Мѣ́сѧца тогѡ́же въ и҃-й де́нь. Собо́ръ ст҃а́гѡ а҆рхїстрати́га мїхаи́ла, и҆ про́чихъ безпло́тныхъ си́лъ.
А҆́ще хра́мъ собо́ра ст҃а́гѡ а҆рхїстрати́га мїхаи́ла, и҆лѝ и҆зво́литъ настоѧ́тель твори́ти бдѣ́нїе:
На ма́лѣй вече́рни, на Гдⷭ҇и, воззва́хъ, стїхи̑ры на д҃. Гла́съ а҃.
Подо́бенъ: Всехва́льнїи мч҃ницы:
Безпло́тнїи а҆́гг҃ли, ꙳ бж҃їю прⷭ҇то́лꙋ предстоѧ́ще, ꙳ и҆ ѿѻнꙋ́дными свѣтлостьмѝ ѡ҆блиста́еми, ꙳ и҆ свѣтоли̑тїи вѣ́чнѡ сїѧ́юще, ꙳ и҆ свѣ́ти быва́юще вторі́и, ꙳ хрⷭ҇тꙋ̀ моли́тесѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Два́жды.
Безсме́ртнїи а҆́гг҃ли, ꙳ жи́зни и҆́стиннѡ неги́бельныѧ, ꙳ ѿ пе́рвыѧ прїе́мше ꙳ жи́зни, всебл҃же́ннїи, ꙳ присносꙋ́щныѧ сла́вы, ꙳ и҆ ст҃і́и зри́телїе мꙋ́дрости вѣ́чныѧ бы́сте, ꙳ свѣ́та и҆сполнѧ́еми, ꙳ и҆ свѣщы̀ соѡбраща́емыѧ, ꙳ прили́чнѡ показꙋ́емїи.
А҆рха́гг҃ли, а҆́гг҃ли, ꙳ нача̑ла, прⷭ҇то́ли, ꙳ гдⷭ҇ьствїѧ и҆ серафі́ми шестокрила́тїи, ꙳ и҆ многоѻчи́тїи херꙋві́мы бжⷭ҇твеннїи, ꙳ мꙋ́дрости ѻ҆рга́ни: ꙳ си́лы, и҆ вла̑сти бжⷭ҇твеннѣйшїи, ꙳ хрⷭ҇тꙋ̀ моли́тесѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Сла́ва, гла́съ д҃:
А҆́гг҃льскихъ ликѡ́въ чинонача́льниче, на нб҃сѣ́хъ прⷭ҇то́лꙋ: предстоѧ̀ трисо́лнечнагѡ бжⷭ҇тва̀, и҆ бога́тнѡ ѡ҆сїѧва́емь бжⷭ҇твенными свѣтлостьмѝ, и҆спꙋща́емыми непреста́ннѡ ѿтꙋ́дꙋ, и҆ на́съ сꙋ́щихъ на землѝ, трист҃о́е пѣ́нїе ра́достнѡ пою́щихъ, страсте́й мглы̀ и҆зба́ви, и҆ просвѣще́нїемъ ᲂу҆ѧснѝ, мїхаи́ле а҆рхїстрати́же, моли́твенниче ѡ҆ дꙋша́хъ на́шихъ.
И҆ ны́нѣ, бг҃оро́диченъ:
На стїхо́внѣ стїхи̑ры, гла́съ ѕ҃. Подо́бенъ: Тридне́венъ:
А҆рха́гг҃льскїѧ си̑лы, хрⷭ҇тѐ, ꙳ прⷭ҇то́лꙋ предстоѧ́ще твоемꙋ̀, ꙳ мо́лѧтсѧ ѡ҆ ро́дѣ человѣ́честѣмъ. ꙳ тѣ́хъ ᲂу҆̀бо мольба́ми, ꙳ ꙗ҆зы́кѡвъ де́рзость низложѝ, ꙳ ми́ръ всѣ̑мъ вѣ̑рнымъ подаѧ̀.
Сті́хъ: Творѧ́й а҆́гг҃лы своѧ̑ дꙋ́хи, и҆ слꙋги̑ своѧ̑ пла́мень ѻ҆́гненный.
Ѻ҆крꙋ́гъ прⷭ҇то́ла всѣ́хъ цр҃ѧ̀ ꙳ при́снѡ ликꙋ́юще, ꙳ а҆́гг҃лѡвъ чи́ни ꙳ на́съ сохранѧ́йте, ꙳ вѣ́рою ва́съ призыва́ющыѧ, ꙳ и҆ мꙋче́нїѧ всѣ́хъ и҆зба́вите.
Сті́хъ: Хвали́те є҆го̀ всѝ а҆́гг҃ли є҆гѡ̀, хвали́те є҆го̀ всѧ̑ си̑лы є҆гѡ̀.
Ѻ҆ц҃ъ, и҆́же надъ всѣ́ми бг҃ъ, си̑лы нбⷭ҇ныхъ ᲂу҆мѡ́въ ꙳ без̾ѻбра̑зны и҆ невеще́ствєнны, ꙳ пѣвцы̀ трисо́лнечныѧ сла́вы своеѧ̀, ꙳ и҆ є҆ди́нственное сло́во ꙳ и҆ дх҃ъ приведѐ.
Сла́ва, и҆ ны́нѣ, бг҃оро́диченъ. Подо́бенъ: то́йже:
Ра́дꙋйсѧ, бцⷣе дв҃о, ꙳ съ гаврїи́ломъ согла́снѡ ꙳ тебѣ̀ вопїе́мъ: ꙳ ты́ бо, ра́дость пе́рвꙋю ꙳ свы́ше прїи́мши, ꙳ ра́дости всѧ̑ ны̀ и҆спо́лни.
Тропа́рь, гла́съ д҃:
Нбⷭ҇ныхъ во́инствъ а҆рхїстрати́зи, мо́лимъ ва́съ при́снѡ мы̀ недосто́йнїи: да ва́шими моли́твами ѡ҆градитѐ на́съ кро́вомъ кри́лъ невеще́ственныѧ ва́шеѧ сла́вы, сохранѧ́юще ны̀ припа́дающыѧ прилѣ́жнѡ и҆ вопїю́щыѧ: ѿ бѣ́дъ и҆зба́вите ны̀, ꙗ҆́кѡ чинонача́льницы вы́шнихъ си́лъ.
Сла́ва, и҆ ны́нѣ, бг҃оро́диченъ а҃-й гла́са.
На вели́цѣй вече́рни, на Гдⷭ҇и, воззва́хъ, стїхи̑ры, на и҃. Гла́съ д҃.
Подо́бенъ: Ꙗ҆́кѡ до́блѧ:
Трисо́лнечнагѡ бж҃ества̀ ꙳ предста́тель свѣтлѣ́йшїй мїхаи́ле, ꙗ҆влѧ́ѧсѧ а҆рхїстрати́же, ꙳ съ го́рними си́лами зове́ши, ра́дꙋѧсѧ: ꙳ ст҃ъ є҆сѝ ѻ҆́ч҃е, ꙳ ст҃ъ є҆сѝ собезнача́льное сло́во, ꙳ ст҃ъ є҆сѝ и҆ ст҃ы́й дш҃е, ꙳ є҆ди́на сла́ва, ꙳ є҆ди́но црⷭ҇тво и҆ є҆стество̀, ꙳ є҆ди́но бжⷭ҇тво̀ и҆ си́ла.
И҆ ви́дъ тво́й ѻ҆́гненъ, ꙳ и҆ добро́та чꙋ́дна, ꙳ мїхаи́ле первоа́гг҃ле: ꙳ невеще́ственнымъ бо є҆стество́мъ ꙳ прехо́диши концы̀, ꙳ и҆сполнѧ́ѧ повелѣ̑нїѧ всѣ́хъ творца̀, ꙳ си́ленъ въ крѣ́пости твое́й познава́емь, ꙳ и҆ и҆сто́чникъ и҆сцѣле́нїй хра́мъ тво́й содѣ́ловаѧ, ꙳ зва́нїемъ твои́мъ ст҃ы́мъ почита́емый.
Творѧ́й а҆́гг҃лы твоѧ̑, ꙳ ꙗ҆́коже писа́сѧ, дꙋ́хи, ꙳ и҆ слꙋжа́щыѧ тебѣ̀ пла́мень ѻ҆́гненный: ꙳ посредѣ̀ чинѡ́въ пе́рвенствꙋюща, ꙳ показа́лъ є҆сѝ, гдⷭ҇и, твои́хъ а҆рха́гг҃льскихъ, ꙳ мїхаи́ла а҆рхїстрати́га, ꙳ твои̑мъ манове́нїємъ повинꙋ́ющасѧ, сло́ве, ꙳ и҆ пѣ́снь трист҃ꙋ́ю ꙳ со стра́хомъ возглаша́юща сла́вѣ твое́й.
И҆́ны стїхи̑ры, гла́съ д҃. Подо́бенъ: Да́лъ є҆сѝ зна́менїе.
Оу҆́мъ предвѣ́чный, ꙳ свѣ́тъ соста́ви вторы́й, ꙳ гаврїи́ла, тебѐ прича̑стїи бжⷭ҇твенными ꙳ просвѣща́ющаго всю̀ вселе́ннꙋю, ꙳ и҆ ю҆́же ѿ вѣ́ка ѿкрыва́ющаго на́мъ, ꙳ бжⷭ҇твеннꙋю и҆ вели́кꙋю и҆́стиннѡ та́йнꙋ: ꙳ во ᲂу҆тро́бѣ воплоща́емагѡ дѣ́вственнѣй, ꙳ сꙋ́ща безтѣле́снагѡ, и҆ бы́вша человѣ́ка, ꙳ во є҆́же спастѝ человѣ́ка.
Прⷭ҇то́лꙋ предстоѧ̀ трисо́лнечнагѡ бж҃ества̀, ꙳ и҆ бога́тнѡ ѡ҆сїѧ́емь бжⷭ҇твенными свѣтлостьмѝ, ꙳ и҆спꙋща́емыми непреста́ннѡ ѿтꙋ́дꙋ, ꙳ сꙋ́щыѧ на землѝ ра́достнѡ ликꙋ́ющыѧ, ꙳ и҆ благохва́лѧщыѧ тѧ̀, ꙳ страсте́й мглы̀ и҆зба́ви, ꙳ и҆ просвѣще́нїемъ ᲂу҆ѧснѝ, ꙳ гаврїи́ле а҆рхїстрати́же, ꙳ моли́твенниче ѡ҆ дꙋша́хъ на́шихъ.
Сокрꙋшѝ свирѣ̑пства а҆га̑рѧнскаѧ, ꙳ на ста́до твоѐ ча́стѡ находѧ̑щаѧ: ꙳ ᲂу҆ста́ви раздо́ры цр҃кве: ꙳ ᲂу҆кротѝ бꙋ́рю безмѣ́рныхъ и҆скꙋше́нїй: ꙳ и҆зба́ви бѣ́дъ и҆ ѡ҆бстоѧ́нїй ꙳ любо́вїю чтꙋ́щыѧ тѧ̀ ꙳ и҆ подъ кро́въ тво́й прибѣга́ющыѧ, ꙳ гаврїи́ле а҆рхїстрати́же, ꙳ моли́твенниче ѡ҆ дꙋша́хъ на́шихъ.
Сла́ва, гла́съ ѕ҃. Вѷзанті́ево:
Сра́дꙋйтесѧ на́мъ всѧ̑ а҆́гг҃льскаѧ чинонача̑лїѧ, первостоѧ́тель бо ва́шъ, и҆ на́шъ предста́тель, вели́кїй а҆рхїстрати́гъ, въ дне́шнїй де́нь, въ честнѣ́мъ є҆гѡ̀ хра́мѣ, пресла́внѡ ꙗ҆влѧ́ѧсѧ ѡ҆свѧща́етъ. тѣ́мже по до́лгꙋ воспѣва́юще, томꙋ̀ возопїи́мъ: покры́й на́съ кро́вомъ кри́лъ твои́хъ, велича́йшїй мїхаи́ле а҆рха́гг҃ле.
И҆ ны́нѣ, бг҃оро́диченъ:
Сра́дꙋйтесѧ на́мъ всѧ̑ дѣ́вственныхъ ликостоѧ̑нїѧ, предста́тельница бо на́ша, и҆ хода́таица, и҆ покро́въ, и҆ вели́кое прибѣ́жище, въ дне́шнїй де́нь, въ честнѣ́мъ є҆ѧ̀ и҆ бжⷭ҇твеннѣмъ хра́мѣ, скорбѧ́щыѧ ᲂу҆тѣша́етъ. тѣ́мже по до́лгꙋ воспѣва́юще сїю̀, возопїи́мъ: покры́й ны̀ бжⷭ҇твеннымъ предста́тельствомъ твои́мъ, пречⷭ҇таѧ бцⷣе влⷣчце.
Вхо́дъ. Прокі́менъ днѐ.
І҆исꙋ́са наѵи́на чте́нїе.
[Глава̀ є҃] Бы́сть є҆гда̀ бѧ́ше і҆исꙋ́съ ᲂу҆ і҆ерїхѡ́на, и҆ воззрѣ́въ ѻ҆чи́ма свои́ма, ви́дѣ человѣ́ка, стоѧ́ща предъ ни́мъ, и҆ ме́чь є҆гѡ̀ ѡ҆бнаже́нъ въ рꙋцѣ̀ є҆гѡ̀. И҆ прише́дъ і҆исꙋ́съ, речѐ є҆мꙋ̀: на́шъ ли є҆сѝ, и҆лѝ ѿ сопроти́вныхъ на́шихъ; Ѻ҆́нъ же речѐ є҆мꙋ̀: а҆́зъ а҆рхїстрати́гъ си́лы гдⷭ҇ни, ны́нѣ прїидо́хъ сѣ́мѡ. И҆ і҆исꙋ́съ падѐ лице́мъ свои́мъ на зе́млю, и҆ речѐ є҆мꙋ̀: влⷣко, что̀ повелѣва́еши твоемꙋ̀ рабꙋ̀; И҆ речѐ а҆рхїстрати́гъ гдⷭ҇ень ко і҆исꙋ́сꙋ: разрѣшѝ сапо́гъ тво́й ѿ но́гъ твои́хъ, мѣ́сто бо, на не́мже ты̀ стои́ши, свѧ́то є҆́сть. и҆ сотворѝ і҆исꙋ́съ та́кѡ.
Сꙋде́й і҆и҃левыхъ чте́нїе.
[Глава̀ ѕ҃] Бы́сть во дни̑ ѻ҆́ны, ᲂу҆крѣпи́сѧ мадїа́мъ на сы́ны і҆и҃левы, и҆ ті́и возопи́ша ко гдⷭ҇ꙋ бг҃ꙋ: и҆ сѐ а҆́гг҃лъ гдⷭ҇ень прїи́де, и҆ сѣ́де подъ дꙋ́бомъ, и҆́же во є҆ѵфра́ѳѣ, въ землѝ і҆ѡа́са, ѻ҆тца̀ є҆зрі́мова, и҆ гедеѡ́нъ, сы́нъ є҆гѡ̀, млатѧ́ше пшени́цꙋ на гꙋмнѣ̀, є҆́же бѣжа́ти съ не́ю ѿ лица̀ мадїа́млѧ. И҆ ꙗ҆ви́сѧ є҆мꙋ̀ а҆́гг҃лъ гдⷭ҇ень, и҆ речѐ къ немꙋ̀: гдⷭ҇ь съ тобо́ю, си́льный крѣ́постїю. И҆ речѐ къ немꙋ̀ гедеѡ́нъ: во мнѣ̀, гдⷭ҇и мо́й, и҆ а҆́ще є҆́сть гдⷭ҇ь съ на́ми, и҆ чесѡ̀ ра́ди ѡ҆брѣто́ша ны̀ всѧ̑ ѕла̑ѧ сїѧ̑; и҆ гдѣ̀ сꙋ́ть всѧ̑ чꙋдеса̀ є҆гѡ̀, є҆ли̑ка повѣ́даша на́мъ ѻ҆тцы̀ на́ши, глаго́люще: не и҆зъ є҆гѵ́пта ли и҆зведѐ на́съ гдⷭ҇ь; и҆ ны́нѣ ѿве́рже ны̀ гдⷭ҇ь, и҆ предаде́ ны въ рꙋ́кꙋ мадїа́млю. И҆ воззрѣ̀ на него̀ а҆́гг҃лъ гдⷭ҇ень, и҆ речѐ є҆мꙋ̀: и҆дѝ въ крѣ́пости твое́й се́й, и҆ спасе́ши і҆и҃лѧ ѿ рꙋкѝ мадїа́мли: и҆ сѐ посла́хъ тѧ̀. И҆ речѐ къ немꙋ̀ гедеѡ́нъ: во мнѣ̀, гдⷭ҇и, въ чесо́мъ спасꙋ̀ і҆и҃лѧ; сѐ ты́сѧща моѧ̀ хꙋ́ждша въ манассі́и, и҆ а҆́зъ є҆́смь мні́й въ домꙋ̀ ѻ҆тца̀ моегѡ̀. И҆ речѐ къ немꙋ̀ гдⷭ҇ь: поне́же а҆́зъ бꙋ́дꙋ съ тобо́ю, и҆ и҆збїе́ши мадїа́ма, ꙗ҆́кѡ мꙋ́жа є҆ди́наго. И҆ речѐ къ немꙋ̀ гедеѡ́нъ: и҆ а҆́ще ѡ҆брѣто́хъ бл҃года́ть предъ ѻ҆чи́ма твои́ма, и҆ да сотвори́ши мнѣ̀ дне́сь зна́менїе, ꙗ҆́кѡ ты̀ глаго́леши со мно́ю, не ѿидѝ ѿсю́дꙋ, до́ндеже прїитѝ мнѣ̀ къ тебѣ̀, и҆ принесꙋ̀ же́ртвꙋ мою̀, и҆ пожрꙋ̀ предъ тобо́ю. И҆ речѐ къ немꙋ̀ а҆́гг҃лъ гдⷭ҇ень: а҆́зъ є҆́смь, и҆ преме́длю, до́ндеже ѡ҆брати́шисѧ ты̀. Гедеѡ́нъ же вни́де. и҆ сотворѝ ко́злище ѿ ко́зъ, и҆ че́тверть мꙋкѝ ѻ҆прѣсно́кѡвъ, и҆ вложѝ съ мѧ́сомъ въ ко́шницꙋ, и҆ ю҆хꙋ̀ влїѧ̀ въ горне́цъ, и҆ и҆знесѐ къ немꙋ̀ подъ дꙋ́бъ, и҆ поклони́сѧ. И҆ речѐ къ немꙋ̀ а҆́гг҃лъ гдⷭ҇ень: возьмѝ мѧса̀ и҆ хлѣ́бы прѣ̑сныѧ, и҆ положѝ ᲂу҆ ка́мене ѻ҆́нагѡ, и҆ ю҆хꙋ̀ и҆злі́й: и҆ сотворѝ та́кѡ. И҆ прострѐ а҆́гг҃лъ гдⷭ҇ень коне́цъ жезла̀, сꙋ́щагѡ въ рꙋцѣ̀ є҆гѡ̀: и҆ косне́сѧ мѧсѡ́мъ и҆ хлѣ́бѡмъ прѣ̑снымъ, и҆ возгорѣ́сѧ ѻ҆́гнь и҆зъ ка́мене, и҆ поѧдѐ мѧса̀ и҆ ѻ҆прѣсно́ки, и҆ а҆́гг҃лъ гдⷭ҇ень ѿи́де ѿ ѻ҆че́й є҆гѡ̀. И҆ ви́дѣ гедеѡ́нъ, ꙗ҆́кѡ а҆́гг҃лъ є҆́сть гдⷭ҇ень: и҆ речѐ гедеѡ́нъ: ᲂу҆вы̀ мнѣ̀, гдⷭ҇и, гдⷭ҇и, ꙗ҆́кѡ ви́дѣхъ а҆́гг҃ла гдⷭ҇нѧ лице́мъ къ лицꙋ̀. И҆ речѐ є҆мꙋ̀ гдⷭ҇ь: ми́ръ тебѣ̀, не бо́йсѧ, не ᲂу҆́мреши. И҆ созда̀ та́мѡ гедеѡ́нъ же́ртвенникъ гдⷭ҇ꙋ, и҆ назва̀ є҆го̀, ми́ръ гдⷭ҇ень, да́же до днѐ сегѡ̀.
Прⷪ҇ро́чества и҆са́їина чте́нїе.
[Глава̀ д҃і] Та́кѡ гл҃го́летъ гдⷭ҇ь: всѧ̀ землѧ̀ да вопїе́тъ съ весе́лїемъ. И҆ древа̀ лїва́нѡва да возвеселѧ́тсѧ ѡ҆ тебѣ̀, и҆ ке́дри лїва́нѡвы рекꙋ́тъ: ѿне́лѣже ты̀ ᲂу҆снꙋ́лъ є҆сѝ, не взы́де сѣкі́й на́съ. А҆́дъ до́лѣ ѡ҆горчи́сѧ, срѣ́тивъ тебѐ, грѧдꙋ́щꙋ тѝ воздви́же на тѧ̀ и҆споли́ны всѧ̑ нача́льствовавшыѧ земле́ю. а҆́ще воста́ли бы́ша ѿ престѡ́лъ свои́хъ всѝ ца́рїе ꙗ҆зы́честїи, всѝ ѿвѣща́ютъ, и҆ рекꙋ́тъ тебѣ̀: и҆ ты̀ плѣне́нъ є҆сѝ ꙗ҆́коже и҆ мы̀, съ на́ми же причта́лсѧ є҆сѝ. Сни́де во а҆́дъ сла́ва твоѧ̀, и҆ мно́гое твоѐ весе́лїе: подъ тобо́ю посте́лютъ гни́лость, и҆ покро́въ тво́й че́рви. Ка́кѡ спадѐ съ нб҃сѐ денни́ца, заꙋ́тра возсїѧва́ющаѧ; сокрꙋши́сѧ на зе́млю, посыла́ѧй ко всѣ̑мъ ꙗ҆зы́кѡмъ. Ты́ бо ре́клъ є҆сѝ въ помышле́нїи твое́мъ: на нб҃о взы́дꙋ, верхꙋ̀ ѕвѣ́здъ нбⷭ҇ныхъ поста́влю престо́лъ мо́й. И҆ сѧ́дꙋ на горѣ̀ высо́цѣй, на гора́хъ высо́кихъ сꙋ́щихъ къ сѣ́верꙋ. И҆ взы́дꙋ вы́шше ѻ҆блакѡ́въ, и҆ бꙋ́дꙋ подо́бенъ вы́шнемꙋ. Ны́нѣ же во а҆́дъ сни́деши, во ѡ҆снова̑нїѧ землѝ. И҆ ви́дѣвшїи тѧ̀ почꙋдѧ́тсѧ, и҆ рекꙋ́тъ ѡ҆ тебѣ̀: се́й человѣ́къ смꙋща́ѧй зе́млю, потрѧса́ѧй царѝ: положи́вый вселе́ннꙋю всю̀ пꙋ́стꙋ, и҆ гра́ды є҆ѧ̀ низложѝ, и҆ плѣне́нныхъ не разрѣшѝ въ до́мы и҆́хъ. Всѝ ца́рїе ꙗ҆зы́честїи ᲂу҆спо́ша въ честѝ, человѣ́къ въ домꙋ̀ свое́мъ: ты́ же ѿве́рженъ бꙋ́деши въ гора́хъ, ꙗ҆́кѡ мертве́цъ возгнꙋше́нъ со мно́гими мертвєцы̀, и҆збоде́нными мече́мъ, низходѧ́щими во а҆́дъ. И҆́мже ѻ҆́бразомъ ри́за кро́вїю намоче́на, не бꙋ́детъ чиста̀, си́це нижѐ ты̀ бꙋ́деши чи́стъ: занѐ зе́млю мою̀ погꙋби́лъ є҆сѝ, и҆ лю́ди моѧ̑ порази́лъ є҆сѝ, и҆ не пребꙋ́деши въ вѣ́чное вре́мѧ.
На лїті́и стїхи̑ры, гла́съ а҃. Кѷпрїа́ново.
Оу҆́мныхъ си́лъ а҆рхїстрати́зи, предстоѧ́ще непреста́ннѡ влⷣчню престо́лꙋ, моли́тесѧ ко гдⷭ҇ꙋ, ми́ръ мі́рꙋ дарова́ти, и҆ дꙋша́мъ на́шымъ ве́лїю ми́лость.
А҆рсе́нїево.
Чинонача́льникъ вы́шнихъ си́лъ, мїхаи́лъ первостоѧ́тель бжⷭ҇твенныхъ чинѡ́въ, дне́сь на́съ къ торжествꙋ̀ созва̀, и҆́же всегда̀ съ на́ми ходѧ́й, и҆ сохранѧ́ѧй всѧ̑ ѿ всѧ́кагѡ дїа́волѧ ѡ҆бстоѧ́нїѧ. прїиди́те ᲂу҆́бѡ празднолю́бцы и҆ хрⷭ҇толю́бцы, цвѣ́ты добродѣ́телей взе́мше, чи́стыми пѡ́мыслы, и҆ со́вѣстїю благостоѧ́нною, а҆рха́гг҃лѡвъ собо́ръ почти́мъ: то́й бо непреста́ннѡ бг҃ꙋ предстоѧ̀, и҆ трист҃ꙋ́ю пѣ́снь воспѣва́ѧ, мо́литъ спасти́сѧ дꙋша́мъ на́шымъ.
Гла́съ в҃. Стꙋді́тово:
Невеще́ственное сꙋщество̀, ᲂу҆́мныхъ си́лъ предста́тельствꙋюще, и҆ трисо́лнечныѧ сла́вы блиста́ньми, свѣтодаю́ще вселе́ннѣй, а҆рхїстрати́зи, непреста́ннымъ гла́сомъ трист҃ꙋ́ю пѣ́снь воспѣва́ете. тѣ́мже моли́тесѧ, спасти́сѧ дꙋша́мъ на́шымъ.
Гла́съ то́йже. А҆рсе́нїево:
Невеще́ственный прⷭ҇то́лъ ѡ҆крꙋжа́юще, ᲂу҆́мнаѧ сꙋщєства̀, бжⷭ҇твеннїи безтѣле́снїи, трист҃ꙋ́ю пѣ́снь прави́телю бг҃ꙋ пла́менными ᲂу҆стна́ми поетѐ: ст҃ы́й бж҃е, ѻ҆́ч҃е безнача́льный. ст҃ы́й крѣ́пкїй, сн҃е собезнача́льный. ст҃ы́й безсме́ртный, є҆диносꙋ́щный дш҃е, ѻ҆ц҃ꙋ̀ и҆ сн҃ꙋ спрославлѧ́емый.
А҆нато́лїа:
Безтѣле́сными ᲂу҆стна́ми, и҆ ᲂу҆́мными ᲂу҆сты̀ а҆́гг҃льстїи чи́ни непреста́нное пѣ́нїе прино́сѧтъ твоемꙋ̀ непристꙋ́пномꙋ бжⷭ҇твꙋ̀, гдⷭ҇и, и҆ ᲂу҆́ми чи́стїи и҆ слꙋжи́телїе твоеѧ̀ сла́вы хва́лѧтъ тѧ̀, гдⷭ҇и, съ ни́миже мїхаи́лъ безтѣле́сный, и҆ гаврїи́лъ, ѕѣлѡ̀ бл҃голѣ́пнѣйшїй, и҆ первостоѧ́телїе го́рнихъ си́лъ, а҆рхїстрати́зи а҆́гг҃льстїи, ᲂу҆чреди́телїе на́ши дне́сь бы́ша: пѣ̑сни пѣ́сней повелѣва́юще на́мъ пѣ́ти непристꙋ́пнѣй сла́вѣ твое́й, чл҃вѣколю́бче, є҆́йже мо́лѧтсѧ непреста́ннѡ за дꙋ́шы на́шѧ.
Сла́ва, гла́съ д҃:
Ѻ҆́гненными ᲂу҆стна́ми пою́тъ тѧ̀ херꙋві́ми, хрⷭ҇тѐ бж҃е, безтѣле́сными же ᲂу҆сты̀ немо́лчнѡ славосло́витъ тѧ̀ а҆рха́гг҃льскїй ли́къ: мїхаи́лъ же а҆рхїстрати́гъ вы́шнихъ си́лъ побѣ́днꙋю пѣ́снь непреста́ннѡ прино́ситъ сла́вѣ твое́й: то́й бо на́съ дне́сь ѡ҆зарѝ къ торжествꙋ̀ свѣ́тломꙋ, возбрѧца́ти досто́йнѣ ѱало́мски хвалꙋ̀ трист҃ꙋ́ю бре́нными ᲂу҆стна́ми, ꙗ҆́кѡ всѧ́чєскаѧ твоегѡ̀ хвале́нїѧ и҆спо́лнишасѧ, и҆ подае́ши мі́рꙋ тѣ́мъ ве́лїю ми́лость.
И҆ ны́нѣ, гла́съ то́йже. Геѡ́ргїа нїкомиді́йскагѡ:
Дне́сь бг҃овмѣсти́мый хра́мъ бцⷣа въ хра́мъ гдⷭ҇ень приво́дитсѧ, и҆ заха́рїа сїю̀ под̾е́млетъ. дне́сь ст҃а̑ѧ ст҃ы́хъ ра́дꙋютсѧ, и҆ ли́къ а҆́гг҃льскїй та́инственнѡ торжествꙋ́етъ. съ ни́миже и҆ мы̀, пра́зднꙋюще дне́сь, съ гаврїи́ломъ возопїи́мъ: ра́дꙋйсѧ, бл҃года́тнаѧ, гдⷭ҇ь съ тобо́ю, и҆мѣ́ѧй ве́лїю ми́лость.
На стїхо́внѣ стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:
А҆́гг҃льски въ мі́рѣ торжествꙋ́юще, ꙳ сꙋ́щемꙋ на прⷭ҇то́лѣ сла́вы бг҃ꙋ сѣдѧ́щемꙋ ꙳ возопїи́мъ пѣ́снь: ꙳ ст҃ъ є҆сѝ ѻ҆́ч҃е нбⷭ҇ный, ꙳ ст҃ъ є҆сѝ соприсносꙋ́щное сло́во, ꙳ ст҃ъ є҆сѝ и҆ дш҃е всест҃ы́й.
Сті́хъ: Творѧ́й а҆́гг҃лы своѧ̑ дꙋ́хи, и҆ слꙋги̑ своѧ̑ пла́мень ѻ҆́гненный.
Нбⷭ҇нымъ пе́рвствꙋѧ въ дерзнове́нїи мно́зѣмъ, ꙳ и҆ предстоѧ̀ прⷭ҇то́лꙋ стра́шномꙋ въ сла́вѣ, ꙳ самови́дче неизрече́нныхъ, ꙳ спаси́ ны, мїхаи́ле, а҆рхїстрати́же, ꙳ сꙋ́щыѧ въ нꙋ́ждахъ бѣ́дъ и҆ напа́стей, ꙳ мл҃твами твои́ми, мо́лимсѧ.
Сті́хъ: Хвали́те є҆го̀ всѝ а҆́гг҃ли є҆гѡ̀, хвали́те є҆го̀ всѧ̑ си̑лы є҆гѡ̀.
Безпло́тныхъ а҆́гг҃лѡвъ пе́рвый є҆сѝ, ꙳ и҆ слꙋжи́тель бж҃е́ственнагѡ свѣтозаре́нїѧ ѻ҆́нагѡ, ꙳ самови́децъ же и҆ таи́нникъ, ꙳ спаси́ ны, мїхаи́ле а҆рхїстрати́же, ꙳ лѣ́тнѡ чтꙋ́щыѧ тѧ̀ благоче́стнѡ, ꙳ и҆ пою́щыѧ трⷪ҇цꙋ вѣ́рнѡ.
Сла́ва, и҆ ны́нѣ, гла́съ и҃. І҆ѡа́нна мона́ха:
Ꙗ҆́кѡ чинонача́льникъ и҆ побо́рникъ, и҆ а҆́гг҃лѡвъ началово́ждь а҆рхїстрати́же, всѧ́кїѧ нꙋ́жды и҆ ско́рби, недꙋ́гѡвъ и҆ лю́тыхъ грѣхѡ́въ свободѝ, вѣ́рнѡ воспѣва́ющыѧ и҆ молѧ́щыѧ тѧ̀, сла́вне, ꙗ҆́вѣ ꙗ҆́кѡ невеще́ственъ невеще́ственнаго зрѧ̀, и҆ непристꙋ́пнымъ свѣ́томъ влⷣчнїѧ сла́вы ѡ҆сїѧ́емь: то́й бо чл҃вѣколю́бнѡ пло́ть на́съ ра́ди ѿ дв҃ы прїѧ́тъ, спастѝ восхотѣ́въ человѣ́чество.
Тропа́рь, гла́съ д҃: Нбⷭ҇ныхъ во́инствъ: Два́жды.
И҆ Бцⷣе дв҃о: є҆ди́ножды:
На ᲂу҆́трени, на Бг҃ъ гдⷭ҇ь, тропа́рь, Нбⷭ҇ныхъ во́инствъ: Два́жды.
Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́ное:
По а҃-мъ стїхосло́вїи сѣда́ленъ, гла́съ а҃. Поⷣ: Гро́бъ тво́й, сп҃се:
Прⷭ҇то́лꙋ стра́шномꙋ предстоѧ́ще при́снѡ, и҆ свѣ́тлыми зарѧ́ми трисо́лнечнагѡ бжⷭ҇тва̀ ѡ҆сїѧ́еми, просвѣти́те ны̀, грѣхо́вный мра́къ ѿгонѧ́ще, ва́шъ собо́ръ пра́зднꙋющыѧ свѣ́тлѡ, и҆ прилѣ́жнѡ моли́те и҆зба́витисѧ на́мъ ѿ бѣ́дъ, пресвѣ́тлїи моли́твєнницы.
Сла́ва, гла́съ то́йже. Подо́бенъ: Ли́къ а҆́гг҃льскїй.
Ли́къ а҆́гг҃льскїй а҆рхїстрати́га и҆мѣ́ѧ бжⷭ҇твеннагѡ мїхаи́ла, съ ни́мъ ст҃ѣ́й трⷪ҇цѣ приноша́етъ пѣ́нїе, ѿ не сꙋ́щихъ бо содѣ́тель всѧ́ческихъ, вѡ́инства ѻ҆гнезра́чныхъ чинѡ́въ сло́вомъ приведѐ.
И҆ ны́нѣ, бг҃оро́диченъ:
Оу҆пова́нїе хрⷭ҇тїа́нъ, прест҃а́ѧ дв҃о, є҆го́же родила̀ є҆сѝ бг҃а, па́че ᲂу҆ма̀ и҆ сло́ва, непреста́ннѡ молѝ съ го́рними си́лами, пода́ти ѡ҆ставле́нїе грѣхѡ́въ на́шихъ всѣ́хъ, и҆ и҆справле́нїе житїѧ̀, вѣ́рою и҆ любо́вїю при́снѡ сла́вѧщымъ тѧ̀.
По в҃-мъ стїхосло́вїи сѣда́ленъ, гла́съ в҃. Поⷣ: Є҆гда̀ снизше́лъ є҆сѝ:
Посредѣ̀ полкѡ́въ а҆́гг҃льскихъ старѣ́йшїй ꙗ҆ви́лсѧ є҆сѝ, мїхаи́ле а҆рхїстрати́же, вы́шнѧго цр҃ѧ̀ непреста́ннѡ молѝ, до́льнихъ мꙋчи́телей горды́ню низложи́ти. и҆ ꙗ҆́кѡ и҆мѣ́ѧ дерзнове́нїе ᲂу҆ прⷭ҇то́ла ѻ҆гнезра́чнагѡ, молѝ за ны̀ непреста́ннѡ рабы̑ твоѧ̑.
Сла́ва, гла́съ д҃. Подо́бенъ: Ско́рѡ предварѝ:
Херꙋві́ми и҆ серафі́ми, многоѻчи̑таѧ а҆рха́гг҃лѡвъ слꙋжи́телей вѡ́инства, со властьмѝ прⷭ҇то́ли, гдⷭ҇ьства, а҆́гг҃ли, си̑лы же и҆ нача̑ла, мо́лѧтъ тѧ̀ творца̀ на́шего и҆ бг҃а и҆ влⷣкꙋ, да не пре́зриши моле́нїѧ люде́й согрѣши́вшихъ, бж҃е многоми́лостиве.
И҆ ны́нѣ, бг҃оро́диченъ:
Дв҃о всенепоро́чнаѧ, ꙗ҆́же пресꙋ́щнаго бг҃а ро́ждшаѧ, со безпло́тными того̀ непреста́ннѡ молѝ, ѡ҆ставле́нїе прегрѣше́нїй, и҆ и҆справле́нїе житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ.
По полѷеле́и сѣда́ленъ, гла́съ и҃. Подо́бенъ: Премꙋ́дрости:
Нбⷭ҇ныхъ чинѡ́въ наста́вникъ, слꙋжи́тель же сла́вы бж҃е́ственныѧ, досто́йнѡ бы́въ повелѣ́нїемъ зижди́телѧ твоегѡ̀, хрⷭ҇тїа́нѡмъ є҆сѝ хода́тай спасе́нный, невеще́ственною твое́ю сла́вою земны̑ѧ назира́ѧ. тѣ́мже по до́лгꙋ восхвалѧ́емъ тѧ̀ всѝ, бжⷭ҇твенное твоѐ дне́сь воспѣва́юще торжество̀, мїхаи́ле а҆рхїстрати́же, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю ст҃о́е твоѐ торжество̀.
Сла́ва, гла́съ д҃. Подо́бенъ: Ско́рѡ предварѝ:
А҆́гг҃льстїи чи́ни со стра́хомъ предстоѧ́тъ прⷭ҇то́лꙋ твоемꙋ̀, влⷣко хрⷭ҇тѐ бж҃е, и҆ и҆̀же ѿтꙋ́дꙋ зарѧ́ми при́снѡ просвѣща́еми, пѣ́снь тѝ немо́лчнѡ побѣ́днꙋю воспѣва́ютъ, и҆́хже свѧще́нными моли́твами ми́ръ мі́рꙋ да́рꙋй, и҆ дꙋша́мъ на́шымъ ве́лїю ми́лость.
И҆ ны́нѣ, бг҃оро́диченъ:
Чтⷭ҇аѧ и҆ всенепоро́чнаѧ и҆ неискꙋсомꙋ́жнаѧ дв҃о мт҃и, ꙗ҆́же є҆ди́на безлѣ́тнаго сн҃а и҆ сло́ва бж҃їѧ въ лѣ́то поро́ждши, сего̀ со безпло́тными честны́ми нбⷭ҇ными си́лами молѝ, дарова́ти на́мъ ѡ҆чище́нїе грѣхѡ́въ, и҆ ве́лїю ми́лость.
Та́же степє́нна, а҃ а҆нтїфѡ́нъ д҃-гѡ гла́са. Прокі́менъ: Творѧ́й а҆́гг҃лы своѧ̑ дꙋ́хи, и҆ слꙋги̑ своѧ̑ пла́мень ѻ҆́гненный. Сті́хъ: Благословѝ, дꙋшѐ моѧ̀, гдⷭ҇а: Всѧ́кое дыха́нїе: Є҆ѵⷢ҇лїе матѳе́а, зача́ло н҃в. Сла́ва: Моли́твами а҆рха́гг҃лѡвъ: И҆ ны́нѣ: Моли́твами бцⷣы:
По н҃-мъ ѱалмѣ̀ стїхи́ра, гла́съ ѕ҃:
А҆́гг҃ли твоѝ, хрⷭ҇тѐ, прⷭ҇то́лꙋ вели́чества во стра́сѣ предстоѧ́ще, и҆ твои́мъ свѣтоли́тїемъ при́снѡ ѡ҆сїѧва́еми, въ вы́шнихъ пѣснопѣ́вцы твоѝ, и҆ совѣ́та твоегѡ̀ слꙋжи́телїе, ѿ тебє̀ низпосыла́еми, даю́тъ просвѣщє́нїѧ дꙋша́мъ на́шымъ.
Канѡ́нъ бцⷣы, со і҆рмосо́мъ на ѕ҃. Гла́съ и҃. І҆рмо́съ по два́жды: Пои́мъ гдⷭ҇еви, прове́дшемꙋ лю́ди своѧ̑: пи́санъ во ѻ҆ктѡ́ихѣ во ѻ҆смо́мъ гла́сѣ: въ недѣ́лю на ᲂу҆́трени тре́тїй канѡ́нъ. И҆ безпло́тныхъ два̀ канѡ́на, на и҃. Пе́рвый канѡ́нъ, творе́нїе і҆ѡа́нна мона́ха, є҆гѡ́же краегране́сїе:
Да торжествꙋ́емъ, бг҃омꙋ́дрїи, похвалꙋ̀ собо́рꙋ безпло́тныхъ.
Гла́съ и҃. Пѣ́снь а҃. І҆рмо́съ:
Пѣ́снь возсле́мъ, лю́дїе, чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще и҆ вопїю́ще: пои́мъ тебѣ̀ є҆ди́номꙋ влⷣцѣ.
Всѝ воспои́мъ вѣ́рнїи, всѧ̑ ᲂу҆правлѧ́ющꙋю невеще́ствєнныѧ го́рнихъ ликѡ́въ чинонача̑лїѧ, трⷪ҇цꙋ несозда́ннꙋю, ст҃ъ, ст҃ъ, ст҃ъ є҆сѝ, вопїю́ще, бж҃е вседержи́телю.
Положи́лъ є҆сѝ тва́рей нача́ло, сꙋщество̀ безпло́тное, тво́рче а҆́гг҃лѡвъ, пречⷭ҇тый тво́й прⷭ҇то́лъ ѡ҆крꙋжа́ющее зва́ти тебѣ̀: ст҃ъ, ст҃ъ, ст҃ъ є҆сѝ, бж҃е вседержи́телю.
Ра́дꙋйсѧ, гаврїи́ле, тайнови́дче бж҃їѧ воплоще́нїѧ, мїхаи́ле же, чинѡ́въ невеще́ственныхъ первостоѧ́телю, непреста́ннѡ зовꙋ́ще: ст҃ъ, ст҃ъ, ст҃ъ є҆сѝ, бж҃е вседержи́телю.
Бг҃оро́диченъ:
Трепе́щꙋ та́инства, хрⷭ҇тѐ, твоегѡ̀ снизхожде́нїѧ, ꙗ҆́кѡ, и҆́же є҆стество́мъ бг҃ъ, прїѧ́лъ є҆сѝ ѿ дв҃ы роди́тисѧ, ꙗ҆́кѡ человѣ́къ, да спасе́ши мі́ръ ѿ рабо́ты проти́внагѡ.
Дрꙋгі́й канѡ́нъ, творе́нїе тогѡ́жде і҆ѡа́нна мона́ха.
Гла́съ то́йже. Пѣ́снь а҃. І҆рмо́съ:
Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.
Оу҆́мныѧ безпло́тныхъ чинѡ́въ ли́ки, пѣ́сньми, ꙗ҆́кѡ слꙋжи́тели бжⷭ҇твенныѧ, прїиди́те, восхва́лимъ, ли́къ совокꙋ́пльше, ѡ҆ на́шемъ спасе́нїи непреста́ннѡ молѧ́щыѧсѧ, и҆ ѡ҆ покаѧ́нїи на́шемъ сра́дꙋющыѧсѧ.
И҆̀же а҆́гг҃лѡвъ началовождѝ, и҆ пред̾избра́ннїи, и҆ чинонача́льницы свѣ́тлїи, безплѡ́тныѧ ᲂу҆мы̀ дне́сь (с. 140) воздви́жꙋтъ къ наверше́нїю пра́здника свѣ́тлыѧ и҆́хъ па́мѧти: съ ни́миже кꙋ́пнѡ ра́дꙋютсѧ человѣ́цы, пѣ́нїе трⷪ҇цѣ приносѧ́ще.
Да возвесели́мсѧ со а҆́гг҃лы дне́сь человѣ́цы, дꙋхо́внѣ въ ра́дости: гаврїи́лъ бо па́ки ны́нѣ благовѣствꙋ́етъ цр҃квей соедине́нїе, и҆ низложе́нїе всѧ́кїѧ проти́вныѧ є҆́реси, въ па́мѧти а҆рхїстрати́гѡвъ.
Бг҃оро́диченъ:
Ражда́еши сꙋ́щее па́че є҆стества̀, пречⷭ҇таѧ, въ тебѣ̀ все́льшеесѧ ѻ҆́ч҃ее сло́во, дх҃омъ ст҃ы́мъ, во двꙋ̀ ᲂу҆́бѡ є҆стества́хъ и҆ хотѣ́нїихъ сꙋ́ща, во ѵ҆поста́си же непрело́жнѡ є҆ди́нѣй, є҆ѧ́же и҆ зра́къ цѣлꙋ́емъ.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Стра́хъ тво́й, гдⷭ҇и, всадѝ въ сердца̀ ра̑бъ твои́хъ, и҆ бꙋ́ди на́мъ ᲂу҆твержде́нїе, тѧ̀ во и҆́стинѣ призыва́ющихъ.
Крѣ́постїю поста́вилъ є҆сѝ, безсме́ртне, си̑льныѧ, соверша́ющыѧ всест҃ꙋ́ю твою̀ во́лю, тебѣ̀ въ вы́шнихъ всегда̀ предстоѧ́щыѧ.
Таи́нники твоегѡ̀ вочл҃вѣ́ченїѧ, и҆ честна́гѡ воста́нїѧ, а҆́гг҃льскїѧ чинонача́льники, хрⷭ҇тѐ, за ны̀ прїимѝ молѧ́щыѧсѧ.
А҆́гг҃лы приста́вилъ є҆сѝ храни́тели человѣ́кѡмъ, ꙗ҆́кѡ бл҃гоꙋтро́бенъ: слꙋжи́тели же показа́лъ є҆сѝ, хрⷭ҇тѐ, спасе́нїѧ твои́хъ ᲂу҆го́дникѡвъ.
Бг҃оро́диченъ:
Неизрече́ннѡ зачала̀ є҆сѝ гдⷭ҇а и҆ сп҃са, бг҃оневѣ́сто, и҆збавлѧ́ющаго ны̀ ѿ лю́тыхъ, тѧ̀ вои́стиннѣ призыва́ющыѧ.
И҆́нъ. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
А҆́гг҃лѡвъ пе́рвѣйшїй, и҆ трⷪ҇цы свѣ́тъ вторы́й, ꙗ҆ви́лсѧ є҆сѝ на́мъ, мїхаи́ле нача́льниче, вѣ́рнѡ благохва́лѧщымъ тѧ̀.
Заре́ю бжⷭ҇твенныѧ бл҃года́ти гаврїи́лъ вѣ́рнѡ и҆спо́лни всю̀ зе́млю, бж҃їе проповѣ́давъ во пло́ти прише́ствїе.
Сопрꙋ́гъ приснопѣва́емый, и҆ свѣтоза́рнаѧ дво́ице невеще́ственнаѧ, свѣ́ты бж҃їѧ вѣ́рнѡ соверша́ющыѧ ва́шꙋ па́мѧть покажи́те.
Бг҃оро́диченъ:
Воспѣ̀ и҆са́їа твоѐ, є҆́же па́че ᲂу҆ма̀, чⷭ҇таѧ, ржⷭ҇тво̀: пою̀ и҆ а҆́зъ, да ѻ҆́нагѡ полꙋчꙋ̀ ѡ҆чище́нїѧ.
Сѣда́ленъ, гла́съ и҃. Подо́бенъ: Повелѣ́нное:
Нбⷭ҇ныхъ нача́льницы, и҆ первостоѧ́телїе высокопресто́льныхъ и҆ стра́шныхъ бжⷭ҇твенныѧ сла́вы, мїхаи́ле и҆ гаврїи́ле а҆рхїстрати́зи, а҆́гг҃лѡвъ чинонача́льницы, со всѣ́ми безпло́тными, ѽ слꙋжи́телїе влⷣчни! ѡ҆ мі́рѣ непреста́ннѡ молѧ́щесѧ, и҆спроси́те ѡ҆ставле́нїе прегрѣше́нныхъ на́ми, и҆ млⷭ҇ть и҆ бл҃года́ть ѡ҆брѣстѝ въ де́нь сꙋ́дный.
Два́жды.
Сла́ва, и҆ ны́нѣ, бг҃оро́диченъ:
Бг҃облагода́тнаѧ, чⷭ҇таѧ, бл҃гослове́ннаѧ, бл҃гоꙋтро́бїѧ ра́ди щедро́тъ и҆зъ тебє̀ ро́ждшагосѧ, съ вы́шними си́лами, и҆ а҆рха́гг҃лы, и҆ всѣ́ми безпло́тными молѝ непреста́ннѡ, пода́ти на́мъ пре́жде конца̀ ми́лостивнѡ проще́нїе грѣхѡ́въ и҆ житїѧ̀ и҆справле́нїе, ꙗ҆́кѡ да ѡ҆брѧ́щемъ ми́лость.
Пѣ́снь д҃. І҆рмо́съ:
Всѣ́лъ є҆сѝ на ко́ни, а҆пⷭ҇лы твоѧ̑, гдⷭ҇и, и҆ прїѧ́лъ є҆сѝ рꙋка́ма твои́ма ᲂу҆зды̑ и҆́хъ, и҆ спасе́нїе бы́сть ѣ҆жде́нїе твоѐ вѣ́рнѡ пою́щымъ: сла́ва си́лѣ твое́й, гдⷭ҇и.
Всѣ́лъ є҆сѝ на а҆́гг҃лы, ꙗ҆́коже на ко́ни, чл҃вѣколю́бче, прїѧ́лъ є҆сѝ рꙋко́ю твое́ю брозды̑ и҆́хъ, и҆ спасе́нїе бы́сть ѣ҆жде́нїе твоѐ непреста́ннѡ вопїю́щымъ: сла́ва си́лѣ твое́й, гдⷭ҇и.
Покрыва́етъ а҆́гг҃лы добродѣ́тель твоѧ̀, чл҃вѣколю́бче, и҆ землѝ и҆сполнѧ́етъ концы̀ твоегѡ̀ сла́внагѡ, безнача́льне, бжⷭ҇твеннагѡ хвале́нїѧ, съ ни́ми тебѣ̀ вопїю́щи: сла́ва си́лѣ твое́й, гдⷭ҇и.
И҆зше́лъ є҆сѝ, ще́дре, на спасе́нїе люде́й твои́хъ, хрⷭ҇тѐ, созыва́еши же дрꙋ́ги, си̑лы твоѧ̑, и҆ весе́лїе бы́сть прише́ствїе твоѐ вѣ́рнѡ тебѣ̀ вопїю́щымъ: сла́ва си́лѣ твое́й гдⷭ҇и.
Бг҃оро́диченъ:
Дв҃а и҆ мт҃и преесте́ственнѡ ꙗ҆ви́ласѧ є҆сѝ, всечⷭ҇таѧ, ꙗ҆́кѡ бг҃а того́жде и҆ чл҃вѣ́ка хрⷭ҇та̀ ро́ждшаѧ, є҆мꙋ́же со стра́хомъ вопїю́тъ а҆́гг҃льскїѧ чи́ни: сла́ва си́лѣ твое́й, гдⷭ҇и.
И҆́нъ. І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Во і҆ерїхѡ́нѣ ꙗ҆ви́сѧ си́лы гдⷭ҇ни а҆рхїстрати́гъ вою́ющемꙋ дре́вле і҆исꙋ́сꙋ наѵи́нꙋ, побѣдотворѧ̀ и҆ побо́рствꙋѧ, мїхаи́лъ вели́кїй, безпло́тныхъ нача́льникъ сы́й, ѿ негѡ́же прїе́мъ си́лꙋ, слꙋга̀ гдⷭ҇ень, копїе́мъ плѣни́въ, ꙗ҆́тъ сопоста́ты.
Нача́льникъ нѣ́когда безпло́тныхъ си́лъ ꙗ҆ви́сѧ, носѧ̀, ча̑да благовѣ́щенїѧ, заха́рїи і҆ере́ю гаврїи́лъ вели́кїй и҆ бжⷭ҇твенный и҆́стиннѡ а҆рха́гг҃лъ: тѣ́мже гла́съ словесѐ, роди́выйсѧ і҆ѡа́ннъ ѻ҆тцꙋ̀ своемꙋ̀ гла́съ проглаго́ланїѧ ѿдае́тъ.
Ра́дꙋютсѧ ра́достїю всѝ концы̀ земні́и дне́сь, честнꙋ́ю па́мѧть пра́зднꙋюще а҆рха́гг҃лѡвъ твои́хъ, бж҃е, мїхаи́ла бжⷭ҇твеннагѡ и҆ гаврїи́ла бг҃омꙋ́драгѡ: сра́дꙋетсѧ же кꙋ́пнѡ и҆ ве́сь а҆́гг҃льскїй чи́нъ, ꙗ҆́кѡ сохранѧ́етсѧ мі́ръ покро́вомъ и҆́хъ.
Бг҃оро́диченъ:
Є҆ди́на чⷭ҇таѧ пребыла̀ є҆сѝ и҆ по ржⷭ҇твѣ̀, є҆ди́на то́кмѡ ꙗ҆ви́ласѧ є҆сѝ безмꙋ́жнаѧ, млеко́мъ пита́ющаѧ сло́во ѻ҆́ч҃ее и҆́стинное, дх҃омъ ст҃ы́мъ прїе́мшее ра́бїй зра́къ по на́мъ, дв҃о бцⷣе, є҆го́же, бжⷭ҇твенное чтꙋ́ще зра́ка подо́бїе, почита́емъ.
Пѣ́снь є҃. І҆рмо́съ:
Ѿ но́щи невѣ́дѣнїѧ, по дꙋшелови́тельномꙋ пꙋтѝ при́снѡ блꙋдѧ́щаго, свѣ́томъ ра́зꙋма твоегѡ̀, гдⷭ҇и, преднаставлѧ́ѧ мѧ̀, на стезю̀ за́повѣдей твои́хъ напра́ви.
Невозвра́тнымъ жела́нїемъ при́снѡ къ высотѣ̀, къ тебѣ̀, хрⷭ҇тѐ, носи́ми, кра́йнѣйшемꙋ всѣ́хъ жела́нїй, а҆́гг҃льскїѧ си̑лы непреста́ннѡ тѧ̀ сла́вѧтъ.
Ты̀ ᲂу҆́мныѧ по сꙋществꙋ̀, нетлѣ̑нныѧ благода́тїю твое́ю, хрⷭ҇тѐ, ᲂу҆стро́илъ є҆сѝ пѣснопѣ́вцы твоегѡ̀ вели́чества, а҆́гг҃лы твоѧ̑, по ѻ҆́бразꙋ содѣ́лавъ, непостижи́ме.
Ты̀ непреклѡ́нны на го́ршее, къ тебѣ̀ приближе́нїемъ, хрⷭ҇тѐ, сохрани́лъ є҆сѝ твоѧ̑ слꙋги̑, и҆сто́чникъ бо бла́гости ты̀ є҆сѝ, благотвори́ши досто́йнѡ тебѣ̀ слꙋжа́щыѧ.
Бг҃оро́диченъ:
Оу҆мерщвле́ннꙋю мою̀ дꙋ́шꙋ страстьмѝ ме́рзскими, всенепоро́чнаѧ, ѡ҆живѝ, жи́зни храни́телѧ ро́ждшаѧ, и҆ къ стезѝ вѣ́чнѣй и҆ блаже́ннѣй жи́зни ᲂу҆пра́ви.
И҆́нъ. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Непокорѧ́ющꙋсѧ дре́вле бж҃їимъ неизречє́ннымъ и҆ бжⷭ҇твєннымъ чꙋдесє́мъ, валаа́мꙋ волхвꙋ̀, на распꙋ́тїи а҆́гг҃лъ ѻ҆слꙋ̀ ꙗ҆ви́всѧ, стра́шнѡ ѡ҆бличѝ, и҆ слове́сно живо́тное показа́въ, є҆стества̀ премѣнѝ позна́нїе.
Ꙗ҆́тꙋ бы́вшꙋ петрꙋ̀, и҆ въ темни́цѣ пребыва́ющꙋ, а҆́гг҃лъ, ꙗ҆ви́сѧ бж҃їй, ѿ рꙋ́къ и҆́рѡдовыхъ, и҆ ᲂу҆́зъ и҆ сме́рти и҆збавлѧ́ѧ. тѣ́мже, прїиди́те всѝ, ꙗ҆́кѡ дꙋ́шъ храни́тели бжⷭ҇твєнныѧ, мꙋ̑дрыѧ а҆рха́гг҃лы да почти́мъ.
Бра́ней крамѡлы̀, а҆́гг҃ли, а҆рха́гг҃ли, бжⷭ҇твєнныѧ си̑лы бж҃їѧ, и҆ цр҃кѡ́вныѧ є҆́рєси, и҆ всѧ̑ собла́зны ва́шими разрѣши́те къ бг҃ꙋ при́сными мольба́ми, и҆ на́съ въ ми́рѣ соблюди́те.
Бг҃оро́диченъ:
Во двꙋ̀ сꙋщества́хъ є҆ди́наго тѧ̀ вѣ́мы бг҃а тва́ри, дѣ́йствы ѻ҆бѣ́ма и҆ хотѣ̑нїи, сꙋ́ща несли́тна, сн҃а бж҃їѧ, ѿ жены̀ пло́ть прїи́мша, є҆ѧ́же ѻ҆́бразъ почита́емъ на дщи́цахъ.
Пѣ́снь ѕ҃. І҆рмо́съ:
І҆ѡ́нꙋ въ ки́тѣ, гдⷭ҇и, є҆ди́наго всели́лъ є҆сѝ, мене́ же свѧ́заннаго мре́жами вра́жїими, ꙗ҆́кѡ ѿ тлѝ ѻ҆́наго, спасѝ.
Бг҃олѣ́пнѣ ѿ не сꙋ́щихъ, гдⷭ҇и, сло́вомъ твои́мъ приве́лъ є҆сѝ сꙋщєства̀ нбⷭ҇ныхъ, безсме́ртныхъ во́инствъ свѣтови̑дны ты́ѧ содѣ́ловаѧ.
Таи́нницы честні́и бж҃їѧ хвале́нїѧ бы́сте, безпло́тнїи, гра́ждане нбⷭ҇ныѧ и҆ бжⷭ҇твенныѧ и҆́стиннѡ ски́нїи, творцꙋ̀ досто́йнѡ слꙋжа́ще.
Безпло́тныхъ чи́ни ᲂу҆́мнїи тѧ̀, сн҃е бж҃їй пребезнача́льный, хва́лѧтъ непреста́ннѡ, и҆ славосло́вѧтъ, ꙗ҆́кѡ творца̀ и҆ созда́телѧ всѧ́ческихъ.
Бг҃оро́диченъ:
Со ѻ҆ц҃е́мъ въ вы́шнихъ, пречⷭ҇таѧ, безнача́льнѣ сѣдѧ́щаго на ѡ҆б̾ѧ́тїихъ твои́хъ восклони́ти сподо́биласѧ є҆сѝ: є҆го́же на́мъ пода́ждь, чⷭ҇таѧ, рабѡ́мъ твои̑мъ, ми́лостива.
И҆́нъ. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Ꙗ҆́кѡ ѻ҆́гнь, и҆ пла́мень, и҆ свѣ́тъ, безплѡ́тныѧ сꙋ́щыѧ, ѿ веще́ственныѧ тлѝ ᲂу҆мо́мъ восперѧ́еми, бре́нными ᲂу҆стна́ми невеще́ствєнныѧ со стра́хомъ пѣ́сньми да почти́мъ.
Оу҆мертви́те страсте́й бꙋ̑ри, а҆рха́гг҃ли, и҆ ᲂу҆тиши́те съ ни́ми возмꙋщє́нїѧ всѧ̑ на вѣ́рꙋ, ст҃і́и трⷪ҇цы сꙋ́ще ѻ҆гнезра́чнїи а҆рхїстрати́зи.
А҆рха́гг҃ли бж҃їи, безпло́тныхъ нача́льницы, (с. 145) предста́тельствомъ ва́шимъ ѿ всѧ́кїѧ є҆́реси на́съ сохрани́те, мїхаи́ле, нача́льниче, и҆ гаврїи́ле, а҆рхїстрати́зи.
Бг҃оро́диченъ:
И҆зъ ᲂу҆тро́бы ꙗ҆ви́лсѧ є҆сѝ во́лею, ѿ неискꙋсомꙋ́жныѧ воплоща́емь, безпло́тенъ сы́й, ꙗ҆́кѡ бг҃ъ, хрⷭ҇тѐ, плотоно́сецъ же, ꙗ҆́кѡ чл҃вѣ́къ, бы́лъ є҆сѝ: є҆гѡ́же подо́бїѧ, вѣ́рнїи, ви́дъ почита́емъ.
Конда́къ, гла́съ в҃:
А҆рхїстрати́зи бж҃їи, слꙋжи́телїе бж҃е́ственныѧ сла́вы, а҆́гг҃лѡвъ нача́льницы и҆ человѣ́кѡвъ наста́вницы, поле́зное на́мъ проси́те и҆ ве́лїю ми́лость, ꙗ҆́кѡ безпло́тныхъ а҆рхїстрати́зи.
І҆́косъ:
Ре́клъ є҆сѝ, чл҃вѣколю́бче, въ писа́нїихъ твои́хъ, мно́жествꙋ ра́доватисѧ а҆́гг҃лѡвъ на нб҃сѝ ѡ҆ человѣ́цѣ є҆ди́номъ ка́ющемсѧ, безсме́ртне. тѣ́мже мы̀, и҆̀же въ беззако́нїихъ, безгрѣ́шне, є҆ди́не сердцевѣ́дче, тѧ̀ моли́ти всегда̀ дерза́емъ, ꙗ҆́кѡ бл҃гоꙋтро́бнаго, ᲂу҆ще́дрити и҆ низпосла́ти недостѡ́йнымъ ᲂу҆миле́нїе, влⷣко, подаѧ́й на́мъ проще́нїе: ѡ҆ всѣ́хъ бо на́съ мо́лѧтсѧ тебѣ̀ безпло́тныхъ а҆рхїстрати́зи.
Пѣ́снь з҃. І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Свѣ́ты ꙗ҆ви́лъ є҆сѝ, ще́дре, а҆́гг҃лѡвъ твои́хъ невеще́ственное сꙋщество̀, неизрече́ннагѡ свѣ́та и҆сполнѧ́еми непреста́ннѡ, бл҃гослове́нъ є҆сѝ, зовꙋ́щыѧ, бж҃е, во вѣ́ки.
Є҆мꙋ́же предстоѧ́тъ непреста́ннѡ, слꙋжа́ще тмы̑ а҆́гг҃лѡвъ, лица́ же зрѣ́ти не терпѧ́тъ зрѣ́нїѧ, бл҃гослове́нъ є҆сѝ, зовꙋ́ще, гдⷭ҇и бж҃е, во вѣ́ки.
Сло́вомъ твои́мъ ѵ҆поста́снымъ а҆́гг҃льское є҆стество̀ содѣ́лалъ є҆сѝ: ѡ҆свѧти́въ же бжⷭ҇твеннымъ дх҃омъ, трⷪ҇цꙋ бг҃осло́вити наꙋчи́лъ є҆сѝ, бж҃е, во вѣ́ки.
Трⷪ҇ченъ:
Трѝ ᲂу҆́бѡ ᲂу҆́мствꙋюще ѵ҆поста̑си, неѡпи́санное сла́вимъ сꙋщество̀, ѻ҆ц҃а̀, сло́ва со дх҃омъ, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
И҆́нъ. І҆рмо́съ:
Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.
Съ ли́ки безпло́тныхъ, и҆ человѣ́ческїй ро́дъ, прїиди́те, поклони́мсѧ, въ благознамени́тый де́нь се́й па́мѧть соверша́юще мꙋ́дрыхъ а҆рха́гг҃лѡвъ хрⷭ҇то́выхъ, ст҃ъ, ст҃ъ, ст҃ъ пою́ще, бж҃е ѻ҆тє́цъ на́шихъ.
Ꙗ҆́кѡ страннолюби́вїи дре́вле, а҆враа́мъ бг҃ови́децъ и҆ лѡ́тъ сла́вный ᲂу҆чреди́ша а҆́гг҃лы, и҆ ѡ҆брѣто́ша ѻ҆бще́нїе со а҆́гг҃лы, зовꙋ́ще: ст҃ъ, ст҃ъ, ст҃ъ є҆сѝ, бж҃е ѻ҆тє́цъ на́шихъ.
Манѡ́ю до́блественномꙋ и҆ тѡві́тꙋ премꙋ́дромꙋ ꙗ҆ви́шасѧ а҆́гг҃ли, воздаю́ще натрижнє́нїѧ житїѧ̀ по досто́инствꙋ: и҆ ѻ҆трокѡ́въ а҆́гг҃лъ ᲂу҆гасѝ пла́мень и҆ногда̀, въ пещѝ ѻ҆́гненнѣй сꙋ́щихъ.
Бг҃оро́диченъ:
Всѐ на́ше по сꙋществꙋ̀ ѿ дв҃ы поне́слъ є҆сѝ, кромѣ̀ и҆змѣне́нїѧ, і҆и҃се, є҆стествы̀ сꙋгꙋ́ба, но є҆ди́наго ѵ҆поста́сїю, ѻ҆ч҃ески тѧ̀ проповѣ́дꙋемъ: є҆гѡ́же и҆ ви́дъ вѣ́рнѡ почита́емъ, и҆з̾ѡбразꙋ́юще.
Пѣ́снь и҃. І҆рмо́съ:
На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.
А҆́гг҃льскомꙋ поревнꙋ́имъ житїю̀, и҆ мы̑сли впери́мъ къ высотѣ̀: и҆ съ ни́ми невеще́ственнѡ воспои́мъ гдⷭ҇а, пою́ще и҆ превозносѧ́ще во всѧ̑ вѣ́ки.
Лико́вствєнницы ликова́нїѧ нбⷭ҇нїи, прⷭ҇то́лъ ѡ҆бстоѧ́ще сла́вы, ѻ҆́крестъ бг҃а же всегда̀ ѡ҆браща́ющесѧ, а҆́гг҃ли пою́тъ и҆ превозно́сѧтъ є҆го̀ во всѧ̑ вѣ́ки. (с. 147)
Невеще́ственнагѡ ѻ҆гнѧ̀ творѧ́щей пла́мень, на высотѣ̀ непреста́ннѡ слꙋжа́щыѧ, и҆ а҆́гг҃лы дꙋ́хи ꙗ҆влѧ́ющей, трⷪ҇цѣ покланѧ́емсѧ и҆ славосло́вимъ во всѧ̑ вѣ́ки.
Бг҃оро́диченъ:
Є҆мꙋ́же на нб҃сѝ предстоѧ́тъ съ тре́петомъ тмы̑ а҆́гг҃лъ и҆ а҆рха̑гг҃лъ, того̀ на ѡ҆б̾ѧ́тїихъ носи́ти сподо́биласѧ є҆сѝ, бцⷣе: молѝ спасти́сѧ славосло́вѧщымъ є҆го̀ во всѧ̑ вѣ́ки.
И҆́нъ. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Нача́льникъ а҆́гг҃лѡвъ бы́сть мїхаи́лъ а҆рха́гг҃лъ: но сла́витсѧ съ ни́мъ свѣтлѣ́е таи́нникъ бл҃года́ти, и҆ дв҃ы ѡ҆брꙋчи́тель честны́й, воево́да безпло́тныхъ, досто́йнѡ ра́дость предвозвѣща́ѧ гаврїи́лъ вопїю́щымъ: лю́дїе, превозноси́те хрⷭ҇та̀ во всѧ̑ вѣ́ки.
А҆́гг҃льскїѧ чи́ны въ разли́чномъ зра́цѣ ᲂу҆ви́дѣвъ і҆езекі́иль, предсказꙋ́ѧ, проповѣ́даше: въ ни́хже шестокри́льнїи серафі́ми предстоѧ́хꙋ, и҆ херꙋві́ми многоѻчи́тїи ѡ҆крꙋжа́хꙋ, съ ни́миже а҆рха́гг҃лы пресвѣ̑тлыѧ зрѧ́ше, хрⷭ҇та̀ славосло́вѧщыѧ во всѧ̑ вѣ́ки.
Ꙗ҆́кѡ стра́шно прише́ствїе втора́гѡ сѣда́лища твоегѡ̀, ꙗ҆вленнотворѧ̀ данїи́лъ, предглаго́лаше: ꙗ҆́кѡ прⷭ҇то́ли поста́вишасѧ, и҆ ве́тхїй сѣдѧ́ше, и҆ тмы̑ а҆́гг҃лѡвъ ввожда́ше, со стра́хомъ предстоѧ́щыѧ и҆ гла̑сы немо́лчными вопїю́щыѧ трⷪ҇цѣ во всѧ̑ вѣ́ки.
Бг҃оро́диченъ:
Ѻ҆ц҃ꙋ̀ и҆ дх҃ꙋ є҆диносꙋ́щное сло́во, во́лею ꙗ҆ви́сѧ и҆ на́мъ и҆зъ дв҃ы соѻбра́зенъ, не смѣси́въ въ дрꙋ́гъ дрꙋ́га, ꙗ҆̀же стра́шнагѡ соедине́нїѧ: є҆ди́нъ бо и҆ то́йжде во ѻ҆бои́хъ показꙋ́етсѧ, въ двꙋ̀ сꙋщества́хъ и҆ є҆ди́ной ѵ҆поста́си: є҆гѡ́же ны́нѣ подо́бїѧ ѻ҆́бразꙋ покланѧ́емсѧ.
Пѣ́снь ѳ҃. І҆рмо́съ:
Оу҆ста́вы прешла̀ є҆сѝ є҆стества̀, содѣ́телѧ заче́нши и҆ гдⷭ҇а, и҆ две́рь спасе́нїѧ мі́рови была̀ є҆сѝ: тѣ́мъ тѧ̀, бцⷣе, непреста́ннѡ велича́емъ.
Тѧ̀, неизрече́ннѡ соедини́вшаго нбⷭ҇нымъ, хрⷭ҇тѐ, земна̑ѧ и҆ є҆ди́нꙋ це́рковь соверши́вша а҆́гг҃лѡвъ и҆ человѣ́кѡвъ, непреста́ннѡ велича́емъ.
А҆́гг҃ли же и҆ а҆рха́гг҃ли, престо́ли, вла̑сти и҆ гдⷭ҇ства, нача̑ла же и҆ си̑лы, херꙋві́ми и҆ серафі́ми, съ бцⷣею ѡ҆ мі́рѣ моли́тесѧ.
Всѣ́хъ предста́телїе показꙋ́ющїисѧ, мїхаи́лъ съ гаврїи́ломъ, посѣти́те ѿ любвѐ чтꙋ́щыѧ всепра́зднственнꙋю па́мѧть ва́шꙋ и҆ вѣ́рнѡ воспѣва́ющыѧ: спаса́йте ѿ всѧ́кагѡ ѡ҆бстоѧ́нїѧ.
Бг҃оро́диченъ:
Ра́дꙋйсѧ, ст҃а́ѧ бг҃оневѣ́сто. ра́дꙋйсѧ, свѣ́тъ мі́рꙋ ро́ждшаѧ вѣ̑рнымъ. ра́дꙋйсѧ, стѣно̀ и҆ покро́ве всѣ́хъ на́съ: бг҃а, ꙗ҆́кѡ бл҃годѣ́телѧ, за ны̀ непреста́ннѡ молѝ.
И҆́нъ. І҆рмо́съ:
Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.
Недꙋ́гꙋющихъ и҆ пла́вающихъ и҆ сꙋ́щихъ въ нꙋ́ждахъ ко спасе́нїю побѡ́рницы ꙗ҆ви́стесѧ, безпло́тныхъ пе́рвїи мїхаи́ле и҆ гаврїи́ле.
Си́лъ и҆ прⷭ҇то́лѡвъ бжⷭ҇твенныхъ слико́вственникъ, ꙗ҆́кѡ воево́да а҆́гг҃льскїй и҆ таи́нникъ бж҃їй, ѡ҆ на́съ сп҃сꙋ, гаврїи́ле, моли́сѧ.
Ꙗ҆́кѡ храни́телїе мі́ра и҆ цр҃кве и҆ чинонача́льницы вы́шнихъ си́лъ, ѡ҆ на́съ сп҃са ᲂу҆моли́те.
Бг҃оро́диченъ:
Согла́снѡ, бцⷣе, тѧ̀ славосло́вимъ, ꙗ҆́кѡ ѿ страсте́й и҆ бѣ́дъ спаса́еши ны̀, и҆ на̑ша молє́нїѧ во благи́хъ и҆сполнѧ́еши.
Свѣти́ленъ. Подо́бенъ: Дх҃омъ во ст҃и́лищи:
Ѻ҆́гненныхъ, а҆рхїстрати́же, слꙋ́гъ предста́тельство ѿ ѻ҆ц҃а̀ прїѧ́лъ є҆сѝ, мїхаи́ле, свѣ́тѡвъ: тѣ́мъ и҆ сїѧ́нїе тогѡ̀ сла́вы сїѧ́ющее и҆́маши, ѡ҆крꙋ́гъ пречⷭ҇тагѡ престо́ла ты̀ предстоѧ̀, ꙗ҆́кѡ пе́рвый невеще́ственныхъ чинѡ́въ.
Сла́ва: Подо́бенъ: Со ᲂу҆ченики̑:
Невеще́ственныхъ си́лъ, а҆рха̑гг҃лъ и҆ а҆́гг҃лъ, гдⷭ҇ьствъ и҆ престѡ́лъ, и҆ нача̑лъ предста́тель предъ бг҃омъ постоѧ́нный, а҆рхїстрати́же бжⷭ҇твенне, мїхаи́ле пресла́вне: нестерпи́момꙋ бо престо́лꙋ предстоѧ́й, покры́й, соблюдѝ, сохранѝ и҆ спасѝ всѧ̑, вѣ́рою тѧ̀ почита́ющыѧ, мїрска́го предста́телѧ.
И҆ ны́нѣ, бг҃оро́диченъ:
Честнѣ́йшаѧ є҆сѝ херꙋві̑мъ сла́вныхъ и҆ серафі̑мъ, всепѣ́таѧ, стра́шныхъ безъ сравне́нїѧ сла́внѣйшаѧ, и҆ всѣ́хъ ст҃ы́хъ а҆́гг҃лъ ст҃ѣ́йшаѧ, пречⷭ҇таѧ: зижди́телѧ бо всѣ́хъ пло́тски неизрече́ннѡ родила̀ є҆сѝ, бцⷣе: є҆го́же молѝ, рабѡ́мъ твои̑мъ разрѣше́нїе дарова́ти прегрѣше́нїй.
На хвали́техъ стїхи̑ры, на д҃, гла́съ а҃. Подо́бенъ: Нбⷭ҇ныхъ чинѡ́въ:
Нбⷭ҇ныхъ чинѡ́въ ꙗ҆́кѡ преднача́льника ꙳ и҆ сꙋ́щихъ на землѝ человѣ́кѡвъ крѣ́пкаго тѧ̀ предста́телѧ, ꙳ храни́телѧ же и҆ и҆зба́вителѧ ꙳ воспѣва́емъ вѣ́рнѡ, ꙳ мїхаи́ле а҆рхїстрати́же, ꙳ молѧ́щесѧ, всѧ́кїѧ тлетво́рныѧ болѣ́зни на́съ и҆зба́вити.
Чинонача́льникъ сы́й го́рнихъ бжⷭ҇твенныхъ си́лъ ꙳ дне́сь созыва́етъ человѣ́чєскїѧ ли́ки, ꙳ є҆ди́нъ со а҆́гг҃лы свѣ́тлый пра́здникъ соста́вити, ꙳ собо́ра и҆́хъ бжⷭ҇твеннагѡ, и҆ кꙋ́пнѡ пѣ́снь бг҃ꙋ ꙳ воспѣ́ти трист҃ꙋ́ю.
Подъ кро́въ бжⷭ҇твенныхъ ны̀ кри́лъ твои́хъ ꙳ прибѣга́ющыѧ вѣ́рою, ꙳ мїхаи́ле, бжⷭ҇твенный ᲂу҆́ме, ꙳ соблюда́й и҆ покрыва́й чрезъ всѐ житїѐ: ꙳ и҆ въ ча́съ, а҆рха́гг҃ле, сме́ртный, стра́шный, ты̀ предста́ни помо́щникъ ꙳ всѣ̑мъ на́мъ благопрїе́мнѣйшїй.
Гла́съ д҃. Є҆фре́ма карі́йскагѡ:
Трисо́лнєчныѧ лꙋчѝ бжⷭ҇твеннымъ свѣ́томъ ѡ҆сїѧва́еми, а҆рхїстрати́зи, невеще́ственныхъ ѡ҆зарѧ́ете чинонача̑лїѧ: ꙗ҆́коже свѣ́тъ бѣлоѻбра́знѣ показꙋ́ющесѧ въ вы́шнихъ, ѻ҆́гнь ѡ҆блиста́ете въ мі́рѣ непристꙋ́пнагѡ бжⷭ҇тва̀. тѣ́мъ и҆ трисвѧтꙋ́ю пѣ́снь пла́менными ᲂу҆стна́ми непреста́ннѡ поетѐ: ст҃ъ, ст҃ъ, ст҃ъ є҆сѝ, бж҃е на́шъ сла́ва тебѣ̀.
Сла́ва, гла́съ є҃:
И҆дѣ́же ѡ҆сѣнѧ́етъ бл҃года́ть твоѧ̀, а҆рха́гг҃ле, ѿтꙋ́дꙋ дїа́волѧ прого́нитсѧ си́ла: не терпи́тъ бо свѣ́та твоегѡ̀ ви́дѣти спады́й денни́ца. тѣ́мъ мо́лимъ тѧ̀, ѻ҆гненѡ́сныѧ є҆гѡ̀ стрѣ́лы, ꙗ҆̀же на ны̀ дви̑жимыѧ, ᲂу҆гасѝ хода́тайствомъ твои́мъ, и҆збавлѧ́ѧ на́съ ѿ собла́знѡвъ є҆гѡ̀, достохва́льный мїхаи́ле а҆рхїстрати́же.
И҆ ны́нѣ, бг҃оро́диченъ:
Блажи́мъ тѧ̀, бцⷣе дв҃о, и҆ сла́вимъ тѧ̀ вѣ́рнїи по до́лгꙋ, гра́дъ непоколеби́мый, стѣ́нꙋ неѡбори́мꙋю, тве́рдꙋю предста́тельницꙋ и҆ прибѣ́жище дꙋ́шъ на́шихъ.
Славосло́вїе вели́кое, и҆ ѿпꙋ́стъ.
На лїтꙋргі́и Бл҃жє́нна а҃-гѡ канѡ́на, пѣ́снь г҃: и҆ в҃-гѡ, пѣ́снь ѕ҃. Прокі́менъ, гла́съ д҃: Творѧ́й а҆́гг҃лы своѧ̑ дꙋ́хи, и҆ слꙋги̑ своѧ̑ пла́мень ѻ҆́гненный. Сті́хъ: Благословѝ, дꙋшѐ моѧ̀, гдⷭ҇а. А҆пⷭ҇лъ ко є҆вре́ємъ, зача́ло т҃є. А҆ллилꙋ́їа, гла́съ в҃: Хвали́те гдⷭ҇а всѝ а҆́гг҃ли є҆гѡ̀. Є҆ѵⷢ҇лїе лꙋкѝ, зача́ло н҃а. Прича́стенъ: Творѧ́й а҆́гг҃лы своѧ̑ дꙋ́хи: