Мѣ́сѧца тогѡ́же въ л҃-й де́нь. Ст҃а́гѡ и҆ всехва́льнагѡ а҆пⷭ҇ла а҆ндре́а первозва́ннагѡ.
По предначина́тельномъ ѱалмѣ̀, пое́мъ:
Блаже́нъ мꙋ́жъ: пе́рвый а҆нтїфѡ́нъ.
На Гдⷭ҇и, воззва́хъ: стїхи̑ры на и҃, гла́съ д҃. Поⷣ: Зва́нный свы́ше:
И҆́же прⷣте́чевымъ свѣ́томъ воѡбраже́нъ, ꙳ є҆гда̀ ѡ҆заре́нїе ѵ҆поста́сное ꙳ сла́вы ѻ҆ч҃ескїѧ ꙗ҆ви́сѧ, ꙳ человѣ́ческїй ро́дъ ꙳ за бл҃гоꙋтро́бїе спастѝ хотѧ̀: ꙳ тогда̀ пе́рвый ты̀, сла́вне, къ немꙋ̀ прите́клъ є҆сѝ, ꙳ ѡ҆заре́нъ бы́въ въ ра́зꙋмѣ ꙳ соверше́ннѣйшею лꙋче́ю тогѡ̀ бжⷭ҇тва̀, ꙳ ѿѻнꙋ́дꙋже и҆ проповѣ́дникъ и҆ а҆пⷭ҇лъ бы́въ ꙳ хрⷭ҇та̀ бг҃а на́шегѡ, є҆го́же молѝ, ꙳ спастѝ и҆ просвѣти́ти дꙋ́шы на́шѧ.
Три́жды.
И҆́же прⷣте́чевымъ гла́сомъ ѡ҆глаше́нъ, ꙳ є҆гда̀ всест҃о́е сло́во воплоти́сѧ, ꙳ жи́знь на́мъ подаѧ̀, ꙳ и҆ спасе́нїе сꙋ́щымъ на землѝ благовѣствꙋ́ѧ: ꙳ тогда̀ томꙋ̀, премꙋ́дре послѣ́довалъ є҆сѝ, ꙳ и҆ себѐ кра́йнее и҆ всест҃о́е, ꙳ ꙗ҆́кѡ нача́токъ томꙋ̀ ѡ҆свѧти́лъ є҆сѝ, ꙳ є҆го́же и҆ позна́въ, ꙳ и҆ возвѣсти́лъ є҆сѝ сро́дникꙋ твоемꙋ̀ бг҃а на́шего. ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.
Три́жды.
И҆́же и҆зъ непло́дове прозѧ́бшемꙋ ꙳ ᲂу҆ч҃ни́къ бы́въ, ꙳ є҆гда̀ дѣ́вственное ржⷭ҇тво̀ возсїѧ̀, ꙳ благоче́стїѧ ᲂу҆чи́тель, ꙳ и҆ цѣломꙋ́дрїѧ показꙋ́ѧ чистотꙋ̀: ꙳ тогда̀ ты̀ теплѣ́йшїй добродѣ́тели рачи́тель, ꙳ а҆ндре́е бл҃же́нне, бы́лъ є҆сѝ, ꙳ восхождє́нїѧ въ се́рдцѣ твое́мъ полага́ѧ, ꙳ и҆ ѿ сла́вы къ неизрече́ннѣй взѧ́лсѧ є҆сѝ сла́вѣ ꙳ хрⷭ҇та̀ бг҃а на́шегѡ. ꙳ є҆го́же молѝ, ꙳ спастѝ и҆ просвѣти́ти дꙋ́шы на́шѧ.
Два́жды.
Сла́ва, гла́съ д҃. А҆нато́лїа:
Ры́бъ лови́твꙋ ѡ҆ста́вивъ, а҆пⷭ҇ле, человѣ́ки ᲂу҆ловлѧ́еши тро́стїю про́повѣди, низпꙋща́ѧ, ꙗ҆́коже ᲂу҆́дꙋ благоче́стїѧ льще́нїе, и҆ возводѧ̀ и҆зъ глꙋбины̀ ле́сти ꙗ҆зы́ки всѧ̑, а҆ндре́е а҆пⷭ҇ле, верхо́внагѡ сы́й є҆динокро́вный, и҆ вселе́нныѧ кꙋ́пнѡ проповѣ́дниче велегла́сный, молѧ́сѧ не преста́й ѡ҆ на́съ, вѣ́рою и҆ любо́вїю благохва́лѧщихъ, всехва́льне, при́снѡ честнꙋ́ю па́мѧть твою̀.
И҆ ны́нѣ, предпра́зднства, гла́съ то́йже:
И҆са́їе, ликꙋ́й, сло́во бж҃їе воспрїимѝ, прорцы̀ ѻ҆трокови́цѣ марі́и, кꙋпинꙋ̀ горѣ́ти ѻ҆гне́мъ и҆ не сгара́ти заре́ю бжⷭ҇тва̀. виѳлее́ме, благоꙋкраси́сѧ, ѿве́рзи врата̀, є҆де́ме: и҆ волсвѝ и҆ди́те, ви́дѣти спасе́нїе въ ꙗ҆́слѣхъ повива́емое, є҆го́же ѕвѣзда̀ показа̀ верхꙋ̀ верте́па, жизнода́вца гдⷭ҇а, спаса́ющаго ро́дъ на́шъ.
Вхо́дъ. Прокі́менъ днѐ. И҆ чтє́нїѧ г҃.
Собо́рнагѡ посла́нїѧ петро́ва чте́нїе.
[Зач: н҃и] Пе́тръ, а҆пⷭ҇лъ і҆и҃съ хрⷭ҇то́въ, и҆збра̑ннымъ прише́льцємъ разсѣ́ѧнїѧ, по́нта, галаті́и, каппадокі́и, а҆сі́и и҆ вїѳѷні́и, по прозрѣ́нїю бг҃а ѻ҆ц҃а̀, во ст҃ы́ни дх҃а, въ послꙋша́нїе и҆ кропле́нїе кро́ве і҆и҃съ хрⷭ҇то́вы, бл҃года́ть ва́мъ и҆ ми́ръ да ᲂу҆мно́житсѧ. Бл҃гослове́нъ бг҃ъ и҆ ѻ҆ц҃ъ гдⷭ҇а на́шегѡ і҆и҃съ хрⷭ҇та̀, и҆́же по мно́зѣй свое́й ми́лости порожде́й на́съ во ᲂу҆пова́нїе жи́во, воскрⷭ҇нїемъ і҆и҃съ хрⷭ҇то́вымъ ѿ ме́ртвыхъ, въ наслѣ́дїе нетлѣ́нно, и҆ нескве́рно, и҆ неꙋвѧда́емо, соблюде́но на нб҃сѣ́хъ ва́съ ра́ди: и҆̀же си́лою бж҃їею соблюде́ни вѣ́рою, во спасе́нїе гото́вое ꙗ҆ви́тисѧ во вре́мѧ послѣ́днее. Ѡ҆ не́мже ра́дꙋйтесѧ, ма́лѡ ны́нѣ, а҆́ще лѣ́по є҆́сть, приско́рбни бы́вше въ разли́чныхъ напа́стехъ: Да и҆скꙋше́нїе ва́шеѧ вѣ́ры, многочестнѣ́йше зла́та ги́бнꙋща, ѻ҆гне́мъ же и҆скꙋше́на, ѡ҆брѧ́щетсѧ въ похвалꙋ̀ и҆ че́сть и҆ сла́вꙋ, во ѿкрове́нїи і҆и҃съ хрⷭ҇то́вѣ: є҆го́же не ви́дѣвше лю́бите, и҆ на него́же ны́нѣ не зрѧ́ще, вѣ́рꙋюще же, ра́дꙋетесѧ ра́достїю неизглаго́ланною и҆ просла́вленною, прїе́млюще кончи́нꙋ вѣ́рѣ ва́шей спасе́нїе дꙋша́мъ: ѡ҆ не́мже спасе́нїи взыска́ша и҆ и҆спыта́ша прⷪ҇ро́цы, и҆̀же ѡ҆ ва́шей бл҃года́ти прореко́ша, и҆спыта́юще, въ каково̀ и҆лѝ въ ко́е вре́мѧ ꙗ҆влѧ́ше въ ни́хъ дх҃ъ хрⷭ҇то́въ, пре́жде свидѣ́тельствꙋѧ ѡ҆ хрⷭ҇то́выхъ стрⷭ҇те́хъ, ꙗ҆̀же по си́хъ сла́вахъ: И҆̀мже ѿкры́сѧ, ꙗ҆́кѡ не и҆̀мъ самѣ̑мъ, но на́мъ слꙋжа́хꙋ сїѧ̑, ꙗ҆̀же ны́нѣ возвѣсти́шасѧ ва́мъ благовѣствова́вшими ва́мъ дх҃омъ ст҃ы́мъ, по́сланнымъ съ нб҃сѐ, въ нѧ́же жела́ютъ а҆́гг҃ли прини́кнꙋти. Тѣ́мже, возлю́бленнїи, препоѧ́савше чрє́сла помышле́нїѧ ва́шегѡ, трезвѧ́щесѧ, соверше́ннѣ ᲂу҆пова́йте на приноси́мꙋю ва́мъ бл҃года́ть, ѿкрове́нїемъ і҆и҃съ хрⷭ҇то́вымъ. Ꙗ҆́кѡ ча̑да послꙋша́нїѧ, не преѡбразꙋ́ющесѧ пе́рвыми невѣ́дѣнїѧ ва́шегѡ похотѣ́нїи: но по зва́вшемꙋ вы̀ ст҃о́мꙋ, и҆ са́ми свѧ́ти во все́мъ житїѝ бꙋ́дите. Занѐ пи́сано є҆́сть: свѧ́ти бꙋ́дите, ꙗ҆́кѡ а҆́зъ свѧ́тъ є҆́смь. И҆ а҆́ще ѻ҆ц҃а̀ называ́ете нелицемѣ́рнѡ сꙋдѧ́ща комꙋ́ждо по дѣ́лꙋ, со стра́хомъ житїѧ̀ ва́шегѡ вре́мѧ жи́тельствꙋйте: вѣ́дѧще, ꙗ҆́кѡ не и҆стлѣ́ннымъ сребро́мъ, и҆лѝ зла́томъ и҆зба́вистесѧ ѿ сꙋ́етнагѡ ва́шегѡ житїѧ̀ ѻ҆тцы̀ пре́даннагѡ. но чⷭ҇тно́ю кро́вїю, ꙗ҆́кѡ а҆́гнца непоро́чна, и҆ пречⷭ҇та хрⷭ҇та̀, Пред̾ꙋвѣ́дѣнаго ᲂу҆́бѡ пре́жде сложе́нїѧ мі́ра, ꙗ҆́вльшасѧ же въ послѣ̑днѧѧ лѣ̑та ва́съ ра́ди. И҆̀же є҆гѡ̀ ра́ди вѣ́рꙋете въ бг҃а, воздви́гшаго є҆го̀ и҆зъ ме́ртвыхъ, и҆ сла́вꙋ є҆мꙋ̀ да́вша, ꙗ҆́кѡ да вѣ́ра ва́ша и҆ ᲂу҆пова́нїе бꙋ́детъ на бг҃а. Дꙋ́шы ва́шѧ ѡ҆чи́стивше въ послꙋша́нїе и҆́стины дх҃омъ, въ братолю́бїе нелицемѣ́рно, ѿ чи́ста се́рдца дрꙋ́гъ дрꙋ́га люби́те прилѣ́жнѡ: порожде́ни не ѿ сѣ́мене и҆стлѣ́нна, но неистлѣ́нна, сло́вомъ жива́гѡ бг҃а и҆ пребыва́юща во вѣ́ки. Занѐ всѧ́ка пло́ть ꙗ҆́кѡ трава̀, и҆ всѧ́ка сла́ва человѣ́ча, ꙗ҆́кѡ цвѣ́тъ тра́вный: и҆́зсше трава̀, и҆ цвѣ́тъ є҆ѧ̀ ѿпадѐ: глаго́лъ же гдⷭ҇ень пребыва́етъ во вѣ́ки: се́ же є҆́сть глаго́лъ, благовѣствова́нный въ ва́съ. Ѿло́жше ᲂу҆̀бо всѧ́кꙋ ѕло́бꙋ, и҆ всѧ́кꙋ ле́сть, и҆ лицемѣ́рїе и҆ за́висть, и҆ всѧ̑ клеветы̑, ꙗ҆́кѡ новорожде́ни младе́нцы, слове́сное и҆ неле́стное млеко̀ возлюби́те, ꙗ҆́кѡ да ѡ҆ не́мъ возрасте́те во спасе́нїе. Поне́же вкꙋси́сте, ꙗ҆́кѡ бл҃гъ гдⷭ҇ь. Къ немꙋ́же приходѧ́ще, ка́меню жи́вꙋ, ѿ человѣ̑къ ᲂу҆́бѡ ᲂу҆ничиже́нꙋ, ѿ бг҃а же и҆збра́ннꙋ, че́стнꙋ, и҆ са́ми ꙗ҆́кѡ ка́менїе жи́во зижди́тесѧ въ хра́мъ дꙋхо́венъ, ст҃и́тельство свѧ́то, возноси́ти жє́ртвы дꙋхѡ́вны, благопрїѧ́тны бг҃ови і҆и҃съ хрⷭ҇то́мъ. Занѐ пи́сано є҆́сть въ писа́нїи: сѐ полага́ю въ сїѡ́нѣ ка́мень краеꙋго́ленъ, и҆збра́нъ, че́стенъ: и҆ вѣ́рꙋѧй въ ѻ҆́нь, не постыди́тсѧ.
Собо́рнагѡ посла́нїѧ петро́ва чте́нїе.
[Зач: н҃ѳ] Возлю́бленнїи, хрⷭ҇то́съ пострада̀ по на́съ, на́мъ ѡ҆ста́вль ѻ҆́бразъ, да послѣ́дꙋемъ стопа́мъ є҆гѡ̀. И҆́же грѣха̀ не сотворѝ, ни ѡ҆брѣ́тесѧ ле́сть во ᲂу҆стѣ́хъ є҆гѡ̀: и҆́же ᲂу҆корѧ́емь, проти́вꙋ не ᲂу҆карѧ́ше: стражда̀, не преща́ше: предаѧ́ше же сꙋдѧ́щемꙋ пра́веднѡ. И҆́же грѣхѝ на́шѧ са́мъ вознесѐ на тѣ́лѣ свое́мъ на дре́во, да ѿ грѣ̑хъ и҆збы́вше, пра́вдою поживе́мъ, є҆гѡ́же ꙗ҆́звою и҆сцѣлѣ́сте. Бѣ́сте бо ꙗ҆́кѡ ѻ҆́вцы заблꙋ́ждшыѧ, не и҆мꙋ́ще па́стырѧ: но возврати́стесѧ ны́нѣ къ па́стырю, и҆ посѣти́телю дꙋ́шъ ва́шихъ. Та́кожде же и҆ жєны̀ повинꙋ́ющесѧ свои̑мъ мꙋжє́мъ, да и҆ а҆́ще нѣ́цыи не повинꙋ́ютсѧ сло́вꙋ, же́нскимъ житїе́мъ безъ сло́ва плѣне́ни бꙋ́дꙋтъ, ви́дѣвше є҆́же со стра́хомъ чи́сто житїѐ ва́ше. И҆̀мже да бꙋ́детъ не внѣ̑шнѧѧ плетє́нїѧ вла̑съ, и҆ ѡ҆бложє́нїѧ зла́та, и҆лѝ ѡ҆дѣѧ́нїѧ ри́зъ лѣ́пота, но потае́нный се́рдца человѣ́къ, въ неистлѣ́нїи кро́ткагѡ и҆ молчали́вагѡ дꙋ́ха, є҆́же є҆́сть предъ бг҃омъ многоцѣ́нно. Та́кѡ бо и҆ногда̀ и҆ свѧты̑ѧ жєны̀, ᲂу҆пова́ющыѧ на бг҃а, ᲂу҆краша́хꙋ себѐ, повинꙋ́ющесѧ свои̑мъ мꙋжє́мъ: ꙗ҆́коже са́рра послꙋ́шаше а҆враа́ма, господи́на того̀ зовꙋ́щи: є҆ѧ́же бы́сте ча̑да, благотворѧ́ще и҆ не боѧ́щесѧ ни є҆ди́нагѡ стра́ха. Мꙋ́жїе та́кожде, вкꙋ́пѣ живꙋ́ще съ свои́ми жена́ми по ра́зꙋмꙋ, ꙗ҆́кѡ немощнѣ́йшемꙋ сосꙋ́дꙋ же́нскомꙋ воздаю́ще че́сть, ꙗ҆́кѡ и҆ снаслѣ̑дницы бл҃года́тныѧ жи́зни, во є҆́же не прекраща́тисѧ моли́твамъ ва́шымъ. Коне́цъ же, всѝ є҆диномꙋ́дрени бꙋ́дите, ми́лостиви, братолю́бцы, милосе́рдни, благоꙋтро́бни, мꙋдролю́бцы, смиреномꙋ́дри: не воздаю́ще ѕла̀ за ѕло̀, и҆лѝ досажде́нїѧ за досажде́нїе: сꙋпроти́вное же благословѧ́ще, вѣ́дѧше, ꙗ҆́кѡ на сѐ зва́ни бы́сте, да благослове́нїе наслѣ́дите.
Собо́рнагѡ посла́нїѧ петро́ва чте́нїе.
[Зач: ѯ҃а] Возлю́бленнїи, хрⷭ҇тꙋ̀ пострада́вшꙋ за ны̀ пло́тїю, и҆ вы̀ въ тꙋ́ же мы́сль воѡрꙋжи́тесѧ, занѐ пострада́вый пло́тїю, преста̀ ѿ грѣха̀. Во є҆́же не ктомꙋ̀ въ человѣ́чєскїѧ по́хѡти, но въ во́лю бж҃їю, про́чее во пло́ти жи́ти вре́мѧ. Довлѣ́етъ бо ва́мъ мимоше́дшее вре́мѧ житїѧ̀, во́лю ꙗ҆зы́ческꙋю твори́вшымъ, хо́ждшымъ въ нечистота́хъ, въ по́хотехъ, въ скотоло́жствѣ, въ по́мыслѣхъ, въ пїѧ́нствѣ, въ коѕлогласова́нїихъ, въ лихоима́нїи и҆ бг҃оме́рзскихъ і҆дѡлослꙋже́нїихъ. Ѡ҆ не́мже дивѧ́тсѧ, не сходѧ́щымсѧ ва́мъ въ то́же блꙋда̀ разлїѧ́нїе, хꙋ́лѧще: и҆̀же воздадѧ́тъ сло́во, гото́вꙋ сꙋ́щемꙋ сꙋди́ти живы̑мъ и҆ мє́ртвымъ. На се́ бо и҆ мє́ртвымъ благовѣсти́сѧ, да сꙋ́дъ ᲂу҆́бѡ прїи́мꙋтъ по человѣ́кꙋ пло́тїю, поживꙋ́тъ же по бз҃ѣ дꙋ́хомъ. Всѣ̑мъ же кончи́на прибли́жисѧ: ᲂу҆цѣломꙋ́дритесѧ ᲂу҆̀бо, и҆ трезви́тесѧ въ моли́твахъ. Пре́жде же всѣ́хъ дрꙋ́гъ ко дрꙋ́гꙋ любо́вь прилѣ́жнꙋ и҆мѣ́йте, занѐ любо́вь покрыва́етъ мно́жество грѣхѡ́въ. Страннолю́бцы дрꙋ́гъ ко дрꙋ́гꙋ, безъ ропта́нїй. Кі́йждо, ꙗ҆́коже прїѧ́тъ дарова́нїе, междꙋ̀ себє̀ си̑мъ слꙋжа́ще ꙗ҆́кѡ до́брїи строи́телїе разли́чныѧ бл҃года́ти бж҃їѧ. А҆́ще кто̀ глаго́летъ, ꙗ҆́кѡ словеса̀ бж҃їѧ: а҆́ще кто̀ слꙋ́житъ, ꙗ҆́кѡ ѿ крѣ́пости, ю҆́же подае́тъ бг҃ъ: да ѡ҆ все́мъ сла́витсѧ бг҃ъ і҆и҃съ хрⷭ҇то́мъ, є҆мꙋ́же є҆́сть сла́ва и҆ держа́ва во вѣ́ки вѣкѡ́въ, а҆ми́нь.
На лїті́и стїхи́ра хра́ма, и҆ а҆пⷭ҇ла, гла́съ а҃.
Творе́нїе а҆ндре́а і҆ерꙋсали́мскагѡ.
Первозва́нный ᲂу҆ч҃ни́къ, и҆ подража́тель стрⷭ҇ти, соѡбразꙋ́ѧ тѧ̀, гдⷭ҇и, а҆ндре́й а҆пⷭ҇лъ, и҆́же во глꙋбинѣ̀ невѣдѣ́нїѧ прельща́ємыѧ и҆ногда̀, ᲂу҆́дицею крⷭ҇та̀ твоегѡ̀ возвле́къ, приведѐ тебѣ̀. тѣ́мже и҆ спа́сшесѧ вѣ́рнїи вопїе́мъ тѝ: моли́твами є҆гѡ̀, пребл҃гі́й, жи́знь на́шꙋ ᲂу҆мирѝ и҆ спасѝ дꙋ́шы на́шѧ.
Воспои́мъ вѣ́рнїи петро́ва сро́дника а҆ндре́а, хрⷭ҇то́ва ᲂу҆ченика̀, то́й бо мо́ре мре́жами и҆спыта́въ и҆ногда̀, ры̑бы ᲂу҆ловѝ: ны́нѣ же вселе́ннꙋю тро́стїю ло́витъ крⷭ҇та̀, и҆ ꙗ҆зы́ки ѿ пре́лести ѡ҆браща́етъ ко креще́нїю: и҆ хрⷭ҇тꙋ̀ предстоѧ̀ про́ситъ ми́ра мі́рꙋ и҆ дꙋша́мъ на́шымъ ве́лїѧ ми́лости.
Ѻ҆́гнь ᲂу҆́мный просвѣща́ющь мы̑сли и҆ ѡ҆палѧ́ющь грѣхѝ, внꙋ́трь прїе́мь въ се́рдцы а҆пⷭ҇лъ хрⷭ҇то́въ и҆ ᲂу҆ч҃ни́къ, сїѧ́етъ ᲂу҆́бѡ та́инственными лꙋча́ми ᲂу҆че́нїй, во ꙗ҆зы́ческихъ непросвѣще́нныхъ сердца́хъ: сжига́етъ же па́ки хвра̑стнаѧ нечести́выхъ баснодѣѧ̑нїѧ, ѻ҆́гнь бо дх҃а таково́е и҆́мать дѣ́йство. ѽ чꙋ́до стра́нно и҆ стра́шнѡ! бре́нный ѧ҆зы́къ, бре́нное є҆стество̀, тѣ́ло пе́рстное, ᲂу҆́мное и҆ невеще́ственное прїѧ́тъ зна́нїе: но, ѽ таи́нниче неизрече́нныхъ и҆ зри́телю нбⷭ҇ныхъ. молѝ ѡ҆зари́тисѧ дꙋша́мъ на́шымъ.
Гла́съ и҃. Творе́нїе мала́ѯа:
Жела́емаго бг҃а во пло́ти ᲂу҆ви́дѣвъ на землѝ ходѧ́ща, бг҃ови́дче первозва́нне, є҆динокро́вномꙋ вопїѧ́лъ є҆сѝ ра́дꙋѧсѧ: ѡ҆брѣто́хомъ, ѽ сі́мѡне, жела́емаго! сп҃сꙋ же дв҃дски возопи́лъ є҆сѝ: и҆́мже ѻ҆́бразомъ жела́етъ є҆ле́нь на и҆сто́чники во́дъ, си́це жела́етъ дꙋша̀ моѧ̀ къ тебѣ̀, хрⷭ҇тѐ бж҃е. ѿѻнꙋ́дꙋже и҆ жела́нїю жела́нїе приложи́въ, крⷭ҇то́мъ прехо́диши, къ немꙋ́же возжелѣ́лъ є҆сѝ, ꙗ҆́кѡ и҆́стинный ᲂу҆ч҃ни́къ, и҆ мꙋ́дрый подража́тель бы́въ крⷭ҇то́мъ тогѡ̀ стрⷭ҇те́й: тѣ́мже и҆ сла́вы ѻ҆́бщникъ є҆гѡ̀ бы́въ, прилѣ́жнѡ моли́сѧ ѡ҆ дꙋша́хъ на́шихъ.
Сла́ва, гла́съ и҃. А҆ндре́а і҆ерꙋсали́млѧнина, и҆лѝ а҆нато́лїево:
Проповѣ́дника вѣ́ры и҆ слꙋгꙋ̀ сло́ва, а҆ндре́а восхва́лимъ: то́й бо и҆зъ глꙋбины̀ человѣ́ки ᲂу҆ловлѧ́етъ, вмѣ́стѡ тро́сти крⷭ҇тъ въ рꙋка́хъ держѧ̀, и҆ ꙗ҆́кѡ ᲂу҆́же низпꙋща́ѧ си́лꙋ, возво́дитъ дꙋ́шы ѿ ле́сти вра́жїѧ, и҆ прино́ситъ бг҃ꙋ да́ръ благопрїѧ́тенъ при́снѡ. того̀ вѣ́рнїи въ ли́цѣ ᲂу҆ч҃ни̑къ хрⷭ҇то́выхъ восхва́лимъ, да мо́литсѧ съ ни́ми, ꙗ҆́кѡ да ми́лостивъ бꙋ́детъ на́мъ въ де́нь сꙋ́дный.
И҆ ны́нѣ, бг҃оро́диченъ:
Влⷣчце, прїимѝ моли́твꙋ ра̑бъ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.
На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ:
Ра́дꙋйсѧ, слове́сное нб҃о, сла́вꙋ бж҃їю всегда̀ повѣ́дающе, пе́рвый хрⷭ҇та̀ зовꙋ́ща послꙋ́шавъ те́плѣ, и҆ без̾ѿстꙋ́пнѡ съ ни́мъ пребыва́ѧ: ѿ негѡ́же просвѣща́емь ᲂу҆ви́дѣлъ є҆сѝ свѣ́тъ вторы́й, и҆ сꙋ́щыѧ во тмѣ̀ мо́лнїѧми твои́ми просвѣти́лъ є҆сѝ, бла́гости тогѡ̀ подража́ѧ. тѣ́мъ всест҃о́е твоѐ соверша́емъ торжество̀, и҆ моще́й ра́кꙋ ра́достнѣ цѣлꙋ́емъ: ѿ неѧ́же и҆сточа́еши спасе́нїе просѧ́щымъ и҆ ве́лїю ми́лость.
Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.
Пе́рвый добродѣ́телей ѡ҆брѣта́тель, благоꙋтро́бїѧ ра́ди, на́шимъ ѡ҆бложе́ннагѡ, а҆ндре́е бг҃омꙋ́дре, є҆стество́мъ, совокꙋпи́лсѧ є҆сѝ є҆мꙋ̀ разжже́нною любо́вїю, є҆динокро́вномꙋ вопїѧ̀: є҆го́же проповѣ́даша прⷪ҇ро́цы въ дс҃ѣ, ѡ҆брѣто́хомъ, грѧдѝ къ є҆гѡ̀ красотѣ̀, да привлече́ни бꙋ́демъ и҆ дꙋше́ю и҆ помышле́нїемъ, ꙗ҆́кѡ да свѣтово́дствꙋеми тогѡ̀ свѣтлостьмѝ, но́щь пре́лести и҆ тмꙋ̀ невѣ́дѣнїѧ ѿжене́мъ, хрⷭ҇та̀ благословѧ́ще, подаю́щаго мі́рꙋ ве́лїю ми́лость.
Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.
Ꙗ҆зы́ки, невѣ́дꙋщыѧ бг҃а, ꙗ҆́кѡ и҆зъ глꙋбины̀ невѣ́дѣнїѧ ᲂу҆лови́лъ є҆сѝ мре́жею твои́хъ слове́съ: и҆ возмꙋща́еши ꙗ҆́вѣ сла̑наѧ морѧ̀, ко́нь хра́брѣйшїй ꙗ҆ви́лсѧ є҆сѝ влады́чествꙋющагѡ мо́ремъ, приснопѣва́емый, и҆ гни́лость безбо́жїѧ и҆зсꙋши́лъ є҆сѝ, со́ль честнꙋ́ю вложи́въ мꙋ́дрость твою̀, є҆́йже и҆ ᲂу҆диви́шасѧ, а҆пⷭ҇ле сла́вне, ѡ҆бꙋѧ́вшей мꙋ́дрости безстꙋ́днѣ присвоѧ́ющїисѧ, хрⷭ҇та̀ не вѣ́дꙋще подаю́щагѡ мі́рꙋ ве́лїю ми́лость.
Сла́ва, гла́съ г҃. Ге́рманово:
Скро́вника петро́ва и҆ хрⷭ҇то́ва ᲂу҆ч҃ника̀, ры́бъ лови́телѧ и҆ ловца̀ человѣ́кѡвъ въ пѣ́снехъ почти́мъ а҆ндре́а а҆пⷭ҇ла: і҆и҃совымъ бо ᲂу҆че́нїемъ всѧ̑ наказа́въ догма́ты, и҆ ꙗ҆́кѡ льще́нїе ры́бамъ плѡ́ти беззакѡ́ннымъ предадѐ, и҆ ты̑ѧ ᲂу҆ловѝ. тогѡ̀ моли́твами, хрⷭ҇тѐ, пода́ждь лю́демъ твои̑мъ ми́ръ и҆ ве́лїю ми́лость.
И҆ ны́нѣ, гла́съ то́йже:
І҆ѡ́сифе, рцы̀ на́мъ: ка́кѡ ѿ ст҃ы́хъ, ю҆́же прїѧ́лъ є҆сѝ дв҃ꙋ непра́зднꙋ приво́диши въ виѳлее́мъ; а҆́зъ, глаго́летъ, прⷪ҇ро́ки и҆спыта́въ, и҆ ѿвѣ́тъ прїи́мъ ѿ а҆́гг҃ла, ᲂу҆вѣ́рихсѧ, ꙗ҆́кѡ бг҃а роди́тъ марі́а несказа́ннѡ, є҆гѡ́же на поклоне́нїе волсвѝ ѿ востѡ́къ прїи́дꙋтъ, съ да́ры честны́ми слꙋжа́ще. воплоти́выйсѧ на́съ ра́ди, гдⷭ҇и, сла́ва тебѣ̀.
Тропа́рь, гла́съ д҃:
Ꙗ҆́кѡ а҆пⷭ҇лѡвъ первозва́нный и҆ верхо́внагѡ сꙋ́щїй бра́тъ влⷣцѣ всѣ́хъ, а҆ндре́е, моли́сѧ, ми́ръ вселе́ннѣй дарова́ти, и҆ дꙋша́мъ на́шымъ ве́лїю ми́лость.
Сла́ва, и҆ ны́нѣ, бг҃оро́диченъ воскрⷭ҇нъ.
На ᲂу҆́трени, по а҃-мъ стїхосло́вїи сѣда́ленъ гла́съ а҃.
Подо́бенъ: Гро́бъ тво́й:
Ꙗ҆́кѡ бжⷭ҇твеннагѡ ᲂу҆ч҃ника̀ и҆ первозва́ннаго всѣ́хъ хрⷭ҇то́выхъ ᲂу҆ч҃никѡ́въ похвалѧ́емъ тѧ̀ любо́вїю, а҆ндре́е а҆пⷭ҇ле, и҆ вѣ́рнѡ вопїе́мъ тѝ: и҆зба́ви па́ствꙋ твою̀, є҆́йже ѿ бг҃а ввѣ́рилсѧ є҆сѝ, всѧ́кїѧ ско́рби и҆ нꙋ́ждъ, и҆ собла́знѡвъ, и҆ всѧ́кагѡ ѡ҆ѕлобле́нїѧ.
Два́жды.
Сла́ва, и҆ ны́нѣ, бг҃оро́диченъ:
Рꙋ́ки твоѧ̑, чⷭ҇тна́ѧ, ст҃ы̑ѧ, ны́нѣ просте́рши ᲂу҆ми́льнѣ, по́мощь на́мъ ѿ ст҃а́гѡ пода́ждь, и҆ да́ждь безбѣ́днѡ жи́знь соверши́ти сла́вѧщымъ твоѐ прест҃о́е ржⷭ҇тво̀, и҆ тѧ̀, влⷣчце, написꙋ́ющымъ, ѻ҆трокови́це, наде́ждꙋ и҆ хвалꙋ̀.
По в҃-мъ стїхосло́вїи, сѣда́ленъ, гла́съ г҃. Поⷣ: Бжⷭ҇твенныѧ вѣ́ры:
Первозва́нна тѧ̀ ѡ҆брѣ́те хрⷭ҇то́съ, таи́нника и҆зрѧ́днѣйша, а҆ндре́е блаже́нне, и҆ повелѣ̑нїѧ є҆гѡ̀ ᲂу҆се́рднѡ возвыша́юща вселе́ннѣй, ꙗ҆́коже перна́тъ, просвѣти́лъ є҆сѝ ꙗ҆зы́кѡвъ состоѧ̑нїѧ: того̀ ꙗ҆́кѡ бг҃а молѝ, дарова́ти на́мъ ве́лїю ми́лость.
Два́жды.
Сла́ва, и҆ ны́нѣ, бг҃оро́диченъ:
Бжⷭ҇твеннаѧ ски́нїѧ была̀ є҆сѝ сло́ва, є҆ди́на пречⷭ҇таѧ мт҃и дв҃о, чистото́ю а҆́гг҃лы превозше́дшаѧ, па́че всѣ́хъ менѐ пе́рсть бы́вша, ѡ҆скверне́на плотски́ми прегрѣше́ньми, ѡ҆чи́сти моли́твъ твои́хъ бжⷭ҇твенными вода́ми, подаю́щи, чⷭ҇таѧ, ве́лїю ми́лость.
По полѷеле́и сѣда́ленъ, гла́съ є҃. Подо́бенъ: Собезнача́льное сло́во:
А҆пⷭ҇ла всѝ восхва́лимъ, ꙗ҆́кѡ самови́дца сло́ва, и҆ бж҃е́ственнаго проповѣ́дника, и҆ ꙗ҆зы́кѡвъ дꙋхо́внаго ловца̀, ꙗ҆́кѡ вои́стиннꙋ: и҆́бо приведе́ ны въ позна́нїе хрⷭ҇то́во а҆ндре́й бг҃оглаго́ливый, ве́лїй и҆́стиннѡ на́шъ предста́тель: и҆ ны́нѣ мо́литсѧ непреста́ннѡ, во є҆́же спастѝ дꙋ́шы на́шѧ.
Два́жды.
Сла́ва, и҆ ны́нѣ, бг҃оро́диченъ:
И҆̀же на тѧ̀ надє́жды, дв҃о пречⷭ҇таѧ, несомнѣ́ннѡ и҆мꙋ́щихъ покро́въ сꙋ́щи, ѿ разли́чныхъ напа́стей и҆ ѡ҆бстоѧ́нїй, и҆ бѣ́дъ лю́тыхъ свободѝ на́съ, молѧ́щи сн҃а твоего̀, со а҆пⷭ҇лы є҆гѡ̀: и҆ спасѝ всѧ̑ воспѣва́ющыѧ тѧ̀.
Степє́нна, а҃ а҆нтїфѡ́нъ д҃-гѡ гла́са. Прокі́менъ, гла́съ д҃: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ: Сті́хъ: Нб҃са̀ повѣ́даютъ сла́вꙋ бж҃їю: Всѧ́кое дыха́нїе: Є҆ѵⷢ҇лїе матѳе́а, зача́ло ѳ҃. По н҃-мъ ѱалмѣ̀ стїхи́ра, гла́съ и҃:
Проповѣ́дника вѣ́ры и҆ слꙋгꙋ̀ сло́ва, а҆ндре́а восхва́лимъ: то́й бо и҆зъ глꙋбины̀ человѣ́ки ᲂу҆ловлѧ́етъ, вмѣ́стѡ тро́сти крⷭ҇тъ въ рꙋка́хъ держѧ̀, и҆ ꙗ҆́кѡ ᲂу҆́же низпꙋща́ѧ си́лꙋ, возво́дитъ дꙋ́шы ѿ ле́сти вра́жїѧ, и҆ прино́ситъ бг҃ꙋ да́ръ благопрїѧ́тенъ при́снѡ. того̀, вѣ́рнїи, въ ли́цѣ ᲂу҆чени̑къ хрⷭ҇то́выхъ восхва́лимъ, да мо́литсѧ съ ни́ми, ꙗ҆́кѡ да ми́лостивъ бꙋ́детъ на́мъ въ де́нь сꙋ́дный.
Канѡ́нъ бцⷣы со і҆рмосо́мъ на ѕ҃.
Гла́съ а҃. Пѣ́снь а҃. І҆рмо́съ:
Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ.
Ꙗ҆́кѡ є҆ди́на безлѣ́тнаго сн҃а, въ лѣ́тѣ поро́ждши воплоще́нна, всест҃а́ѧ пречⷭ҇таѧ, всѧ̑ лѣ̑тныѧ стра̑сти, всестра́стныѧ моеѧ̀ дꙋшѝ ᲂу҆врачѝ.
Ꙗ҆́звы дꙋшѝ моеѧ̀ и҆ се́рдца ѡ҆жесточе́нїе, по́мысла ѡ҆мраче́нїе и҆ ᲂу҆ма̀ побѣжде́нїе потребѝ, пречⷭ҇таѧ, ꙗ҆́кѡ сострада́тельна, твои́ми моли́твами.
Ꙗ҆́же свѣ́тъ ро́ждшаѧ и҆зба́вителѧ моего̀, тмы̀ и҆ мꙋ́къ вѣ́чныхъ та́мѡ и҆зба́ви мѧ̀, пречⷭ҇таѧ: ꙗ҆́кѡ да спаса́емь воспѣва́ю вели̑чїѧ твоѧ̑.
Оу҆ма̀ моегѡ̀, всепѣ́таѧ, ѡ҆мрачє́нїѧ свѣ́томъ твои́мъ ѿженѝ, свѣ́тъ ро́ждшаѧ сꙋ́щїй па́че ᲂу҆ма̀: и҆ да́рꙋй мѝ, бл҃га́ѧ, є҆́же свѣ́тъ ᲂу҆зрѣ́ти, и҆зъ тебє̀ возсїѧ́вшїй на́мъ.
И҆ а҆пⷭ҇тола два̀ канѡ́на, на и҃.
Канѡ́нъ пе́рвый, творе́нїе і҆ѡа́нна мона́ха.
Гла́съ а҃. Пѣ́снь а҃. І҆рмо́съ:
Твоѧ̀ побѣди́тельнаѧ десни́ца бг҃олѣ́пнѡ въ крѣ́пости просла́висѧ: та́ бо, безсме́ртне, ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ.
Смꙋти́вшꙋюсѧ мою̀ дꙋ́шꙋ помышлє́нїи же и҆ словесы̀ ѡ҆чи́сти все́льшеюсѧ въ тѧ̀, проповѣ́дниче хрⷭ҇то́въ а҆ндре́е, бжⷭ҇твенною благода́тїю: ꙗ҆́кѡ да чи́стѣ и҆сточꙋ́ ти пѣ́нїе досто́йное.
Честно́е, прⷣте́ча хрⷭ҇то́въ, свои́хъ ᲂу҆ченикѡ́въ верхо́внѣйшее, ѿ непло́дове прозѧ́бшїй, и҆зъ дв҃ы ро́ждшемꙋсѧ хрⷭ҇тꙋ̀ препросла́вленномꙋ, а҆ндре́а, ра́дꙋѧсѧ, приведѐ.
Жела́нїемъ и҆ любо́вїю неꙋкло́нною, добродѣ́тели степе́ней наче́нъ, и҆ восхожде́нїю при́снѡ поꙋча́ѧсѧ, ѿ немощны́ѧ си́лы къ верхо́внѣйшей, а҆ндре́е, си́лѣ дости́глъ є҆сѝ.
Бг҃оро́диченъ:
Ра́дꙋйсѧ, благода́ти и҆сто́чниче, ра́дꙋйсѧ, лѣ́ствице и҆ две́ре нбⷭ҇наѧ: ра́дꙋйсѧ, свѣ́щниче и҆ ста́мно злата́ѧ, и҆ горо̀ несѣко́маѧ, ꙗ҆́же жизнода́вца хрⷭ҇та̀ мі́рꙋ ро́ждшаѧ.
Дрꙋгі́й канѡ́нъ а҆пⷭ҇тола, гла́съ то́йже.
Пѣ́снь а҃. І҆рмо́съ:
Столпо́мъ ѻ҆́гненнымъ и҆ ѻ҆́блачнымъ і҆и҃лѧ наставле́й, ꙗ҆́кѡ бг҃ъ, мо́ре разве́рзе, колесни̑цы же фараѡ́новы глꙋбино́ю покры̀: пои́мъ пѣ́снь побѣ́днꙋю, ꙗ҆́кѡ є҆ди́нъ просла́висѧ.
Тро́стїю є҆ѵⷢ҇лїа и҆зъ глꙋбины̀ ле́сти и҆з̾е́мь, а҆ндре́е многопѣ́тый, ты̀ ᲂу҆лови́лъ є҆сѝ лю́ди, ꙗ҆́кѡ ѡ҆бѣща̀ хрⷭ҇то́съ, наꙋчи́вый тѧ̀ человѣ́ки ꙗ҆́кѡ ры̑бы лови́ти.
И҆́же вѣ́ры сто́лпъ, сѣда́лище и҆́стинныхъ догма̑тъ хрⷭ҇то́выхъ, а҆ндре́й бг҃одохнове́нный, всѧ̑ дне́сь призыва́етъ земны̑ѧ концы̀, пра́зднество лѣ́тное соста́вити: стеце́мсѧ ᲂу҆̀бо всѝ вѣ́рнїи.
Морска́гѡ ки́та мре́жами и҆спытꙋ́ѧ, хꙋдо́жествомъ лове́цъ мре́жею дх҃а ꙗ҆зы́ки, племена̀ и҆ лю́ди ᲂу҆ловлѧ́еши дх҃омъ ꙗ҆́вственнѣе, и҆ вы́шнюю глꙋбинꙋ̀, многочꙋ́дне, ꙗ҆́вѣ ѿкрыва́еши на́мъ.
Тайногра́дче нбⷭ҇ный, самови́дче и҆ ри́торе неизрече́ннагѡ позна́нїѧ хрⷭ҇то́ва, прїе́мый свы́ше дх҃а ст҃а́го, глаго́люща, въ ꙗ҆зы́цѣхъ сѣдѧ́щаго, ѻ҆гне́мъ раздѣлѧ́юща дарова̑нїѧ, молѝ спасти́сѧ на́мъ.
Сла́ва, трⷪ҇ченъ:
Пребезнача́льныѧ трⷪ҇цы, є҆ди́ницѣ пресꙋ́щественнѣй вѣ́рою покланѧ́юсѧ, не разсѣца́ѧ бж҃ества̀: є҆́сть бо є҆динови́дна, проста̀, нераздѣ́льна: совокꙋплѧ́ю же сїю̀ сꙋщество́мъ, ли́цы же вѣ́рнѣ раздѣлѧ́ю.
И҆ ны́нѣ, бг҃оро́диченъ:
Младе́нствꙋетъ бг҃ъ и҆зъ дв҃ы и҆ ѡ҆бновлѧ́етъ растлѣ́вшыѧсѧ и҆зъ а҆да́ма, разрꙋша́етъ же средостѣ́нїе и҆ вражды̀ прегражде́нїе пло́тїю свое́ю: клѧ́твꙋ благословлѧ́етъ прама́тернюю, и҆зъ пречи́стыѧ мт҃ре проше́дъ.
Катава́сїа: Хрⷭ҇то́съ ражда́етсѧ:
Пѣ́снь г҃. І҆рмо́съ:
Да ᲂу҆тверди́тсѧ се́рдце моѐ въ во́ли твое́й, хрⷭ҇тѐ бж҃е, и҆́же надъ вода́ми не́бо ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне.
Непло́дныѧ мы́сли моеѧ̀ безпло́дїе всѐ ѿженѝ, и҆ плодоно́снꙋ добродѣ́тельми дꙋ́шꙋ мою̀ покажѝ, всест҃а́ѧ бцⷣе, вѣ́рныхъ помо́щнице.
И҆зба́ви мѧ̀, всенепоро́чнаѧ, всѧ́кагѡ ѡ҆сꙋжде́нїѧ и҆ мно́гихъ собла́знѡвъ ѕмі́евыхъ, вѣ́чнꙋющагѡ ѻ҆гнѧ̀ и҆ тмы̀, ꙗ҆́же свѣ́тъ ро́ждшаѧ на́мъ невече́рнїй.
Стра́шнымъ сꙋди́щемъ, чⷭ҇таѧ, и҆ ѻ҆гне́мъ ѻ҆́нѣмъ неꙋгаси́мымъ, и҆ ѿвѣ́томъ лю́тымъ ве́сь ѡ҆сꙋжде́нъ є҆́смь: потщи́сѧ спасти́ мѧ пре́жде конца̀, бл҃га́ѧ, раба̀ твоего̀.
Бл҃гослове́нъ пло́дъ чре́ва твоегѡ̀, дв҃о всепѣ́таѧ: и҆стлѣ́вшыѧ бо плодо́мъ дре́ва ра́ди крⷭ҇та̀ є҆гѡ̀ нетлѣ́нїѧ прича́стники сотвори́ла є҆сѝ бжⷭ҇твенною благода́тїю.
И҆́нъ. І҆рмо́съ:
Є҆ди́не вѣ́дый человѣ́ческагѡ сꙋщества̀ не́мощь, и҆ ми́лостивнѡ въ нѐ воѡбра́жсѧ, препоѧ́ши мѧ̀ съ высоты̀ си́лою, є҆́же вопи́ти тебѣ̀, ст҃ы́й: ѡ҆дꙋшевле́нный хра́ме, неизрече́нныѧ сла́вы твоеѧ̀, чл҃вѣколю́бче.
Прите́клъ є҆сѝ жа́ждею не зва́нъ, а҆ндре́е, но самово́льнѣ жи́зни ко и҆сто́чникꙋ, ꙗ҆́коже є҆ле́нь, и҆ всѣ̑мъ сего̀ ѡ҆брѣ́тъ проповѣ́далъ є҆сѝ: и҆ пи́въ, напои́лъ є҆сѝ нетлѣ́нїѧ вода́ми и҆ста́ѧвшыѧ жа́ждею концы̀.
Оу҆вѣ́дѣвъ є҆стє́ственныѧ зако́ны, а҆ндре́е досточꙋ́дне, и҆ ѻ҆́бщника сро́дника прїѧ́лъ є҆сѝ, вопїѧ̀: ѡ҆брѣто́хомъ жела́емаго, и҆ пꙋтесотвори́вшаго пло́ти рожде́нїе, сказа́лъ є҆сѝ ра́зꙋмъ дꙋхо́вный.
Мре́жею сло́ва и҆зъ глꙋбины̀ пре́лести ᲂу҆лови́лъ є҆сѝ словє́сныѧ ры̑бы, а҆пⷭ҇ле, и҆ трапе́зѣ хрⷭ҇то́вѣй снѣ́дь чи́стꙋю прине́слъ є҆сѝ, просвѣщє́нныѧ благода́ти ꙗ҆́вльшагѡсѧ въ подо́бїи пло́ти.
Бг҃оро́диченъ:
Бг҃а заче́нши во ᲂу҆тро́бѣ, дв҃о, дх҃омъ всест҃ы́мъ, пребыла̀ є҆сѝ неѡпа́льна: поне́же тѧ̀ кꙋпина̀, законополо́жникꙋ мѡѷсе́ю пали́мꙋ, несожже́нна ꙗ҆́вѣ предвозвѣстѝ, ѻ҆́гнь прїи́мшꙋю нестерпи́мый.
И҆́нъ. І҆рмо́съ:
Да ᲂу҆тверди́тсѧ се́рдце моѐ въ во́ли твое́й, хрⷭ҇тѐ бж҃е, и҆́же надъ вода́ми не́бо ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне.
Сло́вомъ призыва́ющемꙋ, грѧдѝ во слѣ́дъ менє̀, хрⷭ҇тꙋ̀ а҆́бїе послѣ́дова со а҆ндре́емъ и҆ ки́фа, роди́телѧ ѡ҆ста́вивше, и҆ ладїю̀ и҆ мрє́жи, ꙗ҆́кѡ вѣ́ры пред̾ꙋсмотри́телїе.
Ка̑пища претвори́въ въ хра́мы бж҃їѧ, всече́стне, ѡ҆свѧти́лъ є҆сѝ въ ни́хъ сы́ны креще́нїѧ, ꙗ҆̀же благода́ть ѡ҆бновѝ водо́ю и҆ дх҃омъ.
Би́серъ многоцѣ́нный та́инственнѣ мі́рꙋ предложи́лъ є҆сѝ, въ селѣ̀ се́рдца твоегѡ̀ сокрове́нный, а҆пⷭ҇ле: є҆го́же вѣ́рою сокро́вищствоваша ꙗ҆зы́цы ѡ҆брѣ́тшїи.
Ꙗ҆́кѡ сокро́вище, є҆ѵⷢ҇лїе въ рꙋ́ки прїи́мъ, многопѣ́те, всю̀ ѡ҆богати́лъ є҆сѝ зе́млю бжⷭ҇твенныѧ про́повѣди. тѣ́мже и҆ па́мѧть твою̀ почита́етъ со страда̑нїи твои́ми.
Сла́ва, трⷪ҇ченъ:
Въ трⷪ҇цѣ є҆ди́нꙋ си́лꙋ правосла́внѣ всѝ воспои́мъ безнача́льнаго, несозда́ннаго бг҃а, є҆диносꙋ́щнаго, сопресто́льнаго, трїѷпоста́снаго, трисл҃нечнаго, сїю̀ воспѣва́юще.
И҆ ны́нѣ, бг҃оро́диченъ:
Всѧ́ка ᲂу҆́бѡ ма́ти, ча́до ро́ждши, не ктомꙋ̀ дѣ́вствовати мо́жетъ: ты́ же, ро́ждши хрⷭ҇та̀, дв҃о мт҃и пребыла̀ є҆сѝ, млекопита́ющи жи́знь на́шꙋ и҆ чиста̀ пребы́вши.
Сѣда́ленъ, гла́съ и҃. Подо́бенъ: Премꙋ́дрости:
Ꙗ҆́кѡ первозва́ннаго всѣ́хъ ᲂу҆ч҃никѡ́въ, и҆ самови́дца сло́ва и҆ слꙋжи́телѧ, а҆ндре́е а҆пⷭ҇ле, по до́лгꙋ чти́мъ тѧ̀: а҆́гнцꙋ бо, взе́млющемꙋ грѣхѝ мі́ра, несомнѣ́нною вѣ́рою те́плѣ послѣ́довалъ є҆сѝ: ѿѻнꙋ́дꙋже и҆ стрⷭ҇ти є҆гѡ̀ ѻ҆́бщникъ показа́лсѧ є҆сѝ, пло́тїю претерпѣ́вшагѡ на́съ ра́ди во́льнѡ сме́рть. сегѡ̀ ра́ди вопїе́мъ тѝ: моли́сѧ хрⷭ҇тꙋ̀ бг҃ꙋ, грѣхѡ́въ ѡ҆ставле́нїе пода́ти пра́зднꙋющымъ любо́вїю свѧтꙋ́ю па́мѧть твою̀.
Сла́ва, и҆́нъ сѣда́ленъ, гла́съ и҆ подо́бенъ то́йже:
І҆́дѡльскїѧ свирѣ̑пства низложи́въ, сп҃совы стрⷭ҇ти вожделѣ́въ, а҆ндре́е блаже́нне, показа́лсѧ є҆сѝ а҆пⷭ҇лъ, съ нб҃сѐ всѣ̑мъ точа̀ чꙋдеса̀, и҆ ꙗ҆зы́кѡвъ бы́лъ є҆сѝ, всеблаже́нне, ᲂу҆чи́тель. тѣ́мъ твою̀ па́мѧть досто́йнѡ чтꙋ́ще, въ пѣ́снехъ сла́вимъ, и҆ вѣ́рнѡ велича́емъ, гдⷭ҇ень а҆пⷭ҇ле, моли́сѧ хрⷭ҇тꙋ̀ бг҃ꙋ, грѣхѡ́въ ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.
И҆ ны́нѣ, бг҃оро́диченъ:
Ра́дꙋйсѧ, престо́ле ѻ҆гнезра́чный бж҃їй: ра́дꙋйсѧ, ѻ҆трокови́це, сѣда́лище ца́рское, ѻ҆́дре ᲂу҆пещреннопостла́нный, златопорфѵ́рный черто́же, хламѵ́до червленоша́рнаѧ, ᲂу҆краше́нный хра́ме, молнїено́снаѧ колесни́це, свѣти́льниче многосвѣ́тлый: ра́дꙋйсѧ, бцⷣе, двонадесѧтостѣ́нный гра́де, и҆ две́рь златоко́ваннаѧ, и҆ черто́же свѣтоѻбра́зный, свѣтлопозлаще́ннаѧ трапе́зо, бг҃оꙋкраше́ннаѧ ски́нїе: ра́дꙋйсѧ, сла́внаѧ невѣ́сто солнцека́плющаѧ: ра́дꙋйсѧ, є҆ди́на дꙋшѝ моеѧ̀ благолѣ́пїе.
Пѣ́снь д҃. І҆рмо́съ:
Дх҃омъ прови́дѧ, прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ, вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ. сла́ва си́лѣ твое́й, гдⷭ҇и.
Дв҃о всест҃а́ѧ, нескве́рнаѧ ски́нїе, ѡ҆скверне́на мѧ̀ прегрѣше́ньми, ѡ҆чи́сти ны́нѣ щедро́тъ твои́хъ чистѣ́йшими кропле́ньми, и҆ да́ждь мѝ рꙋ́кꙋ по́мощи, да зовꙋ̀: сла́ва тебѣ̀, чⷭ҇таѧ, бг҃опросла́вленнаѧ.
Хра́мъ ѡ҆свѧще́нный ꙗ҆ви́ласѧ є҆сѝ бг҃а, въ тѧ̀ все́льшагѡсѧ, дв҃о, па́че ᲂу҆ма̀: того̀ молѝ грѣхо́вныѧ на́съ скве́рны ѡ҆чи́стити, ꙗ҆́кѡ да хра́мъ позна́емсѧ и҆ ѻ҆би́телище дх҃а.
Поми́лꙋй мѧ̀, бцⷣе, ꙗ҆́же є҆ди́на ми́лости и҆сто́чникъ ро́ждшаѧ, и҆ разрѣшѝ дꙋшѝ моеѧ̀ лю́тꙋю болѣ́знь, и҆ недоꙋмѣ́нїе се́рдца, сле́зъ стрꙋю̀ и҆ ᲂу҆миле́нїе пре́жде конца̀ да́рꙋющи бжⷭ҇твенное, моли́твами твои́ми.
Позна́въ тѧ̀ го́рꙋ прⷪ҇ро́къ дх҃омъ бжⷭ҇твеннымъ прописа̀, присѣ́ннꙋю, чⷭ҇таѧ: и҆ста́ѧвшыѧ пла́менемъ мно́гихъ согрѣше́нїй ѡ҆чи́сти хода́тайствомъ твои́мъ, дв҃о, є҆ди́на человѣ́кѡвъ и҆справле́нїе.
И҆́нъ. І҆рмо́съ:
Го́рꙋ тѧ̀, бл҃года́тїю бж҃їею приѡсѣне́ннꙋю, прозорли́выма а҆ввакꙋ́мъ ᲂу҆смотри́въ ѻ҆чи́ма, и҆зъ тебє̀ и҆зы́ти і҆и҃левꙋ провозглаша́ше ст҃о́мꙋ, во спасе́нїе на́ше и҆ ѡ҆бновле́нїе.
Бжⷭ҇твеннаѧ, и҆стреби́тельнаѧ го́ршаго, вседѣ́тельнагѡ и҆ свѣтоза́рнагѡ дх҃а си́ла, въ тѧ̀, а҆ндре́е, все́льшисѧ бг҃олѣ́пнѣ, ѻ҆́гненнагѡ ѧ҆зы́ка во ѻ҆́бразѣ, неизрече́нныхъ показа́ тѧ проповѣ́дника.
Не ѻ҆рꙋ̑жїѧ ко мще́нїю взѧ́ше плотска̑ѧ, и҆ къ низверже́нїю крѣ́пкихъ тверды́нь вра́жїихъ а҆ндре́й всечестны́й, но хрⷭ҇то́мъ ѡ҆гради́всѧ принесѐ, плѣни́въ ꙗ҆зы́ки въ послꙋша́нїе.
Го́рꙋ тѧ̀, ка́плющꙋю разꙋ́мное весе́лїе, преесте́ственный бг҃ъ, ѡ҆сꙋществи́выйсѧ є҆́же ѡ҆ на́съ, а҆ндре́е, ꙗ҆вѝ, го́ры го́рькїѧ де́мѡнскагѡ возноше́нїѧ потреблѧ́ющꙋю си́лою дх҃а.
Любо́вїю соверша́ющыѧ твою̀ па́мѧть въ пѣ́снехъ, ѿ ѻ҆би́льна да́ра ᲂу҆чи́телѧ твоегѡ̀ хрⷭ҇та̀, а҆ндре́е пребога́те, дꙋхо́внагѡ весе́лїѧ вода́ми и҆сполнѧ́ѧ не преста́й, моли́твами твои́ми.
Бг҃оро́диченъ:
Пое́мъ ве́лїе и҆ стра́шное твоѐ та́инство: премі́рныхъ бо ᲂу҆таи́всѧ чинонача́лїй, на тѧ̀, при́снѡ сы́й, сни́де ꙗ҆́кѡ до́ждь на рꙋно̀, всепѣ́таѧ, на спасе́нїе на́ше и҆ ѡ҆бновле́нїе.
И҆́нъ. І҆рмо́съ:
Дх҃омъ прови́дѧ, прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ, вопїѧ̀: внегда̀ прибли́житисѧ лѣ́тѡмъ, позна́ешисѧ: внегда̀ прїитѝ вре́мени, пока́жешисѧ. Сла́ва си́лѣ твое́й, гдⷭ҇и.
Мрє́жи твоѧ̑ пове́ргъ, и҆ взе́мъ крⷭ҇тъ, пꙋте́мъ послѣ́довалъ є҆сѝ зовꙋ́щемꙋ хрⷭ҇тꙋ̀, и҆ мре́жꙋ дх҃а распросте́ръ, вмѣ́стѡ ры́бъ человѣ́ки ло́виши: сла́ва да́вшемꙋ тѝ дх҃ꙋ.
Дх҃а пла́мень ꙗ҆зы́комъ прїи́мъ, бы́лъ є҆сѝ, а҆пⷭ҇ле, бг҃опрїѧ́тенъ мꙋ́жъ, нбⷭ҇ныѧ красоты̑ ѡ҆бходѧ̀, и҆ ꙗ҆̀же въ тѣ́хъ ᲂу҆́мнаѧ познава́ѧ добрѡ́ты, и҆ на́мъ ѿкрыва́ѧй сїѧ̑.
Пꙋсты́ню жа́ждꙋщꙋю напои́лъ є҆сѝ, мꙋ́дре, бжⷭ҇твенными словесы̀ твои́ми, и҆ показа́лъ сїю̀ многопло́днꙋ, ча̑да церкѡ́внаѧ плодоносѧ́щꙋю про́повѣди сѣ́мѧ: сла́ва да́вшемꙋ тѝ дх҃ꙋ.
Неизрече́ннꙋю твою̀ добро́тꙋ а҆ндре́й пред̾ꙋви́дѣвъ, і҆и҃се, сро́дника призва̀ свѣ́тлѣ: пе́тре є҆динокро́вне, ѡ҆брѣто́хомъ мессі́ю, въ зако́нѣ и҆ прⷪ҇ро́цѣхъ проповѣ́даннаго, грѧдѝ, прилѣпи́мсѧ и҆́стиннѡ жи́зни.
Сла́ва, трⷪ҇ченъ:
Трⷪ҇цꙋ во є҆ди́ницѣ воспои́мъ, вѣ́рнїи, во є҆ди́номъ бж҃ествѣ̀, ѻ҆ц҃а̀, и҆ сн҃а, и҆ дх҃а бжⷭ҇твеннаго, сꙋщество̀ є҆ди́но, и҆ є҆стество̀, нераздѣ́льнѣ, неразлꙋ́чнѣ, неча́стнѣ: є҆ди́нъ бо въ тре́хъ ли́цѣхъ бг҃ъ.
И҆ ны́нѣ, бг҃оро́диченъ:
Є҆ди́наго ѿ трⷪ҇цы неизрече́ннѡ во чре́вѣ заче́нши, родила̀ є҆сѝ нетлѣ́ннѡ ꙗ҆́кѡ сн҃а, и҆ трⷪ҇ца ᲂу҆́бѡ прило́га ѿню́дъ не воз̾имѣ̀: и҆ чиста̀ ꙗ҆́коже бѣ̀ и҆ пре́жде рождества̀, цѣла̀ бг҃ома́ти пребы́вши.
Пѣ́снь є҃. І҆рмо́съ:
Тво́й ми́ръ да́ждь на́мъ, сн҃е бж҃їй, и҆но́гѡ бо, ра́звѣ тебє̀, бо́га не зна́емъ, и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ.
Ѕѣ̑ницы се́рдца моегѡ̀ разве́рзи, чⷭ҇таѧ, зрѣ́ти мѝ ꙗ҆́снѡ бжⷭ҇твенное сїѧ́нїе, и҆ твою̀ сла́вꙋ неизрече́ннꙋю, ꙗ҆́кѡ да ми́лость полꙋчꙋ̀ и҆ вѣ́чнꙋю сла́вꙋ.
Во двою̀ хотѣ́нїихъ, є҆ди́нагѡ чⷭ҇тны́ѧ трⷪ҇цы породила̀ є҆сѝ, всенепоро́чнаѧ, носѧ́щаго є҆ди́нꙋ ѵ҆поста́сь: є҆го́же молѝ прилѣ́жнѡ всѣ̑мъ спасти́сѧ на́мъ.
Пречⷭ҇таѧ, ꙗ҆́кѡ ро́ждши сп҃са и҆ бг҃а, молѝ, ѿ всѧ́кїѧ мѧ̀ ско́рби, и҆ болѣ́зней, и҆ ѡ҆ѕлобле́нїѧ спасе́на соблюстѝ твоего̀ непотре́бнаго раба̀.
Молѝ є҆го́же родила̀ є҆сѝ, дв҃о, па́че ᲂу҆ма̀, спастѝ вѣ́рою тебѣ̀ зовꙋ́щыѧ: ра́дꙋйсѧ, дв҃о всенепоро́чнаѧ, ра́дꙋйсѧ, бл҃гослове́ннаѧ, мі́ра предста́тельство.
И҆́нъ. І҆рмо́съ:
Просвѣти́вый сїѧ́нїемъ прише́ствїѧ твоегѡ̀, хрⷭ҇тѐ, и҆ ѡ҆свѣти́вый крⷭ҇то́мъ твои́мъ мі́ра концы̀, сердца̀ просвѣтѝ, свѣ́томъ твоегѡ̀ бг҃оразꙋ́мїѧ, правосла́внѡ пою́щихъ тѧ̀.
Воспрїѧ́лъ є҆сѝ, є҆го́же вожделѣ́лъ є҆сѝ, а҆ндре́е а҆пⷭ҇ле, въ нетлѣ́нныхъ съ ни́мъ ѡ҆бита́въ селе́нїихъ, трꙋдѡ́въ твои́хъ снопы̀ пожа́въ досто́йнѡ: тѣ́мже тѧ̀ пѣ́сньми сла́вимъ.
Возлюби́лъ є҆сѝ влⷣкꙋ, и҆ тогѡ̀ во слѣ́дъ быстрѡ̀ поте́клъ є҆сѝ, стопа́ми є҆гѡ̀ къ жи́зни наставлѧ́емь, и҆ стрⷭ҇те́й тогѡ̀ нелжи́вѡ, прече́стне а҆ндре́е, да́же до сме́рти подража́ѧ.
Напрѧ́гъ тѧ̀ ꙗ҆́кѡ стрѣлꙋ̀ си́льнꙋ, блаже́нне, и҆спꙋстѝ въ ве́сь мі́ръ гдⷭ҇ь, ᲂу҆ранѧ́ѧ де́мѡны, и҆ ѕлоче́стїемъ ᲂу҆ѧ́звлєнныѧ человѣ́ки врачꙋ́ѧ.
Бг҃оро́диченъ:
Веселѧ́тсѧ нбⷭ҇ныѧ си̑лы, зрѧ́ще тѧ̀, ра́дꙋютсѧ съ ни́ми и҆ человѣ́чєскаѧ собра̑нїѧ: ржⷭ҇тво́мъ бо твои́мъ соедини́шасѧ, дв҃о бцⷣе, тѧ̀ досто́йнѡ сла́вѧще.
И҆́нъ. І҆рмо́съ:
Ѡ҆зарѝ на́шъ ᲂу҆́мъ, бж҃е, свѣ́томъ за́повѣдей твои́хъ и҆ свѣ́тлостїю благода́ти твоеѧ̀, да́рꙋѧ на́мъ, бла́же, твоѧ̑ ми́лѡсти, занѐ свѣ́тъ и҆ ми́ръ повелѣ̑нїѧ твоѧ̑.
Вожделѣ́вый крⷭ҇та̀, хрⷭ҇то́въ ᲂу҆ч҃ничѐ, полꙋчи́лъ є҆сѝ крⷭ҇то́мъ твои́мъ нетлѣ́нное црⷭ҇тво: къ немꙋ́же всѧ̑ привле́клъ є҆сѝ крⷭ҇то́мъ бг҃отаи́нники, наслѣ́дство подаѧ́й бг҃осло́вѡмъ тогѡ̀.
Поиска́лъ є҆сѝ хрⷭ҇та̀ и҆́стиннѡ живота̀, и҆ взыска́въ, пе́рвый ѡ҆брѣ́лъ є҆сѝ: ѡ҆брѣ́тъ же, та́йнѣ прїѧ́лъ є҆сѝ: и҆ прїе́мъ сего̀, въ само́мъ да́вшемъ, и҆ бы́лъ є҆сѝ сокро́вище жи́зни нетлѣ́нныѧ.
Глаго́лы твои́хъ бжⷭ҇твенныхъ гремѣ́нїй и҆злїѧ́шасѧ въ мі́рѣ, и҆ ѿ крає́въ до крає́въ землѝ проидо́ша: ѡ҆крꙋжи́ша бо ꙗ҆́коже колесо̀, и҆ ꙗ҆ви́шасѧ твоѧ̑ мѡ́лнїѧ, ꙗ҆́кѡ глаго́летъ дв҃дъ, вселе́ннѣй.
Помина́й на́съ, хрⷭ҇то́въ ᲂу҆ч҃ничѐ, соверша́ющихъ твою̀ па́мѧть, и҆ чтꙋ́щихъ мѡ́щи твоѧ̑: моли́сѧ при́снѡ прилѣ́жнѡ ѡ҆ па́ствѣ, є҆ѧ́же бы́лъ є҆сѝ и҆знача́ла храни́тель и҆ спасе́нїе.
Сла́ва, трⷪ҇ченъ:
Ѻ҆ц҃а̀ и҆ сн҃а и҆ дх҃а, бг҃а, нераздѣ́льнꙋю трⷪ҇цꙋ, трїѷпоста́сное црⷭ҇тво просла́вимъ согла́снѡ, вѣ́рнїи, безпреста́нными бг҃ослѡ́вїи сїю̀ вѣ́рнѡ пѣсносло́вѧще.
И҆ ны́нѣ, бг҃оро́диченъ:
Родила̀ є҆сѝ свѣ́тъ, не вѣ́дꙋщи ка́кѡ, всесвѣ́тлый свѣ́щниче сл҃нца свѣтоносѧ́щаѧ: и҆ была̀ є҆сѝ невеще́ственнагѡ свѣ́та но́вое прїѧ́телище, точа́щее все́й землѝ бг҃озна́нїѧ зари̑.
Пѣ́снь ѕ҃. І҆рмо́съ:
Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆зъ тлѝ, и҆ спаси́ мѧ, сп҃се мі́ра, зовꙋ́ща: сла́ва тебѣ̀.
Ѡ҆скверне́на мѧ̀ мно́гими грѣхи̑, молю́сѧ тебѣ̀ сꙋ́щѡ благо́й, и҆ нескве́рнѣй ски́нїи: ѡ҆мы́й ѿ всѧ́кїѧ скве́рны хода́тайствомъ твои́мъ.
Ко́рмчїй мнѣ̀ бꙋ́ди, чⷭ҇таѧ, вла́емомꙋ при́снѡ въ пꙋчи́нѣ лю́тыхъ житїѧ̀ и҆скꙋше́ньми, и҆ спаси́ мѧ, ко спасе́нїѧ приста́нищꙋ ᲂу҆пра́вивши.
Треволнє́нїѧ помышле́нїй, и҆ страсте́й нахождє́нїѧ, и҆ глꙋбина̀ грѣхѡ́въ ѻ҆каѧ́ннꙋю мою̀ дꙋ́шꙋ ѡ҆бꙋрева́ютъ, помозѝ мнѣ̀, ст҃а́ѧ влⷣчце.
Вели̑чїѧ тебѣ̀ при́снѡ сотворѝ хрⷭ҇то́съ, є҆го́же молѝ всегда̀, возвели́чити на мнѣ̀ бога̑тыѧ своѧ̑ ми́лѡсти, бг҃облагода́тнаѧ.
И҆́нъ. І҆рмо́съ:
Ѡ҆бы́де на́съ послѣ́днѧѧ бе́здна, нѣ́сть и҆збавлѧ́ѧй, вмѣни́хомсѧ ꙗ҆́кѡ ѻ҆́вцы заколе́нїѧ, спасѝ лю́ди твоѧ̑, бж҃е на́шъ: ты́ бо крѣ́пость немощствꙋ́ющихъ и҆ и҆справле́нїе.
Мо́ре жите́йское препла́ваѧ въ ладїѝ тѣле́снѣй, всѧ́чєскаѧ пра́вѧщаго хрⷭ҇та̀ ѡ҆брѣ́лъ є҆сѝ ко́рмчїѧ, всеблаже́нне, и҆ къ немꙋ̀ ра́дꙋѧсѧ приста́лъ є҆сѝ, а҆ндре́е всече́стне.
Дꙋ́хи сло́вомъ прогонѧ́ютсѧ, недꙋ́зи бѣ́гаютъ, дꙋше́вныхъ же страсте́й мно́жество дале́че ѿ недꙋ́жныхъ ѿгонѧ́ютсѧ, да́нною тебѣ̀ ѿ бг҃а, а҆ндре́е, благода́тїю.
Ꙗ҆́кѡ волна̀ ти́хаѧ, кро́ткимъ дꙋ́хомъ дви́жимь, блаже́нне, и҆зсꙋши́лъ є҆сѝ морѧ̀ лꙋка̑ваѧ многобо́жїѧ бжⷭ҇твенными стрꙋѧ́ми, и҆ рѣ́ки бг҃озна́нїѧ всѣ̑мъ и҆сточи́лъ є҆сѝ.
Бг҃оро́диченъ:
Веселѧ́тсѧ ѡ҆ тебѣ̀, дв҃о пречⷭ҇таѧ, ро́да на́шегѡ пра́ѻтцы, є҆де́мъ воспрїе́мше тобо́ю, є҆го́же престꙋпле́нїемъ погꙋби́ша: ты́ бо, чⷭ҇таѧ, и҆ пре́жде ржⷭ҇тва̀, и҆ по ржⷭ҇твѣ̀ є҆сѝ.
И҆́нъ. І҆рмо́съ:
Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆зъ тлѝ, и҆ спаси́ мѧ, сп҃се мі́ра, зовꙋ́ща: сла́ва тебѣ̀.
И҆́же и҆зъ виѳсаі́ды и҆зводи́мый на́съ пра́здновати созыва́етъ, торжество̀ своѐ предложи́въ на́мъ и҆зрѧ́дства боре́нїй свои́хъ.
Хꙋдо́жествомъ ры́барь, вѣ́рою же ᲂу҆ч҃ни́къ: ꙗ҆́кѡ глꙋбинꙋ̀ и҆спытꙋ́ѧ сердца̀ вѣ́рныхъ, ᲂу҆́дицꙋ низпꙋща́етъ сло́ва и҆ ᲂу҆ловлѧ́етъ на́съ.
Любвѐ хрⷭ҇то́вы въ се́рдцы твое́мъ ѻ҆́гнь ѡ҆бносѧ̀, ᲂу҆ченичѐ, вопїѧ́лъ є҆сѝ ꙗ҆зы́кѡмъ: пла́мень ва́шъ ᲂу҆гасѐ, и҆́стиннѡ ꙗ҆́вльшꙋсѧ хрⷭ҇тꙋ̀.
Со́лїю ᲂу҆́мъ ѡ҆соли́вше хрⷭ҇то́вою, ꙗ҆́ди ва́шѧ ᲂу҆слади́ша ва́мъ, догма́ты нбⷭ҇ныѧ и҆ нетлѣ́нныѧ сла́дости.
Сла́ва, трⷪ҇ченъ:
Ѻ҆ц҃ꙋ̀, и҆ сн҃ꙋ, и҆ дх҃ꙋ пра́вомꙋ поклони́мсѧ, вѣ́рнїи, трїѷпоста́сномꙋ є҆стествꙋ̀, нераздѣ́льномꙋ, вопїю́ще: сла́ва въ трⷪ҇цѣ бг҃ꙋ.
И҆ ны́нѣ, бг҃оро́диченъ:
Благоволе́нїемъ ѻ҆ц҃а̀ воплоти́сѧ сн҃ъ, дх҃омъ бж҃їимъ, во ᲂу҆тро́бѣ твое́й, чⷭ҇таѧ, и҆ спасѐ пре́жднїй ѻ҆́бразъ, бг҃ороди́тельнице, ꙗ҆́вѣ.
Конда́къ, гла́съ в҃. Подо́бенъ: Въ мл҃твахъ:
Мꙋ́жества тезоимени́таго бг҃оглаго́льника, и҆ цр҃кве возслѣ́дователѧ верхо́внаго, петро́ва сро́дника восхва́лимъ: занѐ ꙗ҆́коже дре́вле семꙋ̀, и҆ ны́нѣ на́мъ воззва̀: прїиди́те, ѡ҆брѣто́хомъ жела́емаго.
І҆́косъ:
Дре́вле ᲂу҆́бѡ дв҃дъ возстѧга́етъ грѣ́шнаго, ꙗ҆́кѡ менѐ, повѣ́дати бж҃їѧ бл҃госло́внѣ ѡ҆правда̑нїѧ: ѻ҆ба́че къ вѣ́рѣ ᲂу҆чи́тъ па́ки, и҆ слеза́ми мно́жайшими и҆зглаго́льствꙋетъ: дне́сь бо гла́съ є҆гѡ̀ а҆́ще ᲂу҆слы́шите, серде́цъ не ѡ҆жесточи́те, ꙗ҆́кѡ нѣ́когда і҆и҃ль преѡгорчѝ. наво́дитъ же про́чее во ѱалмѣ̀: гдⷭ҇еви всѧ̑ землѧ̀ воспо́йте, прїиди́те, ѡ҆брѣто́хомъ жела́емаго.
Пѣ́снь з҃. І҆рмо́съ:
Сꙋ́щымъ въ пещѝ ѻ҆трокѡ́мъ твои̑мъ, сп҃се, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ, ꙗ҆́кѡ є҆ди́нѣми ᲂу҆сты̑, поѧ́хꙋ и҆ благословлѧ́хꙋ, глаго́люще: бл҃гослове́нъ бг҃ъ ѻ҆тє́цъ на́шихъ.
Ѡ҆скверни́вшꙋюсѧ страстьмѝ дꙋ́шꙋ мою̀ ѡ҆свѧтѝ, всегда̀ раба̀ твоего̀, чⷭ҇таѧ, и҆ ᲂу҆ма̀ лю́тое плѣне́нїе, и҆ се́рдца ѡ҆жесточе́нїе, и҆ де́мѡнѡвъ стремлє́нїѧ вско́рѣ потребѝ.
Оу҆мерщвле́нный страстьмѝ плотски́ми, всенепоро́чнаѧ, ѡ҆живѝ ᲂу҆́мъ мо́й, и҆ бг҃ꙋ ᲂу҆гѡ́днаѧ соверша́ти ᲂу҆крѣпи́ мѧ: да велича́ю тѧ̀, да сла́влю при́снѡ бл҃гоꙋтро́бїе твоѐ.
Оу҆мерщвле́на мѧ̀, влⷣчце чⷭ҇таѧ, плотски́ми страстьмѝ. и҆ дꙋшѝ моеѧ̀ смире́нныѧ скве́рнꙋ лю́тꙋю ѡ҆чища́ющи, дв҃о, и҆ ловле́нїѧ неви́димыхъ врагѡ́въ и҆зба́ви, и҆ спаси́ мѧ.
Тебѣ̀ всест҃а́ѧ, непоро́чнаѧ, чⷭ҇таѧ, рабѝ твоѝ всегда̀ де́нь и҆ но́щь припа́даемъ, сокрꙋше́нїемъ се́рдца молѧ́ще, и҆збавле́нїе грѣхѡ́въ ѡ҆брѣстѝ на́мъ твои́ми моли́твами.
И҆́нъ. І҆рмо́съ:
Тебѐ ᲂу҆́мнꙋю, бцⷣе, пе́щь, разсмотрѧ́емъ, вѣ́рнїи, ꙗ҆́коже бо ѻ҆́троки спасѐ трѝ превозноси́мый, мі́ръ ѡ҆бновѝ во чре́вѣ твое́мъ всецѣ́лъ, хва́льный ѻ҆тцє́въ бг҃ъ и҆ препросла́вленъ.
Нелжи́во ꙗ҆́вственнѡ и҆спо́лнисѧ ѡ҆бѣща́нїе твоѐ, хрⷭ҇тѐ, бꙋ́ри бо ᲂу҆чени́къ тво́й бжⷭ҇твенѣйшїй сло́вомъ запреща́ѧ, на кро́ткꙋю тишинꙋ̀ преложѝ: хва́льный ѻ҆тцє́въ бж҃е, и҆ препросла́вленный.
На ᲂу҆́мнꙋю сїѡ́на, а҆пⷭ҇ле, взы́ти го́рꙋ повелѣ́нъ, спасе́нїѧ же прїи́мъ ча́шꙋ, ра́дꙋѧсѧ подае́ши, преходѧ̀ сме́ртїю къ бжⷭ҇твеннѣй жи́зни, хва́льнаго ѻ҆тцє́въ бг҃а, и҆ препросла́вленнаго.
Тѧ̀ слове́снꙋю рѣкꙋ̀ показа̀, бжⷭ҇твеннаѧ вода̀ жи́зни, прелє́стныѧ рѣ́ки пото́ки и҆зсꙋша́ющꙋю, бл҃же́нне, проповѣ́данїѧ, и҆ вопїю́щыѧ напаѧ́ющꙋю: хва́льный ѻ҆тцє́въ бж҃е и҆ препросла́вленный.
Ты̀, земноро́денъ сы́й а҆пⷭ҇ле, преесте́ственнѡ чꙋдодѣ́йствꙋеши: любо́вїю бо страствори́всѧ, томꙋ̀ послѣ́довалъ є҆сѝ возлюби́вшемꙋ тѧ̀ хрⷭ҇тꙋ̀: хва́льный, воспѣва́ѧ, бг҃ъ, и҆ препросла́вленный.
Бг҃оро́диченъ:
Тѧ̀ і҆а́кѡвъ, бцⷣе, лѣ́ствицꙋ прⷪ҇ро́чески разꙋмѣ̀: тобо́ю бо на землѝ превыша́емый ꙗ҆ви́сѧ человѣ́кѡмъ, и҆ поживѐ, ꙗ҆́коже благоволѝ: хва́льный ѻ҆тцє́въ бг҃ъ и҆ препросла́вленный.
И҆́нъ. І҆рмо́съ:
Сꙋ́щымъ въ пещѝ ѻ҆трокѡ́мъ твои̑мъ, сп҃се, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ, ꙗ҆́кѡ є҆ди́нѣми ᲂу҆сты̀ поѧ́хꙋ и҆ бл҃гословлѧ́хꙋ, глаго́люще: бл҃гослове́нъ бг҃ъ ѻ҆ц҃ъ на́шихъ.
Всест҃а́гѡ дх҃а ѻ҆́гнь соше́дый, свы́ше, а҆пⷭ҇ле хрⷭ҇то́въ, ѧ҆зы́ки но́вы, и҆́миже никогда́же вѣща́лъ є҆сѝ, мі́ра концє́мъ, повелѣ̀ тебѣ̀ глаго́лати вели̑чїѧ є҆гѡ̀.
Преꙋдивлѧ́етъ всѧ́кꙋ мы́сль про́повѣдь, ю҆́же вострꙋби́сте землѝ, таи̑нницы хрⷭ҇то́вы и҆ зри́телє вы́шнихъ, ꙗ҆́кѡ є҆ди́ни двана́десѧте, тмы̑ землѝ просвѣти́сте.
Оу҆дивле́на бы́сть, влⷣко хрⷭ҇тѐ, бл҃года́ть твоѧ̀ въ бг҃омꙋ́дрыхъ ᲂу҆ч҃ницѣ́хъ, ꙗ҆́кѡ ма́лїи и҆ простцы̀ сꙋ́ще, всю̀ зе́млю протеко́ша, ѿ конє́цъ є҆ѧ̀ да́же до конє́цъ всѣ́хъ.
Кто̀ наꙋчи́ тѧ та́кѡ глаго́лати, а҆пⷭ҇ле; кто̀ просвѣтѝ тво́й ᲂу҆́мъ, зрѣ́ти ꙗ҆́снѡ непристꙋ́пныѧ сла́вы зарю̀, возсїѧ́вшꙋю и҆́стины свѣ́тъ въ сердца́хъ на́шихъ;
Сла́ва, трⷪ҇ченъ:
Трⷪ҇чески воспои́мъ вѣ́рнїи, сла́вѧще безнача́льнаго ѻ҆ц҃а̀, и҆ сн҃а, и҆ дх҃а пра́ваго, є҆ди́нственное сꙋщество̀ є҆ди́но, ю҆́же трегꙋ́бѡ да воспои́мъ: ст҃ъ, ст҃ъ, ст҃ъ є҆сѝ во вѣ́ки, а҆ми́нь.
И҆ ны́нѣ, бг҃оро́диченъ:
Ꙗ҆́кѡ ѿ трⷪ҇цы є҆ди́наго тѧ̀, хрⷭ҇тѐ, сла́вимъ: ꙗ҆́кѡ и҆зъ дв҃ы воплоти́выйсѧ кромѣ̀ враще́нїѧ, человѣ́чески всѧ̑ поне́слъ є҆сѝ, не ѿстꙋпи́въ є҆стества̀ ѻ҆ч҃ескагѡ, і҆и҃се, а҆́ще и҆ соедини́лсѧ є҆сѝ на́мъ.
Пѣ́снь и҃. І҆рмо́съ:
Є҆гѡ́же ᲂу҆жаса́ютсѧ а҆́гг҃ли и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте свѧще́нницы, просла́вите ѻ҆́троцы, благослови́те лю́дїе, и҆ превозноси́те во всѧ̑ вѣ́ки.
Воплоща́етсѧ безпло́тный и҆зъ тебє̀ бг҃олѣ́пнѡ: є҆го́же молѝ, пречⷭ҇таѧ, стра̑сти моеѧ̀ дꙋшѝ ᲂу҆мертви́ти, и҆ ѡ҆живи́ти ю҆̀ ᲂу҆мерщвле́ннꙋю дре́вле ѕлѣ́йшимъ грѣхо́мъ.
Оу҆врачи́ла є҆сѝ сокрꙋше́нїе а҆да́ма пе́рстнагѡ, сп҃са ро́ждши пречⷭ҇таѧ, и҆ бг҃а: того̀ ᲂу҆молѝ ꙗ҆́звы дꙋшѝ моеѧ̀ ᲂу҆врачи́ти, неизлѣ́чнѡ недꙋ́гꙋющїѧ.
Возста́ви, лежа́ща мѧ̀ во глꙋбинѣ̀ ѕлы́хъ, и҆ ны́нѣ борю́щыѧ мѧ̀ побѣдѝ врагѝ, ᲂу҆ѧ́звленнꙋю безмѣ́стными сластьмѝ дꙋ́шꙋ мою̀, чⷭ҇таѧ, не пре́зри, но ᲂу҆ще́дри и҆ спасѝ.
Оу҆врачѝ, пречⷭ҇таѧ, стра̑сти моегѡ̀ се́рдца, ро́ждшаѧ всѣ́хъ врача̀, и҆ пра́ведныхъ ча́сти покажи́ мѧ прича́стника, дв҃о, хрⷭ҇та̀ ᲂу҆молѧ́ющи.
И҆́нъ. І҆рмо́съ:
Въ пещѝ ѻ҆́троцы і҆и҃левы, ꙗ҆́коже въ горни́лѣ, добро́тою бл҃гоче́стїѧ чистѣ́е зла́та блеща́хꙋсѧ, гл҃го́люще: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те во всѧ̑ вѣ́ки.
Свѣтоно́снаѧ и҆ веселотво́рнаѧ лꙋча̀ врачева́нїй, а҆ндре́е хрⷭ҇то́въ а҆пⷭ҇ле, ѡ҆сїѧва́етъ на́съ бжⷭ҇твеннаѧ па́мѧть твоѧ̀, вопїю́щихъ: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки.
Человѣ́ческое є҆стество̀ полꙋчи́въ, того̀ превозше́лъ є҆сѝ зако́ны, и҆ ко а҆́гг҃льстѣй преше́лъ є҆сѝ ски́нїи, а҆ндре́е а҆пⷭ҇ле, и҆ зове́ши: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки.
Є҆́же съ высоты̀ дх҃а бж҃їѧ дохнове́нїе тѧ̀ пре́жде ѻ҆́гненно просвѣтѝ ри́тора, бг҃оглаго́ливе, показꙋ́етъ те́пла. вопїю́ща, а҆пⷭ҇ле, хрⷭ҇тꙋ̀ твоемꙋ̀: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки.
Свѣтолꙋ́ченъ ꙗ҆́коже мо́лнїѧ во свѣ́тъ ꙗ҆зы́кѡвъ и҆зше́лъ є҆сѝ, тмꙋ̀ невѣ́дѣнїѧ ѿгонѧ̀, и҆ вѣ̑рныѧ просвѣща́ѧ зовꙋ́щыѧ: благослови́те, всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те є҆го̀ во вѣ́ки.
Бг҃оро́диченъ:
Ра́дꙋйсѧ, престо́ле сла́вы бж҃їѧ, ра́дꙋйсѧ, вѣ́рныхъ стѣно̀, є҆́юже свѣ́тъ сꙋ́щымъ во тмѣ̀ возсїѧ̀ хрⷭ҇то́съ, тебѐ блажа́щымъ, и҆ вопїю́щымъ: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те є҆го̀ во вѣ́ки.
И҆́нъ. І҆рмо́съ:
На сїна́и кꙋпинꙋ̀ горѧ́щꙋ неѡпа́льнꙋ сохра́ншагѡ, и҆ ѻ҆́троки посредѣ̀ горѧ́щагѡ пла́ме и҆зба́вльшаго бг҃а, по́йте, бл҃гослови́те и҆ превозноси́те є҆го̀ во вѣ́ки.
Хꙋдо́жествомъ ры́барства и҆зъ мо́рѧ ᲂу҆лови́лъ є҆сѝ ры̑бы, всемꙋ́дре, ны́нѣ же вѣ́рою человѣ́ки ло́виши хрⷭ҇тꙋ̀ ѿ ле́сти вра́жїѧ: глꙋбина́ бо бѣ̀ ле́сть и҆ногда̀, погрꙋжа́ющаѧ ꙗ҆зы́ки бꙋ́рею невѣ́дѣнїѧ.
Оу҆́мнꙋю житїѧ̀ нево́лненнѡ преплы́лъ є҆сѝ глꙋбинꙋ̀, а҆пⷭ҇ле, прелетѣ́въ вѣ́триломъ дх҃а, вѣ́рою хрⷭ҇то́вою. тѣ́мже и҆ въ приста́нище жи́зни дости́глъ є҆сѝ ра́дꙋѧсѧ во всѧ̑ вѣ́ки.
Оу҆́мномꙋ сл҃нцꙋ на дре́вѣ заше́дшꙋ самовла́стною во́лею, и҆́же сл҃нца свѣти́льникъ сразрѣши́тисѧ и҆ща́й, и҆ заитѝ во хрⷭ҇та̀, на дре́вѣ повѣ́шенъ бы́сть крⷭ҇тнѣмъ а҆ндре́й вели́кїй, свѣти́ло цр҃ко́вное.
Ѽ ᲂу҆ченичѐ и҆ люби́миче хрⷭ҇то́въ, и҆ сочи́сленне а҆пⷭ҇лѡвъ є҆гѡ̀. є҆гда̀ на престо́лѣ сѧ́детъ сꙋдїѧ̀ съ ва́ми двана́десѧтьми сꙋди́ти, ꙗ҆́кѡ ѡ҆бѣща́нїе глаго́летъ, бꙋ́дите тогда̀ на́мъ чл҃вѣколю́бїѧ стѣна̀.
Благослови́мъ ѻ҆ц҃а̀, и҆ сн҃а, и҆ ст҃а́гѡ дх҃а, гдⷭ҇а.
Трⷪ҇ченъ:
Трисвѣ́тлꙋю є҆ди́ницꙋ, и҆ трⷪ҇цꙋ сопресто́льнꙋю возславосло́вимъ не раздѣлѧ́юще, соединѧ́юще же ю҆̀ соесте́ственнѡ, ꙗ҆́кѡ є҆ди́но и҆́стиннѡ сꙋщество̀, соедине́нно въ ли́цѣхъ тре́хъ не слива́емо.
Бг҃оро́диченъ:
Сꙋ́ща ѿ трⷪ҇цы є҆ди́наго заче́нши, родила̀ є҆сѝ, воплоще́ннаго и҆зъ тебє̀, и҆ ѡ҆бновлѧ́ющаго зако́ны є҆стества̀ рождество́мъ твои́мъ, чⷭ҇таѧ: того̀ ѡ҆ на́съ ꙗ҆́кѡ бг҃а при́снѡ молѧ́щи не преста́й, бцⷣе.
Пѣ́снь ѳ҃. І҆рмо́съ:
Свѣтоно́сный ѻ҆́блакъ, въ ѻ҆́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ чл҃вѣ́къ, безнача́льный: велича́емъ всѝ, ꙗ҆́кѡ мт҃рь бг҃а на́шегѡ чⷭ҇тꙋю.
Грѣхолюби́въ сы́й въ нерадѣ́нїи пребыва́ю, и҆ сꙋди́ща, чⷭ҇таѧ, неꙋмы́тнагѡ трепе́щꙋ, въ не́мже соблюдѝ твои́ми ст҃ы́ми моли́твами, бг҃оневѣ́сто, неѡсꙋжде́нна, да ꙗ҆́кѡ предста́тельницꙋ мою̀ ᲂу҆блажа́ю тѧ̀ при́снѡ.
Трепе́щꙋ сꙋди́ща, дв҃о, и҆ незабве́ннагѡ ѻ҆́ка твоегѡ̀ сн҃а, дѣѧ̑нїѧ сра̑мнаѧ на землѝ соверши́въ, и҆ сегѡ̀ ра́ди тебѣ̀ зовꙋ̀: всеблагоꙋтро́бнаѧ влⷣчце, помози́ ми, и҆ тогда́шнїѧ нꙋ́жды и҆зми́ мѧ, и҆ спасѝ, чⷭ҇таѧ.
Ко́ль стра́шенъ де́нь и҆спыта́нїѧ, ѻ҆трокови́це, ко́ль ᲂу҆жа́сенъ ѿвѣ́тъ: ко́ль лю́тъ сра́мъ. кто̀ постои́тъ про́чее, пречⷭ҇таѧ влⷣчце; поми́лꙋй стра́стнꙋю мою̀ дꙋ́шꙋ, и҆ пре́жде конца̀ да́ждь мѝ ѡ҆ставле́нїе, чⷭ҇таѧ.
Свѣ́тъ поро́ждшаѧ бжⷭ҇твенный ѡ҆мраче́ннаго всѧ́кими прилѡ́ги лꙋка́вагѡ, и҆ ѕло́бами, всѧ́кими, и҆ прогнѣ́вающаго бг҃а, всенепоро́чнаѧ, просвѣтѝ, пꙋтеводѧ́щи къ благи̑мъ дѣѧ́нїємъ, ꙗ҆́кѡ вино́вна сꙋ́щи всѣ́хъ до́брыхъ.
И҆́нъ. І҆рмо́съ:
Ѡ҆́бразъ чи́стагѡ рождества̀ твоегѡ̀ ѻ҆гнепали́маѧ кꙋпина̀ показа̀ неѡпа́льнаѧ: и҆ ны́нѣ на на́съ напа́стей свирѣ́пѣющꙋю ᲂу҆гаси́ти, мо́лимсѧ, пе́щь, да тѧ̀, бцⷣе, непреста́ннѡ велича́емъ.
Ꙗ҆́кѡ ᲂу҆чени́къ всеизѧ́щнѣйшїй, на крⷭ҇тѣ̀ хотѣ́нїемъ распе́ншемꙋсѧ влⷣцѣ твоемꙋ̀, да́же до сме́рти послѣ́дꙋѧ, возше́лъ є҆сѝ ра́дꙋѧсѧ на высотꙋ̀ крⷭ҇та̀, и҆дѧ́й ше́ствїемъ на нб҃са̀, блаже́нне а҆пⷭ҇ле.
Две́рь є҆де́ма тебѣ̀ ѿве́рзесѧ, и҆ предложи́сѧ лѣ́ствица нбⷭ҇наѧ, и҆ прїѧ́ша тѧ̀ нбⷭ҇ныѧ ѻ҆би́тєли, и҆ предста́лъ є҆сѝ ра́дꙋѧсѧ, а҆пⷭ҇ле, хрⷭ҇тꙋ̀ жизнода́вцꙋ, ѡ҆ мі́рѣ моли́твенникъ и҆зѧ́щнѣйшїй.
Ра́вными просла́вилсѧ є҆сѝ страда́ньми ᲂу҆ч҃телѧ твоегѡ̀, блаже́нне, а҆ндре́е всемꙋ́дре: кресто́мъ бо бжⷭ҇твенный коне́цъ прїѧ́лъ є҆сѝ, и҆ прича́стїемъ бо́гъ бы́лъ є҆сѝ. тѣ́мже тѧ̀ мо́лимъ, ѡ҆ на́съ при́снѡ моли́сѧ.
Ра́дꙋйсѧ, дво́ице всеизрѧ́днѣйшаѧ, на нб҃сѣ́хъ наслѣ́довавши ны́нѣ гражда́нство: назира́ете же вѣнцє́въ произволе́нїе, тѣ́хъ побѣжда́ющи си́лꙋ, и҆ бжⷭ҇твенныхъ дарова́нїй просвѣща́ете свѣтлостьмѝ.
Бг҃оро́диченъ:
И҆зъ ко́рене дв҃дова прозѧбла̀ є҆сѝ прⷪ҇ро́ческагѡ, дв҃о, и҆ бг҃оѻте́ческагѡ: но и҆ дв҃да ꙗ҆́кѡ и҆́стиннѡ ты̀ просла́вила є҆сѝ, ꙗ҆́кѡ ро́ждшаѧ прⷪ҇ро́чествꙋемаго гдⷭ҇а сла́вы: є҆го́же пою́ще, досто́йнѣ велича́емъ.
И҆́нъ. І҆рмо́съ:
Свѣтоно́сный ѻ҆́блакъ, въ ѻ҆́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ чл҃вѣ́къ, безнача́льный, велича́емъ всѝ ꙗ҆́кѡ мт҃рь бг҃а на́шегѡ чⷭ҇тꙋю.
И҆́же мре́жꙋ распростры́й та́инственнагѡ бг҃овидѣ́нїѧ, и҆ ꙗ҆́кѡ ры̑бы въ не́й ᲂу҆лови́вый добро́тами нбⷭ҇ныхъ разꙋмѣ́нїй, молѝ, свѧ́те, ст҃ꙋ́ю трⷪ҇цꙋ, и҆сточи́ти и҆ на́мъ ѡ҆чище́нїе.
Благодари́мъ ꙗ҆зы́цы тобо́ю просвѣ́щшїисѧ, и҆ ѿ землѝ на нб҃са̀ тобо́ю возведе́ннїи: слꙋже́нїѧ бо вра́жїѧ ѿстꙋ́пльше, бы́хомъ соприча́стницы ст҃ы́хъ а҆́гг҃лъ, гдⷭ҇нїѧ же сла́вы ѻ҆́бщницы.
Неизрече́нныхъ самови́дцы и҆ слꙋжи́телїе сло́ва, таинственново́дцы и҆ зри́телїе неизслѣ́дныхъ, снаслѣ́дникѡмъ и҆ на́мъ бы́ти моли́тесѧ, а҆пⷭ҇ли, хрⷭ҇то́ва црⷭ҇твїѧ, и҆ прича́стникѡмъ бж҃ества̀ є҆гѡ̀.
Вѧза́ти и҆ рѣши́ти прїе́мше ѿ хрⷭ҇та̀ вла́сть, разрѣши́те всѧ̑ ѿ ᲂу҆́зъ мно́гихъ прегрѣше́нїй, є҆гда̀ прїи́детъ хрⷭ҇то́съ, и҆ всѝ сѧ́дете двана́десѧть, на прⷭ҇то́лѣхъ толи́цѣхъ, сꙋди́ти всѧ̑ племена̀ і҆и҃лєва.
Сла́ва, трⷪ҇ченъ:
Трїѷпоста́сное є҆стество̀, и҆ нераздѣ́льнꙋю сла́вꙋ въ бжⷭ҇твѣ̀ є҆ди́номъ пѣва́емꙋю, непреста́ннѡ на нб҃сѝ и҆ на землѝ трⷪ҇цꙋ неразлꙋ́чнꙋю просла́вимъ, съ сн҃омъ ѻ҆ц҃ꙋ̀ и҆ дх҃ꙋ покланѧ́ющесѧ благоче́стнѡ.
И҆ ны́нѣ, бг҃оро́диченъ:
Подъ твоѐ бл҃гоꙋтро́бїе прибѣга́ющыѧ вѣ́рою, и҆ покланѧ́ющыѧсѧ благоче́стнѡ сн҃ꙋ твоемꙋ̀, дв҃о бг҃ороди́тельнице: того̀ ꙗ҆́кѡ бг҃а мі́ра, и҆ гдⷭ҇а молѝ, ѿ тлѣ́нїѧ и҆ бѣ́дъ и҆зба́вити, и҆ всѧ́кихъ напа́стей.
Свѣти́ленъ. Подо́бенъ: Дх҃омъ во ст҃и́лищи:
Сло́во пребезнача́льное ѡ҆брѣ́тъ тѧ̀, всеблаже́нне, первозва́нна показа̀ всѣ́хъ а҆пⷭ҇лѡвъ, а҆ндре́е приснопа́мѧтне: и҆ сегѡ̀ стопа́мъ возслѣ́дꙋѧ, показа́лсѧ є҆сѝ пꙋтево́ждь заблꙋ́ждшихъ, къ нбⷭ҇номꙋ сїѧ̑ возводѧ̀ бжⷭ҇твенномꙋ ше́ствїю.
Сла́ва, Подо́бенъ: Жєны̀ ᲂу҆слы́шите:
Петро́ва скро́вника, ᲂу҆ч҃никѡ́въ пе́рвѣйшаго, самови́дца и҆ слꙋгꙋ̀ бы́вшаго сло́ва, а҆ндре́а а҆пⷭ҇ла пресла́внѡ восхва́лимъ: ꙗ҆зы́ки бо просвѣтѝ, и҆ ра́спѧтъ бы́въ, кончи́нꙋ под̾е́млетъ, ꙗ҆́кѡ ᲂу҆ч҃ни́къ влⷣки.
И҆ ны́нѣ, бг҃оро́диченъ:
Бг҃а, є҆го́же родила̀ є҆сѝ, дв҃о всенепоро́чнаѧ, молѝ ѡ҆ всѣ́хъ, благоче́стнѡ тѧ̀ чтꙋ́щихъ, съ первозва́ннымъ а҆ндре́емъ, ᲂу҆лꙋчи́ти бжⷭ҇твеннагѡ ѡ҆сїѧ́нїѧ твоегѡ̀ сн҃а, и҆ стоѧ́нїѧ и҆збра́нныхъ и҆ ст҃ы́хъ: и҆́бо мо́жеши, ꙗ҆́кѡ хо́щеши.
На хвали́техъ стїхи̑ры, на д҃. Гла́съ а҃. Подо́бенъ: Нбⷭ҇ныхъ чинѡ́въ:
Виѳсаі́до, ны́нѣ весели́сѧ: ꙳ въ тебѣ́ бо процвѣто́ша ѿ ма́тернѧ ᲂу҆до́лїѧ ꙳ благово́ннѣйшїи крі́ни пе́тръ и҆ а҆ндре́й, ꙳ мі́рꙋ всемꙋ̀ про́повѣдь вѣ́ры благово́инствꙋюще ꙳ бл҃года́тїю хрⷭ҇то́вою: ꙳ є҆го́же и҆ стрⷭ҇тє́мъ приѡбщи́шасѧ.
А҆ндре́е, ра́дꙋйсѧ и҆ и҆гра́й, ꙳ ꙗ҆́кѡ прїѧ́лъ є҆сѝ ꙗ҆́вѣ во словесѝ сїѧ́нїи, ꙳ сл҃нце сла́вы хрⷭ҇та̀ жизнода́вца, ꙳ є҆го́же и҆ держа́сѧ вѣ́рою проповѣ́далъ є҆сѝ. ꙳ того̀ молѝ непреста́ннѡ ѡ҆ на́съ, ꙳ вѣ́рою воспѣва́ющихъ тѧ̀.
Тайноꙋчи́тель бжⷭ҇твеннагѡ строе́нїѧ хрⷭ҇то́ва, ꙳ и҆збра́нный пе́рвыхъ, ꙳ ᲂу҆ч҃ни́къ бы́ти сло́ва, а҆ндре́й бг҃ови́децъ, ꙳ вопїѧ̀ глаго́летъ: ꙳ є҆динокро́внаго петра̀ ᲂу҆ви́дѣвъ, ꙳ ѡ҆брѣто́хомъ мессі́ю, ꙳ є҆го́же писа́нїе и҆ прⷪ҇ро́цы предпроповѣ́даша.
Па́трскїй тѧ̀ гра́дъ па́стырѧ стѧжа̀, ꙳ и҆ градоде́ржца бжⷭ҇твеннаго, ꙳ и҆ бѣ́дъ всѧ́ческихъ и҆зба́вителѧ ꙳ и҆ храни́телѧ тѧ̀, а҆ндре́е мꙋ́дре, ꙳ благода́рнѡ чтꙋ́щїй тѧ̀: ꙳ но молѝ непреста́ннѡ ѡ҆ не́мъ, ꙳ спасти́сѧ неврежде́ннꙋ.
Сла́ва, гла́съ и҃:
Проповѣ́дника вѣ́ры и҆ слꙋгꙋ̀ сло́ва, а҆ндре́а восхва́лимъ: то́й бо и҆зъ глꙋбины̀ человѣ́ки ᲂу҆ловлѧ́етъ, вмѣ́стѡ тро́сти крⷭ҇тъ въ рꙋка́хъ держа̀, и҆ ꙗ҆́кѡ ᲂу҆́же низпꙋща́ѧ си́лꙋ, возво́дитъ дꙋ́шы ѿ ле́сти вра́жїѧ, и҆ прино́ситъ бг҃ꙋ да́ръ благопрїѧ́тенъ при́снѡ. того̀, вѣ́рнїи, въ ли́цѣ ᲂу҆ч҃ни̑къ хрⷭ҇то́выхъ восхва́лимъ, да мо́литсѧ съ ни́ми: ꙗ҆́кѡ да ми́лостивъ бꙋ́детъ на́мъ въ де́нь сꙋ́дный.
И҆ ны́нѣ, гла́съ то́йже:
Воспрїимѝ, виѳлее́ме, бж҃їю митропо́лїю: свѣ́тъ бо незаходи́мый въ тебѣ̀ роди́тисѧ прихо́дитъ. а҆́гг҃ли, ᲂу҆диви́тесѧ на нб҃сѝ: человѣ́цы, просла́вите на землѝ: волсвѝ, и҆зъ персі́ды пресла̑вныѧ да́ры принеси́те: па́стырїе свирѧ́юще, трист҃о́е пѣ́нїе пѣсновоспо́йте: всѧ́кое дыха́нїе да хва́литъ вседѣ́телѧ.
Славосло́вїе вели́кое. И҆ ѿпꙋ́стъ.
На лїтꙋргі́и, Бл҃жє́нна, ѿ канѡ́нѡвъ, пѣ́снь г҃-ѧ и҆ ѕ҃-ѧ. Прокі́менъ, гла́съ и҃: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ. Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь. А҆пⷭ҇лъ, къ корі́нѳѧнѡмъ, зача́ло рл҃а. А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̀, гдⷭ҇и: Є҆ѵⷢ҇лїе і҆ѡа́нна, зача́ло д҃. Прича́стенъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.