Мѣ́сѧца тогѡ́же въ к҃а-й де́нь. Вхо́дъ во хра́мъ прест҃ы́ѧ влⷣчцы на́шеѧ бцⷣы и҆ приснодѣ́вы марі́и.
На ма́лѣй вече́рни,
На Гдⷭ҇и, воззва́хъ, стїхи̑ры, гла́съ а҃. Поⷣ: Нбⷭ҇ныхъ чинѡ́въ:
Ѿ гдⷭ҇а прїи́мше ѡ҆бѣща́нїѧ пло́дъ, ꙳ і҆ѡакі́мъ и҆ а҆́нна бж҃їю мт҃рь, ꙳ благопрїѧ́тнꙋ же́ртвꙋ, ꙳ въ хра́мъ введо́ша дне́сь, ꙳ и҆ заха́рїа, вели́кїй а҆рхїере́й, ꙳ благослови́въ, прїѧ́тъ.
Два́жды.
Ст҃ы́хъ ст҃а́ѧ ꙳ во ст҃ы́хъ ѡ҆бита́ти досто́йнѡ введе́сѧ, ꙳ ꙗ҆́кѡ бг҃опрїѧ́тна же́ртва. ꙳ и҆ сїю̀ дѣ́вы, добродѣ́тельми благоꙋкраша́емы, ꙳ впредѝ свѣщеносѧ́ще, ꙳ приведо́ша гдⷭ҇ꙋ, ꙗ҆́коже сосꙋ́дъ свѧще́ннѣйшїй.
Да ѿве́рзетсѧ две́рь бг҃опрїѧ́тнагѡ хра́ма: ꙳ хра́мъ бо всѣ́хъ цр҃ѧ̀ и҆ престо́лъ ꙳ дне́сь со сла́вою внꙋ́трь прїе́мъ, ꙳ і҆ѡакі́мъ возлага́етъ, ѡ҆свѧти́въ гдⷭ҇ꙋ, ꙳ ѿ негѡ̀ и҆збра́ннꙋю въ мт҃рь є҆гѡ̀.
Сла́ва, и҆ ны́нѣ, гла́съ и҃:
Дв҃дъ провозглаша́ше тебѣ̀, пречⷭ҇таѧ, прови́дѧ ѡ҆свѧще́нїе вхо́да твоегѡ̀ въ хра́мъ, въ не́мже концы̀ дне́сь пра́зднꙋюще, славосло́вѧтъ тѧ̀, всепѣ́таѧ: ꙗ҆́же бо пре́жде ржⷭ҇тва̀ дѣ́ва, и҆ по ржⷭ҇твѣ̀ пребы́вши нетлѣ́нна, мт҃и сло́ва жи́зни. дне́сь въ хра́мѣ заха́рїа весели́тсѧ, воспрїе́мъ тѧ̀, влⷣчце: и҆ ст҃а̑ѧ ст҃ы́хъ ра́дꙋютсѧ, под̾е́мши тѧ̀, и҆сто́чника жи́зни на́шеѧ. тѣ́мже и҆ мы̀ ѱало́мски вопїе́мъ тѝ: ѡ҆ на́съ молѝ сн҃а твоего̀ и҆ бг҃а на́шего, дарова́ти на́мъ ве́лїю ми́лость.
На стїхо́внѣ стїхи́ра, гла́съ в҃. Подо́бенъ: До́ме є҆ѵфра́ѳовъ:
Двє́ри нбⷭ҇ныѧ, ꙳ прїими́те дв҃ꙋ ꙳ во ст҃а̑ѧ ст҃ы́хъ, ꙳ нескве́рнꙋю же ски́нїю ꙳ бг҃а вседержи́телѧ.
Сті́хъ: Приведꙋ́тсѧ цр҃ю̀ дѣ̑вы въ слѣ́дъ є҆ѧ̀: и҆́скрєннїѧ є҆ѧ̀ приведꙋ́тсѧ тебѣ̀.
Дѣ́вственнїи ли́цы, ꙳ чⷭ҇тꙋю прїе́млите дѣ́вꙋ, ꙳ свѣ́тлѡ свѣщеносѧ́ще ꙳ во ст҃а̑ѧ ст҃ы́хъ, ꙳ ꙗ҆́кѡ невѣ́стꙋ бг҃а всецр҃ѧ̀.
Сті́хъ: Приведꙋ́тсѧ въ весе́лїи и҆ ра́дованїи, введꙋ́тсѧ въ хра́мъ цр҃е́въ.
Хлѣ́бъ слове́сный, ꙳ черто́гъ бж҃їѧ сло́ва, ꙳ и҆зъ рꙋкѝ бж҃е́ственнагѡ а҆́гг҃ла ꙳ прїе́млетъ, ꙳ ѡ҆бита́ющи ꙳ во свѧта̑ѧ ст҃ы́хъ.
Сла́ва, и҆ ны́нѣ: Подо́бенъ: то́йже:
Свѣ́тъ тѧ̀ трисїѧ́нный ꙳ вже́гши, бцⷣе, ꙳ въ хра́мѣ сла́вы, ꙳ нбⷭ҇нꙋю тѝ пи́щꙋ ꙳ посыла́етъ, велича́ѧ тѧ̀.
Тропа́рь, гла́съ д҃:
Дне́сь благоволе́нїѧ бж҃їѧ пред̾ѡбраже́нїе, и҆ человѣ́кѡвъ спасе́нїѧ проповѣ́данїе, въ хра́мѣ бж҃їи ꙗ҆́снѡ дв҃а ꙗ҆влѧ́етсѧ и҆ хрⷭ҇та̀ всѣ̑мъ предвозвѣща́етъ. то́й и҆ мы̀ велегла́снѡ возопїи́мъ: ра́дꙋйсѧ, смотре́нїѧ зижди́телева и҆сполне́нїе.
На вели́цѣй вече́рни стїхологисꙋ́емъ, Блаже́нъ мꙋ́жъ, а҃-й а҆нтїфѡ́нъ.
На Гдⷭ҇и, воззва́хъ, стїхи̑ры на и҃, гла́съ а҃. Поⷣ: Ѽ ди́внагѡ чꙋдесѐ!
Дне́сь, вѣ́рнїи, ликовствꙋ́имъ, во ѱалмѣ́хъ и҆ пѣ́снехъ гдⷭ҇еви пою́ще, и҆ чтꙋ́ще тогѡ̀ свѧще́ннꙋю сѣ́нь, ѡ҆дꙋшевле́нный кївѡ́тъ, невмѣсти́мое сло́во вмѣсти́вшꙋю: приво́дитсѧ бо гдⷭ҇еви, па́че є҆стества̀ пло́тїю младе́нствꙋющи, и҆ ст҃и́тель вели́кїй заха́рїа прїе́млетъ съ весе́лїемъ сїю̀, ꙗ҆́кѡ бж҃їе жили́ще.
Два́жды.
Дне́сь хра́мъ ѡ҆дꙋшевле́нный ст҃ы́ѧ сла́вы хрⷭ҇та̀ бг҃а на́шегѡ, є҆ди́на въ жена́хъ бл҃гослове́ннаѧ, чⷭ҇таѧ приво́дитсѧ въ хра́мъ зако́нный жи́ти во ст҃ы́хъ: и҆ ра́дꙋютсѧ съ не́ю і҆ѡакі́мъ и҆ а҆́нна дꙋ́хомъ, и҆ дѣ́вственнїи ли́цы гдⷭ҇еви пою́тъ, ѱало́мски воспѣва́юще и҆ чтꙋ́ще мт҃рь є҆гѡ̀.
Ты̀ прⷪ҇ро́кѡвъ проповѣ́данїе, а҆пⷭ҇лѡвъ сла́ва, и҆ мꙋ́ченикѡвъ похвала̀, и҆ всѣ́хъ земноро́дныхъ ѡ҆бновле́нїе, дв҃о, мт҃и бж҃їѧ: тобо́ю бо бг҃ꙋ примири́хомсѧ. тѣ́мже чти́мъ твоѐ въ хра́мъ гдⷭ҇ень вхожде́нїе, и҆ со а҆́гг҃ломъ всѝ пѣ́сненнѡ, ра́дꙋйсѧ, тебѣ̀, пречⷭ҇таѧ, вопїе́мъ, твои́ми моли́твами спаса́емїи.
И҆́ны стїхи̑ры, гла́съ д҃. Подо́бенъ: Ꙗ҆́кѡ до́блѧ:
Во ст҃ы́хъ ст҃а̑ѧ ꙳ ст҃а́ѧ и҆ непоро́чнаѧ ꙳ ст҃ы́мъ дх҃омъ вво́дитсѧ ꙳ и҆ ст҃ы́мъ а҆́гг҃ломъ пита́етсѧ, сꙋ́щи ст҃ѣ́йшїй хра́мъ ꙳ ст҃а́гѡ бг҃а на́шегѡ, ꙳ всѧ́чєскаѧ ѡ҆свѧти́вшагѡ вхо́домъ є҆ѧ̀, ꙳ и҆ ѡ҆божи́вшагѡ є҆стество̀ земны́хъ ꙳ попо́лзшеесѧ.
Два́жды.
Ѻ҆трокови̑цы, ра́дꙋющесѧ ꙳ и҆ свѣщы̀ и҆мꙋ́ще, ꙳ свѣщѝ дне́сь предхо́дѧтъ разꙋ́мнѣй: ꙳ и҆ вво́дѧтъ сїю̀ ꙳ во ст҃а̑ѧ ст҃ы́хъ свѧще́ннѡ, ꙳ проѧвлѧ́юще хотѧ́щꙋю зарю̀ ꙳ неизрече́ннѡ и҆зъ неѧ̀ возсїѧ́ти ꙳ и҆ просвѣти́ти во тмѣ̀ сѣдѧ́щыѧ ꙳ невѣ́дѣнїѧ, дх҃омъ.
Веселѧ́сѧ прїимѝ, заха́рїе, ꙳ возопѝ а҆́нна всехва́льнаѧ, ꙳ ю҆́же проповѣ́даша бж҃їи прⷪ҇ро́цы дх҃омъ, ꙳ и҆ сїю̀ введѝ во ст҃ы́й хра́мъ, ꙳ свѧще́ннѡ воспита́тисѧ, ꙳ ꙗ҆́кѡ да бꙋ́детъ влⷣки всѣ́хъ ꙳ бжⷭ҇твенный престо́лъ, ꙳ и҆ пала́та, и҆ ѻ҆́дръ, ꙳ и҆ свѣтоза́рное ѻ҆би́телище.
Сла́ва, и҆ ны́нѣ, гла́съ и҃:
По ржⷭ҇твѣ̀ твое́мъ, бг҃оневѣ́сто влⷣчце, пришла̀ є҆сѝ въ хра́мъ гдⷭ҇е́нь воспита́тисѧ во ст҃а̑ѧ ст҃ы́хъ, ꙗ҆́кѡ ѡ҆свѧще́нна: тогда̀ и҆ гаврїи́лъ по́сланъ бы́сть къ тебѣ̀ всенепоро́чнѣй, пи́щꙋ тебѣ̀ приносѧ̀. нбⷭ҇наѧ всѧ̑ ᲂу҆диви́шасѧ, зрѧ́ще дх҃а ст҃а́го въ тѧ̀ все́льшасѧ. тѣ́мже, пречⷭ҇таѧ и҆ нескве́рнаѧ, ꙗ҆́же на нб҃сѝ и҆ на землѝ сла́вима, мт҃и бж҃їѧ, спасѝ ро́дъ на́шъ.
Вхо́дъ. Прокі́менъ днѐ. Чтє́нїѧ г҃.
И҆схо́да чте́нїе.
[Глава̀ м҃] Гл҃го́ла гдⷭ҇ь къ мѡѷсе́ю, гл҃го́лѧ: въ де́нь є҆ди́нъ мѣ́сѧца пе́рвагѡ, поста́виши ски́нїю свидѣ́нїѧ: и҆ вло́жиши кївѡ́тъ, и҆ покры́еши є҆го̀ завѣ́сою. И҆ внесе́ши трапе́зꙋ и҆ свѣти́льникъ є҆ѧ̀, и҆ положи́ши кади́льницꙋ златꙋ́ю, во є҆́же кади́ти предъ кївѡ́томъ свидѣ́нїѧ. И҆ положи́ши покро́въ завѣ́сы надъ две́рми ски́нїи свидѣ́нїѧ. И҆ во́змеши є҆ле́й пома́занїѧ, и҆ пома́жеши ски́нїю, и҆ всѧ̑ ꙗ҆̀же въ не́й, и҆ ѡ҆свѧти́ши ю҆̀, и҆ всѧ̑ сосꙋ́ды є҆ѧ̀, и҆ бꙋ́детъ свѧта̀. И҆ ѡ҆свѧти́ши же́ртвенникъ, и҆ бꙋ́детъ же́ртвенникъ ст҃а̑ѧ ст҃ы́хъ. И҆ сотворѝ мѡѷсе́й всѧ̑, є҆ли̑ка заповѣ́да є҆мꙋ̀ гдⷭ҇ь бг҃ъ, ст҃ы́й і҆и҃левъ. И҆ покры̀ ѻ҆́блакъ ски́нїю свидѣ́нїѧ, и҆ сла́вы гдⷭ҇ни и҆спо́лнисѧ ски́нїѧ. И҆ не можа́ше мѡѷсе́й вни́ти въ ски́нїю свидѣ́нїѧ, ꙗ҆́кѡ ѡ҆сѣнѧ́ше надъ не́ю ѻ҆́блакъ: и҆ сла́вы гдⷭ҇ни и҆спо́лнисѧ ски́нїѧ.
Ца́рствъ тре́тїихъ чте́нїе.
[Глава̀ и҃] Бы́сть, ꙗ҆́кѡ совершѝ соломѡ́нъ є҆́же созда́ти до́мъ гдⷭ҇ень. И҆ собра̀ всѧ̑ ста́рцы і҆и҃левы въ сїѡ́нъ, вознестѝ кївѡ́тъ завѣ́та гдⷭ҇нѧ и҆зъ гра́да дв҃дова, се́й є҆́сть сїѡ́нъ. И҆ взѧ́ша свѧще́нницы кївѡ́тъ завѣ́та гдⷭ҇нѧ, и҆ ски́нїю свидѣ́нїѧ, и҆ всѧ̑ сосꙋ́ды ст҃ы̑ѧ, ꙗ҆̀же въ ски́нїи свидѣ́нїѧ. И҆ ца́рь, и҆ ве́сь і҆и҃ль предъ кївѡ́томъ. И҆ внесо́ша свѧще́нницы кївѡ́тъ завѣ́та гдⷭ҇нѧ, на мѣ́сто є҆гѡ̀, въ даві́ръ хра́ма, во ст҃а̑ѧ ст҃ы́хъ, подъ кри̑ла херꙋві́мѡвъ. Ꙗ҆́кѡ херꙋві́ми бѧ́хꙋ распросте́рты крила́ми, надъ мѣ́стомъ кївѡ́та: и҆ покрыва́хꙋ херꙋві́ми надъ кївѡ́томъ, и҆ надъ ст҃а̑ѧ є҆гѡ̀ свы́шше. И҆ не бѣ̀ въ кївѡ́тѣ, кромѣ̀ двꙋ́хъ скрижа́лей завѣ́та, ꙗ҆̀же положѝ та́мѡ мѡѷсе́й въ хѡри́вѣ, ꙗ҆̀же завѣща̀ гдⷭ҇ь. И҆ бы́сть ꙗ҆́кѡ и҆зыдо́ша свѧще́нницы ѿ ст҃а́гѡ, и҆ ѻ҆́блакъ и҆спо́лни до́мъ. и҆ не возмого́ша свѧще́нницы ста́ти слꙋжи́ти ѿ лица̀ ѻ҆́блака: ꙗ҆́кѡ и҆спо́лнисѧ сла́вы до́мъ гдⷭ҇а бг҃а вседержи́телѧ.
Прⷪ҇ро́чества і҆езекі́илева чте́нїе.
[Глава̀ м҃г и҆ м҃д] Та́кѡ глаго́летъ гдⷭ҇ь: бꙋ́детъ ѿ днѐ ѻ҆сма́гѡ и҆ про́чее, сотворѧ́тъ і҆ерє́и на ѻ҆лтарѝ всесожже́нїѧ ва́шегѡ, и҆ ꙗ҆̀же спасе́нїѧ ва́шегѡ, и҆ прїимꙋ̀ вы̀, глаго́летъ а҆дѡнаі̀ гдⷭ҇ь. И҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ, зрѧ́щихъ на восто́ки, и҆ сїѧ̑ бѧ́хꙋ затворє́на. И҆ речѐ гдⷭ҇ь ко мнѣ̀: врата̀ сїѧ̑ затворє́на бꙋ́дꙋтъ, и҆ не ѿве́рзꙋтсѧ, и҆ никто́же про́йдетъ сквозѣ̀ и҆́хъ, ꙗ҆́кѡ гдⷭ҇ь бг҃ъ і҆и҃левъ про́йдетъ и҆́ми, и҆ бꙋ́дꙋтъ заключє́на. Ꙗ҆́кѡ и҆гꙋ́менъ сѧ́детъ въ ни́хъ снѣ́сти хлѣ́бъ, по пꙋтѝ є҆ла́мскихъ вра́тъ вни́детъ, и҆ по пꙋтѝ є҆гѡ̀ и҆зы́детъ. И҆ введе́ мѧ по пꙋтѝ вра́тъ ст҃ы́хъ, сꙋ́щихъ къ сѣ́верꙋ, прѧ́мѡ до́мꙋ, и҆ ви́дѣхъ, и҆ сѐ и҆спо́лнь сла́вы до́мъ гдⷭ҇ень.
На лїті́и стїхи̑ры, гла́съ а҃. Самогла́сны. Геѡ́ргїа нїкомїді́йскагѡ:
Да ра́дꙋетсѧ дне́сь нб҃о свы́ше, и҆ ѻ҆́блацы весе́лїе да кропѧ́тъ, ѡ҆ ѕѣлѡ̀ пресла́вныхъ вели́чїихъ бг҃а на́шегѡ: се́ бо две́рь на восто́ки зрѧ́щаѧ, ро́ждшисѧ ѿ непло́дове безпло́дныѧ по ѡ҆бѣтова́нїю, и҆ бг҃ꙋ ѡ҆свѧще́на бы́вши въ жили́ще, дне́сь въ хра́мъ, ꙗ҆́кѡ непоро́чное приноше́нїе приво́дитсѧ, да ра́дꙋетсѧ дв҃дъ брѧца́ѧ въ гꙋ́сли: приведꙋ́тсѧ, речѐ, цр҃ю̀ дѣ̑вы въ слѣ́дъ є҆ѧ̀, бли̑жнѧѧ є҆ѧ̀ приведꙋ́тсѧ внꙋ́трь ски́нїи бж҃їѧ, внꙋ́трь ѡ҆чисти́лища є҆гѡ̀, воспита́тисѧ въ жили́ще, пре́жде вѣ̑къ ѿ ѻ҆ц҃а̀ нетлѣ́ннѡ ро́ждшагѡсѧ, во спасе́нїе дꙋ́шъ на́шихъ.
Гла́съ д҃:
Дне́сь бг҃овмѣсти́мый хра́мъ бцⷣа въ хра́мъ гдⷭ҇ень приво́дитсѧ, и҆ заха́рїа сїю̀ прїе́млетъ: дне́сь ст҃а̑ѧ ст҃ы́хъ ра́дꙋютсѧ, и҆ ли́къ а҆́гг҃льскїй та́инственнѡ торжествꙋ́етъ. съ ни́миже и҆ мы̀ пра́зднꙋюще дне́сь, съ гаврїи́ломъ возопїи́мъ: ра́дꙋйсѧ, бл҃года́тнаѧ, гдⷭ҇ь съ тобо́ю, и҆мѣ́ѧй ве́лїю ми́лость.
Прїиди́те, всѝ вѣ́рнїи, є҆ди́нꙋ непоро́чнꙋю восхва́лимъ, ѿ прⷪ҇ро́кѡвъ проповѣ́даннꙋю, и҆ въ хра́мъ приведе́ннꙋю, пре́жде вѣ̑къ пронарече́ннꙋю мт҃рь, и҆ въ послѣ̑днѧѧ лѣ̑та ꙗ҆́вльшꙋюсѧ бцⷣꙋ. гдⷭ҇и, моли́твами є҆ѧ̀, ми́ръ тво́й пода́ждь на́мъ и҆ ве́лїю ми́лость.
Сла́ва, и҆ ны́нѣ, гла́съ є҃. Леѡ́нта маи́стра:
Возсїѧ̀ де́нь ра́достенъ и҆ пра́здникъ всече́стенъ: дне́сь бо ꙗ҆́же пре́жде ржⷭ҇тва̀ и҆ по ржⷭ҇твѣ̀ дв҃а пребы́вши, въ хра́мъ гдⷭ҇ень приво́дитсѧ, и҆ ра́дꙋетсѧ заха́рїа ста́рецъ, роди́тель прⷣте́чевъ, и҆ вопїе́тъ ве́селѡ: прибли́жисѧ предста́тельница скорбѧ́щихъ въ хра́мъ ст҃ы́й, ꙗ҆́кѡ свѧта̀, ѡ҆свѧти́тисѧ во ѻ҆би́телище всецр҃ѧ̀. да весели́тсѧ і҆ѡакі́мъ пра́ѻтєцъ, и҆ а҆́нна да ра́дꙋетсѧ, ꙗ҆́кѡ принесо́ша бг҃ꙋ, ꙗ҆́кѡ трилѣ́тствꙋющꙋю ю҆́ницꙋ, непоро́чнꙋю влⷣчцꙋ. ма́тєри, сра́дꙋйтесѧ, дѣ̑вы, взыгра́йте, и҆ непло́ды, сликовствꙋ́йте, ꙗ҆́кѡ ѿве́рзе на́мъ нбⷭ҇ное црⷭ҇тво пронарече́ннаѧ всецр҃и́ца, ра́дꙋйтесѧ, лю́дїе, и҆ весели́тесѧ.
На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ:
Ра́дꙋетсѧ, нб҃о и҆ землѧ̀, нб҃о ᲂу҆́мное, грѧдꙋ́щее зрѧ́ще, въ бжⷭ҇твенный до́мъ воспита́тисѧ че́стнѡ, дв҃ꙋ є҆ди́нꙋ и҆ непоро́чнꙋю, къ не́йже дивѧ́сѧ заха́рїа вопїѧ́ше: две́ре гдⷭ҇нѧ, хра́ма ѿверза́ю тебѣ̀ двє́ри, ра́дꙋющисѧ въ не́мъ ликовствꙋ́й: позна́хъ бо и҆ вѣ́ровахъ, ꙗ҆́кѡ ᲂу҆жѐ и҆збавле́нїе прїи́детъ проѧвле́ннѡ і҆и҃лево, и҆ роди́тсѧ и҆зъ тебє̀ бг҃ъ сло́во, да́рꙋѧй мі́рови ве́лїю ми́лость.
Сті́хъ: Приведꙋ́тсѧ цр҃ю̀ дѣ̑вы въ слѣ́дъ є҆ѧ̀: и҆́скрєннїѧ є҆ѧ̀ приведꙋ́тсѧ тебѣ̀.
А҆́нна бжⷭ҇твеннаѧ благода́ть ꙗ҆́вѣ, ѿ благода́ти да́ннꙋю чⷭ҇тꙋю приснодв҃ꙋ приво́дитъ съ весе́лїемъ въ хра́мъ бж҃їй, призва́вши и҆тѝ предъ не́ю ѻ҆трокови́цамъ свѣщы̀ носѧ́щымъ, и҆ глаго́лющи: пойдѝ, ча́до, да́вшемꙋ тѧ̀ бꙋ́ди возложе́нїе, и҆ благово́нный ѳѷмїа́мъ. вни́ди въ незаходи̑маѧ, и҆ ᲂу҆вѣ́ждь та̑йны, и҆ ᲂу҆гото́висѧ бы́ти і҆и҃сово вмѣсти́лище весе́лое и҆ кра́сное, подаю́щагѡ мі́рꙋ ве́лїю ми́лость.
Сті́хъ: Приведꙋ́тсѧ въ весе́лїи и҆ ра́дованїи, введꙋ́тсѧ въ хра́мъ цр҃е́въ.
Внꙋ́трь въ хра́мъ бж҃їй, бг҃овмѣсти́мый хра́мъ возлага́етсѧ дв҃а всест҃а́ѧ, и҆ ѻ҆трокови̑цы є҆́й ны́нѣ, свѣщы̀ носѧ́ще, предхо́дѧтъ. и҆гра́етъ роди́телей сопрѧже́нїе и҆зрѧ́дное, і҆ѡакі́мъ же и҆ а҆́нна ликовствꙋ́юще, ꙗ҆́кѡ роди́ша творца̀ ро́ждшꙋю, ꙗ҆́же, ликовствꙋ́ющи въ бжⷭ҇твенныхъ ски́нїихъ, и҆ пита́ема рꙋко́ю а҆́гг҃ловою всенепоро́чнаѧ, хрⷭ҇та̀ ꙗ҆ви́сѧ мт҃и, подаю́щагѡ мі́рꙋ ве́лїю ми́лость.
Сла́ва, и҆ ны́нѣ, гла́съ ѕ҃. Се́ргїа а҆гїополі́та:
Дне́сь, собо́ри вѣ́рныхъ, соше́дшесѧ, дꙋхо́внѣ да торжествꙋ́имъ, и҆ бг҃оѻтрокови́цꙋ, дв҃ꙋ и҆ бцⷣꙋ, въ хра́мъ гдⷭ҇ень приводи́мꙋ, благоче́стнѡ восхва́лимъ, пред̾избра́ннꙋ ѿ всѣ́хъ родѡ́въ, во ѡ҆би́телище всѣ́хъ цр҃ѧ̀ хрⷭ҇та̀ и҆ бг҃а: дѣ̑вы, свѣщы̀ носѧ́ще, пред̾иди́те, приснодв҃ы, чтꙋ́ще честно́е происхожде́нїе, ма́тєри, печа́ль всю̀ ѿложи́вше, ра́достнѡ спослѣ́дствꙋйте мт҃ри бг҃а быва́ющей, и҆ ра́дости мі́ра (с. 374) хода́таицѣ. всѝ ᲂу҆́бѡ ра́достнѡ, є҆́же ра́дꙋйсѧ, со а҆́гг҃ломъ возопїи́мъ ѡ҆бра́дованнѣй, при́снѡ молѧ́щейсѧ ѡ҆ дꙋша́хъ на́шихъ.
На благослове́нїи хлѣ́бѡвъ, тропа́рь, гла́съ д҃:
Дне́сь благоволе́нїѧ бж҃їѧ пред̾ѡбраже́нїе: три́жды:
Пи́санъ на ма́лѣй вече́рни.
[Зрѝ] А҆ и҆дѣ́же всено́щнагѡ бдѣ́нїѧ нѣ́сть, на вели́цѣй вече́рни тропа́рь глаго́лемъ є҆ди́ножды.
🕅 Подоба́етъ вѣ́дати, ꙗ҆́кѡ а҆́ще слꙋчи́тсѧ пра́здникъ введе́нїѧ бцⷣы въ недѣ́лю:
Въ сꙋббѡ́тꙋ ве́чера, на ма́лѣй вече́рни, на Гдⷭ҇и, воззва́хъ, стїхи̑ры воскрⷭ҇ны гла́са, д҃. Сла́ва, и҆ ны́нѣ, пра́здника, и҆́же на Гдⷭ҇и, воззва́хъ, ма́лыѧ вече́рни. На стїхо́внѣ стїхи́ра воскрⷭ҇на є҆ди́на. та́же пра́здника стїхо́вна вели́кїѧ вече́рни, со стїхи̑ пра́здничными: Сла́ва, и҆ ны́нѣ, пра́здника. Тропа́рь воскрⷭ҇нъ. Сла́ва, и҆ ны́нѣ, пра́здника. Посе́мъ є҆ктенїа̀ ма́лаѧ, и҆ ѿпꙋ́стъ.
На вели́цѣй вече́рни. На Гдⷭ҇и, воззва́хъ, стїхи̑ры воскрⷭ҇ны г҃: и҆ ꙾восто́ченъ꙾ 7 є҆ди́нъ: и҆ пра́здника ѕ҃. Сла́ва, и҆ ны́нѣ, пра́здника. Посе́мъ вхо́дъ. Прокі́менъ днѐ, и҆ чтє́нїѧ пра́здника г҃. На лїті́и стїхи̑ры, и҆ Сла́ва, и҆ ны́нѣ, пра́здника: Возсїѧ̀ де́нь ра́достенъ: На стїхо́внѣ стїхи̑ры воскрⷭ҇ны: Сла́ва, и҆ ны́нѣ, пра́здника. На благослове́нїи хлѣ́бѡвъ тропа́рь пра́здника три́жды. И҆ чте́нїе въ посла́нїихъ а҆пⷭ҇льскихъ.
На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды: Сла́ва, и҆ ны́нѣ, пра́здника. По ѻ҆бы́чныхъ каѳі́смахъ, сѣда́льны воскрⷭ҇ны, съ бг҃орѡ́дичны и҆́хъ. И҆ чте́нїе во є҆ѵⷢ҇лїи толково́мъ. Та́же многоми́лостиво. И҆ тропарѝ, А҆́гг҃льскїй собо́ръ: Ѵ҆пакоѝ гла́са. и҆ сѣда́льны всѝ пра́здника, по є҆ди́нощи. Сла́ва, и҆ ны́нѣ, пра́здника, и҆́же по полѷеле́и сѣда́ленъ. и҆ чте́нїе пра́здника. Степє́нна гла́са. Прокі́менъ и҆ є҆ѵⷢ҇лїе, пра́здника. Та́же, Воскресе́нїе хрⷭ҇то́во: ѱало́мъ н҃. И҆ цѣлова́нїе є҆ѵⷢ҇лїа, по ѻ҆бы́чаю. Та́же, Сла́ва, припѣ́въ пра́здника, И҆ ны́нѣ, то́йже. и҆ стїхи́ра пра́здника. Канѡ́нъ воскрⷭ҇нъ со і҆рмосо́мъ на д҃, и҆ Бцⷣѣ два̀: и҆ пра́здника ѻ҆́ба канѡ́на на и҃. Катава́сїа, Хрⷭ҇то́съ ражда́етсѧ: ѻ҆́ба ли́ка вкꙋ́пѣ. По г҃-й пѣ́сни, конда́къ воскрⷭ҇нъ и҆ і҆́косъ: и҆ сѣда́ленъ пра́здника два́жды. И҆ чте́нїе пра́здника. По ѕ҃- й пѣ́сни конда́къ пра́здника, и҆ і҆́косъ, и҆ чте́нїе въ про́лозѣ. На ѳ҃-й пѣ́сни припѣ́вѡвъ не пое́мъ, но Честнѣ́йшꙋю. Свѣти́ленъ воскрⷭ҇нъ: Сла́ва, и҆ ны́нѣ, пра́здника. На хвали́техъ стїхи̑ры воскрⷭ҇ны д҃, и҆ пра́здника д҃, со стїхи̑ пра́здничными. Сла́ва, пра́здника. И҆ ны́нѣ, Пребл҃гослове́нна є҆сѝ, бцⷣе дв҃о: Та́же Славосло́вїе вели́кое. По трⷭ҇то́мъ тропа́рь воскрⷭ҇нъ то́чїю, и҆ є҆ктєнїѝ и҆ ѿпꙋ́стъ. Та́же, стїхи́ра є҆ѵⷢ҇льскаѧ, и҆ ѡ҆глаше́нїе, и҆ ѻ҆бы́чное и҆схожде́нїе, и҆ ча́съ а҃ въ притво́рѣ. На часѣ́хъ тропа́рь воскрⷭ҇нъ: Сла́ва, тропа́рь пра́здника: и҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ воскрⷭ҇нъ. Та́кожде и҆ на всѣ́хъ часѣ́хъ кондакѝ премѣнѧ́юще глаго́лемъ.
На лїтꙋргі́и, Бл҃жє́нна воскрⷭ҇на гла́са, на ѕ҃: и҆ пра́здника пѣ́снь г҃, на д҃. По вхо́дѣ тропа́рь воскрⷭ҇нъ, и҆ пра́здника. Сла́ва, конда́къ воскрⷭ҇нъ: И҆ ны́нѣ, пра́здника. Прокі́менъ, а҆пⷭ҇лъ, а҆ллилꙋ́їа, є҆ѵⷢ҇лїе и҆ прича́стенъ, пре́жде днѐ, и҆ пра́здника.
На ᲂу҆́трени, на Бг҃ъ гдⷭ҇ь, тропа́рь: Дне́сь благоволе́нїѧ бж҃їѧ: три́жды.
По а҃-мъ стїхосло́вїи, сѣда́ленъ, гла́съ а҃. Поⷣ: Ли́къ а҆́гг҃льскїй:
Пра́ведныхъ пло́дъ і҆ѡакі́ма и҆ а҆́нны прино́ситсѧ бг҃ꙋ во свѧти́лище ст҃о́е, пло́тїю младе́нствꙋющи, пита́тельница жи́зни на́шеѧ, ю҆́же благословѝ свѧще́нный заха́рїа: сїю̀ всѝ, ꙗ҆́кѡ мт҃рь бж҃їю, вѣ́рнѡ да ᲂу҆блажи́мъ.
Сла́ва, и҆ ны́нѣ, то́йже.
По в҃-мъ стїхосло́вїи, сѣда́ленъ, гла́съ д҃. Поⷣ: Оу҆диви́сѧ і҆ѡ́сифъ:
Пре́жде зача́тїѧ, чⷭ҇таѧ, ѡ҆свѧти́ласѧ є҆сѝ бг҃ꙋ, и҆ ро́ждшисѧ на землѝ, да́ръ принесла́сѧ є҆сѝ ны́нѣ є҆мꙋ̀, и҆сполнѧ́ющи ѻ҆те́ческое ѡ҆бѣща́нїе, въ бжⷭ҇твеннѣмъ же хра́мѣ, ꙗ҆́кѡ сꙋ́щѡ бжⷭ҇твенный хра́мъ, ѿ младе́нства чи́стѣ со свѣща́ми свѣ́тлыми ѿдана̀ бы́вши, ꙗ҆ви́ласѧ є҆сѝ прїѧ́телище непристꙋ́пнагѡ и҆ бжⷭ҇твеннагѡ свѣ́та. вели́ко вои́стиннꙋ предше́ствїе твоѐ, є҆ди́на бг҃оневѣ́сто и҆ приснодв҃о.
Сла́ва, и҆ ны́нѣ, то́йже:
По полѷеле́и сѣда́ленъ, гла́съ и҃. Подо́бенъ: Повелѣ́нное та́йнѡ:
Да ра́дꙋетсѧ дв҃дъ пѣснопи́сецъ, и҆ да ликовствꙋ́етъ і҆ѡакі́мъ со а҆́нною, ꙗ҆́кѡ пло́дъ ст҃ы́й и҆зъ ни́хъ произы́де, марі́а свѣтоно́снаѧ, бжⷭ҇твеннаѧ свѣща̀, и҆ ра́дꙋетсѧ входѧ́щи въ хра́мъ: ю҆́же и҆ зрѧ̀ благословѝ варахі́инъ сы́нъ, и҆ ра́дꙋѧсѧ взыва́ше: ра́дꙋйсѧ, чꙋ́до всемі́рное.
Сла́ва, и҆ ны́нѣ, то́йже.
Та́же степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Слы́ши дщѝ, и҆ ви́ждь, и҆ приклонѝ ᲂу҆́хо твоѐ. Сті́хъ: Ѿры́гнꙋ срⷣце моѐ сло́во бл҃го: Всѧ́кое дыха́нїе Є҆ѵⷢ҇лїе лꙋкѝ, зача́ло д҃.
По н҃-мъ ѱалмѣ̀, вмѣ́стѡ Моли́твами бцⷣы, Сла́ва, гла́съ в҃:
Дне́сь хра́мъ ѡ҆дꙋшевле́нный и҆ вели́кагѡ цр҃ѧ̀ въ хра́мъ вхо́дитъ, томꙋ̀ ᲂу҆гото́ватисѧ въ бжⷭ҇твенное жили́ще: лю́дїе весели́тесѧ.
И҆ ны́нѣ, то́йже. Та́же: Поми́лꙋй мѧ̀, бж҃е:
Стїхи́ра, самогла́сна, гла́съ д҃:
Дне́сь бг҃овмѣсти́мый хра́мъ бцⷣа въ хра́мъ гдⷭ҇ень приво́дитсѧ, и҆ заха́рїа сїю̀ прїе́млетъ: дне́сь ст҃а̑ѧ ст҃ы́хъ ра́дꙋютсѧ, и҆ ли́къ а҆́гг҃льскїй та́инственнѡ торжествꙋ́етъ. съ ни́миже и҆ мы̀ пра́зднꙋюще дне́сь, съ гаврїи́ломъ возопїи́мъ: ра́дꙋйсѧ, бл҃года́тнаѧ, гдⷭ҇ь съ тобо́ю, и҆мѣ́ѧй ве́лїю ми́лость.
Канѡ́на пра́здника два̀: пе́рвый со і҆рмосо́мъ на и҃. І҆рмо́съ по два́жды, тропарѝ на ѕ҃. Творе́нїе геѡ́ргїево, є҆гѡ́же краегране́сїе:
Ты̀ благода́ть, влⷣчце, сло́вꙋ да́ждь.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ вхожде́нїе.
Премꙋ́дрости, пречⷭ҇таѧ, тѧ̀ сокро́вище вѣ́мы, и҆ благода́ти точа́щꙋю, и҆сто́чникъ приснотекꙋ́щїй ра́зꙋма, про́симъ: твоѧ̑ ка̑пли ѡ҆дождѝ, влⷣчце, є҆́же воспѣва́ти тѧ̀ при́снѡ.
Превы́шши, пречⷭ҇таѧ, нб҃съ бы́вши, хра́мъ и҆ пала́та, въ хра́мъ бж҃їй возложи́ласѧ є҆сѝ, томꙋ̀ ᲂу҆гото́ватисѧ въ бжⷭ҇твенное жили́ще прише́ствїѧ є҆гѡ̀.
Свѣ́тъ возсїѧ́вши бцⷣа благода́ти, всѧ̑ просвѣтѝ, и҆ совокꙋпѝ пресвѣ́тлое є҆ѧ̀ ᲂу҆краси́ти торжество̀ пѣ́сньми: прїиди́те, къ не́й стеце́мсѧ.
Две́рь сла́внаѧ, пѡ́мыслы непроходи́маѧ, двє́ри ѿве́рзши хра́ма бж҃їѧ, ны́нѣ повелѣва́етъ на́мъ совше́дшымъ, бжⷭ҇твенныхъ є҆ѧ̀ чꙋде́съ наслади́тисѧ.
Дрꙋгі́й канѡ́нъ пра́здника, подо́бнѣ со і҆рмосо́мъ на и҃. І҆рмо́съ по два́жды, тропарѝ на ѕ҃. Творе́нїе васі́лїево.
Гла́съ а҃. Пѣ́снь а҃. І҆рмо́съ:
Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ.
Стеце́мсѧ дне́сь, бцⷣꙋ почита́юще пѣ́сньми, и҆ торжествꙋ́имъ дꙋхо́вный пра́здникъ: въ хра́мъ бо бг҃ꙋ да́ръ прино́ситсѧ.
Пѣ́сньми да воспои́мъ бцⷣы сла́вное предше́ствїе: къ хра́мꙋ бо дне́сь, ꙗ҆́кѡ хра́мъ бж҃їй, прино́ситсѧ прⷪ҇ро́чески да́ръ многоцѣ́нный.
А҆́нна непоро́чнаѧ ра́довашесѧ, ꙗ҆́кѡ да́ръ многоцѣ́ненъ бг҃ꙋ приносѧ́щи въ хра́мъ ма́терски, і҆ѡакі́мъ же съ не́ю торжествꙋ́етъ свѣ́тлѡ.
Дв҃дъ пра́ѻтецъ тво́й воспѣ̀ тѧ̀ дре́вле, дв҃о бг҃оневѣ́сто, дще́рь глаго́лѧ тѧ̀ цр҃ѧ̀ хрⷭ҇та̀: є҆го́же и҆ роди́вши, ма́терски млⷣнца дои́ла є҆сѝ.
Пло́тїю трилѣ́тствꙋющи, бцⷣа гдⷭ҇ꙋ прино́ситсѧ: заха́рїа же сїю̀ свѧще́нникъ бж҃їй прїе́мъ, ра́дꙋѧсѧ въ хра́мъ возложѝ.
Дѣ̑вы ликовствꙋ́йте свѣщенѡ́сицы, начни́те дне́сь и҆ ма́тєри: воспо́йте цр҃и́цѣ мт҃ри, приходѧ́щей въ хра́мъ цр҃ѧ̀ хрⷭ҇та̀.
Сла́ва, трⷪ҇ченъ:
Трⷪ҇це є҆диносꙋ́щнаѧ, ѻ҆́ч҃е, и҆ сло́ве, и҆ дш҃е ст҃ы́й, тѧ̀ вѣ́рнѡ сла́вимъ, ꙗ҆́кѡ творца̀ всѣ́хъ, и҆ тебѣ̀ вопїе́мъ благоче́стнѡ: спаси́ ны, бж҃е.
И҆ ны́нѣ, бг҃оро́диченъ:
Ѿ ба́гра крове́й твои́хъ червлени́цею, пречⷭ҇таѧ, ѡ҆дѣ́ѧвсѧ, проше́дъ ѡ҆бновѝ цр҃ь и҆ бг҃ъ, ро́дъ ве́сь человѣ́ческїй бл҃гоꙋтро́бїемъ свои́мъ.
Катава́сїа ѻ҆́ба ли́ка вкꙋ́пѣ:
Хрⷭ҇то́съ ражда́етсѧ, сла́вите. хрⷭ҇то́съ съ нб҃съ, срѧ́щите. хрⷭ҇то́съ на землѝ, возноси́тесѧ. по́йте гдⷭ҇еви всѧ̀ землѧ̀, и҆ весе́лїемъ воспо́йте, лю́дїе, ꙗ҆́кѡ просла́висѧ.
(Ѿ сегѡ̀ днѐ, катава́сїѧ сїѧ̀ пое́тсѧ до а҃-гѡ днѐ і҆аннꙋа́рїа.)
Пѣ́снь г҃. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дꙋхо́внѡ ᲂу҆твердѝ, въ честнѣ́мъ вхожде́нїи твое́мъ вѣнцє́въ, сла́вы сподо́би.
Невѣстокраси́тель дне́сь ꙗ҆ви́сѧ, кра́сный дв҃ы хра́мъ и҆ черто́гъ, прїе́мь ѡ҆дꙋшевле́нный черто́гъ бж҃їй, чⷭ҇тꙋю и҆ непоро́чнꙋю, и҆ свѣтлѣ́йшꙋю всеѧ̀ тва́ри.
Дв҃дъ предначина́ѧ ликова́нїе, и҆гра́етъ и҆ ликовствꙋ́етъ съ на́ми, и҆ цр҃и́цꙋ зове́тъ тѧ̀ ᲂу҆кра́шенꙋ, пречⷭ҇таѧ, предстоѧ́щꙋ, всечⷭ҇таѧ, въ хра́мѣ цр҃ю̀ и҆ бг҃ꙋ.
И҆зъ неѧ́же престꙋпле́нїе произы́де дре́вле ро́дꙋ человѣ́ческомꙋ, и҆зъ тоѧ̀ и҆справле́нїе и҆ нетлѣ́нїе процвѣтѐ, бцⷣа дне́сь приводи́ма въ до́мъ бж҃їй.
И҆гра́ютъ а҆́гг҃льскаѧ вѡ́инства, и҆ всѣ́хъ человѣ̑къ мно́жество, и҆ предъ лице́мъ, пречⷭ҇таѧ, предтекꙋ́тъ твои́мъ дне́сь свѣщенѡ́сицы зовꙋ́ще, вели́чєствїѧ твоѧ̑ въ домꙋ̀ бж҃їи.
И҆́нъ. І҆рмо́съ:
Да ᲂу҆тверди́тсѧ се́рдце моѐ въ во́ли твое́й, хрⷭ҇тѐ бж҃е, и҆́же надъ вода́ми не́бо ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне.
Торжествꙋ́имъ празнолю́бцы и҆ сра́дꙋимсѧ дꙋ́хомъ, во ст҃ѣ́мъ пра́здницѣ ᲂу҆чрежда́ющесѧ дне́сь, дще́ре цр҃е́вы, и҆ мт҃ре бг҃а на́шегѡ.
І҆ѡакі́ме, ра́дꙋйсѧ дне́сь, и҆ весели́сѧ, а҆́нно, дх҃омъ, рожде́ннꙋю и҆зъ ва́съ гдⷭ҇ꙋ приводѧ́ще трилѣ́тствꙋющꙋ, ꙗ҆́кѡ ю҆́ницꙋ чи́стꙋ всенепоро́чнꙋю.
Бж҃їе селе́нїе во хра́мъ ст҃ы́й приво́дитсѧ, бцⷣа марїа́мь, пло́тїю трилѣ́тствꙋющаѧ, и҆ то́й свѣщесвѣ́тѧтъ дѣ̑вы, предтекꙋ́ще.
Бж҃їѧ а҆́гница небла́зненнаѧ, и҆ голꙋби́ца нескве́рнаѧ, бг҃овмѣсти́маѧ ски́нїѧ, сла́вы ѡ҆свѧще́нїе, въ ски́нїи свѧтѣ́й ѡ҆бита́ти и҆збра̀.
Трилѣ́тствꙋющаѧ тѣ́ломъ, и҆ многолѣ́тствꙋющаѧ дꙋ́хомъ, ши́ршаѧ нб҃съ, и҆ го́рнихъ си́лъ превы́шшаѧ, да восхва́литсѧ пѣ́сньми бг҃оневѣ́стнаѧ.
Бцⷣы пра́зднꙋюще въ невходи́мыхъ предше́ствїе, свѣщеимꙋ́ще ᲂу҆́мнѡ съ весе́лїемъ дне́сь, и҆ мы̀ съ дѣ́вами къ хра́мꙋ прибли́жимсѧ.
Свѧще́нницы бж҃їи, ѡ҆блецы́тесѧ въ пра́вдꙋ бл҃года́тїю, и҆ срѧ́щите свѣ́тлѡ, вхо́ды подаю́ще дще́ри цр҃ѧ̀ и҆ бг҃а во ст҃а̑ѧ.
Сла́ва, трⷪ҇ченъ:
Свѣ́тъ ѻ҆ц҃ъ, свѣ́тъ сн҃ъ є҆гѡ̀, свѣ́тъ дх҃ъ ᲂу҆тѣ́шительный: ꙗ҆́кѡ ѿ сл҃нца бо є҆ди́нагѡ трⷪ҇ца сїѧ́ющи, бж҃е́ственнѡ ѡ҆зарѧ́етъ и҆ соблюда́етъ дꙋ́шы на́шѧ.
И҆ ны́нѣ:
Тѧ̀ прⷪ҇ро́цы проповѣ́даша кївѡ́тъ, чⷭ҇таѧ, ст҃ы́ни, кади́льницꙋ златꙋ́ю, и҆ свѣ́щникъ, и҆ трапе́зꙋ: и҆ мы̀, ꙗ҆́кѡ бг҃овмѣсти́мꙋю ски́нїю, воспѣва́емъ тѧ̀.
Катава́сїа: Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ, гдⷭ҇и.
Сѣда́ленъ, гла́съ д҃. Подо́бенъ: Оу҆диви́сѧ і҆ѡ́сифъ:
Возопі́й, дв҃де, что̀ се́й настоѧ́щїй пра́здникъ, ю҆́же воспѣ́лъ є҆сѝ и҆ногда̀ въ кни́зѣ ѱало́мстѣй, ꙗ҆́кѡ дще́рь бг҃оѻтрокови́цꙋ и҆ дв҃ꙋ. приведꙋ́тсѧ, речѐ, цр҃ю̀ та́инственнѡ дѣ̑вы во слѣ́дъ є҆ѧ̀, и҆ бли̑жнїѧ є҆ѧ̀: и҆ ди́венъ содѣ́лай и҆ всемі́ренъ пра́здникъ зовꙋ́щымъ: бцⷣа на́мъ предста̀, спасе́нїѧ хода́таица.
Сла́ва, и҆ ны́нѣ, гла́съ и҆ подо́бенъ то́йже:
Непоро́чнаѧ а҆́гница и҆ нескве́рный черто́гъ, въ до́мъ бж҃їй бцⷣа марїа́мь съ весе́лїемъ вво́дитсѧ пресла́внѡ, ю҆́же а҆́гг҃ли бж҃їи дорѷно́сѧтъ вѣ́рнѡ, и҆ всѝ вѣ́рнїи блажа́тъ при́снѡ, и҆ благода́рственнѡ пою́тъ є҆́й непреста́ннѡ ве́лїимъ гла́сомъ: на́ша сла́ва и҆ спасе́нїе ты̀ є҆сѝ, всенепоро́чнаѧ.
Пѣ́снь д҃. І҆рмо́съ:
Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебє̀ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и.
Две́рь непрохо́днꙋю, бж҃їй до́мъ прїе́млѧ дне́сь, преста́ти сотворѝ всѧ́кой слꙋ́жбѣ зако́нной, ꙗ҆́кѡ и҆́стиннѡ ꙗ҆ви́сѧ, зовы́й, сꙋ́щымъ на землѝ и҆́стина.
Гора̀ присѣ́ннаѧ, ю҆́же прови́дѣ дре́вле а҆ввакꙋ́мъ, предпроповѣ́да внꙋ́трь вмѣсти́вшꙋюсѧ въ нехо́дныхъ хра́ма, добродѣ́тєли процвѣ́тши, и҆ покрыва́етъ концы̀.
Ви́дѣвши пресла̑внаѧ всѧ̀ землѧ̀ стра̑нныѧ же и҆ ди̑вныѧ вє́щи, ка́кѡ дв҃а, ѿ а҆́гг҃ла пи́щꙋ прїе́млющи, ѻ҆́бразы строе́нїѧ но́ситъ.
Хра́мъ и҆ пала́та, и҆ нб҃о ѡ҆дꙋшевле́нное ꙗ҆́вльшисѧ, бг҃оневѣ́сто цр҃е́ва, во хра́мъ зако́нный приводи́ма дне́сь, томꙋ̀ соблюда́ема, пречⷭ҇таѧ.
И҆́нъ. І҆рмо́съ:
Дх҃омъ прови́дѧ, прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ, вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ. сла́ва си́лѣ твое́й, гдⷭ҇и.
Прⷪ҇ро́че и҆са́їе, прорцы̀ на́мъ, дѣ́ва кто́ є҆сть, и҆мꙋ́щаѧ во чре́вѣ, ꙗ҆́же и҆зъ і҆ꙋ́дина ко́рене прозѧ́бши, и҆ ро́ждшисѧ и҆зъ дв҃да царѧ̀, сѣ́мене ст҃а́гѡ, пло́дъ благосла́вный;
Начина́йте дѣ̑вы, и҆ воспо́йте пѣ̑сни, рꙋка́ми держа́ще свѣщы̀, чⷭ҇тыѧ бцⷣы предше́ствїе хва́лѧще, ны́нѣ грѧдꙋ́щїѧ во хра́мъ бж҃їй кꙋ́пнѡ съ на́ми пра́зднꙋюще.
І҆ѡакі́ме и҆ а҆́нно, весели́тесѧ ны́нѣ, во хра́мъ приводѧ́ще гдⷭ҇ень чⷭ҇тꙋю бг҃а мт҃рь, хрⷭ҇та̀ всецр҃ѧ̀ бꙋ́дꙋщꙋю, ѿ ва́съ же ро́ждшꙋюсѧ, ꙗ҆́кѡ трилѣ́тствꙋющꙋю ю҆́ницꙋ.
Ст҃а̑ѧ ст҃ы́хъ сꙋ́щи, чⷭ҇таѧ, во хра́мъ ст҃ы́й возлюби́ла є҆сѝ всели́тисѧ, и҆ со а҆́гг҃лы, дв҃о, бесѣ́дꙋющи пребыва́еши, пресла́внѣ съ нб҃сѐ хлѣ́бъ прїе́млющи, пита́тельнице жи́зни.
Ро́ждше па́че наде́жди пречⷭ҇тꙋю дв҃ꙋ, благочести́вѡ ѡ҆бѣща́хꙋсѧ бг҃ꙋ принестѝ: и҆ и҆сполнѧ́ютъ, даю́ще, ꙗ҆́кѡ же́ртвꙋ рожде́ннꙋю ѿ ни́хъ, і҆ѡакі́мъ дне́сь и҆ а҆́нна въ до́мъ бж҃їй.
Прозѧбѐ же́злъ и҆ногда̀ а҆арѡ́новъ, проѡбразꙋ́ющїй, чи́стаѧ, бжⷭ҇твенное ржⷭ҇тво̀, ꙗ҆́кѡ безсѣ́меннѡ зачне́ши, и҆ нетлѣ́нна пребꙋ́деши, и҆ по ржⷭ҇твѣ̀ дѣ́вствꙋющи ꙗ҆ви́шисѧ, млⷣнца пита́ющи, всѣ́хъ бг҃а.
Дѣ̑вы дв҃ꙋ, и҆ ма́тєри мт҃рь, благоче́стнѡ стецы́тесѧ почти́ти съ на́ми ро́ждшꙋюсѧ, ꙗ҆́кѡ непоро́чнꙋю же́ртвꙋ и҆ рожде́ннꙋю бг҃ꙋ плодоноси́мꙋю, всѝ ᲂу҆́бѡ свѣ́тлѡ пра́зднꙋемъ.
Сла́ва, трⷪ҇ченъ:
Трⷪ҇цꙋ ли́цы, є҆ди́ницꙋ ѻ҆́бразомъ благоче́стнѡ сла́вимъ бг҃а и҆́стинна, є҆го́же пою́тъ а҆́гг҃льскаѧ и҆ а҆рха́гг҃льскаѧ чинонача̑лїѧ, ꙗ҆́кѡ тва́ри влⷣкꙋ, и҆ человѣ́цы вѣ́рнѡ покланѧ́ющесѧ при́снѡ.
И҆ ны́нѣ:
Молѝ непреста́ннѡ, прест҃а́ѧ чⷭ҇таѧ, є҆го́же пло́тїю родила̀ є҆сѝ сн҃а твоего̀ и҆ бг҃а, ѿ многоѻбра́зныхъ сѣ́тей дїа́волихъ, и҆ ѿ всѧ́кихъ и҆скꙋше́нїй находѧ́щихъ всѧ̑ и҆зба́вити рабы̑ твоѧ̑.
Катава́сїа:
Же́злъ и҆зъ ко́рене і҆ессе́ова, и҆ цвѣ́тъ ѿ негѡ̀, хрⷭ҇тѐ, ѿ дв҃ы прозѧ́блъ є҆сѝ, и҆зъ горы̀ хва́льный приѡсѣне́нныѧ ча́щи, прише́лъ є҆сѝ вопло́щсѧ, ѿ неискꙋсомꙋ́жныѧ, невеще́ственный бж҃е: сла́ва си́лѣ твое́й, гдⷭ҇и.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ въ честнѣ́мъ вхожде́нїи твое́мъ: ты́ бо, неискꙋсобра́чнаѧ дв҃о, внꙋ́трь вошла̀ є҆сѝ въ хра́мъ бж҃їй, ꙗ҆́коже чⷭ҇тѣ́йшїй хра́мъ, всѣ̑мъ воспѣва́ющымъ тѧ̀ ми́ръ подава́ющаѧ.
Свѧще́нїе сла́вное и҆ свѧще́нное возложе́нїе дне́сь пречⷭ҇таѧ дв҃а, возложи́вшисѧ въ хра́мъ бж҃їй, всецр҃ю̀ на́шемꙋ, бг҃ꙋ є҆ди́номꙋ въ жили́ще соблюда́етсѧ, ꙗ҆́кѡ вѣ́сть са́мъ.
Добро́тꙋ, пречⷭ҇таѧ, дꙋшѝ твоеѧ̀ зрѧ̀ нѣ́когда, вѣ́рою заха́рїа возопѝ: ты̀ є҆сѝ и҆збавле́нїе, ты̀ є҆сѝ всѣ́хъ ра́дость, ты̀ є҆сѝ воззва́нїе на́ше, є҆́юже невмѣ́стный вмѣще́нъ мнѣ̀ ꙗ҆ви́тсѧ.
Ѽ па́че ᲂу҆ма̀ чꙋде́съ твои́хъ, всечⷭ҇таѧ! стра́нное твоѐ ржⷭ҇тво̀ є҆́сть, стра́ненъ ѻ҆́бразъ возраще́нїѧ твоегѡ̀, стра̑нна и҆ пресла̑вна твоѧ̑ бг҃оневѣ́сто, всѧ̑, и҆ человѣ́ки несказа̑нна.
Свѣ́щникъ многосвѣ́тлый сꙋ́щи, бг҃оневѣ́сто, дне́сь возсїѧ́ла є҆сѝ въ домꙋ̀ гдⷭ҇ни, и҆ ѡ҆зарѧ́еши ны̀ чⷭ҇тны́ми дарова̑нїи, чⷭ҇тыѧ, чꙋде́съ твои́хъ, бцⷣе всепѣ́таѧ.
И҆́нъ. І҆рмо́съ:
Свѣ́тлый на́мъ возсїѧ́й свѣ́тъ присносꙋ́щный, ᲂу҆́тренюющымъ ѡ҆ сꙋдьба́хъ за́повѣдей твои́хъ, влⷣко чл҃вѣколю́бче, хрⷭ҇тѐ бж҃е на́шъ.
Да свѣтлоно́симъ, правосла́внїи всѝ, стека́ющесѧ, и҆ сла́вѧще бг҃ома́терь, ꙗ҆́кѡ гдⷭ҇ꙋ дне́сь приво́дитсѧ, ꙗ҆́кѡ же́ртва благопрїѧ́тна.
Да веселѧ́тсѧ пра́ѻц҃ы дне́сь, влⷣчце, и҆ да ра́дꙋетсѧ ро́ждшаѧ тѧ̀ со ѻ҆тце́мъ твои́мъ, ꙗ҆́кѡ пло́дъ и҆́хъ гдⷭ҇ꙋ прино́ситсѧ.
Многоимени́тꙋю и҆ сла́внѣйшꙋю непоро́чнꙋю ю҆́ницꙋ, ꙗ҆́кѡ пло́тїю ро́ждшꙋю бжⷭ҇твеннаго тельца̀, всѝ воспои́мъ, вѣ́рнѡ пра́зднꙋюще.
Оу҆невѣ́щенїѧ написꙋ́ютсѧ бжⷭ҇твеннаѧ зна́мєнїѧ па́че ᲂу҆ма̀ ржⷭ҇тва̀ твоегѡ̀, чⷭ҇таѧ дв҃о, дне́сь дх҃омъ ст҃ы́мъ въ домꙋ̀ бж҃їи.
Да ѿве́рзꙋтсѧ преддвє́рїѧ сла́вы бг҃а на́шегѡ, и҆ да прїе́млютъ неискꙋсобра́чнꙋю бж҃їю мт҃рь, ꙗ҆́коже трилѣ́тствꙋющꙋю нескве́рнꙋю ю҆́ницꙋ.
Многочестнꙋ́ю и҆ присѣ́ннꙋю го́рꙋ воспои́мъ приснодв҃ꙋ, бж҃їю мт҃рь бы́вшꙋ: та́ бо ѡ҆блиста̀ свѣ́тъ въ концѣ́хъ.
Сла́ва, трⷪ҇ченъ:
Пренача́льное и҆ присносꙋ́щное є҆ди́но бжⷭ҇тво̀ (с. 384) славосло́вѧще, поклони́мсѧ, тре́ми ли́цы є҆стество́мъ нераздѣ́льное, и҆ сла́вою равноче́стное.
И҆ ны́нѣ:
Приста́нище благоꙋти́шное, и҆ неѡбори́мꙋю стѣ́нꙋ стѧжа́хомъ, моли́твꙋ твою̀ во ѡ҆бстоѧ́нїихъ, бг҃ороди́тельнице, всегда̀ и҆збавлѧ́еми бѣ́дъ и҆ скорбе́й.
Катава́сїа:
Бг҃ъ сы́й ми́ра, ѻ҆ц҃ъ щедрѡ́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща, посла́лъ є҆сѝ на́мъ: тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче.
Пѣ́снь ѕ҃. І҆рмо́съ:
Бжⷭ҇твенное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Всѧ́чєскаѧ носѧ́й глаго́ломъ, моли́твꙋ пра́ведныхъ ᲂу҆слы́ша. тѣ́мже непло́дныѧ разрѣши́лъ є҆сѝ недꙋ́гъ, ꙗ҆́кѡ бл҃гоꙋтро́бенъ, ра́дости вино́внꙋю си̑мъ дарова̀.
Сказа́ти хотѧ̀ гдⷭ҇ь ꙗ҆зы́кѡмъ своѐ спасе́нїе, неискꙋсобра́чнꙋю ны́нѣ ѿ человѣ̑къ прїѧ́тъ, примире́нїѧ зна́менїе и҆ ѡ҆бновле́нїѧ.
Ꙗ҆́кѡ до́мъ сꙋ́щи благода́ти, въ не́мже сокрѡ́вища лежа́тъ неизрече́ннагѡ бж҃їѧ строе́нїѧ, всечⷭ҇таѧ, въ хра́мѣ причасти́ласѧ є҆сѝ нетлѣ́нныѧ сла́дости.
Дїади́мꙋ тѧ̀ ца́рскꙋю прїе́мъ хра́мъ, бг҃оневѣ́сто, просвѣща́шесѧ, и҆ подстꙋпа́ше лꙋ́чшымъ, предрече́нныхъ зрѧ̀ на тебѣ̀ сбы́тїе.
И҆́нъ. І҆рмо́съ:
Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆зъ тлѝ, и҆ спаси́ мѧ, сп҃се мі́ра, зовꙋ́ща: сла́ва тебѣ̀.
Пра́зднꙋимъ, вѣ́рнїи, пра́здникъ дꙋхо́вный мт҃ре бж҃їѧ, воспѣва́юще благоче́стнѡ: є҆́сть бо ст҃ѣ́йша нбⷭ҇ныхъ ᲂу҆мѡ́въ.
Пѣ́сньми дꙋхо́вными восхва́лимъ, вѣ́рнїи, мт҃рь свѣ́та, ꙗ҆́кѡ дне́сь на́мъ ꙗ҆ви́сѧ, преходѧ́щи въ хра́мъ бж҃їй.
Нескве́рна а҆́гница, и҆ чⷭ҇таѧ голꙋби́ца приведе́сѧ ѡ҆бита́ти въ до́мъ бж҃їй, ꙗ҆́кѡ непоро́чнаѧ, пронарече́ннаѧ бы́ти мт҃и бж҃їѧ.
Въ хра́мъ зако́нный вхо́ды соверша́етъ хра́мъ бж҃їй, нбⷭ҇наѧ ски́нїѧ, и҆зъ неѧ́же на́мъ сꙋ́щымъ во тмѣ̀ свѣ́тъ возсїѧ̀.
Младе́нствꙋющи пло́тїю, и҆ соверше́на дꙋше́ю, ст҃ы́й кївѡ́тъ въ до́мъ бж҃їй вхо́дитъ, воспита́тисѧ бжⷭ҇твенною бл҃года́тїю.
Ѿ всѧ́кихъ и҆скꙋше́нїй и҆ бѣ́дъ дꙋше́вныхъ свободи́ ны притека́ющыѧ къ тебѣ̀, всепѣ́таѧ, твои́ми мольба́ми, мт҃и хрⷭ҇та̀ бг҃а.
Сла́ва, трⷪ҇ченъ:
Ѻ҆ц҃ъ, и҆ сн҃ъ, и҆ дх҃ъ пра́вый, трїѷпоста́снаѧ є҆ди́нице, и҆ нераздѣли́маѧ трⷪ҇це, поми́лꙋй покланѧ́ющыѧсѧ бжⷭ҇твеннѣй держа́вѣ твое́й.
И҆ ны́нѣ:
Во чре́вѣ твое́мъ вмѣще́нъ невмѣсти́мый всѣ́ми, бг҃ома́ти, бы́въ, и҆зъ тебє̀ произы́де, пречⷭ҇таѧ, сꙋгꙋ́бъ є҆стество́мъ бг҃ъ и҆ чл҃вѣ́къ.
Катава́сїа:
И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мше про́йде сохра́ншее нетлѣ́ннꙋ. є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.
Конда́къ, гла́съ д҃. Подо́бенъ: Вознесы́йсѧ:
Пречⷭ҇тый хра́мъ сп҃совъ, многоцѣ́нный черто́гъ и҆ дв҃а, сщ҃е́нное сокро́вище сла́вы бж҃їѧ, дне́сь вво́дитсѧ въ до́мъ гдⷭ҇ень, благода́ть совводѧ́щи, ꙗ҆́же въ дс҃ѣ бжⷭ҇твенномъ, ю҆́же воспѣва́ютъ а҆́гг҃ли бж҃їи: сїѧ̀ є҆́сть селе́нїе нбⷭ҇ное.
І҆́косъ:
Неизрече́нныхъ бж҃їихъ и҆ бж҃е́ственныхъ та̑инъ зрѧ̀ въ дв҃ѣ благода́ть ꙗ҆влѧ́емꙋю, и҆ и҆сполнѧ́емꙋ ꙗ҆́вственнѡ, ра́дꙋйсѧ. и҆ ѻ҆́бразъ разꙋмѣ́ти недоꙋмѣ́юсѧ, стра́нный и҆ неизрече́нный: ка́кѡ и҆збра́ннаѧ чи́стаѧ є҆ди́на ꙗ҆ви́сѧ па́че всеѧ̀ тва́ри ви́димыѧ и҆ разꙋмѣва́емыѧ; тѣ́мже восхвали́ти хотѧ̀ сїю̀, ᲂу҆жаса́юсѧ ѕѣлѡ̀ ᲂу҆мо́мъ же и҆ сло́вомъ, ѻ҆ба́че дерза́ѧ проповѣ́даю и҆ велича́ю: сїѧ̀ є҆́сть селе́нїе нбⷭ҇ное.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи, па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ, пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.
Сѐ дне́сь возсїѧ̀ концє́мъ весна̀ ра́достнаѧ, просвѣща́ющи на́шꙋ дꙋ́шꙋ и҆ помышле́нїе и҆ ᲂу҆́мъ благода́тїю, торжество́мъ бцⷣы дне́сь та́инственнѡ да ᲂу҆чреди́мсѧ.
Да дароно́сѧтъ дне́сь всѧ́чєскаѧ цр҃и́цѣ мт҃ри бж҃їи, нб҃о и҆ землѧ̀, и҆ а҆́гг҃лѡвъ чи́ни, и҆ человѣ́кѡвъ мно́жество, и҆ да вопїю́тъ: во хра́мъ вво́дитсѧ ра́дость и҆ и҆збавле́нїе.
Писа́нїе мимотечѐ, и҆ ѡ҆скꙋдѣ̀ зако́нъ ꙗ҆́коже сѣ́нь, и҆ благода́ти лꙋчѝ возсїѧ́ша, въ хра́мъ бж҃їй вше́дшей тебѣ̀, дв҃о мт҃и чⷭ҇таѧ, въ не́мъ благослове́ннаѧ.
Повинꙋ́сѧ ржⷭ҇твꙋ̀ твоемꙋ̀, всечⷭ҇таѧ, ꙗ҆́кѡ творцꙋ̀ и҆ бг҃ꙋ, нб҃о и҆ землѧ̀ и҆ преиспо́днѧѧ, и҆ всѧ́къ ѧ҆зы́къ земны́хъ и҆сповѣ́даетъ, ꙗ҆́кѡ гдⷭ҇ь ꙗ҆ви́сѧ сп҃съ дꙋ́шъ на́шихъ.
И҆́нъ. І҆рмо́съ:
Пе́щь, сп҃се, ѡ҆роша́шесѧ, ѻ҆́троцы же, ликꙋ́юще, поѧ́хꙋ: ѻ҆тцє́въ бж҃е, бл҃гослове́нъ є҆сѝ.
Ликовствꙋ́имъ празднолю́бцы дне́сь, воспои́мъ чⷭ҇тꙋю влⷣчцꙋ, і҆ѡакі́ма и҆ а҆́ннꙋ досто́йнѡ чтꙋ́ще.
Прⷪ҇ро́чествꙋй дв҃де, глаго́лѧ дх҃омъ: приведꙋ́тсѧ дѣ̑вы въ слѣ́дъ тебє̀, приведꙋ́тсѧ тебѣ̀ во хра́мъ цр҃и́цы мт҃ри.
Ра́довахꙋсѧ а҆́гг҃лѡвъ чи́ни, веселѧ́хꙋсѧ пра́ведныхъ дꙋ́си, ꙗ҆́кѡ бж҃їѧ мт҃и во ст҃а̑ѧ приво́дитсѧ.
Прїе́млющи пи́щꙋ нбⷭ҇нꙋю, преспѣва́ше мꙋ́дростїю и҆ благода́тїю, бы́вши мт҃и по пло́ти хрⷭ҇та̀ бг҃а.
И҆ тѣ́ломъ и҆ дꙋ́хомъ ра́довашесѧ, пребыва́ющи марі́а непоро́чнаѧ во хра́мѣ бж҃їи, ꙗ҆́коже сосꙋ́дъ свѧще́ннѣйшїй.
Введо́ша тѧ̀ во внꙋ́треннѣйшее хра́ма, цѣломꙋ́дреннїи роди́телїе твоѝ, пречⷭ҇таѧ, воспита́тисѧ стра́ннѡ въ жили́ще хрⷭ҇та̀ бг҃а.
Сла́ва, трⷪ҇ченъ:
Просла́вимъ трⷪ҇цꙋ нераздѣ́льнꙋю, воспои́мъ є҆ди́но бжⷭ҇тво̀, со ѻ҆ц҃е́мъ сло́во, и҆ дх҃а всест҃а́го.
И҆ ны́нѣ:
Молѝ, є҆го́же родила̀ є҆сѝ, гдⷭ҇а, ꙗ҆́кѡ бл҃гоꙋтро́бна є҆стество́мъ сꙋ́ща, бг҃ороди́тельнице, спастѝ дꙋ́шы воспѣва́ющихъ тѧ̀.
Катава́сїа:
Ѻ҆́троки благоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но, посредѣ̀ пла́мене стоѧ́ще, поѧ́хꙋ: ѻ҆ц҃є́въ бж҃е, бл҃гослове́нъ є҆сѝ.
Пѣ́снь и҃. І҆рмо́съ:
Слы́ши, ѻ҆трокови́це дв҃о чи́стаѧ, да рече́тъ ᲂу҆́бѡ гаврїи́лъ, совѣ́тъ вы́шнѧгѡ дре́внїй и҆́стинный, бꙋ́ди къ прїѧ́тїю гото́ва бж҃їю: тобо́ю бо невмѣсти́мый съ человѣ́ки поживѐ. тѣ́мъ и҆ ра́дꙋѧсѧ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а.
Пречⷭ҇тый хра́мъ въ до́мъ бж҃їй приводѧ́щи а҆́нна и҆ногда̀, вопїю́щи, съ вѣ́рою речѐ свѧще́нникꙋ: ча́до, ѿ бг҃а да́нное мнѣ̀, прїи́мъ ны́нѣ, введѝ во хра́мъ зижди́телѧ твоегѡ̀, и҆ ра́дꙋѧсѧ по́й є҆мꙋ̀: благослови́те, всѧ̑ дѣла̀ гдⷭ҇нѧ, гдⷭ҇а.
Речѐ, ви́дѣвъ, а҆́ннѣ и҆ногда̀ дх҃омъ заха́рїа: жи́зни мт҃рь вво́диши и҆́стиннꙋю, ю҆́же свѣ́тлѡ прⷪ҇ро́цы бж҃їи бцⷣꙋ проповѣ́даша, и҆ ка́кѡ хра́мъ вмѣсти́тъ ю҆̀; тѣ́мъ чꙋдѧ́сѧ вопїю̀: благослови́те, всѧ̑ дѣла̀ гдⷭ҇нѧ, гдⷭ҇и.
Раба̀ бж҃їѧ бы́хъ а҆́зъ, ѿвѣща̀ а҆́нна є҆мꙋ̀, призыва́ющи сего̀ вѣ́рою и҆ моли́твою, прїѧ́ти моеѧ̀ болѣ́зни пло́дъ, по прїѧ́тїи же рожде́ннꙋю привестѝ да́вшемꙋ ю҆̀. тѣ́мъ зовѧ̀ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а.
Зако́нное вои́стиннꙋ дѣ́ло є҆́сть, свѧще́нникъ речѐ є҆́й, стра́ннꙋ же весьма̀ ве́щь поразꙋмѣва́ю, зрѧ̀ приводи́мꙋю въ до́мъ бж҃їй, пресла́внѡ превосходѧ́щꙋю ст҃а̑ѧ благода́тїю. тѣ́мъ и҆ ра́дꙋѧсѧ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а.
Возмога́ю, речѐ а҆́нна є҆мꙋ̀, зна́ющи, ꙗ҆̀же глаго́леши, разꙋмѣ́еши бо сїѧ̑ дх҃омъ бж҃їимъ, ꙗ҆́снѡ ꙗ҆̀же дв҃ы проповѣ́далъ є҆сѝ: прїимѝ ᲂу҆́бѡ пречⷭ҇тꙋю въ хра́мъ созда́телѧ твоегѡ̀, и҆ ра́дꙋѧсѧ по́й є҆мꙋ̀: благослови́те, всѧ̑ дѣла̀ гдⷭ҇нѧ, гдⷭ҇а.
Свѣтоно́сна на́мъ возжже́сѧ свѣща̀, возопѝ свѧще́нникъ, ра́дость велича́йшꙋю свѣтѧ́щи въ хра́мѣ: дꙋ́шы прⷪ҇ро́чєскїѧ да сра́дꙋютсѧ мнѣ̀, ꙗ҆́кѡ пресла̑внаѧ зрѧ́ще, соверша́ємаѧ въ домꙋ̀ бж҃їи, и҆ да вопїю́тъ при́снѡ: благослови́те, всѧ̑ дѣла̀ гдⷭ҇нѧ, гдⷭ҇а.
И҆́нъ. І҆рмо́съ:
Є҆гѡ́же ᲂу҆жаса́ютсѧ а҆́гг҃ли и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте свѧще́нницы, просла́вите ѻ҆́троцы, благослови́те лю́дїе, и҆ превозноси́те во всѧ̑ вѣ́ки.
Весели́тсѧ дне́сь свѣ́тлѡ і҆ѡакі́мъ, и҆ а҆́нна непоро́чнаѧ гдⷭ҇ꙋ бг҃ꙋ прино́ситъ же́ртвꙋ, да́ннꙋю є҆́й ѿ ѡ҆бѣща́нїѧ ст҃ꙋ́ю дще́рь.
Хва́лѧтсѧ ст҃і́и, дв҃дъ и҆ і҆ессе́й, и҆ і҆ꙋ́да чти́тсѧ, и҆зъ ко́рене бо и҆́хъ и҆зрастѐ пло́дъ, дв҃а чⷭ҇таѧ, и҆зъ неѧ́же роди́сѧ бг҃ъ превѣ́чный.
Марі́а, пречⷭ҇таѧ и҆ ѡ҆дꙋшевле́ннаѧ ски́нїа, приво́дитсѧ дне́сь въ до́мъ бж҃їй: и҆ прїе́млетъ сїю̀ заха́рїа рꙋка́ми, ꙗ҆́кѡ ѡ҆свѧще́нное сокро́вище гдⷭ҇не.
Ꙗ҆́кѡ две́рь спаси́тельнꙋю и҆ го́рꙋ мы́сленнꙋю, ꙗ҆́кѡ лѣ́ствицꙋ ѡ҆дꙋшевле́ннꙋю, почти́мъ, вѣ́рнїи, вои́стиннꙋ дв҃ꙋ и҆ мт҃рь бж҃їю, бл҃гослове́ннꙋю рꙋка́ми і҆ере́євъ.
Прⷪ҇ро́цы, а҆пⷭ҇ли и҆ мч҃ницы хрⷭ҇то́вы, а҆́гг҃лѡвъ чи́ни и҆ всѝ земноро́днїи, почти́мъ пѣ́сньми дв҃ꙋ чⷭ҇тꙋю, ꙗ҆́кѡ благослове́ннꙋю мт҃рь высоча́йшагѡ.
Въ хра́мъ тѧ̀ принесо́ша, всенепоро́чнаѧ чⷭ҇таѧ, бж҃е́ственнѣ ро́ждшїи тѧ̀, ꙗ҆́кѡ же́ртвꙋ чи́стꙋ: и҆ стра́ннѡ водворѧ́ешисѧ въ неходи́мыхъ бг҃ꙋ, пред̾ꙋгото́ватисѧ въ жили́ще сло́ва.
Благослови́мъ ѻ҆ц҃а̀, и҆ сн҃а и҆ ст҃а́го дх҃а, гдⷭ҇а. Трⷪ҇ченъ:
Да пое́тсѧ трист҃ы́й, ѻ҆ц҃ъ, и҆ сн҃ъ, и҆ дх҃ъ ст҃ы́й, нераздѣ́льнаѧ є҆ди́ница, є҆ди́но бжⷭ҇тво̀, держа́щее дла́нїю всю̀ тва́рь, во всѧ̑ вѣ́ки.
И҆ ны́нѣ:
Безнача́льное начина́етсѧ сло́во пло́тїю, роди́всѧ, ꙗ҆́кѡ благоволѝ, бг҃ъ же и҆ чл҃вѣ́къ, и҆зъ ѻ҆трокови́цы дв҃ы, возсозида́ѧ ны̀ пре́жде па́дшыѧ, ра́ди кра́йнѧгѡ бл҃гоꙋтро́бїѧ.
Хва́лимъ, благослови́мъ, покланѧ́емсѧ гдⷭ҇еви, пою́ще и҆ превозносѧ́ще во всѧ̑ вѣ́ки.
Катава́сїа:
Чꙋ́да преесте́ственнагѡ росода́тельнаѧ и҆з̾ѡбразѝ пе́щь ѻ҆́бразъ: не бо̀, ꙗ҆̀же прїѧ́тъ, пали́тъ ю҆́ныѧ, ꙗ҆́кѡ нижѐ ѻ҆́гнь бжⷭ҇тва̀ дв҃ы, въ ню́же вни́де ᲂу҆тро́бꙋ. тѣ́мъ воспѣва́юще воспое́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
На девѧ́той пѣ́сни, Честнѣ́йшꙋю не пое́мъ, но пое́мъ припѣ́вы пра́здника.
А҆́гг҃ли, вхожде́нїе пречⷭ҇тыѧ зрѧ́ще, ᲂу҆диви́шасѧ, ка́кѡ дв҃а вни́де во ст҃а̑ѧ ст҃ы́хъ.
И҆ посе́мъ і҆рмо́съ: Ꙗ҆́кѡ ѡ҆дꙋшевле́нномꙋ бж҃їю кївѡ́тꙋ: Та́же вторы́й ли́къ пое́тъ то́йже припѣ́въ пра́здника, и҆ і҆рмо́съ. и҆ на кі́йждо тропа́рь пою́тъ припѣ́вы пра́здника, на ѻ҆́ба ли́ка.
Пѣ́снь ѳ҃. І҆рмо́съ:
Ꙗ҆́кѡ ѡ҆дꙋшевле́нномꙋ бж҃їю кївѡ́тꙋ, да ника́коже ко́снетсѧ рꙋка̀ скве́рныхъ, ᲂу҆стнѣ́ же вѣ́рныхъ бцⷣѣ немо́лчнѡ гла́съ а҆́гг҃ла воспѣва́юще, съ ра́достїю да вопїю́тъ: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
Два́жды.
А҆́гг҃ли, вхожде́нїе всечⷭ҇тыѧ зрѧ́ще, ᲂу҆диви́шасѧ: ка́кѡ со сла́вою вни́де во ст҃а̑ѧ ст҃ы́хъ.
Ꙗ҆́кѡ пресвѣ́тлꙋю, бцⷣе чⷭ҇таѧ, дꙋше́вныѧ чистоты̀ и҆мꙋ́щи добро́тꙋ, бл҃года́тїю же бж҃їею и҆сполнѧ́ема съ нб҃сѐ, свѣ́томъ присносꙋ́щнымъ просвѣща́еши всегда̀ съ весе́лїемъ вопїю́щыѧ: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
А҆́гг҃ли, вхожде́нїе дв҃ы зрѧ́ще, ᲂу҆диви́шасѧ: ка́кѡ пресла́внѡ вни́де во ст҃а̑ѧ ст҃ы́хъ.
Прелета́етъ, бцⷣе чⷭ҇таѧ, чꙋ́до твоѐ си́лꙋ слове́съ: тѣ́ло бо въ тебѣ̀ поразꙋмѣва́ю па́че сло́ва, тече́нїѧ грѣхо́внагѡ непрїѧ́тно. тѣ́мже благода́рственнѡ вопїю́ ти: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
А҆́гг҃ли и҆ человѣ́цы дв҃ы вхожде́нїе почти́мъ: ꙗ҆́кѡ со сла́вою вни́де во ст҃а̑ѧ ст҃ы́хъ.
Пресла́внѡ проѡбразова́ше, чⷭ҇таѧ, зако́нъ тѧ̀ ски́нїю и҆ бжⷭ҇твеннꙋю ста́мнꙋ: стра́ненъ кївѡ́тъ, и҆ катапета́смꙋ, и҆ же́злъ: хра́мъ неразрꙋши́мый и҆ две́рь бж҃їю. тѣ́мже наꙋча́ютъ тебѣ̀ зва́ти: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
А҆́гг҃ли, вхожде́нїе дв҃ы зрѧ́ще, ᲂу҆диви́шасѧ: ка́кѡ бг҃оꙋго́днѣ вни́де во ст҃а̑ѧ ст҃ы́хъ.
Пѣсноспоѧ̀ тебѣ̀, провозглаша́ше дв҃дъ, глаго́лѧ тѧ̀ дще́рь цр҃е́вꙋ, красото́ю добродѣ́телей, ѡ҆деснꙋ́ю предстоѧ́щꙋю бг҃а, ви́дѣвъ тѧ̀ ᲂу҆пещре́нꙋ. тѣ́мже, прⷪ҇ро́чествꙋѧ, вопїѧ́ше: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
А҆́гг҃ли, взыгра́йте со ст҃ы́ми, дѣ̑вы, сликовствꙋ́йте: бг҃оѻтрокови́ца бо вни́де во ст҃а̑ѧ ст҃ы́хъ.
Бг҃опрїѧ́тнꙋ предзрѧ̀ соломѡ́нъ, проповѣ́да тѧ̀ ѻ҆́дръ цр҃е́въ, живы́й и҆сто́чникъ запеча́тствованъ, и҆зъ негѡ́же немꙋ́тнаѧ на́мъ произы́де вода̀, вѣ́рою вопїю́щымъ: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
А҆́гг҃ли и҆ человѣ́цы дв҃ꙋ пѣ́сньми да возвели́чимъ: бг҃олѣ́пнѡ бо вни́де во ст҃а̑ѧ ст҃ы́хъ.
Подае́ши дарова́нїй твою̀ тишинꙋ̀, бцⷣе, дꙋшѝ мое́й, точа́щи жи́знь тебѐ чтꙋ́щымъ по до́лгꙋ, сама̀ защища́ющи, и҆ покрыва́ющи, и҆ соблюда́ющи, вопи́ти тебѣ̀: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
Та́же пе́рвый ли́къ пое́тъ втора́гѡ канѡ́на припѣ́въ пра́здника:
Велича́й, дꙋшѐ моѧ̀, приведе́ннꙋю во хра́мъ гдⷭ҇е́нь, и҆ бл҃гослове́ннꙋю рꙋка́ми і҆ере́евыми.
И҆ посе́мъ і҆рмо́съ: Свѣтоно́сный ѻ҆́блакъ: И҆ вторы́й ли́къ пое́тъ то́йже припѣ́въ пра́здника, и҆ і҆рмо́съ: и҆ на тропарѣ́хъ пое́мъ то́йже припѣ́въ пра́здника.
И҆́нъ. І҆рмо́съ:
Свѣтоно́сный ѻ҆́блакъ, въ ѻ҆́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ чл҃вѣ́къ, безнача́льный: велича́емъ всѝ ꙗ҆́кѡ мт҃рь бг҃а на́шегѡ чⷭ҇тꙋю.
Два́жды.
Припѣ́въ: Велича́й, дꙋшѐ моѧ̀, приведе́ннꙋю во хра́мъ гдⷭ҇ень, и҆ бл҃гослове́ннꙋю рꙋка́ми і҆ере́евыми.
И҆зъ пра́ведныхъ произы́де, і҆ѡакі́ма и҆ а҆́нны, ѡ҆бѣща́нїѧ пло́дъ, бг҃оѻтрокови́ца марі́а: и҆ ꙗ҆́кѡ кади́ло прїѧ́тное, пло́тїю младе́нствꙋющи, приво́дитсѧ во свѧти́лище ст҃о́е, ꙗ҆́кѡ ст҃а́ѧ во ст҃ы́хъ ѡ҆бита́ти.
Младе́нствꙋющꙋю є҆стество́мъ, и҆ па́че є҆стества̀ ꙗ҆́вльшꙋюсѧ мт҃рь бж҃їю, восхва́лимъ пѣ́сньми: въ хра́мъ бо зако́нный гдⷭ҇ꙋ дне́сь приво́дитсѧ, въ воню̀ благово́нїѧ пра́ведныхъ, ꙗ҆́кѡ пло́дъ дх҃о́вный.
Со а҆́гг҃ломъ, є҆́же ра́дꙋйсѧ, бцⷣѣ прили́чнѣ возопїи́мъ, вѣ́рнїи: ра́дꙋйсѧ, вседо́браѧ невѣ́сто. ра́дꙋйсѧ, ѻ҆́блаче свѣ́тлый, и҆зъ негѡ́же на́мъ возсїѧ̀ гдⷭ҇ь, во тмѣ̀ невѣ́дѣнїѧ сѣдѧ́щымъ. ра́дꙋйсѧ, всѣ́хъ наде́ждо.
Ст҃ы́хъ ст҃а́ѧ, и҆ бг҃ома́ти марі́е, моли́твами твои́ми, чⷭ҇таѧ, свободи́ ны ѿ сѣ́тей вра́жїихъ и҆ всѧ́кїѧ є҆́реси и҆ ско́рби, вѣ́рнѡ покланѧ́ющыѧсѧ ѻ҆́бразꙋ ст҃а́гѡ твоегѡ̀ зра́ка.
Пѣ́снь досто́йнꙋ бцⷣѣ всѧ̀ тва́рь со а҆́гг҃ломъ гаврїи́ломъ взыва́етъ, вопїю́щи: ра́дꙋйсѧ, мт҃и бж҃їѧ всенепоро́чнаѧ, є҆́юже и҆зба́вихомсѧ пе́рвыѧ клѧ́твы, бы́вше нетлѣ́нїѧ ѻ҆́бщницы.
Херꙋві̑мъ пребо́льши, и҆ серафі̑мъ вы́шши, и҆ ши́рши нб҃съ ꙗ҆ви́ласѧ є҆сѝ, дв҃о, ꙗ҆́кѡ невмѣ́стнаго всѣ́ми, во ᲂу҆тро́бѣ вмѣсти́вши бг҃а на́шего, и҆ ро́ждши несказа́ннѡ: є҆го́же молѝ прилѣ́жнѡ ѡ҆ на́съ.
Трⷪ҇ченъ:
Припѣ́въ: Велича́й, дꙋшѐ моѧ̀, трїѷпоста́снагѡ и҆ нераздѣ́льнагѡ бжⷭ҇тва̀ держа́вꙋ.
Трїѷпоста́сное є҆стество̀, и҆ нераздѣ́льнꙋю сла́вꙋ, и҆ въ бжⷭ҇твѣ̀ є҆ди́номъ пое́мꙋю непреста́ннѡ, на нб҃сѝ и҆ на землѝ, трⷪ҇цꙋ неразлꙋ́чнꙋю просла́вимъ, съ сн҃омъ ѻ҆ц҃ꙋ̀ и҆ дх҃ꙋ покланѧ́ющесѧ благоче́стнѡ.
Бг҃оро́диченъ:
Велича́й, дꙋшѐ моѧ̀, чⷭ҇тнѣ́йшꙋю и҆ сла́внѣйшꙋю го́рнихъ во́инствъ, дв҃ꙋ, пречⷭ҇тꙋю бцⷣꙋ.
Подъ твоѐ бл҃гоꙋтро́бїе прибѣга́ющыѧ вѣ́рнѡ, и҆ покланѧ́ющыѧсѧ благоче́стнѡ сн҃ꙋ твоемꙋ̀, дв҃о бг҃ороди́тельнице, ꙗ҆́кѡ бг҃ꙋ и҆ гдⷭ҇ꙋ мі́ра моли́сѧ, ѿ тлѝ и҆ бѣ́дъ и҆зба́вити, и҆ всѧ́ческихъ и҆скꙋше́нїй.
Та́же ѻ҆́ба ли́ка, вкꙋ́пѣ соше́дшесѧ, пою́тъ припѣ́въ а҃-гѡ канѡ́на: А҆́гг҃ли, вхожде́нїе пречⷭ҇тыѧ: И҆ посе́мъ і҆рмо́съ:
Та́инство стра́нное ви́жꙋ и҆ пресла́вное: нб҃о, верте́пъ: престо́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ, є҆го́же воспѣва́юще велича́емъ.
Свѣти́ленъ. Подо́бенъ: Жєны̀ ᲂу҆слы́шите:
Ю҆́же дре́вле предвозвѣстѝ прⷪ҇ро́ческое сосло́вїе, ста́мнꙋ и҆ же́злъ, и҆ скрижа́ль, и҆ несѣко́мꙋю го́рꙋ, марі́ю бг҃оѻтрокови́цꙋ вѣ́рнѡ да восхва́лимъ: дне́сь бо вво́дитсѧ во ст҃а̑ѧ ст҃ы́хъ, воспита́тисѧ гдⷭ҇ꙋ.
Три́жды.
На хвали́техъ стїхи̑ры на д҃, гла́съ а҃. Подо́бенъ: Нбⷭ҇ныхъ чинѡ́въ:
Свѣщенѡ́сицы дѣ̑вы, ꙳ приснодв҃ꙋ свѣ́тлѡ провожда́юще, ꙳ прⷪ҇ро́чествꙋютъ и҆́стиннѡ дх҃омъ бꙋ́дꙋщее: ꙳ хра́мъ бо бж҃їй бцⷣа сꙋ́щи, ꙳ въ хра́мъ со сла́вою дѣ́вственною ꙳ младе́нствꙋющи вво́дитсѧ.
Ѡ҆бѣща́нїѧ ст҃а́гѡ и҆ пло́дъ благосла́вный, ꙳ бцⷣа вои́стиннꙋ ꙗ҆ви́сѧ мі́рꙋ, ꙗ҆́кѡ всѣ́хъ превы́шшаѧ: ꙳ ꙗ҆́же благоче́стнѡ приводи́ма въ хра́мъ бж҃їй, ꙳ моли́твꙋ ро́ждшихъ и҆сполнѧ́етъ, ꙳ соблюда́ема бжⷭ҇твеннымъ дх҃омъ.
Нбⷭ҇нымъ воспита́на, дв҃о, хлѣ́бомъ, ꙳ вѣ́рнѡ въ хра́мѣ гдⷭ҇ни, ꙳ родила̀ є҆сѝ мі́рꙋ жи́зни хлѣ́бъ сло́во: ꙳ є҆мꙋ́же, ꙗ҆́кѡ хра́мъ и҆збра́нный и҆ всенепоро́чный, ꙳ пред̾ѡбрꙋчи́ласѧ є҆сѝ дх҃омъ та́инственнѡ, ꙳ ѡ҆брꙋчена̀ бг҃ꙋ и҆ ѻ҆ц҃ꙋ̀.
Да ѿве́рзетсѧ две́рь ꙳ бг҃опрїѧ́тнагѡ хра́ма: ꙳ хра́мъ бо всѣ́хъ цр҃ѧ̀ и҆ прⷭ҇то́лъ, ꙳ дне́сь со сла́вою внꙋ́трь прїе́мъ, ꙳ і҆ѡакі́мъ возлага́етъ, ѡ҆свѧти́въ гдⷭ҇ꙋ, ꙳ ѿ негѡ̀ и҆збра́ннꙋю въ мт҃рь себѣ̀.
Сла́ва, и҆ ны́нѣ, гла́съ в҃. Леѡ́нта маі́стора:
Дне́сь въ хра́мъ приво́дитсѧ всенепоро́чнаѧ дв҃а, во ѻ҆би́телище всецр҃ѧ̀ бг҃а, и҆ всеѧ̀ жи́зни на́шеѧ пита́телѧ: дне́сь чⷭ҇тѣ́йшаѧ ст҃ы́нѧ, ꙗ҆́кѡ трилѣ́тствꙋющаѧ ю҆́ница, во ст҃а̑ѧ ст҃ы́хъ вво́дитсѧ. то́й возопїи́мъ, ꙗ҆́кѡ а҆́гг҃лъ: ра́дꙋйсѧ, є҆ди́на въ жена́хъ бл҃гослове́ннаѧ.
Славосло́вїе вели́кое. И҆ ѿпꙋ́стъ.
[Зрѝ] Зна́менаютсѧ же бра́тїѧ ѿ і҆ере́а ст҃ы́мъ є҆ле́емъ. И҆ пое́мъ стїхи́рꙋ самогла́снꙋ пра́здника, ю҆́же хо́щетъ є҆кклисїа́рхъ.
На лїтꙋргі́и, Бл҃жє́нна ѿ канѡ́на, пѣ́снь г҃, д҃-гѡ гла́са, и҆ ѕ҃-ѧ, а҃-гѡ гла́са, на и҃. По вхо́дѣ тропа́рь пра́здника. Сла́ва, и҆ ны́нѣ, конда́къ. Прокі́менъ, гла́съ г҃. Пѣ́снь бцⷣы: Вели́читъ дꙋша̀ моѧ̀ гдⷭ҇а: Сті́хъ: Ꙗ҆́кѡ призрѣ̀ на смире́нїе рабы̀ своеѧ̀. А҆пⷭ҇лъ ко є҆вре́ємъ, зача́ло т҃к. А҆ллилꙋ́їа, гла́съ и҃: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ. Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи. Є҆ѵⷢ҇лїе лꙋкѝ, зача́ло н҃д. Прича́стенъ: Ча́шꙋ спасе́нїѧ прїимꙋ̀:
🕅 Подоба́етъ вѣ́дати, а҆́ще слꙋчи́тсѧ попра́зднство вхо́да бцⷣы въ недѣ́лю, и҆ ст҃ы́й пра́зднꙋетсѧ, на д҃, и҆лѝ на ѕ҃:
На ма́лѣй вече́рни, въ сꙋббѡ́тꙋ ве́чера стїхи̑ры воскрⷭ҇ны, и҆ бцⷣѣ, по ѻ҆бы́чаю.
На вели́цѣй вече́рни по стїхосло́вїи, на Гдⷭ҇и, воззва́хъ, стїхи̑ры воскрⷭ҇ны г҃, и҆ ꙾восто́ченъ꙾ 8 є҆ди́нъ: и҆ пра́здника г҃, тогѡ̀ днѐ рѧдовы̑ѧ, и҆ ст҃а́гѡ мине́и г҃. А҆́ще ли пое́тсѧ ст҃ы́й на ѕ҃, и҆лѝ є҆мꙋ́же и҆ полѷеле́й, и҆ пое́мъ стїхи̑ры воскрⷭ҇ны г҃: и҆ пра́здника г҃: и҆ ст҃а́гѡ д҃. Сла́ва, ст҃а́гѡ: А҆́ще же нѝ, Сла́ва, пра́здника. И҆ ны́нѣ, бг҃оро́диченъ а҃ гла́са. Вхо́дъ. Прокі́менъ днѐ. На лїті́и стїхи̑ры пра́здника, тогѡ̀ днѐ стїхѡ́вныѧ: и҆ ст҃а́гѡ, а҆́ще полѷеле́й. Сла́ва, и҆ ны́нѣ, пра́здника. а҆́ще ли и҆́мать ст҃ы́й Сла́вꙋ: Сла́ва, ст҃а́гѡ: И҆ ны́нѣ, пра́здника. На стїхо́внѣ стїхи̑ры воскрⷭ҇ны: Сла́ва, ст҃а́гѡ, а҆́ще є҆́сть. а҆́ще ли нѝ, Сла́ва, и҆ ны́нѣ, пра́здника. На благослове́нїи хлѣ́бѡвъ тропа́рь: Бцⷣе дв҃о: два́жды. и҆ пра́здника, є҆ди́ножды.
На ᲂу҆́трени: на Бг҃ъ гдⷭ҇ь, тропа́рь воскрⷭ҇нъ, в҃. Сла́ва, ст҃а́гѡ, а҆́ще є҆́сть: а҆́ще ли нѝ, Сла́ва, и҆ ны́нѣ, пра́здника. По каѳі́смахъ сѣда́льны воскрⷭ҇ны съ бг҃орѡ́дичны и҆́хъ, и҆ чте́нїе во є҆ѵⷢ҇лїи толково́мъ. Полѷеле́й, и҆ тропарѝ: А҆́гг҃льскїй собо́ръ: ѵ҆пакоѝ, степє́нна, и҆ прокі́менъ гла́са. Є҆ѵⷢ҇лїе воскрⷭ҇но, и҆ стїхи́ра воскрⷭ҇на, и҆ про́чее воскре́сно. Канѡ́нъ воскрⷭ҇нъ, со і҆рмосо́мъ на д҃: и҆ бцⷣѣ на в҃. и҆ пра́здника на д҃: И҆ ст҃а́гѡ на д҃. А҆́ще полѷеле́й, канѡ́нъ воскрⷭ҇нъ со і҆рмосо́мъ на д҃: и҆ пра́здника на д҃. и҆ ст҃а́гѡ на ѕ҃. Катава́сїа: Хрⷭ҇то́съ ражда́етсѧ: По г҃ пѣ́сни конда́къ пра́здника и҆ і҆́косъ, и҆ ст҃а́гѡ, а҆́ще и҆́мать, и҆ сѣда́ленъ ст҃а́гѡ. Сла́ва, и҆ ны́нѣ, пра́здника, и҆ чте́нїе. По ѕ҃ пѣ́сни конда́къ воскрⷭ҇нъ, и҆ і҆́косъ, и҆ чте́мъ про́логъ. На ѳ҃ пѣ́сни пое́мъ, Честнѣ́йшꙋю: свѣти́ленъ воскрⷭ҇нъ. Сла́ва, ст҃а́гѡ, а҆́ще и҆́мать: а҆́ще нѝ, Сла́ва, и҆ ны́нѣ, пра́здника. На хвали́техъ стїхи̑ры воскрⷭ҇ны д҃: и҆ пра́здника со Сла́внымъ д҃, стїхѡ́вныѧ ᲂу҆́трєннїѧ, со стїхи̑ пра́здника. А҆́ще и҆́мать ст҃ы́й стїхи̑ры на хвали́техъ, и҆ пое́мъ стїхи̑ры воскрⷭ҇ны д҃: и҆ ст҃а́гѡ со Сла́внымъ д҃, съ припѣ́вы є҆гѡ̀. Сла́ва, стїхи́ра є҆ѵⷢ҇льскаѧ. И҆ ны́нѣ, Пребл҃гослове́нна є҆сѝ, бцⷣе дв҃о: Славосло́вїе вели́кое. По трист҃о́мъ тропа́рь воскрⷭ҇нъ то́чїю. И҆ є҆ктєнїѝ, и҆ ѿпꙋ́стъ, и҆ ѡ҆глаше́нїе, и҆ ѻ҆бы́чное и҆схожде́нїе въ притво́ръ. Та́же ча́съ а҃: На а҃-мъ часѣ̀ тропа́рь воскрⷭ҇нъ. Сла́ва, тропа́рь пра́здника: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ пра́здника. На г҃-мъ часѣ̀ тропа́рь воскрⷭ҇нъ. Сла́ва, ст҃а́гѡ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ воскрⷭ҇нъ. Та́кожде и҆ въ про́чыѧ часы̀ глаго́лемъ воскрⷭ҇ный тропа́рь, всегда̀ съ пра́здничнымъ, и҆ со ст҃а́гѡ тропаре́мъ, премѣнѧ́юще, а҆́ще є҆́сть. А҆ конда́къ воскрⷭ҇нъ, и҆ пра́здника, глаго́лемъ премѣнѧ́юще: а҆́ще полѷеле́й, и҆ ст҃а́гѡ.
На лїтꙋргі́и: Бл҃жє́нна гла́са на ѕ҃: и҆ пра́здника рѧдова́ѧ пѣ́снь, на д҃. А҆́ще ли и҆́мать ст҃ы́й пѣ́снь во ᲂу҆ста́вѣ: и҆ воскрⷭ҇на на д҃: и҆ пра́здника пѣ́снь рѧдова́ѧ, на д҃: и҆ ст҃а́гѡ пѣ́снь ѕ҃, на д҃. По вхо́дѣ тропа́рь. воскрⷭ҇нъ, и҆ пра́здника, и҆ хра́ма ст҃а́гѡ: и҆ ст҃а́гѡ, а҆́ще и҆́мать. Та́же конда́къ воскрⷭ҇нъ. Сла́ва, ст҃а́гѡ: И҆ ны́нѣ пра́здника. А҆́ще ли не и҆́мать ст҃ы́й тропарѧ̀ и҆ кондака̀: Сла́ва, конда́къ воскрⷭ҇нъ: И҆ ны́нѣ, конда́къ пра́здника. Прокі́менъ, а҆пⷭ҇лъ, а҆ллилꙋ́їа, є҆ѵⷢ҇лїе и҆ прича́стенъ днѐ и҆ ст҃а́гѡ, а҆́ще и҆́мать: а҆́ще ли нѝ, то̀ рѧ́дъ недѣ́ли є҆ди́нъ.
Вѣ́стно бꙋ́ди, ꙗ҆́кѡ пра́зднꙋетсѧ пра́здникъ се́й дне́й є҃.
* * *
꙾А҆нато́лїевъ꙾
꙾А҆нато́лїевъ꙾