗ҆влѧ́юща, и҆ ѡ҆божи́всѧ, дрꙋго́е показа́сѧ со́лнце.
Таи́нникъ бжⷭ҇тва̀, бг҃ови́дче григо́рїе, и҆ неизрече́нныхъ прича́стникъ ты̀ бы́въ, бг҃осло́вити тогѡ̀ та́йнꙋ, є҆ди́но тоѧ̀ возвѣсти́въ и҆ несо́здано си́лою и҆ є҆стество́мъ тремѝ соста́вы.
Бг҃оро́диченъ:
Сло́во ро́ждшꙋю, бж҃їе неизрече́нное, словесы̀ воспѣ́лъ є҆сѝ сщ҃е́нными и҆ та́йнꙋ свѣ́тлѡ бжⷭ҇твеннагѡ воплоще́нїѧ возвѣсти́лъ є҆сѝ, ю҆́же ны́нѣ молѝ цр҃ковь соблюда́ти неѡбꙋрева́емꙋ.
Пѣ́снь є҃.
І҆рмо́съ: Просвѣти́вый сїѧ́нїемъ прише́ствїѧ твоегѡ̀, хрⷭ҇тѐ, и҆ ѡ҆свѣти́вый крⷭ҇то́мъ твои́мъ мі́ра концы̀, сердца̀ просвѣтѝ свѣ́томъ твоегѡ̀ бг҃оразꙋ́мїѧ, правосла́внѡ пою́щихъ тѧ̀.
Оу҆́мъ вели́кїй, премꙋ́дрости глꙋбина̀ неизрече́ннаѧ, ѡ҆брѣ́те тво́й, бг҃оно́се, ᲂу҆́мъ вселе́нїе, себѣ̀ содрꙋже́нъ, ᲂу҆мꙋ̀ и҆ премꙋ́дрости ѻ҆рга́нъ тѧ̀ цр҃кви дарова́лъ є҆́сть.
Ꙗ҆́кѡ лꙋчꙋ̀ свѣ́тлꙋю, пре́жде на а҆ѳѡ́нѣ, григо́рїе, возсїѧ̀, свѣ́тломꙋ тѧ̀ гра́дꙋ да́рꙋетъ, свѣ́томъ дꙋхо́внымъ тогѡ̀ бг҃одви́жимъ, ѡ҆свѧща́ѧ и҆ ѻ҆те́чески преднаставлѧ́ѧ.
Да́ръ бжⷭ҇твенный ѿ бг҃а тѧ̀ и҆ бога́тство неистощи́мое ѡ҆брѣ́тъ, ѳетта́льскаѧ держа́внаѧ митропо́лїѧ созыва́етъ сосѣ́ды къ прича́стїю твои́хъ слове́съ и҆ чꙋде́съ, бл҃же́нне.
Жела́ющїи по́двига и҆ слове́съ бл҃года́тей григо́рїевыхъ, пѣ́снь томꙋ̀ ны́нѣ приносѧ́ще, того̀ помо́лимъ є҆гѡ́же моли́твами зижди́телѧ и҆ влⷣкꙋ ми́лостива всѣ̑мъ содѣ́лати.
Бг҃оро́диченъ:
Просвѣти́вый землѝ широтꙋ̀ со́лнца свѣ́тлостїю, свѣ́тъ сꙋ́щымъ ꙗ҆ви́сѧ во тмѣ̀, дв҃о, невече́рнїй, є҆го́же молѝ тмы̀ лю́тыѧ и҆ грѣхо́вныѧ на́съ и҆зба́вити, влⷣчце.
Пѣ́снь ѕ҃.
І҆рмо́съ: И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во и҆ пло́ть прїе́мшее про́йде, сохра́ньшее нетлѣ́ннꙋ: є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.
Пра́вило добродѣ́тели, ѡ҆бж҃е́нное житїѐ твоѐ ви́дѣно бы́сть вѣ́рными вои́стиннꙋ, григо́рїе, бл҃гоче́стїѧ же прави́тель сло́во твоѐ, и҆ велѣ́нїе, и҆́ми же своѐ ро́дное и҆ пꙋсторо́дное разсꙋжда́етсѧ, є҆ди́наго бг҃а проповѣ́дающе всеси́льна, є҆ди́наго и҆ несо́здана.
Є҆ди́но бл҃гоче́стнѡ проповѣ́давъ бжⷭ҇тво̀, вели́кїй на́мъ ꙗ҆ви́сѧ, григо́рїе, соста́вми тремѝ є҆ди́но є҆стество̀ и҆ си́лꙋ, всѧ́чески тꙋ́ю про́стꙋ и҆ несо́зданꙋ, всѣ́хъ посрами́лъ є҆сѝ держа́внѣ, бꙋесло́вѧщихъ со́здано бжⷭ҇тво̀.
Безꙋ́мнагѡ мꙋдрова́нїе ѡ҆блича́еши а҆кїндѵ́на, ꙗ҆́кѡ и҆ пре́жде варлаа́ма го́рдаго, є҆́ллинскимъ бо приѡбщи́вшымсѧ сла́вамъ, сведо́ша бжⷭ҇тво̀ въ тва́рь, ѡ҆бесче́стивше, ꙗ҆́коже жи́дове пе́рвѣе, сн҃а бж҃їѧ досто́инство.
Оу҆ста́вы приводѧ̀ велѣ́нїй, григо́рїе, и҆ словеса̀ свѣ́тла, и҆́миже ѿве́рзлъ є҆сѝ мы́сль честны́хъ бг҃осло́вєцъ дх҃омъ, мл҃твами тѝ неподви́жимꙋ соблюдѝ хрⷭ҇то́вꙋ, и҆збавлѧ́ющи, цр҃ковь ѿ всѧ́кїѧ є҆́реси.
Бг҃оро́диченъ:
Престо́лъ херꙋві́мскихъ и҆ всѣ́хъ нбⷭ҇ныхъ си́лъ, влⷣчце, и҆ всѧ́кагѡ вкꙋ́пѣ го́рнѧгѡ чи́на вы́шши ты̀ показа́сѧ, ꙗ҆́кѡ престо́лъ неизрече́ненъ бы́вши бж҃їѧ соста́ва, є҆го́же, ꙗ҆́кѡ сн҃а своегѡ̀, ми́лостива мѝ, вѣ́рнѡ тѧ̀ пою́щꙋ, содѣ́лай.
Конда́къ, гла́съ и҃. Подо́бенъ: Взбра́нной:
Премꙋ́дрости сщ҃е́нный и҆ бжⷭ҇твенный ѻ҆рга́нъ, бг҃осло́вїѧ свѣ́тлꙋю согла́снѡ трꙋбꙋ̀, воспѣва́емъ тѧ̀, григо́рїе бг҃оглаго́льниче, но ꙗ҆́кѡ ᲂу҆́мъ ᲂу҆мꙋ̀ пе́рвомꙋ предстоѧ́й, къ немꙋ̀ ᲂу҆́мъ на́шъ ѻ҆́тче наста́ви, да зове́мъ: ра́дꙋйсѧ, проповѣ́дниче бл҃года́ти.
І҆́косъ:
А҆́гг҃лъ ꙗ҆ви́лсѧ є҆сѝ на землѝ, неизрече́нныхъ бжⷭ҇твєннаѧ тлѣ̑ннымъ возвѣща́ѧ, и҆́бо безпло́тныхъ гласовѡ́мъ, человѣ́ческимъ же ᲂу҆мо́мъ и҆ тѣ́ломъ живы́й, ᲂу҆диви́лъ є҆сѝ и҆ сотвори́лъ є҆сѝ зва́ти тѝ, бг҃оглаго́ливе, сїѧ̑: ра́дꙋйсѧ, є҆гѡ́же ра́ди свѣ́тъ проповѣ́дасѧ: ра́дꙋйсѧ, є҆гѡ́же ра́ди тма̀ ѿгна́сѧ: ра́дꙋйсѧ, несозда́ннагѡ бжⷭ҇тва̀ возвѣсти́телю: ра́дꙋйсѧ, созда́ннагѡ є҆стества̀ и҆ бꙋ́ѧгѡ вои́стиннꙋ ѻ҆бличи́телю: ра́дꙋйсѧ, высото̀ невосхо́днаѧ, бж҃їе є҆стество̀ ре́къ: ра́дꙋйсѧ, глꙋбино̀ неꙋдо́бь зри́тельнаѧ, дѣ́йство ре́къ: ра́дꙋйсѧ, ꙗ҆́кѡ сла́вꙋ бж҃їю до́брѣ ре́клъ є҆сѝ: ра́дꙋйсѧ, ꙗ҆́кѡ мꙋдрова̑нїѧ ѕло́бныхъ ѿре́къ: ра́дꙋйсѧ, свѣти́ло, показа́вый сл҃нце: ра́дꙋйсѧ, сосꙋ́де, бжⷭ҇твеннагѡ питїѧ̀ прїѧ́телище: ра́дꙋйсѧ, и҆́мже и҆́стина сїѧ́етъ: ра́дꙋйсѧ, и҆́мже помрачи́сѧ лжа̀: ра́дꙋйсѧ, проповѣ́дниче благода́ти.
Пѣ́снь з҃.
І҆рмо́съ: Тебѐ, ᲂу҆́мнꙋю, бг҃оро́дице, пе́щь разсмотрѧ́емъ, вѣ́рнїи: ꙗ҆́коже бо ѻ҆́троки сп҃сѐ трѝ превозноси́мый, мі́ръ ѡ҆бновѝ, во чре́вѣ твое́мъ всецѣ́лъ, хва́льный ѻ҆тцє́въ бг҃ъ и҆ препросла́вленъ.
Ꙗ҆́коже гро́ма гла́съ твои́хъ велѣ́нїй и҆ слове́съ бжⷭ҇твенныхъ мо́лнїе ᲂу҆жа́сныхъ зрѣ́ти ꙗ҆́вственнѣ, ѻ҆́тче, не возмога́ютъ пре́лестїю плѣне́ннїи и҆ ѡ҆сѧза́ютъ, ꙗ҆́коже пи́шетъ, ꙗ҆́кѡ слѣпы́й, ны́нѣ стѣ́ны смѣ́шнѣ безꙋ́мнїи.
Но́щь не свѣтла̀ непокѡри́вымъ бы́сть, и҆ ны́нѣ свѣ́тъ є҆сте́ственный црⷭ҇тво сла́вы бж҃їѧ, и҆́же ꙗ҆вѝ таи́нникѡмъ чл҃вѣколю́бецъ на горѣ̀ ѳавѡ́рстѣй, григо́рїе, є҆́юже, причасти́всѧ дово́льнѣ, прїѡбща́ешисѧ ᲂу҆годи́вшымъ.
И҆̀же нечести́вѣ въ бл҃года́ть, пресла́вне, похꙋ́лившымъ бж҃їе безмо́лвїе и҆ моли́твꙋ, ѡ҆бж҃е́нїю же неизрече́нномꙋ скве́рнѣ насмѣѧ́вшихсѧ, тѣ́хъ посрами́въ, ѿгна́лъ є҆сѝ бжⷭ҇твеннагѡ двора̀, є҆го́же соблюда́еши всегда̀ твои́ми мольба́ми.
Бг҃оро́диченъ:
Прїидѝ ны́нѣ въ на́шꙋ по́мощь, сп҃се́нїе ѻ҆́бщее, григо́рїєвы моли̑твы прїе́млющи, влⷣчце, стра̑сти ᲂу҆̀бо ᲂу҆сыпа́ющи дꙋшє́вныѧ и҆ тѣлє́сныѧ и҆ ѻ҆́бщїй мѧте́жъ и҆ тлѣ́нїе вско́рѣ разрѣша́ющи.
Пѣ́снь и҃.
І҆рмо́съ: Въ пещѝ ѻ҆́троцы і҆и҃лєвы, ꙗ҆́коже въ горни́лѣ, добро́тою бл҃гоче́стїѧ чистѣ́е зла́та блеща́хꙋсѧ, глаго́люще: бл҃гослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те во всѧ̑ вѣ́ки.
Ꙗ҆ви́лсѧ є҆сѝ, ѻ҆́тче, ве́сь свѣ́телъ, сла́достенъ, пра́въ, кро́токъ, вѣ́рою приходѧ́щымъ тѝ и҆сточа́ѧ сла́дкое слове́съ, григо́рїе, бжⷭ҇твенное пи́во, всѣ́хъ веселѧ̀ бл҃гочести́выхъ сердца̀, ка́плѧ недꙋ́гꙋющихъ дꙋше́вными чꙋ́вствы.
Оу҆́мъ и҆ ѧ҆зы́къ вои́стиннꙋ благоро́денъ, наказа́нїе же и҆ словеса̀ се́рдце ѡ҆чище́но ѡ҆брѣ́тъ, бж҃їѧ въ тѧ̀ всели́сѧ премꙋ́дрость, є҆́йже дрꙋ́гъ дрꙋ́гꙋ сосвѧза́вшисѧ, ѻ҆́тче, чꙋ́до всѣ̑мъ стра́нно показа́ тѧ мі́рови.
Въ пещѝ дѣ́ти невреждє́ны є҆врє́йскїѧ показа̀ держа́ва благоче́стїѧ, и҆̀мже подо́бѧсѧ, премꙋ́дре, пла́мень ᲂу҆держа́лъ є҆сѝ ѕлоче́стїѧ посредѣ̀ пе́щи и҆скꙋше́нїй. и҆ до́блественнѣ поѧ̀ влⷣкꙋ, и҆ ѡ҆палѧ́ѧ гонѧ́щихъ.
Оу҆́мнаго погрꙋзи́лъ є҆сѝ фараѡ́на тече́ньми твои́хъ сле́зъ и҆ всѐ є҆гѵ́петское потопи́лъ є҆сѝ во́инство. возше́лъ є҆сѝ на го́рꙋ безстра́стїѧ, побива́ѧ ѿтꙋ́дꙋ дх҃а си́лою полкѝ бори́тель, ꙗ҆́коже мѡѷсе́й вели́кїй.
Бг҃оро́диченъ:
Свѣ́тлый бл҃года́ти, чⷭ҇таѧ, проповѣ́дникъ и҆ бг҃осло́вецъ дх҃а, бг҃оро́дице, да́ннагѡ тобо́ю мі́рови, ны́нѣ словесы̀ торжествꙋ́ѧ пѣ́нїе, пѣ́сни же и҆ ли́ки всѧ̑ тѝ собира́етъ, ꙗ҆́кѡ вѣ́рный ра́бъ, па́мѧть твою̀ сла́вѧ.
Пѣ́снь ѳ҃.
І҆рмо́съ: Ѻ҆́бразъ чи́стагѡ ржⷭ҇тва̀ твоегѡ̀ ѻ҆гнепали́маѧ кꙋпина̀ показа̀ неѡпа́льнаѧ: и҆ ны́нѣ на на́съ напа́стей свирѣ́пѣющꙋю ᲂу҆гаси́ти, мо́лимсѧ, пе́щь, да тѧ̀, бг҃оро́дице, непреста́ннѡ велича́емъ.
Прⷭ҇то́лꙋ предстоѧ̀, григо́рїе, трисо́лнечнагѡ и҆ безнача́льнагѡ бжⷭ҇тва̀ и҆ дѣ́йствомъ дово́льнѣ насы́тивсѧ бл҃года́тїю, ю҆́же воспѣ́лъ є҆сѝ, содѣ́йственникъ и҆ дрꙋгѡ́въ, ны́нѣ воспомѧнꙋ́вшихъ тѧ̀ помина́й.
Ѡ҆брѣ́лъ є҆сѝ возда́нїе болѣ́зней твои́хъ, црⷭ҇тво, ѻ҆́тче, бж҃їе безнача́льное, є҆́же благоче́стнѣ на землѝ воспроповѣ́далъ є҆сѝ, вѣнцы̀ триплетє́ны воспрїѧ́лъ є҆сѝ и҆сповѣ́данїѧ бжⷭ҇твеннагѡ, сщ҃е́нства же и҆ безмо́лвїѧ.
Ꙗ҆ви́лсѧ є҆сѝ и҆́ночествꙋющымъ похвала̀, бг҃осло́вецъ бж҃е́ственъ, сщ҃е́нства же пра́вило и҆звѣ́стное, сегѡ̀ ра́ди здѣ̀ да́стъ тѝ сѧ чꙋдесє́мъ бжⷭ҇твеннаѧ бл҃года́ть, словеса̀ твоѧ̑ ᲂу҆твержда́ѧ.
Зако́нъ похва́льныхъ, пресла́вне, и҆ слове́сныхъ пѡ́двигъ вои́стиннꙋ и҆сше́дъ, и҆ на землѝ живы́й, и҆ и҆сше́дъ ѿ тѣ́ла, но прїимѝ ма́лое пѣ́нїе и҆зрѧ́днѣйши и҆ прошє́нїѧ подава́й тебѣ̀ жела́ющихъ моли́твами свои́ми.
Бг҃оро́диченъ:
Оу҆ста̀ стра́шнагѡ ржⷭ҇тва̀ твоегѡ̀ и҆ бг҃ослове́сный ѧ҆зы́къ, влⷣчце, бы́сть, є҆́же па́че є҆стества̀ ѿ тебѐ ꙗ҆́вльшагосѧ ѡ҆бж҃е́нїѧ чⷭ҇тны́й тво́й ра́бъ григо́рїй, є҆го́же ны́нѣ мольбы̀ прїе́млющи, сп҃сѝ всѣ́хъ.
Свѣти́ленъ. Подо́бенъ: Со ᲂу҆ченикѝ:
Ра́дꙋйсѧ, ѻ҆тцє́мъ похвала̀, бг҃осло́вєцъ ᲂу҆ста̀, безмо́лвїѧ жили́ще, до́мъ премꙋ́дрости, ᲂу҆чи́телей держа́ва, бе́здна сло́ва: ра́дꙋйсѧ, дѣѧ̑нїѧ ѻ҆рга́нъ, видѣ́нїѧ ве́рхъ, цѣли́телю страсте́й и҆ болѣ́знємъ человѣ̑ческимъ: ра́дꙋйсѧ, дх҃а ст҃а́гѡ селе́нїе, и҆ ᲂу҆́меръ, и҆ жи́въ, ѻ҆́тче.
Сла́ва, и҆ ны́нѣ, бг҃оро́диченъ:
Ра́дꙋйсѧ, ра́дости хода́таице: ра́дꙋйсѧ, клѧ́твѣ разрѣше́нїе: ра́дꙋйсѧ, а҆да́мово воскресе́нїе: ра́дꙋйсѧ, паде́нїе бѣсовѡ́мъ: ра́дꙋйсѧ, же́нскагѡ стꙋда̀ потребле́нїе: ра́дꙋйсѧ, а҆́дово и҆спражне́нїе, тлѧ̀ сме́рти, ѡ҆свѧще́нїе человѣ́ческагѡ є҆стества̀: ра́дꙋйсѧ, дв҃о, ра́дꙋйсѧ, всѣ́хъ влⷣчце: ра́дꙋйсѧ, бж҃їѧ мт҃и.
На хвали́техъ стїхи̑ры, гла́съ и҃. Подо́бенъ: Ѽ, пресла́внагѡ чꙋдесѐ:
Ѻ҆́тче сщ҃е́нне григо́рїе, ты̀, бг҃а и҆здѣ́тска возлюби́въ, возненави́дѣлъ є҆сѝ ве́щное пристра́стїе и҆ мі́ра не постоѧ́тельное и҆ крⷭ҇тъ до́блественъ воспрїи́мъ, своемꙋ̀ влⷣце послѣ́довалъ є҆сѝ, пла́чемъ и҆ слеза́ми дꙋ́шꙋ ѡ҆чи́стивъ свою̀ и҆ ᲂу҆́мъ, ве́сь бы́лъ є҆сѝ бг҃ови́днѣйшїй.
Ѻ҆́тче сщ҃е́нне григо́рїе, ты̀ се́рдце до́брѣ видѣ́нїемъ же и҆ дѣѧ́нїемъ ѡ҆чи́стивъ си, дх҃ови бы́лъ є҆сѝ селе́нїе, и҆ ѡ҆сїѧ́нїе тогѡ̀ прїе́млѧ, свѣ́тъ ꙗ҆ви́лсѧ є҆сѝ вои́стиннꙋ приближа́ющымтисѧ, сѐ сн҃ъ свѣ́та бы́лъ є҆сѝ по бл҃года́ти, сла́вне, є҆́же са́мъ є҆стество̀ бы́въ бж҃їе, не раздѣлѧ́ѧсѧ.
Ѻ҆́тче бг҃омꙋ́дре григо́рїе, ты̀ ѕлѣ́йшее сѣ́мѧ и҆ ко́рень раскопа́лъ є҆сѝ, варлаа́ма скве́рнаго ѿсѣ́клъ є҆сѝ мече́мъ дх҃о́внымъ, преда́телѧ же а҆́бїе вѣ́рѣ и҆ сотаи́нника семꙋ̀, сꙋемꙋ́дреннаго а҆кїндѵ́на, бжⷭ҇твеннагѡ и҆сполне́нїѧ є҆реті́чествꙋющихъ ѿгна́въ, сочета́лъ є҆сѝ хꙋ́льникѡмъ є҆вре́ѡмъ, поревнова́вша си́хъ безꙋ́мїю.
Ѻ҆́тче бг҃омꙋ́дре григо́рїе, дꙋ́шꙋ ѡ҆чи́стилъ є҆сѝ, ᲂу҆мо́мъ свои́мъ и҆збѣжа́въ ѿ нечи́стагѡ дїа́вола, вои́стиннꙋ сла́венъ свои́мъ вели́чествомъ, дꙋ́хъ сво́й преда́лъ є҆сѝ хрⷭ҇тꙋ̀, бг҃ꙋ на́шемꙋ.
Сла́ва, гла́съ а҃:
И҆́же пра́выѧ вѣ́ры до́блїй подви́жниче, и҆́же пострада́въ, ꙗ҆́кѡ до́бръ во́инъ хрⷭ҇та̀ бг҃а, и҆ воево́дѣ ᲂу҆годи́вый, и҆ подвиза́сѧ ны́нѣ въ цр҃кви до́брымъ по́двигомъ, соблюда́ѧ ю҆̀ твои́ми ᲂу҆че́ньми на недви́жимомъ ѻ҆снова́нїи, григо́рїе.
И҆ ны́нѣ, бг҃оро́диченъ:
Ра́дꙋйсѧ, бг҃оро́дице дв҃о: ра́дꙋйсѧ, похвало̀ всеѧ̀ вселе́нныѧ: ра́дꙋйсѧ, пречⷭ҇таѧ мт҃и бж҃їѧ, бл҃гослове́ннаѧ.
Славосло́вїе вели́кое, и҆ ча́съ а҃-й, и҆ ѿпꙋ́стъ.
На лїтꙋргі́и.
Бл҃жє́нны, пѣ́сни г҃-ѧ и҆ ѕ҃-ѧ.
Прокі́менъ: Оу҆ста̀ моѧ̑ возглаго́лютъ:
А҆пⷭ҇лъ ко є҆вре́ѡмъ, зача́ло ти҃і.
Є҆ѵⷢ҇лїе ѿ і҆ѡа́нна, зача́ло л҃ѕ.