В 21-й день

Преподо́бнаго отца нашего Иларио́на Великаго

В той же день. Святителя Иларио́на, епископа Мегли́нскаго

В той же день. Преподобнаго Иларио́на схимника, в Дальних пещерах почивающаго

В той же день. Преподобнаго отца нашего Иларио́на Гдовскаго, Псковоезерскаго

На Го́споди, воззва́х: стихиры на 6, глас 4.

Подо́бен: Зва́нный свыше:

Кроток душею и сердцем,/ егда́ тя Боже́ственное раче́ние уязви́/ и священными восхождении отлучи́тися мирски́х смущений покори́,/ тогда вооружи́вся силою Креста,/ на демоны устремился еси, всеблаженне, боре́нием/ и сплел еси победы диади́му./ И ны́не водворя́ешися во све́тлостех святых,/ с нимиже и нам испроси просвещение, и мир, и согрешений избавление.

Светода́тельными зарями/преславно, отче достославне, исцелений твоих/ просвеща́еши подсо́лнечную,/ неду́гов разреша́яй тьму глубочайшую,/ тем тя солнце иное познава́ем/ и мона́шествующих утверждение,/ и наставника спасаемых Божественным Ду́хом./ И ны́не память совершаем твою́ светлую и спаси́тельную, Иларио́не,/ прегрешений тобою разрешение прие́млюще.

Воздержанием телесныя страсти, отче,/ покорил еси разумному души́/ и, безстрастия крилы́ укра́шен,/ благодать приял еси цели́ти, преподобне, человеков не́мощи,/ и отгони́ти духо́в лука́вствия,/ и спасати притекающия к тебе́./ Темже ли́цы тя блажа́т мона́шествующих, достославне,/ и почитает вся тварь, Иларионе, подвиги твоя.

Сла́ва, глас 2. Анатолия:

От юности твоея́ нося совершенства мудрость,/ возложи́в на себе, Иларионе, и́го Христово/ и житию́ поревнова́л еси Божественнаго Анто́ния,/ равными ме́рами доброде́тели подо́бяся,/ изсуши́л еси плоть, ска́чущу, аки жребя́,/ я́ко до́лжно бе души́ покори́ти,/ постное течение совершив./ Но, о блаженнейше отче и чудоде́йственне Богоно́се,/ память твою́ любовию совершающим/ проси очищения и ве́лия милости.

И ны́не, Богоро́дичен или́ Крестобогоро́дичен.

Подо́бен: Егда́ от Дре́ва:

Древу Кре́стному Тя, Иисусе, пригвожде́на зря́щи,/ Неискусобра́чная, плачущи, глаго́лаше:/ Чадо Сладкое, почто́ оставил еси Мене, рождшую Тя, едину,/ Све́те неприступный Пребезнача́льнаго Отца,/ потщи́ся и просла́вися, я́ко да славу получа́т Божественную,/ иже Божественныя страсти Твоя сла́вящии.

На стиховне Окто́иха.

Сла́ва, глас 8. Самогла́сен:

Духа Свята́го исполнен быв преподобный Иларио́н,/ де́монския ко́зни упраздни́,/ кресто́м бо вооружи́вся и в нем дерза́я,/ вся неду́ги словом исцели,/ душевныя убо страсти,/ теле́с же всякую я́зю./ Того моли́твами, Христе,/ низпосли́ нам мир я́ко Человеколюбец.

И ны́не, Богоро́дичен или́ Крестобогоро́дичен.

Подо́бен: О преславнаго чудесе:

Ю́ница Нескве́рная,/ Юнца́ видящи на Древе пригвожда́ема волею,/ рыдающи жа́лостне:/ увы́ Мне, вопия́ше, любимейшее Чадо,/ что Ти сонм воздаде́ безблагода́тный еврейский,/ хотя Мя обезча́дствовати от Тебе́, Вселюбе́зне.

Тропа́рь, глас 8:

Слез твоих тече́ньми пусты́ни безплодное возде́лал еси/ и, иже из глубины́ воздыха́ньми, во сто трудо́в уплодоноси́л еси,/ и был еси светильник вселенней, сияя чудесы́,/ Иларионе, отче наш:/ моли Христа Бога спастися душа́м нашим.

Сла́ва, ин тропа́рь, глас 8:

Я́ко и́ноков утверждение, наставник же гра́ждан пустынных,/ и чудотворец благодатию Великому Антонию подо́бяся,/ помощник в страсте́х бе́дствующим неотступен, Иларионе отче наш,/ моли за чтущия святую память твою́.

И ны́не, Богоро́дичен или́ Крестобогоро́дичен.

НА У́ТРЕНИ

Оба канона Окто́иха, без мученичнов, и свята́го на 6, егoже краегране́сие: Светлость пою, всеблаженне, твоих чудес.

Феофа́ново. Глас 2

Песнь 1

Ирмо́с: Во глубине́ постла́ иногда/ фараони́тское всево́инство Преоруже́нная Сила,/ Вопло́щшееся же Слово всезлобный грех потреби́ло есть,/ препрославленный Господь славно бо прославися.

Светоно́сное и светови́дное житие́ твое́, блаженне,/ прера́достно благохвали́ти усе́рдствующа,/ твоея́ светлости ти́хостию просвети́ мя, молюся,/ и греха́, отче, уныние отжени́.

Всенра́вно, блаженне, к Бо́гу, радуяся, приступи́л еси,/ вне плоти и мира быв,/ и ум нему́тен, утвержден воздержанием, соблюл еси,/ Божественным безстра́стием отсю́ду присвоя́яся.

Светлыми ты заря́ми просвещаемь Безначальнаго и Несозда́ннаго Божества́,/ о́тча небрегл еси зловерия/ и многомяте́жнаго невежества того отврати́вся,/ Единей Троице сочетался еси.

Богоро́дичен:

Возсия́вый Солнце из Тебе́, Мати Присноде́во,/ из Отца прежде век Неви́димый,/ и видимым же преславно опису́емь телом,/ благочестия светом человеки просвети́л есть.

Песнь 3

Ирмо́с: На ка́мени мя веры утверди́в,/ разшири́л еси уста́ моя на враги моя,/ возвесели́бося дух мой, внегда пе́ти:/ несть свят, я́коже Бог наш,/ и несть праведен па́че Тебе́, Го́споди.

Ядовитых страсте́й востания,/ лечбо́ю по́стничества обложе́н,/ изсушил еси, приснопа́мятне, взывая:/ несть свят, я́коже Бог наш,/ и несть праведен па́че Тебе́, Го́споди.

Кожныя ме́ртвенныя ри́зы острога́в ноже́м воздержания,/ истка́л еси ризу спасения,/ вопия́ Творцу твое́му:/ Ты еси Бог наш,/ и несть свят па́че Тебе́, Го́споди.

Укрепля́емь надеждею вечных/ и Бо́гу приводи́мь, Богоносе, дла́ньми Богомудраго Антония,/ егoже подража́я, светильник был еси,/ преславными чудесы́ светя́ся, преподобне.

Богоро́дичен:

Иже вся вообрази́вый хотением Боже́ственным,/ в человека вообрази́тися сподо́бися,/ созида́яся во утробе Твое́й, Богородице./ Емуже ны́не зовем:/ Ты еси Бог наш,/ и несть праведен, па́че Тебе́, Го́споди.

Седален, глас 8.

Подо́бен: Премудрости:

Антония Боже́ственнаго духовне доброде́тельному житию поревновав,/ на ра́мена твоя взял еси крест Господа твоего,/ оставив жития́ все попече́ние/ и страсти умертвив, ду́хом пожи́л еси./ Тем и тварь преславными исполнил еси чудесы́, преподобне,/ Духа благодатию, Иларио́не, отче наш,/ моли Христа Бога грехо́в оставление дарова́ти/ чтущим любовию святую память твою́.

Сла́ва, и ны́не, Богоро́дичен:

Я́ко Деву и Едину в жена́х/ Тя, без Се́мене Рождшую Бога пло́тию,/ вси ублажаем ро́ди человечестии,/ огнь бо всели́ся в Тя Божества́/ и я́ко Младенца дои́ши Зижди́теля и Господа./ Тем Ангельский и человеческий род/ достойно славим пресвятое Рождество Твое́ и согласно вопием Ти:/ моли Христа Бога прегрешений оставле́ние дарова́ти/ покланяющимся верою пресвятому Рождеству Твое́му.

Крестобогоро́дичен:

А́гнца,и Пастыря, и Изба́вителя/ А́гница зря́щи на Кресте́, восклица́ше,/ плачущи и горько рыдающи, вопия́ше:/ мир убо радуется, прие́мля Тобою избавление,/ утроба же Моя гори́т, зря́щи Твое́ распятие,/ еже терпи́ши за милосердие милости,/ Долготерпели́ве Го́споди, милости бе́здно и источниче неисчерпаемый,/ умилосе́рдися и даруй согрешений оставле́ние/ верою поющим Божественныя страсти Твоя.

Песнь 4

Ирмо́с: Пою Тя, слухом бо, Го́споди, услышах и ужасохся,/ до мене́ бо и́деши, мене ища́, заблу́ждшаго./ Тем многое Твое́ снизхождение, е́же на мя,/ прославля́ю, Многоми́лостиве.

Умертви́в плоти мудрова́ние,/ поток беззакония мяте́жи, преподобне, и демонских ко́зней избежа́в,/ к тихости Божественнаго Духа/ с праведными, отче, воспочи́л еси.

Водны́ми слез тече́нии напаяемь, преподобне,/ душевную ни́ву многоплодну де́ланием я́ве Спасовым, отче, показал еси,/ постников умно́жив составле́ния.

Причастием Свята́го Духа укрепляемь, Богоно́се,/ лукавствия ду́хи низложи́л еси/ и силою Христовою немощны́я исцеля́еши,/ пророческою обогати́вся чистото́ю.

Богоро́дичен:

Храм Тя и Черто́г одушевле́нный,/ и мы́сленную трапе́зу, и светильник, Богомати Благословенная, разуме́ем,/ из Неяже су́щим во тьме Свет возсия,/ о́тча Существа́ Сияние.

Песнь 5

Ирмо́с: Просвещение во тьме лежащих,/ спасение отча́янных, Христе Спа́се мой,/ к Тебе́ у́тренюю, Царю́ мира,/ просвети́ мя сиянием Твоим:/ ино́го бо, ра́зве Тебе́, бога не знаю.

Я́ко молния, чистотою жития́ и жи́тельством безпло́тным подо́бяся, просияв в мире,/ тьмы предстателя отго́ниши, Богоблаже́нне,/ благочестия светом просвещаемь.

Вся́ческими светя́ся, Богому́дре, чудодействы/ и благодатию Божественною озаре́н,/ всем познался еси сокровище исцелений лю́бящим,/ отче Богоприя́тне,/ я́ко други́й не́кий пророк Божий познава́емь.

Све́тлостию твоих, отче, кро́тких исправле́ний/ мрачныя вражия силы прогна́л еси,/ и от тех ярости исхити́в к тебе́ прибега́ющия, Божественными твоими учении/ к вере просвети́л еси.

Богоро́дичен:

Еди́ну нам во дву существу́ ви́димую Ипоста́сь, Едина Благослове́нная,/ родила́ еси неизреченно Божия Бога Слова,/ вопло́щшася за милость неизглаго́ланную./ Сего у́бо моли́ сохранити поющия Тя.

Песнь 6

Ирмо́с: В бе́здне греховней валя́яся,/ неизсле́дную милосердия Твоего призываю бе́здну:/ от тли, Боже, мя возведи.

Единонача́лию служа́ Божества́ Безначальнаго,/ многоначалие обличи́л еси,/ идольское нечестие упраздни́в, Богомудре, благодатию.

Прозя́б, отче,/ я́ко финикс процвел еси в Церкви, всеблаженне Богомудре,/ плодо́в сладостию верных возвеселяя исполнение.

Низложи́тель явился еси непобеди́мь лукавых духо́в, всеславне,/ богатотво́рная дарова́ния от Христа получив, блаженне.

Богоро́дичен:

Неискусому́жно, Дево, родила́ еси и ве́чнуеши Дева,/ являющи Истиннаго Божества, Сына и Бога Твоего, образы.

Конда́к, глас 3.

Подо́бен: Дева днесь:

Я́ко светильника незаходимаго умнаго тя Солнца,/ сошедшеся днесь, восхваля́ем в песнех,/ возсиял бо еси сущим во тьме неведения,/ вся возводя́ к Божественней высоте́, Иларионе./ Темже вопием:/ радуйся, отче, всех по́стников основание.

Икос:

Возлюби́в Христовы Божественныя заповеди/ и возненави́дев всего мира наслаждение,/ пришел еси усердно к Тому/ и был еси светильник, просвещая вся концы блистанием Духа./ Тем, припа́дая, молю тя:/ просвети и моя очи душевныя, воспе́ти твоя подвиги,/ яже показал еси на земли́ ра́ди будущия жизни./ Еяже ны́не наслажда́яся, поминай вопию́щих ти:/ радуйся, отче, всех по́стников основание.

Песнь 7

Ирмо́с: Богопроти́вное веление беззако́ннующаго мучителя/ высо́к пла́мень вознесло есть,/ Христос же простре́ Богочестивым отроко́м ро́су духовную,/ Сый благословен и препрославлен.

Глагол вещание твое́ и чудес благодать Божественная/ во всю изы́де землю, всеблаженне,/ Богочестия зарею всем сияя верно исцеле́ний тишину́.

Крестом ограждаемь Спасовым, неврежде́н пребыл еси,/ безумно окуси́вшуся де́монскому свире́пству о тебе́, всемудре,/ весть бо Вышний Бог соблюдати Своя угодники.

Я́ко столп непоколе́блен небесовысо́кий,/ я́ко стена́ неподви́жима, явился еси посто́м,/ просвещая чудесы́ и дая́ исцеления,/ и источа́я Божественныя догма́ты от источника приснотеку́ща Богодухнове́нных Писаний.

Богоро́дичен:

Облак Дева Тя, правды Солнце, роди́ и Дева пребывши,/ дебельству́ плоти приобщи́вшася, Человека бывша за благоутробие и снизхождение:/ Егoже воспеваем, я́ко препросла́влена.

Песнь 8

Ирмо́с: Пещь иногда́ огненная в Вавилоне де́йства разделя́ше,/ Божиим велением халде́и опаляющая,/ верныя же орошающая, поющия:/ благословите вся дела Господня Господа.

Престол истинно чу́вствия был еси,/ Божественным разумом просвещаемь/ и Божиим повелением Богомудренно наставляемь,/ и доброде́телию светя́ся, зовы́й:/ благословите вся дела Господня Господа.

Колесница та́инственная, носящая Имя Господне, явился еси, преподобне,/ све́тлостию дел и чудес явлением,/ и чистотою жития́, взывая:/ благословите вся дела Господня Господа.

Сыноположе́н Божественною благодатию, снасле́дник Христов был еси/ и богатство Небесное, и Царство непрее́мное приял еси, Богоглаго́ливе, зовя:/ благословите вся дела Господня Господа.

Богоро́дичен:

Ми́ро умное истоще́нное, Дево, именуема Сына чревоноси́ла еси,/ куре́нием Божества земныя благово́нствующа/ и от тли избавляющаго взывающия:/ благословите вся дела Господня Господа.

Песнь 9

Ирмо́с: Безначальна Родителя Сын, Бог и Господь,/ воплощся от Девы, нам явися,/ омраче́нная просвети́ти, собрати расточе́нная./ Тем Всепетую Богородицу величаем.

Святых жилища проходи́ти сподо́бился еси, житие́ совершив свя́то, преподобне,/ и, я́ко су́щу праведну, тебе́ Трисветлый возсия́ Свет,/ и Того сопру́г веселие прия́ше.

Трудо́в воздаяние от Христа прием и жизни вечныя я́ве причасти́вся,/ и па́че ума благолепия добро́тами, отче, преизя́ществован,/ о поющих тя ко Владыце моли́ся.

Я́ко кедр высокове́рхий доброде́телию возвышаемь,/ во дво́рех, Богоносе, Божиих насажде́н был еси,/ и я́ко заключе́н огра́д, я́ко благоцветы́й рай явился еси,/ и я́ко источник кипящий исцелений дарования.

Богоро́дичен:

Черто́г была еси па́че ума Воплоти́вшагося Слова, Дево Богороди́тельнице,/ оде́яна славою добродетелей и укра́шена,/ тем Тя, Всенепорочная, Богородицу возвещаем.

Светилен.

Подо́бен: Жены́, услышите:

Мирска́го пристрастия, я́ко стра́стна, уклонился еси/ и, безпи́щием плоть увяди́в, обновляеши брозды́ держа́щих/ и славою обогатился еси, чудоде́йствуя изрядная,/ пастыренача́льников верх, Богоприятне Иларионе.

Богоро́дичен:

Во двух хоте́ниих и естества́х, Всенепорочная,/ Еди́ней же Ипоста́си раждаеши Бога неизреченно,/ нас ради обнищавшаго до Креста хотением/ и даровавшаго нам Божества́ богатство, Богомати Дево.

На стиховне Окто́иха.

Сла́ва, глас 2. Самогла́сен:

Тихое твое́, отче, и чистое житие́ ви́дев Христос, кроткое и молчаливое,/ обитель сотвори в тебе́, и был еси жили́ще Боже́ственное,/ и сего ради со Ангелы на Небесех водворяешися, блаженне.

И ны́не, Богоро́дичен или́ Крестобогоро́дичен.

Подо́бен: Егда́ от Дре́ва:

Егда Нескве́рная А́гница ви́де Своего А́гнца,/ на заколе́ние, я́ко человека, волею влеко́ма, плачущи, глаго́лаше:/ безча́дствовати Мя ны́не тщи́шися, Христе, Рождшую Тя,/ что сие сотворил еси, Изба́вителю всяческих,/ оба́че воспева́ю и сла́влю Твою́, юже па́че ума и слова, крайнюю благость, Человеколюбче.

На Литургии: Блаженна Окто́иха на 4 и свята́го песнь 3, На 4. Прокимен, глас 7: Честна пред Господем смерть преподобных Его. Стих: Что воздам Господеви о всех, яже воздаде ми: Апостол к Коринфяном, зачало 188. Аллилуия, глас 6: Блажен муж, бояйся Господа: Евангелие от Луки, зачало 24. Причастен: В память вечную будет праведник:

ВЕ́ЧЕР

Блажен муж: Стихиры, глас 2:

Ки́ими похва́льными венцы́/ ны́не составим ликова́ние/ в честне́м пра́зднице твоего пренесения, иерарше,/ духовно празднующе, мо́лимся:/ моли́ся православному во́инству победительная на враги даровати,/ тебе́ бо те́пла молитвенника ко Владыце стяжа́хом,/ подающаго миру ве́лию милость.

Ки́ими похвальными добро́тами/ воспои́м во архиереех славнаго и в вере великаго,/ и в пелена́х доброразсу́днаго,/ во учении язы́ка сладкаго/ учением Церковь обога́щша святителя Илариона,/ егoже венцы́ венчает Христос Бог наш,/ имеяй ве́лию милость.

Ки́ими духовными пе́сньми/ воспои́м архиерея,/ учением к Богоразумию всех наста́вльшаго,/ источника чудес пречудна,/ Церкви светильника пресветлаго/ и учителя премудра Мегли́нския земли́/ и всея Российския прекрасное удобрение,/ егoже ради Христос врагов шатание низложи́,/ имеяй ве́лию милость.

Сла́ва, глас 6:

Архиереев похвалу́,/ священников всех украшение,/ к Бо́гу молитвенника непрестаннаго,/ источника чудес преизоби́льна/ днесь, любовию сошедшеся, Мегли́нстии наро́ди,/ иерарха Илариона похва́лим,/ честныя мощи обстояще,/ благодарныя гла́сы тому приносим, глаголюще:/ радуйся, архиерее Иларионе, светильниче светлый,/ озари́ изря́дное достояние твое́, православныя люди,/ о нихже непрестанно Христу моли́ся мирно житие́ дарова́ти,/ да вси честно́е твое́ пренесение любовию почитаем и молимся:/ моли спасти́ся душа́м нашим.

И ны́не, Богоро́дичен: Кто Тебе́ не ублажит: Вход. Прокимен дне. Чтения три (зри страницы 135–138)

На стиховне стихиры, глас 2. Самогласны:

Христово стадо словесных овец/ на зла́це благочестия до́бре упасл еси, иерарше,/ темже и по преставлении/ церковных твоих чад не оставляй, но посещай/ и, Святей Троице со архиереи предстоя́,/ моли спасти вся,/ честно́е твое́ пренесение любовию почитающия, Иларионе прехвальне.

Стих: Священницы Твои облекутся в правду,/ и преподобнии Твои возрадуются.

Тезоимени́таго ра́ди твоего жития́,/ и сладости язы́ка,/ и разсуждения доброразсу́днаго,/ пастыря тя лю́дей до́бре вручает Христос,/ Eгoже моли спасти и уще́дрити вся,/ пресветлую память твою́ празднующия,/ Иларионе пресла́вне, молитвенниче о душа́х наших.

Стих: Восхва́лятся преподобнии во славе/ и возрадуются на ло́жах своих.

Днесь преславно, святителю,/ от своих ко своим же че́стно прехо́диши,/ да своим шествием вся освяти́ши/ и радостию наполнивши/ память твою́ любовию празднующая/ и честно́е прехожде́ние твое́ верно сла́вящия,/ и прилежно вопиющая:/ моли́, мо́лимся, спастися душа́м нашим.

Сла́ва, глас 8:

Град освяти́ся, наро́ди благослови́шася,/ Церковь первородных ду́хом ликовству́ет/ в пренесение честны́х твоих моще́й, иерарше Иларионе,/ с людьми зовущи:/ ты моя крепость и утверждение,/ ты моя добро́та, и тобою хвалю́ся,/ молися спасти вся,/ любовию всемирное твое́ пренесение присно славящия.

И ны́не, Богоро́дичен по гласу.

Тропа́рь, глас 3:

Чудо явився извеще́ния,/ де́лы возсиял еси добродетелей Божиих,/ монашествующих ли́ки упасл еси,/ архиерейская седалища изчи́стил еси,/ ерети́ческаго же напа́дания не усумне́вся,/ церкви Христовы воздвигл еси,/ преподобне Иларионе,/ умер, я́ко спя,/ тело же твое́ цело и нетленно соблюдено́ бысть,/ и подае́т цельбы́ болящим от различных неду́г,/ и демоны прогоняет,/ сего ради молим тя:/ моли спастися душа́м нашим.

НА У́ТРЕНИ

По 1-м стихословии седален, глас 4:

Бо́гу освяти́л еси твою́ жизнь, всеблаженне,/ быв изря́ден священноде́йственник воистинну Христов, священне./ Темже по многих по́тех и болезнех,/ радуяся, к невещественным преставился еси селением,/ ны́не источа́еши нам струи́ исцелений.

Богоро́дичен:

Дево Всенепорочная, Пресу́щнаго Бога рождшая,/ со Безплотными Того непрестанно моли/ оставление прегрешений и исправление жития́ дати нам прежде конца,/ верою и любовию поющим Тя по до́лгу,/ Едина Всепетая.

По 2-м стихословии седален, глас 8:

Сле́зными струя́ми страсте́й взыграния неуста́вная потопи́л еси,/ пучи́на бысть долготерпения, преподобне,/ к тишине веды́й долготерпения.

Богоро́дичен:

Па́че естества и сло́ва, Владычице,/ всех Питателя родила́ еси/ и питавши от сосцу́ Твое́ю,/ во вре́мя готовяща трапе́зу,/ Егoже прилежно, Пречистая, о нас моли.

По полиелеи седален, глас 8:

Великим доброде́телей поревновал еси, Иларионе,/ сим последуя, воздержанием, преподобне, верхо́вен явился еси/ и стадо воображе́нное по́ты воздержа́тельными упасл еси,/ у́глие врага неверия стрела́ми слове́с погасил еси/ и еретическая шата́ния.

Сла́ва, и ны́не, Богоро́дичен:

О Тебе́ радуется, Благодатная, всякая тварь,/ Ангельский собор и человеческий род./ Освященный хра́ме и раю́ слове́сный,/ девственная похвало́, из Неяже Бог воплотися/ и Младенец бысть, прежде век Сый Бог наш,/ ложесна бо Твоя Престол сотвори и чрево Твое́ пространнее небес соде́ла./ О Тебе́ радуется, Благодатная, всякая тварь, сла́ва Тебе́.

Степенна, 1-й антифон 4-го гласа. Прокимен: Честна пред Господем смерть преподобных Его. Стих: Что воздам Господеви о всех, яже воздаде́ ми. Евангелие от Иоанна, зачало 36. Псалом 50. Стихира, глас 2:

От юности, отче, имея совершенную мудрость/ и, возложив на ся и́го Христово,/ житию́ поревновал еси святых отец,/ ра́вными ме́рилы доброде́тели подо́бяся,/ усуши́л еси плоть, ска́чущу, я́ко жребца́,/ я́ко до́лжно бе, души́ покорил еси,/ постное течение совершити, блаженне отче,/ память твою́ совершающим/ проси очищения грехо́в и ве́лия милости.

Канон Богоро́дицы со ирмо́сом на 6. И свята́го на 8, егoже краегране́сие: Внимай о червленых словесех. Глас 4

Песнь 1

Ирмо́с: Отве́рзу уста моя/ и наполнятся Духа,/ и слово отры́гну Царице Матери,/ и явлюся, све́тло торжествуя,/ и воспою́, радуяся, Тоя чудеса.

Повелением Владыки твоего подо́бяся, иера́рше,/ кро́ток и смире́н, Иларионе, был еси/ и отсюду ублажаемых чи́ну быти сподобился еси./ Темже днесь преславное твое́ пренесение почитаем.

Благочестиваго ко́рене пресветлая преславно прозябе́ о́трасль, архиерее Иларионе,/ в доброде́тели совершенно пожи́в/ и сосу́д чист Духа Свята́го, отче, был еси.

Ядови́тых страсте́й возгорения, лечбо́ю по́стничества обложе́н,/ изсуши́л еси, присносло́вый.

Богоро́дичен:

Возсия́ Солнце из Тебе́, Мати Приснодево,/ Иже от Отца прежде век Невидимый/ и, видим преславно, опису́ется телесе́м,/ благоче́стия светом человеки просвети́.

Катавасия: Отве́рзу уста́ моя:

Песнь 3

Ирмо́с: Твоя́ песносло́вцы, Богородице,/ живый и незави́стный источниче,/ лик себе совоку́пльшия, духовно утверди́,/ в Божественней Твое́й славе,/ венце́в славы сподо́би.

Благословением твоим вся возмогл еси, укрепляющу Христу тя, отче,/ олядене́вшия иногда людей бразды́ душевныя,/ премудрыми твоими уче́ньми, иера́рше, очистил еси/ и плодоносны сотворил еси.

Фарисейское киче́ние от юности, отче, возненави́дев,/ мытаре́ву же смирению поревнова́в,/ кроток и смире́н, отче, ко всем был еси,/ сего ради тя вси, я́ко вину́ и образ благих, почитаем.

Исполни радости и веселия тебе́ присно, иерарше Иларионе, лю́бящия/ и торжественная твое́му честно́му пренесению в песнех всегда поющия.

Богоро́дичен:

Тя заступление небла́знено, Богомати, стяжа́хом,/ надежду на Тя возлагающе, спасаемся/ и, к Тебе́ прибегающе, сохраня́емся.

Седален, глас 4.

Подо́бен: Вознесыйся:

Молитвам и ми́лостыням, архиерее Иларионе, присно прираде́в,/ милостив к требующим, отче, независтен был еси./ Темже тя почитающия от сопротивных зол избавляй,/ да вси твое́ пренесение любовию почитаем.

Сла́ва, и ны́не, Богоро́дичен:

Свет рождши пречестны́й, от Отца возсиявший прежде век,/ просвети́, Отроковице, душу мою и ум,/ дале́че от Мене отгоня́щи тьму страсте́й,/ да Тя ублажаю, Присноблаженную, верных упование.

Песнь 4

Ирмо́с: Седя́й в славе на Престоле Божества,/ во облаце ле́гце/ прииде Иисус Пребоже́ственный/ нетленною дла́нию и спасе́ зовущия:/ сла́ва, Христе, силе Твое́й.

Епископа тя Мегли́нская страна преславно, архиерее Иларионе, стяжавши,/ тобою красуется с князи и архиереи,/ и со всенародным множеством Христа воспевает,/ сим присно тебе́ даровавшаго.

Всея Мегли́нския земли́ первопресто́льник, архиерее Иларионе, был еси/ и вся твоим учением просвети́л еси./ Тем память твою́ почитаем и, пренесение твое́ почитающе, вопием:/ моли о всех поющих тя.

Принес дар Бо́гу-тобою множество спасаемых,/ твое́му учению присно последующих/ и Христа во хвалении воспева́ющих,/ тебе́ всем даровавшаго.

Богоро́дичен:

Крепкое Тя оружие на враги предлагаем/ и скорбе́й всяких, и лютых обстояний отрева́ем вред,/ и еретическаго возмущения избега́ем,/ Мати Божия.

Песнь 5

Ирмо́с: Ужасо́шася всяческая/ о Божественней славе Твое́й,/ Ты бо, Неискусобра́чная Дево,/ имела еси во утробе над всеми Бога/ и родила́ еси Безле́тнаго Сына,/ всем воспева́ющим Тя/ мир подава́ющая.

Многогрешнаго, нерадением ижди́вшаго житие́, не возгнуша́йся, архиерее,/ но твоими моли́твами очисти,/ твое́ пренесение песньми трудолю́бно сла́вяща.

Пахо́мия Ангельскому виде́нию сподо́бльшася,/ сего пра́вилу навы́к,/ мно́гажды без сна в молитве всю нощь пребы́л еси,/ отону́дуже сподобился еси Горняго звания.

Смире́н нрав и высоко́, еже по Бо́гу, житие́ стяжа́л еси, иерарше./ Темже Всевидящее Око,/ ви́дев твое́ доброе произволе́ние,/ сла́вна тя всем концем показа, Христос Спас наш.

Богоро́дичен:

Едину Тя, Всенепорочная, от родо́в Пречистую обре́т,/ вселися в Тя и человеки обожи́,/ темже, я́ко ма́тернее дерзновение к Нему стяжавши,/ моли о иже верою Богородицу именующих Тя.

Песнь 6

Ирмо́с: Боже́ственное сие́ и всечестно́е/ совершающе пра́зднество,/ Богомудрии, Богоматере,/ прииди́те руками воспле́щим,/ от Нея рождшагося Бога славим.

На смирение нас свыше ми́лостивно назира́я,/ верно тебе́ присно славящих,/ молися всякия ско́рби изба́вити,/ тебе́, те́пла предстателя к Бо́гу, стяжавших.

Селение явился еси прекрасное Духа Свята́го,/ Богодухновенными ученьми твоими обильно питая словесная твоя чада,/ отону́дуже по преставлении спребыва́еши лю́бящим тя, иерарше.

Возсияв, я́ко фи́никс,/ процвел еси в Церкви, всеблаженне Богомудре,/ плодо́в сладостию верныя веселя́я.

Богоро́дичен:

Неискусомужная Дево родила́ еси и пребываеши Дева,/ являеши Истиннаго Божества́,/ Сына и Бога Твоего, образы.

Конда́к, глас 3.

Подо́бен: Дева днесь:

Я́ко светоносна явися, архиерее, память твоя,/ тьму разруши́ уныния и свет облиста́ даро́в Небесных,/ вся созывающи на радость,/ от Бога бо, Иларионе, благодать обре́л еси/ и монахов был еси степе́нь.

Икос:

От юности Боже́ственное твое́ житие́, иерарше, до́бре исправив/ и внимательным о́ком всегда к вышним зря и та́мошних непрестанно желая,/ отню́дуже, великия ради доброде́тели и прему́дрости язы́ка, архиерейства са́ном укра́шен быв,/ Церковь и люди твоими учении обогати́л еси./ Темже, течение благочестно совершив,/ к Бо́гу преславно ду́хом прешел еси,/ нам честны́я мощи в память оставив./ ихже ны́не честно́е пренесение празднующе,/ мо́лимся победительная на враги верным людем дарова́ти,/ я́ко да в тишине Богоугодно поживше,/ тебе́ радостною душею благодарно воспое́м, глаголюще:/ радуйся, отче Иларионе,/ архиереев всея Российския земли удобре́ние и монахов был еси степе́нь.

Песнь 7

Ирмо́с: Не послужи́ша твари Богомудрии,/ па́че Создавшаго,/ но, огненное преще́ние му́жески попра́вше,/ ра́довахуся, поюще:/ препетый отцев Господь и Бог, благословен еси.

Свыше от Бога дар тезоименитый гра́ду и всей земли́ дан бысть, архиерее Иларионе,/ удивляя учением вся, Христу вопиющия:/ препетый отцев Господь и Бог, благословен еси.

Архиереев пресветлая добро́та, отче, пребы́л еси/ и Христовы Церкве столп и утверждение,/ темже поминай честно́е твое́ пренесение славящия, преславне.

Крестом зна́менуяся Христовым, пребы́л еси неврежде́н,/ су́етно покуси́вшуся де́монскому свере́пству на тя, Богомудре:/ весть бо Вышний Бог соблюдати угодники Своя.

Богоро́дичен:

Облак Дева Тя, правды Солнце, роди́,/ дебельству́ пло́ти приобщи́вшася, Человека бывша за благоутробие и снизхождение:/ Егoже пои́м, я́ко препрославлена.

Песнь 8

Ирмо́с: Отроки благочестивыя в пещи́/ Рождество Богородичо спасло есть,/ тогда убо образуемое,/ ны́не же действуемое,/ вселенную всю воздвизает пети Тебе́:/ Господа пойте дела́/ и превозноси́те Его во вся веки.

Боже́ственное пребывание Свята́го Духа, отче, был еси,/ темже и в житии́ сем, я́ко вне мира быв, к тамошним раче́ние имея./ Темже и вся научил еси Христу вопити:/ дети, благословите, священницы, пойте и превозносите Его во веки.

По Бозе заступника тя превели́ка, архиерее, духовная твоя чада стяжавше,/ всякия сопротивныя вещи тобою да избавимся/ и, в тишине поживше, Христу воспоим:/ благословите вся дела́ Господня, Господа.

Колесни́ца та́инственная, носящи Имя Господне, явился еси, святителю,/ све́тлостию дел, и чудес явлением, и чистотою жития, взывая:/ священницы, пойте и превозноси́те Его во веки.

Богоро́дичен:

Ми́ро умное истощенное, Пречистая Дево, именуема Сына родила́ еси,/ благовонием Божества́ всю землю благово́нствующа и от тли избавляюща поющия:/ священницы, пойте и превозноси́те Его во веки.

Песнь 9

Ирмо́с: Всяк земноро́дный/ да взыграется, Духом просвещаемь,/ да торжествует же Безпло́тных умов естество́,/ почитающее священное торжество Богоматере,/ и да вопие́т:/ радуйся, Всеблаженная/ Богородице, Чистая Приснодево.

Светлый священный праздник преставления твоего, архиерее Иларионе,/ светле́е же пренесение твое́,/ егoже сла́вяще, тебе́ величаем.

Источник благочестия явился еси, архиерее,/ церковная твоя чада напояеши,/ тем, соше́дшеся благочестно во священное твое́ пренесение, любовию тя почитаем.

Святых жили́ща проходи́ти сподобился еси, житие совершив, преподобне, свя́то,/ я́ко сущу ти праведну,/ тебе́ пресветлый возсия́ Свет и того сопру́г, веселие приял еси.

Богоро́дичен:

Плотию из Тебе́, Всенепорочная, оде́явся/ и в мире я́ко Человек пожив,/ дре́вле вся му́чащаго Божественною силою низложи́.

Светилен.

Подо́бен: Жены, услы́шите:

Архиерее Иларионе, вои́стину тезоимени́те,/ достойно звание от дел прии́м,/ данный тебе́ талант до́бре умно́жив/ и внутрь Чертога быв,/ идеже со священными живе́ши,/ помяни твое́ пренесение сла́вящия.

Богоро́дичен:

При́зри, Чистая, на достояние Твое́/ и непобедимо сие соблюди заступлением,/ Церковь сохрани и утверди, язы́ки укроти,/ излей мир в концы́ мира.

На хвалитех стихиры на 4, глас 4.

Подо́бен: Дал еси зна́мение:

Житие́ нескверно,/ терпение, кротость и любовь нелицемерну,/ воздержание безмерное, всено́щное стояние,/ умиление Боже́ственное,/ веру и надежду истинну, с милованием, отче, стяжа́в,/ я́ко Ангел, пожи́л еси на земли с телом, Иларионе блаженне,/ молитвеннике о душа́х наших.

Земны́й Ангел, Небесный человек/ был еси, святителю,/ источник умиления, пучина чудес, грешником пору́чник,/ ма́слина воистину Божия плодови́та,/ еле́ем трудов твоих ума́сти лице́, Иларионе чу́дне,/ верно восхваляющим тя.

Умертви́л еси Божественными разуме́нии плоть,/ телесных страсте́й превыше был еси,/ смеше́н с до́льными,/ начертание изображая в себе Божественныя добро́ты,/ позна́н был еси весь световиден де́йством Свята́го Духа,/ Иларионе отче наш, монашествующих украшение.

Сла́ва, глас 6:

Еще от ю́на во́зраста/ Бо́гу освящен был еси, архиерее,/ мудрости рачителю,/ темже потщи́лся еси тленными ве́чнующая стяжа́ти,/ воздержания брозда́ми себе обложи́в,/ плоть ду́ху повину́л еси,/ темже и по честно́м твое́м преставле́нии,/ совокупля́яся с Небе́сными ликостоянии,/ ихже житию́ во пло́ти поревновал еси:/ Христа, Емуже от юности послужил еси, моли спастися всем,/ честно́е твое́ пренесение присно славящим песньми.

И ны́не, Богоро́дичен: Богородице, Ты еси лоза:

Славословие великое. И отпуст.

На Литургии служба святительская.

Тропа́рь, глас 1:

Воистину достойне нарече́н был еси Иларион,/ ти́хостен бо и кроток нрав по имени твое́му имел еси, блаженне,/ имже кроткому Господу Иисусу благоугоди́в,/ молися Ему о нас рабе́х твоих.

Конда́к, глас 2:

Великий Ангельский образ и́ноческаго чи́на святую схиму я́ко прием,/ и второе отрицание суетнаго мира сего я́ко сотво́рь,/ тща́лся еси всеми о́бразы, преподобне Иларионе,/ обеща́ние де́лом исполнити/ и о́бразу святому прили́чне пожити,/ тем тя чтим и ублажаем.

Тропа́рь, глас 4:

В молитвах бо́дрствуя,/ пресветлый храм Духа Свята́го был еси,/ темже и чудотворец преди́вный явился еси,/ преподобне отче наш Иларио́не./ О нас моли Христа Бога/ светом Божественнаго позна́ния просвети́ти ны/ и спасти души на́ша.